ABDIASANG palanan-awon ni Abdias. Amo ini ang ginasiling sang Ginoong DIOS nahanungud sa Edom; Nakabati kami sing balita gikan sa GINOO, kag ang isa ka embajador ginapadala sa mga pagano, Tindug kamo, kag magtindug kita batok sa iya sa inaway. 2 Yari karon, ginhimo ko ikaw nga diotay sa tunga sang mga pagano: ginatamay ka sing daku. 3 ¶ Ang bugal sang imo tagiposoon naglimbong sa imo, ikaw nga nagapuyo sa mga litik sang dakung bato, nga ang imo puluy-an mataas; nga nagasiling sa iya tagiposoon, Sin-o bala ang magapapanaug sa akon sa duta? 4 Bisan nagatimbuuk ka subong sang aguila, kag bisan ginapahamtang mo ang imo pugad sa kabitoonan, gikan didto papanaugon ko ikaw pa idalum, nagasiling ang GINOO. 5 Kon ang mga makawat mag-abut sa imo, kon ang mga buyong sa kagab-ihon, (daw ano ang pagkalaglag mo!) indi bala sila magpangawat tubtub nga may tuman na sila? kon mag-abut sa imo ang mga manugpamopo sang ubas, indi bala nila pagbilinan ang mga ubas? 6 Daw ano nga pag-usisa sang mga butang ni Esau! daw ano nga pagpangita sang iya tinago nga mga butang! 7 Ang tanan nga mga tawo nga kadampig mo nagdala sa imo bisan sa dulunan: ang mga tawo nga may paghidait sa imo naglimbong sa imo, kag naglandas batok sa imo; ang mga nagakalaon sang imo tinapay nagpilas sa idalum nimo: walay paghangup sa iya. 8 Indi ko bala sa sinang adlaw, nagasiling ang GINOO, paglaglagon ang maalam nga mga tawo sa Edom, kag ang paghangup sa bukid ni Esau? 9 Kag ang imo gamhanan nga mga tawo, O Teman, mahangawa, sa katuyoan nga ang tagsatagsa sa bukid ni Esau mapapas sa pagpamatay. 10 ¶ Tungud sa palugus nimo batok sa imo utud nga si Jacob taklapan ka sang kahuya, kag papason ka sing dayon. 11 Sang adlaw nga nagtindug ka sa pihak, sang adlaw nga ang mga dumuloong nagdala nga bihag sang iya mga kusug, kag ang mga tagaluwas nagsulud sa iya mga gawang, kag nagpapalad tungud sa Jerusalem, ikaw gid nanginsubong sang isa sa ila. 12 Apang wala ikaw kuntani naglantaw sa adlaw sang imo utud sa adlaw nga sia nangin dumuloong; wala man ikaw kuntani nagkalipay sa kaanakan sang Juda sa adlaw sang ila kalaglagan; wala man ikaw kuntani nagpamolong nga may pagpabugal sa adlaw sang kasisit-an. 13 Wala man ikaw kuntani nagsulud sa gawang sang akon katawohan sa adlaw sang ila kalalat-an; hoo, wala ikaw kuntani nagtan-aw sa ila kapipit-an sa adlaw sang ila kalalat-an, ukon nagbutang sang imo mga kamut sa ila pagkabutang sa adlaw sang ila kalalat-an; 14 Wala man ikaw kuntani nagtindug sa ginsang-an, sa pagbalabag sang mga gikan sa iya nga nagapalagyo; wala man ikaw kuntani nagtugyan sang mga gikan sa iya nga nabilin sa adlaw sang kasisit-an. 15 Kay ang adlaw sang GINOO malapit na sa tanan nga pagano: sono sa imo ginhimo, himoon ini sa imo: ang imo balus magabalik sa imo kaugalingon nga olo. 16 Kay subong nga nag-inum kamo sa akon bukid nga balaan, sa amo magainum ang tanan nga pagano sing dalayon, hoo, magainum sila, kag magalab-ok sila, kag sila manginsubong sang wala sila. 17 ¶ Apang sa bukid nga Zion manginmay kaluwasan, kag may pagkabalaan didto; kag ang panimalay ni Jacob magatag-iya sang ila mga ginapanag-iyahan. 18 Kag ang panimalay ni Jacob manginkalayo, kag ang panimalay ni Jose mangindabdab, kag ang panimalay ni Esau manginginalaban, kag magasonog sila sa ila, kag magalamon sa ila; kag wala gid sing mabilin sa panimalay ni Esau; kay ang GINOO nagpamolong sini. 19 Kag ang mga sa bagatnan magatag-iya sang bukid ni Esau; kag ang mga sa kapatagan sang mga Filistinhon: kag magatag-iya sila sang mga latagon ni Efraim, kag sang mga latagon sang Samaria: kag si Benjamin magatag-iya sang Galaad. 20 Kag ang kabihagan sining kasoldadosan sang kaanakan sang Israel magatag-iya sinang iya sang mga Canaanhon, tubtub sa Zarepat; kag ang kabihagan sang Jerusalem, nga yara sa Sefarad, magatag-iya sang mga siudad sang bagatnan. 21 Kag ang mga manluluwas magataklad sa bukid nga Zion sa paghukom sang bukid ni Esau; kag ang ginharian mangin-iya sang GINOO. |