ANG BALAAN NGA BIBLIA

ANG LIBRO NI

NEHEMIAS

KAPITULO 1

ANG mga polong ni Nehemias nga anak nga lalaki ni Hakalias. Kag nahanabu sa bulan nga Cisleu, sa tuig nga ikaduha ka pulo, sang didto ako sa Susan nga palacio,

2 Nga si Hanani, isa sang akon mga kauturan, nag-abut, sia kag ang pila ka mga lalaki gikan sa Juda; kag ginpamangkot ko sila nahanungud sa mga Judio nga nakapalagyo, nga nabilin sang kabihagan, kag nahanungud sa Jerusalem.

3 Kag nagsiling sila sa akon, Ang nabilin nga salin sang kabihagan didto sa probinsya yara sa dakung kapipit-an kag kahuluy-an: ang kuta sang Jerusalem man nalumpag, kag ang iya mga gawang nasonog sa kalayo.

4 ś Kag nahanabu, sang pagkabati ko sining mga polong, nga naglingkod ako kag naghibi, kag naglalaw sing pila ka adlaw, kag nagpuasa, kag nagpangamuyo sa atubangan sang Dios sang langit,

5 Kag nagsiling, Ginapakilooy ko sa imo, O GINOONG Dios sang langit, ang daku kag makakulugmat nga Dios, nga nagabantay sang katipan kag sang kalooy sa mga nagahigugma sa iya kag nagabantay sang iya mga sogo:

6 Magtalupangud karon ang imo idulungug, kag magmuklat ang imo mga mata, agud nga makabati ka sa pangamuyo sang imo alagad, nga ginapangamuyo ko sa imo atubangan sa sining tion, sa adlaw kag gab-i, tungud sa kaanakan sang Israel nga imo mga alagad, kag nagatuad sang mga sala sang kaanakan sang Israel, nga amon ginapakasala batok sa imo: ako kag ang panimalay sang akon amay nakasala.

7 Naggawi kami sang dunut gid batok sa imo, kag wala magbantay sang mga sogo, ukon sang mga palatukuran, ukon sang mga pagsolondan, nga ginsogo mo kay Moises nga imo alagad.

8 Dumduma, ginapakilooy ko sa imo, ang polong nga ginsogo mo kay Moises nga imo alagad, nga nagasiling, Kon maglalis kamo, paaplaagon ko kamo sa mga pungsud:

9 Apang kon kamo magbalik sa akon, kag magbantay sang akon mga sogo, kag magtuman sa ila; bisan ang mga sinobol sa inyo didto sa ukbung sang langit, walay sapayan gikan didto tiponon ko sila, kag dalhon sila sa duug nga ginpili ko sa pagpapuyo didto sang akon ngalan.

10 Karon ini sila amo ang imo mga alagad kag imo katawohan, nga gintubus mo sa imo dakung gahum, kag sa imo makusug nga kamut.

11 O GINOO, ginapakilooy ko sa imo, magtalupangud karon ang imo idulungug sa pangamuyo sang imo alagad, kag sa pangamuyo sang imo mga alagad, nga nagahandum sa pagkahadluk sa imo ngalan: kag pauswaga, ginaampo ko sa imo, ang imo alagad sining adlaw, kag kalooyi sia sa itololok sining lalaki. Kay manugtagay ako sang hari.

KAPITULO 2

KAG nahanabu sa bulan nga Nisan, sa ikaduha ka pulo nga tuig ni Artajerjes nga hari, nga yara ang alak sa atubangan niya: kag ginkuha ko ang alak, kag ginhatag ini sa hari. Karon wala ako anay magkasubu sa iya atubangan.

2 Busa nagsiling sa akon ang hari, Ngaa bala nga masubu ang imo nawung, sa ginatan-aw nga indi ka masakiton? ini indi liwan kondi kasubu sang tagiposoon. Niyan nagkahadluk ako sing tama gid,

3 Kag nagsiling ako sa hari, Ang hari magkabuhi sa gihapon: ngaa bala nga indi magmasubu ang akon nawung, nga ang siudad, ang duug sang mga lulubngan sang akon mga kaamayan, nahapay, kag ang iya mga gawang naupud sang kalayo?

4 Niyan nagsiling sa akon ang hari, Ano bala ang ginapangayo mo? Gani nagpangamuyo ako sa Dios sang langit.

5 Kag nagsiling ako sa hari, Kon nahamut-an sang hari, kag kon nakapahamuut ang imo alagad sa itololok mo, nga ipadala mo ako sa Juda, sa siudad sang mga lulubngan sang akon mga kaamayan, agud nga mapatindug ko ini.

6 Kag ang hari nagsiling sa akon, (ang hara man nagalingkod sa luyo niya,) Tubtub san-o bala ang imo pagpanlakatan? kag san-o ka bala mabalik? Gani nahamuut ang hari nga ipadala ako; kag nagpat-ud ako sa iya sang tion.

7 Labut pa nagsiling ako sa hari, Kon nahamuut ang hari, hatagan ako sing mga sulat nga sa mga gobernador sa tabok sang suba, agud nga tugutan nila ako sa pag-agi tubtub nga mag-abut ako sa Juda;

8 Kag sulat kay Asaf, nga bantay sang kakahoyan sang hari, agud nga hatagan niya ako sing tablon nga himoon nga mga balayan nga sa mga gawang sang palacio nga nahanungud sa balay, kag sa kuta sang siudad, kag sa balay nga masudlan ko. Kag gintugutan ako sang hari, sono sa maayong kamut sang akon Dios sa ibabaw nakon.

9 ś Niyan nag-abut ako sa mga gobernador sa tabok sang suba, kag ginhatag sa ila ang mga sulat sang hari. Karon ang hari nagpadala upud sa akon sing mga kapitan sang kasoldadosan kag mga manugkabayo.

10 Sang nabatian ini ni Sanbalat nga Horonhon, kag ni Tobias nga alagad, ang Amonhon, nagkalisud sila sing lakas tungud nga may nag-abut nga tawo sa pagpaninguha sang kaayohan sang kaanakan sang Israel.

11 Gani nag-abut ako sa Jerusalem, kag nagpabilin didto sing tatlo ka adlaw.

12 ś Kag nagbangon ako sang gab-i, ako kag pila sang mga tawo upud sa akon; kag wala ako magsugid sa bisan kay sin-ong tawo sang ginbutang sang Dios sa akon tagiposoon nga himoon sa Jerusalem: wala sing bisan ano nga sapat nga upud sa akon, luwas sang sapat nga akon ginsakyan.

13 Kag naggowa ako sa kagab-ihon sa luyo sang gawang sang nalupyakan, sa atubangan sang bobon nga dragon, kag nayon sa gawang sang ipot, kag ginlantaw ang mga kuta sang Jerusalem, nga nagkalumpag, kag ang iya mga gawang gin-upud sang kalayo.

14 Niyan nagpadayon ako sa gawang sang tuburan, kag sa ponong sang hari: apang wala sing duug nga agihan sang sapat nga akon nasakyan.

15 Niyan nagtaklad ako sa ubay sang sapa sa kagab-ihon, kag ginlantaw ang kuta, kag nagbalik ako, kag nagsulud sa gawang sang nalupyakan, kag nagpauli.

16 Kag wala makahibalo ang mga manugdumala kon diin ako magkadto, ukon sang akon ginhimo; kag wala ko pa masugid ini sa mga Judio, ukon sa mga pari, ukon sa mga dungganon, ukon sa mga manugdumala, ukon sa iban nga nagahimo sang buluhaton.

17 ś Niyan nagsiling ako sa ila, Ginatan-aw ninyo ang kalisdanan nga nasudlan naton, kon paano nga ang Jerusalem nahapay, kag ang iya mga gawang nasonog sang kalayo: kari, kag patindugon naton ang kuta sang Jerusalem, agud nga indi na kita manginkahuluy-an.

18 Niyan ginsugiran ko sila sang kamut sang akon Dios nga maayo sa ibabaw nakon; subong man sang mga polong sang hari nga napamolong niya sa akon. Kag nagsiling sila, Magtindug kita kag magpatindug. Gani ginpabaskug nila ang ila mga kamut tungud sining maayong buluhaton.

19 Apang sang pagkabati sini ni Sanbalat nga Horonhon, kag ni Tobias nga alagad, ang Amonhon, kag ni Gesem nga Arabiahanon, ginkadlawan nila kami nga ginayagota, kag gintamay kami, kag nagsiling, Ano bala ining butang nga ginahimo ninyo? magaribuk bala kamo batok sa hari?

20 Niyan ginsabat ko sila, kag ginsilingan ko sila, Ang Dios sang langit, sia magapauswag sa amon; busa kami nga iya mga alagad magatindug kag magapatindug: apang kamo wala sing bahin, ukon kinamatarung, ukon handumanan, sa Jerusalem.

KAPITULO 3

NIYAN nagtindug si Eliasib nga mataas nga pari upud sang iya mga utud nga mga pari, kag ginpatindug nila ang gawang sang mga carnero; ginpakabalaan nila ini, kag gintakud ang iya mga takup; ginpakabalaan nila ini tubtub sa torre sang Mea, tubtub sa torre sang Hananeel.

2 Kag madason sa iya nagpatindug ang mga tawo sang Jerico. Kag madason sa ila nagpatindug si Zacur nga lalaking anak ni Imri.

3 Apang ang gawang sang isda ginpatindug sang mga lalaking anak ni Hasenaa, nga amo man ang mga nagbutang sang mga bakalan sini, kag nagtakud sang mga takup sini, sang mga cerradura sini, kag sang mga pintal sini.

4 Kag madason sa ila nagkaayo si Meremot nga lalaking anak ni Urias, ang lalaking anak ni Koz. Kag madason sa ila nagkaayo si Mesullam nga lalaking anak ni Berequias, ang lalaking anak ni Mesezabel. Kag madason sa ila nagkaayo si Sadoc nga lalaking anak ni Baana.

5 Kag madason sa ila nagkaayo ang mga Tekoanhon; apang ang ila mga dungganon wala nagbutang sang ila mga liog sa buluhaton sang ila Ginoo.

6 Labut pa ang gawang nga daan ginkaayo ni Jehoiada nga lalaking anak ni Pasea, kag ni Mesullam nga lalaking anak ni Besodias; ginbutang nila ang iya mga bakalan, kag gintakud ang iya mga takup, kag ang iya mga cerradura, kag ang iya mga pintal.

7 Kag madason sa ila nagkaayo si Melatias nga Gabaonhon, kag si Jadon nga Meronotnon, ang mga tawo sang Gabaon, kag sang Mizpa, tubtub sa trono sang gobernador sa sining kilid sang suba.

8 Madason sa iya nagkaayo si Uziel nga lalaking anak ni Harhaya, nga gikan sa mga manugsalsal sang bulawan. Madason sa iya nagkaayo man si Hananias nga lalaking anak sang isa sang mga manugpahumut, kag ginpamakuran nila ang Jerusalem tubtub sa kuta nga masangkad.

9 Kag madason sa ila nagkaayo si Refaias nga lalaking anak ni Hur, ang manugdumala sang katunga sang ginsakpan sang Jerusalem.

10 Kag madason sa ila nagkaayo si Jedaya nga lalaking anak ni Harumaf, sa atubang sang iya balay. Kag madason sa iya nagkaayo si Hatus nga lalaking anak ni Hasabnias.

11 Si Malquias nga lalaking anak ni Harim, kag si Hasub nga lalaking anak ni Pahat-moab, nagkaayo sang isa pa ka bahin, kag sang torre sang mga horno.

12 Kag madason sa iya nagkaayo si Sallum nga lalaking anak ni Hallohes, ang manugdumala sang katunga sang ginsakpan sang Jerusalem, sia kag ang iya mga anak nga babaye.

13 Ang gawang sang nalupyakan ginkaayo ni Hanun, kag sang mga pumuluyo sang Zanoa; ginpatindug nila ini, kag gintakud ang iya mga takup, ang iya mga cerradura, kag ang iya mga pintal, kag isa ka libo ka maniko sang kuta tubtub sa gawang sang ipot.

14 Apang ang gawang sang ipot ginkaayo ni Malquias nga lalaking anak ni Recab, ang manugdumala sang ginsakpan sang Bet-hacquerim; ginpatindug niya ini, kag gintakud ang iya mga takup, ang iya mga cerradura, kag ang iya mga pintal.

15 Apang ang gawang sang tuburan ginkaayo ni Sallum nga lalaking anak ni Col-hoze, ang manugdumala sang ginsakpan sang Mizpa; ginpatindug niya ini, kag gin-atupan ini, kag gintakud ang iya mga takup, ang iya mga cerradura, kag ang iya mga pintal, kag ang kuta sang ponong sang Siloe sa luyo sang katamnan sang hari, kag tubtub sa hagdanan nga nagadulhog gikan sa siudad ni David.

16 Madason sa iya nagkaayo si Nehemias nga lalaking anak ni Azbuk, ang manugdumala sang katunga sang ginsakpan sang Bet-zur, tubtub sa duug sa atubang sang mga lulubngan ni David, kag tubtub sa ponong nga nahimo, kag tubtub sa balay sang mga gamhanan.

17 Madason sa iya nagkaayo ang mga Levinhon, si Rehum nga lalaking anak ni Bani. Madason sa iya nagkaayo si Hasabias, ang manugdumala sang katunga sang ginsakpan sang Ceila, nga sa iya ginsakpan.

18 Madason sa iya nagkaayo ang ila mga utud, si Bavai nga lalaking anak ni Henadad, ang manugdumala sang katunga sang ginsakpan sang Ceila.

19 Kag madason sa iya nagkaayo si Ezer nga lalaking anak ni Jesua, ang manugdumala sang Mizpa, isa pa ka bahin sa atubang sang taklaran pakadto sa bulutangan sang mga hinganiban sa nalikoan sang kuta.

20 Madason sa iya si Baruc nga lalaking anak ni Zabai nagkaayo sing makugihon sang isa pa ka bahin, kutub sa nalikoan sang kuta tubtub sa ganhaan sang balay ni Eliasib nga mataas nga pari.

21 Madason sa iya si Meremot nga lalaking anak ni Urias, lalaking anak ni Koz, nagkaayo sang isa pa ka bahin, kutub sa gawang sang balay ni Eliasib tubtub sa ukbung sang balay ni Eliasib.

22 Kag madason sa iya nagkaayo ang mga pari, ang mga tawo sang kapatagan.

23 Madason sa iya nagkaayo si Benjamin kag si Hasub sa atubang sang ila balay. Madason sa iya nagkaayo si Azarias nga lalaking anak ni Maasias, lalaking anak ni Ananias sa luyo sang iya balay.

24 Madason sa iya si Binui nga lalaking anak ni Henadad nagkaayo sing isa pa ka bahin, kutub sa balay ni Azarias tubtub sa nalikoan sang kuta, tubtub sa pamusud.

25 Si Palal nga lalaking anak ni Uzai, sa atubangan sang nalikoan sang kuta, kag sang torre nga nagalabaw sa mataas nga balay sang hari, nga yara sa luyo sang luwang sang bilanggoan. Madason sa iya si Pedaya nga lalaking anak ni Paros.

26 Labut pa ang mga Netinim nagpuyo sa Ofel, tubtub sa duug sa atubang sang gawang sang tubig nayon sa sidlangan, kag sang torre nga nagalabaw.

27 Madason sa ila ang mga Tekoanhon nagkaayo sang isa pa ka bahin, sa atubangan sang daku nga torre nga nagalabaw, tubtub sa kuta sang Ofel.

28 Kutub sa ibabaw sang gawang sang kabayo nagkaayo ang mga pari, ang tagsatagsa sa atubang sang iya balay.

29 Madason sa ila nagkaayo si Sadoc nga lalaking anak ni Imer sa atubang sang iya balay. Madason sa iya nagkaayo si Semaya nga lalaking anak ni Secanias, ang manugbantay sang gawang nga sidlangan.

30 Madason sa iya nagkaayo sang isa pa ka bahin si Hananias nga lalaking anak ni Selemias, kag si Hanun nga ikan-um nga lalaking anak ni Salaf. Madason sa iya nagkaayo si Mesullam nga lalaking anak ni Berequias sa atubang sang iya hulut.

31 Madason sa iya nagkaayo si Malquias, ang lalaking anak sang manugsalsal sang bulawan, tubtub sa duug sang mga Netinim, kag sang mga komersyante, sa atubang sang gawang nga Mifkad, kag tubtub sa taklaran sang pamusud.

32 Kag sa ulut sang taklaran sang pamusud tubtub sa gawang sang mga carnero nagkaayo ang mga manugsalsal sang bulawan kag ang mga komersyante.

KAPITULO 4

APANG nahanabu, sang pagkabati ni Sanbalat nga nagapatindug kami sang kuta, nagsingkal sia, kag naakig sing daku, kag nag-uligyat sang mga Judio.

2 Kag nagpamolong sia sa atubangan sang iya mga utud kag sang kasoldadosan sang Samaria, kag nagsiling, Ano bala ang ginahimo sining mapigaw nga mga Judio? magapabakud bala sila? magahalad bala sila? pagatapuson bala nila sa isa ka adlaw? banhawon bala nila ang mga bato gikan sa mga tinumpok sang dag-ot nga nasonog?

3 Karon yara sa luyo niya si Tobias nga Amonhon, kag nagsiling sia, Bisan pa ang ginapatindug nila, kon taklasan sang singgalong, lumpagon niya ang ila kuta nga bato.

4 Pamatii, O Dios namon; kay ginatamay kami: kag pabalika sa ila kaugalingon nga olo ang ila pasipala, kag itugyan sila nga inagaw sa duta sang kabihagan:

5 Kag indi pagtaboni ang ila kalautan, kag indi pagpanasa ang ila sala sa atubangan mo: kay ginpaakig ka nila sa atubangan sang mga manugpatindug.

6 Gani napatindug namon ang kuta; kag ang bug-os nga kuta napatabo tubtub sa iya katunga: kay ang katawohan may kabubut-on sa pagpangabudlay.

7 ś Apang nahanabu, nga sang pagkabati ni Sanbalat, kag ni Tobias, kag sang mga Arabiahanon, kag sang mga Amonhon, kag sang mga Asdodnon, nga ang mga kuta sang Jerusalem ginakaayo, kag nga ang mga bulho nakapulan, niyan nagsingkal sila sing tama gid,

8 Kag naghimbon sila tanan sing tingub sa pagkadto kag sa pagpakig-away sa Jerusalem, kag sa pagpugung sini.

9 Walay sapayan nagpangamuyo kami sa amon Dios, kag nagbutang sing mga bantay batok sa ila sa adlaw kag gab-i, bangud sa ila.

10 Kag ang Juda nagsiling, Ang kusug sang mga manugdala sang lulan nagluya, kag may madamu nga dag-ot; sa bagay nga indi kita makasarang magpatindug sang kuta.

11 Kag ang aton mga kasumpung nagsiling, Indi sila makahibalo, ukon makakita, tubtub nga magsulud kita sa tunga nila, kag magpatay sa ila, kag magpadolog sang buluhaton.

12 Kag nahanabu, nga sang pag-abut sang mga Judio nga nagpuyo malapit sa ila, nagsiling sila sa amon sing makapulo, Gikan sa tanan nga duug diin magapakari kamo sa amon, magapakadto sila batok sa inyo.

13 ś Busa sa manubo nga duug sa likod sang kuta, kag sa mga mataas nga mga duug, ginbutang ko ang katawohan sono sa ila mga panimalay, nga may ila nga mga espada, ila mga bangkaw, kag ila mga pana.

14 Kag nagtolok ako, kag nagtindug, kag nagsiling sa mga dungganon, kag sa mga manugdumala, kag sa iban nga katawohan, Dili kamo magkahadluk sa ila: dumduma ang GINOO, nga daku kag makakulugmat, kag pakig-away kamo tungud sa inyo mga utud, sa inyo mga anak nga lalaki, sa inyo mga anak nga babaye, sa inyo mga asawa, kag sa inyo mga balay.

15 Kag nahanabu, sang pagkabati sang amon mga kaaway nga nahibaloan namon ini, kag ginpakawala sing pulus sang Dios ang laygay nila, nga nagbalik kami tanan sa kuta, ang tagsatagsa sa iya buluhaton.

16 Kag nahanabu kutub sadto nga tion, nga ang katunga sang akon mga alagad nagpangabudlay sa buluhaton, kag ang katunga sa ila nag-uyat sang mga bangkaw, sang mga taming, kag sang mga pana, kag sang mga limbutong; kag ang mga manugdumala yara sa likod sang bug-os nga balay sang Juda.

17 Ang mga nagpatindug sang kuta, kag ang mga nagpas-an sing mga lulan, upud sa ila nga naglulan, ang tagsatagsa nagpangabudlay sa buluhaton sing isa ka kamut, kag ang isa ka kamut nag-uyat sing hinganiban.

18 Kay ang mga manugpatindug, ang tagsatagsa may espada nga nataklus sa iya kilid, kag sa sini nagpatindug sia. Kag ang nagpatonog sang budyong yara sa luyo nakon.

19 ś Kag nagsiling ako sa mga dungganon, kag sa mga manugdumala, kag sa iban sang katawohan, Ang buluhaton daku kag malapad, kag nabahinbahin kita sa kuta, ang isa malayo sa isa.

20 Sa bisan ano nga duug mabatian ninyo ang tonog sang budyong, magtilipon kamo didto sa amon: ang aton Dios magapakig-away tungud sa aton.

21 Gani kami nagpangabudlay sa buluhaton: kag ang katunga sa ila nagdala sing mga bangkaw kutub sa pagpamanagbanag tubtub sa pagsubang sang mga bitoon.

22 Subong man sa amo nga tion nagsiling ako sa katawohan, Ang tagsatagsa magdayon sa sulud sang Jerusalem upud sang iya alagad, agud nga sa kagab-ihon manginbantay sila sa aton, kag magpangabudlay sa adlaw.

23 Gani bisan ako, ukon ang akon mga utud, ukon ang akon mga alagad, ukon ang mga tawo sang bantay nga nagsonod sa akon, wala sa amon sing nagauba sang amon panapton, luwas lamang kon ang tagsatagsa nagauba sa ila tungud sa pagpangbunak.

KAPITULO 5

KAG may daku nga pagpanghakroy sang katawohan kag sang ila mga asawa batok sa mga Judio nga ila mga utud.

2 Kay may iban nga nagsiling, Kami, ang amon mga anak nga lalaki, kag ang amon mga anak nga babaye, madamu: busa nagapanghulam kami sing uyas tungud sa ila, agud nga makakaon kami, kag mabuhi.

3 May iban man nga nagsiling, Amon ginprenda ang amon mga uma, ang amon mga ulubasan, kag ang amon mga balay, agud nga makabakal kami sang uyas, bangud sang tiggulutum.

4 May iban man nga nagsiling, Nahulaman namon sing kuarta ang amon mga uma kag ang amon mga ulubasan tungud sa buhis sang hari.

5 Apang karon ang amon unud subong sa unud sang amon mga utud, ang amon mga anak subong sang ila mga anak: kag, yari karon, ginapaulipon namon ang amon anak nga lalaki kag ang amon mga anak nga babaye, kag iban sang amon mga anak nga babaye naulipon na: kag wala kami sing gahum sa paggawad sa ila; kay ang amon mga uma kag ang amon mga ulubasan yara sa iban nga mga tawo.

6 ś Kag naakig ako sing tama sang nabatian ko ang ila pagpanghakroy kag ini nga mga polong.

7 Niyan nagpatugsiling ako sa akon kaugalingon, kag ginsabdong ko ang mga dungganon, kag ang mga manugdumala, kag nagsiling sa ila, Nagasukut kamo sing saka, ang tagsatagsa sa iya utud. Kag naghimo ako sing daku nga pagtilipon batok sa ila.

8 Kag nagsiling ako sa ila, Kita, sono sa aton ikasarang, naggawad sang aton mga utud nga mga Judio, nga nabaligya sa mga pagano; kag ibaligya bala ninyo bisan ang inyo mga utud? ukon ibaligya bala sila sa aton? Niyan naghipus sila, kag wala sing isabat.

9 Nagsiling man ako, Inang inyo ginahimo indi maayo: indi bala dapat kamo maglakat sa kahadluk sa aton Dios bangud sa kahuya sang mga pagano nga mga kaaway naton?

10 Ako man, kag ang mga utud ko, kag ang mga alagad ko sarang man makasukut sa ila sing kuarta kag uyas: ginaampo ko sa inyo, bayaan ta ini nga pagpasaka.

11 Iuli sa ila, ginaampo ko sa inyo, sini gid nga adlaw, ang ila mga uma, ang ila mga ulubasan, ang ila mga kaolivohan, kag ang ila mga balay, kag ang ikaisa ka gatus nga bahin sang kuarta, kag sang uyas, sang alak, kag sang lana, nga ginsukut ninyo sa ila.

12 Niyan nagsiling sila, Iuli namon sila, kag indi magsukut sing bisan ano sa ila; amo ini ang amon himoon sono gid sa imo ginasiling. Niyan gintawag ko ang mga pari, kag ginpasumpa sila, nga maghimo sila sono sa sini nga saad.

13 Gintuk-ap ko man ang akon sabak, kag nagsiling, Sa among bagay ituk-ap sang Dios ang tagsa ka tawo gikan sa iya balay, kag gikan sa iya pangabudlayan, nga wala nagatuman sining saad, kag sa amo ituk-ap sia sing subong gid sini, kag kuhaan sing sulud. Kag ang bug-os nga katilingban nagsiling, Amen, kag nagdayaw sa GINOO. Kag ang katawohan naghimo sono sining saad.

14 ś Labut pa kutub sa tion nga gintangdo ako nga gobernador sa duta sang Juda, kutub sa ikaduha ka pulo nga tuig tubtub sa ikakatloan kag duha nga tuig ni Artajerjes nga hari, napulog duha ka tuig, ako kag ang akon mga utud wala makakaon sang kalan-on sang gobernador.

15 Apang ang unang mga gobernador nga una sa akon nagpabug-at sang mga tawo, kag nagkuha sa ila sing kalan-on kag alak, luwas sang kap-atan ka siclo nga pilak; hoo, bisan ang ila mga alagad man naggahum sa katawohan: apang wala ako maghimo sing subong, bangud sang kahadluk sa Dios.

16 Hoo, nagpadayon ako man sa buluhaton sining kuta, kag wala kami magbakal sing bisan anong duta: kag ang tanan nga akon mga alagad nagtipon didto sa buluhaton.

17 Labut pa may dira sa akon latok gikan sa mga Judio kag mga manugdumala nga isa ka gatus kag kalim-an, luwas sa ila nga nag-abut sa amon gikan sa mga pagano sa palibut namon.

18 Karon ang gin-aman nga sa akon sa adlawadlaw isa ka baka kag anum ka carnero nga pinili; mga pispis man naaman nga sa akon, kag makaisa sa napulo ka adlaw may tanan nga sari nga alak: apang tungud sini tanan wala ako magpangayo sang kalan-on sa gobernador, bangud nga ang pag-ulipon mabug-at sa sining katawohan.

19 Dumduma sa akon, O Dios ko, nga sa kaayohan, sono sa tanan nga akon nahimo tungud sining katawohan.

KAPITULO 6

KARON nahanabu, sang nabatian ni Sanbalat, kag ni Tobias, kag ni Gesem nga Arabiahanon, kag sang iban sang amon mga kaaway, nga napatindug ko ang kuta, kag nga walay bulwang nga nabilin sa iya; (bisan nga tubtub gid sadtong tion wala ko matakud ang mga takup sa mga gawang;)

2 Nga si Sanbalat kag si Gesem nagpatawag sa akon, nga nagasiling, Kari, kag magkitaay kita sing tingub sa isa sang mga minoro sa kapatagan sang Ono. Apang naghunahuna sila sa paghimo sing malaut sa akon.

3 Kag nagpadala ako sing mga manugbalita sa ila, nga nagasiling, Ako nagahimo sing dakung buluhaton sa bagay nga indi ako makadulhog: ngaa bala mag-untat ang buluhaton, samtang ginabayaan ko ini, kag magdulhog sa inyo?

4 Walay sapayan ginpakadtoan nila ako sing makap-at sono sining bagay; kag ginsabat ko sila sono sa among bagay.

5 Niyan ginpadala ni Sanbalat ang iya alagad sa akon sa among bagay sa ikalimang tion nga may bukas nga sulat sa iya kamut;

6 Nga sa sini nasulat, Ginsugid sa mga pagano, kag si Gasmu nagasiling sini, nga ikaw kag ang mga Judio nagahunahuna sa pagribuk: tungud sining kabangdanan nagapatindug ka sang kuta, agud nga ikaw mangin-ila hari, sono sining mga polong.

7 Kag ikaw nagtangdo man sing mga manalagna sa pagwali nahanungud sa imo sa Jerusalem, nga nagasiling, May hari sa Juda: kag karon isugid ini sa hari sono sining mga polong. Busa kari karon, kag maghinun-anon kita sing tingub.

8 Niyan ginpakadtoan ko sia, nga nagasiling, Walay among mga butang nga nahimo sono sa ginasiling mo, kondi ginapatopato mo sila gikan sa imo kaugalingon nga tagiposoon.

9 Kay tanan sila nagpahadluk sa amon, nga nagasiling, Magaluya ang mga kamut nila sa buluhaton, agud nga indi ini mahimo. Busa karon, O Dios, palig-ona ang akon mga kamut.

10 Sa olihi nagkadto ako sa balay ni Semaya nga lalaking anak ni Delaya, nga lalaking anak ni Mehetabel, nga natakpan; kag nagsiling sia, Magkitaay kita sa balay sang Dios, sa sulud sang templo, kag takpan naton ang mga ganhaan sang templo: kay magakari sila sa pagpatay sa imo; hoo, sa kagab-ihon magakari sila sa pagpatay sa imo.

11 Kag nagsiling ako, Ang tawo nga subong sa akon magapalagyo bala? kag sin-o bala dira nga subong sa akon magasulud sa templo sa pagluwas sang iya kabuhi? indi ako magsulud.

12 Kag, yari karon, nahantup ko nga ang Dios wala magpadala sa iya; kondi ginmitlang niya ining tagna batok sa akon: bangud nga ginsoholan sia ni Tobias kag ni Sanbalat.

13 Sa sining kabangdanan ginsoholan sia, agud nga mahadluk ako, kag maghimo sing subong, kag magpakasala, kag agud nga may butang sila nga inugsugid nga malaut, agud nga mapakahuy-an nila ako.

14 Dios ko, dumduma si Tobias kag si Sanbalat sono sa sining ila mga binuhatan, kag si Noadias nga manalagna nga babaye, kag ang iban pa nga mga manalagna, nga buut magpahadluk sa akon.

15 ś Gani ang kuta natapus sa ikaduha ka pulo kag lima nga adlaw sang bulan nga Elul, sa kalim-an kag duha ka adlaw.

16 Kag nahanabu, nga sang nakabati sini ang tanan namon nga kaaway, kag ang tanan nga pagano sa palibut namon nakakita sining mga butang, sila nahuy-an sing tama sa ila kaugalingon nga mga mata: kay ginhantup nila nga ining buluhaton ginhikut sang amon Dios.

17 ś Labut pa sa sadtong mga adlaw ang mga dungganon sang Juda nagpadala sing madamung mga sulat kay Tobias, kag ang mga sulat ni Tobias nag-abut sa ila.

18 Kay madamu sa Juda ang nagsumpa sa iya, bangud nga sia lalaking umagad ni Secanias nga lalaking anak ni Ara; kag si Johanan nga iya lalaking anak nagpangasawa sang babaying anak ni Mesullam nga lalaking anak ni Berequias.

19 Nagsugid man sila sang iya maayong mga binuhatan sa atubangan nakon, kag nagsugid sang akon mga polong sa iya. Kag si Tobias nagpadala sing mga sulat sa pagpahadluk sa akon.

KAPITULO 7

KARON nahanabu, sang napatindug ang kuta, kag natakud ko na ang mga gawang, kag natangdo ang mga bantay sang gawang kag ang mga manug-amba kag ang mga Levinhon,

2 Nga ginpadumala ko sa Jerusalem si Hanani nga akon utud nga lalaki kag si Hananias nga pangolo sang palacio: kay matutum sia nga tawo, kag nahadluk sa Dios labaw sa madamu.

3 Kag nagsiling ako sa ila, Dili pagbuksan ang mga gawang sang Jerusalem tubtub nga mag-init ang adlaw; kag samtang nagabantay sila, takpan nila ang mga gawang, kag pintalan nila sila: kag magtangdo sing mga bantay sang mga pumuluyo sang Jerusalem, ang tagsatagsa sa iya balantayan, kag ang tagsatagsa sa atubang sang iya balay.

4 Karon ang siudad malapad kag daku: apang diotay ang katawohan sa sulud niya, kag ang mga balay wala pa mapatindug.

5 ś Kag ang akon Dios nagbutang sa akon tagiposoon sa pagtipon sing tingub sang mga dungganon, kag sang mga manugdumala, kag sang katawohan, agud nga maisip sila sa lista sang kaliwatan. Kag nakita ko ang libro sang lista sang kaliwatan sang mga nagtaklad sing una, kag nakita ko nga nasulat sa sini,

6 Ini sila amo ang kaanakan sang probinsya, nga nagtaklad gikan sa kabihagan sadtong mga gindala ni Nabucodonosor nga hari sang Babilonia, kag nagbalik sila sa Jerusalem kag sa Juda, ang tagsatagsa sa iya siudad;

7 Nga nag-abut upud kay Zorobabel, Jesua, Nehemias, Azarias, Raamias, Nahamani, Mardoqueo, Bilsan, Misperet, Bigvai, Nehum, Baana. Ang kadamuon, masiling ko, sang mga tawo sang katawohan sang Israel amo ini;

8 Ang mga anak ni Paros, duha ka libo kag isa ka gatus kag kapitoan kag duha.

9 Ang mga anak ni Sefatias, tatlo ka gatus kag kapitoan kag duha.

10 Ang mga anak ni Ara, anum ka gatus kag kalim-an kag duha.

11 Ang mga anak ni Pahat-moab, gikan sa mga anak ni Jesua kag ni Joab, duha ka libo kag walo ka gatus kag napulog walo.

12 Ang mga anak ni Elam, isa ka libo kag duha ka gatus kag kalim-an kag apat.

13 Ang mga anak ni Zatu, walo ka gatus kag kap-atan kag lima.

14 Ang mga anak ni Zacai, pito ka gatus kag kan-uman.

15 Ang mga anak ni Binui, anum ka gatus kag kap-atan kag walo.

16 Ang mga anak ni Bebai, anum ka gatus kag duha ka pulo kag walo.

17 Ang mga anak ni Azgad, duha ka libo kag tatlo ka gatus kag duha ka pulo kag duha.

18 Ang mga anak ni Adonicam, anum ka gatus kag kan-uman kag pito.

19 Ang mga anak ni Bigvai, duha ka libo kag kan-uman kag pito.

20 Ang mga anak ni Adin, anum ka gatus kag kalim-an kag lima.

21 Ang mga anak ni Ater, gikan kay Ezequias, kasiaman kag walo.

22 Ang mga anak ni Hasum, tatlo ka gatus kag duha ka pulo kag walo.

23 Ang mga anak ni Besai, tatlo ka gatus kag duha ka pulo kag apat.

24 Ang mga anak ni Harif, isa ka gatus kag napulog duha.

25 Ang mga anak ni Gabaon, kasiaman kag lima.

26 Ang mga tawo sang Bet-lehem kag Netofa, isa ka gatus kag kawaloan kag walo.

27 Ang mga tawo sang Anatot, isa ka gatus kag duha ka pulo kag walo.

28 Ang mga tawo sang Bet-azmavet, kap-atan kag duha.

29 Ang mga tawo sang Kiryat-jearim, sang Cafira, kag sang Beerot, pito ka gatus kag kap-atan kag tatlo.

30 Ang mga tawo sang Rama kag sang Geba, anum ka gatus kag duha ka pulo kag isa.

31 Ang mga tawo sang Micmas, isa ka gatus kag duha ka pulo kag duha.

32 Ang mga tawo sang Bet-el kag sang Ai, isa ka gatus kag duha ka pulo kag tatlo.

33 Ang mga tawo sang isa pa ka Nebo, kalim-an kag duha.

34 Ang mga anak sang isa pa ka Elam, isa ka libo kag duha ka gatus kag kalim-an kag apat.

35 Ang mga anak ni Harim, tatlo ka gatus kag duha ka pulo.

36 Ang mga anak sang Jerico, tatlo ka gatus kag kap-atan kag lima.

37 Ang mga anak sang Lod, sang Hadid, kag sang Ono, pito ka gatus kag duha ka pulo kag isa.

38 Ang mga anak ni Senaa, tatlo ka libo kag siam ka gatus kag katloan.

39 ś Ang mga pari: ang mga anak ni Jedaya, gikan sa panimalay ni Jesua, siam ka gatus kag kapitoan kag tatlo.

40 Ang mga anak ni Imer, isa ka libo kag kalim-an kag duha.

41 Ang mga anak ni Pasur, isa ka libo kag duha ka gatus kag kap-atan kag pito.

42 Ang mga anak ni Harim, isa ka libo kag napulog pito.

43 ś Ang mga Levinhon: ang mga anak ni Jesua, ni Cadmiel, kag gikan sa mga anak ni Hodeva, kapitoan kag apat.

44 ś Ang mga manug-amba: ang mga anak ni Asaf, isa ka gatus kag kap-atan kag walo.

45 ś Ang mga manugbantay sang gawang: ang mga anak ni Sallum, ang mga anak ni Ater, ang mga anak ni Talmon, ang mga anak ni Acub, ang mga anak ni Hatita, ang mga anak ni Soba, isa ka gatus kag katloan kag walo.

46 ś Ang mga Netinim: ang mga anak ni Ziha, ang mga anak ni Hasufa, ang mga anak ni Tabaot,

47 Ang mga anak ni Keros, ang mga anak ni Sia, ang mga anak ni Padon,

48 Ang mga anak ni Lebana, ang mga anak ni Hagaba, ang mga anak ni Salmai,

49 Ang mga anak ni Hanan, ang mga anak ni Gidel, ang mga anak ni Gahar,

50 Ang mga anak ni Reaya, ang mga anak ni Rezin, ang mga anak ni Necoda,

51 Ang mga anak ni Gazam, ang mga anak ni Uza, ang mga anak ni Pasea,

52 Ang mga anak ni Besai, ang mga anak ni Meunim, ang mga anak ni Nefusesim,

53 Ang mga anak ni Bacbuc, ang mga anak ni Hacufa, ang mga anak ni Harhur,

54 Ang mga anak ni Bazlit, ang mga anak ni Mehida, ang mga anak ni Harsa,

55 Ang mga anak ni Barcos, ang mga anak ni Sisera, ang mga anak ni Tama,

56 Ang mga anak ni Nezia, ang mga anak ni Hatifa.

57 ś Ang mga anak sang mga alagad ni Salomon: ang mga anak ni Sotai, ang mga anak ni Soferet, ang mga anak ni Perida,

58 Ang mga anak ni Jaala, ang mga anak ni Darcon, ang mga anak ni Gidel,

59 Ang mga anak ni Sefatias, ang mga anak ni Hatil, ang mga anak ni Poquerit sang Zebaim, ang mga anak ni Amon.

60 Ang tanan nga Netinim, kag ang mga anak sang mga alagad ni Salomon, tatlo ka gatus kag kasiaman kag duha.

61 Kag ini sila amo ang mga nagtaklad man gikan sa Tel-mela, sa Tel-harsa, sa Querub, sa Adon, kag sa Imer: apang indi sila makapahayag sang panimalay sang ila amay, ukon sang ila kaliwat, kon sila taga-Israel.

62 Ang mga anak ni Delaya, ang mga anak ni Tobias, ang mga anak ni Necoda, anum ka gatus kag kap-atan kag duha.

63 ś Kag gikan sa mga pari: ang mga anak ni Hobaya, ang mga anak ni Koz, ang mga anak ni Barzilai, nga nagpangasawa sang isa sang mga babaying anak ni Barzilai nga Galaadnon, kag gintawag sono sa ila ngalan.

64 Ini sila nagpangita sang ila listahan sa tunga sang mga gin-isip sono sa lista sang kaliwatan, apang wala ini makita: busa sa ginkabig sila nga dinagtaan, ginpagowa sila sa pagkapari.

65 Kag ang Tirsata nagsiling sa ila, nga indi sila magkaon gikan sa labing balaan nga mga butang, tubtub nga may magtindug nga pari nga may Urim kag Tummim.

66 ś Ang bug-os nga katilingban sing tingub kap-atan kag duha ka libo kag tatlo ka gatus kag kan-uman,

67 Luwas sang ila mga alagad nga lalaki kag ila mga alagad nga babaye nga pito ka libo kag tatlo ka gatus kag katloan kag pito: kag may ila sila nga duha ka gatus kag kap-atan kag lima ka manug-amba nga lalaki kag manug-amba nga babaye.

68 Ang ila mga kabayo, pito ka gatus kag katloan kag anum: ang ila mga mula, duha ka gatus kag kap-atan kag lima:

69 Ang ila mga camelyo, apat ka gatus kag katloan kag lima: anum ka libo kag pito ka gatus kag duha ka pulo nga mga asno.

70 ś Kag ang iban sang mga pangolo sang mga kaamayan naghatag sa buluhaton. Ang Tirsata naghatag sa bahandian sing isa ka libo ka darico nga bulawan, kalim-an ka batiya, lima ka gatus kag katloan ka panapton sang mga pari.

71 Kag ang iban sang mga pangolo sang mga kaamayan naghatag sa bahandian sang buluhaton sing duha ka pulo ka libo ka darico nga bulawan, kag duha ka libo kag duha ka gatus ka mina nga pilak.

72 Kag inang nahatag sang nabilin sang mga tawo duha ka pulo ka libo ka darico nga bulawan, kag duha ka libo ka mina nga pilak, kag kan-uman kag pito ka panapton sang mga pari.

73 Gani ang mga pari, kag ang mga Levinhon, kag ang mga bantay sang gawang, kag ang mga manug-amba, kag ang iban sang katawohan, kag ang mga Netinim, kag ang bug-os nga Israel, nagpuyo sa ila mga siudad; kag sang nag-abut ang ikapitong bulan, ang kaanakan sang Israel yara sa ila mga siudad.

KAPITULO 8

KAG ang bug-os nga katawohan nagtipon sing tingub subong nga isa ka tawo sa dalan nga yara sa atubangan sang gawang sang tubig; kag nagpamolong sila kay Esdras nga escriba nga dalhon ang libro sang kasogoan ni Moises, nga ginsogo sang GINOO sa Israel.

2 Kag si Esdras nga pari nagdala sang kasogoan sa atubang sang katilingban sang mga lalaki kag mga babaye, kag sang tanan nga makapamati nga may paghangup, sa nahaunang adlaw sang ikapitong bulan.

3 Kag nagbasa sia sa sini sa atubangan sang dalan nga yara sa atubangan sang gawang sang tubig kutub sa pamanagbanag tubtub sa udto, sa atubangan sang mga lalaki kag mga babaye, kag sadtong mga makahangup; kag ang mga idulungug sang bug-os nga katawohan nagmatalupangdon sa libro sang kasogoan.

4 Kag si Esdras nga escriba nagtindug sa pulpito nga kahoy, nga ginhimo nila tungud sa katuyoan; kag sa luyo niya nagtindug sila ni Matitias, kag Sema, kag Anaya, kag Urias, kag Helcias, kag Maasias, sa iya too; kag sa iya wala, sila ni Pedaya, kag Misael, kag Malquias, kag Hasum, kag Hasbadana, Zacarias, kag Mesullam.

5 Kag ginbukad ni Esdras ang libro sa itololok sang bug-os nga katawohan; (kay sia labaw sa bug-os nga katawohan;) kag sang nabukad niya ini, ang bug-os nga katawohan nagtindug:

6 Kag si Esdras nagpakamaayo sa GINOO, ang dakung Dios. Kag ang bug-os nga katawohan nagsabat, Amen, Amen, nga nagabayaw sang ila mga kamut: kag nagduko sila, kag nagsimba sa GINOO nga nagahapa sila sa duta.

7 Labut pa sila ni Jesua, kag Bani, kag Serebias, Jamin, Acub, Sabetai, Hodias, Maasias, Kelita, Azarias, Jozabad, Hanan, Pelaya, kag ang mga Levinhon, nagpahangup sa katawohan sang kasogoan: kag ang katawohan nagtindug sa ila duug.

8 Gani nagbasa sila sa libro sa kasogoan sang Dios sing maathag, kag ginhatag nila ang kahologan, kag nagpahangup sa ila sang pagbasa.

9 ś Kag si Nehemias, nga amo ang Tirsata, kag si Esdras nga pari nga escriba, kag ang mga Levinhon nga nagtudlo sang katawohan, nagsiling sa bug-os nga katawohan, Ining adlaw balaan sa GINOO nga inyo Dios; dili kamo maglalaw, ukon maghibi. Kay ang bug-os nga katawohan naghibi, sang nabatian nila ang mga polong sang kasogoan.

10 Niyan nagsiling sia sa ila, Lakat kamo, kaon sang sapay, kag inum sang matam-is, kag padala sing mga bahin sa wala makaaman: kay ining adlaw balaan sa aton GINOO: kag dili kamo magkalisud; kay ang kalipay sang GINOO among inyo kusug.

11 Gani ang mga Levinhon nagpahipus sang bug-os nga katawohan, nga nagasiling, Maglinong kamo, kay ang adlaw balaan; dili kamo magkalisud.

12 Kag ang bug-os nga katawohan naglakat sa pagkaon, kag sa pag-inum, kag sa pagpadala sing mga bahin, kag sa paghimo sing dakung kinalipay, bangud nga nahangpan nila ang mga polong nga ginpahayag sa ila.

13 ś Kag sa ikaduhang adlaw nagtipon sang tingub ang mga pangolo sang mga kaamayan sang bug-os nga katawohan, ang mga pari, kag ang mga Levinhon, kay Esdras nga escriba sa pagtalupangud sang mga polong sang kasogoan.

14 Kag nakita nila nga nasulat sa kasogoan nga ang GINOO nagsogo paagi kay Moises, nga ang kaanakan sang Israel magpuyo sa mga payagpayag sa pandut sang ikapitong bulan:

15 Kag nga ipahibalo nila kag ipabantala sa tanan nilang mga siudad, kag sa Jerusalem, nga nagasiling, Kadto kamo sa bukid, kag magkuha sing mga sanga sang olivo, kag mga sanga sang pino, kag mga sanga sang mirto, kag mga paklang sang palma, kag mga sanga sang kahoy nga madabong, nga himoon nga mga payagpayag, sono sa nasulat.

16 ś Gani ang katawohan naglakat, kag nagdala sa ila, kag naghimo nga sa ila sing mga payagpayag, ang tagsatagsa sa ibabaw sang atop sang iya balay, kag sa ila mga luwang, kag sa mga luwang sang balay sang Dios, kag sa dalan sang gawang sang tubig, kag sa dalan sang gawang ni Efraim.

17 Kag ang bug-os nga katilingban sang mga nakabalik gikan sa kabihagan naghimo sing mga payagpayag, kag naglingkod sa idalum sang mga payagpayag: kay kutub sa mga adlaw ni Jesua nga lalaking anak ni Nun tubtub sadtong adlaw wala makahimo sing subong ang kaanakan sang Israel. Kag may tama kadaku nga kasadya.

18 Adlawadlaw man, kutub sa nahaunang adlaw tubtub sa katapusan nga adlaw, nagbasa sia sa libro sang kasogoan sang Dios. Kag ginhiwat nila ang pandut sing pito ka adlaw; kag sa ikawalong adlaw may solemne nga pagtilipon, sono sa pagsolondan.

KAPITULO 9

KARON sa ikaduha ka pulo kag apat nga adlaw sining bulan ang kaanakan sang Israel nagtipon nga may pagpuasa, kag may panapton nga sako, kag may duta sa ibabaw nila.

2 Kag ang kaliwat sang Israel nagpain gikan sa tanan nga dumuloong, kag nagtindug kag nagtuad sang ila mga sala, kag sang mga kasal-anan sang ila mga kaamayan.

3 Kag nagtindug sila sa ila duug, kag nagbasa sa libro sang kasogoan sang GINOO nga ila Dios sa ikap-at nga bahin sang adlaw; kag sa isa pa ka ikap-at nga bahin nagtuad sila, kag nagsimba sa GINOO nga ila Dios.

4 ś Niyan nagtindug sa hagdanan, gikan sa mga Levinhon sila ni Jesua, kag Bani, Kadmiel, Sebanias, Buni, Serebias, Bani, kag Kenani, kag nagtuaw sila sa matonog nga tingug sa GINOO nga ila Dios.

5 Niyan ang mga Levinhon, sila ni Jesua, kag Kadmiel, Bani, Hasabnias, Serebias, Hodias, Sebanias, kag Petahias, nagsiling, Tindug kag pakamaayoha ang GINOO nga inyo Dios sa gihapon kag sa walay katapusan: kag pakamaayohon ang imo mahimayaon nga ngalan, nga ginbayaw labaw sa tanan nga pagpakamaayo kag pagdayaw.

6 Ikaw, ikaw gid, amo ang GINOO lamang; ginhimo mo ang langit, ang langit sang mga langit, pati ang bug-os nilang panong, ang duta, kag ang tanan nga butang nga yara sa iya, ang mga dagat, kag ang tanan nga yara sa ila, kag ikaw nagatipig sa ila tanan; kag ang panong sang langit nagasimba sa imo.

7 Ikaw amo ang GINOO, ang Dios, nga nagpili kay Abram, kag nagpagowa sa iya gikan sa Ur sang Caldea, kag naghatag sa iya sang ngalan nga Abraham;

8 Kag ikaw nakasapu sang iya tagiposoon nga matutum sa atubangan mo, kag nagpakigkatipan sa iya sa paghatag sang duta sang mga Canaanhon, sang mga Hithanon, sang mga Amornon, kag sang mga Pereznon, kag sang mga Jebusnon, kag sang mga Gergasnon; sa paghatag sini, masiling ko, sa iya kaliwat, kag ikaw nagtuman sang imo mga polong; kay matarung ka:

9 Kag nakita mo ang kapipit-an sang amon mga kaamayan sa Egipto, kag nagpamati sang ila pagtuaw sa ubay sang Mapulang dagat;

10 Kag nagpakita sing mga tanda kag mga katanhagaan kay Faraon, kag sa tanan niyang mga alagad, kag sa bug-os nga katawohan sang iya duta: kay nahibaloan mo nga sila nagpabugal batok sa ila. Gani nakaagum ka sing ngalan, subong sang sa sining adlaw.

11 Kag ginpahawa mo ang dagat sa atubangan nila, sa bagay nga nag-agi sila sa tunga sang dagat sa mamalang duta; kag ang ila mga manughingabut gintagbong mo sa mga kadadalman, subong sang bato pakadto sa gamhanan nga mga tubig.

12 Labut pa sa haliging panganud gintuytuyan mo sila sa adlawon; kag sa haliging kalayo sa kagab-ihon, sa paghatag sa ila sing kapawa sa dalanon nga ila paglaktan.

13 Nagpanaug ka man sa bukid nga Sinai, kag nagpakighambal sa ila kutub sa langit, kag naghatag sa ila sing matarung nga mga pagsolondan, kag matuud nga mga kasogoan, maayong mga palatukuran kag mga sogo:

14 Kag nagpakilala sa ila sang imo balaan nga sabbath, kag nagsogo sa ila sing mga tulumanon, mga palatukuran, kag mga kasogoan, paagi sa kamut ni Moises nga imo alagad:

15 Kag naghatag sa ila sing tinapay gikan sa langit sa ila kagutum, kag nagpagowa sing tubig gikan sa dakung bato nga sa ila kauhaw, kag nagpanaad sa ila nga magasulud sila sa pagtag-iya sang duta nga imo nasumpa nga ihatag sa ila.

16 Apang sila kag ang amon mga kaamayan nagbugalon, kag nagpatig-a sang ila tingkoy, kag wala magpamati sang imo mga sogo,

17 Kag nagdumili sa pagtuman, kag wala magsapak sang imo mga katanhagaan nga ginhimo mo sa tunga nila; kondi nagpatig-a sang ila tingkoy, kag sa ila pagbato nagtangdo sing kapitan sa pagbalik sa ila kahiolipnan: apang ikaw ang isa ka Dios nga handa sa pagpatawad, mainayohon kag maloloy-on, makuli sa pagpangakig, kag may daku nga kalolo, kag wala magbiya sa ila.

18 Hoo, sang nakahimo sila nga sa ila sing tinday nga baka nga tinunaw, kag nagsiling, Ini amo ang imo Dios nga nagpataklad sa imo gikan sa Egipto, kag nakahikot sing dalagku nga mga pagpaakig;

19 Walay sapayan ikaw sa imo bugana nga mga kalooy wala magbiya sa ila sa kamingawan: ang haligi nga panganud wala magbulag sa ibabaw nila sa adlawon, sa pagtuytuy sa ila sa dalanon; kag ang haligi nga kalayo sa kagab-ihon, sa pagpakita sa ila sing kapawa, kag sang dalanon nga ila paglaktan.

20 Ikaw naghatag man sang imo maayo nga espiritu sa pagtudlo sa ila, kag wala magpugung sang imo mana gikan sa ila baba, kag naghatag sa ila sing tubig nga sa ila kauhaw.

21 Hoo, ginsakdag mo sila sing kap-atan ka tuig sa kamingawan, sa bagay nga wala sila makulangi sing bisan ano; ang ila mga panapton wala magdaan, kag ang ila mga tiil wala magbanug.

22 Labut pa ginhatagan mo sila sing mga ginharian kag mga pungsud, kag ginpahatpahat mo sila sa ila mga bahin: gani ginpanag-iyahan nila ang duta ni Sihon, kag ang duta sang hari sang Hesbon, kag ang duta ni Og nga hari sang Basan.

23 Ang ila mga anak man ginpabuad mo subong sang mga bitoon sang langit, kag ginpasulud mo sila sa duta, nga nahanungud sini nagpanaad ka sa ila mga kaamayan, nga magsulud sila sa pagtag-iya sini.

24 Gani ang mga anak nagsulud kag nagpanag-iya sang duta, kag ginpangdaug mo sa atubangan nila ang mga pumuluyo sang duta, ang mga Canaanhon, kag gintugyan sila sa ila mga kamut, pati ang ila mga hari, kag ang katawohan sang duta, agud nga mahimo nila sa ila ang sono sa luyag nila.

25 Kag nag-agaw sila sing mga siudad nga napamakuran, kag duta nga mabungahon, kag nagpanag-iya sing mga balay nga puno sang tanan nga pagkabutang, mga bobon nga nakutkut, mga ulubasan, kag mga kaolivohan, kag bugana nga mga kahoy nga nagapamunga: gani nagkaon sila, kag nabusug, kag nagtambok, kag nagkalipay sila sa imo daku nga pagkaayo.

26 Walay sapayan nagdimatinumanon sila, kag nagsumpung batok sa imo, kag naghaboy sang imo kasogoan sa likod nila, kag nagpatay sang imo mga manalagna nga nagpamatuud batok sa ila sa pagpaliso sa ila sa imo, kag naghikot sila sing dalagku nga mga pagpaakig.

27 Busa gintugyan mo sila sa kamut sang ila mga kaaway, nga nagtublag sa ila: kag sa tion sang ila kalisdanan, sang nagtuaw sila sa imo, ginpamatian mo sila kutub sa langit; kag sono sa imo bugana nga mga kalooy ginhatagan mo sila sing mga manluluwas, nga nagluwas sa ila sa kamut sang ila mga kaaway.

28 Apang sang nakapahuway sila, naghimo sila liwat sing malaut sa atubangan mo: busa ginbayaan mo sila sa kamut sang ila mga kaaway, sa bagay nga naggahum sila sa ila: apang sang nagbalik sila, kag nagtuaw sa imo, nagpamati ka sa ila kutub sa langit; kag sa madamu nga tion ginluwas mo sila sono sa imo mga kalooy;

29 Kag nagpamatuud ikaw batok sa ila, agud nga mapabalik mo sila sa imo kasogoan: apang nagbugalon sila, kag wala magpamati sa imo mga sogo, kondi nagpakasala sa imo mga pagsolondan, (nga kon himoon sang tawo, magakabuhi sia sa ila;) kag nagpatiskug sila sang ila abaga, kag nagpatig-a sang ila tingkoy, kag indi buut magpamati.

30 Walay sapayan ginbatas mo sila sa madamu nga tuig, kag nagpamatuud batok sa ila paagi sa imo espiritu sa imo mga manalagna: apang indi sila buut magpamati: busa gintugyan mo sila sa kamut sang katawohan sang mga duta.

31 Wala sing sapayan tungud sa imo dakung mga kalooy wala mo sila paglaglaga sing bug-os, ukon nagbiya sa ila; kay ikaw Dios nga mainayohon kag maloloy-on.

32 Busa karon, Dios namon, ang daku, ang gamhanan, kag ang makahaladluk nga Dios, nga nagatipig sing katipan kag kalooy, indi pagpakadiotaya sa imo atubangan ang bug-os nga kasakit, nga nag-abut sa amon, sa amon mga hari, sa amon mga prinsipe, kag sa amon mga pari, kag sa amon mga manalagna, kag sa amon mga kaamayan, kag sa bug-os mo nga katawohan, kutub sa tion sang mga hari sang Asiria tubtub sini nga adlaw.

33 Apang ikaw matarung sa tanan nga nag-abut sa amon; kay naghimo ka sing matarung, apang kami nakahimo sing malaut:

34 Kag ang amon mga hari, ang amon mga prinsipe, ang amon mga pari, kag ang amon mga kaamayan, wala magbantay sang imo kasogoan, ukon magpamati sa imo mga sogo kag sa imo mga pagpamatuud, nga imo ginpamatuud batok sa ila.

35 Kay wala sila mag-alagad sa imo sa ila ginharian, kag sa imo daku nga pagkaayo nga ginhatag mo sa ila, kag sa duta nga malapad kag matambok nga ginhatag mo sa atubangan nila, kag wala sila magtalikod sa ila malaut nga mga binuhatan.

36 Yari karon, mga alagad kami sa sini nga adlaw, kag sa duta nga ginhatag mo sa amon mga kaamayan sa pagkaon sang iya bunga kag iya kaayohan, yari karon, mga alagad kami sa sulud niya:

37 Kag nagapatubas ini sing madamu sa mga hari nga ginpagahum mo sa amon bangud sang amon mga sala: may kagamhanan man sila sa amon mga lawas, kag sa amon kahayupan, sa ila luyag, kag yari kami sa daku nga kasakit.

38 Kag bangud sini tanan nagahimo kami sing malig-on nga katipan, kag nagasulat sini; kag ang amon mga prinsipe, mga Levinhon, kag mga pari, nagapat-in sini.

KAPITULO 10

KARON yadtong mga nagpat-in amo sanday Nehemias nga Tirsata, ang lalaking anak ni Hacalias, kag si Zidkias,

2 Si Seraya, si Azarias, si Jeremias,

3 Si Pasur, si Amarias, si Malquias,

4 Si Hatus, si Sebanias, si Maluc,

5 Si Harim, si Meremot, si Obadias,

6 Si Daniel, si Geneton, si Baruc,

7 Si Mesullam, si Abias, si Miamin,

8 Si Maazias, si Bilgai, si Semaya: ini sila mga pari.

9 Kag ang mga Levinhon: si Jesua nga lalaking anak ni Azanias, si Binui gikan sa mga lalaking anak ni Henadad, si Kadmiel;

10 Kag ang ila mga utud, si Sebanias, si Hodias, si Kelita, si Pelaya, si Hanan,

11 Si Mica, si Rehob, si Hasabias,

12 Si Zacur, si Serebias, si Sebanias,

13 Si Hodias, si Bani, si Beninu.

14 Ang mga puno sang katawohan; si Paros, si Pahat-moab, si Elam, si Zatu, si Bani,

15 Si Buni, si Azgad, si Bebai,

16 Si Adonias, si Bigvai, si Adin,

17 Si Ater, si Ezquias, si Azur,

18 Si Hodias, si Hasum, si Bezai,

19 Si Harif, si Anatot, si Nebai,

20 Si Magpias, si Mesullam, si Hezir,

21 Si Mesezabeel, si Sadoc, si Jadua,

22 Si Pelatias, si Hanan, si Anaya,

23 Si Oseas, si Hananias, si Hasub,

24 Si Hallohes, si Pilha, si Sobec,

25 Si Rehum, si Hasabna, si Maasias,

26 Kag si Ahias, si Hanan, si Anan,

27 Si Malluc, si Harim, si Baana.

28 ś Kag ang nabilin sang katawohan, ang mga pari, ang mga Levinhon, ang mga manugbantay sang gawang, ang mga manug-amba, ang mga Netinim, kag ang tanan sa ila nga nagpain sang ila kaugalingon nga sa kasogoan sang Dios gikan sa katawohan sang mga duta, ang ila mga asawa, ang ila mga anak nga lalaki, kag ang ila mga anak nga babaye, ang tagsatagsa nga may ihibalo, kag may paghangup;

29 Nagtingub sila sa ila mga utud, sa ila mga dungganon, kag nagpasakup sa pagpakamalaut, kag sa pagsumpa, sa paglakat sa kasogoan sang Dios, nga ginhatag paagi kay Moises nga alagad sang Dios, kag sa pagbantay kag sa paghimo sang tanan nga sogo sang GINOO nga amon Ginoo, kag sang iya mga pagsolondan kag sang iya mga palatukuran;

30 Kag indi kami maghatag sang amon mga anak nga babaye sa katawohan sang duta, ukon magkuha sang ila mga anak nga babaye nga sa amon mga anak nga lalaki:

31 Kag kon ang katawohan sang duta magdala sing mga inugbaligya ukon bisan ano nga kalan-on sa pagbaligya sa adlaw nga sabbath, indi kami magbakal sa ila sa sabbath, ukon sa adlaw nga balaan: kag paligaron namon ang ikapito nga tuig, kag ang pagsukut sang tagsatagsa ka utang.

32 Naghimo man kami sing mga pagsolondan nga sa amon, sa pagpabayad sang amon kaugalingon tuigtuig sang ikatlo nga bahin sang siclo nga sa pag-alagdan sang balay sang amon Dios;

33 Nga sa tinapay nga pahayag, kag nga sa dalayon nga halad nga kalan-on, kag nga sa dalayon nga halad nga sinonog, sa mga sabbath, sa mga lati, nga sa pinat-ud nga mga pandut, kag nga sa balaan nga mga butang, kag nga sa mga halad tungud sa sala sa paghimo sing katumbasan tungud sang Israel, kag tungud sa tanan nga buluhaton sang balay sang amon Dios.

34 Kag nagpapalad kami sa tunga sang mga pari, sang mga Levinhon, kag sang katawohan, nga sa dolot nga gatong, sa pagdala sini sa balay sang amon Dios, sono sa mga panimalay sang amon mga kaamayan, sa pinat-ud nga mga tion tuigtuig, sa pagsonog sa halaran sang GINOO nga amon Dios, sono sa nasulat sa kasogoan:

35 Kag sa pagdala sang nahauna nga mga bunga sang amon duta, kag sang nahauna nga mga bunga sang bug-os nga bunga sang tanan nga kahoy, tuigtuig, sa balay sang GINOO:

36 Ang panganay man sang amon mga anak nga lalaki, kag sang amon kahayupan, sono sa nasulat sa kasogoan, kag ang mga panganay sang amon kabakahan kag sang amon mga panong, sa pagdala sa balay sang amon Dios, sa mga pari nga nagaalagad sa balay sang amon Dios:

37 Kag ang pagdala sang nahauna nga mga bunga sang amon linamas, kag sang amon mga halad, kag sang bunga sang tanan nga bagay sang mga kahoy, sang alak kag sang lana, sa mga pari, sa mga hulut sang balay sang amon Dios; kag sang mga ikapulo sang amon duta sa mga Levinhon, agud nga ang amo nga mga Levinhon makabaton sang mga ikapulo sa tanan nga siudad sang amon pinangumahan.

38 Kag ang pari, lalaking anak ni Aaron, magaupud sa mga Levinhon, kon ang mga Levinhon magkuha sang mga ikapulo: kag ang mga Levinhon magadala sang ikapulo sang mga ikapulo sa balay sang amon Dios, sa mga hulut, sa sulud sang balay sang bahandi.

39 Kay ang kaanakan sang Israel kag ang mga lalaking anak ni Levi magadala sang halad gikan sa uyas, gikan sa bag-o nga alak, kag gikan sa lana, sa mga hulut, sa diin ang mga suludlan sang santuario, kag ang mga pari nga nagaalagad, kag ang mga manugbantay sang gawang, kag ang mga manug-amba: kag indi namon pagbayaan ang balay sang amon Dios.

KAPITULO 11

KAG nagpuyo sa Jerusalem ang mga pangolo sang katawohan: ang nabilin sang katawohan nagpapalad man, sa pagpakari sang isa sang napulo nga magpuyo sa Jerusalem nga siudad nga balaan, kag sang siam ka bahin nga magpuyo sa iban nga mga siudad.

2 Kag ang katawohan nagpakamaayo sang tanan nga tawo, nga nagtanyag sing kinabubut-on sang ila kaugalingon sa pagpuyo sa Jerusalem.

3 ś Karon amo ini sila ang mga puno sang probinsya nga nagpuyo sa Jerusalem: apang sa mga siudad sang Juda nagpuyo ang tagsatagsa sa iya kaugalingon sa ila mga siudad, nga amo, ang Israel, ang mga pari, kag ang mga Levinhon, kag ang mga Netinim, kag ang mga anak sang mga alagad ni Salomon.

4 Kag sa Jerusalem nagpuyo ang pila sang mga anak sang Juda, kag sang mga anak sang Benjamin. Gikan sa mga anak sang Juda; si Ataya nga lalaking anak ni Uzias, lalaking anak ni Zacarias, lalaking anak ni Amarias, lalaking anak ni Sefatias, lalaking anak ni Mahalaleel, gikan sa mga anak ni Perez;

5 Kag si Maasias nga lalaking anak ni Baruc, lalaking anak ni Col-hose, lalaking anak ni Hasaya, lalaking anak ni Adaya, lalaking anak ni Joiarib, lalaking anak ni Zacarias, lalaking anak ni Siloni.

6 Ang tanan nga lalaking anak ni Perez nga nagpuyo sa Jerusalem apat ka gatus kag kan-uman kag walo ka tawo nga isganan.

7 Kag amo ini sila ang mga lalaking anak sang Benjamin; si Sallu nga lalaking anak ni Mesullam, lalaking anak ni Joed, lalaking anak ni Pedaya, lalaking anak ni Kolaya, lalaking anak ni Maasias, lalaking anak ni Itiel, lalaking anak ni Jesaias.

8 Kag madason sa iya si Gabai, si Sallai, siam ka gatus kag duha ka pulo kag walo.

9 Kag si Joel nga lalaking anak ni Sicri amo ang ila manugtatap: kag si Juda nga lalaking anak ni Senua among ikaduha nga tinulinan sa siudad.

10 Gikan sa mga pari: si Jedaya nga lalaking anak ni Joiarib, si Jaquin,

11 Si Seraya nga lalaking anak ni Helcias, lalaking anak ni Mesullam, lalaking anak ni Sadoc, lalaking anak ni Merayot, lalaking anak ni Ahitub, among manugdumala sa balay sang Dios.

12 Kag ang ila mga utud nga naghimo sang buluhaton sang balay, walo ka gatus kag duha ka pulo kag duha: kag si Adaya nga lalaking anak ni Jeroham, lalaking anak ni Pelalias, lalaking anak ni Amzi, lalaking anak ni Zacarias, lalaking anak ni Pasur, lalaking anak ni Malquias,

13 Kag ang iya mga utud, mga puno sang mga kaamayan, duha ka gatus kag kap-atan kag duha: kag si Amasai nga lalaking anak ni Azareel, lalaking anak ni Ahasai, lalaking anak ni Mesillemot, lalaking anak ni Imer,

14 Kag ang ila mga utud, gamhanan nga mga tawo nga isganan, isa ka gatus kag duha ka pulo kag walo: kag ang ila manugtatap amo si Sabdiel, lalaking anak sang isa sang mga dakung tawo.

15 Labut pa gikan sa mga Levinhon: si Semaya nga lalaking anak ni Hasub, lalaking anak ni Azricam, lalaking anak ni Hasabaya, lalaking anak ni Buni;

16 Kag si Sabetai kag si Jozabad, gikan sa mga puno sang mga Levinhon, among nagtatap sang nagowa nga hilikuton sang balay sang Dios.

17 Kag si Matanias nga lalaking anak ni Mica, lalaking anak ni Zabdi, lalaking anak ni Asaf, amo ang puno sa pagsugud sang pagpasalamat sa pangamuyo: kag si Bacbucias, ikaduha sa tunga sang iya mga utud, kag si Abda nga lalaking anak ni Samua, lalaking anak ni Galal, lalaking anak ni Jedutun.

18 Ang tanan nga mga Levinhon sa balaan nga siudad duha ka gatus kag kawaloan kag apat.

19 Labut pa ang mga manugbantay sang gawang, si Acub, si Talmon, kag ang ila mga utud, nga nagbantay sa mga gawang, isa ka gatus kag kapitoan kag duha.

20 ś Kag ang nabilin sang Israel, gikan sa mga pari, kag ang mga Levinhon, yara sa tanan nga siudad sang Juda, ang tagsatagsa sa iya panublion.

21 Apang ang mga Netinim nagpuyo sa Ofel: kag si Ziha kag si Gispa naggahum sa mga Netinim.

22 Ang manugtatap man sang mga Levinhon sa Jerusalem amo si Uzi nga lalaking anak ni Bani, lalaking anak ni Hasabias, lalaking anak ni Matanias, lalaking anak ni Mica. Gikan sa mga lalaking anak ni Asaf, ang mga manug-amba mga manugtatap sang hilikuton sang balay sang Dios.

23 Kay ini sogo sang hari nahanungud sa ila, nga may napat-ud nga sakdag nga sa mga manug-amba, sono sa kinahanglan sa tagsa ka adlaw.

24 Kag si Petahias nga lalaking anak ni Mesezabel, gikan sa mga anak ni Zara nga lalaking anak ni Juda, yara sa kamut sang hari sa tanan nga butang nahanungud sa katawohan.

25 Kag nahanungud sa mga minoro, pati ang ila mga latagon, ang iban sang mga anak sang Juda nagpuyo sa Kiryat-arba kag sa iya mga minoro, kag sa Dibon, kag sa iya mga minoro, kag sa Jecabseel, kag sa iya mga minoro,

26 Kag sa Jesua, kag sa Molada, kag sa Bet-pelet,

27 Kag sa Hazar-sual, kag sa Beer-seba, kag sa iya mga minoro,

28 Kag sa Ziclag, kag sa Mecona, kag sa iya mga minoro,

29 Kag sa En-rimon, kag sa Zora, kag sa Jarmut,

30 Sa Zanoa, sa Adullam, kag sa ila mga minoro, sa Laquis, kag sa iya mga latagon, sa Azeca, kag sa iya mga minoro. Kag nagpuyo sila kutub sa Beer-seba tubtub sa nalupyakan sang Hinom.

31 Ang mga anak sang Benjamin man gikan sa Geba nagpuyo sa Micmas, kag sa Aya, kag sa Bet-el, kag sa ila mga minoro,

32 Kag sa Anatot, sa Nob, sa Ananias,

33 Sa Hazor, sa Rama, sa Gitaim,

34 Sa Hadid, sa Zeboim, sa Neballat,

35 Sa Lod, kag sa Ono, ang nalupyakan sang mga panday.

36 Kag gikan sa mga Levinhon may mga kinabon sa Juda, kag sa Benjamin.

KAPITULO 12

KARON amo ini sila ang mga pari kag ang mga Levinhon nga nagtaklad upud kay Zorobabel nga lalaking anak ni Sealtiel, kag kay Jesua: sila ni Seraya, Jeremias, Esdras,

2 Amarias, Maluc, Hatus,

3 Secanias, Rehum, Meremot,

4 Iddo, Geneto, Abias,

5 Miamin, Maadias, Bilga,

6 Semaya, kag Joiarib, Jedaya,

7 Sallu, Amoc, Helcias, Jedaya. Ini sila amo ang mga puno sang mga pari kag sang ila mga utud sa mga adlaw ni Jesua.

8 Labut pa ang mga Levinhon: sila ni Jesua, Benui, Kadmiel, Serebias, Juda, kag Matanias, nga nagdumala sang pagpasalamat, sia kag ang iya mga utud.

9 Si Bacbucias man kag si Uni, nga ila mga utud, yadto sa atubangan nila sa mga pagbantay.

10 ś Kag si Jesua nagpanganak kay Joiaquim, si Joiaquim man nagpanganak kay Eliasib, kag si Eliasib nagpanganak kay Joiada,

11 Kag si Joiada nagpanganak kay Jonatan, kag si Jonatan nagpanganak kay Jadua.

12 Kag sa mga adlaw ni Joiaquim may mga pari, nga mga pangolo sang mga kaamayan: gikan kay Seraya, si Meraya; gikan kay Jeremias, si Hananias;

13 Gikan kay Esdras, si Mesullam; gikan kay Amarias, si Jehohanan;

14 Gikan kay Melicu, si Jonatan; gikan kay Sebanias, si Jose;

15 Gikan kay Harim, si Adna; gikan kay Merayot, si Helcai;

16 Gikan kay Iddo, si Zacarias; gikan kay Gineton, si Mesullam;

17 Gikan kay Abias, si Sicri; gikan kay Miniamin, gikan kay Moadias, si Piltai;

18 Gikan kay Bilga, si Samua; gikan kay Semaya, si Jehonatan;

19 Kag gikan kay Joiarib, si Matenai; gikan kay Jedaya, si Uzi;

20 Gikan kay Sallai, si Callai; gikan kay Amoc, si Eber;

21 Gikan kay Helcias, si Hasabias; gikan kay Jedaya, si Nataneel.

22 ś Ang mga Levinhon, sa mga adlaw ni Eliasib, ni Joiada, kag ni Johanan, kag ni Jadua, ginsulat nga mga pangolo sang mga kaamayan: ang mga pari man, tubtub sa paghari ni Dario nga Persiahanon.

23 Ang mga lalaking anak ni Levi, nga mga pangolo sang mga kaamayan, nasulat sa libro sang mga maragtas tubtub sa mga adlaw ni Johanan nga lalaking anak ni Eliasib.

24 Kag ang mga puno sang mga Levinhon: si Hasabias, si Serebias, kag si Jesua nga lalaking anak ni Kadmiel, pati ang ila mga utud sa atubang nila, sa pagdayaw kag pagpasalamat, sono sa sogo ni David nga tawo sang Dios, isa ka bantay nagatal-us sa isa.

25 Sila ni Matanias, kag Bacbucias, Abdias, Mesullam, Talmon, Acub, mga manugbantay nga nagabantay sang mga salamputan sang mga gawang.

26 Amo ini sila sa mga adlaw ni Joiaquim nga lalaking anak ni Jesua, lalaking anak ni Josadac, kag sa mga adlaw ni Nehemias nga gobernador, kag ni Esdras nga pari nga escriba.

27 ś Kag sa pagdedicar sang kuta sa Jerusalem ginpangita nila ang mga Levinhon gikan sa tanan nilang mga duug, sa pagdala sa ila sa Jerusalem, sa paghiwat sang pagdedicar nga may kasadya, nga may mga pagpasalamat, kag may inamba, nga may apiping, mga salterio, kag mga arpa.

28 Kag ang mga lalaking anak sang mga manug-amba nagtipon sila sing tingub gikan sa kapatagan sa palibut sang Jerusalem, kag gikan sa mga minoro sang Netofanti;

29 Gikan sa balay sang Gilgal man, kag gikan sa mga latagon sang Geba kag Asmavet: kay ang mga manug-amba nagpatindug sila sing mga minoro sa palibut sang Jerusalem.

30 Kag ang mga pari kag ang mga Levinhon nagpaninlo sang ila kaugalingon, kag gintinloan nila ang katawohan, kag ang mga gawang, kag ang kuta.

31 Niyan ginpasaka ko ang mga prinsipe sang Juda sa ibabaw sang kuta, kag gintangdo ang duha ka dalagku nga guban sa ila nga nagpasalamat, nga ang isa sa sini nag-agi sa too sa ibabaw sang kuta nayon sa gawang sang ipot:

32 Kag nagsonod sa ila si Hosaya, kag ang katunga sang mga prinsipe sang Juda,

33 Kag sila ni Azarias, Esdras, kag Mesullam,

34 Juda, kag Benjamin, kag Semaya, kag Jeremias,

35 Kag ang pila sang mga lalaking anak sang mga pari nga may mga budyong; nga amo, si Zacarias nga lalaking anak ni Jonatan, lalaking anak ni Semaya, lalaking anak ni Matanias, lalaking anak ni Micaya, lalaking anak ni Zacur, lalaking anak ni Asaf:

36 Kag ang iya mga utud, sila ni Semaya, kag Azarael, Milalai, Gilalai, Maai, Netaneel, kag Juda, Hanani, nga may mga tulunggon ni David nga tawo sang Dios, kag si Esdras nga escriba nahauna sa ila.

37 Kag sa gawang sang tuburan, tadlong sa atubang nila, nagsaka sila sa hagdanan sang siudad ni David, sa taklaran sang kuta, sa ibabaw sang balay ni David, tubtub sa gawang sang tubig nayon sa sidlangan.

38 Kag ang isa pa ka guban nga nagpasalamat nagsugata sa ila, kag ako sa olihi nila, kag ang katunga sang katawohan sa ibabaw sang kuta, kutub sa unhan sang torre sang mga horno tubtub sa masangkad nga kuta;

39 Kag kutub sa ibabaw sang gawang sang Efraim, kag sa ibabaw sang daan nga gawang, kag sa ibabaw sang gawang sang isda, kag sa torre nga Hananeel, kag sa torre nga Mea, tubtub sa gawang sang mga carnero: kag nagdolog sila sa gawang sang bilanggoan.

40 Gani nagdolog ang duha ka guban sang mga nagpasalamat sa balay sang Dios, kag ako, kag ang katunga sang mga manugdumala upud sa akon:

41 Kag ang mga pari; sila ni Eliaquim, Maasias, Miniamin, Micaya, Elioenai, Zacarias, kag Hananias, nga may mga budyong;

42 Kag sila ni Maasias, kag Semaya, kag Eleazar, kag Uzi, kag Jehohanan, kag Malquias, kag Elam, kag Ezer. Kag ang mga manug-amba nag-amba sing matonog, upud kay Jezrahias nga ila manugtatap.

43 Labut pa nagdolot sila sing dalagkung mga halad sadtong adlaw, kag nagkasadya: kay ang Dios nagpasadya sa ila sa dakung kasadya: nagkasadya man ang mga asawa kag ang kabataan: sa bagay nga ang kinasadya sang Jerusalem nabatian sa malayo.

44 ś Kag sa sadtong tion gintangdo ang pila sa ibabaw sang mga hulut tungud sa mga bahandi, tungud sa mga halad, tungud sa nahaunang mga bunga, kag tungud sa mga ikapulo, sa pagtipon sa ila gikan sa mga uma sang mga siudad sang mga bahin sang kasogoan tungud sa mga pari kag sa mga Levinhon: kay nagkalipay ang Juda tungud sa mga pari kag sa mga Levinhon nga nag-alagad.

45 Kag ginbantayan sang mga manug-amba kag sang mga manugbantay sang gawang ang tinulin sang ila Dios, kag ang tinulin sang pagpaninlo, sono sa sogo ni David, kag ni Salomon nga iya anak nga lalaki.

46 Kay sadto anay sa mga adlaw ni David kag ni Asaf may mga puno sang mga manug-amba, kag mga ambahanon sang pagdayaw kag pagpasalamat sa Dios.

47 Kag ang bug-os nga Israel sa mga adlaw ni Zorobabel, kag sa mga adlaw ni Nehemias, naghatag sang mga bahin sang mga manug-amba kag sang mga manugbantay sang gawang, sono sa kinahanglan sang tagsa ka adlaw: kag ginpakabalaan nila sa mga Levinhon ang mga butang nga balaan; kag ang mga Levinhon nagpakabalaan sa ila sa mga anak ni Aaron.

KAPITULO 13

SA sadtong adlaw nagbasa sila sa libro ni Moises sa palamatin-an sang katawohan; kag sa sini nasapwan nga nasulat, nga ang Amonhon kag ang Moabnon dili dapat magsulud sa katilingban sang Dios sing dayon;

2 Bangud nga wala nila pagsugataa ang kaanakan sang Israel sing kalan-on kag tubig, kondi ginhinakayan si Balaam batok sa ila, agud nga pakamalauton niya sila: apang ang aton Dios nagbaylo sang pagpakamalaut sa pagpakamaayo.

3 Karon nahanabu, sang pagkabati nila sang kasogoan, nga ginpain nila sa Israel ang tanan nga nagsalakut nga kadam-an.

4 ś Kag sa una sini, si Eliasib nga pari, nga sia ang tinulinan sang hulut sang balay sang Dios, nagpakigkatapu kay Tobias:

5 Kag sia nag-aman tungud sa iya sang dakung hulut, nga ginbutangan nila sadto sang mga halad nga kalan-on, sang frankincienso, kag sang mga suludlan, kag sang mga ikapulo sang uyas, sang bag-ong alak, kag sang lana, nga nasogo nga ihatag sa mga Levinhon, kag sa mga manug-amba, kag sa mga manugbantay sang gawang; kag sang mga halad sang mga pari.

6 Apang sa bug-os sining tion wala ako sa Jerusalem: kay sa tuig nga ikakatloan kag duha ni Artajerjes nga hari sang Babilonia nagkadto ako sa hari, kag sa tapus ang pila ka adlaw nakaagum ako sing pahanugut sa hari:

7 Kag nag-abut ako sa Jerusalem, kag nakahangup sang malaut nga ginhimo ni Eliasib tungud kay Tobias, sa pag-aman sa iya sing hulut sa mga luwang sang balay sang Dios.

8 Kag ini nagpasakit sa akon sing tama: busa ginpanghaboy ko ang tanan nga kasangkapan sang balay ni Tobias gikan sa hulut.

9 Niyan nagsogo ako, kag gintinloan nila ang mga hulut: kag ginsulud ko didto liwat ang mga suludlan sang balay sang Dios, pati sang halad nga kalan-on kag sang frankincienso.

10 ś Kag nahantupan ko nga ang mga bahin sang mga Levinhon wala mahatag sa ila: kay ang mga Levinhon kag ang mga manug-amba, nga naghimo sang buluhaton, nagpalagyo ang tagsatagsa pakadto sa iya latagon.

11 Niyan nagpakigsuay ako sa mga manugdumala, kag nagsiling, Ngaa bala nga ang balay sang Dios ginpatumbayaan? Kag gintipon ko sila sing tingub, kag ginpahamtang sila sa ila duug.

12 Niyan ang bug-os nga Juda nagdala sa bahandian nga mga duug sang ikapulo sang uyas kag sang bag-ong alak kag sang lana.

13 Kag ginhimo ko nga mga manugtipig sang bahandian nga mga duug, si Selemias nga pari, kag si Sadoc nga escriba, kag si Pedaya gikan sa mga Levinhon: kag madason sa ila si Hanan nga lalaking anak ni Zacur, lalaking anak ni Matanias: kay amo sila ang ginpakamatutum, kag ang ila hilikuton amo ang pagpanagtag sa ila mga utud.

14 Dumduma ako, O Dios ko, nahanungud sini, kag indi pagpanasa ang akon maayo nga mga buhat nga nahimo ko nga sa balay sang akon Dios, kag sa iya mga hilikuton sini.

15 ś Sa sadtong mga adlaw nakita ko sa Juda ang pila ka tawo nga nagalinas sa mga linasan sang ubas sa sabbath, kag nagapasulud sing mga linaylay, kag ginapakulo sa mga asno; subong man ang alak, ang mga ubas, kag ang mga higos, kag ang tanan nga bagay sang mga lulan, nga ginpasulud nila sa Jerusalem sa adlaw nga sabbath: kag nagpamatuud ako batok sa ila sa adlaw nga nagbaligya sila sing kalan-on.

16 May nagpuyo man didto nga mga tawo sang Tiro, nga nagdala sing isda, kag sang tanan nga inugbaligya, kag nagbaligya sa sabbath sa kaanakan sang Juda, kag sa Jerusalem.

17 Niyan nagpakigsuay ako sa mga dungganon sang Juda, kag nagsiling sa ila, Ano bala ining malaut nga butang nga inyo ginahimo, kag ginapasipalahan ang adlaw nga sabbath?

18 Wala bala maghimo ang inyo mga kaamayan sing subong sini, kag wala bala magdala ang aton Dios sini tanan nga malaut sa aton, kag sa sining siudad? apang nagadala kamo sing labi pa nga kasingkal sa Israel paagi sa pagpasipala sang sabbath.

19 Kag nahanabu, nga sang nag-amat na dulum sa mga gawang sang Jerusalem sa wala pa ang sabbath, nagsogo ako nga takpan ang mga gawang, kag nagtulin nga indi sila pagbuksan tubtub nga lumigad ang sabbath: kag ginbutang ko sa mga gawang ang pila sang akon mga alagad, nga walay pasudlon nga lulan sa adlaw nga sabbath.

20 Gani ang mga komersyante kag mga manugbaligya sang tanan nga sari sang mga inugbaligya nagdayon sa gowa sang Jerusalem sa makaisa ukon makaduha.

21 Niyan nagpamatuud ako batok sa ila, kag nagsiling sa ila, Ngaa bala nagadayon kamo sa palibut sang kuta? kon buhaton ninyo ini liwat dakpon ko kamo. Kutub sadtong tion wala na sila mag-abut sa sabbath.

22 Kag nagsogo ako sa mga Levinhon nga magpaninlo sila, kag nga magkari sila kag magbantay sang mga gawang, sa pagpakabalaan sang adlaw nga sabbath. Dumduma ako, O Dios ko, nahanungud sini man, kag kalooyi ako sono sa pagkadaku sang imo kalooy.

23 ś Sa sadto man nga mga adlaw nakita ko ang mga Judio nga nakapangasawa sing mga asawa gikan sa Asdod, gikan sa Amon, kag gikan sa Moab:

24 Kag ang ila mga anak nagpamolong sing alang-alang sa hambal sang Asdod, kag indi makahambal sing Jinudio, kondi sono sa hambal sang tagsa ka katawohan.

25 Kag nagpakigsuay ako sa ila, kag ginpakamalaut sila, kag ginbunal ang iban sa ila, kag gingabut ang ila bohok, kag ginpasumpa sila tungud sa Dios, nga nagasiling, Dili ninyo pag-ihatag ang inyo mga anak nga babaye sa ila mga anak nga lalaki, ukon magkuha sang ila mga anak nga babaye nga sa inyo mga anak nga lalaki, ukon sa inyo kaugalingon.

26 Wala bala makasala tungud sining mga butang si Salomon nga hari sang Israel? apang sa madamung pungsud walay hari nga kaangay sa iya, nga hinigugma sia sang iya Dios, kag ginhimo sia sang Dios nga hari sa bug-os nga Israel: walay sapayan bisan sia ginpapakasala sang mga babaye nga dumuloong.

27 Niyan magapamati bala kami sa inyo, sa paghimo sini tanan nga daku nga malaut, sa paglalis batok sa aton Dios sa pagpangasawa sing mga asawa nga dumuloong?

28 Kag ang isa sang mga lalaking anak ni Joiada, nga lalaking anak ni Eliasib nga mataas nga pari, umagad ni Sanbalat nga Horonhon: busa gintabog ko sia gikan sa akon.

29 Dumduma sila, O Dios ko, bangud nga gindagtaan nila ang pagkapari, kag ang katipan sang pagkapari, kag sang mga Levinhon.

30 Sa sini gintinloan ko sila gikan sa tanan nga dumuloong, kag nagtangdo sing mga tinulin sang mga pari kag sang mga Levinhon, ang tagsatagsa sa iya buluhaton;

31 Kag nga sa dolot nga gatong, sa mga tion nga pinat-ud, kag nga sa nahaunang mga bunga. Dumduma ako, O Dios ko, nga sa kaayohan.

AMAZING GRACE BIBLE INSTITUTE