ANG BALAAN NGA BIBLIA

MIQUEAS

KAPITULO 1

ANG polong sang GINOO nga nag-abut kay Miqueas nga Morasnon sa mga adlaw ni Jotam, ni Acas, kag ni Ezequias, mga hari sang Juda, nga iya nakita nahanungud sa Samaria kag sa Jerusalem.

2 Pamati, tanan kamo nga katawohan; magpamati, O duta, kag tanan nga yara sa sini: kag ang Ginoong DIOS magsaksi batok sa inyo, ang Ginoo kutub sa iya balaan nga templo.

3 Kay, yari karon, ang GINOO nagagowa sa iya duug, kag magapanaug, kag magatapak sa mataas nga mga duug sang duta.

4 Kag ang mga kabukiran matunaw sa idalum niya, kag ang mga nalupyakan magalitik, subong sang talo sa atubangan sang kalayo, kag subong sang mga tubig nga ginaula sa bakilid nga duug.

5 Kay amo ini tanan tungud sang paglalis ni Jacob, kag tungud sa mga sala sang panimalay sang Israel. Ano bala ang paglalis ni Jacob? indi bala ang Samaria? kag ano bala ang mataas nga mga duug sang Juda? indi bala sila amo ang Jerusalem?

6 Busa himoon ko ang Samaria subong sang tinumpok sang latagon, kag subong sang mga duug nga talamnan sing ulubasan: kag iula ko ang mga bato sini sa nalupyakan, kag ipadayag ko ang mga sadsaran sini.

7 Kag ang tanan nga tinigban nga mga imahen sini bukbukon, kag ang tanan nga hinakay sini sonogon sa kalayo, kag ang tanan nga diosdios sini pamingawon ko: kay gintipon niya ini sa hinakay sang alpot, kag magabalik sila sa hinakay sang alpot.

8 Busa magapanalabiton ako kag magahaya, magalakat ako nga hublas kag hubo: magahaya ako subong sang mga dragon, kag magalalaw ako subong sang mga bukaw.

9 Kay ang iya pilas indi mapaayo; kay nagalambut ini tubtub sa Juda; nagalambut sia tubtub sa gawang sang akon katawohan, tubtub sa Jerusalem.

10 ś Dili ninyo ini pag-ibantala sa Gat, dili gid kamo maghibi: sa panimalay sang Afra magligid ka sa yab-ok.

11 Taliwan kamo, ikaw nga pumuluyo sang Safir, nga ang imo kahuluy-an nahublasan: ang pumuluyo sang Zaanan wala maggowa sa lalaw sang Bet-ezel; batonon niya sa imo ang iya pagkahimtang.

12 Kay ang pumuluyo sang Marot naglangkag sang kaayohan: apang ang malaut nagpanaug gikan sa GINOO tubtub sa gawang sang Jerusalem.

13 O ikaw nga pumuluyo sang Laquis, itakud ang kangga sa sapat nga madasig: sia amo ang kamunoan sang sala sa babaye nga anak sang Zion: kay sa imo nakita ang mga paglalis sang Israel.

14 Busa magahatag ka sing mga regalo sa Moreset-gat: ang mga panimalay sang Aczib mangin isa ka butig sa mga hari sang Israel.

15 Walay sapayan dalhon ko ang manunubli sa imo, O pumuluyo sang Maresa: sia magakari sa Adullam, ang himaya sang Israel.

16 Magpabolog ka, kag magpaalot sang imo bohok tungud sa imo nahamut-an nga mga anak; palapara ang imo pagkabolog subong sang aguila; kay ginbihag sila gikan sa imo.

KAPITULO 2

KAILO sa mga nagapahito sing kalautan, kag nagahikot sing malaut sa ila mga higdaan! kon ang kaagahon magsanag, ginabuhat nila ini, bangud nga ini yara sa gahum sang ila kamut.

2 Kag nagakaibog sila sing mga latagon, kag ginaagaw sila paagi sa palugus; kag sing mga balay, kag ginaagaw sila: gani ginapigus nila ang tawo kag ang iya balay, ang tawo kag ang iya panublion.

3 Busa amo ini ang ginasiling sang GINOO; Yari karon, ako nagapahito sing malaut batok sini nga panimalay, nga sa iya indi ninyo mahukas ang inyo mga liog; kag indi ninyo mapalabilabihan: kay ining tion malaut.

4 ś Sa sinang adlaw gamiton sang isa ang isa ka palaanggiran batok sa inyo, kag magapanalabiton sing makahanoklog nga panalabiton, kag magasiling, Nalaglag kita sing bug-os: iya ginbaylohan ang bahin sang akon katawohan: daw ano ang pagkuha niya sa akon sini! sa nagatalikod ginbahinbahin niya ang amon mga latagon.

5 Busa wala ka sing magauntay sang latid paagi sa papalad sa katilingban sang GINOO.

6 Dili kamo magtagna, siling nila sa ila nga nagatagna: indi sila magatagna sa ila, agud nga indi sila makabaton sing kahuya.

7 ś O ikaw nga ginahingalanan nga panimalay ni Jacob, ginapiotan bala ang espiritu sang GINOO? amo ini bala ang iya mga hinimoan? wala bala nagahimo sing maayo ang akon mga polong sa nagalakat sing matadlong?

8 Bisan sa wala pa lamang madugay ang akon katawohan nagtindug subong nga kaaway: ginahuklas ninyo ang kunup pati ang panapton gikan sa mga nagaligad sing masinaligon subong nga mga tawo nga nagapamatok sa inaway.

9 Ang mga babaye sa akon katawohan ginsobol ninyo gikan sa mga balay nila nga matahum; gikan sa ila kabataan ginkuha ninyo ang akon himaya sing dayon.

10 Tindug kamo, kag magtaliwan; kay indi ini ang inyo pagpahuway: bangud nadagtaan ini, magalaglag ini sa inyo, paagi sa tama nga kalaglagan.

11 Kon ang tawo nga nagalakat sa espiritu kag sa pagkadimatuud magbutig, nga nagasiling, Ako magatagna sa imo sang alak kag sang masingkal nga ilimnon; sia gid ang manginmanalagna sini nga katawohan.

12 ś Tiponon ko sa pagkamatuud ang tanan nimo, O Jacob; tiponon ko sa pagkamatuud ang nabilin sang Israel; tingbon ko sila subong sang mga carnero sang Bozra, subong sang panong sa tunga sang ila halalban: magagalahud sila bangud sang kadamuon sang mga tawo.

13 Ang manugboong nagtaklad sa una nila: naggalahit sila, kag nag-agi sa gawang, nga naggowa paagi sini: kag ang ila hari magaagi sa una nila, kag ang GINOO sa una nila.

KAPITULO 3

KAG nagsiling ako, Pamati, ginaampo ko sa inyo, O mga pangolo ni Jacob, kag kamo nga mga prinsipe sang panimalay sang Israel; Indi bala sa inyo ang pagkilala sang paghukom?

2 Kamo nga nagadumut sang maayo, kag nagahigugma sang malaut; nga nagaak-ak sa ila sang panit nila, kag sang ila unud sa ila mga tul-an;

3 Nga nagakaon man sang unud sang akon katawohan, kag nagakakas sa ila sang panit nila; kag sila nagaboong sang ila mga tul-an, kag nagatuktuk sa ila, subong nga sa kolon, kag subong sang unud sa sulud sang kawa.

4 Niyan magatuaw sila sa GINOO, apang indi sia magapamati sa ila: lipdan niya sa ila ang iya nawung sa sinang tion, sono sa ila paghimo sing malaut sa ila mga hinimoan.

5 ś Amo ini ang ginasiling sang GINOO nahanungud sa mga manalagna nga nagapasayup sa akon katawohan, nga nagakagat sa ila mga ngipon, kag nagasinggit, Paghidait; kag sia nga wala nagabutang sa ila mga baba, nagaaman gid sila sing inaway batok sa iya.

6 Busa manginkagab-ihon sa inyo, agud nga wala kamo sing palanan-awon; kag manginkadudulman sa inyo, agud nga indi kamo makapamakot; kag ang adlaw magatunud sa mga manalagna, kag ang adlawon manginmadulum sa ila.

7 Niyan ang mga manugpanan-aw mahuy-an, kag ang mga manugpamakot malibogan: hoo, sila tanan magatabon sang ila mga bibig; kay wala sing sabat gikan sa Dios.

8 ś Apang sa pagkamatuud puno ako sang gahum paagi sa espiritu sang GINOO, kag sang paghukom, kag sang kusug, sa pagpahayag kay Jacob sang iya paglalis, kag sa Israel sang iya sala.

9 Pamati sini, ginaampo ko sa inyo, kamo nga mga pangolo sang panimalay ni Jacob, kag mga prinsipe sang panimalay sang Israel, nga nagakangil-ad sang paghukom, kag nagapatiko sang tanan nga katarungan.

10 Ginapatindug nila nga may dugo ang Zion, kag ang Jerusalem nga may kalautan.

11 Ang mga pangolo sini nagahukom tungud sa balus, kag ang mga pari sini nagatudlo tungud sa hinakay, kag ang mga manalagna sini nagapamakot tungud sa kuarta: apang magasandig sila sa GINOO, kag magasiling, Wala bala ang GINOO sa tunga naton? wala sing malaut nga magaabut sa aton.

12 Busa tungud sa inyo ang Zion aradohon subong sang latagon, kag ang Jerusalem mangin mga tinumpok, kag ang bukid sang balay subong sang mataas nga mga duug sang talon.

KAPITULO 4

APANG sa katapusan nga mga adlaw mahanabu, nga ang bukid sang balay sang GINOO tukuron sa putokputokan sang mga bukid, kag bayawon ini labaw sa kabakoloran; kag ang katawohan magaduguk sa sini.

2 Kag ang madamu nga pungsud magakari, kag magasiling, Kari, kag magtaklad kita sa bukid sang GINOO, kag sa balay sang Dios ni Jacob; kag tudloan niya kita sang iya mga dalanon, kag magalakat kita sa iya mga banas: kay ang kasogoan magagowa gikan sa Zion, kag ang polong sang GINOO gikan sa Jerusalem.

3 ś Kag sia magahukom sa tunga sang madamu nga katawohan, kag magasabdong sang mabakud nga mga pungsud sa malayo; kag salsalon nila nga mga punta sang arado ang ila mga espada, kag mga galab nga inughagbas ang ila mga bangkaw: ang pungsud indi magabayaw sing espada batok sa pungsud, kag indi na sila magtoon sang inaway.

4 Kondi magalingkod sila ang tagsa ka tawo sa idalum sang iya puno sang ubas kag sa idalum sang iya kahoy nga higuera; kag wala sing magapahadluk sa ila: kay ang baba sang GINOO sang mga kasoldadosan nagpamolong sini.

5 Kay ang tanan nga katawohan magalakat ang tagsatagsa sa ngalan sang iya dios, kag kita magalakat sa ngalan sang GINOO nga aton Dios sa gihapon kag sa gihapon.

6 Sa sinang adlaw, nagasiling ang GINOO, sia nga nagapiangpiang tingbon ko, kag tiponon ko sia nga ginsobol, kag sia nga ginpapiotan ko;

7 Kag himoon ko sia nga napiang nga salin, kag sia nga sinobol sa malayo nga mabakud nga pungsud: kag ang GINOO magahari sa ila sa bukid nga Zion kutub karon tubtub gid sa gihapon.

8 ś Kag ikaw, O torre sang panong, ang pamakud sang babaye nga anak sang Zion, sa imo magaabut ini, ang una nga pagdumalahan; ang ginharian magaabut sa babaye nga anak sang Jerusalem.

9 Karon ngaa bala nagasinggit ka sing mabaskug? wala bala sing hari sa imo? nawala bala ang imo manuglaygay? kay gindakup ka sang mga kasakit subong sang babaye nga ginasakitan?

10 Pagsakitan ka, kag magpangabudlay sa pag-anak, O babaye nga anak sang Zion, kaangay sang babaye nga ginasakitan: kay karon magagowa ka sa siudad, kag magapuyo ka sa latagon, kag magakadto ka tubtub gid sa Babilonia; didto pagaluwason ka; didto tubson ka sang GINOO sa kamut sang imo mga kaaway.

11 ś Karon ang madamu nga mga pungsud man nagtingub batok sa imo, nga nagasiling, Pagdagtaan sia, kag magtan-aw ang aton mata sa Zion.

12 Apang sila wala makahibalo sang mga hunahuna sang GINOO, ukon makahangup sila sang iya laygay: kay tiponon niya sila subong sang mga linaylay sa linasan.

13 Tindug kag maglinas, O babaye nga anak sang Zion: kay himoon ko nga salsalon ang imo sungay, kag himoon ko nga saway ang imo mga koko: kag dugmokon mo ang madamu nga katawohan: kag pakasagradohon ko sa GINOO ang ila daug, kag ang ila pagkabutang sa Ginoo sang bug-os nga duta.

KAPITULO 5

KARON magtipon ka sa mga kinabon, O babaye nga anak sang mga kinabon: nagkibon sia batok sa aton: han-usan nila sing bilogon sa pisngi ang hukom sang Israel.

2 Apang ikaw, Bet-lehem Efrata, bisan pa nga ikaw diotay sa tunga sang mga linibo sang Juda, walay sapayan gikan sa imo magagowa sa akon ang isa nga manginmanugdumala sa Israel; nga ang iya mga gingikanan kutub sa dumaan, kutub sa gihapon.

3 Busa itugyan niya sila, tubtub sa tion nga sia nga ginasakitan mag-anak: niyan ang nabilin sang iya mga utud magabalik sa kaanakan sang Israel.

4 ś Kag magatindug sia kag magapahalab sa kusug sang GINOO, sa pagkahalangdon sang ngalan sang GINOO nga iya Dios; kag magapabilin sila: kay karon mangindaku sia tubtub sa mga ukbung sang duta.

5 Kag ining tawo mangin-amo ang paghidait, kon mag-abut ang Asiriahanon sa aton duta: kag kon magtapak sia sa aton mga palacio, niyan magabangon kita batok sa iya sing pito ka manugpahalab, kag walo ka puno nga mga tawo.

6 Kag laglagon nila sa espada ang duta sang Asiria, kag ang duta ni Nimrod sa mga salamputan sini: sa amo luwason niya kita sa Asiriahanon, kon mag-abut sia sa aton duta, kag kon magtapak sia sa aton mga ginsakpan.

7 Kag ang nabilin ni Jacob manginsa tunga sang madamu nga katawohan subong sang ton-og gikan sa GINOO, subong sang mga talithi sa hilamon, nga wala nagaangan-angan sa tawo, ukon nagahulat sa mga anak sang mga tawo.

8 ś Kag ang nabilin ni Jacob manginsa tunga sang mga Gentil sa tunga sang madamu nga katawohan, subong sang leon sa tunga sang mga kasapatan sang talon, subong sang bataon nga leon sa tunga sang mga panong nga mga carnero: nga, kon mag-agi sia, nagapanapak, kag nagapangusnit, kag wala gid sing makaluwas.

9 Ang imo kamut pagabayawon sa ibabaw sang imo mga kasumpung, kag papason ang tanan mo nga mga kaaway.

10 Kag mahanabu sa sinang adlaw, nagasiling ang GINOO, nga papason ko ang imo mga kabayo gikan sa tunga nimo, kag laglagon ko ang imo mga kangga:

11 Kag papason ko ang mga siudad sang imo duta, kag lumpagon ang tanan mo nga pamakud:

12 Kag papason ko sa imo kamut ang mga pagbabaylan; kag wala ka na sing mga manugpakot:

13 Ang imo man mga imahen nga tinigban papason ko, kag ang imo mga imahen nga nagatindug gikan sa tunga nimo; kag indi ka na magsimba sa binuhatan sang imo mga kamut.

14 Kag gabuton ko ang imo mga puong-puong sang kakahoyan gikan sa tunga nimo: subong man laglagon ko ang imo mga siudad.

15 Kag hikoton ko ang pagtimalus sa kaakig kag kaalipungut sa mga pagano, subong sang wala pa nila nabatian.

KAPITULO 6

PAMATII ninyo karon ang ginasiling sang GINOO; Tindug, pakigsuay ka sa atubangan sang mga bukid, kag pabati-a ang kabakoloran sang imo tingug.

2 Pamati kamo, O mga bukid, sang kasaba sang GINOO, kag kamo nga mabakud nga mga sadsaran sang duta: kay may kasaba ang GINOO sa iya katawohan, kag magapakigsuay sia sa Israel.

3 O katawohan ko, ano bala ang nahimo ko sa imo? kag sa diin bala ginpatak-an ko ikaw? magpamatuud batok sa akon.

4 Kay ginpataklad ko ikaw gikan sa duta sang Egipto, kag gintubus ikaw gikan sa balay sang mga alagad; kag ginpadala ko sa una nimo si Moises, si Aaron, kag si Miriam.

5 O katawohan ko, panumduma karon kon ano ang ginpahito ni Balak nga hari sang Moab, kag ang ginsabat sa iya ni Balaam nga anak nga lalaki ni Beor kutub sa Sitim tubtub sa Gilgal; agud nga makakilala kamo sang pagkamatarung sang GINOO.

6 ś Sa ano bala magaatubang ako sa GINOO, kag magayaub ako sa atubangan sang Dios nga mataas? magakari ako bala sa atubangan niya nga may mga halad nga sinonog, nga may mga tinday sang baka nga isa ka tuig?

7 Mahamuut bala ang GINOO sang mga linibo nga mga carnero nga lalaki, ukon sang napulo nga mga linibo nga mga suba nga lana? ihatag ko bala ang akon panganay tungud sa akon paglalis, ang bunga sang akon lawas tungud sa sala sang akon kalag?

8 Napahayag niya sa imo, O tawo, kon ano ang maayo; kag ano bala ang ginakinahanglan sa imo sang GINOO, kondi ang paghimo sing matarung, kag ang paghigugma sang kalooy, kag ang paglakat sing mapainubuson upud sa imo Dios?

9 Ang tingug sang GINOO nagasinggit sa siudad, kag ang tawo sang kaalam makakita sang imo ngalan: pamatii ninyo ang bilogon, kag kon sin-o ang nagpat-ud sini.

10 ś May mga bahandi pa bala sang pagkamalaut sa balay sang malauton, kag kulang nga sulukban nga kangil-aran?

11 Kabigon ko bala sila nga putli nga may mga timbangan nga malaut, kag nga may puyo sang mga itilimbang nga malimbongon?

12 Kay ang manggaranon nga mga tawo sini puno sang palugus, kag ang mga pumuluyo sini nagpamolong sing mga kabutigan, kag ang ila dila malimbongon sa ila baba.

13 Busa ako man magapamasakit sa imo nga nagapilas sa imo, sa pagpamingaw sa imo bangud sang imo mga sala.

14 Magakaon ka, apang indi mabusug; kag ang imo kamusmusan manginsa tunga nimo; kag magapangdala ka, apang indi makaluwas; kag inang imo naluwas itugyan ko sa espada.

15 Magasab-ug ka, apang indi ka makaani; magalinas ka sing mga olivo, apang indi ka makapanghaplas sing lana; kag sang matam-is nga alak, apang indi makainum sang alak.

16 ś Kay ang mga palatukuran ni Omri nabantayan, kag ang tanan nga binuhatan sang panimalay ni Acab, kag nagalakat kamo sa mga laygay nila; agud nga himoon ko ikaw nga mamingaw, kag ang mga pumuluyo sini nga panagutsutan: busa magaantus kamo sang kahuluy-an sang akon katawohan.

KAPITULO 7

KAILO ako! kay subong ako sang napamopo na nila ang mga bunga sa tingadlaw, subong sang nasaghaw na ang patubas sang ubas: walay pinungpung nga kaonon: ang akon kalag naghandum sang nahaunang luto nga bunga.

2 Ang maayo nga tawo nawala sa duta: kag wala gid sing matadlong sa tunga sang mga tawo: tanan sila nagapuut tungud sa dugo; sila nagapangayam ang tagsa ka tawo sang iya utud sa siod nga pinuna.

3 Agud nga sila makahimo sing malaut nga may duha ka kamut sing makugihon, ang prinsipe nagapangayo, kag ang hukom nagapangayo sang hamham; kag ang dakung tawo, sia nagabungat sang makahalalit nga handum: gani ginatalaud nila ini sing tingub.

4 Ang labi gid kaayo sa ila subong sang sapinit: ang labi gid katadlong matalum pa sa tunukon nga habong: ang adlaw sang imo mga manugbantay kag sang imo pagduaw nagaabut; karon amo ang ila palaligban.

5 ś Dili kamo magsalig sa abyan, dili pagsaligi ang manugtuytuy: takpi ang mga ganhaan sang imo baba sa nagasaliay sa imo sabak.

6 Kay ang anak nga lalaki nagapakahuya sang amay, ang anak nga babaye nagabato sa iya iloy, ang umagad nga babaye batok sa iya ugangan nga babaye; ang mga kaaway sang tawo amo ang mga tawo sang iya kaugalingon nga balay.

7 Busa ako magatolok sa GINOO; magahulat ako sa Dios sang akon kaluwasan: ang akon Dios magapamati sa akon.

8 ś Dili kamo magkalipay batok sa akon, O akon kaaway: kon mapukan ako, magatindug ako; kon maglingkod ako sa kadudulman, ang GINOO manginkapawa sa akon.

9 Antuson ko ang kaalipungut sang GINOO, bangud nga nakasala ako batok sa iya, tubtub nga apinan niya ang akon kasaba, kag maghikot sing paghukom tungud sa akon: pagowaon niya ako sa kapawa, kag magatan-aw ako sang iya pagkamatarung.

10 Niyan sia nga akon kaaway makakita sini, kag ang kahuya magatabon sa iya nga nagsiling sa akon, Diin bala ang GINOO nga imo Dios? ang akon mga mata magatolok sa iya: karon tapakon sia subong sang lunang sang mga dalan.

11 Sa adlaw nga patindugon ang imo mga kuta, sa sinang adlaw ang mando magahilayoay.

12 Sa sinang adlaw magaabut man sia sa imo kutub sa Asiria, kag kutub sa mga siudad nga napamakuran, kag kutub sa pamakud tubtub sa suba, kag kutub sa dagat pa dagat, kag kutub sa bukid pa bukid.

13 Apang ang duta magamingaw bangud sang mga nagapuyo sa sini, tungud sang bunga sang ila mga hinimoan.

14 ś Pahalba ang imo katawohan sa imo sungkud, ang panong nga imo panublion, nga nagapuyo sing isahanon sa talon, sa tunga sang Carmelo: maghalab sila sa Basan kag sa Galaad, subong sang sa mga adlaw nga dumaan.

15 Subong sang sa mga adlaw sang imo paggowa sa duta sang Egipto magapakita ako sa iya sing makatilingala nga mga butang.

16 ś Ang mga pungsud makakita kag magakahuya sang bug-os nila nga kagamhanan: itabon nila ang ila kamut sa ila baba, magabungol ang ila mga dulunggan.

17 Magadilap sila sang yab-ok kaangay sang man-ug, magagowa sila gikan sa ila mga boho kaangay sang mga ulud sang duta: magakahadluk sila sa GINOO nga aton Dios, kag magakalisang bangud sa imo.

18 Sin-o bala nga Dios ang kaangay sa imo, nga nagapatawad sang kalautan, kag nagapasaylo sang paglalis sang nabilin sang iya panublion? wala sia nagahuput sing dayon sang iya kaakig, bangud nga nagakahamuut sia sa pagkalooy.

19 Sia magaliso liwat sa aton, sia magakaawa sa aton; sia magalutos sang aton mga kalautan; kag ikaw magatagbong sang tanan nilang mga sala sa mga kadadalman sang dagat.

20 Himoon mo ang kamatooran kay Jacob, kag ang pagkalooy kay Abraham, nga ginsumpa mo sa amon mga kaamayan kutub sa mga adlaw nga dumaan.las sa imo, sa pagpamingaw sa imo bangud sang imo mga sala.

AMAZING GRACE BIBLE INSTITUTE