MALAQUIASKAPITULO 1ANG lulan sang polong sang GINOO sa Israel paagi kay Malaquias. 2 Ginhigugma ko ikaw, nagasiling ang GINOO. Apang nagasiling kamo, Sa ano bala nga ginhigugma mo kami? Indi bala si Esau utud ni Jacob? nagasiling ang GINOO: apang ginhigugma ko si Jacob, 3 Kag gindumtan ko si Esau, kag ginlaglag ang iya kabukiran kag ang iya panublion nga sa mga dragon sang kamingawan. 4 Bisan ang Edom nagasiling, Ginmusmus kami, apang magabalik kami kag magapatindug sang mga duug nga nalaglag; amo ini ang ginasiling sang GINOO sang mga kasoldadosan, Sila magapatindug, apang ako magalumpag; kag sila magahingalan sa ila, Ang ginsakpan sang pagkamalaut, kag, Ang katawohan nga batok sa ila ang GINOO may kaalipungut sa gihapon. 5 Kag ang inyo mga mata makakita, kag magasiling kamo, Ang GINOO pakadakuon kutub sa ginsakpan sang Israel. 6 ¶ Ang anak nga lalaki nagatahud sang iya amay, kag ang alagad sang iya agalon: niyan kon ako amay, diin bala ang pagtahud sa akon? kag kon ako agalon, diin bala ang kahadluk sa akon? nagasiling ang GINOO sang mga kasoldadosan sa inyo, O mga pari, nga nagatamay sang akon ngalan. Kag nagasiling kamo, Sa ano bala nga gintamay namon ang imo ngalan? 7 Nagahalad kamo sa akon halaran sing tinapay nga dinagtaan; kag nagasiling kamo, Sa ano bala nga gindagtaan ka namon? Sa ginasiling ninyo, Ang latok sang GINOO talamayon. 8 Kag kon nagadolot kamo sang bulag nga sa halad, indi bala ina malaut? kag kon nagadolot kamo sang piang kag masakiton, indi bala ina malaut? idolot ina karon sa imo gobernador; mahamuut bala sia sa imo, ukon pagapasulabihon ka bala niya? nagasiling ang GINOO sang mga kasoldadosan. 9 Kag karon, ginaampo ko sa inyo, magpakilooy sa Dios nga magmainayohon sia sa aton: ini sono sa inyo mga pinaagi: pagapasulabihon kamo bala niya? nagasiling ang GINOO sang mga kasoldadosan. 10 Sin-o bala sa tunga ninyo ang buut nga magtakup sang mga ganhaan nga sa wala sing pulus? kag wala kamo nagadabok sing kalayo sa akon halaran nga sa wala sing pulus. Wala ako sing kahamuut sa inyo, nagasiling ang GINOO sang mga kasoldadosan, kag indi ako magbaton sing halad sa inyo kamut. 11 Kay kutub sa pagsubang sang adlaw tubtub gid sa pagtunud sang amo ang akon ngalan mangindaku sa tunga sang mga Gentil; kag sa tagsa ka duug ang incienso idolot sa akon ngalan, kag isa ka dolot nga putli: kay ang akon ngalan mangindaku sa mga pagano, nagasiling ang GINOO sang mga kasoldadosan. 12 ¶ Apang ginpasipalahan ninyo ini, sa nagasiling kamo, Ang latok sang GINOO dinagtaan; kag ang bunga sini, bisan ang iya kalan-on, talamayon. 13 Nagsiling man kamo, Yari karon, daw ano ka makatalaka ini! kag nagpusnga kamo sa sini, nagasiling ang GINOO sang mga kasoldadosan; kag gindala ninyo inang ginkusnit, kag ang piang, kag ang masakiton; amo ini ang pagdala ninyo sang halad: batonon ko bala ini sa inyo kamut? nagasiling ang GINOO. 14 Apang pinapakamalaut ang malimbongon, nga may lalaki sa iya panong, kag nagasaad, kag nagahalad sa Ginoo sing butang nga may kasawayan: kay ako daku nga Hari, nagasiling ang GINOO sang mga kasoldadosan, kag ang akon ngalan makakulugmat sa tunga sang mga pagano. KAPITULO 2KAG karon, O kamo nga mga pari, ining sogo tungud sa inyo.2 Kon indi kamo magpamati, kag kon indi ninyo paghuptan ini sa tagiposoon, sa paghatag sing himaya sa akon ngalan, nagasiling ang GINOO sang mga kasoldadosan, ako gid magapadala sang pagpakamalaut sa inyo, kag pakamalauton ko ang inyo mga pagpakamaayo: hoo, ginpakamalaut ko na sila, bangud nga wala ninyo ginahuptan ini sa tagiposoon. 3 Yari karon, pagdautan ko ang inyo binhi, kag hamlasan sing ipot ang inyo mga nawung, ang ipot sang inyo mga pandut nga solemne; kag pahalinon kamo sang isa upud sini. 4 Kag mahibaloan ninyo nga ako nagpadala sining sogo sa inyo, agud nga ang akon katipan mangin-upud kay Levi, nagasiling ang GINOO sang mga kasoldadosan. 5 Ang akon katipan nanginsa iya sa kabuhi kag sa paghidait; kag ginhatag ko sila sa iya tungud sa kahadluk nga ginkahadluk niya sa akon, kag nagkahadluk sa atubangan sang akon ngalan. 6 Ang kasogoan sang kamatooran yara sa iya baba, kag ang kalautan wala makita sa iya mga bibig: naglakat sia upud sa akon sa paghidait kag sa katarungan, kag ginpaliso ang madamu gikan sa kalautan. 7 Kay ang mga bibig sang pari dapat maghuput sing ihibalo, kag dapat pangitaon nila ang kasogoan sa iya baba: kay sia manugbalita sang GINOO sang mga kasoldadosan. 8 Apang kamo naglipas sa dalanon; ginpasandad ninyo ang madamu sa kasogoan; gindunut ninyo ang katipan ni Levi, nagasiling ang GINOO sang mga kasoldadosan. 9 Busa ginhimo ko kamo man nga talamayon kag kubus sa atubangan sang bug-os nga katawohan, sono sa wala kamo pagbantay sang akon mga dalanon, kondi may pinasulabi sa kasogoan. 10 Wala bala kita nga tanan sing isa ka amay? wala bala kita pagtugaha sang isa ka Dios? ngaa bala nagabudhi kita ang tagsa ka tawo sa iya utud, paagi sa pagpasipala sang katipan sang aton mga kaamayan? 11 ¶ Ang Juda nagbudhi, kag ang kangil-aran nahimo sa Israel kag sa Jerusalem; kay ang Juda nagpasipala sang pagkabalaan sang GINOO nga iya ginhigugma, kag nagpangasawa sang anak nga babaye sang dios nga dumuloong. 12 Papason sang GINOO ang tawo nga nagahimo sini, ang agalon kag ang tinon-an, gikan sa mga tabernakulo ni Jacob, kag ang nagadolot sing halad sa GINOO sang mga kasoldadosan. 13 Kag ini ginhimo ninyo liwat, nga ginatabonan ninyo ang halaran sang GINOO sing mga luha, sing paghaya, kag sing paghibi, sa bagay nga wala na sia nagasapak sang halad, ukon nagabaton sini sa maayong kabubut-on sa inyo kamut. 14 ¶ Apang nagasiling kamo, Ngaa bala? Bangud nga ang GINOO nanginsaksi sa tunga nimo kag sang asawa sang imo pagkapamatan-on, nga batok sa iya nagbudhi ka: apang sia ang imo kaupud, kag ang asawa sa imo katipan. 15 Kag wala bala sia maghimo sing isa? Walay sapayan may nabilin sia sang espiritu. Kag ngaa bala isa? Agud nga makapangita sia sing kaliwat nga diosnon. Busa andami ang inyo espiritu, kag wala sing magbudhi sa asawa sang iya pagkapamatan-on. 16 Kay ang GINOO, ang Dios sang Israel, nagasiling nga nagadumut sia sang pagsikway: kay ang isa nagatabon sing kalugusan sang iya panapton, nagasiling ang GINOO sang mga kasoldadosan: busa andami ang inyo espiritu, nga indi kamo magbudhi. 17 ¶ Ginpalapyo ninyo ang GINOO sang inyo mga polong. Apang nagasiling kamo, Sa ano bala nga ginpalapyo namon sia? Sa nagasiling kamo, Ang tagsatagsa nga nagahimo sang malaut maayo sa itololok sang GINOO, kag nagakalipay sia sa ila; ukon, Diin bala ang Dios sang paghukom? KAPITULO 3YARI KARON, ako magapadala sang akon manugbalita, kag sia magaaman sang dalanon sa una nakon: kag ang Ginoo, nga ginapangita ninyo, magaabut sing hinali sa iya templo, nga amo ang manugbalita sang katipan, nga inyo ginakalipayan: yari karon, magaabut sia, nagasiling ang GINOO sang mga kasoldadosan.2 Apang sin-o bala ang makabatas sang adlaw sang iya pagkari? kag sin-o bala ang makatindug kon magpahayag sia? kay sia kaangay sang kalayo sang manug-ulay, kag kaangay sang habon sang mga manugbunak sang tela: 3 Kag magalingkod sia subong sang manug-ulay kag manugpaputli sang pilak: kag paputlion niya ang mga lalaking anak ni Levi, kag ulayon sila subong sang bulawan kag pilak, agud nga magdolot sila sa GINOO sing halad sa pagkamatarung. 4 Niyan ang halad sang Juda kag sang Jerusalem manginkalahamut-an sa GINOO, subong sang sa mga adlaw nga dumaan, kag subong sang sa dumaan nga mga tuig. 5 Kag magapalapit ako sa inyo sa paghukom; kag manginsaksi ako nga madagmit batok sa mga babaylan, kag batok sa mga makihilahion, kag batok sa mga nagasumpa sing dimatuud, kag batok sa mga nagapigus sang sinoholan sa iya mga sohol, sang balo nga babaye, kag sang ilo sa amay, kag sa nagapatalang sang dumuloong sa iya kinamatarung, kag wala nagakahadluk sa akon, nagasiling ang GINOO sang mga kasoldadosan. 6 Kay ako amo ang GINOO, wala ako nagabaylo; busa kamo nga mga lalaking anak ni Jacob wala mapapas. 7 ¶ Bisan kutub sa mga adlaw sang inyo mga kaamayan naglipas kamo sa akon mga pagsolondan, kag wala magbantay sa ila. Balik kamo sa akon, kag magabalik ako sa inyo, nagasiling ang GINOO sang mga kasoldadosan. Apang nagsiling kamo, Sa ano bala nga kami magabalik? 8 ¶ Magapangawat bala ang tawo sa Dios? Walay sapayan nagpangawat kamo sa akon. Apang nagasiling kamo, Sa ano bala nga nagpangawat kami sa imo? Sa mga ikapulo kag sa mga dolot. 9 Ginpakamalaut kamo sang pagpakamalaut: kay kamo nagpangawat sa akon, ining bug-os nga pungsud. 10 Dalha ninyo ang tanan nga mga ikapulo sa balay nga suluptan, agud nga may kalan-on sa akon balay, kag tilawi ako karon sa sini, nagasiling ang GINOO sang mga kasoldadosan, kon indi ko pagbuksan sa inyo ang mga talambuan sang langit, kag iula sa inyo ang pagpakamaayo, sa bagay nga wala na sing masudlan. 11 Kag sabdongon ko ang manughalunhon tungud sa inyo, kag indi niya paglaglagon ang mga bunga sang inyo duta; kag ang puno sang inyo ubas sa latagon indi mapulakan sang iya bunga sa wala pa ang tion, nagasiling ang GINOO sang mga kasoldadosan. 12 Kag ang tanan nga pungsud magatawag sa inyo nga bulahan: kay kamo manginduta nga kalaluyagan, nagasiling ang GINOO sang mga kasoldadosan. 13 ¶ Ang inyo mga polong nanginmatigdas batok sa akon, nagasiling ang GINOO. Apang nagasiling kamo, Ano bala ang matigdas nga ginpamolong namon batok sa imo? 14 Nagsiling kamo, Walay pulus ang pag-alagad sa Dios: kag ano bala ang kapuslanan nga ginbantayan namon ang iya pagsolondan, kag nga naglakat kami sing masinulub-on sa atubangan sang GINOO sang mga kasoldadosan? 15 Kag karon ginatawag naton nga malipayon ang bugalon; hoo, ang mga nagahikot sing pagkamalaut ginapatindug; hoo, ang mga nagasulay sa Dios naluwas. 16 ¶ Niyan ang mga nagakahadluk sa GINOO nagsinilingay sing masunsun ang isa kag isa: kag ang GINOO nagdungug, kag nagpamati sini, kag ang libro nga handumanan ginsulat sa atubangan niya tungud sa mga nagkahadluk sa GINOO, kag nagpainoino sa iya ngalan. 17 Kag sila mangin-akon, nagasiling ang GINOO sang mga kasoldadosan, sa adlaw nga matipon ko ang akon mga alahas; kag pasaylohon ko sila, subong sang tawo nga nagapasaylo sang iya kaugalingon nga anak nga lalaki nga nagaalagad sa iya. 18 Niyan magabalik kamo, kag magakilala sang ginakalainan sang matarung kag sang malaut, sang nagaalagad sa Dios kag sang wala nagaalagad sa iya. KAPITULO 4KAY, yari karon, ang adlaw nagaabut, nga magasonog subong sang horno; kag ang tanan nga bugalon, hoo, kag ang tanan nga nagahimo sing malauton, manginginalaban: kag ang adlaw nga nagaabut magaupus sa ila, nagasiling ang GINOO sang mga kasoldadosan, agud nga indi ini magabilin sa ila sing gamut ukon sanga.2 ¶ Apang sa inyo nga nagakahadluk sa akon ngalan magasubang ang Adlaw sang pagkamatarung nga may pag-ayo sa iya mga pakpak; kag magagowa kamo, kag magatubo subong sang mga tinday nga baka sang palasudlan. 3 Kag tapakon ninyo ang mga malauton; kay sila mangin mga abo sa idalum sang mga dapadapa sang inyo mga tiil sa adlaw nga himoon ko ini, nagasiling ang GINOO sang mga kasoldadosan. 4 ¶ Dumduma ninyo ang kasogoan ni Moises nga akon alagad, nga ginsogo ko sa iya sa Horeb nga sa bug-os nga Israel, pati sang mga palatukuran kag mga paghukom. 5 ¶ Yari karon, ipadala ko sa inyo si Elias nga manalagna sa wala pa mag-abut ang daku kag makakulugmat nga adlaw sang GINOO: 6 Kag lisoon niya ang tagiposoon sang mga amay sa mga anak, kag ang tagiposoon sang mga anak sa ila mga amay, basi nga mag-abut ako kag sakiton ang duta sing pagpakamalaut. |