ANG BALAAN NGA BIBLIA

LUCAS

KAPITULO 1

SANGLIT kay madamu ang nagpangamut sa pagpahayag sing pasonod sing isa ka deklarasyon nahanungud sadtong mga butang nga ginatoohan sa tunga naton sing totoo,

2 Subong sang gintugyan nila sa aton, nga kutub sa ginsuguran mga saksi nga nakakita, kag mga ministro sang polong;

3 Ginpakamaayo ko man, sa may akon ako sing himpit nga paghangup sang tanan nga mga butang kutub sa nahauna gid, sa pagsulat sa imo sing pasonod, labing halangdon nga Teofilo,

4 Agud nga makahibalo ka sang kapat-uran nahanungud sadtong mga butang, diin ginton-an ka.

5 ś SA mga adlaw ni Herodes, nga hari sang Judea, may isa ka pari nga ginhingalanan si Zacarias, sa kabon ni Abias: kag ang iya asawa gikan sa mga anak nga babaye ni Aaron, kag ang iya ngalan si Elisabet.

6 Kag sila nga duha matarung sa atubangan sang Dios, nga nagalakat sa tanan nga mga sogo kag mga pagsolondan sang Ginoo sa walay kasawayan.

7 Kag wala sila sing anak, kay si Elisabet baw-as, kag sila nga duha tigulang na.

8 Kag nahanabu, nga samtang sia nagapanghikot sang pagkapari sa atubangan sang Dios sa torno sang iya kabon,

9 Sono sa kinabatasan sang pagkapari, naigo sa iya kapalaran ang pagsonog sang incienso kon sia magsulud sa templo sang Ginoo.

10 Kag ang bug-os nga kadam-an sang katawohan nagapangamuyo sa gowa sa takna sang incienso.

11Kag may nagpakita sa iya nga isa ka anghel sang Ginoo nga nagatindug sa too nayon sang halaran sang incienso.

12 Kag sang nakita sia ni Zacarias, natublag sia, kag hinadlukan sia.

13 Apang ang anghel nagsiling sa iya, Dili ka mahadluk, Zacarias: kay ang imo pangamuyo ginpamatian; kag ang imo asawa nga si Elisabet magaanak sing lalaki sa imo, kag tawgon mo ang iya ngalan Juan.

14 Kag magaagum ka sing kalipay kag kasadya; kag madamu ang magakalipay sa iya pagkatawo.

15 Kay mangindaku sia sa itololok sang Ginoo, kag indi sia mag-inum sing alak ukon ilimnon nga masingkal; kag pagapun-an sia sang Balaan nga Espiritu, kutub pa sa taguangkan sang iya iloy.

16 Kag madamu sang kaanakan sang Israel ang palisoon niya sa Ginoo nga ila Dios.

17 Kag magauna sia sa iya sa espiritu kag gahum ni Elias, sa pagpaliso sang mga tagiposoon sang mga amay sa mga anak, kag sang mga dimatinumanon sa kaalam sang mga matarung; sa paghanda sa Ginoo sang katawohan nga naaman.

18 Kag si Zacarias nagsiling sa anghel, Paano bala ang pagkahibalo ko sini? kay ako tigulang nga tawo, kag ang akon asawa tigulang na.

19 Kag ang anghel nga nagasabat nagsiling sa iya, Ako si Gabriel, nga nagatindug sa atubangan sang Dios; kag ginpadala ako sa paghambal sa imo, kag sa pagpahayag sa imo sining mga masadya nga balita.

20 Kag, yari karon, magaapa ka, kag indi makahambal, tubtub sa adlaw nga mahanabu ining mga butang, bangud nga wala ka magtoo sa akon mga polong, nga tumanon sa ila panag-on.

21 Kag ang katawohan naghulat kay Zacarias, kag natingala nga nagpalantang sia sing malawig sa templo.

22 Kag sang paggowa niya, indi sia makahambal sa ila: kag ginhantup nila nga nakakita sia sing palanan-awon sa templo: kay nagsinyas sia sa ila, kag nadayonan nga wala makahambal.

23 Kag nahanabu, nga, sang natapus ang mga adlaw sang iya pagpanghikot, nagpauli sia.

24 Kag sa tapus sadtong mga adlaw si Elisabet nga iya asawa nagpanamkon, kag nagpanago sia sing lima ka bulan, nga nagasiling,

25 Amo ina ang ginhimo sang Ginoo sa akon sa mga adlaw nga nagtamud sia sa akon, sa pagkuha sang akon kahuluy-an sa tunga sang mga tawo.

26 Kag sa ikan-um nga bulan ang anghel nga si Gabriel ginpadala gikan sa Dios sa isa ka siudad sang Galilea, nga ginhingalanan Nazaret,

27 Sa isa ka ulay nga kalaslon sa lalaki nga ang iya ngalan si Jose, sa panimalay ni David; kag ang ngalan sang ulay si Maria.

28 Kag ang anghel nagpalapit sa iya, kag nagsiling, Magkalipay ka, ikaw nga nahamut-an gid, ang Ginoo kaupud nimo: bulahan ka sa tunga sang mga babaye.

29 Kag sang nakita niya sia, natublag sia sa iya hambalanon, kag nagpainoino kon ano ayhan ining pag-abiabi.

30 Kag ang anghel nagsiling sa iya, Dili ka mahadluk, Maria: kay nakaagum ikaw sing bugay sa Dios.

31 Kag, yari karon, magapanamkon ka sa imo taguangkan, kag magaanak sing lalaki, kag tawgon mo ang iya ngalan JESUS.

32 Mangindaku sia, kag tawgon nga Anak sang Labing Mataas: kag ang Ginoong Dios magahatag sa iya sang trono sang iya amay nga si David:

33 Kag magahari sia sa panimalay ni Jacob sa walay katapusan; kag ang iya ginharian walay katubtuban.

34 Niyan si Maria nagsiling sa anghel, Paano bala ang pagkahimo sini, kay wala ako makakilala sing lalaki?

35 Kag ang anghel nagsabat kag nagsiling sa iya, Ang Balaan nga Espiritu magakari sa imo, kag ang gahum sang Labing Mataas magalandong sa imo: busa ina man nga balaan nga butang nga matawo sa imo tawgon nga, ang Anak sang Dios.

36 Kag, yari karon, si Elisabet nga imo pakaisa, sia man nagpanamkon sing anak nga lalaki sa iya katigulangon: kag ini ikan-um nga bulan sa iya, nga gintawag nga baw-as.

37 Kay sa Dios walay bisan ano nga indi mahimo.

38 Kag si Maria nagsiling, Yari karon ang babaye nga sologoon sang Ginoo; himoon ini sa akon sono sa imo polong. Kag ang anghel nagtaliwan sa iya.

39 Kag si Maria nagtindug sa sinang mga adlaw, kag nagkadto sing dalidali sa kabakoloran, sa isa ka siudad sang Juda;

40 Kag nagsulud sia sa balay ni Zacarias, kag nag-abiabi kay Elisabet.

41 Kag nahanabu, nga, sang pagkabati ni Elisabet sang pag-abiabi ni Maria, ang lapsag nagkibo sa iya taguangkan; kag si Elisabet napun-an sang Balaan nga Espiritu:

42 Kag naghambal sia sa matonog nga tingug, kag nagsiling, Bulahan ka sa tunga sang mga babaye, kag bulahan ang bunga sang imo taguangkan.

43 Kag ngaa bala gintugut ini sa akon, nga ang iloy sang akon Ginoo magkari sa akon?

44 Kay, yari karon, sang nag-abut ang tingug sang imo pag-abiabi sa akon mga idulungug, ang lapsag sa akon taguangkan nagkibo sa kalipay.

45 Kag bulahan sia nga nagtoo: kay may katumanan yadtong mga butang nga nasugid sa iya gikan sa Ginoo.

46 Kag si Maria nagsiling, Ginapakadaku sang akon kalag ang Ginoo,

47 Kag ang akon espiritu nalipay sa Dios nga akon Manluluwas.

48 Kay nagtamud sia sang kubus nga kahimtangan sang iya babaye nga sologoon: kay, yari karon, kutub karon ang tanan nga kaliwatan magatawag sa akon nga bulahan.

49 Kay sia nga gamhanan naghimo sa akon sing dalagkung mga butang; kag balaan ang iya ngalan.

50 Kag ang iya kalooy yara sa mga nahadluk sa iya sa kaliwatan pa kaliwatan.

51 Nagpakita sia sing kusug sa iya butkon; ginpaaplaag niya ang mga bugalon sa painoino sang ila mga tagiposoon.

52 Ginpapanaug niya ang mga gamhanan gikan sa ila mga lingkoran, kag ginbayaw sila nga mga kubus.

53 Ginbusug niya sing maayo nga mga butang ang mga gutum; kag ang mga manggaranon ginpahalin niya nga walay dala.

54 Nagbulig sia sa Israel nga iya alagad, sa handumanan sang iya kalooy;

55 Sono sa ginpamolong niya sa aton mga kaamayan, kay Abraham, kag sa iya kaliwat sa walay katapusan.

56 Kag si Maria nagpabilin kaupud niya sing mga tatlo ka bulan, kag nagpauli sa iya kaugalingon nga balay.

57 Karon ang tion ni Elisabet natuman nga mag-anak sia; kag nag-anak sia sing lalaki.

58 Kag ang iya mga kasilingan kag ang iya mga himata nakabati kon paano nagpahayag ang Ginoo sang dakung kalooy sa iya; kag nagkalipay sila kaupud niya.

59 Kag nahanabu, nga sa ikawalong adlaw nag-abut sila sa pagcircuncidar sang bata; kag ila gintawag sia Zacarias, sono sa ngalan sang iya amay.

60 Kag ang iya iloy nagsabat kag nagsiling, Indi amo; kondi pagatawgon sia Juan.

61 Kag nagsiling sila sa iya, Walay bisan sin-o sa imo kahimataan nga ginatawag sa sining ngalan.

62 Kag nagsinyas sila sa iya amay, kon ano ang iya buut nga itawag sa iya.

63 Kag nagpangayo sia sing sululatan nga tapitapi, kag nagsulat, nga nagasiling, Ang iya ngalan si Juan. Kag sila tanan natingala.

64 Kag ang iya baba nagtikab sa gilayon, kag ang iya dila nagtugak, kag nakahambal sia, kag nagdayaw sa Dios.

65 Kag ang kahadluk nag-abut sa tanan nga nagpuyo sa palibut nila: kag ini tanan nga hambalanon nabantala sa bug-os nga kabakoloran sang Judea.

66 Kag sila tanan nga nakabati sini nagtipig sini sa ila mga tagiposoon, nga nagasiling, Mangin daw ano nga sahi sang bata ini! Kag ang kamut sang Ginoo kaupud niya.

67 Kag ang iya amay nga si Zacarias napun-an sang Balaan nga Espiritu, kag nagtagna, nga nagasiling,

68 Bulahan ang Ginoong Dios sang Israel; kay nagduaw sia kag nagtubus sang iya katawohan,

69 Kag nagbangon sing sungay sang kaluwasan nga sa aton sa panimalay sang iya alagad nga si David;

70 Sono sa iya ginpamolong sa baba sang iya balaan nga mga manalagna, nga kutub pa sa pagsugud sang kalibutan:

71 Agud nga maluwas kita sa aton mga kaaway, kag sa kamut sang tanan nga nagadumut sa aton;

72 Sa paghimo sing kalooy nga ginsaad sa aton mga kaamayan, kag sa pagpanumdum sang iya balaan nga katipan;

73 Ang sumpa nga ginsumpa niya kay Abraham nga aton amay,

74 Nga sia magatugut sa aton, nga kon maluwas na kita sa kamut sang aton mga kaaway makaalagad kita sa iya sa walay kahadluk,

75 Sa pagkabalaan kag sa pagkamatarung sa atubangan niya, sa tanan nga inadlaw sang aton kabuhi.

76 Kag ikaw, anak, tawgon nga manalagna sang Labing Mataas: kay magauna ka sa Ginoo sa pag-aman sang iya mga dalanon;

77 Sa paghatag sing ihibalo sang kaluwasan sa iya katawohan sa kapatawaran sang ila mga sala,

78 Paagi sa mahinoklogon nga kalooy sang aton Dios; nga sa diin ang pamanagbanag gikan sa kahitaasan nagduaw sa aton,

79 Sa pag-iwag sa ila nga nagalingkod sa kadudulman kag sa landong sang kamatayon, sa pagtuytuy sang aton mga tiil sa dalanon sang paghidait.

80 Kag nagtubo ang bata, kag nagbakud sa espiritu, kag yara sa mga kamingawan tubtub sa adlaw sang iya pagpahayag sa Israel.

KAPITULO 2

KAG nahanabu sa sadtong mga adlaw, nga naghalin ang mando gikan kay Cesar Augusto, nga ang bug-os nga kalibutan buhisan.

2 (Kag ini nga pangbuhis una nga nahimo sang si Cirenio amo ang gobernador sang Siria.)

3 Kag ang tanan nagkadto agud buhisan, ang tagsatagsa sa iya siudad nga kaugalingon.

4 Kag si Jose man nagtaklad gikan sa Galilea, halin sa siudad sang Nazaret, pa Judea, sa siudad ni David, nga ginatawag Betlehem; (bangud nga sia sa panimalay kag sa kaliwatan ni David:)

5 Agud nga buhisan upud kay Maria nga katiayon niya, nga daku na gid ang ginadala.

6 Kag nahanabu, nga samtang didto sila, natuman ang mga adlaw nga mag-anak sia.

7 Kag nag-anak sia sang iya panganay nga lalaki, kag ginputus niya sia sa mga lampin, kag ginpahigda sia sa pasungan; bangud nga walay hulut sa ila sa balay nga dalayonan.

8 Kag may mga manugpahalab sang mga carnero sa among duta nga nagapabilin sa latagon, nga nagapulaw sa kagab-ihon sa ila panong.

9 Kag, yari karon, ang anghel sang Ginoo nagpahayag sa ila, kag ang himaya sang Ginoo nagsilak sa palibut nila: kag hinadlukan sila sing tama.

10 Kag ang anghel nagsiling sa ila, Dili kamo mahadluk: kay, yari karon, nagadala ako sa inyo sing maayo nga mga balita sang dakung kalipay, nga manginsa bug-os nga katawohan.

11 Kay natawo sa inyo karon nga adlaw sa siudad ni David ang isa ka Manluluwas, nga amo si Cristo nga Ginoo.

12 Kag ini amo ang tanda sa inyo; Makita ninyo ang lapsag nga naputus sa mga lampin, nga nagahigda sa pasungan.

13 Kag sa hinali may nagbuylog sa anghel nga isa ka kadam-an sang panong nga langitnon nga nagadayaw sa Dios, kag nagasiling,

14 Himaya sa Dios sa kahitaasan, kag paghidait sa duta, maayong kabubut-on sa mga tawo.

15 Kag nahanabu, sang naghalin sa ila ang mga anghel pakadto sa langit, ang mga manugpahalab sang mga carnero nagsinilingay, Makadto kita karon sa Betlehem, kag tan-awon ta ining butang nga nahanabu, nga ginpahibalo sang Ginoo sa aton.

16 Kag nagkadto sila sing dalidali, kag nakita nila si Maria, kag si Jose, kag ang lapsag nga nagahigda sa pasungan.

17 Kag sang nakita nila ini, ginpalapnag nila ang hambalanon nga ginsugid sa ila nahanungud sining bata.

18 Kag sila tanan nga nakabati sini natingala sa sinang mga butang nga ginpanugid sa ila sang mga manugpahalab sang mga carnero.

19 Apang gintipigan ni Maria ining tanan nga butang, kag nagbinagbinag sini sa ila sa iya tagiposoon.

20 Kag nagbalik ang mga manugpahalab sang mga carnero, nga nagahimaya kag nagadayaw sa Dios bangud sang tanan nga butang nga nabatian nila kag nakita, subong sang ginpanugid sa ila.

21 Kag sang natapus ang walo ka adlaw, sang gincircuncidar ang bata, ginhingalanan sia JESUS, nga amo ang ginhingalan sang anghel sa wala pa sia mapanamkon sa taguangkan.

22 Kag sang natuman ang mga adlaw sang pagpaninlo ni Maria sono sa kasogoan ni Moises, gindala nila ang bata sa Jerusalem, nga ihalad sia sa Ginoo;

23 (Sono sa nasulat sa kasogoan sang Ginoo, Ang tagsa ka lalaki nga magbukas sang taguangkan tawgon nga balaan sa Ginoo;)

24 Kag sa pagdolot sing isa ka halad sono sa nasiling sa kasogoan sang Ginoo, Isa ka paris nga tukmo, ukon duha ka kuyabog nga salampati.

25 Kag, yari karon, may isa ka tawo sa Jerusalem, nga ang iya ngalan si Simeon; kag ining tawo matarung kag mainampoon, nga nagahulat sang paglipay sang Israel: kag ang Balaan nga Espiritu yara sa iya.

26 Kag ginbugna ini sa iya sang Balaan nga Espiritu, nga indi sia mapatay, sa wala pa niya makita ang Cristo sang Ginoo.

27 Kag gindaldal sia sang Espiritu pakadto sa templo: kag sang napasulud sang mga ginikanan ang bata nga si Jesus, agud nga mahimo nila tungud sa iya ang sono sa kinabatasan sang kasogoan,

28 Niyan ginbaton niya sia sa iya mga butkon, kag ginpakamaayo ang Dios, kag nagsiling,

29 Ginoo, pataliwana karon sa paghidait ang imo alagad, sono sa imo polong:

30 Kay ang akon mga mata nakakita sang imo kaluwasan,

31 Nga gin-aman mo sa atubangan sang nawung sang tanan nga katawohan;

32 Isa ka kapawa sa pag-iwag sa mga Gentil, kag ang himaya sang imo katawohan nga Israel.

33 Kag si Jose kag ang iya iloy natingala sa sinang mga butang nga ginpamolong nahanungud sa iya.

34 Kag ginpakamaayo sila ni Simeon, kag nagsiling kay Maria nga iloy niya, Yari karon, ining bata ginabutang nga sa pagkapukan kag pagbangon liwat sang madamu sa Israel; kag nga sa isa ka tanda nga pagasuayon;

35 (Hoo, isa ka espada magalapus man sa imo kaugalingon nga kalag,) agud nga ang mga hunahuna sang madamung tagiposoon mapadayag.

36 Kag may isa ka manalagna nga babaye, si Ana, anak ni Fanuel, sa tribo ni Aser: sia tigulang na, kag nagpangabuhi nga may bana sing pito ka tuig kutub sang iya pagkaulay;

37 Kag balo sia mga kawaloan kag apat ka tuig, nga wala magbiya sa templo, apang nag-alagad sa Dios nga may mga pagpuasa kag mga pagpangamuyo sa gab-i kag adlaw.

38 Kag sa nagasulud sia sadto gid nga takna nagpasalamat man sia sa Ginoo, kag naghambal nahanungud sa bata sa tanan nga nagahulat sang pagtubus sa Jerusalem.

39 Kag sang natuman nila ang tanan nga butang sono sa kasogoan sang Ginoo, nagpauli sila sa Galilea, sa ila kaugalingon nga siudad nga Nazaret.

40 Kag ang bata nagtubo, kag nagbakud sa espiritu, nga napun-an sang kaalam: kag ang bugay sang Dios yara sa iya.

41 Karon ang iya mga ginikanan nagkadto tuigtuig sa Jerusalem sa pandut sang pagligad.

42 Kag sang napulog duha ka tuig sia, nagkadto sila sa Jerusalem sono sa kinabatasan sang pandut.

43 Kag sang natuman nila ang mga adlaw, sang nagabalik sila, ang bata nga si Jesus nagpabilin sa Jerusalem; kag si Jose kag ang iya iloy wala makahibalo sini.

44 Apang sila, nga nagahunahuna nga yara sia sa kaupdanan, naglakat sing isa ka adlaw nga lalakton; kag ginpangita nila sia sa ila kahimataan kag kilala.

45 Kag sang wala nila sia makita, nagbalik sila sa Jerusalem, nga nagapangita sa iya.

46 Kag nahanabu, sa tapus ang tatlo ka adlaw nakita nila sia sa templo, nga nagalingkod sa tunga sang mga magtotoon, nga nagapamati sa ila, kag nagapamangkot sa ila.

47 Kag ang tanan nga nakabati sa iya naorongan sa iya paghangup kag mga sabat.

48 Kag sang nakita nila sia, natingala sila: kag ang iya iloy nagsiling sa iya, Anak, ngaa bala naghimo ka sa amon sing subong? yari karon, ang imo amay kag ako nagpangita sa imo nga nagakasubu.

49 Kag nagsiling sia sa ila, Ngaa bala nga nagpangita kamo sa akon? wala bala kamo makahibalo nga kinahanglan nga yara ako sa buluhaton sang akon Amay?

50 Kag wala sila makahangup sang hambalanon nga ginhambal niya sa ila.

51 Kag nagdolhog sia upud sa ila, kag nag-abut sa Nazaret, kag nagmatinumanon sa ila: apang ang iya iloy nagtipig sini tanan nga hambalanon sa iya tagiposoon.

52 Kag si Jesus nagdugang sa kaalam kag sa kataason, kag sa pagkalahamut-an sa Dios kag sa mga tawo.

KAPITULO 3

KARON sa ikapulog lima nga tuig sang paghari ni Tiberio Cesar, sang si Poncio Pilato ang gobernador sang Judea, kag si Herodes ang tetrarca sang Galilea, kag si Felipe nga iya utud ang tetrarca sang Iturea kag sang ginsakpan sang Traconite, kag si Lisanias ang tetrarca sang Abilinia,

2 Sang sanday Anas kag Caifas ang mga mataas nga pari, ang polong sang Dios nag-abut kay Juan nga anak ni Zacarias sa kamingawan.

3 Kag nagpanlakatan sia sa bug-os nga ginsakpan sa palibut sang Jordan, nga nagawali sang bautismo sang paghinulsul bangud sa kapatawaran sang mga sala;

4 Sono sa nasulat sa libro sang mga polong ni Isaias nga manalagna, nga nagasiling, Ang tingug sang isa nga nagasinggit sa kamingawan, Amana ninyo ang dalan sang Ginoo, tadlonga ang iya mga banas.

5 Ang tagsa ka nalupyakan tampokan, kag ang tagsa ka bukid kag bakolod panuboon; kag ang tiko tadlongon, kag ang mga dalanon nga kudulkudul tapanon;

6 Kag makita sang tanan nga unud ang kaluwasan sang Dios.

7 Niyan nagsiling sia sa kadam-an nga naggowa sa pagpabautiso sa iya, O kaliwatan sang mga man-ug nga dalitan, sin-o bala ang nagpaandam sa inyo sa pagpalagyo sa kaakig nga magaabut?

8 Busa patubas kamo sing mga bunga nga takus sa paghinulsul, kag dili kamo magsugud sa pagsiling sa inyo kaugalingon, May Abraham kami nga amon amay: kay nagasiling ako sa inyo, Nga ang Dios sarang makabangon sing mga anak kay Abraham sa sining mga bato.

9 Kag karon man ang wasay nabutang na sa gamut sang mga kahoy: busa ang tagsa ka kahoy nga wala nagapatubas sing maayong bunga ginapulud, kag ginadap-ung sa kalayo.

10 Kag nagpamangkot sa iya ang katawohan, nga nagasiling, Ano bala niyan ang amon himoon?

11 Nagsabat sia kag nagsiling sa ila, Sia nga may duha ka bayo, maghatag sa iya nga wala; kag sia nga may kalan-on, maghimo sing amo man.

12 Niyan nag-abut man ang mga manugsukot sang buhis nga pagbautisohan, kag nagsiling sa iya, Agalon, ano bala ang amon himoon?

13 Kag nagsiling sia sa ila, Sukot kamo sing indi kapin sa ginasogo sa inyo.

14 Kag ang mga soldado man namangkot sa iya, nga nagasiling, Kag ano bala ang amon himoon? Kag nagsiling sia sa ila, Dili kamo magpigus sa tawo, ukon magbutangbutang sa bisan kay sin-o; kag magcontento kamo sa inyo mga sohol.

15 Kag sang yara sa pagpaabut ang katawohan, kag ang tanan nga tawo nagpasibosibo sa ila mga tagiposoon nahanungud kay Juan, kon sia amo ayhan bala ang Cristo, ukon indi;

16 Si Juan nagsabat, nga nagasiling sa ila tanan, Sa pagkamatuud ako nagabautiso sa inyo sa tubig; apang may isa nga nagakari nga gamhanan pa sa akon, nga indi ako takus sa paghubad sang higot sang iya sapatos: magabautiso sia sa inyo sa Balaan nga Espiritu kag sa kalayo:

17 Nga ang iya inugpahangin yara sa iya kamut, kag tinloan niya sing maayo gid ang iya linasan, kag tiponon ang trigo sa iya tambobo; apang ang labhang sonogon niya sa kalayo nga indi mapalong.

18 Kag madamu nga iban pa nga mga butang sa iya laygay ang ginwali niya sa katawohan.

19 Apang si Herodes nga tetrarca, sang ginsabdong sia niya bangud kay Herodias, nga asawa sang iya utud nga si Felipe, kag sang tanan nga mga malaut nga nahimo ni Herodes,

20 Nagdugang sini man sa ila tanan, nga ginsulud niya si Juan sa bilanggoan.

21 Karon sang nabautisohan ang tanan nga katawohan, ini nahanabu nga, si Jesus man nabautisohan, kag sa nagapangamuyo sia, nagbukas ang langit,

22 Kag ang Balaan nga Espiritu nagkunsad sa dagway nga lawasnon subong sang pating sa ibabaw niya, kag naggowa ang isa ka tingug sa langit, nga nagsiling, Ikaw hinigugma ko nga Anak; sa imo nahamuut gid ako.

23 Kag si Jesus, sang sia mga katloan ka tuig sa panuigon, nga (sono sa ginhunahunaan) anak nga lalaki ni Jose, ang anak nga lalaki ni Heli,

24 Ang anak nga lalaki ni Matat, ang anak nga lalaki ni Levi, ang anak nga lalaki ni Melqui, ang anak nga lalaki ni Jana, ang anak nga lalaki ni Jose,

25 Ang anak nga lalaki ni Matatias, ang anak nga lalaki ni Amos, ang anak nga lalaki ni Naum, ang anak nga lalaki ni Esli, ang anak nga lalaki ni Nagge,

26 Ang anak nga lalaki ni Maat, ang anak nga lalaki ni Matatias, ang anak nga lalaki ni Semei, ang anak nga lalaki ni Jose, ang anak nga lalaki ni Juda,

27 Ang anak nga lalaki ni Joana, ang anak nga lalaki ni Resa, ang anak nga lalaki ni Zorobabel, ang anak nga lalaki ni Salatiel, ang anak nga lalaki ni Neri,

28 Ang anak nga lalaki ni Melqui, ang anak nga lalaki ni Adi, ang anak nga lalaki ni Cosam, ang anak nga lalaki ni Elmodam, ang anak nga lalaki ni Er,

29 Ang anak nga lalaki ni Jose, ang anak nga lalaki ni Eliezer, ang anak nga lalaki ni Jorim, ang anak nga lalaki ni Matat, ang anak nga lalaki ni Levi,

30 Ang anak nga lalaki ni Simeon, ang anak nga lalaki ni Juda, ang anak nga lalaki ni Jose, ang anak nga lalaki ni Jonan, ang anak nga lalaki ni Eliaquim,

31 Ang anak nga lalaki ni Melea, ang anak nga lalaki ni Menan, ang anak nga lalaki ni Matata, ang anak nga lalaki ni Natan, ang anak nga lalaki ni David,

32 Ang anak nga lalaki ni Jesse, ang anak nga lalaki ni Obed, ang anak nga lalaki ni Booz, ang anak nga lalaki ni Salmon, ang anak nga lalaki ni Naason,

33 Ang anak nga lalaki ni Aminadab, ang anak nga lalaki ni Aram, ang anak nga lalaki ni Esrom, ang anak nga lalaki ni Fares, ang anak nga lalaki ni Juda,

34 Ang anak nga lalaki ni Jacob, ang anak nga lalaki ni Isaac, ang anak nga lalaki ni Abraham, ang anak nga lalaki ni Tara, ang anak nga lalaki ni Nachor,

35 Ang anak nga lalaki ni Saruc, ang anak nga lalaki ni Ragau, ang anak nga lalaki ni Palec, ang anak nga lalaki ni Heber, ang anak nga lalaki ni Sala,

36 Ang anak nga lalaki ni Cainan, ang anak nga lalaki ni Arfaxad, ang anak nga lalaki ni Sem, ang anak nga lalaki ni Noe, ang anak nga lalaki ni Lamec,

37 Ang anak nga lalaki ni Matusala, ang anak nga lalaki ni Enoc, ang anak nga lalaki ni Jared, ang anak nga lalaki ni Maleleel, ang anak nga lalaki ni Cainan,

38 Ang anak nga lalaki ni Enos, ang anak nga lalaki ni Set, ang anak nga lalaki ni Adam, ang anak nga lalaki sang Dios.

KAPITULO 4

KAG si Jesus, nga puno sang Balaan nga Espiritu, nagbalik gikan sa Jordan, kag gindala sang Espiritu sa kamingawan,

2 Sa sulud sang kap-atan ka adlaw, nga ginasulay sang yawa. Kag sa sadtong mga adlaw wala sia magkaon sing bisan ano: kag sang natapus sila, gingutum sia.

3 Kag ang yawa nagsiling sa iya, Kon ikaw ang Anak sang Dios, sogo-a ining bato nga mangintinapay.

4 Kag si Jesus nagsabat sa iya, nga nagasiling, Nasulat na, Nga ang tawo indi mabuhi sa tinapay lamang, kondi sa tagsa ka polong sang Dios.

5 Kag ang yawa, nga nagadala sa iya sa ibabaw sang isa ka mataas nga bukid, nagpakita sa iya sang tanan nga mga ginharian sang kalibutan sa isa ka pamisok.

6 Kag ang yawa nagsiling sa iya, Sa imo ihatag ko ining tanan nga gahum, kag ang himaya nila: kay natugyan ina sa akon; kag sa bisan kay sin-o nga buut ko ihatag ko ini.

7 Busa kon ikaw magsimba sa akon, mangin-imo ang tanan.

8 Kag si Jesus nagsabat kag nagsiling sa iya, Kadto ka sa likod ko, Satanas: kay nasulat na, Magsimba ka sa Ginoo nga imo Dios, kag sa iya lamang mag-alagad ka.

9 Kag gindala niya sia sa Jerusalem, kag ginpahamtang sia sa alibungan sang templo, kag nagsiling sa iya, Kon ikaw ang Anak sang Dios, lukso ka paidalum:

10 Kay nasulat na, Magasogo sia sang iya mga anghel nahanungud sa imo, sa pagbantay sa imo:

11 Kag sa ila mga kamut bayawon ka nila, basi nga makaigo ang imo tiil sa bato.

12 Kag si Jesus nga nagasabat nagsiling sa iya, Nasiling na, Dili mo pagsulayon ang Ginoo nga imo Dios.

13 Kag sang natapus sang yawa ang tanan nga pagsulay, naghalin sia sa iya sa sinang panag-on.

14 ś Kag si Jesus nagbalik sa Galilea sa gahum sang Espiritu: kag ang kabantugan nahanungud sa iya naglapnag sa tanan nga ginsakpan sa palibut.

15 Kag nagpanudlo sia sa mga sinagoga nila, nga ginahimaya sang tanan.

16 ś Kag nag-abut sia sa Nazaret, diin gin-alila sia: kag, nagsulud sia, sono sa iya kinabatasan, sa sinagoga sa adlaw nga sabbath, kag nagtindug sia sa pagbasa.

17 Kag ginhatag sa iya ang libro sang manalagna nga si Isaias. Kag sang ginbukad niya ang libro, nakita niya ang bahin diin nasulat,

18 Ang Espiritu sang Ginoo yari sa akon, bangud nga ginhaplas niya ako sa pagwali sang ebanghelyo sa mga kubus; ginpadala niya ako sa pag-ayo sang mga may boong nga tagiposoon, sa pagwali sang kahilwayan sa mga bihag, kag pagpasag-uli sang itololok sa mga bulag, sa paghilway sang mga ginpigus,

19 Sa pagwali sang tuig nga nahamut-an sang Ginoo.

20 Kag gintakup niya ang libro, kag ginhatag niya ini liwat sa ministro, kag naglingkod. Kag ang mga mata sang tanan sa sinagoga nag-ungut sa iya.

21 Kag nagsugud sia sa pagsiling sa ila, Sining adlaw natuman ining kasulatan sa inyo mga idulungug.

22 Kag ang tanan nagpamatuud sa iya, kag natingala sa mga malolo nga polong nga naggowa sa iya baba. Kag nagsiling sila, Indi bala anak ini ni Jose?

23 Kag nagsiling sia sa ila, Magasiling kamo sing totoo sa akon sining hulubaton, Manugbulong, ayoha ang imo kaugalingon: ang bisan ano nga amon nabatian nga nahimo sa Capernaum, buhata man diri sa imo nga duta.

24 Kag nagsiling sia, Sa pagkamatuud nagasiling ako sa inyo, Walay manalagna nga ginabaton sa iya kaugalingon nga duta.

25 Apang matuud gid nagasugid ako sa inyo, may madamung babaying balo sa Israel sa mga adlaw ni Elias, sang gintakpan ang langit sa tatlo ka tuig kag anum ka bulan, sang nag-abut ang dakung tiggulutum sa bug-os nga duta;

26 Apang si Elias wala pag-ipadala sa bisan kay sin-o sa ila, kondi sa Sarepta, isa ka siudad sang Sidon, sa isa ka babaye nga balo.

27 Kag may madamu nga aroon sa Israel sa tion ni Eliseo nga manalagna; kag wala gid sa ila sing gintinloan, kondi si Naaman nga Sirianhon.

28 Kag sila tanan sa sinagoga, sang pagkabati nila sining mga butang, napun-an sing kasingkal,

29 Kag nagtindug, kag ginsobol sia gikan sa siudad, kag gindala sia sa bibi sang bakolod diin natukud ang ila siudad, agud sa pagholog sa iya sing suli.

30 Apang naglakat sia nga nagaagi sa tunga nila,

31 Kag nag-abut sa Capernaum, isa ka siudad sang Galilea, kag nagpanudlo sa ila sa mga adlaw nga sabbath.

32 Kag naorongan sila sa iya doktrina: kay ang iya polong may upud nga gahum.

33 ś Kag sa sinagoga may isa ka tawo, nga may espiritu sang isa ka yawa nga dimatinlo, kag nagsinggit sa matonog nga tingug,

34 Nga nagasiling, Pabay-i kami; ano bala ang labut mo sa amon, ikaw nga si Jesus sang Nazaret? nagkari ka bala sa paglaglag sa amon? nakahibalo ako kon sin-o ikaw; ang Balaan nga Isa sang Dios.

35 Kag si Jesus nagsabdong sa iya, nga nagasiling, Hipus ka, kag gowa sa iya. Kag sang gindusmo sia sang yawa sa tunga, naggowa sia sa iya, kag wala sia ginsakit.

36 Kag sila tanan naorongan, kag naghinambalanay, nga nagasiling, Daw ano nga polong ini! kay sa may pagbulut-an kag gahum ginasogo niya ang mga espiritu nga dimatinlo, kag nagagowa sila.

37 Kag ang kabantugan niya naglapnag sa tagsa ka duug sang ginsakpan sa palibut.

38 ś Kag nagtindug sia gikan sa sinagoga, kag nagsulud sa balay ni Simon. Kag ang iloy sang asawa ni Simon nag-antus sing mabaskug nga hilanat; kag nagpakilooy sila sa iya tungud sa iya.

39 Kag nagtindug sia sa tupad sang babaye, kag nagsabdong sang hilanat; kag nagbiya ini sa iya: kag sa gilayon nagbangon sia kag nag-alagad sa ila.

40 ś Karon sang nagahinunud ang adlaw, tanan sila nga may mga masakiton sa sarisari nga balatian nagdala sa ila sa iya; kag nagtakdung sia sang iya mga kamut sa tagsatagsa sa ila, kag gin-ayo sila.

41 Kag ang mga yawa man naggowa sa madamu, nga nagasinggit, kag nagasiling, Ikaw amo si Cristo, ang Anak sang Dios. Kag sa ginasabdong niya sila wala niya sila pagtuguti sa paghambal: bangud nga nakakilala sila nga sia Cristo.

42 Kag sang adlaw na, nagtaliwan sia kag nagkadto sa duug nga baw-ing: kag ang katawohan nagpangita sa iya, kag nag-abut sa iya, kag ginhawiran nila sia, agud nga indi sia maghalin sa ila.

43 Kag nagsiling sia sa ila, Kinahanglan ako magwali sang ginharian sang Dios sa iban nga mga siudad man: kay sa sining katuyoan ginpadala ako.

44 Kag nagpangwali sia sa mga sinagoga sang Galilea.

KAPITULO 5

KAG nahanabu, nga, sang nagdinagusu ang katawohan sa iya sa pagpamati sang polong sang Dios, nagtindug sia sa pangpang sang linaw sang Genesaret,

2 Kag nakita niya ang duha ka sakayan nga didto sa bibi sang linaw: apang ang mga mangingisda nagpanaug sa ila, kag nagahugas sang ila mga pukot.

3 Kag nagsakay sia sa isa sang mga sakayan, nga iya ni Simon, kag nagpangayo sa iya nga magtulak sia sing diotay. Kag naglingkod sia, kag nagpanudlo sa katawohan gikan sa sakayan.

4 Karon sang nakatapus sia sa pagpamolong, nagsiling sia kay Simon, Palawud, kag iladlad ang inyo mga pukot sa pagpangisda.

5 Kag si Simon nga nagasabat nagsiling sa iya, Agalon, nagpangabudlay kami sa bug-os nga gab-i, kag wala gid sing nadakup: apang sa imo polong iladlad ko ang pukot.

6 Kag sang nahimo nila ini, nakasakup sila sing daku nga luta sang mga isda: kag nagkagisi ang ila pukot.

7 Kag ginpaypay nila ang ila mga kumbuya, nga yara sa isa ka sakayan, nga dapat sila magpalapit kag magbulig sa ila. Kag nagpalapit sila, kag ginpuno nila ang duha ka sakayan, sa bagay nga nagakalunud sila.

8 Sang nakita ini ni Simon Pedro, nagyaub sia sa mga tuhud ni Jesus, nga nagasiling, Palayo sa akon; kay ako tawong makasasala, O Ginoo.

9 Kay naorongan sia, kag ang tanan nga upud niya, tungud sa madamung isda nga ila nakuha:

10 Kag subong man si Santiago, kag si Juan, nga mga anak ni Zebedeo, nga mga kumbuya ni Simon. Kag si Jesus nagsiling kay Simon, Dili mahadluk; kutub karon magapangisda ka sing mga tawo.

11 Kag sang napatakas nila ang ila mga sakayan, binayaan nila ang tanan, kag nagsonod sa iya.

12 ś Kag nahanabu, sang yadto sia sa isa ka siudad, yari karon ang isa ka lalaki nga nalipus sang aro: nga sang pagkakita niya kay Jesus naghapa sia, kag nagpakilooy sa iya, nga nagasiling, Ginoo, kon buut mo, sarang mo ako matinloan.

13 Kag gin-untay niya ang iya kamut, kag gintandug sia, nga nagasiling, Buut ako: magmatinlo ka. Kag sa gilayon ang aro naghalin sa iya.

14 Kag nagtugon sia sa iya nga indi magsugid sa bisan kay sin-o nga tawo: apang kadto, kag ipakita ang imo kaugalingon sa pari, kag magdolot tungud sa imong pagkatinlo, sono sa ginsogo ni Moises, nga pagpamatuud sa ila.

15 Apang ang kabantugan nahanungud sa iya naglapnag sing labi pa gid: kag nagtipon ang dalagku nga mga kadam-an sa pagpamati, kag sa pagpaayo sang ila mga masakit paagi sa iya.

16 ś Kag naglikaw sia pakadto sa kamingawan, kag nagpangamuyo.

17 Kag nahanabu sang isa ka adlaw, sang nagapanudlo sia, nga may mga Fariseo kag mga magtotoon sang kasogoan nga nagalingkod didto, nga nagikan sa tagsa ka banwa sang Galilea, kag Judea, kag Jerusalem: kag ang gahum sang Ginoo yara sa pagpang-ayo sa ila.

18 ś Kag, yari karon, ang mga lalaki nagdala sa higdaan sing isa ka tawo nga paralitiko: kag naghimulat sila sa pagpasulud sa iya, kag sa pagbutang sa iya sa atubangan niya.

19 Kag sang wala sila makakita kon sa ano nga bagay mapasulud nila sia bangud sang kadam-an, nagsaka sila sa atop sang balay, kag gintonton nila sia paagi sa naukab nga tisa lakip ang iya higdaan sa tunga nayon sa atubangan ni Jesus.

20 Kag sang nakita niya ang ila pagtoo, nagsiling sia sa iya, Tawo, pinatawad sa imo ang imo mga sala.

21 Kag ang mga escriba kag ang mga Fariseo nagsugud sa pagpainoino, nga nagasiling, Sin-o bala ining nagahambal sing mga pasipala? Sin-o bala ang makapatawad sang mga sala, kondi Dios lamang?

22 Apang sang si Jesus nakahantup sang ila mga panghunahuna, sia nga nagasabat nagsiling sa ila, Ngaa bala nagapainoino kamo sa inyo mga tagiposoon?

23 Ano bala ang labing mahapus, ang pagsiling, Pinatawad sa imo ang imo mga sala; ukon ang pagsiling, Tindug kag maglakat?

24 Apang agud nga inyo mahibal-an nga ang Anak sang tawo may gahum sa duta sa pagpatawad sang mga sala, (nagsiling sia sa paralitiko,) nagasiling ako sa imo, Tindug, kag dalha ang imo higdaan, kag magpauli sa imo balay.

25 Kag sa gilayon nagtindug sia sa atubangan nila, kag nagkuha sang iya ginhigdaan, kag nagpauli sa iya kaugalingon nga balay, nga nagahimaya sa Dios.

26 Kag sila tanan naorongan, kag naghimaya sila sa Dios, kag napun-an sing kahadluk, nga nagasiling, Nakakita kita sing katingalahan nga mga butang karon nga adlaw.

27 ś Kag sa tapus sining mga butang naggowa sia, kag nakita niya ang manugsukot sang buhis, nga ginhingalanan si Levi, nga nagalingkod sa buluhisan: kag nagsiling sia sa iya, Sonod sa akon.

28 Kag nagbiya sia sang tanan, nagtindug, kag nagsonod sa iya.

29 Kag si Levi naghimo sa iya sing daku nga sinalosalo sa iya kaugalingon nga balay: kag didto may dakung pagtililipon sang mga manugsukot sang buhis kag sang iban nga naglingkod kaupud nila.

30 Apang ang ila mga escriba kag mga Fariseo nagkumud batok sa iya mga disipulo, nga nagasiling, Ngaa bala nagakaon kag nagainum kamo upud sang mga manugsukot sang buhis kag mga makasasala?

31 Kag si Jesus nga nagasabat nagsiling sa ila, Ang mga maayo walay kinahanglan sang manugbulong; kondi sila nga nagamasakit.

32 Wala ako magkari sa pagtawag sang mga matarung, kondi sang mga makasasala sa paghinulsul.

33 ś Kag nagsiling sila sa iya, Ngaa bala ang mga disipulo ni Juan nagapuasa sing masunsun, kag nagapangamuyo, kag subong man ang mga disipulo sang mga Fariseo; apang ang imo nagakaon kag nagainum?

34 Kag sia nagsiling sa ila, Mapapuasa bala ninyo ang kaanakan sang katilingban sang kasal, samtang ang nobyo kaupud nila?

35 Apang magaabut ang mga adlaw, kon kuhaon sa ila ang nobyo, kag niyan magapuasa sila sa sinang mga adlaw.

36 ś Kag nagpamolong man sia sa ila sing isa ka palaanggiran; Walay tawo nga nagabutang sing tukap nga bag-o nga panapton sa daan; kay kon buhaton ini, niyan magisi ang bag-o, kag ang ginikas sa bag-o indi mag-angay sa daan.

37 Kag walay tawo nga nagasulud sing alak nga bag-o sa mga suludlan nga daan; kay kon buhaton ini, ang alak nga bag-o magabusdik sang mga suludlan, kag mauyang, kag ang mga suludlan malaglag.

38 Apang ang bag-ong alak kinahanglan isulud sa bag-ong mga suludlan; kag sila nga duha matipigan.

39 Walay tawo man nga nakainum sing laon nga alak nga sa gilayon nagahandum sang bag-o: kay nagasiling sia, Ang laon labi pa kaayo.

KAPITULO 6

KAG nahanabu sa ikaduha nga sabbath sa tapus sang nahauna, nga naglakat sia sa mga kamaisan; kag ang iya mga disipulo nagluak sing mga pusu sang mais, kag nagkaon, nga nagakisikisi sini sa ila mga kamut.

2 Kag ang pila sang mga Fariseo nagsiling sa ila, Ngaa bala nagahimo kamo sinang indi tugut nga pagbuhaton sa mga adlaw nga sabbath?

3 Kag si Jesus nga nagasabat sa ila nagsiling, Wala gid bala ninyo mabasahi ini, kon ano ang ginhimo ni David, sang sia gingutum, kag sila nga kaupud niya;

4 Paano nga nagsulud sia sa balay sang Dios, kag nagkuha kag nagkaon sang tinapay nga pahayag, kag ginhatagan man sila nga kaupud niya; nga indi tugut nga kaonon luwas sa mga pari lamang?

5 Kag nagsiling sia sa ila, Nga ang Anak sang tawo Ginoo man sang sabbath.

6 Kag nahanabu man sa isa na man ka sabbath, nga nagsulud sia sa sinagoga kag nagpanudlo: kag may isa ka lalaki didto nga ang iya too nga kamut itus.

7 Kag ang mga escriba kag mga Fariseo nagpanilag sa iya, kon magapang-ayo sia sa adlaw nga sabbath; agud nga makakita sila sing ikasumbung batok sa iya.

8 Apang nakahibalo sia sang ila mga hunahuna, kag nagsiling sa tawo nga may itus nga kamut, Tindug, kag patunga ka. Kag nagtindug sia kag nagpatunga.

9 Niyan si Jesus nagsiling sa ila, Magapamangkot ako sa inyo sing isa ka butang; Tugut bala sa mga adlaw nga sabbath ang paghimo sing maayo, ukon ang paghimo sing malaut? ang pagluwas sing kabuhi, ukon ang paglaglag sini?

10 Kag sa nagatolok sia sa palibut sa ila nga tanan, sia nagsiling sa tawo, Untaya ang imo kamut. Kag sia naghimo sing subong: kag ang iya kamut nahaulian subong sa isa.

11 Kag napuno sila sing kasingkal; kag nagsinapul sila kon ano ang mahimo nila kay Jesus.

12 Kag nahanabu sa sadtong mga adlaw, nga nagkadto sia sa isa ka bukid sa pagpangamuyo, kag nagpadayon sia sa bug-os nga gab-i sa pagpangamuyo sa Dios.

13 ś Kag sang adlaw na, gintawag niya sa iya ang iya mga disipulo: kag nagpili sia sa ila sing napulog duha, nga ginhingalanan man niya nga mga apostol;

14 Si Simon, (nga ginhingalanan man niya si Pedro,) kag si Andres nga utud niya, si Santiago kag si Juan, si Felipe kag si Bartolome,

15 Si Mateo kag si Tomas, si Santiago nga anak ni Alfeo, kag si Simon nga gintawag Zelotes,

16 Kag si Judas nga utud ni Santiago, kag si Judas Iscariote, nga amo man ang maluib.

17 ś Kag nagdolhog sia kaupud nila, kag nagtindug sa duug nga matapan, kag ang punsok sang iya mga disipulo, kag isa ka daku nga kadam-an sang katawohan gikan sa bug-os nga Judea kag Jerusalem, kag sa baybayon sang Tiro kag Sidon, nga nag-abut sa pagpamati sa iya, kag sa pagpaayo sang ila mga balatian;

18 Kag sila nga ginasakit sang mga espiritu nga dimatinlo: kag sila nag-alayo.

19 Kag ang bug-os nga kadam-an nagtinguha sa pagtandug sa iya: kay ang birtud naggowa sa iya, kag nag-ayo sa ila tanan.

20 ś Kag ginbayaw niya ang iya mga mata sa iya mga disipulo, kag nagsiling, Bulahan kamo nga mga kubus: kay inyo ang ginharian sang Dios.

21 Bulahan kamo nga mga ginagutum karon: kay busgon kamo. Bulahan kamo nga mga nagahibi karon: kay magakadlaw kamo.

22 Bulahan kamo, kon dumtan kamo sang mga tawo, kag kon sila magbulag sa inyo gikan sa ila kaupdanan, kag pasipalahan kamo, kag isikway ang inyo ngalan subong nga malaut, bangud sa Anak sang tawo.

23 Hinugyaw kamo sa sinang adlaw, kag tumbo sa kalipay: kay, yari karon, ang inyo balus daku sa langit: kay sa amo nga bagay naghimo ang ila mga kaamayan sa mga manalagna.

24 Apang kailo sa inyo nga mga manggaranon! kay nabaton na ninyo ang inyo kalipayan.

25 Kailo sa inyo nga mga busug! kay gutumon kamo. Kailo sa inyo nga nagakadlaw karon! kay magakasakit kamo kag magahibi.

26 Kailo sa inyo, kon ang tanan nga tawo magahambal sing maayo nahanungud sa inyo! kay sa amo nga bagay naghimo ang ila mga kaamayan sa dimatuud nga mga manalagna.

27 ś Apang nagasiling ako sa inyo nga nagapamati, Higugmaa ang inyo mga kaaway, buhata ang maayo sa ila nga nagadumut sa inyo,

28 Pakamaayoha ang mga nagapakamalaut sa inyo, kag pangamuyoi ang mga nagatratar sa inyo sing malain.

29 Kag sa iya nga nagatampa sa imo sa isa ka pisngi itaya man ang isa; kag sa iya nga nagakuha sang imo kunup dili pagdumilii nga kuhaon ang imo bayo man.

30 Hatagi ang tagsa ka tawo nga nagapangayo sa imo; kag sa iya nga nagakuha sang imo mga pagkabutang, dili pagbawi-a sila.

31 Kag ang buut ninyo nga himoon sa inyo sang mga tawo, himoa man ninyo sa ila ang subong.

32 Kay kon kamo maghigugma sa ila nga nagahigugma sa inyo, ano bala ang pasalamatan sa inyo? kay bisan pa ang mga makasasala nagahigugma sadtong mga nagahigugma sa ila.

33 Kag kon maghimo kamo sing maayo sa ila nga nagahimo sing maayo sa inyo, ano bala ang pasalamatan sa inyo? kay bisan pa ang mga makasasala nagahimo sing subong.

34 Kag kon kamo magpahulam sa ila nga may ginapaabut kamo nga batonon, ano bala ang pasalamatan sa inyo? kay bisan pa ang mga makasasala nagapahulam sa mga makasasala, sa pagbaton liwat sing amo man nga kadamuon.

35 Apang higugmaa ninyo ang inyo mga kaaway, kag maghimo sing maayo, kag magpahulam, nga wala nagapaabut nga ulian; kag ang inyo balus mangindaku, kag mangin-anak kamo sang Labing Mataas: kay sia mainayohon sa mga dimapasalamaton kag sa mga malaut.

36 Busa magmaloloy-on kamo, subong nga ang inyo Amay man maloloy-on.

37 Dili kamo maghukom, kag indi kamo paghukman: dili kamo magtagudili, kag indi kamo pagtagudilian: magpatawad, kag kamo patawaron:

38 Hatag, kag ini igahatag sa inyo; sukub nga maayo, dinasok, kag naligoligo, kag nagaawas, ihatag sang mga tawo sa imo sabak. Kay sa talaksan nga ginataksan ninyo takson kamo liwat.

39 Kag nagpamolong sia sa ila sing isa ka palaanggiran, Makatuytuy bala ang bulag sa bulag? indi bala maholog sila nga duha sa boho?

40 Ang disipulo indi labi sa iya agalon: apang ang tagsatagsa nga himpit manginsubong sang iya agalon.

41 Kag ngaa bala ginamulalong mo ang puling nga yara sa mata sang imo utud, apang wala nagasapak sang balayanon nga yara sa imo kaugalingon nga mata?

42 Ukon paano bala ang pagsiling mo sa imo utud, Utud, ipakuha sa akon ang puling nga yara sa imo mata, nga ikaw gid wala nagamulalong sang balayanon nga yara sa imo kaugalingon nga mata? Ikaw nga salimpapaw, kuhaa anay ang balayanon sa imo kaugalingon nga mata, kag ugaling makakita ka sing maayo sa pagkuha sang puling sa mata sang imo utud.

43 Kay ang maayo nga kahoy wala nagapamunga sing malaut nga bunga; kag ang malaut nga kahoy wala nagapamunga sing maayo nga bunga.

44 Kay ang tagsa ka kahoy makilala sa iya kaugalingon nga bunga. Kay gikan sa mga talongon wala nagatipon ang mga tawo sing mga higos, ukon sa sapinit sila nagapopo sing mga ubas.

45 Ang maayong tawo sa maayong bahandi sang iya tagiposoon nagapagowa sinang maayo; kag ang malaut nga tawo sa malaut nga bahandi sang iya tagiposoon nagapagowa sinang malaut: kay sa kabuganaan sang tagiposoon nagapamolong ang iya baba.

46 ś Kag ngaa bala ginatawag ako ninyo, Ginoo, Ginoo, kag wala kamo nagahimo sang mga butang nga akon ginasiling?

47 Ang bisan sin-o nga nagakari sa akon, kag nagapamati sang akon mga hambalanon, kag nagahimo sa ila, ipakita ko sa inyo kon kay sin-o kaangay sia:

48 Kaangay sia sa tawo nga nagtukud sing isa ka balay, kag nagkutkut sang madalum, kag nagbutang sang sadsaran sa ibabaw sang isa ka dakung bato: kag sang nagbaha, ang sulog nagsampi batok sadtong balay, kag wala makauyog sini: kay napasad ini sa ibabaw sang isa ka dakung bato.

49 Apang sia nga nagapamati, kag wala nagahimo, kaangay sa tawo nga nagtukud sa duta sing balay nga walay sadsaran; ang sulog nagsampi batok sa sini, kag sa gilayon napukan ini; kag daku ang kalaglagan sadtong balay.

KAPITULO 7

KARON sang natapus niya ang tanan niya nga hambalanon sa palamatin-an sang katawohan, nagsulud sia sa Capernaum.

2 Kag ang isa ka alagad sang centurion, nga iya ginpakamahal, nagamasakit, kag tagumatayon.

3 Kag sang nakabati sia nahanungud kay Jesus, ginpakadto niya sa iya ang mga tigulang sang mga Judio, nga nagapakilooy sa iya nga magkari sia kag ayohon ang iya alagad.

4 Kag sang pag-abut nila kay Jesus, nagpakilooy sila sa iya sing hanoot, nga nagasiling, Takus sia nga iya dapat paghimoan sini:

5 Kay nagahigugma sia sa aton pungsud, kag sia nagtukud sa amon sang sinagoga.

6 Niyan si Jesus nag-upud sa ila. Kag sang indi na sia malayo sa balay, ang centurion nagpakadto sing mga abyan sa iya, nga nagasiling sa iya, Ginoo, indi ka magpagamo: kay ako indi takus nga magpasilong ka sa akon atop:

7 Gani naghunahuna ako nga indi ako takus sa pagpalapit sa imo: apang isiling sa isa ka polong, kag ang akon alagad magaayo.

8 Kay ako man tawo nga yara sa idalum sang pagbulut-an, nga may akon nga mga soldado sa idalum nakon, kag nagasiling ako sa isa, Lakat, kag nagalakat sia; kag sa isa, Kari, kag nagakari sia; kag sa akon alagad, Buhata ini, kag ginabuhat niya ini.

9 Sang nakabati si Jesus sining mga butang, natingala sia sa iya, kag nagliso, kag nagsiling sa katawohan nga nagsonod sa iya, Nagasiling ako sa inyo, wala ko makita ang daku nga pagtoo nga subong sini, wala, bisan sa Israel.

10 Kag sang nakabalik sa balay ang mga ginpakadto, nakita nila nga ang alagad nag-ayo.

11 ś Kag nahanabu sang dason nga adlaw, nga nagkadto sia sa isa ka siudad nga ginatawag Nain; kag madamu sang iya mga disipulo nag-upud sa iya, kag madamu nga tawo.

12 Karon sang naghinamput sia sa ganhaan sang siudad, yari karon, may patay nga tawo nga ginadala pagowa, ang bugtong nga lalaking anak sang iya iloy, kag sia isa ka balo: kag madamu nga tawo sang siudad ang upud sa iya.

13 Kag sang nakita sia sang Ginoo, nalooy sia sa iya, kag nagsiling sa iya, Dili maghibi.

14 Kag nagpalapit sia kag nagtandug sang liyaliya: kag sila nga nagadala sa iya nagdolog. Kag nagsiling sia, Pamatan-on, nagasiling ako sa imo, Bangon.

15 Kag sia nga napatay naglingkod, kag nagsugud sa paghambal. Kag ginhatag niya sia sa iya iloy.

16 Kag hinadlukan ang tanan: kag ginhimaya nila ang Dios, nga nagasiling, Nga isa ka dakung manalagna ang naglutaw sa tunga naton; kag, Nga ang Dios nagduaw sang iya katawohan.

17 Kag ining sugid nahanungud sa iya naglapnag sa bug-os nga Judea, kag sa bug-os nga duta sa palibut.

18 Kag ang mga disipulo ni Juan nagsugid sa iya sini tanan nga butang.

19 ś Kag gintawag ni Juan ang duha sang iya mga disipulo kag ginpakadto sila kay Jesus, nga nagasiling, Ikaw bala yadtong dapat magakari? ukon magahulat kami sing isa pa?

20 Sang nag-abut ang mga tawo sa iya, nagsiling sila, Ginpakari kami sa imo ni Juan Manugbautiso, nga nagasiling, Ikaw bala yadtong dapat magakari? ukon magahulat kami sing isa pa?

21 Kag sang amo nga takna gin-ayo niya ang madamu sa ila mga masakit kag mga kalalat-an, kag sa mga espiritung malaut; kag sa madamu nga mga bulag naghatag sia sing itololok.

22 Niyan si Jesus nga nagasabat nagsiling sa ila, Lakat, kag sugiri ninyo si Juan sang mga butang nga inyo nakita kag nabatian; kon paano ang mga bulag nakakita, ang mga piang nagalakat, ang mga aroon ginatinloan, ang mga bungul nakabati, ang mga patay ginabanhaw, sa mga kubus ginawali ang ebanghelyo.

23 Kag bulahan sia, ang bisan sin-o nga indi masandad sa akon.

24 ś Kag sang nagtaliwan ang mga manugbalita ni Juan, nagsugud sia sa pagsiling sa katawohan nahanungud kay Juan, Ano bala ang gingowa ninyo sa kamingawan nga tan-awon? Tabon-ak bala nga ginahapayhapay sang hangin?

25 Apang ano bala ang gingowa ninyo nga tan-awon? Tawo bala nga nagapanaput sing malum-ok? Yari karon, sila nga nagapanaput sing matahum, kag nagakabuhi sa kadayawan, yara sa mga luwang sang mga hari.

26 Apang ano bala ang gingowa ninyo nga tan-awon? Manalagna bala? Hoo, nagasiling ako sa inyo, kag labi pa sa manalagna.

27 Ini sia amo ang natungdan sang nasulat, Yari karon, ginapadala ko ang akon manugbalita sa una sang imo nawung, nga magaaman sang imo dalanon sa una nimo.

28 Kay nagasiling ako sa inyo, Sa mga natawo sa mga babaye wala sing daku pa nga manalagna sang sa kay Juan nga Manugbautiso: apang sia nga labing diotay sa ginharian sang Dios daku pa sa iya.

29 Kag ang tanan nga katawohan nga nakabati sa iya, kag ang mga manugsukot sang buhis, nagpakamatarung sang Dios, nga sila ginbautisohan sa bautismo ni Juan.

30 Apang ang mga Fariseo kag ang mga mangin-alamon sa kasogoan nagsikway sang laygay sang Dios batok sa ila kaugalingon, nga wala mabautisohi niya.

31 ś Kag ang Ginoo nagsiling, Sa ano ko bala niyan ipaangay ang mga tawo sining kaliwatan? kag sa ano bala kaangay sila?

32 Kaangay sila sa kabataan nga nagalingkod sa balaligyaan, kag nagatawganay, kag nagasiling, Naglantoy kami sa inyo, kag wala kamo magsaut; nagpanalabiton kami sa inyo, kag wala kamo maghibi.

33 Kay si Juan nga Manugbautiso nagkari nga wala nagakaon sing tinapay ukon nagainum sing alak; kag nagasiling kamo, May yawa sia.

34 Nagkari ang Anak sang tawo nga nagakaon kag nagainum; kag nagasiling kamo, Yari karon ang isa ka tawo nga mahakug, kag palainum sing alak, abyan sang mga manugsukot sang buhis kag mga makasasala!

35 Apang ang kaalam ginapakamatarung sang tanan niyang anak.

36 ś Kag isa sang mga Fariseo nag-agda sa iya nga magkaon sia upud sa iya. Kag nagsulud sia sa balay sang Fariseo, kag naglingkod sa pagkaon.

37 Kag, yari karon, isa ka babaye sa siudad, nga makasasala, sang pagkahibalo niya nga nagalingkod si Jesus sa pagkaon sa balay sang Fariseo, nagdala sia sing suludlan nga alabastro sang ihalaplas,

38 Kag nagtindug sia sa likod sa iya tiilan nga nagahibi, kag nagsugud sa paghinaw sang mga tiil ni Jesus sang mga luha, kag ginpahiran sila sang bohok sang iya olo, kag ginhalukan ang iya mga tiil, kag ginhaplas sila sang ihalaplas.

39 Karon sang nakita ini sang Fariseo nga nag-agda sa iya, nagpamolong sia sa iya kaugalingon, nga nagasiling, Ining tawo, kon manalagna sia, nakahantup kuntani kon sin-o kag kon anong babaye ining nagatandug sa iya: kay makasasala sia.

40 Kag si Jesus nga nagasabat nagsiling sa iya, Simon, may isiling ako sa imo. Kag nagsiling sia, Agalon, magpadayon sa paghambal.

41 May isa ka manugpautang nga may duha nga nakautang sa iya: ang isa nakautang sing lima ka gatus ka denario, kag ang isa kalim-an.

42 Kag sang wala sila sing ibayad, ginpatawad niya sila nga duha sing bug-os. Busa sugiri ako, sin-o sa ila ang magahigugma sa iya sing labi?

43 Si Simon nagsabat kag nagsiling, Sa akon banta, sia nga ginpatawad niya sing labi. Kag nagsiling sia sa iya, Naghukom ka sing matarung.

44 Kag nagliso sia sa babaye, kag nagsiling kay Simon, Nakita mo bala ining babaye? Nagsulud ako sa imo balay, wala ka maghatag sa akon sing tubig tungud sa akon mga tiil: apang naghinaw sia sang akon mga tiil sang iya mga luha, kag ginpahiran sila sang bohok sang iya olo.

45 Wala mo ako paghaluki: apang ining babaye kutub sang tion nga nagsulud ako wala mag-untat sa paghaluk sang akon mga tiil.

46 Wala mo paghisoi sing lana ang akon olo: apang ining babaye naghaplas sang akon mga tiil sing ihalaplas.

47 Gani nagasiling ako sa imo, Ang iya mga sala, nga madamu, ginpatawad; kay nagahigugma sia sing daku: apang ang ginpatawad sing diotay, nagahigugma sing diotay.

48 Kag nagsiling sia sa babaye, Ginpatawad ang imo mga sala.

49 Kag sila nga naglingkod sa pagkaon kaupud niya nagsugud sa pagsiling sa ila kaugalingon, Sin-o bala ini nga nagapatawad sang mga sala man?

50 Kag nagsiling sia sa babaye, Ang imo pagtoo nagluwas sa imo; lakat ka sa paghidait.

KAPITULO 8

KAG nahanabu sa tapus sini, nga naglibut sia sa tagsa ka siudad kag minoro, nga nagawali kag nagapahayag sang mga masadya nga balita sang ginharian sang Dios: kag kaupud niya ang napulog duha,

2 Kag pila ka babaye nga nag-ayo sa mga espiritung malaut kag mga masakit, si Maria nga ginatawag Magdalena, nga sa iya naggowa ang pito ka yawa,

3 Kag si Joana nga asawa ni Chuza nga tulugyanan ni Herodes, kag si Susana, kag iban pa nga madamu, nga nag-alagad sa iya sang mga pagkabutang nila.

4 ś Kag sang nagtipon ang madamu nga tawo sing tingub, kag nag-abut sa iya gikan sa tagsa ka siudad, nagpamolong sia sa palaanggiran:

5 Isa ka manugsab-ug nagkadto sa pagsab-ug sang iya binhi: kag samtang nagasab-ug sia, ang iban nagtupa sa higad sang dalan; kag natapakan ini, kag gintuka ini sang mga pispis sa kahanginan.

6 Kag ang iban nagtupa sa dakung bato; kag sa gilayon sang nagtubo, nalaya ini, bangud nga walay kahon-og.

7 Kag ang iban nagtupa sa tunga sang mga talongon; kag ang mga talongon nagtubo dungan sa sini, kag naglumus sini.

8 Kag ang iban nagtupa sa maayong duta, kag nagtubo, kag nagpamunga sing isa ka gatus ka pilo. Kag sang nasiling niya ining mga butang, nagsinggit sia, Sia nga may mga idulungug sa pagpamati, magpamati sia.

9 Kag nagpamangkot sa iya ang iya mga disipulo, nga nagasiling, Ano bala ang kahologan sining palaanggiran?

10 Kag nagsiling sia, Sa inyo ginahatag ang paghibalo sang mga misterio sang ginharian sang Dios: apang sa iban sa mga palaanggiran; agud nga sa nagatolok indi sila makakita, kag sa nagapamati indi sila makahangup.

11 Karon amo ini ang palaanggiran: Ang binhi amo ang polong sang Dios.

12 Ang mga yadto sa higad sang dalan amo sila ang nakabati; niyan nagaabut ang yawa, kag nagakuha sang polong sa ila mga tagiposoon, agud nga indi sila magtoo kag maluwas.

13 Ang mga yadto sa dakung bato amo sila, nga, sang nakabati sila, ginabaton ang polong nga may kalipay; kag ini sila walay gamut, nga nagatoo sa diotay nga tion, kag sa tion sang pagsulay nagabulag.

14 Kag ang nagtupa sa tunga sang mga talongon amo sila, nga, sang sila nakabati, nagapadayon, kag ginalumsan sang mga paghimud-os kag mga manggad kag mga kalipayan sining kabuhi, kag ang ila bunga walay nagagulang.

15 Apang ang sa maayong duta amo sila, nga sa maminatud-on kag maayo nga tagiposoon, sang nabatian ang polong, nagahuput sini, kag nagapamunga nga may pagpailub.

16 ś Walay tawo, nga sang nakasindi sia sing kandila, nagatabon sini sing suludlan, ukon nagabutang sini sa idalum sang higdaan; kondi nagabutang sini sa kandilero, agud nga sila nga nagasulud makakita sang kapawa.

17 Kay walay bisan anong natago, nga indi pag-ipahayag; ukon bisan ano nga butang nga tinago, nga indi mahibaloan kag magdayag.

18 Busa mag-andam kon paano ang inyo pagpamati: kay ang bisan sin-o nga may iya, sa iya pagaihatag; kag ang bisan sin-o nga walay iya, kuhaon sa iya bisan pa ang ginahunahuna niya nga iya.

19 ś Niyan nag-abut sa iya ang iya iloy kag ang iya mga utud, kag indi sila makapalapit sa iya bangud sang punsok.

20 Kag ginsugid ini sa iya sang iban nga nagsiling, Ang imo iloy kag ang imo mga utud nagatindug sa gowa, nga maluyag makigkita sa imo.

21 Kag nagsabat sia kag nagsiling sa ila, Ang akon iloy kag ang akon mga utud amo sila nga nagapamati sang polong sang Dios, kag nagahimo sini.

22 ś Karon nahanabu sang isa ka adlaw, nga nagsakay sia sa sakayan kaupud ang iya mga disipulo: kag nagsiling sia sa ila, Matabok kita sa linaw. Kag nagtulak sila.

23 Apang sang nagpanakayon sila natologan sia: kag nagtugpo ang unus sang hangin sa linaw; kag gintugub sila sing tubig, kag yara sa katalagman.

24 Kag nagpalapit sila sa iya, kag ginpukaw sia, nga nagasiling, Agalon, agalon, nagakawala kita. Niyan nagbangon sia, kag ginsabdong ang hangin kag ang kasingkal sang tubig: kag nagpuas sila, kag nag-abut ang kalinaw.

25 Kag nagsiling sia sa ila, Diin bala ang inyo pagtoo? Kag sila nga nagakahadluk nagkalatingala, nga nagasilingay, Ano nga sahi sang tawo ini! kay ginasogo niya bisan ang mga hangin kag ang tubig, kag nagatuman sila sa iya.

26 ś Kag nagdungka sila sa duta sang mga taga-Gadara, nga natampad sang Galilea.

27 Kag sang nagtakas sia sa duta, may nagsugata sa iya nga isa ka lalaki gikan sa siudad, nga may mga yawa sa dugay na, kag wala sia pagsuksuk sing mga panapton, kag wala pagpuyo sa bisan ano nga balay, kondi sa mga lulubngan.

28 Sang nakita niya si Jesus, nagsinggit sia, kag naghapa sa atubangan niya, kag sa matonog nga tingug nagsiling, Ano bala ang imo labut sa akon, Jesus, ikaw nga Anak sang Dios nga labing mataas? nagapakilooy ako sa imo, dili ako pagsakita.

29 (Kay ginsogo niya ang espiritu nga dimatinlo sa paggowa sa tawo. Kay sa masami nga tion nadakup sia sini: kag gingapus sia sing mga kadena kag mga grilyos; kag ginbugto niya ang mga gapus, kag gintabog sia sang yawa pa kamingawan.)

30 Kag si Jesus nagpamangkot sa iya, nga nagasiling, Sin-o bala ang ngalan mo? Kag nagsiling sia, Si Legion: kay madamung yawa ang nagsulud sa iya.

31 Kag nagpakilooy sila sa iya nga indi niya pagtabogon sila pa kadadalman.

32 Kag didto may panong sang madamung babuy nga nagakaon sa bukid: kag nagpakilooy sila sa iya nga tugutan niya sila sa pagsulud sa ila. Kag gintugutan niya sila.

33 Niyan ang mga yawa naggowa sa tawo, kag nagsulud sa mga babuy: kag ang panong nagdinagusu sa pil-as pa linaw, kag nalumus.

34 Sang nakita sang mga nagbahog sa ila kon ano ang nahanabu, nagpalagyo sila, kag naglakat kag nagsugid sini sa siudad kag sa kaumhan.

35 Niyan nagkadto sila sa pagtan-aw sang nahanabu; kag nagpalapit kay Jesus, kag nakita ang tawo, nga gingowaan sang mga yawa, nga nagalingkod sa tiilan ni Jesus, nga napanaptan, kag sa iya maayong hunahuna: kag hinadlukan sila.

36 Sila man nga nakakita sini nagsugid sa ila kon paano ang pag-ayo sa iya nga gingamhan sang mga yawa.

37 ś Niyan ang bug-os nga kadam-an sa palibut sang duta sang mga taga-Gadara nagpangayo sa iya nga maghalin sa ila; kay hinadlukan sila sing daku: kag nagsakay sia sa sakayan, kag nagbalik.

38 Karon ang tawo nga gingowaan sang mga yawa nagpakilooy sa iya nga makaupud sia sa iya: apang ginpalakat sia ni Jesus, nga nagasiling,

39 Pauli ka sa imo panimalay, kag ipahayag kon daw ano ka dalagku nga mga butang ang nahimo sang Dios sa imo. Kag naglakat sia, kag nagbantala sa bug-os nga siudad kon daw ano ka dalagku nga mga butang ang nahimo ni Jesus sa iya.

40 Kag nahanabu, nga, sang nakabalik na si Jesus, ang katawohan nagbaton sa iya sing malipayon: kay sila tanan nagahulat sa iya.

41 ś Kag, yari karon, may nag-abut nga isa ka tawo nga ginhingalanan si Jairo, kag sia isa ka manugdumala sang sinagoga: kag naghapa sia sa tiilan ni Jesus, kag naghinyo sa iya nga sia magkadto sa iya balay:

42 Kay sia may isa lamang ka anak nga babaye, nga nagapanuigon sing mga napulog duha ka tuig, kag sia nagahigda nga tagumatayon. Apang sang nagpakadto sia gin-ipit sia sang kadam-an.

43 ś Kag ang isa ka babaye nga may tagas sang dugo sing napulog duha ka tuig, nga naggamit sang tanan niya nga inugpangabuhi sa mga manugbulong, kag indi mapaayo ni bisan sin-o,

44 Nagpalapit sa likod niya, kag nagtandug sang sidsid sang iya panapton: kag sa gilayon natugon ang pagtagas sang iya dugo.

45 Kag si Jesus nagsiling, Sin-o bala ang nagtandug sa akon? Sang nagpanghiwala ang tanan, si Pedro kag ang mga kaupud niya nagsiling, Agalon, ang kadam-an nagalibut sa imo kag nagaipit sa imo, kag ikaw nagasiling, Sin-o bala ang nagtandug sa akon?

46 Kag si Jesus nagsiling, May isa nga nagtandug sa akon: kay nahantup ko nga ang birtud naggowa sa akon.

47 Kag sang nakita sang babaye nga wala sia malipdi, nagpalapit sia nga nagakurug, kag sa nagahapa sa atubangan niya, nagpahayag sia sa iya sa atubangan sang tanan nga katawohan kon sa anong kabangdanan nagtandug sia sa iya, kag kon paano nga nag-ayo sia gilayon.

48 Kag si Jesus nagsiling sa iya, Anak, magkalipay ka: ang imo pagtoo nag-ayo sa imo; lakat sa paghidait.

49 ś Sang nagapamolong pa sia, nag-abut ang isa gikan sa balay sang manugdumala sang sinagoga, nga nagasiling sa iya, Ang imo anak nga babaye patay na; dili pagbudlaya ang Agalon.

50 Apang sang si Jesus nakabati sini, nagsabat sia sa iya, nga nagasiling, Dili mahadluk: magtoo ka lamang, kag magaayo sia.

51 Kag sang nag-abut sia sa balay, walay bisan sin-o nga tawo nga gintugutan niya sa pagsulud, kondi si Pedro, kag si Santiago, kag si Juan, kag ang amay kag ang iloy sang dalagita.

52 Kag ang tanan naghibi, kag naghaya sa dalagita: apang nagsiling sia, Dili kamo maghibi; indi sia patay, kondi nagakatolog.

53 Kag ginkadlawan nila sia nga ginayagota, kay nahibal-an nila nga patay na ang dalagita.

54 Kag iya ginpagowa sila tanan, kag nagkaput sa kamut sang dalagita, kag nagtawag, nga nagasiling, Dalagita, bangon ka.

55 Kag ang iya espiritu nagbalik, kag nagtindug sia gilayon: kag nagsogo si Jesus nga hatagan sing pagkaon ang dalagita.

56 Kag ang iya mga ginikanan naorongan: apang nagtugon sia sa ila nga indi magsugid sa bisan kay sin-o nga tawo kon ano ang nahimo.

KAPITULO 9

NIYAN gintawag niya sing tingub ang napulog duha niya ka mga disipulo, kag ginhatagan sila sing gahum kag pagbulut-an sa tanan nga yawa, kag sa pag-ayo sang mga balatian.

2 Kag ginpadala niya sila sa pagwali sang ginharian sang Dios, kag sa pag-ayo sang mga masakiton.

3 Kag nagsiling sia sa ila, Dili kamo magdala sing bisan ano sa inyo panlakatan, bisan mga sungkud, bisan balalonan, bisan tinapay, bisan kuarta; kag dili maghuput sing duha ka bayo ang tagsatagsa.

4 Kag bisan diin nga balay kamo magsulud, dayon kamo didto, kag maghalin kamo gikan didto.

5 Kag ang bisan sin-o nga indi magbaton sa inyo, sa paghalin ninyo sadtong siudad, taktaka ang yab-ok sa inyo mga tiil nga pagpamatuud batok sa ila.

6 Kag naghalin sila, kag nagkadto sa mga banwa, nga nagawali sang ebanghelyo, kag nagapang-ayo sa bisan diin.

7 ś Karon si Herodes nga tetrarca nakabati sang tanan nga nahimo niya: kag nalibogan sia, bangud nga ginsiling sang iban, nga si Juan nabanhaw gikan sa mga patay;

8 Kag sang iban, nga si Elias nagpahayag; kag sang iban, nga ang isa sang dumaan nga mga manalagna nabanhaw.

9 Kag si Herodes nagsiling, Ginpugutan ko si Juan: apang sin-o bala ini, nga nahanungud sa iya akon ginapamatian ang subong nga mga butang? Kag naghandum sia sa pagpakigkita sa iya.

10 ś Kag ang mga apostol, sang sila nakabalik na, nagsugid sa iya sang tanan nga ila nahimo. Kag gindala niya sila, kag naglikaw sila sing pahain sa duug nga baw-ing nga nasakpan sang siudad nga gintawag Betsaida.

11 Kag ang katawohan, sang sila nakahibalo sini, nagsonod sa iya: kag ginbaton niya sila, kag nagpamolong sa ila nahanungud sa ginharian sang Dios, kag ginpang-ayo ang mga may kinahanglan nga ayohon.

12 Kag sang nagsugud sa paghingapus ang adlaw, niyan ang napulog duha nagpalapit, kag nagsiling sa iya, Papaulia ang kadam-an, agud nga magkadto sila sa mga banwa kag sa kaumhan sa palibut, kag magdayon, kag magpangita sing pagkaon: kay yari kita diri sa duug nga baw-ing.

13 Apang nagsiling sia sa ila, Hatagi ninyo sila sing pagkaon. Kag nagsiling sila, Wala na kita sing iban kondi lima ka tinapay kag duha ka isda; luwas kon magkadto kami kag magbakal sing pagkaon sa sini tanan nga katawohan.

14 Kay mga lima ka libo ka lalaki sila. Kag nagsiling sia sa iya mga disipulo, Palingkora ninyo sila sing mga hinut-ong, nga mga tagkinalim-an.

15 Kag ginhimo nila ini, kag ginpalingkod sila tanan.

16 Niyan ginkuha niya ang lima ka tinapay kag ang duha ka isda, kag sang nagahangad sa langit, ginpakamaayo niya sila, kag gintipiktipik, kag ginhatag sa mga disipulo nga ibutang sa atubangan sang kadam-an.

17 Kag nagkaon sila, kag nabusug ang tanan: kag gintipon nila ang nabilin, napulog duha ka alat sang mga tinipik.

18 ś Kag nahanabu, sang nagapangamuyo sia sing pahain, ang iya mga disipulo kaupud niya: kag nagpamangkot sia sa ila, nga nagasiling, Sin-o bala ako sa ginasiling sang katawohan?

19 Sila nga nagasabat nagsiling, Si Juan nga Manugbautiso; apang ang iban nagasiling, si Elias; kag ang iban nagasiling, nga ang isa sang dumaan nga mga manalagna nabanhaw.

20 Nagsiling sia sa ila, Apang sin-o bala ako sa inyo? Si Pedro nga nagasabat nagsiling, Ang Cristo sang Dios.

21 Kag nagtugon sia sa ila sing matigdas, kag nagsogo sa ila nga indi magsugid sinang butang sa bisan kay sin-ong tawo;

22 Nga nagasiling, Ang Anak sang tawo kinahanglan mag-antus sing madamung butang, kag isikway sang mga tigulang kag puno nga mga pari kag mga escriba, kag patyon, kag sa ikatlong adlaw pagabanhawon.

23 ś Kag nagsiling sia sa ila tanan, Kon sin-ong tawo buut magsonod sa akon, magdumili sia sang iya kaugalingon, kag magpas-an sang iya krus adlawadlaw, kag magsonod sa akon.

24 Kay ang bisan sin-o nga buut magluwas sang iya kabuhi madula niya ini: apang ang bisan sin-o nga madulaan sang iya kabuhi bangud sa akon, maluwas niya ini.

25 Kay ano bala ang mapulus sang tawo, kon maangkon niya ang bug-os nga kalibutan, kag madula ang iya kaugalingon, ukon mawala?

26 Kay ang bisan sin-o nga magkahuya sa akon kag sang akon mga polong, pagaikahuya sia sang Anak sang tawo, kon magkari sia sa iya kaugalingon nga himaya, kag sa iya sang iya Amay, kag sang balaan nga mga anghel.

27 Apang nagasugid ako sa inyo sang kamatooran, may iban sang mga nagatindug diri, nga indi makatilaw sang kamatayon, tubtub nga makita nila ang ginharian sang Dios.

28 ś Kag nahanabu sang may mga walo ka adlaw sa tapus sining mga hambalanon, gin-upud niya si Pedro kag si Juan kag si Santiago, kag nagtaklad sa isa ka bukid sa pagpangamuyo.

29 Kag sang nagapangamuyo sia, ang dagway sang iya nawung nabalhin, kag ang iya panapton nagputi kag nagsilaw.

30 Kag, yari karon, may duha ka tawo nga nagpakighambal sa iya, nga amo si Moises kag si Elias:

31 Nga nagpakita sa himaya, kag nagpamolong sang iya pagtaliwan nga iya pagatumanon sa Jerusalem.

32 Apang si Pedro kag sila nga kaupud niya ginpuyat sa katuyo: kag sang sila nagmata, nakita nila ang iya himaya, kag ang duha ka tawo nga nagtindug kaupud niya.

33 Kag nahanabu, sang nagataliwan sila sa iya, si Pedro nagsiling kay Jesus, Agalon, maayo sa aton nga diri kita: kag mahimo kita sing tatlo ka tabernakulo; isa sa imo, kag isa kay Moises, kag isa kay Elias: nga wala makahibalo sang iya ginsiling.

34 Samtang nagapamolong sia sini, nag-abut ang isa ka panganud, kag naglikup sa ila: kag hinadlukan sila sang nagsulud sila sa panganud.

35 Kag may naggowa nga isa ka tingug sa panganud, nga nagasiling, Ini hinigugma ko nga Anak: pamatii sia.

36 Kag sang nakahambal na ang tingug, isa na lang si Jesus. Kag ginhipsan nila ini, kag wala magpanugid bisan kay sin-o nga tawo sa sadtong mga adlaw sang bisan ano sinang mga butang nga ila nakita.

37 ś Kag nahanabu, nga sa adlaw nga madason, sang nagdolhog sila sa bakolod, ginsugata sia sang madamu nga katawohan.

38 Kag, yari karon, isa ka tawo sa kadam-an nagsinggit, nga nagasiling, Agalon, ginapakilooy ko sa imo, tan-awa ang akon anak nga lalaki: kay sia akon anak nga bugtong.

39 Kag, yari karon, isa ka espiritu nagadakup sa iya, kag sa hinali nagasinggit sia; kag ini nagapakibang sa iya sa bagay nga nagabula sia liwat, kag nagakusokuso sa iya nga halus magbiya sa iya.

40 Kag nagpakilooy ako sa imo mga disipulo sa pagsobol sa iya; kag wala sila makasarang.

41 Kag si Jesus nga nagasabat nagsiling, O kaliwatan nga dimatinoohon kag balingag, tubtub san-o pa bala magaupud ako sa inyo, kag magabatas sa inyo? Dalha diri ang imo anak.

42 Kag sang nagapalapit pa sia, ginpukan sia sang yawa, kag ginpakibang sia. Kag ginsabdong ni Jesus ang espiritu nga dimatinlo, kag gin-ayo ang bata, kag gin-uli sia sa iya amay.

43 ś Kag sila tanan natingala sa daku gid nga gahum sang Dios. Apang samtang nagakatingala ang tagsatagsa sa ila sa tanan nga mga butang nga nahimo ni Jesus, nagsiling sia sa iya mga disipulo,

44 Ipaturuk ining mga hambalanon sa inyo mga idulungug: kay ang Anak sang tawo itugyan sa mga kamut sang mga tawo.

45 Apang wala nila mahangpi ining hambalanon, kag nalikman ini sa ila, agud nga indi nila mahantupan ini: kag nahadluk sila sa pagpamangkot sa iya nahanungud sinang hambalanon.

46 ś Niyan may natabo nga pagbinaisay sa tunga nila, kon sin-o ang labing daku sa ila.

47 Kag si Jesus, sang nakahantup sang painoino sang ila tagiposoon, nagkuha sia sing bata, kag ginbutang sia sa iya luyo,

48 Kag nagsiling sa ila, Ang bisan sin-o nga magbaton sining bata sa akon ngalan nagabaton sa akon: kag ang bisan sin-o nga nagabaton sa akon nagabaton sa iya nga nagpadala sa akon: kay sia nga labing diotay sa inyo tanan, ang amo man mangindaku.

49 ś Kag si Juan nagsabat kag nagsiling, Agalon, nakita namon ang isa nga nagasobol sang mga yawa sa imo ngalan; kag gindumilian namon sia, bangud nga wala sia nagasonod sa amon.

50 Kag si Jesus nagsiling sa iya, Dili sia pagdumilii: kay sia nga indi batok sa aton apin sa aton.

51 ś Kag nahanabu, sang nag-abut na ang tion nga bayawon sia, ginpadolong niya sing mapag-on ang iya nawung pa Jerusalem,

52 Kag nagpadala sing mga manugbalita sa una sang iya nawung: kag naglakat sila, kag nagsulud sa isa ka minoro sang mga taga-Samaria, sa pag-aman sa iya.

53 Kag wala sila magbaton sa iya, bangud nga ang iya nawung daw magapadolong pa Jerusalem.

54 Kag sang nakita ini sang iya mga disipulo nga si Santiago kag si Juan, nagsiling sila, Ginoo, buut mo bala nga magsogo kami nga manaug ang kalayo gikan sa langit, kag sonogon sila, subong sang ginhimo ni Elias?

55 Apang nagliso sia, kag nagsabdong sa ila, kag nagsiling, Wala kamo makahibalo kon sa anong espiritu kamo.

56 Kay ang Anak sang tawo wala magkari sa paglaglag sang mga kabuhi sang mga tawo, kondi sa pagluwas sa ila. Kag nagkadto sila sa isa pa ka minoro.

57 ś Kag nahanabu, nga, sang nagalakat sila sa dalan, may isa ka tawo nga nagsiling sa iya, Ginoo, masonod ako sa imo bisan diin ka makadto.

58 Kag si Jesus nagsiling sa iya, Ang mga singgalong may mga lungib, kag ang mga pispis sa kahanginan may mga pugad; apang ang Anak sang tawo wala gid sing olonlan sang iya olo.

59 Kag sia nagsiling sa isa man, Sonod ka sa akon. Apang nagsiling sia, Ginoo, tuguti ako anay sa pagkadto kag sa paglubung sang akon amay.

60 Nagsiling si Jesus sa iya, Baya-i ang mga patay sa paglubung sang ila mga patay: apang lakat ka kag iwali ang ginharian sang Dios.

61 Kag ang isa man nagsiling, Ginoo, masonod ako sa imo; apang tuguti ako anay sa pagpaalam sa ila, nga yara sa akon balay.

62 Kag si Jesus nagsiling sa iya, Walay tawo, nga nagakaput sa arado, kag nagabalikid, nga takus sa ginharian sang Dios.

KAPITULO 10

SA tapus sining mga butang ang Ginoo nagpili sing iban nga kapitoan man, kag ginpadala sila sing tagduhaduha sa una niya sa tagsa ka siudad kag duug, nga iya kadtoan.

2 Busa nagsiling sia sa ila, Matuud ang alanyon bugana, apang pila lamang ang mga mamumugon: busa pangamuyo kamo sa Ginoo sang alanyon, nga magpadala sia sing mga mamumugon sa iya alanyon.

3 Lakat kamo sa inyo mga dalanon: yari karon, ginapadala ko kamo subong sang mga cordero sa tunga sang mga lobo.

4 Dili kamo magdala sing puyo, ukon balalonan, ukon sapatos: kag dili kamo mag-abiabi bisan kay sin-ong tawo sa dalan.

5 Kag sa bisan diin nga balay kamo magsulud, siling kamo anay, Paghidait sa sining balay.

6 Kag kon ang lalaking anak sang paghidait didto, ang inyo paghidait magapabilin sa sini: apang kon wala, magabalik ini sa inyo.

7 Kag sa among balay pabilin kamo, nga nagakaon kag nagainum sinang mga butang nga ila ginahatag: kay ang mamumugon takus sang iya sohol. Dili kamo magpamalaybalay.

8 Kag sa bisan diin nga siudad kamo magsulud, kag ginabaton nila kamo, kaona inang mga butang nga ginabutang sa inyo atubangan:

9 Kag ayoha ninyo ang mga masakiton nga yadto didto, kag magsiling sa ila, Ang ginharian sang Dios malapit na sa inyo.

10 Apang sa bisan diin nga siudad kamo magsulud, kag indi nila kamo pagbatonon, gowa kamo sa iya mga dalan, kag magsiling,

11 Bisan ang yab-ok gid sang inyo siudad, nga nagatapik sa amon, ginapipi namon batok sa inyo: walay sapayan kilalaha ninyo ini, nga ang ginharian sang Dios malapit na sa inyo.

12 Apang nagasiling ako sa inyo, nga magahaganhagan pa sa sinang adlaw sa Sodoma, sang sa sadtong siudad.

13 Kailo sa imo, Corazin! kailo sa imo, Betsaida! kay kon nahimo ang mga buhat nga gamhanan sa Tiro kag Sidon, nga ginhimo sa inyo, dugay na kuntani naghinulsul sila, nga napanaptan sing sako kag nagalingkod sa abo.

14 Apang magahaganhagan pa sa Tiro kag Sidon sa paghukom, sang sa inyo.

15 Kag ikaw, Capernaum, nga nabayaw tubtub sa langit, pagapausmuron sa impierno.

16 Sia nga nagapamati sa inyo nagapamati sa akon; kag sia nga nagatamay sa inyo nagatamay sa akon; kag sia nga nagatamay sa akon nagatamay sa iya nga nagpadala sa akon.

17 ś Kag ang kapitoan nagbalik nga may kalipay, nga nagasiling, Ginoo, bisan pa ang mga yawa nagapasakup sa amon paagi sa imo ngalan.

18 Kag nagsiling sia sa ila, Nakita ko si Satanas nga naholog subong sang kilat gikan sa langit.

19 Yari karon, nagahatag ako sa inyo sing gahum sa pagtapak sang mga man-ug kag mga iwiiwi, kag sa ibabaw sang tanan nga gahum sang kaaway: kag walay bisan ano sa bisan ano nga paagi nga makahalit sa inyo.

20 Walay sapayan sa sini dili kamo magkalipay, nga ang mga espiritu nagapasakup sa inyo; kondi hinonoo magkalipay, bangud ang inyo mga ngalan nasulat sa langit.

21 ś Sa among takna nagkalipay si Jesus sa espiritu, kag nagsiling, Nagapasalamat ako sa imo, O Amay, Ginoo sang langit kag duta, nga ginlipdan mo ining mga butang sa mga maalam kag mga mainandamon, kag ginpahayag sila sa mga lapsag: hoo, Amay; kay amo ini ang maayo sa imo itololok.

22 Ang tanan nga mga butang gintugyan sa akon sang Amay ko: kag wala sing tawo nga nakakilala kon sin-o ang Anak, luwas ang Amay; kag kon sin-o ang Amay, luwas ang Anak, kag ang bisan sin-o nga ipahayag sia sang Anak.

23 ś Kag nagliso sia sa iya mga disipulo, kag nagsiling sing pahain, Bulahan ang mga mata nga nakakita sang mga butang nga inyo nakita:

24 Kay nagasugid ako sa inyo, nga madamu nga manalagna kag mga hari ang naghandum sa pagtan-aw sinang mga butang nga inyo ginatan-aw, kag wala makakita sa ila; kag sa pagpamati sinang mga butang nga inyo ginapamatian, kag wala makabati sa ila.

25 ś Kag, yari karon, isa ka mangin-alamon sa kasogoan nagtindug, kag nagsulay sa iya, nga nagasiling, Agalon, ano bala ang himoon ko sa pagpanubli sang kabuhi nga walay katapusan?

26 Nagsiling sia sa iya, Ano bala ang nasulat sa kasogoan? paano bala ang pagbasa mo?

27 Kag sia nga nagasabat nagsiling, Higugmaon mo ang Ginoo nga imo Dios sa bug-os mong tagiposoon, kag sa bug-os mong kalag, kag sa bug-os mong kusug, kag sa bug-os mong hunahuna; kag ang imo isigkatawo subong sang imo kaugalingon.

28 Kag nagsiling sia sa iya, Nagsabat ka sing matadlong: himoa ini, kag magakabuhi ka.

29 Apang sia, nga nagahandum sa pagpakamatarung sang iya kaugalingon, nagsiling kay Jesus, Kag sin-o bala ang akon isigkatawo?

30 Kag si Jesus nga nagasabat nagsiling, Isa ka tawo nagkadto sa Jerico gikan sa Jerusalem, kag ginbanggaan sia sang mga makawat, nga naghublas sa iya, kag nagpilas sa iya, kag nagtaliwan, nga nagabiya sa iya nga daw patay.

31 Kag nataboan nga may isa ka pari nga nagdolhog sa sadtong dalan: kag sang nakita niya sia, nagligad sia sa pihak.

32 Kag sa among bagay ang isa ka Levita, sang sia yadto sa duug, nagpalapit kag nagtan-aw sa iya, kag nagligad sa pihak.

33 Apang ang isa ka Samariahanon, sang nagpanlakatan sia, nag-abut diin sia: kag sang nakita niya sia, nalooy sia sa iya,

34 Kag nagpalapit sa iya, kag ginsamburan ang iya mga pilas, nga ginaboboan sing lana kag alak, kag ginpasakay niya sia sa iya kaugalingon nga hayup, kag gindala sia sa dalayonan, kag gin-atipan sia.

35 Kag sa madason nga adlaw sang sia nagtaliwan, nagkuha sia sing duha ka denario, kag ginhatag sila sa tagbalay, kag nagsiling sa iya, Atipana sia; kag bisan ano nga magamit mo nga dugang, sa akon pagbalik, magabayad ako sa imo.

36 Karon sin-o bala sa sining tatlo, sa hunahuna mo, ang nangin-isigkatawo sa ginbanggaan sang mga makawat?

37 Kag nagsiling sia, Sia nga nagpakita sing kalooy sa iya. Niyan si Jesus nagsiling sa iya, Lakat, kag himoa ang subong.

38 ś Karon nahanabu, sang nagalakat sila, nga nagsulud sia sa isa ka minoro: kag ang isa ka babaye nga ginhingalanan nga si Marta nagbaton sa iya sa iya balay.

39 Kag may utud sia nga gintawag nga si Maria, nga naglingkod man sa tiilan ni Jesus, kag nagpamati sang iya polong.

40 Apang si Marta nagpalibog nahanungud sa madamung pag-aman, kag nagpalapit sa iya, kag nagsiling, Ginoo, wala ka bala sing kabalaka nga ginpatumbayaan ako sang akon utud nga isa lamang sa pag-aman? busa silinga sia nga magbulig sia sa akon.

41 Kag si Jesus nagsabat kag nagsiling sa iya, Marta, Marta, mabinalak-on kag nagapalibog ka nahanungud sa madamung butang:

42 Apang isa ka butang ang kinahanglan: kag napili ni Maria inang maayong bahin, nga indi pagkuhaon sa iya.

KAPITULO 11

KAG nahanabu, nga, samtang sia nagapangamuyo sa isa ka duug, sang nag-untat sia, ang isa sang iya mga disipulo nagsiling sa iya, Ginoo, tudloi kami sa pagpangamuyo, subong nga si Juan nagtudlo sang iya mga disipulo.

2 Kag nagsiling sia sa ila, Kon magpangamuyo kamo, magsiling, Amay namon nga yara sa langit, Pakabalaanon ang imo ngalan. Magkari ang imo ginharian. Paghimoon ang imo kabubut-on, subong sang sa langit, amo man sa duta.

3 Hatagi kami sang amon adlawadlaw nga kalan-on sa inadlaw.

4 Kag patawara kami sang mga sala namon; kay nagapatawad man kami sa tagsatagsa nga nakautang sa amon. Kag dili kami pagdalha sa pagsulay; kondi luwasa kami sa malaut.

5 Kag nagsiling sia sa ila, Sin-o bala sa inyo ang may abyan, kag magakadto sa iya sa tungang gab-i, kag magsiling sa iya, Abyan, pahulama ako sing tatlo ka tinapay;

6 Kay ang abyan nakon sa iya panlakatan nag-abut sa akon, kag wala ako sing ibutang sa atubangan niya?

7 Kag sia gikan sa sulud magasabat kag magasiling, Dili ako paggamoha: natakup na ang gawang, kag ang akon mga kabataan upud sa akon sa higdaan na; indi ako makabangon kag makahatag sa imo.

8 Nagasiling ako sa inyo, Bisan indi sia buut magbangon kag maghatag sa iya, bangud nga abyan niya sia, walay sapayan bangud sang iya pagpamilit magabangon sia kag magahatag sa iya sang tanan nga kinahanglan niya.

9 Kag nagasiling ako sa inyo, Pangayo, kag kamo hatagan; pangita, kag kamo makakita; panoktok, kag kamo pagabuksan.

10 Kay ang tagsatagsa nga nagapangayo nagabaton; kag sia nga nagapangita makakita; kag sa iya nga nagapanoktok pagabuksan ini.

11 Kon ang isa ka anak nga lalaki magpangayo sang tinapay sa bisan sin-o sa inyo nga isa ka amay, magahatag bala sia sa iya sing bato? ukon kon magpangayo sia sang isda, magahatag bala sia sing man-ug sa baylo sang isda?

12 Ukon kon magpangayo sia sing itlog, dolotan bala niya sia sing iwiiwi?

13 Niyan kon kamo, nga malaut, makahibalo maghatag sing maayong mga regalo sa inyo mga bata: daw ano pa gid bala nga ang inyo Amay nga langitnon magahatag sang Balaan nga Espiritu sa ila nga nagapangayo sa iya?

14 ś Kag nagasobol sia sang isa ka yawa, kag ini apa. Kag nahanabu, sang nakagowa ang yawa, ang apa nakahambal; kag natingala ang katawohan.

15 Apang ang iban sa ila nagsiling, Paagi kay Beelzebub nga puno sang mga yawa nagasobol sia sang mga yawa.

16 Kag ang iban, nga nagasulay sa iya, nagpangita sa iya sing tanda gikan sa langit.

17 Apang sia, nga nakahibalo sang ila mga hunahuna, nagsiling sa ila, Ang tagsa ka ginharian nga napihak batok sa iya kaugalingon mamusmus; kag ang panimalay nga napihak batok sa iya kaugalingon nga panimalay nagakapukan.

18 Kon si Satanas man napihak batok sa iya kaugalingon, paano bala ang pagtindug sang iya ginharian? bangud nga nagasiling kamo nga nagasobol ako sang mga yawa paagi kay Beelzebub.

19 Kag kon ako paagi kay Beelzebub nagasobol sang mga yawa, paagi kay sin-o bala nagasobol sa ila ang inyo mga anak nga lalaki? busa manginhukom ninyo sila.

20 Apang kon ako paagi sa tudlo sang Dios nagasobol sang mga yawa, sa wala pagduhaduha ang ginharian sang Dios nag-abut na sa inyo.

21 Kon ang isa ka makusug nga tawo nga lupit nagabantay sang iya palacio, ang iya mga pagkabutang malinong:

22 Apang kon ang isa ka makusug pa sa iya maggubat sa iya, kag madaug sia, ginaagaw niya sa iya ang iya bug-os nga hinganib nga ginsaligan niya, kag nagabahinbahin sang iya mga inagaw.

23 Sia nga wala nagaupud sa akon batok sa akon: kag sia nga wala nagapanipon upud sa akon nagapaaplaag.

24 Kon ang espiritu nga dimatinlo nakagowa sa tawo, nagalakat sia sa mamala nga mga duug, nga nagapangita sing kapahuwayan; kag sang wala makakita, nagasiling sia, Magabalik ako sa akon balay nga ginhalinan ko.

25 Kag kon mag-abut sia, makita niya ini nga nasilhigan kag napunihan.

26 Niyan nagalakat sia, kag nagadala upud sa iya sing iban nga pito ka espiritu nga malaut pa sa iya; kag nagasulud sila, kag nagapuyo didto: kag ang kaolihian sinang tawo manginmalaut pa sang sa nahauna.

27 ś Kag nahanabu, sang nagahambal sia sining mga butang, isa ka babaye sa tunga sang katawohan nagtib-ong sang iya tingug, kag nagsiling sa iya, Bulahan ang taguangkan nga nagdala sa imo, kag ang mga soso nga imo ginsosohan.

28 Apang nagsiling sia, Hinonoo, bulahan ang mga nagapamati sang polong sang Dios, kag nagahuput sini.

29 ś Kag sang nagpinunsok ang katawohan, nagsugud sia sa pagsiling, Ini isa ka malaut nga kaliwatan: nagapangita sila sing tanda; kag walay tanda nga ihatag sa sini, kondi ang tanda ni Jonas nga manalagna.

30 Kay subong nga si Jonas nangintanda sa mga taga-Ninive, amo man ang Anak sang tawo sa sining kaliwatan.

31 Sa paghukom ang hara sang bagatnan magatindug upud sa mga tawo sining kaliwatan, kag magatagudili sa ila: kay nagkari sia gikan sa kaukbungan sang duta sa pagpamati sang kaalam ni Salomon; kag, yari karon, ang daku pa kay Salomon yari diri.

32 Sa paghukom ang mga tawo sang Ninive magatindug upud sining kaliwatan, kag magatagudili sini: kay naghinulsul sila sa pagwali ni Jonas; kag, yari karon, ang daku pa kay Jonas yari diri.

33 Walay tawo, sang nakasindi sia sing kandila, nga nagabutang sini sa tago nga duug, ukon sa idalum sang sulukban, kondi sa ibabaw sang kandilero, agud sila nga nagasulud makakita sang kasanag.

34 Ang suga sang lawas amo ang mata: busa kon ang imo mata ginapatuhoy sa isa, ang bug-os mo nga lawas man puno sang kapawa; apang kon ang imo mata malaut, ang imo lawas man puno sang kadudulman.

35 Busa tatapa nga ang kapawa nga yara sa imo indi kadudulman.

36 Busa kon ang bug-os mo nga lawas puno sang kapawa, nga walay bahin nga madulum, ang kabug-osan sini mapuno sang kapawa, subong nga ang masanag nga iwag sang kandila nagahatag sing kasanag sa imo.

37 ś Kag sang nagapamolong sia, isa ka Fariseo nag-agda sa iya sa pagkaon upud sa iya: kag nagsulud sia, kag naglingkod sa pagkaon.

38 Kag sang nakita ini sang Fariseo, natingala sia nga wala sia anay magpanghinaw sa wala pa ang pagkaon.

39 Kag ang Ginoo nagsiling sa iya, Karon kamo nga mga Fariseo nagatinlo sang nagowa sang tagayan kag sang pinggan; apang ang sa sulud ninyo puno sang panglugus kag kalautan.

40 Kamong mga buangbuang, indi bala sia nga naghimo sang nagowa naghimo sang nasulud man?

41 Apang hinonoo maghatag kamo sing mga limos sa mga butang nga may inyo kamo; kag, yari karon, ang tanan nga butang matinlo sa inyo.

42 Apang kailo sa inyo, mga Fariseo! kay nagahatag kamo sing ikapulo sang herbabuena kag sang ruda kag sang tanan nga sahi sang ulutanon, kag ginbayaan ninyo ang paghukom kag ang gugma sang Dios: ini sila amo ang dapat ninyo kuntani himoon, kag indi pagbayaan ang iban nga wala mahimo.

43 Kailo sa inyo, mga Fariseo! kay naluyag kamo sang labing mataas nga mga lingkoran sa mga sinagoga, kag sang mga pagtamyaw sa mga balaligyaan.

44 Kailo sa inyo, mga escriba kag mga Fariseo, mga salimpapaw! kay subong kamo sang mga lulubngan nga indi makita, kag ang mga tawo nga nagalakat sa ibabaw nila wala makahisayud sa ila.

45 ś Niyan nagsabat ang isa sang mga mangin-alamon sa kasogoan, kag nagsiling sa iya, Agalon, sa sining panghambal ginabadlong mo man kami.

46 Kag nagsiling sia, Kailo sa inyo man, kamo nga mga mangin-alamon sa kasogoan! kay ginapapas-an ninyo ang mga tawo sing mga lulan nga maiwat dalhon, kag kamo inyo wala nagatandug sang mga lulan sang isa sang inyo mga tudlo.

47 Kailo sa inyo! kay nagapatindug kamo sang mga lulubngan sang mga manalagna, kag ginpamatay sila sang inyo mga kaamayan.

48 Matuud gid nagahatag kamo sing panaksi nga nagapasugot kamo sa mga buhat sang inyo mga kaamayan: kay sila sing matuud nagpamatay sa ila, kag kamo nagapatindug sang ila mga lulubngan.

49 Busa nagsiling man ang kaalam sang Dios, Magapadala ako sa ila sing mga manalagna kag mga apostol, kag ang iban sa ila patyon nila kag hingabuton:

50 Agud nga ang dugo sang tanan nga manalagna, nga gin-ula kutub sang pagtukud sang kalibutan, pagasukton sa sining kaliwatan;

51 Kutub sa dugo ni Abel tubtub sa dugo ni Zacarias, nga napatay sa gin-utlan sang halaran kag sang templo: sa pagkamatuud nagasiling ako sa inyo, Sukton ini sa sining kaliwatan.

52 Kailo sa inyo, mga mangin-alamon sa kasogoan! kay ginkuha ninyo ang yabi sang ihibalo: kamo inyo wala magsulud, kag sila nga nagasulud ginsablagan ninyo.

53 Kag samtang sia nagasiling sining mga butang sa ila, ang mga escriba kag ang mga Fariseo nagsugud sa pag-ipit gid sa iya, kag sa pagsugyot sa iya sa paghambal sang madamung butang:

54 Nga ginapanilagan sia, kag nagapangita sa pagdakup sa iya baba sing ano man, agud nga ila sia masumbung.

KAPITULO 12

SA amo nga tion, sang nagtipon ang indi maisip nga kadam-an sang katawohan, sa bagay nga nagtinapakay sila, nagsugud sia sa pagsiling sing una sa iya mga disipulo, Andam kamo sang tapay sang mga Fariseo, nga amo ang pagkasalimpapaw.

2 Kay walay bisan ano nga natabonan, nga indi pag-ipahayag; ukon natago, nga indi mahibaloan.

3 Busa ang bisan ano nga nahambal ninyo sa kadudulman mabatian sa kapawa; kag inang nahambal ninyo sa idulungug sa natakpan nga mga hulut ibantala sa mga atop sang mga balay.

4 Kag mga abyan ko nagasiling ako sa inyo, Dili kamo mahadluk sa ila nga nagapatay sang lawas, kag sa tapus sina wala na sila sing sarang mahimo.

5 Apang magapaandam ako sa inyo nga daan kon sin-o ang kahadlukan ninyo: Kahadluki sia, nga sa tapus sia makapatay may gahum sa pagpilak sa impierno; hoo, nagasiling ako sa inyo, Kahadluki sia.

6 Wala bala ginabaligya ang lima ka magamay nga pispis sing duha ka upis, kag walay isa sa ila nga malipatan sa atubangan sang Dios?

7 Apang bisan pa ang mga bohok sa inyo olo naisipan tanan. Busa dili kamo mahadluk: mahal pa kamo sa madamung magamay nga pispis.

8 Labut pa nagasiling ako sa inyo, Ang bisan sin-o nga magtuad sa akon sa atubangan sang mga tawo, ituad man sia sang Anak sang tawo sa atubangan sang mga anghel sang Dios:

9 Apang sia nga nagapanghiwala sa akon sa atubangan sang mga tawo ipanghiwala sa atubangan sang mga anghel sang Dios.

10 Kag ang bisan sin-o nga maghambal sing isa ka polong batok sa Anak sang tawo, patawaron ini sa iya: apang ang nagapasipala batok sa Balaan nga Espiritu indi ini pagpatawaron.

11 Kag kon dalhon kamo nila sa mga sinagoga, kag sa mga punoan, kag sa mga gamhanan, dili kamo maghimud-os kon paano ukon ano nga butang ang inyo isabat, ukon ano ang inyo isiling:

12 Kay ang Balaan nga Espiritu magatudlo sa inyo sa amo nga takna kon ano ang dapat ninyo isiling.

13 ś Kag ang isa sang kadam-an nagsiling sa iya, Agalon, hambala ang akon utud nga lalaki nga bahinon niya kaupud nakon ang palanublion.

14 Kag nagsiling sia sa iya, Tawo, sin-o bala ang naghimo sa akon nga hukom ukon manugbahin sa inyo?

15 Kag nagsiling sia sa ila, Pamatii, kag mag-andam sa pagkamahamkonon: kay ang kabuhi sang tawo indi sa kabuganaan sang mga butang nga naangkon niya.

16 Kag nagpamolong sia sing isa ka palaanggiran sa ila, nga nagasiling, Ang palangumhan sang isa ka tawo nga manggaranon nagpatubas sing madamu gid:

17 Kag nagpainoino sia sa iya kaugalingon, nga nagasiling, Ano bala ang himoon ko, kay wala ako sing tiponan sang akon patubas?

18 Kag nagsiling sia, Amo ini ang buhaton ko: gub-on ko ang akon mga tambobo, kag magapatindug sing dalagku pa; kag dira tiponon ko ang bug-os ko nga patubas kag ang akon mga pagkabutang.

19 Kag magasiling ako sa akon kalag, Kalag, may madamu ka nga pagkabutang nga natigana sa madamung tuig; magpatawhay ka, magkaon, mag-inum, kag magkasadya.

20 Apang ang Dios nagsiling sa iya, Buangbuang ka, karon nga gab-i pagakinahanglan sa imo ang imo kalag: niyan sin-o bala ang magatag-iya sadtong mga butang, nga imo naaman?

21 Amo man sia nga nagatigana sing bahandi nga sa iya kaugalingon, kag indi manggaranon sa Dios.

22 ś Kag nagsiling sia sa iya mga disipulo, Busa nagasiling ako sa inyo, Dili kamo maghimud-os nahanungud sa inyo kabuhi, kon ano ang inyo kaonon; ukon nahanungud sa lawas, kon ano ang inyo ipanaput.

23 Ang kabuhi labi sa kalan-on, kag ang lawas labi sa panapton.

24 Talupangda ang mga uwak: kay wala sila nagasab-ug ukon nagaani; wala sila sing bodega ukon tambobo; kag ang Dios nagapakaon sa ila: daw ano kamo kamahal pa sa mga pispis?

25 Kag sin-o bala sa inyo nga tungud sang paghimud-os makadugang sing isa ka maniko sa iya kataason?

26 Niyan kon kamo indi makasarang maghimo sinang butang nga labing diotay, ngaa bala nagahimud-os kamo nahanungud sa iban?

27 Talupangda ang mga lirio kon daw ano ang pagtubo nila: wala sila nagapangabudlay, wala sila nagapamorong; kag walay sapayan nagasiling ako sa inyo, nga si Salomon sa bug-os niyang himaya wala makapanaput subong sang isa sini sa ila.

28 Niyan kon ang Dios nagapapanaput sang hilamon sing subong, nga karon nga adlaw yara sa latagon, kag buwas idap-ung sa dapog; daw ano pa bala nga panaptan niya kamo, O kamo nga diotay sing pagtoo?

29 Kag dili kamo maghimud-os kon ano ang inyo kaonon, ukon ano ang inyo imnon, kag dili magmay maduhaduhaon nga hunahuna.

30 Kay ang tanan nga kapungsuran sang kalibutan nagapangita sini tanan nga butang: kag ang inyo Amay nakahibalo nga kamo may kinahanglan sining mga butang.

31 ś Apang sa baylo, pangitaa ninyo ang ginharian sang Dios; kag tanan ining mga butang idugang sa inyo.

32 Dili mahadluk, diotay nga panong; kay nahamut-an sang inyo Amay nga ihatag sa inyo ang ginharian.

33 Ibaligya inang may inyo kamo, kag magpanglimos; maghimo nga sa inyo sing mga puyo nga wala pagdaan, isa ka bahandi sa mga langit nga indi mahubsan, diin walay makawat nga nagapalapit, ukon sipit nga nagapapas.

34 Kay kon diin ang inyo bahandi, didto man ang inyo tagiposoon.

35 Wagkusi ang inyo mga hawak, kag padabdaba ang inyo mga suga;

36 Kag magpakaangay kamo sa mga tawo nga nagahulat sa ila ginoo, kon magbalik sia gikan sa kasal; agud nga kon mag-abut sia kag magpanoktok, makabukas sila sa iya sa gilayon.

37 Bulahan yadtong mga alagad, nga kon mag-abut ang ginoo makita sila nga nagapulaw: sa pagkamatuud nagasiling ako sa inyo, nga magawagkus sia, kag magapalingkod sa ila sa pagkaon, kag magapalapit kag magaalagad sa ila.

38 Kag kon mag-abut sia sa ikaduha nga pagpulaw, ukon mag-abut sa ikatlo nga pagpulaw, kag makita sila sing subong, bulahan yadtong mga alagad.

39 Kag hibaloa ini, nga kon ang agalon sang panimalay nakasayud kon sa ano nga takna magaabut ang makawat, magapulaw sia kuntani, kag indi sia magtugut nga guhaban ang iya balay.

40 Busa maghanda man kamo: kay sa takna nga wala ninyo ginahunahuna magakari ang Anak sang tawo.

41 ś Niyan si Pedro nagsiling sa iya, Ginoo, ginapamolong mo bala ining palaanggiran sa amon, ukon sa tanan?

42 Kag ang Ginoo nagsiling, Sin-o bala niyan yadtong tulugyanan nga matutum kag maalam, nga padumalahon sang iya ginoo sa iya panimalay, sa paghatag sa ila sing ila bahin sang pagkaon sa nagakaigo nga tion?

43 Bulahan yadtong alagad, nga kon mag-abut ang iya ginoo makita nga nagahimo sing subong.

44 Matuud gid nagasiling ako sa inyo, nga padumalahon niya sia sa bug-os niyang pagkabutang.

45 Apang kag kon yadtong alagad magsiling sa iya tagiposoon, Ang akon agalon nagapalantang sang iya pag-abut; kag magsugud sa pagpamakul sa mga alagad nga lalaki kag babaye, kag sa pagkaon kag pag-inum, kag sa paghoboghobog;

46 Ang ginoo sadtong alagad magaabut sa isa ka adlaw nga wala niya ginapaabuta, kag sa takna nga wala niya mahibaloi, kag utdon sia, kag hatagan sang iya bahin upud sang mga dimatinoohon.

47 Kag yadtong alagad, nga nakahibalo sang kabubut-on sang iya ginoo, kag wala maghanda, ukon maghimo sono sa iya kabubut-on, bunalon sing madamu nga lapdus.

48 Apang sia nga wala nakahibalo, kag naghimo sing mga butang nga takus sa mga lapdus, bunalon sing pila ka lapdus. Kay ang bisan sin-o nga ginhatagan sing madamu, madamu ang kinahanglan sa iya: kag ang gintugyanan sang mga tawo sing madamu, labi pa ang pangayoon nila sa iya.

49 ś Nagkari ako sa pagpadala sing kalayo sa duta; kag ano ang himoon ko, kon ini nagdabdab na?

50 Apang may bautismo ako nga ibautiso sa akon; kag daw ano ang akon kasakit tubtub nga matuman ini!

51 Nagahunahuna bala kamo nga nagkari ako sa paghatag sing paghidait sa duta? Nagasugid ako sa inyo, Indi; kondi hinonoo pagbinahinbahin:

52 Kay kutub karon may pagbinahinbahin ang lima sa isa ka balay, ang tatlo batok sa duha, kag ang duha batok sa tatlo.

53 Ang amay magabahin batok sa anak nga lalaki, kag ang anak nga lalaki batok sa amay; ang iloy batok sa anak nga babaye, kag ang anak nga babaye batok sa iloy; ang ugangan nga babaye batok sa iya umagad nga babaye, kag ang umagad nga babaye batok sa iya ugangan nga babaye.

54 ś Kag nagsiling sia sa katawohan man, Kon makita ninyo ang isa ka gal-um nga nagatub-ok sa katundan, sa gilayon nagasiling kamo, Magaulan; kag amo ini ang nagakahanabu.

55 Kag kon makita ninyo nga nagahuyup ang habagat, nagasiling kamo, May init; kag nagakahanabu ini.

56 Mga salimpapaw kamo, makahibalo kamo magpanimad-on sang dagway sang langit kag sang duta; apang paano bala nga indi kamo makahibalo magpanimad-on sining tion?

57 Hoo, kag ngaa bala wala kamo sa inyo kaugalingon nagahukom kon ano ang matarung?

58 ś Kon magkadto ka kaupud sang imo kasumpung sa atubangan sang punoan, samtang nga ikaw yara sa dalanon, himulati nga mahilway ka sa iya; basi kon sagnoyon ka niya sa hukom, kag ang hukom magatugyan sa imo sa opisyal, kag isulud ka sang opisyal sa bilanggoan.

59 Nagasugid ako sa imo, indi ka makagowa didto, tubtub nga imo mabayaran ang katapusan nga lepta.

KAPITULO 13

MAY pila sa sadto gid nga tion nga nagsugid sa iya nahanungud sa mga Galileanhon, nga ang ila dugo ginsimbog ni Pilato sa mga halad nila.

2 Kag si Jesus nga nagasabat nagsiling sa ila, Nagahunahuna bala kamo nga ining mga Galileanhon mga makasasala labaw sa tanan nga Galileanhon, bangud nga nag-antus sila sining mga butang?

3 Nagasugid ako sa inyo, Indi: apang, kon indi kamo maghinulsul, tanan kamo mawala man.

4 Ukon yadtong mga napulog walo, nga napukanan sang torre sa Siloe, kag nagpatay sa ila, nagahunahuna bala kamo nga makasasala sila sing labi sa tanan nga tawo nga nagapuyo sa Jerusalem?

5 Nagasugid ako sa inyo, Indi: apang, kon indi kamo maghinulsul, tanan kamo mawala man.

6 ś Nagpamolong man sia sining palaanggiran; Ang isa ka tawo may kahoy nga higuera nga natanum sa iya ulubasan; kag nagkadto sia kag nagpangita sing bunga sa sini, kag walay nakita.

7 Niyan nagsiling sia sa manugtatap sang iya ulubasan, Yari karon, sining tatlo na ka tuig nagakari ako sa pagpangita sing bunga sa sining kahoy nga higuera, kag wala ako sing nakita: tapsa ini; ngaa bala nagasablag pa ini sang duta?

8 Kag sia nga nagasabat nagsiling sa iya, Ginoo, pabayai ini anay sa sining tuig pa, tubtub nga makutkutan ko ang palibut sini, kag mabutangan ko sing ipot:

9 Kag kon magpamunga ini, maayo: kag kon indi, niyan sa tapus sina tapson mo ini.

10 Kag nagapanudlo sia sa isa sang mga sinagoga sa sabbath.

11 ś Kag, yari karon, may isa ka babaye nga may espiritu sang masakit sa napulog walo ka tuig, kag nagsikoktot, kag indi sia nga mas-a makatadlong.

12 Kag sang si Jesus nakakita sa iya, ginpakadto niya sia sa iya, kag nagsiling sa iya, Babaye, nahuklasan ka sang imo masakit.

13 Kag gintakdungan niya sia sang iya mga kamut: kag sa gilayon nagtadlong sia, kag naghimaya sa Dios.

14 Kag ang punoan sang sinagoga nagsabat nga may kaakig, bangud nga si Jesus nagpang-ayo sa adlaw nga sabbath, kag nagsiling sa katawohan, May anum ka adlaw nga dapat ipangabudlay sang mga tawo: gani sa ila magkari kamo kag magpaayo, kag dili sa adlaw nga sabbath.

15 Niyan ang Ginoo nagsabat sa iya, kag nagsiling, Salimpapaw ka, wala bala ang tagsatagsa sa inyo nagahubad sa sabbath sang iya baka ukon sang iya asno sa palasudlan, kag nagadala sa iya sa pagpainum?

16 Kag indi bala dapat ining babaye, nga anak ni Abraham, nga nagapus ni Satanas sa napulog walo ka tuig, paghuklasan sining gapus sa adlaw nga sabbath?

17 Kag sang pagsiling niya sining mga butang, ang tanan niyang mga kasumpung nahuy-an: kag ang bug-os nga katawohan nagkalipay sa tanan nga mahimayaon nga butang nga nahimo niya.

18 ś Niyan nagsiling sia, Kaangay bala sa ano ang ginharian sang Dios? kag sa ano bala ipaangay ko ini?

19 Kaangay ini sa lamigas sang mostaza, nga ginkuha sang isa ka tawo, kag ginpanggas sa iya katamnan; kag nagtubo ini, kag nahimo nga isa ka dakung kahoy; kag ang mga pispis sa kahanginan nagholon sa mga sanga sini.

20 Kag sa liwat nagsiling sia, Sa ano bala ipaangay ko ang ginharian sang Dios?

21 Kaangay ini sang tapay, nga ginkuha sang babaye kag gintago sa tatlo ka sukub nga harina, tubtub nga ang bug-os nalatum.

22 Kag nag-agi sia sa mga siudad kag sa mga minoro, nga nagapanudlo, kag nagapanlakatan pa Jerusalem.

23 Niyan ang isa nagsiling sa iya, Ginoo, diotay lamang bala ang maluwas? Kag nagsiling sia sa ila,

24 ś Panikasug kamo sa pagsulud sa gawang nga makitid: kay, nagasiling ako sa inyo, madamu ang magapaninguha sa pagsulud, kag indi makasarang.

25 Sa tion nga magtindug na ang agalon sang panimalay, kag natakpan ang ganhaan, kag kamo magsugud sa pagtindug sa gowa, kag sa pagpanoktok sa ganhaan, nga nagasiling, Ginoo, Ginoo, buksi kami; kag magasabat sia kag magasiling sa inyo, Wala ako makahibalo kon diin kamo naghalalin:

26 Niyan magasugud kamo sa pagsiling, Nagkaon kami kag nag-inum sa imo atubangan, kag nagpanudlo ikaw sa amon mga dalan.

27 Apang magasiling sia, Nagasugid ako sa inyo, wala ako makahibalo kon diin kamo naghalalin; palayo sa akon, tanan kamo nga manugbuhat sang kalautan.

28 Didto may magahinibi kag magabalagrut sang mga ngipon, kon makita ninyo si Abraham, kag si Isaac, kag si Jacob, kag ang tanan nga manalagna, sa ginharian sang Dios, kag kamo inyo ginasobol pagowa.

29 Kag magaabut sila gikan sa sidlangan, kag gikan sa katundan, kag gikan sa aminhan, kag gikan sa bagatnan, kag magalingkod sa ginharian sang Dios.

30 Kag, yari karon, may mga naolihi nga mahauna, kag may mga nahauna nga maolihi.

31 ś Sa amo man nga adlaw may nagpalapit nga mga Fariseo, nga nagasiling sa iya, Halin ka, kag lakat gikan diri: kay si Herodes buut magpatay sa imo.

32 Kag nagsiling sia sa ila, Lakat kamo, kag sugiran inang singgalong, Yari karon, nagasobol ako sang mga yawa, kag nagapang-ayo ako karon nga adlaw kag buwas, kag sa ikatlong adlaw pagahimpiton ako.

33 Walay sapayan kinahanglan ako magpadayon karon nga adlaw, kag buwas, kag sa madason nga adlaw: kay indi mahimo nga ang manalagna mapatay sa gowa sang Jerusalem.

34 O Jerusalem, Jerusalem, nga nagapatay sang mga manalagna, kag nagabato sa ila nga ginapadala sa imo; makapila kuntani nga buut ko tiponon ang imo mga anak, subong sang munga nga nagatipon sang iya mga piso sa idalum sang iya mga pakpak, kag indi kamo buut!

35 Yari karon, ang inyo balay ginapabayaan sa inyo nga winagwag: kag sa pagkamatuud ako nagasiling sa inyo, Indi ninyo ako makita, tubtub nga ang tion magkari nga kamo magasiling, Bulahan ang nagakari sa ngalan sang Ginoo.

KAPITULO 14

KAG nahanabu, sang nagsulud sia sa balay sang isa sang mga puno nga mga Fariseo sa pagkaon sa adlaw nga sabbath, nga ginpanilagan nila sia.

2 Kag, yari karon, may isa ka lalaki sa atubangan niya nga may palamanog.

3 Kag si Jesus nga nagasabat nagpamolong sa mga mangin-alamon sa kasogoan kag sa mga Fariseo, nga nagasiling, Tugut bala ang pag-ayo sa adlaw nga sabbath?

4 Kag naghipus sila. Kag ginkuha niya sia, kag gin-ayo sia, kag ginpalakat sia;

5 Kag nagsabat sa ila, nga nagasiling, Sin-o bala sa inyo nga may asno ukon baka nga naholog sa boho, kag indi magkuha sini gilayon sa adlaw nga sabbath?

6 Kag wala sila makasabat sa iya liwat sa sining mga butang.

7 ś Kag nagpamolong sia sing isa ka palaanggiran sa sadtong mga inagda, sang namulalongan niya kon daw ano ang pagpili nila sang pinasulabing mga hulut; nga nagasiling sa ila,

8 Kon agdahon ka sang bisan sin-ong tawo sa kasal, dili ka maglingkod sa labing mataas nga hulut; basi kon nakaagda sia sing tawo nga dungganon pa sa imo;

9 Kag sia nga nag-agda sa imo kag sa iya magkari kag magsiling sa imo, Hatagi sing duug ining tawo; kag magasugud ka sa pagkuha nga may kahuya sang labing kubus nga hulut.

10 Apang kon ginaagda ikaw, kadto ka kag maglingkod sa labing kubus nga hulut; agud nga kon mag-abut sia nga nag-agda sa imo, makasiling sia sa imo, Abyan, paibabaw ka: niyan magaagum ka sing kadungganan sa atubangan sang mga nagalingkod sa pagkaon kaupud nimo.

11 Kay ang bisan sin-o nga nagapakataas sang iya kaugalingon paubson; kag ang nagapaubus sang iya kaugalingon pataason.

12 ś Niyan sia nagsiling man sa iya nga nag-agda sa iya, Kon nagahimo ikaw sing paniaga ukon panihapon, dili pagtawga ang imo mga abyan, ukon ang imo mga utud, ukon ang imo mga himata, ukon ang imo mga kasilingan nga manggaranon; basi nga sila mag-agda man sa imo, kag mahimoan ka sing balus.

13 Apang kon nagahimo ikaw sing sinalosalo, tawga ang mga imol, ang mga kumpol, ang mga piang, ang mga bulag:

14 Kag pakamaayohon ikaw; kay sila indi makabalus sa imo: kay balusan ka sa pagkabanhaw sang mga matarung.

15 ś Kag sang nabatian ining mga butang sang isa sa ila nga nagalingkod sa pagkaon kaupud niya, nagsiling sia sa iya, Bulahan ang magakaon sing tinapay sa ginharian sang Dios.

16 Niyan nagsiling sia sa iya, Ang isa ka tawo naghimo sing dakung panihapon, kag nag-agda sing madamu:

17 Kag sa tion sang panihapon ginpakadto niya ang iya alagad sa pagsiling sa mga inagda, Kari; kay ang tanan nga butang nahanda na.

18 Kag tanan sila sa isa ka sinugtanan nagsugud sa pagpamalibad. Ang nahauna nagsiling sa iya, Nakataba ako sing uma, kag kinahanglan nga kadtoan ko kag tan-awon ini: ginaampo ko sa imo nga pasaylohon mo ako.

19 Kag ang isa nagsiling, Nakabakal ako sing lima ka pares nga baka, kag malakat ako sa pagtilaw sa ila: ginaampo ko sa imo nga pasaylohon mo ako.

20 Kag ang isa nagsiling, Nakapangasawa ako, kag busa indi ako makakari.

21 Gani nag-abut inang alagad, kag nagpahayag sa iya ginoo sining mga butang. Niyan ang agalon sang panimalay nga naakig nagsiling sa iya alagad, Gowa ka sing dalidali sa mga dalan kag sa mga banas sang siudad, kag dalha diri ang mga imol, kag mga kumpol, kag mga piang, kag mga bulag.

22 Kag nagsiling ang alagad, Ginoo, nahimo ang imo ginsogo, kag may duug pa.

23 Kag ang ginoo nagsiling sa alagad, Kadto ka sa mga dakung dalan kag sa mga hinabongan, kag pilita sila sa pagsulud, agud nga mapuno ang akon balay.

24 Kay nagasiling ako sa inyo, Nga walay isa sadtong mga tawo nga gin-agda nga magatilaw sang akon panihapon.

25 ś Kag nag-upud sa iya ang dalagkung mga kadam-an: kag nagliso sia, kag nagsiling sa ila,

26 Kon ang bisan sin-ong tawo magkari sa akon, kag wala nagadumut sang iya amay, kag iloy, kag asawa, kag mga anak, kag mga utud nga lalaki, kag mga utud nga babaye, hoo, kag sang iya kaugalingon nga kabuhi man, indi sarang mahimo nga akon sia disipulo.

27 Kag ang bisan sin-o nga wala nagapas-an sang iya krus, kag nagasonod sa akon, indi sarang mahimo nga akon sia disipulo.

28 Kay sin-o bala sa inyo, nga nagatuyo sa pagtukud sing torre, nga indi anay maglingkod, kag mag-isip sang kabilihanan, kon may igapahuman sia?

29 Basi kon, sa tapus nabutang niya ang sadsaran, kag indi makasarang sa pagtapus sini, ang tanan nga makakita sini magasugud sa pagyagota sa iya,

30 Nga nagasiling, Ining tawo nagsugud sa pagtukud, kag wala makasarang sa pagtapus.

31 Ukon sin-o bala nga hari, sang nagakadto sia sa pagsumpung sa isa ka hari sa pag-awayan, indi anay maglingkod, kag magbinagbinag kon makasarang sia upud sang napulo ka libo sa pagsugata sa iya nga nagaabut batok sa iya nga may duha ka pulo ka libo?

32 Kag kon indi, sa malayo pa gid ang isa, nagapadala sia sing manugpangatubang, kag nagapangayo sing mga kasugtanan sang paghidait.

33 Busa gani, ang bisan sin-o sa inyo nga indi magbiya sang tanan niya nga may iya sia, indi sarang mahimo nga akon sia disipulo.

34 ś Ang asin maayo: apang kon ang asin magtab-ang, ano bala ang pagpaasin sini?

35 Wala ini sing pulus bisan sa duta, ukon sa tinumpok sang ipot; apang ginapilak ini sang mga tawo sa gowa. Sia nga may mga idulungug sa pagpamati, magpamati sia.

KAPITULO 15

NIYAN nagpalapit sa iya ang tanan nga mga manugsukot sang buhis kag mga makasasala sa pagpamati sa iya.

2 Kag ang mga Fariseo kag ang mga escriba nagkumud, nga nagasiling, Ining tawo nagabaton sang mga makasasala, kag nagakaon upud sa ila.

3 ś Kag nagpamolong sia sa ila sining palaanggiran, nga nagasiling,

4 Sin-o bala ang tawo sa inyo, nga may isa ka gatus ka carnero, kon madula niya ang isa sa ila, nga indi magbiya sang kasiaman kag siam sa kamingawan, kag magpangita sinang nadula, tubtub nga makita niya ini?

5 Kag sang nakita niya ini, ginapahamtang niya ini sa iya mga abaga, nga nagakalipay.

6 Kag sang nakapauli sia, ginatipon niya ang iya mga abyan kag mga kasilingan, nga nagasiling sa ila, Kalipay kamo upud sa akon; kay nakita ko ang akon carnero nga nadula.

7 Nagasiling ako sa inyo, nga sa among bagay, may kalipay sa langit tungud sa isa ka makasasala nga nagahinulsul, labi pa sa kasiaman kag siam nga matarung nga tawo, nga wala nagakinahanglan sing paghinulsul.

8 ś Ukon sin-o bala nga babaye nga may napulo ka bilog nga pilak, kon madula niya ang isa, nga indi magsindi sing kandila, kag magsilhig sang balay, kag magpangita sing makugi gid tubtub nga makita niya ini?

9 Kag sang nakita niya ini, ginatipon niya ang iya mga abyan kag ang iya mga kasilingan, nga nagasiling, Kalipay kamo upud sa akon; kay nakita ko ang pilak nga nadula.

10 Sa among bagay, nagasiling ako sa inyo, nga may kalipay sa atubangan sang mga anghel sang Dios tungud sa isa ka makasasala nga nagahinulsul.

11 ś Kag nagsiling sia, Ang isa ka tawo may duha ka anak nga lalaki:

12 Kag ang manghud sa ila nagsiling sa iya amay, Amay, ihatag sa akon ang bahin sang pagkabutang nga naigo sa akon. Kag ginbahinbahin niya sa ila ang iya pangabuhian.

13 Kag sa wala madugay nga mga adlaw, gintipon sang manghud nga anak ang tanan, kag nagpanlakatan sa malayong duta, kag didto gin-usikan niya ang iya pagkabutang sa patuyang nga pagpangabuhi.

14 Kag sang nahinguyang niya ang tanan, nag-abut ang dakung kagutum sa sadtong duta; kag nagsugud sia sa pagbatyag sing kinawad-on.

15 Kag nagkadto sia kag nagpamugon sa isa ka banwahanon sa sadtong duta; kag sia ginpadala niya sa mga uma niya sa pagbahog sang mga babuy.

16 Kag ginhandum niya kuntani ang pagbusug sang iya tiyan sang mga damog nga ginakaon sang mga babuy: kag walay tawo nga naghatag sa iya.

17 Kag sang nahaulian sia, nagsiling sia, Pila ka mga alagad nga sinoholan sang akon amay nga may tuman nga kalan-on kag nagabugana, kag nagakapatay ako sa gutum!

18 Magatindug ako kag magakadto sa akon amay, kag magasiling sa iya, Amay, nakasala ako batok sa langit, kag sa imo atubangan,

19 Kag indi na ako takus pagtawgon nga anak mo: himoa ako nga subong sang isa sang imo mga alagad nga sinoholan.

20 Kag nagtindug sia, kag nagkadto sa iya amay. Apang sang malayo pa sia, nakit-an sia sang iya amay, kag ginkalooyan, kag nagdalagan, kag ginhakus niya sia sa liog, kag ginhalukan sia.

21 Kag ang anak nga lalaki nagsiling sa iya, Amay, nakasala ako batok sa langit, kag sa imo itololok, kag indi na ako takus pagtawgon nga anak mo.

22 Apang ang amay nagsiling sa iya mga alagad, Dalha ang pinakamaayo nga kunup, kag isul-ub sa iya; kag butangi sing singsing ang iya kamut, kag sapatos ang iya mga tiil:

23 Kag dalha diri ang pinatambok nga tinday sang baka, kag ihawa ini; kag magkaon kita, kag magkasadya:

24 Kay ining akon anak napatay, kag nabuhi liwat; nadula sia, kag nakita. Kag nagsugud sila sa pagkasadya.

25 Karon ang iya anak nga lalaki nga magulang yadto sa uma: kag sang nagpauli sia kag naghinamput sa balay, nakabati sia sang lanton kag sinaut.

26 Kag gintawag niya ang isa sang mga alagad, kag ginpamangkot kon ano ang kahologan sining mga butang.

27 Kag nagsiling sia sa iya, Ang imo utud nag-abut; kag ginpaihaw sang imo amay ang pinatambok nga tinday sang baka, bangud nga nabaton niya sia nga maayo.

28 Kag nangakig sia, kag indi buut magsulud: busa ang iya amay naggowa, kag nagpakilooy sa iya.

29 Kag sia nga nagasabat nagsiling sa iya amay, Yari karon, sa sining mga tinuig nagaalagad ako sa imo, kag wala ako maglapas sang imo sogo sa bisan ano nga tion: apang wala mo gid ako paghatagi sing tinday nga kanding, agud nga magkasadya ako upud sang akon mga abyan:

30 Apang sang nag-abut ining imo anak, nga naghalunhon sang imo pangabuhian upud sa mga alpot, gin-ihaw mo tungud sa iya ang pinatambok nga tinday sang baka.

31 Kag nagsiling sia sa iya, Anak, ikaw kaupud nakon sa gihapon, kag ang tanan nga may akon ako imo.

32 Dapat kita magkasadya, kag magkalipay: kay ining imo utud napatay, kag nabuhi liwat; kag nadula, kag nakita.

KAPITULO 16

KAG nagsiling man sia sa iya mga disipulo, May isa ka tawo nga manggaranon, nga may tulugyanan; kag sia ginsumbung sa iya nga gin-usikan niya ang iya mga pagkabutang.

2 Kag gintawag niya sia, kag nagsiling sa iya, Ano bala ining ginapamatian ko nahanungud sa imo? ihatag ang husay sang imo pagkatinugyanan; kay indi ka na makapadayon nga tulugyanan.

3 Niyan ang tulugyanan nagsiling sa iya kaugalingon, Ano bala ang akon himoon? sanglit ang ginoo ko nagakuha sa akon sang akon pagkatinugyanan: indi ako makakutkut; sa pagpakilimos nahuya ako.

4 Nakapat-ud ako sang akon pagabuhaton, agud nga, kon kuhaon ako sa pagkatinugyanan, batonon nila ako sa ila mga balay.

5 Gani gintawag niya pakadto sa iya ang tagsatagsa sang mga mangungutang sang iya ginoo, kag nagsiling sa nahauna, Pila bala ang utang mo sa akon ginoo?

6 Kag nagsiling sia, Isa ka gatus ka sukub nga lana. Kag nagsiling sia sa iya, Kuhaa ang imo lista sang balayran, kag lingkod ka sing madali, kag isulat kalim-an.

7 Niyan nagsiling sia sa isa, Kag pila bala ang utang mo? Kag nagsiling sia, Isa ka gatus ka sukub nga trigo. Kag nagsiling sia sa iya, Kuhaa ang imo lista sang balayran, kag isulat kawaloan.

8 Kag ang ginoo nagdayaw sang dimatarung nga tulugyanan, bangud nga nakahimo sia sing maalamon: kay ang mga anak sining kalibutan sa ila kaliwatan maalam pa sang sa mga anak sang kapawa.

9 Kag ako nagasiling sa inyo, Maghimo kamo nga sa inyo kaugalingon sing mga abyan paagi sa manggad nga dimatarung; agud nga, kon kamo mawad-an, mabaton nila kamo sa mga puluy-an nga walay katapusan.

10 Sia nga matutum sa sina nga diotay gid matutum man sa madamu: kag sia nga dimatarung sa diotay gid dimatarung man sa madamu.

11 Busa kon wala kamo magmatutum sa manggad nga dimatarung, sin-o bala ang magasalig sa inyo sing mga manggad nga matuud?

12 Kag kon wala kamo magmatutum sa sinang iya sang iban nga tawo, sin-o bala ang magahatag sa inyo sinang inyo?

13 ś Walay alagad nga makaalagad sa duha ka agalon: kay magadumut sia sa isa, kag magahigugma sa isa; ukon magadampig sia sa isa, kag magatamay sa isa. Indi kamo makaalagad sa Dios kag sa manggad.

14 Kag ang mga Fariseo man, nga mga maibogon, nakabati sini tanan nga butang: kag nagyagota sila sa iya.

15 Kag nagsiling sia sa ila, Kamo amo sila nga nagapakamatarung sang inyo kaugalingon sa atubangan sang mga tawo; apang ang Dios nakakilala sang inyo mga tagiposoon: kay inang ginapakamataas sa tunga sang mga tawo kangil-aran sa itololok sang Dios.

16 Ang kasogoan kag ang mga manalagna tubtub kay Juan: kutub sadtong tion ginawali ang ginharian sang Dios, kag ang tagsa ka tawo nagasulud sang palugus sa sini.

17 Kag mahapus pa nga magtaliwan ang langit kag duta, sang sa mangin-walay pulus ang isa ka kudlit sang kasogoan.

18 Ang bisan sin-o nga nagasikway sang iya asawa, kag nagapangasawa sing iban, nagapanglahi: kag ang bisan sin-o nga nagapangasawa sang sinikway sang iya bana nagapanglahi.

19 ś May isa ka tawo nga manggaranon, nga napanaptan sing purpura kag lino nga mapino, kag nagkabuhi sa lakas nga kadayawan adlawadlaw:

20 Kag may isa ka manugpakilimos nga ginhingalanan si Lazaro, nga ginhal-id sa iya ganhaan, puno sang mga pilas,

21 Kag nagahandum nga pakan-on sang mga usik nga nagkalaholog sa latok sang manggaranon nga tawo: kapin pa ang mga ido nagpalapit kag nagdilap sang iya mga pilas.

22 Kag nahanabu, nga napatay ang manugpakilimos, kag gindala sang mga anghel sa sabak ni Abraham: ang tawo nga manggaranon napatay man, kag ginlubung;

23 Kag sa impierno ginbayaw niya ang iya mga mata, sia nga sa kasakitan, kag nakita niya si Abraham sa malayo, kag si Lazaro sa iya sabak.

24 Kag nagsinggit sia kag nagsiling, Amay nga Abraham, kalooyi ako, kag ipadala si Lazaro, agud nga itum-oy niya ang ukbung sang iya tudlo sa tubig, kag mapabugnawan ang akon dila; kay ginasakit ako sa sining dabdab.

25 Apang si Abraham nagsiling, Anak, dumduma nga ikaw sang nagakabuhi ka pa nagbaton sang imo maayong mga butang, kag si Lazaro sa amo nga bagay sang malaut nga mga butang: apang karon ginalipay sia, kag ikaw ginasakit.

26 Kag dugang pa sini tanan, sa ulut namon kag ninyo may ginbutang nga daku nga kadadalman: agud nga ang mga buut magtabok gikan diri pakadto sa inyo indi makasarang; kag ang mga buut magtabok gikan dira, indi sila makakari sa amon.

27 Niyan nagsiling sia, Busa ginaampo ko sa imo, amay, nga ipadala mo sia sa balay sang akon amay:

28 Kay may lima ako ka utud nga lalaki; agud nga makapanaksi sia sa ila, agud nga indi sila man magkari sa sining duug sang kasakitan.

29 Si Abraham nagsiling sa iya, Sila may Moises kag mga manalagna; magpamati sila sa ila.

30 Kag nagsiling sia, Indi, amay nga Abraham: apang kon may isa nga magkadto sa ila gikan sa mga patay, magahinulsul sila.

31 Kag nagsiling sia sa iya, Kon indi sila magpamati kay Moises kag sa mga manalagna, indi man sila mabuyuk, bisan may isa nga mabanhaw gikan sa mga patay.

KAPITULO 17

NIYAN nagsiling sia sa mga disipulo, Indi mahimo kondi mag-abut gid ang mga pagkasandad: apang kailo sa iya nga paagi sa iya magaabut sila!

2 Maayo pa sa iya kon bitayan sa iya liog sing bato nga galingan, kag itagbong sia sa dagat, sang sa magpasandad sia sang isa sining mga magamay.

3 ś Andam kamo sa inyo kaugalingon: Kon ang imo utud makalapas batok sa imo, sabdonga sia; kag kon maghinulsul sia, patawara sia.

4 Kag kon makalapas sia batok sa imo sing makapito sa isa ka adlaw, kag makapito sa isa ka adlaw magbalik sa imo, nga nagasiling, Nagahinulsul ako; patawaron mo sia.

5 Kag ang mga apostol nagsiling sa Ginoo, Dugangi ang amon pagtoo.

6 Kag ang Ginoo nagsiling, Kon kamo may pagtoo subong sang lamigas sang mostaza, makasiling kamo sa sining sicamino nga kahoy, Magabut ka, kag matanum ka sa dagat; kag magatuman ini sa inyo.

7 Apang sin-o bala sa inyo, nga may isa ka alagad nga nagaarado ukon nagapahalab sang kahayupan, nga magasiling sa iya sa indi madugay, sang nakaabut sia sa uma, Kadto ka kag maglingkod sa pagkaon?

8 Kag indi bala hinonoo magasiling sia sa iya, Ihanda ang panihapon ko, kag mag-ilis ka, kag mag-alagad sa akon, tubtub nga makakaon ako kag makainum; kag sa tapus sini magkaon ka kag mag-inum?

9 Nagapasalamat bala sia sa sinang alagad bangud nga naghimo sia sang mga butang nga ginsogo sa iya? Nagahunahuna ako nga indi.

10 Subong man kamo, kon nahimo ninyo inang tanan nga mga butang nga ginsogo sa inyo, magsiling kamo, Mga alagad kami nga walay pulus: ginhimo namon inang amon katungdanan nga paghimoon.

11 ś Kag nahanabu, sang nagapakadto sia sa Jerusalem, nga nag-agi sia sa tunga sang Samaria kag Galilea.

12 Kag sang nagsulud sia sa isa ka minoro, may nagsugata sa iya nga napulo ka tawo nga aroon, nga nagtindug sa malayo:

13 Kag gintib-ong nila ang ila mga tingug, kag nagsiling, Jesus, Agalon, kalooyi kami.

14 Kag sang nakita niya sila, nagsiling sia sa ila, Lakat kag ipakita ang inyo mga kaugalingon sa mga pari. Kag nahanabu, nga, sang nagalakat sila, nagtilinlo sila.

15 Kag ang isa sa ila, sang nakita niya nga nag-ayo sia, nagbalik, kag sa matonog nga tingug naghimaya sa Dios,

16 Kag naghapa sia sa tiilan niya, nga nagapasalamat sa iya: kag sia isa ka Samariahanon.

17 Kag si Jesus nga nagasabat nagsiling, Indi bala napulo ang gintinloan? Apang diin ang siam?

18 Wala na sing nagbalik sa paghatag sing himaya sa Dios, luwas sining dumoloong.

19 Kag nagsiling sia sa iya, Tindug, lakat ka: ang imo pagtoo nag-ayo sa imo.

20 ś Kag sang ginpamangkot sia sang mga Fariseo, kon san-o magaabut ang ginharian sang Dios, nagsabat sia sa ila kag nagsiling, Ang ginharian sang Dios wala nagaabut paagi sa pagpanilag:

21 Kag indi sila magasiling, Yari diri! ukon, yadto didto! kay, yari karon, ang ginharian sang Dios yara sa sulud ninyo.

22 Kag nagsiling sia sa mga disipulo, Magaabut ang mga adlaw, nga magahandum kamo sa pagtan-aw sa isa sang mga adlaw sang Anak sang tawo, kag indi ninyo makita ini.

23 Kag magasiling sila sa inyo, Tan-awa diri; ukon, tan-awa didto: dili kamo mag-apas sa ila, ukon magsonod sa ila.

24 Kay subong sang kilat, nga nagaidlab gikan sa isa ka bahin sa idalum sang langit, nagasidlak tubtub sa isa pa ka bahin sa idalum sang langit; mangin-amo man ang Anak sang tawo sa iya adlaw.

25 Apang kinahanglan sia anay mag-antus sing madamung butang, kag isikway sining kaliwatan.

26 Kag subong sang nahanabu sa mga adlaw ni Noe, mangin-amo man sa mga adlaw sang Anak sang tawo.

27 Nagkalaon sila, nag-ilinum sila, nagpangasawa sila, ginpabanhan sila, tubtub sa adlaw nga si Noe nagsulud sa arka, kag nag-abut ang anaw, kag naglaglag sa ila tanan.

28 Subong man sang nahanabu sa mga adlaw ni Lot; nagkalaon sila, nag-ilinum sila, nagpamakal sila, nagpamaligya sila, nagpananum sila, nagpatindug sila;

29 Apang sa amo gid nga adlaw nga naggowa si Lot sa Sodoma nag-ulan sing kalayo kag azufre gikan sa langit, kag naglaglag sa ila tanan.

30 Mangin-amo man ini sa adlaw nga ipahayag ang Anak sang tawo.

31 Sa sinang adlaw, sia nga yara sa ibabaw sang balay, kag ang iya mga galamiton sa sulud sang balay, dili sia magpanaug sa pagkuha sini: kag sia nga yara sa latagon, dili man sia magbalik.

32 Dumduma ang asawa ni Lot.

33 Ang bisan sin-o nga magatinguha sa pagluwas sang iya kabuhi magadula sini; kag ang bisan sin-o nga magadula sang iya kabuhi magatipig sini.

34 Nagasugid ako sa inyo, sa sinang gab-i may duha ka lalaki sa isa ka higdaan; ang isa kuhaon, kag ang isa mabilin.

35 Duha ka babaye magagaling sing tingub; ang isa kuhaon, kag ang isa mabilin.

36 Duha ka lalaki sa latagon; ang isa kuhaon, kag ang isa mabilin.

37 Kag sila nagsabat kag nagsiling sa iya, Diin bala, Ginoo? Kag nagsiling sia sa ila, Kon diin ang lawas, didto man magatipon ang mga aguila.

KAPITULO 18

KAG nagpamolong sia sa ila sing isa ka palaanggiran sa sining katuyoan, nga dapat ang mga tawo sa gihapon magpangamuyo, kag indi magpakaluya;

2 Nga nagasiling, Sa isa ka siudad may isa ka hukom, nga wala mahadluk sa Dios, kag wala magtahud sa tawo:

3 Kag may babaying balo sa sadtong siudad; kag nagkadto sia sa iya, nga nagasiling, Itimalus ako sa akon kasumpung.

4 Kag indi sia anay: apang sang olihi nagsiling sia sa iya kaugalingon, Bisan wala ako mahadluk sa Dios, ukon magtahud sa tawo;

5 Apang bangud nga ginagamo ako sining babaye nga balo, akon itimalus sia, basi kon pakag-ason niya ako sa iya dalayon nga pagkari.

6 Kag ang Ginoo nagsiling, Pamatii ninyo ang ginasiling sang hukom nga dimatarung.

7 Kag indi bala itimalus sang Dios ang iya kaugalingon nga mga pinili, nga nagatuaw sa iya sa adlaw kag gab-i, bisan pa mag-antus sia sing malawig sa ila?

8 Nagasugid ako sa inyo nga itimalus niya sila sing madali. Walay sapayan, kon magkari ang Anak sang tawo, makakita bala sia sing pagtoo sa duta?

9 Kag nagpamolong sia sining palaanggiran sa pila nga nagsalig sa ila kaugalingon nga mga matarung sila, kag nagtamay sa iban:

10 Duha ka tawo nagsaka sa templo sa pagpangamuyo; ang isa Fariseo, kag ang isa manugsukot sang buhis.

11 Ang Fariseo nagtindug kag nagpangamuyo sa iya kaugalingon sing subong, Dios, nagapasalamat ako sa imo, nga ako indi subong sang iban nga mga tawo, nga mga malupigon, mga dimatarung, mga makihilawason, ukon subong man sining manugsukot sang buhis.

12 Nagapuasa ako sing makaduha sa isa ka semana, nagahatag ako sing mga ikapulo sang tanan nga akon ginaangkon.

13 Kag ang manugsukot sang buhis, nga nagatindug sa malayo, indi sia buut bisan magbayaw sang iya mga mata sa langit, kondi nagpukpuk sang iya dughan, nga nagasiling, Dios, magmaloloy-on ka sa akon nga makasasala.

14 Nagasugid ako sa inyo, ining tawo nagpauli sa iya balay nga ginpakamatarung sa baylo sang isa: kay ang tagsatagsa nga nagapakataas sang iya kaugalingon paubson; kag sia nga nagapaubus sang iya kaugalingon pataason.

15 Kag nagdala man sila sa iya sang mga lapsag, agud nga tandugon niya sila: apang sang nakita ini sang iya mga disipulo, ginsabdong nila sila.

16 Apang gintawag ni Jesus sila sa iya, kag nagsiling, Tuguti ninyo ang mga kabataan nga magamay sa pagkari sa akon, kag dili sila pagdumilian: kay ang ginharian sang Dios ila sang mga kaangay nila.

17 Sa pagkamatuud nagasiling ako sa inyo, Ang bisan sin-o nga indi magbaton sang ginharian sang Dios subong sang bata nga magamay indi sia nga mas-a makasulud sini.

18 Kag ang isa ka manugdumala nagpamangkot sa iya, nga nagasiling, Maayo nga Agalon, ano bala ang akon himoon sa pagpanubli sang kabuhi nga walay katapusan?

19 Kag si Jesus nagsiling sa iya, Ngaa bala nga ginatawag mo ako nga maayo? walay bisan sin-o nga maayo, luwas sa isa, nga amo, ang Dios.

20 Nahibaloan mo ang mga sogo, Dili magpanglahi, Dili magpatay, Dili magpangawat, Dili magsaksi sing dimatuud, Tahora ang imo amay kag ang imo iloy.

21 Kag nagsiling sia, Tanan ini ginhuptan ko kutub sang akon pagkapamatan-on.

22 Karon sang nabatian ni Jesus ining mga butang, nagsiling sia sa iya, Isa ka butang ang nakulang pa sa imo: ibaligya ang tanan nga may imo ikaw, kag ipanagtag sa mga imol, kag may bahandi ka sa langit: kag kari, magsonod sa akon.

23 Kag sang pagkabati niya sini, nagkasubu sia sing lakas: kay manggaranon gid sia.

24 Kag sang nakita ni Jesus nga sia nagkasubu sing lakas, nagsiling sia, Daw ano kabudlay sa ila nga may mga manggad ang pagsulud sa ginharian sang Dios!

25 Kay mahapus pa sa camelyo ang paglapus sa boho sang dagum, sang sa manggaranon nga tawo sa pagsulud sa ginharian sang Dios.

26 Kag sila nga nakabati sini nagsiling, Niyan sin-o bala ang maluwas?

27 Kag nagsiling sia, Ang mga butang nga indi mahimo sa mga tawo mahimo sa Dios.

28 Niyan si Pedro nagsiling, Yari karon, ginpamayaan namon ang tanan, kag nagsonod sa imo.

29 Kag nagsiling sia sa ila, Sa pagkamatuud nagasiling ako sa inyo, Walay tawo nga nagbiya sang balay, ukon mga ginikanan, ukon mga utud, ukon asawa, ukon mga anak, bangud sa ginharian sang Dios,

30 Nga indi magbaton sing madamu pa sa sini nga tion, kag sa kalibutan nga palaabuton kabuhi nga walay katapusan.

31 ś Niyan ginpain niya sa iya ang napulog duha, kag nagsiling sia sa ila, Yari karon, nagataklad kita pa Jerusalem, kag ang tanan nga butang nga nasulat paagi sa mga manalagna tumanon nahanungud sa Anak sang tawo.

32 Kay itugyan sia sa mga Gentil, kag yagotaon, kag halitan, kag duplaan:

33 Kag bunalon nila sia, kag patyon sia: kag sa ikatlong adlaw mabanhaw sia.

34 Kag walay nahangup sila sining mga butang: kag ining hambalanon nalipdan sa ila, kag wala sila makahantup sang mga butang nga nahambal.

35 ś Kag nahanabu, nga sang naghinamput sia sa Jerico, isa ka bulag naglingkod sa higad sang dalan nga nagapakilimos:

36 Kag sang nakabati sang kadam-an nga nagaligad, nagpamangkot sia kon ano ang kahologan sini.

37 Kag nagsugid sila sa iya, nga si Jesus sang Nazaret nagaligad.

38 Kag nagsinggit sia, nga nagasiling, Jesus, ikaw nga Anak ni David, kalooyi ako.

39 Kag sila nga sa atubangan nagsabdong sa iya, nga maghipus sia: apang nagsinggit sia sing dugang pa gid, Ikaw nga Anak ni David, kalooyi ako.

40 Kag si Jesus nagdolog, kag nagsogo nga dalhon sia sa iya: kag sang nagpalapit sia, ginpamangkot sia niya,

41 Nga nagasiling, Ano bala ang buut mo nga himoon ko sa imo? Kag nagsiling sia, Ginoo, nga mabaton ko ang akon itololok.

42 Kag si Jesus nagsiling sa iya, Batona ang imo itololok: ang imo pagtoo nagluwas sa imo.

43 Kag sa gilayon nabaton niya ang iya itololok, kag nagsonod sa iya, nga nagahimaya sa Dios: kag ang tanan nga katawohan, sang nakita nila ini, nagdayaw sa Dios.

KAPITULO 19

KAG si Jesus nagsulud kag naglatas sa Jerico.

2 Kag, yari karon, may isa ka tawo nga ginhingalanan si Zaqueo, nga amo ang puno sa tunga sang mga manugsukot sang buhis, kag manggaranon sia.

3 Kag nagtinguha sia sa pagtan-aw kon sin-o si Jesus; kag indi makasarang bangud sang kadam-an, kay putot sia.

4 Kag nagdalagan sia sa unhan, kag nagsaka sa sicomoro nga kahoy sa pagtan-aw sa iya: kay maagi sia sa sinang dalan.

5 Kag sang nag-abut si Jesus sa duug, nagtangla sia, kag nakita sia, kag nagsiling sa iya, Zaqueo, dalidali, kag magpanaug; kay karon nga adlaw kinahanglan ako magdayon sa imo balay.

6 Kag nagdalidali sia, kag nagpanaug, kag nagbaton sa iya sing malipayon.

7 Kag sang nakita nila ini, sila tanan nagkumud, nga nagasiling, Nga sia nag-upud nga mangin-bisita sa tawo nga makasasala.

8 Kag si Zaqueo nagtindug, kag nagsiling sa Ginoo; Yari karon, Ginoo, ang katunga sang akon pagkabutang ginahatag ko sa mga imol; kag kon nakakuha ako sang bisan ano nga butang sa bisan sin-ong tawo paagi sa dimatuud nga pagsumbung, ginaulian ko sia sing apat ka pilo.

9 Kag si Jesus nagsiling sa iya, Sini nga adlaw nag-abut ang kaluwasan sa sining balay, sanglit kay sia man anak nga lalaki ni Abraham.

10 Kay ang Anak sang tawo nagkari sa pagpangita kag sa pagluwas sinang nadula.

11 Kag sang nagapamati sila sining mga butang, nagdugang sia kag nagpamolong sing isa ka palaanggiran, bangud nga malapit sia sa Jerusalem, kag bangud nga naghunahuna sila nga ang ginharian sang Dios magapahayag sa gilayon.

12 Busa nagsiling sia, Ang isa ka tawo nga dungganon nagkadto sa malayong duta sa pagbaton nga sa iya kaugalingon sing isa ka ginharian, kag sa pagbalik.

13 Kag gintawag niya ang iya napulo ka alagad, kag ginhatagan sila sing napulo ka mina, kag nagsiling sa ila, Magpatikang kamo tubtub nga mag-abut ako.

14 Apang ang iya mga kasimanwa nagdumut sa iya, kag nagpadala sing mensahi sa iya, nga nagasiling, Indi kami buut nga ining tawo maghari sa amon.

15 Kag nahanabu, nga sang nakabalik sia, sang nabaton na niya ang ginharian, niyan nagsogo sia nga panawgon ining mga alagad sa iya, nga ginhatagan niya sang kuarta, agud nga mahibaloan niya kon pila ang naganansya sang tagsa ka tawo sa pagpatikang.

16 Niyan ang nahauna nag-abut, nga nagasiling, Ginoo, ang imo mina nagganansya sing napulo pa ka mina.

17 Kag nagsiling sia sa iya, Maayo, ikaw nga maayong alagad: bangud nga nagmatutum ka sa diotay gid, maggahum ka sa napulo ka siudad.

18 Kag ang ikaduha nag-abut, nga nagasiling, Ginoo, ang imo mina nagganansya sing lima pa ka mina.

19 Kag nagsiling sia sa iya sing amo man nga bagay, Maggahum ka man sa lima ka siudad.

20 Kag ang isa nag-abut, nga nagasiling, Ginoo, tan-awa, yari ang imo mina, nga gintago ko nga naputus sa panyo:

21 Kay nahadluk ako sa imo, bangud nga ikaw tawo nga matig-a: nagakuha ka sinang wala mo mabutang, kag nagaani ka sinang wala mo masab-ug.

22 Kag nagsiling sia sa iya, Sa imo baba hukman ko ikaw, ikaw nga malaut nga alagad. Nakahibalo ka nga ako tawo nga matig-a, nga nagakuha sinang wala ko mabutang, kag nagaani sinang wala ko masab-ug:

23 Niyan ngaa bala wala mo pag-ibutang sa banko ang akon kuarta, nga sa akon pag-abut ako makasukot kuntani nga may saka?

24 Kag nagsiling sia sa ila nga nagtindug didto, Kuhaa ninyo sa iya ang mina, kag ihatag sa iya nga may napulo ka mina.

25 (Kag nagsiling sila sa iya, Ginoo, may napulo sia ka mina.)

26 Kay nagasiling ako sa inyo, Nga ang tagsatagsa nga may iya hatagan; kag sia nga wala sing iya, bisan pa ang yara sa iya kuhaon sa iya.

27 Apang yadtong akon mga kaaway, nga indi buut nga ako maghari sa ila, dalha sila diri, kag pamatya sila sa akon atubangan.

28 ś Kag sang nakapamolong sia sini, nag-una sia, nga nagapataklad sa Jerusalem.

29 Kag nahanabu, sang naghinamput sia sa Betfage kag sa Betania, sa bukid nga ginatawag ang bukid sang mga Olivo, nagpadala sia sang duha sang iya mga disipulo,

30 Nga nagasiling, Kadto kamo sa minoro nga yara sa atubangan ninyo; diin sa inyo pagsulud makita ninyo ang isa ka tinday sang asno nga nahigot, nga wala pa gid masakyi sing tawo: hubari ninyo sia, kag dalha sia diri.

31 Kag kon ang bisan sin-o nga tawo magpamangkot sa inyo, Ngaa bala ginahubad ninyo sia? magsiling kamo sa iya sing subong, Bangud ang Ginoo may kinahanglan sa iya.

32 Kag sila nga ginpadala naglakat, kag nakita nila sono sa nasiling niya sa ila.

33 Kag sang nagahubad sila sang tinday, ang mga tag-iya sini nagsiling sa ila, Ngaa bala ginahubad ninyo ang tinday?

34 Kag nagsiling sila, Ang Ginoo may kinahanglan sa iya.

35 Kag gindala nila sia kay Jesus: kag ginhampilo nila ang ila mga panapton sa tinday, kag ginpasakyan nila kay Jesus.

36 Kag sang nagasakay sia, naghumlad sila sang ila mga panapton sa dalanon.

37 Kag sang naghinamput sia, sa kunsaran na sang bukid sang mga Olivo, ang bug-os nga kadam-an sang mga disipulo nagsugud sa pagkalipay kag pagdayaw sa Dios sa matonog nga tingug bangud sang tanan nga gamhanan nga buhat nga ila nakita;

38 Nga nagasiling, Bulahan ang Hari nga nagakari sa ngalan sang Ginoo: paghidait sa langit, kag himaya sa kahitaasan.

39 Kag ang iban sang mga Fariseo sa kadam-an nagsiling sa iya, Agalon, sabdonga ang imo mga disipulo.

40 Kag nagsabat sia kag nagsiling sa ila, Nagasugid ako sa inyo, nga, kon ini sila maghipus, ang mga bato magasinggit sa gilayon.

41 ś Kag sang naghinamput sia, nakita niya ang siudad, kag naghibi sa sini,

42 Nga nagasiling, Kon ikaw kuntani nakahibalo, ikaw gid, bisan karon lamang nga imo adlaw, sang mga butang nga nahanungud sa imo paghidait! apang karon nalipdan sila sa imo mga mata.

43 Kay magaabut sa imo ang mga adlaw, nga likupan ka sang imo mga kaaway sing kalog, kag libutan ka, kag ipiton ka sa tagsa ka luyo,

44 Kag pukanon ka tubtub sa duta, kag ang imo mga anak sa sulud nimo; kag wala sila sing ibilin sa imo nga isa ka bato nga nasampaw sa isa; bangud nga wala mo pagkilalaha ang tion sang pagduaw sa imo.

45 Kag nagsulud sia sa templo, kag nagsugud sa pagpanobol sang mga nagbaligya sa sulud, kag sang mga nagpamakal;

46 Nga nagasiling sa ila, Nasulat na, Ang akon balay amo ang balay nga palangamuyoan: apang ginhimo ninyo ini nga lungib sang mga makawat.

47 Kag nagpanudlo sia adlawadlaw sa templo. Apang ang puno nga mga pari kag ang mga escriba kag ang mga pangolo sang mga tawo nagtinguha sa paglaglag sa iya,

48 Kag wala sing nakita kon ano ang ila mahimo: kay ang katawohan nga tanan mautitiron sa pagpamati sa iya.

KAPITULO 20

KAG nahanabu, sang isa sadto nga mga adlaw, sang nagpanudlo sia sang katawohan sa templo, kag nagwali sang ebanghelyo, nagpalapit sa iya ang puno nga mga pari kag ang mga escriba upud sang mga tigulang,

2 Kag nagpamolong sa iya, nga nagasiling, Sugiri kami, kon sa ano nga pagbulut-an nagahimo ka sining mga butang? ukon sin-o ang naghatag sa imo sining pagbulut-an?

3 Kag nagsabat sia kag nagsiling sa ila, Ako man magapamangkot sa inyo sing isa ka butang; kag sabta ninyo ako:

4 Ang bautismo ni Juan, gikan bala sa langit, ukon sa mga tawo?

5 Kag nagbinaisay sila, nga nagasiling, Kon magsiling kita, Gikan sa langit; magasiling sia, Niyan ngaa bala wala kamo magtoo sa iya?

6 Apang kag kon magsiling kita, Gikan sa mga tawo; batohon kita sang tanan nga katawohan: kay nagapati sila nga si Juan isa ka manalagna.

7 Kag nagsabat sila, nga wala nila mahibaloi kon diin ini nagikan.

8 Kag si Jesus nagsiling sa ila, Indi man ako magsugid sa inyo kon sa anong pagbulut-an ginahimo ko ining mga butang.

9 Niyan nagsugud sia sa pagpamolong sa katawohan sining palaanggiran; Ang isa ka tawo naghimo sing ulubasan, kag ginpaagsahan ini sa mga mangunguma, kag nagpanlakatan sa malayo nga duta sing madugay.

10 Kag sa panag-on nagpadala sia sing isa ka alagad sa mga mangunguma, agud nga maghatag sila sa iya sang bunga sang ulubasan: apang ginbunal sia sang mga mangunguma, kag ginpalakat sia nga walay dala.

11 Kag liwat nagpadala sia sing isa pa ka alagad: kag sia man ginbunal nila, kag ginpakahuy-an, kag ginpalakat sia nga walay dala.

12 Kag liwat nagpadala sia sang ikatlo: kag sia man ginpilas nila, kag ginsobol sia.

13 Niyan ang ginoo sang ulubasan nagsiling, Ano bala ang akon himoon? ipadala ko ang akon hinigugma nga anak nga lalaki: ayhan tahoron nila sia kon makita nila sia.

14 Apang sang nakita sia sang mga mangunguma, nagbinaisay sila, nga nagasiling, Ini amo ang manunubli: kari, patyon ta sia, agud ang panublion mangin-aton.

15 Gani ginsobol nila sia sa gowa sang ulubasan, kag ginpatay sia. Busa ano bala ang himoon sa ila sang ginoo sang ulubasan?

16 Magakari sia kag laglagon ining mga mangunguma, kag ihatag ang ulubasan sa iban. Kag sang nabatian nila ini, nagsiling sila, Ang Dios magdumili.

17 Kag nagtolok sia sa ila, kag nagsiling, Ano bala niyan ining nasulat, Ang bato nga ginsikway sang mga manunukud, amo ang nangin-olo sang pamag-ang?

18 Ang bisan sin-o nga maholog sa sinang bato mapusa; apang ang bisan sin-o nga mahologan sini, dugmokon sia sini sing mapino.

19 ś Kag ang puno nga mga pari kag ang mga escriba nagtinguha sa pagdakup sa iya sa sadto gid nga takna; kag nahadluk sila sa katawohan: kay nahantupan nila nga ginpamolong niya ining palaanggiran batok sa ila.

20 Kag ginpanilagan nila sia, kag ginpadalhan sing mga espiya, nga nagpakunokuno sila nga mga matarung nga tawo, agud nga madakup nila sia sa iya mga polong, sa katuyoan nga matugyan nila sia sa kagamhanan kag sa pagbulut-an sang gobernador.

21 Kag nagpamangkot sila sa iya, nga nagasiling, Agalon, nahibaloan namon nga ikaw nagasiling kag nagatudlo sing matarung, kag wala ka nagapasulabi, kondi matuud gid nagatudlo ka sang dalanon sang Dios:

22 Tugut bala sa amon ang paghatag sing buhis kay Cesar, ukon indi?

23 Apang nahantupan niya ang ila daya, kag nagsiling sa ila, Ngaa bala ginasulay ninyo ako?

24 Pakita-i ako sing isa ka denario. Kay sin-o bala dagway kag sinulat ang yara dira? Nagsabat sila kag nagsiling, Kay Cesar.

25 Kag nagsiling sia sa ila, Busa ihatag kay Cesar ang mga butang nga iya ni Cesar, kag sa Dios ang mga butang nga iya sang Dios.

26 Kag wala nila madakpi sia sa iya mga polong sa atubangan sang katawohan: kag natingala sila sa iya sabat, kag naghipus sila.

27 ś Niyan nagpalapit sa iya ang pila sang mga Saduceo, nga nagapanginwala nga may bisan ano nga pagkabanhaw; kag nagpamangkot sila sa iya,

28 Nga nagasiling, Agalon, si Moises nagsulat sa amon, Kon ang utud nga lalaki sang bisan sin-ong tawo mapatay, nga may asawa, kag wala sing mga anak, ang iya utud dapat magpangasawa sang asawa niya, kag magbangon sing kaliwat sa iya utud.

29 Busa may pito ka mag-ulutud nga lalaki: kag ang nahauna nagpangasawa, kag napatay nga walay mga anak.

30 Kag ang ikaduha nagpangasawa sa iya, kag napatay nga walay mga anak.

31 Kag ang ikatlo nagpangasawa sa iya; kag sa amo nga bagay amo man ang pito: kag sila walay mga anak, kag nagkalamatay.

32 Sang olihi ang babaye napatay man.

33 Busa sa pagkabanhaw, mangin kay sin-o bala asawa sia? kay ang pito nakapangasawa sa iya.

34 Kag si Jesus nga nagasabat nagsiling sa ila, Ang mga anak sining kalibutan nagapangasawa, kag ginapabanhan:

35 Apang sila nga ginakabig nga takus sa pagdangat sa sinang kalibutan, kag sang pagkabanhaw gikan sa mga patay, wala nagapangasawa, ukon ginapabanhan:

36 Kag indi na sila sarang mapatay: kay kaangay sila sa mga anghel; kag mga anak sila sang Dios, sanglit nga mga anak sang pagkabanhaw.

37 Karon nga ang mga patay ginabanhaw, bisan man si Moises nagpahayag sa kahoykahoy, sang pagtawag niya sang Ginoo nga Dios ni Abraham, kag Dios ni Isaac, kag Dios ni Jacob.

38 Kay indi sia Dios sang mga patay, kondi sang mga buhi: kay ang tanan nagakabuhi nga sa iya.

39 ś Niyan ang pila sang mga escriba nga nagasabat nagsiling, Agalon, nakasiling ka sing maayo.

40 Kag sa tapus sina wala na gid sila magpangahas sa pagpamangkot sa iya sing bisan ano nga palamangkotanon.

41 Kag nagsiling sia sa ila, Paano bala nga nagasiling sila nga ang Cristo anak ni David?

42 Kag si David gid nagsiling sa libro sang mga Salmo, Ang GINOO nagsiling sa akon Ginoo, Lingkod ka sa akon too,

43 Tubtub nga mahimo ko ang imo mga kaaway nga palatungan sang imo mga tiil.

44 Busa si David nagatawag sa iya nga Ginoo, niyan paano bala nga sia anak niya?

45 ś Niyan sa palamatin-an sang bug-os nga katawohan nagsiling sia sa iya mga disipulo,

46 Andam kamo sa mga escriba, nga naluyag maglakat nga may mga kunup nga malaba, kag nagahingamo sang mga pagtamyaw sa mga balaligyaan, kag sang labing mataas nga mga lingkoran sa mga sinagoga, kag sang pinasulabi nga mga hulut sa mga sinalosalo;

47 Nga nagahalunhon sang mga balay sang mga babaying balo, kag nga sa pagpakunokuno nagahimo sing malawig nga mga pangamuyo: ini sila magabaton sing daku pa nga katagudilian.

KAPITULO 21

KAG nagtukhayaw sia, kag nakakita sang mga manggaranon nga mga lalaki nga nagabutang sang ila mga dolot sa duug nga bahandian.

2 Kag nakita niya man ang isa ka imol nga babaying balo nga nagabutang didto sing duha ka lepta.

3 Kag nagsiling sia, Matuud gid nagasiling ako sa inyo, nga ining imol nga babaying balo nagbutang sing labi pa sa ila tanan:

4 Kay ini sila tanan gikan sa ila kabuganaan nagbutang sang mga dolot nga sa Dios: apang sia sa iya kinawad-on nagbutang sang tanan nga inugpangabuhi niya.

5 ś Kag sang nagpamolong ang iban nahanungud sa templo, kon paano nga napunihan ini sing matahum nga mga bato kag mga hatag, nagsiling sia,

6 Nahanungud sining mga butang nga inyo ginatan-aw, magaabut ang mga adlaw, nga walay mabilin diri nga isa ka bato sa ibabaw sang isa, nga indi paglumpagon.

7 Kag nagpamangkot sila sa iya, nga nagasiling, Agalon, apang san-o bala magakahanabu ining mga butang? kag ano bala ang tanda kon ining mga butang mahanabu?

8 Kag nagsiling sia, Mag-andam nga dili kamo pagdayaan: kay madamu ang magakari sa akon ngalan, nga nagasiling, Ako ang Cristo; kag ang tion nagahilapit na: busa dili kamo magsonod sa ila.

9 Apang kon makabati kamo sang mga inaway kag mga kinagubut, dili kamo magkakugmat: kay ining mga butang kinahanglan mahanabu anay; apang ang katapusan indi pa sa gilayon.

10 Niyan nagsiling sia sa ila, Ang pungsud magatindug batok sa pungsud, kag ang ginharian batok sa ginharian:

11 Kag ang mabaskug nga mga linog mangin-yara sa nagakalainlain nga mga duug, kag mga kagutum, kag mga peste; kag may mga makakulugmat nga talan-awon kag dalagku nga talandaan gikan sa langit.

12 Apang sa wala pa ini tanan, dakpon kamo nila, kag hingabuton kamo, nga nagatugyan sa inyo sa mga sinagoga, kag sa mga bilanggoan, kag dalhon kamo sa atubangan sang mga hari kag mga manugdumala bangud sa akon ngalan.

13 Kag ini manginkahigayonan ninyo sa pagsaksi.

14 Busa ipaturuk ini sa inyo mga tagiposoon, nga indi magpainoino anay kon ano ang inyo isabat:

15 Kay hatagan ko kamo sing baba kag kaalam, nga ang tanan ninyong kasumpung indi sarang makasupuk ukon makapamatok.

16 Kag itugyan kamo sang mga ginikanan, kag mga utud, kag kahimataan, kag mga abyan; kag ang iban sa inyo ipapatay nila.

17 Kag dumtan kamo sang tanan nga mga tawo bangud sa akon ngalan.

18 Apang walay bohok sang inyo olo nga madula.

19 Sa inyo pagpailub maangkon ninyo ang inyo mga kalag.

20 Kag kon makita ninyo ang Jerusalem nga nalikupan sing mga kasoldadosan, niyan kilalaha ninyo nga malapit na ang kamusmusan.

21 Niyan ang mga sa Judea magpalagyo sa mga bukid; kag ang mga sa sulud sini maggowa; kag ang mga sa kaumhan dili magsulud sa sini.

22 Kay mga adlaw ini sang pagtimalus, agud nga ang tanan nga butang nga nasulat matuman.

23 Apang kailo sa ila nga nagadala, kag sa ila nga mga nagapasoso, sa sinang mga adlaw! kay may dakung kasisit-an sa duta, kag kasingkal sa sining katawohan.

24 Kag magakapukan sila sa sulab sang espada, kag dalhon nga bihag sa tanan nga kapungsuran: kag ang Jerusalem tapakon sang mga Gentil, tubtub nga ang mga tion sang mga Gentil matuman.

25 ś Kag may mga tanda sa adlaw, kag sa bulan, kag sa mga bitoon; kag sa duta kasisit-an sang kapungsuran, nga may kalisang; ang dagat kag ang mga balud nagadinaguhub;

26 Ang mga tagiposoon sang mga tawo nagakapunaw sa kahadluk, kag sa kalangkag sinang mga butang nga nagaabut sa kalibutan: kay ang mga kagamhanan sang langit uyugon.

27 Kag niyan makita nila ang Anak sang tawo nga nagakari sa isa ka panganud nga may gahum kag dakung himaya.

28 Kag kon ining mga butang magsugud sa pagkahanabu, niyan maghangad, kag bayawa ang inyo mga olo; kay ang pagtubus sa inyo nagapalapit.

29 Kag nagpamolong sia sa ila sing isa ka palaanggiran; Tan-awa ang kahoy nga higuera, kag ang tanan nga kahoy;

30 Sang nagapanalingsing na sila, makita ninyo kag mahibaloan sa inyo kaugalingon nga malapit na ang tingadlaw.

31 Subong man kamo, kon makita ninyo nga nagakahanabu ining mga butang, makilala ninyo nga malapit na ang ginharian sang Dios.

32 Sa pagkamatuud nagasiling ako sa inyo, Indi magtaliwan ining kaliwatan, tubtub nga ang tanan mahanabu.

33 Ang langit kag duta magataliwan: apang ang akon mga polong indi magtaliwan.

34 ś Kag andam kamo sa inyo mga kaugalingon, basi sa bisan ano nga tion ang inyo mga tagiposoon mabug-atan sang patuyang, kag kahologbon, kag mga paghimud-os sining kabuhi, kag gani inang adlaw magaabut sa inyo sing hinali.

35 Kay subong sang siod magaabut ini sa ila tanan nga nagapuyo sa kadaygan sang bug-os nga duta.

36 Busa magbantay kamo, kag magpangamuyo sa gihapon, nga makasarang kamo sa pagpalagyo sa sini tanan nga butang nga mahanabu, kag sa pagtindug sa atubangan sang Anak sang tawo.

37 Kag sa adlaw nagapanudlo sia sa templo; kag sa gab-i naggowa sia, kag nagpabilin sa bukid nga ginatawag nga bukid sang mga Olivo.

38 Kag ang tanan nga katawohan nagkari sa iya sa templo sa aga pa, sa pagpamati sa iya.

KAPITULO 22

KARON nagapalapit ang pandut sang tinapay nga walay tapay, nga ginatawag nga Pagligad.

2 Kag ang puno nga mga pari kag ang mga escriba nagtinguha kon paano mapatay nila sia; kay nahadluk sila sa katawohan.

3 ś Niyan si Satanas nagsulud kay Judas nga gintawag Iscariote, nga naisipan sa napulog duha.

4 Kag naglakat sia, kag nagpakigsapul sa puno nga mga pari kag sa mga kapitan, kon paano nga matugyan niya sia sa ila.

5 Kag nagkasadya sila, kag naghisugut sa paghatag sa iya sing kuarta.

6 Kag nagsaad sia, kag nagpangita sing kahigayonan nga matugyan niya sia sa ila sa wala ang kadam-an.

7 ś Niyan ang adlaw sang tinapay nga walay tapay nag-abut, nga kinahanglan patyon ang pagligad.

8 Kag ginpadala niya si Pedro kag si Juan, nga nagasiling, Kadto kamo kag ihanda ninyo sa aton ang pagligad, agud nga makakaon kita.

9 Kag nagsiling sila sa iya, Diin bala ang buut mo nga maghanda kami?

10 Kag nagsiling sia sa ila, Yari karon, sa pagsulud ninyo sa siudad, sugataon kamo sang tawo, nga nagadala sing isa ka tibud nga tubig; sonda sia tubtub sa balay nga sudlan niya.

11 Kag magsiling kamo sa agalon sang panimalay, Ang Agalon nagasiling sa imo, Diin bala ang hulut nga sa bisita, nga kaonan ko sang pagligad kaupud sang akon mga disipulo?

12 Kag pakitaan kamo niya sing daku nga hulut sa ibabaw nga nasangkapan: didto maghanda kamo.

13 Kag nagkadto sila, kag nakita nila subong sang nasiling niya sa ila: kag ginhanda nila ang pagligad.

14 Kag sang nag-abut ang takna, naglingkod sia, kag ang napulog duha ka apostol kaupud niya.

15 Kag nagsiling sia sa ila, Ginhandum ko sing hanoot gid ang pagkaon sining pagligad kaupud ninyo sa wala pa ako mag-antus:

16 Kay nagasiling ako sa inyo, Indi na ako magkaon sini, tubtub nga matuman ini sa ginharian sang Dios.

17 Kag ginkuha niya ang tagayan, kag nagpasalamat, kag nagsiling, Kuhaa ninyo ini, kag bahinbahinon ini sa inyo.

18 Kay nagasiling ako sa inyo, Indi ako mag-inum sang bunga sang ubas, tubtub nga mag-abut ang ginharian sang Dios.

19 ś Kag nagkuha sia sing tinapay, kag nagpasalamat, kag gintipiktipik ini, kag ginhatag sa ila, nga nagasiling, Ini among akon lawas nga ginhatag tungud sa inyo: himoa ninyo ini sa handumanan nakon.

20 Sa amo nga bagay man ang tagayan sa tapus ang panihapon, nga nagasiling, Ining tagayan amo ang bag-ong testamento sa akon dugo, nga ginaula tungud sa inyo.

21 ś Apang, yari karon, ang kamut sang nagatugyan sa akon kaupud nakon sa latok.

22 Kag sa pagkamatuud ang Anak sang tawo nagataliwan, sono sa gintapat: apang kailo sa sinang tawo nga paagi sa iya igatugyan sia!

23 Kag nagsugud sila sa pagpamangkotanay, kon sin-o sa ila ang magahimo sini.

24 ś Kag nag-abut man ang kasuayon sa tunga nila, kon sin-o sa ila ang makabig nga labing daku.

25 Kag nagsiling sia sa ila, Ang mga hari sang mga Gentil nagapakaginoo sa ila; kag ang mga may pagbulut-an sa ila ginatawag nga mga manughimo sing maayo.

26 Apang indi kamo subong sina: kondi sia nga labing daku sa tunga ninyo, magmanginsubong sia sang kamanghuran; kag sia nga puno, subong sang nagaalagad.

27 Kay sin-o bala ang daku pa, sia nga nagalingkod sa pagkaon, ukon sia nga nagaalagad? indi bala sia nga nagalingkod sa pagkaon? apang ako yari sa tunga ninyo subong sang nagaalagad.

28 Kamo amo ang mga nakapadayon kaupud nakon sa mga pagsulay sa akon.

29 Kag nagatangdo ako sa inyo sing isa ka ginharian, subong nga ang akon Amay nagtangdo sa akon;

30 Agud nga magkaon kamo kag mag-inum sa akon latok sa akon ginharian, kag maglingkod sa mga trono nga nagahukom sang napulog duha ka tribo sang Israel.

31 ś Kag ang Ginoo nagsiling, Simon, Simon, yari karon, si Satanas naghandum sa pag-angkon sa imo, nga ayagon ka niya subong sang trigo:

32 Apang nagpangamuyo ako tungud sa imo, agud nga indi mag-untat ang imo pagtoo: kag kon ikaw magliso, palig-ona ang imo mga kauturan.

33 Kag nagsiling sia sa iya, Ginoo, handa ako sa pag-upud sa imo sa bilanggoan, kag sa kamatayon.

34 Kag nagsiling sia, Nagasugid ako sa imo, Pedro, indi magpamalo ang sulug sining adlaw, tubtub nga mapanghiwala mo sing makatlo nga nakilala mo ako.

35 Kag nagsiling sia sa ila, Sang ginpadala ko kamo nga walay puyo, kag balalonan, kag sapatos, nakulangan bala kamo sing bisan anong butang? Kag nagsiling sila, Wala.

36 Niyan nagsiling sia sa ila, Apang karon, ang may puyo, dalhon niya ini, kag subong man ang iya balalonan: kag ang wala sing espada, ibaligya niya ang iya panapton, kag ibakal sini.

37 Kay nagasiling ako sa inyo, nga ining nasulat kinahanglan pa matuman sa akon, Kag naisipan sia upud sa mga malinapason: kay ang mga butang nga nahanungud sa akon may katumanan.

38 Kag nagsiling sila, Ginoo, tan-awa, yaring duha ka espada. Kag nagsiling sia sa ila, Tuman na.

39 ś Kag naggowa sia, kag nagkadto, sono sa iya kinabatasan, sa bukid sang mga Olivo; kag ang iya mga disipulo nagsonod man sa iya.

40 Kag sang nag-abut sia sa duug, nagsiling sia sa ila, Pangamuyo kamo agud nga indi kamo magsulud sa pagsulay.

41 Kag nagbulag sia sa ila sing mga isa ka haboy sang bato, kag nagluhud, kag nagpangamuyo,

42 Nga nagasiling, Amay, kon buut mo, ipahilayo sa akon ining tagayan: apang indi ang akon kabubut-on, kondi ang imo, paghimoon.

43 Kag nagpahayag sa iya ang isa ka anghel gikan sa langit, nga nagapabakud sa iya.

44 Kag sa kasakit nagpangamuyo sia sing hanoot gid: kag ang iya balhas subong sang dalagkung tinolo sang dugo nga nagatupa sa duta.

45 Kag sang nagtindug sia gikan sa pangamuyo, kag nagkadto sa iya mga disipulo, nakita niya sila nga nagakatolog bangud sa kasubu,

46 Kag nagsiling sa ila, Ngaa bala nagakatolog kamo? bangon kag magpangamuyo, agud nga indi kamo magsulud sa pagsulay.

47 ś Kag sang nagahambal pa sia, yari karon, ang isa ka kadam-an, kag sia nga gintawag si Judas, isa sang napulog duha, nag-una sa ila, kag nagpalapit kay Jesus sa paghaluk sa iya.

48 Apang si Jesus nagsiling sa iya, Judas, ginatugyan mo bala ang Anak sang tawo paagi sa haluk?

49 Sang nakita sang mga yara sa palibut niya kon ano ang mahanabu, nagsiling sila sa iya, Ginoo, ilabo bala namon ang espada?

50 ś Kag ginlabo sang isa sa ila ang alagad sang mataas nga pari, kag ginilang ang iya dulunggan nga too.

51 Kag si Jesus nagsabat kag nagsiling, Pabayai ninyo ang subong tubtub diri. Kag gintandug niya ang iya dulunggan, kag gin-ayo sia.

52 Niyan si Jesus nagsiling sa puno nga mga pari, kag sa mga kapitan sang templo, kag sa mga tigulang, nga nag-abut sa iya, Nagakari bala kamo, subong nga batok sa makawat, nga may mga espada kag mga lalampus?

53 Sang didto ako adlawadlaw kaupud ninyo sa templo, wala kamo magdakup sa akon: apang ini amo ang inyo takna, kag ang gahum sang kadudulman.

54 ś Niyan gindakup nila sia, kag gindul-ong sia, kag ginsulud sia sa balay sang mataas nga pari. Kag si Pedro nagsonod sa malayo.

55 Kag sang nakadabok sila sing kalayo sa tunga sang salapulan, kag nakalingkod sing tingub, si Pedro naglingkod upud sa ila.

56 Apang ang isa ka sologoon nga babaye nagtan-aw sa iya sang nagalingkod sia sa luyo sang kalayo, kag nagtolok sing hanoot gid sa iya, kag nagsiling, Ining tawo man kaupud niya.

57 Kag ginpanghiwala niya sia, nga nagasiling, Babaye, wala ko sia makilala.

58 Kag sa wala madugay nakita sia sang isa, kag nagsiling, Ikaw sa ila man. Kag si Pedro nagsiling, Tawo, indi ako.

59 Kag sa tapus sang mga isa ka takna ang isa pa nagpamatuud sing malig-on gid, nga nagasiling, Matuud gid ining tawo man kaupud niya: kay sia Galileanhon.

60 Kag si Pedro nagsiling, Tawo, wala ako makahibalo sang imo ginasiling. Kag sa gilayon, sang nagahambal pa sia, nagpamalo ang sulug.

61 Kag nagbalikid ang Ginoo, kag nagtolok kay Pedro. Kag si Pedro nakadumdum sang polong sang Ginoo, kon paano nga nagsiling sia sa iya, Sa indi pa magpamalo ang sulug, ipanghiwala mo ako sing makatlo.

62 Kag naggowa si Pedro, kag naghibi sing mapait gid.

63 ś Kag ang mga lalaki nga nagauyat kay Jesus nag-uligyat sa iya, kag nagbunal sa iya.

64 Kag sang ginbutabutahan nila sia, ginsumbag nila sia sa nawung, kag ginpamangkot sia, nga nagasiling, Itagna, sin-o bala ang nagsumbag sa imo?

65 Kag madamu pa nga butang nga mapasipalahon ang ginpamolong nila batok sa iya.

66 ś Kag sang adlaw na, ang mga tigulang sang katawohan kag ang puno nga mga pari kag ang mga escriba nagtipon sing tingub, kag gindala nila sia sa ila konseho, nga nagasiling,

67 Ikaw bala ang Cristo? sugiri kami. Kag nagsiling sia sa ila, Kon sugiran ko kamo, indi kamo magtoo:

68 Kag kon pamangkoton ko kamo man, indi kamo magsabat, ukon buhian ako.

69 Sa tapus sini ang Anak sang tawo magalingkod sa too sang gahum sang Dios.

70 Niyan sila tanan nagsiling, Ikaw bala niyan ang Anak sang Dios? Kag nagsiling sia sa ila, Ginasiling ninyo nga amo ako.

71 Kag nagsiling sila, Ano pa bala ang kinahanglan naton sang saksi? kay kita gid nakabati sa iya baba.

KAPITULO 23

KAG ang bug-os nga kadam-an sa ila nagtindug, kag nagdala sa iya sa kay Pilato.

2 Kag ginsugdan nila ang pagsumbung sa iya, nga nagasiling, Nakita namon ining tawo nga nagapatalang sang pungsud, kag nagadumili sa pagbayad sang buhis kay Cesar, nga nagasiling nga sia gid amo ang Cristo nga isa ka Hari.

3 Kag si Pilato nagpamangkot sa iya, nga nagasiling, Ikaw bala ang Hari sang mga Judio? Kag nagsabat sia sa iya kag nagsiling, Ikaw ang nagasiling sini.

4 Niyan si Pilato nagsiling sa puno nga mga pari kag sa katawohan, Wala ako sing nakita nga kasal-anan sa sining tawo.

5 Kag nangin-mabangis pa sila, nga nagasiling, Ginasugyot niya ang katawohan, nga nagapanudlo sa bug-os gid nga duta sang mga Judio, kutub sa Galilea tubtub sining duug.

6 Sang pagkabati ni Pilato nahanungud sa Galilea, nagpamangkot sia kon ang tawo Galileanhon.

7 Kag sang nahibaloan niya nga sa ginsakpan sia ni Herodes, ginpadala niya sia kay Herodes, nga didto man sia sa Jerusalem sa sadtong tion.

8 ś Kag sang nakita ni Herodes si Jesus, nagkalipay sia sing daku: kay dugay na nga nagahandum sia sa pagtan-aw sa iya, kay nakabati sia sing madamu nga butang nahanungud sa iya; kag naglaum sia sa pagtan-aw sing milagro nga ginahimo niya.

9 Niyan ginpamangkot niya sia sa madamu nga mga polong; apang wala sia magsabat sa iya sing bisan ano.

10 Kag nagtindug ang puno nga mga pari kag ang mga escriba kag ginsumbung sia sing masingkal.

11 Kag si Herodes upud sang iya hangaway nga mga lalaki nagtamay sa iya, kag nag-uligyat sa iya, kag ginpasul-uban sia sing kunup nga matahum, kag ginpabalik sia kay Pilato.

12 ś Kag si Herodes kag si Pilato nag-abyanay sadto gid nga adlaw: kay anay mga kaaway sila.

13 ś Kag si Pilato, sang napatipon niya ang puno nga mga pari kag ang mga manugdumala kag ang katawohan,

14 Nagsiling sa ila, Gindala ninyo sa akon ining tawo, subong sang isa nga nagapatalang sang katawohan: kag, yari karon, sang nausisa sia sa atubangan ninyo, ako walay nakita nga kasal-anan sa sining tawo nahanungud sinang mga butang nga ginasumbung ninyo batok sa iya:

15 Wala, bisan pa si Herodes: kay ginpadala ko kamo sa iya; kag, yari karon, walay ano nga takus sa kamatayon nga nahimo sa iya.

16 Busa silotan ko sia, kag buhian sia.

17 (Kay kinahanglan sia magbuhi sa ila sing isa ka binilanggo sa pandut.)

18 Kag nagsinggit sila tanan sing dungan, nga nagasiling, Patya ining tawo, kag buhii sa amon si Barabbas:

19 (Nga bangud sa isa ka ribok nga nahimo sa siudad, kag bangud sa pagpatay, ginsulud sia sa bilanggoan.)

20 Busa si Pilato, nga nagahandum sa pagbuhi kay Jesus, nagpamolong sa ila liwat.

21 Apang nagsinggit sila, nga nagasiling, Ilansang sia sa krus, ilansang sia sa krus.

22 Kag nagsiling sia sa ila sa ikatlo, Ngaa, ano bala nga kalautan ang nahimo niya? wala ako sing nakita sa iya nga kabangdanan sa kamatayon: busa silotan ko sia, kag buhian sia.

23 Kag nagpilit sila sa matonog nga mga tingug, nga nagapangayo nga ilansang sia sa krus. Kag ang mga tingug nila kag sang puno nga mga pari naglandas.

24 Kag si Pilato nagpamatbat nga ang ila ginapangayo himoon.

25 Kag ginbuhian niya sa ila sia nga bangud sa ribok kag pagpatay ginsulud sa bilanggoan, nga ila ginpangayo; apang si Jesus gintugyan niya sa kabubut-on nila.

26 Kag sang gindala nila sia, gindakup nila ang isa nga si Simon, nga isa ka taga-Cirene, nga gikan sa kaumhan, kag ginpapas-an nila sa iya ang krus, agud nga sia magdala sini sa olihi ni Jesus.

27 ś Kag may nagsonod sa iya nga dakung kadam-an sang katawohan, kag sang mga babaye, nga nagahaya man kag nagapanalabiton sa iya.

28 Apang si Jesus nga nagbalikid sa ila nagsiling, Mga babaying anak sang Jerusalem, dili kamo maghibi tungud sa akon, kondi maghibi kamo tungud sa inyo kaugalingon, kag tungud sa inyo mga anak.

29 Kay, yari karon, nagaabut ang mga adlaw, nga magasiling sila, Bulahan ang mga baw-as, kag ang mga taguangkan nga wala makadala, kag ang mga soso nga wala makapasoso.

30 Niyan magasugud sila sa pagsiling sa mga kabukiran, Pukani kami; kag sa mga kabakoloran, Taboni kami.

31 Kay kon ginahimo nila ining mga butang sa hilaw nga kahoy, ano bala ang himoon sa laya?

32 Kag may duha man, nga mga manugbuhat sang kalautan, nga gindul-ong nga palatyon upud sa iya.

33 Kag sang nag-abut sila sa duug, nga ginatawag Calbaryo, didto ginlansang nila sia sa krus, kag ang mga manugbuhat sang kalautan, ang isa sa too, kag ang isa sa wala.

34 ś Niyan si Jesus nagsiling, Amay, patawara sila; kay wala sila makahibalo sang ila ginahimo. Kag ginbahinbahin nila ang iya panapton, kag nagpapalaran.

35 Kag ang katawohan nagtindug nga nagatan-aw. Kag ang mga manugdumala man upud sa ila nagyaguta sa iya, nga nagasiling, Ang iban ginluwas niya; luwason niya ang iya kaugalingon, kon Cristo sia, ang pinili sang Dios.

36 Kag ang mga soldado man nag-uligyat sa iya, nga nagapalapit sa iya, kag nagatunghol sa iya sing langgaw,

37 Kag nagasiling, Kon ikaw ang hari sang mga Judio, luwasa ang imo kaugalingon.

38 Kag isa ka sinulat man ang nasulat sa ibabaw niya sa mga letra sang Griego, kag Latin, kag Hebreo, INI AMO ANG HARI SANG MGA JUDIO.

39 ś Kag ang isa sang mga manugbuhat sang kalautan nga nabitay nagbuyayaw sa iya, nga nagasiling, Kon Cristo ka, luwasa ang imo kaugalingon kag kami.

40 Apang ang isa nga nagasabat nagsabdong sa iya, nga nagasiling, Wala ka bala mahadluk sa Dios, sanglit yara ka sa amo man nga katagudilian?

41 Kag sa aton matarung gid; kay nagabaton kita sang nagakaigo nga balus sa aton mga buhat: apang ining tawo walay nahimo nga sayup.

42 Kag nagsiling sia kay Jesus, Ginoo, dumduma ako kon magsulud ka sa imo ginharian.

43 Kag si Jesus nagsiling sa iya, Sa pagkamatuud nagasiling ako sa imo, Karon nga adlaw manginkaupud ka nakon sa paraiso.

44 Kag mga ikan-um nga takna sadto, kag may kadudulman sa bug-os nga duta tubtub sa ikasiam nga takna.

45 Kag ang adlaw nagdulum, kag ang kumbung sang templo napihak sa tunga.

46 ś Kag sang si Jesus nakasinggit sa matonog nga tingug, nagsiling sia, Amay, sa imo mga kamut ginatugyan ko ang akon espiritu: kag sang nakasiling sia sini, nabugtoan sia sang ginhawa.

47 Karon sang nakita sang centurion ang nahanabu, ginhimaya niya ang Dios, nga nagasiling, Totoo gid nga ini matarung nga tawo.

48 Kag ang tanan nga katawohan nga nagtipon sa sinang talan-awon, sang nakita nila ang mga butang nga nahanabu, nagpamukpuk sang ila mga dughan kag nagpauli.

49 Kag ang tanan nga kilala niya, kag ang mga babaye nga nagsonod sa iya gikan sa Galilea, nagtindug sa malayo, nga nagatan-aw sining mga butang.

50 ś Kag, yari karon, may isa ka tawo nga ginhingalanan si Jose, isa ka manuglaygay; kag sia isa ka maayo nga tawo, kag matarung:

51 (Nga wala magsugut sa ila pagsinapul kag buhat;) taga-Arimatea sia, isa ka siudad sang mga Judio: nga naghulat man sang ginharian sang Dios.

52 Ining tawo nagkadto kay Pilato, kag nagpangayo sang lawas ni Jesus.

53 Kag ginpapanaug niya ini, kag ginputus ini sa panapton nga lino, kag ginpahamtang ini sa lulubngan nga ginguhab sa bato, nga wala pa gid mapahamtangi sing tawo.

54 Kag yadtong adlaw amo ang pag-aman, kag nagahilapit ang sabbath.

55 Kag ang mga babaye man, nga nag-abut upud sa iya gikan sa Galilea nagsonod, kag nagtan-aw sang lulubngan, kag kon paano ang pagpahamtang sang iya lawas.

56 Kag nagpauli sila, kag nag-aman sing mga pahumut kag mga ihalaplas; kag sa adlaw nga sabbath nagpahuway sono sa sogo.

KAPITULO 24

KARON sa nahaunang adlaw sang semana, nga aga pa gid, nagkadto sila sa lulubngan, nga nagadala sing mga pahumut nga ila naaman, kag nag-upud sa ila ang mga iban.

2 Kag nakita nila ang bato nga napaligid gikan sa lulubngan.

3 Kag nagsulud sila, kag wala nila makita ang lawas ni Ginoong Jesus.

4 Kag nahanabu, sang naligban gid sila nahanungud sini, yari karon, duha ka tawo nagtindug sa tupad nila nga may mga panapton nga masilaw:

5 Kag sang hinadlukan sila, kag nagdulunguk sa duta, nagsiling sila sa ila, Ngaa bala ginapangita ninyo ang buhi sa tunga sang mga patay?

6 Wala sia diri, kondi nabanhaw: panumduma kon paano nga nagpamolong sia sa inyo sang didto pa sia sa Galilea,

7 Nga nagasiling, Ang Anak sang tawo kinahanglan itugyan sa mga kamut sang mga tawo nga makasasala, kag ilansang sa krus, kag sa ikatlong adlaw mabanhaw.

8 Kag nadumduman nila ang iya mga polong,

9 Kag nagpauli gikan sa lulubngan, kag nagsugid sini tanan nga butang sa napulog isa, kag sa tanan nga iban.

10 Sila amo si Maria Magdalena, kag si Joana, kag si Maria nga iloy ni Santiago, kag ang iban nga mga babaye kaupud nila, nga nagsugid sining mga butang sa mga apostol.

11 Kag ang ila mga polong sa ila panan-aw daw mga patopato, kag wala nila sila pagpatiha.

12 Niyan si Pedro nagtindug, kag nagdalagan sa lulubngan; kag sang nagakuub, nakita niya ang mga panapton nga lino nga napahamtang sing pahain, kag nagtaliwan, nga natingala sa iya kaugalingon sa sinang nahanabu.

13 ś Kag, yari karon, sa sadto gid nga adlaw duha sa ila nagapakadto sa isa ka minoro nga ginhingalanan Emaus, nga mga kan-uman ka estadio ang kalayoon gikan sa Jerusalem.

14 Kag nagsugilanon sila sini tanan nga butang nga nahanabu.

15 Kag nahanabu, nga, sang nagasugilanon sila kag nagapainoino, si Jesus gid nagpalapit, kag naglakat upud sa ila.

16 Apang ang ila mga mata nakulapan sa bagay nga wala sila makakilala sa iya.

17 Kag nagsiling sia sa ila, Ano bala nga mga sugid ining ginahambalan ninyo, sa nagalakat kamo, kag nagakasubu?

18 Kag ang isa sa ila, nga ang iya ngalan si Cleopas, nga nagasabat nagsiling sa iya, Ikaw lamang bala ang isa ka dumoloong sa Jerusalem, kag wala makahibalo sang mga butang nga nahanabu didto sa sining mga adlaw?

19 Kag nagsiling sia sa ila, Ano bala nga mga butang? Kag nagsiling sila sa iya, Ang nahanungud kay Jesus sang Nazaret, nga isa ka manalagna nga gamhanan sa buhat kag sa polong sa atubangan sang Dios kag sang tanan nga katawohan:

20 Kag kon paano nga gintugyan sia sang puno nga mga pari kag sang amon mga manugdumala agud nga tagudilian sa kamatayon, kag ginlansang sia sa krus.

21 Apang nagsalig kami nga sia amo ang dapat nga magtubus sang Israel: kag labut pa sini tanan, karon amo ang ikatlo nga adlaw kutub sang pagkahanabu sining mga butang.

22 Hoo, kag ang pila sang mga babaye man nga kaupdanan namon nagpayanghag sa amon, nga yara sa lulubngan sing aga pa;

23 Kag sang wala nila makita ang iya lawas, nag-abut sila, nga nagasiling, nga nakakita man sila sing palanan-awon sang mga anghel, nga nagsiling nga sia buhi.

24 Kag ang pila sang mga kaupud namon nagkadto sa lulubngan, kag nakita ini subong sang ginsiling sang mga babaye: apang sia wala nila makita.

25 Niyan nagsiling sia sa ila, O mga buangbuang, kag makuli sing tagiposoon sa pagtoo sa tanan nga napamolong sang mga manalagna:

26 Indi bala kinahanglan nga ang Cristo mag-antus sining mga butang, kag magsulud sa iya himaya?

27 Kag sumugud kay Moises kag sa tanan nga manalagna, gintalastas niya sa ila sa bug-os nga mga kasulatan ang mga butang nahanungud sa iya kaugalingon.

28 Kag naghinamput sila sa minoro, nga ginapakadtoan nila: kag nagpahayag sia nga daw magapadayon pa sia.

29 Apang ginpilit nila sia, nga nagasiling, Pabilin ka sa amon: kay malapit na ang kahaponon, kag nagataliwan na ang adlaw. Kag nagsulud sia sa pagpabilin sa ila.

30 Kag nahanabu, sang nakalingkod sia sa pagkaon upud sa ila, nagkuha sia sang tinapay, kag ginpakamaayo ini, kag gintipiktipik, kag ginhatag sa ila.

31 Kag nagbukas ang ila mga mata, kag nakilala nila sia; kag sia nadula sa ila panolok.

32 Kag nagsinilingay sila, Wala bala nagadabdab ang aton tagiposoon sa sulud naton, sang nagpamolong sia sa aton sa dalan, kag sang gintalastas niya sa aton ang mga kasulatan?

33 Kag nagtindug sila sa sadto gid nga takna, kag nagbalik sa Jerusalem, kag nakita nila ang napulog isa nga nagtilipon, kag sila nga kaupud nila,

34 Nga nagasiling, Matuud gid nabanhaw ang Ginoo, kag nagpakita kay Simon.

35 Kag ginsugid nila ang mga butang nga nahanabu sa dalan, kag kon paano nga nakilala nila sia sa pagtipiktipik sang tinapay.

36 ś Kag sang nagpamolong sila sini, si Jesus gid nagtindug sa tunga nila, kag nagsiling sa ila, Paghidait sa inyo.

37 Apang nakugmat sila kag kinulbaan, kag naghunahuna nga nakakita sila sing isa ka espiritu.

38 Kag nagsiling sia sa ila, Ngaa bala nagakalatublag kamo? kag ngaa bala nga nagaabut ang mga panghunahuna sa inyo mga tagiposoon?

39 Tan-awa ang akon mga kamut kag ang akon mga tiil, nga ako gid ini: hikapa ninyo ako, kag tan-awa; kay ang isa ka espiritu walay unud kag mga tul-an, subong sang ginatan-aw ninyo nga ako may akon.

40 Kag sang nakasiling sia sini, ginpakita niya sa ila ang iya mga kamut kag ang iya mga tiil.

41 Kag sang indi pa sila makatoo bangud sa kalipay, kag natingala, nagsiling sia sa ila, May kalan-on bala kamo diri?

42 Kag ginhatagan nila sia sing bahin sang isa ka sinugba nga isda, kag sang uludlan sang dugus.

43 Kag ginkuha niya ini, kag ginkaon sa atubangan nila.

44 Kag nagsiling sia sa ila, Ini sila amo ang mga polong nga ginpamolong ko sa inyo, sang kaupud pa ako ninyo, nga ang tanan nga butang kinahanglan matuman, nga nasulat sa kasogoan ni Moises, kag sa mga manalagna, kag sa mga salmo, nahanungud sa akon.

45 Niyan ginbuksan niya ang ila paghangup, agud nga mahangpan nila ang mga kasulatan,

46 Kag nagsiling sa ila, Amo ining nasulat, kag amo ini ang nagkaigo nga ang Cristo mag-antus, kag mabanhaw gikan sa mga patay sa ikatlo nga adlaw:

47 Kag nga ang paghinulsul kag ang kapatawaran sang mga sala dapat iwali sa iya ngalan sa tanan nga kapungsuran, sumugud sa Jerusalem.

48 Kag kamo amo ang mga saksi sining mga butang.

49 ś Kag, yari karon, ginapadala ko ang saad sang akon Amay sa inyo: apang pabilin kamo sa siudad sang Jerusalem, tubtub nga masukluban kamo sing gahum gikan sa kahitaasan.

50 ś Kag gindala niya sila sa gowa tubtub sa Betania, kag ginbayaw niya ang iya mga kamut, kag ginpakamaayo sila.

51 Kag nahanabu, samtang nagapakamaayo sia sa ila, ginhamulag sia sa ila, kag ginbayaw pa langit.

52 Kag sila nagsimba sa iya, kag nagbalik sa Jerusalem nga may dakung kalipay:

53 Kag didto sila sa templo sing dalayon, nga nagadayaw kag nagapakamaayo sa Dios. Amen.

AMAZING GRACE BIBLE INSTITUTE