ANG BALAAN NGA BIBLIA

LIBRO SANG MGA

HUKOM

KAPITULO 1

KARON nahanabu sa tapus sang kamatayon ni Josue, nga ang kaanakan sang Israel nagpamangkot sa GINOO, nga nagasiling, Sin-o bala ang magataklad sing una tungud sa amon batok sa mga Canaanhon, sa pagpakig-away sa ila?

2 Kag ang GINOO nagsiling, Ang Juda magataklad: yari karon, gintugyan ko ang duta sa iya kamut.

3 Kag si Juda nagsiling kay Simeon nga iya utud, Taklad ka kaupud nakon sa akon bahin, agud nga magpakig-away kita sa mga Canaanhon; kag ako man magaupud sa imo sa imo bahin. Gani si Simeon nag-upud sa iya.

4 Kag nagtaklad ang Juda; kag gintugyan sang GINOO sa ila kamut ang mga Canaanhon kag ang mga Pereznon: kag sa ila ginpatay nila sa Bezec ang napulo ka libo ka tawo.

5 Kag nakita nila si Adoni-bezec sa Bezec: kag nagpakig-away sila sa iya, kag ginpatay nila ang mga Canaanhon kag ang mga Pereznon.

6 Apang si Adoni-bezec nagpalagyo; kag ginlagas nila sia, kag gindakup sia, kag gin-utud ang mga kumalagku sang iya mga kamut kag sang iya mga tiil.

7 Kag si Adoni-bezec nagsiling, Kapitoan ka hari, nga nautdan sang mga kumalagku sang ila mga kamut kag sang ila mga tiil, nagapamolot sang ila kalan-on sa idalum sang akon latok: sono sa nahimo ko, amo ang ginbalus sang Dios sa akon. Kag gindala nila sia sa Jerusalem, kag napatay sia didto.

8 Karon ang kaanakan ni Juda nagpakig-away batok sa Jerusalem, kag nag-agaw sini, kag ginlaglag ini sa sulab sang espada, kag ginsonog sa kalayo ang siudad.

9 ś Kag ugaling ang kaanakan ni Juda nagdulhog sa pag-away batok sa mga Canaanhon, nga nagpuyo sa bukid, kag sa bagatnan, kag sa nalupyakan.

10 Kag ang Juda naggubat sa mga Canaanhon nga nagpuyo sa Hebron: (karon ang ngalan sang Hebron anay amo ang Kiryat-arba:) kag ginpatay nila si Sesai, kag si Ahiman, kag si Talmai.

11 Kag gikan didto gingubat niya ang mga pumuluyo sang Debir: kag ang ngalan sang Debir amo anay ang Kiryat-sefer:

12 Kag si Caleb nagsiling, Ang nagalaglag sang Kiryat-sefer, kag nagaagaw sini, ipaasawa ko sa iya si Acsa nga akon anak.

13 Kag si Otniel nga anak nga lalaki ni Cenaz, manghud ni Caleb, nag-agaw sini: kag ginpaasawa niya sa iya si Acsa nga iya anak.

14 Kag nahanabu, sang nag-abut si Acsa sa kay Otniel, ginbuyuk sia ni Acsa nga magpangayo sa iya amay sing latagon: kag nagpanaug si Acsa gikan sa iya asno; kag si Caleb nagsiling sa iya, Ano bala ang buut mo?

15 Kag sia nagsiling sa iya, Hatagi ako sing pagpakamaayo: kay ginhatagan mo ako sang duta nga bagatnan; hatagi man ako sing mga tuburan sang tubig. Kag ginhatagan sia ni Caleb sang mga tuburan nga naibabaw kag sang mga tuburan nga naubus.

16 ś Kag ang kaanakan sang Cenhanon, ugangan nga lalaki ni Moises, nagtaklad gikan sa siudad sang mga palma nga kahoy kaupud sang kaanakan ni Juda pakadto sa kamingawan sang Juda, nga yara sa bagatnan sang Arad; kag nagkadto sila kag nagpuyo kaupud sang katawohan.

17 Kag si Juda nagkadto upud kay Simeon nga iya utud, kag ginpatay nila ang mga Canaanhon nga nagpuyo sa Sefat, kag ginlaglag ini sing bug-os. Kag ginhingalanan ang siudad Horma.

18 Gin-agaw man sang Juda ang Gaza pati ang iya ginsakpan, kag ang Ascalon pati ang iya ginsakpan, kag ang Ecron pati ang iya ginsakpan.

19 Kag ang GINOO nag-upud kay Juda; kag gintabog niya ang mga pumuluyo sang bukid; apang wala makatabog sang mga pumuluyo sang nalupyakan, bangud nga sila may mga kangga nga salsalon.

20 Kag ginhatag nila ang Hebron kay Caleb, sono sa nasiling ni Moises: kag gintabog niya gikan didto ang tatlo ka lalaki nga anak ni Anak.

21 Kag wala pagtaboga sang kaanakan ni Benjamin ang mga Jebusnon nga nagpuyo sa Jerusalem; apang ang mga Jebusnon nagapuyo kaupud sang kaanakan ni Benjamin sa Jerusalem tubtub sini nga adlaw.

22 ś Kag ang panimalay ni Jose, sila man nagtaklad batok sa Bet-el: kag nag-upud sa ila ang GINOO.

23 Kag ang panimalay ni Jose nagpalampitaw sang Bet-el. (Karon ang ngalan sang siudad sadto anay amo ang Luz.)

24 Kag ang mga espiya nakakita sing tawo nga nagagowa sa siudad, kag nagsiling sila sa iya, Ipakita sa amon, ginaampo namon sa imo, ang salamputan pasulud sa siudad, kag magakalooy kami sa imo.

25 Kag sang ginpakita niya sa ila ang salamputan pasulud sa siudad, ginlaglag nila ang siudad sa sulab sang espada; apang ginpalakat nila ang tawo pati ang bug-os niya nga panimalay.

26 Kag ang tawo nagkadto sa duta sang mga Hithanon, kag nagpatindug sing siudad, kag ginhingalanan ini Luz: nga amo ang ngalan sini tubtub sini nga adlaw.

27 ś Kag wala pagtaboga sang Manases ang mga pumuluyo sang Bet-sean kag sang iya mga banwa, ukon ang Taanac kag sang iya mga banwa, ukon ang mga pumuluyo sang Dor kag sang iya mga banwa, ukon ang mga pumuluyo sang Ibleam kag sang iya mga banwa, ukon ang mga pumuluyo sang Meguido kag sang iya mga banwa: apang ang mga Canaanhon buut magpuyo sa sina nga duta.

28 Kag nahanabu, sang nagbakud ang Israel, nga ginpabayad nila ang mga Canaanhon sang buhis, kag wala sila pagtaboga sing bug-os.

29 ś Kag wala pagtaboga sang Efraim ang mga Canaanhon nga nagpuyo sa Gezer; kondi ang mga Canaanhon nagpuyo sa tunga nila sa Gezer.

30 ś Kag wala pagtaboga sang Zabulon ang mga pumuluyo sang Kitron, ukon ang mga pumuluyo sang Nahalol; kondi ang mga Canaanhon nagpuyo sa tunga nila, kag nangin manugbayad sang buhis.

31 ś Kag wala pagtaboga sang Aser ang mga pumuluyo sang Acco, ukon ang mga pumuluyo sang Zidon, ukon sang Alab, ukon sang Azcib, ukon sang Helba, ukon sang Afec, ukon sang Rehob:

32 Kondi ang mga Asernon nagpuyo sa tunga sang mga Canaanhon, ang mga pumuluyo sang duta: kay wala nila pagtaboga sila.

33 ś Kag wala pagtaboga ni Neftali ang mga pumuluyo sang Bet-semes, ukon ang mga pumuluyo sang Bet-anat; kondi nagpuyo sia sa tunga sang mga Canaanhon, ang mga pumuluyo sang duta: wala sing sapayan ang mga pumuluyo sang Bet-semes kag sang Bet-anat nangin manugbayad sang buhis sa ila.

34 Kag ang mga Amornon nagdusdus sang kaanakan ni Dan sa bukid: kay wala sila magtugut sa ila sa pagdulhog sa nalupyakan:

35 Apang ang mga Amornon buut magpuyo sa bukid nga Heres sa Ayalon, kag sa Saalbim: apang ang kamut sang panimalay ni Jose naglandas, sa bagay nga nangin manugbayad sila sang buhis.

36 Kag ang ginsakpan sang mga Amornon kutub sa taklaran sang Acrabim, kutub sa dakung bato, kag pa ibabaw.

KAPITULO 2

KAG ang anghel sang GINOO nagtaklad gikan sa Gilgal pa Boquim, kag nagsiling, Ginpataklad ko kamo gikan sa Egipto, kag gindala kamo sa duta nga ginsumpa ko sa inyo mga kaamayan; kag nagsiling ako, Dili ko gid paglalison ang akon katipan sa inyo.

2 Kag dili kamo magpakigkatipan sa mga pumuluyo sini nga duta; lumpagon ninyo ang ila mga halaran: apang wala kamo magtuman sang akon tingug: ngaa bala nga naghimo kamo sini?

3 Busa ako man nagsiling, Indi ko sila pagtabogon gikan sa atubangan ninyo; kondi sila manginsubong sa mga tunuk sa inyo mga kilid, kag ang ila mga dios manginsiod sa inyo.

4 Kag nahanabu, sang nagpamolong ang anghel sang GINOO sini nga mga polong sa tanan nga kaanakan sang Israel, nga ang katawohan nagbayaw sang ila tingug, kag naghibi.

5 Kag ginhingalanan nila yadtong duug Boqui: kag naghalad sila didto sa GINOO.

6 ś Kag sang napataliwan ni Josue ang katawohan, ang kaanakan sang Israel nagpauli ang tagsa ka tawo sa iya panublion sa pagtag-iya sang duta.

7 Kag ang katawohan nag-alagad sa GINOO sa tanan nga adlaw ni Josue, kag sa tanan nga adlaw sang mga tigulang nga naglawig pa kay Josue, nga nakakita sang bug-os nga binuhatan nga daku sang GINOO, nga iya nahimo tungud sa Israel.

8 Kag si Josue nga anak nga lalaki ni Nun, ang alagad sang GINOO, napatay nga isa ka gatus kag napulo ka tuig.

9 Kag ginlubung nila sia sa dulunan sang iya panublion sa Timnat-heres, sa bukid sang Efraim, sa aminhan nga kilid sang bakolod nga Gaas.

10 Kag yadtong bug-os man nga kaliwatan ginsimpon sa ila mga kaamayan: kag may nagbangon nga isa pa ka kaliwatan sa olihi nila, nga wala makakilala sa GINOO, ukon sang mga buhat nga iya nahimo tungud sa Israel.

11 ś Kag ang kaanakan sang Israel naghimo sang malaut sa itololok sang GINOO, kag nag-alagad sa mga Baalim:

12 Kag ginbayaan nila ang GINOONG Dios sang ila mga kaamayan, nga nagpagowa sa ila sa duta sang Egipto, kag nagsonod sa iban nga mga dios, sa mga dios sang katawohan sa palibut nila, kag nagyaub sila sa ila, kag ginpaakig ang GINOO.

13 Kag ginbayaan nila ang GINOO, kag nag-alagad sa kay Baal kag kay Astarot.

14 ś Kag ang kaakig sang GINOO nagdabdab batok sa Israel, kag gintugyan niya sila sa mga kamut sang mga mangangati nga nag-ati sa ila, kag ginbaligya niya sila sa mga kamut sang ila mga kaaway sa palibut, agud nga indi na sila makatindug sa atubangan sang ila mga kaaway.

15 Bisan diin sila naggowa, ang kamut sang GINOO batok sa ila sa malaut, sono sa nasiling sang GINOO, kag sono sa nasumpa sang GINOO sa ila: kag sila yara sa dakung kapipit-an.

16 ś Walay sapayan ang GINOO nagbangon sing mga hukom, nga nagluwas sa ila gikan sa kamut sadtong mga nag-ati sa ila.

17 Kag bisan pa wala sila magpamati sa ila mga hukom, kondi nagmakihilawason sila sa pagsonod sa iban nga mga dios, kag nagyaub sila sa ila: naglipas sila sing madali gikan sa dalanon nga ginlaktan sang ila mga kaamayan, nga nagatuman sang mga sogo sang GINOO; apang sila wala maghimo sing subong.

18 Kag sang nagbangon ang GINOO sa ila sing mga hukom, niyan ang GINOO nag-upud sa hukom, kag nagluwas sa ila gikan sa kamut sang ila mga kaaway sa tanan nga adlaw sang hukom: kay nagpahinulsul ini sa GINOO bangud sang ila mga pag-ugayong tungud sa mga nagpigus sa ila kag nagtublag sa ila.

19 Kag nahanabu, sang napatay ang hukom, nga nagbalik sila, kag naggawi sing labi pa kadunut sa ila mga kaamayan, sa pagsonod sa iban nga mga dios sa pag-alagad sa ila, kag sa pagyaub sa ila; wala sila mag-untat sa ila kaugalingon nga mga hinimoan, ukon sa ila binatinggilan nga paagi.

20 ś Kag ang kaakig sang GINOO nagdabdab batok sa Israel; kag nagsiling sia, Bangud ining katawohan naglapas sang akon katipan nga ginsogo ko sa ila mga kaamayan, kag wala magpamati sa akon tingug;

21 Ako man kutub karon indi magtabog gikan sa atubangan nila sang bisan ano sang mga pungsud nga ginbilin ni Josue sang napatay sia:

22 Agud nga paagi sa ila matilawan ko ang Israel, kon bala magabantay sila sang dalanon sang GINOO sa paglakat sa sini, subong sang pagbantay sini sang ila mga kaamayan, ukon indi.

23 Busa ginbilin sang GINOO yadtong mga pungsud, nga wala pagtaboga sila sing madali; kag wala niya sila pag-itugyan sa kamut ni Josue.

KAPITULO 3

KARON amo ini ang mga pungsud nga ginbilin sang GINOO, sa pagtilaw sang Israel paagi sa ila, ang kapid-an sang Israel nga wala makaagi sang tanan nga inaway sa Canaan;

2 Lamang nga ang mga kaliwatan sang kaanakan sang Israel makakilala, sa pagtudlo sa ila sang inaway, sa kubus gid nga kutub sang una wala makakilala sini;

3 Nga amo, ang lima ka ginoo sang mga Filistinhon, kag ang tanan nga Canaanhon, kag ang mga Sidonhon, kag ang mga Hevhanon nga nagpuyo sa bukid nga Libano, kutub sa bukid nga Baal-hermon tubtub sa salamputan sang Hamat.

4 Kag ini sila among pagtilaw sang Israel paagi sa ila, sa paghibalo kon bala magapamati sila sa mga sogo sang GINOO, nga iya ginsogo sa ila mga kaamayan paagi sa kamut ni Moises.

5 ś Kag ang kaanakan sang Israel nagpuyo sa tunga sang mga Canaanhon, sang mga Hithanon, kag sang mga Amornon, kag sang mga Pereznon, kag sang mga Hevhanon, kag sang mga Jebusnon:

6 Kag nagpangasawa sila sang ila mga anak nga babaye, kag ginhatag ang ila mga anak nga babaye sa mga anak nga lalaki nila, kag nag-alagad sa ila mga dios.

7 Kag ang kaanakan sang Israel naghimo sang malaut sa itololok sang GINOO, kag nalimot sa GINOO nga ila Dios, kag nag-alagad sa mga Baalim kag sang mga puong-puong sang kakahoyan.

8 ś Busa ang kaakig sang GINOO nagdabdab batok sa Israel, kag ginbaligya niya sila sa kamut ni Cusan-risataim nga hari sang Mesopotamia: kag nag-alagad ang kaanakan sang Israel kay Cusan-risataim sing walo ka tuig.

9 Kag sang nagtuaw ang kaanakan sang Israel sa GINOO, ang GINOO nagbangon sing manluluwas sa kaanakan sang Israel, nga nagluwas sa ila, si Otniel nga anak nga lalaki ni Cenaz, manghud ni Caleb.

10 Kag ang Espiritu sang GINOO nag-abut sa iya, kag naghukom sia sa Israel, kag naggowa sia sa pagpakig-away: kag gintugyan sang GINOO sa iya kamut si Cusan-risataim nga hari sang Mesopotamia; kag naglandas ang iya kamut batok kay Cusan-risataim.

11 Kag ang duta nagpahuway sing kap-atan ka tuig. Kag napatay si Otniel nga anak nga lalaki ni Cenaz.

12 ś Kag liwat ang kaanakan sang Israel naghimo sang malaut sa itololok sang GINOO: kag ginpabaskug sang GINOO si Eglon nga hari sang Moab batok sa Israel, bangud nga nakahimo sila sang malaut sa itololok sang GINOO.

13 Kag gintingub niya kaupud niya ang mga anak ni Amon kag ni Amalec, kag naglakat sia kag ginlaglag ang Israel, kag gintag-iyahan ang siudad sang mga palma nga kahoy.

14 Gani nag-alagad ang kaanakan sang Israel kay Eglon nga hari sang Moab sing napulog walo ka tuig.

15 Apang sang nagtuaw ang kaanakan sang Israel sa GINOO, ang GINOO nagbangon sing manluluwas sa ila, si Ehud nga anak nga lalaki ni Gera, ang Benjaminhon, tawong walis: kag ang kaanakan sang Israel nagpadala paagi sa iya sing regalo kay Eglon nga hari sang Moab.

16 Apang si Ehud naghimo nga sa iya sing espada nga duha sing sulab, isa ka maniko ang kalaba; kag gintaklus niya ini sa idalum sang iya panapton sa iya paa nga too.

17 Kag ginhatag niya ang regalo kay Eglon nga hari sang Moab: kag si Eglon tawo nga tama katambok.

18 Kag sang nakatapus si Ehud sa pagdolot sang regalo, ginpalakat niya ang mga tawo nga nagdala sang regalo.

19 Apang sia iya nagbalik sa mga batong tinigban sa luyo sang Gilgal, kag nagsiling, May balita ako nga tago nga sa imo, O hari: nga nagsiling, Hipus. Kag naghalin sa iya ang tanan nga nagtindug sa luyo niya.

20 Kag nagkadto si Ehud sa iya; kag sia naglingkod sa hulut nga sa pangadlawan, nga among sa iya lamang. Kag si Ehud nagsiling, May balita ako gikan sa Dios nga sa imo. Kag nagtindug sia gikan sa lingkoran niya.

21 Kag ginkuut ni Ehud ang iya kamut nga wala, kag gingabut ang espada gikan sa iya paa nga too, kag ginbuno ini sa iya tiyan:

22 Kag ang polo man nagsalup upud sa sulab; kag ang tambok nagtabon sa sulab, sa bagay nga wala niya magabut ang espada sa iya tiyan; kag ang laing naggowa.

23 Niyan si Ehud naggowa sa balkon, kag gintakpan sa iya ang mga ganhaan sang hulut, kag ginpintalan sila.

24 Sang nakagowa na sia, nag-abut ang mga alagad niya; kag sang nakita ina nila, yari karon, ang mga ganhaan sang hulut napintalan, nagsiling sila, Sa pagkamatuud nagapahuway sia sa hulut nga sa pangadlawan.

25 Kag naghulat sila tubtub nga nahuy-an sila: kag, yari karon, wala pa niya pagbuksi ang mga ganhaan sang hulut; busa ginkuha nila ang yabi, kag ginbuksan sila: kag, yari karon, ang ila ginoo napukan nga patay sa salog.

26 Kag si Ehud nagpalayo sang nagapalantang sila, kag nag-agi sa unhan sang mga batong tinigban, kag nagpalagyo pa Seirat.

27 Kag nahanabu, sang nag-abut sia, nga nagpatonog sia sing budyong sa bukid sang Efraim, kag ang kaanakan sang Israel nagdulhog kaupud niya gikan sa bukid, kag sia sa una nila.

28 Kag nagsiling sia sa ila, Sonod kamo sa akon: kay gintugyan sang GINOO sa inyo kamut ang inyo mga kaaway nga mga Moabnon. Kag nagdulhog sila sa olihi niya, kag gin-agaw nila ang mga obogan sang Jordan pa Moab, kag wala magtugut nga magtabok ang bisan sin-ong tawo.

29 Kag sa sadtong tion ginpatay nila sa Moab ang mga napulo ka libo ka lalaki, ang tanan mabakud, kag ang tanan isganan nga lalaki; kag wala sing bisan isa ka lalaki nga nakapalagyo.

30 Gani ang Moab ginsakup sadtong adlaw sa idalum sang kamut sang Israel. Kag ang duta may pahuway nga kawaloan ka tuig.

31 ś Kag sa olihi niya si Samgar nga anak nga lalaki ni Anat, nga nagpatay sa mga Filistinhon sing anum ka gatus ka lalaki sa suntok sa baka: kag sia man nagluwas sang Israel.

KAPITULO 4

KAG liwat ang kaanakan sang Israel naghimo sang malaut sa itololok sang GINOO, sang patay na si Ehud.

2 Kag ginbaligya sila sang GINOO sa kamut ni Jabin nga hari sang Canaan, nga naghari sa Hazor; ang kapitan sang iya kasoldadosan si Sisera, nga nagpuyo sa Haroset sang mga Gentil.

3 Kag ang kaanakan sang Israel nagtuaw sa GINOO: kay sia may siam ka gatus ka kangga nga salsalon; kag ginpigus niya ang kaanakan sang Israel sing lakas sa duha ka pulo ka tuig.

4 ś Kag si Debora, manalagna nga babaye, ang asawa ni Lapidot, naghukom sia sadtong tion sang Israel.

5 Kag nagpuyo sia sa idalum sang palma nga kahoy ni Debora sa ulut sang Rama kag Bet-el sa bukid nga Efraim: kag ang kaanakan sang Israel nagtaklad pakadto sa iya nga paghukman.

6 Kag nagpadala sia kag nagpatawag kay Barak nga anak nga lalaki ni Abinoam gikan sa Cades-neftali, kag nagsiling sa iya, Wala bala nagsogo ang GINOONG Dios sang Israel, nga nagasiling, Lakat kag magpalapit sa bukid nga Tabor, kag dala ka kaupud nimo sing napulo ka libo ka lalaki sa kaanakan sang Neftali kag sa kaanakan sang Zabulon?

7 Kag buyukon ko sa imo sa suba nga Kison si Sisera, ang kapitan sang kasoldadosan ni Jabin, pati sang iya mga kangga kag sang iya kadam-an; kag itugyan ko sia sa imo kamut.

8 Kag si Barak nagsiling sa iya, Kon ikaw mag-upud sa akon, niyan ako magalakat: apang kon indi ka mag-upud sa akon, niyan indi ako maglakat.

9 Kag nagsiling sia, Magaupud ako sa imo sa pagkamatuud: wala sing sapayan indi manginsa kadungganan mo ang imo paglakat; kay ibaligya sang GINOO si Sisera sa kamut sang babaye. Kag nagtindug si Debora, kag nag-upud kay Barak pa Cades.

10 ś Kag ginpatawag ni Barak ang Zabulon kag ang Neftali sa Cades; kag nagtaklad sia upud sang napulo ka libo ka lalaki sa olihi niya: kag si Debora nagtaklad kaupud niya.

11 Karon si Heber nga Cenhanon, nga gikan sa kaanakan ni Hobab nga ugangan ni Moises, nagbulag sa mga Cenhanon, kag nagpatindug sang iya layanglayang tubtub sa kapatagan sang Saananim, nga yara sa luyo sang Cades.

12 Kag ginpahayag nila kay Sisera nga si Barak nga anak nga lalaki ni Abinoam nagtaklad sa bukid nga Tabor.

13 Kag gintipon ni Sisera ang tanan niya nga kangga, siam ka gatus nga kangga nga salsalon, kag ang bug-os nga katawohan nga kaupud niya, kutub sa Haroset sang mga Gentil tubtub sa suba sang Kison.

14 Kag si Debora nagsiling kay Barak, Tindug ka; kay amo ini ang adlaw nga si Sisera gintugyan sang GINOO sa imo kamut: wala bala maggowa ang GINOO sa una nimo? Gani si Barak nagdulhog sa bukid nga Tabor, kag ang napulo ka libo ka lalaki sa olihi niya.

15 Kag gindaug sang GINOO si Sisera, kag ang tanan niyang kangga, kag ang bug-os niyang kasoldadosan, sa sulab sang espada sa atubangan ni Barak; sa bagay nga si Sisera nagpanaug sa iya kangga, kag nagpalagyo nga lakat lang.

16 Apang ginlagas ni Barak ang mga kangga, kag ang kasoldadosan, tubtub sa Haroset sang mga Gentil: kag ang bug-os nga kasoldadosan ni Sisera napukan sa sulab sang espada; kag wala sing lalaki nga nabilin.

17 Apang si Sisera nagpalagyo nga lakat lang sa layanglayang ni Jael nga asawa ni Heber nga Cenhanon: kay may paghidait sa tunga ni Jabin nga hari sang Hazor kag sang panimalay ni Heber nga Cenhanon.

18 ś Kag si Jael naggowa sa pagsugata kay Sisera, kag nagsiling sa iya, Sulud ka, ginoo ko, sulud ka sa akon; dili magkahadluk. Kag sang nakasulud sia sa iya sa layanglayang, gintabonan niya sia sing habol.

19 Kag nagsiling sia kay Jael, Paimna ako, ginaampo ko sa imo, sing diotay nga tubig; kay ginauhaw ako. Kag binuksan ni Jael ang isa ka suludlan sang gatas, kag ginpainum sia, kag gintabonan sia.

20 Liwat nagsiling sia sa iya, Tindug ka sa ganhaan sang layanglayang, kag kon ang bisan sin-o nga tawo mag-abut kag magpamangkot sa imo, kag magsiling, May lalaki bala diri? magsiling ka, Wala.

21 Niyan si Jael nga asawa ni Heber nagkuha sing palpal sang layanglayang, kag nagkuha sang palo, kag nagkadto sing hinay sa iya, kag ginpadulut ang palpal sa iya mga dungandungan, kag ginpalapus ini sa duta: kay hamook ang tolog niya kag lapyo. Gani napatay sia.

22 Kag, yari karon, sang si Barak naglagas kay Sisera, si Jael naggowa sa pagsugata sa iya, kag nagsiling sa iya, Kari, kag ipakita ko sa imo ang lalaki nga imo ginapangita. Kag sang nagsulud sia sa iya layanglayang, yari karon, si Sisera nagahigda nga patay, kag ang palpal yara sa iya mga dungandungan.

23 Gani sa sadtong adlaw ginpasakup sang Dios si Jabin nga hari sang Canaan sa atubangan sang kaanakan sang Israel.

24 Kag ang kamut sang kaanakan sang Israel nagdaug, kag naglandas batok kay Jabin nga hari sang Canaan, tubtub nga nalaglag nila si Jabin nga hari sang Canaan.

KAPITULO 5

NIYAN sa sadtong adlaw nag-amba si Debora kag si Barak nga anak nga lalaki ni Abinoam, nga nagasiling,

2 Dayawon ninyo ang GINOO bangud sang pagtimalus sang Israel, sang ang katawohan nagdolot sang ila kaugalingon sing kinabubut-on.

3 Pamati, O kamo nga mga hari; magdungug, O kamo nga mga prinsipe; ako, ako magaamba sa GINOO; magaamba ako sing pagdayaw sa GINOONG Dios sang Israel.

4 GINOO, sang paggowa mo gikan sa Seir, sang paglakat mo gikan sa latagon sang Edom, ang duta nagkurug, kag ang mga langit naholog, ang mga gal-um nagholog man sing tubig.

5 Ang mga bukid natunaw sa atubangan sang GINOO, ang Sinai sa atubangan sang GINOONG Dios sang Israel.

6 Sa mga adlaw ni Samgar, anak nga lalaki ni Anat, sa mga adlaw ni Jael, ang mga dalan nga daku wala maagihi, kag ang mga manlalakat naglatas sa mga banas.

7 Nagkululang ang mga pumuluyo sang mga minoro, nagkululang sila sa Israel, tubtub nga ako, si Debora, nagtindug, ako nagtindug nga iloy sa Israel.

8 Nagpili sila sing mga dios nga bag-o; niyan may inaway sa mga gawang: may nakit-an bala nga taming ukon bangkaw sa tunga sang kap-atan ka libo sa Israel?

9 Ang akon tagiposoon yara sa mga gobernador sang Israel, nga nagdolot sang ila kaugalingon sing kinabubut-on sa tunga sang katawohan. Pakamaayoha ninyo ang GINOO.

10 Hambal, kamo nga nagasakay sa maputi nga mga asno, kamo nga nagalingkod sa paghukom, kag nagalakat sa dalanon.

11 Sila nga naluwas sa kagahud sang mga manugpana sa mga duug nga salag-uban sing tubig, didto suliton nila ang matarung nga mga binuhatan sang GINOO, ang matarung nga mga binuhatan ayon sa mga pumuluyo sang iya mga minoro sa Israel: niyan ang katawohan sang GINOO magadulhog sa mga gawang.

12 Pagmata, pagmata, Debora: pagmata, pagmata, mitlang sing ambahanon: tindug, Barac, kag dalha ang imo mga bihag sa kabihagan, ikaw nga anak ni Ahinoam.

13 Niyan ginpadumala niya sia nga nabilin labaw sa mga dungganon sa tunga sang katawohan: ginpadumala ako sang GINOO labaw sa mga gamhanan.

14 Gikan sa Efraim may gamut gikan sa ila batok kay Amalec; sa olihi mo, Benjamin, sa tunga sang imo katawohan; gikan sa Maquir nagdulhog ang mga gobernador, kag gikan sa Zabulon sila nga nagakapyut sang pluma sang manugsulat.

15 Kag ang mga prinsipe sang Isacar upud kay Debora; si Isacar, kag si Barac man: ginpadala sia nga lakat lang pa nalupyakan. Bangud sang mga pagbinahinbahin ni Ruben may dalagkung mga panghunahuna sang tagiposoon.

16 Ngaa bala nagpuyo ka sa tunga sang mga toril sang carnero, sa pagpamati sang mga paglantoy sang mga panong? Bangud sang mga pagbinahinbahin ni Ruben may dalagkung mga pangusisa sang tagiposoon.

17 Si Galaad nagpabilin sa tabok sang Jordan: kag ngaa bala nga si Dan nagpabilin sa mga sakayan? Si Aser nagpabilin sa higad sang dagat, kag nagpuyo sa iya mga look.

18 Ang Zabulon kag ang Neftali katawohan nga nagpakatalagman sang ila mga kabuhi tubtub sa kamatayon sa mataas nga mga duug sang latagon.

19 Ang mga hari nag-abut kag nag-away, niyan nag-away ang mga hari sang Canaan sa Taanac sa ubay sang mga tubig sang Meguido; wala sila magkuha sing daug nga kuarta.

20 Sila nagpakig-away gikan sa langit; ang mga bitoon sa ila mga panlakatan nagpakig-away batok kay Sisera.

21 Ang suba sang Kison nag-anud sa ila, yadto nga dumaan nga suba, ang suba nga Kison. O kalag ko, nagtapak ka sang kusug.

22 Niyan ang mga koko sang kabayo nagkalabuka bangud sang mga pagtuwak, ang mga pagtuwak sang ila mga gamhanan.

23 Pakamalauta ninyo ang Meroz, nagsiling ang anghel sang GINOO, pakamalauta ninyo sing mapait ang mga pumuluyo sini; bangud nga wala mag-abut sila nga bulig sa GINOO, nga bulig sa GINOO batok sa gamhanan.

24 Bulahan labaw sa mga babaye si Jael nga asawa ni Heber nga Cenhanon, bulahan sia labaw sa mga babaye sa layanglayang.

25 Nangayo si Sisera sing tubig, kag ginhatagan niya sia sing gatas; gindalhan niya sia sing mantekilya sa halangdon nga pinggan.

26 Ginbutang niya ang iya kamut sa palpal, kag ang iya too nga kamut sa palo sang mga manugpangabudlay; kag ginpalpag niya si Sisera sang palo, ginwas-ag niya ang iya olo, sang ginpadutlan niya kag ginpalapsan ang iya mga dungandungan.

27 Sa iya tiilan nagduko sia, napukan sia, humamyang sia: sa iya tiilan nagduko sia, napukan sia: kon diin sia nagduko, didto sia napukan nga patay.

28 Ang iloy ni Sisera nagtan-aw sa isa ka bintana, kag nagtiabaw sa lipud sang balatibat, Ngaa bala nagdugay ang iya kangga sa pag-abut? ngaa bala nagalantang ang mga aliling sang iya mga kangga?

29 Ang iya maalam nga mga babaye nagsabat sa iya, hoo, nagsabat sia sa iya kaugalingon,

30 Wala bala sila nagdali? wala bala sila nagbahinbahin sang inagaw; sa isa ka lalaki isa ka dalaga ukon duha; sa kay Sisera ang inagaw nga sarisari ang mga duag, ang inagaw nga sarisari ang mga duag nga nabordahan, nga sarisari ang mga duag nga nabordahan sa pihak kag pihak, nga sa mga liog nila nga nag-agaw sang inagaw?

31 Gani magmawala ang tanan mo nga kaaway, O GINOO: apang ang mga nagahigugma sa iya manginsubong sang adlaw sa nagapadayon sia sa iya gahum. Kag ang duta may pahuway sing kap-atan ka tuig.

KAPITULO 6

KAG ang kaanakan sang Israel naghimo sang malaut sa itololok sang GINOO: kag gintugyan sila sang GINOO sa kamut sang Midian sing pito ka tuig.

2 Kag ang kamut sang Midian naglandas batok sa Israel: kag bangud sang mga Midianhon ang kaanakan sang Israel naghimo nga sa ila sing mga gikab sa mga bukid, kag sing mga lungib, kag sing mga pamakud.

3 Kag nahanabu, sang nakasab-ug ang Israel, nga nagtaklad ang mga Midianhon, kag ang mga Amalecnon, kag ang kaanakan sang sidlangan, nagtaklad sila batok sa ila;

4 Kag nagpahamtang sila sing kampo batok sa ila, kag ginlaglag ang patubas sang duta, tubtub nga maglambut ka sa Gaza, kag wala magbilin sing pangabuhian sa Israel, bisan carnero, ukon baka, ukon asno.

5 Kay nagtaklad sila pati ang ila kahayupan kag ang ila mga layanglayang, kag nag-abut sila nga madamu subong sang mga apan; kay sila kag ang ila mga camelyo indi maisip: kag nagsulud sila sa duta sa paglaglag sini.

6 Kag ang Israel nangin-imol gid bangud sang mga Midianhon; kag ang kaanakan sang Israel nagtuaw sa GINOO.

7 ś Kag nahanabu, sang nagtuaw ang kaanakan sang Israel sa GINOO bangud sang mga Midianhon,

8 Nga ang GINOO nagpadala sing manalagna sa kaanakan sang Israel, nga nagsiling sa ila, Amo ini ang ginasiling sang GINOONG Dios sang Israel, Ako nagpataklad sa inyo gikan sa Egipto, kag ginpagowa ko kamo sa balay sang kahiolipnan;

9 Kag ako nagluwas sa inyo sa kamut sang mga Egiptohanon, kag sa kamut sang tanan nga nagpigus sa inyo, kag gintabog sila gikan sa atubangan ninyo, kag ginhatag sa inyo ang ila duta;

10 Kag nagsiling ako sa inyo, Ako amo ang GINOO nga inyo Dios; dili kamo magkahadluk sa mga dios sang mga Amornon, nga sa ila duta nagapuyo kamo: apang wala kamo magtuman sa akon tingug.

11 ś Kag may nag-abut nga isa ka anghel sang GINOO, kag naglingkod sa idalum sang terebinto nga kahoy nga yara sa Ofra, nga naigo kay Joas nga Abi-ezernon: kag ang iya anak nga lalaki nga si Gideon nagawaswas sang trigo sa linasan sang ubas, sa pagtago sini sa mga Midianhon.

12 Kag ang anghel sang GINOO nagpahayag sa iya, kag nagsiling sa iya, Ang GINOO nagaupud sa imo, ikaw nga gamhanan nga lalaki nga isganan.

13 Kag si Gideon nagsiling sa iya, O Ginoo ko, kon ang GINOO nagaupud sa amon, ngaa bala niyan nahanabu ini tanan sa amon? kag diin na bala ang tanan niya nga milagro nga ginsugid sa amon sang amon mga kaamayan, nga nagasiling, Wala bala kami pagpataklara sang GINOO gikan sa Egipto? apang karon ginpabay-an kami sang GINOO, kag gintugyan kami sa kamut sang mga Midianhon.

14 Kag gintolok sia sang GINOO, kag nagsiling, Lakat sa sini nga imo kusug, kag magaluwas ka sang Israel sa kamut sang mga Midianhon: wala ko bala ikaw pag-ipadala?

15 Kag nagsiling sia sa iya, O Ginoo ko, paano bala nga pagluwas ko sang Israel? yari karon, ang akon panimalay imol sa Manases, kag ako amo ang kubus gid sa panimalay sang akon amay.

16 Kag ang GINOO nagsiling sa iya, Sa pagkamatuud ako magaupud sa imo, kag magalaglag ka sang mga Midianhon subong sang isa ka tawo.

17 Kag nagsiling sia sa iya, Kon karon nakaagum ako sang bugay sa imo itololok, niyan pakitai ako sing tanda nga ikaw nagapakighambal sa akon.

18 Dili ka maghalin diri, ginaampo ko sa imo, tubtub nga ako magbalik sa imo, kag magdala sang akon regalo, kag magbutang sini sa atubangan mo. Kag sia nagsiling, Ako magahulat tubtub nga magbalik ka.

19 ś Kag nagsulud si Gideon, kag naghanda sing tinday nga kanding, kag mga torta nga wala sing tapay nga isa ka efa nga harina: ang unud ginbutang niya sa alat, kag ginbutang niya ang sabaw sa kolon, kag gindala ini sa iya sa idalum sang terebinto nga kahoy, kag gindolot ini.

20 Kag ang anghel sang Dios nagsiling sa iya, Kuhaa ang unud kag ang mga torta nga wala sing tapay, kag itungtung sila sa sini nga dakung bato, kag boboan sang sabaw. Kag ginhimo niya ang amo.

21 ś Niyan ang anghel sang GINOO nagbayaw sang ukbung sang sungkud nga yara sa iya kamut, kag nagtandug sang unud kag sang mga torta nga wala sing tapay; kag may naggowa nga kalayo gikan sa dakung bato, kag naglamon sang unud kag sang mga torta nga wala sing tapay. Niyan ang anghel sang GINOO nagtaliwan sa iya itololok.

22 Kag sang nahantupan ni Gideon nga sia anghel sang GINOO, si Gideon nagsiling, Ahay, O Ginoong DIOS! kay bangud nakita ko ang anghel sang GINOO sa nawung kag nawung.

23 Kag ang GINOO nagsiling sa iya, Ang paghidait manginsa imo; dili ka magkahadluk: dili ka mapatay.

24 Niyan nagtukud didto si Gideon sing halaran sa GINOO, kag ginhingalanan ini Jehovah-shalom: tubtub sini nga adlaw yara pa ini sa Ofra sang mga Abi-ezernon.

25 ś Kag nahanabu sa amo nga gab-i, nga ang GINOO nagsiling sa iya, Kuhaa ang tinday nga baka nga lalaki sang imo amay, ang ikaduha nga tinday nga baka nga lalaki nga pito ka tuig, kag lumpaga ang halaran ni Baal nga iya sang imo amay, kag pudla ang puong-puong sang kakahoyan nga yara sa luyo sini:

26 Kag magtukud ka sing halaran sa GINOO nga imo Dios sa putokputokan sining dakung bato, sa nagakaigo nga duug, kag kuhaa ang ikaduha nga tinday nga baka nga lalaki, kag magdolot sing halad nga sinonog upud sang kahoy gikan sa puong-puong sang kakahoyan nga imo pudlon.

27 Niyan si Gideon nagkuha sing napulo ka lalaki sa iya mga alagad, kag naghimo sono sa nasiling sang GINOO sa iya: kag, bangud nga nahadluk sia sa panimalay sang iya amay, kag sa mga tawo sang siudad, sa bagay nga indi sia makahimo sini sa adlaw, ginhimo niya ini sa gab-i.

28 ś Kag sang pagkabangon sang mga lalaki sang siudad sing aga pa gid, yari karon, ang halaran ni Baal nalumpag na, kag napulud na ang puong-puong sang kakahoyan nga yara sa luyo sini, kag nahalad ang ikaduha nga tinday nga baka nga lalaki sa ibabaw sang halaran nga gintukud.

29 Kag nagsilingay sila, Sin-o bala ang naghimo sining butang? Kag sang nagpakiana sila kag namangkot, nagsiling sila, Si Gideon nga anak ni Joas ang naghimo sini nga butang.

30 Niyan ang mga tawo sang siudad nagsiling kay Joas, Pagowaa ang imo anak, agud nga mapatay sia: bangud nga ginlumpag niya ang halaran ni Baal, kag bangud nga ginpulud niya ang puong-puong sang kakahoyan nga yara sa luyo sini.

31 Kag si Joas nagsiling sa tanan nga nagtindug batok sa iya, Magapakigkasaba bala kamo tungud kay Baal? magaluwas bala kamo sa iya? ang magpakigkasaba tungud sa iya, patyon sia sa aga pa: kon sia isa ka dios, magpakigkasaba sia tungud sa iya kaugalingon, bangud nga may isa nga naglumpag sang iya halaran.

32 Busa sa sadto nga adlaw ginhingalanan niya sia si Jerubaal, nga nagasiling, Magpakigkasaba si Baal batok sa iya, bangud nga ginlumpag niya ang iya halaran.

33 ś Niyan ang tanan nga Midianhon kag ang mga Amalecnon kag ang kaanakan sang sidlangan nagtipon sing tingub, kag nagtabok, kag nagpahamtang sa nalupyakan sang Jezreel.

34 Apang ang Espiritu sang GINOO nag-abut kay Gideon, kag nagpatonog sia sing budyong; kag ang Abi-ezer nagtipon sa olihi niya.

35 Kag nagpadala sia sing mga manugbalita sa bug-os nga Manases; nga sila man nagtipon sa olihi niya: kag nagpadala sia sing mga manugbalita sa Aser, kag sa Zabulon, kag sa Neftali; kag sila nagtaklad sa pagsugata sa ila.

36 ś Kag si Gideon nagsiling sa Dios, Kon buut ka magluwas sang Israel paagi sa akon kamut, sono sa nasiling mo,

37 Yari karon, ako magabutang sing bulbul sang carnero sa salog; kag kon may ton-og sa bulbul lamang, kag mamala sa bug-os nga duta sa palibut, niyan makahibalo ako nga luwason mo ang Israel paagi sa akon kamut, sono sa nasiling mo.

38 Kag nahanabu sing subong: kay nagbangon sia sing aga pa sa madason nga adlaw, kag ginpuga ang bulbul, kag ginlubag nga nagtubud ang ton-og gikan sa bulbul, isa ka yahong nga puno sang tubig.

39 Kag si Gideon nagsiling sa Dios, Indi magdabdab ang imo kaakig batok sa akon, kag magapamolong ako sini nga makaisa lamang: patilawa ako, ginaampo ko sa imo, sini nga makaisa lamang sa bulbul; magmamala karon sa bulbul lamang, kag may ton-og sa bug-os nga duta.

40 Kag ginhimo sang Dios ang subong sa sadtong gab-i: kay mamala sa bulbul lamang, kag may ton-og sa bug-os nga duta.

KAPITULO 7

NIYAN si Jerubaal, nga amo si Gideon, kag ang tanan nga katawohan nga kaupud niya, nagbangon sing aga pa, kag nagpahamtang sa luyo sang bobon sang Harod: sa bagay nga ang kasoldadosan sang mga Midianhon yara sa aminhan nga kilid nila, sa luyo sang bakolod sang More, sa nalupyakan.

2 Kag ang GINOO nagsiling kay Gideon, Ang katawohan nga kaupud nimo tama kadamu sa akon sa pagtugyan sang mga Midianhon sa ila mga kamut, basi nga ang Israel magpabugal sila batok sa akon, nga nagasiling, Ang akon gid nga kamut nagluwas sa akon.

3 Busa karon, ibantala sa mga idulungug sang katawohan, nga nagasiling, Ang bisan sin-o nga mahadlukon kag nagakurug, magbalik sia kag magtaliwan sing aga pa gikan sa bukid nga Galaad. Kag may nagbalik sang katawohan nga duha ka pulo kag duha ka libo; kag may nagpabilin nga napulo ka libo.

4 Kag ang GINOO nagsiling kay Gideon, Tama pa gid kadamu ang katawohan; padulhoga sila sa tubig, kag didto tilawan ko sila nga sa imo: kag ang bisan sin-o nga isiling ko sa imo, Ini magaupud sa imo, ang amo magaupud sa imo; kag ang bisan sin-o nga isiling ko sa imo, Ini indi mag-upud sa imo, ang amo indi mag-upud sa imo.

5 Gani ginpadulhog niya ang katawohan sa tubig: kag ang GINOO nagsiling kay Gideon, Ang tagsatagsa nga nagalaklak sang tubig sang iya dila, subong sang paglaklak sang ido, painon mo sia; subong man ang tagsatagsa nga nagaduko nga nagaluhud sa pag-inum.

6 Kag ang kadamuon sang mga naglaklak, nga nagabutang sang ila kamut sa baba nila, tatlo ka gatus ka lalaki: apang ang tanan nga nabilin sang katawohan nagduko nga nagaluhud sa pag-inum sang tubig.

7 Kag ang GINOO nagsiling kay Gideon, Paagi sa tatlo ka gatus ka lalaki nga naglaklak luwason ko kamo, kag itugyan ang mga Midianhon sa imo kamut: kag papauli-a ang tanan nga nabilin sang katawohan ang tagsa ka tawo sa iya duug.

8 Gani ang katawohan nagdala sing mga balon sa ila kamut, kag sang ila mga budyong: kag ginpapauli niya ang tanan nga nabilin sang Israel ang tagsa ka lalaki sa iya layanglayang, kag ginhawiran yadtong tatlo ka gatus ka lalaki: kag ang kasoldadosan sang Midian yara sa ubus niya sa nalupyakan.

9 ś Kag nahanabu sa amo nga gab-i, nga ang GINOO nagsiling sa iya, Tindug ka, dulhog ka sa kasoldadosan; kay natugyan ko ini sa imo kamut.

10 Apang kon nahadluk ka sa pagdulhog, dulhog ka kaupud ni Pura nga imo alagad sa kasoldadosan:

11 Kag mabatian mo ang ginasiling nila; kag ugaling ang imo mga kamut magabaskug sa pagdulhog sa kasoldadosan. Niyan sia nagdulhog upud si Pura nga iya alagad sa nahigad gid nga bahin sang mga lalaki nga lupit sa hinganiban nga yara sa kasoldadosan.

12 Kag ang mga Midianhon kag ang mga Amalecnon kag ang tanan nga kaanakan sang sidlangan nahamtang sa nalupyakan kaangay sa kadamuon sang apan; kag ang ila mga camelyo dimaisip, subong sang balas nga yara sa baybayon sa kadamuon.

13 Kag sang nag-abut si Gideon, yari karon, may tawo nga nagsugid sing damgo sa iya kaupud, kag nagsiling, Yari karon, nagdamgo ako sing isa ka damgo, kag, yari karon, ang isa ka bilog nga torta sang tinapay nga sebada nagligid pakadto sa kasoldadosan sang Midian, kag naglambut sa layanglayang, kag nagbunggo sini sa bagay nga napukan ini, kag nagbaliskad sini, sa bagay nga ang layanglayang naghaplak.

14 Kag ang iya kaupud nagsabat kag nagsiling, Ini indi liwan kondi ang espada ni Gideon nga anak ni Joas, isa ka lalaki sang Israel: kay gintugyan sang Dios sa iya kamut ang Midian, kag ang bug-os nga kasoldadosan.

15 Kag sang si Gideon nakabati sang pagsugid sang damgo, kag sang iya kasaysayan, nagsimba sia, kag nagbalik sia sa kasoldadosan sang Israel, kag nagsiling, Tindug kamo; kay natugyan sang GINOO sa inyo kamut ang kasoldadosan sang Midian.

16 Kag ginbahinbahin niya ang tatlo ka gatus ka lalaki sa tatlo ka kabon, kag nagbutang sia sang budyong sa kamut sang tagsa ka tawo, upud sang mga tibud nga wala sing sulud, kag sang mga sulo sa sulud sang mga tibud.

17 Kag nagsiling sia sa ila, Tolok kamo sa akon, kag maghimo sing subong: kag, yari karon, kon ako maglambut sa nahigad nga bahin sang kampo, niyan sono sa himoon ko, amo ang himoon ninyo.

18 Kon ako magpatonog sang budyong, ako kag ang tanan nga upud sa akon, niyan kamo magpatonog sang mga budyong man sa tagsa ka kilid sang bug-os nga kampo, kag magsiling, Ang espada sang GINOO, kag ni Gideon.

19 ś Gani si Gideon, kag ang isa ka gatus ka lalaki nga upud sa iya, nag-abut sa nahigad gid nga bahin sang kampo sa pagpamuno sang natunga nga pagpulaw; kag nakabutang sila sing bag-o pa lamang sang mga bantay: kag ginpatonog nila ang mga budyong, kag ginbuka ang mga tibud nga yara sa ila mga kamut.

20 Kag ang tatlo ka kabon nagpatonog sang mga budyong, kag nagbuka sang mga tibud, kag ginkaptan sa ila mga kamut nga wala ang mga sulo, kag sa ila mga kamut nga too ang mga budyong sa pagpatonog: kag nagsinggit sila, Ang espada sang GINOO, kag ni Gideon.

21 Kag nagtindug ang tagsa ka lalaki sa iya duug sa palibut sang kampo: kag ang bug-os nga kasoldadosan nagdalagan, kag nagsinggit sila, kag nagpalagyo.

22 Kag ginpatonog sang tatlo ka gatus ang mga budyong, kag ginbutang sang GINOO ang espada sang tagsa ka lalaki batok sa iya kaupud, sa bug-os nga kasoldadosan: kag ang kasoldadosan nagpalagyo tubtub sa Bet-sita sa Zererat, kag tubtub sa dulunan sang Abel-meloha, tubtub sa Tabat.

23 Kag nagtipon sing tingub ang mga lalaki sang Israel gikan sa Neftali, kag gikan sa Aser, kag gikan sa bug-os nga Manases, kag naglagas sang mga Midianhon.

24 ś Kag si Gideon nagpadala sing mga manugbalita sa bug-os nga bukid nga Efraim, nga nagasiling, Dulhog kamo batok sa mga Midianhon, kag agawa ninyo sa atubangan nila ang mga tubig tubtub sa Bet-bara kag sa Jordan. Gani ang tanan nga lalaki sang Efraim nagtipon sing tingub, kag gin-agaw nila ang mga tubig tubtub sa Bet-bara kag sa Jordan.

25 Kag gindakup nila ang duha ka prinsipe sang mga Midianhon, si Oreb kag si Zeeb; kag ginpatay nila si Oreb sa dakung bato sang Oreb, kag si Zeeb ginpatay nila sa linasan sang ubas sang Zeeb, kag ginlagas ang Midian, kag gindala nila ang mga olo ni Oreb kag ni Zeeb kay Gideon sa tabok sang Jordan.

KAPITULO 8

KAG ang mga lalaki sang Efraim nagsiling sa iya, Ngaa bala nga ginhimoan mo kami sing subong, nga wala mo kami pagtawga sang pagkadto mo sa pag-away batok sa mga Midianhon? Kag nagpakigsuay sila sa iya sing matigdas.

2 Kag nagsiling sia sa ila, Ano bala ang nahimo ko karon nga ipaanggid sa inyo? Indi bala ang sinaghaw sang mga ubas sang Efraim maayo pa sa patubas sang ubas sang Abi-ezer?

3 Gintugyan sang Dios sa inyo mga kamut ang mga prinsipe sang Midian, si Oreb kag si Zeeb: kag ano bala ang nasarangan ko sa paghimo nga ipaanggid sa inyo? Niyan ang kaakig nila batok sa iya nalugpayan, sang pagsiling niya sina.

4 ś Kag nag-abut si Gideon sa Jordan, kag nagtabok, sia, kag ang tatlo ka gatus ka lalaki nga kaupud niya, nga lapyo, apang nagalagas sa ila.

5 Kag nagsiling sia sa mga lalaki sang Sucot, Hatagi, ginaampo ko sa inyo, sing mga binilog sang tinapay ang katawohan nga nagasonod sa akon; kay sila ginalapyo, kag ako nagalagas kay Zeba kag kay Zalmuna, ang mga hari sang Midian.

6 ś Kag ang mga prinsipe sang Sucot nagsiling, Yara na bala karon ang mga kamut ni Zeba kag ni Zalmuna sa imo kamut, agud nga maghatag kami sing tinapay sa imo kasoldadosan?

7 Kag si Gideon nagsiling, Busa kon itugyan sang GINOO sa akon kamut si Zeba kag si Zalmuna, niyan gision ko ang inyo unud sa mga talongon sang kamingawan kag sa mga tunuk.

8 ś Kag gikan didto nagtaklad sia sa Penuel, kag nagpamolong sa ila sa amo nga bagay: kag ang mga lalaki sang Penuel nagsabat sa iya subong sang ginsabat sa iya sang mga lalaki sang Sucot.

9 Kag sia nagpamolong man sa mga lalaki sang Penuel, nga nagasiling, Kon ako magbalik sa paghidait, lumpagon ko ini nga torre.

10 ś Karon si Zeba kag si Zalmuna didto sa Carcor, kag upud sa ila ang ila mga kasoldadosan, mga napulo kag lima ka libo ka lalaki, ang tanan nga nabilin sang tanan nga mga kasoldadosan sang kaanakan sang sidlangan: kay may napukan nga isa ka gatus kag duha ka pulo ka libo ka lalaki nga naggabut sing espada.

11 ś Kag si Gideon nagtaklad sa dalan sang mga nagpuyo sa mga layanglayang sa sidlangan sang Noba kag sang Jogbea, kag naglaglag sang kasoldadosan: kay ang kasoldadosan naghinalig.

12 Kag sang si Zeba kag si Zalmuna nalagyo, ginlagas sila niya, kag gindakup niya ang duha ka hari sang Midian, si Zeba kag si Zalmuna, kag gindaug ang bug-os nga kasoldadosan.

13 ś Kag si Gideon nga anak nga lalaki ni Joas nagpauli gikan sa inaway sa wala pa magbutlak ang adlaw,

14 Kag gindakup ang isa ka pamatan-on nga lalaki sang mga lalaki sang Sucot, kag nagpamangkot sa iya: kag ginsugid niya sa iya ang mga prinsipe sang Sucot, kag ang mga tigulang sini, kapitoan kag pito ka lalaki.

15 Kag nag-abut sia sa mga lalaki sang Sucot, kag nagsiling, Tan-awa si Zeba kag si Zalmuna, nga tungud sa ila gin-uligyat ako ninyo, nga nagasiling, Yara na bala ang mga kamut ni Zeba kag ni Zalmuna sa imo kamut, agud nga maghatag kami sing tinapay sa imo mga tawo nga lapyo?

16 Kag nagkuha sia sang mga tigulang sang siudad, kag sang mga talongon sang kamingawan kag mga tunuk, kag sa ila gintudloan niya ang mga lalaki sang Sucot.

17 Kag ginlumpag niya ang torre sang Penuel, kag ginpatay ang mga lalaki sang siudad.

18 ś Niyan nagsiling sia kay Zeba kag kay Zalmuna, Ano bala nga sahi sang mga lalaki ang ginpatay ninyo sa Tabor? Kag sila nagsabat, Kon ano ikaw, amo sila; ang tagsatagsa kaangay sa mga anak sang hari.

19 Kag nagsiling sia, Mga utud ko sila nga lalaki, mga anak sang akon iloy: sa nagakabuhi ang GINOO, kon ginluwas ninyo sila nga buhi, indi ko kamo pagpatyon.

20 Kag nagsiling sia kay Jeter nga iya panganay, Tindug ka, kag patya sila. Apang ang pamatan-on wala maggabut sang iya espada: kay nahadluk sia, bangud nga sia pamatan-on pa.

21 Niyan nagsiling si Zeba kag si Zalmuna, Tindug ka, kag magdamhag sa amon: kay kon ano ang lalaki, amo ang iya kusug. Kag si Gideon nagtindug, kag nagpatay kay Zeba kag kay Zalmuna, kag nagkuha sang mga puni sa mga liog sang ila mga camelyo.

22 ś Niyan ang mga lalaki sang Israel nagsiling kay Gideon, Pangolo ka sa amon, ikaw, kag ang imo anak nga lalaki, kag ang imo man apo nga lalaki: kay naluwas mo kami gikan sa kamut sang Midian.

23 Kag si Gideon nagsiling sa ila, Indi gid ako magpangolo sa inyo, kag indi man ang akon anak nga lalaki magpangolo sa inyo: ang GINOO magapangolo sa inyo.

24 ś Kag si Gideon nagsiling sa ila, Buut ako magpangabay sa inyo, nga ang tagsa ka tawo sa inyo maghatag sa akon sang mga aritos gikan sa iya inagaw. (Kay may mga aritos nga bulawan sila, bangud nga mga Ismaelnon sila.)

25 Kag nagsabat sila, Ihatag namon sila sing kinabubut-on. Kag naghumlad sila sing panapton, kag nagpilak didto ang tagsa ka tawo sang mga aritos gikan sa iya inagaw.

26 Kag ang kabug-aton sang mga aritos nga bulawan nga iya ginpangayo isa ka libo kag pito ka gatus ka siclo nga bulawan; luwas sang mga puni, kag sang mga baliog, kag sang panapton nga purpura nga yara sa mga hari sang Midian, kag luwas sang mga kadena nga yara sa mga liog sang ila mga camelyo.

27 Kag sa ila sini naghimo si Gideon sing efod, kag ginbutang ini sa iya siudad, sa Ofra: kag ang bug-os nga Israel nagmakihilawason sa pagsonod sini didto: ining butang nanginsiod kay Gideon, kag sa iya panimalay.

28 ś Sa amo ang Midian gindaug sa atubangan sang kaanakan sang Israel, agud nga wala na sila makautwas sang ila mga olo. Kag ang duta may kalinong nga kap-atan ka tuig sa mga adlaw ni Gideon.

29 ś Kag si Jerubaal nga anak nga lalaki ni Joas naglakat kag nagpuyo sa iya balay nga kaugalingon.

30 Kag si Gideon may kapitoan ka anak nga lalaki nga ginpanganak gikan sa iya lawas: kay may madamu sia sing asawa.

31 Kag ang iya oloasawa nga didto sa Siquem, sia man nag-anak nga sa iya sing lalaki, nga ginhingalanan niya si Abimelec.

32 ś Kag si Gideon nga anak nga lalaki ni Joas napatay sa maayong katigulangon, kag ginlubung sa lulubngan sang iya amay nga si Joas, sa Ofra sang mga Abi-ezernon.

33 Kag nahanabu, sa gilayon sang napatay si Gideon, ang kaanakan sang Israel nagbalik liwat, kag nagmakihilawason sa pagsonod sa mga Baalim, kag naghimo sang Baal-berit nga ila dios.

34 Kag wala magdumdum ang kaanakan sang Israel sa GINOO nga ila Dios, nga nagluwas sa ila gikan sa kamut sang tanan nilang kaaway sa tagsa ka luyo:

35 Kag wala sila magpakita sing kalolo sa panimalay ni Jerubaal, nga amo, si Gideon, sono sa tanan nga pagkaayo nga napakita niya sa Israel.

KAPITULO 9

KAG si Abimelec nga anak nga lalaki ni Jerubaal nagkadto sa Siquem sa mga utud nga lalaki sang iya iloy, kag nagpakighambal sa ila, kag sa bug-os nga panimalay sang balay sang amay sang iya iloy, nga nagasiling,

2 Isiling, ginaampo ko sa inyo, sa mga idulungug sang tanan nga tawo sang Siquem, Kon labi pa bala kaayo sa inyo, nga ang tanan nga anak nga lalaki ni Jerubaal, nga kapitoan ka tawo, magpangolo sa inyo, ukon nga ang isa magpangolo sa inyo? dumduma man nga ako inyo tul-an kag inyo unud.

3 Kag ang mga utud sang iya iloy nagpamolong nahanungud sa iya sa mga idulungug sang tanan nga tawo sang Siquem sini tanan nga polong: kag ang ila mga tagiposoon nabuyuk sa pagsonod kay Abimelec; kay nagsiling sila, Aton utud sia.

4 Kag ginhatagan nila sia sing kapitoan ka bilog nga pilak gikan sa balay ni Baal-berit, nga ginhinakay ni Abimelec sa mga tawo nga walay pulus kag mapatuyangon, nga nagsonod sa iya.

5 Kag nagkadto sia sa balay sang iya amay sa Ofra, kag ginpatay ang iya mga utud nga lalaki nga mga anak ni Jerubaal, nga kapitoan ka tawo, sa isa ka bato: apang nabilin si Jotam nga kamanghuran nga anak nga lalaki ni Jerubaal; kay nanago sia.

6 Kag ang tanan nga tawo sang Siquem nagtilipon sing tingub, kag ang bug-os nga panimalay ni Milo, kag nagkadto kag naghimo kay Abimelec nga hari, sa luyo sang kapatagan sang haligi nga yara sa Siquem.

7 ś Kag sang ginsugid nila ini kay Jotam, nagkadto sia kag nagtindug sa putokputokan sang bukid nga Gerizim, kag nagbayaw sang iya tingug, kag nagsinggit, kag nagsiling sa ila, Pamatii ninyo ako, kamo nga mga tawo sang Siquem, agud nga ang Dios magpamati sa inyo.

8 Ang mga kahoy nagkadto sa isa ka tion sa paghaplas sing hari sa ibabaw nila; kag nagsiling sila sa kahoy nga olivo, Maghari ka sa amon.

9 Apang ang kahoy nga olivo nagsiling sa ila, Bayaan ko bala ang akon katambok, nga tungud sa akon ginapadunggan nila ang Dios kag ang tawo, kag magkadto nga itib-ong labaw sa mga kahoy?

10 Kag ang mga kahoy nagsiling sa higuera nga kahoy, Kari ka, kag maghari sa amon.

11 Apang ang higuera nga kahoy nagsiling sa ila, Bayaan ko bala ang akon katam-is, kag ang akon maayong bunga, kag magkadto nga itib-ong labaw sa mga kahoy?

12 Niyan ang mga kahoy nagsiling sa puno sang ubas, Kari ka, kag maghari sa amon.

13 Kag ang puno sang ubas nagsiling sa ila, Bayaan ko bala ang akon alak, nga nagalipay sang Dios kag sang tawo, kag magkadto nga itib-ong labaw sa mga kahoy?

14 Niyan ang tanan nga kahoy nagsiling sa sapinit nga kahoykahoy, Kari ka, kag maghari sa amon.

15 Kag ang sapinit nga kahoykahoy nagsiling sa mga kahoy, Kon sa pagkamatuud ginahaplas ako ninyo nga hari sa inyo, niyan kari kag ibutang ang inyo pagsalig sa akon landong: apang kon indi, maggowa ang kalayo sa sapinit nga kahoykahoy, kag maglamon sang mga cedro nga kahoy sang Libano.

16 Busa karon, kon naghisayo kamo sing matuud kag matarung, nga ginhimo ninyo nga hari si Abimelec, kag kon naghisayo kamo sing maayo kay Jerubaal, kag sa iya panimalay, kag nakahimo sa iya sono sa nagakaigo sa iya mga kamut;

17 (Kay ang akon amay nagpakig-away tungud sa inyo, kag nagpasimpalad gid sang iya kabuhi, kag nagluwas sa inyo sa kamut sang Midian:

18 Kag kamo nagtindug batok sa panimalay sang akon amay sining adlaw, kag nagpatay sang iya mga anak nga lalaki, nga kapitoan ka tawo, sa isa ka bato, kag naghimo kay Abimelec, ang anak sang iya alagad nga babaye, nga hari sa mga tawo sang Siquem, bangud nga inyo utud sia;)

19 Kon kamo niyan nakahisayo sing matuud kag matarung kay Jerubaal kag sa iya panimalay sining adlaw, niyan magkalipay kamo kay Abimelec, kag sia man magkalipay sa inyo:

20 Apang kon wala, maggowa ang kalayo gikan kay Abimelec, kag maglamon sang mga tawo sang Siquem, kag sang panimalay ni Milo; kag maggowa ang kalayo gikan sa mga tawo sang Siquem, kag gikan sa panimalay ni Milo, kag maglamon kay Abimelec.

21 Kag si Jotam nagdalagan kag nagpalagyo, kag nagkadto sa Beer, kag nagpuyo didto, sa kahadluk kay Abimelec nga iya utud.

22 ś Sang si Abimelec nakahari sa Israel sing tatlo ka tuig,

23 Niyan ang Dios nagpadala sing espiritu nga malaut sa tunga ni Abimelec kag sa mga tawo sang Siquem; kag ang mga tawo sang Siquem nagluib kay Abimelec:

24 Agud nga ang pagpintas nga nahimo sa kapitoan ka anak nga lalaki ni Jerubaal mag-abut, kag ang dugo nila maholog kay Abimelec nga ila utud, nga nagpatay sa ila; kag sa mga tawo sang Siquem, nga nagbulig sa iya sa pagpatay sang iya mga utud.

25 Kag ang mga tawo sang Siquem nagbutang sing mga manugpuut sa iya sa putokputokan sang mga bukid, kag ginbuyong nila ang tanan nga nag-agi sa sadtong dalanon sa luyo nila: kag ginsugid ini kay Abimelec.

26 Kag si Gaal nga anak nga lalaki ni Ebed nag-abut upud ang iya mga utud, kag nagkadto sa Siquem: kag ang mga tawo sang Siquem nagsalig sa iya.

27 Kag nagkadto sila sa mga latagon, kag nagpamupo sa ila mga ulubasan, kag naglinas sang mga ubas, kag nagkasadya, kag nagsulud sa balay sang ila dios, kag nagkaon kag nag-inum, kag nagpakamalaut kay Abimelec.

28 Kag si Gaal nga anak nga lalaki ni Ebed nagsiling, Sin-o bala si Abimelec, kag sin-o bala si Siquem, nga mag-alagad kita sa iya? indi bala sia ang anak ni Jerubaal? kag si Zebul nga iya opisyal? mag-alagad sa mga tawo ni Hamor nga amay ni Siquem: kay ngaa bala mag-alagad kita sa iya?

29 Kag buut ko sa Dios kuntani nga ining katawohan yari sa idalum sang akon kamut! niyan pahalinon ko si Abimelec. Kag nagsiling sia kay Abimelec, Dugangi ang imo kasoldadosan, kag gowa ka.

30 ś Kag sang si Zebul nga manugdumala sang siudad nakabati sang mga polong ni Gaal nga anak nga lalaki ni Ebed, nagdabdab ang iya kaakig.

31 Kag nagpadala sia sing mga manugbalita sing tago kay Abimelec, nga nagasiling, Yari karon, si Gaal nga anak ni Ebed kag ang iya mga utud nag-abut sa Siquem; kag, yari karon, ginapabakud nila ang siudad batok sa imo.

32 Busa karon tindug ka sa kagab-ihon, ikaw kag ang katawohan nga kaupud nimo, kag magpuut kamo sa latagon:

33 Kag mahanabu, nga sa kaagahon, sa gilayon sa pagbutlak sang adlaw, magbangon ka sing aga pa, kag gubaton ang siudad: kag, yari karon, kon sia kag ang katawohan kaupud niya maggowa batok sa imo, niyan himoon mo sa ila sono sa imo kahigayonan.

34 ś Kag si Abimelec nagtindug, kag ang bug-os nga katawohan nga upud sa iya, sa kagab-ihon, kag nagpuut sila batok sa Siquem sa apat ka kabon.

35 Kag si Gaal nga anak nga lalaki ni Ebed naggowa, kag nagtindug sa salamputan sang gawang sang siudad: kag si Abimelec nagtindug, kag ang katawohan nga upud sa iya, gikan sa pulut-an.

36 Kag sang nalantawan ni Gaal ang katawohan, nagsiling sia kay Zebul, Yari karon, may nagadulhog nga mga tawo gikan sa mga putokputokan sang mga bukid. Kag si Zebul nagsiling sa iya, Ginatolok mo ang landong sang mga bukid subong nga daw mga tawo.

37 Kag si Gaal nagpamolong liwat kag nagsiling, Tan-awa, may mga tawo nga nagadulhog paagi sa tunga sang duta, kag ang isa ka kabon nagapakari sa dalanon sang kapatagan sang Meonenim.

38 Niyan si Zebul nagsiling sa iya, Diin na bala karon ang imo baba, nga nagsiling ka, Sin-o bala si Abimelec, nga mag-alagad kita sa iya? indi bala ini ang katawohan nga gintamay mo? gowa ka, ginaampo ko karon, kag awayon sila.

39 Kag si Gaal naggowa sa atubangan sang mga tawo sang Siquem, kag nagpakig-away kay Abimelec.

40 Kag ginlagas sia ni Abimelec, kag nagpalagyo sia sa atubangan niya, kag madamu ang napukan kag napilasan, tubtub sa salamputan sang gawang.

41 Kag si Abimelec nagpuyo sa Aruma: kag gintabog ni Zebul si Gaal kag ang iya mga utud, agud nga indi sila magpuyo sa Siquem.

42 Kag nahanabu sa madason nga adlaw, nga ang katawohan nagkadto sa latagon; kag nagsugid sila kay Abimelec.

43 Kag ginkuha niya ang katawohan, kag ginbahinbahin sila sa tatlo ka kabon, kag nagpuut sa latagon, kag naglantaw, kag, yari karon, ang katawohan nagagowa sa siudad; kag nagtindug sia batok sa ila, kag ginpatay sila.

44 Kag si Abimelec, kag ang kabon nga kaupud niya, nagsolong, kag nagtindug sa salamputan sang gawang sang siudad: kag ang duha ka kabon nagdamhag sa bug-os nga katawohan nga yadto sa mga latagon, kag ginpatay sila.

45 Kag si Abimelec nag-away batok sa siudad sa bug-os sadtong adlaw; kag gin-agaw niya ang siudad, kag ginpatay ang katawohan nga yara sa sulud, kag ginlaglag ang siudad, kag ginsab-ugan ini sing asin.

46 ś Kag sang nakabati sini ang tanan nga tawo sa torre sang Siquem, nagsulud sila sa kuta sang balay sang dios nga si Berit.

47 Kag ginsugid kay Abimelec, nga nagtilipon sing tingub ang tanan nga tawo sang torre sang Siquem.

48 Kag si Abimelec nagtaklad sa bukid nga Salmon, sia kag ang bug-os nga katawohan nga kaupud niya; kag si Abimelec nagdala sing wasay sa iya kamut, kag nagtapas sing sanga gikan sa kakahoyan, kag nagkuha sini, kag ginpas-an ini sa iya abaga, kag nagsiling sa katawohan nga kaupud niya, Ang nakita ninyo nga ginahimo ko, dalidali kamo, kag maghimo subong sang nahimo ko.

49 Kag sa among bagay ang bug-os nga katawohan nagtapas ang tagsa ka tawo sang iya sanga, kag nagsonod kay Abimelec, kag ginbutang sila sa kuta, kag gintutdan sing kalayo ang kuta sa ibabaw nila; sa bagay nga ang tanan nga tawo sang torre sang Siquem nagkalamatay man, mga isa ka libo ka lalaki kag mga babaye.

50 ś Niyan si Abimelec nagkadto sa Tebes, kag nagpatindug sing kampo batok sa Tebes, kag gin-agaw ini.

51 Apang sa tunga sang siudad may torre nga malig-on, kag nagpalagyo didto ang tanan nga lalaki kag babaye, kag sila tanan sa siudad, kag nagpangtakup sila sa sulud, kag nagsaka sila sa atop sang torre.

52 Kag nagkadto si Abimelec sa torre, kag nagpakig-away batok sini, kag nagpalapit sa ganhaan sang torre sa pagtutud sini sa kalayo.

53 Kag ginholog sang isa ka babaye ang bato sang galingan sa ibabaw sang olo ni Abimelec, kag naboong ang iya bagol.

54 Niyan gintawag niya sing madali ang iya pamatan-on nga lalaki nga manugdala sang iya hinganiban, kag nagsiling sa iya, Gabuta ang imo espada, kag patya ako, agud nga ang mga tawo indi magsiling nahanungud sa akon, Isa ka babaye nagpatay sa iya. Kag ginbuno sia sang iya pamatan-on nga lalaki, kag napatay sia.

55 Kag sang nakita sang mga tawo sang Israel nga patay na si Abimelec, nagpauli ang tagsa ka tawo sa iya duug.

56 ś Sa amo ginbalusan sang Dios ang pagkamalaut ni Abimelec, nga iya ginhimo sa iya amay, sa pagpatay sang iya kapitoan ka utud:

57 Kag ang bug-os nga pagkamalaut sang mga tawo sang Siquem ginbalus sang Dios sa ibabaw sang ila mga olo: kag nag-abut sa ila ang pagpakamalaut ni Jotam nga anak nga lalaki ni Jerubaal.

KAPITULO 10

KAG madason kay Abimelec may nagtindug sa pagluwas sang Israel nga si Tola nga anak ni Pua, ang anak ni Dodo, lalaki sang Isacar; kag nagpuyo sia sa Samir sa bukid nga Efraim.

2 Kag naghukom sia sang Israel sing duha ka pulo kag tatlo ka tuig, kag napatay, kag ginlubung sa Samir.

3 ś Kag madason sa iya nagtindug si Jair, nga Galaadnon, kag naghukom sang Israel sing duha ka pulo kag duha ka tuig.

4 Kag may katloan ka anak nga lalaki sia nga nagsakay sa katloan ka tinday nga asno, kag may katloan sila ka siudad, nga ginahingalanan Havot-jair tubtub sining adlaw, nga yara sa duta sang Galaad.

5 Kag napatay si Jair, kag ginlubung sa Kamon.

6 ś Kag ang kaanakan sang Israel liwat naghimo sang malaut sa itololok sang GINOO, kag nag-alagad sa mga Baalim, kag kay Astarot, kag sa mga dios sang Siria, kag sa mga dios sang Zidon, kag sa mga dios sang Moab, kag sa mga dios sang mga anak ni Amon, kag sa mga dios sang mga Filistinhon, kag ginbayaan nila ang GINOO, kag wala mag-alagad sa iya.

7 Kag nagdabdab ang kaakig sang GINOO batok sa Israel, kag ginbaligya niya sila sa mga kamut sang mga Filistinhon, kag sa mga kamut sang mga anak ni Amon.

8 Kag sadtong tuig gintublag kag ginpigus nila ang kaanakan sang Israel: sa napulog walo ka tuig, ang tanan nga kaanakan sang Israel nga didto sa tabok sang Jordan sa duta sang mga Amornon, nga yara sa Galaad.

9 Labut pa ang mga anak ni Amon nagtabok sang Jordan sa pagpakig-away man batok kay Juda, kag batok kay Benjamin, kag batok sa panimalay ni Efraim; sa bagay nga ang Israel nagkalisud sing tama.

10 ś Kag ang kaanakan sang Israel nagtuaw sa GINOO, nga nagasiling, Kami nakasala batok sa imo, bangud nga amon ginbayaan ang amon Dios, kag nag-alagad pa gid sa mga Baalim.

11 Kag ang GINOO nagsiling sa kaanakan sang Israel, Wala ko bala pagluwasa kamo sa mga Egiptohanon, kag sa mga Amornon, sa mga anak ni Amon, kag sa mga Filistinhon?

12 Ang mga Zidonhon man, kag ang mga Amalecnon, kag ang mga Maonhon, nagpigus sa inyo; kag nagtuaw kamo sa akon, kag ginluwas ko kamo gikan sa ila kamut.

13 Apang kamo nagbiya sa akon, kag nag-alagad sa iban nga mga dios: busa indi na ako magluwas sa inyo.

14 Lakat kamo kag magtuaw sa mga dios nga ginpili ninyo; magluwas sila sa inyo sa tion sang inyo kangitngitan.

15 ś Kag ang kaanakan sang Israel nagsiling sa GINOO, Nakasala kami: himoa sa amon ang bisan anong maayo sa imo; lamang luwasa kami, ginaampo namon sa imo, sining adlaw.

16 Kag ginsikway nila sa ila ang mga dios nga dumuloong, kag nag-alagad sa GINOO: kag ang iya kalag nagkasubu bangud sang pagkakailo sang Israel.

17 Niyan ang mga anak ni Amon nagtipon sing tingub, kag nagpahamtang sing kampo sa Galaad. Kag ang kaanakan sang Israel nagtipon sing tingub, kag nagpahamtang sing kampo sa Mizpe.

18 Kag ang katawohan kag ang mga prinsipe sang Galaad, nagsilingay, Sin-o bala nga tawo nga magasugud sa pagpakig-away batok sa mga anak ni Amon? sia manginpangolo sa tanan nga pumuluyo sang Galaad.

KAPITULO 11

KARON si Jefte nga Galaadnon gamhanan nga lalaki nga isganan, kag anak sia sang babaye nga alpot: kag si Galaad nagpanganak kay Jefte.

2 Kag ang asawa ni Galaad nag-anak nga sa iya sing mga lalaki; kag nagdalagku ang mga anak sang iya asawa, kag gintabog nila si Jefte, kag nagsiling sa iya, Dili ka magpanubli sa balay sang amon amay; kay anak ka sang iban nga babaye.

3 Niyan si Jefte nagpalagyo gikan sa iya kauturan, kag nagpuyo sa duta sang Tob: kag nagtipon kay Jefte ang mga tawo nga walay pulus, kag naggowa sila upud sa iya.

4 ś Kag nahanabu sa pag-alagisud sang panag-on, nga ang mga anak ni Amon nagpakig-away sa Israel.

5 Kag sang nagpakig-away batok sa Israel ang mga anak ni Amon, ang mga tigulang sang Galaad naglakat sa pagkuha kay Jefte gikan sa duta sang Tob:

6 Kag nagsiling sila kay Jefte, Kari ka, kag manginkapitan namon, agud nga makapakig-away kita sa mga anak ni Amon.

7 Kag si Jefte nagsiling sa mga tigulang sang Galaad, Wala bala ninyo ako pagdumti, kag pagtaboga sa balay sang akon amay? kag ngaa bala nga nagakari kamo sa akon karon nga yara kamo sa kalisdanan?

8 Kag ang mga tigulang sang Galaad nagsiling kay Jefte, Busa nagbalik kami sa imo karon, agud nga mag-upud ka sa amon, kag magpakig-away sa mga anak ni Amon, kag manginpangolo ka namon sa tanan nga pumuluyo sang Galaad.

9 Kag si Jefte nagsiling sa mga tigulang sang Galaad, Kon papaulion ninyo ako liwat sa pagpakig-away sa mga anak ni Amon, kag itugyan sila sang GINOO sa atubangan nakon, manginpangolo bala ako ninyo?

10 Kag ang mga tigulang sang Galaad nagsiling kay Jefte, Ang GINOO manginsaksi sa tunga naton, kon indi kami maghimo sono sa imo mga polong.

11 Niyan si Jefte nag-upud sa mga tigulang sang Galaad, kag ang katawohan naghimo sa iya nga pangolo kag kapitan sa ila: kag si Jefte nagmitlang sang tanan niya nga polong sa atubangan sang GINOO sa Mizpe.

12 ś Kag si Jefte nagpadala sing mga manugbalita sa hari sang mga anak ni Amon, nga nagasiling, Ano bala ang imo sa akon, nga nagkari ka sa akon sa pagpakig-away sa akon duta?

13 Kag ang hari sang mga anak ni Amon nagsabat sa mga manugbalita ni Jefte, Bangud nga gin-agaw sang Israel ang akon duta, sang pagtaklad nila gikan sa Egipto, kutub sa Arnon tubtub sa Jaboc, kag tubtub sa Jordan: busa karon iuli mo liwat yadtong mga duta sing mahidaiton.

14 Kag liwat si Jefte nagpadala sing mga manugbalita sa hari sang mga anak ni Amon:

15 Kag nagsiling sa iya, Amo ini ang ginasiling ni Jefte, Ang Israel wala mag-agaw sang duta sang Moab, ukon sang duta sang mga anak ni Amon:

16 Apang sang nagtaklad ang Israel gikan sa Egipto, kag naglatas sang kamingawan tubtub sa Mapulang dagat, kag nag-abut sa Cades;

17 Niyan ang Israel nagpadala sing mga manugbalita sa hari sang Edom, nga nagasiling, Paagiha ako, ginaampo ko sa imo, sa imo duta: apang wala magpamati ang hari sang Edom sa sini. Kag sa among bagay sila nagpadala sa hari sang Moab: apang wala sia nagsugut: kag ang Israel nagpuyo sa Cades.

18 Niyan naglatas sila sa kamingawan, kag naglibut sa duta sang Edom, kag sa duta sang Moab, kag nag-abut sa luyo sang sidlangan nga kilid sang duta sang Moab, kag nagpahamtang sa tabok sang Arnon, apang wala magsulud sa dulunan sang Moab: kay ang Arnon amo ang dulunan sang Moab.

19 Kag nagpadala ang Israel sing mga manugbalita kay Sihon nga hari sang mga Amornon, ang hari sang Hesbon; kag ang Israel nagsiling sa iya, Paagiha kami, ginaampo namon sa imo, sa imo duta pakadto sa akon duug.

20 Apang si Sihon wala magsalig sa Israel sa pagpaagi sa iya dulunan: apang gintipon sing tingub ni Sihon ang bug-os niyang katawohan, kag nagpahamtang sa Jahaz, kag nagpakig-away sa Israel.

21 Kag ang GINOONG Dios sang Israel nagtugyan kay Sihon kag sang bug-os niyang katawohan sa kamut sang Israel, kag ginlaglag nila sila: gani ginpanag-iyahan sang Israel ang bug-os nga duta sang mga Amornon, ang mga pumuluyo sadtong duta.

22 Kag ginpanag-iyahan nila ang tanan nga mga ginsakpan sang mga Amornon, kutub sa Arnon tubtub sa Jaboc, kag kutub sa kamingawan tubtub sa Jordan.

23 Gani karon gin-agawan sang GINOONG Dios sang Israel ang mga Amornon sa atubangan sang Israel nga iya katawohan, kag dapat mo bala panag-iyahan sila?

24 Indi mo bala pagpanag-iyahan inang ginahatag ni Cemos nga imo dios sa imo sa pagpanag-iya? Gani ang bisan sin-o nga sobolon sang GINOO nga amon Dios sa atubangan namon, sila amon panag-iyahan.

25 Kag karon labi ka pa bala kaayo kay Balac nga anak ni Zipor, hari sang Moab? nakasumpung bala sia batok sa Israel, ukon nakapakig-away bala sia batok sa ila,

26 Samtang ang Israel nagpuyo sing tatlo ka gatus ka tuig sa Hesbon kag sa iya mga kabanwaanan, kag sa Aroer kag sa iya mga kabanwaanan, kag sa tanan nga siudad nga yara sa ubay sang mga dulunan sang Arnon? busa ngaa bala nga wala ninyo sila pagbawi-a sa sulud sadtong tion?

27 Busa ako wala makasala batok sa imo, kondi ginahimoan mo ako sing sayup sa pagpakig-away sa akon: ang GINOO nga Hukom manginhukom sining adlaw sa tunga sang kaanakan sang Israel kag sang mga anak ni Amon.

28 Apang ang hari sang mga anak ni Amon wala magpamati sang mga polong ni Jefte nga ginpadala niya sa iya.

29 ś Niyan ang Espiritu sang GINOO nag-abut kay Jefte, kag naglatas sia sa Galaad kag sa Manases, kag naglatas sa Mizpe sang Galaad, kag gikan sa Mizpe sang Galaad naglatas sia pakadto sa mga anak ni Amon.

30 Kag si Jefte nagsaad sang saad sa GINOO, kag nagsiling, Kon itugyan mo sing totoo sa akon mga kamut ang mga anak ni Amon,

31 Niyan ang bisan ano nga maggowa sa mga ganhaan sang akon balay sa pagsugata sa akon, kon magpauli ako sa paghidait gikan sa mga anak ni Amon, sa pagkamatuud ini mangin-iya sang GINOO, kag idolot ko ini nga sa halad nga sinonog.

32 ś Gani si Jefte naglatas pakadto sa mga anak ni Amon sa pagpakig-away sa ila; kag gintugyan sila sang GINOO sa iya mga kamut.

33 Kag ginlaglag sila niya sa tama ka daku nga kamatay kutub sa Aroer, tubtub nga mag-abut ka sa Minit, duha ka pulo ka siudad, kag tubtub sa kapatagan sang mga ulubasan. Gani ang mga anak ni Amon gindaug sa atubangan sang kaanakan sang Israel.

34 ś Kag nag-abut si Jefte sa Mizpe sa iya balay, kag, yari karon, ang iya anak nga babaye naggowa sa pagsugata sa iya nga may mga pandarita kag may mga sinaut: kag sia bugtong niyang anak; luwas sa iya wala na sia sing anak nga lalaki ukon anak nga babaye.

35 Kag nahanabu, sang nakita sia ni Jefte, nga ginkusnit niya ang iya mga panapton, kag nagsiling, Ahay, anak ko! ginpapaubus mo gid ako, kag ikaw isa sang mga nagapakalisud sa akon: kay nakabungat ako sang akon baba sa GINOO, kag indi na ako makaisul.

36 Kag sia nagsiling sa iya, Amay ko, kon nabungat mo ang imo baba sa GINOO, himoa sa akon inang sono sa naggowa sa imo baba; sa bagay nga ang GINOO nakatimalus tungud sa imo sa imo mga kaaway, sa mga anak ni Amon.

37 Kag nagsiling sia sa iya amay, Himoa ining butang sa akon: pabayai ako sing duha ka bulan, agud nga magtaklad ako kag magdulhog sa mga bukid, kag maghaya sang akon pagkaulay, ako kag ang akon mga kaupdanan.

38 Kag nagsiling sia, Lakat ka. Kag ginpalakat sia niya sing duha ka bulan: kag nagtaliwan sia upud ang iya mga kaupdanan, kag naghaya sang iya pagkaulay sa mga bukid.

39 Kag nahanabu sa tapus ang duha ka bulan, nga nagbalik sia sa iya amay, nga naghimo sa iya sono sa iya saad nga ginsaad niya: kag wala sia makakilala sing lalaki. Kag ini kinabatasan sa Israel,

40 Nga ang babaye nga mga anak sang Israel nagkadto tuigtuig sa paglalaw sa anak nga babaye ni Jefte nga Galaadnon sing apat ka adlaw sa tuig.

KAPITULO 12

KAG nagtilipon sing tingub ang mga lalaki sang Efraim, kag nag-alagi nayon sa aminhan, kag nagsiling kay Jefte, Ngaa bala nga naglatas ka sa pagpakig-away sa mga anak ni Amon, kag wala magtawag sa amon sa paglakat upud sa imo? sonogon namon sa kalayo ang imo balay sa ibabaw nimo.

2 Kag si Jefte nagsiling sa ila, Ako kag ang akon katawohan yara sa dakung pagpakigsumpung sa mga anak ni Amon; kag sang nagtawag ako sa inyo, wala ako ninyo pagluwasa sa ila mga kamut.

3 Kag sang nakita ko nga wala ako ninyo pagluwasa, ginpasimpalaran ko ang akon kabuhi, kag naglatas batok sa mga anak ni Amon, kag gintugyan sila sang GINOO sa akon kamut: ngaa bala niyan nga nagtaklad kamo sa akon sining adlaw, sa pagpakig-away sa akon?

4 Niyan gintipon sing tingub ni Jefte ang tanan nga lalaki sang Galaad, kag nagpakig-away sa Efraim: kag ang mga lalaki sang Galaad nagdaug sang Efraim, bangud nga nagsiling sila, Kamo nga mga Galaadnon mga laaslaas sang Efraim sa tunga sang Efraimnon, kag sa tunga sang Manasinhon.

5 Kag gin-agaw sang mga Galaadnon ang mga talabokan sang Jordan sa atubangan sang mga Efraimnon: kag nahanabu nga, sang yadtong mga Efraimnon nga nakapalagyo nagsiling, Pataboka ako; ang mga lalaki sang Galaad nagsiling sa iya, Efraimnon bala ikaw? Kon magsiling sia, Indi;

6 Niyan nagsiling sila sa iya, Karon siling ka Shibolet: kag nagsiling sia Sibolet: kay indi sia makahimo magmitlang sini sing nagakaigo. Niyan gindakup nila sia, kag ginpatay sa mga talabokan sang Jordan: kag may napukan sadtong tion sang mga Efraimnon nga kap-atan kag duha ka libo.

7 Kag si Jefte naghukom sang Israel sing anum ka tuig. Niyan napatay si Jefte nga Galaadnon, kag ginlubung sa isa sang mga siudad sang Galaad.

8 ś Kag madason sa iya si Ibzan sang Bet-lehem naghukom sang Israel.

9 Kag sia may katloan ka anak nga lalaki, kag katloan ka anak nga babaye, nga ginpadala niya sa luwas, kag gindala niya gikan sa luwas ang katloan ka anak nga babaye nga sa iya mga anak nga lalaki. Kag naghukom sia sa Israel sing pito ka tuig.

10 Niyan napatay si Ibzan, kag ginlubung sa Bet-lehem.

11 ś Kag madason sa iya si Elon, nga Zabulonhon, naghukom sa Israel; kag naghukom sia sa Israel sing napulo ka tuig.

12 Kag napatay si Elon nga Zabulonhon, kag ginlubung sa Ayalon sa duta sang Zabulon.

13 ś Kag madason sa iya si Abdon nga anak nga lalaki ni Hilel, nga Piratonhon, naghukom sa Israel.

14 Kag sia may kap-atan ka anak nga lalaki kag katloan ka hinablos nga lalaki, nga nagsakay sa kapitoan ka tinday nga asno: kag naghukom sia sa Israel sing walo ka tuig.

15 Kag napatay si Abdon nga anak nga lalaki ni Hilel nga Piratonhon, kag ginlubung sa Piraton sa duta sang Efraim, sa bukid sang mga Amalecnon.

KAPITULO 13

KAG ang kaanakan sang Israel naghimo liwat sang malaut sa itololok sang GINOO; kag gintugyan sila sang GINOO sa kamut sang mga Filistinhon sing kap-atan ka tuig.

2 ś Kag may isa sadto ka lalaki sang Zora, gikan sa panimalay sang mga Danhanon, nga ang iya ngalan Manoa; kag ang iya asawa baw-as, kag wala mag-anak.

3 Kag ang anghel sang GINOO nagpahayag sa babaye, kag nagsiling sa iya, Yari karon, ikaw baw-as, kag wala nagaanak: apang magapanamkon ka, kag magaanak sing lalaki.

4 Busa karon mag-andam, ginaampo ko sa imo, kag dili mag-inum sing alak ukon masingkal nga ilimnon, kag dili magkaon sing butang nga dimatinlo:

5 Kay, yari karon, ikaw magapanamkon, kag magaanak sing lalaki; kag wala sing inugkiskis nga mag-agi sa iya olo: kay ang bata mangin-Nazareo sa Dios kutub sa taguangkan: kag magasugud sia sa pagluwas sang Israel gikan sa kamut sang mga Filistinhon.

6 ś Niyan ang babaye nagkadto kag nagsugid sa iya bana, nga nagasiling, Isa ka lalaki sang Dios nag-abut sa akon, kag ang iya dagway kaangay sang dagway sang anghel sang Dios, makahalanguyus gid: apang wala ako magpamangkot sa iya kon diin sia maghalin, kag wala sia magsugid sa akon sang iya ngalan:

7 Apang nagsiling sia sa akon, Yari karon, ikaw magapanamkon, kag magaanak sing lalaki; kag karon dili mag-inum sing alak ukon masingkal nga ilimnon, kag dili magkaon sing butang nga dimatinlo: kay ang bata mangin-Nazareo sa Dios kutub sa taguangkan tubtub sa adlaw sang iya kamatayon.

8 ś Niyan nagpakilooy si Manoa sa GINOO, kag nagsiling, O Ginoo ko, pabalika sa amon ang lalaki sang Dios nga ginpadala mo, kag magtudlo sa amon kon ano ang amon himoon sa bata nga matawo.

9 Kag ang Dios nagpamati sa tingug ni Manoa; kag ang anghel sang Dios nagbalik liwat sa babaye sang nagalingkod sia sa latagon: apang ang iya bana nga si Manoa wala upud sa iya.

10 Kag ang babaye nagdalidali, kag nagdalagan, kag nagsugid sa iya bana, kag nagsiling sa iya, Yari karon, ang lalaki nagpahayag sa akon, nga nag-abut sa akon sang isa ka adlaw.

11 Kag nagtindug si Manoa, kag nagsonod sa iya asawa, kag nagkadto sa lalaki, kag nagsiling sa iya, Ikaw bala ang lalaki nga nagpamolong sa babaye? Kag nagsiling sia, Amo ako.

12 Kag si Manoa nagsiling, Karon pahanabua ang imo mga polong. Ano bala ang pagpatubo namon sang bata, kag ano ang himoon namon sa iya?

13 Kag ang anghel sang GINOO nagsiling kay Manoa, Ang babaye mag-andam sa tanan nga ginsiling ko sa iya.

14 Dili sia makakaon sang bisan ano nga butang nga nagagikan sa puno sang ubas, kag dili sia pagpaimnon sing alak ukon masingkal nga ilimnon, ukon magkaon sang bisan ano nga butang nga dimatinlo: magbantay sia sang tanan nga ginsogo ko sa iya.

15 ś Kag si Manoa nagsiling sa anghel sang GINOO, Ginaampo ko sa imo, magpahawid ka sa amon, tubtub nga makahiwat kami sing tinday nga kanding nga sa imo.

16 Kag ang anghel sang GINOO nagsiling kay Manoa, Bisan pa hawiran mo ako, indi ako magkaon sang imo tinapay: kag kon maghalad ka sing halad nga sinonog, kinahanglan ihalad mo ini sa GINOO. Kay wala kahibalo si Manoa nga sia anghel sang GINOO.

17 Kag si Manoa nagsiling sa anghel sang GINOO, Sin-o bala ang imo ngalan, agud nga kon matuman ang imo mga hambalanon pasidunggan ka namon?

18 Kag ang anghel sang GINOO nagsiling sa iya, Ngaa bala nagapamangkot ka sang akon ngalan, sa ginatan-aw nga ini likum?

19 Gani nagkuha si Manoa sing isa ka tinday nga kanding pati ang halad nga kalan-on, kag ginhalad ini sa ibabaw sang dakung bato sa GINOO: kag ang anghel naghimo sang makatilingala; kag si Manoa kag ang iya asawa nagtolok sini.

20 Kay nahanabu, sang nagpaibabaw ang dabdab gikan sa halaran pa langit, nga ang anghel sang GINOO nagsaka sa dabdab sang halaran. Kag si Manoa kag ang iya asawa nagtolok sini, kag naghapa sila sa duta.

21 Apang ang anghel sang GINOO wala na gid magpahayag kay Manoa kag sa iya asawa. Niyan nahibal-an ni Manoa nga sia anghel sang GINOO.

22 Kag si Manoa nagsiling sa iya asawa, Sa pagkamatuud mapatay kita, bangud nga nakita naton ang Dios.

23 Apang ang iya asawa nagsiling sa iya, Kon buut kita patyon sang GINOO, wala sia kuntani magbaton sa aton mga kamut sang halad nga sinonog kag sang halad nga kalan-on, kag wala sia kuntani magpakita sa aton sini tanan nga butang, ukon magsugid sa aton sa sini nga tion sang subong sini nga mga butang.

24 ś Kag ang babaye nag-anak sing lalaki, kag ginhingalanan sia Samson: kag ang bata nagtubo, kag ginpakamaayo sia sang GINOO.

25 Kag ang Espiritu sang GINOO nagpamuno sa pagdaldal sa iya sa mga tion sa kampo sang Dan sa ulut sang Zora kag Estaol.

KAPITULO 14

KAG nagdulhog si Samson pa Timna, kag nakakita sa Timna sing isa ka babaye sa mga anak sang mga Filistinhon.

2 Kag nagtaklad sia, kag nagsugid sa iya amay kag sa iya iloy, kag nagsiling, Ako nakakita sa Timna sing babaye sa mga anak sang mga Filistinhon: busa karon ipaasawa ninyo sia sa akon.

3 Niyan ang iya amay kag ang iya iloy nagsiling sa iya, Wala na gid bala sing babaye sa babaye nga mga anak sang imo mga utud, ukon sa tunga sang bug-os ko nga katawohan, nga nagalakat ka sa pagkuha sang asawa gikan sa mga Filistinhon nga wala macircuncidar? Kag si Samson nagsiling sa iya amay, Ipaasawa sia sa akon; kay sia nagapahamuut sa akon sing maayo.

4 Apang ang iya amay kag ang iya iloy wala makahibalo nga ini nagikan sa GINOO, nga sia nagpangita sing kahigayonan batok sa mga Filistinhon: kay sa sadto nga tion ang mga Filistinhon naggahum sa Israel.

5 ś Niyan si Samson nagdulhog, kag ang iya amay kag ang iya iloy, sa Timna, kag nag-abut sa mga ulubasan sang Timna: kag, yari karon, isa ka bataon nga leon nagngurub batok sa iya.

6 Kag ang Espiritu sang GINOO nag-abut sing gamhanan sa iya, kag ginkusnit niya sia subong sang magkusnit sia sang tinday nga kanding, kag wala sia sing bisan ano sa iya kamut: apang wala sia magsugid sa iya amay ukon sa iya iloy sang iya nahimo.

7 Kag nagdulhog sia, kag nagpakighambal sa babaye; kag nagpahamuut sia sing maayo kay Samson.

8 ś Kag sa tapus sang isa ka tion nagbalik sia sa pagpangasawa sa iya, kag naglipas sia sa pagtan-aw sang patay nga lawas sang leon: kag, yari karon, may nagpungyot nga mga putyokan kag dugus sa lawas nga patay sang leon.

9 Kag gindala niya ini sa iya mga kamut, kag nagpadayon sa paglakat nga nagakaon, kag nag-abut sa iya amay kag sa iya iloy, kag ginhatagan niya sila, kag nagkaon sila: apang wala niya sila pagsugiri nga iya nakuha ang dugus gikan sa lawas nga patay sang leon.

10 ś Gani nagdulhog ang iya amay pakadto sa babaye: kag si Samson naghimo didto sing sinalosalo; kay amo ini ang kinabatasan nga himoon sang mga pamatan-on nga lalaki.

11 Kag nahanabu, sang nakita nila sia, nga nagdala sila sing katloan ka kaupdanan nga magaupud sa iya.

12 ś Kag si Samson nagsiling sa ila, Karon matugma ako sa inyo sing paktakon: kon mapatpat gid ini ninyo sa akon sa sulud sang pito ka adlaw sang sinalosalo, kag mapakot ini, niyan ako magahatag sa inyo sing katloan ka pinanid sang tela kag katloan ka ilislan nga panapton:

13 Apang kon indi ninyo mapatpat ini sa akon, niyan kamo magahatag sa akon sing katloan ka pinanid sang tela kag katloan ka ilislan nga panapton. Kag sila nagsiling sa iya, Itugma ang imo paktakon, agud nga mabatian namon.

14 Kag nagsiling sia sa ila, Gikan sa manugkaon naggowa ang kalan-on, kag gikan sa makusug naggowa ang katam-is. Kag indi sila makapatpat sang paktakon sa tatlo ka adlaw.

15 Kag nahanabu sa ikapito nga adlaw, nga nagsiling sila sa asawa ni Samson, Buyoka ang imo bana, agud nga mapatpat niya sa amon ang paktakon, basi kon sonogon ka namon kag ang balay sang imo amay sa kalayo: gin-agda bala kami ninyo sa pagkuha sinang may amon kami? indi bala amo?

16 Kag naghibi ang asawa ni Samson sa atubangan niya, kag nagsiling, Nagadumut ka lamang sa akon, kag wala nagahigugma sa akon: nagtugma ka sing paktakon sa mga anak sang akon katawohan, kag wala magsugid sa akon. Kag sia nagsiling sa iya, Yari karon, wala ko ini masugid sa akon amay ukon sa akon iloy, kag isugid ko bala ini sa imo?

17 Kag naghibi sia sa atubangan niya sa pito ka adlaw, tubtub natapus ang ila sinalosalo: kag nahanabu sa ikapito nga adlaw, nga ginsugiran niya sia, bangud nga ginpilit sia niya sing tama: kag ginsugid niya sa mga anak sang iya katawohan ang paktakon.

18 Kag sa ikapito nga adlaw sa wala pa magsalup ang adlaw ang mga lalaki sang siudad nagsiling sa iya, Ano bala ang matam-is pa sa dugus? kag ano bala ang makusug pa sa leon? Kag nagsiling sia sa ila, Kon wala ninyo pag-iarado ang akon bakiya, wala ninyo masapwi ang akon paktakon.

19 ś Kag ang Espiritu sang GINOO nag-abut sa iya, kag nagdulhog sia pa Ascalon, kag ginpatay niya ang katloan ka lalaki sa ila, kag ginkuha ang ila pagkabutang, kag ginhatag ang mga ilislan nga panapton sa mga nagpahayag sang paktakon. Kag nagdabdab ang iya kaakig, kag nagtaklad sia sa balay sang iya amay.

20 Apang ang asawa ni Samson ginhatag sa iya kaupud, nga abyan niya anay.

KAPITULO 15

APANG nahanabu sa wala madugay nga tion, sa tig-alani sang trigo, nga si Samson nga may tinday nga kanding nagduaw sa iya asawa; kag nagsiling sia, Magasulud ako sa akon asawa sa hulut sa sulud. Apang ang iya amay wala magtugut sa iya sa pagsulud.

2 Kag nagsiling ang iya amay, Naghunahuna gid ako nga gindumtan mo sia sing totoo; gani ginhatag ko sia sa imo kaupud: indi bala ang iya manghud nga babaye maayoayo pa sa iya? pangasaw-a sia, ginaampo ko sa imo, sa tal-us niya.

3 ś Kag si Samson nagsiling nahanungud sa ila, Karon manginlabi pa nga wala ako sing kabasolanan sang sa mga Filistinhon, bisan pa himoan ko sila sing malain.

4 Kag naglakat si Samson kag nagdakup sing tatlo ka gatus ka singgalong, kag nagkuha sing mga agipo, kag gintabid ang ikog sa ikog, kag ginbutangan sing agipo sa ulut sang tagsa ka duha ka ikog.

5 Kag sang nasindihan niya sing kalayo ang mga sulo, ginbuhian niya sila sa alanyon nga uyas sang mga Filistinhon, kag nasonog sing tingub ang mga tumpi, kag ang alanyon nga uyas man, upud ang mga ulubasan kag ang mga olivo.

6 ś Niyan nagsiling ang mga Filistinhon, Sin-o bala ang naghimo sini? Kag nagsabat sila, Si Samson, ang umagad sang Timnahanon, bangud nga ginkuha niya sa iya ang iya asawa kag ginhatag sia sa iya kaupud. Kag nagtaklad ang mga Filistinhon, kag ginsonog sa kalayo ang babaye kag ang iya amay.

7 ś Kag si Samson nagsiling sa ila, Bisan ginhimo ninyo ini, walay sapayan magatimalus ako sa inyo, kag ugaling magauntat ako.

8 Kag ginsamad niya sila sa hawak kag sa paa sa daku nga kamatay: kag nagdulhog sia kag nagpuyo sa ukbung sang dakung bato nga Etam.

9 ś Niyan ang mga Filistinhon nagtaklad, kag nagpahamtang sa Juda, kag naglapta sila sa Lehi.

10 Kag ang mga lalaki sang Juda nagsiling, Ngaa bala nagtaklad kamo batok sa amon? Kag nagsabat sila, Sa paggapus kay Samson nagtaklad kami, sa paghimo sa iya subong sang nahimo niya sa amon.

11 Niyan naglakat ang tatlo ka libo ka lalaki sang Juda pakadto sa ukbung sang dakung bato nga Etam, kag nagsiling kay Samson, Wala ka bala makahibalo nga ang mga Filistinhon mga manuggahum naton? ano bala ini nga nahimo mo sa amon? Kag nagsiling sia sa ila, Sono sa nahimo nila sa akon, amo ang nahimo ko sa ila.

12 Kag nagsiling sila sa iya, Kami nagdulhog sa paggapus sa imo, agud nga matugyan ka namon sa kamut sang mga Filistinhon. Kag si Samson nagsiling sa ila, Sumpa kamo sa akon, nga indi kamo inyo magdamhag sa akon.

13 Kag nagpamolong sila sa iya, nga nagasiling, Indi; kondi gapuson ka namon sing malig-on, kag itugyan ka sa ila kamut: apang indi gid kami magpatay sa imo. Kag gingapus nila sia sang duha ka lubid nga bag-o, kag ginpataklad sia gikan sa dakung bato.

14 ś Kag sang nag-abut sia sa Lehi, ang mga Filistinhon nagsinggit batok sa iya: kag ang Espiritu sang GINOO nag-abut sing gamhanan sa iya, kag ang mga lubid nga yara sa iya mga butkon nanginsubong sang lino nga nasonog sa kalayo, kag ang iya mga gapus nahukas gikan sa iya mga kamut.

15 Kag nakakita sia sang bag-o nga sulang nga tul-an sang asno, kag gin-untay ang iya kamut, kag ginkuha ini, kag ginpatay niya sa sini ang isa ka libo ka lalaki.

16 Kag si Samson nagsiling, Sa sulang nga tul-an sang asno, mga tinumpok sa mga tinumpok, sa sulang sang asno ginpatay ko ang isa ka libo ka lalaki.

17 Kag nahanabu, sang nakatapus sia sa pagpamolong, nga ginpilak niya ang sulang nga tul-an gikan sa iya kamut, kag ginhingalanan yadto nga duug Ramat-lehi.

18 ś Kag gin-uhaw sia sing tama, kag nagtuaw sia sa GINOO, kag nagsiling, Ikaw naghatag sini nga daku nga pagluwas sa kamut sang imo alagad: kag karon mapatay bala ako sa kauhaw, kag maholog sa kamut sang mga wala macircuncidar?

19 Apang ginpalitik sang Dios ang yuhob nga yara sa sulang, kag naggowa didto ang tubig; kag sang nakainum sia, nag-uli ang iya espiritu, kag naumpawan sia: busa ginhingalanan niya ini nga En-hakore, nga yara sa Lehi tubtub sini nga adlaw.

20 Kag naghukom sia sa Israel sa mga adlaw sang mga Filistinhon sing duha ka pulo ka tuig.

KAPITULO 16

NIYAN si Samson nagkadto sa Gaza, kag nakakita didto sing alpot, kag naghiusa sa iya.

2 Kag ginsugid ini sa mga Gazanhon, nga nagasiling, Si Samson nag-abut diri. Kag ginlikupan nila sia, kag ginput-an sia sa bug-os nga gab-i sa gawang sang siudad, kag nagtinong sila sa bug-os nga gab-i, nga nagasiling, Sa kaagahon, kon mag-aga, patyon ta sia.

3 Kag si Samson naghigda tubtub sa tungang gab-i, kag nagbangon sia sa tungang gab-i, kag ginkaptan ang mga ganhaan sang gawang sang siudad, kag ang duha ka haligi, kag gingabut sila, ang pintal kag tanan, kag ginpas-an sila, kag gindala sila sa putokputokan sang bakolod nga yara sa tampad sang Hebron.

4 ś Kag nahanabu sa tapus sini, nga naghigugma sia sing isa ka babaye sa nalupyakan sang Sorec, nga ang iya ngalan Delila.

5 Kag ang mga ginoo sang mga Filistinhon nagtaklad pakadto sa iya, kag nagsiling sa iya, Buyoka sia, kag tan-awa kon diin nagagikan ang iya daku nga kusug, kag kon ano nga paagi nga madaug namon sia, agud nga magapus namon sia sa pagsakit sa iya: kag ang tagsatagsa sa amon magahatag sa imo sing napulo kag isa ka gatus ka bilog nga pilak.

6 ś Kag si Delila nagsiling kay Samson, Sugiri ako, ginaampo ko sa imo, kon diin nagagikan ang imo daku nga kusug, kag ano ang ikagapus sa imo sa pagsakit sa imo.

7 Kag si Samson nagsiling sa iya, Kon gapuson nila ako sing pito ka lubid nga lab-as nga wala pa mabulad, niyan magamaluya ako, kag manginsubong sa iban nga tawo.

8 Niyan ang mga ginoo sang mga Filistinhon nagdala sa iya sing pito ka lubid nga lab-as nga wala pa mabulad, kag gingapus niya sia sini.

9 Karon may mga manugpuut, nga nagapabilin upud sa iya sa nasulud nga hulut. Kag si Delila nagsiling sa iya, Ang mga Filistinhon yara sa imo, Samson. Kag ginbugras niya ang mga lubid nga lab-as, subong sang pagbugto sang nahot sang lanut kon makasindot sa kalayo. Gani wala mahibal-i ang iya kusug.

10 Kag si Delila nagsiling kay Samson, Yari karon, natiawtiawan mo ako, kag ginsugiran ako sing mga butig: karon sugiri ako, ginaampo ko sa imo, kon ano ang ikagapus sa imo.

11 Kag nagsiling sia sa iya, Kon gapuson nila ako sing malig-on sing mga lubid nga bag-o nga wala pa magamit, niyan magaluya ako, kag manginsubong sa iban nga tawo.

12 Gani si Delila nagkuha sing bag-o nga mga lubid, kag gingapus sia sini, kag nagsiling sa iya, Ang mga Filistinhon yara sa imo, Samson. Kag may mga manugpuut nga nagapabilin sa hulut nga nasulud. Kag ginbugto niya sila sa iya mga butkon kaangay sang hilo.

13 Kag si Delila nagsiling kay Samson, Tubtub karon gintiawtiawan mo ako, kag ginsugiran ako sing mga butig: sugiri ako ano bala ang ikagapus sa imo. Kag nagsiling sia sa iya, Kon ihabol mo ang pito ka bunghay nga bohok sang akon olo sa hablon.

14 Kag ginhigot niya ini sa palpal, kag nagsiling sa iya, Ang mga Filistinhon yara sa imo, Samson. Kag sia nagmata sa iya katologon, kag naggowa sia nga may palpal sang balayanon, kag may hablon.

15 ś Kag nagsiling sia sa iya, Paano bala nga pagsiling mo, Ako nahagugma sa imo, kon ang imo tagiposoon wala sa akon? sa makatlo gintiawtiawan mo ako, kag wala makasugid sa akon kon diin nagagikan ang imo dakung kusug.

16 Kag nahanabu, sang ginpuga sia niya adlaw-adlaw sa iya mga polong, kag ginpilit sia, sa bagay nga gingamohan ang iya kalag tubtub sa ikamatay;

17 Nga ginsugiran niya sia sang bug-os niyang tagiposoon, kag nagsiling sa iya, Wala gid sing inugkiskis nga nag-agi sa akon olo; kay ako Nazareo sa Dios kutub pa sa taguangkan sang akon iloy: kon kiskisan ako, niyan ang akon kusug magataliwan sa akon, kag magaluya ako, kag manginkaangay sa iban nga tawo.

18 Kag sang nakita ni Delila nga ginsugid niya sa iya ang bug-os niyang tagiposoon, nagpadala sia kag nagpatawag sang mga ginoo sang mga Filistinhon, nga nagasiling, Taklad kamo sining makaisa, kay ginsugid niya sa akon ang bug-os niyang tagiposoon. Niyan ang mga ginoo sang mga Filistinhon nagtaklad pakadto sa iya, kag nagdala sa ila kamut sang kuarta.

19 Kag ginpatolog niya sia sa ibabaw sang iya mga tuhud; kag nagpatawag sia sing isa ka tawo, kag ginpakiskis niya sa iya ang pito ka bunghay nga bohok sang iya olo; kag ginsugdan niya sa pagsakit sa iya, kag ang iya kusug nagtaliwan sa iya.

20 Kag nagsiling sia, Ang mga Filistinhon yara sa imo, Samson. Kag nagmata sia sa iya katologon, kag nagsiling, Magagowa ako subong sang sa iban nga mga tion, kag magapanginpalus. Kag wala sia makahibalo nga ang GINOO nagtaliwan sa iya.

21 ś Apang gindakup sia sang mga Filistinhon, kag ginlukat ang iya mga mata, kag gindulhog nila sia sa Gaza, kag gingapus sia sing mga grillos nga saway; kag naggaling sia sa balay nga bilanggoan.

22 Apang ang bohok sang iya olo nagsugud sa pagtubo liwat sa tapus nakiskisan sia.

23 Niyan ang mga ginoo sang mga Filistinhon nagtipon sa ila sing tingub sa pagdolot sing dakung halad kay Dagon nga ila dios, kag sa pagkasadya: kay nagsiling sila, Ang aton dios nagtugyan sa aton kamut kay Samson nga aton kaaway.

24 Kag sang nakita sia sang katawohan, nagdayaw sila sa ila dios: kay nagsiling sila, Ang aton dios nagtugyan sa aton mga kamut sang aton kaaway, kag manuglaglag sang aton duta, nga nakapatay sang madamu sa aton.

25 Kag nahanabu, sang malipayon ang tagiposoon nila, nga nagsiling sila, Tawga ninyo si Samson, agud nga maghimo sia sa aton sing kalingawan. Kag tinawag nila si Samson gikan sa bilanggoan nga balay; kag naghimo sia sing kalingawan sa atubangan nila: kag ginbutang nila sia sa ulut sang mga haligi.

26 Kag si Samson nagsiling sa pamatan-on nga lalaki nga nagtuytuy sa iya sa kamut, Tuguti ako sa paghikap sang mga haligi diin nagatindug ang balay, agud nga magsandig ako sa ila.

27 Karon ang balay napuno sang mga lalaki kag mga babaye; kag ang tanan nga ginoo sang mga Filistinhon yadto didto; kag sa ibabaw sang atop may mga tatlo ka libo ka mga lalaki kag mga babaye, nga nagtan-aw sang naghimo si Samson sang kalingawan.

28 Kag si Samson nagpanawag sa GINOO, kag nagsiling, O Ginoong DIOS, dumduma ako, ginaampo ko sa imo, kag pabaskuga ako, ginaampo ko sa imo, sini lamang nga makaisa, O Dios, agud nga sa makaisa makatimalus ako sa mga Filistinhon bangud sang akon duha ka mata.

29 Kag nagkaput si Samson sa duha ka haligi nga natunga nga ginatungtungan sang balay, kag sa ibabaw nila ini natukud, ang isa sang iya kamut nga too, kag ang isa sang iya wala.

30 Kag si Samson nagsiling, Pakamatya ako kaupud sang mga Filistinhon. Kag nagduko sia sa bug-os niyang kusug; kag nalusud ang balay sa ibabaw sang mga ginoo, kag sa ibabaw sang bug-os nga katawohan nga didto sa sulud sini. Gani ang mga patay nga napatay niya sa iya kamatayon labi pa kadamu sa mga ginpatay niya sa iya kinabuhi.

31 Niyan nagdulhog ang iya mga utud kag ang bug-os nga panimalay sang iya amay, kag nagkuha sa iya, kag gindala sia pataklad, kag ginlubung sia sa ulut sang Zora kag Estaol sa lulubngan ni Manoa nga iya amay. Kag naghukom sia sang Israel sing duha ka pulo ka tuig.

KAPITULO 17

KAG may isa ka lalaki sa bukid nga Efraim, nga ginhingalanan Mica.

2 Kag nagsiling sia sa iya iloy, Ang napulog isa ka gatus ka siclo nga pilak nga nakuha sa imo, nga nahanungud sa ila nagpasakup ka sa pagpakamalaut, kag ginpamolong man sa akon idulungug, yari karon, ang pilak yari sa akon; ako nagkuha sini. Kag ang iya iloy nagsiling, Pakamaayohon ka sang GINOO, anak ko.

3 Kag sang gin-uli niya sa iya iloy ang napulog isa ka gatus ka siclo nga pilak, ang iya iloy nagsiling, Ginhalad ko sing bug-os sa GINOO ang pilak gikan sa akon kamut tungud sa akon anak, sa paghimo sing imahen nga tinigban kag imahen nga tinunaw: busa karon iuli ko ina sa imo.

4 Walay sapayan gin-uli niya sa iya iloy ang kuarta; kag nagkuha ang iya iloy sing duha ka gatus ka siclo nga pilak, kag ginhatag sila sa manugtunaw, nga naghimo sini nga imahen nga tinigban kag imahen nga tinunaw: kag ang mga ini yara sa balay ni Mica.

5 Kag ang tawo nga si Mica may balay sang mga dios, kag naghimo sia sing efod, kag terafim, kag ginpakasagrado ang isa sang iya mga anak nga lalaki, nga nanginpari niya.

6 Sa sadtong mga adlaw wala sing hari sa Israel, apang ang tagsa ka tawo naghimo sinang matarung sa iya kaugalingon nga mga mata.

7 ś Kag may isa ka pamatan-on nga lalaki gikan sa Bet-lehem-juda, sa panimalay ni Juda, nga Levinhon, kag nagpanlugayaw sia didto.

8 Kag ang lalaki naghalin sa siudad sang Bet-lehem-juda sa pagpanlugayaw kon diin sia makakita sing duug: kag nag-abut sia sa bukid nga Efraim sa balay ni Mica, sang nagpanlakatan sia.

9 Kag si Mica nagsiling sa iya, Diin ka bala maghalin? Kag sia nagsiling sa iya, Ako Levinhon sang Bet-lehem-juda, kag nagakadto ako sa pagpanlugayaw diin makakita ako sing duug.

10 Kag si Mica nagsiling sa iya, Puyo ka upud sa akon, kag manginsubong nga amay kag pari sa akon, kag hatagan ko ikaw sing napulo ka siclo nga pilak sa tinuig, kag isa ka ilislan nga bayo, kag sang imo pagkaon. Gani ang Levinhon nagsulud.

11 Kag ang Levinhon nakauyon sa pagpuyo upud sa lalaki; kag ang pamatan-on nga lalaki nanginsubong sang isa sang iya mga anak nga lalaki.

12 Kag ginpakasagrado ni Mica ang Levinhon; kag ang pamatan-on nga lalaki nangin-iya pari, kag didto sa balay ni Mica.

13 Niyan si Mica nagsiling, Karon nahibaloan ko nga ang GINOO magahimo sa akon sing maayo, sa ginatan-aw nga may akon ako nga Levinhon nga akon pari.

KAPITULO 18

SA sadtong mga adlaw walay hari sa Israel: kag sa sadtong mga adlaw ang tribo sang mga Danhanon nagpangita nga sa ila sing panublion nga mapuy-an; kay tubtub sadtong adlaw ang tanan nilang panublion wala pa maholog sa ila sa tunga sang mga tribo sang Israel.

2 Kag ang kaanakan ni Dan nagpadala gikan sa ila panimalay sing lima ka lalaki gikan sa ila mga ginsakpan, mga lalaking isganan, gikan sa Zora, kag gikan sa Estaol, sa paglampitaw sang duta, kag sa pag-usisa sini; kag nagsiling sila sa ila, Lakat kamo, usisaon ninyo ang duta: nga sila sang nag-abut sila sa bukid nga Efraim, sa balay ni Mica, sila nagdayon didto.

3 Sang didto sila sa luyo sang balay ni Mica, nakilala nila ang tingug sang pamatan-on nga lalaki nga Levinhon: kag naghapit sila didto, kag nagsiling sa iya, Sin-o bala ang nagdala sa imo diri? kag ano bala ang ginahimo mo sa sining duug? kag maano ka bala diri?

4 Kag nagsiling sia sa ila, Amo ini kag amo ini ang paghisayo sa akon ni Mica, kag ginsoholan ako niya, kag pari niya ako.

5 Kag sila nagsiling sa iya, Pakiana ka sa Dios, ginaampo namon sa imo, agud nga amon mahibaloan kon manginmauswagon ang amon dalanon nga ginalaktan namon.

6 Kag ang pari nagsiling sa ila, Lakat kamo sa paghidait: ang dalanon nga ginalaktan ninyo yara sa atubangan sang GINOO.

7 ś Niyan ang lima ka lalaki nagtaliwan, kag nag-abut sa Lais, kag nakita ang katawohan nga yadto didto, kon paano nga pagpuyo nila sa kalig-onan, sono sa pamatasan sang mga Zidonhon, malinong kag malig-on; kag wala sing punoan sa duta, nga makapakahuya sa ila sa bisan anong butang; kag malayo sila sa mga Zidonhon, kag wala sila sing mga paghisayo sa bisan kay sin-ong tawo.

8 Kag nag-abut sila sa ila mga utud sa Zora kag sa Estaol: kag ang ila mga utud nagsiling sa ila, Ano bala sa inyo?

9 Kag sila nagsiling, Tindug kamo, agud nga magtaklad kita batok sa ila: kay nakita namon ang duta, kag, yari karon, maayo gid: kag ngaa bala nagadolog pa kamo? dili kamo magpabuyanbuyan sa paglakat, kag sa pagsulud sa pagtag-iya sang duta.

10 Kon maglakat kamo, magaabut kamo sa katawohan nga malig-on, kag sa duta nga malapad: kay ang Dios naghatag sini sa inyo mga kamut; duug nga wala makulangi sang bisan anong butang nga yara sa duta.

11 ś Kag may nagtaliwan gikan didto sang panimalay sang mga Danhanon, gikan sa Zora kag gikan sa Estaol, anum ka gatus ka lalaki nga nagtaklus sang mga hinganiban sa inaway.

12 Kag nagtaklad sila, kag nagpahamtang sa Kiryat-jearim sa Juda: tungud sini ginhingalanan nila yadtong duug Mahane-dan tubtub sining adlaw: yari karon, ini yara sa likod sang Kiryat-jearim.

13 Kag gikan didto nag-agi sila sa bukid nga Efraim, kag nag-abut sa balay ni Mica.

14 ś Niyan nagsabat ang lima ka lalaki nga nagkadto sa paglampitaw sang duta sang Lais, kag nagsiling sa ila mga utud, Kamo bala nakahibalo nga sa sining mga balay may efod, kag terafim, kag imahen nga tinigban, kag imahen nga tinunaw? busa karon patugsilingi kon ano ang himoon ninyo.

15 Kag naghapit sila didto, kag nag-abut sa balay sang pamatan-on nga lalaki nga Levinhon, sa balay ni Mica, kag nag-abiabi sa iya.

16 Kag ang anum ka gatus ka lalaki nga nagtaklus sing mga hinganiban sa inaway, nga gikan sa kaanakan ni Dan, nagtindug sa salamputan sang gawang.

17 Kag ang lima ka lalaki nga nagkadto sa paglampitaw sang duta nagsaka, kag nagsulud didto, kag nagkuha sang imahen nga tinigban, kag sang efod, kag sang terafim, kag sang imahen nga tinunaw: kag ang pari nagtindug sa luyo sang salamputan sang gawang upud sa anum ka gatus ka lalaki nga nagtaklus sang mga hinganiban sa inaway.

18 Kag ini sila nagsulud sa balay ni Mica, kag nagkuha sang imahen nga tinigban, sang efod, kag sang terafim, kag sang imahen nga tinunaw. Niyan ang pari nagsiling sa ila, Ano bala ang ginahimo ninyo?

19 Kag sila nagsiling sa iya, Hipus ka, itakup ang imo kamut sa imo baba, kag mag-upud sa amon, kag magmangin-amay ka namon kag magmanginpari: maayo pa bala sa imo ang magpari sa panimalay sang isa ka tawo, ukon magpari ka sa isa ka tribo kag isa ka panimalay sa Israel?

20 Kag nalipay ang tagiposoon sang pari, kag ginkuha niya ang efod, kag ang terafim, kag ang imahen nga tinigban, kag nagpatunga sa katawohan.

21 Gani nagtalikod sila kag nagtaliwan, kag nagbutang sang mga magamay kag sang kahayupan kag sang mga pagkabutang sa una nila.

22 ś Kag sang malayo na sila sa balay ni Mica, ang mga lalaki sa mga balay nga malapit sa balay ni Mica nagtipon sing tingub, kag nag-apas sa kaanakan ni Dan.

23 Kag nagsinggit sila sa kaanakan ni Dan. Kag nagbalikid sila, kag nagsiling kay Mica, Ano bala ang ginahinakitan mo, nga nagakari ka upud sa among hut-ong?

24 Kag nagsiling sia, Ginkuha ninyo ang akon mga dios nga ginhimo ko, kag ang pari, kag nagtaliwan kamo: kag ano pa ang akon? kag paano bala nga nagasiling kamo sa akon, Ano bala ang ginahinakitan mo?

25 Kag ang kaanakan ni Dan nagsiling sa iya, Dili pag-ipabati ang imo tingug sa tunga namon, basi magdamhag sa imo ang mga tawo nga maakigon, kag madula mo ang imo kabuhi, pati ang mga kabuhi sang imo panimalay.

26 Kag ang kaanakan ni Dan nagpadayon sa ila dalanon: kag sang nakita ni Mica nga sila tama kakusug sa iya, nagbalik sia kag nagpauli sa iya balay.

27 Kag ginkuha nila ang mga butang nga ginhimo ni Mica, kag ang pari niya, kag nag-abut sa Lais, sa katawohan nga malinong kag malig-on: kag ginpatay nila sila sa sulab sang espada, kag ginsonog nila ang siudad sa kalayo.

28 Kag wala sing manluluwas, bangud nga malayo ini sa Zidon, kag wala sila sing paghisayo sa bisan kay sin-o nga tawo; kag ini yara sa nalupyakan nga nahamtang sa luyo sang Bet-rehob. Kag gintukud nila ang isa ka siudad, kag nagpuyo didto.

29 Kag ginhingalanan nila ang siudad Dan, sono sa ngalan ni Dan nga ila amay, nga natawo kay Israel: apang sadto anay ang ngalan sang siudad Lais.

30 ś Kag ang kaanakan ni Dan nagpatindug sing imahen nga tinigban: kag si Jonatan, nga anak nga lalaki ni Gersom, nga anak nga lalaki ni Manases, sia kag ang iya mga anak nga lalaki mga pari nga sa tribo ni Dan tubtub sa adlaw sang pagbihag sang duta.

31 Kag ginpatindug nila nga sa ila ang imahen nga tinigban ni Mica, nga ginhimo niya, sa bug-os nga tion nga ang balay sang Dios didto sa Silo.

KAPITULO 19

KAG nahanabu sa sadto nga mga adlaw, sang wala sing hari sa Israel, nga may isa ka Levinhon nga nagapanlugayaw sa unhan nga bukid nga Efraim, nga nagkuha sing isa ka oloasawa gikan sa Bet-lehem-juda.

2 Kag ang iya oloasawa nagpamiga batok sa iya, kag naghalin sa iya pakadto sa balay sang iya amay sa Bet-lehem-juda, kag didto sia sing apat ka bulan.

3 Kag nagtindug ang iya bana, kag nag-apas sa iya, sa pag-oloolo sa iya, kag sa pagpabalik sa iya, nga nagadala sang iya alagad upud sa iya, kag sang duha ka asno: kag gindala sia niya sa balay sang iya amay: kag sang nakita sia sang amay sang dalaga, nalipay sia sa pagpakigkita sa iya.

4 Kag ang iya ugangan nga lalaki, ang amay sang dalaga, naghawid sa iya; kag nagpabilin sia kaupud niya sing tatlo ka adlaw: gani nagkaon sila kag nag-inum, kag nagpabilin didto.

5 ś Kag nahanabu sa ikap-at nga adlaw, sang nagbangon sila sing aga pa, nga nagtindug sia sa pagtaliwan: kag ang amay sang dalaga nagsiling sa iya umagad nga lalaki, Pabaskuga ang imo tagiposoon sa isa ka hungit nga tinapay, kag ugaling maglakat sa inyo dalanon.

6 Gani naglingkod sila, kag nagkaon kag nag-inum sila nga duha sing tingub: kay ang amay sang dalaga nagsiling sa lalaki, Magkahamuut ka, ginaampo ko sa imo, kag magpabilin sa bug-os nga gab-i, kag magkalipay ang imo tagiposoon.

7 Kag sang nagtindug ang lalaki sa pagtaliwan, ang iya ugangan nga lalaki nagpilit sa iya: busa nagpabilin sia liwat didto.

8 Kag sa ikalima nga adlaw nagbangon sia sing aga pa sa pagtaliwan: kag nagsiling ang amay sang dalaga, Pabaskuga ang imo tagiposoon, ginaampo ko sa imo. Kag sila nagpabilin tubtub sa kahaponon, kag nagkaon sila nga duha.

9 Kag sang nagtindug ang lalaki sa pagtaliwan, sia, kag ang iya oloasawa, kag ang iya alagad, ang iya ugangan, ang amay sang dalaga, nagsiling sa iya, Yari karon, ang adlaw nagapalapit sa kagab-ihon, ginaampo ko sa imo pabilin kamo sa bug-os nga gabi: yari karon, ang adlaw nagahingapus, pabilin ka diri, agud nga magkalipay ang imo tagiposoon; kag buwas bugtaw kamo sing aga pa sa inyo dalanon, agud nga makapauli ka.

10 Apang ang lalaki indi buut magpabilin sa sadto nga gab-i, apang nagtindug sia kag nagtaliwan, kag nag-abut sa atubang sang Jebus, nga amo ang Jerusalem; kag kaupud niya ang duha ka asno nga nasiyahan, ang iya oloasawa man upud niya.

11 Kag sang malapit sila sa Jebus, ang adlaw hapon na; kag nagsiling ang alagad sa iya agalon, Kari ka, ginaampo ko sa imo, kag maghapit kita sa sini nga siudad sang mga Jebusnon, kag magpabilin sa sini.

12 Kag ang iya agalon nagsiling sa iya, Dili kita maghapit sa siudad sang dumoloong, nga indi sa kaanakan sang Israel; magapadayon kita sa Gabaa.

13 Kag nagsiling sia sa iya alagad, Kari, kag magpalapit kita sa isa sini nga mga duug sa pagdayon sa bug-os nga gab-i, sa Gabaa, ukon sa Rama.

14 Kag nagpadayon sila kag naglakat sa ila dalanon; kag natunuran sila sang adlaw sang sila malapit sa Gabaa, nga iya sang Benjamin.

15 Kag naghapit sila didto, sa pagsulud kag sa pagdayon sa Gabaa: kag sang nagsulud sia, naglingkod sia sa dalan sang siudad: kay wala sing bisan sin-o nga tawo nga nagbaton sa ila sa iya balay sa pagpadayon.

16 ś Kag, yari karon, may isa ka lalaki nga tigulang nga nagpauli gikan sa iya hilikuton sa latagon sa kahaponon, nga taga-bukid nga Efraim man; kag nagpanlugayaw sia sa Gabaa: apang ang mga tawo sang duug mga Benjaminhon.

17 Kag sang ginbayaw niya ang iya mga mata, nakita niya ang manlalakat sa dalan sang siudad: kag nagsiling ang lalaki nga tigulang, Diin ka makadto? kag diin ka maghalin?

18 Kag nagsiling sia sa iya, Nagaagi kami gikan sa Bet-lehem-juda pakadto sa unhan nga bukid nga Efraim; taga-didto ako: kag nagkadto ako sa Bet-lehem-juda, apang karon nagakadto ako sa balay sang GINOO; kag wala sing bisan sin-o nga tawo nga nagbaton sa akon sa iya balay.

19 Walay sapayan may dagami kag kompay nga sa amon mga asno; kag may tinapay kag alak man nga sa akon, kag sa imo alagad nga babaye, kag sa pamatan-on nga lalaki nga upud sa imo mga alagad: wala sing nakulang sa bisan ano nga butang.

20 Kag ang lalaki nga tigulang nagsiling, Ang paghidait manginsa imo; sa wala sing ano man ang tanan mo nga kinahanglanon manginsa akon; lamang, indi ka magdayon sa dalan.

21 Gani gindala niya sia sa iya balay, kag ginhatagan sing kompay ang mga asno: kag nagpanghinaw sila sang ila mga tiil, kag nagkaon kag nag-inum.

22 ś Karon sang nagakinasadya sila sa ila mga tagiposoon, yari karon, ang mga lalaki sang siudad, nga mga anak nga lalaki ni Belial, naglibut sa balay, kag nagpulpog sa ganhaan, kag nagpamolong sila sa agalon sang balay, ang tigulang nga lalaki, nga nagasiling, Pagowaa ang lalaki nga nagsulud sa imo balay, agud nga makilala namon sia.

23 Kag ang lalaki, ang agalon sang balay, naggowa sa ila, kag nagsiling sa ila, Indi, mga utud ko, indi, ginaampo ko sa inyo, dili kamo maghimo sang among pagkalaut; sa ginatan-aw nga ining lalaki nagsulud sa akon balay, dili kamo maghimo sining kabuangan.

24 Yari karon, yari ang akon anak nga babaye nga ulay, kag ang oloasawa niya; pagowaon ko sila karon, kag paubsa ninyo sila, kag himoa sa ila ang maayo sa inyo: apang sa sining lalaki dili kamo maghimo sang tama kalaut nga butang.

25 Apang ang mga lalaki indi buut magpamati sa iya: gani ginkaptan sang lalaki ang iya oloasawa, kag ginpagowa sia sa ila; kag sila nagkilala sa iya, kag ginhimuslan nila sia sa bug-os nga gab-i tubtub sa aga: kag sang nagpamanagbanag na, ginbuhian nila sia.

26 Niyan nag-abut ang babaye sang pagpamanagbanag, kag napukan sa ganhaan sang balay sang lalaki diin ang iya ginoo, tubtub nga nagsanag.

27 Kag nagbangon ang iya ginoo sa aga, kag nagbukas sang mga ganhaan sang balay, kag naggowa sa pagpadayon sa iya dalanon: kag, yari karon, ang babaye nga iya oloasawa napukan sa ganhaan sang balay, kag ang iya mga kamut yara sa atangan.

28 Kag nagsiling sia sa iya, Tindug ka, kag maglakat na kita. Apang wala sing nagsabat. Niyan ginpahamtang sia sang lalaki sa ibabaw sang asno, kag nagtindug ang lalaki, kag nagpauli sa iya duug.

29 ś Kag sang nag-abut sia sa iya balay, nagkuha sia sing sundang, kag ginkaptan ang iya oloasawa, kag ginhiwahiwa sia, sono sa iya mga tul-an, sa napulog duha ka bahin, kag ginpadala sia sa tanan nga ginsakpan sang Israel.

30 Kag ang tanan nga nakakita sini nagsiling, Wala nga mas-a sing subong nga buhat nga nahimo ukon nakita kutub sang adlaw nga ang kaanakan sang Israel nagtaklad gikan sa duta sang Egipto tubtub sining adlaw: patugsilingi ini, batona ninyo ang laygay, kag magpamolong kamo kon ano ang inyo mga hunahuna.

KAPITULO 20

NIYAN naggowa ang tanan nga kaanakan sang Israel, kag ang katilingban nagtipon subong sang isa ka tawo, kutub sa Dan tubtub sa Beer-seba, pati ang duta sang Galaad, sa GINOO sa Mizpe.

2 Kag ang mga pangolo sang bug-os nga katawohan, sang tanan nga tribo sang Israel, nag-atubang sila sa katilingban sang katawohan sang Dios, apat ka gatus ka libo ka hangaway nga nagalakat nga naggabut sing espada.

3 (Karon ang kaanakan sang Benjamin nakabati nga ang kaanakan sang Israel nagtaklad sa Mizpe.) Niyan nagsiling ang kaanakan sang Israel, Sugiri kami, paano bala ang pagkahanabu sining pagkamalaut?

4 Kag ang Levinhon, ang bana sang babaye nga ginpatay, nagsabat kag nagsiling, Ako nag-abut sa Gabaa nga sakup sang Benjamin, ako kag ang akon babaye, sa pagdayon.

5 Kag ang mga lalaki sang Gabaa nagtindug batok sa akon, kag naglibut sa akon sa balay sa kagab-ihon, kag naghunahuna sila sa pagpatay sa akon: kag ang akon babaye ginlugus nila, sa bagay nga napatay sia.

6 Kag gindala ko ang akon babaye, kag ginhiwahiwa sia, kag ginpadala sia sa bug-os nga duta sang panublion sang Israel: kay nakahimo sila sing hinigal kag kabuangan sa Israel.

7 Yari karon, kamo tanan kaanakan sang Israel; ihatag ninyo diri ang inyo panugyan kag laygay.

8 ś Kag ang bug-os nga katawohan nagtindug subong sang isa ka tawo, nga nagasiling, Wala sing bisan sin-o sa amon nga magkadto sa iya layanglayang, kag wala sing bisan sin-o sa amon nga magpauli sa iya balay.

9 Apang karon amo ini ang butang nga himoon namon sa Gabaa; magataklad kami batok sa iya paagi sa papalad;

10 Kag magakuha kami sing napulo ka tawo sa isa ka gatus sa bug-os sang tanan nga tribo sang Israel, kag isa ka gatus sa isa ka libo, kag isa ka libo gikan sa napulo ka libo, sa pagkuha sing mga kalan-on nga sa katawohan, agud nga mahimo nila kon mag-abut sila sa Gabaa sang Benjamin, ang sono sa tanan nga kabuangan nga ginhimo nila sa Israel.

11 Gani ang tanan nga mga lalaki sang Israel nagtipon batok sa siudad, nga naghiusa sing tingub subong sang isa ka tawo.

12 ś Kag ang mga tribo sang Israel nagpadala sing mga lalaki sa bug-os nga tribo ni Benjamin, nga nagasiling, Ano bala ini nga pagkamalaut nga ginhimo sa tunga ninyo?

13 Busa karon itugyan sa amon ang mga lalaki, ang mga anak ni Belial, nga yara sa Gabaa, agud nga mapatay namon sila, kag masikway ang malaut gikan sa Israel. Apang ang kaanakan sang Benjamin indi buut magpamati sa tingug sang ila mga utud nga kaanakan sang Israel:

14 Apang ang kaanakan sang Benjamin nagtipon sila sing tingub sa Gabaa gikan sa mga siudad, sa paggowa sa pagpakig-away sa kaanakan sang Israel.

15 Kag ang kaanakan sang Benjamin gikan sa mga siudad naisipan sadto nga tion nga duha ka pulo kag anum ka libo ka lalaki nga naggabut sang espada, luwas sang mga pumuluyo sang Gabaa, nga naisipan nga pito ka gatus ka lalaki nga pinili.

16 Sa tunga sini nga bug-os nga katawohan may pito ka gatus ka lalaki nga pinili nga walis; ang tagsatagsa makalabyog sing mga bato sa malabohok, kag wala paglisa.

17 Kag ang mga tawo sang Israel, luwas sang Benjamin, naisipan nga apat ka gatus ka libo ka lalaki nga naggabut sing espada: ini sila tanan lalaki sang pag-awayan.

18 ś Kag ang kaanakan sang Israel nagtindug, kag nagtaklad pa balay sang Dios, kag nagpangayo sing laygay sa Dios, kag nagsiling, Sin-o bala sa amon ang magtaklad sing una sa pagpakig-away sa kaanakan sang Benjamin? Kag ang GINOO nagsiling, Ang Juda ang magauna.

19 Kag ang kaanakan sang Israel nagbangon sing aga pa, kag nagpahamtang sing kampo batok sa Gabaa.

20 Kag naggowa ang mga lalaki sang Israel sa pagpakig-away batok sa Benjamin; kag ang mga lalaki sang Israel nagpahamtang sing paagisud sa pag-away batok sa ila sa Gabaa.

21 Kag ang kaanakan sang Benjamin naggowa sa Gabaa, kag naglaglag sa duta sang mga Israelnon sa sadto nga adlaw sing duha ka pulo kag duha ka libo ka lalaki.

22 Kag ang katawohan, ang mga lalaki sang Israel, nagpangisug sa ila kaugalingon, kag nagpahamtang sing paagisud liwat sa inaway sa duug diin sila nagpahamtang sing paagisud sa nahauna nga adlaw.

23 (Kag ang kaanakan sang Israel nagtaklad kag naghibi sa atubangan sang GINOO tubtub sa kahaponon, kag nagpangayo sing laygay sa GINOO, nga nagasiling, Magapalapit bala ako liwat sa pagpakig-away sa kaanakan sang Benjamin nga akon utud? Kag ang GINOO nagsiling, Taklad kamo batok sa iya.)

24 Kag nagpalapit ang kaanakan sang Israel batok sa kaanakan sang Benjamin sa ikaduha nga adlaw.

25 Kag naggowa ang Benjamin batok sa ila gikan sa Gabaa sa ikaduha nga adlaw, kag naglaglag sa duta sa kaanakan sang Israel liwat sing napulo kag walo ka libo ka lalaki; ini sila tanan naggabut sang espada.

26 ś Niyan ang tanan nga kaanakan sang Israel, kag ang tanan nga katawohan, nagtaklad, kag nag-abut sa balay sang Dios, kag naghibi, kag naglingkod didto sa atubangan sang GINOO, kag nagpuasa sa sadto nga adlaw tubtub sa kahaponon, kag nagdolot sing mga halad nga sinonog kag mga halad sa paghidait sa atubangan sang GINOO.

27 Kag ang kaanakan sang Israel nagpamangkot sa GINOO (kay ang arka sang katipan sang Dios didto pa sa sadto nga mga adlaw,

28 Kag si Finees, ang anak nga lalaki ni Eleazar, ang anak nga lalaki ni Aaron, nagtindug sa atubangan sini sadto nga mga adlaw,) nga nagasiling, Magataklad pa bala ako liwat sa pagpakig-away sa kaanakan sang Benjamin nga akon utud, ukon magauntat ako? Kag ang GINOO nagsiling, Magtaklad; kay buwas itugyan ko sila sa imo kamut.

29 Kag ang Israel nagbutang sing mga manugpuut sa palibut sang Gabaa.

30 Kag ang kaanakan sang Israel nagtaklad batok sa kaanakan sang Benjamin sa ikatlo nga adlaw, kag nagpahamtang sila sing paagisud batok sa Gabaa, subong sang iban nga mga tion.

31 Kag ang kaanakan sang Benjamin naggowa batok sa katawohan, kag nagpalayo sila sa siudad; kag nagsugud sila sa pagsamad sang mga tawo, kag pagpatay, subong sang iban nga mga tion, sa mga dalan nga daku, nga ginaagihan sang isa pataklad sa balay sang Dios, kag ang iban pa Gabaa sa latagon, nga mga katloan ka lalaki sang Israel.

32 Kag nagsiling ang kaanakan sang Benjamin, Nagakapukan sila sa atubangan naton, subong sang sa nahauna. Apang ang kaanakan sang Israel nagsiling, Magpalagyo kita, kag papalayoon sila gikan sa siudad pakadto sa mga dalan nga daku.

33 Kag ang tanan nga lalaki sang Isarel nagtindug gikan sa ila duug, kag nagpahamtang sila sing paagisud sa Baal-tamar: kag ang mga manugpuut sang Israel naggowa sa ila mga duug gikan sa mga halalban sang Gabaa.

34 Kag may nag-abut nga napulo ka libo ka mga lalaki nga pinili sa bug-os nga Israel batok sa Gabaa, kag ang inaway matama: apang wala sila makahibalo nga ang kalaut malapit sa ila.

35 Kag ang GINOO naglaglag sang Benjamin sa atubangan sang Israel: kag ang kaanakan sang Israel naglaglag sa mga Benjaminhon sadto nga adlaw sing duha ka pulo kag lima ka libo kag isa ka gatus ka lalaki: ini nga tanan sila naggabut sang espada.

36 Gani nakita sang kaanakan sang Benjamin nga nalaglag sila: kay ang mga lalaki sang Israel naghatag sing duug sa mga Benjaminhon, bangud nga nagsalig sila sa mga manugpuut nga nabutang nila batok sa Gabaa.

37 Kag ang mga manugpuut nagdalidali, kag nagdamhag sa Gabaa; kag ang mga manugpuut naglapta, kag ginlaglag nila sa sulab sang espada ang bug-os nga siudad.

38 Karon may tanda nga ginpat-ud sa tunga sang mga lalaki sang Israel kag sang mga manugpuut, nga dapat maghimo sila sing daku nga kalayo nga may aso nga nagatub-ok gikan sa siudad.

39 Kag sang ang mga lalaki sang Israel nag-isul sa inaway, ang mga Benjaminhon nagsugud sa pagsamad kag pagpatay sang mga lalaki sang Israel nga mga katloan ka tawo: kay nagsiling sila, Sa pagkamatuud ginalaglag sila sa atubangan naton, subong sang sa nahauna nga inaway.

40 Apang sang nagsugud ang kalayo nga magdaku gikan sa siudad nga may isa ka haligi nga aso, nagbalikid ang mga Benjaminhon sa olihi nila, kag, yari karon, ang kalayo sang siudad nagsaka pa langit.

41 Kag sang nagbalik ang mga lalaki sang Israel, ang mga lalaki sang Benjamin nalisang: kay nakita nila nga ang malaut nag-abut sa ila.

42 Busa nagtalikod sila sa atubangan sang mga lalaki sang Israel pakadto sa dalanon sang kamingawan; apang ang inaway nagsonod sing mapiot sa ila; kag ang mga naghalin sa mga siudad, ginlaglag nila sa tunga nila.

43 Sa sini ginlikupan nila ang mga Benjaminhon, kag ginlagas sila, kag gintasak sila sing mahapus tubtub sa tampad sang Gabaa nayon sa bulutlakan sang adlaw.

44 Kag napukan sa Benjamin ang napulo kag walo ka libo ka lalaki; tanan sila mga lalaki nga isganan.

45 Kag nagtalikod sila kag nagpalagyo nayon sa kamingawan tubtub sa dakung bato sang Rimon: kag ginsigput sa ila sa mga dalanon nga daku ang lima ka libo ka lalaki; kag ginlagas sila sing mapiot tubtub sa Gidom, kag ginpatay sa ila ang duha ka libo ka lalaki.

46 Gani ang tanan nga napukan sadto nga adlaw sa Benjamin duha ka pulo kag lima ka libo ka lalaki nga naggabut sing espada; ini tanan mga tawo nga isganan.

47 Apang ang anum ka gatus ka tawo nagtalikod kag nagpalagyo nayon sa kamingawan tubtub sa dakung bato nga Rimon, kag nagpuyo sa dakung bato nga Rimon sing apat ka bulan.

48 Kag ang mga lalaki sang Israel nagbalik batok sa kaanakan sang Benjamin, kag ginpatay sila sa sulab sang espada, pati ang mga tawo sang tagsa ka siudad, kag ang kasapatan, kag ang tanan nga nakita nila: labut pa ang tanan nga siudad nga ila naabutan ginsonog nila sa kalayo.

KAPITULO 21

KARON ang mga lalaki sang Israel nagsumpa sa Mizpe, nga nagasiling, Wala sing bisan sin-o sa aton nga magpaasawa sang iya anak nga babaye kay Benjamin.

2 Kag ang katawohan nag-abut sa balay sang Dios, kag nagpabilin didto tubtub sa kahaponon sa atubangan sang Dios, kag nagbayaw sang ila mga tingug, kag naghibi sing tama;

3 Kag nagsiling sila, O GINOONG Dios sang Israel, ngaa bala nahanabu ini sa Israel, nga may makulang sini nga adlaw sing isa ka tribo sa Israel?

4 Kag nahanabu sang adlaw nga madason, nga ang katawohan nagbangon sing aga pa, kag nagpatindug didto sing halaran, kag nagdolot sing mga halad nga sinonog kag mga halad sa paghidait.

5 Kag ang kaanakan sang Israel nagsiling, Sin-o bala sa tunga sang tanan nga tribo sang Israel nga wala magtaklad sa katilingban sa GINOO? Kay nakahimo sila sing daku nga sumpa nahanungud sa wala magtaklad sa GINOO sa Mizpe, nga nagasiling, Sa pagkamatuud patyon sia.

6 Kag naghinulsul ang kaanakan sang Israel tungud kay Benjamin nga ila utud, kag nagsiling, May isa ka tribo nga nautud gikan sa Israel sini nga adlaw.

7 Paano bala ang pagpaasawa naton sa ila nga nabilin, sa ginatan-aw nga nagsumpa kita sa GINOO nga indi kita magpaasawa sa ila sang aton mga anak nga babaye?

8 ś Kag nagsiling sila, May tawo bala sang mga tribo sang Israel nga wala magtaklad sa GINOO sa Mizpe? Kag, yari karon, wala sing bisan isa nga nag-abut sa kampo sa pagtilipon gikan sa Jabes-galaad.

9 Kay ang katawohan gin-isip, kag, yari karon, wala gid sing bisan sin-o didto nga gikan sa mga pumuluyo sang Jabes-galaad.

10 Kag ang katilingban nagpadala didto sing napulo kag duha ka libo ka lalaki nga labi gid kaisganan, kag ginsogo sila, nga nagasiling, Lakat kamo, kag patya ninyo sa sulab sang espada ang mga pumuluyo sang Jabes-galaad, pati ang mga babaye kag ang mga magamay.

11 Kag amo ini ang butang nga himoon ninyo, Laglagon ninyo sing totoo ang tagsa ka lalaki, kag ang tagsa ka babaye nga nakahulid sa lalaki.

12 Kag nakita nila sa tunga sang mga pumuluyo sang Jabes-galaad ang apat ka gatus ka pamatan-on nga babaye nga ulay, nga wala makahulid sa lalaki: kag gindala sila nila sa kampo sa Silo, nga yara sa duta sang Canaan.

13 Kag ang bug-os nga katilingban nagpadala sa pagpamolong sa kaanakan sang Benjamin nga yadto sa dakung bato nga Rimon, kag nagbantala sa ila sing paghidait.

14 Kag nagbalik ang Benjamin sadto nga tion; kag ginhatag nila sa ila ang mga asawa nga ginluwas nila nga buhi sa mga babaye sang Jabes-galaad: kag walay sapayan wala sila makatapud sa ila.

15 Kag ang katawohan naghinulsul tungud kay Benjamin, bangud nga ang GINOO naghimo sing bulwang sa mga tribo sang Israel.

16 ś Niyan nagsiling ang mga tigulang sang katilingban, Paano bala ang pagpaasawa naton sa ila nga nabilin, sa ginatan-aw nga ang mga babaye gikan sa Benjamin nalaglag?

17 Kag nagsiling sila, Kinahanglan nga may panublion sa mga nakapalagyo sang Benjamin, agud nga indi mapanas ang isa ka tribo sa Israel.

18 Wala sing sapayan indi kita makapaasawa sa ila sang aton mga anak nga babaye: kay ang kaanakan sang Israel nakasumpa, nga nagasiling, Pinapakamalaut sia nga nagahatag sing asawa sa Benjamin.

19 Niyan nagsiling sila, Yari karon, may pandut sa GINOO tuigtuig sa Silo sa duug nga yara sa aminhan sang Bet-el, sa nasidlangan sang dalan nga daku nga nagataklad gikan sa Bet-el pa Siquem, kag sa bagatnan sang Lebona.

20 Busa nagsogo sila sa kaanakan sang Benjamin, nga nagasiling, Kadto kamo kag magpuut sa mga ulubasan;

21 Kag tan-awa, kag, yari karon, kon ang babaye nga mga anak sang Silo maggowa sa pagsaut sa mga sinaut, niyan maggowa kamo gikan sa mga ulubasan, kag magdakup ang tagsa ka tawo sa inyo sang iya asawa sa babaye nga mga anak sang Silo, kag magkadto sa duta sang Benjamin.

22 Kag kon mag-abut ang ila mga kaamayan ukon ang ila mga utud sa pagyamo sa aton, kita magsiling sa ila, Kahamut-i sila tungud sa amon: bangud nga wala kami magkuha nga sa tagsa ka tawo sang iya asawa sa inaway: kay wala ninyo pag-ihatag sa ila sa sining tion, nga kuntani malinapason kamo.

23 Kag amo ini ang ginhimo sang kaanakan sang Benjamin, kag nagkuha sila sing mga asawa, sono sa ila kadamuon, gikan sa ila nga nagsaut, nga gintaban nila: kag naglakat sila kag nagpauli sa ila panublion, kag nagkaayo sang mga siudad, kag nagpuyo sa ila.

24 Kag ang kaanakan sang Israel nagtaliwan gikan didto sa sadto nga tion, ang tagsa ka tawo sa iya tribo kag sa iya panimalay, kag naghalin sila didto ang tagsa ka tawo pakadto sa iya panublion.

25 Sa sadto nga mga adlaw wala sing hari sa Israel: ang tagsa ka tawo naghimo sang matarung sa iya kaugalingon nga mga mata.

AMAZING GRACE BIBLE INSTITUTE