ANG PANGKABUG-OSAN NGA SULAT NIJUDASSI JUDAS, ang alagad ni Jesu-Cristo, kag utud ni Santiago, sa ila nga ginpakabalaan paagi sa Dios nga Amay, kag nga tinipigan sa kay Jesu-Cristo, kag tinawag:2 Ang kalooy, kag paghidait, kag gugma pagpaukaron sa inyo. 3 Mga hinigugma, sang nagakabalaka ako sing bug-os sa pagsulat sa inyo nahanungud sang komon nga kaluwasan, nangin-kinahanglan sa akon ang pagsulat sa inyo, kag ang paglaygay sa inyo nga dapat kamo magtinguha sing hanoot sa pagtipig sang pagtoo nga natugyan sa mga santo sang una. 4 Kay may pila ka tawo nga nagsulud sing tago, nga gintangdoan nga daan sa sining katagudilian, didiosnon nga mga tawo, nga nagabaylo sang bugay sang aton Dios sa kaulag, kag nagapanghiwala sang isa lamang ka Ginoong Dios, kag sang aton Ginoong Jesu-Cristo. 5 Busa buut ako magpahanumdum sa inyo, bisan kamo nakahibalo sini sing una, kon paano nga ang Ginoo, sang naluwas niya ang katawohan pagowa sa duta sang Egipto, sang olihi ginlaglag niya ang mga wala magtoo. 6 Kag ang mga anghel nga wala magtipig sang ila nahaunang kahimtangan, kondi nagbiya sang ila kaugalingon nga puluy-an, iya gintigana sa walay katapusan nga mga kadena sa kadudulman nga sa paghukom sang dakung adlaw. 7 Subong nga ang Sodoma kag Gomorra, kag ang mga siudad sa palibut nila nga sa amo man nga bagay, nagpanugyan sang ila mga kaugalingon sa pagpanghilawas, kag nagsolonod sa iban nga unud, nga ginabutang sila nga huwaran, nga nagaantus sang pagtimalus sang walay katapusan nga kalayo. 8 Subong man ining mga mahigko nga dumalamgo nagadagta sang unud, nagatamay sang pagbulut-an, kag nagahambal sang malaut nahanungud sa mga halangdon. 9 Apang si Miquel nga puno nga anghel, sang nagapanikasug batok sa yawa, nagpakigbais sia nahanungud sang lawas ni Moises, wala magpangahas sa paggamit sing mapasipalahon nga sulumbungon batok sa iya, kondi nagsiling, Ang Ginoo magsabdong sa imo. 10 Apang ini sila nagahambal sang malaut nahanungud sinang mga butang nga wala nila mahibaloi: apang ang nahangpan nila sa kinaugali, kaangay sang mga sapat nga walay buut, sa sinang mga butang ginadunut nila ang ila kaugalingon. 11 Kailo sa ila! kay nagsonod sila sa dalan ni Cain, kag nagdinagusu sa sayup ni Balaam tungud sa sohol, kag nawala sa pagpakigbais ni Core. 12 Ini sila mga dagta sa inyo mga sinalosalo sang diosnon nga gugma, kon nagasinalosalo sila upud sa inyo, nga nagapakaon sang ila kaugalingon sing walay kahadluk: mga panganud sila nga walay tubig, nga ginapalis sang mga hangin; mga kahoy nga ang ila mga bunga nagakapulak, walay bunga, nagkalamatay sing makaduha, nga nagabut sa mga gamut; 13 Masangsang nga kabaluran sang dagat, nga nagabula sang ila kaugalingon nga kahuluy-an; talang nga mga bitoon, nga sa ila natigana ang kangitongito sang kadudulman sa walay katapusan. 14 Kag si Enoc man, ang ikapito kutub kay Adam, nagtagna nahanungud sa ila, nga nagasiling, Yari karon, ang Ginoo magaabut upud ang napulo ka mga linibo sang iya mga santo, 15 Sa paghukom sa tanan, kag sa pagpatalupangud sa tanan nga didiosnon sa tunga nila nahanungud sang tanan nila nga didiosnon nga mga buhat nga ginhimo nila sing didiosnon, kag nahanungud sang tanan nila nga mga matig-a nga hambal nga ginpamolong sang mga didiosnon nga mga makasasala batok sa iya. 16 Ini sila mga palakumud, mga palareklamo, nga nagalakat sono sa ila kaugalingon nga mga kailigbon; kag ang ila baba nagahambal sang mga dakung habok nga mga polong, nga nagadayaw sang mga tawo agud nga makapulus. 17 Apang, mga hinigugma, panumduma ninyo ang mga polong nga ginpamolong anay sang mga apostol sang aton Ginoong Jesu-Cristo; 18 Nga nagsugid sila sa inyo nga may mga mayubiton sa katapusan nga tion, nga magalakat sono sa ila kaugalingon nga mga kailigbon nga didiosnon. 19 Ini sila amo ang nagabulag sang ila kaugalingon, mga lawasnon, nga wala sang Espiritu. 20 Apang kamo, mga hinigugma, sa nagapalig-on sang inyo mga kaugalingon sa inyo labing balaan nga pagtoo, nga nagapangamuyo sa Balaan nga Espiritu, 21 Tipigi ang inyo kaugalingon sa gugma sang Dios, nga nagahulat sang kalooy sang aton Ginoong Jesu-Cristo nga sa kabuhi nga walay katapusan. 22 Kag magkalooy sa iban, nga nagahikot sang pagbalhin: 23 Kag magluwas sang iban nga may kahadluk, sa pag-agaw sa ila sa kalayo; nga nagadumut bisan sang panapton nga nadagtaan sang unud. 24 Karon sa iya nga sarang makabantay sa inyo gikan sa pagkapukan, kag makapaatubang sa inyo nga walay sayup sa atubang sang iya himaya nga may lakas nga kalipay, 25 Sa isa lamang ka maalam nga Dios nga aton Manluluwas, ang himaya kag pagkahalangdon, pagdumala kag gahum, karon kag sa walay katapusan. Amen. |