ANG BALAAN NGA BIBLIA

ANG LIBRO NI

JOSUE

KAPITULO 1

KARON nahanabu sa tapus sang kamatayon ni Moises nga alagad sang GINOO, nga ang GINOO nagpamolong kay Josue nga anak nga lalaki ni Nun, ministro ni Moises, nga nagasiling,

2 Si Moises nga akon alagad napatay na; busa karon tindug, tabok ka sini nga Jordan, ikaw, kag ining bug-os nga katawohan, pakadto sa duta nga ginahatag ko sa ila, sa kaanakan sang Israel.

3 Ang tagsa ka duug nga matapakan sang dapadapa sang imo tiil, nahatag ko ina sa imo, sono sa napamolong ko kay Moises.

4 Kutub sa kamingawan kag sini nga Libano tubtub gid sa daku nga suba, ang suba nga Eufrates, ang bug-os nga duta sang mga Hithanon, kag tubtub sa daku nga dagat nayon sa ginatunuran sang adlaw mangin-inyo dulunan.

5 Wala sing tawo nga makasarang sa pagtindug sa atubangan mo sa tanan nga adlaw sang imo kabuhi: subong nga ako nag-upud kay Moises, sa amo magaupud ako sa imo: indi ako magpabaya sa imo ukon magbiya sa imo.

6 Magpakabakud kag magpakaisug: kay sa sining katawohan bahinbahinon mo ang duta nga panublion, nga ginsumpa ko sa ila mga kaamayan nga ihatag sa ila.

7 Lamang magpakabakud ka kag magpakaisug gid, agud nga makabantay ka sa paghimo sono sa bug-os nga kasogoan, nga ginsogo sa imo sang akon alagad nga si Moises: dili ka maglipas gikan sini sa too ukon sa wala, agud nga mag-uswag ka sa bisan diin ka makadto.

8 Ining libro sang kasogoan indi magbulag sa imo baba; kondi magpamalandong ka sa iya sa adlaw kag gab-i, agud nga makabantay ka sa paghimo sono sa tanan nga nasulat sa sini: kay niyan mapauswag mo ang imo dalanon, kag niyan may maayo ka nga kauswagan.

9 Wala bala ako magsogo sa imo? Magpakabakud kag magpakaisug; dili ka mahadluk, ukon mahangawa: kay ang GINOO nga imo Dios nagaupud sa imo bisan diin ka makadto.

10 ś Niyan si Josue nagsogo sa mga opisyal sang katawohan, nga nagasiling,

11 Mag-agi kamo sa tunga sang kasoldadosan, kag sogoa ang katawohan, nga nagasiling, Aman kamo sing mga balon; kay sa tatlo ka adlaw magatabok kamo sini nga Jordan, sa pagsulud sa pagtag-iya sang duta, nga ginahatag sa inyo sang GINOO nga inyo Dios sa pagtag-iya sini.

12 ś Kag sa mga Rubenhon, kag sa mga Gadhanon, kag sa katunga nga tribo ni Manases, nagpamolong si Josue, nga nagasiling,

13 Dumduma ang polong nga ginsogo sa inyo ni Moises nga alagad sang GINOO, nga nagasiling, Ang GINOO nga inyo Dios naghatag sa inyo sing pahuway, kag naghatag sa inyo sini nga duta.

14 Ang inyo mga asawa, ang inyo mga magamay, kag ang inyo kahayupan, magapabilin sa duta nga ginhatag sa inyo ni Moises sa tabok sang Jordan; apang kamo nga nalupit sa hinganiban magatabok sing una sa inyo mga utud, ang tanan nga gamhanan nga lalaki nga isganan, kag magabulig sa ila;

15 Tubtub nga ang GINOO makahatag sing pahuway sa inyo mga utud, subong sang ginhatag niya sa inyo, kag sila man makatag-iya sang duta nga ginahatag sa ila sang GINOO nga inyo Dios: niyan magabalik kamo sa duta nga inyo kaugalingon, kag panag-iyahan ini, nga ginhatag ni Moises nga alagad sang GINOO sa inyo sa tabok sang Jordan nayon sa bulutlakan sang adlaw.

16 ś Kag sila nagsabat kay Josue, nga nagasiling, Ang tanan nga ginasogo mo sa amon himoon namon, kag bisan diin nga ginapadala mo kami, magakadto kami.

17 Subong nga nagpamati kami kay Moises sa tanan nga butang, sa amo magapamati kami sa imo: lamang mag-upud sa imo ang GINOO nga imo Dios, subong nga nag-upud sia kay Moises.

18 Ang bisan sin-o nga magsumpung batok sa imo sogo, kag indi magpamati sa imo mga polong sa tanan nga ginasogo mo sa iya, patyon sia: lamang magpakabakud kag magpakaisug.

KAPITULO 2

KAG si Josue nga anak nga lalaki ni Nun nagpadala gikan sa Sitim sing duha ka lalaki sa paglampitaw sing tago, nga nagasiling, Lantawa ang duta, ang Jerico. Kag naglakat sila, kag nagsulud sa balay sang isa ka alpot, nga ginahingalanan si Rahab, kag naghigda didto.

2 Kag ginsugid sa hari sang Jerico, nga nagasiling, Yari karon, may mga tawo sa kaanakan sang Israel nga nagkari sining gab-i sa pag-usisa sang duta.

3 Kag ang hari sang Jerico nagpadala kay Rahab, nga nagasiling, Pagowaa ang mga lalaki nga nag-abut sa imo, nga nagsulud sa imo balay: kay nagakari sila sa pag-usisa sang bug-os nga duta.

4 Kag ginkuha sang babaye ang duha ka lalaki, kag gintago sila, kag nagsiling sing amo, May nag-abut nga mga lalaki sa akon, apang wala ko mahibaloi kon tagadiin sila:

5 Kag nahanabu sa tion nga inugtakup sang gawang, sang madulum na, nga ang mga tawo naggowa: kon diin magkadto ang mga lalaki wala ako makahibalo: lagsa sila gilayon; kay malambut ninyo sila.

6 Apang gindala niya sila sa atop sang balay, kag gintago sila sa mga pinuno sang lino, nga ginhantal niya sa atop.

7 Kag ang mga tawo naglagas sa ila sa dalanon pa Jordan tubtub sa mga olobogan: kag sa gilayon nga nakagowa ang mga naglagas sa ila, gintakpan nila ang gawang.

8 ś Kag sa wala pa sila maghigda, nagsaka sia sa ila sa atop;

9 Kag nagsiling sia sa mga lalaki, Nakahibalo ako nga ang duta ginhatag sa inyo sang GINOO, kag nga ang kakugmat sa inyo naholog sa amon, kag nga ang tanan nga pumuluyo sang duta nagpalangluya sa atubangan ninyo.

10 Kay amon nabatian kon paano nga ginpamala sang GINOO ang tubig sang Mapulang dagat tungud sa inyo, sang paggowa ninyo sa Egipto; kag kon ano ang ginhimo ninyo sa duha ka hari sang mga Amornon, nga yadto sa tabok sang Jordan, kay Sihon kag kay Og, nga ginlaglag ninyo sing totoo.

11 Kag sa pagkabati namon sining mga butang, natunaw ang amon mga tagiposoon, kag wala na sing nabilin nga kaisug sa bisan kay sin-o nga tawo, bangud sa inyo: kay ang GINOO nga inyo Dios, amo sia ang Dios sa langit sa ibabaw, kag sa duta sa idalum.

12 Busa karon, ginaampo ko sa inyo, sumpa sa akon tungud sa GINOO, sanglit nga nagpakita ako sa inyo sing pagkaayo, nga kamo man magpakita sing kaayo sa panimalay sang akon amay, kag hatagi ako sing matuud nga tandaan:

13 Kag luwason ninyo nga buhi ang akon amay, kag ang akon iloy, kag ang akon mga utud nga lalaki, kag ang akon mga utud nga babaye, kag ang tanan nga ila, kag luwason ang amon mga kabuhi sa kamatayon.

14 Kag ang mga lalaki nagsabat sa iya, Ang amon kabuhi tal-us sang inyo, kon indi ninyo pag-imitlang ini nga katuyoan namon. Kag mahanabu, kon ihatag sa amon sang GINOO ang duta, nga magmainayohon kami kag magminatud-on sa imo.

15 Niyan ginpadalos-os niya sila sa bintana sa isa ka lubid: kay ang iya balay yara sa kilid sang kuta, kag nagpuyo sia sa kuta.

16 Kag nagsiling sia sa ila, Kadto kamo sa bukid, basi nga masalapuan kamo sang mga manuglagas; kag panago kamo didto sing tatlo ka adlaw, tubtub nga ang mga manuglagas magbalik: kag ugaling makapadayon kamo sa inyo dalanon.

17 Kag ang mga lalaki nagsiling sa iya, Manginwala kami sing sala sining imo sumpa nga ginpasumpa mo sa amon.

18 Yari karon, kon magsulud kami sa duta, ihigot mo ining lubid nga escarlata nga nahut sa bintana nga ginpadalos-osan mo sa amon: kag tiponon mo sa imo sa sulud sang balay ang imo amay, kag ang imo iloy, kag ang imo mga kauturan, kag ang bug-os nga panimalay sang imo amay.

19 Kag kon ang bisan sin-o maggowa sa mga ganhaan sang imo balay pakadto sa dalan, ang iya dugo manginsa ibabaw sang iya olo, kag kami mangin wala sing sala: kag ang bisan sin-o nga kaupud nimo sa balay, ang iya dugo manginsa ibabaw sang amon olo, kon may magtandug sa iya.

20 Kag kon imitlang mo ining amon katuyoan, niyan manginwalay sala kami sa imo sumpa nga ginpasumpa mo sa amon.

21 Kag nagsiling sia, Sono sa inyo mga polong, mangin-amo ini. Kag ginpalakat niya sila, kag nagtaliwan sila: kag ginhigot niya ang lubid nga escarlata sa bintana.

22 Kag naglakat sila, kag nag-abut sa bukid, kag nagpabilin didto sing tatlo ka adlaw, tubtub nga nagbalik ang mga manuglagas: kag ang mga manuglagas nagpangita sa ila sa bug-os nga dalanon, apang wala sila makit-i.

23 ś Gani ang duha ka lalaki nagbalik, kag nagdolhog gikan sa bukid, kag nagtabok, kag nag-abut kay Josue nga anak nga lalaki ni Nun, kag nagsugid sila sa iya sang tanan nga natabu sa ila:

24 Kag nagsiling sila kay Josue, Sa pagkamatuud natugyan sang GINOO sa aton mga kamut ang bug-os nga duta; kay bisan ang tanan nga pumuluyo sang duta nagpalangluya bangud sa aton.

KAPITULO 3

KAG si Josue nagbangon sing aga pa; kag nagtaliwan sila gikan sa Sitim, kag nag-abut sa Jordan, sia kag ang bug-os nga kaanakan sang Israel, kag nagpabilin didto sa wala pa sila magtabok.

2 Kag nahanabu sa tapus ang tatlo ka adlaw, nga ang mga opisyal nag-agi sa tunga sang kasoldadosan;

3 Kag nagsogo sila sa katawohan, nga nagasiling, Kon makita ninyo ang arka sang katipan sang GINOO nga inyo Dios, kag ang mga pari nga mga Levinhon nga nagadala sini, niyan magtaliwan kamo gikan sa inyo duug, kag magsonod sini.

4 Apang sa tunga ninyo kag sa iya, may antad nga takus nga duha ka libo ka maniko: dili kamo magpalapit sa iya, agud nga inyo mahibaloan ang dalanon kon diin kamo dapat magpakadto: kay wala pa kamo makaagi sining dalanon tubtub karon.

5 Kag si Josue nagsiling sa katawohan, Magpakabalaan kamo: kay buwas ang GINOO magahimo sa tunga ninyo sing mga katanhagaan.

6 Kag si Josue nagpamolong sa mga pari, nga nagasiling, Hakwata ninyo ang arka sang katipan, kag magtabok sing una sa katawohan. Kag ginhakwat nila ang arka sang katipan, kag nag-una sa katawohan.

7 ś Kag ang GINOO nagsiling kay Josue, Sa sining adlaw magasugud ako sa pagpakadaku sa imo sa itololok sang bug-os nga Israel, agud nga makahibalo sila nga, subong nga nag-upud ako kay Moises, sa amo magaupud ako sa imo.

8 Kag sogoon mo ang mga pari nga nagadala sang arka sang katipan, nga nagasiling, Kon mag-abut kamo sa bibi sang tubig sang Jordan, magdolog kamo sa Jordan.

9 ś Kag si Josue nagsiling sa kaanakan sang Israel, Kari diri, kag pamatii ang mga polong sang GINOO nga inyo Dios.

10 Kag si Josue nagsiling, Sa sini makilala ninyo nga ang Dios nga buhi yara sa tunga ninyo, kag nga sobolon niya sing totoo gikan sa atubangan ninyo ang mga Canaanhon, kag ang mga Hithanon, kag ang mga Hevhanon, kag ang mga Pereznon, kag ang mga Gergesnon, kag ang mga Amornon, kag ang mga Jebusnon.

11 Yari karon, ang arka sang katipan sang GINOO sang bug-os nga duta magatabok sa Jordan una sa inyo.

12 Busa kuha kamo karon sing napulog duha ka lalaki gikan sa mga tribo sang Israel, sa tagsa ka tribo isa ka lalaki.

13 Kag mahanabu, kon ang mga dapadapa sang mga tiil sang mga pari nga nagadala sang arka sang GINOO, ang GINOO sang bug-os nga duta, makapahuway sa mga tubig sang Jordan, ang mga tubig sang Jordan pagautdon gikan sa mga tubig nga nagailig gikan sa ibabaw; kag sila magatindug subong sang tinumpuk.

14 ś Kag nahanabu, sang nagtaliwan ang katawohan gikan sa ila mga layanglayang, sa pagtabok sa Jordan, kag ang mga pari nga nagadala sang arka sang katipan nga nagauna sa katawohan;

15 Kag sang nag-abut sa Jordan ang mga nagdala sang arka, kag ang mga tiil sang mga pari nga nagdala sang arka nakatusmog sa bibi sang tubig, (kay ang Jordan nagaawas sa tanan niyang pangpang sa bug-os nga dag-on sang ani,)

16 Nga ang mga tubig nga nag-ilig gikan sa ilaya nagdolog kag nagponong subong sang tinumpuk nga tama ka lawig kutub sa siudad nga Adam, nga sa luyo sang Saretan: kag ang mga nag-ilig pa ilawod nayon sa dagat sang kapatagan, ang dagat nga maasin, nagdolog, kag naghawa sing bug-os: kag ang katawohan nagtabok sa tampad sang Jerico.

17 Kag ang mga pari nga nagdala sang arka sang katipan sang GINOO nagtindug sing malig-on sa mamala nga duta sa tunga sang Jordan, kag ang tanan nga Israelnon nagtabok sa mamala nga duta, tubtub nga ang bug-os nga pungsud nakatabok gid sa Jordan.

KAPITULO 4

KAG nahanabu, sang nakatabok na gid sa Jordan ang bug-os nga katawohan, nga ang GINOO nagpamolong kay Josue, nga nagasiling,

2 Kuha ka sa katawohan sing napulog duha ka lalaki, isa ka lalaki gikan sa tagsa ka tribo,

3 Kag sogoa ninyo sila, nga nagasiling, Kuha kamo sa tunga sang Jordan, sa duug nga gintindugan sing malig-on sang mga tiil sang mga pari, sing napulog duha ka bato, kag dalhon sila ninyo, kag ibilin sila sa dayonan, diin kamo magadayon sa sining gab-i.

4 Niyan gintawag ni Josue ang napulog duha ka lalaki, nga naaman niya gikan sa kaanakan sang Israel, isa ka lalaki gikan sa tagsa ka tribo:

5 Kag nagsiling sa ila si Josue, Magtabok kamo sing una sa arka sang GINOO nga inyo Dios sa tunga sang Jordan, kag ang tagsa ka tawo sa inyo magpas-an sing bato, sono sa kadamuon sang mga tribo sang kaanakan sang Israel:

6 Agud nga ini mangintanda sa tunga ninyo, nga kon ang inyo mga anak magpamangkot sa ila mga amay sa tion nga palaabuton, nga nagasiling, Ano bala sa inyo ining mga bato?

7 Niyan isabat ninyo sa ila, Nga ang mga tubig sang Jordan naghawa sa atubangan sang arka sang katipan sang GINOO; sang nagtabok ini sa Jordan, ang mga tubig sang Jordan naghawa: kag ining mga bato manginhandumanan sa kaanakan sang Israel sa gihapon.

8 Kag ang kaanakan sang Israel naghimo sing subong sono sa ginsogo ni Josue, kag nagkuha sing napulog duha ka bato gikan sa tunga sang Jordan, sono sa ginpamolong sang GINOO kay Josue, sono sa kadamuon sang mga tribo sang kaanakan sang Israel, kag gindala nila sila sa gindayonan nila, kag ginbutang sila didto.

9 Kag si Josue nagpatindug sing napulog duha ka bato sa tunga sang Jordan, sa duug nga didto nagtindug ang mga tiil sang mga pari nga nagdala sang arka sang katipan: kag didto sila tubtub sining adlaw.

10 ś Kay ang mga pari nga nagdala sang arka nagtindug sa tunga sang Jordan, tubtub nga natapus ang tagsa ka butang nga ginsogo sang GINOO kay Josue nga ipamolong sa katawohan, sono sa tanan nga ginsogo ni Moises kay Josue: kag ang katawohan nagdalidali kag nagtabok.

11 Kag nahanabu, sang nakatabok na gid ang bug-os nga katawohan, nga nagtabok ang arka sang GINOO, kag ang mga pari, sa atubangan sang katawohan.

12 Kag ang kaanakan ni Ruben, kag ang kaanakan ni Gad, kag ang katunga nga tribo ni Manases, nagtabok nga lupit sa hinganiban una sa kaanakan sang Israel, subong sang ginpamolong sa ila ni Moises:

13 Mga kap-atan ka libo nagtabok sa atubangan sang GINOO nga handa sa pag-awayan, pakadto sa mga kapatagan sang Jerico.

14 ś Sa sadtong adlaw ginpakadaku sang GINOO si Josue sa itololok sang bug-os nga Israel; kag ginkahadlukan nila sia, subong sang pagkahadluk nila kay Moises, sa tanan nga adlaw sang iya kabuhi.

15 Kag ang GINOO nagpamolong kay Josue, nga nagasiling,

16 Sogoa ang mga pari nga nagadala sang arka sang pagpamatuud, nga magtakas sila sa Jordan.

17 Busa ginsogo ni Josue ang mga pari, nga nagasiling, Takas kamo gikan sa Jordan.

18 Kag nahanabu, sang nakatakas ang mga pari nga nagadala sang arka sang katipan sang GINOO gikan sa tunga sang Jordan, kag ang mga dapadapa sang mga tiil sang mga pari nabayaw sa pagtapak sa mamala nga duta, nga ang mga tubig sang Jordan nag-uli sa ila duug, kag nag-awas sa tanan niyang pangpang, subong sang sa una.

19 ś Kag ang katawohan nagtakas sa Jordan sa ikapulo nga adlaw sang bulan nga nahauna, kag nagpahamtang sing kampo sa Gilgal, sa dulunan nga nasidlangan sang Jerico.

20 Kag yadtong napulog duha ka bato, nga gindala nila gikan sa Jordan, ginpatindug ni Josue sa Gilgal.

21 Kag nagpamolong sia sa kaanakan sang Israel, nga nagasiling, Kon magpamangkot sa ila mga amay ang inyo mga anak sa tion nga palaabuton, nga nagasiling, Ano bala sa inyo ining mga bato?

22 Niyan ipakilala ninyo sa inyo mga anak, nga nagasiling, Ang Israel nagtabok sa sining Jordan sa mamalang duta.

23 Kay ginpahubas sang GINOO nga inyo Dios ang mga tubig sang Jordan sa atubangan ninyo, tubtub nga nakatabok kamo, subong sang ginhimo sang GINOO nga inyo Dios sa Mapulang dagat, nga ginpahubas niya sa atubangan naton, tubtub nga nakatabok kita:

24 Agud nga ang tanan nga katawohan sang duta makakilala sang kamut sang GINOO, nga ini gamhanan: agud nga magkahadluk kamo sa GINOO nga inyo Dios sa gihapon.

KAPITULO 5

KAG nahanabu, sang nakabati ang tanan nga hari sang mga Amornon, nga didto sa tabok sang Jordan nayon sa katundan, kag ang tanan nga hari sang mga Canaanhon, nga didto sa ubay sang dagat, nga ginpahubas sang GINOO ang mga tubig sang Jordan sa atubangan sang kaanakan sang Israel, tubtub nga nakatabok kita, natunaw ang ila tagiposoon, kag wala na sing espiritu sa ila, bangud sang kaanakan sang Israel.

2 ś Sa sadtong tion nagsiling ang GINOO kay Josue, Buhat ka sing mga sundang nga matalum, kag circuncidaha liwat ang kaanakan sang Israel sa makaduha.

3 Kag si Josue naghimo sing mga sundang nga matalum, kag gincircuncidar ang kaanakan sang Israel sa bakolod sang mga napunta nga panit.

4 Kag amo ini ang kabangdanan nga nagpangcircuncidar si Josue: Ang tanan nga katawohan nga naggowa gikan sa Egipto, nga mga lalaki, bisan ang tanan nga lalaki sang pag-awayan, nagkalamatay sa kamingawan sa dalanon, sa tapus nga naggowa sila sa Egipto.

5 Karon ang bug-os nga katawohan nga naggowa gincircuncidar: apang ang bug-os nga katawohan nga natawo sa kamingawan sa dalanon sang naggowa sila gikan sa Egipto, ini sila wala nila macircuncidar.

6 Kay ang kaanakan sang Israel naglakat sa kamingawan sing kap-atan ka tuig, tubtub nga napapas ang bug-os nga katawohan nga mga lalaki sang pag-awayan, nga naggowa gikan sa Egipto, bangud nga wala sila magtuman sang tingug sang GINOO: sa ila nagsumpa ang GINOO nga indi niya sila pagpatan-awon sang duta, nga ginsumpa sang GINOO sa ila mga kaamayan nga ihatag niya sa aton, duta nga nagailig sing gatas kag dugus.

7 Kag ang mga anak nila, nga ginbangon niya nga tal-us sa ila, gincircuncidar sila ni Josue: kay wala sila macircuncidar, bangud nga wala nila sila macircuncidar sa dalanon.

8 Kag nahanabu, sang natapus na nila macircuncidar ang bug-os nga katawohan, nga nagpabilin sila sa ila mga duug sa kampo, tubtub nga nag-ayo sila.

9 Kag ang GINOO nagsiling kay Josue, Sining adlaw ginpaligid ko gikan sa inyo ang pagpakahuya sang Egipto. Busa ang ngalan sadtong duug ginatawag Gilgal tubtub sining adlaw.

10 ś Kag ang kaanakan sang Israel nagpahamtang sing kampo sa Gilgal, kag ginhiwat ang pagligad sa ikapulog apat nga adlaw sang bulan sa kahaponon sa mga kapatagan sang Jerico.

11 Kag sa madason nga adlaw sa tapus ang pagligad nagkaon sila sang daan nga uyas sang duta, mga torta nga walay tapay, kag uyas nga sinanlag sa among adlaw.

12 ś Kag ang mana nag-untat sang adlaw nga madason sa tapus nga nakakaon sila sang daan nga uyas sang duta; kag ang kaanakan sang Israel wala na gid sing mana; kondi nga nagkaon sila sang bunga sang duta sang Canaan sadtong tuig.

13 ś Kag nahanabu, sang didto si Josue sa Jerico, nga ginbayaw niya ang iya mga mata kag naglantaw, kag, yari karon, may isa ka lalaki nga nagtindug sa atubangan niya nga may espada nga ginabut sa iya kamut: kag si Josue nagkadto sa iya, kag nagsiling sa iya, Tungud bala ikaw sa amon, ukon sa amon mga kasumpung?

14 Kag nagsiling sia, Indi; kondi subong nga kapitan sang kasoldadosan sang GINOO nagakari ako karon. Kag si Josue naghapa sa duta, kag nagsimba, kag nagsiling sa iya, Ano bala ang isiling sang akon ginoo sa iya alagad?

15 Kag ang kapitan sang kasoldadosan sang GINOO nagsiling kay Josue, Huksa ang imo sapatos sa imo tiil; kay ang duug nga ginatindugan mo balaan. Kag amo ini ang ginhimo ni Josue.

KAPITULO 6

KARON ang Jerico natakpan sing malig-on bangud sang kaanakan sang Israel: wala gid sing naggowa, kag wala gid sang nagsulud.

2 Kag ang GINOO nagsiling kay Josue, Tan-awa, nahatag ko sa imo kamut ang Jerico, kag ang iya hari, kag ang gamhanan nga lalaki nga isganan.

3 Kag libuton ninyo ang siudad, tanan kamo nga mga lalaki sang pag-awayan, kag maglibut sang siudad sing makaisa. Amo ini ang himoon mo sa anum ka adlaw.

4 Kag pito ka pari magdala sing pito ka budyong nga sungay sang mga carnero sa atubangan sang arka: kag sa ikapitong adlaw libuton ninyo sing makapito ang siudad, kag ang mga pari magapatonog sang mga budyong.

5 Kag mahanabu, kon patunggon nila sing malawig ang sungay sang carnero, kag kon mabatian ninyo ang tonog sang budyong, ang tanan nga katawohan magsinggit sa daku nga pagsinggit; kag ang kuta sang siudad mapukan sing haplak, kag ang katawohan magasaka ang tagsa ka tawo patadlong sa atubang niya.

6 ś Kag gintawag ni Josue nga anak nga lalaki ni Nun ang mga pari, kag nagsiling sa ila, Dalha ang arka sang katipan, kag ang pito ka pari magdala sing pito ka budyong nga mga sungay sang mga carnero sa atubangan sang arka sang GINOO.

7 Kag nagsiling sia sa katawohan, Agi kamo, kag libuton ang siudad, kag sia nga lupit sa hinganiban mag-una sa arka sang GINOO.

8 ś Kag nahanabu, sang si Josue nakapamolong sa katawohan, nga ang pito ka pari nga nagadala sang pito ka budyong nga mga sungay sang mga carnero nag-una sa atubangan sang GINOO, kag nagpatonog sang mga budyong: kag ang arka sang katipan sang GINOO nagsonod sa ila.

9 ś Kag ang mga tawo nga lupit sa hinganiban nag-una sa mga pari nga nagpatonog sang mga budyong, kag ang naolihi nagsonod sa arka, ang mga pari nagalakat, kag nagapatonog sang mga budyong.

10 Kag si Josue nagsogo sa katawohan, nga nagasiling, Dili kamo magsinggit, kag dili magpabati sang inyo tingug, kag wala gid sing polong nga maggowa sa inyo baba, tubtub sa adlaw nga magsogo ako sa inyo sa pagsinggit; niyan magsinggit kamo.

11 Gani ang arka sang GINOO naglibut sa siudad, nga nagalibut sini sang makaisa: kag nagsulud sila sa kampo, kag nagpabilin sa kampo.

12 ś Kag si Josue nagbangon sing aga pa, kag ang mga pari nagdala sang arka sang GINOO.

13 Kag ang pito ka pari nga nagadala sang pito ka budyong nga mga sungay sang mga carnero sa atubangan sang arka sang GINOO nagpadayon sa paglakat, kag nagpatonog sang mga budyong: kag ang mga lalaki nga lupit sing hinganiban nag-una sa ila; apang ang naolihi nagsonod sa arka sang GINOO, ang mga pari nagalakat, kag nagapatonog sang mga budyong.

14 Kag sa ikaduhang adlaw ginlibut nila ang siudad sing makaisa, kag nagpauli sa kampo: amo ini ang ginhimo nila sa anum ka adlaw.

15 Kag nahanabu sa ikapitong adlaw, nga nagbangon sila sing aga pa sa pagpamanagbanag sang adlaw, kag naglibut sang siudad sa among bagay sing makapito: lamang sa sadtong adlaw ginlibut nila ang siudad sing makapito.

16 Kag nahanabu sa ikapito nga tion, sang nagpatonog sang mga budyong ang mga pari, si Josue nagsiling sa katawohan, Singgit; kay ginhatag sa inyo sang GINOO ang siudad.

17 ś Kag ang siudad pakamalauton, ini gid, kag ang tanan nga yara sa sini, sa GINOO: lamang si Rahab nga alpot magakabuhi, sia kag ang tanan nga yara sa balay kaupud niya, bangud nga gintago niya ang mga manugbalita nga ginpadala naton.

18 Kag kamo, maglihi gid kamo sa ginpakamalaut nga butang, agud nga indi kamo mapakamalaut, kon magkuha kamo sa ginpakamalaut nga butang, kag mahimo ninyo nga pagpakamalaut ang kampo sang Israel, kag matublag ini.

19 Apang ang tanan nga pilak, kag bulawan, kag mga suludlan nga saway kag salsalon, sagrado sa GINOO: isulud sila sa duug nga bahandian sang GINOO.

20 Gani ang katawohan nagsinggit sang ang mga pari nagpatonog sang mga budyong: kag nahanabu, sang nakabati ang katawohan sang tonog sang budyong, kag ang katawohan nagsinggit sa daku nga pagsinggit, nga ang kuta napukan sing haplak, sa bagay nga ang katawohan nagsaka pasulud sa siudad, ang tagsa ka tawo patadlong sa atubangan niya, kag gin-agaw nila ang siudad.

21 Kag ginlaglag nila sing bug-os ang tanan nga yara sa siudad, lalaki kag babaye, pamatan-on kag tigulang, kag baka, kag carnero, kag asno, sa sulab sang espada.

22 Apang si Josue nagsiling sa duha ka tawo nga naglampitaw sang duta, Sulud kamo sa balay sang alpot, kag ipagowa ninyo gikan didto ang babaye, kag ang bug-os nga iya, subong sang inyo ginsumpa sa iya.

23 Kag ang pamatan-on nga mga lalaki nga mga espiya nagsulud, kag gindala sa gowa si Rahab, kag ang iya amay, kag ang iya iloy, kag ang iya kauturan, kag ang tanan nga iya; kag ang bug-os niyang kahimataan gindala nila sa gowa, kag ginbutang sila sa gowa sang kampo sang Israel.

24 Kag ginsonog nila sa kalayo ang siudad, kag ang tanan nga yara sa iya: lamang ang pilak, kag ang bulawan, kag ang mga suludlan nga saway kag salsalon, ginsulud nila sa duug nga bahandian sang balay sang GINOO.

25 Kag ginluwas nga buhi ni Josue si Rahab nga alpot, kag ang panimalay sang iya amay, kag ang tanan nga iya; kag nagapuyo sia sa tunga sang Israel tubtub sining adlaw; bangud nga gintago niya ang mga manugbalita, nga ginpadala ni Josue sa paglampitaw sang Jerico.

26 ś Kag sadtong tion ginpasumpa sila ni Josue, nga nagasiling, Pinapakamalaut ang tawo sa atubangan sang GINOO, nga nagabangon kag nagatukud sining siudad nga Jerico: magabutang sia sang sadsaran sini sa iya panganay, kag sa iya kamanghuran nga lalaki magapatindug sia sang mga gawang sini.

27 Gani ang GINOO nag-upud kay Josue; kag ang iya kadungganan nagguub sa bug-os nga duta.

KAPITULO 7

APANG ang kaanakan sang Israel naghimo sing paglapas sa ginpakamalaut nga butang: kay si Acan, ang anak nga lalaki ni Carmi, ang anak nga lalaki ni Zabdi, ang anak nga lalaki ni Zera, gikan sa tribo ni Juda, nagkuha sa ginpakamalaut nga butang: kag ang kaakig sang GINOO nagdabdab batok sa kaanakan sang Israel.

2 Kag si Josue nagpadala sing mga lalaki kutub sa Jerico pa Ai, nga yara sa luyo sang Bet-aven, sa nasidlangan sang Bet-el, kag nagsiling sa ila, nga nagasiling, Taklad kag lantawa ninyo ang duta. Kag ang mga lalaki nagtaklad kag naglantaw sang Ai.

3 Kag nagbalik sila kay Josue, kag nagsiling sa iya, Dili pagpataklara ang bug-os nga katawohan; kondi magtaklad ang mga duha ukon tatlo ka libo ka lalaki kag maglaglag sang Ai; kag dili pagpapangabudlaya ang bug-os nga katawohan didto; kay pila lamang sila ka bilog.

4 Gani nagtaklad didto gikan sa katawohan ang mga tatlo ka libo ka lalaki: kag nagpalagyo sila sa atubangan sang mga lalaki sang Ai.

5 Kag ginpatay sa ila sang mga lalaki sang Ai ang mga katloan kag anum ka lalaki: kay ginlagas sila nila kutub sa atubangan sang gawang tubtub sa Sebarim, kag ginlaglag sila sa dulhogan: busa natunaw ang mga tagiposoon sang katawohan, kag nangin-daw tubig.

6 ś Kag ginkusnit ni Josue ang iya mga panapton, kag naghapa sa duta sa atubangan sang arka sang GINOO tubtub sa kahaponon, sia kag ang mga tigulang sang Israel, kag nagbutang sila sing yab-ok sa ila mga olo.

7 Kag si Josue nagsiling, Ahay, O Ginoong DIOS, ngaa bala ginpatabok mo pa ining katawohan sa Jordan, sa pagtugyan sa amon sa kamut sang mga Amornon, sa paglaglag sa amon? buut kami sa Dios kuntani nga nagcontento kami, kag nagpuyo sa tabok sang Jordan!

8 O Ginoo, ano bala ang isiling ko, kon ang Israel magtalikod sa atubangan sang ila mga kaaway!

9 Kay ang mga Canaanhon kag ang tanan nga pumuluyo sang duta makabati sini, kag magalikup sa amon, kag magadula sang amon ngalan gikan sa duta: kag ano bala ang himoon mo tungud sa imo dakung ngalan?

10 ś Kag ang GINOO nagsiling kay Josue, Bangon ka; ngaa bala nga nagahapa ka sing subong?

11 Ang Israel nakasala, kag ginlapas pa nila ang akon katipan nga ginsogo ko sa ila: kay nagkuha pa sila sang ginpakamalaut nga butang, kag nangawat man, kag naglikum man, kag ginsimpon pa nila ini sa ila pagkabutang.

12 Busa ang kaanakan sang Israel wala makasarang sa pagtindug sa atubangan sang ila mga kaaway, kondi nagtalikod sila sa atubangan sang ila mga kaaway, bangud nga nanginpagpakamalaut sila: kag indi na ako mag-upud sa inyo, luwas kon malaglag ninyo ang ginpakamalaut nga butang gikan sa inyo.

13 Tindug ka, pakabalaana ang katawohan, kag isiling, Pakabalaana ang inyo mga kaugalingon sa buwas: kay amo ini ang ginasiling sang GINOONG Dios sang Israel, May ginpakamalaut nga butang sa tunga mo, O Israel: indi ka makasarang magtindug sa atubangan sang imo mga kaaway, tubtub nga mapahilayo ninyo ang ginpakamalaut nga butang gikan sa inyo.

14 Busa sa aga papalapiton kamo sono sa inyo mga tribo: kag mahanabu, nga ang tribo nga kuhaon sang GINOO magapalapit sono sa mga panimalay sini; kag ang panimalay nga kuhaon sang GINOO magapalapit sono sa mga balay; kag ang balay nga kuhaon sang GINOO magapalapit sono sa tawo kag tawo.

15 Kag ang madakpan nga may ginpakamalaut nga butang sonogon sa kalayo, sia kag ang tanan nga iya: bangud nga ginlapas niya ang katipan sang GINOO, kag bangud nga nakahimo sia sing kabuangan sa Israel.

16 ś Gani nagbangon si Josue sing aga pa, kag ginpapalapit ang Israel sono sa ila mga tribo; kag ginkuha ang tribo ni Juda:

17 Kag ginpapalapit niya ang panimalay ni Juda; kag ginkuha niya ang panimalay sang mga Zerahanon: kag ginpapalapit niya ang panimalay sang mga Zerahanon sa tawo kag tawo; kag si Zabdi ginkuha:

18 Kag ginpapalapit niya ang iya panimalay sono sa tawo kag tawo; kag si Acan, ang anak nga lalaki ni Carmi, ang anak nga lalaki ni Zadbi, ang anak nga lalaki ni Zera, sa tribo ni Juda, ginkuha.

19 Kag si Josue nagsiling kay Acan, Anak ko, ihatag, ginaampo ko sa imo, ang himaya sa GINOONG Dios sang Israel, kag magtuad sa iya; kag isugid karon sa akon ang nahimo mo; dili ini pag-ililong sa akon.

20 Kag si Acan nagsabat kay Josue, kag nagsiling, Sa pagkamatuud ako nakasala batok sa GINOONG Dios sang Israel, kag nakahimo ako sing amo sini kag amo sini.

21 Sang nakita ko sa inagaw ang isa ka matahum nga panapton nga Babilonianhon, kag duha ka gatus ka siclo nga pilak, kag isa ka bilog nga bulawan nga kalim-an ka siclo ang kabug-aton, niyan ginkaibugan ko sila, kag ginkuha sila; kag, yari karon, nalubong sila sa duta sa tunga sang akon layanglayang, kag ang pilak sa idalum sini.

22 ś Gani si Josue nagpadala sing mga manugbalita, kag nagdalagan sila sa layanglayang; kag, yari karon, natago ini sa iya layanglayang, kag ang pilak sa idalum sini.

23 Kag ginkuha nila sila gikan sa tunga sang layanglayang, kag gindala sila kay Josue, kag sa tanan nga kaanakan sang Israel, kag ginbutang sila sa atubangan sang GINOO.

24 Kag si Josue, kag ang bug-os nga Israel kaupud niya, nagkuha kay Acan nga anak nga lalaki ni Zera, kag sang pilak, kag sang panapton, kag sang bilog nga bulawan, kag sang iya mga anak nga lalaki, kag sang iya mga anak nga babaye, kag sang iya mga baka, kag sang iya mga asno, kag sang iya mga carnero, kag sang iya layanglayang, kag sang tanan nga iya: kag gindala nila sila sa nalupyakan sang Acor.

25 Kag si Josue nagsiling, Ngaa bala nga gingamo mo kami? gamohon ka sang GINOO sining adlaw. Kag ginbato sia sang bug-os nga Israel sang mga bato, kag ginsonog sila sa kalayo, sa tapus nga ginbato sila nila sang mga bato.

26 Kag nagtumpok sila sa ibabaw niya sang isa ka dakung tinumpok sang mga bato tubtub sining adlaw. Gani ang GINOO nagtalikod sa kasingkal sang iya kaakig. Busa ginhingalanan inang duug, Ang nalupyakan sang Acor, tubtub sining adlaw.

KAPITULO 8

KAG ang GINOO nagsiling kay Josue, Dili magkahadluk, ukon magkahangawa: dalha kaupud nimo ang bug-os nga katawohan sang pag-awayan, kag magtindug, magtaklad sa Ai: tan-awa, nahatag ko sa imo kamut ang hari sang Ai, kag ang iya katawohan, kag ang iya siudad, kag ang iya duta:

2 Kag himoon mo sa Ai kag sa iya hari ang subong sang ginhimo mo sa Jerico kag sa iya hari: lamang ang inagaw sa iya, kag ang kahayupan sa iya, kuhaon ninyo nga sa inyo subong nga inatihan: magbutang ka sing puut sa siudad sa likod sini.

3 ś Gani nagtindug si Josue, kag ang bug-os nga katawohan sang pag-awayan, sa pagtaklad batok sa Ai: kag nagpili si Josue sing katloan ka libo ka gamhanan nga lalaki nga isganan kag ginpadala sila sa kagab-ihon.

4 Kag nagsogo sia sa ila, nga nagasiling, Yari karon, magapuut kamo batok sa siudad, sa likod sang siudad: dili kamo magpahilayo sing tama sa siudad, kondi maghanda kamo nga tanan:

5 Kag ako, kag ang bug-os nga katawohan nga kaupud nakon, magapalapit sa siudad: kag mahanabu, kon maggowa sila batok sa amon, subong sang sa nahauna, nga magapalagyo kami sa atubangan nila,

6 (Kay sila magagowa sa olihi namon) tubtub nga mapapalayo namon sila sa siudad; kay sila magasiling, Nagapalagyo sila sa atubangan naton, subong sang sa nahauna: gani magapalagyo kami sa atubangan nila.

7 Niyan kamo magatindug sa pulut-an, kag magaagaw sang siudad: kay igatugyan ini sa inyo kamut sang GINOO nga inyo Dios.

8 Kag kon maagaw na ninyo ang siudad, tutdan ninyo sing kalayo ang siudad: sono sa sogo sang GINOO himoon ninyo. Tan-awa, ginsogo ko kamo.

9 ś Busa ginpadala sila ni Josue: kag nagkadto sila sa pulut-an, kag nagpabilin sa gin-utlan sang Bet-el kag Ai, sa katundan sang Ai: apang si Josue nagpabilin sadtong gab-i sa katawohan.

10 Kag nagbangon si Josue sing aga pa, kag gin-isip ang katawohan, kag nagtaklad, sia kag ang mga tigulang sang Israel, sa una sang katawohan pakadto sa Ai.

11 Kag ang bug-os nga katawohan, ang katawohan sang pag-awayan nga kaupud niya, nagtaklad, kag nagpalapit, kag nag-abut sa atubang sang siudad, kag nagpahamtang sa aminhan sang Ai: karon sa ulut nila kag sang Ai may nalupyakan.

12 Kag nagkuha sia sing mga lima ka libo ka tawo, kag ginbutang sila sa pagpuut sa ulut sang Bet-el kag Ai, sa katundan sang siudad.

13 Kag sang ginbutang nila ang katawohan, ang bug-os nga kasoldadosan nga yadto sa aminhan sang siudad, kag ang ila manugpuut nga yadto sa katundan sang siudad, nagkadto si Josue sa sadtong gab-i sa tunga sang nalupyakan.

14 ś Kag nahanabu, sang nakita ini sang hari sang Ai, nga nagdalidali sila kag nagbangon sing aga pa, kag ang mga lalaki sang siudad naggowa sa pag-awayan batok sa Israel, sia kag ang bug-os niyang katawohan, sa pinat-ud nga tion, sa atubangan sang kapatagan; apang wala sia makahibalo nga may puut batok sa iya sa likod sang siudad.

15 Kag si Josue kag ang bug-os nga Israel naghimo subung nga daw nadaug sila sa atubangan nila, kag nagpalayo sa dalanon sang kamingawan.

16 Kag ang bug-os nga katawohan nga yadto sa Ai gintawag sing tingub sa paglagas sa ila: kag naglagas sila kay Josue, kag ginpapalayo sa siudad.

17 Kag wala gid sing lalaki nga nabilin sa Ai ukon sa Bet-el, nga wala maggowa sa paglagas sa Israel: kag ginbayaan nila ang siudad nga nabuksan, kag naglagas sa Israel.

18 Kag ang GINOO nagsiling kay Josue, Iuntay ang bangkaw nga yara sa imo kamut nayon sa Ai; kay ihatag ko ini sa imo kamut. Kag gin-untay ni Josue ang bangkaw nga yara sa iya kamut nayon sa siudad.

19 Kag ang puut naggowa sing dalidali gikan sa ila duug, kag nagdalagan sila sa gilayon nga nauntay niya ang iya kamut: kag nagsulud sila sa siudad, kag nag-agaw sini, kag nagdalidali kag ginsonog sa kalayo ang siudad.

20 Kag sang nagbalikid sa olihi nila ang mga lalaki sang Ai, nakita nila, kag, yari karon, ang aso sang siudad nagtub-ok pa langit, kag wala sila sing gahum sa pagpalagyo sa sini nga dalanon ukon sa sina nga dalanon: kag ang katawohan nga nagpalagyo sa kamingawan nagbalik batok sa mga nagalagas.

21 Kag sang nakita ni Josue kag sang bug-os nga Israel nga naagaw sang nagpuut ang siudad, kag nga ang aso sang siudad nagtub-ok, niyan nagbalik sila, kag ginpamatay ang mga tawo sang Ai.

22 Kag ang iban naggowa sa siudad sa pagsugata sa ila; sa bagay nga sila natunga sa Israel, ang iban sa sini nga luyo, kag ang iban sa sina nga luyo: kag ginlaglag nila sila, sa bagay nga wala sing bisan sin-o sa ila nga nabilin ukon nakapalagyo.

23 Kag gindakup nila nga buhi ang hari sang Ai, kag gindala sia kay Josue.

24 Kag nahanabu, sang nakatapus ang Israel sa pagpatay sang tanan nga pumuluyo sang Ai sa latagon, sa kamingawan diin ginlagas nila sila, kag sang sila tanan napukan sa sulab sang espada, tubtub nga napapas sila, nga ang bug-os nga Israel nagbalik sa Ai, kag ginlaglag ini sa sulab sang espada.

25 Kag gani, ang tanan nga napukan sa sadto nga adlaw, mga lalaki kag mga babaye, napulo kag duha ka libo, ang tanan nga tawo sang Ai.

26 Kay wala pagpunggi ni Josue ang iya kamut, nga iya gin-untay sang bangkaw, tubtub nga nalaglag niya sing bug-os ang tanan nga pumuluyo sang Ai.

27 Ang kahayupan kag ang mga inagaw lamang sa sadto nga siudad ginkuha sang Israel nga sa ila subong nga inatihan, sono sa polong sang GINOO nga iya ginsogo kay Josue.

28 Kag ginsonog ni Josue ang Ai, kag ginhimo ini nga isa ka tinumpok nga dayon, kamingawan tubtub sini nga adlaw.

29 Kag ang hari sang Ai ginbitay niya sa kahoy tubtub sa kahaponon: kag sang pagkatunud sang adlaw, nagsogo si Josue nga kuhaon nila sa kahoy ang bangkay, kag ipilak ini sa salamputan sang gawang sang siudad, kag itampukan sing isa ka daku nga tinumpok sang mga bato, nga yara tubtub sini nga adlaw.

30 ś Niyan si Josue nagpatindug sing halaran sa GINOONG Dios sang Israel sa bukid nga Ebal,

31 Subong sang ginsogo ni Moises nga alagad sang GINOO sa kaanakan sang Israel, subong sang nasulat sa libro sang kasogoan ni Moises, isa ka halaran sang mga bato nga wala mabasbasi, nga wala magamiti sang bisan sin-o nga tawo sang salsalon: kag nagdolot sila sa ibabaw sini sing mga halad nga sinonog sa GINOO, kag naghalad sing mga halad sa paghidait.

32 ś Kag nagsulat sia didto sa mga bato sing huwad sang kasogoan ni Moises, nga iya ginsulat sa atubangan sang kaanakan sang Israel.

33 Kag ang bug-os nga Israel, kag ang ila mga tigulang, kag ang mga opisyal, kag ang ila mga hukom, nagtindug sa sini nga kilid sang arka kag sa sina nga kilid sa atubangan sang mga pari nga mga Levinhon, nga nagpas-an sang arka sang katipan sang GINOO, subong ang dumuloong amo man ang tumandok; ang katunga nila sa atubang sang bukid nga Gerisim, kag ang katunga nila sa atubang sang bukid nga Ebal; sono sa ginsogo anay ni Moises nga alagad sang GINOO, nga pakamaayohon nila ang katawohan sang Israel.

34 Kag ugaling ginbasa niya ang tanan nga polong sang kasogoan, ang mga pagpakamaayo kag ang mga pagpakamalaut, sono sa tanan nga nasulat sa libro sang kasogoan.

35 Wala sing bisan ano nga polong sang tanan nga ginsogo ni Moises, nga wala pagbasaha ni Josue sa atubangan sang bug-os nga katilingban sang Israel, upud sang mga babaye, kag sang mga magamay, kag sang mga dumuloong nga nagaupud sa ila.

KAPITULO 9

KAG nahanabu, sang nakabati sini ang tanan nga hari nga yara sa sining kilid sang Jordan, sa kabakoloran, kag sa mga nalupyakan, kag sa bug-os nga baybayon sang daku nga dagat sa atubang sang Libano, ang Hithanon, kag ang Amornon, ang Canaanhon, ang Pereznon, ang Hevhanon, kag ang Jebusnon;

2 Nga nag-ulugyon sila sing tingub, sa pagpakig-away kay Josue kag sa Israel, sa isa ka paghilimbon.

3 ś Kag sang nakabati ang pumuluyo sang Gabaon sang nahimo ni Josue sa Jerico kag sa Ai,

4 Sila nagbuhat sing malimbongon, kag naglakat kag nagpakaembajador sila, kag nagdala sila sing lapat nga mga sako sa ila mga asno, kag mga suludlan sing alak, nga daan, kag gisi-on, kag pinongyutan;

5 Kag daan nga mga sapatos kag tinukapan sa ila mga tiil, kag daan nga mga panapton sa ila; kag ang tanan nga tinapay nga balon nila mamala kag agup-upon.

6 Kag nagkadto sila kay Josue sa kampo sa Gilgal, kag nagsiling sa iya, kag sa mga lalaki sang Israel, Nag-abut kami gikan sa malayo nga duta: busa karon pakigkatipan kamo sa amon.

7 Kag ang mga tawo sang Israel nagsiling sa mga Hevhanon, Ayhan kamo nagapuyo sa tunga namon; niyan paano bala ang pagpakigkatipan namon sa inyo?

8 Kag sila nagsiling kay Josue, Kami imo mga alagad. Kag si Josue nagsiling sa ila, Sin-o bala kamo? kag diin kamo maghalin?

9 Kag nagsiling sila sa iya, Ang imo mga alagad naghalin sa malayo gid nga duta bangud sang ngalan sang GINOO nga imo Dios: kay nakabati kami sang iya kabantugan, kag sang tanan nga ginhimo niya sa Egipto,

10 Kag sang tanan nga ginhimo niya sa duha ka hari sang mga Amornon, nga didto sa tabok sang Jordan, kay Sihon nga hari sang Hesbon, kag kay Og nga hari sang Basan, nga didto sa Astarot.

11 Bangud sini ang amon mga tigulang kag ang tanan nga pumuluyo sang amon duta nagpamolong sa amon, nga nagasiling, Dala kamo sang balon nga sa panlakatan, kag maglakat sa pagsugata sa ila, kag silingon sila, Kami inyo mga alagad: busa karon pakigkatipan kamo sa amon.

12 Ining amon tinapay ginkuha namon nga mainit nga amon balon gikan sa amon mga balay sang adlaw nga naghalin kami sa pagkari sa inyo; apang karon, yari, mala ini, kag nag-agup-upon:

13 Kag ini nga mga suludlan sang alak, nga ginpuno namon, mga bag-o; kag, yari karon, mga gisi-on na: kag ini nga amon mga panapton kag ang amon mga sapatos nagdaan bangud sang tama kalawig nga panlakatan.

14 Kag ang mga tawo nagkuha sang ila balon, kag wala magpangayo sang laygay sa baba sang GINOO.

15 Kag si Josue nagpakighidait sa ila, kag nagpakigkatipan sa ila, sa pagpakabuhi sa ila: kag ang mga prinsipe sang katilingban nagsumpa sa ila.

16 ś Kag nahanabu sa tapus ang tatlo ka adlaw nga tapus sila makapakigkatipan sa ila, nga nakabati sila nga mga kaingud nila sila, kag nga nagpuyo sila sa tunga nila.

17 Kag nagpanlakatan ang kaanakan sang Israel, kag sa ikatlo ka adlaw nag-abut sa ila mga siudad. Karon ang ila mga siudad amo ang Gabaon, kag ang Cafira, kag ang Beerot, kag ang Kiryat-jearim.

18 Kag wala sila paglaglaga sang kaanakan sang Israel, bangud nga ang mga prinsipe sang katilingban nakasumpa sa ila tungud sa GINOONG Dios sang Israel. Kag ang bug-os nga katilingban nagkumud batok sa mga prinsipe.

19 Apang ang tanan nga prinsipe nagsiling sa bug-os nga katilingban, Nakasumpa kami sa ila tungud sa GINOONG Dios sang Israel: busa karon indi naton matandug sila.

20 Ini amo ang himoon ta sa ila; pakabuhion ta sila, basi nga ang kasingkal manginsa aton, bangud sang sumpa nga ginsumpa namon sa ila.

21 Kag ang mga prinsipe nagsiling sa ila, Pakabuhia sila; apang magmanginmanugpangahoy sila kag magmanugsag-ub sang tubig sa bug-os nga katilingban; sono sa ginsaad sa ila sang mga prinsipe.

22 ś Kag gintawag sila ni Josue, kag nagpamolong sia sa ila, nga nagasiling, Ngaa bala nga dinayaan ninyo kami, nga nagasiling, Tama kami kalayo sa inyo; sing ugai nagapuyo kamo sa tunga namon?

23 Busa pinapakamalaut kamo karon, kag walay gid sang bisan sin-o sa inyo nga pagabuhian sa pagkaulipon, kag sa mga manugpangahoy, kag sa mga manugsag-ub sang tubig nga sa balay sang akon Dios.

24 Kag sila nagsabat kay Josue, kag nagsiling, Bangud nga ginsugid sa imo mga alagad sa minatuud, kon paano nga ang GINOO nga imo Dios nagsogo kay Moises nga iya alagad nga ihatag sa inyo ang bug-os nga duta, kag laglagon ang tanan nga pumuluyo sang duta gikan sa atubangan ninyo, busa nahadluk kami sing tama tungud sang amon kabuhi bangud sa inyo, kag naghimo sini nga butang.

25 Kag karon, yari, kami yara sa imo kamut: ang subong nga daw maayo kag matarung sa imo nga himoon sa amon, himoa.

26 Kag amo ini ang ginhimo niya sa ila, kag ginluwas sila sa kamut sang kaanakan sang Israel, kag wala nila sila pagpatya.

27 Kag ginhimo sila ni Josue sadto nga adlaw nga mga manugpangahoy kag manugsag-ub sang tubig nga sa katilingban, kag sa halaran sang GINOO, tubtub sini nga adlaw, sa duug nga iya pagapilion.

KAPITULO 10

KARON nahanabu, sang nabatian ni Adoni-zedec nga hari sang Jerusalem kon paano nga naagaw ni Josue ang Ai, kag nalaglag niya ini sing bug-os; subong sang nahimo niya sa Jerico kag sa iya hari, amo ini ang ginhimo niya sa Ai kag sa iya hari; kag kon paano nga ang mga pumuluyo sang Gabaon nagpakighidait sa Israel, kag yadto sa tunga nila;

2 Nga ginhadlukan sila sing daku, bangud nga ang Gabaon daku nga siudad, subong sang isa sang mga harianon nga siudad, kag bangud nga labi pa kadaku sia sa Ai, kag ang tanan niya nga tawo gamhanan.

3 Gani nagpadala si Adoni-zedec nga hari sang Jerusalem kay Hoham nga hari sang Hebron, kag kay Piram nga hari sang Jarmut, kag kay Jafia nga hari sang Laquis, kag kay Debir nga hari sang Eglon, nga nagasiling,

4 Taklad kamo sa akon, kag buligi ako, agud nga gubaton ta ang Gabaon: kay sia nagpakighidait kay Josue kag sa kaanakan sang Israel.

5 Busa ang lima ka hari sang mga Amornon, ang hari sang Jerusalem, ang hari sang Hebron, ang hari sang Jarmut, ang hari sang Laquis, ang hari sang Eglon, nagtingub, kag nagtaklad, sila kag ang tanan nila nga kasoldadosan, kag nagpahamtang sing kampo sa atubangan sang Gabaon, kag nagpakig-away batok sa iya.

6 ś Kag ang mga lalaki sang Gabaon nagpadala kay Josue sa kampo sa Gilgal, nga nagasiling, Dili pagpabuyanbuyani sang imo kamut ang imo mga alagad; taklad ka sing madali sa amon, kag luwasa kami, kag tabangi kami: kay ang tanan nga hari sang mga Amornon nga nagapuyo sa kabukiran nagtingub batok sa amon.

7 Gani nagtaklad si Josue gikan sa Gilgal, sia kag ang bug-os nga katawohan sang pag-awayan kaupud niya, kag ang tanan nga gamhanan nga lalaki nga isganan.

8 ś Kag ang GINOO nagsiling kay Josue, Dili ka magkahadluk sa ila: kay natugyan ko sila sa imo kamut; wala sing bisan sin-o nga tawo sa ila nga makatindug sa atubangan mo.

9 Busa si Josue nag-abut sa ila sing hinali, kag sa bug-os nga gab-i nagtaklad sia gikan sa Gilgal.

10 Kag ginlaglag sila sang GINOO sa atubangan sang Israel, kag ginpatay niya sila sa daku nga pagpamatay sa Gabaon, kag ginlagas sila sa dalanon sang taklaran sang Bet-horon, kag ginlaglag sila tubtub sa Azeca, kag tubtub sa Maceda.

11 Kag nahanabu, sang nagpalagyo sila gikan sa atubangan sang Israel, kag sang didto sila sa dulhogan sang Bet-horon, nga ginhologan sila sang GINOO gikan sa langit sing dalagku nga mga bato tubtub sa Azeca, kag nagkalamatay sila: madamu pa sa ila ang nagkalamatay sa mga bato nga hielo sang sa mga ginpatay sa espada sang kaanakan sang Israel.

12 ś Niyan si Josue nagpamolong sa GINOO sa adlaw nga gintugyan sang GINOO ang mga Amornon sa atubangan sang kaanakan sang Israel, kag nagsiling sia sa itololok sang Israel, Adlaw, dolog ka sa ibabaw sang Gabaon; kag ikaw, Bulan, sa nalupyakan sang Ayalon.

13 Kag ang adlaw nagdolog, kag ang bulan nagpahimonong, tubtub nga ang katawohan nakapanimalus sa ila mga kaaway. Wala bala masulat ini sa libro ni Jaser? Gani ang adlaw nagdolog sa tunga sang langit, kag wala magdalidali sa pagtunud sing mga isa ka adlaw nga bug-os?

14 Kag wala sing adlaw nga kaangay sadto nga una sini ukon olihi sini, nga ang GINOO nagpamati sa tingug sang isa ka tawo: kay ang GINOO nagpakig-away tungud sa Israel.

15 ś Kag si Josue nagbalik, kag ang bug-os nga Israel kaupud niya, sa kampo sa Gilgal.

16 Apang ini nga lima ka hari nagpalagyo, kag nagpanago sa lungib sa Maceda.

17 Kag ginsugid kay Josue, nga nagasiling, Nakita ang lima ka hari nga nagapanago sa lungib sa Maceda.

18 Kag si Josue nagsiling, Paligira ninyo ang mga bato nga dalagku sa baba sang lungib, kag butangan sing mga tawo sa luyo niya sa pagbantay sa ila:

19 Kag kamo dili magdolog, kondi lagsa ang inyo mga kaaway, kag laglaga ang naolihi sa ila; dili sila pagpasudla sa ila mga siudad: kay gintugyan sila sa inyo kamut sang GINOO nga inyo Dios.

20 Kag nahanabu, sang si Josue kag ang kaanakan sang Israel nakatapus sa pagpamatay sa ila sa daku nga pagpamatay, tubtub nga napapas sila, nga ang nabilin sa ila nakasulud sa mga siudad nga napamakuran.

21 Kag ang bug-os nga katawohan nagbalik sa kampo kay Josue sa Maceda sa paghidait: wala sing bisan sin-o nga naghulag sang iya dila batok sa bisan kay sin-o sang kaanakan sang Israel.

22 Niyan nagsiling si Josue, Buksi ninyo ang baba sang lungib, kag dalhon sa akon yadto nga lima ka hari pagowa gikan sa lungib.

23 Kag ginhimo nila ang subong sini, kag gindala sa iya yadto nga lima ka hari pagowa gikan sa lungib, ang hari sang Jerusalem, ang hari sang Hebron, ang hari sang Jarmut, ang hari sang Laquis, kag ang hari sang Eglon.

24 Kag nahanabu, sang gindala nila kay Josue yadtong mga hari, nga si Josue nagtawag sa tanan nga lalaki sang Israel, kag nagsiling sa mga kapitan sang mga lalaki sang pag-awayan nga nag-upud sa iya, Palapit kamo, ibutang ang inyo mga tiil sa mga liog sining mga hari. Kag nagpalapit sila, kag ginbutang ang ila mga tiil sa mga liog nila.

25 Kag si Josue nagsiling sa ila, Dili magkahadluk, ukon magkahangawa, magpakabakud kag magpakaisug: kay subong sini ang himoon sang GINOO sa tanan ninyo nga kaaway nga ginaaway ninyo.

26 Kag sang olihi ginsakit sila ni Josue, kag ginpatay sila, kag ginbitay sila sa lima ka kahoy: kag nabitay sila sa mga kahoy tubtub sa kahaponon.

27 Kag nahanabu sa tion nga nagahinunud ang adlaw, nga si Josue nagsogo, kag gintonton nila sila gikan sa mga kahoy, kag ginpilak sila sa lungib diin nagpanago sila, kag ginbutangan sing dalagku nga mga bato ang baba sang lungib, nga nagapabilin tubtub sini gid nga adlaw.

28 ś Kag gin-agaw ni Josue ang Maceda sadto nga adlaw, kag ginlaglag ini sa sulab sang espada, kag ang hari sini ginlaglag niya sing bug-os, sila, kag ang tanan nga kalag nga yara sa sulud niya; wala sia sing ginbilin: kag ginhimo niya sa hari sang Maceda subong sang nahimo niya sa hari sang Jerico.

29 Niyan si Josue nagtaliwan sa Maceda, kag ang bug-os nga Israel kaupud niya, pakadto sa Libna, kag nagpakig-away batok sa Libna:

30 Kag gintugyan ini man sang GINOO, kag ang hari sini, sa kamut sang Israel; kag ginlaglag niya ini sa sulab sang espada, kag ang tanan nga kalag nga yara sa sulud niya; wala sia sing ginbilin sa iya; kondi ginhimo niya sa hari sini subong sang nahimo niya sa hari sang Jerico.

31 ś Kag si Josue nagtaliwan sa Libna, kag ang bug-os nga Israel kaupud niya, pakadto sa Laquis, kag nagpahamtang sing kampo batok sa iya, kag nagpakig-away batok sa iya:

32 Kag gintugyan sang GINOO ang Laquis sa kamut sang Israel, nga gin-agaw ini sa ikaduha nga adlaw, kag ginlaglag ini sa sulab sang espada, kag ang tanan nga kalag nga yara sa sulud niya, sono sa tanan nga nahimo niya sa Libna.

33 ś Niyan si Horam nga hari sang Gezer nagtaklad sa pagbulig sang Laquis; kag ginlaglag ni Josue sia kag ang iya katawohan, tubtub nga wala sia sing ginbilin sa iya.

34 ś Kag si Josue nagtaliwan gikan sa Laquis pakadto sa Eglon, kag ang bug-os nga Israel kaupud niya; kag nagpahamtang sila sing kampo batok sa iya, kag nagpakig-away batok sa iya:

35 Kag gin-agaw nila ini sa sadto nga adlaw, kag ginlaglag ini sa sulab sang espada, kag ang tanan nga kalag nga yara sa sulud sini ginlaglag niya sing bug-os sadto nga adlaw, sono sa tanan nga nahimo niya sa Laquis.

36 Kag si Josue nagtaklad gikan sa Eglon, kag ang bug-os nga Israel kaupud niya, pakadto sa Hebron; kag nagpakig-away sila batok sa iya:

37 Kag gin-agaw nila ini, kag ginlaglag ini sa sulab sang espada, kag ang iya hari, kag ang tanan niya nga siudad, kag ang tanan nga kalag nga yara sa sulud sini; wala sia sing ginbilin, sono sa tanan nga nahimo niya sa Eglon; apang ginlaglag niya ini sing bug-os, kag ang tanan nga kalag nga yara sa sulud sini.

38 ś Kag si Josue nagbalik, kag ang bug-os nga Israel kaupud niya, pakadto sa Debir; kag nagpakig-away batok sa sini:

39 Kag gin-agaw niya ini, kag ang iya hari, kag ang tanan niya nga siudad; kag ginlaglag nila sila sa sulab sang espada, kag ginlaglag sing bug-os ang tanan nga kalag nga yara sa sulud sini; wala sia sing ginbilin: subong sang nahimo niya sa Hebron, amo ini ang nahimo niya sa Debir, kag sa iya hari; subong sang nahimo niya man sa Libna, kag sa iya hari.

40 ś Gani ginlaglag ni Josue ang bug-os nga duta sang mga kabakoloran, kag sang bagatnan, kag sang nalupyakan, kag sang mga tuburan, kag sang tanan nila nga hari: wala sia sing ginbilin, kondi nga ginlaglag niya sing bug-os ang tanan nga nagaginhawa, subong sang ginsogo sang GINOONG Dios sang Israel.

41 Kag ginlaglag sila ni Josue kutub sa Cades-barnea tubtub sa Gaza, kag ang bug-os nga duta sang Gozen, tubtub sa Gabaon.

42 Kag ini tanan nga hari kag ang ila duta gin-agaw ni Josue sa makaisa, bangud nga ang GINOONG Dios sang Israel nagpakig-away tungud sa Israel.

43 Kag nagbalik si Josue, kag ang bug-os nga Israel kaupud niya, sa kampo sa Gilgal.

KAPITULO 11

KAG nahanabu, sang nabatian ni Jabin nga hari sang Hazor inang mga butang, nga nagpadala sia kay Jobab nga hari sang Madon, kag sa hari sang Simron, kag sa hari sang Acsaf,

2 Kag sa mga hari nga didto sa aminhan sa kabukiran, kag sa mga kapatagan sa bagatnan sang Cinerot, kag sa nalupyakan, kag sa mga dulunan sang Dor sa katundan,

3 Kag sa Canaanhon sa sidlangan kag sa katundan, kag sa Amornon, kag sa Hithanon, kag sa Pereznon, kag sa Jebusnon sa kabukiran, kag sa Hevhanon sa ubus sang Hermon sa duta sang Mizpe.

4 Kag sila naggowa, sila ang tanan nilang mga kasoldadosan kaupud nila, madamu gid nga katawohan, subong sang kadamuon sang balas nga yara sa baybayon, nga may mga kabayo kag mga kangga nga tama gid kadamu.

5 Kag sang ini tanan nga hari nagtingub, nag-abut sila kag nagpahamtang sing tingub malapit sa mga tubig sang Merom, sa pagpakig-away batok sa Israel.

6 ś Kag ang GINOO nagsiling kay Josue, Dili magkahadluk bangud sa ila: kay buwas sa sining tion itugyan ko sila tanan nga patay sa atubangan sang Israel: kitinan mo ang ila mga kabayo, kag sonogon sa kalayo ang ila mga kangga.

7 Gani si Josue nag-abut, kag ang bug-os nga katawohan sang pag-awayan kaupud niya, batok sa ila sing hinali sa luyo sang mga tubig sang Merom; kag gindamhagan nila sila.

8 Kag gintugyan sila sang GINOO sa kamut sang Israel, nga naglaglag sa ila, kag naglagas sa ila tubtub sa dakung Zidon, kag tubtub sa Misrefot-maim, kag tubtub sa nalupyakan sang Mizpe nayon sa sidlangan; kag ginlaglag nila sila, tubtub nga wala sing nabilin sa ila.

9 Kag ginhimo ni Josue sa ila subong sang ginsogo sang GINOO sa iya: ginkitinan niya ang ila mga kabayo, kag ang ila mga kangga ginsonog sa kalayo.

10 ś Kag si Josue nagbalik sa sadtong tion, kag gin-agaw ang Hazor, kag ginpatay sa espada ang iya hari: kay ang Hazor anay amo ang olo sadto tanan nga ginharian.

11 Kag ginlaglag nila sa sulab sang espada ang tanan nga kalag nga yara sa iya, nga nagalaglag sa ila sing bug-os: wala gid sing nabilin nga nagaginhawa: kag ang Hazor ginsonog niya sa kalayo.

12 Kag ang tanan nga siudad sadtong mga hari, kag ang tanan nga hari nila, ginkuha ni Josue, kag ginpapas niya sila sa sulab sang espada, kag ginlaglag niya sila sing bug-os, sono sa ginsogo ni Moises nga alagad sang GINOO.

13 Apang nahanungud sang mga siudad nga nagtindug sa ila kabakuran, walay bisan isa sa ila nga ginsonog sang Israel, luwas lamang ang Hazor; yadto ginsonog ni Josue.

14 Kag ang tanan nga inagaw sining mga siudad, kag ang kahayupan, ginkuha sang kaanakan sang Israel nga ila inatihan; apang ang tagsa ka tawo ginlabo nila sa sulab sang espada, tubtub nga nalaglag nila sila, kag wala gid sila sing ginbilin nga nagaginhawa.

15 ś Subong sang ginsogo sang GINOO kay Moises nga iya alagad, amo ini ang ginsogo ni Moises kay Josue, kag amo ini ang ginhimo ni Josue; wala sia sing ginbilin nga wala mahimo sang tanan nga ginsogo sang GINOO kay Moises.

16 Gani gin-agaw ni Josue ang bug-os sadtong duta, ang kabakoloran, kag ang bug-os nga duta sa bagatnan, kag ang bug-os nga duta sang Gosen, kag ang nalupyakan, kag ang kapatagan, kag ang bukid sang Israel, kag ang nalupyakan niya;

17 Kutub sa bukid nga Halak, nga nagataklad pa Seir, tubtub sa Baal-gad sa nalupyakan sang Libano sa ubus sang bukid nga Hermon: kag ginkuha niya ang tanan nga hari nila, kag ginsakit sila, kag ginpatay sila.

18 Si Josue nagpakig-away sing malawig sa tanan sadtong hari.

19 Walay siudad nga nagpakighidait sa kaanakan sang Israel, luwas sang mga Hevhanon nga mga pumuluyo sang Gabaon: ang tanan gin-agaw nila sa inaway.

20 Kay ini nagikan sa GINOO ang pagpatig-a sang ila mga tagiposoon, nga magkadto sila sa pagsumpung sa Israel sa inaway, agud nga malaglag niya sila sing bug-os, kag nga indi sila pagkalooyan, kondi malaglag niya sila, subong sang ginsogo sang GINOO kay Moises.

21 ś Kag nag-abut si Josue sa sadtong tion, kag ginpapas ang mga Anakimnon gikan sa kabukiran, gikan sa Hebron, gikan sa Debir, gikan sa Anab, kag gikan sa bug-os nga kabukiran sang Juda, kag gikan sa bug-os nga kabukiran sang Israel: ginlaglag sila ni Josue sing bug-os pati ang ila siudad.

22 Wala gid sing nabilin sang mga Anakim sa duta sang kaanakan sang Israel: lamang sa Gaza, sa Gat, kag sa Asdod, nabilin ang iban.

23 Gani gin-agaw ni Josue ang bug-os nga duta, sono sa tanan nga ginpamolong sang GINOO kay Moises; kag ginhatag ini ni Josue sa Israel nga panublion sono sa ila mga bahin sa ila tribo. Kag ang duta nakapahuway gikan sa inaway.

KAPITULO 12

KARON amo ini sila ang mga hari sang duta, nga ginlaglag sang kaanakan sang Israel, kag ang ila duta ginpanag-iyahan sa tabok sang Jordan nayon sa bulutlakan sang adlaw, kutub sa suba nga Arnon tubtub sa bukid nga Hermon, kag ang bug-os nga kapatagan sa sidlangan:

2 Si Sihon nga hari sang mga Amornon, nga nagpuyo sa Hesbon, kag naggahum kutub sa Aroer, nga yara sa pangpang sang suba nga Arnon, kag kutub sa katunga sang suba, kag kutub sa katunga sang Galaad, tubtub sa suba nga Jaboc, nga amo ang dulunan sang kaanakan ni Amon;

3 Kag kutub sa kapatagan tubtub sa dagat sang Cinerot sa sidlangan, kag tubtub sa dagat sang kapatagan, ang dagat nga maasin sa sidlangan, sa dalan pakadto sa Bet-jesimot; kag kutub sa bagatnan, sa ubus sang Asdot-pisga:

4 ś Kag ang ginsakpan ni Og nga hari sang Basan, nga gikan sa nabilin sang mga higante, nga nagpuyo sa Astarot kag sa Edrei,

5 Kag naggahum sa bukid nga Hermon, kag sa Salca, kag sa bug-os nga Basan, tubtub sa dulunan sang mga Gesurnon kag sang mga Maacatnon, kag sa katunga sang Galaad, ang dulunan ni Sihon nga hari sang Hesbon.

6 Sila ginlaglag ni Moises nga alagad sang GINOO kag sang kaanakan sang Israel: kag si Moises nga alagad sang GINOO naghatag sini nga kaugalingon sang mga Rubenhon, kag sang mga Gadhanon, kag sang katunga nga tribo ni Manases.

7 ś Kag ini sila amo ang mga hari sang duta nga ginlaglag ni Josue kag sang kaanakan sang Israel sa sining kilid sang Jordan nayon sa katundan, kutub sa Baal-gad sa nalupyakan sang Libano tubtub sa bukid nga Halac, nga nagataklad pa Seir; ini ginhatag ni Josue nga kaugalingon sa mga tribo sang Israel sono sa ila mga bahin;

8 Sa kabukiran, kag sa mga nalupyakan, kag sa mga kapatagan, kag sa mga tuburan, kag sa kamingawan, kag sa duta sa bagatnan; ang mga Hithanon, ang mga Amornon, kag ang mga Canaanhon, ang mga Pereznon, ang mga Hevhanon, kag ang mga Jebusnon:

9 ś Ang hari sang Jerico, isa; ang hari sang Ai, nga yara sa luyo sang Bet-el, isa;

10 Ang hari sang Jerusalem, isa; ang hari sang Hebron, isa;

11 Ang hari sang Jarmut, isa; ang hari sang Laquis, isa;

12 Ang hari sang Eglon, isa; ang hari sang Gezer, isa;

13 Ang hari sang Debir, isa; ang hari sang Geder, isa;

14 Ang hari sang Horma, isa; ang hari sang Arad, isa;

15 Ang hari sang Libna, isa; ang hari sang Adullam, isa;

16 Ang hari sang Maceda, isa; ang hari sang Bet-el, isa;

17 Ang hari sang Tapua, isa; ang hari sang Heper, isa;

18 Ang hari sang Afec, isa; ang hari sang Lasaron, isa;

19 Ang hari sang Madon, isa; ang hari sang Hazor, isa;

20 Ang hari sang Simron-meron, isa; ang hari sang Acsaf, isa;

21 Ang hari sang Taanak, isa; ang hari sang Meguido, isa;

22 Ang hari sang Cades, isa; ang hari sang Jocneam sa Carmelo, isa;

23 Ang hari sang Dor sa dulunan sang Dor, isa; ang hari sang mga pungsud sang Gilgal, isa;

24 Ang hari sang Tirza, isa: katloan kag isa ka hari tanan.

KAPITULO 13

KARON si Josue tigulang na kag sobol sa panuigon; kag ang GINOO nagsiling sa iya, Ikaw tigulang na kag sobol sa panuigon, kag may nabilin pa nga tama gid kadaku nga duta nga panag-iyahan.

2 Ini amo ang duta nga nabilin pa: ang bug-os nga ginsakpan sang mga Filistinhon, kag ang bug-os nga Gesuri,

3 Kutub sa Sihor, nga yara sa atubang sang Egipto, tubtub sa mga dulunan sang Ecron nayon sa aminhan, nga ginkabig nga sa mga Canaanhon: ang lima ka ginoo sang mga Filistinhon; ang mga Gazahanon, kag ang mga Asdodnon, ang mga Ascalonhon, ang mga Gethanon, kag ang mga Ecronhon; subong man ang mga Avimnon:

4 Kutub sa bagatnan, ang bug-os nga duta sang mga Canaanhon, kag ang Meara nga yara sa luyo sang mga Sidonhon, tubtub sa Afec, tubtub sa mga dulunan sang mga Amornon:

5 Kag ang duta sang mga Gibalnon, kag ang bug-os nga Libano, nayon sa bulutlakan sang adlaw, kutub sa Baal-gad sa ubus sang bukid nga Hermon tubtub sa salamputan sang Hamat.

6 Ang bug-os nga pumuluyo sang kabakoloran kutub sa Libano tubtub sa Misrefot-maim, kag ang tanan nga mga Sidonhon, sobolon ko sila gikan sa atubangan sang kaanakan sang Israel: lamang pahaton mo ini sa papalad sa mga Israelnon nga sa panublion, subong sang ginsogo ko sa imo.

7 Busa karon bahinbahina ining duta nga panublion sa siam ka tribo, kag sa katunga nga tribo ni Manases,

8 Nga upud sa iya ang mga Rubenhon kag ang mga Gadhanon nagbaton sang ila panublion, nga ginhatag sa ila ni Moises, sa tabok sang Jordan nayon sa sidlangan, subong sang ginhatag sa ila ni Moises nga alagad sang GINOO;

9 Kutub sa Aroer, nga yara sa pangpang sang suba nga Arnon, kag ang siudad nga yara sa tunga sang suba, kag ang bug-os nga kapatagan sang Medeba tubtub sa Dibon;

10 Kag ang tanan nga siudad ni Sihon nga hari sang mga Amornon, nga naghari sa Hesbon, tubtub sa dulunan sang kaanakan ni Amon;

11 Kag ang Galaad, kag ang dulunan sang mga Gesurnon kag sang mga Maacatnon, kag ang bug-os nga bukid nga Hermon, kag ang bug-os nga Basan tubtub sa Salca;

12 Ang bug-os nga ginharian ni Og sa Basan, nga naghari sa Astarot kag sa Edrei, nga nagpabilin gikan sa nabilin sang mga higante: kay amo ini sila ang gindaug ni Moises, kag ginsobol.

13 Apang wala pagsobola sang kaanakan sang Israel ang mga Gesurnon, ukon ang mga Maacatnon: apang ang mga Gesurnon kag ang mga Maacatnon nagapuyo sa tunga sang Israel tubtub sining adlaw.

14 Lamang sa tribo ni Levi wala sia maghatag sing panublion; ang mga halad nga pinadabdab sa GINOONG Dios sang Israel amo ang ila panublion, subong sang ginsiling niya sa ila.

15 ś Kag si Moises naghatag sing panublion sa tribo sang kaanakan ni Ruben sono sa ila mga panimalay.

16 Kag ang ginsakpan nila kutub sa Aroer, nga yara sa pangpang sang suba nga Arnon, kag ang siudad nga yara sa tunga sang suba, kag ang bug-os nga kapatagan sang Medeba;

17 Ang Hesbon, kag ang tanan niyang siudad nga yara sa kapatagan; ang Dibon, kag ang Bamot-baal, kag ang Bet-baal-meon,

18 Kag ang Jahaz, kag ang Cedemot, kag ang Mefaat,

19 Kag ang Kiryataim, kag ang Sibma, kag ang Seret-sahar sa bukid sang nalupyakan,

20 Kag ang Bet-peor, kag ang Asdot-pisga, kag ang Bet-jesimot,

21 Kag ang tanan nga siudad sang kapatagan, kag ang bug-os nga ginharian ni Sihon nga hari sang mga Amornon, nga naghari sa Hesbon, nga gindaug ni Moises pati ang mga prinsipe sang Midian, si Evi, kag si Requem, kag si Zur, kag si Hur, kag si Reba, nga mga duke ni Sihon, nga nagpuyo sa duta.

22 ś Si Balaam man nga anak nga lalaki ni Beor, ang manugpakut, ginpatay sa espada sang kaanakan sang Israel upud sa iban nga pinatay nila.

23 Kag ang dulunan sang kaanakan ni Ruben amo ang Jordan, kag ang dulunan sini. Ini amo ang panublion sang kaanakan ni Ruben, sono sa ila mga panimalay, ang mga siudad kag ang ila mga minoro.

24 Kag si Moises naghatag sing panublion sa tribo ni Gad, sa kaanakan ni Gad sono sa ila mga panimalay.

25 Kag ang ginsakpan nila amo ang Jazer, kag ang tanan nga siudad sang Galaad, kag katunga sang duta sang kaanakan ni Amon, tubtub sa Aroer nga yara sa atubangan sang Raba;

26 Kag kutub sa Hesbon tubtub sa Ramat-mizpe, kag sa Betonim; kag kutub sa Mahanaim tubtub sa dulunan sang Debir;

27 Kag sa nalupyakan, ang Bet-haram, kag ang Bet-nimra, kag ang Sucot, kag ang Zafon, ang nabilin sang ginharian ni Sihon nga hari sang Hesbon, ang Jordan kag ang iya ginsakpan, tubtub sa ukbung sang dagat sang Cinerot sa tabok sang Jordan nayon sa sidlangan.

28 Ini amo ang panublion sang kaanakan ni Gad sono sa ila panimalay, ang mga siudad, kag ang ila mga minoro.

29 ś Kag si Moises naghatag sing panublion sa katunga nga tribo ni Manases: kag ini iya sang katunga nga tribo sang kaanakan ni Manases sono sa ila mga panimalay.

30 Kag ang ginsakpan nila kutub sa Mahanaim, ang bug-os nga Basan, ang bug-os nga ginharian ni Og nga hari sang Basan, kag ang tanan nga banwa sang Jair, nga yara sa Basan, kan-uman ka siudad:

31 Kag ang katunga sang Galaad, kag ang Astarot, kag ang Edrei, ang mga siudad sang ginharian ni Og sa Basan, iya sang kaanakan ni Maquir nga anak nga lalaki ni Manases, bisan ang katunga sang kaanakan ni Maquir sono sa ila mga panimalay.

32 Ini amo ang mga duta nga ginpanagtag ni Moises nga panublion sa mga kapatagan sang Moab, sa tabok sang Jordan, sa Jerico, nayon sa sidlangan.

33 Apang sa tribo ni Levi wala maghatag si Moises sing panublion: ang GINOONG Dios sang Israel amo ang ila panublion, subong sang ginpamolong niya sa ila.

KAPITULO 14

KAG ini amo ang mga duta nga ginpanubli sang kaanakan sang Israel sa duta sang Canaan, nga ginpanagtag nga panublion sa ila ni Eleazar nga pari, kag ni Josue nga anak nga lalaki ni Nun, kag sang mga pangolo sang mga kaamayan sang mga tribo sang kaanakan sang Israel.

2 Paagi sa papalad ang ila panublion, subong sang ginsogo sang GINOO kay Moises nga sa siam ka tribo, kag sa katunga nga tribo.

3 Kay si Moises nakahatag sing panublion sa duha ka tribo kag sa katunga nga tribo sa tabok sang Jordan: apang sa mga Levinhon wala sia maghatag sing panublion sa tunga nila.

4 Kay ang kaanakan ni Jose duha ka tribo, si Manases kag si Efraim: busa wala sila maghatag sing bahin sa mga Levinhon sa duta, luwas sang mga siudad nga puluy-an, pati sang ila mga halalban nga sa ila kahayupan kag sa ila pagkabutang.

5 Subong sang ginsogo sang GINOO kay Moises, amo ini ang ginhimo sang kaanakan sang Israel, kag ginbahinbahin nila ang duta.

6 ś Niyan ang kaanakan ni Juda nagpalapit kay Josue sa Gilgal: kag si Caleb nga anak nga lalaki ni Jefone nga Ceniznon nagsiling sa iya, Ikaw nakahibalo sang butang nga ginpamolong sang GINOO kay Moises nga tawo sang Dios nahanungud sa akon kag sa imo sa Cades-barnea.

7 Ako kap-atan ka tuig sang ginpadala ako ni Moises nga alagad sang GINOO gikan sa Cades-barnea sa paglampitaw sang duta; kag ginsugiran ko sia sang yari sa akon tagiposoon.

8 Apang ang akon mga utud nga nagtaklad kaupud nakon nagpatunaw sang tagiposoon sang katawohan: walay sapayan ako nagsonod sing bug-os gid sa GINOO nga akon Dios.

9 Kag si Moises nagsumpa sadtong adlaw, nga nagasiling, Sa pagkamatuud ang duta nga natapakan sang imo tiil manginpanublion mo, kag sang imo mga anak sing dayon, bangud nga nagsonod ka sing bug-os sa GINOO nga akon Dios.

10 Kag karon, yari karon, ginbuhi ako sang GINOO, sono sa ginpamolong niya, sining kap-atan kag lima ka tuig, kutub sang tion nga ang GINOO naghambal sining polong kay Moises, sang naglugayaw ang Israel sa kamingawan: kag karon, yari karon, ako kawaloan kag lima ka tuig sining adlaw.

11 Sa sining adlaw ako subong pa kakusug sang sa adlaw nga ginpadala ako ni Moises: subong sang kakusug ko sadto, amo man ang kakusug ko karon, nga sa pag-awayan, sa paggowa, kag sa pagsulud.

12 Busa karon ihatag sa akon ining bukid, nga ginpamolong sang GINOO sadtong adlaw; kay ikaw nakabati sadtong adlaw kon paano nga ang mga Anakimnon yadto didto, kag nga ang mga siudad dalagku kag napamakuran: kon ang GINOO magaupud sa akon, niyan masobol ko sila, sono sa ginpamolong sang GINOO.

13 Kag ginpakamaayo sia ni Josue, kag ginhatag niya kay Caleb nga anak nga lalaki ni Jefone ang Hebron nga panublion.

14 Busa ang Hebron nanginpanublion ni Caleb nga anak nga lalaki ni Jefone nga Ceniznon tubtub sining adlaw, bangud nga nagsonod sia sing bug-os sa GINOONG Dios sang Israel.

15 Kag ang ngalan sang Hebron sadto anay Kiryat-arba; ining Arba isa ka daku nga tawo sa mga Anakimnon. Kag ang duta nakapahuway gikan sa inaway.

KAPITULO 15

INI niyan amo ang kapalaran sang tribo sang kaanakan ni Juda sono sa ila mga panimalay; tubtub sa dulunan sang Edom ang kamingawan sang Zin nayon sa bagatnan amo ang ukbung gid sang bagatnan nga dulunan.

2 Kag ang ila dulunan sa bagatnan kutub sa baybayon sang dagat nga maasin, kutub sa look nga nagaatubang nayon sa bagatnan:

3 Kag naggowa ini nayon sa bagatnan nga kilid tubtub sa Maale-Acrabim, kag nag-ubay sa Zin, kag nagtaklad sa luyo sang bagatnan sang Cades-barnea, kag nag-ubay sa Hesron, kag nagtaklad sa Adar, kag nagliko pa Carca:

4 Gikan didto ini nag-ubay pakadto sa Azmon, kag naggowa sa suba sang Egipto; kag ang sa golowaan sinang dulunan yara sa dagat: ini mangin-inyo dulunan sa bagatnan.

5 Kag ang dulunan sa sidlangan amo ang dagat nga maasin, tubtub sa gibwangan sang Jordan. Kag ang ila dulunan sa aminhan nga bahin kutub sa look sang dagat sa ukbung gid nga bahin sang Jordan:

6 Kag ang dulunan nagtaklad sa Bet-hogla, kag nag-ubay sa aminhan sang Bet-araba; kag ang dulunan nagtaklad pakadto sa bato ni Bohan nga anak nga lalaki ni Ruben:

7 Kag ang dulunan nagtaklad nayon sa Debir kutub sa nalupyakan sang Acor, kag nagapadayon nayon sa Aminhan, nga nagapadolong sa Gilgal, nga yara sa atubangan sang taklaran sang Adumim, nga yara sa bagatnan nga kilid sang suba: kag nag-ubay ang dulunan nayon sa mga tubig sang En-semes, kag ang iya mga golowaan sa En-rogel:

8 Kag ang dulunan nagtaklad sa luyo sang nalupyakan sang anak nga lalaki ni Hinom tubtub sa bagatnan nga kilid sang mga Jebusnon; nga amo ang Jerusalem: kag ang dulunan nagtaklad sa putokputokan sang bukid nga yara sa atubang sang nalupyakan sang Hinom nayon sa katundan, nga yara sa ukbung nga bahin sang nalupyakan sang mga higante nayon sa aminhan:

9 Kag ang dulunan naglambut kutub sa putokputokan sang bakolod tubtub sa tuburan sang tubig sang Neftoa, kag naggowa pakadto sa mga siudad sang bukid nga Efron; kag ang dulunan naglambut pa Baala, nga amo ang Kiryat-jearim:

10 Kag ang dulunan naglibut kutub sa Baala nayon sa katundan pakadto sa bukid nga Sier, kag nag-ubay sa kilid sang bukid nga Jearim, nga amo ang Kesalon, sa aminhan nga kilid, kag nagdulhog pa Bet-semes, kag nag-ubay sa Timna:

11 Kag naggowa ang dulunan sa kilid sang Ecron nayon sa aminhan: kag ang dulunan naglambut sa Siceron, kag nag-ubay sa bukid nga Baala, kag naggowa sa Jabneel; kag ang mga golowaan sang dulunan amo ang dagat.

12 Kag ang dulunan sa katundan amo ang dagat nga daku, kag ang iya dulunan. Ini amo ang dulunan sang kaanakan ni Juda sa palibut sono sa ila mga panimalay.

13 ś Kag ginhatagan niya si Caleb nga anak nga lalaki ni Jefone sing bahin sa tunga sang kaanakan ni Juda, sono sa ginsogo sang GINOO kay Josue, ang siudad ni Arba nga amay ni Anak, ining siudad among Hebron.

14 Kag gikan didto ginsobol ni Caleb ang tatlo ka anak nga lalaki ni Anak, si Sesai, kag si Ahiman, kag si Talmai, ang mga anak ni Anak.

15 Kag nagtaklad sia gikan didto sa mga pumuluyo sang Debir: kag ang ngalan sang Debir sadto anay amo ang Kiryat-sefer.

16 ś Kag nagsiling si Caleb, Ang nagalaglag sang Kiryat-sefer, kag nagaagaw sini, ipaasawa ko sa iya ang akon anak nga si Acsa.

17 Kag si Otniel ang anak nga lalaki ni Cenaz, utud ni Caleb, nag-agaw sini: kag ginpasawa niya sa iya ang iya anak nga si Acsa.

18 Kag nahanabu, sang nag-abut si Acsa kay Otniel, ginbuyuk niya si Otniel nga mangayo sa iya amay sing isa ka latagon: kag nagpanaug si Acsa gikan sa iya asno; kag si Caleb nagsiling sa iya, Ano bala ang buut mo?

19 Sia nagsabat, Hatagi ako sing pagpakamaayo; kay ginhatagan mo ako sang duta nga nabagatnan; hatagi man ako sing mga tuburan sang tubig. Kag ginhatag ni Caleb sa iya ang mga tuburan nga naibabaw, kag ang mga tuburan nga naubus.

20 Ini amo ang panublion sang tribo sang kaanakan ni Juda sono sa ila mga panimalay.

21 Kag ang mga siudad nga naukbung gid sang tribo sang kaanakan ni Juda nayon sa dulunan sang Edom nayon sa bagatnan amo ang Kabzeel, kag ang Eder, kag ang Jagur,

22 Kag ang Cina, kag ang Dimona, kag ang Adada,

23 Kag ang Cades, kag ang Hazor, kag ang Itnan,

24 Ang Zif, kag ang Telem, kag ang Bealot,

25 Kag ang Hazor, Hadata, kag ang Keryot, kag ang Hezron, nga amo ang Hazor,

26 Ang Amam, kag ang Sema, kag ang Molada,

27 Kag ang Hazar-gada, kag ang Hesmon, kag ang Bet-palet,

28 Kag ang Hazar-sual, kag ang Beer-seba, kag ang Besiota,

29 Ang Baala, kag ang Iyim, kag ang Ezem,

30 Kag ang Eltolad, kag ang Kesil, kag ang Horma,

31 Kag ang Siclag, kag ang Madmana, kag ang Sansana,

32 Kag ang Lebaot, kag ang Silhim, kag ang Ain, kag ang Rimon: ang tanan nga siudad duha ka pulo kag siam, pati ang ila mga minoro:

33 Kag sa nalupyakan, ang Estaol, kag ang Zora, kag ang Asna,

34 Kag ang Zanoa, kag ang En-ganim, ang Tapua, kag ang Enam,

35 Ang Jarmut, kag ang Adulam, ang Soco, kag ang Azeca,

36 Kag ang Zaraim, kag ang Aditaim, kag ang Gedera, kag ang Gederotaim; napulog apat ka siudad pati ang ila mga minoro:

37 Ang Zenan, kag ang Hadasa, kag ang Migdal-gad,

38 Kag ang Dilan, kag ang Mizpe, kag ang Jocteel,

39 Ang Laquis, kag ang Boskat, kag ang Eglon,

40 Kag ang Cabon, kag ang Lamam, kag ang Kitlis,

41 Kag ang Gedrot, ang Bet-dagon, kag ang Naama, kag ang Maceda; napulog anum ka siudad pati ang ila mga minoro:

42 Ang Libna, kag ang Eter, kag ang Asan,

43 Kag ang Ifta, kag ang Asna, kag ang Nezib,

44 Kag ang Ceila, kag ang Aczib, kag ang Maresa; siam ka siudad pati ang ila mga minoro:

45 Ang Ecron, pati ang iya kabanwaanan kag ang iya mga minoro:

46 Kutub sa Ecron tubtub sa dagat, ang tanan nga yara sa tambi sang Asdod, pati ang ila mga minoro:

47 Ang Asdod pati ang iya kabanwaanan kag ang iya mga minoro, ang Gaza pati ang iya kabanwaanan kag ang iya mga minoro, tubtub sa suba sang Egipto, kag ang daku nga dagat, kag ang iya dulunan:

48 ś Kag sa kabukiran, ang Samir, kag ang Jatir, kag ang Soco,

49 Kag ang Dana, kag ang Kiryat-sana, nga amo ang Debir,

50 Kag ang Anab, kag ang Estemo, kag ang Anim,

51 Kag ang Gosen, kag ang Holon, kag ang Gilo; napulog isa ka siudad pati ang ila mga minoro:

52 Ang Arab, kag ang Duma, kag ang Esan,

53 Kag ang Janum, kag ang Bet-tapua, kag ang Afeca,

54 Kag ang Humta, kag ang Kiryat-arba, nga amo ang Hebron, kag ang Zior; siam ka siudad pati ang ila mga minoro:

55 Ang Maon, ang Carmelo, kag ang Zif, kag ang Juta,

56 Kag ang Jezreel, kag ang Jocdeam, kag ang Zanoa,

57 Ang Cain, ang Gabaa, kag ang Timna; napulo ka siudad pati ang ila mga minoro:

58 Ang Halhul, ang Bet-zur, kag ang Gedor,

59 Kag ang Maarat, kag ang Bet-anot, kag ang Eltecon; anum ka siudad pati ang ila mga minoro:

60 Ang Kiryat-baal, nga amo ang Kiryat-jearim, kag ang Raba; duha ka siudad pati ang ila mga minoro:

61 Sa kamingawan, ang Bet-araba, ang Midin, kag ang Secaca,

62 Kag ang Nibsan, kag ang siudad sang Asin, kag ang En-gedi; anum ka siudad pati ang ila mga minoro.

63 ś Nahanungud sa mga Jebusnon nga amo ang mga pumuluyo sang Jerusalem, ang kaanakan ni Juda indi makasobol sa ila: kondi ang mga Jebusnon nagapuyo upud sa kaanakan ni Juda sa Jerusalem tubtub sining adlaw.

KAPITULO 16

KAG ang kapalaran naggowa nga sa kaanakan ni Jose kutub sa Jordan sa Jerico, sa tubig sang Jerico sa sidlangan, pa kamingawan nga nagataklad kutub sa Jerico paagi sa bukid nga Bet-el,

2 Kag nagagowa sa Bet-el pakadto sa Luz, kag nagaubay sa mga dulunan sang Arqui pakadto sa Atarot,

3 Kag nagadulhog nayon sa katundan pakadto sa dulunan sang Jafleti, tubtub sa dulunan sang Bet-horon nga naubus, kag tubtub sa Gezer: kag ang mga golowaan nila amo ang dagat.

4 Gani ang kaanakan ni Jose, si Manases kag si Efraim, nagkuha sang ila panublion.

5 ś Kag ang dulunan sang kaanakan ni Efraim sono sa ila mga panimalay amo ini: ang dulunan sang ila panublion sa sidlangan nga kilid amo ang Atarot-adar, tubtub sa Bet-horon nga naibabaw;

6 Kag ang dulunan nagpadayon nayon sa dagat pa Micmetat sa aminhan nga kilid; kag ang dulunan nagliko nayon sa sidlangan tubtub sa Taanat-silo, kag nag-ubay sa sini sa sidlangan sang Janoa;

7 Kag gikan sa Janoa nagdulhog ini pa Atarot, kag pa Naarat, kag naglambut sa Jerico, kag naglapus sa Jordan.

8 Gikan sa Tapu-a ang dulunan nagpadayon nayon sa katundan pakadto sa suba nga Kana; kag ang mga golowaan sini amo ang dagat. Ini amo ang panublion sang tribo sang kaanakan ni Efraim sono sa ila mga panimalay.

9 Kag ang mga siudad nga ginpain nga sa kaanakan ni Efraim yara sa tunga sang panublion sang kaanakan ni Manases, ang tanan nga siudad pati ang ila mga minoro.

10 Kag wala nila pagsobola ang mga Canaanhon nga nagpuyo sa Gezer: kondi ang mga Canaanhon nagapuyo sa tunga sang mga Efraimnon tubtub sining adlaw, kag nagaalagad sa pagbayad sang buhis.

KAPITULO 17

MAY kapalaran man nga sa tribo ni Manases; kay panganay sia ni Jose; nga amo, nga sa kay Maquir nga panganay ni Manases, ang amay ni Galaad: bangud nga tawo sia sang pag-awayan, busa iya ang Galaad kag Basan.

2 May kapalaran man nga sa nabilin sang kaanakan ni Manases sono sa ila mga panimalay; sa mga anak ni Abiezer, kag sa mga anak ni Helec, kag sa mga anak ni Asriel, kag sa mga anak ni Siquem, kag sa mga anak ni Hefer, kag sa mga anak ni Semida: ini sila amo ang mga anak nga lalaki ni Manases nga anak nga lalaki ni Jose sono sa ila mga panimalay.

3 ś Apang si Zelofehad, anak nga lalaki ni Hefer, anak nga lalaki ni Galaad, anak nga lalaki ni Maquir, anak nga lalaki ni Manases, walay mga anak nga lalaki, kondi mga anak nga babaye: kag ini sila amo ang mga ngalan sang iya mga anak nga babaye, si Mala, kag si Noa, si Hogla, si Milca, kag si Tirza.

4 Kag sila nagpalapit sa atubangan ni Eleazar nga pari, kag sa atubangan ni Josue nga anak nga lalaki ni Nun, kag sa atubangan sang mga prinsipe, nga nagasiling, Ang GINOO nagsogo kay Moises nga hatagan kami sing panublion sa tunga sang amon mga utud. Busa sono sa sogo sang GINOO ginhatagan sila niya sing panublion sa tunga sang mga utud sang ila amay.

5 Kag sa amo naholog kay Manases ang napulo ka bahin, luwas sang duta sang Galaad kag Basan, nga yara sa tabok sang Jordan;

6 Bangud nga ang mga babaye nga anak ni Manases may panublion sa tunga sang iya mga anak nga lalaki: kag ang duta sang Galaad ila sang iban nga mga anak nga lalaki ni Manases.

7 ś Kag ang dulunan ni Manases kutub sa Aser tubtub sa Micmetat, nga yara sa atubang sang Siquem; kag ang dulunan nagpadayon sa too tubtub sa mga pumuluyo sang En-tapua.

8 Karon ang duta sang Tapua iya ni Manases: apang ang Tapua nga yara sa dulunan ni Manases iya sang kaanakan ni Efraim;

9 Kag nagdulhog ang dulunan padolong sa suba nga Kana, nayon sa bagatnan sang suba: ining mga siudad ni Efraim yara sa tunga sang mga siudad ni Manases: ang dulunan man ni Manases yara sa aminhan nga kilid sang suba, kag ang mga golowaan sini amo ang dagat:

10 Nayon sa bagatnan iya ni Efraim, kag nayon sa aminhan iya ni Manases, kag ang dagat amo ang iya dulunan; kag nagtabo sila kay Aser sa aminhan, kag kay Isacar sa sidlangan.

11 Kag si Manases may iya sa Isacar kag sa Aser nga Bet-sean kag ang iya mga banwa, kag Ibleam kag ang iya mga banwa, kag ang mga pumuluyo sang Dor kag ang iya mga banwa, kag ang mga pumuluyo sang En-dor kag ang iya mga banwa, kag ang mga pumuluyo sang Taanac kag ang iya mga banwa, kag ang mga pumuluyo sang Meguido kag ang iya mga banwa, bisan ang tatlo ka duta.

12 Apang ang kaanakan ni Manases indi makasobol sang mga pumuluyo sadto nga mga siudad; apang ang mga Canaanhon buut magpuyo sadto nga duta.

13 Apang nahanabu, sang nagbakud ang kaanakan sang Israel, ginpabayad nila ang mga Canaanhon sang buhis; apang wala nga mas-a magsobol sa ila sing bug-os.

14 Kag ang kaanakan ni Jose nagpamolong kay Josue, nga nagasiling, Ngaa bala nga ginhatagan mo ako sing isa lamang ka kapalaran kag isa ka bahin nga panublion, sa ginatan-aw nga ako isa ka daku nga katawohan, sa bagay nga ang GINOO nagpakamaayo sa akon tubtub karon?

15 Kag si Josue nagsabat sa ila, Kon ikaw daku nga katawohan, niyan taklad ka sa katalonan, kag maghawan nga sa imo kaugalingon didto sa duta sang mga Pereznon kag sang mga higante, kon ang bukid nga Efraim tama kakitid nga sa imo.

16 Kag ang kaanakan ni Jose nagsiling, Ang bakolod indi tuman sa amon: kag ang tanan nga Canaanhon nga nagapuyo sa duta sang nalupyakan may mga kangga nga salsalon, sila nga yara sa Bet-sean kag sa iya mga banwa, kag sila nga yara sa nalupyakan sang Jezreel.

17 Kag si Josue nagpamolong sa panimalay ni Jose, kay Efraim kag kay Manases, nga nagasiling, Ikaw daku nga katawohan, kag may daku nga gahum: dili mag-isa lamang ka kapalaran ang imo:

18 Kondi ang bukid mangin-imo; kay ini katalonan, kag hawanan mo ini: kag mangin-imo ang iya mga golowaan: kay sobolon mo ang mga Canaanhon, bisan sila may kangga nga salsalon, kag bisan makusug sila.

KAPITULO 18

KAG ang bug-os nga katilingban sang kaanakan ni Israel nagtingub sa Silo, kag nagpahamtang didto sang tabernakulo sang katilingban. Kag gindaug ang duta sa atubangan nila.

2 Kag may nabilin sa kaanakan sang Israel nga pito ka tribo, nga wala pa makabaton sang ila panublion.

3 Kag si Josue nagsiling sa kaanakan sang Israel, Tubtub san-o pa bala kamo magpabuyanbuyan sa pagsulud sa pagtag-iya sang duta, nga ginhatag sa inyo sang GINOONG Dios sang inyo kaamayan?

4 Magpili kamo gikan sa tunga ninyo sing tatlo ka lalaki tungud sa tagsa ka tribo: kag ipadala ko sila, kag sila magatindug, kag magalatas sa duta, kag magalatid sini sono sa ila panublion; kag magabalik sila sa akon.

5 Kag bahinon nila ini sa pito ka bahin: si Juda magpuyo sa ila ginsakpan sa bagatnan, kag ang panimalay ni Jose magpuyo sa ila mga ginsakpan sa aminhan.

6 Busa latiran ninyo ang duta sa pito ka bahin, kag dalhon ang paglatid diri sa akon, agud nga ako makapapalad nga sa inyo diri sa atubangan sang GINOO nga aton Dios.

7 Apang ang mga Levinhon wala sing bahin sa tunga ninyo; bangud nga ang pagkapari sang GINOO amo ang panublion nila: kag si Gad, kag si Ruben, kag ang katunga nga tribo ni Manases, nakabaton na sang ila panublion sa tabok sang Jordan sa sidlangan, nga ginhatag sa ila ni Moises nga alagad sang GINOO.

8 ś Kag ang mga lalaki nagtindug kag naglakat: kag si Josue nagtulin sa mga nagkadto sa paglatid sang duta, nga nagasiling, Lakat kamo kag maglatas sa duta, kag maglatid sa iya, kag magbalik sa akon, agud nga ako makapapalad nga sa inyo diri sa atubangan sang GINOO sa Silo.

9 Kag ang mga lalaki naglakat kag naglatas sa duta, kag naglatid sini sono sa mga siudad sa pito ka bahin sa isa ka libro, kag nagbalik kay Josue sa kasoldadosan sa Silo.

10 ś Kag si Josue nagpapalad nga sa ila sa Silo sa atubangan sang GINOO: kag didto ginbahinbahin ni Josue ang duta sa kaanakan sang Israel sono sa ila mga bahin.

11 ś Kag ang kapalaran sang tribo sang kaanakan ni Benjamin naggowa sono sa ila mga panimalay: kag naggowa ang dulunan sang ila kapalaran sa tunga sang kaanakan ni Juda kag sang kaanakan ni Jose.

12 Kag ang dulunan nila sa aminhan nga kilid kutub sa Jordan; kag ang dulunan nagtaklad sa luyo sang Jerico sa aminhan nga kilid, kag nagtaklad pa kabukiran nayon sa katundan; kag ang iya mga golowaan sa kamingawan sang Bet-aven.

13 Kag ang dulunan nag-agi gikan didto padolong sa Luz, sa luyo sang Luz, nga amo ang Bet-el, nayon sa bagatnan; kag ang dulunan nagdulhog sa Atarot-adar, malapit sa bakolod nga yara sa bagatnan nga kilid sang Bet-horon nga naubus.

14 Kag ang dulunan nagpadayon kutub didto, kag naglibut sang pamusud sang dagat nayon sa bagatnan, kutub sa bakolod nga yara sa atubang sang Bet-horon nayon sa bagatnan; kag ang mga golowaan sini sa Kiryat-baal, nga amo ang Kiryat-jearim, siudad sang kaanakan ni Juda: ini amo ang bahin nga nakatundan.

15 Kag ang bagatnan nga bahin kutub sa ukbung sang Kiryat-jearim, kag ang dulunan nagpadolong sa katundan, kag nagpadolong sa bobon sang mga tubig sang Neftoa:

16 Kag ang dulunan nagdulhog sa ukbung sang bukid nga yara sa atubang sang nalupyakan sang anak nga lalaki ni Hinom, kag nga yara sa nalupyakan sang mga higante sa aminhan, kag nagdulhog sa nalupyakan ni Hinom, sa luyo sang Jebusi sa bagatnan, kag nagdulhog sa En-rogel,

17 Kag nagpadayon gikan sa aminhan, kag nagpadolong sa En-semes, kag nagpadolong sa Gelilot, nga yara sa tampad sang taklaran sang Adumim, kag nagdulhog sa bato ni Bohan nga anak nga lalaki ni Ruben,

18 Kag nag-ubay padolong sa kilid nga tampad sang Araba nayon sa aminhan, kag nagdulhog sa Araba:

19 Kag ang dulunan nag-ubay padolong sa luyo sang Bet-hogla nayon sa aminhan: kag ang mga golowaan sang mga dulunan sa look nga naaminhan sang dagat nga maasin sa ukbung nga nabagatnan sang Jordan: ini amo ang dulunan sa bagatnan.

20 Kag ang Jordan amo ang dulunan sini sa nasidlangan nga kilid. Ini amo ang panublion sang kaanakan ni Benjamin, sono sa ila mga dulunan palibut, sono sa ila mga panimalay.

21 Karon ang mga siudad sang tribo sang kaanakan ni Benjamin sono sa ila mga panimalay amo ang Jerico, kag ang Bet-hogla, kag ang nalupyakan sang Keziz,

22 Kag ang Bet-araba, kag ang Zemaraim, kag ang Bet-el,

23 Kag ang Avim, kag ang Para, kag ang Ofra,

24 Kag ang Kepar-amoni, kag ang Ofni, kag ang Geba; napulo kag duha ka mga siudad pati ang ila mga minoro:

25 Ang Gabaon, kag ang Rama, kag ang Beerot,

26 Kag ang Mizpe, kag ang Kefira, kag ang Moza,

27 Kag ang Requem, kag ang Irpeel, kag ang Tarala,

28 Kag ang Zela, ang Elef, kag ang Jebus, nga amo ang Jerusalem, ang Gebeat, kag ang Kiryat; napulo kag apat ka siudad pati ang ila mga minoro. Ini amo ang panublion sang kaanakan ni Benjamin sono sa ila mga panimalay.

KAPITULO 19

KAG ang ikaduha nga kapalaran naggowa nga sa kay Simeon, sa tribo sang kaanakan ni Simeon sono sa ila mga panimalay: kag ang ila panublion yara sa tunga sang panublion sang kaanakan ni Juda.

2 Kag may ila sila, sa ila panublion, ang Beer-seba, ukon ang Seba, kag ang Molada,

3 Kag ang Hazar-sual, kag ang Bala, kag ang Ezem,

4 Kag ang Eltolad, kag ang Betul, kag ang Horma,

5 Kag ang Siclag, kag ang Bet-marcabot, kag ang Hazar-susa,

6 Kag ang Bet-lebaot, kag ang Saruhen; napulo kag tatlo ka siudad pati ang ila mga minoro:

7 Ang Ain, ang Rimon, kag ang Eter, kag ang Asan; apat ka siudad pati ang ila mga minoro:

8 Kag ang tanan nga minoro nga yara sa palibut sini nga mga siudad tubtub sa Baalat-beer, ang Rama sang bagatnan. Ini amo ang panublion sang tribo sang kaanakan ni Simeon sono sa ila mga panimalay.

9 Gikan sa bahin sang kaanakan ni Juda ginkuha ang panublion sang kaanakan ni Simeon: kay ang bahin sang kaanakan ni Juda tama kadaku nga sa ila: busa ang kaanakan ni Simeon may panublion sa tunga sang panublion nila.

10 ś Kag ang ikatlong kapalaran naggowa nga sa kaanakan ni Zabulon sono sa ila mga panimalay: kag ang dulunan sang ila panublion tubtub sa Sarid:

11 Kag ang ila dulunan nagtaklad nayon sa dagat, kag sa Marala, kag naglambut sa Dabeset, kag naglambut sa suba nga yara sa atubangan sang Jokneam;

12 Kag nagliko kutub sa Sarid nayon sa sidlangan nayon sa bulutlakan sang adlaw tubtub sa dulunan sang Kislot-tabor, kag niyan nagapadolong sa Daberat, kag nagataklad pa Jafia,

13 Kag gikan didto nagaubay sa sidlangan pa Gita-hefer, pakadto sa Eta-cazin, kag nagapadolong pa Rimon-metoar pakadto sa Nea;

14 Kag ang dulunan nagalibut sini sa aminhan nga kilid pakadto sa Hanaton: kag ang iya mga golowaan yara sa nalupyakan sang Jefta-el:

15 Kag ang Katat, kag ang Nahalal, kag ang Simron, kag ang Idala, kag ang Bet-lehem: napulo kag duha ka siudad pati ang ila mga minoro.

16 Ini amo ang panublion sang kaanakan ni Zabulon sono sa ila mga panimalay, ining mga siudad pati ang ila mga minoro.

17 ś Kag ang ikap-at nga kapalaran naggowa nga kay Isacar, nga sa kaanakan ni Isacar sono sa ila mga panimalay.

18 Kag ang ila dulunan pakadto sa Jesreel, kag ang Kesulot, kag ang Sunem,

19 Kag ang Hafaraim, kag ang Sion, kag ang Anaharat,

20 Kag ang Rabit, kag ang Kision, kag ang Ebez,

21 Kag ang Remet, kag ang En-ganim, kag ang En-hada, kag ang Bet-pazez;

22 Kag ang dulunan naglambut sa Tabor, kag sa Sahazima, kag sa Bet-semes; kag ang mga golowaan sang ila dulunan sa Jordan: napulo kag anum ka siudad pati ang ila mga minoro.

23 Ini amo ang panublion sang tribo sang kaanakan ni Isacar sono sa ila mga panimalay, ang mga siudad kag ang ila mga minoro.

24 ś Kag ang ikalima nga kapalaran naggowa nga sa tribo sang kaanakan ni Aser sono sa ila mga panimalay.

25 Kag ang ila dulunan amo ang Helcaf, kag ang Hali, kag ang Beten, kag ang Acsaf,

26 Kag ang Alamelec, kag ang Amad, kag ang Mesal; kag nagalambut sa Carmelo nayon sa katundan, kag sa Sihor-libnat;

27 Kag nagaliko nayon sa bulutlakan sang adlaw pakadto sa Bet-dagon, kag nagalambut sa Zabulon, kag sa nalupyakan sang Jefta-el nayon sa aminhan nga kilid sang Bet-emec, kag Neiel, kag nagapadolong sa Cabul sa wala,

28 Kag ang Hebron, kag ang Rehob, kag ang Hamon, kag ang Kana, tubtub sa dakung Zidon;

29 Kag niyan nagaliko ang dulunan pakadto sa Rama, kag sa mabakud nga siudad nga Tiro; kag nagaliko ang dulunan pa Hosa; kag ang ila mga golowaan sa dagat gikan sa ginsakpan pa Aczib:

30 Ang Uma man, kag ang Afec, kag ang Rehob: duha ka pulo kag duha ka siudad pati ang ila mga minoro.

31 Ini amo ang panublion sang kaanakan ni Aser sono sa ila mga panimalay, ini nga mga siudad pati ang ila mga minoro.

32 ś Kag ang ikaanum nga kapalaran naggowa nga sa kaanakan ni Neftali, bisan sa kaanakan ni Neftali sono sa ila mga panimalay.

33 Kag ang ila dulunan kutub sa Helef, gikan sa Allon tubtub sa Zaananim, kag ang Adami, ang Nekeb, kag ang Jabneel, tubtub sa Lakum; kag ang golowaan nila sa Jordan:

34 Kag niyan ang dulunan nagaliko nayon sa katundan pakadto sa Asnot-tabor, kag nagapadolong gikan didto pakadto sa Hucoc, kag nagalambut sa Zabulon sa bagatnan nga kilid, kag nagalambut sa Aser sa katundan nga kilid, kag sa Juda sa Jordan nayon sa bulutlakan sang adlaw.

35 Kag ang mga siudad nga napamakuran amo ang Zidim, ang Zer, kag ang Hamat, ang Rakat, kag ang Cineret,

36 Kag ang Adama, kag ang Rama, kag ang Hazor,

37 Kag ang Cades, kag ang Edrei, kag ang En-hazor,

38 Kag ang Iron, kag ang Megdal-el, ang Horem, kag ang Bet-anat, kag ang Bet-semes; napulo kag siam ka siudad pati ang ila mga minoro.

39 Ini amo ang panublion sang tribo sang kaanakan ni Neftali sono sa ila mga panimalay, ang mga siudad kag ang ila mga minoro.

40 ś Kag ang ikapito nga kapalaran naggowa nga sa tribo sang kaanakan ni Dan sono sa ila mga panimalay.

41 Kag ang dulunan sang ila panublion amo ang Zora, kag ang Estaol, kag ang Ir-semes,

42 Kag ang Saalabin, kag ang Ayalon, kag ang Itla,

43 Kag ang Elon, kag ang Timnata, kag ang Ecron,

44 Kag ang Eltece, kag ang Gibeton, kag ang Baalat,

45 Kag ang Jehud, kag ang Bene-berac, kag ang Gat-rimon,

46 Kag ang Me-harcon, kag ang Racon, pati ang dulunan sa atubang sang Japo.

47 Kag ang dulunan sang kaanakan ni Dan tama kagamay sa ila: busa nagtaklad ang kaanakan ni Dan sa pagpakig-away batok sa Lesem, kag nag-agaw sini, kag ginlaglag ini sa sulab sang espada, kag ginpanag-iyahan ini, kag nagpuyo sa sini, kag ginhingalanan ang Lesem, nga Dan, sa ngalan ni Dan nga ila amay.

48 Ini amo ang panublion sang tribo sang kaanakan ni Dan sono sa ila mga panimalay, ining mga siudad pati ang ila mga minoro.

49 ś Sang natapus nila ang pagbahinbahin sang duta nga sa panublion sono sa ila mga dulunan, ang kaanakan sang Israel naghatag sing panublion kay Josue nga anak nga lalaki ni Nun sa tunga nila:

50 Sono sa polong sang GINOO ginhatag nila sa iya ang siudad nga ginpangayo niya, ang Temnat-sera sa bukid nga Efraim: kag gintukud niya ang siudad, kag nagpuyo sa sini.

51 Ini amo ang mga panublion, nga ginbahinbahin ni Eleazar nga pari, kag ni Josue nga anak nga lalaki ni Nun, kag sang mga pangolo sang mga kaamayan sang mga tribo sang kaanakan sang Israel, nga sa panublion paagi sa papalad sa Silo sa atubangan sang GINOO, sa ganhaan sang tabernakulo sang katilingban. Gani natapus nila ang pagbahinbahin sang duta.

KAPITULO 20

LABUT PA ang GINOO nagpamolong kay Josue, nga nagasiling,

2 Ipamolong sa kaanakan sang Israel, kag isiling, Pat-ud kamo nga sa inyo sing mga siudad nga dalangpan, nga ginpamolong ko sa inyo paagi kay Moises:

3 Agud nga magpalagyo didto ang nakapatay sing bisan sin-ong tawo sing dihungud ukon wala masayori: kag sila mangin-inyo dalangpan gikan sa manugtimalus sang dugo.

4 Kag kon ang nagapalagyo sa isa sinang mga siudad magatindug sa salamputan sang gawang sang siudad, kag magapahayag sang natabu sa iya sa mga idulungug sang mga tigulang sadtong siudad, sila magapasulud sa iya sa siudad sa ila, kag magahatag sa iya sing duug, agud nga makapuyo sia sa tunga nila.

5 Kag kon ang manugtimalus sang dugo maglagas sa iya, niyan dili nila pag-itugyan ang nakapatay sing tawo sa iya kamut; bangud nga napatay niya ang iya isigkatawo sing dihungud, kag wala niya pagdumti sia sang una.

6 Kag magapuyo sia sa sadtong siudad, tubtub nga mag-atubang sia sa katilingban nga hukman, kag tubtub sa pagkapatay sang mataas nga pari nga mataboan sadtong mga adlaw: niyan ang nakapatay sing tawo magabalik, kag magapauli sa iya kaugalingon nga siudad, kag sa iya kaugalingon nga balay, sa siudad nga ginhalinan niya sa pagpalagyo.

7 ś Kag gintangdo nila ang Cades sa Galilea sa bukid nga Neftali, kag ang Siquem sa bukid nga Efraim, kag ang Kiryat-arba, nga amo ang Hebron, sa bukid sang Juda.

8 Kag sa tabok sang Jordan sa Jerico nayon sa sidlangan, ginpat-ud nila gikan sa tribo ni Ruben ang Bezer sa kamingawan sa kapatagan, kag gikan sa tribo ni Gad ang Ramot sa Galaad, kag gikan sa tribo ni Manases ang Golan sa Basan.

9 Ini amo ang mga siudad nga gintangdo nga sa tanan nga kaanakan sang Israel, kag sa dumuloong nga nagapanlugayaw sa tunga nila, agud nga magpalagyo didto ang bisan sin-o nga makapatay sing bisan sin-ong tawo sing dihungud, kag indi mapatay sa kamut sang manugtimalus sang dugo, tubtub nga makaatubang sia sa katilingban.

KAPITULO 21

NIYAN nagpalapit ang mga pangolo sang mga kaamayan sang mga Levinhon kay Eleazar nga pari, kag kay Josue nga anak nga lalaki ni Nun, kag sa mga pangolo sang mga kaamayan sang tribo sang kaanakan sang Israel;

2 Kag nagpamolong sila sa ila sa Silo sa duta sang Canaan, nga nagasiling, Ang GINOO nagsogo paagi kay Moises sa paghatag sa amon sing mga siudad nga puluy-an, pati ang ila mga halalban nga sa amon kahayupan.

3 Kag ang kaanakan sang Israel naghatag sa mga Levinhon gikan sa ila panublion, sa sogo sang GINOO, sining mga siudad kag sang ila mga halalban.

4 Kag ang kapalaran naggowa nga sa mga panimalay sang mga Coatnon: kag ang kaanakan ni Aaron nga pari, nga gikan sa mga Levinhon, paagi sa papalad gikan sa tribo ni Juda, kag gikan sa tribo ni Simeon, kag gikan sa tribo ni Benjamin, may napulog tatlo ka mga siudad.

5 Kag ang nabilin nga kaanakan ni Coat paagi sa papalad gikan sa mga panimalay sang tribo ni Efraim, kag gikan sa tribo ni Dan, kag gikan sa katunga nga tribo ni Manases, may napulo ka mga siudad.

6 Kag ang kaanakan ni Gerson paagi sa papalad gikan sa mga panimalay sang tribo ni Isacar, kag gikan sa tribo ni Aser, kag gikan sa tribo ni Neftali, kag gikan sa katunga nga tribo ni Manases sa Basan, may napulog tatlo ka mga siudad.

7 Ang kaanakan ni Merari sono sa ila mga panimalay gikan sa tribo ni Ruben, kag gikan sa tribo ni Gad, kag gikan sa tribo ni Zabulon, may napulog duha ka mga siudad.

8 Kag ang kaanakan ni Israel naghatag sa mga Levinhon paagi sa papalad sining mga siudad pati ang ila mga halalban, sono sa ginsogo sang GINOO paagi kay Moises.

9 ś Kag ginhatag nila gikan sa tribo sang kaanakan ni Juda, kag gikan sa tribo sang kaanakan ni Simeon, ining mga siudad nga nasambit sa ngalan,

10 Nga ila sang kaanakan ni Aaron, sa mga panimalay sang mga Coatnon, nga sa kaanakan ni Levi: kay ila ang nahaunang kapalaran.

11 Kag ginhatag nila sa ila ang siudad nga Arba nga amay ni Anak, ining siudad amo ang Hebron, sa dutang bakolod sang Juda, pati ang iya mga halalban sa iya palibut.

12 Apang ang mga latagon sang siudad, kag ang iya mga minoro, ginhatag nila kay Caleb nga anak nga lalaki ni Jefone nga iya kaugalingon.

13 ś Sa sini ginhatag nila sa kaanakan ni Aaron nga pari ang Hebron pati ang iya mga halalban, nga mangin siudad nga dalangpan sa nakapatay sang tawo; kag ang Libna pati ang iya mga halalban,

14 Kag ang Jatir pati ang iya mga halalban, kag ang Estemoa pati ang iya mga halalban,

15 Kag ang Holon pati ang iya mga halalban, kag ang Debir pati ang iya mga halalban,

16 Kag ang Ain pati ang iya mga halalban, kag ang Juta pati ang iya mga halalban, kag ang Bet-semes pati ang iya mga halalban; siam ka siudad gikan sadtong duha ka tribo.

17 Kag gikan sa tribo ni Benjamin, ang Gibeon pati ang iya mga halalban, ang Geba pati ang iya mga halalban,

18 Ang Anatot pati ang iya mga halalban, kag ang Almon pati ang iya mga halalban; apat ka siudad.

19 Ang tanan nga siudad sang kaanakan ni Aaron, nga mga pari, napulog tatlo ka siudad pati ang ila mga halalban.

20 ś Kag ang mga panimalay sang kaanakan ni Coat, ang mga Levinhon nga nabilin sang kaanakan ni Coat, may mga siudad sila nga ila kapalaran gikan sa tribo ni Efraim.

21 Kay ginhatag nila sa ila ang Siquem pati ang iya mga halalban sa bukid nga Efraim, nga mangin siudad nga dalangpan sa nakapatay sing tawo; kag ang Gezer pati ang iya mga halalban,

22 Kag ang Kibzaim pati ang iya mga halalban, kag ang Bet-horon pati ang iya mga halalban; apat ka siudad.

23 Kag gikan sa tribo ni Dan, ang Elteque pati ang iya mga halalban, ang Gibeton pati ang iya mga halalban,

24 Ang Ayalon pati ang iya mga halalban, ang Gat-rimon pati ang iya mga halalban; apat ka siudad.

25 Kag gikan sa katunga nga tribo ni Manases, ang Taanac pati ang iya mga halalban, kag ang Gat-rimon pati ang iya mga halalban; duha ka siudad.

26 Ang tanan nga siudad sang mga panimalay sang nabilin nga kaanakan ni Coat napulo pati ang ila mga halalban.

27 ś Kag sa kaanakan ni Gerson, sa mga panimalay sang mga Levinhon, gikan sa isa pa ka katunga nga tribo ni Manases ginhatag nila ang Golan sa Basan pati ang iya mga halalban, nga mangin siudad nga dalangpan sa nakapatay sing tawo; kag ang Bees-tera pati ang iya mga halalban; duha ka siudad.

28 Kag gikan sa tribo ni Isacar, ang Kison pati ang iya mga halalban, ang Daberat pati ang iya mga halalban,

29 Ang Jarmut pati ang iya mga halalban, ang En-ganim pati ang iya mga halalban; apat ka siudad.

30 Kag gikan sa tribo ni Aser, ang Misal pati ang iya mga halalban, ang Abdon pati ang iya mga halalban,

31 Ang Helcat pati ang iya mga halalban, kag ang Rehob pati ang iya mga halalban; apat ka siudad.

32 Kag gikan sa tribo ni Neftali, ang Cades sa Galilea pati ang iya mga halalban, nga mangin siudad nga dalangpan sa nakapatay sing tawo; kag ang Hamot-dor pati ang iya mga halalban, kag ang Cartan pati ang iya mga halalban; tatlo ka siudad.

33 Ang tanan nga siudad sang mga Gersonhon sono sa ila mga panimalay napulog tatlo pati ang ila mga halalban.

34 ś Kag sa mga panimalay sang kaanakan ni Merari, ang nabilin sang mga Levinhon, gikan sa tribo ni Zabulon, ang Jokneam pati ang iya mga halalban, kag ang Carta pati ang iya mga halalban,

35 Ang Dimna pati ang iya mga halalban, ang Nahalal pati ang iya mga halalban; apat ka siudad.

36 Kag gikan sa tribo ni Ruben, ang Bezer pati ang iya mga halalban, kag ang Jahaz pati ang iya mga halalban,

37 Ang Quedemot pati ang iya mga halalban, kag ang Mefaat pati ang iya mga halalban; apat ka siudad.

38 Kag gikan sa tribo ni Gad, ang Ramot sa Galaad pati ang iya mga halalban, nga mangin siudad nga dalangpan sa nakapatay sing tawo; kag ang Mahanaim pati ang iya mga halalban,

39 Ang Hesbon pati ang iya mga halalban, ang Jazer pati ang iya mga halalban; apat ka siudad tanan.

40 Gani ang tanan nga siudad nga iya sang kaanakan ni Merari sono sa ila mga panimalay, nga nabilin sang mga panimalay sang mga Levinhon, ang ila kapalaran napulog duha ka siudad.

41 Ang tanan nga siudad sang mga Levinhon sa tunga sang kaugalingon sang kaanakan sang Israel kap-atan kag walo ka siudad pati ang ila mga halalban.

42 Ining mga siudad may ila nga mga halalban ang tagsatagsa sa palibut nila: amo ini sa tanan sining mga siudad.

43 ś Kag ginhatag sang GINOO sa Israel ang bug-os nga duta nga ginsumpa niya nga ihatag sa ila mga kaamayan; kag ginpanag-iyahan nila ini, kag nagpuyo didto.

44 Kag ginhatagan sila sang GINOO sing kapahuwayan sa palibut, sono sa tanan nga ginsumpa niya sa ila mga kaamayan: kag wala sing tawo nga nagtindug sang tanan nilang kaaway batok sa ila; ang GINOO nagtugyan sa ila mga kamut sang tanan nilang kaaway.

45 Walay bisan ano nga nakulang sang bisan anong maayong butang nga napamolong sang GINOO sa balay sang Israel; ang tanan nahanabu.

KAPITULO 22

NIYAN gintawag ni Josue ang mga Rubenhon, kag ang mga Gadhanon, kag ang katunga nga tribo ni Manases,

2 Kag nagsiling sa ila, Kamo nagbantay sang tanan nga ginsogo sa inyo ni Moises nga alagad sang GINOO, kag gintuman ninyo ang akon tingug sa tanan nga akon ginsogo sa inyo:

3 Wala ninyo pagpabayai ang inyo mga utud sa sining madamu nga adlaw tubtub sining adlaw, kondi nga ginbantayan ninyo ang tinulin sang sogo sang GINOO nga inyo Dios.

4 Kag karon ang GINOO nga inyo Dios naghatag sing kapahuwayan sa inyo kauturan, sono sa iya ginsaad sa ila: busa karon balik kamo, kag magpauli kamo sa inyo mga layanglayang, kag sa duta nga inyo kaugalingon, nga ginhatag sa inyo sa tabok sang Jordan ni Moises nga alagad sang GINOO.

5 Apang andami ninyo sing makugihon sa paghimo sang sogo kag sang kasogoan, nga gintulin sa inyo ni Moises nga alagad sang GINOO, sa paghigugma sa GINOO nga inyo Dios, kag sa paglakat sa tanan niyang dalanon, kag sa pagbantay sang iya mga sogo, kag sa pagtapik sa iya, kag sa pag-alagad sa iya sa bug-os ninyong tagiposoon kag sa bug-os ninyong kalag.

6 Gani ginpakamaayo sila ni Josue, kag ginpalakat sila: kag nagpauli sila sa ila mga layanglayang.

7 ś Karon sa katunga nga tribo ni Manases naghatag si Moises sing panublion sa Basan: apang sa isa ka katunga sini naghatag si Josue sa tunga sang ila mga utud sa sining kilid sang Jordan nayon sa katundan. Kag sang ginpapauli man sila ni Josue sa ila mga layanglayang, niyan ginpakamaayo niya sila,

8 Kag sia nagpamolong sa ila, nga nagasiling, Balik kamo nga may madamung manggad sa inyo mga layanglayang, kag may madamu gid nga kahayupan, nga may pilak, kag may bulawan, kag may saway, kag may salsalon, kag may madamu gid nga mga panapton: bahinbahina ninyo ang inagaw gikan sa inyo mga kaaway sa inyo kauturan.

9 ś Kag nagbalik ang kaanakan ni Ruben kag ang kaanakan ni Gad kag ang katunga nga tribo ni Manases, kag nagtaliwan gikan sa kaanakan sang Israel sa Silo, nga yara sa duta sang Canaan, sa pagkadto sa duta sang Galaad, sa duta nga ila kaugalingon, nga ini sila ginpanag-iyahan nila, sono sa polong sang GINOO paagi kay Moises.

10 ś Kag sang nag-abut sila sa mga ginsakpan sang Jordan, nga yara sa duta sang Canaan, ang kaanakan ni Ruben kag ang kaanakan ni Gad kag ang katunga nga tribo ni Manases nagpatindug didto sing halaran sa ubay sang Jordan, isa ka daku nga halaran kon tolokon.

11 ś Kag ang kaanakan sang Israel nakabati nga ginasiling, Yari karon, ang kaanakan ni Ruben kag ang kaanakan ni Gad kag ang katunga nga tribo ni Manases nagpatindug sing isa ka halaran sa tampad sang duta sang Canaan, sa mga ginsakpan sang Jordan, sa alagyan sang kaanakan sang Israel.

12 Kag sang nabatian ini sang kaanakan sang Israel, nagtipon sing tingub ang bug-os nga katilingban sang kaanakan sang Israel sa Silo, sa pagtaklad sa pagpakig-away batok sa ila.

13 Kag ang kaanakan sang Israel nagpadala sa kaanakan ni Ruben, kag sa kaanakan ni Gad, kag sa katunga nga tribo ni Manases, sa duta sang Galaad, kay Finees nga anak nga lalaki ni Eleazar nga pari,

14 Kag upud sa iya ang napulo ka prinsipe, isa ka prinsipe sa tagsa ka punong panimalay sa tanan nga tribo sang Israel; kag ang tagsa sa ila pangolo sang panimalay sang ila mga kaamayan sa tunga sang mga linibo sang Israel.

15 ś Kag nag-abut sila sa kaanakan ni Ruben, kag sa kaanakan ni Gad, kag sa katunga nga tribo ni Manases, sa duta sang Galaad, kag nagpakighambal sila sa ila, nga nagasiling,

16 Amo ini ang ginasiling sang bug-os nga katilingban sang GINOO, Ano bala nga paglapas ining ginhimo ninyo batok sa Dios sang Israel, sa pagtalikod sining adlaw sa pagsonod sa GINOO, nga nagpatindug kamo sa inyo sing halaran sa pagbato sining adlaw sa GINOO?

17 Diotay pa bala katama sa aton ang kasal-anan sang Peor, nga sa sini wala pa kita matinloan tubtub sining adlaw, bisan nag-abut ang kalalat-an sa katilingban sang GINOO,

18 Kondi nga kinahanglan kamo magtalikod sining adlaw sa pagsonod sa GINOO? kag mahanabu, sanglit nagbato kamo karon nga adlaw sa GINOO, nga buwas maakig sia sa bug-os nga katilingban sang Israel.

19 Walay sapayan, kon ang duta nga inyo kaugalingon dimatinlo, niyan tabok kamo sa duta nga kaugalingon sang GINOO, diin nagapuyo ang tabernakulo sang GINOO, kag magpanag-iya kamo sa tunga namon: apang dili kamo magbato sa GINOO, ukon magbato sa amon, sa pagpatindug sa inyo sing halaran luwas sang halaran sang GINOO nga aton Dios.

20 Wala bala si Acan nga anak nga lalaki ni Zera makalapas sa butang nga pinapakamalaut, kag nag-abut ang kaakig sa bug-os nga katilingban sang Israel? kag yadtong tawo wala mawala nga isa lamang sa iya kasal-anan.

21 ś Niyan ang kaanakan ni Ruben kag ang kaanakan ni Gad kag ang katunga nga tribo ni Manases nagsabat, kag nagsiling sa mga pangolo sang mga linibo sang Israel,

22 Ang GINOONG Dios sang mga dios, ang GINOONG Dios sang mga dios, sia nakahibalo, kag ang Israel makilala niya; kon ini pagbato, ukon kon paglapas batok sa GINOO, (dili kami pagluwasa sining adlaw,)

23 Nga kami nagpatindug nga sa amon sing halaran sa pagtalikod sa pagsonod sa GINOO, ukon kon sa paghalad sing mga halad nga sinonog ukon halad nga kalan-on, ukon kon sa pagdolot sa sini sing mga halad sa paghidait, timalusan ini sing GINOO;

24 Kag kon wala namon ini paghimoa sing hinonoo sa kahadluk sining butang, nga nagasiling, Sa tion nga palaabuton basi magsiling ang inyo mga anak sa amon mga anak, nga nagasiling, Ano bala ang inyo labut sa GINOONG Dios sang Israel?

25 Kay ang GINOO naghimo sang Jordan nga dulunan namon kag ninyo, kamo nga kaanakan ni Ruben kag kaanakan ni Gad; wala kamo sing bahin sa GINOO: sa sini pauntaton sang inyo mga anak ang amon mga anak sa pagkahadluk sa GINOO.

26 Busa nagsiling kami, Mag-aman kita karon sa pagpatindug nga sa aton sing halaran, indi nga sa halad nga sinonog, ukon sa halad:

27 Kondi nga ini manginsaksi sa tunga namon, kag ninyo, kag sang aton mga kaliwatan sa olihi naton, agud nga makahimo kami sang pag-alagad sa GINOO sa atubangan niya upud sang amon mga halad nga sinonog, kag sang amon mga halad, kag sang amon mga halad sa paghidait; agud nga indi magsiling ang inyo mga anak sa amon mga anak sa tion nga palaabuton, Wala kamo sing bahin sa GINOO.

28 Busa nagsiling kami, nga kon magsiling sila sang amo sa amon ukon sa amon mga kaliwatan sa tion nga palaabuton, nga kami man magasiling, Tan-awa ninyo ang huwaran sang halaran sang GINOO, nga ginhimo sang aton mga kaamayan, indi tungud sa mga halad nga sinonog, ukon sa mga halad; kondi ini saksi sa tunga namon kag ninyo.

29 Ang Dios magdumili nga magbato kami sa GINOO, kag magtalikod sining adlaw sa pagsonod sa GINOO, sa pagpatindug sing halaran nga sa mga halad nga sinonog, sa mga halad nga kalan-on, ukon sa mga halad, luwas sang halaran sang GINOO nga aton Dios nga yara sa atubangan sang iya tabernakulo.

30 ś Kag sang nabatian ni Finees nga pari, kag sang mga prinsipe sang katilingban kag sang mga pangolo sang mga linibo sang Israel nga upud sa iya, ang mga polong nga ginpamolong sang kaanakan ni Ruben kag sang kaanakan ni Gad kag sang kaanakan ni Manases, nagpahamuut ini sa ila.

31 Kag si Finees nga anak nga lalaki ni Eleazar nga pari nagsiling sa kaanakan ni Ruben, kag sa kaanakan ni Gad, kag sa kaanakan ni Manases, Sining adlaw nahibaloan naton nga ang GINOO yara sa tunga naton, bangud nga wala ninyo mahimo ining paglapas batok sa GINOO: karon ginluwas ninyo ang kaanakan sang Israel gikan sa kamut sang GINOO.

32 ś Kag si Finees nga anak nga lalaki ni Eleazar nga pari, kag ang mga prinsipe, nagpauli gikan sa kaanakan ni Ruben, kag gikan sa kaanakan ni Gad, sa duta sang Galaad, pakadto sa duta sang Canaan, sa kaanakan sang Israel, kag ginbalitaan sila.

33 Kag ang butang nagpahamuut sa kaanakan sang Israel; kag ginpakamaayo sang kaanakan sang Israel ang Dios, kag wala na nagtuyo sa pagtaklad sa pagpakig-away batok sa ila, sa paglaglag sang duta nga ginpuy-an sang kaanakan ni Ruben kag ni Gad.

34 Kag gintawag sang kaanakan ni Ruben kag sang kaanakan ni Gad ang halaran nga Ed: kay ini mangin saksi sa tunga naton nga ang GINOO Dios.

KAPITULO 23

KAG nahanabu sang tapus ang malawig nga tion nga ang GINOO naghatag sing kapahuwayan sa kaanakan sang Israel gikan sa tanan nilang mga kaaway sa palibut, nga si Josue nagtigulang na kag sobol sa panuigon.

2 Kag ginpatawag ni Josue ang bug-os nga Israel, kag ang ila mga tigulang, kag ang ila mga pangolo, kag ang ila mga hukom, kag ang ila mga opisyal, kag nagsiling sa ila, Tigulang na ako kag sobol sa panuigon:

3 Kag nakita ninyo ang tanan nga ginhimo sang GINOO nga inyo Dios sa sini tanan nga pungsud bangud sa inyo; kay ang GINOO nga inyo Dios amo ang nagapakig-away tungud sa inyo.

4 Yari karon, nabahinbahin ko sa inyo sa papalad ining mga pungsud nga nabilin, nga panublion nga sa inyo mga tribo, kutub sa Jordan, pati ang tanan nga pungsud nga ginlaglag ko, tubtub sa daku nga dagat nayon sa katundan.

5 Kag ang GINOO nga inyo Dios, sia magasobol sa ila gikan sa atubangan ninyo, kag magatabog sa ila gikan sa itololok ninyo; kag kamo magatag-iya sang ila duta, sono sa ginsaad sa inyo sang GINOO nga inyo Dios.

6 Busa magpakaisug gid kamo sa pagbantay kag sa paghimo sang tanan nga nasulat sa libro sang kasogoan ni Moises, nga dili kamo maglipas gikan sini sa too ukon sa wala;

7 Nga dili kamo magsimpon sa sining mga pungsud, sining mga nagkalabilin sa tunga ninyo; kag dili kamo magsambit sang ngalan sang ila mga dios, ukon magpasumpa tungud sa ila, ukon mag-alagad sa ila, ukon magyaub kamo sa ila:

8 Kondi magtapik sa GINOO nga inyo Dios, subong sang nahimo ninyo tubtub sini nga adlaw.

9 Kay ang GINOO nagtabog gikan sa atubangan ninyo sing dalagku nga mga pungsud kag makusug: apang nahanungud sa inyo, wala sing tawo nga nakatindug sa atubangan ninyo tubtub sini nga adlaw.

10 Isa ka tawo sa inyo magalagas sing isa ka libo: kay ang GINOO nga inyo Dios, sia amo ang nagapakig-away tungud sa inyo, sono sa ginsaad niya sa inyo.

11 Busa andami ninyo sing maayo ang inyo mga kaugalingon, nga higugmaon ninyo ang GINOO nga inyo Dios.

12 Kag kon magbalik gid kamo, kag magtapik sa nabilin sining mga pungsud, sining mga nabilin sa tunga ninyo, kag magpangasawa sa ila, kag maghiusa sa ila, kag sila sa inyo:

13 Kilalaha ninyo sing totoo nga ang GINOO nga inyo Dios indi na magtabog sa bisan diin sining mga pungsud gikan sa atubangan ninyo; kondi sila mangin mga siod kag mga tiglapak sa inyo, kag mangin mga hanut sa inyo mga kilid, kag mangin mga tunuk sa inyo mga mata, tubtub nga mawala kamo sa sini nga maayo nga duta nga ginhatag sa inyo sang GINOO nga inyo Dios.

14 Kag, yari karon, sa sini nga adlaw nagalakat ako sa dalanon sang bug-os nga duta: kag nakahibalo kamo sa bug-os ninyo nga mga tagiposoon kag sa bug-os ninyo nga mga kalag, nga wala sing isa ka butang nga nakulang sa tanan nga butang nga maayo nga ginpamolong sang GINOO nga inyo Dios nahanungud sa inyo; ang tanan nahanabu sa inyo, kag wala sing isa ka butang nga nakulang sa ila.

15 Busa mahanabu, nga, subong nga nag-abut sa inyo ang tanan nga butang nga maayo, nga ginsaad sa inyo sang GINOO nga inyo Dios; sa amo dalhon sa inyo sang GINOO ang tanan nga butang nga malaut, tubtub nga malaglag niya kamo sa sini nga duta nga maayo nga ginhatag sa inyo sang GINOO nga inyo Dios.

16 Kon maglapas kamo sang katipan sang GINOO nga inyo Dios, nga iya ginsogo sa inyo, kag magkadto kag mag-alagad sa iban nga mga dios, kag magyaub kamo sa ila; niyan ang kaakig sang GINOO magadabdab batok sa inyo, kag mawala kamo sing madali sa duta nga maayo nga ginhatag niya sa inyo.

KAPITULO 24

KAG gintipon ni Josue ang tanan nga tribo sang Israel sa Siquem, kag ginpatawag ang mga tigulang sang Israel, kag ang ila mga pangolo, kag ang ila mga hukom, kag ang ila mga opisyal; kag nag-atubang sila sa Dios.

2 Kag si Josue nagsiling sa bug-os nga katawohan, Amo ini ang ginasiling sang GINOONG Dios sang Israel, Ang inyo mga kaamayan nagpuyo sa pihak sang baha sa dumaan nga tion, si Tera, nga amay ni Abraham, kag amay ni Nahor: kag sila nag-alagad sang iban nga mga dios.

3 Kag ginkuha ko ang inyo amay nga si Abraham gikan sa pihak sang baha, kag gintuytuyan sia sa bug-os nga duta sang Canaan, kag ginpabuad ang iya kaliwat, kag ginhatag si Isaac sa iya.

4 Kag ginhatag ko kay Isaac si Jacob kag si Esau: kag ginhatag ko kay Esau ang bukid nga Seir, sa pagtag-iya sini; apang si Jacob kag ang iya mga anak nagdulhog sa Egipto.

5 Ginpadala ko man si Moises kag si Aaron, kag ginsakit ko ang Egipto, sono sa ginhimo ko sa tunga nila: kag ugaling ginpagowa ko kamo.

6 Kag ginpagowa ko ang inyo mga kaamayan gikan sa Egipto: kag nag-abut kamo sa dagat; kag ang mga Egiptohanon naglagas sang inyo mga kaamayan sang mga kangga kag mga manugkabayo tubtub sa Mapulang dagat.

7 Kag sang nagtuaw sila sa GINOO, nagbutang sia sing kadulum sa tunga ninyo kag sang mga Egiptohanon, kag ginpalapaw ang dagat sa ila, kag gintabonan sila; kag ang inyo mga mata nakakita sang ginhimo ko sa Egipto: kag nagpuyo kamo sa kamingawan sing malawig nga panag-on.

8 Kag ginpasulud ko kamo sa duta sang mga Amornon, nga nagpuyo sa tabok sang Jordan; kag sila nagpakig-away sa inyo: kag gintugyan ko sila sa inyo kamut, agud nga magtag-iya kamo sang ila duta; kag ginlaglag ko sila gikan sa atubangan ninyo.

9 Niyan si Balac nga anak nga lalaki ni Sipor, hari sang Moab, nagtindug kag nagpakig-away sa Israel, kag nagpadala kag nagpatawag kay Balaam nga anak nga lalaki ni Beor sa pagpakamalaut sa inyo:

10 Apang wala ako magbuut sa pagpamati kay Balaam; busa ginpakamaayo pa kamo niya: gani ginluwas ko kamo sa kamut niya.

11 Kag nagtabok kamo sang Jordan, kag nag-abut sa Jerico: kag ang mga tawo sang Jerico nagpakig-away sa inyo, ang mga Amornon, kag ang mga Pereznon, kag ang mga Canaanhon, kag ang mga Hithanon, kag ang mga Gergesnon, ang mga Hevhanon, kag ang mga Jebusnon; kag gintugyan ko sila sa inyo kamut.

12 Kag ginpadala ko sa una ninyo ang alingayo, nga nagtabog sa ila gikan sa atubangan ninyo, bisan ang duha ka hari sang mga Amornon; apang indi sa imo espada, ukon sa imo pana.

13 Kag ginhatagan ko kamo sang duta nga wala ninyo pagpangabudlayi, kag mga siudad nga wala ninyo pagpatinduga, kag kamo nagapuyo sa ila; nagakaon kamo sa mga ulubasan kag sa mga katamnan sang mga olivo nga wala ninyo gintanum.

14 ś Busa karon kahadluki ang GINOO, kag alagda sia sa kabunayag kag sa kamatooran: kag isikway ang mga dios nga gin-alagad sang inyo mga kaamayan sa pihak sang baha, kag sa Egipto; kag alagda ninyo ang GINOO.

15 Kag kon daw malaut sa inyo ang pag-alagad sa GINOO, magpili kamo sini nga adlaw kon sin-o ang inyo alagdon; kon ang mga dios nga gin-alagad sang inyo mga kaamayan sa pihak sang baha, ukon ang mga dios sang mga Amornon, nga sa ila duta nagapuyo kamo: apang nahanungud sa akon kag sa akon panimalay, magaalagad kami sa GINOO.

16 Kag ang katawohan nagsabat kag nagsiling, Ang Dios magdumili nga magbiya kami sa GINOO, sa pag-alagad sa iban nga mga dios;

17 Kay ang GINOO nga aton Dios, sia amo ang nagpataklad sa aton kag sa aton mga kaamayan gikan sa duta sang Egipto, gikan sa balay sang kahiolipnan, kag ang naghimo sadto nga mga dalagku nga mga tanda sa aton itololok, kag nagtipig sa aton sa bug-os nga dalanon nga ginlaktan naton, kag sa tunga sang tanan nga katawohan nga gin-agihan naton:

18 Kag ang GINOO nagtabog gikan sa atubangan naton sang tanan nga katawohan, bisan ang mga Amornon nga nagpuyo sa duta: busa kami man magaalagad sa GINOO; kay sia aton Dios.

19 Kag si Josue nagsiling sa katawohan, Indi kamo sarang makaalagad sa GINOO: kay sia balaan nga Dios; sia maimon nga Dios; indi sia magpatawad sang inyo mga paglapas ukon sang inyo mga sala.

20 Kon magbiya kamo sa GINOO, kag mag-alagad sa mga dios nga dumuloong, niyan magaliso sia kag magahimo sing malaut sa inyo, kag magapapas sa inyo, sa tapus nga nakahimo sia sing maayo sa inyo.

21 Kag ang katawohan nagsiling kay Josue, Indi; kondi magaalagad kami sa GINOO.

22 Kag si Josue nagsiling sa katawohan, Kamo mga saksi batok sa inyo mga kaugalingon nga ginpili ninyo ang GINOO, sa pag-alagad sa iya. Kag sila nagsiling, Mga saksi kami.

23 Busa karon isikway ninyo, siling niya, ang mga dios nga dumuloong nga yara sa tunga ninyo, kag ihuyog ang inyo tagiposoon sa GINOONG Dios sang Israel.

24 Kag ang katawohan nagsiling kay Josue, Magaalagad kami sa GINOO nga amon Dios, kag magatuman kami sang iya tingug.

25 Gani nagpakigkatipan si Josue sa katawohan sinang adlaw, kag ginbutangan sila sing palatukuran kag pagsolondan sa Siquem.

26 ś Kag ginsulat ni Josue ini nga mga polong sa libro sang kasogoan sang Dios, kag nagkuha sing daku nga bato, kag ginpatindug ini didto sa idalum sang terebinto nga kahoy, nga yara sa luyo sang santuario sang GINOO.

27 Kag si Josue nagsiling sa bug-os nga katawohan, Yari karon, ining bato manginsaksi batok sa aton; kay nakabati ini sang tanan nga polong sang GINOO nga ginpamolong niya sa aton: busa mangin saksi ini sa inyo, basi magpanghiwala kamo sang inyo Dios.

28 Gani ginpataliwan ni Josue ang katawohan, ang tagsa ka tawo sa iya panublion.

29 ś Kag nahanabu sa tapus sining mga butang, nga napatay si Josue nga anak nga lalaki ni Nun, alagad sang GINOO, nga isa ka gatus kag napulo ka tuig.

30 Kag ginlubung nila sia sa dulunan sang iya panublion sa Timnat-sera, nga yara sa bukid nga Efraim, sa aminhan nga kilid sang bakolod sang Gaas.

31 Kag ang Israel nag-alagad sa GINOO sa tanan nga adlaw ni Josue, kag sa tanan nga adlaw sang mga tigulang nga naglawig pa kay Josue, kag nakakilala sang tanan nga binuhatan sang GINOO, nga ginhimo niya tungud sa Israel.

32 ś Kag ang mga tul-an ni Jose, nga gindala sang kaanakan sang Israel gikan sa Egipto, ginlubung nila sa Siquem, sa puna sang duta nga ginbakal ni Jacob sa mga anak nga lalaki ni Hamor nga amay ni Siquem sing isa ka gatus ka bilog nga pilak: kag nangin panublion ini sang kaanakan ni Jose.

33 Kag si Eleazar nga anak nga lalaki ni Aaron napatay; kag ginlubung nila sia sa bakolod nga naigo kay Finees nga iya anak nga lalaki, nga ginhatag sa iya sa bukid nga Efraim.

AMAZING GRACE BIBLE INSTITUTE