ANG BALAAN NGA BIBLIA

JUAN

KAPITULO 1

SA ginsuguran amo ang Polong, kag ang Polong kaupud sa Dios, kag ang Polong Dios.

2 Ang amo man sa ginsuguran kaupud sa Dios.

3 Ang tanan nga mga butang ginhimo niya; kag sa wala sia walay bisan ano nga butang nga nahimo sang ginhimo.

4 Sa iya ang kabuhi; kag ang kabuhi amo ang kapawa sang mga tawo.

5 Kag ang kapawa nagasilak sa kadudulman; kag ang kadudulman wala nakahangup sini.

6 ś May ginpadala nga tawo gikan sa Dios, nga ang iya ngalan si Juan.

7 Ang amo man nag-abut nga saksi, sa pagpanaksi sang Kapawa, agud nga ang tanan nga mga tawo magtoo paagi sa iya.

8 Sia indi amo inang Kapawa, kondi ginpadala sa pagpanaksi sa sinang Kapawa.

9 Ina amo ang matuud nga Kapawa, nga nagaiwag sa tagsa ka tawo nga nagakari sa kalibutan.

10 Sa kalibutan sia, kag ang kalibutan ginhimo niya, kag ang kalibutan wala nagkilala sa iya.

11 Nagkari sia sa mga iya, kag ang mga iya wala nagbaton sa iya.

12 Apang ang tanan nga nagbaton sa iya, sa ila naghatag sia gahum sa pagkamangin mga anak nga lalaki sang Dios, sa ila nga magtoo sa iya ngalan:

13 Nga natawo, indi sa dugo, ukon sa kabubut-on sang unud, ukon sa kabubut-on sang tawo, kondi sang Dios.

14 Kag ang Polong nangin unud, kag nagpuyo sa tunga naton, (kag kita nagtan-aw sang iya himaya, ang himaya subong sang sa bugtong nga ginpanganak sang Amay,) puno sang bugay kag kamatooran.

15 ś Si Juan nagpanaksi sa iya, kag nagsinggit, nga nagasiling, Amo ini sia nga nahanungud sa iya akon ginhambal, Sia nga nagasonod sa akon ginapasulabi una sa akon: kay sia una sa akon.

16 Kag gikan sa iya kabuganaan tanan kita nakabaton, kag bugay sa bugay.

17 Kay ang kasogoan ginhatag paagi kay Moises, apang ang bugay kag kamatooran nag-abut paagi kay Jesu-Cristo.

18 Wala sang tawo nga nakakita sa Dios sa bisan ano nga tion; ang bugtong nga ginpanganak nga Anak, nga yara sa sabak sang Amay, sia nagpahayag sa iya.

19 ś Kag ini amo ang pagpanaksi ni Juan, sang nagpadala ang mga Judio sang mga pari kag mga Levita gikan sa Jerusalem sa pagpamangkot sa iya, Sin-o bala ikaw?

20 Kag sia nagtuad, kag wala nagpanghiwala; kondi nagtuad, Indi ako ang Cristo.

21 Kag sila nagpamangkot sa iya, Niyan ano bala? Ikaw bala si Elias? Kag sia nagsiling, Indi ako. Ikaw bala inang manalagna? Kag sia nagsabat, Indi.

22 Niyan nagsiling sila sa iya, Sin-o bala ikaw? agud makahatag kami sang sabat sa ila nga nagpadala sa amon. Ano bala ang ginasiling mo sang imo kaugalingon?

23 Sia nagsiling, Ako amo ang tingug sang isa nga nagasinggit sa kamingawan, Tadlonga ang dalan sang Ginoo, subong sang ginsiling sang manalagna nga si Isaias.

24 Kag sila nga ginpadala gikan sa mga Fariseo.

25 Kag sila nagpamangkot sa iya, kag nagsiling sa iya, Niyan ngaa bala nagabautiso ka, kon indi ikaw inang Cristo, ukon si Elias, ukon inang manalagna?

26 Si Juan nagsabat sa ila, nga nagasiling, Ako nagabautiso sa tubig: apang may nagatindug nga isa sa tunga ninyo, nga wala ninyo makilal-an;

27 Sia amo yadto, nga nagasonod sa akon ginapasolabi una sa akon, nga ang higot sang iya sapatos indi ako takus sa paghubad.

28 Ining mga butang nahanabu sa Betabara sa tabok sang Jordan, diin si Juan nagbautiso.

29 ś Sang madason nga adlaw nakita ni Juan si Jesus nga nagapakari sa iya, kag nagsiling, Yari karon ang Cordero sang Dios, nga nagakuha sang sala sang kalibutan.

30 Ini amo sia nga nahanungud sa iya nagsiling ako, Sa olihi nakon nagakari ang isa ka tawo nga ginpasulabi una sa akon: kay sia una sa akon.

31 Kag wala ko sia makilal-i: apang nga sia mapahayag sa Israel, busa nag-abut ako nga nagabautiso sa tubig.

32 Kag nagpanaksi si Juan, nga nagasiling, Nakita ko ang Espiritu nga nagakunsad gikan sa langit subong sang isa ka pating, kag ini nagpabilin sa ibabaw niya.

33 Kag wala ko sia makilal-i: apang sia nga nagpadala sa akon sa pagbautiso sa tubig, amo man ang nagsiling sa akon, Sa ibabaw niya nga imo makit-an ang Espiritu nga nagakunsad, kag nagapabilin sa ibabaw niya, amo man sia ang nagabautiso sa Balaan nga Espiritu.

34 Kag nakita ko, kag nagpanaksi nga ini amo ang Anak sang Dios.

35 ś Liwat sa adlaw nga madason si Juan nagtindug, kag duha sang iya mga disipulo;

36 Kag sang nagatolok kay Jesus samtang sia nagalakat, nagsiling sia, Yari karon ang Cordero sang Dios!

37 Kag ang duha ka disipulo nakabati sa iya nga nagahambal, kag sila nagsonod kay Jesus.

38 Niyan nagbalikid si Jesus, kag nakita sila nga nagasonod, kag nagsiling sa ila, Ano bala ang inyo ginapangita? Nagsiling sila sa iya, Rabbi, (nga kon isaysay, kon sayoron, Agalon,) sa diin ka nagapuyo?

39 Nagsiling sia sa ila, Kari kag tan-awa. Nag-abut sila kag nakita kon sa diin sia nagapuyo, kag nagpabilin upud sa iya sa sina nga adlaw: kay sadto mga ikanapulo nga takna.

40 Ang isa sang duha nga nakabati kay Juan nga nagahambal, kag nagsonod sa iya, amo si Andres, utud ni Simon Pedro.

41 Ginpangita niya anay ang iya kaugalingon nga utud nga si Simon, kag nagsiling sa iya, Nakit-an namon ang Mesias, nga, kon sayoron, ang Cristo.

42 Kag gindala niya sia kay Jesus. Kag sang magtolok si Jesus sa iya, nagsiling sia, Ikaw si Simon nga anak ni Jona: ikaw pagatawgon Cefas, nga kon sayoron, Isa ka bato.

43 ś Sang masonod nga adlaw ginbuut ni Jesus magkadto sa Galilea, kag ginpangita si Felipe, kag nagsiling sa iya, Sonod sa akon.

44 Karon si Felipe taga-Betsaida, ang siudad ni Andres kag ni Pedro.

45 Ginpangita ni Felipe si Natanael, kag nagsiling sa iya, Nakit-an namon sia, nga nahanungud sa iya si Moises sa kasogoan, kag ang mga manalagna nagsulat, si Jesus sang Nazaret, ang anak ni Jose.

46 Kag si Natanael nagsiling sa iya, May makagowa bala nga bisan ano nga maayo nga butang gikan sa Nazaret? Si Felipe nagsiling sa iya, Kari kag tan-awa.

47 Nakita ni Jesus si Natanael nga nagapakari sa iya, kag nagsiling nahanungud sa iya, Yari karon ang isa ka matuud nga Israelinhon, nga sa iya wala sing limbong!

48 Si Natanael nagsiling sa iya, Sa diin mo ako nakilala? Si Jesus nagsabat kag nagsiling sa iya, Sa wala pa ikaw gintawag ni Felipe, sang ikaw yara sa idalum sang kahoy nga higuera, nakita ko ikaw.

49 Nagsabat si Natanael kag nagsiling sa iya, Rabbi, ikaw ang Anak sang Dios; ikaw ang Hari sang Israel.

50 Nagsabat si Jesus kag nagsiling sa iya, Bangud nga nagsiling ako sa imo, Nakit-an ko ikaw sa idalum sang kahoy nga higuera, nagatoo bala ikaw? makakita ka sang dalagku pa nga mga butang sa mga sini.

51 Kag sia nagsiling sa iya, Sa pagkamatuud, sa pagkamatuud, ako nagasiling sa imo, Sa tapus sini makita ninyo ang langit nga bukas, kag ang mga anghel sang Dios nagakayab kag nagakunsad sa ibabaw sang Anak sang tawo.

KAPITULO 2

KAG sang ikatlo nga adlaw may isa ka kasal sa Cana sang Galilea; kag ang iloy ni Jesus yadto didto:

2 Kag si Jesus gintawag, kag ang iya mga disipulo, sa kasal.

3 Kag sang nagkinahanglan sila sang alak, nagsiling ang iloy ni Jesus sa iya, Wala sila sing alak.

4 Si Jesus nagsiling sa iya, Babaye, ano bala ang akon sa imo? wala pa mag-abut ang akon takna.

5 Nagsiling ang iya iloy sa mga alagad, Ang bisan ano nga isiling niya sa inyo, himoa ninyo.

6 Kag may napahamtang didto nga anum ka tadyaw nga bato, sono sa kinabatasan sang pagpaninlo sang mga Judio, nagaunud sang napulo kag walo ukon duha ka napulo kag pito ka galon ang tagsa ka bilog.

7 Si Jesus nagsiling sa ila, Pun-a ang mga tadyaw sang tubig. Kag ila sila ginpuno tubtub sa bibig.

8 Kag nagsiling sia sa ila, Sanduka ninyo karon, kag dalha sa manugdumala sang sinalosalo. Kag sila nagdala sini.

9 Sang natilawan sang manugdumala sang sinalosalo ang tubig nga ginhimo alak, kag wala nahibaloan kon sa diin ini nagikan: (apang nahibaloan sang mga alagad nga nagsanduk sang tubig;) gintawag sang manugdumala sang sinalo-salo ang nobyo,

10 Kag nagsiling sa iya, Ang tagsa ka tawo sa panugud nagabutang sang maayo nga alak; kag kon ang mga tawo nakainum sang tuman, ugaling inang malain: apang ikaw nakatago sang maayo nga alak tubtub karon.

11 Ining panugud sang mga milagro ginhimo ni Jesus sa Cana sang Galilea, kag nagpahayag sang iya himaya; kag ang iya mga disipulo nagtoo sa iya.

12 ś Sa tapus sini nagdolhog sia pa Capernaum, sia, kag ang iya iloy, kag ang iya mga kauturan, kag ang iya mga disipulo: kag wala sila nagpadayon didto sing madamu nga mga adlaw.

13 ś Kag malapit na ang pagligad sang mga Judio, kag si Jesus nagtaklad pa Jerusalem,

14 Kag nakit-an sa templo yadtong mga nagabaligya sang mga baka kag mga carnero kag mga pating, kag ang mga manugbaylo sang kuarta nga nagalingkod:

15 Kag sang nakahimo sia sang isa ka halanot gikan sa gamay nga mga lubid, iya ginsobol sila tanan gikan sa templo, kag ang mga carnero, kag ang mga baka; kag gin-ula ang kuarta sang mga manugbaylo, kag ginpamaliskad ang mga latok;

16 Kag nagsiling sa ila nga nagpamaligya sang mga pating, Kuhaa ninyo ining mga butang diri; dili ninyo paghimoon ang balay sang akon Amay nga isa ka balay sang balaligya.

17 Kag nadumduman sang iya mga disipulo nga nasulat, Ang kakugi sa imo balay naghalunhon sa akon.

18 ś Niyan nagsabat ang mga Judio kag nagsiling sa iya, Ano bala nga tanda ang mapakita mo sa amon, sanglit nga ikaw nagahimo sining mga butang?

19 Si Jesus nagsabat kag nagsiling sa ila, Gub-a ninyo ining templo, kag sa tatlo ka adlaw akon ini pabangonon.

20 Niyan nagsiling ang mga Judio, Kap-atan kag anum ka tuig ining templo gintukud, kag ikaw mapatindug bala sini sa tatlo ka adlaw?

21 Apang naghambal sia nahanungud sa templo sang iya lawas.

22 Busa sang nabanhaw sia gikan sa mga patay, nadumduman sang iya mga disipulo nga sia nakasiling sini sa ila; kag ila gintoohan ang kasulatan, kag ang polong nga nasiling ni Jesus.

23 ś Karon sang didto sia sa Jerusalem sa pagligad, sa adlaw sang pandut, madamu ang nagtoo sa iya ngalan, sang ila nakita ang mga milagro nga iya ginhimo.

24 Apang wala si Jesus magtugyan sang iya kaugalingon sa ila, bangud iya nahibaloan ang tanan nga tawo,

25 Kag wala nagkinahanglan nga may bisan sin-o nga magsaksi nahanungud sa tawo: kay sia nakahibalo kon ano ang sa sulud sang tawo.

KAPITULO 3

MAY isa ka tawo sang mga Fariseo, nga ginhingalanan si Nicodemo, isa ka manugdumala sang mga Judio:

2 Ang amo man nagkadto kay Jesus sang gab-i, kag nagsiling sa iya, Rabbi, kami nakahibalo nga ikaw manunudlo gikan sa Dios: bangud nga wala sang tawo nga makahimo sining mga milagro nga imo ginahimo, kon indi ang Dios kaupud niya.

3 Si Jesus nagsabat kag nagsiling sa iya, Sa pagkamatuud, sa pagkamatuud, ako nagasiling sa imo, Kon ang tawo indi matawo liwat, indi sia makakita sang ginharian sang Dios.

4 Si Nicodemo nagsiling sa iya, Paano bala ang pagkatawo sang tawo kon sia tigulang na? makasulud bala sia sa ikaduha nga tion sa taguangkan sang iya iloy, kag matawo?

5 Si Jesus nagsabat, Sa pagkamatuud, sa pagkamatuud, nagasiling ako sa imo, Kon ang tawo indi matawo sa tubig kag sa Espiritu, indi sia makasulud sa ginharian sang Dios.

6 Inang natawo sa unud unud; kag inang natawo sa Espiritu espiritu.

7 Indi ka matingala nga nagsiling ako sa imo, Kinahanglan kamo matawo liwat.

8 Ang hangin nagahuyup kon sa diin ang buut sini, kag mabatian mo ang tonog sini, apang indi mahibaloan kon sa diin ina nagahalin, kag kon sa diin ina nagapakadto: subong man ang tagsatagsa nga natawo sa Espiritu.

9 Si Nicodemo nagsabat kag nagsiling sa iya, Paano bala ang pagkahimo sining mga butang?

10 Nagsabat si Jesus kag nagsiling sa iya, Ikaw isa ka agalon sang Israel, kag wala makahibalo sining mga butang?

11 Sa pagkamatuud, sa pagkamatuud, ako nagasiling sa imo, Kami nagahambal sadtong amon nahibaloan, kag nagapamatuud sadtong amon nakit-an; kag kamo wala nagabaton sang amon panaksi.

12 Kon nagsugid ako sa inyo sang dutan-on nga mga butang, kag wala kamo nagatoo, paano bala ang pagtoo ninyo, kon ako magsugid sa inyo sang langitnon nga mga butang?

13 Kag wala sang tawo nga nakasaka sa langit, kondi sia nga nagpanaug sa langit, nga amo ang Anak sang tawo nga yara sa langit.

14 ś Kag subong nga ginbayaw ni Moises ang man-ug sa kamingawan, subong man ang Anak sang tawo kinahanglan pagabayawon:

15 Agud nga ang bisan sin-o nga magtoo sa iya indi mawala, kondi may kabuhi nga walay katapusan.

16 ś Kay ginhigugma gid sang Dios ang kalibutan, sa bagay nga ginhatag niya ang iya bugtong nga ginpanganak nga Anak, agud nga ang bisan sin-o nga magtoo sa iya indi mawala, kondi may kabuhi nga walay katapusan.

17 Kay ang Dios wala magpadala sang iya Anak sa kalibutan sa pagtagudili sang kalibutan; kondi nga ang kalibutan maluwas paagi sa iya.

18 ś Sia nga nagatoo sa iya wala ginatagudilii: apang sia nga wala nagatoo natagudilian na, bangud nga wala sia nagtoo sa ngalan sang bugtong nga ginpanganak nga Anak sang Dios.

19 Kag amo ini ang katagudilian, nga ang kapawa nagkari sa kalibutan, kag ang mga tawo naghigugma sang kadudulman labi sa kapawa, bangud ang ila nga mga buhat malaut.

20 Kay ang tagsatagsa nga nagahimo sang malaut nagadumut sang kapawa, kag wala nagakari sa kapawa, agud indi pagsabdongon ang iya mga buhat.

21 Apang sia nga nagahimo sang kamatooran nagakari sa kapawa, agud mapahayag ang iya mga buhat, nga sila napanghimo sa Dios.

22 ś Sa tapus sining mga butang nag-abut si Jesus kag ang iya mga disipulo sa duta sang Judea; kag didto nagpabilin sia upud sa ila, kag nagbautiso.

23 ś Kag si Juan nagbautiso man sa Enon malapit sa Salim, kay didto may madamu nga tubig: kag nagkadto sila, kag ginbautisohan.

24 Kay si Juan wala pa masulud sa bilanggoan.

25 ś Niyan may nagpatunga nga pamangkot sa tunga sang iban nga mga disipulo ni Juan kag sang mga Judio nahanungud sa pagpaninlo.

26 Kag nagkadto sila kay Juan, kag nagsiling sa iya, Rabbi, sia nga nag-upud sa imo sa tabok sang Jordan, nga sa iya nagsaksi ka, yari karon, ang amo man nagabautiso, kag ang tanan nga mga tawo nagakadto sa iya.

27 Si Juan nagsabat kag nagsiling, Wala sing mabaton ang isa ka tawo, luwas sa nahatag sa iya gikan sa langit.

28 Kamo gid nagasaksi sa akon, nga nagsiling ako, Indi ako ang Cristo, kondi nga ako pinadala sa una niya.

29 Sia nga iya ang nobya amo ang nobyo: apang ang abyan sang nobyo, nga nagatindug kag nagapamati sa iya, nagakalipay sing daku bangud sang tingug sang nobyo: busa ining akon kalipay natuman.

30 Sia kinahanglan magdugang, apang ako kinahanglan magbuhin.

31 Sia nga nagahalin sa ibabaw labaw sa tanan: sia nga sa duta dutan-on, kag nagapamolong nahanungud sa duta: sia nga nagahalin sa langit labaw sa tanan.

32 Kag kon ano ang iya nakit-an kag nabatian, ina iya ginapanaksi; kag wala sang tawo nga nagabaton sang iya pagpanaksi.

33 Sia nga nakabaton sang iya pagpanaksi nakabutang sa iya selyo nga ang Dios matuud.

34 Kay sia nga ginpadala sang Dios nagapamolong sang mga polong sang Dios: kay ang Dios wala nagahatag sang Espiritu sa iya paagi sa talaksan.

35 Ginahigugma sang Amay ang Anak, kag nakahatag sang tanan nga mga butang sa iya kamut.

36 Sia nga nagatoo sa Anak may kabuhi nga walay katapusan: kag sia nga wala nagatoo sa Anak indi makakita sang kabuhi; apang ang kasingkal sang Dios nagapabilin sa iya.

KAPITULO 4

BUSA sang nahibaloan sang Ginoo kon paano nakabati ang mga Fariseo nga si Jesus naghimo kag nagbautiso sing madamu pa nga mga disipulo sang sa kay Juan,

2 (Bisan indi si Jesus gid ang nagbautiso, kondi ang iya mga disipulo,)

3 Ginbayaan niya ang Judea, kag naglakat liwat pakadto sa Galilea.

4 Kag kinahanglan gid sia mag-agi sa Samaria.

5 Niyan nag-abut sia sa isa ka siudad sang Samaria, nga natawag Sicar, malapit sa puna sang duta nga ginhatag ni Jacob sa iya anak nga si Jose.

6 Karon ang bobon ni Jacob yadto didto. Busa si Jesus, nga nalapyo sang iya panlakatan, naglingkod sang amo sa bobon: kag mga ikan-um nga takna sadto.

7 May nag-abut nga isa ka babaye nga taga-Samaria sa pagsag-ub sang tubig: nagsiling si Jesus sa iya, Hatagi ako sang mainum.

8 (Kay ang iya mga disipulo nagkadto sa siudad sa pagbakal sang pagkaon.)

9 Niyan nagsiling ang babaye nga taga-Samaria sa iya, Paano bala nga ikaw, nga isa ka Judio, nagapangayo sang mainum sa akon, nga isa ka babaye nga taga-Samaria? kay ang mga Judio wala sang mga kahilabtanan sa mga Samariahanon.

10 Si Jesus nagsabat kag nagsiling sa iya, Kon imo nahibaloan ang regalo sang Dios, kag kon sin-o ang nagasiling sa imo, Hatagi ako sang mainum; nagpangayo ka kuntani sa iya, kag sia magahatag sa imo sang tubig nga buhi.

11 Ang babaye nagsiling sa iya, Sir, wala ikaw sang itimba, kag ang bobon madalum: busa sa diin bala may imo ikaw sinang tubig nga buhi?

12 Daku ka pa bala sa amon amay nga si Jacob, nga naghatag sa amon sang bobon, kag sia gid nag-inum sa sini, kag ang iya mga anak, kag ang iya mga kabakahan?

13 Si Jesus nagsabat kag nagsiling sa iya, Ang bisan sin-o nga mag-inum sa sini nga tubig pagauhawon liwat:

14 Apang ang bisan sin-o nga mag-inum sa tubig nga akon ihatag sa iya indi na gid pag-uhawon; apang ang tubig nga akon ihatag sa iya mangin bobon sang tubig sa sulud niya nga nagaibwal sa kabuhi nga walay katapusan.

15 Ang babaye nagsiling sa iya, Sir, hatagi ako sining tubig, agud indi ako pag-uhawon, ukon magkadto diri sa pagsag-ub.

16 Si Jesus nagsiling sa iya, Lakat, tawga ang imo bana, kag magbalik diri.

17 Ang babaye nagsabat kag nagsiling, Wala ako sing bana. Si Jesus nagsiling sa iya, Nagsiling ikaw sing husto, Wala ako sing bana:

18 Kay may lima ka na ka bana; kag sia nga yara sa imo karon indi imo bana: sa sina ikaw nagsiling sing matuud.

19 Ang babaye nagsiling sa iya, Sir, ginahantup ko nga ikaw isa ka manalagna.

20 Ang amon mga kaamayan nagsimba sa sining bukid; kag kamo nagasiling, nga sa Jerusalem amo ang duug diin ang mga tawo dapat magsimba.

21 Si Jesus nagsiling sa iya, Babaye, magtoo ka sa akon, ang takna nagaabut, nga indi ninyo sa sining bukid, ukon bisan pa sa Jerusalem, pagsimbahon ang Amay.

22 Kamo nagasimba sang wala ninyo mahibaloi: nahibaloan namon kon ano ang amon ginasimba: kay ang kaluwasan gikan sa mga Judio.

23 Apang ang takna nagaabut, kag karon amo na, nga ang matuud nga mga manugsimba magasimba sa Amay sa espiritu kag sa kamatooran: kay ang Amay nagapangita sang subong nga magsimba sa iya.

24 Ang Dios isa ka Espiritu: kag sila nga nagasimba sa iya kinahanglan magsimba sa iya sa espiritu kag sa kamatooran.

25 Ang babaye nagsiling sa iya, Nakahibalo ako nga ang Mesias magaabut, nga ginatawag Cristo: kon mag-abut sia, sugiran niya kami sang tanan nga mga butang.

26 Si Jesus nagsiling sa iya, Ako nga nagapakighambal sa imo amo sia.

27 ś Kag sa sini nag-abut ang iya mga disipulo, kag nagkatingala nga sia nagpakighambal sa babaye: apang wala sang tawo nga nagsiling, Ano bala ang imo ginapangita? ukon, Ngaa bala nagapakighambal ka sa iya?

28 Niyan ginbayaan sang babaye ang iya tibud, kag naglakat pa siudad, kag nagsiling sa mga tawo,

29 Kari kamo, tan-awa ang isa ka tawo, nga nagsugid sa akon sang tanan nga mga butang nga akon nahimo sang dalayon: indi bala amo ini ang Cristo?

30 Niyan naggowa sila sa siudad, kag nagkadto kay Jesus.

31 ś Sa sadtong tion ang iya mga disipulo nag-agda sa iya, nga nagasiling, Agalon, kaon.

32 Apang sia nagsiling sa ila, May pagkaon ako nga kalan-on nga wala ninyo mahibaloi.

33 Busa nagsiling ang mga disipulo sa isa kag isa, May tawo bala nga nagdala sa iya sang bisan ano nga makaon?

34 Si Jesus nagsiling sa ila, Ang akon pagkaon amo ang paghimo sang kabubut-on niya nga nagpadala sa akon, kag sa pagtapus sang iya buluhaton.

35 Wala bala kamo nagasiling, May apat pa ka bulan, kag niyan maabut ang ani? yari karon, ako nagasiling sa inyo, Ibayaw ang inyo mga mata, kag toloka ang mga kaumhan; kay sila maputi na nga alanyon.

36 Kag sia nga nagaani nagabaton sang mga sohol, kag nagatipon sang bunga pa kabuhi nga walay katapusan: agud nga sia nga nagasab-ug kag sia nga nagaani magkalipay sing tingub.

37 Kag sa sini matuud inang hambalanon, Ang isa nagasab-ug, kag ang isa nagaani.

38 Ako nagpadala sa inyo sa pag-ani sinang wala ninyo pagpangabudlayi: ang iban nga mga tawo nagpangabudlay, kag kamo nagsulud sa ila mga kinabudlayan.

39 ś Kag madamu sang mga Samariahanon sang sina nga siudad ang nagtoo sa iya bangud sang hambalanon sang babaye, nga nagpamatuud, Sia nagsugid sa akon sang tanan nga akon nahimo sang dalayon.

40 Gani sang nag-abut sa iya ang mga Samariahanon, nagpakilooy sila sa iya nga sia magpabilin upud sa ila: kag sia nagpabilin didto sang duha ka adlaw.

41 Kag madamu pa gid ang mga nagtoo bangud sang iya gid polong;

42 Kag nagsiling sa babaye, Nagatoo na kami, indi bangud sang imo hambalanon: kay kami gid nakabati sa iya, kag nakahibalo nga ini sa pagkamatuud amo ang Cristo, ang Manluluwas sang kalibutan.

43 ś Karon sa tapus ang duha ka adlaw naghalin sia didto, kag nagkadto sa Galilea.

44 Kay si Jesus gid nagpamatuud, nga ang isa ka manalagna walay kadungganan sa iya kaugalingon nga duta.

45 Niyan sang nag-abut sia sa Galilea, ginbaton sia sang mga Galileanhon, kay nakit-an nila ang tanan nga mga butang nga iya ginhimo sa Jerusalem sa pandut: kay nagkadto man sila sa pandut.

46 Gani nagkadto si Jesus liwat sa Cana sang Galilea, diin ginhimo niya nga alak ang tubig. Kag may isa ka halangdon nga tawo, nga ang iya anak nga lalaki nagmasakit sa Capernaum.

47 Sang nabatian niya nga si Jesus nag-abut sa Galilea gikan sa Judea, nagkadto sia sa iya, kag nagpakilooy sa iya nga magdolhog sia, kag ayohon ang iya anak: kay sia tagumatayon.

48 Niyan si Jesus nagsiling sa iya, Kon indi kamo makakita sang mga tanda kag mga katanhagaan, indi kamo magtoo.

49 Ang halangdon nga tawo nagsiling sa iya, Sir, kari sa wala pa mapatay ang akon bata.

50 Si Jesus nagsiling sa iya, Lakat ka; ang imo anak nagakabuhi. Kag gintoohan sang tawo ang polong nga ginhambal ni Jesus sa iya, kag naglakat sia.

51 Kag sang nagadolhog na sia, ang iya mga alagad nagsugata sa iya, kag nagpanugid sa iya, nga nagasiling, Ang imo anak nagakabuhi.

52 Niyan nagpangusisa sia sa ila sang takna kon san-o sia nagsugud sa pag-ayo. Kag sila nagsiling sa iya, Kahapon sang ikapito nga takna ang hilanat nagbiya sa iya.

53 Gani nahibaloan sang amay nga ini amo yadtong takna, nga sia ginsilingan ni Jesus, Ang imo anak nagakabuhi: kag sia gid nagtoo, kag ang bug-os niyang panimalay.

54 Ini amo naman ang ikaduha nga milagro nga ginhimo ni Jesus, sang nakagowa sia sa Judea pa Galilea.

KAPITULO 5

SA tapus sini may isa ka pandut sang mga Judio; kag si Jesus nagkadto sa Jerusalem.

2 Karon sa Jerusalem sa tupad sang balaligyaan sang mga carnero may isa ka ponong, nga ginatawag sa Hebreo nga hambal Betesda, nga may lima ka portico.

3 Sa ila sini nagahamyang ang isa ka dakung kadam-an sang masakiton nga katawohan, sang mga bulag, mga piang, mga nagapalangmatay, nga nagahulat sang paghulag sang tubig.

4 Kay ang isa ka anghel nagkunsad sa isa ka pat-ud nga panahon sa ponong, kag nagtublag sang tubig: niyan ang bisan sin-o nga una nga maglusung sa tapus matublag ang tubig nag-ayo sa bisan ano nga balatian niya.

5 Kag ang isa ka tawo yadto didto, nga may masakit katloan kag walo ka tuig.

6 Sang nakita sia ni Jesus nga nagahamyang, kag nakahibalo nga madugay na sia sa sinang kahimtangan, nagsiling sia sa iya, Buut ka bala mag-ayo?

7 Ang masakiton nga tawo nagsabat sa iya, Sir, wala ako sang tawo, kon ginatublag ang tubig, nga magbutang sa akon sa ponong: apang samtang nagapakadto ako, ang iban nagalusung sing una sa akon.

8 Si Jesus nagsiling sa iya, Tindug ka, dalha ang imo higdaan, kag maglakat.

9 Kag sa gilayon nag-ayo ang tawo, kag nagdala sang iya higdaan, kag naglakat: kag sang amo nga adlaw amo ang sabbath.

10 ś Busa ang mga Judio nagsiling sa iya nga gin-ayo, Adlaw ini nga sabbath: indi tugut sa imo ang pagdala sang imo higdaan.

11 Nagsabat sia sa ila, Sia nga nag-ayo sa akon, amo man ang nagsiling sa akon, Dalha ang imo higdaan, kag maglakat.

12 Niyan ginpamangkot nila sia, Ano bala yadtong tawo nga nagsiling sa imo, Dalha ang imo higdaan, kag maglakat?

13 Kag sia nga gin-ayo wala makahibalo kon sin-o yadto: kay si Jesus naghalin, bangud sang kadam-an sa sinang duug.

14 Sang olihi nakita sia ni Jesus sa templo, kag nagsiling sa iya, Yari karon, ikaw nag-ayo: dili ka na magpakasala, agud indi mahanabu sa imo ang malain pa nga butang.

15 Ang tawo naglakat, kag nagsugid sa mga Judio nga amo yadto si Jesus, nga nag-ayo sa iya.

16 Kag busa ang mga Judio naghingabut kay Jesus, kag nagtinguha sa pagpatay sa iya, bangud naghimo sia sining mga butang sa adlaw nga sabbath.

17 ś Apang si Jesus nagsabat sa ila, Ang akon Amay nagapangabudlay tubtub karon, kag nagapangabudlay ako.

18 Busa ang mga Judio labi pa gid nga nagtinguha sa pagpatay sa iya, bangud indi lamang nga ginlapas niya ang sabbath, kondi nagsiling man nga ang Dios Amay niya, nga nagapakigtupung sang iya kaugalingon sa Dios.

19 Niyan nagsabat si Jesus kag nagsiling sa ila, Sa pagkamatuud, sa pagkamatuud, ako nagasiling sa inyo, Ang Anak indi makahimo sang bisan ano nga butang sa iya kaugalingon, kondi kon ano ang makita niya nga ginahimo sang Amay: kay ang bisan ano nga mga butang nga ginahimo niya, ang mga ini ginahimo man sang Anak sa amo nga bagay.

20 Kay ang Amay nagahigugma sa Anak, kag nagapakita sa iya sang tanan nga mga butang nga iya ginahimo: kag dalagku pa nga mga buhat sa mga sini ang ipakita niya sa iya, agud nga kamo matingala.

21 Kay subong nga ang Amay nagabanhaw sang mga patay, kag nagabuhi sa ila; amo man ang Anak nagabuhi sa kon sin-o nga buut niya.

22 Kay ang Amay walay ginahukman nga tawo, kondi gintugyan sa Anak ang bug-os nga paghukom:

23 Agud nga ang tanan nga mga tawo dapat magtahud sa Anak, subong nga sila nagatahud sa Amay. Sia nga wala nagatahud sa Anak wala nagatahud sa Amay nga nagpadala sa iya.

24 Sa pagkamatuud, sa pagkamatuud, ako nagasiling sa inyo, Sia nga nagapamati sang akon polong, kag nagatoo sa iya nga nagpadala sa akon, may kabuhi nga walay katapusan, kag indi magdangat sa katagudilian; kondi naliton na gikan sa kamatayon pa kabuhi.

25 Sa pagkamatuud, sa pagkamatuud, ako nagasiling sa inyo, Ang takna magaabut, kag karon amo na, nga ang mga patay magapamati sang tingug sang Anak sang Dios: kag sila nga nakabati magakabuhi.

26 Kay subong nga ang Amay may kabuhi sa iya kaugalingon; sa amo nga bagay ginhatag niya sa Anak ang may pagkabuhi sa iya kaugalingon;

27 Kag naghatag sa iya sing pagbulut-an sa paghukom man, bangud sia ang Anak sang tawo.

28 Dili kamo magkatingala sini: kay ang takna magaabut, nga ang tanan nga yara sa mga lulubngan magapalamati sang iya tingug,

29 Kag magagowa; sila nga nakahimo sang maayo, sa pagkabanhaw nga sa kabuhi; kag sila nga nakahimo sang malaut, sa pagkabanhaw nga sa katagudilian.

30 Ako sa akon kaugalingon indi makahimo sing bisan ano: sono sa ginapamatian ko, nagahukom ako: kag ang akon paghukom matarung; bangud wala ako nagapangita sang akon kaugalingon nga kabubut-on, kondi ang kabubut-on sang Amay nga nagpadala sa akon.

31 Kon ako nagasaksi nahanungud sa akon kaugalingon, ang akon panaksi indi matuud.

32 ś May iban nga nagasaksi nahanungud sa akon; kag nahibaloan ko nga ang panaksi nga iya ginasaksi nahanungud sa akon matuud.

33 Ginpasogoan ninyo si Juan, kag sia nagsaksi sa kamatooran.

34 Apang wala ako nagabaton sing pagpamatuud gikan sa tawo: apang nagasiling ako sining mga butang, agud nga maluwas kamo.

35 Isa sia ka nagadabdab sadto kag isa ka nagasiga nga suga: kag nagbuut kamo magkalipay sa iya kapawa sa isa ka panag-on.

36 ś Apang ako may daku pa nga panaksi sa sinang iya ni Juan: kay ang mga buluhaton nga ginhatag sang Amay sa akon nga tapuson, ang amo man nga mga buluhaton nga akon ginahimo, nagasaksi nahanungud sa akon, nga ang Amay nagpadala sa akon.

37 Kag ang Amay gid, nga nagpadala sa akon, nagsaksi nahanungud sa akon. Kamo wala nakabati sang iya tingug sa bisan ano nga tion, ukon nakakita sang iya bayhon.

38 Kag wala kamo sang nagapabilin nga polong niya sa inyo: kay sia nga iya ginpadala, sa iya wala kamo nagatoo.

39 ś Usisaa ninyo ang mga kasulatan; bangud nga nagahunahuna kamo nga sa ila may kabuhi kamo nga walay katapusan: kag amo sila ang nagapamatuud nahanungud sa akon.

40 Kag indi kamo buut magkari sa akon, agud nga may kabuhi kamo.

41 Wala ako nagabaton sing kadungganan gikan sa mga tawo.

42 Apang nakilala ko kamo, nga wala kamo sang gugma sang Dios sa inyo.

43 Ako nagakari sa ngalan sang akon Amay, kag wala kamo nagabaton sa akon: kon iban ang magkari sa iya kaugalingon nga ngalan, sia batonon ninyo.

44 Paano bala nga makatoo kamo, nga nagabaton sang kadungganan sang isa kag isa, kag wala nagapangita sang kadungganan nga nagagikan sa Dios lamang?

45 Dili kamo maghunahuna nga ako magasumbung sa inyo sa Amay: may isa nga nagasumbung sa inyo, si Moises, nga ginasaligan ninyo.

46 Kay kon nagtoo kamo kuntani kay Moises, magatoo kamo sa akon: kay sia nagsulat nahanungud sa akon.

47 Apang kon kamo wala magtoo sa iya mga sinulatan, paano bala ang pagtoo ninyo sa akon mga polong?

KAPITULO 6

SA tapus sining mga butang si Jesus nagkadto sa tabok sang dagat sang Galilea, nga amo ang dagat sang Tiberias.

2 Kag ang isa ka dakung kadam-an nagsonod sa iya, bangud nakita nila ang iya mga milagro nga ginhimo niya sa mga balatianon.

3 Kag si Jesus nagtaklad sa bukid, kag didto naglingkod sia kaupud sang iya mga disipulo.

4 Kag ang pagligad, isa ka pandut sang mga Judio, malapit na.

5 ś Niyan sang magbayaw si Jesus sang iya mga mata, kag nakita ang isa ka dakung kadam-an nga nagapalapit sa iya, nagsiling sia kay Felipe, Diin bala kita mabakal sang tinapay, agud makakaon ang mga ini?

6 Kag ini ginsiling niya sa pagtilaw sa iya: kay sia gid nakahibalo kon ano ang iya himoon.

7 Si Felipe nagsabat sa iya, Duha ka gatus ka denario nga bili sang tinapay indi makaigo sa ila, agud ang tagsatagsa sa ila makakuha sing diotay.

8 Isa sang iya mga disipulo, si Andres, utud ni Simon Pedro, nagsiling sa iya,

9 May isa ka bata nga lalaki diri, nga may lima ka tinapay nga sebada, kag duha ka magagmay nga mga isda: apang daw ano man lamang ini sila sa amo nga kadamuon?

10 Kag si Jesus nagsiling, Palingkora ninyo ang mga tawo. Karon may madamung hilamon sa duug. Gani naglingkod ang mga lalaki, nga mga lima ka libo ang kadamuon.

11 Kag ginkuha ni Jesus ang mga tinapay; kag sang nakapasalamat sia, ginpanagtag niya sa mga disipulo, kag ang mga disipulo sa ila nga nagalilingkod; kag subong man ang mga isda sa kadamuon nga luyag nila.

12 Sang nabusug sila, nagsiling sia sa iya mga disipulo, Tipona ninyo ang mga tinipik nga nabilin, agud walay mausik.

13 Busa gintipon nila sila sing tingub, kag nagpuno sang napulog duha ka alat sang mga tinipik sang lima ka tinapay nga sebada, nga nabilin sobra kag kapin sa ila nga nagkaon.

14 Niyan yadtong mga tawo, sang nakita nila ang milagro nga ginhimo ni Jesus, nagsiling, Ini amo sa matuud gid inang manalagna nga dapat magkari sa kalibutan.

15 ś Busa sang nahantupan ni Jesus nga sila magakari kag magakuha sa iya paagi sa pakusug, nga himoon sia nga isa ka hari, naglakat sia liwat sa isa ka bukid nga sia lamang.

16 Kag sang nag-abut na ang kasisidmon, ang iya mga disipulo nagdolhog pa dagat,

17 Kag nagsakay sa isa ka sakayan, kag nagtabok sa dagat pa Capernaum. Kag madulum na, kag si Jesus wala mag-abut sa ila.

18 Kag nagmabalud ang dagat bangud sang mamadlus nga hangin nga naghuyup.

19 Gani sang nakabugsay sila sang mga duha ka napulo kag lima ukon katloan ka estadio, nakita nila si Jesus nga nagalakat sa ibabaw sang dagat, kag nagapalapit sa sakayan: kag hinadlukan sila.

20 Apang nagsiling sia sa ila, Ako ini; dili kamo mahadluk.

21 Niyan malipayon sila nga nagbaton sa iya sa sakayan: kag sa gilayon ang sakayan yara sa dungkaan nga ila ginpadolongan.

22 ś Sang masonod nga adlaw, sang nakita sang katawohan nga nagtilindug sa tabok sang dagat nga wala sang liwan nga sakayan didto, kondi inang isa nga sa diin nagsulud ang iya mga disipulo, kag nga si Jesus wala nag-upud sa iya mga disipulo sa sakayan, kondi nga ang iya mga disipulo naghalin nga sila lamang;

23 (Walay sapayan may iban nga nag-abut nga mga sakayan gikan sa Tiberias malapit sa duug nga ila ginkan-an sang tinapay, sa tapus nga ang Ginoo nakapasalamat:)

24 Busa sang nakita sang katawohan nga wala didto si Jesus, ukon ang iya mga disipulo, sila man nagpanakayon, kag nagkadto sa Capernaum, nga nagapangita kay Jesus.

25 Kag sang nakita nila sia sa tabok sang dagat, nagsiling sila sa iya, Rabbi, san-o bala ikaw nagkari diri?

26 Si Jesus nagsabat sa ila kag nagsiling, Sa pagkamatuud, sa pagkamatuud, ako nagasiling sa inyo, Ginapangita ninyo ako, indi bangud nakakita kamo sang mga milagro, kondi bangud nga nakakaon kamo sang mga tinapay, kag nabusug.

27 Dili kamo magpangabudlay tungud sa kalan-on nga nagakawala, kondi tungud sinang kalan-on nga nagapadayon sa kabuhi nga walay katapusan, nga ihatag sang Anak sang tawo sa inyo: kay sia ginselyohan sang Dios nga Amay.

28 Niyan nagsiling sila sa iya, Ano bala ang amon himoon, agud nga mabuhat namon ang mga buluhaton sang Dios?

29 Si Jesus nagsabat kag nagsiling sa ila, Amo ini ang buluhaton sang Dios, nga magtoo kamo sa iya nga ginpadala niya.

30 Busa nagsiling sila sa iya, Niyan ano bala nga tanda ang ginapakita mo, agud nga makita namon, kag magtoo sa imo? ano bala ang imo ginabuhat?

31 Ang amon nga mga kaamayan nagkaon sang mana sa kamingawan; subong sang nasulat na, Ginhatagan niya sila sing tinapay gikan sa langit nga makaon.

32 Niyan si Jesus nagsiling sa ila, Sa pagkamatuud, sa pagkamatuud, nagasiling ako sa inyo, Indi si Moises ang naghatag sa inyo sinang tinapay gikan sa langit; kondi ang akon Amay nagahatag sa inyo sang matuud nga tinapay gikan sa langit.

33 Kay ang tinapay sang Dios amo sia ang nagpanaug gikan sa langit, kag nagahatag sing kabuhi sa kalibutan.

34 Niyan nagsiling sila sa iya, Ginoo, hatagi kami sa gihapon sining tinapay.

35 Kag si Jesus nagsiling sa ila, Ako amo ang tinapay sang kabuhi: sia nga nagakari sa akon indi na gid paggutumon; kag sia nga nagatoo sa akon indi na gid pag-uhawon.

36 Apang nagsiling ako sa inyo, Nga kamo man nakakita sa akon, kag wala nagatoo.

37 Ang tanan nga ginahatag sa akon sang Amay magakari sa akon; kag sia nga nagakari sa akon indi ko sa bisan ano nga paagi pagsikwayon.

38 Kay ako nagpanaug gikan sa langit, indi sa paghimo sang akon kaugalingon nga kabubut-on, kondi sang kabubut-on niya nga nagpadala sa akon.

39 Kag ini amo ang kabubut-on sang Amay nga nagpadala sa akon, nga wala ako sing madula sang tanan nga ginhatag niya sa akon, kondi nga banhawon ini sa katapusan nga adlaw.

40 Kag ini amo ang kabubut-on niya nga nagpadala sa akon, nga ang tagsatagsa nga nakakita sa Anak, kag nagatoo sa iya, may kabuhi nga walay katapusan: kag ako magabanhaw sa iya sa katapusan nga adlaw.

41 Niyan ang mga Judio nagkumud sa iya, bangud nga nagsiling sia, Ako amo ang tinapay nga nagpanaug gikan sa langit.

42 Kag nagsiling sila, Indi bala si Jesus ini, ang anak ni Jose, nga ang iya amay kag iloy nakilala naton? busa paano bala nga nagasiling sia, Nagpanaug ako gikan sa langit?

43 Busa si Jesus nagsabat kag nagsiling sa ila, Dili kamo magkumud sa inyo mga kaugalingon.

44 Wala sang tawo nga makakari sa akon, kon indi sia pagbuyukon sang Amay nga nagpadala sa akon: kag banhawon ko sia sa katapusan nga adlaw.

45 Nasulat na sa mga manalagna, Kag tudloan sila tanan sang Dios. Busa ang tagsa ka tawo nga nakapamati, kag nakatoon sa Amay, nagakari sa akon.

46 Indi kay may bisan sin-o nga tawo nga nakakita sa Amay, luwas sia nga gikan sa Dios, sia nakakita sa Amay.

47 Sa pagkamatuud, sa pagkamatuud, nagasiling ako sa inyo, Sia nga nagatoo sa akon may kabuhi nga walay katapusan.

48 Ako amo inang tinapay sang kabuhi.

49 Ang inyo mga kaamayan nagkaon sang mana sa kamingawan, kag nagkalamatay.

50 Ini amo ang tinapay nga nagpanaug gikan sa langit, agud nga ang tawo makakaon sini, kag indi mapatay.

51 Ako ang buhi nga tinapay nga nagpanaug gikan sa langit: kon bisan sin-o nga tawo ang magkaon sining tinapay, magakabuhi sia sing walay katapusan: kag ang tinapay nga akon ihatag amo ang akon unud, nga akon ihatag tungud sa kabuhi sang kalibutan.

52 Busa ang mga Judio nagbinaisay, nga nagasiling, Paano bala ining tawo makahatag sa aton sang iya unud nga kaonon?

53 Niyan si Jesus nagsiling sa ila, Sa pagkamatuud, sa pagkamatuud, nagasiling ako sa inyo, Kon indi ninyo pagkan-on ang unud sang Anak sang tawo, kag pag-imnon ang iya dugo, wala kamo sing kabuhi sa inyo.

54 Ang bisan sin-o nga nagakaon sang akon unud, kag nagainum sang akon dugo, may kabuhi nga walay katapusan; kag ako magabanhaw sa iya sa katapusan nga adlaw.

55 Kay ang akon unud kalan-on gid, kag ang akon dugo ilimnon gid.

56 Sia nga nagakaon sang akon unud, kag nagainum sang akon dugo, nagapuyo sa akon, kag ako sa iya.

57 Subong nga ang Amay nga buhi nagpadala sa akon, kag ako nagakabuhi paagi sa Amay: amo man sia nga nagakaon sa akon, sia magakabuhi paagi sa akon.

58 Ini amo inang tinapay nga nagpanaug gikan sa langit: indi subong sang mana nga ginkaon sang inyo mga kaamayan, kag nagkalamatay: sia nga nagakaon sa sining tinapay magakabuhi sing walay katapusan.

59 Ining mga butang ginsiling niya sa sinagoga, sang nagpanudlo sia sa Capernaum.

60 Busa ang madamu sang iya mga disipulo, sang sila nakabati sini, nagsiling, Isa ini ka mabudlay nga hambalanon; sin-o bala ang makapamati sini?

61 Sang nahibaloan ni Jesus sa iya kaugalingon nga ang iya mga disipulo nagkumud sa sini, sia nagsiling sa ila, Nagapasandad bala ini sa inyo?

62 Ano bala kag kon makita ninyo ang Anak sang tawo nga nagakayab sa diin sia sadto anay?

63 Ang espiritu amo ang nagapabuhi; ang unud walay pulus: ang mga polong nga ginapomolong ko sa inyo, sila espiritu, kag sila kabuhi.

64 Apang may iban sa inyo nga wala nagatoo. Kay si Jesus nakahibalo kutub sa ginsuguran kon sin-o ang mga wala magtoo, kag kon sin-o ang matugyan sa iya.

65 Kag nagsiling sia, Busa nagsiling ako sa inyo, nga walay tawo nga makakari sa akon, luwas lang nga hatag ini sa iya sang akon Amay.

66 ś Kutub sadto madamu sang iya mga disipulo ang nag-ilisul, kag wala na magpakig-upud sa iya.

67 Niyan si Jesus nagsiling sa napulog duha, Mahalin man bala kamo?

68 Niyan si Simon Pedro nagsabat sa iya, Ginoo, kay sin-o bala kami makadto? ikaw ang may mga polong sang kabuhi nga walay katapusan.

69 Kag kami nagatoo kag nakaseguro gid nga ikaw inang Cristo, ang Anak sang buhi nga Dios.

70 Si Jesus nagsabat sa ila, Wala bala ako magpili sa inyo nga napulog duha, kag ang isa sa inyo isa ka yawa?

71 Sia nagpamolong nahanungud kay Judas Iscariote nga anak ni Simon: kay amo ini sia yadtong magatugyan sa iya, nga isa sang napulog duha.

KAPITULO 7

SA tapus sining mga butang si Jesus nagpanlakatan sa Galilea: kay indi sia buut magpanlakatan sa duta sang mga Judio, bangud ang mga Judio nagtinguha sa pagpatay sa iya.

2 Karon malapit na ang pandut sang mga tabernakulo sang mga Judio sadto.

3 Busa ang iya mga kauturan nagsiling sa iya, Magtaliwan ka diri, kag magkadto sa Judea, agud nga ang imo mga disipulo man makakita sang mga buhat nga ginahimo mo.

4 Kay walay tawo nga nagahimo sang bisan ano nga butang sa tago, kag sia gid nagatinguha nga makilala sing hayag. Kon ginahimo mo ining mga butang, ipahayag ang imo kaugalingon sa kalibutan.

5 Kay bisan pa ang iya mga kauturan wala man magtoo sa iya.

6 Niyan si Jesus nagsiling sa ila, Ang akon tion wala pa mag-abut: apang ang inyo tion handa sa gihapon.

7 Ang kalibutan indi makadumut sa inyo; apang nagadumut ini sa akon, bangud nga nagapanaksi ako nahanungud sini, nga ang mga buhat sini malaut.

8 Taklad kamo sa sining pandut: ako indi pa magtaklad sa sining pandut; bangud nga ang akon tion wala pa mag-abut sing bug-os.

9 Sang nakasiling sia sining mga polong sa ila, nagpabilin pa sia sa Galilea.

10 ś Apang sang nakataklad ang iya mga kauturan, niyan sia man nagtaklad sa pandut, indi sing hayag, kondi daw sa tago.

11 Niyan ang mga Judio nagpangita sa iya sa pandut, kag nagsiling, Diin bala sia?

12 Kag may madamu nga hinuringhuring sa tunga sang katawohan nahanungud sa iya: kay ang iban nagsiling, Maayo sia nga tawo: ang iban nagsiling, Indi; kondi nagapangdaya sia sang katawohan.

13 Walay sapayan walay tawo nga nagpamolong sing hayag nahanungud sa iya tungud sa kahadluk sa mga Judio.

14 ś Karon sang mga nagahinunga na ang pandut si Jesus nagtaklad sa templo, kag nagpanudlo.

15 Kag ang mga Judio nagkatingala, nga nagasiling, Paano bala nakahibalo ining tawo sang mga sinulatan, nga wala gid sia makatoon?

16 Si Jesus nagsabat sa ila, kag nagsiling, Ang akon doktrina indi akon, kondi iya sang nagpadala sa akon.

17 Kon himoon sang bisan sin-ong tawo ang iya kabubut-on, mahibaloan niya ang nahanungud sa doktrina, kon bala ini gikan sa Dios, ukon bala nagapamolong ako sa akon kaugalingon.

18 Sia nga nagapamolong sa iya kaugalingon nagapangita sang iya kaugalingon nga himaya: apang sia nga nagapangita sang himaya sang nagpadala sa iya, amo man ang matuud, kag wala sang pagkadimatarung sa iya.

19 Indi bala si Moises ang naghatag sa inyo sang kasogoan, kag bisan pa wala sing isa sa inyo nga nagatuman sang kasogoan? Ngaa bala nagatinguha kamo sa pagpatay sa akon?

20 Ang katawohan nagsabat kag nagsiling, May yawa ikaw: sin-o bala ang nagatinguha nga magpatay sa imo?

21 Si Jesus nagsabat kag nagsiling sa ila, Ako nakahimo sang isa ka buhat, kag tanan kamo natingala.

22 Busa si Moises naghatag sa inyo sang circuncision; (indi bangud gikan ini kay Moises, kondi gikan sa mga kaamayan;) kag sa adlaw nga sabbath nagacircuncidar kamo sang tawo.

23 Kon ang isa ka tawo nagabaton sang circuncision sa adlaw nga sabbath, agud nga indi malapas ang kasogoan ni Moises; naakig bala kamo sa akon, bangud ako nakaayo sang tagsa ka bahin sang tawo sing bug-os sa adlaw nga sabbath?

24 Dili kamo maghukom sono sa dagway, kondi maghukom sang matarung nga paghukom.

25 Niyan ang iban sa ila nga taga-Jerusalem nagsiling, Indi bala amo ini sia, ang ila ginatinguhaan nga patyon?

26 Apang, yari karon, nagapamolong sia sing maisug, kag wala sila sing ginasiling sa iya. Nakahibalo gid bala ang mga manugdumala nga amo ini ang matuud nga Cristo?

27 Walay sapayan kita nakahibalo sining tawo kon diin sia gikan: apang kon mag-abut ang Cristo, walay tawo nga makahibalo kon diin sia gikan.

28 Niyan si Jesus nagsinggit sa templo sang nagpanudlo sia, nga nagasiling, Kilala ninyo ako, kag nahibal-an ninyo kon diin ako gikan: kag ako wala magkari sa akon kaugalingon, apang sia nga nagpadala sa akon matuud, sia nga wala ninyo makilala.

29 Apang kilala ko sia: kay ako gikan sa iya, kag ginpadala niya ako.

30 Niyan nagtinguha sila sa pagdakup sa iya: apang walay tawo nga nagdakup sa iya, bangud nga wala pa mag-abut ang iya takna.

31 Kag madamu sang katawohan ang nagtoo sa iya, kag nagsiling, Kon ang Cristo magakari, magahimo bala sia sang dugang pa nga mga milagro sang sa mga nahimo sining tawo?

32 ś Ang mga Fariseo nakabati nga naghinuringhuring ang katawohan sang amo nga mga butang nahanungud sa iya; kag ang mga Fariseo kag ang puno nga mga pari nagpadala sang mga opisyal sa pagdakup sa iya.

33 Niyan si Jesus nagsiling sa ila, Sa diotay pa nga tion kaupud ako ninyo, kag niyan magakadto ako sa iya nga nagpadala sa akon.

34 Kamo magapangita sa akon, kag indi makakita sa akon: kag kon diin ako, sa sinang duug indi kamo makakadto.

35 Niyan ang mga Judio nagsinilingay, Sa diin bala nga duug sia makadto, nga indi naton sia makit-an? magakadto bala sia sa mga nag-alaplaag sa tunga sang mga Gentil, kag magapanudlo sa mga Gentil?

36 Ano bala nga sahi sang hambalanon ining ginsiling niya, Kamo magapangita sa akon, kag indi makakita sa akon: kag kon diin ako, sa sinang duug indi kamo makakadto?

37 Sa katapusan nga adlaw, inang daku nga adlaw sang pandut, si Jesus nagtindug kag nagsinggit, nga nagasiling, Kon ang bisan sin-ong tawo ginauhaw, magkari sia sa akon, kag mag-inum.

38 Sia nga nagatoo sa akon, subong sang nasiling sang kasulatan, gikan sa tiyan niya magailig ang mga suba sang tubig nga buhi.

39 (Apang ini ginpamolong niya nahanungud sa Espiritu, nga pagabatonon sang mga nagatoo sa iya: kay ang Balaan nga Espiritu sadto wala pa mahatag; bangud nga si Jesus wala pa mahimaya.)

40 ś Busa madamu sang katawohan, sang mabatian nila ining hambalanon, nagsiling, Sa pagkamatuud amo ini ang Manalagna.

41 Ang iban nagsiling, Ini amo ang Cristo. Apang ang iban nagsiling, Magagikan bala ang Cristo sa Galilea?

42 Wala bala magsiling ang kasulatan, Nga ang Cristo magagikan sa kaliwat ni David, kag gikan sa banwa sang Betlehem, diin anay si David?

43 Gani may isa ka pagbinahinbahin sa tunga sang katawohan bangud sa iya.

44 Kag ang iban sa ila buut magdakup sa iya; apang walay tawo nga nagdakup sa iya.

45 ś Niyan nag-abut ang mga opisyal sa puno nga mga pari kag mga Fariseo; kag sila nagsiling sa ila, Ngaa bala wala ninyo sia pagdalha?

46 Ang mga opisyal nagsabat, Wala pa gid sang tawo nga nagpamolong subong sining tawo.

47 Niyan ang mga Fariseo nagsabat sa ila, Nadayaan man bala kamo?

48 May yara bala sang mga manugdumala ukon sang mga Fariseo nga nagtoo sa iya?

49 Apang ining katawohan nga wala nakahibalo sang kasogoan pinapakamalaut.

50 Si Nicodemo nagsiling sa ila, (sia nga nagkari kay Jesus sang gab-i, nga isa sa ila,)

51 Nagahukom bala ang aton kasogoan sa bisan sin-o nga tawo, sa wala pa ini makapamati sa iya, kag mahibaloan kon ano ang iya ginahimo?

52 Nagsabat sila kag nagsiling sa iya, Ikaw man bala gikan sa Galilea? Usisaa, kag tan-awa: kay gikan sa Galilea walay manalagna nga nagalutaw.

53 Kag ang tagsa ka tawo nagkadto sa iya kaugalingon nga balay.

KAPITULO 8

SI JESUS nagkadto sa bukid sang mga Olivo.

2 Kag sa aga pa nagkadto sia liwat sa templo, kag ang tanan nga katawohan nagkadto sa iya; kag naglingkod sia, kag nagpanudlo sa ila.

3 Kag ang mga escriba kag ang mga Fariseo nagdala sa iya sang isa ka babaye nga nadakpan sa pagpanglahi; kag sang nabutang nila sia sa tunga,

4 Nagsiling sila sa iya, Agalon, ining babaye nadakpan sa pagpanglahi, sa amo gid nga buhat.

5 Karon si Moises sa kasogoan nagsogo sa amon, nga ang tagsubong sina dapat pagabatohon: apang ano bala ang masiling mo?

6 Ini ila ginsiling, sa pagsulay sa iya, agud nga may ikasumbung sila sa iya. Apang si Jesus nagdunguk, kag nagsulat sang iya tudlo sa duta, subong nga wala sia nakabati sa ila.

7 Gani sang nagpadayon sila sa pagpamangkot sa iya, nagtindug sia, kag nagsiling sa ila, Sia nga walay sala sa inyo, mag-una haboy sing bato sa iya.

8 Kag liwat nagdunguk sia, kag nagsulat sa duta.

9 Kag sila nga nakabati sina, nga ginasabdong sang ila kaugalingon nga konsiensya, naggowa sing tag-isaisa, sumugud sa labing tigulang, tubtub sa katapusan: kag si Jesus lang ang nabilin, kag ang babaye nga nagatindug sa tunga.

10 Sang nakatindug si Jesus, kag wala sing nakit-an kondi ang babaye, nagsiling sia sa iya, Babaye, diin bala yadtong imo mga manunumbung? wala bala sang tawo nga nagtagudili sa imo?

11 Nagsiling sia, Walay tawo, Ginoo. Kag si Jesus nagsiling sa iya, Bisan ako wala man nagatagudili sa imo: lakat, kag dili na magpakasala.

12 ś Niyan si Jesus nagpamolong liwat sa ila, nga nagasiling, Ako amo ang kapawa sang kalibutan: sia nga nagasonod sa akon indi maglakat sa kadudulman, kondi may kapawa sang kabuhi.

13 Busa ang mga Fariseo nagsiling sa iya, Ikaw nagasaksi sang imo kaugalingon; ang imo panaksi indi matuud.

14 Si Jesus nagsabat kag nagsiling sa ila, Bisan ako nagasaksi sang akon kaugalingon, apang ang akon panaksi matuud: kay nakahibalo ako kon diin ako naghalin, kag kon diin ako makadto; apang kamo wala makahibalo kon diin ako naghalin, kag kon diin ako makadto.

15 Kamo nagahukom sono sa unud; wala ako sang ginahukman nga tawo.

16 Kag walay sapayan kon maghukom ako, ang akon paghukom matuud: kay ako indi isa lamang, kondi ako kag ang Amay nga nagpadala sa akon.

17 Sa inyo kasogoan nasulat man, nga ang panaksi sang duha ka tawo matuud.

18 Isa ako nga nagasaksi sa akon kaugalingon, kag ang Amay nga nagpadala sa akon nagasaksi sa akon.

19 Niyan nagsiling sila sa iya, Diin bala ang imo Amay? Si Jesus nagsabat, Wala kamo makakilala sa akon, ukon sa akon Amay: kon kamo nakakilala sa akon, nakakilala man kamo kuntani sa akon Amay.

20 Ining mga polong ginpamolong ni Jesus sa duug nga bahandian, sang nagpanudlo sia sa templo: kag wala sang tawo nga nagdakup sa iya; bangud nga wala pa mag-abut ang iya takna.

21 Niyan nagsiling si Jesus liwat sa ila, Makadto ako sa akon dalanon, kag kamo magapangita sa akon, kag magakamatay sa inyo mga sala: kon diin ako makadto, indi kamo makakadto.

22 Niyan nagsiling ang mga Judio, Manginmatay bala sia? sanglit nagasiling sia, Kon diin ako makadto, indi kamo makakadto.

23 Kag sia nagsiling sa ila, Kamo gikan sa idalum; ako gikan sa ibabaw: kamo iya sining kalibutan; ako indi iya sining kalibutan.

24 Busa nagsiling ako sa inyo, nga kamo magakamatay sa inyo mga sala: kay kon indi kamo magtoo nga ako amo sia, magakamatay kamo sa inyo mga sala.

25 Niyan nagsiling sila sa iya, Sin-o ka bala? Kag si Jesus nagsiling sa ila, Amo gid sang akon ginsiling sa inyo kutub sa ginsuguran.

26 May madamu ako nga mga butang nga isiling kag ihukom nahanungud sa inyo: apang sia nga nagpadala sa akon matuud; kag akon ginapamolong sa kalibutan yadtong mga butang nga akon nabatian sa iya.

27 Wala sila nakahangup nga sia nagpamolong sa ila nahanungud sa Amay.

28 Niyan si Jesus nagsiling sa ila, Kon mabayaw na ninyo ang Anak sang tawo, niyan mahibaloan ninyo nga ako amo sia, kag nga wala ako nagahimo sang bisan ano sa akon kaugalingon; kondi sono sa gintudlo sang akon Amay sa akon, akon ginapamolong ining mga butang.

29 Kag sia nga nagpadala sa akon kaupud nakon: ang Amay wala nagbiya sa akon nga isa lamang; kay ako nagahimo sa gihapon sinang mga butang nga nagapahamuut sa iya.

30 Sang nagpamolong sia sining mga polong, madamu ang nagtoo sa iya.

31 Niyan nagsiling si Jesus sa mga Judio nga nagtoo sa iya, Kon kamo magpadayon sa akon polong, niyan kamo matuud gid nga mga disipulo nakon;

32 Kag mahibaloan ninyo ang kamatooran, kag ang kamatooran magahilway sa inyo.

33 ś Sila nagsabat sa iya, Kami kaliwat ni Abraham, kag wala pa gid naulipon sa bisan sin-o nga tawo: paano bala nga nagasiling ka, Hilwayon kamo?

34 Si Jesus nagsabat sa ila, Sa pagkamatuud, sa pagkamatuud, nagasiling ako sa inyo, Ang bisan sin-o nga nagahimo sang sala amo ang alagad sang sala.

35 Kag ang alagad wala nagapabilin sa panimalay sing dayon: apang ang Anak nagapabilin sing dayon.

36 Busa kon ang Anak maghilway sa inyo, matuud gid nga manginhilway kamo.

37 Nakahibalo ako nga kamo kaliwat ni Abraham; apang kamo nagatinguha sa pagpatay sa akon, bangud nga ang akon polong wala sing duug sa inyo.

38 Ako nagapamolong sinang akon nakita sa akon Amay: kag kamo nagahimo sinang inyo nakita sa inyo amay.

39 Sila nagsabat kag nagsiling sa iya, Si Abraham ang amon amay. Nagsiling si Jesus sa ila, Kon kamo mga anak ni Abraham, magahimo kamo kuntani sang mga buhat ni Abraham.

40 Apang karon nagatinguha kamo sa pagpatay sa akon, isa ka tawo nga nagsugid sa inyo sang kamatooran, nga akon nabatian sa Dios: ini wala paghimoa ni Abraham.

41 Kamo nagahimo sang mga buhat sang inyo amay. Niyan nagsiling sila sa iya, Wala kami natawo sa pagpanghilawas; kami may isa ka Amay, nga amo ang Dios.

42 Si Jesus nagsiling sa ila, Kon ang Dios inyo Amay, nagahigugma kamo kuntani sa akon: kay ako nagikan kag naghalin sa Dios; kag wala ako magkari sa akon kaugalingon, kondi ginpadala niya ako.

43 Ngaa bala wala ninyo ginahangup ang akon hambal? ina bangud indi kamo makabati sang akon polong.

44 Kamo iya sang inyo amay nga yawa, kag ang mga kailigbon sang inyo amay inyo himoon. Sia manugpatay kutub sa ginsuguran, kag wala nagpabilin sa kamatooran, bangud walay kamatooran sa iya. Kon sia nagapamolong sang binutig, nagapamolong sia sang iya kinaugali: kay butigon sia, kag ang amay sini.

45 Kag bangud ginasugid ko sa inyo ang kamatooran, wala kamo nagatoo sa akon.

46 Sin-o bala sa inyo ang makapamatuud nga ako makasasala? Kag kon akon ginasiling ang kamatooran, ngaa wala kamo nagatoo sa akon?

47 Sia nga iya sang Dios nagapamati sang mga polong sang Dios: busa wala kamo nagapamati sa ila, bangud nga kamo indi iya sang Dios.

48 Niyan nagsabat ang mga Judio, kag nagsiling sa iya, Wala bala kami nagasiling sing husto nga ikaw Samariahanon, kag may yawa?

49 Si Jesus nagsabat, Wala ako sang yawa; kondi nagatahud ako sa akon Amay, kag kamo wala nagatahud sa akon.

50 Kag ako wala nagapangita sang akon kaugalingon nga himaya: may isa nga nagapangita kag nagahukom.

51 Sa pagkamatuud, sa pagkamatuud, nagasiling ako sa inyo, Kon ginahuptan sang tawo ang akon hambalanon, indi gid sia makakita sang kamatayon.

52 Niyan nagsiling ang mga Judio sa iya, Karon nakahibalo kami nga ikaw may yawa. Si Abraham napatay, kag ang mga manalagna; kag ikaw nagasiling, Kon ginahuptan sang tawo ang akon hambalanon, sia indi gid makatilaw sang kamatayon.

53 Daku ka pa bala sa amon amay nga si Abraham, nga napatay? kag ang mga manalagna nagkalamatay: nagapakasin-o ka bala?

54 Si Jesus nagsabat, Kon ako nagatahud sang akon kaugalingon, walay pulus ang akon katahuran: ang akon Amay amo ang nagatahud sa akon; nga ginasiling ninyo, nga sia amo ang inyo Dios:

55 Walay sapayan kamo wala makakilala sa iya; apang ako nakakilala sa iya: kag kon ako magsiling, Wala ako makakilala sa iya, manginkaangay ako sa inyo nga butigon: apang nakilala ko sia, kag ginahuptan ang iya hambalanon.

56 Ang inyo amay nga si Abraham nagkalipay sa pagtan-aw sang akon adlaw: kag nakita niya ini, kag nalipay.

57 Niyan nagsiling ang mga Judio sa iya, Wala ka pa magkalim-an ka tuig, kag nakakita ka bala kay Abraham?

58 Si Jesus nagsiling sa ila, Sa pagkamatuud, sa pagkamatuud, ako nagasiling sa inyo, Sa wala pa si Abraham, amo ako.

59 Niyan nagpulut sila sang mga bato nga ihaboy sa iya: apang si Jesus nagpanago, kag naggowa gikan sa templo, nga nagaagi sa tunga nila, kag gani nag-agi.

KAPITULO 9

KAG sang pag-agi ni Jesus, nakakita sia sang isa ka tawo nga bulag kutub sa iya pagkatawo.

2 Kag ang iya mga disipulo nagpamangkot sa iya, nga nagasiling, Agalon, sin-o bala ang nakasala, ining tawo, ukon ang iya mga ginikanan, nga natawo sia nga bulag?

3 Si Jesus nagsabat, Ini nga tawo wala nakasala, ukon ang iya mga ginikanan: kondi agud nga ang mga buhat sang Dios igapahayag sa iya.

4 Kinahanglan ko buhaton ang mga buluhaton niya nga nagpadala sa akon, sa adlaw pa: nagaabut ang gab-i, nga walay tawo nga makapangabudlay.

5 Samtang yari ako sa kalibutan, ako ang kapawa sang kalibutan.

6 Sang nakapamolong sia sini, nagdupla sia sa duta, kag naghimo sing lunang sa dupla, kag iya ginhaplasan sang lunang ang mga mata sang bulag nga tawo,

7 Kag nagsiling sa iya, Kadto, panghugas sa ponong sang Siloe, (nga kon sayoron, Pinadala.) Busa nagkadto sia, kag nagpanghugas, kag nag-abut nga makakita.

8 ś Busa ang mga kasilingan, kag sila nga nakakita sa iya anay nga sia bulag, nagsiling, Indi bala amo ini sia ang naglingkod kag nagpakilimos?

9 Ang iban nagsiling, Amo ini sia: ang iban nagsiling, Sia kaangay sa iya: apang sia nagsiling, Ako sia.

10 Busa nagsiling sila sa iya, Paano bala nga nagmuklat ang imo mga mata?

11 Sia nagsabat kag nagsiling, Ang isa ka tawo nga ginatawag si Jesus naghimo sing lunang, kag naghaplas sang akon mga mata, kag nagsiling sa akon, Kadto sa ponong sang Siloe, kag magpanghugas: kag nagkadto ako kag nagpanghugas, kag nakabaton ako sang itololok.

12 Niyan nagsiling sila sa iya, Diin bala sia? Sia nagsiling, Wala ako makahibalo.

13 ś Gindala nila sa mga Fariseo sia nga bulag anay.

14 Kag adlaw sadto nga sabbath sang paghimo ni Jesus sang lunang, kag pagpamuklat sang iya mga mata.

15 Niyan nagpamangkot man liwat ang mga Fariseo sa iya kon paano sia nakabaton sang iya itololok. Sia nagsiling sa ila, Ginbutangan niya sing lunang ang akon mga mata, kag nagpanghugas ako, kag nakakita.

16 Busa nagsiling ang iban sang mga Fariseo, Ining tawo indi nagikan sa Dios, bangud nga wala niya ginatuman ang adlaw nga sabbath. Ang iban nagsiling, Paano bala nga makahimo ang isa ka tawo nga makasasala sang tagsubong sina nga mga milagro? Kag may pagbinahinbahin sa tunga nila.

17 Nagsiling sila sa bulag nga tawo liwat, Ano bala ang masiling mo nahanungud sa iya, nga iya ginpamuklat ang imo mga mata? Sia nagsiling, Isa sia ka manalagna.

18 Apang ang mga Judio wala magtoo nahanungud sa iya, nga sia anay bulag, kag nakabaton sang iya itololok, tubtub ila gintawag ang mga ginikanan sang nakabaton sing iya itololok.

19 Kag sila nagpamangkot sa ila, nga nagasiling, Amo bala ini ang inyo anak, nga ginasiling ninyo nga natawo nga bulag? niyan paano nga makakita sia karon?

20 Ang iya mga ginikanan nagsabat sa ila kag nagsiling, Kahibalo kami nga ini anak namon, kag nga natawo sia nga bulag:

21 Apang kon sa ano nga paagi nga sia makakita karon, wala kami makahibalo; ukon sin-o ang nagpamuklat sang iya mga mata, wala kami makahibalo: may edad na sia; pamangkota sia: magahambal sia nahanungud sa iya kaugalingon.

22 Ining mga polong ginhambal sang iya mga ginikanan, kay nahadluk sila sa mga Judio: kay ang mga Judio naghisugut na, nga kon ang bisan sin-o nga tawo magtuad nga sia Cristo, pagapagowaon sia sa sinagoga.

23 Busa nagsiling ang iya mga ginikanan, May edad na sia; pamangkota sia.

24 Niyan liwat gintawag nila ang tawo nga anay bulag, kag nagsiling sa iya, Ihatag sa Dios ang pagdayaw: kahibalo kami nga ining tawo makasasala.

25 Sia nagsabat kag nagsiling, Kon sia makasasala ukon indi, wala ako makahibalo: isa ka butang ang nahibaloan ko, nga sadto ako bulag, karon ako makakita.

26 Niyan nagsiling sila liwat sa iya, Ano bala ang iya ginhimo sa imo? paano bala ang pagpamuklat niya sang imo mga mata?

27 Sia nagsabat sa ila, Nasugid ko na sa inyo, kag wala kamo magpamati: sa ano bala nga kabangdanan nga pamatian ninyo ini liwat? buut bala kamo man mangin-disipulo niya?

28 Niyan ginpasipalahan nila sia, kag nagsiling, Ikaw iya disipulo; apang kami mga disipulo ni Moises.

29 Nakahibalo kami nga ang Dios nagpakighambal kay Moises: nahanungud sining tawo, wala kami makahibalo kon tagadiin sia.

30 Ang tawo nagsabat kag nagsiling sa ila, Abaw katingalahan nga butang ini, nga wala kamo makahibalo kon tagadiin sia, kag walay sapayan sia nagpamuklat sang akon mga mata.

31 Karon kita nakahibalo nga ang Dios wala nagapamati sa mga makasasala: apang kon ang bisan sin-o nga tawo manugsimba sa Dios, kag nagahimo sang iya kabubut-on, sia ginapamatian niya.

32 Kutub sa pagsugud sang kalibutan wala mabatii nga ginpamuklat sang bisan sin-o nga tawo ang mga mata sang isa nga natawo nga bulag.

33 Kon ining tawo indi nagikan sa Dios, indi sia makahimo sing bisan ano.

34 Sila nagsabat kag nagsiling sa iya, Ikaw natawo sing bug-os sa mga sala, kag ginatudloan mo bala kami? Kag ginsobol nila sia.

35 Si Jesus nakabati nga ginsobol nila sia; kag sang nakita niya sia, nagsiling sia sa iya, Nagatoo ka bala sa Anak sang Dios?

36 Sia nagsabat kag nagsiling, Sin-o bala sia, Ginoo, agud nga makatoo ako sa iya?

37 Kag si Jesus nagsiling sa iya, Nakita mo sia, kag amo sia ang nagapakighambal sa imo.

38 Kag sia nagsiling, Ginoo, nagatoo ako. Kag sia nagsimba sa iya.

39 ś Kag si Jesus nagsiling, Tungud sa paghukom ako nagkari sa sining kalibutan, agud nga sila nga indi makakita makakita; kag agud nga sila nga makakita pagabulagon.

40 Kag nabatian sang iban sang mga Fariseo nga upud sa iya ining mga polong, kag nagsiling sa iya, Bulag man bala kami?

41 Si Jesus nagsiling sa ila, Kon kamo bulag, wala kamo kuntani sing sala: apang karon nagasiling kamo, Makakita kami; busa ang inyo sala nagapabilin.

KAPITULO 10

SA pagkamatuud, sa pagkamatuud, ako nagasiling sa inyo, Sia nga wala nagasulud sa ganhaan sang toril sang mga carnero, kondi nagataklas sa iban nga alagyan, ang amo man makawat kag buyong.

2 Apang sia nga nagasulud sa ganhaan amo ang manugpahalab sang mga carnero.

3 Sa iya nagabukas ang manugbantay sang ganhaan; kag ang mga carnero nagapamati sang iya tingug: kag sia nagatawag sang iya kaugalingon nga mga carnero sa ngalan, kag nagatuytuy sa ila pagowa.

4 Kag kon magpagowa sia sang iya kaugalingon nga mga carnero, nagauna sia sa ila, kag ang mga carnero nagasonod sa iya: kay nakilala nila ang iya tingug.

5 Kag sa isa ka dumoloong indi sila magasonod, kondi magapalagyo sa iya: kay wala sila makakilala sang tingug sang mga dumoloong.

6 Ining palaanggiran ginpamolong ni Jesus sa ila: apang wala nila mahangpi kon ano nga mga butang sila nga iya ginhambal sa ila.

7 Niyan si Jesus nagsiling sa ila liwat, Sa pagkamatuud, sa pagkamatuud, nagasiling ako sa inyo, Ako ang ganhaan sang mga carnero.

8 Ang tanan nga dalayon nga nagkari sing una sa akon mga makawat kag mga buyong: apang ang mga carnero wala magpamati sa ila.

9 Ako amo ang ganhaan: kon ang bisan sin-o nga tawo magsulud paagi sa akon, maluwas sia, kag magasulud kag magagowa, kag makakita sang halalbon.

10 Ang makawat wala nagakari, kondi sa pagpangawat, kag sa pagpamatay, kag sa pagpanglaglag: ako nagkari agud nga may kabuhi sila, kag agud may yara sila sini sing labing bugana.

11 Ako ang maayong manugpahalab: ang maayong manugpahalab nagahatag sang iya kabuhi tungud sa mga carnero.

12 Apang sia nga isa ka sinoholan, kag indi manugpahalab, nga ang mga carnero indi iya, nakakita sang lobo nga nagapakari, kag nagabiya sang mga carnero, kag nagapalagyo: kag ginadakup sila sang lobo, kag ginapaalaplaag ang mga carnero.

13 Ang sinoholan nagapalagyo, bangud nga sia sinoholan, kag wala nagakabalaka sa mga carnero.

14 Ako ang maayong manugpahalab, kag nakakilala sang akon mga carnero, kag ang mga akon nakakilala sa akon.

15 Subong nga ang Amay nakakilala sa akon, ako nakakilala man sa Amay: kag ako nagahatag sang akon kabuhi tungud sa mga carnero.

16 Kag may iban ako nga mga carnero, nga indi sa sining panong: sila man kinahanglan ko dalhon, kag sila magapamati sa akon tingug; kag may mangin-isa ka panong, kag isa ka manugpahalab.

17 Busa ang akon Amay nagahigugma sa akon, bangud nga ako nagahatag sang akon kabuhi, agud nga makuha ko ini liwat.

18 Walay tawo nga nagakuha sini sa akon, kondi ginahatag ko ini sing kinaugalingon. Ako may gahum sa paghatag sini, kag ako may gahum sa pagkuha sini liwat. Ining sogo nabaton ko sa akon Amay.

19 ś Busa may pagbinahinbahin liwat sa mga Judio bangud sining mga hambalanon.

20 Kag ang madamu sa ila nagsiling, May yawa sia, kag buang; ngaa bala nagapamati kamo sa iya?

21 Ang iban nagsiling, Ini indi mga polong sang may yawa. Mapamuklat bala sang isa ka yawa ang mga mata sang bulag?

22 ś Kag ini sadto pandut sang paghalad sa Jerusalem, kag tigtulugnaw sadto.

23 Kag si Jesus naglakatlakat sa templo sa portico ni Salomon.

24 Niyan nag-abut ang mga Judio sa palibut niya, kag nagsiling sa iya, Tubtub pa bala san-o mo kami paduhaduhaon? Kon ikaw ang Cristo, sugiri kami sing maathag.

25 Si Jesus nagsabat sa ila, Nagsugid ako sa inyo, kag wala kamo nagtoo: ang mga buhat nga akon ginahimo sa ngalan sang akon Amay, sila nagasaksi sa akon.

26 Apang wala kamo nagatoo, bangud kamo indi sa akon mga carnero, subong sa ginsiling ko sa inyo.

27 Ang akon mga carnero nagapamati sang akon tingug, kag nakilala ko sila, kag nagasonod sila sa akon:

28 Kag nagahatag ako sa ila sing kabuhi nga walay katapusan; kag indi na gid sila mawala, kag walay bisan sin-o nga tawo nga magaagaw sa ila sa akon kamut.

29 Ang akon Amay, nga naghatag sa ila sa akon, daku pa sa tanan; kag walay tawo nga makaagaw sa ila sa kamut sang akon Amay.

30 Ako kag ang akon Amay isa.

31 Niyan ang mga Judio nagpulut liwat sing mga bato sa pagbato sa iya.

32 Si Jesus nagsabat sa ila, Madamu nga maayong buhat ang ginpakita ko sa inyo gikan sa akon Amay; diin bala sadtong mga buhat ginabato ako ninyo?

33 Ang mga Judio nagsabat sa iya, nga nagasiling, Bangud sang maayong buhat wala kami nagabato sa imo; kondi bangud sa pagpasipala; kag bangud nga ikaw, nga tawo, nagapaka-Dios.

34 Si Jesus nagsabat sa ila, Wala bala masulat sa inyo kasogoan, Ako nagsiling, Mga dios kamo?

35 Kon gintawag niya nga mga dios sila, nga gin-abutan sang polong sang Dios, kag ang kasulatan indi mabungkag;

36 Nagasiling kamo nahanungud sa iya, nga ginpakabalaan sang Amay, kag ginpadala sa kalibutan, Ikaw nagapasipala; bangud nga ako nagsiling, Ako ang Anak sang Dios?

37 Kon wala ko ginahimo ang mga buhat sang akon Amay, dili kamo magtoo sa akon.

38 Apang kon akon ginahimo, bisan wala kamo nagatoo sa akon, magtoo kamo sang mga buhat: agud nga inyo mahibaloan, kag matoohan, nga ang Amay sa akon, kag ako sa iya.

39 Busa nagtinguha sila liwat sa pagdakup sa iya: apang nagpalagyo sia sa ila kamut,

40 Kag nagkadto liwat sa unhan sang Jordan sa duug diin si Juan nagbautiso anay; kag nagpabilin sia didto.

41 Kag madamu ang nagdangup sa iya, kag nagsiling, Si Juan wala maghimo sang milagro: apang ang tanan nga mga butang nga ginpamolong ni Juan nahanungud sining tawo matuud.

42 Kag didto madamu ang nagtoo sa iya.

KAPITULO 11

KARON may isa ka tawo nga nagmasakit, nga ginhingalanan si Lazaro, sang Betania, ang banwa ni Maria kag sang iya utud nga babaye nga si Marta.

2 (Amo yadtong Maria nga naghaplas sa Ginoo sing ihalaplas, kag nagpahid sang iya mga tiil sang iya bohok, nga ang iya utud nga lalaki nga si Lazaro nagmasakit.)

3 Gani ang iya mga utud nga babaye nagpasogo sa iya, nga nagasiling, Ginoo, yari karon, sia nga imo ginahigugma nagamasakit.

4 Sang pagkabati sina ni Jesus, nagsiling sia, Ining masakit indi ikamatay, kondi tungud sa himaya sang Dios, agud nga ang Anak sang Dios mahimaya paagi sini.

5 Karon ginhigugma ni Jesus si Marta, kag ang iya utud nga babaye, kag si Lazaro.

6 Busa sang pagkabati niya nga sia nagmasakit, nagpabilin pa sia sang duha ka adlaw sa amo man nga duug diin sia.

7 Niyan sa tapus sina nagsiling sia sa iya mga disipulo, Makadto kita liwat sa Judea.

8 Ang iya mga disipulo nagsiling sa iya, Agalon, bag-o pa lamang ang mga Judio nagtinguha sa pagbato sa imo; kag makadto ka liwat didto?

9 Si Jesus nagsabat, Indi bala may napulog duha ka takna ang adlaw? Kon ang bisan sin-o nga tawo nagalakat sa adlaw, wala sia nagakasandad, bangud nga makita niya ang kapawa sining kalibutan.

10 Apang kon ang tawo nagalakat sa kagab-ihon, nagakasandad sia, bangud nga wala sing kapawa sa iya.

11 Ining mga butang ginsiling niya: kag sa tapus sina nagsiling sia sa ila, Ang aton abyan nga si Lazaro natologan; apang makadto ako, agud nga akon sia mapukaw sa katologon.

12 Niyan ang iya mga disipulo nagsiling, Ginoo, kon sia natologan, maumpawan sia.

13 Walay sapayan si Jesus nagpamolong sang iya kamatayon: apang naghunahuna sila nga nagpamolong sia sang pagpahuway sa katologon.

14 Niyan nagsiling si Jesus sa ila sing maathag, Si Lazaro napatay.

15 Kag nagakalipay ako bangud sa inyo nga wala ako didto, sa katuyoan nga magtoo kamo; walay sapayan makadto kita sa iya.

16 Niyan nagsiling si Tomas, nga ginatawag Didimo, sa iya mga masigkadisipulo, Makadto man kita, agud nga mapatay kita upud sa iya.

17 Niyan sang pag-abut ni Jesus, nakita niya nga apat na ka adlaw nga nahamyang sia sa lulubngan.

18 Karon ang Betania malapit sa Jerusalem, mga napulog lima ka estadio kalayo:

19 Kag madamu sang mga Judio ang nagkadto kay Marta kag kay Maria, sa paglipay sa ila nahanungud sa ila utud nga lalaki.

20 Niyan si Marta, sang pagkabati niya nga si Jesus nagapakari, nagkadto kag nagsugata sa iya: apang si Maria naglingkod pa sa balay.

21 Niyan si Marta nagsiling kay Jesus, Ginoo, kon yari ka diri, wala kuntani mapatay ang akon utud.

22 Apang nakahibalo ako, nga bisan karon, ang bisan ano nga pangayoon mo sa Dios, ihatag ini sang Dios sa imo.

23 Si Jesus nagsiling sa iya, Ang imo utud mabanhaw.

24 Si Marta nagsiling sa iya, Nakahibalo ako nga mabanhaw sia sa pagkabanhaw sa katapusan nga adlaw.

25 Si Jesus nagsiling sa iya, Ako ang pagkabanhaw, kag ang kabuhi: sia nga nagatoo sa akon, bisan patay na sia, walay sapayan magakabuhi sia:

26 Kag ang bisan sin-o nga nagakabuhi kag nagatoo sa akon indi na gid mapatay. Nagatoo ka bala sini?

27 Nagsiling sia sa iya, Hoo, Ginoo: nagatoo ako nga ikaw ang Cristo, ang Anak sang Dios, nga dapat magkari sa kalibutan.

28 Kag sang nakasiling sia sini, naglakat sia, kag gintawag si Maria nga iya utud sa tago, nga nagasiling, Nag-abut ang Agalon, kag nagatawag sa imo.

29 Sang pagkabati niya sina, nagtindug sia sing dalidali, kag nagkadto sa iya.

30 Karon si Jesus wala pa makaabut sa banwa, kondi didto sa duug diin nasugata sia ni Marta.

31 Niyan ang mga Judio nga kaupud niya sa balay, kag naglipay sa iya, sang nakita nila si Maria, nga nagtindug sia sing dalidali kag naggowa, nagsonod sa iya, nga nagasiling, Makadto sia sa lulubngan sa paghaya didto.

32 Niyan sang pag-abut ni Maria diin si Jesus, kag nakita sia, naghapa sia sa iya tiilan, nga nagasiling sa iya, Ginoo, kon yari ka diri, wala kuntani mapatay ang akon utud.

33 Busa sang nakita sia ni Jesus nga nagahaya, kag ang mga Judio nga nag-upud sa iya nga nagahaya man, nagbakho sia sa espiritu, kag natublag,

34 Kag nagsiling, Diin ninyo sia ginhamyang? Nagsiling sila sa iya, Ginoo, kari kag tan-awa.

35 Si Jesus naghibi.

36 Niyan nagsiling ang mga Judio, Tan-awa kon daw ano ang paghigugma niya sa iya!

37 Kag ang iban sa ila nagsiling, Indi bala makasarang ining tawo, nga nagpamuklat sang mga mata sang bulag, sa paghimo nga bisan ining tawo indi mapatay?

38 Busa si Jesus liwat nga nagabakho sa iya kaugalingon nagkadto sa lulubngan. Yadto isa ka lungib, kag ang isa ka bato nahamtang sa sini.

39 Si Jesus nagsiling, Kuhaa ninyo ang bato. Si Marta, nga utud nga babaye sang napatay, nagsiling sa iya, Ginoo, sa sining tion mabaho na sia: kay apat na ka adlaw nga napatay sia.

40 Si Jesus nagsiling sa iya, Wala bala ako magsiling sa imo, nga, kon magtoo ka, makita mo ang himaya sang Dios?

41 Niyan ginkuha nila ang bato sa duug diin ginhamyang ang patay. Kag si Jesus nagbayaw sang iya mga mata, kag nagsiling, Amay, nagapasalamat ako sa imo nga ginpamatian mo ako.

42 Kag nakahibalo ako nga ginapamatian mo ako sa gihapon: apang bangud sang katawohan nga nagatindug sa palibut ginsiling ko ini, agud nga magtoo sila nga ikaw nagpadala sa akon.

43 Kag sang nakapamolong sia sini, nagsinggit sia sa matonog nga tingug, Lazaro, gowa ka.

44 Kag sia nga napatay naggowa, nga nasamburan ang kamut kag tiil sang mga isalambud nga panapton sa lubung: kag ang iya nawung naputus sang panyo. Nagsiling si Jesus sa ila, Hubari sia, kag palakta sia.

45 Niyan ang madamu sang mga Judio nga nagkadto kay Maria, kag nakakita sang mga butang nga ginhimo ni Jesus, nagtoo sa iya.

46 Apang ang iban sa ila naglakat sa ila mga dalanon pakadto sa mga Fariseo, kag nagpanugid sa ila kon anong mga butang ang ginhimo ni Jesus.

47 ś Niyan ang puno nga mga pari kag ang mga Fariseo nagsinapul, kag nagsiling, Ano bala ang aton himoon? kay ining tawo nagahimo sang madamu nga mga milagro.

48 Kon aton pabayaan sia sa sini, ang tanan nga mga tawo magatoo sa iya: kag ang mga Romanhon magakari kag magakuha sang aton duug kag pungsud.

49 Kag ang isa sa ila, ginhingalanan si Caifas, nga amo ang mataas nga pari sinang amo man nga tuig, nagsiling sa ila, Wala gid kamo sing nahibaloan,

50 Ukon magtalupangud nga ini mapuslanon sa aton, nga mapatay ang isa ka tawo tungud sa katawohan, kag agud indi mawala ang bug-os nga pungsud.

51 Kag ini wala niya ginpamolong sing kinaugalingon: apang kay mataas sia nga pari sinang tuig, nagtagna sia nga si Jesus mapatay tungud sinang pungsud;

52 Kag indi tungud sinang pungsud lamang, kondi nga iya man tiponon sing tingub sa isa ang mga anak sang Dios nga naaplaag.

53 Niyan kutub sadto nga adlaw nagsinapul sila sing tilingub sa pagpatay sa iya.

54 Busa si Jesus wala na naglakat sing hayag sa tunga sang mga Judio; kondi naghalin sinang duug pakadto sa isa ka duta nga malapit sa kamingawan, sa isa ka siudad nga gintawag Efraim, kag didto nagpabilin upud sang iya mga disipulo.

55 ś Kag ang pagligad sang mga Judio malapit na sadto: kag madamu ang nagtaklad gikan sa kaumhan pa Jerusalem sa wala pa ang pagligad, sa pagpaninlo sang ila kaugalingon.

56 Niyan nagpangita sila kay Jesus, kag naghambalanay sila, samtang nagtilindug sila sa templo, Ano bala sa hunahuna ninyo, nga indi sia magkari sa pandut?

57 Karon ang puno nga mga pari kag ang mga Fariseo naghatag sing sogo, nga, kon makahibalo ang bisan sin-o nga tawo kon diin sia, dapat niya ipahayag ini, agud madakup nila sia.

KAPITULO 12

NIYAN si Jesus anum ka adlaw sa wala pa ang pagligad nag-abut sa Betania, diin napatay si Lazaro, nga iya ginbanhaw gikan sa mga patay.

2 Didto ginhimoan nila sia sing panihapon; kag si Marta nag-alagad: apang si Lazaro isa sang mga naglingkod sa latok upud sa iya.

3 Niyan si Maria nagkuha sang isa ka libra sang ihalaplas nga nardo, nga tama ka malahalon, kag ginhaplasan ang mga tiil ni Jesus, kag ginpahiran ang iya mga tiil sang iya bohok: kag ang balay natugub sang kaamyon sang ihalaplas.

4 Niyan nagsiling ang isa sang iya mga disipulo, si Judas Iscariote, anak ni Simon, nga magatugyan sa iya,

5 Ngaa bala wala pag-ibaligya ining ihalaplas sing tatlo ka gatus ka denario, kag ginhatag sa mga imol?

6 Nagsiling sia sini, indi kay nabalaka sia sa mga imol; kondi kay sia makawat, kag yara sa iya ang puyo, kag gindala ang kon ano ang ginsulud sa sini.

7 Niyan nagsiling si Jesus, Pabayai ninyo sia: gintigana niya ini sa adlaw sang paglubung sa akon.

8 Kay ang mga imol kaupud ninyo sa gihapon; apang ako indi ninyo kaupud sa gihapon.

9 Busa madamu nga katawohan sang mga Judio ang nakahibalo nga yadto sia didto: kag nag-abut sila indi bangud kay Jesus lamang, kondi sa pagtan-aw man kay Lazaro, nga ginbanhaw niya gikan sa mga patay.

10 ś Apang nagsinapul ang puno nga mga pari agud nga mapatay nila si Lazaro man;

11 Kay bangud sa iya madamu sang mga Judio ang naghalin, kag nagtoo kay Jesus.

12 ś Sa adlaw nga madason ang madamu nga katawohan nga nag-abut sa pandut, sang pagkabati nila nga si Jesus nagapakari sa Jerusalem,

13 Nagkuha sang mga paklang, kag naggowa sa pagsugata sa iya, kag nagsinggit, Hosanna: Bulahan ang Hari sang Israel nga nagakari sa ngalan sang Ginoo.

14 Kag si Jesus, sang pagkakita niya sang tinday nga asno, nagsakay sa sini; subong sang nasulat,

15 Dili ka mahadluk, babaying anak sang Sion: yari karon, ang imo Hari nagakari, nga nagasakay sa tinday sang asna.

16 Ining mga butang wala mahangpi sang iya mga disipulo sa panugud: apang sang nahimaya si Jesus, niyan nadumduman nila nga ining mga butang nasulat nahanungud sa iya, kag nga ginhimo nila ining mga butang sa iya.

17 Busa ang katawohan nga nag-upud sa iya sang pagtawag niya kay Lazaro gikan sa iya lulubngan, kag pagbanhaw sa iya gikan sa mga patay, nagsaksi.

18 Sa sining kabangdanan nagsugata man sa iya ang katawohan, kay nakabati sila nga nahimo niya ining milagro.

19 Busa ang mga Fariseo nagsinilingay, Nakita bala ninyo kon paano nga wala kamo nagapangibabaw sa bisan ano lang? yari karon, ang kalibutan nagasonod sa iya.

20 ś Kag may pila ka mga Greciahanon sa tunga nila nga nagtaklad sa pagsimba sa pandut:

21 Busa ini sila nagkadto kay Felipe, nga taga-Betsaida sang Galilea, kag nagpangayo sa iya, nga nagasiling, Sir, buut kami magpakigkita kay Jesus.

22 Si Felipe nagkadto kag nagsugid kay Andres: kag si Andres kag si Felipe naman nagsugid kay Jesus.

23 ś Kag si Jesus nagsabat sa ila, nga nagasiling, Nag-abut na ang takna, nga ang Anak sang tawo pagahimayaon.

24 Sa pagkamatuud, sa pagkamatuud, ako nagasiling sa inyo, Kon ang isa ka binato sang trigo indi maholog sa duta kag mapatay, nagapadayon ini nga isa lamang: apang kon ini mapatay, nagapamunga ini sing madamu.

25 Sia nga nagahigugma sang iya kabuhi magadula sini; kag sia nga nagadumut sang iya kabuhi sa sining kalibutan magatipig sini sa kabuhi nga walay katapusan.

26 Kon ang bisan sin-o nga tawo mag-alagad sa akon, magsonod sia sa akon; kag kon diin ako, didto man ang akon alagad: kon ang bisan sin-o nga tawo mag-alagad sa akon, sia padunggan sang akon Amay.

27 Karon natublag ang akon kalag; kag ano bala ang isiling ko? Amay, luwasa ako sa sining takna: apang sa sining kabangdanan nag-abut ako sa sining takna.

28 Amay, himayaa ang imo ngalan. Niyan may nag-abut nga isa ka tingug gikan sa langit, nga nagasiling, Nahimaya ko na ini, kag himayaon ini liwat.

29 Busa ang katawohan, nga nagtindug didto, kag nakabati sini, nagsiling nga nagdaguub: ang iban nagsiling, Ang isa ka anghel naghambal sa iya.

30 Si Jesus nagsabat kag nagsiling, Ining tingug wala nag-abut bangud sa akon, kondi bangud sa inyo.

31 Karon amo ang paghukom sining kalibutan: karon ang prinsipe sining kalibutan sobolon.

32 Kag ako, kon ako bayawon gikan sa duta, magabuyuk sang tanan nga mga tawo sa akon.

33 Ini ginsiling niya, sa pagpahayag kon sa anong kamatayon sia mapatay.

34 Ang katawohan nagsabat sa iya, Nabatian namon sa kasogoan nga ang Cristo nagapadayon sa walay katapusan: kag paano nga nagasiling ka, Ang Anak sang tawo kinahanglan bayawon? sin-o bala ining Anak sang tawo?

35 Niyan nagsiling si Jesus sa ila, Sa diotay pa nga tion ang kapawa kaupud ninyo. Lakat samtang may kapawa kamo, agud nga ang kadudulman indi maglambut sa inyo: kay sia nga nagalakat sa kadudulman wala nakahibalo kon diin sia nagakadto.

36 Samtang may kapawa kamo, magtoo sa kapawa, agud nga mangin mga anak kamo sang kapawa. Ining mga butang ginpamolong ni Jesus, kag nagtaliwan sia, kag nagpanago gikan sa ila.

37 ś Apang bisan nakahimo sia sing tama kadamu nga milagro sa atubangan nila, walay sapayan wala sila magtoo sa iya:

38 Agud nga matuman ang hambalanon ni Isaias nga manalagna, nga ginpamolong niya, Ginoo, sin-o bala ang nakatoo sang amon balita? kag kay sin-o bala napahayag ang butkon sang Ginoo?

39 Busa wala sila makatoo, bangud nga si Isaias nagsiling liwat,

40 Ginbulag niya ang ila mga mata, kag ginpatig-a ang ila tagiposoon; agud nga indi sila makakita sa ila mga mata, ukon makahangup sa ila tagiposoon, kag magliso, kag ako magaayo sa ila.

41 Ining mga butang ginsiling ni Isaias, sang nakita niya ang iya himaya, kag nagpamolong nahanungud sa iya.

42 ś Walay sapayan sa tunga man sang mga puno nga manugdumala madamu ang nagtoo sa iya; apang bangud sang mga Fariseo wala nila sia gintuad, agud indi sila pagpagowaon sa sinagoga:

43 Kay ginhigugma nila ang pagdayaw sang mga tawo sing labi pa sa pagdayaw sang Dios.

44 ś Si Jesus nagsinggit kag nagsiling, Sia nga nagatoo sa akon, wala nagatoo sa akon, kondi sa iya nga nagpadala sa akon.

45 Kag sia nga nakakita sa akon nakakita sa iya nga nagpadala sa akon.

46 Nagkari ako nga isa ka kapawa sa kalibutan, agud nga ang bisan sin-o nga nagatoo sa akon indi magpabilin sa kadudulman.

47 Kag kon ang bisan sin-o nga tawo magpamati sang akon mga polong, kag wala nagatoo, wala ako nagahukom sa iya: kay ako wala magkari sa paghukom sang kalibutan, kondi sa pagluwas sang kalibutan.

48 Sia nga nagasikway sa akon, kag wala nagabaton sang akon mga polong, may isa nga nagahukom sa iya: ang polong nga akon napamolong, amo man ang magahukom sa iya sa katapusan nga adlaw.

49 Kay wala ako nagpamolong gikan sa akon kaugalingon; kondi ang Amay nga nagpadala sa akon, sia naghatag sa akon sang sogo, kon ano ang dapat ko isiling, kag kon ano ang dapat ko ihambal.

50 Kag nakahibalo ako nga ang iya sogo kabuhi nga walay katapusan: busa ang bisan ano nga akon ginapamolong, sono sa ginsiling sang Amay sa akon, amo man ang akon ginapamolong.

KAPITULO 13

KARON sa wala pa ang pandut sang pagligad, sang si Jesus nakahibalo nga nag-abut na ang iya takna nga magataliwan sia sining kalibutan pakadto sa Amay, sang nakahigugma sang mga iya nga yari sa kalibutan, ginhigugma niya sila tubtub sa katapusan.

2 Kag natapus ang panihapon, ang yawa nga nakapasulud na sa tagiposoon ni Judas Iscariote, anak ni Simon, sa pagtugyan sa iya;

3 Si Jesus nga nakahibalo nga ginhatag sang Amay ang tanan nga mga butang sa iya mga kamut, kag nga sia naggikan sa Dios, kag nagkadto sa Dios;

4 Nagtindug sia sa panihapon, kag ginpahigad ang iya panaput; kag nagkuha sang isa ka inugpamahid, kag ginwagkus niya.

5 Sa tapus sina nagbobo sia sing tubig sa batiya, kag nagsugud sa paghinaw sang mga tiil sang mga disipulo, kag sa pagpahid sa ila sang inugpamahid nga nawagkus niya.

6 Niyan nag-abut sia kay Simon Pedro: kag si Pedro nagsiling sa iya, Ginoo, hinawan mo bala ang akon mga tiil?

7 Si Jesus nagsabat kag nagsiling sa iya, Kon ano ang akon ginahimo wala mo mahibaloi karon; apang mahibaloan mo ugaling.

8 Si Pedro nagsiling sa iya, Ikaw indi gid maghinaw sang akon mga tiil. Si Jesus nagsabat sa iya, Kon indi ako maghinaw sa imo, wala ikaw sang bahin sa akon.

9 Si Simon Pedro nagsiling sa iya, Ginoo, indi ang akon mga tiil lamang, kondi man ang akon mga kamut kag akon olo.

10 Si Jesus nagsiling sa iya, Sia nga nakapaligos wala nagakinahanglan magpanghinaw luwas sa iya mga tiil, apang matinlo sia sa tagsa ka bahin: kag kamo matinlo, apang indi tanan.

11 Kay nakilala niya kon sin-o ang magatugyan sa iya; busa nagsiling sia, Indi tanan kamo matinlo.

12 Gani sa tapus sang pagpanghinaw niya sang ila mga tiil, kag nakuha ang iya mga panapton, kag nakalingkod liwat, nagsiling sia sa ila, Nakahibalo bala kamo kon ano ang akon nahimo sa inyo?

13 Kamo nagatawag sa akon Agalon kag Ginoo: kag husto ang ginasiling ninyo; kay amo gid ako.

14 Busa kon ako, ang Ginoo kag Agalon ninyo, nakahinaw sang inyo mga tiil; kamo man dapat maghinaway sang mga tiil sang isa kag isa.

15 Kay naghatag ako sa inyo sang isa ka solondan, nga dapat ninyo himoon subong sa nahimo ko sa inyo.

16 Sa pagkamatuud, sa pagkamatuud, ako nagasiling sa inyo, Ang alagad indi daku pa sa iya ginoo; ukon sia nga ginpadala daku pa sa iya nga nagpadala sa iya.

17 Kon nakahibalo kamo sining mga butang, malipayon kamo kon ginahimo ninyo sila.

18 ś Ako wala nagapamolong nahanungud sa inyo tanan: ako nakakilala kon sin-o ang akon ginpili: apang agud nga matuman ang kasulatan, Sia nga nagakaon sing tinapay upud sa akon nagbayaw sang iya tikod batok sa akon.

19 Karon nagasugid ako sa inyo sa wala pa ini mahanabu, agud nga, kon ini mahanabu, magatoo kamo nga ako amo sia.

20 Sa pagkamatuud, sa pagkamatuud, nagasiling ako sa inyo, Sia nga nagabaton sa bisan kay sin-o nga ginapadala ko nagabaton sa akon; kag sia nga nagabaton sa akon nagabaton sa iya nga nagpadala sa akon.

21 Sang nakasiling sini si Jesus, natublag sia sa espiritu, kag nagpamatuud, kag nagsiling, Sa pagkamatuud, sa pagkamatuud, nagasiling ako sa inyo, nga ang isa sa inyo magatugyan sa akon.

22 Niyan ang mga disipulo nagtinolokay, nga nagaduhaduha kon nahanungud kay sin-o nagpamolong sia.

23 Karon may nagaidag sa dughan ni Jesus isa sang iya mga disipulo, nga nahigugmaan ni Jesus.

24 Gani si Simon Pedro nagsinyas sa iya, nga dapat sia magpamangkot kon nahanungud kay sin-o nagpamolong sia.

25 Niyan sia nga nagaidag sa dughan ni Jesus nagsiling sa iya, Ginoo, sin-o bala sia?

26 Si Jesus nagsabat, Amo sia, ang akon hatagan sang tinusmug, kon akon matusmug na ini. Kag sang matusmug niya ang tinusmug, ginhatag niya ini kay Judas Iscariote, ang anak ni Simon.

27 Kag sa tapus sang tinusmug si Satanas nagsulud sa iya. Niyan si Jesus nagsiling sa iya, Inang imo ginahimo, himoa sing madali.

28 Karon walay tawo sa latok nga nakahibalo sa ano nga katuyoan ginpamolong niya ini sa iya.

29 Kay ang iban sa ila naghunahuna, bangud nga yara kay Judas ang puyo, nga si Jesus nagsiling sa iya, Bakal ka sinang mga butang nga kinahanglan naton sa pagpangaman sa pandut; ukon, nga dapat sia maghatag sa mga imol.

30 Niyan sia sang nabaton ang tinusmug sa gilayon naggowa: kag gab-i sadto.

31 ś Busa, sang nakagowa sia, si Jesus nagsiling, Karon ang Anak sang tawo ginahimaya, kag ang Dios ginahimaya sa iya.

32 Kon ang Dios ginahimaya sa iya, ang Dios magahimaya man sa iya sa iya kaugalingon, kag magahimaya gilayon sa iya.

33 Gamay nga mga kabataan, sa diotay pa nga tion kaupud ako ninyo. Kamo magapangita sa akon: kag subong sa ginsiling ko sa mga Judio, Kon diin ako makadto, indi kamo makakadto; amo man ang ginasiling ko sa inyo karon.

34 Ako nagahatag sa inyo sing isa ka bag-ong sogo, Nga maghigugmaanay kamo; subong nga ako naghigugma sa inyo, nga kamo man maghigugmaanay.

35 Sa sini ang tanan nga tawo makahibalo nga kamo mga disipulo ko, kon kamo may paghigugmaanay.

36 ś Si Simon Pedro nagsiling sa iya, Ginoo, diin bala ikaw makadto? Si Jesus nagsabat sa iya, Kon diin ako makadto, indi ka makasonod sa akon karon; apang magasonod ka sa akon ugaling.

37 Si Pedro nagsiling sa iya, Ginoo, ngaa bala indi ako makasonod sa imo sa karon? Ihatag ko ang akon kabuhi tungud sa imo.

38 Si Jesus nagsabat sa iya, Ihatag mo bala ang imo kabuhi tungud sa akon? Sa pagkamatuud, sa pagkamatuud, nagasiling ako sa imo, Ang sulug indi magpamalo, tubtub nga mapanghiwala mo ako sing makatlo.

KAPITULO 14

DILI matublag ang inyo tagiposoon: nagatoo kamo sa Dios, magtoo man kamo sa akon.

2 Sa balay sang akon Amay may madamu nga mga mansyon: kon wala, nagsugid ako kunta sa inyo. Makadto ako sa pag-aman sa inyo sang duug.

3 Kag kon ako magkadto kag mag-aman sa inyo sang duug, magabalik ako, kag magabaton sa inyo sa akon kaugalingon; agud nga kon diin ako, didto man kamo.

4 Kag kon diin ako makadto nakahibalo kamo, kag nahibaloan ninyo ang dalan.

5 Si Tomas nagsiling sa iya, Ginoo, wala kami nakahibalo kon diin ka makadto; kag paano bala ang pagkahibalo namon sang dalan?

6 Si Jesus nagsiling sa iya, Ako amo ang dalan, ang kamatooran, kag ang kabuhi: walay tawo nga nagaabut sa Amay, kondi paagi sa akon.

7 Kon nakakilala kamo sa akon, nakakilala kamo kuntani sa akon Amay man: kag kutub karon nakilala ninyo sia, kag nakita sia.

8 Si Felipe nagsiling sa iya, Ginoo, ipakita sa amon ang Amay, kag tuman na sa amon.

9 Si Jesus nagsiling sa iya, Kadugay na nga kaupud ninyo ako, kag wala ka pa nakakilala sa akon, Felipe? sia nga nakakita sa akon nakakita sa Amay; kag paano niyan nga nagasiling ka, Ipakita sa amon ang Amay?

10 Wala ka bala nagatoo nga ako sa Amay, kag ang Amay sa akon? ang mga polong nga akon ginapamolong sa inyo wala ko ginapamolong gikan sa akon kaugalingon: kondi ang Amay nga nagapuyo sa akon, sia ang nagahimo sang mga buhat.

11 Magtoo kamo sa akon nga ako sa Amay, kag ang Amay sa akon: ukon indi, magtoo kamo sa akon bangud sang mga buhat gid.

12 Sa pagkamatuud, sa pagkamatuud, nagasiling ako sa inyo, Sia nga nagatoo sa akon, ang mga buhat nga akon ginahimo iya man himoon; kag sia magahimo sang dalagku pa nga mga buhat sang sa mga sini; bangud nga ako makadto sa akon Amay.

13 Kag ang bisan ano nga inyo pangayoon sa akon ngalan, ina himoon ko, agud nga ang Amay mahimaya sa Anak.

14 Kon magpangayo kamo sang bisan ano nga butang sa akon ngalan, ina himoon ko.

15 ś Kon nagahigugma kamo sa akon, hupti ninyo ang akon mga sogo.

16 Kag ako magaampo sa Amay, kag sia magahatag sa inyo sing isa pa ka Manuglipay, agud nga sia magapabilin upud sa inyo sa walay katapusan;

17 Nga amo ang Espiritu sang kamatooran; nga indi mabaton sang kalibutan, kay wala ini makakita sa iya, ukon makakilala sa iya: apang nakilala ninyo sia; kay nagapuyo sia upud sa inyo, kag manginyara sa inyo.

18 Indi ko kamo pagbayaan nga walay kalipay: magakari ako sa inyo.

19 Sa diotay pa nga tion, kag ang kalibutan indi na makakita sa akon; apang kamo makakita sa akon: bangud nga ako nagakabuhi, kamo magakabuhi man.

20 Sa sinang adlaw makahibalo kamo nga ako sa akon Amay, kag kamo sa akon, kag ako sa inyo.

21 Sia nga may mga sogo nakon, kag nagahuput sa ila, sia amo ang nagahigugma sa akon: kag sia nga nagahigugma sa akon higugmaon sang akon Amay, kag ako magahigugma sa iya, kag magapahayag sang akon kaugalingon sa iya.

22 Si Judas nagsiling sa iya, indi ang Iscariote, Ginoo, paano bala nga ikaw magapahayag sang imo kaugalingon sa amon, kag indi sa kalibutan?

23 Si Jesus nagsabat kag nagsiling sa iya, Kon ang tawo nagahigugma sa akon, huptan niya ang akon mga polong: kag ang akon Amay magahigugma sa iya, kag kami magakari sa iya, kag magapuyo kaupud niya.

24 Sia nga wala nagahigugma sa akon wala nagahuput sang akon mga hambalanon: kag ang polong nga inyo ginapamatian indi akon, kondi iya sang Amay nga nagpadala sa akon.

25 Ining mga butang napamolong ko sa inyo, sa yari pa ako kaupud ninyo.

26 Apang ang Manuglipay, nga amo ang Balaan nga Espiritu, nga ipadala sang Amay sa akon ngalan, sia magatudlo sa inyo sang tanan nga mga butang, kag magapahanumdum sa inyo sang tanan nga mga butang, ang bisan ano nga ginsiling ko sa inyo.

27 Ang paghidait ginabilin ko sa inyo, ang akon paghidait ginahatag ko sa inyo: indi subong sang paghatag sang kalibutan, ang paghatag ko sa inyo. Dili matublag ang inyo tagiposoon, ukon mahadluk.

28 Nakabati kamo kon paano ako nagsiling sa inyo, Ako magataliwan, kag magabalik sa inyo. Kon naghigugma kamo sa akon, nagkalipay kamo kuntani, bangud nagsiling ako, Magakadto ako sa Amay: kay ang akon Amay daku pa sa akon.

29 Kag karon nasugid ko sa inyo sa wala pa mahanabu ini, agud nga, kon ini mahanabu, magatoo kamo.

30 Kutub karon indi ako magpakighambal sa inyo sing madamu: kay nagapakari ang prinsipe sining kalibutan, kag wala sia ano man sa akon.

31 Apang agud nga makilala sang kalibutan nga ako nagahigugma sa Amay; kag sono sa ginhatag nga sogo sang Amay sa akon, amo man ang akon ginahimo. Tindug kamo, mahalin kita diri.

KAPITULO 15

AKO ang matuud nga puno sang ubas, kag ang akon Amay amo ang mangunguma.

2 Ang tagsa ka sanga sa akon nga wala nagapamunga ginakuha niya: kag ang tagsa ka sanga nga nagapamunga, ginatinloan niya, agud nga magpamunga sang dugang pa nga bunga.

3 Kamo subong matinlo paagi sa polong nga akon napamolong sa inyo.

4 Magpabilin kamo sa akon, kag ako sa inyo. Subong nga ang sanga indi makapamunga sa iya kaugalingon, kon wala nagaangut sa puno sang ubas; amo man kamo, kon wala kamo nagapabilin sa akon.

5 Ako ang puno sang ubas, kamo ang mga sanga: Sia nga nagapabilin sa akon, kag ako sa iya, sia amo ang nagapamunga sing labing madamu nga bunga: kay luwas sa akon wala kamo sing mahimo.

6 Kon ang tawo wala nagapabilin sa akon, ginapilak sia subong sang sanga, kag nagakalaya; kag ginatipon sila sang mga tawo, kag ginadap-ong sila sa kalayo, kag sila nagakasonog.

7 Kon nagapabilin kamo sa akon, kag ang akon mga polong nagapabilin sa inyo, mangayo kamo kon ano ang buut ninyo, kag himoon ini sa inyo.

8 Sa sini ginahimaya ang akon Amay, nga kamo nagapamunga sing labing madamu nga bunga; sa amo mangin mga disipulo nakon kamo.

9 Subong nga ang Amay naghigugma sa akon, amo man ako naghigugma sa inyo: magpadayon kamo sa akon gugma.

10 Kon ginahuptan ninyo ang akon mga sogo, magapabilin kamo sa akon gugma; subong nga ako naghuput sang mga sogo sang akon Amay, kag nagapabilin sa iya gugma.

11 Ining mga butang akon napamolong sa inyo, agud nga ang akon kalipay magpabilin sa inyo, kag agud nga ang inyo kalipay mabug-os.

12 Ini amo ang akon sogo, Nga maghigugmaanay kamo, subong nga ako naghigugma sa inyo.

13 Walay tawo nga may gugma nga daku pa sini, nga ang isa ka tawo nagahatag sang iya kabuhi tungud sa iya mga abyan.

14 Kamo akon mga abyan, kon ginahimo ninyo ang bisan ano nga ginasogo ko sa inyo.

15 Kutub karon indi ako magtawag sa inyo nga mga alagad; kay ang alagad wala nakahibalo kon ano ang ginahimo sang iya ginoo: apang ako nagtawag sa inyo nga mga abyan; kay ang tanan nga mga butang nga akon nabatian sa akon Amay napahibalo ko sa inyo.

16 Kamo wala magpili sa akon, kondi ako nagpili sa inyo, kag nagtangdo sa inyo, agud nga kamo dapat maglakat kag magpamunga, kag agud nga ang inyo bunga dapat magpadayon: agud nga ang bisan ano nga inyo pangayoon sa Amay sa akon ngalan, ihatag niya sa inyo.

17 Ining mga butang ginasogo ko sa inyo, nga maghigugmaanay kamo.

18 Kon ang kalibutan nagadumut sa inyo, nakahibalo kamo nga ini nagdumut sa akon sa wala pa ini nagdumut sa inyo.

19 Kon kamo iya sang kalibutan, ang kalibutan magahigugma sang mga iya: apang bangud nga kamo indi iya sang kalibutan, kondi ginpili ko kamo gikan sa kalibutan, busa ang kalibutan nagadumut sa inyo.

20 Panumduma ninyo ang polong nga ginsiling ko sa inyo, Ang alagad indi daku pa sa iya ginoo. Kon ginhingabut nila ako, hingabuton man nila kamo; kon ginhuptan nila ang akon hambalanon, huptan nila ang inyo man.

21 Apang tanan ining mga butang himoon nila sa inyo bangud sa akon ngalan, kay wala sila nakakilala sa iya nga nagpadala sa akon.

22 Kon ako wala magkari kag magpamolong sa ila, wala sila kuntani sing sala: apang karon wala sila sang tabon sa ila sala.

23 Sia nga nagadumut sa akon nagadumut sa akon Amay man.

24 Kon wala ako makahimo sa tunga nila sang mga buhat nga wala sing iban nga tawo nga nakahimo, wala sila kuntani sing sala: apang karon nakakita sila kag nagdumut sa akon kag sa akon Amay.

25 Apang ini nagakahanabu, agud nga matuman ang polong nga nasulat sa ila kasogoan, Gindumtan nila ako sa walay kabangdanan.

26 Apang kon magkari ang Manuglipay, nga akon ipadala sa inyo gikan sa Amay, nga amo ang Espiritu sang kamatooran, nga nagagikan sa Amay, sia magasaksi sa akon:

27 Kag kamo man magasaksi, bangud nga nakaupud kamo sa akon kutub sa ginsuguran.

KAPITULO 16

INING mga butang napamolong ko sa inyo, agud nga indi kamo dapat masandad.

2 Sila magapagowa sa inyo sa mga sinagoga: hoo, ang takna magaabut, nga ang bisan sin-o nga magpatay sa inyo magahunahuna nga sia nagahimo sing pag-alagad sa Dios.

3 Kag ining mga butang himoon nila sa inyo, bangud nga wala sila makakilala sa Amay, ukon sa akon.

4 Apang ining mga butang nasugid ko sa inyo, agud nga kon mag-abut ang takna, inyo madumduman nga nagsugid ako sa inyo nahanungud sa ila. Kag ining mga butang wala ko ginsiling sa inyo sa ginsuguran, bangud nga kaupud ako ninyo.

5 Apang karon makadto ako sa iya nga nagpadala sa akon; kag wala gid sa inyo sing nagapamangkot sa akon, Diin ka bala makadto?

6 Apang bangud nga ginsiling ko ining mga butang sa inyo, ang kasubu nagtugub sang inyo tagiposoon.

7 Walay sapayan nagasugid ako sa inyo sang kamatooran; Mapuslanon ini sa inyo nga ako magtaliwan: kay kon indi ako magtaliwan, ang Manuglipay indi mag-abut sa inyo; apang kon ako magtaliwan, ipadala ko sia sa inyo.

8 Kag kon mag-abut sia, sabdongon niya ang kalibutan nahanungud sa sala, kag sa pagkamatarung, kag sa paghukom:

9 Nahanungud sa sala, bangud nga wala sila nagatoo sa akon;

10 Nahanungud sa pagkamatarung, bangud nga ako makadto sa akon Amay, kag indi na kamo makakita sa akon;

11 Nahanungud sa paghukom, bangud nga ang prinsipe sining kalibutan nahukman.

12 May madamu pa ako nga mga butang nga inugsiling sa inyo, apang indi kamo makadala sa ila karon.

13 Walay sapayan kon sia, ang Espiritu sang kamatooran, mag-abut, sia magatuytuy sa inyo sa bug-os nga kamatooran: kay indi sia magapamolong gikan sa iya kaugalingon; kondi ang bisan ano nga iya mabatian, ina iya ipamolong: kag sia magapahayag sa inyo sang mga butang nga magaabut.

14 Himayaon niya ako: kay batonon niya ang akon, kag ipahayag ini sa inyo.

15 Ang tanan nga mga butang nga iya sang Amay akon: busa nagsiling ako, nga kuhaon niya ang akon, kag ipahayag ini sa inyo.

16 Sa diotay pa nga tion, kag indi na kamo makakita sa akon: kag liwat, sa diotay pa nga tion, kag kamo makakita sa akon, bangud nga ako makadto sa Amay.

17 Niyan nagsinilingay ang iban sang iya mga disipulo, Ano bala ining ginasiling niya sa aton, Sa diotay pa nga tion, kag indi na kamo makakita sa akon: kag liwat, sa diotay pa nga tion, kag kamo makakita sa akon: kag, Bangud nga ako makadto sa Amay?

18 Busa nagsiling sila, Ano bala ining ginasiling niya, Sa diotay pa nga tion? wala kita makahibalo kon ano ang ginasiling niya.

19 Karon si Jesus nakahibalo nga sila buut magpamangkot sa iya, kag nagsiling sa ila, Nagapinamangkotanay bala kamo nahanungud sinang akon ginsiling, Sa diotay pa nga tion, kag indi na kamo makakita sa akon: kag liwat, sa diotay pa nga tion, kag kamo makakita sa akon?

20 Sa pagkamatuud, sa pagkamatuud, nagasiling ako sa inyo, Nga kamo magahaya kag magapanalabiton, apang ang kalibutan magakalipay: kag magakasubu kamo, apang ang inyo kasubu mabaylo sa kalipay.

21 Ang isa ka babaye kon ginasakitan may kasubu, bangud nga nag-abut ang iya takna: apang sang nakaanak sia, indi na sia makadumdum sang kasakit, bangud sang kalipay nga natawo ang isa ka tawo sa kalibutan.

22 Kag busa kamo karon may kasubu: apang ako makigkita sa inyo liwat, kag magakalipay ang inyo tagiposoon, kag wala sing tawo nga magakuha sa inyo sang inyo kalipay.

23 Kag sa sinang adlaw indi kamo magapangayo sa akon sang bisan ano. Sa pagkamatuud, sa pagkamatuud, nagasiling ako sa inyo, Ang bisan ano nga inyo pangayoon sa Amay sa akon ngalan, ihatag niya ini sa inyo.

24 Tubtub karon wala kamo sang napangayo sa akon ngalan: pangayo, kag kamo magabaton, agud nga ang inyo kalipay mabug-os.

25 Ining mga butang napamolong ko sa inyo sa mga hulubaton: apang ang takna magaabut, nga ako indi na magpamolong sa inyo sa mga hulubaton, kondi ipahayag ko sa inyo sing maathag ang nahanungud sa Amay.

26 Sa sinang adlaw magapangayo kamo sa akon ngalan: kag wala ako nagasiling sa inyo, nga magapangamuyo ako sa Amay tungud sa inyo:

27 Kay ang Amay gid nagahigugma sa inyo, bangud nga naghigugma kamo sa akon, kag nagtoo nga ako nagikan sa Dios.

28 Ako nagikan sa Amay, kag nagkari sa kalibutan: liwat, magabiya ako sang kalibutan, kag makadto sa Amay.

29 Nagsiling ang iya mga disipulo sa iya, Yari karon, karon ikaw nagapamolong sing maathag, kag wala nagapamolong sa hulubaton.

30 Sigurado na kami karon nga ikaw nakahibalo sang tanan nga mga butang, kag wala nagakinahanglan nga ang bisan sin-o nga tawo magpamangkot sa imo: sa sini kami nagatoo nga ikaw nagikan sa Dios.

31 Si Jesus nagsabat sa ila, Nagatoo na bala kamo?

32 Yari karon, ang takna nagaabut, hoo, nag-abut na, nga kamo magaaplaag, ang tagsa ka tawo sa iya kaugalingon, kag magabilin sa akon nga isa lamang: kag walay sapayan indi ako isa lamang, kay ang Amay kaupud nakon.

33 Ining mga butang napamolong ko sa inyo, agud nga kamo may paghidait sa akon. Sa kalibutan may kangitngitan kamo: apang magkasadya kamo; nadaug ko ang kalibutan.

KAPITULO 17

INING mga polong ginpamolong ni Jesus, kag nagbayaw sang iya mga mata sa langit, kag nagsiling, Amay, nag-abut na ang takna; himayaa ang imo Anak, agud nga himayaon ka sang imo Anak man:

2 Subong nga ginhatagan mo sia sing gahum sa tanan nga unud, nga sia maghatag sang kabuhi nga walay katapusan sa tanan nga nahatag mo sa iya.

3 Kag ini amo ang kabuhi nga walay katapusan, nga pagkilalahon ka nila nga amo lamang ang matuud nga Dios, kag si Jesu-Cristo, nga imo ginpadala.

4 Ginhimaya ko ikaw sa duta: natapus ko ang buluhaton nga nahatag mo sa akon nga himoon.

5 Kag karon, O Amay, himayaa ako kaupud nimo sang himaya nga naangkon ko kaupud nimo sa wala pa ang kalibutan.

6 Ginpahayag ko ang imo ngalan sa mga tawo nga ginhatag mo sa akon gikan sa kalibutan: imo sila, kag ginhatag mo sila sa akon; kag naghuput sila sang imo polong.

7 Karon nakahibalo sila nga ang tanan nga mga butang nga bisan ano nga nahatag mo sa akon gikan sa imo.

8 Kay nahatag ko sa ila ang mga polong nga ginhatag mo sa akon; kag ila ginbaton sila, kag nakahibalo sing totoo nga ako nagikan sa imo, kag nagtoo sila nga ginpadala mo ako.

9 Ako nagapangamuyo tungud sa ila: ako wala nagapangamuyo tungud sa kalibutan, kondi tungud sa ila nga imo nahatag sa akon; kay imo sila.

10 Kag ang tanan nga akon imo, kag ang imo akon; kag ginahimaya ako sa ila.

11 Kag karon ako wala na sa kalibutan, apang ini sila yara sa kalibutan, kag ako nagakari sa imo. Amay nga Balaan, tipigi paagi sa imo kaugalingon nga ngalan sila nga nahatag mo sa akon, agud nga mangin-isa sila, subong sa aton.

12 Sang ako kaupud nila sa kalibutan, gintipigan ko sila sa imo ngalan: inang mga nahatag mo sa akon akon gintipigan, kag walay isa sa ila nga nawala, kondi ang anak nga lalaki sang kalaglagan; agud nga matuman ang kasulatan.

13 Kag karon ako nagakari sa imo; kag ginapamolong ko ining mga butang sa kalibutan, agud nga makaangkon sila sang akon kalipay nga bug-os sa ila kaugalingon.

14 Nahatag ko sa ila ang imo polong; kag ang kalibutan nagdumut sa ila, bangud nga sila indi iya sang kalibutan, subong nga ako indi iya sang kalibutan.

15 Ako wala nagapangamuyo nga kuhaon mo sila sa kalibutan, kondi nga tipigan mo sila sa malaut.

16 Sila indi iya sang kalibutan, subong nga ako indi iya sang kalibutan.

17 Pakabalaana sila paagi sa imo kamatooran: ang imo polong kamatooran.

18 Subong nga ginpadala mo ako sa kalibutan, amo man ginpadala ko sila sa kalibutan.

19 Kag bangud sa ila ako nagapakabalaan sang akon kaugalingon, agud nga sila man pakabalaanon paagi sa kamatooran.

20 Kag wala ako nagapangamuyo tungud lamang sini sa ila, kondi tungud man sa ila nga magatoo sa akon paagi sa ila polong;

21 Agud nga sila tanan mangin-isa; subong nga ikaw, Amay, sa akon, kag ako sa imo, agud nga sila man mangin-isa sa aton: agud nga ang kalibutan magtoo nga ikaw nagpadala sa akon.

22 Kag ang himaya nga ginhatag mo sa akon ginhatag ko sa ila; agud nga mangin-isa sila, subong nga kita isa:

23 Ako sa ila, kag ikaw sa akon, agud nga pahimpiton sila sa isa; kag agud nga ang kalibutan makahibalo nga ikaw nagpadala sa akon, kag naghigugma sa ila, subong nga ikaw naghigugma sa akon.

24 Amay, buut ko nga sila man, nga nahatag mo sa akon, manginkaupud ko kon diin ako; agud nga makita nila ang akon himaya, nga nahatag mo sa akon: kay ikaw naghigugma sa akon sa wala pa mapasad ang kalibutan.

25 O Amay nga matarung, ang kalibutan wala makakilala sa imo: apang ako nakakilala sa imo, kag ini sila nakahibalo nga ginpadala mo ako.

26 Kag ginpahayag ko sa ila ang imo ngalan, kag magapahayag sini: agud nga ang gugma nga imo ginhigugma sa akon manginyara sa ila, kag ako sa ila.

KAPITULO 18

SANG si Jesus nakapamolong sining mga polong, nagkadto sia kaupud sang iya mga disipulo sa tabok sang sapa nga Cedron, diin may isa ka katamnan, nga didto nagsulud sia, kag ang iya mga disipulo.

2 Kag si Judas man, nga nagtugyan sa iya, nakatultul sang duug: kay si Jesus sa masunsun nagasabuy sa sinang duug kaupud sang iya mga disipulo.

3 Niyan si Judas, sang nakabaton sang guban sang kalalakin-an kag mga opisyal gikan sa puno nga mga pari kag mga Fariseo, nag-abut didto nga may mga parol kag mga sulo kag mga hinganiban.

4 Busa si Jesus, nga nakahibalo sang tanan nga mga butang nga mahanabu sa iya, nagpalapit, kag nagsiling sa ila, Sin-o bala ang ginapangita ninyo?

5 Nagsabat sila sa iya, Si Jesus sang Nazaret. Si Jesus nagsiling sa ila, Ako amo sia. Kag si Judas man, nga nagtugyan sa iya, nagtindug upud sa ila.

6 Sa gilayon gid sang pagkasiling niya sa ila, Ako amo sia, nag-ilisul sila, kag nagkalapukan sa duta.

7 Niyan nagpamangkot sia liwat sa ila, Sin-o bala ang ginapangita ninyo? Kag sila nagsiling, Si Jesus sang Nazaret.

8 Si Jesus nagsabat, Nagsugid ako sa inyo nga ako amo sia: busa kon ginapangita ninyo ako, palakta ninyo ini sila:

9 Agud nga matuman ang hambalanon, nga ginpamolong niya, Sila nga nahatag mo sa akon wala ako sing nadula.

10 Niyan si Simon Pedro nga may isa ka espada naggabut sini, kag ginlabo ang alagad sang mataas nga pari, kag naggilang sang iya dulunggan nga too. Ang ngalan sang alagad si Malco.

11 Niyan si Jesus nagsiling kay Pedro, Itagub ang imo espada: ang tagayan nga ginhatag sa akon sang akon Amay, indi ko bala ini pag-imnon?

12 Niyan ang guban kag ang kapitan kag ang mga opisyal sang mga Judio nagdakup kay Jesus, kag naggapus sa iya,

13 Kag gindala sia sing una kay Annas; kay sia ugangan ni Caifas, nga amo ang mataas nga pari sadtong amo man nga tuig.

14 Karon si Caifas amo gid, ang naghatag laygay sa mga Judio, nga ini mapuslanon nga ang isa ka tawo mapatay tungud sa katawohan.

15 ś Kag si Simon Pedro nagsonod kay Jesus, kag amo man ang isa ka disipulo: inang disipulo nakilala sang mataas nga pari, kag nagsulud upud kay Jesus sa palacio sang mataas nga pari.

16 Apang si Pedro nagtindug sa gowa sang ganhaan. Niyan naggowa inang isa ka disipulo, nga nakilala sang mataas nga pari, kag nagpakighambal sa babaye nga nagabantay sang ganhaan, kag ginpasulud si Pedro.

17 Niyan nagsiling ang dalagita nga nagabantay sang ganhaan kay Pedro, Indi bala isa ka man sang mga disipulo sining tawo? Sia nagsiling, Indi ako.

18 Kag didto nagtindug ang mga alagad kag mga opisyal, nga nagdabok sang kalayo sa mga uling; kay matugnaw sadto: kag sila nagpaganggang sang ila mga kaugalingon: kag si Pedro nagtindug upud sa ila, kag nagpaganggang sang iya kaugalingon.

19 ś Niyan ang mataas nga pari nagpamangkot kay Jesus nahanungud sa iya mga disipulo, kag nahanungud sa iya doktrina.

20 Si Jesus nagsabat sa iya, Nagpamolong ako sing dayag sa kalibutan; nagpanudlo ako gihapon sa sinagoga, kag sa templo, diin ang mga Judio nagasabuy sa gihapon; kag wala ako sing nasiling sa tago.

21 Ngaa bala nagapamangkot ka sa akon? pamangkota sila nga nakabati sa akon, kon ano ang akon ginsiling sa ila: yari karon, sila nakahibalo kon ano ang akon ginsiling.

22 Kag sang nakahambal sia sini, ginhampak sang isa sang mga opisyal nga nagatindug didto si Jesus sang iya palad, nga nagasiling, Amo bala ina ang pagsabat mo sa mataas nga pari?

23 Si Jesus nagsabat sa iya, Kon nakahambal ako sang malaut, magsaksi ka sang malaut: apang kon maayo, ngaa bala ginhampak mo ako?

24 Karon si Annas nagpadala sa iya nga nagapus pakadto kay Caifas nga mataas nga pari.

25 Kag si Simon Pedro nagtindug kag nagpaganggang sang iya kaugalingon. Busa nagsiling sila sa iya, Indi bala isa ka man sang iya mga disipulo? Sia nagpanghiwala sini, kag nagsiling, Indi ako.

26 Ang isa sang mga alagad sang mataas nga pari, nga himata sang gingilangan ni Pedro, nagsiling, Wala ko bala ikaw makita sa katamnan kaupud niya?

27 Niyan si Pedro nagpanghiwala liwat: kag gilayon namalo ang sulug.

28 ś Niyan gindala nila si Jesus halin kay Caifas pakadto sa salapulan sang paghukom: kag kaagahon sadto; kag sila ila wala magsulud sa salapulan sang paghukom, agud nga indi sila madagtaan; kondi nga sila makakaon sang pagligad.

29 Niyan si Pilato naggowa sa ila, kag nagsiling, Ano bala nga panumbungon ang ginadala ninyo batok sining tawo?

30 Nagsabat sila kag nagsiling sa iya, Kon indi sia manugbuhat sang kalautan, wala namon sia kuntani pag-itugyan sa imo.

31 Niyan nagsiling si Pilato sa ila, Dalha ninyo sia, kag hukmi sia sono sa inyo kasogoan. Busa ang mga Judio nagsiling sa iya, Indi tugut sa amon kasogoan ang pagpatay sang bisan sin-o nga tawo:

32 Agud nga matuman ang hambalanon ni Jesus, nga iya ginhambal, nga nagapahayag kon sa anong kamatayon sia mapatay.

33 Niyan si Pilato nagsulud liwat sa salapulan sang paghukom, kag nagtawag kay Jesus, kag nagsiling sa iya, Ikaw bala ang Hari sang mga Judio?

34 Si Jesus nagsabat sa iya, Nagasiling ka bala sini sing kinaugalingon, ukon ginsugiran ka sini sang iban nahanungud sa akon?

35 Si Pilato nagsabat, Judio bala ako? Ikaw gintugyan sa akon sang imo kaugalingon nga pungsud kag sang puno nga mga pari: ano bala ang nahimo mo?

36 Si Jesus nagsabat, Ang akon ginharian indi iya sining kalibutan: kon ang akon ginharian iya sining kalibutan, niyan ang akon mga alagad makig-away kuntani, agud nga indi ako matugyan sa mga Judio: apang karon ang akon ginharian indi gikan diri sini.

37 Busa si Pilato nagsiling sa iya, Niyan hari bala ikaw? Si Jesus nagsabat, Ginasiling mo nga ako hari. Sa sining katuyoan natawo ako, kag sa sining kabangdanan nagkari ako sa kalibutan, agud nga magasaksi ako sa kamatooran. Ang tagsatagsa nga iya sang kamatooran nagapamati sang akon tingug.

38 Si Pilato nagsiling sa iya, Ano bala ang kamatooran? Kag sang nakasiling sia sini, naggowa sia liwat sa mga Judio, kag nagsiling sa ila, Wala gid ako sing nakita nga sayup sa iya.

39 Apang kamo may kinabatasan, nga dapat ako magbuhi sa inyo sang isa sa pagligad: busa buut bala ninyo nga buhian ko sa inyo ang Hari sang mga Judio?

40 Niyan liwat nagsinggit sila tanan, nga nagasiling, Indi ining tawo, kondi si Barabbas. Karon si Barabbas isa ka buyong.

KAPITULO 19

BUSA niyan ginkuha ni Pilato si Jesus, kag ginbunal sia.

2 Kag ang mga soldado nagsalapid sing purungpurung nga tunukon, kag ginsuklub ini sa iya olo, kag ginpanaptan nila sia sing kunup nga purpura,

3 Kag nagsiling, Mabuhi, Hari sang mga Judio! kag ginhampak nila sia sang ila mga kamut.

4 Busa si Pilato naggowa liwat, kag nagsiling sa ila, Yari karon, ginapagowa ko sia sa inyo, agud nga mahibaloan ninyo nga wala ako sing nakita nga sayup sa iya.

5 Niyan naggowa si Jesus, nga nasukluban sang purungpurung nga tunukon, kag sang kunup nga purpura. Kag si Pilato nagsiling sa ila, Tan-awa ang tawo!

6 Busa sang makita sia sang puno nga mga pari kag sang mga opisyal, nagsinggit sila, nga nagasiling, Ilansang sia sa krus, ilansang sia sa krus. Si Pilato nagsiling sa ila, Dalha ninyo sia, kag ilansang sia sa krus: kay wala ako sing nakita nga sayup sa iya.

7 Ang mga Judio nagsabat sa iya, Kami may kasogoan, kag sono sa amon kasogoan dapat sia mapatay, bangud nga sia nagpaka-Anak sang Dios.

8 ś Busa sang pagkabati ni Pilato sinang hambalanon, ginhadlukan pa gid sia;

9 Kag nagsulud liwat sa salapulan sang paghukom, kag nagsiling kay Jesus, Diin ka bala maghalin? Apang wala sing ginhatag nga sabat si Jesus sa iya.

10 Niyan si Pilato nagsiling sa iya, Indi ka bala maghambal sa akon? wala ka bala makahibalo nga ako may gahum sa paglansang sa imo sa krus, kag may gahum sa pagbuhi sa imo?

11 Si Jesus nagsabat, Ikaw wala gid kuntani sing gahum batok sa akon, kon wala ini ginhatag sa imo gikan sa ibabaw: busa sia nga nagtugyan sa akon sa imo amo ang may daku pa nga sala.

12 Kag kutub sadto si Pilato nagtinguha sa pagbuhi sa iya: apang ang mga Judio nagsinggit, nga nagasiling, Kon buhian mo ining tawo, indi ka abyan ni Cesar: ang bisan sin-o nga nagapakahari sa iya kaugalingon nagahambal batok kay Cesar.

13 ś Busa sang nakabati si Pilato sinang hambalanon, ginpagowa niya si Jesus, kag naglingkod sa lingkoran nga hukmanan sa isa ka duug nga ginatawag nga Nabatohan, apang sa Hebreo, Gabbata.

14 Kag pag-aman sang pagligad sadto, kag mga ikaanum nga takna: kag nagsiling sia sa mga Judio, Tan-awa ang inyo Hari!

15 Apang nagsinggit sila, Patya sia, patya sia, ilansang sia sa krus. Si Pilato nagsiling sa ila, Ilansang ko bala sa krus ang inyo Hari? Ang puno nga mga pari nagsabat, Wala kami sing hari kondi si Cesar.

16 Busa niyan gintugyan niya sia sa ila nga ilansang sa krus. Kag ginkuha nila si Jesus, kag gindala sia.

17 Kag sia nga nagapas-an sang iya krus naglakat pakadto sa isa ka duug nga gintawag nga duug sang bagol, nga ginatawag sa Hebreo Golgota:

18 Diin ginlansang nila sia, kag duha pa dungan sa iya, sa magtimbang isa, kag si Jesus sa tunga.

19 ś Kag si Pilato nagsulat sang isa ka titulo, kag ginbutang ini sa krus. Kag ang nasulat amo ang, JESUS SANG NAZARET ANG HARI SANG MGA JUDIO.

20 Niyan madamu sang mga Judio ang nakabasa sining titulo: kay ang duug nga ginlansangan kay Jesus sa krus malapit sa siudad: kag nasulat ini sa Hebreo, kag sa Griego, kag sa Latin.

21 Niyan ang puno nga mga pari sang mga Judio nagsiling kay Pilato, Dili mo pag-isulat, Ang Hari sang mga Judio; kondi nga sia nagsiling, Ako Hari sang mga Judio.

22 Si Pilato nagsabat, Ang nasulat ko nasulat ko.

23 ś Niyan ang mga soldado, sang nalansang nila si Jesus sa krus, nagkuha sang iya mga panapton, kag ginhimo sing apat ka bahin, sa tagsa ka soldado isa ka bahin; kag ang iya bayo man: karon ang bayo walay tinahian, hinabol ang bug-os nga bahin kutub sa ibabaw.

24 Busa nagsinilingay sila, Dili ta paggision ini, kondi papalaran ini, kon sin-o ang mangin tag-iya sini: agud nga matuman ang kasulatan, nga nagasiling, Ang akon panapton ginbahinbahin nila sa ila, kag ginpapalaran nila ang akon bayo. Busa ining mga butang ginhimo sang mga soldado.

25 ś Karon nagtindug sa tupad sang krus ni Jesus ang iya iloy, kag ang utud nga babaye sang iya iloy, nga si Maria nga asawa ni Cleofas, kag si Maria Magdalena.

26 Busa sang nakita ni Jesus ang iya iloy, kag ang disipulo nga nagatindug sa luyo, nga ginhigugma niya, nagsiling sia sa iya iloy, Babaye, yara karon ang imo anak!

27 Niyan nagsiling sia sa disipulo, Yara karon ang imo iloy! Kag kutub sadtong takna ginbaton sia sinang disipulo sa iya kaugalingon nga balay.

28 ś Sa tapus sini si Jesus, nga nakahibalo nga ang tanan nga mga butang natapus na, agud nga matuman ang kasulatan, nagsiling, Ginauhaw ako.

29 Karon may nabutang didto nga isa ka suludlan nga napuno sang langgaw: kag sila naghupug sang isa ka esponha sa langgaw, kag nagtakud sini sa hisopo, kag nagduhol sini sa iya baba.

30 Busa sang si Jesus nakabaton sang langgaw, nagsiling sia, Tapus na: kag ginduko niya ang iya olo, kag nabugtoan sia sang ginhawa.

31 Busa ang mga Judio, bangud pag-aman sadto, agud nga ang mga lawas indi mabilin sa krus sa adlaw nga sabbath, (kay inang adlaw nga sabbath isa ka dakung adlaw,) nagpangayo kay Pilato nga balbagon ang ila mga tiil, kag nga sila kuhaon.

32 Niyan ang mga soldado nag-abut, kag ginbalbag ang mga tiil sang nahauna, kag sang isa pa nga ginlansang sa krus dungan sa iya.

33 Apang sang pag-abut nila kay Jesus, kag nakita nga patay na sia, wala nila pagbalbaga ang iya mga tiil.

34 Apang ang isa sang mga soldado nagbuno sang iya kilid sang bangkaw, kag sa gilayon naggowa ang dugo kag tubig.

35 Kag sia nga nakakita sini nagsaksi, kag ang iya panaksi matuud: kag nakahibalo sia nga nagasiling sia sing matuud, agud nga kamo magtoo.

36 Kay ining mga butang nahanabu, agud nga matuman ang kasulatan, Walay tul-an niya nga pagbalbagon.

37 Kag liwat ang isa man ka kasulatan nagasiling, Magatolok sila sa iya nga ila ginbuno.

38 ś Kag sa tapus sini si Jose sang Arimatea, nga isa ka disipulo ni Jesus, apang sa tago tungud sa kahadluk sa mga Judio, nagpangayo kay Pilato nga kuhaon niya ang lawas ni Jesus: kag gintugutan sia ni Pilato. Busa nagkadto sia, kag ginkuha ang lawas ni Jesus.

39 Kag didto nag-abut man si Nicodemo, nga nagkadto anay kay Jesus sing gab-i, kag nagdala sang sinimbog nga mirra kag aloe, nga mga isa ka gatus ka libra.

40 Niyan ginkuha nila ang lawas ni Jesus, kag ginputus sa mga panapton nga lino nga may mga pahumut, sono sa kinabatasan sang mga Judio sa paglubung.

41 Karon sa duug nga ginlansangan sa iya sa krus may isa ka katamnan; kag sa katamnan may isa ka lulubngan nga bag-o, nga wala pa gid malubngi sing tawo.

42 Busa didto ginlubung nila si Jesus bangud sang adlaw sang pag-aman sang mga Judio; kay malapit ang lulubngan.

KAPITULO 20

SANG kaagahon sang nahaunang adlaw sang semana, sang madulum pa, nag-abut si Maria Magdalena sa lulubngan, kag nakita ang bato nga nakuha sa lulubngan.

2 Niyan nagdalagan sia, kag nag-abut kay Simon Pedro, kag sa isa ka disipulo, nga ginhigugma ni Jesus, kag nagsiling sa ila, Ginkuha nila ang Ginoo sa lulubngan, kag wala namon mahibaloi kon diin nila ginpahamtang sia.

3 Busa si Pedro naglakat, kag inang isa ka disipulo, kag nagpakadto sa lulubngan.

4 Gani nagdalagan sila nga duha sing dungan: kag nalumbaan sang isa ka disipulo si Pedro, kag nag-abut sing una sa lulubngan.

5 Kag sia nga nagakuub, kag nagalantaw sa sulud, nakita niya ang mga panapton nga lino nga napahamtang; apang wala sia magsulud.

6 Niyan si Simon Pedro nag-abut nga nagasonod sa iya, kag nagsulud sa lulubngan, kag nakita niya ang mga panapton nga lino nga napahamtang,

7 Kag ang panyo, nga sa palibut sang olo niya anay, nga wala mapahamtang kaupud sang mga panapton nga lino, kondi napiod sing tingub sa isa ka duug sing pahain.

8 Niyan nagsulud man inang isa ka disipulo, nga nag-abut sing una sa lulubngan, kag nakakita sia, kag nagtoo.

9 Kay wala pa nila mahibaloan ang kasulatan, nga kinahanglan sia mabanhaw gikan sa mga patay.

10 Niyan ang mga disipulo liwat nagpauli sa ila mga kaugalingon nga puluy-an.

11 ś Apang si Maria nagtindug sa gowa sang lulubngan nga nagahibi: kag sang nagahibi sia, nagkuub sia, kag naglantaw sa sulud sang lulubngan,

12 Kag nakakita sang duha ka anghel nga nakaputi nga nagalingkod, ang isa sa olohan, kag ang isa sa tiilan, sa ginpahamtangan sang lawas ni Jesus.

13 Kag sila nagsiling sa iya, Babaye, ngaa bala nga nagahibi ka? Nagsiling sia sa ila, Bangud nga ginkuha nila ang akon Ginoo, kag wala ako makahibalo kon diin sia nila ginpahamtang.

14 Kag sang nakasiling sia sini, nagbalikid sia, kag nakita si Jesus nga nagatindug, kag wala makakilala nga si Jesus yadto.

15 Si Jesus nagsiling sa iya, Babaye, ngaa bala nga nagahibi ka? sin-o bala ang imo ginapangita? Sia, sang nagahunahuna nga sia amo ang manugbantay sang katamnan, nagsiling sa iya, Sir, kon ikaw ang nagkuha sa iya gikan diri sini, sugiri ako kon diin mo sia ginbutang, kag akon sia kuhaon.

16 Si Jesus nagsiling sa iya, Maria. Nagliso sia, kag nagsiling sa iya, Rabboni; nga kon sayoron, Agalon.

17 Si Jesus nagsiling sa iya, Dili ako pagtanduga; kay wala pa ako makakayab sa akon Amay: apang kadto ka sa akon mga kauturan, kag isiling sa ila, Makayab ako sa akon Amay, kag inyo Amay; kag sa akon Dios, kag inyo Dios.

18 Si Maria Magdalena nagkadto kag nagsugid sa mga disipulo nga nakita niya ang Ginoo, kag nga sia nagpamolong sining mga butang sa iya.

19 ś Niyan sang kahaponon sang amo man nga adlaw, nga amo ang nahaunang adlaw sang semana, sang natakup ang mga ganhaan sang ginatiponan sang mga disipulo tungud sa kahadluk sa mga Judio, si Jesus nag-abut kag nagtindug sa tunga, kag nagsiling sa ila, Ang paghidait sa inyo.

20 Kag sang nakasiling sia sini, ginpakita niya sa ila ang iya mga kamut kag ang iya kilid. Niyan ang mga disipulo nagkasadya, sang nakita nila ang Ginoo.

21 Niyan si Jesus nagsiling liwat sa ila, Ang paghidait sa inyo: subong nga ang Amay nagpadala sa akon, ako man nagapadala sa inyo.

22 Kag sang nakasiling sia sini, ginhuypan niya sila, kag nagsiling sa ila, Batona ninyo ang Balaan nga Espiritu:

23 Ang bisan kay sin-o nga mga sala nga patawaron ninyo, napatawad ini sa ila; kag ang bisan kay sin-o nga mga sala nga punggan ninyo, napunggan ini.

24 ś Apang si Tomas, isa sang napulog duha, nga gintawag Didimo, wala nakaupud sa ila sang pag-abut ni Jesus.

25 Busa ang iban nga mga disipulo nagsiling sa iya, Nakita namon ang Ginoo. Apang nagsiling sia sa ila, Kon indi ko makita sa iya mga kamut ang agi sang mga lansang, kag mabutang ang akon tudlo sa agi sang mga lansang, kag magolo ang akon kamut sa iya kilid, indi ako magtoo.

26 ś Kag sa tapus sang walo ka adlaw liwat ang iya mga disipulo didto sa sulud, kag si Tomas kaupud nila: niyan nag-abut si Jesus, nga natakup ang mga ganhaan, kag nagtindug sa tunga, kag nagsiling, Ang paghidait sa inyo.

27 Niyan nagsiling sia kay Tomas, Idab-ot diri ang imo tudlo, kag tan-awa ang akon mga kamut; kag idab-ot diri ang imo kamut, kag igolo ini sa akon kilid: kag dili ka magdimatinoohon, kondi nagatoo.

28 Kag si Tomas nagsabat kag nagsiling sa iya, Ginoo ko kag Dios ko.

29 Si Jesus nagsiling sa iya, Tomas, bangud nga nakakita ka sa akon, nagtoo ka: bulahan ang mga wala makakita, kag walay sapayan nagtoo.

30 ś Kag iban pa man nga madamu nga mga tanda ginhimo ni Jesus sing totoo sa atubangan sang iya mga disipulo, nga wala masulat sa sining libro:

31 Apang ini sila nasulat, agud nga magtoo kamo nga si Jesus amo ang Cristo, ang Anak sang Dios; kag agud nga sa pagtoo may kabuhi kamo paagi sa iya ngalan.

KAPITULO 21

SA tapus sining mga butang si Jesus nagpahayag sang iya kaugalingon liwat sa mga disipulo sa obay sang dagat sang Tiberias; kag sa sining bagay nagpahayag sia sang iya kaugalingon.

2 Didto nag-ulupud si Simon Pedro, kag si Tomas nga gintawag Didimo, kag si Natanael sang Cana sang Galilea, kag ang mga anak nga lalaki ni Zebedeo, kag duha pa sang iya mga disipulo.

3 Si Simon Pedro nagsiling sa ila, Mangisda ako. Nagsiling sila sa iya, Kami man maupud sa imo. Naglakat sila, kag nagsakay gilayon sa isa ka sakayan; kag sa sadtong gab-i wala sila sing nakuha.

4 Apang sang kaagahon na, si Jesus nagtindug sa baybayon: apang ang mga disipulo wala makakilala nga si Jesus yadto.

5 Niyan si Jesus nagsiling sa ila, Mga anak, may pagkaon bala kamo? Nagsabat sila sa iya, Wala.

6 Kag nagsiling sia sa ila, Iladlad ninyo ang pukot sa too sang sakayan, kag makakita kamo. Busa ginladlad nila, kag karon indi sila makasarang sa pagbatak sini bangud sang kadamuon sang mga isda.

7 Gani inang disipulo nga ginhigugma ni Jesus nagsiling kay Pedro, Ang Ginoo ini. Karon sang pagkabati ni Simon Pedro nga ang Ginoo yadto, nagsuklub sia sang iya panapton nga sa pangisda, (kay hubo sia,) kag nagsugbo sa dagat.

8 Kag ang iban nga mga disipulo nag-abut sa isa ka gamay nga sakayan; (kay indi sila malayo sa duta, kondi daw mga duha ka gatus ka maniko,) nga nagaguyud sang pukot nga may mga isda.

9 Sa gilayon gid sang nakatakas sila sa duta, didto nakakita sila sang isa ka kalayo sang mga uling, kag mga isda nga natungtung sa sini, kag tinapay.

10 Si Jesus nagsiling sa ila, Magdala kamo sang mga isda nga inyo karon nakuha.

11 Si Simon Pedro nagsakay, kag nagbutong patakas sang pukot nga puno sang dalagku nga mga isda, isa ka gatus kag kalim-an kag tatlo: kag bisan tama kadamu, walay sapayan ang pukot wala magisi.

12 Si Jesus nagsiling sa ila, Kari kag magkaon. Kag wala gid sing isa sa mga disipulo nga nagpangahas sa pagpamangkot sa iya, Sin-o bala ikaw? kay nakilala nila nga yadto amo ang Ginoo.

13 Niyan si Jesus nagpalapit, kag nagkuha sang tinapay, kag ginhatag sa ila, kag subong man ang isda.

14 Ini ikatlong tion na nga si Jesus nagpahayag sang iya kaugalingon sa iya mga disipulo, sa tapus sia nabanhaw gikan sa mga patay.

15 ś Gani sang nakakaon sila, si Jesus nagsiling kay Simon Pedro, Simon, anak ni Jonas, ginahigugma mo bala ako sing labi sini sa ila? Nagsiling sia sa iya, Hoo, Ginoo; ikaw nakahibalo nga ako nagahigugma sa imo. Nagsiling sia sa iya, Pahalba ang akon mga cordero.

16 Nagsiling sia sa iya liwat sa ikaduhang tion, Simon, anak ni Jonas, ginahigugma mo bala ako? Nagsiling sia sa iya, Hoo, Ginoo; ikaw nakahibalo nga ako nagahigugma sa imo. Nagsiling sia sa iya, Pahalba ang akon mga carnero.

17 Nagsiling sia sa iya sa ikatlong tion, Simon, anak ni Jonas, ginahigugma mo bala ako? Si Pedro nagkasubu bangud nga nagsiling sia sa iya sa ikatlong tion, Ginahigugma mo bala ako? Kag nagsiling sia sa iya, Ginoo, ikaw nakahibalo sang tanan nga mga butang; ikaw nakahibalo nga ako nagahigugma sa imo. Si Jesus nagsiling sa iya, Pahalba ang akon mga carnero.

18 Sa pagkamatuud, sa pagkamatuud, nagasiling ako sa imo, Sang ikaw bataon, ginsukluban mo ang imo kaugalingon, kag naglakat kon diin ang buut mo: apang kon magtigulang ka na, untayon mo ang imo mga kamut, kag iban ang magapasuklub sa imo, kag magadala sa imo diin indi mo buut.

19 Ginpamolong niya ini, sa pagpahayag kon sa ano nga kamatayon himayaon niya ang Dios. Kag sang nakapamolong sia sini, nagsiling sia sa iya, Sonod ka sa akon.

20 Niyan sang nagbalikid si Pedro, nakita niya nga nagasonod ang disipulo nga ginhigugma ni Jesus; nga nag-idag man sa iya dughan sa panihapon, kag nagsiling, Ginoo, sin-o bala ang magatugyan sa imo?

21 Si Pedro nga nagatan-aw sa iya nagsiling kay Jesus, Ginoo, kag magaano bala ining tawo?

22 Si Jesus nagsiling sa iya, Kon buut ko nga magpabilin sia tubtub nga ako magkari, ano bala ina sa imo? sonod ka sa akon.

23 Niyan ining hambalanon naglapnag sa mga kauturan, nga inang disipulo indi mapatay: apang si Jesus wala magsiling sa iya, Indi sia mapatay; kondi, Kon buut ko nga magpabilin sia tubtub nga ako magkari, ano bala ina sa imo?

24 Ini amo ang disipulo nga nagasaksi sining mga butang, kag nagsulat sining mga butang: kag kami nakahibalo nga ang iya panaksi matuud.

25 Kag may madamu pa man nga iban nga mga butang nga ginhimo ni Jesus, nga, kon isulat ang tagsatagsa sa ila, ginabanta ko nga bisan ang kalibutan gid indi maigoan sang mga libro nga sulaton. Amen.

AMAZING GRACE BIBLE INSTITUTE