JOELKAPITULO 1ANG polong sang GINOO nga nag-abut kay Joel nga anak nga lalaki ni Petuel.2 Magpamati sini, kamo nga mga tigulang nga lalaki, kag magdungug, tanan kamo nga pumuluyo sang duta. Nahanabu bala ini sa inyo mga adlaw, ukon sa mga adlaw sang inyo mga kaamayan? 3 Magsugid kamo sini sa inyo mga anak, kag ang inyo mga anak magsugid sa ila mga anak, kag ang ila mga anak sa isa ka kaliwatan. 4 Inang ginbilin sang ulud nga litoglitog ginkaon sang apan; kag inang ginbilin sang apan ginkaon sang alosiwsiw; kag inang ginbilin sang alosiwsiw ginkaon sang atatalo. 5 Pagmata, kamo nga mga palahobog, kag maghibi; kag maghaya, tanan kamo nga palainum sing alak, bangud sang bag-o nga alak; kay ginakuha ini sa inyo baba. 6 Kay ang isa ka pungsud nagtaklad sa akon duta, nga makusug, kag dimaisip, nga ang iya mga ngipon mga ngipon sang leon, kag may mga bag-ang sang daku nga leon. 7 Ginlaglag niya ang akon puno sang ubas, kag ginpanitan ang akon kahoy nga higuera: gin-ak-akan niya ini, kag ginpilak ini; ang mga sanga sini nagputi. 8 ¶ Magpanalabiton kaangay sang ulay nga nawagkusan sing panapton nga sako tungud sa bana sang iya pagkapamatan-on. 9 Ang halad nga kalan-on kag ang halad nga ilimnon nag-untat sa balay sang GINOO; ang mga pari, ang mga ministro sang GINOO, nagalalaw. 10 Ang latagon nalaglag, ang duta nagalalaw; kay ang uyas nalaglag: ang bag-o nga alak nahubas, ang lana nagamala. 11 Magkahuya kamo, O kamo nga mga mangunguma; maghaya, O kamo nga mga manugtatap sang ulubasan, tungud sang trigo kag tungud sang sebada; kay nawala ang patubas sang latagon. 12 Nalaya ang puno sang ubas, kag ang kahoy nga higuera nagakupus; ang kahoy nga granada, ang kahoy nga palma man, kag ang kahoy nga mansanas, bisan ang tanan nga kakahoyan sang latagon nalaya: kay ang kalipay nagtaliwan sa mga anak sang mga tawo. 13 Magpangwagkus kamo, kag magpanalabiton, kamo nga mga pari: maghaya, kamo nga mga ministro sang halaran: kari, maghigda sa bug-os nga gab-i sa panapton nga sako, kamo nga mga ministro sang akon Dios: kay ginpauntat sa balay sang inyo Dios ang halad nga kalan-on kag ang halad nga ilimnon. 14 ¶ Magpakabalaan kamo sing puasa, magtawag sing solemne nga pagtilipon, tipona ang mga tigulang kag ang tanan nga pumuluyo sang duta sa balay sang GINOO nga inyo Dios, kag magtuaw sa GINOO, 15 Ahay tungud sang adlaw! kay ang adlaw sang GINOO malapit na, kag magaabut ini subong sang kalaglagan gikan sa Makaako. 16 Wala bala pagkuhaa ang kalan-on sa atubangan sang aton mga mata, hoo, ang kalipay kag ang kasadya sa balay sang aton Dios? 17 Ang mga binhi nadunut sa idalum sang ila mga puga, ang mga talagoan sang uyas napanghapay, ang mga tambobo nawasdak; kay nagkupus ang uyas. 18 Daw ano ang pagbakho sang kasapatan! ang mga panong sang mga baka nalisang, bangud nga wala sila sing halalban; hoo, ang mga panong sang mga carnero nagutman. 19 O GINOO, sa imo magatuaw ako: kay ang kalayo naglamon sang mga halalban sang kamingawan, kag ang dabdab nagsonog sang tanan nga kahoy sang latagon. 20 Ang kasapatan sang latagon nagaima man sa imo: kay nahubsan ang kasapaan sang tubig, kag ang kalayo naglamon sang mga halalban sang kamingawan. KAPITULO 2PATONOG kamo sing budyong sa Zion, kag patonog sing paandam sa akon balaan nga bukid: magkurug ang tanan nga pumuluyo sang duta: kay nagaabut ang adlaw sang GINOO, kay malapit na ini;2 Adlaw sang kadudulman kag sang kaguum, adlaw sang mga gal-um kag sang pitipit nga kadudulman, subong sang kaagahon nga nagahumlad sa kabukiran: isa ka daku nga katawohan kag makusug; wala nga mas-a sing kaangay sa sini sadto, ukon may yara pa sa olihi sini, bisan sa mga tuig sang madamu nga kaliwatan. 3 Ang kalayo nagalamon sa atubangan nila; kag sa olihi nila ang dabdab nagasonog: ang duta subong sang katamnan sang Eden sa atubangan nila, kag sa likod nila mamingaw nga kamingawan; hoo, kag wala sing makapalagyo sa ila. 4 Ang ila dagway subong sang dagway sang mga kabayo; kag subong sang mga manugkabayo, magadalagan sila sing subong. 5 Kaangay sang dinagubdub sang mga kangga sa mga putokputokan sang mga bukid magalumpat sila, kaangay sang kagahud sang dabdab sang kalayo nga nagalamon sang ginalaban, subong sang makusug nga katawohan nga napaagisud sa inaway. 6 Sa atubangan sang ila nawung ang katawohan magakasakit sing tama: ang tanan nga mga nawung magapalanggit-um. 7 Magadalagan sila kaangay sang gamhanan nga mga lalaki; magataklas sila sa kuta kaangay sang mga lalaki sang pag-awayan; kag magapadolong sila ang tagsatagsa sa iya mga dalanon, kag indi nila pagbungkagon ang ila mga katay: 8 Kag indi magadis-ugay ang isa kag isa; sila magalakat ang tagsatagsa sa iya banas: kag kon maigo sila sa espada, indi sila mapilasan. 9 Magadalagan sila pakadto-pakari sa siudad; magadalagan sila sa ibabaw sang kuta, magataklas sila sa ibabaw sang mga balay; magasulud sila paagi sa mga bintana kaangay sang makawat. 10 Ang duta magatay-og sa atubangan nila; magakurug ang mga langit: ang adlaw kag ang bulan magadulum, kag ang kabitoonan magauntat ang ila pagsilak: 11 Kag ang GINOO magamitlang sang iya tingug sa atubangan sang iya kasoldadosan: kay ang iya kampo tama ka daku: kay makusug sia nga nagahikot sang iya polong: kay ang adlaw sang GINOO daku kag tama ka makakulugmat; kag sin-o bala ang makaantus sini? 12 ¶ Busa karon gid, nagasiling ang GINOO, balik kamo sa akon sa bug-os ninyo nga tagiposoon, kag nga may puasa, kag nga may paghibi, kag nga may paglalaw: 13 Kag kusnita ang inyo tagiposoon, kag indi ang inyo mga panapton, kag magbalik sa GINOO nga inyo Dios: kay mainayohon sia kag maloloy-on, mukuli sa pagpangakig, kag bugana sa kaayo, kag nagahinulsul sia sang malaut. 14 Sin-o bala ang nakahibalo kon magbalik sia kag magbaylo, kag magbilin sing pagpakamaayo sa olihi niya; nga amo ang halad nga kalan-on kag halad nga ilimnon nga sa GINOO nga inyo Dios? 15 ¶ Magpatonog sing budyong sa Zion, magpakabalaan sing puasa, magtawag sing solemne nga pagtilipon: 16 Tipona ang katawohan, pakabalaana ang katilingban, tinguba ang mga tigulang, tipona ang kabataan, kag yadtong mga nagasoloso: pagowaa ang nobyo sa iya hulut, kag ang nobya sa iya hulut. 17 Patangisa ang mga pari, ang mga ministro sang GINOO, sa ulut sang portico kag sang halaran, kag pasilinga sila, Paiwaya ang imo katawohan, O GINOO, kag indi pag-itugyan ang imo panublion sa kahuluy-an, agud nga ang mga pagano magdumala sa ila: ngaa bala magsiling sila sa katawohan, Diin bala ang ila Dios? 18 ¶ Niyan ang GINOO maimon sa iya duta, kag maawa sa iya katawohan. 19 Hoo, ang GINOO magasabat kag magasiling sa iya katawohan, Yari karon, magapadala ako sa inyo sing uyas, kag alak, kag lana, kag mabusug kamo sini: kag indi ko na kamo paghimoon nga kahuluy-an sa tunga sang mga pagano: 20 Kondi ipahilayo ko sa inyo ang kasoldadosan nga naaminhan, kag sobolon sia sa duta nga bakyas kag mamingaw, nga ang iya nawung nagaatubang sa dagat nga nasidlangan, kag ang iya pangolihi nayon sa dagat nga naukbungan gid, kag ang iya kabaho magausbong, kag ang iya makaluluod nga baho magausbong, bangud nga nakahimo sia sing dalagku nga mga butang. 21 ¶ Dili magkahadluk, O duta; magkasadya kag magkalipay: kay ang GINOO magahimo sing dalagku nga mga butang. 22 Dili magkahadluk, kamo nga kasapatan sang latagon: kay ang mga halalban sang kamingawan nagapanubo, kay ang kahoy nagapamunga sang iya bunga, ang kahoy nga higuera kag ang puno sang ubas nagahatag sang ila kusug. 23 Magkasadya niyan, kamo nga mga kaanakan sang Zion, kag magkalipay sa GINOO nga inyo Dios: kay naghatag sia sa inyo sang nahauna nga ulan sing nagakaigo, kag patup-on niya sa inyo ang ulan, ang nahauna nga ulan, kag ang naolihi nga ulan sa nahauna nga bulan. 24 Kag ang mga linasan mapuno sang trigo, kag ang mga kawa magaawas sing alak kag lana. 25 Kag iuli ko sa inyo ang mga tuig nga ginkaon sang apan, sang alosiwsiw, kag sang atatalo, kag sang ulud nga litoglitog, ang akon daku nga kasoldadosan nga ginpadala ko sa tunga ninyo. 26 Kag magakaon kamo sa kabugana, kag mabusug, kag magadayaw sang ngalan sang GINOO nga inyo Dios, nga naghisayo sing makatilingala sa inyo: kag ang akon katawohan indi gid mahuy-an. 27 Kag makilala ninyo nga ako yara sa tunga sang Israel, kag nga ako amo ang GINOO nga inyo Dios, kag wala na gid sing iban: kag ang akon katawohan indi gid mahuy-an. 28 ¶ Kag mahanabu sa olihi, nga ipasagahay ko ang akon espiritu sa tanan nga unud; kag ang inyo mga anak nga lalaki kag ang inyo mga anak nga babaye magapanagna, ang inyo mga katigulangan nga lalaki magadamgo sing mga damgo, ang inyo mga pamatan-on nga lalaki makakita sing mga palanan-awon: 29 Kag sa mga alagad nga lalaki kag sa mga alagad nga babaye man sa sinang mga adlaw ipasagahay ko ang akon espiritu. 30 Kag magapakita ako sing mga katanhagaan sa mga langit kag sa duta, dugo, kag kalayo, kag mga halagi nga aso. 31 Ang adlaw magabaylo sa kadudulman, kag ang bulan sa dugo, sa wala pa ang daku kag makakulugmat nga adlaw sang GINOO mag-abut. 32 Kag mahanabu, nga ang bisan sin-o nga magpanawag sa ngalan sang GINOO maluwas: kay sa bukid nga Zion kag sa Jerusalem manginyara ang kaluwasan, sono sa ginsiling sang GINOO, kag sa nabilin nga pagatawgon sang GINOO. KAPITULO 3KAY, yari karon, sa sinang mga adlaw, kag sa sinang tion, kon pahaulian ko ang kabihagan sang Juda kag Jerusalem,2 Tiponon ko man ang tanan nga pungsud, kag padulhogon sila sa nalupyakan ni Jehosafat, kag magapakigkasaba ako sa ila didto tungud sa akon katawohan kag tungud sa akon panublion nga Israel, nga ginpaaplaag nila sa tunga sang mga pungsud, kag ginbahinbahin nila ang akon duta. 3 Kag ginpapalaran nila ang akon katawohan; kag ginbaylo ang bata nga lalaki sa isa ka alpot, kag ginbaligya ang bata nga babaye tungud sa alak, agud nga makainum sila. 4 Hoo, kag ano bala ang akon sa inyo, O Tiro, kag Zidon, kag tanan nga ginsakpan sang Palestina? hatagan bala ninyo ako sing tumbas? kag kon tumbasan ninyo ako, sa madasig kag sa madali ibalik ko ang inyo tumbas sa inyo kaugalingon nga olo; 5 Bangud nga nakuha ninyo ang akon pilak kag ang akon bulawan, kag gindala sa inyo mga templo ang akon matahum nga makawiwili nga mga butang: 6 Ginbaligya ninyo ang kaanakan man sang Juda kag ang kaanakan sang Jerusalem sa mga Greciahanon, agud nga mapapalayo ninyo sila sa ila dulunan. 7 Yari karon, pagowaon ko sila sa duug diin ginbaligya ninyo sila, kag ibalik ko ang inyo tumbas sa inyo kaugalingon nga olo: 8 Kag ibaligya ko ang inyo mga anak nga lalaki kag ang inyo mga anak nga babaye sa kamut sang kaanakan sang Juda, kag ibaligya nila sila sa mga Sabeanhon, sa katawohan nga malayo: kay ang GINOO nagpamolong sini. 9 ¶ Ibantala ninyo ini sa mga Gentil; Mag-aman sing inaway, pukawa ang mga lalaki nga gamhanan, magpalapit ang mga lalaki sang pag-awayan; magtaklad sila: 10 Salsala nga mga espada ang inyo mga punta sang arado, kag mga bangkaw ang inyo mga galab nga inughagbas: magsiling ang maluya, Mabakud ako. 11 Magtilipon kamo, kag magkari, kamo tanan nga pagano, kag tilipon kamo sing tingub sa palibut: didto padulhoga ang imo mga gamhanan, O GINOO. 12 Magmata ang mga pagano, kag magtaklad sa nalupyakan ni Jehosafat: kay didto magalingkod ako sa paghukom sang tanan nga mga pagano sa palibut. 13 Igolo ninyo ang galab, kay ang alanyon luto na: kari, magdulhog kamo; kay ang linasan sang ubas puno, ang mga kawa nagaalawas; kay daku ang pagkamalaut nila. 14 Mga kadam-an, mga kadam-an sa nalupyakan sang pagtapat: kay ang adlaw sang GINOO malapit na sa nalupyakan sang pagtapat. 15 Ang adlaw kag ang bulan padulmon, kag ang kabitoonan magauntat ang ila pagsilak. 16 Ang GINOO magangurub man gikan sa Zion, kag magamitlang sang iya tingug gikan sa Jerusalem; kag ang mga langit kag ang duta magauyug: apang ang GINOO mangin-amo ang paglaum sang iya katawohan, kag kusug sang kaanakan sang Israel. 17 Gani makilala ninyo nga ako amo ang GINOO nga inyo Dios nga nagapuyo sa Zion, ang akon bukid nga balaan: niyan manginbalaan ang Jerusalem, kag didto wala na sing mga dumuloong nga magaagi sa iya. 18 ¶ Kag mahanabu sa sinang adlaw, nga ang kabukiran magapatubud sing bag-o nga alak, kag ang kabakoloran magapailig sing gatas, kag ang tanan nga mga suba sang Juda magapailig sing mga tubig, kag ang isa ka tuburan magagowa sa balay sang GINOO, kag magabunyag sang nalupyakan sang Sitim. 19 Ang Egipto manginmamingaw, kag ang Edom manginmamingaw nga kamingawan, bangud sang palugus batok sa kaanakan sang Juda, bangud nga nagpaagay sila sing dugo nga inocente sa ila duta. 20 Apang ang Juda magapabilin sa gihapon, kag ang Jerusalem sa kaliwatan kag sa kaliwatan. 21 Kay tinloan ko ang ila dugo, nga wala ko matinloi: kay ang GINOO nagapuyo sa Zion. |