ANG BALAAN NGA BIBLIA

ANG LIBRO SANG MANALAGNA NGA SI

JEREMIAS

KAPITULO 1

ANG mga polong ni Jeremias nga lalaking anak ni Helcias, isa sang mga pari nga didto sa Anatot sa duta ni Benjamin:

2 Nga sa iya nag-abut ang polong sang GINOO sa mga adlaw ni Josias nga lalaking anak ni Amon nga hari sang Juda, sa ikanapulog tatlo nga tuig sang iya paghari.

3 Nag-abut man ini sa mga adlaw ni Jehoaquim nga lalaking anak ni Josias nga hari sang Juda, tubtub sa katapusan sang ikanapulog isa nga tuig ni Sedequias, ang lalaking anak ni Josias nga hari sang Juda, tubtub sa pagdala sang Jerusalem nga bihag sa ikalimang bulan.

4 Niyan ang polong sang GINOO nag-abut sa akon, nga nagasiling,

5 Sa wala ko pa ikaw mahuman sa tiyan nakilala ko ikaw; kag sa wala pa ikaw maggowa sa taguangkan ginpakabalaan ko ikaw, kag gintangdo ko ikaw nga manalagna sa mga pungsud.

6 Niyan nagsiling ako, Ah, Ginoong DIOS! yari karon, indi ako makahibalo maghambal: kay bata ako.

7 ś Apang ang GINOO nagsiling sa akon, Dili ka magsiling, Bata ako: kay magakadto ka sa tanan nga pagapakadtoan ko sa imo, kag bisan ano ang isogo ko sa imo ipamolong mo.

8 Dili ka mahadluk sang ila mga nawung: kay ako nagaupud sa imo sa pagluwas sa imo, nagasiling ang GINOO.

9 Niyan gin-untay sang GINOO ang iya kamut, kag gintandug ang akon baba. Kag ang GINOO nagsiling sa akon, Yari karon, ginbutang ko ang akon mga polong sa imo baba.

10 Tan-awa, ginbutang ko ikaw sa sining adlaw sa ibabaw sang mga pungsud kag sa ibabaw sang mga ginharian, sa paggabut, kag sa pagguba, kag sa paglaglag, kag sa pagwagwag, sa pagpatindug, kag sa pagtanum.

11 ś Labut pa ang polong sang GINOO nag-abut sa akon, nga nagasiling, Jeremias, ano bala ang makita mo? Kag nagsiling ako, Makita ko ang isa ka sanga sang kahoy nga almendro.

12 Niyan nagsiling ang GINOO sa akon, Nakita mo sing maayo: kay ako magapadali sang akon polong sa paghimo sini.

13 Kag ang polong sang GINOO nag-abut sa akon sa ikaduha, nga nagasiling, Ano bala ang makita mo? Kag nagsiling ako, Makita ko ang nagaindakal nga kaldero; kag ang nawung sini nayon sa aminhan.

14 Niyan ang GINOO nagsiling sa akon, Gikan sa aminhan magabuka ang malaut sa tanan nga pumuluyo sang duta.

15 Kay, yari karon, tawgon ko ang tanan nga panimalay sang mga ginharian sang aminhan, nagasiling ang GINOO; kag magakari sila, kag sila magapahamtang ang tagsatagsa sang iya trono sa salamputan sang mga gawang sang Jerusalem, kag batok sa tanan niyang kuta palibut, kag batok sa tanan nga mga siudad sang Juda.

16 Kag magamitlang ako sang akon mga paghukom batok sa ila nahanungud sa tanan nilang pagkamalaut, sila nga nagbiya sa akon, kag nagsonog sing incienso sa iban nga mga dios, kag nagsimba sa mga binuhatan sang ila kaugalingon nga mga kamut.

17 ś Busa magpangwagkus ka sang imo mga hawak, kag magtindug, kag magpamolong sa ila sang tanan nga ginasogo ko sa imo: dili ka mahangawa sa ila mga nawung, basi nga pasaligmatoon ko ikaw sa atubangan nila.

18 Kay, yari karon, ginhimo ko ikaw sining adlaw nga siudad nga napamakuran, kag haligi nga salsalon, kag mga kuta nga saway batok sa bug-os nga duta, batok sa mga hari sang Juda, batok sa mga prinsipe sini, batok sa mga pari sini, kag batok sa katawohan sang duta.

19 Kag magapakig-away sila batok sa imo; apang indi sila makadaug sa imo; kay ako nagaupud sa imo, nagasiling ang GINOO, sa pagluwas sa imo.

KAPITULO 2

LABUT PA ang polong sang GINOO nag-abut sa akon, nga nagasiling,

2 Lakat kag isinggit sa mga idulungug sang Jerusalem, nga nagasiling, Amo ini ang ginasiling sang GINOO; Ginadumdum ko ikaw, ang kaayo sang imo pagkapamatan-on, ang gugma sang imo pagkakalaslon, sang nagsonod ka sa akon sa kamingawan, sa duta nga wala masab-ugi.

3 Ang Israel sadto pagkabalaan sa GINOO, kag ang nahauna nga mga bunga sang iya patubas: ang tanan nga nagalamon sa iya magamalinapason; ang malaut magaabut sa ila, nagasiling ang GINOO.

4 Pamatii ninyo ang polong sang GINOO, O panimalay ni Jacob, kag tanan nga panimalay sang balay sang Israel:

5 ś Amo ini ang ginasiling sang GINOO, Ano bala nga kalautan ang nakita sang inyo mga kaamayan sa akon, nga nagpalayo sila sa akon, kag nagsonod sa kadayawan, kag nanginwala sing pulus?

6 Kag wala sila magsiling, Diin bala ang GINOO nga nagpataklad sa aton gikan sa duta sang Egipto, nga nagpalatas sa aton sa kamingawan, paagi sa duta sang mga desierto kag sang mga boho, paagi sa duta nga namalhan, kag sang landong sang kamatayon, paagi sa duta nga wala gid malatasi sing bisan sin-o nga tawo, kag wala sing tawo nga nagpuyo?

7 Kag ginpasulud ko kamo sa duta nga bugana, sa pagkaon sang bunga sini kag sang pagkaayo sini; apang sang pagsulud ninyo, gindagtaan ninyo ang akon duta, kag ginhimo nga kangil-aran ang akon panublion.

8 Ang mga pari wala magsiling, Diin bala ang GINOO? kag ang mga nagahikot sang kasogoan wala makakilala sa akon: ang mga pastor man naglalis sa akon, kag ang mga manalagna nagtagna tungud kay Baal, kag nagsonod sa mga butang nga wala sing kapuslanan.

9 ś Busa magapakigsuay pa ako sa inyo, nagasiling ang GINOO, kag sa mga anak sang inyo mga anak magapakigsuay ako.

10 Kay tabok kamo sa kapuloan sang Kitim, kag magtan-aw; kag magpadala sa Kedar, kag magpatugsiling sing maid-id, kag tan-awa kon may yara nga subong nga butang.

11 May pungsud bala nga nagbaylo sang ila mga dios, nga indi gid mga dios? apang ang akon katawohan nagbaylo sang ila himaya tungud sinang wala sing kapuslanan.

12 Maorongan, O kamo nga mga langit, sa sini, kag magkahadluk kamo nga may kahanguyus, magmamingaw kamo sing tama, nagasiling ang GINOO.

13 Kay ang akon katawohan naghimo sing duha ka malaut; ginbayaan nila ako, ang tuburan sang mga tubig nga buhi, kag nagbasbas nga sa ila sing mga suluptan sing tubig, mga suluptan sing tubig nga tahus, nga indi makasuput sing tubig.

14 ś Alagad bala ang Israel? ulipon bala sia nga tumandok? ngaa bala nga gin-ati sia?

15 Ang lamharon nga mga leon nagngurub sa iya, kag nagsiagit, kag ginlaglag nila ang iya duta: ang iya mga siudad nasonog, nga wala sing pumuluyo.

16 Ang mga anak man sang Nop kag sang Tahapanes nagboong sang alipudwan sang imo olo.

17 Wala mo bala maagum ini sa imo kaugalingon, nga ginbayaan mo ang GINOO nga imo Dios, sang gintuytuyan ka niya sa dalanon?

18 Kag karon ano bala ang imo sa dalanon pa Egipto, sa pag-inum sang mga tubig sang Sihor? ukon ano bala ang imo sa dalanon pa Asiria, sa pag-inum sang mga tubig sang suba?

19 Ang imo kaugalingon nga pagkamalaut magabadlong sa imo, kag ang imo mga pagtalikod magasabdong sa imo: busa kilalaha kag tan-awa nga ini butang nga malaut kag mapait, nga nagbiya ka sa GINOO nga imo Dios, kag nga ang akon kahadluk wala sa imo, nagasiling ang Ginoong DIOS sang mga kasoldadosan.

20 ś Kay kutub sa dumaan nga tion ginbali ko ang imo gota, kag ginbugras ang imo mga gapus; kag nagsiling ka, Indi ako maglalis; apang sa tagsa ka mataas nga bakolod kag sa idalum sang tagsa ka kahoy nga malagtum nagdayandayan ka, nga nagapakaalpot.

21 Apang gintanum ko ikaw nga dungganon nga puno sang ubas, bug-os nga maayo nga binhi: paano niyan nga nagbaylo ka nga dimaayo nga tanum sang dumuloong nga puno sang ubas sa akon?

22 Kay bisan pa magpanghugas ka sang salitre, kag maggamit sing madamu nga habon, apang ang imo kalautan nabalhag sa akon atubangan, nagasiling ang Ginoong DIOS.

23 Paano bala nga makasiling ka, Wala ako madagtai, wala ako magsonod sa mga Baalim? tan-awa ang imo dalan sa nalupyakan, kilalaha ang imo nahimo: ikaw madasig nga dromedario nga nagaisiisi sa iya mga dalanon;

24 Asno nga talonon nga naanad sa kamingawan, nga nagapaningo-singo sang hangin sa iya kailigbon; sa iya panag-on sin-o bala ang makapaliso sa iya? tanan sila nga nagapangita sa iya indi magpabudlay sa ila kaugalingon; makita nila sia sa iya binulan.

25 Dili pagpawad-i sang sapatos ang imo tiil, kag ang imo totonlan dili pagpauhawi: apang nagsiling ka, Wala sing paglaum: wala; kay nahagugma ako sa mga dumuloong, kag magasonod ako sa ila.

26 Subong nga ang makawat mahuya kon masapwan sia, sa amo ang panimalay sang Israel mahuya; sila, ang ila mga hari, ang ila mga prinsipe, kag ang ila mga pari, kag ang ila mga manalagna,

27 Nga nagasiling sa inutud nga puno sang kahoy, Ikaw ang akon amay; kag sa bato, Ikaw ang nag-anak sa akon: kay nagtalikod sila sa akon, kag wala mag-atubang: apang sa tion sang ila kalisdanan magasiling sila, Tindug, kag luwasa kami.

28 Apang diin bala ang imo mga dios nga ginhimo mo sa imo? patinduga sila, kon makaluwas sila sa imo sa tion sang paggamo sa imo: kay sono sa kadamuon sang imo mga siudad amo ang imo mga dios, O Juda.

29 Ngaa bala magapakigsuay kamo sa akon? kamo tanan naglalis sa akon, nagasiling ang GINOO.

30 Wala sing pulus ang pagsakit ko sang inyo mga anak; wala sila makabaton sing pagbadlong: ang inyo kaugalingon nga espada naghalunhon sang inyo mga manalagna, kaangay sang leon nga nagalaglag.

31 ś O kaliwatan, tan-awa ninyo ang polong sang GINOO. Nanginkamingawan bala ako sa Israel? duta sang kadudulman? ngaa bala nagasiling ang akon katawohan, Kami mga ginoo; indi na kami magkadto sa imo?

32 Makalipat bala ang dalaga sang iya mga puni, ukon ang nobya sa iya panaput? apang ang akon katawohan nalipat sa akon sa dimaisip nga mga adlaw.

33 Ngaa bala nga ginakaayo mo ang imo dalanon sa pagpangita sing gugma? busa gintudloan mo man sang imo mga dalanon ang mga malauton.

34 Sa imo mga sidsid man nakita ang dugo sang mga kalag sang mga makalolooy nga inocente: wala ko ina makita paagi sa pagpangusisa sing tago, kondi sa ibabaw sini tanan.

35 Walay sapayan ikaw nagasiling, Bangud nga inocente ako, sa pagkamatuud ang iya kaakig magapalayo sa akon. Yari karon, magapakigsuay ako sa imo, bangud nga nagasiling ka, Wala ako makasala.

36 Ngaa bala nagadalangdalang ka gid sing tama sa pagbaylo sang imo dalanon? ikaw man mahuy-an sa Egipto, subong nga nahuy-an ikaw sa Asiria.

37 Hoo, magahalin ka sa iya, kag ang imo mga kamut yara sa ibabaw sang imo olo: kay ginsikway sang GINOO ang imo mga ginasaligan, kag indi ka mag-uswag sa ila.

KAPITULO 3

NAGASILING sila, Kon ang isa ka tawo magsikway sang iya asawa, kag maghalin sia sa iya, kag mangin-iya sang iban nga lalaki, magauli bala ang iya bana sa iya? indi bala madagtaan sing daku yadto nga duta? apang nagpakaalpot ka sa madamu nga kahagugma; walay sapayan magbalik ka sa akon, nagasiling ang GINOO.

2 Bayawa ang imo mga mata sa mataas nga mga duug, kag tan-awa kon diin ka wala mahuliri. Sa mga dalanon naglingkod ka tungud sa ila, subong sang Arabiahanon sa kamingawan; kag gindagtaan mo ang duta sang imo mga pagkamahilawason kag sang imo pagkamalaut.

3 Busa ginpunggan ang mga ulan, kag wala sing ulan nga olihi; kag may agtang ka sang makihilawason, nagdumili ka sa pagkahuya.

4 Kutub sini nga tion indi ka bala magtuaw sa akon, Akon amay, ikaw ang tuytuy sang akon pagkapamatan-on?

5 Padayonon bala niya ang iya kaakig sa gihapon? huptan bala niya ini tubtub sa katapusan? Yari karon, ikaw nakapamolong kag nakahimo sang malaut nga mga butang sa imo masarangan.

6 ś Labut pa ang GINOO nagsiling sa akon sa mga adlaw ni Josias nga hari, Nakita mo bala inang nahimo sang nagtalikod nga Israel? nagtaklad sia sa tagsa ka bukid nga mataas kag sa idalum sang tagsa ka kahoy nga malagtum, kag didto nagpakaalpot?

7 Kag nagsiling ako sa tapus nga nahimo niya ini tanan nga butang, Magbalik ka sa akon. Apang wala sia magbalik. Kag ang iya mabudhion nga utud nga babaye nga Juda nakakita sini.

8 Kag nakita ko, nga tungud sang mga pagpanglahi sang nagtalikod nga Israel ginsikway ko sia, kag ginhatagan sia sing sulat sa pagbulagay; apang ang iya mabudhion nga utud nga babaye nga Juda wala magkahadluk, kondi sia man naglakat kag nagpakaalpot.

9 Kag nahanabu nga paagi sa kadalas sang iya pagkamahilawason, nga iya gindagtaan ang duta, kag nagpanglahi sia sa mga bato kag sa mga inutud nga puno sang kahoy.

10 Kag walay sapayan sini tanan ang iya mabudhion nga utud nga babaye nga Juda wala magbalik sa akon sa bug-os niya nga tagiposoon, kondi sa pakunokuno, nagasiling ang GINOO.

11 Kag ang GINOO nagsiling sa akon, Ang Israel nga nagtalikod nagapakamatarung sang iya kaugalingon labi pa sa Juda nga mabudhion.

12 ś Lakat kag ibantala ining mga polong nayon sa aminhan, kag isiling, Balik, ikaw nga nagtalikod nga Israel, nagasiling ang GINOO; kag ako indi magapatupa sang akon kaakig sa inyo: kay maloloy-on ako, nagasiling ang GINOO, kag indi ako maghuput sang kaakig sa gihapon.

13 Lamang kilalaha ang imo kalautan, nga ikaw naglalis sa GINOO nga imo Dios, kag nagpalapta sang imo mga dalanon sa mga dumuloong sa idalum sang tagsa ka kahoy nga malagtum, kag wala kamo magtuman sa akon tingug, nagasiling ang GINOO.

14 Balik, O mga anak nga nagtalikod, nagasiling ang GINOO; kay ako kinasal sa inyo: kag magakuha ako sa inyo sing isa sa isa ka siudad, kag duha sa isa ka panimalay, kag dalhon ko kamo sa Zion:

15 Kag hatagan ko kamo sing mga pastor sono sa akon tagiposoon, nga magapahalab sa inyo sing ihibalo kag paghangup.

16 Kag mahanabu, nga kon magbuad kamo kag magdamu sa duta, sa sinang mga adlaw, nagasiling ang GINOO, indi na sila magsiling, Ang arka sang katipan sang GINOO: kag indi na ini mag-abut sa painoino: ukon pagdumdumon nila ini; ukon pagduawon nila ini; kag indi na ini paghimoon.

17 Sa sinang tion tawgon nila ang Jerusalem nga trono sang GINOO; kag ang tanan nga pungsud tiponon pakadto sa sini, sa ngalan sang GINOO, pa Jerusalem: kag indi na sila maglakat sono sa painoino sang ila tagiposoon nga malaut.

18 Sa sinang mga adlaw ang panimalay sang Juda magalakat upud sa panimalay sang Israel, kag magagowa sila sing tingub gikan sa duta sang aminhan pa duta nga ginhatag ko nga panublion sa inyo mga kaamayan.

19 Apang nagsiling ako, Paano bala ang pag-impon ko sa imo sa mga anak, kag hatagan ikaw sing duta nga maayo, sing matahum nga panublion sang mga kasoldadosan sang mga pungsud? kag nagsiling ako, Tawgon nimo ako, Akon amay; kag indi magbiya sa pagsonod sa akon.

20 ś Sa pagkamatuud, subong sang asawa nga nagabiya sing mabudhion sa iya bana, sa amo nagmabudhion kamo sa akon, O panimalay sang Israel, nagasiling ang GINOO.

21 Isa ka tingug nabatian sa mataas nga mga duug, ang hinibi kag mga pag-ampo sang kaanakan sang Israel: bangud nga ginpatiko nila ang ila dalanon, kag ginkalipatan nila ang GINOO nga ila Dios.

22 Balik, kamo nga mga anak nga nagtalikod, kag ayohon ko ang inyo mga pagtalikod. Yari karon, nagakari kami sa imo; kay ikaw amo ang GINOO nga amon Dios.

23 Sa pagkamatuud walay pulus ang kaluwasan nga ginapaabut gikan sa kabakoloran, kag sa kadam-an sang kabukiran: sa pagkamatuud sa GINOO nga aton Dios yara ang kaluwasan sang Israel.

24 Kay ang kahuya naglamon sang kinabudlayan sang aton mga kaamayan kutub sa aton pagkapamatan-on; sang ila mga panong kag sang ila kabakahan, sang ila mga anak nga lalaki kag sang ila mga anak nga babaye.

25 Nagahigda kita sa aton kahuluy-an, kag ang aton pagsaligmato nagatabon sa aton: kay nakasala kita batok sa GINOO nga aton Dios, kita kag ang aton mga kaamayan, kutub sa aton pagkapamatan-on tubtub sining adlaw, kag wala kita magtuman sang tingug sang GINOO nga aton Dios.

KAPITULO 4

KON magbalik ka, O Israel, nagasiling ang GINOO, magbalik ka sa akon: kag kon isikway mo ang imo mga kangil-aran gikan sa akon itololok, niyan indi ka paghalinon.

2 Kag magasumpa ka, Ang GINOO nagakabuhi, sa kamatooran, sa paghukom, kag sa pagkamatarung; kag ang mga pungsud magapakamaayo sang ila kaugalingon sa iya, kag sa iya magahimaya sila.

3 ś Kay amo ini ang ginasiling sang GINOO sa mga tawo sang Juda kag sa Jerusalem, Bungkaga ang inyo duta nga ginpabay-an, kag dili kamo magsab-ug sa mga talongon.

4 Circuncidaha ang inyo kaugalingon sa GINOO, kag kuhaa ang napunta nga mga panit sang inyo tagiposoon, kamo nga mga tawo sang Juda kag mga pumuluyo sang Jerusalem: basi nga ang akon kaalipungut maggowa kaangay sang kalayo, kag magsonog sa bagay nga wala gid sing makapalong sini, bangud sang kalaut sang inyo mga hinimoan.

5 Ipahayag ninyo sa Juda, kag ibantala sa Jerusalem; kag isiling, Patungga ninyo ang budyong sa duta: magsinggit, magtilipon sing tingub, kag isiling, Tilipon kamo, kag magsulud kita sa mga siudad nga napamakuran.

6 Patinduga ang hayahay nayon sa Zion: palagyo nga sa kalig-onan, dili magdolog: kay magadala ako sing malaut gikan sa aminhan, kag daku nga kalaglagan.

7 Ang leon nagataklad gikan sa iya kasiotan, kag ang manuglaglag sang mga Gentil yara sa iya dalanon; naggowa sia sa iya duug sa pagpamingaw sang imo duta; kag ang imo mga siudad mawagwag, nga walay pumuluyo.

8 Tungud sini magsuklub kamo sing panapton nga sako, magpanalabiton kag maghaya: kay ang masingkal nga kaakig sang GINOO wala magtalikod sa aton.

9 Kag mahanabu sa sinang adlaw, nagasiling ang GINOO, nga ang tagiposoon sang hari mawala, kag ang tagiposoon sang mga prinsipe; kag ang mga pari maorongan, kag ang mga manalagna matingala.

10 Niyan nagsiling ako, Ah, Ginoong DIOS! sa pagkamatuud ginlimbongan mo sing daku ining katawohan kag ang Jerusalem, nga nagasiling, Manginmay paghidait kamo; sing ugai ang espada nagalambut tubtub sa kalag.

11 Sa sinang tion isiling sa sining katawohan kag sa Jerusalem, Isa ka mainit nga hangin gikan sa mataas nga mga duug sa kamingawan pakadto sa babaying anak sang akon katawohan, indi sa pagpahangin, ukon sa pagtinlo,

12 Hangin nga mabaskug gikan sadtong mga duug magaabut sa akon: karon ako man magahatag sing pamatbat batok sa ila.

13 Yari karon, magapaibabaw sia subong sang mga panganud, kag ang iya mga kangga subong sang buhawi: ang iya mga kabayo madasig pa sa mga aguila. Kailo sa aton! kay nalaglag kita.

14 O Jerusalem, hugasi ang imo tagiposoon gikan sa pagkamalaut, agud nga maluwas ka. Tubtub bala san-o magapabilin sa sulud nimo ang imo mga hunahuna nga walay kapuslanan?

15 Kay ang isa ka tingug nagapahayag gikan sa Dan, kag nagabantala sing kapipit-an gikan sa bukid nga Efraim.

16 Isambit ninyo sa mga pungsud; yari karon, ibantala sa Jerusalem, nga ang mga manugpuut nagaabut gikan sa dutang malayo, kag nagahayaw sang ila tingug batok sa mga siudad sang Juda.

17 Subong sang mga manugbantay sang latagon, yara sila batok sa iya sa palibut; bangud nga nagmabinatoon sia sa akon, nagasiling ang GINOO.

18 Ang imo dalanon kag ang imo mga hinimoan nagpaabut sining mga butang sa imo; ini amo ang imo pagkamalaut, kay mapait ini, bangud nagalambut ini sa imo tagiposoon.

19 ś Ang nasulud nakon, ang nasulud nakon! nagakasakit ako sa akon gid tagiposoon; ang akon tagiposoon nagakubakuba sa sulud nakon; indi ako makahipus, bangud nga nakabati ikaw, O akon kalag, sang tonog sang budyong, ang paandam sang inaway.

20 Ang kalaglagan sa kalaglagan ginasinggit; kay ang bug-os nga duta nawagwag: sa hinali ang akon mga layanglayang naguba, kag sa isa ka tion ang akon mga kumbung.

21 Tubtub bala san-o nga makita ko ang hayahay, kag mabatian ang tingug sang budyong?

22 Kay ang akon katawohan buangbuang, wala nila ako makilala; mga anak sila nga kulangkulang, kag wala sila sing paghangup: maalam sila sa paghimo sing malaut, apang wala sila sing ihibalo sa paghimo sing maayo.

23 Gintolok ko ang duta, kag, yari karon, wala sing kahusayan, kag wala sing sulud; kag ang mga langit, kag wala sila sing kapawa.

24 Gintolok ko ang mga bukid, kag, yari karon, nagkurug sila, kag ang tanan nga kabakoloran nagtiong sing mahinay.

25 Nagtolok ako, kag, yari karon, walay tawo, kag ang tanan nga kapispisan sang mga langit nagpalagyo.

26 Nagtolok ako, kag, yari karon, ang duug nga mabungahon kamingawan, kag ang tanan sining siudad ginguba sa atubangan sang GINOO, kag paagi sa iya masingkal nga kaakig.

27 Kay amo ini ang ginsiling sang GINOO, Manginmamingaw ang bug-os nga duta; apang indi ko pagtapuson sing bug-os.

28 Tungud sini ang duta magatangis, kag ang mga langit sa ibabaw magaitum: bangud nga ginpamolong ko ini, gintuyo ko ini, kag indi ako maghinulsul, kag indi ako magtalikod sa sini.

29 Ang bug-os nga siudad magapalagyo bangud sa kagahud sang mga manugkabayo kag sang mga manugpana; magasughut sila sa kasiotan, kag magataklas sa mga dakung bato: ang tagsa ka siudad pagabayaan, kag wala sing tawo nga magapuyo sa sini.

30 Kag kon laglagon ka, ano bala ang himoon mo? Bisan pa nga magpanaput ka sing carmesi, bisan pa nga magpamuni ka sing mga puni nga bulawan, bisan pa nga magpatahum ka sang imo nawung sa pinta, walay pulus nga paayoayohon mo ang imo kaugalingon; ang imo mga kahagugma magatamay sa imo, magatinguha sila sang imo kabuhi.

31 Kay nabatian ko ang tingug subong sang babaying nasakitan, kag ang kasakit subong sang nagaanak sang iya panganay nga bata, ang tingug sang babaye nga anak sang Zion, nga nagabakho, nga nagauntay sang iya mga kamut, nga nagasiling, Kailo ako karon! kay ang akon kalag ginalapyo bangud sang mga manugpatay.

KAPITULO 5

DALAGAN kamo pakadto-pakari sa mga dalan sang Jerusalem, kag tan-awa karon, kag kilalaha, kag pangitaa sa masangkad nga mga duug sini, kon makakita kamo sing tawo, kon may yara nga nagahimo sing katarungan, nga nagapangita sing kamatooran; kag ako magapatawad sini.

2 Kag bisan nagasiling sila, Ang GINOO nagakabuhi; sa pagkamatuud nagasumpa sila sing dimatuud.

3 O GINOO, indi bala yara sa kamatooran ang imo mga mata? ginsakit mo sila, apang wala sila magkalisud; ginpapas mo sila, apang nagdumili sila sa pagbaton sing pagbadlong: ginpatig-a nila ang ila mga nawung labi pa sa dakung bato; nagdumili sila sa pagbalik.

4 Busa nagsiling ako, Sa pagkamatuud ini sila makalolooy; mga buangbuang sila: kay wala sila makakilala sang dalanon sang GINOO, ukon sang paghukom sang ila Dios.

5 Makadto ako sa dalagkung mga tawo, kag magapamolong sa ila; kay nakakilala sila sang dalanon sang GINOO, kag sang paghukom sang ila Dios: apang ini sila sing tingub nagbali sang gota, kag nagbugras sang mga gapus.

6 Busa ang isa ka leon gikan sa talon magapatay sa ila, kag ang isa ka lobo sang mga kahaponon magalaglag sa ila, ang isa ka leopardo magapuut batok sa ila mga siudad: ang tagsatagsa nga nagagowa gikan didto kusniton: bangud nga madamu ang ila mga paglalis, kag ang ila mga pagtalikod nagadugang.

7 ś Paano bala ang pagpatawad ko sa imo tungud sini? ang imo mga anak nagbiya sa akon, kag nagsumpa paagi sa ila nga indi mga dios: sang nabusug ko na sila, niyan nagpanglahi sila, kag sa mga balay sang mga alpot nagtipon sila sa pinanongpanong.

8 Subong sila sang sinagud nga mga kabayo sa kaagahon: ang tagsatagsa nagahirihiri sa asawa sang iya isigkatawo.

9 Indi bala ako magduaw tungud sining mga butang? nagasiling ang GINOO: kag indi bala magtimalus ang akon kalag sa subong sining pungsud?

10 ś Magsalaka kamo sa iya mga kuta, kag magpanglaglag; apang dili pagtapuson sing bug-os: kuhaa ang iya mga pamakud; kay indi sila iya sang GINOO.

11 Kay ang panimalay sang Israel kag ang panimalay sang Juda nagmabudhion gid batok sa akon, nagasiling ang GINOO.

12 Ginhimutig nila ang GINOO, kag nagsiling, Indi ini sia; kag indi man mag-abut sa aton ang malaut; kag indi kita makakita sing espada ukon tiggulutum:

13 Kag ang mga manalagna manginhangin, kag ang polong wala sa ila: amo ini ang himoon sa ila.

14 Busa amo ini ang ginasiling sang GINOONG Dios sang mga kasoldadosan, Bangud nga ginapamolong ninyo ini nga polong, yari karon, himoon ko nga kalayo ang akon mga polong sa imo baba, kag ini nga katawohan kahoy, kag ini magalamon sa ila.

15 Yari karon, dalhon ko sa inyo ang isa ka pungsud gikan sa malayo, O panimalay sang Israel, nagasiling ang GINOO: ini gamhanan nga pungsud, dumaan ini nga pungsud, pungsud nga ang iya hambal wala mo mahibaloi, kag indi ka makahangup sang ila ginasiling.

16 Ang ila baslayan subong sang bukas nga lulubngan, sila tanan gamhanan nga tawo.

17 Kag kaonon nila ang imo patubas, kag ang imo kalan-on, nga kalan-on sang imo mga anak nga lalaki kag sang imo mga anak nga babaye: kaonon nila ang imo mga panong kag ang imo mga kahayupan: kaonon nila ang imo ubas kag ang imo mga higuera: ang imo napamakuran nga mga siudad, nga ginasaligan mo, musmuson nila sang espada.

18 Walay sapayan sa sinang mga adlaw, nagasiling ang GINOO, indi ko kamo pagtapuson sing bug-os.

19 ś Kag mahanabu, kon magsiling kamo, Ngaa bala nga ang GINOO nga aton Dios nagahimo sini tanan nga butang sa aton? niyan sabton mo sila, Kaangay sang inyo pagbiya sa akon, kag pag-alagad sa mga dios nga dumuloong sa inyo duta, sa amo magaalagad kamo sa mga dumuloong sa duta nga indi inyo.

20 Ipahayag ini sa panimalay ni Jacob, kag ibantala ini sa Juda, nga nagasiling,

21 Pamatii ini karon, O buangbuang nga katawohan, kag wala sing paghangup; nga may mga mata, kag indi makakita; nga may mga dulunggan, kag indi makabati:

22 Wala bala kamo mahadluk sa akon? nagasiling ang GINOO: indi bala kamo magkurug sa akon atubangan, nga nagbutang sang balas nga dulunan sang dagat sa dayon nga mando, nga indi ini makalakbay sini: kag bisan ang mga balud sini nagapaibabaw, apang indi sila makalandas; bisan nagadaguhub sila, apang indi sila makalakbay sini?

23 Apang ini nga katawohan may tagiposoon nga masinumpungon kag mabinatoon; nagsumpung sila kag nagtaliwan.

24 Kag wala sila nagasiling sa ila tagiposoon, Magkahadluk kita karon sa GINOO nga aton Dios, nga nagahatag sing ulan sa iya panag-on, sang nahauna kag sang naolihi: sia nagatipig sa aton sang pinat-ud nga mga semana sang pag-ani.

25 ś Ang inyo mga kalautan nagpapalayo sini nga mga butang, kag ang inyo mga sala nagpugung sang maayo nga mga butang gikan sa inyo.

26 Kay sa akon katawohan may malauton nga mga tawo nga makita: nagapuut sila, subong sang nagabutang sang mga siod; nagabutang sila sing tiglapak, nagadakup sila sing mga tawo.

27 Subong sang hawla nga puno sang mga pispis, sa amo ang ila mga balay puno sang limbong: busa nangindalagku sila, kag nagmanggaranon.

28 Nagtambok sila, nagkalanawkanaw sila: hoo, nagalabaw sila sa mga buhat sang malauton: wala nila pag-apini ang kasaba, ang kasaba sang ilo sa amay, walay sapayan nagauswag sila; kag ang kinamatarung sang nawad-an wala nila ginahukmi.

29 Indi bala ako magduaw tungud sini nga mga butang? nagasiling ang GINOO: indi bala magtimalus ang akon kalag sa subong sini nga pungsud?

30 ś Ang makatilingala kag makakulugmat nga butang ginahimo sa duta;

31 Ang mga manalagna nagatagna sing dimatuud, kag ang mga pari nagagahum tungud sa ila mga paagi; kag ang akon katawohan naluyag nga manginsubong sini: kag ano bala ang himoon ninyo sa katapusan sini?

KAPITULO 6

O KAMO nga mga anak sang Benjamin, magtilipon kamo sa pagpalagyo gikan sa tunga sang Jerusalem, kag patonoga ang budyong sa Tecoa, kag pagdabok sang tanda nga kalayo sa Bet-hacarem: kay ang malaut nagalantaw gikan sa aminhan, kag ang daku nga kalaglagan.

2 Ginpaangay ko sa magayon kag maluming nga babaye ang babaye nga anak sang Zion.

3 Ang mga manugpahalab upud sang ila mga panong magaabut sa iya; magapatindug sila sang ila mga layanglayang batok sa iya sa palibut; magapahalab sila ang tagsatagsa sa iya duug.

4 Aman kamo sing inaway batok sa iya; tindug, kag magtaklad kita sa kaodtohon. Kailo sa aton! kay nagakahapon ang adlaw, kay ang mga landong sang kahaponon nagalaba.

5 Tindug, kag maglakat kita sa kagab-ihon, kag laglagon naton ang iya mga palacio.

6 ś Kay amo ini ang ginsiling sang GINOO sang mga kasoldadosan, Pulud kamo sing mga kahoy, kag patindug sang balwarte batok sa Jerusalem: ini amo ang siudad nga duluawon; sia bug-os nga pagpigus sa tunga niya.

7 Subong sang tuburan nga nagapatubud sang iya mga tubig, sa amo sia nagapatubud sang iya pagkamalaut: palugus kag kalaglagan nabatian sa iya; sa akon atubangan yara ang kasubo kag ang mga pilas sing dalayon.

8 Pagpatudlo ka, O Jerusalem, basi nga ang akon kalag magpalayo sa imo; basi nga himoon ko ikaw nga mamingaw, duta nga wala mapuy-i.

9 ś Amo ini ang ginasiling sang GINOO sang mga kasoldadosan, Saghawon nila sing bug-os subong sang ubas ang nabilin sang Israel: pabalika liwat ang imo kamut subong sang manugpamopo sang ubas sa mga tabig.

10 Sa kay sin-o bala ako magapamolong, kag magapaandam, agud nga magpamati sila? yari karon, ang ila dulunggan dicircuncidado, kag indi sila makabati: yari karon, ang polong sang GINOO nanginkahuluy-an sa ila; wala sila sing kalipay sa sini.

11 Busa puno ako sang kaalipungut sang GINOO; natak-an ako sa pagpugung sini: ibobo ko ini sa ibabaw sang kabataan sa gowa, kag sa ibabaw sang katilingban sang mga pamatan-on nga lalaki sing tingub: kay bisan ang bana upud ang asawa dakpon, ang tigulang pati ang puno sang mga inadlaw.

12 Kag ang ila mga balay pagaisaylo sa iban, pati ang ila mga latagon kag ang ila mga asawa sing tingub: kay untayon ko ang akon kamut sa mga pumuluyo sang duta, nagasiling ang GINOO.

13 Kay kutub sa labi gid kakubus sa ila tubtub sa labi gid kadaku sa ila, ang tagsatagsa nabuyo sa paghamkon; kag kutub sa manalagna tubtub sa pari, ang tagsatagsa nagahisayo sang dimatuud.

14 Gin-ayo man nila sing hapaw ang samad sang babaying anak sang akon katawohan, nga nagasiling, Paghidait, paghidait; sing ugai wala sing paghidait.

15 Nahuya bala sila sang naghimo sila sing kangil-aran? wala, wala gid sila mahuya, ukon makapalamula sila: busa mapukan sila sa tunga sang mga nagakapukan: sa tion nga duawon ko sila, pukanon sila, nagasiling ang GINOO.

16 Amo ini ang ginasiling sang GINOO, Tindug kamo sa mga dalanon, kag magtan-aw, kag magpamangkot sang mga banas nga dumaan, kon diin ang maayo nga dalan, kag maglakat sa sini, kag makakita kamo sing kapahuwayan sa inyo mga kalag. Apang nagsiling sila, Indi kami maglakat sa sini.

17 Labut pa nagbutang ako sing mga manugbantay sa ibabaw ninyo, nga nagasiling, Pamati sa tonog sang budyong. Apang nagsiling sila, Indi kami magpamati.

18 ś Busa magpamati, kamo nga mga pungsud, kag magkilala, O katilingban, kon ano ang yara sa ila.

19 Pamati, O duta: yari karon, magadala ako sing malaut sa sini nga katawohan, ang bunga sang ila mga hunahuna, bangud nga wala sila magpamati sa akon mga polong, ukon sa akon kasogoan, kondi ginsikway ini.

20 Sa ano bala nga katuyoan nga nag-abut sa akon ang incienso gikan sa Seba, kag ang mahamut nga calamo gikan sa duta nga malayo? ang inyo mga halad nga sinonog indi mabaton, ukon ang inyo mga halad kalahamut-an sa akon.

21 Busa amo ini ang ginasiling sang GINOO, Yari karon, ako magabutang sa atubangan sini nga katawohan sing mga kasandaran, kag ang mga kaamayan kag ang mga anak nga lalaki magakalapukan sa ila sing tingub; ang isigkatawo kag ang iya abyan mawala.

22 Amo ini ang ginasiling sang GINOO, Yari karon, ang isa ka katawohan nagaabut gikan sa duta sang aminhan, kag ang isa ka daku nga pungsud pahublagon gikan sa mga kilid sang duta.

23 Magakaput sila sang pana kag bangkaw; mapintas sila, kag wala sing kalooy; ang tingug nila nagadaguhub kaangay sang dagat; kag sila nagakabayo, nga napaagisud subong sang mga tawo nga sa pag-awayan batok sa imo, O babaye nga anak sang Zion.

24 Nabatian namon ang sugid sini: ang amon mga kamut nagluya: nagdakup sa amon ang pagkagha, kag ang kasakit, subong sang babaye nga ginasakitan.

25 Dili ka maggowa sa latagon, ukon maglakat sa dalanon; kay ang espada sang kaaway kag ang kahadluk yara sa tagsa ka luyo.

26 ś O babaye nga anak sang akon katawohan, magwagkus ka sing panapton nga sako, kag magtubug ka sa mga abo: maglalaw ka, subong nga sa bugtong nga anak nga lalaki, panalabiton nga mapait gid: kay sa hinali ang manuglaglag magaabut sa aton.

27 Ginpahamtang ko ikaw nga torre kag pamakud sa akon katawohan, agud nga mahibaloan mo kag matilawan ang dalanon nila.

28 Sila tanan lakas nga mga manriribuk, nga nagalakat nga may mga pagbutangbutang: sila mga saway kag salsalon; sila tanan mga madunuton.

29 Ang mga hasohasohan nasonog, ang tingga naupud sang kalayo; nagatunaw sa wala sing pulus ang manugtunaw: kay ang mga malaut wala makuha.

30 Tawgon sila sang mga tawo nga sinikway nga pilak, bangud nga ang GINOO nagsikway sa ila.

KAPITULO 7

ANG polong nga nag-abut kay Jeremias gikan sa GINOO, nga nagasiling,

2 Magtindug sa gawang sang balay sang GINOO, kag ibantala didto ini nga polong, kag isiling, Magpamati sang polong sang GINOO, tanan kamo nga taga-Juda, nga nagasulud sa sini nga mga gawang sa pagsimba sa GINOO.

3 Amo ini ang ginasiling sang GINOO sang mga kasoldadosan, ang Dios sang Israel, Kaayoha ang inyo mga dalanon kag ang inyo mga buhat, kag papuy-on ko kamo sa sini nga duug.

4 Dili kamo magsalig sa binutig nga mga polong, nga nagasiling, Ang templo sang GINOO, Ang templo sang GINOO, Ang templo sang GINOO, amo ini sila.

5 Kay kon kaayohon ninyo sing bug-os ang inyo mga dalanon kag ang inyo mga buhat; kon himoon ninyo sing bug-os ang katarungan sa tunga sang tawo kag sang iya isigkatawo;

6 Kon indi ninyo pagpiguson ang dumuloong, ang ilo sa amay, kag ang balo nga babaye, kag indi magpaagay sa sini nga duug sing dugo nga inocente, ukon magsonod sa iban nga mga dios sa inyo kaugalingon nga kasamaran:

7 Niyan papuy-on ko kamo sa sini nga duug, sa duta nga ginhatag ko sa inyo mga kaamayan, sa gihapon kag sa walay katapusan.

8 ś Yari karon, nagasalig kamo sa binutig nga mga polong, nga indi mapuslan.

9 Kamo bala magapangawat, magapatay, kag magapanglahi, kag magasumpa sing dimatuud, kag magasonog sing incienso kay Baal, kag magasonod sa iban nga mga dios nga wala ninyo makilala;

10 Kag magakari kag magatindug sa akon atubangan sa sini nga balay, nga ginatawag sa akon ngalan, kag magasiling, Naluwas kami agud nga mahimo namon ini tanan nga kangil-aran?

11 Ini bala nga balay, nga ginatawag sa akon ngalan, nanginlungib sang mga buyong sa inyo mga mata? Yari karon, ako gid nakakita sini, nagasiling ang GINOO.

12 Apang kadto kamo karon sa akon duug nga didto anay sa Silo, diin ginpahamtang ko ang akon ngalan sing una, kag tan-awa kon ano ang ginhimo ko sa sini tungud sang pagkamalaut sang akon katawohan nga Israel.

13 Kag karon, bangud nga ginhimo ninyo ini tanan nga binuhatan, nagasiling ang GINOO, kag nagpamolong ako sa inyo, nga nagabangon sing aga pa kag nagapamolong, apang wala kamo magpamati; kag gintawag ko kamo, apang wala kamo magsabat;

14 Busa himoon ko sa sining balay, nga ginatawag sa akon ngalan, sa diin nagasalig kamo, kag sa duug nga ginhatag ko sa inyo kag sa inyo mga kaamayan, subong sang ginhimo ko sa Silo.

15 Kag sobolon ko kamo sa akon itololok, subong sang pagsobol ko sang tanan ninyo nga kauturan, ang bug-os nga kaliwat sang Efraim.

16 Busa dili ka magpangamuyo tungud sini nga katawohan, kag dili magbayaw sing pagtuaw ukon sing pagpangamuyo tungud sa ila, kag dili magpatunga sa akon: kay indi ako magapamati sa imo.

17 ś Wala mo bala makita ang ginahimo nila sa mga siudad sang Juda kag sa mga dalan sang Jerusalem?

18 Ang mga anak nagatipon sing gatong, kag ang mga amay nagadabok sang kalayo, kag ang mga babaye nagaligis sang ila linamas, sa paghimo sing mga torta sa hara sang langit, kag sa pagbobo sing mga halad nga ilimnon sa iban nga mga dios, agud nga mapaakig ako nila.

19 Ginapaakig bala nila ako? nagasiling ang GINOO: wala bala sila nagapaakig sang ila kaugalingon, nga sa kalibog sang ila kaugalingon nga mga nawung?

20 Busa amo ini ang ginasiling sang Ginoong DIOS; Yari karon, ang akon kaakig kag ang akon kaalipungut iula sa sini nga duug, sa tawo, kag sa sapat, kag sa kakahoyan sang latagon, kag sa bunga sang duta; kag magasonog ini, kag indi mapalong.

21 ś Amo ini ang ginasiling sang GINOO sang mga kasoldadosan, ang Dios sang Israel; Idugang ang inyo mga halad nga sinonog sa inyo mga halad, kag magkaon kamo sing unud.

22 Kay wala ako magpamolong sa inyo mga kaamayan, ukon magsogo sa ila sang adlaw nga ginpagowa ko sila gikan sa duta sang Egipto, nahanungud sang mga halad nga sinonog kag sang mga halad:

23 Apang ini nga butang ginsogo ko sa ila, nga nagasiling, Tumana ang akon tingug, kag ako mangin-inyo Dios, kag kamo mangin-akon katawohan: kag lakat kamo sa tanan nga mga dalanon nga ginsogo ko sa inyo, agud nga magmaayo sa inyo.

24 Apang wala sila magpamati, ukon maglingig sang ila idulungug, kondi naglakat sa mga laygay kag sa painoino sang ila malaut nga tagiposoon, kag nag-isul, kag wala magpaatubang.

25 Kutub sang adlaw nga ang inyo mga kaamayan naggowa gikan sa duta sang Egipto tubtub sini nga adlaw, ginpadala gid nakon sa inyo ang tanan nakon nga alagad nga mga manalagna, nga nagabangon sing aga pa sa adlawadlaw kag nagapadala sa ila:

26 Apang wala sila magpamati sa akon, ukon maglingig sang ila idulungug, kondi nagtingkoyan sila: naghimo sila sing malain pa sang sa ila mga kaamayan.

27 Busa magpamolong ka sa ila sini tanan nga polong; apang indi sila magapamati sa imo: magtawag ka man sa ila; apang indi sila magasabat sa imo.

28 Apang magsiling ka sa ila, Ini pungsud nga wala nagatuman sa tingug sang GINOO nga ila Dios, ukon nagabaton sing pagtudlo: nawala ang kamatooran, kag nag-untat ini sa baba nila.

29 ś Alota ang imo bohok, O Jerusalem, kag ipilak, kag maghayaw sing panalabiton sa ibabaw sang mataas nga mga duug; kay ang GINOO nagsikway kag nagbiya sang kaliwatan sang iya kasingkal.

30 Kay ang mga anak sang Juda naghimo sang malaut sa akon itololok, nagasiling ang GINOO: ginbutang nila ang ila mga kangil-aran sa balay nga ginatawag sa akon ngalan, sa pagdagta sini.

31 Kag ginpatindug nila ang mataas nga mga duug sang Tofet, nga yara sa nalupyakan sang anak nga lalaki ni Hinom, sa pagsonog sang ila mga anak nga lalaki kag sang ila mga anak nga babaye sa kalayo; nga wala ko pag-isogo sa ila, ukon nag-abut sa akon tagiposoon.

32 ś Busa, yari karon, magaabut ang mga adlaw, nagasiling ang GINOO, nga indi na ini pagtawgon nga Tofet, ukon ang nalupyakan sang anak nga lalaki ni Hinom, kondi ang nalupyakan nga palatyan: kay magalubung sila sa Tofet, tubtub nga wala na sing duug.

33 Kag ang mga bangkay sini nga katawohan manginkalan-on sang kapispisan sang langit, kag sang kasapatan sang duta; kag wala gid sing sin-o nga magapahadluk sa ila.

34 Niyan pauntaton ko sa mga siudad sang Juda, kag sa mga dalan sang Jerusalem, ang tingug sang kalipay, kag ang tingug sang kasadya, ang tingug sang nobyo, kag ang tingug sang nobya: kay ang duta manginmamingaw.

KAPITULO 2

SA sina nga tion, nagasiling ang GINOO, pagowaon nila ang mga tul-an sang mga hari sang Juda, kag ang mga tul-an sang iya mga prinsipe, kag ang mga tul-an sang mga pari, kag ang mga tul-an sang mga manalagna, kag ang mga tul-an sang mga pumuluyo sang Jerusalem, sa ila mga lulubngan:

2 Kag laptahon sila nila sa dayag sang adlaw, kag sang bulan, kag sang bug-os nga panong sang langit, nga ginhigugma nila, kag nga gin-alagad nila, kag ginsonod nila, kag ginpangita nila, kag ginsimba nila: indi sila pagtiponon ukon ilubung; mangin-ipot sila sa ibabaw sang kadaygan sang duta.

3 Kag pasulabihon ang kamatayon sang sa kabuhi sang tanan nga salin sang mga nabilin sini nga malaut nga panimalay, nga nabilin sa tanan nga duug diin ginsobol ko sila, nagasiling ang GINOO sang mga kasoldadosan.

4 ś Labut pa isiling mo sa ila, Amo ini ang ginasiling sang GINOO; Mapukan bala sila, kag indi magtindug? magatalikod bala sia, kag indi magbalik?

5 Ngaa bala niyan ini nga katawohan nagtalikod sa dayon nga pagtalikod? ginahakus nila ang limbong, nagadumili sila sa pagbalik.

6 Nagpamati ako kag nakabati, apang wala sila magpamolong sing matadlong: wala sing tawo nga naghinulsul sang iya pagkamalaut, nga nagasiling, Ano bala ang nahimo ko? ang tagsatagsa naglipas sa iya alagyan, subong sang kabayo nga nagaduksul sa inaway.

7 Hoo, ang dugwak sa langit nakahibalo sang iya pinat-ud nga mga tion; kag ang tukmo kag ang tulabong, kag ang salimbabatang nagabantay sang tion sang ila pag-abut; apang ang akon katawohan wala makakilala sang paghukom sang GINOO.

8 Paano bala nga nagasiling kamo, Maalam kami, kag ang kasogoan sang GINOO yari sa amon? Yari karon, sa pagkamatuud walay pulus ang paghimo niya sini; ang pluma sang mga escriba walay pulus.

9 Ang maalam nga mga tawo nahuy-an, nahangawa sila kag nadakpan: yari karon, ginsikway nila ang polong sang GINOO; kag ano bala nga kaalam ang yara sa ila?

10 Busa ihatag ko sa iban ang ila mga asawa, kag ang ila mga latagon sa mga magapanubli sa ila: kay ang tagsatagsa kutub sa labi gid kakubus tubtub sa labi gid kadaku natugyan sa paghamkon, kutub sa manalagna tubtub sa pari ang tagsatagsa nagahisayo sing dimatuud.

11 Kay gin-ayo nila sing hapaw ang samad sang babaye nga anak sang akon katawohan, nga nagasiling, Paghidait, paghidait; sing ugai wala sing paghidait.

12 Nahuya bala sila sang naghimo sila sing kangil-aran? wala, wala gid sila mahuya, ukon makapalamula sila: busa mapukan sila sa tunga sang mga nagakapukan: sa tion sang pagduaw sa ila pukanon sila, nagasiling ang GINOO.

13 ś Papason ko sila sing totoo, nagasiling ang GINOO: manginwala sing ubas sa balagon, ukon higos sa higuera, kag magakalayong ang dahon; kag ang mga butang nga ginhatag ko sa ila magataliwan gikan sa ila.

14 Ngaa bala nagalingkod kita sing matinong? tilipon kamo, kag magsulud kita sa mga siudad nga napamakuran, kag maghipus kita didto: kay ang GINOO nga aton Dios nagpahipus sa aton, kag nagpainum sa aton sing tubig nga apdohon, bangud nga nakasala kita batok sa GINOO.

15 Naghulat kita sing paghidait, apang wala sing kaayohan nga nag-abut; kag sing tion sa pag-ayo, kag yari karon, kagamo!

16 Ang pusnga sang iya mga kabayo nabatian kutub sa Dan: ang bug-os nga duta nagkurug sa tingug sang paghirihiri sang iya mga makusug; kay nag-abut na sila, kag naglamon sang duta, kag sang tanan nga yara sa sini; sang siudad, kag yadtong mga nagapuyo sa sini.

17 Kay, yari karon, ako magapadala sa inyo sing mga man-ug nga dalitan, mga cocatris nga man-ug, nga indi matiwtiw, kag kagton kamo nila, nagasiling ang GINOO.

18 ś Kon malipay ko na kuntani ang akon kaugalingon batok sa kasubo, ang akon tagiposoon nagakapunaw sa sulud nakon.

19 Yari karon, ang tingug sang singgit sang babaying anak sang akon katawohan bangud sang mga nagapuyo sa duta nga malayo: Wala bala ang GINOO sa Zion? wala bala sa iya ang iya hari? Ngaa bala nga ginpaakig nila ako sa ila mga imahen nga tinigban, kag sa mga kadayawan nga dumuloong?

20 Nagligad na ang ani, natapus na ang tingadlaw, kag kami wala maluwas.

21 Tungud sa samad sang babaye nga anak sang akon katawohan ginasamad ako; maitum ako; ang kahangawa nagdakup sa akon.

22 Wala bala sing banyus sa Galaad; wala bala didto sing manugbolong? niyan ngaa bala nga ang panglawas sang babaying anak sang akon katawohan wala mapaayo?

KAPITULO 9

O kabay kuntani nga ang akon olo mga tubig, kag ang akon mga mata tuburan sang mga luha, agud nga maghibi ako sa adlaw kag gab-i tungud sa mga pinatay gikan sa babaye nga anak sang akon katawohan!

2 O kabay kuntani nga ako sa kamingawan may dalayonan sang mga manlalakat nga mga tawo; agud nga mabayaan ko ang akon katawohan, kag magpalayo sa ila! kay sila tanan mga makihilahion, katilingban sang mga tawong mabudhion.

3 Kag ginapabawud nila ang ila dila kaangay nga ila pana nga sa kabutigan: apang indi sila isganan sa kamatooran sa duta; kay nagapadayon sila gikan sa malaut pa malaut, kag wala sila makakilala sa akon, nagasiling ang GINOO.

4 Mag-andam kamo ang tagsatagsa sa iya isigkatawo, kag dili kamo magsalig sa bisan kay sin-ong utud: kay ang tagsa ka utud buut gid magtal-us, kag ang tagsa ka isigkatawo magalakat nga may mga pagpatopato.

5 Kag sila magalimbong ang tagsatagsa sa iya isigkatawo, kag indi magapamolong sang kamatooran: gintudloan nila ang ila dila sa pagpamolong sing kabutigan, kag ginabudlay nila ang ila kaugalingon sa paghimo sing kalautan.

6 Ang imo puluy-an yara sa tunga sang paglimbong; tungud sa limbong nagadumili sila sa pagkilala sa akon, nagasiling ang GINOO.

7 Busa amo ini ang ginasiling sang GINOO sang mga kasoldadosan, Yari karon, tunawon ko sila, kag tilawan sila; kay paano bala ang paghimo ko tungud sang babaying anak sang akon katawohan?

8 Ang ila dila subong sang baslay nga napagowa; nagapamolong ini sing limbong: ang isa sa iya baba nagapamolong sing madaiton sa iya isigkatawo, apang sa tagiposoon nagapuut sia sa iya.

9 ś Indi ko bala sila pagduawon tungud sining mga butang? nagasiling ang GINOO: indi bala magtimalus ang akon kalag sa subong sining pungsud?

10 Tungud sa mga bukid pagahayawon ko ang paghibi kag ang paghaya, kag tungud sa mga puluy-an sang kamingawan ang pagpanalabiton, bangud nga nasonog sila, sa bagay nga walay makaagi sa ila; kag walay mga tawo nga makabati sang tingug sang kahayupan; ang kapispisan sang mga langit kag ang kasapatan nagpalagyo; wala na sila.

11 Kag himoon ko ang Jerusalem nga mga tinumpok, kag isa ka lungib sang mga dragon; kag himoon ko nga mamingaw ang mga siudad sang Juda, nga walay pumuluyo.

12 ś Sin-o bala ang tawong maalam, nga makahangup sini? kag sin-o bala sia nga ang baba sang GINOO nagpamolong sa iya, agud mapahayag niya ini, kay ang duta nagakalaglag kag nasonog subong sang kamingawan, sa bagay nga wala gid sing nagaagi?

13 Kag ang GINOO nagasiling, Bangud nga ginbayaan nila ang akon kasogoan nga ginapahamtang ko sa atubangan nila, kag wala nagtuman sa akon tingug, ukon naglakat sa sini;

14 Kondi naglakat sono sa painoino sang ila kaugalingon nga tagiposoon, kag sa mga Baalim, nga gintudlo sa ila sang mga kaamayan nila:

15 Busa amo ini ang ginasiling sang GINOO sang mga kasoldadosan, ang Dios sang Israel; Yari karon, pakan-on ko sila, ang ini gid nga katawohan, sing artamisa, kag paimnon sila sing tubig nga apdohon.

16 Paaplaagon ko man sila sa mga pagano, nga bisan sila ukon ang ila mga kaamayan wala makakilala: kag padalhan ko sang espada sa olihi nila, tubtub nga mapapas ko sila.

17 ś Amo ini ang ginasiling sang GINOO sang mga kasoldadosan, Pamalandong kamo, kag ipatawag ang manughaya nga mga babaye, agud nga magkari sila; kag pakadtoi ang sampaton nga mga babaye, agud nga magkari sila:

18 Kag magdalidali sila, kag maghayaw sang paghaya tungud sa aton, agud nga ang aton mga mata magpaagay sing mga luha, kag ang aton mga ilalakub magpatubud sing mga tubig.

19 Kay ang tingug sang paghaya mabatian na gikan sa Zion, Daw ano nga paglaglag sa aton! ginaligban kita sing daku, bangud nga ginabayaan naton ang duta, bangud nga gintabug kita sang aton mga puluy-an.

20 Apang pamatii ang polong sang GINOO, O kamo nga mga babaye, kag pabatona ang inyo idulungug sang polong sang iya baba, kag ton-i ang inyo mga anak nga babaye sing paghaya, kag ang tagsatagsa sang iya isigkatawo sing panalabiton.

21 Kay ang kamatayon nagsaka na sa aton mga bintana, kag nagsulud sa aton mga palacio, sa pagpapas sang mga anak gikan sa luwas, kag sang pamatan-on nga mga lalaki gikan sa mga dalan.

22 Magpamolong, Amo ini ang ginasiling sang GINOO, Ang mga bangkay gid sang mga tawo mapukan subong sang ipot sa wayang, kag subong sang inupong sa olihi sang mangangani, kag walay magatipon sa ila.

23 ś Amo ini ang ginasiling sang GINOO, Dili maghimaya ang maalam nga tawo sa iya kaalam, ukon maghimaya ang gamhanan nga tawo sa iya gahum, ang manggaranon nga tawo dili maghimaya sa iya manggad:

24 Kondi ang nagahimaya maghimaya sa sini, nga sia may paghangup kag nakakilala sa akon, nga ako amo ang GINOO nga nagahikot sing mahigugmaon nga kaayo, sing paghukom, kag pagkamatarung, sa duta: kay sa sining mga butang nagakalipay ako, nagasiling ang GINOO.

25 ś Yari karon, nagaabut ang mga adlaw, nagasiling ang GINOO, nga silotan ko ang tanan nga circuncidado upud sa dicircuncidado;

26 Ang Egipto, kag ang Juda, kag ang Edom, kag ang mga anak ni Amon, kag ang Moab, kag ang tanan nga yara sa ukbung gid nga mga bahin, nga nagapuyo sa kamingawan: kay ining tanan nga mga pungsud mga dicircuncidado, kag ang bug-os nga panimalay sang Israel dicircuncidado sa tagiposoon.

KAPITULO 10

PAMATII ninyo ang polong nga ginapamolong sang GINOO sa inyo, O panimalay sang Israel:

2 Amo ini ang ginasiling sang GINOO, Dili kamo magtoon sang dalanon sang mga pagano, kag dili kamo magkahangawa sa mga tanda sang langit; kay ang mga pagano nahangawa sa ila.

3 Kay ang mga kinabatasan sang katawohan kadayawan: kay ang isa nagapulud sang kahoy sa talon, buhat sang mga kamut sang panday, nga may wasay.

4 Ginapunihan nila ini sing pilak kag sing bulawan; ginapalig-on nila ini sa mga lansang kag sa mga palo, agud nga indi mationg.

5 Matadlong sila kaangay sang palma nga kahoy, apang wala sila nagahambal: kinahanglan nga dalhon sila, kay indi sila makalakat. Dili kamo mahadluk sa ila; kay indi sila makahimo sang malaut, kag wala man sa ila ang paghimo sing maayo.

6 Kay wala gid sing kaangay sa imo, O GINOO; daku ka, kag daku ang imo ngalan sa kagamhanan.

7 Sin-o bala ang indi mahadluk sa imo, O Hari sang mga pungsud? kay ini naigo sa imo: sa bagay nga sa tanan nga maalam nga mga tawo sang mga pungsud, kag sa tanan nilang mga ginharian, wala gid sing kaangay sa imo.

8 Apang sila sing tingub sapatsapaton kag buangbuang: ang inutud nga puno sang kahoy doktrina sang mga kadayawan.

9 Ang pilak nga pinapa sa pinanid ginadala gikan sa Tarsis, kag ang bulawan gikan sa Ufaz, buhat sang manugpahito, kag sang mga kamut sang manugtunaw: asul kag purpura ang ila panapton: sila tanan buhat sang sampaton nga mga tawo.

10 Apang ang GINOO amo ang Dios nga matuud, sia amo ang Dios nga buhi, kag hari nga walay katubtuban: sa iya kasingkal magakurug ang duta, kag ang mga pungsud indi sarang makapabilin sa iya kaalipungut.

11 Amo ini ang isiling ninyo sa ila, Ang mga dios nga wala maghimo sang mga langit kag sang duta, sila man mawala sa duta, kag sa idalum sining mga langit.

12 Sia naghimo sang duta paagi sa iya gahum, sia nagpalig-on sang kalibutan paagi sa iya kaalam, kag naghumlad sang mga langit paagi sa iya paghangup.

13 Kon nagamitlang sia sang iya tingug, may kadam-an sang mga tubig sa mga langit, kag ginapatub-ok niya ang mga alisngaw gikan sa mga ukbung sang duta; nagahimo sia sang mga kilat upud sang ulan, kag ginapagowa ang hangin gikan sa iya mga bahandi.

14 Ang tagsa ka tawo sapatsapaton sa iya ihibalo: ang tagsa ka manugsalsal ginapakahuy-an sang imahen nga tinigban: kay ang iya imahen nga tinunaw dimatuud, kag walay ginhawa sa ila.

15 Sila kadayawan, kag buhat sang mga sayup: sa tion sang pagduaw sa ila mawala sila.

16 Ang bahin ni Jacob indi kaangay sa ila: kay sia amo ang una sang tanan nga butang; kag ang Israel amo ang sungkud sang iya panublion: Ang GINOO sang mga kasoldadosan amo ang iya ngalan.

17 ś Tipona ang imo mga pagkabutang gikan sa duta, O pumuluyo sang kuta.

18 Kay amo ini ang ginasiling sang GINOO, Yari karon, ilabyug ko ang mga pumuluyo sang duta sa sining makaisa, kag pakalisdon sila, agud nga mabatyagan nila.

19 ś Kailo ako bangud sang akon samad! ang akon pilas matama: apang nagsiling ako, Sa pagkamatuud kalisdanan ini, kag dapat ko antuson.

20 Ang akon tabernakulo inati, kag nabugto ang tanan ko nga banting: ang akon mga anak nagpalayo sa akon, kag wala na sila: wala na sing mahumlad liwat sang akon layanglayang, kag mabitay sang akon mga kumbung.

21 Kay ang mga pastor nanginsapatsapaton, kag wala magpangita sa GINOO: busa indi sila mag-uswag, kag ang tanan nila nga panong paaplaagon.

22 Yari karon, ang tingug sang balita nag-abut na, kag isa ka daku nga kagubut gikan sa duta nga aminhan, sa pagpamingaw sang mga siudad ni Juda, kag lungib sang mga dragon.

23 ś O GINOO, nahibaloan ko nga ang dalanon sang tawo wala sa iya kaugalingon: wala sa tawo nga nagalakat sa pagmando sang iya mga tikang.

24 O GINOO, badlonga ako, apang sa katarungan; indi sa imo kaakig, basi nga dalhon mo ako sa pagkawala.

25 Iula ang imo kaalipungut sa mga pagano nga wala makakilala sa imo, kag sa mga panimalay nga wala nagapanawag sa imo ngalan: kay gin-ubus nila si Jacob, kag ginlamon sia, kag ginpapas sia, kag ginpamingaw ang iya puluy-an.

KAPITULO 11

ANG polong nga nag-abut kay Jeremias gikan sa GINOO, nga nagasiling,

2 Pamatii ninyo ang mga polong sini nga katipan, kag ipamolong sa mga tawo sang Juda, kag sa mga pumuluyo sang Jerusalem;

3 Kag isiling mo sa ila, Amo ini ang ginasiling sang GINOONG Dios sang Israel; Pinapakamalaut ang tawo nga wala nagatuman sang mga polong sini nga katipan,

4 Nga ginsogo ko sa inyo mga kaamayan sang adlaw nga ginpagowa ko sila gikan sa duta sang Egipto, gikan sa horno nga salsalon, nga nagasiling, Tumana ang akon tingug, kag himoa sila, sono sa tanan nga ginasogo ko sa inyo: sa amo kamo mangin-akon katawohan, kag ako mangin-inyo Dios:

5 Agud nga magtuman ako sang sumpa nga ginsumpa ko sa inyo mga kaamayan, sa paghatag sa ila sing duta nga nagailig sing gatas kag dugus, subong sang sa sini nga adlaw. Niyan nagsabat ako, kag nagsiling, Kabay pa, O GINOO.

6 Niyan ang GINOO nagsiling sa akon, Ibantala ini tanan nga polong sa mga siudad sang Juda, kag sa mga dalan sang Jerusalem, nga nagasiling, Pamatii ninyo ang mga polong sini nga katipan, kag himoon sila.

7 Kay ako nagpaandam sing hanuut sa inyo mga kaamayan sang adlaw nga ginpataklad ko sila pagowa sa duta sang Egipto, bisan tubtub sini nga adlaw, nga nagabangon sing aga pa kag nagapaandam, nga nagasiling, Tumana ang akon tingug.

8 Apang wala sila magtuman, ukon naglingig sang ila idulungug, kondi naglakat ang tagsatagsa sa painoino sang ila tagiposoon nga malaut: busa dalhon ko sa ila ang tanan nga polong sini nga katipan, nga ginsogo ko nga himoon nila; apang wala nila sila paghimoa.

9 Kag ang GINOO nagsiling sa akon, Nasapwan ang puhon sa mga tawo sang Juda, kag sa mga pumuluyo sang Jerusalem.

10 Nagbalik sila sa mga kalautan sang ila nahauna nga mga kaamayan, nga nagdumili sa pagpamati sang akon mga polong; kag nagsonod sila sa iban nga mga dios sa pag-alagad sa ila: ang panimalay sang Israel kag ang panimalay sang Juda naglalis sang akon katipan nga ginhimo ko upud sa ila mga kaamayan.

11 ś Busa amo ini ang ginasiling sang GINOO, Yari karon, magadala ako sing malaut sa ila, nga indi sila sarang makapalagyo; kag bisan magatuaw sila sa akon, indi ko sila pagpamatian.

12 Niyan ang mga siudad sang Juda kag ang mga pumuluyo sang Jerusalem magakadto, kag magatuaw sa mga dios nga ginadolotan nila sing incienso: apang sila indi gid magluwas sa ila sa tion sang ila kagamo.

13 Kay sono sa kadamuon sang imo mga siudad amo ang imo mga dios, O Juda; kag sono sa kadamuon sang mga dalan sang Jerusalem nagpatindug kamo sing mga halaran sa sinang makahuluya nga butang, mga halaran sa pagsonog sing incienso kay Baal.

14 Busa dili ka magpangamuyo tungud sini nga katawohan, kag dili magbayaw sing pagtuaw ukon pangamuyo tungud sa ila: kay indi ako magpamati sa ila sa tion nga magtuaw sila sa akon bangud sang ila kagamo.

15 Ano bala ang himoon sang akon hinigugma sa akon balay, sa ginatan-aw nga nakahimo sia sing paghinigal sa madamu, kag ang balaan nga unud nagtaliwan sa imo? kon nagahimo ka sing malaut, niyan nagakalipay ka.

16 Ang GINOO nagtawag sang imo ngalan, Isa ka olivo nga kahoy nga malagtum, matahum, kag nga may maayoayo nga bunga: sa kagahud sang daku nga kinagubut gindabukan niya ini sing kalayo, kag nabali ang mga sanga sini.

17 Kay ang GINOO sang mga kasoldadosan, nga nagtanum sa imo, naglawag sing malaut batok sa imo, bangud sang kalaut sang panimalay sang Israel kag sang panimalay sang Juda, nga ginhimo nila batok sa ila kaugalingon sa pagpaakig sa akon sa pagdolot sing incienso kay Baal.

18 ś Kag ang GINOO nagpahibalo sini sa akon, kag nahibaloan ko ini: niyan ginpakita mo sa akon ang ila mga ginhimo.

19 Apang kaangay ako sang cordero ukon sang baka nga ginadala sa ihawan; kag wala ako makahibalo nga nagpahito sila sing mga padugi batok sa akon, nga nagasiling, Laglagon naton ang kahoy upud sang bunga sini, kag utdon naton sia gikan sa duta sang mga buhi, agud nga indi na madumduman ang iya ngalan.

20 Apang, O GINOO sang mga kasoldadosan, nga nagahukom sing matarung, nga nagatilaw sang mga reinda kag sang tagiposoon, pakitaa ako sang imo pagtimalus sa ila: kay sa imo ginpahayag ko ang akon kahimtangan.

21 Busa amo ini ang ginasiling sang GINOO nahanungud sa mga tawo sa Anatot, nga nagatinguha sang imo kabuhi, nga nagasiling, Dili ka magtagna sa ngalan sang GINOO, agud nga indi ka mapatay sa amon kamut:

22 Busa amo ini ang ginasiling sang GINOO sang mga kasoldadosan, Yari karon, silotan ko sila: ang pamatan-on nga mga lalaki mapatay sa espada; ang ila mga anak nga lalaki kag ang ila mga anak nga babaye mapatay sa tiggulutum:

23 Kag wala sing mabilin sa ila: kay magadala ako sing malaut sa mga tawo sang Anatot, sang tuig sang pagduaw sa ila.

KAPITULO 12

MATARUNG ikaw, O GINOO, kon magpakigkasaba ako sa imo: apang pahambala ako sa imo sang imo mga paghukom: Ngaa bala nga nagauswag ang dalanon sang malauton? ngaa bala nga malipayon sila tanan nga labi gid kamabudhion?

2 Gintanum mo sila, hoo, nagpanggamut sila: nagatubo sila, hoo, nagapamunga sila: malapit ka sa ila baba, kag malayo sa ila mga reinda.

3 Apang ikaw, O GINOO, nakakilala sa akon: nakakita ka sa akon, kag nagtilaw sang akon tagiposoon ayon sa imo: guyuda sila kaangay sang mga carnero nga ilihawon, kag amana sila sa adlaw sang pag-ihaw.

4 Tubtub bala san-o magakalisud ang duta, kag malaya ang mga ulutanon sang tagsa ka latagon, bangud sang pagkamalaut sang mga nagapuyo sa sini? ang kasapatan nagakapapas, kag ang kapispisan; bangud nga nagsiling sila, Indi sia makakita sang aton kaolihian.

5 ś Kon nagdalagan ka upud sa mga hangaway nga nagalakat, kag ginlapyo ka nila, niyan paano bala ang pagpalumba mo sa mga kabayo? kag kon sa duta sang paghidait, nga imo ginasaligan, sila nagpalapyo sa imo, niyan ano bala ang mahimo mo sa pahabok sang Jordan?

6 Kay bisan ang imo mga kauturan, kag ang panimalay sang imo amay, bisan sila nagmabudhion sa imo; hoo, nagpanawag sila sing kadam-an sa paglagas sa imo: dili sila pagpatiha, bisan nagapamolong sila sing matahum nga mga polong sa imo.

7 ś Ginbayaan ko ang akon panimalay, ginbayaan ko ang akon panublion; gintugyan ko ang hinigugmang nalolotan sang akon kalag sa kamut sang iya mga kaaway.

8 Ang akon panublion nanginsa akon subong sang leon sa talon; nagatuaw ini batok sa akon: busa gindumtan ko ini.

9 Ang akon panublion nanginsa akon subong sang pispis nga may pintokpintok, ang mga pispis sa palibut batok sa iya; lakat kamo, tipona ang tanan nga kasapatan sang latagon, kari sa paglamon.

10 Madamung mga pastor naglaglag sang akon ulubasan, gintasak nila ang akon bahin, ginhimo nila nga mamingaw nga kamingawan ang akon matahum nga bahin.

11 Ginhimo nila ini nga mamingaw, kag sa namingawan ini, nagakalisud ini sa akon; ang bug-os nga duta ginpamingaw, bangud nga walay tawo nga nagasapak sini sa iya tagiposoon.

12 Ang mga manug-ati nagaabut sa tanan nga mataas nga duug sa kamingawan: kay ang espada sang GINOO magalamon kutub sa isa ka ukbung sang duta tubtub sa isa ka ukbung sang duta: walay unud nga may paghidait.

13 Nagsab-ug sila sing trigo, apang magaani sila sing talongon: ginsakit nila ang ila kaugalingon, apang indi magamapuslanon: kag mahuy-an sila sang inyo mga ingreso bangud sang masingkal nga kaakig sang GINOO.

14 ś Amo ini ang ginasiling sang GINOO batok sa tanan nga akon malaut nga mga isigkatawo, nga nagatandug sang panublion nga ginpapanubli ko sa akon katawohan nga Israel; Yari karon, gabuton ko sila sa ila duta, kag gabuton ko sa ila ang panimalay sang Juda.

15 Kag mahanabu, nga sa tapus nga magabut ko sila magabalik ako, kag magakalooy sa ila, kag ibalik sila ang tagsa ka tawo sa iya panublion, kag ang tagsa ka tawo sa iya duta.

16 Kag mahanabu, kon magtoon sila sing makugihon sang mga dalanon sang akon katawohan, sa pagsumpa sa akon ngalan, Ang GINOO nagakabuhi; subong sang pagtudlo nila sa akon katawohan sa pagsumpa kay Baal; niyan patindugon sila sa tunga sang akon katawohan.

17 Apang kon indi sila magtuman, gabuton ko sing bug-os kag laglagon inang pungsud, nagasiling ang GINOO.

KAPITULO 13

AMO INI ang ginasiling sang GINOO sa akon, Lakat kag bakal ka sing wagkus nga lino, kag iwagkus ini sa imo mga balikawang, kag dili ini pag-ibutang sa tubig.

2 Gani nagbakal ako sing wagkus sono sa polong sang GINOO, kag ginwagkus ini sa akon mga balikawang.

3 Kag ang polong sang GINOO nag-abut sa akon sa ikaduhang tion, nga nagasiling,

4 Dalha ang wagkus nga ginbakal mo, nga yara sa imo mga balikawang, kag tindug, kadto sa Eufrates, kag tagoa ini didto sa litik sang dakung bato.

5 Gani naglakat ako, kag gintago ini sa ubay sang Eufrates, sono sang ginsogo sa akon sang GINOO.

6 Kag nahanabu sa tapus ang madamung adlaw, nga nagsiling ang GINOO sa akon, Tindug, kadto sa Eufrates, kag kuhaa ang wagkus gikan didto, nga ginsogo ko sa imo nga tagoon didto.

7 Niyan nagkadto ako sa Eufrates, kag nagkutkut, kag ginkuha ang wagkus sa duug nga gintagoan ko sini: kag, yari karon, ang wagkus nasamad, ini indi mapuslan.

8 Niyan ang polong sang GINOO nag-abut sa akon, nga nagasiling,

9 Amo ini ang ginasiling sang GINOO, Sa sining bagay samaron ko ang bugal sang Juda, kag ang dakung bugal sang Jerusalem.

10 Ining malaut nga katawohan, nga nagadumili sa pagpamati sang akon mga polong, nga nagalakat sa painoino sang ila tagiposoon, kag nagasonod sa iban nga mga dios, sa pag-alagad sa ila, kag sa pagsimba sa ila, manginsubong sini nga wagkus, nga indi mapuslan.

11 Kay subong nga ang wagkus nagatapik sa mga balikawang sang tawo, sa amo ginpatapik ko man sa akon ang bug-os nga panimalay sang Israel kag ang bug-os nga panimalay sang Juda, nagasiling ang GINOO; agud nga sila manginkatawohan, kag ngalan, kag pagdayaw, kag himaya sa akon: apang indi sila buut nga magpamati.

12 ś Busa ipamolong mo sa ila ining polong; Amo ini ang ginasiling sang GINOONG Dios sang Israel, Ang tagsa ka tibud pun-on sing alak: kag sila magasiling sa imo, Wala bala kami makahibalo sa pagkamatuud nga ang tagsa ka tibud pun-on sa alak?

13 Niyan magsiling ka sa ila, Amo ini ang ginasiling sang GINOO, Yari karon, sa kahologbon pun-on ko ang tanan nga pumuluyo sining duta, bisan ang mga hari nga nagalingkod sa trono ni David, kag ang mga pari, kag ang mga manalagna, kag ang tanan nga pumuluyo sang Jerusalem.

14 Kag ilampus ko sila ang isa sa isa, ang mga amay kag ang mga anak nga lalaki sing tingub, nagasiling ang GINOO: indi ako magkaawa, ukon magpaiway, ukon magkalooy, kondi paglaglagon ko sila.

15 ś Pamati kamo, kag dungga; dili magbugalon: kay ang GINOO nagpamolong.

16 Ihatag ang himaya sa GINOO nga inyo Dios, sa wala pa sia nagapadulum, kag sa wala pa makasandad ang inyo mga tiil sa madulum nga mga bukid, kag, samtang nagapangita kamo sing kapawa, baylohon niya ini sa landong sang kamatayon, kag himoon ini nga pitipit nga kadudulman.

17 Apang kon indi kamo magpamati sini, ang akon kalag magahibi sa tago nga mga duug tungud sa inyo bugal; kag ang akon mata magahibi sing tama, kag magapailig sing mga luha, bangud nga ang panong sang GINOO ginpangdala nga bihag.

18 Isiling sa hari kag sa hara, Magpaubus kamo, maglingkod: kay ang inyo mga ginadumalahan paubson, bisan ang purungpurung sang inyo himaya.

19 Ang mga siudad sang bagatnan pagatakpan, kag wala gid sing magbukas sa ila: ang Juda pagadalhon nga bihag ang kabug-osan sini, bihagon ini sing bug-os.

20 Bayawa ang inyo mga mata, kag toloka sila nga nagaabut gikan sa aminhan: diin bala ang panong nga ginhatag sa imo, ang imo matahum nga panong?

21 Ano bala ang isiling mo kon silotan ka niya? kay gintudloan mo sila nga mangin mga kapitan, kag subong sang pangolo nimo: indi bala ikaw pagdakpon sang mga kasubo, subong sang babaying ginasakitan?

22 ś Kag kon magsiling ka sa imo tagiposoon, Ngaa bala nagaabut ining mga butang sa akon? Bangud sang pagkadaku sang imo kalaut ginabuksan ang imo mga sidsid, kag ginapahubo ang imo mga tikod.

23 Makailis bala ang Etiopiahanon sang iya panit, ukon ang leopardo sang iya mga pintokpintok? niyan kamo man makahimo sing maayo, nga naanad sa paghimo sing malaut.

24 Busa paaplaagon ko sila subong sang ginalab nga ginapalid sang hangin sang kamingawan.

25 Ini amo ang imo kapalaran, ang bahin nga gintakus sa imo gikan sa akon, nagasiling ang GINOO; bangud nga ginkalipatan mo ako, kag nagsalig sa dimatuud.

26 Busa buksan ko ang imo mga sidsid sa imo nawung, agud magagowa ang imo kahuluy-an.

27 Nakita ko ang imo mga pagpanglahi, kag ang imo mga paghirihiri, ang kahigal sang imo pagkamahilawason, kag ang imo mga kangil-aran sa kabakoloran sa mga latagon. Kailo sa imo, O Jerusalem! indi ka bala buut magmatinlo? tubtub pa bala san-o ini?

KAPITULO 14

ANG polong sang GINOO nga nag-abut kay Jeremias nahanungud sang tiggulutum.

2 Nagakalisud ang Juda, kag ang mga gawang sini nagakag-as; maitum sila nga nagahamyang sa duta; kag ang pagtuaw sang Jerusalem nagasaka.

3 Kag ang ila mga dungganon nagpadala sang ila mga magamay sa mga tubig: nagkadto sila sa mga boho, kag wala makakita sing tubig; nagpauli sila nga walay sulud ang ila mga suludlan; nahuy-an sila kag ginlibogan, kag nagpanabon sang ila mga olo.

4 Bangud nga nagpanglitik ang duta, kay walay ulan sa duta, ang mga manug-arado nahuy-an, nagpanabon sila sang ila mga olo.

5 Hoo, ang mga usa man nga babaye nag-anak sa latagon, kag nagbiya sini, bangud nga walay hilamon.

6 Kag ang mga asno nga talonon nagtindug sa mga duug nga mataas, nagpaningo-singo sila sang hangin kaangay sang mga dragon; nagdulum ang ila mga mata, bangud nga walay hilamon.

7 ś O GINOO, bisan ang amon mga kalautan nagapamatuud batok sa amon, maghimo ka sini tungud sa imo ngalan: kay ang amon mga pagtalikod madamu; nakasala kami batok sa imo.

8 O lalauman sang Israel, ang manluluwas sini sa tion sang kagamo, ngaa bala nga magmanginsubong ka sang dumuloong sa duta, kag subong sang manlalakat nga tawo nga nagahapit sa pagpabilin sa isa ka gab-i?

9 Ngaa bala magmanginsubong ka sang tawong naorongan, subong sang gamhanan nga tawo nga indi makaluwas? apang ikaw, O GINOO, yari sa tunga namon, kag ginatawag kami sa imo ngalan; dili kami pagbayai.

10 ś Amo ini ang ginasiling sang GINOO sa sining katawohan, Subong sini ang pagkaluyag nila sa paglagaw, wala nila pagpunggi ang ila mga tiil, busa ang GINOO wala nagabaton sa ila; karon dumdumon niya ang kalautan nila, kag duawon ang ila mga sala.

11 Niyan nagsiling sa akon ang GINOO, Dili ka magpangamuyo tungud sining katawohan sa kaayohan nila.

12 Kon magpuasa sila, indi ako magpamati sang ila pagtuaw; kag kon magdolot sila sing halad nga sinonog kag sang halad, indi ko sila pagbatonon: kondi papason ko sila sa espada, kag sa tiggulutum, kag sa pameste.

13 ś Niyan ako nagsiling, Ah, Ginoong DIOS! yari karon, ang mga manalagna nagasiling sa ila, Indi kamo makakita sang espada, ukon may tiggulutum kamo; kondi hatagan ko kamo sing malig-on nga paghidait sa sining duug.

14 Niyan nagsiling sa akon ang GINOO, Ang mga manalagna nagatagna sing kabutigan sa akon ngalan: wala ko pag-ipadala sila, ukon ginsogo sila, ukon nagpamolong ako sa ila: nagatagna sila sa inyo sing dimatuud nga palanan-awon kag pagpamakot, kag butang nga walay pulus, kag limbong sang ila tagiposoon.

15 Busa amo ini ang ginasiling sang GINOO nahanungud sa mga manalagna nga nagatagna sa akon ngalan, kag wala ko sila pag-ipadala, apang nagasiling sila, Ang espada kag ang tiggulutum indi mag-abut sa sining duta; Sa espada kag sa tiggulutum papason yadtong mga manalagna.

16 Kag ang katawohan nga ginatagnaan nila ipilak sa mga dalan sang Jerusalem bangud sang tiggulutum kag sang espada; kag wala sila sing bisan sin-o nga magalubung sa ila, sila, ang ila mga asawa, ukon ang ila mga anak nga lalaki, ukon ang ila mga anak nga babaye: kay iula ko sa ibabaw nila ang pagkamalaut nila.

17 ś Busa magsiling ka sa ila sining polong; Magpailig ang akon mga mata sang mga luha sa gab-i kag adlaw, kag indi sila mag-untat: kay ang ulay nga babaying anak sang akon katawohan naboong sa dakung pagkaboong, sa tama gid nga halit.

18 Kon maggowa ako sa latagon, niyan yara ang mga pinatay sa espada! kag kon magsulud ako sa siudad, niyan yara ang mga nagabalatian sa tiggulutum! hoo, ang manalagna kag ang pari nagalagaw pakadto sa duta nga wala nila makilal-i.

19 Ginsikway mo bala sing bug-os ang Juda? nagkangil-ad bala ang imo kalag sa Zion? ngaa bala ginpilas mo kami, kag walay pag-ayo nga sa amon? naghulat kami sang paghidait, apang walay kaayohan; kag sang tion sang pag-ayo, kag yari karon, kagamo!

20 Ginakilala namon, O GINOO, ang amon pagkamalaut, kag ang kalautan sang amon mga kaamayan: kay nakasala kami batok sa imo.

21 Dili kami pagkangil-ari, tungud sa imo ngalan, dili pagpakahuy-i ang trono sang imo himaya: dumduma, dili pagbungkaga ang imo katipan sa amon.

22 May dira bala sa tunga sang mga kadayawan sang mga Gentil nga makapaulan? ukon makahatag bala sing mga talithi ang mga langit? indi bala ikaw sia, O GINOO nga amon Dios? busa magahulat kami sa imo: kay ikaw naghimo sini tanan nga butang.

KAPITULO 15

NIYAN nagsiling sa akon ang GINOO, Bisan pa si Moises kag si Samuel nag-atubang sa akon, apang ang akon painoino indi maghuyug sa sining katawohan: taboga sila gikan sa itololok nakon, kag palakta sila.

2 Kag mahanabu, kon magsiling sila sa imo, Diin bala kami makadto? niyan sugiran mo sila, Amo ini ang ginasiling sang GINOO; Ang mga sa kamatayon, sa kamatayon; kag ang mga sa espada, sa espada; kag ang mga sa tiggulutum, sa tiggulutum; kag ang mga sa kabihagan, sa kabihagan.

3 Kag ako magatangdo sa ila sang apat ka bagay, nagasiling ang GINOO: ang espada sa pagpatay, kag ang mga ido sa pagkusnit, kag ang kapispisan sang langit, kag ang mga kasapatan sang duta, sa pagtukub kag sa paglaglag.

4 Kag ipasaylo ko sila pakadto sa tanan nga ginharian sang duta, bangud kay Manases nga anak nga lalaki ni Ezequias nga hari sang Juda, tungud sinang iya ginhimo sa Jerusalem.

5 Kay sin-o bala ang magakaawa sa imo, O Jerusalem, ukon sin-o bala ang magahaya sa imo? ukon sin-o bala ang magabalikid sa pagpamangkot tungud sang imo kaayohan?

6 Ikaw nagbiya sa akon, nagasiling ang GINOO, nagtalikod ka: busa untayon ko batok sa imo ang akon kamut, kag laglagon ka; sa paghinulsul ginatak-an ako.

7 Kag pahanginan ko sila nga may inugpahangin sa mga gawang sang duta; kuhaan ko sila sing mga anak, laglagon ko ang akon katawohan, sanglit wala sila nagatalikod sa ila mga dalanon.

8 Ang ila mga balo nga babaye nagdugang sa akon kapin pa sa balas sang mga dagat: gindala ko sa ila batok sa iloy sang pamatan-on nga mga lalaki ang manuglaglag sa kaodtohon: ginpatupa ko sia sing hinali sa sini, kag ang mga kakugmat sa siudad.

9 Ang nakaanak sing pito nagakagha: nabugtoan sia sang ginhawa; ang iya adlaw natunud sa adlawon pa: nahuy-an sia kag nalibogan: kag ang salin sa ila itugyan ko sa espada sa atubangan sang ila mga kaaway, nagasiling ang GINOO.

10 ś Kailo ako, iloy ko, nga gin-anak mo ako, lalaking maawayon kag lalaking masuayon sa bug-os nga duta! wala ako makapahulam nga may saka, kag wala magpahulam ang mga tawo sa akon nga may saka; apang ang tagsatagsa sa ila nagapakamalaut sa akon.

11 Ang GINOO nagsiling, Sa pagkamatuud magamaayo ang sa imo salin; sa pagkamatuud himoon ko ang kaaway nga magtratar sa imo sing maayo sa tion sang kalaut kag sa tion sang kapipit-an.

12 Balion bala sang salsalon ang salsalon sang aminhan kag ang asero?

13 Ang imo pagkabutang kag ang imo mga bahandi ihatag ko nga inagaw sa wala sing bili, kag ina tungud sang imo tanan nga sala, sa tanan mo nga ginsakpan.

14 Kag paagihon ko ikaw upud sa imo mga kaaway sa duta nga wala mo makilala: kay nagadabdab ang kalayo sa akon kaakig, nga magasonog sa inyo.

15 ś O GINOO, ikaw nakahibalo: dumduma ako, kag duawa ako, kag ipanimalus ako sa akon mga manughingabut; sa imo pagkamabinatason indi ako pagkuhaa: kilalaha nga tungud sa imo nag-antus ako sing pagpakahuya.

16 Ang imo mga polong nakit-an, kag ginkaon ko sila; kag ang imo polong kalipay sa akon kag kasadya sang akon tagiposoon: kay ginatawag ako sa imo ngalan, O GINOONG Dios sang mga kasoldadosan.

17 Wala ako maglingkod sa katilingban sang mga manug-uligyat, ukon nagkalipay; bangud sang imo kamut naglingkod ako nga isa lamang: kay ginpuno mo ako sing kaalipungut.

18 Ngaa bala nga dalayon ang akon kasakit, kag ang akon pilas dimabolong, nga nagadumili nga ayohon? manginsubong gid bala ikaw sang butigon sa akon, kag subong sang mga tubig nga nagakahubas?

19 ś Busa amo ini ang ginasiling sang GINOO, Kon ikaw magbalik, niyan papaulion ko ikaw, kag magatindug ka sa atubangan nakon: kag kon pagowaon mo ang bilidhon sa talamayon, manginsubong ka sang akon baba: pabalika sila sa imo; apang indi ka magbalik sa ila.

20 Kag himoon ko ikaw sa sini nga katawohan nga kuta nga saway nga pinabakud: kag magapakig-away sila sa imo, apang indi sila makalandas sa imo: kay ako nagaupud sa imo sa pagluwas sa imo kag sa pagbawi sa imo, nagasiling ang GINOO.

21 Kag bawion ko ikaw sa kamut sang malauton, kag tubson ko ikaw sa kamut sang makakulugmat.

KAPITULO 16

ANG polong sang GINOO nag-abut man sa akon, nga nagasiling,

2 Dili ka magpangasawa, ukon mag-anak sing mga lalaki ukon mga babaye sa sini nga duug.

3 Kay amo ini ang ginasiling sang GINOO nahanungud sa mga anak nga lalaki kag sa mga anak nga babaye nga natawo sa sini nga duug, kag nahanungud sa ila mga iloy nga nag-anak sa ila, kag nahanungud sa ila mga amay nga nagpanganak sa ila sa sini nga duta;

4 Mapatay sila sa makahalanusbo nga mga kamatayon; indi sila paghayaan; kag indi pag-ipanglubung sila; kondi manginsubong sila sang ipot sa kadaygan sang duta: kag papason sila sang espada, kag sang tiggulutum; kag ang ila mga bangkay manginkalan-on sang kapispisan sang langit, kag sang kasapatan sang duta.

5 Kay amo ini ang ginasiling sang GINOO, Dili ka magsulud sa balay sang lalaw, ukon magkadto sa pagpanalabiton ukon hayaan sila: kay ginkuha ko ang akon paghidait sa sini nga katawohan, nagasiling ang GINOO, bisan ang mahigugmaon nga kaayo kag mga kalooy.

6 Tingub ang dalagku kag ang magamay mapatay sa sini nga duta: indi sila pag-ilubung, ukon hayaan sila sang mga tawo, ukon magpilas sang ila kaugalingon, ukon magpabulug tungud sa ila:

7 Kag wala man sing tawo nga magakusnit sang ila kaugalingon tungud sa ila sa lalaw, sa paglipay sa ila tungud sa mga patay; kag wala sing mga tawo nga magapainum sa ila sang tagayan sang paglipay tungud sa ila amay ukon tungud sa ila iloy.

8 Dili ka man magsulud sa balay sang sinalosalo, sa paglingkod upud sa ila sa pagkaon kag sa pag-inum.

9 Kay amo ini ang ginasiling sang GINOO sang mga kasoldadosan, ang Dios sang Israel; Yari karon, pauntaton ko sa sini nga duug sa atubangan sang inyo mga mata, kag sa inyo mga adlaw, ang tingug sang kalipay, kag ang tingug sang kinasadya, ang tingug sang nobyo, kag ang tingug sang nobya.

10 ś Kag mahanabu, kon magpahayag ka sa sini nga katawohan sini tanan nga polong, kag magsiling sila sa imo, Ngaa bala nga nagmitlang ang GINOO sini tanan nga daku nga kalaut batok sa amon? ukon ano bala ang amon kalautan? ukon ano bala ang sala namon nga ginhimo namon batok sa GINOO nga amon Dios?

11 Niyan magsiling ka sa ila, Bangud nga ang inyo mga kaamayan nagbiya sa akon, nagasiling ang GINOO, kag nagsonod sa iban nga mga dios, kag nag-alagad sa ila, kag nagsimba sa ila, kag nagbiya sa akon, kag wala magbantay sang akon kasogoan;

12 Kag kamo naghimo sing malaut labaw pa sa inyo mga kaamayan; kay, yari karon, kamo nagalakat ang tagsatagsa sono sa painoino sang iya malaut nga tagiposoon, agud nga indi kamo makapamati sa akon:

13 Busa ipilak ko kamo gikan sa sini nga duta pakadto sa duta nga wala kamo makakilala, kamo ukon ang inyo mga kaamayan; kag didto magaalagad kamo sa iban nga mga dios sa adlaw kag gab-i; diin indi ako magpakita sa inyo sing kaayohan.

14 ś Busa, yari karon, nagaabut ang mga adlaw, nagasiling ang GINOO, nga indi na pag-isiling, Ang GINOO nagakabuhi, nga nagpataklad sang kaanakan sang Israel gikan sa duta sang Egipto;

15 Kondi, Ang GINOO nagakabuhi, nga nagpataklad sang kaanakan sang Israel gikan sa duta sang aminhan, kag gikan sa tanan nga mga duta sa diin ginsobol niya sila: kag ibalik ko sila sa ila duta nga ginhatag ko sa ila mga kaamayan.

16 ś Yari karon, magapatawag ako sing madamu nga mangingisda, nagasiling ang GINOO, kag pangisdaon nila sila; kag ugaling magapatawag ako sing madamu nga mangangayam, kag ayamon sila nila gikan sa tagsa ka bukid, kag sa tagsa ka bakolod, kag sa mga gikab sang mga dakung bato.

17 Kay ang akon mga mata yara sa tanan nila nga dalanon: wala sila matago gikan sa akon nawung, kag ang ila kalautan wala mataboni sa akon mga mata.

18 Kag sa nahauna tumbasan ko sing pilo ang ila kalautan kag ang ila sala; bangud nga gindagtaan nila ang akon duta, ginpuno nila ang akon panublion sang mga bangkay sang ila mga garuk kag makangilil-ad nga mga butang.

19 O GINOO, akon kusug, kag akon kuta, kag akon dalangpan sa adlaw sang kapipit-an, sa imo magaabut ang mga Gentil gikan sa mga ukbung sang duta, kag magasiling, Sa pagkamatuud ang amon mga kaamayan nagpanubli sing kabutigan, kadayawan, kag mga butang nga sa ila wala sing kapuslanan.

20 Magahimo bala ang tawo nga sa iya kaugalingon sing mga dios, kag indi mga dios sila?

21 Busa, yari karon, pakilalahon ko sila sing makaisa, pakilalahon ko sila sang akon kamut kag sang akon gahum; kag makilala nila nga ang akon ngalan amo Ang GINOO.

KAPITULO 17

ANG sala sang Juda nasulat sing pluma nga salsalon, kag sing taliwis sang diamante: natigib ini sa tapitapi sang ila tagiposoon, kag sa mga sungay sang ila mga halaran;

2 Samtang ang ila mga anak nagadumdum sang ila mga halaran kag sang ila mga puong-puong sang kakahoyan sa luyo sang mga kahoy nga malagtum, sa mataas nga mga bakolod.

3 O bukid ko sa latagon, ihatag ko nga inagaw ang imo pagkabutang kag ang tanan mo nga bahandi, kag ang imo mataas nga mga duug tungud sa sala, sa bug-os mo nga mga ginsakpan.

4 Kag ikaw, ikaw gid, indi magpadayon sa imo panublion nga ginhatag ko sa imo; kag paalagdon ko ikaw sa imo mga kaaway sa duta nga wala mo makilala: kay nagpadabdab kamo sing kalayo sa akon kaakig, nga magasonog sa gihapon.

5 ś Amo ini ang ginasiling sang GINOO; Pinapakamalaut ang tawo nga nagasalig sa tawo, kag nagahimo sang unud nga iya butkon, kag nga ang iya tagiposoon nagapalayo sa GINOO.

6 Kay manginkaangay sia sang siok sa desierto, kag indi makakita kon mag-abut ang kaayohan; kondi sia magapuyo sa kigas nga mga duug sa kamingawan, sa duta nga asin kag wala ginapuy-i.

7 Bulahan ang tawo nga nagasalig sa GINOO, kag nga ang iya paglaum amo ang GINOO.

8 Kay manginsubong sia sang kahoy nga natanum sa luyo sang mga tubig, kag nga nagapakalapkap sang iya mga gamut sa ubay sang suba, kag indi makabatyag kon mag-abut ang kainit, apang ang iya dahon manginmalagtum; kag indi maghimud-os sa tuig sang tigmala, kag indi man mag-untat sa pagpamunga.

9 ś Ang tagiposoon malimbongon labaw sa tanan nga butang, kag lakas gid kalaut: sin-o bala ang makahibalo sini?

10 Ako nga GINOO nagausisa sang tagiposoon, ako nagatilaw sang mga reinda, sa paghatag sa tagsa ka tawo sono sa iya mga dalanon, kag sono sa bunga sang iya mga hinimoan.

11 Subong sang pitaw nga nagaluub sa mga itlog, kag wala nagapabuto sa ila; amo ini ang nagaagum sing mga manggad, kag indi paagi sa matarung, sa tunga sang iya mga adlaw pagabayaan sila niya, kag sa iya katapusan manginbuangbuang sia.

12 ś Mahimayaon nga mataas nga trono kutub sa ginsuguran amo ang duug sang aton santuario.

13 O GINOO, ang paglaum sang Israel, ang tanan nga nagabiya sa imo pakahuy-an, kag ang mga nagatalikod sa akon isulat sa duta, bangud nga ginbayaan nila ang GINOO, ang tuburan sang mga tubig nga buhi.

14 Ayoha ako, O GINOO, kag magaayo ako; luwasa ako, kag maluwas ako: kay ikaw ang akon pagdayaw.

15 ś Yari karon, nagasiling sila sa akon, Diin bala ang polong sang GINOO? paabuta ini karon.

16 Nahanungud sa akon, wala gid ako maghalin sa pagkapastor nga nagasonod sa imo: kag wala ako maghandum sang kailo nga adlaw; ikaw nakahibalo: inang naggowa sa akon mga bibig matarung sa atubangan nimo.

17 Indi ka magmanginkakugmat sa akon: ikaw amo ang paglaum nakon sa adlaw sang kalaut.

18 Pakaligban sila nga nagahingabut sa akon, apang indi ako pagpakaligban: pahangaw-i sila, apang indi ako pagpahangaw-i: dalha sa ila ang adlaw sang kalaut, kag laglaga sila sa pilo nga kalaglagan.

19 ś Amo ini ang ginsiling sa akon sang GINOO; Lakat kag tindug sa gawang sang mga anak sang katawohan, diin nagasulud ang mga hari sang Juda, kag diin sila nagaagi pagowa, kag sa tanan nga mga gawang sang Jerusalem;

20 Kag isiling sa ila, Pamatii ninyo ang polong sang GINOO, kamo nga mga hari sang Juda, kag bug-os nga Juda, kag tanan nga pumuluyo sang Jerusalem, nga nagaagi pasulud sa sini nga mga gawang:

21 Amo ini ang ginasiling sang GINOO; Andam kamo sa inyo kaugalingon, kag dili magdala sing lulan sa adlaw nga sabbath, ukon magdala sini pasulud sa mga gawang sang Jerusalem;

22 Kag dili magpagowa sing lulan sa inyo mga balay sa adlaw nga sabbath, kag dili kamo maghimo sing bisan anong buluhaton, kondi pakabalaana ninyo ang adlaw nga sabbath, subong sa ginsogo ko sa inyo mga kaamayan.

23 Apang wala sila magtuman, ukon maglingig sang ila idulungug, kondi nagpakatingkoyan sila, agud nga indi sila makabati, kag indi makabaton sing pagtudlo.

24 Kag mahanabu, kon magpamati kamo sing makugihon sa akon, nagasiling ang GINOO, nga indi magpasulud sing lulan paagi sa mga gawang sining siudad sa adlaw nga sabbath, kondi sa pagpakabalaan sang adlaw nga sabbath, nga indi maghimo sing buluhaton sa iya;

25 Niyan magasulud sa mga gawang sining siudad ang mga hari kag ang mga prinsipe nga nagalingkod sa trono ni David, nga nagasakay sa mga kangga kag sa mga kabayo, sila, kag ang ila mga prinsipe, ang mga tawo sang Juda, kag ang mga pumuluyo sang Jerusalem: kag ining siudad magapabilin sa gihapon.

26 Kag magaabut sila gikan sa mga siudad sang Juda, kag gikan sa mga duug palibut sang Jerusalem, kag gikan sa duta sang Benjamin, kag gikan sa kapatagan, kag gikan sa kabukiran, kag gikan sa bagatnan, nga nagadala sing mga halad nga sinonog, kag mga halad, kag mga halad nga kalan-on, kag incienso, kag nagadala sing mga halad sa pagdayaw, sa balay sang GINOO.

27 Apang kon indi kamo magpamati sa akon sa pagpakabalaan sang adlaw nga sabbath, kag indi magdala sing lulan, nga nagasulud sa mga gawang sang Jerusalem sa adlaw nga sabbath; niyan magapadabdab ako sing kalayo sa mga gawang sini, kag magalamon ini sang mga palacio sang Jerusalem, kag indi ini mapalong.

KAPITULO 18

ANG polong nga nag-abut kay Jeremias gikan sa GINOO, nga nagasiling,

2 Tindug, kag dulhog pakadto sa balay sang maninihon, kag didto pabation ko ikaw sang akon mga polong.

3 Niyan nagdulhog ako pakadto sa balay sang maninihon, kag, yari karon, naghimo sia sing buluhaton sa mga aliling.

4 Kag ang suludlan nga ginhimo niya sa lunang nasamad sa kamut sang maninihon: gani ginhimo niya ini liwat nga iban nga suludlan, sono sa minamaayo sa maninihon nga himoon ini.

5 Niyan nag-abut sa akon ang polong sang GINOO, nga nagasiling,

6 O panimalay sang Israel, indi bala ako makahimo sa inyo subong sining maninihon? nagasiling ang GINOO. Yari karon, subong nga ang lunang yara sa kamut sang maninihon, amo ini kamo sa akon kamut, O panimalay sang Israel.

7 Sa ano nga tion magpamolong ako nahanungud sa pungsud, kag nahanungud sa ginharian, sa paggabut, kag sa paglumpag, kag sa paglaglag sini;

8 Kon inang pungsud, nga batok sa iya nagpamolong ako, magtalikod sa ila kalaut, ako magahinulsul sang malaut nga ginhunahuna ko nga himoon sa ila.

9 Kag sa anong tion magpamolong ako nahanungud sa pungsud, kag nahanungud sa ginharian, sa pagpatindug kag pagtanum sini;

10 Kon maghimo ini sang malaut sa akon itololok, nga wala sini ginatuman ang akon tingug, niyan magahinulsul ako sang maayo, nga ginsiling ko nga himoon ko sa ila kaayohan.

11 ś Busa karon lakat, ipamolong sa mga tawo sang Juda, kag sa mga pumuluyo sang Jerusalem, nga nagasiling, Amo ini ang ginasiling sang GINOO; Yari karon, ako nagahuman sing malaut batok sa inyo, kag nagapahito ako batok sa inyo sing padugi: magbalik kamo karon, ang tagsatagsa gikan sa iya malaut nga dalanon, kag kaayoha ang inyo mga dalanon kag ang inyo mga binuhatan.

12 Kag nagsiling sila, Wala na sing paglaum: apang magalakat kami sono sa amon kaugalingon nga mga padugi, kag magahimo kami ang tagsatagsa sono sa painoino sang iya malaut nga tagiposoon.

13 Busa amo ini ang ginasiling sang GINOO; Pamangkot kamo karon sa mga pagano, kon sin-o ang nakabati sang subong nga mga butang: ang ulay sang Israel nakahimo sang makasiligning butang.

14 Pagabayaan bala sang tawo ang nieve sang Libano nga nagagikan sa dakung bato sang latagon? ukon pagabayaan bala ang mga tubig nga matugnaw nga nagailig nga gikan sa iban nga duug?

15 Kay ang akon katawohan nalipat sa akon, nagsonog sila sing incienso sa kadayawan, kag ginpasandad nila sila sa ila mga dalanon, sa mga dalanon nga dumaan, sa paglakat sa mga banas, sa dalan nga wala mapataas;

16 Sa paghimo sang ila duta nga mamingaw, kag dayon nga panagutsutan; ang tagsatagsa nga nagaligad mabulung, kag magalungolungo sang iya olo.

17 Paaplaagon ko sila subong sang sa hangin nga sidlangan sa atubangan sang kaaway; pakitaan ko sila sang likod, kag indi sang nawung, sa adlaw sang ila kalalat-an.

18 ś Niyan nagsiling sila, Kari, kag magpahito kita sing mga padugi batok kay Jeremias; kay ang kasogoan indi mawala gikan sa pari, ukon ang laygay gikan sa maalam, ukon ang polong gikan sa manalagna. Kari, kag pilason naton sia sang dila, kag indi kita magsapak sang bisan ano sang iya mga polong.

19 Talupangda ako, O GINOO, kag pamatii ang tingug sang mga nagasumpung sa akon.

20 Ibalus bala ang malaut tungud sa maayo? kay nagkutkut sila sing boho tungud sa akon kalag. Panumduma nga ako nagtindug sa imo atubangan sa pagpamolong sing maayo tungud sa ila, kag sa pagpahilayo sa ila sang imo kasingkal.

21 Busa itugyan ang ila mga anak sa tiggulutum, kag ipaula ang ila dugo paagi sa gahum sang espada; kag pawad-i sing mga anak ang ila mga asawa, kag pabaloha; kag ipapatay sa kamatayon ang ila mga lalaki; ang ila mga pamatan-on nga lalaki ipapatay sa espada sa inaway.

22 Ipabati ang pagsinggit gikan sa ila mga balay, kon magdala ka sing hinali sing kabon sa ila: kay nagkutkut sila sing boho sa pagdakup sa akon, kag nagtago sing mga siod nga sa akon mga tiil.

23 Apang, GINOO, ikaw nakahibalo sang bug-os nilang laygay batok sa akon sa pagpatay sa akon: dili pagpatawara ang ila kalautan, ukon pagpanasa ang ila sala gikan sa imo itololok, kondi pagpukanon sila sa atubangan mo; himoa sa ila ang subong sini sa tion sang imo kaakig.

KAPITULO 19

AMO INI ang ginasiling sang GINOO, Lakat kag bakal sing tibud nga daga sang maninihon, kag dala sa mga tigulang sang katawohan, kag sa mga tigulang sang mga pari;

2 Kag maggowa pakadto sa nalupyakan sang anak nga lalaki ni Hinom, nga yara sa salamputan sang gawang nga sidlangan, kag ibantala didto ang mga polong nga akon isugid sa imo,

3 Kag isiling, Pamatii ninyo ang polong sang GINOO, O mga hari sang Juda, kag mga pumuluyo sang Jerusalem; Amo ini ang ginasiling sang GINOO sang mga kasoldadosan, ang Dios sang Israel; Yari karon, dalhon ko ang malaut sa sining duug, nga ang bisan sin-o nga makabati, ang iya mga dulunggan tinglan.

4 Bangud nga ginbayaan nila ako, kag ginpakadumuloong ining duug, kag nagsonog sing incienso sa sini sa iban nga mga dios, nga wala nila makilala ukon sang ila mga kaamayan, ukon sang mga hari sang Juda, kag nagpuno sining duug sang dugo sang mga inocente;

5 Nagpatindug man sila sing mataas nga mga duug kay Baal, sa pagsonog sa kalayo sang ila mga anak nga lalaki nga mga halad nga sinonog kay Baal, nga wala ko pag-isogo, ukon pag-ihambal ini, ukon nag-abut ini sa akon painoino:

6 Busa, yari karon, nagaabut ang mga adlaw, nagasiling ang GINOO, nga ining duug indi na pagtawgon nga Topet, ukon Ang nalupyakan sang anak nga lalaki ni Hinom, kondi Ang nalupyakan sang palatyan.

7 Kag ipakawalay pulus ko ang laygay sang Juda kag sang Jerusalem sa sining duug; kag ipapukan ko sila sa espada sa atubangan sang ila mga kaaway, kag sa mga kamut sang mga nagatinguha sang ila mga kabuhi: kag ihatag ko ang ila mga bangkay nga kalan-on sa kapispisan sang langit, kag sa kasapatan sang duta.

8 Kag himoon ko ini nga siudad nga mamingaw, kag panagutsutan; ang tagsatagsa nga nagaagi sa iya mabulung kag managutsut bangud sang tanan nga mga kalalat-an sini.

9 Kag ipakaon ko sa ila ang unud sang ila mga anak nga lalaki kag ang unud sang ila mga anak nga babaye, kag sila magakaon ang tagsatagsa sang unud sang iya abyan sa pagkibon kag sa kalisdanan, nga ipakalisud sa ila sang ila mga kaaway kag sang mga nagatinguha sang ila kabuhi.

10 Niyan boongon mo ang tibud sa itololok sang mga tawo nga nagaupud sa imo,

11 Kag magsiling sa ila, Amo ini ang ginasiling sang GINOO sang mga kasoldadosan; Sa amo gid boongon ko ining katawohan kag ining siudad, subong sang isa nga nagaboong sang suludlan sang maninihon, nga indi na mauli nga bilog: kag sila magalubung sa ila sa Topet, tubtub nga walay duug nga malubngan.

12 Amo ini ang himoon ko sa sining duug, nagasiling ang GINOO, kag sa mga pumuluyo sini, kag sa paghimo sini nga siudad subong sang Topet:

13 Kag ang mga balay sang Jerusalem, kag ang mga balay sang mga hari sang Juda, madagtaan subong sang duug sang Topet, bangud sang tanan nga balay nga sa ibabaw sang ila mga atop nagsonog sila sing incienso sa bug-os nga panong sang langit, kag nag-ula sing mga halad nga ilimnon sa iban nga mga dios.

14 Niyan nag-abut si Jeremias gikan sa Topet, diin ginpadala sia sang GINOO sa pagtagna; kag nagtindug sia sa luwang sang balay sang GINOO; kag nagsiling sa bug-os nga katawohan,

15 Amo ini ang ginasiling sang GINOO sang mga kasoldadosan, ang Dios sang Israel; Yari karon, dalhon ko sa sining siudad kag sa tanan niyang mga banwa ang bug-os nga malaut nga ginmitlang ko batok sini, bangud nga nagtingkoyan sila, agud nga indi sila magpamati sang akon mga polong.

KAPITULO 20

KARON si Pasur, nga anak nga lalaki ni Imer, nga pari, nga puno nga manugdumala man sa balay sang GINOO, nakabati nga si Jeremias nagpanagna sini nga mga butang.

2 Niyan ginbunal ni Pasur si Jeremias nga manalagna, kag ginbutang sia sa mga pandug nga yara sa naibabaw nga gawang ni Benjamin, nga yara sa luyo sang balay sang GINOO.

3 Kag nahanabu sa madason nga adlaw, nga ginkuha ni Pasur si Jeremias sa mga pandug. Niyan nagsiling sa iya si Jeremias, Ang GINOO wala magtawag sang imo ngalan nga Pasur, kondi Magor-missabib.

4 Kay amo ini ang ginasiling sang GINOO, Yari karon, himoon ko ikaw nga kakugmat sa imo kaugalingon, kag sa tanan nimo nga abyan: kag mapukan sila paagi sa espada sang ila mga kaaway, kag ang imo mga mata makakita sini: kag itugyan ko ang bug-os nga Juda sa kamut sang hari sang Babilonia, kag dalhon sila niya nga bihag sa Babilonia, kag patyon sila sa espada.

5 Labut pa, itugyan ko ang tanan nga kusug sini nga siudad, kag ang tanan nga kinabudlayan sini, kag ang tanan nga bilidhon nga butang sini, kag ang tanan nga bahandi sang mga hari sang Juda itugyan ko sa kamut sang ila mga kaaway, nga magaati sa ila, kag magakuha sa ila, kag magadala sa ila sa Babilonia.

6 Kag ikaw, Pasur, kag ang tanan nga nagapuyo sa imo balay magakadto sa kabihagan: kag magakadto ka sa Babilonia, kag didto mapatay ka, kag ilubung ka didto, ikaw, kag ang tanan mo nga abyan, nga sa ila nagtagna ka sing kabutigan.

7 ś O GINOO, ikaw nagdaya sa akon, kag nadayaan ako: ikaw makusug pa sa akon, kag naglandas: nanginyuyubitan ako adlawadlaw, ang tagsatagsa nagauligyat sa akon.

8 Kay kutub nga nagpamolong ako, nagsinggit ako, nagsinggit ako nahanungud sang palugus kag kalaglagan; bangud nga ang polong sang GINOO nanginkahuluy-an sa akon, kag yuyubitan, adlawadlaw.

9 Niyan nagsiling ako, Indi na ako magsambit sa iya, ukon magpamolong pa sa iya ngalan. Apang ang iya polong sa akon tagiposoon subong sang kalayo nga nagadabdab nga natakpan sa akon mga tul-an, kag ginlapyo ako sa pagbatas, kag wala ako makapugung.

10 ś Kay nakabati ako sang linibak sang kadamuan, ang kahadluk yara sa tagsa ka luyo. Panugiron, nagasiling sila, kag isugid namon ini. Ang tanan ko nga naandan nga mga abyan nagbantay kon mapukan ako, nga nagasiling, Ayhan mabuyok sia, kag magalandas kita batok sa iya, kag magatimalus kita sa iya.

11 Apang ang GINOO upud sa akon subong nga isa nga gamhanan nga makakulugmat: busa ang mga manughingabut sa akon masandad, kag indi sila maglandas: pakahuy-an sila sing daku gid; kay indi sila magauswag: ang ila dayon nga pagsaligmato indi gid malipatan.

12 Apang, O GINOO sang mga kasoldadosan, nga nagatilaw sang matarung, kag nga nagatan-aw sang mga reinda kag sang tagiposoon, patan-awa ako sang imo pagtimalus sa ila: kay sa imo ginpahayag ko ang akon kahimtangan.

13 Mag-ambahan sa GINOO, dayawa ninyo ang GINOO: kay ginluwas niya ang kalag sang mga imol gikan sa kamut sang mga nagahimo sing malaut.

14 ś Pinapakamalaut ang adlaw nga natawo ako: indi pagpakamaayoha ang adlaw nga ang akon iloy nag-anak sa akon.

15 Pinapakamalaut ang tawo nga nagdala sing mga balita sa akon amay, nga nagasiling, Anak nga lalaki ang natawo sa imo; nga nagahimo sa iya nga masadya gid.

16 Kag manginsubong yadtong tawo sa mga siudad nga ginpukan sang GINOO, kag wala maghinulsul: kag pabati-a sia sang singgit sa kaagahon, kag sang sininggit sa kaodtohon;

17 Bangud nga wala niya ako pagpatya gikan sa taguangkan; ukon nga ang akon iloy nangin-akon lulubngan kuntani, kag ang iya taguangkan nagabusung sing dalayon sa akon.

18 Ngaa bala naggowa ako sa taguangkan sa pagtan-aw sang kabudlayan kag sang kasubo, nga ang akon mga adlaw maubus sa kahuya?

KAPITULO 21

ANG polong gikan sa GINOO nga nag-abut kay Jeremias, sang si haring Sedequias nagpadala sa iya kay Pasur nga anak nga lalaki ni Malquias, kag kay Sofonias nga anak nga lalaki ni Maasias, ang pari, nga nagasiling,

2 Pamangkot sa GINOO tungud sa aton, ginaampo ko sa imo; kay si Nabucodonosor nga hari sang Babilonia nagapakig-away batok sa aton; ayhan ang GINOO magahisayo sa aton sono sa tanan niya nga katingalahan nga mga binuhatan, sa bagay nga sia magapalayo sa aton.

3 ś Niyan si Jeremias nagsiling sa ila, Amo ini ang isiling ninyo kay Sedequias:

4 Amo ini ang ginasiling sang GINOONG Dios sang Israel; Yari karon, pabalikon ko ang mga hinganiban sang inaway nga yara sa inyo mga kamut, nga sa sini nagaaway kamo batok sa hari sang Babilonia, kag batok sa mga Caldeanhon, nga nagakibon sa inyo sa gowa sang mga kuta, kag tiponon ko sila sa tunga sini nga siudad.

5 Kag ako akon magapakig-away batok sa inyo sa kamut nga inuntay kag sa butkon nga makusug, sa kaakig, kag sa kaalipungut, kag sa daku nga kasingkal.

6 Kag samaron ko ang mga pumuluyo sini nga siudad, tingub ang tawo kag sapat: mapatay sila sa daku nga pameste.

7 Kag sa olihi, nagasiling ang GINOO, itugyan ko si Sedequias nga hari sang Juda, kag ang iya mga alagad, kag ang katawohan, kag ang mabilin sa sini nga siudad gikan sa pameste, gikan sa espada, kag gikan sa tiggulutum, sa kamut ni Nabucodonosor nga hari sang Babilonia, kag sa kamut sang ila mga kaaway, kag sa kamut sinang mga nagatinguha sang ila kabuhi: kag magalabo sia sa ila sa sulab sang espada; indi sia magpasaylo sa ila, ukon maawa, ukon malooy.

8 ś Kag isiling mo sa sini nga katawohan, Amo ini ang ginasiling sang GINOO; Yari karon, ginabutang ko sa atubangan ninyo ang dalan sang kabuhi, kag ang dalan sang kamatayon.

9 Ang nagapabilin sa sini nga siudad mapatay sa espada, kag sa tiggulutum, kag sa pameste: apang ang nagagowa, kag nagasaylo sa mga Caldeanhon nga nagakibon sa inyo, sia magakabuhi, kag ang iya kabuhi mangin-inagaw sa iya.

10 Kay ginapahamtang ko ang akon nawung batok sa sini nga siudad nga sa malaut, kag indi nga sa maayo, nagasiling ang GINOO: pagaitugyan ini sa kamut sang hari sang Babilonia, kag sonogon niya ini sa kalayo.

11 ś Kag nahanungud sa panimalay sang hari sang Juda, isiling, Pamatii ninyo ang polong sang GINOO;

12 O panimalay ni David, amo ini ang ginasiling sang GINOO; Hikuta ang katarungan sa kaagahon, kag luwasa sia nga inati gikan sa kamut sang manugpigus, basi nga ang akon kaalipungut maggowa kaangay sang kalayo, kag magdabdab nga wala sing makapalong, bangud sang kalaut sang inyo mga hinimoan.

13 Yari karon, batok ako sa imo, O pumuluyo sang nalupyakan, kag dakung bato sang kapatagan, nagasiling ang GINOO; kamo nga nagasiling, Sin-o bala ang magadulhog batok sa amon? ukon sin-o bala ang magasulud sa amon mga puluy-an?

14 Apang ako magasilot sa inyo sono sa bunga sang inyo mga hinimoan, nagasiling ang GINOO: kag padabdabon ko ang kalayo sa talon sini, kag lamonon sini ang tanan nga yara sa palibut sini.

KAPITULO 22

AMO INI ang ginasiling sang GINOO; Dulhog ka sa panimalay sang hari sang Juda, kag ipamolong didto ini nga polong,

2 Kag isiling, Pamatii ang polong sang GINOO, O hari sang Juda, nga nagalingkod sa trono ni David, ikaw, kag ang imo mga alagad, kag ang imo katawohan nga nagasulud paagi sini nga mga gawang:

3 Amo ini ang ginasiling sang GINOO; Maghikot kamo sing katarungan kag pagkamatarung, kag luwasa sia ang hinublasan gikan sa kamut sang manugpigus: kag dili maghimo sing malain, dili maghimo sang kalugusan sa dumuloong, sa ilo sa amay, ukon sa balo nga babaye, kag dili magpaagay sing dugo nga inocente sa sining duug.

4 Kay kon himoon ninyo ini nga butang sa pagkamatuud, niyan masulud sa mga gawang sini nga balay ang mga hari nga nagalingkod sa trono ni David, nga nagasakay sa mga kangga kag sa mga kabayo, sia, kag ang iya mga alagad, kag ang iya katawohan.

5 Apang kon indi kamo magpamati sini nga mga polong, nagasumpa ako sa akon kaugalingon, nagasiling ang GINOO, nga ini nga balay manginmamingaw.

6 Kay amo ini ang ginasiling sang GINOO nahanungud sa balay sang hari sang Juda; Ikaw amo ang Galaad sa akon, kag ang olo sang Libano: apang sa pagkamatuud himoon ko ikaw nga kamingawan, kag mga siudad nga wala ginapuy-i.

7 Kag magaaman ako sing mga manuglaglag batok sa imo, ang tagsatagsa may iya nga mga hinganiban: kag pudlon nila ang imo mga cedro nga pinili, kag ipilak sila sa kalayo.

8 Kag ang madamu nga pungsud magaagi sa sini nga siudad, kag sila magasiling ang tagsa ka tawo sa iya isigkatawo, Ngaa bala nga amo ini ang ginhimo sang GINOO sa sini nga daku nga siudad?

9 Niyan magasabat sila, Bangud nga ginbayaan nila ang katipan sang GINOO nga ila Dios, kag nagsimba sa iban nga mga dios, kag nag-alagad sa ila.

10 ś Dili kamo maghibi tungud sa patay, ukon maghaya sa iya: kondi maghibi sing tama tungud sa nagataliwan: kay indi na sia magbalik, ukon makakita sang iya duta nga natawohan.

11 Kay amo ini ang ginasiling sang GINOO nahanungud kay Sallum nga anak nga lalaki ni Josias, hari sang Juda, nga naghari sa tal-us ni Josias nga iya amay, nga naggowa sa sini nga duug; Indi na gid sia magbalik diri:

12 Kondi mapatay sia sa duug diin gindala nila sia nga bihag, kag indi na makakita sini nga duta.

13 ś Kailo sa nagapatindug sang iya balay tungud sa pagkadimatarung, kag sang iya mga hulut sa dikatarungan; nga nagagamit sang pag-alagad sang iya isigkatawo sa wala sing sohol, kag wala nagahatag sa iya sang bayad sa iya pagpangabudlay;

14 Nga nagasiling, Magapatindug ako nga sa akon sing balay nga masangkad kag mga malapad nga mga hulut, kag ginahimoan sia sing mga bintana; kag ginadagpakan ini sing cedro, kag ginapintahan sang vermilion.

15 Magahari ka bala, bangud nga ikaw sa sulud nalibutan sang cedro? wala bala magkaon kag mag-inum ang imo amay, kag maghimo sang katarungan kag pagkamatarung, kag niyan nanginmaayo sa iya?

16 Sia naghukom sang kasaba sang imol kag sang nawad-an; niyan nanginmaayo sa iya: indi bala ini sa pagkilala sa akon? nagasiling ang GINOO.

17 Apang ang imo mga mata kag ang imo tagiposoon indi amo kondi tungud sa imo pagkamahamkonon, kag sa pagpaagay sing dugo nga inocente, kag sa pagpigus, kag sa palugus, sa paghimo sini.

18 Busa amo ini ang ginasiling sang GINOO nahanungud kay Jehoaquim nga anak nga lalaki ni Josias, hari sang Juda; Indi sila magapanalabiton tungud sa iya, nga nagasiling, Ah, utud ko nga lalaki! ukon Ah, utud ko nga babaye! indi sila magapanalabiton tungud sa iya, nga nagasiling, Ah, ginoo! ukon, Ah, ang iya himaya!

19 Ilubung sia subong sang paglubung sang asno, nga sagnoyon kag ipilak sa unhan sang mga gawang sang Jerusalem.

20 ś Taklad ka sa Libano, kag magsinggit; kag bayawa ang imo tingug sa Basan, kag singgit ka kutub sa mga alagyan: kay ang tanan mo nga kahagugma ginalaglag.

21 Nagpamolong ako sa imo sa kauswagan mo; apang nagsiling ka, Indi ako magpamati. Amo ini ang imo kinabatasan kutub sa imo pagkapamatan-on, nga wala ka magtuman sang akon tingug.

22 Ang hangin magalamon sang tanan mo nga mga pastor, kag ang imo mga kahagugma bihagon: niyan sa pagkamatuud mahuy-an kag malibogan ka tungud sang tanan mo nga pagkamalaut.

23 O pumuluyo sang Libano, nga nagapugad sa mga cedro, daw ano ka makaalawa ka kon mag-abut sa imo ang mga kasakit, ang kasakit subong sang babaye nga ginasakitan!

24 Sa nagakabuhi ako, nagasiling ang GINOO, bisan si Conias nga anak nga lalaki ni Jehoaquim nga hari sang Juda singsing nga inugpat-in sang akon kamut nga too, apang gikan didto gabuton ko ikaw;

25 Kag itugyan ko ikaw sa kamut sang mga nagatinguha sang imo kabuhi, kag sa kamut sang imo ginakahadlukan, bisan sa kamut ni Nabucodonosor nga hari sang Babilonia, kag sa kamut sang mga Caldeanhon.

26 Kag ipilak ko ikaw, kag ang imo iloy nga nag-anak sa imo, sa iban nga duta, nga wala ninyo matawohi; kag didto magakalamatay kamo.

27 Apang sa duta nga ginahandum nila nga balikan, didto indi na sila magbalik.

28 Ini bala nga tawo si Conias talamayon nga diosdios nga binoong? suludlan bala sia nga wala sing kahamuut? ngaa bala ginapilak sila, sia kag ang iya kaliwat, kag ginapilak sa duta nga wala nila makilala?

29 O duta, duta, duta, pamatii ang polong sang GINOO.

30 Amo ini ang ginasiling sang GINOO, Isulat ninyo ini nga tawo nga wala sing anak, tawo nga indi mag-uswag sa iya mga adlaw: kay wala gid sing tawo sa iya kaliwat nga magauswag, nga nagalingkod sa trono ni David, kag nagagahum sa Juda.

KAPITULO 23

KAILO sa mga pastor nga nagalaglag kag nagapaaplaag sang mga carnero sang akon halalban! nagasiling ang GINOO.

2 Busa amo ini ang ginasiling sang GINOONG Dios sang Israel batok sa mga pastor nga nagapahalab sang akon katawohan; Ginpaaplaag ninyo ang akon panong, kag gintabog sila, kag wala magduaw sa ila: yari karon, iduaw ko sa inyo ang kalaut sang inyo mga hinimoan, nagasiling ang GINOO.

3 Kag tiponon ko ang salin sang akon panong gikan sa tanan nga duta diin ginsobol ko sila, kag ibalik ko sila sa ila mga toril; kag magamabungahon sila kag magabuad.

4 Kag magabutang ako sing mga manugpahalab sa ibabaw nila nga magapahalab sa ila: kag indi na sila mahadluk, ukon mahangawa, kag walay sa ila nga makulang, nagasiling ang GINOO.

5 ś Yari karon, nagaabut ang mga adlaw, nagasiling ang GINOO, nga magabangon ako kay David sing isa ka matarung nga Sanga, kag ang isa ka Hari magahari kag magauswag, kag magahukom kag magahikot sing katarungan sa duta.

6 Sa iya mga adlaw ang Juda maluwas, kag ang Israel magapuyo sing malig-on: kag amo ini ang ngalan niya nga itawag sa iya, ANG GINOO ATON PAGKAMATARUNG.

7 Busa, yari karon, nagaabut ang mga adlaw, nagasiling ang GINOO, nga indi na sila magsiling, Ang GINOO nagakabuhi, nga nagpataklad sang kaanakan sang Israel gikan sa duta sang Egipto;

8 Kondi, Ang GINOO nagakabuhi, nga nagpataklad kag nagtuytuy sang kaliwat sang panimalay sang Israel gikan sa aminhan nga duta, kag gikan sa tanan nga mga duta diin ginsobol ko sila; kag magapuyo sila sa ila kaugalingon nga duta.

9 ś Ang akon tagiposoon sa sulud ko naboong bangud sang mga manalagna; ang tanan kong tul-an nagakurug; kaangay ako sang tawo nga hobog, kag kaangay sang tawo nga gindaug sang alak, bangud sa GINOO, kag bangud sa mga polong sang iya pagkabalaan.

10 Kay ang duta puno sang mga makihilahion; kay bangud sang pagsumpa ang duta nagakalisud; ang manami nga mga duug sang kamingawan nagmala, kag ang dalanon nila malaut, kag ang ila kusug indi matarung.

11 Kay tingub ang manalagna kag ang pari mapasipalahon; hoo, sa akon balay nakita ko ang ila pagkamalaut, nagasiling ang GINOO.

12 Busa ang ila dalanon manginsa ila subong sang madanlug nga mga dalanon sa kadudulman: tabogon sila, kag mapukan sa sini: kay magadala ako sing malaut sa ila, sa tuig sang pagduaw sa ila, nagasiling ang GINOO.

13 Kag nakakita ako sing kabuangan sa mga manalagna sang Samaria; nagtagna sila paagi kay Baal, kag nagpasayup sang akon katawohan nga Israel.

14 Nakita ko man sa mga manalagna sang Jerusalem ang makasiligning butang: nagapanglahi sila, kag nagalakat sa kabutigan: ginapabakud man nila ang mga kamut sang mga nagahimo sing malaut, agud nga wala gid sing magliso gikan sa iya pagkamalaut: tanan sila sa akon nanginsubong sang Sodoma, kag ang mga pumuluyo sini subong sang sa Gomorra.

15 Busa amo ini ang ginasiling sang GINOO sang mga kasoldadosan nahanungud sang mga manalagna; Yari karon, pakan-on ko sila sing artamisa, kag paimnon ko sila sang tubig nga apdohon: kay gikan sa mga manalagna sang Jerusalem naggowa ang pagkamapasipalahon pakadto sa bug-os nga duta.

16 Amo ini ang ginasiling sang GINOO sang mga kasoldadosan, Dili kamo magpamati sang mga polong sang mga manalagna nga nagatagna sa inyo: sila nagahimo sa inyo nga walay pulus: nagapamolong sila sing palanan-awon sang ila kaugalingon nga tagiposoon, kag indi gikan sa baba sang GINOO.

17 Nagasiling pa sila sa ila nga nagatamay sa akon, Ang GINOO nagsiling, May paghidait kamo; kag sila nagasiling sa tagsatagsa nga nagalakat sa painoino sang iya kaugalingon nga tagiposoon, Walay malaut nga maabut sa imo.

18 Kay sin-o bala ang nagtindug sa paglaygay sang GINOO, kag naghantup kag nagpamati sa iya polong? sin-o bala ang nagtanda sang iya polong, kag nakabati sini?

19 Yari karon, ang isa ka buhawi sang GINOO nagagowa nga may kaalipungut, bisan isa ka buhawi nga makakalagha: magatupa ini sing makakalagha sa olo sang malauton.

20 Ang kaakig sang GINOO indi magbalik, tubtub nga mahikot na niya, kag tubtub nga mahimo niya ang mga painoino sang iya tagiposoon: sa olihing mga adlaw mahangpan ninyo ini sing himpit.

21 Wala ko pag-ipadala ining mga manalagna, apang nagdalagan sila: ako wala magpamolong sa ila, apang nagtagna sila.

22 Apang kon nagtindug sila kuntani sa akon paglaygay, kag napabati nila kuntani ang akon katawohan sang akon mga polong, niyan napalipas nila sila kuntani gikan sa ila malaut nga dalanon, kag gikan sa kalaut sang ila mga hinimoan.

23 Dios bala ako nga malapit, nagasiling ang GINOO, kag indi Dios nga malayo?

24 May makapanago bala sa tago nga mga duug agud nga indi ko makita sia? nagasiling ang GINOO. Wala ko bala ginapuno ang langit kag ang duta? nagasiling ang GINOO.

25 Ako nakabati sang nasiling sang mga manalagna, nga nagatagna sing kabutigan sa akon ngalan, nga nagasiling, Nagdamgo ako, nagdamgo ako.

26 Tubtub bala san-o nga ini manginsa tagiposoon sang mga manalagna nga nagatagna sing kabutigan? hoo, sila mga manalagna sang paglimbong nga nagikan sa ila kaugalingon nga tagiposoon;

27 Nga nagahunahuna sa pagpalimot sa akon katawohan sang akon ngalan paagi sa ila mga damgo nga ginasugid nila, ang tagsatagsa sa iya isigkatawo, subong sang ila mga kaamayan nga nalimot sa akon ngalan tungud kay Baal.

28 Ang manalagna nga may damgo, magsugid sia sing damgo; kag ang may iya sang akon polong, magpamolong sia sang akon polong sing matutum. Ano bala ang dagami sa trigo? nagasiling ang GINOO.

29 Indi bala ang akon polong kaangay sang kalayo? nagasiling ang GINOO; kag kaangay sang palo nga nagapusa sang dakung bato?

30 Busa, yari karon, batok ako sa mga manalagna, nagasiling ang GINOO, nga nagakawat sang akon mga polong ang tagsatagsa sa iya isigkatawo.

31 Yari karon, batok ako sa mga manalagna, nagasiling ang GINOO, nga nagagamit sang ila mga dila, kag nagasiling, Sia nagasiling.

32 Yari karon, batok ako sa mga nagatagna sing mga damgo nga dimatuud, nagasiling ang GINOO, kag ginasugid ini sila, kag ginapasayup ang akon katawohan paagi sa ila mga kabutigan, kag paagi sa ila kadalas; apang wala ko sila pag-ipadala, ukon ginsogo sila: gani wala sila gid sing mahatag nga kapuslanan sa sining katawohan, nagasiling ang GINOO.

33 ś Kag kon ini nga katawohan, ukon ang manalagna, ukon ang pari, magpamangkot sa imo, nga nagasiling, Ano bala ang lulan sang GINOO? niyan magsiling ka sa ila, Ano bala nga lulan? pagabayaan ko gid kamo, nagasiling ang GINOO.

34 Kag nahanungud sang manalagna, kag sang pari, kag sang katawohan, nga magasiling, Ang lulan sang GINOO, silotan ko gid ina nga tawo kag ang iya panimalay.

35 Amo ini ang isiling ninyo, ang tagsatagsa sa iya isigkatawo, kag ang tagsatagsa sa iya utud, Ano bala ang ginsabat sang GINOO? kag, Ano bala ang ginpamolong sang GINOO?

36 Kag indi na gid ninyo pagsambiton ang lulan sang GINOO: kay ang kaugalingon nga polong sang tagsa ka tawo manginlulan niya; kay ginpatiko ninyo ang mga polong sang Dios nga buhi, sang GINOO sang mga kasoldadosan, nga Dios naton.

37 Amo ini ang isiling mo sa manalagna, Ano bala ang ginsabat sa imo sang GINOO? kag, Ano bala ang ginpamolong sang GINOO?

38 Apang sanglit kamo nagasiling, Ang lulan sang GINOO; busa amo ini ang ginasiling sang GINOO; Bangud nga ginasiling ninyo ining polong, Ang lulan sang GINOO, kag ako nagpadala sa inyo, nga nagasiling, Dili kamo magsiling, Ang lulan sang GINOO;

39 Busa, yari karon, ako, ako gid magalimot sa inyo sing bug-os, kag ako magabiya sa inyo, kag sang siudad nga ginhatag ko sa inyo kag sa inyo mga kaamayan, kag ipilak kamo palayo sa akon atubangan:

40 Kag magadala ako sa inyo sing dayon nga kahuluy-an, kag wala sing katubtuban nga kahuya, nga indi malimtan.

KAPITULO 24

ANG GINOO may ginpakita sa akon, kag, yari karon, duha ka alat sang mga higos nga nabutang sa atubangan sang templo sang GINOO, sa tapus nga si Nabucodonosor nga hari sang Babilonia nagbihag kay Jeconias nga anak nga lalaki ni Jehoaquim, hari sang Juda, kag sang mga prinsipe sang Juda, upud sang mga panday kag sang mga manugsalsal, gikan sa Jerusalem, kag gindala sila sa Babilonia.

2 Ang isa ka alat may tama gid kaayo nga mga higos, kaangay sang mga higos nga una maloto: kag ang isa pa ka alat may tama gid kalain nga mga higos, nga indi makaon, tama sila kalain.

3 Niyan nagsiling sa akon ang GINOO, Ano bala ang nakita mo, Jeremias? Kag nagsiling ako, Mga higos; ang maayo nga mga higos, tama gid kaayo; kag ang malaut, tama gid kalaut, nga indi makaon, tama sila kalaut.

4 ś Liwat ang polong sang GINOO nag-abut sa akon, nga nagasiling,

5 Amo ini ang ginasiling sang GINOO, ang Dios sang Israel; Kaangay sini nga maayo nga mga higos, kabigon ko sing subong ang mga gindala nga bihag gikan sa Juda, nga ginpagowa ko gikan sini nga duug pakadto sa duta sang mga Caldeanhon nga sa ila kaayohan.

6 Kay ipahamtang ko ang akon mga mata sa ila tungud sa kaayohan, kag ibalik ko sila sa sini nga duta: kag patindugon ko sila, kag indi sila paggub-on; kag itanum ko sila, kag indi sila paggabuton.

7 Kag hatagan ko sila sing tagiposoon sa pagkilala sa akon, nga ako amo ang GINOO: kag sila mangin-akon katawohan, kag ako mangin-ila Dios: kay sila magabalik sa akon sa bug-os nila nga tagiposoon.

8 ś Kag subong sang malaut nga mga higos, nga indi makaon, tama sila kalaut; sa pagkamatuud amo ini ang ginasiling sang GINOO, Sa amo itugyan ko si Sedequias nga hari sang Juda, kag ang iya mga prinsipe, kag ang salin sa Jerusalem, nga nabilin sa sini nga duta, kag ang mga nagapuyo sa duta sang Egipto:

9 Kag itugyan ko sila nga pagsaylohon sila pakadto sa tanan nga ginharian sang duta nga sa kasamaran nila, nga mangin kahuluy-an kag hulubaton, ululigyaton kag pagpakamalaut, sa tanan nga duug diin sobolon ko sila.

10 Kag ipadala ko ang espada, ang tiggulutum, kag ang pameste, sa tunga nila, tubtub nga maubus sila gikan sa duta nga ginhatag ko sa ila kag sa ila mga kaamayan.

KAPITULO 25

ANG polong nga nag-abut kay Jeremias nahanungud sa tanan nga katawohan sang Juda, sa ikap-at nga tuig ni Jehoaquim nga anak nga lalaki ni Josias, hari sang Juda, nga amo ang nahauna nga tuig ni Nabucodonosor nga hari sang Babilonia;

2 Nga ginpamolong ni Jeremias nga manalagna sa tanan nga katawohan sang Juda, kag sa tanan nga pumuluyo sang Jerusalem, nga nagasiling,

3 Kutub sa ikapulo kag tatlo nga tuig ni Josias nga anak nga lalaki ni Amon, hari sang Juda, tubtub sini nga adlaw, sa sini nga duha ka pulo kag tatlo ka tuig, nag-abut sa akon ang polong sang GINOO, kag nagpamolong ako sa inyo, nga nagabangon sing aga pa kag nagapamolong; apang wala kamo magpamati.

4 Kag ang GINOO nagpadala sa inyo sang tanan niya nga alagad nga mga manalagna, nga nagabangon sing aga pa kag nagapadala sa ila; apang wala kamo magpamati, ukon maglingig sang inyo idulungug sa pagpamati.

5 Sila nagsiling, Magbiya kamo karon, ang tagsatagsa, sa iya malaut nga dalanon, kag sa kalaut sang inyo mga binuhatan, kag magpuyo sa duta nga ginhatag sang GINOO sa inyo kag sa inyo mga kaamayan sa gihapon kag sa walay katapusan:

6 Kag dili magsonod sa iban nga mga dios sa pag-alagad sa ila, kag sa pagsimba sa ila, kag dili ako pagpaakiga sa mga binuhatan sang inyo mga kamut; kag indi ako magsamad sa inyo.

7 Apang wala kamo magpamati sa akon, nagasiling ang GINOO; agud nga mapaakig ninyo ako sa mga binuhatan sang inyo mga kamut sa inyo kaugalingon nga kasamaran.

8 ś Busa amo ini ang ginasiling sang GINOO sang mga kasoldadosan; Bangud nga wala kamo magpamati sa akon mga polong,

9 Yari karon, ipadala ko kag kuhaon ang tanan nga panimalay sang aminhan, nagasiling ang GINOO, kag si Nabucodonosor nga hari sang Babilonia, nga akon alagad, kag dalhon sila batok sini nga duta, kag batok sa mga pumuluyo sini, kag batok sini tanan nga pungsud sa palibut, kag laglagon ko sila sing bug-os, kag himoon sila nga kabulungan, kag panagutsutan, kag dayon nga mga kamingaw.

10 Labut pa kuhaon ko sa ila ang tingug sang kasadya, kag ang tingug sang kalipay, ang tingug sang nobyo, kag ang tingug sang nobya, ang kagahud sang mga galingan, kag ang kapawa sang kandila.

11 Kag ini nga bug-os nga duta manginmamingaw, kag kabulungan; kag magaalagad ining mga pungsud sa hari sang Babilonia sing kapitoan ka tuig.

12 ś Kag mahanabu, kon matuman ang kapitoan ka tuig, nga silotan ko ang hari sang Babilonia, kag ina nga pungsud, nagasiling ang GINOO, tungud sa ila kalautan, kag ang duta sang mga Caldeanhon, kag himoon ko ini nga mga mamingaw sa gihapon.

13 Kag dalhon ko sa sina nga duta ang tanan ko nga mga polong nga ginmitlang ko batok sa sini, ang tanan nga nasulat sa sini nga libro, nga gintagna ni Jeremias batok sa tanan nga pungsud.

14 Kay madamu nga mga pungsud kag dalagku nga mga hari ang magapaalagad man sa ila: kag tumbasan ko sila sono sa ila mga binuhatan, kag sono sa mga buhat sang kaugalingon nila nga mga kamut.

15 ś Kay amo ini ang ginasiling sang GINOONG Dios sang Israel sa akon; Kuhaa sa akon kamut ang tagayan sang alak sining kaalipungut, kag paimna sini ang tanan nga pungsud nga padalhan ko sa imo.

16 Kag magainum sila, kag magadulingduling sila, kag magabuangbuang, bangud sang espada nga ipadala ko sa ila.

17 Niyan ginkuha ko ang tagayan sa kamut sang GINOO, kag ginpainum ang tanan nga pungsud nga ginpadalhan sa akon sang GINOO:

18 Nga amo, ang Jerusalem, kag ang mga siudad sang Juda, kag ang mga hari sini, kag ang mga prinsipe sini, sa paghimo sa ila nga mamingaw, nga kabulungan, nga panagutsutan, kag pagpakamalaut; subong sang sa sini nga adlaw;

19 Si Faraon nga hari sang Egipto, ang iya mga alagad, kag ang iya mga prinsipe, kag ang bug-os niya nga katawohan;

20 Kag ang bug-os nga katawohan nga salakut, kag ang tanan nga hari sang duta sang Uz, kag ang tanan nga hari sang duta sang mga Filistinhon, kag ang Ascalon, kag ang Azza, kag ang Ekron, kag ang nabilin sang Asdod,

21 Ang Edom, kag ang Moab, kag ang mga anak ni Amon,

22 Kag ang tanan nga hari sang Tiro, kag ang tanan nga hari sang Zidon, kag ang mga hari sang mga pulo nga yara sa tabok sang dagat,

23 Ang Dedan, kag ang Tema, kag ang Buz, kag ang tanan nga yara sa mga naukbungan gid,

24 Kag ang tanan nga hari sang Arabia, kag ang tanan nga hari sang katawohan nga nagasalakut nga nagapuyo sa desierto,

25 Kag ang tanan nga hari sang Zimri, kag ang tanan nga hari sang Elam, kag ang tanan nga hari sang mga Mediahanon,

26 Kag ang tanan nga hari sang aminhan, malayo kag malapit, ang isa upud sa isa, kag ang tanan nga mga ginharian sang kalibutan, nga yara sa kadaygan sang duta: kag ang hari sang Sesac magainum sa olihi nila.

27 Busa isiling mo sa ila, Amo ini ang ginasiling sang GINOO sang mga kasoldadosan, ang Dios sang Israel; Inum kamo, kag maghinobog, kag magbuga, kag mapukan, kag dili na magbangon, bangud sang espada nga ipadala ko sa tunga ninyo.

28 Kag kon magdumili sila sa pagbaton sang tagayan sa imo kamut sa pag-inum, niyan isiling mo sa ila, Amo ini ang ginasiling sang GINOO sang mga kasoldadosan; Mag-inum gid kamo.

29 Kay, yari karon, ako nagasugud sa pagdala sang malaut sa siudad nga ginahingadlan sa akon ngalan, kag indi gid kamo bala pagsilotan? Indi kamo mahilway sa silot: kay magatawag ako sang espada sa tanan nga pumuluyo sang duta, nagasiling ang GINOO sang mga kasoldadosan.

30 Busa itagna mo batok sa ila ini tanan nga polong, kag isiling sa ila, Ang GINOO magangurub gikan sa hitaas, kag magamitlang sang iya tingug gikan sa iya balaan nga puluy-an; magangurub sia sing mabaskug batok sa iya puluy-an; sia magasinggit, subong sang mga nagalapak sang mga ubas, batok sa tanan nga mga pumuluyo sang duta.

31 Magalambut ang kagahud bisan tubtub sa mga ukbung sang duta; kay ang GINOO may kasaba batok sa mga pungsud, sia magasuay sa tanan nga unud; itugyan niya ang mga malauton sa espada, nagasiling ang GINOO.

32 Amo ini ang ginasiling sang GINOO sang mga kasoldadosan, Yari karon, ang malaut magalapnag sa pungsud pa pungsud, kag ang daku nga buhawi magagikan sa mga ukbung sang duta.

33 Kag ang pinatay sang GINOO sa sina nga adlaw manginkutub sa isa ka ukbung sang duta tubtub gid sa isa ka ukbung sang duta: indi sila paghayaan, ukon pagtiponon, ukon pag-ilubung; mangin-ipot sila sa kadaygan sang duta.

34 ś Haya, kamo nga mga manugpahalab, kag singgit; kag tubog kamo sa mga abo, kamo nga mga kadalagkuan sang panong: kay ang mga adlaw sang pag-ihaw sa inyo kag ang mga pagpaaplaag sa inyo nagaabut sing bug-os; kag maholog kamo kaangay sang matahum nga suludlan.

35 Kag ang mga manugpahalab wala sing palagyohan, ukon ang kadalagkuan sang panong may likawan.

36 Ang tingug sang singgit sang mga manugpahalab, kag ang paghaya sang kadalagkuan sang panong, mabatian: kay ang GINOO nagsamad sang ila halalban.

37 Kag ang malinong nga mga puluy-an ginlaglag bangud sang masingkal nga kaakig sang GINOO.

38 Ginbayaan niya ang iya palanagoan, subong sang leon: kay ang ila duta mamingaw bangud sang kabangis sang manugpigus, kag bangud sang iya masingkal nga kaakig.

KAPITULO 26

SA pagsugud sang paghari ni Jehoaquim nga anak nga lalaki ni Josias, hari sang Juda, nag-abut ini nga polong gikan sa GINOO, nga nagasiling,

2 Amo ini ang ginasiling sang GINOO; Tindug ka sa luwang sang balay sang GINOO, kag ipamolong sa tanan nga mga siudad sang Juda, nga nagkari sa pagsimba sa balay sang GINOO, ang tanan nga polong nga ginasogo ko sa imo nga ipamolong sa ila; dili pag-ibani sing isa ka polong:

3 Ayhan magapamati sila, kag magabiya ang tagsa ka tawo sa iya malaut nga dalanon, agud nga maghinulsul ako sang malaut, nga ginatuyo ko nga himoon sa ila bangud sang kalaut sang ila mga hinimoan.

4 Kag isiling mo sa ila, Amo ini ang ginasiling sang GINOO; Kon indi kamo magpamati sa akon, sa paglakat sa akon kasogoan, nga ginbutang ko sa atubangan ninyo,

5 Sa pagpamati sa mga polong sang akon mga alagad nga mga manalagna, nga ginpadala ko sa inyo, bisan nga nagabangon sing aga pa, kag nagapadala sa ila, apang wala kamo magpamati;

6 Niyan himoon ko ini nga balay kaangay sang Silo, kag himoon ko ini nga siudad nga pagpakamalaut sa tanan nga pungsud sa duta.

7 Gani ang mga pari kag ang mga manalagna kag ang bug-os nga katawohan nakabati kay Jeremias nga nagapamolong sini nga mga polong sa balay sang GINOO.

8 ś Karon nahanabu, sang nakatapus si Jeremias sa pagpamolong sang tanan nga ginsogo sa iya sang GINOO nga ipamolong sa bug-os nga katawohan, nga gindakup sia sang mga pari kag sang mga manalagna kag sang bug-os nga katawohan, nga nagasiling, Mapatay ka sing totoo.

9 Ngaa bala nagtagna ka sa ngalan sang GINOO, nga nagasiling, Ini nga balay manginkaangay sang Silo, kag ini nga siudad manginmamingaw, nga wala sing pumuluyo? Kag ang bug-os nga katawohan nagtipon kay Jeremias sa balay sang GINOO.

10 ś Sang nakabati sini nga mga butang ang mga prinsipe sang Juda, niyan nagsaka sila sa balay sang GINOO gikan sa balay sang hari, kag naglingkod sa salamputan sang bag-o nga gawang sang balay sang GINOO.

11 Niyan nagpamolong ang mga pari kag ang mga manalagna sa mga prinsipe kag sa bug-os nga katawohan, nga nagasiling, Ini nga tawo takus sa kamatayon; kay nagtagna sia batok sini nga siudad, subong sang nabatian ninyo sang inyo mga idulungug.

12 ś Niyan si Jeremias nagpamolong sa tanan nga prinsipe kag sa bug-os nga katawohan, nga nagasiling, Ang GINOO nagpadala sa akon sa pagtagna batok sini nga balay kag batok sini nga siudad sang tanan nga polong nga inyo nabatian.

13 Busa karon kaayoha ang inyo mga dalanon kag ang inyo mga hinimoan, kag tumana ang tingug sang GINOO nga inyo Dios; kag magahinulsul ang GINOO sang malaut nga ginmitlang niya batok sa inyo.

14 Nahanungud sa akon, yari karon, yari ako sa inyo kamut: himoa sa akon ang maayo kag matadlong sa inyo.

15 Lamang kilalaha ninyo sing totoo, nga kon patyon ninyo ako, sa pagkamatuud magadala kamo sing dugo nga inocente sa inyo kaugalingon, kag sa sini nga siudad, kag sa mga pumuluyo sini: kay sa pagkamatuud ginpadala ako sang GINOO sa inyo sa pagpamolong sini tanan nga polong sa inyo mga idulungug.

16 ś Niyan ang mga prinsipe kag ang bug-os nga katawohan nagsiling sa mga pari kag sa mga manalagna; Ini nga tawo indi takus sa kamatayon: kay nagpamolong sia sa aton sa ngalan sang GINOO nga aton Dios.

17 Niyan may nagtindug gikan sa mga tigulang sang duta, kag nagpamolong sa bug-os nga katilingban sang katawohan, nga nagasiling,

18 Si Miqueas nga Morasnon nagtagna sa mga adlaw ni Ezequias nga hari sang Juda, kag nagpamolong sa bug-os nga katawohan sang Juda, nga nagasiling, Amo ini ang ginasiling sang GINOO sang mga kasoldadosan; Ang Zion aradohon subong sang latagon, kag ang Jerusalem mangin mga tinumpok, kag ang bukid sang balay subong sang mataas nga mga duug sang talon.

19 Ginpatay gid bala sia ni Ezequias nga hari sang Juda kag sang bug-os nga Juda? wala bala sia magkahadluk sa GINOO, kag magpakilooy sa GINOO, kag ang GINOO naghinulsul sang malaut nga ginmitlang niya batok sa ila? Sa amo magaagum kita sing daku nga malaut batok sa aton mga kalag.

20 Kag may tawo man nga nagtagna sa ngalan sang GINOO, si Urias nga lalaking anak ni Semaya sang Kiryat-jearim, nga nagtagna batok sining siudad kag batok sining duta sono sa tanan nga polong ni Jeremias:

21 Kag sang ang iya mga polong nabatian ni Jehoaquim nga hari, pati sang tanan niyang gamhanan nga mga tawo, kag sang tanan nga prinsipe, ang hari nagtinguha sa pagpatay sa iya: apang sang nakabati sini si Urias, nahadluk sia, kag nagpalagyo, kag nagkadto sa Egipto;

22 Kag si Jehoaquim nga hari nagpadala sing mga tawo sa Egipto, nga amo, si Elnatan nga lalaking anak ni Acbor, kag pila ka tawo upud sa iya pakadto sa Egipto.

23 Kag ginpagowa nila si Urias sa Egipto, kag gindala sia kay Jehoaquim, ang hari; nga nagpatay sa iya sa espada, kag nagpilak sang iya patay nga lawas sa mga lulubngan sang mga timawa.

24 Apang ang kamut ni Ahicam nga anak nga lalaki ni Sapan yara upud kay Jeremias, agud nga indi sia pag-itugyan nila sa mga kamut sang katawohan sa pagpatay sa iya.

KAPITULO 27

SA pagsugud sang paghari ni Jehoaquim nga anak nga lalaki ni Josias, hari sang Juda, nag-abut ining polong kay Jeremias gikan sa GINOO, nga nagasiling,

2 Amo ini ang ginasiling sang GINOO sa akon; Buhat ka sing mga gapus kag mga gota, kag ibutang sila sa imo liog,

3 Kag ipadala sila sa hari sang Edom, kag sa hari sang Moab, kag sa hari sang mga Amonhon, kag sa hari sang Tiro, kag sa hari sang Zidon, paagi sa kamut sang mga manugbalita nga nagaabut sa Jerusalem kay Sedequias nga hari sang Juda;

4 Kag sogoa sila sa pagsiling sa ila mga agalon, Amo ini ang ginasiling sang GINOO sang mga kasoldadosan, ang Dios sang Israel; Amo ini ang isiling ninyo sa inyo mga agalon;

5 Ginhimo ko ang duta, ang tawo kag ang sapat nga yara sa duta, paagi sa akon dakung gahum kag sa akon inuntay nga butkon, kag ginhatag ini sa iya nga nahamut-an ko.

6 Kag karon ginhatag ko ini tanan nga mga duta sa kamut ni Nabucodonosor nga hari sang Babilonia, nga akon alagad; kag ang kasapatan sang latagon man ginhatag ko sa iya sa pag-alagad sa iya.

7 Kag ang tanan nga pungsud magaalagad sa iya, kag sa iya anak nga lalaki, kag sa anak nga lalaki sang iya anak nga lalaki, tubtub nga mag-abut ang tion na sang iya duta: kag niyan madamu nga mga pungsud kag dalagku nga mga hari ang magapaalagad sa iya.

8 Kag mahanabu, nga ang pungsud kag ginharian nga indi mag-alagad sa among Nabucodonosor nga hari sang Babilonia, kag nga indi magbutang sang ila liog sa idalum sang gota sang hari sang Babilonia, inang pungsud silotan ko, nagasiling ang GINOO, sa espada, kag sa tiggulutum, kag sa pameste, tubtub nga mapapas ko sila paagi sa iya kamut.

9 Busa dili kamo magpamati sa inyo mga manalagna, ukon sa inyo mga manugpakot, ukon sa inyo mga manugdamgo, ukon sa inyo mga manugpadihot sing enkantohanon, ukon sa inyo mga babaylan, nga nagapamolong sa inyo, nga nagasiling, Indi kamo magaalagad sa hari sang Babilonia:

10 Kay sila nagatagna sa inyo sing butig, sa pagpapalayo sa inyo sa inyo duta; kag agud nga sobolon ko kamo, kag mawala kamo.

11 Apang ang mga pungsud nga magpasakup sang ila liog sa gota sang hari sang Babilonia, kag mag-alagad sa iya, ina sila akon ibilin pa sa ila kaugalingon nga duta, nagasiling ang GINOO; kag pangumahon nila ini, kag magapuyo sa sini.

12 ś Nagpamolong ako man kay Sedequias nga hari sang Juda sono sa sini tanan nga polong, nga nagasiling, Ipasakup ang inyo mga liog sa gota sang hari sang Babilonia, kag alagda sia kag ang iya katawohan, kag magkabuhi.

13 Ngaa bala nga magakalamatay kamo, ikaw kag ang imo katawohan, paagi sa espada, paagi sa tiggulutum, kag paagi sa pameste, sono sa ginpamolong sang GINOO batok sa pungsud nga indi mag-alagad sa hari sang Babilonia?

14 Busa dili kamo magpamati sa mga polong sang mga manalagna nga nagapamolong sa inyo, nga nagasiling, Indi kamo magaalagad sa hari sang Babilonia: kay nagatagna sila sa inyo sing butig.

15 Kay ako wala magpadala sa ila, nagasiling ang GINOO, apang sila nagatagna sing butig sa akon ngalan; agud nga masobol ko kamo, kag agud nga mawala kamo, kamo, kag ang mga manalagna nga nagatagna sa inyo.

16 Nagpamolong man ako sa mga pari kag sa sining bug-os nga katawohan, nga nagasiling, Amo ini ang ginasiling sang GINOO; Dili kamo magpamati sa mga polong sang inyo mga manalagna nga nagatagna sa inyo, nga nagasiling, Yari karon, ang mga suludlan sang balay sang GINOO ibalik na sing madali gikan sa Babilonia: kay nagatagna sila sa inyo sing butig.

17 Dili kamo magpamati sa ila; alagda ang hari sang Babilonia, kag magkabuhi: ngaa bala nga manginmamingaw ining siudad?

18 Apang kon sila mga manalagna, kag kon yara sa ila ang polong sang GINOO, magpakilooy sila karon sa GINOO sang mga kasoldadosan, nga ang mga suludlan nga nabilin sa balay sang GINOO, kag sa balay sang hari sang Juda, kag sa Jerusalem, indi pagdalhon sa Babilonia.

19 ś Kay amo ini ang ginasiling sang GINOO sang mga kasoldadosan nahanungud sang mga haligi, kag nahanungud sang dagat, kag nahanungud sang mga tulungtungan, kag nahanungud sang salin sang mga suludlan nga nabilin sa sining siudad,

20 Nga wala pagkuhaa ni Nabucodonosor nga hari sang Babilonia, sang gindala niya nga bihag si Jeconias nga anak nga lalaki ni Jehoaquim, hari sang Juda, gikan sa Jerusalem pa Babilonia, kag ang tanan nga dungganon sang Juda kag Jerusalem;

21 Hoo, amo ini ang ginasiling sang GINOO sang mga kasoldadosan, ang Dios sang Israel, nahanungud sang mga suludlan nga nabilin sa balay sang GINOO, kag sa balay sang hari sang Juda kag sa Jerusalem;

22 Dalhon sila sa Babilonia, kag magapabilin sila didto tubtub sa adlaw nga ako magaduaw sa ila, nagasiling ang GINOO; niyan pataklaron ko sila, kag iuli sila sa sining duug.

KAPITULO 28

KAG nahanabu sa amo nga tuig, sa pagsugud sang paghari ni Sedequias nga hari sang Juda, sa ikap-at nga tuig, kag sa ikalima nga bulan, nga si Hananias nga anak nga lalaki ni Azur, ang manalagna nga taga-Gabaon, nagpamolong sa akon sa balay sang GINOO, sa atubangan sang mga pari kag sang bug-os nga katawohan, nga nagasiling,

2 Amo ini ang ginapamolong sang GINOO sang mga kasoldadosan, ang Dios sang Israel, nga nagasiling, Ginbali ko ang gota sang hari sang Babilonia.

3 Sa sulud sang bug-os nga duha ka tuig ibalik ko sa sini nga duug ang tanan nga suludlan sang balay sang GINOO, nga ginkuha sa sini nga duug ni Nabucodonosor nga hari sang Babilonia, kag gindala sa Babilonia:

4 Kag ibalik ko sa sini nga duug si Jeconias nga anak nga lalaki ni Jehoaquim, nga hari sang Juda, pati sang tanan nga mga bihag sang Juda, nga nagkadto sa Babilonia, nagasiling ang GINOO: kay balion ko ang gota sang hari sang Babilonia.

5 ś Niyan si Jeremias nga manalagna nagsiling kay Hananias nga manalagna sa atubangan sang mga pari, kag sa atubangan sang bug-os nga katawohan nga nagtindug sa balay sang GINOO,

6 Si Jeremias gid nga manalagna nagsiling, Amen: himoon ang subong sang GINOO: tumanon sang GINOO ang imo mga polong nga gintagna mo, sa pagpabalik sang mga suludlan sang balay sang GINOO, kag sang tanan nga gindala nga bihag, gikan sa Babilonia pakadto sini nga duug.

7 Wala sing sapayan pamatii karon ini nga polong nga ginapamolong ko sa imo mga idulungug, kag sa mga idulungug sang bug-os nga katawohan;

8 Ang mga manalagna nga nahauna sa akon kag nahauna sa imo gikan sa dumaan nagtagna batok sa madamu nga mga duta, kag batok sa dalagku nga mga ginharian, nahanungud sang inaway, kag sang malaut, kag sang pameste.

9 Ang manalagna nga nagatagna sang paghidait, kon ang polong sang manalagna mahanabu, niyan makilala ang manalagna, nga ginpadala sia sing matuud gid sang GINOO.

10 ś Niyan ginkuha ni Hananias nga manalagna ang gota sa liog ni Jeremias nga manalagna, kag ginbali ini.

11 Kag nagpamolong si Hananias sa atubangan sang bug-os nga katawohan, nga nagasiling, Amo ini ang ginasiling sang GINOO; Sa sini gid nga bagay balion ko ang gota ni Nabucodonosor nga hari sang Babilonia sa sulud sang bug-os nga duha ka tuig gikan sa liog sang tanan nga pungsud. Kag naglakat si Jeremias sa iya dalanon.

12 ś Niyan ang polong sang GINOO nag-abut kay Jeremias nga manalagna, sa tapus nga nabali na ni Hananias nga manalagna ang gota gikan sa liog ni Jeremias nga manalagna, nga nagasiling,

13 Lakat kag sugiri si Hananias, nga nagasiling, Amo ini ang ginasiling sang GINOO; Ginbali mo ang mga gota nga kahoy; apang sa tal-us nila magahimo ka sing mga gota nga salsalon.

14 Kay amo ini ang ginasiling sang GINOO sang mga kasoldadosan, ang Dios sang Israel; Nagbutang ako sang gota nga salsalon sa liog sini tanan nga pungsud, agud nga mag-alagad sila kay Nabucodonosor nga hari sang Babilonia; kag magaalagad sila sa iya: kag ginhatag ko man sa iya ang kasapatan sang latagon.

15 ś Niyan nagsiling ang manalagna nga si Jeremias kay Hananias nga manalagna, Pamatii karon, Hananias; Ang GINOO wala magpadala sa imo; kondi ginapasalig mo ini nga katawohan sa butig.

16 Busa amo ini ang ginasiling sang GINOO; Yari karon, sobolon ko ikaw gikan sa kadaygan sang duta: mapatay ka sa sini nga tuig, bangud nga nagtudlo ka sing pagbato sa GINOO.

17 Gani sa amo nga tuig napatay si Hananias sa ikapito nga bulan.

KAPITULO 29

KARON amo ini ang mga polong sang sulat nga ginpadala ni Jeremias nga manalagna gikan sa Jerusalem pakadto sa salin sang mga tigulang nga gindala nga mga bihag, kag sa mga pari, kag sa mga manalagna, kag sa bug-os nga katawohan nga gindala ni Nabucodonosor nga bihag gikan sa Jerusalem pa Babilonia;

2 (Sa tapus na nga naghalin sa Jerusalem si Jeconias nga hari, kag ang hara, kag ang mga eunuco, ang mga prinsipe sang Juda kag Jerusalem, kag ang mga panday, kag ang mga manugsalsal;)

3 Paagi sa kamut ni Elasa nga anak nga lalaki ni Safan, kag ni Gemarias nga anak nga lalaki ni Hilcias, (nga ginpadala ni Sedequias nga hari sang Juda sa Babilonia kay Nabucodonosor nga hari sang Babilonia) nga nagasiling,

4 Amo ini ang ginasiling sang GINOO sang mga kasoldadosan, ang Dios sang Israel, sa tanan nga ginpangdala nga mga bihag, nga ginpabihag ko gikan sa Jerusalem pa Babilonia;

5 Patindug kamo sing mga balay, kag magpuyo sa ila; kag tanum sing mga katamnan, kag magkaon sang bunga nila;

6 Palangasawa kamo, kag magpanganak sing mga lalaki kag mga babaye; kag paasaw-i ang inyo mga anak nga lalaki, kag pabanhi ang inyo mga anak nga babaye, agud nga mag-anak sila sing mga lalaki kag sing mga babaye; agud nga magbuad kamo didto, kag indi magbuhin.

7 Kag tinguhaa ang paghidait sang siudad diin ginpadala ko kamo nga mga bihag, kag magpangamuyo sa GINOO tungud sa sini: kay sa paghidait sini may paghidait kamo.

8 ś Kay amo ini ang ginasiling sang GINOO sang mga kasoldadosan, ang Dios sang Israel; Dili kamo magpalimbong sa inyo mga manalagna kag sa inyo mga manugpakot nga yara sa tunga ninyo, kag dili kamo magpamati sa inyo mga damgo nga ginpadamgo ninyo.

9 Kay nagatagna sila sing dimatuud sa inyo sa akon ngalan: wala ko sila pag-ipadala, nagasiling ang GINOO.

10 ś Kay amo ini ang ginasiling sang GINOO, Sa tapus nga matuman ang kapitoan ka tuig sa Babilonia, duawon ko kamo, kag magahimo sang akon maayo nga polong ayon sa inyo, sa pagpabalik sa inyo sa sini nga duug.

11 Kay nahibaloan ko ang mga hunahuna nga ginahunahuna ko ayon sa inyo, nagasiling ang GINOO, mga hunahuna sang paghidait, kag indi sang malaut, sa paghatag sa inyo sing ginalauman nga kaolihian.

12 Niyan magatawag kamo sa akon, kag magakadto kamo kag magapangamuyo sa akon, kag pamatian ko kamo.

13 Kag pangitaon ninyo ako, kag makita ako, kon pangitaon ninyo ako sa bug-os ninyo nga tagiposoon.

14 Kag makita ninyo ako, nagasiling ang GINOO: kag pahaulian ko ang inyo kabihagan, kag tiponon ko kamo gikan sa tanan nga pungsud, kag gikan sa tanan nga duug diin ginsobol ko kamo, nagasiling ang GINOO; kag pabalikon ko kamo sa duug diin ginpabihag ko kamo.

15 ś Bangud nga nagsiling kamo, Ang GINOO nagpatindug sa amon sing mga manalagna sa Babilonia;

16 Kilalaha nga amo ini ang ginasiling sang GINOO nahanungud sa hari nga nagalingkod sa trono ni David, kag nahanungud sa bug-os nga katawohan nga nagapuyo sa sini nga siudad, kag nahanungud sa inyo mga kauturan nga wala maggowa upud sa inyo sa kabihagan;

17 Amo ini ang ginasiling sang GINOO sang mga kasoldadosan; Yari karon, ipadala ko batok sa ila ang espada, ang tiggulutum, kag ang pameste, kag himoon sila kaangay sang mga higos nga malain, nga indi makaon, tama kalaut sila.

18 Kag hingabuton ko sila sang espada, sang tiggulutum, kag sang pameste, kag itugyan ko sila nga pagsaylohon sila pakadto sa tanan nga ginharian sang duta, nga mangin pagpakamalaut, kag kabulungan, kag panagutsutan, kag kahuluy-an, sa tunga sang tanan nga pungsud diin ginsobol ko sila:

19 Bangud nga wala sila magpamati sa akon mga polong, nagasiling ang GINOO, nga ginpadala ko sa ila paagi sa akon mga alagad nga mga manalagna, nga nagabangon sing aga pa kag nagapadala sa ila; apang kamo indi magpamati, nagasiling ang GINOO.

20 ś Busa pamatii ninyo ang polong sang GINOO, kamo tanan sang kabihagan, nga ginpadala ko gikan sa Jerusalem pa Babilonia:

21 Amo ini ang ginasiling sang GINOO sang mga kasoldadosan, ang Dios sang Israel, nahanungud kay Acab nga anak nga lalaki ni Colaya, kag nahanungud kay Sedequias nga anak nga lalaki ni Maasias, nga nagatagna sa inyo sing butig sa akon ngalan; Yari karon, itugyan ko sila sa kamut ni Nabucodonosor nga hari sang Babilonia; kag sia magapatay sa ila sa atubangan sang inyo mga mata;

22 Kag sa ila ang tanan nga bihag gikan sa Juda nga yadto sa Babilonia magagamit sing pakamalaut, nga nagasiling, Himoon ka sang GINOO kaangay kay Sedequias kag kaangay kay Acab, nga gin-asal sa kalayo sang hari sang Babilonia;

23 Bangud nga naghimo sila sing kabanyagaan sa Israel, kag nagpanglahi sa mga asawa sang ila mga isigkatawo, kag nagpamolong sing binutig nga mga polong sa akon ngalan nga wala ko pag-isogo sa ila; ako ang nakahibalo, kag saksi, nagasiling ang GINOO.

24 ś Amo ini ang ipamolong mo man kay Semaya nga Nehelamnon, nga nagasiling,

25 Amo ini ang ginapamolong sang GINOO sang mga kasoldadosan, ang Dios sang Israel, nga nagasiling, Bangud nga nagpadala ka sing mga sulat sa imo ngalan sa bug-os nga katawohan nga yara sa Jerusalem, kag kay Sofonias nga anak nga lalaki ni Maasias nga pari, kag sa tanan nga pari, nga nagasiling,

26 Ang GINOO naghimo sa imo nga pari sa tal-us ni Jehoiada nga pari, agud nga mangin mga opisyal kamo sa balay sang GINOO, sa tagsa ka tawo nga buangbuang, kag nga nagapakamanalagna sia, nga ibutang mo sia sa bilanggoan, kag sa mga pandug.

27 Busa karon ngaa bala nga wala mo pagsabdonga si Jeremias nga taga-Anatot nga nagapakamanalagna sa inyo?

28 Kay tungud sini nagpadala sia sa amon sa Babilonia, nga nagasiling, Ining kabihagan malawig: patindug kamo sing mga balay, kag magpuyo sa ila; kag magtanum sing mga katamnan, kag magkaon sang bunga nila.

29 Kag si Sofonias nga pari nagbasa sini nga sulat sa mga idulungug ni Jeremias nga manalagna.

30 ś Niyan nag-abut ang polong sang GINOO kay Jeremias, nga nagasiling,

31 Padala sa tanan sa ila sa kabihagan, nga nagasiling, Amo ini ang ginasiling sang GINOO nahanungud kay Semaya nga Nehelamnon; Bangud nga si Semaya nagtagna sa inyo, kag wala ko sia pag-ipadala, kag ginpasalig niya kamo sa butig:

32 Busa amo ini ang ginasiling sang GINOO; Yari karon, silotan ko si Semaya nga Nehelamnon, kag ang iya mga kaliwat: wala sia sing tawo nga magapuyo sa tunga sini nga katawohan; kag indi sia makakita sang kaayohan nga himoon ko sa akon katawohan, nagasiling ang GINOO; bangud nga nagtudlo sia sing pagbato sa GINOO.

KAPITULO 30

ANG polong nga nag-abut kay Jeremias gikan sa GINOO, nga nagasiling,

2 Amo ini ang ginapamolong sang GINOONG Dios sang Israel, nga nagasiling, Isulat mo sa libro ang tanan nga polong nga ginpamolong ko sa imo.

3 Kay, yari karon, ang mga adlaw nagaabut, nagasiling ang GINOO, nga pahaulian ko ang kabihagan sang akon katawohan nga Israel kag Juda, nagasiling ang GINOO: kag pabalikon ko sila sa duta nga ginhatag ko sa ila mga kaamayan, kag tag-iyahan nila ini.

4 ś Kag amo ini ang mga polong nga ginpamolong sang GINOO nahanungud sa Israel kag nahanungud sa Juda.

5 Kay amo ini ang ginasiling sang GINOO; Nabatian namon ang tingug sang pagkurug, sang kahadluk, kag indi sang paghidait.

6 Pamangkot kamo karon, kag tan-awa kon bala ang lalaki ginasakitan sa pag-anak? ngaa bala nakita ko ang tagsa ka lalaki nga ang iya mga kamut yara sa iya mga hawak, subong sang babaye nga ginasakitan, kag ang tanan nga guya nagpalanglapsi?

7 Ahay! kay ina nga adlaw daku, sa bagay nga wala gid sing kaangay sa sini: tion gid ini sang kagamo ni Jacob; apang sia maluwas sa sini.

8 Kay mahanabu sa sinang adlaw, nagasiling ang GINOO sang mga kasoldadosan, nga balion ko ang iya gota sa imo liog, kag bugrason ang imo mga gapus, kag ang mga dumuloong indi na magpaalagad sa iya:

9 Kondi magaalagad sila sa GINOO nga ila Dios, kag kay David nga ila hari, nga bangonon ko sa ila.

10 ś Busa dili ka magkahadluk, O akon alagad nga Jacob, nagasiling ang GINOO; kag dili magkahangawa, O Israel: kay, yari karon, luwason ko ikaw gikan sa malayo, kag ang imo kaliwat gikan sa duta sang ila kabihagan; kag si Jacob magabalik, kag magatawhay, kag magalinong, kag wala gid sing magapahadluk sa iya.

11 Kay nagaupud ako sa imo, nagasiling ang GINOO, sa pagluwas sa imo: bisan tapuson ko sing bug-os ang tanan nga pungsud diin ginpaaplaag ko ikaw, apang indi ko ikaw pagtapuson sing bug-os: kondi tudloan ko ikaw sa talaksan, kag indi ko ikaw nga mas-a pagpabay-an nga wala masiloti.

12 Kay amo ini ang ginasiling sang GINOO, Ang imo samad dimabolong, kag ang imo pilas matama.

13 Wala gid sing matabang sang imo kahimtangan, agud nga mabugkusan ka: wala sing mga bolong nga makapaayo sa imo.

14 Ang tanan mo nga kahagugma nalipat sa imo; wala ka nila ginapangita; kay ginpilas ko ikaw sa pilas sang kaaway, sa silot sang isa nga mapintas, tungud sang kadamuon sang imo kalautan; bangud nga nagdugang ang imo mga sala.

15 Ngaa bala nagasinggit ka tungud sang imo kapipit-an? ang imo kasakit dimabolong tungud sang kadamuon sang imo kalautan: bangud nga ang imo mga sala nagdugang, ginhimo ko ini nga mga butang sa imo.

16 Busa ang tanan nga nagahalunhon sa imo halunhonon; kag ang tanan mo nga kasumpung, ang tagsatagsa sa ila, magakadto sa kabihagan; kag ang tanan nga nagahublas sa imo manginhinublasan, kag ang tanan nga nagaati sa imo ipaati ko.

17 Kay iuli ko sa imo ang maayo nga lawas, kag ayohon ko ikaw sa imo mga pilas, nagasiling ang GINOO; bangud nga gintawag ka nila nga Sinikway, nga nagasiling, Ini amo ang Zion, nga wala sing tawo nga nagapangita.

18 ś Amo ini ang ginasiling sang GINOO; Yari karon, pahaulian ko ang kabihagan sang mga layanglayang ni Jacob, kag magakalooy sa iya mga puluy-an; kag ang siudad patindugon sa iya kaugalingon nga tinumpok, kag ang palacio magapabilin sono sa iya kinaugali.

19 Kag sa ila magagowa ang pagpasalamat kag ang tingug sang mga nagakasadya: kag pabuaron ko sila, kag indi sila magdiotay; himayaon ko man sila, kag indi sila magdiotay.

20 Ang ila mga anak man manginsubong sang sadto anay, kag ang ila katilingban palig-onon sa atubangan nakon, kag silotan ko ang tanan nga nagapigus sa ila.

21 Kag ang ila mga dungganon magagikan sa ila, kag ang ila gobernador magagowa gikan sa tunga nila; kag papalapiton ko sia, kag magapalapit sia sa akon: kay sin-o bala ang nagpatuhoy sang iya tagiposoon sa pagpalapit sa akon? nagasiling ang GINOO.

22 Kag kamo mangin-akon katawohan, kag ako mangin-inyo Dios.

23 Yari karon, ang buhawi sang GINOO nagagowa nga may kaalipungut, isa ka buhawi nga nagapadayon: magatupa ini nga may kasakit sa olo sang malauton.

24 Ang masingkal nga kaakig sang GINOO indi magbalik, tubtub nga mahimo niya ini, kag tubtub nga matuman niya ang mga tinutuyo sang iya tagiposoon: sa olihi nga mga adlaw patugsilingan ninyo ini.

KAPITULO 31

SA among tion, nagasiling ang GINOO, ako mangin-Dios sang tanan nga panimalay sang Israel, kag sila mangin-akon katawohan.

2 Amo ini ang ginasiling sang GINOO, Ang katawohan nga nabilin sang espada nakaagum sang bugay sa kamingawan; bisan si Israel, sang nagpapahuway ako sa iya.

3 Ang GINOO nagpahayag sa akon kutub sa dumaan, nga nagasiling, Hoo, ginhigugma ko ikaw sa gugma nga dayon: busa sa mahigugmaon nga kaayo ginbuyuk ko ikaw.

4 Sa liwat patindugon ko ikaw, kag mapatindug ka, O ulay sang Israel: sa liwat punihan ka sang imo mga panderita, kag magakadto sa mga sinaut sang mga nagakasadya.

5 Magatanum ka sa liwat sing mga ulubasan sa kabukiran sang Samaria: ang mga manugtanum magatanum, kag magakaon sa ila subong nga komon nga mga butang.

6 Kay may adlaw, nga magasinggit ang mga bantay sa bukid nga Efraim, Tindug kamo, kag magtaklad kita sa Zion sa GINOO nga aton Dios.

7 Kay amo ini ang ginasiling sang GINOO; Mag-amba kay Jacob nga may kasadya, kag magsinggit sa tunga sang mga puno sang mga pungsud: magbantala kamo, magdayaw kamo, kag magsiling, O GINOO, luwasa ang imo katawohan, ang salin sa Israel.

8 Yari karon, kuhaon ko sila gikan sa duta nga naaminhan, kag tiponon sila gikan sa mga ukbung gid sang duta, kag upud sa ila ang bulag kag ang piang, ang babaye nga nagabusung kag ang ginasakitan sa pag-anak, sing tingub: ang isa ka dakung kadam-an magabalik diri.

9 Magaabut sila nga may paghibi, kag may mga pag-ampo, tuytuyan ko sila: palakton ko sila sa ubay sang mga suba sang mga tubig sa dalan nga matadlong, diin indi sila makasandad: kay amay ako sang Israel, kag si Efraim panganay ko.

10 ś Pamatii ang polong sang GINOO, O kamo nga mga pungsud, kag ipahayag ini sa kapuloan sa malayo, kag isiling, Ang nagapaaplaag sang Israel magatipon sa iya, kag magabantay sa iya, subong sang manugpahalab sa iya panong.

11 Kay ang GINOO nagtubus kay Jacob, kag naggawad sa iya sa kamut sang makusug pa sa iya.

12 Busa magakari sila kag magaamba sa kataasan sang Zion, kag magaduluguk sa pagkaayo sang GINOO, sa uyas, kag sa alak, kag sa lana, kag sa mga tinday sang panong kag sang kahayupan: kag ang ila kalag manginsubong sang katamnan nga nabunyagan; kag indi na gid sila magkasubo pa.

13 Niyan ang ulay magakasadya sa saut, ang pamatan-on nga mga lalaki kag mga tigulang sing tingub: kay baylohan ko ang ila paglalaw sa kalipay, kag lipayon ko sila, kag pasadyahon sila gikan sa ila kasubo.

14 Kag busgon ko ang kalag sang mga pari sing katambok, kag mabusug ang akon katawohan sang akon kaayohan, nagasiling ang GINOO.

15 ś Amo ini ang ginasiling sang GINOO; Isa ka tingug nabatian sa Rama, panalabiton, kag pagtangis nga mapait; si Raquel nga nagatangis tungud sa iya mga anak nagdumili nga paglipayon tungud sa iya mga anak, kay sila wala na.

16 Amo ini ang ginasiling sang GINOO; Punggi ang imo tingug sa paghibi, kag ang imo mga mata sa mga luha: kay balusan ang imo binuhatan, nagasiling ang GINOO; kag magabalik sila gikan sa duta sang kaaway.

17 Kag may paglaum sa imo kaolihian, nagasiling ang GINOO, nga ang imo mga anak magabalik sa ila kaugalingon nga dulunan.

18 ś Sa pagkamatuud nabatian ko si Efraim nga nagahaya sing subong tungud sa iya kaugalingon; Ginsilotan mo ako, kag nasilotan ako, subong sang tinday nga baka nga lalaki nga wala maanad sa gota: palisoa ako, kag mapaliso ako; kay ikaw amo ang GINOO nga akon Dios.

19 Sa pagkamatuud, sa tapus nga ako naliso, naghinulsul ako; kag sa tapus nga natudloan ako, ginhampak ko ang akon paa: nahuya ako, hoo, nga nalibogan, bangud nga gin-antus ko ang kahuluy-an sang akon pagkapamatan-on.

20 Si Efraim bala ang akon pinalangga nga anak nga lalaki? kalahamut-an bala sia nga bata? kay kutub sang nagpamolong ako batok sa iya, ginapanumdum ko pa sia sing hanuut: busa ang akon tagiposoon nalisdan sa iya; sa pagkamatuud magakalooy ako sa iya, nagasiling ang GINOO.

21 Patindug nga sa imo sing mga tanda sa dalanon, himo nga sa imo sing mga tinumpok nga mataas: ituhoy ang imo tagiposoon sa dakung dalan, ang dalanon diin ka nagpakadto: balik, O ulay sang Israel, balik sa sining imo mga siudad.

22 ś Tubtub bala san-o nga ikaw magatiyogtiyog, O ikaw nga nagtalikod nga babaying anak? kay ang GINOO nagtuga sing bag-ong butang sa duta, Ang babaye magalikup sing lalaki.

23 Amo ini ang ginasiling sang GINOO sang mga kasoldadosan, ang Dios sang Israel; Sa liwat pa gamiton nila ining hambal sa duta sang Juda kag sa mga siudad sini, kon pahaulian ko ang ila kabihagan; Ang GINOO magpakamaayo sa imo, O puluy-an sang katarungan, kag bukid sang pagkabalaan.

24 Kag magapuyo sa Juda gid, kag sa tanan niyang mga siudad sing tingub, ang mga mangunguma, kag ang mga nagagowa upud sang mga pinanong.

25 Kay ginbusug ko ang kalag nga nalapyo, kag gintugub ko liwat ang tagsa ka kalag nga masinulub-on.

26 Sa sini nagmata ako, kag nagtan-aw; kag ang akon katologon matam-is sa akon.

27 ś Yari karon, nagaabut ang mga adlaw, nagasiling ang GINOO, nga sab-ugan ko ang panimalay sang Israel kag ang panimalay sang Juda sang binhi sang tawo, kag sang binhi sang sapat.

28 Kag mahanabu, nga subong nga ginpulawan ko sila sa paggabut, kag sa pagguba, kag sa pagpukan, kag sa paglaglag, kag sa pagpapiot; sa amo magapulaw ako sa ila sa pagpatindug, kag sa pagtanum, nagasiling ang GINOO.

29 Sa sinang mga adlaw indi na sila magsiling, Ang mga kaamayan nakakaon sing ubas nga maaslum, kag ang mga ngipon sang mga anak nagangilo.

30 Apang ang tagsatagsa mapatay tungud sa iya kaugalingon nga kalautan: ang tagsa ka tawo nga nagakaon sang ubas nga maaslum, ang iya ngipon magangilo.

31 ś Yari karon, ang mga adlaw nagaabut, nagasiling ang GINOO, nga magahimo ako sing bag-ong katipan kaupud sa panimalay sang Israel, kag kaupud sa panimalay sang Juda:

32 Indi sono sa katipan nga ginhimo ko upud sa ila mga kaamayan sang adlaw nga ginkaptan ko sila sa kamut sa pagpagowa sa ila gikan sa duta sang Egipto; ang akon katipan nga ginlalis nila, bisan ako bana sa ila, nagasiling ang GINOO:

33 Apang ini amo ang katipan nga akon himoon kaupud sa panimalay sang Israel; Sa tapus sinang mga adlaw, nagasiling ang GINOO, ibutang ko ang akon kasogoan sa ila nasulud nga mga bahin, kag isulat ini sa ila mga tagiposoon; kag ako mangin-ila Dios, kag sila mangin-akon katawohan.

34 Kag indi na sila magatudlo ang tagsa ka tawo sa iya isigkatawo, kag ang tagsa ka tawo sa iya utud, nga nagasiling, Kilalaha ang GINOO: kay sila tanan magakilala sa akon, kutub sa labing kubus sa ila tubtub sa labing daku sa ila, nagasiling ang GINOO: kay patawaron ko ang kalautan nila, kag indi ko na pagdumdumon ang ila sala.

35 ś Amo ini ang ginasiling sang GINOO, nga nagahatag sang adlaw nga kapawa sa adlawon, kag sang mga pagsolondan sang bulan kag sang mga kabitoonan nga kapawa sa kagab-ihon, nga nagapahawa sang dagat kon nagadaguhub ang iya mga balud; Ang GINOO sang mga kasoldadosan amo ang iya ngalan:

36 Kon ining mga pagsolondan magtaliwan sa atubangan nakon, nagasiling ang GINOO, niyan ang kaliwat sang Israel man magauntat sa pagkapungsud sa atubangan nakon sing dayon.

37 Amo ini ang ginasiling sang GINOO; Kon matakus ang langit sa ibabaw, kag matungkad ang mga sadsaran sang duta sa idalum, ako man magasikway sang bug-os nga kaliwat sang Israel tungud sang tanan nga ila nahimo, nagasiling ang GINOO.

38 ś Yari karon, ang mga adlaw nagaabut, nagasiling ang GINOO, nga ang siudad patindugon tungud sa GINOO kutub sa torre ni Hananeel tubtub sa gawang sang pamusud.

39 Kag ang latid magapadayon pa sa tampad sini sa ibabaw sang bakolod nga Gareb, kag magalibut pa Goat.

40 Kag ang bug-os nga nalupyakan sang patay nga mga lawas, kag sang mga abo, kag ang tanan nga mga latagon tubtub sa sapa nga Kidron, tubtub sa pamusud sang gawang sang kabayo nayon sa sidlangan, mangin-balaan sa GINOO; indi ini paggabuton, ukon pagpukanon pa sing dayon.

KAPITULO 32

ANG polong nga nag-abut kay Jeremias gikan sa GINOO sa ikapulo nga tuig ni Sedequias nga hari sang Juda, nga amo ang ikapulog walo nga tuig ni Nabucodonosor.

2 Kay sadtong tion ang kasoldadosan sang hari sang Babilonia nagkibon sang Jerusalem: kag si Jeremias nga manalagna nabilanggo sa luwang sang bilanggoan, nga yara sa balay sang hari sang Juda.

3 Kay ginbilanggo sia ni Sedequias nga hari sang Juda, nga nagasiling, Ngaa bala nagatagna ka, kag nagasiling, Amo ini ang ginasiling sang GINOO, Yari karon, ihatag ko ining siudad sa kamut sang hari sang Babilonia, kag agawon niya ini;

4 Kag si Sedequias nga hari sang Juda indi makapalagyo sa kamut sang mga Caldeanhon, kondi sa pagkamatuud itugyan sia sa kamut sang hari sang Babilonia, kag magapakighambal sa iya sa baba kag baba, kag ang iya mga mata magatan-aw sa iya mga mata;

5 Kag dalhon niya si Sedequias sa Babilonia, kag didto sia tubtub nga duawon ko sia, nagasiling ang GINOO: bisan magpakig-away kamo sa mga Caldeanhon, indi kamo mag-uswag.

6 ś Kag si Jeremias nagsiling, Ang polong sang GINOO nag-abut sa akon, nga nagasiling,

7 Yari karon, si Hanameel nga anak nga lalaki ni Sallum nga imo tiyo magaabut sa imo, nga nagasiling, Bakla nga sa imo ang akon latagon nga yara sa Anatot: kay ang kinamatarung sa paggawad imo sa pagbakal sini.

8 Gani si Hanameel nga anak nga lalaki sang akon tiyo nag-abut sa akon sa luwang sang bilanggoan sono sa polong sang GINOO, kag nagsiling sa akon, Bakla ang akon latagon, ginaampo ko sa imo, nga yara sa Anatot, nga yara sa duta sang Benjamin: kay imo ang kinamatarung sa pagpanubli, kag imo ang paggawad; bakla ini nga sa imo. Niyan nahibaloan ko nga ini polong sang GINOO.

9 Kag ginbakal ko ang latagon ni Hanameel nga anak nga lalaki sang akon tiyo, nga yara sa Anatot, kag gintimbangan sia sing kuarta, nga napulog pito ka siclo nga pilak.

10 Kag ginpirmahan ko ang kalig-onan, kag ginpat-inan ini, kag nagtawag sing mga saksi, kag gintimbangan sia sang kuarta sa mga timbangan.

11 Gani ginkuha ko ang kalig-onan sang pagbakal, ang napat-inan sono sa kasogoan kag kinabatasan, kag ang nabukad:

12 Kag ginhatag ko ang kalig-onan sang pagbakal kay Baruc nga anak nga lalaki ni Neria, ang anak nga lalaki ni Maasias, sa atubangan ni Hanameel nga anak nga lalaki sang akon tiyo, kag sa atubangan sang mga saksi nga nagpirma sang libro sang pagbakal, sa atubangan sang tanan nga Judio nga naglingkod sa luwang sang bilanggoan.

13 ś Kag gintulinan ko si Baruc sa atubangan nila, nga nagasiling,

14 Amo ini ang ginasiling sang GINOO sang mga kasoldadosan, ang Dios sang Israel; Kuhaa ining mga kalig-onan, ining kalig-onan sang pagbakal, ang pinat-inan, kag ining kalig-onan nga nabukad; kag isulud sila sa suludlan nga daga, agud nga magpadayon sila sa madamung adlaw.

15 Kay amo ini ang ginasiling sang GINOO sang mga kasoldadosan, ang Dios sang Israel; Ang mga balay kag ang mga latagon kag ang mga ulubasan panag-iyahan pa liwat sa sining duta.

16 ś Karon sa tapus nga natugyan ko ang kalig-onan sang pagbakal kay Baruc nga anak nga lalaki ni Neria, nagpangamuyo ako sa GINOO, nga nagasiling,

17 Ah Ginoong DIOS! yari karon, ikaw naghimo sang langit kag sang duta paagi sa imo dakung gahum kag inuntay nga butkon, kag wala gid sing tama kabudlay sa imo:

18 Ikaw nagapakita sing mahigugmaon nga kaayo sa mga linibo, kag nagatumbas sang kalautan sang mga kaamayan sa dughan sang ila mga anak sa olihi nila: ang Daku, ang Gamhanan nga Dios, ang GINOO sang mga kasoldadosan, amo ang iya ngalan,

19 Daku sa laygay, kag gamhanan sa buhat: kay ang imo mga mata nagamuklat sa tanan nga dalanon sang mga anak nga lalaki sang mga tawo: sa paghatag sa tagsatagsa sono sa iya mga dalanon, kag sono sa bunga sang iya mga hinimoan:

20 Nga nagbutang sing mga tanda kag mga kalatingalahan sa duta sang Egipto, tubtub sining adlaw, kag sa Israel, kag sa iban nga mga tawo; kag naghimo nga sa imo sing ngalan, subong sang sa sining adlaw;

21 Kag nagpagowa sang imo katawohan nga Israel gikan sa duta sang Egipto nga may mga tanda, kag mga kalatingalahan, kag sa kamut nga makusug, kag sa butkon nga inuntay, kag sa daku nga kakugmat;

22 Kag naghatag sa ila sini nga duta, nga ginsumpa mo sa ila mga kaamayan nga ihatag sa ila, duta nga nagailig sing gatas kag dugus;

23 Kag nagsulud sila, kag nagtag-iya sini; apang wala sila magtuman sang imo tingug, ukon maglakat sa imo kasogoan; wala gid sila sing ginhimo sang tanan nga ginsogo mo sa ila nga himoon: busa ginpakari mo sa ila ini tanan nga malaut:

24 Yari karon, ang mga pamakud, nagakari sila sa siudad sa pag-agaw sini; kag ang siudad ginhatag sa kamut sang mga Caldeanhon, nga nagaaway batok sini, bangud sang espada, kag sang tiggulutum, kag sang pameste: kag ang imo ginpamolong nahanabu; kag, yari karon, nakita mo ini.

25 Kag ikaw nagsiling sa akon, O Ginoong DIOS, Bakla nga sa imo ang latagon sa kuarta, kag magtawag sing mga saksi; kay ang siudad ginahatag sa kamut sang mga Caldeanhon.

26 ś Niyan nag-abut ang polong sang GINOO kay Jeremias, nga nagasiling,

27 Yari karon, ako ang GINOO, ang Dios sang tanan nga unud: may bisan ano nga butang bala nga tama kabudlay sa akon?

28 Busa, amo ini ang ginasiling sang GINOO; Yari karon, ihatag ko ini nga siudad sa kamut sang mga Caldeanhon, kag sa kamut ni Nabucodonosor nga hari sang Babilonia, kag kuhaon niya ini:

29 Kag ang mga Caldeanhon, nga nagaaway batok sini nga siudad, magakari kag magatutud sini nga siudad sa kalayo, kag magasonog sini upud sang kabalayan, nga sa ibabaw sang ila mga atop nagdolot sila sing incienso kay Baal, kag nag-ula sing mga halad nga ilimnon sa iban nga mga dios, sa pagpaakig sa akon.

30 Kay ang mga kaanakan sang Israel kag ang mga kaanakan sang Juda naghimo lamang sang malaut sa akon itololok kutub sa ila pagkapamatan-on: kay ang mga kaanakan sang Israel nagpaakig lamang sa akon tungud sa mga binuhatan sang ila mga kamut, nagasiling ang GINOO.

31 Kay ini nga siudad sa akon nanginhangkat sang akon kaakig kag sang akon kaalipungut, kutub sa adlaw nga ginpatindug nila ini tubtub sini nga adlaw; agud nga kuhaon ko ini sa atubangan sang akon nawung,

32 Bangud sang tanan nga kalaut sang mga kaanakan sang Israel kag sang mga kaanakan sang Juda, nga ginhimo nila sa pagpaakig sa akon, sila, ang ila mga hari, ang ila mga prinsipe, ang ila mga pari, kag ang ila mga manalagna, kag ang mga tawo sang Juda, kag ang mga pumuluyo sang Jerusalem.

33 Kag nagtalikod sila sa akon, kag wala mag-atubang: bisan gintudloan ko sila, nga nagabangon sing aga pa kag nagatudlo sa ila, walay sapayan wala sila magpamati sa pagbaton sing pagtudlo.

34 Kondi ginpahamtang nila ang ila mga kangil-aran sa balay, nga ginatawag sa akon ngalan, sa pagdagta sini.

35 Kag ginpatindug nila ang mataas nga mga duug ni Baal, nga yara sa nalupyakan sang anak nga lalaki ni Hinom, sa pagpaagi sa kalayo sang ila mga anak nga lalaki kag sang ila mga anak nga babaye kay Moloc; nga wala ko pag-isogo sa ila, ukon nag-abut ini sa akon painoino, nga himoon nila ini nga kangil-aran, sa pagpapakasala sang Juda.

36 ś Kag busa karon amo ini ang ginasiling sang GINOO, ang Dios sang Israel, nahanungud sini nga siudad, nga sa sini kamo nagasiling, Igahatag ini sa kamut sang hari sang Babilonia paagi sa espada, kag paagi sa tiggulutum, kag paagi sa pameste;

37 Yari karon, tiponon ko sila gikan sa tanan nga duta, diin ginsobol ko sila sa akon kaakig, kag sa akon kaalipungut, kag sa daku nga kasingkal; kag pabalikon ko sila sa sini nga duug, kag papuy-on ko sila sing malig-on:

38 Kag sila mangin-akon katawohan, kag ako mangin-ila Dios:

39 Kag hatagan ko sila sing isa ka tagiposoon, kag isa ka dalanon, agud nga magkahadluk sila sa akon sa gihapon, tungud sa kaayohan nila, kag sang ila mga anak sa olihi nila:

40 Kag magahimo ako sing dayon nga katipan upud sa ila, nga indi ako magbiya sa ila, sa paghimo sa ila sing kaayohan; apang ibutang ko ang akon kahadluk sa mga tagiposoon nila, agud nga indi sila magpalayo sa akon.

41 Hoo, magakalipay ako sa ila sa paghimo sa ila sing kaayohan, kag itanum ko sila sa sini nga duta sa pagkamatuud sa bug-os ko nga tagiposoon kag sa bug-os ko nga kalag.

42 Kay amo ini ang ginasiling sang GINOO; Subong nga gindala ko ining bug-os nga dakung malaut sa sining katawohan, sa amo dalhon ko sa ila ang bug-os nga kaayohan nga ginsaad ko sa ila.

43 Kag ang mga latagon baklon sa sining duta, nga sa sini nagasiling kamo, Mamingaw ini, nga wala sing tawo ukon sapat; ginahatag ini sa kamut sang mga Caldeanhon.

44 Ang mga tawo magabakal sing mga latagon sa kuarta, kag magapirma sing mga kalig-onan, kag magapat-in sa ila, kag magatawag sing mga saksi sa duta sang Benjamin, kag sa mga duug palibut sa Jerusalem, kag sa mga siudad sang Juda, kag sa mga siudad sang kabukiran, kag sa mga siudad sang nalupyakan, kag sa mga siudad sang bagatnan: kay pahaulian ko ang ila kabihagan, nagasiling ang GINOO.

KAPITULO 33

LABUT PA ang polong sang GINOO nag-abut kay Jeremias sa ikaduha nga tion, samtang nabilanggo pa sia sa luwang sang bilanggoan, nga nagasiling,

2 Amo ini ang ginasiling sang GINOO nga manunuga sini, ang GINOO nga naghuman sini, sa pagpalig-on sini; ang GINOO ang iya ngalan;

3 Panawag sa akon, kag ako magasabat sa imo, kag magapakita sa imo sing dalagku kag gamhanan nga mga butang, nga wala mo mahibal-i.

4 Kay amo ini ang ginasiling sang GINOO, ang Dios sang Israel, nahanungud sa mga balay sining siudad, kag nahanungud sa mga balay sang mga hari sang Juda, nga naguba paagi sa mga pamakud, kag paagi sa espada;

5 Sila nagakari sa pagpakig-away sa mga Caldeanhon, apang ini sa pagpuno sa ila sang patay nga mga lawas sang mga tawo, nga ginpatay ko sa akon kaakig kag sa akon kaalipungut, kag bangud sa tanan nila nga pagkamalaut ginlipnan ko ang akon nawung gikan sa sini nga siudad.

6 Yari karon, dalhan ko ini sing pagbolong kag pag-ayo, kag ayohon ko sila, kag ipahayag ko sa ila ang bugana nga paghidait kag kamatooran.

7 Kag pahaulian ko ang kabihagan sang Juda kag ang kabihagan sang Israel, kag patindugon sila, subong sang sa una.

8 Kag tinloan ko sila sa bug-os nila nga kalautan, nga ginpakasala nila batok sa akon; kag patawaron ko ang tanan nila nga mga kalautan, nga ginpakasala nila, kag nga ginlalis nila batok sa akon.

9 ś Kag ini mangin isa ka ngalan sang kalipay nga sa akon, isa ka pagdayaw kag isa ka katahoran sa atubangan sang tanan nga pungsud sang duta, nga magapamati sang tanan nga kaayohan nga ginahimo ko sa ila: kag sila magakahadluk kag magakurug bangud sang bug-os nga kaayohan kag sang bug-os nga kauswagan nga ginapatigayon ko sa sini.

10 Amo ini ang ginasiling sang GINOO; Sa liwat pa mabatian sa sini nga duug, nga sa sini nagasiling kamo nga ini manginmamingaw, nga wala sing tawo kag wala sing sapat, sa mga siudad sang Juda, kag sa mga dalan sang Jerusalem, nga mamingaw, nga wala sing tawo, kag wala sing pumuluyo, kag wala sing sapat,

11 Ang tingug sang kalipay, kag ang tingug sang kasadya, ang tingug sang nobyo, kag ang tingug sang nobya, ang tingug sang mga magasiling, Dayawa ang GINOO sang mga kasoldadosan: kay ang GINOO maayo; kay ang iya kalooy nagapadayon sa gihapon: kag sang mga magadala sing halad sa pagdayaw sa sulud sang balay sang GINOO. Kay pahaulian ko ang kabihagan sang duta, subong sang sa una, nagasiling ang GINOO.

12 Amo ini ang ginasiling sang GINOO sang mga kasoldadosan; Sa liwat pa sa sini nga duug, nga mamingaw, nga wala sing tawo kag wala sing sapat, kag sa tanan niya nga mga siudad, manginmay puluy-an sang mga manugpahalab nga nagapaluko sang ila mga panong.

13 Sa mga siudad sang kabukiran, sa mga siudad sang nalupyakan, kag sa mga siudad sang bagatnan, kag sa duta sang Benjamin, kag sa mga duug palibut sa Jerusalem, kag sa mga siudad sang Juda, magaagi liwat ang mga panong sa idalum sang mga kamut sang nagaisip sa ila, nagasiling ang GINOO.

14 Yari karon, nagaabut ang mga adlaw, nagasiling ang GINOO, nga himoon ko inang butang nga maayo nga ginsaad ko sa panimalay sang Israel kag sa panimalay sang Juda.

15 ś Sa sinang mga adlaw, kag sa sinang tion, patubuon ko kay David ang isa ka Sanga sang pagkamatarung; kag sia magahukom kag magahikot sing pagkamatarung sa duta.

16 Sa sinang mga adlaw ang Juda maluwas, kag ang Jerusalem magapuyo sing malig-on: kag amo ini ang ngalan nga itawag sa iya, Ang GINOO aton pagkamatarung.

17 ś Kay amo ini ang ginasiling sang GINOO; Si David indi pagkulangon sing tawo nga magalingkod sa trono sang panimalay sang Israel;

18 Kag sa mga pari nga mga Levinhon wala sing makulang nga tawo sa akon atubangan sa pagdolot sing mga halad nga sinonog, kag sa pagsonog sing mga halad nga kalan-on, kag sa paghalad sing dalayon.

19 ś Kag ang polong sang GINOO nag-abut kay Jeremias, nga nagasiling,

20 Amo ini ang ginasiling sang GINOO; Kon mabungkag ninyo ang akon katipan nahanungud sa adlaw, kag ang akon katipan nahanungud sa gab-i, kag nga wala na sing adlaw kag gab-i sa ila panag-on;

21 Niyan mabungkag man ninyo ang akon katipan kay David nga akon alagad, agud nga wala na sia sing anak nga lalaki nga magahari sa iya trono; kag sa mga Levinhon nga mga pari, nga akon mga ministro.

22 Subong nga ang panong sang langit indi maisip, ukon masukub ang balas sang dagat: sa amo pabu-aron ko ang kaliwat ni David nga akon alagad, kag ang mga Levinhon nga nagaalagad sa akon.

23 Labut pa ang polong sang GINOO nag-abut kay Jeremias, nga nagasiling,

24 Wala ka bala nagapatugsiling sang napamolong sining katawohan, nga nagasiling, Ang duha ka panimalay nga ginpili sang GINOO, sila ginsikway niya? sa sini gintamay nila ang akon katawohan, agud nga indi na sila manginpungsud sa atubangan nila,

25 Amo ini ang ginasiling sang GINOO; Kon ang akon katipan indi upud sa adlaw kag gab-i, kag kon wala ko itangdo ang mga pagsolondan sang langit kag sang duta;

26 Niyan isikway ko ang kaliwat ni Jacob, kag ni David nga akon alagad, sa bagay nga indi ako magkuha sang bisan sin-o sa iya kaliwat nga mangin mga manuggahum sa kaliwat ni Abraham, ni Isaac, kag ni Jacob: kay papahaulian ko ang ila kabihagan, kag magakalooy sa ila.

KAPITULO 34

ANG polong nga nag-abut kay Jeremias gikan sa GINOO, sang si Nabucodonosor nga hari sang Babilonia, kag ang bug-os niya nga kasoldadosan, kag ang tanan nga ginharian sang duta nga iya ginsakpan, kag ang tanan nga mga katawohan, nag-away batok sa Jerusalem, kag batok sa tanan nga mga siudad sini, nga nagasiling,

2 Amo ini ang ginasiling sang GINOO, ang Dios sang Israel; Kadto kag magpamolong kay Sedequias nga hari sang Juda, kag sugiri sia, Amo ini ang ginasiling sang GINOO; Yari karon, ihatag ko ini nga siudad sa kamut sang hari sang Babilonia, kag sonogon niya ini sa kalayo:

3 Kag indi ka makapalagyo sa iya kamut, kondi sa pagkamatuud madakpan, kag itugyan ka sa iya kamut; kag ang imo mga mata magatan-aw sa mga mata sang hari sang Babilonia, kag magapakighambal sia sa imo sa baba kag baba, kag magakadto ka sa Babilonia.

4 Apang pamatii ang polong sang GINOO, O Sedequias nga hari sang Juda; Amo ini ang ginasiling sang GINOO nahanungud sa imo, Indi ka mapatay sa espada:

5 Kondi mapatay ka sa paghidait: kag sa mga pagsonog nga sa imo mga kaamayan, ang mga hari anay nga una sa imo, sa amo sila man magasonog sing mga pahumut nga sa imo; kag magapanalabiton sila sa imo, nga nagasiling, Ah ginoo! kay nahambal ko ang polong, nagasiling ang GINOO.

6 Niyan si Jeremias nga manalagna nagpamolong sini tanan nga polong kay Sedequias nga hari sang Juda, sa Jerusalem,

7 Sang nagpakig-away ang kasoldadosan sang hari sang Babilonia batok sa Jerusalem, kag batok sa tanan nga mga siudad sang Juda nga nabilin, batok sa Laquis, kag batok sa Azeka: kay ining mga siudad nga napamakuran among nabilin sang mga siudad sang Juda.

8 ś Ini amo ang polong nga nag-abut kay Jeremias gikan sa GINOO, sa tapus nga si haring Sedequias nagpakigkatipan sa bug-os nga katawohan nga yara sa Jerusalem, sa pagbantala sing kahilwayan sa ila;

9 Nga hilwayon sang tagsa ka tawo ang iya alagad nga lalaki, kag sang tagsa ka tawo ang iya alagad nga babaye, nga Hebreo nga lalaki ukon Hebreo nga babaye; nga wala sing bisan sin-o nga magpaalagad sa ila, sa iya utud nga Judio.

10 Karon sang ang tanan nga prinsipe, kag ang bug-os nga katawohan, nga nakasimpon sa katipan, nakabati nga ang tagsatagsa dapat maghilway sang iya alagad nga lalaki, kag ang tagsatagsa sang iya alagad nga babaye, agud nga wala na gid sing bisan sin-o nga magpaalagad sa ila, niyan nagtuman sila, kag ginpalakat sila.

11 Apang sa olihi nagliwat sila, kag ginpabalik nila ang mga alagad kag ang mga alagad nga babaye nga ginhilway nila, kag ginsakup sila nga mga alagad kag mga alagad nga babaye.

12 ś Busa ang polong sang GINOO nag-abut kay Jeremias gikan sa GINOO, nga nagasiling,

13 Amo ini ang ginasiling sang GINOO, ang Dios sang Israel; Nagpakigkatipan ako sa inyo mga kaamayan sang adlaw nga ginpagowa ko sila gikan sa duta sang Egipto, gikan sa balay sang mga ulipon, nga nagasiling,

14 Sa katapusan sang pito ka tuig hilwayon ninyo sang tagsa ka tawo ang iya utud nga Hebreo nga ginbaligya sa imo; kag kon nakaalagad sia sa imo sing anum ka tuig, hilwayon mo sia gikan sa imo: apang ang inyo mga kaamayan wala magpamati sa akon, ukon naglingig sang ila idulungug.

15 Kag kamo karon nagliso, kag naghimo sang matarung sa akon itololok, sa pagbantala sing kahilwayan sa tagsa ka tawo sa iya isigkatawo; kag nagpakigkatipan kamo sa akon atubangan sa balay nga ginatawag sa akon ngalan:

16 Apang nagliwat kamo kag nagdagta sang akon ngalan, kag nagpabalik ang tagsa ka tawo sang iya alagad, kag ang tagsa ka tawo sang iya alagad nga babaye, nga ginhilway ninyo sa ila kabubut-on, kag ginsakup ninyo sila, nga mangin-inyo mga alagad kag mga alagad nga babaye.

17 Busa, amo ini ang ginasiling sang GINOO; Wala kamo magpamati sa akon, sa pagbantala sing kahilwayan, ang tagsa ka tawo sa iya utud, kag ang tagsa ka tawo sa iya isigkatawo: yari karon, nagabantala ako sa inyo sing kahilwayan, nagasiling ang GINOO, sa espada, sa pameste, kag sa tiggulutum; kag ipasaylo ko kamo pakadto sa tanan nga ginharian sang duta.

18 Kag ihatag ko ang mga tawo nga naglalis sang akon katipan, nga wala magtuman sang mga polong sang katipan nga ginhimo nila sa akon atubangan, sang ginpihak nila ang tinday nga baka, kag nag-agi sa ulut sa mga pinihak sini,

19 Ang mga prinsipe sang Juda, kag ang mga prinsipe sang Jerusalem, ang mga eunuco, kag ang mga pari, kag ang bug-os nga katawohan sang duta, nga nag-agi sa ulut sang mga pinihak sang tinday nga baka;

20 Ihatag ko gid sila sa kamut sang ila mga kaaway, kag sa kamut sang mga nagatinguha sang ila kabuhi: kag ang ila patay nga mga lawas manginkalan-on sang kapispisan sang langit, kag sang kasapatan sang duta.

21 Kag si Sedequias nga hari sang Juda kag ang iya mga prinsipe ihatag ko sa kamut sang ila mga kaaway, kag sa kamut sang mga nagatinguha sang ila kabuhi, kag sa kamut sang kasoldadosan sang hari sang Babilonia, nga nagtaliwan gikan sa inyo.

22 Yari karon, sogoon ko, nagasiling ang GINOO, kag pabalikon sila sa sini nga siudad; kag awayon nila ini, kag agawon ini, kag sonogon ini sa kalayo: kag pamingawon ko ang mga siudad sang Juda nga wala sing pumuluyo.

KAPITULO 35

ANG polong nga nag-abut kay Jeremias gikan sa GINOO sa mga adlaw ni Jehoaquim nga anak nga lalaki ni Josias, hari sang Juda, nga nagasiling,

2 Kadto sa panimalay sang mga Recabnon, kag magpamolong sa ila, kag dalhon sila sa balay sang GINOO, sa isa sang mga hulut, kag paimnon sila sing alak.

3 Niyan ginkuha ko si Jaazanias nga anak nga lalaki ni Jeremias, anak nga lalaki ni Habasinias, kag ang iya mga utud, kag ang tanan niya nga anak nga lalaki, kag ang bug-os nga panimalay sang mga Recabnon;

4 Kag ginpasulud ko sila sa balay sang GINOO, sa hulut sang mga anak nga lalaki ni Hanan, nga anak nga lalaki ni Igdalias, ang tawo sang Dios, nga yara sa luyo sang hulut sang mga prinsipe, nga yara sa ibabaw sang hulut ni Maasias nga anak nga lalaki ni Sallum, ang manugtatap sang ganhaan:

5 Kag ginbutang ko sa atubangan sang mga anak nga lalaki sang panimalay sang mga Recabnon ang mga tibud nga puno sang alak, kag mga tagayan, kag nagsiling ako sa ila, Inum kamo sing alak.

6 Apang nagsiling sila, Indi kami mag-inum sing alak: kay si Jonadab nga anak nga lalaki ni Recab, nga amon amay, nagsogo sa amon, nga nagasiling, Dili kamo mag-inum sing alak, kamo, ukon ang inyo mga anak nga lalaki sing dayon:

7 Kag dili kamo magpatindug sing balay, ukon magsab-ug sing binhi, ukon magtanum sing ulubasan, ukon mag-angkon sing bisan ano: kondi sa tanan ninyo nga adlaw magpuyo kamo sa mga layanglayang; agud nga magkabuhi kamo sing madamu nga adlaw sa duta sa diin mga dumuloong kamo.

8 Sa amo nagtuman kami sang tingug ni Jonadab nga anak nga lalaki ni Recab, nga amon amay, sa tanan nga gintulin niya sa amon, nga indi mag-inum sing alak sa tanan namon nga mga adlaw, kami, ang amon mga asawa, ang amon mga anak nga lalaki, ukon ang amon mga anak nga babaye;

9 Ukon magpatindug sing mga balay nga puy-an namon: kag wala kami sing ulubasan, ukon latagon, ukon binhi:

10 Kondi nagpuyo kami sa mga layanglayang, kag nagtuman, kag naghimo sono sa tanan nga ginsogo sa amon ni Jonadab nga amon amay.

11 Apang nahanabu, sang si Nabucodonosor nga hari sang Babilonia nagtaklad sa duta, nga nagsiling kami, Kari, kag magkadto kita sa Jerusalem sa kahadluk sa kasoldadosan sang mga Caldeanhon, kag sa kahadluk sa kasoldadosan sang mga Sirianhon: gani nagapuyo kami sa Jerusalem.

12 ś Niyan nag-abut ang polong sang GINOO kay Jeremias, nga nagasiling,

13 Amo ini ang ginasiling sang GINOO sang mga kasoldadosan, ang Dios sang Israel; Kadto kag isugid sa mga tawo sang Juda kag sa mga pumuluyo sang Jerusalem, Indi bala kamo magbaton sing pagtudlo sa pagpamati sa akon mga polong? nagasiling ang GINOO.

14 Ang mga polong ni Jonadab nga anak nga lalaki ni Recab, nga iya ginsogo sa iya mga anak nga lalaki, nga indi mag-inum sing alak, ginatuman; kay tubtub sini nga adlaw wala gid sila pag-inum, apang nagatuman sila sang sogo sang ila amay: walay sapayan ako nagpamolong sa inyo, nga nagabangon sing aga pa kag nagapamolong; apang wala kamo magpamati sa akon.

15 Ginpadala ko man sa inyo ang tanan ko nga alagad nga mga manalagna, nga nagabangon sing aga pa kag nagapadala sa ila, nga nagasiling, Magtalikod kamo karon ang tagsa ka tawo gikan sa iya malaut nga dalanon, kag kaayoha ninyo ang inyo mga ginahimo, kag dili magsonod sa iban nga mga dios sa pag-alagad sa ila, kag magapuyo kamo sa duta nga ginhatag ko sa inyo kag sa inyo mga kaamayan: apang wala kamo maglingig sang inyo idulungug, ukon magpamati sa akon.

16 Bangud nga ang mga anak nga lalaki ni Jonadab nga anak nga lalaki ni Recab naghimo sang sogo sang ila amay, nga ginsogo niya sa ila; apang ini nga katawohan wala magpamati sa akon:

17 Busa amo ini ang ginasiling sang GINOONG Dios sang mga kasoldadosan, ang Dios sang Israel; Yari karon, dalhon ko sa Juda kag sa tanan nga pumuluyo sang Jerusalem ang tanan nga malaut nga ginmitlang ko batok sa ila: bangud nga nagpamolong ako sa ila, apang wala sila magpamati; kag nagpanawag ako sa ila, apang wala sila magsabat.

18 ś Kag si Jeremias nagsiling sa panimalay sang mga Recabnon, Amo ini ang ginasiling sang GINOO sang mga kasoldadosan, ang Dios sang Israel; Bangud nga nagtuman kamo sang sogo ni Jonadab nga inyo amay, kag nagbantay sang tanan niya nga tulumanon, kag naghimo sono sa tanan nga ginsogo niya sa inyo:

19 Busa amo ini ang ginasiling sang GINOO sang mga kasoldadosan, ang Dios sang Israel; Si Jonadab nga anak nga lalaki ni Recab indi gid makulangan sing tawo nga magatindug sa akon atubangan.

KAPITULO 36

KAG nahanabu sa ikap-at nga tuig ni Jehoaquim nga anak nga lalaki ni Josias, hari sang Juda, nga nag-abut ini nga polong kay Jeremias gikan sa GINOO, nga nagasiling,

2 Kuha ka sing linukut sang libro, kag isulat sa sini ang tanan nga polong nga ginpamolong ko sa imo batok sa Israel, kag batok sa Juda, kag batok sa tanan nga pungsud, kutub sang adlaw nga nagpamolong ako sa imo, kutub sa mga adlaw ni Josias tubtub sini nga adlaw.

3 Ayhan ang panimalay sang Juda magapamati sang bug-os nga malaut nga ginabuko ko nga himoon sa ila; agud nga magtalikod sila ang tagsa ka tawo sa iya malaut nga dalanon; agud nga mapatawad ko ang ila kalautan kag ang ila sala.

4 Niyan gintawag ni Jeremias si Baruc nga anak nga lalaki ni Nerias: kag ginsulat ni Baruc ang tanan nga polong sang GINOO gikan sa baba ni Jeremias, nga ginpamolong niya sa iya, sa linukut sang libro.

5 Kag ginsogo ni Jeremias si Baruc, nga nagasiling, Nabilanggo ako; indi ako sarang makakadto sa balay sang GINOO:

6 Busa sulud ka, kag basaha sa linukut, nga ginsulat mo gikan sa akon baba, ang mga polong sang GINOO sa mga idulungug sang katawohan sa balay sang GINOO sa adlaw sang puasa: kag basahon mo man sila sa mga idulungug sang bug-os nga Juda nga nagagowa gikan sa ila mga siudad.

7 Ayhan magapabutyag sila sang ila pakilooy sa atubangan sang GINOO, kag magatalikod ang tagsatagsa sa iya malaut nga dalanon: kay daku ang kaakig kag ang kaalipungut nga ginmitlang sang GINOO batok sini nga katawohan.

8 Kag si Baruc nga anak nga lalaki ni Nerias naghimo sono sa tanan nga ginsogo sa iya ni Jeremias nga manalagna, nga nagabasa sa libro sang mga polong sang GINOO sa balay sang GINOO.

9 Kag nahanabu sa ikalima nga tuig ni Jehoaquim nga anak nga lalaki ni Josias, hari sang Juda, sa ikasiam nga bulan, nga nagbantala sila sing puasa sa atubangan sang GINOO sa bug-os nga katawohan sang Jerusalem, kag sa bug-os nga katawohan nga nag-abut sa Jerusalem gikan sa mga siudad sang Juda.

10 Niyan ginbasa ni Baruc sa libro ang mga polong ni Jeremias sa balay sang GINOO, sa hulut ni Gemarias nga anak nga lalaki ni Safan nga escriba, sa naibabaw nga luwang, sa salamputan sang bag-o nga gawang sang balay sang GINOO, sa mga idulungug sang bug-os nga katawohan.

11 ś Sang nabatian ni Micaya nga anak nga lalaki ni Gemarias, ang anak nga lalaki ni Safan, ang tanan nga polong sang GINOO gikan sa libro,

12 Niyan nagpanaug sia pasulud sa balay sang hari, sa hulut sang escriba: kag, yari karon, ang tanan nga prinsipe nagalingkod didto, bisan si Elisama nga escriba, kag si Delaya nga anak nga lalaki ni Semaya, kag si Elnatan nga anak nga lalaki ni Acbor, kag si Gemarias nga anak nga lalaki ni Safan, kag si Sedequias nga anak nga lalaki ni Hananias, kag ang tanan nga prinsipe.

13 Niyan ginpahayag sa ila ni Micaya ang tanan nga polong nga iya nabatian, sang pagbasa ni Baruc sang libro sa mga idulungug sang katawohan.

14 Busa ginpadala sang tanan nga prinsipe si Jehudi nga anak nga lalaki ni Netanias, ang anak nga lalaki ni Selemias nga anak nga lalaki ni Cusi, kay Baruc, nga nagasiling, Dalha sa imo kamut ang linukut nga ginbasa mo sa mga idulungug sang katawohan, kag magkari. Gani si Baruc nga anak nga lalaki ni Nerias nagdala sa iya kamut sang linukut, kag nagkadto sa ila.

15 Kag ginsilingan nila sia, Lingkod ka karon, kag basaha ini sa amon mga idulungug. Gani ginbasa ini ni Baruc sa ila mga idulungug.

16 Karon nahanabu, sang pagkabati nila sang tanan nga polong, nga nagkahadluk sila ang isa kag isa, kag nagsiling kay Baruc, Sa pagkamatuud sugiran naton ang hari sini tanan nga polong.

17 Kag nagpamangkot sila kay Baruc, nga nagasiling, Sugiri kami karon, Paano bala ang pagsulat mo sini tanan nga polong nga nagikan sa iya baba?

18 Niyan si Baruc nagsabat sa ila, Sia nagmitlang sa akon sa iya baba sini tanan nga polong, kag ako nagsulat sa ila sa tinta sa libro.

19 Niyan nagsiling ang mga prinsipe kay Baruc, Lakat, kag panago, ikaw kag si Jeremias; kag dili pagpahibaloa ang bisan sin-o nga tawo kon diin kamo.

20 ś Kag nagsulud sila sa hari sa luwang, apang gintago nila ang linukut sa hulut ni Elisama nga escriba, kag ginsugid nila ang tanan nga polong sa mga idulungug sang hari.

21 Gani ginpadala sang hari si Jehudi sa pagkuha sang linukut: kag ginkuha niya ini sa hulut ni Elisama nga escriba. Kag ini ginbasa ni Jehudi sa mga idulungug sang hari, kag sa mga idulungug sang tanan nga prinsipe nga nagtindug sa luyo sang hari.

22 Karon ang hari nagalingkod sa balay sa tigtulugnaw sa ikasiam nga bulan: kag may nagadabdab nga kalayo sa bagahan sa atubangan niya.

23 Kag nahanabu, nga sang mabasa ni Jehudi ang tatlo ukon apat ka panid, gin-utud niya ini sang gamay nga sundang, kag gindap-ung ini sa kalayo nga yara sa bagahan, tubtub nga ang bug-os nga linukut naupus sa kalayo nga yara sa bagahan.

24 Apang wala sila mahadluk, ukon nagkusnit sang ila mga panapton, ang hari ukon bisan sin-o sang iya nga mga alagad nga nakabati sini tanan nga polong.

25 Walay sapayan si Elnatan kag si Delaya kag si Gemarias nagpakilooy sa hari nga indi niya pagsonogon ang linukut: apang indi sia magpamati sa ila.

26 Apang ginsogo sang hari si Jerameel nga anak nga lalaki ni Hammelec, kag si Seraya nga anak nga lalaki ni Azriel, kag si Selemias nga anak nga lalaki ni Abdeel, nga dakpon si Baruc nga escriba kag si Jeremias nga manalagna: apang gintago sila sang GINOO.

27 ś Niyan ang polong sang GINOO nag-abut kay Jeremias, sa tapus nga nasonog sang hari ang linukut, kag ang mga polong nga ginsulat ni Baruc gikan sa baba ni Jeremias, nga nagasiling,

28 Kuha ka liwat sing isa pa ka linukut, kag isulat sa sini ang tanan nga polong nga didto anay sa nahauna nga linukut, nga ginsonog ni Jehoaquim nga hari sang Juda.

29 Kag isiling mo kay Jehoaquim nga hari sang Juda, Amo ini ang ginasiling sang GINOO; Ginsonog mo ini nga linukut, nga nagasiling, Ngaa bala ginsulat mo sa sini, nga nagasiling, Ang hari sang Babilonia sa pagkamatuud magaabut kag magalaglag sini nga duta, kag magapawala didto sang tawo kag sapat?

30 Busa amo ini ang ginasiling sang GINOO nahanungud kay Jehoaquim nga hari sang Juda; Wala gid sia sing palingkoron sa trono ni David: kag sa adlawon ang iya patay nga lawas ihaboy sa gowa sa initan, kag sa kagab-ihon sa hielo.

31 Kag silotan ko sia kag ang iya kaliwat kag ang iya mga alagad tungud sang ila kalautan; kag dalhon ko sa ila, kag sa mga pumuluyo sang Jerusalem, kag sa mga tawo sang Juda, ang tanan nga malaut nga ginmitlang ko batok sa ila; apang wala sila magpamati.

32 ś Niyan nagkuha si Jeremias sing isa pa ka linukut, kag ginhatag ini kay Baruc nga escriba, ang anak nga lalaki ni Nerias; nga nagsulat sa sini gikan sa baba ni Jeremias sang tanan nga polong sang libro nga ginsonog sa kalayo ni Jehoaquim nga hari sang Juda: kag gindugang pa luwas sa ila ang madamung kaangay nga polong.

KAPITULO 37

KAG si Sedequias nga anak nga lalaki ni Josias naghari sa tal-us ni Conias nga anak nga lalaki ni Jehoaquim, nga ginhimo nga hari sa duta sang Juda ni Nabucodonosor nga hari sang Babilonia.

2 Apang bisan sia, ukon ang iya mga alagad, ukon ang katawohan sang duta, wala magpamati sang mga polong sang GINOO, nga ginpamolong niya paagi sa manalagna nga si Jeremias.

3 Kag si Sedequias nga hari nagpadala kay Jehucal nga anak nga lalaki ni Selemias kag kay Sofonias nga anak nga lalaki ni Maasias, ang pari, pakadto kay Jeremias nga manalagna, nga nagasiling, Pangamuyo karon tungud sa amon sa GINOO nga aton Dios.

4 Karon si Jeremias nagsulud kag naggowa sa katawohan: kay wala nila masulud sia sa bilanggoan.

5 Niyan ang kasoldadosan ni Faraon naggowa sa Egipto: kag sang nabatian sang mga Caldeanhon nga nagkibon sang Jerusalem ang mga balita nahanungud sa ila, naghalin sila sa Jerusalem.

6 ś Niyan nag-abut ang polong sang GINOO kay Jeremias nga manalagna, nga nagasiling,

7 Amo ini ang ginasiling sang GINOO, ang Dios sang Israel; Amo ini ang isiling ninyo sa hari sang Juda, nga nagpadala sa inyo sa akon sa pagpakisayud nahanungud sa akon; Yari karon, ang kasoldadosan ni Faraon, nga naggowa sa pagbulig sa inyo, magabalik sa Egipto sa ila kaugalingon nga duta.

8 Kag ang mga Caldeanhon magabalik, kag magaaway batok sini nga siudad, kag agawon ini, kag sonogon ini sa kalayo.

9 Amo ini ang ginasiling sang GINOO; Dili pagdayai ang inyo kaugalingon, nga nagasiling, Ang mga Caldeanhon sa pagkamatuud magataliwan sa aton: kay indi sila magtaliwan.

10 Kay bisan samaron ninyo ang bug-os nga kasoldadosan sang mga Caldeanhon nga nagaaway batok sa inyo, kag mabilin lamang sa ila ang mga tawo nga pilason, walay sapayan magatindug ang tagsa ka tawo sa iya layanglayang, kag magasonog sini nga siudad sa kalayo.

11 ś Kag nahanabu, nga sang naghalin ang kasoldadosan sang mga Caldeanhon sa Jerusalem bangud sa kahadluk sang kasoldadosan ni Faraon,

12 Niyan si Jeremias naggowa sa Jerusalem sa pagkadto sa duta sang Benjamin, agud nga magpain sia didto sa tunga sang katawohan.

13 Kag sang didto sia sa gawang sang Benjamin, isa ka kapitan sang bilanggoan yadto didto, nga ginhingalanan si Irias nga anak nga lalaki ni Selemias, ang anak nga lalaki ni Hananias; kag gindakup niya si Jeremias nga manalagna, nga nagasiling, Ikaw nagadangup sa mga Caldeanhon.

14 Niyan si Jeremias nagsiling, Dimatuud ini; wala ako nagadangup sa mga Caldeanhon. Apang wala sia magpamati sa iya: gani gindakup ni Irias si Jeremias, kag gindala sia sa mga prinsipe.

15 Busa ang mga prinsipe nagsingkal kay Jeremias, kag ginsakit sia, kag ginsulud sia sa bilanggoan sa balay ni Jonatan nga escriba: kay ginhimo nila yadto nga bilanggoan.

16 ś Sang nagsulud si Jeremias sa bilanggoan nga madulum, kag sa mga huluthulut, kag nagpabilin didto si Jeremias sa madamu nga mga adlaw;

17 Niyan si Sedequias nga hari nagpadala, kag ginpagowa sia: kag ang hari nagpamangkot sa iya sing tago sa iya balay, kag nagsiling, May bisan ano nga polong bala gikan sa GINOO? Kag si Jeremias nagsiling, May yara: kay, nagsiling sia, itugyan ka sa kamut sang hari sang Babilonia.

18 Labut pa nagsiling si Jeremias kay haring Sedequias, Sa ano bala ako nakasala batok sa imo, ukon batok sa imo mga alagad, ukon batok sa sini nga katawohan, nga ginbutang ninyo ako sa bilanggoan?

19 Diin bala karon ang inyo mga manalagna nga nagtagna sa inyo, nga nagasiling, Ang hari sang Babilonia indi magkari batok sa inyo, ukon batok sa sini nga duta?

20 Busa karon pamatii, ginaampo ko sa imo, O ginoo ko nga hari: batona ang akon pangabay sa atubangan mo, ginaampo ko sa imo; nga indi mo ako pag-ipabalik sa balay ni Jonatan nga escriba, basi nga mapatay ako didto.

21 Niyan nagsogo si Sedequias nga hari nga pag-ibutang nila si Jeremias sa luwang sang bilanggoan, kag nga paghatagan nila sia sing isa ka bilog nga tinapay adlawadlaw gikan sa dalan sang mga manugtinapay, tubtub nga ang tanan nga tinapay sang siudad naorot. Sa amo nagpabilin si Jeremias sa luwang sang bilanggoan.

KAPITULO 38

NIYAN si Sefatias nga anak nga lalaki ni Matan, kag si Gedalias nga anak nga lalaki ni Pasur, kag si Jucal nga anak nga lalaki ni Selemias, kag si Pasur nga anak nga lalaki ni Malquias, nakabati sang mga polong nga ginpamolong ni Jeremias sa bug-os nga katawohan, nga nagasiling,

2 Amo ini ang ginasiling sang GINOO, Ang nagapabilin sa sini nga siudad mapatay sa espada, sa tiggulutum, kag sa pameste: apang ang nagakadto sa mga Caldeanhon mabuhi; kay ang iya kabuhi mangin-inagaw sa iya, kag magakabuhi sia.

3 Amo ini ang ginasiling sang GINOO, Sa pagkamatuud itugyan ini nga siudad sa kamut sang kasoldadosan sang hari sang Babilonia, nga magakuha sini.

4 Busa ang mga prinsipe nagsiling sa hari, Nagapakilooy kami sa imo, ipapatay ini nga tawo: kay ginapaluya niya ang mga kamut sang mga lalaki sang pag-awayan nga nabilin sa sini nga siudad, kag ang mga kamut sang bug-os nga katawohan, sa pagpamolong sa ila sang amo nga mga polong: kay ini nga tawo wala nagapangita sang kaayohan sining katawohan, kondi sang ila kasamaran.

5 Niyan si Sedequias nga hari nagsiling, Yari karon, sia yara sa inyo kamut: kay ang hari indi amo ang makasarang sa paghimo sing bisan ano batok sa inyo.

6 Niyan ginkuha nila si Jeremias, kag ginpilak sia pasulud sa bilanggoan nga madulum ni Malquias nga anak nga lalaki ni Hammelec, nga yara sa luwang sang bilanggoan: kag gintonton nila si Jeremias sang mga lubid. Kag sa bilanggoan nga madulum wala sing tubig, kondi lunang: gani nagsalup si Jeremias sa lunang.

7 ś Karon sang nabatian ni Ebed-melec nga Etiopiahanon, isa sang mga eunuco nga yara sa balay sang hari, nga ginsulud nila si Jeremias sa bilanggoan nga madulum; sa sadtong tion nagalingkod ang hari sa gawang sang Benjamin;

8 Si Ebed-melec naggowa sa balay sang hari, kag nagpamolong sa hari, nga nagasiling,

9 Ang ginoo nga hari, ini nga mga tawo naghimo sing malaut sa tanan nga ginhimo nila kay Jeremias nga manalagna, nga ila ginpilak pasulud sa bilanggoan nga madulum; kag madali sia mapatay sa duug diin sia bangud sang tiggulutum: kay wala na sing tinapay sa siudad.

10 Niyan ginsogo sang hari si Ebed-melec nga Etiopiahanon, nga nagasiling, Kuha ka gikan dira sing katloan ka tawo upud sa imo, kag batakon si Jeremias nga manalagna pagowa sa bilanggoan nga madulum, sa wala pa sia mapatay.

11 Gani gindala ni Ebed-melec upud sa iya ang mga tawo, kag nagkadto sa balay sang hari, sa idalum sang bahandian, kag nagkuha didto sing daan nga mga hinaboy nga inugtukap kag daan nga mga gabuk nga lapat, kag gintonton sila sa mga lubid kay Jeremias sa sulud sang bilanggoan nga madulum.

12 Kag si Ebed-melec nga Etiopiahanon nagsiling kay Jeremias, Ibutang karon ining daan nga mga hinaboy nga inugtukap kag mga gabuk nga lapat sa idalum sang imo mga ilok nga hamil sa mga lubid. Kag ginhimo ni Jeremias ang subong sini.

13 Gani ginbatak nila si Jeremias sang mga lubid, kag ginpagowa sia sa bilanggoan nga madulum: kag nagpabilin si Jeremias sa luwang sang bilanggoan.

14 ś Niyan ginpakadtoan ni Sedequias nga hari, kag ginpakuha si Jeremias nga manalagna pakadto sa iya sa ikatlo nga salamputan nga yara sa balay sang GINOO: kag nagsiling ang hari kay Jeremias, Magapamangkot ako sa imo sing isa ka butang; dili iglikum sa akon ang bisan ano nga butang.

15 Niyan si Jeremias nagsiling kay Sedequias, Kon ipahayag ko ini sa imo, indi bala nga pagapatyon mo ako sing totoo? kag kon maglaygay ako sa imo, indi bala nga indi ikaw magpamati sa akon?

16 Gani si Sedequias nga hari nagsumpa sing tago kay Jeremias, nga nagasiling, Sa nagakabuhi ang GINOO, nga naghimo sa aton sini nga kalag, indi ko ikaw pagpatyon, kag indi ko ikaw pag-ihatag sa kamut sini nga mga tawo nga nagatinguha sang imo kabuhi.

17 Niyan nagsiling si Jeremias kay Sedequias, Amo ini ang ginasiling sang GINOO, ang Dios sang mga kasoldadosan, ang Dios sang Israel; Kon magkadto ka gid sa mga prinsipe sang hari sang Babilonia, niyan ang imo kalag magakabuhi, kag ini nga siudad indi pagsonogon sa kalayo; kag magakabuhi ka, kag ang imo panimalay:

18 Apang kon indi ka magkadto sa mga prinsipe sang hari sang Babilonia, niyan ini nga siudad ihatag sa kamut sang mga Caldeanhon, kag sonogon nila ini sa kalayo, kag indi ka makapalagyo sa ila kamut.

19 Kag si Sedequias nga hari nagsiling kay Jeremias, Nahadluk ako sa mga Judio nga nagdangup sa mga Caldeanhon, basi nga itugyan nila ako sa ila kamut, kag uligyaton nila ako.

20 Apang nagsiling si Jeremias, Indi ka nila pag-itugyan. Tumana, ginapakilooy ko sa imo, ang tingug sang GINOO, nga ginapamolong ko sa imo: sa amo mangin-maayo ini sa imo, kag magakabuhi ang imo kalag.

21 Apang kon magdumili ka sa pagkadto, amo ini ang polong nga ginpakita sa akon sang GINOO:

22 Kag, yari karon, ang tanan nga babaye nga nabilin sa balay sang hari sang Juda dalhon sa mga prinsipe sang hari sang Babilonia, kag yadto nga mga babaye magasiling, Ginsugyot ka sang imo mga abyan, kag naglandas sa imo: ang imo mga tiil nagasalalup sa lunang, kag nagatalalikod sila.

23 Gani dalhon nila sa mga Caldeanhon ang tanan mo nga asawa kag ang imo mga anak: kag indi ka makapalagyo sa ila kamut, kondi dakpon ka sang kamut sang hari sang Babilonia: kag ipasonog mo ini nga siudad sa kalayo.

24 ś Niyan nagsiling si Sedequias kay Jeremias, Dili pagpahibaloa ang bisan sin-o nga tawo sini nga mga polong, kag indi ka mapatay.

25 Apang kon ang mga prinsipe makabati nga ako nagpakighambal sa imo, kag magkadto sila sa imo, kag magsiling sa imo, Ipahayag karon sa amon ang ginsiling mo sa hari, indi ini pag-ilikum sa amon, kag indi ka namon pagpatyon; subong man kon ano ang ginsiling sang hari sa imo:

26 Niyan isiling mo sa ila, Ginpabutyag ko ang akon pakilooy sa atubangan sang hari, nga indi niya ako pag-ipabalik sa balay ni Jonatan, sa pagkamatay didto.

27 Niyan nagkadto ang tanan nga prinsipe kay Jeremias, kag nagpamangkot sa iya: kag nagsugid sia sa ila sono sa sini tanan nga polong nga nasogo sang hari. Gani nag-untat sila sa paghambal sa iya; kay ang butang wala mahantupan.

28 Gani si Jeremias nagpabilin sa luwang sang bilanggoan tubtub sa adlaw nga naagaw ang Jerusalem: kag didto sia sang ang Jerusalem gin-agaw.

KAPITULO 39

SA ikasiam nga tuig ni Sedequias nga hari sang Juda, sa ikapulo nga bulan, nag-abut si Nabucodonosor nga hari sang Babilonia kag ang bug-os niya nga kasoldadosan batok sa Jerusalem, kag nagkibon sini.

2 Kag sa ikapulo kag isa nga tuig ni Sedequias, sa ikap-at nga bulan, sa ikasiam nga adlaw sang bulan, nabulwang ang siudad.

3 Kag ang tanan nga prinsipe sang hari sang Babilonia nagsulud, kag naglingkod sa natunga nga gawang, si Nergal-sarezer, si Samgar-nebo, si Sarsequim, si Rab-sarsis, si Nergal-sarezer, si Rab-mag, pati ang iban nga tanan nga mga prinsipe sang hari sang Babilonia.

4 ś Kag nahanabu, nga sang nakita sila ni Sedequias nga hari sang Juda, kag sang tanan nga lalaki sang pag-awayan, niyan nagpalagyo sila, kag naggowa sa siudad sa kagab-ihon, paagi sa dalan sang katamnan sang hari, paagi sa gawang sa ulut sang duha ka kuta: kag naggowa sia paagi sa dalan sang kapatagan.

5 Apang ang kasoldadosan sang mga Caldeanhon naglagas sa ila, kag naabut si Sedequias sa mga kapatagan sang Jerico: kag sang nadakup nila sia, gindala nila sia kay Nabucodonosor nga hari sang Babilonia, sa Ribla sa duta sang Hamat, diin ginhukman niya sia.

6 Niyan ginpatay sang hari sang Babilonia ang mga anak nga lalaki ni Sedequias sa atubangan sang iya mga mata sa Ribla: ginpatay man sang hari sang Babilonia ang tanan nga dungganon sang Juda.

7 Labut pa ginlukat niya ang mga mata ni Sedequias, kag gingapus sia sa mga talikala, sa pagdala sa iya sa Babilonia.

8 ś Kag ginsonog sa kalayo sang mga Caldeanhon ang balay sang hari, kag ang kabalayan sang katawohan, kag ginlumpag ang mga kuta sang Jerusalem.

9 Niyan si Nabuzar-adan, nga kapitan sang mga bantay, nagdala nga bihag sa Babilonia sang salin sang katawohan nga nabilin sa siudad, kag yadtong mga nagsimpon, nga nagdangup sa iya, pati sang salin sang katawohan nga nabilin.

10 Apang si Nabuzar-adan, nga kapitan sang mga bantay, nagbilin sang imol sang katawohan, nga wala sing bisan ano, sa duta sang Juda, kag ginhatagan sila sing mga ulubasan kag mga latagon sa amo nga tion.

11 ś Karon si Nabucodonosor nga hari sang Babilonia nagtulin kay Nabuzar-adan, nga kapitan sang mga bantay, nahanungud kay Jeremias, nga nagasiling,

12 Kuhaa sia, kag tatapa sia sing maayo, kag dili sia pagsakita; kondi himoa sa iya sono sa isiling niya sa imo.

13 Gani nagpadala si Nabuzar-adan nga kapitan sang mga bantay, kag si Nabusazban, kag si Rab-sarsis, kag si Nergal-sarezer, si Rab-mag, kag ang tanan nga prinsipe sang hari sang Babilonia;

14 Sila gid nagpadala, kag nagkuha kay Jeremias pagowa sa luwang sang bilanggoan, kag gintugyan nila sia kay Gedalias nga anak nga lalaki ni Ahicam, ang anak nga lalaki ni Safan, agud nga dalhon niya sia pauli: gani nagpuyo sia sa tunga sang katawohan.

15 ś Karon ang polong sang GINOO nag-abut kay Jeremias, samtang nabilanggo sia sa luwang sang bilanggoan, nga nagasiling,

16 Lakat kag ipamolong kay Ebed-melec nga Etiopiahanon, nga nagasiling, Amo ini ang ginasiling sang GINOO sang mga kasoldadosan, ang Dios sang Israel; Yari karon, dalhon ko ang akon mga polong sa sini nga siudad nga sa kalaut, kag indi nga sa kaayohan; kag matuman sila sa imo atubangan sa sina nga adlaw.

17 Apang luwason ko ikaw sa sina nga adlaw, nagasiling ang GINOO: kag indi ikaw pag-itugyan sa kamut sang mga tawo nga ginakahadlukan mo.

18 Kay sa pagkamatuud luwason ko ikaw, kag indi ka mapukan sa espada, kondi ang imo kabuhi mangin-inagaw sa imo: bangud nga nagbutang ka sang imo pagsalig sa akon, nagasiling ang GINOO.

KAPITULO 40

ANG polong nga nag-abut kay Jeremias gikan sa GINOO, sa tapus nga si Nabuzar-adan nga kapitan sang mga bantay nagbuhi sa iya gikan sa Rama, sang ginkuha niya sia nga ginagapus sa mga talikala upud sa tanan nga gindala nga bihag gikan sa Jerusalem kag Juda, nga ginpangdala nga bihag sa Babilonia.

2 Kag ang kapitan sang mga bantay nagkuha kay Jeremias, kag nagsiling sa iya, Ang GINOO nga imo Dios nagmitlang sini nga malaut sa sini nga duug.

3 Karon ang GINOO nagdala sini, kag naghimo sono sa iya ginsiling: bangud nga nagpakasala kamo batok sa GINOO, kag wala magtuman sa iya tingug, busa ini nga butang nagaabut sa inyo.

4 Kag karon, yari karon, ginahubaran ko ikaw sa sini nga adlaw sang mga talikala nga yara sa imo kamut. Kon maayo sa imo nga mag-upud sa akon sa Babilonia, kari; kag tatapon ko ikaw sing maayo: apang kon malain sa imo nga mag-upud sa akon sa Babilonia, magpaumud: yari karon, ang bug-os nga duta yara sa imo atubangan: kadtoi kon diin ang minamaayo kag matarung nga kadtoan mo.

5 Karon samtang nga wala pa sia magpauli, nagsiling sia, Balik ka man kay Gedalias nga anak nga lalaki ni Ahicam, ang anak nga lalaki ni Safan, nga ginhimo nga gobernador sang hari sang Babilonia sa mga siudad sang Juda, kag puyo upud sa iya sa tunga sang katawohan: ukon kadto ka sa bisan diin nga matarung nga kadtoan mo. Gani ang kapitan sang mga bantay naghatag sa iya sing mga balon kag padya, kag ginpalakat sia.

6 Niyan si Jeremias nagkadto kay Gedalias nga anak nga lalaki ni Ahicam, sa Mizpa; kag nagpuyo upud sa iya sa tunga sang katawohan nga nabilin sa duta.

7 ś Karon sang nakabati ang tanan nga kapitan sang mga kusug nga yara sa mga latagon, sila kag ang ila mga tawo, nga ginhimo sang hari sang Babilonia si Gedalias nga anak nga lalaki ni Ahicam nga gobernador sa duta, kag gintugyan sa iya ang mga lalaki, kag ang mga babaye, kag ang kabataan, kag ang mga imol sang duta, sa mga wala madala nga bihag sa Babilonia;

8 Niyan nag-abut sila kay Gedalias sa Mizpa, si Ismael nga anak nga lalaki ni Netanias, kag si Johanan kag si Jonatan nga mga anak nga lalaki ni Carea, kag si Seraya nga anak nga lalaki ni Tanhumet, kag ang mga anak nga lalaki ni Efai nga Netofanhon, kag si Jezanias nga anak nga lalaki sang Maacatnon, sila kag ang ila mga tawo.

9 Kag si Gedalias nga anak nga lalaki ni Ahicam nga anak nga lalaki ni Safan nagsumpa sa ila kag sa ila mga tawo, nga nagasiling, Dili magkahadluk sa pag-alagad sa mga Caldeanhon: magpuyo sa duta, kag mag-alagad sa hari sang Babilonia, kag mangin-maayo sa inyo.

10 Nahanungud sa akon, yari karon, magapuyo ako sa Mizpa sa pag-alagad sang mga Caldeanhon, nga magaabut sa aton: apang kamo, tipon kamo sing alak, kag mga bunga sang tingadlaw, kag lana, kag isulud sila sa inyo mga suludlan, kag magpuyo sa inyo mga siudad nga nakuha ninyo.

11 Sa amo man nga bagay, sang ang tanan nga Judio nga yara sa Moab, kag sa tunga sang mga Amonhon, kag sa Edom, kag ang yara sa tanan nga duta, nakabati nga ang hari sang Babilonia nagbilin sing salin sa Juda, kag nga ginpagahum niya sa ila si Gedalias nga anak nga lalaki ni Ahicam, ang anak nga lalaki ni Safan;

12 Ang tanan nga Judio nagbalik gikan sa tanan nga duug diin ginsobol sila, kag nag-abut sa duta sang Juda, kay Gedalias, sa Mizpa, kag nagtipon sing madamu gid nga alak kag mga bunga sang tingadlaw.

13 ś Labut pa si Johanan nga anak nga lalaki ni Carea, kag ang tanan nga kapitan sang mga kusug nga yara sa mga latagon, nag-abut kay Gedalias sa Mizpa,

14 Kag nagsiling sa iya, Nakahibalo ka gid bala nga si Baalis nga hari sang mga Amonhon nagpadala kay Ismael nga anak nga lalaki ni Netanias sa pagpatay sa imo? Apang si Gedalias nga anak nga lalaki ni Ahicam wala magpati sa ila.

15 Niyan si Johanan nga anak nga lalaki ni Carea nagpamolong sing tago kay Gedalias sa Mizpa, nga nagasiling, Palakta ako, ginaampo ko sa imo, kag patyon ko si Ismael nga anak nga lalaki ni Netanias, kag walay tawo nga makahibalo sini: ngaa bala nga patyon ka niya, agud nga ang tanan nga Judio nga nagatipon sa imo mag-alaplaag, kag ang salin sang Juda mawala?

16 Apang si Gedalias nga anak nga lalaki ni Ahicam nagsiling kay Johanan nga anak nga lalaki ni Carea, Dili ka maghimo sining butang: kay nagapamolong ka sing dimatuud nahanungud kay Ismael.

KAPITULO 41

KARON nahanabu sa ikapitong bulan, nga si Ismael nga anak nga lalaki ni Netanias, ang anak nga lalaki ni Elisama, gikan sa kaliwat nga harianon, kag ang mga prinsipe sang hari, nga napulo ka tawo upud sa iya, nag-abut kay Gedalias nga anak nga lalaki ni Ahicam sa Mizpa; kag didto nagkaon sila sing tingub sang kalan-on sa Mizpa.

2 Niyan nagtindug si Ismael nga anak nga lalaki ni Netanias, kag ang napulo ka tawo upud sa iya, kag ginlabo sang espada si Gedalias nga anak nga lalaki ni Ahicam, nga anak nga lalaki ni Safan, kag ginpatay sia, sia nga ginhimo sang hari sang Babilonia nga gobernador sa duta.

3 Si Ismael man nagpatay sang tanan nga Judio nga upud sa iya, ang mga upud kay Gedalias, sa Mizpa, kag sang mga Caldeanhon nga nakit-an didto, kag sang mga lalaki sang pag-awayan.

4 Kag nahanabu sa ikaduhang adlaw sa tapus napatay niya si Gedalias, kag walay tawo nga nakahibalo sini,

5 Nga may nag-abut nga pila ka mga tawo gikan sa Siquem, sa Silo, kag sa Samaria, nga kawaloan ka tawo, nga nakiskis ang ila mga bungut, kag nakusnit ang ila mga panapton, kag nagpilas sang ila kaugalingon, nga may mga dolot kag incienso sa ila kamut, sa pagdala sa ila sa balay sang GINOO.

6 Kag si Ismael nga anak nga lalaki ni Netanias naggowa sa Mizpa sa pagsugata sa ila, nga nagahibi sing padayon sa nagalakat sia: kag nahanabu, sang nasugata niya sila, nga nagsiling sia sa ila, Kadto kamo kay Gedalias nga anak nga lalaki ni Ahicam.

7 Kag sang nag-abut sila sa tunga sang siudad, ginpatay sila ni Ismael nga anak nga lalaki ni Netanias, kag sang mga tawo upud sa iya, kag gintagbong sila sa tunga sang boho.

8 Apang may napulo ka tawo sa ila nga nagsiling kay Ismael, Dili kami pagpatya: kay may mga bahandi kami sa latagon, nga trigo, kag sebada, kag lana, kag dugus. Gani nagpaumud sia, kag wala niya pagpatya sila sa tunga sang ila mga utud.

9 Karon ang boho nga gintagbongan ni Ismael sang tanan nga patay nga mga lawas sang mga tawo, nga ginpatay niya bangud kay Gedalias, amo ini ang ginhimo ni Asa nga hari tungud sa kahadluk kay Baasa nga hari sang Israel: kag ini ginpuno ni Ismael nga anak nga lalaki ni Netanias sang mga ginpatay.

10 Niyan gindala ni Ismael nga bihag ang tanan nga nabilin sang katawohan nga yara sa Mizpa, ang babaye nga mga anak sang hari, kag ang tanan nga katawohan nga nabilin sa Mizpa, nga gintugyan ni Nabuzar-adan nga kapitan sang mga bantay kay Gedalias nga anak nga lalaki ni Ahicam: kag si Ismael nga anak nga lalaki ni Netanias nagdala sa ila nga bihag, kag nagtaliwan sa pagtabok sa mga Amonhon.

11 ś Apang sang nabatian ni Johanan nga anak nga lalaki ni Carea, kag sang tanan nga kapitan sang mga kusug nga upud sa iya, ang tanan nga malaut nga nahimo ni Ismael nga anak nga lalaki ni Netanias,

12 Niyan gindala nila ang tanan nga tawo, kag naglakat sa pag-away kay Ismael nga anak nga lalaki ni Netanias, kag nakita nila sia sa ubay sang dalagkung mga tubig nga yara sa Gabaon.

13 Karon nahanabu, nga sang nakita sang bug-os nga katawohan nga nag-upud kay Ismael si Johanan nga anak nga lalaki ni Carea, kag ang tanan nga kapitan sang mga kusug nga upud sa iya, niyan nagkasadya sila.

14 Gani ang bug-os nga katawohan nga gindala ni Ismael nga bihag gikan sa Mizpa nagliso kag nagbalik, kag nagkadto kay Johanan nga anak nga lalaki ni Carea.

15 Apang si Ismael nga anak nga lalaki ni Netanias nagpalagyo upud sang walo ka tawo gikan kay Johanan, kag nagkadto sa mga Amonhon.

16 Niyan ginkuha ni Johanan nga anak nga lalaki ni Carea kag sang tanan nga kapitan sang mga kusug nga upud sa iya, ang bug-os nga salin sang katawohan nga nabawi niya kay Ismael nga anak nga lalaki ni Netanias, gikan sa Mizpa, sa tapus nga napatay niya si Gedalias nga anak nga lalaki ni Ahicam, ang gamhanan nga mga lalaki sang pag-awayan, kag ang mga babaye, kag ang mga kabataan, kag ang mga eunuco, nga ginpabalik niya gikan sa Gabaon:

17 Kag nagtaliwan sila, kag nagpuyo sa puluy-an ni Kimham, nga yara sa luyo sang Bet-lehem, pakadto sa pagsulud sa Egipto,

18 Bangud sang mga Caldeanhon: kay nahadluk sila sa ila, bangud nga ginpatay ni Ismael nga anak nga lalaki ni Netanias si Gedalias nga anak nga lalaki ni Ahicam, nga ginhimo sang hari sang Babilonia nga gobernador sang duta.

KAPITULO 42

NIYAN ang tanan nga kapitan sang mga kusug, kag si Johanan nga anak nga lalaki ni Carea, kag si Jezanias nga anak nga lalaki ni Hosaya, kag ang bug-os nga katawohan kutub sa labing kubus tubtub sa labing dalagku, nagpalapit,

2 Kag nagsiling kay Jeremias nga manalagna, Batona, ginapakilooy namon sa imo, ang amon pangabay sa atubangan mo, kag magpangamuyo ka tungud sa amon sa GINOO nga imo Dios, tungud sa bug-os sining salin; (kay pila lamang kami nga nabilin gikan sa madamu, subong sang ginatan-aw kami sang imo mga mata:)

3 Agud nga ang GINOO nga imo Dios magpakita sa amon sang dalanon nga amon paglaktan, kag sang butang nga amon paghimoon.

4 Niyan si Jeremias nga manalagna nagsiling sa ila, Ginpamatian ko kamo; yari karon, magapangamuyo ako sa GINOO nga inyo Dios sono sa inyo mga polong; kag mahanabu, nga ang bisan anong butang nga isabat sa inyo sang GINOO, ipahayag ko sa inyo; wala ako sing ilikum sa inyo.

5 Niyan nagsiling sila kay Jeremias, Ang GINOO magmangin matuud kag matutum nga saksi sa tunga namon, kon indi kami maghimo sono sa tanan nga mga butang nga ipadala paagi sa imo sang GINOO nga imo Dios sa amon.

6 Bisan ini maayo, ukon malaut, tumanon namon ang tingug sang GINOO nga aton Dios, nga sa iya ginapadala ka namon; agud nga manginmaayo sa amon, kon tumanon namon ang tingug sang GINOO nga aton Dios.

7 ś Kag nahanabu, sa tapus ang napulo ka adlaw, nga ang polong sang GINOO nag-abut kay Jeremias.

8 Niyan gintawag niya si Johanan nga anak nga lalaki ni Carea, kag ang tanan nga kapitan sang mga kusug nga upud sa iya, kag ang bug-os nga katawohan kutub sa labing kubus tubtub sa labing dalagku,

9 Kag nagsiling sa ila, Amo ini ang ginasiling sang GINOO, ang Dios sang Israel, nga sa iya ginpadala ninyo ako sa pagpahayag sang inyo pangabay sa atubangan niya;

10 Kon magpabilin pa kamo sa sining duta, niyan patindugon ko kamo, kag indi paglumpagon, kag itanum ko kamo, kag indi paggabuton: kay nagakalisud ako sang malaut nga nahimo ko sa inyo.

11 Dili kamo magkahadluk sa hari sang Babilonia, nga inyo ginakahadlukan; dili magkahadluk sa iya, nagasiling ang GINOO: kay nagaupud ako sa inyo sa pagluwas sa inyo, kag sa paghilway sa inyo sa iya kamut.

12 Kag pakitaan ko kamo sing mga kalooy, agud nga sia malooy sa inyo, kag pabalikon kamo sa inyo kaugalingon nga duta.

13 ś Apang kon magsiling kamo, Indi kami magpuyo sa sining duta, ukon magtuman sa tingug sang GINOO nga inyo Dios,

14 Nga nagasiling, Indi; kondi magakadto kami sa duta sang Egipto, diin indi kami makakita sang inaway, ukon makabati sang tonog sang budyong, ukon may gutum sang kalan-on; kag didto magapuyo kami:

15 Kag karon, tungud sini pamatii ninyo ang polong sang GINOO, kamo nga salin sang Juda; Amo ini ang ginasiling sang GINOO sang mga kasoldadosan, ang Dios sang Israel; Kon ituhoy ninyo sing bug-os ang inyo mga nawung sa pagsulud pakadto sa Egipto, kag magkadto sa pagpanlugayaw didto;

16 Niyan mahanabu, nga ang espada, nga ginkahadlukan ninyo, magalambut sa inyo didto sa duta sang Egipto, kag ang tiggulutum, nga ginkahadlukan ninyo, magasonod gid sa inyo didto sa Egipto; kag didto mapatay kamo.

17 Mangin-amo ini sa tanan nga tawo nga nagatuhoy sang ila nawung sa pagsulud sa Egipto sa pagpanlugayaw didto; mapatay sila sa espada, sa tiggulutum, kag sa pameste: kag wala gid sa ila sing mabilin ukon makapalagyo sa malaut nga dalhon ko sa ila.

18 Kay amo ini ang ginasiling sang GINOO sang mga kasoldadosan, ang Dios sang Israel; Subong nga ang akon kaakig kag ang akon kaalipungut gin-ula sa mga pumuluyo sang Jerusalem; sa amo iula ang akon kaalipungut sa inyo, kon magsulud kamo sa Egipto: kag kamo mangin himalaut, kag kabulungan, kag pagpakamalaut, kag kahuluy-an; kag indi na kamo makakita sining duug.

19 ś Ang GINOO nagpamolong nahanungud sa inyo, O kamo nga salin sang Juda; Dili kamo magsulud sa Egipto: kilalaha sing matuud nga nagsabdong ako sa inyo sini nga adlaw.

20 Kay nagmalimbongon kamo sa inyo kaugalingon nga mga tagiposoon, sang ginpadala ako ninyo sa GINOO nga inyo Dios, nga nagasiling, Pangamuyo ka sa GINOO nga aton Dios tungud sa amon; kag sono sa tanan nga isiling sang GINOO nga aton Dios, ang amo ipahayag sa amon, kag himoon namon ini.

21 Kag karon ginpahayag ko ini sa inyo sini nga adlaw; apang wala kamo magtuman sang tingug sang GINOO nga inyo Dios, ukon sang bisan ano nga butang nga tungud sa sini ginpadala ako niya sa inyo.

22 Busa karon kilalaha ninyo sing matuud nga mapatay kamo sa espada, sa tiggulutum, kag sa pameste, sa duug nga naluyagan ninyo kadtoan kag panlugayawan.

KAPITULO 43

KAG nahanabu, nga sang nakatapus si Jeremias sa pagpamolong sa bug-os nga katawohan sang tanan nga mga polong sang GINOO nga Dios nila, nga tungud sini ang GINOO nga ila Dios nagpadala sa iya sa ila, bisan sining tanan nga polong,

2 Niyan nagpamolong si Azarias nga anak nga lalaki ni Hosaya, kag si Johanan nga anak nga lalaki ni Carea, kag ang tanan nga tawo nga bugalon, nga nagasiling kay Jeremias, Nagapamolong ka sing dimatuud: ang GINOO nga aton Dios wala magpadala sa imo sa pagsiling, Dili kamo magsulud sa Egipto sa pagpanlugayaw didto:

3 Kondi si Baruc nga anak nga lalaki ni Nerias nagasugyot sa imo batok sa amon, sa pagtugyan sa amon sa kamut sang mga Caldeanhon, agud nga mapatay kami nila, kag madala kami nga bihag sa Babilonia.

4 Gani si Johanan nga anak nga lalaki ni Carea, kag ang tanan nga kapitan sang mga kusug, kag ang bug-os nga katawohan, wala magtuman sang tingug sang GINOO, sa pagpuyo sa duta sang Juda.

5 Apang si Johanan nga anak nga lalaki ni Carea, kag ang tanan nga kapitan sang mga kusug, nagkuha sang tanan nga nabilin sang Juda, nga nagbalik gikan sa tanan nga pungsud, diin ginsobol sila, sa pagpuyo sa duta sang Juda;

6 Ang mga lalaki, kag ang mga babaye, kag ang kabataan, kag ang babaye nga mga anak sang hari, kag ang tagsa ka tawo nga ginbilin ni Nabuzar-adan nga kapitan sang mga bantay upud kay Gedalias nga anak nga lalaki ni Ahicam, ang anak nga lalaki ni Safan, kag si Jeremias nga manalagna, kag si Baruc nga anak nga lalaki ni Nerias.

7 Gani nag-abut sila sa duta sang Egipto: kay wala sila magtuman sa tingug sang GINOO: gani nag-abut sila sa Tahapanhes.

8 ś Niyan nag-abut ang polong sang GINOO kay Jeremias sa Tahapanhes, nga nagasiling,

9 Kuha ka sing dalagku nga mga bato sa imo kamut, kag tagoon sila sa lunang sa horno sang mga tisa, nga yara sa salamputan sang balay ni Faraon sa Tahapanhes, sa itololok sang mga tawo sang Juda;

10 Kag isiling sa ila, Amo ini ang ginasiling sang GINOO sang mga kasoldadosan, ang Dios sang Israel; Yari karon, magapadala ako kag magakuha kay Nabucodonosor nga hari sang Babilonia, nga akon alagad, kag magapahamtang sang iya trono sa ibabaw sini nga mga bato nga gintago ko; kag magahumlad sia sang iya layanglayang nga harianon sa ibabaw nila.

11 Kag kon magkari sia, magasakit sia sang duta sang Egipto, kag ihatag ang mga sa kamatayon sa kamatayon; kag ang mga sa kabihagan sa kabihagan; kag ang mga sa espada sa espada.

12 Kag magapadabdab ako sing kalayo sa mga balay sang mga dios sang Egipto; kag sonogon niya sila, kag dalhon sila nga bihag: kag magapanaput sia sang duta sang Egipto, subong sang manugpahalab nga nagasuklub sang iya panapton; kag magagowa sia gikan didto sa paghidait.

13 Sia man magawagwag sang mga imahen sang Bet-semes, nga yara sa duta sang Egipto; kag ang mga balay sang mga dios sang mga Egiptohanon sonogon niya sa kalayo.

KAPITULO 44

ANG polong nga nag-abut kay Jeremias nahanungud sa tanan nga Judio nga nagapuyo sa duta sang Egipto, nga nagapuyo sa Migdol, kag sa Tahapanhes, kag sa Nop, kag sa duta sang Patros, nga nagasiling,

2 Amo ini ang ginasiling sang GINOO sang mga kasoldadosan, ang Dios sang Israel; Nakita ninyo ang bug-os nga malaut nga gindala ko sa Jerusalem, kag sa tanan nga siudad sang Juda; kag, yari karon, sini nga adlaw mamingaw sila, kag wala sing tawo nga nagapuyo sa ila,

3 Bangud sang ila pagkamalaut nga ginhimo nila sa pagpaakig sa akon, kay nagkadto sila sa pagsonog sing incienso, kag sa pag-alagad sa iban nga mga dios, nga wala nila makilala, bisan sila, kamo, ukon ang inyo mga kaamayan.

4 Wala sing sapayan ginpadala ko sa inyo ang tanan ko nga alagad nga mga manalagna, nga nagabangon sing aga pa kag nagapadala sa ila, nga nagasiling, Oh, dili kamo maghimo sini nga makangilil-ad nga butang nga ginadumtan ko.

5 Apang wala sila magpamati, ukon maghuyug sang ila idulungug sa pagtalikod sa ila pagkamalaut, sa indi pagsonog sing incienso sa iban nga mga dios.

6 Busa ang akon kaalipungut kag ang akon kaakig gin-ula, kag nagdabdab sa mga siudad sang Juda kag sa mga dalan sang Jerusalem; kag nalaglag sila kag mamingaw, subong sang sa sini nga adlaw.

7 Busa karon amo ini ang ginasiling sang GINOO, ang Dios sang mga kasoldadosan, ang Dios sang Israel; Ngaa bala nagahimo kamo sini nga daku nga malaut batok sa inyo mga kalag, sa pag-utud gikan sa inyo sang lalaki kag sang babaye, sang bata kag nagasoso, gikan sa Juda, nga wala sing mabilin sa inyo;

8 Sa bagay nga ginapaakig ako ninyo sa mga binuhatan sang inyo mga kamut, nga nagasonog sing incienso sa iban nga mga dios sa duta sang Egipto, diin nagkadto kamo sa pagpuyo, agud nga mautud kamo, kag agud nga mangin pagpakamalaut kamo kag kahuluy-an sa tanan nga pungsud sang duta?

9 Nalipat bala kamo sang pagkamalaut sang inyo mga kaamayan, kag sang pagkamalaut sang mga hari sang Juda, kag sang pagkamalaut sang ila mga asawa, kag sang inyo kaugalingon nga pagkamalaut, kag sang pagkamalaut sang inyo mga asawa, nga ginhimo nila sa duta sang Juda, kag sa mga dalan sang Jerusalem?

10 Wala sila magpaubus bisan tubtub sini nga adlaw, ukon nagkahadluk sila, ukon naglakat sa akon kasogoan, ukon sa akon mga palatukuran, nga ginbutang ko sa atubangan ninyo kag sa atubangan sang inyo mga kaamayan.

11 ś Busa amo ini ang ginasiling sang GINOO sang mga kasoldadosan, ang Dios sang Israel; Yari karon, ipahamtang ko ang akon nawung batok sa inyo nga sa malaut, kag sa pag-utud sang bug-os nga Juda.

12 Kag kuhaon ko ang nabilin sang Juda, nga nagtuhoy sang ila mga nawung sa pagsulud sa duta sang Egipto sa pagpanlugayaw didto, kag sila tanan mapapas, kag mapukan sa duta sang Egipto; mapapas sila sa espada kag sa tiggulutum: mapatay sila, kutub sa labing kubus tubtub sa labing dalagku, paagi sa espada kag sa tiggulutum: kag mangin himalaut sila, kag kabulungan, kag pagpakamalaut, kag kahuluy-an.

13 Kay silotan ko sila nga nagapuyo sa duta sang Egipto, subong sang pagsilot ko sang Jerusalem, paagi sa espada, sa tiggulutum, kag sa pameste:

14 Agud nga wala gid sang nabilin sang Juda, nga nagkadto sa duta sang Egipto sa pagpanlugayaw didto, nga makapalagyo ukon mabilin, agud nga makabalik sila sa duta sang Juda, diin may handum sila sa pagbalik sa pagpuyo didto: kay wala gid sing makabalik luwas sang makapalagyo.

15 ś Niyan ang tanan nga lalaki nga nakahibalo nga ang ila mga asawa nagsonog sing incienso sa iban nga mga dios, kag ang tanan nga babaye nga nagtambong, isa ka daku nga katilingban, ang bug-os nga katawohan nga nagapuyo sa duta sang Egipto, sa Patros, nagsabat kay Jeremias, nga nagasiling,

16 Nahanungud sang polong nga ginpamolong mo sa amon sa ngalan sang GINOO, indi kami magpamati sa imo.

17 Kondi magahimo gid kami sang bisan anong butang nga nagagowa sa amon baba, sa pagsonog sing incienso sa hara sang langit, kag sa pag-ula sing mga halad nga ilimnon sa iya, subong sang nahimo namon, kami, kag ang amon mga kaamayan, ang amon mga hari, kag ang amon mga prinsipe, sa mga siudad sang Juda, kag sa mga dalan sang Jerusalem: kay niyan may bugana kami nga kalan-on, kag maayo, kag wala sing nakita nga malaut.

18 Apang kutub nga nag-untat kami sa pagsonog sing incienso sa hara sang langit, kag sa pag-ula sing mga halad nga ilimnon sa iya, nakulangan kami sang tanan nga butang, kag ginpapas sang espada kag tiggulutum.

19 Kag sang nagsonog kami sing incienso sa hara sang langit, kag nag-ula kami sing mga halad nga ilimnon sa iya, naghimo bala kami sing mga torta sa iya sa pagsimba sa iya, kag nag-ula sing mga halad nga ilimnon sa iya, nga wala ang amon mga bana?

20 ś Niyan si Jeremias nagsiling sa bug-os nga katawohan, sa mga lalaki, kag sa mga babaye, kag sa bug-os nga katawohan nga nagsabat sina sa iya, nga nagasiling,

21 Ang incienso nga inyo ginsonog sa mga siudad sang Juda, kag sa mga dalan sang Jerusalem, kamo, kag ang inyo mga kaamayan, ang inyo mga hari, kag ang inyo mga prinsipe, kag ang katawohan sang duta, wala bala sila pagdumduma sang GINOO, kag wala bala ini mag-abut sa iya painoino?

22 Sa bagay nga ang GINOO indi na makabatas, bangud sang kalaut sang inyo mga ginahimo, kag bangud sang mga kangil-aran nga inyo nahimo; busa mamingaw ang inyo duta, kag kabulungan, kag pagpakamalaut, nga wala sing pumuluyo, subong sang sa sini nga adlaw.

23 Bangud nga nagsonog kamo sing incienso, kag bangud nagpakasala kamo batok sa GINOO, kag wala magtuman sa tingug sang GINOO, ukon maglakat sa iya kasogoan, ukon sa iya mga palatukuran, ukon sa iya mga pagpamatuud; busa ini nga malaut nahanabu sa inyo, subong sang sa sini nga adlaw.

24 Labut pa si Jeremias nagsiling sa bug-os nga katawohan, kag sa tanan nga babaye, Pamatii ang polong sang GINOO, bug-os nga Juda nga yara sa duta sang Egipto:

25 Amo ini ang ginasiling sang GINOO sang mga kasoldadosan, ang Dios sang Israel, nga nagasiling; Kamo kag ang inyo mga asawa nagpamolong sing tingub sa inyo mga baba, kag sa inyo mga kamut nagtuman sini, nga nagasiling, Sa pagkamatuud tumanon namon ang amon mga saad nga ginsaad namon, sa pagsonog sing incienso sa hara sang langit, kag sa pag-ula sing mga halad nga ilimnon sa iya: tumanon ninyo sa pagkamatuud ang inyo mga saad, kag himoon sa pagkamatuud ang inyo mga saad.

26 Busa pamatii ninyo ang polong sang GINOO, bug-os nga Juda nga nagapuyo sa duta sang Egipto; Yari karon, nagsumpa ako paagi sa akon daku nga ngalan, nagasiling ang GINOO, nga ang akon ngalan indi na gid paghingadlan sa baba sang bisan sin-o nga tawo sang Juda sa bug-os nga duta sang Egipto, nga nagasiling, Ang Ginoong DIOS nagakabuhi.

27 Yari karon, magabantay ako sa ila tungud sa malaut, kag indi tungud sa maayo: kag ang tanan nga tawo sang Juda nga yara sa duta sang Egipto papason paagi sa espada kag sa tiggulutum, tubtub nga maubus sila.

28 Walay sapayan ang pila lamang nga makapalagyo sa espada magabalik gikan sa duta sang Egipto pakadto sa duta sang Juda, kag ang bug-os nga nabilin sang Juda, nga nagkadto sa duta sang Egipto sa pagpanlugayaw didto, makahibalo kon kay sin-o polong ang magapadayon, ang akon ukon ang ila.

29 ś Kag ini mangintanda sa inyo, nagasiling ang GINOO, nga silotan ko kamo sa sini nga duug, agud nga mahibaloan ninyo nga ang akon mga polong magapadayon sing totoo batok sa inyo tungud sa malaut:

30 Amo ini ang ginasiling sang GINOO; Yari karon, ihatag ko si Faraon-hofra nga hari sang Egipto sa kamut sang iya mga kaaway, kag sa kamut sang mga nagatinguha sang iya kabuhi; subong nga ginhatag ko si Sedequias nga hari sang Juda sa kamut ni Nabucodonosor nga hari sang Babilonia, nga iya kaaway, kag nagtinguha sang iya kabuhi.

KAPITULO 45

ANG polong nga ginpamolong ni Jeremias nga manalagna kay Baruc nga anak nga lalaki ni Nerias, sang pagsulat niya sa libro sining mga polong gikan sa baba ni Jeremias, sa ikap-at nga tuig ni Jehoaquim nga anak nga lalaki ni Josias, hari sang Juda, nga nagasiling,

2 Amo ini ang ginasiling sang GINOO, ang Dios sang Israel, sa imo, O Baruc;

3 Ikaw nagsiling, Kailo ako karon! kay ang GINOO nagdugang sing kalisud sa akon kasubo; ginlapyo ako sa akon pag-ugayong, kag wala ako sing pahuway.

4 ś Amo ini ang isiling mo sa iya, Ang GINOO nagasiling sang amo sini; Yari karon, inang akon ginpatindug gub-on ko, kag inang akon gintanum gabuton ko, nga amo, ining bug-os nga duta.

5 Kag nagapangita ka bala sing mga butang nga dalagku tungud sa imo kaugalingon? dili sila pagpangitaa: kay, yari karon, magadala ako sing malaut sa tanan nga unud, nagasiling ang GINOO: apang ang imo kabuhi ihatag ko sa imo nga inagaw sa tanan nga duug diin ka nagakadto.

KAPITULO 46

ANG polong sang GINOO nga nag-abut kay Jeremias nga manalagna batok sa mga Gentil;

2 Batok sa Egipto, batok sa kasoldadosan ni Faraon-neco nga hari sang Egipto, nga yara sa ubay sang suba nga Eufrates sa Carquemis, nga ginsamad ni Nabucodonosor nga hari sang Babilonia sang ikap-at nga tuig ni Jehoaquim nga anak nga lalaki ni Josias, hari sang Juda.

3 Amana ninyo ang kalasag kag ang taming, kag magpalapit sa pag-awayan.

4 Takdi ang mga kabayo; kag magsakay, kamo nga mga manugkabayo, kag atubang kamo nga may inyo mga pandong; pahininga ang mga bangkaw, kag isuklub ang mga limbutong.

5 Ngaa bala nakita ko sila nga nahangawa kag nagtalikod? kag ang ila mga gamhanan ginlutus, kag nagpalagyo sing madasig, kag wala magbalikid: kay ang kahadluk yara sa palibut, nagasiling ang GINOO.

6 Dili pagpapalagyoha ang madasig, ukon pagpalikawa ang gamhanan nga tawo; magakasandad sila, kag mapukan nayon sa aminhan sa ubay sang suba nga Eufrates.

7 Sin-o bala ini nga nagataas kaangay sang baha, nga ang iya mga tubig nagatumbotumbo kaangay sang mga suba?

8 Ang Egipto nagataas kaangay sang baha, kag ang iya mga tubig nagatumbotumbo kaangay sang mga suba; kag nagasiling sia, Magataas ako, kag tabonan ko ang duta; laglagon ko ang siudad kag ang mga pumuluyo sini.

9 Taklad, kamo nga mga kabayo; kag magkasingkal, kamo nga mga kangga; kag palakta ang mga tawo nga gamhanan; ang mga Etiopiahanon kag ang mga Libyahanon, nga nagauyat sang taming; kag ang mga Lydiahanon, nga nagauyat kag nagabingat sang pana.

10 Kay adlaw ini sang Ginoong DIOS sang mga kasoldadosan, adlaw sang pagtimalus, agud nga matimalusan niya sia sang iya mga kasumpung: kag ang espada magahalunhon, kag ini mabusug kag mahobog sa dugo nila: kay ang Ginoong DIOS sang mga kasoldadosan may halad sa aminhan nga duta sa ubay sang suba nga Eufrates.

11 Taklad sa Galaad, kag magkuha sing balsamo, O ulay, anak nga babaye sang Egipto: wala sing pulus nga maggamit ka sing madamu nga mga bolong; kay wala sing pag-ayo nga sa imo.

12 Ang mga pungsud nakabati sang imo kahuluy-an, kag ang imo pagtuaw nagtugub sang duta: kay ang gamhanan nga tawo nakasandad sa gamhanan, kag napukan sila nga duha sing tingub.

13 ś Ang polong nga ginpamolong sang GINOO kay Jeremias nga manalagna, kon paano nga si Nabucodonosor nga hari sang Babilonia magaabut kag magasamad sang duta sang Egipto.

14 Ipahayag ninyo sa Egipto, kag ibantala sa Migdol, kag ibantala sa Nop kag sa Tahapanhes: isiling ninyo, Magtindug sing malig-on, kag mag-aman ka; kay ang espada magahalunhon sa palibut mo.

15 Ngaa bala ginsilhig ang imo isganan nga mga lalaki? wala sila magtindug, bangud nga ang GINOO nagtabog sa ila.

16 Ginpukan niya ang madamu, hoo, napukan ang isa sa ibabaw sang isa: kag nagsinilingay sila, Tindug, kag magbalik kita sa aton kaugalingon nga katawohan, kag sa duta nga aton natawohan, gikan sa espada nga nagapigus.

17 Nagsilinggit sila didto, Si Faraon nga hari sang Egipto isa ka kagahud lamang; sia nagpaligad sang tion nga tinangdo.

18 Sa nagakabuhi ako, nagasiling ang Hari, nga ang iya ngalan ang GINOO sang mga kasoldadosan, Sa pagkamatuud kaangay sang Tabor sa tunga sang kabukiran, kag kaangay sang Carmelo sa ubay sang dagat, sa amo magakari sia.

19 O ikaw nga anak nga babaye nga nagapuyo sa Egipto, panghimos ka sa pagkadto sa kabihagan: kay ang Nop mangin kahapayan kag mamingaw nga wala sing pumuluyo.

20 Ang Egipto kaangay sang magayon gid nga baka nga bakiya, apang ang kalaglagan nagaabut; ini nagaabut gikan sa aminhan.

21 Ang iya man nga mga tawo nga sinoholan sa tunga niya kaangay sang mga tinday nga baka nga lalaki nga pinatambok; kay sila man nag-ilisul, kag nagpalagyo sing tingub: wala sila magbato, kay nag-abut sa ila ang adlaw sang ila kalalat-an, kag ang tion sang pagduaw sa ila.

22 Ang tingug sini magaagi kaangay sang man-ug; kay magalakat sila nga may kasoldadosan, kag magaabut batok sa iya nga may mga wasay, subong sang mga manugpulud sang kahoy.

23 Pudlon nila ang iya talon, nagasiling ang GINOO, bisan indi ini matungkad; bangud nga madamu pa sila sa mga apan, kag sila dimaisip.

24 Ang babaye nga anak sang Egipto maligban; itugyan sia sa kamut sang katawohan sang aminhan.

25 Ang GINOO sang mga kasoldadosan, ang Dios sang Israel, nagasiling; Yari karon, silotan ko ang kadam-an sang No, kag si Faraon, kag ang Egipto, pati ang ila mga dios, kag ang ila mga hari; bisan si Faraon, kag ang tanan nga nagasalig sa iya:

26 Kag itugyan ko sila sa kamut sang mga nagatinguha sang ila mga kabuhi, kag sa kamut ni Nabucodonosor nga hari sang Babilonia, kag sa kamut sang iya mga alagad: kag ugaling puy-an ini subong sang sa mga adlaw nga dumaan, nagasiling ang GINOO.

27 ś Apang dili ka magkahadluk, O akon alagad nga Jacob, kag dili magkahangawa, O Israel: kay, yari karon, luwason ko ikaw gikan sa malayo, kag ang imo kaliwat gikan sa duta sang ila kabihagan; kag si Jacob magabalik, kag manginmalinong kag matawhay, kag wala gid sing magapahadluk sa iya.

28 Dili ka mahadluk, O Jacob nga akon alagad, nagasiling ang GINOO: kay nagaupud ako sa imo; kay tapuson ko sing bug-os ang tanan nga pungsud diin ginsobol ko ikaw: apang indi ko ikaw pagtapuson sing bug-os, kondi tudloan ko ikaw sa talaksan; walay sapayan indi ko ikaw nga mas-a pagbayaan nga dimasilotan.

KAPITULO 47

ANG polong sang GINOO nga nag-abut kay Jeremias nga manalagna batok sa mga Filistinhon, sa wala pa masamad ni Faraon ang Gaza.

2 Amo ini ang ginasiling sang GINOO; Yari karon, nagataas ang mga tubig gikan sa aminhan, kag mangin baha nga nagapanglambas, kag magalapaw sang duta, kag sang tanan nga yara sa sini; sang siudad, kag sang mga nagapuyo sa sini: niyan ang mga tawo magasinggit, kag ang tanan nga pumuluyo sang duta magahaya.

3 Sa kagahud sang tapaktapak sang mga koko sang iya makusug nga mga kabayo, sa huyab sang iya mga kangga, kag sa dinagubdub sang iya mga aliling, ang mga amay indi magabalikid sa ila mga anak bangud sa kaluya sang mga kamut;

4 Bangud sang adlaw nga nagaabut sa paglaglag sang tanan nga Filistinhon, kag sa pag-utud gikan sa Tiro kag sa Zidon sang tagsa ka kabulig nga nabilin: kay laglagon sang GINOO ang mga Filistinhon, ang nabilin sang duta sang Caftor.

5 Ang kaupaw nagaabut sa Gaza; ang Ascalon ginlaglag upud sang nabilin sang ila nalupyakan: tubtub bala san-o nga pagpilas mo sang imo kaugalingon?

6 O ikaw nga espada sang GINOO, tubtub bala san-o pa nga maglinong ka? sulud ka sa imo tagub, pahuway, kag magpahimonong.

7 Paano bala nga paglinong sini, sa ginatan-aw nga gintulinan ini sang GINOO batok sa Ascalon, kag batok sa baybayon? didto gintangdo niya ini.

KAPITULO 48

BATOK sa Moab amo ini ang ginasiling sang GINOO sang mga kasoldadosan, ang Dios sang Israel; Kailo sa Nebo! kay ginwagwag ini: ang Kiryataim ginalibogan kag gin-agaw: ang Misgab ginalibogan kag nahangawa.

2 Wala na sing himaya nga sa Moab: sa Hesbon nagpahito sila sing malaut batok sini; kari, kag utdon naton ini sa pagkapungsud. Ikaw man pudlon, O Madmen; ang espada magalagas sa imo.

3 Ang kagahud sang singgit magagikan sa Horonaim, kahapayan kag daku nga kalaglagan.

4 Ang Moab nalaglag na; ang iya mga magamay nagpabati sing singgit.

5 Kay sa taklaran sang Luhit magataklad ang paghibi nga dalayon; kay sa dulhogan sang Horonaim nakabati ang mga kaaway sang pagsinggit sang kalaglagan.

6 Palagyo, luwasa ang inyo mga kabuhi, kag magkaangay sa siok sa kamingawan.

7 ś Kay bangud nga nagsalig ka sa imo mga binuhatan kag sa imo mga bahandi, ikaw man agawon: kag si Cemos magakadto sa kabihagan upud sang iya mga pari kag sang iya mga prinsipe sing tingub.

8 Kag ang manuglaglag magaabut sa tagsa ka siudad, kag wala sing siudad nga makapalagyo: ang nalupyakan man mawala, kag ang kapatagan malaglag, sono sa napamolong sang GINOO.

9 Hatagi sing mga pakpak ang Moab, agud nga magpalagyo ini kag magpalayo: kay ang mga siudad sini manginmamingaw, nga wala sing bisan sin-o nga magapuyo sa sini.

10 Pinapakamalaut ang nagahimo sang buluhaton sang GINOO sing malimbongon, kag pinapakamalaut ang nagapugung sang iya espada sa dugo.

11 ś Ang Moab nagpatawhay kutub sang iya pagkapamatan-on, kag nagpahimonong sia sa iya mga lalud, kag wala sia mahuwad sa suludlan pa suludlan, ukon nakakadto sa kabihagan: busa ang iya lalim nagapabilin sa iya, kag ang iya baho wala magbalhin.

12 Busa, yari karon, nagaabut ang mga adlaw, nagasiling ang GINOO, nga ako magapadala sa iya sang mga manlulugayaw, nga magapapanlugayaw sa iya, kag magahuwad sang iya mga suludlan, kag magaboong sang ila mga tibud.

13 Kag magakahuya ang Moab kay Cemos, subong nga ang panimalay sang Israel nagkahuya sang Bet-el nga ila salaligan.

14 ś Paano bala nga nagasiling kamo, Gamhanan kami kag isganan nga mga tawo sa inaway?

15 Ang Moab nalaglag na, kag nagataklad sila sa iya mga siudad, kag ang iya pinili nga mga pamatan-on nga lalaki nagadulhog sa palatyan, nagasiling ang Hari, nga ang iya ngalan amo ang GINOO sang mga kasoldadosan.

16 Ang kalalat-an sang Moab malapit sa pag-abut, kag ang iya kapipit-an nagadalidali gid.

17 Tanan kamo nga yara sa palibut niya, magkalisud sa iya; kag tanan kamo nga nakakilala sang iya ngalan, isiling, Daw ano nga pagkabali sang itulukud nga mabakud, kag sang sungkud nga matahum!

18 Ikaw nga babaye nga anak nga nagapuyo sa Dibon, panaug ka gikan sa imo himaya, kag maglingkod sa kauhaw; kay ang manuglaglag sang Moab magataklad batok sa imo, kag laglagon niya ang imo mga pamakud.

19 O pumuluyo sang Aroer, tindug ka sa dalanon, kag magbantay; pamangkot sa lalaki nga nagapalagyo, kag sa babaye nga nagalikaw, kag isiling, Ano bala ang nahimo?

20 Ang Moab ginlibogan; kay ginlumpag ini: maghaya kag magsinggit; isugid ninyo ini sa Arnon, nga ang Moab ginlaglag,

21 Kag nag-abut ang paghukom sa mapatag nga duta; sa Holon, kag sa Jahaza, kag sa Mefaat,

22 Kag sa Dibon, kag sa Nebo, kag sa Bet-diblataim,

23 Kag sa Kiryataim, kag sa Bet-gamul, kag sa Bet-meon,

24 Kag sa Keryot, kag sa Bozra, kag sa tanan nga siudad sang duta sang Moab, malayo ukon malapit.

25 Ang sungay sang Moab ginpungal, kag ang iya butkon ginbali, nagasiling ang GINOO.

26 ś Hoboga ninyo sia: kay nagpakadaku sia batok sa GINOO: ang Moab man magatubog sa iya suka, kag sia man manginyuyubitan.

27 Kay wala bala magmanginyuyubitan ang Israel sa imo? nakit-an bala sia sa tunga sang mga makawat, kay kutub nga nagpamolong ka nahanungud sa iya, nagatumbotumbo ikaw sa kalipay.

28 O kamo nga nagapuyo sa Moab, bayai ang mga siudad, kag magpuyo sa dakung bato, kag magmanginkaangay kamo sang pating nga nagapugad sa mga kilid sang bibi sang boho.

29 Nabatian namon ang bugal sang Moab, (tama sia kabugalon) ang iya pagkamatinaastaason, kag ang iya pagpahabok, kag ang iya bugal, kag ang pagpalabi-labi sang iya tagiposoon.

30 Ako nakakilala sang iya kasingkal, nagasiling ang GINOO; apang indi mangin-amo sini; ang iya mga butig indi magapulus sini.

31 Busa magahaya ako tungud sa Moab, kag magasinggit ako tungud sa bug-os nga Moab; magakalisud ang akon tagiposoon tungud sang mga tawo sang Kir-heres.

32 O puno sang ubas sang Sibma, magahibi ako tungud sa imo kaangay sang paghibi sang Jazer: ang imo mga tanum nagtabok sa dagat, nagalambut gid sila tubtub sa dagat sang Jazer: ang manuglaglag nagatupa sa imo mga bunga sa tingadlaw kag sa imo patubas sang ubas.

33 Kag ang kasadya kag ang kalipay ginakuha sa latagon nga mabungahon, kag sa duta sang Moab; kag ginpauntat ko ang alak sa mga linasan sang ubas: walay na magalinas nga may pagsinggit; ang ila pagsinggit indi na pagsinggit.

34 Kutub sa pagsinggit sang Hesbon tubtub sa Eleale, kag tubtub sa Jahaz, nagmitlang sila sang ila tingug, kutub sa Zoar tubtub sa Horonaim, subong sang baka nga bakiya nga tatlo ka tuig: kay ang mga tubig sang Nimrim man manginmamingaw.

35 Labut pa pauntaton ko sa Moab, nagasiling ang GINOO, ang nagahalad sa mataas nga mga duug, kag ang nagasonog sing incienso sa iya mga dios.

36 Busa ang akon tagiposoon magatonog tungud sang Moab kaangay sa mga lantoy, kag ang akon tagiposoon magatonog kaangay sa mga lantoy tungud sa mga tawo sang Kir-heres: bangud ang mga manggad nga iya naagum nawala.

37 Kay ang tagsa ka olo magaupawon, kag ang tagsa ka bungut maguruban: sa tanan nga kamut mga pinilas, kag sa mga hawak panapton nga sako.

38 May panalabiton sa kabug-osan sa tanan nga atop sang Moab, kag sa mga dalan sini: kay ginboong ko ang Moab kaangay sang suludlan nga wala gid sing nahamuut, nagasiling ang GINOO.

39 Magahaya sila, nga nagasiling, Daw ano nga nalumpag ini! daw ano nga pagtalikod sang Moab sa kahuya! sa amo ang Moab manginyuyubitan kag kahangaw-an sa tanan nga yara sa iya palibut.

40 Kay amo ini ang ginasiling sang GINOO; Yari karon, magalupad sia subong sang aguila, kag magahumlad sang iya mga pakpak sa ibabaw sang Moab.

41 Ang Keryot naagaw, kag ang mga pamakud nakibot, kag ang tagiposoon sang gamhanan nga mga tawo sa Moab sa sinang adlaw manginsubong sang tagiposoon sang babaye sa iya mga kasakit.

42 Kag ang Moab laglagon agud nga indi na mangin katawohan, bangud nga nagpakadaku sia sang iya kaugalingon batok sa GINOO.

43 Ang kahadluk, kag ang boho, kag ang siod, manginyara sa ibabaw nimo, O pumuluyo sang Moab, nagasiling ang GINOO.

44 Ang nagapalagyo sa kahadluk maholog sa boho; kag ang nagagowa sa boho pagadakpon sang siod: kay pagapakarion ko sa ibabaw niya, sa ibabaw sang Moab, ang tuig sa pagduaw sa ila, nagasiling ang GINOO.

45 Ang mga nagpalagyo nagatindug sa idalum sang landong sang Hesbon bangud sang kusug: apang ang isa ka kalayo magagowa sa Hesbon, kag ang dabdab gikan sa tunga sang Sihon, kag magalamon sang pamusud sang Moab, kag sang alipudwan sang mga manugpagubut.

46 Kailo sa imo, O Moab! ang katawohan ni Cemos nagakawala: kay ang imo mga anak nga lalaki ginadakup nga sa pagkabihag, kag ang imo mga anak nga babaye nga sa kabihagan.

47 ś Apang pahaulian ko ang kabihagan sang Moab sa olihing mga adlaw, nagasiling ang GINOO. Tubtub diri ang paghukom sa Moab.

KAPITULO 49

NAHANUNGUD sang mga Amonhon, amo ini ang ginasiling sang GINOO; Wala bala sing mga anak nga lalaki si Israel? wala bala sia sing manunubli? ngaa bala niyan ginapanubli sang ila hari ang Gad, kag ang iya katawohan nagapuyo sa iya mga siudad?

2 Busa, yari karon, nagaabut ang mga adlaw, nagasiling ang GINOO, nga magapabati ako sang paandam sang inaway sa Raba sang mga Amonhon; kag ini manginmamingaw nga tinumpok, kag ang iya mga anak nga babaye sonogon sa kalayo: niyan ang Israel mangin manunubli sang mga nagpanubli sa iya anay, nagasiling ang GINOO.

3 Haya, O Hesbon, kay ang Ai nalaglag na: hibi, kamo nga babaying mga anak sang Raba, panaput kamo sing panapton nga sako; magpanalabiton, kag magpakadto-pakari sa tunga sang mga kudal; kay ang ila hari magakadto sa kabihagan, kag ang iya mga pari kag ang iya mga prinsipe sing tingub.

4 Ngaa bala nagahimaya ka sa mga nalupyakan, ang imo nalupyakan nga nagailig, O nagtalikod nga anak nga babaye? nga nagsalig sa iya mga bahandi, nga nagasiling, Sin-o bala ang magakari sa akon?

5 Yari karon, magadala ako sing kahadluk sa imo, nagasiling ang Ginoong DIOS sang mga kasoldadosan, gikan sa tanan nga yara sa palibut mo; kag tabogon kamo, ang tagsa ka tawo sa gilayon; kag wala gid sing magatipon sa iya nga nagapanlugayaw.

6 Kag ugaling pahaulian ko ang kabihagan sang mga anak ni Amon, nagasiling ang GINOO.

7 ś Nahanungud sang Edom, amo ini ang ginasiling sang GINOO sang mga kasoldadosan; Wala na bala ang kaalam sa Teman? nawala na bala ang laygay gikan sa mga mainandamon? nadula bala ang ila kaalam?

8 Palagyo kamo, balik, puyo sa kadadalman, O mga pumuluyo sang Dedan; kay dalhon ko ang kalalat-an ni Esau sa iya, sa tion nga duawon ko sia.

9 Kon ang mga manugpamopo sang ubas mag-abut sa imo, indi bala sila magbilin sing salaghawon nga mga ubas? kon mga makawat sa kagab-ihon, magapanglaglag sila tubtub nga maayawan sila.

10 Apang ginhublasan ko si Esau, ginbuksan ko ang mga duug niya nga likum, kag indi sia sarang makapanago: ang iya kaliwat nalaglag na, kag ang iya mga utud, kag ang iya mga masigkatawo, kag wala na sia.

11 Bayai ang imo mga bata nga ilo sa amay, tipigan ko sila nga buhi; kag pasaliga sa akon ang imo mga balong babaye.

12 Kay amo ini ang ginasiling sang GINOO; Yari karon, ang mga wala maghukom sa pag-inum sang tagayan sa pagkamatuud nag-inum; kag ikaw gid bala ang mahilway sa silot? indi ka mahilway sa silot, kondi magainum ka sa pagkamatuud.

13 Kay nagsumpa ako sa akon kaugalingon, nagasiling ang GINOO, nga ang Bozra manginmamingaw, kahuluy-an, kahapayan, kag pagpakamalaut; kag ang tanan nga mga siudad sini mangindayon nga kahapayan.

14 Nakabati ako sang pahibalo gikan sa GINOO, kag ginpadala ang embajador sa mga pagano, nga nagasiling, Tilipon kamo sing tingub, kag magkari batok sa iya, kag magtindug pakadto sa inaway.

15 Kay, yari karon, padiotayon ko ikaw sa tunga sang mga pagano, kag ipatamay sa tunga sang mga tawo.

16 Ang imo pagkamakakulugmat naglimbong sa imo, kag ang bugal sang imo tagiposoon, O ikaw nga nagapuyo sa mga litik sang dakung bato, nga nagakaput sang kataasan sang bakolod: bisan pa pataason mo ang imo pugad subong sang aguila, dalhon ko ikaw paidalum gikan didto, nagasiling ang GINOO.

17 Ang Edom man manginmamingaw: ang tagsatagsa nga nagalabay sa sini mabulung, kag magapanagutsut sa tanan nga kalalat-an sini.

18 Subong sang paglaglag sang Sodoma kag Gomorra kag sang iya kasilingan nga mga siudad, nagasiling ang GINOO, walay tawo nga magapuyo didto, kag walay bisan sin-o nga anak sang tawo nga magapuyo sa sini.

19 Yari karon, magatakas sia subong sang leon gikan sa habok sang Jordan batok sa puluy-an sang mabakud: apang padalaganon ko sia sa hinali gikan sa iya: kag sin-o bala ang tawong pinili, agud nga itangdo ko sa ibabaw niya? kay sin-o bala ang kaangay sa akon? kag sin-o bala ang magatangdo sa akon sang tion? kag sin-o bala inang manugpahalab nga magatindug sa akon atubangan?

20 Busa pamatii ang tinutuyo sang GINOO, nga ginbuko niya batok sa Edom; kag ang iya mga katuyoan, nga gintuyo niya batok sa mga pumuluyo sang Teman: Sa pagkamatuud pagaguyuron sila sang mga labing kubus sang panong pagowa: sa pagkamatuud pamingawon niya sa ila ang puluy-an nila.

21 Ang duta nagauyug sa kagahud sang ila pagkapukan, sa ila singgit ang kagahud sini nabatian sa Mapulang dagat.

22 Yari karon, magasaka sia kag magalupad subong sang aguila, kag magahumlad sang iya mga pakpak sa ibabaw sang Bozra: kag ang tagiposoon sang gamhanan nga mga tawo sang Edom sa sinang adlaw manginsubong sang tagiposoon sang babaye sa iya mga kasakit.

23 ś Nahanungud sang Damasco. Ang Hamat ginalibogan, kag ang Arpad: kay nakabati sila sing malaut nga mga balita: ginatalawan sila; may kasubo sa dagat; indi ini mapahipus.

24 Ang Damasco nagluya, kag nagatalikod sia sa pagpalagyo, kag ginadakup sia sang kahadluk: ang kasakit kag mga kasubo nagdakup sa iya, subong sang babaye nga ginasakitan.

25 Daw ano nga wala pagbayai ang siudad sang pagdayaw, ang siudad sang akon kalipay!

26 Busa ang iya mga pamatan-on nga lalaki mapukan sa iya mga dalan, kag ang tanan nga lalaki sang pag-awayan pagautdon sa sinang adlaw, nagasiling ang GINOO sang mga kasoldadosan.

27 Kag magapadabdab ako sing kalayo sa kuta sang Damasco, kag magalamon ini sang mga palacio ni Ben-hadad.

28 ś Nahanungud sang Kedar, kag nahanungud sang mga ginharian sang Hazor, nga samaron ni Nabucodonosor nga hari sang Babilonia, amo ini ang ginasiling sang GINOO; Tindug kamo, taklad sa Kedar, kag laglaga ang mga tawo sang sidlangan.

29 Ang ila mga layanglayang kag ang ila mga panong kuhaon nila: kuhaon nila nga sa ila ang ila mga kumbung, kag ang tanan nila nga suludlan, kag ang ila mga camelyo; kag magasinggit sila sa ila, Kahadluk yara sa tagsa ka luyo.

30 ś Palagyo kamo, layas sa malayo, puyo sa kadadalman, O kamo nga mga pumuluyo sang Hazor, nagasiling ang GINOO; kay si Nabucodonosor nga hari sang Babilonia naghimbon batok sa inyo, kag nagbuko sing katuyoan batok sa inyo.

31 Magtindug, taklad kamo sa pungsud nga manggaranon, nga nagapuyo nga wala sing libog, nagasiling ang GINOO, nga wala sing mga gawang ukon mga pintal, nga nagapuyo sing isa lamang.

32 Kag ang ila mga camelyo mangin-inatihan, kag ang kadam-an sang ila kahayupan mangin-inagaw: kag paaplaagon ko sa tanan nga hangin ang mga yara sa ukbung gid nga mga pamusud; kag dalhon ko ang ila kalalat-an gikan sa tanan nga kilid sini, nagasiling ang GINOO.

33 Kag ang Hazor manginpuluy-an nga sa mga dragon, kag manginkahapayan sa gihapon: wala sing tawo nga magapuyo didto, ukon anak sang tawo nga magapuyo didto.

34 ś Ang polong sang GINOO nga nag-abut kay Jeremias nga manalagna batok sa Elam sa pamuno sang paghari ni Sedequias nga hari sang Juda, nga nagasiling,

35 Amo ini ang ginasiling sang GINOO sang mga kasoldadosan; Yari karon, balion ko ang pana sang Elam, ang puno sang ila kusug.

36 Kag dalhon ko sa Elam ang apat ka hangin gikan sa apat ka bahin sang langit, kag paaplaagon sila nayon sa sadto tanan nga mga hangin; kag wala sing pungsud nga indi pagkadtoan sang mga sinikway sang Elam.

37 Kay himoon ko nga ang Elam mahangawa sa atubangan sang ila mga kaaway, kag sa atubangan sang nagatinguha sang ila kabuhi: kag magadala ako sing malaut sa ila, ang akon masingkal nga kaakig, nagasiling ang GINOO; kag ipadala ko sa olihi nila ang espada, tubtub nga mapapas ko sila:

38 Kag ibutang ko ang akon trono sa Elam, kag laglagon gikan didto ang hari kag ang mga prinsipe, nagasiling ang GINOO.

39 ś Apang mahanabu sa olihi nga mga adlaw, nga pahaulian ko ang kabihagan sang Elam, nagasiling ang GINOO.

KAPITULO 50

ANG polong nga ginpamolong sang GINOO batok sa Babilonia kag batok sa duta sang mga Caldeanhon paagi kay Jeremias nga manalagna.

2 Ipahayag ninyo sa tunga sang mga pungsud, kag ibantala, kag magbayaw sing hayahay; ibantala, kag dili pagtagoon: isiling, Nakuha ang Babilonia, ginapakahuy-an si Bel, ginpamoong si Merodac; ginapakahuy-an ang iya mga diosdios, ang iya mga imahen ginpamoong.

3 Kay nagataklad batok sa iya ang pungsud gikan sa aminhan, nga magapamingaw sang iya duta, kag wala na sing magapuyo sa sini: magasaylo sila, magataliwan sila, tingub ang tawo kag ang sapat.

4 ś Sa sinang mga adlaw, kag sa sinang tion, nagasiling ang GINOO, magaabut ang kaanakan sang Israel, sila kag ang kaanakan sang Juda sing tingub, nga nagalakat kag nagahibi: magalakat sila, kag magapangita sa GINOO nga ila Dios.

5 Magapamangkot sila sang dalan pa Zion nga natuhoy didto ang ila mga nawung, nga nagasiling, Kari, kag magsimpon kita sa GINOO sa katipan nga dayon nga indi malimtan.

6 Ang akon katawohan nadula nga mga carnero: ang ila mga manugpahalab nagpatalang sa ila, ginbuhian nila sila sa kabukiran: naglakat sila sa bukid pa bakolod, nalimtan nila ang ila duug nga palahuwayan.

7 Ang tanan nga nakakita sa ila naglamon sa ila: kag nagsiling ang ila mga kasumpung, Wala kami nagalapas, bangud nga nagpakasala sila batok sa GINOO, ang puluy-an sang katarungan, ang GINOO, ang paglaum sang ila mga kaamayan.

8 Palagyo kamo gikan sa tunga sang Babilonia, kag gowa kamo sa duta sang mga Caldeanhon, kag manginsubong sang mga kanding nga lalaki sa atubangan sang mga panong.

9 ś Kay, yari karon, pukawon ko kag pakarion batok sa Babilonia ang isa ka hut-ong sang dalagku nga mga pungsud gikan sa duta nga naaminhan: kag magapaagisud sila batok sa iya; gikan didto kuhaon sia: ang ila mga baslay manginsubong sang ila sang gamhanan nga tawo nga sampaton; wala gid sing magabalik sa wala sing pulus.

10 Kag ang Caldea mangin-inagaw: ang tanan nga nagaagaw sa iya mabusug, nagasiling ang GINOO.

11 Bangud nga nagkasadya kamo, bangud nga nagkalipay kamo, O kamo nga manuglaglag sang akon panublion, bangud nga nagtambok kamo subong sang baka nga bakiya nga nagahalab, kag nagaima subong sang mga baka nga lalaki;

12 Ang inyo iloy malibogan sing tama; ang nag-anak sa inyo pakahuy-an: yari karon, ang olihi gid sang mga pungsud manginkamingawan, mamala nga duta, kag desierto.

13 Bangud sang kasingkal sang GINOO indi ini pagpuy-an, kondi magamamingaw ini sing bug-os: ang tagsatagsa nga magaagi sa Babilonia mabulung, kag magapanagutsut sa tanan niya nga kalalat-an.

14 Pahamtang kamo sing paagisud batok sa Babilonia sa palibut: tanan kamo nga nagabingat sang pana, panaa sia, dili maghawid sing mga baslay: kay nakasala sia batok sa GINOO.

15 Magsinggit batok sa iya sa palibut: gintugyan niya ang iya kamut: nagakapukan ang iya mga sadsaran, nagakawasak ang iya mga kuta: kay pagtimalus ini sang GINOO: timalusi sia; himoa sa iya subong sang ginhimo niya.

16 Utda sa Babilonia ang manugsab-ug, kag ang nagakaput sang galab sa tion sang ani: sa kahadluk sang espada nga nagapigus, sila magabalik ang tagsatagsa sa iya katawohan, kag sila magapalagyo ang tagsatagsa pakadto sa iya kaugalingon nga duta.

17 ś Ang Israel ginpaaplaag nga carnero; ang mga leon nagtabog sa iya: sa nahauna ginlamon sia sang hari sang Asiria; kag sa katapusan ining si Nabucodonosor nga hari sang Babilonia nagboong sang iya mga tul-an.

18 Busa, amo ini ang ginasiling sang GINOO sang mga kasoldadosan, ang Dios sang Israel; Yari karon, silotan ko ang hari sang Babilonia kag ang iya duta, subong nga ginsilotan ko ang hari sang Asiria.

19 Kag ibalik ko ang Israel sa iya puluy-an, kag magahalab sia sa Carmelo kag Basan, kag mabusug ang iya kalag sa bukid nga Efraim kag Galaad.

20 Sa sinang mga adlaw, kag sa sinang tion, nagasiling ang GINOO, ang kalautan sang Israel pangitaon, kag wala na; kag ang mga sala sang Juda, kag indi sila makita: kay patawaron ko sila nga gintipigan ko.

21 ś Taklad ka batok sa duta sang Merataim, bisan batok sini, kag batok sa mga pumuluyo sang Pekod: patya kag laglaga sing bug-os sa olihi nila, nagasiling ang GINOO, kag himoa sono sa tanan nga akon ginsogo sa imo.

22 Ang kagahud sang inaway yara sa duta, kag sang daku nga kalaglagan.

23 Daw ano nga napihak kag nabali ang palo sang bug-os nga duta! daw ano nga nanginmamingaw ang Babilonia sa tunga sang mga pungsud!

24 Ginsid-an ko ikaw, kag nadakup ka man, O Babilonia, kag wala ka makapangaman: nakita ka, kag nadakup man, bangud nga nagpakigsuay ka sa GINOO.

25 Ginbuksan sang GINOO ang iya bulutangan sang hinganiban, kag nagpagowa sang mga hinganiban sang iya kaalipungut: kay ini amo ang buluhaton sang Ginoong DIOS sang mga kasoldadosan sa duta sang mga Caldeanhon.

26 Kari kamo batok sa iya kutub sa malayo gid nga dulunan, buksi ang iya mga tambobo: tumpoka sia subong sa mga tinumpi, kag laglaga sia sing bug-os: dili pagbilini ang bisan ano niya.

27 Ihawa ang tanan niya nga tinday nga baka nga lalaki; padulhoga sila sa ihawan: kailo sa ila! kay nag-abut na ang ila adlaw, ang tion sang pagduaw sa ila.

28 Ang tingug sang mga nagapalagyo kag nagalikaw gikan sa duta sang Babilonia, sa pagpahayag sa Zion sang pagtimalus sang GINOO nga aton Dios, sang pagtimalus sang iya templo.

29 Tawga sing tingub batok sa Babilonia ang mga manugpana: ang tanan sa inyo nga nagabingat sang pana, pahamtang sing kampo batok sa iya sa palibut; dili pagpalikawon ang bisan sin-o sa iya: tumbasi sia sono sa iya binuhatan; himoa sa iya sono sa tanan nga nahimo niya: kay nanginbugalon sia batok sa GINOO, batok sa Balaan nga Isa sang Israel.

30 Busa ang iya mga pamatan-on nga lalaki mapukan sa mga dalan, kag ang tanan niya nga mga lalaki sang pag-awayan papason sa sinang adlaw, nagasiling ang GINOO.

31 Yari karon, ako batok sa imo, O ikaw nga labing bugalon, nagasiling ang Ginoong DIOS sang mga kasoldadosan: kay nag-abut na ang imo adlaw, ang tion nga duawon ko ikaw.

32 Kag ang labing bugalon makasandad kag mapukan, kag wala gid sing magapatindug sa iya: kag magapadabdab ako sing kalayo sa iya mga siudad, kag ini magalamon sang tanan sa palibut niya.

33 ś Amo ini ang ginasiling sang GINOO sang mga kasoldadosan; Ang kaanakan sang Israel kag ang kaanakan sang Juda ginpigus sing tingub: kag ang tanan nga nagdala sa ila nga bihag nagpugung sa ila sing malig-on; nagdumili sila nga buhian sila.

34 Ang ila Manunubus makusug; ang GINOO sang mga kasoldadosan amo ang iya ngalan: magaapin sia sing bug-os sang kasaba nila, agud nga makahatag sia sing pahuway sa duta, kag matublag ang mga pumuluyo sa Babilonia.

35 ś Ang espada yara sa mga Caldeanhon, nagasiling ang GINOO, kag sa mga pumuluyo sang Babilonia, kag sa iya mga prinsipe, kag sa iya mga maalam nga tawo.

36 Ang espada yara sa mga butigon; kag manginbuangbuang sila: ang espada yara sa iya mga tawo nga gamhanan; kag mahangawa sila.

37 Ang espada yara sa ila mga kabayo, kag sa ila mga kangga, kag sa bug-os nga katawohan nga nagsalakut nga yara sa tunga niya; kag manginsubong sila sang mga babaye: ang espada yara sa iya mga bahandi; kag kawaton sila.

38 Ang kamala yara sa iya mga tubig; kag magamala sila: kay duta ini sang mga imahen nga tinigban, kag nagasalimuang sila sa ila mga diosdios.

39 Busa didto magapuyo ang mga sapat nga talonon sang desierto upud ang mga sapat nga talonon sang mga pulo, kag ang mga bukaw magapuyo sa sini: kag indi na ini pagpuy-an sing dayon; kag indi na pagpuy-an gikan sa kaliwatan pa kaliwatan.

40 Subong sang pagguba sang Dios sang Sodoma kag Gomorra kag sang ila kasilingan nga mga siudad, nagasiling ang GINOO; gani walay tawo nga magapabilin didto, kag walay anak sang tawo nga magapuyo sa sini.

41 Yari karon, magaabut ang isa ka katawohan gikan sa aminhan, kag ang isa ka dakung pungsud, kag madamung hari pukawon gikan sa ukbung gid nga mga bahin sang duta.

42 Magakaput sila sang pana kag bangkaw: mapintas sila, kag indi magapahayag sing kalooy: ang ila tingug magadaguhub kaangay sang dagat, kag magasakay sila sa mga kabayo, nga ang tagsatagsa nagapaagisud, kaangay sang tawo sa pag-awayan, batok sa imo, O babaying anak sang Babilonia.

43 Ang hari sang Babilonia nakabati sang mga balita nahanungud sa ila, kag nagluya ang iya mga kamut: ang kagha nagdakup sa iya, kag ang mga kasakit subong sang babaying ginasakitan.

44 Yari karon, magatakas sia subong sang leon gikan sa habok sang Jordan pakadto sa puluy-an sang mabakud: apang sa hinali padalaganon ko sila gikan sa iya: kag sin-o bala ang tawong pinili, agud nga itangdo ko sa ibabaw niya? kay sin-o bala ang kaangay sa akon? kag sin-o bala ang magatangdo sa akon sang tion? kag sin-o bala inang manugpahalab nga magatindug sa akon atubangan?

45 Busa pamatii ninyo ang tinutuyo sang GINOO, nga ginbuko niya batok sa Babilonia; kag ang iya mga katuyoan, nga gintuyo niya batok sa duta sang mga Caldeanhon: Sa pagkamatuud pagaguyuron sila sang mga labing kubus sang panong pagowa: sa pagkamatuud pamingawon niya sa ila ang ila puluy-an.

46 Sa kagahud sang pag-agaw sang Babilonia ang duta nagauyug, kag ang singgit mabatian sa mga pungsud.

KAPITULO 51

AMO INI ang ginasiling sang GINOO; Yari karon, magatugpo ako batok sa Babilonia, kag batok sa mga nagapuyo sa tunga sang mga nagapamatok sa akon, sang isa ka makalalaglag nga hangin;

2 Kag magapadala ako sa Babilonia sing mga manugpahangin, nga magapahangin sa iya, kag magahapay sang iya duta: kay sa adlaw sang kagamo manginbatok sila sa iya sa palibut.

3 Ang manugpana magbingat sang iya pana batok sa nagabingat, kag batok sa nagapakataas sang iya kaugalingon sa iya limbutong: kag dili ninyo pagpasayloha ang iya mga pamatan-on nga lalaki; laglaga ninyo sing bug-os ang tanan niyang kasoldadosan.

4 Sa amo sini ang mga patay magakalapukan sa duta sang mga Caldeanhon, kag ang mga pinalapsan sa iya mga dalan.

5 Kay ang Israel wala pagpabayaan, ukon ang Juda sang iya Dios, ang GINOO sang mga kasoldadosan; bisan pa ang ila duta napuno sang sala batok sa Balaan nga Isa sang Israel.

6 Palagyo gikan sa tunga sang Babilonia, kag magluwas ang tagsa ka tawo sang iya kalag: dimawala kamo sa iya kalautan; kay tion ini sang pagtimalus sang GINOO; hatagan niya sia sing tumbas.

7 Ang Babilonia nangintagayan nga bulawan sa kamut sang GINOO, nga naghobog sang bug-os nga duta: ang mga pungsud nag-inum sang iya alak; busa ang mga pungsud nagbuluang.

8 Sa hinali ang Babilonia napukan kag nalaglag: haya tungud sa iya; kuha sing balsamo nga sa iya kasakit, basi ayhan mag-ayo sia.

9 Ayohon kuntani namon ang Babilonia, apang wala sia mag-ayo: bayai sia, kag magkadto kita ang tagsatagsa sa iya kaugalingon nga duta: kay ang paghukom sa iya nagalambut sa langit, kag ginabayaw bisan tubtub sa mga kahawaan.

10 Ginpahayag sang GINOO ang aton pagkamatarung: kari, kag ipahayag naton sa Zion ang buhat sang GINOO nga aton Dios.

11 Pataluma ang mga baslay; tipona ang mga taming: ang GINOO nagsugyot sang espiritu sang mga hari sang mga Mediahanon: kay ang iya katuyoan batok sa Babilonia, sa paglaglag sini; kay amo ini ang pagtimalus sang GINOO, ang pagtimalus sang iya templo.

12 Patindug sing hayahay batok sa mga kuta sang Babilonia, bakura ang bantay, ipahamtang ang mga bantay, amana ang mga puut: kay ang GINOO nagtuyo kag naghimo sang ginpamolong niya batok sa mga pumuluyo sang Babilonia.

13 O ikaw nga nagapuyo sa madamung tubig, bugana sa mga bahandi, ang imo katapusan nag-abut na, kag ang talaksan sang imo pagkamahamkonon.

14 Ang GINOO sang mga kasoldadosan nagsumpa sa iya kaugalingon, nga nagasiling, Sa pagkamatuud pun-on ko ikaw sing mga tawo, subong sang mga atatalo; kag magasininggit sila batok sa imo.

15 Ginhimo niya ang duta paagi sa iya gahum, ginpalig-on niya ang kalibutan paagi sa iya kaalam, kag ginhumlad niya ang langit paagi sa iya paghangup.

16 Kon nagamitlang sia sang iya tingug, may kadam-an sang mga tubig sa mga langit; kag ginapatub-ok niya ang mga alisngaw gikan sa mga ukbung sang duta: nagahimo sia sang mga kilat upud sang ulan, kag ginapagowa ang hangin gikan sa iya mga bahandi.

17 Ang tagsa ka tawo sapatsapaton tungud sang iya ihibalo; ang tagsa ka manugsalsal ginalibogan tungud sa iya imahen nga tinigban: kay ang iya imahen nga tinunaw dimatuud, kag walay ginhawa sa ila.

18 Sila kadayawan, buhat sang mga sayup: sa tion sang pagduaw sa ila mawala sila.

19 Ang bahin ni Jacob indi kaangay sa ila; kay sia amo ang una sang tanan nga butang: kag ang Israel amo ang sungkud sang iya panublion: ang GINOO sang mga kasoldadosan amo ang iya ngalan.

20 Ikaw akon parakol sa away kag mga hinganiban sa inaway: kay sa imo dugmokon ko ang mga pungsud, kag sa imo laglagon ko ang mga ginharian;

21 Kag sa imo dugmokon ko ang kabayo kag ang iya manugsakay; kag sa imo dugmokon ko ang kangga kag ang iya manugsakay;

22 Sa imo dugmokon ko man ang lalaki kag ang babaye; kag sa imo dugmokon ko ang tigulang kag ang bataon; kag sa imo dugmokon ko ang pamatan-on nga lalaki kag ang dalaga;

23 Sa imo dugmokon ko man ang manugpahalab kag ang iya panong; kag sa imo dugmokon ko ang mangunguma kag ang iya nagotahan nga mga baka; kag sa imo dugmokon ko ang mga kapitan kag ang mga manugdumala.

24 Kag balusan ko ang Babilonia kag ang tanan nga pumuluyo sang Caldea sang tanan nga kalautan nga ginhimo nila sa Zion sa inyo itololok, nagasiling ang GINOO.

25 Yari karon, ako batok sa imo, O bukid nga makalalaglag, nagasiling ang GINOO, nga nagalaglag sang bug-os nga duta: kag untayon ko ang akon kamut batok sa imo, kag paligiron ikaw gikan sa mga dakung bato, kag himoon ko ikaw nga bukid nga sonog.

26 Kag indi sila magkuha sa imo sing bato nga sa pamag-ang, ukon bato nga sa mga sadsaran; kondi manginmamingaw ka sing dayon, nagasiling ang GINOO.

27 Patindug kamo sing hayahay sa duta, magpatonog sang budyong sa tunga sang mga pungsud, amana ang mga pungsud batok sa iya, tawga sing tingub batok sa iya ang mga ginharian sang Ararat, sang Mini, kag sang Askenaz; tangdo sing kapitan batok sa iya; pataklara ang mga kabayo subong sang mga magaras nga atatalo.

28 Amana batok sa iya ang mga pungsud pati ang mga hari sang mga Mediahanon, ang mga kapitan sini, kag ang tanan nga manugdumala sini, kag ang bug-os nga duta sang iya ginsakpan.

29 Kag ang duta magakurug kag magakasubo: kay ang tagsa ka katuyoan sang GINOO batok sa Babilonia himoon, sa paghimo sang duta sang Babilonia nga mamingaw, nga walay pumuluyo.

30 Ang gamhanan nga mga tawo sang Babilonia nagdumili sa pag-away, nagpabilin sila sa ila mga pamakud: ang ila kusug napaslawan; nanginsubong sila sang mga babaye: ginsonog nila ang iya mga ginapuy-an; ang iya mga pintal nabali.

31 Ang isa ka manugdalagan magadalagan sa pagsugata sang isa, kag ang isa ka manugbalita sa pagsugata sang isa, sa pagpakita sa hari sang Babilonia nga ang iya siudad naagaw sa isa ka bahin,

32 Kag nga ang mga alagyan napunggan, kag ang katabon-akan ginsonog nila sa kalayo, kag ang mga lalaki sang pag-awayan nakulbaan.

33 Kay amo ini ang ginasiling sang GINOO sang mga kasoldadosan, ang Dios sang Israel; Ang babaying anak sang Babilonia kaangay sang linasan, tion na sa pagtasak sa iya: apang sa diotay pa nga tion, kag ang tion sang pag-ani sa iya magaabut.

34 Si Nabucodonosor nga hari sang Babilonia naglamon sa akon, ginligsa niya ako, ginhimo niya ako nga suludlan nga walay sulud, ginlamon niya ako kaangay sang dragon, ginpuno niya ang iya tiyan sang akon manamit nga mga pagkaon, ginpilak niya ako sa gowa.

35 Ang palugus nga nahimo sa akon kag sa akon unud manginsa Babilonia, magasiling ang pumuluyo sang Zion; kag ang akon dugo manginsa mga pumuluyo sa Caldea, magasiling ang Jerusalem.

36 Busa amo ini ang ginasiling sang GINOO; Yari karon, apinan ko ang imo kasaba, kag magatimalus tungud sa imo; kag pahubsan ko ang iya dagat, kag pahubsan ko ang iya mga tuburan.

37 Kag ang Babilonia mangintinumpoktumpok, puluy-an sang mga dragon, kabulungan, kag panagutsutan, nga walay pumuluyo.

38 Magangurub sila sing tingub kaangay sang mga leon: magasiagit sila subong sang mga totoy sang mga leon.

39 Sa ila kainit hiwaton ko ang ila mga pandut, kag hobgon ko sila, agud nga magkalipay sila, kag magtolog sing dayon nga pagtolog, kag indi magmata, nagasiling ang GINOO.

40 Padulhogon ko sila sa ihawan kaangay sa mga cordero, kaangay sa mga carnero nga lalaki upud sa mga kanding nga lalaki.

41 Daw ano nga nakuha ang Sesac! kag daw ano ang pagkakibot sang pagdayaw sang bug-os nga duta! daw ano nga ang Babilonia nanginkabulungan sa tunga sang mga pungsud!

42 Ang dagat nagsaka sa Babilonia: ginatabonan sia sang kadam-an sang kabaluran niya.

43 Ang iya mga siudad nanginmamingaw, duta nga mamala, kag kamingawan, duta diin walay tawo nga nagapuyo, kag walay bisan sin-o nga anak sang tawo nga nagaagi sa sini.

44 Kag ako magasilot kay Bel sa Babilonia, kag pagowaon ko sa iya baba inang iya ginhalunhon: kag indi na magduguk sa iya ang mga pungsud: hoo, ang kuta sang Babilonia mapukan.

45 Katawohan ko, gowa kamo gikan sa tunga niya, kag panginluwas ang tagsa ka tawo sang iya kalag gikan sa mapintas nga kaakig sang GINOO.

46 Kag basi ayhan ang inyo tagiposoon mapunaw, kag kamo magakahadluk sa mga balita nga mabatian sa duta; isa ka balita nga magaabut sa isa ka tuig, kag sa tapus sina sa lain nga tuig magaabut ang isa ka balita, kag ang palugus sa duta, ang manuggahum batok sa manuggahum.

47 Busa, yari karon, ang mga adlaw nagaabut, nga magahikot ako sing paghukom sa mga imahen nga tinigban sa Babilonia: kag ang bug-os niya nga duta malibogan, kag ang tanan niyang pinatay mapukan sa tunga niya.

48 Niyan ang langit kag ang duta, kag ang tanan nga yara sa ila sini, magaamba tungud sa Babilonia: kay ang mga manuglaglag magaabut sa iya gikan sa aminhan, nagasiling ang GINOO.

49 Subong nga ang Babilonia nagpapukan sang mga pinatay sa Israel, sa amo sa Babilonia mapukan ang mga pinatay sa bug-os nga duta.

50 Kamo nga nakaluwas sa espada, lakat kamo, dili magdolog: dumduma ang GINOO gikan sa malayo, kag hupti ang Jerusalem sa inyo painoino.

51 Ginalibogan kita, bangud nga nakabati kita sing kahuluy-an: ang kahuya nagtabon sang aton mga nawung: kay ang mga dumuloong nagsulud sa mga santuario sang balay sang GINOO.

52 Busa, yari karon, nagaabut ang mga adlaw, nagasiling ang GINOO, nga magahikot ako sing paghukom sa iya mga imahen nga tinigban: kag sa bug-os niya nga duta ang mga pilason magaugayong.

53 Bisan ang Babilonia magasaka sa langit, kag bisan magpamakud sia sang kataasan sang iya kusug, apang magaabut sa iya ang mga manuglaglag gikan sa akon, nagasiling ang GINOO.

54 Ang tingug sang singgit nagagikan sa Babilonia, kag dakung kalaglagan gikan sa duta sang mga Caldeanhon:

55 Kay ang GINOO nagwagwag sang Babilonia, kag naglaglag gikan sa iya sang dakung tingug; kon ang iya mga kabaluran magdaguhub kaangay sang madamung tubig, ang kagahud sang ila tingug ginamitlang:

56 Kay ang manuglaglag nag-abut sa iya, sa Babilonia, kag ang iya gamhanan nga mga tawo nadakpan, ang tagsatagsa sang ila mga pana ginbalibali: kay ang GINOONG Dios sang mga pagtumbas magabalus sa pagkamatuud.

57 Kag hobgon ko ang iya mga prinsipe, kag ang iya maalam nga mga tawo, ang iya mga kapitan, kag ang iya mga manuggahum, kag ang iya gamhanan nga mga tawo: kag magatolog sila sa dayon nga pagtolog, kag indi na magmata, nagasiling ang Hari, nga ang iya ngalan amo ang GINOO sang mga kasoldadosan.

58 Amo ini ang ginasiling sang GINOO sang mga kasoldadosan; Ang masangkad nga mga kuta sang Babilonia gub-on sing bug-os, kag ang iya mataas nga mga gawang sonogon sa kalayo; kag ang katawohan magapangabudlay sa walay kapuslanan, kag ang mga tawo sa kalayo, kag sila pagalapyoon.

59 ś Ang polong nga ginsogo ni Jeremias nga manalagna kay Seraya nga anak nga lalaki ni Nerias, ang anak nga lalaki ni Maasias, sang nag-upud sia kay Sedequias nga hari sang Juda pa Babilonia, sa ikap-at nga tuig sang iya paghari. Kag ining si Seraya hipuson nga prinsipe.

60 Gani nagsulat si Jeremias sa isa ka libro sang tanan nga malaut nga magaabut sa Babilonia, ini tanan nga polong nga nasulat nahanungud sa Babilonia.

61 Kag si Jeremias nagsiling kay Seraya, Kon mag-abut ka sa Babilonia, kag makit-an, kag magbasa sini tanan nga polong;

62 Niyan magsiling ka, O GINOO, nagpamolong ka batok sini nga duug, nga utdon ini, agud nga wala na sing magpuyo sa sini, bisan tawo ukon sapat, kondi manginmamingaw ini sing dayon.

63 Kag kon matapus mo ini nga libro sa pagbasa, higtan mo ini sing bato, kag itagbong sa tunga sang Eufrates:

64 Kag magsiling ka, Amo ini ang paglugdang sang Babilonia, kag indi na maglutaw gikan sa malaut nga dalhon ko sa iya: kag lapyoon sila. Tubtub diri ang mga polong ni Jeremias.

KAPITULO 52

SI SEDEQUIAS duha ka pulo kag isa ka tuig sang nagsugud sia sa paghari, kag naghari sia sing napulo kag isa ka tuig sa Jerusalem. Kag ang ngalan sang iya iloy si Hamutal nga anak nga babaye ni Jeremias sang Libna.

2 Kag ginhimo niya inang malaut sa itololok sang GINOO, sono sa tanan nga nahimo ni Jehoaquim.

3 Kay tungud sa kaakig sang GINOO nahanabu ini sa Jerusalem kag sa Juda tubtub nga ginsikway niya sila sa iya atubangan, nga si Sedequias nagbato sa hari sang Babilonia.

4 ś Kag nahanabu sa ikasiam nga tuig sang iya paghari, sa ikapulo nga bulan, sa ikapulo nga adlaw sang bulan, nga si Nabucodonosor nga hari sang Babilonia nag-abut, sia kag ang bug-os niya nga kasoldadosan, batok sa Jerusalem, kag nagpahamtang batok sini, kag nagpatindug sing mga pamakud batok sini sa palibut.

5 Gani ang siudad ginkibon tubtub sa ikapulo kag isa nga tuig ni haring Sedequias.

6 Kag sa ikap-at nga bulan, sa ikasiam nga adlaw sang bulan, ang tiggulutum matama sa siudad, sa bagay nga wala sing kalan-on nga sa katawohan sang duta.

7 Niyan nahimo ang bulho sa siudad, kag ang tanan nga lalaki sang pag-awayan nagpalagyo, kag naggowa sa siudad sa kagab-ihon sa alagyan sang gawang sa ulut sang duha ka kuta, nga yara sa luyo sang katamnan sang hari; (karon ang mga Caldeanhon yara sa palibut sang siudad:) kag nag-agi sila sa dalan sang kapatagan.

8 ś Apang ang kasoldadosan sang mga Caldeanhon naglagas sa hari, kag nalambut si Sedequias sa mga kapatagan sang Jerico; kag nag-alaplaag gikan sa iya ang bug-os niya nga kasoldadosan.

9 Niyan gindakup nila ang hari, kag gindala sia sa hari sang Babilonia sa Ribla sa duta sang Hamat; nga didto ginhukman niya sia.

10 Kag ginpatay sang hari sang Babilonia ang mga anak nga lalaki ni Sedequias sa atubangan sang iya mga mata: ginpatay man niya sa Ribla ang tanan nga mga prinsipe sang Juda.

11 Niyan ginlukat niya ang mga mata ni Sedequias; kag ang hari sang Babilonia naggapus sa iya sa mga talikala, kag gindala sia sa Babilonia, kag ginsulud sia sa bilanggoan tubtub sa adlaw sang iya kamatayon.

12 ś Karon sa ikalima nga bulan, sa ikapulo nga adlaw sang bulan, nga amo ang ikapulo kag siam nga tuig ni Nabucodonosor nga hari sang Babilonia, nag-abut sa Jerusalem si Nabuzar-adan, kapitan sang mga bantay, nga nag-alagad sang hari sang Babilonia,

13 Kag ginsonog niya ang balay sang GINOO, kag ang balay sang hari; kag ang tanan nga kabalayan sang Jerusalem, kag ang tanan nga kabalayan sang kadalagkuan nga mga tawo, ginsonog niya sa kalayo:

14 Kag ang bug-os nga kasoldadosan sang mga Caldeanhon, nga nag-upud sa kapitan sang mga bantay, nagguba sang tanan nga mga kuta sa Jerusalem palibut.

15 Niyan gindala nga bihag ni Nabuzar-adan nga kapitan sang mga bantay ang pila sang mga imol sang katawohan, kag ang salin sang katawohan nga nabilin sa siudad, kag ang mga nagsimpon, nga nagdangup sa hari sang Babilonia, kag ang salin sang kadam-an.

16 Apang si Nabuzar-adan nga kapitan sang mga bantay nagbilin sang pila sang mga imol sang duta nga mga manugtatap sang ubas kag mga mangunguma.

17 Ang mga haligi nga saway man nga yadto sa balay sang GINOO, kag ang mga tulungtungan, kag ang dagat nga saway nga yadto sa balay sang GINOO, ginboong sang mga Caldeanhon, kag gindala ang tanan nga saway nila sa Babilonia.

18 Ginkuha nila ang mga kawa man, kag ang mga pala, kag ang mga inugpalong, kag ang mga yahong, kag ang mga kutsara, kag ang tanan nga mga suludlan nga saway nga sa ila nagpanghikot sila.

19 Kag ang mga planggana, kag ang mga balagahan, kag ang mga yahong, kag ang mga kawa, kag ang mga kandilero, kag ang mga kutsara, kag ang mga tagayan; inang sa bulawan, sa bulawan, kag inang sa pilak, sa pilak, gindala sang kapitan sang mga bantay.

20 Ang duha ka haligi, ang isa ka dagat, kag ang napulo kag duha ka baka nga lalaki nga saway nga yara sa idalum sang mga tulungtungan, nga ginhimo ni haring Salomon sa balay sang GINOO: ang saway sini tanan nga suludlan indi matimbang.

21 Kag nahanungud sa mga haligi, ang kataason sang isa ka haligi napulog walo ka maniko; kag ang isa ka napunihan nga lubid nga napulo kag duha ka maniko naglikus sini; kag ang iya kadamul apat ka tudlo: kag guyko ini.

22 Kag ang oloolo nga saway yara sa ibabaw sini; kag ang kataason sang isa ka oloolo lima ka maniko, sa ibabaw sang mga oloolo sa palibut may pinuna kag mga granada, ang tanan saway. Ang ikaduha nga haligi man kag ang mga granada kaangay sini sa ila.

23 Kag may kasiaman kag anum ka mga granada sa isa ka kilid; kag ang tanan nga mga granada sa ibabaw sang pinuna palibut isa ka gatus.

24 ś Kag ang kapitan sang mga bantay nagkuha kay Seraya nga puno nga pari, kag kay Sofonias nga ikaduha nga pari, kag sang tatlo ka bantay sang ganhaan:

25 Nagkuha man sia gikan sa siudad sang isa ka eunuco, nga manugdumala sang mga lalaki sang pag-awayan; kag pito ka tawo sa ila nga malapit sa hari, nga nakita sa siudad; kag sang escriba nga pangolo sang kasoldadosan, nga nagtipon sang katawohan sang duta; kag kan-uman ka lalaki sang katawohan sang duta, nga nakita sa tunga sang siudad.

26 Gani ginkuha sila ni Nabuzar-adan nga kapitan sang mga bantay, kag gindala sila sa hari sang Babilonia pa Ribla.

27 Kag ginpilas sila sang hari sang Babilonia, kag ginpatay sila sa Ribla sa duta sang Hamat. Sa amo ang Juda gindala nga bihag gikan sa iya kaugalingon nga duta.

28 Ini amo ang katawohan nga gindala ni Nabucodonosor nga bihag: sa ikapito nga tuig, tatlo ka libo kag duha ka pulo kag tatlo ka mga Judio:

29 Sa ikapulo kag walo nga tuig ni Nabucodonosor nagdala sia nga bihag walo ka gatus kag katloan kag duha ka tawo gikan sa Jerusalem:

30 Sa ikaduha ka pulo kag tatlo nga tuig ni Nabucodonosor, si Nabuzar-adan nga kapitan sang mga bantay nagdala nga bihag sa mga Judio sing pito ka gatus kag kap-atan kag lima ka tawo: ang tanan nga tawo apat ka libo kag anum ka gatus.

31 ś Kag nahanabu sa ikakatloan kag pito nga tuig sang pagbihag kay Jehoaquin nga hari sang Juda, sa ikapulo kag duha nga bulan, sa ikaduha ka pulo kag lima nga adlaw sang bulan, nga si Evil-merodac nga hari sang Babilonia, sa nahauna nga tuig sang iya paghari, nagbayaw sang olo ni Jehoaquin nga hari sang Juda, kag ginpagowa niya sia sa bilanggoan,

32 Kag nagpamolong sia sing maayo sa iya, kag nagpahamtang sang iya trono sa ibabaw sang trono sang mga hari nga upud sa iya sa Babilonia,

33 Kag gin-ilisan ang iya mga panapton sa bilanggoan: kag nagkaon sia sing tinapay sing dalayon sa tanan nga adlaw sang iya kabuhi sa atubangan niya.

34 Kag sa iya inugkabuhi, ginhatagan sia sang hari sang Babilonia sing dalayon nga inugkabuhi, sing bahin sa tagsa ka adlaw tubtub sa adlaw sang iya kamatayon, sa tanan nga mga adlaw sang iya kabuhi.ari sang Babilonia, kag ang salin sang kadam-an.

AMAZING GRACE BIBLE INSTITUTE