ANG BALAAN NGA BIBLIA

ANG PANGKABUG-OSAN NGA SULAT NI

SANTIAGO

KAPITULO 1

SI SANTIAGO, isa ka alagad sang Dios kag ni Ginoong Jesu-Cristo, sa napulog duha ka tribo nga nag-alaplaag, pag-abiabi.

2 Mga kauturan ko, kabiga ninyo nga bug-os nga kalipay kon makasugata kamo sing nagakalainlain nga mga pagsulay;

3 Nga nahibaloan ninyo ini, nga ang pagtilaw sang inyo pagtoo nagahikot sing pagpailub.

4 Apang magmay iya nga himpit nga buhat ang pagpailub, agud nga mahimpit kamo kag mabug-os, nga walay kakulangan.

5 Kon may yara sa inyo nga nakulangan sing kaalam, magpangayo sia sa Dios, nga nagahatag sing maalwan sa tanan nga tawo, kag wala nagabasul; kag hatagan sia sini.

6 Apang magpangayo sia sa pagtoo, sa walay pangduhaduha. Kay ang nagaduhaduha kaangay sang balud sang dagat nga ginapalid sang hangin kag ginatumbo.

7 Kay indi maghunahuna inang tawo nga sia magabaton sing bisan ano nga butang sa Ginoo.

8 Ang tawo nga duha sing painoino mahuyang sa tanan niya nga dalanon.

9 Magkalipay ang utud nga kubus bangud ginabayaw sia:

10 Apang ang manggaranon, bangud ginapakakubus sia: bangud nga subong sang bulak sang hilamon magataliwan sia.

11 Kay ang adlaw nagasaka nga may masingkal nga init, kag nagalaya sang hilamon, kag ang iya bulak nagakapulak, kag ang katahum sang iya dagway nagakawala: subong man ang manggaranon nga tawo magakalayong sa iya mga dalanon.

12 Bulahan ang tawo nga nagabatas sang pagsulay: kay kon matilawan na sia, magabaton sia sang purungpurung sang kabuhi, nga ginsaad sang Ginoo sa ila nga nagahigugma sa iya.

13 Walay tawo nga sang ginasulay sia magsiling, Ginasulay ako sang Dios: kay ang Dios indi masulay sang malaut, kag sia wala nagasulay sa bisan kay sin-o nga tawo:

14 Apang ang tagsa ka tawo ginasulay, kon ginabuyuk sia sang iya kaugalingon nga kailigbon, kag ginahaylo.

15 Niyan kon ang kailigbon nakapanamkon, nagapanganak ini sing sala: kag ang sala, kon nahuman na, nagapamunga sing kamatayon.

16 Dili kamo magtalang, hinigugma ko nga mga kauturan.

17 Ang tagsa ka maayong dolot kag ang tagsa ka himpit nga dolot gikan sa ibabaw, kag nagahalin sa Amay sang mga kapawa, nga sa iya walay pagliwanliwan, ukon landong sang pagbalhin.

18 Sa iya kaugalingon nga kabubut-on ginpanganak niya kita paagi sa polong sang kamatooran, agud nga kita dapat magmanginsari sang una nga mga bunga sa iya mga tinuga.

19 Busa, hinigugma kong mga kauturan, ang tagsa ka tawo magmadagmit sa pagpamati, magmahinay sa paghambal, magmakuli sa pagsingkal:

20 Kay ang kasingkal sang tawo wala nagahikot sang pagkamatarung sang Dios.

21 Busa isikway ang tanan nga kahigkoan kag kalakasan sang kasutilan, kag batona nga may pagpaubus ang polong nga gintanum, nga sarang makaluwas sang inyo mga kalag.

22 Apang magmangin manugtuman kamo sang polong, kag dili manugpalamati lamang, nga nagadaya sang inyo kaugalingon.

23 Kay kon ang bisan sin-o manugpamati sang polong, kag indi manugtuman, kaangay sia sa tawo nga nagatan-aw sang iya kinaugali nga nawung sa salaming:

24 Kay ginatan-aw niya ang iya kaugalingon, kag nagahalin, kag sa gilayon nalimot kon ano nga bagay sang tawo sia.

25 Apang ang bisan sin-o nga nagatolok sa himpit nga kasogoan sang kahilwayan, kag nagapadayon sa sini, sia nga indi malimoton nga manugpamati, kondi manugtuman sang buhat, ining tawo manginbulahan sa iya binuhatan.

26 Kon ang bisan sin-ong tawo sa inyo nga daw sa relihioso, kag wala ginabusalan ang iya dila, kondi ginadayaan ang iya kaugalingon nga tagiposoon, ang relihiyon sining tawo walay pulus.

27 Ang putli nga relihiyon kag walay dagta sa atubang sang Dios kag Amay amo ini, Ang pagduaw sa mga ilo sa amay kag balo nga mga babaye sa ila kapipit-an, kag sa pagtipig sang iya kaugalingon nga walay dagta sa kalibutan.

KAPITULO 2

MGA KAUTURAN ko, dili ninyo ang pagtoo sang aton Ginoong Jesu-Cristo, ang Ginoo sang himaya, igpamili sang mga tawo.

2 Kay kon may magsulud sa inyo katilingban nga isa ka tawo nga may singsing nga bulawan, sa maayo-ayo nga panapton, kag may magsulud man nga isa ka imol nga tawo sa panapton nga mahigko;

3 Kag may pagpasulabi kamo sa iya nga nagapanaput sing panapton nga maalikaya, kag nagasiling sa iya, Lingkod ka diri sa maayong lingkoran; kag nagasiling kamo sa imol, Tindug ka dira, ukon lingkod ka sa idalum sang palatungan sang akon mga tiil:

4 Niyan wala bala kamo sing may ginapasulabi sa inyo kaugalingon, kag manginhukom nga may malaut sing mga hunahuna?

5 Pamati kamo, hinigugma kong mga kauturan, Wala bala pagpili-a sang Dios ang mga imol sining kalibutan nga magmanggaranon sa pagtoo, kag mga manunubli sang ginharian nga ginsaad niya sa ila nga nagahigugma sa iya?

6 Apang ginatamay ninyo ang mga imol. Wala bala ang mga manggaranon nga tawo nagapigus sa inyo, kag nagaguyud sa inyo sa mga lingkoran nga hukmanan?

7 Wala bala nila ginapasipalahi inang dungganon nga ngalan nga sa sini ginatawag kamo?

8 Kon nagatuman kamo sang harianon nga kasogoan sono sa kasulatan, Higugmaon mo ang imo isigkatawo subong sa imo kaugalingon, nagahimo kamo sing maayo:

9 Apang kon nagapasulabi kamo sing mga tawo, nagapakasala kamo, kag ginapamatud-an sang kasogoan nga mga malinapason.

10 Kay ang bisan sin-o nga magahuput sang bug-os nga kasogoan, apang makasayup sa isa ka bahin, manginmalinapason sia sang tanan.

11 Kay sia nga nagsiling, Dili magpanglahi, nagsiling man, Dili magpatay. Karon kon wala ka nagapanglahi, apang kon ikaw nagapatay, nanginmalinapason ka sang kasogoan.

12 Maghambal kamo subong sini, kag magbuhat subong sini, subong sa ila nga hukman sang kasogoan sang kahilwayan.

13 Kay sia nga wala magpakita sing kalooy pagahukman nga walay kalooy; kag ang kalooy nagahimaya batok sa paghukom.

14 Ano bala ang kapuslanan sini, mga kauturan ko, kon ang tawo nagasiling nga may pagtoo sia, kag walay mga buhat? makaluwas bala ang pagtoo sa iya?

15 Kon ang utud nga lalaki ukon utud nga babaye hubo, kag nawad-an sing pang-adlawadlaw nga kalan-on,

16 Kag ang isa sa inyo nagasiling sa ila, Lakat kamo sa paghidait, magpainit-init kamo kag magkalabusug; walay sapayan wala ninyo sila paghatagi sinang mga butang nga kinahanglan sa lawas; ano bala ang kapuslanan sini?

17 Amo man ang pagtoo, kon ini walay mga binuhatan, patay, kon isa lamang.

18 Hoo, ang tawo makasiling, Ikaw may pagtoo, kag ako may mga binuhatan: ipakita sa akon ang imo pagtoo nga walay mga binuhatan mo, kag ipakita ko sa imo ang akon pagtoo paagi sa akon mga binuhatan.

19 Ikaw nagatoo nga may isa ka Dios; nagahimo ka sing maayo: ang mga yawa man nagatoo, kag nagakurug.

20 Apang buut ka bala nga makahibalo, O tawo nga walay pulus, nga ang pagtoo nga walay mga binuhatan patay?

21 Wala bala si Abraham nga aton amay ginpakamatarung paagi sa mga binuhatan, sang gindolot niya ang iya anak nga si Isaac sa ibabaw sang halaran?

22 Imo bala nakita kon paano nga ang pagtoo nagahikot kaupud sang iya mga binuhatan, kag paagi sa mga binuhatan ang pagtoo ginhimo nga himpit?

23 Kag natuman ang kasulatan nga nagasiling, Si Abraham nagtoo sa Dios, kag naisipan ini sa iya nga sa pagkamatarung: kag gintawag sia nga Abyan sang Dios.

24 Niyan nakita ninyo kon paano nga ang tawo ginapakamatarung paagi sa mga binuhatan, kag indi lamang paagi sa pagtoo.

25 Subong man si Rahab nga alpot wala bala man ginpakamatarung paagi sa mga binuhatan, sang iya pagbaton sang mga manugbalita, kag ginpalakat niya sila sa liwan nga dalan?

26 Kay subong nga ang lawas patay kon walay espiritu, amo man ang pagtoo patay man kon walay mga binuhatan.

KAPITULO 3

MGA KAUTURAN ko, dili mangin madamu nga mga agalon, nga nahibaloan nga batonon ta ang labi pa nga katagudilian.

2 Kay sa madamung butang kita nagapasandad sang tanan. Kon ang bisan sin-o nga tawo wala nagasandad sa polong, sia himpit nga tawo, kag sarang makapugung sang bug-os nga lawas man.

3 Yari karon, ginabutangan ta sang mga busal sa mga baba ang mga kabayo, agud nga magtuman sila sa aton; kag ginapaliso ta ang ila bug-os nga lawas.

4 Tan-awa ang mga sakayan man, bisan daw ano ka dalagku sila, kag ginapalid sang mamadlus nga mga hangin, apang ginapaliso sila sang diotay gid nga bansalan, kon diin ang buut sang manug-ulin.

5 Amo man ang dila bahin nga diotay, kag nagapabugal sing dalagku nga mga butang. Yari karon, daw ano kadaku nga butang ang ginasonog sang diotay nga kalayo!

6 Kag ang dila isa ka kalayo, isa ka kalibutan sang kalautan: amo man ang dila sa tunga sang aton mga bahin, nga nagadagta sang bug-os nga lawas, kag ginatutdan ang paglakat sang pangabuhi; kag ginatutdan sang impierno.

7 Kay ang tagsa ka sari sang mga sapat, kag sang mga pispis, kag sang mga man-ug, kag sang mga butang sa dagat, ginahagup, kag nahagup sang katawohan:

8 Apang walay tawo nga makahagup sang dila; isa ini ka buraskal nga kalaut, puno sang makamamatay nga hilo.

9 Paagi sini ginapakamaayo ta ang Dios, ang Amay; kag paagi sini ginapakamalaut ta ang mga tawo, nga ginahimo sono sa kaanggid sang Dios.

10 Gikan sa among baba nagagowa ang pagpakamaayo kag ang pagpakamalaut. Mga kauturan ko, ini indi dapat magmangin-amo.

11 Nagapailig bala ang tuburan gikan sa amo man nga duug sing tubig nga matab-ang kag matayam?

12 Mga kauturan ko, makapatubas bala ang kahoy nga higuera sing mga olivo? ukon ang puno sang ubas, sing mga higos? subong man walay tuburan nga makahatag sing tubig nga maasin kag matab-ang.

13 Sin-o bala ang maalam nga tawo kag may ihibalo sa inyo? magpakita sia gikan sa maayong kagawian sang iya mga binuhatan sa pagkamapainubuson sang kaalam.

14 Apang kon kamo may mapait nga kahisa kag pinuyasay sa inyo mga tagiposoon, dili maghimaya, kag dili magbutig batok sa kamatooran.

15 Ining kaalam wala magikan sa ibabaw, kondi dutan-on, lawasnon, yawan-on.

16 Kay kon diin ang kahisa kag pinuyasay, didto ang kagamo kag tagsa ka malaut nga buhat.

17 Apang ang kaalam nga gikan sa ibabaw sa nahauna putli, ugaling madaiton, malolo, kag mahapus nga pagpatalupangdon, puno sang kalooy kag maayong mga bunga, wala sing pinasulabi, kag wala sing pagkasalimpapaw.

18 Kag ang bunga sang pagkamatarung ginasab-ug sa paghidait sang mga nagapakighidait.

KAPITULO 4

DIIN bala magikan ang mga pag-inaway kag ang mga pagsinuay sa tunga ninyo? wala bala ini magikan sa inyo mga kailigbon nga nagainaway sa inyo mga bahin?

2 Nagakaibog kamo, kag wala ninyo maagum: nagapamatay kamo, kag nagahandum sa pag-angkon, kag indi kamo makaagum: nagasinuay kag nagainaway kamo, apang wala ninyo maagum, kay wala kamo nagapangayo.

3 Nagapangayo kamo, kag wala makabaton, bangud sayup ang inyo pagpangayo, agud nga mahinguyang ninyo ini sa inyo mga kailigbon.

4 Mga makihilahion nga lalaki kag mga makihilahion nga babaye, wala bala kamo makahibalo nga ang pagpakig-abyan sa kalibutan pagpakig-away sa Dios? busa ang bisan sin-o nga magpakig-abyan sa kalibutan kaaway sang Dios.

5 Nagahunahuna bala kamo nga ang kasulatan nagasiling sa walay kapuslanan, Ang espiritu nga nagapuyo sa aton nagakaibog sa pagkahisa?

6 Apang nagahatag sia sing labi pa nga bugay. Busa sia nagasiling, Ginasumpung sang Dios ang mga bugalon, apang nagahatag sia sing bugay sa mga mapainubuson.

7 Busa magpasakup kamo sa Dios. Sumpunga ang yawa, kag magapalagyo sia sa inyo.

8 Magpalapit sa Dios, kag sia magapalapit sa inyo. Tinloi ang inyo mga kamut, kamo nga mga makasasala; kag putli-a ang inyo mga tagiposoon, kamo nga mga duha sing painoino.

9 Magkalisud, kag maglalaw, kag maghaya: baylohi ang inyo kinadlaw sa paglalaw, kag ang inyo kalipay sa kasubu.

10 Paubsa ang inyo kaugalingon sa itololok sang Ginoo, kag bayawon niya kamo.

11 Dili kamo maghambal sing malaut nahanungud sa isa kag isa, mga kauturan. Sia nga nagahambal sing malaut nahanungud sa iya utud, kag nagahukom sa iya utud, nagahambal sing malaut nahanungud sa kasogoan, kag nagahukom sang kasogoan: apang kon nagahukom ka sang kasogoan, indi ka manugtuman sang kasogoan, kondi hukom.

12 May isa ka manughatag sang kasogoan, nga sarang makaluwas kag makalaglag: sin-o ikaw bala nga nagahukom sang iban?

13 Kari karon, kamo nga nagasiling, Karon nga adlaw ukon buwas makadto kita sa sining siudad, kag magpabilin didto sing isa ka tuig, kag magbakal kag magbaligya, kag mag-agum sing ganansya:

14 Sing ugai wala ninyo mahibaloi kon ano ang sa buwas. Kay ano bala ang inyo kabuhi? Ini isa ka usbung, nga nagapahayag sa diotay nga tion, kag niyan nagakawala.

15 Kay sa baylo sina dapat kamo magsiling, Kon buut sang Ginoo, magkabuhi kita, kag maghimo sini, ukon sina.

16 Apang karon nagakalipay kamo sa inyo mga pagpabugal: ang tanan nga tagsubong sina nga pagkalipay malaut.

17 Busa ang makahibalo nga maghimo sing maayo, kag wala nagahimo sini, sa iya ini sala.

KAPITULO 5

KARI karon, kamo nga mga manggaranon, maghibi kag magtiabaw bangud sang inyo mga pagkakailo nga magaabut sa inyo.

2 Ang inyo mga manggad nadunut, kag ang inyo mga panapton inut-ut sang sipit.

3 Ang inyo bulawan kag pilak natuktukan; kag ang ila tuktuk manginsaksi batok sa inyo, kag magaupud sang inyo unud subong sang kalayo. Nagtipon kamo sang bahandi sa katapusan nga mga adlaw.

4 Yari karon, ang mga sohol sang mga mamumugon nga naggalab sang inyo mga uma, nga inyo ginahawiran sa limolimo, nagasinggit: kag ang mga singgit sang mga naggalab naglambut sa mga idulungug sang Ginoo sang sabaoth.

5 Nakapangabuhi kamo sa duta sa patuyang, kag sa kalaw-ayan; ginsagud ninyo ang inyo mga tagiposoon, subong sa adlaw sang ihaw.

6 Gintagudilian kag ginpatay ninyo ang matarung; kag wala sia nagasumpung sa inyo.

7 Busa, mga kauturan, magpailub kamo tubtub sa pag-abut sang Ginoo. Yari karon, ang mangunguma nagahulat sang hamiling bunga sang duta, kag may malawig nga pagpailub tungud sini, tubtub nga mabaton niya ang una kag olihing ulan.

8 Magpailub man kamo; palig-ona ang inyo mga tagiposoon: kay ang pag-abut sang Ginoo nagahilapit na.

9 Mga kauturan, dili kamo magkulumuray ang isa batok sa isa, agud nga indi kamo pagtagudilian: yari karon, ang hukom nagatindug sa atubang sang ganhaan.

10 Mga kauturan, batona ninyo nga huwaran sang pag-antus sang kapipit-an kag sang pagpailub ang mga manalagna nga nagpamolong sa ngalan sang Ginoo.

11 Yari karon, ginakabig naton nga bulahan ang mga nagapadayon. Nabatian ninyo ang pagpailub ni Job, kag nakita ninyo ang katapusan nga ginhatag sang Ginoo; nga ang Ginoo tama ka mainawaon, kag may mahinoklogon nga kalooy.

12 Apang labaw sa tanan nga butang, mga kauturan ko, dili magsumpa, bisan paagi sa langit, ukon paagi sa duta, ukon paagi sa bisan ano pa nga sumpa: kondi ang inyo hoo manginhoo; kag ang inyo indi, indi; agud nga indi kamo maholog sa katagudilian.

13 May yara bala sa inyo nga napiotan? magpangamuyo sia. May malipayon? mag-amba sia sing mga salmo.

14 May nagamasakit bala sa inyo? magpatawag sia sang mga tigulang sang iglesia; kag pangamuyoan nila sia, nga ginahaplas sia sing lana sa ngalan sang Ginoo:

15 Kag ang pangamuyo sang pagtoo magaluwas sang nagamasakit, kag ang Ginoo magabangon sa iya; kag kon nakahimo sia sing mga sala, patawaron ang mga ini sa iya.

16 Magtinu-aray kamo ang isa kag isa sang inyo mga sayup, kag magpangamuyoay kamo ang isa kag isa, agud nga mag-ayo kamo. Ang mabungahon nga hugut nga pangamuyo sang matarung nga tawo nagapulus sing daku.

17 Si Elias tawo nga kaanggid naton sa kinaugali, kag nagpangamuyo sia sing hanoot nga indi mag-ulan: kag wala mag-ulan sa duta sa tatlo ka tuig kag anum ka bulan.

18 Kag nagpangamuyo sia liwat, kag ang langit naghatag sing ulan, kag ang duta nagpatubas sang iya bunga.

19 Mga kauturan, kon may yara sa inyo nga nagatalang sa kamatooran, kag may isa nga nagapaliso sa iya;

20 Pahibaloa sia, nga ang nagapaliso sing makasasala gikan sa pagtalang sang iya dalan magaluwas sang isa ka kalag gikan sa kamatayon, kag magatabon sing kadam-an nga mga sala.

AMAZING GRACE BIBLE INSTITUTE