ANG BALAAN NGA BIBLIA

ANG LIBRO SANG MANALAGNA NGA SI

ISAIAS

KAPITULO 1

ANG palanan-awon ni Isaias nga anak nga lalaki ni Amoz, nga nakita niya nahanungud sa Juda kag Jerusalem sa mga adlaw ni Uzias, ni Jotam, ni Acaz, kag ni Ezequias, mga hari sang Juda.

2 Pamati, O mga langit, kag dungga, O duta: kay ang GINOO nagpamolong, Nagsagud ako kag nagpatubo sing mga anak, kag sila nagbato sa akon.

3 Ang baka nakakilala sa iya tag-iya, kag ang asno sang pasungan sang iya agalon: apang ang Israel wala nagakilala, ang akon katawohan wala nagapatugsiling.

4 Ah, pungsud nga makasasala, katawohan nga nalulanan sing kalautan, kaliwat sang mga manughimo sang malaut, mga anak nga manugdunut: ginbayaan nila ang GINOO, ginpaakig nila ang Balaan nga Isa sang Israel, nagpalayo sila nga naga-ilisul.

5 ś Ngaa bala nga sakiton pa kamo? magaribuk kamo sing labi kag labi pa: ang bug-os nga olo nagabalatian, kag ang bug-os nga tagiposoon ginapunaw.

6 Kutub sa dapadapa sang tiil bisan tubtub sa olo wala sing maayo sa sini; kondi mga pilas, kag mga hanug, kag mga pilas nga nagadagsang: wala sila makipot, ukon nabugkusan, ukon napahomokan sing ihalaplas.

7 Ang inyo duta mamingaw, ang inyo mga siudad nasonog sa kalayo: ang inyo duta, ginahalunhon ini sang mga dumuloong sa atubangan ninyo, kag mamingaw ini, subong sang ginalaglag sang mga dumuloong.

8 Kag ang babaying anak sang Zion nabilin subong sang payagpayag sa ulubasan, subong sang dalayonan sa katamnan sang mga atimon, subong sang siudad nga nakibon.

9 Kon wala ang GINOO sang kasoldadosan magbilin sa aton sing diotay gid nga nabilin, nanginsubong kita kuntani sang Sodoma, kag nanginkaangay kita kuntani sang Gomorra.

10 ś Pamatii ang polong sang GINOO, kamo nga mga manugdumala sang Sodoma; dungga ang kasogoan sang aton Dios, kamo nga katawohan sang Gomorra.

11 Ano bala ang katuyoan sang kadamuon sang inyo mga paghalad sa akon? nagasiling ang GINOO: tuman na ako sa mga halad nga sinonog nga mga carnero nga lalaki, kag sa sapay sang mga sapat nga pinatambok; kag wala ako nagakalipay sa dugo sang tinday nga mga baka nga lalaki, ukon sang mga cordero, ukon sang mga kanding nga lalaki.

12 Kon mag-atubang kamo sa akon, sin-o bala ang nagkinahanglan sini sa inyo kamut, sa paglapak sang akon mga luwang?

13 Dili na kamo magdala sing walay pulus nga mga halad; ang incienso kangil-aran sa akon; ang mga lati kag ang mga sabbath, ang pagtawag sang mga pagtilipon, indi ako makabatas; kalautan ini, bisan ang solemne nga pagtilipon.

14 Ang inyo mga lati kag ang inyo pinat-ud nga mga pandut ginadumtan sang akon kalag: lulan sila sa akon; ginalapyo ako sa pagdala sa ila.

15 Kag kon untayon ninyo ang inyo mga kamut, lipnan ko ang akon mga mata gikan sa inyo: hoo, kon maghimo kamo sing madamu nga pangamuyo, indi ako magpamati: ang inyo mga kamut puno sang dugo.

16 ś Panghugas kamo, paninlo kamo; isikway ang malaut nga mga buhat ninyo sa atubangan sang akon mga mata; mag-untat sa paghimo sing malaut;

17 Magtoon sa paghimo sing maayo; magpangita sang katarungan, magluwas sang pinigus, maghukom sang ilo sa amay, mag-apin sang balong babaye.

18 Kari karon, kag mag-isipisip kita sing tingub, nagasiling ang GINOO: bisan ang inyo mga sala subong sang escarlata, manginmaputi sila subong sang nieve; bisan mapula sila subong sang carmesi, manginsubong sila sang bulbul sang carnero.

19 Kon kamo buut kag magmatinumanon, magakaon kamo sang kaayohan sang duta:

20 Apang kon kamo magdumili kag magbato, halunhonon kamo sa espada: kay ang baba sang GINOO nagpamolong sini.

21 ś Daw ano nga ang matutum nga siudad nangin-alpot! sadto puno ini sang katarungan; ang pagkamatarung nagpuyo sa sini; apang karon mga manugpatay.

22 Ang imo pilak nanginbuay, ang imo alak nasimbogan sing tubig:

23 Ang imo mga prinsipe mabinatoon, kag kaupdanan sang mga makawat: ang tagsatagsa nagahigugma sang mga hamham, kag nagasonod sang mga balus: wala sila nagahukom sang ilo sa amay, kag wala nagaabut sa ila ang kasaba sang balong babaye.

24 Busa nagasiling ang Ginoo, ang GINOO sang mga kasoldadosan, ang gamhanan nga Isa sang Israel, Ah, magapatawhay ako nahanungud sa akon mga kasumpung, kag magatimalus ako sa akon mga kaaway:

25 ś Kag ibalik ko ang akon kamut sa imo, kag tinloan ko sing bug-os gid ang imo buay, kag kuhaon ang tanan mong istanyo:

26 Kag iuli ko ang imo mga hukom subong sang sa una, kag ang imo mga manuglaygay subong sang sa kamunoan: ugaling tawgon ka, Ang siudad sang pagkamatarung, ang siudad nga matutum.

27 Ang Zion tubson sing paghukom, kag ang mga pinaliso niya sing pagkamatarung.

28 ś Kag ang kalaglagan sang mga malinapason kag sang mga makasasala mangintingub, kag ang mga nagabiya sa GINOO papason.

29 Kay magakahuya sila sang mga terebinto nga ginhandum ninyo, kag magataligmato kamo tungud sang mga katamnan nga ginpili ninyo.

30 Kay manginsubong kamo sang terebinto nga nagakalaya ang iya dahon, kag subong sang katamnan nga walay tubig.

31 Kag ang makusug manginsubong sang nahot sang lino, kag ang manugbuhat sini subong sang alipalok, kag sila masonog sing tingub, kag wala gid sing makapalong sa ila.

KAPITULO 2

ANG polong nga nakita ni Isaias nga anak nga lalaki ni Amoz nahanungud sang Juda kag sang Jerusalem.

2 Kag mahanabu sa katapusan nga mga adlaw, nga ang bukid sang balay sang GINOO tukuron sa putokputokan sang mga kabukiran, kag bayawon labaw sa mga kabakoloran; kag ang tanan nga pungsud magaduguk sa sini.

3 Kag ang madamung katawohan magakadto kag magasiling, Kari kamo, kag magtaklad kita sa bukid sang GINOO, sa balay sang Dios ni Jacob; kag tudloan niya kita sang iya mga dalanon, kag magalakat kita sa iya mga banas: kay gikan sa Zion magagowa ang kasogoan, kag ang polong sang GINOO gikan sa Jerusalem.

4 Kag sia magahukom sa tunga sang mga pungsud, kag magasabdong sang madamung katawohan: kag salsalon nila nga mga punta sang arado ang ila mga espada, kag mga galab nga inughagbas ang ila mga bangkaw: ang pungsud indi magabayaw sing espada batok sa pungsud, kag indi na sila magtoon sing inaway.

5 O balay ni Jacob, kari kamo, kag maglakat kita sa kapawa sang GINOO.

6 ś Busa ginbayaan mo ang imo katawohan nga panimalay ni Jacob, bangud nga napuno sila liwat gikan sa sidlangan, kag mga manugpakot kaangay sang mga Filistinhon, kag sila nagapahalipay sang ila kaugalingon sa mga anak sang mga dumuloong.

7 Ang ila duta man puno sang pilak kag bulawan, kag wala gid sang katapusan ang ila mga bahandi; ang ila duta man puno sang mga kabayo, kag wala gid sang katapusan ang ila mga kangga:

8 Ang ila duta puno man sang mga diosdios; ginasimba nila ang binuhatan sang ila kaugalingon nga mga kamut, nga ginhimo sang ila kaugalingon nga mga tudlo:

9 Kag ang kubus nga tawo nagayaub, kag ang dakung tawo nagapapaubus sang iya kaugalingon: busa dili sila pagpatawara.

10 ś Sulud sa dakung bato, kag panago ka sa yab-ok, bangud sa kahadluk sa GINOO, kag bangud sa himaya sang iya pagkaharianon.

11 Ang matinaastaason nga mga panolok sang tawo paubson, kag ang pagpalabi-labi sang mga tawo payaubon, kag ang GINOO lamang ang pakataason sa sinang adlaw.

12 Kay ang adlaw sang GINOO sang mga kasoldadosan manginsa tagsatagsa nga bugalon kag matinaastaason, kag sa tagsatagsa nga nagapahabokhabok; kag paubson sia:

13 Kag sa tanan nga cedro sang Libano, nga mataas kag nabayaw, kag sa tanan nga terebinto sang Basan,

14 Kag sa tanan nga mataas nga mga kabukiran, kag sa tanan nga mga kabakoloran nga nabayaw,

15 Kag sa tagsa ka torre nga mataas, kag sa tagsa ka kuta nga napamakuran,

16 Kag sa tanan nga sakayan sang Tarsis, kag sa tanan nga matahum nga laragway.

17 Kag ang pagkamatinaastaason sang tawo paubson, kag ang pagpalabi-labi sang mga tawo panuboon: kag ang GINOO lamang ang pakataason sa sinang adlaw.

18 Kag ang mga diosdios dulaon niya sing bug-os.

19 Kag sila magasulud sa mga boho sang mga dakung bato, kag sa mga lungib sang duta, bangud sa kahadluk sa GINOO, kag bangud sa himaya sang iya pagkaharianon, kon magtindug sia sa pag-uyog sing mabaskug sang duta.

20 Sa sinang adlaw ipilak sang tawo ang iya mga diosdios nga pilak, kag ang iya mga diosdios nga bulawan, nga ila ginhimo ang tagsatagsa nga sa iya kaugalingon nga simbahon, sa mga mole kag sa mga kabug;

21 Sa pagsulud sa mga litik sang mga dakung bato, kag sa mga putokputokan sang magisrang nga mga dakung bato, bangud sa kahadluk sa GINOO, kag bangud sa himaya sang iya pagkaharianon, kon magtindug sia sa pag-uyog sing mabaskug sang duta.

22 Bayai ninyo ang tawo, nga ang iya ginhawa yara sa iya mga ilong: kay diin bala sia pakamahalon?

KAPITULO 3

KAY, yari karon, ang Ginoo, ang GINOO sang mga kasoldadosan, nagakuha sa Jerusalem kag sa Juda sang inugsagud kag inugsakdag, ang bug-os nga inugsagud nga kalan-on, kag ang bug-os nga inugsagud nga tubig,

2 Ang gamhanan nga tawo, kag ang lalaki sang pag-awayan, ang hukom, kag ang manalagna, kag ang mainandamon, kag ang tigulang,

3 Ang kapitan sang kalim-an, kag ang dungganon nga tawo, kag ang manuglaygay, kag ang sampaton nga manugpadugi, kag ang sampaton nga manugpamolong.

4 Kag magahatag ako sing kabataan nga mangin-ila mga prinsipe, kag ang mga bata nga gamay magagahum sa ila.

5 Kag ang katawohan piguson, ang tagsatagsa sang isa, kag ang tagsatagsa sang iya isigkatawo: ang bata magapabugal batok sa tigulang, kag ang huroshuros batok sa dungganon.

6 Kon ang tawo magdakup sang iya utud nga lalaki sa balay sang iya amay, nga nagasiling; May panapton ka, manginmanugdumala ka namon, kag ini nga kalaglagan manginsa idalum sang imo kamut:

7 Sa sinang adlaw magasumpa sia, nga nagasiling, Indi ako magmanugbolong; kay sa akon balay wala sing kalan-on ukon panapton: indi ako ninyo paghimoa nga manugdumala sang katawohan.

8 Kay ang Jerusalem nalaglag, kag ang Juda napukan: kay ang ila dila kag ang ila mga binuhatan batok sa GINOO, sa pagpaakig sang mga mata sang iya himaya.

9 ś Ang pahayag sang ila nawung nagasaksi batok sa ila; kag ginabantala nila ang ila sala subong sang Sodoma, wala nila pagtagoa ini. Kailo sa ila kalag! kay ginbalusan nila sing malaut ang ila kaugalingon.

10 Isiling ninyo sa matarung, nga manginmaayo sa iya: kay magakaon sila sang bunga sang ila mga hinimoan.

11 Kailo sa malauton! manginmalain sa iya: kay ang pagbalus sa iya mga kamut himoon sa iya.

12 ś Nahanungud sang akon katawohan, ang kabataan amo ang ila mga manugpigus, kag ang mga babaye nagagahum sa ila. O katawohan ko, ang mga nagatuytuy sa imo nagapasayup sa imo, kag nagalaglag sang dalanon sang imo mga banas.

13 Ang GINOO nagatindug sa pagpakigkasaba, kag nagatindug sa paghukom sang katawohan.

14 Ang GINOO magasulud sa hukmanan upud sang mga tigulang sang iya katawohan, kag upud sang mga prinsipe nila: kay kamo nagkaon sang ulubasan; ang inagaw sa imol yara sa inyo mga balay.

15 Ano bala ang buut ninyo isiling nga ginadugmok ninyo ang akon katawohan, kag ginagaling ang mga nawung sang imol? nagasiling ang Ginoong DIOS sang mga kasoldadosan.

16 ś Labut pa ang GINOO nagasiling, Bangud nga ang babaye nga mga anak sang Zion mga palabilabihon, kag nagalakat nga nagapatiskog sang mga liog kag maulag nga mga mata, nga nagalakat kag nagakiay-kiay sa nagapadayon sila, kag nagapalagting sang ila mga tiil:

17 Busa samaron sang Ginoo sing palangugan ang alipudwan sang olo sang mga babaye nga anak sang Zion, kag ang GINOO magapadayag sang ila mga tinago nga bahin.

18 Sa sinang adlaw kuhaon sang Ginoo ang pagpadayaw sang ila nagalagting nga mga puni sa palibut sang ila mga tiil, kag ang ila mga pinuna sa olo, kag ang ila matipolon nga mga manto kaangay sang bulan,

19 Ang mga pakabit, kag ang mga pulseras, kag ang mga takurung,

20 Ang mga gura, kag ang mga puni sa batiis, kag ang mga laso, kag ang mga puni nga kisap, kag ang mga aritos,

21 Ang mga singsing, kag ang mga alahas sa ilong,

22 Ang mga panapton nga ginabaylobaylo, kag ang mga mantelyina, kag ang mga pandong, kag ang mga kimpit nga inugkulong,

23 Ang mga salaming, kag ang lino nga mapino, kag ang mga tuka, kag ang mga belo.

24 Kag mahanabu, nga sa baylo sang kaamyon amo ang kabaho; kag sa baylo sang wagkus amo ang pahak; kag sa baylo sang napatahum nga bohok amo ang pagkaupaw; kag sa baylo sang bra amo ang pagwagkus sang panapton nga sako; kag pagkapaso sa baylo sang katahum.

25 Ang imo mga lalaki magakapukan sa espada, kag ang imo mga gamhanan sa inaway.

26 Kag ang iya mga gawang magapanalabiton kag magalalaw; kag sia nga mamingaw magalingkod sa duta.

KAPITULO 4

KAG sa sinang adlaw ang pito ka babaye magadakup sang isa ka lalaki, nga nagasiling, Magakaon kami sang amon kaugalingon nga tinapay, kag magapanaput sang amon kaugalingon nga panapton: lamang pagtawgon kami sa imo ngalan, sa pagkuha sang amon kahuluy-an.

2 Sa sinang adlaw ang sanga sang GINOO manginmatahum kag mahimayaon, kag ang bunga sang duta manginmaayo gid kag manginmaanyag sa mga nakapalagyo sang Israel.

3 Kag mahanabu, nga sia nga mabilin sa Zion, kag sia nga mabilin sa Jerusalem, tawgon nga balaan, bisan ang tagsatagsa nga napanulat sa tunga sang mga buhi sa Jerusalem:

4 Kon mahugasan na sang Ginoo ang higko sang babaye nga mga anak sang Zion, kag matinloan na ang dugo sang Jerusalem gikan sa tunga sini paagi sa espiritu sang paghukom, kag paagi sa espiritu sang pag-upus.

5 Kag ang GINOO magatuga sa ibabaw sang tagsa ka puluy-an sang bukid nga Zion, kag sa ibabaw sang iya mga pagtilipon, sing panganud kag aso sa adlawon, kag pagsilak sang nagadabdab nga kalayo sa kagab-ihon: kay sa ibabaw sang bug-os nga himaya manginyara ang pag-apin.

6 Kag may tabernakulo nga sa handong sa adlawon gikan sa kainit, kag nga sa dalangpan, kag pasilongan gikan sa unus kag gikan sa ulan.

KAPITULO 5

KARON magaamba ako sa akon hinigugma gid sing ambahanon sang akon hinigugma nahanungud sang iya ulubasan. Ang akon hinigugma gid may ulubasan sa mapatubason gid nga bakolod:

2 Kag ginkudalan niya ini, kag ginkuhaan ini sang mga bato, kag gintamnan ini sang pinili gid nga puno sang ubas, kag ginpatindugan sang torre sa tunga sini, kag ginhimoan man sing linasan sang ubas: kag nagpaabut sia nga magpatubas ini sing mga ubas, kag ini nagpatubas sing mga ubas nga talonon.

3 Kag karon, O mga pumuluyo sang Jerusalem, kag mga tawo sang Juda, maghukom, ginaampo ko sa inyo, sa tunga nakon kag sang akon ulubasan.

4 Ano pa bala ayhan ang mahimo sa akon ulubasan, nga wala ko mahimo sa sini? ngaa bala, nga sang nagpaabut ako nga magpatubas ini sing mga ubas, nagpatubas ini sing mga ubas nga talonon?

5 Kag karon; isugid ko sa inyo ang himoon ko sa akon ulubasan: kuhaan ko ini sing habong, kag ini halbon; kag lumpagon ang kuta sini, kag ini tasakon:

6 Kag papason ko ini: indi ini pagpanapsan, ukon pagsadulan; kondi tuboan sing mga sapinit kag mga tunuk: sogoon ko man ang mga gal-um nga indi sila mag-ulan sa sini.

7 Kay ang ulubasan sang GINOO sang mga kasoldadosan amo ang balay sang Israel, kag ang mga tawo sang Juda iya tanum nga matahum: kag nagpaabut sia sang paghukom, apang yari karon, pagpigus; sang pagkamatarung, apang yari karon, paghibi.

8 ś Kailo sa mga nagasugpon sing balay sa balay, nga nagatambi sing uma sa uma, tubtub nga wala na sing duug, agud nga magpuyo sila nga isa lamang sa tunga sang duta!

9 Sa akon mga idulungug nagsiling ang GINOO sang mga kasoldadosan, Sa pagkamatuud madamu nga mga balay ang magamamingaw, ang dalagku kag matahum, nga wala sing pumuluyo.

10 Hoo, ang napulo ka acre nga ulubasan magapatubas sing isa ka bat, kag ang isa ka homer nga binhi magapatubas sing isa ka efa.

11 ś Kailo sa mga nagabangon sing aga pa, agud nga makasonod sila sa masingkal nga ilimnon; nga nagapadayon tubtub sa kagab-ihon, tubtub nga mapainit sila sang alak!

12 Kag ang arpa, kag ang viola, ang tambor, kag ang lantoy, kag ang alak, yara sa ila mga sinalosalo: apang wala sila nagasapak sang buluhaton sang GINOO, kag wala sila nagapatugsiling sang pagpanghikot sang iya mga kamut.

13 ś Busa ang akon katawohan nabihag, bangud nga wala sila sing ihibalo: kag ang ila dungganon nga mga tawo nagakagutuman, kag ang ila kadam-an nagakigas sa kauhaw.

14 Busa ang impierno nagpasangkad sang iya kaugalingon, kag nagnganga sang iya baba sa wala sing takus: kag ang ila himaya, kag ang ila kadam-an, kag ang ila kadayawan, kag sia nga nagakalipay, magapanaug sa sini.

15 Kag ang kubus nga tawo pagapanuboon, kag ang gamhanan nga tawo pagapaubson, kag ang mga mata sang matinaastaason pagapaubson:

16 Apang ang GINOO sang mga kasoldadosan pagapakataason sa paghukom, kag ang Dios nga balaan pagapakabalaanon sa pagkamatarung.

17 Niyan ang mga cordero magahalab sono sa ila kinaugali, kag ang mga dumuloong magakaon sang nalaglag nga mga duug sang mga matambok.

18 Kailo sa ila nga nagaguyud sang kalautan sa mga kalat sang kadayawan, kag sang sala subong sang sa may gikos sang karo:

19 Nga nagasiling, Padasiga sia, kag padalidalia ang iya buluhaton, agud nga makita naton ini: kag papalapita kag paabuta ang laygay sang Balaan nga Isa sang Israel, agud nga makilala naton ini!

20 ś Kailo sa ila nga nagatawag sang malaut maayo, kag sang maayo malaut; nga nagabutang sang kadudulman nga kapawa, kag sang kapawa nga kadudulman; nga nagabutang sang mapait nga matam-is, kag sang matam-is nga mapait!

21 Kailo sa ila nga mga maalam sa ila kaugalingon nga mga mata, kag mainandamon sa ila kaugalingon nga itololok!

22 Kailo sa ila nga mga gamhanan sa pag-inum sing alak, kag sa mga lalaki nga makusug sa pagsimbog sing masingkal nga ilimnon:

23 Nga nagapakamatarung sang malauton tungud sa hamham, kag nagakuha sang pagkamatarung sang matarung gikan sa iya!

24 Busa subong nga ang kalayo nagalamon sang ginalaban, kag ang dabdab nagaupus sang upa, sa amo ang ila gamut manginsubong sang pagkadunut, kag ang ila bulak magapaibabaw subong sang yab-ok: bangud nga ginsikway nila ang kasogoan sang GINOO sang mga kasoldadosan, kag gintamay ang polong sang Balaan nga Isa sang Israel.

25 Busa ang kaakig sang GINOO nagadabdab batok sa iya katawohan, kag nauntay niya ang iya kamut batok sa ila, kag ginsakit sila: kag ang mga kabakoloran nagkurug, kag ang ila mga bangkay ginpahakpahak sa tunga sang mga dalan. Tungud sini tanan wala makuha ang iya kaakig, kondi ang iya kamut nauntay pa gihapon.

26 ś Kag magabayaw sia sing hayahay sa mga pungsud gikan sa malayo, kag magapanitsit sa ila kutub sa ukbung sang duta: kag, yari karon, magakari sila nga may kadasig sing madali:

27 Wala gid sing lapyoon ukon makasandad sa tunga nila; wala gid sing tuyhon ukon matolog; kag indi mahubad ang ila wagkus sa ila mga hawak, ukon mabugto ang higot sang ila mga sapatos:

28 Nga ang ila sini mga baslay mataliwis, kag ang tanan nila nga pana nabingat, ang mga koko sang ila mga kabayo kabigon nga kaangay sang santikan, kag ang ila mga aliling kaangay sang buhawi:

29 Ang ila pagngurub manginkaangay sang leon, magangurub sila kaangay sang bataon nga mga leon: hoo, magangurub sila, kag magadakup sang tulukbon, kag sila magadala sini sing malig-on, kag wala gid sing magaluwas sini.

30 Kag sa sinang adlaw magangurub sila batok sa ila kaangay sang huganas sang dagat: kag kon ang isa magtolok sa duta, yari karon kadudulman kag kasubo, kag ang kapawa nadulman sa mga langit sini.

KAPITULO 6

SA tuig nga napatay si haring Uzias nakita ko man ang Ginoo nga nagalingkod sa isa ka trono, mataas kag nabayaw, kag ang iya panong naghil-ub sang templo.

2 Sa ibabaw sini nagtindug ang mga serafim: ang tagsatagsa may anum ka pakpak; sa duha gintabonan niya ang iya nawung, kag sa duha gintabonan niya ang iya mga tiil, kag sa duha naglupad sia.

3 Kag ang isa nagsinggit sa isa, kag nagsiling, Balaan, balaan, balaan, ang GINOO sang mga kasoldadosan: ang bug-os nga duta napuno sang iya himaya.

4 Kag ang mga bakalan sang ganhaan nag-uyug sa tingug sang nagsinggit, kag ang balay napuno sang aso.

5 ś Niyan nagsiling ako, Kailo ako! kay nawala na ako; bangud nga tawo ako nga dimatinlo sing mga bibig, kag nagapuyo ako sa tunga sang katawohan nga dimatinlo sing mga bibig: kay ang akon mga mata nakakita sang Hari, ang GINOO sang mga kasoldadosan.

6 Niyan ang isa sang mga serafim naglupad sa akon, nga sa iya kamut may baga nga nagadabdab, nga ginkuha niya sang mga kimpit sa halaran:

7 Kag ginsulsul niya ini sa akon baba, kag nagsiling, Yari karon, ini nakatandug sa imo mga bibig; kag nakuha ang imo kalautan, kag natinloan ang imo sala.

8 Nabatian ko man ang tingug sang Ginoo, nga nagasiling, Sin-o bala ang akon ipadala, kag sin-o ang magakadto tungud sa amon? Niyan nagsiling ako, Yari ako; ipadala ako.

9 ś Kag nagsiling sia, Lakat, kag sugiri ini nga katawohan, Sa pagkamatuud makabati kamo, apang indi makahangup; kag sa pagkamatuud makakita kamo, apang indi makahantup.

10 Patamboka ang tagiposoon sini nga katawohan, kag pabungula ang ila mga idulungug, kag papiyonga ang ila mga mata; basi nga makakita sila sa ila mga mata, kag makabati sa ila mga idulungug, kag makahangup sa ila tagiposoon, kag magliso, kag mag-ayo.

11 Niyan ako nagsiling, Ginoo, tubtub bala san-o? Kag nagsabat sia, Tubtub nga ang mga siudad malaglag nga wala sing pumuluyo, kag ang mga balay wala sing tawo, kag ang duta malaglag sing bug-os,

12 Kag mapapalayo sang GINOO ang mga tawo, kag magdaku ang pagbinayaay sa tunga sang duta.

13 ś Apang may yara pa sa sini nga ikapulo, kag ini magabalik, kag kaonon: subong sang lima nga kahoy, kag subong sang terebinto, nga ang ila substansya yara sa sulud nila, kon magpangdagas sila sang ila mga dahon: subong man ang kaliwat nga balaan mangin amo ang substansya sini.

KAPITULO 7

KAG nahanabu sa mga adlaw ni Acaz nga anak nga lalaki ni Jotam, ang anak nga lalaki ni Uzias, hari sang Juda, nga si Rezin nga hari sang Siria, kag si Peca nga anak nga lalaki ni Remalias, nga hari sang Israel, nagtaklad sa Jerusalem sa pag-away batok sini, apang indi makalandas batok sini.

2 Kag ini ginsugid sa balay ni David, nga nagasiling, Ang Siria kadampig sang Efraim. Kag ang iya tagiposoon nagkurug, kag ang tagiposoon sang iya katawohan, subong sang kakahoyan sang talon nga ginauyug sang hangin.

3 Niyan nagsiling ang GINOO kay Isaias, Lakat na sa pagsugata kay Acaz, ikaw, kag si Sear-jasub nga imo anak nga lalaki, sa ukbung sang pailigan sang ponong nga naibabaw sa daku nga dalan sang latagon sang manugbunak sang tela;

4 Kag isiling sa iya, Andam ka, kag maghipus; dili magkahadluk, ukon mapunaw ang imo tagiposoon bangud sang duha ka ikog sining mga dungkulan nga nagaaso, bangud sang mapintas nga kaakig ni Rezin kaupud sang Siria, kag sang anak nga lalaki ni Remalias.

5 Bangud nga ang Siria, ang Efraim, kag ang anak nga lalaki ni Remalias, nagbuko sing malaut batok sa imo, nga nagasiling,

6 Magtaklad kita batok sa Juda, kag gamohon ini, kag bulhoan naton ini nga sa aton, kag magbutang sing hari sa tunga sini, bisan ang anak nga lalaki ni Tabeel:

7 Amo ini ang ginasiling sang Ginoong DIOS, Indi ini mahimo, kag indi mahanabu.

8 Kay ang olo sang Siria amo ang Damasco, kag ang olo sang Damasco si Rezin; kag sa sulud sang kan-uman kag lima ka tuig ang Efraim maboong, sa bagay nga indi na ini manginkatawohan.

9 Kag ang olo sang Efraim amo ang Samaria, kag ang olo sang Samaria amo ang anak nga lalaki ni Remalias. Kon kamo indi magtoo, sa pagkamatuud indi kamo maglig-on.

10 ś Labut pa ang GINOO nagpamolong liwat kay Acaz, nga nagasiling,

11 Pangayo ka sing tanda sa GINOO nga imo Dios; pangayoa ini sa kadadalman, ukon sa kataasan sa ibabaw.

12 Apang si Acaz nagsiling, Indi ako magpangayo, kag indi ko pagsulayon ang GINOO.

13 Kag nagsiling sia, Pamati kamo karon, O balay ni David; Diotay bala nga butang sa inyo ang maglapyo sang mga tawo, apang lapyoon man bala ninyo ang akon Dios?

14 Busa ang Ginoo gid magahatag sa inyo sing tanda; Yari karon, ang ulay magapanamkon, kag magaanak sing lalaki, kag tawgon ang iya ngalan Immanuel.

15 Mantekilya kag dugus ang kaonon niya, agud nga makahibalo sia magdumili sang malaut, kag magpili sang maayo.

16 Kay sa indi pa makahibalo ang bata sa pagdumili sang malaut, kag pagpili sang maayo, ang duta nga ginakangil-aran mo pagabayaan sang duha niya ka hari.

17 ś Pakarion sang GINOO sa imo, kag sa imo katawohan, kag sa panimalay sang imo amay, ang mga adlaw nga wala pa mag-abut, kutub sa adlaw nga ang Efraim nagbulag sa Juda; ang hari sang Asiria.

18 Kag mahanabu sa sinang adlaw, nga magapanitsit ang GINOO sa langaw nga yara sa malayo gid nga bahin sang mga suba sang Egipto, kag sa buyog nga yara sa duta sang Asiria.

19 Kag magaabut sila, kag magahugpa sila tanan sa mga nalupyakan nga mamingaw, kag sa mga boho sang mga dakung bato, kag sa tanan nga tunuk, kag sa tanan nga kahoykahoy.

20 Sa amo man nga adlaw kiskison sang Ginoo ang olo, kag ang bulbul sang mga tiil, sang labaha nga ginhinakayan, nga amo, ang mga sa tabok sang suba, ang hari sang Asiria: kag ini maarot man sang bungut.

21 Kag mahanabu sa sinang adlaw, nga ang tawo magasagud sing baka nga bataon, kag duha ka carnero;

22 Kag mahanabu, bangud sang kabugana sang gatas nga ihatag nila magakaon sia sing mantekilya: kay ang tagsatagsa nga nabilin sa tunga sang duta magakaon sing mantekilya kag dugus.

23 Kag mahanabu sa sinang adlaw, nga ang tagsa ka duug, diin may isa ka libo ka puno sang ubas, sa tag-isa ka libo ka bilog nga pilak, manginkasapinitan kag katunukan.

24 Magasulud didto ang mga lalaki nga may mga baslay kag pana; bangud nga ang bug-os nga duta manginkasapinitan kag katunukan.

25 Kag sa tanan nga kabakoloran nga kutkutan sang sadol, didto indi magaabut ang kahadluk sa mga sapinit kag mga tunuk: kondi ini manginbuluhian sang mga baka, kag talasakon sang mga gamay nga kahayupan.

KAPITULO 8

LABUT PA ang GINOO nagsiling sa akon, Kuha ka sing isa ka daku nga rolyo, kag isulat sa sini sa pluma sang tawo ang nahanungud kay Maher-salal-has-baz.

2 Kag nagkuha ako nga sa akon sing mga saksi nga matutum sa pagsulat, si Urias nga pari, kag si Zacarias nga lalaking anak ni Jeberequias.

3 Kag naghiusa ako sa manalagna nga babaye; kag nagpanamkon sia, kag nag-anak sing lalaki. Niyan nagsiling ang GINOO sa akon, Hingalani sia Maher-salal-has-baz.

4 Kay sa indi pa ang bata makahibalo magsinggit, Amay ko, kag iloy ko, ang manggad sang Damasco kag ang inagaw sang Samaria dalhon sa atubangan sang hari sang Asiria.

5 ś Ang GINOO nagpamolong man sa akon liwat, nga nagasiling,

6 Sa bagay nga ginasikway sining katawohan ang mga tubig sang Siloe nga nagailig sing mahinay, kag nagakalipay kay Rezin kag sa anak nga lalaki ni Remalias;

7 Busa karon, yari karon, ang Ginoo nagapasaka sa ila sang mga tubig sang suba, makusug kag madamu, nga amo ang hari sang Asiria, kag ang bug-os niyang himaya: kag magaawas sia sa tanan niya nga iligan, kag magalapaw sa tanan niyang pangpang:

8 Kag magaagi sia sa Juda; magalapaw sia kag magalambas, magalambut sia bisan tubtub sa liog; kag ang paghumlad sang iya mga pakpak magahil-ub sang kasangkaron sang imo duta, O Immanuel.

9 ś Magtalapu kamo, O kamo nga katawohan, kag boongon kamo; kag pamati, tanan kamo nga sa malayong duta: magwagkus kamo, kag boongon kamo; magwagkus kamo, kag boongon kamo.

10 Magsinapul kamo, kag ini mangin walay pulus; ipamolong ang polong, kag indi ini mahimo: kay ang Dios nagaupud sa amon.

11 ś Kay ang GINOO nagpamolong sa akon sing subong sini sa makusug nga kamut, kag nagtudlo sa akon nga indi ako dapat maglakat sa dalanon sining katawohan, nga nagasiling,

12 Dili kamo magsiling, Isa ka pagdampig, sa tanan nga silingan sining katawohan, Isa ka pagdampig; kag dili kamo magkahadluk sang ila kahadluk, ukon magpakulba.

13 Pakabalaana ninyo ang GINOO sang mga kasoldadosan lamang; kag magmangin-inyo sia kahadluk, kag magmangin-inyo sia kakugmat.

14 Kag sia mangin nga sa isa ka santuario; apang nga sa isa ka bato sang kasandaran kag isa ka dakung bato sang kasaklaw sa duha ka balay sang Israel, isa ka tiglapak kag isa ka siod sa mga pumuluyo sang Jerusalem.

15 Kag madamu sa ila ang makasandad, kag mapukan, kag maboong, kag masiod, kag madakup.

16 Bugkusa ang pagpamatuud, iselyo ang kasogoan sa akon mga disipulo.

17 Kag hulaton ko ang GINOO, nga nagalipon sang iya nawung gikan sa balay ni Jacob, kag pangitaon ko sia.

18 Yari karon, ako kag ang mga anak nga ginhatag sa akon sang GINOO mga tanda kag mga katanhagaan sa Israel gikan sa GINOO sang mga kasoldadosan, nga nagapuyo sa bukid nga Zion.

19 ś Kag kon magsiling sila sa inyo, Dangup kamo sa mga may kinilala nga mga espiritu, kag sa mga manugbabaylan nga nagawiswis, kag nagakibut: indi bala dapat magdangup ang katawohan sa ila Dios? tungud sa mga buhi bala sa mga patay?

20 Sa kasogoan kag sa pagpamatuud: kon indi sila magpamolong sono sining polong, ini bangud wala sing kapawa sa ila.

21 Kag magaalagi sila sa sini, nga haluson nga makasarang kag gutum: kag mahanabu, nga kon gutumon sila, magakaakig sila sa ila kaugalingon, kag magapakamalaut sa ila hari kag sa ila Dios, kag magatangla.

22 Kag magatolok sila sa duta; kag yari karon, kalisdanan kag kadudulman, ang kadulum sang pagbakho; kag tabugon sila pa kadudulman.

KAPITULO 9

WALAY sapayan indi manginsubong ang kadulum nga nanginyara sa iya kalisdanan sadto, nga sang sa nahauna ginsakit niya sing diotay ang duta sang Zabulon kag ang duta sang Neftali, kag sa olihi ginsakit niya sia sing tama pa gid sa dalanon sang dagat, sa unhan sang Jordan, sa Galilea sang mga pungsud.

2 Ang katawohan nga naglakat sa kadudulman nakakita sing daku nga kapawa: ang mga nagapuyo sa duta sang landong sang kamatayon, ang kapawa nagsilak sa ila.

3 Ginpadamu mo ang pungsud, kag wala nagdugang sang kalipay: nagakalipay sila sa atubangan mo sono sa kalipay sa ani, kag subong nga ang mga tawo nagakasadya kon magbahinbahin sila sang inagaw.

4 Kay ang gota sang iya lulan, kag ang sungkud sang iya abaga, ang bilogon sang iya manugpigus, ginbali mo subong sang sa adlaw sang Midian.

5 Kay ang tagsa ka pag-away sang hangaway may kagubut, kag ang mga panapton nga gintubug sa dugo; apang ini manginmay pagkasonog kag gatong nga kalayo.

6 Kay sa aton natawo ang isa ka bata, sa aton ginhatag ang isa ka anak nga lalaki: kag ang pangolohan manginsa iya abaga: kag tawgon ang iya ngalan Makatilingala, Manuglaygay, Ang gamhanan nga Dios, Ang walay katapusan nga Amay, Ang Prinsipe sang Paghidait.

7 Nahanungud sang pagdugang sang iya pangolohan kag sang paghidait mangin walay katapusan, sa trono ni David, kag sa iya ginharian, sa pagdumala sini, kag sa pagpalig-on sini sa paghukom kag katarungan kutub sining tion tubtub gid sa gihapon. Ang kakugi sang GINOO sang mga kasoldadosan magahimo sini.

8 ś Ang Ginoo nagpadala sing polong sa Jacob, kag nagtupa ini sa Israel.

9 Kag makahibalo ang bug-os nga katawohan, ang Efraim kag ang pumuluyo sang Samaria, nga nagasiling sa pagpabugal kag katig-a sang tagiposoon,

10 Ang mga tisa nagkaholog, apang magapatindug kita nga may binasbasan nga mga bato: ginpulud ang mga sicomoro, apang ilisan naton sila sing mga cedro.

11 Busa patindugon sang GINOO ang mga kasumpung ni Rezin batok sa iya, kag magahugpong sang iya mga kaaway;

12 Ang mga Sirianhon sa atubangan, kag ang mga Filistinhon sa likod; kag sila magalamon sang Israel sa naganganga nga baba. Tungud sini tanan wala makuha ang iya kaakig, kondi ang iya kamut nauntay pa gihapon.

13 ś Kay ang katawohan wala nagaliso sa iya nga nagasakit sa ila, kag wala sila nagapangita sa GINOO sang mga kasoldadosan.

14 Busa utdon sang GINOO sa Israel ang olo kag ikog, ang sanga kag ang tabun-ak, sa isa ka adlaw.

15 Ang tigulang kag dungganon, sia amo ang olo; kag ang manalagna nga nagatudlo sing kabutigan, sia amo ang ikog.

16 Kay ang mga manugdumala sining katawohan nagapasayup sa ila; kag ang mga ginadumalahan nila ginalaglag.

17 Busa ang Ginoo indi magkasadya sa ila mga pamatan-on nga lalaki, kag indi magkalooy sa ila mga ilo sa amay kag mga balong babaye: kay ang tagsatagsa salimpapaw kag manughimo sing malaut, kag ang tagsa ka baba nagapamolong sing kabuangan. Tungud sini tanan wala makuha ang iya kaakig, kondi ang iya kamut nauntay pa gihapon.

18 ś Kay ang pagkalaut nagadabdab subong sang kalayo: ini magalamon sang kasapinitan kag sang mga tunuk, kag magamakut sa mga kasiotan sang talon, kag magatub-ok sila kaangay sang pagtub-ok sang aso.

19 Paagi sa kasingkal sang GINOO sang mga kasoldadosan nadulman ang duta, kag ang katawohan manginsubong sang gatong sang kalayo: walay tawo nga magapaiway sang iya utud.

20 Kag sia magasabnit sa too, kag gutumon; kag sia magakaon sa wala, kag indi mabusug sila: sila magakaon ang tagsa ka tawo sang unud sang iya kaugalingon nga butkon:

21 Ang Manases, sang Efraim; kag ang Efraim, sang Manases: kag sila nga duha magabatok sa Juda. Tungud sini tanan wala makuha ang iya kaakig, kondi ang iya kamut nauntay pa gihapon.

KAPITULO 10

KAILO sa mga nagamando sing dimatarung nga mga mando, kag nga nagasulat sing pagpamigus nga ila ginhimo;

2 Sa pagpatalang sang mga nawad-an sa katarungan, kag sa pagkuha sang kinamatarung sang mga imol sang akon katawohan, agud nga ang mga balong babaye mangin-ila inagaw, kag agud nga ila makawatan ang mga ilo sa amay!

3 Kag ano bala ang inyo himoon sa adlaw sang pagduaw, kag sa kamusmusan nga magaabut gikan sa malayo? sa kay sin-o bala kamo magapalagyo sa pagpakitabang? kag diin bala ninyo ibilin ang inyo himaya?

4 Kon wala ako magasioktot sila sa idalum sang mga binilanggo, kag sila mapukan sa idalum sang mga pinatay. Tungud sini tanan wala makuha ang iya kaakig, kondi ang iya kamut nauntay pa gihapon.

5 ś O Asiriahanon, ang bilogon sang akon kaakig, kag ang sungkud sa ila kamut amo ang akon kaalipungut.

6 Ipadala ko sia batok sa salimpapaw nga pungsud, kag batok sa katawohan sang akon kasingkal tulinan ko sia, sa pagkuha sang inagaw, kag sa pagkuha sang tinukub, kag sa pagtapak sa ila kaangay sang lunang sang mga dalan.

7 Apang wala sia sing amo nga katuyoan, kag ang iya tagiposoon wala nagahunahuna sing amo; apang yara sa iya tagiposoon ang paglaglag kag pag-utud sing indi lamang pila ka pungsud.

8 Kay sia nagasiling, Indi bala mga hari tanan ang akon mga prinsipe?

9 Indi bala ang Calno subong sang Carquemis? indi bala ang Hamat subong sang Arpad? indi bala ang Samaria subong sang Damasco?

10 Subong nga nasapwan sang akon kamut ang mga ginharian sang mga diosdios, kag nga ang ila mga imahen nga tinigban naglabaw pa sa ila sang Jerusalem kag sang Samaria;

11 Indi bala himoon ko sa Samaria kag sa iya mga diosdios ang subong sang ginhimo ko sa Jerusalem kag sa iya mga diosdios?

12 Busa mahanabu, nga kon mahimo sang Ginoo ang bug-os niyang buluhaton sa bukid nga Zion kag sa Jerusalem, silotan ko ang bunga sang matig-a nga tagiposoon sang hari sang Asiria, kag ang himaya sang iya matinaastaason nga mga panolok.

13 Kay nagasiling sia, Sa kusug sang akon kamut nahimo ko ini, kag sa akon kaalam; kay mainandamon ako: kag ginhalin ko ang mga dulunan sang katawohan, kag ginkawat ang ila mga bahandi, kag subong nga isganan nga tawo ginsakup ko ang mga pumuluyo:

14 Kag ang akon kamut nakasapo subong sang pugad sang manggad sang katawohan: kag subong sang isa nga nagatipon sang mga itlog nga binayaan, natipon ko ang bug-os nga duta; kag walay isa nga naghulag sang pakpak, ukon nagbuka sang baba, ukon nagsiyak.

15 Magapabugal bala ang wasay batok sa nagawasay sa iya? ukon magapakadaku bala ang lagari batok sa nagagamit sa iya? subong abi nga ang bilogon magahayaw sang iya kaugalingon batok sa mga nagabayaw sa iya, ukon subong abi nga ang sungkud magabayaw sang iya kaugalingon, subong abi nga ini indi kahoy.

16 Busa ang Ginoo, ang Ginoo sang mga kasoldadosan, magapadala sing kaniwang sa tunga sang iya mga matambok; kag sa idalum sang iya himaya magasindut sia sing dabdab kaangay sang dabdab sang kalayo.

17 Kag ang kapawa sang Israel mangin nga sa kalayo, kag ang iya Balaan nga Isa mangin nga sa dabdab: kag ini magasonog kag magalamon sang iya mga tunuk kag kasapinitan sa isa ka adlaw;

18 Kag magaupus sang himaya sang iya talon, kag sang iya mabungahon nga latagon, tingub ang kalag kag lawas: kag sila manginsubong sang ginapunaw nga nagadala sang hayahay.

19 Kag ang salin sang mga kahoy sang iya talon manginpila ka bilog, sa bagay nga masulat sila sang isa ka bata.

20 ś Kag mahanabu sa sinang adlaw, nga ang salin sang Israel, kag inang mga nakapalagyo sang panimalay ni Jacob, indi na gid magsandig liwat sa nagsakit sa ila; kondi magasandig sa GINOO, ang Balaan nga Isa sang Israel, sa kamatooran.

21 Ang salin magabalik, ang salin ni Jacob, sa Dios nga gamhanan.

22 Kay bisan ang imo katawohan nga Israel subong sang balas sang dagat, walay sapayan ang isa ka salin sa ila ang magabalik: ang pagpapas nga natapat na magapaawas sing pagkamatarung.

23 Kay ang Ginoong DIOS sang mga kasoldadosan magahimo sing pagpapas, nga natapat na, sa tunga sang bug-os nga duta.

24 ś Busa amo ini ang ginasiling sang Ginoong DIOS sang mga kasoldadosan, O katawohan ko nga nagapuyo sa Zion, dili magkahadluk sa Asiriahanon: sakiton ka niya sang bilogon, kag bayawon ang iya sungkud batok sa imo, sono sa paagi sang Egipto.

25 Kay sa diotay gid nga tion pa, kag ang kaalipungut magauntat, kag ang akon kaakig sa ila kalaglagan.

26 Kag ang GINOO sang mga kasoldadosan magasugyot sang bunal nga sa iya sono sa pagpamatay sang Midian sa dakung bato sang Oreb: kag subong nga ang iya sungkud sadto yara sa ibabaw sang dagat, amo man bayawon niya ini sono sa paagi sang Egipto.

27 Kag mahanabu sa sinang adlaw, nga ang iya lulan kuhaon sa imo abaga, kag ang iya gota gikan sa imo liog, kag ang gota laglagon bangud sa pagkahinaplas.

28 Nag-abut sia sa Ayat, naglatas sia pa Migron; sa Micmas ginbutang niya ang iya mga dala:

29 Naglampuwas sila sa alagyan: nagdayon sila sa Geba; ang Rama nagakahadluk; ang Gabaa ni Saul nagpalagyo.

30 Itib-ong ang imo tingug, O babaying anak sang Gallim: ipabati ini tubtub sa Lais, O kailo nga Anatot.

31 Ang Madmena ginhalin; ang mga pumuluyo sang Gebim nagatingub sa pagpalagyo.

32 Sa sinang adlaw magapabilin pa sia sa Nob: ibalabad niya ang iya kamut batok sa bukid sang babaying anak sang Zion, ang bakolod sang Jerusalem.

33 Yari karon, ang Ginoo, ang GINOO sang mga kasoldadosan, magaotop sang mga sanga nga may kakugmat: kag ang mga matag-as pagapudlon, kag ang palabi-labihon pagapanuboon.

34 Kag hagbason niya sang salsalon ang kasiotan sang talon, kag ang Libano mapukan paagi sa gamhanan nga isa.

KAPITULO 11

KAG may magagowa nga salingsing gikan sa puno ni Jesse, kag isa ka Sanga magatubo gikan sa iya mga gamut:

2 Kag magadolog sa iya ang espiritu sang GINOO, ang espiritu sang kaalam kag paghangup, ang espiritu sang laygay kag kusug, ang espiritu sang ihibalo kag sang kahadluk sa GINOO;

3 Kag magapahangup sa iya sing maabtik sa kahadluk sa GINOO: kag indi sia maghukom sono sa panolok sang iya mga mata, ukon magsabdong sono sa pagpamati sang iya mga idulungug:

4 Kondi magahukom sia nga may pagkamatarung sang mga imol, kag magasabdong nga may pag-alangay tungud sa mga mapainubuson sang duta: kag sakiton niya ang duta sang bilogon sang iya baba, kag patyon niya ang malauton sang gininhawa sang iya mga bibig.

5 Kag ang pagkamatarung manginwagkus sang iya mga hawak, kag ang katutum manginwagkus sang iya mga reinda.

6 Ang lobo magapuyo man kaupud sang cordero, kag ang leopardo magaluko kaupud sang kanding nga tinday; kag ang tinday nga baka kag ang leon nga bataon kag ang pinatambok sing tingub; kag ang gamay nga bata magatuytuy sa ila.

7 Kag ang baka kag ang oso magahalab; ang ila mga tinday magaluko sing tingub: kag ang leon magakaon sing dagami kaangay sang baka.

8 Kag ang bata nga nagasoso magahampang sa ibabaw sang boho sang dalitan nga man-ug, kag ang nalutas nga bata magakoot sang iya kamut sa talangag sang cocatris nga man-ug.

9 Indi sila magahalit ukon magalaglag sa bug-os ko nga bukid nga balaan: kay ang duta matugub sang pagkilala sa GINOO, subong nga ang mga tubig nagatabon sang dagat.

10 ś Kag sa sinang adlaw may magatindug nga gamut ni Jesse, nga mangin hayahay nga sa katawohan; sa iya magapangita ang mga Gentil: kag ang iya palahuwayan manginmahimayaon.

11 Kag mahanabu sa sinang adlaw, nga ang Ginoo magabutang liwat sang iya kamut sa ikaduhang tion sa pagbawi sang salin sang iya katawohan, nga mabilin, gikan sa Asiria, kag sa Egipto, kag sa Patros, kag sa Cus, kag sa Elam, kag sa Sinar, kag sa Hamat, kag sa mga kapuloan sang dagat.

12 Kag magapatindug sia sing hayahay tungud sa mga pungsud, kag magatipon sang mga sinikway sang Israel, kag magatipon sing tingub sang mga nag-alaplaag sang Juda gikan sa apat ka pamusud sang duta.

13 Ang kahisa man sang Efraim madula na, kag ang mga kasumpung sang Juda utdon: ang Efraim indi magkahisa sa Juda, kag ang Juda indi maggamo sang Efraim.

14 Apang magahugpa sila sa mga abaga sang mga Filistinhon nayon sa katundan; atihon nila sing tingub ang mga sa sidlangan: untayon nila ang ila kamut sa Edom kag Moab; kag ang mga anak ni Amon magatuman sa ila.

15 Kag ang GINOO magalaglag sing bug-os sang dila sang dagat nga Egiptohanon; kag ibalabad niya ang iya kamut sa ibabaw sang suba sang iya mabaskug nga hangin, kag magalaglag sini sa pito ka iligan, kag magapatabok sang mga tawo nga may mga sapin nga mamala.

16 Kag may daku nga dalan nga sa salin sang iya katawohan, nga mabilin, gikan sa Asiria; kaangay nga may dira sa Israel sang adlaw nga nagtaklad sia gikan sa duta sang Egipto.

KAPITULO 12

KAG sa sinang adlaw magasiling ka, O GINOO, magadayaw ako sa imo: bisan pa naakig ka sa akon, ang imo kaakig nadula, kag ginlipay mo ako.

2 Yari karon, ang Dios akon kaluwasan; magasalig ako, kag indi magkahadluk: kay ang GINOONG JEHOVAH amo ang akon kusug kag akon ambahanon; sia man nangin-akon kaluwasan.

3 Busa magasag-ub kamo nga may kalipay sing tubig sa mga bobon sang kaluwasan.

4 Kag sa sinang adlaw magasiling kamo, Dayawon ang GINOO, magpanawag sa iya ngalan, ipahayag ang iya mga hinimoan sa katawohan, isambit nga ang iya ngalan ginapakataas.

5 Mag-amba sa GINOO; kay naghimo sia sing halangdon nga mga butang: ini nakilal-an sa bug-os nga duta.

6 Magtuaw kag magsinggit, ikaw nga pumuluyo sang Zion: kay daku ang Balaan nga Isa sang Israel sa tunga nimo.

KAPITULO 13

ANG lulan sang Babilonia, nga nakita ni Isaias nga anak nga lalaki ni Amoz.

2 Patindug kamo sing hayahay sa ibabaw sang mataas nga bukid, alsaha ang tingug sa ila, ibalabad ang kamut, nga magsulud sila sa mga gawang sang mga dungganon.

3 Ginsogo ko ang akon mga ginpakabalaan, gintawag ko man ang akon mga gamhanan tungud sa akon kaakig, bisan ang mga nagakasadya sa akon kataas.

4 Ang kagahud sang kadam-an sa kabukiran, subong sang daku nga katawohan; ang kagahud sang kagubut sang mga ginharian sang mga pungsud nagtipon sing tingub: ang GINOO sang mga kasoldadosan nagalista sang kasoldadosan nga sa inaway.

5 Nagaabut sila gikan sa malayo nga duta, sa ukbung gid sang langit, ang GINOO, kag ang mga hinganiban sang iya kaalipungut, sa paglaglag sang bug-os nga duta.

6 ś Haya kamo; kay malapit na ang adlaw sang GINOO; magaabut ini subong nga kalaglagan gikan sa Makaako.

7 Busa magaluya ang tanan nga kamut, kag matunaw ang tagsa ka tagiposoon sang tawo:

8 Kag magakahadluk sila: dakpon sila sing mga kasakit kag mga kasubo; manginsa kasakit sila subong sang babaye nga ginasakitan: magatolokay sila nga may katingala; ang ila mga nawung manginsubong sang mga dabdab.

9 Yari karon, ang adlaw sang GINOO nagaabut, nga mapintas nga may kasingkal kag mabangis nga kaakig, sa pagpamingaw sang duta: kag laglagon niya ang mga makasasala sini sa iya.

10 Kay ang kabitoonan sang langit kag ang mga pinunsok sini indi na magahatag sang ila kapawa: ang adlaw pagadulman sa iya pagbutlak, kag ang bulan indi na magapasanag sang iya kapawa.

11 Kag silotan ko ang kalibutan bangud sang kalautan nila, kag ang mga malauton bangud sang ila kalainan; kag pauntaton ko ang pagpahabok sang mga bugalon, kag paubson ko ang pagpalabi-labi sang mga makakulugmat.

12 Himoon ko nga ang tawo mahal pa sang sa ulay nga bulawan; nga ang tawo sang sa pisak nga bulawan sang Ofir.

13 Busa uyugon ko ang mga langit, kag ang duta magahalin gikan sa iya duug, sa kasingkal sang GINOO sang mga kasoldadosan, kag sa adlaw sang iya mabangis nga kaakig.

14 Kag manginsubong ini sang usa nga ginalagas, kag subong sang carnero nga wala ginatipon sang tawo: magapauli ang tagsa ka tawo sa iya kaugalingon nga katawohan, kag ang tagsatagsa magapalagyo pakadto sa iya kaugalingon nga duta.

15 Ang tagsatagsa nga makita palapsan; kag ang tagsatagsa nga nagdampig sa ila mapukan sa espada.

16 Ang ila mga kabataan man dugmokon sa atubangan sang ila mga mata; ang ila mga balay atihon, kag luguson ang ila mga asawa.

17 Yari karon, painiton ko batok sa ila ang mga Mediahanon, nga indi magsapak sang pilak; kag nahanungud sa bulawan, indi sila magkalipay sa sini.

18 Ang ila mga pana magalaglag sang mga pamatan-on nga lalaki; kag indi sila maawa sa bunga sang taguangkan; ang ila mata indi malooy sa kabataan.

19 ś Kag ang Babilonia, ang himaya sang mga ginharian, ang katahum sang pagkalantip sang mga Caldeanhon, manginsubong sang ginlaglag sang Dios ang Sodoma kag ang Gomorra.

20 Indi na gid ini pagtawohan, ukon pagpuy-an ini kutub sa kaliwatan pa kaliwatan: kag ang Arabiahanon indi magpatindug sing layanglayang didto; kag ang mga manugpahalab sang carnero indi magpaluko sang ila mga panong didto.

21 Kondi ang talonon nga mga sapat sang desierto magaluko didto; kag ang ila mga balay mapuno sang masulub-on nga mga tinuga; kag ang mga bukaw magapuyo didto, kag magalumpatlumpat didto ang mga satyr.

22 Kag ang talonon nga mga sapat sang mga kapuloan magauwang sa ila mamingaw nga mga balay, kag ang mga dragon sa ila mga palacio nga matahum: kag ang iya tion malapit sa pag-abut, kag ang iya mga adlaw indi maglawig.

KAPITULO 14

KAY ang GINOO magakalooy kay Jacob, kag magapili pa sang Israel, kag magapahamtang sa ila sa kaugalingon nila nga duta: kag ang mga dumuloong magasimpon sa ila, kag sila magatapik sa panimalay ni Jacob.

2 Kag ang katawohan magakuha sa ila, kag magadala sa ila sa duug nila: kag ang panimalay sang Israel magaangkon sa ila sa duta sang GINOO subong nga mga alagad kag mga sologoon nga babaye: kag bihagon nila ang mga nagbihag sa ila; kag magagahum sila sa mga manugpigus nila.

3 Kag mahanabu sa adlaw nga ang GINOO magapapahuway sa imo sa imo kasubo, kag sa imo kahadluk, kag sa mabudlay nga kahiolipnan nga ginpapaalagad ka,

4 ś Nga gamiton mo ini nga hulubaton batok sa hari sang Babilonia, kag magasiling, Daw ano nga nag-untat ang manugpigus! ang bulawanon nga siudad nag-untat!

5 Ginbali sang GINOO ang sungkud sang malauton, kag ang cetro sang mga manugdumala.

6 Sia nga nagsakit sang katawohan sa kasingkal sa dalayon nga pagbunal, sia nga naggahum sa mga pungsud sa kaakig, ginahingabut, kag wala sing nagapugung.

7 Ang bug-os nga duta nagapahuway, kag malinong: nagahinugyaw sila sa pag-amba.

8 Hoo, ang mga kahoy nga abeto nagakalipay sa imo, kag ang mga cedro sang Libano, nga nagasiling, Kutub nga napukan ka, wala sing manugpulud nga nagakari batok sa amon.

9 Ang impierno kutub sa idalum nagakalangkag tungud sa imo sa pagsugata sa imo sa pag-abut nimo: ginapahanda sini ang mga patay tungud sa imo, ang tanan nga puno sang duta; ginbayaw sini gikan sa ila mga trono ang tanan nga hari sang mga pungsud.

10 Sila tanan magapamolong kag magasiling sa imo, Nagaluya ka man bala subong sa amon? nanginkaangay ka bala sa amon?

11 Ang imo kadayaw gindala pa idalum sa lulubngan, kag ang tonog sang imo mga viola: ang ulud nagalapta sa idalum mo, kag ang mga ulud nagatabon sa imo.

12 Daw ano nga naholog ka kutub sa langit, O Lucifer, anak nga lalaki sang kaagahon! daw ano nga ginpulud ka sa duta, ikaw nga nagpaluya sang mga pungsud!

13 Kay ikaw nagsiling sa imo tagiposoon, Magasaka ako sa langit, pataason ko ang akon trono labaw sa kabitoonan sang Dios: magalingkod man ako sa bukid sang katilingban, sa mga kilid sang aminhan:

14 Magasaka ako labaw sa mga kataason sang mga panganud; magapakaangay ako sa labing Mataas.

15 Apang dalhon ka pa idalum sa impierno, sa mga nakilid sang boho.

16 Sila nga makakita sa imo magatan-aw sing maid-id sa imo, kag magapatugsiling sa imo, nga nagasiling, Amo bala ini ang tawo nga nagpakurug sang duta, nga nag-uyug sang mga ginharian;

17 Nga naghimo sang kalibutan subong sang kamingawan, kag naglaglag sang mga siudad sini; nga wala nagbukas sang balay sang iya mga binilanggo?

18 Ang tanan nga hari sang mga pungsud, sila nga tanan, nagahamyang sa himaya, ang tagsatagsa sa iya kaugalingon nga balay.

19 Apang ginasobol ka gikan sa imo lulubngan kaangay sang sanga nga mangil-ad, kag subong sang panapton sang mga pinatay, nga ginpalapsan sang espada, nga nagapanaug sa mga bato sang boho; subong sang bangkay nga gintapak sang mga tiil.

20 Indi ka pag-isimpon sa ila sa paglubung, bangud nga ginlaglag mo ang imo duta, kag ginpatay mo ang imo katawohan: ang kaliwat sang mga manughimo sing malaut indi gid pagbantugon.

21 Aman kamo sing pagpamatay tungud sa iya mga anak bangud sang kalautan sang ila mga kaamayan; agud nga indi sila magtindug, ukon mag-angkon sang duta, ukon maghil-ob sang kadaygan sang kalibutan sing mga siudad.

22 Kay magatindug ako batok sa ila, nagasiling ang GINOO sang mga kasoldadosan, kag magautud sa Babilonia sing ngalan, kag salin, kag anak nga lalaki, kag hinablos nga lalaki, nagasiling ang GINOO.

23 Himoon ko man ini nga kaugalingon sang herisa, kag mga danaw sang tubig: kag silhigon ko ini sang silhig sang kalaglagan, nagasiling ang GINOO sang mga kasoldadosan.

24 ś Ang GINOO sang mga kasoldadosan nagsumpa, nga nagasiling, Sa pagkamatuud sono sa akon ginpainoino, amo ini ang mahanabu; kag sono sa akon gintuyo, amo ini ang mahimo:

25 Nga balion ko ang Asiriahanon sa akon duta, kag sa akon mga kabukiran tapakon sia sang tiil: niyan ang iya gota mawala sa ila, kag ang iya lulan mawala sa ila mga abaga.

26 Ini amo ang katuyoan nga ginatuyo sa bug-os nga duta: kag ini amo ang kamut nga ginauntay sa tanan nga pungsud.

27 Kay ang GINOO sang mga kasoldadosan nagtuyo, kag sin-o bala ang makawala sini? kag ang iya kamut nauntay, kag sin-o bala ang magapakulo sini?

28 Sa tuig nga napatay si haring Acaz amo ini ang lulan.

29 ś Dili ka magkasadya, Palestina nga bug-os, bangud nga ang bilogon sang nagsakit sa imo nabali: kay gikan sa gamut sang man-ug magagowa ang cocatris nga man-ug, kag ang iya bunga mangin nagahingalayo nga nagalupad nga man-ug.

30 Kag ang panganay sang imol magakaon, kag ang nawad-an magahigda sa kalig-onan: kag patyon ko sa tiggulutum ang imo gamut, kag patyon niya ang imo salin.

31 Haya, O gawang; singgit, O siudad; ikaw, Palestina nga bug-os, natunaw: kay may magagowa nga aso gikan sa aminhan, kag wala sing isa nga magaisahanon sa mga tion niya nga pinat-ud.

32 Ano bala niyan ang isabat sang isa sa mga manugbalita sang pungsud? Nga ang GINOO nagpasad sang Zion, kag sa sini magasalig ang mga imol gikan sa iya katawohan.

KAPITULO 15

ANG lulan sang Moab. Bangud sa kagab-ihon ang Ar sang Moab ginwagwag, kag ginpahipus; bangud sa kagab-ihon ang Kir sang Moab ginwagwag, kag ginpahipus;

2 Nagsaka sia sa Bayit, kag sa Dibon, mga duug nga mataas, sa paghibi: ang Moab magahaya sa Nebo, kag sa Medeba: sa tanan nilang olo manginyara ang kaupaw, kag ang tagsa ka bungut kiskisan.

3 Sa ila mga dalan magatampion sila sing panapton nga sako: sa mga atop sang ila mga balay, kag sa ila mga dalan, ang tagsatagsa magahaya, nga nagahibi sing tama.

4 Kag ang Hesbon magatuaw, kag ang Eleale: mabatian ang ila tingug bisan tubtub sa Jahaz: busa magatuaw ang lupit nga mga soldado sang Moab; ang iya kabuhi manginmakakalagha sa iya.

5 Ang akon tagiposoon magasinggit tungud sang Moab; ang iya mga laaslaas magapalagyo pa Zoar, isa ka bakiya nga tatlo ka tuig: kay sa taklaran sang Luhit magataklad sila sini nga may paghinibi; kay sa dalanon sang Horonaim magabayaw sila sang pagsinggit sang kalaglagan.

6 Kay ang mga tubig sang Nimrim magamingaw: kay nalaya ang halalbon, ang hilamon nawala, walay malagtum nga butang.

7 Busa ang kabuganaan nga naagum nila, kag ang nasuput nila, dalhon nila sa tabok sang sapa sang mga sause.

8 Kay ang singgit nagalibut sa mga dulunan sang Moab; ang haya sini tubtub sa Eglaim, kag ang haya sini tubtub sa Beer-elim.

9 Kay ang mga tubig sang Dimon mapuno sang dugo: kay magadala ako sing dugang pa sa Dimon, sing mga leon sa makapalagyo sang Moab, kag sa salin sang duta.

KAPITULO 16

IPADALA ninyo ang cordero sa manugdumala sang duta kutub sa Sela tubtub sa kamingawan, tubtub sa bukid sang babaying anak sang Zion.

2 Kay mahanabu, nga, subong sang pispis nga nagadalangdalang nga nasobol gikan sa pugad, amo ini ang mahanabu sa mga babaying anak sang Moab sa mga ubogan sang Arnon.

3 Maghinun-anon, maghukom; himoa ang imo handong subong sang gab-i sa tunga sang kaodtohon; tagoa ang mga sinikway; dili pag-itugyan ang laaslaas.

4 Papuy-a upud sa imo ang akon mga sinikway, Moab; manginpalanagoan ka nila gikan sa nawung sang manug-ati: kay ang malupigon nawala na, ang manug-ati nawala na, ang mga manugpigus ginpapas sa duta.

5 Kag sa kalooy ang trono palig-onon: kag sa sini magalingkod sia sa kamatooran sa tabernakulo ni David, nga nagahukom, kag nagapangita sing katarungan, kag nagapadasig sing pagkamatarung.

6 ś Nakabati kami sang bugal sang Moab; sia tama kabugalon: bisan sang iya pagkapalabi-labihon, kag sang iya bugal, kag sang iya kasingkal: apang ang iya kabutigan indi mangin-amo sina.

7 Busa ang Moab magahaya tungud sa Moab, ang tagsatagsa magahaya: tungud sa mga sadsaran sang Kir-hareseth magalalaw kamo; sa pagkamatuud ginsakit sila.

8 Kay ang mga latagon sang Hesbon nagakag-as, kag ang puno sang ubas sang Sibma: ang mga ginoo sang mga pagano nagbanggi sang labing puno nga mga tanum sini, naglambut sila tubtub sa Jazer, nagkalapkap sila paagi sa kamingawan: ang iya mga sanga naglapnag, nagtabok sila sa dagat.

9 ś Busa magatangis ako kaangay sang paghibi sang Jazer tungud sa puno sang ubas sang Sibma: bunyagan ko ikaw sang akon mga luha, O Hesbon, kag Eleale: kay ang pagsinggit tungud sa imo mga bunga nga tingadlaw kag tungud sa imo ani naholog.

10 Kag ang kasadya nakuha, kag ang kalipay gikan sa latagon nga mabungahon; kag sa mga ulubasan manginwalay pag-ambahan, kag walay pagsininggit: ang mga manuglinas walay alak nga pagalinason sa ila mga linasan; ginpauntat ko ang singgit sang ila patubas nga ubas.

11 Busa ang akon tagiposoon magatonog kaangay sang arpa tungud sa Moab, kag ang akon mga kasudlan tungud sa Kir-hares.

12 ś Kag mahanabu, kon makit-an nga ang Moab nalapyo sa mataas nga duug, nga magakadto sia sa iya santuario sa pagpangamuyo; apang indi sia magdaug.

13 Ini amo ang polong nga ginpamolong sang GINOO nahanungud sa Moab kutub sadtong tion.

14 Apang karon ang GINOO nagpamolong, nga nagasiling, Sa sulud sang tatlo ka tuig, subong sang mga tuig sang sinoholan, kag ang himaya sang Moab mangintalamayon, pati sinang bug-os nga dakung kadam-an; kag ang salin mangintama kadiotay kag mangin maluya.

KAPITULO 17

ANG lulan sang Damasco. Yari karon, ang Damasco ginakuha sa pagkasiudad, kag manginnalaglag nga tinumpok.

2 Ang mga siudad sang Aroer binayaan: mangin-iya sila sang mga panong, nga magaluko, kag walay magapahadluk sa ila.

3 Ang kuta makuha man sa Efraim, kag ang ginharian gikan sa Damasco, kag ang salin sang Siria: sila manginsubong sang himaya sang mga kaanakan sang Israel, nagasiling ang GINOO sang mga kasoldadosan.

4 Kag sa sinang adlaw mahanabu, nga ang himaya ni Jacob magabuhin, kag maganiwang ang katambokon sang iya unud.

5 Kag manginsubong ini sang kon ang manug-ani nagatipon sang mais, kag nagaani sang mga pusu sa iya butkon; kag manginsubong ini sang nagatipon sang mga pusu sa nalupyakan sang Refaim.

6 ś Walay sapayan may mabilin sa sini nga salaghawon nga mga ubas, subong sang pagpalaspas sang kahoy nga olivo, duha ukon tatlo ka bilog sa natuyoktuyokan nga sanga, apat ukon lima sa nagowa gid nga mga sanga nga mabungahon sini, nagasiling ang GINOONG Dios sang Israel.

7 Sa sinang adlaw magatolok ang tawo sa iya Magbubuhat, kag ang iya mga mata magahangad sa Balaan nga Isa sang Israel.

8 Kag indi sia magatolok sa mga halaran, ang buhat sang iya mga kamut, kag indi sia magasapak sa sinang ginhimo sang iya mga tudlo, bisan sa mga puong-puong sang kakahoyan, ukon sa mga imahen.

9 ś Sa sinang adlaw ang iya mga siudad nga mabakud manginsubong sang pinabayaan nga sanga, kag sang natuyoktuyokan nga sanga, nga ginbayaan nila bangud sang mga kaanakan sang Israel: kag manginmamingaw ini.

10 Bangud nga nalimtan mo ang Dios sang imo kaluwasan, kag wala magdumdum sang dakung bato sang imo kusug, busa magatanum ka sing mga tanum nga matahum, kag butangan ini sing dumuloong nga mga singil:

11 Sa adlaw padakuon mo ang imo tanum, kag sa aga palamboon mo ang imo binhi: apang ang ani mangin isa ka tinumpok sa adlaw sang kalisud kag sang walay aputan nga kasubo.

12 ś Kailo sa kadam-an sang madamung tawo, nga nagaginahud kaangay sang paghuganas sang mga dagat; kag sa pagdinaguso sang mga pungsud, nga nagasagana kaangay sang pagsagana sang gamhanan nga mga tubig!

13 Ang mga pungsud magadinaguso kaangay sang pagsagana sang madamung tubig: apang sabdongon sila sang Dios, kag magapalagyo sila sa malayo, kag lagson subong sang sagbut sang mga kabukiran sa atubangan sang hangin, kag kaangay sang nagaalimpulus nga butang sa atubangan sang buhawi.

14 Kag sa kahaponon, yari karon, ang kagamo; kag sa wala pa mag-aga, wala na sia. Ini amo ang bahin sang mga nagaati sa aton, kag ang kapalaran sang mga nagapangawat sa aton.

KAPITULO 18

KAILO sa duta nga nagalandong nga may mga pakpak, nga yara sa tabok sang mga suba sang Etiopia:

2 Nga nagapadala sing mga embajador paagi sa dagat, sa mga sakayan nga papiro sa mga tubig, nga nagasiling, Lakat, kamo nga madasig nga mga manugbalita, sa pungsud nga gin-aplaag kag gin-ati, sa katawohan nga makakulugmat kutub sa ila kamunoan tubtub karon; pungsud nga tinakus kag linapak, nga ang ila duta ginlaglag sang mga suba!

3 Kamo tanan nga pumuluyo sang kalibutan, kag mga nagapuyo sa duta, tan-awa ninyo, kon magbayaw sia sang hayahay sa kabukiran; kag kon magpatonog sia sang budyong, pamatii ninyo.

4 Kay amo ini ang ginsiling sang GINOO sa akon, Magapahuway ako, kag lantawon ko sa akon puluy-an kaangay sang matin-aw nga kainit sa mga ulutanon, kag kaangay sang panganud sang ton-og sa kainit sang ani.

5 Kay sa wala pa ang ani, sang nahuman na ang bokol, kag ang maaslum nga ubas nagakaluto sa bulak, utdon niya sang inughagbas nga mga sanggut ang mga singil, kag kuhaon niya kag utdon ang mga sanga.

6 Ibilin sila sing tingub sa kapispisan sang kabukiran, kag sa kasapatan sang duta: kag ang kapispisan magapatingadlaw sa ila, kag ang tanan nga kasapatan sang duta magapatigtulugnaw sa ila.

7 ś Sa sinang tion dalhon ang dolot sa GINOO sang mga kasoldadosan gikan sa katawohan nga gin-aplaag kag gin-ati, kag gikan sa katawohan nga makakulugmat kutub sa ila kamunoan tubtub karon; pungsud nga tinakus kag linapak sang tiil, nga ang ila duta ginlaglag sang mga suba, sa duug sang ngalan sang GINOO sang mga kasoldadosan, ang bukid nga Zion.

KAPITULO 19

ANG lulan sang Egipto. Yari karon, ang GINOO nagasakay sa madasig nga panganud, kag magaabut sa Egipto: kag ang mga diosdios sang Egipto matublag sa iya atubangan, kag ang tagiposoon sang Egipto matunaw sa tunga sini.

2 Kag painiton ko ang mga Egiptohanon batok sa mga Egiptohanon: kag sila magapakig-away ang tagsatagsa batok sa iya utud, kag ang tagsatagsa batok sa iya isigkatawo; ang siudad batok sa siudad, kag ang ginharian batok sa ginharian.

3 Kag ang espiritu sang Egipto mapaslawan sa tunga sini; kag laglagon ko ang laygay sini: kag magadangup sila sa mga diosdios, kag sa mga manugtiwtiw, kag sa mga may kinilala nga mga espiritu, kag sa mga manugbabaylan.

4 Kag itugyan ko ang mga Egiptohanon sa kamut sang ginoong mapintas; kag ang hari nga mabangis magahari sa ila, nagasiling ang Ginoo, ang GINOO sang mga kasoldadosan.

5 Kag ang mga tubig mahubas sa dagat, kag ang suba magahubas kag magamala.

6 Kag magapalipas sila palayo sang mga suba; kag ang mga sapa sang pag-apin magahubas kag magamala: ang mga tabon-ak kag ang mga tigbaw malaya.

7 Ang mga papiro sa ubay sang mga sapa, sa pangpang sang mga sapa, kag ang tagsa ka butang nga nasab-ug sa ubay sang mga sapa, magakigas, magakapalid, kag mawala.

8 Ang mga mangingisda man magalalaw, kag sila tanan nga nagapamunit sa mga sapa magapanalabiton, kag ang mga nagaladlad sing mga pukot sa mga tubig magakag-as.

9 Labut pa sila nga nagapangabudlay sa lino nga nahusay, kag ang mga nagahabol sing mga pinuna, malibogan.

10 Kag sila pagapangpaslawon sa mga katuyoan sini, ang tanan nga nagahimo sang mga gawang sa pagregular sang tubig sa suba kag sang mga ponong nga sa kaisdaan.

11 ś Sa pagkamatuud ang mga prinsipe sang Zoan mga buangbuang, ang laygay sang mga maalam nga manuglaygay ni Faraon nanginsinapat: paano bala nga nagasiling kamo kay Faraon, Anak ako nga lalaki sang maalam, ang anak nga lalaki sang mga hari nga dumaan?

12 Diin bala sila? diin bala ang imo maalam nga mga tawo? kag pasugira sila karon sa imo, kag pakilalaha sila sang gintuyo sang GINOO sang mga kasoldadosan nahanungud sa Egipto.

13 Ang mga prinsipe sang Zoan nanginbuangbuang, ang mga prinsipe sang Nop nalimbongan; nagpatalang man sila sang Egipto, bisan sila nga amo ang ginasaligan sang mga tribo sini.

14 Ang GINOO nagsimbog sa tunga sini sing espiritu sang pagkabalingag: kag ginpasayup nila ang Egipto sa tagsa ka buluhaton sini, subong sang hobog nga tawo nga nagadulingduling sa iya suka.

15 Kag wala sing bisan ano nga buluhaton nga sa Egipto, nga mahimo sang olo ukon ikog, sanga ukon tabon-ak.

16 Sa sinang adlaw ang Egipto manginkaangay sa mga babaye: kag magakurug ini kag magakahadluk bangud sang pagbalabad sang kamut sang GINOO sang mga kasoldadosan, nga ginabalabad niya sa ibabaw sini.

17 Kag ang duta sang Juda manginkakugmat sa Egipto, ang tagsatagsa nga masambitan sini magakahadluk, bangud sang katuyoan sang GINOO sang mga kasoldadosan, nga gintuyo niya batok sini.

18 ś Sa sinang adlaw may lima ka siudad sa duta sang Egipto nga magapamolong sang hambal sang Canaan, kag magasumpa sa GINOO sang mga kasoldadosan; ang isa tawgon, Ang siudad sang kalaglagan.

19 Sa sinang adlaw may isa ka halaran sa GINOO sa tunga sang duta sang Egipto, kag isa ka haligi sa GINOO sa dulunan sini.

20 Kag ini mangintanda kag manginsaksi sa GINOO sang mga kasoldadosan sa duta sang Egipto: kay magatuaw sila sa GINOO bangud sang mga manugpigus, kag magapadala sia sa ila sing manluluwas, kag isa ka daku nga isa, kag sia magaluwas sa ila.

21 Kag ang GINOO makilala sa Egipto, kag ang mga Egiptohanon magakilala sa GINOO sa sinang adlaw, kag magahalad kag magadolot; hoo, magasaad sila sing saad sa GINOO, kag magatuman sini.

22 Kag ang GINOO magapilas sang Egipto: sia magapilas kag magaayo sini: kag magabalik sila sa GINOO, kag mapakilooyan sia nila, kag ayohon sila.

23 ś Sa sinang adlaw may dalan nga daku gikan sa Egipto pa Asiria, kag ang Asiriahanon magakadto sa Egipto, kag ang Egiptohanon sa Asiria, kag ang mga Egiptohanon magaalagad upud sang mga Asiriahanon.

24 Sa sinang adlaw ang Israel mangin-ikatlo upud sa Egipto kag sa Asiria, isa ka pakamaayo sa tunga sang duta:

25 Ini sila ang pakamaayohon sang GINOO sang mga kasoldadosan, nga nagasiling, Bulahan ang Egipto nga akon katawohan, kag ang Asiria nga binuhatan sang akon mga kamut, kag ang Israel nga akon panublion.

KAPITULO 20

SA tuig nga si Tartan nag-abut sa Asdod, (sang si Sargon nga hari sang Asiria nagpadala sa iya,) kag gin-away niya ang Asdod, kag gin-agaw ini;

2 Sa amo man nga tion ang GINOO nagpamolong paagi kay Isaias nga anak nga lalaki ni Amoz, nga nagasiling, Lakat kag ubaha ang panapton nga sako sa imo mga balikawang, kag huksa ang imo sapatos sa imo tiil. Kag ginhimo niya ini, nga nagalakat nga hubo kag wala sing sapatos.

3 Kag ang GINOO nagsiling, Kaangay sang akon alagad nga si Isaias nga naglakat nga hubo kag wala sing sapatos sing tatlo ka tuig nga tanda kag katingalahan nahanungud sa Egipto kag nahanungud sa Etiopia;

4 Sa amo ang hari sang Asiria magadala sang mga Egiptohanon nga mga binilanggo, kag sang mga Etiopiahanon nga mga bihag, pamatan-on kag tigulang, hubo kag wala sing sapatos, kag wala sing tabon nga sa ila mga buli, sa kahuluy-an sang Egipto.

5 Kag magakahadluk sila kag magakahuya bangud sang Etiopia nga ila palaabuton, kag sang Egipto nga ila himaya.

6 Kag ang pumuluyo sa sining pulo magasiling sa sinang adlaw, Yari karon, amo ini ang aton palaabuton, bisan diin kita nagapalagyo sa pagpakitabang nga luwason gikan sa hari sang Asiria: kag paano bala ang pagpalagyo naton?

KAPITULO 21

ANG lulan sang desierto sang dagat. Subong sang mga buhawi sa bagatnan nga nagaagi; sa amo nagahalin ini gikan sa desierto, gikan sa duta nga makakulugmat.

2 Isa ka makahalanguyus nga palanan-awon ang ginpahayag sa akon; ang mabudhion nga tawo nagabudhi, kag ang manuglaglag nagalaglag. Taklad, O Elam: magkibon, O Media; ginpauntat ko ang tanan sini nga panghayhay.

3 Busa ang akon mga balikawang puno sing sakit: ang mga kasakit nagdakup sa akon, subong sang mga kasakit sang babaye nga ginasakitan: nagbalikutot ako sa pagkabati ko sini; nalisang ako sa pagkakita ko sini.

4 Ang akon tagiposoon nagakubakuba, ang kakugmat nagpalisang sa akon: ang kagab-ihon nga akon kalipay ginbaylo niya sa kahadluk nga sa akon.

5 Amana ang latok, bantay sa torre nga balantayan, kaon, inum: tindug, kamo nga mga prinsipe, kag haplasa ang taming.

6 Kay amo ini ang ginsiling sang Ginoo sa akon, Lakat, butang sing bantay, magpahayag sia sang iya makita.

7 Kag nakakita sia sing isa ka kangga nga may mga manugkabayo nga pares, isa ka kangga sang mga asno, kag isa ka kangga sang mga camelyo; kag nagpamati sia sing makugi sa daku gid nga pagtalupangud:

8 Kag nagsinggit sia, Leon: Akon ginoo, nagatindug ako sa torre nga balantayan sing dalayon sa adlawon, kag yara ako sa akon pagbantay sa bug-os nga mga gab-i:

9 Kag, yari karon, nagapakari ang isa ka kangga sang mga lalaki, nga may mga manugkabayo nga pares. Kag nagsabat sia kag nagsiling, Ang Babilonia napukan, napukan; kag ang tanan nga imahen nga tinigban sang iya mga dios ginpang-utud niya sa duta.

10 O akon paglinas, kag ang uyas sang akon linasan: inang akon nabatian sa GINOO sang mga kasoldadosan, ang Dios sang Israel, ginpahayag ko sa imo.

11 ś Ang lulan sang Duma. Sia nagapanawag sa akon gikan sa Seir, Manugbantay, ano bala ang nahanungud sa kagab-ihon? Manugbantay, ano bala ang nahanungud sa kagab-ihon?

12 Ang manugbantay nagsiling, Ang kaagahon nagaabut, kag ang kagab-ihon man: kon kamo mamangkot, pamangkot kamo: balik, magkari.

13 ś Ang lulan tuhoy sa Arabia. Sa talon sa Arabia magapabilin kamo, O kamo nga mga karabana sang mga Dedanhon.

14 Ang mga pumuluyo sang duta sang Tema nagdala sang tubig sa nauhaw, nagsugata sila sa iya nga nagpalagyo upud sang ila tinapay.

15 Kay nagpalagyo sila gikan sa mga espada, gikan sa espada nga nagabut, kag gikan sa pana nga nabingat, kag gikan sa kagha sang inaway.

16 Kay amo ini ang ginsiling sa akon sang Ginoo, Sa sulud sang isa ka tuig, sono sa mga tuig sang sinoholan, kag ang bug-os nga himaya sang Kedar mawala:

17 Kag ang nabilin sang kadamuon sang mga manugpana, mga gamhanan nga mga lalaki sang mga anak sang Kedar, magadiotay: kay ang GINOONG Dios sang Israel nagpamolong sini.

KAPITULO 22

ANG lulan sang nalupyakan sang palanan-awon. Ano bala ang nagatublag sa imo karon, nga nagsaka gid ka sa mga alibungan?

2 Ikaw nga puno sang mga sininggit, siudad nga magahud, siudad nga masinadyahon: ang imo mga patay nga mga tawo wala pagpatya sa espada, ukon napatay sa away.

3 Ang tanan mo nga manuggahum nagpalagyo sing tingub, gingapus sila sang mga manugpana: ang tanan nga nasapwan sa imo gingapus sing tingub, nagpalagyo sila sa malayo.

4 Busa nagsiling ako, Indi ako pagtoloka; magahibi ako sing mapait, dili magtinguha sa paglipay sa akon, tungud sang kalaglagan sang babaye nga anak sang akon katawohan.

5 Kay adlaw ini sang kagamo, kag sang pagtapak, kag sang kalibog gikan sa Ginoong DIOS sang mga kasoldadosan sa nalupyakan sang palanan-awon, sang paglumpag sang mga kuta, kag sang sininggit pakadto sa kabukiran.

6 Kag ang Elam nagdala sang baslayan upud ang mga kangga sang mga lalaki kag mga manugkabayo, kag ang Kir nagbukas sang taming.

7 Kag mahanabu, nga ang imo pinili gid nga mga nalupyakan mapuno sang mga kangga, kag ang mga manugkabayo magapahamtang sing paagisud sa gawang.

8 ś Kag ginkuha niya ang tabon sang Juda, kag nagtolok ka sa sadto nga adlaw sa hinganiban sa balay sang talon.

9 Nakita ninyo man ang mga bulwang sang siudad ni David, nga madamu sila: kag gintipon ninyo sing tingub ang mga tubig sang ponong sa ubus.

10 Kag gin-isip ninyo ang mga balay sang Jerusalem, kag ginguba ninyo ang mga balay sa pagpamakud sang kuta.

11 Naghimo man kamo sing kalog sa ulut sang duha ka kuta nga sa tubig sang ponong nga daan: apang wala kamo magtamud sa naghimo sini, ukon naghangad sa nagdihon sini sing dugay na.

12 Kag sa sadtong adlaw ang Ginoong DIOS sang mga kasoldadosan nagtawag sa paghibi, kag sa paglalaw, kag sa pagpabolog, kag sa pagwagkus sing panapton nga sako:

13 Kag yari karon kalipay kag kasadya, pagpatay sing mga baka, kag pag-ihaw sing mga carnero, pagkaon sing unud, kag pag-inum sing alak: magkaon kita kag mag-inum; kay buwas mapatay kita.

14 Kag ini ginpahayag sa akon mga idulungug sang GINOO sang mga kasoldadosan, Sa pagkamatuud ini nga kalautan indi pagtinloan sa inyo tubtub nga mapatay kamo, nagasiling ang Ginoong DIOS sang mga kasoldadosan.

15 ś Amo ini ang ginasiling sang Ginoong DIOS sang mga kasoldadosan, Lakat, kadto ka sa sini nga manugtipig sang bahandi, nga amo si Sebna, nga nagadumala sang balay, kag isiling,

16 Ano bala ang imo diri? kag sin-o bala ang yari sa imo diri, nga nagbasbas ka diri sing lulubngan nga sa imo, subong sang sa nagabasbas nga sa iya sing lulubngan sa mataas, kag nga nagasinsil sing puluy-an nga sa iya sa dakung bato?

17 Yari karon, ang GINOO magadala sa imo paagi sa makusug nga pagpamihag, kag sa pagkamatuud magatabon sa imo.

18 Sa pagkamatuud paligiron kag ilabyog ka niya sing mabaskug kaangay sang bola sa duta nga malapad: didto mapatay ka, kag didto ang mga kangga sang imo himaya manginkahuluy-an sang balay sang imo ginoo.

19 Kag sobolon ko ikaw sa imo palangakoan, kag sa imo kahimtangan papaubuson ka niya.

20 ś Kag mahanabu sa sinang adlaw, nga tawgon ko ang akon alagad nga si Eliaquim nga anak nga lalaki ni Helcias:

21 Kag papanaptan ko sia sang imo kunup, kag lig-onon sia sang imo wagkus, kag itugyan ko ang imo pangolohan sa iya kamut: kag mangin-amay sia sa mga pumuluyo sang Jerusalem, kag sa panimalay sang Juda.

22 Kag ibutang ko ang yabi sang balay ni David sa iya abaga; gani buksan niya, kag wala gid sing magatakup; kag takpan niya, kag wala gid sing magabukas.

23 Kag lig-onon ko sia subong sang lansang sa duug nga malig-on; kag sia manginsa isa ka mahimayaon nga trono nga sa balay sang iya amay.

24 Kag ibitay nila sa iya ang bug-os nga himaya sang balay sang iya amay, ang inanak kag ang kaliwat, ang tanan nga suludlan nga magamay, kutub sa mga suludlan nga mga tagayan, tubtub sa mga suludlan nga mga prasko.

25 Sa sinang adlaw, nagasiling ang GINOO sang mga kasoldadosan, ang lansang nga nalig-on sa duug nga malig-on gabuton, kag mautud, kag maholog; kag ang lulan nga yara sa sini mawala: kay ang GINOO nagpamolong sini.

KAPITULO 23

ANG lulan sang Tiro. Haya, kamo nga mga sakayan sang Tarsis; kay ginwagwag ini, sa bagay nga wala sing balay, wala sing pagsulud: kutub sa duta sang Kitim ginpahayag ini sa ila.

2 Magpahimonong, kamo nga mga pumuluyo sang pulo; ikaw nga ginpuno liwat sang mga komersyante sang Zidon, nga nagaagi sa dagat.

3 Kag paagi sa dalagku nga mga tubig ang binhi sang Sihor, ang patubas sang suba, amo ang iya palangitan-an; kag sia balaligyaan sang mga pungsud.

4 Magkahuya ka, O Zidon: kay ang dagat nagpamolong, bisan ang kusug sang dagat, nga nagasiling, Wala ako ginasakiti, ukon nagaanak sing mga kabataan, kag wala ako nagasagud sing mga pamatan-on nga lalaki, ukon nagabatiti sing mga ulay.

5 Kaangay sa sugid nahanungud sang Egipto, amo man magakasakit sila sing tama sa sugid nahanungud sang Tiro.

6 Tabok kamo sa Tarsis; maghaya, kamo nga mga pumuluyo sang pulo.

7 Amo bala ini ang inyo malipayon nga siudad, nga ang iya pagkagulang kutub pa sa mga adlaw nga dumaan? ang iya gid mga tiil magadala sa iya sa malayo sa pagpanlugayaw.

8 Sin-o bala ang nagtuyo sini batok sa Tiro, ang siudad nga nagapamurungpurung, nga ang iya mga komersyante mga prinsipe, nga ang iya mga manugpatikang mga dungganon sa duta?

9 Ang GINOO sang mga kasoldadosan nagtuyo sini, sa pagdagta sang bugal sang bug-os nga himaya, kag sa pagdala sa katamayan sang tanan nga dungganon sang duta.

10 Latas ka sa imo duta subong sang suba, O babaye nga anak sang Tarsis: wala na sing kusug.

11 Gin-untay niya ang iya kamut sa ibabaw sang dagat, gin-uyug niya ang mga ginharian: ang GINOO naghatag sing sogo batok sa komersyante nga siudad, sa paglaglag sang mga pamakud sini.

12 Kag nagsiling sia, Indi ka na magkalipay, O ikaw nga pinigus nga ulay, babaying anak sang Zidon: tindug, magtabok sa Kitim; didto indi ka man makapahuway.

13 Yari karon ang duta sang mga Caldeanhon; wala ini nga katawohan, tubtub nga ginpasad ini sang Asiriahanon tungud sa mga nagapuyo sa kamingawan: ginpatindug nila ang mga torre sini, ginpatindug nila ang mga palacio sini; kag ginguba niya ini.

14 Haya, kamo nga mga sakayan sang Tarsis: kay ang inyo kusug nawagwag.

15 Kag mahanabu sa sinang adlaw, nga ang Tiro kalimtan sing kapitoan ka tuig, sono sa mga adlaw sang isa ka hari: sa matapus ang kapitoan ka tuig, ang Tiro magaamba subong sang isa ka alpot.

16 Kuha sing arpa, libuta ang siudad, ikaw nga alpot nga nalimtan; lanton ka sing malolot nga melodia, amba sing madamung ambahanon, agud nga madumduman ka.

17 ś Kag mahanabu sa tapus ang kapitoan ka tuig, nga ang GINOO magaduaw sa Tiro, kag magabalik sia sa iya sohol, kag magapakighilawas sa tanan nga mga ginharian sang kalibutan sa kadaygan sang duta.

18 Kag ang iya inugbaligya kag ang iya sohol manginbalaan sa GINOO: indi ini pagsupton ukon pagtipigan; kay ang iya inugbaligya manginsa ila nga mga nagapuyo sa atubangan sang GINOO, sa pagkaon sing tuman, kag sa mahunit nga panapton.

KAPITULO 24

YARI KARON, ang GINOO nagahublas sang duta, kag nagawagwag sini, kag nagabaliskad sini, kag nagapaaplaag sang mga pumuluyo sini.

2 Kag mahanabu, kon ano ang sa katawohan, amo sa pari; kon ano ang sa alagad, amo sa iya agalon; kon ano ang sa alagad nga babaye, amo sa iya agalon nga babaye; kon ano ang sa manugbakal, amo sa manugbaligya; kon ano ang sa manugpahulam, amo sa nagahulam; kon ano ang sa manugpasaka, amo sa nagahatag sa iya sing saka.

3 Ang duta hublasan sing bug-os, kag wagwagon sing bug-os: kay ang GINOO nagpamolong sining polong.

4 Ang duta nagalalaw kag nagakawala, ang kalibutan nagakag-as kag nagakawala, ang palabi-labihon nga katawohan sang duta nagakag-as.

5 Ang duta man ginadagtaan sa idalum sang mga pumuluyo sini; bangud nga ginlalis nila ang mga kasogoan, ginbaylohan ang mga pagsolondan, ginbungkag ang katipan nga dayon.

6 Busa ang pagpakamalaut naglamon sang duta, kag ang mga nagapuyo sa sini mamingaw: busa ang mga pumuluyo sang duta nasonog, kag pila ka tawo ang nabilin.

7 Ang bag-ong alak nagalalaw, ang puno sang ubas nagakag-as, ang tanan nga malipayon sa tagiposoon nagapanghayhay.

8 Ang kasadya sang mga tambor nagauntat, ang kagahud sang mga nagakasadya natapus, ang kalipay sang arpa nagauntat.

9 Indi sila mag-inum sing alak nga may inamba; ang ilimnon nga masingkal manginmapait sa mga nagainum sini.

10 Ang siudad sang pagsaligmato nalumpag: ang tagsa ka balay natakpan, agud nga walay tawo nga makasulud.

11 May hinibi sa mga dalan bangud sang alak; ang bug-os nga kalipay ginadulman, ang kasadya sang duta nawala.

12 Nabilin sa siudad ang kamingaw, kag ang gawang ginsamad sang kalaglagan.

13 ś Kon amo ini ang mahanabu sa tunga sang duta sa katawohan, manginmay kasubong sang pagpalaspas sang kahoy nga olivo, kag kasubong sang mga ubas nga ginasaghaw kon tapus na ang patubas sang ubas.

14 Sila magatib-ong sang ila tingug, magaamba sila tungud sang pagkaharianon sang GINOO, magasinggit sila sing mabaskug kutub sa dagat.

15 Busa himayaa ninyo ang GINOO sa mga kalayo, ang ngalan sang GINOONG Dios sang Israel sa kapuloan sang dagat.

16 ś Kutub sa naukbung gid nga bahin sang duta nakabati kita sing mga ambahanon, sang himaya sa matarung. Apang nagsiling ako, Ang akon pagkaniwang, ang akon pagkaniwang, kailo sa akon! ang mga mabudhion nagbudhi; hoo, ang mga mabudhion nagbudhi sing tama.

17 Ang kahadluk, kag ang boho, kag ang siod, yara sa imo, O pumuluyo sang duta.

18 Kag mahanabu, nga ang nagapalagyo sa kagahud sang kahadluk maholog sa boho; kag ang nagagowa sa tunga sang boho madakpan sa siod: kay ang mga talamwaan sa hitaas nabuksan, kag ang mga sadsaran sang duta nagauyug.

19 Ang duta nalumpag sing bug-os, ang duta natunaw sing bug-os, ang duta ginauyug sing mabaskug.

20 Ang duta magadulingduling subong sang tawo nga hobog, kag pagahalinon kaangay sang payagpayag; kag ang paglalis sini manginmabug-at sa sini; kag mapukan ini, kag indi na magbangon.

21 Kag mahanabu sa sinang adlaw, nga ang GINOO magasilot sang kasoldadosan sang mga mataas nga yara sa hitaas, kag sang mga hari sang duta nga yara sa duta.

22 Kag tiponon sila sing tingub, subong sang mga binilanggo nga ginatipon sa boho, kag takpan sila sa bilanggoan, kag duawon sila sa tapus ang madamung adlaw.

23 Niyan ang bulan malibogan, kag ang adlaw mahuy-an, kon ang GINOO sang mga kasoldadosan magahari sa bukid nga Zion, kag sa Jerusalem, kag sa atubangan sang iya mga katigulangan sing mahimayaon.

KAPITULO 25

O GINOO, ikaw ang akon Dios; bayawon ko ikaw, dayawon ko ang imo ngalan; kay naghimo ka sing makatilingalang mga butang; ang imo mga laygay kutub sa dumaan pagkatutum kag kamatooran.

2 Kay ang siudad ginhimo mo nga tinumpok; ang siudad nga may pamakud nga kagulub-an: ang palacio sang mga dumuloong nga indi siudad; indi na gid ini pagpatindugon.

3 Busa ang katawohan nga mabakud magahimaya sa imo, ang siudad sang makakulugmat nga mga pungsud magakahadluk sa imo.

4 Kay ikaw nanginkabakuran sa imol, kabakuran sa nawad-an sa iya kasakitan, dalangpan gikan sa unus, handong sa kainit, kon ang pusnga sang mga makakulugmat subong sang unus batok sa kuta.

5 Palinongon mo ang kagahud sang mga dumuloong, subong sang kainit sa duug nga kigas; subong sang kainit paagi sa handong sang isa ka panganud: ang sanga sang mga makakulugmat paubson.

6 ś Kag sa sining bukid ang GINOO sang mga kasoldadosan magahimo sa tanan nga katawohan sing pandut sa matambok nga mga butang, pandut sa mga alak sa labud, sa matambok nga mga butang nga puno sing utuk sa tul-an, sa mga alak sa labud nga pinatin-aw sing maayo.

7 Kag laglagon niya sa sining bukid ang nawung sang tabon nga natabon sa tanan nga katawohan, kag ang takurung nga nahumlad sa ibabaw sang tanan nga mga pungsud.

8 Lamonon niya ang kamatayon sa kadalag-an; kag pahiran sang Ginoong DIOS ang mga luha sang tanan nga mga nawung; kag ang pagsabdong sa iya katawohan kuhaon niya sa bug-os nga duta: kay ang GINOO nagpamolong sini.

9 ś Kag isiling sa sinang adlaw, Yari karon, ini amo ang aton Dios; naghulat kita sa iya, kag sia magaluwas sa aton: ini amo ang GINOO; naghulat kita sa iya, magakalipay kita kag magakasadya sa iya kaluwasan.

10 Kay sa sining bukid ang kamut sang GINOO magapahuway, kag ang Moab tapakon sa idalum niya, subong sang pagtapak sang dagami nga sa tinumpok sang ipot.

11 Kag magauntay sia sang iya mga kamut sa tunga nila, subong sang nagalangoy nga nagauntay sang iya mga kamut sa paglangoy: kag paubson niya ang ila bugal pati sang mga inagaw sang ila mga kamut.

12 Kag ang pamakud sang mataas nga kabakuran sang imo mga kuta pukanon niya, paubson, kag tapanon sa duta, bisan tubtub sa yab-ok.

KAPITULO 26

SA sinang adlaw ining ambahanon ambahon sa duta sang Juda; May mabakud kita nga siudad; ang kaluwasan ipat-ud sang Dios nga mga kuta kag mga balwarte.

2 Buksi ninyo ang mga gawang, agud nga ang pungsud nga matarung nga nagahuput sing kamatooran makasulud.

3 Ikaw magatipig sa iya sa himpit nga paghidait, nga ang iya hunahuna natuhoy sa imo: bangud nga nagasalig sia sa imo.

4 Salig kamo sing dayon sa GINOO: kay sa GINOONG JEHOVAH amo ang kusug nga walay katapusan:

5 ś Kay ginapaubus niya ang mga nagapuyo sa hitaas; ang siudad nga mataas, ginapaubus niya ini; ginapaubus niya ini, bisan tubtub sa duta; ginatapan niya ini bisan tubtub sa yab-ok.

6 Ang tiil magatapak sini, bisan ang mga tiil sang imol, kag ang mga tikang sang mga nawad-an.

7 Ang dalanon sang matarung amo ang pagkatadlong: ikaw, labing matadlong, nagatimbang sing banas sang matarung.

8 Hoo, sa dalanon sang imo mga paghukom, O GINOO, naghulat kami sa imo; sa imo ngalan yara ang handum sang amon kalag, kag sa pagdumdum sa imo.

9 Sa akon kalag naghandum ako sa imo sa kagab-ihon; hoo, sa akon espiritu sa sulud nakon pangitaon ko ikaw sing aga pa: kay kon ang imo mga paghukom yari sa duta, ang mga pumuluyo sang kalibutan magatoon sing pagkamatarung.

10 Ipakita ang kahamuut sa malauton, apang indi sia magtoon sing pagkamatarung: sa duta sang pagkatadlong magahimo sia sing masinalaypon, kag indi magtan-aw sang pagkaharianon sang GINOO.

11 GINOO, kon ang imo kamut nabayaw, indi sila makakita: apang magatan-aw sila, kag mahuy-an tungud sang ila kahisa sa katawohan; hoo, ang kalayo sang imo mga kaaway magalamon sa ila.

12 ś GINOO, magapatok ka sing paghidait tungud sa amon: kay ikaw man naghimo sang tanan namon nga buluhaton sa amon.

13 O GINOO nga amon Dios, ang iban nga mga ginoo luwas sa imo nakagahum sa amon: apang sa imo lamang magasambit kami sang imo ngalan.

14 Mga patay sila, indi sila mabuhi; mga minatay sila, indi sila magbangon: busa ginduaw mo kag ginlaglag sila, kag ginpanas mo ang tanan nilang handumanan.

15 Gindugangan mo ang pungsud, O GINOO, gindugangan mo ang pungsud: ginahimaya ikaw: ginsaylo mo ini palayo sa tanan nga ukbung sang duta.

16 GINOO, sa kalisdanan ginduaw ka nila, nag-ula sila sing pangamuyo sang yara sa ila ang imo pagdisiplina.

17 Kaangay sang babaye nga nagadala, nga nagapalapit sa tion sang iya pag-anak, yara sa kasakit, kag nagauraroy sa iya mga kasakit; nanginsubong kami sini sa imo itololok, O GINOO.

18 Nagdala kami, ginsakitan kami, subong nga daw nag-anak kami sing hangin; wala kami nakahimo sing bisan anong pagluwas sa duta; kag ang mga pumuluyo sang kalibutan wala mapukan.

19 Ang imo mga tawo nga patay magakabuhi, kaupud sang akon patay nga lawas magabangon sila. Pagmata kag mag-amba, kamo nga nagapuyo sa yab-ok: kay ang imo ton-og subong sang ton-og sang mga ulutanon, kag ang duta magapagowa sang mga patay.

20 ś Kari, katawohan ko, sulud ka sa imo mga hulut, kag takpi ang imo mga ganhaan sa palibut mo: panago ka sing malip-ot nga tion, tubtub nga magtaliwan ang kaalipungut.

21 Kay, yari karon, ang GINOO nagagowa sa iya duug sa pagsilot sang mga pumuluyo sang duta tungud sang ila kalautan: ang duta man magapahayag sang iya dugo, kag indi na magtabon sang mga ginpatay sa iya.

KAPITULO 27

SA sinang adlaw ang GINOO nga may iya nga espada nga makakalagha kag daku kag mabakud magasilot sang leviatan nga man-ug nga baslayanon, ang leviatan nga amo inang man-ug nga tikotiko; kag patyon niya ang dragon nga yara sa dagat.

2 Sa sinang adlaw mag-amba kamo sa iya, Ulubasan sang mapulang alak.

3 Ako, ang GINOO, nagabantay sini; bunyagan ko ini sa tagsa ka tion: basi nga may magsamad sini, bantayan ko ini sa gab-i kag adlaw.

4 Wala sa akon ang kaalipungut: sin-o bala ang buut nga magapahamtang sang mga sapinit kag mga tunuk batok sa akon sa inaway? magaagi ako sa ila, sonogon ko sila sing tingub.

5 Ukon magkaput sia sa akon kusug, agud nga magpakighidait sia sa akon; kag sia magapakighidait sa akon.

6 Papanggamuton niya ang mga nagagikan kay Jacob: ang Israel magapamulak kag magapanalingsing, kag magapuno sang kadaygan sang kalibutan sing bunga.

7 ś Ginpilas bala niya sia, subong sang pagpilas niya sadtong mga nagpilas sa iya? ukon ginpatay bala sia sono sa pagpamatay sa ila nga ginpatay niya?

8 Sa talaksan, kon magpanalingsing ini, magapakigsuay ka sa sini: ginapunggan niya ang iya mamadlus nga hangin sa adlaw sang hangin nga sidlangan.

9 Busa paagi sini tinloan ang kalautan ni Jacob; kag ini amo ang bug-os nga bunga sa pagkuha sang iya sala; kon himoon niya ang tanan nga bato sang halaran subong sang mga bato sang apog nga gindugmok, ang mga puong-puong sang kakahoyan kag ang mga imahen indi magtindug.

10 Walay sapayan ang siudad nga napamakuran magamamingaw, kag ang puluy-an bayaan, kag mabilin kaangay sang kamingawan: didto magahalab ang tinday nga baka, kag didto magaluko sia, kag magapapas sang mga sanga sini.

11 Kon ang mga sanga sini malaya, balion sila: magakari ang mga babaye, kag magatutud sa ila sa kalayo: kay katawohan ini nga walay paghangup: busa sia nga naghimo sa ila indi malooy sa ila, kag sia nga nagdihon sa ila indi mahamuut sa ila.

12 ś Kag mahanabu sa sinang adlaw, nga ang GINOO magapauntat kutub sa ililigan sang suba tubtub sa sapa sang Egipto, kag tiponon kamo sing tag-isaisa, O kamo nga kaanakan sang Israel.

13 Kag mahanabu sa sinang adlaw, nga patunggon ang daku nga budyong, kag magaabut ang mga buut nga mawala sa duta sang Asiria, kag ang mga sinikway sa duta sang Egipto, kag magasimba sa GINOO sa bukid nga balaan sa Jerusalem.

KAPITULO 28

KAILO sa purungpurung sang bugal, sa mga palahobog sang Efraim, nga ang ila mahimayaon nga katahum isa ka nagakalaya nga bulak, nga yara sa olo sang mapatubason nga mga nalupyakan sang mga ginadaug sang alak!

2 Yari karon, ang Ginoo may isa nga gamhanan kag makusug, nga magahaboy paidalum sa duta paagi sa kamut, subong sang bagyo sang hielo nga daw bato kag sang unus nga nagalaglag, subong sang anaw sang mabaskug nga mga tubig nga nagaawas.

3 Ang purungpurung sang bugal, ang mga palahobog sang Efraim, tapakon sang mga tiil:

4 Kag ang mahimayaon nga katahum, nga yara sa olo sang mapatubason nga nalupyakan, mangin bulak nga nagakalaya, kag manginsubong sang sa nahauna nga loto nga bunga sa wala pa ang tingadlaw; nga kon ang nagatolok sini makakita, samtang nga yari ini sa iya kamut, ginaubus niya ini.

5 ś Sa sinang adlaw ang GINOO sang mga kasoldadosan mangin nga sa isa ka purungpurung sang himaya, kag nga sa isa ka diadema sang katahum, sa nabilin sang iya katawohan,

6 Kag nga sa isa ka espiritu sang paghukom sa nagalingkod sa hukmanan, kag nga sa kusug sa mga nagapaisul sang inaway sa gawang.

7 ś Apang sila man nagasayup paagi sa alak, kag nagtalang sa dalan paagi sa masingkal nga ilimnon; ang pari kag ang manalagna nagasayup paagi sa masingkal nga ilimnon, nalumoy sila sa alak, nagtalang sila paagi sa masingkal nga ilimnon; nagasayup sila sa palanan-awon, nagakasandad sila sa paghukom.

8 Kay ang tanan nga latok puno sang suka kag kahigko, sa bagay nga wala sing duug nga matinlo.

9 ś Sin-o bala ang tudloan niya sing ihibalo? kag sin-o bala ang iya pahangpon sang doktrina? sila nga ginlutas sa gatas, kag ginkuha sa mga soso.

10 Kay ang pagsolondan kinahanglan tukuron sa pagsolondan, pagsolondan sa pagsolondan; dinalan sa dinalan, dinalan sa dinalan; diotay diri, kag diotay didto:

11 Kay sa mga bibig nga bikwalon kag sa iban nga hambal magapamolong sia sa sining katawohan.

12 Sa ila sia nagsiling, Amo ini ang pahuway nga sa sini papahuwayon ninyo ang nalapyo; kag ini amo ang paumpaw: apang wala sila maluyag magpamati.

13 Apang ang polong sang GINOO nanginsa ila pagsolondan sa pagsolondan, pagsolondan sa pagsolondan; dinalan sa dinalan, dinalan sa dinalan; diotay diri, kag diotay didto; agud nga maglakat sila, kag matingkaya, kag mabali, kag masiod, kag madakpan.

14 ś Busa magpamati sang polong sang GINOO, kamo nga mga tawong mayubiton, nga nagadumala sini nga katawohan nga yara sa Jerusalem.

15 Bangud nga nagsiling kamo, Nagpakigkatipan kami sa kamatayon, kag nagkasugot kami sang impierno; kon ang nagalapaw nga kalalat-an mag-agi, indi ini maglambut sa amon: kay ginhimo namon nga amon dalangpan ang kabutigan, kag nagpanago kami sa idalum sang pagkadimatuud:

16 ś Busa amo ini ang ginasiling sang Ginoong DIOS, Yari karon, nagabutang ako sa Zion nga sa sadsaran sing bato, bato nga natilawan, bilidhon nga bato sang pamag-ang, nga sadsaran nga malig-on: ang nagatoo indi magdali.

17 Kag himoon ko ang paghukom nga latid, kag ang pagkamatarung nga tonton: kag ang hielo nga daw bato magasilhig sang dalangpan sang kabutigan, kag ang mga tubig magalapaw sa duug nga palanagoan.

18 ś Kag ang inyo katipan sa kamatayon walaon, kag ang inyo kasugtanan sa impierno indi magapadayon; kon ang nagalapaw nga kalalat-an mag-agi, niyan ligson kamo sini.

19 Kutub sa tion nga mag-agi ini lambuton kamo sini: kay magaagi ini agaaga, sa adlaw kag sa gab-i: kag manginpagpaugtas sa paghangup lamang sang balita.

20 Kay ang higdaan malip-ot pa sa mauntayan sang tawo: kag ang habol makitid pa sa mapangalumbut niya sa sini.

21 Kay ang GINOO magatindug subong sang sa bukid nga Perasim, magasingkal sia subong sang sa nalupyakan sang Gabaon, agud nga mahimo niya ang iya buluhaton; ang iya makatilingala nga buluhaton; kag matigayon ang iya buhat, ang iya makatilingala nga buhat.

22 Busa karon dili kamo magmayubiton, agud nga indi pagbakuron ang inyo mga gapus: kay ang pagpangpapas nabatian ko gikan sa Ginoong DIOS sang mga kasoldadosan, nga tinapat sa ibabaw sang bug-os nga duta.

23 ś Dungga ninyo, kag pamatii ang akon tingug; magpamati, kag pamatii ang akon hambal.

24 Nagaarado bala sa pagpanggas ang manug-arado sa bug-os nga adlaw? ginabungkag niya bala kag ginakaras ang mga puga sang iya duta?

25 Kon matapan na niya ang kadaygan sini, wala bala niya ginasab-ug ang garbanso, kag ginasabwag ang comino, kag ginapanggas ang pangolong trigo kag ang sebada nga napat-ud kag ang espelta sa ila idas?

26 Kay ang iya Dios nagatudlo sa iya sing panibuut, kag nagatoon sa iya.

27 Kay ang mga garbanso wala ginalinas sang inuglinas nga galamiton, kag ang comino wala ginapaligis sa aliling sang karo; kondi ang mga garbanso ginapalpag sang sungkud, kag ang comino sang bilogon.

28 Ang mais nga tinapay ginaligis; bangud nga indi gid niya ini paglinason, ukon pagpus-on ini paagi sa aliling sang iya karo, ukon pagligison ini paagi sa iya mga manugkabayo.

29 Ini man nagagikan sa GINOO sang mga kasoldadosan, nga makatilingala sa laygay, kag lantip sa buluhaton.

KAPITULO 29

KAILO sa Ariel, sa Ariel, ang siudad diin nagpuyo si David! dugangi ninyo sing tuig sa tuig; magpatay sila sing mga halad.

2 Walay sapayan pakalisdon ko ang Ariel, kag may kabug-atan kag kasubo: kag ini manginsubong sang Ariel sa akon.

3 Kag magapahamtang ako sing kampo batok sa imo sa palibut, kag magakibon sa imo sing trinsera, kag magapatindug ako batok sa imo sing mga pamakud.

4 Kag ikaw paubson, kag magapamolong gikan sa duta, kag ang imo hambal mahinay gikan sa yab-ok, kag ang imo tingug manginsubong sang isa nga may kinilala nga espiritu, gikan sa duta, kag ang imo hambal magahutik gikan sa yab-ok.

5 Labut pa ang kadam-an sang imo mga dumuloong manginkaangay sa mapino nga yab-ok, kag ang kadam-an sang mga makakulugmat manginsubong sang labhang nga nagataliwan: hoo, sa hinali mahanabu ini sa pagpisok.

6 Ikaw duawon sang GINOO sang mga kasoldadosan nga may daguub, kag may linog, kag may daku nga kagahud, nga may bagyo kag unus, kag dabdab sang kalayo nga nagalamon.

7 ś Kag ang kadam-an sang tanan nga pungsud nga nagaaway batok sa Ariel, ang tanan nga nagaaway batok sa iya kag sa iya pamakud, kag nga nagapapiot sa iya, manginsubong sang damgo sang palanan-awon sa kagab-ihon.

8 Manginsubong ini sang gutum nga tawo nga nagadamgo, kag, yari karon, nagakaon sia; apang nagamata sia, kag ang iya kalag wala sing sulud: ukon subong sang nauhaw nga tawo nga nagadamgo, kag, yari karon, nagainum sia; apang nagamata sia, kag, yari karon, ginapunaw sia, kag ang iya kalag may kauhaw: mangin-amo ini ang kadam-an sang tanan nga pungsud, nga nagaaway batok sa bukid nga Zion.

9 ś Paghiorong kamo, kag magkatingala; magsininggit kamo, kag maghibi: mga hobog sila, apang indi sa alak; nagadulingduling sila, apang indi sa masingkal nga ilimnon.

10 Kay ang GINOO nag-ula sa inyo sang espiritu sang katologon nga hamook, kag nagpapiyong sang inyo mga mata: ang mga manalagna kag ang inyo mga manuggahum, ang mga manugpanan-aw gintabonan niya.

11 Kag ang palanan-awon sang tanan nanginsubong sa inyo sang mga polong sang libro nga ginselyohan, nga ginahatag sang mga tawo sa isa nga naton-an, nga nagasiling, Basaha ini, ginaampo ko sa imo: kag sia nagasiling, Indi ako makahimo; kay ginselyohan ini:

12 Kag ang libro gintugyan sa iya nga wala naton-an, nga nagasiling, Basaha ini, ginaampo ko sa imo: kag sia nagasiling, Wala ako maton-an.

13 ś Busa ang GINOO nagsiling, Sanglit nga ini nga katawohan nagapalapit sa akon sa ila baba, kag sa ila mga bibig nagatahud sa akon, apang nagpapalayo sang ila tagiposoon sa akon, kag ang ila kahadluk sa akon gintudlo paagi sa sogo sang mga tawo:

14 Busa, yari karon, magapadayon ako sa paghimo sing makatilingala nga buhat sa tunga sini nga katawohan, ang makatilingala nga buhat kag katanhagaan: kay ang kaalam sang ila maalam nga mga tawo mawala, kag ang paghangup sang ila mainandamon nga mga tawo malipdan.

15 Kailo sa ila nga nagatinguha sa pagtago sing madalum sang ila hinun-anon gikan sa GINOO, kag ang ila mga binuhatan yara sa kadudulman, kag nagasiling sila, Sin-o bala ang makakita sa aton? kag sin-o bala ang makahibalo sa aton?

16 Sa pagkamatuud ang pagpamaliskad ninyo sang mga butang kabigon subong sang lunang sang maninihon: kay magasiling bala ang buhat nahanungud sa iya nga naghimo sini, Wala niya ako paghimoa? ukon ang butang nga nahuman magasiling bala nahanungud sa iya nga naghuman sini, Wala sia sing paghangup?

17 Indi bala diotay na gid lang nga tion, kag ang Libano magamanginmabungahon nga latagon, kag ang latagon nga mabungahon kabigon nga talon?

18 ś Kag sa sinang adlaw ang bungul makabati sang mga polong sang libro, kag ang mga mata sang bulag makakita gikan sa kadulum, kag sa kadudulman.

19 Ang mapainubuson man magadugang sang ila kalipay sa GINOO, kag ang mga imol sa mga tawo magakalipay sa Balaan nga Isa sang Israel.

20 Kay ang makakulugmat ginapauntat, kag ang mayubiton ginapapas, kag ang tanan nga nagabantay nga sa kalautan ginautud:

21 Nga nagahimo sang tawo nga makasasala bangud sa polong, kag nagabutang sing siod tungud sa iya nga nagasabdong sa gawang, kag nagapapahigad sang matarung tungud sa butang nga wala sing pulus.

22 Busa amo ini ang ginasiling sang GINOO, nga nagtubus kay Abraham, nahanungud sang panimalay ni Jacob, Karon si Jacob indi na mahuya, kag indi na ang iya nawung magpanglapsi.

23 Apang kon makita niya ang iya mga anak, ang binuhatan sang akon mga kamut, sa tunga niya, pakabalaanon nila ang akon ngalan, kag pakabalaanon nila ang Balaan nga Isa ni Jacob, kag magakahadluk sa Dios sang Israel.

24 Sila man nga nagsayup sa espiritu magakilala sing paghangup, kag sila nga nagkumud magatoon sing doktrina.

KAPITULO 30

KAILO sa mabinatoon nga mga anak, nagasiling ang GINOO, nga nagahinun-anon, apang indi gikan sa akon; kag nga nagapanabon sing tabon, apang indi gikan sa akon espiritu, agud nga makadugang sila sing sala sa sala:

2 Nga nagalalakat sa pagdulhog sa Egipto, kag wala magpamangkot sa akon baba; sa pagpabakud sang ila kaugalingon sa kusug ni Faraon, kag sa pagsalig sa landong sang Egipto!

3 Busa ang kusug ni Faraon mangin-inyo kahuluy-an, kag ang pagsalig sa landong sang Egipto mangin-inyo kalibog.

4 Kay ang iya mga prinsipe yara sa Zoan, kag ang iya mga embajador nag-abut sa Hanes.

5 Sila tanan nahuya bangud sang katawohan nga indi makapulus sa ila, nga indi kabulig ukon kapuslanan, kondi kahuluy-an, kag dikadungganan man.

6 Ang lulan sang mga sapat sang bagatnan: pakadto sa duta sang kalisdanan kag kasakit, diin nagikan ang bataon kag tigulang nga leon, ang dalitan nga man-ug kag ang nagahingalayo nga nagalupad nga man-ug, ipakulo nila ang ila mga manggad sa mga abaga sang mga asno nga bataon, kag ang ila mga bahandi sa mga binuktotan sang mga camelyo, pakadto sa katawohan nga indi mapuslan nila.

7 Kay ang mga Egiptohanon magabulig sa wala sing pulus, kag sa wala sing katuyoan: busa nagtuaw ako nahanungud sini, Ang ila kusug amo ang magpahimonong.

8 ś Karon lakat, sulata ini sa tapitapi sa atubangan nila, kag isulat ini sa isa ka libro, agud nga ini manginsa tion nga palaabuton sa gihapon kag sa walay katapusan:

9 Nga ining katawohan mabinatoon, butigon nga mga anak, mga anak nga indi magpamati sa kasogoan sang GINOO:

10 Nga nagasiling sa mga manugpanan-aw, Dili kamo magtalan-aw; kag sa mga manalagna, Dili kamo magtagna sa amon sing mga butang nga matarung, magpamolong sa amon sing mga butang nga maayo, magtagna sing mga limbong:

11 Halin kamo sa dalanon, lipas kamo sa banas, kuhaa sa amon atubangan ang Balaan nga Isa sang Israel.

12 Busa amo ini ang ginasiling sang Balaan nga Isa sang Israel, Bangud nga ginatamay ninyo ini nga polong, kag nagasalig sa pagpigus kag katikoan, kag nagasandig sa sini:

13 Busa ini nga kalautan manginsa inyo subong sang bulwang nga madali na lang matiphag, nga nagaulbo sa mataas nga kuta, nga ang iya pagkatiphag nagaabut sing hinali sa isa ka tion.

14 Kag boongon niya ini subong sang pagboong sang isa ka suludlan sang maninihon nga gindugmok; indi sia magpugung: sa bagay nga sa iya mga tinipik wala sing makakita sing bika nga ikuha sing kalayo sa dapog, ukon isaluk sing tubig sa boho.

15 Kay amo ini ang ginasiling sang Ginoong DIOS, ang Balaan nga Isa sang Israel; Sa pagbalik kag sa pahuway maluwas kamo; sa kalinong kag sa pagsalig mangin dira ang inyo kusug: kag wala kamo magbuut.

16 Apang nagsiling kamo, Indi; kay magapalagyo kami sa mga kabayo; busa magapalagyo kamo: kag, Magasakay kami sa madasig; busa sila nga magalagas sa inyo manginmadasig.

17 Ang isa ka libo magapalagyo sa pagsabdong sang isa; sa pagsabdong sang lima magapalagyo kamo: tubtub nga mabilin kamo subong sang pinatindug nga palo sa putokputokan sang bukid, kag subong sang hayahay sa ibabaw sang bakolod.

18 ś Kag busa ang GINOO magahulat, agud nga magmainayohon sia sa inyo, kag busa pakataason sia, agud nga malooy sia sa inyo: kay ang GINOO Dios sang paghukom: bulahan tanan sila nga nagahulat sa iya.

19 Kay ang katawohan magapuyo sa Zion sa Jerusalem: indi na ikaw maghibi: mangin mainayohon gid sia sa imo sa tingug sang imo pagtuaw; kon makabati sia sini, sabton ka niya.

20 Kag bisan ang Ginoo nagahatag sa imo sang tinapay sang kalisdanan, kag sang tubig sang kapipit-an, apang ang imo mga manunudlo indi na pagpahalinon pakadto sa pamusud, kondi ang imo mga mata magatan-aw sang imo mga manunudlo:

21 Kag ang imo mga idulungug magapamati sang polong sa likod nimo, nga nagasiling, Ini amo ang dalan, lakat kamo sa sini, kon magliso kamo sa too, kag kon magliso kamo sa wala.

22 Dagtaan man ninyo ang taklap sang imo mga imahen nga tinigban nga pilak, kag ang durar sang imo mga imahen nga tinunaw nga bulawan: ihaboy mo sila subong sang hapin sang nagapamulanon; ikaw magasiling sa sini, Halin ka.

23 Niyan magahatag sia sing ulan tungud sa imo binhi, agud nga magasab-ug ikaw sini sa duta; kag sing kalan-on sang patubas sang duta, kag ini magatambok kag magabugana: sa sinang adlaw ang imo kahayupan magahalab sa malapad nga mga halalban.

24 Subong man ang mga baka kag ang mga asno nga tinday nga nagaarado sang duta magahalab sing matinlo nga kumpay, nga napahanginan sa pala kag sa inugpahangin.

25 Kag sa ibabaw sang tagsa ka mataas nga bukid, kag sa ibabaw sang tagsa ka bakolod nga mataas, manginmay mga suba kag mga sapa sang mga tubig sa adlaw sang daku nga pagpamatay, kon mapukan ang mga torre.

26 Labut pa ang kapawa sang bulan manginsubong sang kapawa sang adlaw, kag ang kapawa sang adlaw manginpito ka pilo, subong sang kapawa sa pito ka adlaw, sa adlaw nga bugkosan sang GINOO ang bulwang sang iya katawohan, kag bolngon ang napilasan sang ila pilas.

27 ś Yari karon, ang ngalan sang GINOO nagagikan sa malayo, nga nagadabdab sang iya kaakig, kag ang lulan sini mabug-at: ang iya mga bibig puno sang kaalipungut, kag ang iya dila subong sang kalayo nga nagalamon:

28 Kag ang iya ginhawa, subong sang nagaawas nga sapa, magalambut tubtub sa natunga sang liog, sa pag-ayag sang mga pungsud sa ayagan sang kadayawan: kag mangin may busal sa mga sulang sang katawohan, nga nagapasayup sa ila.

29 Manginmay ambahanon kamo, subong sang sa kagab-ihon kon ginahiwat ang balaan nga pandut nga solemne; kag kasadya sa tagiposoon, subong sang isa nga may lantoy nga nagakadto sa bukid sang GINOO, sa gamhanan nga Isa sang Israel.

30 Kag ipabati sang GINOO ang iya mahimayaon nga tingug, kag ipakita ang pagpatupa sang iya butkon, nga may kaalipungut sang iya kaakig, kag may dabdab sang kalayo nga nagalamon, nga may pagpanglapta, kag unus, kag ulan sang mga bato nga hielo.

31 Kay sa tingug sang GINOO papason ang Asiriahanon, nga nagpangbunal nga may bilogon.

32 Kag sa tagsa ka duug nga magaagi ang napat-ud nga sungkud, nga gamiton sang GINOO sa iya, updan ini sang tambor kag sang mga arpa: kag sa mga inaway nga nagabalabad magaaway sia paagi sini.

33 Kay ang Tofet gintangdo kutub pa sa dumaan; hoo, naaman ini tungud sa hari; ginhimo niya ini nga madalum kag daku: ang tumpok sini kalayo kag gatong nga madamu; ang ginhawa sang GINOO, kaangay sang ilig nga azufre, nagapadabdab sini.

KAPITULO 31

KAILO sa mga nagadulhog sa Egipto sa pagpabulig; kag nagasandig sa mga kabayo, kag nagasalig sa mga kangga, bangud nga madamu sila; kag sa mga manugkabayo, bangud nga sila tama ka kusug; apang wala sila nagatolok sa Balaan nga Isa sang Israel, ukon nagapangita sa GINOO!

2 Apang sia man maalam, kag magadala sing malaut, kag indi magbawi sang iya mga polong: kondi magatindug batok sa balay sang mga manughimo sing malaut, kag batok sa pagbulig sang mga nagahikot sing kalautan.

3 Karon ang mga Egiptohanon mga tawo, kag indi Dios; kag ang ila mga kabayo unud, kag indi espiritu. Kon untayon sang GINOO ang iya kamut, ang nagabulig mapukan, kag ang ginabuligan mapukan, kag sila tanan mawala sing tingub.

4 Kay amo ini ang nasiling sang GINOO sa akon, Subong sang leon kag bataon nga leon nga nagangurub sa ibabaw sang iya tinukub, kon tawgon ang kadam-an sang mga manugpahalab batok sa iya, indi sia mahadluk sa ila tingug, ukon magpaubus sang iya kaugalingon sa kagahud nila: sa amo ang GINOO sang mga kasoldadosan magapanaug sa pag-away tungud sa bukid nga Zion, kag tungud sa bakolod sini.

5 Subong sang kapispisan nga nagalupad, sa amo ang GINOO sang mga kasoldadosan magaapin sang Jerusalem; sa pag-apin man sia magaluwas sini; kag sa paglapaw sia magatipig sini.

6 ś Balik kamo sa iya, nga sa iya ang kaanakan sang Israel nagbato sing tuduk.

7 Kay sa sinang adlaw ipilak sang tagsa ka tawo ang iya mga diosdios nga pilak, kag ang iya mga diosdios nga bulawan, nga ginhimo sa inyo nga sala sang inyo kaugalingon nga mga kamut.

8 ś Niyan mapukan ang Asiriahanon paagi sa espada, indi sa tawo nga gamhanan; kag ang espada, nga indi sa tawo nga kubus, magalamon sa iya: apang magapalagyo sia gikan sa espada, kag ang iya mga pamatan-on nga lalaki malutos.

9 Kag sia magataliwan pakadto sa iya pamakud bangud sang kahadluk, kag ang iya mga prinsipe malisang sa hayahay, nagasiling ang GINOO, nga ang iya kalayo yara sa Zion, kag ang iya horno sa Jerusalem.

KAPITULO 32

YARI KARON, ang isa ka hari magahari sa pagkamatarung, kag ang mga prinsipe magagahum sa katarungan.

2 Kag ang isa ka tawo manginsubong sang palalipdan sa hangin, kag palanagoan sa unus; subong sang mga ilig sang tubig sa duug nga kigas, subong sang landong sang isa ka daku-daku nga bato sa duta nga makalalapyo.

3 Kag ang mga mata sang mga makakita indi magdulum, kag ang mga idulungug sang mga nagapamati magatalupangud.

4 Ang tagiposoon man sang madalas magahangup sing ihibalo, kag ang dila sang mga ang-ang mahanda sa pagpamolong sing maathag.

5 Ang tampalasan nga tawo indi na pagtawgon nga dungganon, ukon ang kuripot pagtawgon nga maalwan.

6 Kay ang tampalasan nga tawo magapamolong sing tampalas, kag ang iya tagiposoon magahikot sing kalautan, sa paggawi sing pagkasalimpapaw, kag sa pagmitlang sing sayup batok sa GINOO, sa pagpakawalay sulud sang kalag sang ginagutum, kag pakulangan niya ang ilimnon sang ginauhaw.

7 Ang mga galamiton man sang kuripot malaut: sia nagapahito sing malaut nga mga kalalangan sa paglaglag sang mga imol sa mga polong nga binutig, bisan kon ang nawad-an nagapamolong sing matarung.

8 Apang ang dungganon nagapahito sing dungganon nga mga butang; kag sia magapadayon sa mga butang nga dungganon.

9 ś Tindug, kamo nga mga babaye nga matawhay; pamatii ang akon tingug, kamo nga mga anak nga babaye nga mapatumbayaon; dungga ang akon hambal.

10 Sa madamung adlaw kag tinuig gamohon kamo, kamo nga mapatumbayaon nga mga babaye: kay ang patubas sang ubas mapaslawan, ang pagdamisag indi mag-abut.

11 Magkurug, kamo nga mga babaye nga matawhay; magkalisud, kamo nga mga mapatumbayaon: uba kamo, kag maghublas kamo, kag magtampion sing panapton nga sako sa inyo mga balikawang.

12 Magapanalabiton sila tungud sa mga soso, tungud sa mga latagon nga matahum, tungud sa ubas nga mabungahon.

13 Sa duta sang akon katawohan magatubo ang mga tunuk kag mga sapinit; hoo, sa ibabaw sang tanan nga balay sang kalipay sa siudad nga malipayon:

14 Kay ang mga palacio pagabayaan; ang siudad sang kadam-an pagabayaan; ang pamakud kag ang mga torre mga manginlungib sing dayon, kalipay sang mga asno nga talonon, halalban sang mga panong;

15 Tubtub nga ipasagahay sa aton ang espiritu gikan sa hitaas, kag ang kamingawan manginmabungahon nga latagon, kag ang latagon nga mabungahon kabigon subong sang talon.

16 Niyan ang katarungan magapuyo sa kamingawan, kag ang pagkamatarung magapabilin sa latagon nga mabungahon.

17 Kag ang buhat sang pagkamatarung manginpaghidait; kag ang patubas sang pagkamatarung manginkalinong kag pagkalig-on nga dayon.

18 Kag ang akon katawohan magapuyo sa puluy-an nga makidaiton, kag sa mga puluy-an nga malig-on, kag sa mga palahuwayan nga malinong;

19 Kon magaulan sing mga hielo nga daw bato, nga nagatupa sa talon; kag ang siudad magamanubo sa manubo nga duug.

20 Bulahan kamo nga nagasab-ug sa luyo sang tanan nga mga tubig, nga nagapalagaw dira sang mga tiil sang baka kag sang asno.

KAPITULO 33

KAILO sa imo nga nagapang-ati, kag wala ka maatihan; kag nagapahito sing mabudhion, kag sila wala nagpahito sing mabudhion sa imo! kon mag-untat ka sa pagpang-ati, atihan ka; kag kon mag-untat ka sa pagpahito sing mabudhion, sila magapahito sing mabudhion sa imo.

2 O GINOO, magmaayohon ka sa amon; naghulat kami sa imo: magmanginbutkon ka nila sa tagsa ka aga, mangin-amon kaluwasan man sa tion sang kagamo.

3 Sa kagahud sang kagubut ang katawohan nagpalagyo; sa pagbayaw sang imo kaugalingon ang mga pungsud nag-alaplaag.

4 Kag ang inyo inatihan tiponon subong sang pagtipon sang atatalo: subong sang pagluksolukso sang mga apan, magalukso sia sa ila.

5 Ang GINOO ginapakataas; kay nagapuyo sia sa hitaas: ginpuno niya ang Zion sing paghukom kag pagkamatarung.

6 Kag ang kaalam kag ihibalo mangin kalig-onan sang imo mga tion, kag kusug sang kaluwasan: ang kahadluk sa GINOO amo ang iya bahandi.

7 Yari karon, ang ila mga isganan magasinggit sa gowa: ang mga embajador sang paghidait magahibi sing mapait.

8 Ang dakung mga dalan mamingaw, ang manlalakat nga tawo nagauntat: ginbungkag niya ang katipan, ginhikayan niya ang mga siudad, wala sia sing tawo nga ginapasulabi.

9 Nagalalaw ang duta kag nagakag-as: ang Libano nahuy-an kag ginpulud: ang Saron kaangay sang kamingawan; kag ang Basan kag ang Carmelo nagataktak sang ila mga bunga.

10 Karon magatindug ako, nagasiling ang GINOO; karon pagabayawon ako; karon pagapakataason ko ang akon kaugalingon.

11 Magapanamkon kamo sing labhang, magaanak kamo sing ginalaban: ang inyo ginhawa, subong sang kalayo, magalamon sa inyo.

12 Kag ang katawohan manginsubong sa mga pagsonog sang apog: subong sang mga tunuk nga ginatapas, sonogon sila sa kalayo.

13 ś Pamati, kamo nga yara sa malayo, sang akon nahimo; kag, kamo nga malapit, kilalaha ang akon gahum.

14 Ang mga makasasala sa Zion nahadluk; ang kahadluk nagkibot sang mga salimpapaw. Sin-o bala sa aton ang magapuyo sa nagalamon nga kalayo? sin-o bala sa aton ang magapuyo sa dayon nga mga pagdabdab?

15 Ang nagalakat sang matarung, kag nagapamolong sing matadlong; ang nagatamay sang daug sang mga pagpigus, nga nagawaslik sang iya mga kamut nga indi magbaton sang mga hamham, nga nagasungsung sang iya mga dulunggan nga indi magpamati sang dugo, kag nagapiyong sang iya mga mata nga indi magtolok sa malaut;

16 Sia magapuyo sa mataas: ang iya duug sang pangapin amo ang mga pamakud sang mga dakung bato: ang kalan-on ihatag sa iya; ang iya mga tubig indi makulang.

17 Ang imo mga mata makakita sa hari sa iya katahuman: magatolok sila sa duta nga tama kalayo.

18 Ang imo tagiposoon magapamalandong sa kakugmat. Diin bala ang escriba? diin bala ang manugbaton? diin bala ang nag-isip sang mga torre?

19 Indi ka makakita sang mabangis nga katawohan, katawohan nga may madalum pa sing hambal sang sa imo mahantupan; nga may ang-ang nga hambal, nga indi mo mahangpan.

20 Magtolok sa Zion, ang siudad sang aton solemne nga mga pandut: ang imo mga mata makakita sang Jerusalem, nga isa ka puluy-an nga malinong, tabernakulo nga indi pagbungkagon: nga ang iya mga palpal indi gid paggabuton, kag ang bisan ano sang iya mga banting indi pagbugtoon.

21 Apang didto ang mahimayaon nga GINOO mangin isa ka duug sang masangkad nga mga suba kag mga ilig sa aton; nga sa ila indi magasulud ang sakayan nga may mga gaud, kag indi magaagi ang gamhanan nga sakayan dira.

22 Kay ang GINOO aton hukom, ang GINOO aton manughatag sing kasogoan, ang GINOO aton hari; sia magaluwas sa aton.

23 Ang imo mga banting nagtugak; indi sila makapalig-on sang puno sang ila palo, indi sila makapahumlad sang layag: niyan ginbahinbahin ang inatihan sang dakung inagaw; ang mga piang nagakuha sang inatihan.

24 Kag ang pumuluyo indi magsiling, Nagamasakit ako: ang katawohan nga nagapuyo sa sini patawaron sang ila kalautan.

KAPITULO 34

PALAPIT, kamo nga mga pungsud, sa pagpamati; kag magpamati, kamo nga katawohan: magpamati ang duta, kag ang tanan nga yari sa sini; ang kalibutan, kag ang tanan nga butang nga nagagowa gikan sini.

2 Kay ang kaalipungut sang GINOO yara sa tanan nga pungsud, kag ang iya kasingkal yara sa bug-os nilang mga kasoldadosan: ginlaglag niya sila sing bug-os, gintugyan niya sila sa palatyan.

3 Ang pinatay sa ila man ipilak, kag ang ila kabaho magausbong gikan sa ila mga bangkay, kag ang kabukiran matunaw sang dugo nila.

4 Kag ang bug-os nga panong sang langit matunaw, kag ang mga langit lokoton subong sang rolyo sang libro: kag ang bug-os nilang panong maholog, subong sang dahon nga nagakataktak gikan sa balagon, kag subong sang nagakataktak nga higos gikan sa kahoy nga higuera.

5 Kay ang akon espada papaligosan sa langit: yari karon, magatupa ini sa Idumea, kag sa katawohan sang akon pinapakamalaut, sa paghukom.

6 Ang espada sang GINOO puno sing dugo, ginapatambok ini sing katambok, kag sang dugo sang mga cordero kag sang mga kanding, sang sapay sang mga batobato sang mga carnerong lalaki: kay ang GINOO may halad sa Bozra, kag may dakung pagpamatay sa duta sang Idumea.

7 Ang mga unicorn magadulhog upud sa ila, kag ang mga tinday nga baka nga lalaki upud sa mga kabakahan nga lalaki; kag ang ila duta humogon sa dugo, kag ang ila yab-ok ginpatambok sing katambok.

8 Kay ini among adlaw sang pagtimalus sang GINOO, kag tuig sang mga pagbalus tungud sa kasaba sang Zion.

9 Kag ang mga ilig sini mahimo nga balaw, kag ang iya yab-ok nga azufre, kag ang iya duta manginbalaw nga nagadabdab.

10 Indi ini mapalong sa gab-i ukon sa adlaw; magatub-ok sing dayon ang iya aso: kutub sa kaliwatan pa kaliwatan magamamingaw ini; wala gid sing magaagi sini sa gihapon kag sa gihapon.

11 ś Kondi ang uwak sa dagat kag ang herisa magatag-iya sini; ang bukaw man kag ang uwak magapuyo sa sini: kag untayon niya sa ibabaw sini ang latid sang kagumon, kag ang mga bato sang pagkawala.

12 Tawgon nila ang mga dungganon sini sa ginharian, apang wala gid sing isa didto, kag ang tanan niyang prinsipe manginwalay ano man.

13 Kag ang mga tunuk magatubo sa iya mga palacio, sa iya mga pamakud may katunukan kag mga ragiwriw: kag manginpuluy-an ini sang mga dragon, kag luwang sang mga bukaw.

14 Ang mga sapat nga talonon sang desierto magakilita man upud sang mga talonon nga mga sapat sang pulo, kag ang satyr magatawag sa iya kaupud; ang bukaw nga nagaorok magahukmong man didto, kag makakita sia sing duug nga palahuwayan.

15 Didto magapugad ang dakung bukaw, kag magaitlog, kag magabuto, kag magatipon sa idalum sang landong niya: didto magatipon man ang mga buitre, ang tagsatagsa upud sa iya minyo.

16 ś Usisaa ninyo sa libro sang GINOO, kag basaha: walay isa sini sa ila nga madula, wala gid sing mawad-an sang iya minyo: kay ang akon baba, ini nagsogo, kag ang iya espiritu, ini nagtipon sa ila.

17 Kag nagpapalad sia tungud sa ila, kag ang iya kamut nagbahinbahin sini sa ila sa linatid: panag-iyahan nila ini sing dayon, sa kaliwatan pa kaliwatan magapuyo sila didto.

KAPITULO 35

ANG kamingawan kag ang duug nga baw-ing magakasadya tungud sa ila; kag ang desierto magakalipay, kag magapamulak subong sang rosa.

2 Magapamulak ini sing bugana, kag magakalipay nga may kasadya kag inamba: ang himaya sang Libano ihatag sa sini, ang pagkahalangdon sang Carmelo kag Saron, makita nila ang himaya sang GINOO, kag ang pagkahalangdon sang Dios naton.

3 ś Pabaskuga ninyo ang mga kamut nga maluya, kag lig-ona ang mga tuhud nga maluya.

4 Isiling sa mga mahadlukon sing tagiposoon, Magpakabakud, dili mahadluk: yari karon, ang inyo Dios magakari nga may pagtimalus, ang Dios gid nga may balus; sia magakari kag magaluwas sa inyo.

5 Niyan ang mga mata sang mga bulag pamuklaton, kag ang mga idulungug sang mga bungul mabuksan.

6 Niyan ang tawong piang magalumpat subong sang usa nga lalaki, kag ang dila sang apa magaamba: kay ang mga tubig magagowa sa kamingawan, kag ang mga ilig sa desierto.

7 Kag ang kigas nga duta manginlinaw, kag ang uhaw nga duta mangin mga tuburan sang tubig: sa puluy-an sang mga dragon, diin sila nagaluko, manginhilamon nga may mga tigbaw kag mga tabun-ak.

8 Kag manginmay dakung dalan didto, kag alagyan, kag tawgon ini nga Ang alagyan sang pagkabalaan; ang dimatinlo indi makaagi sa sini; kondi ini manginsa ila sini: ang manlalakat nga mga tawo, bisan pa mga buangbuang, indi magatalang sa sini.

9 Manginwalay leon didto, ukon bisan anong sapat nga manunukub nga magataklad sa sini, indi ini makita didto; apang ang mga tinubus magalakat didto:

10 Kag ang mga ginawad sang GINOO magabalik, kag magaabut sa Zion nga may mga inamba kag may dayon nga kalipay sa ila mga olo: magaagum sila sing kasadya kag kalipay, kag ang kasubo kag ang panghayhay magapalagyo.

KAPITULO 36

KARON nahanabu sa ikapulog apat nga tuig ni haring Ezequias, nga si Senaquerib nga hari sang Asiria nagtaklad batok sa tanan nga napamakuran nga siudad sa Juda, kag gin-agaw sila.

2 Kag ang hari sang Asiria nagpadala kay Rabsaces nga may dakung kasoldadosan gikan sa Laquis pa Jerusalem kay haring Ezequias. Kag nagtindug sia sa luyo sang iligan sang naibabaw nga ponong sa dakung dalan sang latagon sang manugbunak sang tela.

3 Niyan naggowa pakadto sa iya si Eliaquim, anak nga lalaki ni Hilcias, nga tulugyanan sang panimalay, kag si Sebna nga escriba, kag si Joa, anak nga lalaki ni Asaf, ang manugsulat sang mga maragtas.

4 ś Kag si Rabsaces nagsiling sa ila, Isiling ninyo karon kay Ezequias, Amo ini ang ginasiling sang dakung hari, ang hari sang Asiria, Ano bala nga pagsalig ini nga imo ginasaligan?

5 Nagasiling ako, ikaw nagasiling, (apang mga polong lamang sila nga walay pulus) may laygay ako kag kusug nga sa inaway: karon sa kay sin-o ka bala nagasalig, nga nagaribuk ka sa akon?

6 Yari karon, nagasalig ka sa sungkud sining ginbali nga tabun-ak, sa Egipto; nga kon magpanukud sa sini ang isa ka tawo, magadulut ini sa iya kamut, kag magalapus sa sini: subong sini si Faraon nga hari sang Egipto sa tanan nga nagasalig sa iya.

7 Apang kon ikaw magsiling sa akon, Kami nagasalig sa GINOO nga amon Dios: indi bala amo sia, nga ang iya mataas nga mga duug kag ang iya mga halaran ginkuha ni Ezequias, kag nagsiling sa Juda kag sa Jerusalem, Magsimba kamo sa atubangan sini nga halaran?

8 Busa karon, ginaampo ko sa imo, maghatag ka sing mga kalig-onan sa akon agalon nga hari sang Asiria, kag hatagan ko ikaw sing duha ka libo ka kabayo, kon makasarang ka sa imo bahin sa pagbutang sing mga manugsakay sa ila.

9 Paano bala niyan ang pagpatalingi mo sang nawung sang isa ka kapitan sang labi kakubus sang mga alagad sang akon agalon, kag magsalig ka sa Egipto tungud sa mga kangga kag sa mga manugkabayo?

10 Kag nagataklad bala ako karon nga wala ang GINOO batok sini nga duta sa paglaglag sini? ang GINOO nagsiling sa akon, Taklad ka batok sini nga duta, kag laglaga ini.

11 ś Niyan nagsiling si Eliaquim kag si Sebna kag si Joa kay Rabsaces, Ipamolong, ginaampo ko sa imo, sa imo mga alagad sa Siriahanon nga hambal; kay makahangup kami sini: kag dili magpamolong sa amon sa hambal sang mga Judio, sa mga idulungug sang katawohan nga yara sa kuta.

12 ś Apang si Rabsaces nagsiling, Ginpadala bala ako sang akon agalon sa imo agalon kag sa imo sa pagpamolong sini nga mga polong? wala bala niya ako pag-ipadala sa mga tawo nga nagalingkod sa kuta, agud nga magkaon sila sang ila kaugalingon nga higko, kag sa pag-inum sang ila kaugalingon nga ihi upud sa inyo?

13 Niyan si Rabsaces nagtindug, kag nagsinggit sa matonog nga tingug sa hambal sang mga Judio, kag nagsiling, Pamati kamo sang mga polong sang dakung hari, ang hari sang Asiria.

14 Amo ini ang ginasiling sang hari, Dili pagpalimbonga sa inyo si Ezequias: kay indi sia makasarang sa pagluwas sa inyo.

15 Kag dili magpasalig si Ezequias sa inyo sa GINOO, nga nagasiling, Sa pagkamatuud ang GINOO magaluwas sa aton: ini nga siudad indi pag-ihatag sa kamut sang hari sang Asiria.

16 Dili kamo magpamati kay Ezequias: kay amo ini ang ginasiling sang hari sang Asiria, Magpakighisugut kamo sa akon paagi sa regalo, kag maggowa pakari sa akon: kag magkaon kamo ang tagsatagsa gikan sa iya ulubasan, kag ang tagsatagsa gikan sa iya higuera, kag mag-inum kamo ang tagsatagsa gikan sa iya kaugalingon nga tanki;

17 Tubtub nga magkari ako kag magdala sa inyo sa duta kaangay sang inyo kaugalingon nga duta, duta sang uyas kag alak, duta sang kalan-on kag mga ulubasan.

18 Mag-andam kamo basi buyukon kamo ni Ezequias, nga nagasiling, Ang GINOO magaluwas sa aton. May bisan sin-o bala sang mga dios sang mga pungsud nga nagluwas sang iya duta gikan sa kamut sang hari sang Asiria?

19 Diin bala ang mga dios sang Hamat kag Arpad? diin bala ang mga dios sang Sefarvaim? kag naluwas bala nila ang Samaria gikan sa akon kamut?

20 Sin-o bala sila sa tunga sang tanan nga dios sini nga mga duta, nga nagluwas sang ila duta sa akon kamut, nga ang GINOO magaluwas sa akon kamut sang Jerusalem?

21 Apang naghipus sila, kag wala magsabat sa iya sing polong: kay ang sogo sang hari amo, nga nagasiling, Dili sia pagsabta.

22 ś Niyan si Eliaquim, nga anak nga lalaki ni Hilcias, nga tulugyanan sang panimalay, kag si Sebna nga escriba, kag si Joah, ang anak nga lalaki ni Asaf, ang manugsulat sang mga maragtas, nag-abut kay Ezequias nga nakusnit ang ila mga panapton, kag nagsugid sa iya sang mga polong ni Rabsaces.

KAPITULO 37

KAG nahanabu, sang pagkabati sini ni haring Ezequias, nga ginkusnit niya ang iya mga panapton, kag nagpanabon sia sing panapton nga sako, kag nagsulud sa balay sang GINOO.

2 Kag ginpadala niya si Eliaquim, nga tulugyanan sang panimalay, kag si Sebna nga escriba, kag ang mga tigulang sang mga pari nga nagpanabon sing panapton nga sako, kay Isaias nga manalagna nga anak nga lalaki ni Amoz.

3 Kag nagsiling sila sa iya, Amo ini ang ginasiling ni Ezequias, Ining adlaw adlaw sang kagamo, kag sang pagsabdong, kag sang pagpasipala: kay ang mga anak inugbun-ag na, kag wala sing kusug sa pagpatawo.

4 Ayhan ang GINOO nga imo Dios magapamati sang mga polong ni Rabsaces, nga ginpadala sang hari sang Asiria nga iya agalon sa pagtampalas sang Dios nga buhi, kag magasabdong sang mga polong nga nabatian sang GINOO nga imo Dios: busa bayawa ang imo pangamuyo tungud sa salin nga nabilin.

5 Gani nag-abut ang mga alagad ni haring Ezequias kay Isaias.

6 ś Kag si Isaias nagsiling sa ila, Amo ini ang isiling ninyo sa inyo agalon, Amo ini ang ginasiling sang GINOO, Dili magkahadluk sa mga polong nga nabatian mo, nga ginpasipala sa akon sang mga alagad sang hari sang Asiria.

7 Yari karon, magapadala ako sa iya sang isa ka kalalat-an, kag magapamati sia sing sugidsugid, kag magabalik sia sa iya kaugalingon nga duta; kag ipapukan ko sia paagi sa espada sa iya kaugalingon nga duta.

8 ś Gani nagbalik si Rabsaces, kag nakita ang hari sang Asiria nga nagapakig-away batok sa Libna: kay sia nakabati nga nagtaliwan sia sa Laquis.

9 Kag nakabati sia sang nasiling nahanungud kay Tirhaca nga hari sang Etiopia, Nagagowa sia sa pagpakig-away sa imo. Kag sang pagkabati niya sini, nagpadala sia sing mga manugbalita kay Ezequias, nga nagasiling,

10 Amo ini ang ipamolong ninyo kay Ezequias nga hari sang Juda, nga nagasiling, Dili ka magpalimbong sa imo Dios, nga ginasaligan mo, nga nagasiling, Ang Jerusalem indi pag-ihatag sa kamut sang Asiria.

11 Yari karon, ikaw nakabati sang ginhimo sang mga hari sang Asiria sa tanan nga duta sa paglaglag sa ila sing bug-os; kag maluwas ka bala?

12 Naluwas bala sila sang mga dios sang mga pungsud, nga ginlaglag sang akon mga kaamayan, subong sang Gosan, kag Haran, kag Resef, kag sang kaanakan sang Eden nga didto sa Telassar?

13 Diin bala ang hari sang Hamat, kag ang hari sang Arpad, kag ang hari sang siudad sang Sefarvaim, sang Hena, kag sang Iva?

14 ś Kag ginbaton ni Ezequias ang sulat sa kamut sang mga manugbalita, kag ginbasa ini: kag si Ezequias nagsaka sa balay sang GINOO, kag ginhumlad ini sa atubangan sang GINOO.

15 Kag si Ezequias nagpangamuyo sa GINOO, nga nagasiling,

16 O GINOO sang mga kasoldadosan, ang Dios sang Israel, nga nagapuyo sa ulut sang mga querubin, ikaw amo ang Dios, ikaw gid lamang, sang tanan nga ginharian sang duta: ikaw ang naghimo sang langit kag sang duta.

17 Ilingig ang imo idulungug, O GINOO, kag magpamati; muklata ang imo mga mata, O GINOO, kag magtan-aw: kag magpamati sang tanan nga polong ni Senaquerib, nga nagpadala sa pagtampalas sang Dios nga buhi.

18 Sa pagkamatuud, GINOO, ang mga hari sang Asiria naglaglag sang tanan nga pungsud, kag sang ila mga duta,

19 Kag nagdap-ong sang ila mga dios sa kalayo: kay indi sila mga dios, kondi buhat sang mga kamut sang mga tawo, kahoy kag bato: busa ginlaglag nila sila.

20 Busa karon, O GINOO nga amon Dios, luwasa kami sa iya kamut, agud nga ang tanan nga ginharian sang duta makakilala nga ikaw amo ang GINOO, ikaw gid lamang.

21 ś Niyan ginpadal-an ni Isaias nga anak nga lalaki ni Amoz si Ezequias, nga nagasiling, Amo ini ang ginasiling sang GINOONG Dios sang Israel, Sanglit nga nagpangamuyo ka sa akon batok kay Senaquerib nga hari sang Asiria:

22 Ini amo ang polong nga ginpamolong sang GINOO nahanungud sa iya; Ang ulay, ang babaye nga anak sang Zion, nagtamay sa imo, kag nagkadlaw sa pagyagota sa imo; ang babaye nga anak sang Jerusalem naglungolungo sang iya olo sa imo.

23 Sin-o bala ang imo gintampalas kag ginpasipalahan? kag batok kay sin-o bala ginbayaw mo ang imo tingug, kag ginbayawan mo sang imo mga mata sa hitaas? batok sa Balaan nga Isa sang Israel.

24 Paagi sa imo mga alagad gintampalas mo ang Ginoo, kag ikaw nagsiling, Sa kadam-an sang akon mga kangga nagataklad ako sa kataasan sang mga bukid, sa mga kilid sang Libano; kag pudlon ko ang mataas nga mga cedro sini, kag ang pili nga mga abeto sini: kag magasulud ako sa kataasan sang iya dulunan, kag sa talon sang iya Carmel.

25 Ako nakakutkut, kag nakainum sing tubig; kag sa dapadapa sang akon mga tiil ginpamala ko ang tanan nga suba sang nakibon nga mga duug.

26 Wala ka bala makabati sing madugay na, kon paano ang paghimo ko sini; kag sa mga tion nga dumaan, nga ginhuman ko ini? karon napahanabu ko ina, nga mangin-imo ang paglaglag sang mga siudad nga napamakuran sa mga tinumpok sang kagulub-an.

27 Busa ang ila mga pumuluyo diotay sing gahum, nahanguyusan sila kag nagasalimuang: subong sila sang hilamon sang latagon, kag subong sang ulutanon nga malagtum, subong sang hilamon sa mga atop, kag subong sang uyas nga nakigas sa wala pa ini maggulang.

28 Apang nahibaloan ko ang imo puluy-an, kag ang imo paggowa, kag ang imo pagsulud, kag ang imo pagsingkal batok sa akon.

29 Bangud ang imo pagsingkal batok sa akon, kag ang imo kagaruk, nagalambut sa akon mga idulungug, busa ibutang ko ang akon kaw-it sa imo ilong, kag ang akon busal sa imo mga bibig, kag ibalik ko ikaw sa dalanon nga gin-agihan mo.

30 Kag ini mangin tanda sa imo, Magakaon kamo sa sining tuig sinang nagatubo sa iya kaugalingon; kag sa ikaduhang tuig sinang nagatubo sa amo: kag sa ikatlong tuig magsab-ug kamo, kag mag-ani, kag magtanum sang mga ulubasan, kag magkaon sang bunga sini.

31 Kag ang salin nga nakapalagyo sang panimalay ni Juda magapanggamut liwat paidalum, kag magapamunga paibabaw:

32 Kay gikan sa Jerusalem magagowa ang isa ka salin, kag gikan sa bukid nga Zion sila nga magapalagyo: ang kakugi sang GINOO sang mga kasoldadosan magahimo sini.

33 Busa amo ini ang ginasiling sang GINOO nahanungud sa hari sang Asiria, Indi sia magasulud sa sining siudad, ukon magapana sing baslay didto, ukon magakari nga may mga taming sa atubangan sini, ukon magatalampok sing bungyud batok sini.

34 Sa dalan nga gin-agihan niya, paagi sa amo magabalik sia, kag indi sia magasulud sa sining siudad, nagasiling ang GINOO.

35 Kay apinan ko ining siudad sa pagluwas sini tungud sa akon kaugalingon, kag tungud kay David nga akon alagad.

36 Niyan ang anghel sang GINOO naggowa, kag nagpamatay sa kampo sang mga Asiriahanon sing isa ka gatus kag kawaloan kag lima ka libo: kag sang pagbangon nila sing aga pa, yari karon, sila tanan mga patay nga bangkay.

37 ś Gani si Senaquerib nga hari sang Asiria nagtaliwan, kag naglakat kag nagbalik, kag nagpuyo sa Ninive.

38 Kag nahanabu, sang nagasimba sia sa balay ni Nisroc nga iya dios, nga si Adramelec kag si Sarezer nga iya mga anak nga lalaki nagpatay sa iya sa espada; kag nagpalagyo sila pakadto sa duta sang Armenia: kag naghari nga tal-us niya si Esar-hadon nga iya anak nga lalaki.

KAPITULO 38

SA sadtong mga adlaw si Ezequias nagmasakit nga sa kamatayon. Kag nag-abut sa iya si Isaias nga manalagna nga anak nga lalaki ni Amoz, kag nagsiling sa iya, Amo ini ang ginasiling sang GINOO, Ipahamtang sing nagakaigo ang imo panimalay: kay mapatay ka, kag indi mabuhi.

2 Niyan si Ezequias nag-atubang sa dingding, kag nagpangamuyo sa GINOO,

3 Kag nagsiling, Dumduma karon, O GINOO, ginapakilooy ko sa imo, kon paano ang paglakat ko sa atubangan mo sa kamatooran kag himpit nga tagiposoon, kag naghimo sinang maayo sa imo itololok. Kag si Ezequias naghibi sing tama.

4 ś Niyan nag-abut ang polong sang GINOO kay Isaias, nga nagasiling,

5 Lakat, kag isiling kay Ezequias, Amo ini ang ginasiling sang GINOO, ang Dios ni David nga imo amay, Napamatian ko ang imo pangamuyo, nakita ko ang imo mga luha: yari karon, dugangan ko ang imo mga adlaw sing napulog lima ka tuig.

6 Kag luwason ko ikaw kag ining siudad sa kamut sang hari sang Asiria: kag apinan ko ining siudad.

7 Kag ini mangintanda sa imo gikan sa GINOO, nga himoon sang GINOO ining butang nga iya ginpamolong;

8 Yari karon, pabalikon ko sing napulo ka alintaga ang landong sang mga alintaga, nga nagpaubus sa taknaan ni Acaz paagi sa adlaw. Gani ang adlaw nagbalik sing napulo ka alintaga, nga sa sining mga alintaga nagpaubus ini.

9 ś Ang sinulat ni Ezequias nga hari sang Juda, sang nagmasakit sia, kag nag-ayo sa iya masakit:

10 Nagsiling ako sa hingapusan sang akon mga adlaw, Magakadto ako sa mga gawang sang lulubngan: nawad-an ako sa nabilin sang akon mga tuig.

11 Nagsiling ako, Indi ko makita ang GINOO, ang GINOO gid, sa duta sang mga buhi: indi na ako makakita sing tawo upud sa mga pumuluyo sang kalibutan.

12 Ang akon pang-edaron nagataliwan, kag ginhalin sa akon subong sang layanglayang sang manugpahalab: gingutab ko ang akon kabuhi kaangay sang manughabol: sia magagutab sa akon paagi sa makakalag-as nga sakit: kutub sa adlaw tubtub sa gab-i tapuson mo ako.

13 Nagpanghunahuna ako tubtub sa aga, nga, subong sang leon, sa amo balion niya ang tanan kong tul-an: kutub sa adlaw tubtub sa gab-i tapuson mo ako.

14 Kaangay sang dugwak ukon sang salimbabatang, naghuni ako: nagnguynguy ako subong sang pating: ang akon mga mata nagadulum sa pagtangla: O GINOO, ginapigus ako; tabangi ako.

15 Ano bala ang isiling ko? nagpamolong sia sa akon, kag sia gid ang naghimo sini: magalakat ako sing maligdong sa tanan kong tuig sa kapaitan sang akon kalag.

16 O Ginoo, paagi sining mga butang nagakabuhi ang mga tawo, kag sa kabug-osan sining mga butang yara ang kabuhi sang akon espiritu: busa ayoha ako, kag pakabuhia ako.

17 Yari karon, tungud sa paghidait may daku ako nga kapaitan: apang tungud sa paghigugma sa akon kalag ginluwas mo ini sa boho sang kaduluntan: kay ginpilak mo sa imo likod ang tanan nakon nga sala.

18 Kay ang lulubngan indi makadayaw sa imo, ang kamatayon indi makasaolog sa imo: ang mga nagapanaug sa boho indi makalaum sa imo kamatooran.

19 Ang buhi, ang buhi, sia magadayaw sa imo, subong sang ginahimo ko karon nga adlaw: ang amay sa mga anak magapakilala sang imo kamatooran.

20 Ang GINOO handa sa pagluwas sa akon: busa magaamba kita sang akon mga ambahanon sa mga tolonggon nga may cuerdas sa tanan nga adlaw sang aton kabuhi sa balay sang GINOO.

21 Kay si Isaias nagsiling, Magkuha sila sing isa ka pighol nga higos, kag ihampol ini sa hubag, kag magaayo sia.

22 Si Ezequias man nagsiling, Ano bala ang tanda nga magasaka ako sa balay sang GINOO?

KAPITULO 39

SA sadtong tion si Merodac-baladan nga lalaking anak ni Baladan, hari sang Babilonia, nagpadala sing mga sulat kag regalo kay Ezequias: kay nakabati sia nga nagmasakit sia, kag nag-ayo.

2 Kag si Ezequias nalipay sa ila, kag ginpakita sa ila ang balay sang iya bilidhon nga mga butang, ang pilak, kag ang bulawan, kag ang mga pahumut, kag ang bilidhon nga ihalaplas, kag ang bug-os nga balay sang iya hinganiban, kag ang tanan nga nakita sa iya mga bahandi: walay bisan ano sa iya balay, ukon sa bug-os niyang ginsakpan, nga wala mapakita ni Ezequias sa ila.

3 ś Niyan nag-abut si Isaias nga manalagna kay haring Ezequias, kag nagsiling sa iya, Ano bala ang ginsiling sining mga tawo? kag diin bala sila maghalin pakari sa imo? Kag si Ezequias nagsiling, Nagkari sila sa akon gikan sa duta nga malayo, gikan gid sa Babilonia.

4 Niyan nagsiling sia, Ano bala ang nakita nila sa imo balay? Kag si Ezequias nagsabat, Nakita nila ang tanan nga yara sa akon balay: walay ano sa akon mga bahandi nga wala ko mapakita sa ila.

5 Niyan si Isaias nagsiling kay Ezequias, Pamatii ang polong sang GINOO sang mga kasoldadosan:

6 Yari karon, magaabut ang mga adlaw, nga ang tanan nga yara sa imo balay, kag yadtong ginsuput sang imo mga kaamayan tubtub sining adlaw, pagadalhon sa Babilonia: wala gid sing mabilin, nagasiling ang GINOO.

7 Kag sa mga anak nimo nga lalaki nga magagikan sa imo, nga ipanganak mo, kuhaon nila; kag mangin-eunuco sila sa palacio sang hari sang Babilonia.

8 Niyan nagsiling si Ezequias kay Isaias, Maayo ang polong sang GINOO nga imo ginpamolong. Labut pa nagsiling sia, Kay manginmay paghidait kag kamatooran sa akon mga adlaw.

KAPITULO 40

LIPAYA ninyo, lipaya ninyo ang akon katawohan, nagasiling ang inyo Dios.

2 Pamolong kamo sing malipayon sa Jerusalem, kag isinggit sa iya nga ang iya pag-away tapus na, nga ang iya kalautan napatawad: kay sia nakabaton sa kamut sang GINOO sing pilo tungud sa tanan niyang sala.

3 ś Ang tingug sang isa nga nagasinggit sa kamingawan, Amana ninyo ang dalan sang GINOO, tadlonga sa desierto ang dakung dalan tungud sa aton Dios.

4 Ang tagsa ka nalupyakan pataason, kag ang tagsa ka bukid kag bakolod panuboon: kag ang tiko tadlongon, kag ang mga dalanon nga kudulkudul tapanon:

5 Kag ang himaya sang GINOO igapahayag, kag ang tanan nga unud makakita sini sing tingub: kay ang baba sang GINOO nagpamolong sini.

6 Ang tingug nagsiling, Singgit. Kag sia nagsiling, Ano bala ang isinggit ko? Ang tanan nga unud hilamon, kag ang bug-os nga katahum sini subong sang bulak sang latagon:

7 Ang hilamon nagakalaya, ang bulak nagakalayong: bangud nga ang espiritu sang GINOO nagahuyup sini: sa pagkamatuud ang katawohan hilamon.

8 Ang hilamon nagakalaya, ang bulak nagakalayong: apang ang polong sang aton Dios magapadayon sa gihapon.

9 ś O Zion, nga nagadala sing maayong mga balita, taklad ka sa bukid nga mataas; O Jerusalem, nga nagadala sing maayong mga balita, itib-ong ang imo tingug nga may kusug; itib-ong ini, dili magkahadluk; isiling sa mga siudad sang Juda, Yara karon ang inyo Dios!

10 Yari karon, ang Ginoong DIOS magakari nga may makusug nga kamut, kag ang iya butkon magagahum tungud sa iya: yari karon, ang iya balus upud sa iya, kag ang iya buhat sa una niya.

11 Sia magapahalab sang iya panong kaangay sang manugpahalab: tiponon niya sang iya butkon ang mga cordero, kag dalhon sila sa iya dughan, kag magatuytuy sing mahinay sadtong mga may tinday.

12 ś Sin-o bala ang nagsukub sang mga tubig sa siku-ong sang iya kamut, kag nagtakus sang langit sa dangaw, kag nakatipon sang yab-ok sang duta sa sulukban, kag nagtimbang sang mga bukid sa mga tilimbangan, kag sang kabakoloran sa timbangan?

13 Sin-o bala ang nagmando sa Espiritu sang GINOO, ukon subong nga manuglaygay niya nagtudlo sa iya?

14 Sa kay sin-o bala sia nagpalaygay, kag sin-o bala ang nagtulin sa iya, kag nagtudlo sa iya sa banas sang katarungan, kag nagtudlo sa iya sing ihibalo, kag nagpakita sa iya sang dalan sang paghangup?

15 Yari karon, ang mga pungsud subong sang isa ka tolo gikan sa timba, kag ginaisip subong sang diotay nga yab-ok sang timbangan: yari karon, ginahakwat niya ang mga pulo subong sang diotay gid nga butang.

16 Kag ang Libano indi tuman nga isonog, ukon ang mga sapat sini tuman nga sa halad nga sinonog.

17 Ang tanan nga pungsud subong nga wala sa atubangan niya; kag ginakabig sila niya nga kubus pa sa walay ano, kag walay pulus.

18 ś Niyan sa kay sin-o bala ninyo ipaangay ang Dios? ukon sa ano bala nga kaangay ipaanggid ninyo sa iya?

19 Ang panday nagatunaw sang imahen nga tinigban, kag ginataklapan ini sing bulawan sang manugsalsal sang bulawan, kag nagahimo sing mga talikala nga pilak.

20 Ang tama ka imol nga wala sing inughalad nagapili sing kahoy nga indi magabok; nagapangita sia nga sa iya sing sampaton nga panday nga mag-aman sing imahen nga tinigban nga indi maggiho.

21 Wala bala kamo makahibalo? wala bala kamo makabati? wala bala masugid sa inyo kutub sa ginsuguran? wala bala kamo makahangup kutub sa mga pagpasad sang duta?

22 Sia amo ang nagalingkod sa ibabaw sang natipolonan sang duta, kag ang mga pumuluyo sini subong sang mga tibakla; nga nagabitad sang mga langit subong sang kumbung, kag nagahumlad sa ila subong sang layanglayang nga puluy-an:

23 Nga nagapakawalay ano sang mga prinsipe; ginahimo niya ang mga hukom sang duta subong nga walay pulus.

24 Hoo, indi sila pag-itanum; hoo, indi sila pag-isab-ug: hoo, ang ila puno indi magapanggamut sa duta: kag sia man magahuyup sa ila, kag malaya sila, kag ang buhawi magadala sa ila subong sang ginalaban.

25 Niyan sa kay sin-o bala ipaangay ninyo ako, ukon ipatupung ako? nagasiling ang Balaan nga Isa.

26 Itangla ang inyo mga mata sa hitaas, kag tan-awa kon sin-o ang nagtuga sining mga butang, nga nagapagowa sang panong nila sa isip: ginatawag niya sila tanan sa ngalan paagi sa kadaku sang iya gahum, bangud nga makusug sia sa gahum; wala sing isa nga nakulang.

27 Ngaa bala nagasiling ka, O Jacob, kag nagapamolong, O Israel, Ang akon dalan nalipdan sa GINOO, kag ang paghukom sa akon nga gikan sa akon Dios nagligad na?

28 ś Wala ka bala makahibalo? wala ka bala makabati, nga ang nagapadayon nga Dios, ang GINOO, ang Manunuga sang mga ukbung sang duta, wala ginapunaw, ukon ginalapyo? wala sing pagtungkad sang iya paghangup.

29 Sia nagahatag sing gahum sa ginapunaw; kag sa mga wala sing gahum nagadugang sia sing kusug.

30 Bisan ang mga pamatan-on punawon kag lapyoon, kag ang mga pamatan-on nga lalaki mapukan sing bug-os:

31 Apang ang mga nagahulat sa GINOO magabag-o sang ila kusug; magatimbook sila nga may mga pakpak subong sang mga aguila; magadalagan sila, kag indi paglapyoon; kag magalakat sila, kag indi pagpunawon.

KAPITULO 41

MAGHIPUS sa atubangan ko, O mga kapuloan; kag magbag-o ang katawohan sang ila kusug: magpalapit sila; niyan magpamolong sila: magpalapit kita sing tingub sa pagpangatarungan.

2 Sin-o bala ang nagpatindug sing matarung nga tawo gikan sa sidlangan, nagtawag sa iya sa iya tiil, naghatag sing mga pungsud sa atubangan niya, kag nagpagahum sa iya labaw sa mga hari? ginhatag niya sila subong sang yab-ok sa iya espada, kag subong sang ginalaban nga ginapalis sa iya pana.

3 Ginlagas niya sila, kag nag-agi nga hilway; sa dalanon nga wala niya maagihan sang iya mga tiil.

4 Sin-o bala ang nagbuhat kag naghimo sini, nga nagatawag sang mga kaliwatan kutub sa kamunoan? ako, nga GINOO, ang nahauna, kag upud sang katapusan; ako amo sia.

5 Ang mga kapuloan nakakita sini, kag nagkahadluk; ang mga ukbung sang duta nagkahadluk, nagpalapit, kag nagkari.

6 Nagbuligay sila ang tagsa sa iya isigkatawo; kag ang tagsatagsa nagsiling sa iya utud, Magpakaisug ka.

7 Gani ang panday nagpaisug sang manugsalsal sang bulawan, kag ang nagapapa nga may palo sang nagmaso sang landasan, nga nagasiling, Handa na ini nga pagsoldahon: kag ginpalig-on niya ini sang mga lansang, agud nga indi ini makagiho.

8 Apang ikaw, Israel, alagad ko, si Jacob nga akon ginpili, ang kaliwat ni Abraham nga akon abyan.

9 Ikaw nga ginkuha ko kutub sa mga ukbung sang duta, kag gintawag gikan sa mga puno nga mga tawo sini, kag nagsiling sa imo, Ikaw akon alagad; ginpili ko ikaw, kag wala ka pag-ipilak.

10 ś Dili ka mahadluk; kay ako nagaupud sa imo: dili ka magkahangawa; kay ako ang imo Dios: palig-onon ko ikaw; hoo, buligan ko ikaw; hoo, alay-ayon ko ikaw sang too nga kamut sang akon pagkamatarung.

11 Yari karon, ang tanan nga nasingkal sa imo mahuy-an kag maligban: mangin subong sila sang wala; kag ang mga nagapakigsuay sa imo mawala.

12 Pangitaon mo sila, kag indi mo sila makita, bisan ang mga nagapakigbato sa imo: ang mga nagpakig-away sa imo manginsubong sang wala, kag sang butang nga walay pulus.

13 Kay ako ang GINOO nga imo Dios magauyat sang imo kamut nga too, nga nagasiling sa imo, Dili magkahadluk; magatabang ako sa imo.

14 Dili magkahadluk, ikaw nga ulud nga Jacob, kag kamo nga mga tawo sang Israel; ako magatabang sa imo, nagasiling ang GINOO, kag imo manunubus, ang Balaan nga Isa sang Israel.

15 Yari karon, himoon ko ikaw nga ililinas nga bag-o nga matalum nga may mga ngipon: linason mo ang mga bukid, kag dugmukon sila, kag ang kabakoloran himoon subong sang labhang.

16 Pahanginan mo sila, kag ang hangin magapalid sa ila, kag ang buhawi magalapta sa ila: kag magakalipay ka sa GINOO, kag magahimaya sa Balaan nga Isa sang Israel.

17 Kon ang mga imol kag ang nawad-an nagapangita sing tubig, kag wala gid, kag ang ila dila nagamala sa kauhaw, ako nga GINOO magapamati sa ila, ako nga Dios sang Israel indi magbiya sa ila.

18 Magabukas ako sing mga suba sa mataas nga mga duug, kag mga tuburan sa tunga sang mga nalupyakan: himoon ko ang kamingawan nga punong sang tubig, kag ang duta nga mala nga mga tuburan sang tubig.

19 Itanum ko sa kamingawan ang cedro, ang kahoy nga acasia, kag ang mirto, kag ang kahoy sa lana; ipahamtang ko sing tingub sa desierto ang kahoy nga abeto, kag ang kahoy nga pino, kag ang kahoy nga boks:

20 Agud nga makita nila, kag makilala, kag mapatugsilingan, kag mahangup sing tingub, nga ang kamut sang GINOO naghimo sini, kag ang Balaan nga Isa sang Israel nagtuga sini.

21 Ipakita ang inyo kasaba, nagasiling ang GINOO; ipagowa ang inyo mga katarungan nga mabakud, nagasiling ang Hari ni Jacob.

22 Magpagowa sila sa ila, kag magpahayag sa amon sang mahanabu: magpahayag sila sang nahauna nga mga butang, kon ano sila, agud nga mapatugsilingan namon sila, kag mahibaloan ang ila kaolihian; ukon ipakita sa amon ang mga butang nga magaabut.

23 Ipahayag ang mga butang nga magaabut sa olihi, agud nga mahibaloan namon nga kamo mga dios: hoo, maghimo kamo sing maayo, ukon malaut, agud nga mahanguyus kami, kag magtan-aw sini sing tingub.

24 Yari karon, wala kamo, kag ang inyo buhat wala sing pulus: kangil-aran ang nagapili sa inyo.

25 Gikan sa aminhan ginpatindug ko ang isa, kag magakari sia: gikan sa bulutlakan sang adlaw sia magatawag sa akon ngalan: kag magadamhag sia sa mga prinsipe subong sang sa galagala, kag subong sang maninihon nga nagalinas sa lunang.

26 Sin-o bala ang nagpahayag kutub sa ginsuguran, agud nga makahibalo kita? kag sa una nga tion, agud nga magsiling kita, Matarung sia? hoo, wala sing nagapakita, hoo, wala sing nagapahayag, hoo, wala gid sing nagapamati sang inyo mga polong.

27 Ang nahauna magasiling sa Zion, Yari karon, yari karon sila: kag hatagan ko ang Jerusalem sang isa nga nagadala sing maayo nga mga balita.

28 Kay nagtolok ako, kag wala sing tawo; sa tunga nila, kag wala sing manuglaygay, nga, sang pamangkoton ko sila, makasabat sing polong.

29 Yari karon, tanan sila kadayawan; ang ila mga binuhatan wala sing pulus: ang ila mga imahen nga tinunaw hangin kag kalibog.

KAPITULO 42

YARI KARON ang akon alagad, nga akon ginatib-ong; ang akon pinili, nga sa iya ang akon kalag nagakalipay; ginbutang ko sa iya ang akon espiritu: magapahayag sia sing paghukom sa mga Gentil.

2 Indi sia magsinggit, ukon magbayaw, ukon magpabati sang iya tingug sa dalan.

3 Ang tabon-ak nga basag indi niya pagbalion, kag ang lino nga nagapuug indi niya pagpalongon: magapahayag sia sang paghukom nga sa kamatooran.

4 Indi sia magluya ukon magmatalaw, tubtub nga mapahamtang niya sa duta ang katarungan: kag ang mga pulo magahulat sang iya kasogoan.

5 ś Amo ini ang ginasiling sang Dios, ang GINOO, sia nga nagtuga sang mga langit, kag naghitad sa ila; sia nga naghumlad sang duta, kag sang nagagowa sa sini; sia nga nagahatag sing ginhawa sa katawohan sa ibabaw sini, kag espiritu sa mga nagalakat sa sini:

6 Ako nga GINOO nagtawag sa imo sa pagkamatarung, kag magauyat sang imo kamut, kag magabantay sa imo, kag magahatag sa imo nga katipan sa katawohan, nga kapawa sa mga Gentil;

7 Sa pagpamuklat sang mga mata nga bulag, sa pagpagowa sa bilanggoan sang mga binilanggo, kag sang mga nagalingkod sa kadudulman gikan sa balay nga bilanggoan.

8 Ako amo ang GINOO: ina amo ang akon ngalan: kag ang akon himaya indi ko pag-ihatag sa iban, ukon ang akon pagdayaw sa mga imahen nga tinigban.

9 Yari karon, ang mga butang nga nahauna nahanabu na, kag ako nagapahayag sing mga butang nga bag-o: sa wala pa sila maggowa ginasugid ko sila sa inyo.

10 Ambahan kamo sa GINOO sing bag-o nga ambahanon, kag sang iya pagdayaw gikan sa ukbung sang duta, kamo nga nagadulhog sa dagat, kag ang tanan nga yara sa sini; ang kapuloan, kag ang mga pumuluyo sini.

11 Magbayaw sang ila tingug ang kamingawan kag ang mga siudad sini, ang mga minoro nga ginapuy-an sang Kedar: mag-ambahan ang mga pumuluyo sang dakung bato, magsinggit sila kutub sa putokputokan sang mga bukid.

12 Maghimaya sila sa GINOO, kag magpahayag sang iya pagdayaw sa kapuloan.

13 Ang GINOO magagowa subong sang gamhanan nga tawo, painiton niya ang kaimon kaangay sang lalaki sang pag-awayan: magasinggit sia, hoo, magasinggit sia sang mabaskug; magadaug sia batok sa iya mga kaaway.

14 Naghipus ako sing malawig nga tion; nagpahimonong ako, kag nagpugung sang akon kaugalingon: karon magasinggit ako subong sang babaye nga ginasakitan; magapanglaglag ako kag magapangpapas sing tingub.

15 Laglagon ko ang kabukiran kag kabakoloran, kag palayaon ang tanan nila nga ulutanon; kag himoon ko nga kapuloan ang mga suba, kag pamalahon ko ang mga ponong.

16 Kag dalhon ko ang mga bulag sa dalan nga wala nila mahibaloi; ako magatuytuy sa ila sa mga banas nga wala nila makilala: sa atubangan nila himoon ko ang kadudulman nga kapawa, kag ang mga butang nga tiko nga matadlong. Ini nga mga butang himoon ko sa ila, kag indi ko sila pagbayaan.

17 ś Pabalikon sila, kag pakahuy-an sila sing daku, nga nagasalig sa mga imahen nga tinigban, nga nagasiling sa mga imahen nga tinunaw, Mga dios kamo namon.

18 Pamati, kamo nga mga bungul; kag magtolok, kamo nga mga bulag, agud nga makakita kamo.

19 Sin-o bala ang bulag, kondi ang akon alagad? ukon ang bungul, subong sang akon manugbalita nga ginpadala ko? sin-o bala ang bulag subong sa iya nga himpit, kag bulag subong sang alagad sang GINOO?

20 Nga nagatan-aw sang madamu nga butang, apang wala ka nagatalupangud; nga nabuksan ang mga idulungug, apang wala sia nagapamati.

21 Ang GINOO nahamuut gid tungud sa iya pagkamatarung; pagapakadakuon niya ang kasogoan, kag himoon ini nga dungganon.

22 Apang ini nga katawohan kinawatan kag inati; sila tanan nasiod sa mga boho, kag ginatago sila sa mga balay nga bilanggoan: natugyan sila nga alagawon, kag wala gid sing nagaluwas; alatihon, kag wala gid sing nagasiling, Iuli.

23 Sin-o bala dira sa inyo ang magadungug sini? sin-o bala ang magadungug kag magapamati nahanungud sa tion nga palaabuton?

24 Sin-o bala ang nagtugyan sang Jacob nga alagawon, kag sang Israel sa mga buyong? indi bala ang GINOO, nga sa iya nakasala kita? kay indi sila buut maglakat sa iya mga dalanon, kag wala sila nagmatinumanon sa iya kasogoan.

25 Busa iya gin-ula sa iya ang kaalipungut sang iya kaakig, kag ang kakusug sang inaway: kag gintutdan sia sing kalayo sa palibut, apang wala sia makahibalo; kag nagsonog ini sa iya, apang wala niya ini paghupti sa tagiposoon.

KAPITULO 43

APANG karon amo ini ang ginasiling sang GINOO nga nagtuga sa imo, O Jacob, kag ang naghuman sa imo, O Israel, Dili ka mahadluk: kay gintubus ko ikaw, gintawag ko ikaw sa imo ngalan; akon ikaw.

2 Kon mag-agi ka sa mga tubig, ako magaupud sa imo; kag sa mga suba, indi sila maglapaw sa imo: kon mag-agi ka sa kalayo, indi ka masonog; kag ang dabdab indi magdukut sa imo.

3 Kay ako ang GINOO nga imo Dios, ang Balaan nga Isa sang Israel, ang imo Manluluwas: ginhatag ko ang Egipto nga sa imo gawad, ang Etiopia kag ang Seba nga tal-us nimo.

4 Tungud nga bilidhon ka sa akon itololok, nangin dungganon ka, kag ginhigugma ko ikaw: busa ihatag ko ang mga tawo sa tal-us nimo, kag ang mga katawohan sa baylo sang imo kabuhi.

5 Dili ka mahadluk: kay ako nagaupud sa imo: dalhon ko ang imo kaliwat gikan sa sidlangan, kag tiponon ikaw gikan sa katundan;

6 Magasiling ako sa aminhan, Itugyan; kag sa bagatnan, Dili pagpunggi: dalha gikan sa malayo ang akon mga anak nga lalaki, kag ang akon mga anak nga babaye gikan sa mga ukbung sang duta;

7 Ang tagsatagsa nga ginatawag sa akon ngalan: kay gintuga ko sia nga sa akon himaya, ginhuman ko sia; hoo, ginbuhat ko sia.

8 ś Pagowaa ang katawohan nga bulag nga may mga mata, kag ang mga bungul nga may mga idulungug.

9 Pagtiponon sing tingub ang tanan nga pungsud, kag magtipon ang katawohan: sin-o bala sa ila ang makapahayag sini, kag makapakita sa aton sang nahauna nga mga butang? padalha sila sang ila mga saksi, agud nga mapakamatarung sila: ukon papamati-a sila, kag magsiling, Kamatooran ini.

10 Kamo akon mga saksi, nagasiling ang GINOO, kag akon alagad nga ginpili ko: agud nga makakilala kamo kag magtoo sa akon, kag makahangup nga ako amo sia: una sa akon wala gid sing Dios nga ginhuman, kag wala na gid sa olihi nakon.

11 Ako, ako gid amo ang GINOO; kag luwas sa akon walay manluluwas.

12 Ako nagpahayag, kag nagluwas, kag ako nagpakita, sang walay dumuloong nga dios sa tunga ninyo: busa kamo ang akon mga saksi, nagasiling ang GINOO, nga ako Dios.

13 Hoo, sa wala pa ang adlaw ako amo sia; kag wala gid sing makaluwas gikan sa akon kamut: ako magapangabudlay, kag sin-o bala ang magasablag sini?

14 ś Amo ini ang ginasiling sang GINOO, nga inyo manunubus, ang Balaan nga Isa sang Israel; Tungud sa inyo ginpadalhan ko ang Babilonia, kag ginpaubus ko ang tanan nilang halangdon, kag ang mga Caldeanhon, nga ang ila sininggit yara sa mga sakayan.

15 Ako amo ang GINOO, ang inyo Balaan nga Isa, ang manunuga sang Israel, nga inyo Hari.

16 Amo ini ang ginasiling sang GINOO, nga nagahimo sing dalan sa dagat, kag banas sa gamhanan nga mga tubig;

17 Nga nagapagowa sang kangga kag kabayo, sang kasoldadosan kag gahum; magahulid sila sing tingub, indi sila magbangon: nawala sila, napalong sila subong sang pabilo.

18 ś Dili kamo magpanumdum sang nahaunang mga butang, ukon magpamalandong sang dumaan nga mga butang.

19 Yari karon, magahimo ako sing bag-ong butang; karon magalutaw ini; indi bala kamo makahibalo sini? ako gid magahimo sing dalan sa kamingawan, kag mga suba sa desierto.

20 Ang mga sapat sa latagon magapadungug sa akon, ang mga dragon kag ang mga bukaw: bangud nga nagahatag ako sing mga tubig sa kamingawan, kag mga suba sa desierto, sa pagpainum sa akon katawohan, nga pinili ko.

21 Ining katawohan ginhuman ko nga sa akon; sila magapahayag sang akon kadayawan.

22 ś Apang wala ka magpanawag sa akon, O Jacob; kondi gintak-an ka sa akon, O Israel.

23 Wala mo ako pagdalhan sang gamay nga mga kahayupan sang imo mga halad nga sinonog; kag wala mo ako ginpadunggan sang imo mga halad. Wala ko ikaw pagpaalagda sang halad, ukon ginpatak-an ko ikaw sing incienso.

24 Wala mo ako mabakli sa kuarta sing calamo nga mahumut, ukon ginbusug ako sang sapay sang imo mga halad: kondi ginpaalagad mo ako sang imo mga sala, ginpatak-an mo ako sang imo mga kalautan.

25 Ako, ako gid amo sia nga nagapanas sang imo mga paglalis tungud sa akon, kag indi na ako magdumdum sang imo mga sala.

26 Dumduma ako: magkasabaay kita: magpahayag ka, agud nga mapakamatarung ka.

27 Ang imo nahaunang amay nagpakasala, kag ang imo manunudlo naglalis sa akon.

28 Busa ginpasipalahan ko ang mga prinsipe sang santuario, kag gintugyan ko ang Jacob sa pagpakamalaut, kag ang Israel sa mga buluyayawon.

KAPITULO 44

APANG karon pamatii, O Jacob nga akon alagad; kag Israel, nga akon ginpili:

2 Amo ini ang ginasiling sang GINOO nga naghimo sa imo, kag nagdihon sa imo gikan sa taguangkan, nga magatabang sa imo; Dili mahadluk, O Jacob, nga akon alagad; kag ikaw, Jesurun, nga akon ginpili.

3 Kay ako magaula sing tubig sa ginauhaw, kag mga baha sa duta nga mamala: ipasagahay ko ang akon espiritu sa imo kaliwat, kag ang akon pagpakamaayo sa imo inanak:

4 Kag magatubo sila subong sang sa tunga sang hilamon, subong sang mga sause sa luyo sang mga ilig sang tubig.

5 Ang isa magasiling, Ako iya sang GINOO; kag ang isa magatawag sang iya kaugalingon sa ngalan ni Jacob; kag ang isa magasulat sa iya kamut sa GINOO, kag magapangalan sang iya kaugalingon sa ngalan sang Israel.

6 Amo ini ang ginasiling sang GINOO, ang Hari sang Israel, kag ang iya manunubus, ang GINOO sang mga kasoldadosan; Ako ang nahauna, kag ako ang katapusan; kag luwas sa akon walay Dios.

7 Kag sin-o bala, subong sa akon, ang magatawag, kag magapahayag sini, kag magapaagisud sini sa akon, kutub sang pagtukud ko sang dumaan nga katawohan? kag ang mga butang nga nagaabut, kag ang magaabut, magpahayag sila sa ila.

8 Dili kamo mahadluk, ukon magpakulba: wala bala ako magsugid sa imo kutub sinang tion, kag magpahayag sini? kamo amo ang akon mga saksi. May Dios bala luwas sa akon? hoo, wala sing Dios; wala ako sing nahibaloan nga bisan sin-o.

9 ś Ang mga nagahuman sing imahen nga tinigban sila tanan kadayawan; kag ang mga butang nga ginakalipayan nila indi mapuslan; kag sila amo ang ila kaugalingon nga mga saksi; indi sila makakita, ukon makakilala; agud nga mahuy-an sila.

10 Sin-o bala ang naghuman sing isa ka dios, ukon nagtunaw sing imahen nga tinigban nga wala sing kapuslanan?

11 Yari karon, ang tanan niyang kaupdanan pakahuy-an: kag ang mga manughimo, sila mga tawo lamang: magtilipon sila tanan sing tingub, magtilindug sila; walay sapayan magakahadluk sila, kag pakahuy-an sila sing tingub.

12 Ang manugsalsal nga may mga kimpit nagapangabudlay sa mga baga, kag nagabuhat sini sa mga palo, kag nagahimo sini paagi sa kusug sang iya mga butkon: hoo, ginagutum sia, kag nawala ang iya kusug: wala sia nagainum sing tubig, kag napunaw.

13 Ang panday nagauntay sang iya latid; ginapat-inan niya ini sing linya; ginasapiyohan niya ini, kag ginapat-inan niya ini sing kompas, kag ginahimo niya ini sono sa dagway sang tawo, sono sa katahum sang tawo; agud nga magpuyo ini sa balay.

14 Nagapulud sia nga sa iya sing mga cedro, kag nagakuha sang sipres kag sang terebinto, nga iya ginapalig-on nga sa iya kaugalingon sa tunga sang mga kahoy sang talon: nagatanum sia sing kahoy nga ash, kag ang ulan nagasagud sini.

15 Niyan mangingatong ini sang tawo: kay magakuha sia sa sini, kag magapainit sang iya kaugalingon; hoo, ginadabok niya ini, kag nagabibingka; hoo, nagahimo sia sing isa ka dios, kag nagasimba sini; ginahimo niya ini nga imahen nga tinigban, kag nagayaub sa sini.

16 Ginagatong niya ang bahin sini sa kalayo; sa bahin sini nagakaon sia sing unud; nagaasal sia, kag nabusug: hoo, nagapainit sia sang iya kaugalingon, kag nagasiling, Aha, mainit na ako, nakakita ako sing kalayo:

17 Kag ang nabilin sini ginahimo niya nga isa ka dios, ang imahen niya nga tinigban: nagayaub sia sa sini, kag nagasimba sini, kag nagapangamuyo sa sini, kag nagasiling, Luwasa ako; kay ikaw ang akon dios.

18 Wala sila makahibalo ukon makahangup: kay gintakpan niya ang ila mga mata, sa bagay nga indi sila makakita; kag ang ila mga tagiposoon, sa bagay nga indi sila makahangup.

19 Kag wala gid sing isa nga nagapainoino sa iya tagiposoon, ukon may ihibalo ukon paghangup sa pagsiling, Ginatong ko ang bahin sini sa kalayo; hoo, nagbibingka man ako sa mga baga sini; nag-asal ako sing unud, kag ginkaon ini: kag ang nabilin sini himoon ko bala nga kangil-aran? magayaub bala ako sa inutud nga puno sang kahoy?

20 Nagakaon sia sang mga abo: ang tagiposoon nga nalimbongan nagpatalang sa iya, sa bagay nga indi sia makaluwas sang iya kalag, ukon makasiling, Wala bala sing butig sa akon kamut nga too?

21 ś Dumduma ang mga ini, O Jacob, kag Israel; kay ikaw akon alagad: ginhuman ko ikaw; ikaw akon alagad: O Israel, indi ko ikaw pagkalimtan.

22 Ginpanas ko, subong sang panganud nga madamul, ang imo mga paglalis, kag, subong sang panganud, ang imo mga sala: balik sa akon; kay gintubus ko ikaw.

23 Mag-amba, O kamo nga mga langit; kay ang GINOO naghimo sini: singgit, kamo nga mga naidalum nga bahin sang duta: maghugyaw sa pag-amba, kamo nga mga bukid, O talon, kag ang tagsa ka kahoy nga yara sa iya: kay ang GINOO nagtubus kay Jacob, kag naghimaya sang iya kaugalingon sa Israel.

24 Amo ini ang ginasiling sang GINOO, nga imo Manunubus, kag sia nga naghuman sa imo kutub sa taguangkan, Ako amo ang GINOO nga nagahimo sang tanan nga butang; nga nagabitad nga isa lamang sang mga langit; nga nagahumlad sang duta nga ako lamang;

25 Nga nagapapaslaw sang mga tanda sang mga butigon, kag nagapabuang sang mga manugpakot; nga nagapaisul sang maalam nga mga tawo, kag nagapabuang sang ila ihibalo;

26 Nga nagapalig-on sang polong sang iya alagad, kag nagatuman sang laygay sang iya mga manugbalita; nga nagasiling sa Jerusalem, Pagpuy-an ka; kag sa mga siudad sang Juda, Patindugon kamo, kag bangonon ko ang nagkalalumpag nga mga duug sini:

27 Nga nagasiling sa kadadalman, Magmala, kag pamalahon ko ang imo mga suba:

28 Nga nagasiling nahanungud kay Ciro, Manugpahalab ko sia, kag magatuman sang tanan nga nahamut-an ko: nga nagasiling sa Jerusalem, Patindugon ka; kag sa templo, Ang imo sadsaran pasaron.

KAPITULO 45

AMO ini ang ginasiling sang GINOO sa iya hinaplas, kay Ciro, nga gin-uyatan ko ang iya kamut nga too, sa pagdaug sing mga pungsud sa atubangan niya; kag hubaran ko ang mga balikawang sang mga hari, sa pagbukas sang mga gawang nga duha sing takup sa atubangan niya; kag ang mga gawang indi pagtakpan;

2 Magauna ako sa imo, kag magapatadlong sang mga duug nga balingag: dugmokon ko ang mga gawang nga saway, kag utdon ang mga pintal nga salsalon:

3 Kag ihatag ko sa imo ang mga bahandi sang kadudulman, kag ang mga manggad nga tinago sa mga duug nga tago, agud nga makilala mo nga ako, ang GINOO, nga nagatawag sa imo sa imo ngalan, amo ang Dios sang Israel.

4 Tungud kay Jacob nga akon alagad, kag kay Israel nga akon pinili, gintawag ko ikaw sa imo ngalan: ginpangalanan ko ikaw, bisan wala mo ako makilala.

5 ś Ako amo ang GINOO, kag wala na gid sing iban, luwas sa akon walay Dios: ako nagwagkus sa imo, bisan wala ka makakilala sa akon:

6 Agud makilala nila kutub sa bulutlakan sang adlaw, kag kutub sa katundan, nga wala na gid sing iban luwas sa akon. Ako amo ang GINOO, kag wala na gid sing iban.

7 Ginahuman ko ang kapawa, kag ginatuga ang kadudulman: ginahimo ko ang paghidait, kag ginatuga ang malaut: ako amo ang GINOO nga nagahimo sini tanan nga butang.

8 Magpatolo, kamo nga mga langit, gikan sa ibabaw, kag mag-ula ang mga gal-um sing pagkamatarung: magbuka ang duta, kag magpamunga sila sing kaluwasan, kag magtubo sing tingub ang pagkamatarung; ako nga GINOO nagtuga sini.

9 Kailo sa nagapakigsuay sa iya Magbubuhat! Magpanikasug ang bika batok sa mga bika sang duta. Magasiling bala ang lunang sa nagahuman sa iya, Ano bala ang ginahimo mo? ukon ang imo binuhat, Wala sia sing mga kamut?

10 Kailo sa nagasiling sa iya amay, Ano bala ang ginapanganak mo? ukon sa babaye, Ano bala ang imo ginbun-ag?

11 Amo ini ang ginasiling sang GINOO, ang Balaan nga Isa sang Israel, kag ang iya Magbubuhat, Pamangkota ako ninyo sang mga butang nga magaabut nahanungud sa akon mga anak nga lalaki, kag nahanungud sang buhat sang akon mga kamut, sogoa ninyo ako.

12 Ginhimo ko ang duta, kag gintuga sa sini ang tawo: ako, ang akon gid mga kamut, nagbitad sang mga langit, kag ang tanan nilang panong ginsogo ko.

13 Ginpatubo ko sia sa pagkamatarung, kag tuytuyan ko ang tanan niyang dalanon: sia magapatindug sang akon siudad, kag sia magabuhi sang mga ginbihag sa akon, indi tungud sa bili ukon sa balus, nagasiling ang GINOO sang mga kasoldadosan.

14 Amo ini ang ginasiling sang GINOO, Ang pangabudlay sang Egipto, kag ang inugbaligya sang Etiopia kag sang mga Sabeanhon, mga tawo nga mataas sing panindug, magakari sa imo, kag mangin-imo sila: magasonod sila sa imo; sa mga talikala magakari sila, kag magayaub sila sa imo, magaampo sila sa imo, nga nagasiling, Sa pagkamatuud ang Dios yara sa imo; kag wala na gid sing iban, wala na sing Dios.

15 Sa pagkamatuud ikaw ang Dios nga nagapanago, O Dios sang Israel, ang Manluluwas.

16 Pakahuy-an sila, kag malibogan man, sila tanan: magakadto sila sing tingub sa kalibog ang mga manugbuhat sang mga diosdios.

17 Apang ang Israel maluwas sa GINOO sa kaluwasan nga dayon: indi kamo pagpakahuy-an kag indi magasaligmato sa kalibutan nga wala sing katapusan.

18 Kay amo ini ang ginasiling sang GINOO nga nagtuga sang mga langit; ang Dios gid nga naghuman sang duta kag naghimo sini; ginpalig-on niya ini, wala sia magtuga sini nga walay pulus, ginhuman niya ini nga pagpuy-an: ako amo ang GINOO; kag wala na gid sing iban.

19 Wala ako magpamolong sa tago, sa madulum nga duug sang duta: wala ako magsiling sa kaliwat ni Jacob, Pangitaa ninyo ako sa wala sing pulus: ako nga GINOO nagapamolong sing pagkamatarung, ginapahayag ko ang mga butang nga matarung.

20 ś Tilipon kamo kag kari; palapit sing tingub, kamo nga nakapalagyo gikan sa mga pungsud: wala sing ihibalo ang mga nagapatindug sang kahoy sang ila imahen nga tinigban, kag nagapangamuyo sa isa ka dios nga indi makaluwas.

21 Isugid ninyo, kag papalapita sila; hoo, maglinaygayay sila: sin-o bala ang nagpahayag sini kutub sa tion nga dumaan? sin-o bala ang nagsugid sini kutub sinang tion? indi bala ako, ang GINOO? kag wala sing iban nga Dios luwas sa akon; Dios nga matarung kag Manluluwas; wala na gid luwas sa akon.

22 Tolok sa akon, kag maluwas kamo, tanan nga ukbung sang duta: kay ako ang Dios, kag wala na gid sing iban.

23 Tungud sa akon nagsumpa ako, naggowa gikan sa akon baba sa pagkamatarung ang polong, kag indi magbalik, Sa akon ang tagsa ka tuhud magapilo, ang tagsa ka dila magasumpa.

24 Sa pagkamatuud, magasiling ang isa, sa GINOO may pagkamatarung ako kag kusug: bisan sa iya magakari ang mga tawo; kag ang tanan nga nagasingkal batok sa iya mahuy-an.

25 Sa GINOO ang bug-os nga kaliwat sang Israel pakamatarungon, kag magahimaya.

KAPITULO 46

SI BEL nagasikoktot, si Nebo nagakuub, ang ila mga diosdios natungtung sa mga sapat, kag sa mga kahayupan: ang inyo mga karwahe ginpabug-atan sing tama; lulan sila sa sapat nga nalapyo.

2 Nagakuub sila, nagasikoktot sila sing tingub; wala sila makaluwas sang lulan, apang sila ila nabihagan.

3 ś Magpamati sa akon, O balay ni Jacob, kag ang bug-os nga salin sang panimalay sang Israel, nga ginadala ko kutub sa tiyan, nga ginadala kutub sa taguangkan:

4 Kag bisan tubtub sa inyo katigulangon ako amo sia; kag bisan tubtub sa pagkaubanon pagapas-anon ko kamo: ako ang naghimo, kag ako magadala; bisan ako magapas-an, kag magaluwas sa inyo.

5 ś Sa kay sin-o bala ako ninyo ipaangay, kag ipatupung ako, kag ipaanggid ako, agud nga manginkaangay kami?

6 Sila nagahinguyang sang bulawan gikan sa puyo, kag nagatimbang sing pilak sa timbangan, kag nagasohol sing manugsalsal sing bulawan; kag ginahimo niya ini nga isa ka dios: nagayaub sila, hoo, nagasimba sila.

7 Ginapas-an nila sia, ginadala nila sia, kag ginapahamtang sia sa iya duug, kag sia nagatindug; gikan sa iya duug indi sia makuha: hoo, ang isa magatuaw sa iya, apang indi sia makasabat, ukon makaluwas sa iya sa kalisdanan niya.

8 Dumduma ini, kag magpakalalaki kamo: painoinoha liwat ninyo ini, O kamo nga mga malalison.

9 Dumduma ang nahauna nga mga butang sang dumaan: kay ako Dios, kag wala na sing iban; ako Dios, kag wala na gid sing kaangay sa akon,

10 Nga nagapahayag sang katapusan kutub sa ginsuguran, kag kutub sa dumaan nga mga tion sang mga butang nga wala pa mahimo, nga nagasiling, Ang akon tinutuyo magapadayon, kag himoon ko ang tanan ko nga luyag:

11 Nga nagatawag gikan sa sidlangan sang pispis nga mananagit, ang tawo nga nagatuman sang akon tinutuyo gikan sa duta nga malayo: hoo, nagpamolong ako sini, pahanabuon ko man ini; ginboko ko ini, himoon ko man ini.

12 ś Pamati sa akon, kamo nga matig-a sing tagiposoon, nga malayo sa pagkamatarung:

13 Ginapapalapit ko ang akon pagkamatarung; indi magamalayo ini, kag indi magapalantang ang akon kaluwasan: kag ibutang ko sa Zion ang kaluwasan tungud sa Israel nga akon himaya.

KAPITULO 47

PANAUG, kag lingkod sa yab-ok, O ulay nga babaye nga anak sang Babilonia, lingkod sa duta: wala sing trono, O babaye nga anak sang mga Caldeanhon: kay indi ka na pagtawgon nga mahomok kag maluming.

2 Kuhaa ang mga galingan, kag maggaling sing harina: buksi ang imo mga bunghay sang bohok, hublasi ang imo batiis, huklasi ang imo paa, tabok sa mga suba.

3 Ang imo kahubo ipadayag, hoo, ang imo kahuluy-an makita: magatimalus ako, kag indi ko ikaw pagsugataon subong nga tawo.

4 Ang nahanungud sa aton manunubus, ang GINOO sang mga kasoldadosan ang iya ngalan, ang Balaan nga Isa sang Israel.

5 Lingkod ka sing hipus, kag didto ka sa kadulum, O babaye nga anak sang mga Caldeanhon: kay indi ka na pagtawgon, Ang ginang sang mga ginharian.

6 ś Nagsingkal ako sa akon katawohan, gindagtaan ko ang akon panublion, kag ginhatag sila sa imo kamut: wala ka magkalooy sa ila; sa mga tigulang ginbutang mo ang imo gota sing mabug-at gid.

7 ś Kag nagsiling ka, Ako mangin-ginang sing dayon: sa bagay nga wala mo paghupti ini nga mga butang sa imo tagiposoon, ukon magdumdum sang kaolihian sini.

8 Busa karon pamatii ini, ikaw nga nagapatuyang sa mga kalipayan, nga nagapuyo sing patarasak, nga nagasiling sa imo tagiposoon, Ako amo, kag wala na gid sing iban luwas sa akon; indi ako magalingkod subong nga balo nga babaye, ukon makakilala sang kadulaan sang mga anak:

9 Apang ini nga duha ka butang magaabut sa imo sa hinali sa isa ka adlaw, ang pagkadula sang mga anak, kag ang pagkabalo nga babaye: sa ila kabug-osan magaabut sila sa imo tungud sa kadam-an sang imo mga pagbabaylan, kag sa daku nga kabuganaan sang imo mga enkantohanon nga padihot.

10 ś Kay ikaw nagsalig sa imo pagkamalaut: nagsiling ka, Wala gid sing nakakita sa akon. Ang imo kaalam kag ang imo ihibalo, ini nagpabalingag sa imo; kag nagsiling ka sa imo tagiposoon, Ako amo, kag wala na gid sing iban luwas sa akon.

11 ś Busa magaabut sa imo ang malaut; indi ka makahibalo kon sa diin ini nagahalin: kag ang malain magaabut sa imo; indi ka makasarang magsikway sini: kag ang pagkamusmus magaabut sa imo sing hinali, nga wala mo mahibaloi.

12 Tindug ka karon upud sa imo mga enkantohanon nga padihot, kag sa kadam-an sang imo mga pagbabaylan, sa diin nagpangabudlay ka kutub sa imo pagkapamatan-on; basi kon makapulus ka, basi kon makalandas ka.

13 Ginalapyo ka sa kadam-an sang imo mga laygay. Patinduga karon ang mga astrologo, ang mga manuglantaw sa bitoon, ang mga manugpakot sa binulan, kag magluwas sa imo sa sining mga butang nga magaabut sa imo.

14 Yari karon, manginsubong sila sang ginalaban; ang kalayo magasonog sa ila; indi nila maluwas ang ila kaugalingon sa gahum sang dabdab: magawala sing baga nga palainitan, ukon kalayo nga ganggangan.

15 Manginsubong sini sa imo ang mga ginpangabudlayan mo, bisan ang imo mga komersyante, kutub sa imo pagkapamatan-on: sila magadalangdalang ang tagsatagsa sa iya duug; wala gid sing magaluwas sa imo.

KAPITULO 48

PAMATII ninyo ini, O panimalay ni Jacob, nga ginatawag sa ngalan sang Israel, kag nagagowa sa mga tubig sang Juda, nga nagasumpa sa ngalan sang GINOO, kag nagasambit sang Dios sang Israel, apang indi sa kamatooran, ukon sa pagkamatarung.

2 Kay nagapatawag sila sang ila kaugalingon nga sa balaan nga siudad, kag nagasandig sila sa Dios sang Israel; Ang GINOO sang mga kasoldadosan amo ang iya ngalan.

3 Ginpahayag ko ang nahauna nga mga butang kutub sa dumaan; kag naggowa sila sa akon baba, kag ginpakita ko sila; ginhimo ko sila sa hinali, kag nahanabu sila.

4 Bangud nga nakilala ko nga ikaw batinggilan, kag ang imo liog lanitlanit nga salsalon, kag ang imo agtang saway;

5 Ako nagpahayag sini sa imo bisan kutub sa ginsuguran; sa wala pa ini mahanabu ginpakita ko ini sa imo: basi magsiling ka, Ang akon diosdios naghimo sa ila, kag ang akon imahen nga tinigban, kag ang akon imahen nga tinunaw, nagsogo sa ila.

6 Nabatian mo ini, tan-awa ini tanan; kag indi bala kamo magpahayag sini? Nagpakita ako sa imo sing bag-o nga mga butang kutub sini nga tion, ang tinago nga mga butang, kag wala mo sila mahibaloi.

7 Karon ginatuga sila, kag indi kutub sa ginsuguran; bisan sa wala pa ang adlaw sang wala mo mabatii sila; basi magsiling ka, Yari karon, nahibaloan ko sila.

8 Hoo, wala mo mabatii; hoo, wala mo mahibaloi; hoo, kutub sinang tion sang wala pa mabuksi ang imo dulunggan: kay nahibaloan ko nga ikaw nagmaluibon gid, kag gintawag nga malalison kutub sa taguangkan.

9 ś Tungud sa akon ngalan palantangon ko ang akon kaakig, kag tungud sa akon pagdayaw magapugung ako tungud sa imo, agud nga indi ko ikaw mautud.

10 Yari karon, gin-ulay ko ikaw, apang indi upud sa pilak; ginpili ko ikaw sa horno sang kapipit-an.

11 Tungud sa akon kaugalingon, tungud sa akon gid kaugalingon, himoon ko ini: kay paano bala nga pagdagtaan ang akon ngalan? kag ang akon himaya indi ko pag-ihatag sa iban.

12 ś Pamatii ako, O Jacob kag Israel, nga akon tinawag; Ako amo sia; ako ang nahauna, ako man ang katapusan.

13 Ang akon kamut man nagpasad sang sadsaran sang duta, kag ang akon too nga kamut nagdangaw sang mga langit: kon tawgon ko sila, nagatindug sila sing tingub.

14 Tilipon kamo, tanan kamo, kag magpamati; sin-o bala sa ila ang nagpahayag sini nga mga butang? Ang GINOO naghigugma sa iya: himoon niya sa Babilonia ang iya nahamut-an, kag ang iya butkon manginsa mga Caldeanhon.

15 Ako, ako gid, nagpamolong; hoo, gintawag ko sia: gindala ko sia, kag pauswagon niya ang iya dalanon.

16 ś Palapit kamo sa akon, pamatii ninyo ini; kutub sa ginsuguran wala ako magpamolong sa tago; kutub sa tion nga nagkalaamo ini, didto ako: kag karon ang Ginoong DIOS, kag ang iya Espiritu, nagpadala sa akon.

17 Amo ini ang ginasiling sang GINOO, ang imo Manunubus, ang Balaan nga Isa sang Israel; Ako amo ang GINOO nga imo Dios nga nagatudlo sa imo sa kapuslanan, nga nagatuytuy sa imo sa dalanon nga dapat mo laktan.

18 O nga nagpamati ka kuntani sa akon mga sogo! niyan ang imo paghidait nanginsubong kuntani sang suba, kag ang imo pagkamatarung nanginsubong sang mga balud sang dagat:

19 Ang imo kaliwat man nanginsubong kuntani sang balas, kag ang inanak sang imo tiyan kaangay sa mga batobato sini; ang iya ngalan kuntani indi pag-utdon ukon paglaglagon gikan sa akon atubangan.

20 ś Gowa kamo sa Babilonia, palagyo kamo gikan sa mga Caldeanhon, sa tingug sang pag-amba ipahayag ninyo, isugid ini, imitlang ini bisan tubtub sa ukbung sang duta; isiling ninyo, Gintubus sang GINOO ang iya alagad nga si Jacob.

21 Kag wala sila pag-uhawa sang gintuytuyan niya sila paagi sa mga desierto: ginpailig niya ang mga tubig gikan sa dakung bato tungud sa ila: ginpihak man niya ang dakung bato, kag ang mga tubig nagsagawak.

22 Wala sing paghidait, nagasiling ang GINOO, sa malaut.

KAPITULO 49

PAMATI, O kapuloan, sa akon; kag magpamati, kamo nga katawohan, gikan sa malayo; Gintawag ako sang GINOO kutub sa taguangkan; kutub sa tiyan sang akon iloy ginsambit niya ang akon ngalan.

2 Kag ginhimo niya ang akon baba kaangay sang matalum nga espada; sa landong sang iya kamut gintago niya ako, kag ginhimo niya ako nga baslay nga mahining; gintago niya ako sa iya baslayan;

3 Kag nagsiling sa akon, Alagad ko ikaw, O Israel, nga sa imo himayaon ako.

4 Niyan nagsiling ako, Nagpangabudlay ako sa wala sing pulus, ginhinguyang ko ang akon kusug sa wala sing ano man, kag sa wala sing pulus: apang sa pagkamatuud ang akon katarungan yara sa GINOO, kag ang akon buhat yara sa akon Dios.

5 ś Kag karon, nagasiling ang GINOO nga nagdihon sa akon kutub sa taguangkan nga mangin-alagad niya, sa pagpabalik kay Jacob sa iya, Bisan indi pagtiponon ang Israel, walay sapayan mangin mahimayaon ako sa mga mata sang GINOO, kag ang akon Dios mangin-akon kusug.

6 Kag nagsiling sia, Diotay nga butang nga ikaw mangin-akon alagad sa pagpatindug sang mga tribo ni Jacob, kag sa pagpahauli sang tinipigan sang Israel: ihatag ko man ikaw nga kapawa sa mga Gentil, agud nga ikaw mangin-akon kaluwasan tubtub sa ukbung sang duta.

7 Amo ini ang ginasiling sang GINOO, ang Manunubus sang Israel, kag ang iya Balaan nga Isa, sa iya nga ginatamay sang tawo, sa iya nga ginakangil-aran sang pungsud, sa alagad sang mga manuggahum, Ang mga hari makakita kag magatindug, ang mga prinsipe man magasimba, bangud sa GINOO nga matutum, kag sa Balaan nga Isa sang Israel, kag sia magapili sa imo.

8 Amo ini ang ginasiling sang GINOO, Sa tion nga nahamut-an nabatian ko ikaw, kag sa adlaw sang kaluwasan gintabangan ko ikaw: kag ako magatipig sa imo, kag magahatag sa imo nga katipan sang katawohan, sa pagpalig-on sang duta, sa pagpapanubli sang mamingaw nga mga panublion;

9 Agud nga magsiling ka sa mga binilanggo, Gowa kamo; sa mga yara sa kadudulman, Pakita kamo. Magakaon sila sa mga dalanon, kag sa tanan nga duug nga kataasan mangindidto ang ila mga halalban.

10 Indi sila paggutumon ukon pag-uhawon; kag ang init ukon ang adlaw indi magsakit sa ila: kay sia nga nagakalooy sa ila magatuytuy sa ila, bisan sa ubay sang mga tuburan sang tubig ubayan niya sila.

11 Kag ang tanan ko nga kabukiran himoon ko nga dalan, kag ang akon daku nga mga dalan pataason.

12 Yari karon, ini sila magaabut gikan sa malayo: kag, yari karon, ini sila gikan sa aminhan kag gikan sa katundan; kag ini sila gikan sa duta sang Sinim.

13 ś Mag-amba, O mga langit; kag magkalipay, O duta; kag maghugyaw sa pag-amba, O mga kabukiran: kay ang GINOO naglipay sang iya katawohan, kag magakalooy sa iya mga napiotan.

14 Apang ang Zion nagsiling, Ginbayaan ako sang GINOO, kag nalipat sa akon ang akon Ginoo.

15 Malipatan bala sang babaye ang iya bata nga nagasogo, nga indi sia magkalooy sa anak nga lalaki sang iya taguangkan? hoo, basi sila malipat, apang ako indi malipat sa imo.

16 Yari karon, gintigib ko ikaw sa mga palad sang akon mga kamut; ang imo mga kuta yara sing dalayon sa akon atubangan.

17 Ang imo mga anak magadalidali; ang imo mga manuglaglag kag ang mga nagwagwag sa imo magagowa sa imo.

18 ś Bayawa ang imo mga mata sa palibut, kag tan-awa: ini sila tanan nagatipon sing tingub, kag nagakari sa imo. Sa nagakabuhi ako, nagasiling ang GINOO, ipanaput mo gid sila nga tanan, subong sang puni, kag iwagkus mo sila, subong sang ginahimo sang nobya.

19 Kay ang imo nawagwag kag ang imo mamingaw nga mga duug, kag ang imo duta nga nalaglag, magakitid na karon bangud sang mga pumuluyo, kag ang mga naglamon sa imo magamalayo.

20 Ang mga maanak nimo, sa tapus nga ginkuha sa imo ang iban, magasiling pa sa imo mga idulungug, Ang duug tama kakitid sa akon: hatagi ako sing duug nga mapuy-an ko.

21 Niyan magasiling ka sa imo tagiposoon, Sin-o bala ang nagpanganak sini sa ila sa akon, sanglit ginkuhaan ako sang akon mga anak, kag nagaisaisa ako, bihag, kag nagalataglatag? kag sin-o bala ang nagsagud sini sa ila? Yari karon, binayaan ako nga isa lamang; ang mga ini sila, diin bala sila maghalin?

22 Amo ini ang ginasiling sang Ginoong DIOS, Yari karon, bayawon ko ang akon kamut sa mga Gentil, kag patindugon ko ang akon hayahay sa katawohan: kag dalhon nila nga ginakugus ang imo mga anak nga lalaki, kag ang imo mga anak nga babaye usungon nila.

23 Kag ang mga hari mangin-imo mga manuglibang nga amay, kag ang ila mga hara mga manuglibang nga iloy: magayaub sila sa imo nga nagahapa sa duta, kag magadilap sang yab-ok sang imo mga tiil; kag makilala mo nga ako amo ang GINOO: kay ang mga nagahulat sa akon indi mahuy-an.

24 ś Agawon bala ang inagaw sa gamhanan, ukon luwason bala ang bihag nga sono sa pagbulut-an?

25 Apang amo ini ang ginasiling sang GINOO, Bisan ang mga bihag sang gamhanan agawon, kag ang inagaw sang makakulugmat luwason: kay magasuay ako sa nagapakigsuay sa imo, kag ako magaluwas sang imo mga anak.

26 Kag ang mga nagapigus sa imo pakaonon ko sang ila kaugalingon nga unud; kag mahobog sila sang ila kaugalingon nga dugo, subong sang sa matam-is nga alak: kag ang tanan nga unud makakilala nga ako ang GINOO amo ang imo Manluluwas kag imo Manunubus, ang gamhanan nga Isa ni Jacob.

KAPITULO 50

AMO INI ang ginasiling sang GINOO, Diin bala ang sulat sa pagbulagay sang inyo iloy, nga akon ginsikway? ukon sa kay sin-o bala sa akon mga nautangan ginbaligya ko kamo? Yari karon, tungud sang inyo mga kalautan ginbaligya ninyo ang inyo kaugalingon, kag tungud sang inyo mga paglalis ginsikway ang inyo iloy.

2 Ngaa bala, sang pag-abut ko, walay tawo? sang pagtawag ko, walay isa nga masabat? Ginpalip-ot bala nga mas-a ang akon kamut, nga indi makatubus? ukon wala bala ako sing gahum sa pagluwas? yari karon, sa akon pagsabdong ginapamala ko ang dagat, ginahimo ko nga kamingawan ang mga suba: ang ila mga isda nagabaho, bangud nga walay tubig, kag nagakapatay sa kauhaw.

3 Ginapanaptan ko sing kaitum ang mga langit, kag ginahimo ko nga panapton nga sako ang ila tabon.

4 Ang Ginoong DIOS naghatag sa akon sang dila sang tinon-an, agud nga makahibalo ako kon paano nga maghambal sang polong sa nagakaigo nga tion sa ginalapyo: nagamata sia agaaga, ginapukaw niya ang akon idulungug sa pagpamati subong sang tinon-an.

5 ś Ang Ginoong DIOS nagbukas sang akon idulungug, kag wala ako magmabinatoon, ukon mag-isul.

6 Gintaya ko ang akon likod sa mga manughanut, kag ang akon mga pisngi sa mga naggabut sang bohok: wala ko pagtagoa ang akon nawung sa kahuya kag sa pagdupla.

7 ś Kay ang Ginoong DIOS magatabang sa akon; busa indi ako maligban: busa ginpalig-on ko ang akon nawung subong sang santikan, kag nakahibalo ako nga indi ako pagpakahuy-an.

8 Malapit sia nga nagapakamatarung sa akon; sin-o bala ang magapakigsuay sa akon? magtindug kita sing tingub: sin-o bala ang akon kasumpung? magpalapit sia sa akon.

9 Yari karon, ang Ginoong DIOS magatabang sa akon; sin-o bala sia nga magatagudili sa akon? yari karon, magadaan sila tanan subong sang panapton; ut-uton sila sang sipit.

10 ś Sin-o bala sa inyo ang nagakahadluk sa GINOO, nga nagatuman sang tingug sang iya alagad, nga nagalakat sa kadudulman, kag walay kapawa? magsalig sia sa ngalan sang GINOO, kag magsandig sa iya Dios.

11 Yari karon, tanan kamo nga nagadabok sing kalayo, nga nagalikup sang inyo kaugalingon sing mga alipalok: lakat kamo sa kapawa sang inyo kalayo, kag sa mga alipalok nga inyo gindabok. Amo ini ang maagum ninyo sa akon kamut; magahigda kamo sa kasubo.

KAPITULO 51

PAMATI sa akon, kamo nga nagasonod sa pagkamatarung, kamo nga nagapangita sa GINOO: tolok kamo sa dakung bato diin ginbasbas kamo, kag sa guab sang boho diin kamo ginkali.

2 Tolok kamo kay Abraham nga inyo amay, kag kay Sara nga nag-anak sa inyo: kay gintawag ko sia nga isa lamang, kag ginpakamaayo sia, kag ginpadamu sia.

3 Kay ang GINOO magalipay sang Zion: lipayon niya ang tanan niyang duug nga nawagwag; kag himoon niya ang iya kamingawan kaangay sang Eden, kag ang iya desierto kaangay sang katamnan sang GINOO; kalipay kag kasadya makita sa sini, pagpasalamat, kag ang tingug sang melodia.

4 ś Magpamati kamo sa akon, akon katawohan; kag dungga ako, O akon pungsud: kay ang kasogoan magagowa gikan sa akon, kag patokon ko ang akon paghukom subong nga kapawa sang katawohan.

5 Ang akon pagkamatarung malapit; ang akon kaluwasan nagagowa na, kag ang akon mga butkon magahukom sa katawohan; ang kapuloan magahulat sa akon, kag sa akon butkon magasalig sila.

6 Itangla ang inyo mga mata sa mga langit, kag magtamud sa duta sa idalum: kay ang mga langit mawala kaangay sang aso, kag ang duta magadaan kaangay sang panapton, kag ang mga nagapuyo sa sini mapatay sa among bagay: apang ang akon kaluwasan manginsa gihapon, kag ang akon pagkamatarung indi pagwalaon.

7 ś Pamati sa akon, kamo nga nakakilala sang pagkamatarung, ang katawohan nga sa ila tagiposoon yara ang akon kasogoan; dili kamo mahadluk sa pagpakahuya sang mga tawo, kag dili kamo malisang sa ila mga pagbuyayaw.

8 Kay ang sipit magaut-ut sa ila kaangay sang panapton, kag ang ulud magakaon sa ila kaangay sang bulbul sang carnero: apang ang akon pagkamatarung manginsa gihapon, kag ang akon kaluwasan kutub sa kaliwatan pa kaliwatan.

9 ś Magmata, magmata, magsuklub sing kusug, O butkon sang GINOO; magmata, subong sa mga adlaw nga dumaan, sa mga kaliwatan sang dumaan nga mga tion. Indi bala ikaw ang nag-utud-utud sang Rahab, kag ang nagpilas sang dragon?

10 Indi bala ikaw ang nagpamala sang dagat, sang mga tubig sang daku nga kadadalman; ang naghimo sang mga kadadalman sang dagat nga alagyan sa pagtabok sang mga tinubus?

11 Busa ang mga gingawad sang GINOO magabalik, kag magaabut nga may inamba sa Zion; kag ang dayon nga kalipay manginsa ila olo: magaagum sila sing kasadya kag kalipay; kag ang kasubo kag panghayhay magapalagyo.

12 Ako, ako gid amo ang nagalipay sa inyo: sin-o bala ikaw, nga nahadluk ka sa tawo nga mapatay, kag sa anak nga lalaki sang tawo nga himoon subong sang hilamon;

13 Kag nagakalipat sa GINOO nga imo magbubuhat, nga nagbitad sang mga langit, kag nagpasad sang mga sadsaran sang duta; kag nagakahadluk sing dalayon sa adlawadlaw bangud sang kaalipungut sang manugpigus, subong nga daw handa sia sa paglaglag? kag diin bala ang kaalipungut sang manugpigus?

14 Ang bihag nga tinapok nagadali nga mabuhian sia, kag nga indi sia mapatay sa boho, kag nga indi makulang ang iya kalan-on.

15 Apang ako ang GINOO nga imo Dios, nga nagpahawa sang dagat, nga ang iya mga balud nagdaguhub: Ang GINOO sang mga kasoldadosan ang iya ngalan.

16 Kag ginbutang ko ang akon mga polong sa imo baba, kag gintabonan ko ikaw sa landong sang akon kamut, agud nga matanum ko ang mga langit, kag mapasad ang mga sadsaran sang duta, kag magsiling sa Zion, Ikaw ang akon katawohan.

17 ś Magmata, magmata, magtindug, O Jerusalem, nga nakainum sa kamut sang GINOO sang tagayan sang iya kasingkal; nakainum ka sang mga labud sang tagayan sang pagkurug, kag ginpuga ini.

18 Wala sing isa nga makatuytuy sa iya sa tanan nga anak nga lalaki nga gin-anak niya; kag walay bisan sin-o nga nagauyat sa iya sa kamut sa tanan nga anak nga lalaki nga ginsagud niya.

19 Ining duha ka butang nahanabu sa imo; sin-o bala ang mahanoklog sa imo? ang kamingaw, kag ang kalaglagan, kag ang tiggulutum, kag ang espada: sin-o bala ang pahalipayon ko sa imo?

20 Ang imo mga anak nga lalaki napunaw, nagahigda sila sa olo sang tanan nga dalan, subong sang talonon nga baka nga lalaki sa siod nga pinuna: puno sila sang kaalipungut sang GINOO, ang sabdong sang imo Dios.

21 ś Busa pamatii karon ini, ikaw nga napiotan, kag nahobog, apang indi sang alak:

22 Amo ini ang ginasiling sang imo Ginoo, ang GINOO, kag sang imo Dios nga nagaapin sang kasaba sang iya katawohan, Yari karon, ginkuha ko sa imo kamut ang tagayan sang pagkurug, ang mga labud sang tagayan sang akon kaalipungut; indi ka na mag-inum sini liwat:

23 Kondi ibutang ko ini sa kamut sang mga nagpapiot sa imo; nga nagsiling sa imo kalag, Kuub ka, agud nga maglatay kami: kag ginhamyang mo ang imo lawas subong nga duta, kag subong nga dalan, sa mga naglatay.

KAPITULO 52

MAGMATA, magmata; suklub ka sang imo kusug, O Zion; suklub ka sang imo mga panapton nga matahum, O Jerusalem, ang siudad nga balaan: kay kutub karon wala na sing magasulud sa imo nga dicircuncidado kag nga dimatinlo.

2 Panuk-ap ka sang yab-ok; magtindug, kag maglingkod, O Jerusalem: panginpalus ka sa mga gapus sang imo liog, O bihag nga babaye nga anak sang Zion.

3 Kay amo ini ang ginasiling sang GINOO, Sa walay bisan ano kamo nagbaligya sang inyo kaugalingon; kag sa walay kuarta tubuson kamo.

4 Kay amo ini ang ginasiling sang Ginoong DIOS, Ang akon katawohan nagdulhog sang una sa Egipto sa pagpanlugayaw didto; kag ang Asiriahanon nagpigus sa ila sa walay kabangdanan.

5 Busa karon, ano bala ang akon diri, nagasiling ang GINOO, nga ang akon katawohan ginakuha sa wala sing bisan ano? ang mga nagagahum sa ila nagapatiabaw sa ila, nagasiling ang GINOO; kag sa dalayon ginapasipalahan ang akon ngalan sa adlawadlaw.

6 Busa ang akon katawohan makakilala sang akon ngalan: busa makakilala sila sa sina nga adlaw nga amo ako ang nagapamolong: yari karon, ako ini.

7 ś Daw ano katahum sa mga bukid sang mga tiil sang nagadala sang maayong mga balita, nga nagabantala sang paghidait; nga nagadala sang maayong mga balita sang kaayohan, nga nagabantala sang kaluwasan; nga nagasiling sa Zion, Ang imo Dios nagahari!

8 Ang imo mga manugbantay magabayaw sang tingug; sa tingug magaamba sila sing tingub: kay makakita sila sa mata kag mata, kon ang GINOO magadala pa balik sang Zion.

9 ś Magkalipay kamo sing tingub, mag-amba sing tingub, kamo nga mga nawagwag nga duug sang Jerusalem: kay ang GINOO naglipay sang iya katawohan, gintubus niya ang Jerusalem.

10 Ginhublasan sang GINOO ang iya butkon nga balaan sa mga mata sang tanan nga pungsud; kag ang tanan nga ukbung sang duta makakita sang kaluwasan sang Dios naton.

11 ś Halin kamo, halin kamo, gowa kamo gikan dira, dili kamo magtandug sang butang nga dimatinlo; gowa kamo gikan sa tunga niya; palaninlo kamo, kamo nga nagadala sang mga suludlan sang GINOO.

12 Kay indi kamo maggowa sa dalidali, kag indi kamo maglakat sa pagpalagyo: kay ang GINOO magauna sa inyo; kag ang Dios sang Israel amo ang sa olihi ninyo.

13 ś Yari karon, ang akon alagad magahisayo sing mainandamon, pakataason sia kag dayawon, kag manginmataas gid.

14 Madamu ang nagkatingala sa imo; ang iya nawung nasamaran sing tama labi pa sa bisan kay sin-ong tawo, kag ang iya dagway labi pa sa mga anak sang mga tawo:

15 Sa amo magawisik sia sang madamung pungsud; ang mga hari magakium sang ila mga baba sa iya: kay inang wala masugid sa ila makita nila; kag inang wala nila mabatii patugsilingan nila.

KAPITULO 53

SIN-O bala ang nagtoo sang amon balita? kag sa kay sin-o bala ginapahayag ang butkon sang GINOO?

2 Kay magatubo sia sa atubangan niya subong sang linghud nga tanum, kag subong sang gamut gikan sa duta nga kigas: wala sia sing dagway ukon kaayoayo; kag kon magtolok kita sa iya, wala sing katahum nga paghandumon naton sia.

3 Gintamay sia kag ginsikway sang mga tawo; lalaki sa mga kasubo, kag nakakilala sang kalisud: kag nagpanago kita sang aton nawung sa iya; gintamay sia, kag wala naton sia pagpakamahala.

4 ś Sa pagkamatuud ginpas-an niya ang aton mga kalisud, kag gindala ang aton mga kasubo: apang ginkabig naton sia nga ginpilas, ginbunal sang Dios, kag ginsakit.

5 Apang sia ginpilas tungud sang aton mga paglalis, ginhanog sia tungud sa aton mga kalautan: ang silot sang aton paghidait yara sa iya; kag sa iya mga labud gin-alayo kita.

6 Tanan kita kaangay sang mga carnero nga nagtalang; naglipas kita ang tagsatagsa sa iya kaugalingon nga dalanon; kag ang GINOO nagpapas-an sa iya sang kalautan naton nga tanan.

7 Ginpigus sia, kag ginsakit sia, apang wala sia magtikab sang iya baba: gindul-ong sia sa ihawan subong sang cordero, kag subong sang carnero nga babaye nga apa sa atubangan sang iya mga manug-alot, sa amo wala sia magtikab sang iya baba.

8 Ginkuha sia sa hulunungan kag sa hukmanan: kag sin-o bala ang magapahayag sang iya kaliwatan? kay gin-utud sia gikan sa duta sang mga buhi: ginbunal sia tungud sang paglalis sang akon katawohan.

9 Kag ginhimo niya ang iya lulubngan upud sa malauton, kag upud sa manggaranon sa iya kamatayon; bangud nga wala sia naghimo sang palugus, kag wala sing bisan ano nga limbong sa iya baba.

10 ś Apang nahamut-an sang GINOO ang paghanog sa iya; ginpakalisud niya sia: kon himoon mo ang iya kalag nga halad tungud sa sala, makita niya ang iya kaliwat, palawigon niya ang iya mga adlaw, kag ang kabubut-on sang GINOO magauswag sa iya kamut.

11 Makakita sia sang kasakit sang iya kalag, kag macontento: tungud sa iya pagkilala, ang akon matarung nga alagad magapakamatarung sing madamu; kag sia magabatas sang mga kalautan nila.

12 Busa hatagan ko sia sing bahin upud sa mga kadalagkuan, kag magapakigbahin sia sang inagaw upud sa mga makusug; bangud nga gin-ula niya ang iya kalag tubtub sa kamatayon: kag naisipan sia kaupud sang mga malalison; kag gindala niya ang sala sang madamu, kag nagpatunga tungud sa mga malalison.

KAPITULO 54

MAG-AMBA, O baw-as, ikaw nga wala mag-anak; maghugyaw sa pag-amba, kag magsinggit sing mabaskug, ikaw nga wala pagsakiti sa pag-anak: kay madamu pa ang mga anak sang mamingaw sang sa anak sang nakasal nga asawa, nagasiling ang GINOO.

2 Palapara ang duug sang imo layanglayang, kag ipahitad sa ila ang mga kumbung sang imo mga puluy-an: dili pagpunggi, palabaa ang imo mga banting, kag palig-ona ang imo mga palpal;

3 Kay magasangkad ka sa too kag sa wala; kag ang imo kaliwat magapanubli sang mga Gentil, kag magapapuyo sang mga siudad nga mamingaw.

4 Dili magkahadluk; kay indi ka mahuy-an: kag dili ka magpalibog; kay indi ka pagpakahuy-an: kay malipatan mo ang kahuluy-an sang imo pagkapamatan-on, kag indi mo na madumduman ang kahuluy-an sang imo pagkababaying balo.

5 Kay ang imo Magbubuhat amo ang imo bana; ang GINOO sang mga kasoldadosan amo ang iya ngalan; kag ang imo Manunubus, ang Balaan nga Isa sang Israel; Ang Dios sang bug-os nga duta pagatawgon sia.

6 Kay ang GINOO nagtawag sa imo subong sang babaye nga binayaan kag pinakalisud sa espiritu, kag sang asawa sang pamatan-on, sang binayaan ka, nagasiling ang imo Dios.

7 Sa isa ka diotay nga tion ginbayaan ko ikaw; apang sa may dalagku nga mga kalooy tiponon ko ikaw.

8 Sa diotay nga kasingkal gintago ko sa malip-ot nga tion ang akon nawung gikan sa imo; apang sa dayon nga kalolo magakalooy ako sa imo, nagasiling ang GINOO nga imo Manunubus.

9 Kay ini subong sang mga tubig ni Noe sa akon: kay subong nga nagsumpa ako nga ang mga tubig ni Noe indi na maglambas sa ibabaw sang duta; sa amo nagsumpa ako nga indi na ako magkasingkal sa imo, ukon magsabdong sa imo.

10 Kay ang kabukiran mataliwan, kag ang kabakoloran makuha; apang ang akon kalolo indi magtaliwan sa imo, ukon ang katipan sang akon paghidait makuha, nagasiling ang GINOO nga may kalooy sa imo.

11 ś O ikaw nga ginpapiotan, nga ginbatibati sang unus, kag wala paglipaya, yari karon, ako magapahamtang sang imo mga bato nga may maanyag nga mga duag, kag ipahamtang ko ang imo mga sadsaran nga may mga zafiro.

12 Kag himoon ko ang imo mga bintana sa mga agate, kag ang imo mga gawang sa mga carbunclo, kag ang tanan mo nga dulunan sa mga bato nga maanyag.

13 Kag ang tanan mo nga anak tudloan sang GINOO; kag mangindaku ang paghidait sang imo mga anak.

14 Sa pagkamatarung lig-onon ka: magalayo ka sa pagpigus; kay indi ka mahadluk: kag sa kakugmat; kay indi ini magpalapit sa imo.

15 Yari karon, magahimbon sila sing totoo, apang indi tungud sa akon: ang bisan sin-o nga magahimbon batok sa imo mapukan bangud sa imo.

16 Yari karon, ako nagtuga sang manugsalsal nga nagahungkoy sang mga baga sa kalayo, kag nagapagowa sing gamit sa iya buluhaton; kag ako nagtuga sang manuglaglag sa paglaglag.

17 ś Wala sing hinganiban nga ginhimo batok sa imo nga magauswag; kag ang tagsa ka dila nga magtindug batok sa imo sa paghukom tagudilian mo. Ini amo ang panublion sang mga alagad sang GINOO, kag ang ila pagkamatarung gikan sa akon, nagasiling ang GINOO.

KAPITULO 55

HOY, ang tagsatagsa nga ginauhaw, kari kamo sa mga tubig, kag ang wala sing kuarta; kari kamo, magbakal, kag magkaon; hoo, kari, magbakal sing alak kag gatas sa wala sing kuarta kag sa wala sing bili.

2 Ngaa bala nagahinguyang kamo sing kuarta sa indi kalan-on? kag sang inyo pagpangabudlay sa wala nagapabusug? magpamati sing matalupangdon sa akon, kag magkaon kamo sinang maayo, kag pakalipaya ang inyo kalag sa katambok.

3 Ilingig ang inyo idulungug, kag magkari sa akon: magpamati, kag ang inyo kalag magakabuhi; kag magahimo ako sing dayon nga katipan upud sa inyo, nga amo ang malig-on nga mga kalooy kay David.

4 Yari karon, ginhatag ko sia nga saksi sa mga katawohan, pangolo kag manugmando sa katawohan.

5 Yari karon, magatawag ka sing pungsud nga wala mo makilala, kag ang mga pungsud nga wala makakilala sa imo magadalagan sa imo bangud sang GINOO nga imo Dios, kag sang Balaan nga Isa sang Israel; kay ginhimaya ka niya.

6 ś Pangitaa ninyo ang GINOO samtang nga makita pa sia, magpanawag kamo sa iya samtang nga malapit pa sia:

7 Magbiya ang malauton sang iya dalanon, kag ang dimatarung nga tawo sang iya mga hunahuna: kag magbalik sia sa GINOO, kag sia magakalooy sa iya; kag sa aton Dios, kay sia magapatawad sing bugana.

8 ś Kay ang akon mga hunahuna indi inyo mga hunahuna, kag ang inyo mga dalanon indi akon mga dalanon, nagasiling ang GINOO.

9 Kay subong nga ang mga langit mataas pa sa duta, sa amo ang akon mga dalanon mataas pa sa inyo mga dalanon, kag ang akon mga hunahuna sa inyo mga hunahuna.

10 Kay subong sang ulan nga nagakaholog, kag sang nieve gikan sa langit, kag wala nagabalik didto, kondi nagatubig sang duta, kag nagapabunga sini kag nagapasalingsing, agud nga maghatag ini sing binhi sa manugsab-ug, kag kalan-on sa manugkaon:

11 Manginsubong sini ang akon polong nga nagagowa sa akon baba: indi magbalik ini sa akon sa wala sing pulus, kondi magapatigayon ini sinang akon nahamut-an, kag magauswag ini sa butang nga akon ginpadal-an sini.

12 Kay magagowa kamo nga may kalipay, kag pagtuytuyan nga may paghidait: ang mga kabukiran kag ang mga kabakoloran sa atubangan ninyo magahugyaw sa pag-amba, kag ang tanan nga kahoy sang latagon magapamalakpak sang ila mga kamut.

13 Sa baylo sang talongon magatubo ang kahoy nga abeto, kag sa baylo sang sapinit magatubo ang kahoy nga mirto: kag ini manginngalan sa GINOO, nga sa dayon nga tanda nga indi mawala.

KAPITULO 56

AMO INI ang ginasiling sang GINOO, Hupti ninyo ang paghukom, kag maghimo sang katarungan: kay ang akon kaluwasan malapit na sa pag-abut, kag ang akon pagkamatarung sa pagpahayag.

2 Bulahan ang tawo nga nagahimo sini, kag ang anak nga lalaki sang tawo nga nagahuput sini; nga nagabantay sang sabbath gikan sa pagpasipala sini, kag nga nagabantay sang iya kamut gikan sa paghimo sing bisan ano nga malaut.

3 ś Kag ang anak nga lalaki sang dumuloong nga nagsimpon sa GINOO dili magpamolong, nga nagasiling, Ang GINOO nagpain sa akon sing bug-os sa iya katawohan: kag ang eunuco indi magsiling, Yari karon, ako kahoy nga mamala.

4 Kay amo ini ang ginasiling sang GINOO sa mga eunuco nga nagabantay sang akon mga sabbath, kag nga nagapili sang mga butang nga nagapahamuut sa akon, kag nagahuput sang akon katipan;

5 Bisan sa ila magahatag ako sa akon balay kag sa sulud sang akon mga kuta sing duug kag ngalan nga maayo pa sa mga anak nga lalaki kag sa mga anak nga babaye: hatagan ko sila sing ngalan nga dayon, nga indi mawala.

6 Labut pa ang mga anak nga lalaki sang dumuloong, nga nagasimpon sa GINOO, sa pag-alagad sa iya, kag sa paghigugma sang ngalan sang GINOO, nga mangin-iya mga alagad, ang tagsatagsa nga nagabantay sang sabbath gikan sa pagpasipala sini, kag nagahuput sing malig-on sang akon katipan;

7 Bisan sila dalhon ko sa akon balaan nga bukid, kag lipayon sila sa akon balay nga palangamuyoan: ang ila mga halad nga sinonog kag ang ila mga halad batonon sa akon halaran; kay ang akon balay tawgon nga balay nga palangamuyoan sa tanan nga katawohan.

8 Ang Ginoong DIOS nga nagatipon sang mga sinobol sang Israel nagasiling, Tiponon ko pa ang iban sa iya, luwas sadtong mga nagtilipon sa iya.

9 ś Kamo tanan nga kasapatan sang latagon, kari sa paghalunhon, hoo, tanan kamo nga kasapatan sa talon.

10 Ang iya mga manugbantay bulag: sila tanan wala ihibalo, sila tanan apa nga mga ido, indi sila makataghol; nga nagakatolog, nga nagaloko, nga nagahigugma sa pagtolog.

11 Hoo, mga ido sila nga dalok nga wala gid sing kacontento, kag sila mga manugpahalab nga indi makahangup: sila tanan nagatololok sa ila kaugalingon nga dalanon, ang tagsatagsa sa iya daug, gikan sa duug niya.

12 Kari kamo, siling nila, magakuha ako sing alak, kag busgon ta ang aton kaugalingon sing ilimnon nga masingkal; kag ang buwas manginsubong sining adlaw, kag labi pa ka bugana.

KAPITULO 57

ANG matarung nagakawala, kag wala sing tawo nga nagahuput sini sa tagiposoon: kag ang maloloy-on nga mga tawo ginakuha, nga walay bisan sin-o nga nagapatugsiling nga ang matarung ginakuha sa malaut nga magaabut.

2 Magasulud sia sa paghidait: magapahuway sila sa ila mga higdaan, ang tagsatagsa magalakat sa iya pagkatadlong.

3 ś Apang palapit diri, kamo nga mga anak nga lalaki sang babaying babaylan, ang kaliwat sang makihilahion kag sang bigaon.

4 Batok kay sin-o bala nagauligyat kamo? batok kay sin-o bala ginapasangkad ninyo ang baba, kag ginapadiwal ang dila? indi bala kamo mga anak sang paglalis, kaliwat sang pagkadimatuud,

5 Nga nagapadabdab kamo sang inyo kaugalingon sa mga diosdios sa idalum sang tagsa ka kahoy nga malagtum, nga nagapatay sang kabataan sa mga nalupyakan sa idalum sang mga guab sang mga dakung bato?

6 Ang imo bahin yara sa mahining nga mga bato sang sapa; sila, sila ang imo kapalaran: sa ila gid nag-ula ka sing halad nga ilimnon, nagdolot ka sing halad nga kalan-on. Mapahalipay bala ako sa ila sini?

7 Sa ibabaw sang makahalawhaw kag mataas nga bukid ginpahamtang mo ang imo higdaan: bisan didto nagtaklad ka sa pagdolot sing halad.

8 Sa likod sang mga ganhaan man kag sang mga haligi nagpatindug ka sang imo handumanan: kay naghublas ka sang imo kaugalingon sa iban sang sa akon, kag nagsaka; ginpalapad mo ang imo higdaan, kag nagpakigkatipan ka sa ila; ginhigugma mo ang ila higdaan diin nakita mo ini.

9 Kag nagkadto ka nga may ihalaplas sa hari, kag nagdugang ang imo mga pahumut, kag nagpadala sang imo mga manugbalita sa malayo, kag nagpakubus sang imo kaugalingon tubtub sa impierno.

10 Ginlapyo ka sa pagkadaku sang imo dalanon; apang wala ka magsiling, Wala ini sing paglaum: nakita mo ang kabuhi sa imo kamut; busa wala ka malisdan.

11 Kag sa kay sin-o ka bala nahangawa kag nahadluk, nga nagbutig ka, kag wala magdumdum sa akon, ukon maghuput sini sa imo tagiposoon? wala bala ako maghipus sa malawig na gid nga tion, kag ikaw wala nagakahadluk sa akon?

12 Ipahayag ko ang imo pagkamatarung, kag ang imo mga buhat; kay indi mo sila mapuslan.

13 ś Kon magtuaw ka, paluwasa sa imo ang mga hubon nimo; apang ang hangin magadala sa ila tanan palayo; dalhon sila sing kadayawan: apang ang nagabutang sang iya pagsalig sa akon magatag-iya sang duta, kag magapanubli sang akon balaan nga bukid;

14 Kag magasiling sia, Tampok kamo, tampok kamo, amana ang dalanon, kuhaa ang kasandaran sa dalanon sang akon katawohan.

15 Kay amo ini ang ginasiling sang mataas kag makahalangad nga Isa nga nagapuyo sa wala sing katubtuban, nga ang iya ngalan Balaan; Nagapuyo ako sa mataas kag balaan nga duug, upud sa iya man nga may mahinulsulon kag mapainubuson nga espiritu, sa pagpaumpaw sang espiritu sang mapainubuson, kag sa pagpaumpaw sang tagiposoon sang mga mahinulsulon.

16 Kay indi ako magapakigsuay sa gihapon, ukon magkasingkal ako sa gihapon: kay ang espiritu mapunaw sa atubangan nakon, kag ang mga kalag nga akon ginhimo.

17 Bangud sang kalautan sang iya pagkamahamkonon nasingkal ako, kag ginsakit ko sia: nagpanago ako, kag nasingkal, kag sia nagpadayon nga may kabalingag sa dalanon sang iya tagiposoon.

18 Nakita ko ang iya mga dalanon, kag ayohon ko sia: tuytuyan ko man sia, kag iuli ang mga paglipay sa iya kag sa iya mga manuglalaw.

19 Ako nagatuga sang bunga sang mga bibig; Paghidait, paghidait sa iya nga malayo, kag sa iya nga malapit, nagasiling ang GINOO; kag ayohon ko sia.

20 Apang ang mga malauton kaangay sang dagat nga natublag, kon indi ini makapahuway, nga ang iya mga tubig nagaalimbukad sing lunang kag dag-ut.

21 Wala sing paghidait, nagasiling ang akon Dios, sa malauton.

KAPITULO 58

SINGGIT sing mabaskug, dili magpugung, bayawa ang imo tingug kaangay sang budyong, kag ipahayag sa akon katawohan ang ila paglalis, kag sa panimalay ni Jacob ang ila mga sala.

2 Apang ginapangita nila ako adlawadlaw, kag nagakalipay sa pagkilala sang akon mga dalanon, subong sang pungsud nga naghimo sang pagkamatarung, kag wala magbiya sang pagsolondan sang ila Dios: nagapangayo sila sa akon sing mga pagsolondan sang katarungan; nagakalipay sila sa pagpalapit sa Dios.

3 ś Ngaa bala nagpuasa kami, siling nila, kag wala ka makakita? ngaa bala nga ginpapiotan namon ang amon kalag, kag wala ka nagasapak? Yari karon, sa adlaw sang inyo pagpuasa nakakita kamo sing kalipayan, kag nagasukut sang bug-os ninyo nga mga pagpangabudlay.

4 Yari karon, nagapuasa kamo tungud sa pagbanggianay kag pagsinuay, kag sa pagsumbag nga may inumol sang pagkamalaut: indi kamo magapuasa subong sang ginahimo ninyo sining adlaw, agud nga mapabati ninyo ang inyo tingug sa hitaas.

5 Amo bala ina ang puasa nga ginpili ko? ang adlaw nga ang tawo magpapiot sang iya kalag? amo bala ang pagduko sang iya olo subong sang papiro, kag paghumlad sing panapton nga sako kag may abo sa idalum niya? tawgon mo bala ini nga puasa, kag kalahamut-an nga adlaw sa GINOO?

6 Indi bala amo ini ang puasa nga ginpili ko? ang paghubad sang mga gapus sang pagkamalaut, ang pagkuha sang mabug-at nga mga lulan, kag ang pagbuhi sang mga ginpigus, kag nga balion ninyo ang tagsa ka gota?

7 Indi bala ini ang pagpaambit sang imo kalan-on sa nagutum, kag nga dalhon mo sa imo balay ang mga imol nga ginasikway? kon makita mo ang hubo, nga pagtabonan mo sia; kag nga dili ka magpanago gikan sa imo kaugalingon nga unud?

8 ś Niyan ang imo kapawa magabanaag subong sang kaagahon, kag ang imo pag-ayo magaabut sing madali: kag ang imo pagkamatarung magauna sa imo; ang himaya sang GINOO mangin-imo bantay sa imo likod.

9 Niyan magatawag ka, kag ang GINOO magasabat; magatuaw ka, kag magasiling sia, Yari ako. Kon kuhaon mo sa tunga nimo ang gota, ang pag-untay sang tudlo sang kamut, kag ang pagpamolong sing kadayaw;

10 Kag kon ikaw magkaawa sa imo kalag sa nagutum, kag magbusug sang napiotan nga kalag; niyan ang imo kapawa magasilak sa kadudulman, kag ang imo kadulum manginsubong sang kaodtohon:

11 Kag ang GINOO magatuytuy sa imo sing dalayon, kag magabusug sang imo kalag sa tion sang kakigas, kag magapatambok sang imo mga tul-an: kag manginkaangay ka sang katamnan nga natubigan, kag kaangay sang tuburan sang tubig, nga ang iya mga tubig wala pagkahubas.

12 Kag ang mga magikan sa imo magapatindug sang dumaan nga mga duug nga nalaglag: patindugon mo ang mga sadsaran sang madamung kaliwatan; kag ikaw pagatawgon nga, Ang manugkaayo sang bulho, Ang manugpahauli sang mga banas nga puy-an.

13 ś Kon ipalikaw mo ang imo tiil sa sabbath, gikan sa paghimo sang nahamut-an mo sa akon balaan nga adlaw; kag tawgon nga kalipay ang sabbath, nga balaan sang GINOO, halangdon; kag tahoron sia, nga wala nagahimo sang imo kaugalingon nga mga paagi, ukon nagapangita sang imo kaugalingon nga kalipayan, ukon nagapamolong sang imo kaugalingon nga mga polong:

14 Niyan magakalipay ka sa GINOO; kag pasakyon ko ikaw sa mataas nga mga duug sang duta, kag pakan-on ko ikaw sang pinanubli ni Jacob nga imo amay: kay ang baba sang GINOO nagpamolong sini.

KAPITULO 59

YARI KARON, ang kamut sang GINOO indi malip-ot, nga indi ini makaluwas; kag ang iya idulungug indi bungul, nga indi ini makabati:

2 Apang ang inyo mga kalautan nagpahamulag sa inyo kag sa inyo Dios, kag ang inyo mga sala naglipud sang iya nawung sa inyo, sa bagay nga indi sia magpamati.

3 Kay ang inyo mga kamut nadagtaan sing dugo, kag ang inyo mga tudlo sing kalautan; ang inyo mga bibig nagpamolong sing kabutigan, ang inyo dila nagmitlang sing pagkabalingag.

4 Wala sing sin-o nga nagapangita sing katarungan, kag wala man sang bisan sin-o nga nagapangapin sang kamatooran: nagasalig sila sa kadayawan, kag nagapamolong sing kabutigan; nagapanamkon sila sing kalainan, kag nagaanak sing kalautan.

5 Nagapabuto sila sang mga itlog sang mga cocatris nga man-ug, kag nagahabol sila sang lawa sang damang: ang nagakaon sang ila mga itlog nagakapatay, kag inang nagakapusa nagagowa nga man-ug nga dalitan.

6 Ang ila mga lawa mangin-indi mga panapton, kag indi sila makapanabon sang ila mga binuhatan: ang ila mga binuhatan mga binuhatan sang kalautan, kag ang buhat sang kalugusan yara sa ila mga kamut.

7 Ang ila mga tiil nagadalagan sa malaut, kag nagadalidali sila sa pagpaagay sing dugo nga inocente: ang ila mga hunahuna mga hunahuna sang kalautan; ang pagpangwagwag kag kalaglagan yara sa ila mga banas.

8 Wala sila makakilala sang dalan sang paghidait; kag walay paghukom sa ila mga paglakat: naghimo sila nga sa ila sing mga banas nga tiko: ang bisan sin-o nga nagalakat sa ila indi makakilala sing paghidait.

9 ś Busa malayo sa aton ang katarungan, kag wala nagalambut sa aton ang matarung: nagapangita kita sang kapawa, apang yari karon, ang kadudulman; sang kasanag, apang nagalakat kita sa kadulum.

10 Ginapangapkap ta ang dingding kaangay sang mga bulag, kag nagapangapkap kita subong nga daw wala kita sang mga mata: nagakasandad kita sa kaodtohon subong sang sa kagab-ihon; yari kita sa mamingaw nga mga duug subong sang patay nga mga tawo.

11 Kita tanan nagangurub kaangay sang mga oso, kag naganguynguy sing tama kaangay sang mga pating: nagapangita kita sang katarungan, apang wala; sang kaluwasan, apang malayo ini sa aton.

12 Kay ang amon mga paglalis nagdamu sa atubangan nimo, kag ang amon mga sala nagapamatuud batok sa amon: kay ang amon mga paglalis yari sa amon; kag nahanungud sa amon mga kalautan, kilala namon sila;

13 Ang paglalis kag pagbutig batok sa GINOO, kag ang pagtalikod sa pagsonod sa amon Dios, ang pagpamolong sing pagpigus kag pagribuk, ang pagpanamkon kag pagmitlang gikan sa tagiposoon sing mga polong nga dimatuud.

14 Kag ang katarungan ginapaisul, kag ang pagkamatarung nagatindug sa malayo: kay ang kamatooran napukan sa dalan, kag ang pagkatadlong indi makasulud.

15 Hoo, ang kamatooran nagakawala; kag ang nagahalin sa malaut nagahimo sang iya kaugalingon nga tulukbon: kag nakita ini sang GINOO, kag ini nagpaakig sa iya bangud nga wala sing paghukom.

16 ś Kag nakita niya nga walay tawo, kag natingala sia nga walay manugpatunga: busa ang iya butkon nagdala sing kaluwasan sa iya; kag ang iya pagkamatarung, ini nagsakdag sa iya.

17 Kay ginsuklub niya ang pagkamatarung subong sang taming sa dughan, kag pandong sang kaluwasan sa iya olo; kag ginsuklub niya nga bayo ang mga panapton sang pagtimalus, kag napanaptan sang kakugi subong sang kunup.

18 Sono sa ila mga buhat, sia magabayad sing sono, kaalipungut sa iya mga kasumpung, tumbas sa iya mga kaaway; magabayad sia sa kapuloan sing tumbas.

19 Sa amo magakahadluk sila sa ngalan sang GINOO kutub sa katundan, kag sang iya himaya kutub sa bulutlakan sang adlaw. Kon magaabut ang kaaway subong sang baha, ang Espiritu sang GINOO magabayaw sang hayahay batok sa iya.

20 ś Kag ang Manunubus magaabut sa Zion, kag sa mga nagaliso gikan sa paglalis sa Jacob, nagasiling ang GINOO.

21 Kag nahanungud sa akon, amo ini ang akon katipan upud sa ila, nagasiling ang GINOO; Ang akon espiritu nga yara sa imo, kag ang akon mga polong nga ginbutang ko sa imo baba, indi magtaliwan sa imo baba, ukon sa baba sang imo kaliwat, ukon sa baba sang kaliwat sang imo kaliwat, nagasiling ang GINOO, kutub karon kag sa gihapon.

KAPITULO 60

MAGTINDUG, magsilak; kay ang imo kapawa nag-abut na, kag ang himaya sang GINOO nagasilak sa imo.

2 Kay, yari karon, ang kadudulman magatabon sang duta, kag ang pitipit nga kadudulman sang mga katawohan: apang ang GINOO magasilak sa imo, kag ang iya himaya makita sa imo.

3 Kag ang mga Gentil magaabut sa imo kapawa, kag ang mga hari sa kasanag sang imo pagdilag.

4 Bayawa ang imo mga mata sa palibut, kag tan-awa: sila tanan nagatipon sing tingub, nagakari sila sa imo: ang imo mga anak nga lalaki magaabut gikan sa malayo, kag ang imo mga anak nga babaye saguron sa luyo nimo.

5 Niyan makit-an mo, kag magaulugyon, kag ang imo tagiposoon magakahadluk, kag magadaku; bangud nga ang kabugana sang dagat magasaylo sa imo, ang mga kusug sang mga Gentil magaabut sa imo.

6 Ang kadam-an sang mga camelyo magatabon sa imo, ang mga dromedario sang Midian kag Efa; sila tanan magaabut gikan sa Seba: magadala sila sing bulawan kag incienso; kag sila magabantala sang mga pagdayaw sa GINOO.

7 Ang tanan nga panong sang Kedar tiponon sing tingub sa imo, ang mga carnero nga lalaki sang Nabayot magaalagad sa imo: magasaka sila nga may kahamuut sa akon halaran, kag himayaon ko ang balay sang akon himaya.

8 Sin-o bala ini sila nga nagalupad subong sang panganud, kag subong sang mga pating sa ila mga bintana?

9 Sa pagkamatuud ang kapuloan magahulat sa akon, kag una ang mga sakayan sang Tarsis, sa pagdala sang imo mga anak nga lalaki gikan sa malayo, ang ila pilak kag ang ila bulawan upud sa ila, sa ngalan sang GINOO nga imo Dios, kag sa Balaan nga Isa sang Israel, bangud nga naghimaya sia sa imo.

10 Kag ang mga anak nga lalaki sang mga dumuloong magapatindug sang imo mga kuta, kag ang ila mga hari magaalagad sa imo: kay sa akon kasingkal ginsakit ko ikaw, apang sa akon kahamuut nalooy ako sa imo.

11 Busa ang imo mga gawang buksan sing dalayon; indi sila pagtakpan sa adlaw ukon sa gab-i; agud nga ang mga tawo magadala sa imo sang mga kusug sang mga Gentil, kag agud nga ang ila mga hari madala.

12 Kay ang pungsud kag ang ginharian nga indi mag-alagad sa imo mawala; hoo, yadto nga mga pungsud laglagon sing bug-os.

13 Ang himaya sang Libano magaabut sa imo, ang kahoy nga abeto, ang kahoy nga pino, kag ang kahoy nga boks sing tingub, sa pagpatahum sang duug sang akon santuario; kag himoon ko nga mahimayaon ang duug sang akon mga tiil.

14 Ang mga anak nga lalaki man sang mga nagpapiot sa imo magakari nga nagayaub sa imo; kag tanan sila nga naghikay sa imo magahapa sila tubtub sa mga dapadapa sang imo mga tiil; kag tawgon ka nila nga, Ang siudad sang GINOO, Ang Zion sang Balaan nga Isa sang Israel.

15 Bangud kay ginbayaan kag gindumtan ka, sa bagay nga wala sing tawo nga nag-agi sa imo, himoon ko ikaw nga maglabaw sa wala sing katubtuban, kalipay sang madamu nga mga kaliwatan.

16 Ikaw man magasoso sang gatas sang mga Gentil, kag magasoso sang dughan sang mga hari: kag ikaw makahibalo nga ako, ang GINOO, amo ang imo Manluluwas kag imo Manunubus, ang gamhanan nga Isa ni Jacob.

17 Sa baylo sang saway magadala ako sing bulawan, kag sa baylo sang salsalon magadala ako sing pilak, kag sa baylo sang kahoy, saway, kag sa baylo sang mga bato, salsalon: himoon ko man nga paghidait ang imo mga opisyal, kag ang imo mga manugsukut nga pagkamatarung.

18 Ang palugus indi na mabatian sa imo duta, ang pagpangwagwag ukon ang kalaglagan sa imo mga ginsakpan; kondi tawgon mo ang imo mga kuta Kaluwasan, kag ang imo mga gawang Pagdayaw.

19 Ang adlaw indi na mangin-imo kapawa sa adlawon; kag sa kasilaw ang bulan indi na magahatag sang kapawa sa imo: kondi ang GINOO mangindayon nga kapawa sa imo, kag ang imo Dios imo himaya.

20 Ang imo adlaw indi na magtunud; kag ang imo bulan indi na magtaliwan: kay ang GINOO mangin-imo dayon nga kapawa, kag ang mga adlaw sang imo paglalaw matapus.

21 Ang imo katawohan man mangin-matarung nga tanan: panublion nila ang duta sa gihapon, ang sanga sang akon tinanum, ang buhat sang akon mga kamut, agud nga himayaon ako.

22 Ang isa ka diotay mangin-isa ka libo, kag ang isa ka gamay manginmabakud nga pungsud: ako, ang GINOO, magapadali sini sa iya tion.

KAPITULO 61

ANG Espiritu sang Ginoong DIOS yara sa akon; bangud nga ang GINOO naghaplas sa akon sa pagwali sang maayo nga mga balita sa mga mapainubuson; ginpadala niya ako sa pagbugkus sang mga may boong nga tagiposoon, sa pagbantala sing kahilwayan sa mga bihag, kag sa pagbukas sang bilanggoan sa mga nagapus;

2 Sa pagbantala sang tuig nga nahamut-an sang GINOO, kag sang adlaw sang pagtimalus sang Dios naton; sa paglipay sang tanan nga nagalalalaw;

3 Sa pagtangdo sa mga nagalalalaw sa Zion, sa paghatag sa ila sing katahum sa baylo sang mga abo, sang lana sang kalipay sa baylo sang lalaw, sang panapton sang pagdayaw sa baylo sang espiritu sang kabug-atan; agud nga tawgon sila nga mga kahoy sang pagkamatarung, ang tinanum sang GINOO, agud nga himayaon sia.

4 ś Kag patindugon nila ang dumaan nga mga nagub-an, tukuron nila ang nauna nga mga nahapay, kag kaayohon nila ang mga siudad nga naguba, ang mga kahapayan sang madamu nga mga kaliwatan.

5 Kag ang mga dumuloong magatindug kag magapahalab sang inyo mga panong, kag ang mga anak nga lalaki sang tagaluwas mangin-inyo mga manug-arado kag inyo mga manugtatap sang ubas.

6 Apang kamo hingalanan nga mga Pari sang GINOO: ang mga tawo magatawag sa inyo nga Mga Ministro sang aton Dios: magakaon kamo sang manggad sang mga Gentil, kag sa ila himaya magapabugal kamo.

7 ś Sa baylo sang inyo kahuluy-an may inyo kamo nga pilo nga bahin; kag sa baylo sang kalibog magakalipay sila sa ila bahin: busa sa ila duta magatag-iya sila sing pilo nga bahin: ang dayon nga kalipay manginsa ila.

8 Kay ako nga GINOO nagahigugma sang katarungan, nagadumut ako sang pangawat nga sa halad nga sinonog; kag ako magatudlo sang buhat nila sa kamatooran, kag magahimo ako sa ila sing katipan nga dayon.

9 Kag ang kaliwat nila kilalahon sa mga Gentil, kag ang ila inanak sa katawohan: ang tanan nga makakita sa ila magakilala sa ila, nga sila amo ang kaliwat nga ginapakamaayo sang GINOO.

10 Magakalipay ako sing daku sa GINOO, ang akon kalag magamalipayon sa akon Dios; kay ginpapanaptan niya ako sang mga panapton sang kaluwasan, ginputus niya ako sang kunup sang pagkamatarung, subong sang nobyo nga nagapamuni sang iya kaugalingon sing mga puni, kag subong sang nobya nga nagapamuni sang iya kaugalingon sang iya mga alahas.

11 Kay subong nga ang duta nagapatubo sang iya salingsing, kag subong nga ang katamnan nagapatubo sang mga butang nga ginatanum sa sini; sa amo ang Ginoong DIOS magapatubo sang pagkamatarung kag pagdayaw sa atubangan sang tanan nga pungsud.

KAPITULO 62

TUNGUD sang Zion indi ako maghipus, kag tungud sang Jerusalem indi ako magpahuway, tubtub nga ang pagkamatarung sini magagowa subong sang kasilaw, kag ang kaluwasan sini subong sang suga nga nagadabdab.

2 Kag ang mga Gentil makakita sang imo pagkamatarung, kag ang tanan nga hari, sang imo himaya: kag tawgon ka sa ngalan nga bag-o, nga ihingalan sang baba sang GINOO.

3 Ikaw man manginpurungpurung sang himaya sa kamut sang GINOO, kag diadema nga harianon sa kamut sang imo Dios.

4 Indi ka na pagtawgon Binayaan; kag indi na pagtawgon ang imo duta Mamingaw: kondi tawgon ka Hefzi-ba, kag ang imo duta Beula: kay ang GINOO nagakalipay sa imo, kag ang imo duta kaslon.

5 ś Kay subong sang pamatan-on nga lalaki nga nagapangasawa sa ulay, sa amo ang imo mga anak nga lalaki magapangasawa sa imo: kag subong sang nobyo nga nagakalipay sa nobya, sa amo magakalipay sa imo ang imo Dios.

6 Nagbutang ako sing mga manugbantay sa imo mga kuta, O Jerusalem, nga indi gid magahilipus sa adlaw kag sa gab-i: kamo nga mga manugsambit sa GINOO, dili kamo maghilipus,

7 Kag dili sia pagpapahuwaya, tubtub nga mapatindug niya, kag tubtub nga mahimo niya ang Jerusalem nga pagdayaw sa duta.

8 Nagsumpa ang GINOO tungud sa iya too nga kamut, kag tungud sa butkon sang iya kusug, Sa pagkamatuud indi na ako maghatag sang imo uyas nga kalan-on sa imo mga kaaway; kag ang mga anak nga lalaki sang dumuloong indi magainum sang imo alak, nga imo ginpangabudlayan:

9 Kondi ang mga nagpopo sini magakaon sini, kag magadayaw sa GINOO; kag ang mga nagtipon sini magainum sini sa mga luwang sang akon pagkabalaan.

10 ś Mag-agi, mag-agi sa mga gawang; amana ninyo ang dalanon sang katawohan; tampoki, tampoki ang dalan nga daku; pamuluta ang mga bato; bayawa ang hayahay tungud sa katawohan.

11 Yari karon, ang GINOO nagbantala tubtub sa ukbung sang kalibutan, Isiling ninyo sa babaye nga anak sang Zion, Yari karon, ang imo kaluwasan nagaabut; yari karon, ang iya balus upud sa iya, kag ang iya buhat sa atubangan niya.

12 Kag tawgon nila sila, Ang balaan nga katawohan, Ang tinubus sang GINOO: kag tawgon ka, Pinangita, Siudad nga wala pagbayai.

KAPITULO 63

SIN-O bala ini nga nagaabut gikan sa Edom, nga may nalugum nga mga panapton gikan sa Bozra? ini nga mahimayaon sa iya panapton, nga nagalakat sa pagkadaku sang iya kusug? Ako nga nagapamolong sa pagkamatarung, gamhanan sa pagluwas.

2 Ngaa bala nga mapula ka sa imo panapton, kag ang imo mga panapton kaangay sa nagalinas sa linasan sang alak?

3 Naglinas ako nga isa lamang sa linasan sang alak; kag gikan sa katawohan walay isa nga nag-upud sa akon: kay linason ko sila sa akon kaakig, kag tapakon sila sa akon kaalipungut; kag ang ila dugo magaagsik sa akon mga panapton, kag dagtaan ko ang bug-os ko nga bayo.

4 Kay ang adlaw sang pagtimalus yari sa akon tagiposoon, kag ang tuig sang akon pagtubus nag-abut na.

5 Kag nagtolok ako, kag wala gid sing matabang; kag natingala ako nga wala gid sing masakdag: busa ang akon kaugalingon nga butkon nagdala sing kaluwasan sa akon; kag ang akon kaalipungut, ini nag-alay-ay sa akon.

6 Kag linason ko ang katawohan sa akon kaakig, kag hobogon sila sa akon kaalipungut, kag taktakon ko sa duta ang ila kusug.

7 ś Isambit ko ang mahigugmaon nga mga kaayo sang GINOO, kag ang mga pagdayaw sang GINOO, sono sa tanan nga ginhatag sa amon sang GINOO, kag ang daku nga pagkaayo ayon sa panimalay sang Israel, nga ginhatag niya sa ila sono sa iya mga kalooy, kag sono sa kadam-an sang iya mahigugmaon nga mga kaayo.

8 Kay nagsiling sia, Sa pagkamatuud sila akon katawohan, mga anak nga indi magbutig: gani sia ila Manluluwas.

9 Sa tanan nila nga kapipit-an ginpiotan sia, kag ang anghel sang iya pagtambong nagluwas sa ila: sa iya gugma kag sa iya kaawa gintubus niya sila; kag ginkugus niya sila, kag gindala sila sa tanan nga adlaw sang dumaan.

10 ś Apang nagbato sila, kag ginpaugtas ang iya balaan nga Espiritu: busa nabaylo sia nga kaaway nga sa ila, kag sia nagpakig-away batok sa ila.

11 Niyan nadumduman niya ang mga adlaw sang dumaan, si Moises, kag ang iya katawohan, nga nagasiling, Diin bala ang nagpataklad sa ila gikan sa dagat upud sa manugpahalab sang iya panong? diin bala ang nagbutang sang iya balaan nga Espiritu sa sulud niya?

12 Nga nagtuytuy sa ila sang iya butkon nga mahimayaon sa too nga kamut ni Moises, nga nagapahawa sang tubig sa atubangan nila, sa paghimo nga sa iya sing ngalan nga dayon?

13 Nga nagtuytuy sa ila paagi sa kadadalman, subong sang kabayo sa kamingawan, agud nga indi sila makasandad?

14 Subong sang hayup nga nagadulhog sa nalupyakan, ang Espiritu sang GINOO nagpapahuway sa iya: sa amo gintuytuyan mo ang imo katawohan, sa paghimo nga sa imo sing ngalan nga mahimayaon.

15 ś Tamud ka kutub sa langit, kag magtolok kutub sa puluy-an sang imo pagkabalaan kag sang imo himaya: diin bala ang imo kakugi kag ang imo kusug, ang balatyagon sang imo tagiposoon kag sang imo mga kalooy ayon sa akon? ginapunggan bala sila?

16 Sa walay pagduhaduha ikaw amo ang amon amay, bisan si Abraham wala makakilala sa amon, kag ang Israel wala nagakilala sa amon: ikaw, O GINOO, amo ang amon amay, amon manunubus; ang imo ngalan kutub sa wala sing katapusan.

17 ś O GINOO, ngaa bala ginpatalang mo kami sa imo mga dalanon, kag ginpatig-a ang amon tagiposoon sa kahadluk sa imo? Balik ka tungud sa imo mga alagad, ang mga tribo sang imo panublion.

18 Ang katawohan sang imo pagkabalaan nagtag-iya sini sa malip-ot lamang nga tion: gintapak sang amon mga kasumpung ang imo santuario.

19 Imo kami: wala ka nga mas-a maggahum sa ila; wala sila gintawag sa imo ngalan.

KAPITULO 64

O kabay kuntani nga gision mo ang mga langit, nga magpanaug ka, agud nga mag-ililig ang kabukiran sa imo atubangan,

2 Subong sang pagdukut sang kalayo nga nagapangtunaw, ang kalayo nga nagapabukal sang mga tubig, sa pagpakilala sang imo ngalan sa imo mga kasumpung, agud nga ang mga pungsud magkurug sa imo atubangan!

3 Sang naghimo ka sing mga butang nga makakulugmat nga wala namon pagpaabuta, nagpanaug ka, ang kabukiran nag-ililig sa atubangan mo.

4 Kay kutub sa kamunoan sang kalibutan ang mga tawo wala makabati, ukon makahantup paagi sa idulungug, ukon ang mata makakita, O Dios, luwas sa imo, kon ano ang gin-aman niya tungud sa nagahulat sa iya.

5 Nagasugata ka sang nagakasadya kag nagapanghikot sing pagkamatarung, sadtong mga nagadumdum sa imo sa mga dalanon mo: yari karon, ikaw nasingkal; kay nakasala kami: sa ila sini ang pagpadayon, kag maluwas kami.

6 Apang kami tanan subong sang dimatinlo nga butang, kag ang tanan namon nga mga pagkamatarung subong sang mahigko nga mga lapat; kag kami tanan nagakalaya subong sang dahon; kag ang amon mga kalautan, kaangay sang hangin, nagpapahilayo sa amon.

7 Kag wala gid sing nagapanawag sa imo ngalan, nga nagapanikasug sa iya kaugalingon sa pagkapyot sa imo: kay gintago mo gikan sa amon ang imo nawung, kag nagpapas sa amon, bangud sang amon mga kalautan.

8 Apang karon, O GINOO, ikaw ang amon amay; kami ang lunang, kag ikaw ang amon maninihon; kag kami tanan buhat sang imo kamut.

9 ś Dili magkasingkal sing tama gid, O GINOO, kag dili pagdumduma sa gihapon ang kalautan: yari karon, toloka, nagapakilooy kami sa imo, kami tanan imo katawohan.

10 Ang imo balaan nga mga siudad isa ka kamingawan, ang Zion isa ka kamingawan, ang Jerusalem isa ka kahapayan.

11 Ang amon balaan kag ang amon matahum nga balay, diin nagdayaw sa imo ang amon mga kaamayan, ginsonog sang kalayo: kag ang tanan namon nga butang nga matahum nawagwag.

12 Magapugung ka bala sang imo kaugalingon tungud sining mga butang, O GINOO? magahipus ka bala, kag papiotan kami sing tama gid?

KAPITULO 65

GINAPANGITA ako sang mga wala magpamangkot nahanungud sa akon; nakita ako sang mga wala magpangita sa akon: nagsiling ako, Toloka ako, toloka ako, sa pungsud nga wala matawag sa akon ngalan.

2 Gin-untay ko sa bug-os nga adlaw ang akon mga kamut sa katawohan nga mabinatoon, nga nagalakat sa dalanon nga indi maayo, sono sa ila kaugalingon nga mga hunahuna;

3 Katawohan nga nagapaakig sa akon sa guya nakon sing dalayon; nga nagahalad sa mga katamnan, kag nagasonog sing incienso sa ibabaw sang mga halaran nga tisa;

4 Nga nagapabilin sa mga lulubngan, kag nagapuyo sa mga lapida, nga nagakaon sing unud sang babuy, kag ang sabaw sang makangilil-ad nga mga butang yara sa ila mga suludlan;

5 Nga nagasiling, Palayo ka, dili ka magpalapit sa akon; kay ako balaan pa sa imo. Ini sila aso sa akon ilong, kalayo nga nagadabdab sa bug-os nga adlaw.

6 Yari karon, nasulat na ini sa atubangan nakon: indi ako maghipus, kondi magabalus, magabalus ako sa ila dughan,

7 Sang inyo mga kalautan, kag sang mga kalautan sang inyo mga kaamayan sing tingub, nagasiling ang GINOO, nga nagsolonog sing incienso sa mga bukid, kag nagpasipala sa akon sa mga kabakoloran: busa sukbon ko sa ila sabak ang buhat nila nga una.

8 ś Amo ini ang ginasiling sang GINOO, Subong sang bag-ong alak nga makita sa pinungpung, kag ang isa nagasiling, Dili ini paglaglaga; kay may yara nga pagpakamaayo sa sini: amo ini ang himoon ko tungud sa akon mga alagad, agud nga indi ko paglaglagon sila tanan.

9 Kag magapagowa ako sing kaliwat gikan kay Jacob, kag sing manugpanubli sang akon mga kabukiran gikan kay Juda: kag ang akon pinili magapanubli sini, kag ang akon mga alagad magapuyo didto.

10 Kag ang Saron manginhalalban sang mga panong, kag ang nalupyakan sang Acor duug nga lulukohan sang kabakahan, tungud sa akon katawohan nga nagpangita sa akon.

11 ś Apang kamo amo ang mga nagabiya sa GINOO, nga nagakalipat sang akon bukid nga balaan, nga nagaaman sing latok sa sinang kabon, kag nagaaman sang halad nga ilimnon sa sinang numero.

12 Busa itangdo ko kamo sa espada, kag kamo tanan magaduko nga pamatyon: bangud nga sang nagpanawag ako, wala kamo magsabat; sang nagpamolong ako, wala kamo magpamati; kondi naghimo sang malaut sa atubangan sang akon mga mata, kag nagpili sang wala ko pagkalipayi.

13 Busa amo ini ang ginasiling sang Ginoong DIOS, Yari karon, ang akon mga alagad magakaon, apang kamo gutumon: yari karon, ang akon mga alagad magainum, apang kamo uhawon: yari karon, ang akon mga alagad magakalipay, apang pakahuy-an kamo:

14 Yari karon, ang akon mga alagad magaamba bangud sa kalipay sang tagiposoon, apang kamo magahibi bangud sa kasubo sang tagiposoon, kag magahaya bangud sa pagpaugtas sa espiritu.

15 Kag bayaan ninyo ang inyo ngalan nga pagpakamalaut sa akon pinili: kay ang Ginoong DIOS magapatay sa imo, kag magatawag sang iya mga alagad sa iban nga ngalan:

16 Sa bagay nga ang nagapakamaayo sang iya kaugalingon sa duta magapakamaayo sang iya kaugalingon sa Dios sang kamatooran; kag ang nagasumpa sa duta magasumpa sa Dios sang kamatooran; bangud nga ang una nga mga kalisdanan ginakalipatan, kag bangud nga natabonan sila sa akon mga mata.

17 ś Kay, yari karon, ako nagatuga sing bag-ong mga langit kag isa ka bag-ong duta: kag ang una indi na pagdumdumon, ukon mag-abut sa painoino.

18 Apang magkasadya kamo kag magkalipay sa gihapon sa sinang akon ginatuga: kay, yari karon, akon ginatuga ang Jerusalem nga pagkasadya, kag ang iya katawohan nga kalipay.

19 Kag magakalipay ako sa Jerusalem, kag magakasadya sa akon katawohan: kag ang tingug sang pagtangis indi na gid mabatian sa iya, ukon ang tingug sang paghibi.

20 Wala na didto sing lapsag nga nagakabuhi sing pila ka adlaw, ukon tawo nga tigulang nga wala makapuno sang iya mga adlaw: kay ang bata mapatay nga isa ka gatus ka tuig; apang ang makasasala nga isa ka gatus ka tuig manginpinapakamalaut.

21 Kag magapatindug sila sing mga balay, kag puy-an sila; kag magatanum sila sing mga ulubasan, kag magakaon sang bunga nila.

22 Indi sila magpatindug, kag iban ang magapuyo; indi sila magtanum, kag iban ang magakaon: kay subong sang mga adlaw sang kahoy, amo ini ang mga adlaw sang akon katawohan, kag ang akon mga pinili magakalipay sing malawig sa buhat sang ila mga kamut.

23 Indi sila magpangabudlay sa walay pulus, ukon magpanganak nga sa kagamo; kay sila ang kaliwat sang ginpakamaayo sang GINOO, kag ang ila mga inanak upud sa ila.

24 Kag mahanabu, nga sa wala pa sila magpanawag, ako magasabat; kag sa nagapamolong pa sila, ako magapamati.

25 Ang lobo kag ang cordero magakaon sing tingub, kag ang leon magakaon sing dagami kaangay sang tinday nga baka nga lalaki: kag ang yab-ok manginkalan-on sang man-ug. Indi sila maghalit ukon maglaglag sa bug-os ko nga balaan nga bukid, nagasiling ang GINOO.

KAPITULO 66

AMO INI ang ginasiling sang GINOO, Ang langit amo ang akon trono, kag ang duta palatungan sang akon mga tiil: diin bala ang balay nga patindugon ninyo sa akon? kag diin bala ang duug sang akon palahuwayan?

2 Kay tanan yadtong mga butang ginhimo sang akon kamut, kag tanan yadtong mga butang nangin-amo, nagasiling ang GINOO: apang sa sining tawo magatolok ako, sa iya nga imol kag may mahinulsulon nga espiritu, kag nga nagakurug sa akon polong.

3 Sia nga nagapatay sang baka subong nga daw nagapatay sia sang tawo; sia nga nagahalad sing cordero, subong nga daw nagapugut sia sang liog sang ido; sia nga nagadolot sing halad, subong nga daw nagadolot sia sing dugo sang babuy; sia nga nagasonog sing incienso, subong nga daw nagapakamaayo sia sang diosdios. Hoo, ginpili nila ang ila kaugalingon nga mga dalanon, kag ang ila kalag nagakalipay sa ila mga kangil-aran.

4 Ako man magapili sang ila mga pagtalang, kag magadala sa ila sang ila mga kahadluk; bangud nga sang nagpanawag ako, wala gid sing nagsabat; sang nagpamolong ako, wala sila magpamati: kondi naghimo sila sang malaut sa atubangan sang akon mga mata, kag nagpili sinang wala nakon pagkalipayi.

5 ś Pamatii ang polong sang GINOO, kamo nga nagakurug sa iya polong; Ang inyo mga kauturan nga nagdumut sa inyo, nga nagsobol sa inyo tungud sa akon ngalan, nagsiling, Paghimayaon ang GINOO: apang magapakita sia sa kalipay ninyo, kag sila mahuy-an.

6 Tingug sang kinagubut gikan sa siudad, tingug gikan sa templo, tingug sang GINOO nga nagahatag sing balus sa iya mga kaaway.

7 Sa wala pa sia pagsakiti, nag-anak sia; sa wala pa mag-abut ang iya kasakit, nag-anak sia sing isa ka lalaki nga bata.

8 Sin-o bala ang nakabati sang among butang? sin-o ang nakakita sang among mga butang? Mapatawo bala ang duta sa isa ka adlaw? ukon ipanganak bala sa hinali ang isa ka pungsud? kay sa gilayon nga ang Zion ginsakitan, nag-anak sia sang iya mga anak.

9 Dalhon ko bala sa pagkatawo, kag indi pag-ipaanak? nagasiling ang GINOO: magapaanak bala ako, kag magatakup bala sang taguangkan? nagasiling ang imo Dios.

10 Magkalipay kamo upud sa Jerusalem, kag magkasadya upud sa iya, kamo tanan nga nagahigugma sa iya: magkalipay sa kasadya upud sa iya, kamo tanan nga nagalalaw sa iya:

11 Agud nga magsoso kamo, kag mabusug sa mga soso sang iya mga paglipay; agud nga maggatas kamo, kag magkalipay sa kabugana sang iya himaya.

12 Kay amo ini ang ginasiling sang GINOO, Yari karon, palambuton ko sa iya ang paghidait subong sang suba, kag ang himaya sang mga Gentil kaangay sang nagaawas nga ilig: niyan magasoso kamo, kuguson kamo sa iya mga kilid, kag daloon sa mga tuhud niya.

13 Subong sang isa nga ginalipay sang iya iloy, sa amo magalipay ako sa inyo; kag lipayon kamo sa Jerusalem.

14 Kag kon makita ninyo ini, magakalipay ang inyo tagiposoon, kag ang inyo mga tul-an magalambo kaangay sang ulutanon: kag ang kamut sang GINOO makilala ayon sa iya mga alagad, kag ang iya kaalipungut ayon sa iya mga kaaway.

15 Kay, yari karon, ang GINOO magaabut nga may kalayo, kag upud sang iya mga kangga kaangay sang buhawi, sa paghatag sang iya kaakig nga may kaalipungut, kag sang iya pagsabdong nga may mga dabdab sang kalayo.

16 Kay paagi sa kalayo kag paagi sa iya espada ang GINOO magapakigsuay sa tanan nga unud: kag ang mga pinatay sang GINOO manginmadamu.

17 Ang mga nagapakabalaan sang ila kaugalingon, kag nagapaninlo sang ila kaugalingon sa mga katamnan sa likod sang isa ka kahoy sa tunga, nga nagakaon sang unud sang babuy, kag sang kangil-aran, kag sang ilaga, papason sila sing tingub, nagasiling ang GINOO.

18 Kay nakilala ko ang ila mga binuhatan kag ang ila mga hunahuna: ang tion magaabut, nga tiponon ko ang tanan nga mga pungsud kag mga hambal; kag magaabut sila, kag makakita sang akon himaya.

19 Kag butangan ko sing tanda sa tunga nila, kag yadtong mga nakapalagyo gikan sa ila ipadala ko sa mga pungsud, sa Tarsis, sa Pul, kag sa Lud, nga nagabingat sang pana, sa Tubal, kag sa Javan, sa malayo nga mga pulo, nga wala makabati sang akon kabantugan, ukon nakakita sang akon himaya; kag sila magapahayag sang akon himaya sa tunga sang mga Gentil.

20 Kag dalhon nila gikan sa tanan nga pungsud ang tanan ninyong kauturan nga dolot sa GINOO, sa mga kabayo, kag sa mga kangga, kag sa mga yayongan, kag sa mga mula, kag sa madasig nga mga kasapatan, pakadto sa akon balaan nga bukid nga Jerusalem, nagasiling ang GINOO, subong nga nagadala ang kaanakan sang Israel sang dolot sa suludlan nga matinlo pasulud sa balay sang GINOO.

21 Kag gikan sa ila man magakuha ako nga sa mga pari kag nga sa mga Levinhon, nagasiling ang GINOO.

22 Kay subong nga ang bag-ong mga langit kag ang bag-ong duta, nga himoon ko, magapabilin sa atubangan nakon, nagasiling ang GINOO, sa amo magapabilin ang inyo kaliwat kag ang inyo ngalan.

23 Kag mahanabu, nga kutub sa isa ka lati tubtub sa isa, kag kutub sa isa ka sabbath tubtub sa isa, ang tanan nga unud magakari sa pagsimba sa atubangan nakon, nagasiling ang GINOO.

24 Kag magagowa sila, kag magatolok sa mga bangkay sang mga tawo nga naglalis sa akon: kay ang ila ulud indi mapatay, kag ang ila kalayo indi mapalong; kag manginkalangil-aran sila sa tanan nga unud.

AMAZING GRACE BIBLE INSTITUTE