ANG BALAAN NGA BIBLIA

OSEAS

KAPITULO 1

ANG polong sang GINOO nga nag-abut kay Oseas, nga anak nga lalaki ni Beri, sa mga adlaw ni Uzias, ni Jotam, ni Acas, kag ni Ezequias, ang mga hari sang Juda, kag sa mga adlaw ni Jeroboam nga anak nga lalaki ni Joas, ang hari sang Israel.

2 Ang pamuno sang polong sang GINOO paagi kay Oseas. Kag ang GINOO nagsiling kay Oseas, Lakat, pangasawa ka gikan sa mga pagkamakihilawason kag mga anak sang mga pagkamakihilawason: kay ang duta nagahimo sing daku nga pagkamakihilawason, nga nagabiya sa GINOO.

3 Gani naglakat sia kag nagpangasawa kay Gomer nga anak nga babaye ni Diblaim; nga nagpanamkon, kag nag-anak sa iya sing lalaki.

4 Kag nagsiling sa iya ang GINOO, Hingalani sia nga Jezreel; kay sa indi lamang madugay, kag akon timalusan ang dugo ni Jezreel sa panimalay ni Jehu, kag pauntaton ko ang ginharian sang panimalay sang Israel.

5 Kag mahanabu sa sina nga adlaw, nga balion ko ang pana sang Israel sa nalupyakan sang Jezreel.

6 ś Kag nagpanamkon sia liwat, kag nag-anak sing babaye. Kag ang GINOO nagsiling sa iya, Hingalani sia nga Lo-ruhama: kay indi na gid ako magkalooy sa panimalay sang Israel; kondi papalayoon ko sila sing bug-os.

7 Apang magakalooy ako sa panimalay sang Juda, kag luwason ko sila paagi sa GINOO nga ila Dios, kag indi ko sila pagluwason paagi sa pana, ukon sa espada, ukon sa inaway, ukon sa mga kabayo, ukon sa mga manugkabayo.

8 ś Karon sang nalutas niya si Lo-ruhama, nagpanamkon sia, kag nag-anak sing lalaki.

9 Niyan ang Dios nagsiling, Hingalani sia nga Lo-ami: kay kamo indi akon katawohan, kag ako indi mangin-inyo Dios.

10 ś Wala sing sapayan ang kadamuon sang kaanakan sang Israel manginsubong sang balas sang dagat, nga indi masukub ukon maisip; kag mahanabu, nga sa duug diin ginsiling sa ila, Indi kamo akon katawohan, didto pagaisiling sa ila, Mga anak nga lalaki kamo sang Dios nga buhi.

11 Niyan ang kaanakan sang Juda kag ang kaanakan sang Israel tiponon sing tingub, kag magatangdo sa ila kaugalingon sing isa ka pangolo, kag magataklad sila gikan sa duta: kay mangindaku ang adlaw sang Jezreel.

KAPITULO 2

ISILING ninyo sa inyo mga utud nga lalaki, Ami; kag sa inyo mga utud nga babaye, Ruhama.

2 Pakigkasaba sa inyo iloy, pakigkasaba: kay sia indi ko asawa, kag ako indi iya bana: busa ipasikway sa iya ang iya mga pagkamakihilawason sa iya itololok, kag ang iya mga pagkamakihilahion sa ulut sang iya mga soso;

3 Basi nga hublasan ko sia, kag bayaan sia subong sang sa adlaw nga natawo sia, kag himoon sia nga kamingawan, kag bayaan sia kaangay sang kigas nga duta, kag patyon sia sa kauhaw.

4 Kag indi ko pagkalooyan ang iya mga anak; kay mga anak sila sang mga pagkamakihilawason.

5 Kay ang ila iloy nagpakaalpot: sia nga nagpanamkon sa ila naghimo sing kahuluy-an: kay nagsiling sia, Magasonod ako sa akon mga kahagugma, nga nagahatag sa akon sang akon tinapay kag sang akon tubig, sang akon dilana kag sang akon lino, sang akon lana kag sang akon ilimnon.

6 ś Busa, yari karon, pulpulan ko ang imo dalan sing mga tunuk, kag patindugon ko ang kuta, agud nga indi niya matultulan ang iya mga banas.

7 Kag magasonod sia sa iya mga kahagugma, apang indi niya sila malambut; kag pangitaon niya sila, apang indi sila makita: niyan magasiling sia, Magalakat ako kag magabalik sa akon nahauna nga bana; kay maayo pa sa akon sang una sang sa karon.

8 Kag wala sia makahibalo nga ako ang naghatag sa iya sang uyas, kag sang alak, kag sang lana, kag nagpabuad sang iya pilak kag bulawan, nga gingamit nila kay Baal.

9 Busa magabalik ako, kag pagakuhaon ko ang akon uyas sa tion sini, kag ang akon alak sa panag-on sini, kag bawion ang akon dilana kag akon lino nga ginhatag sa pagtabon sang iya kahubo.

10 Kag karon buksan ko ang iya paghinigal sa itololok sang iya mga kahagugma, kag wala gid sing magaluwas sa iya sa akon kamut.

11 Kag pauntaton ko man ang iya tanan nga kasadyahan, ang iya mga adlaw sang pandut, ang iya mga lati, kag ang iya mga sabbath, kag ang iya tanan nga solemne nga mga pandut.

12 Kag laglagon ko ang iya pinuno sang mga ubas kag ang iya mga kahoy nga higuera, nga nahanungud sa ila nagsiling sia, Ini sila amo ang akon mga balus nga ginhatag sa akon sang akon mga kahagugma: kag himoon ko sila nga talon, kag kaonon sila sang kasapatan sang latagon.

13 Kag iduaw ko sa iya ang mga adlaw sang mga Baalim, nga sa ila nagsonog sia sing incienso, kag nagpamuni sia sang iya kaugalingon sang iya mga aritos kag iya mga alahas, kag nagsonod sia sa iya mga kahagugma, kag nalipat sa akon, nagasiling ang GINOO.

14 ś Busa, yari karon, haylohon ko sia, kag dal-on sia sa kamingawan, kag hambalon sia sing malolo.

15 Kag ihatag ko sa iya ang iya mga ulubasan gikan didto, kag ang nalupyakan sang Acor nga ganhaan sang paglaum: kag didto magaamba sia, subong sa mga adlaw sang iya pagkapamatan-on, kag subong sang sa mga adlaw sang iya pagtaklad gikan sa duta sang Egipto.

16 Kag sa sina nga adlaw, nagasiling ang GINOO, tawgon mo ako, Ishi; kag indi ka na magatawag sa akon, Baali.

17 Kay kuhaon ko sa iya baba ang mga ngalan sang mga Baalim, kag indi na gid sila pagdumdumon sa ila ngalan.

18 Kag sa sina nga adlaw magapakigkatipan ako tungud sa ila upud sa kasapatan sang latagon, kag upud sa kapispisan sang langit, kag upud sa mga butang nga nagasaug sa duta: kag balion ko ang pana kag ang espada kag ang inaway gikan sa duta, kag pahigdaon ko sila sing malig-on.

19 Kag itiayon ko ikaw sa akon sing dayon; hoo, itiayon ko ikaw sa akon sa pagkamatarung, kag sa paghukom, kag sa mahigugmaon nga kaayo, kag sa mga kalooy.

20 Itiayon ko gid ikaw sa akon sa katutum: kag makilala mo ang GINOO.

21 Kag mahanabu sa sina nga adlaw, nga pamatian ko, nagasiling ang GINOO, pamatian ko ang mga langit, kag pamatian nila ang duta;

22 Kag ang duta magapamati sang uyas, kag sang alak, kag sang lana; kag sila magapamati kay Jezreel.

23 Kag isab-ug ko sia sa akon sa duta; kag sia wala makaagum sing kalooy akon kalooyan; kag isiling ko sa mga indi ko anay katawohan, Ikaw katawohan ko; kag sila magasiling, Ikaw Dios ko.

KAPITULO 3

NIYAN nagsiling sa akon ang GINOO, Lakat liwat, higugmaa ang babaye nga hinigugma sang iya abyan, apang makihilahion, sono sa paghigugma sang GINOO ayon sa kaanakan sang Israel, nga nagadangup sa iban nga mga dios, kag nagahigugma sang mga prasko sang alak.

2 Gani ginbakal ko sia nga sa akon sing napulo kag lima ka bilog nga pilak, kag isa ka homer nga sebada, kag tunga sa homer nga sebada:

3 Kag nagsiling ako sa iya, Magpabilin ka nga sa akon sa madamu nga mga adlaw; dili ka magpakaalpot, kag dili ka mangin-iya sang iban nga lalaki: kag magahimo ako sing subong man sa imo.

4 Kay sa madamu nga adlaw ang kaanakan sang Israel magapabilin nga wala sing hari, kag wala sing prinsipe, kag wala sing halad, kag wala sing imahen, kag wala sing efod, kag wala sing terafim:

5 Sa olihi magabalik ang kaanakan sang Israel, kag magapangita sa GINOO nga ila Dios, kag kay David nga ila hari; kag magakahadluk sa GINOO kag sa iya kaayohan sa olihi nga mga adlaw.

KAPITULO 4

PAMATII ang polong sang GINOO, kamo nga kaanakan sang Israel: kay ang GINOO may kasuayon sa mga pumuluyo sang duta, bangud nga wala sing kamatooran, ukon kalooy, ukon pagkilala sa Dios sa duta.

2 Paagi sa pagpangsumpa, kag pagbinutig, kag pagpatay, kag pagpangawat, kag pagpanglahi, sila nagalaksam, kag ang dugo nagatandug sang dugo.

3 Busa magalalaw ang duta, kag ang tagsatagsa nga nagapuyo sa sini magakag-as, pati ang kasapatan sang latagon, kag pati ang kapispisan sang langit; hoo, ang kaisdaan sang dagat man makuha.

4 Apang wala sing tawo nga magsuay, ukon magsabdong sang iban: kay ang imo katawohan subong sang mga nagasuay sa pari.

5 Busa mapukan ka sa adlaw, kag ang manalagna man mapukan upud sa imo sa kagab-ihon, kag laglagon ko ang imo iloy.

6 ś Ang akon katawohan ginalaglag tungud sa kakulang sing ihibalo: bangud nga ginsikway mo ang ihibalo, sikwayon ko man ikaw, agud nga indi ka na manginpari sa akon: sanglit nga ginkalimtan mo ang kasogoan sang imo Dios, ako man magakalipat sang imo mga anak.

7 Subong nga nagbuad sila, amo sina ang pagpakasala nila batok sa akon: busa baylohon ko ang ila himaya sa kahuluy-an.

8 Nagakalaon sila sang sala sang akon katawohan, kag ginatuhoy nila ang ila tagiposoon sa ila kalautan.

9 Kag kon ano ang katawohan, amo man ang pari: kag silotan ko sila tungud sang ila mga dalanon, kag ibalus sa ila ang ila mga hinimoan.

10 Kay magakaon sila, kag indi mabusug: magamakihilawason sila, kag indi magdamu: bangud nga nag-untat sila sa pagsapak sa GINOO.

11 Ang pagkamakihilawason kag ang alak kag ang bag-o nga alak nagapapalayo sang tagiposoon.

12 ś Ang akon katawohan nagapangayo sing laygay sa ila mga inutud nga puno sang kahoy, kag ang ila sungkud nagasaysay sa ila: kay ang espiritu sang mga pagkamakihilawason nagapasayup sa ila, kag nagmakihilawason sila nga nagabulag sa ila Dios.

13 Nagahalad sila sa mga putokputokan sang mga bukid, kag nagasonog sing incienso sa ibabaw sang mga bakolod, sa idalum sang mga terebinto kag sang mga alamo kag sang mga elm, bangud nga ang landong sini maayo: busa ang inyo mga anak nga babaye magamakihilawason, kag ang inyo mga katiayon magapanglahi.

14 Indi ako magasilot sang inyo mga anak nga babaye kon magmakihilawason sila, ukon sang inyo mga katiayon kon magpanglahi sila: kay sila gid nagapain kaupud sa mga bigaon, kag nagahalad sila upud sa mga alpot: busa ang katawohan nga wala nakahangup mapukan.

15 ś Bisan ikaw, Israel, nagapakaalpot, apang ang Juda dili pagpasandara; kag dili kamo magkadto sa Gilgal, ukon magtaklad kamo sa Bet-aven, ukon magsumpa, Ang GINOO nagakabuhi.

16 Kay ang Israel nagatalikod subong sang nagtalikod nga bakiya nga baka: karon pahalbon sila sang GINOO subong sang cordero sa duug nga malapad.

17 Si Efraim natapik sa mga diosdios: pabayai sia.

18 Ang ila ilimnon maaslum: nagamakihilawason sila sing dalayon: ang iya mga manugdumala nga may pagpakahuya nagahigugma, Maghatag kamo.

19 Ginhigot sia sang hangin sa iya mga pakpak, kag mahuy-an sila bangud sang ila mga halad.

KAPITULO 5

PAMATII ninyo ini, O mga pari; kag magpamati, kamo nga panimalay sang Israel; kag magdungug, O panimalay sang hari; kay sa inyo natungud ang paghukom, kay nanginsiod kamo sa Mispa, kag pukot nga nahumlad sa Tabor.

2 Kag ang mga manriribuk nagdalum sa ila pagpamatay, bisan pa ako manugsabdong sa ila tanan.

3 Ako nakakilala kay Efraim, kag si Israel wala malipdi sa akon: kay karon, O Efraim, nagamakihilawason ka, kag nadagtaan si Israel.

4 Indi sila mag-aman sang ila mga ginahimo sa pagliso sa ila Dios: kay ang espiritu sang mga pagkamakihilawason yara sa tunga nila, kag wala sila makakilala sa GINOO.

5 Kag ang bugal ni Israel nagapamatuud sa iya nawung: busa si Israel kag si Efraim magakapukan sa ila kalautan; si Juda man mapukan upud sa ila.

6 Magalakat sila upud sa ila mga panong kag upud sa ila kahayupan sa pagpangita sa GINOO; apang indi nila sia makita; sia nagpalayo sa ila.

7 Nagbudhi sila batok sa GINOO: kay nagpanganak sila sing dumuloong nga kabataan: karon ang isa ka bulan magahalunhon sa ila upud sang ila mga pahat.

8 Patonog kamo sang cornetin sa Gabaa, kag sang budyong sa Rama: magsinggit kamo sa Bet-aven, sa olihi nimo, O Benjamin.

9 Si Efraim manginmamingaw sa adlaw sang pagsabdong: sa tunga sang mga tribo sang Israel ginpakilala ko ang totoo nga mahanabu.

10 Ang mga prinsipe sang Juda kaangay sang mga nagahalin sang dulunan: busa iula ko subong sang tubig sa ila ang akon kasingkal.

11 Si Efraim ginapigus kag ginaligis sa paghukom, bangud nga sia sing kinabubut-on naglakat sono sa sogo.

12 Busa ako manginsubong sang sipit kay Efraim, kag subong sang kaduluntan sa panimalay ni Juda.

13 Sang nakita ni Efraim ang iya balatian, kag nakita ni Juda ang iya pilas, niyan nagkadto si Efraim sa Asiriahanon, kag nagpadala kay haring Jareb: apang wala sia makaayo sa inyo, ukon makabolong sa inyo sang inyo pilas.

14 Kay manginsubong ako sang leon kay Efraim, kag subong sang bataon nga leon sa panimalay ni Juda: ako, ako gid, magakusnit kag magapalayo; magapanaban ako, kag walay magaluwas sa iya.

15 ś Magalakat ako kag magabalik sa akon duug, tubtub nga kilalahon nila ang ila pagpakasala, kag pangitaon ang akon nawung: sa ila kapipit-an magapangita sila sa akon sing aga pa.

KAPITULO 6

KARI, kag magbalik kita sa GINOO: kay sia nagkusnit, kag sia magaayo sa aton; sia nagpilas, kag bugkosan niya kita.

2 Sa tapus ang duha ka adlaw buhion niya kita liwat: sa ikatlong adlaw pagapabangonon niya kita, kag magakabuhi kita sa iya itololok.

3 Niyan mahibaloan naton, kon magsonod kita sa pagkilala sa GINOO: ang iya paggowa naaman subong sang kaagahon; kag magaabut sia sa aton subong sang ulan, subong sang naolihi nga ulan kag sang nahauna nga ulan sa duta.

4 ś O Efraim, ano bala ang himoon ko sa imo? O Juda, ano bala ang himoon ko sa imo? kay ang imo pagkaayo subong sang panganud sang kaagahon, kag subong sang ton-og sa aga pa nga nagakapanas.

5 Busa ginpulud ko sila paagi sa mga manalagna; ginpatay ko sila paagi sa mga polong sang akon baba: kag ang imo mga paghukom subong sang kapawa nga nagabanaag.

6 Kay ginhandum ko ang kalooy, kag indi ang halad; kag ang pagkilala sa Dios labi pa sa mga halad nga sinonog.

7 Apang sila kaangay sang mga tawo naglalis sang katipan: didto nagmabudhion sila batok sa akon.

8 Ang Galaad siudad sang mga nagabuhat sing kalautan, kag nadagtaan ini sang dugo.

9 Kag subong sang mga kabon sang mga buyong nga nagapuut sa tawo, sa amo ang hut-ong sang mga pari nagapamatay sa dalan nga may paghilisugut: kay nagahimo sila sing paghinigal.

10 Nakakita ako sing butang nga makahalanguyus sa panimalay sang Israel: yadto didto makita ang pagkamakihilawason sang Efraim, ang Israel nadagtaan.

11 Labut pa, O Juda, nag-aman sia sang tig-alani sa imo, sang napahaulian ko ang kabihagan sang akon katawohan.

KAPITULO 7

SANG buut ko ayohon ang Israel, niyan nasapwan ang kalautan sang Efraim, kag ang pagkamalaut sang Samaria: kay nagahilimo sila sing limbong; kag nagasulud ang makawat, kag ang kabon sang mga buyong nagapang-ati sa gowa.

2 Kag wala sila nagapatugsiling sa ila mga tagiposoon nga akon ginadumdum ang tanan nilang pagkamalaut: karon ginalibutan sila sang ila mga hinimoan; yara sila sa atubangan sang akon nawung.

3 Ginapasadya nila ang hari sa ila pagkamalaut, kag ang mga prinsipe sa ila kabutigan.

4 Sila tanan mga makilahion, subong sila sang pogon nga ginpainit sang manugtinapay, nga nagauntat sa pagpainit sang kalayo sa tapus niya malamas ang linamas, tubtub nga nagkumbo ini.

5 Sa adlaw sang aton hari ang mga prinsipe nagpabalatian sa iya paagi sa mga suludlan sang alak; nag-untay sia sang iya kamut upud sa mga mayubiton.

6 Kay gin-aman nila ang ila tagiposoon kaangay sang pogon, samtang nagapuut sila: ang ila manugtinapay nagakatolog sa bug-os nga gab-i; sa aga ini nagadabdab subong sang kalayo nga nagadabadaba.

7 Sila tanan mainit subong sang pogon, kag nagahalunhon sang ila mga hukom; ang tanan nilang hari napukan: wala gid sa ila sing nagapanawag sa akon.

8 Si Efraim, nagsimpon sia sa katawohan; si Efraim torta nga wala mabaliskad.

9 Ginhalunhon sang mga dumuloong ang iya kusug, kag sia wala makahibalo sini: hoo, ang mga uban yari diri kag didto sa iya, apang wala sia makahibalo sini.

10 Kag ang bugal ni Israel nagapamatuud sa iya nawung: kag wala sila nagabalik sa GINOO nga ila Dios, ukon nagapangita sa iya bangud sini tanan.

11 ś Si Efraim man kaangay sang pating nga kulangkulang nga wala sing tagiposoon: sila nagapanawag sa Egipto, sila nagakadto sa Asiria.

12 Kon maglakat sila, ihumlad ko sa ibabaw nila ang akon sapyud; pagapanghologon ko sila subong sang kapispisan sang langit; silotan ko sila, sono sa nabatian sang ila katilingban.

13 Kailo sa ila! kay nagpalagyo sila sa akon: kalaglagan sa ila! kay naglalis sila batok sa akon: bisan gintubus ko sila, apang sila nagpamolong sing kabutigan batok sa akon.

14 Kag wala sila nagtuaw sa akon sa ila tagiposoon, sang nagtiabaw sila sa ila mga higdaan: nagtilipon sila tungud sa uyas kag sa alak, kag nagbato sila sa akon.

15 Bisan ginbugkosan ko kag ginpabakud ang ila mga butkon, apang nagapadugi sila sing malain batok sa akon.

16 Nagabalik sila, apang indi sa labing Mataas: kaangay sila sang pana nga malimbongon: mapukan sa espada ang ila mga prinsipe tungud sa kasingkal sang ila dila: ini mangin-ila ululigyaton sa duta sang Egipto.

KAPITULO 8

IBUTANG sa imo baba ang budyong. Subong sang aguila magaabut sia batok sa panimalay sang GINOO, bangud nga ginlalis nila ang akon katipan, kag naglapas batok sa akon kasogoan.

2 Magasinggit ang Israel sa akon, Dios ko, kami nakakilala sa imo.

3 Ang Israel nagpilak sang butang nga maayo: ang kaaway magalagas sa iya.

4 Nagpatindug sila sang mga hari, apang indi tungud sa akon: naghimo sila sing mga prinsipe, kag ako wala makahibalo sini: sa ila pilak kag sa ila bulawan naghimo sila sing mga diosdios, agud nga utdon sila.

5 ś Ang imo tinday nga baka, O Samaria, nagsikway sa imo; ang akon kaakig nagsingkal batok sa ila: tubtub bala san-o nga makadangat sila sa pagkainocente?

6 Kay ini nagikan man sa Israel: ang panday naghimo sini; busa indi ini Dios: apang ang tinday nga baka sang Samaria dugmokon.

7 Kag nagsab-ug sila sang hangin, kag magaani sila sang buhawi: wala ini sing puno: ang sublak indi magapatubas sing harina: kon magpatubas ini, ang mga dumuloong magalamon sini.

8 Ang Israel ginlamon: karon yara sila sa tunga sang mga Gentil subong sang suludlan nga wala sing kahamuut.

9 Kay nagataklad sila sa Asiria, ang asno nga talonon nga isa lamang: ang Efraim naghinakay sang mga kahagugma.

10 Hoo, bisan nga naghinakay sila sa tunga sang mga pungsud, karon tiponon ko sila, kag magakasubo sila sing diotay tungud sang lulan sang hari sang mga prinsipe.

11 Bangud nga ang Efraim naghimo sang madamu nga mga halaran sa pagpakasala, ang mga halaran manginpagpakasala sa iya.

12 Nagsulat ako sa iya sang dalagkung mga butang sang akon kasogoan, apang ginkabig sila nga butang nga dumuloong.

13 Sila nagahalad sang unud nga sa mga halad sang akon mga dolot, kag nagakaon sini; apang ang GINOO wala nagabaton sa ila; karon dumdumon niya ang ila kalautan, kag duawon ang ila mga sala: magabalik sila sa Egipto.

14 Kay ang Israel nalimot sa iya Magbubuhat, kag nagapatindug sing mga templo; kag ang Juda nagpadamu sing mga siudad nga napamakuran: apang magapadala ako sing kalayo sa iya mga siudad, kag magahalunhon ini sang ila mga palacio.

KAPITULO 9

DILI magkasadya, O Israel, tungud sa kalipay, subong sang iban nga katawohan: kay nagmakihilawason ka nga nagabiya sa imo Dios, naghigugma ka sang balus sa tagsa ka salog nga linasan sang uyas.

2 Ang linasan kag ang linasan sang ubas indi magapakaon sa ila, kag ang bag-o nga alak makulang sa iya.

3 Indi sila magapuluyo sa duta sang GINOO; kondi magabalik ang Efraim sa Egipto, kag magakaon sila sing dimatinlo nga mga butang sa Asiria.

4 Indi sila magadolot sing mga halad nga alak sa GINOO, kag indi sila manginkalahamut-an sa iya: ang ila mga halad magamanginsubong sa ila sang kalan-on sang mga manuglalaw; ang tanan nga magkaon sini madagtaan: kay ang ila kalan-on tungud sa ila kalag indi magsulud sa balay sang GINOO.

5 Ano bala ang inyo himoon sa adlaw nga solemne, kag sa adlaw sang pandut sang GINOO?

6 Kay, yari karon, nawala sila bangud sa kalaglagan: ang Egipto magatipon sa ila, ang Memfis magalubung sa ila: ang matahum nga mga duug nga sa ila pilak, angkonon sila sang katunukan: ang mga tunuk manginsa ila mga tabernakulo.

7 Nagaabut ang mga adlaw sang pagduaw, nagaabut ang mga adlaw sang pagbalus; ang Israel makahibalo sini: ang manalagna buangbuang, ang tawo nga espirituhanon buang, bangud sang kadamuon sang imo kalautan, kag sang dakung pagdumut.

8 Ang manugbantay sang Efraim upud anay sa akon Dios: apang ang manalagna siod sang manugpamispis sa tanan niya nga mga dalanon, kag pagdumut sa balay sang iya Dios.

9 Nagdunut sila sang ila kaugalingon sing tuduk, subong sang sa mga adlaw sang Gabaa: busa dumdumon niya ang ila kalautan, duawon niya ang ila mga sala.

10 Nasapwan ko ang Israel subong sang mga ubas sa kamingawan; nakita ko ang inyo mga kaamayan subong nga nahauna nga loto sa kahoy nga higuera sa iya nahauna nga tion: apang nagkadto sila sa Baal-peor, kag nagtugyan sang ila kaugalingon sa sinang kahuluy-an; kag ang ila mga kalangil-aran nanginsono sa ila ginhigugma.

11 Nahanungud sa Efraim, ang ila himaya magalupad palayo subong sang pispis, wala na sing pag-anak, wala na sing pagbusung, kag wala na sing pagpanamkon.

12 Bisan magsagud sila sang ila mga anak, apang pakawalaan ko sila, agud nga wala sing tawo nga mabilin: hoo, kailo man sa ila kon ako magtaliwan sa ila!

13 Ang Efraim, kaangay sang nakita ko ang Tiro, natanum sa matahum nga duug: apang ang Efraim magadala sang iya mga anak sa manugpatay.

14 Hatagi sila, O GINOO: ano bala ang imo ihatag? hatagi sila sing taguangkan nga mahar-ason kag mga soso nga mamala.

15 Ang tanan nila nga pagkamalaut yara sa Gilgal: kay didto gindumtan ko sila: bangud sang pagkamalaut sang ila mga hinimoan sobolon ko sila sa akon balay, indi ko na sila paghigugmaon: ang tanan nila nga mga prinsipe mga mabinatoon.

16 Ang Efraim ginsamad, nagmala ang ila gamut, indi na sila magbunga: hoo, bisan magpanganak sila, apang patyon ko bisan ang hinigugma nga bunga sang ila taguangkan.

17 Ang akon Dios magasikway sa ila, bangud nga sila wala magpamati sa iya: kag manginlaaslaas sila sa tunga sang mga pungsud.

KAPITULO 10

ANG Israel walay bunga nga puno sang ubas, nagapamunga sia nga sa iya kaugalingon: sono sa kadamuon sang iya bunga ginpadamu niya ang iya mga halaran; sono sa pagkaayo sang iya duta naghimo sila sing matahum nga mga imahen.

2 Ang ila tagiposoon nabahinbahin; karon masapwan nga nakasala sila: gub-on niya ang ila mga halaran, laglagon niya ang ila mga imahen.

3 Kay karon magasiling sila, Wala kami sing hari, kay wala kami nagkahadluk sa GINOO; kag ano bala niyan ang mahimo sang hari sa amon?

4 Nagpamolong sila sing mga polong, nga nagasumpa sing dimatuud sa paghimo sing katipan: busa ang paghukom nagatubo subong sang tanum nga makahililo sa mga sul-ay sang latagon.

5 Ang mga pumuluyo sang Samaria magakahadluk bangud sa mga tinday nga baka sang Bet-aven: kay ang katawohan sini magalalaw sa sini, kag ang mga pari sini nga nagkasadya sa sini, tungud sang himaya sini, bangud nga ini nagtaliwan sa sini.

6 Ini man dalhon sa Asiria nga regalo kay haring Jareb: si Efraim magabaton sing kahuluy-an, kag ang Israel mahuy-an sang iya kaugalingon nga laygay.

7 Nahanungud sa Samaria, ang iya hari ginkuha subong sang bukal sa ibabaw sang tubig.

8 Ang mataas nga mga duug man sang Aven, ang sala sang Israel, pagalaglagon: magatubo sa ibabaw sang ila mga halaran ang talongon kag ang mga sapinit; kag magasiling sila sa mga bukid, Taboni kami; kag sa kabakoloran, Pukani kami.

9 O Israel, nagpakasala ka kutub sa mga adlaw sang Gabaa: didto nagtindug sila: ang inaway sa Gabaa batok sa mga anak sang kalautan wala nag-ubus sa ila.

10 Yara sa akon handum nga silotan ko sila; kag ang katawohan magatipon batok sa ila, kon sila mapanggaid sang ila kaugalingon sa ila duha ka sul-ay.

11 Kag ang Efraim subong sang bakiya nga baka nga naton-an, kag naluyag sa paglinas sang trigo; apang nag-agi ako sa ibabaw sang iya matahum nga liog: pasakyon ko ang Efraim; ang Juda magaarado, kag ang Jacob magabungkag sang iya mga puga.

12 Sab-ug kamo nga sa inyo sing pagkamatarung, mag-alani sa kalooy; bungkaga ang inyo pinabayaan nga duta: kay tion ini sa pagpangita sa GINOO, tubtub nga mag-abut sia kag mag-ulan sa inyo sing pagkamatarung.

13 Nag-arado kamo sing pagkamalaut, nag-ani kamo sing kalautan; nakakaon kamo sang bunga sang kabutigan: kay nagsalig ka sa imo dalanon, sa kadamuon sang imo gamhanan nga mga tawo.

14 Busa ang kagubut magalutaw sa tunga sang imo katawohan, kag ang tanan mo nga mga pamakud laglagon, subong sang paglaglag ni Salman sang Bet-arbel sa adlaw sang inaway: ang iloy ginlampus sa ibabaw sang iya mga anak.

15 Amo ini ang himoon sang Bet-el sa inyo bangud sang inyo daku nga pagkamalaut: sa isa ka kaagahon laglagon sing bug-os ang hari sang Israel.

KAPITULO 11

SANG bata pa si Israel, niyan ginhigugma ko sia, kag gintawag ang akon anak nga lalaki pa gowa sa Egipto.

2 Sa labi pa nga pagtawag nila sa ila, labi pa nga nagpalayo sila sa ila: naghalad sila sa mga Baalim, kag nagsonog sing incienso sa mga imahen nga tinigban.

3 Gintudloan ko ang Efraim man sa paglakat, nga nagauyat sa ila sa ila mga butkon; apang wala sila makakilala nga ako nag-ayo sa ila.

4 Ginbutong ko sila sa mga lubid sang tawo, sa mga higot sang gugma: kag nanginsubong ako sa ila sang mga nagahukas sang gota sa ila mga sulang, kag ginbutangan ko sing pagkaon sa atubangan nila.

5 ś Indi sia magbalik sa duta sang Egipto, kondi ang Asiriahanon mangin iya hari, bangud nga nagdumili sila sa pagbalik.

6 Kag ang espada magapabilin sa iya mga siudad, kag magaubus sang iya mga sanga, kag magahalunhon sa ila, bangud sang ila kaugalingon nga mga laygay.

7 Kag ang akon katawohan nabuyuk sa pagtalikod sa akon: bisan pa nagtawag sila sa ila nga sa labing Mataas, wala gid sing sin-o nga nagpakataas sa iya.

8 Paano bala ang pagbiya ko sa imo, Efraim? paano bala ang pagtugyan ko sa imo, Israel? paano bala ang paghimo ko sa imo subong sang Adma? paano bala ang pagbutang ko sa imo subong sang Zeboim? ang akon tagiposoon nagliso sa sulud nakon, ang akon mga pagbaylo nagadabdab sing tingub.

9 Indi ko paghikoton ang kasingkal sang akon kaakig, indi ako magbalik sa paglaglag sang Efraim: kay Dios ako, kag indi tawo; ang Balaan nga Isa sa tunga nimo: kag indi ako magsulud sa siudad.

10 Magasonod sila sa GINOO: sia magangurub kaangay sang leon: kon magngurub sia, niyan ang mga anak magakurug gikan sa katundan.

11 Magakurug sila subong sang pispis gikan sa Egipto, kag subong sang pating gikan sa duta sang Asiria: kag papuy-on ko sila sa ila mga balay, nagasiling ang GINOO.

12 Ginalibutan ako sang Efraim sing kabutigan, kag sang panimalay sang Israel sing paglimbong: apang ang Juda nagadumala pa upud sa Dios, kag matutum upud sa mga santo.

KAPITULO 12

SI EFRAIM nagakaon sang hangin, kag nagasonod sa sidlangan nga hangin: nagapadamu sia sa adlawadlaw sing kabutigan kag kamingaw; kag nagapakigkatipan sila sa mga Asiriahanon, kag ginadala ang lana sa Egipto.

2 Ang GINOO may kasaba man kay Juda, kag magasilot kay Jacob sono sa iya mga dalanon; sono sa iya mga hinimoan balusan niya sia.

3 ś Sa taguangkan ginkaptan niya sa tikod ang iya utud nga lalaki, kag sa iya kabaskug may gahum sia upud sa Dios:

4 Hoo, may gahum sia sa anghel, kag naglandas: naghibi sia, kag nagpangampo sa iya: sa Bet-el nasapwan niya sia, kag didto nagpakighambal sia sa aton;

5 Ang GINOONG Dios sang mga kasoldadosan; ang GINOO amo ang iya handumanan.

6 Busa balik ka sa imo Dios: hupti ang kalooy kag ang paghukom, kag alagdon ang imo Dios sing dalayon.

7 ś Komersyante sia, yara sa iya kamut ang mga timbangan sang paglimbong: nagahigugma sia sa pagpigus.

8 Kag si Efraim nagsiling, Walay sapayan nagmanggaran ako, nakakita ako sing manggad nga sa akon: sa tanan ko nga pagpangabudlay wala sila sing makita sa akon nga kalautan nga sala.

9 Kag ako nga amo ang GINOO nga imo Dios kutub sa duta sang Egipto magapapuyo pa sa imo sa mga tabernakulo, subong sang sa mga adlaw sang pandut nga solemne.

10 Nagpamolong man ako paagi sa mga manalagna, kag ginpabuad ko ang mga palanan-awon, kag naggamit sang mga paanggid, paagi sa pag-alagdan sang mga manalagna.

11 May kalautan bala sa Galaad? sa pagkamatuud sila mga walay pulus: nagahalad sila sing mga tinday nga baka nga lalaki sa Gilgal; hoo, ang mga halaran nila subong sang mga tinumpok sa mga idas sang mga latagon.

12 Kag si Jacob nagpalagyo sa duta sang Siria, kag si Israel nagpangagad tungud sa asawa, kag tungud sa asawa nagbantay sia sing mga carnero.

13 Kag paagi sa manalagna ginpagowa sang GINOO sa Egipto ang Israel, kag paagi sa manalagna gintipigan sia.

14 Si Efraim nagpaakig sa iya sing mapait gid: busa ibilin niya ang iya dugo sa iya, kag ang iya Ginoo magapabalik sa iya sang iya kahuluy-an.

KAPITULO 13

SANG si Efraim nagpamolong nga nagakurug, nagpakataas sia sang iya kaugalingon sa Israel; apang sang nagpakasala sia sa Baal, napatay sia.

2 Kag karon nagapakasala sila sing labi kag labi pa, kag sa ila pilak naghimo sila nga sa ila sing mga imahen nga tinunaw, kag sing mga diosdios sono sa ila kaugalingon nga paghangup, tanan ini sila buhat sang mga panday: sila nagasiling nahanungud sa ila, Ang mga tawo nga nagahalad maghaluk sa mga tinday nga baka.

3 Busa manginsubong sila sang panganud sang kaagahon, kag subong sang ton-og sa aga pa nga nagapuas, subong sang labhang nga ginapalid sang buhawi gikan sa salog nga linasan, kag subong sang aso nga nagagowa sa simboryo.

4 Walay sapayan ako amo ang GINOO nga imo Dios kutub sa duta sang Egipto, kag wala ka sing kilalahon nga dios kondi ako: kay luwas sa akon walay manluluwas.

5 ś Ginkilala ko ikaw sa kamingawan, sa duta sang dakung pagkahubas sang tubig.

6 Sono sa ila halalban, sa amo ginbusug sila; nabusug sila, kag nagpakataas ang ila tagiposoon; busa nalipat sila sa akon.

7 Busa ako manginsubong sang leon sa ila: subong sang leopardo sa dalanon magapanilag ako sa ila:

8 Sugataon ko sila subong sang oso nga nawad-an sang iya mga totoy, kag kusniton ko ang labutlabut sang ila tagiposoon, kag didto halunhonon ko sila kaangay sang leon: ang sapat nga talonon magakusnit sa ila.

9 ś O Israel, ginlaglag mo ang imo kaugalingon; apang yara sa akon ang imo bulig.

10 Ako mangin imo hari: diin bala ang bisan sin-o nga iban nga makaluwas sa imo sa tanan mong mga siudad? kag ang imo mga hukom nga nahanungud sa ila ikaw nagsiling, Hatagi ako sing hari kag mga prinsipe?

11 Ginhatagan ko ikaw sing hari sa akon kaakig, kag ginkuha sia sa akon kasingkal.

12 Ang kalautan ni Efraim ginputus; ang iya sala gintakpan.

13 Ang mga kalisud sang babaye nga ginasakitan magaabut sa iya: sia dimaalam nga anak nga lalaki; kay indi sia dapat magpalantang sa duug nga ginapanganakan sang mga anak.

14 Gawaron ko sila sa gahum sang lulubngan; tubson ko sila sa kamatayon: O kamatayon, magamangin mga kalalat-an mo ako; O lulubngan, magamangin kalaglagan mo ako: ang paghinulsul lipdan sa akon mga mata.

15 ś Bisan pa mabungahon sia sa tunga sang iya mga utud, ang sidlangan nga hangin magaabut, ang hangin sang GINOO magasaka gikan sa kamingawan, kag ang iya tulubdan magamala, kag ang iya tuburan mahubsan: atihon niya ang bahandi sang tanan nga manami nga mga suludlan.

16 Ang Samaria mangin mamingaw; kay nagbato sia sa iya Dios: mapukan sila sa espada: ang ila mga lapsag ilampus, kag ang ila mga babaye nga nagabusung gayhabon.

KAPITULO 14

O ISRAEL, balik ka sa GINOO nga imo Dios; kay tungud sa imo kalautan napukan ka.

2 Dala kamo sing mga polong, kag magliso sa GINOO: isiling sa iya, Kuhaa ang bug-os nga kalautan, kag batona kami sing mainayohon: sa amo ihatag namon subong sang mga tinday nga baka ang halad sang amon mga bibig.

3 Ang Asur indi magaluwas sa amon; indi kami magsakay sa mga kabayo: kag indi na kami magsiling sa buhat sang amon mga kamut, Kamo mga dios namon: kay sa imo ang mga ilo sa amay makakita sing kalooy.

4 ś Ayohon ko ang ila pagtalikod, higugmaon ko sila sing bugana: kay ang akon kaakig nagapalayo sa iya.

5 Ako manginsubong sang ton-og sa Israel: sia magatubo subong sang lirio, kag magapanggamut subong sang Libano.

6 Magagapa ang iya mga sanga, kag ang iya katahum manginsubong sang kahoy nga olivo, kag ang iya kahumut subong sang Libano.

7 Ang mga nagapuyo sa idalum sang iya landong magabalik; maumpawan sila subong sang uyas, kag magatubo subong sang puno sang ubas: ang iya baho manginsubong sang alak sang Libano.

8 Ang Efraim magasiling, Ano pa bala ang labut ko sa mga diosdios? Nabatian ko sia, kag napanilagan sia: ako kaangay sang kahoy nga abeto nga lab-as. Gikan sa akon nakita ang imo bunga.

9 Sin-o bala ang maalam, kag sia magahangup sining mga butang? ang mainandamon, kag sia makahibalo sa ila? kay ang mga dalanon sang GINOO matarung, kag ang mga matarung magalakat sa ila: apang ang mga malalison mapukan sa ila.gna gintipigan sia.

AMAZING GRACE BIBLE INSTITUTE