ANG BALAAN NGA BIBLIA

ANG SULAT NI PABLO NGA APOSTOL SA

MGA HEBREO

KAPITULO 1

ANG DIOS, nga sa lainlain nga mga tion kag sa sarisari nga mga paagi sa nagligad nga tion naghambal sa mga kaamayan paagi sa mga manalagna,

2 Sa sining katapusan nga mga adlaw naghambal sa aton paagi sa iya Anak, nga gintangdo niya nga manunubli sang tanan nga mga butang, nga paagi sa iya man ginhimo niya ang mga kalibutan;

3 Sia nga amo ang kasiga sang iya himaya, kag ang maathag nga dagway sang iya pagkaamo, kag nagapapadayon sang tanan nga mga butang paagi sa polong sang iya gahum, sang natinloan niya paagi sa iya kaugalingon ang aton mga sala, naglingkod sa too sang Pagkahalangdon sa kahitaasan;

4 Nga nanginmaayo pa sa mga anghel, sanglit sia paagi sa panublion nakaagum sing labi pa ka halangdon nga ngalan sang sa ila.

5 Kay sa kay sin-o bala sang mga anghel sa bisan kon san-o nga tion nagsiling sia, Ikaw akon Anak, sini nga adlaw ginpanganak ko ikaw? Kag liwat, Ako mangin-Amay sa iya, kag sia mangin-Anak sa akon?

6 Kag liwat, sang ginadala niya ang nahaunang ginpanganak sa kalibutan, nagasiling sia, Kag pagsimbahon sia sang tanan nga mga anghel sang Dios.

7 Kag nahanungud sa mga anghel nagasiling sia, Nga nagahimo sang iya mga anghel nga mga espiritu, kag sang iya mga ministro nga dabdab sang kalayo.

8 Apang sa Anak nagasiling sia, Ang imo trono, O Dios, sa gihapon kag sa walay katapusan: ang cetro sang pagkamatarung amo ang cetro sang imo ginharian.

9 Ginhigugma mo ang pagkamatarung, kag gindumtan ang kalautan; busa ang Dios, ang imo Dios, naghaplas sa imo sang lana sang kalipay labaw sa imo mga kaupud.

10 Kag, Ikaw, Ginoo, sa ginsuguran nagpahamtang sang sadsaran sang duta; kag ang mga langit mga binuhatan sang imo mga kamut:

11 Sila mawala; apang ikaw nagapadayon; kag sila tanan magadaan subong sang panapton;

12 Kag lukuton mo sila subong sang bayo, kag baylohan sila: apang ikaw amo sa gihapon, kag ang imo mga tuig magapadayon.

13 Apang sa kay sin-o bala sang mga anghel sa bisan kon san-o nga tion nagsiling sia, Lingkod ka sa akon too, tubtub nga mahimo ko ang imo mga kaaway nga palatungan sang imo mga tiil?

14 Indi bala sila tanan manug-alagad nga mga espiritu, nga ginpadala sa pag-alagad tungud sa ila nga magamanugpanubli sang kaluwasan?

KAPITULO 2

BUSA dapat kita magtalupangud sing hanoot pa sa mga butang nga aton nabatian, basi kon sa bisan ano nga tion madula naton sila.

2 Kay kon ang polong nga ginhambal paagi sa mga anghel nagmalig-on, kag ang tagsa ka paglapas kag pagkadimatinumanon nakabaton sing matarung nga tumbas sang balus;

3 Paano bala ang pagpalagyo ta, kon aton ginapatumbayaan ang tama kadaku nga kaluwasan; nga sa nahauna ginpamunoan pamolong sang Ginoo, kag ginpamatud-an sa aton sang mga nakabati sa iya;

4 Ang Dios man nagasaksi sa ila, paagi sa mga tanda kag mga katanhagaan, kag sa sarisari nga mga milagro, kag mga hiyas sang Balaan nga Espiritu, sono sa iya kaugalingon nga kabubut-on?

5 Kay wala niya pag-ipasakup sa mga anghel ang kalibutan nga palaabuton, nga ginahambal ta.

6 Apang isa ang nagpamatuud sa isa ka bahin, nga nagasiling, Ano bala ang tawo, nga ginapanumdum mo sia? ukon ang anak sang tawo, nga ginaduaw mo sia?

7 Ginhimo mo sia nga kubus gawa sa mga anghel; ginpurungan mo sia sing himaya kag dungug, kag ginpahamtang sia sa ibabaw sang mga binuhatan sang imo mga kamut:

8 Ginpasakup mo ang tanan nga mga butang sa idalum sang iya mga tiil. Kay sa pagpasakup niya sang tanan sa idalum niya, wala sia sing ginbayaan nga wala mapasakup sa iya. Apang karon wala ta pa makit-i ang tanan nga mga butang nga napasakup sa iya.

9 Apang ginatan-aw ta si Jesus, nga ginhimo nga kubus gawa sa mga anghel tungud sa pag-antus sang kamatayon, ginpurungan sing himaya kag dungug; agud nga sa bugay sang Dios magtilaw sia sang kamatayon tungud sa tagsa ka tawo.

10 Kay nagakaigo sa iya, nga tungud sa iya among tanan nga mga butang, kag paagi sa iya among tanan nga mga butang, sa pagdala sang madamu nga mga anak nga lalaki sa himaya, agud nga paghimpiton ang kapitan sang ila kaluwasan paagi sa mga pag-antus.

11 Kay sia nga nagapakabalaan kag sila nga mga ginpakabalaan tanan nagikan sa isa: sa sining kabangdanan wala sia mahuya sa pagtawag sa ila nga mga kauturan,

12 Nga nagasiling, Ipahayag ko ang imo ngalan sa akon mga kauturan, sa tunga sang iglesia magaambahan ako sing pagdayaw sa imo.

13 Kag liwat, Ibutang ko ang akon pagsalig sa iya. Kag liwat, Yari karon ako kag ang mga anak nga ginhatag sang Dios sa akon.

14 Sanglit niyan subong nga ang mga anak mga umalambit sang unud kag dugo, sia man iya sa among bagay nag-ambit sini; agud nga paagi sa kamatayon malaglag niya ang may gahum sa kamatayon, nga amo, ang yawa;

15 Kag maluwas niya sila nga sa kahadluk sa kamatayon mga sakup sa kahiolipnan sa bug-os nila nga kabuhi.

16 Kay sa pagkamatuud wala niya ginsuklub ang kinaugali sang mga anghel; kondi ginsuklub niya ang kaliwat ni Abraham.

17 Busa nagkaigo nga sia magmangin-kaangay sa iya mga kauturan sa tanan nga mga butang, agud nga sia magmangin-maloloy-on kag matutum nga mataas nga pari sa mga butang nga nahanungud sa Dios, sa paghimo sing pagpasag-uli tungud sa mga sala sang katawohan.

18 Kay sa pag-antus niya gid sang sinulay sia, sarang sia makatabang sa mga ginasulay.

KAPITULO 3

BUSA, balaan nga mga kauturan, mga umalambit sang langitnon nga pagtawag, talupangda ninyo ang Apostol kag Mataas nga Pari sang aton pagtuad, si Cristo Jesus;

2 Nga matutum sa nagtangdo sa iya, subong nga si Moises man matutum sa bug-os nga panimalay niya.

3 Kay ining tawo ginpakatakus nga labaw pa sing himaya kay Moises, subong nga sia nga nagtukud sang balay dungganon pa sa balay.

4 Kay ang tagsa ka balay ginatukud sang isa ka tawo; apang sia nga nagtukud sang tanan nga mga butang amo ang Dios.

5 Kag si Moises sa pagkamatuud matutum sa bug-os nga panimalay niya, subong nga isa ka alagad, sa pagpamatuud sinang mga butang nga ihambal sa olihi;

6 Apang si Cristo subong nga isa ka anak nga lalaki labaw sa iya kaugalingon nga panimalay; nga ang amo nga panimalay amo kita, kon ginahuptan ta sing malig-on ang pagsalig kag paglipay sang paglaum sing mabakud tubtub sa katapusan.

7 Busa (subong sang ginasiling sang Balaan nga Espiritu, Karon nga adlaw kon mabatian ninyo ang iya tingug,

8 Dili pagpatig-aha ang inyo mga tagiposoon, subong sang sa pagpaakig, sa adlaw sang pagsulay sa kamingawan:

9 Sang ang inyo mga kaamayan nagsulay sa akon, nagtilaw sa akon, kag nakita ang akon mga binuhatan sing kap-atan ka tuig.

10 Busa nagkasubu ako sa sinang kaliwatan, kag nagsiling, Nagasayup sila sa gihapon sa ila tagiposoon; kag wala nila makilala ang akon mga dalanon.

11 Gani nagsumpa ako sa akon kasingkal, Indi sila magasulud sa akon kapahuwayan.)

12 Andam kamo, mga kauturan, basi kon may bisan sin-o sa inyo nga may malaut nga tagiposoon sang pagkadimatinoohon, nga nagapahilayo sa buhi nga Dios.

13 Apang maglinaygayay kamo adlawadlaw, samtang nga ginatawag pa Karon nga adlaw; agud nga wala sa inyo nga magtig-a paagi sa pagkadaya sang sala.

14 Kay ginahimo kita nga mga umalambit kay Cristo, kon ginahuptan ta sing malig-on ang pamuno sang aton pagsalig tubtub sa katapusan;

15 Samtang ginasiling ini, Karon nga adlaw kon mabatian ninyo ang iya tingug, dili pagpatig-aha ang inyo mga tagiposoon, subong sang sa pagpaakig.

16 Kay ang iban, sang nakabati sila, nagpaakig: walay sapayan indi tanan nga naggowa sa Egipto paagi kay Moises.

17 Apang kay sin-o bala nagkasubu sia sing kap-atan ka tuig? indi bala sa mga nagpakasala, nga ang ila mga bangkay napukan sa kamingawan?

18 Kag kay sin-o bala nagpanumpa sia nga indi sila magasulud sa iya kapahuwayan, kondi sa ila nga wala nagtoo?

19 Gani nakita naton nga wala sila makasulud bangud sang pagkadimatinoohon.

KAPITULO 4

BUSA magkahadluk kita, basi nga, ang saad nga nabilin sa aton nahanungud sa pagsulud sa iya kapahuwayan, ang bisan sin-o sa inyo bilangon nga wala makalambut sini.

2 Kay ginwali sa aton ang ebanghelyo, subong nga sa ila: apang ang polong nga ginwali wala nila mapusli, bangud nga wala pag-updi sang pagtoo sang mga nakabati sini.

3 Kay kita nga nagtoo nagasulud sa kapahuwayan, subong nga iya nasiling, Subong nga nagsumpa ako sa akon kasingkal, kon magasulud sila sa akon kapahuwayan: bisan nga natapus ang mga buhat kutub sa pagpasad sang kalibutan.

4 Kay nagpamolong sia sa isa ka bahin nahanungud sa ikapitong adlaw sa sining bagay, Kag ang Dios nagpahuway sa ikapitong adlaw gikan sa tanan niyang buluhaton.

5 Kag sa sining bahin liwat, Kon magasulud sila sa akon kapahuwayan.

6 Sanglit niyan nagapabilin nga ang iban kinahanglan magsulud sini, kag sila nga una nga ginwalihan sini wala makasulud bangud sa pagkadimatinoohon:

7 Liwat, nagpat-ud sia sing isa ka adlaw, nga nagasiling paagi kay David, Karon nga adlaw, sa tapus ang malawig nga tion; subong sang nasiling, Karon nga adlaw kon mabatian ninyo ang iya tingug, dili pagpatig-aha ang inyo mga tagiposoon.

8 Kay kon si Jesus nakahatag sa ila sing kapahuwayan, niyan wala sia kuntani maghambal sa olihi sang iban pa nga adlaw.

9 Busa may nagapabilin nga kapahuwayan sa katawohan sang Dios.

10 Kay sia nga nakasulud sa iya kapahuwayan, sia man nag-untat gikan sa iya kaugalingon nga mga buhat, subong nga ang Dios sa iya.

11 Busa magpangabudlay kita sa pagsulud sa sinang kapahuwayan, agud nga walay tawo nga maholog sa among huwaran sang pagkadimatinoohon.

12 Kay ang polong sang Dios buhi, kag gamhanan, kag matalum pa sa bisan ano nga espada nga duha sing sulab, nga nagalapus tubtub sa nautlan sang kalag kag espiritu, kag sang mga lutalutahan kag utuk, kag isa ka manughantup sang mga hunahuna kag mga tinutuyo sang tagiposoon.

13 Kag wala bisan ano nga tinuga nga indi hayag sa itololok niya: kondi ang tanan nga mga butang hublas kag napamuksan sa mga mata niya nga hatagan ta sing husay.

14 Niyan sanglit nga kita may daku nga mataas nga pari, nga nakalatas sa mga langit, si Jesus, ang Anak sang Dios, lig-onon ta ang aton pagtuad.

15 Kay wala kita sing mataas nga pari nga indi matandug sang balatyagon sang aton mga kaluyahon; kondi nga nasulay sia sa tanan nga bagay kaangay naton, apang sa walay sala.

16 Busa magkari kita nga may pagsalig sa trono sang bugay, agud nga makaagum kita sing kalooy, kag makaangkon sing bugay sa pagbulig sa tion sang kinahanglan.

KAPITULO 5

KAY ang tagsa ka mataas nga pari nga ginkuha sa mga tawo gintangdo tungud sa mga tawo sa mga butang nga natungud sa Dios, agud nga magdolot sia sing mga dolot kag mga halad tungud sa mga sala:

2 Sia may ikasarang nga magkalooy sa mga dimaalam, kag sa ila nga nagtalang sa dalan; bangud nga sia gid ginalikupan man sang kaluyahon.

3 Kag bangud sining kabangdanan dapat sia magdolot tungud sa mga sala, tungud sa katawohan, kag tungud sa iya kaugalingon man.

4 Kag walay tawo nga nagakuha nga sa iya kaugalingon sining kadungganan, kondi sia, nga gintawag sang Dios, subong kay Aaron.

5 Subong man si Cristo wala maghimaya sang iya kaugalingon nga paghimoon nga mataas nga pari; kondi sia nga nagsiling sa iya, Ikaw akon Anak, karon nga adlaw ginpanganak ko ikaw.

6 Subong nga nagasiling man sia sa iban nga bahin, Ikaw isa ka pari sa walay katapusan sono sa paagi ni Melquisedec.

7 Nga sa mga adlaw sang iya pagkaunud, sang nagdolot sia sang mga pangamuyo kag mga pag-ampo nga may mabaskug nga paghibi kag mga luha sa iya nga sarang makaluwas sa iya sa kamatayon, kag ginpamatian bangud nga nagkahadluk sia;

8 Bisan sia Anak, walay sapayan nagtoon sia sang pagkamatinumanon paagi sa mga butang nga iya gin-antus;

9 Kag sang nahimpit sia, nangin-gintunaan sia sang walay katapusan nga kaluwasan sa ila tanan nga nagatuman sa iya;

10 Nga gintawag sang Dios nga isa ka mataas nga pari sono sa paagi ni Melquisedec.

11 Nahanungud sa iya may madamu kita nga mga butang nga isiling, kag mabudlay nga imitlang, sanglit makuli kamo sa pagpamati.

12 Kay dapat na kamo kuntani magmanunudlo sa sining tion, apang nagakinahanglan kamo sing isa nga magtudlo sa inyo liwat sang nahauna nga mga palatukuran sang mga oraculo sang Dios; kag nangin tagsubong sa nagakinahanglan sang gatas, kag indi sang mabaskug nga pagkaon.

13 Kay ang tagsatagsa nga nagagamit sang gatas disampaton sa polong sang pagkamatarung: kay lapsag sia.

14 Apang ang mabaskug nga pagkaon naigo sa mga hamtong, sa ila nga paagi sa paggamit ang ila mga igbalati nahanas sa pagkilala sang maayo kag malaut.

KAPITULO 6

BUSA sa nagapadayon kita gikan sa nahauna nga mga palatukuran sang doktrina ni Cristo, magpadayon kita nga sa kahimpitan; nga indi magpahamtang liwat sing sadsaran sang paghinulsul gikan sa patay nga mga buhat, kag sang pagtoo ayon sa Dios,

2 Sang doktrina sang mga pagbautiso, kag sang pagtakdung sang mga kamut, kag sang pagkabanhaw sang mga patay, kag sang paghukom nga walay katapusan.

3 Kag ini himoon ta, kon itugut sang Dios.

4 Kay indi mahimo sa ila nga naiwagan anay, kag nakatilaw sang langitnon nga dolot, kag nahimo nga mga umalambit sang Balaan nga Espiritu,

5 Kag nakatilaw sang maayo nga polong sang Dios, kag sang mga kagamhanan sang kalibutan nga palaabuton,

6 Kon sila magtalikod, sa pagbag-o sa ila liwat sa paghinulsul; sanglit ginalansang nila sa krus sa ila kaugalingon ang Anak sang Dios liwat, kag ginapakahuy-an sia sing dayag.

7 Kay ang duta nga nagasuyup sang ulan nga sa masunsun nagakaholog sa iya, kag nagapatubas sing mga ulutanon nga kapuslanan sa ila nga nagpanguma sini, nagabaton sing pagpakamaayo sa Dios:

8 Apang inang nagapatubo sing mga talongon kag mga ragiwriw ginasikway, kag malapit sa pagpakamalaut; nga ang katapusan sini amo nga sonogon.

9 Apang, mga hinigugma, ginpatalupangud kami sing maayo pa nga mga butang nahanungud sa inyo, kag mga butang nga nagaupud sa kaluwasan, bisan nagahambal kami sing subong sini.

10 Kay ang Dios indi dimatarung nga malimot sang inyo binuhatan kag sang pagpangabudlay bangud sa gugma, nga ginpakita ninyo ayon sa iya ngalan, sanglit nag-alagad kamo sa mga santo, kag nagaalagad pa.

11 Kag ginahandum namon nga ang tagsa sa inyo magpakita sang amo man nga kaukud sa bug-os nga kalig-onan sang paglaum tubtub sa katapusan:

12 Agud nga indi kamo magmatamad, kondi mga somolonod nila nga paagi sa pagtoo kag pagpailub nagapanubli sang mga saad.

13 Kay sang ang Dios naghimo sang saad kay Abraham, sanglit nga wala sia sing bisan sin-o nga sumpaan nga daku pa, nagsumpa sia paagi sa iya kaugalingon,

14 Nga nagasiling, Matuud gid sa pagpakamaayo pakamaayohon ko ikaw, kag sa pagpamuad pabuaron ko ikaw.

15 Kag sa amo, sa tapus nga sia nakabatas sing mapailubon, naagum niya ang saad.

16 Kay ang mga tawo sa pagkamatuud nagasumpa paagi sa daku pa: kag sa ila ang sumpa nga sa kalig-onan katapusan sang tanan nga kasuayon.

17 Nga sa diin ang Dios, sa buut sia magpakita sing labing bugana pa sa mga manunubli sang saad sang pagkadimabalhinon sang iya katuyoan, ginpabakud ini paagi sa isa ka sumpa:

18 Agud nga paagi sa duha ka butang nga dimabalhinon, nga sa sini indi mahimo nga ang Dios magbutig, kita makaangkon sang mabakud nga paglipay, kita nga nagpalagyo sa pagdangup sa pagkapyot sa paglaum nga ginbutang sa aton atubang:

19 Nga ang among paglaum nga ginaangkon ta subong sang isa ka ankla sang kalag, mapag-on kag malig-on, kag nga nagasulud didto sa sulud sang kumbung;

20 Diin ang manug-una nagsulud tungud sa aton, nga si Jesus, nga ginhimo nga isa ka mataas nga pari sa walay katapusan sono sa paagi ni Melquisedec.

KAPITULO 7

KAY ining Melquisedec, hari sang Salem, pari sang labing mataas nga Dios, nga nagsugata kay Abraham nga nagapauli gikan sa pagpamatay sang mga hari, kag nagpakamaayo sa iya;

2 Sa iya man si Abraham naghatag sing ikapulo nga bahin sang tanan; una nga ginsaysay Hari sang pagkamatarung, kag ugaling Hari sang Salem man, kon sayoron, Hari sang paghidait;

3 Walay amay, walay iloy, walay kaliwatan, walay bisan pamuno sang mga adlaw, bisan katapusan sang pagkabuhi; apang ginhimo nga kaangay sang Anak sang Dios; nagapadayon nga isa ka pari sa gihapon.

4 Karon talupangda kon daw ano kadaku ining tawo sadto, nga sa iya bisan si Abraham nga patriarca naghatag sing ikapulo sang mga inagaw.

5 Kag sa pagkamatuud sila nga sa mga anak nga lalaki ni Levi, nga nagabaton sang alagdan sang pagkapari, may sogo sa pagkuha sang mga ikapulo sa katawohan sono sa kasogoan, kon sayoron, sa ila mga kauturan, bisan naggikan sila sa balikawang ni Abraham:

6 Apang sia nga ang iya kaliwatan wala ginaisip sa ila nagbaton sing mga ikapulo kay Abraham, kag nagpakamaayo sa iya nga nakaangkon sang mga saad.

7 Kag sa wala sing bisan ano nga kasuayon ang kubus ginapakamaayo sang mataas pa.

8 Kag diri ang mga tawo nga nagakapatay nagabaton sing mga ikapulo; apang didto sia ang nagabaton sa ila, nga ginasaksihan nga nagakabuhi sia.

9 Kag makasiling ako, nga si Levi man, nga nagabaton sing mga ikapulo, nagbayad sing mga ikapulo paagi kay Abraham.

10 Kay yara pa sia sa balikawang sang iya amay, sang ginsugata sia ni Melquisedec.

11 Busa kon ang kahimpitan nangin tungud sa pagkapari nga Levinhon, (kay sa idalum sini nabaton sang katawohan ang kasogoan,) ano pa bala ang kinahanglan nga maglutaw ang isa pa ka pari sono sa paagi ni Melquisedec, kag nga indi pagtawgon sono sa paagi ni Aaron?

12 Sanglit ginbaylohan ang pagkapari, kinahanglan nga may himoon man nga pagbaylo sang kasogoan.

13 Kay sia nga nahanungud sa iya ginapamolong ining mga butang nagikan sa isa ka tribo, nga gikan sini walay tawo nga nag-alagad sa halaran.

14 Kay maathag nga ang aton Ginoo nagikan sa Juda; nga nahanungud sining tribo walay ginpamolong si Moises nahanungud sa pagkapari.

15 Kag ini maathag pa gid: kay sono sa kaangay ni Melquisedec may nagalutaw nga isa pa ka pari,

16 Nga wala paghimoa sono sa kasogoan sang isa ka sogo nga lawasnon, kondi sono sa gahum sang walay katapusan nga kabuhi.

17 Kay sia nagasaksi, Ikaw isa ka pari sa walay katapusan sono sa paagi ni Melquisedec.

18 Kay sa pagkamatuud may pagwala sang sogo nga sadto anay bangud sang pagkaluya kag pagkawalay kapuslanan sini.

19 Kay ang kasogoan wala nagpahimpit sang bisan ano, kondi ang nagpahimpit amo ang pagdala sang maayo pa nga paglaum; nga paagi sini nagapalapit kita sa Dios.

20 Kag sanglit ginhimo sia nga pari nga indi sa wala sing pagsumpa:

21 (Kay yadtong mga pari ginhimo sa walay panumpa; apang ini may isa ka pagsumpa paagi sa iya nga nagsiling sa iya, Nagsumpa ang Ginoo kag indi maghinulsul, Ikaw isa ka pari sa walay katapusan sono sa paagi ni Melquisedec:)

22 Bangud sini si Jesus ginhimo nga manugpalig-on sang maayo pa nga testamento.

23 Kag matuud nangin-madamu sila nga pari, bangud wala sila gintugutan nga magpadayon bangud sang kamatayon:

24 Apang ining tawo, bangud nagapadayon sia sing dayon, may dimabaylohan nga pagkapari.

25 Busa sarang man sia sa pagluwas sa ila sing bug-os nga nagakari sa Dios paagi sa iya, sanglit nagakabuhi sia sing dayon sa pagpatunga tungud sa ila.

26 Kay ang ini nga mataas nga pari naigo sa aton, sia nga balaan, dimahalaliton, walay dagta, nahamulag sa mga makasasala, kag ginpakataas sang sa mga langit;

27 Nga wala nagakinahanglan, subong sadtong mga mataas nga pari, nga magdolot adlawadlaw sing halad, una tungud sa iya kaugalingon nga mga sala, kag ugaling tungud sa ila sang katawohan: kay ini ginhimo niya sing makaisa, sang pagdolot niya sang iya kaugalingon.

28 Kay ang kasogoan nagahimo sa mga tawo nga mataas nga mga pari nga may kaluyahon; apang ang polong sang sumpa, nga nag-abut sing olihi pa sa kasogoan, nagahimo sa Anak, nga ginpakabalaan sa walay katapusan.

KAPITULO 8

KARON nahanungud sa mga butang nga ginpamolong namon ini ang kabilogan: May amo kita nga mataas nga pari, nga nagalingkod sa too sang trono sang Pagkahalangdon sa mga langit;

2 Isa ka ministro sa santuario, kag sa matuud nga tabernakulo, nga ginpatindug sang Ginoo, kag indi sang tawo.

3 Kay ang tagsa ka mataas nga pari gintangdoan sa pagdolot sing mga dolot kag mga halad: gani kinahanglan nga ining tawo man may iya nga inugdolot.

4 Kay kon sia yari sa duta, indi sia manginpari, sanglit may mga pari nga nagadolot sang mga dolot sono sa kasogoan:

5 Nga nagaalagad sang hinuwad kag landong sang langitnon nga mga butang, subong nga si Moises gintudloan sang Dios sang sia manugpatindug sang tabernakulo: kay, Tatapa, nagasiling sia, nga himoon mo ang tanan nga butang sono sa huwaran nga ginpakita sa imo sa bukid.

6 Apang karon nakaagum sia sing isa ka pag-alagdan nga labi pa kaayo gid, nga paagi sina sia man manugpatunga sang labi pa kaayo nga katipan, nga gintukud sa maayo pa nga mga saad.

7 Kay kon yadtong nahaunang katipan walay sayup, niyan wala na kuntani sing kinahanglan sang ikaduha.

8 Kay nakakita sia sing sayup sa ila, nagsiling sia, Yari karon, ang mga adlaw magaabut, nagasiling ang Ginoo, nga magahimo ako sing bag-ong katipan kaupud sa panimalay sang Israel kag kaupud sa panimalay sang Juda:

9 Indi sono sa katipan nga ginhimo ko upud sa ila mga kaamayan sang adlaw nga ginkaptan ko sila sa kamut sa pagtuytuy sa ila pagowa sa duta sang Egipto; bangud wala sila magpadayon sa akon katipan, kag wala ako magsapak sa ila, nagasiling ang Ginoo.

10 Kay ini amo ang katipan nga akon himoon kaupud sa panimalay sang Israel sa tapus sinang mga adlaw, nagasiling ang Ginoo; ibutang ko ang akon mga kasogoan sa ila hunahuna, kag isulat sila sa ila mga tagiposoon: kag mangin isa ka Dios ako sa ila, kag mangin isa ka katawohan sila sa akon:

11 Kag indi sila ang tagsa ka tawo magatudlo sa iya isigkatawo, kag ang tagsatagsa sa iya utud, nga nagasiling, Kilalaha ang Ginoo: kay ang tanan magakilala sa akon, kutub sa labing kubus tubtub sa labing daku.

12 Kay magamaloloy-on ako sa ila mga pagkadimatarung, kag ang ila mga sala kag ang ila mga kalautan indi ko na pagdumdumon.

13 Sa sina sia nagasiling, Isa ka bag-ong katipan, ginpakadaan niya ang nahauna. Karon inang nagataliwan kag nagadaan malapit sa pagkawala.

KAPITULO 9

NIYAN sa pagkamatuud ang nahaunang katipan may mga pagsolondan man tungud sa diosnon nga pag-alagad, kag isa ka santuario nga kalibutanon.

2 Kay may isa ka tabernakulo nga ginhimo; ang nahauna, diin ang kandilero, kag ang latok, kag ang tinapay nga pahayag; nga gintawag ang santuario.

3 Kag sa likod sang ikaduhang kumbung, ang tabernakulo nga gintawag ang Pinakabalaan sa tanan;

4 Nga may incensario nga bulawan, kag ang arka sang katipan nga nataklapan sa palibut sing bulawan, diin ang suludlan nga bulawan nga nasudlan sang mana, kag ang sungkud ni Aaron nga nagpanalingsing, kag ang mga tapitapi sang katipan;

5 Kag sa ibabaw sini ang mga querubin sang himaya nga nagalandong sa lingkoran nga pakilooyan; nga nahanungud sini indi kita karon makahambal sing talaid.

6 Karon sang ang ining mga butang natangdoan sing subong, ang mga pari nagsulud sa gihapon sa nahaunang tabernakulo, nga nagatuman sang pag-alagad sa Dios.

7 Apang sa ikaduha nagsulud ang mataas nga pari sing isahanon sing makaisa sa isa ka tuig, indi sa walay dugo, nga ginadolot niya tungud sa iya kaugalingon, kag tungud sa mga sayup sang katawohan:

8 Ang Balaan nga Espiritu nagapahangup sini, nga ang dalan pakadto sa pinakabalaan sa tanan wala pa mapahayag, sa nagatindug pa ang nahaunang tabernakulo:

9 Nga kaanggid sang sadto nga tion, nga sa amo ginadolot ang mga dolot kag mga halad, nga indi sarang makapahimpit sa iya nga naghimo sang pag-alagad, nahanungud sa konsiensya;

10 Nga nagapadayon lamang sa mga kalan-on kag mga ilimnon, kag sarisari nga mga pagpanghugas, kag mga pagsolondan nga lawasnon, nga ginpatuman sa ila tubtub sa tion sang pagbaylo.

11 Apang si Cristo nga nangin isa ka mataas nga pari sang maayong mga butang nga magaabut, paagi sa daku pa kag himpit pa nga tabernakulo, nga wala paghimoa sang mga kamut, nga kon sayoron, indi sa sining tinukud;

12 Kag indi paagi sa dugo sang mga kanding kag mga tinday sang baka, kondi paagi sa iya kaugalingon nga dugo nagsulud sia sing makaisa sa balaan nga duug, nga nakaagum sang walay katapusan nga pagtubus tungud sa aton.

13 Kay kon ang dugo sang mga baka nga lalaki kag sang mga kanding, kag ang mga abo sang tinday nga baka nga babaye nga ginwisik sa mga dimatinlo, nagapakabalaan nga sa kaputlian sang unud:

14 Daw ano pa gid bala ang dugo ni Cristo, nga paagi sa Espiritu nga dayon nagdolot sang iya kaugalingon nga walay dagta sa Dios, nagatinlo sang inyo konsiensya gikan sa patay nga mga buhat sa pag-alagad sa Dios nga buhi?

15 Kag sa sining kabangdanan sia amo ang manugpatunga sang bag-ong testamento, agud nga paagi sa kamatayon, nga sa pagtubus sang mga paglapas nga yara sa idalum sang nahaunang testamento, sila nga mga tinawag magabaton sang saad nga panublion nga walay katapusan.

16 Kay kon may yara nga testamento, kinahanglan man ang kamatayon sang testador.

17 Kay ang isa ka testamento may kusug sa tapus nga ang mga tawo mapatay: apang wala gid ini sing kusug samtang nagakabuhi pa ang testador.

18 Nga sa diin bisan pa ang nahaunang testamento wala mahalad sa walay dugo.

19 Kay sang napamolong ni Moises ang tagsa ka pagsolondan sa bug-os nga katawohan sono sa kasogoan, ginkuha niya ang dugo sang mga tinday nga baka kag sang mga kanding, nga may tubig, kag dilana nga escarlata, kag hisopo, kag ginwisikan ang libro, kag ang bug-os nga katawohan,

20 Nga nagasiling, Ini amo ang dugo sang testamento nga ginsogo sang Dios sa inyo.

21 Labut pa ginwisikan niya sing dugo ang tabernakulo, kag ang tanan nga galamiton sang pag-alagdan.

22 Kag halus ang tanan nga mga butang nga paagi sa kasogoan gintinloan sang dugo; kag sa walay pagpaagay sang dugo walay kapatawaran.

23 Busa kinahanglan nga ang mga hinuwad sang mga butang nga yara sa mga langit dapat pagputlion sang mga sini; apang ang mga butang nga langitnon sa maayo pa nga mga halad sang sa mga sini.

24 Kay si Cristo wala nagsulud sa balaan nga mga duug nga ginhimo sang mga kamut, nga amo ang mga kaanggid sang matuud; kondi sa langit gid, karon sa pagpahayag sa atubangan sang Dios tungud sa aton:

25 Kag indi nga dapat pa sia magdolot sang iya kaugalingon sing masunsun, subong sang mataas nga pari nga nagasulud sa balaan nga duug tuigtuig nga may dugo sang iban;

26 Kay kon mag-amo sina kinahanglan sia mag-antus sing masunsun kutub sa pagpasad sang kalibutan: apang karon sa makaisa sa katapusan sang kalibutan nagpahayag sia sa pagwala sang sala paagi sa paghalad sang iya kaugalingon.

27 Kag subong nga gintangdo sa mga tawo nga mapatay sing makaisa, apang sa tapus sini ang paghukom:

28 Subong man si Cristo gindolot sing makaisa sa pagdala sang mga sala sang madamu; kag sa mga nagahulat sa iya magapahayag sia sa ikaduha nga tion nga walay sala sa kaluwasan.

KAPITULO 10

KAY ang kasogoan nga may landong sang maayong mga butang nga palaabuton, kag indi amo ang matuud nga dagway sang mga butang, indi nga mas-a ini paagi sa sadtong mga halad nga gindolot nila sing dalayon tuigtuig makapahimpit sa mga nagapalapit sa sina.

2 Kay niyan wala bala sila kuntani gin-untat sa pagdolot? bangud nga ang mga manugsimba nga natinloan sing makaisa wala na sila sing konsiensya sang mga sala.

3 Apang sa sadtong mga halad may pagpahanumdum liwat tuigtuig sang mga sala.

4 Kay indi mahimo nga ang dugo sang mga lalaking baka kag sang mga kanding magkuha sang mga sala.

5 Busa sang pag-abut niya sa kalibutan, nagsiling sia, Halad kag dolot wala ka magbuut, kondi gin-amanan mo ako sing lawas:

6 Sa mga halad nga sinonog kag mga halad tungud sa sala wala ka sing kalipay.

7 Niyan nagsiling ako, Yari karon, nagaabut ako (sa kabilogan sang libro ini nasulat nahanungud sa akon,) sa paghimo sang imo kabubut-on, O Dios.

8 Sang nagsiling sia sa ibabaw, Halad kag dolot kag mga halad nga sinonog kag halad tungud sa sala wala ka magbuut, kag wala ka sing kalipay sa sina; nga gindolot paagi sa kasogoan;

9 Niyan nagsiling sia, Yari karon, nagaabut ako sa paghimo sang imo kabubut-on, O Dios. Ginakuha niya ang nahauna, agud nga mapasad niya ang ikaduha.

10 Paagi sa sinang kabubut-on ginpakabalaan kita paagi sa paghalad sang lawas ni Jesu-Cristo sing makaisa nga sa gihapon.

11 Kag ang tagsa ka pari nagatindug adlawadlaw nga nagaalagad kag nagadolot sing masunsun sang amo man nga mga halad, nga indi gid sarang makakuha sang mga sala:

12 Apang ining tawo, sa tapus nga sia nakadolot sing isa ka halad tungud sa mga sala sa walay katapusan, naglingkod sa too sang Dios;

13 Kutub karon nagapaabut tubtub nga ang iya mga kaaway mahimo nga palatungan sang iya mga tiil.

14 Kay paagi sa isa ka halad ginhimpit niya sing dayon sila nga ginpakabalaan.

15 Nahanungud sini ang Balaan nga Espiritu man saksi sa aton: kay sa tapus nga nakasiling sia anay,

16 Ini amo ang katipan nga himoon ko sa ila sa tapus sinang mga adlaw, nagasiling ang Ginoo, ibutang ko ang akon mga kasogoan sa ila mga tagiposoon, kag sa ila mga hunahuna isulat ko ini sila;

17 Kag ang ila mga sala kag mga kalautan indi ko na pagdumdumon.

18 Karon sa may kapatawaran ang mga ini, wala na sing halad tungud sa sala.

19 Busa, mga kauturan, sa may kasidla kita sa pagsulud sa pinakabalaan paagi sa dugo ni Jesus,

20 Paagi sa dalan nga bag-o kag buhi, nga iya ginpakasagrado tungud sa aton, paagi sa kumbung, nga kon sayoron, paagi sa iya unud;

21 Kag sanglit may isa kita ka mataas nga pari nga labaw sa panimalay sang Dios;

22 Magpalapit kita nga may matuud nga tagiposoon sa bug-os nga kalig-onan sang pagtoo, nga nawisikan ang aton mga tagiposoon gikan sa malaut nga konsiensya, kag nahugasan ang aton mga lawas sa tubig nga maputli.

23 Huptan ta sing malig-on ang pagtuad sang aton pagtoo sing indi mationg; (kay sia nga nagsaad matutum;)

24 Kag magpatugsiling kita sa pagpukaw sa isa kag isa sa gugma kag maayong mga buhat:

25 Nga wala nagabiya sang pagtilipon sang aton kaugalingon sing tingub, subong sang kinabatasan sang iban; kondi nagalinaygayay ang isa kag isa: kag labi pa gid, sa ginatan-aw ninyo nga nagapalapit ang adlaw.

26 Kay kon magpakasala kita sing kinabubut-on sa tapus nga aton nabaton ang pagkilala sang kamatooran, wala na sing halad tungud sa mga sala,

27 Kondi ang isa ka makahaladluk nga paghulat sang paghukom kag nagakalayo nga kaakig, nga magalamon sang mga kasumpung.

28 Sia nga nagtamay sang kasogoan ni Moises napatay sa walay kalooy paagi sa duha ukon tatlo ka saksi:

29 Daw ano pa bala kapait nga silot, ang ginahunahuna ninyo, nga takus nga pag-ibilang sa iya, nga nagtapak sa Anak sang Dios, kag nagbilang sang dugo sang katipan nga isa ka dibalaan nga butang, nga paagi sini ginpakabalaan sia, kag naghimo sing pagtampalas sa Espiritu sang bugay?

30 Kay kilala naton ang nagsiling, Akon ang pagtimalus, ako magabalus, nagasiling ang Ginoo. Kag liwat, Ang Ginoo magahukom sang iya katawohan.

31 Makahaladluk nga butang nga maholog sa mga kamut sang Dios nga buhi.

32 Apang panumduma ninyo ang nahaunang mga adlaw, diin, sa tapus na kamo maiwagan, ginbatas ninyo ang isa ka daku nga pag-away sang mga kapipit-an;

33 Sa isa ka bahin, samtang nga kamo ginhimo nga talan-awon paagi sa mga pagpasipala kag mga kapipit-an; kag sa isa ka bahin, samtang kamo nangin mga kaupud sang mga ginhimoan sini.

34 Kay may kalooy kamo sa akon sa akon mga gapus, kag ginbaton ninyo sing malipayon ang paglugus sang inyo mga pagkabutang, sa nahibaloan ninyo nga kamo may yara sa langit sing isa ka maayo pa kag isa ka nagapadayon nga pagkabutang.

35 Busa dili ninyo pag-isikway ang inyo pagsalig, nga may daku nga katumbasan nga balus.

36 Kay may kinahanglan kamo sang pagpailub, agud nga, sa tapus nga mahimo ninyo ang kabubut-on sang Dios, mabaton ninyo ang saad.

37 Kay sa diotay pa nga tion, kag sia nga magaabut magaabut, kag indi maglantang.

38 Karon ang matarung magakabuhi paagi sa pagtoo: apang kon ang bisan sin-o nga tawo mag-isul, ang akon kalag walay kahamuut sa iya.

39 Apang indi kita gikan sa ila nga nagaisul pa kalaglagan; kondi sa ila nga nagatoo nga sa kaluwasan sang kalag.

KAPITULO 11

KARON ang pagtoo amo ang substansya sang mga butang nga ginalauman, ang pagpamatuud sang mga butang nga indi makita.

2 Kay sa sini ang mga tigulang nakaagum sing maayo nga testimonyo.

3 Paagi sa pagtoo nahangup ta nga nabuhat ang mga kalibutan paagi sa polong sang Dios, agud nga ang mga butang nga makita wala pagbuhata sa mga butang nga makita.

4 Paagi sa pagtoo si Abel nagdolot sa Dios sing isa ka labi pa kaayo gid nga halad sang kay Cain, nga paagi sini nakaagum sia sing pagpamatuud nga sia matarung, ang Dios nagapamatuud sang iya mga dolot: kag paagi sini, bisan patay sia, nagahambal pa sia.

5 Paagi sa pagtoo si Enoc ginpaliton agud nga indi sia mapatay; kag wala sia makita, bangud nga ginpaliton sia sang Dios: kay sa wala pa ang iya pagliton nakaagum sia sining pagpamatuud, nga nakapahamuut sia sa Dios.

6 Apang sa wala sing pagtoo indi mahimo ang pagpahamuut sa iya: kay sia nga nagapalapit sa Dios kinahanglan magtoo nga amo sia, kag nga manugbalus sia sa ila nga nagapangita sa iya sing maukud.

7 Paagi sa pagtoo si Noe, sang ginpaandaman sang Dios nahanungud sa mga butang nga wala pa makita, naggiho nga may kahadluk, nag-aman sing arka sa kaluwasan sang iya panimalay; paagi sini gintagudilian niya ang kalibutan, kag nanginmanunubli sang pagkamatarung nga paagi sa pagtoo.

8 Paagi sa pagtoo si Abraham, sang gintawag sia sa paggowa pakadto sa duug nga iya batonon nga panublion sa olihi, nagtuman; kag naggowa sia, nga wala makahibalo kon diin sia makadto.

9 Paagi sa pagtoo sia nagpanlugayaw sa duta sang saad, subong sa duta nga dumoloong, nga nagapuyo sa mga tabernakulo upud kay Isaac kag kay Jacob, ang mga kaupud niya nga manunubli sang amo nga saad:

10 Kay nagpangita sia sang isa ka siudad nga may mga sadsaran, nga ang manunukud kag manugbuhat sini amo ang Dios.

11 Paagi sa pagtoo man si Sara gid nakabaton sing kusug sa pagpanamkon sing kaliwat, kag nag-anak sing bata sang nagtaliwan na sia sa edad, bangud ginbilang niya nga matutum ang nagsaad.

12 Busa gikan sa isa, kag sia nga daw patay na, natawo ang kadam-an nga subong kadamu sang mga bitoon sang langit, kag subong sang mga balas nga dimaisip sa baybayon.

13 Ini sila tanan napatay sa pagtoo, nga wala makabaton sang mga saad, kondi nakit-an ang mga ini gikan sa malayo, kag nagpati nahanungud sa mga sini, kag ginhakus ang mga ini, kag nagtuad nga sila mga dumoloong kag mga umalagi sa duta.

14 Kay sila nga nagasiling sang amo nga mga butang nagapahayag sing maathag nga nagapangita sila sing isa ka duta.

15 Kag matuud, kon ginpanumdum nila yadtong duta nga ila ginhalinan, may kahigayonan sila kuntani sa pagbalik.

16 Apang karon nagahandum sila sang duta nga maayo pa, nga among, isa ka langitnon: busa ang Dios indi mahuya nga pagtawgon nga ila Dios: kay nakaaman sia sa ila sing isa ka siudad.

17 Paagi sa pagtoo si Abraham, sang gintilawan sia, nagdolot kay Isaac: kag sia nga nakabaton sang mga saad nagdolot sang iya bugtong nga ginpanganak nga anak,

18 Nga nahanungud sa iya ini ginsiling, Nga sa kay Isaac tawgon ang imo kaliwat:

19 Sia nagkabig nga ang Dios makasarang sa pagbanhaw sa iya, bisan gikan sa mga patay; nga sa diin ginbaton man niya sia sa isa ka kaanggid.

20 Paagi sa pagtoo ginpakamaayo ni Isaac si Jacob kag si Esau nahanungud sa mga butang nga palaabuton.

21 Paagi sa pagtoo si Jacob, sang tagumatayon sia, ginpakamaayo ang duha ka anak nga lalaki ni Jose; kag nagsimba, nga nagasandig sa puno sang iya sungkud.

22 Paagi sa pagtoo si Jose, sang sia napatay, naghinambit sang pagtaliwan sang mga anak ni Israel; kag naghatag sing sogo nahanungud sang iya mga tul-an.

23 Paagi sa pagtoo si Moises, sang natawo sia, gintago sang iya mga ginikanan sing tatlo ka bulan, bangud nakita nila nga angay sia nga bata; kag wala sila mahadluk sa sogo sang hari.

24 Paagi sa pagtoo si Moises, sang daku na sia, nagdumili nga pagtawgon nga anak sang babaying anak ni Faraon;

25 Nga nagapasulabi sa pag-antus sang kapipit-an kaupud sa katawohan sang Dios, sang sa pag-agum sang mga pagpangalipay sang sala sa malip-ot nga panag-on;

26 Nga ginabilang niya ang pagtamay ni Cristo nga daku pa nga manggad sang sa mga bahandi sa Egipto: kay ginpakamahal niya ang katumbasan sang balus.

27 Paagi sa pagtoo ginbayaan niya ang Egipto, nga wala nagakahadluk sa kasingkal sang hari: kay nagbatas sia, subong nga nagatan-aw sa iya nga dimakita.

28 Paagi sa pagtoo ginhiwat niya ang pagligad, kag ang pagwisik sang dugo, agud nga sia nga naglaglag sang mga panganay indi magtandug sa ila.

29 Paagi sa pagtoo nag-agi sila sa Mapulang dagat subong sang sa mamala nga duta: nga sang ang mga Egiptohanon nagtilaw sa paghimo, nagkalumus.

30 Paagi sa pagtoo nagkapukan ang mga pader sang Jerico, sa tapus nga nalibut ang mga ini sing pito ka adlaw.

31 Paagi sa pagtoo si Rahab nga alpot wala mawala upud sa mga wala nagtoo, sang ginbaton niya nga may paghidait ang mga espiya.

32 Kag ano pa bala ang isiling ko? kay kulangon ako sing tion sa pagsugid nahanungud kay Gideon, kag kay Barac, kag kay Samson, kag kay Jefte; kay David man, kag kay Samuel, kag sang mga manalagna:

33 Nga paagi sa pagtoo nagdaug sing mga ginharian, naghimo sing pagkamatarung, nag-agum sing mga saad, ginpakium ang mga baba sang mga leon,

34 Ginpalong ang kasingkal sang kalayo, nagpalagyo sa sulab sang espada, sa kaluyahon ginpabakud, nag-ilisug sa inaway, nagpapalagyo sang mga kasoldadosan sang mga dumoloong.

35 Ang mga babaye nagbaton sang ila mga patay nga ginbanhaw liwat: kag ang iban ginsakit sing tama, nga wala nagabaton sing paghilway; agud nga makaagum sila sing maayo pa nga pagkabanhaw:

36 Kag ang iban may pagtilaw sang pag-uligyat nga mapintas kag mga paghampak, hoo, labut pa sina sang mga gapus kag pagbilanggo:

37 Ginbato sila, ginpang-utud sila sa lagari, ginsulay, ginpamatay sa espada: nagdalangdalang sila nga napanaptan sang mga panit sang mga carnero kag mga kanding; nga nawad-an, ginpapiotan, ginpintasan;

38 (Nga sa ila indi takus ang kalibutan:) nagdalangdalang sila sa mga kamingawan, kag sa mga kabukiran, kag sa mga gikab kag mga lungib sang duta.

39 Kag ini sila tanan, nga nakaagum sing maayo nga testimonyo paagi sa pagtoo, wala makabaton sang saad:

40 Ang Dios naghimos sang maayo pa nga butang tungud sa aton, nga sa wala kita indi sila maghimpit.

KAPITULO 12

BUSA sanglit ginalibutan kita man sing tama kadaku nga panganud sang mga saksi, isikway ta ang tagsa ka kabug-atan, kag ang sala nga nagadapo sing mahulas sa aton, kag magdalagan kita nga may pagpailub sang dalaganon nga ginabutang sa aton atubang,

2 Nga nagatolok kay Jesus nga gintunaan kag manugtapus sang aton pagtoo; nga tungud sa kalipay nga ginbutang sa iya atubang nagbatas sang krus, nga nagatamay sang kahuluy-an, kag nagalingkod sa too sang trono sang Dios.

3 Kay talupangda sia nga nagbatas sang amo nga pagtaligmato nahanungud sang mga makasasala batok sa iya kaugalingon, agud nga indi kamo paglapyoon kag pagpunawon sa inyo mga hunahuna.

4 Wala pa kamo magabatok tubtub sa dugo, nga nagapanikasug batok sa sala.

5 Kag nalimtan ninyo ang laygay nga nagahambal sa inyo subong sa mga anak, Anak ko, dili pagtamaya ang disiplina sang Ginoo, ukon mapunaw kon pagsabdongon ka niya:

6 Kay kon sin-ong ginahigugma sang Ginoo ginadisiplina niya, kag ginahampak ang tagsa ka anak nga ginabaton niya.

7 Kon magbatas kamo sang pagdisiplina, ang Dios nagatratar sa inyo subong nga mga anak; kay sin-o bala ang anak nga wala ginadisiplina sang amay?

8 Apang kon wala kamo sing disiplina, diin ang tanan mga umalambit, niyan mga onon kamo, kag indi mga anak.

9 Labut pa may mga amay kita sa unud nga nagsilot sa aton, kag ginhatagan ta sila sang pagtahud: indi bala kita magpasakup sing labi pa sa Amay sang mga espiritu, kag magkabuhi?

10 Kay sa pagkamatuud sila nagdisiplina sa aton sing pila lamang ka adlaw sono sa ila kaugalingon nga kahamuut; apang sia sa aton kapuslanan, agud nga mangin mga umalambit kita sang iya pagkabalaan.

11 Walay pagdisiplina nga ginabilang nga makalilipay sa karon, kondi masakit: walay sapayan sa olihi nagapatubas ini sing madaiton nga bunga sang pagkamatarung sa mga nahanas sa sini.

12 Busa bayawa ang nagapamuypuy nga mga kamut, kag ang maluya nga mga tuhud;

13 Kag maghimo sing mga banas nga matadlong sa inyo mga tiil, agud nga inang piang indi magtalang sa dalan; kondi hinonoo mag-ayo.

14 Tinguhaa ninyo ang pagpakighidait sa tanan nga tawo, kag ang pagkabalaan, nga sa wala ini walay tawo nga makakita sang Ginoo:

15 Nga nagatan-aw sing maukud basi ang bisan sin-o nga tawo mawad-an sang bugay sang Dios; basi nga ang bisan ano nga gamut sang kapaitan nga nagaulhot magtublag sa inyo, kag bangud sini madagtaan ang madamu;

16 Basi nga may kon sin-o nga makihilawason, ukon dibalaan nga tawo, subong kay Esau, nga sa isa ka kaonan nagbaligya sang iya kinamatarung sa pagkapanganay.

17 Kay nahibaloan ninyo kon paano nga sang olihi, sang panublion na niya kuntani ang pagpakamaayo, ginsikway sia: kay wala na sia sing kahigayonan sa paghinulsul, bisan ginpangita niya ini sing maukud nga may mga luha.

18 Kay wala kamo nagapalapit sa bukid nga sarang matandug, kag nagadabdab sing kalayo, bisan sa kangitongito, kag sa kadudulman, kag sa bagyo,

19 Kag sa tonog sang budyong, kag sa tingug sang mga polong; nga sa among tingug sila nga nakabati nagpakilooy nga indi na pag-ipamolong pa sa ila ang polong:

20 (Kay indi sila makabatas sinang ginsogo, Kag kon bisan ang isa ka sapat magtandug sang bukid, batohon ini, ukon tohogon sing baslay:

21 Kag tama ka makahaladluk ang talan-awon, nga si Moises nagsiling, Nahadluk ako sing lakas kag nagakurug:)

22 Kondi nagapalapit kamo sa bukid nga Sion, kag sa siudad sang Dios nga buhi, ang Jerusalem nga langitnon, kag sa dimaisip nga pagtililipon sang mga anghel,

23 Sa bug-os nga katilingban kag iglesia sang mga panganay, nga nasulat sa langit, kag sa Dios nga Hukom sang tanan, kag sa mga espiritu sang matarung nga mga tawo nga nahimpit,

24 Kag sa kay Jesus nga manugpatunga sang bag-o nga katipan, kag sa dugo nga ginawisik, nga nagahambal sing maayo pa nga mga butang sang sa sinang kay Abel.

25 Andam kamo nga sia nga nagpamolong indi ninyo pagsikwayon. Kay kon sila nga nagsikway sa iya nga nagpamolong sa duta wala makapalagyo, labi pa gid nga indi kita makapalagyo, kon kita magbiya sa iya nga nagapamolong gikan sa langit:

26 Nga ang iya tingug nagtay-ug anay sang duta: apang karon nagsaad sia, nga nagasiling, Sa makaisa pa uyugon ko indi lamang ang duta, kondi man ang langit.

27 Kag ining polong, Sa makaisa pa, nagapahayag sang pagkuha sinang mga butang nga talay-ugon, subong sang mga butang nga nahimo, agud nga ang yadtong mga butang nga indi matay-ug magpabilin.

28 Busa sa nagabaton kita sing isa ka ginharian nga indi mationg, mag-angkon kita sang bugay, nga paagi sini makaalagad kita sa Dios sing kalahamut-an nga may pagtahud kag diosnon nga kahadluk:

29 Kay ang aton Dios isa ka nagalamon nga kalayo.

KAPITULO 13

PADAYONA ninyo ang gugma nga paghiliutud.

2 Dili kamo malimot sa pagsapopo sa mga dumoloong: kay sa sini ang iban nakaamoma sing mga anghel sa wala nila mahibaloi.

3 Dumduma ninyo ang mga yara sa mga gapus, subong nga mga nagapus kamo kaupud nila; kag sila nga nagaantus sing kalisdanan, subong nga yara man kamo sa lawas.

4 Ang pag-asawahay dungganon sa tanan, kag ang higdaan dipagdagtaan: apang pagahukman sang Dios ang mga makihilawason kag mga makihilahion.

5 Maggawi kamo nga wala sing paghamkon; kag magcontento sa mga butang nga yara sa inyo: kay sia nagsiling, Indi ko ikaw nga mas-a pagpabayaan, kag indi ko ikaw pagpatumbayaan.

6 Agud nga makasiling kita sing masinaligon, Ang Ginoo amo ang akon manugtabang, kag indi ako magakahadluk kon ano ang himoon sang tawo sa akon.

7 Dumduma sila nga among may pagdumala sa inyo, nga naghambal sa inyo sang polong sang Dios: sonda ang ila pagtoo, nga nagatalupangud sang katapusan sang ila pagginawi.

8 Si Jesu-Cristo amo man kahapon, kag karon, kag sa gihapon.

9 Dili kamo magpadaladala sa sarisari kag makatilingala nga mga doktrina. Kay maayo ini nga butang nga ang tagiposoon palig-onon sa bugay; indi sa matig-a nga mga pagkaon, nga wala mapusli sang mga nagahimud-os sa mga sini.

10 May aton kita nga isa ka halaran, nga sa sini walay kinamatarung sa pagkaon ang mga nagaalagad sa tabernakulo.

11 Kay ang mga lawas sadtong mga sapat, nga ang ila dugo ginadala sa santuario sang mataas nga pari tungud sa sala, ginasonog sa gowa sang kampo.

12 Busa si Jesus man, agud nga mapakabalaan niya ang katawohan paagi sa iya kaugalingon nga dugo, nag-antus sa gowa sang gawang.

13 Busa magkadto kita sa iya sa gowa sang kampo, nga nagadala sang iya kahuluy-an.

14 Kay diri wala kita sing siudad nga nagapadayon, kondi nagapangita kita sing isa nga palaabuton.

15 Busa paagi sa iya magdolot kita sing dalayon sa Dios sing halad sang pagdayaw, nga amo, ang bunga sang aton mga bibig nga nagahatag sing mga pagpasalamat sa iya ngalan.

16 Apang dili malimot sa paghimo sing maayo kag sa pagpaambit: kay sa amo nga mga halad nahamuut gid ang Dios.

17 Tumana sila nga among may pagdumala sa inyo, kag magpasakup kamo: kay sila nagabantay tungud sa inyo mga kalag, subong nga sila ang kinahanglan nga magahatag sing husay, nga mahimo nila ini nga may kalipay, kag indi nga may kasubu: kay ina walay kapuslanan sa inyo.

18 Pangamuyo kamo tungud sa amon: kay ginasaligan namon nga may maayo kami nga konsiensya, sa tanan nga butang buut magpangabuhi sing mabunayag.

19 Apang ginapakilooy ko sa inyo sing labi pa gid sa paghimo sini, agud nga mapabalik ako sa inyo sa labing madali.

20 Karon ang Dios sang paghidait, nga nagbanhaw gikan sa mga patay sang aton Ginoong Jesus, inang daku nga manugpahalab sang mga carnero, paagi sa dugo sang walay katapusan nga katipan,

21 Magpahimpit sa inyo sa tagsa ka maayong buhat sa paghimo sang iya kabubut-on, nga nagahikot sa inyo sinang nahamut-an gid sa iya itololok, paagi kay Jesu-Cristo; nga sa iya ang himaya sa gihapon kag sa walay katapusan. Amen.

22 Kag nagapakilooy ako sa inyo, mga kauturan, batasa ninyo ang polong sang paglaygay: kay nagsulat ako sa inyo sing sulat sa pila lamang ka mga polong.

23 Hibaloa ninyo nga si Timoteo nga aton utud nabuhian na; nga kaupud niya, kon mag-abut sia sing madali, magapakigkita ako sa inyo.

24 Abiabiha tanan sila nga among may pagdumala sa inyo, kag ang tanan nga santo. Ang mga taga-Italia nagaabiabi sa inyo.

25 Ang bugay manginkaupud ninyo tanan. Amen.

� Ginsulat sa mga Hebreo gikan sa Italia paagi kay Timoteo.

AMAZING GRACE BIBLE INSTITUTE