ANG BALAAN NGA BIBLIA

HAGEO

KAPITULO 1

SA ikaduhang tuig ni Dario nga hari, sa bulan nga ikan-um, sa nahaunang adlaw sang bulan, ang polong sang GINOO nag-abut paagi kay Hageo nga manalagna kay Zorobabel nga anak nga lalaki ni Sealtiel, gobernador sang Juda, kag kay Josue nga anak nga lalaki ni Josadac, ang mataas nga pari, nga nagasiling,

2 Amo ini ang ginapamolong sang GINOO sang mga kasoldadosan, nga nagasiling, Ining katawohan nagasiling, Ang tion wala pa mag-abut, ang tion nga ang balay sang GINOO pagapatindugon.

3 Niyan nag-abut ang polong sang GINOO paagi kay Hageo nga manalagna, nga nagasiling,

4 Tion bala ini sa inyo, O kamo, sa pagpuyo sa inyo mga balay nga nakisamihan, kag ining balay guba?

5 Busa karon amo ini ang ginasiling sang GINOO sang mga kasoldadosan; Patugsilingi ang inyo mga dalanon.

6 Nakasab-ug kamo sing madamu, kag nagatipon sing diotay; nagakaon kamo, apang wala kamo mabusug; nagainum kamo, apang wala kamo maayawi sing ilimnon; nagapanaput kamo, apang wala gid sing nag-init; kag ang nagabaton sing mga sohol nagabaton sing mga sohol sa pagsulud sini sa puyo nga may mga buslut.

7 ś Amo ini ang ginasiling sang GINOO sang mga kasoldadosan; Patugsilingi ang inyo mga dalanon.

8 Tukad sa bukid, kag magdala sing kahoy, kag patindugon ang balay; kag mahamuut ako sini, kag paghimayaon ako, nagasiling ang GINOO.

9 Naghulat kamo sing madamu, kag, yari karon, nag-abut ini sa diotay; kag sang gindala ninyo ini pauli, ginhuypan ko ini. Ngaa bala? nagasiling ang GINOO sang mga kasoldadosan. Bangud sang akon balay nga guba, kag kamo nagadalagan ang tagsa ka tawo sa iya kaugalingon nga balay.

10 Busa ang langit sa ibabaw ninyo nagpugung sang ton-og, kag ang duta nagapakunul sang iya bunga.

11 Kag gintawag ko ang kakigas sa duta, kag sa mga bukid, kag sa uyas, kag sa bag-o nga alak, kag sa lana, kag sa ginapatubas sang duta, kag sa mga tawo, kag sa kahayupan, kag sa bug-os nga kinabudlayan sang mga kamut.

12 ś Niyan si Zorobabel nga anak nga lalaki ni Sealtiel, kag si Josue nga anak nga lalaki ni Josadac, ang mataas nga pari, pati ang tanan nga nabilin sang katawohan, nagtuman sang tingug sang GINOO nga ila Dios, kag sang mga polong ni Hageo nga manalagna, sono sa ginpadala sa iya sang GINOO nga Dios nila, kag ang katawohan nagkahadluk sa atubangan sang GINOO.

13 Niyan nagpamolong si Hageo, nga manugbalita sang GINOO, sang mensahi sang GINOO sa katawohan, nga nagasiling, Ako nagaupud sa inyo, nagasiling ang GINOO.

14 Kag ginpukaw sang GINOO ang espiritu ni Zorobabel nga anak nga lalaki ni Sealtiel, gobernador sang Juda, kag ang espiritu ni Josue nga anak nga lalaki ni Josadac, ang mataas nga pari, kag ang espiritu sang bug-os nga nabilin sang katawohan; kag nag-abut sila kag nagpangabudlay sa balay sang GINOO sang mga kasoldadosan, nga ila Dios,

15 Sa ikaduha ka pulo kag apat nga adlaw sang ikan-um nga bulan, sa ikaduhang tuig ni Dario nga hari.

KAPITULO 2

SA ikapitong bulan, sa ikaduha ka pulo kag isa nga adlaw sang bulan, nag-abut ang polong sang GINOO paagi sa manalagna nga si Hageo, nga nagasiling,

2 Ipamolong karon kay Zorobabel nga anak nga lalaki ni Sealtiel, gobernador sang Juda, kag kay Josue nga anak nga lalaki ni Josadac, ang mataas nga pari, kag sa nabilin sang katawohan, nga nagasiling,

3 Sin-o bala ang nabilin sa inyo nga nakakita sining balay sa iya una nga himaya? kag paano bala ang pagtan-aw ninyo sini karon? indi bala ini subong nga wala sa inyo mga mata?

4 Apang karon magpakabakud, O Zorobabel, nagasiling ang GINOO; kag magpakabakud, O Josue, anak nga lalaki ni Josadac, ang mataas nga pari; kag magpakabakud, tanan kamo nga katawohan sang duta, nagasiling ang GINOO, kag magpangabudlay: kay ako nagaupud sa inyo, nagasiling ang GINOO sang mga kasoldadosan:

5 Sono sa polong nga ginpakigkatipan ko sa inyo sang paggowa ninyo sa Egipto, sa amo ang akon espiritu nagapabilin sa tunga ninyo: dili kamo magkahadluk.

6 Kay amo ini ang ginasiling sang GINOO sang mga kasoldadosan; Sa makaisa pa, diotay pa ini nga tion, kag uyugon ko ang mga langit, kag ang duta, kag ang dagat, kag ang mamala nga duta;

7 Kag uyugon ko ang tanan nga pungsud, kag ang handum sang tanan nga pungsud magaabut: kag pun-on ko ining balay sing himaya, nagasiling ang GINOO sang mga kasoldadosan.

8 Ang pilak akon, kag ang bulawan akon, nagasiling ang GINOO sang mga kasoldadosan.

9 Ang himaya sining olihi nga balay mangindaku pa sa una, nagasiling ang GINOO sang mga kasoldadosan: kag sa sining duug ihatag ko ang paghidait, nagasiling ang GINOO sang mga kasoldadosan.

10 ś Sa ikaduha ka pulo kag apat nga adlaw sang bulan nga ikasiam, sa ikaduhang tuig ni Dario, nag-abut ang polong sang GINOO paagi kay Hageo nga manalagna, nga nagasiling,

11 Amo ini ang ginasiling sang GINOO sang mga kasoldadosan; Pamangkota karon ang mga pari nahanungud sang kasogoan, nga nagasiling,

12 Kon ang isa magdala sang unud nga balaan sa sidsid sang iya bayo, kag makatandug sa iya sidsid sing tinapay, ukon linaga, ukon alak, ukon lana, ukon bisan anong kalan-on, manginbalaan bala ini? Kag ang mga pari nagsabat kag nagsiling, Indi.

13 Niyan nagsiling si Hageo, Kon ang isa nga dimatinlo paagi sa lawas nga patay makatandug sang bisan ano sini, mangindimatinlo bala ini? Kag ang mga pari nagsabat kag nagsiling, Ini mangindimatinlo.

14 Niyan si Hageo nagsabat, kag nagsiling, Subong sini ining katawohan, kag subong sini ining pungsud sa atubangan nakon, nagasiling ang GINOO; kag subong sini ang tagsa ka binuhatan sang ila mga kamut; kag inang ginahalad nila didto dimatinlo.

15 Kag karon, ginaampo ko sa inyo, patugsilingi kutub sining adlaw kag padayon, sang wala pa natungtung ang bato sa ibabaw sang bato sa templo sang GINOO:

16 Kutub sadtong mga adlaw, kon magpalapit ang isa sa tinumpok nga duha ka pulo ka sukub, may napulo lamang: kon ang isa magpalapit sa ipitan sang ubas sa pagkuha sing kalim-an ka suludlan gikan sa ipitan, may duha ka pulo lamang.

17 Ginsakit ko kamo sang panlaya kag sang agop-op kag sang ulan nga hielo sa tanan nga mga pinangabudlayan sang inyo mga kamut; apang wala kamo magbalik sa akon, nagasiling ang GINOO.

18 Patugsilingi karon kutub sining adlaw kag padayon, kutub sa ikaduha ka pulo kag apat nga adlaw sang bulan nga ikasiam, kutub sang adlaw nga ginpasad ang sadsaran sang templo sang GINOO, patugsilingi ini.

19 Yara pa bala ang binhi sa tambobo? hoo, wala pa magpatubas ang puno sang ubas, kag ang kahoy nga higuera, kag ang granada, kag ang kahoy nga olivo: kutub sining adlaw pakamaayohon ko kamo.

20 ś Kag liwat ang polong sang GINOO nag-abut kay Hageo sa ikaduha ka pulo kag apat nga adlaw sang bulan, nga nagasiling,

21 Ipamolong kay Zorobabel, gobernador sang Juda, nga nagasiling, Uyugon ko ang mga langit kag ang duta;

22 Kag pukanon ko ang trono sang mga ginharian, kag laglagon ko ang kusug sang mga ginharian sang mga pagano; kag wagwagon ko ang mga kangga, kag ang mga nagasakay sa ila; kag ang mga kabayo kag ang mga manugsakay sa ila magakapukan, ang tagsatagsa paagi sa espada sang iya utud.

23 Sa sinang adlaw, nagasiling ang GINOO sang mga kasoldadosan, kuhaon ko ikaw, O Zorobabel, akon alagad, anak nga lalaki ni Sealtiel, nagasiling ang GINOO, kag himoon ko ikaw subong sang singsing nga inugpat-in: kay ginpili ko ikaw, nagasiling ang GINOO sang mga kasoldadosan.

AMAZING GRACE BIBLE INSTITUTE