HABACUCKAPITULO 1HABACUC KAPITULO 1 ANG lulan nga nakita ni Habacuc nga manalagna.2 O GINOO, tubtub pa san-o nga ako magatuaw, kag indi ka magpamati! nagatuaw ako sa imo nahanungud sa palugus, kag indi ka magluwas! 3 Ngaa bala nga ginapakitaan mo ako sing kalautan, kag ginapatolok mo ako sing kasubo? kay ang kalaglagan kag ang palugus yara sa atubangan nakon: kag may mga nagasugud sing kaawayon kag sing kasuayon. 4 Busa ang kasogoan hagoka, kag ang paghukom wala gid nagagowa: kay ang malauton nagalikup sang matarung; busa ang sayup nga paghukom nagagowa. 5 ¶ Tolok kamo sa tunga sang mga pagano, kag magpatugsiling, kag magkatingala sing lakas: kay magahimo ako sing buhat sa inyo mga adlaw, nga indi ninyo pagpatihan, bisan isugid ini sa inyo. 6 Kay, yari karon, ginabangon ko ang mga Caldeanhon, ina nga pungsud nga mapintas kag madalas, nga magalatas sa kasangkaran sang duta, sa pag-angkon sing puluy-an nga mga duug nga indi ila. 7 Makakulugmat sila kag makakululba: ang ila paghukom kag ang ila pagkahalangdon magagikan sa ila kaugalingon. 8 Ang ila mga kabayo man madasig pa sa mga leopardo, kag mapintas pa sa mga lobo sa kahaponon: kag ang ila mga manugkabayo magasolong, kag ang ila mga manugkabayo magaabut gikan sa malayo; magalupad sila subong sang aguila nga nagadalidali sa pagkaon. 9 Tanan sila magaabut nga sa palugus: ang ila mga nawung magapangsuyup subong sang hangin nga sidlangan, kag magapanipon sila sing mga bihag subong sang balas. 10 Kag sila magayubit sa mga hari, kag ang mga prinsipe ululigyaton sa ila: yagotaon nila ang tagsa ka pamakud; kay magatumpok sila sang yab-ok, kag agawon ini. 11 Niyan magabaylo ang iya hunahuna, kag magaligad sia, kag magalalis, nga nagapahanungud sining gahum niya sa iya dios. 12 ¶ Indi ka bala kutub sa gihapon, O GINOO nga akon Dios, ang akon Balaan nga Isa? indi kami mapatay. O GINOO, ginpat-ud mo sila nga sa paghukom; kag, O gamhanan nga Dios, ikaw nagtukud sa ila nga sa pagbadlong. 13 Ikaw nga putli pa sing mga mata sang sa magtolok sa malaut, kag indi makatolok sa kalautan: ngaa bala nagatolok ka sa mga maluibon, kag nagahipus ka kon ang malauton nagahalunhon sang tawo nga matarung pa sa iya? 14 Kag nga ikaw nagahimo sang mga tawo subong sang mga isda sang dagat, subong sang mga butang nga nagasaug, nga wala sing manugdumala sa ila? 15 Ginakuha nila sila tanan sang taga, ginadakup nila sila sa ila siod nga pinuna, kag ginatipon sila sa iya tsintsoro: busa nagakalipay sila kag nagakasadya. 16 Busa nagahalad sila sa ila siod nga pinuna, kag nagasonog sing incienso sa ila tsintsoro; bangud nga sa ila ginapatambok ang ila pahat, kag ginapabugana ang ila pagkaon. 17 Busa ulaan bala nila ang ila siod nga pinuna, kag indi magpaiway sa pagpatay sang mga pungsud sing dalayon? KAPITULO 2MAGATINDUG ako sa akon pagbantay, kag magapahamtang ako sa torre, kag magalantaw kon ano ang ipamolong niya sa akon, kag kon ano ang isabat ko kon ginasabdong ako.2 Kag ang GINOO nagsabat sa akon, kag nagsiling, Isulat ang palanan-awon, kag ipaathag ini sa mga tapitapi, agud nga magdalagan ang nagabasa sini. 3 Kay ang palanan-awon naigo pa sa pinat-ud nga tion, apang sa katapusan magapamolong ini, kag indi magbutig: bisan magpalantang ini, hulata ini; kay sa pagkamatuud magaabut ini, indi ini magpalantang. 4 Yari karon, ang iya kalag nga nahabok indi matadlong sa sulud niya: apang ang matarung magakabuhi paagi sa iya pagtoo. 5 ¶ Hoo labut pa, bangud nga nagalalis sia paagi sa alak, sia tawo nga bugalon, kag wala nagapabilin sa puluy-an, nga nagapalapad sang iya handum subong sang impierno, kag subong sia sang kamatayon, kag indi mabusug, kondi nagatipon sa iya sang tanan nga pungsud, kag nagatingub sa iya sang tanan nga katawohan: 6 Indi bala ini sila tanan magagamit sing isa ka palaanggiran batok sa iya, kag hulubaton sa pagpasipala batok sa iya, kag magasiling, Kailo sa nagapadamu sang indi iya! tubtub pa bala san-o? kag sa nagapalulan sa iya sing madamul nga daga! 7 Indi bala magtindug sa hinali ang mga magakagat sa imo, kag magmata ang mga magagamo sa imo, kag mangin mga inatihan ka nila? 8 Bangud nga gin-ati mo ang madamu nga mga pungsud, ang tanan nga nabilin sang katawohan magaati sa imo; bangud sang dugo sang mga tawo, kag bangud sang palugus nga nahimo sa duta, sa siudad, kag sa tanan nga nagapuyo sa sini. 9 ¶ Kailo sa nagahamkon sang malaut nga paghamkon tungud sa iya balay, agud nga mabutang niya sa mataas ang iya pugad, agud nga maluwas sia sa gahum sang malaut! 10 Nagpakahuya ka sa imo balay paagi sa pagpapas sang madamu nga katawohan, kag nagpakasala batok sa imo kalag. 11 Kay ang bato magasinggit gikan sa dingding, kag ang balayan gikan sa tablon magasabat sini. 12 ¶ Kailo sa nagapatindug nga may dugo sing banwa, kag nagatukud sing siudad paagi sa kalautan! 13 Yari karon, indi bala ini gikan sa GINOO sang mga kasoldadosan nga ang katawohan magapangabudlay sa kalayo gid, kag ang katawohan magalapyo sang ila kaugalingon sa wala gid sing pulus? 14 Kay ang duta mapuno sang pagkilala sang himaya sang GINOO, subong nga ang mga tubig nagatabon sang dagat. 15 ¶ Kailo sa nagapainum sa iya isigkatawo, nga nagahatag sang imo suludlan sa iya, kag nagapahobog man sa iya, agud nga magtolok ka sa ila kahubo! 16 Puno ka sing kahuya nga sa himaya: inum ka man, kag buksan ang imo napunta nga panit: ang tagayan sang too nga kamut sang GINOO magalibud sa imo, kag ang makahuluya nga suka manginsa imo himaya. 17 Kay ang kalugusan sang Libano magatabon sa imo, kag ang kalaglagan sang kasapatan, nga nagpahadluk sa ila, bangud sang dugo sang mga tawo, kag bangud sang palugus sa duta, sa siudad, kag sa tanan nga nagapuyo sa sini. 18 ¶ Ano bala ang kapuslanan sang imahen nga tinigban nga gintigban sang naghimo sini; sang imahen nga tinunaw, kag manunudlo sang mga kabutigan, nga ang nagahuman sang iya buhat nagasalig sa sini, sa paghimo sing mga diosdios nga apa? 19 Kailo sa nagasiling sa kahoy, Magmata; sa bato nga apa, Magtindug, magatudlo ina! Yari karon, ini nahalupan sing bulawan kag pilak, kag wala nga mas-a sing ginhawa sa sulud sini. 20 Apang ang GINOO yara sa iya balaan nga templo: maghipus ang bug-os nga duta sa atubangan niya. KAPITULO 3PANGAMUYO ni Habacuc nga manalagna sa Sigyonot.2 O GINOO, nabatian ko ang imo ginhambal, kag nagkahadluk ako: O GINOO, buhi-a liwat ang imo buhat sa tunga sang mga tuig, sa tunga sang mga tuig ipakilala; sa kasingkal dumduma ang kalooy. 3 Ang Dios nag-abut gikan sa Teman, kag ang Balaan nga Isa gikan sa bukid nga Paran. Selah. Ang iya himaya nagakulap sang mga langit, kag ang duta napuno sang iya pagdayaw. 4 Kag ang iya kasilaw subong sang kapawa; may mga sungay sia nga nagagowa sa iya kamut: kag didto ang palanagoan sang iya gahum. 5 Nagauna sa iya ang pameste, kag ang nagadabadaba nga mga baga nagagowa nayon sa iya mga tiil. 6 Nagtindug sia, kag nagtakus sang duta: nagtolok sia, kag ginpabulag ang mga pungsud; kag ang dayon nga mga bukid ginpaaplaag, ang kabakoloran nga nagapadayon nagsalup: ang iya mga dalanon walay katapusan. 7 Nakita ko ang mga layanglayang sang Cusan sa kapipit-an: kag ang mga kumbung sang duta sang Midian nagkurug. 8 Naakig bala ang GINOO batok sa mga suba? batok bala sa mga suba ang imo kaakig? ang imo kasingkal batok bala sa dagat, nga nagsakay ka sa imo mga kabayo kag sa imo mga kangga sang kaluwasan? 9 Ang imo pana ginhublasan, sono sa mga sumpa sang mga tribo, ang imo gid polong. Selah. Ginpalitik mo ang duta sing mga suba. 10 Nakakita sa imo ang mga bukid, kag nagkurug sila: ang pagpanglambas sang tubig nag-agi: ang kadadalman nagmitlang sang iya tingug, kag nagbayaw sang iya mga kamut sa hitaas. 11 Ang adlaw kag ang bulan nagdolog sa ila puluy-an: sa kapawa sang imo mga baslay naglalakat sila, kag sa kasidlak sang imo bangkaw nga nagaidlap. 12 Ginlatas mo ang duta sa kaalipungut, ginlinas mo ang mga pagano sa kaakig. 13 Naggowa ka tungud sa kaluwasan sang imo katawohan, tungud sa kaluwasan sang imo hinaplas; ginpilasan mo ang olo gikan sa balay sang malauton, nga nagahublas sang sadsaran tubtub sa liog. Selah. 14 Ginlampusan mo sang iya mga lalampus ang olo sang iya mga minoro: nag-abut sila subong sang buhawi sa pagpaaplaag sa akon: ang ila kalipay subong nga sa paghalunhon sang imol sa tago. 15 Ginlatas mo upud sa imo mga kabayo ang dagat, ang tinumpok sang dalagku nga mga tubig. 16 Sang pagkabati ko, ang akon tiyan nagkurug; ang akon mga bibig nagtalakubtakub sa tingug: ang kagabok nagsulud sa akon mga tul-an, kag sa sulud nakon nagkurug ako, agud nga magpahuway ako sa adlaw sang kagamo: sa pag-abut niya sa katawohan, sia magasalakay sa ila upud sa iya mga guban. 17 ¶ Bisan ang kahoy nga higuera indi magpamulak, kag walay bunga sa mga puno sang ubas; ang patubas sang olivo mawad-an, kag ang mga latagon indi magpatubas sing kalan-on; ang panong mapapas sa toril, kag walay kabakahan sa mga palasudlan: 18 Apang ako magakasadya sa GINOO, magakalipay ako sa Dios sang akon kaluwasan. 19 Ang GINOONG Dios amo ang akon kusug, kag himoon niya ang akon mga tiil subong sang mga tiil sang iya sang mga usa nga babaye, kag palakton niya ako sa akon mataas nga mga duug. Sa pangolo nga manug-amba sa akon mga tulunggon nga may cuerdas. |