ANG BALAAN NGA BIBLIA

ANG NAHAUNANG LIBRO NI MOISES,

GINAHINGALANAN GENESIS

KAPITULO 1

SA ginsuguran gintuga sang Dios ang langit kag ang duta.

2 Kag ang duta wala sing kahusayan, kag wala sing sulud; kag ang kadudulman yara sa kadaygan sang kadadalman. Kag ang Espiritu sang Dios naggiho sa kadaygan sang mga tubig.

3 Kag ang Dios nagsiling, Magmay kapawa: kag may kapawa.

4 Kag nakita sang Dios ang kapawa, nga ini maayo: kag ginpain sang Dios ang kapawa sa kadudulman.

5 Kag gintawag sang Dios ang kapawa Adlaw, kag ang kadudulman gintawag niya Gab-i. Kag ang kagab-ihon kag ang kaagahon amo ang nahauna nga adlaw.

6 ś Kag ang Dios nagsiling, Magmay kahawaan sa tunga sang mga tubig, kag magpain ini sang mga tubig sa mga tubig.

7 Kag ang Dios naghimo sang kahawaan, kag nagpain sang mga tubig nga yara sa idalum sang kahawaan sa mga tubig nga yara sa ibabaw sang kahawaan: kag nangin-amo ini.

8 Kag ang Dios nagtawag sang kahawaan Langit. Kag ang kagab-ihon kag ang kaagahon amo ang ikaduha nga adlaw.

9 ś Kag ang Dios nagsiling, Magtingub ang mga tubig nga yara sa idalum sang langit sa isa ka duug, kag magpahayag ang mamala nga duta: kag nangin-amo ini.

10 Kag ang Dios nagtawag sang duta nga mamala Duta; kag ang katilingban sang mga tubig gintawag niya Kadagatan: kag nakita sang Dios nga ini maayo.

11 Kag ang Dios nagsiling, Magpatubo ang duta sing hilamon, ulutanon nga nagahatag sing binhi, kag nagapamunga nga kahoy nga nagahatag sing bunga sono sa iya sari, nga ang iya binhi yara sa sulud sini, sa ibabaw sang duta: kag nangin-amo ini.

12 Kag ang duta nagpatubo sing hilamon, kag ulutanon nga nagahatag sing binhi sono sa iya sari, kag kahoy nga nagahatag sing bunga, nga ang iya binhi yara sa sulud sini, sono sa iya sari: kag nakita sang Dios nga ini maayo.

13 Kag ang kagab-ihon kag ang kaagahon amo ang ikatlo nga adlaw.

14 ś Kag ang Dios nagsiling, Magmay mga kasanag sa kahawaan sang langit sa pagpain sang adlaw sa gab-i; kag sila mangin mga tanda, kag mga panag-on, kag mga adlaw, kag mga tuig:

15 Kag sila mangin mga kasanag sa kahawaan sang langit sa paghatag kasanag sa duta: kag nangin-amo ini.

16 Kag ang Dios naghimo sang duha ka dalagku nga mga kasanag; ang labi kadaku nga kasanag sa paggahum sa adlaw, kag ang labi kadiotay nga kasanag sa paggahum sa gab-i: sia naghimo sang mga bitoon man.

17 Kag ang Dios nagpahamtang sa ila sa kahawaan sang langit sa paghatag kasanag sa duta,

18 Kag sa paggahum sa kaadlawon kag sa kagab-ihon, kag sa pagpain sang kasanag sa kadudulman: kag nakita sang Dios nga ini maayo.

19 Kag ang kagab-ihon kag ang kaagahon amo ang ikap-at nga adlaw.

20 Kag ang Dios nagsiling, Magpadagaya ang mga tubig sing nagagiho nga tinuga nga may kabuhi, kag kapispisan nga makalupad sa ibabaw sang duta sa hanahay nga kahawaan sang langit.

21 Kag ang Dios nagtuga sang dalagku nga mga balyena, kag sang tagsa ka tinuga nga buhi nga nagagiho, nga ginpadagaya sang mga tubig, sono sa ila sari, kag sang tagsa ka pispis nga pakpakan sono sa iya sari: kag nakita sang Dios nga ini maayo.

22 Kag ang Dios nagpakamaayo sa ila, nga nagasiling, Magmabungahon, kag magbuad, kag magtugub sang mga tubig sa kadagatan, kag ang kapispisan magbuad sa duta.

23 Kag ang kagab-ihon kag ang kaagahon amo ang ikalima nga adlaw.

24 ś Kag ang Dios nagsiling, Magpatubo ang duta sing buhi nga tinuga sono sa iya sari, kahayupan, kag nagasaug nga butang, kag kasapatan sang duta sono sa iya sari: kag nangin-amo ini.

25 Kag ang Dios naghimo sang kasapatan sang duta sono sa iya sari, kag kahayupan sono sa ila sari, kag sang tagsa ka butang nga nagasaug sa ibabaw sang duta sono sa iya sari: kag nakita sang Dios nga ini maayo.

26 ś Kag ang Dios nagsiling, Himoon ta ang tawo sa dagway naton, sono sa kaangay naton: kag padumalahon sila sa kaisdaan sang dagat, kag sa kapispisan sang kahanginan, kag sa kahayupan, kag sa bug-os nga duta, kag sa tagsa ka nagasaug nga butang nga nagasaug sa duta.

27 Gani ang Dios nagtuga sang tawo sa iya nga kaugalingon nga dagway, sa dagway sang Dios gintuga niya sia; lalaki kag babaye gintuga niya sila.

28 Kag ang Dios nagpakamaayo sa ila, kag ang Dios nagsiling sa ila, Magmabungahon, kag magbuad, kag magtugub liwat sa duta, kag sakupon ini: kag magdumala sa kaisdaan sang dagat, kag sa kapispisan sang kahanginan, kag sa tagsa ka buhi nga butang nga nagagiho sa duta.

29 ś Kag ang Dios nagsiling, Yari karon, nahatag ko sa inyo ang tagsa ka ulutanon nga nagapaminhi, nga yara sa kadaygan sang bug-os nga duta, kag ang tagsa ka kahoy, nga sa sini ang bunga sang kahoy nga nagahatag sang binhi; ini manginkalan-on ninyo.

30 Kag sa tagsa ka sapat sang duta, kag sa tagsa ka pispis sang kahanginan, kag sa tagsa ka butang nga nagasaug sa duta, nga sa iya may kabuhi, nahatag ko ang tagsa ka ulutanon nga malagtum nga kalan-on: kag nangin-amo ini.

31 Kag nakita sang Dios ang tagsa ka butang nga nahimo niya, kag, yari karon, ini tama gid kaayo. Kag ang kagab-ihon kag ang kaagahon amo ang ikan-um nga adlaw.

KAPITULO 2

SA sini nga paagi nahuman ang mga langit kag ang duta, kag ang bug-os nila nga panong.

2 Kag sa adlaw nga ikapito ang Dios nagtapus sang iya buluhaton nga iya nahimo; kag nagpahuway sia sa adlaw nga ikapito gikan sa tanan nga buluhaton niya nga iya nahimo.

3 Kag ang Dios nagpakamaayo sang adlaw nga ikapito, kag nagpakabalaan sini: bangud nga sa sini sia nagpahuway gikan sa tanan niyang buluhaton nga gintuga kag ginhimo sang Dios.

4 ś Ini amo ang mga napatubas sang mga langit kag sang duta sang gintuga sila, sa adlaw nga ang GINOONG Dios naghimo sang duta kag mga langit,

5 Kag sang tagsa ka tanum sa latagon sang wala pa ini sa duta, kag sang tagsa ka ulutanon sa latagon sang wala pa ini magtubo: kay ang GINOONG Dios wala pa magpaulan sa duta, kag wala sing tawo sa pagpanguma sang duta.

6 Apang may nag-usbong nga alopo-op gikan sa duta, kag nagbunyag sang bug-os nga kadaygan sang duta.

7 Kag ang GINOONG Dios nagdihon sang tawo gikan sa yab-ok sang duta, kag naghuyup sa iya ilong sang ginhawa sang kabuhi; kag ang tawo nangin isa ka buhi nga kalag.

8 ś Kag ang GINOONG Dios nagtanum sing katamnan nayon sa sidlangan sa Eden; kag didto ginbutang niya ang tawo nga iya gindihon.

9 Kag gikan sa duta ginpatubo sang GINOONG Dios ang tagsa ka kahoy nga maanyag sa itololok, kag maayo nga kalan-on; ang kahoy sang kabuhi man sa tunga sang katamnan, kag ang kahoy sang ihibalo sang maayo kag malaut.

10 Kag ang isa ka suba nag-ilig sa Eden sa pagbunyag sang katamnan; kag gikan didto nagbahinbahin ini, kag nangin-apat ka mga sanga.

11 Ang ngalan sang nahauna Pison: nga amo ang nagalibut sang bug-os nga duta sang Havila, nga didto may bulawan;

12 Kag ang bulawan sa sadtong duta maayo: may bedelio kag bato nga onice.

13 Kag ang ngalan sang ikaduha nga suba Gihon: ini among nagalibut sa bug-os nga duta sang Etiopia.

14 Kag ang ngalan sang ikatlo nga suba Hidekel: nga amo ang nagapakadto nayon sa sidlangan sang Asiria. Kag ang ikap-at nga suba Eufrates.

15 Kag ginkuha sang GINOONG Dios ang tawo, kag ginbutang sia sa katamnan sang Eden sa pagtatap sini kag sa pagbantay sini.

16 Kag ang GINOONG Dios nagsogo sa tawo, nga nagasiling, Sa tagsa ka kahoy sang katamnan makakaon ka sing hilway:

17 Apang gikan sa kahoy sang ihibalo sang maayo kag malaut, dili ka magkaon sa iya: kay sa adlaw nga magkaon ka sa iya mapatay ka nga totoo.

18 ś Kag ang GINOONG Dios nagsiling, Indi maayo nga ang tawo mag-isa lamang; himoan ko sia sing kabulig nga bagay sa iya.

19 Kag gikan sa duta nagdihon ang GINOONG Dios sang tagsa ka sapat sang latagon, kag tagsa ka pispis sang kahanginan; kag gindala sila kay Adam sa pagtan-aw kon ano ang itawag niya sa ila: kag bisan ano nga pagtawag ni Adam sang tagsa ka tinuga nga buhi, ina amo ang ngalan sina.

20 Kag si Adam naghatag sing mga ngalan sa tanan nga kahayupan, kag sa kapispisan sang kahanginan, kag sa tagsa ka sapat sang latagon; apang sa kay Adam wala sing nakita nga kabulig bagay sa iya.

21 Kag ang GINOONG Dios naghatag sing mahamook nga katologon sa kay Adam, kag sia natologan: kag nagkuha sia sang isa sang iya mga gusuk, kag gintakpan niya ang unud sa duug sini;

22 Kag ang gusuk, nga ginkuha sang GINOONG Dios gikan sa lalaki, ginhimo niya nga babaye, kag gindala sia sa lalaki.

23 Kag si Adam nagsiling, Ini karon tul-an sang akon mga tul-an, kag unud sang akon unud: sia pagatawgon Babaye, kay ginkuha sia gikan sa Lalaki.

24 Busa baya-an sang lalaki ang iya amay kag ang iya iloy, kag magahiusa sa iya asawa: kag mangin-isa sila ka unud.

25 Kag sila nga duha hubo, ang lalaki kag ang iya asawa, kag wala sila nahuya.

KAPITULO 3

KARON ang man-ug malalang labi sa bisan ano nga sapat sang latagon nga nahimo sang GINOONG Dios. Kag sia nagsiling sa babaye, Hoo, nagsiling bala ang Dios, Dili kamo magkaon sang tagsa ka kahoy sang katamnan?

2 Kag ang babaye nagsiling sa man-ug, Makakaon kami sang bunga sang kakahoyan sang katamnan:

3 Apang sa bunga sang kahoy nga yara sa tunga sang katamnan, ang Dios nagsiling, Dili kamo magkaon sa iya, ukon magtandug sa iya, basi nga mapatay kamo.

4 Kag ang man-ug nagsiling sa babaye, Indi kamo mapatay nga totoo:

5 Kay ang Dios nakahibalo nga sa adlaw nga magkaon kamo sa iya, niyan magamuklat ang inyo mga mata, kag kamo manginkaangay sang mga dios, nga nakahibalo sang maayo kag malaut.

6 Kag sang nakita sang babaye nga ang kahoy maayo nga kalan-on, kag nga ini makagalanyat sa mga mata, kag isa ka kahoy nga halandumon sa pagpaalam, nagkuha sia sang bunga sini, kag nagkaon, kag ginhatagan man ang iya bana kaupud niya; kag sia nagkaon.

7 Kag nagmuklat ang mga mata nila nga duha, kag sila nakahibalo nga sila hubo; kag nagtahi sila sing tambi-tambi sang mga dahon sang higuera, kag naghimo sang ila mga tampion.

8 Kag nabatian nila ang tingug sang GINOONG Dios nga nagadayandayan sa katamnan sa kabugnaw sang kaadlawon: kag si Adam kag ang iya asawa nanago sila gikan sa atubangan sang GINOONG Dios sa tunga sang kakahoyan sang katamnan.

9 Kag ang GINOONG Dios nagtawag kay Adam, kag nagsiling sa iya, Diin ka?

10 Kag nagsiling sia, Nabatian ko ang imo tingug sa katamnan, kag ginhadlukan ako, bangud nga hubo ako; kag nanago ako.

11 Kag nagsiling sia, Sin-o bala ang nagsugid sa imo nga hubo ikaw? Nakakaon ka bala gikan sa kahoy, nga ginsogo ko sa imo nga dili mo pagkaonon?

12 Kag ang lalaki nagsiling, Ang babaye nga ginhatag mo nga manginkaupud ko, ginhatagan niya ako gikan sa kahoy, kag nagkaon ako.

13 Kag ang GINOONG Dios nagsiling sa babaye, Ano bala ining nahimo mo? Kag ang babaye nagsiling, Ang man-ug nagdaya sa akon, kag nagkaon ako.

14 Kag ang GINOONG Dios nagsiling sa man-ug, Bangud nga naghimo ikaw sini, ginapakamalaut ka labi sa tanan nga kahayupan, kag labi sa tagsa ka sapat sang latagon; magasaug ka sa imo tiyan, kag magakaon ka sang yab-ok sa tanan nga mga adlaw sang imo kabuhi:

15 Kag butangan ko sing kaawayon sa tunga mo kag sang babaye, kag sa tunga sang imo kaliwat kag sang iya kaliwat; ini magadugmok sang imo olo, kag magadugmok ka sang iya tikod.

16 Sa babaye nagsiling sia, Padamuon ko sing tama ang imo kasakit kag ang imo pagdala; sa kasakit magapanganak ka sing mga kabataan; kag ang imo handum manginsa imo bana, kag sia magagahum sa imo.

17 Kag sa kay Adam nagsiling sia, Bangud nga nagpamati ka sa tingug sang imo asawa, kag nagkaon gikan sa kahoy, nga ginsogo ko sa imo, nga nagasiling, Dili ka magkaon sini: ginapakamalaut ang duta bangud sa imo; sa kasakit magakaon ka sa iya sa tanan nga mga adlaw sang imo kabuhi;

18 Magapatubo ini sa imo sing mga tunuk man kag mga sapinit; kag magakaon ka sang ulutanon sang latagon;

19 Sa balhas sang imo nawung magakaon ka sing kalan-on, tubtub nga magbalik ka sa duta; kay ginkuha ka gikan sa iya: kay yab-ok ka, kag sa yab-ok magabalik ka.

20 Kag si Adam nagtawag sang ngalan sang iya asawa Eva; bangud nga sia ang iloy sang tanan nga nagakabuhi.

21 Sa kay Adam man kag sa iya asawa ang GINOONG Dios naghimo sang mga bayo nga mga panit, kag ginpanaptan sila.

22 ś Kag ang GINOONG Dios nagsiling, Yari karon, ang tawo nanginsubong sang isa sa aton, sa paghibalo sang maayo kag malaut: kag karon, agud nga indi niya pag-idab-ut ang iya kamut, kag magkuha man sang kahoy sang kabuhi, kag magkaon, kag magkabuhi sing dayon:

23 Busa ang GINOONG Dios nagtabog sa iya gikan sa katamnan sang Eden, sa pagpanguma sang duta nga ginkuhaan sa iya.

24 Gani gintabog niya ang tawo; kag nagbutang sia sa sidlangan sang katamnan sang Eden sang mga Querubin, kag nagaidlab nga espada nga nagabalabad sa tagsa ka dalanon, sa pagbantay sang dalan sang kahoy sang kabuhi.

KAPITULO 4

KAG ginkilala ni Adam si Eva nga iya asawa; kag nanamkon sia, kag nag-anak kay Cain, kag nagsiling, Nakabaton ako sing lalaki gikan sa GINOO.

2 Kag liwat nag-anak sia kay Abel nga iya utud nga lalaki. Kag si Abel manugbantay sang mga carnero, apang si Cain mangunguma sang duta.

3 Kag sa pag-alagisud sang panag-on nahanabu, nga si Cain nagdala gikan sa bunga sang duta sing halad sa GINOO.

4 Kag si Abel, sia man nagdala gikan sa mga panganay sang iya panong kag sang sapay sini. Kag may pagtamud ang GINOO sa kay Abel kag sa iya halad:

5 Apang sa kay Cain kag sa iya halad wala sia pagtamud. Kag si Cain nangakig sing tama, kag naholog ang iya nawung.

6 Kag ang GINOO nagsiling kay Cain, Ngaa bala nga nangakig ka? kag ngaa bala nga naholog ang imo nawung?

7 Kon nagahimo ka sing maayo, indi ka bala pagbatonon? kag kon wala ka nagahimo sing maayo, ang sala nagapuut sa gawang. Kag manginsa imo ang iya handum, kag ikaw magagahum sa iya.

8 Kag si Cain nagpakighambal kay Abel nga iya utud: kag nahanabu, sang yara sila sa latagon, nga ginsumpung ni Cain si Abel nga iya utud, kag ginpatay sia.

9 ś Kag ang GINOO nagsiling kay Cain, Diin bala si Abel nga imo utud? Kag nagsiling sia, Wala ako kahibalo: Manugbantay bala ako sang akon utud?

10 Kag nagsiling sia, Ano bala ang nahimo mo? ang tingug sang dugo sang imo utud nagatuaw sa akon gikan sa duta.

11 Kag karon ginapakamalaut ka sa duta, nga nagbuka sang iya baba sa pagbaton sang dugo sang imo utud gikan sa imo kamut;

12 Kon pangumahon mo ang duta, indi ini kutub karon magpatubas sa imo sang iya kusug; mangin isa ka ka laaslaas kag isa ka landolando sa duta.

13 Kag si Cain nagsiling sa GINOO, Ang silot ko daku pa sang sa akon mabatas.

14 Yari karon, gintabog mo ako sining adlaw gikan sa kadaygan sang duta; kag ako malipdan sa imo nawung; kag ako mangin isa ka laaslaas kag isa ka landolando sa duta; kag mahanabu, nga ang tagsatagsa nga makakita sa akon magapatay sa akon.

15 Kag ang GINOO nagsiling sa iya, Busa ang bisan sin-o nga magpatay kay Cain, magaagum sia sang pagtimalus sing makapito. Kag ang GINOO nagbutang sing marka kay Cain, agud nga ang bisan sin-o nga makakita sa iya indi magpatay sa iya.

16 ś Kag si Cain naghalin sa atubangan sang GINOO, kag nagpuyo sa duta sang Nod, sa sidlangan sang Eden.

17 Kag ginkilala ni Cain ang iya asawa; kag nanamkon sia, kag nag-anak kay Enoc: kag sia nagpatindug sang siudad, kag nagtawag sang ngalan sang siudad, sono sa ngalan sang iya anak nga lalaki, Enoc.

18 Kag sa kay Enoc natawo si Irad: kag si Irad nagpanganak kay Mehujael: kag si Mehujael nagpanganak kay Metusael: kag si Metusael nagpanganak kay Lamec.

19 ś Kag si Lamec nangasawa sing duha: ang ngalan sang isa amo si Ada, kag ang ngalan sang isa amo si Zila.

20 Kag si Ada nag-anak kay Jabal: amay sia sang mga nagapuyo sa mga layanglayang, kag sang mga may kahayupan.

21 Kag ang ngalan sang iya utud nga lalaki amo si Jubal: amay sia sang tanan nga nagagamit sang arpa kag organ.

22 Kag si Zila, sia man nag-anak kay Tubal-cain, isa ka manunudlo sang tagsa ka manugsalsal sa saway kag salsalon: kag ang utud nga babaye ni Tubal-cain amo si Naama.

23 Kag si Lamec nagsiling sa iya mga asawa, si Ada kag si Zila, Pamatii ang akon tingug; kamo nga mga asawa ni Lamec, dungga ang akon hambal: kay nakapatay ako sang tawo nga nagpilas sa akon, kag isa ka pamatan-on nga lalaki nga nagsakit sa akon.

24 Kon si Cain timalusan sing makapito, sa pagkamatuud si Lamec makakapitoan kag pito.

25 ś Kag ginkilala ni Adam ang iya asawa liwat; kag sia nag-anak sang anak nga lalaki, kag gintawag ang iya ngalan Set: Kay ang Dios, siling ni Eva, nagtangdo sa akon sang isa ka kaliwat sa tal-us ni Abel, nga ginpatay ni Cain.

26 Kag sa kay Set, sa iya man may natawo nga anak nga lalaki; kag gintawag niya ang iya ngalan Enos: niyan ang mga tawo nagsugud sa pagtawag sa ngalan sang GINOO.

KAPITULO 5

INI amo ang libro sang mga kaliwatan ni Adam. Sa adlaw nga gintuga sang Dios ang tawo, ginhimo niya sia sa kaangay sang Dios;

2 Lalaki kag babaye gintuga niya sila; kag ginpakamaayo sila, kag gintawag ang ila ngalan Adam, sa adlaw nga gintuga sila.

3 ś Kag si Adam nagkabuhi sing isa ka gatus kag katloan ka tuig, kag nagpanganak sang anak nga lalaki sa iya kaugalingon nga kaangay, sono sa iya dagway; kag gintawag ang iya ngalan Set:

4 Kag ang mga adlaw ni Adam sa tapus nga ginpanganak niya si Set walo ka gatus ka tuig: kag sia nagpanganak sang mga anak nga lalaki kag mga anak nga babaye:

5 Kag ang tanan nga adlaw nga ginkabuhi ni Adam siam ka gatus kag katloan ka tuig: kag napatay sia.

6 Kag si Set nagkabuhi sing isa ka gatus kag lima ka tuig, kag nagpanganak kay Enos:

7 Kag si Set nagkabuhi sa tapus nga ginpanganak niya si Enos sing walo ka gatus kag pito ka tuig, kag nagpanganak sang mga anak nga lalaki kag mga anak nga babaye:

8 Kag ang tanan nga adlaw ni Set siam ka gatus kag napulo kag duha ka tuig: kag napatay sia.

9 ś Kag si Enos nagkabuhi sing kasiaman ka tuig, kag nagpanganak kay Cainan:

10 Kag si Enos nagkabuhi sa tapus nga ginpanganak niya si Cainan sing walo ka gatus kag napulo kag lima ka tuig, kag nagpanganak sang mga anak nga lalaki kag mga anak nga babaye:

11 Kag ang tanan nga adlaw ni Enos siam ka gatus kag lima ka tuig: kag napatay sia.

12 ś Kag si Cainan nagkabuhi sing kapitoan ka tuig, kag nagpanganak kay Mahalalel:

13 Kag si Cainan nagkabuhi sa tapus nga ginpanganak niya si Mahalalel sing walo ka gatus kag kap-atan ka tuig, kag nagpanganak sang mga anak nga lalaki kag mga anak nga babaye:

14 Kag ang tanan nga adlaw ni Cainan siam ka gatus kag napulo ka tuig: kag napatay sia.

15 ś Kag si Mahalalel nagkabuhi sing kan-uman kag lima ka tuig, kag nagpanganak kay Jared:

16 Kag si Mahalalel nagkabuhi sa tapus nga ginpanganak niya si Jared sing walo ka gatus kag katloan ka tuig, kag nagpanganak sang mga anak nga lalaki kag mga anak nga babaye:

17 Kag ang tanan nga adlaw ni Mahalalel walo ka gatus kag kasiaman kag lima ka tuig: kag napatay sia.

18 ś Kag si Jared nagkabuhi sing isa ka gatus kag kan-uman kag duha ka tuig, kag sia nagpanganak kay Enoc:

19 Kag si Jared nagkabuhi sa tapus nga ginpanganak niya si Enoc sing walo ka gatus ka tuig, kag nagpanganak sang mga anak nga lalaki kag mga anak nga babaye:

20 Kag ang tanan nga adlaw ni Jared siam ka gatus kag kan-uman kag duha ka tuig: kag napatay sia.

21 ś Kag si Enoc nagkabuhi sing kan-uman kag lima ka tuig, kag nagpanganak kay Metusela:

22 Kag si Enoc naglakat upud sa Dios sa tapus nga ginpanganak niya si Metusela tatlo ka gatus ka tuig, kag nagpanganak sang mga anak nga lalaki kag mga anak nga babaye:

23 Kag ang tanan nga adlaw ni Enoc tatlo ka gatus kag kan-uman kag lima ka tuig:

24 Kag si Enoc naglakat upud sa Dios: kag sia wala na; kay ang Dios nagkuha sa iya.

25 Kag si Metusela nagkabuhi sing isa ka gatus kag kawaloan kag pito ka tuig, kag nagpanganak kay Lamec:

26 Kag si Metusela nagkabuhi sa tapus nga ginpanganak niya si Lamec sing pito ka gatus kag kawaloan kag duha ka tuig, kag nagpanganak sang mga anak nga lalaki kag mga anak nga babaye:

27 Kag ang tanan nga adlaw ni Metusela siam ka gatus kag kan-uman kag siam ka tuig: kag napatay sia.

28 ś Kag si Lamec nagkabuhi sing isa ka gatus kag kawaloan kag duha ka tuig, kag nagpanganak sang anak nga lalaki:

29 Kag iya gintawag ang iya ngalan Noe, nga nagasiling, Ini sia magalipay sa aton nahanungud sa aton buluhaton kag pangabudlay sang aton mga kamut, bangud sang duta nga ginpakamalaut sang GINOO.

30 Kag si Lamec nagkabuhi sa tapus nga ginpanganak niya si Noe sing lima ka gatus kag kasiaman kag lima ka tuig, kag nagpanganak sang mga anak nga lalaki kag mga anak nga babaye:

31 Kag ang tanan nga adlaw ni Lamec pito ka gatus kag kapitoan kag pito ka tuig: kag napatay sia.

32 Kag si Noe lima ka gatus ka tuig ang pang-edaron: kag si Noe nagpanganak kay Sem, kay Ham, kag kay Jafet.

KAPITULO 6

KAG nahanabu, sang nagsugud pagbuad ang mga tawo sa kadaygan sang duta, kag natawo sa ila ang mga anak nga babaye,

2 Nga ang mga anak nga lalaki sang Dios nakakita sang mga anak nga babaye sang mga tawo nga matahum sila; kag nagpangasawa sila sang tanan nga ila napilian.

3 Kag ang GINOO nagsiling, Ang akon espiritu indi magsumpung sing dayon sa tawo, kay sia man unud: apang ang iya mga adlaw mangin-isa ka gatus kag duha ka pulo ka tuig.

4 Sadtong mga adlaw may mga higante sa duta; kag sa tapus man sadto, sang naghiusa ang mga anak nga lalaki sang Dios sa mga anak nga babaye sang mga tawo, kag nagpanganak sila sa ila, ini sila nangin gamhanan nga mga lalaki nga kutub sa dumaan, mga lalaki nga bantug.

5 ś Kag nakita sang DIOS nga ang pagkamalaut sang tawo daku sa duta, kag nga ang tagsa ka painoino sang mga hunahuna sang iya tagiposoon malaut lamang sing dalayon.

6 Kag nagpahinulsul ini sa GINOO nga nahimo niya ang tawo sa duta, kag nagpasubu ini sa iya tagiposoon.

7 Kag ang GINOO nagsiling, Laglagon ko gikan sa kadaygan sang duta ang tawo nga akon gintuga; ang tawo, kag sapat, kag ang butang nga nagasaug, kag ang kapispisan sang kahanginan; kay nagapahinulsul ini sa akon nga nahimo ko sila.

8 Apang si Noe nakaagum sang bugay sa mga mata sang GINOO.

9 ś Ini sila amo ang mga kaliwatan ni Noe: Si Noe tawo nga matarung kag himpit sa iya mga kaliwatan, kag si Noe naglakat upud sa Dios.

10 Kag si Noe nagpanganak sang tatlo ka anak nga lalaki, si Sem, si Ham, kag si Jafet.

11 Ang duta man dunut sa atubangan sang Dios, kag ang duta napun-an sing kalugusan.

12 Kag ang Dios nagtan-aw sang duta, kag, yari karon, dunut ini; kay ang tanan nga unud nagdunut sang iya dalanon sa duta.

13 Kag ang Dios nagsiling kay Noe, Ang katapusan sang tanan nga unud nag-abut na sa atubangan nakon; kay ang duta napun-an sing kalugusan paagi sa ila; kag, yari karon, laglagon ko sila upud sang duta.

14 ś Himo ka sing arka sang kahoy nga gopher; himo ka sing mga hulut sa sulud sang arka, kag balawon ini sa sulud kag sa gowa sang balaw.

15 Kag amo ini ang paghimo mo sini: Ang kalabaon sang arka tatlo ka gatus ka maniko, ang iya kasangkaron kalim-an ka maniko, kag ang iya kataason katloan ka maniko.

16 Himoan mo sing bintana ang arka, kag tapuson mo ini sing isa ka maniko paibabaw; kag ibutang mo ang ganhaan sang arka sa kilid sini; himoan mo ini sing mga panalgan nga naidalum, ikaduha, kag ikatlo.

17 Kag, yari karon, ako, bisan ako, nagapadala sang anaw sang mga tubig sa ibabaw sang duta, sa paglaglag sang tanan nga unud, nga may ginhawa sang kabuhi, sa idalum sang langit; kag ang tagsa ka butang nga yara sa duta mapatay.

18 Apang sa imo ako magatukud sang akon katipan; kag magsulud ka sa arka, ikaw, kag ang imo mga anak nga lalaki, kag ang imo asawa, kag ang mga asawa sang imo mga anak nga lalaki upud sa imo.

19 Kag gikan sa tagsa ka nagakabuhi nga butang sang tanan nga unud, duha sang tagsa ka sari isulud mo sa arka, sa pagbuhi sa ila upud sa imo; lalaki kag babaye sila.

20 Sa kapispisan sono sa ila sari, kag sa kahayupan sono sa ila sari, sa tagsa ka butang nga nagasaug sa duta sono sa iya sari, duha sang tagsa ka sari magakari sa imo, sa pagbuhi sa ila.

21 Kag magdala ka sa imo sang tanan nga kalan-on nga ginakaon, kag tiponon mo ini sa imo; kag ini mangin-kalan-on sa imo, kag sa ila.

22 Ginhimo ini ni Noe; sono sa tanan nga ginsogo sang Dios sa iya, amo ang ginhimo niya.

KAPITULO 7

KAG ang GINOO nagsiling kay Noe, Kari ka kag ang bug-os mo nga panimalay sa sulud sang arka; kay sa atubangan ko nakita ko ikaw nga matarung sa sining kaliwatan.

2 Sa tagsa ka matinlo nga sapat magkuha ka sang tagpitopito, lalaki kag iya babaye: kag sa mga sapat nga indi matinlo tagduha, lalaki kag iya babaye.

3 Sa kapispisan man sang kahanginan tagpitopito, lalaki kag babaye; sa pagbuhi sang kaliwat sa kadaygan sang bug-os nga duta.

4 Kay pito pa ka adlaw, kag paulanon ko sa duta sing kap-atan ka adlaw kag kap-atan ka gab-i; kag ang tagsa ka buhi nga butang nga akon ginhimo pagalaglagon ko gikan sa kadaygan sang duta.

5 Kag ginhimo ni Noe sono sa tanan nga ginsogo sang GINOO sa iya.

6 Kag si Noe anum ka gatus ka tuig sang pag-anaw sang mga tubig sa ibabaw sang duta.

7 ś Kag si Noe nagsulud, kag ang iya mga anak nga lalaki, kag ang iya asawa, kag ang mga asawa sang iya mga anak upud sa iya, sa sulud sang arka, bangud sang mga tubig sang anaw.

8 Sa kasapatan nga matinlo, kag sa kasapatan nga indi matinlo, kag sa kapispisan, kag sa tagsa ka butang nga nagasaug sa duta,

9 May nagsulud sing tagduhaduha sa arka kay Noe, lalaki kag babaye, sono sa ginsogo sang Dios kay Noe.

10 Kag nahanabu sa tapus ang pito ka adlaw, nga ang mga tubig sang anaw yara sa ibabaw sang duta.

11 ś Sa ikan-um ka gatus nga tuig sang kabuhi ni Noe, sa ikaduhang bulan, sa ikapulog pito nga adlaw sang bulan, sa amo gid nga adlaw nabulwang ang tanan nga mga tuburan sang daku nga kadadalman, kag ang mga talamwaan sang langit nabuksan.

12 Kag may ulan sa ibabaw sang duta kap-atan ka adlaw kag kap-atan ka gab-i.

13 Sa amo gid nga adlaw nagsulud si Noe, kag si Sem, kag si Ham, kag si Jafet, mga anak nga lalaki ni Noe, kag ang asawa ni Noe, kag ang tatlo ka asawa sang iya mga anak upud sa ila, sa sulud sang arka;

14 Sila, kag ang tagsa ka sapat sono sa iya sari, kag ang tanan nga kahayupan sono sa ila sari, kag ang tagsa ka butang nga nagasaug sa duta sono sa iya sari, kag ang tagsa ka pispis sono sa iya sari, tagsa ka pispis sang tagsa ka sari.

15 Kag nagsulud sila kay Noe sa sulud sang arka, tagduhaduha sang tanan nga unud, nga may ginhawa sang kabuhi.

16 Kag sila nga nagsulud, nagsulud ang lalaki kag babaye sang tanan nga unud, sono sa ginsogo sang Dios sa iya: kag gintakpan sia sang GINOO sa sulud.

17 Kag ang anaw kap-atan ka adlaw sa ibabaw sang duta; kag nagdugang ang mga tubig, kag nagpalutaw sang arka, kag nabayaw ini sa ibabaw sang duta.

18 Kag naglambas ang mga tubig, kag nagdugang sing tama sa duta; kag naglutaw ang arka sa kadaygan sang mga tubig.

19 Kag naglambas ang mga tubig sing lakas gid sa duta; kag ang tanan nga mga bakolod nga mataas, nga yara sa idalum sang bug-os nga langit, nalapawan.

20 Napulo kag lima ka maniko paibabaw ang paglambas sang mga tubig; kag ang mga bukid nalapawan.

21 Kag napatay ang tanan nga unud nga nagagiho sa duta, ang kapispisan, kag ang kahayupan, kag ang kasapatan, kag ang tagsa ka nagasaug nga butang nga nagasaug sa duta, kag ang tagsa ka tawo:

22 Ang tanan nga may ginhawa sang kabuhi sa ila ilong, sa tanan nga yara sa mamala nga duta, napatay.

23 Kag ginlaglag ang tagsa ka buhi nga butang nga yara sa kadaygan sang duta, ang tawo, kag ang kahayupan, kag ang mga butang nga nagasaug, kag ang kapispisan sang langit; kag ginlaglag sila sa duta: kag si Noe lamang ang nabilin nga buhi, kag sila nga kaupud niya sa arka.

24 Kag naglambas ang mga tubig sa ibabaw sang duta sing isa ka gatus kag kalim-an ka adlaw.

KAPITULO 8

KAG gindumdum sang Dios si Noe, kag ang tagsa ka buhi nga butang, kag ang tanan nga kahayupan nga upud sa iya sa arka: kag ginpahuyup sang Dios ang isa ka hangin sa ibabaw sang duta, kag naghubas ang mga tubig;

2 Napauntat ang mga tuburan man sang kadadalman kag ang mga talamwaan sang langit, kag ginpahulaw ang ulan gikan sa langit;

3 Kag ang mga tubig nag-iban sing dalayon gikan sa duta: kag sa tapus ang isa ka gatus kag kalim-an ka adlaw ang mga tubig naghubas.

4 Kag sa ikapito nga bulan, sa ikapulog pito nga adlaw sang bulan, ang arka nagtungtung sa kabukiran sang Ararat.

5 Kag ang mga tubig naghubas sing dalayon tubtub sa ikapulo nga bulan: sa ikapulo nga bulan, sa nahauna nga adlaw sang bulan, nakita ang mga putokputokan sang mga bukid.

6 ś Kag nahanabu sa katapusan sang kap-atan ka adlaw, nga ginbuksan ni Noe ang talamwaan sang arka nga nahimo niya:

7 Kag sia nagpadala sang isa ka uwak, nga nagpakadto-pakari, tubtub ang mga tubig naghubas sa duta.

8 Nagpadala man sia sang isa ka pating gikan sa iya, sa pagtan-aw kon ang mga tubig nahubas na sa kadaygan sang duta;

9 Apang ang pating wala sing nakita nga mahaponan sang dapadapa sang iya tiil, kag nagbalik sia sa iya sa arka, kay ang mga tubig yara pa sa kadaygan sang bug-os nga duta: niyan gin-untay niya ang iya kamut, kag gindakup sia, kag ginsulud niya sia sa arka.

10 Kag nagpabilin pa sia sing pito ka adlaw; kag liwat ginpadala niya ang pating gikan sa arka;

11 Kag ang pating nagbalik sa iya sa kagab-ihon; kag, yari karon, sa iya baba may isa ka nakotol nga dahon sang olivo: gani nahibaloan ni Noe nga ang mga tubig nahubas na sa duta.

12 Kag nagpabilin pa sia sing pito ka adlaw; kag ginpadala ang pating; nga wala na magbalik sa iya.

13 ś Kag nahanabu sa ikan-um ka gatus kag isa nga tuig, sa nahaunang bulan, sa nahaunang adlaw sang bulan, ang mga tubig nahubas sa duta: kag ginkuha ni Noe ang takup sang arka, kag naglantaw, kag, yari karon, ang kadaygan sang duta mamala na.

14 Kag sa ikaduhang bulan, sa ikaduha ka pulo kag pito nga adlaw sang bulan, nagmala ang duta.

15 ś Kag ang Dios naghambal kay Noe, nga nagasiling,

16 Gowa sa arka, ikaw, kag ang imo asawa, kag ang imo mga anak nga lalaki, kag ang asawa sang imo mga anak kaupud nimo.

17 Pagowaa kaupud nimo ang tagsa ka buhi nga butang nga kaupud nimo, ang tanan nga unud, ang kapispisan, kag ang kahayupan, kag ang tagsa ka nagasaug nga butang nga nagasaug sa duta; agud nga magbuad sila sing bugana sa duta, kag magmabungahon, kag magdamu sa duta.

18 Kag naggowa si Noe, kag ang iya mga anak nga lalaki, kag ang iya asawa, kag ang mga asawa sang iya mga anak kaupud niya:

19 Ang tagsa ka sapat, ang tagsa ka nagasaug nga butang, kag ang tagsa ka pispis, kag ang bisan ano nga nagasaug sa duta, sono sa ila sari, naggowa sa arka.

20 ś Kag si Noe nagtukud sing halaran sa GINOO; kag nagkuha sa tagsa ka sapat nga matinlo, kag sa tagsa ka pispis nga matinlo, kag nagdolot sing mga halad nga sinonog sa halaran.

21 Kag ang GINOO nakapanimaho sang kaamyon; kag ang GINOO nagsiling sa iya tagiposoon, Indi ko na pagpakamalauton liwat ang duta bangud sa tawo; kay ang painoino sang tagiposoon sang tawo malaut kutub sa iya pagkapamatan-on; kag indi ko na paglaglagon liwat ang tagsa ka butang nga nagakabuhi, subong sang nahimo ko.

22 Sa nagapadayon ang duta, ang tigtalanum kag ang tig-alani, kag ang tugnaw kag ang init, kag ang tingadlaw kag ang tigtulugnaw, kag ang kaadlawon kag ang kagab-ihon indi mag-untat.

KAPITULO 9

KAG ginpakamaayo sang Dios si Noe kag ang iya mga anak nga lalaki, kag nagsiling sa ila, Magmabungahon, kag magbuad, kag magtugub liwat sa duta.

2 Kag ang kahadluk sa inyo kag ang kakugmat sa inyo manginsa tagsa ka sapat sang duta, kag sa tagsa ka pispis sang kahanginan, sa tanan nga nagagiho sa duta, kag sa tanan nga kaisdaan sang dagat; ginatugyan sila sa inyo kamut.

3 Ang tagsa ka butang nga nagagiho nga nagakabuhi manginkalan-on ninyo; subong sang malagtum nga ulutanon ginhatag ko ang tanan nga mga butang sa inyo.

4 Apang ang unud nga may kabuhi, nga amo ang iya dugo, dili ninyo pagkaonon.

5 Kag sa pagkamatuud kinahanglanon ko ang inyo dugo sang inyo kabuhi; sa kamut sang tagsa ka sapat kinahanglanon ko ini, kag sa kamut sang tawo; sa kamut sang tagsa ka utud sang tawo kinahanglanon ko ang kabuhi sang tawo.

6 Ang bisan sin-o nga magpaagay sang dugo sang tawo, paagi sa tawo ang iya dugo paagayon: kay sa dagway sang Dios ginhimo niya ang tawo.

7 Kag kamo, magmabungahon kamo, kag magbuad; magbuad sing bugana sa duta, kag magdamu sa sini.

8 ś Kag ang Dios nagpamolong kay Noe, kag sa iya mga anak nga lalaki upud sa iya, nga nagasiling,

9 Kag ako, yari karon, nagatukud ako sang akon katipan sa inyo, kag sa inyo kaliwat sa olihi ninyo;

10 Kag sa tagsa ka tinuga nga buhi nga upud sa inyo, sa kapispisan, sa kahayupan, kag sa tagsa ka sapat sang duta upud ninyo; sa tanan nga nagagowa sa arka, sa tagsa ka sapat sang duta.

11 Kag ako magatukud sang akon katipan sa inyo; kag indi na pagpapason ang tanan nga unud sang mga tubig sang anaw; kag wala na sing anaw nga maglaglag sang duta.

12 Kag ang Dios nagsiling, Amo ini ang tanda sang katipan nga ginahimo ko sa tunga nakon kag ninyo kag sang tagsa ka tinuga nga buhi nga upud sa inyo, sa dalayon nga mga kaliwatan:

13 Ginabutang ko sa gal-um ang akon balangaw, kag mangintanda ini sang katipan sa tunga nakon kag sang duta.

14 Kag mahanabu, kon magdala ako sing gal-um sa ibabaw sang duta, nga ang balangaw makita sa gal-um:

15 Kag dumdumon ko ang akon katipan, nga sa tunga nakon kag ninyo kag sang tagsa ka tinuga nga buhi sang tanan nga unud; kag indi na mangin-anaw ang mga tubig sa paglaglag sang tanan nga unud.

16 Kag ang balangaw manginsa gal-um; kag magatolok ako sini, agud nga dumdumon ko ang katipan nga walay katapusan sa tunga sang Dios kag sang tagsa ka tinuga nga buhi sang tanan nga unud nga yara sa duta.

17 Kag ang Dios nagsiling kay Noe, Amo ini ang tanda sang katipan, nga natukud ko sa tunga nakon kag sang tanan nga unud nga yara sa duta.

18 ś Kag ang mga anak nga lalaki ni Noe, nga naggowa sa arka, amo si Sem, kag si Ham, kag si Jafet: kag si Ham among amay ni Canaan.

19 Ini sila amo ang tatlo ka mga anak nga lalaki ni Noe: kag sa ila nahil-ub ang bug-os nga duta.

20 Kag si Noe nagsugud sa pagkamangunguma, kag naghimo sia sing ulubasan:

21 Kag nag-inum sia sing alak, kag nahobog; kag hubo sia sa sulud sang iya layanglayang.

22 Kag si Ham, nga amay ni Canaan, nakakita sang kahubo sang iya amay, kag nagsugid sa iya duha ka utud sa gowa.

23 Kag nagkuha si Sem kag si Jafet sing panapton, kag gin-ambilay nila ini, kag nag-isol, kag gintabonan ang kahubo sang ila amay; kag naliso ang ila mga nawung, kag wala nila nakita ang kahubo sang ila amay.

24 Kag nagmata si Noe gikan sa iya alak, kag nakahibalo sang ginhimo sa iya sang iya anak nga manghud.

25 Kag sia nagsiling, Ginapakamalaut si Canaan; mangin-alagad sia sang mga alagad sa iya mga utud.

26 Kag sia nagsiling, Bulahan ang GINOONG Dios ni Sem; kag mangin-alagad niya si Canaan.

27 Ang Dios magapadaku kay Jafet, kag magapuyo sia sa mga layanglayang ni Sem; kag mangin-alagad niya si Canaan.

28 ś Kag si Noe nagkabuhi sa tapus ang anaw sing tatlo ka gatus kag kalim-an ka tuig.

29 Kag ang tanan nga adlaw ni Noe siam ka gatus kag kalim-an ka tuig: kag napatay sia.

KAPITULO 10

KARON amo ini ang mga kaliwatan sang mga anak nga lalaki ni Noe, ni Sem, ni Ham, kag ni Jafet: kag sa ila nagkalatawo ang mga anak nga lalaki sa tapus ang anaw.

2 Ang mga anak nga lalaki ni Jafet; si Gomer, kag si Magog, kag si Madai, kag si Javan, kag si Tubal, kag si Mesec, kag si Tiras.

3 Kag ang mga anak nga lalaki ni Gomer; si Askenaz, kag si Rifat, kag si Togarma.

4 Kag ang mga anak nga lalaki ni Javan; si Elisa, kag si Tarsis, si Kitim, kag si Dodanim.

5 Sa ila sini ginbahinbahin ang mga pulo sang mga Gentil sa ila mga duta; ang tagsatagsa sono sa iya hambal, sono sa ila mga panimalay, sa ila mga pungsud.

6 ś Kag ang mga anak nga lalaki ni Ham; si Cus, kag si Mizraim, kag si Put, kag si Canaan.

7 Kag ang mga anak nga lalaki ni Cus; si Seba, kag si Havila, kag si Sabta, kag si Raama, kag si Sabteca: kag ang mga anak nga lalaki ni Raama; si Sheba, kag si Dedan.

8 Kag si Cus nagpanganak kay Nimrod: nagsugud sia nga mangin isa ka gamhanan nga tawo sa duta.

9 Sia isa ka gamhanan nga mangangayam sa atubangan sang GINOO: busa ini nasiling, Kaangay ni Nimrod ang daku nga mangangayam sa atubangan sang GINOO.

10 Kag ang pamuno sang iya ginharian amo ang Babel, kag ang Erec, kag ang Acad, kag ang Calne, sa duta sang Sinar.

11 Gikan sa sadtong duta nagkadto si Asur, kag nagpatindug sang Ninive, kag sang siudad nga Rehobot, kag sang Cala,

12 Kag sang Resen sa ulut sang Ninive kag Cala: nga amo man ang isa ka dakung siudad.

13 Kag si Mizraim nagpanganak kay Ludim, kag kay Anamim, kag kay Lehabim, kag kay Naftuhim,

14 Kag kay Patrusim, kag kay Casluhim, (nga sa iya naggikan si Filistim,) kag kay Caftorim.

15 ś Kag si Canaan nagpanganak kay Sidon nga iya panganay, kag kay Het,

16 Kag sang Jebusnon, kag sang Amornon, kag sang Girgasanhon,

17 Kag sang Hevhanon, kag sang Arquinhon, kag sang Sinhanon,

18 Kag sang Arvadnon, kag sang Zemarnon, kag sang Hamatnon: kag sang olihi naglapta ang mga panimalay sang mga Canaanhon.

19 Kag ang dulunan sang mga Canaanhon kutub sa Sidon, sa nagapakadto ka nayon sa Gerar, tubtub sa Gaza; sa nagapakadto ka, nayon sa Sodoma, kag Gomorra, kag Adma, kag Zeboim, tubtub sa Lasa.

20 Ini sila amo ang mga anak nga lalaki ni Ham, sono sa ila mga panimalay, sono sa ila mga hambal, sa ila kadutaan, kag sa ila mga pungsud.

21 ś Sa kay Sem man, ang amay sang tanan nga mga anak ni Eber, ang utud nga lalaki ni Jafet nga magulang, sa iya natawo ang mga anak.

22 Ang mga anak ni Sem; si Elam, kag si Asur, kag si Arfaxad, kag si Lud, kag si Aram.

23 Kag ang mga anak ni Aram; si Uz, kag si Hul, kag si Geter, kag si Mas.

24 Kag si Arfaxad nagpanganak kay Sala; kag si Sala nagpanganak kay Eber.

25 Kag sa kay Eber natawo ang duha ka anak nga lalaki: ang ngalan sang isa si Peleg; kay sa iya mga adlaw ginbahinbahin ang duta; kag ang ngalan sang iya utud nga lalaki si Joktan.

26 Kag si Joktan nagpanganak kay Almodad, kag kay Selef, kag kay Hazarmavet, kag kay Jera,

27 Kag kay Hadoram, kag kay Uzal, kag kay Dikla,

28 Kag kay Obal, kag kay Abimael, kag kay Sheba,

29 Kag kay Ofir, kag kay Havila, kag kay Jobab: ini sila tanan mga anak nga lalaki ni Joktan.

30 Kag ang ila puluy-an kutub sa Mesa, sa nagapakadto ka nayon sa Sefar isa ka bukid sang sidlangan.

31 Ini sila amo ang mga anak nga lalaki ni Sem, sono sa ila mga panimalay, sono sa ila mga hambal, sa ila kadutaan, sono sa ila mga pungsud.

32 Ini sila amo ang mga panimalay sang mga anak nga lalaki ni Noe, sono sa ila kaliwatan, sa ila mga pungsud: kag sa ila sini ginbahinbahin ang mga pungsud sa duta sa tapus ang anaw.

KAPITULO 11

KAG ang bug-os nga duta isa sing hambal, kag isa sing polong.

2 Kag nahanabu, sang sila nagpanlakatan gikan sa sidlangan, nga nakakita sila sing isa ka kapatagan sa duta sang Sinar; kag nagpuyo sila didto.

3 Kag nagsinilingay sila, Kari, maghimo kita sing tisa, kag pagbahon sila sing maayo. Kag may tisa sila nga salili sang bato, kag may mapilit nga lunang sila nga salili sang galagala.

4 Kag nagsiling sila, Kari, magtukud kita sing isa ka siudad kag isa ka torre, nga ang iya ukbung maglambut sa langit; kag maghimo kita sa aton sing ngalan, agud nga indi kita mag-alaplaag sa kadaygan sang bug-os nga duta.

5 Kag ang GINOO nagkunsad sa pagtan-aw sang siudad kag sang torre, nga gintukud sang mga anak sang mga tawo.

6 Kag ang GINOO nagsiling, Yari karon, ang katawohan isa, kag sila tanan may isa ka hambal; kag nagasugud sila sa paghimo sini: kag karon wala sing bisan ano nga makapugung sa ila, nga ila ginpainoino nga himoon.

7 Kari, magkunsad kita, kag gumonon naton didto ang ila hambal, agud nga indi sila maghangpanay sa ila polong.

8 Gani ginpaaplaag sila sang GINOO gikan didto sa kadaygan sang bug-os nga duta: kag ginbayaan nila ang pagtukud sang siudad.

9 Busa gintawag ang ngalan sini Babel; bangud nga didto gingumon sang GINOO ang hambal sang bug-os nga duta: kag gikan didto ginpaaplaag sila sang GINOO sa kadaygan sang bug-os nga duta.

10 ś Ini sila amo ang mga kaliwatan ni Sem: si Sem isa ka gatus ka tuig, kag nagpanganak kay Arfaxad duha ka tuig sa tapus ang anaw:

11 Kag si Sem nagkabuhi sing lima ka gatus ka tuig sa tapus nga ginpanganak niya si Arfaxad, kag nagpanganak sang mga anak nga lalaki kag mga anak nga babaye.

12 Kag si Arfaxad nagkabuhi sing lima kag katloan ka tuig, kag nagpanganak kay Sala:

13 Kag si Arfaxad nagkabuhi sing apat ka gatus kag tatlo ka tuig sa tapus nga ginpanganak niya si Sala, kag nagpanganak sang mga anak nga lalaki kag mga anak nga babaye.

14 Kag si Sala nagkabuhi sing katloan ka tuig, kag nagpanganak kay Eber:

15 Kag si Sala nagkabuhi sing apat ka gatus kag tatlo ka tuig sa tapus nga ginpanganak niya si Eber, kag nagpanganak sang mga anak nga lalaki kag mga anak nga babaye.

16 Kag si Eber nagkabuhi sing apat kag katloan ka tuig, kag nagpanganak kay Peleg:

17 Kag si Eber nagkabuhi sing apat ka gatus kag katloan ka tuig sa tapus nga ginpanganak niya si Peleg, kag nagpanganak sang mga anak nga lalaki kag mga anak nga babaye.

18 Kag si Peleg nagkabuhi sing katloan ka tuig, kag nagpanganak kay Reu:

19 Kag si Peleg nagkabuhi sing duha ka gatus kag siam ka tuig sa tapus nga ginpanganak niya si Reu, kag nagpanganak sang mga anak nga lalaki kag mga anak nga babaye.

20 Kag si Reu nagkabuhi sing duha kag katloan ka tuig, kag nagpanganak kay Serug:

21 Kag si Reu nagkabuhi sing duha ka gatus kag pito ka tuig sa tapus nga ginpanganak niya si Serug, kag nagpanganak sang mga anak nga lalaki kag mga anak nga babaye.

22 Kag si Serug nagkabuhi sing katloan ka tuig, kag nagpanganak kay Nahor:

23 Kag si Serug nagkabuhi sing duha ka gatus ka tuig sa tapus nga ginpanganak niya si Nahor, kag nagpanganak sang mga anak nga lalaki kag mga anak nga babaye.

24 Kag si Nahor nagkabuhi sing siam kag duha ka pulo ka tuig, kag nagpanganak kay Tera:

25 Kag si Nahor nagkabuhi sing isa ka gatus kag napulo kag siam ka tuig sa tapus nga ginpanganak niya si Tera, kag nagpanganak sang mga anak nga lalaki kag mga anak nga babaye.

26 Kag si Tera nagkabuhi sing kapitoan ka tuig, kag nagpanganak kay Abram, kay Nahor, kag kay Haran.

27 ś Karon amo ini sila ang mga kaliwatan ni Tera: si Tera nagpanganak kay Abram, kay Nahor, kag kay Haran; kag si Haran nagpanganak kay Lot.

28 Kag si Haran napatay sing una sa iya amay nga si Tera sa duta nga iya natawohan, sa Ur sang mga Caldeanhon.

29 Kag nagpangasawa si Abram kag si Nahor: ang ngalan sang asawa ni Abram si Sarai; kag ang ngalan sang asawa ni Nahor, si Milca, ang anak nga babaye ni Haran, amay ni Milca, kag amay ni Isca.

30 Apang si Sarai baw-as; wala sia sing anak.

31 Kag ginkuha ni Tera si Abram nga iya anak kag si Lot nga anak ni Haran, anak sang iya anak, kag si Sarai nga iya umagad, asawa ni Abram nga iya anak; kag naghalin sila upud sa ila sa Ur sang mga Caldeanhon, sa pagkadto sa duta sang Canaan; kag nag-abut sila sa Haran, kag nagpuyo didto.

32 Kag ang mga adlaw ni Tera duha ka gatus kag lima ka tuig: kag si Tera napatay sa Haran.

KAPITULO 12

KARON ang GINOO nagsiling kay Abram, Halin ka sa imo duta, kag sa imo kahimataan, kag sa balay sang imo amay, pakadto sa duta nga akon igapakita sa imo:

2 Kag magahimo ako gikan sa imo sang isa ka pungsud nga daku, kag pakamaayohon ko ikaw, kag padakuon ang imo ngalan; kag manginpagpakamaayo ikaw:

3 Kag pakamaayohon ko sila nga nagapakamaayo sa imo, kag pakamalauton sia nga nagapakamalaut sa imo: kag sa imo pakamaayohon ang tanan nga mga panimalay sang duta.

4 Gani naglakat si Abram, sono sa napamolong sa iya sang GINOO; kag nag-upud sa iya si Lot: kag si Abram nagaedad sing kapitoan kag lima ka tuig sang pagtaliwan niya sa Haran.

5 Kag gindala ni Abram si Sarai nga iya asawa, kag si Lot nga anak sang iya utud nga lalaki, kag ang tanan nga pagkabutang nila nga ila natipon, kag ang mga kalag nga ila naangkon sa Haran; kag naglakat sila pakadto sa duta sang Canaan; kag nag-abut sila sa duta sang Canaan.

6 ś Kag si Abram naglatas sa duta pakadto sa duug sang Siquem, sa kapatagan sang More. Kag ang mga Canaanhon yara pa sa duta.

7 Kag ang GINOO nagpahayag kay Abram, kag nagsiling, Sa imo kaliwat ihatag ko ining duta: kag nagpatindug sia didto sing halaran sa GINOO, nga nagpahayag sa iya.

8 Kag nagliton sia gikan didto pakadto sa bukid sa sidlangan sang Bet-el, kag nagpatindug sang iya layanglayang, nga ang Bet-el sa katundan, kag ang Hai sa sidlangan: kag nagpatindug sia didto sing halaran sa GINOO, kag nagpanawag sa ngalan sang GINOO.

9 Kag si Abram nagpanlakatan, nga nagapakadto pa nayon sa bagatnan.

10 ś Kag may tiggulutum sa duta: kag nagdulhog si Abram sa Egipto sa pagpanlugayaw didto; kay ang tiggulutum matama sa duta.

11 Kag nahanabu, sang naghinamput sia sa Egipto, nga nagsiling sia kay Sarai nga iya asawa, Yari karon, nahibaloan ko nga ikaw babaye nga maanyag tolokon:

12 Busa mahanabu, kon makita ka sang mga Egiptohanon, nga magasiling sila, Ini asawa niya: kag patyon nila ako, apang ikaw hilwayon nila nga buhi.

13 Isiling, ginaampo ko sa imo, ikaw akon utud nga babaye: agud nga magmaayo sa akon tungud sa imo; kag nga magkabuhi ang akon kalag bangud sa imo.

14 ś Kag nahanabu, nga, sang nakasulud si Abram sa Egipto, nakita sang mga Egiptohanon ang babaye nga tama sia kaanyag.

15 Nakita man sia sang mga prinsipe ni Faraon, kag gindayaw sia kay Faraon: kag gindala ang babaye sa balay ni Faraon.

16 Kag tungud sa iya si Faraon naghimo sing maayo kay Abram: kag may mga carnero sia, kag mga baka, kag mga asno nga lalaki, kag mga alagad nga lalaki, kag mga alagad nga babaye, kag mga asno nga babaye, kag mga camelyo.

17 Kag gindautan sang GINOO si Faraon kag ang iya panimalay sang dalagku nga mga kalalat-an bangud kay Sarai nga asawa ni Abram.

18 Kag gintawag ni Faraon si Abram, kag nagsiling, Ano bala ining ginhimo mo sa akon? ngaa bala nga wala mo ako pagsugiri nga sia imo asawa?

19 Ngaa bala nagsiling ka, Utud ko sia? sa bagay nga basi nakuha ko sia nga mangin-akon asawa: busa karon yara ang imo asawa, kuhaa sia, kag lakat ka.

20 Kag si Faraon nagsogo sa iya mga tawo nahanungud sa iya: kag ginpalakat nila sia, kag ang iya asawa, kag ang tanan nga iya.

KAPITULO 13

KAG si Abram nagtaklad pagowa sa Egipto pabagatnan, sia, kag ang iya asawa, kag ang tanan nga iya, kag si Lot upud niya.

2 Kag si Abram manggaranon gid sa kahayupan, sa pilak, kag sa bulawan.

3 Kag nagpadayon sia sa iya mga panlakatan gikan sa bagatnan tubtub sa Bet-el, sa duug nga didto anay ang iya layanglayang sa ginsuguran, sa ulut sang Bet-el kag Hai;

4 Sa duug sang halaran, nga ginhimo niya anay didto sing una: kag didto si Abram nagtawag sa ngalan sang GINOO.

5 ś Kag si Lot man, nga nag-upud kay Abram, may mga panong, kag kahayupan, kag mga layanglayang.

6 Kag ang duta indi makaigo sa ila, nga magpuyo sila sing tingub: kay ang ila pagkabutang daku, sa bagay nga indi sila makapuyo sing tingub.

7 Kag may kasuayon sa tunga sang mga manugbantay sang kahayupan ni Abram kag sang mga manugbantay sang kahayupan ni Lot: kag ang mga Canaanhon kag mga Pereznon nagpuyo pa niyan sa duta.

8 Kag si Abram nagsiling kay Lot, Magwala sing kasuayon, ginaampo ko sa imo, sa tunga nakon kag nimo, kag sa tunga sang akon mga manugbantay sang kahayupan kag sang imo mga manugbantay sang kahayupan; kay mag-utud kita.

9 Indi bala ang bug-os nga duta sa atubangan mo? bulag ka sa akon, ginaampo ko sa imo: kon mapawala ka, niyan ako mapatoo; kon mapatoo ka, niyan ako mapawala.

10 Kag ginbayaw ni Lot ang iya mga mata, kag nakita niya ang bug-os nga kapatagan sang Jordan, nga nahunub sing hil-ob sang tubig, sa wala pa malaglag sang GINOO ang Sodoma kag ang Gomorra, kaanggid sang katamnan sang GINOO, kaanggid sang duta sang Egipto, sa nagapakadto ka sa Zoar.

11 Niyan ginpili ni Lot nga sa iya ang bug-os nga kapatagan sang Jordan; kag nagpanlakatan si Lot pasidlangan: kag nagbulagay sila ang isa gikan sa isa.

12 Si Abram nagpuyo sa duta sang Canaan, kag si Lot nagpuyo sa mga siudad sang kapatagan, kag ginpahamtang ang iya layanglayang paatubang sa Sodoma.

13 Apang ang mga tawo sang Sodoma malaut kag mga makasasala sing lakas sa atubangan sang GINOO.

14 ś Kag ang GINOO nagsiling kay Abram, sa tapus nga si Lot nakabulag gikan sa iya, Bayawa karon ang imo mga mata, kag lantaw gikan sa duug diin ka paaminhan, kag pabagatnan, kag pasidlangan, kag pakatundan:

15 Kay ang bug-os nga duta nga imo ginatan-aw, ihatag ko sa imo, kag sa imo kaliwat sing dayon.

16 Kag himoon ko ang imo kaliwat subong sang yab-ok sang duta: agud nga kon sarang maisip sang isa ka tawo ang yab-ok sang duta, niyan ang imo kaliwat maisip man.

17 Tindug, latasa ang duta sa iya kalabaon kag sa iya kasangkaron; kay ihatag ko ini sa imo.

18 Niyan ginhalin ni Abram ang iya layanglayang, kag nag-abut kag nagpuyo sa kapatagan sang Mamre, nga yara sa Hebron, kag nagtukud didto sing halaran nga sa GINOO.

KAPITULO 14

KAG nahanabu sa mga adlaw ni Amrafel nga hari sang Sinar, ni Arioc nga hari sang Elasar, ni Kedorlaomer nga hari sang Elam, kag ni Tidal nga hari sang kapungsuran;

2 Nga ini sila nag-inaway batok kay Bera nga hari sang Sodoma, kag batok kay Birsa nga hari sang Gomorra, kay Sinab nga hari sang Adma, kag kay Semeber nga hari sang Zeboim, kag sa hari sang Bela, nga amo ang Zoar.

3 Tanan ini sila nagtingub sa nalupyakan sang Sidim, nga amo ang dagat nga maasin.

4 Sa napulog duha ka tuig gin-alagad nila si Kedorlaomer, kag sa ikapulog tatlo nga tuig nagribok sila.

5 Kag sa tuig nga ikapulog apat nag-abut si Kedorlaomer, kag ang mga hari nga upud sa iya, kag ginpatay ang mga Refaimnon sa Asterot Karnaim, kag ang mga Zuzimnon sa Ham, kag ang mga Emimnon sa Save Kiryataim,

6 Kag ang mga Horhanon sa ila bukid nga Seir, tubtub sa El-paran, nga yara sa luyo sang kamingawan.

7 Kag nagbalik sila, kag nag-abut sa En-mispat, nga amo ang Cades, kag ginpatay ang bug-os nga pungsud sang mga Amalecnon, kag sang mga Amornon man, nga nagapuyo sa Hazazon-tamar.

8 Kag naggowa ang hari sang Sodoma, kag ang hari sang Gomorra, kag ang hari sang Adma, kag ang hari sang Zeboim, kag ang hari sang Bela (nga amo ang Zoar;) kag nagtingub sila sa inaway batok sa ila sa nalupyakan sang Sidim;

9 Batok kay Kedorlaomer nga hari sang Elam, kag batok kay Tidal nga hari sang kapungsuran, kag kay Amrafel nga hari sang Sinar, kag kay Arioc nga hari sang Elasar; apat ka hari batok sa lima.

10 Kag ang nalupyakan sang Sidim nahil-ob sang mga boho nga may mapilit nga lunang; kag nagpalagyo ang mga hari sang Sodoma kag Gomorra, kag nagkalapukan didto; kag sila nga nabilin nagpalagyo sa bukid.

11 Kag ginkuha nila ang tanan nga pagkabutang sang Sodoma kag Gomorra, kag ang tanan nila nga mga kalan-on, kag naglakat.

12 Kag gindala nila si Lot, anak sang utud ni Abram, nga nagapuyo sa Sodoma, kag ang iya pagkabutang, kag nagtaliwan.

13 ś Kag nag-abut ang isa nga nakapalagyo, kag nagsugid kay Abram nga Hebreo; kay nagapuyo sia sa kapatagan sang Mamre nga Amornon, utud nga lalaki ni Escol, kag utud nga lalaki ni Aner: kag ini sila mga kadampig ni Abram.

14 Kag sang nabatian ni Abram nga nabihag ang iya utud, ginsangkapan niya sing mga hinganiban ang iya nahanas nga mga alagad, nga natawo sa iya kaugalingon nga balay, tatlo ka gatus kag napulog walo, kag ginlagas sila tubtub sa Dan.

15 Kag sia kag ang iya mga alagad nagbahinbahin batok sa ila, sa kagab-ihon, kag ginpatay sila, kag ginlagas sila tubtub sa Hoba, nga sa nawala sang Damasco.

16 Kag nabawi niya ang tanan nga pagkabutang, kag gindala man liwat si Lot nga iya utud, kag ang iya pagkabutang, kag ang mga babaye man, kag ang mga katawohan.

17 ś Kag ang hari sang Sodoma naggowa sa pagsugata sa iya sa tapus sang iya pagbalik gikan sa pagpatay kay Kedorlaomer, kag sang mga hari nga kaupud niya, sa nalupyakan sang Save, nga amo ang nalupyakan sang hari.

18 Kag si Melquisedec nga hari sang Salem nagdala sing tinapay kag alak: kag sia amo ang pari sang labing mataas nga Dios.

19 Kag ginpakamaayo niya sia, kag nagsiling, Pakamaayohon si Abram sang labing mataas nga Dios, tag-iya sang langit kag duta:

20 Kag bulahan ang labing mataas nga Dios, nga nagtugyan sang imo mga kaaway sa imo kamut. Kag naghatag sia sa iya sang mga ikapulo sang tanan.

21 Kag ang hari sang Sodoma nagsiling kay Abram, Ihatag sa akon ang mga tawo, kag kuhaa nga sa imo ang pagkabutang.

22 Kag si Abram nagsiling sa hari sang Sodoma, Ginbayaw ko ang akon kamut sa GINOO, ang labing mataas nga Dios, ang tag-iya sang langit kag duta,

23 Nga indi ako magkuha sing isa ka nahut ukon isa ka higot sang sapatos, kag nga indi ako magkuha sing bisan ano nga butang nga imo, basi nga magsiling ka, Ako nagpamanggad kay Abram:

24 Luwas lamang sinang nakaon sang mga pamatan-on nga lalaki, kag ang bahin sang mga lalaki nga nag-upud sa akon, si Aner, si Escol, kag si Mamre; ipakuha sa ila ang ila bahin.

KAPITULO 15

SA tapus sining mga butang nag-abut ang polong sang GINOO kay Abram sa palanan-awon, nga nagasiling, Dili ka mahadluk, Abram: ako ang imo taming, kag ang imo tama kadaku nga balus.

2 Kag si Abram nagsiling, Ginoong DIOS, ano bala ang ihatag mo sa akon, kay nagapadayon nga wala ako sing anak, kag ang tinugyanan sang akon balay amo ining Eliezer sang Damasco?

3 Kag si Abram nagsiling, Yari karon, wala mo ako paghatagi sing kaliwat: kag, yari karon, ang isa nga natawo sa akon balay amo ang akon manunubli.

4 Kag, yari karon, ang polong sang GINOO nag-abut sa iya, nga nagasiling, Ini indi mangin-imo manunubli; apang sia nga magagowa gikan sa imo kaugalingon nga kasudlan mangin-imo manunubli.

5 Kag gindala niya sia sa gowa, kag nagsiling, Tanglaa karon ang langit, kag isipa ang kabitoonan, kon sarang mo sila maisip: kag nagsiling sia sa iya, Mangin-subong sini ang imo kaliwat.

6 Kag nagtoo sia sa GINOO; kag gin-isip niya ini sa iya nga sa pagkamatarung.

7 Kag nagsiling sia sa iya, Ako ang GINOO nga nagpagowa sa imo sa Ur sang mga Caldeanhon, sa paghatag sa imo sining duta nga panublion.

8 Kag nagsiling sia, Ginoong DIOS, sa ano ko bala makilala nga panublion ko ini?

9 Kag nagsiling sia sa iya, Kuhai ako sing isa ka bakiya nga baka nga tatlo ka tuig, kag isa ka kanding nga babaye nga tatlo ka tuig, kag isa ka carnero nga lalaki nga tatlo ka tuig, kag isa ka tukmo, kag isa ka kuyabog nga salampati.

10 Kag nagkuha sia sini tanan sa iya, kag ginpihak sila sa tunga, kag ginbutang ang tagsa ka pihak sa tampad sang pihak: apang wala niya pagpihaka ang mga pispis.

11 Kag sang ang mga pispis nagsanggit sang inihaw nga mga lawas, gintabog sila ni Abram.

12 Kag sang nagahinunud ang adlaw, nag-abut kay Abram ang hamook nga katologon; kag, yari karon, isa ka kakugmat sang dakung kadudulman nag-abut sa iya.

13 Kag nagsiling sia kay Abram, Kilalaha sing matuud nga ang imo kaliwat mangin-dumoloong sa duta nga indi ila, kag magaalagad sa ila; kag sakiton nila sila sing apat ka gatus ka tuig;

14 Kag yadto man nga pungsud, nga alagdon nila, hukman ko: kag sa olihi magagowa sila nga may dakung pagkabutang.

15 Kag magakadto ka sa imo nga kaamayan sa paghidait; ilubung ka sa maayo nga katigulangon.

16 Apang sa ikap-at nga kaliwatan magabalik sila diri: kay wala pa mapuno ang kalautan sang mga Amornon.

17 Kag nahanabu, nga, sang natunud ang adlaw, kag madulum na, yari karon isa ka horno nga nagaaso, kag isa ka sulo nga nagadabdab nag-agi sa tunga sinang mga pinihak.

18 Sa amo man nga adlaw ang GINOO nagpakigkatipan kay Abram, nga nagasiling, Sa imo kaliwat ginahatag ko ining duta, kutub sa suba sang Egipto tubtub sa suba nga daku, ang suba nga Eufrates:

19 Ang mga Cenhanon, kag ang mga Cenisnon, kag ang mga Kadmonhon,

20 Kag ang mga Hithanon, kag ang mga Pereznon, kag ang mga Refaimnon,

21 Kag ang mga Amornon, kag ang mga Canaanhon, kag ang mga Gergesnon, kag ang mga Jebusnon.

KAPITULO 16

KARON si Sarai nga asawa ni Abram wala magpanganak nga sa iya: kag sia may sologoon nga babaye, nga Egiptohanon, nga ang iya ngalan si Agar.

2 Kag si Sarai nagsiling kay Abram, Yari karon, ang GINOO nagpugung sa akon sa pagpamata: ginaampo ko sa imo, hiusa ka sa akon sologoon nga babaye; ayhan makaagum ako sing mga anak paagi sa iya. Kag ginpamatian ni Abram ang tingug ni Sarai.

3 Kag si Sarai nga asawa ni Abram nagkuha kay Agar nga iya sologoon nga babaye nga Egiptohanon, sa tapus nga nakapuyo si Abram sing napulo ka tuig sa duta sang Canaan, kag ginhatag niya sia nga asawa kay Abram nga iya bana.

4 ś Kag naghiusa sia kay Agar, kag nagpanamkon sia: kag sang nakita niya nga nagpanamkon sia, gintamay niya ang iya agalon nga babaye.

5 Kag si Sarai nagsiling kay Abram, Ang sayup nga nahimo sa akon manginsa imo: ginhatag ko ang akon sologoon nga babaye sa imo sabak; kag sang nakita niya nga nanamkon sia, gintamay niya ako: ang GINOO maghukom sa tunga nimo kag nakon.

6 Apang si Abram nagsiling kay Sarai, Yari karon, ang imo sologoon yara sa imo kamut; himoa sa iya ang ginapakamaayo mo. Kag sang ginpintasan ni Sarai sia, nagpalagyo sia gikan sa atubangan niya.

7 ś Kag nakit-an sia sang anghel sang GINOO sa luyo sang tuburan sang tubig sa kamingawan, sa luyo sang tuburan sa dalanon pa Sur.

8 Kag nagsiling sia, Agar, sologoon ni Sarai, diin ka bala maghalin? kag diin ka makadto? Kag nagsiling sia, Nagapalagyo ako gikan sa atubangan ni Sarai nga akon agalon.

9 Kag nagsiling sa iya ang anghel sang GINOO, Balik ka sa imo agalon nga babaye, kag pasakup ka sa idalum sang iya mga kamut.

10 Kag ang anghel sang GINOO nagsiling sa iya, Pabuaron ko sing daku ang imo kaliwat, nga indi maisipan bangud sang kadamuon.

11 Kag ang anghel sang GINOO nagsiling sa iya, Yari karon, nagadala ka, kag magaanak sing lalaki, kag hingalanan sia Ismael; bangud nga nabatian sang GINOO ang imo kapipit-an.

12 Kag sia mangin isa ka talonon nga tawo; ang iya kamut magapamatok sa tagsa ka tawo, kag ang kamut sang tagsa ka tawo magapamatok sa iya; kag magapuyo sia sa atubangan sang tanan niyang mga utud.

13 Kag gintawag niya ang ngalan sang GINOO nga nagpamolong sa iya, Ikaw amo ang Dios nga nagatan-aw sa akon: kay nagsiling sia, Nakakita bala ako diri sa iya nga nagatan-aw sa akon?

14 Busa gintawag ang bobon Beer-lahai-roi; yari karon, sa gin-utlan ini sang Cades kag Bered.

15 ś Kag si Agar nag-anak kay Abram sing isa ka anak nga lalaki: kag ginhingalanan ni Abram ang iya anak, nga gin-anak ni Agar, Ismael.

16 Kag si Abram kawaloan kag anum ka tuig sang si Agar nag-anak kay Ismael sa kay Abram.

KAPITULO 17

KAG sang si Abram kasiaman kag siam ka tuig, ang GINOO nagpahayag kay Abram, kag nagsiling sa iya, Ako amo ang Dios nga Makaako; maglakat ka sa atubangan nakon, kag maghimpit ka.

2 Kag magahimo ako sang akon katipan sa tunga nimo kag nakon, kag magapabuad sa imo sing lakas.

3 Kag si Abram naghapa: kag ang Dios naghambal sa iya, nga nagasiling,

4 Sa akon, yari karon, ang akon katipan upud sa imo, kag mangin-amay ka sang madamu nga mga pungsud.

5 Indi na ikaw pagtawgon nga Abram, kondi ang imo ngalan Abraham; kay ginhimo ko ikaw nga amay sang madamu nga mga pungsud.

6 Kag pabungahon ko ikaw sing tama, kag himoon ko ang mga pungsud gikan sa imo, kag mga hari magagikan sa imo.

7 Kag ako magatukud sang akon katipan sa tunga nakon kag nimo kag sa imo kaliwat sa olihi nimo sa ila mga kaliwatan nga katipan nga dayon, nga mangin-Dios sa imo, kag sa imo kaliwat sa olihi nimo.

8 Kag ihatag ko sa imo, kag sa imo kaliwat sa olihi nimo, ang duta nga sa diin ikaw dumoloong, ang bug-os nga duta sang Canaan, nga kaugalingon nga dayon; kag mangin-ila Dios ako.

9 ś Kag ang Dios nagsiling kay Abraham, Gani maghuput ka sang akon katipan, ikaw, kag ang imo kaliwat sa olihi nimo sa ila mga kaliwatan.

10 Ini among akon katipan, nga huptan ninyo, sa tunga nakon kag nimo kag sa imo kaliwat sa olihi nimo; Circuncidahon ang tagsa ka lalaki nga bata sa tunga ninyo.

11 Kag circuncidahon ninyo ang unud sang inyo napunta nga panit; kag ini mangintanda sang katipan sa tunga nakon kag ninyo.

12 Kag sia nga walo ka adlaw sa inyo tunga circuncidahon, ang tagsa ka lalaki nga bata sa inyo mga kaliwatan, ang natawo sa balay, ukon ginbakal sing kuarta sa bisan kay sin-o nga dumoloong, nga indi sa imo kaliwat.

13 Ang natawo sa imo balay, kag ang ginbakal sang imo kuarta, kinahanglan circuncidahon: kag ang akon katipan manginsa inyo unud nga katipan nga dayon.

14 Kag ang lalaki nga bata nga dicircuncidado nga wala macircuncidar ang unud sang iya napunta nga panit, inang kalag utdon gikan sa iya katawohan; nalalis niya ang akon katipan.

15 ś Kag ang Dios nagsiling kay Abraham, Nahanungud kay Sarai nga imo asawa, indi ka magtawag sa iya ngalan nga si Sarai, kondi Sara ang iya ngalan.

16 Kag pakamaayohon ko sia, kag pagahatagan ko man ikaw sa iya sing anak nga lalaki: hoo, pakamaayohon ko sia, kag mangin-iloy sia sang mga pungsud; mga hari sang katawohan magagikan sa iya.

17 Niyan si Abraham naghapa, kag nagkadlaw, kag nagsiling sa iya tagiposoon, Matawo bala ang isa ka anak sa tawo nga isa ka gatus ka tuig? kag si Sara, nga kasiaman ka tuig, magabata pa bala?

18 Kag si Abraham nagsiling sa Dios, Kabay kuntani nga magkabuhi si Ismael sa atubangan mo!

19 Kag ang Dios nagsiling, Sa pagkamatuud si Sara nga imo asawa magaanak sa imo sing anak nga lalaki; kag hingalanan mo sia Isaac: kag magatukud ako sang akon katipan sa iya subong nga katipan nga dayon, kag sa iya kaliwat sa olihi niya.

20 Kag nahanungud kay Ismael, napamatian ko ikaw: Yari karon, ginpakamaayo ko sia, kag himoon ko sia nga mabungahon, kag pabuaron ko sia sing lakas; magapanganak sia sang napulog duha ka prinsipe, kag himoon ko sia nga dakung pungsud.

21 Apang pagatukuron ko ang akon katipan kay Isaac, nga ipanganak sa imo ni Sara sa sining napat-ud nga tion sa tuig nga masonod.

22 Kag nag-untat sia sa pagpakighambal sa iya, kag nagpaibabaw ang Dios gikan kay Abraham.

23 ś Kag ginkuha ni Abraham si Ismael nga iya anak nga lalaki, kag ang tanan nga natawo sa iya balay, kag ang tanan nga ginbakal sang iya kuarta, ang tagsa ka lalaki sa mga tawo sa balay ni Abraham; kag gincircuncidar ang unud sang ila napunta nga panit sa among adlaw, sono sa nasiling sa iya sang Dios.

24 Kag si Abraham kasiaman kag siam ka tuig, sang gincircuncidar sia sa unud sang iya napunta nga panit.

25 Kag si Ismael nga iya anak napulo kag tatlo ka tuig, sang sia gincircuncidar sa unud sang iya napunta nga panit.

26 Sa among adlaw gincircuncidar si Abraham, kag si Ismael nga iya anak.

27 Kag ang tanan nga lalaki sa iya balay, nga natawo sa balay, kag ginbakal sing kuarta sa dumoloong, gincircuncidar upud sa iya.

KAPITULO 18

KAG ang GINOO nagpahayag sa iya sa mga patag sang Mamre: kag naglingkod sia sa ganhaan sang layanglayang sa init sang adlaw;

2 Kag ginbayaw niya ang iya mga mata kag nagtolok, kag, yari karon, ang tatlo ka lalaki nagtindug sa tupad niya: kag sang nakita niya sila, nagdalagan sia gikan sa ganhaan sang layanglayang sa pagsugata sa ila, kag nagyaub sia sa duta,

3 Kag nagsiling, Ginoo ko, kon karon nakapahamuut ako sa imo itololok, indi pagligari ang imo alagad, ginaampo ko sa imo:

4 Ipakuha ang diotay nga tubig, ginaampo ko sa imo, kag hinawi ninyo ang inyo mga tiil, kag pahuway kamo sa idalum sang kahoy:

5 Kag makuha ako sing isa ka hungit nga tinapay, kag ipatawhay ninyo ang inyo mga tagiposoon; sa tapus sina magpadayon kamo: kay tungud sini nag-abut kamo sa inyo alagad. Kag nagsiling sila, Buhata ang sono sa ginsiling mo.

6 Kag si Abraham nagdalidali sa pagsulud sa layanglayang kay Sara, kag nagsiling, Amana sing madali ang tatlo ka sukub nga maayo nga harina, masaha, kag maghimo sing mga kalan-onon sa hornohan.

7 Kag si Abraham nagdalagan sa kahayupan, kag nagkuha sing isa ka tinday sang baka nga linghod kag maayo, kag ginhatag ini sa pamatan-on nga lalaki; kag sia nagdalidali sa pag-aman sini.

8 Kag nagkuha sia sang mantekilya, kag gatas, kag sang tinday nga baka nga naaman niya, kag ginbutang ini sa atubangan nila; kag nagtindug sia sa luyo nila sa idalum sang kahoy, kag nagkaon sila.

9 ś Kag sila nagsiling sa iya, Diin bala si Sara nga imo asawa? Kag nagsiling sia, Yara, sa sulud sang layanglayang.

10 Kag nagsiling sia, Sa pagkamatuud magabalik ako sa imo sa pagsapul sang panag-on sang kabuhi; kag, yari karon, si Sara nga imo asawa magaanak sing lalaki. Kag si Sara nakabati sa ganhaan sang layanglayang, nga yara sa likod niya.

11 Karon si Abraham kag si Sara tigulang na kag sobol sa panuigon; kag kay Sara nag-untat na ang kinaugali sang mga babaye.

12 Gani si Sara nagkadlaw sa iya kaugalingon, nga nagasiling, Sa tapus nga nagtigulang na ako magakalipay bala ako, nga ang akon ginoo tigulang na man?

13 Kag ang GINOO nagsiling kay Abraham, Ngaa bala nagkadlaw si Sara, nga nagasiling, Magaanak bala sa pagkamatuud ako, nga ako tigulang na?

14 May butang bala nga tama kabudlay sa GINOO? Sa pat-ud nga panag-on magabalik ako sa imo, sono sa panag-on sang kabuhi, kag si Sara magaanak sing lalaki.

15 Niyan si Sara nagpanghiwala, nga nagasiling, Wala ako magkadlaw; kay hinadlukan sia. Kag nagsiling sia, Indi; kondi nagkadlaw ka.

16 ś Kag ang mga lalaki nagtindug gikan didto, kag naglantaw nayon sa Sodoma: kag si Abraham nag-upud sa ila sa pagdol-ong sa ila sa dalanon.

17 Kag ang GINOO nagsiling, Likman ko bala si Abraham sang butang nga akon ginahimo;

18 Sa ginatan-aw nga si Abraham sa pagkamatuud mangindaku kag gamhanan nga pungsud, kag sa iya pakamaayohon ang tanan nga mga pungsud sang duta?

19 Kay nakilala ko sia, nga sogoon niya ang iya kabataan kag ang iya panimalay sa olihi niya, kag huptan nila ang dalanon sang GINOO, sa paghimo sing katarungan kag paghukom; agud nga madala sang GINOO kay Abraham yadtong ginpamolong niya nahanungud sa iya.

20 Kag ang GINOO nagsiling, Bangud nga ang pagsinggit sang Sodoma kag Gomorra daku, kag bangud ang sala nila mabug-at sing tama;

21 Magakunsad ako karon, kag tan-awon kon nahimo nila sing bug-os sono sa singgit sini, nga nag-abut sa akon; kag kon wala, mahibaloan ko.

22 Kag nagtaliwan didto ang mga lalaki, kag nagpadulong sa Sodoma: apang si Abraham nagtindug pa sa atubangan sang GINOO.

23 ś Kag nagpalapit si Abraham, kag nagsiling, Papason mo man bala ang mga matarung upud sa mga malauton?

24 Pananglit may kalim-an ka matarung sa sulud sang siudad: papason mo man bala kag indi pagpaiwayon ang duug tungud sa kalim-an ka matarung nga yara sa sulud niya?

25 Magmalayo sa imo ang paghimo sing subong sini, sa pagpatay sang mga matarung upud sa mga malauton: kag nga ang mga matarung manginsubong sang mga malauton, magmalayo sa imo ina: Indi bala maghimo sing matarung ang Hukom sang bug-os nga duta?

26 Kag ang GINOO nagsiling, Kon may makita ako sa Sodoma nga kalim-an ka matarung sa sulud sang siudad, niyan paiwayon ko ang bug-os nga duug tungud sa ila.

27 Kag si Abraham nagsabat kag nagsiling, Yari karon, nangahas ako sa paghambal sa Ginoo, nga ako yab-ok kag abo lamang:

28 Pananglit ang kalim-an ka matarung makulangan sing lima: laglagon mo bala ang bug-os nga siudad tungud sa kulang nga lima? Kag nagsiling sia, Kon may makita ako nga kap-atan kag lima, indi ko paglaglagon ini.

29 Kag sa liwat nagpamolong pa sia sa iya, kag nagsiling, Pananglit may makita didto nga kap-atan. Kag nagsiling sia, Indi ko paghimoon ini tungud sang kap-atan.

30 Kag nagsiling sia sa iya, O indi maakig ang Ginoo, kag magahambal ako: Pananglit may makita didto nga katloan. Kag nagsiling sia, Indi ko paghimoon ini, kon didto makita ko ang katloan.

31 Kag nagsiling sia, Yari karon, nangahas ako sa paghambal sa Ginoo: Pananglit may makita didto nga duha ka pulo. Kag nagsiling sia, Indi ko paglaglagon ini tungud sang duha ka pulo.

32 Kag nagsiling sia, O indi maakig ang Ginoo, kag magahambal ako sing makaisa lamang: Pananglit makita didto ang napulo. Kag nagsiling sia, Indi ko paglaglagon ini tungud sang napulo.

33 Kag ang GINOO nagpadayon sa iya dalanon, sang nakatapus sia pagpakighambal kay Abraham: kag si Abraham nagbalik sa iya duug.

KAPITULO 19

KAG may duha ka anghel nga nag-abut sa Sodoma sa kasisidmon; kag si Lot nagalingkod sa gawang sang Sodoma: kag sang nakita sila ni Lot nagtindug sia sa pagsugata sa ila; kag nagyaub sia sa duta;

2 Kag sia nagsiling, Yari karon, mga ginoo nakon, ginaampo ko sa inyo, hapit kamo sa balay sang inyo alagad, kag magpabilin sa bug-os nga gab-i, kag hinawi ang inyo mga tiil, kag magbangon kamo sing aga pa, kag magpadayon sa inyo mga dalanon. Kag nagsiling sila, Indi; kondi magapabilin kami sa dalan sa bug-os nga gab-i.

3 Kag ginpilit gid niya sila; kag naghapit sila sa iya, kag nagsulud sa iya balay; kag ginhiwatan niya sila sing sinalosalo, kag nagluto sing tinapay nga wala sing tapay, kag nagkaon sila.

4 ś Apang sa wala pa sila maghigda, ang mga lalaki sang siudad, nga amo ang mga lalaki sang Sodoma, nagkibon sang balay palibut, tingub ang tigulang kag pamatan-on, ang bug-os nga katawohan gikan sa tagsa ka duug:

5 Kag gintawag nila si Lot, kag nagsiling sa iya, Diin bala ang mga lalaki nga nag-abut sa imo sining gab-i? pagowaa sila sa amon, agud nga makilala namon sila.

6 Kag si Lot naggowa sa ganhaan sa ila, kag gintakpan ang ganhaan sa nalikod niya,

7 Kag nagsiling, Ginaampo ko sa inyo, mga utud, dili kamo maghimo sing subong kalaut.

8 Yari karon, may duha ako ka anak nga babaye nga wala makakilala sing lalaki; tuguti ako nga pagowaon ko sila sa inyo, ginaampo ko sa inyo, kag himoa ninyo sa ila ang inyo ginapakamaayo: lamang sa sining mga lalaki indi kamo maghimo sing bisan ano; kay nagpasilong sila sa landong sang akon atop.

9 Kag nagsiling sila, Isul. Kag nagsiling naman sila, Nagkari ining tawo sa pagpanlugayaw, kag buut sia manginhukom: karon himoan ikaw namon sing malain pa sang sa ila. Kag gindagusoan nila ang tawo, nga amo si Lot, kag nagpalapit sa pagbingkal sang ganhaan.

10 Apang ang mga lalaki nagdawhat sang ila mga kamut, kag ginbutung si Lot upud sa ila pasulud sa balay, kag gintakpan ang ganhaan.

11 Kag ginbulag nila ang mga lalaki nga yara sa ganhaan sang balay, magamay kag dalagku: sa bagay nga ginbudlayan sila sa pagpangita sang ganhaan.

12 ś Kag ang mga lalaki nagsiling kay Lot, May iban ka pa bala diri nga upud? umagad nga lalaki, kag ang imo mga anak nga lalaki, kag ang imo mga anak nga babaye, kag bisan ano nga imo sa siudad, pagowaa sila gikan sa sining duug:

13 Kay laglagon namon ining duug, bangud nga ang pagsinggit nila daku na sa atubangan sang nawung sang GINOO; kag ginpadala kami sang GINOO sa paglaglag sini.

14 Kag naggowa si Lot, kag nagpamolong sa iya mga umagad nga lalaki, nga nagpangasawa sa iya mga anak nga babaye, kag nagsiling, Tindug kamo, gowa gikan sining duug; kay laglagon sang GINOO ining siudad. Apang sa iya mga umagad nga lalaki daw sa isa sia nga nagayagota.

15 ś Kag sang pagpamanagbanag, niyan ginpadalidali sang mga anghel si Lot, nga nagasiling, Tindug, kuhaa ang imo asawa, kag ang imo duha ka anak nga babaye, nga yari diri; basi maupus ka sa kasal-anan sang siudad.

16 Kag samtang sia nagadologdolog, ang mga lalaki nag-uyat sa iya kamut, kag sa kamut sang iya asawa, kag sa kamut sang iya duha ka anak nga babaye; ang GINOO nalooy sa iya: kag gindala nila sia, kag ginbutang sia sa gowa sang siudad.

17 ś Kag nahanabu, sang napagowa nila sila, nga nagsiling sia, Palagyo tungud sang imo kabuhi; dili magbalikid sa likod nimo, ukon magpabilin sa bisan diin sa kapatagan; palagyo sa bukid, basi maupus ka.

18 Kag si Lot nagsiling sa ila, O, indi, Ginoo ko:

19 Yari karon, ang imo alagad nakaagum sang bugay sa imo itololok, kag ginpadaku mo ang imo kalooy, nga ginpakita mo sa akon sa pagluwas sang kabuhi ko; kag indi ako makapalagyo sa bukid, basi may iban nga malaut nga makuha sa akon, kag mapatay ako:

20 Yari karon, ining siudad malapit nga palagyohan, kag diotay sia: O, papalagyoha ako didto, (indi bala yadto diotay?) kag ang akon kalag magakabuhi.

21 Kag nagsiling sia sa iya, Tan-awa, nabaton ko ikaw nahanungud man sining butang, nga indi ko paglaglagon ining siudad, nga ginpamolong mo.

22 Dalidali ka, palagyo didto; kay wala ako sing mahimo tubtub nga makalambut ka didto. Busa ginhingalanan ang siudad Zoar.

23 ś Ang adlaw nagsubang sa duta sang nagsulud si Lot sa Zoar.

24 Niyan ginpaulan sang GINOO sa Sodoma kag sa Gomorra ang azufre kag kalayo gikan sa GINOO gikan sa langit;

25 Kag ginlaglag niya yadtong mga siudad, kag ang bug-os nga kapatagan, kag ang tanan nga pumuluyo sang mga siudad, kag ang nagtubo sa duta.

26 ś Apang ang iya asawa sa olihi niya nagbalikid, kag nanginhaligi sia nga asin.

27 ś Kag nagbangon sing aga pa si Abraham pakadto sa duug diin sia nagtindug sa atubangan sang GINOO:

28 Kag naglantaw sia nayon sa Sodoma kag Gomorra, kag nayon sa bug-os nga duta sang kapatagan, kag nakakita, kag, yari karon, ang aso sang duta nagtub-ok subong sang aso sang hornohan.

29 ś Kag nahanabu, sang ginlaglag sang Dios ang mga siudad sang kapatagan, nga ang Dios nagdumdum kay Abraham, kag ginpagowa si Lot gikan sa tunga sang kalaglagan, sang paglaglag niya sang mga siudad nga ginpuy-an ni Lot.

30 ś Kag si Lot nagtaklad gikan sa Zoar, kag nagpuyo sa bukid, kag ang iya duha ka anak nga babaye upud niya; kay nahadluk sia magpuyo sa Zoar: kag nagpuyo sia sa isa ka lungib, sia kag ang iya duha ka anak nga babaye.

31 Kag ang panganay nagsiling sa manghud, Ang aton amay tigulang na, kag wala sing tawo sa duta nga maghiusa sa aton sono sa kinaugali sang bug-os nga duta:

32 Kari, paimnon naton sing alak ang aton amay, kag maghulid kita sa iya, agud nga makatipig kita paagi sa aton amay sing kaliwat.

33 Kag ginpainum nila sing alak ang ila amay sadtong gab-i: kag nagsulud ang panganay, kag naghulid sa iya amay; kag sia wala makahibalo sang paghigda niya, ukon sang pagbangon niya.

34 Kag nahanabu sa adlaw nga masonod, nga nagsiling ang panganay sa manghud, Yari karon, ako naghulid kagab-i upud sa akon amay: paimnon naton sia sing alak sining gab-i man; kag sulud ka, kag maghulid sa iya, agud nga makatipig kita paagi sa aton amay sing kaliwat.

35 Kag ginpainum nila sing alak ang ila amay sadtong gab-i man: kag nagtindug ang manghud, kag naghulid sa iya; kag wala sia makahibalo sang paghigda niya, ukon sang pagbangon niya.

36 Sa amo nga bagay ang duha ka babaye nga anak ni Lot nagdala tungud sa ila amay.

37 Kag ang panganay nag-anak sing lalaki, kag ginhingalanan sia Moab: sia among amay sang mga Moabnon tubtub karon nga adlaw.

38 Kag ang manghud, sia man nag-anak sing lalaki, kag ginhingalanan sia Ben-ammi: sia among amay sang mga kaanakan sang Amon tubtub karon nga adlaw.

KAPITULO 20

KAG gikan didto nagpanlakatan si Abraham nayon sa bagatnan nga duta, kag nagpuyo sa gin-utlan sang Cades kag Sur, kag nagpanlugayaw sia sa Gerar.

2 Kag si Abraham nagsiling nahanungud kay Sara nga iya asawa, Utud ko sia: kag si Abimelec nga hari sang Gerar nagpadala, kag nagpakuha kay Sara.

3 Apang ang Dios nag-abut kay Abimelec sa damgo sang kagab-ihon, kag nagsiling sa iya, Yari karon, patay ka gid nga tawo, bangud sang babaye nga ginkuha mo; kay sia asawa sang tawo.

4 Apang si Abimelec wala makapalapit sa iya: kag nagsiling sia, Ginoo, patyon mo man bala ang pungsud nga matarung?

5 Wala bala sia magsiling sa akon, Utud ko sia nga babaye? kag bisan sia gid nagsiling, Utud ko sia nga lalaki: sa katampad sang akon tagiposoon kag sa pagkainocente sang akon mga kamut ginhimo ko ini.

6 Kag nagsiling sa iya ang Dios sa damgo, Hoo, nakahibalo ako nga sa katampad sang imo tagiposoon nahimo mo ini; kay ako man nagpugung sa imo sa pagpakasala batok sa akon: busa wala ko ikaw pagtuguti sa pagtandug sa iya.

7 Busa iuli karon sa tawo ang iya asawa; kay manalagna sia, kag magapangamuyo sia tungud sa imo, kag magakabuhi ka: kag kon ikaw indi mag-uli sa iya, hibaloa nga sa pagkamatuud mapatay ka, ikaw, kag ang tanan nga imo.

8 Busa si Abimelec nagbangon sing aga pa, kag gintawag ang tanan niyang mga alagad, kag nagsugid sining tanan nga butang sa ila idulungug: kag nahadluk ang mga tawo sing tama.

9 Niyan gintawag ni Abimelec si Abraham, kag nagsiling sa iya, Ano bala ang ginhimo mo sa amon? kag sa ano bala nakasala ako batok sa imo, nga gindala mo ang dakung sala sa akon kag sa akon ginharian? nakahimo ka sa akon sing mga buhat nga indi dapat himoon.

10 Kag si Abimelec nagsiling kay Abraham, Ano bala ang nakita mo, nga nahimo mo ining butang?

11 Kag si Abraham nagsiling, Bangud naghunahuna ako, Wala gayud sing kahadluk sa Dios sa sining duug; kag patyon nila ako bangud sa akon asawa.

12 Kag labut pa utud ko gid sia nga babaye; sia anak nga babaye sang akon amay, apang indi anak sang akon iloy; kag nangin asawa ko sia.

13 Kag nahanabu, sang ginpapanlugayaw ako sang Dios gikan sa balay sang akon amay, nga ako nagsiling sa iya, Ini amo ang imo pagkaayo nga ipakita mo sa akon; sa tagsa ka duug nga maabtan ta, isiling nahanungud sa akon, Sia utud ko nga lalaki.

14 Kag si Abimelec nagkuha sing mga carnero, kag mga baka, kag mga alagad nga lalaki, kag mga alagad nga babaye, kag ginhatag sila kay Abraham, kag gin-uli sa iya si Sara nga iya asawa.

15 Kag si Abimelec nagsiling, Yari karon, ang akon duta yara sa imo atubangan: puyo ka sa diin ang luyag mo.

16 Kag sa kay Sara nagsiling sia, Yari karon, ginhatagan ko sing isa ka libo ka bilog nga pilak ang imo utud nga lalaki: yari karon, sia panabon sa imo sa mga mata sang tanan nga nagaupud sa imo, kag sa tanan nga iban pa: sa amo nga bagay si Sara nasawayan.

17 ś Gani si Abraham nagpangamuyo sa Dios: kag gin-ayo sang Dios si Abimelec, kag ang iya asawa, kag ang iya mga alagad nga babaye; kag sila nagpamata.

18 Kay gintakpan sang GINOO ang tanan nga taguangkan sang panimalay ni Abimelec, bangud kay Sara nga asawa ni Abraham.

KAPITULO 21

KAG ginduaw sang GINOO si Sara subong sang nasiling niya, kag ginhimo sang GINOO kay Sara subong sang ginpamolong niya.

2 Kay si Sara nagpanamkon, kag nag-anak kay Abraham sing lalaki sa iya katigulangon, sa pat-ud nga tion nga napamolong sa iya sang Dios.

3 Kag ginhingalanan ni Abraham ang iya anak nga lalaki nga natawo sa iya, nga gin-anak sa iya ni Sara, Isaac.

4 Kag gincircuncidar ni Abraham sa ikawalong adlaw ang iya anak nga si Isaac, subong sang nasogo sa iya sang Dios.

5 Kag si Abraham isa ka gatus ka tuig, sang natawo sa iya si Isaac nga iya anak.

6 ś Kag si Sara nagsiling, Ginpakadlaw ako sang Dios, agud nga ang tanan nga makabati magakadlaw upud sa akon.

7 Kag nagsiling sia, Sin-o ayhan ang magsiling kay Abraham, nga si Sara magpasoso sing mga anak? kay ako nagpanganak sa iya sing lalaki sa iya katigulangon.

8 Kag nagtubo ang bata, kag ginlutas: kag si Abraham naghimo sing isa ka daku nga sinalosalo sa amo man nga adlaw nga ginlutas si Isaac.

9 ś Kag nakita ni Sara ang anak nga lalaki ni Agar nga Egiptohanon, nga gin-anak niya kay Abraham, nga nagapangyagota.

10 Gani nagsiling sia kay Abraham, Tabuga ining ulipon nga babaye kag ang iya anak nga lalaki: kay ang anak nga lalaki sining ulipon nga babaye indi manginmanunubli kaupud sa akon anak, nga si Isaac.

11 Kag ang butang tama kasubu sa itololok ni Abraham bangud sang iya anak.

12 ś Kag ang Dios nagsiling kay Abraham, Dili ini magpakasubu sa imo itololok bangud sang bata, kag bangud sang imo ulipon nga babaye; ang tanan nga ginsiling sa imo ni Sara, pamatii ang iya tingug; kay sa kay Isaac tawgon ang imo kaliwat.

13 Kag himoon ko man nga isa ka pungsud ang anak sang ulipon nga babaye, bangud nga sia imo kaliwat.

14 Kag si Abraham nagbangon sing aga pa, kag nagkuha sing tinapay, kag sang suludlan sang tubig, kag ginhatag ini kay Agar, nga nagapapas-an sini sa iya abaga, kag ang bata, kag ginpalakat sia: kag nagtaliwan sia, kag nagdalangdalang sa kamingawan sang Beer-seba.

15 Kag naubus ang tubig sa suludlan, kag ginhal-id niya ang bata sa idalum sang isa sang mga kahoykahoy.

16 Kag naglakat sia, kag naglingkod sia sa atubang niya sa malayo, subong sang isa ka pagpana: kay nagsiling sia, Indi ako pagpakitaa sang kamatayon sang bata. Kag naglingkod sia sa atubang niya, kag nagtib-ong sang iya tingug, kag naghibi.

17 Kag nabatian sang Dios ang tingug sang bata; kag ang anghel sang Dios nagtawag kay Agar gikan sa langit, kag nagsiling sa iya, Ano bala ang ginapasakit mo, Agar? dili ka mahadluk; kay nabatian sang Dios ang tingug sang bata sa diin sia.

18 Tindug, hakwata ang bata, kag uyati sia sa imo kamut; kay himoon ko sia nga dakung pungsud.

19 Kag ginpasanag sang Dios ang iya mga mata, kag nakita niya ang isa ka bobon sang tubig; kag nagkadto sia, kag ginpuno sing tubig ang suludlan, kag ginpainum ang bata.

20 Kag ang Dios nag-upud sa bata; kag nagtubo sia, kag nagpuyo sa kamingawan, kag nanginmanugpana.

21 Kag nagpuyo sia sa kamingawan sang Paran: kag ginpaasawahan sia sang iya iloy gikan sa duta sang Egipto.

22 ś Kag nahanabu sa sadtong tion, nga si Abimelec kag si Picol nga punong kapitan sang iya kasoldadosan naghambal kay Abraham, nga nagasiling, Ang Dios upud sa imo sa tanan nga ginahimo mo:

23 Busa karon sumpa ka sa akon diri sa Dios nga indi mo ako paglimbongan, ukon ang akon anak nga lalaki, ukon ang akon apo nga lalaki: kondi sono sa kaayo nga nahimo ko sa imo, himoon mo sa akon, kag sa duta sa diin nagpanlugayaw ka.

24 Kag si Abraham nagsiling, Magasumpa ako.

25 Kag ginsabdong ni Abraham si Abimelec bangud sang bobon sang tubig, nga ginkuha sing lugus sang mga alagad ni Abimelec.

26 Kag si Abimelec nagsiling, Wala ako makahibalo kon sin-o ang naghimo sining butang: kag wala ikaw magsugid sa akon, kag wala pa ako makabati sini, kondi sining adlaw lamang.

27 Kag nagkuha si Abraham sing mga carnero kag mga baka, kag ginhatag sila kay Abimelec; kag nakigkatipan sila nga duha.

28 Kag si Abraham nagpain sing pito ka babaye nga cordero gikan sa panong.

29 Kag si Abimelec nagsiling kay Abraham, Ano bala ang kahologan sining pito ka babaye nga cordero nga ginpain mo?

30 Kag nagsiling sia, Bangud ining pito ka babaye nga cordero batonon mo sa akon kamut, agud nga manginsaksi sila sa akon, nga ako nagkutkut sining bobon.

31 Busa ginhingalanan niya yadtong duug Beer-seba; bangud nga didto nagsumpaanay sila nga duha.

32 Sa sini nagpakigkatipan sila sa Beer-seba: niyan nagtindug si Abimelec kag si Picol nga puno nga kapitan sang iya kasoldadosan, kag nagpauli sila sa duta sang mga Filistinhon.

33 ś Kag si Abraham nagtanum sing puong-puong sang kakahoyan sa Beer-seba, kag nagtawag didto sa ngalan sang GINOO, ang walay katapusan nga Dios.

34 Kag si Abraham nagpanlugayaw sa duta sang mga Filistinhon sa madamung adlaw.

KAPITULO 22

KAG nahanabu sa tapus sining mga butang, nga ginsulay sang Dios si Abraham, kag nagsiling sa iya, Abraham: kag nagsiling sia, Yari ako.

2 Kag nagsiling sia, Kuhaa karon ang imo anak nga lalaki, ang imo bugtong nga anak si Isaac, nga ginahigugma mo, kag kadto ka sa duta sang Moria; kag didto idolot mo sia nga halad nga sinonog sa ibabaw sang isa sang mga bukid nga akon isiling sa imo.

3 ś Kag si Abraham nagbangon sing aga pa, kag nagsiya sang iya asno, kag nagdala upud sa iya sang duha sang iya mga pamatan-on nga lalaki, kag kay Isaac nga iya anak, kag nagbis-ak sang gatong sa halad nga sinonog, kag nagtindug, kag nagkadto sa duug nga ginsiling sa iya sang Dios.

4 Niyan sa ikatlong adlaw ginbayaw ni Abraham ang iya mga mata, kag nakita ang duug sa malayo.

5 Kag si Abraham nagsiling sa iya mga pamatan-on nga lalaki, Pabilin kamo diri kaupud sang asno; kag ako kag ang pamatan-on makadto sa unhan kag masimba, kag mabalik sa inyo.

6 Kag si Abraham nagkuha sang gatong sang halad nga sinonog, kag ginpapas-an ini kay Isaac nga iya anak; kag gindala niya ang kalayo sa iya kamut, kag ang sundang; kag naglakat sila nga duha sing dungan.

7 Kag si Isaac naghambal kay Abraham nga iya amay, kag nagsiling, Amay ko: kag sia nagsiling, Yari ako, anak ko. Kag sia nagsiling, Yari karon ang kalayo kag ang gatong: apang diin bala ang cordero sa halad nga sinonog?

8 Kag si Abraham nagsiling, Anak ko, ang Dios magaaman nga iya kaugalingon sang cordero nga sa halad nga sinonog: gani nagpadayon sila nga duha sing dungan sa paglakat.

9 Kag nag-abut sila sa duug nga ginsiling sa iya sang Dios; kag si Abraham nagpatindug didto sang halaran, kag ginbangdaybangday ang gatong, kag gingapus si Isaac nga iya anak, kag gintungtung sia sa halaran sa ibabaw sang gatong.

10 Kag gin-untay ni Abraham ang iya kamut, kag ginkuha ang sundang sa pagpatay sang iya anak.

11 Kag ang anghel sang GINOO nagtawag sa iya gikan sa langit, kag nagsiling, Abraham, Abraham: kag sia nagsiling, Yari ako.

12 Kag nagsiling sia, Dili pagpatup-i sang imo kamut ang bata, ukon pag-anha sia: kay karon nakilala ko nga ikaw nagakahadluk sa Dios, sa ginatan-aw nga wala mo pag-idumili ang imo anak nga lalaki, ang imo bugtong nga anak sa akon.

13 Kag ginbayaw ni Abraham ang iya mga mata, kag nagtolok, kag yari karon sa iya likod isa ka carnero nga lalaki napukot sa iya mga sungay sa kasiotan: kag nagkadto si Abraham kag ginkuha ang carnero nga lalaki, kag gindolot sia nga halad nga sinonog sa baylo sang iya anak.

14 Kag ginhingalanan ni Abraham yadtong duug Jehovah-jireh: subong sang ginasiling tubtub karon nga adlaw, Sa bukid sang GINOO ini makit-an.

15 ś Kag ang anghel sang GINOO nagtawag kay Abraham sa ikaduhang tion gikan sa langit,

16 Kag nagsiling, Sa akon kaugalingon nagsumpa ako, nagasiling ang GINOO, tungud kay naghimo ka sining butang, kag wala mo pag-idumili ang imo anak nga lalaki, ang imo bugtong nga anak:

17 Nga sa pagpakamaayo pakamaayohon ko ikaw, kag sa pagpamuad pabuaron ko ang imo kaliwat subong sang kabitoonan sang langit, kag subong sang balas nga yara sa baybayon sang dagat; kag ang imo kaliwat magatag-iya sang gawang sang iya mga kaaway;

18 Kag sa imo kaliwat pakamaayohon ang tanan nga pungsud sang duta; bangud nagtuman ka sa akon tingug.

19 Gani nagbalik si Abraham sa iya mga pamatan-on nga lalaki, kag nagtindug sila kag nagkadto sing tingub sa Beer-seba; kag si Abraham nagpuyo sa Beer-seba.

20 ś Kag nahanabu sa tapus sining mga butang, nga ini ginsugid kay Abraham, nga nagasiling, Yari karon, si Milca, sia man nag-anak sang mga kabataan kay Nahor nga imo utud nga lalaki;

21 Si Huz nga iya panganay, si Buz nga iya utud nga lalaki, kag si Kemuel nga amay ni Aram,

22 Kag si Kesed, kag si Hazo, kag si Pildas, kag si Jidlaf, kag si Betuel.

23 Kag si Betuel nagpanganak kay Rebeca: ini sila nga walo gin-anak ni Milca kay Nahor, utud nga lalaki ni Abraham.

24 Kag ang iya babaye, nga ginhingalanan si Reuma, sia nag-anak man kay Teba, kag kay Gaham, kag kay Tahas, kag kay Maaca.

KAPITULO 23

KAG si Sara isa ka gatus kag duha ka pulo kag pito ka tuig: amo ini ang mga tuig sang kabuhi ni Sara.

2 Kag napatay si Sara sa Kiryat-arba; nga amo ang Hebron sa duta sang Canaan: kag si Abraham nag-abut sa paglalaw kay Sara, kag sa paghibi sa iya.

3 ś Kag si Abraham nagtindug gikan sa atubangan sang iya patay, kag nagpamolong sa mga anak nga lalaki ni Het, nga nagasiling,

4 Dumoloong kag manlulugayaw ako sa inyo: hatagi ninyo ako sing kaugalingon nga lulubngan upud sa inyo, agud nga malubung ko ang akon patay gikan sa akon itololok.

5 Kag ang mga anak ni Het nagsabat kay Abraham, nga nagasiling sa iya,

6 Pamatii kami, ginoo ko: ikaw prinsipe nga gamhanan sa tunga namon: sa pili sang amon mga lulubngan ilubung ang imo patay; wala sing isa sa amon nga magadumili sa imo sang iya lulubngan, kondi agud nga malubung mo ang imo patay.

7 Kag si Abraham nagtindug, kag nagyaub sia sa katawohan sang duta, bisan sa mga anak ni Het.

8 Kag nagpakigsugilanon sia sa ila, nga nagasiling, Kon kabubut-on ninyo nga ako maglubung sang akon patay gikan sa akon itololok; pamatii ako, kag patigayona ninyo ako kay Efron nga anak nga lalaki ni Zohar,

9 Agud nga ihatag niya sa akon ang lungib sang Macpela, nga iya, nga yara sa ukbung sang iya latagon; kay sa bug-os nga bili ihatag niya ini sa akon nga kaugalingon nga lulubngan sa tunga ninyo.

10 Kag si Efron nagpuyo sa tunga sang mga anak ni Het: kag nagsabat si Efron nga Hithanon kay Abraham sa idulungug sang mga anak ni Het, sa tanan nga nagsulud sa gawang sang iya siudad, nga nagasiling,

11 Indi, ginoo ko, pamatii ako: ginahatag ko sa imo ang latagon, kag ang lungib nga yara sa sini, ginahatag ko sa imo; sa atubangan sang mga anak nga lalaki sang akon katawohan ginahatag ko ini sa imo: ilubung ang imo patay.

12 Kag si Abraham nagyaub sa atubangan sang katawohan sang duta.

13 Kag nagpamolong sia kay Efron sa idulungug sang katawohan sang duta, nga nagasiling, Apang kon imo buut nga ihatag ini, ginaampo ko sa imo, pamatii ako: mahatag ako sa imo sang kuarta nga sa latagon; batona ini sa akon, kag ilubung ko didto ang akon patay.

14 Kag si Efron nagsabat kay Abraham, nga nagasiling sa iya,

15 Ginoo ko, dungga ako: ang duta nagabili sing apat ka gatus ka siclo nga pilak; ano bala ina sa tunga nimo kag nakon? busa ilubung ang imo patay.

16 Kag si Abraham nagpamati kay Efron; kag gintimbang ni Abraham kay Efron ang pilak, nga namitlang niya sa idulungug sang mga anak nga lalaki ni Het, apat ka gatus ka siclo nga pilak, sono sa mga timbang nga ginagamit sang komersyante.

17 ś Kag ang latagon ni Efron, nga yara sa Macpela, nga sa tampad sang Mamre, ang latagon, kag ang lungib nga yara sa sini, kag ang tanan nga kakahoyan nga yara sa latagon, nga yara sa tanan nga dulunan sa palibut, ginpalig-on

18 Nga kaugalingon ni Abraham sa atubangan sang mga anak ni Het, sa atubangan sang tanan nga nagsulud sa gawang sang iya siudad.

19 Kag sa tapus sini, ginlubung ni Abraham si Sara nga iya asawa sa lungib sang latagon sang Macpela sa tampad sang Mamre: nga amo ang Hebron sa duta sang Canaan.

20 Kag ang latagon, kag ang lungib nga yara sa sini, ginpalig-on sang mga anak nga lalaki ni Het nga kaugalingon nga lulubngan ni Abraham.

KAPITULO 24

KAG si Abraham tigulang na, kag sobol sa panuigon: kag ang GINOO nagpakamaayo kay Abraham sa tanan nga butang.

2 Kag si Abraham nagsiling sa iya labing tigulang nga alagad sang iya balay, nga naggahum sang tanan nga iya, Ibutang, ginaampo ko sa imo, ang imo kamut sa idalum sang akon paa:

3 Kag pasumpaon ko ikaw paagi sa GINOO, ang Dios sang langit, kag ang Dios sang duta, nga dili mo pagpaasaw-an ang akon anak gikan sa babaye nga mga anak sang mga Canaanhon, nga sa tunga nila nagapuyo ako:

4 Kondi magkadto ka sa akon duta, kag sa akon kahimataan, kag magkuha sing asawa nga sa akon anak nga si Isaac.

5 Kag ang alagad nagsiling sa iya, Basi ang babaye indi buut magsonod sa akon sa sining duta: kinahanglan bala nga dalhon ko liwat ang imo anak sa duta diin naghalin ka?

6 Kag si Abraham nagsiling sa iya, Andam ka nga dili mo pag-ibalik liwat ang akon anak didto.

7 ś Ang GINOONG Dios sang langit, nga nagkuha sa akon sa balay sang akon amay, kag sa duta sang akon kahimataan, kag nga nagpamolong sa akon, kag nga nagsumpa sa akon, nga nagasiling, Sa imo kaliwat ihatag ko ining duta; ipadala niya ang iya anghel sa una nimo, kag magkuha ka didto sing asawa nga sa akon anak.

8 Kag kon ang babaye indi buut magsonod sa imo, niyan maluwas ka sa sining akon sumpa: lamang dili mo pag-ibalik didto ang akon anak liwat.

9 Kag ang alagad nagbutang sang iya kamut sa idalum sang paa ni Abraham nga iya agalon, kag nagsumpa sa iya nahanungud sinang butang.

10 ś Kag ang alagad nagkuha sing napulo ka camelyo gikan sa mga camelyo sang iya agalon, kag nagtaliwan; kay ang tanan nga pagkabutang sang iya agalon yara sa iya kamut: kag nagtindug sia, kag nagkadto sa Mesopotamia, sa siudad ni Nahor.

11 Kag ginpaluhud niya ang iya mga camelyo sa gowa sang siudad sa luyo sang bobon sang tubig sa tion sang kahaponon, sa tion nga nagagowa ang mga babaye sa pagsag-ub sang tubig.

12 Kag nagsiling sia, O GINOONG Dios sang akon agalon nga si Abraham, ginaampo ko sa imo, hatagi ako sing kauswagan karon nga adlaw, kag pakitai sing kaayo ang akon agalon nga si Abraham.

13 Yari karon, nagatindug ako diri sa luyo sang bobon sang tubig; kag ang babaye nga mga anak sang mga tawo sang siudad nagagowa sa pagsag-ub sang tubig:

14 Kag pahanabu-a, nga ang dalaga nga sa iya magsiling ako, Ipapanaug ang imo tibud, ginaampo ko sa imo, agud nga makainum ako; kag sia magasiling, Inum ka, kag paimnon ko man ang imo mga camelyo: mangin-amo sia ang ginpat-ud mo nga sa imo alagad nga si Isaac; kag sa sina mahibaloan ko nga nagpakita ka sing kaayo sa akon agalon.

15 ś Kag nahanabu, sang wala pa sia makatapus sa paghambal, nga, yari karon, si Rebeca, nga natawo kay Betuel, anak nga lalaki ni Milca, ang asawa ni Nahor, utud nga lalaki ni Abraham, naggowa nga nagapas-an sang iya tibud.

16 Kag ang dalaga tama kaanyag nga tolokon, isa ka ulay, kag wala pa sia makilala sang lalaki: kag nagdulhog sia sa bobon, kag nagpuno sang iya tibud, kag nagtaklad.

17 Kag ang alagad nagdalagan sa pagsugata sa iya, kag nagsiling, Ginaampo ko sa imo, paimna ako sing diotay nga tubig sa imo tibud.

18 Kag nagsiling sia, Inum ka, ginoo ko: kag nagdalidali sia, kag nagpapanaug sa iya kamut sang iya tibud, kag ginpainum niya sia.

19 Kag sang nakatapus sia sa pagpainum sa iya, nagsiling sia, Magasag-ub ako sang tubig nga sa imo man mga camelyo, tubtub nga makatapus sila sa pag-inum.

20 Kag nagdalidali sia, kag ginbobo ang iya tibud sa palaimnan, kag nagdalagan liwat sa bobon sa pagsag-ub sang tubig, kag nagsag-ub nga sa tanan niya nga camelyo.

21 Kag ang tawo nga nagatolok sa iya naghipus, sa pagsayud kon ang GINOO nagpauswag ukon wala sang iya panlakatan.

22 Kag nahanabu, sang nakatapus sa pag-inum ang mga camelyo, nga nagkuha ang tawo sing isa ka aritos nga bulawan nga nagatimbang sing tunga sa siclo, kag duha ka pulsera nga sa iya mga kamut nga nagatimbang sing napulo ka siclo nga bulawan;

23 Kag nagsiling, Kay sin-o ka bala anak nga babaye? sugiri ako, ginaampo ko sa imo: may hulut bala sa balay sang imo amay nga madayonan namon?

24 Kag nagsiling sia sa iya, Anak nga babaye ako ni Betuel nga anak nga lalaki ni Milca, nga gin-anak niya kay Nahor.

25 Labut pa nagsiling sia sa iya, May tuman kami nga dagami kag kompay, kag hulut nga dayonan.

26 Kag ang tawo nagduko, kag nagsimba sa GINOO.

27 Kag nagsiling sia, Pakamaayohon ang GINOONG Dios sang akon agalon nga si Abraham, nga wala magpabiya sang iya kalooy kag sang iya kamatooran sa akon agalon: ako nga yara sa dalanon, gintuytuyan ako sang GINOO sa balay sang mga utud sang akon agalon.

28 Kag ang dalaga nagdalagan, kag nagsugid sa panimalay sang iya iloy sining mga butang.

29 ś Kag si Rebeca may utud nga lalaki, kag ang iya ngalan amo si Laban: kag si Laban nagdalagan sa gowa pakadto sa tawo, sa bobon.

30 Kag nahanabu, sang nakita niya ang aritos kag ang mga pulsera sa mga kamut sang iya utud nga babaye, kag sang nakabati sia sang mga polong ni Rebeca nga iya utud, nga nagasiling, Amo ini ang ginpamolong sang tawo sa akon; nga nagkadto sia sa tawo; kag, yari karon, nagatindug sia sa luyo sang mga camelyo sa bobon.

31 Kag nagsiling sia, Sulud ka, ikaw nga ginpakamaayo sang GINOO; ngaa bala nga nagatindug ka sa gowa? kay naaman ko ang balay, kag ang hulut nga sa mga camelyo.

32 ś Kag ang tawo nagsulud sa balay: kag ginhukasan niya ang iya mga camelyo, kag ginhatagan sing dagami kag kompay nga sa mga camelyo, kag tubig sa paghinaw sang iya mga tiil, kag sang mga tiil sang mga tawo nga nag-upud sa iya.

33 Kag ginbutangan sia sing kalan-on sa atubangan niya sa pagkaon: apang sia nagsiling, Indi ako magkaon, tubtub nga masugid ko ang akon katuyoan. Kag sia nagsiling, Ihambal.

34 Kag nagsiling sia, Alagad ako ni Abraham.

35 Kag ang GINOO nagpakamaayo sing daku sa akon agalon; kag nangindaku sia: kag ginhatagan niya sia sing mga panong, kag mga kahayupan, kag pilak, kag bulawan, kag mga alagad nga lalaki, kag mga alagad nga babaye, kag mga camelyo, kag mga asno.

36 Kag si Sara nga asawa sang akon agalon nag-anak sa iya katigulangon sing lalaki sa akon agalon: kag sa iya ginhatag ni Abraham ang tanan nga iya.

37 Kag ginpasumpa ako sang akon agalon, nga nagasiling, Dili ka magkuha sing asawa nga sa akon anak gikan sa babaye nga mga anak sang mga Canaanhon, nga sa ila duta nagapuyo ako:

38 Kondi magkadto ka sa panimalay sang akon amay, kag sa akon kahimataan, kag magkuha sing asawa nga sa akon anak.

39 Kag nagsiling ako sa akon agalon, Basi ang babaye indi buut magsonod sa akon.

40 Kag nagsiling sia sa akon, Ang GINOO, nga sa iya atubangan nagalakat ako, magapadala sang iya anghel upud sa imo, kag magapauswag sang imo dalanon; kag magkuha ka sing asawa nga sa akon anak sa akon kahimataan, kag sa panimalay sang akon amay:

41 Niyan maluwas ka sa sining akon sumpa, kon makaabut ka sa akon kahimataan; kag kon indi nila pag-ihatag sia sa imo, maluwas ka sa akon sumpa.

42 Kag nag-abut ako sining adlaw sa bobon, kag nagsiling, O GINOONG Dios sang akon agalon nga si Abraham, kon karon ginapauswag mo ang akon dalanon nga ginalakatan ko:

43 Yari karon, nagatindug ako sa luyo sang bobon sang tubig; kag mahanabu, nga kon ang ulay nga maggowa sa pagsag-ub sang tubig, kag magsiling ako sa iya, Tagai ako, ginaampo ko sa imo, sing diotay nga tubig nga mainum sa imo tibud;

44 Kag magsiling sia sa akon, Inum ka, kag magasag-ub ako nga sa imo man mga camelyo: mangin-amo sia ang babaye nga ginpat-ud sang GINOO nga sa anak sang akon agalon.

45 Kag sang wala pa ako makatapus sa paghambal sa akon tagiposoon, yari karon, si Rebeca naggowa nga nagapas-an sang iya tibud; kag nagdulhog sia sa bobon, kag nagsag-ub sang tubig: kag nagsiling ako sa iya, Paimna ako, ginaampo ko sa imo.

46 Kag nagdalidali sia, kag nagpapanaug sang iya tibud gikan sa iya abaga, kag nagsiling, Inum ka, kag ang imo mga camelyo paimnon ko man: gani nag-inum ako, kag ginpainum niya ang mga camelyo man.

47 Kag ginpamangkot ko sia, kag nagsiling, Kay sin-o ka bala anak? Kag sia nagsiling, Anak ni Betuel, anak nga lalaki ni Nahor, nga gin-anak sa iya ni Milca: kag ginbutang ko ang aritos sa iya nawung, kag ang mga pulsera sa iya mga kamut.

48 Kag nagduko ako, kag nagsimba sa GINOO, kag nagpakamaayo sang GINOONG Dios sang akon agalon nga si Abraham, nga nagtuytuy sa akon sa husto nga dalanon sa pagkuha sang babaye nga anak sang utud nga lalaki sang akon agalon nga sa iya anak nga lalaki.

49 Kag karon kon kamo magmainamomahon kag magmaminatud-on sa akon agalon, sugiri ako: kag kon indi, sugiri ako; agud nga magliso ako sa too, ukon sa wala.

50 Niyan si Laban kag si Betuel nagsabat kag nagsiling, Ang butang nagagikan sa GINOO: indi kami makapamolong sa imo sing malain ukon maayo.

51 Yari karon, si Rebeca yara sa atubangan mo, kuhaa sia, kag maglakat, kag ipaasawa sia sa anak sang imo agalon, subong sang napamolong sang GINOO.

52 Kag nahanabu, nga, sang nabatian sang alagad ni Abraham ang ila mga polong, nagsimba sia sa GINOO, nga nagayaub sa duta.

53 Kag nagkuha ang alagad sing mga alahas nga pilak, kag mga alahas nga bulawan, kag mga panapton, kag ginhatag sila kay Rebeca: ginhatagan man niya sing bilidhon nga mga butang ang iya utud nga lalaki kag ang iya iloy.

54 Kag sila nagkaon kag nag-inum, sia kag ang mga tawo nga nag-upud sa iya, kag nagpabilin sila sing bug-os nga gab-i; kag nagbangon sila sang pagkaaga, kag nagsiling sia, Papauli-a ako sa akon agalon.

55 Kag ang iya utud nga lalaki kag ang iya iloy nagsiling, Papabilina ang dalaga upud sa amon sing pila ka adlaw, sa kubus gid napulo; ugaling magalakat sia.

56 Kag nagsiling sia sa ila, Indi ninyo ako pag-upangi, sanglit nga ginpauswag sang GINOO ang akon dalanon; palakta ako agud nga makapauli ako sa akon agalon.

57 Kag nagsiling sila, Tawgon namon ang dalaga, kag pamangkoton sia.

58 Kag gintawag nila si Rebeca, kag nagsiling sa iya, Magaupud ka bala sa sining lalaki? Kag nagsiling sia, Magaupud ako.

59 Kag ginpalakat nila si Rebeca nga ila utud nga babaye, kag ang iya yaya, kag ang alagad ni Abraham, kag ang iya mga tawo.

60 Kag ginpakamaayo nila si Rebeca, kag nagsiling sa iya, Ikaw utud namon, mangin-iloy ka sa mga linibo sang mga milyon, kag ang imo kaliwat magtag-iya sang gawang sang mga nagadumut sa ila.

61 ś Kag nagtindug si Rebeca, kag ang iya kadalagahan, kag nagsakay sila sa mga camelyo, kag nagsonod sa tawo: kag ang alagad nagdala kay Rebeca, kag naglakat sa iya dalanon.

62 Kag si Isaac naghalin gikan sa dalanon sang bobon nga Lahai-roi; kay nagapuyo sia sa duta sang bagatnan.

63 Kag naggowa si Isaac sa pagpamalandong sa latagon sa kahaponon: kag ginbayaw niya ang iya mga mata, kag nakakita, kag, yari karon, ang mga camelyo nagapakari.

64 Kag si Rebeca nagbayaw sang iya mga mata, kag sang nakita niya si Isaac, nagpanaug sia sa camelyo.

65 Kay nagsiling sia sa alagad, Sin-o bala ining lalaki nga nagalakat sa latagon sa pagsugata sa aton? Kag ang alagad nagsiling, Ini amo ang akon agalon: gani nagkuha sia sang isa ka takurong, kag nanabon sia.

66 Kag ang alagad nagsugid kay Isaac sang tanan nga butang nga nahimo niya.

67 Kag si Isaac nagdala sa iya sa layanglayang sang iya iloy nga si Sara, kag ginkuha si Rebeca, kag nangin-asawa niya sia; kag ginhigugma niya sia: kag si Isaac ginlipay sa tapus sang kamatayon sang iya iloy.

KAPITULO 25

NIYAN si Abraham nagpangasawa liwat, kag ang iya ngalan si Cetura.

2 Kag nag-anak sia sa iya kay Zimram, kag kay Jocsan, kag kay Medan, kag kay Midian, kag kay Isbac, kag kay Sua.

3 Kag si Jocsan nagpanganak kay Sheba, kag kay Dedan. Kag ang mga anak nga lalaki ni Dedan amo si Asurim, kag si Letusim, kag si Leumim.

4 Kag ang mga anak nga lalaki ni Midian; si Efa, kag si Efer, kag si Hanoc, kag si Abida, kag si Eldaa. Ini tanan amo ang mga anak ni Cetura.

5 ś Kag ginhatag ni Abraham kay Isaac ang tanan nga iya.

6 Apang sa mga anak nga lalaki sang mga oloasawa ni Abraham, naghatag si Abraham sing mga regalo, kag ginpadala niya sila sa malayo kay Isaac nga iya anak, sang sia nagakabuhi pa, nayon sa sidlangan, sa duta sang sidlangan.

7 Kag amo ini ang mga adlaw sang mga tuig sang kabuhi ni Abraham nga iya ginkabuhi, isa ka gatus kag kapitoan kag lima ka tuig.

8 Niyan nabugto ang ginhawa ni Abraham, kag napatay sa maayo nga katigulangon, tigulang nga tawo, kag bug-os sang tinuig; kag ginsimpon sa iya katawohan.

9 Kag ginlubung sia ni Isaac kag ni Ismael nga iya mga anak nga lalaki sa lungib sang Macpela, sa latagon ni Efron nga anak nga lalaki ni Zohar nga Hithanon, nga yara sa tampad sang Mamre;

10 Ang latagon nga ginbakal ni Abraham sa mga anak nga lalaki ni Het: didto ginlubung si Abraham, kag si Sara nga iya asawa.

11 ś Kag nahanabu sa tapus sang pagkapatay ni Abraham, nga ginpakamaayo sang Dios si Isaac nga iya anak; kag si Isaac nagpuyo sa luyo sang bobon nga Lahai-roi.

12 ś Karon ini sila amo ang mga kaliwatan ni Ismael, anak nga lalaki ni Abraham, nga gin-anak kay Abraham ni Agar nga Egiptohanon, sologoon nga babaye ni Sara:

13 Kag ini sila amo ang mga ngalan sang lalaki nga mga anak ni Ismael, sono sa ila mga ngalan, sono sa ila mga kaliwatan: ang panganay ni Ismael, si Nebayot; kag si Kedar, kag si Adbeel, kag si Mibsam,

14 Kag si Misma, kag si Duma, kag si Masa,

15 Si Hadar, kag si Tema, si Jetur, si Nafis, kag si Kedema:

16 Ini sila amo ang lalaki nga mga anak ni Ismael, kag ini amo ang ila mga ngalan, sono sa ila mga banwa, kag sono sa ila mga kastilyo; napulog duha ka prinsipe sono sa ila mga pungsud.

17 Kag ini amo ang mga tuig sang kabuhi ni Ismael, isa ka gatus kag katloan kag pito ka tuig: kag nabugto ang ginhawa niya kag napatay; kag ginsimpon sa iya katawohan.

18 Kag nagpuyo sila kutub sa Havila tubtub sa Sur, nga yara sa tampad sang Egipto, sa nagapakadto ka sa Asiria: kag napatay sia sa atubang sang tanan niya nga mga utud.

19 ś Kag ini sila amo ang mga kaliwatan ni Isaac, anak nga lalaki ni Abraham: si Abraham nagpanganak kay Isaac:

20 Kag si Isaac kap-atan ka tuig sang pagpangasawa niya kay Rebeca, ang babaye nga anak ni Betuel nga Sirianhon sang Padan-aram, ang utud nga babaye ni Laban nga Sirianhon.

21 Kag nagpangamuyo si Isaac sa GINOO tungud sa iya asawa, bangud nga baw-as sia: kag ang GINOO nagtugut sang iya pangamuyo, kag nagpanamkon si Rebeca nga iya asawa.

22 Kag ang mga bata nagdumug sa sulud niya; kag nagsiling sia, Kon amo ini, ngaa bala amo ako sini? Kag nagkadto sia sa pagpakiana sa GINOO.

23 Kag ang GINOO nagsiling sa iya, Duha ka pungsud ang yara sa imo taguangkan, kag duha ka sahi sang katawohan ang bahinon gikan sa imo mga kasudlan; kag ang isa ka katawohan mangin mabakud pa sang sa isa ka katawohan; kag ang magulang magaalagad sa kamanghuran.

24 ś Kag sang pagkatuman sang iya mga adlaw sa pag-anak, yari karon, may kapid sa iya taguangkan.

25 Kag ang nahauna nga naggowa mapula, ang bug-os niya nga lawas subong sang panapton nga bulbulon; kag ginhingalanan nila sia Esau.

26 Kag sang olihi naggowa ang iya utud nga lalaki, kag ang iya kamut nagkapyot sa tikod ni Esau; kag ginhingalanan sia Jacob: kag si Isaac kan-uman ka tuig sang pag-anak ni Rebeca sa ila.

27 Kag nagdalagku ang mga bata nga lalaki: kag si Esau sampaton nga mangangayam, isa ka tawo sang latagon; kag si Jacob isa ka tawo nga maligdong, nga nagapuyo sa mga layanglayang.

28 Kag ginhigugma ni Isaac si Esau, bangud nga nagkaon sia sang iya pinangayaman: apang ginhigugma ni Rebeca si Jacob.

29 ś Kag si Jacob nagluto sing linaga: kag si Esau nag-abut gikan sa latagon, kag maluya sia:

30 Kag si Esau nagsiling kay Jacob, Pakaona ako, ginaampo ko sa imo, sinang mapula nga linaga; kay maluya ako: busa ginhingalanan sia Edom.

31 Kag si Jacob nagsiling, Ibaligya sa akon sining adlaw ang imo kinamatarung sa pagkapanganay.

32 Kag si Esau nagsiling, Yari karon, tagumatayon ako: kag ano bala ang kapuslanan sa akon sang kinamatarung sang pagkapanganay?

33 Kag si Jacob nagsiling, Sumpa ka sa akon sining adlaw; kag nagsumpa sia sa iya: kag ginbaligya niya kay Jacob ang iya kinamatarung nga pagkapanganay.

34 Niyan ginhatagan ni Jacob si Esau sing tinapay kag linaga nga mga lentejas; kag nagkaon sia kag nag-inum, kag nagtindug, kag naglakat: sa amo gintamay ni Esau ang iya kinamatarung nga pagkapanganay.

KAPITULO 26

KAG may tiggulutum sa duta, luwas sang nahauna nga tiggulutum nga nag-abut sa mga adlaw ni Abraham. Kag si Isaac nagkadto kay Abimelec nga hari sang mga Filistinhon sa Gerar.

2 Kag ang GINOO nagpahayag sa iya, kag nagsiling, Dili ka magdolhog sa Egipto; puyo ka sa duta nga isiling ko sa imo:

3 Panlugayaw ka sa sining duta, kag magaupud ako sa imo, kag magapakamaayo sa imo; kay sa imo, kag sa imo kaliwat, igahatag ko ini tanan nga mga duta, kag tumanon ko ang sumpa nga ginsumpa ko kay Abraham nga imo amay;

4 Kag pabuaron ko ang imo kaliwat subong sang kabitoonan sang langit, kag magahatag sa imo kaliwat sini tanan nga mga duta; kag ang tanan nga mga pungsud sang duta pakamaayohon paagi sa imo kaliwat;

5 Bangud nga nagtuman si Abraham sa akon tingug, kag naghuput sang akon tinulin, sang akon mga sogo, sang akon mga palatukuran, kag sang akon mga kasogoan.

6 ś Kag si Isaac nagpuyo sa Gerar:

7 Kag nagpamangkot sa iya ang mga tawo sang duug nahanungud sa iya asawa; kag nagsiling sia, Utud ko sia: kay nahadluk sia sa pagsiling, Sia akon asawa; basi, siling niya, ang mga tawo sang duug magpatay sa akon bangud kay Rebeca; bangud nga maanyag sia nga tolokon.

8 Kag nahanabu, sang madugay na sia didto, nga si Abimelec nga hari sang mga Filistinhon naggawa sa bintana, kag nakakita, kag, yari karon, si Isaac nagaangga kay Rebeca nga iya asawa.

9 Kag gintawag ni Abimelec si Isaac, kag nagsiling, Yari karon, matuud sia imo asawa: kag paano bala nga nagsiling ka, Utud ko sia? Kag si Isaac nagsiling sa iya, Kay ako nagsiling, Basi mapatay ako bangud sa iya.

10 Kag si Abimelec nagsiling, Ano bala ining ginhimo mo sa amon? ang isa sang mga tawo mahapus makahulid kuntani sa imo asawa, kag nakadala ka kuntani sa amon sing paglapas.

11 Kag si Abimelec nagtulin sa bug-os niyang katawohan, nga nagasiling, Ang magtandug sa sining tawo ukon sa iya asawa, sa pagkamatuud patyon sia.

12 Niyan nagsab-ug si Isaac sa sadtong duta, kag nagpatubas sa amo nga tuig sing isa ka gatus ka pilo: kag ginpakamaayo sia sang GINOO.

13 Kag ang lalaki nagmanggaron, kag nagpadayon, kag nagtubo tubtub nga nagtama gid kadaku:

14 Kay nagtag-iya sia sing mga panong, kag nagtag-iya sia sing mga kahayupan, kag madamu nga alagad: kag nahisa sa iya ang mga Filistinhon.

15 Kay ang tanan nga bobon nga ginkutkut sang mga alagad sang iya amay sa mga adlaw ni Abraham nga iya amay, gintampokan sang mga Filistinhon, kag ginpuno sila sing duta.

16 Kag si Abimelec nagsiling kay Isaac, Halin ka sa amon; kay gamhanan ka pa sa amon.

17 ś Kag si Isaac nagtaliwan gikan didto, kag nagpahamtang sang iya layanglayang sa nalupyakan sang Gerar, kag nagpuyo didto.

18 Kag ginkutkut liwat ni Isaac ang mga bobon sang tubig, nga ginkutkut nila sa mga adlaw ni Abraham nga iya amay; kay ang mga Filistinhon nagtampok sa ila sa tapus sang pagkapatay ni Abraham: kag ginhingalanan niya sila sa mga ngalan nga gintawag sa ila sang iya amay.

19 Kag nagkutkut ang mga alagad ni Isaac sa nalupyakan, kag nakakita didto sang isa ka bobon nga ang tubig nagapuswak.

20 Kag ang mga manugbantay sang kahayupan sa Gerar nagpakigsuay sa mga manugbantay sang kahayupan ni Isaac, nga nagasiling, Amon ang tubig: kag ginhingalanan niya ang bobon Esec; bangud nga nagsuay sila sa iya.

21 Kag nagkutkut sila sing isa pa ka bobon, kag nagsuay man sila nahanungud sina: kag ginhingalanan niya ini Sitna.

22 Kag naghalin sia gikan didto, kag nagkutkut sing isa pa ka bobon; kag wala sila magsuay nahanungud sina: kag ginhingalanan niya ini Rehobot; kag sia nagsiling, Kay karon ang GINOO naghatag sa aton sing duug, kag magamabungahon kita sa duta.

23 Kag nagtaklad sia gikan didto pa Beer-seba.

24 Kag nagpahayag sa iya ang GINOO sa among gab-i, kag nagsiling, Ako amo ang Dios ni Abraham nga imo amay: dili ka mahadluk, kay nagaupud ako sa imo, kag magapakamaayo sa imo, kag magapabuad sang imo kaliwat tungud kay Abraham nga akon alagad.

25 Kag nagpatindug sia didto sing halaran, kag nagpanawag sa ngalan sang GINOO, kag nagpatindug sang iya layanglayang didto: kag ang mga alagad ni Isaac nagkutkut didto sing isa ka bobon.

26 ś Niyan si Abimelec nagkadto sa iya gikan sa Gerar, kag si Ahuzat nga isa sang iya mga abyan, kag si Picol nga punong kapitan sang iya kasoldadosan.

27 Kag si Isaac nagsiling sa ila, Ngaa bala nagkari kamo sa akon, sanglit nga gindumtan ninyo ako, kag ginsobol ninyo ako gikan sa inyo?

28 Kag nagsiling sila, Nakita namon sing maathag nga ang GINOO upud sa imo: kag nagsiling kami, Magmangin-may sumpa karon sa tunga naton, bisan sa tunga namon kag nimo, kag magpakigkatipan kami sa imo;

29 Nga indi mo kami paghimoan sing malain, subong nga kami wala magtandug sa imo, kag subong nga wala kami sing nahimo sa imo kondi maayo, kag ginpalakat ka sa paghidait: ikaw karon ang ginapakamaayo sang GINOO.

30 Kag sia naghiwat sing sinalosalo sa ila, kag nagkaon kag nag-inum sila.

31 Kag nagbangon sila sing aga pa kag nagsumpaanay: kag si Isaac nagpalakat sa ila, kag nagtaliwan sila gikan sa iya sa paghidait.

32 Kag nahanabu sa among adlaw, nga nag-abut ang mga alagad ni Isaac, kag nagsugid sa iya nahanungud sang bobon nga nakutkut nila, kag nagsiling sa iya, Nakakita kami sing tubig.

33 Kag ginhingalanan niya ini Shebah: busa ang ngalan sang siudad amo ang Beer-seba tubtub sining adlaw.

34 ś Kag si Esau kap-atan ka tuig sang nagpangasawa sia kay Judit nga anak ni Beeri nga Hithanon, kag kay Basmet nga anak ni Elon nga Hithanon:

35 Nga nangin-kasubu sa panghunahuna ni Isaac kag ni Rebeca.

KAPITULO 27

KAG nahanabu, nga sang tigulang na si Isaac, kag ang iya mga mata nagdulum, sa bagay nga indi na sia makakita, gintawag niya si Esau nga anak nga lalaki niya nga magulang, kag nagsiling sa iya, Anak ko: kag nagsiling sia sa iya, Yari ako.

2 Kag nagsiling sia, Yari karon, tigulang na ako, wala ako makahibalo sang adlaw sang akon kamatayon:

3 Niyan karon, ginaampo ko sa imo, kuhaa ang imo mga hinganiban, ang imo baslayan kag ang imo pana, kag gowa ka sa latagon, kag dalhan ako sang pinangayaman;

4 Kag himoi ako sing manamit nga pagkaon, subong sang naluyagan ko, kag dalha ini sa akon, agud nga magkaon ako; agud nga ang akon kalag magapakamaayo sa imo sa wala pa ako mapatay.

5 Kag si Rebeca nakabati sang nagpamolong si Isaac kay Esau nga iya anak. Kag nagkadto si Esau sa latagon sa pagpangayam sang sapat, kag sa pagdala sini.

6 ś Kag si Rebeca naghambal kay Jacob nga iya anak, nga nagasiling, Yari karon, nabatian ko ang imo amay nga nagapamolong kay Esau nga imo utud, nga nagasiling,

7 Dalhi ako sing pinangayaman, kag himoi ako sing manamit nga pagkaon, agud nga makakaon ako, kag magpakamaayo sa imo sa atubangan sang GINOO sa wala pa ako mapatay.

8 Busa karon, anak ko, tumana ang akon tingug sono sa ginasogo ko sa imo.

9 Kadto ka karon sa panong, kag gikan sini dalhi ako sing duha ka maayong tinday sang kanding; kag himoon ko sila nga manamit nga pagkaon nga sa imo amay, subong sang iya naluyagan:

10 Kag dalhon mo ini sa imo amay, nga makaon niya, kag agud nga pakamaayohon ka niya sa wala pa sia mapatay.

11 Kag si Jacob nagsiling kay Rebeca nga iya iloy, Yari karon, si Esau nga akon utud bulbulon nga lalaki, kag ako bulog nga lalaki:

12 Basi hikapon ako sang akon amay, kag manginsubong ako nga malimbongon sa iya; kag magadala ako sa akon sing isa ka pakamalaut, kag indi pakamaayo.

13 Kag ang iya iloy nagsiling sa iya, Sa akon ang pakamalaut sa imo, anak ko: tumana lamang ang akon tingug, kag lakat, dalha sila sa akon.

14 Kag naglakat sia, kag nagkuha, kag nagdala sini sa iya iloy: kag ang iya iloy naghimo sing manamit nga pagkaon, subong sang naluyagan sang iya amay.

15 Kag ginkuha ni Rebeca ang maayo-ayo nga mga panapton ni Esau nga iya anak nga magulang, nga yara sa iya sa balay, kag ginpasuklub sila kay Jacob nga iya anak nga manghud:

16 Kag ang mga panit sang mga tinday sang mga kanding ginpasuksuk ni Rebeca sa iya mga kamut, kag sa iya liog diin wala sing bulbul:

17 Kag ginhatag niya ang manamit nga pagkaon kag ang tinapay, nga gin-aman niya, sa kamut ni Jacob nga iya anak.

18 ś Kag nagkadto sia sa iya amay, kag nagsiling, Amay ko: kag sia nagsiling, Yari ako; sin-o ka bala, anak ako?

19 Kag si Jacob nagsiling sa iya amay, Ako si Esau nga imo panganay; nahimo ko ang sono sa ginsogo mo sa akon: bangon, ginaampo ko sa imo, lingkod kag kaona ang akon pinangayaman, agud nga ang imo kalag magapakamaayo sa akon.

20 Kag si Isaac nagsiling sa iya anak, Paano bala nga nakakita ka sini sing tama kadali, anak ko? Kag sia nagsiling, Bangud nga ang GINOO nga imo Dios nagdala sini sa akon.

21 Kag si Isaac nagsiling kay Jacob, Palapit ka, ginaampo ko sa imo, agud nga mahikap ko ikaw, anak ko, kon ikaw akon totoo nga anak nga si Esau ukon indi.

22 Kag nagpalapit si Jacob sa iya amay nga si Isaac; kag sia naghikap sa iya, kag nagsiling, Ang tingug iya ni Jacob tingug, apang ang mga kamut mga kamut ni Esau.

23 Kag wala niya makilala sia, bangud nga ang iya mga kamut bulbulon, subong sang mga kamut ni Esau nga iya utud: gani ginpakamaayo niya sia.

24 Kag nagsiling sia, Ikaw bala ang totoo ko nga anak nga si Esau? Kag nagsiling sia, Amo ako.

25 Kag nagsiling sia, Ipalapit ini sa akon, kag magakaon ako sang pinangayaman sang akon anak, agud nga ang akon kalag magapakamaayo sa imo. Kag ginpalapit niya ini sa iya, kag nagkaon sia: kag gindalhan niya sia sing alak, kag nag-inum sia.

26 Kag nagsiling sa iya si Isaac nga iya amay, Palapit ka karon, kag haluki ako, anak ko.

27 Kag nagpalapit sia, kag ginhalukan sia: kag napaninghutan niya ang baho sang iya panapton, kag ginpakamaayo sia, kag nagsiling, Ah, ang baho sang akon anak subong sang baho sang latagon nga ginpakamaayo sang GINOO:

28 Busa ang Dios maghatag sa imo sang ton-og sang langit, kag sang katambok sang duta, kag bugana nga uyas kag alak:

29 Mag-alagad sa imo ang katawohan, kag ang mga pungsud magyaub sa imo: magginoo ka sa imo mga utud, kag magyaub sa imo ang mga anak nga lalaki sang imo iloy: pakamalauton ang tagsatagsa nga nagapakamalaut sa imo, kag pakamaayohon ang nagapakamaayo sa imo.

30 ś Kag nahanabu, sang nakatapus si Isaac sa pagpakamaayo kay Jacob, kag sang halus lamang makagowa si Jacob gikan sa atubangan ni Isaac nga iya amay, nga si Esau nga iya utud nag-abut gikan sa iya pagpangayam.

31 Kag naghimo man sia sing manamit nga pagkaon, kag nagdala sini sa iya amay, kag nagsiling sa iya amay, Magbangon ang akon amay, kag magkaon sang pinangayaman sang iya anak, agud nga pakamaayohon ako sang imo kalag.

32 Kag si Isaac nga iya amay nagsiling sa iya, Sin-o bala ikaw? Kag nagsiling sia, Ako ang imo anak, ang imo panganay nga si Esau.

33 Kag si Isaac nagkurug sing lakas, kag nagsiling, Sin-o? diin bala sia nga nagkuha sang pinangayaman, kag nagdala sini sa akon, kag nakaon ko ang tanan sa wala pa ikaw mag-abut, kag ginpakamaayo sia? hoo, kag pagapakamaayohon sia.

34 Kag sang pagkabati ni Esau sang mga polong sang iya amay, naghibi sia sing lakas kag tuman gid kapait nga paghibi, kag nagsiling sa iya amay, Pakamaayoha ako, bisan ako man, O amay ko.

35 Kag nagsiling sia, Nagkari ang imo utud nga may limbong, kag nakuha niya ang imo pagpakamaayo.

36 Kag sia nagsiling, Indi bala sia ginhingalanan sing matarung nga Jacob? kay sa makaduha gin-agawan niya ako: ginkuha niya ang akon kinamatarung nga pagkapanganay; kag, yari karon, ginkuha niya karon ang akon pagpakamaayo. Kag nagsiling sia, Wala ka bala sing natigana nga pagpakamaayo sa akon?

37 Kag si Isaac nagsabat kag nagsiling kay Esau, Yari karon, ginhimo ko sia nga ginoo mo, kag ginhatag ko sa iya nga mga alagad ang tanan niya nga utud; kag ginsakdag ko sia sang uyas kag sang alak: kag ano bala ang mahimo ko karon sa imo, anak ko?

38 Kag si Esau nagsiling sa iya amay, Isa lamang bala ang imo pagpakamaayo, amay ko? pakamaayoha ako, bisan ako man, O amay ko. Kag gintib-ong ni Esau ang iya tingug, kag naghibi.

39 Kag si Isaac nga iya amay nagsabat kag nagsiling sa iya, Yari karon, ang imo puluy-an mangin ang katambok sang duta, kag sa ton-og sang langit sa ibabaw;

40 Kag paagi sa imo espada magakabuhi ka, kag sa imo utud magaalagad ka; kag mahanabu kon ikaw ang maggahum, nga balion mo ang iya gota sa imo liog.

41 ś Kag gindumtan ni Esau si Jacob bangud sang pagpakamaayo nga ginpakamaayo sa iya sang iya amay: kag si Esau nagsiling sa iya tagiposoon, Malapit na ang mga adlaw sang paglalaw sa akon amay; niyan patyon ko si Jacob nga akon utud.

42 Kag ginsugid kay Rebeca ining mga polong ni Esau nga iya anak nga magulang: kag ginpakadtoan niya kag ginpatawag si Jacob nga iya anak nga manghud, kag nagsiling sa iya, Yari karon, ang imo utud nga si Esau, nagalipay sa iya kaugalingon nahanungud sa imo, nagatuyo sa pagpatay sa imo.

43 Busa karon, anak ko, tumana ang akon tingug; kag tindug, palagyo ka pakadto kay Laban nga akon utud nga lalaki sa Haran;

44 Kag pabilin ka sa iya sing pila ka adlaw, tubtub nga mag-ugdaw ang kasingkal sang imo utud;

45 Tubtub mag-ugdaw ang kaakig sang imo utud sa imo, kag malipat sia sang ginhimo mo sa iya: niyan pakadtoan ko, kag ipakuha ikaw gikan didto: ngaa bala mawalaan man ako sa inyong duha sa isa ka adlaw?

46 Kag nagsiling si Rebeca kay Isaac, Ginatak-an ako sang akon kabuhi bangud sang mga babaye nga anak ni Het: kon si Jacob magpangasawa sa mga anak nga babaye ni Het, subong sining sa ila sang mga anak nga babaye sang duta, ano bala ang kapuslanan sang akon kabuhi sa akon?

KAPITULO 28

KAG gintawag ni Isaac si Jacob, kag ginpakamaayo sia, kag gintulinan sia, kag nagsiling sa iya, Dili ka magpangasawa sa isa sang mga anak nga babaye sang Canaan.

2 Tindug ka, kadto sa Padan-aram, sa balay ni Betuel nga amay sang imo iloy; kag pangasawa ka gikan didto sa isa sang mga anak nga babaye ni Laban nga utud sang imo iloy.

3 Kag ang Dios nga Makaako magpakamaayo sa imo, kag maghimo sa imo nga mabungahon, kag magpabuad sa imo, agud nga manginkabon ka sang katawohan;

4 Kag maghatag sa imo sang pagpakamaayo ni Abraham, sa imo, kag sa imo kaliwat upud sa imo; agud nga mapanubli mo ang duta nga sa diin ikaw dumoloong, nga ginhatag sang Dios kay Abraham.

5 Kag ginpalakat ni Isaac si Jacob: kag nagkadto sia sa Padan-aram kay Laban, anak nga lalaki ni Betuel nga Sirianhon, ang utud nga lalaki ni Rebeca, iloy ni Jacob kag ni Esau.

6 ś Sang nakita ni Esau nga ginpakamaayo ni Isaac si Jacob, kag ginpalakat sia sa Padan-aram, sa pagpangasawa didto; kag nga sang ginpakamaayo niya sia gintulinan niya sia, nga nagasiling, Dili ka magpangasawa sa isa sang mga anak nga babaye sang Canaan;

7 Kag nga si Jacob nagtuman sa iya amay kag sa iya iloy, kag nagkadto sa Padan-aram;

8 Kag sang nakita ni Esau nga ang mga babaye nga anak sang Canaan wala mahamut-i ni Isaac nga iya amay;

9 Niyan nagkadto si Esau kay Ismael, kag gindugang sa iya mga asawa si Mahalat nga anak nga babaye ni Ismael nga anak nga lalaki ni Abraham, ang utud nga babaye ni Nebayot, nga mangin iya asawa.

10 ś Kag si Jacob naghalin sa Beer-seba, kag nagpadulong sa Haran.

11 Kag nag-abut sia sa isa ka duug, kag nagpabilin didto sang bilog nga gab-i, bangud nga natunud na ang adlaw; kag nagkuha sia sang mga bato sa sinang duug, kag iya gin-onlan ang mga ini, kag naghigda sa sadtong duug sa pagtolog.

12 Kag nagdamgo sia, kag yari karon may isa ka hagdan nga ginpatindug sa duta, kag ang ukbung sini naglambut sa langit: kag yari karon ang mga anghel sang Dios nagasaka kag nagapanaug sa sini.

13 Kag, yari karon, ang GINOO nagtindug sa ibabaw sini, kag nagsiling, Ako ang GINOONG Dios ni Abraham nga imo amay, kag ang Dios ni Isaac: ang duta nga imo ginahigdaan, igahatag ko ini sa imo, kag sa imo kaliwat;

14 Kag ang imo kaliwat manginsubong sang yab-ok sang duta, kag magalapnag ka sa katundan, kag sa sidlangan, kag sa aminhan, kag sa bagatnan: kag paagi sa imo kag sa imo kaliwat pakamaayohon ang tanan nga mga panimalay sang duta.

15 Kag, yari karon, nagaupud ako sa imo, kag magabantay sa imo sa tanan nga duug nga imo pagakadtoan, kag magapabalik sa imo sa sining duta; kay indi ako magbiya sa imo, tubtub nga mahimo ko ang akon ginpamolong sa imo.

16 ś Kag nagmata si Jacob sa iya katologon, kag nagsiling sia, Sa pagkamatuud ang GINOO yari sa sining duug; kag wala ako makahibalo sini.

17 Kag hinadlukan sia, kag nagsiling, Daw ano ka makakulugmat sining duug! indi ini iban kondi balay sang Dios, kag ini amo ang gawang sang langit.

18 Kag nagbangon si Jacob sing aga pa, kag ginkuha ang bato nga iya gin-onlan, kag ginpatindug ini nga haligi, kag ginboboan sing lana ang ibabaw sini.

19 Kag ginhingalanan niya yadtong duug Bet-el: apang ang ngalan anay sang sadtong siudad amo ang Luz.

20 Kag si Jacob naghimo sang saad, nga nagasiling, Kon mag-upud ang Dios sa akon, kag magbantay sa akon sa sining dalanon nga akon ginalakatan, kag maghatag sa akon sing pagkaon nga kaonon, kag panapton nga isuklub,

21 Sa bagay nga magabalik ako sa paghidait sa balay sang akon amay; niyan ang GINOO mangin-akon Dios:

22 Kag ining bato, nga akon ginpatindug nga haligi, manginbalay sang Dios: kag sa tanan nga ihatag mo sa akon ihatag ko sing totoo ang ikapulo sa imo.

KAPITULO 29

NIYAN nagpadayon si Jacob sang iya panlakatan, kag nag-abut sa duta sang katawohan sang sidlangan.

2 Kag nagtolok sia, kag yari karon isa ka bobon sa latagon, kag, yari karon, may tatlo ka panong sang carnero nga nagaluko sa luyo sini; kay gikan sa sadtong bobon ginpainum nila ang mga panong: kag isa ka daku nga bato sa baba sang bobon.

3 Kag nagtipon didto ang tanan nga mga panong: kag ginpaligid nila ang bato gikan sa baba sang bobon, kag ginpainum ang mga carnero, kag gin-uli ang bato sa baba sang bobon sa iya duug.

4 Kag si Jacob nagsiling sa ila, Mga utud ko, tagadiin bala kamo? Kag nagsiling sila, Taga-Haran kami.

5 Kag nagsiling sia sa ila, Kilala bala ninyo si Laban nga anak nga lalaki ni Nahor? Kag sila nagsiling, Kilala namon sia.

6 Kag nagsiling sia sa ila, Maayo bala sia? Kag sila nagsiling, Maayo sia: kag, yari karon, si Raquel nga iya anak nga babaye nagapakari upud sa mga carnero.

7 Kag nagsiling sia, Yari karon, mataas pa ang adlaw, indi pa ini tion sa pagtipon sang kahayupan sing tingub: paimna ninyo ang mga carnero, kag lakat kag pahalba sila.

8 Kag nagsiling sila, Indi kami makasarang, tubtub nga matipon ang tanan nga mga panong sing tingub, kag tubtub nga mapaligid nila ang bato gikan sa baba sang bobon; ugaling mapainum namon ang mga carnero.

9 ś Kag sang nagapakighambal pa sia sa ila, si Raquel nag-abut upud ang mga carnero sang iya amay: kay sia nagbantay sa ila.

10 Kag nahanabu, sang nakita ni Jacob si Raquel nga anak nga babaye ni Laban nga utud nga lalaki sang iya iloy, kag ang mga carnero ni Laban nga utud nga lalaki sang iya iloy, nga nagpalapit si Jacob, kag ginpaligid ang bato gikan sa baba sang bobon, kag ginpainum ang panong ni Laban nga utud sang iya iloy.

11 Kag si Jacob naghaluk kay Raquel, kag gintib-ong ang iya tingug, kag naghibi.

12 Kag si Jacob nagsugid kay Raquel nga sia utud sang iya amay, kag nga anak sia ni Rebeca: kag nagdalagan sia kag nagsugid sa iya amay.

13 Kag nahanabu, sang pagkabati ni Laban sang mga balita nahanungud kay Jacob nga anak sang iya utud nga babaye, nga nagdalagan sia sa pagsugata sa iya, kag ginhakus sia, kag ginhalukan sia, kag gindala sia sa iya balay. Kag sia nagsugid kay Laban sini tanan nga butang.

14 Kag si Laban nagsiling sa iya, Sa pagkamatuud ikaw tul-an ko kag unud ko. Kag nagpabilin sia upud sa iya sing isa ka bulan.

15 ś Kag si Laban nagsiling kay Jacob, Bangud ikaw akon utud, busa magaalagad ka bala sa akon sa wala sing ano? sugiri ako, ano bala ang imo sohol?

16 Kag si Laban may duha ka anak nga babaye: ang ngalan sang magulang si Lea, kag ang ngalan sang manghud si Raquel.

17 Ang mga mata ni Lea huluy; apang si Raquel matahum kag maanyag.

18 Kag si Jacob naghigugma kay Raquel; kag nagsiling, Ako magapangagad sa imo sing pito ka tuig tungud kay Raquel, nga imo anak nga manghud.

19 Kag si Laban nagsiling, Maayo pa nga ihatag ko sia sa imo, sang sa ihatag ko sia sa iban nga tawo: pabilin ka sa akon.

20 Kag si Jacob nagpangagad sing pito ka tuig tungud kay Raquel; kag daw pila lamang ka adlaw sila sa iya, bangud sang gugma niya sa iya.

21 ś Kag si Jacob nagsiling kay Laban, Ihatag sa akon ang akon asawa, kay natuman na ang akon mga adlaw, agud nga maghiusa ako sa iya.

22 Kag gintipon ni Laban ang tanan nga lalaki sang duug, kag naghiwat sang sinalosalo.

23 Kag nahanabu sa kagab-ihon, nga ginkuha niya si Lea nga iya anak nga babaye, kag gindala sia kay Jacob; kag naghiusa sia sa iya.

24 Kag ginhatag ni Laban ang iya sologoon nga babaye nga si Zilpa nga sologoon sa iya anak nga si Lea.

25 Kag nahanabu, nga sang kaagahon, yari karon, si Lea gali: kag sia nagsiling kay Laban, Ano bala ini ang ginhimo mo sa akon? wala bala ako magpangagad sa imo tungud kay Raquel? ngaa bala nga ginlimbongan mo ako?

26 Kag si Laban nagsiling, Wala ginahimoa ang subong sini sa amon duug, sa paghatag sang manghud sing una sa panganay.

27 Bug-osa ang iya semana sini, kag ihatag namon sa imo ang isa man tungud sa pagpangagad mo sa akon sa pito pa ka tuig.

28 Kag ginhimo ini ni Jacob, kag ginbug-os ang semana niya: kag ginpaasawa niya sa iya si Raquel man nga iya anak.

29 Kag ginhatag ni Laban ang iya sologoon nga babaye nga si Bilha nga sologoon sa iya anak nga si Raquel.

30 Kag naghiusa man sia kay Raquel, kag ginhigugma man niya si Raquel sing labi kay Lea, kag nagpangagad sa iya sing pito pa ka tuig.

31 ś Kag sang nakita sang GINOO nga si Lea gindumtan, ginbuksan niya ang iya taguangkan: apang si Raquel baw-as.

32 Kag nagpanamkon si Lea, kag nag-anak sing lalaki, kag ginhingalanan niya sia Ruben: kay nagsiling sia, Sa pagkamatuud gintolok sang GINOO ang akon kapipit-an; gani karon ang akon bana magahigugma sa akon.

33 Kag nagpanamkon sia liwat, kag nag-anak sing lalaki; kag nagsiling, Bangud ang GINOO nakabati nga ako gindumtan, gani ginhatagan niya ako sining anak man: kag ginhingalanan niya sia Simeon.

34 Kag nagpanamkon sia liwat, kag nag-anak sing lalaki; kag nagsiling, Karon sa sining tion magatingub sa akon ang akon bana, bangud nga ginpangankan ko sia sing tatlo ka anak: busa ginhingalanan sia Levi.

35 Kag nagpanamkon sia liwat, kag nag-anak sing lalaki: kag nagsiling sia, Karon dayawon ko ang GINOO: busa ginhingalanan niya sia Juda; kag nag-untat sa pag-anak.

KAPITULO 30

KAG sang nakita ni Raquel nga wala sia magpanganak nga kay Jacob, nahisa si Raquel sa iya utud nga babaye; kag nagsiling kay Jacob, Hatagi ako sing mga anak, ukon indi, mapatay ako.

2 Kag si Jacob nagpangakig kay Raquel: kag nagsiling sia, Tal-us bala ako sang Dios, nga nagpugung sa imo sang bunga sang imo taguangkan?

3 Kag sia nagsiling, Yari ang akon sologoon nga si Bilha, hiusa ka sa iya; kag mag-anak sia sa ibabaw sang akon mga tuhud, agud nga ako man makaagum sing mga anak paagi sa iya.

4 Kag ginpaasawa niya sa iya si Bilha nga iya sologoon: kag si Jacob naghiusa sa iya.

5 Kag nagpanamkon si Bilha, kag nag-anak kay Jacob sing lalaki.

6 Kag si Raquel nagsiling, Ginhukman ako sang Dios, kag ginpamatian man ang akon tingug, kag ginhatagan ako sing anak: busa ginhingalanan niya sia Dan.

7 Kag nagpanamkon liwat si Bilha nga sologoon ni Raquel, kag nag-anak sing ikaduha nga lalaki kay Jacob.

8 Kag si Raquel nagsiling, Sa makusug nga mga pagdumug nakigdumug ako sa akon utud, kag nagdaug ako: kag ginhingalanan niya sia Neftali.

9 Sang nakita ni Lea nga nag-untat sia sa pag-anak, ginkuha niya si Zilpa nga iya sologoon, kag ginpaasawa sia kay Jacob.

10 Kag si Zilpa nga sologoon ni Lea nag-anak kay Jacob sing lalaki.

11 Kag si Lea nagsiling, Ang hubon nagapakari: kag ginhingalanan niya sia Gad.

12 Kag si Zilpa nga sologoon ni Lea nag-anak kay Jacob sing ikaduha nga lalaki.

13 Kag nagsiling si Lea, Malipayon ako, kay ang mga anak nga babaye magatawag sa akon bulahan: kag ginhingalanan niya sia Aser.

14 ś Kag si Ruben nagkadto sa mga adlaw sang ani sang trigo, kag nakakita sia sing mga mandragora sa latagon, kag gindala sila kay Lea nga iya iloy. Niyan nagsiling si Raquel kay Lea, Hatagi ako, ginaampo ko sa imo, sang mga mandragora sang imo anak.

15 Kag sia nagsiling sa iya, Diotay bala nga butang nga ang akon bana ginkuha mo? kag kuhaon mo pa bala ang mga mandragora sang akon anak? Kag si Raquel nagsiling, Busa magahulid sia sa imo sining gab-i bangud sang mga mandragora sang imo anak.

16 Kag si Jacob nagpauli gikan sa latagon sa kahaponon, kag si Lea naggowa sa pagsugata sa iya, kag nagsiling, Kinahanglan nga maghiusa ka sa akon; kay sa pagkamatuud ginsoholan ko ikaw sang mga mandragora sang akon anak. Kag naghulid sia sa iya sadtong gab-i.

17 Kag ginpamatian sang Dios si Lea, kag nagpanamkon sia, kag nag-anak kay Jacob sing ikalima nga lalaki.

18 Kag nagsiling si Lea, Ang Dios naghatag sa akon sang akon sohol, bangud nga ginhatag ko ang akon sologoon sa akon bana: kag ginhingalanan niya sia Isacar.

19 Kag nagpanamkon si Lea liwat, kag nag-anak kay Jacob sing ikan-um nga lalaki.

20 Kag si Lea nagsiling, Ang Dios naghatag sa akon sing maayo nga dote; karon magapuyo ang akon bana upud sa akon, bangud nga ginpangankan ko sia sing anum ka lalaki: kag ginhingalanan niya sia Zabulon.

21 Kag sang olihi nag-anak sia sing babaye, kag ginhingalanan sia Dina.

22 ś Kag nadumduman sang Dios si Raquel, kag ginpamatian sia sang Dios, kag ginbuksan ang iya taguangkan.

23 Kag nagpanamkon sia, kag nag-anak sing lalaki; kag nagsiling, ginkuha sang Dios ang akon kahuluy-an:

24 Kag ginhingalanan niya sia Jose; kag nagsiling, Ang GINOO magadugang sa akon sing isa pa ka anak nga lalaki.

25 ś Kag nahanabu, sang si Raquel nakaanak kay Jose, nga si Jacob nagsiling kay Laban, Palakta ako, agud nga makapauli ako sa akon duug, kag sa akon duta.

26 Ihatag sa akon ang akon mga asawa kag ang akon mga anak, nga tungud sa ila nag-alagad ako sa imo, kag palakta ako: kay nakahibalo ka sang akon pag-alagad nga ginhimo ko sa imo.

27 Kag si Laban nagsiling sa iya, Ginaampo ko sa imo, kon ako nakapahamuut sa imo mga mata, pabilin ka: kay naton-an ko paagi sa eksperiensya nga ang GINOO nagpakamaayo sa akon bangud sa imo.

28 Kag sia nagsiling, Ipat-ud sa akon ang imo sohol, kag ihatag ko ini.

29 Kag sia nagsiling sa iya, Ikaw nakahibalo kon daw ano nga pag-alagad ko sa imo, kag kon paano ang kahimtangan sang imo kahayupan sa akon.

30 Kay diotay ang imo sang wala pa ako mag-abut, kag karon nagdugang ini nga nangin-kadam-an; kag ang GINOO nagpakamaayo sa imo kutub sa pag-abut ko: kag karon san-o pa bala magapanigana ako tungud sa akon kaugalingon nga panimalay man?

31 Kag sia nagsiling, Ano bala ang ihatag ko sa imo? Kag si Jacob nagsiling, Indi ka maghatag sa akon sang bisan ano: kon himoon mo ining butang sa akon, pahalbon ko liwat kag bantayan ang imo panong:

32 Magaagi ako karon nga adlaw sa tunga sang bug-os mong panong, nga nagapanguha sang tanan nga pintokpintokon kag kambang nga kahayupan, kag sang tanan nga kaki nga kahayupan sa tunga sang mga carnero, kag sang kambang kag pintokpintokon sa tunga sang mga kanding: kag mangin-akon sohol ang kasubong sini.

33 Gani ang akon pagkamatarung magasabat tungud sa akon sa palaabuton nga tion, kon ini mabaton ko nga akon sohol sa atubangan sang imo nawung: ang tagsa nga indi pintokpintokon kag kambang sa tunga sang mga kanding, kag kaki sa tunga sang mga carnero, ina isipon nga kinawat ko.

34 Kag si Laban nagsiling, Yari karon, kabay manginsono ini sa imo polong.

35 Kag ginkuha niya sadtong adlaw ang lalaki nga mga kanding nga guraygurayon kag kambang, kag ang tanan nga mga babaye nga kanding nga may pintokpintokon kag kambang, kag ang tagsa nga may puti, kag ang tanan nga kaki sa tunga sang mga carnero, kag ginhatag sila sa kamut sang iya mga anak nga lalaki.

36 Kag ginbutangan niya sing kalayoon nga tatlo ka adlaw nga lakton sa tunga niya kag ni Jacob: kag si Jacob nagpahalab sang nabilin nga mga panong ni Laban.

37 ś Kag nagkuha si Jacob sing mga sanga sang malagtum nga alamo, kag sang avelyano kag castanyo nga kahoy; kag ginpanitan sila sing gurayguray nga puti, kag ginpadayag ang puti nga yara sa mga sanga.

38 Kag ginbutang niya ang mga sanga nga iya ginpanitan sa atubang sang mga panong sa mga tarog sang tubig sa mga palaimnan sang pag-abut sang mga panong sa pag-inum, agud nga sila magapanamkon kon sila magkari sa pag-inum.

39 Kag nagpanamkon ang mga panong sa atubang sang mga sanga, kag nagbata sang kahayupan nga guraygurayon, pintokpintokon, kag kambang.

40 Kag ginpain ni Jacob ang mga cordero, kag ginpaatubang ang mga panong sa mga guraygurayon, kag ang tanan nga kaki sa panong ni Laban; kag ginbutang niya ang iya kaugalingon nga mga panong sing pain, kag wala niya pag-isimpon sila sa kahayupan ni Laban.

41 Kag nahanabu, sa bisan san-o nga magpanamkon ang labi pa kabakud nga kahayupan, nga si Jacob nagbutang sang mga sanga sa atubang sang mga mata sang kahayupan sa mga palaimnan, agud nga magpanamkon sila sa tunga sang mga sanga.

42 Apang kon ang kahayupan maluya, wala niya sila ginbutang: gani ang mga labi pa kaluya iya ni Laban, kag ang mga labi pa kabakud iya ni Jacob.

43 Kag ang tawo nagdaku sing lakas, kag may madamung kahayupan, kag mga alagad nga babaye, kag mga alagad nga lalaki, kag mga camelyo, kag mga asno.

KAPITULO 31

KAG nabatian niya ang mga polong sang mga anak nga lalaki ni Laban, nga nagasiling, ginkuha ni Jacob ang tanan nga iya sang aton amay; kag sang iya sang aton amay nag-angkon sia sining tanan nga himaya.

2 Kag nakita ni Jacob ang nawung ni Laban, kag, yari karon, indi na ayon sa iya subong sang sa una.

3 Kag ang GINOO nagsiling kay Jacob, Balik ka sa duta sang imo kaamayan, kag sa imo kahimataan; kag ako magaupud sa imo.

4 Kag ginpakadtoan ni Jacob kag ginpatawag si Raquel kag si Lea sa latagon sa iya panong,

5 Kag nagsiling sa ila, Nakita ko ang nawung sang inyo amay, nga indi na ayon sa akon subong sang sa una; apang ang Dios sang akon amay nag-upud sa akon.

6 Kag kamo nakahibalo nga sa akon bug-os nga ikasarang nag-alagad ako sa inyo amay.

7 Kag ang inyo amay nagdaya sa akon, kag nagbaylo sang akon sohol sing makapulo; apang ang Dios wala magtugut sa iya sa paghalit sa akon.

8 Kon sia nagsiling sing subong sini, Ang pintokpintokon mangin-imo sohol; niyan ang bug-os nga kahayupan nagbata sang pintokpintokon: kag kon nagsiling sia sing subong sini, Ang mga guraygurayon mangin-imo sohol; niyan ang bug-os nga kahayupan nagbata sing mga guraygurayon.

9 Sa amo ginkuha sang Dios ang kahayupan sang inyo amay, kag ginhatag sila sa akon.

10 Kag nahanabu sang tion nga ang kahayupan nagpanamkon, nga ginbayaw ko ang akon mga mata, kag nakita sa damgo, kag, yari karon, ang mga lalaki nga kanding nga nagtalakba sa kahayupan mga guraygurayon, pintokpintokon, kag kambang.

11 Kag naghambal sa akon ang anghel sang Dios sa damgo, nga nagasiling, Jacob: Kag nagsiling ako, Yari ako.

12 Kag nagsiling sia, Bayawa karon ang imo mga mata, kag tan-awa, ang tanan nga mga lalaki nga kanding nga nagatalakba sa kahayupan mga guraygurayon, pintokpintokon, kag kambang: kay nakita ko ang tanan nga ginahimo sa imo ni Laban.

13 Ako ang Dios sang Bet-el, diin ginhaplas mo ang haligi, kag diin ikaw naghimo sang saad sa akon: tindug ka karon, gowa ka sa sining duta, kag balik sa duta sang imo kahimataan.

14 Kag nagsabat si Raquel kag si Lea sa iya, May bahin pa bala ukon panublion kami sa panimalay sang amon amay?

15 Wala bala niya kami pag-isipa subong nga mga dumoloong? kay ginbaligya niya kami, kag ginlamon pa niya ang amon kuarta.

16 Kay ang tanan nga manggad nga ginkuha sang Dios sa amon amay, amon ina, kag ila sang amon mga anak: busa karon, ang bisan ano man nga ginsiling sang Dios sa imo, himoa.

17 ś Niyan nagtindug si Jacob, kag ginpasakay ang iya mga anak nga lalaki kag ang iya mga asawa sa mga camelyo;

18 Kag gindala niya ang bug-os niya nga kahayupan, kag ang bug-os niya nga pagkabutang nga iya natipon, ang kahayupan nga iya ginkuha, nga iya natipon sa Padan-aram, sa pagbalik kay Isaac nga iya amay sa duta sang Canaan.

19 Kag si Laban nagkadto sa pag-alot sang iya mga carnero: kag ginkawat ni Raquel ang mga imahen nga iya sang iya amay.

20 Kag naglakat sing kawat si Jacob gikan kay Laban nga Siriahanon, nga wala niya sia pagsugiri nga magapalagyo sia.

21 Gani nagpalagyo sia pati ang tanan nga iya; kag nagtindug sia, kag nagtabok sa suba, kag gin-atubang niya ang bukid nga Galaad.

22 Kag ginsugid ini kay Laban sa ikatlong adlaw nga si Jacob nagpalagyo.

23 Kag gindala niya ang iya mga utud upud sa iya, kag naglagas sa iya sing pito ka adlaw nga pagpanlakatan; kag nalambut nila sia sa bukid nga Galaad.

24 Kag nag-abut ang Dios kay Laban nga Siriahanon sa damgo sang gab-i, kag nagsiling sa iya, Andam nga dili ka magsiling kay Jacob sing bisan maayo ukon malain.

25 ś Niyan nalambut ni Laban si Jacob. Karon si Jacob nagpahamtang sang iya layanglayang sa bukid: kag si Laban upud ang iya mga utud nagpahamtang sa bukid nga Galaad.

26 Kag nagsiling si Laban kay Jacob, Ano bala ang ginhimo mo, nga naglakat ka sing kawat palayo sa akon, kag gindala ang akon mga anak nga babaye, subong mga bihag sa espada?

27 Ngaa bala nagpalagyo ka sa tago, kag naglakat sing kawat palayo sa akon; kag wala mo ako pagpahibaloa, agud mapalakat ko ikaw nga may kasadya, kag mga amba, may mga tambor, kag may arpa?

28 Kag wala mo ako pagpahaluka sa akon mga anak nga lalaki kag sa akon mga anak nga babaye? karon naghimo ka sang binuang sa sining ginhimo mo.

29 Yari sa gahum sang akon kamut ang paghalit sa imo: apang ang Dios sang imo amay nagpamolong sa akon kagab-i, nga nagasiling, Andam nga dili ikaw magpamolong kay Jacob sing bisan maayo ukon malain.

30 Kag karon, bisan pa nga buut mo nga maglakat, bangud nga ginahidlaw gid ikaw sa panimalay sang imo amay, apang ngaa bala ginkawat mo ang akon mga dios?

31 Kag si Jacob nagsabat kag nagsiling kay Laban, Bangud nga ginhadlukan ako: kay ako nagsiling, Basi kon bawion mo sa akon sa lugus ang imo mga anak nga babaye.

32 Sa bisan kay sin-o makita mo ang imo mga dios, indi sia magkabuhi: sa atubangan sang amon mga utud kilalaha ang yari sa akon nga imo, kag kuhaa ini. Kay si Jacob wala makahibalo nga ginkawat sila ni Raquel.

33 Kag nagsulud si Laban sa layanglayang ni Jacob, kag sa layanglayang ni Lea, kag sa layanglayang sang duha ka sologoon nga babaye; apang wala niya makita sila. Niyan naggowa sia sa layanglayang ni Lea, kag nagsulud sa layanglayang ni Raquel.

34 Karon ginkuha ni Raquel ang mga imahen, kag ginbutang sila sa siyasiya sang camelyo, kag ginlingkoran sila. Kag gin-usisa ni Laban ang bug-os nga layanglayang, apang wala makita sila.

35 Kag nagsiling sia sa iya amay, Dili maakig ang akon ginoo nga indi ako makatindug sa atubangan nimo; kay yari sa akon ang kinaugali sang mga babaye. Kag nag-usisa sia, apang wala makita ang mga imahen.

36 ś Kag si Jacob nagsingkal, kag nagbangig kay Laban: kag si Jacob nagsabat kag nagsiling kay Laban, Ano bala ang akon linapas? ano bala ang akon sala, nga ginlagas mo ako sing tama ka singkal?

37 Bisan gin-usisa mo ang tanan ko nga galamiton, ano bala ang nakita mo sang tanan nga galamiton sang imo panimalay? ibutang ini diri sa atubangan sang akon mga utud kag sang imo mga utud, agud nga maghukom sila sa tunga naton nga duha.

38 Sining duha ka pulo ka tuig nagpuyo ako sa imo; ang imo mga babaye nga carnero kag ang imo mga babaye nga kanding wala mahar-asi, kag ang mga lalaki nga carnero sang imo panong wala ako makakaon.

39 Yadtong ginkusnit sang mga sapat wala ko pagdalha sa imo; ako nagbayad sang nadula; sa akon kamut ginkinahanglan mo ini, bisan pa ang kinawat sa adlaw, ukon ang kinawat sa gab-i.

40 Subong ako sini; sa adlaw ginhagas ako sang kamala, kag sa gab-i sang tugnaw; kag ang akon katologon nalagyo sa akon mga mata.

41 Subong ako sini sa duha ka pulo ka tuig sa imo balay; nagpangagad ako sa imo sing napulog apat ka tuig tungud sa imo duha ka anak nga babaye, kag anum ka tuig tungud sa imo kahayupan: kag ginbaylohan mo sing makapulo ang akon sohol.

42 Kon ang Dios sang akon amay, ang Dios ni Abraham, kag ang kahadluk ni Isaac, wala mag-upud sa akon, sa pagkamatuud karon napalakat mo ako nga wala sing dala. Nakita sang Dios ang akon kapipit-an kag ang pangabudlay sang akon mga kamut, kag ginsabdong ka kagab-i.

43 ś Kag nagsabat si Laban kag nagsiling kay Jacob, Ining mga anak nga babaye akon mga anak, kag ining kabataan akon kabataan, kag ining kahayupan akon kahayupan, kag ang tanan nga ginatan-aw mo akon: kag ano bala ang sarang ko mahimo sa sining adlaw sa sining akon mga anak nga babaye, ukon sa ila kabataan nga gin-anak nila?

44 Busa, kari ka karon, maghimo kita sing katipan, ako kag ikaw; kag manginsaksi ini sa tunga nakon kag nimo.

45 Kag si Jacob nagkuha sing isa ka bato, kag ginpatindug niya ini nga haligi.

46 Kag si Jacob nagsiling sa iya mga utud, Tipon kamo sing mga bato; kag nagkuha sila sing mga bato, kag naghimo sing isa ka tumpok: kag nagkaon sila didto sa ibabaw sang tinumpok.

47 Kag ginhingalanan ini ni Laban nga Jegar-sahaduta: apang ginhingalanan ini ni Jacob nga Galeed.

48 Kag nagsiling si Laban, Ining tinumpok saksi karon nga adlaw sa tunga nakon kag nimo. Busa ginhingalanan ini Galeed;

49 Kag Mizpa; kay nagsiling sia, Magbantay ang GINOO sa tunga nakon kag nimo, kon kita wala sa isa kag isa.

50 Kon paantuson mo ang akon mga anak nga babaye, ukon kon magpangasawa ka luwas sa akon mga anak, wala sing tawo nga magaupud sa aton; hibaloa, saksi ang Dios sa tunga nakon kag nimo.

51 Kag si Laban nagsiling kay Jacob, Tan-awa ining tinumpok, kag tan-awa ining haligi, nga ginpatindug ko sa tunga nakon kag nimo;

52 Ining tinumpok manginsaksi, kag ining haligi manginsaksi, nga indi ako maglakbay sa sining tinumpok pakadto sa imo, kag nga indi ikaw maglakbay sa sining tinumpok kag sa sining haligi pakadto sa akon, sa paghalit.

53 Ang Dios ni Abraham, kag ang Dios ni Nahor, ang Dios sang ila amay, maghukom sa tunga naton. Kag si Jacob nagsumpa sa kahadluk ni Isaac nga iya amay.

54 Niyan si Jacob nagdolot sing halad sa ibabaw sang bukid, kag gintawag ang iya mga utud sa pagkaon sing kalan-on: kag nagkaon sila sing kalan-on, kag nagpabilin sa bug-os nga gab-i sa bukid.

55 Kag sa aga pa si Laban nagbangon, kag naghaluk sa iya mga anak nga lalaki kag sa iya mga anak nga babaye, kag ginpakamaayo sila: kag si Laban nagtaliwan, kag nagpauli sa iya duug.

KAPITULO 32

KAG si Jacob nagpadayon sa iya dalanon, kag ginsugata sia sang mga anghel sang Dios.

2 Kag sang nakita ni Jacob sila, sia nagsiling, Ini kasoldadosan sang Dios: kag ginhingalanan niya yadtong duug Mahanaim.

3 Kag si Jacob nagpadala sing mga manugbalita sa una niya sa kay Esau nga utud niya sa duta sang Seir, ang duta sang Edom.

4 Kag nagsogo sia sa ila, nga nagasiling, Amo ini ang isiling ninyo sa akon ginoo nga si Esau; Amo ini ang ginasiling sang imo alagad nga si Jacob, Ako nagpanlugayaw sa kay Laban, kag nagdugay didto tubtub karon:

5 Kag may kabakahan ako, kag mga asno, mga panong, kag mga alagad nga lalaki, kag mga alagad nga babaye: kag nagpadala ako sa pagsugid sa akon ginoo, agud nga makakita ako sing bugay sa imo itololok.

6 ś Kag ang mga manugbalita nagbalik kay Jacob, nga nagasiling, Nakadangat kami sa imo utud nga si Esau, kag nagapakari sia sa pagsugata sa imo man, kag apat ka gatus ka tawo kaupud niya.

7 Niyan si Jacob hinadlukan sing daku kag nagkalisud: kag ginbahinbahin niya ang mga tawo nga upud sa iya, kag ang mga panong, kag ang mga kahayupan, kag ang mga camelyo, sa duha ka hut-ong;

8 Kag nagsiling, Kon mag-abut si Esau sa isa ka hut-ong, kag laglagon ini, niyan ang nabilin nga hut-ong makapalagyo.

9 ś Kag nagsiling si Jacob, O Dios sang akon amay nga si Abraham, kag Dios sang akon amay nga si Isaac, ang GINOO nga nagsiling sa akon, Balik sa imo duta, kag sa imo kahimataan, kag ako magahimo sa imo sing maayo:

10 Indi ako takus sang kubus gid sang tanan nga mga kalooy, kag sang tanan nga kamatooran, nga imo ginpakita sa imo alagad; kay upud sa akon sungkud natabok ko ining Jordan; kag karon nagduha ako ka hut-ong.

11 Luwasa ako, ginaampo ko sa imo, sa kamut sang akon utud, sa kamut ni Esau: kay nahadluk ako sa iya, kay basi mag-abut sia kag laglagon ako, kag ang iloy kaupud sang kabataan.

12 Kag ikaw nagsiling, Sa pagkamatuud magahimo ako sa imo sing maayo, kag magahimo sang imo kaliwat subong sang balas sang dagat, nga indi sarang maisip bangud sang kadamuon.

13 ś Kag nagpabilin sia didto sadtong gab-i; kag nagkuha sang yara sa iya sing regalo nga sa kay Esau nga iya utud;

14 Duha ka gatus ka kanding nga babaye, kag duha ka pulo ka kanding nga lalaki, duha ka gatus ka carnero nga babaye, kag duha ka pulo ka carnero nga lalaki,

15 Katloan ka gatasan nga camelyo pati ang ila mga tinday, kap-atan ka baka nga babaye, kag napulo ka baka nga lalaki, duha ka pulo ka asno nga babaye, kag pulo ka tinday.

16 Kag gintugyan niya sila sa kamut sang iya mga alagad, tagsa ka manada sing pahain; kag nagsiling sa iya mga alagad, Tabok kamo sing una sa akon, kag butangan sing antad sa tunga sang manada kag manada.

17 Kag nagsogo sia sa nahauna, nga nagasiling, Kon masugata ka ni Esau nga akon utud, kag pamangkoton ka, nga nagasiling, Kay sin-o ka bala? kag diin ka makadto? kag kay sin-o bala ini sila sa una nimo?

18 Niyan magsiling ka, Iya sila sang imo alagad nga si Jacob; regalo ini nga ginpadala sa akon ginoo nga si Esau: kag, yari karon, sia yara sa olihi man namon.

19 Kag subong man nagsogo sia sa ikaduha, kag sa ikatlo, kag sa tanan nga nagsonod sa mga manada, nga nagasiling, Sa sining bagay magahambal kamo kay Esau, kon makita ninyo sia.

20 Kag labut pa isiling ninyo, Yari karon, ang imo alagad nga si Jacob yara sa olihi namon. Kay sia nagsiling, Palugpayan ko sia sing regalo nga nagauna sa akon, kag ugaling magatan-aw ako sang iya nawung; basi batonon niya ako.

21 Gani ang regalo nag-una sa iya: kag sia iya nagpabilin sadtong gab-i sa hut-ong.

22 Kag nagtindug sia sadtong gab-i, kag ginkuha ang iya duha ka asawa, kag ang iya duha ka mga alagad nga babaye, kag ang iya napulo kag isa ka anak nga lalaki, kag nagtabok sa ubogan sang Jabok.

23 Kag ginkuha niya sila, kag ginpatabok sila sa sapa, kag ginpadala ang tanan nga iya.

24 ś Kag nabilin si Jacob nga isa lamang; kag nagpakigdumug sa iya ang isa ka lalaki tubtub sa pamanagbanag sang adlaw.

25 Kag sang nakita niya nga indi sia makalandas sa iya, gintandug niya ang lutalutahan sang iya paa; kag nagliw-as ang lutalutahan sang paa ni Jacob, sang sia nagapakigdumug sa iya.

26 Kag sia nagsiling, Buhii ako, kay nagapamanagbanag na ang adlaw. Kag sia nagsiling, Indi ko ikaw pagbuhian, kon indi mo ako pagpakamaayohon.

27 Kag sia nagsiling sa iya, Ano bala ang imo ngalan? Kag sia nagsiling, Si Jacob.

28 Kag sia nagsiling, Indi ka na pagtawgon Jacob, kondi Israel: kay kasubong sa prinsipe ikaw may gahum upud sa Dios kag upud sa mga tawo, kag naglandas.

29 Kag si Jacob nagpamangkot sa iya, kag nagsiling, Sugiri ako, ginaampo ko sa imo, sang imo ngalan. Kag sia nagsiling, Ngaa bala nagapamangkot ka sang akon ngalan? Kag ginpakamaayo sia niya didto.

30 Kag ginhingalanan ni Jacob ang duug Peniel: kay nakita ko ang Dios sa nawung kag nawung, kag naluwas ang kabuhi ko.

31 Kag ginsubangan sia sang adlaw sang nagtabok sia sa Penuel, kag nagasampayud sia sa iya paa.

32 Busa ang kaanakan ni Israel wala nagakaon sang lanitlanit nga nagkupus, nga yara sa lutalutahan sang paa, tubtub sining adlaw: bangud gintandug niya ang lutalutahan sang paa ni Jacob sa lanitlanit nga nagkupus.

KAPITULO 33

KAG ginbayaw ni Jacob ang iya mga mata, kag naglantaw, kag, yari karon, si Esau nagapakari, kag upud sa iya apat ka gatus ka tawo. Kag ginbahinbahin niya ang kaanakan kay Lea, kag kay Raquel, kag sa duha ka sologoon nga babaye.

2 Kag ginbutang niya ang mga sologoon nga babaye kag ang ila kabataan sa una, kag sa madason si Lea kag ang iya kabataan, kag si Raquel kag si Jose sa olihi gid.

3 Kag sia nag-una sa ila, kag nagyaub sa duta sing makapito, tubtub nga nagpalapit sia sa iya utud.

4 Kag si Esau nagdalagan sa pagsugata sa iya, kag ginhakus sia, kag nagkupo sa iya liog, kag naghaluk sa iya: kag naghibi sila.

5 Kag sia nagbayaw sang iya mga mata, kag nakit-an ang mga babaye kag ang kabataan; kag nagsiling, Sin-o bala ini sila nga kaupud mo? Kag sia nagsiling, Ang kabataan nga ginhatag sing mainayohan sang Dios sa imo alagad.

6 Niyan nagpalapit ang mga sologoon nga babaye, sila kag ang ila kabataan, kag nagyaub sila.

7 Kag si Lea man upud ang iya kabataan nagpalapit, kag nagyaub: kag sang olihi nagpalapit si Jose kag si Raquel, kag nagyaub sila.

8 Kag sia nagsiling, Ano bala ang kahologan sini tanan nga manada nga nasugata ko? Kag nagsiling sia, Ini sila sa pagpangita sing bugay sa itololok sang akon ginoo.

9 Kag si Esau nagsiling, May tuman ako nga akon, utud ko; mangin-imo ang imo.

10 Kag nagsiling si Jacob, Indi, ginaampo ko sa imo, kon nakakita ako karon sing bugay sa imo itololok, niyan batona ang akon regalo sa akon kamut: bangud kay nakita ko ang imo nawung, subong nga ako nakakita sang nawung sang Dios, kag ikaw nahamuut sa akon.

11 Batona, ginaampo ko sa imo, ang akon dolot nga ginadala sa imo; bangud ang Dios nagmainayohon sa akon, kag bangud nga may tuman ako nga akon. Kag ginpilit niya sia, kag ginbaton niya ini.

12 Kag sia nagsiling, Magpanlakatan kita, kag maglakat, kag ako magauna sa imo.

13 Kag sia nagsiling sa iya, Ang akon ginoo nakahibalo nga ang kabataan linghud pa, kag upud sa akon ang mga panong kag ang mga kahayupan nga may mga tinday: kag kon patam-an sila sing mga tawo sa paglakat sing isa ka adlaw, magakalamatay ang tanan nga panong.

14 Mag-una ang akon ginoo, ginaampo ko sa imo, sa iya alagad: kag ako magalakat sing hinayhinay, sono sa masarangan sang kahayupan nga nagauna sa akon kag sang kabataan, tubtub nga mag-abut ako sa akon ginoo sa Seir.

15 Kag si Esau nagsiling, Pabilina karon sa imo ang pila ka tawo nga nagaupud sa akon. Kag sia nagsiling, Ano bala ang kinahanglan sini? makakita kunta ako sing bugay sa itololok sang akon ginoo.

16 ś Gani si Esau nagbalik sadtong adlaw sa iya dalanon pa Seir.

17 Kag si Jacob nagpanlakatan pakadto sa Sucot, kag nagpatindug sang iya balay, kag naghimo sing mga payagpayag nga sa iya kahayupan: busa ginhingalanan ang duug Sucot.

18 ś Kag si Jacob nag-abut sa Shalem, isa ka siudad sang Siquem, nga yara sa duta sang Canaan, sang nagapakari sia gikan sa Padan-aram; kag nagpahamtang sang iya layanglayang sa atubang sang siudad.

19 Kag nagbakal sia sang isa ka puna sang latagon, sa diin ginhumlad niya ang iya layanglayang, sa kamut sang mga anak ni Hamor, amay ni Siquem, sing isa ka gatus ka bilog nga kuarta.

20 Kag nagpatindug sia didto sing halaran, kag ginhingalanan ini El-elohe-Israel.

KAPITULO 34

KAG si Dina nga anak nga babaye ni Lea, nga gin-anak niya kay Jacob, naggowa sa pagtan-aw sang mga anak nga babaye sang duta.

2 Kag sang si Siquem nga anak nga lalaki ni Hamor nga Hevhanon, prinsipe sang duta, nakakita sa iya, ginkuha niya sia, kag ginhulidan sia, kag gindagtaan sia.

3 Kag ang iya kalag naangut kay Dina nga anak ni Jacob, kag naghigugma sia sa dalaga, kag nagpamolong sing malolo sa dalaga.

4 Kag si Siquem nagpamolong kay Hamor nga iya amay, nga nagasiling, Paasawahi ako sining dalaga.

5 Kag si Jacob nakabati nga gindagtaan niya si Dina nga iya anak: karon ang iya mga anak nga lalaki yara sa latagon upud sa iya kahayupan: kag si Jacob naghipus tubtub nga nag-abut sila.

6 ś Kag nagkadto si Hamor nga amay ni Siquem kay Jacob sa pagpakighambal sa iya.

7 Kag ang mga anak nga lalaki ni Jacob nag-abut gikan sa latagon sang pagkabati nila sini: kag ang mga lalaki nagkasakit, kag nagsingkal sila sing tama, bangud naghimo sia sing katontohan sa Israel sa paghulid sa anak nga babaye ni Jacob; nga ining butang indi dapat himoon.

8 Kag si Hamor nagpakighambal sa ila, nga nagasiling, Ang kalag sang akon anak nga si Siquem naluyag sa imo anak nga babaye: ginaampo ko sa imo ipaasawa sia sa iya.

9 Kag magpangasawa kamo sa amon, kag ihatag sa amon ang inyo mga anak nga babaye, kag kuha kamo nga sa inyo sang amon mga anak nga babaye.

10 Kag magapuyo kamo upud sa amon: kag ang duta yara sa atubangan ninyo; puyo kamo kag patikang sa duta, kag panag-iya sa iya.

11 Kag si Siquem nagsiling sa amay ni Dina kag sa mga utud niya, Makakita ako kunta sing bugay sa inyo mga mata, kag magahatag ako sang isiling ninyo sa akon.

12 Pangayoi ninyo ako sang daku gid nga dote kag regalo, kag ako magahatag sono sa isiling ninyo sa akon: lamang ipaasawa ninyo sa akon ang dalaga.

13 Kag ang mga anak nga lalaki ni Jacob nagsabat nga may limbong kay Siquem kag kay Hamor nga iya amay, kag nagsiling, bangud nga gindagtaan niya si Dina nga ila utud:

14 Kag nagsiling sila sa ila, Indi kami makahimo sining butang, sa paghatag sang amon utud nga babaye sa isa nga dicircuncidado; kay kahuluy-an ina sa amon:

15 Apang sa sini magasugut kami sa inyo: Kon kamo manginsubong sa amon, nga ang tagsa ka lalaki sa inyo magpacircuncidar;

16 Niyan ihatag namon sa inyo ang amon mga anak nga babaye, kag magakuha kami nga sa amon sang inyo mga anak nga babaye, kag magapuyo kami upud sa inyo, kag mangin-isa kita ka katawohan.

17 Apang kon indi kamo magpamati sa amon, sa pagpacircuncidar; niyan kuhaon namon ang amon anak nga babaye, kag magalakat kami.

18 Kag ang ila mga polong nagpahamuut kay Hamor, kag kay Siquem nga anak ni Hamor.

19 Kag wala magpalantang ang pamatan-on nga lalaki sa paghimo sang butang, bangud nga nahamuut sia sa babaye nga anak ni Jacob: kag sia ginhangad labaw sa bug-os nga panimalay sang iya amay.

20 ś Kag si Hamor kag si Siquem nga iya anak nga lalaki nagkadto sa gawang sang ila siudad, kag nagpakighambal sa mga lalaki sang ila siudad, nga nagasiling,

21 Ining mga tawo makidaiton sa aton; busa papuy-on sila sa duta, kag magpatikang sa iya; yari karon, kay ang duta tuman kasangkad sa ila; pangasaw-on naton ang ila mga anak nga babaye, kag ihatag naton sa ila ang aton mga anak nga babaye.

22 Lamang sa sini ang mga tawo magasugut sa aton sa pagpuyo upud sa aton, nga mangin-isa ka katawohan, kon magpacircuncidar ang tagsa ka lalaki sa aton, subong nga sila circuncidado.

23 Indi bala ang ila kahayupan kag ang ila pagkabutang kag ang tagsa ka sapat nila mangin aton? lamang magsugut kita sa ila, kag magapuyo sila upud sa aton.

24 Kag nagpamati kay Hamor kag kay Siquem nga iya anak nga lalaki ang tanan nga naggowa sa gawang sang iya siudad; kag gincircuncidar ang tagsa ka lalaki, ang tanan nga naggowa sa gawang sang iya siudad.

25 ś Kag nahanabu sa ikatlong adlaw, sang ginahapdian sila, nga ang duha ka anak nga lalaki ni Jacob, si Simeon kag si Levi, mga utud ni Dina, ang tagsatagsa sa ila nagkuha sang iya espada, kag nagkadto sing maisug sa siudad, kag ginpamatay ang tanan nga mga lalaki.

26 Kag ginpatay nila sa sulab sang espada si Hamor kag si Siquem nga iya anak, kag ginkuha si Dina sa balay ni Siquem, kag naglakat.

27 Ang mga anak nga lalaki ni Jacob nagkadto sa mga patay, kag gin-ati ang siudad, bangud nga gindagtaan nila ang ila utud nga babaye.

28 Ginkuha nila ang ila mga carnero, kag ang ila kabakahan, kag ang ila mga asno, kag ang yara sa siudad, kag ang yara sa latagon,

29 Kag ang tanan nila nga manggad, kag ang tanan nila nga magamay, kag ang ila mga asawa ginbihag nila, kag gin-ati ang tanan nga yara sa balay.

30 Kag si Jacob nagsiling kay Simeon kag kay Levi, Gingamo ninyo ako sa paghimo sa akon nga kangil-aran sa mga pumuluyo sang duta, sa mga Canaanhon kag sa mga Pereznon: kag ako pila ka bato, magatingub sila batok sa akon, kag magapatay sa akon; kag malaglag ako, ako kag ang akon panimalay.

31 Kag sila nagsiling, Bilangon bala niya ang amon utud subong sang alpot?

KAPITULO 35

KAG ang Dios nagsiling kay Jacob, Tindug ka, taklad sa Bet-el, kag magpuyo didto: kag maghimo didto sing halaran sa Dios, nga nagpahayag sa imo sang nagpalagyo ka gikan sa nawung ni Esau nga imo utud.

2 Niyan si Jacob nagsiling sa iya panimalay, kag sa tanan nga upud niya, Isikway ang mga dios nga dumoloong nga yara sa tunga ninyo, kag magpaninlo, kag ilisi ang inyo mga panapton:

3 Kag magtindug kita, kag magtaklad sa Bet-el; kag magahimo ako didto sing halaran sa Dios, nga nagsabat sa akon sa adlaw sang akon kalisdanan, kag nag-upud sa akon sa dalanon nga ginlaktan ko.

4 Kag ginhatag nila kay Jacob ang tanan nga mga dios nga dumoloong nga yara sa ila kamut, kag ang tanan nga ila aritos nga yara sa ila mga dulunggan; kag gintago sila ni Jacob sa idalum sang terebinto nga kahoy nga yara sa luyo sang Siquem.

5 Kag nagpanlakatan sila: kag ang kakugmat sa Dios yara sa mga siudad sa palibut nila, kag wala nila paglagsa ang mga anak nga lalaki ni Jacob.

6 ś Gani si Jacob nag-abut sa Luz, nga yara sa duta sang Canaan, nga amo, ang Bet-el, sia kag ang tanan nga katawohan nga upud sa iya.

7 Kag nagpatindug sia didto sing halaran, kag ginhingalanan ang duug El-bet-el: bangud nga didto nagpahayag sa iya ang Dios, sang sia nagpalagyo gikan sa nawung sang iya utud.

8 Apang napatay si Debora nga yaya ni Rebeca, kag ginlubung sia sa ubus sang Bet-el sa idalum sang terebinto nga kahoy: kag ang ngalan sini gintawag Allon-bacut.

9 ś Kag nagpahayag liwat ang Dios kay Jacob, sang pag-abut niya gikan sa Padan-aram, kag ginpakamaayo sia.

10 Kag ang Dios nagsiling sa iya, Ang imo ngalan Jacob: indi na pagtawgon ang imo ngalan Jacob, kondi Israel ang imo ngalan: kag ginhingalanan niya sia Israel.

11 Kag ang Dios nagsiling sa iya, Ako ang Makaako nga Dios: magmabungahon kag magbuad; isa ka pungsud kag isa ka hut-ong sang mga pungsud magagikan sa imo, kag mga hari magagowa sa imo mga balikawang;

12 Kag ang duta nga ginhatag ko kay Abraham kag kay Isaac, ihatag ko sa imo, kag sa imo kaliwat sa olihi nimo ihatag ko ang duta.

13 Kag nagpaibabaw ang Dios gikan sa iya sa duug diin nagpamolong sia sa iya.

14 Kag si Jacob nagpatindug sing isa ka haligi sa duug diin nagpamolong sia sa iya, isa ka haligi nga bato: kag ginboboan niya sa ibabaw sini sing halad nga ilimnon, kag ginboboan niya sa ibabaw sini sing lana.

15 Kag ginhingalanan ni Jacob ang duug diin ang Dios nagpamolong sa iya, Bet-el.

16 ś Kag nagpanlakatan sila gikan sa Bet-el; kag may diotay pa nga lalaktan pakadto sa Efrata: kag ginsakitan si Raquel, kag ginbudlayan sia.

17 Kag nahanabu, sang ginsakitan sia, nga nagsiling sa iya ang partera, Dili ka mahadluk; magaanak ka sining lalaki man.

18 Kag nahanabu, sang nagapataliwan ang iya kalag, (kay napatay sia) nga ginhingalanan niya sia Ben-oni: apang ginhingalanan sia sang iya amay Benjamin.

19 Kag si Raquel napatay, kag ginlubung sa dalanon sa Efrata, nga amo ang Bet-lehem.

20 Kag ginpatindugan ni Jacob sing haligi ang ibabaw sang iya lulubngan: ini amo ang haligi sang lulubngan ni Raquel tubtub sining adlaw.

21 ś Kag nagpanlakatan si Israel, kag naghumlad sang iya layanglayang sa unhan sang torre sang Eder.

22 Kag nahanabu, sang nagpuyo si Israel sa sadtong duta, nga si Ruben nagkadto kag naghulid kay Bilha nga oloasawa sang iya amay: kag nabatian ini ni Israel. Karon ang mga anak nga lalaki ni Jacob napulog duha:

23 Ang mga anak nga lalaki ni Lea; si Ruben, panganay ni Jacob, kag si Simeon, kag si Levi, kag si Juda, kag si Isacar, kag si Zabulon:

24 Ang mga anak nga lalaki ni Raquel; si Jose, kag si Benjamin:

25 Kag ang mga anak nga lalaki ni Bilha, sologoon nga babaye ni Raquel; si Dan, kag si Neftali:

26 Kag ang mga anak nga lakaki ni Zilpa, sologoon nga babaye ni Lea; si Gad, kag si Aser: ini sila amo ang mga anak nga lalaki ni Jacob, nga natawo sa iya sa Padan-aram.

27 ś Kag nagkadto si Jacob kay Isaac nga iya amay sa Mamre, sa siudad sang Arba, nga amo ang Hebron, diin si Abraham kag si Isaac nagpanlugayaw.

28 Kag ang mga adlaw ni Isaac isa ka gatus kag kawaloan ka tuig.

29 Kag nabugto ang ginhawa ni Isaac, kag napatay, kag ginsimpon sia sa iya katawohan, nga tigulang kag puno sang mga inadlaw: kag ginlubung sia ni Esau kag ni Jacob nga iya mga anak nga lalaki.

KAPITULO 36

KARON ini sila amo ang mga kaliwatan ni Esau, nga amo si Edom.

2 Si Esau nagpangasawa gikan sa mga anak nga babaye ni Canaan; kay Ada nga anak nga babaye ni Elon nga Hithanon, kag kay Oholibama nga anak nga babaye ni Ana, nga anak nga babaye ni Zibeon nga Hevhanon;

3 Kag kay Basemat nga anak nga babaye ni Ismael, utud nga babaye ni Nebayot.

4 Kag si Ada nag-anak sa kay Esau kay Elifaz; kag si Basemat nag-anak kay Reuel;

5 Kag si Oholibama nag-anak kay Jeus, kag kay Jaalam, kag kay Core: ini sila amo ang mga anak nga lalaki ni Esau, nga natawo sa iya sa duta sang Canaan.

6 Kag ginkuha ni Esau ang iya mga asawa, kag ang iya mga anak nga lalaki, kag ang iya mga anak nga babaye, kag ang tanan nga tawo sang iya panimalay, kag ang iya kahayupan, kag ang tanan niyang kasapatan, kag ang bug-os niyang pagkabutang, nga natipon niya sa duta sang Canaan; kag nagkadto sa duta nga malayo sa nawung ni Jacob nga iya utud.

7 Kay ang manggad nila tama kadaku sa ila sa pagpuyo sing tingub; kag ang duta nga sa diin sila mga dumoloong indi makaigo sa ila bangud sang ila kahayupan.

8 Gani si Esau nagpuyo sa bukid nga Seir: si Esau amo si Edom.

9 ś Kag ini sila amo ang mga kaliwatan ni Esau nga amay sang mga Edomnon sa bukid nga Seir:

10 Ini sila amo ang mga ngalan sang mga lalaking anak ni Esau; si Elifaz nga anak ni Ada nga asawa ni Esau, si Reuel nga anak ni Basemat nga asawa ni Esau.

11 Kag ang mga lalaking anak ni Elifaz si Teman, si Omar, si Zefo, kag si Gatam, kag si Kenaz.

12 Kag si Timna oloasawa ni Elifaz, nga anak ni Esau; kag sia nag-anak sa kay Elifaz kay Amalec: ini sila amo ang mga lalaking anak ni Ada, asawa ni Esau.

13 Kag ini sila amo ang mga lalaking anak ni Reuel; si Nahat, kag si Zera, si Sama, kag si Miza: ini sila amo ang mga lalaking anak ni Basemat, asawa ni Esau.

14 ś Kag ini sila amo ang mga lalaking anak ni Oholibama nga asawa ni Esau, anak nga babaye ni Ana nga anak nga babaye ni Zibeon: kag nag-anak sia sa kay Esau kay Jeus, kag kay Jaalam, kag kay Core.

15 ś Ini sila amo ang mga duke sang mga lalaking anak ni Esau: ang mga lalaking anak ni Elifaz nga panganay ni Esau; si duke Teman, si duke Omar, si duke Zefo, si duke Kenaz,

16 Si duke Core, si duke Gatam, kag si duke Amalec: ini sila amo ang mga duke nga gikan kay Elifaz sa duta sang Edom; ini sila mga lalaking anak ni Ada.

17 ś Kag ini sila amo ang mga lalaking anak ni Reuel nga anak nga lalaki ni Esau; si duke Nahat, si duke Zera, si duke Sama, kag si duke Miza: ini sila amo ang mga duke nga gikan kay Reuel sa duta sang Edom; ini sila amo ang mga lalaking anak ni Basemat nga asawa ni Esau.

18 ś Kag ini sila amo ang mga lalaking anak ni Oholibama nga asawa ni Esau; si duke Jeus, si duke Jaalam, si duke Core: ini sila amo ang mga duke nga gikan kay Oholibama nga anak nga babaye ni Ana, asawa ni Esau.

19 Ini sila amo ang mga lalaking anak ni Esau, nga amo si Edom, kag ini sila amo ang ila mga duke.

20 ś Ini sila amo ang mga lalaking anak ni Seir nga Horhanon, nga nagpuyo sa duta; si Lotan, kag si Sobal, kag si Zibeon, kag si Ana,

21 Kag si Dison, kag si Ezer, kag si Disan: ini sila amo ang mga duke sang mga Horhanon, ang mga anak ni Seir sa duta sang Edom.

22 Kag ang mga anak ni Lotan amo si Hori kag Hemam; kag si Timna among utud nga babaye ni Lotan.

23 Kag ini sila amo ang mga anak ni Sobal; si Alvan, kag si Manahat, kag si Ebal, si Sefo, kag si Onam.

24 Kag ini sila amo ang mga anak ni Zibeon; si Aya, kag si Ana: amo ini si Ana nga nakasapu sang mga mula sa kamingawan, sang ginapahalab niya ang mga asno ni Zibeon nga iya amay.

25 Kag ini sila amo ang mga anak ni Ana; si Dison, kag si Oholibama nga anak nga babaye ni Ana.

26 Kag ini sila amo ang mga anak ni Dison; si Hemdan, kag si Esban, kag si Itran, kag si Ceran.

27 Ini sila amo ang mga anak ni Ezer; si Bilhan, kag si Zaavan, kag si Acan.

28 Ini sila amo ang mga anak ni Disan; si Uz, kag si Aran.

29 Ini sila amo ang mga duke nga gikan sa mga Horhanon; si duke Lotan, si duke Sobal, si duke Zibeon, si duke Ana,

30 Si duke Dison, si duke Ezer, si duke Disan: ini sila amo ang mga duke nga gikan kay Hori, sa ila mga duke sa duta sang Seir.

31 ś Kag ini sila amo ang mga hari nga naghari sa duta sang Edom, sa wala pa maghari ang bisan sin-ong hari sa mga kaanakan sang Israel.

32 Kag si Bela nga anak nga lalaki ni Beor naghari sa Edom: kag ang ngalan sang iya siudad amo ang Dinhaba.

33 Kag napatay si Bela, kag naghari nga salili niya si Jobab nga anak nga lalaki ni Zera sang Bozra.

34 Kag napatay si Jobab, kag naghari nga salili niya si Husam gikan sa duta nga Temani.

35 Kag napatay si Husam, kag naghari nga salili niya si Hadad nga anak nga lalaki ni Bedad, nga nagpatay kay Midian sa latagon sang Moab: kag ang ngalan sang iya siudad amo ang Avit.

36 Kag napatay si Hadad, kag naghari nga salili niya si Samla sang Masreca.

37 Kag napatay si Samla, kag naghari nga salili niya si Saul sang Rehobot sa ubay sang suba.

38 Kag napatay si Saul, kag naghari nga salili niya si Baal-hanan nga anak nga lalaki ni Acbor.

39 Kag napatay si Baal-hanan nga anak nga lalaki ni Acbor, kag naghari nga salili niya si Hadar: kag ang ngalan sang iya siudad amo ang Pau; kag ang ngalan sang iya asawa si Mehetabel, ang anak nga babaye ni Matred, nga anak nga babaye ni Mezahab.

40 Kag ini sila amo ang mga ngalan sang mga duke nga gikan kay Esau, sono sa ila mga panimalay, sono sa ila mga duug, sono sa ila mga ngalan; si duke Timna, si duke Alva, si duke Jetet,

41 Si duke Oholibama, si duke Ela, si duke Pinon,

42 Si duke Kenaz, si duke Teman, si duke Mibzar,

43 Si duke Magdiel, si duke Iram: ini sila amo ang mga duke gikan kay Edom, sono sa ila mga puluy-an sa duta nga ila kaugalingon: sia amo si Esau nga amay sang mga Edomnon.

KAPITULO 37

KAG si Jacob nagpuyo sa duta nga sa diin ang iya amay dumoloong, sa duta sang Canaan.

2 Ini sila amo ang mga kaliwatan ni Jacob. Si Jose, nga nagapanuigon sing napulog pito ka tuig, nagapahalab sang panong upud sa iya mga utud; kag ang pamatan-on kaupud sa mga anak nga lalaki ni Bilha, kag kaupud sa mga anak nga lalaki ni Zilpa, ang mga asawa sang iya amay: kag si Jose nagdala sa iya amay sang malaut nga balita nahanungud sa ila.

3 Karon ginhigugma ni Israel si Jose sing labi pa sa tanan niya nga kabataan, bangud nga anak sia sang iya katigulangon: kag ginhimoan niya sia sing panapton nga madamu sing duag.

4 Kag sang nakita sang iya mga utud nga ang ila amay naghigugma sa iya sing labi pa sa tanan niya nga mga utud, gindumtan nila sia, kag indi sila makahambal sa iya sing madaiton.

5 ś Kag si Jose nagdamgo sing isa ka damgo, kag ginsugid niya ini sa iya mga utud: kag sila nagdumut pa gid sa iya.

6 Kag nagsiling sia sa ila, Pamati kamo, ginaampo ko sa inyo, sining damgo nga gindamgo ko:

7 Kay, yari karon, nagabugkos kita sing mga linaylay sa uma, kag, yari karon, ang akon linaylay nagbangon, kag nagtindug man sing matadlong; kag, yari karon, ang inyo mga linaylay naglibut sa sini, kag nagyaub sa akon linaylay.

8 Kag ang iya mga utud nagsiling sa iya, Magahari ka bala sa amon sa pagkamatuud? ukon magagahum ka bala sa amon sa pagkamatuud? Kag sila nagdumut pa gid sa iya bangud sang iya mga damgo, kag sang iya mga polong.

9 ś Kag nagdamgo sia sing isa pa ka damgo, kag ginsugid ini sa iya mga utud, kag nagsiling, Yari karon, nagdamgo ako sing isa pa ka damgo; kag, yari karon, ang adlaw kag ang bulan kag ang napulog isa ka bitoon nagyaub sa akon.

10 Kag ginsugid niya ini sa iya amay, kag sa iya mga utud: kag ang iya amay nagsabdong sa iya, kag nagsiling sa iya, Ano bala nga damgo ining gindamgo mo? Magakari bala ako kag ang imo iloy kag ang imo mga utud sa pagyaub sa duta sa imo sa pagkamatuud?

11 Kag ang iya mga utud nahisa sa iya; apang ang iya amay nagpamalandong sang pinamolong.

12 ś Kag ang iya mga utud nagkadto sa pagpahalab sang panong sang ila amay sa Siquem.

13 Kag si Israel nagsiling kay Jose, Wala bala nagapahalab ang imo mga utud sang panong sa Siquem? kari, kag ipadala ko ikaw sa ila. Kag nagsiling sia sa iya, Yari ako.

14 Kag nagsiling sia sa iya, Lakat, ginaampo ko sa imo, tan-awa kon maayo ang imo mga utud, kag maayo ang mga panong; kag dalhi ako sing polong. Gani ginpadala niya sia gikan sa nalupyakan sang Hebron, kag sia nag-abut sa Siquem.

15 ś Kag nakita sia sang isa ka tawo, kag, yari karon, nagadalangdalang sia sa latagon: kag ginpamangkot sia sang tawo, nga nagasiling, Ano bala ang ginapangita mo?

16 Kag nagsiling sia, Nagapangita ako sang akon mga utud: sugiri ako, ginaampo ko sa imo, kon diin sila nagapahalab sang ila mga panong.

17 Kag nagsiling ang tawo, Naghalin sila gikan diri; kay nabatian ko sila nga nagasiling, Makadto kita sa Dotan. Kag si Jose nag-apas sa iya mga utud, kag nakita sila sa Dotan.

18 Kag sang nalantawan nila sia sa malayo, sang wala pa sia makapalapit sa ila, naghimbon sila batok sa iya sa pagpatay sa iya.

19 Kag nagsinilingay sila, Yari karon, ining paladamgo nagapakari.

20 Busa kari kamo karon, kag patyon naton sia, kag iholog sia sa isa ka boho, kag magasiling kita, Ang isa ka malaut nga sapat nagtukub sa iya: kag tan-awon naton kon ano ang madangatan sang iya mga damgo.

21 Kag nabatian ini ni Ruben, kag ginluwas niya sia sa ila mga kamut; kag nagsiling, Indi naton sia pagpatyon.

22 Kag si Ruben nagsiling sa ila, Dili kamo magpaagay sing dugo, kondi iholog sia sa sining boho nga yari sa kamingawan, kag dili pagsakiton sia; agud nga maluwas niya sia gikan sa ila mga kamut, sa pag-uli sa iya sa iya amay.

23 ś Kag nahanabu, sang nag-abut si Jose sa iya mga utud, nga gin-ubahan nila si Jose sang iya panapton, ang panapton nga madamu sing duag nga nasuklub niya;

24 Kag gindakup nila sia, kag ginholog sia sa boho: kag ang boho wala sing sulud, wala sing tubig sa sini.

25 Kag naglingkod sila sa pagkaon sing tinapay: kag ginbayaw nila ang ila mga mata kag nalantawan, kag, yari karon, ang isa ka hubon sang Ismaelnon nga nagapakari gikan sa Gilead upud sang ila mga camelyo nga nagakarga sang mga rikado kag ihalaplas kag mirra, nga nagadala sini padulhog sa Egipto.

26 Kag si Juda nagsiling sa iya mga utud, Ano bala ang kapuslanan kon patyon ta ang aton utud, kag tabonan ang iya dugo?

27 Kari, kag ibaligya naton sia sa mga Ismaelnon, kag indi naton pagbayawon ang aton kamut sa iya; kay aton utud sia kag aton unud. Kag ang iya mga utud nagsugut.

28 Niyan nag-agi didto ang mga komersyante nga mga Midianhon; kag ginbatak nila kag ginpagowa si Jose sa boho, kag ginbaligya si Jose sa mga Ismaelnon sing duha ka napulo ka bilog nga pilak: kag gindala nila si Jose sa Egipto.

29 ś Kag nagbalik si Ruben sa boho; kag, yari karon, si Jose wala na sa boho; kag ginkusnit niya ang iya mga panapton.

30 Kag nagbalik sia sa iya mga utud, kag nagsiling, Ang bata wala na; kag ako, sa diin bala ako makadto?

31 Kag ginkuha nila ang panapton ni Jose, kag nagpatay sing isa ka tinday sa mga kanding, kag gintum-oy sa dugo ang panapton;

32 Kag ginpadala nila ang panapton nga madamu sing duag, kag gindala nila ini sa ila amay; kag nagsiling, Ini amon nakita: hibaloa karon kon ini panapton sang imo anak ukon indi.

33 Kag nakilala niya ini, kag nagsiling, Panapton ini sang akon anak; isa ka malaut nga sapat nagtukub sa iya; sa wala sing duhaduha ginkusnit si Jose.

34 Kag ginkusnit ni Jacob ang iya panapton, kag nagtampion sing panapton nga sako sa iya balikawang, kag naglalaw tungud sa iya anak sa madamung adlaw.

35 Kag nagtindug ang tanan niya nga anak nga lalaki kag ang tanan niya nga anak nga babaye sa paglipay sa iya; apang sia nagdumili nga lipayon; kag sia nagsiling, Kay magapanaug ako nga nagalalaw sa akon anak sa lulubngan. Sa amo ang iya amay naghibi tungud sa iya.

36 Kag ginbaligya sia sang mga Midianhon sa Egipto kay Potifar, isa ka opisyal sang Faraon, kag kapitan sang mga bantay.

KAPITULO 38

KAG nahanabu sa sadtong tion, nga si Juda nagdulhog halin sa iya mga utud, kag naghapit sa isa ka Adulamnon, nga ang iya ngalan si Hira.

2 Kag nakita didto ni Juda ang isa ka babaye nga anak sang isa ka Canaanhon, nga ang iya ngalan si Sua; kag ginkuha niya sia, kag naghiusa sa iya.

3 Kag nagpanamkon sia, kag nag-anak sing lalaki; kag ginhingalanan sia ni Juda Er.

4 Kag nagpanamkon sia liwat, kag nag-anak sing lalaki; kag ginhingalanan sia sang babaying anak ni Sua Onan.

5 Kag nagpanamkon pa sia liwat, kag nag-anak sing lalaki; kag ginhingalanan sia Sela: kag si Judas didto sa Kezib, sang pag-anak niya sa iya.

6 Kag ginpaasaw-an ni Juda si Er nga iya panganay, sa babaye nga ang ngalan si Tamar.

7 Kag si Er, panganay ni Juda, malaut sa itololok sang GINOO; kag ginpatay sia sang GINOO.

8 Kag si Juda nagsiling kay Onan, Hiusa ka sa asawa sang imo utud, kag asawaha sia, kag bangon ka sing kaliwat sa imo utud.

9 Kag nahibaloan ni Onan nga ang kaliwat indi mangin-iya; kag nahanabu, sang naghiusa sia sa asawa sang iya utud, nga ginpaawas niya ini sa duta, agud nga indi sia makahatag sing kaliwat sa iya utud.

10 Kag ang butang nga ginhimo niya wala nahamut-i sang GINOO: gani ginpatay man niya sia.

11 Niyan si Juda nagsiling kay Tamar nga iya umagad nga babaye, Pabilin ka nga balo sa balay sang imo amay, tubtub nga magdaku si Sela nga akon anak: kay nagsiling sia, Kay basi mapatay man sia, subong sang iya mga utud. Kag naglakat si Tamar kag nagpuyo sa balay sang iya amay.

12 ś Kag sa pag-alagisud sang tion ang babaying anak ni Sua nga asawa ni Juda napatay; kag si Juda ginlipay, kag nagtaklad sa iya mga manug-alot sang mga carnero sa Timnat, sia kag ang iya abyan nga si Hira nga Adulamnon.

13 Kag ginsugid ini kay Tamar, nga nagasiling, Yari karon ang imo ugangan nga lalaki nagataklad sa Timnat sa pag-alot sang iya mga carnero.

14 Kag gin-uba niya ang iya panapton sa pagkabalo, kag nagpanabon sang iya takurong, kag nagpangunup sia, kag naglingkod sa mahawan nga duug, nga yara sa higad sang dalan pa Timnat; kay nakita niya nga nagdaku na si Sela, kag sia wala pag-ipaasawa sa iya.

15 Sang nakita sia ni Juda, ginhunahuna niya nga sia isa ka alpot; bangud gintabonan niya ang iya nawung.

16 Kag naghapit sia sa iya sa higad sang dalan, kag nagsiling, Kari ka, ginaampo ko sa imo, pahiusaha ako sa imo; (kay wala sia makahibalo nga sia umagad niya.) Kag sia nagsiling, Ano bala ang ihatag mo sa akon, agud nga makahiusa ka sa akon?

17 Kag nagsiling sia, Padalhan ko ikaw sing isa ka tinday gikan sa panong. Kag nagsiling sia, Mahatagan mo bala ako sing kalig-onan, tubtub nga mapadala mo ini?

18 Kag sia nagsiling, Ano bala nga kalig-onan ang ihatag ko sa imo? Kag sia nagsiling, Ang imo singsing nga inugpat-in, kag ang imo mga pulseras, kag ang imo sungkud nga yara sa imo kamut. Kag ginhatag niya ini sa iya, kag naghiusa sa iya, kag nagpanamkon sia paagi sa iya.

19 Kag nagtindug sia, kag nagtaliwan, kag ginhukas niya ang iya takurong, kag ginsuklub ang mga panapton sang iya pagkabalo.

20 Kag ginpadul-ong ni Juda ang tinday paagi sa kamut sang iya abyan nga Adulamnon, sa pagbawi sang iya kalig-onan gikan sa kamut sang babaye: apang wala niya makita sia.

21 Niyan nagpamangkot sia sa mga lalaki sa sinang duug, nga nagasiling, Diin ang alpot, nga sing hayag yara sa higad sang dalan? Kag sila nagsiling, Wala sing alpot sa sining duug.

22 Kag nagbalik sia kay Juda, kag nagsiling, Indi ko sia makita; kag ang mga lalaki man sang duug nagsiling, nga wala sing alpot sa sining duug.

23 Kag si Juda nagsiling, Ihatag ina sila sa iya, basi mahuy-an kita: yari karon, ginpadul-ong ko ining tinday, kag wala mo makita sia.

24 ś Kag nahanabu sang nagligad ang mga tatlo ka bulan, nga ginsugid ini kay Juda, nga nagasiling, si Tamar nga imo umagad nagpakaalpot; kag labut pa, yari karon, sia nagabusong bangud sa pagpamiga. Kag si Juda nagsiling, Dalha sia diri, kag sonogon sia.

25 Sang nadala sia, ginpakadtoan niya ang iya ugangan, nga nagasiling, Paagi sa lalaki nga tag-iya sini, nagabusong ako: kag sia nagsiling, Kilalaha, ginaampo ko sa imo, kon kay sin-o ini sila, ang singsing nga inugpat-in, kag ang mga pulseras, kag ang sungkud.

26 Kag ginkilala sila ni Juda, kag nagsiling, Labi pa katarung sia sa akon; bangud nga wala ko sia ginhatag kay Sela nga akon anak. Kag wala na sia magkilala sa iya.

27 ś Kag nahanabu sa tion nga ginasakitan sia, nga, yari karon, may kapid sa iya taguangkan.

28 Kag nahanabu sang ginasakitan sia, nga ang isa nagpagowa sang iya kamut: kag ginkaptan sang partera kag ginhigtan niya ang iya kamut sing nahot nga escarlata, nga nagasiling, Ini naggowa sing una.

29 Kag nahanabu, samtang ginabutong niya ang iya kamut, nga, yari karon, ang iya utud nga lalaki naggowa: kag ang partera nagsiling, Paano ka naggowa? ini nga paglusut mangin-imo: busa ginhingalanan sia Farez.

30 Kag sang olihi naggowa ang iya utud nga lalaki, nga may nahot nga escarlata sa iya kamut: kag ginhingalanan sia Zara.

KAPITULO 39

KAG si Jose gindala padulhog sa Egipto; kag ginbakal sia ni Potifar, isa ka opisyal ni Faraon, ang kapitan sang mga bantay, nga Egiptohanon, sa mga kamut sang mga Ismaelnon, nga nagdala sa iya didto.

2 Kag ang GINOO nag-upud kay Jose, kag mauswagon sia nga tawo; kag yara sia sa balay sang iya agalon nga Egiptohanon.

3 Kag nakita sang iya agalon nga ang GINOO upud sa iya, kag nga ang tanan nga ginhimo niya ginpauswag sang GINOO sa iya kamut.

4 Kag si Jose nakaagum sang bugay sa iya itololok, kag nag-alagad sia sa iya: kag ginhimo niya sia nga manugtatap sang iya balay, kag gintugyan niya sa iya kamut ang tanan nga iya.

5 Kag nahanabu kutub sang tion nga ginhimo niya sia nga manugtatap sang iya balay, kag sang tanan nga iya, nga ginpakamaayo sang GINOO ang panimalay sang Egiptohanon tungud kay Jose; kag ang pagpakamaayo sang GINOO yara sa tanan nga iya sa balay, kag sa latagon.

6 Kag ginbilin niya ang tanan nga iya sa kamut ni Jose; kag wala sia sing kabalaka sa bisan ano, luwas sang tinapay nga ginkaon niya. Kag si Jose magayon nga tawo, kag maambong.

7 ś Kag nahanabu sa tapus sining mga butang, nga ang asawa sang iya agalon nagtolok sang iya mga mata kay Jose; kag sia nagsiling, Hulid ka sa akon.

8 Apang nagdumili sia, kag nagsiling sa asawa sang iya agalon, Yari karon, ang akon agalon wala sing kabalaka sa bisan ano sa balay, kag gintugyan niya sa akon kamut ang tanan nga iya;

9 Wala na sing labing daku sa akon sa sining balay; kag wala sia sing bisan anong butang nga gindumili sa akon kondi ikaw, bangud ikaw asawa niya: paano bala niyan nga makahimo ako sining daku nga pagkamalaut, kag magpakasala batok sa Dios?

10 Kag nahanabu, sang sia nagapamolong kay Jose sa adlawadlaw, nga wala niya sia pagpamatii, sa paghulid sa iya, ukon sa pag-upud sa iya.

11 Kag nahanabu sang mga sining tion, nga nagsulud si Jose sa balay sa paghimo sang iya hilikuton; kag wala gid sing bisan sin-o sang mga lalaki nga didto sa sulud sang balay.

12 Kag ginbuyotan sang babaye si Jose sa iya bayo, nga nagasiling, Hulid ka sa akon: kag ginbayaan ni Jose ang iya bayo sa iya kamut, kag nagpalagyo, kag naggowa sia.

13 Kag nahanabu, sang nakita niya nga nabilin niya ang iya bayo sa iya kamut, kag nagpalagyo sa gowa,

14 Nga gintawag sang babaye ang mga lalaki sang iya balay, kag naghambal sa ila, nga nagasiling, Tan-awa, gindalhan niya kita diri sing Hebreo sa pagyaguta sa aton; nagsulud sia sa akon sa paghulid sa akon, kag nagsinggit ako sa matonog nga tingug:

15 Kag nahanabu, sang nabatian niya nga ako nagtib-ong sang akon tingug kag nagsinggit, nga ginbayaan niya ang iya bayo sa akon, kag nagpalagyo, kag naggowa sia.

16 Kag ginbutang sang babaye sa iya luyo ang bayo ni Jose, tubtub nga nagpauli ang iya ginoo.

17 Kag nagpamolong sia sa iya sono sa sining mga polong, nga nagasiling, Ang alagad nga Hebreo, nga gindala mo sa aton, nagsulud sa akon sa pagyaguta sa akon:

18 Kag nahanabu, sang nagtib-ong ako sang akon tingug kag nagsinggit, nga ginbayaan niya ang iya bayo sa akon, kag nalagyo pagowa.

19 Kag nahanabu, sang pagkabati sang iya agalon sang mga polong sang iya asawa, nga ginhambal niya sa iya, nga nagasiling, Sa sining bagay naghimo sa akon ang imo alagad; sa bagay nga nagdabdab ang iya kasingkal.

20 Kag ginkuha sang iya agalon si Jose, kag ginsulud sia sa bilanggoan, ang duug diin nagapus ang mga binilanggo sang hari: kag didto sia sa bilanggoan.

21 ś Apang ang GINOO kaupud kay Jose, kag nagpakita sing kalooy sa iya, kag nagpahamuut sa iya sa itololok sang manugbantay sang bilanggoan.

22 Kag ang manugbantay sang bilanggoan nagtugyan sa kamut ni Jose sang tanan nga mga binilanggo nga yadto sa bilanggoan; kag ang bisan anong ginhimo nila didto, sia amo ang manughimo sini.

23 Ang manugbantay sang bilanggoan wala nagtatap sang bisan anong butang nga yara sa iya kamut; bangud nga ang GINOO kaupud niya, kag inang iya ginhimo, ang GINOO nagpauswag sini.

KAPITULO 40

KAG nahanabu sa tapus sining mga butang, nga ang manugtagay sang hari sang Egipto kag ang iya manugtinapay nagpaakig sa ila ginoo nga hari sang Egipto.

2 Kag nagsingkal si Faraon batok sa duha sang iya mga opisyal, batok sa puno sang mga manugtagay, kag batok sa puno sang mga manugtinapay.

3 Kag ginsulud sila niya nga binilanggo sa balay sang kapitan sang bantay, sa bilanggoan, sa duug diin si Jose nagapus.

4 Kag gintugyan sila sang kapitan sang bantay kay Jose, kag sia nag-alagad sa ila: kag nagpabilin sila sing diotay nga tion nga binilanggo.

5 ś Kag sila nga duha nagdamgo sang damgo, ang manugtagay kag ang manugtinapay sang hari sang Egipto, nga nagapus sa bilanggoan, tagsa ka tawo sa iya damgo sa isa ka gab-i, tagsa ka tawo sono sa kahologan sang iya damgo.

6 Kag si Jose nagsulud sa ila sang pagkaaga, kag nakita sila, kag, yari karon, sila nagakasubu.

7 Kag nagpamangkot sia sa mga opisyal ni Faraon nga upud sa iya sa bilanggoan sa balay sang iya ginoo, nga nagasiling, Ngaa bala masubu gid kamo karon nga adlaw?

8 Kag nagsiling sila sa iya, Nagdamgo kami sang damgo, kag wala sing manugpatpat sini. Kag si Jose nagsiling sa ila, Indi bala iya sang Dios ang mga pagpatpat? isugid sila sa akon, ginaampo ko sa inyo.

9 Kag ang punong manugtagay nagsugid sang iya damgo kay Jose, kag nagsiling sa iya, Sa akon damgo, yari karon, may isa ka puno sang ubas sa atubangan nakon;

10 Kag sa puno sang ubas may tatlo ka sanga: kag daw nagpanalingsing ini, kag namulak ini; kag ang mga pinungpung sina nagdala sing mga ubas nga luto:

11 Kag ang tasa ni Faraon yara sa kamut ko: kag nagkuha ako sang mga ubas, kag ginpuga sila sa tasa ni Faraon, kag ginhatag ko ang tasa sa kamut ni Faraon.

12 Kag si Jose nagsiling sa iya, Ini amo ang iya kahologan: Ang tatlo ka mga sanga amo ang tatlo ka adlaw:

13 Sa sulud sang tatlo pa ka adlaw bayawon ni Faraon ang imo olo, kag iuli ikaw sa imo palangakuan: kag magahatag ka sang tasa ni Faraon sa iya kamut, sono sa unang pinamatasan sang ikaw iya manugtagay.

14 Apang dumduma ako kon sa kaayohan ka na, kag magpakita kaayo sa akon, ginaampo ko sa imo, kag imitlang ako kay Faraon, kag dal-a ako pagowa sa sining balay:

15 Kay sa pagkamatuud ginkawat ako gikan sa duta sang mga Hebreo: kag diri man wala ako sing ginhimo nga bisan ano nga ibutang nila ako sa bilanggoan nga madulum.

16 Sang nakita sang punong manugtinapay nga ang kahologan maayo, sia nagsiling kay Jose, Ako man yara sa akon damgo, kag, yari karon, may tatlo ka alat nga puti sa akon olo:

17 Kag sa naibabaw gid nga alat may tanan nga bagay sang bibingka nga kalan-on nga kay Faraon; kag ang kapispisan nagkaon sini gikan sa alat sa akon olo.

18 Kag si Jose nagsabat kag nagsiling, Ini amo ang iya kahologan: Ang tatlo ka alat amo ang tatlo ka adlaw:

19 Sa sulud sang tatlo pa ka adlaw bayawon ni Faraon ang imo olo gikan sa imo, kag bitayon ka sa kahoy; kag ang kapispisan magakaon sang imo unud gikan sa imo.

20 ś Kag nahanabu sa ikatlong adlaw, nga amo ang kaadlawan ni Faraon, nga sia naghiwat sing sinalosalo sa tanan niyang alagad: kag ginbayaw niya ang olo sang punong manugtagay kag sang punong manugtinapay sa tunga sang iya mga alagad.

21 Kag gin-uli niya liwat ang punong manugtagay sa iya pagkamanugtagay; kag ginhatag niya ang tasa sa kamut ni Faraon:

22 Apang ginbitay niya ang punong manugtinapay: sono sa napatpat ni Jose sa ila.

23 Apang ang punong manugtagay wala makadumdum kay Jose, kondi nalipatan sia.

KAPITULO 41

KAG nahanabu sa tapus ang bug-os nga duha ka tuig, nga nagdamgo si Faraon: kag, yari karon, nagtindug sia sa ubay sang suba.

2 Kag, yari karon, gikan sa suba may nagtakas nga pito ka baka nga matahum kag matambok; kag naghalab sila sa halalban.

3 Kag, yari karon, ang iban nga pito ka baka nagtakas gikan sa suba sa olihi nila, malaw-ay kag maniwang; kag nagtindug sa luyo sang nahauna nga mga baka sa pangpang sang suba.

4 Kag ang mga malaw-ay kag maniwang nga baka nagkaon sang pito ka matahum kag matambok nga baka. Gani nagmata si Faraon.

5 Kag nagtolog sia kag nagdamgo sa ikaduha nga tion: kag, yari karon, pito ka pusu sang mais nag-ulhut sa isa ka puno, matinggas kag maayo.

6 Kag, yari karon, pito ka pusu nga kupus kag ginpakigas sang sidlangan nga hangin nag-ulhut sa olihi nila.

7 Kag ang pito ka pusu nga kupus naglamon sang pito ka pusu nga matinggas kag matimsog. Kag nagmata si Faraon, kag, yari karon, damgo gali.

8 Kag nahanabu sa pagkaaga nga natublag ang iya espiritu; kag nagpadala sia kag ginpatawag ang tanan nga mga salamangkero sang Egipto, kag ang tanan nga maalam nga lalaki didto: kag ginsugid ni Faraon sa ila ang iya damgo; apang wala sing bisan sin-o nga makapatpat sa ila kay Faraon.

9 ś Niyan ang punong manugtagay naghambal kay Faraon, nga nagasiling, Nadumduman ko ang akon mga sayup sining adlaw:

10 Si Faraon nagsingkal sa iya mga alagad, kag ginsulud ako nga bilanggo sa balay sang kapitan sang bantay, ako kag ang punong manugtinapay:

11 Kag nagdamgo kami sang isa ka damgo sa isa ka gab-i, ako kag sia; kami nagdamgo tagsa ka tawo sono sa kahologan sang iya damgo.

12 Kag yadto didto kaupud namon ang isa ka pamatan-on nga lalaki, isa ka Hebreo, alagad sang kapitan sang bantay; kag ginsugid namon sa iya, kag ginpatpat niya sa amon ang amon mga damgo; ginpatpat niya sa tagsa ka tawo sono sa iya damgo.

13 Kag nahanabu, subong sa ginpatpat niya sa amon, amo ang nahanabu; gin-uli niya ako sa akon palangakuan, kag ginbitay niya sia.

14 ś Niyan ginpakadtoan ni Faraon kag ginpatawag si Jose, kag ginpagowa nila sia sing dalidali gikan sa bilanggoan nga madulum: kag namarbas sia, kag nag-ilis sang iya bayo, kag nagkadto kay Faraon.

15 Kag si Faraon nagsiling kay Jose, Nagdamgo ako sing isa ka damgo, kag wala sing bisan sin-o nga makapatpat sini: kag nakabati ako nga ginsiling nahanungud sa imo, nga makahangup ikaw sing damgo sa pagpatpat sini.

16 Kag si Jose nagsabat kay Faraon, nga nagasiling, Wala ini sa akon: ang Dios magahatag kay Faraon sing sabat sang paghidait.

17 Kag si Faraon nagsiling kay Jose, Sa akon damgo, yari karon, nagtindug ako sa pangpang sang suba:

18 Kag, yari karon, gikan sa suba may nagtakas nga pito ka baka, matambok kag matahum; kag naghalab sila sa halalban:

19 Kag, yari karon, ang iban nga pito ka baka nagtakas sa olihi nila, huyus kag tama kalaw-ay kag maniwang, nga wala pa gid ako sing nakita nga kaangay sa kalaw-ayon sa bug-os nga duta sang Egipto:

20 Kag ang mga baka nga maniwang kag malaw-ay nagkaon sang pito nga nahaunang mga baka nga matambok:

21 Kag sang nakaon nila sila, indi makilala nga nakaon nila sila; apang malaw-ay sila gihapon, subong sang una. Gani nagmata ako.

22 Kag nakita ko sa akon damgo, kag, yari karon, pito ka pusu nag-ulhut sa isa ka puno, matimsog kag maayo:

23 Kag, yari karon, pito ka pusu, nalaya, kupus, kag ginpakigas sang sidlangan nga hangin, nag-ulhut sa olihi nila:

24 Kag ang kupus nga mga pusu naglamon sang pito ka pusu nga maayo: kag ginsugid ko ini sa mga salamangkero; apang wala sing bisan sin-o nga makapahayag sini sa akon.

25 ś Kag si Jose nagsiling kay Faraon, Ang damgo ni Faraon isa: ang Dios nagpahayag kay Faraon sang buut na niya himoon.

26 Ang pito ka baka nga maayo pito ka tuig; kag ang pito ka pusu nga maayo pito ka tuig: ang damgo isa.

27 Kag ang pito ka baka nga maniwang kag malaw-ay nga nagtakas sa olihi nila pito ka tuig; kag ang pito ka pusu nga wala sing sulud nga ginpakigas sang sidlangan nga hangin mangin pito ka tuig nga tiggulutum.

28 Ini amo ang butang nga ginpamolong ko kay Faraon: Ang buut na nga himoon sang Dios ginapahayag niya kay Faraon.

29 Yari karon, magaabut ang pito ka tuig sang dakung kabuganaan sa bug-os nga duta sang Egipto:

30 Kag magaabut sa olihi nila ang pito ka tuig nga tiggulutum; kag ang bug-os nga kabuganaan malipatan sa duta sang Egipto; kag upuron sang tiggulutum ang duta;

31 Kag ang kabuganaan indi makilala sa duta bangud sang tiggulutum nga magasonod; kay ini magatama gid.

32 Kag sanglit ang damgo ni Faraon ginduha; ina bangud ang butang ginpat-ud sang Dios, kag ang Dios magapahanabu sini sa madali.

33 Busa karon magpangita si Faraon sing lalaki nga mahinalongon kag maalam, kag padumalahon sia sa duta sang Egipto.

34 Maghimo si Faraon sini, kag magtangdo sia sing mga opisyal sa duta, kag magkuha sang ikalima nga bahin sang patubas sang duta sang Egipto sa pito ka tuig nga bugana.

35 Kag magtipon sila sang tanan nga kalan-on sa sinang maayo nga mga tuig nga magaabut, kag magsuput sing uyas sa idalum sang kamut ni Faraon, kag magtago sila sing kalan-on sa mga siudad.

36 Kag ina nga kalan-on mangintigana sa duta nga sa pito ka tuig nga tiggulutum, nga magaabut sa duta sang Egipto; agud nga ang duta indi malaglag sang tiggulutum.

37 ś Kag ang butang maayo sa itololok ni Faraon, kag sa itololok sang tanan niya nga alagad.

38 Kag si Faraon nagsiling sa iya mga alagad, Makakita bala kita sing isa nga subong sini, lalaki nga yara sa iya ang Espiritu sang Dios?

39 Kag si Faraon nagsiling kay Jose, Sanglit nga ang Dios nagpahayag sa imo sini tanan, wala sing bisan sin-o nga mahinalongon kag maalam subong sa imo:

40 Magadumala ka sang akon balay, kag sono sa imo polong ang bug-os ko nga katawohan pagadumalahan: lamang sa trono magalabi pa ako sa imo.

41 Kag si Faraon nagsiling kay Jose, Tan-awa, ginbutang ko ikaw nga labaw sa bug-os nga duta sang Egipto.

42 Kag si Faraon naghukas sa iya kamut sang iya singsing, kag ginsuksuk ini sa kamut ni Jose, kag ginpapanaptan sia sing mga bayo nga lino nga mapino, kag ginbutangan sing kolintas nga bulawan sa iya liog;

43 Kag ginpasakay niya sia sa ikaduha nga kangga nga iya; kag nagsinggit sila sa una niya, Magpilo sang tuhud: kag ginpadumala niya sia sa bug-os nga duta sang Egipto.

44 Kag si Faraon nagsiling kay Jose, Ako ang Faraon, kag sa wala ikaw wala sing bisan sin-o nga makabayaw sang iya kamut ukon sang iya tiil sa bug-os nga duta sang Egipto.

45 Kag si Faraon naghingalan kay Jose nga Zafenat-paanea; kag ginpaasawa niya sa iya si Asenat nga anak nga babaye ni Poti-fera nga pari sang On. Kag si Jose naggowa sa palibut sang bug-os nga duta sang Egipto.

46 ś Kag si Jose katloan ka tuig sang sia nagtindug sa atubangan ni Faraon nga hari sang Egipto. Kag si Jose naghalin sa atubangan ni Faraon, kag naglibut sa bug-os nga duta sang Egipto.

47 Kag sa pito ka tuig nga bugana ang duta nagpatubas sing mabuganaon.

48 Kag gintipon niya ang tanan nga kalan-on sa pito ka tuig, nga yara sa duta sang Egipto, kag ginsuput ang kalan-on sa mga siudad: ang kalan-on sang latagon, nga yara sa palibut sang tagsa ka siudad, ginsuput niya sa amo man nga duug.

49 Kag si Jose nagtipon sing uyas kaangay sang balas sang dagat, tama kadamu, tubtub nga gin-untatan niya sing isip; kay indi na maisip.

50 Kag kay Jose natawo ang duha ka anak nga lalaki sa wala pa mag-abut ang mga tuig sang tiggulutum, nga gin-anak sa iya ni Asenat nga anak ni Poti-fera nga pari sang On.

51 Kag ginhingalanan ni Jose ang panganay Manases: Kay ang Dios, siling niya, nagpalipat sa akon sang tanan ko nga kabudlayan, kag sang bug-os nga panimalay sang akon amay.

52 Kag ginhingalanan niya ang ikaduha Efraim: Kay ang Dios naghimo sa akon nga mabungahon sa duta sang akon kapipit-an.

53 ś Kag ang pito ka tuig sang kabuganaan, nga yara sa duta sang Egipto, natapus.

54 Kag ang pito ka tuig sang tiggulutum nagsugud sa pag-abut, sono sa nasiling ni Jose: kag ang tiggulutum yara sa tanan nga kadutaan; apang sa bug-os nga duta sang Egipto may kalan-on.

55 Kag sang nagutum ang bug-os nga duta sang Egipto, ang katawohan nagsinggit kay Faraon sing kalan-on: kag si Faraon nagsiling sa tanan nga mga Egiptohanon, Kadto kamo kay Jose; kon ano ang iya isiling sa inyo, himoa.

56 Kag ang tiggulutum yara sa bug-os nga kadaygan sang duta: kag si Jose nagbukas sang tanan nga bodega, kag nagpadalawat sa mga Egiptohanon; kag ang tiggulutum naglala sa duta sang Egipto.

57 Kag ang tanan nga kadutaan nag-abut sa Egipto sa pagdalawat sing uyas kay Jose; bangud nga ang tiggulutum sa tanan nga kadutaan matama.

KAPITULO 42

KARON sang nakita ni Jacob nga may uyas sa Egipto, si Jacob nagsiling sa iya mga anak nga lalaki, Ngaa bala nagatolokay kamo?

2 Kag nagsiling sia, Yari karon, nabatian ko nga may uyas sa Egipto: dulhog kamo didto, kag dalawat nga sa aton gikan didto; agud nga mabuhi kita, kag indi mapatay.

3 ś Kag nagdulhog ang napulo ka mag-ulutud nga lalaki ni Jose sa pagdalawat sing uyas sa Egipto.

4 Apang si Benjamin, utud ni Jose, wala ginpadala ni Jacob upud sa iya mga utud; kay sia nagsiling, Basi may malain nga mahanabu sa iya.

5 Kag ang mga anak nga lalaki ni Israel nag-abut sa pagdalawat sing uyas upud sa iban nga nag-abut: kay ang tiggulutum yara sa duta sang Canaan.

6 Kag si Jose amo ang gobernador sang duta, kag sia ang nagpadalawat sa tanan nga tawo sang duta: kag nag-abut ang mga utud ni Jose, kag nagyaub sila sa duta sa atubangan niya.

7 Kag nakita ni Jose ang iya mga utud, kag nakilala niya sila, apang nagpakadumoloong sia sa ila, kag nagpamolong sing matigdas sa ila; kag sia nagsiling sa ila, Diin bala kamo naghalin? Kag sila nagsiling, Gikan sa duta sang Canaan sa pagdalawat sang kalan-on.

8 Kag nakilala ni Jose ang iya mga utud, apang sila wala makakilala sa iya.

9 Kag nadumduman ni Jose ang mga damgo nga gindamgo niya nahanungud sa ila, kag nagsiling sa ila, Mga espiya kamo; sa pagtan-aw sang kapigaw sang duta nagkari kamo.

10 Kag nagsiling sila sa iya, Indi, ginoo ko, kondi ang imo mga alagad nagkari sa pagdalawat sing kalan-on.

11 Kami tanan mga anak sang isa ka tawo; mga tawo kami nga maminatud-on, ang imo mga alagad indi mga espiya.

12 Kag nagsiling sia sa ila, Indi, kondi sa pagtan-aw sang kapigaw sang duta nagkari kamo.

13 Kag nagsiling sila, Ang imo mga alagad napulog duha ka mag-utud, mga anak nga lalaki sang isa ka tawo sa duta sang Canaan; kag, yari karon, ang kamanghuran yadto sa sining adlaw sa amon amay, kag ang isa wala na.

14 Kag si Jose nagsiling sa ila, Amo ina ang ginpamolong ko sa inyo, nga nagasiling, Mga espiya kamo:

15 Sa sini pamatud-an kamo: Sa kabuhi ni Faraon indi kamo makahalin diri, kon indi ang inyo utud nga kamanghuran magkari diri.

16 Ipadala ang isa sa inyo, kag ipakuha sa iya ang inyo utud, kag kamo magapabilin sa bilanggoan, agud mapamatud-an ang inyo mga polong, kon may kamatooran sa inyo: ukon kon indi, sa kabuhi ni Faraon sa pagkamatuud kamo mga espiya.

17 Kag ginbilanggo niya sila nga tanan sing tingub sing tatlo ka adlaw.

18 Kag si Jose nagsiling sa ila sang ikatlo nga adlaw, Himoa ini, kag mabuhi kamo; kay nahadluk ako sa Dios:

19 Kon maminatud-on kamo nga mga tawo, magpagapus ang isa sang inyo mga utud sa balay sang inyo bilanggoan: lakat kamo, kag magdala sing uyas sa inyo mga panimalay bangud sang tiggulutum:

20 Apang dalha ang inyo kamanghuran nga utud sa akon; sa amo mapamatud-an ang inyo mga polong, kag indi kamo mapatay. Kag ginhimo nila ini.

21 ś Kag nagsinilingay sila, Sa pagkamatuud nakasala kita nahanungud sa aton utud, nga nakita naton ang kasakit sang iya kalag, sang nagpakilooy sia sa aton, kag wala kita magpamati; busa nag-abut sa aton ining kalisdanan.

22 Kag si Ruben nagsabat sa ila, nga nagasiling, Wala bala ako magpamolong sa inyo, nga nagasiling, Dili kamo magpakasala batok sa bata; kag wala kamo magpamati? busa, yari karon, ang iya dugo ginakinahanglan man.

23 Kag wala sila nakahibalo nga si Jose nakahangup sa ila; kay naghambal sia sa ila paagi sa manugpatpat.

24 Kag nagtalikod sia sa ila, kag naghibi; kag nag-atubang sa ila liwat, kag nagpakigsugilanon sa ila, kag ginkuha si Simeon sa ila, kag gingapus sia sa atubangan sang mga mata nila.

25 ś Niyan si Jose nagsogo nga pun-on ang ila mga sako sing uyas, kag iuli ang kuarta sang tagsa ka tawo sa iya sako, kag hatagan sila sing balon sa dalanon: kag amo ini ang ginhimo niya sa ila.

26 Kag ginpakargahan nila ang ila mga asno sing uyas, kag nagtaliwan didto.

27 Kag sang binukad sang isa sa ila ang iya sako sa pagpakaon sang iya asno sa dalayonan, nakita niya ang iya kuarta; kay, yari karon, ini yara sa baba sang iya sako.

28 Kag sia nagsiling sa iya mga utud, Gin-uli ang akon kuarta; kag, yari karon, ini yara sa akon sako: kag ginkulbaan ang ila tagiposoon, kag ginhadlukan sila, nga nagasiling sa isa kag isa, Ano bala ining nahimo sang Dios sa aton?

29 ś Kag nag-abut sila kay Jacob nga ila amay sa duta sang Canaan, kag ginsugid sa iya ang tanan nga nahanabu sa ila; nga nagasiling,

30 Ang lalaki, nga amo ang ginoo sang duta, nagpamolong sing matigdas sa amon, kag nagkabig sa amon nga mga espiya sa duta.

31 Kag kami nagsiling sa iya, Maminatud-on kami nga mga tawo; indi kami mga espiya:

32 Napulog duha kami ka mag-utud, nga mga anak nga lalaki sang amon amay; ang isa wala na, kag ang kamanghuran yadto sa sining adlaw sa amon amay sa duta sang Canaan.

33 Kag ang lalaki, ang ginoo sang duta, nagsiling sa amon, Sa sini makilala ko nga kamo mga tawo nga maminatud-on; ibilin sa akon ang isa sang inyo mga utud, kag dala kamo sing pagkaon sa inyo mga panimalay bangud sang tiggulutum, kag lakat:

34 Kag dalha sa akon ang inyo kamanghuran nga utud: niyan mahibaloan ko nga kamo indi mga espiya, kondi mga tawo nga maminatud-on: sa sini ihatag ko sa inyo ang inyo utud, kag magapatikang kamo sa duta.

35 ś Kag nahanabu sang ginbobo nila ang ila mga sako, nga, yari karon, ang binugkos sang kuarta sang tagsa ka tawo yara sa iya sako: kag sang nakita nila kag sang ila amay ang mga binugkos sang kuarta, ginhadlukan sila.

36 Kag si Jacob nga ila amay nagsiling sa ila, Ginpakawalaan ninyo ako sang akon kabataan: si Jose wala na, kag si Simeon wala na, kag si Benjamin kuhaon ninyo: tanan ining mga butang batok sa akon.

37 Kag si Ruben nagpamolong sa iya amay, nga nagasiling, Patya ang akon duha ka anak nga lalaki, kon indi ko sia mabalik sa imo: itugyan sia sa akon kamut, kag iuli ko sia liwat sa imo.

38 Kag sia nagsiling, Indi magdulhog ang akon anak upud sa inyo; kay ang iya utud patay na, kag sia lamang ang nabilin: kon matabu ang malain sa iya sa dalanon nga inyo kadtoan, niyan papanaugon ninyo ang akon mga uban nga may kasubu sa lulubngan.

KAPITULO 43

KAG ang tiggulutum matama sa duta.

2 Kag nahanabu, sang naorot nila kaon ang uyas nga nadala nila gikan sa Egipto, nagsiling sa ila ang ila amay, Balik liwat, dalawat kamo sa aton sing diutay nga pagkaon.

3 Kag si Juda nagpamolong sa iya, nga nagasiling, Ang lalaki nagpaandam sa amon sing maligdong, nga nagasiling, Indi kamo makakita sang akon nawung, kon wala ang inyo utud upud sa inyo.

4 Kon ipadala mo ang amon utud upud sa amon, magadulhog kami kag magadalawat sa imo sing kalan-on:

5 Apang kon indi mo pag-ipadala sia, indi kami magdulhog: kay ang lalaki nagsiling sa amon, Indi kamo makakita sang akon nawung, kon wala ang inyo utud upud sa inyo.

6 Kag si Israel nagsiling, Ngaa bala ginhimoan ninyo ako sing amo nga kalainan, sa pagsugid sa lalaki nga kamo may utud pa nga lalaki?

7 Kag nagsiling sila, Ang lalaki nagpamangkot sing masusihon nahanungud sa aton kahimtangan, kag sa aton kahimataan, nga nagasiling, Buhi pa bala ang inyo amay? may utud nga lalaki pa kamo? kag amon ginsugid sa iya sono sa naundan sining mga polong: nakahibalo gid bala kami nga sia masiling, Dalha padulhog ang inyo utud nga lalaki?

8 Kag si Juda nagsiling kay Israel nga iya amay, Ipadala ang pamatan-on upud sa akon, kag magatindug kami kag magalakat; agud nga mabuhi kita, kag indi mapatay, tingub kami, kag ikaw, kag ang amon mga magamay man.

9 Ako manginkalig-onan nga sa iya: kinahanglanon mo sia sa akon kamut: kon indi ko sia mauli sa imo, kag mabutang sia sa atubangan mo, niyan paantusa ako sang kabasulanan sing dayon:

10 Kay kon wala kami magdugay, sa pagkamatuud karon nakabalik na kami sing makaduha.

11 Kag ang ila amay nga si Israel nagsiling sa ila, Niyan kon amo ini, himoa ini; dala kamo sing labing maayo nga mga bunga sang duta sa inyo mga suludlan, kag dalhi ang lalaki sing regalo, diutay nga ihalaplas, kag diutay nga dugus, mga rikado, kag mirra, mga nuez, kag mga almendro:

12 Kag dala kamo sing pilo nga kuarta sa inyo kamut; kag ang kuarta nga gin-uli sa baba sang inyo mga sako, dalha sa inyo kamut liwat; ayhan basi wala madiparahan:

13 Dalha man ang inyo utud, kag tindug, balik kamo sa lalaki:

14 Kag ang Makaako nga Dios magkalooy sa inyo sa atubangan sang lalaki, agud nga buhian niya ang inyo isa ka utud, kag si Benjamin. Kon mawalaan ako sang akon kabataan, mawalaan ako.

15 ś Kag nagdala ang mga lalaki sadtong regalo, kag nagdala sila sing pilo nga kuarta sa ila kamut, kag kay Benjamin; kag nagtindug, kag nagdulhog sa Egipto, kag nag-atubang kay Jose.

16 Kag sang nakita ni Jose si Benjamin upud sa ila, nagsiling sia sa manugdumala sang iya balay, Dalha sa balay ining mga lalaki, kag ihawi, kag maghanda; kay ining mga lalaki magapaniaga upud sa akon.

17 Kag ginhimo sang lalaki ang sono sa ginsogo ni Jose; kag gindala sang lalaki ang mga tawo sa balay ni Jose.

18 Kag ginhadlukan ang mga tawo, bangud nga gindala sila sa balay ni Jose; kag nagsiling sila, Bangud sang kuarta nga gin-uli sa aton mga sako sang una ginpasulud kita; agud nga makakita sia sing sil-an batok sa aton, kag magdamhag sa aton, kag sa pagdakup sa aton subong nga mga ulipon, kag sa aton mga asno.

19 Kag nagpalapit sila sa tulugyanan sang balay ni Jose, kag nagpakigsugilanon sila sa iya sa ganhaan sang balay,

20 Kag nagsiling, O sir, nagdulhog kami sa pagkamatuud sing una sa pagbakal sing kalan-on:

21 Kag nahanabu, sang pag-abut namon sa dalayonan, nga ginbukad namon ang amon mga sako, kag, yari karon, ang kuarta sang tagsa ka tawo yara sa baba sang iya sako, ang amon kuarta sa bug-os nga timbang: kag gindala namon ini sa amon kamut liwat.

22 Kag nagdala kami sing iban nga kuarta sa amon kamut sa pagbakal sing kalan-on: wala kami makahibalo kon sin-o ang nagbutang sang amon kuarta sa amon mga sako.

23 Kag nagsiling sia, Ang paghidait sa inyo, dili kamo magkahadluk: ang inyo Dios, kag ang Dios sang inyo amay, naghatag sa inyo sing bahandi sa inyo mga sako: ang inyo kuarta yari sa akon. Kag ginpagowa niya sa ila si Simeon.

24 Kag ang lalaki nagdala sang mga tawo sa balay ni Jose, kag ginhatagan sila sing tubig, kag nagpanghinaw sila sang ila mga tiil; kag ginhatagan niya ang ila mga asno sing kompay.

25 Kag gin-aman nila ang regalo sa wala pa mag-abut si Jose sa odto: kay nabatian nila nga magakalaon sila didto.

26 ś Kag sang nagpauli si Jose sa balay, gindala nila sa iya ang regalo nga yara sa ila kamut sa sulud sang balay, kag nagyaub sila sa iya sa duta.

27 Kag nagpamangkot sia sa ila kon maanoano sila, kag nagsiling, Maayo bala ang inyo amay, ang tigulang nga ginpamolong ninyo? Buhi pa bala sia?

28 Kag sila nagsabat, Ang imo alagad nga amon amay yara sa maayong lawas, buhi pa sia. Kag nagyaub sila sang ila mga olo, kag naghimo sang pagtahud.

29 Kag ginbayaw niya ang iya mga mata, kag nakita si Benjamin nga iya utud, anak nga lalaki sang iya iloy, kag nagsiling, Amo ini bala ang inyo utud nga manghud, nga ginpamolong ninyo sa akon? Kag sia nagsiling, Ang Dios magpakamaayo sa imo, anak ko.

30 Kag nagdalidali si Jose; kay ang iya balatiagon ginhidlaw sa iya utud: kag nagpangita sia kon diin mahibi; kag nagsulud sia sa iya hulut, kag naghibi didto.

31 Kag ginhilam-osan niya ang iya nawung, kag naggowa, kag nagpugung sang iya kaugalingon, kag nagsiling, Ibutang ang pagkaon.

32 Kag nagbutang sila sing pahain nga sa iya, kag pahain nga sa ila, kag pahain nga sa mga Egiptohanon, nga nagkaon upud sa iya: bangud nga ang mga Egiptohanon indi magkaon upud sa mga Hebreo; kay kangil-aran ini sa mga Egiptohanon.

33 Kag naglingkod sila sa atubang niya, ang magulang sono sa iya kinamatarung nga pagkapanganay, kag ang kamanghuran sono sa iya pagkamanghud: kag ang mga tawo natingala sa isa kag isa.

34 Kag ginkuha niya kag ginpadala sa ila ang mga pahat sang pagkaon gikan sa atubangan niya: apang ang pahat sang pagkaon ni Benjamin lima ka pilo sang bisan kay sin-o sa ila. Kag nag-inum sila, kag nagkasadya upud sa iya.

KAPITULO 44

KAG nagsogo sia sa tulugyanan sang iya balay, nga nagasiling, Pun-a ang mga sako sang mga tawo sing kalan-on, sono sa kadamuon nga madala nila, kag ibutang ang kuarta sang tagsa ka tawo sa baba sang iya sako.

2 Kag ibutang ang akon tasa, ang tasa nga pilak, sa baba sang sako sang kamanghuran, kag ang iya kuarta nga sa uyas. Kag ginhimo niya sono sa polong nga ginpamolong ni Jose.

3 Sang pagpamanagbanag sang kaagahon, ginpalakat ang mga tawo, sila kag ang ila mga asno.

4 Kag sang nakagowa sila sa siudad, kag indi pa man malayo, si Jose nagsiling sa iya tulugyanan, Tindug, sonda ang mga tawo; kag kon malambut mo sila, isiling sa ila, Ngaa ginbalusan ninyo sing malaut ang maayo?

5 Indi bala amo ini ang ginaimnan sang akon ginoo, kag sa sini sia nagaban-aw gid? nakahimo kamo sang malaut sa paghimo sini.

6 ś Kag nalambut niya sila, kag ginpamolong niya sa ila ining amo man nga mga polong.

7 Kag sila nagsiling sa iya, Ngaa bala nagasiling ang akon ginoo sing subong sining mga polong? Ang Dios magdumili nga ang imo mga alagad maghimo sing subong sining butang:

8 Yari karon, ang kuarta, nga nakit-an namon sa baba sang amon mga sako, ginbalik namon liwat sa imo gikan sa duta sang Canaan: paano niyan nga magpangawat kami sa balay sang imo ginoo sang pilak ukon bulawan?

9 Bisan sa kay sin-o sang imo mga alagad makita ini, mapatay sia, kag kami man mangin-ulipon sang akon ginoo.

10 Kag sia nagsiling, Karon manginsono ini sa inyo man mga polong: sia nga makitaan sini mangin-akon alagad; kag kamo manginwalay sala.

11 Niyan nagdalidali ang tagsa ka tawo sa pagholog sang iya sako sa duta, kag ginbukad sang tagsa ka tawo ang iya sako.

12 Kag gin-usisa niya, kag nagsugud sa kamagulangan, kag nagdolog sa kamanghuran: kag ang tasa nakit-an sa sako ni Benjamin.

13 Niyan ginkusnit nila ang ila mga bayo, kag ginpakargahan sang tagsa ka tawo ang iya asno, kag nagbalik sa siudad.

14 ś Kag si Juda kag ang iya mga utud nag-abut sa balay ni Jose; kay sia didto pa: kag naghapa sila sa atubangan niya.

15 Kag nagsiling si Jose sa ila, Ano bala nga buhat ining nahimo ninyo? wala bala kamo makahibalo nga ang lalaki subong sa akon makaban-aw sing gayud?

16 Kag si Juda nagsiling, Ano bala ang amon isiling sa akon ginoo? ano bala ang ipamolong namon? ukon ano ang pagpakatarung namon sang amon kaugalingon? ang Dios nakasapo sang kalautan sang imo mga alagad: yari karon, kami mga alagad sang akon ginoo, tingub kami, kag sia man nga nakitaan sang tasa.

17 Kag sia nagsiling, Ang Dios magdumili nga ako maghimo sini: apang ang lalaki nga sa iya kamut nasapwan ang tasa, sia mangin-akon alagad; kag nahanungud sa inyo, pauli kamo sa paghidait sa inyo amay.

18 ś Niyan si Juda nagpalapit sa iya, kag nagsiling, O ginoo ko, ginaampo ko sa imo, pahambala ang imo alagad sing isa ka polong sa idulungug sang akon ginoo, kag dili pagpadabdaba ang imo kaakig batok sa imo alagad: kay ikaw kaangay ni Faraon.

19 Ang akon ginoo nagpamangkot sa iya mga alagad, nga nagasiling, May amay bala kamo, ukon utud nga lalaki?

20 Kag nagsiling kami sa akon ginoo, May amay kami, isa ka tigulang, kag isa ka bata sang iya katigulangon, nga magamay; kag ang iya utud nga lalaki patay na, kag sia lamang ang nabilin sang iya iloy, kag ang iya amay nagahigugma sa iya.

21 Kag ikaw nagsiling sa imo mga alagad, Dalha sia sa akon, agud nga matan-aw ko sia.

22 Kag kami nagsiling sa akon ginoo, Ang pamatan-on indi makabiya sa iya amay: kay kon magbiya sia sa iya amay, ang iya amay mapatay.

23 Kag ikaw nagsiling sa imo mga alagad, Kon ang inyo utud nga kamanghuran indi magdulhog upud sa inyo, indi na ninyo makita ang akon nawung.

24 Kag nahanabu sang nag-abut kami sa akon amay nga imo alagad, ginsugid namon sa iya ang mga polong sang akon ginoo.

25 Kag ang amon amay nagsiling, Balik liwat, kag bakal sa aton sang diutay nga kalan-on.

26 Kag kami nagsiling, Indi kami makadulhog: kon ang amon utud nga kamanghuran mag-upud sa amon, niyan magadulhog kami: kay indi kami makakita sang nawung sang lalaki, kon indi upud sa amon ang amon kamanghuran nga utud.

27 Kag ang imo alagad nga akon amay nagsiling sa amon, Kamo nakahibalo nga ang akon asawa nag-anak sa akon sing duha ka anak nga lalaki:

28 Kag ang isa nagbiya sa akon, kag nagsiling ako, Sa pagkamatuud ginkusnit sia; kag tubtub niyan wala ko sia makita:

29 Kag kon kuhaon ninyo ining isa man sa akon, kag mahanabu sa iya ang kalainan, papanaugon ninyo ang akon mga uban nga may kasubu sa lulubngan.

30 Busa karon kon mag-abut ako sa imo alagad nga akon amay, kag ang pamatan-on wala sa amon; sanglit nga ang iya kabuhi nahigot sa kabuhi sang pamatan-on;

31 Ini mahanabu, kon makita niya nga ang pamatan-on wala sa amon, nga mapatay sia: kag ang imo mga alagad magapapanaug sang mga uban sang imo alagad nga amon amay nga may kasubu sa lulubngan.

32 Kay ang imo alagad nanginkalig-onan sang pamatan-on sa akon amay, nga nagasiling, Kon indi ko sia mauli sa imo, niyan magaantus ako sang kabasulan sang akon amay sing dayon.

33 Busa karon, ginaampo ko sa imo, papabilina nga ulipon sang akon ginoo ang imo alagad sa baylo sang pamatan-on; kag pataklara ang pamatan-on upud sa iya mga utud.

34 Kay paano bala ang pagtaklad ko sa akon amay, kag ang pamatan-on wala sa akon? ayhan basi makit-an ko ang malaut nga matabu sa akon amay.

KAPITULO 45

NIYAN si Jose indi makapugung sang iya kaugalingon sa atubangan nila tanan nga nagatindug sa luyo niya; kag sia nagsinggit, Pagowaa ang tagsa ka tawo gikan sa akon. Kag wala sing tawo nga nagatindug upud sa iya, sang pagpakilala ni Jose sang iya kaugalingon sa iya mga utud.

2 Kag naghibi sia sing matonog: kag ang mga Egiptohanon kag ang panimalay ni Faraon nakabati.

3 Kag si Jose nagsiling sa iya mga utud, Ako si Jose; buhi pa bala ang akon amay? Kag ang iya mga utud wala makasabat sa iya; kay naorongan sila sa atubangan niya.

4 Kag nagsiling si Jose sa iya mga utud, Palapit sa akon, ginaampo ko sa inyo. Kag sila nagpalapit. Kag nagsiling sia, Ako si Jose nga inyo utud, nga ginbaligya ninyo sa Egipto.

5 Gani karon dili kamo magkalisud, ukon magkaakig sa inyo kaugalingon, nga ginbaligya ninyo ako diri: kay ang Dios nagpadala sa akon sing una sa inyo sa pagtipig sang kabuhi.

6 Kay sining duha ka tuig ang tiggulutum yari sa duta: kag may lima pa ka tuig, nga wala sing pag-arado ukon ani.

7 Kag ang Dios nagpadala sa akon sing una sa inyo sa pagtipig nga sa inyo sing mga kaliwatan sa duta, kag sa pagbuhi sa inyo sang daku nga kaluwasan.

8 Gani indi kamo ang nagpadala sa akon diri, kondi ang Dios: kag ginhimo niya ako nga amay kay Faraon, kag ginoo sa bug-os niya nga panimalay, kag isa ka manugdumala sa bug-os nga duta sang Egipto.

9 Dalidali kamo, kag taklad sa akon amay, kag isiling sa iya, Amo ini ang ginasiling sang imo anak nga si Jose, Ang Dios naghimo sa akon nga ginoo sa bug-os nga Egipto: dulhog sa akon, dili ka magpalantang:

10 Kag magapuyo ka sa duta sang Gosen, kag manginmalapit ka sa akon, ikaw, kag ang imo kabataan, kag ang kabataan sang imo kabataan, kag ang imo mga panong, kag ang imo kahayupan, kag ang tanan nga imo:

11 Kag didto saguron ko ikaw; kay may lima pa ka tuig nga tiggulutum; kay basi ikaw, kag ang imo panimalay, kag ang tanan nga imo, magadangat sa pagkaimolon.

12 Kag, yari karon, ang imo mga mata nagatan-aw, kag ang mga mata sang akon utud nga si Benjamin, nga akon ini baba ang nagapamolong sa inyo.

13 Kag sugiran ninyo ang akon amay sang bug-os ko nga himaya sa Egipto, kag sang tanan nga inyo nakita; kag magdalidali kamo kag dalhon ninyo diri ang akon amay.

14 Kag naghakus sia sa liog ni Benjamin nga iya utud, kag naghibi; kag si Benjamin naghibi sa iya liog.

15 Labut pa naghaluk sia sa tanan niya nga utud, kag naghibi sa ila: kag ugaling nagpakighambal sa iya ang iya mga utud.

16 ś Kag ang kabantugan sina nabatian sa balay ni Faraon, nga nagasiling, Nag-abut ang mga utud ni Jose: kag nagpahamuut ini kay Faraon, kag sa iya mga alagad.

17 Kag si Faraon nagsiling kay Jose, Isiling sa imo mga utud, Himoa ninyo ini; lulani ninyo ang inyo kasapatan, kag lakat, kadto kamo sa duta sang Canaan;

18 Kag kuhaa ang inyo amay kag ang inyo mga panimalay, kag kari sa akon: kag ako magahatag sa inyo sang maayo sang duta sang Egipto, kag magakaon kamo sang tambok sang duta.

19 Karon ikaw ginasogo, himoa ninyo ini; kuha kamo sa duta sang Egipto sing mga karo nga sa inyo mga magamay, kag sa inyo mga asawa, kag dalha ang inyo amay, kag magkari.

20 Dili kamo man magsapak sang inyo mga galamiton; kay ang maayo sang bug-os nga duta sang Egipto inyo.

21 Kag ginhimo ini sang mga anak ni Israel: kag ginhatagan sila ni Jose sing mga karo, sono sa sogo ni Faraon, kag ginhatagan sila sing balon sa dalanon.

22 Sa ila tanan ginhatagan niya ang isa kag isa sing mga ilisan nga panapton; apang si Benjamin ginhatagan niya sing tatlo ka gatus ka bilog nga pilak, kag lima ka ilisan nga panapton.

23 Kag sa iya amay nagpadala sia sono sining masonod; napulo ka asno nga nalulanan sang maayong mga butang sang Egipto, kag napulo ka babaye nga asno nga nalulanan sing uyas kag tinapay kag kalan-on nga sa iya amay sa dalanon.

24 Gani ginpapauli niya ang iya mga utud, kag nagtaliwan sila: kag nagsiling sia sa ila, Dili kamo mag-inaway sa dalanon.

25 ś Kag nagtaklad sila gikan sa Egipto, kag nag-abut sa duta sang Canaan kay Jacob nga ila amay,

26 Kag nagsugid sa iya, nga nagasiling, Buhi pa si Jose, kag sia gobernador sa bug-os nga duta sang Egipto. Kag ang tagiposoon ni Jacob napunaw, kay wala sia nagpati sa ila.

27 Kag ginsugiran nila sia sang tanan nga mga polong ni Jose, nga iya ginsiling sa ila: kag sang nakita niya ang mga karo nga ginpadala ni Jose sa pagdala sa iya, ang espiritu ni Jacob nga ila amay naumpawan:

28 Kag si Israel nagsiling, Tuman na; si Jose nga akon anak buhi pa: magakadto ako kag makigkita sa iya sa wala pa ako mapatay.

KAPITULO 46

KAG si Israel nagpanlakatan upud sang tanan nga iya, kag nag-abut sa Beer-seba, kag nagdolot sing mga halad sa Dios sang iya amay nga si Isaac.

2 Kag ang Dios nagpamolong kay Israel sa mga palanan-awon sa kagab-ihon, kag nagsiling, Jacob, Jacob. Kag nagsiling sia, Yari ako.

3 Kag sia nagsiling, Ako ang Dios, ang Dios sang imo amay: dili ka magkahadluk sa pagdulhog sa Egipto; kay magahimo ako didto gikan sa imo sing isa ka dakung pungsud:

4 Ako magadulhog upud sa imo sa Egipto; kag sa pagkamatuud pabalikon ko man ikaw: kag si Jose magabutang sang iya kamut sa imo mga mata.

5 Kag nagtaliwan si Jacob sa Beer-seba: kag gindala sang mga anak nga lalaki ni Israel ang ila amay nga si Jacob, kag ang ila mga magamay, kag ang ila mga asawa, sa mga karo nga napadala ni Faraon sa pagdala sa iya.

6 Kag gindala nila ang ila kahayupan, kag ang ila mga pagkabutang, nga nakuha nila sa duta sang Canaan, kag nag-abut sa Egipto, si Jacob, kag ang tanan niya nga kaliwat upud sa iya:

7 Ang iya mga anak nga lalaki, kag ang mga anak nga lalaki sang iya mga anak nga lalaki upud sa iya, ang iya mga anak nga babaye, kag ang mga anak nga babaye sang iya mga anak nga lalaki, kag ang tanan niya nga kaliwat gindala niya upud sa iya sa Egipto.

8 ś Kag ini sila amo ang mga ngalan sang mga kaanakan ni Israel, nga nag-abut sa Egipto, si Jacob kag ang iya mga anak nga lalaki: si Ruben, panganay ni Jacob.

9 Kag ang mga anak nga lalaki ni Ruben; si Hanoc, kag si Palu, kag si Hezron, kag si Carmi.

10 ś Kag ang mga anak nga lalaki ni Simeon; si Jemuel, kag si Jamin, kag si Ohad, kag si Jaquin, kag si Zohar, kag si Shaul, ang anak nga lalaki sang Canaanhon nga babaye.

11 ś Kag ang mga anak nga lalaki ni Levi; si Gerson, si Coat, kag si Merari.

12 ś Kag ang mga anak nga lalaki ni Juda; si Er, kag si Onan, kag si Sela, kag si Farez, kag si Zera: apang si Er kag si Onan napatay sa duta sang Canaan. Kag ang mga anak nga lalaki ni Farez amo si Hezron kag si Hamul.

13 ś Kag ang mga anak nga lalaki ni Isacar; si Tola, kag si Puva, kag si Job, kag si Simron.

14 ś Kag ang mga anak nga lalaki ni Zabulon; si Sered, kag si Elon, kag si Jaleel.

15 Ini sila amo ang mga anak nga lalaki ni Lea, nga iya gin-anak kay Jacob sa Padan-aram, pati si Dina nga iya anak nga babaye: ang tanan nga mga kalag sang iya mga anak nga lalaki kag sang iya mga anak nga babaye katloan kag tatlo.

16 ś Kag ang mga anak nga lalaki ni Gad; si Zifion, kag si Hagi, si Suni, kag si Ezbon, si Eri, kag si Arodi, kag si Areli.

17 ś Kag ang mga anak nga lalaki ni Aser; si Jimna, kag si Isua, kag si Isui, kag si Beria, kag si Sera nga ila utud nga babaye: kag ang mga anak nga lalaki ni Beria; si Heber, kag si Malquiel.

18 Ini sila amo ang mga anak nga lalaki ni Zilpa, nga ginhatag ni Laban kay Lea nga iya anak nga babaye, kag ini sila gin-anak niya kay Jacob, napulog anum ka kalag.

19 Ang mga anak nga lalaki ni Raquel nga asawa ni Jacob; si Jose, kag si Benjamin.

20 ś Kag natawo kay Jose sa duta sang Egipto si Manases kag si Efraim, ang mga gin-anak sa iya ni Asenat, anak nga babaye ni Poti-fera nga pari sang On.

21 ś Kag ang mga anak nga lalaki ni Benjamin amo si Bela, kag si Bequer, kag si Asbel, si Gera, kag si Naaman, si Ehi, kag si Ros, si Mupim, kag si Hupim, kag si Ard.

22 Ini sila amo ang mga anak nga lalaki ni Raquel, nga natawo sa kay Jacob: napulog apat tanan ka kalag.

23 ś Kag ang mga anak nga lalaki ni Dan; si Husim.

24 ś Kag ang mga anak nga lalaki ni Neftali; si Jazeel, kag si Guni, kag si Jezer, kag si Silem.

25 Ini sila amo ang mga anak nga lalaki ni Bilha, nga ginhatag ni Laban kay Raquel nga iya anak nga babaye, kag ini sila gin-anak niya kay Jacob: pito tanan ka kalag.

26 Ang tanan nga mga kalag nga nag-abut upud ni Jacob sa Egipto, nga naggowa sa iya balikawang, walay labut ang mga asawa sang mga lalaking anak ni Jacob, kan-uman kag anum tanan ka kalag;

27 Kag ang mga anak nga lalaki ni Jose, nga natawo sa iya sa Egipto, duha ka kalag: ang tanan nga kalag sa panimalay ni Jacob, nga nag-abut sa Egipto, kapitoan.

28 ś Kag ginpadala niya si Juda sa una niya kay Jose, sa pagtudlo sa iya pa Gosen; kag nag-abut sila sa duta sang Gosen.

29 Kag si Jose naghanda sang iya kangga, kag nagtaklad sa pagsugata kay Israel nga iya amay, pa Gosen, kag nagpakilala sia sa iya; kag naghakus sia sa iya liog, kag naghibi sing malawig sa iya liog.

30 Kag si Israel nagsiling kay Jose, Karon tuguti ako nga mapatay, kay nakita ko ang imo nawung, bangud nga buhi pa ikaw.

31 Kag si Jose nagsiling sa iya mga utud, kag sa panimalay sang iya amay, Magataklad ako, kag magasugid kay Faraon, kag magasiling sa iya, Ang akon mga utud, kag ang panimalay sang akon amay, nga didto sa duta sang Canaan, nag-abut sa akon;

32 Kag ang mga lalaki mga manugpahalab, kay ang ila pangabuhian pagpahalab sang kahayupan; kag gindala nila ang ila mga panong, kag ang ila kahayupan, kag ang tanan nga ila.

33 Kag mahanabu, kon si Faraon magtawag sa inyo, kag magsiling, Ano bala ang inyo pangita?

34 Nga magsiling kamo, Ang pangabuhian sang imo mga alagad amo ang kahayupan kutub sang amon pagkapamatan-on tubtub karon, kami, kag ang amon kaamayan man: agud nga kamo makapuyo sa duta sang Gosen; kay kangil-aran sa mga Egiptohanon ang tagsa ka manugpahalab.

KAPITULO 47

NIYAN si Jose nagkadto kag nagsugid kay Faraon, kag nagsiling, Ang akon amay kag ang akon mga utud, kag ang ila mga panong, kag ang ila kahayupan, kag ang tanan nga ila, nag-abut gikan sa duta sang Canaan; kag, yari karon, yara sila sa duta sang Gosen.

2 Kag nagkuha sia sing lima ka lalaki sa iya mga utud, kag ginpakilala sila kay Faraon.

3 Kag si Faraon nagsiling sa iya mga utud, Ano bala ang inyo pangita? Kag sila nagsiling kay Faraon, Ang imo mga alagad mga manugpahalab, kami, kag ang amon mga kaamayan man.

4 Nagsiling sila sing dugang kay Faraon, Nagkari kami tungud sa pagpanlugayaw sa duta; kay ang imo mga alagad wala sing halalban nga sa ila mga panong; kay ang tiggulutum matama sa duta sang Canaan: gani karon, ginaampo namon sa imo, papuy-a ang imo mga alagad sa duta sang Gosen.

5 Kag nagpamolong si Faraon kay Jose, nga nagasiling, Ang imo amay kag ang imo mga utud nag-abut sa imo:

6 Ang duta sang Egipto yara sa imo atubangan; sa labi gid kaayo sang duta papuy-a ang imo amay kag ang imo mga utud; papuy-a sila sa duta sang Gosen: kag kon nahibaloan mo nga sa ila may mga lalaki nga sampaton, niyan himoa sila nga mga manugdumala sa akon kahayupan.

7 Kag gindala ni Jose si Jacob nga iya amay, kag ginpaatubang sia kay Faraon: kag ginpakamaayo ni Jacob si Faraon.

8 Kag si Faraon nagsiling kay Jacob, Pila ang edad mo?

9 Kag si Jacob nagsiling kay Faraon, Ang mga adlaw sang mga tuig sang akon pagpanlugayaw isa ka gatus kag katloan ka tuig: diutay kag malaut ang mga adlaw sang mga tuig sang akon kabuhi, kag wala makatupong sa mga adlaw sang mga tuig sang kabuhi sang akon mga kaamayan sa mga adlaw sang ila pagpanlugayaw.

10 Kag ginpakamaayo ni Jacob si Faraon, kag naghalin sa atubangan ni Faraon.

11 ś Kag ginpapuyo ni Jose ang iya amay kag ang iya mga utud, kag ginhatagan sila sing kaugalingon nga duta sa Egipto, sa labi gid kaayo sang duta, sa duta sang Rameses, subong sang ginsogo ni Faraon.

12 Kag ginsagud ni Jose sing kalan-on ang iya amay, kag ang iya mga utud, kag ang bug-os nga panimalay sang iya amay, sono sa ila mga panimalay.

13 ś Kag wala sing kalan-on sa bug-os nga duta; kay ang tiggulutum matama gid, sa bagay nga natup-ay sa gutum ang duta sang Egipto kag ang bug-os nga duta sang Canaan.

14 Kag gintipon ni Jose ang tanan nga kuarta nga nakita sa duta sang Egipto, kag sa duta sang Canaan, tungud sang uyas nga ila gindalawat: kag gindala ni Jose ang kuarta sa balay ni Faraon.

15 Kag sang naubus na ang kuarta sa duta sang Egipto, kag sa duta sang Canaan, nagkadto ang tanan nga Egiptohanon kay Jose, kag nagsiling, Hatagi kami sing kalan-on: kay ngaa bala mapatay kami sa imo atubangan? kay naubus na ang kuarta.

16 Kag si Jose nagsiling, Ihatag ang inyo kahayupan; kag hatagan ko kamo tungud sang inyo kahayupan, kon naubus na ang kuarta.

17 Kag gindala nila ang ila kahayupan kay Jose: kag si Jose naghatag sing kalan-on nga baylo sang mga kabayo, kag sang mga panong, kag sang kahayupan sang mga panong, kag sang mga asno: kag ginsagud sila niya sing kalan-on sa baylo sang tanan nila nga kahayupan sadtong tuig.

18 Sang natapus yadtong tuig, nagkadto sila sa iya sa ikaduhang tuig, kag nagsiling sa iya, Indi namon pag-ilikum ini sa akon ginoo, nga ang amon kuarta naubus na; ang mga panong sang kahayupan iya sang akon ginoo man; wala na gid sing nabilin sa itololok sang akon ginoo, kondi ang amon mga lawas, kag ang amon mga duta:

19 Ngaa bala nga mapatay kami sa atubangan sang imo mga mata, tingub kami kag ang amon duta? bakla kami kag ang amon duta tungud sa kalan-on, kag mangin-alagad kami kag ang amon duta ni Faraon: kag hatagi kami sing binhi, agud nga mabuhi kami, kag indi mapatay, agud nga ang duta indi magmingaw.

20 Kag ginbakal ni Jose ang bug-os nga duta sang Egipto nga kay Faraon; kay ang mga Egiptohanon nagbaligya ang tagsa ka tawo sang iya uma, bangud ang tiggulutum matama sa ila: gani ang duta nangin-iya ni Faraon.

21 Kag nahanungud sa katawohan, ginpahalin niya sila pakadto sa mga siudad kutub sa isa sang mga dulunan sang Egipto tubtub sa isa.

22 Ang duta lamang sang mga pari wala niya pagbakla; kay ang mga pari may pahat nga tinugyan sa ila ni Faraon, kag nagkaon sang ila bahin nga ginhatag sa ila ni Faraon: busa wala nila pag-ibaligya ang mga duta nila.

23 Niyan si Jose nagsiling sa katawohan, Yari karon, nabakal ko sining adlaw kamo kag ang inyo duta nga kay Faraon: yari karon, yari ang binhi nga sa inyo, kag sab-ugan ninyo ang duta.

24 Kag mahanabu sa pagkatubo, nga ihatag ninyo ang ikalima nga bahin kay Faraon, kag ang apat ka bahin mangin-inyo, nga sa binhi sang uma, kag sa inyo kalan-on, kag sa ila sang inyo mga panimalay, kag sa kalan-on sang inyo mga magamay.

25 Kag nagsiling sila, Naluwas mo ang amon mga kabuhi: paaguma kami sing bugay sa itololok sang akon ginoo, kag mangin-alagad kami ni Faraon.

26 Kag ginhimo ni Jose ini nga palatukuran sa duta sang Egipto tubtub sining adlaw, nga ang ikalima nga bahin iya ni Faraon; luwas lamang ang duta sang mga pari, nga wala nangin-iya ni Faraon.

27 ś Kag si Israel nagpuyo sa duta sang Egipto, sa duta sang Gosen; kag nakaangkon sila didto sing mga pagkabutang, kag nagmabungahon, kag nagbuad sing lakas.

28 Kag nagkabuhi si Jacob sa duta sang Egipto sing napulog pito ka tuig: gani ang bug-os nga edad ni Jacob isa ka gatus kag kap-atan kag pito ka tuig.

29 Kag nagpalapit ang tion nga si Israel dapat mapatay: kag gintawag niya ang iya anak nga si Jose, kag nagsiling sa iya, Kon nakaagum ako karon sing bugay sa imo itololok, ibutang, ginaampo ko sa imo, ang imo kamut sa idalum sang akon paa, kag maghimo ka sing maayo kag magmaminatud-on sa akon; indi ako pag-ilubung, ginaampo ko sa imo, sa Egipto:

30 Apang ako magahigda upud sa akon mga kaamayan, kag dalhon mo ako pagowa sa Egipto, kag ilubung ako sa lulubngan nila. Kag nagsiling sia, Himoon ko sono sa imo nasiling.

31 Kag sia nagsiling, Sumpa ka sa akon. Kag nagsumpa sia sa iya. Kag si Israel nagduko sa olohan sang higdaan.

KAPITULO 48

KAG nahanabu sa tapus sining mga butang, nga ang isa nagsugid kay Jose, Yari karon, ang imo amay nagamasakit: kag gindala niya upud sa iya ang duha niya ka anak nga lalaki, si Manases kag si Efraim.

2 Kag ang isa nagsugid kay Jacob, kag nagsiling, Yari karon, ang imo anak nga si Jose nagapakari sa imo: kag si Israel nagpabakud sang iya kaugalingon, kag naglingkod sa higdaan.

3 Kag si Jacob nagsiling kay Jose, Ang Dios nga Makaako nagpahayag sa akon sa Luz sa duta sang Canaan, kag nagpakamaayo sa akon,

4 Kag nagsiling sa akon, Yari karon, himoon ko ikaw nga mabungahon, kag pabuaron ko ikaw, kag magahimo ako gikan sa imo sang isa ka kadam-an sang katawohan; kag ihatag ko ining duta sa imo kaliwat sa olihi nimo nga kaugalingon nga dayon.

5 ś Kag karon ang duha nimo ka anak nga lalaki, si Efraim kag si Manases, nga natawo sa imo sa duta sang Egipto sa wala pa ako mag-abut sa imo sa Egipto, akon; subong nga si Ruben kag si Simeon, sila mangin-akon.

6 Kag ang imo kaliwat, nga igapanganak mo sa olihi nila, mangin-imo, kag tawgon sila sono sa ngalan sang ila mga utud sa ila panublion.

7 Kag nahanungud sa akon, sang naghalin ako sa Padan, napatay si Raquel sa luyo ko sa duta sang Canaan sa dalanon, sang may diutay pa nga lalakton pakadto sa Efrat: kag ginlubung ko sia didto sa dalanon sang Efrat; nga amo ang Bet-lehem.

8 Kag gintan-aw ni Israel ang mga anak nga lalaki ni Jose, kag nagsiling, Sin-o bala ini sila?

9 Kag si Jose nagsiling sa iya amay, Sila mga anak ko nga lalaki, nga ginhatag sang Dios sa akon sa sining duug. Kag nagsiling sia, Dal-a sila, ginaampo ko sa imo, sa akon, kag ako magapakamaayo sa ila.

10 Karon ang mga mata ni Israel madulum na sa katigulangon, sa bagay nga indi sia makakita. Kag ginpapalapit niya sila sa iya; kag ginhalukan niya sila, kag ginhakus sila.

11 Kag si Israel nagsiling kay Jose, Wala ako maghunahuna nga makita ang imo nawung: kag, yari karon, ang Dios nagpatan-aw man sa akon sang imo kaliwat.

12 Kag ginkuha sila ni Jose sa tunga sang iya mga tuhud, kag naghapa sia sa duta.

13 Kag ginkuha sila nga duha ni Jose, si Efraim sa iya too nga kamut nayon sa wala nga kamut ni Israel, kag si Manases sa iya wala nga kamut nayon sa too nga kamut ni Israel, kag ginpapalapit niya sila sa iya.

14 Kag gin-untay ni Israel ang iya too nga kamut, kag ginbutang ini sa olo ni Efraim, nga amo ang manghud, kag ang iya wala nga kamut sa olo ni Manases, nga nagatangday sing hungud sang iya mga kamut; kay si Manases ang panganay.

15 ś Kag ginpakamaayo niya si Jose, kag nagsiling, Ang Dios, nga sa iya atubangan naglakat ang akon mga kaamayan nga si Abraham kag si Isaac, ang Dios nga nagpakaon sa akon sa bug-os kong kabuhi tubtub sining adlaw,

16 Ang Anghel nga nagtubus sa akon gikan sa tanan nga malaut, magpakamaayo sang mga pamatan-on; kag ang akon ngalan ipangalan sa ila, kag ang ngalan sang akon mga kaamayan nga si Abraham kag si Isaac; kag magtubo sila nga isa ka kadam-an sa tunga sang duta.

17 Kag sang nakita ni Jose nga ginbutang sang iya amay ang kamut niya nga too sa olo ni Efraim, wala sia nanamian sini: kag ginbayaw niya ang kamut sang iya amay, sa paghalin sini gikan sa olo ni Efraim pakadto sa olo ni Manases.

18 Kag si Jose nagsiling sa iya amay, Indi subong sini, amay ko: kay ini sia amo ang panganay; ibutang ang imo too nga kamut sa iya olo.

19 Kag ang iya amay nagdumili, kag nagsiling, Nakahibalo ako sini, anak ko, nakahibalo ako sini: sia man mangin-isa ka katawohan, kag sia man mangin-daku: apang sa pagkamatuud ang iya manghud magadaku pa sa iya, kag ang iya kaliwat mangin-kadam-an sang mga pungsud.

20 Kag ginpakamaayo niya sila sa sadtong adlaw, nga nagasiling, Sa imo magapakamaayo si Israel, nga nagasiling, Ang Dios maghimo sa imo nga subong kay Efraim kag kay Manases: kag ginbutang niya si Efraim una kay Manases.

21 Kag nagsiling si Israel kay Jose, Yari karon, ako mapatay: apang ang Dios magaupud sa imo, kag magadala sa imo liwat sa duta sang imo mga kaamayan.

22 Labut pa ako naghatag sa imo sing isa ka bahin labaw sa imo mga utud, nga ginkuha ko sa kamut sang Amornon sa akon espada kag sa akon pana.

KAPITULO 49

KAG gintawag ni Jacob ang iya mga anak nga lalaki, kag nagsiling, Tilipon kamo, agud nga masugid ko sa inyo ang mahanabu sa inyo sa katapusan nga mga adlaw.

2 Tilipon kamo, kag magpamati, kamo nga mga lalaking anak ni Jacob; kag dungga ninyo si Israel nga inyo amay.

3 ś Ruben, ikaw amo ang akon panganay, ang akon kusug, kag ang pamuno sang akon kabakud, ang labing maayo sa kadungganan, kag ang labing maayo sa gahum:

4 Mabalhinon subong sang tubig, indi ikaw mangin-labi; bangud nga nagsaka ka sa higdaan sang imo amay; niyan gindagtaan mo ini: sia nagsaka sa akon higdaan.

5 ś Si Simeon kag si Levi mag-utud; ang mga hinganiban sang kapintas yara sa ila mga puluy-an.

6 O kalag ko, indi ka magsulud sa ila likum; sa ila pagtilipon, ang akon dungug, indi ka magsimpon: kay sa ila kaakig nagpatay sila sing isa ka tawo, kag sa ila kaugalingon nga kabubut-on nagkutkut sila sa pagtumba sang pader.

7 Pakamalauton ang ila kaakig, kay yadto mabangis; kag ang ila kasingkal, kay yadto mapintas: bahinbahinon ko sila sa kay Jacob, kag paaplaagon sila sa Israel.

8 ś Juda, ikaw amo ang pagadayawon sang imo mga utud: ang imo kamut manginsa liog sang imo mga kaaway; ang mga anak sang imo amay magayaub sa atubangan nimo.

9 Totoy nga leon si Juda: gikan sa tulukbon, anak ko, ikaw nagsaka: nagkuub sia, nagluko sia subong sang isa ka leon, kag subong sang tigulang nga leon; sin-o ang magapukaw sa iya?

10 Ang cetro indi mahamulag kay Juda, ukon ang isa ka manughatag sang kasogoan gikan sa tunga sang iya mga tiil, tubtub nga mag-abut si Silo; kag sa iya magatilipon ang katawohan.

11 Nga nagalawig sang iya tinday sa puno sang ubas, kag sang iya tinday sang asno sa pinili nga puno sang ubas; ginhugasan niya ang iya mga panapton sa alak, kag ang iya bayo sa dugo sang mga ubas:

12 Ang iya mga mata magapula sa alak, kag ang iya mga ngipon magaputi sa gatas.

13 ś Si Zabulon magapuyo sa dungkaan sang dagat; kag sia mangindungkaan sang mga sakayan; kag ang iya dulunan manginsa Zidon.

14 ś Si Isacar asno nga mabakud nga nagaluko sa tunga sang duha ka mga lulan:

15 Kag nakita niya nga maayo ang pagpahuway, kag nga ang duta kalahamut-an; kag gintaya niya ang iya abaga sa pagpas-an, kag nangin-alagad sa buhis.

16 ś Si Dan magahukom sang iya katawohan, subong nga isa sang mga tribo sang Israel.

17 Si Dan mangin isa ka man-ug sa dalanon, isa ka man-ug nga dalitan sa banas, nga nagakagat sang mga tikod sang kabayo, sa bagay nga magatingkaya ang iya manugkabayo.

18 Ginhulat ko ang imo kaluwasan, O GINOO.

19 ś Si Gad, isa ka tropa magadaug sa iya: apang sa katapusan magadaug sia.

20 ś Gikan kay Aser ang iya kalan-on mangintambok, kag sia magapatubas sing manamit nga mga kalan-on nga harianon.

21 ś Si Neftali usa nga babaye nga nabuhian: sia nagahatag sing mga maayo nga polong.

22 ś Si Jose sanga nga mabungahon, isa ka sanga nga mabungahon sa luyo sang bobon; nga ang iya mga sanga nagalakbay sa pader:

23 Ang mga manugpana nagsakit sa iya sing tama, kag nagpana sa iya, kag nagdumut sa iya:

24 Apang ang iya pana nagpadayon sa kusug, kag ang mga butkon sang iya mga kamut ginpabakud paagi sa mga kamut sang makagagahum nga Dios ni Jacob; (gikan sini amo ang manugpahalab, ang bato sang Israel:)

25 Paagi sa Dios sang imo amay, nga magabulig sa imo; kag paagi sa Makaako, nga magapakamaayo sa imo sa mga pagpakamaayo sang langit sa ibabaw, mga pagpakamaayo sang kadadalman nga yara sa idalum, mga pagpakamaayo sang mga soso, kag sang taguangkan:

26 Ang mga pagpakamaayo sang imo amay naglabaw sa mga pagpakamaayo sang mga katigulangan ko tubtub sa pinakadulunan sang mga kabakoloran nga dayon: manginsa olo sila ni Jose, kag sa purungpurung sang olo niya nga napain sa iya mga utud.

27 ś Si Benjamin magapanukub subong sing lobo: sa aga magahalunhon sia sang tulukbon, kag sa kagab-ihon magabahinbahin sia sang inagaw.

28 ś Ini tanan amo ang napulog duha ka tribo ni Israel: kag ini amo ang ginhambal sa ila sang ila amay, kag ginpakamaayo sila; ang tagsatagsa sono sa iya pagpakamaayo ginpakamaayo niya sila.

29 Kag nagtulin sia sa ila, kag nagsiling sa ila, Ako igasimpon sa akon katawohan: ilubung ako upud sa akon mga kaamayan sa lungib nga yara sa latagon sang Efron nga Hithanon,

30 Sa lungib nga yara sa latagon sang Macpela, nga sa tampad sang Mamre, sa duta sang Canaan, nga ginbakal ni Abraham upud sa latagon ni Efron nga Hithanon nga sa kaugalingon nga lulubngan.

31 Didto ginlubung nila si Abraham kag si Sara nga iya asawa; didto ginlubung nila si Isaac kag si Rebeca nga iya asawa; kag didto ginlubung ko si Lea.

32 Ang latagon kag ang lungib nga yara sa iya ginbakal sa kaanakan ni Het.

33 Kag sang pagkatapus ni Jacob sa pagtulin sa iya mga anak nga lalaki, ginhugpong niya ang iya mga tiil sa higdaan, kag nabugtoan sia sang ginhawa, kag ginsimpon sa iya katawohan.

KAPITULO 50

KAG naghapa si Jose sa nawung sang iya amay, kag naghibi sa iya, kag ginhalukan sia.

2 Kag nagsogo si Jose sa mga manugbolong nga iya mga alagad nga embalsamahon ang iya amay: kag gin-embalsamar si Israel sang mga manugbolong.

3 Kag natuman sa iya ang kap-atan ka adlaw; kay sa sini natuman ang mga adlaw sang mga ginaembalsamar: kag naglalaw sa iya ang mga Egiptohanon sing kapitoan ka adlaw.

4 Kag sang nagligad ang mga adlaw sang paglalaw sa iya, nagpamolong si Jose sa panimalay ni Faraon, nga nagasiling, Kon karon nakaagum ako sing bugay sa inyo mga mata, ipamolong, ginaampo ko sa inyo, sa idulungug ni Faraon, nga nagasiling,

5 Ang akon amay nagpasumpa sa akon, nga nagasiling, Yari karon, mapatay ako: sa akon lulubngan nga ginkutkut ko nga sa akon sa duta sang Canaan, didto ilubung mo ako. Busa karon, ginaampo ko sa imo, pataklara ako kag palubnga sang akon amay, kag magabalik ako.

6 Kag nagsiling si Faraon, Taklad, kag ilubung ang imo amay, sono sa ginpasumpa niya sa imo.

7 ś Kag nagtaklad si Jose sa paglubung sang iya amay: kag nagtaklad upud sa iya ang tanan nga mga alagad ni Faraon, ang mga tigulang sang iya panimalay, kag ang tanan nga tigulang sang duta sang Egipto,

8 Kag ang bug-os nga panimalay ni Jose, kag ang iya mga utud, kag ang panimalay sang iya amay: lamang ginbilin nila sa duta sang Gosen ang ila mga magamay, kag ang ila mga panong, kag ang ila mga kahayupan.

9 Kag nagtaklad upud sa iya ang mga kangga kag ang mga manugkabayo: kag tama kadaku yadtong kadam-an.

10 Kag nag-abut sila sa linasan sang Atad, nga yara sa unhan sang Jordan, kag didto naglalaw sila sing daku kag tama kapait nga panalabiton: kag sia naglalaw sa iya amay sing pito ka adlaw.

11 Kag sang nakita sang mga pumuluyo sang duta nga mga Canaanhon ang paglalaw sa linasan sang Atad, nagsiling sila, Ini mapait nga paglalaw sa mga Egiptohanon: busa ginhingalanan ini Abel-mizraim, nga yara sa tabok sang Jordan.

12 Kag ang iya mga anak nga lalaki naghimo sa iya sono sa ginsogo niya sa ila:

13 Kay gindala sia sang iya mga anak nga lalaki sa duta sang Canaan, kag ginlubung sia sa lungib sang latagon sang Macpela, nga sa tampad sang Mamre, nga ginbakal ni Abraham upud sang latagon nga kaugalingon nga lulubngan gikan kay Efron nga Hithanon.

14 ś Kag si Jose nagbalik sa Egipto, sia, kag ang iya mga utud, kag ang tanan nga nagtaklad upud sa iya sa paglubung sang iya amay, sa tapus nga nalubung niya ang iya amay.

15 ś Kag sang nakita sang mga utud ni Jose nga ang ila amay patay na, nagsiling sila, Ayhan dumtan kita ni Jose, kag balusan kita sing totoo sang tanan nga malaut nga ginhimo naton sa iya.

16 Kag nagpadala sila sing isa ka manugbalita kay Jose, nga nagasiling, Ang imo amay nagsogo sa wala pa sia mapatay, nga nagasiling,

17 Amo ini ang isiling ninyo kay Jose, Patawara, ginaampo ko karon sa imo, ang paglapas sang imo mga utud, kag ang ila sala; kay nagbuhat sila sing malaut sa imo: kag karon, ginaampo namon sa imo, patawara ang paglapas sang mga alagad sang Dios sang imo amay. Kag si Jose naghibi sang nagpamolong sila sa iya.

18 Kag nagkadto man ang iya mga utud kag naghapa sa atubangan niya; kag nagsiling sila, Yari karon, kami imo mga alagad.

19 Kag si Jose nagsiling sa ila, Dili kamo mahadluk: kay ako bala ang tal-us sang Dios?

20 Apang nahanungud sa inyo, naghunahuna kamo sing malaut batok sa akon; apang gintuyo ini sang Dios sa kaayohan, sa pagpahanabu, subong sang sining adlaw, sa pagluwas sang madamung katawohan nga mabuhi.

21 Busa karon dili kamo mahadluk: ako magasagud sa inyo, kag sa inyo mga magamay. Kag ginlipay niya sila, kag nagpamolong sing maayo sa ila.

22 ś Kag si Jose nagpuyo sa Egipto, sia, kag ang panimalay sang iya amay: kag si Jose nagkabuhi sing isa ka gatus kag napulo ka tuig.

23 Kag nakita ni Jose ang mga anak ni Efraim sa ikatlo nga kaliwatan: ang mga anak man ni Maquir nga anak nga lalaki ni Manases ginbutang sa mga tuhud ni Jose.

24 Kag nagsiling si Jose sa iya mga utud, Ako mapatay: kag magaduaw ang Dios sa inyo sing totoo, kag magapagowa sa inyo gikan sining duta pakadto sa duta nga ginsumpa niya kay Abraham, kay Isaac, kag kay Jacob.

25 Kag si Jose nagpasumpa sa mga anak ni Israel, nga nagasiling, Ang Dios magaduaw sa inyo sing totoo, kag dalhon ninyo gikan diri ang akon mga tul-an.

26 Gani napatay si Jose, nga isa ka gatus kag napulo ka tuig: kag gin-embalsamar sia nila, kag ginsulud sia sa lungon sa Egipto.

AMAZING GRACE BIBLE INSTITUTE