ANG BALAAN NGA BIBLIA

ANG SULAT NI PABLO NGA APOSTOL SA MGA

TAGA-GALACIA.

TAGA-GALACIA

KAPITULO 1

SI PABLO, isa ka apostol, (indi gikan sa mga tawo, ukon paagi sa tawo, kondi paagi kay Jesu-Cristo, kag sa Dios nga Amay, nga nagbanhaw sa iya gikan sa mga patay;)

2 Kag ang tanan nga kauturan nga kaupud nakon, sa mga iglesia sa Galacia:

3 Ang bugay sa inyo kag paghidait gikan sa Dios nga Amay, kag sa aton Ginoong Jesu-Cristo,

4 Nga nagtugyan sang iya kaugalingon tungud sa aton mga sala, agud nga maluwas niya kita gikan sini karon nga malaut nga kalibutan, sono sa kabubut-on sang Dios kag Amay naton:

5 Nga sa iya ang himaya sa gihapon kag sa walay katapusan. Amen.

6 Natingala ako nga naghalin kamo sing tama kadali gikan sa iya nga nagtawag sa inyo sa bugay ni Cristo sa tuhay nga ebanghelyo:

7 Nga indi nga tuhay; kondi nga may iban nga nagagamo sa inyo, kag buut magpatiko sang ebanghelyo ni Cristo.

8 Apang bisan kami, ukon isa ka anghel gikan sa langit, magwali sa inyo sing bisan ano nga ebanghelyo nga tuhay sang sa sinang amon ginwali sa inyo, magmanginpinapakamalaut sia.

9 Subong sang nasiling namon anay, amo man ginasiling ko liwat karon, Kon ang bisan sin-o nga tawo nagawali sa inyo sing bisan ano nga ebanghelyo nga tuhay sang sa sinang nabaton ninyo, magmanginpinapakamalaut sia.

10 Kay nagapangita bala ako karon sang pagdampig sang mga tawo, ukon sang Dios? ukon nagahimulat bala ako sa pagpahamuut sa mga tawo? kay kon nagapahamuut pa ako sa mga tawo, indi kuntani ako alagad ni Cristo.

11 Apang ginapamatud-an ko sa inyo, mga kauturan, nga ang ebanghelyo nga ginwali ko indi sono sa tawo.

12 Kay wala ko mabaton ini gikan sa tawo, ukon gintudlo ini sa akon, kondi paagi sa bugna ni Jesu-Cristo.

13 Kay nabatian ninyo ang akon paggawi sang nagtaliwan nga tion sa relihiyon sang mga Judio, kon paano nga ginhingabut ko sing lakas ang iglesia sang Dios, kag ginlaglag ini:

14 Kag naunahan ko sa relihiyon sang mga Judio ang madamu nga katubo nakon sa akon pungsud, sanglit nga lakas pa ako kakugi sa mga tradisyon sang akon mga kaamayan.

15 Apang sang nahamut-an sang Dios, nga nagpain sa akon gikan sa taguangkan sang akon iloy, kag nagtawag sa akon paagi sa iya bugay,

16 Ang pagpahayag sang iya Anak sa sulud nakon, agud nga mawali ko sia sa mga pagano; gilayon wala ako magpakigsapul sa unud kag dugo:

17 Kag wala ako magtaklad sa Jerusalem sa ila nga mga apostol nga una sa akon; kondi nagkadto ako sa Arabia, kag nagbalik liwat sa Damasco.

18 Ugaling sa tapus ang tatlo ka tuig nagtaklad ako sa Jerusalem sa pagpakigkita kay Pedro, kag nagpabilin kaupud niya sing napulog lima ka adlaw.

19 Apang wala ko makita ang iban nga mga apostol, luwas kay Santiago nga utud sang Ginoo.

20 Karon ang mga butang nga ginasulat ko sa inyo, yari karon, sa atubangan sang Dios, wala ako nagabutig.

21 Sang olihi nagkadto ako sa mga ginsakpan sang Siria kag Cilicia;

22 Kag wala pa ako makilal-i sa guya sa mga iglesia sa Judea nga yara kay Cristo:

23 Apang nakabati lamang sila, Nga sia nga naghingabut sa aton sang nagtaliwan nga mga tion karon nagawali sang pagtoo nga anay iya ginlaglag.

24 Kag ginhimaya nila ang Dios sa akon.

KAPITULO 2

UGALING sa tapus ang napulog apat ka tuig nagtaklad ako liwat sa Jerusalem kaupud ni Bernabe, kag gin-upud ko man si Tito.

2 Kag nagtaklad ako paagi sa bugna, kag ginpahayag ko sa ila inang ebanghelyo nga ginawali ko sa mga Gentil, apang sa tago sa mga dungganon, basi kon sa ano man nga paagi magdalagan ako, ukon nakadalagan, sa walay pulus.

3 Apang bisan pa si Tito, nga upud nakon, nga isa ka Griego, wala pagpilita nga circuncidahon:

4 Kag ina bangud sang dimatuud nga mga kauturan nga ginpasulud sing kawat, nga nagsulud sing tago sa paglampitaw sang amon kahilwayan nga may amon kami kay Cristo Jesus, agud nga madala nila kami sa kahiolipnan:

5 Sa ila wala kami magpasakup, wala, bisan isa ka takna; agud nga ang kamatooran sang ebanghelyo magpadayon sa inyo.

6 Apang nahanungud sa ila nga daw kon si sin-o, (bisan mga ano sila, walay ano man sa akon: ang Dios wala nagapasulabi sing tawo:) kay sila nga daw kon si sin-o sa hambalanay wala sing may nadugang sa akon:

7 Apang sa baylo, sang nakita nila nga gintugyan sa akon ang ebanghelyo sa dicircuncidado, subong nga kay Pedro ang ebanghelyo sa circuncidado;

8 (Kay sia nga nagpanghikot sing mabinungahon kay Pedro nga sa pagkaapostol sa mga circuncidado, ang amo man gamhanan sa akon nga sa mga Gentil:)

9 Kag si Santiago, si Cefas, kag si Juan, nga daw mga haligi, sang nahantup nila ang bugay nga ginhatag sa akon, ginhatag nila sa akon kag kay Bernabe ang mga too nga kamut sang paghiliupud; agud nga magkadto kami sa mga pagano, kag sila sa mga circuncidado.

10 Lamang buut nila nga pagdumdumon namon ang mga imol; nga ini gid ginhandaan ko man sa paghimo.

11 Apang sang pag-abut ni Pedro sa Antioquia, ginsupukan ko sia sa guya, bangud nga salabdongon sia.

12 Kay sang wala pa mag-abut ang pila ka tawo gikan kay Santiago, nagkaon sia upud sa mga Gentil: apang sang pag-abut nila, nag-isul sia kag nagbulag, nga nahadluk sa mga taga-circuncision.

13 Kag ang iban nga mga Judio nagpakasalimpapaw man kaupud niya; sa bagay nga bisan si Bernabe nadala man sa ila pagkasalimpapaw.

14 Apang sang nakita ko nga wala sila naglakat sing matarung sono sa kamatooran sang ebanghelyo, nagsiling ako kay Pedro sa atubangan nila nga tanan, Kon ikaw, nga isa ka Judio, nagakabuhi subong sa batasan sang mga Gentil, kag indi subong sa mga Judio, ngaa bala ginapilit mo ang mga Gentil sa pagpangabuhi subong sang mga Judio?

15 Kita nga mga Judio sa pagkatawo, kag indi mga makasasala sang mga Gentil,

16 Sa nahibaloan ta nga ang tawo wala ginapakamatarung paagi sa mga buhat sang kasogoan, kondi paagi sa pagtoo nga sa kay Jesu-Cristo, bisan kita nagtoo kay Jesu-Cristo, agud nga pagpakamatarungon kita paagi sa pagtoo nga sa kay Cristo, kag indi paagi sa mga buhat sang kasogoan: kay paagi sa mga buhat sang kasogoan walay unud nga pakamatarungon.

17 Apang kon, sa nagahimulat kita nga pagpakamatarungon paagi kay Cristo, kita sa aton kaugalingon man nasapwan nga mga makasasala, busa ministro bala si Cristo sang sala? Ang Dios magdumili.

18 Kay kon ginatukud ko liwat ang mga butang nga akon ginlaglag, ginahimo ko ang akon kaugalingon nga isa ka manuglapas.

19 Kay ako paagi sa kasogoan napatay sa kasogoan, agud nga magkabuhi ako sa Dios.

20 Nalansang ako sa krus kaupud ni Cristo: walay sapayan nagakabuhi ako; apang indi ako, kondi si Cristo nagakabuhi sa akon: kag ang kabuhi nga ginakabuhi ko karon sa unud ginakabuhi ko paagi sa pagtoo nga sa Anak sang Dios, nga naghigugma sa akon, kag nagtugyan sang iya kaugalingon tungud sa akon.

21 Wala ko ginapakawalay pulus ang bugay sang Dios: kay kon ang pagkamatarung nagaabut paagi sa kasogoan, niyan si Cristo napatay sa walay kapuslanan.

KAPITULO 3

O BUANGBUANG nga mga Galaciahanon, sin-o bala ang nagganyat sa inyo, agud nga indi ninyo pagtumanon ang kamatooran, nga sa atubangan sang inyo mga mata ginpahayag si Jesu-Cristo sing dayag, nga ginlansang sa krus sa tunga ninyo?

2 Ini lamang ang buut ko masayran sa inyo, Nabaton bala ninyo ang Espiritu paagi sa mga buhat sang kasogoan, ukon paagi sa pagpamati sa pagtoo?

3 Tama bala kamo ka buangbuang? sa nakasugud sa Espiritu, karon kamo bala ginahimo nga himpit paagi sa unud?

4 Nag-antus bala kamo sing madamung butang sa walay pulus? kon ini pa sa walay pulus.

5 Busa sia nga nagaalagad sa inyo sang Espiritu, kag nagapanghikot sing mga milagro sa tunga ninyo, ginahimo bala niya ini paagi sa mga buhat sang kasogoan, ukon paagi sa pagpamati sa pagtoo?

6 Sa amo si Abraham nagtoo sa Dios, kag gin-isip ini sa iya nga sa pagkamatarung.

7 Busa hibaloa ninyo nga ang mga may pagtoo, ini sila amo ang mga anak ni Abraham.

8 Kag ang kasulatan, nga nagatan-aw nga daan nga ang Dios magapakamatarung sang mga pagano paagi sa pagtoo, nagwali nga daan sang ebanghelyo kay Abraham, nga nagasiling, Sa imo pakamaayohon ang tanan nga pungsud.

9 Gani niyan ang mga may pagtoo ginapakamaayo kaupud ni Abraham nga matinoohon.

10 Kay ang tanan nga sa mga buhat sang kasogoan yara sa idalum sang pagpakamalaut: kay nasulat na, Pinapakamalaut ang tagsatagsa nga wala nagapadayon sa tanan nga mga butang nga nasulat sa libro sang kasogoan agud nga paghimoon sila.

11 Apang nga walay tawo nga ginapakamatarung paagi sa kasogoan sa itololok sang Dios, ini maathag: kay, Ang matarung magakabuhi paagi sa pagtoo.

12 Kag ang kasogoan indi gikan sa pagtoo: apang, Ang tawo nga nagahimo sa ila magakabuhi sa ila.

13 Si Cristo nagtubus sa aton gikan sa pagpakamalaut sang kasogoan, nga ginhimo nga pagpakamalaut tungud sa aton: kay nasulat na, Pinapakamalaut ang tagsa nga nabitay sa kahoy:

14 Agud nga ang pagpakamaayo ni Abraham mag-abut sa mga Gentil paagi kay Jesu-Cristo; agud nga mabaton ta ang saad nga Espiritu paagi sa pagtoo.

15 Mga kauturan, nagahambal ako sono sa batasan sang mga tawo; Bisan ini katipan lang sang tawo, apang kon ini napamatud-an, walay tawo nga nagapakawalay pulus, ukon nagadugang sini.

16 Karon kay Abraham kag sa iya kaliwat ginhimo ang mga saad. Wala sia nagasiling, Kag sa mga kaliwat, subong nga madamu; kondi subong nga sa isa, Kag sa imo kaliwat, nga amo si Cristo.

17 Kag nagasiling ako sini, nga ang katipan, nga ginpamatud-an nga daan sang Dios kay Cristo, ang kasogoan, nga nag-abut sa tapus ang apat ka gatus kag katloan ka tuig, indi makapakawalay pulus, agud nga mahimo sini ang saad nga walay pulus.

18 Kay kon ang panublion gikan sa kasogoan, indi na ini gikan sa saad: apang ginhatag ini sang Dios kay Abraham paagi sa saad.

19 Niyan ano bala ang katuyoan sang kasogoan? Gindugang ini bangud sang mga paglalis, tubtub nga mag-abut ang kaliwat nga sa iya nahimo ang saad; kag gintangdo ini paagi sa mga anghel sa kamut sang isa ka manugpatunga.

20 Karon ang manugpatunga indi manugpatunga sang isa, apang ang Dios isa.

21 Niyan ang kasogoan batok bala sa mga saad sang Dios? Ang Dios magdumili: kay kon may isa ka kasogoan nga makahatag sing kabuhi, sa pagkamatuud ang pagkamatarung nanginpaagi kuntani sa kasogoan.

22 Apang ang kasulatan nagbilang nga ang tanan sa idalum sang sala, agud nga ang saad paagi sa pagtoo nga sa kay Jesu-Cristo mahatag sa ila nga nagatoo.

23 Apang sang wala pa mag-abut ang pagtoo, ginhuptan kita sa idalum sang kasogoan, nga napanakpan tubtub ang pagtoo mapahayag sa olihi.

24 Busa ang kasogoan nanginmanunudlo naton sa pagdala sa aton sa kay Cristo, agud nga mapakamatarung kita paagi sa pagtoo.

25 Apang sa tapus nga ang pagtoo nag-abut, wala na kita sa idalum sang manunudlo.

26 Kay kamo tanan amo ang mga anak sang Dios paagi sa pagtoo kay Cristo Jesus.

27 Kay ang kapid-an sa inyo nga ginbautisohan kay Cristo nagsuklub kay Cristo.

28 Walay Judio ukon Griego, walay ulipon ukon hilway, walay lalaki ukon babaye: kay kamo tanan isa kay Cristo Jesus.

29 Kag kon kamo iya ni Cristo, niyan kaliwat kamo ni Abraham, kag manunubli sono sa saad.

KAPITULO 4

KARON nagasiling ako, Nga ang manunubli, samtang sia bata pa, wala sia sing ginakatuhayan sa alagad, bisan sia ginoo sang tanan;

2 Kondi sa idalum sang mga manunuon kag mga tulugyanan tubtub sa tion nga gintangdo sang amay.

3 Subong man kita, sang mga bata pa kita, gin-ulipon kita sa idalum sang nahauna gid nga mga pagtolon-an sang kalibutan:

4 Apang sang pag-abut sang kabug-osan sang tion, ginpadala sang Dios ang iya Anak, nga natawo sa isa ka babaye, natawo sa idalum sang kasogoan,

5 Sa pagtubus sa ila nga yara sa idalum sang kasogoan, agud nga mabaton ta ang pagkainangkon nga mga anak nga lalaki.

6 Kag bangud nga mga anak nga lalaki kamo, ang Dios nagpadala sang Espiritu sang iya Anak sa inyo mga tagiposoon, nga nagasinggit, Abba, Amay.

7 Busa indi na ikaw alagad, kondi anak nga lalaki; kag kon anak nga lalaki, niyan manunubli sang Dios paagi kay Cristo.

8 Apang, sang wala kamo makakilala sa Dios, nag-alagad kamo sa ila nga sa kinaugali indi mga dios.

9 Apang karon, sa tapus nga nakakilala kamo sa Dios, ukon hinonoo nakilala sang Dios, paano bala nga nagabalik kamo liwat sa maluya kag imol nga nahauna gid nga mga pagtolon-an, nga sa ila buut kamo magpaulipon liwat?

10 Ginabantayan ninyo ang mga adlaw, kag mga bulan, kag mga panag-on, kag mga tuig.

11 Nagakahadluk ako nahanungud sa inyo, basi kon nakapangabudlay ako sa inyo sa walay pulus.

12 Mga kauturan, ginapakilooy ko sa inyo, nga magmanginsubong kamo sa akon; kay ako man subong sa inyo: wala gid ninyo ako masakit.

13 Nakahibalo kamo kon paano nga paagi sa kaluyahon sang unud ginwali ko sa inyo ang ebanghelyo sing una.

14 Kag ang pagsulay sa akon nga yara sa akon unud wala ninyo pagtamaya, ukon ginsikway; kondi ginbaton ninyo ako subong nga isa ka anghel sang Dios, subong kay Cristo Jesus.

15 Busa diin bala ang pagkabulahan nga ginhambal ninyo? kay nagapanaksi ako sa inyo, nga, kon mahimo, buut ninyo kuntani lukaton ang inyo mga mata, kag ihatag sila sa akon.

16 Busa nanginkaaway bala ako ninyo, bangud nga ginasugid ko sa inyo ang kamatooran?

17 Sila nagapabatyag sa inyo sing makugihon, apang indi maayo; hoo, buut kamo nila ibulag, agud nga mapakadaku ninyo sila.

18 Apang maayo nga mapabatyag kamo sing makugihon sa gihapon sa maayong butang, kag indi lamang kon yara ako sa inyo.

19 Magagmay ko nga mga anak, nga tungud sa inyo ginasakitan ako liwat tubtub si Cristo mahuman sa inyo,

20 Buut ko kuntani nga yara ako sa inyo karon, kag magbaylo sang akon tingug; kay nagaduhaduha ako nahanungud sa inyo.

21 Sugiri ako, kamo nga buut magpaidalum sa kasogoan, wala bala kamo makabati sang kasogoan?

22 Kay nasulat na, nga si Abraham may duha ka anak nga lalaki, ang isa sa ulipon nga babaye, ang isa sa hilway nga babaye.

23 Apang sia nga sa ulipon nga babaye natawo sono sa unud; apang sia nga sa hilway nga babaye paagi sa saad.

24 Ini nga mga butang isa ka paanggid: kay ini sila amo ang duha ka katipan; ang isa gikan sa bukid nga Sinai, nga nagapanganak nga sa kahiolipnan, nga amo si Agar.

25 Kay ining Agar amo ang bukid nga Sinai sa Arabia, kag ang naigoan niya Jerusalem nga amo karon, kag yara sa kahiolipnan kaupud sang iya mga anak.

26 Apang ang Jerusalem nga sa ibabaw hilway, nga amo ang iloy naton tanan.

27 Kay nasulat na, Magkalipay, ikaw nga baw-as nga wala nagapanganak; maghugyaw kag magsinggit, ikaw nga wala ginasakiti: kay madamu pa ang mga anak sang binayaan sang sa iya nga may bana.

28 Karon kita, mga kauturan, subong kay Isaac, amo ang mga anak sang saad.

29 Apang subong sadto anay sia nga natawo sono sa unud naghingabut sa iya nga natawo sono sa Espiritu, amo man ini karon.

30 Apang ano bala ang ginasiling sang kasulatan? Tabuga ang ulipon nga babaye kag ang iya anak nga lalaki: kay ang anak nga lalaki sang ulipon nga babaye indi manginmanunubli kaupud sa anak nga lalaki sang hilway nga babaye.

31 Gani niyan, mga kauturan, indi kita mga anak sang ulipon nga babaye, kondi sang hilway.

KAPITULO 5

BUSA magtindug kamo sing malig-on sa kahilwayan nga sa diin ginhilway kita ni Cristo, kag dili magpasaw-id liwat sa gota sang kahiolipnan.

2 Yari karon, ako, si Pablo, nagasiling sa inyo, nga kon magpacircuncidar kamo, si Cristo manginwalay pulus sa inyo.

3 Kay nagasaksi ako liwat sa tagsa ka tawo nga nacircuncidar, nga sia isa ka mangungutang sa pagtuman sang bug-os nga kasogoan.

4 Si Cristo nanginwalay pulus sa inyo, ang bisan sin-o sa inyo nga ginapakamatarung paagi sa kasogoan; naholog kamo gikan sa bugay.

5 Kay kita paagi sa Espiritu nagahulat sang paglaum sang pagkamatarung paagi sa pagtoo.

6 Kay sa kay Jesu-Cristo ang circuncision ukon ang dicircuncision walay bisan ano nga kapuslanan; kondi ang pagtoo nga nagahikot paagi sa gugma.

7 Nagdalagan kamo sing maayo; sin-o bala ang nag-upang sa inyo agud nga indi ninyo pagtumanon ang kamatooran?

8 Ining pagpatalupangud wala magikan sa iya nga nagtawag sa inyo.

9 Ang diotay nga tapay nagalatum sang bug-os nga linamas.

10 May pagsalig ako sa inyo paagi sa Ginoo, nga indi kamo magpanghunahuna sa lain nga bagay: apang ang nagatublag sa inyo magaantus sang paghukom sa iya, bisan sin-o sia.

11 Kag ako, mga kauturan, kon nagawali pa ako sang circuncision, ngaa bala nagaantus pa ako sing paghingabut? niyan ang kasandaran sang krus nauntat.

12 Buut ko nga sila nga nagatublag sa inyo pagabulagon sa inyo.

13 Kay kamo, mga kauturan, gintawag sa kahilwayan; lamang dili paggamita ang kahilwayan nga kahigayonan sa unud, kondi paagi sa gugma mag-inalagaray kamo ang isa kag isa.

14 Kay ang bug-os nga kasogoan natuman sa isa ka polong, nga amo ini; Higugmaon mo ang imo isigkatawo subong sang imo kaugalingon.

15 Apang kon magkinagtanay kag magkinaunay kamo ang isa kag isa, mag-andam nga indi kamo malaglag ang isa sang isa.

16 Niyan ginasiling ko ini, Maglakat sa Espiritu, kag kamo indi magatuman sang kailigbon sang unud.

17 Kay ang unud nagakaibog batok sa Espiritu, kag ang Espiritu batok sa unud: kag ini sila nagasumpunganay ang isa kag isa: agud nga indi ninyo mahimo ang mga butang nga buut ninyo.

18 Apang kon ginatuytuyan kamo sang Espiritu, wala kamo sa idalum sang kasogoan.

19 Karon hayag ang mga buhat sang unud, nga amo ini sila; Pagpanglahi, pagpanghilawas, pagkahigko, pagkaulag,

20 Pagsimba sa mga diosdios, pagkababaylan, dumut, pagsumpakiay, mga pagpakigtopo, kasingkal, pagpinuyas, mga pagribok, mga herehia,

21 Mga kahisa, mga pagpatay, paghinobog, mga magansal nga kinalipay, kag ang mga kaangay sini: nga ginasugid ko nga daan sa inyo, subong nga ginsugid ko sa inyo man sang nagligad nga tion, nga sila nga nagahimo sang among mga butang indi makapanubli sang ginharian sang Dios.

22 Apang ang bunga sang Espiritu amo ang gugma, kalipay, paghidait, pagbatas, pagkalolo, pagkaayo, pagtoo,

23 Pagkamapainubuson, pagkamapinugungon: batok sa amo walay kasogoan.

24 Kag sila nga iya ni Cristo naglansang sang unud sa krus kaupud sang mga balatyagon kag mga kailigbon.

25 Kon nagakabuhi kita sa Espiritu, maglakat man kita sa Espiritu.

26 Dili kita maghandum sa pag-angkon sang walay pulus nga himaya, nga nagahangkatanay ang isa kag isa, nga nagahinisaay ang isa kag isa.

KAPITULO 6

MGA KAUTURAN, kon ang isa ka tawo masapwan sa isa ka sayup, kamo nga mga espirituhanon, magpasag-uli sa iya sa espiritu sang pagkamapainubuson; nga pagtalupangdon mo ang imo kaugalingon, basi kon ikaw man pagsulayon.

2 Magdinalhanay kamo sang mga lulan sang isa kag isa, kag sa amo matuman ang kasogoan ni Cristo.

3 Kay kon ang isa ka tawo nagapakasin-o, nga indi sia si sin-o, nagadaya sia sa iya kaugalingon.

4 Apang ang tagsatagsa magtilaw sang iya kaugalingon nga buhat, kag niyan magakalipay sia sa iya kaugalingon lamang, kag indi sa iban.

5 Kay ang tagsa ka tawo magadala sang iya kaugalingon nga lulan.

6 Ang ginton-an sa polong magpaambit sa nagatudlo sa tanan nga maayong butang.

7 Dili kamo magpadaya; ang Dios indi tiliawtiawan: kay ang bisan ano nga ginasab-ug sang tawo, ina man ang iya anihon.

8 Kay sia nga nagasab-ug sa iya unud magaani sing kaduluntan gikan sa unud; apang sia nga nagasab-ug sa Espiritu magaani sing kabuhi nga walay katapusan gikan sa Espiritu.

9 Kag dili kita magpakaluya sa paghimo sang maayo: kay sa nagakaigo nga dag-on magaani kita, kon indi kita pagpunawon.

10 Busa sa may kahigayonan kita, magbuhat kita sang maayo ayon sa tanan nga tawo, labi na gid sa mga tagapanimalay sang pagtoo.

11 Makita ninyo kon daw ano kadalagku nga sulat ang ginasulat ko sa inyo sa akon kaugalingon nga kamut.

12 Ang tanan nga nagahandum sang maanyag nga pagpakita sa unud, ini sila nagapilit sa inyo nga circuncidahon; agud lamang nga indi sila magbatas sang paghingabut tungud sang krus ni Cristo.

13 Kay bisan sila nga nagapacircuncidar wala nagahuput sang kasogoan; apang nagahandum sila nga circuncidahon kamo, agud nga makahimaya sila sa inyo unud.

14 Apang ang Dios magdumili nga ako dapat maghimaya, luwas sa krus sang aton Ginoong Jesu-Cristo, nga tungud sa iya ang kalibutan nalansang sa krus sa akon, kag ako sa kalibutan.

15 Kay sa kay Cristo Jesus ang circuncision ukon ang dicircuncision walay bisan ano nga kapuslanan, kondi ang bag-o nga tinuga.

16 Kag ang tanan nga nagalakat sono sa sining solondan, paghidait manginsa ila, kag kalooy, kag sa Israel sang Dios.

17 Kutub karon walay tawo nga maggamo sa akon; kay ginadala ko sa akon lawas ang mga pat-in ni Ginoong Jesus.

18 Mga kauturan, ang bugay sang aton Ginoong Jesu-Cristo manginkaupud sa inyo espiritu. Amen.

� Sa mga taga-Galacia ginsulat gikan sa Roma.

AMAZING GRACE BIBLE INSTITUTE