ANG BALAAN NGA BIBLIA


ESDRAS


KAPITULO 1

KARON sa nahaunang tuig ni Ciro nga hari sang Persia, agud nga matuman ang polong sang GINOO paagi sa baba ni Jeremias, ginpukaw sang GINOO ang espiritu ni Ciro nga hari sang Persia, sa bagay nga nagpabantala sia sa bug-os niya nga ginharian, kag ginsulat man ini, nga nagasiling,

2 Amo ini ang ginasiling ni Ciro nga hari sang Persia, Ang GINOONG Dios sang langit naghatag sa akon sang tanan nga ginharian sang duta; kag gintulinan niya ako sa pagpatindug sa iya sing balay sa Jerusalem, nga yara sa Juda.

3 Sin-o bala ang yara sa tunga ninyo sa bug-os niya nga katawohan? ang iya Dios magmanginkaupud niya, kag magtaklad sia sa Jerusalem, nga yara sa Juda, kag magpatindug sang balay sang GINOONG Dios sang Israel, (sia amo ang Dios,) nga yara sa Jerusalem.

4 Kag ang bisan sin-o nga mabilin sa bisan ano nga duug nga iya ginapanlugayawan, ang mga tawo sa iya duug magbulig sa iya sa pilak, kag sa bulawan, kag sa mga pagkabutang, kag sa mga kasapatan, luwas sang halad nga kinabubut-on nga sa balay sang Dios nga yara sa Jerusalem.

5 ¶ Niyan nagtindug ang mga pangolo sang mga kaamayan sang Juda kag Benjamin, kag ang mga pari, kag ang mga Levinhon, upud ang tanan nga ang ila espiritu ginpukaw sang Dios, sa pagtaklad sa pagpatindug sang balay sang GINOO nga yara sa Jerusalem.

6 Kag ang tanan nga yara sa palibut nila nagpalig-on sa ila mga kamut sang mga suludlan nga pilak, sang bulawan, sang mga pagkabutang, kag sang mga kasapatan, kag sang bilidhon nga mga butang, luwas sang tanan nga ginhalad sing kinabubut-on.

7 ¶ Ginpagowa man ni Ciro ang mga suludlan sang balay sang GINOO, nga gindala ni Nabucodonosor gikan sa Jerusalem, kag ginbutang sa balay sang iya mga dios;

8 Bisan yadto sila ginpadala ni Ciro nga hari sang Persia sa kamut ni Mitridates nga manugtipig sang bahandi, kag gin-isip sila kay Sesbasar, nga prinsipe sang Juda.

9 Kag amo ini ang kadamuon nila: katloan ka bandihado nga bulawan, isa ka libo ka bandihado nga pilak, duha ka pulo kag siam ka sundang,

10 Katloan ka batiya nga bulawan, apat ka gatus kag napulo ka batiya nga pilak nga ikaduha nga sari, kag isa ka libo sang iban nga mga suludlan.

11 Ang tanan nga suludlan nga bulawan kag pilak lima ka libo kag apat ka gatus. Sila tanan gindala ni Sesbasar pati ang mga sa kabihagan nga ginpataklad gikan sa Babilonia pa Jerusalem.



KAPITULO 2

KARON amo ini ang kaanakan sang probinsya nga nagtaklad gikan sa kabihagan, gikan sadtong mga gindala anay, nga gindala sa Babilonia ni Nabucodonosor nga hari sang Babilonia, kag nagbalik sa Jerusalem kag Juda, ang tagsatagsa sa iya siudad;

2 Nga nag-abut upud kay Zorobabel: si Jesua, si Nehemias, si Seraya, si Reelaya, si Mardoqueo, si Belsan, si Mispar, si Bigvai, si Rehum, si Baana. Ang kadamuon sang mga lalaki sang katawohan sang Israel:

3 Ang kaanakan ni Paros, duha ka libo kag isa ka gatus kag kapitoan kag duha.

4 Ang kaanakan ni Sefatias, tatlo ka gatus kag kapitoan kag duha.

5 Ang kaanakan ni Ara, pito ka gatus kag kapitoan kag lima.

6 Ang kaanakan ni Pahat-moab, gikan sa kaanakan ni Jesua kag ni Joab, duha ka libo kag walo ka gatus kag napulo kag duha.

7 Ang kaanakan ni Elam, isa ka libo kag duha ka gatus kag kalim-an kag apat.

8 Ang kaanakan ni Zatu, siam ka gatus kag kap-atan kag lima.

9 Ang kaanakan ni Zacai, pito ka gatus kag kan-uman.

10 Ang kaanakan ni Bani, anum ka gatus kag kap-atan kag duha.

11 Ang kaanakan ni Bebai, anum ka gatus kag duha ka pulo kag tatlo.

12 Ang kaanakan ni Azgad, isa ka libo kag duha ka gatus kag duha ka pulo kag duha.

13 Ang kaanakan ni Adonicam, anum ka gatus kag kan-uman kag anum.

14 Ang kaanakan ni Bigvai, duha ka libo kag kalim-an kag anum.

15 Ang kaanakan ni Adin, apat ka gatus kag kalim-an kag apat.

16 Ang kaanakan ni Ater ni Ezequias, kasiaman kag walo.

17 Ang kaanakan ni Bezai, tatlo ka gatus kag duha ka pulo kag tatlo.

18 Ang kaanakan ni Jora, isa ka gatus kag napulo kag duha.

19 Ang kaanakan ni Hasum, duha ka gatus kag duha ka pulo kag tatlo.

20 Ang kaanakan ni Gibar, kasiaman kag lima.

21 Ang kaanakan sang Bet-lehem, isa ka gatus kag duha ka pulo kag tatlo.

22 Ang mga tawo sang Netopa, kalim-an kag anum.

23 Ang mga tawo sang Anatot, isa ka gatus kag duha ka pulo kag walo.

24 Ang kaanakan sang Azmavet, kap-atan kag duha.

25 Ang kaanakan sang Kiryat-jearim, sang Cafira, kag sang Beerot, pito ka gatus kag kap-atan kag tatlo.

26 Ang kaanakan sang Rama kag sang Geba, anum ka gatus kag duha ka pulo kag isa.

27 Ang mga tawo sang Micmas, isa ka gatus kag duha ka pulo kag duha.

28 Ang mga tawo sang Bet-el kag sang Ai, duha ka gatus kag duha ka pulo kag tatlo.

29 Ang kaanakan sang Nebo, kalim-an kag duha.

30 Ang kaanakan sang Magbis, isa ka gatus kag kalim-an kag anum.

31 Ang kaanakan sang isa pa ka Elam, isa ka libo kag duha ka gatus kag kalim-an kag apat.

32 Ang kaanakan ni Harim, tatlo ka gatus kag duha ka pulo.

33 Ang kaanakan sang Lod, sang Hadid, kag sang Ono, pito ka gatus kag duha ka pulo kag lima.

34 Ang kaanakan sang Jerico, tatlo ka gatus kag kap-atan kag lima.

35 Ang kaanakan sang Senaa, tatlo ka libo kag anum ka gatus kag katloan.

36 ¶ Ang mga pari: ang kaanakan ni Jedaya, gikan sa panimalay ni Jesua, siam ka gatus kag kapitoan kag tatlo.

37 Ang kaanakan sang Imer, isa ka libo kag kalim-an kag duha.

38 Ang kaanakan sang Pasur, isa ka libo kag duha ka gatus kag kap-atan kag pito.

39 Ang kaanakan sang Harim, isa ka libo kag napulo kag pito.

40 ¶ Ang mga Levinhon: ang kaanakan ni Jesua kag ni Cadmiel, gikan sa kaanakan ni Odabias, kapitoan kag apat.

41 ¶ Ang mga manug-amba: ang kaanakan ni Asaf, isa ka gatus kag duha ka pulo kag walo.

42 ¶ Ang kaanakan sang mga manugbantay sang gawang: ang kaanakan ni Sallum, ang kaanakan ni Ater, ang kaanakan ni Talmon, ang kaanakan ni Acub, ang kaanakan ni Hatita, ang kaanakan ni Sobai, ang tanan isa ka gatus kag katloan kag siam.

43 ¶ Ang mga Netinim: ang kaanakan ni Ziha, ang kaanakan ni Hasufa, ang kaanakan ni Tabaot,

44 Ang kaanakan ni Keros, ang kaanakan ni Siaha, ang kaanakan ni Padon,

45 Ang kaanakan ni Lebana, ang kaanakan ni Hagaba, ang kaanakan ni Acub,

46 Ang kaanakan ni Hagab, ang kaanakan ni Salmai, ang kaanakan ni Hanan,

47 Ang kaanakan ni Gidel, ang kaanakan ni Gahar, ang kaanakan ni Reaya,

48 Ang kaanakan ni Rezin, ang kaanakan ni Necoda, ang kaanakan ni Gazam,

49 Ang kaanakan ni Uza, ang kaanakan ni Pasea, ang kaanakan ni Besai,

50 Ang kaanakan ni Asna, ang kaanakan ni Meunim, ang kaanakan ni Nefusim,

51 Ang kaanakan ni Bacbuc, ang kaanakan ni Hakufa, ang kaanakan ni Harhur,

52 Ang kaanakan ni Bazlut, ang kaanakan ni Mehida, ang kaanakan ni Harsa,

53 Ang kaanakan ni Barcos, ang kaanakan ni Sisera, ang kaanakan ni Tama,

54 Ang kaanakan ni Nezia, kag kaanakan ni Hatifa.

55 ¶ Ang kaanakan sang mga alagad ni Salomon: ang kaanakan ni Sotai, ang kaanakan ni Soferet, ang kaanakan ni Peruda,

56 Ang kaanakan ni Jaala, ang kaanakan ni Darcon, ang kaanakan ni Gidel,

57 Ang kaanakan ni Sefatias, ang kaanakan ni Hatil, ang kaanakan ni Poqueret sang Zebaim, ang kaanakan ni Ami.

58 Ang tanan nga Netinim, kag ang kaanakan sang mga alagad ni Salomon tatlo ka gatus kag kasiaman kag duha.

59 Kag amo ini sila ang nagtaklad gikan sa Tel-mela, sa Tel-harsa, sa Querub, sa Addan, kag sa Imer: apang indi sila makapahayag sang panimalay sang ila amay, kag sang ila kaliwat, kon bala gikan sila sa Israel:

60 Ang kaanakan ni Delaya, ang kaanakan ni Tobias, ang kaanakan ni Necoda, anum ka gatus kag kalim-an kag duha.

61 ¶ Kag ang kaanakan sang mga pari: ang kaanakan ni Habaya, ang kaanakan ni Koz, ang kaanakan ni Barzillai; nga nagpangasawa gikan sa babaye nga mga anak ni Barzillai nga Galaadnon, kag ginhingadlan sono sa ngalan nila:

62 Ini sila nagpangita sang ila listahan sa mga naisipan sono sa lista sang kaliwatan, apang wala sila makita: busa sa ginkabig sila nga nadagtaan, ginpagowa sila sa pagkapari.

63 Kag ang Tirsata nagsiling sa ila, nga indi sila magkaon gikan sa labi gid ka balaan nga mga butang, tubtub nga may magtindug nga pari nga may Urim kag Tummim.

64 ¶ Ang bug-os nga katilingban sa tingub kap-atan kag duha ka libo kag tatlo ka gatus kag kan-uman,

65 Luwas sang ila mga alagad kag sang ila mga alagad nga mga babaye, nga sa ila may pito ka libo kag tatlo ka gatus kag katloan kag pito: kag sa tunga nila may duha ka gatus nga mga manug-amba nga mga lalaki kag mga manug-amba nga mga babaye.

66 Ang ila mga kabayo pito ka gatus kag katloan kag anum; ang ila mga mula, duha ka gatus kag kap-atan kag lima;

67 Ang ila mga camelyo, apat ka gatus kag katloan kag lima; ang ila mga asno, anum ka libo kag pito ka gatus kag duha ka pulo.

68 ¶ Kag ang iban sang mga pangolo sang mga kaamayan, sang nag-abut sila sa balay sang GINOO nga yara sa Jerusalem, nagdolot sing kinabubut-on nga sa balay sang Dios sa pagpatindug sini sa iya duug:

69 Sila sono sa ikasarang nila naghatag sa bahandi sang buluhaton sing kan-uman kag isa ka libo ka darico nga bulawan, kag lima ka libo ka mina nga pilak, kag isa ka gatus ka panapton sang mga pari.

70 Gani ang mga pari, kag ang mga Levinhon, kag ang iban sang mga tawo, kag ang mga manug-amba, kag ang mga manugbantay sang gawang, kag ang mga Netinim, nagpuyo sa ila mga siudad, kag ang bug-os nga Israel sa ila mga siudad.



KAPITULO 3

KAG sang pag-abut sang ikapito nga bulan, kag ang kaanakan sang Israel yara na sa mga siudad, ang katawohan nagtipon sila sing tingub sa Jerusalem subong sang isa ka tawo.

2 Niyan nagtindug si Jesua nga lalaking anak ni Josadac, kag ang iya mga utud nga mga pari, kag si Zorobabel nga lalaking anak ni Sealtiel, kag ang iya mga utud, kag nagpatindug sang halaran sang Dios sang Israel, sa pagdolot sa ibabaw sini sing mga halad nga sinonog, sono sa nasulat sa kasogoan ni Moises nga tawo sang Dios.

3 Kag ginpahamtang nila ang halaran sa iya mga tulungtungan; kay ang kahadluk yara sa ila bangud sang katawohan sinang mga pungsud: kag nagdolot sila sa GINOO sa ibabaw sini sing mga halad nga sinonog, mga halad nga sinonog sa kaagahon kag sa kahaponon.

4 Naghiwat man sila sang pandut sang mga tabernakulo, sono sa nasulat, kag nagdolot sang inadlaw nga mga halad nga sinonog sa kadamuon, sono sa pagsolondan, sono sa katungdanan nga ginkinahanglan sa tagsa ka adlaw;

5 Kag ugaling gindolot ang dalayon nga halad nga sinonog, ang iya sang mga lati, kag sang tanan nga pinat-ud nga mga pandut sang GINOO nga ginpakasagrado, kag sang tagsatagsa nga sa kinabubut-on nagdolot sing halad nga kinabubut-on sa GINOO.

6 Kutub sa nahaunang adlaw sang ikapitong bulan nagsugud sila sa pagdolot sing mga halad nga sinonog sa GINOO. Apang ang sadsaran sang templo sang GINOO wala pa mapasad.

7 Naghatag man sila sing kuarta sa mga cantero, kag sa mga panday; kag kalan-on, kag ilimnon, kag lana sa mga taga-Zidon, kag sa mga taga-Tiro, sa pagdala sing mga kahoy nga cedro gikan sa Libano pakadto sa dagat sang Joppe, sono sa pahanugut sa ila ni Ciro nga hari sang Persia.

8 ¶ Karon sa ikaduhang tuig sang ila pag-abut sa balay sang Dios sa Jerusalem, sa ikaduhang bulan, nagsugud si Zorobabel nga lalaking anak ni Sealtiel, kag si Jesua nga lalaking anak ni Josadac, kag ang nabilin sang ila mga utud nga mga pari kag mga Levinhon, kag tanan sila nga nagbalik sa Jerusalem gikan sa kabihagan; kag nagtangdo sila sang mga Levinhon, kutub sa duha ka pulo ka tuig kag paibabaw, sa pagtatap sang buluhaton sang balay sang GINOO.

9 Niyan nagtindug sing tingub si Jesua pati ang iya mga lalaking anak kag ang iya mga utud, si Cadmiel kag ang iya mga lalaking anak, ang mga lalaking anak sang Juda, sa pagpatigayon sang mga manugpangabudlay sa balay sang Dios: ang mga lalaking anak ni Henadad, pati ang ila mga lalaking anak kag ang ila mga utud nga mga Levinhon.

10 Kag sang napasad sang mga manugpatindug ang sadsaran sang templo sang GINOO, ginpapanaptan nila ang mga pari nga may mga budyong, kag ang mga Levinhon nga mga lalaking anak ni Asaf nga may mga apiping, sa pagdayaw sa GINOO, sono sa sogo ni David nga hari sang Israel.

11 Kag nag-ambahanay sila paagi sa kinabon sa pagdayaw kag pagpasalamat sa GINOO; kay maayo sia, kay ang iya kalooy nagapadayon sa gihapon sa Israel. Kag ang bug-os nga katawohan nagsinggit sing matonog nga singgit, sang nagdayaw sila sa GINOO, bangud nga ginpasad ang sadsaran sang balay sang GINOO.

12 Apang madamu sang mga pari kag sang mga Levinhon kag sang mga pangolo sang mga kaamayan, nga mga katigulangan, nga nakakita sang nahaunang balay, sang ginpasad ang sadsaran sining balay sa atubangan sang ila mga mata, naghibi sa matonog nga tingug; kag madamu ang nagsinggit sing mabaskug sa kalipay:

13 Sa bagay nga ang katawohan indi makakilala sang kagahud sang hinugyaw sa kalipay gikan sa kagahud sang hinibi sang katawohan: kay ang katawohan nagsinggit sing matonog nga singgit, kag ang kagahud nabatian sa malayo.



KAPITULO 4

KARON sang nakabati ang mga kasumpung sang Juda kag Benjamin nga ang mga anak sang kabihagan nagapatindug sing templo sa GINOONG Dios sang Israel;

2 Niyan nagpalapit sila kay Zorobabel, kag sa mga pangolo sang mga kaamayan, kag nagsiling sa ila, Tuguti kami nga magpatindug upud sa inyo: kay nagapangita kami sa inyo Dios, subong sang ginahimo ninyo; kag nagahalad kami sa iya kutub sang mga adlaw ni Esar-hadon nga hari sang Asur nga nagpataklad sa amon diri.

3 Apang si Zorobabel, kag si Jesua, kag ang iban sa mga pangolo sang mga kaamayan sang Israel, nagsiling sa ila, Wala kamo sing labut sa amon sa pagpatindug sing balay sa amon Dios; kondi kami amon sing tingub magapatindug sa GINOONG Dios sang Israel, sono sa ginsogo sa amon ni haring Ciro nga hari sang Persia.

4 Niyan ang katawohan sang duta nagpaluya sang mga kamut sang katawohan sang Juda, kag nagtublag sa ila sa pagpatindug,

5 Kag nagsohol sing mga manuglaygay batok sa ila, sa paglaglag sang ila tinutuyo, sa tanan nga adlaw ni Ciro nga hari sang Persia, bisan tubtub sa paghari ni Dario nga hari sang Persia.

6 Kag sa paghari ni Asuero, sa pamuno sang iya paghari, nagsulat sila sing sumbung batok sa mga pumuluyo sa Juda kag sa Jerusalem.

7 ¶ Kag sa mga adlaw ni Artajerjes si Bislam, si Mitridates, si Tabeel, kag ang iban sang ila kaupdanan nagsulat kay Artajerjes nga hari sang Persia; kag ang sulat nasulat sa Sirianhon nga hambal, kag napatpat sa Sirianhon nga hambal.

8 Si Rehum nga pangolo nga harianon kag si Simsai nga escriba nagsulat sing sulat batok sa Jerusalem kay Artajerjes nga hari sa sining bagay:

9 Niyan nagsulat si Rehum nga pangolo nga harianon, kag si Simsai nga escriba, kag ang iban sang ila kaupdanan; ang mga Dinahanon, kag ang mga Afarsacnon, ang mga Tarpelinhon, ang mga Afarsinhon, ang mga Arquebinhon, ang mga Babiloniahanon, ang mga Susanhon, ang mga Dehanhon, kag ang mga Elamnon,

10 Kag ang iban sang mga pungsud nga ginbihag sang daku kag dungganon nga Osnapar, kag ginpahamtang sa mga siudad sang Samaria, kag ang iban nga yara sa sining kilid sang suba, kag sa sining tion.

11 ¶ Amo ini ang huwad sang sulat nga ila ginpadala sa iya, kay Artajerjes nga hari; Ang imo mga alagad, mga tawo sa sining kilid sang suba, kag sa sining tion.

12 Magmangindayag sa hari, nga ang mga Judio nga nagtaklad gikan sa imo sa amon nag-abut sa Jerusalem, nga nagapatindug sing siudad nga malalison kag malain, kag nagkaayo sang mga kuta sini, kag nagsugpon sang mga sadsaran.

13 Magmangindayag karon sa hari, nga, kon ining siudad mapatindug, kag ang mga kuta mapakaayo liwan, niyan indi sila magbayad sing alcabala, buhis, kag balayran, kag sa amo madautan mo ang ingreso sang mga hari.

14 Karon bangud nga may sustento kami gikan sa palacio sang hari, kag indi nagakaigo sa amon nga magtan-aw sang kahuluy-an sang hari, busa nagpadala kami kag nagpamatuud sa hari;

15 Nga paghimoon ang pagpangusisa sa libro sang mga sinulat sang imo mga kaamayan: sa amo makita mo sa libro sang mga sinulat, kag mahibaloan nga ining siudad mabinatoon nga siudad, kag makadaut sa mga hari kag sa mga probinsya, kag nga naghikot sila sing pagribuk sa sulud sang amo sa dumaan nga tion: nga sa among kabangdanan ining siudad ginlaglag.

16 Nagapamatuud kami sa hari nga, kon ining siudad mapatindug liwan, kag ang mga kuta sini mapakaayo, tungud sini nga paagi manginwalay bahin ka sa sining kilid sang suba.

17 ¶ Niyan ang hari nagpadala sing sabat kay Rehum nga pangolong harianon, kag kay Simsai nga escriba, kag sa iban sang ila mga kaupdanan nga nagapuyo sa Samaria, kag sa iban sa tabok sang suba, Paghidait, kag sa sining tion.

18 Ang sulat nga ginpadala ninyo sa amon ginbasa sing maathag sa atubangan ko.

19 Kag nagmando ako, kag nahimo ang pagpangusisa, kag nasapwan nga ining siudad sa dumaan nga tion nagbato sa mga hari, kag nga ang pagbato kag pagribuk nahimo sa sulud niya.

20 May gamhanan nga mga hari man sa Jerusalem, nga naghari sa tanan nga duta sa tabok sang suba; kag nga ginbayaran sila sing alcabala, buhis, kag balayran.

21 Karon hatag kamo sing sogo sa pagpauntat sining mga tawo, kag nga ining siudad dili pagpatindugon, tubtub nga ihatag ko ang isa pa ka sogo.

22 Karon mag-andam kamo nga dili magpatumbaya sini: ngaa bala nga magdugang ang kasamaran sa kadautan sang mga hari?

23 ¶ Karon sang ginbasa ang huwad sang sulat ni haring Artajerjes sa atubangan ni Rehum, kag ni Simsai nga escriba, kag sa ila mga kaupdanan, nagkadto sila sing dalidali sa Jerusalem sa mga Judio, kag ginpauntat sila paagi sa kusug kag gahum.

24 Niyan nag-untat ang buluhaton sa balay sang Dios nga yara sa Jerusalem. Gani nag-untat ini tubtub sa ikaduhang tuig sang paghari ni Dario nga hari sang Persia.



KAPITULO 5

NIYAN ang mga manalagna, si Hageo nga manalagna, kag si Zacarias nga lalaking anak ni Iddo, nagtagna sa mga Judio nga didto sa Juda kag sa Jerusalem sa ngalan sang Dios sang Israel, bisan sa ila.

2 Niyan nagtindug si Zorobabel nga lalaking anak ni Sealtiel, kag si Jesua nga lalaking anak ni Josadac, kag nagsugud sa pagpatindug sang balay sang Dios nga yara sa Jerusalem: kag upud sa ila ang mga manalagna sang Dios nga nagabulig sa ila.

3 ¶ Sa among tion nag-abut sa ila si Tatnai, nga gobernador sa sining kilid sang suba, kag si Setar-boznai, kag ang ila mga kaupdanan, kag nagsiling sa ila sing subong sini, Sin-o bala ang nagsogo sa inyo sa pagpatindug sining balay, kag sa pagtapus sining kuta?

4 Niyan nagsiling kami sa ila sa sining bagay, Sin-o ang mga ngalan sang mga tawo nga nagabuhat sining tinukud?

5 Apang ang mata sang ila Dios yara sa mga tigulang sang mga Judio, sa bagay nga wala nila mapauntat sila, tubtub nga ang butang nag-abut kay Dario: kag niyan nagpadala sila sang sabat paagi sa sulat nahanungud sining butang.

6 ¶ Ang huwad sang sulat nga ginpadala ni Tatnai, nga gobernador sa sining kilid sang suba, kag ni Setar-boznai, kag sang iya mga kaupdanan nga mga Afarsacnon, nga yara sa sining kilid sang suba kay Dario nga hari:

7 Nagpadala sila sing sulat sa iya, diin nasulat ang subong sini; Kay Dario nga hari, ang bug-os nga paghidait.

8 Magmangindayag sa hari, nga nagkadto kami sa probinsya sang Juda, sa balay sang dakung Dios, nga ginapatindug nga may dalagkung mga bato, kag mga tablon nga napahamtang sa mga kuta, kag ining buluhaton nagapadayon sing makugihon, kag nagauswag sa ila mga kamut.

9 Niyan nagpamangkot kami sa sadtong mga tigulang, kag nagsiling sa ila sing subong sini, Sin-o bala ang nagsogo sa inyo sa pagpatindug sining balay, kag sa pagtapus sining mga kuta?

10 Ginpamangkot man namon ang ila mga ngalan, sa pagpamatuud sa imo, agud nga masulat namon ang mga ngalan sang mga tawo nga nagapangolo sa ila.

11 Kag amo ini ang balus nila nga sabat sa amon, nga nagasiling, Mga alagad kami sang Dios sang langit kag duta, kag nagapatindug sang balay nga ginpatindug sining madamu na nga tuig, nga ginpatindug kag gintapus sang dakung hari sang Israel.

12 Apang sa tapus nga napasingkal sang amon mga kaamayan ang Dios sang langit, gintugyan niya sila sa kamut ni Nabucodonosor nga hari sang Babilonia, ang Caldeanhon, nga naglaglag sining balay, kag nagdala sang katawohan sa Babilonia.

13 Apang sa nahaunang tuig ni Ciro nga hari sang Babilonia, ang among Ciro nga hari naghimo sing mando sa pagpatindug sining balay sang Dios.

14 Kag ang mga suludlan man nga bulawan kag pilak sang balay sang Dios, nga ginkuha ni Nabucodonosor gikan sa templo nga yara sa Jerusalem, kag gindala sila sa templo sang Babilonia, yadto sila ginkuha ni Ciro nga hari gikan sa templo sang Babilonia, kag gintugyan sila sa isa nga ang iya ngalan si Sesbasar, nga ginhimo niya nga gobernador;

15 Kag nagsiling sa iya, Dalha ining mga suludlan, lakat, ibutang sila sa templo nga yara sa Jerusalem, kag ipatindug ang balay sang Dios sa iya duug.

16 Niyan nag-abut ang among Sesbasar, kag nagpasad sang sadsaran sang balay sang Dios nga yara sa Jerusalem: kag kutub sadtong tion tubtub karon ginapatindug ini, kag wala pa gihapon mahuman.

17 Busa karon, kon maayo ini sa hari, ipausisa sa bahandian nga balay sang hari nga yara dira sa Babilonia, kon bala matuud ini nga si Ciro nga hari naghimo sing mando sa pagpatindug sining balay sang Dios sa Jerusalem, kag ang hari magpadala sa amon sang iya nahamut-an nahanungud sining butang.



KAPITULO 6

NIYAN si Dario nga hari naghimo sang mando, kag nahimo ang pagpangusisa sa balay sang mga linukot, diin nahamtang ang mga bahandi sa Babilonia.

2 Kag nakita sa Acmeta, sa palacio nga yara sa probinsya sang mga Mediahanon, ang isa ka linukot, kag sa sini may nasulat sing subong:

3 Sa nahaunang tuig ni Ciro nga hari, ang among Ciro nga hari naghimo sing mando nahanungud sang balay sang Dios sa Jerusalem, Ipatindug ang balay, ang duug diin sila nagdolot sing mga halad, kag ipapasad sing malig-on ang iya mga sadsaran; ang iya kataason kan-uman ka maniko, kag kan-uman ka maniko ang iya kasangkaron;

4 Nga may tatlo ka anib nga dalagku nga mga bato, kag isa ka anib nga bag-ong tablon: kag ang mga kagastohan kuhaon sa balay sang hari:

5 Kag ang mga suludlan man nga bulawan kag pilak sang balay sang Dios, nga ginkuha ni Nabucodonosor gikan sa templo nga yara sa Jerusalem, kag gindala sa Babilonia, iuli kag isulud liwat sa templo nga yara sa Jerusalem, ang tagsatagsa sa iya duug, kag ibutang sila sa balay sang Dios.

6 Busa karon, Tatnai, gobernador sa tabok sang suba, Setar-boznai, kag ang inyo mga kaupdanan nga mga Afarsacnon, nga yara sa tabok sang suba, palayo kamo gikan dira:

7 Pabayai ninyo ang buluhaton sining balay sang Dios; ang gobernador sang mga Judio kag ang mga tigulang sang mga Judio magpatindug sining balay sang Dios sa iya duug.

8 Labut pa nagahimo ako sing mando kon ano ang himoon ninyo sang mga tigulang sining mga Judio tungud sa pagpatindug sining balay sang Dios: nga gikan sa mga pagkabutang sang hari, gikan sa buhis sa tabok sang suba, sa bug-os nga kakugi ihatag ang mga galastohon sa sining mga tawo, agud nga indi sila masablagan.

9 Kag inang ila kinahanglan, ang mga tinday nga baka nga lalaki, kag mga carnero nga lalaki, kag mga cordero, nga sa mga halad nga sinonog sa Dios sang langit, trigo, asin, alak, kag lana, sono sa pagtangdo sang mga pari nga yara sa Jerusalem, ihatag sa ila adlawadlaw sa walay langan:

10 Agud nga magdolot sila sing mga halad nga maamyon sa Dios sang langit, kag magpangamuyo tungud sa kabuhi sang hari, kag sang iya mga lalaking anak.

11 Naghimo ako sing mando man, nga ang bisan sin-o nga magbalhin sining polong, pakuhaan sing balayan ang iya balay, kag sa napatindug ini, bitayon sia sa sini; kag tungud sini ang iya balay himoon nga tinumpok sang ipot.

12 Kag ang Dios nga nagapapuyo sang iya ngalan didto maglaglag sang tanan nga hari kag katawohan, nga mag-untay sang ila kamut sa pagbalhin kag sa paglaglag sining balay sang Dios nga yara sa Jerusalem. Ako si Dario naghimo sang mando; paghimoon ini sa madali gid.

13 ¶ Niyan si Tatnai, ang gobernador sa sining kilid sang suba, si Setar-boznai, kag ang ila mga kaupdanan, sono sinang ginpadala ni Dario nga hari, sa amo naghimo sila sa madali gid.

14 Kag ang mga tigulang sang mga Judio nagpatindug, kag nag-uswag sila paagi sa mga pagtagna ni Hageo nga manalagna kag ni Zacarias nga anak nga lalaki ni Iddo. Kag ginpatindug nila, kag gintapus ini, sono sa sogo sang Dios sang Israel, kag sono sa sogo ni Ciro, kag ni Dario, kag ni Artajerjes nga hari sang Persia.

15 Kag ining balay natapus sa ikatlong adlaw sang bulan nga Adar, nga amo ang ikan-um nga tuig sang paghari ni Dario nga hari.

16 ¶ Kag ang kaanakan sang Israel, ang mga pari, kag ang mga Levinhon, kag ang iban sang kaanakan sang kabihagan, naghiwat sang pagdedicar sining balay sang Dios nga may kasadya,

17 Kag nagdolot sila sa pagdedicar sining balay sang Dios sing isa ka gatus ka tinday nga baka nga lalaki, duha ka gatus ka carnero nga lalaki, apat ka gatus ka cordero; kag napulog duha ka lalaki nga kanding nga halad tungud sa sala nga sa bug-os nga Israel, sono sa kadamuon sang mga tribo sang Israel.

18 Kag ginpahamtang nila ang mga pari sa ila mga binahin, kag ang mga Levinhon sa ila mga kinabon, tungud sa pag-alagdan sang Dios, nga yara sa Jerusalem; sono sa nasulat sa libro ni Moises.

19 Kag ang kaanakan sang kabihagan naghiwat sang pagligad sa ikapulog apat nga adlaw sang nahaunang bulan.

20 Kay ang mga pari kag ang mga Levinhon nagpaninlo sing tingub, tanan sila matinlo, kag gin-ihaw ang pagligad tungud sa tanan nga kaanakan sang kabihagan, kag tungud sa ila mga utud nga mga pari, kag tungud sa ila kaugalingon.

21 Kag nagkaon ang kaanakan sang Israel, nga nagbalik gikan sa kabihagan, kag ang tanan nga nagpahain sang ila kaugalingon sa ila gikan sa kahigkoan sang mga pagano sang duta, sa pagpangita sa GINOONG Dios sang Israel,

22 Kag naghiwat sila sang pandut sang tinapay nga walay tapay sing pito ka adlaw nga may kalipay: kay ang GINOO naghimo sa ila nga malipayon, kag nagpaliso sang tagiposoon sang hari sang Asiria sa ila, sa pagpalig-on sang ila mga kamut sa buluhaton sa balay sang Dios, ang Dios sang Israel.



KAPITULO 7

KARON sa tapus sining mga butang, sang paghari ni Artajerjes nga hari sang Persia, si Esdras nga lalaking anak ni Seraya, ang lalaking anak ni Azarias, ang lalaking anak ni Helcias,

2 Ang lalaking anak ni Sallum, ang lalaking anak ni Sadoc, ang lalaking anak ni Ahitob,

3 Ang lalaking anak ni Amarias, ang lalaking anak ni Azarias, ang lalaking anak ni Marayot,

4 Ang lalaking anak ni Zeraya, ang lalaking anak ni Uzi, ang lalaking anak ni Buki,

5 Ang lalaking anak ni Abisue, ang lalaking anak ni Finees, ang lalaking anak ni Eleazar, ang lalaking anak ni Aaron nga puno nga pari:

6 Ining Esdras nagtaklad gikan sa Babilonia; kag sia escriba nga handa sa kasogoan ni Moises, nga ginhatag sang GINOONG Dios sang Israel: kag gintugutan sia sang hari sang tanan niyang pangabay, sono sa kamut sang GINOO nga iya Dios sa ibabaw niya.

7 Kag may nagtaklad pa Jerusalem sang iban sang kaanakan sang Israel, kag sang mga pari, kag mga Levinhon, kag mga manug-amba, kag mga manugbantay sang gawang, kag mga Netinim, sa ikapitong tuig ni Artajerjes nga hari.

8 Kag nag-abut sia sa Jerusalem sa ikalimang bulan, sa ikapitong tuig sang hari.

9 Kay sa nahaunang adlaw sang nahaunang bulan nagsugud sia sa pagtaklad gikan sa Babilonia, kag sa nahaunang adlaw sang ikalimang bulan nag-abut sia sa Jerusalem, sono sa maayong kamut sang iya Dios sa ibabaw niya.

10 Kay gin-aman ni Esdras ang iya tagiposoon sa pag-usisa sang kasogoan sang GINOO, kag sa pagtuman sini, kag sa pagtudlo sa Israel sang mga palatukuran kag mga pagsolondan.

11 ¶ Karon ini amo ang huwad sang sulat nga ginhatag ni haring Artajerjes kay Esdras nga pari, ang escriba, isa ka escriba sang mga polong sang mga sogo sang GINOO, kag sang iya mga palatukuran sa Israel.

12 Si Artajerjes, hari sang mga hari, kay Esdras nga pari, isa ka escriba sang kasogoan sang Dios sang langit, himpit nga paghidait, sa tion kag sa tion.

13 Nagahimo ako sing mando, nga sila tanan nga gikan sa katawohan sang Israel, kag gikan sa iya mga pari kag sa mga Levinhon, sa akon ginharian, nga nagahunahuna sing kinabubut-on sa pagkadto sa Jerusalem, mag-upud sa imo.

14 Sanglit nga ginpadala ka sang hari, kag sang iya pito ka manuglaygay, sa pag-usisa nahanungud sa Juda kag Jerusalem, sono sa kasogoan sang imo Dios, nga yara sa imo kamut;

15 Kag sa pagdala sang pilak kag bulawan, nga gindolot sing kinabubut-on sang hari kag sang iya mga manuglaygay sa Dios sang Israel, nga ang iya puluy-an didto sa Jerusalem,

16 Kag sang tanan nga pilak kag bulawan nga makita mo sa bug-os nga probinsya sang Babilonia, pati sang dolot nga kinabubut-on sang katawohan, kag sang mga pari, nga nagadolot sing kinabubut-on sa balay sang ila Dios nga yara sa Jerusalem:

17 Agud nga makabakal ka sa madali gid sa sini nga kuarta sing mga tinday nga baka nga lalaki, mga carnero nga lalaki, mga cordero, pati sang ila mga halad nga kalan-on kag mga halad nga ilimnon, kag idolot sila sa halaran sang balay sang inyo Dios nga yadto sa Jerusalem.

18 Kag ang bisan ano nga maayo sa imo, kag sa imo mga utud, nga himoon sa nabilin sang pilak kag bulawan, himoa ninyo sono sa kabubut-on sang inyo Dios.

19 Ang mga suludlan man nga ginhatag sa imo nga sa pag-alagdan sang balay sang imo Dios, ihatag mo ini sa atubangan sang Dios sang Jerusalem.

20 Kag ang bisan ano pa nga kinahanglan sa balay sang imo Dios, nga may kahigayonan ka sa paghatag, ihatag ini gikan sa balay sang bahandi sang hari.

21 Kag ako, si Artajerjes nga hari, nagahimo sing mando sa tanan nga manugtipig sang bahandi nga yara sa tabok sang suba, nga ang bisan ano nga kinahanglanon sa inyo ni Esdras nga pari, ang escriba sang kasogoan sang Dios sang langit, himoon ini sa madali gid,

22 Tubtub sa isa ka gatus ka talanton nga pilak, kag tubtub sa isa ka gatus ka sukub nga trigo, kag tubtub sa isa ka gatus ka bat nga alak, kag tubtub sa isa ka gatus ka bat nga lana, kag asin nga wala pag-isiling kon pila.

23 Ang bisan ano nga ginsogo sang Dios sang langit, paghimoon sing sibo gid tungud sa balay sang Dios sang langit: kay ngaa bala nga may kasingkal batok sa ginharian sang hari kag sang iya mga lalaking anak?

24 Nagapamatuud man kami sa imo, nga nahanungud sa bisan kay sin-o sang mga pari kag sang mga Levinhon, sang mga manug-amba, sang mga manugbantay sang gawang, sang mga Netinim, ukon sang mga ministro sining balay sang Dios, indi igo sa kasogoan ang pagpabayad sa ila sing alcabala, buhis, ukon balayran.

25 Kag ikaw, Esdras, sono sa kaalam sang imo Dios nga yara sa imo kamut, magtangdo ka sing mga punoan kag mga hukom, nga maghukom sang bug-os nga katawohan nga yara sa tabok sang suba, ang tanan nga nakahibalo sang mga kasogoan sang imo Dios; kag tudloi ninyo sila nga wala makakilala sa ila.

26 Kag ang bisan sin-o nga indi magtuman sang kasogoan sang imo Dios, kag sang kasogoan sang hari, hukman sia sa madali gid, bisan ini sa kamatayon, ukon sa pagtapok, ukon sa pagkuha sang mga pagkabutang, ukon sa pagbilanggo.

27 ¶ Pakamaayohon ang GINOONG Dios sang amon mga kaamayan, nga nagbutang sang subong sini nga butang sa tagiposoon sang hari, sa pagpatahum sang balay sang GINOO nga yara sa Jerusalem:

28 Kag nagpadangat sa akon sang kalooy sa atubangan sang hari, kag sang iya mga manuglaygay, kag sa atubangan sang tanan nga gamhanan nga mga prinsipe sang hari. Kag naglig-on ako sono sa kamut sang GINOO nga akon Dios sa ibabaw nakon, kag gintipon ko ang puno nga mga tawo gikan sa Israel sa pagtaklad upud sa akon.



KAPITULO 8

Ini sila amo karon ang mga pangolo sang ila mga kaamayan, kag amo ini ang listahan sang kaliwatan sang mga nagtaklad upud sa akon gikan sa Babilonia, sa paghari ni Artajerjes nga hari.

2 Gikan sa mga lalaking anak ni Finees; si Gersom: gikan sa mga lalaking anak ni Itamar; si Daniel: gikan sa mga lalaking anak ni David; si Hatus.

3 Gikan sa mga lalaking anak ni Secanias, gikan sa mga lalaking anak ni Paros; si Zacarias: kag upud sa iya gin-isip sono sa listahan sang kaliwatan sang mga lalaki isa ka gatus kag kalim-an.

4 Gikan sa mga lalaking anak ni Pahat-moab; si Elioenai nga lalaking anak ni Zeraias, kag upud sa iya duha ka gatus ka lalaki.

5 Gikan sa mga lalaking anak ni Secanias; ang lalaking anak ni Jahaziel, kag upud sa iya tatlo ka gatus ka lalaki.

6 Gikan sa mga lalaking anak man ni Adin; si Ebed nga lalaking anak ni Jonatan, kag upud sa iya kalim-an ka lalaki.

7 Kag gikan sa mga lalaking anak ni Elam; si Jesaya nga lalaking anak ni Atalias, kag upud sa iya kapitoan ka lalaki.

8 Kag gikan sa mga lalaking anak ni Sepatias; si Zebadias nga lalaking anak ni Micael, kag upud sa iya kawaloan ka lalaki.

9 Gikan sa mga lalaking anak ni Joab; si Obadias nga lalaking anak ni Jehiel, kag upud sa iya duha ka gatus kag napulo kag walo ka lalaki.

10 Kag gikan sa mga lalaking anak ni Selomit; ang lalaking anak ni Josifias, kag upud sa iya isa ka gatus kag kan-uman ka lalaki.

11 Kag gikan sa mga lalaking anak ni Bebai; si Zacarias nga lalaking anak ni Bebai, kag upud sa iya duha ka pulo kag walo ka mga lalaki.

12 Kag gikan sa mga lalaking anak ni Azgad; si Johanan nga lalaking anak ni Hacatan, kag upud sa iya isa ka gatus kag napulo ka lalaki.

13 Kag gikan sa mga naolihi nga mga lalaking anak ni Adonicam, ang ila mga ngalan si Elifelet, si Jeiel, kag si Semayas, kag upud sa ila kan-uman ka lalaki.

14 Gikan sa mga lalaking anak man ni Bigvai; si Utai, kag si Zabud, kag upud sa ila kapitoan ka lalaki.

15 ¶ Kag gintipon ko sila sa suba nga nagailig pa Ahava; kag didto nagpabilin kami sa mga layanglayang sing tatlo ka adlaw: kag gintan-aw ko ang katawohan, kag ang mga pari, kag wala ko makita didto ang bisan sin-o sang mga lalaking anak ni Levi.

16 Niyan ginpatawag ko si Eliezer, si Ariel, si Semaya, kag si Elnatan, kag si Jarib, kag si Elnatan, kag si Natan, kag si Zacarias, kag si Mesullam, puno nga mga tawo; si Joiarib man, kag si Elnatan, nga mga tawo nga mahangponon.

17 Kag ginpadala ko sila nga may sogo sa kay Iddo, nga puno sa duug nga Casifia, kag ginsugiran ko sila sang isiling nila kay Iddo, kag sa iya mga utud nga mga Netinim, sa duug nga Casifia, nga magdala sila sa amon sing mga ministro nga sa balay sang amon Dios.

18 Kag paagi sa maayo nga kamut sang amon Dios sa ibabaw namon, nagdala sila sa amon sing lalaki nga mahangponon, gikan sa mga lalaking anak ni Mali nga lalaking anak ni Levi, lalaking anak ni Israel; kag si Serebias, upud ang iya mga lalaking anak kag ang iya mga utud, napulo kag walo;

19 Kag si Hasabias, kag upud sa iya si Jesaya gikan sa mga lalaking anak ni Merari, ang iya mga utud kag ang ila mga lalaking anak, duha ka pulo;

20 Kag sa mga Netinim, nga gintangdo ni David kag sang mga prinsipe tungud sa pag-alagdan sang mga Levinhon, duha ka gatus kag duha ka pulo ka Netinim: tanan sila nasambit sa ngalan.

21 ¶ Niyan nagbantala ako sing puasa didto, sa luyo sang suba nga Ahava, agud nga makapaubus kami sa atubangan sang amon Dios, sa pagpangayo gikan sa iya sing dalan nga matadlong tungud sa amon, kag tungud sa amon mga magamay, kag tungud sa amon bug-os nga pagkabutang.

22 Kay nahuya ako magpangayo sa hari sing guban sang mga soldado kag mga manugkabayo sa pagtabang sa amon batok sa kaaway sa dalanon: bangud nga nakapamolong kami sa hari, nga nagasiling, Ang kamut sang amon Dios yara sa tanan nga nagapangita sa iya sa kaayohan; apang ang iya gahum kag iya kasingkal batok sa tanan nga nagbiya sa iya.

23 Gani nagpuasa kami kag nagpakilooy sa amon Dios tungud sini: kag nalooy sia sa amon.

24 ¶ Niyan ginpain ko ang napulog duha sang mga puno sang mga pari, si Serebias, si Hasabias, kag napulo sang ila mga utud upud sa ila,

25 Kag gintimbang ko sa ila ang pilak, kag ang bulawan, kag ang mga suludlan, ang halad nga sa balay sang amon Dios, nga gindolot sang hari, kag sang iya mga manuglaygay, kag sang iya mga ginoo, kag sang bug-os nga Israel nga nagtambong didto:

26 Gintimbang ko sa kamut nila ang anum ka gatus kag kalim-an ka talanton nga pilak, kag ang mga suludlan nga pilak nga isa ka gatus ka talanton, kag sa bulawan isa ka gatus ka talanton;

27 Duha ka pulo man ka batiya nga bulawan, nga isa ka libo ka darico; kag duha ka suludlan nga lunsay nga saway, nga bilidhon subong sang bulawan.

28 Kag nagsiling ako sa ila, Balaan kamo sa GINOO; balaan man ang mga suludlan; kag ang pilak kag ang bulawan halad nga kinabubut-on sa GINOONG Dios sang inyo mga kaamayan.

29 Bantayi ninyo, kag tipigan sila, tubtub nga matimbang ninyo sila sa atubangan sang mga puno sang mga pari kag sang mga Levinhon, kag sang mga puno sang mga kaamayan sang Israel, sa Jerusalem, sa mga hulut sang balay sang GINOO.

30 Gani ginbaton sang mga pari kag sang mga Levinhon ang timbang sang pilak, kag sang bulawan, kag sang mga suludlan, sa pagdala sa ila sa Jerusalem, sa balay sang amon Dios.

31 ¶ Niyan nagtaliwan kami gikan sa suba nga Ahava sang ikapulog duha nga adlaw sang nahauna nga bulan, sa pagkadto sa Jerusalem: kag ang kamut sang amon Dios yara sa ibabaw namon, kag sia nagluwas sa amon sa kamut sang kaaway, kag sang mga manugpuut sa dalanon.

32 Kag nag-abut kami sa Jerusalem, kag nagpabilin didto sing tatlo ka adlaw.

33 ¶ Karon sa ikap-at nga adlaw gintimbang ang pilak kag ang bulawan kag ang mga suludlan sa balay sang amon Dios sa kamut ni Meremot, nga lalaking anak ni Urias nga pari; kag upud sa iya yara si Eleazar nga lalaking anak ni Finees; kag upud sa ila yara si Jozabad nga lalaking anak ni Jesua, kag si Noadias nga lalaking anak ni Binui, ang mga Levinhon;

34 Sono sa isip kag sa timbang sang tagsatagsa: kag ang bug-os nga timbang nasulat sa sadtong tion.

35 Ang mga anak man sadtong ginbihag, nga naggowa gikan sa kabihagan, nagdolot sing mga halad nga sinonog sa Dios sang Israel, napulog duha ka tinday nga baka nga lalaki tungud sa bug-os nga Israel, kasiaman kag anum ka carnero nga lalaki, kapitoan kag pito ka cordero, napulog duha ka kanding nga lalaki nga halad tungud sa sala: ini tanan amo ang halad nga sinonog sa GINOO.

36 ¶ Kag ginhatag nila ang mga panugyan sang hari sa mga teniente sang hari, kag sa mga gobernador sa sining kilid sang suba: kag sila nagbulig sa katawohan, kag sa balay sang Dios.



KAPITULO 9

KARON sang nahimo ini nga mga butang, ang mga prinsipe nagpalapit sa akon, nga nagasiling, Ang katawohan sang Israel, kag ang mga pari, kag ang mga Levinhon, wala magpahain sang ila kaugalingon gikan sa katawohan sang mga duta, nga nagahimo sono sa ila mga kangil-aran, gikan sa mga Canaanhon, mga Hithanon, mga Pereznon, mga Jebusnon, mga Amonhon, mga Moabnon, mga Egiptohanon, kag sa mga Amornon.

2 Kay nagkuha sila sa ila mga anak nga babaye nga sa ila kaugalingon, kag sa ila mga anak nga lalaki: sa bagay nga ang kaliwat nga balaan nagsimpon sa katawohan sadtong mga duta: hoo, ang kamut sang mga prinsipe kag mga manugdumala amo ang puno sa sini nga paglapas.

3 Kag sang pagkabati ko sining butang, ginkusnit ko ang akon panapton kag ang akon kunup, kag gingan-it ko ang buhok sang akon olo kag sang akon bungut, kag naglingkod nga naorongan.

4 Niyan nagtingub sa akon ang tagsatagsa nga nagkurug sa mga polong sang Dios sang Israel, bangud sang paglapas sang mga kabihagan; kag naglingkod ako nga naorongan tubtub sa halad sa kahaponon.

5 ¶ Kag sa paghalad sa kahaponon nagtindug ako gikan sa akon kasubo; kag sa nakusnit ang akon panapton kag ang akon kunup, nagluhud ako, kag naghumlad sang akon mga kamut sa GINOO nga akon Dios,

6 Kag nagsiling, O Dios ko, nahuya ako kag nagapalamula sa pagbayaw sang akon nawung sa imo, Dios ko: kay ang amon kalautan nagdugang labaw sa amon olo, kag ang amon paglapas nagtaas tubtub sa mga langit.

7 Kutub sa kaadlawan sang amon mga kaamayan yara kami sa dakung paglapas tubtub sini nga adlaw; kag tungud sang amon mga kasal-anan, kami, ang amon mga hari, kag ang amon mga pari gintugyan sa kamut sang mga hari sang mga duta, sa espada, sa kabihagan, kag sa pang-ati, kag sa pagsaligmato, subong sang sa sini nga adlaw.

8 Kag karon sa diotay nga tion ang bugay ginpakita gikan sa GINOO nga amon Dios, sa pagbilin sa amon sing nabilin nga sa pagpalagyo, kag sa paghatag sa amon sang kalig-on sa iya duug nga balaan, agud nga mapasanag sang amon Dios ang amon mga mata, kag mahatagan kami sing diotay nga pagpaumpaw sa amon kahiolipnan.

9 Kay mga ulipon kami; apang ang amon Dios wala magbiya sa amon sa kahiolipnan namon, kondi nagtanyag sing kalooy sa amon sa atubangan sang mga hari sang Persia, sa paghatag sa amon sing pagpaumpaw, sa pagpatindug sang balay sang amon Dios, kag sa pagkaayo sang mga kalaglagan sini, kag sa paghatag sa amon sing kuta sa Juda kag sa Jerusalem.

10 Kag karon, O Dios namon, ano bala ang isiling namon sa tapus sini? kay ginbayaan namon ang imo mga sogo,

11 Nga ginsogo mo paagi sa imo mga alagad nga mga manalagna, nga nagasiling, Ang duta nga inyo ginakadtoan, sa pagtag-iya sa iya, dimatinlo nga duta tungud sang kahigkoan sang katawohan sang mga duta, pati sang ila mga kangil-aran, nga naghil-ob sini sang ila pagkadimatinlo kutub sa isa ka ukbung tubtub sa isa.

12 Busa karon dili pag-ihatag ang inyo mga anak nga babaye sa ila mga anak nga lalaki, kag dili magkuha sang ila mga anak nga babaye nga sa inyo mga anak nga lalaki, ukon maghimulat kamo sang ila paghidait ukon sang ila kauswagan sa gihapon: agud nga magbakud kamo, kag magkaon sang kaayohan sang duta, kag magbilin sini nga panublion sa inyo mga anak sa gihapon.

13 Kag sa tapus sang tanan nga nag-abut sa amon tungud sang amon malaut nga mga buhat, kag tungud sang amon daku nga paglapas, sa ginatan-aw nga ikaw, nga amon Dios, nagsilot sa amon sing kubus sa nagakaigo sa amon mga kalautan, kag ginhatagan kami sang kaluwasan nga subung sini;

14 Magalalis bala kami liwat sang imo mga sogo, kag magatapik sa katawohan nga nagahimo sini nga mga kangil-aran? indi ka bala maakig sa amon tubtub nga mapapas mo kami, agud nga wala sing mabilin ukon may makapalagyo?

15 O GINOONG Dios sang Israel, matarung ka: kay kami nabilin nga nakapalagyo, subong sang sa sini nga adlaw: yari karon, yari kami sa atubangan nimo sa amon mga paglapas: kay indi kami sarang makatindug sa imo atubangan bangud sini.



KAPITULO 10

KARON sang nakapangamuyo si Esdras, kag sang nakatuad sia, nga nagahibi kag nagahapa sa atubangan sang balay sang Dios, may nagtipon sing tingub sa iya nga tama kadaku nga katilingban nga mga lalaki kag mga babaye kag mga kabataan gikan sa Israel: kay naghibi sing tama gid ang katawohan.

2 Kag si Sekanias nga lalaking anak ni Jehiel, isa sang mga lalaking anak ni Elam, nagsabat kag nagsiling kay Esdras, Naglapas kami batok sa aton Dios, kag nagpangasawa sing dumuloong nga mga asawa gikan sa katawohan sang duta: apang karon may paglaum pa nga sa Israel nahanungud sini nga butang.

3 Busa karon magpakigkatipan kita sa aton Dios sa pagsikway sang tanan nga asawa, kag sang mga natawo sa ila, sono sa laygay sang akon ginoo, kag sadtong mga nagakurug sa sogo sang aton Dios; kag himoon ini sono sa kasogoan.

4 Tindug ka; kay ining butang naigo sa imo: kami man maupud sa imo: magpakaisug ka, kag himoa ini.

5 Niyan nagtindug si Esdras, kag ginpasumpa ang mga puno sang mga pari, ang mga Levinhon, kag ang bug-os nga Israel, nga maghimo sila sono sa sini nga polong. Kag nagsumpa sila.

6 ¶ Niyan nagtindug si Esdras gikan sa atubangan sang balay sang Dios, kag nagsulud sa hulut ni Johanan nga lalaking anak ni Eliasib: kag sang nag-abut sia didto, wala sia magkaon sing kalan-on, ukon mag-inum sing tubig: kay naglalaw sia bangud sang paglalis sang mga sa kabihagan.

7 Kag nagbantala sila sa bug-os nga Juda kag Jerusalem sa tanan nga kaanakan sang kabihagan, nga magtipon sila sing tingub sa Jerusalem;

8 Kag ang bisan sin-o nga indi mag-abut sa sulud sang tatlo ka adlaw, sono sa ginkasugtanan sang mga prinsipe kag mga tigulang, pagakuhaon ang bug-os niya nga pagkabutang, kag pabulagon sia sa katilingban sadtong mga ginbihag.

9 ¶ Niyan ang tanan nga lalaki sang Juda kag Benjamin nagtipon sing tingub sa Jerusalem sa sulud sang tatlo ka adlaw. Ini sa ikasiam nga bulan, sa ikaduha ka pulo nga adlaw sang bulan; kag naglingkod ang bug-os nga katawohan sa dalan sang balay sang Dios, nga nagakurug bangud sini nga butang, kag bangud sang daku nga ulan.

10 Kag nagtindug si Esdras nga pari, kag nagsiling sa ila, Kamo naglalis, kag nakapangasawa sing dumuloong nga mga asawa, sa pagdugang sang paglapas sang Israel.

11 Busa karon, magtuad kamo sa GINOONG Dios sang inyo mga kaamayan, kag maghimo sang iya nahamut-an: kag bulag kamo sa katawohan sang duta, kag sa dumuloong nga mga asawa.

12 Niyan ang bug-os nga katilingban nagsabat kag nagsiling sa matonog nga tingug, Subong sang imo ginsiling sa amon, amo ang dapat namon himoon.

13 Apang ang katawohan madamu, kag tion sang madamu nga ulan, kag kami indi makasarang magtindug sa gowa, kag ini indi buluhaton sa isa ka adlaw ukon sa duha: kay kami madamu nga nakalalis sa sining butang.

14 Magtindug karon ang amon mga pangolo sang bug-os nga katilingban, kag ang tanan sa aton mga siudad nga nakapangasawa sing dumuloong nga mga asawa magkari sa pinat-ud nga mga tion, kag upud sa ila ang mga tigulang sang tagsa ka siudad, kag ang mga hukom sini, tubtub nga ang masingkal nga kaakig sang aton Dios maghalin sa amon bangud sining butang.

15 ¶ Si Jonatan lamang nga lalaking anak ni Asael kag si Jahazia nga lalaking anak ni Ticva amo ang nagpatigayon sining butang: kag si Mesulla kag si Sabetai nga Levinhon nagbulig sa ila.

16 Kag ang kaanakan sang kabihagan naghimo sing subong. Kag si Esdras nga pari, pati sang pila ka mga pangolo sang mga kaamayan, sono sa panimalay sang ila mga kaamayan, kag tanan sila sono sa ila mga ngalan, ginpain, kag naglingkod sila sa nahauna nga adlaw sang ikanapulong bulan sa pag-usisa sang butang.

17 Kag natapus nila ang tanan nga lalaki nga nakapangasawa sing dumuloong nga mga asawa sa nahaunang adlaw sang nahaunang bulan.

18 ¶ Kag sa tunga sang mga lalaking anak sang mga pari may nasapwan nga nakapangasawa sing dumuloong nga mga asawa: nga amo, sa mga lalaking anak ni Jesua, ang lalaking anak ni Josadac, kag sa iya mga utud; si Maasias, kag si Eliezer, kag si Jarib, kag si Gedalias.

19 Kag naghatag sila sang ila kamut nga isikway nila ang ila mga asawa; kag subong nga nagpakasala, naghalad sila sing carnero nga lalaki gikan sa panong tungud sa ila paglapas.

20 Kag gikan sa mga lalaking anak ni Imer; si Hanani, kag si Zebadias.

21 Kag gikan sa mga lalaking anak ni Harim; sila ni Maasias, kag Elias, kag Semaya, kag Jehiel, kag Uzias.

22 Kag gikan sa mga lalaking anak ni Pasur; sila ni Elioenai, Maasias, Ismael, Netaneel, Jozabad, kag Elasa.

23 Gikan sa mga Levinhon man; sila ni Jozabad, kag Simei, kag Kelaya (nga amo si Kelita,) Petahias, Juda, kag Eliezer.

24 Gikan sa mga manug-amba man; si Eliasib: kag gikan sa mga manugbantay sang gawang; si Sallum, kag si Telem, kag si Uri.

25 Labut pa gikan sa Israel: gikan sa mga lalaking anak ni Paros; sila ni Ramia, kag Jezias, kag Malquias, kag Miamin, kag Eleazar, kag Malquias, kag Benaya.

26 Kag gikan sa mga lalaking anak ni Elam; sila ni Matanias, Zacarias, kag Jehiel, kag Abdi, kag Jeremot, kag Eliah.

27 Kag gikan sa mga lalaking anak ni Zatu; sila ni Elioenai, Eliasib, Matanias, kag Jeremot, kag Zabad, kag Asisa.

28 Gikan sa mga lalaking anak man ni Bebai; sila ni Jehohanan, Hananias, Zabai, kag Atlai.

29 Kag gikan sa mga lalaking anak ni Bani; sila ni Mesullam, Malluc, kag Adaya, Jasub, kag Seal, kag Ramot.

30 Kag gikan sa mga lalaking anak ni Pahat-moab; sila ni Adna, kag Kelal, Benaya, Maasias, Matanias, Bezaleel, kag Binui, kag Manases.

31 Kag gikan sa mga lalaking anak ni Harim; sila ni Eliezer, Isya, Malquias, Semaya, Shimeon,

32 Benjamin, Malluc, kag Semarias.

33 Gikan sa mga lalaking anak ni Hasum; sila ni Matenai, Matata, Zabad, Elifelet, Jeremai, Manases, kag Simei.

34 Gikan sa mga lalaking anak ni Bani; sila ni Maadai, Amram, kag Uel,

35 Benaya, Bedias, Kelu,

36 Vanias, Meremot, Eleasib,

37 Matanias, Matenai, kag Jaasau,

38 Kag Bani, kag Binui, Simei,

39 Kag Selemias, kag Natan, kag Adaya,

40 Macnadebai, Sasai, Sarai,

41 Azareel, kag Selemias, Semarias,

42 Sallum, Amarias, kag Jose.

43 Gikan sa mga lalaking anak ni Nebo; sila ni Jeiel, Matitias, Zabad, Zebina, Jadau, kag Joel, Benaya.

44 Ini tanan nakapangasawa sang dumuloong nga mga asawa: kag ang iban sa ila may mga asawa nga sa ila may mga anak sila.




AMAZING GRACE BIBLE INSTITUTE