ANG BALAAN NGA BIBLIA

ANG IKADUHANG LIBRO NI MOISES,

GINAHINGALANAN EXODO

KAPITULO 1

KARON amo ini ang mga ngalan sang mga anak ni Israel, nga nag-abut sa Egipto; ang tagsa ka tawo kag ang iya panimalay nag-upud kay Jacob.

2 Si Ruben, si Simeon, si Levi, kag si Juda,

3 Si Isacar, si Zabulon, kag si Benjamin,

4 Si Dan, kag si Neftali, si Gad, kag si Aser.

5 Kag ang tanan nga mga kalag nga naggolowa sa balikawang ni Jacob kapitoan ka kalag: kay si Jose yadto na sa Egipto.

6 Kag si Jose napatay, kag ang tanan niya nga mga utud, kag yadtong bug-os nga kaliwatan.

7 ś Kag ang mga anak ni Israel mabungahon, kag nagdugang sing bugana, kag nagbuad, kag nagmakusug sing lakas; kag nahil-ob nila ang duta.

8 Karon may naglutaw nga isa ka bag-ong hari sa Egipto, nga wala makakilala kay Jose.

9 Kag nagsiling sia sa iya katawohan, Yari karon, ang katawohan sang kaanakan sang Israel madamu kag makusug pa sa aton:

10 Kari kamo, maghisayo kita sing maalamon sa ila; basi magbuad sila, kag mahanabu, nga, kon mag-abut ang pag-inaway, sila man magsimpon sa aton mga kaaway, kag mag-away batok sa aton, kag sa amo maggowa sila sa duta.

11 Busa ginbutangan nila sila sing mga agalon sa pangabudlay sa pagsakit sa ila sa mga lulan nila. Kag nagpatindug sila nga kay Faraon sang mga siudad nga tambobohan, ang Pitom kag Raamses.

12 Apang sa labi nga pagsakit nila sa ila, labi nga nagbuad sila kag nagdugang. Kag nalisdan sila bangud sa kaanakan sang Israel.

13 Kag ginpapangabudlay sang mga Egiptohanon ang mga kaanakan sang Israel nga may kapintas:

14 Kag ginpapait nila ang ila kabuhi sa mapiot nga kahiolipnan, sa galagala, kag sa tisa, kag sa tanan nga bagay sang pagpangabudlay sa uma: ang tanan nila nga pagpangabudlay, ginpapangabudlay nila sila nga may kapintas.

15 ś Kag ang hari sang Egipto nagpamolong sa mga partera nga Hebreo, nga ang isa sa ila ginhingalanan si Sifra, kag ang isa si Pua;

16 Kag nagsiling sia, Kon magpaanak kamo sa Hebreo nga mga babaye, kag makita sila sa mga balataan; kon ini lalaki, niyan patyon ninyo sia: apang kon ini babaye, niyan buhion sia.

17 Apang ang mga partera nahadluk sa Dios, kag wala maghimo sono sa ginsogo sa ila sang hari sang Egipto, kondi ginbuhi nila ang kabataan nga lalaki.

18 Kag ang hari sang Egipto nagpatawag sa mga partera, kag nagsiling sa ila, Ngaa bala nga naghimo kamo sining butang, kag ginbuhi ang kabataan nga lalaki?

19 Kag ang mga partera nagsiling kay Faraon, Bangud nga ang mga babaye nga Hebreo indi subong sang mga Egiptohanon nga babaye; kay mga mapagsik sila, kag nagaanak sa wala pa mag-abut ang mga partera sa ila.

20 Gani ang Dios nagmaayo sa mga partera: kag ang katawohan nagbuad, kag naggamhanan gid.

21 Kag nahanabu, bangud nga nahadluk ang mga partera sa Dios, nga ginhatagan niya sila sing mga panimalay.

22 Kag si Faraon nagsogo sa bug-os niyang katawohan, nga nagasiling, Ihaboy ninyo sa suba ang tagsa ka anak nga lalaki nga matawo, kag buhia ninyo ang tagsa ka anak nga babaye.

KAPITULO 2

KAG may isa ka lalaki sa panimalay ni Levi nga naglakat, kag nagpangasawa sa anak ni Levi.

2 Kag ang babaye nanamkon, kag nag-anak sing lalaki: kag sang nakita niya nga sia maayoayo nga bata, gintago niya sia sing tatlo ka bulan.

3 Kag sang indi na sia matago niya, nagkuha sia tungud sa iya sang arka nga papiro, kag gingalagalahan ini sing mapilit nga lunang kag balaw, kag ginsulud sa sini ang bata; kag ginbutang niya ini sa mga katigbawan sa bibi sang suba.

4 Kag nagtindug sa malayo ang iya utud nga babaye, sa paghibalo sang mahanabu sa iya.

5 ś Kag ang babaying anak ni Faraon nagdulhog sa pagpaligos sa suba; kag ang iya mga kadalagahan nagadayandayan sa pangpang sang suba; kag sang nakita niya ang arka sa tunga sang mga katigbawan, ginpadala niya ang iya sologoon nga babaye sa pagkuha sini.

6 Kag sang ginbuksan niya ini, nakita niya ang bata: kag, yari karon, ang bata naghibi. Kag nalooy sia sa iya, kag nagsiling, Ini isa sang kabataan sang mga Hebreo.

7 Niyan ang iya utud nga babaye nagsiling sa babaying anak ni Faraon, Magalakat bala ako kag tawgan ka sing isa ka sisiwa sa mga babaye nga Hebreo, agud nga mabatiti niya ang bata tungud sa imo?

8 Kag ang babaying anak ni Faraon nagsiling sa iya, Lakat. Kag naglakat ang sologoon nga babaye kag gintawag ang iloy sang bata.

9 Kag ang anak nga babaye ni Faraon nagsiling sa iya, Dalha ining bata, kag batiti-a sia tungud sa akon, kag ako magasohol sa imo. Kag ginkuha sang babaye ang bata, kag ginbatiti sia.

10 Kag nagtubo ang bata, kag gindala niya sia sa anak nga babaye ni Faraon, kag nangin-anak sia niya. Kag ginhingalanan sia niya Moises: kag nagsiling sia, Bangud nga ginkuha ko sia sa tubig.

11 ś Kag nahanabu sa sadtong mga adlaw, sang daku na si Moises, nga nagkadto sia sa iya kauturan, kag nagtan-aw sa ila mga lulan: kag napanilagan niya ang isa ka Egiptohanon nga nagabakol sang isa ka Hebreo, isa sang iya kauturan.

12 Kag nagpangholongholong sia, kag sang nakita niya nga wala sing tawo, ginpatay niya ang Egiptohanon, kag gintago sia sa balas.

13 Kag sang maggowa sia sang ikaduha nga adlaw, yari karon, duha ka lalaki sang mga Hebreo nagaaway: kag nagsiling sia sa naghimo sang sayup, Ngaa bala nga ginasakit mo ang imo isigkatawo?

14 Kag nagsiling sia, Sin-o bala ang naghimo sa imo nga prinsipe kag hukom sa amon? nagahunahuna ka bala sa pagpatay sa akon, subong sang pagpatay mo sang Egiptohanon? Kag si Moises ginhadlukan, kag nagsiling, Sa pagkamatuud nasapwan ining butang.

15 Karon sang nabatian ni Faraon ining butang, nagtinguha sia sa pagpatay kay Moises. Apang si Moises nagpalagyo gikan sa nawung ni Faraon, kag nagpuyo sa duta sang Midian: kag naglingkod sia sa luyo sang bobon.

16 Karon ang pari sang Midian may pito ka anak nga babaye: kag nag-abut sila kag nagsag-ub sing tubig, kag nagpuno sang mga palaimnan sa pagpainum sang panong sang ila amay.

17 Kag ang mga manugpahalab nag-abut kag gintabog sila: apang si Moises nagtindug kag nag-apin sa ila, kag nagpainum sang ila panong.

18 Kag sang nagpauli sila kay Reuel nga ila amay, nagsiling sia, Paano bala nga nag-abut kamo sing madali karon nga adlaw?

19 Kag nagsiling sila, Isa ka Egiptohanon nagluwas sa amon sa kamut sang mga manugpahalab, kag ginsag-uban pa niya kami sing tuman, kag ginpainum ang panong.

20 Kag nagsiling sia sa iya mga anak nga babaye, Kag diin bala sia? ngaa bala ginbayaan ninyo ang lalaki? tawga sia, agud nga makakaon sia sing tinapay.

21 Kag si Moises contento sa pagpuyo upud sa lalaki: kag ginpaasawa niya kay Moises ang iya anak nga si Zipora.

22 Kag nag-anak sia sa iya sing lalaki, kag ginhingalanan niya sia Gersom: kay nagsiling sia, Nangin-dumoloong ako sa duta nga dumoloong.

23 ś Kag nahanabu sang pag-alagisud sang tion, nga napatay ang hari sang Egipto: kag ang kaanakan sang Israel nagpanghayhay bangud sang kahiolipnan, kag naghibi sila, kag ang ila singgit naglambut sa Dios bangud sang kahiolipnan.

24 Kag nabatian sang Dios ang pag-ugayong nila, kag ang Dios nagdumdum sang iya katipan kay Abraham, kay Isaac, kag kay Jacob.

25 Kag gintolok sang Dios ang kaanakan sang Israel, kag gintalupangud sang Dios sila.

KAPITULO 3

KARON si Moises nagpahalab sang panong ni Jetro nga iya ugangan nga lalaki, ang pari sang Midian: kag gindala niya ang panong sa likod sang kamingawan, kag nag-abut sa bukid sang Dios, sa Horeb.

2 Kag nagpahayag sa iya ang anghel sang GINOO sa dabdab sang kalayo gikan sa tunga sang kahoykahoy: kag sia nagtolok, kag, yari karon, ang kahoykahoy nagdabdab sing kalayo, kag ang kahoykahoy wala maupus.

3 Kag si Moises nagsiling, Magalipas ako karon, kag tan-awon ining daku nga talan-awon, ngaa ang kahoykahoy wala masonog.

4 Kag sang nakita sang GINOO nga naglipas sia sa pagtan-aw, ang Dios nagtawag sa iya gikan sa tunga sang kahoykahoy, kag nagsiling, Moises, Moises. Kag sia nagsiling, Yari ako.

5 Kag sia nagsiling, Dili ka magpalapit diri: huksa ang imo mga sapatos sa imo mga tiil, kay ang duug nga ginatindugan mo dutang balaan.

6 Nagsiling sia sing dugang, Ako ang Dios sang imo amay, ang Dios ni Abraham, ang Dios ni Isaac, kag ang Dios ni Jacob. Kag si Moises nagtago sang iya nawung; kay nahadluk sia sa pagtolok sa Dios.

7 ś Kag ang GINOO nagsiling, Sa pagkamatuud nakita ko ang kapipit-an sang akon katawohan nga yara sa Egipto, kag nabatian ko ang ila pagtuaw bangud sang ila mga agalon sa pangabudlay; kay nahibaloan ko ang ila mga kasubu;

8 Kag nagapanaug ako sa pagluwas sa ila gikan sa kamut sang mga Egiptohanon, kag sa pagpagowa sa ila gikan sinang duta sa pagpataklad sa isa ka dutang maayo kag malapad, sa duta nga nagailig sing gatas kag dugus; sa duug sang mga Canaanhon, kag sang mga Hithanon, kag sang mga Amornon, kag sang mga Pereznon, kag sang mga Hevhanon, kag sang mga Jebusnon.

9 Busa karon, tan-awa, ang pagtuaw sang kaanakan sang Israel nag-abut sa akon: kag nakita ko man ang pagpigus nga ginpigus sa ila sang mga Egiptohanon.

10 Busa kari karon, kag ipadala ko ikaw kay Faraon, agud nga mapagowa mo ang akon katawohan, ang kaanakan sang Israel, gikan sa Egipto.

11 ś Kag si Moises nagsiling sa Dios, Sin-o bala ako, nga magkadto ako kay Faraon, kag magpagowa ako gikan sa Egipto sang kaanakan sang Israel?

12 Kag nagsiling sia, Sa pagkamatuud magaupud ako sa imo; kag ini mangintanda sa imo, nga napadala ko ikaw: Kon mapagowa mo na ang katawohan gikan sa Egipto, magaalagad kamo sa Dios sa sining bukid.

13 Kag si Moises nagsiling sa Dios, Yari karon, kon ako mag-abut sa kaanakan sang Israel, kag magsiling sa ila, Ang Dios sang inyo kaamayan nagpadala sa akon sa inyo; kag sila magsiling sa akon, Sin-o bala ang iya ngalan? ano bala ang isiling ko sa ila?

14 Kag ang Dios nagsiling kay Moises, AKO AMO AKO: kag nagsiling sia, Amo ini ang isiling mo sa kaanakan sang Israel, Si AMO AKO nagpadala sa akon sa inyo.

15 Kag ang Dios nagsiling sing dugang kay Moises, Amo ini ang isiling mo sa kaanakan sang Israel, Ang GINOONG Dios sang inyo kaamayan, ang Dios ni Abraham, ang Dios ni Isaac, kag ang Dios ni Jacob, nagpadala sa akon sa inyo: ini amo ang akon ngalan sa gihapon, kag ini amo ang akon handumanan sa tanan nga mga kaliwatan.

16 Lakat, kag tipona ang mga tigulang sang Israel, kag isiling sa ila, Ang GINOONG Dios sang inyo mga kaamayan, ang Dios ni Abraham, ni Isaac, kag ni Jacob, nagpahayag sa akon, nga nagasiling, Sa pagkamatuud ginduaw ko kamo, kag nakita ang ginahimo sa inyo sa Egipto:

17 Kag ako nagsiling, Pagowaon ko kamo gikan sa kapipit-an sang Egipto pakadto sa duta sang mga Canaanhon, kag sang mga Hithanon, kag sang mga Amornon, kag sang mga Pereznon, kag sang mga Hevhanon, kag sang mga Jebusnon, sa duta nga nagailig sing gatas kag dugus.

18 Kag magapamati sila sa imo tingug: kag ikaw magkari, ikaw kag ang mga tigulang sang Israel, sa hari sang Egipto, kag magsiling kamo sa iya, Ang GINOONG Dios sang mga Hebreo nagpakigkita sa amon: kag karon, palakta kami, ginaampo namon sa imo, sing tatlo ka adlaw nga lalakton sa kamingawan, agud nga maghalad kami sa GINOO nga amon Dios.

19 ś Kag ako nakapiho nga ang hari sang Egipto indi magtugut nga maglakat kamo, indi, indi paagi sa isa ka gamhanan nga kamut.

20 Kag untayon ko ang akon kamut, kag laglagon ang Egipto sang tanan nga akon mga katanhagaan nga himoon ko sa tunga niya: kag ugaling palakton kamo niya.

21 Kag hatagan ko ining katawohan sing kahamuut sa itololok sang mga Egiptohanon: kag mahanabu, nga, kon maglakat kamo, indi kamo maglakat nga wala sing dala:

22 Kondi magahulam ang tagsa ka babaye sa iya kasilingan, kag sa iya nga nagadapon sa iya balay, sing mga alahas nga pilak, kag mga alahas nga bulawan, kag mga panapton: kag ibutang ninyo sila sa inyo mga anak nga lalaki, kag sa inyo mga anak nga babaye; kag hublasan ninyo ang mga Egiptohanon.

KAPITULO 4

KAG si Moises nagsabat kag nagsiling, Apang, yari karon, indi sila magpati sa akon, ukon magpamati sa akon tingug: kay magasiling sila, Wala magpahayag sa imo ang GINOO.

2 Kag ang GINOO nagsiling sa iya, Ano bala ina sa imo kamut? Kag nagsiling sia, Isa ka sungkud.

3 Kag sia nagsiling, Ihaboy ina sa duta. Kag ginhaboy niya ini sa duta, kag nahimo ini nga man-ug; kag si Moises nagpalagyo gikan sa atubangan sini.

4 Kag ang GINOO nagsiling kay Moises, Untaya ang imo kamut, kag kapti ini sa ikog. Kag gin-untay niya ang iya kamut, kag gindakup ini, kag nahimo ini nga sungkud sa iya kamut:

5 Agud nga magpati sila nga nagpahayag sa imo ang GINOONG Dios sang ila kaamayan, ang Dios ni Abraham, ang Dios ni Isaac, kag ang Dios ni Jacob.

6 ś Kag ang GINOO nagsiling sa iya sing dugang, Isuksuk karon ang imo kamut sa imo dughan. Kag ginsuksuk niya ang iya kamut sa iya dughan: kag sang pagkuha niya sini, yari karon, ang iya kamut nag-aroon subong sang nieve.

7 Kag sia nagsiling, Isuksuk liwat ang imo kamut sa imo dughan. Kag ginsuksuk niya liwat ang iya kamut sa iya dughan; kag ginkuha ini sa iya dughan, kag, yari karon, nag-uli ini liwat subong sang iya iban nga unud.

8 Kag mahanabu, kon indi sila magpati sa imo, ukon magpamati sa tingug sang nahaunang tanda, nga magapati sila sa tingug sang naolihing tanda.

9 Kag mahanabu, kon indi pa sila magpati sa sining duha ka tanda, ukon magpamati sang imo tingug, nga magkuha ka sing tubig sang suba, kag iula ini sa mamalang duta: kag ang tubig nga ginakuha mo sa suba mangin-dugo sa duta nga mamala.

10 ś Kag si Moises nagsiling sa GINOO, O Ginoo ko, indi ako madagmit maghambal, bisan tubtub karon, ukon kutub sang pagpamolong mo sa imo alagad: kondi makuli ako sa paghambal, kag mahinay sing dila.

11 Kag ang GINOO nagsiling sa iya, Sin-o bala ang naghimo sing baba sang tawo? ukon sin-o bala ang nagahimo sang apa, ukon bungul, ukon makakita, ukon bulag? indi bala ako nga GINOO?

12 Busa karon lakat ka, kag magaupud ako sa imo baba, kag magatudlo sa imo sang imo ihambal.

13 Kag nagsiling sia, O Ginoo ko, ipadala, ginaampo ko sa imo, ang imo luyag nga pag-ipadala.

14 Kag ang kaakig sang GINOO nagdabdab batok kay Moises, kag nagsiling sia, Indi bala utud mo si Aaron nga Levinhon? nakahibalo ako nga makahambal sia sing maayo. Kag labut pa, yari karon, nagakari sia sa pagpakigkita sa imo: kag kon makita niya ikaw, magakalipay sia sa iya tagiposoon.

15 Kag ikaw magpamolong sa iya, kag magbutang sa iya baba sang mga polong: kag magaupud ako sa imo baba, kag sa iya baba, kag magatudlo sa inyo sang himoon ninyo.

16 Kag sia mangin-imo manughambal sa katawohan: kag sia mangin-salili sang baba sa imo, kag ikaw mangin-salili sang Dios sa iya.

17 Kag dalhon mo ining sungkud sa imo kamut, nga sa sini magahimo ka sang mga tanda.

18 ś Kag si Moises naglakat kag nagbalik kay Jetro nga iya ugangan nga lalaki, kag nagsiling sa iya, Palakta ako, ginaampo ko sa imo, kag pabalika sa akon kauturan nga yara sa Egipto, kag sa pagtan-aw kon buhi pa sila. Kag si Jetro nagsiling kay Moises, Lakat ka sa paghidait.

19 Kag ang GINOO nagsiling kay Moises sa Midian, Lakat, balik sa Egipto: kay patay na ang tanan nga tawo nga nagatinguha sang imo kabuhi.

20 Kag ginkuha ni Moises ang iya asawa kag ang iya mga anak nga lalaki, kag ginpasakay sila sa asno, kag nagbalik sia sa duta sang Egipto: kag gindala ni Moises ang sungkud sang Dios sa iya kamut.

21 Kag ang GINOO nagsiling kay Moises, Kon makabalik ka na sa Egipto, tan-awa nga himoon mo sa atubangan ni Faraon inang tanan nga katanhagaan, nga ginbutang ko sa imo kamut: apang patig-ahon ko ang iya tagiposoon, sa bagay nga indi niya pagtugutan nga maglakat ang katawohan.

22 Kag magsiling ka kay Faraon, Amo ini ang ginasiling sang GINOO, Ang Israel akon anak nga lalaki, ang akon panganay:

23 Kag nagasiling ako sa imo, Tuguti sa paglakat ang akon anak nga lalaki, agud nga mag-alagad sia sa akon: kag kon magdumili ka sa pagpalakat sa iya, yari karon, patyon ko ang imo anak nga lalaki, ang imo panganay.

24 ś Kag nahanabu sa dalayonan sa dalanon, nga ang GINOO nagsugata sa iya, kag nagtinguha sa pagpatay sa iya.

25 Niyan si Zipora nagkuha sing matalum nga bato, kag gin-utud ang napunta nga panit sang iya anak nga lalaki, kag ginhaboy ini sa iya mga tiil, kag nagsiling, Sa pagkamatuud isa ka dugoon nga bana ikaw sa akon.

26 Gani ginpabay-an niya sia: niyan si Zipora nagsiling, Dugoon nga bana ikaw, bangud sang circuncision.

27 ś Kag ang GINOO nagsiling kay Aaron, Lakat ka sa pagsugata kay Moises sa kamingawan. Kag sia naglakat, kag ginsugata sia sa bukid sang Dios, kag ginhalukan sia.

28 Kag si Moises nagsugid kay Aaron sang tanan nga polong sang GINOO nga nagpadala sa iya, kag sang tanan nga tanda nga iya ginsogo sa iya.

29 ś Kag naglakat si Moises kag si Aaron kag gintipon ang tanan nga tigulang sang kaanakan sang Israel:

30 Kag ginpamolong ni Aaron ang tanan nga polong nga ginpamolong sang GINOO kay Moises, kag ginhimo ang mga tanda sa itololok sang katawohan.

31 Kag ang katawohan nagpati: kag sang nabatian nila nga ang GINOO nagduaw sa kaanakan sang Israel, kag nga nakita niya ang ila kapipit-an, niyan nagduko sila sang ila mga olo kag nagsimba.

KAPITULO 5

KAG sang olihi si Moises kag si Aaron nagsulud, kag nagsugid kay Faraon, Amo ini ang ginasiling sang GINOONG Dios sang Israel, Tuguti sa paglakat ang akon katawohan, agud nga maghiwat sila sa akon sing pandut sa kamingawan.

2 Kag si Faraon nagsiling, Sin-o bala ang GINOO, nga magtuman ako sa iya tingug sa pagpalakat sang Israel? Ako wala makakilala sang GINOO, kag labut pa indi ko pagpalakton ang Israel.

3 Kag nagsiling sila, Ang Dios sang mga Hebreo nagpakigkita sa amon: ginaampo namon sa imo, itugut nga maglakat kami sing tatlo ka adlaw nga lalakton sa kamingawan, kag maghalad sa GINOO nga amon Dios; basi nga sakiton niya kami sing peste, ukon sing espada.

4 Kag ang hari sang Egipto nagsiling sa ila, Moises kag Aaron, ngaa bala ginakuha ninyo ang katawohan sa ila buluhaton? kadto kamo sa inyo mga lulan.

5 Kag si Faraon nagsiling, Yari karon, ang katawohan sang duta madamu na karon, kag ginapapahuway ninyo sila sa ila mga lulan.

6 Kag si Faraon nagsogo sa amo nga adlaw sa mga agalon sang pangabudlay sang katawohan, kag sa ila mga opisyal, nga nagasiling,

7 Dili na ninyo paghatagan sing dagami ang katawohan sa paghimo sing tisa, subong sadto: palakta sila kag patiponon sila sing dagami nga sa ila kaugalingon.

8 Kag ang kadamuon sang tisa, nga ginhimo nila tubtub karon, kinahanglanon ninyo sa ila; dili gid ninyo pagbuhinan ini: kay matamad sila; busa nagasinggit sila, nga nagasiling, Palakta kami kag pahalara sa amon Dios.

9 Pabug-ata pa ang buluhaton sang mga lalaki, agud nga magpangabudlay sila sa sini; kag dili sila magsapak sang mga polong nga walay pulus.

10 ś Kag ang mga agalon sang pangabudlay sang katawohan naggowa, kag ang ila mga opisyal, kag nagpamolong sila sa katawohan, nga nagasiling, Amo ini ang ginasiling ni Faraon, Indi ako maghatag sa inyo sing dagami.

11 Lakat kamo, kuha kamo sing dagami sa diin makita ninyo ini: apang indi gid pagbuhinan ang inyo buluhaton.

12 Gani ang katawohan naglapta sa bug-os nga duta sang Egipto sa pagtipon sing ginalaban sa baylo sang dagami.

13 Kag ang mga agalon sang pangabudlay nagsako sa ila, nga nagasiling, Tapusa ang inyo mga buluhaton, ang inyo inadlaw nga mga takay, subong sang may dagami pa.

14 Kag ang mga opisyal sang kaanakan sang Israel, nga ginpagahum sa ila sang mga agalon sang pangabudlay ni Faraon, ginpamunal, kag ginpamangkot, Ngaa bala nga wala ninyo pagtapusa ang inyo takay sa paghimo sing tisa sang kahapon kag karon nga adlaw, subong sang sa tubtub karon?

15 ś Niyan ang mga opisyal sang kaanakan sang Israel nag-abut kag nagtuaw kay Faraon, nga nagasiling, Ngaa bala ginahimo mo ang subong sini sa imo mga alagad?

16 Wala sing dagami nga nahatag sa imo mga alagad, kag sila nagasiling sa amon, Himo kamo sing tisa: kag, yari karon, ang imo mga alagad ginapamunal; apang ang sayup yara sa imo kaugalingon nga katawohan.

17 Apang nagsiling sia, Matamad kamo, matamad kamo: busa nagasiling kamo, Palakta kami kag pahalara sa GINOO.

18 Busa lakat kamo karon, kag magpangabudlay; kay wala sing dagami nga ihatag sa inyo, apang magahatag kamo sang kadamuon sang mga tisa.

19 Kag ang mga opisyal sang kaanakan sang Israel nakakita nga yara sila sa malaut nga kahimtangan, sa tapus nga ini nasiling, Dili gid ninyo pagbuhinan ang inyo inadlaw nga takay sa inyo mga tisa.

20 ś Kag ginsugata nila si Moises kag si Aaron, nga nagatindug sa dalanon, sang paghalin nila kay Faraon:

21 Kag nagsiling sila sa ila, Ang GINOO magtolok sa inyo, kag maghukom; bangud ginhimo ninyo kami nga kangil-aran sa mga mata ni Faraon, kag sa mga mata sang iya mga alagad, sa pagbutang sing espada sa ila kamut sa pagpatay sa amon.

22 Kag si Moises nagbalik sa GINOO, kag nagsiling, Ginoo, ngaa bala nahimoan mo sing malaut ining katawohan? ngaa bala ginpadala mo ako?

23 Kay kutub nga ako nagkadto kay Faraon sa pagpamolong sa ngalan mo, nahimoan niya sing malaut ining katawohan; kag ikaw wala gid magluwas sang imo katawohan.

KAPITULO 6

NIYAN ang GINOO nagsiling kay Moises, Karon makita mo ang akon himoon kay Faraon: kay sa makusug nga kamut magatugut sia sa pagpalakat sa ila, kag sa makusug nga kamut sobolon niya sila pagowa sa iya duta.

2 Kag ang Dios nagpamolong kay Moises, kag nagsiling sa iya, Ako ang GINOO:

3 Kag ako nagpahayag kay Abraham, kay Isaac, kag kay Jacob, sa ngalan sang Dios nga Makaako, apang sa akon ngalan nga JEHOVAH wala ako magpakilala sa ila.

4 Kag ako man nagpasad sang akon katipan upud sa ila, sa paghatag sa ila sang duta sang Canaan, ang duta sang ila pagpanlugayaw, nga sa diin nangin mga dumoloong sila.

5 Kag labut pa nabatian ko ang pag-ugayong sang kaanakan sang Israel, nga gin-ulipon sang mga Egiptohanon; kag ako nakadumdum sang akon katipan.

6 Busa isiling sa kaanakan sang Israel, Ako ang GINOO, kag pagowaon ko kamo gikan sa idalum sang mga lulan sang mga Egiptohanon, kag luwason ko kamo sa kahiolipnan nila, kag tubson ko kamo sa butkon nga inuntay, kag sa dalagku nga mga paghukom:

7 Kag angkonon ko kamo nga akon katawohan, kag ako mangin-inyo Dios: kag magakilala kamo nga ako ang GINOO nga inyo Dios, nga nagapagowa sa inyo gikan sa idalum sang mga lulan sang mga Egiptohanon.

8 Kag dalhon ko kamo sa duta, nga ginsumpa ko nga ihatag kay Abraham, kay Isaac, kag kay Jacob; kag ihatag ko ini sa inyo nga panublion: Ako ang GINOO.

9 ś Kag si Moises nagpamolong sing subong sa kaanakan sang Israel: apang wala sila magpamati kay Moises bangud sang kasakit sa espiritu, kag sang mapintas nga kahiolipnan.

10 Kag ang GINOO nagpamolong kay Moises, nga nagasiling,

11 Sulud ka, hambala si Faraon nga hari sang Egipto, nga pagowaon niya ang kaanakan sang Israel gikan sa iya duta.

12 Kag si Moises nagpamolong sa atubangan sang GINOO, nga nagasiling, Yari karon, ang kaanakan sang Israel wala magpamati sa akon; paano bala niyan nga magpamati sa akon si Faraon, nga ako dicircuncidado sa mga bibig?

13 Kag ang GINOO nagpamolong kay Moises kag kay Aaron, kag gintulinan sila nahanungud sa kaanakan sang Israel, kag kay Faraon nga hari sang Egipto, sa pagpagowa sang kaanakan sang Israel gikan sa duta sang Egipto.

14 ś Ini sila amo ang mga pangolo sang panimalay sang ila mga kaamayan: Ang mga lalaking anak ni Ruben, nga panganay ni Israel; si Hanoc, kag si Palu, si Hezron, kag si Carmi: ini sila amo ang mga panimalay ni Ruben.

15 Ang mga lalaking anak ni Simeon: si Jemuel, kag si Jamin, kag si Ohad, kag si Jaquin, kag si Zohar, kag si Saul, nga anak nga lalaki sang Canaanhon nga babaye: ini sila amo ang mga panimalay ni Simeon.

16 ś Kag ini sila amo ang mga ngalan sang mga lalaking anak ni Levi sono sa ila mga kaliwatan; si Gerson, kag si Coat, kag si Merari: kag ang mga tinuig sang kabuhi ni Levi isa ka gatus kag katloan kag pito ka tuig.

17 Ang mga lalaking anak ni Gerson; si Libni, kag si Simi, sono sa ila mga panimalay.

18 Kag ang mga lalaking anak ni Coat; si Amram, kag si Izar, kag si Hebron, kag si Uziel: kag ang mga tinuig sang kabuhi ni Coat isa ka gatus kag katloan kag tatlo ka tuig.

19 Kag ang mga lalaking anak ni Merari; si Mahali, kag si Musi: ini sila amo ang mga panimalay ni Levi sono sa ila mga kaliwatan.

20 Kag si Amram nagpangasawa kay Jocabed nga utud sang iya amay; kag sia nag-anak sa iya kay Aaron kag kay Moises: kag ang mga tinuig sang kabuhi ni Amram isa ka gatus kag katloan kag pito ka tuig.

21 ś Kag ang mga lalaking anak ni Izar; si Core, kag si Nefeg, kag si Zicri.

22 Kag ang mga lalaking anak ni Uziel; si Misael, kag si Elzafan, kag si Zitri.

23 Kag si Aaron nagpangasawa kay Eliseba, anak nga babaye ni Aminadab, babaying utud ni Nason; kag sia nag-anak sa iya kay Nadab, kay Abiu, kay Eleazar, kag kay Itamar.

24 Kag ang mga lalaking anak ni Core; si Asir, kag si Elcana, kag si Abiasaf: ini sila amo ang mga panimalay sang mga Corinhon.

25 Kag si Eleazar, nga anak nga lalaki ni Aaron, nagpangasawa sang isa sang mga anak nga babaye ni Putiel; kag sia nag-anak sa iya kay Finehas: ini sila amo ang mga pangolo sang mga kaamayan sang mga Levinhon sono sa ila panimalay.

26 Ini sila amo yadtong Aaron kag Moises, nga sa ila nagsiling ang GINOO, Pagowaa ang kaanakan sang Israel gikan sa duta sang Egipto sono sa ila mga kasoldadosan.

27 Ini sila amo ang nagpamolong kay Faraon nga hari sang Egipto, sa pagpagowa sang kaanakan sang Israel gikan sa Egipto: ini sila amo yadtong Moises kag Aaron.

28 ś Kag nahanabu sa adlaw sang nagpamolong ang GINOO kay Moises sa duta sang Egipto,

29 Nga ang GINOO nagpamolong kay Moises, nga nagasiling, Ako ang GINOO: sugiri si Faraon nga hari sang Egipto sang tanan nga ginasiling ko sa imo.

30 Kag si Moises nagsiling sa GINOO, Yari karon, ako dicircuncidado sa mga bibig, kag paano bala ang pagpamati sa akon ni Faraon?

KAPITULO 7

KAG ang GINOO nagsiling kay Moises, Tan-awa, ginahimo ko ikaw nga isa ka dios kay Faraon: kag si Aaron nga imo utud mangin-imo manalagna.

2 Ipamolong mo ang tanan nga ginasogo ko sa imo: kag si Aaron nga imo utud magapamolong kay Faraon, nga ipadala niya ang kaanakan sang Israel pagowa sa iya duta.

3 Kag patig-ahon ko ang tagiposoon ni Faraon, kag pabuaron ko ang akon mga tanda kag akon mga katanhagaan sa duta sang Egipto.

4 Apang si Faraon indi magapamati sa inyo, agud nga ibutang ko ang akon kamut sa Egipto, kag pagadalhon ko ang akon mga kasoldadosan, kag ang akon katawohan nga kaanakan sang Israel, gikan sa duta sang Egipto paagi sa dalagku nga mga paghukom.

5 Kag kilalahon sang mga Egiptohanon nga ako ang GINOO, kon mag-untay ako sang akon kamut sa Egipto, kag magdala pagowa sang kaanakan sang Israel gikan sa tunga nila.

6 Kag ginhimo ni Moises kag ni Aaron sono sa ginsogo sang GINOO sa ila, ginhimo nila ang subong sini.

7 Kag si Moises kawaloan ka tuig, kag si Aaron kawaloan kag tatlo ka tuig, sang nagpamolong sila kay Faraon.

8 ś Kag ang GINOO nagpamolong kay Moises kag kay Aaron, nga nagasiling,

9 Kon magpamolong sa inyo si Faraon, nga nagasiling, Pakita kamo sing milagro nga sa inyo: niyan magsiling ka kay Aaron, Kuhaa ang imo sungkud, kag ipilak ini sa atubangan ni Faraon, kag mahimo ini nga man-ug.

10 ś Kag si Moises kag si Aaron nagkadto kay Faraon, kag ginhimo nila sono sang ginsogo sang GINOO: kag si Aaron nagpilak sang iya sungkud sa atubangan ni Faraon, kag sang iya mga alagad, kag nahimo ini nga man-ug.

11 Niyan gintawag man ni Faraon ang mga maalam nga lalaki kag mga babaylan: karon ang mga salamangkero sang Egipto, sila man naghimo sang amo nga bagay paagi sa ila mga enkantohanon nga padihot.

12 Kay ginpilak sang tagsa ka tawo ang iya sungkud, kag nanginman-ug sila: apang ang sungkud ni Aaron naghalunhon sang mga sungkud nila.

13 Kag iya ginpatig-a ang tagiposoon ni Faraon, sa bagay nga wala sia magpamati sa ila; sono sa ginsiling sang GINOO.

14 ś Kag ang GINOO nagsiling kay Moises, Ang tagiposoon ni Faraon nagtig-a, nagadumili sia sa pagpalakat sang katawohan.

15 Kadto ka sa kaagahon kay Faraon; yari karon, magagowa sia pakadto sa tubig; kag magtindug ka sa pangpang sang suba nga nagahulat sa iya; kag uyatan mo sa imo kamut ang sungkud nga nanginman-ug.

16 Kag magsiling ka sa iya, Ang GINOONG Dios sang mga Hebreo nagpadala sa akon sa imo, nga nagasiling, Tuguti sa paglakat ang akon katawohan, agud nga sila mag-alagad sa akon sa kamingawan: kag, yari karon, wala pa ikaw magpamati.

17 Amo ini ang ginasiling sang GINOO, Sa sini pagkilalahon mo nga ako ang GINOO: yari karon, sa sungkud nga yari sa akon kamut hampakon ko ang mga tubig nga yara sa suba, kag mangindugo sila.

18 Kag ang isda sa suba mapatay, kag magabaho ang suba; kag ang mga Egiptohanon magakangil-ad sa pag-inum sang tubig gikan sa suba.

19 ś Kag ang GINOO nagpamolong kay Moises, Isiling kay Aaron, Kuhaa ang imo sungkud, kag untaya ang imo kamut sa ibabaw sang mga tubig sang Egipto, sa ibabaw sang ila mga sapa, sa ibabaw sang ila mga suba, kag sa ibabaw sang ila mga punong, kag sa ibabaw sang tanan nila nga mga danaw sang tubig, agud nga mangindugo sila; kag agud nga manginmay dugo sa bug-os nga duta sang Egipto, pati sa mga suludlan nga kahoy, kag sa mga suludlan nga bato.

20 Kag ginhimo ni Moises kag ni Aaron ang sono sa ginsogo sa ila sang GINOO; kag ginbayaw niya ang sungkud, kag ginbunal ang mga tubig nga yara sa suba, sa itololok ni Faraon, kag sa itololok sang iya mga alagad; kag ang tanan nga mga tubig sa suba nangindugo.

21 Kag napatay ang isda nga yara sa suba; kag nagbaho ang suba, kag indi makainum ang mga Egiptohanon sang tubig gikan sa suba; kag ang dugo yara sa bug-os nga duta sang Egipto.

22 Kag ang mga salamangkero sang Egipto naghimo sa amo nga bagay paagi sa ila mga enkantohanon nga padihot: kag nagtig-a ang tagiposoon ni Faraon, kag wala sia magpamati sa ila; sono sa ginsiling sang GINOO.

23 Kag si Faraon nagtalikod kag nagpauli sa iya balay, kag wala man niya pagsapaka ini sa iya tagiposoon.

24 Kag ang tanan nga Egiptohanon nagkutkut sa palibut sang suba sa pagpangita sa tubig nga ilimnon; kay indi sila makainum sang tubig sang suba.

25 Kag natuman ang pito ka adlaw, sa tapus nga ginbunal sang GINOO ang suba.

KAPITULO 8

KAG ang GINOO nagpamolong kay Moises, Kadtoi sa sulud si Faraon, kag isiling sa iya, Amo ini ang ginasiling sang GINOO, Tuguti sa paglakat ang akon katawohan, agud nga alagdon nila ako.

2 Kag kon ikaw magdumili sa pagtugut sa pagpalakat sa ila, yari karon, halitan ko ang bug-os mong duta sing mga paka:

3 Kag ang suba magapadagaya sing mga paka, nga magasaka kag magasulud sa imo balay, kag sa imo hulut nga tolologan, kag sa imo higdaan, kag sa balay sang imo mga alagad, kag sa imo katawohan, kag sa imo mga horno, kag sa imo mga lamasan:

4 Kag ang mga paka magasaka sa imo, kag sa imo katawohan, kag sa tanan mong alagad.

5 ś Kag ang GINOO nagpamolong kay Moises, Isiling kay Aaron, Untaya ang imo kamut nga may sungkud nimo sa ibabaw sang mga sapa, sa ibabaw sang mga suba, kag sa ibabaw sang mga punong, kag pasakaa ang mga paka sa duta sang Egipto.

6 Kag gin-untay ni Aaron ang iya kamut sa ibabaw sang mga tubig sang Egipto; kag nagsaka ang mga paka, kag naghil-ob sang duta sang Egipto.

7 Kag ang mga salamangkero naghimo sa amo nga bagay paagi sa ila mga enkantohanon nga padihot, kag nagpasaka sing mga paka sa duta sang Egipto.

8 ś Niyan ginpatawag ni Faraon si Moises kag si Aaron, kag nagsiling, Pakilooyi ang GINOO, nga kuhaon niya ang mga paka sa akon, kag sa akon katawohan; kag ako magapalakat sang katawohan, agud nga makahalad sila sa GINOO.

9 Kag si Moises nagsiling kay Faraon, Himaya sa ibabaw nakon: san-o ako magpakilooy tungud sa imo, kag tungud sa imo mga alagad, kag tungud sa imo katawohan, sa paglaglag sang mga paka gikan sa imo kag sa imo mga balay, agud nga sila magpabilin sa suba lamang?

10 Kag nagsiling sia, Buwas. Kag nagsiling sia, Manginsono sa imo polong: agud nga makilala mo nga wala gid sing iban nga kaangay sa GINOO nga amon Dios.

11 Kag ang mga paka magapalayo sa imo, kag sa imo mga balay, kag sa imo mga alagad, kag sa imo katawohan; magapabilin sila sa suba lamang.

12 Kag si Moises kag si Aaron naggowa gikan kay Faraon: kag nagtuaw si Moises sa GINOO bangud sang mga paka nga gindala niya batok kay Faraon.

13 Kag ginhimo sang GINOO ang sono sa polong ni Moises; kag napatay ang mga paka gikan sa mga balay, sa mga minoro, kag sa mga latagon.

14 Kag gintipon nila sila sa mga tinumpok: kag nagbaho ang duta.

15 Apang sang nakita ni Faraon nga may pag-untat, ginpatig-a niya ang iya tagiposoon, kag wala magpamati sa ila; subong sang ginsiling sang GINOO.

16 ś Kag ang GINOO nagsiling kay Moises, Isiling kay Aaron, Iuntay ang imo sungkud, kag bunala ang yab-ok sang duta, agud nga manginkuto ini sa bug-os nga duta sang Egipto.

17 Kag ginhimo nila ang subong; kay gin-untay ni Aaron ang iya kamut nga may sungkud niya, kag ginbunal ang yab-ok sang duta, kag nanginkuto ini sa tawo, kag sa sapat; ang tanan nga yab-ok sang duta nanginkuto sa bug-os nga duta sang Egipto.

18 Kag ginhimo sang mga salamangkero ang subong paagi sa ila mga enkantohanon nga padihot ang pagpagowa sing mga kuto, apang indi sila makasarang: gani may mga kuto sa tawo, kag sa sapat.

19 Niyan nagsiling ang mga salamangkero kay Faraon, Tudlo sang Dios ini: kag nagtig-a ang tagiposoon ni Faraon, kag wala sia magpamati sa ila; sono sa ginsiling sang GINOO.

20 ś Kag ang GINOO nagsiling kay Moises, Bangon sang aga pa, kag tindug sa atubangan ni Faraon; yari karon, magagowa sia pakadto sa tubig; kag isiling sa iya, Amo ini ang ginasiling sang GINOO, Tuguti sa paglakat ang akon katawohan, agud nga maalagad nila ako.

21 Kon indi, kon ikaw indi magtugut sa pagpalakat sang akon katawohan, yari karon, magapadala ako sing mga pinanong nga mga langaw sa imo, kag sa imo mga alagad, kag sa imo katawohan, kag sa imo mga balay: kag mapuno ang mga balay sang mga Egiptohanon sang mga pinanong nga mga langaw, kag ang duta man nga diin sila.

22 Kag sa sinang adlaw painon ko ang duta sang Gosen, diin nagapuyo ang akon katawohan, agud nga didto wala sing mga pinanong nga mga langaw; sa katuyoan nga mahibaloan mo nga ako ang GINOO sa tunga sang duta.

23 Kag ako magabutang sing ulut sa tunga sang akon katawohan kag sang imo katawohan: buwas amo ini ang tanda.

24 Kag ginhimo sang GINOO ang subong; kag nag-abut ang makasiligni nga pinanong sang mga langaw sa balay ni Faraon, kag sa mga balay sang iya mga alagad, kag sa bug-os nga duta sang Egipto: ang duta nalaglag bangud sang pinanong nga mga langaw.

25 ś Kag ginpatawag ni Faraon si Moises kag si Aaron, kag nagsiling, Lakat kamo, halad sa inyo Dios sa duta.

26 Kag si Moises nagsiling, Indi nagakaigo ang paghimo sing subong; kay ihalad namon sa GINOO nga amon Dios ang kangil-aran sa mga Egiptohanon: yari karon, ihalad bala namon ang kangil-aran sa mga Egiptohanon sa atubangan sang ila mga mata, kag indi bala nila kami pagbatohon?

27 Magalakat kami sing tatlo ka adlaw nga lalakton sa kamingawan, kag magahalad sa GINOO nga amon Dios, sono sa isogo niya sa amon.

28 Kag si Faraon nagsiling, Tugutan ko kamo sa paglakat, agud nga kamo makahalad sa GINOO nga inyo Dios sa kamingawan; lamang dili kamo maglakat sing tama kalayo: pakilooy ka tungud sa akon.

29 Kag si Moises nagsiling, Yari karon, nagahalin ako gikan sa imo, kag magapakilooy ako sa GINOO nga ang mga pinanong nga mga langaw maghalin kay Faraon, sa iya mga alagad, kag sa iya katawohan, buwas: lamang nga indi si Faraon maglimbong pa nga indi magtugut sa pagpalakat sang katawohan sa paghalad sa GINOO.

30 Kag si Moises naggowa gikan kay Faraon, kag nagpakilooy sa GINOO.

31 Kag ginhimo sang GINOO ang sono sa polong ni Moises; kag ginkuha niya ang mga pinanong nga mga langaw gikan kay Faraon, sa iya mga alagad, kag sa iya katawohan; wala sing nabilin bisan isa.

32 Kag si Faraon nagtig-a sang iya tagiposoon sining tion man, kag wala niya pagtuguti nga maglakat ang katawohan.

KAPITULO 9

NIYAN ang GINOO nagsiling kay Moises, Kadtoi sa sulud si Faraon, kag sugiri sia, Ang GINOONG Dios sang mga Hebreo nagasiling sing subong sini, Tuguti sa paglakat ang akon katawohan, agud nga alagdon nila ako.

2 Kay kon magpamalibad ka sa pagpalakat sa ila, kag punggan pa nimo sila,

3 Yari karon, ang kamut sang GINOO manginsa imo kahayupan nga yara sa latagon, sa mga kabayo, sa mga asno, sa mga camelyo, sa kabakahan, kag sa mga carnero: manginmay tama kamalala nga pameste.

4 Kag tuhayon sang GINOO ang kahayupan sang Israel kag ang kahayupan sang Egipto: kag wala sing mapatay sang tanan nga iya sang kaanakan sang Israel.

5 Kag ang GINOO nagpat-ud sing tion, nga nagasiling, Buwas himoon sang GINOO ining butang sa duta.

6 Kag sa madason nga adlaw ginhimo sang GINOO ining butang, kag napatay ang tanan nga kahayupan sang Egipto: apang ang kahayupan sang kaanakan sang Israel wala mapatyi bisan isa.

7 Kag ginpakadtoan ni Faraon, kag, yari karon, sa kahayupan sang mga Israelnon wala sing napatay bisan isa. Kag ang tagiposoon ni Faraon nagtig-a, kag wala niya pagtuguti sa paglakat ang katawohan.

8 ś Kag ang GINOO nagsiling kay Moises kag kay Aaron, Dala kamo sing mga tinapnay nga mga abo sang horno, kag ipasabwag ini kay Moises nayon sa langit sa itololok ni Faraon.

9 Kag manginyab-ok ini sa bug-os nga duta sang Egipto, kag manginhubag nga nagabuswang sa tawo, kag sa sapat, sa bug-os nga duta sang Egipto.

10 Kag nagkuha sila sing mga abo sa horno, kag nagtindug sa atubangan ni Faraon; kag si Moises nagsabwag sini nayon sa langit; kag nanginhubag ini nga nagabuswang sa tawo, kag sa sapat.

11 Kag ang mga salamangkero indi makatindug sa atubangan ni Moises bangud sang mga hubag; kay ang hubag yara sa mga salamangkero, kag sa tanan nga Egiptohanon.

12 Kag ginpatig-a sang GINOO ang tagiposoon ni Faraon, kag wala sia magpamati sa ila; sono sa napamolong sang GINOO kay Moises.

13 ś Kag nagsiling ang GINOO kay Moises, Bangon ka sing aga pa gid, kag tindug sa atubangan ni Faraon, kag isiling sa iya, Amo ini ang ginasiling sang GINOONG Dios sang mga Hebreo, Tuguti sa paglakat ang akon katawohan, agud nga makaalagad sila sa akon.

14 Kay sa sining tion ipadala ko ang tanan ko nga kalalat-an sa imo tagiposoon, kag sa imo mga alagad, kag sa imo katawohan; agud nga makahibalo ka nga wala na gid sing iban nga kaangay sa akon sa bug-os nga duta.

15 Kay karon untayon ko ang akon kamut, agud nga malaglag ko ikaw kag ang imo katawohan sa peste; kag ikaw pagautdon gikan sa duta.

16 Kag tungud sini gid nga katuyoan ginbangon ko ikaw, sa pagpakita sa imo sang akon gahum; kag agud nga ang akon ngalan mapalapnag sa bug-os nga duta.

17 Nagapakataas ka pa bala sang imo kaugalingon batok sa akon katawohan, nga indi ikaw magtugut sa ila sa paglakat?

18 Yari karon, buwas sa mga amo sining tion magapaulan ako sing hielo nga tama ka makasiligni, subong sang wala pa nga mas-a mahanabu sa Egipto kutub sang adlaw nga ginpasad ini tubtub karon.

19 Busa karon padala ka, kag tiponon ang imo kahayupan, kag ang tanan nga imo nga yara sa latagon; kay ang tagsa ka tawo kag sapat nga yara sa latagon, kag wala madala sing pauli, matup-an sila sang ulan nga hielo, kag mapatay sila.

20 Sia nga nahadluk sa polong sang GINOO sa tunga sang mga alagad ni Faraon nagpapalagyo sang iya mga alagad kag sang iya kahayupan pakadto sa kabalayan:

21 Kag sia nga wala magsapak sang polong sang GINOO nagbiya sang iya mga alagad kag sang iya kahayupan sa latagon.

22 ś Kag ang GINOO nagsiling kay Moises, Untaya ang imo kamut nayon sa langit, agud nga may ulan nga hielo sa bug-os nga duta sang Egipto, sa tawo, kag sa sapat, kag sa tagsa ka tanum sang latagon, sa bug-os nga duta sang Egipto.

23 Kag gin-untay ni Moises ang iya sungkud nayon sa langit: kag ang GINOO nagpadala sing daguub kag ulan nga hielo, kag ang kalayo nagburhot pakadto sa duta; kag ginpaulan sang GINOO sing hielo sa duta sang Egipto.

24 Gani may ulan nga hielo, kag kalayo nga nagsamo upud sa ulan nga hielo, makasiligni gid subong sang wala pa gid mahanabu sa bug-os nga duta sang Egipto kutub nga nanginpungsud ini.

25 Kag ang ulan nga hielo nagsamad sang bug-os nga duta sang Egipto sang tanan nga yara sa latagon, tingub ang tawo kag sapat; kag ang ulan nga hielo nagsamad sang tagsa ka tanum sang latagon, kag nagbali sang tagsa ka kahoy sang latagon.

26 Lamang sa duta sang Gosen, diin ang kaanakan sang Israel, wala sing ulan nga hielo.

27 ś Kag ginpakadtoan ni Faraon, kag ginpatawag si Moises kag si Aaron, kag nagsiling sa ila, Sa sining tion nakasala ako: ang GINOO matarung, kag ako kag ang akon katawohan malaut.

28 Pakilooyi ang GINOO (kay tuman na) agud nga wala na sang mabaskug nga mga pagpanaguub kag sang ulan nga hielo; kag ako magatugut sa pagpalakat sa inyo, kag indi na kamo magpabilin pa.

29 Kag si Moises nagsiling sa iya, Sa gilayon nga ako makagowa sa siudad, magauntay ako sang akon mga kamut sa GINOO; kag ang daguub magauntat, kag wala na gid sing ulan nga hielo; agud nga makahibalo ka nga ang duta iya sang GINOO.

30 Apang nahanungud sa imo kag sa imo mga alagad, nakahibalo ako nga indi pa kamo magkahadluk sa GINOONG Dios.

31 Kag ang lino kag ang sebada nalaglag: kay ang sebada nagauhay, kag ang lino nagapamulak.

32 Apang ang trigo kag ang espelta wala malaglag: kay wala pa mag-ulhot sila.

33 Kag si Moises naggowa sa siudad gikan kay Faraon, kag nag-untay sang iya mga kamut sa GINOO: kag nag-untat ang mga daguub kag ang ulan nga hielo, kag ang ulan wala na magtupa sa duta.

34 Kag sang nakita ni Faraon nga nag-untat ang ulan kag ang ulan nga hielo kag ang mga daguub, sia nagpakasala pa gid, kag nagpatig-a sang iya tagiposoon, sia kag ang iya mga alagad.

35 Kag ang tagiposoon ni Faraon nagtig-a, kag wala niya pagtuguti sa paglakat ang kaanakan sang Israel; sono sa napamolong sang GINOO paagi kay Moises.

KAPITULO 10

KAG ang GINOO nagsiling kay Moises, Kadtoi sa sulud si Faraon: kay ginpatig-a ko ang iya tagiposoon, kag ang tagiposoon sang iya mga alagad, agud nga mapakita ko ining akon mga tanda sa atubangan niya:

2 Kag agud nga masugid mo sa idulungug sang imo anak nga lalaki, kag sa anak nga lalaki sang imo anak nga lalaki, kon ano nga mga butang ang ginhimo ko sa Egipto, kag ang akon mga tanda nga nahimo ko sa tunga nila; agud nga kamo makahibalo nga ako ang GINOO.

3 Kag si Moises kag si Aaron nagkadto sa sulud kay Faraon, kag nagsiling sa iya, Amo ini ang ginasiling sang GINOONG Dios sang mga Hebreo, Daw ano pa bala kadugay nga magpamalibad ka sa pagpaubus sang imo kaugalingon sa atubangan nakon: tuguti sa paglakat ang akon katawohan, agud nga alagdon nila ako.

4 Kay, kon ikaw magpamalibad sa pagpalakat sang akon katawohan, yari karon, buwas pakarion ko ang mga apan sa sulud sang imo dulunan:

5 Kag tabonan nila ang kadaygan sang duta, sa bagay nga ang isa indi makakita sang duta: kag kaonon nila ang nabilin sadtong mga nagkalabilin, nga nabilin sa inyo gikan sa ulan nga hielo, kag kaonon nila ang tagsa ka kahoy nga nagatubo nga sa inyo sa latagon:

6 Kag pun-on nila ang imo mga balay, kag ang mga balay sang tanan mo nga alagad, kag ang mga balay sang tanan nga Egiptohanon; nga wala makakita bisan pa ang imo mga kaamayan, ukon ang mga kaamayan sang imo mga kaamayan, kutub sa adlaw nga diri sila sa duta tubtub sining adlaw. Kag sia nagtalikod, kag naghalin kay Faraon.

7 Kag ang mga alagad ni Faraon nagsiling sa iya, Tubtub pa bala san-o nga ining tawo manginsiod sa aton? tuguti sa paglakat ang mga tawo, agud nga mag-alagad sila sa GINOO nga ila Dios: wala ka pa bala makahibalo nga ang Egipto nalaglag?

8 Kag si Moises kag si Aaron ginpabalik kay Faraon: kag sia nagsiling sa ila, Lakat kamo, alagda ninyo ang GINOO nga inyo Dios: apang sin-o bala sila nga magalakat?

9 Kag si Moises nagsiling, Magalakat kami upud ang amon kabataan kag upud ang amon mga tigulang, upud ang amon mga anak nga lalaki kag upud ang amon mga anak nga babaye, upud ang amon mga panong kag upud ang amon kahayupan magalakat kami; kay dapat kami maghiwat sing pandut sa GINOO.

10 Kag nagsiling sia sa ila, Ang GINOO mag-upud sing subong sa inyo, kay palakton ko kamo, kag ang inyo mga magamay: bantay lang; kay ang malaut yara sa una ninyo.

11 Indi: lakat na kamo nga mga lalaki, kag alagdon ang GINOO; kay amo ina ang ginhandum ninyo. Kag gintabog sila gikan sa atubangan ni Faraon.

12 ś Kag ang GINOO nagsiling kay Moises, Untaya ang imo kamut sa ibabaw sang duta sang Egipto tungud sa mga apan, agud nga magsaka sila sa duta sang Egipto, kag magkaon sang tagsa ka tanum sang duta, sang tanan nga ginbilin sang ulan nga hielo.

13 Kag gin-untay ni Moises ang iya sungkud sa ibabaw sang duta sang Egipto, kag ang GINOO nagpahuyup sing sidlangan nga hangin sa duta sa bug-os sadtong adlaw, kag sa bug-os sadtong gab-i; kag sang pagkaaga, ang sidlangan nga hangin nagdala sang mga apan.

14 Kag nagsalaka ang mga apan sa ibabaw sang bug-os nga duta sang Egipto, kag naghugpa sa bug-os nga duta sang Egipto: tama ka makasiligni sila; nga wala pa gid sing subong nga mga apan kutub pa sang una, ukon may subong pa sa olihi.

15 Kay gintabonan nila ang kadaygan sang bug-os nga duta, sa bagay nga ang duta nadulman; kag ginkaon nila ang tagsa ka tanum sang duta, kag ang tanan nga bunga sang kakahoyan nga nabilin sang ulan nga hielo: kag wala gid sing nabilin nga hilaw nga butang sa mga kahoy, ukon sa mga tanum sang latagon, sa bug-os nga duta sang Egipto.

16 ś Niyan ginpatawag sing dalidali ni Faraon si Moises kag si Aaron; kag nagsiling sia, Nakasala ako batok sa GINOO nga inyo Dios, kag batok sa inyo.

17 Busa karon, ginaampo ko sa inyo, patawara ang akon sala sini na lamang nga makaisa, kag pakilooyi ang GINOO nga inyo Dios, nga kuhaon lamang niya sa akon ining kamatayon.

18 Kag naghalin sia kay Faraon, kag nagpakilooy sa GINOO.

19 Kag ginpaliso sang GINOO ang mabaskug nga katundan nga hangin, nga nagpalid sang mga apan, kag nagtabog sa ila pakadto sa Mapulang dagat; wala gid sing nabilin bisan isa ka apan sa bug-os nga mga dulunan sang Egipto.

20 Apang ginpatig-a sang GINOO ang tagiposoon ni Faraon, sa bagay nga wala niya pagtuguti sa paglakat ang kaanakan sang Israel.

21 ś Kag ang GINOO nagsiling kay Moises, Untaya ang imo kamut nayon sa langit, agud nga may kadudulman sa ibabaw sang duta sang Egipto, isa ka pitipit nga kadudulman.

22 Kag gin-untay ni Moises ang iya kamut nayon sa langit; kag may pitipit nga kadudulman sa bug-os nga duta sang Egipto sing tatlo ka adlaw:

23 Indi sila makakita sa isa kag isa, kag wala sing nagtindug sa iya duug sa tatlo ka adlaw: apang ang tanan nga kaanakan sang Israel may kapawa sa ila mga puluy-an.

24 ś Kag si Faraon nagtawag kay Moises, kag nagsiling, Lakat kamo, alagda ang GINOO; ibilin lamang ang inyo mga panong kag ang inyo kahayupan: ang inyo mga magamay man paupda ninyo.

25 Kag si Moises nagsiling, Dapat man ikaw maghatag sa amon sing mga halad kag mga halad nga sinonog, agud nga mahalad namon sa GINOO nga amon Dios.

26 Ang amon kahayupan man dapat magaupud sa amon; wala sing mabilin bisan isa ka koko; kay sa ila dapat magkuha kami sa pag-alagad sa GINOO nga amon Dios; kag wala kami makahibalo kon ano ang dapat i-alagad namon sa GINOO, tubtub mag-abut kami didto.

27 ś Apang ginpatig-a sang GINOO ang tagiposoon ni Faraon, kag sia indi magtugut sa pagpalakat sa ila.

28 Kag si Faraon nagsiling sa iya, Halin ka sa akon, andami ang imo kaugalingon, dili ka na magtan-aw sang akon nawung; kay sa adlaw nga makita mo ang akon nawung mapatay ka.

29 Kag si Moises nagsiling, Nagpamolong ka sing husto, indi na ako magtan-aw liwat sang imo nawung.

KAPITULO 11

KAG ang GINOO nagsiling kay Moises, Isa pa ka kalalat-an dalhon ko kay Faraon, kag sa Egipto; sa tapus sini tugutan kamo niya sa paglakat gikan diri: kon tugutan kamo niya sa paglakat, sa pagkamatuud sobolon niya kamo sing bug-os.

2 Pamolong karon sa palamatin-an sang katawohan, kag ang tagsa ka lalaki maghulam sa iya kasilingan, kag ang tagsa ka babaye sa iya kasilingan, mga alahas nga pilak, kag mga alahas nga bulawan.

3 Kag ang GINOO nagpapahamuut sang katawohan sa itololok sang mga Egiptohanon. Labut pa si Moises tama ka gamhanan nga lalaki sa duta sang Egipto, sa itololok sang mga alagad ni Faraon, kag sa itololok sang katawohan.

4 Kag si Moises nagsiling, Amo ini ang ginasiling sang GINOO, Sa mga tunga ang gab-i ako magakadto sa tunga sang Egipto:

5 Kag ang tanan nga panganay sa duta sang Egipto mapatay, kutub sa panganay ni Faraon nga nagalingkod sa iya trono, bisan tubtub sa panganay sang alagad nga babaye nga yara sa likod sang galingan; kag ang tanan nga panganay sang kasapatan.

6 Kag may daku nga hinaya sa bug-os nga duta sang Egipto, subong sang wala pa nga mas-a mahanabu, ukon subong sang mahanabu pa.

7 Apang batok sa bisan kay sin-o sang kaanakan sang Israel, sa tawo ukon sa sapat, wala sing ido nga magngurub: agud nga inyo mahibaloan nga ang GINOO nagatuhay sang mga Egiptohanon kag sang Israel.

8 Kag ini tanan nga imo alagad magadulhog pakadto sa akon, kag magayaub sa akon, nga nagasiling, Gowa ka, kag ang bug-os nga katawohan nga nagasonod sa imo: kag sa tapus sina ako magagowa. Kag nagtaliwan sia kay Faraon sa dakung kaakig.

9 Kag ang GINOO nagsiling kay Moises, Si Faraon indi magpamati sa imo; agud nga ang akon mga katanhagaan magamuad sa duta sang Egipto.

10 Kag si Moises kag si Aaron naghimo sini tanan nga katanhagaan sa atubangan ni Faraon: kag ginpatig-a sang GINOO ang tagiposoon ni Faraon, sa bagay nga wala niya pagtuguti ang kaanakan sang Israel sa paggowa sa iya duta.

KAPITULO 12

KAG ang GINOO nagpamolong kay Moises kag kay Aaron sa duta sang Egipto, nga nagasiling,

2 Ining bulan manginpamuno sang mga bulan sa inyo: ini manginnahauna nga bulan sang tuig sa inyo.

3 ś Ipamolong ninyo sa bug-os nga katilingban sang Israel, nga nagasiling, Sa ikapulo nga adlaw sining bulan ang tagsa ka tawo sa ila magkuha sing isa ka cordero, sono sa panimalay sang ila mga kaamayan, isa ka cordero sa tagsa ka panimalay:

4 Kag kon ang panimalay tama kadiotay nga sa isa ka cordero, sia kag ang iya kasilingan nga madason sa iya balay magkuha sini sono sa kadamuon sang mga kalag; isipon ninyo sa cordero sono sa makaon sang tagsa ka tawo.

5 Ang inyo cordero manginwala sing kasawayan, lalaki nga isa ka tuig: kuhaon ninyo ini sa mga carnero, ukon sa mga kanding:

6 Kag bokoton ninyo ini tubtub sa adlaw nga ikapulo kag apat sining bulan: kag ang bug-os nga pagtilipon sang katilingban sang Israel mag-ihaw sini sa kahaponon.

7 Kag magkuha sila sang dugo, kag ipalhit ini sa duha ka bakalan kag sa olohan sang ganhaan sang mga balay, nga kaonan nila sini.

8 Kag sa sinang gab-i magkaon sila sang unud, nga inasal sa kalayo, kag sang tinapay nga wala sing tapay; kag upud sang mga tanum nga mapait kaonon nila ini.

9 Dili ninyo pagkaonon ini nga hilaw, ukon linaga sa tubig, kondi inasal sa kalayo; ang iya olo pati ang iya mga tiil, kag ang iya mga kasudlan.

10 Kag dili kamo magbilin sing bisan ano sini tubtub sa aga; kag ang mabilin sini tubtub sa aga sonogon ninyo sa kalayo.

11 ś Kag amo ini ang inyo pagkaon sini; nawagkusan ang inyo mga hawak, ang inyo mga sapatos sa inyo mga tiil, kag ang inyo sungkud sa inyo kamut; kag kaonon ninyo ini sing dalidali: ini pagligad sang GINOO.

12 Kay magaagi ako sa sining gab-i sa duta sang Egipto, kag magapatay sang tanan nga panganay sa duta sang Egipto, tingub ang tawo kag ang sapat; kag batok sa tanan nga mga dios sang Egipto magahukom ako: ako amo ang GINOO.

13 Kag ang dugo mangintanda sa inyo sa mga balay diin kamo: kag kon makita ko ang dugo, magaligad ako sa inyo, kag ang kalalat-an indi maglaglag sa inyo, kon akon laglagon ang duta sang Egipto.

14 Kag ining adlaw manginhandumanan sa inyo; kag bantayan ninyo ini subong nga pandut sa GINOO sa bug-os ninyong mga kaliwatan; bantayan ninyo ini subong nga pandut nga isa ka pagsolondan nga dayon.

15 Pito ka adlaw magkaon kamo sing tinapay nga walay tapay; bisan sa nahaunang adlaw ipalayo ninyo ang tapay gikan sa inyo mga balay: kay ang bisan sin-o nga magkaon sang tinapay nga may tapay kutub sa nahaunang adlaw tubtub sa ikapitong adlaw, inang kalag utdon gikan sa Israel.

16 Kag sa nahaunang adlaw may balaan nga pagtilipon, kag sa ikapitong adlaw may balaan nga pagtilipon sa inyo; wala sing bisan anong buluhaton nga himoon sa ila, luwas sang kinahanglan kaonon sang tagsa ka tawo, ina lamang ang mahimo ninyo.

17 Kag bantayan ninyo ang pandut sang tinapay nga walay tapay; kay sa sini gid nga adlaw ginpagowa ko ang inyo mga kasoldadosan gikan sa duta sang Egipto: busa bantayan ninyo ining adlaw sa inyong mga kaliwatan sa dayon nga pagsolondan.

18 ś Sa nahaunang bulan, sa ikapulo kag apat nga adlaw sang bulan sa kahaponon, magkaon kamo sing tinapay nga walay tapay, tubtub sa ikaduha ka pulo kag isa nga adlaw sang bulan sa kahaponon.

19 Pito ka adlaw wala sing makita nga tapay sa inyo mga balay: kay ang bisan sin-o nga magkaon sinang may tapay, inang kalag utdon gikan sa katilingban sang Israel, bisan sia dumoloong, ukon tumandok.

20 Dili kamo magkaon sing bisan ano nga may tapay; sa inyo tanan nga mga puluy-an magkaon kamo sing tinapay nga walay tapay.

21 ś Niyan gintawag ni Moises ang tanan nga tigulang sang Israel, kag nagsiling sa ila, Pili kag kuha kamo sing isa ka cordero sono sa inyo mga panimalay, kag ihawa ang pagligad.

22 Kag magkuha kamo sing isa ka pungpung nga hisopo, kag itusmog ini sa dugo nga yara sa batiya, kag ipalhit ang dugo nga yara sa batiya sa olohan sang ganhaan kag sa duha ka bakalan; kag wala sa inyo sing maggowa sa ganhaan sang iya balay tubtub sa aga.

23 Kay ang GINOO magaagi sa pagpatay sang mga Egiptohanon; kag kon makita niya ang dugo sa olohan sang ganhaan, kag sa duha ka bakalan, ang GINOO magaligad sa ganhaan, kag indi magtugut nga ang manuglaglag magsulud sa inyo mga balay sa pagpatay sa inyo.

24 Kag bantayan ninyo ining butang nga pagsolondan sa imo kag sa imo mga anak nga lalaki sa gihapon.

25 Kag mahanabu, kon mag-abut kamo sa duta nga ihatag sa inyo sang GINOO, sono sa ginsaad niya, bantayan ninyo ining pag-alagdan.

26 Kag mahanabu, kon ang inyo mga anak magsiling sa inyo, Ano bala ang kahologan sining pag-alagdan?

27 Nga magasiling kamo, Ini halad sang pagligad sang GINOO, nga nagligad sa kabalayan sang kaanakan sang Israel sa Egipto, sang pagpatay niya sang mga Egiptohanon, kag ginluwas ang amon kabalayan. Kag ang katawohan nagyaub kag nagsimba.

28 Kag ang kaanakan sang Israel naglakat, kag naghimo sono sa ginsogo sang GINOO kay Moises kag kay Aaron, amo ang ginhimo nila.

29 ś Kag nahanabu, sa tunga sang gab-i ginpatay sang GINOO ang tanan nga panganay sa duta sang Egipto, kutub sa panganay ni Faraon nga nagalingkod sa iya trono tubtub sa panganay sang bihag nga yara sa bilanggoan nga madulum; kag ang tanan nga panganay sang kabakahan.

30 Kag nagtindug si Faraon sang gab-i, sia, kag ang tanan niya nga alagad, kag ang tanan nga Egiptohanon; kag may dakung hinaya sa Egipto; kay wala sing balay nga wala sing isa nga patay.

31 ś Kag ginpatawag niya si Moises kag si Aaron sa kagab-ihon, kag nagsiling, Tindug, kag halin kamo gikan sa tunga sang akon katawohan, kamo kag ang kaanakan sang Israel; kag lakat, alagda ang GINOO, sono sa ginsiling ninyo.

32 Kuhaa man ang inyo mga panong kag ang inyo kahayupan, sono sa ginsiling ninyo, kag maglakat; kag pakamaayoha man ako.

33 Kag ginsako sang mga Egiptohanon ang katawohan, agud nga mapagowa nila sila sing madali gikan sa duta; kay nagsiling sila, Tanan kami mga patay.

34 Kag gindala sang katawohan ang ila linamas sa wala pa magkumbo, nga nagabagtong sang ila lamasan sa ila panapton sa ila mga abaga.

35 Kag ginhimo sang kaanakan sang Israel sono sa polong ni Moises; kag naghulam sila sa mga Egiptohanon sing mga alahas nga pilak, kag mga alahas nga bulawan, kag panapton:

36 Kag ang GINOO nagpapahamuut sang katawohan sa itololok sang mga Egiptohanon, sa bagay nga ginpahulam sila nila sadtong mga butang nga ila ginpangayo. Kag ginhublasan nila ang mga Egiptohanon.

37 ś Kag ang kaanakan sang Israel nagpanlakatan kutub sa Rameses pa Sucot, mga anum ka gatus ka libo ka lalaki nga naglakat, walay labut ang kabataan.

38 Kag isa ka nagasalakut nga kadam-an ang nagtaklad man upud sa ila; kag mga panong, kag kahayupan, bisan kabakahan nga tama kadamu.

39 Kag sa linamas nga gindala nila gikan sa Egipto nagbibingka sila sing mga torta nga walay tapay, kay walay tapay ini; bangud nga ginsobol sila pagowa sa Egipto, kag indi makapalantang, kag wala sila makaaman nga sa ila kaugalingon sing bisan ano nga kalan-on.

40 ś Karon ang tion sang pagpangayaw sang kaanakan sang Israel, nga nagpuyo sa Egipto, apat ka gatus kag katloan ka tuig.

41 Kag nahanabu sa katapusan sang apat ka gatus kag katloan ka tuig, sa amo gid nga adlaw ini nahanabu, nga naggowa ang tanan nga mga kasoldadosan sang GINOO gikan sa duta sang Egipto.

42 Gab-i ini nga pagbantayan sa GINOO sa pagpagowa sa ila sa duta sang Egipto: ini amo inang gab-i sang GINOO nga bantayan sang tanan nga kaanakan sang Israel sa ila mga kaliwatan.

43 ś Kag ang GINOO nagsiling kay Moises kag kay Aaron, Ini amo ang pagsolondan sang pagligad: Wala sing dumoloong nga magkaon sini:

44 Apang ang tagsa ka alagad sang tawo nga ginabakal sa kuarta, kon macircuncidar mo sia, niyan makakaon sia sini.

45 Ang tagaluwas ukon ang alagad nga sinoholan dili magkaon sini.

46 Kaonon ini sa isa ka balay; dili ka gid magdala sa gowa sang balay sang unud sini; kag dili ninyo pagbalbagon ang iya tul-an.

47 Ang bug-os nga katilingban sang Israel magahiwat sini.

48 Kag kon ang dumoloong magpanlugayaw upud sa imo, kag magbantay sang pagligad sa GINOO, circuncidahon ang tanan niya nga lalaki, kag niyan magpalapit sia kag maghiwat sini; kag manginsubong sia sang tumandok sang duta: kay wala sing dicircuncidado nga tawo nga magkaon sini.

49 May isa ka kasogoan sa tumandok, kag sa dumoloong nga nagapanlugayaw sa tunga ninyo.

50 Amo ini ang ginhimo sang kaanakan sang Israel; sono sa ginsogo sang GINOO kay Moises kag kay Aaron, amo ang ginhimo nila.

51 Kag nahanabu sa amo gid nga adlaw, nga ginpagowa sang GINOO ang kaanakan sang Israel sa duta sang Egipto sono sa ila mga kasoldadosan.

KAPITULO 13

KAG ang GINOO nagpamolong kay Moises, nga nagasiling,

2 Pakabalaana sa akon ang tanan nga panganay, ang bisan ano nga una maggowa sa taguangkan sa kaanakan sang Israel, sa tawo kag sa sapat: akon sia.

3 ś Kag si Moises nagsiling sa katawohan, Dumduma ninyo ining adlaw, nga sa iya naggowa kamo sa Egipto, gikan sa balay sang kahiolipnan; kay ginpagowa kamo sang GINOO paagi sa kusug sang kamut gikan sa sining duug: wala sing kaonon nga tinapay nga may tapay.

4 Sining adlaw naggowa kamo sa bulan nga Abib.

5 ś Kag mahanabu kon madala ikaw sang GINOO sa duta sang mga Canaanhon, kag sang mga Hithanon, kag sang mga Amornon, kag sang mga Hevhanon, kag sang mga Jebusnon, nga ginsumpa niya sa imo mga kaamayan nga ihatag sa imo, duta nga nagailig sing gatas kag dugus, nga hiwaton mo ining pag-alagdan sa sining bulan.

6 Magkaon ka sa pito ka adlaw sing tinapay nga walay tapay, kag sa adlaw nga ikapito may pandut sa GINOO.

7 Kaonon ang tinapay nga walay tapay sa sulud sang pito ka adlaw; kag wala sing makita sa imo sang tinapay nga may tapay, kag wala sing makita sa imo nga tapay sa bug-os mo nga ginsakpan.

8 ś Kag magsugid ikaw sa imo anak nga lalaki sa sinang adlaw, nga nagasiling, Ini nahimo bangud sa ginhimo sang GINOO sa akon sang paggowa ko gikan sa Egipto.

9 Kag mangintanda ini sa imo sa kamut nimo, kag handumanan sa tunga sang imo mga mata, agud nga ang kasogoan sang GINOO manginsa imo baba: kay ginpagowa ikaw sang GINOO gikan sa Egipto sa makusug nga kamut.

10 Busa bantayan mo ining pagsolondan sa iya dag-on tuigtuig.

11 ś Kag kon mapasulud na ikaw sang GINOO sa duta sang mga Canaanhon, sono sa ginsumpa niya sa imo kag sa imo mga kaamayan, kag mahatag ini sa imo,

12 Nga painon mo sa GINOO ang tanan nga una maggowa sa taguangkan, kag ang tagsa ka panganay gikan sa imo sapat nga imo; ang mga lalaki iya sang GINOO.

13 Kag ang tagsa ka panganay sang asno tubson mo sing isa ka cordero; kag kon indi mo ini pagtubson, niyan longgoon mo ang iya liog: kag ang tanan nga panganay sang tawo sa tunga sang imo mga anak tubson mo.

14 ś Kag mahanabu kon pamangkoton ka sang imo anak nga lalaki sa tion nga magaabut, nga nagasiling, Ano bala ini? nga isiling mo sa iya, Sa kusug sang kamut ang GINOO nagpagowa sa aton gikan sa Egipto, sa balay sang kahiolipnan:

15 Kag nahanabu, sang si Faraon halus magtugut sa pagpalakat sa amon, nga ginpatay sang GINOO ang tanan nga panganay sa duta sang Egipto, ang panganay sang tawo kag ang panganay sang sapat: busa ginahalad ko sa GINOO ang tanan nga lalaki nga una maggowa sa taguangkan; apang ang tanan nga panganay sang akon mga anak ginatubus ko.

16 Kag mangintanda ini sa imo kamut, kag handumanan sa ulut sang imo mga mata: kay sa kusug sang kamut ginpagowa kita sang GINOO sa Egipto.

17 ś Kag nahanabu, sang natugutan ni Faraon sa paglakat ang katawohan, nga wala sila pagtuytuyi sang Dios paagi sa dalanon sang duta sang mga Filistinhon, bisan malapit yadto; kay ang Dios nagsiling, Basi ayhan maghinulsul ang katawohan kon makakita sila sing inaway, kag magbalik sila sa Egipto:

18 Apang ang Dios nagtuytuy sang katawohan palibut, paagi sa dalanon sang kamingawan sang Mapulang dagat: kag nagtaklad ang kaanakan sang Israel nga sangkap sa hinganiban gikan sa duta sang Egipto.

19 Kag gindala ni Moises ang mga tul-an ni Jose upud sa iya: kay nakapasumpa sia sing maligdong sa kaanakan sang Israel, nga nagasiling, Ang Dios magaduaw sa inyo sing totoo; kag dalhon ninyo ang akon mga tul-an gikan diri upud sa inyo.

20 ś Kag nagpanlakatan sila gikan sa Sucot, kag nagpahamtang sing kampo sa Etam, sa higad sang kamingawan.

21 Kag ang GINOO nag-una sa ila sa adlaw sa isa ka haligi nga panganud, sa pagtuytuy sa ila sa dalanon; kag sa gab-i sa isa ka haligi nga kalayo, sa paghatag sa ila sing kapawa; sa paglakat sa adlaw kag gab-i:

22 Wala niya ginkuha ang haligi nga panganud sa adlaw, ukon ang haligi nga kalayo sa gab-i, sa una sang katawohan.

KAPITULO 14

KAG ang GINOO nagpamolong kay Moises, nga nagasiling,

2 Ipamolong sa kaanakan sang Israel, nga magbalik sila kag magpahamtang sang kampo sa atubang sang Pi-hahirot, sa ulut sang Migdol kag sang dagat, sa tampad sang Baal-zefon: sa tampad sini magpahamtang kamo sing kampo sa ubay sang dagat.

3 Kay si Faraon magasiling nahanungud sa kaanakan sang Israel, Nagadalangdalang sila sa duta, ang kamingawan nagkibon sa ila.

4 Kag patig-ahon ko ang tagiposoon ni Faraon, agud nga magalagas sia sa ila; kag padunggan ako kay Faraon, kag sa bug-os niya nga kasoldadosan; agud nga mahibaloan sang mga Egiptohanon nga ako ang GINOO. Kag ginhimo nila ang subong.

5 ś Kag ginsugiran ang hari sang Egipto nga ang katawohan nagpalagyo: kag ang tagiposoon ni Faraon kag sang iya mga alagad nagbaylo batok sa katawohan, kag nagsiling sila, Ngaa bala nahimo naton ini, nga gintugutan ta ang Israel sa paglakat nga indi na mag-alagad sa aton?

6 Kag gintakdan niya ang iya kangga, kag gin-upud niya ang iya katawohan:

7 Kag nagkuha sia sing anum ka gatus ka kangga nga pinili, kag sang tanan nga kangga sang Egipto, kag mga kapitan sa ila tanan.

8 Kag ginpatig-a sang GINOO ang tagiposoon ni Faraon nga hari sang Egipto, kag ginlagas niya ang kaanakan sang Israel: kag ang kaanakan sang Israel naggowa nga may mataas nga kamut.

9 Apang ginlagas sila sang mga Egiptohanon, sang tanan nga kabayo kag kangga ni Faraon, kag sang iya mga manugkabayo, kag sang iya kasoldadosan, kag nalambut sila sa ila kampo sa ubay sang dagat, sa luyo sang Pi-hahirot, sa tampad sang Baal-zefon.

10 ś Kag sang nagpalapit si Faraon, ginbayaw sang kaanakan sang Israel ang ila mga mata, kag, yari karon, ang mga Egiptohanon nagsonod sa ila; kag ginhadlukan sila sing tama: kag ang kaanakan sang Israel nagtuaw sa GINOO.

11 Kag nagsiling sila kay Moises, Bangud nga wala sing mga lulubngan sa Egipto, gindala mo bala kami sa malayo nga mapatay sa kamingawan? ngaa bala nga ginhimoan mo kami sing subong, sa pagpagowa sa amon sa Egipto?

12 Indi bala ini ang ginpamolong namon sa imo sa Egipto, nga nagasiling, Pabayai kami, agud nga makaalagad kami sa mga Egiptohanon? Kay maayo pa sa amon nga mag-alagad sa mga Egiptohanon sang sa mapatay kami sa kamingawan.

13 ś Kag si Moises nagsiling sa katawohan, Dili kamo magkahadluk, magmalinong, kag tan-awa ang kaluwasan sang GINOO, nga ipakita niya karon nga adlaw sa inyo: kay ang mga Egiptohanon nga inyo nakita karon nga adlaw, indi na ninyo sila makita liwat sing dayon.

14 Ang GINOO magapakig-away tungud sa inyo, kag kamo magahilipus.

15 ś Kag ang GINOO nagsiling kay Moises, Ngaa bala nga nagatuaw ka sa akon? ipamolong sa kaanakan sang Israel, nga magpadayon sila sing lakat:

16 Apang bayawa ang imo sungkud, kag untaya ang imo kamut sa ibabaw sang dagat, kag pihaka ini: kag magaagi ang kaanakan sang Israel sa tunga sang dagat sa mamala nga duta.

17 Kag ako, yari karon, patig-ahon ko ang mga tagiposoon sang mga Egiptohanon, kag sondon nila sila: kag mapadunggan ako kay Faraon, kag sa iya bug-os nga kasoldadosan, sa iya mga kangga, kag sa iya mga manugkabayo.

18 Kag ang mga Egiptohanon makahibalo nga ako ang GINOO, kon mapadunggan ako kay Faraon, sa iya mga kangga, kag sa iya mga manugkabayo.

19 ś Kag ang anghel sang Dios, nga nag-una sa kampo sang Israel, naghalin kag nagsonod sa ila; kag ang haligi nga panganud nga nagauna sa ila naghalin, kag nagtindug sa likod nila:

20 Kag ini nagpatunga sa kampo sang mga Egiptohanon kag sa kampo sang Israel; kag ini panganud kag kadudulman sa ila, apang ini naghatag kasanag sa kagab-ihon sa ila: agud nga wala maghilapitay sila sa bug-os nga gab-i.

21 Kag gin-untay ni Moises ang iya kamut sa ibabaw sang dagat; kag ginpaatras sang GINOO ang dagat paagi sa mabaskug nga sidlangan nga hangin sa bug-os nga gab-i, kag ginhimo ang dagat nga mamala nga duta, kag ang mga tubig nagpihak.

22 Kag ang kaanakan sang Israel nagsulud sa tunga sang dagat sa mamalang duta: kag ang mga tubig nangindingding sa ila sa too nila, kag sa wala nila.

23 ś Kag naglagas ang mga Egiptohanon, kag nagsonod sa ila pasulud sa tunga sang dagat, ang tanan nga kabayo ni Faraon, ang iya mga kangga, kag ang iya mga manugkabayo.

24 Kag nahanabu, nga sa kaagahon nga pagpulaw nagtolok ang GINOO sa kasoldadosan sang mga Egiptohanon paagi sa haligi nga kalayo kag panganud, kag nagtublag sang kasoldadosan sang mga Egiptohanon,

25 Kag ginpalus niya ang mga rueda sang ila mga kangga, agud nga gin-iwatan sila sa pagpalakat sa ila: sa bagay nga ang mga Egiptohanon nagsiling, Malagyo kita gikan sa atubangan sang Israel; kay ang GINOO nagapakig-away tungud sa ila batok sa mga Egiptohanon.

26 ś Kag ang GINOO nagsiling kay Moises, Untaya ang imo kamut sa ibabaw sang dagat, agud nga ang mga tubig mag-uli sa ibabaw sang mga Egiptohanon, sa ibabaw sang ila mga kangga, kag sa ibabaw sang ila mga manugkabayo.

27 Kag gin-untay ni Moises ang iya kamut sa ibabaw sang dagat, kag ang dagat sa pagkaaga nagbalik sa iya kinaugali; kag ang mga Egiptohanon nalagyo sini; kag ginlaglag sang GINOO ang mga Egiptohanon sa tunga sang dagat.

28 Kag nag-uli ang mga tubig, kag nagtabon sang mga kangga, kag sang mga manugkabayo, kag sang bug-os nga kasoldadosan ni Faraon nga nagsonod sa ila pasulud sa dagat; wala sing nabilin sa ila bisan isa.

29 Apang ang kaanakan sang Israel naglakat sa mamalang duta sa tunga sang dagat; kag ang mga tubig nangindingding sa ila sa too nila, kag sa wala nila.

30 Amo ini ang pagluwas sang GINOO sang Israel sadtong adlaw sa kamut sang mga Egiptohanon; kag nakita sang Israel ang mga Egiptohanon nga patay sa baybayon.

31 Kag nakita sang Israel inang dakung buhat nga ginhimo sang GINOO sa mga Egiptohanon: kag ang katawohan nagkahadluk sa GINOO, kag nagtoo sa GINOO, kag kay Moises nga iya alagad.

KAPITULO 15

NIYAN si Moises kag ang kaanakan sang Israel nag-ambahan sining ambahanon sa GINOO, kag nagpamolong, nga nagasiling, Magaamba ako sa GINOO, kay nagdaug sia sing mahimayaon: gintagbong niya sa dagat ang kabayo kag ang iya manugsakay.

2 Ang GINOO akon kusug kag ambahanon, kag sia nangin-akon kaluwasan: sia akon Dios, kag magaaman ako sang puluy-anan nga sa iya; Dios sang akon amay, kag pakataason ko sia.

3 Ang GINOO isa ka lalaki sang pag-awayan: ang GINOO ang iya ngalan.

4 Ang mga kangga ni Faraon kag ang iya kasoldadosan gintagbong niya sa dagat: ang iya pinili nga mga kapitan man nalugdang sa Mapulang dagat.

5 Ang mga kadadalman nagtabon sa ila: naglugdang sila sa idalum kaangay sa bato.

6 Ang imo too nga kamut, O GINOO, nangin-mahimayaon sa gahum: ang imo too nga kamut, O GINOO, nagdugmok sang kaaway.

7 Kag sa kadaku sang imo pagkahalangdon gindaug mo sila nga nagbatok sa imo: ginpadala mo ang imo kasingkal, nga nag-upus sa ila subong sang ginalaban.

8 Kag sa pusnga sang imo ilong nagtumpok ang mga tubig, ang mga baha nagtindug subong sang tinumpuk, kag ang mga kadadalman nagtig-a sa alibutud sang dagat.

9 Ang kaaway nagsiling, Lagson ko, lambuton ko, bahinbahinon ko ang inagaw; busgon ko sa ila ang akon kaibog; gabuton ko ang akon espada, laglagon sila sang akon kamut.

10 Ginpahuyup mo ang imo hangin, ang dagat nagtabon sa ila: nalugdang sila subong sang tingga sa gamhanan nga mga tubig.

11 Sin-o bala ang kaangay mo, O GINOO, sa tunga sang mga dios? sin-o bala ang kaangay mo, mahimayaon sa pagkabalaan, makahaladluk sa mga kadayawan, nagahimo sing mga katanhagaan?

12 Gin-untay mo ang imo too nga kamut, ang duta naglamon sa ila.

13 Ikaw sa imo kalooy naggiya sang katawohan nga gintubus mo: gintuytuyan mo sila sa imo kusug tubtub sa imo balaan nga puluy-an.

14 Ang katawohan makabati, kag magakahadluk: ang kasubu magadakup sa mga pumuluyo sang Palestina.

15 Niyan ang mga duke sang Edom matingala; ang mga gamhanan nga lalaki sang Moab, ang pagkibang magadakup sa ila; ang tanan nga pumuluyo sang Canaan matunaw.

16 Ang kahadluk kag kakugmat maholog sa ila; paagi sa kadaku sang imo butkon magamatinong sila subong sang bato; tubtub nga makatabok ang imo katawohan, O GINOO, tubtub nga makatabok ang katawohan, nga nabakal mo.

17 Pasudlon mo sila, kag itanum sila sa bukid sang imo panublion, sa duug, O GINOO, nga imo ginhimo nga pagapuy-an mo, sa Santuario, O GINOO, nga gintukud sang imo mga kamut.

18 Ang GINOO magahari sa gihapon kag sa walay katapusan.

19 Kay nagsugbo sa dagat ang kabayo ni Faraon pati ang iya mga kangga kag ang iya mga manugkabayo, kag ginpabalik sang GINOO ang mga tubig sang dagat sa ibabaw nila; apang ang kaanakan sang Israel naglakat sa mamala nga duta sa tunga sang dagat.

20 ś Kag si Miriam nga manalagna nga babaye, ang utud ni Aaron, nag-uyat sing pandarita sa iya kamut; kag naggowa ang tanan nga babaye sa olihi niya nga may mga pandarita kag mga sinaut.

21 Kag si Miriam nagsabat sa ila, Ambahan kamo sa GINOO, kay nagdaug sia sing mahimayaon; ang kabayo kag ang iya manugsakay ginpilak niya sa dagat.

22 Gani gintuytuyan ni Moises ang Israel gikan sa Mapulang dagat, kag nagpadayon sila sa kamingawan sang Sur; kag naglakat sila sing tatlo ka adlaw sa kamingawan, kag wala makakita sing tubig.

23 ś Kag sang nag-abut sila sa Mara, indi sila makainum sang mga tubig sang Mara, kay mapait ini: busa ginhingalanan ini Mara.

24 Kag nagkumud ang katawohan batok kay Moises, nga nagasiling, Ano bala ang amon imnon?

25 Kag nagtuaw sia sa GINOO; kag ginpakitaan sia sang GINOO sing isa ka kahoy, nga sang ginhaboy niya ini sa mga tubig, ang mga tubig nagtam-is: didto naghimo sia sa ila sing palatukuran kag pagsolondan, kag didto gintilawan niya sila,

26 Kag nagsiling, Kon ikaw magpamati sing matalupangdon gid sa tingug sang GINOO nga imo Dios, kag maghimo sing matadlong sa iya itololok, kag magpamati sang iya mga sogo, kag maghuput sang tanan niyang palatukuran, indi ako magbutang sa imo sining bisan ano nga mga balatian, nga ginbutang ko sa mga Egiptohanon: kay ako amo ang GINOO nga nagaayo sa imo.

27 ś Kag nag-abut sila sa Elim, diin may napulog duha ka bobon sang tubig, kag kapitoan ka palma nga kahoy: kag nagpahamtang sila sing kampo didto sa luyo sang mga tubig.

KAPITULO 16

KAG nagpanlakatan sila gikan sa Elim, kag ang bug-os nga katilingban sang kaanakan sang Israel nag-abut sa kamingawan sang Sin, nga yara sa ulut sang Elim kag sang Sinai, sa ikapulo kag lima nga adlaw sang ikaduha nga bulan sa tapus nga nakagowa sila sa duta sang Egipto.

2 Kag ang bug-os nga katilingban sang kaanakan sang Israel nagkumud batok kay Moises kag kay Aaron sa kamingawan:

3 Kag nagsiling ang kaanakan sang Israel sa ila, Buut namon sa Dios nga nagkalamatay kami kuntani sa kamut sang GINOO sa duta sang Egipto, sang kami nagalingkod sa luyo sang mga lalagaan sang unud, kag sang nagakaon sing tinapay tubtub mabusug; kay gindala ninyo kami sa sining kamingawan, sa pagpatay sa gutum sining bug-os nga katilingban.

4 ś Niyan ang GINOO nagsiling kay Moises, Yari karon, paulanon ko sa inyo ang tinapay gikan sa langit; kag ang katawohan magagowa kag magatipon sa adlawadlaw sang bahin sa tagsa ka adlaw, agud nga akon sila matilawan, kon magalakat sila sa akon kasogoan, ukon indi.

5 Kag mahanabu, nga sa ikan-um nga adlaw nga sila magaaman sinang ila matipon; kag manginpilo ini sa kadamuon nga ila matipon sa tagsa ka adlaw.

6 Kag nagsiling si Moises kag si Aaron sa tanan nga kaanakan sang Israel, Sa kahaponon, niyan makilala ninyo nga ang GINOO nagpagowa sa inyo gikan sa duta sang Egipto:

7 Kag sa kaagahon, niyan makita ninyo ang himaya sang GINOO; kay sia nagapamati sang inyo mga pagkumud batok sa GINOO: kag ano bala kami, nga nagakumud kamo batok sa amon?

8 Kag si Moises nagsiling, Mangin-amo ini, kon ang GINOO maghatag sa inyo sa kahaponon sing unud nga kaonon, kag sa kaagahon tinapay nga makabusug; kay ang GINOO nakabati sang inyo mga pagkumud nga ginkumud ninyo batok sa iya: kag ano bala kami? ang inyo mga pagkumud indi batok sa amon, kondi batok sa GINOO.

9 ś Kag si Moises nagpamolong kay Aaron, Isiling sa bug-os nga katilingban sang kaanakan sang Israel, Palapit sa atubangan sang GINOO: kay sia nakabati sang inyo mga pagkumud.

10 Kag nahanabu, sang nagpamolong si Aaron sa bug-os nga katilingban sang kaanakan sang Israel, nga naglantaw sila nayon sa kamingawan, kag, yari karon, ang himaya sang GINOO nagpahayag sa panganud.

11 ś Kag ang GINOO nagpamolong kay Moises, nga nagasiling,

12 Ako nakabati sang mga pagkumud sang kaanakan sang Israel: ipamolong sa ila, nga nagasiling, Sa kahaponon magakaon kamo sing unud, kag sa kaagahon busgon kamo sing tinapay; kag mahibaloan ninyo nga ako ang GINOO nga inyo Dios.

13 Kag nahanabu, nga sa kahaponon nagsaka ang mga umbok, kag naghil-ob sang kampo: kag sa kaagahon ang ton-og yara sa palibut sang katilingban.

14 Kag sang naghayaw ang ton-og, yari karon, sa kadaygan sang kamingawan may diotay nga matipolon nga butang, diotay subong sang binukbuk nga hielo nga maputi sa ibabaw sang duta.

15 Kag sang nakita ini sang kaanakan sang Israel, nagsinilingay sila, Ini mana: kay wala sila makahibalo kon ano yadto. Kag si Moises nagsiling sa ila, Ini ang tinapay nga ginhatag sang GINOO nga kaonon ninyo.

16 ś Ini amo ang butang nga ginsogo sang GINOO, Pamolot kamo sini, ang tagsa ka tawo sono sa iya makaon, isa ka omer sa tagsa ka tawo, sono sa kadamuon sang inyo mga tawo; magkuha kamo ang tagsa ka tawo tungud sa mga yadto sa iya mga layanglayang.

17 Kag ang kaanakan sang Israel naghimo sing subong sini, kag nagpamolot, ang iban madamu, ang iban diotay.

18 Kag sang ginsukub nila ini sa omer, sia nga nagpamolot sing madamu wala sing kapin, kag sia nga nagpamolot sing diotay wala sing kulang; ang tagsa ka tawo nagpamolot sono sa iya makaon.

19 Kag si Moises nagsiling, Wala sing tawo nga magbilin sini tubtub sa aga.

20 Apang wala sila magpamati kay Moises; apang iban sa ila nagbilin sini tubtub sa aga, kag gin-udlan ini, kag nagbaho: kag nagsingkal batok sa ila si Moises.

21 Kag nagpamolot sila sini agaaga, ang tagsa ka tawo sono sa iya makaon: kag sang nag-init ang adlaw, natunaw ini.

22 ś Kag nahanabu, nga sa adlaw nga ikan-um nagpamolot sila sing pilo nga kadamuon sang tinapay, duha ka omer kada isa ka tawo: kag nagkadto ang tanan nga manugdumala sang katilingban kag nagsugid kay Moises.

23 Kag sia nagsiling sa ila, Ini amo inang ginsiling sang GINOO, Buwas amo ang pahuway sang balaan nga sabbath sa GINOO: bibingkaha ninyo inang inyo bibingkahon karon nga adlaw, kag laga-a ang inyo lalaga-on; kag inang mabilin itigana sa inyo tubtub sa aga.

24 Kag gintigana nila ini tubtub sa aga, sono sa ginsogo ni Moises: kag wala nagbaho, kag wala pag-udla ini.

25 Kag si Moises nagsiling, Kaona ninyo ina karon nga adlaw; kay karon nga adlaw isa ka sabbath sa GINOO: karon nga adlaw indi kamo makakita sini sa latagon.

26 Sa anum ka adlaw magapamolot kamo sini; apang sa ikapitong adlaw, nga amo ang sabbath, wala sini.

27 ś Kag nahanabu, sa adlaw nga ikapito ang iban nga katawohan naggowa sa pagpamolot, kag wala sila sing nakita.

28 Kag ang GINOO nagsiling kay Moises, Tubtub pa bala san-o magadumili kamo sa pagtuman sang akon mga sogo kag akon mga kasogoan?

29 Tan-awa, kay ang GINOO naghatag sa inyo sang sabbath, busa nagahatag sia sa inyo sa ikan-um nga adlaw sang tinapay sa duha ka adlaw; magpabilin ang tagsa ka tawo sa iya duug, dili maghalin ang bisan sin-ong tawo sa iya duug sa adlaw nga ikapito.

30 Gani nagpahuway ang katawohan sa adlaw nga ikapito.

31 Kag ang panimalay sang Israel naghingalan sini Mana: kag kaangay ini sang liso nga culantro, maputi; kag ang iya lalim subong sang mga tinapay nga manipis nga may dugus.

32 ś Kag si Moises nagsiling, Ini amo ang butang nga ginasogo sang GINOO, Pun-a ang isa ka omer sini nga tagoon sa inyo mga kaliwatan; agud nga makita nila ang tinapay nga ginpakaon ko sa inyo sa kamingawan, sang pagpagowa ko sa inyo gikan sa duta sang Egipto.

33 Kag si Moises nagsiling kay Aaron, Kuha ka sing kolon, kag butangi sing isa ka omer sang mana, kag ibutang ini sa atubangan sang GINOO, nga tagoon sa inyo mga kaliwatan.

34 Sono sa ginsogo sang GINOO kay Moises, sa amo si Aaron nagbutang sini sa atubangan sang Pagpamatuud, nga tagoon.

35 Kag nagkaon sang mana ang kaanakan sang Israel sing kap-atan ka tuig, tubtub nga nag-abut sila sa duta nga ginapuy-an; nagkaon sila sang mana, tubtub nga nagsulud sila sa mga ginsakpan sang duta sang Canaan.

36 Karon ang isa ka omer ikapulo nga bahin sang isa ka efa.

KAPITULO 17

KAG ang bug-os nga katilingban sang kaanakan sang Israel naglakat halin sa kamingawan sang Sin, sono sa ila mga pagpanlakatan, sono sa sogo sang GINOO, kag nagpahamtang sa Refidim: kag wala sing tubig nga imnon sang katawohan.

2 Busa ang katawohan nagbasul kay Moises, kag nagsiling, Hatagi kami sing tubig nga mainum namon. Kag si Moises nagsiling sa ila, Ngaa bala nga ginabasol ninyo ako? ngaa bala nga ginasulay ninyo ang GINOO?

3 Kag didto ang katawohan gin-uhaw sing tubig; kag nagkumud ang katawohan batok kay Moises, kag nagsiling, Sa ano bala nga kabangdanan ini nga ginpagowa mo kami gikan sa Egipto, sa pagpatay sa amon kag sa amon kabataan kag sa amon kahayupan sa kauhaw?

4 Kag nagtuaw si Moises sa GINOO, nga nagasiling, Ano bala ang himoon ko sa sining katawohan? daw batohon na nila ako.

5 Kag ang GINOO nagsiling kay Moises, Una ka sa katawohan, kag magdala upud sa imo sang mga tigulang sang Israel; kag ang imo sungkud, nga ginhampak mo sa suba, dalha sa imo kamut, kag lakat ka.

6 Yari karon, ako magatindug sa atubangan nimo didto sa ibabaw sang dakung bato sa Horeb; kag hampakon mo ang dakung bato, kag magagowa sa sini ang tubig, agud nga makainum ang katawohan. Kag ginhimo ni Moises ang subong sini sa itololok sang mga tigulang sang Israel.

7 Kag ginhingalanan niya ang duug Masa, kag Meriba, bangud sang pagpamasol sang kaanakan sang Israel, kag bangud nga ginsulay nila ang GINOO, nga nagasiling, Yari bala ang GINOO sa tunga naton, ukon wala?

8 ś Niyan nag-abut si Amalec, kag nag-away batok sa Israel sa Refidim.

9 Kag si Moises nagsiling kay Josue, Pili ka sing mga lalaki sa aton, kag gowa, awaya si Amalec: buwas magatindug ako sa putokputokan sang bakolod nga yara ang sungkud sang Dios sa akon kamut.

10 Gani ginhimo ni Josue sono sa ginsiling sa iya ni Moises, kag nagpakig-away kay Amalec: kag si Moises, si Aaron, kag si Hur nagtaklad sa putokputokan sang bakolod.

11 Kag nahanabu, sang si Moises magbayaw sang iya kamut, nga ang Israel nagdaug: kag sang ginholog niya ang iya kamut, si Amalec nagdaug.

12 Apang kinapoy ang mga kamut ni Moises; kag nagkuha sila sing bato, kag ginbutang ini sa idalum niya, kag naglingkod sia sa sini; kag si Aaron kag si Hur nagtib-ong sang iya mga kamut, ang isa sa isa ka kilid, kag ang isa sa isa ka kilid; kag ang iya mga kamut malig-on tubtub sa pagtunud sang adlaw.

13 Kag ginlaglag ni Josue si Amalec kag ang iya katawohan sa sulab sang espada.

14 Kag ang GINOO nagsiling kay Moises, Isulat ini sa libro subong nga handumanan, kag basahon ini sa idulungug ni Josue: kay panason ko sing bug-os ang handumanan ni Amalec gikan sa idalum sang langit.

15 Kag si Moises nagpatindug sing halaran, kag ginhingalanan niya ini Jehovah-nissi:

16 Kay sia nagsiling, Bangud ang GINOO nagsumpa nga ang GINOO magaaway batok kay Amalec gikan sa kaliwatan pa kaliwatan.

KAPITULO 18

SANG si Jetro, ang pari sang Midian, ugangan ni Moises, nakabati sang tanan nga ginhimo sang Dios tungud kay Moises, kag tungud sa Israel nga iya katawohan, kag nga ginpagowa sang GINOO ang Israel sa Egipto;

2 Niyan si Jetro, ugangan ni Moises, nagkuha kay Zipora, asawa ni Moises, sa tapus nga ginpapauli niya sia,

3 Kag ang iya duha ka anak nga lalaki; nga ang isa sa ila ginhingalanan Gersom; kay nagsiling sia, Nanginmanlulugayaw ako sa duta nga dumoloong:

4 Kag ang ngalan sang isa Eliezer; kay ang Dios sang akon amay, siling niya, akon kabulig, kag nagluwas sa akon sa espada ni Faraon:

5 Kag si Jetro, ugangan ni Moises, nag-abut upud ang iya mga anak nga lalaki kag ang asawa niya kay Moises sa kamingawan, diin sia nagpahamtang sang kampo sa bukid sang Dios:

6 Kag sia nagsiling kay Moises, Ako nga imo ugangan nga si Jetro nagakari sa imo, kag ang imo asawa, kag ang iya duha ka anak nga lalaki upud sa iya.

7 ś Kag si Moises naggowa sa pagsugata sa iya ugangan, kag nagyaub, kag naghaluk sa iya; kag nagpamangkotanay sila sang ila kahimtangan; kag nagsulud sila sa layanglayang.

8 Kag ginsugid ni Moises sa iya ugangan ang tanan nga ginhimo sang GINOO kay Faraon kag sa mga Egiptohanon tungud sang Israel, kag ang tanan nga kabudlayan nga nag-abut sa ila sa dalanon, kag kon paano ang pagluwas sa ila sang GINOO.

9 Kag nagkalipay si Jetro tungud sang tanan nga pagkaayo nga nahimo sang GINOO sa Israel, nga ginluwas niya gikan sa kamut sang mga Egiptohanon.

10 Kag si Jetro nagsiling, Bulahan ang GINOO, nga nagluwas sa inyo sa kamut sang mga Egiptohanon, kag sa kamut ni Faraon, nga nagluwas sang katawohan gikan sa idalum sang kamut sang mga Egiptohanon.

11 Karon nakilala ko nga ang GINOO labi pa kadaku sa tanan nga dios: kay sa butang nga sa diin sila nagpabugal sia labaw sa ila.

12 Kag si Jetro, ugangan ni Moises, nagkuha sing halad nga sinonog kag mga halad nga sa Dios: kag si Aaron nagkari, kag ang tanan nga tigulang sang Israel, sa pagkaon sing tinapay upud sa ugangan ni Moises sa atubangan sang Dios.

13 ś Kag nahanabu sa madason nga adlaw, nga si Moises naglingkod sa paghukom sa katawohan: kag ang katawohan nagtindug sa palibut ni Moises kutub sa aga tubtub sa kahaponon.

14 Kag sang nakita sang ugangan ni Moises ang tanan nga ginhimo niya sa katawohan, nagsiling sia, Ano bala ining butang nga ginahimo mo sa katawohan? ngaa bala nga nagalingkod ka nga ikaw lamang, kag ang bug-os nga katawohan nagatindug sa palibut nimo kutub sa aga tubtub sa kahaponon?

15 Kag si Moises nagsiling sa iya ugangan, Bangud nga ang katawohan nagakari sa akon sa pagpakisayud sa Dios:

16 Kon may kasaba sila, nagakari sila sa akon; kag ako nagahukom sa tunga sang isa kag isa, kag ginapakilala ko sila sang mga palatukuran sang Dios, kag sang iya mga kasogoan.

17 Kag ang ugangan ni Moises nagsiling sa iya, Ang butang nga ginahimo mo indi maayo.

18 Magaas-as ikaw sa pagkamatuud, ikaw, kag ang ining katawohan nga upud sa imo: kay ining butang tama kabug-at sa imo; indi ka makasarang sa paghimo sini nga ikaw lamang.

19 Pamatii karon ang akon tingug, ako magalaygay sa imo, kag ang Dios magaupud sa imo: Magmanugpangatubang ikaw sang katawohan sa Dios, agud nga makadala ka sang mga kasaba sa Dios:

20 Kag magtudlo ka sa ila sang mga pagsolondan kag mga kasogoan, kag pakilalahon sila sang dalan nga kinahanglan nila laktan, kag sang buhat nga kinahanglan nila himoon.

21 Labut pa magpangita ka sa tunga sang tanan nga katawohan sing mga lalaki nga sangkul, nga mahadlukon sa Dios, mga lalaki nga maminatud-on, nga nagadumut sang kaibug; kag ibutang sila sa ibabaw nila, nga mga manugdumala sang linibo, kag mga manugdumala sang ginatus, mga manugdumala sang kinalim-an, kag mga manugdumala sang tagnapulo:

22 Kag pahukma sila sa katawohan sa tanan nga panag-on: kag mangin-amo, nga ang tagsa ka daku nga kasaba dalhon nila sa imo, apang ang tagsa ka magamay nga kasaba sila ang magahukom: sa sini magalabi kahapus sa imo, kag sila magadala sang lulan upud sa imo.

23 Kon himoon mo ining butang, kag ang Dios magsogo sa imo sing subong, niyan makabatas ka, kag ining bug-os nga katawohan magakadto sa ila duug sa paghidait.

24 Gani ginpamatian ni Moises ang tingug sang iya ugangan, kag ginhimo ang tanan nga nasiling niya.

25 Kag ginpili ni Moises ang mga lalaki nga sangkul sa bug-os nga Israel, kag ginbutang sila nga mga pangolo sang katawohan, mga manugdumala sang linibo, mga manugdumala sang ginatus, mga manugdumala sang kinalim-an, kag mga manugdumala sang tagnapulo.

26 Kag sila naghukom sang katawohan sa tanan nga panag-on: ang mga kasaba nga mabudlay gindala nila kay Moises, apang ang tagsa ka magamay nga kasaba sila ila naghukom.

27 ś Kag gintugutan ni Moises sa pagpauli ang iya ugangan; kag nagkadto sia sa iya duta.

KAPITULO 19

SA ikatlong bulan, sang paggowa sang kaanakan sang Israel gikan sa duta sang Egipto, sa among adlaw nag-abut sila sa kamingawan sang Sinai.

2 Kay nagtaliwan sila gikan sa Refidim, kag nag-abut sa kamingawan sang Sinai, kag nagpahamtang sa kamingawan; kag didto ang Israel nagpahamtang sang kampo sa atubang sang bukid.

3 Kag si Moises nagtaklad pakadto sa Dios, kag ang GINOO nagtawag sa iya gikan sa bukid, nga nagasiling, Amo ini ang isiling mo sa panimalay ni Jacob, kag sugiri ang kaanakan sang Israel;

4 Kamo nakakita sang ginhimo ko sa mga Egiptohanon, kag kon paano nga gindala ko kamo sa ibabaw sang mga pakpak sang mga aguila, kag gindala kamo sa akon.

5 Busa karon, kon tumanon ninyo sing totoo ang akon tingug, kag huptan ang akon katipan, niyan mangin pinasahi nga bahandi kamo sa akon labaw sa tanan nga katawohan: kay ang bug-os nga duta akon:

6 Kag kamo mangin isa ka ginharian nga mga pari sa akon, kag isa ka pungsud nga balaan. Ini amo ang mga polong nga ipamolong mo sa kaanakan sang Israel.

7 ś Kag si Moises nag-abut kag nagpatawag sang mga tigulang sang katawohan, kag ginpahayag sa atubangan nila ini tanan nga mga polong nga ginsogo sa iya sang GINOO.

8 Kag ang bug-os nga katawohan nagsabat sing dungan, kag nagsiling, Ang tanan nga napamolong sang GINOO himoon namon. Kag ginsugid ni Moises sa GINOO ang mga polong sang katawohan.

9 Kag ang GINOO nagsiling kay Moises, Yari karon, ako nagakari sa imo sa isa ka madamul nga panganud, agud nga ang katawohan makabati kon magpakighambal ako sa imo, kag magtoo sa imo sa gihapon. Kag ginsugid ni Moises ang mga polong sang katawohan sa GINOO.

10 ś Kag ang GINOO nagsiling kay Moises, Lakat ka sa katawohan, kag pakabalaana sila karon nga adlaw kag buwas, kag magbunak sila sang ila mga bayo,

11 Kag maghanda sa ikatlong adlaw: kay sa ikatlong adlaw ang GINOO magapanaug sa itololok sang bug-os nga katawohan sa ibabaw sang bukid nga Sinai.

12 Kag magabutang ka sing mga dulunan sa katawohan sa palibut, nga nagasiling, Mag-andam kamo, nga indi kamo magtaklad sa bukid, ukon magtandug sang dulunan sini: ang bisan sin-o nga magtandug sang bukid patyon sing totoo:

13 Wala sing kamut nga magtandug sini, kondi sia pagabatohon sing totoo, ukon panaon; bisan ini sapat ukon tawo, indi sia mabuhi: kon magtonog sing malawig ang budyong, magapalapit sila sa bukid.

14 ś Kag si Moises nagdulhog gikan sa bukid pakadto sa katawohan, kag ginpakabalaan ang katawohan; kag nagbunak sila sang ila mga bayo.

15 Kag nagsiling sia sa katawohan, Maghanda kamo sa ikatlong adlaw: dili kamo magpalapit sa inyo mga asawa.

16 ś Kag nahanabu sa kaagahon sang ikatlong adlaw, nga may mga daguub kag mga kilat, kag isa ka madamul nga panganud sa ibabaw sang bukid, kag tonog sang budyong nga tama katonog; sa bagay nga nagkurug ang bug-os nga katawohan nga yara sa kampo.

17 Kag ginpagowa ni Moises ang katawohan gikan sa kampo sa pagsugata sa Dios; kag nagtindug sila sa kunsaran sang bukid.

18 Kag ang bukid nga Sinai nagaaso sing bug-os, bangud nga ang GINOO nagpanaug sa ibabaw sini sa kalayo: kag ang aso sini nagtub-ok subong sang aso sang horno, kag ang bug-os nga bukid nagkurug sing mabaskug gid.

19 Kag sang ang tingug sang budyong nagtonog sing malawig, kag nagtonog pa gid nga nagtonog, si Moises nagpamolong, kag ang Dios nagsabat sa iya sa tingug.

20 Kag ang GINOO nagpanaug sa ibabaw sang bukid nga Sinai, sa putokputokan sang bukid: kag gintawag sang GINOO si Moises sa putokputokan sang bukid; kag si Moises nagtaklad.

21 Kag ang GINOO nagsiling kay Moises, Dulhog ka, sogoa ang katawohan, basi nga maglakbang sila sa panolok sa GINOO, kag mawala ang madamu sa ila.

22 Kag ang mga pari man, nga nagapalapit sa GINOO, magpakabalaan sang ila kaugalingon, agud nga ang GINOO indi magtupa sa ila.

23 Kag si Moises nagsiling sa GINOO, Ang katawohan indi makataklad sa bukid nga Sinai: kay ikaw nagtulin sa amon, nga nagasiling, Butangi sing mga dulunan sa palibut sang bukid, kag pakabalaana ini.

24 Kag ang GINOO nagsiling sa iya, Palayo, dulhog ka, kag magtaklad ka, ikaw, kag si Aaron upud sa imo: apang ang mga pari kag ang katawohan dili maglakbang sa pagtaklad pakadto sa GINOO, agud nga indi sia magtupa sa ila.

25 Gani si Moises nagdulhog pakadto sa katawohan, kag nagpamolong sa ila.

KAPITULO 20

KAG ang Dios naghambal sini tanan nga mga polong, nga nagasiling,

2 Ako ang GINOO nga imo Dios, nga nagpagowa sa imo gikan sa duta sang Egipto, sa balay sang kahiolipnan.

3 Dili ka maghuput sing iban nga mga dios sa atubangan ko.

4 Dili ka maghimo nga sa imo sing bisan ano nga imahen nga tinigban, ukon bisan ano nga kaangay sang bisan anong butang nga yara sa langit sa ibabaw, ukon yara sa duta sa idalum, ukon yara sa tubig sa idalum sang duta:

5 Dili ka magyaub sa ila, ukon mag-alagad sa ila: kay ako ang GINOO nga imo Dios isa ka maimon nga Dios, nga nagapaduaw sang kasal-anan sang mga amay sa mga anak tubtub sa ikatlo kag sa ikap-at nga kaliwatan sang mga nagadumut sa akon;

6 Kag nagapakita sing kalooy sa mga linibo sang mga nagahigugma sa akon, kag nagahuput sang akon mga sogo.

7 Dili ka maggamit sang ngalan sang GINOO nga imo Dios sa wala sing kapuslanan; kay indi pagkabigon sang GINOO nga wala sing sala ang nagagamit sang iya ngalan sa walay kapuslanan.

8 Dumduma ang adlaw nga sabbath, sa pagpakabalaan sini.

9 Sa anum ka adlaw magpangabudlay ka, kag maghimo sang tanan mong buluhaton:

10 Apang ang ikapitong adlaw amo ang sabbath sa GINOO nga imo Dios: sa sini dili ka maghimo sing bisan anong buluhaton, ikaw, ukon ang imo anak nga lalaki, ukon ang imo anak nga babaye, ang imo alagad nga lalaki, ukon ang imo alagad nga babaye, ukon ang imo kahayupan, ukon ang dumuloong nga yara sa sulud sang imo mga gawang:

11 Kay sa anum ka adlaw ginhimo sang GINOO ang langit kag ang duta, ang dagat, kag ang tanan nga yara sa ila, kag nagpahuway sa ikapitong adlaw: busa ginpakamaayo sang GINOO ang adlaw nga sabbath, kag ginpakabalaan ini.

12 ś Tahora ang imo amay kag ang imo iloy: agud nga ang imo mga adlaw maglawig sa duta nga ginahatag sa imo sang GINOO nga imo Dios.

13 Dili ka magpatay.

14 Dili ka magpanglahi.

15 Dili ka magpangawat.

16 Dili ka magsaksi sing dimatuud batok sa imo isigkatawo.

17 Dili ka magkaibog sang balay sang imo isigkatawo, dili ka magkaibog sang asawa sang imo isigkatawo, ukon sang iya alagad nga lalaki, ukon sang iya alagad nga babaye, ukon sang iya baka, ukon sang iya asno, ukon bisan ano nga butang nga iya sang imo isigkatawo.

18 ś Kag nakit-an sang bug-os nga katawohan ang mga pagpanaguub, kag ang mga kilat, kag ang tonog sang budyong, kag ang bukid nga nagaaso: kag sang nakita ini sang katawohan, naghalin sila, kag nagtindug sa malayo.

19 Kag nagsiling sila kay Moises, Pamolong ka sa amon, kag kami magapamati: apang dili ang Dios magpamolong sa amon, basi nga mapatay kami.

20 Kag si Moises nagsiling sa katawohan, Dili kamo mahadluk: kay nagkari ang Dios sa pagtilaw sa inyo, kag nga ang kahadluk sa iya manginyara sa atubangan ninyo, agud nga indi kamo magpakasala.

21 Kag ang katawohan nagtindug sa malayo, kag si Moises nagpalapit sa pitipit nga kadudulman diin yara ang Dios.

22 ś Kag ang GINOO nagsiling kay Moises, Amo ini ang isiling mo sa kaanakan sang Israel, Kamo nakakita nga ako nagpakighambal sa inyo gikan sa langit.

23 Dili kamo maghimo sing mga dios nga pilak upud sa akon, ukon maghimo nga sa inyo sing mga dios nga bulawan.

24 ś Halaran nga duta himoon mo sa akon, kag ihalad sa ibabaw sini ang imo mga halad nga sinonog, kag ang imo mga halad sa paghidait, ang imo mga carnero, kag ang imo mga baka: sa tanan nga duug diin ipahanumdum ko ang akon ngalan magakari ako sa imo, kag magapakamaayo ako sa imo.

25 Kag kon maghimo ka sing halaran nga bato sa akon, dili mo pagpatindugon ini sa bato nga binasbasan: kay kon gamitan mo ini sang imo galamiton, gindagtaan mo ini.

26 Kag dili ka magsaka sa mga halintang sa akon halaran, agud nga indi masapwan didto ang imo kahubo.

KAPITULO 21

KARON amo ini ang mga paghukom nga ibutang mo sa atubangan nila.

2 Kon magbakal ka sing alagad nga Hebreo, magaalagad sia sing anum ka tuig: kag sa ikapito magahalin sia nga hilway sa wala sing ano.

3 Kon nagsulud sia nga isa lamang, magahalin sia nga isa lamang: kon minyo sia, niyan magahalin ang iya asawa upud sa iya.

4 Kon ang iya agalon naghatag sa iya sing asawa, kag sia nag-anak sa iya sing mga anak nga lalaki ukon mga anak nga babaye; ang asawa kag ang iya mga anak mangin-iya sang iya agalon, kag ang alagad magahalin nga isa lamang.

5 Kag kon ang alagad magsiling sing maathag, Ginahigugma ko ang akon agalon, ang akon asawa, kag ang akon mga anak; indi ako maghalin nga hilway:

6 Niyan ang iya agalon magadala sa iya sa mga hukom; sia man magadala sa iya sa gawang, ukon sa bakalan; kag ang iya agalon magaboho sa iya dulunggan sang dulat; kag sia magaalagad sa iya sing dayon.

7 ś Kag kon ang isa ka tawo magbaligya sang iya anak nga babaye nga mangin-alagad, sia dili maghalin subong sang paghalin sang mga alagad nga lalaki.

8 Kon sia indi mahamut-an sang iya agalon, nga nagtiayon sa iya sa iya kaugalingon, niyan tugutan niya nga tubson sia: wala sia sing gahum sa pagbaligya sa iya sa pungsud nga dumoloong, sanglit nga nalimbongan niya sia.

9 Kag kon ipatiayon niya sia sa iya anak nga lalaki, kabigon niya sia subong nga mga anak nga babaye.

10 Kon magpangasawa sia sing isa pa; dili niya pagbuhinan ang iya pagkaon, ang iya panapton, kag ang iya katungdanan sa pagkatiayon.

11 Kag kon indi sia maghimo sining tatlo sa iya, niyan magahalin sia sing hilway sa wala sing kuarta.

12 ś Sia nga nagasakit sa isa ka tawo, sa bagay nga mapatay sia, patyon sing totoo.

13 Kag kon ang isa ka tawo wala magpuut, kondi nga ang Dios nagtugyan sa iya sa iya kamut; niyan magatangdo ako sing duug sa diin sia magapalagyo.

14 Apang kon ang isa ka tawo magkari nga madahas sa iya isigkatawo, sa pagpatay sa iya sa daya; kuhaon mo sia sa akon halaran, agud nga patyon sia.

15 ś Kag sia nga nagasakit sa iya amay, ukon sa iya iloy, patyon sing totoo.

16 ś Kag sia nga nagakawat sing tawo, kag nagabaligya sa iya, ukon kon masapwan sia sa iya kamut, patyon sia sing totoo.

17 ś Kag sia nga nagapakamalaut sa iya amay, ukon sa iya iloy, patyon sing totoo.

18 ś Kag kon mag-away ang mga tawo, kag ang isa magpilas sa isa sa bato, ukon sa iya inumol, kag wala sia mapatay, apang napahigda sia:

19 Kon makabangon na sia, kag makalakatlakat sa gowa sa iya sungkud, niyan manginhilway sia nga nagpilas sa iya: lamang magbayad sia sang tion niya nga nausik, kag ipabolong niya sia nga mag-ayo gid.

20 ś Kag kon ang isa ka tawo magbunal sang iya alagad, ukon sang iya alagad nga babaye, sa bilogon, kag mapatay sia sa iya kamut; silotan sia sing totoo.

21 Apang, kon buhi pa sia sa isa ukon duha ka adlaw, dili sia pagsilotan: kay sia iya kuarta.

22 ś Kon ang mga tawo mag-inaway, kag magsamad sang babaye nga nagadala, sa bagay nga mahologan sia, apang wala sing malain nga masonod: sia silotan sing totoo, sono sa ipabayad sa iya sang bana sang babaye; kag magabayad sia sono sa mapat-ud sang mga hukom.

23 Kag kon may malain nga masonod, niyan magabayad ka sing kabuhi sa kabuhi,

24 Mata sa mata, ngipon sa ngipon, kamut sa kamut, tiil sa tiil,

25 Sonog sa sonog, pilas sa pilas, labud sa labud.

26 ś Kag kon ang isa ka tawo magpilas sang mata sang iya alagad, ukon sang mata sang iya alagad nga babaye, agud nga malusuk ini; buhian niya sia nga hilway tungud sang iya mata.

27 Kag kon mabingaw niya ang ngipon sang iya alagad nga lalaki, ukon ang ngipon sang iya alagad nga babaye; buhian niya sia nga hilway tungud sang iya ngipon.

28 ś Kon ang isa ka baka magsungay sing lalaki ukon babaye, sa bagay nga mapatay sila: niyan ang baka batohon sing totoo, kag dili pagkaonon ang iya unud; apang ang tag-iya sang baka hilwayon.

29 Apang kon ang baka palasungay kutub sadto, kag napaandaman sini ang iya tag-iya, kag wala niya sia pagpasudla, kondi nga nakapatay sia sing lalaki ukon babaye; ang baka batohon, kag patyon man ang tag-iya.

30 Kon may ibutang nga kuarta nga gawad sa iya, niyan magahatag sia sing gawad tungud sa iya kabuhi bisan ano nga ipabayad sa iya.

31 Kon makasungay sia sing anak nga lalaki, ukon makasungay sing anak nga babaye, himoon sa iya sono sa sining paghukom.

32 Kon ang baka magtiklud sing alagad nga lalaki ukon alagad nga babaye; magahatag sia sing katloan ka siclo nga pilak sa ila agalon, kag ang baka batohon.

33 ś Kag kon ang isa ka tawo magbukas sing boho, ukon ang isa ka tawo magkutkut sing boho, kag wala niya ini pagtaboni, kag maholog didto ang baka ukon asno;

34 Ang tag-iya sang boho magabayad sing tumbas, kag magahatag sing kuarta sa tag-iya sini; kag ang sapat nga patay mangin-iya.

35 ś Kag kon ang baka sang isa ka tawo makasamad sang iya sang iban, sa bagay nga mapatay ini; niyan ibaligya nila ang baka nga buhi, kag tung-on nila ang iya bili; kag tung-on man nila ang baka nga patay.

36 Ukon kon nahibaloan nga ang baka palasungay kutub sadto, kag ang tag-iya wala magpasulud sa iya; magabayad sia sing baka tungud sa baka sing totoo; kag ang baka nga patay mangin-iya.

KAPITULO 22

KON ang isa ka tawo magkawat sing baka, ukon carnero, kag magpatay sini, ukon magbaligya sini; magabayad sia sing lima ka baka tungud sa isa ka baka, kag apat ka carnero tungud sa isa ka carnero.

2 ś Kon ang isa ka makawat makita nga nagaguhab, kag ginpilas sia sa bagay nga mapatay sia, wala sing dugo nga patuloon tungud sa iya.

3 Kon maadlawan sia, may dugo nga patuloon tungud sa iya; kay dapat mag-uli sia sing bug-os; kon wala sia, niyan ibaligya sia tungud sang iya ginkawat.

4 Kon ang ginkawat masapwan nga buhi sa iya gid kamut, bisan ini baka, ukon asno, ukon carnero; magabayad sia sing pilo.

5 ś Kon pahalban sang isa ka tawo ang isa ka uma ukon ulubasan, kag magbuhi sang iya sapat, kag maghalab sa uma sang iban nga tawo; magauli sia gikan sa labi gid kaayo sang iya kaugalingon nga uma, kag gikan sa labi gid kaayo sang iya kaugalingon nga ulubasan.

6 ś Kon magdabdab ang kalayo, kag magmakut sa katunukan, sa bagay nga masonog ang mga tumpi sang uyas, ukon ang alanyon nga uyas, ukon ang uma; ang nagsindot sang kalayo magauli sing totoo.

7 ś Kon ang isa ka tawo maghatag sa iya isigkatawo sing kuarta ukon pagkabutang nga taguon, kag kon kawaton ini sa balay sang tawo; kon makita ang makawat, magabayad sia sing pilo.

8 Kon ang makawat indi makita, niyan ang agalon sang balay pagadalhon sa mga hukom, sa pagtan-aw kon bala natandug niya ang mga pagkabutang sang iya isigkatawo.

9 Kay ang tanan nga bagay sang paglapas, kon ini nahanungud sa baka, sa asno, sa carnero, sa panapton, ukon sa bisan ano nga bagay sang butang nga nadula, nga ginasiling sang isa nga ina iya, ang kasuayon sang duha nga natungdan magaabut sa atubangan sang mga hukom; kag ang tagudilian sang mga hukom, magabayad sia sing pilo sa iya isigkatawo.

10 Kon ang isa ka tawo magtugyan sa iya isigkatawo sing asno, ukon baka, ukon carnero, ukon bisan ano nga sapat, sa pagpabantay; kag ini mapatay, ukon masamad, ukon gintabog, nga wala sing tawo nga makakita sini:

11 Niyan ang sumpa sa GINOO magapatunga sa ila nga duha, nga wala niya matandug ang mga pagkabutang sang iya isigkatawo; kag ang tag-iya sini magabaton sini, kag dili sia mag-uli.

12 Kag kon ginkawat ini sa iya, ulian niya ini sa tag-iya.

13 Kon ginkusnit ini, niyan dalhon niya ini nga saksi, kag dili sia magbayad sinang ginkusnit.

14 ś Kag kon ang isa ka tawo maghulam sing bisan ano sa iya isigkatawo, kag ini masamad, ukon mapatay, nga wala nagatambong ang tag-iya, ulian niya ini sing totoo.

15 Apang kon nagatambong ang iya tag-iya, dili sia magbayad: kon ini ginhinakayan, masulud ini sa iya hinakay.

16 ś Kag kon ang isa ka lalaki maghaylo sang isa ka dalaga nga wala matiayon, kag maghulid sa iya, dapat sia magdote sing totoo sa iya nga mangin-iya asawa.

17 Kon ang iya amay magdumili gid nga ihatag sia sa iya, sia magabayad sing kuarta sono sa dote sang mga ulay.

18 ś Dili mo pagtugutan nga magkabuhi ang aswang.

19 ś Ang bisan sin-o nga maghulid sa sapat patyon sing totoo.

20 ś Sia nga nagahalad sa bisan ano nga dios, luwas sa GINOO lamang, sia laglagon sing bug-os.

21 ś Dili mo paggamohon ang dumoloong, ukon pagpiguson sia: kay nangindumoloong kamo sa duta sang Egipto.

22 ś Dili ninyo pagpapiotan ang bisan sin-o nga balo nga babaye, ukon ilo nga bata sa amay.

23 Kon papiotan mo sila sa bisan ano nga bagay, kag magtuaw sila sa akon, sa pagkamatuud pamatian ko ang ila pagtuaw;

24 Kag magadabdab ang akon kasingkal, kag patyon ko kamo sa espada; kag ang inyo mga asawa manginbalo, kag ang inyo mga anak mangin-ilo sa amay.

25 ś Kon magpahulam ka sing kuarta sa bisan kay sin-o sang akon katawohan nga imol nga upud sa imo, dili ka magsubong nga manugpasaka sa iya, kag dili mo pagpasakaan sia.

26 Kon kuhaon mo gid nga kalig-onan ang panapton sang imo isigkatawo, iuli mo ini sa iya sa wala pa matunud ang adlaw:

27 Kay amo lamang ina ang iya panabon, ini iya panapton nga sa iya panit: sa ano bala sia magatolog? kag mahanabu, kon magtuaw sia sa akon, nga magapamati ako; kay maloloy-on ako.

28 ś Dili mo pagpasipalahan ang mga dios, ukon pagpakamalauton ang manuggahum sang imo katawohan.

29 ś Dili ka magpalantang sa paghalad sang nahauna sang imo luto nga mga bunga, kag sang imo mga ilimnon: ihatag mo sa akon ang panganay sang imo mga anak nga lalaki.

30 Himoon man nimo ini sa imo kabakahan, kag sa imo mga carnero: sa pito ka adlaw magaupud ini sa iya iloy; sa ikawalo nga adlaw ihatag mo ini sa akon.

31 ś Kag manginbalaan kamo nga mga tawo sa akon: kag dili kamo magkaon sang unud nga kinusnit sang mga sapat sa latagon; ipilak ninyo ini sa mga ido.

KAPITULO 23

DILI ka magmitlang sang dimatuud nga sugid: dili ka magbuylog sa malauton nga mangindimatarung nga saksi.

2 ś Dili ka magsonod sa kadam-an sa paghimo sing malaut; kag dili ka maghambal sa kasaba sa pagsonod sang kadam-an sa pagpatiko sang paghukom:

3 ś Kag dili ka magdampig sa imol nga tawo sa iya kasaba.

4 ś Kon masugata mo ang baka sang imo kaaway ukon ang iya asno nga nagtalang, iuli mo ini sa iya sing totoo.

5 Kon makita mo nga naglup-og tungud sa iya lulan ang asno nga iya sang nagadumut sa imo, kag dili mo buligan sia, dapat mo buligan sia sing totoo.

6 Dili mo pagpatikoon ang paghukom sang imo imol sa iya kasaba.

7 Palayo ka sa indi matuud nga butang; kag dili pagpatya ang inocente kag ang matarung: kay ako indi magpakamatarung sang malauton.

8 ś Kag dili ka magbaton sing hamham: kay ang hamham nagabulag sang mga maalam, kag nagapatiko sang mga polong sang mga matarung.

9 ś Dili mo man pagpiguson ang dumoloong: kay kamo nakahibalo sang tagiposoon sang dumuloong, kay sadto mga dumuloong kamo sa duta sang Egipto.

10 Kag sa anum ka tuig sab-ugan mo ang imo duta, kag tiponon ang mga patubas sini:

11 Apang sa ikapitong tuig papahuwayon mo ini kag pabay-an; agud nga makakaon ang imol sang imo katawohan: kag ang mabilin nila kaonon sang mga sapat sang latagon. Sa among bagay himoon mo sa imo katamnan sang ubas, kag sa imo katamnan sang olivo.

12 Sa anum ka adlaw himoon mo ang imo buluhaton, kag sa ikapitong adlaw magpahuway ka: agud nga makapahuway ang imo baka kag ang imo asno, kag ang anak nga lalaki sang imo alagad nga babaye, kag ang dumoloong, maumpawan.

13 Kag talupangdon ninyo ang tanan nga ginsiling ko sa inyo: kag dili magsambit sang ngalan sang iban nga mga dios, ukon mabatian ini sa imo baba.

14 ś Makatlo sa isa ka tuig hiwatan ako nimo sing isa ka pandut.

15 Hiwaton mo ang pandut sang tinapay nga walay tapay: (pito ka adlaw magkaon ka sing tinapay nga wala sing tapay, sono sa ginsogo ko sa imo, sa pinat-ud nga tion sa bulan sang Abib; kay sa sini naggowa ka gikan sa Egipto: kag walay sin-o nga magaatubang sa akon nga walay dala:)

16 Kag ang pandut sang ani, ang mga nahaunang bunga sang imo mga pinangabudlayan, nga ginasab-ug mo sa uma: kag ang pandut sang pagdamisag, nga sa katapusan sang tuig, kon magtipon ka sang imo mga pinangabudlayan sa uma.

17 Makatlo sa isa ka tuig ang tanan mong lalaki mag-atubang sa Ginoong DIOS.

18 Dili mo pag-ihalad ang dugo sang akon halad upud sa tinapay nga may tapay; ukon ang sapay sang akon halad pag-ibilin tubtub sa aga.

19 Ang nahauna sang mga nahaunang bunga sang imo duta dalhon mo sa sulud sang balay sang GINOO nga imo Dios. Dili mo paglagaon ang tinday sang kanding sa gatas sang iya inang.

20 ś Yari karon, nagapadala ako sang isa ka Anghel sa una nimo, sa pagbantay sa imo sa dalanon, kag sa pagdala sa imo sa duug nga gin-aman ko.

21 Mag-andam ka sa iya, kag tumana ang iya tingug, dili ka magpaugtas sa iya; kay indi sia magpatawad sang inyo mga paglapas: kay ang akon ngalan yara sa iya.

22 Apang kon tumanon mo sing totoo ang iya tingug, kag maghimo sang tanan nga ginasiling ko; niyan ako manginkaaway sa imo mga kaaway, kag kasumpung sa imo mga kasumpung.

23 Kay ang akon Anghel magauna sa imo, kag magadala sa imo sa mga Amornon, kag sa mga Hithanon, kag sa mga Pereznon, kag sa mga Canaanhon, kag sa mga Hevhanon, kag sa mga Jebusnon: kag papason ko sila.

24 Dili ka magyaub sa ila mga dios, ukon mag-alagad sa ila, ukon maghimo sono sa ila mga binuhatan: kondi laglagon mo sing bug-os sila, kag dugmukon sing bug-os gid ang ila mga imahen.

25 Kag mag-alagad kamo sa GINOO nga inyo Dios, kag sia magapakamaayo sang imo tinapay, kag sang imo tubig; kag kuhaon ko ang balatian gikan sa imo.

26 ś Wala na sing bisan sin-o nga mahologan, ukon magbaw-as, sa imo duta: tumanon ko ang kadamuon sang imo kaadlawan.

27 Ipadala ko ang akon kakugmat sa una nimo, kag lutuson ko ang tanan nga katawohan nga imo abutan, kag patal-ason ko ang tanan mong kaaway gikan sa imo.

28 Kag ipadala ko ang mga alingayo sa una nimo, nga magasobol sang Hevhanon, Canaanhon, kag Hithanon, sa imo atubangan.

29 Indi ko sila pagsobolon gikan sa atubangan nimo sa isa ka tuig; basi ang duta magmingaw, kag magbuad batok sa imo ang sapat sang latagon.

30 Sa amat-amat sobolon ko sila gikan sa atubangan nimo, tubtub nga magdugang ka, kag magpanubli sang duta.

31 Kag ibutang ko ang imo mga dulunan kutub sa Mapulang dagat tubtub sa dagat sang mga Filistinhon, kag kutub sa kamingawan tubtub sa suba: kay itugyan ko sa imo kamut ang mga pumuluyo sang duta; kag sobolon mo sila gikan sa atubangan nimo.

32 Dili ka magpakigkatipan sa ila, ukon sa ila mga dios.

33 Dili sila pagpapuy-on sa imo duta, basi nga pakasalaon ka nila batok sa akon: kay kon mag-alagad ka sa ila mga dios, sa pagkamatuud manginsiod ina sa imo.

KAPITULO 24

KAG nagsiling sia kay Moises, Taklad ka pakadto sa GINOO, ikaw, kag si Aaron, si Nadab, kag si Abiu, kag ang kapitoan sang mga tigulang sang Israel; kag simba kamo sa malayo.

2 Kag si Moises lamang ang magpalapit sa GINOO: apang dili sila magpalapit; kag ang katawohan dili magtaklad upud sa iya.

3 ś Kag si Moises nag-abut kag nagsugid sa katawohan sang tanan nga polong sang GINOO, kag sang tanan nga mga paghukom: kag ang bug-os nga katawohan nagsabat sa isa ka tingug, kag nagsiling, Ang tanan nga polong nga napamolong sang GINOO himoon namon.

4 Kag ginsulat ni Moises ang tanan nga polong sang GINOO, kag nagbangon sing aga pa, kag nagpatindug sing isa ka halaran sa kunsaran sang bukid, kag sang napulog duha ka haligi, sono sa napulog duha ka tribo sang Israel.

5 Kag nagpadala sia sing mga pamatan-on nga lalaki sang kaanakan sang Israel, nga nagdolot sing mga halad nga sinonog, kag naghalad sing mga halad sa paghidait nga mga baka sa GINOO.

6 Kag ginkuha ni Moises ang katunga sang dugo, kag ginbutang ini sa mga palanggana; kag ang katunga sang dugo ginwisik niya sa ibabaw sang halaran.

7 Kag ginkuha niya ang libro sang katipan, kag ginbasa sa idulungug sang katawohan: kag nagsiling sila, Ang tanan nga napamolong sang GINOO himoon namon, kag kami magmatinumanon.

8 Kag ginkuha ni Moises ang dugo, kag ginwisik sa katawohan, kag nagsiling, Yari karon ang dugo sang katipan, nga ginhimo sa inyo sang GINOO sono sini tanan nga polong.

9 ś Niyan nagtaklad si Moises, kag si Aaron, si Nadab, kag si Abiu, kag ang kapitoan sang mga tigulang sang Israel:

10 Kag nakita nila ang Dios sang Israel: kag yara sa idalum sang iya mga tiil ang daw nabanigan sang bato nga zafiro, kag daw langit gid sa iya katin-aw.

11 Kag wala niya pagtakdungi sang iya kamut ang mga dungganon sa kaanakan sang Israel: labut pa nakita nila ang Dios, kag nagkaon kag nag-inum.

12 ś Kag ang GINOO nagsiling kay Moises, Taklad ka pakari sa akon sa bukid, kag maghulat didto: kag ihatag ko sa imo ang mga tapitapi nga bato, kag ang isa ka kasogoan, kag ang mga sogo nga nasulat ko; agud nga matudlo mo sa ila.

13 Kag si Moises nagtindug, kag si Josue nga ministro niya: kag si Moises nagtaklad sa bukid sang Dios.

14 Kag nagsiling sia sa mga tigulang, Hulata ninyo kami diri, tubtub nga magbalik kami sa inyo: kag, yari karon, upud sa inyo si Aaron kag si Hur: kon ang bisan sin-o nga tawo may bisan ano nga kasaba, magdangup sia sa ila.

15 Kag si Moises nagtaklad sa bukid, kag ginputus sang isa ka panganud ang bukid.

16 Kag ang himaya sang GINOO nagpabilin sa ibabaw sang bukid nga Sinai, kag ang panganud nagputus sini sa anum ka adlaw: kag sa ikapitong adlaw gintawag niya si Moises gikan sa tunga sang panganud.

17 Kag sa panolok sang kaanakan sang Israel ang dagway sang himaya sang GINOO kaangay sang kalayo nga nagahalonhon sa putokputokan sang bukid.

18 Kag si Moises nagsulud sa tunga sang panganud, kag nagtaklad sa bukid: kag didto si Moises sa bukid sing kap-atan ka adlaw kag kap-atan ka gab-i.

KAPITULO 25

KAG ang GINOO nagpamolong kay Moises, nga nagasiling,

2 Ipamolong sa kaanakan sang Israel, nga magdala sila sa akon sing isa ka dolot: sa tagsa ka tawo nga nagahatag sini sing kinabubut-on sa iya tagiposoon kuhaon ninyo ang akon dolot.

3 Kag amo ini ang dolot nga kuhaon ninyo sa ila; bulawan, kag pilak, kag saway,

4 Kag asul, kag purpura, kag escarlata, kag lino nga mapino, kag bulbul sang mga kanding,

5 Kag mga panit sang mga carnero nga lalaki nga nalugum sing mapula, kag mga panit sang mga badger, kag kahoy nga acasia,

6 Lana nga sa suga, mga pahumut nga sa lana nga ihalaplas, kag sa incienso nga mahamut,

7 Mga bato nga onice, kag mga bato nga inugtampok sa efod, kag sa hapin sa dughan.

8 Kag himoan nila ako sing santuario; agud nga ako makapuyo sa tunga nila.

9 Sono sa tanan nga ginapahayag ko sa imo, sono sa huwaran sang tabernakulo, kag sa huwaran sang tanan nga mga gamit sini, himoon ninyo gid ini sing subong.

10 ś Kag maghimo sila sing isa ka arka nga kahoy nga acasia: duha ka maniko kag tunga ang iya kalabaon, kag isa ka maniko kag tunga ang iya kasangkaron, kag isa ka maniko kag tunga ang iya kataason.

11 Kag taklapan mo ini sing bus-og nga bulawan, sa sulud kag sa gowa taklapan mo ini, kag maghimo ka sa ibabaw sini sing purungpurung nga bulawan palibut.

12 Kag magsalsal ka nga sa sini sing apat ka argolya nga bulawan, kag itakud sila sa iya apat ka pamusud; kag duha ka argolya sa isa ka kilid sini, kag duha ka argolya sa pihak nga kilid sini.

13 Kag maghimo ka sing mga yayongan nga kahoy nga acasia, kag taklapan sila sing bulawan.

14 Kag igolo mo ang mga yayongan sa mga argolya sa mga kilid sang arka, sa pagdala sang arka paagi sa ila.

15 Ibilin sa mga argolya sang arka ang mga yayongan: dili sila paghusloon sa sini.

16 Kag ibutang mo sa sulud sang arka ang pagpamatuud nga ihatag ko sa imo.

17 Kag maghimo ka sing lingkoran nga pakilooyan nga bulawan nga bus-og: duha ka maniko kag tunga ang iya kalabaon, kag isa ka maniko kag tunga ang iya kasangkaron.

18 Kag maghimo ka sing duha ka querubin nga bulawan, himoon mo sila sa sinalsal, sa duha ka ukbung sang lingkoran nga pakilooyan.

19 Kag maghimo ka sing isa ka querubin sa isa ka ukbung, kag isa ka querubin sa pihak nga ukbung: himoon ninyo ang mga querubin nga unay sa lingkoran nga pakilooyan sa iya duha ka ukbung.

20 Kag ang mga querubin magahumlad sang ila mga pakpak sa ibabaw, nga nagatabon ang ila mga pakpak sa lingkoran nga pakilooyan, kag ang ila mga nawung nagaatubangay; ang mga nawung sang mga querubin nagatamud sa lingkoran nga pakilooyan.

21 Kag itungtung mo ang lingkoran nga pakilooyan sa arka; kag sa sulud sang arka ibutang mo ang pagpamatuud nga ihatag ko sa imo.

22 Kag didto magapakigkita ako sa imo, kag magapakighambal ako sa imo gikan sa ibabaw sang lingkoran nga pakilooyan, sa tunga sang duha ka querubin nga yara sa ibabaw sang arka sang pagpamatuud, sang tanan nga butang nga isogo ko sa imo nga sa kaanakan sang Israel.

23 ś Maghimo ka man sing latok nga kahoy nga acasia: duha ka maniko ang iya kalabaon, kag isa ka maniko ang iya kasangkaron, kag isa ka maniko kag tunga ang iya kataason.

24 Kag taklapan mo ini sing puro nga bulawan, kag himoan ini sing isa ka purungpurung nga bulawan palibut.

25 Kag himoan mo ini sing sanipa nga isa ka dapal kasangkad palibut, kag himoan mo ini sing isa ka purungpurung nga bulawan sa palibut sang iya sanipa.

26 Kag himoan mo ini sing apat ka argolya nga bulawan, kag itakud ang mga argolya sa apat ka pamusud nga yara sa iya apat ka tiil.

27 Ang mga argolya malapit sa sanipa, nga bulutangan sang mga yayongan sa pagdala sang latok.

28 Himoon mo ang mga yayongan nga kahoy nga acasia, kag taklapan sila sing bulawan, agud nga ang latok madala paagi sa ila.

29 Kag himoan mo sang iya mga pinggan, kag sang iya mga kutsara, kag sang iya mga tabon, kag sang iya mga yahong, sa pagtabon sini: himoon mo sila gikan sa puro nga bulawan.

30 Kag sa ibabaw sang latok ibutang mo ang tinapay nga pahayag sa atubangan nakon sa gihapon.

31 ś Kag maghimo ka sing kandilero nga puro nga bulawan: sa sinalsal himoon ang kandilero: ang iya puno, kag ang iya mga sanga, ang iya mga gokop, ang iya mga puskol, kag ang iya mga bukad, mangin-unay sa sini.

32 Kag may anum ka sanga nga magagowa sa iya mga kilid; tatlo ka sanga sang kandilero sa isa ka kilid, kag tatlo ka sanga sang kandilero sa pihak nga kilid sini:

33 Tatlo ka gokop nga ginhimo kaangay sang mga almendro, ang tagsa may isa ka puskol kag isa ka bukad sa isa ka sanga; kag tatlo ka gokop nga ginhimo kaangay sang sang mga almendro sa pihak nga sanga, nga may isa ka puskol kag isa ka bukad: amo ini sa anum ka sanga nga nagagowa sa kandilero.

34 Kag sa kandilero apat ka gokop nga ginhimo kaangay sang mga almendro, nga may ila nga mga puskol kag mga bukad.

35 Kag isa ka puskol sa ubus sang duha ka sanga nga unay sa iya, kag isa ka puskol sa ubus sang duha ka sanga nga unay sa iya, kag isa ka puskol sa ubus sang duha ka sanga nga unay sa iya, nga sa anum ka sanga nga nagagowa sa kandilero.

36 Ang ila mga puskol kag ang ila mga sanga unay sa sini: ang bug-os sini unay nga sinalsal nga bulawan nga puro.

37 Kag maghimo ka sa sini sing pito ka suga: kag sindihan nila ang mga suga sini, agud nga maghatag sila sing kapawa sa atubangan sini.

38 Kag ang iya mga kimpit, kag ang iya mga alagbonan, mangin-puro nga bulawan.

39 Sa isa ka talanton nga bulawan nga puro himoon niya ini, pati ini tanan nga suludlan.

40 Kag tan-awa nga himoon mo sila sono sa huwaran nila, nga ginpakita sa imo sa bukid.

KAPITULO 26

LABUT PA maghimo ka sang tabernakulo nga may napulo ka kumbung nga lino nga mapino nga binolong, kag asul, kag purpura, kag escarlata: nga may mga querubin nga nahimo sing sampaton himoon mo sila.

2 Ang kalabaon sang tagsa ka kumbung duha ka pulo kag walo ka maniko, kag ang kasangkaron sang tagsa ka kumbung apat ka maniko: kag isa lamang ka takus ang tanan nga kumbung.

3 Ang lima ka kumbung tambihon ang isa sa isa; kag ang iban nga lima ka kumbung tambihon ang isa sa isa.

4 Kag himoan mo sing mga sulusingsing nga asul ang kilid sang kumbung nga nahigad gid sa tinambitambi; kag subong sini man pagahimoon mo sa nahigad gid nga kilid sang isa pa ka kumbung, sa pagtambi sang ikaduha.

5 Himoan mo sing kalim-an ka sulusingsing ang isa ka kumbung, kag himoan mo sing kalim-an ka sulusingsing ang kilid sang kumbung nga sa ikaduha nga tinambitambi; agud nga ang mga sulusingsing magatunguray.

6 Kag maghimo ka sing kalim-an ka kaw-it nga bulawan, kag tabiron sang mga kaw-it ang mga kumbung ang isa sa isa sang mga kaw-it: kag mangin-isa ang tabernakulo.

7 ś Kag maghimo ka sing mga kumbung nga bulbul sang mga kanding nga mangin taklap sa tabernakulo: napulo kag isa ka kumbung ang himoon mo.

8 Ang kalabaon sang isa ka kumbung katloan ka maniko, kag ang kasangkaron sang isa ka kumbung apat ka maniko: kag isa lamang ka takus ang tanan nga napulog isa ka kumbung.

9 Kag tambihon mo ang lima ka kumbung sing pain, kag ang anum ka kumbung sing pain, kag pagaapiron mo ang ikan-um nga kumbung sa atubangan sang tabernakulo. 10 Kag himoan mo sing kalim-an ka sulusingsing ang kilid sang isa ka kumbung nga nahigad gid sa tinambitambi, kag kalim-an ka sulusingsing ang kilid sang kumbung nga nagtambi sang ikaduha.

11 Kag maghimo ka sing kalim-an ka kaw-it nga saway, kag itakud ang mga kaw-it sa mga sulusingsing, kag tabiron ang layanglayang, agud nga mangin-isa ini.

12 Kag ang nagaapid nga bahin nga nabilin sang mga kumbung sang layanglayang, ang katunga sang kumbung nga nabilin, paloyloyon sa likod sang tabernakulo.

13 Kag ang maniko sa isa ka kilid, kag ang maniko sa pihak nga kilid, sang nabilin sang kalabaon sang mga kumbung sang layanglayang paloyloyon sa mga kilid sang tabernakulo sa sini nga kilid kag sadto nga kilid, sa pagtaklap sini.

14 Kag himoan mo ang layanglayang sing taklap nga mga panit sang mga carnero nga lalaki nga nalugum sa mapula, kag isa ka taklap sa ibabaw nga mga panit sang mga badger.

15 ś Kag maghimo ka sing mga tapi sa patindug nga kahoy nga acasia nga sa tabernakulo.

16 Napulo ka maniko ang kalabaon sang isa ka tapi, kag isa ka maniko kag tunga ang kasangkaron sang tagsa ka tapi.

17 May duha ka diladila ang tagsa ka tapi, nga naangut ang isa sa isa: amo ini ang himoon mo sa tanan nga mga tapi sang tabernakulo.

18 Kag himoon mo ang mga tapi sang tabernakulo, duha ka pulo ka tapi nga sa kilid nga nabagatnan.

19 Kag maghimo ka sing kap-atan ka boho nga palatindugan nga pilak sa idalum sang duha ka pulo ka tapi; duha ka boho sa idalum sang isa ka tapi nga sa iya duha ka diladila, kag duha ka boho sa idalum sang isa pa ka tapi nga sa iya duha ka diladila.

20 Kag sa ikaduha nga kilid sang tabernakulo, sa kilid nga naaminhan may duha ka pulo ka tapi:

21 Kag ang ila kap-atan ka boho nga palatindugan himoon sa pilak; duha ka boho sa idalum sang isa ka tapi, kag duha ka boho sa idalum sang isa pa ka tapi.

22 Kag sa katundan nga mga kilid sang tabernakulo himoan mo sing anum ka tapi.

23 Kag himoan mo sing duha ka tapi nga sa mga pamusud sang tabernakulo sa duha ka kilid.

24 Kag sila magtalalabid sa sadsaran, kag tabiron sila tubtub sa ukbung sa isa ka argolya: amo ini sa ila nga duha; sila manginsa duha ka pamusud.

25 Kag may walo ka tapi, kag ang ila mga boho nga palatindugan nga pilak, napulo kag anum ka boho; duha ka boho sa idalum sang isa ka tapi, kag duha ka boho sa idalum sang isa pa ka tapi.

26 ś Kag maghimo ka sing mga balabag nga kahoy nga acasia; lima nga sa mga tapi sang isa ka kilid sang tabernakulo,

27 Kag lima ka balabag nga sa mga tapi sang pihak nga kilid sang tabernakulo, kag lima ka balabag nga sa mga tapi sa kilid sang tabernakulo, nga sa duha ka kilid sa nakatundan.

28 Kag ang balabag nga natunga magaagi sa tunga sang mga tapi gikan sa isa ka pamusud tubtub sa isa.

29 Kag taklapan mo ang mga tapi sing bulawan, kag himoan mo sing mga argolya nga bulawan nga goloan sang mga balabag: kag taklapan mo ang mga argolya sing bulawan.

30 Kag patindugon mo ang tabernakulo sono sa huwaran sini nga ginpakita sa imo sa bukid.

31 ś Kag maghimo ka sing kumbung nga asul, kag purpura, kag escarlata, kag lino nga mapino nga binolong nga hinimo sing sampaton: himoon ini nga may mga querubin:

32 Kag bitayon mo ini sa ibabaw sang apat ka haligi nga acasia nga nataklapan sing bulawan: ang ila mga panga bulawan, nga nagatindug sa apat ka boho nga palatindugan nga pilak.

33 ś Kag bitayon mo ang kumbung sa mga kaw-it, agud nga madala mo didto sa sulud sang kumbung ang arka sang pagpamatuud: kag ang kumbung magapain sang duug nga balaan gikan sa labi gid kabalaan sa inyo.

34 Kag itongtong mo ang lingkoran nga pakilooyan sa arka sang pagpamatuud sa duug nga labi gid kabalaan.

35 Kag ipahamtang mo ang latok sa gowa sang kumbung, kag ang kandilero sa atubangan sang latok sa kilid nga nabagatnan sang tabernakulo: kag ibutang mo ang latok sa kilid nga naaminhan.

36 Kag maghimo ka sing lipon nga sa ganhaan sang layanglayang, nga asul, kag purpura, kag escarlata, kag lino nga mapino nga binolong, nga ginbuhat sa borda.

37 Kag maghimo ka nga sa lipon sing lima ka haligi nga acasia, kag taklapan sila sing bulawan, kag ang ila mga panga bulawan: kag magbasia ka nga sa ila sing lima ka boho nga palatindugan nga saway.

KAPITULO 27

KAG himoon mo ang halaran nga kahoy nga acasia, lima ka maniko ang kalabaon, kag lima ka maniko ang kasangkaron; ang halaran mangin-kwadrado: kag tatlo ka maniko ang iya kataason.

2 Kag himoan mo sang iya mga sungay sa apat niya ka pamusud: ang iya mga sungay unay sa iya: kag taklapan mo ini sing saway.

3 Kag maghimo ka sang iya mga alabohan, kag sang iya mga pala, kag sang iya mga batiya, kag sang iya mga kaw-it sa unud, kag sang iya mga bagahan: ang tanan niyang suludlan himoon mo sa saway.

4 Kag himoan mo ini sing isa ka saladang nga saway nga pinuna; kag sa ibabaw sang saladang maghimo ka sing apat ka argolya nga saway sa iya apat ka pamusud.

5 Kag ibutang mo ini sa idalum sang sanipa palibut sang halaran sa ubus, sa bagay nga ang pinuna maglambut tubtub sa katunga sang halaran.

6 Kag maghimo ka sing mga yayongan nga sa halaran, mga yayongan nga kahoy nga acasia, kag taklapan sila sing saway.

7 Kag ang mga yayongan igolo sa mga argolya, kag ang mga yayongan mangin-yara sa duha ka kilid sang halaran, sa pagdala sini.

8 Himoon mo ini nga dagpakan sing mga tapi: sono sa ginpakita sa imo sa bukid, himoon nila sing subong sini.

9 ś Kag maghimo ka sang luwang sang tabernakulo: sa kilid nga nabagatnan may mga lipon nga lino nga mapino nga binolong nga sa luwang nga isa ka gatus ka maniko ang kalabaon sa isa ka kilid:

10 Kag ang ila duha ka pulo nga haligi kag ang ila duha ka pulo nga boho nga palatindugan himoon sa saway; ang mga panga sang mga haligi kag ang ila mga pikit sa liogliog pilak.

11 Kag amo man sa kilid nga naaminhan sa kalabaon may mga lipon nga isa ka gatus ka maniko ang kalaba, kag ang iya duha ka pulo nga haligi kag ang ila duha ka pulo nga boho nga palatindugan himoon sa saway; ang mga panga sang mga haligi kag ang ila mga pikit sa liogliog pilak.

12 ś Kag sa kasangkaron sang luwang sa kilid nga nakatundan may mga lipon nga kalim-an ka maniko: ang ila mga haligi napulo, kag ang ila boho nga palatindugan napulo.

13 Kag ang kasangkaron sang luwang sa kilid nayon sa nasidlangan kalim-an ka maniko.

14 Ang mga lipon sang isa ka kilid sang gawang napulog lima ka maniko: ang ila mga haligi tatlo, kag ang ila mga boho nga palatindugan tatlo.

15 Kag sa pihak nga kilid may mga lipon nga napulog lima ka maniko: ang ila mga haligi tatlo, kag ang ila mga boho nga palatindugan tatlo.

16 ś Kag sa gawang sang luwang may isa ka lipon nga duha ka pulo ka maniko, nga asul kag purpura kag escarlata kag lino nga mapino nga binolong, nga ginbuhat sa borda: kag ang ila mga haligi apat, kag ang ila mga boho nga palatindugan apat.

17 Ang tanan nga mga haligi sang luwang palibut pikitan sa liogliog sing pilak; ang ila mga panga pilak, kag ang ila mga boho nga palatindugan saway.

18 ś Ang kalabaon sang luwang isa ka gatus ka maniko, kag ang kasangkaron kalim-an bisan diin, kag ang kataason lima ka maniko, nga nabungbungan sing lino nga mapino nga binolong, kag ang ila mga boho nga palatindugan saway.

19 Ang tanan nga suludlan sang tabernakulo sa tanan nga pag-alagdan, kag ang tanan nga palpal niya, kag ang tanan nga palpal sang luwang manginsaway.

20 ś Kag sogoon mo ang kaanakan sang Israel, nga dalhan ka nila sing lana sang olivo nga lunsay nga nalubak nga sa suga, sa pagpasiga sang suga sing dalayon.

21 Sa tabernakulo sang katilingban, sa gowa sang kumbung nga yara sa atubangan sang pagpamatuud, si Aaron kag ang iya mga anak nga lalaki mag-atipan sini sa atubangan sang GINOO kutub sa kahaponon tubtub sa kaagahon: ini manginpalatukuran nga dayon sa ila mga kaliwatan tungud sa kaanakan sang Israel.

KAPITULO 28

KAG papalapiton mo sa imo si Aaron nga imo utud, kag ang iya mga lalaking anak upud sa iya, gikan sa kaanakan sang Israel, agud nga sia mag-alagad sa akon sa pagkapari, si Aaron, si Nadab kag si Abiu, si Eleazar kag si Itamar, mga anak nga lalaki ni Aaron.

2 Kag himoan mo sing balaan nga mga panapton si Aaron nga imo utud, nga sa himaya kag katahum.

3 Kag magpamolong ka sa tanan nga may kaalam sa tagiposoon, nga ginpuno ko sang espiritu sang kaalam, agud nga maghimo sila sang mga panapton ni Aaron sa pagpasagrado sa iya, agud nga mag-alagad sia sa akon sa pagkapari.

4 Kag ini sila amo ang mga panapton nga himoon nila; isa ka hapin sa dughan, kag isa ka efod, kag isa ka kunup, kag bayo nga binordahan, isa ka turbante, kag isa ka wagkus: kag magahimo sila sing mga panapton nga balaan nga kay Aaron nga imo utud, kag sa iya mga anak nga lalaki, agud nga mag-alagad sia sa akon sa pagkapari.

5 Kag magkuha sila sang bulawan, kag sang asul, kag sang purpura, kag sang escarlata, kag sang lino nga mapino.

6 ś Kag maghimo sila sang efod nga bulawan, nga asul kag purpura kag escarlata, kag lino nga mapino nga binolong, nga nahimo sang sampaton.

7 May duha ka hombrera ini nga nagatambi sa duha ka pamusud sini; agud nga masugpon ini.

8 Kag ang hinabol sing sinampaton nga wagkus sang efod, nga yara sa sini, manginkaangay sa sining buhat kag naunay; sa bulawan, sa asul, kag purpura, kag escarlata, kag lino nga mapino nga binolong.

9 Kag magkuha ka sing duha ka batong onice, kag itigib sa ila ang mga ngalan sang kaanakan sang Israel:

10 Ang anum sang ila mga ngalan sa isa ka bato, kag ang anum ka ngalan nga nabilin sa isa man ka bato, sono sa ila pagkatawo.

11 Sa buhat sang manugtigib sa bato, sa kaangay sang mga pagtigib sang singsing nga inugpat-in, patigban mo ang duha ka bato sono sa mga ngalan sang kaanakan sang Israel: pagaipatampok mo sila sa mga kamoy nga bulawan.

12 Kag ibutang mo ang duha ka bato sa ibabaw sang mga hombrera sang efod, subong nga mga bato nga handumanan sang kaanakan sang Israel: kag dalhon ni Aaron sa iya duha ka abaga ang mga ngalan nila nga handumanan sa atubangan sang GINOO.

13 ś Kag maghimo ka sing kamoy nga bulawan;

14 Kag duha ka kadena nga puro nga bulawan sa mga ukbung; himoon mo sila kaangay sang mga linubid nga linubag, kag itakud mo ang mga kadena nga linubag sa mga kamoy.

15 ś Kag maghimo ka sang hapin sa dughan sa paghukom nga nahimo sang sampaton; himoon mo ini kaangay sa pagbuhat sang efod; himoon mo ini sa bulawan, sa asul, kag sa purpura, kag sa escarlata, kag sa lino nga mapino nga binolong.

16 Mangin-kwadrado ini kag dubli; isa ka dangaw ang iya kalabaon, kag isa ka dangaw ang iya kasangkaron.

17 Kag takdan mo ini sing apat ka kubay nga mga bato: ang nahaunang kubay sardio, kag topacio, kag carbunclo: ini manginnahaunang kubay.

18 Kag ang kubay nga ikaduha esmeralda, zafiro, kag diamante.

19 Kag ang kubay nga ikatlo ligure, agate, kag ametista.

20 Kag ang kubay nga ikap-at berilo, kag onice, kag jaspe: pagaitampok sila sa bulawan sa ila mga kamoy.

21 Kag ang mga bato manginsono sa mga ngalan sang kaanakan sang Israel, napulog duha, sono sa mga ngalan nila, kaangay sa pagtigib sang singsing nga inugpat-in; ang tagsatagsa sono sa iya ngalan, ini sila manginsa napulo kag duha ka tribo.

22 ś Kag maghimo ka sa hapin sa dughan sing mga kadena sa mga ukbung sang mga lubid nga linubag nga bulawan nga puro.

23 Kag maghimo ka sa hapin sa dughan sing duha ka singsing nga bulawan, kag itakud mo ang duha ka singsing sa duha ka pamusud sang hapin sa dughan.

24 Kag itakud mo ang duha ka kadena nga bulawan nga linubid sa duha ka singsing sa mga pamusud sang hapin sa dughan.

25 Kag ang duha ka ukbung sang duha ka linubid nga kadena itakud mo sa duha ka kamoy, kag itakud sila sa mga hombrera sang efod, nayon sa atubangan niya.

26 ś Kag maghimo ka sing duha ka singsing nga bulawan, kag itakud mo sila sa duha ka pamusud sang hapin sa dughan, sa iya sidsid, nga nayon sa kilid sang efod sa sulud.

27 Kag maghimo ka sing duha pa ka singsing nga bulawan, kag itakud sila sa ibabaw sang duha ka kilid sang efod nayon sa idalum, sa bahin nga sa atubangan sini malapit sa ila tinambihan sa ibabaw sang hinabol sing sinampaton nga wagkus sang efod.

28 Kag ang hapin sa dughan ihigot sang laso nga asul sa iya mga singsing sa mga singsing sang efod, agud nga ini manginsa ibabaw sang hinabol sing sinampaton nga wagkus sang efod, kag agud nga indi mapalus sa efod ang hapin sa dughan.

29 Kag si Aaron magadala sang mga ngalan sang kaanakan sang Israel sa hapin sa dughan sa paghukom sa ibabaw sang iya tagiposoon, kon magsulud sia sa balaan nga duug, nga handumanan nga dayon sa atubangan sang GINOO.

30 ś Kag ibutang mo sa sulud sang hapin sa dughan sa paghukom ang Urim kag ang Tumim; kag didto sila sa ibabaw sang tagiposoon ni Aaron, kon magsulud sia sa atubangan sang GINOO: kag dalhon ni Aaron ang paghukom sang kaanakan sang Israel sa ibabaw sang iya tagiposoon sa atubangan sang GINOO sing dalayon.

31 ś Kag maghimo ka sang kunup sang efod nga bug-os nga asul.

32 Kag may liab sa olo sa tunga sini: ang liab may aporo nga hinabol sa palibut, subong nga daw liab sang limbutong, agud nga indi ini magisi.

33 ś Kag sa mga sidsid sini himoan mo sing mga granada nga asul, kag purpura, kag escarlata, sa iya mga sidsid palibut; kag nagabal-ut sa ila ang mga kampanilya nga bulawan palibut:

34 Isa ka kampanilya nga bulawan kag isa ka granada, isa pa ka kampanilya nga bulawan kag isa ka granada, sa mga sidsid sang kunup palibut.

35 Kag isuklub ini kay Aaron sa pag-alagad: kag mabatian ang kilingkiling sini kon magsulud sia sa balaan nga duug sa atubangan sang GINOO, kag kon maggowa sia, agud nga indi sia mapatay.

36 ś Kag maghimo ka sing isa ka pinanid nga bulawan nga puro, kag itigib sa sini, kaangay sang mga tinigib sang singsing nga inugpat-in, PAGKABALAAN SA GINOO.

37 Kag itakud mo ini sa laso nga asul, ini manginsa atubangan sang turbante; didto ini sa atubangan sang turbante.

38 Kag ini manginsa agtang ni Aaron, agud nga si Aaron magadala sang mga kalautan sang mga butang nga balaan, nga pakabalaanon sang kaanakan sang Israel sa tanan nilang balaan nga mga dolot; kag ini manginsa iya agtang sa gihapon, agud nga mahamut-an sila sa atubangan sang GINOO.

39 ś Kag maghabol ka sing bayo nga lino nga mapino, kag maghimo ka sing turbante nga lino nga mapino, kag maghimo ka sing wagkus nga nahimo sa borda.

40 ś Kag sa mga anak nga lalaki ni Aaron maghimo ka sing mga bayo, kag maghimo ka sa ila sang mga wagkus, kag maghimo ka sa ila sang mga goro, sa himaya kag sa katahum.

41 Kag isuklub mo sila kay Aaron nga imo utud, kag sa iya mga anak nga lalaki upud sa iya; kag haplason sila, kag pakasagradohon sila, kag pakabalaanon sila, agud nga mag-alagad sila sa pagkapari sa akon.

42 Kag maghimo ka sa ila sing mga poroy nga lino sa pagtabon sang ila pagkahublas; magalambut sila kutub sa hawak tubtub sa mga paa:

43 Kag isuklub sila ni Aaron, kag sang iya mga anak nga lalaki, kon magsulud sila sa tabernakulo sang katilingban, ukon kon magpalapit sila sa halaran sa pag-alagad sa balaan nga duug; agud nga indi sila magdala sing kalautan, kag mapatay: mangin-palatukuran nga dayon ini sa iya kag sa iya kaliwat sa olihi niya.

KAPITULO 29

KAG amo ini ang butang nga himoon mo sa ila sa pagpakabalaan sa ila, sa pag-alagad sa akon sa pagkapari: Kuha ka sing isa ka tinday nga baka nga lalaki, kag duha ka carnero nga lalaki nga wala sing kasawayan,

2 Kag tinapay nga walay tapay, kag mga torta nga walay tapay nga nasamoan sing lana, kag mga manipis nga tinapay nga wala sing tapay nga nahibo sing lana: sa harina sang trigo himoon mo sila.

3 Kag ibutang mo sila sa isa ka alat, kag dalhon sila nga yara sa alat, upud sa tinday nga baka nga lalaki kag duha ka carnero nga lalaki.

4 Kag dalhon mo si Aaron kag ang iya mga anak nga lalaki sa ganhaan sang tabernakulo sang katilingban, kag hugasan sila sing tubig.

5 Kag magkuha ka sang mga panapton, kag isuklub kay Aaron ang bayo, kag ang kunup sang efod, kag ang efod, kag ang hapin sa dughan, kag wagkusan sia sang hinabol sing sinampaton nga wagkus sang efod:

6 Kag itakdong mo ang turbante sa iya olo, kag itakud ang purungpurung nga balaan sa turbante.

7 Niyan magkuha ka sing lana nga ihalaplas, kag ibobo ini sa iya olo, kag haplason sia.

8 Kag dalhon mo ang iya mga anak nga lalaki, kag sukluban sila sang mga bayo.

9 Kag wagkusan mo sila sang mga wagkus, si Aaron kag ang iya mga anak nga lalaki, kag itakud ang mga goro sa ila: kag mangin-ila ang pagkapari tungud sa palatukuran nga dayon: kag pakasagradohon mo si Aaron kag ang iya mga anak nga lalaki.

10 Kag magpadala ka sang tinday nga baka nga lalaki sa atubangan sang tabernakulo sang katilingban: kag si Aaron kag ang iya mga anak nga lalaki magapandong sang ila mga kamut sa olo sang tinday nga baka nga lalaki.

11 Kag ihawon mo ang tinday nga baka nga lalaki sa atubangan sang GINOO, sa ganhaan sang tabernakulo sang katilingban.

12 Kag magkuha ka sa dugo sang tinday nga baka nga lalaki, kag ihamlit sang imo tudlo sa mga sungay sang halaran, kag iula mo ang tanan nga dugo sa luyo sang tiilan sang halaran.

13 Kag kuhaon mo ang tanan nga sapay nga nagaputus sang mga kasudlan, kag ang putus sang atay, kag ang duha ka batobato, kag ang sapay nga yara sa ila, kag sonogon sila sa ibabaw sang halaran.

14 Apang ang unud sang tinday nga baka nga lalaki, kag ang iya panit, kag ang iya ipot, sonogon mo sa kalayo sa gowa sang kampo: ini halad tungud sa sala.

15 ś Magkuha ka man sing isa ka lalaki nga carnero; kag si Aaron kag ang iya mga anak nga lalaki magapandong sang ila mga kamut sa olo sang carnero nga lalaki.

16 Kag ihawon mo ang carnero nga lalaki, kag kuhaon mo ang iya dugo, kag iwisik ini sa ibabaw sang halaran palibut.

17 Kag hiwahiwaon mo ang carnero nga lalaki, kag hugasan ang iya mga kasudlan, kag ang iya mga tiil, kag ibutang sila sa iya mga hiniwa, kag sa iya olo.

18 Kag sonogon mo ang bug-os nga carnero nga lalaki sa ibabaw sang halaran: ini halad nga sinonog sa GINOO: ini maamyon nga humut, isa ka halad nga nahimo sa kalayo sa GINOO.

19 ś Kag kuhaon mo ang isa pa ka carnero nga lalaki; kag si Aaron kag ang iya mga anak nga lalaki magapandong sang ila mga kamut sa olo sang carnero nga lalaki.

20 Niyan ihawon mo ang carnero nga lalaki, kag magkuha sang iya dugo, kag ibutang mo ini sa labit sang dulunggan nga too ni Aaron, kag sa labit sang dulunggan nga too sang iya mga anak nga lalaki, kag sa kumalagko sang ila kamut nga too, kag sa kumalagko sang ila tiil nga too, kag iwisik mo ang dugo sa ibabaw sang halaran palibut.

21 Kag magkuha ka sang dugo nga yara sa ibabaw sang halaran, kag sang ihalaplas nga lana, kag iwisik ini kay Aaron, kag sa iya mga panapton, kag sa iya mga anak nga lalaki, kag sa mga panapton sang iya mga anak nga lalaki kaupud niya: kag pakabalaanon sia, kag ang iya mga panapton, kag ang iya mga anak nga lalaki, kag ang mga panapton sang iya mga anak nga lalaki kaupud niya.

22 Kuhaon mo man sa carnero nga lalaki ang sapay kag ang ikog nga matambok, kag ang sapay nga nagaputus sang mga kasudlan, kag ang putus sang atay, kag ang duha ka batobato, kag ang sapay nga yara sa ila, kag ang abaga nga too; kay ini lalaking carnero sa pagpasagrado:

23 Kag isa ka bareta nga tinapay, kag isa ka bilog nga kalan-onon nga may lana, kag isa ka manipis nga tinapay, gikan sa alat sang tinapay nga walay tapay nga yara sa atubangan sang GINOO:

24 Kag ibutang mo ang bug-os sa mga kamut ni Aaron, kag sa mga kamut sang iya mga anak nga lalaki; kag habogon sila nga halad nga hinabog sa atubangan sang GINOO.

25 Kag batonon mo sila sa ila mga kamut, kag sonogon sila sa halaran nga sa halad nga sinonog, subong nga maamyon nga humut sa atubangan sang GINOO: halad ini nga nahimo sa kalayo sa GINOO.

26 Kag kuhaon mo ang dughan sang carnero nga lalaki sa pagpasagrado kay Aaron, kag habogon ini nga halad nga hinabog sa atubangan sang GINOO: kag manginbahin mo ini.

27 Kag pakabalaanon mo ang dughan sang halad nga hinabog, kag ang abaga sang halad nga binayaw, nga hinabog, kag ginbayaw gikan sa carnero nga lalaki sa pagpasagrado, sanglit ini iya ni Aaron, kag sang iya mga anak nga lalaki:

28 Kag manginbahin ini ni Aaron kag sang iya mga anak nga lalaki paagi sa palatukuran nga dayon gikan sa kaanakan sang Israel: kay ini isa ka halad nga binayaw: kag mangin isa ka halad nga binayaw ini gikan sa kaanakan sang Israel nga ginkuha sa halad sang ila mga halad sa paghidait, ang ila halad nga binayaw sa GINOO.

29 ś Kag ang mga panapton nga balaan nga iya ni Aaron mangin-iya sang iya mga anak nga lalaki sa olihi niya, nga hidhiran sa ila kag pakasagradohon sa ila.

30 Kag sa pito ka adlaw isuklub sila sinang anak nga lalaki nga pari nga salili niya, kon magsulud sia sa tabernakulo sang katilingban sa pag-alagad sa balaan nga duug.

31 ś Kag kuhaon mo ang carnero nga lalaki nga pagpasagrado, kag lagaon ang iya unud sa duug nga balaan.

32 Kag si Aaron kag ang iya mga anak nga lalaki magakaon sang unud sang carnero nga lalaki, kag sang tinapay nga didto sa alat, sa ganhaan sang tabernakulo sang katilingban.

33 Kag kaonon nila yadtong mga butang nga tungud sa ila ginhimo ang katumbasan, sa pagpasagrado kag sa pagpakabalaan sa ila: apang ang dumuloong dili magkaon sa ila, bangud nga sila balaan.

34 Kag kon may mabilin sang unud sang mga pagpasagrado, ukon sang tinapay, tubtub sa aga, niyan sonogon mo sa kalayo ang mabilin: dili pagkaonon ini, bangud nga balaan ini.

35 Kag amo ini ang himoon mo kay Aaron, kag sa iya mga anak nga lalaki, sono sa tanan nga butang nga nasogo ko sa imo: sa pito ka adlaw pakasagradohon mo sila.

36 Kag sa adlawadlaw maghalad ka sing isa ka tinday nga baka nga lalaki nga halad tungud sa sala nga katumbasan: kag pagatinloan mo ang halaran, kon maghimo ka sing katumbasan tungud sini, kag hidhiran mo ini, sa pagpakabalaan sini.

37 Sa pito ka adlaw maghimo ka sing katumbasan tungud sa halaran, kag magpakabalaan sini; kag manginlabi kabalaan gid ang halaran: ang bisan ano nga nagatandug sa halaran manginbalaan.

38 ś Karon ini amo inang ihalad mo sa ibabaw sang halaran; duha ka cordero nga isa ka tuig adlawadlaw sing dalayon.

39 Ang isa ka cordero ihalad mo sa aga; kag ang isa ka cordero ihalad mo sa kahaponon:

40 Kag upud sang isa ka cordero ang ikapulo nga bahin sang harina nga nasamo sa ikap-at nga bahin sang isa ka hin nga lana nga linubak; kag ang ikap-at nga bahin sang isa ka hin nga alak nga sa halad nga ilimnon.

41 Kag ihalad mo ang isa man ka cordero sa kahaponon, kag pagahimoon mo sa iya sono sa halad nga kalan-on sang aga, kag sono sa iya halad nga ilimnon, nga maamyon nga humut, isa ka halad nga nahimo sa kalayo sa GINOO.

42 Ini mangindalayon nga halad nga sinonog sa bug-os ninyo nga mga kaliwatan sa ganhaan sang tabernakulo sang katilingban sa atubangan sang GINOO: diin magapakigkita ako sa imo, sa paghambal didto sa imo.

43 Kag didto magapakigkita ako sa kaanakan sang Israel, kag ang tabernakulo pakabalaanon sang akon himaya.

44 Kag pakabalaanon ko ang tabernakulo sang katilingban, kag ang halaran: pakabalaanon ko man si Aaron kag ang iya mga anak nga lalaki, sa pag-alagad sa akon sa pagkapari.

45 ś Kag magapuyo ako sa tunga sang kaanakan sang Israel, kag ako mangin-ila Dios.

46 Kag pagakilalahon nila nga ako amo ang GINOO nga ila Dios, nga nagpagowa sa ila gikan sa duta sang Egipto, agud nga magpuyo ako sa tunga nila: ako amo ang GINOO nga ila Dios.

KAPITULO 30

KAG maghimo ka sing isa ka halaran nga sonogan sang incienso: sa kahoy nga acasia himoon mo ini.

2 Ang iya kalabaon isa ka maniko, kag isa ka maniko ang iya kasangkaron; mangin-kwadrado ini: kag duha ka maniko ang iya kataason: ang iya mga sungay unay sa iya.

3 Kag taklapan mo ini sing bulawan nga puro, ang iya ibabaw, kag ang iya mga kilid palibut, kag ang iya mga sungay; kag himoan mo ini sing purungpurung nga bulawan palibut.

4 Kag himoan mo ini sing duha ka argolya nga bulawan sa idalum sang purungpurung sini, himoon mo sila sa iya duha ka pamusud, sa iya duha ka kilid; kag goloan sila sang mga yayongan sa pagdala sini.

5 Kag himoon mo ang mga yayongan gikan sa kahoy nga acasia, kag taklapan sila sing bulawan.

6 Kag ibutang mo ini sa atubangan sang kumbung nga yara sa luyo sang arka sang pagpamatuud, sa atubangan sang lingkoran nga pakilooyan nga yara sa ibabaw sang pagpamatuud, diin magapakigkita ako sa imo.

7 Kag si Aaron magasonog sa ibabaw sini sing incienso nga mahamut agaaga: kon mag-aman sia sang mga suga, magasonog sia sang incienso sa sini.

8 Kag sa pagsindi ni Aaron sang mga suga sa kahaponon, magasonog sia sang incienso sa sini, isa ka incienso nga dalayon sa atubangan sang GINOO sa bug-os ninyong mga kaliwatan.

9 Dili kamo maghalad sa sini sing incienso nga dumoloong, ukon halad nga sinonog, ukon halad nga kalan-on; kag dili kamo mag-ula sing halad nga ilimnon sa ibabaw sini.

10 Kag si Aaron magahimo sing katumbasan sa ibabaw sang mga sungay sini sing makaisa sa tuig nga may dugo sang halad tungud sa sala nga sa mga katumbasan: makaisa sa tuig himoon niya ang katumbasan sa ibabaw sini sa bug-os ninyong mga kaliwatan: ini labi gid kabalaan sa GINOO.

11 ś Kag ang GINOO nagpamolong kay Moises, nga nagasiling,

12 Kon magkuha ka sang kabilogan sang kaanakan sang Israel sono sa kadamuon nila, niyan ang tagsa ka tawo magahatag sing gawad tungud sa iya kalag sa GINOO, kon isipon mo sila; agud nga wala sa ila sing kalalat-an, kon isipon mo sila.

13 Ini ihatag nila, ang tagsatagsa nga masakup sa pag-isip, tunga sa siclo sono sa siclo sang santuario: (ang siclo duha ka pulo ka gera:) tunga sa siclo ang halad sa GINOO.

14 Ang tagsatagsa nga masakup sa pag-isip, kutub sa duha ka pulo ka tuig pa ibabaw, magahatag sang halad sa GINOO.

15 Ang manggaranon dili maghatag sing kapin, kag ang imol dili maghatag sing kubus sa tunga sa siclo, kon maghatag sila sang halad sa GINOO, sa paghimo sing katumbasan tungud sa inyo mga kalag.

16 Kag batonon mo ang kuarta sang katumbasan gikan sa kaanakan sang Israel, kag ipat-ud ini sa pag-alagdan sang tabernakulo sang katilingban; agud nga manginhandumanan ini sa kaanakan sang Israel sa atubangan sang GINOO, sa paghimo sing katumbasan tungud sa inyo mga kalag.

17 ś Kag ang GINOO nagpamolong kay Moises, nga nagasiling,

18 Maghimo ka man sing batiya nga saway, kag ang iya tulungtungan saway man, nga palanghinawan: kag ibutang mo ini sa ulut sang tabernakulo sang katilingban kag sang halaran, kag butangan mo ini sing tubig.

19 Kay sa sini si Aaron kag ang iya mga anak nga lalaki magpanghinaw sang ila mga kamut kag sang ila mga tiil:

20 Kon magsulud sila sa tabernakulo sang katilingban, magpanghinaw sila sang tubig, agud nga indi sila mapatay; ukon kon magpalapit sila sa halaran nga sa pag-alagad, sa pagsonog sing halad nga nahimo sa kalayo sa GINOO:

21 Gani magpanghinaw sila sang ila mga kamut kag sang ila mga tiil, agud indi sila mapatay: kag manginpalatukuran ini nga dayon sa ila, bisan sa iya kag sa iya mga kaliwat sa bug-os nilang mga kaliwatan.

22 ś Labut pa, ang GINOO nagpamolong kay Moises, nga nagasiling,

23 Kuha ka man nga sa imo sang pili nga mga pahumut, sang puro nga mira nga lima ka gatus ka siclo, kag sang canela nga mahamut nga katunga sini, bisan duha ka gatus kag kalim-an ka siclo, kag sang calamo nga mahamut duha ka gatus kag kalim-an ka siclo,

24 Kag sang casia lima ka gatus ka siclo, sono sa siclo sang santuario, kag sang lana sang olivo isa ka hin:

25 Kag himoon mo ini nga balaan nga lana nga ihalaplas, ihalaplas nga ginsimbog sono sa kinaadman sang manugpahumut: manginbalaan ining lana nga ihalaplas.

26 Kag haplasan mo sini ang tabernakulo sang katilingban, kag ang arka sang pagpamatuud,

27 Kag ang latok kag ang tanan niyang suludlan, kag ang kandilero kag ang tanan niyang suludlan, kag ang halaran sang incienso,

28 Kag ang halaran sang halad nga sinonog pati ang tanan niyang suludlan, kag ang batiya kag ang iya tulungtungan.

29 Kag pakabalaanon mo sila, agud nga sila manginlabi gid kabalaan: ang bisan ano nga nagatandug sa ila manginbalaan.

30 Kag haplasan mo si Aaron kag ang iya mga anak nga lalaki, kag pakasagradohon sila, agud nga mag-alagad sila sa akon sa pagkapari.

31 Kag maghambal ka sa kaanakan sang Israel, nga nagasiling, Ini manginbalaan kong lana nga ihalaplas sa bug-os ninyong mga kaliwatan.

32 Sa unud sang tawo dili ini pag-ibobo, kag dili kamo maghimo sing bisan anong kaangay sini, sono sa mga sangkap sini: balaan ini, kag manginbalaan sa inyo.

33 Ang bisan sin-o magsimbog sing bisan ano kaangay sini, ukon ang bisan sin-o magbutang sini sa dumoloong, utdon sia gikan sa iya katawohan.

34 ś Kag ang GINOO nagsiling kay Moises, Kuha nga sa imo sing mga pahumut, ang estacte, kag onica, kag galbano; ining mga pahumut nga may frankincienso nga puro: sa tagsatagsa sa alangay nga timbang:

35 Kag himoon mo ini nga pahumut, isa ka pahumut sono sa kinaadman sang manugpahumut, nga ginsimbog, puro kag balaan:

36 Kag bukbukon mo sing mapino ang iban sa ila, kag ibutang ang iban sini sa atubangan sang pagpamatuud sa sulud sang tabernakulo sang katilingban, diin magapakigkita ako sa imo: manginlabi gid kabalaan ini sa inyo.

37 Kag nahanungud sang pahumut nga pagahimoon mo, dili kamo maghimo sono sa mga sangkap sini nga sa inyo: manginbalaan ini sa inyo sa GINOO.

38 Ang bisan sin-o nga maghimo sang kaangay sina sa pagsinghut sa iya, utdon sia gikan sa iya katawohan.

KAPITULO 31

KAG ang GINOO nagpamolong kay Moises, nga nagasiling,

2 Tan-awa, gintawag ko sa ngalan si Bezalel nga anak nga lalaki ni Uri, ang anak nga lalaki ni Hur, sang tribo ni Juda:

3 Kag ginpuno ko sia sang espiritu sang Dios, sa kaalam, kag sa paghangup, kag sa ihibalo, kag sa tanan nga bagay sang buluhaton,

4 Sa pagpadugi sing sinampaton nga mga buluhaton, sa pagsalsal sa bulawan, kag sa pilak, kag sa saway,

5 Kag sa paglagari sang mga bato nga inugtampok, kag sa paggutib sang kahoy, sa pagpangabudlay sa tanan nga bagay sang buluhaton.

6 Kag, yari karon, gintangdo ko upud sa iya si Oholiab, ang anak nga lalaki ni Ahisamac, sang tribo ni Dan: kag ginbutangan ko sing kaalam ang mga tagiposoon sang tanan nga may kaalam sa tagiposoon, agud nga maghimo sila sang tanan nga ginsogo ko sa imo;

7 Ang tabernakulo sang katilingban, kag ang arka sang pagpamatuud, kag ang lingkoran nga pakilooyan nga yara sa ibabaw sini, kag ang tanan nga gamit sang tabernakulo,

8 Kag ang latok kag ang iya mga gamit, kag ang kandilero nga puro pati ang tanan niyang gamit, kag ang halaran sang incienso,

9 Kag ang halaran sang halad nga sinonog pati ang tanan niyang gamit, kag ang batiya kag ang iya tulungtungan,

10 Kag ang mga panapton sang pag-alagdan, kag ang balaan nga mga panapton nga kay Aaron nga pari, kag ang mga panapton sang iya mga anak nga lalaki, sa pag-alagad sa pagkapari,

11 Kag ang lana nga ihalaplas, kag ang incienso nga mahamut nga sa balaan nga duug: himoon nila sono sa tanan nga ginsogo ko sa imo.

12 ś Kag ang GINOO nagpamolong kay Moises, nga nagasiling,

13 Maghambal ka man sa kaanakan sang Israel, nga nagasiling, Bantayan gid ninyo ang akon mga sabbath: kay tanda ini sa tunga nakon kag ninyo sa bug-os ninyong mga kaliwatan; agud nga mahibaloan ninyo nga ako amo ang GINOO nga nagapakabalaan sa inyo.

14 Busa bantayan ninyo ang sabbath; kay balaan ini sa inyo: ang tagsatagsa nga nagapasipala sini, sa pagkamatuud, patyon sia: kay ang bisan sin-o nga nagahimo sing bisan anong buluhaton sa iya, inang kalag utdon gikan sa tunga sang iya katawohan.

15 Sa anum ka adlaw himoon ang buluhaton; apang sa adlaw nga ikapito amo ang sabbath nga pagpahuway, balaan sa GINOO: ang bisan sin-o nga nagahimo sing bisan anong buluhaton sa adlaw nga sabbath, sa pagkamatuud, patyon sia.

16 Busa bantayan sang kaanakan sang Israel ang sabbath, sa pagtuman sang sabbath sa bug-os nilang mga kaliwatan, subong nga katipan nga dayon.

17 Tanda ini sa gihapon sa tunga nakon kag sang kaanakan sang Israel: kay sa anum ka adlaw ginhimo sang GINOO ang langit kag ang duta, kag sa ikapitong adlaw nagpahuway sia, kag nahaulian.

18 ś Kag sang nakatapus sia sa pagpakighambal sa iya sa bukid nga Sinai, ginhatag niya kay Moises ang duha ka tapitapi sang pagpamatuud, mga tapitapi nga bato, nga nasulatan sang tudlo sang Dios.

KAPITULO 32

KAG sang nakita sang katawohan nga si Moises nagpalantang sa pagdulhog sa bukid, nagtipon sing tingub ang katawohan kay Aaron, kag nagsiling sa iya, Tindug ka, himoi kami sing mga dios, nga magauna sa amon; kay nahanungud sining Moises, ang lalaki nga nagpagowa sa amon gikan sa duta sang Egipto, wala kami makahibalo kon ano ang nahanabu sa iya.

2 Kag si Aaron nagsiling sa ila, Palusa ninyo ang mga aritos nga bulawan, nga yara sa mga dulunggan sang inyo mga asawa, sang inyo mga anak nga lalaki, kag sang inyo mga anak nga babaye, kag dalha sila sa akon.

3 Kag ang bug-os nga katawohan nagpalus sang mga aritos nga bulawan nga yara sa ila mga dulunggan, kag gindala sila kay Aaron.

4 Kag ginbaton niya ini sila sa kamut nila, kag ginpamandayan ini sang tigib, kag ginhimo ini nga tinday nga baka nga tinunaw: kag nagsiling sila, Ini sila amo ang imo mga dios, O Israel, nga nagpagowa sa imo gikan sa duta sang Egipto.

5 Kag sang nakita ini ni Aaron, nagpatindug sia sing halaran sa atubangan sini; kag nagpabantala si Aaron kag nagsiling, Buwas manginpandut sa GINOO.

6 Kag sang madason nga adlaw nagbangon sila sing aga pa, kag nagdolot sing mga halad nga sinonog, kag nagdala sing mga halad sa paghidait; kag naglingkod ang katawohan sa pagkaon kag sa pag-inum, kag nagtindug sa paghampang.

7 ś Kag ang GINOO nagsiling kay Moises, Lakat, magdulhog ka; kay ang imo katawohan, nga ginpagowa mo gikan sa duta sang Egipto, nagdunut sang ila kaugalingon:

8 Sa madali naglipas sila sa dalanon nga akon ginsogo sa ila: naghimo sila sa ila sing tinday nga baka nga tinunaw, kag nagsimba sini, kag naghalad sa sini, kag nagsiling, Ini sila amo ang imo mga dios, O Israel, nga nagpagowa sa imo gikan sa duta sang Egipto.

9 Kag ang GINOO nagsiling kay Moises, Nakita ko ining katawohan, kag, yari karon, ini katawohan nga tingkoyan:

10 Busa karon pabayai ako, nga magdabdab ang akon kasingkal batok sa ila, kag mapapas ko sila: kag gikan sa imo himoon ko ang isa ka dakung pungsud.

11 Kag si Moises nagpakilooy sa GINOO nga iya Dios, kag nagsiling, GINOO, ngaa bala nagadabdab ang imo kasingkal batok sa imo katawohan, nga ginpagowa mo gikan sa duta sang Egipto sa dakung gahum, kag sa makusug nga kamut?

12 Ngaa bala nga maghambal ang mga Egiptohanon, kag magsiling, Sa kalaut ginpagowa niya sila, sa pagpatay sa ila sa kabukiran, kag sa pagpapas sa ila gikan sa kadaygan sang duta? Bayai ang imo masingkal nga kaakig, kag magkalisud sining malaut batok sa imo katawohan.

13 Dumduma si Abraham, si Isaac, kag si Israel, nga imo mga alagad, nga sa ila nagsumpa ka sa imo kaugalingon, kag nagsiling sa ila, Pabuaron ko ang inyo kaliwat subong sang mga bitoon sang langit, kag ihatag ko sa inyo kaliwat ining bug-os nga duta nga akon ginpamolong, kag panublion nila ini sing dayon.

14 Kag ang GINOO naghinulsul sang malaut nga iya ginhunahuna nga himoon sa iya katawohan.

15 ś Kag si Moises nagbalik, kag nagdulhog sa bukid, kag yara sa iya kamut ang duha ka tapitapi sang pagpamatuud: mga tapitapi nga nasulatan sa ila duha ka nawung; sa isa ka nawung kag sa pihak nasulatan sila.

16 Kag ang mga tapitapi binuhat sang Dios, kag ang sulat sinulat sang Dios, nga natigib sa ibabaw sang mga tapitapi.

17 Kag sang pagkabati ni Josue sang kinagahud sang katawohan sang nagasinggit sila, nagsiling sia kay Moises, May kinagahud sang inaway sa kampo.

18 Kag nagsiling sia, Indi ini sininggit sang mga mandadaug, ukon tingug sang mga ginadaug: kondi kinagahud sang mga nagaamba ang ginapamatian ko.

19 ś Kag nahanabu, sang malapit na sia sa kampo, nga nakita niya ang tinday nga baka, kag ang sinaut: kag nagdabdab ang kaakig ni Moises, kag ginpus-ang niya ang mga tapitapi gikan sa iya mga kamut, kag binoong sila sa kunsaran sang bukid.

20 Kag ginkuha niya ang tinday nga baka nga ila nahimo, kag ginsonog ini sa kalayo, kag ginbukbuk ini nga nanginpolbos, kag ginsabwag ini sa tubig, kag ginpainum ini sa kaanakan sang Israel.

21 Kag si Moises nagsiling kay Aaron, Ano bala ang ginhimo sa imo sining katawohan nga gindala mo ang dakung sala sa ila?

22 Kag si Aaron nagsiling, Dili magdabdab ang kaakig sang akon ginoo: ikaw nakakilala sang katawohan, nga nabuyo sila sa malaut.

23 Kay sila nagsiling sa akon, Himoi kami sing mga dios, nga magauna sa amon: kay nahanungud sining Moises, ang lalaki nga nagpagowa sa amon gikan sa duta sang Egipto, wala kami makahibalo kon ano ang nahanabu sa iya.

24 Kag nagsiling ako sa ila, Ang bisan sin-o nga may bulawan, paluson nila ini. Gani ginhatag nila ini sa akon: niyan ginpilak ko ini sa kalayo, kag naggowa ining tinday nga baka.

25 ś Kag sang nakita ni Moises nga ang katawohan hubo; (kay ginpahubo sila ni Aaron, nga sa ila kahuluy-an sa tunga sang ila mga kaaway:)

26 Niyan si Moises nagtindug sa gawang sang kampo, kag nagsiling, Sin-o ang dampig sa GINOO? magkari sia sa akon. Kag ang tanan nga lalaki nga mga anak ni Levi nagtipon sing tingub sa iya.

27 Kag nagsiling sia sa ila, Amo ini ang ginasiling sang GINOONG Dios sang Israel, Magtaklus ang tagsa ka tawo sang iya espada, kag magpakadto-pakari sa gawang pa gawang sa bug-os nga kampo, kag patyon sang tagsa ka lalaki ang iya utud nga lalaki, kag sang tagsa ka lalaki ang iya kaupud, kag sang tagsa ka lalaki ang iya isigkatawo.

28 Kag ginhimo sang mga anak ni Levi sono sa polong ni Moises: kag may nagkalamatay sa katawohan sadtong adlaw nga mga tatlo ka libo ka tawo.

29 Kay si Moises nagsiling, Magpakasagrado kamo sang inyo kaugalingon karon nga adlaw sa GINOO, bisan pa ang tagsa ka lalaki sa iya anak nga lalaki, kag sa iya utud nga lalaki; agud nga sia maghatag sa inyo sing pagpakamaayo sining adlaw.

30 ś Kag nahanabu sa adlaw nga madason, nga nagsiling si Moises sa katawohan, Nakasala kamo sing daku nga sala: kag karon magataklad ako pakadto sa GINOO; ayhan makahimo ako sing katumbasan tungud sa inyo sala.

31 Kag si Moises nagbalik sa GINOO, kag nagsiling, O, ining katawohan nakasala sing daku nga sala, kag naghimo nga sa ila sing mga dios nga bulawan.

32 Apang karon, kon patawaron mo ang ila sala --; kag kon indi, panasa ako, ginaampo ko sa imo, sa imo libro nga nasulat mo.

33 Kag ang GINOO nagsiling kay Moises, Ang bisan sin-o nga nakasala batok sa akon, sia panason ko sa akon libro.

34 Busa karon lakat ka, tuytuyi ang katawohan sa duug nga napamolong ko sa imo: yari karon, ang akon Anghel magauna sa imo: wala sing sapayan sa adlaw nga ako magduaw, paduawon ko sa ila ang ila sala.

35 Kag ang GINOO naghatag sang kalalat-an sa katawohan, bangud nga naghimo sila sing tinday nga baka, nga nahimo ni Aaron.

KAPITULO 33

KAG ang GINOO nagsiling kay Moises, Halin ka, kag magtaklad gikan diri, ikaw kag ang katawohan nga ginpataklad mo gikan sa duta sang Egipto, pakadto sa duta nga ginsumpa ko kay Abraham, kay Isaac, kag kay Jacob, nga nagasiling, Sa imo kaliwat ihatag ko ini:

2 Kag ako magapadala sang anghel sa una nimo; kag sobolon ko ang mga Canaanhon, ang mga Amornon, kag ang mga Hithanon, kag ang mga Pereznon, ang mga Hevhanon, kag ang mga Jebusnon:

3 Sa duta nga nagailig sing gatas kag dugus: kay ako indi magtaklad sa tunga nimo; kay ikaw katawohan nga tingkoyan: agud nga indi ko ikaw pagpapason sa dalanon.

4 ś Kag sang nabatian sang katawohan ining malaut nga mga balita, naglalaw sila: kag wala sing tawo nga nagbutang sang iya mga puni.

5 Kay ang GINOO nagsiling kay Moises, Isiling sa kaanakan sang Israel, Kamo katawohan nga tingkoyan: magataklad ako sa tunga nimo sa hinali, kag papason ko ikaw: busa karon huksa sa imo ang imo mga puni, agud nga ako makahibalo sang himoon ko sa imo.

6 Kag ang kaanakan sang Israel nagpanghukas sang ila mga puni sa luyo sang bukid nga Horeb.

7 Kag ginkuha ni Moises ang tabernakulo, kag ginpatindug ini sa gowa sang kampo, malayo sa kampo, kag gintawag ini, ang Tabernakulo sang katilingban. Kag nahanabu, nga ang tagsatagsa nga nagpangita sa GINOO naggowa pakadto sa tabernakulo sang katilingban, nga yadto sa gowa sang kampo.

8 Kag nahanabu, kon si Moises magkadto sa tabernakulo, ang bug-os nga katawohan nagbangon, kag nagtindug ang tagsa ka tawo sa ganhaan sang iya layanglayang, kag naglantaw kay Moises, tubtub nga sia nakasulud sa layanglayang.

9 Kag nahanabu, kon si Moises magsulud sa tabernakulo, ang haligi nga panganud nagpaubus, kag nagtindug sa ganhaan sang tabernakulo, kag ang GINOO nagpakighambal kay Moises.

10 Kag ang bug-os nga katawohan nakakita sang pagtindug sang haligi nga panganud sa ganhaan sang tabernakulo: kag ang bug-os nga katawohan nagtindug kag nagsimba, ang tagsa ka tawo sa ganhaan sang iya layanglayang.

11 Kag ang GINOO nagpamolong kay Moises sa nawung kag nawung, subong sang isa ka tawo nga nagahambal sa iya abyan. Kag nagbalik sia sa kampo: apang ang iya alagad nga si Josue, anak nga lalaki ni Nun, isa ka pamatan-on, wala maghalin sa tabernakulo.

12 śKag si Moises nagsiling sa GINOO, Tan-awa, nagasiling ka sa akon, Pataklara ining katawohan: kag wala mo ako pagpahibaloa kon sin-o ang ipadala mo upud sa akon. Apang ikaw nakasiling, Kilala ko ikaw sa ngalan, kag nakapahamuut ka man sa akon itololok.

13 Busa karon, ginaampo ko sa imo, kon nakapahamuut ako sa imo itololok, ipahayag mo sa akon karon ang imo dalanon, agud nga makilala ko ikaw, agud nga makaagum ako sing bugay sa imo itololok: kag talupangda nga ining pungsud imo katawohan.

14 Kag nagsiling sia, Ang akon pagtambong magaupud sa imo, kag papahuwayon ko ikaw.

15 Kag nagsiling sia sa iya, Kon ang imo pagtambong indi mag-upud sa akon, indi kami pagpataklara gikan diri.

16 Kay sa ano bala kilalahon ini, nga nakaagum ako kag ang imo katawohan sing bugay sa imo itololok? indi bala nga ikaw nagaupud sa amon? kon indi, pagapainon kami, ako kag ang imo katawohan, gikan sa tanan nga mga tawo nga yara sa kadaygan sang duta.

17 Kag ang GINOO nagsiling kay Moises, Himoon ko ini nga butang man nga napamolong mo: kay ikaw nakaagum sing bugay sa akon itololok, kag nakilala ko ikaw sa ngalan.

18 Kag nagsiling sia, Ginaampo ko sa imo, ipakita sa akon ang imo himaya.

19 Kag nagsiling sia, Paagihon ko ang bug-os nakon nga pagkaayo sa atubangan mo, kag ibantala ko sa atubangan mo ang ngalan sang GINOO; kag magamaayo ako sa pagaayohan ko, kag magakalooy ako sa pagakalooyan ko.

20 Kag nagsiling sia, Indi ka makakita sang akon nawung: kay wala sing tawo nga makakita sa akon, kag mabuhi.

21 Kag ang GINOO nagsiling, Yari karon, may duug sa luyo ko, kag magtindug ka sa ibabaw sang dakung bato:

22 Kag mahanabu, samtang nagaagi ang akon himaya, nga ibutang ko ikaw sa litik sang dakung bato, kag tabonan ikaw sang akon kamut tubtub nga ako makaligad:

23 Kag kuhaon ko ang akon kamut, kag makita mo ang akon likod: apang ang akon nawung indi makita.

KAPITULO 34

KAG ang GINOO nagsiling kay Moises, Basbas ka sing duha ka tapitapi nga bato kaangay sang nahauna: kag ako magasulat sa sining mga tapitapi sang mga polong nga didto sa nahauna nga mga tapitapi, nga ginboong mo.

2 Kag maghanda ka sa pagkaaga, kag sa aga magtukad ka sa bukid nga Sinai, kag mag-atubang ka sa akon didto sa putokputokan sang bukid.

3 Kag wala sing bisan sin-o nga tawo nga magtukad upud sa imo, kag wala sing bisan sin-o nga tawo nga makita sa bug-os nga bukid; kag dili pagpahalba ang mga panong ukon ang kabakahan sa atubang sang bukid.

4 ś Kag nagbasbas sia sing duha ka tapitapi kaangay sang nahauna; kag sang aga pa nagbugtaw si Moises, kag nagtukad sa bukid nga Sinai, sono sa nasogo sang GINOO sa iya, kag nagdala sa iya kamut sing duha ka tapitapi nga bato.

5 Kag ang GINOO nagpanaug sa panganud, kag nagtindug didto upud sa iya, kag nagbantala sang ngalan sang GINOO.

6 Kag ang GINOO nag-agi sa atubangan niya, kag nagbantala, Ang GINOO, Ang GINOONG Dios, maloloy-on kag mainayohon, mabinatason, kag bugana sa pagkaayo kag sa kamatooran,

7 Nga nagatipig sing kalooy sa mga linibo, nga nagapatawad sang kasal-anan kag sang paglapas kag sang sala, kag indi nga mas-a magkuha sang sala sang malalison; nga nagapaduaw sang kasal-anan sang mga amay sa mga anak, kag sa mga anak sang mga anak, tubtub sa ikatlo kag sa ikap-at nga kaliwatan.

8 Kag si Moises nagdalidali, kag nagduko nayon sa duta, kag nagsimba.

9 Kag nagsiling sia, Kon karon ako nakaagum sing bugay sa imo itololok, O Ginoo, ginaampo ko sa imo, maglakat ang akon Ginoo sa tunga namon; kay tingkoyan ining katawohan; kag patawara ang amon kalautan kag ang amon sala, kag batona kami nga imo panublion.

10 ś Kag nagsiling sia, Yari karon, nagahimo ako sing katipan: sa atubangan sang bug-os mo nga katawohan magahimo ako sing mga katingalahan, subong sang wala pa nga mahimo sa bug-os nga duta, ukon sa bisan ano nga pungsud: kag ang bug-os nga katawohan diin yara ka makakita sang binuhatan sang GINOO: kay butang nga makahalanguyus ang himoon ko upud sa imo.

11 Tandaan mo ang ginsogo ko sa imo sining adlaw: yari karon, ginasobol ko gikan sa imo atubangan ang mga Amornon, kag ang mga Canaanhon, kag ang mga Hithanon, kag ang mga Pereznon, kag ang mga Hevhanon, kag ang mga Jebusnon.

12 Andam ka sa imo kaugalingon, agud nga indi ka magpakigkatipan sa mga pumuluyo sang duta sa diin nagakadto ka, agud nga indi manginsiod ini sa tunga nimo:

13 Apang wagwagon ninyo ang ila mga halaran, dugmokon ang ila mga imahen, kag tapson ninyo ang ila mga puong-puong sang kakahoyan:

14 Kay dili ka magsimba sa iban nga dios: kay ang GINOO, nga ginahingalanan Maimon, Dios nga maimon:

15 Agud nga indi ka magpakigkatipan sa mga pumuluyo sang duta, kag sila magmakihilawason sa pagsonod sa ila mga dios, kag maghalad sa ila mga dios, kag mag-agda ang isa sa imo, kag magkaon ka sang iya halad;

16 Kag magkuha ka sa ila mga anak nga babaye nga sa imo mga anak nga lalaki, kag magmakihilawason ang ila mga anak nga babaye sa pagsonod sa ila mga dios, kag himoon nga ang imo mga anak nga lalaki magmakihilawason sa pagsonod sa ila mga dios.

17 Dili ka maghimo nga sa imo sing mga dios nga tinunaw.

18 ś Bantayan mo ang pandut sang tinapay nga walay tapay. Sa pito ka adlaw magkaon ka sing tinapay nga walay tapay, sono sa ginsogo ko sa imo, sa napat-ud nga tion sa bulan nga Abib: kay sa bulan nga Abib naggowa ka gikan sa Egipto.

19 Ang tanan nga una maggowa sa taguangkan akon; kag ang tagsa ka panganay nga lalaki sa imo kahayupan, sang baka ukon sang carnero.

20 Apang ang panganay sang asno tubson mo sang isa ka cordero: kag kon indi mo sia pagtubson, niyan longgoon mo ang iya liog. Ang tanan nga panganay sang imo mga anak nga lalaki tubson mo. Kag walay bisan sin-o nga mag-atubang sa akon nga walay dala.

21 ś Magpangabudlay ka sa anum ka adlaw, apang magpahuway ka sa ikapito nga adlaw: sa tion sang pag-arado kag sang pag-ani magpahuway ka.

22 ś Kag hiwaton mo ang pandut sang mga semana, sang mga bunga nga nahauna sang ani sang trigo, kag ang pandut sang pagdamisag sa katapusan sang tuig.

23 ś Makatlo sa isa ka tuig magaatubang ang tanan mo nga lalaki nga kabataan sa Ginoong DIOS, ang Dios sang Israel.

24 Kay sobolon ko ang mga pungsud gikan sa imo atubangan, kag palaparon ko ang imo ginsakpan: kag wala sing bisan sin-ong tawo nga magakaibog sang imo duta, kon magtaklad ka sa pag-atubang sa GINOO nga imo Dios sing makatlo sa isa ka tuig.

25 Dili mo pag-idolot ang dugo sang akon halad nga may upud nga tapay; kag ang halad sang pandut sang pagligad dili pag-ibilin tubtub sa aga.

26 Ang nahauna sang mga bunga nga nahauna sang imo duta dalhon mo sa balay sang GINOO nga imo Dios. Dili mo paglagaon ang tinday sang kanding sa gatas sang iya inang.

27 Kag ang GINOO nagsiling kay Moises, Isulat mo ining mga polong: kay sono sa tinutuyo sining mga polong nakahimo ako sing katipan sa imo kag sa Israel.

28 Kag didto sia upud sa GINOO sing kap-atan ka adlaw kag kap-atan ka gab-i; wala sia magkaon sing tinapay, ukon mag-inum sing tubig. Kag ginsulat niya sa mga tapitapi ang mga polong sang katipan, ang napulo ka sogo.

29 ś Kag nahanabu, sang nagdulhog si Moises sa bukid nga Sinai nga may duha ka tapitapi sang pagpamatuud sa kamut ni Moises, sang sia nagdulhog sa bukid, wala sia makahibalo nga ang panit sang iya nawung nagsilak samtang sia nagpakighambal sa iya.

30 Kag sang nakita ni Aaron kag sang tanan nga kaanakan sang Israel si Moises, yari karon, ang panit sang iya nawung nagsilak; kag nahadluk sila sa pagpalapit sa iya.

31 Kag gintawag sila ni Moises; kag nagbalik sa iya si Aaron kag ang tanan nga manugdumala sang katilingban: kag si Moises nagpakighambal sa ila.

32 Kag sang olihi nagpalapit ang tanan nga kaanakan sang Israel: kag ginhatag niya sa ila sa sogo ang tanan nga napamolong sa iya sang GINOO sa bukid nga Sinai.

33 Kag tubtub sang nakatapus si Moises sa pagpakighambal sa ila, nagbutang sia sing isa ka tabon sa iya nawung.

34 Apang kon si Moises magsulud sa pag-atubang sa GINOO sa pagpakighambal sa iya, ginkuha niya ang tabon, tubtub nga naggowa sia. Kag naggowa sia, kag nagpamolong sa kaanakan sang Israel sinang ginsogo sa iya.

35 Kag nakita sang kaanakan sang Israel ang nawung ni Moises, nga ang panit sang nawung ni Moises nagsilak: kag ginbutang liwat ni Moises ang tabon sa iya nawung, tubtub nga nagsulud sia sa pagpakighambal sa iya.

KAPITULO 35

KAG gintipon ni Moises ang bug-os nga katilingban sang kaanakan sang Israel, kag nagsiling sa ila, Ini sila amo ang mga polong nga ginsogo sang GINOO, nga himoon ninyo.

2 Sa anum ka adlaw himoon ang pagpangabudlay, apang sa ikapitong adlaw may balaan nga adlaw kamo, sabbath nga pagpahuway sa GINOO: ang bisan sin-o nga maghimo sing bisan anong buluhaton sa sini patyon.

3 Dili kamo magdabok sing kalayo sa bug-os ninyong puluy-an sa adlaw nga sabbath.

4 ś Kag si Moises naghambal sa bug-os nga katilingban sang kaanakan sang Israel, nga nagasiling, Ini amo ang butang nga ginsogo sang GINOO, nga nagasiling,

5 Kuha kamo sa inyo sing dolot sa GINOO: ang bisan sin-o nga may kinabubut-on sa tagiposoon, padalha sia sini, isa ka dolot sa GINOO; bulawan, kag pilak, kag saway,

6 Kag asul, kag purpura, kag escarlata, kag lino nga mapino, kag bulbul sang mga kanding,

7 Kag mga panit sang mga carnero nga lalaki nga linugum sing pula, kag mga panit sang badger, kag kahoy nga acasia,

8 Kag lana nga sa suga, kag mga pahumut nga sa lana nga ihalaplas, kag sa incienso nga mahamut,

9 Kag mga bato nga onice, kag mga bato nga inugtampok nga sa efod, kag nga sa hapin sa dughan.

10 Kag magkari ang tagsa ka tawo nga may kaalam sa tagiposoon sa tunga ninyo, kag himoon ang tanan nga nasogo sang GINOO;

11 Ang tabernakulo, ang iya layanglayang, kag ang iya tabon, ang iya mga kaw-it, kag ang iya mga tapi, ang iya mga balabag, ang iya mga haligi, kag ang iya mga boho nga palatindugan,

12 Ang arka, kag ang iya nga mga yayongan, upud ang lingkoran nga pakilooyan, kag ang kumbung sang lipon,

13 Ang latok, kag ang iya nga mga yayongan, kag ang iya mga suludlan, kag ang tinapay nga pahayag,

14 Ang kandilero man nga sa suga, kag ang iya nga mga gamit, kag ang iya mga suga, upud ang lana sa suga,

15 Kag ang halaran sang incienso, kag ang iya nga mga yayongan, kag ang lana nga ihalaplas, kag ang incienso nga mahamut, kag ang lipon sang ganhaan, nga sa salamputan sang tabernakulo,

16 Ang halaran sang halad nga sinonog, nga may iya nga saladang nga saway, ang iya mga yayongan, kag ang tanan niyang suludlan, ang batiya kag ang iya tulungtungan,

17 Ang mga lipon sang luwang, ang iya mga haligi, kag ang ila mga boho nga palatindugan, kag ang lipon sa gawang sang luwang,

18 Ang mga palpal sang tabernakulo, kag ang mga palpal sang luwang, kag ang ila mga banting,

19 Ang mga panapton sang pag-alagdan, sa pag-alagad sa balaan nga duug, ang mga balaan nga panapton nga kay Aaron nga pari, kag ang mga panapton sang iya mga anak nga lalaki, sa pag-alagad sa pagkapari.

20 ś Kag ang bug-os nga katilingban sang kaanakan sang Israel nagtaliwan gikan sa atubangan ni Moises.

21 Kag nag-abut sila, ang tagsatagsa nga ang iya tagiposoon nagtandug sa iya, kag ang tagsatagsa nga may kabubut-on sa iya espiritu, kag nagdala sila sang dolot sa GINOO nga sa buluhaton sang tabernakulo sang katilingban, kag nga sa tanan niya nga pag-alagdan, kag nga sa mga panapton nga balaan.

22 Kag nag-abut sila, mga lalaki kag mga babaye, ang kapid-an nga may kinabubut-on sa tagiposoon, kag nagdala sing mga pulseras, kag mga aritos, kag mga singsing, kag mga puni nga kisap, tanan nga alahas nga bulawan: kag ang tagsa ka tawo nga naghalad, naghalad sing dolot nga bulawan sa GINOO.

23 Kag ang tagsa ka tawo, nga may asul, kag purpura, kag escarlata, kag lino nga mapino, kag bulbul sang mga kanding, kag mapula nga mga panit sang mga carnero nga lalaki, kag mga panit sang mga badger, nagdala sa ila.

24 Ang tagsatagsa nga naghalad sang dolot nga pilak kag saway nagdala sang dolot sa GINOO: kag ang tagsa ka tawo, nga may kahoy nga acasia sa bisan anong buluhaton sang pag-alagdan, nagdala sini.

25 Kag ang tanan nga babaye nga may kaalam sa tagiposoon nagbolong sa ila mga kamut, kag nagdala sinang ginbolong nila, sang asul, kag sang purpura, kag sang escarlata, kag sang lino nga mapino.

26 Kag tanan nga babaye nga natandug sang ila tagiposoon sa kaalam nagbolong sang bulbul sang mga kanding.

27 Kag ang mga manugdumala nagdala sing mga bato nga onice, kag sang mga bato nga inugtampok, nga sa efod, kag sa hapin sa dughan;

28 Kag sang pahumut, kag sang lana nga sa suga, kag sang lana nga ihalaplas, kag sa incienso nga mahumut.

29 Ang kaanakan sang Israel nagdala sing dolot nga kinabubut-on sa GINOO, ang tagsa ka lalaki kag babaye, nga ang ila tagiposoon nagtandug sang ila kabubut-on sa pagdala tungud sa tanan nga buluhaton, nga ginsogo sang GINOO paagi kay Moises nga himoon.

30 ś Kag si Moises nagsiling sa kaanakan sang Israel, Tan-awa, ang GINOO nagtawag sa ngalan kay Bezalel nga anak nga lalaki ni Uri, ang anak nga lalaki ni Hur, sang tribo ni Juda;

31 Kag ginpuno niya sia sang espiritu sang Dios, sa kaalam, sa paghangup, kag sa ihibalo, kag sa tanan nga bagay sang buluhaton;

32 Kag sa pagpadugi sang buluhaton nga sinampaton, sa pagbuhat sa bulawan, kag sa pilak, kag sa saway,

33 Kag sa paglagari sing mga bato nga inugtampok, kag sa paggutib sang kahoy, sa pagpangabudlay sa tanan nga bagay sang buluhaton nga sinampaton.

34 Kag ginbutang niya sa iya tagiposoon agud nga sia magtudlo, sia kag si Oholiab, ang anak nga lalaki ni Ahisamac, sang tribo ni Dan.

35 Ginpuno niya sila sing kaalam sa tagiposoon, sa pagpangabudlay sa tanan nga bagay sang buluhaton sang manugtigib, kag sang sampaton nga tawo, kag sang manugborda sa asul, kag sa purpura, sa escarlata, kag sa lino nga mapino, kag sang manughabol, sa ila nga nagahimo sang bisan anong buluhaton, kag sang mga nagapadugi sang mga buluhaton nga sinampaton.

KAPITULO 36

NIYAN si Bezalel kag si Oholiab, kag ang tagsa ka tawo nga may kaalam sa tagiposoon, nga sa ila ginbutang sang GINOO ang kaalam kag ang paghangup sa paghibalo sa pagbuhat sang tanan nga buluhaton nga sa pag-alagdan sang santuario, nagbuhat sono sa tanan nga ginsogo sang GINOO.

2 Kag gintawag ni Moises si Bezalel kag si Oholiab, kag ang tagsa ka tawo nga may kaalam sa tagiposoon, nga ang ila tagiposoon ginbutangan sang GINOO sing kaalam, ang tagsatagsa nga ang iya tagiposoon nagtandug sa iya sa pagkadto sa buluhaton sa paghimo sini:

3 Kag ginbaton nila kay Moises ang tanan nga dolot, nga gindala sang kaanakan sang Israel nga sa buluhaton sang pag-alagdan sang santuario, sa paghimo sini. Kag nagdala pa sila sing mga halad nga kinabubut-on agaaga.

4 Kag ang tanan nga maalam nga tawo, nga naghimo sang tanan nga buluhaton sang santuario nag-abut, ang tagsatagsa gikan sa buluhaton nga ginhimo nila;

5 ś Kag naghambal sila kay Moises, nga nagasiling, Ang katawohan nagadala sing labi pa kadamu sang sa kinahanglan nga sa pag-alagdan sang buluhaton, nga ginsogo sang GINOO nga himoon.

6 Kag si Moises nagsogo, kag ginpabantala nila ini sa bug-os nga kampo, nga nagasiling, Dili na ang bisan sin-ong lalaki ukon babaye maghimo sing bisan ano pa nga buluhaton nga sa dolot sang santuario. Gani ginpunggan ang katawohan sa pagdala.

7 Kay may kasangkapan sila nga tuman na sa paghimo sang tanan nga buluhaton, kag madamu pa.

8 ś Kag ang tagsa ka tawo sa ila nga may kaalam sa tagiposoon nga naghimo sang buluhaton sang tabernakulo, naghimo sang napulo ka kumbung sa lino nga mapino nga binolong, kag sa asul, kag sa purpura, kag sa escarlata: ginhimo niya ini sila nga may mga querubin nga ginhimo sing sinampaton.

9 Ang kalabaon sang tagsa ka kumbung duha ka pulo kag walo ka maniko, kag ang kasangkaron sang tagsa ka kumbung apat ka maniko: isa ka takus ang tanan nga kumbung.

10 Kag gintambitambi niya ang lima ka kumbung: kag ang iban nga lima ka kumbung gintambitambi niya.

11 Kag naghimo sia sing mga sulusingsing nga asul sa kilid sang isa ka kumbung nga nahigad gid gikan sa hamitan sang nahaunang tinambitambi: amo man ang ginhimo niya sa kilid sang kumbung nga nahigad gid sang ikaduhang tinambitambi.

12 Naghimo sia sing kalim-an ka sulusingsing sa isa ka kumbung, kag naghimo sia sing kalim-an ka sulusingsing sa kilid sang kumbung sa ikaduhang tinambitambi: ang mga sulusingsing nagatunguray sang isa ka kumbung sa isa.

13 Kag naghimo sia sing kalim-an ka kaw-it nga bulawan, kag gintabid ang mga kumbung sa isa kag isa paagi sang mga kaw-it: gani ang tabernakulo nangin-isa.

14 ś Kag naghimo sia sing mga kumbung nga bulbul sang mga kanding nga sa layanglayang nga taklap sa tabernakulo: ginhimo niya sila nga napulog isa ka kumbung.

15 Ang kalabaon sang isa ka kumbung katloan ka maniko, kag apat ka maniko ang kasangkaron sang tagsa ka kumbung: isa ka takus ang napulog isa ka kumbung.

16 Kag gintambitambi niya ang lima ka kumbung sing pain, kag ang anum ka kumbung sing pain.

17 Kag naghimo sia sing kalim-an ka sulusingsing sa kilid sang kumbung nga nahigad gid sa nahaunang tinambitambi, kag naghimo sia sing kalim-an ka sulusingsing sa kilid sang kumbung sa ikaduhang tinambitambi.

18 Kag naghimo sia sing kalim-an ka kaw-it nga saway sa pagtabid sang layanglayang agud nga mangin-isa ini.

19 Kag naghimo sia sa layanglayang sing taklap nga mga panit sang mga carnero nga lalaki nga linugum sing pula, kag taklap nga mga panit sang mga badger sa ibabaw sini.

20 ś Kag naghimo sia nga sa tabernakulo sing mga tapi sa patindug nga kahoy nga acasia.

21 Napulo ka maniko ang kalabaon sang isa ka tapi, kag isa ka maniko kag tunga ang kasangkaron sang tagsa ka tapi.

22 May duha ka diladila ang tagsa ka tapi, nga tadlong ang isa sa isa: ginhimo niya ang subong sini sa tanan nga tapi sang tabernakulo.

23 Kag naghimo sia sang mga tapi nga sa tabernakulo; duha ka pulo ka tapi nga sa kilid nga nabagatnan nayon sa bagatnan:

24 Kag naghimo sia sing kap-atan ka boho nga palatindugan nga pilak sa idalum sang duha ka pulo ka tapi; duha ka boho sa idalum sang isa ka tapi nga sa iya duha ka diladila, kag duha ka boho sa idalum sang isa pa ka tapi nga sa iya duha ka diladila.

25 Kag sa pihak nga kilid sang tabernakulo, nga nayon sa aminhan nga pamusud, naghimo sia sing duha ka pulo ka tapi,

26 Kag ang ila kap-atan ka boho nga palatindugan nga pilak; duha ka boho sa idalum sang isa ka tapi, kag duha ka boho sa idalum sang isa pa ka tapi.

27 Kag sa mga kilid sang tabernakulo nayon sa katundan naghimo sia sing anum ka tapi.

28 Kag duha ka tapi ang ginhimo niya nga sa mga pamusud sang tabernakulo sa duha ka kilid.

29 Kag natabid sila sa idalum, kag nagtabiray sila tubtub sa ukbung nila, sa isa ka argolya: ginhimo niya ang subong sini sa duha sa ila, sa duha ka pamusud.

30 Kag may walo ka tapi; kag ang ila mga boho nga palatindugan nga pilak napulog anum ka boho, duha ka boho sa idalum sang tagsa ka tapi.

31 ś Kag naghimo sia sing mga balabag nga kahoy nga acasia; lima nga sa mga tapi sa isa ka kilid sang tabernakulo,

32 Kag lima ka balabag nga sa mga tapi sang ikaduhang kilid sang tabernakulo, kag lima ka balabag nga sa mga tapi sang tabernakulo sa mga kilid nayon sa katundan.

33 Kag naghimo sia sang balabag nga natunga nga mag-agi sa tunga sang mga tapi gikan sa isa ka ukbung tubtub sa isa.

34 Kag gintaklapan niya sing bulawan ang mga tapi, kag naghimo sang ila mga argolya nga bulawan nga goloan sang mga balabag, kag gintaklapan sing bulawan ang mga balabag.

35 ś Kag naghimo sia sang kumbung nga asul, kag purpura, kag escarlata, kag lino nga mapino nga binolong: nga may mga querubin nga ginhimo sang sinampaton, ini ginhimo niya.

36 Kag naghimo sia nga sa iya sing apat ka haligi nga acasia, kag gintaklapan sila sing bulawan: ang ila mga panga bulawan; kag nagbasia sia nga sa ila sing apat ka boho nga palatindugan nga pilak.

37 ś Kag naghimo sia sing lipon nga sa ganhaan sang tabernakulo, nga asul, kag purpura, kag escarlata, kag lino nga mapino nga binolong, nga nahimo sa borda;

38 Kag ang iya lima ka haligi pati ang ila mga panga: kag gintaklapan niya ang ila mga oloolo kag ang ila mga pikit sa liogliog sing bulawan: apang ang ila lima ka boho nga palatindugan nahimo sa saway.

KAPITULO 37

KAG ginhimo ni Bezalel ang arka gikan sa kahoy nga acasia: duha ka maniko kag tunga ang iya kalabaon, kag isa ka maniko kag tunga ang iya kasangkaron, kag isa ka maniko kag tunga ang iya kataason:

2 Kag gintaklapan niya ini sing bulawan nga puro sa sulud kag sa gowa, kag ginhimoan ini sing purungpurung nga bulawan palibut.

3 Kag nagbasia sia nga sa sini sing apat ka argolya nga bulawan nga sa iya apat ka pamusud; duha ka argolya sa isa ka kilid sini, kag duha ka argolya sa isa pa ka kilid sini.

4 Kag naghimo sia sing mga yayongan nga kahoy nga acasia, kag gintaklapan sila sing bulawan.

5 Kag gingolo niya ang mga yayongan sa mga argolya sa mga kilid sang arka, sa pagdala sang arka.

6 ś Kag ginhimo niya ang lingkoran nga pakilooyan gikan sa bulawan nga puro: duha ka maniko kag tunga ang iya kalabaon, kag isa ka maniko kag tunga ang iya kasangkaron.

7 Kag naghimo sia sing duha ka querubin nga bulawan, ginhimo niya sila nga pinapa sa isa ka bilog, sa duha ka ukbung sang lingkoran nga pakilooyan;

8 Isa ka querubin sa isa ka ukbung, kag isa ka querubin sa isa pa ka ukbung: ginhimo niya ang mga querubin nga unay sa lingkoran nga pakilooyan sa duha niya ka ukbung.

9 Kag ang mga querubin naghumlad sang ila mga pakpak sa ibabaw, kag nagtabon ang ila mga pakpak sang lingkoran nga pakilooyan, nga ang ila mga nawung nagaatubangay; ang mga nawung sang mga querubin nagatamud nayon sa lingkoran nga pakilooyan.

10 ś Kag ginhimo niya ang latok gikan sa kahoy nga acasia: duha ka maniko ang iya kalabaon, kag isa ka maniko ang iya kasangkaron, kag isa ka maniko kag tunga ang iya kataason:

11 Kag gintaklapan niya ini sing bulawan nga puro, kag ginhimoan ini sing purungpurung nga bulawan palibut.

12 Ginhimoan man niya ini sing sanipa palibut nga dapal kasangkad; kag ginhimoan sa sanipa sini sing purungpurung nga bulawan palibut.

13 Kag nagbasia sia nga sa sini sing apat ka argolya nga bulawan, kag gintakud ang mga argolya sa apat ka pamusud sa iya apat ka tiil.

14 Ang mga argolya malapit sa sanipa, nga goloan sang mga yayongan sa pagdala sang latok.

15 Kag ginhimo niya gikan sa kahoy nga acasia ang mga yayongan sa pagdala sang latok, kag gintaklapan sila sing bulawan.

16 Kag ginhimo niya gikan sa bulawan nga puro ang mga suludlan nga yara sa latok, ang iya mga pinggan, kag ang iya mga kutsara, kag ang iya mga yahong, kag ang iya mga tabon sa pagtabon sini tanan.

17 ś Kag ginhimo niya ang kandilero gikan sa bulawan nga puro: ginhimo niya ang kandilero gikan sa bulawan nga pinapa; ang iya puno, kag ang iya sanga, ang iya mga gokop, ang iya mga puskol, kag ang iya mga bukad, unay sila sa iya:

18 Kag may anum ka sanga nga nagagowa sa mga kilid niya; tatlo ka sanga sang kandilero nagagowa sa isa ka kilid niya, kag tatlo ka sanga sang kandilero nagagowa sa pihak nga kilid niya:

19 Tatlo ka gokop nga ginhimo kaangay sang mga bulak sang almendro sa isa ka sanga, isa ka puskol kag isa ka bukad; kag tatlo ka gokop nga ginhimo kaangay sang mga almendro sa isa pa ka sanga, isa ka puskol kag isa ka bukad: amo ini sa anum ka sanga nga nagagowa sa kandilero.

20 Kag sa kandilero may apat ka gokop nga ginhimo kaangay sang mga almendro, ang iya mga puskol, kag ang iya mga bukad:

21 Kag isa ka puskol sa ubus sang duha ka sanga nga unay sa iya, kag isa ka puskol sa ubus sang duha ka sanga nga unay sa iya, kag isa ka puskol sa ubus sang duha ka sanga nga unay sa iya, sa anum ka sanga nga nagagowa sa iya.

22 Ang ila mga puskol kag ang ila mga sanga unay sa iya: ang bug-os niya isa ka pinapa nga buhat sa puro nga bulawan.

23 Kag naghimo sia sang pito ka suga niya, kag sang iya mga inugpalong, kag sang iya mga alagbonan, gikan sa bulawan nga puro.

24 Gikan sa isa ka talanton nga bulawan nga puro ginhimo niya ini, kag ang tanan niya nga mga suludlan.

25 ś Kag ginhimo niya gikan sa kahoy nga acasia ang halaran sang incienso: isa ka maniko ang iya kalabaon, kag isa ka maniko ang iya kasangkaron; kwadrado ini; kag duha ka maniko ang iya kataason; unay sa iya ang iya mga sungay.

26 Kag gintaklapan niya ini sing bulawan nga puro, ang iya ibabaw, kag ang iya mga kilid sa palibut, kag ang iya mga sungay: ginhimoan man niya ini sing purungpurung nga bulawan palibut.

27 Kag ginhimoan niya ini sing duha ka argolya nga bulawan sa ubus sang purungpurung, sa duha ka magtimbang nga kilid sini, nga goloan sang mga yayongan sa pagdala sini.

28 Kag naghimo sia sang mga yayongan gikan sa kahoy nga acasia, kag gintaklapan sila sing bulawan.

29 ś Kag naghimo sia sang balaan nga lana nga ihalaplas, kag sang puro nga incienso nga mga pahumut, sono sa padugi sang manugpahamut.

KAPITULO 38

KAG ginhimo niya gikan sa kahoy nga acasia ang halaran sang halad nga sinonog: lima ka maniko ang iya kalabaon, kag lima ka maniko ang iya kasangkaron; kwadrado ini; kag tatlo ka maniko ang iya kataason.

2 Kag ginhimo niya ang mga sungay sini sa iya apat ka pamusud; ang iya mga sungay unay sa iya: kag gintaklapan niya ini sing saway.

3 Kag ginhimo niya ang tanan nga suludlan sang halaran, ang mga kaldera, kag ang mga pala, kag ang mga batiya, kag ang mga kaw-it sa unud, kag ang mga bagahan: ang tanan niya nga suludlan ginhimo niya sila gikan sa saway.

4 Kag naghimo sia nga sa halaran sing isa ka saladang nga saway sa buhat nga pinuna, sa idalum sang pamibig palibut sa sulud, nga nagalambut tubtub sa katunga paibabaw.

5 Kag nagbasia sia sing apat ka argolya nga sa apat ka ukbung sang saladang nga saway, nga goloan sang mga yayongan.

6 Kag naghimo sia sang mga yayongan gikan sa kahoy nga acasia, kag gintaklapan sila sing saway.

7 Kag gingolo niya ang mga yayongan sa mga argolya sa mga kilid sang halaran, sa pagdala sini; ginhimo niya ang halaran nga guyko sang mga tapi.

8 ś Kag ginhimo niya ang batiya gikan sa saway, kag ang iya tulungtungan gikan sa saway, gikan sa mga salaming sang mga babaye nga nagatilipon, nga nagtilipon sa ganhaan sang tabernakulo sang katilingban.

9 ś Kag ginhimo niya ang luwang: sa kilid nga nabagatnan nayon sa bagatnan ang mga bungbung sang luwang lino nga mapino nga binolong, isa ka gatus ka maniko:

10 Ang ila mga haligi duha ka pulo, kag ang ila mga boho nga palatindugan duha ka pulo nga saway; ang mga panga sang haligi kag ang ila mga pikit sa liogliog pilak.

11 Kag sa kilid nga naaminhan, ang mga kumbung isa ka gatus ka maniko, ang ila mga haligi duha ka pulo, kag ang ila mga boho nga palatindugan nga saway duha ka pulo; ang mga panga sang mga haligi kag ang ila mga pikit sa liogliog pilak.

12 Kag sa kilid nga nakatundan ang mga bungbung kalim-an ka maniko, ang ila haligi napulo, kag ang ila mga boho nga palatindugan napulo; ang mga panga sang mga haligi kag ang ila mga pikit sa liogliog pilak.

13 Kag sa kilid nga nasidlangan nayon sa sidlangan kalim-an ka maniko.

14 Ang mga bungbung sa isa ka kilid sang gawang napulo kag lima ka maniko; ang ila mga haligi tatlo, kag ang ila mga boho nga palatindugan tatlo.

15 Kag sa pihak nga kilid, sa sining bahin kag sa sinang bahin sang gawang sang luwang ang mga bungbung napulog lima ka maniko; ang ila mga haligi tatlo, kag ang ila mga boho nga palatindugan tatlo.

16 Ang tanan nga bungbung sang luwang palibut lino nga mapino nga binolong.

17 Kag ang mga boho nga palatindugan sang mga haligi, saway sila; ang mga panga sang mga haligi kag ang ila mga pikit sa liogliog pilak; kag ang mga taklap sang ila mga oloolo pilak; kag ang tanan nga haligi sang luwang napikitan sa liogliog sing pilak.

18 Kag ang lipon sa gawang sang luwang nahimo sa borda sa asul, kag sa purpura, kag sa escarlata, kag sa lino nga mapino nga binolong: kag ang kalabaon duha ka pulo ka maniko, kag ang kataason sa kasangkaran lima ka maniko, sono sa mga bungbung sang luwang.

19 Kag ang ila haligi apat, kag ang ila boho nga palatindugan nga saway apat; ang ila mga panga pilak, kag ang mga taklap sang ila mga oloolo kag ang ila mga pikit sa liogliog pilak.

20 Kag ang tanan nga palpal sang tabernakulo, kag sang luwang sa palibut saway.

21 ś Amo ini ang kadamuon sang mga butang nga sa tabernakulo, ang tabernakulo sang pagpamatuud, sang gin-isip sila, sono sa sogo ni Moises, nga sa pag-alagdan sang mga Levinhon sa kamut ni Itamar, nga anak nga lalaki ni Aaron nga pari.

22 Kag ginhimo ni Bezalel nga anak nga lalaki ni Uri, ang anak nga lalaki ni Hur, sang tribo ni Juda, ang tanan nga ginsogo sang GINOO kay Moises.

23 Kag upud sa iya si Oholiab, nga anak nga lalaki ni Ahisamac, sang tribo ni Dan, isa ka manuggutib, kag sampaton nga manugbuhat, kag manugborda sa asul, kag sa purpura, kag sa escarlata, kag sa lino nga mapino.

24 Ang bug-os nga bulawan nga gingamit nga sa buluhaton, sa tanan nga paghimo sang balaan nga duug, bisan ang dolot nga bulawan, duha ka pulo kag siam ka talanton, kag pito ka gatus kag katloan ka siclo, sono sa siclo sang santuario.

25 Kag ang pilak nga ila sang katilingban nga naisipan isa ka gatus ka talanton, kag isa ka libo kag pito ka gatus kag kapitoan kag lima ka siclo, sono sa siclo sang santuario:

26 Isa ka beka sa tagsa ka lalaki, nga amo, ang katunga sang isa ka siclo, sono sa siclo sang santuario, sa tagsatagsa nga naisipan, kutub sa duha ka pulo ka tuig kag paibabaw, nga sa anum ka gatus kag tatlo ka libo, lima ka gatus kag kalim-an ka lalaki.

27 Kag ang isa ka gatus ka talanton nga pilak gingamit nga sa pagbasia sang mga boho nga palatindugan sa santuario, kag sa mga boho nga palatindugan sang kumbung; isa ka gatus ka boho sa isa ka gatus ka talanton, isa ka talanton nga sa tagsa ka boho.

28 Kag sa isa ka libo kag pito ka gatus kag kapitoan kag lima ka siclo naghimo sia sing mga panga nga sa mga haligi, kag gintaklapan niya ang ila mga oloolo, kag naghimo sing mga pikit sa liogliog sa ila.

29 Kag ang dolot nga saway kapitoan ka talanton, kag duha ka libo kag apat ka gatus ka siclo.

30 Kag sa ila ginhimo niya ang mga boho nga palatindugan sa ganhaan sang tabernakulo sang katilingban, kag ang halaran nga saway, kag ang iya saladang nga saway, kag ang tanan nga suludlan sang halaran,

31 Kag ang mga boho nga palatindugan sang luwang palibut, kag ang mga boho nga palatindugan sang gawang sang luwang, kag ang tanan nga palpal sang tabernakulo, kag ang tanan nga palpal sang luwang palibut.

KAPITULO 39

KAG gikan sa asul, kag sa purpura, kag sa escarlata, ginhimo nila ang mga panapton sang pag-alagdan, nga sa pag-alagad sa balaan nga duug, kag ginhimo nila ang mga panapton nga balaan nga iya ni Aaron; sono sa ginsogo sang GINOO kay Moises.

2 Kag ginhimo niya ang efod gikan sa bulawan, sa asul, kag sa purpura, kag sa escarlata, kag sa lino nga mapino nga binolong.

3 Kag ginpapa nila ang bulawan sa mga pinanid nga manipis, kag gingihaygihay ini sa mga nahotnahot, sa pagsamay sini sa asul, kag sa purpura, kag sa escarlata, kag sa lino nga mapino, nga nahimo sang sampaton.

4 Naghimo sila nga sa sini sing mga hombrera, sa pagtambitambi sini: sa iya duha ka ukbung natambi ini.

5 Kag ang hinabol sing sinampaton nga wagkus sang iya efod, nga yara sa ibabaw sini, naunay sa iya, sono sa buhat sini; sa bulawan, sa asul, kag sa purpura, kag sa escarlata, kag sa lino nga mapino nga binolong; sono sa ginsogo sang GINOO kay Moises.

6 ś Kag gintakud nila ang mga bato nga onice nga nalibutan sing mga kamoy nga bulawan, nga natigban, kaangay sang mga pagtigib sang singsing nga inugpat-in, sono sa mga ngalan sang kaanakan sang Israel.

7 Kag iya ginbutang sila sa ibabaw sang mga hombrera sang efod, subong nga mga bato nga sa handumanan sa mga anak sang Israel; sono sa ginsogo sang GINOO kay Moises.

8 ś Kag ginhimo niya ang hapin sa dughan nga nahimo sang sampaton, kaangay sang pagbuhat sang efod; gikan sa bulawan, sa asul, kag sa purpura, kag sa escarlata, kag sa lino nga mapino nga binolong.

9 Kwadrado ini; ginhimo nila ang hapin sa dughan nga doble: ang iya kalaba isa ka dangaw, kag isa ka dangaw ang iya kasangkad nga doble.

10 Kag ginbutangan nila ini sing apat ka kubay nga mga bato: ang nahaunang kubay, isa ka sardio, isa ka topacio, kag isa ka carbunclo: amo ini ang nahaunang kubay.

11 Kag ang kubay nga ikaduha, isa ka esmeralda, isa ka zafiro, kag isa ka diamante.

12 Kag ang kubay nga ikatlo, isa ka ligure, isa ka agate, kag isa ka ametista.

13 Kag ang kubay nga ikap-at, isa ka berilo, isa ka onice, kag isa ka jaspe: napalibutan sila sing mga kamoy nga bulawan sa ila mga tampok.

14 Kag ang mga bato sono sa mga ngalan sang kaanakan sang Israel, napulog duha, sono sa mga ngalan nila, kaangay sila sa mga pagtigib sa singsing nga inugpat-in, ang tagsatagsa sono sa ngalan niya, nga sa napulog duha ka tribo.

15 Kag ginhimoan nila ang hapin sa dughan sing mga kadena sa mga ukbung, sa buhat nga linubag nga bulawan nga puro.

16 Kag naghimo sila sing duha ka kamoy nga bulawan, kag duha ka singsing nga bulawan; kag gintakud ang duha ka singsing sa duha ka ukbung sang hapin sa dughan.

17 Kag gintakud nila ang kadena nga bulawan nga linubag sa duha ka singsing sa mga ukbung sang hapin sa dughan.

18 Kag ang duha ka ukbung sang duha ka kadena nga linubag gintakud nila sa duha ka kamoy, kag gintakud sila sa mga hombrera sang efod nayon sa atubangan sini.

19 Kag naghimo sila sing duha ka singsing nga bulawan, kag gintakud sila sa duha ka ukbung sang hapin sa dughan, sa iya sidsid nayon sa kilid sang efod pasulud.

20 Kag ginhimo nila ang duha pa ka singsing nga bulawan, kag gintakud sila sa duha ka kilid sang efod nayon sa idalum, sa iya bahin sa atubangan malapit sa iya tinabuan sa ibabaw sang hinabol sing sinampaton nga wagkus sang efod.

21 Kag ginhigot nila ang hapin sa dughan paagi sa iya mga singsing sa mga singsing sang efod sang laso nga asul, agud nga ini manginsa ibabaw sang hinabol sing sinampaton nga wagkus sang efod, kag agud nga indi mapalus sa efod ang hapin sa dughan; sono sa ginsogo sang GINOO kay Moises.

22 ś Kag naghimo sia sang kunup sang efod nga hinabol nga bug-os nga asul.

23 Kag may liab sa tunga sang kunup, subong sang liab sang limbutong, nga may aporo palibut sa iya liab, agud nga indi ini magisi.

24 Kag naghimo sila sa mga sidsid sang kunup sing granada nga asul, kag purpura, kag escarlata, kag lino nga binolong.

25 Kag naghimo sila sing mga kampanilya nga bulawan nga puro, kag ginbal-utbal-ut ang mga kampanilya sa mga granada sa sidsid sang kunup palibut, nga nabal-utbal-ut sa mga granada;

26 Isa ka kampanilya kag isa ka granada, isa ka kampanilya kag isa ka granada, palibut sa sidsid sang kunup sa pag-alagad; sono sa ginsogo sang GINOO kay Moises.

27 ś Kag naghimo sila sing mga bayo nga lino nga mapino nga hinabol nga sa kay Aaron, kag nga sa iya mga anak nga lalaki,

28 Kag isa ka turbante nga lino nga mapino, kag mga goro nga matahum nga lino nga mapino, kag lino nga mga poroy nga himo sa mapino nga lino nga binolong,

29 Kag isa ka wagkus nga lino nga mapino nga binolong, kag asul, kag purpura, kag escarlata, nga nahimo sa borda; sono sa ginsogo sang GINOO kay Moises.

30 ś Kag naghimo sila sang pinanid nga balaan nga purungpurung nga bulawan nga puro, kag nagsulat sa sini sing sinulat, kaangay sang mga pagtigib sang singsing nga inugpat-in, PAGKABALAAN SA GINOO.

31 Kag sa sini naghigut sila sang laso nga asul, sa pagtakud sini sa turbante sa ibabaw; sono sa ginsogo sang GINOO kay Moises.

32 ś Sa amo nahuman ang tanan nga buluhaton sang tabernakulo sang layanglayang sang katilingban: kag ginhimo sang kaanakan sang Israel sono sa tanan nga ginsogo sang GINOO kay Moises, subong sini ang paghimo nila.

33 ś Kag gindala nila kay Moises ang tabernakulo, ang layanglayang, kag ang tanan niyang kasangkapan, ang iya mga kaw-it, ang iya mga tapi, ang iya mga balabag, kag ang iya mga haligi, kag ang iya mga boho nga palatindugan,

34 Kag ang taklap nga mga panit sang mga carnero nga lalaki nga linugum sing pula, kag ang taklap nga mga panit sang mga badger, kag ang kumbung sang lipon,

35 Ang arka sang pagpamatuud, kag ang iya mga yayongan, kag ang lingkoran nga pakilooyan,

36 Ang latok, kag ang tanan niya nga suludlan, kag ang tinapay nga pahayag,

37 Ang kandilero nga puro pati ang iya mga suga, ang mga suga nga ipahamtang sing nagakaigo, kag ang tanan niyang suludlan, kag ang lana nga sa kapawa,

38 Kag ang halaran nga bulawan, kag ang lana nga ihalaplas, kag ang incienso nga mahumut, kag ang lipon sa ganhaan sang tabernakulo,

39 Ang halaran nga saway, kag ang iya saladang nga saway, ang iya mga yayongan, kag ang tanan niyang suludlan, ang batiya kag ang iya tulungtungan,

40 Ang mga bungbung sang luwang, ang iya mga haligi, kag ang iya mga boho nga palatindugan, kag ang lipon sa gawang sang luwang, ang iya mga banting, kag ang iya mga palpal, kag ang tanan nga suludlan nga sa pag-alagdan sang tabernakulo, nga sa layanglayang sang katilingban,

41 Ang mga panapton sang pag-alagdan nga sa pag-alagad sa balaan nga duug, kag ang mga panapton nga balaan nga kay Aaron nga pari, kag ang mga panapton sang iya mga anak nga lalaki, sa pag-alagad sa pagkapari.

42 Sono sa tanan nga ginsogo sang GINOO kay Moises, amo ini tanan nga buluhaton ang ginhimo sang kaanakan sang Israel.

43 Kag gintan-aw ni Moises ang tanan nga nabuhat, kag, yari karon, nahimo nila ini sono sa nasogo sang GINOO, amo gid ini ang nahimo nila: kag ginpakamaayo sila ni Moises.

KAPITULO 40

KAG ang GINOO nagpamolong kay Moises, nga nagasiling,

2 Sa nahaunang adlaw sang nahaunang bulan patindugon mo ang tabernakulo sang layanglayang sang katilingban.

3 Kag ibutang mo sa sulud sini ang arka sang pagpamatuud, kag lipnan mo sang kumbung ang arka.

4 Kag ipasulud mo ang latok, kag ipahamtang sing nagakaigo ang mga butang nga dapat ipahamtang sing nagakaigo sa ibabaw sini; kag ipasulud mo ang kandilero, kag pasigaha ang iya mga suga.

5 Kag ibutang mo ang halaran nga bulawan nga sa incienso sa atubangan sang arka sang pagpamatuud, kag itakud ang lipon sang ganhaan sa tabernakulo.

6 Kag ibutang mo ang halaran sang halad nga sinonog sa atubangan sang ganhaan sang tabernakulo sang layanglayang sang katilingban.

7 Kag ibutang mo ang batiya sa ulut sang layanglayang sang katilingban kag sang halaran, kag sudlan ini sing tubig.

8 Kag ipahamtang mo ang luwang sa palibut, kag ibitay ang lipon sang gawang sang luwang.

9 Kag magkuha ka sang lana nga ihalaplas, kag haplason ang tabernakulo, kag ang tanan nga yara sa sulud sini, kag pakabalaanon ini, kag ang tanan nga suludlan sini: kag manginbalaan ini.

10 Kag haplason mo ang halaran sang halad nga sinonog, kag ang tanan niyang suludlan, kag pakabalaanon ang halaran: kag ini manginbalaan gid nga halaran.

11 Kag haplason mo ang batiya kag ang iya tulungtungan, kag pakabalaanon ini.

12 Kag dalhon mo si Aaron kag ang iya mga anak nga lalaki sa ganhaan sang tabernakulo sang katilingban, kag hinawan sila sing tubig.

13 Kag isuklub mo kay Aaron ang mga panapton nga balaan, kag haplason mo sia kag pakabalaanon sia; agud nga mag-alagad sia sa akon sa pagkapari.

14 Kag dalhon mo ang iya mga anak nga lalaki, kag sukluban sila sing mga bayo:

15 Kag haplason mo sila, subong sang paghaplas mo sa ila amay, agud nga mag-alagad sila sa akon sa pagkapari: kay ang paghaplas sa ila mangindayon nga pagkapari sa ila mga kaliwatan.

16 Amo ini ang ginhimo ni Moises: sono sa tanan nga ginsogo sa iya sang GINOO, amo ini ang iya ginhimo.

17 ś Kag nahanabu sa bulan nga nahauna sa ikaduhang tuig, sa nahaunang adlaw sang bulan, nga ang tabernakulo napatindug.

18 Kag si Moises nagpatindug sang tabernakulo, kag ginpahamtang ang iya mga boho nga palatindugan, kag ginpatindug ang iya mga tapi, kag gingolo ang iya mga balabag, kag ginbangon ang iya mga haligi.

19 Kag ginhumlad niya ang layanglayang sa ibabaw sang tabernakulo, kag ginhumlad ang taklap sang layanglayang sa ibabaw sini; sono sa ginsogo sang GINOO kay Moises.

20 ś Kag ginkuha niya kag ginbutang ang pagpamatuud sa sulud sang arka, kag gingolo ang mga yayongan sa arka, kag gintungtung ang lingkoran nga pakilooyan sa ibabaw sang arka:

21 Kag ginsulud niya ang arka sa tabernakulo, kag ginbitay ang kumbung sang lipon, kag ginlipnan ang arka sang pagpamatuud; sono sa ginsogo sang GINOO kay Moises.

22 ś Kag ginsulud niya ang latok sa layanglayang sang katilingban, sa kilid nga naaminhan sang tabernakulo, sa gowa sang kumbung.

23 Kag ginpahamtang niya sing nagakaigo ang tinapay sa ibabaw sini sa atubangan sang GINOO; sono sa ginsogo sang GINOO kay Moises.

24 ś Kag ginbutang niya ang kandilero sa layanglayang sang katilingban, sa atubangan sang latok, sa kilid nga nabagatnan sang tabernakulo nayon sa bagatnan.

25 Kag ginpasiga niya ang mga suga sa atubangan sang GINOO; sono sa ginsogo sang GINOO kay Moises.

26 ś Kag ginbutang niya ang halaran nga bulawan sa layanglayang sang katilingban sa atubangan sang kumbung:

27 Kag sa ibabaw sini nagsonog sia sing incienso nga mahumut; sono sa ginsogo sang GINOO kay Moises.

28 ś Kag gintakud niya ang lipon sa ganhaan sang tabernakulo.

29 Kag ginbutang niya ang halaran sang halad nga sinonog sa ganhaan sang tabernakulo sang layanglayang sang katilingban, kag naghalad sa ibabaw sini sang halad nga sinonog kag sang halad nga kalan-on; sono sa ginsogo sang GINOO kay Moises.

30 ś Kag ginbutang niya ang batiya sa ulut sang layanglayang sang katilingban kag sang halaran, kag ginsudlan ini sing tubig nga inugpanghinaw.

31 Kag si Moises kag si Aaron kag ang iya mga anak nga lalaki nagpanghinaw sa sini sang ila mga kamut kag sang ila mga tiil:

32 Kon magsulud sila sa layanglayang sang katilingban, kag kon magpalapit sila sa halaran, nagpanghinaw sila; sono sa ginsogo sang GINOO kay Moises.

33 Kag ginpatindug niya ang luwang sa palibut sang tabernakulo kag sang halaran, kag gintakud ang lipon sang gawang sang luwang. Gani natapus ni Moises ang buluhaton.

34 ś Niyan ang isa ka panganud nagtabon sang layanglayang sang katilingban, kag ang himaya sang GINOO nagpuno sang tabernakulo.

35 Kag si Moises indi makasulud sa layanglayang sang katilingban, bangud nga ang panganud nagpabilin sa ibabaw sini, kag ang himaya sang GINOO nagpuno sang tabernakulo.

36 Kag sang naghayaw ang panganud sa ibabaw sang tabernakulo, ang kaanakan sang Israel nagpadayon sa tanan nilang panlakatan:

37 Apang kon ang panganud wala maghayaw, niyan wala sila magpanlakatan tubtub sa adlaw nga naghayaw ini.

38 Kay ang panganud sang GINOO yara sa ibabaw sang tabernakulo sa adlaw, kag ang kalayo yara sa ibabaw sini sa kagab-ihon, sa itololok sang bug-os nga panimalay sang Israel, sa tanan nilang panlakatan.

AMAZING GRACE BIBLE INSTITUTE