ANG SULAT NI PABLO NGA APOSTOL SA MGATAGA-COLOSASKAPITULO 1SI PABLO, isa ka apostol ni Jesu-Cristo paagi sa kabubut-on sang Dios, kag si Timoteo nga aton utud,2 Sa mga santo kag mga matutum nga kauturan kay Cristo nga yara sa Colosas: Ang bugay sa inyo, kag paghidait, gikan sa Dios nga aton Amay kag Ginoong Jesu-Cristo. 3 Nagapasalamat kami sa Dios kag Amay sang aton Ginoong Jesu-Cristo, nga nagapangamuyo gihapon tungud sa inyo, 4 Sang pagkabati namon sang inyo pagtoo kay Cristo Jesus, kag sang inyo gugma tungud sa tanan nga santo, 5 Bangud sang paglaum nga natigana sa inyo sa langit, nga nabatian ninyo anay sa polong sang kamatooran sang ebanghelyo; 6 Nga nag-abut sa inyo, subong nga yara sa bug-os nga kalibutan; kag nagapamunga, nga subong man sa inyo, kutub sa adlaw sang pagkabati ninyo sini, kag pagkilala sang bugay sang Dios sa kamatooran: 7 Subong sang inyo naton-an man kay Epafras nga amon hinigugma nga masigkaalagad, nga matutum nga ministro ni Cristo tungud sa inyo; 8 Nga nag-asoy man sa amon sang inyo gugma sa Espiritu. 9 Bangud sini man, kutub sa adlaw sang amon pagkabati, wala kami mag-untat sa pagpangamuyo tungud sa inyo, kag sa pagpangayo nga mapun-an kamo sang pagkilala sang iya kabubut-on sa bug-os nga kaalam kag espirituhanon nga paghangup; 10 Agud nga maglakat kamo sing takus sa Ginoo sa bug-os nga pagpahamuut, nga nagapamunga sa tagsa ka maayong buhat, kag nagatubo sa pagkilala sa Dios; 11 Sa napangalig-onan kamo sing may bug-os nga kusug, sono sa iya mahimayaon nga gahum, sa bug-os nga pagpailub kag pagbatas nga may kalipay; 12 Nga nagapasalamat sa Amay, nga nagpakatakus sa aton nga mangin mga umalambit sang panublion sang mga santo sa kapawa: 13 Nga nagluwas sa aton gikan sa gahum sang kadudulman, kag nagpaliton sa aton sa ginharian sang iya hinigugma nga Anak: 14 Nga sa iya may pagtubus kita paagi sa iya dugo, bisan pa ang kapatawaran sang mga sala: 15 Sia amo ang dagway sang dimakita nga Dios, ang panganay sang tagsa ka tinuga: 16 Kay paagi sa iya gintuga ang tanan nga butang, nga yara sa langit, kag ang yara sa duta, ang makita kag ang dimakita, bisan mga trono, ukon mga pagdumala, ukon mga punoan, ukon mga kagamhanan: ang tanan nga butang natuga paagi sa iya, kag tungud sa iya: 17 Kag sia una sa tanan nga butang, kag paagi sa iya ang tanan nga butang nagatingub. 18 Kag sia amo ang olo sang lawas, ang iglesia: nga amo ang ginsuguran, ang panganay gikan sa mga patay; agud nga sa tanan nga butang mangin-nahauna sia. 19 Kay nahamut-an sang Amay nga sa iya magpuyo ang tanan nga kabug-osan; 20 Kag, sang nahimo niya ang paghidait paagi sa dugo sang iya krus, paagi sa iya sa pagpasag-uli sang tanan nga butang sa iya kaugalingon; paagi sa iya, nagasiling ako, bisan ang mga butang sa duta, ukon mga butang sa langit. 21 Kag kamo, nga sang tion nga nagligad nahamulag kag mga kaaway sa inyo panghunahuna paagi sa malaut nga mga buhat, walay sapayan karon iya ginpasag-uli 22 Sa lawas sang iya unud paagi sa kamatayon, sa pagpaatubang sa inyo nga balaan kag walay kasawayan kag disalabdongon sa iya itololok: 23 Kon magpadayon kamo sa pagtoo, nga napasad kag malig-on, kag indi magihit sa paglaum sang ebanghelyo, nga inyo nabatian, kag nga ginwali sa tagsa ka tinuga sa idalum sang langit; nga sa sini ako, si Pablo, ginhimo nga isa ka ministro; 24 Nga karon nagakalipay sa akon mga pag-antus tungud sa inyo, kag ginahimun-an ko sa akon unud ang nakulang sa mga kapipit-an ni Cristo tungud sang iya lawas, nga amo ang iglesia: 25 Nga sa sini ako ginhimo nga isa ka ministro, sono sa hinatag sang Dios nga ginhatag sa akon tungud sa inyo, agud nga matuman ang polong sang Dios; 26 Ang misterio nga nalipdan sa mga katuigan kag sa mga kaliwatan, apang karon napahayag sa iya mga santo: 27 Sa ila ginbuut sang Dios ang pagpakilala kon ano ang kamanggaran sang himaya sining misterio sa tunga sang mga Gentil; nga amo nga si Cristo sa inyo, ang paglaum sang himaya: 28 Nga sia ang ginawali namon, nga nagapaandam sa tagsa ka tawo, kag nagapanudlo sa tagsa ka tawo sa bug-os nga kaalam; agud nga amon mapaatubang nga himpit ang tagsa ka tawo kay Cristo Jesus: 29 Nga sa amo nagapangabudlay ako man, nga nagapanikasug sono sa iya pagpanghikot, nga nagapanghikot sing gamhanan sa akon. KAPITULO 2KAY buut ko nga inyo mahibaloan kon daw ano kadaku ang akon pagpanikasug tungud sa inyo, kag tungud sa ila sa Laodicea, kag tungud sa tanan nga wala makakita sang akon nawung sa unud;2 Agud nga ang ila mga tagiposoon malipay, sa ginahiusa sila sa gugma, kag nga sa tanan nga kamanggaran sang bug-os nga kalig-onan sang paghangup, nga sa pagkilala sang misterio sang Dios, kag sang Amay, kag ni Cristo; 3 Nga sa iya natago ang tanan nga bahandi sang kaalam kag ihibalo. 4 Kag ini ginasiling ko, agud nga walay bisan sin-o nga tawo nga magdaya sa inyo sa mga polong nga makabuluyok. 5 Kay bisan wala ako sa unud, apang sa espiritu upud ako sa inyo, nga nagakalipay kag nagatan-aw sang inyo kahusay, kag kalig-on sang inyo pagtoo kay Cristo. 6 Busa sa bagay nga ginbaton ninyo si Cristo Jesus nga Ginoo, maglakat kamo sing amo sa iya: 7 Nga nakapanggamut kag natukud sa iya, kag napalig-on sa pagtoo, subong sang gintudlo sa inyo, nga nagabugana sa sini nga may pagpasalamat. 8 Andam kamo nga walay bisan sin-o nga tawo nga magpatalang sa inyo paagi sa filosofia kag daya nga walay pulus, sono sa tradisyon sang mga tawo, sono sa mga nahauna gid nga pagtolon-an sang kalibutan, kag indi sono kay Cristo. 9 Kay sa iya nagapuyo sing lawasnon ang bilog nga kabug-osan sang pagka-Dios. 10 Kag bug-os na kamo sa iya, nga amo ang olo sang bug-os nga punoan kag kagamhanan: 11 Sa iya man gincircuncidar kamo sang circuncision nga wala paghimoa sang mga kamut, sa pag-uba sang lawas sang mga sala sang unud paagi sa circuncision ni Cristo: 12 Nalubung kamo kaupud niya sa bautismo, nga sa sini ginbanhaw man kamo kaupud niya paagi sa pagtoo sa operasyon sang Dios, nga nagbanhaw sa iya gikan sa mga patay. 13 Kag kamo, nga patay sa inyo mga sala kag dicircuncision sang inyo unud, ginbuhi niya sing tingub upud sa iya, nga nagpatawad sa inyo sang tanan nga mga paglapas; 14 Nga ginpanas ang mga pagsolondan nga sinulat sang kamut nga batok sa aton, nga sumpung sa aton, kag ginkuha niya ini, nga ginalansang ini sa krus niya; 15 Kag sang ginhuklasan niya ang mga punoan kag mga kagamhanan, ginpakita niya sila sing dayag, nga nagadaug sa ila sa sini. 16 Busa walay tawo nga maghukom sa inyo nahanungud sa kalan-on, ukon sa ilimnon, ukon nahanungud sa balaan nga adlaw, ukon sa lati, ukon sa mga adlaw nga sabbath: 17 Nga ang ini sila isa ka landong sang mga butang nga magaabut; apang ang lawas iya ni Cristo. 18 Walay tawo nga magdaya sa inyo sa inyo padya sa hungud sa buut nga pagpaubus kag pagsimba sa mga anghel, nga nagapahilabut sa sinang mga butang nga wala niya makit-an, nga ginpahabok sa walay pulus sang iya hunahuna nga unudnon, 19 Kag wala nagakapyot sa Olo, nga gikan sa iya ang bug-os nga lawas ginasagud paagi sa mga lutalutahan kag mga kaangtan nga nagasangkap, kag napanugpon sila sing tingub, nagatubo sa pagtubo nga gikan sa Dios. 20 Busa kon napatay kamo upud kay Cristo sa mga nahauna gid nga pagtolon-an sang kalibutan, ngaa bala, subong kamo nga nagakabuhi sa kalibutan, nagapasakup kamo sa mga pagsolondan, 21 (Dili magtandug; dili magtilaw; dili mag-uyat; 22 Nga ang amo nga tanan magakawala sa paggamit;) sono sa mga sogo kag mga doktrina sang mga tawo? 23 Ang amo nga mga butang matuud may dagway sang kaalam sa pagsimba sa kaugalingon nga pagbuut, kag pagpaubus, kag pagpatumbaya sang lawas; indi sa pagpadungug sa pagkacontento sang unud. KAPITULO 3NIYAN kon nabanhaw kamo upud kay Cristo, pangitaa yadtong mga butang nga sa ibabaw, diin si Cristo nagalingkod sa too sang Dios.2 Ipahamtang ang inyo panghunahuna sa mga butang sa ibabaw, indi sa mga butang sa duta. 3 Kay napatay kamo, kag ang inyo kabuhi natago upud kay Cristo sa Dios. 4 Kon si Cristo, nga aton kabuhi, magpahayag, niyan kamo man magapahayag kaupud niya sa himaya. 5 Busa patya ninyo ang mga bahin sang inyo lawas nga mga sa duta; ang pagpanghilawas, kahigkoan, malaut nga balatyagon, malaut nga kailigbon, kag pagkamahamkonon, nga amo ang pagsimba sa mga diosdios: 6 Nga bangud sining mga butang ang kasingkal sang Dios nagaabut sa mga anak sang pagkadimatinumanon: 7 Nga sa ila sini kamo man anay naglakat, sang nagkabuhi kamo sa ila. 8 Apang karon mag-uba man kamo sini tanan; kaakig, kasingkal, kalainan, pasipala, malaw-ay nga pololongon sang inyo baba. 9 Dili kamo magbinutigay ang isa kag isa, sanglit nauba ninyo ang daan nga tawo upud ang iya mga buhat; 10 Kag nagsul-ub kamo sang bag-ong tawo, nga ginapabag-o sa ihibalo sono sa dagway niya nga nagtuga sa iya: 11 Sa sini walay Griego ukon Judio, circuncidado ukon dicircuncidado, Barbaro, Scita, ulipon ukon hilway: apang si Cristo amo ang tanan, kag sa tanan. 12 Busa sul-ub kamo, subong nga mga pinili sang Dios, balaan kag hinigugma, sing igbalatyag nga mga kalooy, pagkaayo, pagkamapainubuson sa hunahuna, pagkalolo, pagkamabinatason; 13 Nga nagapinaumuray ang isa kag isa, kag nagapinatawaray ang isa kag isa, kon ang bisan sin-o nga tawo may inugsumbung batok sa isa: subong nga si Cristo nagpatawad sa inyo, amo man ang himoon ninyo. 14 Kag labi sining tanan nga mga butang isul-ub ninyo ang diosnon nga gugma, nga amo ang higot sang kahimpitan. 15 Kag pagahuma ang paghidait sang Dios sa inyo mga tagiposoon, nga sa amo man gintawag kamo sa isa ka lawas; kag magmapinasalamaton kamo. 16 Papuy-a ang polong ni Cristo sa inyo sing mabuganaon sa bug-os nga kaalam; sa nagatinudloay kag nagalinaygayay ang isa kag isa sa mga salmo kag mga himno kag mga kalantahon nga espirituhanon, nga nagaamba nga may bugay sa inyo mga tagiposoon sa Ginoo. 17 Kag bisan ano ang inyo himoon sa polong ukon sa buhat, himoa tanan sa ngalan ni Ginoong Jesus, nga nagapasalamat sa Dios kag sa Amay paagi sa iya. 18 Mga asawa, magpasakup kamo sa inyo kaugalingon nga mga bana, subong nga nagakaigo sa Ginoo. 19 Mga bana, higugmaa ang inyo mga asawa, kag dili kamo magmapait sa ila. 20 Mga kabataan, tumana ang inyo mga ginikanan sa tanan nga butang: kay ini kalahamut-an kaayo sa Ginoo. 21 Mga amay, dili pagpaakiga ang inyo mga kabataan, agud nga indi sila mahanusbu. 22 Mga alagad, tumana ninyo sa tanan nga butang ang inyo mga agalon nga sono sa unud; indi sa pag-alagad nga sa mata, subong nga manugpahamuut sa mga tawo; kondi sa kabunayag sang tagiposoon, nga nahadluk sa Dios: 23 Kag bisan ano ang inyo himoon, himoa ninyo sing tinagiposoon, subong nga sa Ginoo, kag indi nga sa mga tawo; 24 Sa nahibaloan ninyo nga gikan sa Ginoo pagabatonon ninyo ang padya nga panublion: kay ginaalagad ninyo ang Ginoong Cristo. 25 Apang ang nagahimo sing dimatarung magabaton sang dimatarung nga iya nahimo: kag walay ginapasulabi sa mga tawo. KAPITULO 4MGA AGALON, ihatag sa inyo mga alagad inang matarung kag nagakaangay; sa nahibaloan nga kamo man may Agalon sa langit.2 Padayon kamo sa pangamuyo, kag magbantay sa sini nga may pagpasalamat; 3 Kag magpangamuyo tungud sa amon man, nga ang Dios magbukas sa amon sing ganhaan nga sa paghambal, sa pagpamolong sang misterio ni Cristo, nga tungud sini yari ako man nagapus: 4 Agud nga mapahayag ko ini, sono sa dapat ko ipamolong. 5 Maglakat sa kaalam ayon sa mga sa gowa, nga nagahimulus sang tion. 6 Magpamolong kamo sa gihapon nga may bugay, nga naunawan sing asin, agud nga makahibalo kamo kon ano ang dapat nga pagsabat ninyo sa tagsa ka tawo. 7 Ang tanan ko nga kahimtangan ipahibalo sa inyo ni Tiquico, utud nga hinigugma, kag matutum nga ministro kag masigkaalagad sa Ginoo: 8 Sia ginpadala ko sa inyo tungud sini gid nga katuyoan, agud nga masayuran niya ang inyo kahimtangan, kag malipay niya ang inyo mga tagiposoon; 9 Kaupud si Onesimo, matutum kag hinigugma nga utud, nga isa sa inyo. Sila magapahibalo sa inyo sang tanan nga butang nga nahimo diri. 10 Si Aristarco nga masigkabinilanggo ko nagaabiabi sa inyo, kag si Marcos, nga hinablos ni Bernabe (nga nahanungud sa iya nagbaton kamo sing mga sogo: kon makari sia sa inyo, batona ninyo sia;) 11 Kag si Jesus, nga ginatawag si Justo, nga sa mga circuncision. Ini sila lamang ang akon mga masigkamanugpangabudlay nga sa ginharian sang Dios, nga nanginkalipay sa akon. 12 Si Epafras, nga isa sa inyo, nga alagad ni Cristo, nagaabiabi sa inyo, nga sa gihapon nagapangabudlay sing hanoot tungud sa inyo sa mga pangamuyo, agud nga magtindug kamo nga himpit kag bug-os sa tanan nga kabubut-on sang Dios. 13 Kay ginasaksihan ko sia, nga may dakung kakugi sia tungud sa inyo, kag sa ila nga yara sa Laodicea, kag sa ila sa Hierapolis. 14 Si Lucas, ang manugbulong nga hinigugma, kag si Demas, nagatamyaw sa inyo. 15 Abiabiha ninyo ang mga kauturan nga yara sa Laodicea, kag si Nimfas, kag ang iglesia nga yara sa iya balay. 16 Kag kon mabasa ining sulat sa tunga ninyo, ipabasa man ini sa iglesia sang mga taga-Laodicea; kag kamo man magbasa sang sulat gikan sa Laodicea. 17 Kag isiling ninyo kay Arquipo, Pagtatapa ang pag-alagdan nga nabaton mo sa Ginoo, nga paghimoon mo ini. 18 Ang pag-abiabi ko, si Pablo, paagi sa akon kamut. Dumduma ninyo ang akon mga gapus. Ang bugay manginkaupud ninyo. Amen. ¶ Ginsulat gikan sa Roma sa mga taga-Colosas paagi kay Tiquico kag kay Onesimo. |