ANG BALAAN NGA BIBLIA


AMOS


KAPITULO 1

ANG mga polong ni Amos, nga isa sa tunga sang mga manugbantay sang kahayupan sang Tekoa, nga nakita niya nahanungud sa Israel sa mga adlaw ni Uzias nga hari sang Juda, kag sa mga adlaw ni Jeroboam nga anak nga lalaki ni Joas nga hari sang Israel, duha ka tuig sang wala pa ang linog.

2 Kag nagsiling sia, Ang GINOO magangurub gikan sa Zion, kag magamitlang sang iya tingug gikan sa Jerusalem; kag ang mga puluy-an sang mga manugpahalab magalalaw, kag ang putokputokan sang Carmelo malaya.

3 Amo ini ang ginasiling sang GINOO; Bangud sang tatlo ka paglalis sang Damasco, kag bangud sang apat, indi ko pag-ipaiway ang silot sini; bangud nga ginlinas nila ang Galaad sang mga gamit sa linas nga salsalon:

4 Kondi magapadala ako sing kalayo sa panimalay ni Hazael, nga magalamon sang mga palacio ni Ben-hadad.

5 Balion ko man ang pintal sang Damasco, kag utdon ang mga pumuluyo sa patag sang Aven, kag sia nga nagakaput sang cetro sa panimalay sang Eden: kag ang katawohan sang Siria dalhon sa kabihagan sa Kir, nagasiling ang GINOO.

6 ¶ Amo ini ang ginasiling sang GINOO; Bangud sang tatlo ka paglalis sang Gaza, kag bangud sang apat, indi ko pag-ipaiway ang silot sini; bangud nga gindala nila nga bihag ang bug-os nga kabihagan, sa pagtugyan sa ila sa Edom:

7 Kondi magapadala ako sing kalayo sa kuta sang Gaza, nga magalamon sang mga palacio sini:

8 Kag utdon ko ang pumuluyo sa Asdod, kag sia nga nagakaput sang cetro sa Ascalon, kag lisoon ko ang akon kamut batok sa Ecron: kag ang nabilin sang mga Filistinhon mawala, nagasiling ang Ginoong DIOS.

9 ¶ Amo ini ang ginasiling sang GINOO; Bangud sang tatlo ka paglalis sang Tiro, kag bangud sang apat, indi ko pag-ipaiway ang silot sini; bangud nga ila gintugyan ang bug-os nga kabihagan sa Edom, kag wala makadumdum sang mahiuturon nga katipan:

10 Kondi magapadala ako sing kalayo sa kuta sang Tiro, nga magalamon sang mga palacio sini.

11 ¶ Amo ini ang ginasiling sang GINOO; Bangud sang tatlo ka paglalis sang Edom, kag bangud sang apat, indi ko pag-ipaiway ang silot sini; bangud nga ginlagas niya ang iya utud sang espada, kag ginsikway niya ang bug-os nga kaawa, kag ang iya kaakig naggisi sing dalayon, kag ginhuptan niya ang iya kasingkal sa gihapon:

12 Kondi magapadala ako sing kalayo sa Teman, nga magalamon sang mga palacio sang Bozra.

13 ¶ Amo ini ang ginasiling sang GINOO; Bangud sang tatlo ka paglalis sang mga anak ni Amon, kag bangud sang apat, indi ko pag-ipaiway ang silot sini; bangud nga gingayhab nila ang mga babaye nga nagabusung sa Galaad, agud nga mapalapad nila ang ila dulunan:

14 Kondi magadabok ako sing kalayo sa kuta sang Raba, kag magalamon ini sang mga palacio sini, nga may sininggit sa adlaw sang inaway, nga may unus sa adlaw sang buhawi:

15 Kag bihagon ang ila hari, sia kag ang iya mga prinsipe sing tingub, nagasiling ang GINOO.



KAPITULO 2

AMO INI ang ginasiling sang GINOO; Bangud sang tatlo ka paglalis sang Moab, kag bangud sang apat, indi ko pag-ipaiway ang silot sini; bangud nga ginsonog niya ang mga tul-an sang hari sang Edom tubtub nga nag-apog:

2 Kondi magapadala ako sing kalayo sa Moab, kag magalamon ini sang mga palacio sang Kiryot: kag mapatay ang Moab sa kagubut, sa sininggit, kag sa tonog sang budyong:

3 Kag utdon ko ang hukom sa tunga sini, kag patyon ko ang tanan nga prinsipe sini upud sa iya, nagasiling ang GINOO.

4 ¶ Amo ini ang ginasiling sang GINOO; Bangud sang tatlo ka paglalis sang Juda, kag bangud sang apat, indi ko pag-ipaiway ang silot sini; bangud nga gintamay nila ang kasogoan sang GINOO, kag wala magbantay sang iya mga sogo, kag ang ila kabutigan nagpasayup sa ila, nga ginsonod sang ila mga kaamayan:

5 Kondi magapadala ako sing kalayo sa Juda, kag magalamon ini sang mga palacio sang Jerusalem.

6 ¶ Amo ini ang ginasiling sang GINOO; Bangud sang tatlo ka paglalis sang Israel, kag bangud sang apat, indi ko pag-ipaiway ang silot sini; bangud nga ginbaligya nila ang matarung tungud sa pilak, kag ang imol tungud sa isa ka paris nga sapatos;

7 Nga nagahagal tungud sa yab-ok sang duta sa ibabaw sang olo sang imol, kag nagapatiko sang dalanon sang mapainubuson: kag ang lalaki kag ang iya amay nagahiusa sa isa ka dalaga, sa pagpasipala sang akon balaan nga ngalan:

8 Kag nagahiligda sila sa luyo sang tagsa ka halaran sa mga panapton nga ginkuha nga inugpalig-on, kag nagainum sila sang alak sang tinagudilian sa balay sang ila dios.

9 ¶ Walay sapayan ginlaglag ko ang Amornon sa atubangan nila, nga ang iya kataas subong sang kataas sang mga cedro, kag mabakud sia subong sang mga terebinto; walay sapayan ginlaglag ko ang iya bunga sa ibabaw, kag ang iya mga gamut sa idalum.

10 Ginpataklad ko man kamo gikan sa duta sang Egipto, kag gintuytuyan kamo sing kap-atan ka tuig sa kamingawan, sa pagtag-iya sang duta sang Amornon.

11 Kag sa inyong mga anak nga lalaki nagbangon ako sing mga manalagna, kag sa inyo mga pamatan-on nga lalaki sing mga Nazareo. Indi bala amo gid ini, O kamo nga kaanakan sang Israel? nagasiling ang GINOO.

12 Apang ginpainum ninyo sing alak ang mga Nazareo; kag ginsogo ang mga manalagna, nga nagasiling, Dili magpanagna.

13 Yari karon, ginapilpilan ako ninyo, subong sang karo nga puno sang mga linaylay nga ginapilpilan.

14 Busa ang pagpalagyo mawala sa mga madasig, kag ang makusug indi makapabaskug sang iya kusug, kag ang gamhanan indi makaluwas sang iya kaugalingon:

15 Kag ang nagagamit sang pana indi magabato; kag ang madasig sa mga tiil indi makaluwas sang iya kaugalingon: kag ang nagakabayo indi makaluwas sang iya kaugalingon.

16 Kag ang maisug sa tunga sang mga gamhanan magapalagyo nga hubo sa sinang adlaw, nagasiling ang GINOO.



KAPITULO 3

PAMATII ining polong nga ginpamolong sang GINOO batok sa inyo, O kaanakan sang Israel, batok sa bug-os nga panimalay nga ginpataklad ko gikan sa duta sang Egipto, nga nagasiling,

2 Kamo lamang ang ginkilala ko sa tanan nga panimalay sang duta: busa silotan ko kamo tungud sang tanan ninyong kalautan.

3 Makalakat bala ang duha sing tingub, kon wala sila magkasugut?

4 Magangurub bala ang leon sa talon, kon wala sia sing tulukbon? magangurub bala ang totoy nga leon sa gowa sang iya lungib, kon wala sia sing nadakup?

5 Masiod bala ang pispis sa duta, diin wala sing tiglapak sa iya? kuhaon bala sang isa ang siod gikan sa duta, kag wala gid sing nakuha?

6 Patonggon bala ang budyong sa siudad, kag indi mahadlukan ang mga tawo? mahanabu bala ang malaut sa siudad, kag wala bala paghimoa ini sang GINOO?

7 Sa pagkamatuud ang Ginoong DIOS indi maghimo sing bisan ano, kon indi niya anay mapahayag ang iya tinago sa iya mga alagad nga mga manalagna.

8 Ang leon nagngurub, sin-o bala ang indi mahadluk? ang Ginoong DIOS nagpamolong, sin-o bala ang indi makapanagna?

9 ¶ Ibantala sa mga palacio sa Asdod, kag sa mga palacio sa duta sang Egipto, kag isiling, Tilipon kamo sa mga bukid sang Samaria, kag tan-awa ang mga dakung kagubut nga yara sa tunga sini, kag ang mga pagpigus sa tunga sini.

10 Kay indi sila makahibalo maghimo sang matarung, nagasiling ang GINOO, nga nagasuput sing palugus kag pangawat sa ila mga palacio.

11 Busa amo ini ang ginasiling sang Ginoong DIOS; May dira nga isa ka kasumpung nga manginyara sa palibut sang duta; kag lusluson niya sa imo ang imo kusug, kag atihon ang imo mga palacio.

12 Amo ini ang ginasiling sang GINOO; Subong nga ang manugpahalab nagakuha sa baba sang leon sang duha ka paa, ukon sang bahin sang dulunggan; sa amo kuhaon ang kaanakan sang Israel nga nagapuyo sa Samaria sa pamusud sang hiligdaan, kag sa Damasco sa higdaan.

13 Pamati kamo, kag magpamatuud sa panimalay ni Jacob, nagasiling ang Ginoong DIOS, ang Dios sang mga kasoldadosan,

14 Nga sa adlaw nga duawon ko sa iya ang mga paglalis sang Israel duawon ko man ang mga halaran sang Bet-el: kag utdon ang mga sungay sang halaran, kag maholog sa duta.

15 Kag samaron ko ang balay sa tigtulugnaw pati ang balay sa tingadlaw; kag ang mga balay nga tiposo mawala, kag ang dalagkung mga balay pagatapuson, nagasiling ang GINOO.



KAPITULO 2

PAMATI sini nga polong, kamo nga mga baka sang Basan, nga yara sa bukid sang Samaria, nga nagapigus sang mga imol, nga nagaligis sang mga nawad-an, nga nagasiling sa ila mga agalon, Magdala, kag mag-ininum kita.

2 Ang Ginoong DIOS nagsumpa sa iya pagkabalaan, nga, yari karon, magaabut ang mga adlaw sa inyo, nga dalhon kamo niya sang mga kaw-it, kag ang inyo mga kaliwatan sang mga taga.

3 Kag magagowa kamo sa mga bulho, ang tagsa ka baka sing tadlong sa atubangan niya; kag kamo magapahabug sa ila pasulud sa palacio, nagasiling ang GINOO.

4 ¶ Magkadto sa Bet-el, kag maglalis; sa Gilgal magpadamu sang paglalis; kag dalha ang inyo mga halad sa tagsa ka aga, kag ang inyo mga ikapulo sa tapus sang ikatlong tuig:

5 Kag magdolot sang halad sang pagpasalamat nga may tapay, kag magbantala kag magpahibalo sing mga halad nga kinabubut-on: kay ini naluyagan ninyo, O kamo nga kaanakan sang Israel, nagasiling ang Ginoong DIOS.

6 ¶ Kag ginhatagan ko man kamo sing pagkatinlo sang mga ngipon sa tanan ninyong mga siudad, kag pagkakulang sing kalan-on sa tanan ninyong mga duug: apang wala kamo magbalik sa akon, nagasiling ang GINOO.

7 Kag ako man nagpugung sa inyo sang ulan, sang tatlo pa ka bulan tubtub ang tig-alani: kag ginpaulan ko sa isa ka siudad, kag wala ko pagpaulana sa iban nga siudad: ang isa ka bahin gin-ulanan, kag ang isa ka bahin nga wala maulani nalaya.

8 Gani ang duha ukon tatlo ka siudad nagdalangdalang pakadto sa isa ka siudad, sa pag-inum sing tubig; apang wala sila maayawi: apang wala kamo magbalik sa akon, nagasiling ang GINOO.

9 Ginsakit ko kamo sing panlaya kag agop-op: sang nagdugang ang inyo mga katamnan kag ang inyo mga ulubasan kag ang inyo mga kahoy nga higuera kag ang inyo mga kahoy nga olivo, ang ulud nga litoglitog naglamon sa ila: apang wala kamo magbalik sa akon, nagasiling ang GINOO.

10 Ginpadala ko sa tunga ninyo ang pameste subong sang sa Egipto: ginpatay ko sa espada ang inyo mga pamatan-on nga lalaki, kag gindala ang inyo mga kabayo; kag ginpausbong ko sa inyo mga ilong ang kabaho sang inyo mga kampo: apang wala kamo magbalik sa akon, nagasiling ang GINOO.

11 Ginlaglag ko ang iban sa inyo, subong sang paglaglag sang Dios sang Sodoma kag Gomorra, kag kamo nanginsubong sang agipo nga ginsabnit sa pagkasonog: apang wala kamo magbalik sa akon, nagasiling ang GINOO.

12 Busa amo ini ang himoon ko sa imo, O Israel: kag bangud nga himoon ko ini sa imo, mag-aman sa pagsugata sa imo Dios, O Israel.

13 Kay, yari karon, sia nga nagahuman sang kabukiran, kag nagatuga sang hangin, kag nagapahayag sa tawo kon ano ang iya hunahuna, nga nagahimo sang kaagahon nga kadudulman, kag nagatapak sa mataas nga mga duug sang duta, Ang GINOO, Ang Dios sang mga kasoldadosan, amo ang iya ngalan.



KAPITULO 5

PAMATI kamo sining polong nga akon ginagamit batok sa inyo, nga isa ka panalabiton, O panimalay sang Israel.

2 Napukan ang ulay sang Israel; indi na sia magbangon pa: ginbayaan sia sa iya duta; wala gid sing mabangon sa iya.

3 Kay amo ini ang ginasiling sang Ginoong DIOS; Ang siudad nga naggowa nga isa ka libo mabilinan sing isa ka gatus, kag inang naggowa nga isa ka gatus mabilinan sing napulo, sa panimalay sang Israel.

4 ¶ Kay amo ini ang ginasiling sang GINOO sa panimalay sang Israel, Pangitaa ninyo ako, kag magakabuhi kamo:

5 Apang dili magpangita sang Bet-el, ukon magsulud sa Gilgal, kag dili magpadayon sa Beer-seba: kay ang Gilgal magakadto sing totoo sa kabihagan, kag ang Bet-el manginwala sing pulus.

6 Pangitaa ang GINOO, kag magakabuhi kamo; basi nga mag-ibwal sia kaangay sang kalayo sa panimalay ni Jose, kag magapanglamon sini, kag nga wala gid sing makapapalong sini sa Bet-el.

7 Kamo nga nagahimo nga artamisa sang katarungan, kag nagabiyabiya sang pagkamatarung sa duta,

8 Pangitaa sia nga nagahimo sang pito ka bitoon kag Orion, kag nagabaylo sang landong sang kamatayon sa kaagahon, kag nagapadulum sang kaadlawon sa kagab-ihon: nga nagatawag sang mga tubig sang dagat, kag ginaula sila sa kadaygan sang duta: Ang GINOO amo ang iya ngalan:

9 Nga nagapabakud sang mga gin-ati batok sa mga makusug, sa bagay nga ang mga gin-ati magakari batok sa pamakud.

10 Ginadumtan nila ang nagasabdong sa gawang, kag ginakangil-aran nila ang nagapamolong sing matadlong.

11 Busa sanglit nga ginatapak ninyo ang mga imol, kag nagabalaton sa iya sing mga sulukton nga trigo: nagpatindug kamo sing mga balay nga bato nga binasbasan, apang indi kamo makapuyo sa ila; nagtanum kamo sing matahum nga mga ulubasan, apang indi kamo makainum sang alak nila.

12 Kay nakilala ko ang inyo madamu nga mga paglalis, kag ang inyo dalagku gid nga mga sala: nagapapiot sila sang matarung, nagakuha sila sing hamham, kag ginpatiko nila ang katarungan sang mga imol sa gawang.

13 Busa ang mainandamon magahipus sa sinang tion; kay ini tion nga malaut.

14 Pangitaa ang maayo, kag indi ang malaut, agud nga mabuhi kamo: kag sa amo ang GINOO, ang Dios sang mga kasoldadosan, manginkaupud ninyo, subong sang ginsiling ninyo.

15 Dumti ang malaut, kag higugmaa ang maayo, kag tukura ang katarungan sa gawang: ayhan ang GINOONG Dios sang mga kasoldadosan magamainayohon sa mga nabilin ni Jose.

16 Busa ang GINOO, ang Dios sang mga kasoldadosan, ang Ginoo, nagasiling sing amo sini; Ang paghaya manginsa tanan nga masangkad nga dalan; kag magasiling sila sa tanan nga dakung dalan, Ahay! ahay! kag tawgon nila ang mangunguma sa paglalaw, kag ang mga sampaton sa panalabiton sa paghaya.

17 Kag sa tanan nga ulubasan may paghaya: kay magalatas ako sa tunga nimo, nagasiling ang GINOO.

18 Kailo sa inyo nga nagahandum sang adlaw sang GINOO! sa ano bala ang katuyoan sini tungud sa inyo? ang adlaw sang GINOO kadudulman, kag indi kapawa.

19 Subong abi sang tawo nga nagpalagyo sa leon, kag ginsugata sia sang oso; ukon nagsulud sa balay, kag naghamboy sang iya kamut sa dingding, kag ginkagat sia sang man-ug.

20 Indi bala manginkadudulman ang adlaw sang GINOO, kag indi kapawa? tama gid kadulum, kag wala sing kasanag sa sini?

21 ¶ Ginadumtan ko, ginatamay ko ang inyo mga adlaw sang pandut, kag indi ako magapanimaho sa inyo mga solemne nga pagtilipon.

22 Bisan dolotan ninyo ako sang mga halad nga sinonog kag sang inyo mga halad nga kalan-on, indi ako magbaton sa ila: kag indi ko pagsapakon ang mga halad sa paghidait sang inyo mga pinatambok nga sapat.

23 Kuhaa ninyo sa akon ang kagahud sang inyo mga ambahanon; kay indi ako magpamati sang melodia sang inyo mga viola.

24 Apang pabulhoga ang katarungan subong sang mga tubig, kag ang pagkamatarung subong sang mabaskug nga kasulgan.

25 Gindolotan bala ako ninyo sing mga halad kag mga dolot sa kamingawan sing kap-atan ka tuig, O panimalay sang Israel?

26 Apang gindala ninyo ang tabernakulo sang inyo Moloc kag Caiun nga inyo mga imahen, ang bitoon sang inyo dios, nga ginhimo ninyo nga sa inyo.

27 Busa ipadala ko kamo sa kabihagan sa unhan sang Damasco, nagasiling ang GINOO, nga ang iya ngalan amo Ang Dios sang mga kasoldadosan.



KAPITULO 6

KAILO sa ila nga nagapatawhay sa Zion, kag nagasalig sa bukid sang Samaria, nga ginahingadlan nga puno sang mga pungsud, nga sa ila nagkari ang panimalay sang Israel!

2 Agi kamo sa Calne, kag magtan-aw; kag gikan didto kadto kamo sa Hamat nga daku: niyan dolhog sa Gat sang mga Filistinhon: maayo pa sila bala sa sining mga ginharian? ukon ang ila ginsakpan malapad pa bala sa inyo ginsakpan?

3 Kamo nga nagapaiswag sang adlaw sang malaut, kag nagapapalapit sang lingkoran sang palugus;

4 Nga nagahigda sa mga hiligdaan nga tiposo, kag nagahilayhilay sila sa ila mga salaliayan, kag nagakaon sang mga cordero gikan sa panong, kag sang mga tinday nga baka gikan sa palasudlan;

5 Nga nagaamba sing mga ugoy-ugoy sa lanton sang viola, kag nagapatok nga sa ila sing mga tolonggon sang lanton, kaangay kay David;

6 Nga nagainum sing alak sa mga yahong, kag nagapanghaplas sila sang mga ihalaplas nga ali: apang wala sila nagakasubo sang kapipit-an ni Jose.

7 ¶ Busa magakadto sila karon sa kabihagan upud sa una nga bilihagon, kag ang bankite sang mga nagahilayhilay magataliwan.

8 Ang Ginoong DIOS nagsumpa sa iya kaugalingon, nagasiling ang GINOO nga Dios sang mga kasoldadosan, Ginakangil-aran ko ang pagkahalangdon ni Jacob, kag ginadumtan ang iya mga palacio: busa itugyan ko ang siudad pati ang tanan nga yara sa sini.

9 Kag mahanabu, kon may napulo ka tawo nga mabilin sa isa ka balay, nga magakalapatay sila.

10 Kag ang tiyo sang tawo magadala sa iya, kag sia nga nagasonog sa iya, sa pagpagowa sang mga tul-an sa balay, kag magasiling sa iya nga yara sa mga luyo sang balay, May dira pa bala upud sa imo? kag magasiling sia, Wala. Niyan magasiling sia, Hipus ka: kay indi kita makasambit sang ngalan sang GINOO.

11 Kay, yari karon, ang GINOO nagasogo, kag gub-on niya ang daku nga balay sa mga bulho, kag ang balay nga diotay sa mga litik.

12 ¶ Magadalagan bala ang mga kabayo sa ibabaw sang dakung bato? magaarado bala ang isa didto sing mga baka? kay ginbaylo ninyo ang katarungan sa apdo, kag ang bunga sang pagkamatarung sa tanum nga makahililo:

13 Kamo nga nagakalipay sa butang nga wala sing pulus, nga nagasiling, Wala bala kami makaagaw sing mga sungay nga sa amon paagi sa amon kaugalingon nga kusug?

14 Apang, yari karon, magabangon ako sing pungsud batok sa inyo, O panimalay sang Israel, nagasiling ang GINOO nga Dios sang mga kasoldadosan; kag papiotan nila kamo kutub sa salamputan sang Hamat tubtub sa suba sang kamingawan.



KAPITULO 7

AMO INI ang ginpahayag sa akon sang Ginoong DIOS; kag, yari karon, naghimo sia sing mga tibakla sa pagsugud sang pagtubo sang naolihi nga tubo; kag, yari karon, amo ini ang naolihi nga tubo sa tapus nga napagalaban sang hari.

2 Kag nahanabu, nga sang natapus nila sa pagkaon ang hilamon sang duta, niyan ako nagsiling, O Ginoong DIOS, patawara, ginapakilooy ko sa imo: paagi kay sin-o bala si Jacob magatindug? kay diotay sia. 3 Ang GINOO naghinulsul nahanungud sini: Indi mahanabu ini, nagasiling ang GINOO.

4 ¶ Amo ini ang ginpahayag sa akon sang Ginoong DIOS: kag, yari karon, ang Ginoong DIOS nagtawag sa pagpakigsuay paagi sa kalayo, kag naglamon ini sang daku nga kadadalman, kag nag-ubus sang isa ka bahin.

5 Niyan nagsiling ako, O Ginoong DIOS, pauntata, ginapakilooy ko sa imo: paagi kay sin-o bala si Jacob magatindug? kay diotay sia.

6 Ang GINOO naghinulsul nahanungud sini: Ini man indi mahanabu, nagasiling ang Ginoong DIOS.

7 ¶ Amo ini ang ginpahayag niya sa akon: kag, yari karon, ang GINOO nagtindug sa ibabaw sang kuta nga nahimo sa tonton, nga may isa ka tonton sa iya kamut.

8 Kag ang GINOO nagsiling sa akon, Amos, ano bala ang makita mo? Kag nagsiling ako, Isa ka tonton. Niyan ang Ginoo nagsiling, Yari karon, ako magabutang sing tonton sa tunga sang akon katawohan nga Israel: indi na ako liwat magalabay sa ila:

9 Kag ang mataas nga mga duug ni Isaac manginmamingaw, kag ang mga santuario sang Israel gub-on; kag magasumpung ako nga may espada sa panimalay ni Jeroboam.

10 ¶ Niyan si Amasias nga pari sang Bet-el nagpadala kay Jeroboam nga hari sang Israel, nga nagasiling, Si Amos nagpuhon batok sa imo sa tunga sang panimalay sang Israel: ang duta indi makabatas sang tanan niya nga polong.

11 Kay amo ini ang ginasiling ni Amos, Si Jeroboam mapatay sa espada, kag sa pagkamatuud ang Israel dalhon nga bihag gikan sa ila kaugalingon nga duta.

12 Si Amasias man nagsiling kay Amos, O ikaw nga manugpanan-aw, lakat, palagyo ka pakadto sa duta sang Juda, kag magkaon sing tinapay didto, kag magtagna didto:

13 Apang dili ka na magpanagna pa sa Bet-el: kay kapilya ini sang hari, kag luwang ini sang hari.

14 ¶ Niyan nagsabat si Amos, kag nagsiling kay Amasias, Indi ako sadto manalagna, ukon anak ako sang manalagna; kondi manugbantay ako sang kahayupan, kag manug-ipo sang bunga sang sicomoro:

15 Kag ginkuha ako sang GINOO sang nagasonod ako sang panong, kag nagsiling sa akon ang GINOO, Lakat, tagna sa akon katawohan nga Israel.

16 ¶ Busa karon pamatian mo ang polong sang GINOO: Ikaw nagasiling, Dili ka magtagna batok sa Israel, kag dili magholog sang imo polong sa panimalay ni Isaac.

17 Busa amo ini ang ginasiling sang GINOO; Ang imo asawa mangin alpot sa siudad, kag ang imo mga anak nga lalaki kag ang imo mga anak nga babaye mapukan sa espada, kag ang imo duta bahinbahinon sa latid; kag ikaw mapatay sa duta nga nadagtaan: kag sa pagkamatuud ang Israel magakaladto sa kabihagan gikan sa iya duta.



KAPITULO 8

AMO INI ang ginpahayag sang Ginoong DIOS sa akon: kag yari karon isa ka alat nga bunga sa tingadlaw.

2 Kag nagsiling sia, Amos, ano bala ang makita mo? Kag nagsiling ako, Isa ka alat nga bunga sa tingadlaw. Niyan nagsiling sa akon ang GINOO, Nagaabut ang katapusan sa akon katawohan nga Israel; indi na ako liwat magalabay sa ila.

3 Kag ang mga ambahanon sang templo mangin mga paghinaya sa sinang adlaw, nagasiling ang Ginoong DIOS: manginmay madamu nga patay nga mga lawas sa tagsa ka duug; ihaboy nila sila sing hipus.

4 ¶ Pamati sini, O kamo nga nagalamon sang mga nawad-an, sa pagdula sang mga imol sang duta,

5 Nga nagasiling, San-o pa bala magtaliwan ang lati, agud nga makabaligya kami sing uyas? kag ang sabbath, agud nga makapagowa kami sing trigo, nga nagapadiotay sang efa, kag nagapadaku sang siclo, kag nagapatalang sa mga timbangan paagi sa limbong?

6 Agud nga mabakal namon ang mga imol sang pilak, kag ang mga nawad-an sang isa ka paris nga sapatos; hoo, kag mabaligya ang alupinpin sang trigo?

7 Ang GINOO nagsumpa sa pagkahalangdon ni Jacob, Sa pagkamatuud indi ko pagkalimtan nga mas-a ang bisan ano sang ila mga binuhatan.

8 Indi bala magakurug ang duta tungud sini, kag magalalaw ang tagsatagsa nga nagapuyo didto? kag magadalodo ini sing bug-os kaangay sang baha; kag sikwayon ini kag malapawan, subong nga paagi sa baha sang Egipto.

9 Kag mahanabu sa sinang adlaw, nagasiling ang Ginoong DIOS, nga patunuron ko ang adlaw sa kaudtohon, kag padulmon ko ang duta sa masanag nga adlaw:

10 Kag pagabaylohan ko ang inyo mga pandut sang lalaw, kag ang tanan ninyo nga ambahanon sang panalabiton; kag pawagkusan ko sing panapton nga sako ang tanan nga balikawang, kag paupawon ang tagsa ka olo; kag himoon ko ini subong nga paglalaw sa bugtong nga anak nga lalaki, kag ang katapusan sini subong sang adlaw sang kapaitan.

11 ¶ Yari karon, nagaabut ang mga adlaw, nagasiling ang Ginoong DIOS, nga magapadala ako sing tiggulutum sa duta, indi tiggulutum sa kalan-on, ukon kauhaw sa tubig, kondi sa pagpamati sang mga polong sang GINOO:

12 Kag magadalangdalang sila kutub sa dagat pa dagat, kag kutub sa aminhan tubtub gid sa sidlangan, magadalagan sila pakadto-pakari sa pagpangita sang polong sang GINOO, kag indi makakita sini.

13 Sa sina nga adlaw ang maayoayo nga mga ulay kag ang pamatan-on nga mga lalaki mapunaw sa kauhaw.

14 Sila nga nagasumpa tungud sa sala sang Samaria, kag nagasiling, Ang imo dios, O Dan, nagakabuhi; kag, Ang pagginawi sang Beer-seba nagakabuhi; sila gid mapukan, kag indi nga mas-a magabangon liwat.



KAPITULO 9

NAKITA ko ang Ginoo nga nagatindug sa ibabaw sang halaran: kag nagsiling sia, Lampusi ang olohan sang ganhaan, agud mag-uyug ang mga bakalan: kag utdon sila sa olo, tanan sila; kag patyon ko sa espada ang nabilin sa ila: ang nagatal-as sa ila indi makapalagyo, kag ang nagapalagyo sa ila indi maluwas.

2 Bisan sila magkutkut sa impierno, kutub didto kuhaon sila sang akon kamut; bisan magsaka sila tubtub sa langit, kutub didto dalhon ko sila paidalum:

3 Kag bisan magpanago sila sa putokputokan sang Carmelo, pangitaon ko kag kuhaon sila didto; kag bisan nalipdan sila sa akon itololok sa naidalum sang dagat, didto sogoon ko ang man-ug, kag sia magakagat sa ila:

4 Kag bisan magkadto sila sa kabihagan sa atubangan sang ila mga kaaway, didto sogoon ko ang espada, kag ini magapatay sa ila: kag ituhoy ko sa ila ang akon mga mata tungud sa malaut, kag indi tungud sa maayo.

5 Kag ang Ginoong DIOS sang mga kasoldadosan amo sia ang nagatandug sang duta, kag magakatunaw ini, kag ang tanan nga nagapuyo sa sini magalalaw: kag magadalodo ini sing bug-os kaangay sang baha; kag malapawan ini, subong nga paagi sa baha sang Egipto.

6 Sia amo ang nagapatindug sang iya mga panalgan sa langit, kag nagpasad sang iya kabon sa duta; sia nga nagatawag sang mga tubig sang dagat, kag ginaula sila sa kadaygan sang duta: Ang GINOO amo ang iya ngalan.

7 Indi bala kamo subong sang kaanakan sang mga Etiopiahanon sa akon, O kaanakan sang Israel? nagasiling ang GINOO. Wala ko bala pagpataklara ang Israel gikan sa duta sang Egipto? kag ang mga Filistinhon gikan sa Caftor, kag ang mga Sirianhon gikan sa Kir?

8 Yari karon, ang mga mata sang Ginoong DIOS yara sa makasasala nga ginharian, kag laglagon ko ini gikan sa kadaygan sang duta; luwas nga indi ko paglaglagon sing bug-os ang panimalay ni Jacob, nagasiling ang GINOO.

9 Kay, yari karon, ako magasogo, kag ayagon ko ang panimalay sang Israel sa tunga sang mga pungsud, kaangay sang uyas nga gin-ayag sa ayagan, apang walay diotay gid nga pasi nga maholog sa duta.

10 Ang tanan nga makasasala sang akon katawohan mapatay sa espada, nga nagasiling, Ang malaut indi maglambut ukon magsugata sa amon.

11 ¶ Sa sinang adlaw patindugon ko ang tabernakulo ni David nga napukan, kag kapulan ko ang mga bulho sini; kag patindugon ko ang iya mga naguba, kag tukuron ko ini subong sadto sang sa mga adlaw nga dumaan:

12 Agud nga tag-iyahan nila ang nabilin sa Edom, kag sa tanan nga pagano, nga ginatawag sa akon ngalan, nagasiling ang GINOO nga nagahimo sini.

13 Yari karon, nagaabut ang mga adlaw, nagasiling ang GINOO, nga ang manug-arado magalambut sang mangangani, kag ang manuglinas sang mga ubas sang nagasab-ug sang binhi; kag ang mga bukid magapatulo sing matam-is nga alak, kag ang tanan nga kabakoloran matunaw.

14 Kag pahaulian ko ang kabihagan sang akon katawohan nga Israel, kag patindugon nila ang mga siudad nga nalaglag, kag puy-an sila; kag magatanum sila sing mga ulubasan, kag magainum sang alak sini; magahimo man sila sing mga katamnan, kag magakaon sang bunga nila.

15 Kag itanum ko sila sa ila duta, kag indi na sila paggabuton sa ila duta nga ginhatag ko sa ila, nagasiling ang GINOO nga imo Dios.




AMAZING GRACE BIBLE INSTITUTE