ANG BALAAN NGA BIBLIA

BINUHAT

KAPITULO 1

ANG nahaunang tolon-an nga akon ginsulat, O Teofilo, nahanungud sang tanan nga ginsugdan ni Jesus sa paghimo kag pagpanudlo,

2 Tubtub sa adlaw nga ginbayaw sia, sa tapus nga nakahatag sia sing mga sogo paagi sa Balaan nga Espiritu sa mga apostol nga iya napili:

3 Nga sa ila man sia nagpakita sang iya kaugalingon nga buhi sa tapus ang iya pag-antus paagi sa madamung pagpamatuud nga walay sayup, nga nakit-an sia nila sing kap-atan ka adlaw, kag nagapamolong sang mga butang nahanungud sa ginharian sang Dios:

4 Kag, sang nagapabilin upud sa ila, nagsogo sia sa ila nga dili sila maghalin sa Jerusalem, kondi maghulat sang saad sang Amay, nga, siling niya, inyo nabatian sa akon.

5 Kay sa pagkamatuud si Juan nagbautiso sa tubig; apang bautisohan kamo sa Balaan nga Espiritu sa indi madugay nga mga adlaw kutub karon.

6 Gani sang nagtingub sila, nagpamangkot sila sa iya, nga nagasiling, Ginoo, pasag-ulion mo bala ang ginharian sa Israel sa sining tion?

7 Kag nagsiling sia sa ila, Indi inyo ang paghibalo sang mga tion ukon mga dag-on, nga ginpat-ud sang Amay sa iya kaugalingon nga gahum.

8 Apang magabaton kamo sing gahum, sa tapus nga ang Balaan nga Espiritu mag-abut sa inyo: kag manginsaksi ko kamo sa Jerusalem, kag sa bug-os nga Judea, kag sa Samaria, kag tubtub sa ukbung sang duta.

9 Kag sang nakasiling sia sining mga butang, sa nagatolok sila, ginbayaw sia; kag ang isa ka panganud nagbaton sa iya gikan sa ila itololok.

10 Kag sang nagatolok gid sila sa langit sang nagpaibabaw sia, yari karon, may duha ka lalaki nga napanaptan sing maputi nga nagtindug sa luyo nila;

11 Nga nagsiling man, Kamo nga mga tawo sang Galilea, ngaa bala nagatindug kamo nga nagatolok sa langit? ining amo man nga Jesus, nga ginbayaw pa langit gikan sa inyo, magabalik sa amo nga bagay subong nga nakita ninyo sia nga nagapalangit.

12 Niyan nagbalik sila sa Jerusalem gikan sa bukid nga gintawag Olivo, nga gikan sa Jerusalem isa ka adlaw nga sabbath nga lalakton.

13 Kag sang nakasulud sila, nagsaka sila sa hulut nga naibabaw, diin nagadayon sanday Pedro, kag Santiago, kag Juan, kag Andres, Felipe, kag Tomas, Bartolome, kag Mateo, Santiago nga anak ni Alfeo, kag Simon Zelotes, kag Judas nga utud ni Santiago.

14 Ini sila tanan nagpadayon sing hiliusa sa pagpangamuyo kag sa pag-ampo, kaupud sa mga babaye, kag ni Maria nga iloy ni Jesus, kag sang iya mga utud.

15 ś Kag sa sadtong mga adlaw si Pedro nagtindug sa tunga sang mga disipulo, kag nagsiling, (ang kadamuon sang mga ngalan nga nagtingub mga isa ka gatus kag duha ka pulo,)

16 Mga tawo kag mga kauturan, kinahanglan nga matuman ining kasulatan, nga ginpamolong anay sang Balaan nga Espiritu paagi sa baba ni David nahanungud kay Judas, nga manugtuytuy sang mga nagdakup kay Jesus.

17 Kay naisipan sia kaupud naton, kag nagbaton sang bahin sa sining pag-alagdan.

18 Karon ining tawo nakataba sing latagon sa balus sang pagkamalaut; kag sang pagkaholog niya sing suli, nawasak sia sa tunga, kag ang bug-os niyang kasudlan naggowa.

19 Kag nabantugan ini sa tanan nga pumuluyo sa Jerusalem; sa bagay nga yadtong latagon gintawag sa ila kaugalingon nga hambal, Aceldama, nga amo, Ang latagon sang dugo.

20 Kay nasulat sa libro sang mga Salmo, Pamingawa ang iya puluy-an, kag dili pagpapuy-i sing tawo: kag ipakuha sa isa ang iya pagkamanugtatap.

21 Gani sa sining mga lalaki nga nakig-upud sa aton sa bug-os nga tion nga ang Ginoong Jesus nagsulud kag naggowa sa tunga naton,

22 Sumugud sa bautismo ni Juan, tubtub sa sinang adlaw nga ginbayaw sia gikan sa aton, kinahanglan nga pagtangdoan ang isa nga manginsaksi kaupud naton sang iya pagkabanhaw.

23 Kag ginbutang nila ang duha, si Jose nga gintawag Barsabas, nga ginhayoan Justo, kag si Matias.

24 Kag nagpangamuyo sila, kag nagsiling, Ikaw, Ginoo, nga nakakilala sang mga tagiposoon sang tanan nga tawo, ipakita kon sin-o sining duha ang imo ginpili,

25 Agud nga sia makapakigbahin sa sining pag-alagdan kag pagkaapostol, nga ginbayaan ni Judas paagi sa paglapas, agud nga magkadto sia sa iya kaugalingon nga duug.

26 Kag ginpapalaran nila sila, kag ang kapalaran naholog kay Matias; kag naisipan sia kaupud sang napulog isa ka apostol.

KAPITULO 2

KAG sang nag-abut na ang adlaw sang Pentecostes, sila tanan yara sa isa ka duug nga may paghiusa.

2 Kag sa hinali may nag-abut nga isa ka hagunus gikan sa langit subong sang mamadlus nga hangin nga naghuyup, kag nagpuno sang bug-os nga balay diin sila naglingkod.

3 Kag nagpahayag sa ila ang mga dila nga buka nga daw kalayo, kag ini nagtungtung sa tagsatagsa sa ila.

4 Kag napuno sila tanan sang Balaan nga Espiritu, kag nagsugud sa pagpamolong sa iban nga mga hambal, sono sa paghambal nga ginhatag sa ila sang Espiritu.

5 Kag may nagpuyo sa Jerusalem nga mga Judio, nga mainampoon nga mga tawo, gikan sa tagsa ka pungsud sa idalum sang langit.

6 Karon sang nabatian ining kagahud, nagtipon ang kadam-an, kag ginlibogan sila, bangud nga ang tagsa ka tawo nakabati sa ila nga nagapamolong sa iya kaugalingon nga hambal.

7 Kag nahalawhaw sila tanan kag natingala, nga nagasinilingay, Yari karon, indi bala Galileanhon ini tanan nga nagahambal?

8 Kag paano bala nga ginapamatian naton, ang tagsa ka tawo sa aton kaugalingon nga hambal nga natawohan?

9 Mga taga-Parto, kag mga taga-Media, kag mga taga-Elam, kag mga pumuluyo sa Mesopotamia, kag sa Judea, kag Capadocia, sa Ponto, kag Asia,

10 Frigia, kag Panfilia, sa Egipto, kag sa mga ginsakpan sang Libya nga malapit sa Cirene, kag mga dumoloong gikan sa Roma, nga mga Judio kag mga pinaliso,

11 Mga taga-Creta kag mga taga-Arabia, ginapamatian ta sila nga nagapamolong sa aton mga hambal sang katingalahan nga mga buhat sang Dios.

12 Kag nahalawhaw sila nga tanan, kag nagduhaduha, nga nagasinilingay, Ano bala ang kahologan sini?

13 Ang iban nga nagauligyat nagsiling, Puno sang bag-ong alak ining mga tawo.

14 ś Apang si Pedro, nga nagatindug kaupud sang napulog isa, nagtib-ong sang iya tingug, kag nagsiling sa ila, Kamo nga mga tawo sang Judea, kag kamo tanan nga nagapuyo sa Jerusalem, kilalaha ninyo ini, kag dungga ang akon mga polong:

15 Kay ini sila indi hobog, sono sa ginabanta ninyo, kay ini ikatlo pa lang nga takna sang adlaw.

16 Apang ini amo ang napamolong sang manalagna nga si Joel;

17 Kag mahanabu sa katapusan nga mga adlaw, nagasiling ang Dios, nga ipasagahay ko ang akon Espiritu sa tanan nga unud: kag ang inyo mga anak nga lalaki kag ang inyo mga anak nga babaye magapanagna, kag ang inyo mga pamatan-on nga lalaki makakita sing mga palanan-awon, kag ang inyo mga katigulangan nga lalaki magadamgo sing mga damgo:

18 Kag sa akon mga alagad nga lalaki kag sa akon mga alagad nga babaye sa sinang mga adlaw ipasagahay ko ang akon Espiritu; kag magapanagna sila:

19 Kag magapakita ako sing mga katanhagaan sa langit sa ibabaw, kag mga tanda sa duta sa idalum; dugo, kag kalayo, kag usbung sang aso:

20 Ang adlaw magabaylo sa kadudulman, kag ang bulan sa dugo, sa wala pa inang daku kag dayag nga adlaw sang Ginoo mag-abut:

21 Kag mahanabu, nga ang bisan sin-o nga magpanawag sa ngalan sang Ginoo maluwas.

22 Kamo nga mga tawo sang Israel, pamatii ining mga polong; Si Jesus sang Nazaret, isa ka tawo nga ginpamatud-an sang Dios sa inyo paagi sa mga milagro kag mga katanhagaan kag mga tanda, nga ginhimo sang Dios paagi sa iya sa tunga ninyo, subong nga kamo gid nakahibalo man:

23 Sia, nga gintugyan sono sa pat-ud nga katuyoan kag nahibaloan na sang Dios, inyo gindakup, kag ginlansang sa krus kag ginpatay paagi sa malaut nga mga kamut:

24 Sia ginbanhaw sang Dios, nga nahuklasan sang mga kasakitan sang kamatayon: bangud nga indi mahimo nga hawiran sia sini.

25 Kay si David naghambal nahanungud sa iya, Sa gihapon ginatan-aw ko ang Ginoo sa atubangan nakon, kay yara sia sa akon too, agud nga indi ako mationg:

26 Busa ang akon tagiposoon nagkasadya, kag ang akon dila nagkalipay; labut pa ang akon unud man magapahuway sa paglaum:

27 Bangud nga indi mo pagbayaan ang akon kalag sa impierno, ukon itugut nga makakita ang imo Balaan nga Isa sing kaduluntan.

28 Ginpakilala mo sa akon ang mga dalanon sang kabuhi; pun-on mo ako sing kasadya sang imo nawung.

29 Mga tawo kag mga kauturan, pahambala ako sa inyo sing hayag nahanungud sa patriarca nga si David, nga napatay sia kag ginlubung, kag ang iya lulubngan yari sa aton tubtub karon nga adlaw.

30 Busa kay manalagna sia, kag nakahibalo nga ang Dios nagsaad sa iya nga may panumpa, nga sa bunga sang iya balikawang, sono sa unud, palingkoron niya ang Cristo sa iya trono;

31 Sia nga nagapanganinaw sini nga daan, nagpamolong sang pagkabanhaw sang Cristo, nga wala ang iya kalag pagpabayai sa impierno, ukon ang iya unud ginpakita sing kaduluntan.

32 Ining Jesus ginbanhaw sang Dios, nga sa sina mga saksi kami tanan.

33 Busa sang ginbayaw sia sang too nga kamut sang Dios, kag nakabaton sa Amay sang saad nga Balaan nga Espiritu, ginpasagahay niya ini, nga ginatan-aw ninyo karon kag ginapamatian.

34 Kay si David wala magkayab sa mga langit: apang sia gid nagsiling, Ang GINOO nagsiling sa akon Ginoo, Lingkod ka sa akon too,

35 Tubtub nga mahimo ko ang imo mga kaaway nga palatungan sang imo mga tiil.

36 Busa kilalahon sing totoo gid sang bug-os nga panimalay sang Israel, nga ining amo man nga Jesus nga ginlansang ninyo sa krus, ginhimo sang Dios nga Ginoo kag Cristo.

37 ś Karon sang pagkabati nila sini, nasuntok sila sa ila tagiposoon, kag nagsiling kay Pedro kag sa iban nga mga apostol, Mga tawo kag mga kauturan, ano bala ang himoon namon?

38 Niyan si Pedro nagsiling sa ila, Hinulsul kamo, kag magpabautiso ang tagsatagsa sa inyo sa ngalan ni Jesu-Cristo bangud sa kapatawaran sang mga sala, kag mabaton ninyo ang regalo nga Balaan nga Espiritu.

39 Kay ang saad sa inyo, kag sa inyo mga anak, kag sa tanan nga yadto sa malayo, sa tagsatagsa nga tawgon sang Ginoo nga aton Dios.

40 Kag sa iban pa nga madamu nga polong nagpanaksi sia kag naglaygay, nga nagasiling, Panginluwas kamo sa sining kaliwatan nga tiko.

41 ś Niyan sila nga nagbaton sing malipayon sang iya polong ginbautisohan: kag may gindugang sa ila sa sadtong adlaw nga mga tatlo ka libo ka kalag.

42 Kag nagpadayon sila sing malig-on sa doktrina sang mga apostol kag sa paghiliupud, kag sa pagtipiktipik sang tinapay, kag sa mga pangamuyo.

43 Kag gindakup sing kahadluk ang tagsa ka kalag: kag madamung mga katanhagaan kag mga tanda ang nahimo paagi sa mga apostol.

44 Kag ang tanan nga nagtoo nagtingub, kag kalabilogan nila ang tanan nga butang;

45 Kag ginbaligya nila ang ila pagkabutang kag galamiton, kag ginpanagtag ini sa tanan nga tawo, sono sa kinahanglan sang tagsa ka tawo.

46 Kag adlawadlaw, sa nagapadayon sila sing hiliusa sa templo, kag sa pagtipiktipik sang tinapay sa mga puluy-an, nagkaon sila sang ila kalan-on nga may kasadya kag kabunayag sang tagiposoon,

47 Nga nagadayaw sa Dios, kag nahamut-an sang bug-os nga katawohan. Kag gindugang sang Ginoo sa iglesia adlawadlaw ang mga nagakalaluwas.

KAPITULO 3

KARON si Pedro kag si Juan nagsaka sa templo sing dungan sa tion sang pangamuyo, nga ikasiam nga takna.

2 Kag ang isa ka tawo nga piang kutub sa taguangkan sang iya iloy gindala, nga ginbutang nila adlawadlaw sa gawang sang templo nga ginatawag Matahum, sa pagpakilimos sa mga nagasulud sa templo;

3 Sang pagkakita niya kay Pedro kag kag Juan nga manugsulud sa templo, nagpangayo sia nga limosan.

4 Kag si Pedro, sang nagapaungut sang iya mga mata sa iya, upud kay Juan, nagsiling, Tolok ka sa amon.

5 Kag nagpamati sia sa ila, nga nagapaabut nga may batonon sa ila.

6 Niyan si Pedro nagsiling, Wala ako sing pilak kag bulawan; apang ang yari sa akon ginahatag ko sa imo: Sa ngalan ni Jesu-Cristo sang Nazaret magtindug ka kag maglakat.

7 Kag ginkaptan niya sia sa kamut nga too, kag ginpatindug sia: kag sa gilayon nagbaskug ang iya mga tiil kag mga bukobuko.

8 Kag sa nagatumbo nagtindug sia, kag naglakat, kag nagsulud kaupud nila sa templo, nga nagalakat, kag nagatumbotumbo, kag nagadayaw sa Dios.

9 Kag ang bug-os nga katawohan nakakita sa iya nga nagalakat kag nagadayaw sa Dios:

10 Kag nakilala nila sia nga amo sia ang naglingkod sa pagpakilimos sa gawang nga Matahum sang templo: kag napuno sila sing katingala kag kahangawa sa nahanabu sa iya.

11 Kag sang nagkaput kay Pedro kag kay Juan ang piang nga nag-ayo, ang bug-os nga katawohan nagdinalagan sing tingub pakadto sa ila sa portico nga gintawag iya ni Salomon, nga nagakatingala sing daku.

12 ś Kag sang pagkakita ni Pedro sini, nagsabat sia sa katawohan, Kamo nga mga tawo sang Israel, ngaa bala nagakatingala kamo sa sini? ukon ngaa ginapaungutan ninyo kami sang inyo mga mata, subong nga daw sa amon kaugalingon nga gahum ukon pagkabalaan napalakat namon ining tawo?

13 Ang Dios ni Abraham, kag ni Isaac, kag ni Jacob, ang Dios sang aton mga kaamayan, naghimaya sang iya Anak nga si Jesus; nga gintugyan ninyo, kag ginpanghiwala sa atubangan ni Pilato, sang sia nakatapat sa pagbuhi sa iya.

14 Apang ginpanghiwala ninyo ang Balaan nga Isa kag ang Matarung, kag ginpangayo nga itugut sa inyo ang manugpatay;

15 Kag ginpatay ang Prinsipe sang kabuhi, nga ginbanhaw sang Dios gikan sa mga patay; nga sa sini mga saksi kami.

16 Kag ang iya ngalan paagi sa pagtoo sa iya ngalan nagpabaskug sining tawo, nga inyo natan-aw kag nakilala: hoo, ang pagtoo nga paagi sa iya nakahatag sa iya sining himpit nga pag-ayo sa atubangan ninyo tanan.

17 Kag karon, mga kauturan, nahibaloan ko nga ginhimo ninyo ini sa dipagkaalam, subong sang ginhimo man sang inyo mga manugdumala.

18 Apang yadtong mga butang, nga ginpahayag anay sang Dios sa baba sang tanan niyang manalagna, nga ang Cristo magaantus, amo ang gintuman niya.

19 ś Busa hinulsul kamo, kag magliso, agud mapanas ang inyo mga sala, kon mag-abut ang mga tion sang pagpaumpaw gikan sa atubangan sang Ginoo;

20 Kag ipadala niya si Jesu-Cristo, nga anay ginwali sa inyo:

21 Nga kinahanglan pagbatonon sang langit tubtub sa mga tion sang pagpasag-uli sang tanan nga mga butang, nga ginpamolong sang Dios sa baba sang tanan niyang balaan nga mga manalagna kutub sa ginsuguran sang kalibutan.

22 Kay si Moises sa pagkamatuud nagsiling sa mga kaamayan, Ang isa ka manalagna bangonon sang Ginoo nga inyo Dios sa inyo gikan sa inyo mga kauturan, kaangay sa akon; sa iya magapamati kamo sa tanan nga mga butang nga bisan ano nga isiling niya sa inyo.

23 Kag mahanabu, nga ang tagsa ka kalag, nga indi magpamati sa sinang manalagna, pagalaglagon gikan sa tunga sang katawohan.

24 Hoo, kag ang tanan nga manalagna kutub kay Samuel kag ang mga nagsonod, ang tanan nga nagpamolong, sila man nagsugid anay nahanungud sining mga adlaw.

25 Kamo amo ang mga anak sang mga manalagna, kag sang katipan nga ginhimo sang Dios sa aton kaamayan, nga nagasiling kay Abraham, Kag sa imo kaliwat pakamaayohon ang tanan nga kahimataan sa duta.

26 Sa inyo sing una ang Dios, sang nabangon niya ang iya Anak nga si Jesus, nagpadala sa iya sa pagpakamaayo sa inyo, sa pagpatalikod sa tagsatagsa sa inyo gikan sa iya mga kalautan.

KAPITULO 4

KAG sang nagpamolong sila sa katawohan, ang mga pari, kag ang kapitan sang templo, kag ang mga Saduceo, nagpalapit sa ila,

2 Nga nagakalahanusbu nga gintudloan nila ang katawohan, kag ginwali paagi kay Jesus ang pagkabanhaw gikan sa mga patay.

3 Kag gindakup nila sila, kag ginsulud sa bilanggoan tubtub sa madason nga adlaw: kay kahaponon na.

4 Walay sapayan ang madamu sa ila nga nakabati sang polong nagtoo; kag ang kadamuon sang mga tawo mga lima ka libo.

5 ś Kag nahanabu sa madason nga adlaw, nga ang ila mga manugdumala, kag mga tigulang, kag mga escriba,

6 Kag si Annas nga mataas nga pari, kag si Caifas, kag si Juan, kag si Alejandro, kag ang tanan nga himata sang mataas nga pari, nagtipon sa Jerusalem.

7 Kag sang napatunga nila sila, nagpamangkot sila, Sa ano bala nga gahum, ukon sa ano nga ngalan, nahimo ninyo ini?

8 Niyan si Pedro, nga puno sang Balaan nga Espiritu, nagsiling sa ila, Kamo nga mga manugdumala sang katawohan, kag mga tigulang sang Israel,

9 Kon kami sining adlaw usisaon nahanungud sang kaayohan nga nahimo sa tawo nga piang, kon sa ano nga kalalangan nag-ayo sia;

10 Kilalahon ninyo nga tanan, kag sang bug-os nga katawohan sang Israel, nga sa ngalan ni Jesu-Cristo sang Nazaret, nga inyo ginlansang sa krus, nga ginbanhaw sang Dios gikan sa mga patay, paagi sa iya ining tawo nagatindug diri nga maayo sa atubangan ninyo.

11 Ini amo ang bato nga ginsikway ninyo nga mga manunukud, nga nangin-olo sang pamag-ang.

12 Kag walay kaluwasan sa bisan kay sin-o nga iban: kay walay iban nga ngalan sa idalum sang langit nga ginhatag sa mga tawo, nga paagi sa iya kinahanglan kita maluwas.

13 ś Karon sang nakita nila ang kasidla ni Pedro kag ni Juan, kag nahantupan nga sila walay tinon-an kag dimalaam nga mga tawo, natingala sila; kag ginkilala nila sila, nga nakapakig-upud sila kay Jesus.

14 Kag sang ginatan-aw nila ang tawo nga gin-ayo nga nagatindug upud sa ila, wala sila sing ikasiling batok sini.

15 Apang sang ginpagowa nila sila sa gowa sang konseho, nagsinapul sila,

16 Nga nagasiling, Ano bala ang himoon ta sining mga tawo? kay sing matuud hayag sa tanan nga nagapuyo sa Jerusalem nga ang isa ka milagro nga bantug nahimo paagi sa ila; kag indi naton mapanghiwala ini.

17 Apang agud nga indi na maglapnag ini sa katawohan, pahogon ta sila sing matigdas, nga kutub karon indi na sila magpamolong sa bisan kay sin-o sa sining ngalan.

18 Kag gintawag nila sila, kag gintugnan sila nga indi gid magpamolong ukon magpanudlo sa ngalan ni Jesus.

19 Apang si Pedro kag si Juan nagsabat kag nagsiling sa ila, Kon matarung sa itololok sang Dios ang magpamati sa inyo sang sa Dios, hukmi ninyo.

20 Kay kami indi makahimo kondi magpamolong sang mga butang nga amon nakita kag nabatian.

21 Gani sang ginpahog pa gid nila sila, ginbuhian nila sila, nga wala sing nakita kon paano nga masilotan nila sila, bangud sang katawohan: kay ang tanan nga tawo naghimaya sa Dios tungud sang nahimo.

22 Kay ang tawo nga ginhimoan sining milagro sang pag-ayo kapin sa kap-atan ka tuig.

23 ś Kag sang nabuhian sila, nagkadto sila sa ila kaugalingon nga kaupdanan, kag nagsugid sang tanan nga nasiling sa ila sang puno nga mga pari kag sang mga tigulang.

24 Kag sang pagkabati nila sini, nagtib-ong sila sing hiusa sang ila tingug sa Dios, kag nagsiling, Ginoo, ikaw Dios, nga naghimo sang langit, kag sang duta, kag sang dagat, kag sang tanan nga yara sa ila:

25 Nga paagi sa baba sang imo alagad nga si David nagsiling, Ngaa bala nagsingkal ang mga pagano, kag ang katawohan naghunahuna sing walay pulus nga mga butang?

26 Nagtindug ang mga hari sang duta, kag nagtipon sing tingub ang mga manugdumala batok sa Ginoo, kag batok sa iya Cristo.

27 Kay matuud gid batok sa imo balaan nga bata nga si Jesus, nga imo hinaplas, nagtipon si Herodes, kag si Poncio Pilato, upud ang mga Gentil, kag ang katawohan sang Israel,

28 Sa paghimo sang bisan ano nga gintangdoan nga daan sang imo kamut kag sang imo kabubut-on nga mahanabu.

29 Kag karon, Ginoo, tan-awa ang ila mga pagpahog: kag itugut sa imo mga alagad, nga sa bug-os nga kasidla sila makapamolong sang imo polong,

30 Paagi sa pag-untay sang imo kamut sa pagpang-ayo; kag mahimo ang mga tanda kag mga katanhagaan paagi sa ngalan sang imo balaan nga bata nga si Jesus.

31 ś Kag sang nakapangamuyo sila, nag-uyug ang duug diin sila nagtipon sing tingub; kag napuno sila tanan sang Balaan nga Espiritu, kag nagpamolong sila nga may kasidla sang polong sang Dios.

32 Kag ang kadam-an nga nagtoo isa ka tagiposoon kag isa ka kalag: kag walay isa sa ila nga nagsiling nga may bisan ano sang mga butang nga naangkon niya nga iya kaugalingon; kondi kabilogan nila ang tanan nga butang.

33 Kag sa daku nga gahum nagpanaksi ang mga apostol sang pagkabanhaw ni Ginoong Jesus: kag daku nga bugay ang yara sa ila tanan.

34 Kag walay bisan sin-o sa ila nga nakulangan: kay ang kapid-an nga may mga duta ukon mga balay nagbaligya sini, kag gindala ang mga bili sang mga butang nga nabaligya,

35 Kag ginbutang ini sa tiilan sang mga apostol: kag ginpanagtag sa tagsatagsa sono sa iya kinahanglan.

36 Kag si Joses, nga ginhayoan sang mga apostol nga Bernabe, (nga, kon sayoron, Ang lalaking anak sang paglipay,) nga Levita, kag gikan sa duta sang Cipre,

37 Sa may iya sia sing uma, nagbaligya sini, kag gindala ang kuarta, kag ginbutang ini sa tiilan sang mga apostol.

KAPITULO 5

APANG ang isa ka tawo nga ginhingalanan si Ananias, upud kay Safira nga iya asawa, nagbaligya sing pagkabutang,

2 Kag ginlikman niya ang bahin sang bili, kag nahibal-an ini sang iya asawa, kag gindala ang isa ka bahin, kag ginbutang ini sa tiilan sang mga apostol.

3 Apang si Pedro nagsiling, Ananias, ngaa bala gintugub ni Satanas ang imo tagiposoon sa pagbutig sa Balaan nga Espiritu, kag paglikum sang bahin sang bili sang duta?

4 Sang imo pa ini, indi bala imo ini nga kaugalingon? kag sa nabaligya na ini, wala bala sa imo gahum? ngaa bala nga napainoino mo ining butang sa imo tagiposoon? wala ka magbutig sa mga tawo, kondi sa Dios.

5 Kag sang pagkabati ni Ananias sining mga polong, napukan sia kag nabugtoan sang ginhawa: kag gindakup sing daku nga kahadluk ang tanan nga nakabati sining mga butang.

6 Kag ang mga pamatan-on nga lalaki nagtindug, kag ginputus nila sia, kag ginpagowa sia, kag ginlubung.

7 Kag sa may mga tatlo ka takna nga nagligad, nagsulud ang iya asawa, nga wala makahibalo sang nahanabu.

8 Kag si Pedro nagsabat sa iya, Isugid sa akon kon ginbaligya ninyo ang duta sa amo nga bili? Kag nagsiling sia, Hoo, sa amo.

9 Niyan si Pedro nagsiling sa iya, Ngaa bala nagkasugtanay kamo sa pagsulay sa Espiritu sang Ginoo? yari karon, sa ganhaan ang mga tiil sang mga naglubung sang imo bana, kag dalhon ka nila sa gowa.

10 Niyan napukan sia sa gilayon sa tiilan ni Pedro, kag nabugtoan sang ginhawa: kag nagsulud ang mga pamatan-on nga lalaki, kag nakita nila sia nga patay, kag gindala nila sia sa gowa, kag ginlubung sa luyo sang iya bana.

11 Kag gindakup sing daku nga kahadluk ang bug-os nga iglesia, kag ang tanan nga nakabati sining mga butang.

12 ś Kag paagi sa mga kamut sang mga apostol madamu nga tanda kag katingalahan ang nahimo sa katawohan; (kag yadto sila tanan sa portico ni Salomon nga may paghiusa.

13 Kag wala sang iban nga nagpangahas sa pag-impon sa ila: apang ang katawohan nagdayaw sa ila.

14 Kag nagdugang pa gid ang mga tomoloo sa Ginoo, mga kadam-an sang mga lalaki kag mga babaye.)

15 Sa bagay nga gindala nila ang mga masakiton sa mga dalan, kag ginbutang sila sa mga higdaan kag sa mga langkapan, agud nga sa paglabay ni Pedro bisan ang iya landong lamang makatupa sa iban sa ila.

16 Nagduguk man sa Jerusalem ang kadam-an gikan sa mga siudad sa palibut, nga nagadala sing mga masakiton, kag sang mga ginsakit sang mga espiritu nga dimatinlo: kag ang tagsatagsa sa ila nag-ayo.

17 ś Niyan ang mataas nga pari nagtindug, kag ang tanan nga kaupud niya, (nga amo ang bunghay sang mga Saduceo,) kag ginpun-an sila sing kaakig,

18 Kag gindakup nila ang mga apostol, kag ginsulud sila sa bilanggoan sang siudad.

19 Apang sa kagab-ihon ang anghel sang Ginoo nagbukas sang mga ganhaan sang bilanggoan, kag ginpagowa sila, kag nagsiling,

20 Kadto kamo, kag magtindug kag magpamolong sa templo sa katawohan sang tanan nga polong sining kabuhi.

21 Kag sang pagkabati nila sini, nagsulud sila sa templo sing aga pa gid, kag nagpanudlo. Apang ang mataas nga pari nag-abut, kag ang mga kaupud niya, kag gintipon ang konseho, kag ang tanan nga senador sang kaanakan sang Israel, kag ginpakadtoan ang bilanggoan sa pagpakuha sa ila.

22 Apang sang ang mga opisyal nag-abut, kag wala makakita sa ila sa bilanggoan, nagbalik sila, kag nagsugid,

23 Nga nagasiling, Sa pagkamatuud ang bilanggoan nakita namon nga natakpan sing malig-on, kag ang mga manugbantay nagatindug sa mga ganhaan: apang sang pagbukas namon, wala kami sing nakita nga tawo sa sulud.

24 Karon sang pagkabati sang mataas nga pari kag sang kapitan sang templo kag sang puno nga mga pari sining mga butang, ginlibogan sila nahanungud sa ila kon ano ayhan ang madangatan sini.

25 Niyan may isa nga nag-abut kag nagsugid sa ila, nga nagasiling, Yari karon, ang mga tawo nga ginsulud ninyo sa bilanggoan yadto sa templo nagatindug, kag nagapanudlo sa katawohan.

26 Niyan ang kapitan nagkadto upud sang mga opisyal, kag gindala sila sa walay palugus: kay nahadluk sila sa katawohan, basi kon batohon sila.

27 Kag sang nadala nila sila, ginpaatubang nila sila sa konseho: kag ang mataas nga pari nagpamangkot sa ila,

28 Nga nagasiling, Wala bala kamo namon gintugnan sing matigdas nga indi kamo magpanudlo sa sining ngalan? kag, yari karon, ginpuno ninyo ang Jerusalem sang inyo doktrina, kag buut ninyo kami pasangtan sang dugo sining tawo.

29 ś Niyan si Pedro kag ang mga iban nga mga apostol nagsabat kag nagsiling, Kami dapat magtuman sa Dios sang sa mga tawo.

30 Ang Dios sang aton mga kaamayan nagbanhaw kay Jesus, nga ginpatay ninyo kag ginbitay sa kahoy.

31 Sia ginbayaw sang Dios sang iya too nga kamut nga mangin isa ka Prinsipe kag isa ka Manluluwas, sa paghatag sing paghinulsul sa Israel, kag kapatawaran sang mga sala.

32 Kag kami mga saksi niya sa sining mga butang; kag amo man ang Balaan nga Espiritu, nga nahatag sang Dios sa ila nga nagatuman sa iya.

33 ś Sang pagkabati nila sini, napilasan sila sa tagiposoon, kag nagsinapul sa pagpatay sa ila.

34 Niyan nagtindug ang isa sa konseho, isa ka Fariseo, nga ginhingalanan si Gamaliel, nga isa ka mangin-alamon sang kasogoan, nga halangdon sang bug-os nga katawohan, kag nagsogo nga pagowaon anay ang mga apostol;

35 Kag nagsiling sa ila, Kamo nga mga tawo sang Israel, mag-andam kamo sang ginatuyo ninyo nga himoon nahanungud sining mga tawo.

36 Kay una sining mga adlaw nagtindug si Teudas, nga nagapakasin-o; nga sa iya nag-impon ang mga apat ka gatus ka tawo: ini sia ginpatay; kag ang tanan nga nagtuman sa iya, ginpaaplaag, kag nanginwalay pulus.

37 Madason sining tawo nagtindug si Judas nga taga-Galilea sa mga adlaw sang pagpangbuhis, kag napasonod sa iya ang madamu nga katawohan: sia man nawala; kag ang tanan nga nagtuman sa iya nag-aplaag.

38 Kag karon nagasiling ako sa inyo, Palayo kamo sa sining mga tawo, kag pabayai lang sila: kay kon ining katuyoan ukon ining buhat iya sang mga tawo, ini manginwalay pulus:

39 Apang kon ini iya sang Dios, indi kamo makasarang sa pagbungkag sini; basi masapwan pa kamo nga nagapakig-away batok sa Dios.

40 Kag nagsugut sila sa iya: kag sang natawag nila ang mga apostol, kag nabunal sila, nagtugon sila nga indi sila dapat maghambal sa ngalan ni Jesus, kag ginbuhian sila.

41 ś Kag naghalin sila sa atubangan sang konseho, nga nagakalipay nga naisipan sila nga takus sa pag-antus sing kahuluy-an tungud sa iya ngalan.

42 Kag sa adlawadlaw sa templo, kag sa tagsa ka puluy-an, wala sila mag-untat sa pagpanudlo kag pagwali kay Jesu-Cristo.

KAPITULO 6

KAG sa sinang mga adlaw, sang nagadugang ang kadamuon sang mga disipulo, nagkumud ang mga Greciahanon batok sa mga Hebreo, bangud nga wala matatapi ang ila mga balong babaye sa adlawadlaw nga pag-alagdan.

2 Niyan ang napulog duha nagpatawag sang kadam-an sang mga disipulo, kag nagsiling, Indi nagakaigo nga bayaan namon ang polong sang Dios, kag mag-alagad sa mga latok.

3 Busa, mga kauturan, pili kamo sing pito ka lalaki sa tunga ninyo nga maayo sing kadungganan, nga puno sang Balaan nga Espiritu kag sang kaalam, nga matangdo ta sa sining buluhaton.

4 Apang magapadayon kami sing malig-on sa pangamuyo, kag sa pagpanghikot sang polong.

5 ś Kag ang hambalanon nagpahamuut sang bug-os nga kadam-an: kag ginpili nila si Esteban, tawong puno sang pagtoo kag sang Balaan nga Espiritu, kag si Felipe, kag si Procoro, kag si Nicanor, kag si Timon, kag si Parmenas, kag si Nicolas nga isa ka pinaliso nga taga-Antioquia:

6 Ini sila ginpaatubang nila sa mga apostol: kag sang nakapangamuyo sila, ginpandungan nila sila sang ila mga kamut.

7 Kag ang polong sang Dios nagtubo; kag ang kadamuon sang mga disipulo nagdugang sing tama gid sa Jerusalem; kag isa ka daku nga grupo sang mga pari nagmatinumanon sa pagtoo.

8 Kag si Esteban, nga puno sang pagtoo kag gahum, naghimo sing dalagkung mga katanhagaan kag mga milagro sa tunga sang katawohan.

9 ś Niyan nagtilindug ang iban nga taga-sinagoga, nga ginatawag nga sinagoga sang mga Napatimawa, kag sang mga taga-Cirene, kag sang mga taga-Alejandria, kag sang mga gikan sa Cilicia kag sa Asia, nga nagapakigsuay kay Esteban.

10 Kag wala sila makasarang sa pagsumpung sang kaalam kag sang espiritu nga paagi sini nagpamolong sia.

11 Niyan ginsutsut nila ang mga tawo, nga nagsiling, Nabatian namon sia nga nagapamolong sing polong nga pasipala batok kay Moises, kag sa Dios.

12 Kag ginsugyot nila ang katawohan, kag ang mga tigulang, kag ang mga escriba, kag nagpalapit sila sa iya, kag gindakup sia, kag gindala sia sa konseho,

13 Kag ginbutangan sing dimatuud nga mga saksi, nga nagsiling, Ining tawo wala nagauntat sa pagpamolong sing mga polong nga pasipala batok sining balaan nga duug, kag sa kasogoan:

14 Kay nabatian namon sia nga nagasiling, nga ining Jesus sang Nazaret magaguba sining duug, kag magaliwat sang mga kinabatasan nga ginhatag ni Moises sa aton.

15 Kag ang tanan nga naglingkod sa konseho, nga nagapaungut sang ila mga mata sa iya, nakakita sang iya nawung subong sang nawung sang anghel.

KAPITULO 7

NIYAN ang mataas nga pari nagsiling, Matuud bala ining mga butang?

2 Kag sia nagsiling, Mga tawo, mga kauturan, kag mga kaamayan, pamati kamo; Ang Dios sang himaya nagpahayag sa aton amay nga si Abraham, sang sa Mesopotamia sia, sa wala pa sia magpuyo sa Haran,

3 Kag nagsiling sa iya, Halin ka sa imo duta, kag sa imo kahimataan, kag magkadto sa duta nga ipakita ko sa imo.

4 Niyan naghalin sia sa duta sang mga taga-Caldea, kag nagpuyo sa Haran: kag gikan didto, sang pagkapatay sang iya amay, ginpaliton niya sia sa sining duta, nga inyo karon ginapuy-an.

5 Kag wala niya sia paghatagi sa sini sing panublion, wala, bisan tumbanan sang iya isa ka tiil: apang nagsaad sia nga ihatag ini sa iya nga kaugalingon, kag sa iya kaliwat sa olihi niya, bisan wala pa sia sing anak.

6 Kag ang Dios nagpamolong sing subong sini, Nga ang iya kaliwat magapangayaw sa isa ka dumoloong nga duta; kag nga sila pagauliponon nila, kag pintasan sila sing apat ka gatus ka tuig.

7 Kag hukman ko ang pungsud nga magaulipon sa ila, nagsiling ang Dios: kag sa tapus sina magagowa sila, kag magaalagad sa akon sa sining duug.

8 Kag ginhatag niya sa iya ang katipan sang circuncision: kag gani si Abraham nagpanganak kay Isaac, kag nagcircuncidar sa iya sa ikawalong adlaw; kag si Isaac nagpanganak kay Jacob; kag si Jacob nagpanganak sang napulog duha ka patriarca.

9 Kag ang mga patriarca, nga nahisa, nagbaligya kay Jose pa Egipto: apang ang Dios kaupud niya,

10 Kag nagluwas sa iya sa tanan niyang kapipit-an, kag naghatag sa iya sing pagkahamuut kag kaalam sa atubangan ni Faraon nga hari sang Egipto; kag sia naghimo sa iya nga gobernador sa Egipto kag sa bug-os niyang panimalay.

11 Karon may nag-abut nga tiggulutum sa bug-os nga duta sang Egipto kag Canaan, kag dakung kapipit-an: kag ang aton mga kaamayan walay nakita nga kalan-on.

12 Apang sang pagkabati ni Jacob nga may uyas sa Egipto, ginpakadto niya sing una ang aton mga kaamayan.

13 Kag sa ikaduhang tion, si Jose napakilala sa iya mga utud; kag napakilala kay Faraon ang kahimataan ni Jose.

14 Niyan ginpakadtoan ni Jose, kag ginpatawag ang iya amay nga si Jacob, kag ang bug-os niyang kahimataan, nga kapitoan kag lima ka kalag.

15 Gani nagdolhog si Jacob pa Egipto, kag napatay, sia, kag ang aton mga kaamayan,

16 Kag gindala sila pabalik sa Siquem, kag ginbutang sa lulubngan nga ginbakal ni Abraham sa bili nga kuarta gikan sa mga anak nga lalaki ni Hamor nga amay ni Siquem.

17 Apang sang nagahilapit na ang tion sang saad, nga ginsumpa sang Dios kay Abraham, ang katawohan nagtubo kag nagbuad sa Egipto,

18 Tubtub nga nagtindug ang isa pa ka hari, nga wala makakilala kay Jose.

19 Ang amo man nagbuhat sing pagdaya sa aton kahimataan, kag ginpigus ang aton mga kaamayan, sa bagay nga gintapuk nila ang ila mga kabataan nga diotay, agud nga indi sila mabuhi.

20 Sa sining tion natawo si Moises, kag tama gid kaanyag, kag ginbatiti sia sing tatlo ka bulan sa balay sang iya amay:

21 Kag sang gintapuk sia, ginsapopo sia sang babaying anak ni Faraon, kag ginsagud sia subong nga iya kaugalingon nga anak nga lalaki.

22 Kag si Moises ginton-an sang tanan nga kaalam sang mga taga-Egipto, kag gamhanan sia sa mga polong kag mga buhat.

23 Kag sang sia kap-atan ka tuig, nag-abut sa iya tagiposoon ang pagduaw sa iya mga kauturan nga kaanakan sang Israel.

24 Kag sang nakita niya ang isa sa ila nga ginalupig, gin-apinan niya sia, kag gintimalusan niya ang ginlupig, kag ginpatay ang Egiptohanon:

25 Kay naghunahuna sia nga ang iya mga kauturan nakahangup nga ang Dios paagi sa iya kamut magaluwas sa ila: apang wala sila makahangup.

26 Kag sa madason nga adlaw nagpahayag sia sa ila sang nag-inaway sila, kag buut niya nga pasag-ulion sila, nga nagasiling, Mga sir, mag-ulutud kamo; ngaa bala nagalinupigay kamo?

27 Apang ang naglupig sa iya isigkatawo nagtiklud sa iya, nga nagasiling, Sin-o bala ang naghimo sa imo nga isa ka manugdumala kag isa ka hukom sa amon?

28 Buut mo bala ako patyon, subong sang pagpatay mo sang Egiptohanon kahapon?

29 Niyan sa sining hambalanon nagpalagyo si Moises, kag nagdumoloong sa duta sang Madian, diin nagpanganak sia sang duha ka anak nga lalaki.

30 Kag sang natapus ang kap-atan ka tuig, isa ka anghel sang Ginoo nagpakita sa iya sa kamingawan sang bukid nga Sinai sa dabdab sang kalayo sa kahoy-kahoy.

31 Sang pagkakita ni Moises sini, natingala sia sa talan-awon: kag sang nagpalapit sia sa pagtan-aw sini, nag-abut ang tingug sang Ginoo sa iya,

32 Nga nagasiling, Ako ang Dios sang imo mga kaamayan, ang Dios ni Abraham, kag ang Dios ni Isaac, kag ang Dios ni Jacob. Niyan si Moises nagkurug, kag wala magpangahas sa pagtan-aw.

33 Niyan ang Ginoo nagsiling sa iya, Huksa ang mga sapatos mo sa imo mga tiil: kay ang duug nga ginatindugan mo duta nga balaan.

34 Nakita ko, nakita ko ang kapipit-an sang akon katawohan nga yara sa Egipto, kag nabatian ko ang ila pag-ugayong, kag nagakunsad ako sa pagluwas sa ila. Kag karon kari ka, ipadala ko ikaw sa Egipto.

35 Ining Moises nga ginsikway nila, nga nagasiling, Sin-o bala ang naghimo sa imo nga isa ka manugdumala kag isa ka hukom? ang amo man ginpadala sang Dios nga mangin isa ka manugdumala kag isa ka manunubus paagi sa kamut sang anghel nga nagpahayag sa iya sa kahoy-kahoy.

36 Sia nagpagowa sa ila, sa tapus nga sia nakapakita sing mga katanhagaan kag mga tanda sa duta sang Egipto, kag sa Mapulang dagat, kag sa kamingawan sing kap-atan ka tuig.

37 ś Ini amo inang Moises, nga nagsiling sa kaanakan sang Israel, Ang isa ka manalagna bangonon sang Ginoo nga inyo Dios sa inyo gikan sa inyo mga kauturan, subong sa akon; sa iya kamo magapamati.

38 Ini amo sia, nga yadto sa iglesia sa kamingawan kaupud sang anghel nga nagpamolong sa iya sa bukid nga Sinai, kag kaupud sang aton mga kaamayan: nga nagbaton sang buhi nga mga oraculo nga ihatag sa aton:

39 Sa iya indi buut magtuman ang aton mga kaamayan, kondi ginsikway nila sia, kag sa ila mga tagiposoon nagbalalik sila sa Egipto,

40 Nga nagasiling kay Aaron, Buhati kami sing mga dios nga magauna sa aton: kay nahanungud sining Moises, nga nagpagowa sa aton sa duta sang Egipto, wala kita makahibalo kon ano ang nahanabu sa iya.

41 Kag naghimo sila sing tinday nga baka sa sadtong mga adlaw, kag nagdolot sang halad sa diosdios, kag nagkinasadya sa mga buhat sang ila mga kamut.

42 Niyan ang Dios nagtalikod, kag gintugyan sila sa pagsimba sang panong sang langit; sono sa nasulat sa libro sang mga manalagna, O kamo nga panimalay sang Israel, gindolotan bala ako ninyo sing pinatay nga mga sapat kag mga halad sa kamingawan sing kap-atan ka tuig?

43 Hoo, gindala ninyo ang tabernakulo ni Moloc, kag ang bitoon sang inyo dios nga si Remfan, ang mga imahen nga ginhimo ninyo nga simbahon: kag dalhon ko kamo sa unhan sang Babilonia.

44 Ang aton mga kaamayan sa kamingawan may tabernakulo sang pagpamatuud, sono sa iya gintangdo, nga nagapamolong kay Moises, nga himoon niya ini sono sa huwaran nga iya nakita.

45 Ini ginpasulud man sang aton mga kaamayan nga nagsolonod upud kay Jesus nga panag-iyahan sang mga Gentil, nga ginsobol sang Dios sa atubangan sang aton mga kaamayan, tubtub sa mga adlaw ni David;

46 Nga nakapahamuut sa atubangan sang Dios, kag naghandum nga makakita sing isa ka tabernakulo nga sa Dios ni Jacob.

47 Apang ginpatindugan sia ni Salomon sing balay.

48 Apang ang labing Mataas wala nagapuyo sa mga templo nga ginhimo sang mga kamut; subong sa ginasiling sang manalagna,

49 Ang langit amo ang akon trono, kag ang duta palatungan sang akon mga tiil: ano bala nga balay ang patindugon ninyo sa akon? nagasiling ang Ginoo: ukon ano bala ang duug nga palahuwayan ko?

50 Wala bala paghimoa sang akon kamut ini tanan nga butang?

51 ś Kamo nga tingkoyan kag wala macircuncidar sa tagiposoon kag sa mga idulungug, nagasumpung kamo gihapon sa Balaan nga Espiritu: subong sang ginhimo sang inyo mga kaamayan, amo man ang ginahimo ninyo.

52 Sin-o bala sang mga manalagna ang wala paghingabuta sang inyo mga kaamayan? kag ginpatay nila ang mga nagbantala anay sang pag-abut sang Matarung nga Isa; nga karon kamo mga maluib kag manugpatay:

53 Nga nagbaton sang kasogoan nga ginhatag paagi sa mga anghel, kag wala maghuput sini.

54 ś Sang pagkabati nila sining mga butang, napilas sila sa tagiposoon, kag ginpabagrutan nila sia sang ila mga ngipon.

55 Apang sia, nga puno sang Balaan nga Espiritu, nagtangla sing malig-on sa langit, kag nakita ang himaya sang Dios, kag si Jesus nga nagatindug sa too sang Dios,

56 Kag nagsiling, Yari karon, nakita ko ang mga langit nga nabuksan, kag ang Anak sang tawo nga nagatindug sa too sang Dios.

57 Niyan nagsinggit sila sa matonog nga tingug, kag gintakpan ang ila mga dulunggan, kag gindamhagan sia sing hiliusa,

58 Kag ginsobol nila sia sa siudad, kag ginbato sia: kag ginbutang sang mga saksi ang ila mga panapton sa tiilan sang pamatan-on nga lalaki, nga ginhingalanan si Saulo.

59 Kag ginbato nila si Esteban, nga nagapanawag sa Dios, kag nagasiling, Ginoong Jesus, batona ang akon espiritu.

60 Kag nagluhud sia, kag nagsinggit sa matonog nga tingug, Ginoo, dili sila pagpasangti sining sala. Kag sang nakasiling sia sini, natologan sia.

KAPITULO 8

KAG si Saulo nagpahanugut sa iya kamatayon. Kag sa sadtong tion may dakung paghingabut batok sa iglesia nga didto sa Jerusalem; kag sila tanan nag-aplaag sa bug-os nga ginsakpan sang Judea kag Samaria, luwas ang mga apostol.

2 Kag si Esteban gindala sang mga mainampoon nga mga lalaki sa iya paglubung, kag naghaya sing daku tungud sa iya.

3 Nahanungud kay Saulo, naghimo sia sing pagpanglaglag sa iglesia, nga nagapamalaybalay, kag sa ginapangguyud ang mga lalaki kag mga babaye ginpanulud niya sila sa bilanggoan.

4 Busa sila nga nag-aplaag nagpanlakatan sa bisan diin nga nagawali sang polong.

5 Niyan si Felipe nagdolhog sa siudad sang Samaria, kag ginwali si Cristo sa ila.

6 Kag ang katawohan nagtalupangud sing hiusa sadtong mga butang nga ginpamolong ni Felipe, nga nagapamati kag nagatan-aw sang mga milagro nga iya ginhimo.

7 Kay ang mga espiritu nga dimatinlo, nga nagasinggit sa matonog nga tingug, naggowa gikan sa madamu nga gingamhan nila: kag ang madamu nga paralitiko, kag ang mga piang, gin-ayo.

8 Kag may daku nga kalipay sa sadtong siudad.

9 Apang may isa ka tawo, nga ginatawag si Simon, nga nagpanghikot anay sing pagbabaylan sa amo man nga siudad, kag naglumay sang katawohan sang Samaria, nga nagapakadaku sang iya kaugalingon:

10 Sa iya sila tanan nagtalupangud, kutub sa labing magamay tubtub sa labing dalagku, nga nagasiling, Ining tawo amo ang dakung gahum sang Dios.

11 Kag nagtalupangud sila sa iya, bangud nga sa malawig nga tion ginlumay niya sila sang mga pagbabaylan.

12 Apang sang nagtoo sila kay Felipe nga nagawali sang mga butang nahanungud sang ginharian sang Dios, kag sang ngalan ni Jesu-Cristo, ginbautisohan sila, mga lalaki kag mga babaye.

13 Niyan si Simon gid nagtoo man: kag sang nabautisohan sia, nagpadayon sia upud kay Felipe, kag natingala sia, sang pagkakita niya sang mga milagro kag mga tanda nga nahimo.

14 Karon sang nakabati ang mga apostol nga yara sa Jerusalem nga ang Samaria nagbaton sang polong sang Dios, ginpadala nila sa ila si Pedro kag si Juan:

15 Nga, sang pagdolhog nila, nagpangamuyo sila tungud sa ila, agud nga mabaton nila ang Balaan nga Espiritu:

16 (Kay sia wala pa maholog sa bisan kay sin-o sa ila: kondi nabautisohan lamang sila sa ngalan ni Ginoong Jesus.)

17 Niyan gintakdungan nila sila sang ila mga kamut, kag nabaton nila ang Balaan nga Espiritu.

18 Kag sang nakita ni Simon nga paagi sa pagtakdung sang mga kamut sang mga apostol ginhatag ang Balaan nga Espiritu, nagtanyag sia sa ila sing kuarta,

19 Nga nagasiling, Hatagi man ako sining gahum, agud nga sa bisan kay sin-o itakdung ko ang akon mga kamut, makabaton sia sang Balaan nga Espiritu.

20 Apang si Pedro nagsiling sa iya, Ang imo kuarta mawala upud sa imo, bangud nga naghunahuna ka nga ang regalo sang Dios mabakal sang kuarta.

21 Wala ka sing bisan ano nga bahin ukon kapalaran sa sining butang: kay ang imo tagiposoon indi matarung sa itololok sang Dios.

22 Busa hinulsuli ining kalautan mo, kag pangamuyo sa Dios, basi ayhan ang hunahuna sang imo tagiposoon patawaron sa imo.

23 Kay ginatan-aw ko nga yara ka sa apdo sang kapaitan, kag sa gapus sang kalautan.

24 Niyan si Simon nagsabat, kag nagsiling, Pangamuyo kamo sa Ginoo tungud sa akon, agud nga walay mag-abut sa akon sining mga butang nga napamolong ninyo.

25 Kag sila, sang nakapanaksi sila kag nakawali sang polong sang Ginoo, nagbalik sa Jerusalem, kag nagwali sang ebanghelyo sa madamu nga minoro sang mga Samariahanon.

26 Kag ang anghel sang Ginoo nagpamolong kay Felipe, nga nagasiling, Tindug ka, kag magkadto nayon sa bagatnan sa dalan nga nagapadolhog pa Gaza gikan sa Jerusalem, nga desierto.

27 Kag nagtindug sia kag nagkadto: kag, yari karon, ang isa ka tawo nga taga-Etiopia, isa ka eunuco nga may daku nga pagbulut-an sa idalum ni Candace nga hara sang mga Etiopiahanon, nga tulugyanan sang tanan niya nga bahandi, kag nagkadto sa Jerusalem sa pagsimba,

28 Sang nagapauli, kag nagalingkod sa iya kangga, nagbasa sia kay Isaias nga manalagna.

29 Niyan ang Espiritu nagsiling kay Felipe, Palapit ka, kag magbuylog sa sining kangga.

30 Kag si Felipe nagdalagan didto sa iya, kag nabatian sia nga nagabasa sa manalagna nga si Isaias, kag nagsiling, Nakahangup ka bala sang imo ginabasa?

31 Kag nagsiling sia, Paano bala nga pagkahangup ko, kon walay isa nga magtuytuy sa akon? Kag nagpangabay sia kay Felipe nga magsakay sia kag maglingkod upud sa iya.

32 Ang bahin sang kasulatan nga ginabasa niya amo ini, Gindala sia sa ihawan subong sang carnero; kag subong sang cordero nga lalaki nga apa sa atubangan sang iya manug-alot, sa amo wala sia magtikab sang iya baba:

33 Sa iya pagpaubus ginkuhaan sia sang katarungan: kag sin-o bala ang magapahayag sang iya kaliwatan? kay ang iya kabuhi ginkuha sa duta.

34 Kag ang eunuco nagsabat kay Felipe, kag nagsiling, Nagapakilooy ako sa imo, nahanungud kay sin-o bala nagapamolong ang manalagna sini? sa iya kaugalingon, ukon sa iban pa nga tawo?

35 Niyan si Felipe nagtikab sang iya baba, kag nagsugud sa sining kasulatan, kag ginwali sa iya si Jesus.

36 Kag sang nagpadayon sila sang ila paglakat, nag-abut sila sa tubig: kag ang eunuco nagsiling, Tan-awa, may tubig diri; ano bala ang nagasablag sa akon sa pagpabautiso?

37 Kag si Felipe nagsiling, Kon nagatoo ka sa bug-os mo nga tagiposoon, sarang ka. Kag nagsabat sia kag nagsiling, Nagatoo ako nga si Jesu-Cristo amo ang Anak sang Dios.

38 Kag ginpadolog niya ang kangga: kag naglusung sila nga duha sa tubig, si Felipe kag ang eunuco; kag ginbautisohan niya sia.

39 Kag sang nakatakas sila sa tubig, ginbalitbit sang Espiritu sang Ginoo si Felipe, sa bagay nga wala na sia makita sang eunuco: kag nagpadayon sia nga malipayon sa iya dalanon.

40 Apang si Felipe nakita sa Azoto: kag sang nagalatas nagwali sia sa tanan nga siudad, tubtub nga nag-abut sia sa Cesarea.

KAPITULO 9

KAG si Saulo, nga nagasambo pa sa pagpamahog kag pagpamatay batok sa mga disipulo sang Ginoo, nagkadto sa mataas nga pari,

2 Kag nangayo sa iya sing mga sulat nga sa mga sinagoga sa Damasco, agud nga kon may makita sia nga bisan sin-o nga sa sining dalan, mga lalaki ukon mga babaye, madala niya sila nga nagapus sa Jerusalem.

3 Kag sang nagpanlakatan sia, naghinamput sia sa Damasco: kag sa hinali nagsidlak sa palibut niya ang isa ka kapawa gikan sa langit:

4 Kag napukan sia sa duta, kag nakabati sing isa ka tingug nga nagasiling sa iya, Saulo, Saulo, ngaa bala nga ginahingabut mo ako?

5 Kag nagsiling sia, Sin-o bala ikaw, Ginoo? Kag ang Ginoo nagsiling, Ako si Jesus nga ginahingabut mo: mabudlay sa imo ang pagtindak batok sa mga suyak.

6 Kag sia nga nagakurug kag natingala nagsiling, Ginoo, ano ang buut mo nga himoon ko? Kag ang Ginoo nagsiling sa iya, Tindug, kag magsulud sa siudad, kag isugid sa imo ang kinahanglan mo himoon.

7 Kag ang mga tawo nga nagpanlakatan upud sa iya nagtindug nga wala nakahambal, nga nagapamati sang isa ka tingug, apang walay nakita nga tawo.

8 Kag nagbangon si Saulo sa duta; kag sang pagmuklat sang iya mga mata, wala sia sing nakita nga tawo: apang gintuytuyan nila sia sa kamut, kag gindala sia sa Damasco.

9 Kag tatlo ka adlaw nga indi sia makakita, kag wala magkaon ukon mag-inum.

10 ś Kag may isa ka disipulo sa Damasco, nga ginhingalanan si Ananias; kag ang Ginoo nagsiling sa iya sa palanan-awon, Ananias. Kag nagsiling sia, Yari ako, Ginoo.

11 Kag ang Ginoo nagsiling sa iya, Tindug, kag magkadto sa dalan nga ginatawag Matadlong, kag pangitaa sa balay ni Judas ang isa ka tawo nga taga-Tarso nga ginhingalanan si Saulo: kay, yari karon, nagapangamuyo sia,

12 Kag nakita niya sa palanan-awon ang isa ka tawo nga ginhingalanan si Ananias nga nagasulud, kag nagatakdung sang iya kamut sa iya, agud nga makakita sia.

13 Niyan si Ananias nagsabat, Ginoo, nakabati ako sa madamu nahanungud sining tawo, kon daw ano nga kalautan ang ginhimo niya sa imo mga santo sa Jerusalem:

14 Kag may pagbulut-an sia diri gikan sa puno nga mga pari sa paggapus sang tanan nga nagapanawag sa imo ngalan.

15 Apang ang Ginoo nagsiling sa iya, Kadto ka: kay sia galamiton nga pinili nakon, sa pagdala sang akon ngalan sa atubangan sang mga Gentil, kag sang mga hari, kag sang mga anak sang Israel:

16 Kay ipakita ko sa iya kon daw ano ka dakung mga butang ang dapat niya antuson tungud sa akon ngalan.

17 Kag si Ananias nagtaliwan, kag nagsulud sa balay; kag sang nagatakdung sia sang iya mga kamut sa iya nagsiling, Utud Saulo, ang Ginoo, nga amo si Jesus, nga nagpakita sa imo sa dalan nga imo gin-agihan, nagpadala sa akon, agud nga makakita ka, kag mapuno ka sang Balaan nga Espiritu.

18 Kag sa gilayon nataktak sa iya mga mata ang daw mga himbis: kag nakakita sia sa gilayon, kag nagtindug, kag ginbautisohan.

19 Kag sang nakakaon sia, nagbaskug sia. Niyan didto si Saulo sing pila ka adlaw kaupud sang mga disipulo nga yara sa Damasco.

20 Kag sa gilayon ginwali niya si Cristo sa mga sinagoga, nga sia amo ang Anak sang Dios.

21 Apang ang tanan nga nagpamati sa iya natingala, kag nagsiling; Indi bala ini sia amo ang naglaglag sa ila nga nagpanawag sa sining ngalan sa Jerusalem, kag nagkari sia diri sa sining katuyoan, agud nga madala niya sila nga nagapus sa puno nga mga pari?

22 Apang si Saulo nagbakud pa gid, kag ginpalibog niya ang mga Judio nga nagapuyo sa Damasco, nga nagapamatuud nga ini amo ang matuud nga Cristo.

23 ś Kag sa tapus nga natuman ang madamung adlaw, ang mga Judio nagsinapul sa pagpatay sa iya:

24 Apang ang ila puhon nahibaloan ni Saulo. Kag ginbantayan nila ang mga gawang sa adlaw kag gab-i sa pagpatay sa iya.

25 Niyan ginkuha sia sang mga disipulo sa kagab-ihon, kag gintonton sia sa pader sa sulud sang isa ka alat.

26 Kag sang pag-abut ni Saulo sa Jerusalem, naghimulat sia sa pagpakig-impon sa mga disipulo: apang sila tanan nahadluk sa iya, kag wala magpati nga sia disipulo.

27 Apang ginkuha sia ni Bernabe, kag gindala sia sa mga apostol, kag nag-asoy sia sa ila kon paano nakita niya ang Ginoo sa dalan, kag nga sia nagpamolong sa iya, kag kon paano nga sa Damasco nagwali sia sing masidla sa ngalan ni Jesus.

28 Kag kaupud sia nila nga nagasulud kag nagagowa sa Jerusalem.

29 Kag sia nagpamolong sing masidla sa ngalan ni Ginoong Jesus, kag nagpakigbais sa mga Greciahanon: apang nagtinguha sila sa pagpatay sa iya.

30 Nga sang pagkahibalo sini sang mga kauturan, gindul-ong nila sia sa Cesarea, kag ginpadala sia sa Tarso.

31 Niyan ang mga iglesia sa bug-os nga Judea kag Galilea kag Samaria may kalinong kag naglig-on; kag sa nagalakat sa kahadluk sang Ginoo, kag sa paglipay sang Balaan nga Espiritu, nagdugang sila.

32 ś Kag nahanabu, sang si Pedro nag-agi sa tanan nga kahigaran, nagdolhog man sia sa mga santo nga nagapuyo sa Lida.

33 Kag didto nakita niya ang isa ka tawo nga ginhingalanan si Eneas, nga walo na ka tuig sa iya higdaan, kag paralitiko.

34 Kag si Pedro nagsiling sa iya, Eneas, si Jesu-Cristo nagaayo sa imo: bangon ka, kag himosa ang imo higdaan. Kag sa gilayon nagbangon sia.

35 Kag nakita sia sang tanan nga nagpuyo sa Lida kag sa Sarona, kag nagliso sila sa Ginoo.

36 ś Karon didto sa Joppe may isa ka disipulo nga ginhingalanan si Tabita, nga kon sayoron Dorcas: ining babaye puno sang maayong mga buhat kag mga pagpanglimos nga ginhimo niya.

37 Kag nahanabu sa sadtong mga adlaw, nga nagmasakit sia, kag napatay: sang naligos nila sia, ginhamyang nila sia sa isa ka hulut nga naibabaw.

38 Kag sanglit ang Lida malapit sa Joppe, kag nakabati ang mga disipulo nga didto si Pedro, ginpakadtoan nila sia sing duha ka tawo, nga nagahanyo sa iya nga indi sia magpalantang sa pagkari sa ila.

39 Niyan si Pedro nagtindug kag nag-upud sa ila. Sang nag-abut sia, gindala nila sia sa hulut nga naibabaw: kag ang tanan nga babaying balo nagtindug sa luyo ni Pedro nga nagahibi, kag nagapakita sang mga kunup kag mga bayo nga ginhimo ni Dorcas, sang kaupud pa sia nila.

40 Apang ginpagowa sila tanan ni Pedro, kag nagluhud sia, kag nagpangamuyo; kag sang nagliso sia sa bangkay nagsiling sia, Tabita, bangon ka. Kag ginmuklat niya ang iya mga mata: kag sang pagkakita niya kay Pedro, naglingkod sia.

41 Kag gindaho ni Pedro sa iya ang iya kamut, kag ginpatindug sia, kag sang natawag niya ang mga santo kag ang mga babaying balo, ginpaatubang niya sia nga buhi.

42 Kag ini naglapnag sa bug-os nga Joppe; kag madamu ang nagtoo sa Ginoo.

43 Kag nahanabu, nga nagpabilin sia sing madamu nga adlaw sa Joppe upud sa isa nga si Simon nga manugpanit.

KAPITULO 10

MAY isa ka tawo sa Cesarea nga ginatawag si Cornelio, isa ka centurion sa kabon nga gintawag Italiahanon nga kabon,

2 Tawo nga mainampoon, kag isa nga mahinadlukon sa Dios upud ang bug-os niya nga panimalay, nga naghatag sing madamu nga limos sa katawohan, kag nagpangamuyo gihapon sa Dios.

3 Nakita niya sa palanan-awon sing maathag sa mga ikasiam nga takna sang adlaw ang isa ka anghel sang Dios nga nagasulud pakadto sa iya, kag nagasiling sa iya, Cornelio.

4 Kag sang sia nagtolok sa iya, ginhadlukan sia, kag nagsiling, Ano bala ina, Ginoo? Kag nagsiling sia sa iya, Ang imo mga pangamuyo kag ang imo mga panglimos nagdangat nga handumanan sa atubangan sang Dios.

5 Kag karon magpadala ka sing mga lalaki sa Joppe, kag ipatawag si Simon nga ginhayoan si Pedro:

6 Nagadayon sia kay Simon nga manugpanit, nga ang iya balay yara sa ubay sang dagat: magasugid sia sa imo kon ano ang dapat mo himoon.

7 Kag sang nagtaliwan ang anghel nga nagpamolong kay Cornelio, gintawag niya ang duha sang iya alagad sang panimalay, kag isa ka mainampoon nga soldado sa mga nagaalagad sa iya sing padayon;

8 Kag sang nasugid niya sa ila ining tanan nga butang, ginpadala niya sila sa Joppe.

9 ś Sa madason nga adlaw, sang nagapanlakatan sila, kag nagahinamput sa siudad, nagsaka si Pedro sa atop sang balay sa pagpangamuyo sa mga ikan-um nga takna:

10 Kag gingutum gid sia, kag buut makaon: apang sang nagahimos pa sila, nag-abut sa iya ang isa ka pagpanganinaw,

11 Kag natan-aw niya ang langit nga nabuksan, kag nagapaubus sa iya ang isa ka suludlan, subong sa isa ka malapad nga habol nga nahigtan sa apat ka pamusud, kag gintonton sa duta:

12 Sa sulud sini yara ang tanan nga sari sang mga kasapatan sa duta nga may apat ka tiil, kag mga talonon nga kasapatan, kag mga nagasaug nga butang, kag mga kapispisan sa kahanginan.

13 Kag nag-abut sa iya ang isa ka tingug, Tindug ka, Pedro; mag-ihaw, kag magkaon.

14 Apang si Pedro nagsiling, Indi, Ginoo; kay wala gid ako makakaon sing bisan ano nga komon ukon dimatinlo.

15 Kag sa ikaduha nagpamolong sa iya liwat ang tingug, Ang natinloan sang Dios, dili mo pagtawgon nga komon.

16 Nahimo ini sa makatlo: kag ang suludlan ginbatak liwat sa langit.

17 Karon samtang si Pedro nagaduhaduha sa iya kaugalingon kon ano ang kahologan sining palanan-awon nga iya nakita, yari karon, ang mga lalaki nga ginpadala ni Cornelio nakausisa nahanungud sang balay ni Simon, kag nagtindug sa gawang,

18 Kag nagpanawag, kag nagpamangkot kon si Simon, nga ginhayoan si Pedro, nagadayon didto.

19 ś Samtang si Pedro nagapanghunahuna sang palanan-awon, ang Espiritu nagsiling sa iya, Yari karon, tatlo ka lalaki nagapangita sa imo.

20 Busa tindug ka, kag panaug, kag mag-upud ka sa ila, sa walay pangduhaduha: kay akon sila ginpadala.

21 Niyan si Pedro nagpanaug sa mga lalaki nga ginpadala sa iya gikan kay Cornelio; kag nagsiling, Yari karon, ako ang inyo ginapangita: ano bala ang kabangdanan nga yari kamo?

22 Kag nagsiling sila, Si Cornelio nga centurion, tawo nga matarung, kag isa nga mahinadlukon sa Dios, kag maayo sing kadungganan sa bug-os nga pungsud sang mga Judio, ginpaandaman sang Dios paagi sa isa ka balaan nga anghel sa pagpakadto sa imo sa iya balay, kag sa pagpamati sing mga polong sa imo.

23 Niyan ginpasulud niya sila, kag ginpadayon sila. Kag sa madason nga adlaw si Pedro nag-upud sa ila, kag ang pila sang mga kauturan sa Joppe nag-upud sa iya.

24 Kag sa adlaw nga madason nagsulud sila sa Cesarea. Kag si Cornelio nagpaabut sa ila, kag ginpatipon niya ang iya mga himata kag hanuut nga mga abyan.

25 Kag sang pagsulud ni Pedro, si Cornelio nagsugata sa iya, kag naghapa sa iya tiilan, kag nagsimba sa iya.

26 Apang ginpatindug sia ni Pedro, nga nagasiling, Tindug ka; ako tawo man.

27 Kag sang nakighambal sia sa iya, nagsulud sia, kag nakita ang madamu nga nagtipon.

28 Kag nagsiling sia sa ila, Kamo nakahibalo nga indi tugut sa isa ka tawo nga Judio ang pagpakig-impon, ukon pagpalapit sa isa nga taga-iban nga pungsud; apang ang Dios nagpakita sa akon nga walay tawo nga pagtawgon ko nga komon ukon dimatinlo.

29 Busa nagkari ako sa inyo sa walay pagsumpung, sang ginpakadtoan ako: busa nagapamangkot ako sa ano bala nga katuyoan nga ginpakadtoan ninyo ako?

30 Kag nagsiling si Cornelio, Apat na ka adlaw tubtub sining takna nagapuasa ako; kag sa ikasiam nga takna nagapangamuyo ako sa akon balay, kag, yari karon, ang isa ka lalaki nga may panapton nga masilaw nagtindug sa akon atubangan,

31 Kag nagsiling, Cornelio, ginpamatian ang imo pangamuyo, kag gindumdum ang imo panglimos sa itololok sang Dios.

32 Busa magpadala ka sa Joppe, kag pagpakarion mo diri si Simon, nga ginhayoan si Pedro; nagadayon sia sa balay ni Simon nga manugpanit sa ubay sang dagat: nga, kon mag-abut sia, magahambal sia sa imo.

33 Gani sa gilayon ginpakadtoan ko ikaw; kag maayo ang imo ginhimo nga nagkari ka. Busa karon yari kami tanan sa atubangan sang Dios, sa pagpamati sang tanan nga butang nga ginsogo sang Dios sa imo.

34 ś Niyan si Pedro nagtikab sang iya baba, kag nagsiling, Matuud gid ginahantup ko nga ang Dios walay ginapasulabi sa mga tawo:

35 Apang sa tagsa ka pungsud ang nagakahadluk sa iya, kag nagahimo sang katarungan, kalahamut-an sa iya.

36 Ang polong nga ginpadala sang Dios sa kaanakan sang Israel, nga nagawali sang paghidait paagi kay Jesu-Cristo (Ginoo sia sang tanan:)

37 Yadtong polong, ako nagasiling, inyo nahibaloan, nga ginbantala sa bug-os nga Judea, kag nagsugud sa Galilea, sa tapus sang bautismo nga ginwali ni Juan;

38 Kon paano nga si Jesus sang Nazaret ginhaplas sang Dios sang Balaan nga Espiritu kag sang gahum: nga naglibut nga nagahimo sing kaayohan, kag nagapang-ayo sang tanan nga ginpapiotan sang yawa; kay ang Dios kaupud niya.

39 Kag kami mga saksi sang tanan nga mga butang nga ginhimo niya sa duta sang mga Judio, kag sa Jerusalem; nga ila ginpatay kag ginbitay sa kahoy:

40 Sia ginbanhaw sang Dios sa ikatlo nga adlaw, kag ginpakita sia sing dayag;

41 Indi sa bug-os nga katawohan, kondi sa mga saksi nga ginpili sang Dios anay, sa amon nga nagkaon kag nag-inum kaupud niya sa tapus nga sia nabanhaw gikan sa mga patay.

42 Kag ginsogo niya kami sa pagwali sa katawohan, kag sa pagpanaksi nga ini sia amo ang gintangdoan sang Dios nga mangin amo ang Hukom sang mga buhi kag sang mga patay.

43 Sa iya ang tanan nga manalagna nagasaksi, nga paagi sa iya ngalan ang bisan sin-o nga nagatoo sa iya magabaton sing kapatawaran sang mga sala.

44 ś Sang nagahambal pa si Pedro sining mga polong, ang Balaan nga Espiritu naholog sa ila tanan nga nagpamati sang polong.

45 Kag ang mga sa circuncision nga nagtoo naorongan, ang tanan nga nag-upud kay Pedro, bangud nga sa mga Gentil man ginpasagahay ang regalo nga Balaan nga Espiritu.

46 Kay ginpamatian nila nga nagapamolong sila sing mga hambal, kag nagapakadaku sang Dios. Niyan nagsabat si Pedro,

47 May tawo bala nga makadumili sang tubig, agud nga indi pagbautisohan ini sila, nga nakabaton sang Balaan nga Espiritu subong sa aton?

48 Kag nagsogo sia nga bautisohan sila sa ngalan sang Ginoo. Niyan ginpangayo nila sia sa pagpabilin sing pila ka adlaw.

KAPITULO 11

KAG ang mga apostol kag ang mga kauturan nga didto sa Judea nakabati nga ang mga Gentil man nagbaton sang polong sang Dios.

2 Kag sang nakataklad si Pedro sa Jerusalem, ang mga sa circuncision nakigsuay sa iya,

3 Nga nagasiling, Ikaw nagsulud sa mga tawo nga dicircuncidado, kag nagkaon kaupud nila.

4 Apang si Pedro nagtalastas sang hitabu kutub sa ginsuguran, kag nagpatpat sa ila sing pasonod, nga nagasiling,

5 Didto ako nga nagapangamuyo sa siudad sang Joppe: kag sa isa ka pagpanganinaw, nakakita ako sing palanan-awon, Ang isa ka suludlan nga nagapaubus, subong sa isa ka malapad nga habol, nga gintonton sa apat ka pamusud gikan sa langit; kag ini naglambut gid sa akon:

6 Sang nahimutaran ko ini sang akon mga mata, akon namulalongan, kag nakita ang mga kasapatan sa duta nga may apat ka tiil, kag ang mga talonon nga kasapatan, kag ang mga nagasaug nga butang, kag ang mga kapispisan sa kahanginan.

7 Kag nakabati ako sing isa ka tingug nga nagasiling sa akon, Tindug ka, Pedro; mag-ihaw kag magkaon.

8 Apang nagsiling ako, Indi, Ginoo: kay wala pa sing bisan ano nga komon ukon dimatinlo nga nakasulud bisan san-o sa akon baba.

9 Apang nagsabat sa akon liwat ang tingug gikan sa langit, Ang natinloan sang Dios, dili mo pagtawgon nga komon.

10 Kag natabu ini sing makatlo: kag ang tanan ginbatak liwat pa langit.

11 Kag, yari karon, gilayon may nag-abut na nga tatlo ka lalaki sa balay diin didto ako, nga ginpadala sa akon gikan sa Cesarea.

12 Kag ang Espiritu nagsogo sa akon sa pag-upud sa ila, sa walay pangduhaduha. Labut pa ining anum ka kauturan nag-upud sa akon, kag nagsulud kami sa balay sang tawo:

13 Kag nagsugid sia sa amon kon paano nga nakita niya ang isa ka anghel sa iya balay, nga nagtindug kag nagsiling sa iya, Pagpadala ka sang mga lalaki sa Joppe, kag ipatawag si Simon, nga ginhayoan si Pedro;

14 Sia magasugid sa imo sing mga polong, nga paagi sini ikaw kag ang bug-os mong panimalay maluwas.

15 Kag sang nagsugud ako sa pagpamolong, ang Balaan nga Espiritu naholog sa ila subong sang sa aton sa ginsuguran.

16 Niyan nadumduman ko ang polong sang Ginoo, kon paano nga nagsiling sia, Sa pagkamatuud si Juan nagbautiso sa tubig; apang bautisohan kamo sa Balaan nga Espiritu.

17 Niyan sanglit ang Dios naghatag sa ila sang amo nga regalo subong sa ginhimo niya sa aton, nga nagtoo kay Ginoong Jesu-Cristo; sin-o ako bala, nga makasumpung ako sa Dios?

18 Sang pagkabati nila sining mga butang, naghipus sila, kag naghimaya sa Dios, nga nagasiling, Niyan ang Dios naghatag sa mga Gentil man sing paghinulsul pa kabuhi.

19 ś Karon ang mga nag-aplaag bangud sang paghingabut nga nagdangat nahanungud kay Esteban nagpanlakatan tubtub sa Fenice, kag Cipre, kag Antioquia, nga wala nagawali sang polong sa bisan kay sin-o kondi sa mga Judio lamang.

20 Kag ang iban sa ila mga lalaki nga taga-Cipre kag taga-Cirene, nga, sang pag-abut nila sa Antioquia, nagpamolong sa mga Griego, nga ginawali si Ginoong Jesus.

21 Kag ang kamut sang Ginoo yara sa ila: kag madamu gid ang nagtoo, kag nagliso sa Ginoo.

22 ś Niyan ang balita nahanungud sa sining mga butang nag-abut sa mga idulungug sang iglesia nga didto sa Jerusalem: kag ginpadala nila si Bernabe, nga sia dapat maglakat tubtub sa Antioquia.

23 Nga, sang pag-abut niya, kag iya nakita ang bugay sang Dios, nalipay sia, kag ginlaygayan niya sila tanan, nga sa pagtapat nga sa tagiposoon magpadayon sila sa Ginoo.

24 Kay maayo sia nga tawo, kag puno sang Balaan nga Espiritu kag sang pagtoo: kag madamu nga tawo ang gindugang sa Ginoo.

25 Niyan naghalin si Bernabe pa Tarso, sa pagpangita kay Saulo:

26 Kag sang nakita niya sia, iya gindala sia sa Antioquia. Kag nahanabu, nga sa bilog nga tuig nag-impon sila sa iglesia, kag nagpanudlo sa madamu nga katawohan. Kag ang mga disipulo gintawag sing una nga mga Cristohanon sa Antioquia.

27 ś Kag sa sining mga adlaw nagdolhog ang mga manalagna gikan sa Jerusalem pa Antioquia.

28 Kag nagtindug ang isa sa ila nga ginhingalanan si Agabo, kag nagpakita paagi sa Espiritu nga magaabut ang daku nga tiggulutum sa bug-os nga kalibutan: nga nahanabu sa mga adlaw ni Claudio Cesar.

29 Niyan ang mga disipulo, sono sa ikasarang sang tagsa ka tawo, nagtapat sa pagpadala sing bulig sa mga kauturan nga nagapuyo sa Judea:

30 Kag amo ang ila ginhimo, kag ginpadala ini sa mga tigulang paagi sa mga kamut ni Bernabe kag ni Saulo.

KAPITULO 12

KARON sa mga amo yadtong tion si Herodes nga hari nagbayaw sang iya mga kamut sa pagpintas sang pila sa iglesia.

2 Kag ginpatay niya sa espada si Santiago nga utud ni Juan.

3 Kag bangud nakita niya nga ini nagpahamuut sa mga Judio, nagpadayon sia sa pagdakup kay Pedro man. (Ini sa mga adlaw sang tinapay nga walay tapay.)

4 Kag sang nadakpan niya sia, ginsulud niya sia sa bilanggoan, kag gintugyan sia sa apat ka tinag-apat nga mga soldado sa pagbantay sa iya; nga nagabuko sa pagpaatubang sa iya sa katawohan sa tapus ang Easter.

5 Busa ginbantayan si Pedro sa bilanggoan: apang ang pangamuyo sa Dios ginhimo sang iglesia sing walay langan tungud sa iya.

6 Kag sang buut na ni Herodes ipagowa sia, sadtong gab-i si Pedro nagakatolog sa tunga sang duha ka soldado, nga nagapus sa duha ka kadena: kag ang mga manugbantay sa atubangan sang ganhaan nagbantay sang bilanggoan.

7 Kag, yari karon, ang anghel sang Ginoo nagpahayag sa iya, kag may nagsilak nga kapawa sa bilanggoan: kag ginpakpak niya si Pedro sa kilid, kag ginpukaw sia, nga nagasiling, Bangon ka sing dalidali. Kag ang iya mga kadena nagkalataktak sa iya mga kamut.

8 Kag ang anghel nagsiling sa iya, Pangwagkus ka, kag ihigot ang imo sandalias. Kag ginhimo niya ini. Kag nagsiling sia sa iya, Ikunup ang imo panapton, kag magsonod ka sa akon.

9 Kag naggowa sia, kag nagsonod sa iya; kag wala sia makahibalo nga matuud ang ginhimo sang anghel; kondi naghunahuna nga nakakita sia sing palanan-awon.

10 Sang naligaran nila ang nahauna kag ang ikaduha nga bantay, nag-abut sila sa gawang nga salsalon nga nagapadolong sa siudad; nga nagbukas sa ila nga sia lamang: kag naggowa sila, kag nagpadayon sa isa ka dalan; kag sa gilayon nagbiya sa iya ang anghel.

11 Kag sang nakamarasmas si Pedro, nagsiling sia, Karon nakilala ko sing matuud gid, nga ang Ginoo nagpadala sang iya anghel, kag ginluwas ako sa kamut ni Herodes, kag sa bug-os nga pagpaabut sang katawohan sang mga Judio.

12 Kag sang nahangpan niya ini, nagkadto sia sa balay ni Maria, nga iloy ni Juan nga ang iya hayo si Marcos; diin madamu ang nagtipon nga nagapangamuyo.

13 Kag sang pagpanoktok ni Pedro sa gawang nga sa gowa, nagkadto sa pagpamati ang isa ka dalagita, nga ginhingalanan si Roda.

14 Kag sang nakilala niya ang tingug ni Pedro, wala niya pagbuksi ang gawang tungud sa kalipay, kondi nagdalagan sa sulud, kag nagsugid nga si Pedro nagtindug sa gawang.

15 Kag nagsiling sila sa iya, Buang ka. Apang nagpamatuud sia sing malig-on nga amo gid. Niyan nagsiling sila, Anghel niya ina.

16 Apang si Pedro nagpadayon sa pagpanoktok: kag sang nabuksan nila ang gawang, kag nakita sia, naorongan sila.

17 Apang sia, nga nagasinyas sa ila sang iya kamut nga maghipus sila, nag-asoy sa ila kon paano ang pagpagowa sa iya sang Ginoo sa bilanggoan. Kag nagsiling sia, Isugid ninyo ining mga butang kay Santiago, kag sa mga kauturan. Kag nagtaliwan sia, kag nagkadto sa iban nga duug.

18 Karon sang pagkaaga, indi diotay ang pagkagubut sang mga soldado, tungud sang nahanabu kay Pedro.

19 Kag sang ginpangita sia ni Herodes, kag wala sia makita, gin-usisa niya ang mga manugbantay, kag nagsogo sia nga pamatyon sila. Kag nagdolhog sia gikan sa Judea pa Cesarea, kag nagpabilin didto.

20 ś Kag naakig sing tama si Herodes sa mga taga-Tiro kag taga-Sidon: apang nagpalapit sila sing hiliusa sa iya, kag sang naabyan nila si Blasto, nga manugtatap sang pagkabutang sang hari, nagpangayo sila sing paghidait; bangud nga ang ila duta ginsagud sang iya sang hari.

21 Kag sa isa ka adlaw nga pinat-inan si Herodes, sang nakasul-ub sang panapton nga harianon, naglingkod sa iya trono, kag nagpamolongpolong sa ila.

22 Kag ang katawohan nagsinggit, nga nagasiling, Tingug ini sang isa ka dios, kag indi iya sang tawo.

23 Kag gilayon ginhalitan sia sang anghel sang Ginoo, bangud nga wala niya pag-ihatag ang himaya sa Dios: kag gin-uk-uk sia sang mga ulud, kag nabugtoan sang ginhawa.

24 ś Apang ang polong sang Dios nagtubo kag nagdugang.

25 Kag si Bernabe kag si Saulo nagpauli gikan sa Jerusalem, sang natapus nila ang ila hilikuton, kag gin-upud nila si Juan, nga ang iya hayo si Marcos.

KAPITULO 13

KARON sa iglesia sa Antioquia may mga manalagna kag mga manunudlo; si Bernabe, kag si Simon nga gintawag si Niger, kag si Lucio nga taga-Cirene, kag si Manaen nga kasoso ni Herodes nga tetrarca, kag si Saulo.

2 Sang nagaalagad sila sa Ginoo, kag nagapuasa, ang Balaan nga Espiritu nagsiling, Ipain ako kay Bernabe kag kay Saulo sa buluhaton nga sa amo gintawag ko sila.

3 Kag sang nakapuasa sila kag nakapangamuyo, kag natakdungan sila sang ila mga kamut, ginpalakat nila sila.

4 ś Gani sila, nga ginapadala sang Balaan nga Espiritu, nagkadto sa Seleucia; kag gikan didto nagpanakayon sila pa Cipre.

5 Kag sang nakadangat sila sa Salamis, ginwali nila ang polong sang Dios sa mga sinagoga sang mga Judio: kag kaupud man nila si Juan nga kabulig nila.

6 Kag sang nalatas nila ang bug-os nga pulo tubtub sa Pafo, nakita nila ang isa ka babaylan, nga manalagna nga dimatuud, nga isa ka Judio, nga ang iya ngalan si Bar-jesus:

7 Sia kaupud sang proconsul sang duta, si Sergio Paulo, tawo nga mainandamon; nga nagpatawag kay Bernabe kag kay Saulo, kag naghandum sa pagpamati sang polong sang Dios.

8 Apang si Elimas nga babaylan (kay amo ini ang iya ngalan kon patpaton) nagsumpung sa ila, nga nagatinguha sa pagpatalang sa pagtoo sang proconsul.

9 Niyan si Saulo, (nga gintawag man si Pablo,) nga puno sang Balaan nga Espiritu, nagpaungut sang iya mga mata sa iya,

10 Kag nagsiling, O nga napun-an sang tanan nga limbong kag sang tanan nga kalag-it, ikaw nga anak sang yawa, ikaw nga kaaway sang tanan nga pagkamatarung, indi ka bala mag-untat sa pagpatiko sang matadlong nga mga dalan sang Ginoo?

11 Kag karon, tan-awa, ang kamut sang Ginoo yara sa imo, kag mabulag ka nga may tion nga indi makakita sang adlaw. Kag sa gilayon naholog sa iya ang kakarap kag kadulum; kag nagdalangdalang sia nga nagapangita kon sin-o ang makatuytuy sa iya.

12 Niyan ang proconsul nagtoo, sang nakita niya ang nahimo, kay naorongan sia sang doktrina sang Ginoo.

13 Karon sang si Pablo kag ang iya mga kaupdanan nagpalayag gikan sa Pafo, nag-abut sila sa Perge sa Panfilia: kag si Juan sa pagbulag sa ila nagbalik sa Jerusalem.

14 ś Apang sang nagtaliwan sila sa Perge, nag-abut sila sa Antioquia sang Pisidia, kag nagsulud sa sinagoga sa adlaw nga sabbath, kag naglingkod.

15 Kag sa tapus ang pagbasa sang kasogoan kag sang mga manalagna, ang mga manugdumala sang sinagoga nagpasogo sa ila, nga nagasiling, Kamo nga mga tawo kag mga kauturan, kon may bisan ano nga polong kamo nga laygay sa katawohan, ihambal ninyo.

16 Niyan si Pablo nagtindug, kag sang nakasinyas sia sang iya kamut nagsiling, Mga tawo sang Israel, kag kamo nga mahinadlukon sa Dios, pamati kamo.

17 Ang Dios sining katawohan sang Israel nagpili sang aton mga kaamayan, kag ginbayaw niya ang katawohan sang nagpuyo sila subong nga mga dumoloong sa duta sang Egipto, kag ginpagowa niya sila sing may gamhanan nga butkon.

18 Kag sa mga kap-atan ka tuig ginbatas niya ang ila mga batasan sa kamingawan.

19 Kag sang nalaglag niya ang pito ka pungsud sa duta sang Canaan, ginbahinbahin niya sa ila paagi sa pagpapalad ang ila duta.

20 Kag sa tapus sini ginhatagan niya sila sing mga hukom sa mga apat ka gatus kag kalim-an ka tuig, tubtub kay Samuel nga manalagna.

21 Kag ugaling nagpangayo sila sing hari: kag ginhatag sa ila sang Dios si Saul nga anak nga lalaki ni Cis, tawo sang tribo ni Benjamin, sa sulud sang kap-atan ka tuig.

22 Kag sang napahalin niya sia, ginbangon niya sa ila si David nga manginhari nila; nga sa iya man nagsaksi sia, kag nagsiling, Nakita ko si David nga anak nga lalaki ni Jesse, tawo nga sono sa akon tagiposoon, nga magahimo sang bug-os nakon nga kabubut-on.

23 Sa kaliwat sining tawo sono sa iya saad ang Dios nagbangon sa Israel sing isa ka Manluluwas, si Jesus:

24 Sang wala pa sia magkari si Juan nagwali sing una sang bautismo sang paghinulsul sa bug-os nga katawohan sang Israel.

25 Kag sang nagahingapus si Juan sang iya buluhaton, nagsiling sia, Sin-o bala ako sa banta ninyo? Indi ako sia. Apang, yari karon, may nagasonod sa akon, nga indi ako takus sa paghubad sang sapatos sa iya mga tiil.

26 Mga tawo kag mga kauturan, mga anak sa kaliwat ni Abraham, kag ang bisan sin-o sa inyo nga nagakahadluk sa Dios, sa inyo ginapadala ang polong sining kaluwasan.

27 Kay ang mga nagapuyo sa Jerusalem, kag ang ila mga manugdumala, bangud nga wala sila makakilala sa iya, ukon sang mga tingug sang mga manalagna nga ginabasa sa tagsa ka adlaw nga sabbath, gintuman nila ang mga ini paagi sa pagtagudili sa iya.

28 Kag bisan wala sila sing nakita nga kabangdanan sang kamatayon sa iya, walay sapayan ginpangayo nila kay Pilato nga patyon sia.

29 Kag sang natuman nila ang tanan nga nasulat nahanungud sa iya, ginkuha nila sia sa kahoy, kag ginbutang sia sa lulubngan.

30 Apang ginbanhaw sia sang Dios gikan sa mga patay:

31 Kag nakita sia sa madamu nga mga adlaw sang mga nagtaklad kaupud niya gikan sa Galilea pa Jerusalem, nga sila among mga saksi niya sa katawohan.

32 Kag kami nagasugid sa inyo sang mga masadyang balita, nga ang saad nga nahimo sa aton kaamayan,

33 Ang Dios nagtuman sini sa aton nga ila mga anak, sanglit iya ginbanhaw si Jesus; subong nga nasulat man sa ikaduha nga salmo, Ikaw akon Anak, sini nga adlaw ginpanganak ko ikaw.

34 Kag nahanungud sa pagbanhaw niya sa iya gikan sa mga patay, nga karon indi na magbalik sa kaduluntan, nagsiling sia sa sining bagay, Ihatag ko sa inyo ang malig-on nga mga kalooy kay David.

35 Busa nagsiling man sia sa isa pa ka salmo, Indi mo pag-itugut nga ang imo Balaan nga Isa makakita sing kaduluntan.

36 Kay si David, sa tapus nga nakaalagad sia sang iya kaliwatan sa kabubut-on sang Dios, nagtolog, kag ginpahamtang upud sa iya mga kaamayan, kag nakakita sing kaduluntan:

37 Apang sia, nga ginbanhaw sang Dios, wala makakita sing kaduluntan.

38 ś Busa kilalaha ninyo, mga tawo kag mga kauturan, nga paagi sining tawo ginawali sa inyo ang kapatawaran sang mga sala:

39 Kag paagi sa iya ang tanan nga magtoo ginapakamatarung sa tanan nga butang, diin indi kamo mapakamatarung paagi sa kasogoan ni Moises.

40 Busa andam kamo, basi mag-abut sa inyo ang napamolong sa mga manalagna;

41 Tan-aw, kamo nga mga mayubiton, kag magkatingala, kag magkalawala: kay nagahimo ako sing buhat sa inyo mga adlaw, buhat nga indi ninyo nga mas-a pagpatihan, bisan pa ang isa ka tawo mag-asoy sini sa inyo.

42 Kag sang nakagowa ang mga Judio sa sinagoga, naghanyo ang mga Gentil nga ining mga polong mawali sa ila sa madason nga sabbath.

43 Karon sang pagbulublag sang katilingban, madamu sang mga Judio kag sang mga relihioso nga pinaliso nagsonod kay Pablo kag kay Bernabe: nga sang nagapamolong sila sa ila, nagbuyuk sa ila sa pagpadayon sa bugay sang Dios.

44 ś Kag sa madason nga adlaw nga sabbath halus ang bug-os nga siudad nagtipon sa pagpamati sang polong sang Dios.

45 Apang sang nakita sang mga Judio ang mga kadam-an, napuno sila sing kahisa, kag nagpamolong batok sadtong mga butang nga ginpamolong ni Pablo, nga nagasumpung kag nagapasipala.

46 Niyan si Pablo kag si Bernabe nangin-masidla, kag nagsiling, Kinahanglan nga ang polong sang Dios ihambal sing una sa inyo: apang sanglit ginsikway ninyo ini, kag ginhukman ang inyo kaugalingon nga ditakus sang kabuhi nga walay katapusan, yari karon, nagaliso kami sa mga Gentil.

47 Kay amo ini ang ginsogo sa amon sang Ginoo, nga nagasiling, Ginbutang ko ikaw nga mangin-kapawa sang mga Gentil, agud nga magdala ka sing kaluwasan tubtub sa mga ukbung sang duta.

48 Kag sang pagkabati sang mga Gentil sini, nagkasadya sila, kag ginhimaya ang polong sang Ginoo: kag ang tanan nga gintangdoan sa kabuhi nga walay katapusan nagtoo.

49 Kag ang polong sang Ginoo nabantala sa bug-os gid nga duta.

50 Apang ginsugyot sang mga Judio ang mga mainampoon kag dungganon nga mga babaye, kag ang mga punoan nga lalaki sang siudad, kag nagsutsut sing paghingabut batok kay Pablo kag kay Bernabe, kag ginsobol sila sa ila mga ginsakpan.

51 Apang gintaktak nila ang yab-ok sa ila mga tiil batok sa ila, kag nagkadto sa Iconio.

52 Kag ang mga disipulo napun-an sang kalipay, kag sang Balaan nga Espiritu.

KAPITULO 14

KAG nahanabu sa Iconio, nga nagsulud sila nga duha sing dungan sa sinagoga sang mga Judio, kag nagpamolong sa bagay nga nagtoo ang dakung kadam-an sang mga Judio kag sang mga Griego man.

2 Apang ang dimatinoohon nga mga Judio nagsugyot sang mga Gentil, kag ginpapait ang ila mga hunahuna batok sa mga kauturan.

3 Gani nagpabilin sila didto sing malawig nga tion nga nagapamolong sing may kasidla sa Ginoo, nga nagsaksi sa polong sang iya bugay, kag nagtugut nga himoon sang ila mga kamut ang mga tanda kag mga katanhagaan.

4 Apang ang kadam-an sang siudad napihak: kag ang isa ka bahin nag-ugyon sa mga Judio, kag ang isa sa mga apostol.

5 Kag sang pagduksul sang mga Gentil, kag sang mga Judio man pati ang ila mga manugdumala, sa pagtratar sa ila sing malain, kag sa pagbato sa ila,

6 Nasat-uman nila ini, kag nagpalagyo sila pa Listra kag Derbe, nga mga siudad sang Licaonia, kag pa ginsakpan sa palibut:

7 Kag didto ginwali nila ang ebanghelyo.

8 ś Kag sa Listra may isa ka tawo nga nagalingkod, nga masakiton sa iya mga tiil, nga lupog gikan sa taguangkan sang iya iloy, nga wala gid makalakat:

9 Sia nakabati kay Pablo nga nagahambal: nga sang nagapaungut sang iya mga mata sa iya, kag sa nakita niya nga sia may pagtoo nga pag-ayohon,

10 Nagsiling sia sa matonog nga tingug, Tindug ka sing tadlong sa imo mga tiil. Kag nagtumbo sia kag naglakat.

11 Kag sang nakita sang katawohan ang nahimo ni Pablo, gintib-ong nila ang ila mga tingug, nga nagasiling sa hambal sang Licaonia, Ang mga dios nagkunsad sa aton sa kaanggid sang mga tawo.

12 Kag gintawag nila si Bernabe, Jupiter; kag si Pablo, Mercurio, bangud nga amo sia ang pangolo nga manughambal.

13 Niyan ang pari ni Jupiter, nga didto sa gowa sang ila siudad, nagdala sang mga baka kag mga purungpurung sa mga gawang, kag buut kuntani maghalad kaupud sang katawohan.

14 Nga sang nabatian ini sang mga apostol nga si Bernabe kag si Pablo, ginkusnit nila ang ila mga panapton, kag nagdalagan sa tunga sang katawohan, nga nagasinggit,

15 Kag nagasiling, Mga sir, ngaa bala nagahimo kamo sining mga butang? Mga tawo man kami nga kaangay sing kinaugali sa inyo, kag nagawali sa inyo nga magliso kamo gikan sa sining walay pulus nga mga butang pa Dios nga buhi, nga naghimo sang langit, kag duta, kag dagat, kag sang tanan nga mga butang nga yara sa ila:

16 Nga sa nagligad nga mga tion nagtugut sia sa tanan nga kapungsuran sa paglakat sa ila kaugalingon nga mga dalanon.

17 Walay sapayan wala sia magpabaya sa iya kaugalingon nga walay saksi, kay naghimo sia sing maayo, kag naghatag sa aton sing ulan sa langit, kag mga panag-on nga mapatubason, nga nagapuno sang aton mga tagiposoon sing pagkaon kag kasadya.

18 Kag sa sining mga hambalanon halus sila makapugung sang katawohan sa paghimo sing paghalad sa ila.

19 ś Kag nag-abut didto ang mga Judio gikan sa Antioquia kag sa Iconio, nga nagbuyuk sang katawohan, kag, sang nabato nila si Pablo, ginguyud nila sia sa gowa sang siudad, nga nagahunahuna sila nga patay sia.

20 Apang, sang nagatindug sa palibut niya ang mga disipulo, nagtindug sia, kag nagsulud sa siudad: kag sa madason nga adlaw naglakat sia kaupud ni Bernabe pa Derbe.

21 Kag sang nakawali sila sang ebanghelyo sa sadtong siudad, kag nagpanudlo sing madamu, nagbalik sila sa Listra, kag sa Iconio, kag sa Antioquia,

22 Nga nagapalig-on sang mga kalag sang mga disipulo, kag nagalaygay sa ila sa pagpadayon sa pagtoo, kag nga kinahanglan nga pag-agyan ta ang madamung kangitngitan sa pagsulud sa ginharian sang Dios.

23 Kag sang nakatangdo sila sa ila sing mga tigulang sa tagsa ka iglesia, kag nakapangamuyo nga may pagpuasa, gintugyan nila sila sa Ginoo, nga ila gintoohan.

24 Kag sa tapus nila nalatas ang Pisidia, nag-abut sila sa Panfilia.

25 Kag sang nawali nila ang polong sa Perge nagdolhog sila sa Atalia:

26 Kag gikan didto nagpanakayon sila pa Antioquia, diin natugyan sila sa bugay sang Dios nga sa buluhaton nga ila natuman.

27 Kag sang pag-abut nila, kag natipon ang iglesia sing tingub, ginsugid nila ang tanan nga nahimo sang Dios upud sa ila, kag kon paano ang pagbukas niya sang ganhaan sang pagtoo sa mga Gentil.

28 Kag nagpabilin sila didto sing malawig nga tion kaupud sang mga disipulo.

KAPITULO 15

KAG ang pila ka mga tawo nga nagdolhog gikan sa Judea nagpanudlo sa mga kauturan, kag nagsiling, Kon indi kamo magpacircuncidar sono sa kinabatasan ni Moises, indi kamo maluwas.

2 Busa sang si Pablo kag si Bernabe may indi diotay nga pagbinanggianay kag pinuyasay sa ila, si Pablo kag si Bernabe kag pila pa sa ila gintangdoan nila nga magtaklad sa Jerusalem sa mga apostol kag mga tigulang nahanungud sining kasuayon.

3 Kag sila, sang gindul-ong sa ila dalanon sang iglesia, naglatas sang Fenice kag Samaria, nga nagaasoy sang pagliso sang mga Gentil: kag ginlipay nila sing daku ang tanan nga mga kauturan.

4 Kag sang pag-abut nila sa Jerusalem, ginbaton sila sang iglesia, kag sang mga apostol kag sang mga tigulang, kag ginsugid nila ang tanan nga nahimo sang Dios upud sa ila.

5 Apang may nagtindug nga pila sa bunghay sang mga Fariseo nga nagtoo, nga nagasiling, Nga kinahanglan nga circuncidahon sila, kag tugnan sila nga maghuput sang kasogoan ni Moises.

6 ś Kag nagtipon ang mga apostol kag ang mga tigulang sa pagpatugsiling sining butang.

7 Kag sang may dakung pagpinuyasay, nagtindug si Pedro, kag nagsiling sa ila, Mga tawo kag mga kauturan, nakahibalo kamo nga sang nagliligad nga mga inadlaw ang Dios nagpili sa tunga naton, nga paagi sa akon baba ang mga Gentil magpamati sang polong sang ebanghelyo, kag magtoo.

8 Kag ang Dios, nga nakakilala sang mga tagiposoon, nagsaksi sa ila, nga nagahatag sa ila sang Balaan nga Espiritu, subong sang ginhimo niya sa aton;

9 Kag wala sia sing ginpasulabi sa aton kag sa ila, nga nagatinlo sang ila mga tagiposoon paagi sa pagtoo.

10 Busa karon ngaa bala ginasulay ninyo ang Dios, sa bagay nga ginagotahan ninyo ang liog sang mga disipulo, nga bisan ang aton mga kaamayan ukon kita wala makasarang sa pagdala?

11 Apang nagatoo kita nga maluwas kita paagi sa bugay ni Ginoong Jesu-Cristo, kaangay sa ila.

12 ś Niyan ang bug-os nga kadam-an naghipus, kag nagpamati sila kay Bernabe kag kay Pablo nga nagasugid kon anong mga milagro kag mga katanhagaan ang nahimo sang Dios sa tunga sang mga Gentil paagi sa ila.

13 ś Kag sa tapus sila nakahipus, si Santiago nagsabat, nga nagasiling, Mga tawo kag mga kauturan, pamatii ninyo ako:

14 Si Simeon nagsugid kon paano nga ang Dios nagduaw sing una sa mga Gentil, sa pagkuha sa ila sing katawohan sa iya ngalan.

15 Kag sa sini nagakasinanto ang mga polong sang mga manalagna; subong sang nasulat na,

16 Sa tapus sini magabalik ako, kag tukuron ko liwat ang tabernakulo ni David, nga napukan; kag tukuron ko liwat ang mga naguba sini, kag patindugon ko ini:

17 Agud nga ang mabilin nga mga tawo mangita sa Ginoo, kag ang tanan nga Gentil, nga ginatawag sa akon ngalan, nagasiling ang Ginoo, nga nagahimo sining tanan nga mga butang.

18 Kutub sa ginsuguran sang kalibutan nahibaloan na sang Dios ang tanan niyang mga buhat.

19 Busa ang akon pamatbat amo nga indi ta pagpagamohan ang sa mga Gentil, nga nagliso sa Dios:

20 Kondi nga sulatan ta sila, nga magpugung sila sa mga kahigkoan sang mga diosdios, kag sa pagpanghilawas, kag sa mga butang nga nakuga, kag sa dugo.

21 Kay si Moises kutub sa dumaan may mga nagawali sa iya sa tagsa ka siudad, kay ginabasa sia sa mga sinagoga sa tagsa ka adlaw nga sabbath.

22 Niyan ginpakamaayo sang mga apostol kag sang mga tigulang, pati sang bug-os nga iglesia, nga magpadala sing pinili nga mga tawo sa ila kaugalingon nga kaupdanan pa Antioquia upud kay Pablo kag kay Bernabe; nga amo si Judas nga gintawag si Barsabas, kag si Silas, puno nga mga tawo sa mga kauturan:

23 Kag sila nagsulat sang mga sulat sono sining bagay paagi sa ila; Ang mga apostol kag ang mga tigulang kag ang mga kauturan nagaabiabi sa mga kauturan nga sa mga Gentil sa Antioquia kag Siria kag Cilicia:

24 Sanglit amon nabatian, nga ang iban nga nagikan sa amon naggamo sa inyo sa mga polong, nga nagapagamo sang inyo mga kalag, nga nagasiling, Kinahanglan kamo magpacircuncidar, kag maghuput sang kasogoan: nga sa ila wala kami magsogo:

25 Ini ginpakamaayo namon, sang nagatingub kami nga may paghiliusa, sa pagpadala sing pinili nga mga lalaki sa inyo kaupud sang aton hinigugma nga si Bernabe kag si Pablo,

26 Mga tawo nga nagpakatalagman sang ila mga kabuhi tungud sa ngalan sang aton Ginoong Jesu-Cristo.

27 Busa ginpadala namon si Judas kag si Silas, nga sila man magasugid sa inyo sang amo nga mga butang sa baba.

28 Kay ini ginpakamaayo sang Balaan nga Espiritu, kag namon, nga indi na kamo paglulanan pa luwas sining mga butang nga kinahanglan;

29 Nga magpugung kamo sa mga pagkaon nga gindolot sa mga diosdios, kag sa dugo, kag sa mga butang nga nakuga, kag sa pagpanghilawas: kon maglikaw kamo sa ila sini, manginmaayo sa inyo. Paalam sa inyo.

30 Gani sang ginpalakat na sila, nagdolhog sila pa Antioquia: kag sang natipon nila ang kadam-an, ginhatag nila ang sulat:

31 Nga sang nabasa nila ini, nagkalipay sila tungud sang laygay.

32 Kag si Judas kag si Silas, nga mga manalagna man, naglaygay sa mga kauturan sa madamung polong, kag nagpalig-on sa ila.

33 Kag sa tapus nga nakapabilin sila didto sing pila ka tion, ginpalakat sila sa paghidait sang mga kauturan pakadto sa mga apostol.

34 Apang ginpakamaayo ni Silas nga magpabilin pa didto.

35 Si Pablo kag si Bernabe man nagpabilin sa Antioquia, nga nagapanudlo kag nagawali sang polong sang Ginoo, kaupud sang iban man nga madamu.

36 ś Kag sa tapus ang pila ka adlaw si Pablo nagsiling kay Bernabe, Makadto kita liwat kag duawon ang mga kauturan sa tagsa ka siudad diin aton ginwali ang polong sang Ginoo, kag tan-awon kon paano sila.

37 Kag si Bernabe buut nga paupdon sa ila si Juan, nga gintawag si Marcos.

38 Apang wala pagpakamaayoha ni Pablo nga iupud nila sia, nga nagbulag sa ila sa Panfilia, kag wala mag-upud sa ila sa buluhaton.

39 Kag ang pagbanggianay sa tunga nila matigdas gid, sa bagay nga nagbulag ang isa sa isa: kag gani gin-upud ni Bernabe si Marcos, kag nagpanakayon pa Cipre;

40 Kag si Pablo nagpili kay Silas, kag naglakat, nga gintugyan sang mga kauturan sa bugay sang Dios.

41 Kag ginlatas niya ang Siria kag Cilicia, nga nagapalig-on sang mga iglesia.

KAPITULO 16

NIYAN nag-abut sia sa Derbe kag sa Listra: kag, yari karon, yadto didto ang isa ka disipulo, nga ginhingalanan si Timoteo, nga anak nga lalaki sang isa ka babaye nga Judio, kag nagtoo; apang ang iya amay Griego:

2 Ini sia ginsugid nga maayo sang mga kauturan sa Listra kag sa Iconio.

3 Buut ni Pablo nga iupud sia niya; kag ginkuha niya sia kag gincircuncidar bangud sang mga Judio nga didto sa sadtong mga duug: kay sila tanan nakahibalo nga ang iya amay Griego.

4 Kag sang naglatas sila sa mga siudad, ginhatag nila sa ila nga paghuptan ang mga mando, nga natangdo sang mga apostol kag mga tigulang nga didto sa Jerusalem.

5 Kag gani ang mga iglesia naglig-on sa pagtoo, kag nagdugang sa kadamuon adlawadlaw.

6 Karon sang naglatas sila sa Frigia kag sa ginsakpan sang Galacia, kag gindumilian sila sang Balaan nga Espiritu sa pagwali sang polong sa Asia,

7 Sang pagsamput nila sa Misia, naghimulat sila sa pagkadto sa Bitinia: apang ang Espiritu wala magtugut sa ila.

8 Kag sang nagaligad sila sa Misia, nagdolhog sila pa Troas.

9 Kag ang isa ka palanan-awon nagpahayag kay Pablo sa kagab-ihon; May isa ka lalaki nga taga-Macedonia nga nagatindug, kag nagpakilooy sa iya, nga nagasiling, Tabok ka sa Macedonia, kag tabangi kami.

10 Kag sa tapus nga nakita niya ang palanan-awon, sa gilayon naghimulat kami sa pagkadto sa Macedonia, nga nagahangup nga ang Ginoo nagtawag sa amon sa pagwali sang ebanghelyo sa ila.

11 Busa sang nagapalayag kami gikan sa Troas, nagtadlong kami pa Samotracia, kag sa madason nga adlaw pa Neapolis;

12 Kag gikan didto pa Filipos, nga amo ang puno nga siudad sadtong ginsakpan sang Macedonia, kag isa ka colonia: kag nagpabilin kami sa sinang siudad sing pila ka adlaw.

13 Kag sa sabbath nagkadto kami sa luwas sang siudad sa ubay sang suba, nga naanaran sa pagpangamuyo; kag naglingkod kami, kag nagpamolong sa mga babaye nga nagtipon didto.

14 ś Kag ang isa ka babaye nga ginhingalanan si Lidia, nga manugbaligya sang purpura, nga gikan sa siudad sang Tiatira, nga masinimbahon sa Dios, nagpamati sa amon: nga ang iya tagiposoon ginbuksan sang Ginoo, nga sia nagtalupangud sang mga butang nga ginpamolong ni Pablo.

15 Kag sang nabautisohan sia, kag ang iya panimalay, nagpakilooy sia sa amon, nga nagasiling, Kon nagahunahuna kamo nga ako matinoohon sa Ginoo, sulud kamo sa akon balay, kag magpabilin didto. Kag ginpilit niya kami.

16 ś Kag nahanabu, sang nagapakadto kami sa pagpangamuyo, ginsugata kami sang isa ka dalagita nga gingamhan sang espiritu sang pagpamakot, nga nagdala sing madamu nga ganansya sa iya mga agalon paagi sa pagpamakot:

17 Ini sia nagsonod kay Pablo kag sa amon, kag nagsinggit, nga nagasiling, Ining mga tawo among mga alagad sang labing mataas nga Dios, nga nagapahayag sa aton sang dalan sang kaluwasan.

18 Kag ginhimo niya ini sa madamu nga mga adlaw. Apang si Pablo, sang gingamohan gid, nagbalikid kag nagsiling sa espiritu, Nagasogo ako sa imo sa ngalan ni Jesu-Cristo nga maggowa sa iya. Kag naggowa sia sa sadto gid nga takna.

19 ś Kag sang nakita sang iya mga agalon nga ang paglaum sang ila kita nadula, gindakup nila si Pablo kag si Silas, kag ginguyud sila sa balaligyaan sa atubangan sang mga manugdumala,

20 Kag gindala sila sa mga hukom, nga nagasiling, Ining mga tawo nga mga Judio nagagamo sing tama sang aton siudad,

21 Kag nagapanudlo sing mga pamatasan, nga indi tugut sa aton ang pagbaton, ukon pagsonod, subong nga mga Romanhon.

22 Kag ang kadam-an nagtindug sing tingub batok sa ila: kag ginkusnit sang mga hukom ang ila panapton, kag nagsogo nga bunalon sila.

23 Kag sang nalapdusan nila sila sing madamu, ginsulud nila sila sa bilanggoan, nga ginatugnan ang manugbantay sang bilanggoan sa pagbantay sa ila sing malig-on:

24 Sang nakabaton sang amo nga tugon, ginsulud niya sila sa nasulud nga bilanggoan, kag gintakud niya ang ila mga tiil sa mga pandug.

25 ś Kag sa tungang gab-i si Pablo kag si Silas nagpangamuyo, kag nag-ambahan sing mga pagdayaw sa Dios: kag ang mga binilanggo nagpamati sa ila.

26 Kag sa hinali nag-abut ang mabaskug nga linog, sa bagay nga nag-uyug ang mga sadsaran sang bilanggoan: kag sa gilayon nagbukas ang tanan nga ganhaan, kag nahubad ang mga gapus sang tagsatagsa.

27 Kag sang pagmata sang manugbantay sang bilanggoan, kag nakita nga napamuksan ang mga ganhaan sang bilanggoan, naggabut sia sang iya espada, kag buut nga manginmatay, nga nagahunahuna nga nakapalagyo ang mga binilanggo.

28 Apang si Pablo nagsinggit sa matonog nga tingug, nga nagasiling, Dili paghaliti ang imo kaugalingon: kay yari kami diri tanan.

29 Niyan nagpanawag sia sing suga, kag nagsulud sing madagmit, kag nagpalapit nga nagakurug, kag naghapa sa atubangan ni Pablo kag ni Silas,

30 Kag gindala sila sa gowa, kag nagsiling, Mga sir, ano bala ang dapat ko himoon nga maluwas ako?

31 Kag nagsiling sila, Magtoo kay Ginoong Jesu-Cristo, kag maluwas ka, kag ang imo panimalay.

32 Kag ginhambal nila ang polong sang Ginoo sa iya, kag sa tanan nga yara sa iya panimalay.

33 Kag ginkuha niya sila sadtong takna sang kagab-ihon, kag ginhugasan ang ila mga pilas; kag nagpabautiso, sia kag ang iya bug-os nga panimalay, sa gilayon.

34 Kag sang ginpasaka niya sila sa iya balay, ginbutangan niya sila sing pagkaon, kag nagkalipay, nga nagatoo sa Dios upud sang iya bug-os nga panimalay.

35 Kag sang pagkaaga, ang mga hukom nagpadala sing mga polis, nga nagasiling, Buhii inang mga tawo.

36 Kag ang manugbantay sang bilanggoan nagbalita sining hambalanon kay Pablo, Ang mga hukom nagpasogo nga buhian kamo: busa karon gowa kamo, kag maglakat sa paghidait.

37 Apang si Pablo nagsiling sa ila, Ginbunal nila kami sa dayag nga wala mahukmi, mga tawo nga mga Romanhon, kag ginbutang kami sa bilanggoan; kag karon pagowaon nila kami sa tago? indi gid mahimo; kondi sila gid pakari-a kag pagowaon kami.

38 Kag ang mga polis nagbalita sining mga polong sa mga hukom: kag hinadlukan sila, sang pagkabati nila nga mga Romanhon sila.

39 Kag nag-abut sila kag nagpakilooy sa ila, kag ginpagowa nila sila, kag ginpangayo nila sa ila nga maghalin sa siudad.

40 Kag naggowa sila sa bilanggoan, kag nagsulud sa balay ni Lidia: kag sang nakita nila ang mga kauturan, ginlipay nila sila, kag nagtaliwan.

KAPITULO 17

KARON sang nalatas nila ang Anfipolis kag Apolonia, nag-abut sila sa Tesalonica, diin may sinagoga sang mga Judio:

2 Kag si Pablo, sono sa iya kinabatasan, nagsulud sa ila, kag sa tatlo ka adlaw nga sabbath nagpakigbais sa ila gikan sa mga kasulatan,

3 Nga nagasaysay kag nagapahayag, nga ang Cristo kinahanglan mag-antus, kag mabanhaw gikan sa mga patay; kag nga ining Jesus, nga ginawali ko sa inyo, amo ang Cristo.

4 Kag ang iban sa ila nagtoo, kag nag-impon kay Pablo kag kay Silas; kag ang daku nga kadam-an sang mga Griego nga mainampoon, kag indi diotay sa puno nga mga babaye.

5 ś Apang ang mga Judio nga wala magtoo, nga nagkalahisa, nagkuha sing pila ka tawo nga malaut gikan sa mga horong, kag nagtipon sang isa ka punsok, kag ginpagubut nila ang bug-os nga siudad, kag gingubat ang balay ni Jason, kag ginhimulatan nila nga pagdalhon sila sa katawohan.

6 Kag sang wala nila sila makita, ginguyud nila si Jason kag ang pila ka mga kauturan sa mga manugdumala sang siudad, nga nagasinggit, Ini sila nga nagpabaliskad sang kalibutan nagkari man diri;

7 Nga ginbaton ni Jason: kag sila tanan nagahimo sing batok sa mga mando ni Cesar, nga nagasiling nga may isa pa ka hari, nga amo si Jesus.

8 Kag gingamo nila ang katawohan kag ang mga manugdumala sang siudad, sang pagkabati nila sining mga butang.

9 Kag sang nakabaton sila sing pagpasalig kay Jason, kag sa iban, ginbuhian nila sila.

10 ś Kag sa gilayon sa kagab-ihon ginpadala sang mga kauturan si Pablo kag si Silas sa Berea: nga sang pag-abut nila didto nagsulud sila sa sinagoga sang mga Judio.

11 Ini sila labi pa ka dungganon sang sa mga yadto sa Tesalonica, kay ginbaton nila ang polong nga may handa nga panghunahuna, kag gin-usisa ang mga kasulatan adlawadlaw, kon ining mga butang matuud.

12 Busa madamu sa ila ang nagtoo; amo man sa mga babaying Greciahanon nga dungganon, kag sa mga lalaki, indi diotay.

13 Apang sang nahibaloan sang mga Judio sa Tesalonica nga ang polong sang Dios ginwali ni Pablo sa Berea, nagkadto sila didto man, kag nagtublag sang katawohan.

14 Kag niyan sa gilayon gindul-ong sang mga kauturan si Pablo tubtub sa dagat: apang si Silas kag si Timoteo nagpabilin pa didto.

15 Kag sila nga nagdul-ong kay Pablo nagdala sa iya tubtub sa Atenas: kag sang pagkabaton nila sing sogo kay Silas kag kay Timoteo nga magkadto sila sa iya sa madali gid, nagtaliwan sila.

16 ś Karon sang nagahulat si Pablo sa ila sa Atenas, natublag ang iya espiritu, sang ginatan-aw niya ang siudad nga puno sang mga diosdios.

17 Gani nagpakigbais sia sa mga Judio sa sinagoga, kag sa mainampoon nga mga tawo, kag sa mga masugata niya sa balaligyaan sa adlawadlaw.

18 Niyan ang pila sang Epicureo kag sang Estoico nga mga filosofo nagpakigbais sa iya. Kag ang iban nagsiling, Ano bala ang buut nga isiling sining boraan? ang iban nagsiling, Daw sa manugbantala sia sang dumoloong nga mga dios: bangud nga ginwali niya si Jesus sa ila, kag ang pagkabanhaw.

19 Kag ginkaptan nila sia, kag gindala sia sa Areopago, nga nagasiling, Mapakilala mo bala sa amon kon ano ining bag-o nga doktrina, nga ginapamolong mo?

20 Kay nagadala ka sing kalamag-ohan nga mga butang sa amon mga idulungug: busa buut namon mahibaloan kon ano ang kahologan sining mga butang.

21 (Kay ang tanan nga taga-Atenas kag ang mga dumoloong nga nagapuyo didto walay liwan nga ginagamitan sang ila tion, kondi ang pagsugid, ukon ang pagpamati sang bag-o nga butang.)

22 ś Niyan si Pablo nagtindug sa tunga sang bakolod sang Mars, kag nagsiling, Kamo nga mga tawo nga taga-Atenas, ginahantup ko nga kamo sa tanan nga butang palalihi gid.

23 Kay sang pagligad ko, kag ginatan-aw ang inyo pagsimba, nakita ko ang halaran nga nasulatan sini, SA DIOS NGA WALA MAKILAL-I. Busa ang ginasimba ninyo nga wala makilal-i, sia ginabantala ko sa inyo.

24 Ang Dios nga naghimo sang kalibutan kag sang tanan nga butang nga yara sa sini, sanglit sia Ginoo sang langit kag duta, wala nagapuyo sa mga templo nga ginhimo sang mga kamut;

25 Kag wala sia ginasimba sang mga kamut sang mga tawo, subong nga daw may kinahanglan sia sing bisan ano, kay sia nagahatag sa tanan sing kabuhi, kag ginhawa, kag sang tanan nga butang;

26 Kag sa isa ka dugo ginhimo ang tanan nga pungsud sang mga tawo sa pagpuyo sa bug-os nga nawung sang duta, kag nagpat-ud sang mga tion nga natangdo sing una, kag sang mga dulunan sang ila puluy-an;

27 Agud nga magpangita sila sa Ginoo, kon ayhan magsagap sila sa iya, kag makita sia, bisan pa indi sia malayo sa tagsatagsa sa aton:

28 Kay sa iya nagakabuhi kita, kag nagahulag, kag amo kita; subong sang nasiling man sang pila sang inyo mga mamalaybay, Kay kita hinimo man niya.

29 Busa sanglit nga kita hinimo sang Dios, indi kita dapat maghunahuna nga ang pagkaDios kaangay sa bulawan, ukon pilak, ukon bato, nga tinigib sang arte kag pagpatok sang tawo.

30 Kag ang mga tion sining dipagkaalam ginlaktawan sang Dios; apang karon sia nagasogo sa tanan nga tawo bisan diin nga maghinulsul:

31 Bangud nga nagtangdo sia sing isa ka adlaw nga hukman niya ang kalibutan sa pagkamatarung paagi sa sinang tawo nga iya gintangdoan; nga nahanungud sini nakahatag sia sing kalig-onan sa tanan nga tawo, sanglit iya ginbanhaw sia gikan sa mga patay.

32 ś Kag sang pagkabati nila sang pagkabanhaw sang mga patay, ang iban nag-uligyat: kag ang iban nagsiling, Mamati pa liwat kami sa imo nahanungud sini.

33 Gani si Pablo naggowa gikan sa tunga nila.

34 Apang may mga tawo nga nagbuylog sa iya, kag nagtoo: nga sa ila amo si Dionisio nga Areopagonhon, kag ang babaye nga ginhingalanan si Damaris, kag ang iban nga kaupud nila.

KAPITULO 18

SA tapus sining mga butang naghalin si Pablo sa Atenas, kag nagkadto sa Corinto;

2 Kag nakita niya ang isa ka Judio nga ginhingalanan si Aquila, nga natawo sa Ponto, nga bag-o pa lang mag-abut gikan sa Italia, kaupud ang iya asawa nga si Priscila; (bangud nga si Claudio nagsogo sang tanan nga Judio sa paghalin sa Roma:) kag nagkadto sia sa ila.

3 Kag bangud nga kaangay sila sing palangitan-an, nagdayon sia sa ila, kag nag-obra: kay sa ila palangitan-an manughimo sila sing mga layanglayang.

4 Kag nagpakigbais sia sa sinagoga sa tagsa ka sabbath, kag nagbuyuk sang mga Judio kag mga Griego.

5 Kag sang nag-abut si Silas kag si Timoteo gikan sa Macedonia, si Pablo napilitan sa espiritu, kag nagpanaksi sa mga Judio nga si Jesus amo ang Cristo.

6 Kag sang nagsumpung sila sang ila kaugalingon, kag nagpasipala, ginwaswas niya ang iya panapton, kag nagsiling sa ila, Ang inyo dugo manginsa inyo gid mga olo; ako walay salabton: kutub karon makadto ako sa mga Gentil.

7 ś Kag nagtaliwan sia didto, kag nagsulud sa balay sang tawo nga ginhingalanan si Justo, nga masinimbahon sa Dios, nga ang iya balay iping sa sinagoga.

8 Kag si Crispo, nga puno nga manugdumala sang sinagoga, nagtoo sa Ginoo pati ang bug-os niyang panimalay; kag ang madamu sang mga taga-Corinto nga nakabati nagtoo, kag ginbautisohan.

9 Niyan sa kagab-ihon ang Ginoo naghambal kay Pablo sa palanan-awon, Dili ka magkahadluk, kondi magpamolong, kag dili ka maghipus:

10 Kay ako kaupud nimo, kag walay tawo nga magdamhag sa paghalit sa imo: kay may madamu ako nga katawohan sa sining siudad.

11 Kag nagpuyo sia didto sing isa ka tuig kag anum ka bulan, nga nagapanudlo sang polong sang Dios sa tunga nila.

12 ś Kag sang si Galio ang proconsul sa Acaya, ang mga Judio nagdamhag sing hiliusa batok kay Pablo, kag gindala sia sa lingkoran nga hukmanan,

13 Nga nagasiling, Ining tawo nagabuyuk sang mga tawo sa pagsimba sa Dios batok sa kasogoan.

14 Kag sang si Pablo buut na magtikab sang iya baba, si Galio nagsiling sa mga Judio, Kon ini butang nga sayup ukon malaut nga pagkabanyaga, O kamo nga mga Judio, may katarungan nga batason ko kamo:

15 Apang kon ini kasuayon nahanungud sa mga polong kag mga ngalan, kag sa inyo kasogoan, kamo inyo ang mahibalo sini; kay indi ako buut magmanginhukom sining mga butang.

16 Kag gintabog niya sila gikan sa lingkoran nga hukmanan.

17 Niyan ang tanan nga Griego nagdakup kay Sostenes, nga puno nga manugdumala sang sinagoga, kag ginbunal sia sa atubangan sang lingkoran nga hukmanan. Kag si Galio wala magsapak sining mga butang.

18 ś Kag sa tapus sini si Pablo nagpabilin pa didto sing madamung adlaw, kag niyan nagpaalam sia sa mga kauturan, kag nagpanakayon gikan didto pa Siria, kag kaupud niya si Priscila kag si Aguila; nga nakapabulug sia sa Cencreas: kay may panaad sia.

19 Kag nag-abut sia sa Efeso, kag ginbayaan sila didto: apang sia iya nagsulud sa sinagoga, kag nagpakigbais sa mga Judio.

20 Sang ginpangayo nila sia sa pagpabilin sa ila sing madugaydugay pa nga tion, wala sia magsugut;

21 Kondi nagpaalam sia sa ila, nga nagasiling, Kinahanglan ko sa tanan nga paagi magbantay sining pandut nga magaabut sa Jerusalem: apang magabalik ako liwat sa inyo, kon buut sang Dios. Kag nagpanakayon sia gikan sa Efeso.

22 Kag sang nakadungka sia sa Cesarea, kag nakataklad, kag naabiabi ang iglesia, nagdolhog sia pa Antioquia.

23 Kag sa tapus nga nakapabilin sia sing pila ka tion didto, nagtaliwan sia, kag naglatas sing pasonod sa bug-os nga ginsakpan sang Galacia kag Frigia, nga nagapalig-on sang tanan nga disipulo.

24 ś Kag ang isa ka Judio nga ginhingalanan si Apolos, nga natawo sa Alejandria, tawo nga sampaton sa hambal, kag gamhanan sa mga kasulatan, nag-abut sa Efeso.

25 Ining tawo naton-an sa dalan sang Ginoo; kag sanglit nga nagasilabo sa espiritu, nagpamolong sia kag nagpanudlo nga may kapisan sang mga butang nahanungud sa Ginoo, nga nahibaloan niya lamang ang bautismo ni Juan.

26 Kag nagsugud sia sa pagpamolong nga may kasidla sa sinagoga: nga sang napamatian sia ni Priscila kag ni Aquila, gindala nila sia sa ila, kag gintalastas sa iya sing sibo pa gid ang dalan sang Dios.

27 Kag sang buut sia maglaton sa Acaya, nagsulat ang mga kauturan, nga nagasugid sa mga disipulo sa pagbaton sa iya: nga, sang pag-abut niya, ginbuligan niya sing daku ang mga nagtoo paagi sa bugay:

28 Kay sa dakung kagamhanan ginhaylo niya ang mga Judio sa dayag, nga nagapakita paagi sa mga kasulatan nga si Jesus amo ang Cristo.

KAPITULO 19

KAG nahanabu, nga, sang didto si Apolos sa Corinto, si Pablo, nga nagalatas sa kadutaan nga natakas, nag-abut sa Efeso: kag nakita niya ang pila ka disipulo,

2 Nagsiling sia sa ila, Nabaton bala ninyo ang Balaan nga Espiritu kutub sang nagtoo kamo? Kag nagsiling sila sa iya, Wala kami bisan nakabati kon may Balaan nga Espiritu.

3 Kag nagsiling sia sa ila, Niyan sa ano bala ginbautisohan kamo? Kag nagsiling sila, Sa bautismo ni Juan.

4 Niyan si Pablo nagsiling, Sa pagkamatuud si Juan nagbautiso sang bautismo sang paghinulsul, nga nagasiling sa katawohan, nga dapat magtoo sila sa iya nga magasonod sa iya, nga amo, kay Cristo Jesus.

5 Sang pagkabati nila sini, ginbautisohan sila sa ngalan ni Ginoong Jesus.

6 Kag sang natakdungan sila ni Pablo sang iya mga kamut, nag-abut sa ila ang Balaan nga Espiritu; kag nagpamolong sila sing mga hambal, kag nagpanagna.

7 Kag ang tanan nga tawo mga napulog duha ka lalaki.

8 Kag nagsulud sia sa sinagoga, kag nagpamolong nga may kasidla sa sulud sang tatlo ka bulan, nga nagapakigbais kag nagapatalupangud sang mga butang nahanungud sa ginharian sang Dios.

9 Apang sang nagpatig-a ang iban, kag wala magtoo, apang nagpamolong sing malaut nahanungud sinang dalan sa atubangan sang kadam-an, nagtaliwan sia sa ila, kag nagpain sang mga disipulo, nga nagapakigbais adlawadlaw sa buluthoan ni Tirano.

10 Kag ini nagpadayon sa sulud sang duha ka tuig; sa bagay nga ang tanan nga nagpuyo sa Asia nakabati sang polong ni Ginoong Jesus, ang mga Judio kag mga Griego.

11 Kag ginhimo sang Dios ang pinasahi nga mga milagro paagi sa mga kamut ni Pablo:

12 Sa bagay nga ang mga panyo ukon mga tampi gikan sa iya lawas gindala sa mga masakiton, kag ang mga balatian nagtaliwan sa ila, kag ang malaut nga mga espiritu naggowa sa ila.

13 ś Niyan ang iban sang landolando nga mga Judio nga mga manugsobol sang mga yawa naghimulat sa pagmitlang sang ngalan ni Ginoong Jesus sa may mga espiritung malaut, nga nagasiling, Ginapasumpa namon kamo kay Jesus nga ginawali ni Pablo.

14 Kag ang pito ka lalaking anak ni Sceva, isa ka Judio, kag puno sang mga pari, naghimo sini.

15 Kag ang espiritu nga malaut nagsabat kag nagsiling, Nakilala ko si Jesus, kag nakilala ko si Pablo; apang sin-o bala kamo?

16 Kag ang tawo nga yara sa iya ang malaut nga espiritu naglumpat sa ila, kag gindaug sila, kag ginlutus sila, sa bagay nga nagpalagyo sila nga hublas kag pilason sa sadtong balay.

17 Kag ini nahibaloan sang tanan nga Judio kag Griego man nga nagapuyo sa Efeso; kag hinadlukan sila tanan, kag ginpadaku ang ngalan ni Ginoong Jesus.

18 Kag madamu sang mga nagtoo nag-abut, kag nagtuad, kag nag-asoy sang ila mga buhat.

19 Madamu sa ila man nga naggamit sing mga salamangka nagdala sing tingub sang ila mga libro, kag ginpanutdan nila ini sa atubangan sang tanan nga tawo: kag gin-isip nila ang bili sini, kag nasapwan nga kalim-an ka libo ka bilog nga pilak.

20 Gani nagtubo sing gamhanan ang polong sang Dios kag naglandas.

21 ś Sa tapus sining mga hitabu, si Pablo nagtuyo sa espiritu, sa pagkadto sa Jerusalem kon makalatas sia sa Macedonia kag sa Acaya, nga nagasiling, Sa tapus nga makakadto ako didto, kinahanglan ko man tan-awon ang Roma.

22 Gani ginpadala niya sa Macedonia ang duha sang mga nag-alagad sa iya, si Timoteo kag si Erasto; apang sia iya nagpabilin sa Asia sa diotay nga tion.

23 Kag sa sadtong tion nahanabu ang indi diotay nga kagubut nahanungud sinang dalan.

24 Kay ang isa ka tawo nga ginhingalanan si Demetrio, isa ka manugsalsal sang pilak, nga naghimo sing mga solosimbahan nga pilak nga sa kay Diana, nagdala sing indi diotay nga ganansya sa mga manugsalsal;

25 Ini sila gintipon niya upud sang mga mamumugon sa kaangay nga buluhaton, kag nagsiling, Mga sir, nakahibalo kamo nga sa sining palangitan-an nagagikan ang aton manggad.

26 Labut pa ginatan-aw ninyo kag ginapamatian, nga indi lamang sa Efeso, kondi halus sa bug-os nga Asia, ining Pablo nakabuyuk kag nakapalipas sang madamu nga katawohan, nga nagasiling nga indi mga dios ang mga ginhimo sang mga kamut:

27 Sa sining kabangdanan indi lamang nga may katalagman nga ining aton palangitan-an manginwalay pulus; kondi man nga ang templo sang daku nga diosa nga si Diana pagatamayon, kag ang iya pagkadaku laglagon, nga ginasimba sang bug-os nga Asia kag sang kalibutan.

28 Kag sang pagkabati nila sining mga hambalanon, nagsingkal sila, kag nagsinggit, nga nagasiling, Daku si Diana sang mga taga-Efeso.

29 Kag ang bug-os nga siudad napuno sang kagubut: kag sang nadakup nila si Gayo kag si Aristarco, mga tawo nga taga-Macedonia, nga kaupdanan ni Pablo sa panlakatan, nagdagusu sila sing hiusa pa teatro.

30 Kag sang buut si Pablo magpatunga sa katawohan, wala sia pagtuguti sang mga disipulo.

31 Kag ang pila sang mga pangolo sa Asia, nga mga abyan niya, nagpasogo sa iya, nga nagapakilooy sa iya nga indi sia magpangahas sa teatro.

32 Busa ang iban nagsinggit sing isa ka butang, kag ang iban sing lain: kay ang katilingban nagkalalibug; kag ang kalabanan wala makahibalo kon sa ano nga nagtipon sila.

33 Kag ginkuha nila sa tunga sang kadam-an si Alejandro, nga ginatulud sang mga Judio. Kag si Alejandro nagsinyas sang iya kamut, kag buut kuntani maghimo sing pag-apin sang iya kaugalingon sa katawohan.

34 Apang sang nasayoran nila nga Judio sia, ang tanan nagsinggit sa isa ka tingug sing mga duha ka takna, Daku si Diana sang mga taga-Efeso.

35 Kag sang napatunung sang escribano ang katawohan, nagsiling sia, Kamo nga mga tawo sang Efeso, sin-o bala nga tawo nga wala makahibalo nga ang siudad sang mga taga-Efeso manugsimba sang dakung diosa nga si Diana, kag sang imahen nga naholog gikan kay Jupiter?

36 Niyan sanglit indi malalis ining mga butang, dapat kamo magtawhay, kag indi maghimo sing dasodaso.

37 Kay gindala ninyo diri ining mga tawo, nga indi mga buyong sang mga iglesia, ukon manugpasipala sa inyo diosa.

38 Busa kon si Demetrio, kag ang mga manugsalsal nga upud sa iya, may butang batok sa bisan kay sin-o nga tawo, yara ang hukmanan, kag may mga proconsul: pasumbunga sila ang isa sa isa.

39 Apang kon nagapangita kamo sing bisan ano nahanungud sa iban nga mga butang, husayon ini sa legal nga pagtipon.

40 Kay may katalagman kita nga pagtawgon kag pamangkoton nahanungud sang kinagamo sining adlaw, nga wala sing kabangdanan nga aton mahatag sa pagpakamatarung sining pagtipon.

41 Kag sang nakapamolong sia sini, ginpapauli niya ang katilingban.

KAPITULO 20

KAG sa tapus nga nagpuas ang kinagahud, ginpatawag ni Pablo ang mga disipulo, kag naghakus sa ila, kag nagtaliwan pakadto sa Macedonia.

2 Kag sang nalatas niya yadtong mga bahin, kag nakahatag sa ila sing madamung laygay, nag-abut sia sa Grecia,

3 Kag nagpuyo sia didto sing tatlo ka bulan. Kag sang ginpuhon sia sang mga Judio, sang buut na sia maglayag pa Siria, nagtapat sia sa pagbalik paagi sa Macedonia.

4 Kag nag-upud sa iya pa Asia si Sopater nga taga-Berea; kag sa mga taga-Tesalonica, si Aristarco kag si Segundo; kag si Gayo nga taga-Derbe, kag si Timoteo; kag sa mga taga-Asia, si Tiquico kag si Trofimo.

5 Ini sila nga nagauna naghulat sa amon sa Troas.

6 Kag naglayag kami gikan sa Filipos sa tapus ang mga adlaw sang tinapay nga walay tapay, kag nag-abut kami sa ila sa Troas sa lima ka adlaw; diin nagpabilin kami sing pito ka adlaw.

7 Kag sa nahaunang adlaw sang semana, sang nagtipon ang mga disipulo sa pagtipiktipik sing tinapay, nagwali sa ila si Pablo, nga buut magtaliwan sa adlaw nga madason; kag sia nagpadayon sang iya wali tubtub sa tungang gab-i.

8 Kag may madamu nga suga sa hulut nga naibabaw, diin sila nagtipon.

9 Kag may naglingkod sa bintana nga isa ka pamatan-on nga lalaki nga ginhingalanan si Eutico, nga natologan sing hamuuk: kag sang ginpalawig ni Pablo ang wali, sia nahamuukan sa katologon, kag naholog gikan sa ikatlo nga panalgan, kag ginhakwat sia nga patay.

10 Kag nagpanaug si Pablo, kag nagduko sa iya, kag sang nagahakus sa iya nagsiling, Indi kamo magpalibog; kay ang iya kabuhi yara sa iya.

11 Sang nakasaka sia liwat, kag nakatipiktipik sang tinapay, kag nakakaon, kag nakahambal sing malawig, tubtub sa pamanagbanag, amo ugaling ang paghalin niya.

12 Kag gindala nila nga buhi ang pamatan-on nga lalaki, kag indi diotay ang paglipay sa ila.

13 ś Kag nag-una kami sa sakayan, kag naglayag pa Asos, sa katuyoan sa pagpasakay kay Pablo didto: kay amo ini ang iya gintangdo, nga nagatuyo nga magakadto sia paagi sa duta.

14 Kag sang ginsugata niya kami sa Asos, ginpasakay namon sia, kag nag-abut sa Mitilene.

15 Kag naglayag kami gikan didto, kag naglambut sa madason nga adlaw sa tampad sang Quio; kag sang adlaw nga madason nag-abut kami sa Samos, kag nagpabilin sa Trogilio; kag sa adlaw nga madason nag-abut sa Mileto.

16 Kay si Pablo nakatapat nga maglayag nga indi maghapit sa Efeso, bangud nga indi sia magdugay sa Asia: kay nagasako sia, kon mahimo, nga didto sia sa Jerusalem sa adlaw sang Pentecostes.

17 ś Kag gikan sa Mileto nagpasogo sia sa Efeso, kag ginpatawag ang mga tigulang sang iglesia.

18 Kag sang pag-abut nila sa iya, nagsiling sia sa ila, Kamo nakahibalo, kutub sa nahaunang adlaw nga nag-abut ako sa Asia, kon ano ang pagginawi ko kaupud ninyo sa tanan nga tion,

19 Nga nagaalagad sa Ginoo sa bug-os nga pagpailub sang panghunahuna, kag may madamu nga luha, kag mga pagsulay, nga nag-abut sa akon bangud sa pagpuhon sang mga Judio:

20 Kag kon paano nga wala ako maghawid sang bisan ano nga kapuslanan ninyo, apang nagpahayag sa inyo, kag nagtudlo sa inyo sing hayag, kag sa pamalaybalay,

21 Nga nagapanaksi sa mga Judio, kag subong man sa mga Griego, sang paghinulsul sa Dios, kag pagtoo sa aton Ginoong Jesu-Cristo.

22 Kag karon, yari karon, nagakadto ako nga nagapus sa espiritu pa Jerusalem, nga wala makahibalo sang mga butang nga mahanabu sa akon didto:

23 Luwas nga ang Balaan nga Espiritu nagapamatuud sa tagsa ka siudad, nga nagasiling nga ang mga gapus kag mga kapipit-an nagahulat sa akon.

24 Apang wala ko pagasapaka ining mga butang, kag wala ko pagkabiga ang akon kabuhi nga mahal sa akon kaugalingon, agud nga matapus ko ang akon dalaganon nga may kalipay, kag ang hilikuton, nga akon nabaton kay Ginoong Jesus, sa pagpanaksi sang ebanghelyo sang bugay sang Dios.

25 Kag karon, yari karon, nahibaloan ko nga kamo tanan, nga sa tunga ninyo naglibut ako nga nagawali sang ginharian sang Dios, indi na makakita sang akon nawung.

26 Busa nagapanaksi ako sa inyo sini nga adlaw, nga matinlo ako sa dugo sang tanan nga tawo.

27 Kay wala ako mag-isul sa pag-asoy sa inyo sang bug-os nga laygay sang Dios.

28 ś Busa tatapa ang inyo kaugalingon, kag ang bug-os nga panong, nga sa ila ginhimo kamo sang Balaan nga Espiritu nga mga manugtatap, sa pagpahalab sang iglesia sang Dios, nga ginbakal niya sang iya kaugalingon nga dugo.

29 Kay nahibaloan ko ini, nga sa tapus sang akon pagtaliwan sudlon kamo sang mga lobo nga mapintas, nga indi magpaligad sang panong.

30 Kag gikan sa inyo gid magalutaw ang mga tawo, nga nagapamolong sing mga butang nga balingag, sa pagpasonod sa ila sang mga disipulo.

31 Busa magbantay kamo, kag magpanumdum, nga sa sulud sang tatlo ka tuig sa gab-i kag adlaw wala ako mag-untat sa pagpaandam nga may mga luha sa tagsatagsa.

32 Kag karon, mga kauturan, ginatugyan ko kamo sa Dios, kag sa polong sang iya bugay, nga makasarang sa pagpalig-on sa inyo, kag sa paghatag sa inyo sang panublion upud sa tanan nga ginpakabalaan.

33 Wala ako nagkaibug sang pilak, ukon bulawan, ukon panapton ni bisan sin-o.

34 Hoo, kamo gid nakahibalo, nga ining mga kamut nagpanghikot sa akon mga kinahanglan, kag sa ila sang akon mga kaupud.

35 Akon napahayag sa inyo ang tanan nga butang, kon paano nga sa pagpangabudlay dapat buligan ninyo ang mga maluya, kag dumdumon ang mga polong ni Ginoong Jesus, nga sia nagsiling, Bulahan pa ang paghatag sang sa pagbaton.

36 ś Kag sang nakapamolong sia sini, nagluhud sia, kag nagpangamuyo kaupud nila tanan.

37 Kag sila tanan naghibi sing tama, kag ginhakus nila si Pablo sa liog, kag ginhalukan sia,

38 Nga nagakasubu labi sa tanan bangud sang mga polong nga nahambal niya, nga indi na sila makakita sang iya nawung. Kag gindul-ong nila sia tubtub sa sakayan.

KAPITULO 21

KAG nahanabu, nga sa tapus kami nakabulag sa ila, kag nakalayag, nagtadlong kami pa Coos, kag sa adlaw nga madason pa Rodas, kag gikan didto pa Patara:

2 Kag sang nakakita kami sing sakayan nga matabok pa Fenicia, nagsakay kami, kag naglayag.

3 Karon sang nalantawan namon ang Cipre, ginligaran namon ini sa wala, kag naglayag pa Siria, kag nagdungka sa Tiro: kay didto haw-asan ang sakayan sang iya lulan.

4 Kag sang nakita namon ang mga disipulo, nagpabilin kami didto sing pito ka adlaw: nga nagsiling kay Pablo paagi sa Espiritu, nga dili sia magkadto sa Jerusalem.

5 Kag sang natapus namon yadtong mga adlaw didto, nagtaliwan kami kag nagpadayon sa amon panlakatan; kag sila tanan, pati ang mga asawa kag kabataan, nagdul-ong sa amon sa dalanon tubtub nakagowa kami sa siudad: kag nagluhud kami sa baybayon, kag nagpangamuyo.

6 Kag sang nakapaalam kami sa isa kag isa, nagsakay kami sa sakayan; kag sila nagpauli.

7 Kag sang natapus namon ang panakayon gikan sa Tiro, nag-abut kami sa Tolemaida, kag gin-abiabi ang mga kauturan, kag nagpabilin sa ila sing isa ka adlaw.

8 Kag sa adlaw nga madason nagtaliwan kami nga mga kaupdanan ni Pablo, kag nag-abut sa Cesarea: kag nagsulud kami sa balay ni Felipe nga ebanghelista, nga isa sang pito; kag nagpabilin upud sa iya.

9 Kag sia may apat ka anak nga babaye, nga mga ulay, nga nagpanagna.

10 Kag sang nagapabilin kami didto sing madamung adlaw, nagdolhog gikan sa Judea ang isa ka manalagna, nga ginhingalanan si Agabo.

11 Kag sang nag-abut sia sa amon, ginkuha niya ang wagkus ni Pablo, kag gingapus ang iya kaugalingon nga mga kamut kag mga tiil, kag nagsiling, Amo ini ang ginasiling sang Balaan nga Espiritu, Gapuson sing subong sini sang mga Judio sa Jerusalem ang tawo nga tag-iya sining wagkus, kag itugyan sia sa mga kamut sang mga Gentil.

12 Kag sang pagkabati namon sining mga butang, kami kag ang mga taga-didto nagpakilooy sa iya nga indi magtaklad sa Jerusalem.

13 Niyan si Pablo nagsabat, Ano bala ang ginahimo ninyo, nga nagahibi kag nagapasubu sang akon tagiposoon? kay handa ako indi lamang sa pagpagapus, kondi man sa pagpanginmatay sa Jerusalem tungud sa ngalan ni Ginoong Jesus.

14 Kag sang indi sia mabuyuk, nag-untat kami, nga nagasiling, Paghimoon ang kabubut-on sang Ginoo.

15 Kag sa tapus sinang mga adlaw gindala namon ang amon mga dala-dalahan, kag nagtaklad pa Jerusalem.

16 May nag-upud man sa amon nga pila sang mga disipulo gikan sa Cesarea, kag nagdala upud sa ila kay Mnason nga taga-Cipre, nga isa ka tigulang nga disipulo, nga amo ang dapat namon dayonan.

17 Kag sang pag-abut namon sa Jerusalem, ginbaton kami sang mga kauturan sing malipayon.

18 Kag sa madason nga adlaw si Pablo nagsulud kaupud namon kay Santiago; kag yara ang tanan nga katigulangan.

19 Kag sang naabiabi niya sila, gintalastas niya kon ano nga mga butang ang ginhimo sang Dios sa tunga sang mga Gentil paagi sa iya pagpanghikot.

20 Kag sang pagkabati nila sini, ginhimaya nila ang Ginoo, kag nagsiling sa iya, Nakita mo, utud, kon pila ka linibolibo sang mga Judio ang nagatoo; kag sila tanan makugi nahanungud sa kasogoan:

21 Kag nasugiran sila nahanungud sa imo, nga ginatudloan mo ang tanan nga Judio nga yara sa mga Gentil sa pagbiya kay Moises, nga nagasiling nga dili nila pagcircuncidahon ang ila kabataan, ukon pagsondon ang mga kinabatasan.

22 Busa ano ini? magatipon gid ang kadam-an: kay makabati sila nga nag-abut ka.

23 Busa buhata ining ginasiling namon sa imo: May apat kami ka tawo nga may panaad;

24 Upda sila, kag magpaninlo ka upud sa ila, kag bayari ang balayran upud sa ila, agud nga magpakiskis sila sang ila mga olo: kag ang tanan makahibalo nga walay kamatooran yadtong mga butang nga ginsugid sa ila nahanungud sa imo; kondi nga ikaw nagalakat sing mahusay, kag nagahuput sang kasogoan.

25 Nahanungud sa mga Gentil nga nagtoo, nagsulat kami kag nagtangdo nga indi sila maghimo sinang butang, luwas lamang nga magpugung sila sa mga butang nga gindolot sa mga diosdios, kag sa dugo, kag sa nakuga, kag sa pagpanghilawas.

26 Niyan gin-upud ni Pablo ang mga lalaki, kag sa adlaw nga madason sang nakapaninlo sia kaupud nila nagsulud sa templo, sa pagpahibalo sang kahingapusan sang mga adlaw sang pagpaninlo, tubtub nga ang isa ka halad madolot tungud sa tagsatagsa sa ila.

27 Kag sang nagahingapus ang pito ka adlaw, ang mga Judio gikan sa Asia, sang nakakita sila sa iya sa templo, nagsugyot sang bug-os nga katawohan, kag nagdakup sa iya,

28 Nga nagasinggit, Mga tawo sang Israel, bulig kamo: Amo ini ang tawo, nga nagapanudlo sa tanan nga tawo sa bisan diin batok sa katawohan, kag sa kasogoan, kag sa sining duug: kag kapin pa nagdala sia sing mga Griego man sa templo, kag gindagtaan ining balaan nga duug.

29 (Kay nakita nila anay sa siudad kaupud niya si Trofimo nga taga-Efeso, nga ginbanta nila nga gindala ni Pablo sa templo.)

30 Kag nagkinagubut ang bug-os nga siudad, kag nagdinagusu ang katawohan: kag gindakup nila si Pablo, kag ginguyud sia sa gowa sang templo: kag sa gilayon gintakup ang mga gawang.

31 Kag sang nagatinguha sila sa pagpatay sa iya, ginbalitaan ang puno nga kapitan sang kabon, nga ang bug-os nga Jerusalem nagkinagubut.

32 Sa gilayon nagdala sia sing mga soldado kag mga centurion, kag nagdolhog sing dalidali sa ila: kag sang nakita nila ang puno nga kapitan kag ang mga soldado, gin-untatan nila ang pagbunal kay Pablo.

33 Niyan ang puno nga kapitan nagpalapit, kag gindakup sia, kag ginpagapus sia sing duha ka kadena; kag ginpamangkot niya kon sin-o sia, kag kon ano ang iya nahimo.

34 Kag ang iban sa kadam-an nagsinggit sing isa ka butang, ang iban sing lain: kag sang indi niya mahibaloan ang kamatooran bangud sang kagahud, nagsogo sia nga dalhon sia sa kastilyo.

35 Kag sang pag-abut niya sa mga halintang, nahanabu nga ginhakwat sia sang mga soldado bangud sang kalugus sang katawohan.

36 Kay ang kadam-an sang katawohan nagsonod, nga nagasinggit, Patya sia.

37 Kag sang dalalhon na si Pablo sa kastilyo, nagsiling sia sa puno nga kapitan, Makahambal bala ako sa imo? Kag nagsiling sia, Makahibalo ka bala maghambal sang Griego?

38 Indi bala ikaw yadtong Egiptohanon, nga sang nagliligad nga mga adlaw nagtuga sang pagkagubut, kag nagdala sa kamingawan sang apat ka libo ka mga lalaki nga mga manugpatay?

39 Apang si Pablo nagsiling, Ako isa ka tawo nga Judio, nga taga-Tarso, isa ka siudad sa Cilicia, banwahanon sang dikubus nga siudad: kag, nagapakilooy ako sa imo, nga tugutan mo ako sa paghambal sa katawohan.

40 Kag sang natugutan niya sia, si Pablo nagtindug sa hagdan, kag nagsinyas sang iya kamut sa katawohan. Kag sang nagtinong na gid, nagpamolong sia sa ila sa hambal nga Hebreo, nga nagasiling,

KAPITULO 22

MGA tawo, mga kauturan, kag mga kaamayan, pamatii ninyo ang pangapin nga ginahimo ko karon sa inyo.

2 (Kag sang pagkabati nila nga nagpamolong sia sa ila sa hambal nga Hebreo, nagtinong pa gid sila: kag nagsiling sia,)

3 Sa pagkamatuud tawo nga Judio ako, nga natawo sa Tarso, isa ka siudad sa Cilicia, apang ginpadaku sa sining siudad, nga gintudloan sa tiilan ni Gamaliel sono sa tul-id nga paagi sang kasogoan sang aton mga kaamayan, kag makugi tungud sa Dios, subong sa inyo tanan karon nga adlaw.

4 Kag ginhingabut ko ining dalan tubtub sa kamatayon, nga ginapanggapus kag ginapamilanggo ko ang mga lalaki kag mga babaye.

5 Subong nga ang mataas nga pari man nagapanaksi sa akon, kag ang tanan nga katilingban sang mga tigulang: sa ila man nakabaton ako sing mga sulat nga sa mga kauturan, kag nagkadto ako sa Damasco, sa pagdala sa ila nga yadto didto nga gapus pa Jerusalem, agud nga pagsilotan sila.

6 Kag nahanabu, nga, sang nagpanlakatan ako, kag naghinamput sa Damasco sa mga odtong adlaw, sa hinali nagsilak palibut sa akon ang isa ka dakung kapawa gikan sa langit.

7 Kag napukan ako sa duta, kag nakabati sing isa ka tingug nga nagasiling sa akon, Saulo, Saulo, ngaa bala ginahingabut mo ako?

8 Kag nagsabat ako, Sin-o bala ikaw, Ginoo? Kag nagsiling sia sa akon, Ako si Jesus sang Nazaret, nga ginahingabut mo.

9 Kag sila nga nag-upud sa akon nakakita gid sang kapawa, kag hinadlukan; apang wala nila mabatii ang tingug sang nagpamolong sa akon.

10 Kag nagsiling ako, Ano bala ang himoon ko, Ginoo? Kag ang Ginoo nagsiling sa akon, Tindug ka, kag magkadto sa Damasco; kag didto isugid sa imo ang tanan nga mga butang nga gintangdo nga himoon mo.

11 Kag sang indi ako makakita bangud sang himaya sadtong kapawa, gintuytuyan ako sang mga nagaulupud sa akon, kag nakaabut ako sa Damasco.

12 Kag ang isa nga si Ananias, tawong mainampoon sono sa kasogoan, nga ginsugid nga maayo sang tanan nga Judio nga nagpuyo didto,

13 Nagkari sa akon, kag nagtindug, kag nagsiling sa akon, Utud Saulo, batona ang imo itololok. Kag sa sadto gid nga takna nagtolok ako sa iya.

14 Kag nagsiling sia, Ang Dios sang aton mga kaamayan nagpili sa imo, agud nga makilala mo ang iya kabubut-on, kag matan-aw inang Matarung nga Isa, kag mabatian ang tingug sang iya baba.

15 Kay manginsaksi ka niya sa tanan nga tawo sang imo nakita kag nabatian.

16 Kag karon ngaa bala nagapalantang ka? tindug ka, kag magpabautiso, kag manghugas sang imo mga sala, nga nagapanawag sa ngalan sang Ginoo.

17 Kag nahanabu, nga, sang nakabalik ako sa Jerusalem, sang nagapangamuyo ako sa templo, nag-abut sa akon ang isa ka pinasahi nga pagpanganinaw;

18 Kag nakita ko sia nga nagasiling sa akon, Dalidali ka, kag maggowa ka sing madali sa Jerusalem: bangud nga indi sila magbaton sang imo pagpamatuud nahanungud sa akon.

19 Kag nagsiling ako, Ginoo, sila nakahibalo nga ginpamilanggo ko kag ginpamunal sila nga nagtoo sa imo sa tagsa ka sinagoga:

20 Kag sang nag-agay ang dugo sang imo martir nga si Esteban, ako man nagatambong, kag nagapasugut sa iya kamatayon, kag nagbantay sang mga panapton sang mga nagpatay sa iya.

21 Kag nagsiling sia sa akon, Lakat ka: kay ipadala ko ikaw sa mga Gentil sa malayo.

22 Kag ginpamatian nila sia tubtub sining polong, kag niyan gintib-ong nila ang ila mga tingug, kag nagsiling, Dulaa sa duta ang tawo nga subong sa iya: kay indi nagakaigo nga magkabuhi sia.

23 Kag sang nagsinggit sila, kag nagpilak sang ila mga panapton, kag nagsabwag sing yab-ok sa hangin,

24 Ang puno nga kapitan nagsogo nga dalhon sia sa kastilyo, kag nagmando nga usisaon sia paagi sa lapdus; agud nga mahibaloan niya kon sa ano nga kabangdanan nga nagsinggit sila sing subong batok sa iya.

25 Kag sang nagaid nila sia sang ginihay nga mga panit, nagsiling si Pablo sa centurion nga nagatambong, Tugut bala sa inyo ang paglapdus sa tawo nga Romanhon, kag wala pa mahukmi?

26 Sang pagkabati sang centurion sini, nagkadto sia kag nagsugid sa puno nga kapitan, nga nagasiling, Mag-andam ka kon ano ang imo ginahimo: kay ining tawo Romanhon.

27 Niyan ang puno nga kapitan nag-abut, kag nagsiling sa iya, Sugiri ako, Romanhon ka bala? Nagsiling sia, Hoo.

28 Kag ang puno nga kapitan nagsabat, Sa daku nga bili naagum ko ining kahilwayan. Kag si Pablo nagsiling, Apang ako natawo nga hilway.

29 Niyan sa gilayon nagtaliwan sila nga buut mag-usisa sa iya: kag ang puno nga kapitan man hinadlukan, sa tapus niya nahibaloan nga sia Romanhon, kag bangud nga gingapus niya sia.

30 Sa madason nga adlaw, sanglit buut sia makisayud sang kamatooran kon sa ano nga ginsumbung sia sang mga Judio, ginhubaran niya sia sang iya mga gapus, kag nagsogo nga magtilipon ang puno nga mga pari kag ang bug-os nila nga konseho, kag ginpanaug niya si Pablo, kag ginpaatubang sia sa ila.

KAPITULO 23

KAG si Pablo, sang nagatolok sing tuhoy sa konseho, nagsiling, Mga tawo kag mga kauturan, nagpangabuhi ako sa bug-os nga maayong konsiensya sa atubangan sang Dios tubtub karon nga adlaw.

2 Kag ang mataas nga pari nga si Ananias nagsogo sa mga nagtindug sa luyo niya sa pagdapal sa iya sa baba.

3 Niyan si Pablo nagsiling sa iya, Pagdapalon ka sang Dios, ikaw nga dingding nga ginpaputi: kay nagalingkod ka bala sa paghukom sa akon sono sa kasogoan, kag nagasogo ka batok sa kasogoan nga pagdapalon ako?

4 Kag ang mga nagtambong nagsiling, Ginapasipalahan mo bala ang mataas nga pari sang Dios?

5 Niyan si Pablo nagsiling, Wala ako makahibalo, mga kauturan, nga sia amo ang mataas nga pari: kay nasulat na, Dili ka magpamolong sing malaut nahanungud sa manugdumala sang imo katawohan.

6 Apang sang nahantupan ni Pablo nga ang isa ka bahin mga Saduceo, kag ang isa mga Fariseo, nagsinggit sia sa konseho, Mga tawo kag mga kauturan, Fariseo ako, anak nga lalaki sang isa ka Fariseo: nahanungud sa paglaum kag sa pagkabanhaw sang mga patay ginahukman ako.

7 Kag sang nakasiling sia sini, nag-abut ang isa ka binanggianay sa tunga sang mga Fariseo kag mga Saduceo: kag ang katilingban nagpihak.

8 Kay ang mga Saduceo nagasiling nga walay pagkabanhaw, ukon anghel, ukon espiritu: apang ang mga Fariseo nagatuad sang duha.

9 Kag nag-abut ang daku nga sininggit: kag ang mga escriba nga sa bahin sang mga Fariseo nagtindug, kag nagpakigpuyas, nga nagasiling, Wala kami sing nakita nga malaut sa sini nga tawo: apang kon ang isa ka espiritu ukon ang isa ka anghel nakapamolong sa iya, indi kita magsumpung sa Dios.

10 Kag sang nag-abut ang daku nga binanggianay, ang puno nga kapitan, nga nahadluk basi kon si Pablo paghugniton nila, nagsogo sa mga soldado sa pagpanaug, kag pag-agaw sa iya sa tunga nila, kag pagdala sa iya sa kastilyo.

11 Kag sa gab-i nga madason ang Ginoo nagtindug sa luyo niya, kag nagsiling, Magkalipay ka, Pablo: kay subong nga nagpanaksi ka nahanungud sa akon sa Jerusalem, subong man dapat ka magsaksi sa Roma.

12 Kag sang pagkaaga, naghimbon ang iban sang mga Judio, kag naghiusa sila nga may panumpa, nga nagasiling nga indi sila magkaon ukon mag-inum tubtub nga mapatay nila si Pablo.

13 Kag kapin sila sa kap-atan nga naghimbon sa sining katuyoan.

14 Kag nagkadto sila sa puno nga mga pari kag sa mga tigulang, kag nagsiling, Naghiusa kami nga may daku nga panumpa, nga indi kami magkaon sang bisan ano tubtub nga mapatay namon si Pablo.

15 Busa karon kamo kaupud ang konseho magpahibalo sa puno nga kapitan nga dalhon niya sia sa inyo buwas, subong nga daw buut kamo mag-usisa sing sibo pa gid sang nahanungud sa iya: kag kami, sa bisan anong tion nga sia magpalapit, handa na sa pagpatay sa iya.

16 Kag sang ang anak nga lalaki sang utud nga babaye ni Pablo nakabati sang ila pagpuut, nagkadto sia kag nagsulud sa kastilyo, kag nagsugid kay Pablo.

17 Niyan gintawag ni Pablo ang isa sang mga centurion, kag nagsiling, Dalha ining pamatan-on nga lalaki sa puno nga kapitan: kay may isugid sia sa iya.

18 Gani gin-upud niya sia, kag gindala sia sa puno nga kapitan, kag nagsiling, Si Pablo nga binilanggo nagtawag sa akon, kag nagpangayo sa akon nga dalhon ining pamatan-on nga lalaki sa imo, nga may isiling sa imo.

19 Niyan ginkaptan sia sang puno nga kapitan sa kamut, kag nagpahigadhigad upud sa iya sing pahain, kag nagpamangkot sa iya, Ano bala ang inugsugid mo sa akon?

20 Kag nagsiling sia, Ang mga Judio naghisugut sa pagpangayo sa imo nga dalhon mo si Pablo buwas sa konseho, subong nga daw buut sila magpamangkot sing sibo pa gid nahanungud sa iya.

21 Apang dili ka magpasugut sa ila: kay kapin sa kap-atan ka tawo sa ila ang nagapuut sa iya, nga naghiusa sila nga may panumpa, nga indi sila magkaon ukon mag-inum tubtub nga mapatay nila sia: kag karon handa na sila, nga nagahulat sang panug-an halin sa imo.

22 Gani niyan ginpalakat sang puno nga kapitan ang pamatan-on nga lalaki, kag nagtugon sa iya, Dili ka magsugid sa bisan kay sin-o nga tawo nga ginpahayag mo sa akon ining mga butang.

23 Kag gintawag niya ang duha ka centurion, nga nagasiling, Ihanda ninyo ang duha ka gatus ka mga soldado, kag kapitoan ka manugkabayo, kag duha ka gatus ka manugbangkaw sa pagpakadto sa Cesarea, sa ikatlo nga takna sang gab-i;

24 Kag amani ninyo sila sing mga hayup, agud nga mapasakyan nila kay Pablo, kag dalhon sia nga walay katalagman kay Felix nga gobernador.

25 Kag nagsulat sia sing sulat sa sini nga bagay:

26 Si Claudio Lisias nagaabiabi sa labing halangdon nga gobernador nga si Felix.

27 Ining tawo gindakup sang mga Judio, kag diotay na lang nga patyon nila: niyan nag-abut ako upud ang kasoldadosan, kag gintabangan ko sia, sang nasayoron ko nga Romanhon sia.

28 Kag sang buut ko mahibal-an ang kabangdanan nga ginsumbung nila sia, gindala ko sia sa ila konseho:

29 Nga nahantupan ko nga ginsumbung sia nahanungud sa mga kasuayon sang ila kasogoan, apang walay bisan ano nga nasumbung sa iya nga takus sa kamatayon ukon sa mga gapus.

30 Kag sang ginsugid ini sa akon nga may mga Judio nga nagapuut batok sa tawo, sa gilayon ginpadala ko sa imo, kag ginsogo ang iya mga manunumbung man sa pagpamolong sa imo atubangan kon ano ang ila napamatukan sa iya. Paalam.

31 Niyan ang mga soldado, sono sa ginsogo sa ila, nagkuha kay Pablo, kag nagdala sa iya sa kagab-ihon sa Antipatris.

32 Sa adlaw nga madason ginbayaan nila ang mga manugkabayo sa pag-upud sa iya, kag nagbalik sila sa kastilyo:

33 Nga, sang nakaabut sila sa Cesarea, kag nakahatag sang sulat sa gobernador, ginpaatubang nila si Pablo man sa iya.

34 Kag sang nabasa sang gobernador ang sulat, nagpamangkot sia kon tagadiin nga probinsya sia. Kag sang nahangpan niya nga taga-Cilicia sia;

35 Nagsiling sia, Pamatian ko ikaw kon mag-abut man ang imo mga manunumbung. Kag nagsogo sia nga bantayan sia sa salapulan sang paghukom ni Herodes.

KAPITULO 24

KAG sa tapus sang lima ka adlaw nagdolhog ang mataas nga pari nga si Ananias kaupud sang mga tigulang, kag kaupud sang isa ka sampaton nga manugpamolong nga ginhingalanan si Tertulo, nga nagsugid sa gobernador batok kay Pablo.

2 Kag sang gintawag sia, si Tertulo nagsugud sa pagsumbung sa iya, nga nagasiling, Sanglit nga paagi sa imo ginahiagum namon ang dakung kalinong, kag paagi sa imo nga pagkamainamanon ang tama ka maayong mga buhat nahimo sa sining pungsud,

3 Ginabaton namon ini sa gihapon, kag sa tanan nga duug, labing halangdon nga Felix, nga may bug-os nga pagpasalamat.

4 Apang, agud nga indi ako makaawat pa sa imo, nagapakilooy ako sa imo nga pamatian mo kami sa imo pagkaayo sa malip-ot nga mga polong.

5 Kay nakita namon ining tawo nga magamo, kag manugpatigayon sang ribok sa tunga sang tanan nga Judio sa bug-os nga kalibutan, kag isa ka pangolo sang bunghay sang mga Nazaretnon:

6 Nga sia man nagtinguha sa pagdagta sang templo: sia gindakup namon, kag kuntani hukman namon sia sono sa amon kasogoan.

7 Apang nag-abut sa amon si Lisias nga puno nga kapitan, kag sa dakung paglugus gin-agaw niya sia sa amon mga kamut,

8 Nga nagasogo sa iya mga manunumbung sa pagkari sa imo: sa pag-usisa mo sa iya sarang ka makahibalo sini tanan nga butang, nga ginasumbung namon batok sa iya.

9 Kag ang mga Judio nag-ulugyon man, nga nagasiling nga ining mga butang matuud.

10 Niyan si Pablo, sa tapus sang pagsinyas sa iya sang gobernador sa paghambal, nagsabat, Sa bagay nga nahibaloan ko nga ikaw hukom sa madamu nga tuig sa sining pungsud, labi ako nga nalipay sa paghimo sang akon pag-apin:

11 Bangud nga ikaw makahangup, nga may napulog duha pa lang ka adlaw kutub sang nagtaklad ako sa Jerusalem sa pagsimba.

12 Kag wala nila ako makita sa templo nga nagapakigbanggianay sa bisan kay sin-o nga tawo, ukon nagasugyot sing katawohan, bisan sa mga sinagoga, ukon sa siudad:

13 Kag indi sila makapamatuud sang mga butang nga ila ginasumbung karon batok sa akon.

14 Apang ini ginatuad ko sa imo, nga sono sa dalan nga ginatawag nila nga herehia, sa amo nagasimba ako sa Dios sang akon mga kaamayan, nga nagatoo sang tanan nga butang nga nasulat sa kasogoan kag sa mga manalagna:

15 Kag may paglaum sa Dios, nga sila gid nagabaton man, nga may pagkabanhaw sang mga patay, sang mga matarung kag sang mga dimatarung.

16 Kag sa sini ako nagahanas sang akon kaugalingon, sa paghuput gihapon sing konsiensya nga dimalinapason sa Dios, kag sa mga tawo.

17 Karon sa tapus ang madamu nga tuig nagkadto ako sa pagdala sa akon pungsud sing mga limos, kag mga dolot.

18 Nga sa diin nakita ako sang pila ka mga Judio gikan sa Asia nga natinloan sa templo, sa walay punsok ukon kagubut.

19 Nga ini sila dapat kuntani magkari diri sa atubangan nimo, kag magsumbung, kon may bisan ano sila batok sa akon.

20 Ukon pasilinga ini sila gid nga yari diri, kon may nakita sila sa akon nga malaut nga hinimoan, sang nagtindug ako sa atubangan sang konseho,

21 Luwas sining isa ka hambal, nga ginsinggit ko sang nagatindug ako sa tunga nila, Nahanungud sa pagkabanhaw sang mga patay ginahukman ako ninyo karon nga adlaw.

22 Kag sang si Felix nakabati sining mga butang, nga nakahibalo sing sibo gid nahanungud sinang dalan, nagpahulat sia sa ila, kag nagsiling, Kon magdolhog si Lisias nga puno nga kapitan, mahibaloan ko ang kabug-osan sang inyo kasaba.

23 Kag nagsogo sia sa centurion nga bantayan si Pablo, kag tugutan sia nga makaangkon sing kahilwayan, kag indi pagdilian sa bisan sin-o sang iya mga abyan sa pag-alagad sa iya ukon sa pagkari sa iya.

24 Kag sa tapus ang pila ka adlaw, sang nag-abut si Felix upud ang iya asawa nga si Drusila, nga Judia, ginpatawag niya si Pablo, kag nagpamati sa iya nahanungud sang pagtoo kay Cristo.

25 Kag sang nagtalastas sia sang pagkamatarung, sang pagkamapinugungon, kag sang paghukom nga palaabuton, nakugmat si Felix, kag nagsabat, Lakat ka anay karon; kon may nagakaigo ako nga tion, ipatawag ko ikaw.

26 Sia naglaum man nga hatagan sia ni Pablo sing kuarta, agud nga iya hilwayan sia: gani ginpatawag niya sia sing masunsun, kag nagpakighambal sa iya.

27 Apang sang nagligad ang duha ka tuig si Felix gintal-usan ni Porcio Festo: kag si Felix, nga buut magpahamuut sa mga Judio, nagbiya kay Pablo nga gapus.

KAPITULO 25

KARON sang si Festo nakaabut sa probinsya, sa tapus ang tatlo ka adlaw nagtaklad sia pa Jerusalem gikan sa Cesarea.

2 Niyan ang mataas nga pari kag ang mga puno sang mga Judio nagsugid sa iya batok kay Pablo, kag nagpakilooy sa iya,

3 Kag nagpangayo sing pangabay batok sa iya, nga ipatawag niya sia sa Jerusalem, nga nagahimos sing pagpuut sa pagpatay sa iya sa dalanon.

4 Apang si Festo nagsabat, nga si Pablo dapat bantayan sa Cesarea, kag nga sia iya manugkadto didto sa indi madugay.

5 Gani, nagsiling sia, magdolhog kaupud nakon ang mga makasarang sa inyo, kag magsumbung sining tawo, kon may yara nga bisan ano nga kalautan sa iya.

6 Kag sang nakapabilin sia sa ila sing kapin sa napulo ka adlaw, nagdolhog sia sa Cesarea; kag sa madason nga adlaw sa nagapungko sia sa lingkoran nga hukmanan, nagsogo sia nga dalhon si Pablo.

7 Kag sang pag-abut niya, ang mga Judio nga nagdolhog gikan sa Jerusalem naglibut sa iya, kag nagdala sing madamu kag mabug-at nga mga sumbung batok kay Pablo, nga indi nila mapamatud-an.

8 Sia nagsabat sa iya pag-apin, Wala gid ako makasala bisan ano batok sa kasogoan sang mga Judio, ukon batok sa templo, ukon batok kay Cesar.

9 Apang si Festo, nga buut magpahamuut sa mga Judio, nagsabat kay Pablo, kag nagsiling, Buut ka bala magtaklad pa Jerusalem, kag didto magpahukom nahanungud sining butang sa atubangan ko?

10 Niyan si Pablo nagsiling, Ako nagatindug sa atubangan sang lingkoran nga hukmanan ni Cesar, diin ako dapat paghukman: wala ako sing nahimo nga kalainan sa mga Judio, subong nga nahibaloan mo sing maayo.

11 Kay kon ako malinapason, ukon nakahimo sing bisan ano nga butang nga takus sa kamatayon, indi ako mangindi nga mapatay: apang kon walay ano man sa sining mga butang nga ginasumbung nila sa akon, walay tawo nga makatugyan sa akon sa ila. Nagadangup ako kay Cesar.

12 Niyan si Festo, sang nakapakigsapul sia sa konseho, nagsabat, Nagdangup ka bala kay Cesar? sa kay Cesar ka makadto.

13 Kag sa tapus ang pila ka adlaw, nag-abut sa Cesarea ang hari nga si Agripa kag si Bernice sa pag-abiabi kay Festo.

14 Kag sang nagpabilin sila didto sing madamu nga adlaw, gin-asoy ni Festo ang kasaba ni Pablo sa hari, nga nagasiling, May isa ka tawo nga nagapus nga ginbilin ni Felix:

15 Nahanungud sa iya, sang didto ako sa Jerusalem, nagsugid sa akon ang puno nga mga pari kag ang mga tigulang sang mga Judio, nga ginapangayo nila ang paghukom batok sa iya.

16 Nagsabat ako sa ila, Indi batasan sang mga Romanhon ang pagtugyan sang bisan sin-o nga tawo nga patyon, sa wala pa ang sinumbung mapaatubang sa mga manunumbung, kag mahatagan sing kahigayonan sa paghimo sang iya pangapin nahanungud sa sala nga ginsumbung batok sa iya.

17 Busa, sang pag-abut nila diri, sa walay pabuyanbuyan sa adlaw nga madason naglingkod ako sa lingkoran nga hukmanan, kag nagsogo nga dalhon ang tawo.

18 Sang nagtindug ang mga manunumbung batok sa iya, wala sila sing ginsumbung sa sadtong mga butang nga akon ginbanta:

19 Kondi sila may pila ka kasuayon batok sa iya nahanungud sa ila kaugalingon nga lihi, kag nahanungud sa isa nga si Jesus, nga napatay, nga ginpamatud-an ni Pablo nga buhi.

20 Kag bangud nga nagduhaduha ako nahanungud sinang mga kasuayon, nagpamangkot ako sa iya kon buut sia magkadto sa Jerusalem, kag didto paghukman nahanungud sining mga butang.

21 Apang sang pagdangup ni Pablo nga ihulat tubtub sa paghukom ni Augusto, nagsogo ako nga bantayan sia tubtub nga mapadala ko sia kay Cesar.

22 Niyan si Agripa nagsiling kay Festo, Ako man luyag magpamati sa tawo. Buwas, nagsiling sia, magapamati ka sa iya.

23 Kag sa adlaw nga madason, sang nag-abut si Agripa, kag si Bernice, sa dakung kadayawan, kag nagsulud sa duug nga palamatian, kaupud ang puno nga mga kapitan, kag ang pangolo nga mga tawo sang siudad, sa sogo ni Festo ginpasulud si Pablo.

24 Kag si Festo nagsiling, Haring Agripa, kag tanan nga tawo nga yari diri nagatambong kaupud namon, ginatan-aw ninyo ining tawo, nga nahanungud sa iya ang bug-os nga kadam-an sang mga Judio nagdangup sa akon, sa Jerusalem, kag diri man, nga nagasinggit nga indi dapat nga magkabuhi pa sia.

25 Apang sang nakita ko nga wala sia sing nahimo nga takus sa kamatayon, kag nga sia gid nagdangup kay Augusto, nagtapat ako sa pagpadala sa iya.

26 Nahanungud sa iya wala ako sing pat-ud nga butang nga ikasulat sa akon ginoo. Bangud sini ginapaatubang ko sia sa inyo, kag labi na gid sa atubangan mo, O haring Agripa, agud nga, sa tapus ang pag-usisa, may ikasulat ako.

27 Kay sa akon daw dinagakaigo ang pagpadala sang isa ka binilanggo, kag indi mapahayag ang mga sala nga ginsumbung batok sa iya.

KAPITULO 26

NIYAN si Agripa nagsiling kay Pablo, Ginatugut sa imo ang pagpamolong nahanungud sa imo kaugalingon. Niyan nag-untay si Pablo sang kamut, kag naghimo sang iya pangapin:

2 Ginakabig ko ang akon kaugalingon nga malipayon, haring Agripa, bangud magahimo ako sang akon pangapin sa imo atubangan karon nga adlaw nahanungud sa tanan nga mga butang nga ako ginasumbung sang mga Judio:

3 Labi na gid bangud ako nakahibalo nga ikaw sampaton sa tanan nga kinabatasan kag kasuayon nga yara sa tunga sang mga Judio: busa ginapakilooy ko sa imo nga pamatian mo ako sing mapailubon.

4 Ang akon pagginawi kutub sang pagkapamatan-on ko, nga sa ginsuguran sa tunga sang akon kaugalingon nga pungsud sa Jerusalem, nahibaloan sang tanan nga Judio;

5 Nga nakakilala sa akon kutub sa ginsuguran, kon buut sila magsaksi, nga sono sa labing maid-id nga bunghay sang amon relihiyon nagkabuhi ako nga Fariseo.

6 Kag karon nagatindug ako kag ginahukman tungud sang paglaum sa saad nga ginhimo sang Dios sa amon mga kaamayan:

7 Nga sa among saad ang amon napulog duha ka tribo, nga nagaalagad sa Dios sing hanoot sa adlaw kag gab-i, nagalaum sa pag-abut. Bangud sining paglaum, haring Agripa, ginasumbung ako sang mga Judio.

8 Ngaa bala ginahunahunaan nimo nga indi matoohan, nga ang Dios magabanhaw sang mga patay?

9 Sa pagkamatuud naghunahuna ako sa akon kaugalingon, nga dapat ako maghimo sing madamung butang batok sa ngalan ni Jesus sang Nazaret.

10 Ang among butang ginhimo ko man sa Jerusalem: kag ang madamu sang mga santo gintakpan ko sa bilanggoan, sang nakabaton ako sang pagbulut-an gikan sa puno nga mga pari; kag sang ginpamatay sila, ginhatag ko ang akon panangdo batok sa ila.

11 Kag ginsilotan ko sila sing masunsun sa tagsa ka sinagoga, kag ginpilit ko sila sa pagpasipala; kag sa kasingkal nga lakas batok sa ila, ginhingabut ko sila bisan tubtub sa mga siudad sa iban nga duta.

12 Sa sini sang nagpakadto ako sa Damasco nga may pagbulut-an kag pagpanulin sang puno nga mga pari,

13 Sa odtong adlaw, O hari, nakita ko sa dalanon ang isa ka kapawa gikan sa langit, nga labi pa kasilaw sa adlaw, nga nagasilak palibut sa akon kag sa ila nga nagpanlakatan upud sa akon.

14 Kag sang napukan kami tanan sa duta, nakabati ako sing isa ka tingug nga nagahambal sa akon, kag nagasiling sa hambal nga Hebreo, Saulo, Saulo, ngaa bala ginahingabut mo ako? mabudlay sa imo ang pagtindak batok sa mga suyak.

15 Kag nagsiling ako, Sin-o bala ikaw, Ginoo? Kag sia nagsiling, Ako si Jesus nga ginahingabut mo.

16 Apang magbangon ka, kag magtindug: kay sa sining katuyoan nagpakita ako sa imo, sa paghimo sa imo nga isa ka ministro kag isa ka saksi sang sining mga butang nga nakita mo, kag sang sadtong mga butang diin magapahayag ako sa imo;

17 Nga nagaluwas sa imo sa katawohan, kag sa mga Gentil, nga karon ginapadalhan ko sa imo,

18 Sa pagpamuklat sang ila mga mata, kag sa pagliso sa ila gikan sa kadudulman pa kapawa, kag gikan sa gahum ni Satanas pa Dios, agud nga makabaton sila sang kapatawaran sa mga sala, kag sang panublion sa tunga nila nga ginpakabalaan paagi sa pagtoo nga sa akon.

19 Gani, O haring Agripa, wala ako magmalalison sa langitnon nga palanan-awon:

20 Kondi nag-asoy ako sing una sa mga taga-Damasco, kag sa Jerusalem, kag sa bug-os nga duta sang Judea, kag ugaling sa mga Gentil, nga maghinulsul sila kag magliso sa Dios, kag maghimo sang mga buhat nga takus sa paghinulsul.

21 Sa sining mga kabangdanan gindakup ako sang mga Judio sa templo, kag ginhimulatan nga patyon ako.

22 Busa paagi sa naagum ko nga bulig gikan sa Dios, nagapadayon ako tubtub sining adlaw, nga nagapanaksi sa kagamayan kag sa kadalagkuan, nga wala ako sing ginasiling bisan anong mga butang kondi ang ginsiling sang mga manalagna kag ni Moises nga mahanabu:

23 Nga ang Cristo magaantus, kag nga sia mabanhaw gikan sa mga patay sing una, kag magapahayag sing kapawa sa katawohan, kag sa mga Gentil.

24 Kag sang nagahambal sia sang iya pangapin, si Festo nagsiling sa matonog nga tingug, Pablo, ikaw wala sa imo kaugalingon; ang tama mo nga tinon-an nagapabuang sa imo.

25 Apang sia nagsiling, Indi ako buang, labing halangdon nga Festo; kondi nagahambal sang mga polong sang kamatooran kag kabut-anan.

26 Kay ang hari nakahibalo sining mga butang, nga sa iya atubangan man nagapamolong ako sing hilway: kay napat-ud ko nga walay bisan ano sining mga butang nga nalipdan sa iya; kay wala ining butang mahimo sa kasuukan.

27 Haring Agripa, nagatoo ka bala sa mga manalagna? Nakahibalo ako nga nagatoo ikaw.

28 Niyan si Agripa nagsiling kay Pablo, Halus nga mabuyuk mo na ako nga magCristohanon.

29 Kag si Pablo nagsiling, Buut ko sa Dios kuntani, nga indi lamang ikaw, kondi man ang tanan nga nagapamati sa akon sining adlaw, manginhalus, kag manginsubong sa akon, luwas sining mga gapus.

30 Kag sang napamolong niya ini, ang hari nagtindug, kag ang gobernador, kag si Bernice, kag ang mga nagalingkod kaupud nila.

31 Kag sang nakapahigadhigad sila, naghambalanay sila, nga nagasiling, Ining tawo walay ginahimo nga takus sa kamatayon ukon sa mga gapus.

32 Niyan si Agripa nagsiling kay Festo, Ining tawo mabuhian kuntani kon wala sia magdangup kay Cesar.

KAPITULO 27

KAG sang gintapat nga maglayag kami pa Italia, gintugyan nila si Pablo kag ang pila sang iban pa nga mga binilanggo sa isa ka centurion nga ginhingalanan si Julio, centurion sang kabon ni Augusto.

2 Kag sang nakasakay sa isa ka sakayan sang Adrumentina, nagtulak kami, nga nagatuyo sa paglayag sa mga baybayon sang Asia; si Aristarco, isa ka Macedoniahanon nga taga-Tesalonica, nagaupud sa amon.

3 Kag sa adlaw nga madason nagdungka kami sa Sidon. Kag gin-abiabi ni Julio si Pablo sing mapatugsilingon, kag gintugutan sia sa pagkadto sa iya mga abyan agud sa pagpaumpaw sang iya kaugalingon.

4 Kag sang nakataliwan kami gikan didto, naglayag kami sa lipud sang Cipre, bangud nga ang mga hangin sumpung.

5 Kag sang nakatabok kami sa dagat sang Cilicia kag Panfilia, nag-abut kami sa Mira, isa ka siudad sang Licia.

6 Kag didto nakakita ang centurion sing sakayan sang Alejandria nga nagalayag pa Italia; kag ginpasakay niya kami sa sini.

7 Kag sang mahinay ang amon paglayag sa madamung adlaw, kag halus makalambut sa tampad sang Gnido, sa wala ang hangin magtugut sa amon, naglayag kami sa lipud sang Creta, sa tampad sang Salmone;

8 Kag sang halus kami makapamaybay sa sini, nag-abut kami sa isa ka duug nga ginatawag Ang mga matahum nga dulungkaan; nga malapit didto ang siudad nga Lasea.

9 Karon sang nakataliwan ang malawig nga tion, kag may katalagman na ang panakayon, bangud nga nagtaliwan na ang puasa, si Pablo nagpaandam sa ila,

10 Kag nagsiling sa ila, Mga sir, ginahantup ko nga ining panakayon manginmay kasamaran kag daku nga kagub-anan, indi lamang sang lulan kag sang sakayan, kondi man sang aton mga kabuhi.

11 Apang ang centurion nagpati sing labi pa sa nagadumala kag sa tag-iya sang sakayan sang sa sinang mga butang nga ginpamolong ni Pablo.

12 Kag bangud nga ang dulungkaan indi bagay sa itulugnaw, ang kalabanan naglaygay man nga magtaliwan gikan didto, basi sa bisan anong paagi makalambut sila sa Fenice, kag sa pagpanugnaw didto; nga isa ka dulungkaan sang Creta, kag nagalantaw sa habagatnan kag kanawayan.

13 Kag sang nagkanaykanay ang habagat, sang ginabanta nila nga naagum nila ang ila tinutuyo, nagpalayag sila gikan didto, kag naglayag sa ubay sang Creta.

14 Apang sa wala madugay nagtugpo batok sini ang isa ka mamadlus nga hangin, nga ginatawag Euroklidon.

15 Kag sang gindaldal ang sakayan, kag indi makasumpung sa hangin, nagpapalis kami.

16 Kag sang nagapadalagan kami sa lipud sang isa ka pulo nga ginatawag nga Clauda, halus namon madaug ang bote:

17 Nga sang nabatak nila ini, gindapatan nila sing mga tabang, nga ginwagkusan nila ang sakayan; kag, sang ginahadlukan sila basi kon idas-il sila sa hatayhatay, gintonton nila ang mga layag, kag sa amo nagpapalis.

18 Kag sang ginakuso kami sing sugung gid sang bagyo, sa adlaw nga madason ginpamag-anan nila ang sakayan;

19 Kag sa ikatlo nga adlaw ginpamilak namon sang amon gid mga kamut ang mga galamiton sang sakayan.

20 Kag sa walay adlaw ukon mga bitoon nga nagdilag sa madamung adlaw, kag nagaabut sa amon ang mabaskug nga bagyo, ang tanan nga paglaum nga maluwas kami nadula na.

21 Apang sa tapus sang malawig nga pagpuasa si Pablo nagtindug sa tunga nila, kag nagsiling, Mga sir, dapat kamo kuntani nagpamati sa akon, kag wala maglayag gikan sa Creta, kag mag-agum sining kasamaran kag kadulaan.

22 Kag karon nagalaygay ako sa inyo nga magkalipay kamo: kay walay kabuhi nga madula sa inyo, kondi lamang ang sakayan.

23 Kay karon nga gab-i nagtindug sa luyo nakon ang anghel sang Dios, nga iya ako, kag akon ginaalagad,

24 Nga nagasiling, Dili ka mahadluk, Pablo; kinahanglan ka mag-atubang kay Cesar: kag, yari karon, gintugyan sa imo sang Dios ang tanan nga nagapanakayon kaupud nimo.

25 Busa, mga sir, magkalipay kamo: kay nagatoo ako sa Dios, nga mangin-amo gid ini subong sang napamolong sa akon.

26 Apang kinahanglan kita isampay sa isa ka pulo.

27 Apang sang nag-abut ang ikanapulog apat ka gab-i, sang ginaanud-anud kami sa Adria, sa may tunga ang gab-i ang mga sakayanon nagbanta nga nagahinamput sila sa duta;

28 Kag gintungkad nila, kag nasapwan nga duha ka pulo ka dupa: kag sang nakapauluunhan sila, gintungkad nila liwat, kag nasapwan nga napulog lima ka dupa.

29 Niyan sang ginahadlukan kami basi kon mabunggo kami sa mga dakung bato, ginholog nila ang apat ka ankla sa olin, kag ginhandum nga mag-aga.

30 Kag sang ang mga sakayanon manugpalagyo gikan sa sakayan, sang nakatonton sila sang bote sa dagat, nga daw buut magholog sila sing mga ankla sa dolong,

31 Si Pablo nagsiling sa centurion kag sa mga soldado, Kon indi ini sila magpabilin sa sakayan, indi kamo maluwas.

32 Niyan gin-utud sang mga soldado ang mga kalat sang bote, kag pinabayaan nila nga maholog ini.

33 Kag sa nagapamanagbanag na, si Pablo nagpakilooy sa ila tanan nga magkaon sila, nga nagasiling, Karon nga adlaw amo ang ikanapulog apat nga adlaw nga nagahulat kamo kag nagapadayon nga nagapuasa, nga walay bisan ano nga nakaon.

34 Busa ginapakilooy ko sa inyo nga magkaon kamo: kay ini sa ikaayong lawas ninyo: kay bisan isa lamang ka bohok sang olo sang bisan sin-o sa inyo indi madula.

35 Kag sang nakapamolong sia sini, nagkuha sia sing tinapay, kag nagpasalamat sa Dios sa atubangan nila tanan: kag sang natipiktipik niya ini, nagsugud sia sa pagkaon.

36 Niyan nagkalipay sila tanan, kag nagkaon man sila.

37 Kag kami tanan sa sakayan duha ka gatus kag kapitoan kag anum ka kalag.

38 Kag sang nabusug sila, ginpamag-anan nila ang sakayan, kag ginapanagbung ang trigo sa dagat.

39 Kag sang adlaw na, wala nila makilala ang duta: apang natapatan nila ang isa ka luuk nga may baybayon, nga amo ang gintuyo nila, kon masarangan nila, nga padungkaan sang sakayan.

40 Kag sang ginbatak nila ang mga ankla, gintugyan nila ang ila kaugalingon sa dagat, kag ginhubad nila ang mga higot sang mga bansalan, kag ginbatak nila ang layag sa dolong sa hangin, kag nagpadolong sila sa baybayon.

41 Kag sang naigoan nila ang ginkitaan sang duha ka dagat, napasunggo nila ang sakayan; kag ang dolong nagdulut, kag indi na mationg, apang ang olin nagkawagwag bangud sang kabaskug sang mga balud.

42 Kag ang buko sang mga soldado amo nga pamatyon ang mga binilanggo, basi kon may maglangoy sa ila, kag magpalagyo.

43 Apang ang centurion, nga buut magluwas kay Pablo, nagpugung sa ila sa tinutuyo nila; kag nagsogo sia nga ang mga makalangoy magsugbo sing una sa dagat, kag magtakas sa duta:

44 Kag ang iban sa mga tapi, kag ang iban sa mga guba nga bahin sang sakayan. Kag sa amo nahanabu, nga naluwas sila tanan nga nakatakas sa duta.

KAPITULO 28

KAG sang naluwas sila, niyan nakilala nila nga ang pulo gintawag Melita.

2 Kag gin-amuma kami sang tumandok nga mga pumuluyo sa indi diotay nga kalolo: kay nagdabok sila, kag ginbaton nila kami tanan, bangud sang ulan nga nagatupa, kag bangud sang tugnaw.

3 Kag sang nakatipon si Pablo sing hugpong sang mga inuggatong, kag nadap-ung ini sa dabok, may naggowa nga isa ka man-ug nga dalitan gikan sa init, kag nag-ungut sa iya kamut.

4 Kag sang nakita sang mga tumandok ang sapat nga dalitan nga nagakabit sa iya kamut, nagsinilingay sila, Sa walay duhaduha ining tawo manugpatay, nga, bisan nakaluwas sia sa dagat, apang indi magtugut ang pagtimalus nga mabuhi sia.

5 Kag ginwaslik niya ang sapat sa kalayo, kag wala sia maano.

6 Walay sapayan nagtolok sila nga magpalanghubag sia, ukon mapukan nga patay sa hinali: apang sa tapus nga sila nagtolok sing madugay, kag nakita nila nga walay bisan ano nga kalainan nga nahanabu sa iya, ginbaylohan nila ang ila mga hunahuna, kag nagsiling nga sia isa ka dios.

7 Sa amo man nga duug may mga pagkabutang sang puno nga lalaki sang pulo, nga ang iya ngalan si Publio; nga nagbaton sa amon, kag ginpadayon kami sing tatlo ka adlaw sing maabiabihon gid.

8 Kag nahanabu, nga ang amay ni Publio ginahilanat kag ginabalaud: sa iya nagsulud si Pablo, kag nagpangamuyo, kag gintakdungan sia sang iya mga kamut, kag gin-ayo sia.

9 Gani sang nahimo ini, ang iban man nga may mga balatian sa pulo nagkari, kag gin-ayo:

10 Sila man nagpadungug sa amon sing madamu nga pagpadungug; kag sang nagtaliwan kami, ginlulan nila sa amon ang mga butang nga kinahanglanon.

11 Kag sa tapus ang tatlo ka bulan naglayag kami sa sakayan sang Alejandria, nga nagpanugnaw sa pulo, nga ang iya tanda among Castor kag Poluks.

12 Kag sang pagdungka sa Siracusa, nagpabilin kami didto sing tatlo ka adlaw.

13 Kag gikan didto naglibut kami, kag nag-abut sa Regio: kag sa tapus ang isa ka adlaw naghuyup ang habagat, kag sa madason nga adlaw nag-abut kami sa Puteoli:

14 Didto nakakita kami sing mga kauturan, kag nag-agda sila sa amon sa pagpabilin sa ila sing pito ka adlaw: kag sa amo nagpadolong kami sa Roma.

15 Kag gikan didto, sang pagkabati sang mga kauturan nahanungud sa amon, nagsugat sila sa amon tubtub sa Appioforo, kag sa Tres tavernas: nga sang nakit-an sila ni Pablo, nagpasalamat sia sa Dios, kag nagpakaisug.

16 Kag sang nag-abut kami sa Roma, gintugyan sang centurion ang mga binilanggo sa kapitan sang bantay: apang si Pablo gintugutan sa pagpuyo sing kinaugalingon upud sa soldado nga nagabantay sa iya.

17 Kag nahanabu, nga sa tapus ang tatlo ka adlaw gintawag ni Pablo sing tingub ang mga puno sang mga Judio: kag sang nagtipon sila, nagsiling sia sa ila, Mga tawo kag mga kauturan, bisan ako walay nahimo batok sa katawohan, ukon sa mga batasan sang aton mga kaamayan, walay sapayan gintugyan ako nga binilanggo gikan sa Jerusalem sa mga kamut sang mga Romanhon.

18 Nga, sang nausisa nila ako, buut sila magbuhi sa akon, bangud nga wala sa akon sing kabangdanan sa kamatayon.

19 Apang sang nagpamolong ang mga Judio batok sini, napilitan ako sa pagdangup kay Cesar; indi nga may isumbung ako batok sa akon pungsud.

20 Busa sa sining kabangdanan ginpatawag ko kamo, sa pagpakigkita sa inyo, kag sa pagpakighambal sa inyo: kay bangud sa paglaum sang Israel nagapus ako sining kadena.

21 Kag nagsiling sila sa iya, Wala kami sing nabaton nga mga sulat nahanungud sa imo gikan sa Judea, kag wala sing bisan sin-o sa mga kauturan nga nagkari nga nagpanugid ukon nagpamolong sang bisan anong kalainan nahanungud sa imo.

22 Apang luyag kami mamati sa imo sang imo ginahunahuna: kay nahanungud sining bunghay, nahibaloan namon nga bisan diin ginapakamalain ini.

23 Kag sang nakapat-in sila sing adlaw sa iya, madamu ang nag-abut sa iya sa dalayonan niya; sa ila nagtalastas sia kag nagpanaksi nahanungud sa ginharian sang Dios, nga nagabuyuk sa ila nahanungud kay Jesus gikan sa kasogoan ni Moises, kag sa mga manalagna, kutub sa aga tubtub sa gab-i.

24 Kag ang iban nagtoo sang mga butang nga pinamolong, kag ang iban wala nagtoo.

25 Kag sang wala sila magkalasugut, nagtaliwan sila sa tapus sang paghambal ni Pablo sang isa ka polong: Igo gid ang ginpamolong sang Balaan nga Espiritu paagi kay Isaias nga manalagna sa aton mga kaamayan,

26 Nga nagasiling, Kadto ka sa sining katawohan, kag magsiling, Sa pagpamati makabati kamo, kag indi makahangup; kag sa pagtolok makakita kamo, kag indi makahantup:

27 Kay ang tagiposoon sining katawohan nagdamul, kag ang ila mga idulungug makuli sa pagpamati, kag ang ila mga mata ginpiyong nila; basi makakita sila sa ila mga mata, kag makabati sa ila mga idulungug, kag makahangup sa ila tagiposoon, kag magliso, kag ayohon ko sila.

28 Busa kilalaha ninyo, nga ang kaluwasan sang Dios ginpadala sa mga Gentil, kag sila magapamati sini.

29 Kag sang nakasiling sia sining mga polong, nagtaliwan ang mga Judio, kag may daku nga pagbinaisay sa tunga nila.

30 Kag nagpuyo si Pablo sa bug-os nga duha ka tuig sa iya gin-alquilahan nga puluy-an, kag nagbaton sang tanan nga nagduaw sa iya,

31 Nga nagawali sang ginharian sang Dios, kag nagapanudlo sinang mga butang nahanungud kay Ginoong Jesu-Cristo, sa bug-os nga kasidla, nga walay tawo nga nagaupang sa iya.

AMAZING GRACE BIBLE INSTITUTE