ANG IKADUHANG SULAT NI PABLO NGA APOSTOL KAYTIMOTEOKAPITULO 1SI PABLO, isa ka apostol ni Jesu-Cristo paagi sa kabubut-on sang Dios, sono sa saad nga kabuhi nga yara kay Cristo Jesus,2 Kay Timoteo, nga hinigugma kong nalolotan nga anak: Ang bugay, kalooy, kag paghidait, gikan sa Dios nga Amay kag kay Cristo Jesus nga aton Ginoo. 3 Nagapasalamat ako sa Dios, nga ginaalagad ko gikan pa sa akon mga kaamayan sa putli nga konsiensya, nga sa walay langan ginadumdum ko ikaw sa akon mga pangamuyo sa gab-i kag adlaw; 4 Nga nagahandum sing daku sa pagpakigkita sa imo, nga ginapadumdum sang imo mga luha, agud nga mapun-an ako sing kalipay; 5 Kon ginapanumdum ko ang pagtoo nga bunayag nga yara sa imo, nga nagpuyo anay sa imo lola nga si Loida, kag sa imo iloy nga si Eunice; kag nagasalig ako nga yara sa imo man. 6 Sa sining kabangdanan ginapahanumdum ko ikaw nga padabdabon mo ang hiyas sang Dios, nga yara sa imo paagi sa pagtakdung sang akon mga kamut. 7 Kay ang Dios wala maghatag sa aton sang espiritu sang kahadluk; kondi sang gahum, kag sang gugma, kag sang maayo nga hunahuna. 8 Busa dili mo ikahuya ang pagpamatuud nahanungud sa aton Ginoo, ukon sa akon nga iya binilanggo: kondi mag-umalambit ka sa mga kapipit-an sang ebanghelyo sono sa gahum sang Dios; 9 Nga nagluwas sa aton, kag nagtawag sa aton sa balaan nga pagtawag, indi sono sa aton nga mga buhat, kondi sono sa iya kaugalingon nga tinutuyo kag bugay, nga ginhatag sa aton kay Cristo Jesus sa wala pa nagsugud ang kalibutan, 10 Apang karon napakita na paagi sa pagpahayag sang aton Manluluwas nga si Jesu-Cristo, nga nagwala sang kamatayon, kag nagdala sang kabuhi kag pagkadimamalatyon sa kapawa paagi sa ebanghelyo: 11 Nga sa sini gintangdoan ako nga manugwali, kag apostol, kag manunudlo sang mga Gentil. 12 Sa sining kabangdanan nagaantus man ako sining mga butang: apang wala ako mahuya: kay nakilala ko ang akon natoohan, kag ginasaligan ko nga sarang sia makabantay sinang akon gintugyan sa iya tubtub sinang adlaw. 13 Hupti sing malig-on ang huwaran sang maayong mga polong, nga nabatian mo sa akon, sa pagtoo kag paghigugma nga yara kay Cristo Jesus. 14 Bantayi inang maayong butang nga gintugyan sa imo paagi sa Balaan nga Espiritu nga nagapuyo sa aton. 15 Nahibaloan mo ini, nga sila tanan nga yara sa Asia nagbulag sa akon; nga sa ila amo si Figelo kag si Hermogenes. 16 Pagkalooyan sang Ginoo ang panimalay ni Onesiforo; kay sa masunsun ginapaumpawan niya ako, kag wala sia mahuya sang akon kadena: 17 Kondi, sang sia didto sa Roma, ginpangita niya ako sing mapisanon, kag iya ako nakita. 18 Ang Ginoo magtugut sa iya nga makaagum sia sang kalooy sang Ginoo sa sinang adlaw: kag sa madamu gid nga mga butang nga nag-alagad sia sa akon sa Efeso, nahibaloan mo gid sing maayo. KAPITULO 2BUSA ikaw, anak ko, magpakabakud sa bugay nga yara kay Cristo Jesus.2 Kag ang mga butang nga imo nabatian sa akon sa atubangan sang madamu nga saksi, ang ini man itugyan mo sa mga tawo nga matutum, nga sarang makapanudlo sa iban man. 3 Busa magbatas ka sing kabudlayan, subong nga maayong soldado ni Jesu-Cristo. 4 Walay tawo nga nagaaway nga nagapasaw-id sang iya kaugalingon sa mga hilikoton sining pagkabuhi; agud nga mapahamuut niya sia nga nagpili sa iya nga mangin isa ka soldado. 5 Kag kon ang isa ka tawo man magpaninguha tungud sa pagkasampaton, indi sia mapurungan, kon indi sia magpaninguha sono sa mga pagsolondan. 6 Ang mangunguma nga nagapangabudlay kinahanglan nga mangin-una sa pag-ambit sang mga patubas. 7 Talupangda ang akon ginapamolong; kag ang Ginoo maghatag sa imo sing paghangup sa tanan nga butang. 8 Panumduma nga si Jesu-Cristo nga gikan sa kaliwat ni David ginbanhaw gikan sa mga patay sono sa akon ebanghelyo: 9 Nga sa sini nagaantus ako sing kagamo, subong sang isa nga nagahimo sing malaut, pati pa sa mga gapus; apang ang polong sang Dios wala nagapus. 10 Busa akon ginabatas ang tanan nga butang tungud sa mga pinili, agud nga sila man makaagum sang kaluwasan nga yara kay Cristo Jesus nga may himaya nga walay katapusan. 11 Matutum ini nga hambalanon: Kay kon napatay kita kaupud niya, magakabuhi man kita kaupud niya: 12 Kon mag-antus kita, magahari man kita kaupud niya: kon ipanghiwala ta sia, sia man magapanghiwala sa aton: 13 Kon kita indi magtoo, walay sapayan sia nagapadayon nga matutum: indi sia makapanghiwala sang iya kaugalingon. 14 Nahanungud sining mga butang ipahanumdum sa ila, nga nagatulin sa ila sa atubang sang Ginoo nga dili sila magbinanggianay nahanungud sa mga polong nga sa walay kapuslanan, kondi nga sa kalaglagan sang mga nagapamati. 15 Magtoon sa pagpakita sang imo kaugalingon nga napamatud-an sa Dios, isa ka manugpangabudlay nga indi kinahanglan magkahuya, nga nagabahinbahin sing nagakaigo sang polong sang kamatooran. 16 Apang likawi ang dibalaan kag walay pulus nga mga pagwakal: kay ini sila magadugang sing labi sa pagkadidiosnon. 17 Kag ang ila polong magaab-ab subong sang kalamayo: nga sa ila amo si Himeneo kag si Fileto; 18 Nga nahanungud sa kamatooran nagsayup, nga nagasiling nga ang pagkabanhaw nagligad na; kag nagalaglag sang pagtoo sang iban. 19 Apang ang sadsaran sang Dios nagatindug sing malig-on, nga may sini nga selyo, Ang Ginoo nakakilala sang mga iya. Kag, Ang tagsatagsa nga nagahingalan sang ngalan ni Cristo magpahilayo sa kalautan. 20 Apang sa dakung balay yara indi lamang ang mga suludlan nga bulawan kag pilak, kondi man mga kahoy kag lunang; kag ang iban sa pagpadungug, kag ang iban sa dipagpadungug. 21 Busa kon ang tawo magpaninlo sang iya kaugalingon gikan sa ila sini, manginsuludlan sia nga sa kadungganan, ginpakabalaan, kag mapuslanon sa paggamit sang agalon, kag handa sa tagsa ka maayong buhat. 22 Pagpalagyo ka man sa mga kailigbon nga pinamatan-on: kondi magsonod sang pagkamatarung, pagtoo, diosnon nga gugma, paghidait, kaupud sa mga nagapanawag sa Ginoo sa tagiposoon nga putli. 23 Apang likawi ang binuang kag dimaalam nga mga pamangkot, nga nahibaloan mo nga sila nagapatubo sang mga pagbinanggianay. 24 Kag ang alagad sang Ginoo dili dapat magpakigbanggianay; kondi magmalolo sa tanan nga tawo, sampaton sa pagpanudlo, mapailubon, 25 Nga nagatudlo nga may pagpaubus sadtong mga nagasumpung sang ila kaugalingon; kon ang Dios ayhan maghatag sa ila sing paghinulsul nga sa pagkilala sang kamatooran; 26 Kag nga mabawi nila ang ila kaugalingon gikan sa siod sang yawa, nga nabihag niya sa iya kabubut-on. KAPITULO 3HIBALOA man ini, nga sa katapusan nga mga adlaw magaabut ang makahalanguyus nga mga tion.2 Kay ang mga tawo magamahigugmaon sang ila kaugalingon, mahamkonon, mga hambog, bugalon, mga manugpasipala, malalison sa mga ginikanan, dimapinasalamaton, dibalaan, 3 Walay gugma nga kinabatasan, manugguba sang kasugtanan, mga dimatuud nga manunumbung, dimapinugungon, mabangis, mga manugtamay sang mga maayo, 4 Mga maluib, dasodaso, mataas-taason, mahigugmaon sa mga kinasadya sing labi pa sa Dios; 5 Nga may dagway sang pagkadiosnon, apang nagapanghiwala sang gahum sini: pahilayo ka sa mga tagsubong sini sa ila. 6 Kay sa ila sini amo ang mga nagasulud sing likum sa mga balay, kag nagapamihag sang hangag nga mga babaye nga nalulanan sang mga sala, nga naguyguy sang nagakalainlain nga mga kailigbon, 7 Nga nagatoon gihapon, kag indi gid makadangat sa pagkilala sang kamatooran. 8 Karon subong nga si Jannes kag si Jambres nagsumpung kay Moises, amo man ini sila nagasumpung sang kamatooran: mga tawong dunut sing mga painoino, lampingasan nahanungud sa pagtoo. 9 Apang indi na sila magpadayon: kay ang ila kabuangan magadayag sa tanan nga tawo, subong man ang ila sini sadto. 10 Apang nahibaloan mo sing bug-os ang akon doktrina, paggawi, tinutuyo, pagtoo, pagbatas, diosnon nga gugma, pagpailub, 11 Mga paghingabut, mga kapipit-an, nga nag-abut sa akon sa Antioquia, sa Iconio, sa Listra; kon ano nga mga paghingabut ang akon ginbatas: apang sa ila tanan ginluwas ako sang Ginoo. 12 Hoo, kag ang tanan nga buut magkabuhi sing diosnon kay Cristo Jesus magaantus sing paghingabut. 13 Apang ang malaut nga mga tawo kag mga manugpatalang magalain kag magalain pa, nga nagadaya, kag ginadayaan. 14 Apang padayon ka sa mga butang nga naton-an mo kag nasaligan, nga nakahibalo kon kay sin-o mo ini sila naton-an; 15 Kag nga kutub sang pagkabata nahibaloan mo ang balaan nga mga kasulatan, nga makapaalam sa imo sa kaluwasan paagi sa pagtoo nga sa kay Cristo Jesus. 16 Ang bug-os nga kasulatan ginahatag paagi sa pagbugna sang Dios, kag mapuslanon sa doktrina, sa pagsabdong, sa pagsaway, sa pagtudlo sa pagkamatarung: 17 Agud nga ang tawo sang Dios mahimpit, nga nasangkapan sing bug-os nga sa tanan nga maayong buhat. KAPITULO 4BUSA ginatulinan ko ikaw sa atubangan sang Dios, kag ni Ginoong Jesu-Cristo, nga magahukom sa mga buhi kag mga patay sa iya pagpahayag kag sa iya ginharian;2 Iwali ang polong; mag-ukud sa panag-on, sa dipanag-on; magsabdong, magbadlong, maglaygay sa bug-os nga pagbatas kag doktrina. 3 Kay magaabut ang tion nga sila indi magbatas sang maayong doktrina; kondi sono sa ila kaugalingon nga mga kailigbon magatipon sila sa ila kaugalingon sing mga manunudlo, nga may nagakalam nga mga dulunggan; 4 Kag sila magapahilayo sang ila mga dulunggan sa kamatooran, kag magaliso sa patopato nga mga sugilanon. 5 Apang magbantay ka sa tanan nga mga butang, batasa ang mga kapipit-an, himoa ang buluhaton sang ebanghelista, pamatud-i sing bug-os ang imo pag-alagdan. 6 Kay ako handa na karon nga idolot, kag ang tion sang akon pagtaliwan malapit na. 7 Nakapakig-away ako sang maayong pag-away, natapus ko ang akon dalaganon, natipigan ko ang pagtoo: 8 Kutub karon may natigana sa akon nga purungpurung sang pagkamatarung, nga ihatag sa akon sang Ginoo, nga matarung nga hukom, sa sinang adlaw: kag indi sa akon lamang, kondi man sa ila tanan nga nagahigugma sang iya pagpahayag. 9 Magtinguha ka gid sa pagkari sing madali sa akon: 10 Kay si Demas nagbiya sa akon, nga nagahigugma sining kalibutan karon, kag nagkadto sa Tesalonica; si Crescente sa Galacia, si Tito sa Dalmacia. 11 Si Lucas lamang ang kaupud nakon. Kuhaa si Marcos, kag dalha sia kaupud nimo: kay mapuslanon sia sa akon sa pag-alagdan. 12 Kag si Tiquico ginpadala ko sa Efeso. 13 Dalha kon magkari ka ang kunup nga akon ginbilin sa Troas kay Carpo, kag ang mga libro, apang labi na gid ang mga pergamino. 14 Si Alejandro nga manugsalsal sang saway naghimo sa akon sing daku nga kalautan: ang Ginoo magatumbas sa iya sono sa iya mga buhat: 15 Sa iya mag-andam ka man; kay ginsumpung niya sing tama ang amon mga polong. 16 Sa akon nahaunang pangapin walay bisan sin-o nga nagtindug upud sa akon, kondi ginbayaan ako sang tanan nga tawo: ginapangamuyo ko sa Dios nga indi pag-isipon ini batok sa ila. 17 Apang ang Ginoo nagtindug upud sa akon, kag nagpabakud sa akon; agud nga paagi sa akon ang pagwali mahibaloan sing bug-os, kag agud nga magpamati ang tanan nga Gentil: kag ginluwas ako sa baba sang leon. 18 Kag ang Ginoo magaluwas sa akon sa tagsa ka malaut nga buhat, kag magatipig sa akon tubtub sa iya ginharian nga langitnon: sa iya ang himaya sa gihapon kag sa walay katapusan. Amen. 19 Abiabiha si Prisca kag si Aquila, kag ang panimalay ni Onesiforo. 20 Si Erasto nagpabilin sa Corinto: apang si Trofimo nga nagamasakit ginbayaan ko sa Mileto. 21 Magtinguha ka gid sa pagkari sa wala pa ang tigtulugnaw. Nagatamyaw sa imo si Eubulo, kag si Pudente, kag si Lino, kag si Claudia, kag ang tanan nga kauturan. 22 Ang Ginoong Jesu-Cristo manginkaupud sa imo espiritu. Ang bugay manginkaupud nimo. Amen. ¶ Ang ikaduhang sulat sa kay Timoteo, nga gintangdo nga nahauna nga obispo sang iglesia sang mga taga-Efeso, ginsulat gikan sa Roma, sang gindala si Pablo sa atubangan ni Nero sa ikaduhang tion. |