ANG IKADUHANG SULAT NI PABLO NGA APOSTOL SA MGATAGA-TESALONICAKAPITULO 1SI PABLO, kag si Silvano, kag si Timoteo, sa iglesia sang mga taga-Tesalonica sa Dios nga aton Amay kag kay Ginoong Jesu-Cristo:2 Ang bugay sa inyo, kag paghidait, gikan sa Dios nga aton Amay kag kay Ginoong Jesu-Cristo. 3 Kinahanglan kami sa gihapon magpasalamat sa Dios tungud sa inyo, mga kauturan, subong nga nagakaigo, bangud nga ang inyo pagtoo nagatubo sing lakas gid, kag ang diosnon nga gugma sang tagsa sa inyo nga tanan ayon sa isa kag isa nagabugana; 4 Sa bagay nga kami amon nagahimaya sa inyo sa mga iglesia sang Dios tungud sang inyo pagpailub kag pagtoo sa tanan nga paghingabut sa inyo kag sa mga kangitngitan nga inyo ginabatas: 5 Nga among isa ka hayag nga tanda sang matarung nga paghukom sang Dios, agud nga pagpakatakuson kamo sa ginharian sang Dios, nga tungud sini kamo man nagaantus: 6 Sanglit nga isa ka matarung nga butang sa Dios ang pagbalus sang kangitngitan sa mga nagapapiot sa inyo; 7 Kag sa inyo nga mga ginapapiotan magpahuway kaupud namon, kon ipahayag si Ginoong Jesus gikan sa langit kaupud sang iya gamhanan nga mga anghel, 8 Sa nagadabdab nga kalayo nagatimalus sa ila nga wala nagakilala sa Dios, kag nga wala nagatuman sang ebanghelyo sang aton Ginoong Jesu-Cristo: 9 Sila pagasilotan sa walay katapusan nga kalaglagan palayo sa atubangan sang Ginoo, kag sa himaya sang iya gahum; 10 Kon mag-abut sia nga paghimayaon sa iya mga santo, kag pagdayawon sa ila tanan nga nagatoo (bangud nga ang amon pagpamatuud sa inyo gintoohan) sa sinang adlaw. 11 Bangud sina nagapangamuyo man kami gihapon tungud sa inyo, nga ang aton Dios magpakatakus sa inyo sa sining pagtawag, kag magtuman sang bug-os nga maayong kalahamut-an sang iya kaayo, kag sang buhat sang pagtoo nga may gahum: 12 Agud nga ang ngalan sang aton Ginoong Jesu-Cristo paghimayaon sa inyo, kag kamo sa iya, sono sa bugay sang aton Dios kag ni Ginoong Jesu-Cristo. KAPITULO 2KARON ginapakilooy namon sa inyo, mga kauturan, nahanungud sa pag-abut sang aton Ginoong Jesu-Cristo, kag sang aton pagtililipon sa iya,2 Nga indi kamo sa hinali magpatublag sa hunahuna, ukon magmaligban, bisan paagi sa espiritu, ukon paagi sa polong, ukon sa sulat nga daw gikan sa amon, subong nga ang adlaw ni Cristo malapit na. 3 Walay tawo nga maglimbong sa inyo sa bisan anong bagay: kay inang adlaw indi mag-abut, kon indi anay mag-abut ang pagtalikod, kag pag-ipahayag inang tawo sang sala, ang anak nga lalaki sang kalaglagan; 4 Nga nagasumpung kag nagapakataas sang iya kaugalingon labaw sa tanan nga ginatawag Dios, ukon inang ginasimba; sa bagay nga sia subong sang Dios nagalingkod sa templo sang Dios, nga nagapahayag sang iya kaugalingon nga sia Dios. 5 Wala bala kamo makadumdum, nga, sang kaupud pa ako ninyo, ginsugiran ko kamo sining mga butang? 6 Kag karon nahibal-an ninyo kon ano ang nagapugung agud nga mapahayag sia sa iya tion. 7 Kay ang misterio sang kalautan nagapanghikot na: lamang sia nga nagapugung karon magapugung, tubtub nga kuhaon sia. 8 Kag niyan ipahayag inang Malaut, nga pagapapason sang Ginoo sang espiritu sang iya baba, kag pagalaglagon sang kasilaw sang iya pag-abut: 9 Sia, nga ang iya pag-abut sono sa pagpanghikot ni Satanas upud ang bug-os nga gahum kag mga tanda kag mga binutig nga katanhagaan, 10 Kag upud ang bug-os nga limbong sang pagkadimatarung sa ila nga nagakawala; kay wala sila nagbaton sang paghigugma sang kamatooran, agud nga maluwas sila. 11 Kag sa sining kabangdanan ang Dios magapadala sa ila sang dakung pagtalang, agud nga magtoo sila sang butig: 12 Agud nga tagudilian sila tanan nga wala magtoo sang kamatooran, kondi nagkalipay sa pagkadimatarung. 13 Apang kinahanglan kami sa gihapon magpasalamat sa Dios tungud sa inyo, mga kauturan nga hinigugma sang Ginoo, kay ginpili kamo sang Dios kutub sa ginsuguran sa kaluwasan paagi sa pagpakabalaan sang Espiritu kag pagtoo sa kamatooran: 14 Nga sa diin gintawag niya kamo paagi sa amon ebanghelyo, sa pag-agum sang himaya sang aton Ginoong Jesu-Cristo. 15 Busa, mga kauturan, tindug sing malig-on, kag huptan ang mga tradisyon nga gintudlo sa inyo, paagi sa polong, ukon sa amon sulat. 16 Karon ang aton Ginoong Jesu-Cristo gid, kag ang Dios, nga aton Amay, nga naghigugma sa aton, kag naghatag sa aton sing walay katapusan nga paglipay kag maayong paglaum paagi sa bugay, 17 Maglipay sang inyo mga tagiposoon, kag magpalig-on sa inyo sa tagsa ka maayong polong kag buhat. KAPITULO 3SA KATAPUSAN, mga kauturan, magpangamuyo kamo tungud sa amon, nga ang polong sang Ginoo maglapnag sing hilway, kag paghimayaon, subong nga sa inyo:2 Kag nga maluwas kami sa balingag kag malaut nga mga tawo: kay indi ang tanan nga tawo may pagtoo. 3 Apang ang Ginoo matutum, nga magapalig-on sa inyo, kag magabantay sa inyo sa malaut. 4 Kag may pagsalig kami sa Ginoo nahanungud sa inyo, nga kamo nagahimo kag magahimo sang mga butang nga amon ginasogo sa inyo. 5 Kag ang Ginoo magtuytuy sang inyo mga tagiposoon sa gugma sang Dios, kag sa mapinailubon nga paghulat kay Cristo. 6 Karon nagasogo kami sa inyo, mga kauturan, sa ngalan sang aton Ginoong Jesu-Cristo, nga magpahilayo kamo sa tagsa ka utud nga nagalakat sing indi nagakaigo, kag indi sono sa tradisyon nga nabaton niya sa amon. 7 Kay kamo inyo nakahibalo kon paano ang dapat pagsonod ninyo sa amon: kay wala kami maggawi sing indi nagakaigo sa tunga ninyo; 8 Kag wala kami magkaon sing tinapay sang bisan sin-o nga walay bayad; kondi sa kabudlay kag sa kasakit nagpangabudlay kami sa gab-i kag adlaw, agud nga indi namon mapabug-atan ang bisan sin-o sa inyo: 9 Indi bangud nga wala kami sing kagamhanan, kondi sa paghimo sang amon kaugalingon nga huwaran sa inyo agud nga sondon kami. 10 Kay bisan sang kaupud kami ninyo, ini ginsogo namon sa inyo, nga kon sin-o ang indi buut magpangabudlay, indi sia magkaon. 11 Kay nakabati kami nga may iban nga nagalakat sing indi nagakaigo sa tunga ninyo, nga wala gid nagapangabudlay, kondi mga mahilabtanon. 12 Karon ang mga subong sina ginasogo namon kag ginalaygayan paagi sa aton Ginoong Jesu-Cristo, nga sila magpangabudlay sa kalinong, kag magkaon sang ila kaugalingon nga tinapay. 13 Apang kamo, mga kauturan, dili magpakaluya sa paghimo sing maayo. 14 Kag kon ang bisan sin-o nga tawo wala nagatuman sang amon polong paagi sa sining sulat, tandai inang tawo, kag dili kamo magpakig-upud sa iya, agud nga mahuy-an sia. 15 Walay sapayan dili ninyo pagbilangon sia nga kaaway, kondi paandami sia subong nga utud. 16 Karon ang Ginoo gid sang paghidait maghatag sa inyo sing paghidait sa gihapon paagi sa tanan nga bagay. Ang Ginoo manginkaupud ninyo nga tanan. 17 Ang pag-abiabi ni Pablo sa akon kaugalingon nga kamut, nga amo ang tanda sa tagsa ka sulat: amo ini ang panulat ko. 18 Ang bugay sang aton Ginoong Jesu-Cristo manginkaupud ninyo nga tanan. Amen. ¶ Ang ikaduhang sulat sa mga taga-Tesalonica ginsulat gikan sa Atenas. |