ANG BALAAN NGA BIBLIA

ANG IKADUHANG LIBRO NI

SAMUEL

KAPITULO 1

KARON nahanabu sa tapus sang kamatayon ni Saul, sang si David nakabalik na gikan sa pagpatay sa mga Amalecnon, kag si David nakapabilin sing duha ka adlaw sa Ziklag;

2 Ini nahanabu sa ikatlo nga adlaw, nga, yari karon, ang isa ka tawo naggowa sa kampo gikan kay Saul nga gisi ang iya mga panapton, kag dutaon ang iya olo: kag sang nag-abut sia kay David, naghapa sia sa duta, kag nagyaub.

3 Kag si David nagsiling sa iya, Diin ka maghalin? Kag sia nagsiling sa iya, Nagpalagyo ako gikan sa kampo sang Israel.

4 Kag si David nagsiling sa iya, Paano bala ang kahimtangan? ginaampo ko sa imo, sugiri ako. Kag sia nagsabat, Nga ang katawohan nagpalagyo gikan sa inaway, kag madamu sang katawohan man ang napukan kag napatay; kag si Saul kag si Jonatan nga iya anak napatay man.

5 Kag si David nagsiling sa pamatan-on nga lalaki nga nagsugid sa iya, Paano bala ang pagkahibalo mo nga si Saul kag si Jonatan nga iya anak napatay?

6 Kag ang pamatan-on nga lalaki nga nagsugid sa iya nagsiling, Sang natabuan ako sa bukid nga Gilboa, yari karon, si Saul nagsandiay sa iya bangkaw; kag, yari karon, ang mga kangga kag ang mga manugkabayo nagdusdus sa iya.

7 Kag sang nagbalikid sia, nakita niya ako, kag nagtawag sa akon. Kag nagsabat ako, Yari ako.

8 Kag nagsiling sia sa akon, Sin-o ka? Kag ako nagsabat sa iya, Amalecnon ako.

9 Liwat sia nagsiling sa akon, Magtindug, ginaampo ko sa imo, sa ibabaw nakon, kag patya ako: kay ang kangitngit nagdakup sa akon, bangud nga ang akon kabuhi bug-os pa sa akon.

10 Gani nagtindug ako sa ibabaw niya, kag ginpatay sia, bangud nga nagsalig ako nga indi na sia mabuhi sa tapus nga napukan sia: kag ginkuha ko ang purungpurung nga yara sa iya olo, kag ang pulsera nga yara sa iya butkon, kag gindala sila diri sa akon ginoo.

11 Niyan si David nag-uyat sang iya mga panapton, kag gingisi sila; kag subong man ang tanan nga lalaki nga upud sa iya:

12 Kag naglalaw sila, kag naghibi, kag nagpuasa tubtub sa kahaponon, tungud kay Saul, kag tungud kay Jonatan nga iya anak nga lalaki, kag tungud sang katawohan sang GINOO, kag tungud sang panimalay sang Israel; bangud nga napukan sila sa espada.

13 ś Kag si David nagsiling sa pamatan-on nga lalaki nga nagsugid sa iya, Taga-diin ka bala? Kag sia nagsabat, Anak ako sang dumuloong, isa ka Amalecnon.

14 Kag si David nagsiling sa iya, Paano bala nga wala ka nahadluk sa pag-untay sang imo kamut sa paglaglag sang hinaplas sang GINOO?

15 Kag gintawag ni David ang isa sang mga pamatan-on nga lalaki, kag nagsiling, Palapit, kag damhagi sia. Kag ginlabo sia niya sa bagay nga napatay sia.

16 Kag si David nagsiling sa iya, Ang imo dugo manginsa ibabaw sang imo olo; kay ang imo baba nagpamatuud batok sa imo, nga nagasiling, Ginpatay ko ang hinaplas sang GINOO.

17 ś Kag nagpanalabiton si David tungud kay Saul kag kay Jonatan nga iya anak nga lalaki sini nga panalabiton:

18 (Ginsogo man niya sila nga tudloan ang mga anak sang Juda sang paggamit sang pana: yari karon, nasulat ini sa libro ni Jaser.)

19 Ang katahum sang Israel ginpatay sa ibabaw sang imo mataas nga mga duug: daw ano nga pagkapukan sang mga gamhanan!

20 Dili pag-isugid ini sa Gat, dili pag-ibantala ini sa mga dalan sang Ascalon; basi nga ang babaye nga mga anak sang mga Filistinhon magkasadya, basi nga ang babaye nga mga anak sang mga dicircuncidado magkalipay sa kadaugan.

21 Kamo nga mga bukid sang Gilboa, magwala sing ton-og, ukon ulan sa inyo, ukon mga latagon sang mga halad: kay didto ang taming sang gamhanan ginhaboy nga nadagtaan, ang taming ni Saul, nga daw sia wala mahaplas sing lana.

22 Gikan sa dugo sang mga pinatay, gikan sa tambok sang mga gamhanan, ang pana ni Jonatan wala mag-isul, kag ang espada ni Saul wala magbalik nga wala sing dala.

23 Si Saul kag si Jonatan hiligugmaon kag manayanaya sa ila kabuhi, kag sa ila kamatayon wala sila magbulag: madasig pa sila sa mga aguila, makusug pa sila sa mga leon.

24 Kamo nga babaye nga mga anak sang Israel, hilibi kay Saul, nga nagpasaput sa inyo sing escarlata, nga may iban pa gid nga mga kalipay, nga nagbutang sa inyo mga panapton sing mga puni nga bulawan.

25 Daw ano nga pagkapukan sang mga gamhanan sa tunga sang inaway! O Jonatan, ginpatay ka sa imo mataas nga mga duug.

26 Nagakalisud ako tungud sa imo, utud ko nga Jonatan: manayanaya ka gid sa akon: ang imo gugma sa akon makatilingala, nga nagalabaw sa gugma sang mga babaye.

27 Daw ano nga pagkapukan sang mga gamhanan, kag ang mga hinganiban sa inaway mawala!

KAPITULO 2

KAG nahanabu sa tapus sini, nga si David nagpamangkot sa GINOO, nga nagasiling, Magataklad bala ako sa bisan diin sang mga siudad sang Juda? Kag ang GINOO nagsiling sa iya, Taklad. Kag si David nagsiling, Sa diin bala ako magataklad? Kag sia nagsiling, Sa Hebron.

2 Gani si David nagtaklad didto, kag ang iya duha ka asawa man, si Ahinoam nga Jezreelnon, kag si Abigail nga asawa ni Nabal nga Carmelonhon.

3 Kag ginpataklad ni David upud sa iya ang iya mga tawo, ang tagsa ka tawo pati sang iya panimalay: kag nagpuyo sila sa mga siudad sang Hebron.

4 Kag nag-abut ang mga tawo sang Juda, kag didto ginhaplas nila si David nga hari sa ibabaw sang panimalay sang Juda. Kag ginsugiran nila si David, nga nagasiling, Nga ang mga lalaki sang Jabes-galaad amo sila ang naglubung kay Saul.

5 ś Kag si David nagpadala sing mga manugbalita sa mga lalaki sang Jabes-galaad, kag nagsiling sa ila, Pakamaayohon kamo sang GINOO, nga nagpahayag kamo sining kalolo sa inyo ginoo, kay Saul, kag naglubung sa iya.

6 Kag karon ang GINOO magpahayag sing kalolo kag kamatooran sa inyo: kag ako man magabalus sining kalolo sa inyo, bangud nga naghimo kamo sining butang.

7 Busa karon magmabakud ang inyo mga kamut, kag mag-isganan kamo: kay si Saul nga inyo agalon patay na, kag ang panimlay sang Juda man naghaplas sa akon nga hari sa ibabaw nila.

8 ś Apang si Abner nga anak nga lalaki ni Ner, kapitan sang kasoldadosan ni Saul, nagkuha kay Is-boset nga anak nga lalaki ni Saul, kag gindala sia sa Mahanaim;

9 Kag ginhimo niya sia nga hari sa ibabaw sang Galaad, kag sa ibabaw sang mga Asurnon, kag sa ibabaw sang Jezreel, kag sa ibabaw sang Efraim, kag sa ibabaw sang Benjamin, kag sa ibabaw sang bug-os nga Israel.

10 Si Is-boset nga anak nga lalaki ni Saul kap-atan ka tuig sang nagsugud sia sa paghari sa ibabaw sang Israel, kag naghari sia sing duha ka tuig. Apang ang panimalay sang Juda nagsonod kay David.

11 Kag ang tion nga si David hari sa Hebron sa ibabaw sang panimalay sang Juda pito ka tuig kag anum ka bulan.

12 ś Kag si Abner nga anak nga lalaki ni Ner, kag ang mga alagad ni Is-boset nga anak nga lalaki ni Saul, naggowa gikan sa Mahanaim pakadto sa Gabaon.

13 Kag si Joab nga anak nga lalaki ni Seruia, kag ang mga alagad ni David, naggowa, kag nagsugataay sila sa luyo sang punong sang Gabaon: kag naglingkod sila, ang isa sa pihak nga kilid sang punong, kag ang isa sa pihak nga kilid sang punong.

14 Kag si Abner nagsiling kay Joab, Patinduga karon ang mga pamatan-on nga lalaki, kag pahampanga sa atubangan naton. Kag si Joab nagsiling, Patinduga sila.

15 Niyan nagtindug sila kag nagkadto sono sa isip, napulog duha gikan sa Benjamin, nga naigo kay Is-boset nga anak nga lalaki ni Saul, kag napulog duha gikan sa mga alagad ni David.

16 Kag nagdakpanay ang tagsa sa ila sa olo, kag masigbon-anay sang iya espada sa kilid sang iya kasumpung; gani napukan sila sing tingub: busa ginhingalanan yadtong duug nga Helcat-hazurim, nga yara sa Gabaon.

17 Kag may inaway nga matama gid sadtong adlaw; kag si Abner kag ang mga tawo sang Israel dinaug sa atubangan sang mga alagad ni David.

18 ś Kag yadto didto ang tatlo ka anak nga lalaki ni Seruia, si Joab, kag Abisai, kag si Asael: kag si Asael makisay sing paniil subong sang usa nga talonon.

19 Kag si Asael naglagas kay Abner; kag sia wala maglipas sa too ukon sa wala sa pagsonod kay Abner.

20 Niyan si Abner nagbalikid sa olihi niya, kag nagsiling, Ikaw bala si Asael? Kag nagsabat sia, Amo ako.

21 Kag si Abner nagsiling sa iya, Lipas ka sa imo too ukon sa imo wala, kag dakpa ang isa sang mga pamatan-on nga lalaki, kag kuhaa ang iya hinganiban. Apang si Asael indi buut maglipas gikan sa pagsonod sa iya.

22 Kag si Abner nagsiling liwat kay Asael, Lipas ka sa pagsonod sa akon: ngaa bala pukanon ko ikaw sa duta? paano bala niyan ang pagbayaw ko sang akon nawung sa atubangan sang imo utud nga si Joab?

23 Apang nagdumili sia sa paglipas: busa ginbuno sia ni Abner pa likod sang iya bangkaw sa idalum sang ikalima nga gusuk, sa bagay nga ang bangkaw naglapus sa likod niya; kag napukan sia didto, kag napatay sa among duug: kag nahanabu, nga ang kapid-an nga nagsamput sa duug diin si Asael napukan kag napatay, nagdolog.

24 Si Joab man kag si Abisai naglagas kay Abner: kag natunud na ang adlaw sang nag-abut sila sa bakolod sang Ama, nga yara sa atubang sang Gia sa dalanon sang kamingawan sang Gabaon.

25 ś Kag nagtilipon sing tingub kay Abner ang mga anak sang Benjamin, kag nangin-isa ka kabon, kag nagtindug sa putokputokan sang bakolod.

26 Niyan si Abner nagsinggit kay Joab, kag nagsiling, Magalamon bala ang espada sa gihapon? wala ka bala makahibalo nga sa katapusan manginkapaitan? tubtub pa bala san-o niyan pabalikon mo ang katawohan gikan sa paglagas sang ila mga utud?

27 Kag si Joab nagsiling, Sa nagakabuhi ang Dios, kon wala ka kuntani magpamolong, niyan sa pagkamatuud sa pagkaaga ang katawohan nagbalik ang tagsatagsa sa paglagas sa ila mga utud.

28 Gani si Joab nagpatonog sang budyong, kag ang bug-os nga katawohan nagdolog, kag wala na maglagas sa Israel, kag wala na mag-away sila.

29 Kag si Abner kag ang iya mga tawo naglakat sa kapatagan sa bug-os sadtong gab-i, kag gintabok ang Jordan, kag ginlatas ang bug-os nga Bitron, kag sila nag-abut sa Mahanaim.

30 Kag si Joab nagbalik gikan sa paglagas kay Abner: kag sang natipon niya sing tingub ang bug-os nga katawohan, may nakulang sang mga alagad ni David nga napulog siam ka tawo kag si Asael.

31 Apang ang mga alagad ni David nagsamad sa Benjamin, kag sa mga tawo ni Abner, sa bagay nga tatlo ka gatus kag kan-uman ka tawo napatay.

32 ś Kag gindala nila si Asael, kag ginlubung sia sa lulubngan sang iya amay, nga yara sa Bet-lehem. Kag si Joab kag ang iya mga tawo naglakat sa bug-os nga gab-i, kag nag-abut sila sa Hebron sang pagpamanagbanag sang adlaw.

KAPITULO 3

KARON may malawig nga inaway sa tunga sang panimalay ni Saul kag sang panimalay ni David: apang si David nagbakud pa kag nagbakud pa, kag ang panimalay ni Saul nagluya pa kag nagluya pa.

2 ś Kag natawo ang mga anak nga lalaki kay David sa Hebron: kag ang iya panganay si Amnon, kay Ahinoam nga Jezreelnon;

3 Kag ang iya ikaduha, si Quileab, kay Abigail nga asawa ni Nabal nga Carmelonhon; kag ang ikatlo, si Absalom nga lalaking anak ni Maaca nga babaying anak ni Talmai nga hari sa Gesur;

4 Kag ang ikap-at, si Adonias nga lalaking anak ni Hagit; kag ang ikalima, si Sefatias nga lalaking anak ni Abital;

5 Kag ang ikan-um, si Itream, kay Egla, nga asawa ni David. Ini sila natawo kay David sa Hebron.

6 ś Kag nahanabu, sang may inaway pa sa tunga sang panimalay ni Saul kag sang panimalay ni David, si Abner nagpamakud sang iya kaugalingon sa panimalay ni Saul.

7 Kag si Saul may oloasawa anay, nga ginhingalanan Rispa, ang anak ni Aya: kag nagsiling si Is-boset kay Abner, Ngaa bala nga naghiusa ka sa oloasawa sang akon amay?

8 Niyan si Abner nasingkal sing tama gid tungud sang mga polong ni Is-boset, kag nagsiling, Olo bala ako sang ido, nga batok sa Juda sa sining adlaw nagapakita sing kalolo sa panimalay ni Saul nga imo amay, sa iya mga utud, kag sa iya mga abyan, kag wala magtugyan sa imo sa kamut ni David, nga ginpabangdan mo ako sining adlaw sing sayup nahanungud sining babaye?

9 Himoon sang Dios kay Abner ang subong, kag labi pa man, kon sono sa nasumpa sang GINOO kay David indi ko paghimoon ang amo man sa iya;

10 Sa pagpasaylo sang ginharian gikan sa panimalay ni Saul, kag sa pagtukud sang trono ni David sa ibabaw sang Israel kag sa ibabaw sang Juda, kutub sa Dan tubtub sa Beer-seba.

11 Kag sia indi makasabat kay Abner sing isa ka polong, kay nahadluk sia sa iya.

12 ś Kag si Abner nagpadala sing mga manugbalita kay David sa bahin niya, nga nagasiling, Kay sin-o bala ang duta? nga nagasiling pa gid, Magpakigdampig ka sa akon, kag, yari karon, ang akon kamut mangin-upud sa imo, sa pagdala sa imo sang bug-os nga Israel.

13 ś Kag sia nagsiling, Maayo; magapakigdampig ako sa imo: apang isa ka butang ang ginakinahanglan ko sa imo, nga amo, Indi ka makakita sang akon nawung, kon indi mo anay madala si Micol, ang babaying anak ni Saul, kon magkari ka sa pagtan-aw sang akon nawung.

14 Kag si David nagpadala sing mga manugbalita kay Is-boset nga anak nga lalaki ni Saul, nga nagasiling, Itugyan sa akon ang akon asawa nga si Micol, nga akon napangasawa sa bili sang isa ka gatus ka napunta nga panit sang mga Filistinhon.

15 Kag nagpadala si Is-boset, kag nagkuha sa iya gikan sa iya bana nga si Paltiel nga anak nga lalaki ni Lais.

16 Kag ang iya bana nag-upud sa iya, nga nagahibi sa nagalakat sia sa olihi niya tubtub sa Bahurim. Niyan si Abner nagsiling sa iya, Lakat, balik. Kag nagbalik sia.

17 ś Kag si Abner nagpakigsapul sa mga tigulang sang Israel, nga nagasiling, Sa mga tion nga nagligad ginpangita ninyo si David nga manginhari sa ibabaw ninyo:

18 Niyan karon himoa ini: kay ang GINOO nagpamolong nahanungud kay David, nga nagasiling, Paagi sa kamut sang akon alagad nga si David luwason ko ang akon katawohan nga Israel gikan sa kamut sang mga Filistinhon, kag gikan sa kamut sang tanan nilang kaaway.

19 Kag si Abner man nagpamolong sa mga idulungug sang Benjamin: kag si Abner naglakat man sa pagpamolong sa idulungug ni David sa Hebron sang tanan nga maayo sa Israel, kag sang maayo sa bug-os nga panimalay ni Benjamin.

20 Gani si Abner nagkadto kay David sa Hebron, kag upud sa iya ang duha ka pulo ka lalaki. Kag si David naghimo sing sinalosalo kay Abner kag sa mga lalaki nga upud niya.

21 Kag si Abner nagsiling kay David, Ako magatindug kag magalakat, kag magatipon sang bug-os nga Israel sa akon ginoo nga hari, agud nga magpakigdampig sila sa imo, kag nga maghari ka sa bug-os nga luyag sang imo tagiposoon. Kag ginpalakat ni David si Abner; kag naglakat sia sa paghidait.

22 ś Kag, yari karon, ang mga alagad ni David kag si Joab nag-abut gikan sa pagpanglagas sang kabon, kag nagdala sing daku nga inagaw upud sa ila: apang si Abner wala didto kay David sa Hebron; kay ginpalakat niya sia, kag nagtaliwan sia sa paghidait.

23 Sang nag-abut si Joab kag ang bug-os nga kasoldadosan nga upud sa iya, ginsugiran nila si Joab, nga nagasiling, Si Abner nga anak ni Ner nagkadto sa hari, kag ginpalakat niya sia, kag nagtaliwan sia sa paghidait.

24 Niyan si Joab nagkadto sa hari, kag nagsiling, Ano bala ang nahimo mo? yari karon, si Abner nagkadto sa imo; ngaa bala ginpalakat mo sia, kag sia nakataliwan na sing bug-os?

25 Nakahibalo ka kay Abner nga anak nga lalaki ni Ner, nga nagkari sia sa paglimbong sa imo, kag sa paghibalo sang imo paggowa kag sang imo pagsulud, kag sa paghibalo sang tanan nga imo ginahimo.

26 Kag sang nakagowa si Joab gikan kay David, nagpadala sia sing mga manugbalita sa olihi ni Abner, nga gindala sia pabalik gikan sa bobon sang Sira: apang si David wala makahibalo sini.

27 Kag sang nakabalik si Abner sa Hebron, gindala sia sang pahain ni Joab sa gawang sa paghambal sa iya sing tago, kag didto ginbuno sia sa idalum sang ikalima nga gusuk, sa bagay nga napatay sia, tungud sa dugo ni Asael nga iya utud.

28 ś Kag ugaling sang nabatian ini ni David, nagsiling sia, Ako kag ang akon ginharian wala sing sala sa atubangan sang GINOO sa gihapon sang dugo ni Abner nga anak nga lalaki ni Ner:

29 Magholog ini sa olo ni Joab, kag sa bug-os nga panimalay sang iya amay; kag indi mawalaan ang panimalay ni Joab sing isa nga may tagas, ukon aroon, ukon isa nga nagapanungkud, ukon nagakapukan sa espada, ukon nakulangan sing tinapay.

30 Gani si Joab kag si Abisai nga iya utud nagpatay kay Abner, bangud nga ginpatay niya ang utud nila nga si Asael sa inaway sa Gabaon.

31 ś Kag si David nagsiling kay Joab, kag sa tanan nga katawohan nga upud niya, Kusnita ang inyo mga panapton, kag magsuklub kamo sang panapton nga sako, kag maglalaw sa atubang ni Abner. Kag si haring David nagsonod sa liyaliya.

32 Kag ginlubung nila si Abner sa Hebron: kag ang hari nagbayaw sang iya tingug, kag naghibi sa lulubngan ni Abner; kag naghibi ang bug-os nga katawohan.

33 Kag ang hari nagpanalabiton tungud kay Abner, kag nagsiling, Namatay bala si Abner subong sang pagkapatay sang buangbuang?

34 Ang imo mga kamut wala magapus, kag ang imo mga tiil wala man nabutang sa grilyos: subong sang isa ka tawo nga nagakapukan sa atubang sang malaut nga mga tawo, amo ang pagkapukan mo. Kag ang bug-os nga katawohan naghibi liwat sa iya.

35 Kag sang ang bug-os nga katawohan nag-abut sa pagpakaon sing kalan-on kay David sang adlaw pa, si David nagsumpa, nga nagasiling, Ang Dios maghimo sang subong sa akon, kag labi pa man, kon sa wala pa matunud ang adlaw magtilaw ako sing kalan-on, ukon bisan ano nga iban nga butang.

36 Kag ang bug-os nga katawohan nagtanda sini, kag nagpahamuut ini sa ila: subong nga ang bisan ano nga ginhimo sang hari nagpahamuut sa bug-os nga katawohan.

37 Kay ang bug-os nga katawohan kag ang bug-os nga Israel nakahangup sadto nga adlaw nga indi nagikan sa hari ang pagpatay kay Abner nga anak nga lalaki ni Ner.

38 Kag ang hari nagsiling sa iya mga alagad, Wala bala kamo makahibalo nga may prinsipe kag daku nga tawo nga napukan sini nga adlaw sa Israel?

39 Kag sini nga adlaw maluya ako, bisan nga hinaplas nga hari; kag ining mga lalaki nga mga anak ni Seruia tama katig-a sa akon: ang GINOO magtumbas sa manughimo sang malaut sono sa iya pagkamalauton!

KAPITULO 3

KAG sang pagkabati sang anak nga lalaki ni Saul, nga si Abner napatay sa Hebron, nagpalang-uy-uy ang iya mga kamut, kag natublag ang bug-os nga Israel.

2 Kag ang anak nga lalaki ni Saul may duha ka lalaki nga kapitan sang mga kabon: ang ngalan sang isa Baana, kag ang ngalan sang isa pa si Recab, ang mga anak nga lalaki ni Rimon nga Beerotnon sa mga anak sang Benjamin: (kay ang Beerot man nakabig sa Benjamin:

3 Kag ang mga Beerotnon nagpalagyo pa Gitaim, kag nangin-manlulugayaw didto tubtub sini nga adlaw.)

4 Kag si Jonatan, anak nga lalaki ni Saul, may anak nga lalaki nga piang sa iya mga tiil. Sia lima ka tuig sang pag-abut sang mga balita nahanungud kay Saul kag kay Jonatan gikan sa Jezreel, kag ang iya sisiwa naghakwat sa iya, kag nagpalagyo: kag nahanabu, sang nagdalidali sia sa pagpalagyo, nga naholog ang bata, kag napiang. Kag ang iya ngalan si Mefiboset.

5 Kag ang mga anak nga lalaki ni Rimon nga Beerotnon, si Recab kag si Baana, naglakat, kag nag-abut sa balay ni Is-boset sang mga nagahingudto ang adlaw, nga nagahigda sa higdaan sa udto.

6 Kag nagsulud sila sa tunga sang balay, subong nga daw makuha sila sing trigo; kag ginbuno nila sia sa idalum sang ikalima nga gusuk: kag nagpalagyo si Recab kag si Baana nga iya utud.

7 Kay sang nagsulud sila sa balay, nagahigda sia sa iya higdaan sa iya hulut nga higdaan, kag ginbuno sia nila, kag ginpatay sia, kag ginpunggol ang iya olo, kag ginkuha ang olo niya, kag naghalin nga nagaagi sa bug-os nga gab-i sa kapatagan.

8 Kag gindala nila ang olo ni Is-boset kay David sa Hebron, kag nagsiling sa hari, Yari ang olo ni Is-boset, ang anak ni Saul, nga imo kaaway, nga nagtinguha sang imo kabuhi; kag ang GINOO nagtimalus nga sa akon ginoo nga hari sini nga adlaw kay Saul kag sa iya kaliwat.

9 ś Kag si David nagsabat kay Recab kag kay Baana nga iya utud, ang mga anak nga lalaki ni Rimon nga Beerotnon, kag nagsiling sa ila, Sa nagakabuhi ang GINOO, nga nagtubus sang akon kalag sa bug-os nga kalisdanan,

10 Sang nagsugid sa akon ang isa, nga nagasiling, Yari karon, si Saul patay na, nga nagahunahuna sa pagdala sing maayo nga mga balita, gindakup ko sia, kag ginpatay sia sa Ziklag, nga naghunahuna nga ako magbalus sa iya tungud sang iya balita:

11 Daw ano pa bala, kon ang malaut nga mga tawo nagpatay sang tawo nga matarung sa iya kaugalingon nga balay sa iya higdaan? indi bala ako magpangayo sang iya dugo sa inyo mga kamut, kag panason kamo sa duta?

12 Kag si David nagsogo sang iya pamatan-on nga mga lalaki, kag ginpatay nila sila, kag gin-utud ang ila mga kamut kag ang ila mga tiil, kag ginbitay sila sa ibabaw sang punong sa Hebron. Apang ginkuha nila ang olo ni Is-boset, kag ginlubung ini sa lulubngan ni Abner sa Hebron.

KAPITULO 5

NIYAN nag-abut ang tanan nga tribo sang Israel kay David sa Hebron, kag nagpamolong, nga nagasiling, Yari karon, kami imo tul-an kag imo unud.

2 Labut pa sa mga tion nga nagligad, sang si Saul naghari sa ibabaw naton, ikaw nagtuytuy pagowa kag nagpasulud sang Israel: kag ang GINOO nagsiling sa imo, Ikaw magapahalab sang akon katawohan nga Israel, kag ikaw manginkapitan sa ibabaw sang Israel.

3 Gani nag-abut ang tanan nga tigulang sang Israel sa hari sa Hebron; kag si haring David nagpakigdampig sa ila sa Hebron sa atubangan sang GINOO: kag ginhaplas nila si David nga hari sa ibabaw sang Israel.

4 ś Si David katloan ka tuig sang nagsugud sia sa paghari, kag naghari sia sing kap-atan ka tuig.

5 Sa Hebron naghari sia sa ibabaw sang Juda sing pito ka tuig kag anum ka bulan: kag sa Jerusalem naghari sia sing katloan kag tatlo ka tuig sa ibabaw sang bug-os nga Israel kag Juda.

6 ś Kag ang hari kag ang iya mga lalaki nagkadto sa Jerusalem sa mga Jebusnon, ang mga pumuluyo sang duta: nga nagpamolong kay David, nga nagasiling, Kon indi mo makuha ang mga bulag kag ang mga piang, indi ka magsulud diri: nga nagahunahuna, Si David indi makasulud diri.

7 Wala sing sapayan gin-agaw ni David ang pamakud sang Zion: nga amo ang siudad ni David.

8 Kag nagsiling si David sadtong adlaw, Ang bisan sin-o nga magtaklad sa daganasan, kag magpatay sang mga Jebusnon, kag sang mga piang kag sang mga bulag, nga ginadumtan sang kalag ni David, sia manginpuno kag kapitan. Busa nagsiling sila, Ang mga bulag kag ang mga piang indi magasulud sa balay.

9 Gani si David nagpuyo sa pamakud, kag gintawag ini nga siudad ni David. Kag nagpatindug si David sa palibut kutub sa Milo kag pasulud.

10 Kag si David nag-uswag pa, kag nagdaku, kag ang GINOONG Dios sang mga kasoldadosan nag-upud sa iya.

11 ś Kag si Hiram nga hari sang Tiro nagpadala sing mga manugbalita kay David, kag mga kahoy nga cedro, kag mga panday, kag mga kantero: kag nagpatindug sila sing balay kay David.

12 Kag nahantup ni David nga ang GINOO nagpalig-on sa iya nga hari sa ibabaw sang Israel, kag nga ginbayaw niya ang iya ginharian tungud sa iya katawohan nga Israel.

13 ś Kag si David nagkuha pa sing mga babaye kag mga asawa gikan sa Jerusalem, sa tapus na nga nag-abut sia gikan sa Hebron: kag may natawo pa kay David nga mga anak nga lalaki kag mga anak nga babaye.

14 Kag ini sila amo ang mga ngalan sadtong mga natawo sa iya sa Jerusalem; si Samua, kag si Sobab, kag si Natan, kag si Salomon,

15 Si Ibhar man, kag si Elisua, kag si Nefeg, kag si Jafia,

16 Kag si Elisama, kag si Eliada, kag si Elifalet.

17 ś Apang sang nakabati ang mga Filistinhon nga si David nahaplas nila nga hari sa ibabaw sang Israel, ang tanan nga Filistinhon nagtaklad sa pagpangita kay David; kag nakabati sini si David, kag nagdulhog sa pamakud.

18 Nag-abut ang mga Filistinhon man kag naglapta sila sa nalupyakan sang Refaim.

19 Kag si David nagpamangkot sa GINOO, nga nagasiling, Magataklad ako bala batok sa mga Filistinhon? itugyan mo bala sila sa akon kamut? Kag ang GINOO nagsiling kay David, Taklad: kay sa wala sing pangduhaduha itugyan ko ang mga Filistinhon sa imo kamut.

20 Kag si David nag-abut sa Baal-perazim, kag didto ginpatay sila ni David, kag nagsiling, Ginbulwang sang GINOO ang akon mga kaaway sa atubangan nakon, kaangay sang pagbulwang sang mga tubig. Busa ginhingalanan niya yadtong duug Baal-perazim.

21 Kag ginbayaan nila didto ang ila mga imahen, kag si David kag ang iya mga tawo nagsonog sa ila.

22 ś Kag ang mga Filistinhon nagtaklad pa liwat, kag naglapta sila sa nalupyakan sang Refaim.

23 Kag sang namangkot si David sa GINOO, nagsiling sia, Dili ka magtaklad; kondi maglibut ka sa likod nila, kag kadto ka sa ila sa atubang sang mga kahoy nga morera.

24 Kag kon makabati ka sing tonog sang pagkalas sa mga tuyoktuyokan sang mga kahoy nga morera, niyan magdalidali ka: kay niyan ang GINOO magagowa una sa imo, sa paglaglag sang kasoldadosan sang mga Filistinhon.

25 Kag ginhimo ni David ang subong sini, sono sa ginsogo sa iya sang GINOO; kag ginlaglag ang mga Filistinhon kutub sa Geba tubtub sa nagakadto ka sa Gazer.

KAPITULO 6

LIWAT, si David nagtipon sing tingub sang tanan nga tawo nga pinili sa Israel, katloan ka libo.

2 Kag nagtindug si David, kag nagkadto upud ang bug-os nga katawohan nga yara sa iya kutub sa Baale sang Juda, sa pagpataklad gikan didto sang arka sang Dios, nga ang iya ngalan ginatawag sa ngalan sang GINOO sang mga kasoldadosan nga nagapuyo sa ulut sang mga querubin.

3 Kag ginlulan nila ang arka sang Dios sa bag-ong karo, kag gindala ini gikan sa balay ni Abinadab nga yara sa Gabaa: kag si Uza kag si Ahio, ang mga anak nga lalaki ni Abinadab, nagpaguyud sang bag-ong karo.

4 Kag ginkuha nila ini sa balay ni Abinadab nga yara sa Gabaa, upud ang arka sang Dios: kag si Ahio nag-una sa arka.

5 Kag si David kag ang bug-os nga panimalay sang Israel naglanton sa atubangan sang GINOO sang tanan nga bagay sang mga palatunggon nga kahoy nga abeto, bisan sang mga arpa, kag sang mga salterio, kag sang mga panderita, kag sang mga kornetin, kag sang mga apiping.

6 ś Kag sang pag-abut nila sa linasan ni Nacon, si Uza nag-untay sang iya kamut sa arka sang Dios, kag nagkaput sini; kay ang mga baka nag-uyug sini.

7 Kag ang kaakig sang GINOO nagdabdab batok kay Uza; kag ginlaglag sia didto sang Dios tungud sang iya sayup; kag didto napatay sia sa luyo sang arka sang Dios.

8 Kag si David wala nahamuut, bangud nga ang GINOO nagbulwang kay Uza: kag ginhingalanan niya yadtong duug Perez-uza tubtub sining adlaw.

9 Kag si David nahadluk sa GINOO sadtong adlaw, kag nagsiling, Paano bala ang pagkari sa akon sang arka sang GINOO.

10 Gani si David indi buut magsaylo sang arka sang GINOO sa iya sa siudad ni David: apang ginpahapit ni David sa balay ni Obed-edom nga Githanon.

11 Kag nabilin ang arka sang GINOO sa balay ni Obed-edom nga Githanon sing tatlo ka bulan: kag ginpakamaayo sang GINOO si Obed-edom, kag ang bug-os niyang panimalay.

12 ś Kag ginsugid ini kay haring David, nga nagasiling, Ginpakamaayo sang GINOO ang panimalay ni Obed-edom, kag ang tanan nga iya, bangud sang arka sang Dios. Gani si David nagkadto kag ginpataklad ang arka sang Dios gikan sa balay ni Obed-edom pakadto sa siudad ni David nga may kalipay.

13 Kag sang nakalakat sing anum ka tikang ang mga nagadala sang arka sang GINOO, naghalad sia sing mga baka kag mga pinatambok.

14 Kag si David nagsaut sa bug-os niya nga kusug sa atubang sang GINOO; kag si David nasukluban sing efod nga lino.

15 Gani si David kag ang bug-os nga panimalay sang Israel nagpataklad sang arka sang GINOO nga may sininggit, kag may tonog sang budyong.

16 Kag sang pag-abut sang arka sang GINOO sa siudad ni David, si Micol nga babaying anak ni Saul naggawa sa bintana, kag nakita si haring David nga nagatumbo kag nagasaut sa atubang sang GINOO; kag gintamay sia ni Micol sa iya tagiposoon.

17 ś Kag ginpasulud nila ang arka sang GINOO, kag ginpahamtang ini sa iya duug, sa tunga sang tabernakulo nga ginhumlad sa iya ni David: kag si David nagdolot sing mga halad nga sinonog kag mga halad sa paghidait sa atubang sang GINOO.

18 Kag sang nakatapus si David sa pagdolot sang mga halad nga sinonog kag sang mga halad sa paghidait, ginpakamaayo niya ang katawohan sa ngalan sang GINOO sang mga kasoldadosan.

19 Kag nagpanagtag sia sa tanan nga katawohan, bisan sa bug-os nga kadam-an sang Israel, tingub ang mga lalaki kag ang mga babaye, sa tagsatagsa isa ka bilog nga tinapay, kag isa ka hiwa nga unud, kag isa ka prasko sang alak. Gani ang tanan nga katawohan nagpauli ang tagsatagsa sa iya balay.

20 ś Niyan si David nagpauli sa pagpakamaayo sang iya panimalay. Kag si Micol nga babaye nga anak ni Saul naggowa sa pagsugata kay David, kag nagsiling, Daw ano ka mahimayaon ang hari sang Israel karon nga adlaw, nga nag-uba sang iya kaugalingon karon nga adlaw sa mga mata sang mga alagad nga babaye sang iya mga alagad, subong sang isa sang mga wala sing pulus nga mga tawo nga nagauba sa wala sing kahuya!

21 Kag si David nagsiling kay Micol, Yadto sa atubang sang GINOO, nga nagpili sa akon labaw sa imo amay, kag labaw sa bug-os niya nga panimalay, sa pagtangdo sa akon nga pangolo sa ibabaw sang katawohan sang GINOO, sa ibabaw sang Israel: busa magakasadya ako sa atubang sang GINOO.

22 Kag ako magamalaut pa sang sa sini, kag magakubus sa akon kaugalingon nga itololok: kag sa alagad nga mga babaye nga ginpamolong mo, sa ila pagapasidunggan ako.

23 Busa si Micol nga babaye nga anak ni Saul wala sing anak tubtub sa adlaw sang iya kamatayon.

KAPITULO 7

KAG nahanabu, sang naglingkod ang hari sa iya balay, kag ang GINOO nakahatag sa iya sing pahuway gikan sa tanan niya nga mga kaaway palibut;

2 Nga ang hari nagsiling kay Natan nga manalagna, Tan-awa karon, ako nagapuyo sa balay nga cedro, apang ang arka sang Dios nagapuyo sa sulud sang mga kumbung.

3 Kag si Natan nagsiling sa hari, Lakat, himoa ang tanan nga yara sa imo tagiposoon; kay ang GINOO nagaupud sa imo.

4 ś Kag nahanabu sa amo nga gab-i, nga ang polong sang GINOO nag-abut kay Natan, nga nagasiling,

5 Lakat kag sugiri ang akon alagad nga si David, Amo ini ang ginasiling sang GINOO, Patindugan mo bala ako sing balay nga akon puy-an?

6 Sanglit wala ako makapuyo sa bisan ano nga balay kutub sang tion nga ginpataklad ko ang kaanakan sang Israel gikan sa Egipto, tubtub sini nga adlaw, kondi naglakat sa layanglayang kag sa tabernakulo.

7 Sa tanan nga duug nga ginlaktan ko upud sang tanan nga kaanakan sang Israel, nakapamolong ako bala sa isa ka polong sa bisan isa sang mga tribo sang Israel, nga akon ginsogo nga magpahalab sang akon katawohan nga Israel, nga nagasiling, Ngaa bala nga wala ninyo ako pagpatindugi sing balay nga cedro?

8 Busa karon amo ini ang isiling mo sa akon alagad nga si David, Amo ini ang ginasiling sang GINOO sang mga kasoldadosan, Ginkuha ko ikaw sa palasudlan sang mga carnero, gikan sa pagsonod sang mga carnero, agud nga manginpangolo ka sa ibabaw sang akon katawohan, sa ibabaw sang Israel:

9 Kag nag-upud ako sa imo bisan diin ka nagkadto, kag gin-utud ko ang tanan mo nga kaaway gikan sa atubangan mo, kag ginhimo ko ikaw nga daku nga ngalan, kaangay sa ngalan sang mga dalagku nga tawo nga yara sa duta.

10 Labut pa magatangdo ako sing duug nga sa akon katawohan nga Israel, kag ako magatanum sa ila, agud nga magpuyo sila sa ila kaugalingon nga duug, kag indi na maghalin; kag indi na sila pagsakiton pa sang mga anak sang pagkamalaut, subong sang sa una,

11 Kag kutub sang tion nga ginsogo ko ang mga hukom sa pagdumala sang akon katawohan nga Israel, kag ginpapahuway ko ikaw gikan sa tanan mo nga kaaway. Labut pa ang GINOO nagasugid sa imo nga himoan ka niya sang balay.

12 ś Kag kon ang imo mga adlaw matuman, kag magtolog ka upud sa imo mga kaamayan, bangonon ko ang imo kaliwat sa olihi nimo, nga magagikan sa imo mga kasudlan, kag palig-onon ko ang iya ginharian.

13 Sia magapatindug sing balay sa akon ngalan, kag palig-onon ko ang trono sang iya ginharian sing dayon.

14 Ako mangin-amay niya, kag sia mangin-anak nakon. Kon maghimo sia sing kasal-anan, magasilot ako sa iya sa bilogon sang mga tawo, kag sa mga lapdus sang mga anak sang mga tawo:

15 Apang ang akon kalooy indi magtaliwan sa iya, subong nga ginkuha ko ini kay Saul, nga ginsikway ko sa atubangan mo.

16 Kag ang imo balay kag ang imo ginharian papag-onon sing dayon sa atubang mo: ang imo trono palig-onon sing dayon.

17 Sono sa tanan sini nga polong, kag sono sa bug-os sini nga palanan-awon, amo ang ginpamolong ni Natan kay David.

18 ś Niyan si David nga hari nagsulud, kag naglingkod sa atubang sang GINOO, kag sia nagsiling, Sin-o bala ako, O Ginoong DIOS? kag ano bala ang akon balay, nga gindala mo ako tubtub sa amo sini?

19 Kag ini butang nga diotay pa sa imo itololok, O Ginoong DIOS; apang ikaw nagpamolong man nahanungud sang balay sang imo alagad sa malayo pa nga palaabuton. Kag ini bala ang kinaanaran sang tawo, O Ginoong DIOS?

20 Kag ano pa bala ang ikasiling ni David sa imo? kay ikaw, Ginoong DIOS, nakakilala sang imo alagad.

21 Tungud sang imo polong, kag sono sa imo tagiposoon, nahimo mo ining bug-os nga mga butang nga daku, sa pagpakilala sang imo alagad sini.

22 Busa daku ka, O GINOONG Dios: kay wala sing kaangay sa imo, ukon may iban nga Dios luwas sa imo, sono sa tanan nga amon nabatian sang amon mga idulungug.

23 Kag ano bala nga isa ka pungsud sa duta ang kaangay sa imo katawohan, ang kaangay sa Israel, nga ginkadtoan sang Dios sa pagtubus nga sa iya nga isa ka katawohan, kag sa paghimo sa iya sing ngalan, kag sa paghimo tungud sa imo sing mga butang nga dalagku kag makakulugmat, tungud sa imo duta, sa atubang sang imo katawohan, nga imo gintubus sa imo gikan sa Egipto, gikan sa mga pungsud kag sa ila mga dios?

24 Kay ikaw nagpalig-on sa imo sang imo katawohan nga Israel nga manginkatawohan nga sa imo sa gihapon: kag ikaw, GINOO, nangin-ila Dios.

25 Kag karon, O GINOONG Dios, ang polong nga imo napamolong nahanungud sa imo alagad, kag nahanungud sa iya balay, palig-ona ini sing dayon, kag himoa sono sa imo nasiling.

26 Kag pagpakadakuon ang imo ngalan sa gihapon, nga nagasiling, Ang GINOO sang mga kasoldadosan amo ang Dios sa ibabaw sang Israel: kag palig-ona ang balay sang imo alagad nga si David sa atubangan mo.

27 Kay ikaw, O GINOO sang mga kasoldadosan, ang Dios sang Israel, nagpahayag sa imo alagad, nga nagasiling, Ako magapatindug sa imo sing balay: busa ang imo alagad nakakita sa iya tagiposoon sa pagpangamuyo sini nga pangamuyo sa imo.

28 Kag karon, O Ginoong DIOS, ikaw inang Dios, kag ang imo mga polong kamatooran, kag ikaw nagsaad sa imo alagad sining kaayohan:

29 Busa karon kahamut-an mo ang pagpakamaayo sang balay sang imo alagad, agud nga magpadayon ini sa atubang mo sa gihapon: kay ikaw, O Ginoong DIOS, nakapamolong sini: kag sa imo pagpakamaayo pagpakamaayohon ang balay sang imo alagad sa gihapon.

KAPITULO 8

KAG nahanabu sa tapus sini, nga ginlaglag ni David ang mga Filistinhon, kag ginpasakup sila: kag ginkuha ni David ang Meteg-amma gikan sa kamut sang mga Filistinhon.

2 Kag ginlaglag niya ang Moab, kag gintakus sila sang inuglatid, nga ginapahigda sila sa duta; nagtakus sia sing duha ka latid nga palatyon, kag isa ka bug-os nga latid nga buhion. Kag gani ang mga Moabnon nangin-alagad kay David, kag nagdala sing mga dolot.

3 ś Ginlaglag man ni David si Hadadezer, nga anak nga lalaki ni Rehob, hari sang Soba, sang paglakat niya sa pagbawi sang iya ginsakpan sa suba nga Eufrates.

4 Kag si David nag-agaw sa iya sing isa ka libo ka kangga, kag pito ka gatus ka mga manugkabayo, kag duha ka pulo ka libo ka hangaway nga nagalakat: kag ginkitinan ni David ang mga kabayo sang tanan nga mga kangga, apang naghawid gikan sa ila nga sa isa ka gatus ka kangga.

5 Kag sang nag-abut ang mga Sirianhon gikan sa Damasco sa pagtabang kay Hadadezer nga hari sang Soba, ginpatay ni David sa mga Sirianhon ang duha ka pulo kag duha ka libo ka tawo.

6 Niyan si David nagbutang sing mga garison sa Siria sang Damasco: kag ang mga Sirianhon nangin-alagad kay David, kag nagdala sing mga dolot. Kag gintipigan sang GINOO si David sa bisan diin magkadto sia.

7 Kag ginkuha ni David ang mga taming nga bulawan nga yara sa mga alagad ni Hadadezer, kag gindala sila sa Jerusalem.

8 Kag gikan sa Beta, kag gikan sa Berotai, mga siudad ni Hadadezer, nagkuha si haring David sing lakas kadamu nga saway.

9 ś Sang nakabati si Toi nga hari sang Hamat nga ginlaglag ni David ang bug-os nga kasoldadosan ni Hadadezer,

10 Niyan ginpadala ni Toi si Joram nga iya anak nga lalaki kay haring David, sa pag-abiabi sa iya, kag sa pagpakamaayo sa iya, bangud nga nagpakig-away sia kay Hadadezer, kag ginlaglag sia: kay si Hadadezer may mga pagpakig-away kay Toi. Kag si Joram nagdala sing mga suludlan nga pilak, kag mga suludlan nga bulawan, kag mga suludlan nga saway:

11 Nga ang mga ini man gindedicar ni haring David sa GINOO, pati sang pilak kag bulawan nga gindedicar niya gikan sa tanan nga pungsud nga gindaug niya;

12 Gikan sa Siria, kag sa Moab, kag sa mga anak ni Amon, kag sa mga Filistinhon, kag sa Amalec, kag sa inagaw kay Hadadezer, nga anak nga lalaki ni Rehob, hari sang Soba.

13 Kag si David nakaagum nga sa iya sing ngalan sang pagbalik niya gikan sa paglaglag sang mga Sirianhon sa nalupyakan sang asin, nga napulo kag walo ka libo ka tawo.

14 ś Kag nagbutang sia sing mga garison sa Edom; sa bug-os nga Edom nagbutang sia sing mga garison, kag tanan sila sa Edom nangin-alagad kay David. Kag gintipigan sang GINOO si David bisan diin magkadto sia.

15 Kag si David naghari sa bug-os nga Israel; kag si David naghukom kag naghimo sing katarungan sa bug-os niya nga katawohan.

16 Kag si Joab nga anak nga lalaki ni Seruia nagpangolo sa kasoldadosan; kag si Josafat nga anak nga lalaki ni Ahilud amo ang manugsulat sang mga maragtas;

17 Kag si Sadok nga anak nga lalaki ni Ahitub, kag si Ahimelec nga anak nga lalaki ni Abiatar mga pari; kag si Seraya escriba;

18 Kag si Benaya nga anak nga lalaki ni Jehoiada nagpangolo sa mga Keretnon kag sa mga Peletnon; kag ang mga anak nga lalaki ni David mga puno nga pangolo.

KAPITULO 9

KAG si David nagsiling, May nabilin pa bala nga isa sa panimalay ni Saul, agud nga mapakitaan ko sia sing kalolo tungud kay Jonatan?

2 Kag may alagad gikan sa panimalay ni Saul nga ginahingalanan Siba. Kag sang gintawag nila sia pakadto kay David, ang hari nagsiling sa iya, Ikaw bala si Siba? Kag nagsiling sia, Ang imo alagad amo sia.

3 Kag ang hari nagsiling, Wala na bala sing isa nga nabilin sa panimalay ni Saul, agud nga mapakita ko ang kalolo sang Dios sa iya? Kag si Siba nagsiling sa hari, Si Jonatan may anak pa nga lalaki, nga piang ang iya mga tiil.

4 Kag ang hari nagsiling sa iya, Diin bala sia? Kag si Siba nagsiling sa hari, Yari karon, sia yara sa balay ni Maquir, nga anak nga lalaki ni Amiel, sa Lo-debar.

5 ś Niyan nagpadala si haring David, kag ginpakuha sia sa balay ni Maquir nga anak nga lalaki ni Amiel, gikan sa Lo-debar.

6 Karon sang si Mefiboset, nga anak nga lalaki ni Jonatan, ang anak nga lalaki ni Saul, nag-abut kay David, naghapa sia, kag nagtahud. Kag si David nagsiling, Mefiboset. Kag sia nagsabat, Yari karon ang imo alagad!

7 ś Kag si David nagsiling sa iya, Dili ka mahadluk: kay ako sa pagkamatuud magapakita sa imo sing kalolo tungud kay Jonatan nga imo amay, kag magauli sa imo sang bug-os nga duta ni Saul nga imo amay; kag ikaw magakaon sing tinapay sa akon latok sing dalayon.

8 Kag nagyaub sia, kag nagsiling, Ano bala ang imo alagad, nga magtamud ka sa amo nga ido nga patay subong sa akon?

9 ś Niyan gintawag sang hari si Siba, alagad ni Saul, kag nagsiling sa iya, Ang tanan nga naigo kay Saul kag sa bug-os niya nga panimalay ginhatag ko sa anak nga lalaki sang imo agalon.

10 Busa ikaw, kag ang imo mga anak nga lalaki, kag ang imo mga alagad, magapanguma sang duta tungud sa iya, kag tiponon mo ang mga patubas, agud nga ang anak nga lalaki sang imo agalon may kalan-on: apang si Mefiboset nga anak nga lalaki sang imo agalon magakaon sa akon latok sing dalayon. Karon si Siba may napulo kag lima ka anak nga lalaki kag duha ka pulo ka alagad.

11 Niyan si Siba nagsiling sa hari, Sono sa tanan nga ginsogo sang akon ginoo nga hari sa iya alagad, amo ang himoon sang imo alagad. Nahanungud kay Mefiboset, nagsiling ang hari, sia magakaon sa akon latok, subong sang isa sang mga anak nga lalaki sang hari.

12 Kag si Mefiboset may lanubo nga anak nga lalaki, nga ginhingalanan Mica. Kag ang tanan nga nagpuyo sa balay ni Siba mga alagad kay Mefiboset.

13 Gani nagpuyo si Mefiboset sa Jerusalem: kay nagkaon sia sing dalayon sa latok sang hari; kag sia piang sa duha niya ka tiil.

KAPITULO 10

KAG nahanabu sa tapus sini, nga napatay ang hari sang mga anak ni Amon, kag naghari sa tal-us niya si Hanun nga iya anak nga lalaki.

2 Niyan si David nagsiling, Ako magapakita sing kalolo kay Hanun nga anak ni Nahas, subong nga ang iya amay nagpakita sing kalolo sa akon. Kag ginpadala ni David ang iya mga alagad sa paglipay sa iya nahanungud sang iya amay. Kag ang mga alagad ni David nagkadto sa duta sang mga anak ni Amon.

3 Kag ang mga prinsipe sang mga anak ni Amon nagsiling kay Hanun nga ila ginoo, Nagahunahuna ka bala nga nagatahud sa imo amay si David, bangud nga nagpadala sia sing mga manuglipay sa imo? wala bala magpadala si David hinonoo sang iya mga alagad sa imo, sa pag-usisa sang siudad, kag sa paglampitaw sini, kag sa paglaglag sini?

4 Gani gindakup ni Hanun ang mga alagad ni David, kag ginkiskis ang katunga sang ila mga bungut, kag gingutrab ang ila mga panapton sa tunga, bisan tubtub sa ila mga buli, kag ginpalakat sila.

5 Sang ginsugid nila ini kay David, nagpadala sia sa pagsugata sa ila, kay ang mga tawo nahuya sing daku: kag nagsiling ang hari, Pabilin kamo sa Jerico tubtub nga magtubo ang inyo mga bungut, kag ugaling magpauli.

6 ś Kag sang nakita sang mga anak ni Amon nga nanginmangil-ad sila kay David, ang mga anak ni Amon nagpadala kag nagsohol sang mga Sirianhon sang Bet-rehob, kag sang mga Sirianhon sang Soba, duha ka pulo ka libo ka hangaway nga nagalakat, kag kay haring Maaca isa ka libo ka tawo, kag kay Is-tob napulo kag duha ka libo ka tawo.

7 Kag sang pagkabati ni David sini, ginpadala niya si Joab, kag ang bug-os nga kasoldadosan sang gamhanan nga mga tawo.

8 Kag naggowa ang mga anak ni Amon, kag nagpaagisud sa inaway sa salamputan sang gawang: kag ang mga Sirianhon sang Soba, kag sang Rehob, kag kay Is-tob, kag kay Maaca, nagpabilin sila ila sa latagon.

9 Sang nakita ni Joab nga ang inaway yara batok sa iya, sa atubangan kag sa likod, nagpili sia sa tanan nga pinili nga tawo sang Israel, kag ginpahamtang sila sing paagisud batok sa mga Sirianhon:

10 Kag ang nabilin sang katawohan gintugyan niya sa kamut ni Abisai nga iya utud, agud nga mapahamtang niya sila sing paagisud batok sa mga anak ni Amon.

11 Kag nagsiling sia, Kon ang mga Sirianhon tama kabakud sa akon, niyan buligan mo ako: apang kon ang mga anak ni Amon tama kabakud sa imo, niyan ako magakari kag magabulig sa imo.

12 Magpakaisug ka, kag magpakalalaki kita tungud sa aton katawohan, kag tungud sa mga siudad sang aton Dios: kag himoon sang GINOO inang maayo sa iya.

13 Kag nagpalapit si Joab, kag ang katawohan nga upud sa iya, sa inaway batok sa mga Sirianhon: kag sila nagpalagyo gikan sa atubang niya.

14 Kag sang nakita sang mga anak ni Amon nga ang mga Sirianhon nagpalagyo, niyan nagpalagyo man sila sa atubang ni Abisai, kag nagsulud sa siudad. Gani si Joab nagbalik gikan sa mga anak ni Amon, kag nagsulud sa Jerusalem.

15 ś Kag sang nakita sang mga Sirianhon nga ginlaglag sila sa atubang sang Israel, nagtilipon sila sing tingub.

16 Kag nagpadala si Hadadezer, kag nagpagowa sang mga Sirianhon nga yara sa tabok sa suba: kag nag-abut sila sa Helam; kag si Sobac nga kapitan sang kasoldadosan ni Hadadezer nagpanguna sa ila.

17 Kag sang ginsugid ini kay David, gintipon niya ang bug-os nga Israel sing tingub, kag nagtabok sa Jordan, kag nag-abut sa Helam. Kag ang mga Sirianhon nagpahamtang sa ila kaugalingon sing paagisud batok kay David, kag nagpakig-away sa iya.

18 Kag ang mga Sirianhon nagpalagyo gikan sa atubang sang Israel; kag ginpatay ni David sa mga Sirianhon ang mga tawo sang pito ka gatus ka kangga, kag kap-atan ka libo ka manugkabayo, kag ginpilas si Sobac nga kapitan sang ila kasoldadosan, kag napatay sia didto.

19 Kag sang nakita sang tanan nga hari nga mga alagad ni Hadadezer nga tinamaan sila sa atubang sang Israel, nagpakighidait sila sa Israel, kag nag-alagad sa ila. Gani ang mga Sirianhon nahadluk na gid sa pagbulig sang mga anak ni Amon.

KAPITULO 11

KAG nahanabu, sa pagsapul sang tuig, sa tion nga nagagowa ang mga hari sa pag-away, nga si David nagpadala kay Joab, kag sang iya mga alagad upud sa iya, kag sang bug-os nga Israel; kag ginlaglag nila ang mga anak ni Amon, kag ginlikupan ang Raba. Apang si David nagpabilin pa sa Jerusalem.

2 ś Kag nahanabu sa kahaponon, nga si David nagbangon gikan sa iya higdaan, kag nagdayandayan sa atop sang balay sang hari: kag kutub sa atop nakita niya ang babaye nga nagapaligos; kag ang babaye tama gid katahum tolokon.

3 Kag si David nagpadala kag nagpamangkot nahanungud sa babaye. Kag ang isa nagsiling, Indi bala ini si Bat-seba, ang babaye nga anak ni Eliam, ang asawa ni Urias nga Hithanon?

4 Kag si David nagpadala sing mga manugbalita, kag ginpakuha sia; kag nagpalapit sia sa iya, kag naghulid sia sa iya; kay natinloan ang babaye sa iya pagkadimatinlo: kag nagpauli sia sa iya balay.

5 Kag ang babaye nanamkon, kag nagpadala kag nagsugid kay David, kag nagsiling, Ako nagabusung.

6 ś Kag ginpadalhan ni David si Joab, nga nagasiling, Ipadala sa akon si Urias nga Hithanon. Kag ginpadala ni Joab si Urias kay David.

7 Kag sang nag-abut si Urias sa iya, ginpamangkot sia ni David kon paano si Joab, kag kon maanoano ang katawohan, kag kon paano ang lakat sang inaway.

8 Kag si David nagsiling kay Urias, Dulhog ka sa imo balay, kag hinawi ang imo mga tiil. Kag nagtaliwan si Urias gikan sa balay sang hari, kag nagsonod sa iya ang isa ka dolot nga pagkaon gikan sa hari.

9 Apang si Urias nagtolog sa ganhaan sang balay sang hari upud sang tanan nga alagad sang iya ginoo, kag wala magdulhog sa iya balay.

10 Kag sang ginsugiran nila si David, nga nagasiling, Si Urias wala magdulhog sa iya balay, si David nagsiling kay Urias, Wala ka bala maghalin sa imo panlakatan? ngaa bala niyan nga wala ka magdulhog sa imo balay?

11 Kag si Urias nagsiling kay David, Ang arka, kag ang Israel, kag ang Juda, nagapuyo sa mga layanglayang; kag ang akon ginoo nga si Joab, kag ang mga alagad sang akon ginoo, nagpahamtang sing kampo sa mga wayang; magasulud bala ako niyan sa akon balay, sa pagkaon kag sa pag-inum, kag sa paghulid sa akon asawa? sa nagakabuhi ka, kag sa nagakabuhi ang imo kalag, indi ako maghimo sini nga butang.

12 Kag si David nagsiling kay Urias, Pabilin ka diri karon nga adlaw man, kag buwas palakton ko ikaw. Gani nagpabilin si Urias sa Jerusalem sadto nga adlaw, kag sa madason nga adlaw.

13 Kag sang ginpatawag sia ni David, nagkaon kag nag-inum sia sa atubang niya; kag ginhobog niya sia: kag sa pagkagab-i naggowa sia sa paghigda sa iya higdaan upud sang mga alagad sang iya ginoo, apang wala magdulhog sa iya balay.

14 ś Kag nahanabu sa pagkaaga, nga nagsulat si David kay Joab sing sulat, kag ginpadala ini sa kamut ni Urias.

15 Kag ginsulat niya sa sulat, nga nagasiling, Ibutang ninyo si Urias sa atubang gid sang inaway nga malapuyot, kag bayaan ninyo sia, agud nga maigo sia, kag mapatay.

16 Kag nahanabu, sang si Joab nagbantay sang siudad, nga ginbutang niya si Urias sa duug nga nahibaloan niya didto ang mga tawo nga isganan.

17 Kag naggowa ang mga tawo sang siudad kag nagpakig-away kay Joab: kag nagkalapukan ang iban sang mga tawo nga mga alagad ni David; kag si Urias nga Hithanon napatay man.

18 ś Niyan si Joab nagpadala kag nagsugid kay David sang tanan nga butang nahanungud sang inaway;

19 Kag nagtogon sia sa manugbalita, nga nagasiling, Kon makatapus ka sa pagsugid sa hari sang tanan nga butang nahanungud sang inaway,

20 Kag kon mag-ibwal ang kasingkal sang hari, kag magsiling sia sa imo, Ngaa bala nga nagpalapit gid kamo sa siudad sang kamo nagpakig-away? wala bala kamo makahibalo nga magapana sila gikan sa kuta?

21 Sin-o bala ang nagpatay kay Abimelec nga anak nga lalaki ni Jerubeset? wala bala paghologi sia sang isa ka babaye gikan sa kuta sang bato sang galingan, sa bagay nga napatay sia sa Tebez? ngaa bala nga nagpalapit gid kamo sa kuta? niyan magsiling ka, Ang imo alagad nga si Urias nga Hithanon napatay man.

22 ś Gani naglakat ang manugbalita, kag nag-abut kag nagpahayag kay David sang tanan nga ginpadalhan sa iya ni Joab.

23 Kag ang manugbalita nagsiling kay David, Naglandas gid sa amon ang mga tawo, kag naggowa sa amon sa latagon, kag ginsalakay namon sila tubtub sa salamputan sang gawang.

24 Kag ang mga manugpana nagpana sa imo mga alagad kutub sa kuta; kag ang iban sang mga alagad sang hari napatay, kag ang imo alagad nga si Urias nga Hithanon napatay man.

25 Niyan si David nagsiling sa manugbalita, Amo ini ang isiling mo kay Joab, Indi ini magpasubu sa imo, kay ang espada nagalamon sang isa subong man sang isa: baskuga pa ang imo pag-away batok sa siudad, kag laglaga ini: kag paisugon mo sia.

26 ś Kag sang nakabati ang asawa ni Urias nga ang iya bana nga si Urias napatay, naghaya sia tungud sang iya bana.

27 Kag sang natapus ang lalaw, si David nagpadala kag ginpakuha sia pauli sa iya balay, kag sia nangin-iya asawa, kag nag-anak sa iya sing lalaki. Apang ang butang nga nahimo ni David nagpaakig sa GINOO.

KAPITULO 12

KAG ginpadala sang GINOO si Natan kay David. Kag nagkadto sia sa iya, kag nagsiling sa iya, May duha ka tawo sa isa ka siudad; ang isa manggaranon kag ang isa imol.

2 Ang manggaranon nga tawo may lakas kadamu nga mga panong kag kabakahan:

3 Apang ang imol nga tawo wala luwas sang diotay nga cordera, nga iya ginbakal kag ginbatiti: kag nagdaku ini upud sa iya, kag upud sa iya mga anak; ini nagkaon sang iya kaugalingon nga pagkaon, kag nag-inum sa iya ilimnan, kag nagluko sa iya sabak, kag nanginsubong sa iya sang isa ka anak nga babaye.

4 Kag may nag-abut nga manlalagaw sa tawo nga manggaranon, kag nahilak sia magkuha sa iya kaugalingon nga panong kag sa iya kaugalingon nga kabakahan, nga ihawon tungud sa manlalakat nga tawo nga nag-abut sa iya; kondi ginkuha niya ang cordera sang tawo nga imol, kag gin-ihaw ini tungud sa tawo nga nag-abut sa iya.

5 Kag nagdabdab ang kaakig ni David batok sa tawo; kag nagsiling sia kay Natan, Sa nagakabuhi ang GINOO, ang tawo nga nakahimo sini mapatay sing totoo:

6 Kag ulian niya ang cordera sing apat ka pilo, bangud nga naghimo sia sini nga butang, kag bangud nga wala sia sing kaawa.

7 ś Kag si Natan nagsiling kay David, Ikaw amo ang tawo. Amo ini ang ginasiling sang GINOONG Dios sang Israel, Ako naghaplas sa imo nga hari sa ibabaw sang Israel, kag ginluwas ko ikaw sa kamut ni Saul;

8 Kag ako naghatag sa imo sang balay sang imo agalon, kag sang mga asawa sang imo agalon sa imo sabak, kag naghatag sa imo sang balay sang Israel kag sang Juda; kag kon ini tama pa kadiotay, ako nagdugang kuntani sa imo sang amo kag amo nga mga butang.

9 Ngaa bala nga gintamay mo ang sogo sang GINOO, sa paghimo sang malaut sa iya itololok? ginpatay mo sa espada si Urias nga Hithanon, kag ginkuha mo ang iya asawa nga mangin-asawa mo, kag ginpapatay sia sa espada sang mga anak ni Amon.

10 Busa karon ang espada indi magbulag nga mas-a sa imo panimalay; bangud nga gintamay mo ako, kag ginkuha mo ang asawa ni Urias nga Hithanon nga mangin-imo asawa.

11 Amo ini ang ginasiling sang GINOO, Yari karon, magabangon ako sing malaut batok sa imo gikan sa imo kaugalingon nga panimalay, kag kuhaon ko ang imo mga asawa gikan sa imo mga mata, kag ihatag sila sa imo isigkatawo, kag sia magahulid sa imo mga asawa sa dayag sini nga adlaw.

12 Kay ginhimo mo ini sa tago: apang himoon ko ini sa atubang sang bug-os nga Israel, kag sa dayag sang adlaw.

13 Kag si David nagsiling kay Natan, Nakasala ako batok sa GINOO. Kag si Natan nagsiling kay David, Ang GINOO man nagsikway sang imo sala; indi ka mapatay.

14 Apang, bangud nga paagi sini nga buhat naghatag ka sing daku nga kahigayonan sa mga kaaway sang GINOO sa pagpasipala, ang bata man nga natawo sa imo mapatay sing totoo.

15 ś Kag si Natan nagpauli sa iya balay. Kag ginsakit sang GINOO ang bata nga gin-anak sang asawa ni Urias kay David, kag nagbalatian ini sing tama.

16 Busa si David nagpakilooy sa Dios tungud sang bata; kag nagpuasa si David, kag nagsulud, kag naghigda sa duta sa bug-os nga gab-i.

17 Kag nagtindug ang mga tigulang sang iya balay, kag nagkadto sa iya, sa pagpabangon sa iya gikan sa duta: apang indi sia buut, kag wala sia nagkaon sing tinapay upud sa ila.

18 Kag nahanabu sa ikapito nga adlaw, nga ang bata napatay. Kag ang mga alagad ni David nahadluk magsugid sa iya nga ang bata patay na: kay nagsiling sila, Yari karon, sang buhi pa ang bata, nagpamolong kita sa iya, kag wala sia magpamati sa aton tingug: paano bala niyan ang pagsakit niya sang iya kaugalingon, kon sugiran naton sia nga ang bata patay na?

19 Apang sang nakita ni David nga ang iya mga alagad nagahinutikay, ginhantup ni David nga ang bata patay na: busa si David nagsiling sa iya mga alagad, Patay na bala ang bata? Kag sila nagsiling, Patay na sia.

20 Niyan si David nagtindug gikan sa duta, kag nagpaligos, kag nagpanghaplas sang iya kaugalingon, kag nag-ilis sang iya panapton, kag nagsulud sia sa balay sang GINOO, kag nagsimba: niyan nagpauli sia sa iya kaugalingon nga balay; kag sang nagpangayo sia, ginbutangan nila sia sing tinapay, kag nagkaon sia.

21 Niyan nagsiling sa iya ang iya mga alagad, Ano bala ini nga butang nga imo nahimo? nagpuasa ka kag naghibi tungud sa bata, sang buhi pa ini; apang sang patay na ang bata, nagtindug ka kag nagkaon sing tinapay.

22 Kag nagsiling sia, Sang buhi pa ang bata, nagpuasa ako kag naghibi: kay nagsiling ako, Sin-o bala ang makasugid nga ang DIOS indi magkalooy sa akon, agud nga mabuhi ang bata?

23 Apang karon patay na sia, ngaa bala nga magpuasa pa ako? sarang ko bala sia mapabalik liwat? ako makadto sa iya, apang sia indi magbalik sa akon.

24 ś Kag ginlipay ni David si Bat-seba nga iya asawa, kag nagsulud sa iya, kag naghulid sa iya: kag nag-anak sia sing lalaki, kag ginhingalanan niya sia Salomon: kag ang GINOO naghigugma sa iya.

25 Kag nagpadala sia sa kamut ni Natan nga manalagna; kag gintawag niya ang iya ngalan Jedidia, bangud sang GINOO.

26 ś Kag si Joab nag-away batok sa Raba sang mga anak ni Amon, kag gin-agaw ang siudad nga harianon.

27 Kag si Joab nagpadala sing mga manugbalita kay David, kag nagsiling, Ako nagpakig-away batok sa Raba, kag gin-agaw ko ang siudad sang mga tubig.

28 Busa karon tipona sing tingub ang katawohan nga nabilin, kag magpahamtang sing kampo batok sa siudad, kag agawa ini: basi nga maagaw ko ang siudad, kag tawgon ini sono sa akon ngalan.

29 Kag gintipon sing tingub ni David ang bug-os nga katawohan, kag nagkadto sa Raba, kag gin-away ini, kag gin-agaw ini.

30 Kag ginkuha niya ang purungpurung sang ila hari sa iya olo, ang iya timbang isa ka talanton nga bulawan nga may mga bato nga bilidhon: kag ginbutang ini sa olo ni David. Kag nagdala sia sing tama kadamu nga inagaw gikan sa siudad.

31 Kag gindala niya pagowa ang katawohan nga yara sa sini, kag ginpaidalum sila sa mga lagari, kag sa mga pakalas nga salsalon, kag sa mga wasay nga salsalon, kag ginpaagi sila sa horno sang mga tisa: kag amo ini ang ginhimo niya sa tanan nga siudad sang mga anak ni Amon. Gani si David kag ang bug-os nga katawohan nagpauli sa Jerusalem.

KAPITULO 13

KAG nahanabu sa tapus sini, nga si Absalom nga anak nga lalaki ni David may maayoayo nga utud nga babaye, nga ginhingalanan Tamar; kag ginhigugma sia ni Amnon nga anak nga lalaki ni David.

2 Kag si Amnon nagpalibog sing tama, sa bagay nga nagbalatian sia bangud kay Tamar nga iya utud; kay sia ulay; kag daw tama kabudlay kay Amnon ang paghimo sing bisan ano nga butang sa iya.

3 Apang si Amnon may abyan, nga ginhingalanan si Jonadab, ang anak nga lalaki ni Simea, utud ni David: kag si Jonadab tawo nga tama gid kalalang.

4 Kag sia nagsiling sa iya, Ngaa bala ikaw, nga anak sang hari, naganiwang adlawadlaw? indi ka bala magsugid sa akon? Kag si Amnon nagsiling sa iya, Ako nagahigugma kay Tamar, utud nga babaye ni Absalom nga akon utud.

5 Kag si Jonadab nagsiling sa iya, Higda ka sa imo higdaan, kag magmulumasakit ka: kag kon ang imo amay magkari sa pagduaw sa imo, isiling sa iya, Ginaampo ko sa imo, pakari-a ang akon utud nga si Tamar, kag maghatag sa akon sing pagkaon, kag maghimo sing pagkaon sa akon itololok, agud nga akon ini makita, kag magkaon sini gikan sa iya kamut.

6 ś Gani si Amnon naghigda, kag nagpamulumasakit sia: kag sang nag-abut ang hari sa pagduaw sa iya, si Amnon nagsiling sa hari, Ginaampo ko sa imo, pakari-a ang akon utud nga si Tamar, kag himoan ako sing duha ka torta sa itololok ko, agud nga magkaon ako gikan sa iya kamut.

7 Niyan si David nagpasogo sa iya puluy-an kay Tamar, nga nagasiling, Kadto ka karon sa balay ni Amnon nga imo utud, kag himoi sia sing pagkaon.

8 Gani si Tamar nagkadto sa balay sang iya utud nga si Amnon; kag sia nagahigda. Kag sia nagkuha sing harina, kag ginlamas ini, kag naghimo sing mga torta sa iya itololok, kag nagluto sang mga torta.

9 Kag ginbahit niya ang sartin, kag ginbobo sila sa atubang niya; apang nagdumili sia sa pagkaon. Kag si Amnon nagsiling, Pagowaa gikan sa akon ang tanan nga tawo. Kag sila naggowa ang tagsa ka tawo gikan sa iya.

10 Kag si Amnon nagsiling kay Tamar, Dalha ang pagkaon sa hulut, agud nga ako makakaon gikan sa imo kamut. Kag ginkuha ni Tamar ang mga torta nga iya nahimo, kag gindala sila sa sulud sang hulut sa iya utud nga si Amnon.

11 Kag sang nadala niya sila sa iya sa pagkaon, gindakup niya sia, kag nagsiling sa iya, Kari, hulid ka sa akon, utud ko.

12 Kag sia nagsabat sa iya, Dili, utud ko, dili ako paglugusa; kay ang subong nga butang dili dapat himoon sa Israel: dili ka maghimo sini nga kabuangan.

13 Kag ako, diin ko bala dalhon ang akon kahuluy-an? kag nahanungud sa imo, manginsubong ka sang isa sang mga buangbuang sa Israel. Busa karon, ginaampo ko sa imo, hambala ang hari; kay indi sia magpugung sa akon sa imo.

14 Wala sing sapayan wala sia magpamati sa iya tingug: apang, bangud nga makusug pa sia sa iya, ginlugus niya sia, kag naghulid sa iya.

15 ś Niyan si Amnon nagdumut sa iya sing lakas; sa bagay nga ang dumut nga gindumut niya sa iya daku pa sa gugma nga ginhigugma niya sa iya. Kag si Amnon nagsiling sa iya, Tindug ka, halin.

16 Kag sia nagsiling sa iya, Wala sing kabangdanan: ining kalautan sa pagtabog sa akon malain pa sang sa isa nga ginhimo mo sa akon. Apang indi sia magpamati sa iya.

17 Niyan gintawag niya ang iya alagad nga nag-alagad sa iya, kag nagsiling, Pagowaa karon ini nga babaye gikan sa akon, kag pintali ang ganhaan sa olihi niya.

18 Kag napanaptan sia sing bayo nga sarisari sing mga duag: kay sa amo nga mga kunup ginpanaptan ang mga ulay nga mga anak nga babaye sang hari. Niyan gindala sia pagowa sang iya alagad, kag ginpintalan ang ganhaan sa olihi niya.

19 ś Kag si Tamar nagbutang sing mga abo sa iya olo, kag nagkusnit sang iya panapton nga sarisari sing mga duag nga ginpanaput niya, kag ginbutang niya ang iya kamut sa iya olo, kag naglakat nga nagahibi.

20 Kag nagsiling sa iya ang iya utud nga si Absalom, Nakaupud bala sa imo ang imo utud nga si Amnon? apang hipus ka karon, utud ko: utud mo sia; dili magsapak sining butang. Gani si Tamar nagpabilin nga mamingaw sa balay ni Absalom nga iya utud.

21 ś Apang sang pagkabati ni haring David sini tanan nga butang, nagsingkal gid sia.

22 Kag si Absalom wala magpamolong kay Amnon nga iya utud sing maayo ukon malain: kay si Absalom nagdumut kay Amnon, bangud nga ginlugus niya si Tamar nga iya utud nga babaye.

23 ś Kag nahanabu sa tapus ang duha ka bug-os nga tuig, nga si Absalom may mga manug-alot sang mga carnero sa Baal-hazor, nga yara sa luyo sang Efraim: kag gin-agda ni Absalom ang tanan nga anak nga lalaki sang hari.

24 Kag si Absalom nagkadto sa hari, kag nagsiling, Yari karon, ang imo alagad may mga manug-alot sang mga carnero; ginaampo ko sa imo, mag-upud ang hari kag ang iya mga alagad sa imo alagad.

25 Kag ang hari nagsiling kay Absalom, Indi, anak ko, indi nga tanan kami magkadto karon, basi nga kami manginmabug-at sa imo. Kag ginpilit niya sia: apang indi sia buut magkadto, kondi ginpakamaayo sia.

26 Niyan si Absalom nagsiling, Kon indi, ginaampo ko sa imo, paupda sa amon si Amnon nga akon utud. Kag ang hari nagsiling sa iya, Ngaa bala nga mag-upud sia sa imo?

27 Apang si Absalom nagpilit sa iya, sa bagay nga ginpaupud niya si Amnon kag ang tanan nga anak nga lalaki sang hari sa iya.

28 ś Karon si Absalom nagsogo sa iya mga alagad, nga nagasiling, Tandai ninyo karon kon ang tagiposoon ni Amnon nagakasadya sa alak, kag kon magsiling ako sa inyo, Lab-a si Amnon; niyan patya sia, dili magkahadluk: wala bala ako magsogo sa inyo? magpakaisug kamo, kag magpakaisganan.

29 Kag ang mga alagad ni Absalom naghimo kay Amnon subong sang nasogo sa ila ni Absalom. Niyan nagtilindug ang tanan nga anak nga lalaki sang hari, kag nagsakay ang tagsa ka tawo sa iya mula, kag nagpalagyo.

30 ś Kag nahanabu, sang sa dalanon pa sila, nga nag-abut kay David ang mga balita, nga nagasiling, Ginpatay ni Absalom ang tanan nga anak nga lalaki sang hari, kag wala sing isa sa ila nga nabilin.

31 Niyan nagtindug ang hari, kag nagkusnit sang iya mga panapton, kag naghigda sa duta; kag ang tanan niya nga alagad nagtindug sa luyo nga nakusnit ang ila mga panapton.

32 Kag si Jonadab, ang anak nga lalaki ni Simea nga utud ni David, nagsabat kag nagsiling, Dili magbanta ang akon ginoo nga ginpatay nila ang tanan nga pamatan-on nga lalaki nga mga anak sang hari; kay si Amnon lamang ang napatay: kay tungud sa gintangdo ni Absalom ini napat-ud kutub sa adlaw nga ginlugus niya si Tamar nga iya utud nga babaye.

33 Busa karon dili magkalisud sa iya tagiposoon ang akon ginoo nga hari sini nga butang, sa paghunahuna nga ang tanan nga anak nga lalaki sang hari napatay: kay si Amnon lamang ang napatay.

34 Apang si Absalom nagpalagyo. Kag ang pamatan-on nga lalaki nga nagbantay nagbayaw sang iya mga mata, kag naglantaw, kag, yari karon, may nag-abut nga labi kadamu nga katawohan sa dalanon sa banglid sa nalikod niya.

35 Kag si Jonadab nagsiling sa hari, Yari karon, ang mga anak nga lalaki sang hari nagapakari: sono sa ginsiling sang imo alagad, amo ini.

36 Kag nahanabu, sa gilayon nga nakatapus sia sa pagpamolong, nga, yari karon, ang mga anak nga lalaki sang hari nag-abut, kag nagbayaw sang ila tingug kag naghinibi: kag ang hari man kag ang tanan niya nga alagad naghinibi sing tama gid.

37 ś Apang si Absalom nagpalagyo, kag nagkadto kay Talmai, nga anak nga lalaki ni Amihud, hari sang Gesur. Kag si David naglalaw tungud sa iya anak adlawadlaw.

38 Gani si Absalom nagpalagyo, kag nagkadto sa Gesur, kag yadto didto sing tatlo ka tuig.

39 Kag nahidlaw ang kalag ni haring David sa pagkadto kay Absalom: kay ginlipay sia nahanungud kay Amnon, kay patay na sia.

KAPITULO 14

KARON nahantup ni Joab nga anak nga lalaki ni Seruia nga ang tagiposoon sang hari ayon kay Absalom.

2 Kag si Joab nagpadala sa Tekoa, kag nagpakuha didto sing isa ka babaye nga maalamon, kag nagsiling sa iya, Ginaampo ko sa imo, magpakamanuglalaw ka, kag magsuklub karon sing panapton sa lalaw, kag dili ka magpanghaplas sing lana, kondi magpakasubong ka sang babaye nga naglalaw sing malawig nga tion tungud sa patay:

3 Kag magsulud ka sa hari, kag magpamolong sa iya sa sini nga bagay. Gani ginbutang ni Joab ang mga polong sa iya baba.

4 ś Kag sang nagpamolong sa hari ang babaye sang Tekoa, naghapa sia sa duta, kag nagyaub, kag nagsiling, Tabang, O hari.

5 Kag ang hari nagsiling sa iya, Ano bala ang ginabatyag mo? Kag nagsabat sia, Ako sa pagkamatuud balong babaye, kag ang akon bana napatay.

6 Kag ang imo alagad may duha ka anak nga lalaki, kag sila nga duha nag-away sa latagon, kag wala sing bisan sin-o nga matambag sa ila, apang ginlabo sang isa ang isa, kag ginpatay sia.

7 Kag, yari karon, ang bug-os nga panimalay nagtindug batok sa imo alagad, kag nagsiling sila, Itugyan ang nagpatay sa iya utud, agud nga mapatay namon sia, tungud sa kabuhi sang iya utud nga iya ginpatay; kag laglagon namon ang manunubli man: kag sa sini palongon nila ang akon baga nga nabilin, kag indi magbilin sa akon bana sing ngalan ukon salin sa kadaygan sang duta.

8 Kag ang hari nagsiling sa babaye, Pauli ka sa imo balay, kag ako magatugon nahanungud sa imo.

9 Kag ang babaye sang Tekoa nagsiling sa hari, Akon ginoo, O hari, ang kasal-anan maholog sa akon, kag sa panimalay sang akon amay: kag ang hari kag ang iya trono manginwala sing sala.

10 Kag ang hari nagsiling, Ang bisan sin-o nga magsiling sing bisan ano sa imo, dalha sia sa akon, kag indi na sia makahilabut sa imo.

11 Niyan nagsiling sia, Ginaampo ko sa imo, ang hari magpanumdum sa GINOO nga imo Dios, agud nga ang mga manugtimalus sang dugo indi na maglaglag, basi nga laglagon nila ang akon anak. Kag nagsiling sia, Sa nagakabuhi ang GINOO, wala sing maholog sa duta nga bisan isa ka bohok sang olo sang imo anak.

12 Niyan ang babaye nagsiling, Ginaampo ko sa imo, pahambala ang imo alagad sing isa ka polong sa akon ginoo nga hari. Kag sia nagsiling, Isiling.

13 Kag ang babaye nagsiling, Ngaa bala niyan nga nakahunahuna ka sing amo nga butang batok sa katawohan sang Dios? kay ang hari nagapamolong sining butang kasubong sang isa nga malinapason, nga ang hari wala magpapauli sang iya tinapok.

14 Kay kita kinahanglan nga mapatay, kag subong sang tubig nga naula sa duta, nga indi na matipon liwat; kag ang Dios wala nagapasulabi sa bisan sin-o: apang nagapahito sia sing kalalangan, agud nga ang iya tinapok indi manginsinikway gikan sa iya.

15 Busa karon sa ginatan-aw nga ako nagkari sa pagpamolong sini nga butang sa akon ginoo nga hari, ini bangud nga ang katawohan nagpahadluk sa akon: kag ang imo alagad nagsiling, Magapamolong ako karon sa hari; ayhan ang hari magahimo sang pangabay sang iya alagad.

16 Kay ang hari magapamati, sa pagluwas sang iya alagad gikan sa kamut sang tawo nga buut maglaglag sa akon kag sa akon anak sing tingub gikan sa panublion sang Dios.

17 Niyan ang imo alagad nagsiling, Ang polong sang akon ginoo nga hari manginkalinongan sa karon: kay subong sang anghel sang Dios, amo ini ang akon ginoo nga hari sa paghibalo sang maayo kag malain: busa ang GINOO nga imo Dios manginkaupud mo.

18 Niyan ang hari nagsabat kag nagsiling sa babaye, Indi pag-ilikum sa akon, ginaampo ko sa imo, ang butang nga akon ipamangkot sa imo. Kag ang babaye nagsiling, Magpamolong karon ang akon ginoo nga hari.

19 Kag ang hari nagsiling, Indi bala upud sa imo ang kamut ni Joab sa sini tanan? Kag ang babaye nagsabat kag nagsiling, Sa nagakabuhi ang imo kalag, ginoo ko nga hari, wala sing makalipas sa too ukon sa wala sang bisan ano nga napamolong sang akon ginoo nga hari: kay ang imo alagad nga si Joab, sia nagsogo sa akon, kag sia nagbutang sa baba sang imo alagad sini tanan nga polong:

20 Sa paghimo sining sahi sang pamolongpolong ginhimo ini ni Joab nga imo alagad: kag ang akon ginoo maalam, sono sa kaalam sang anghel sang Dios, sa pagkilala sang tanan nga butang nga yara sa duta.

21 ś Kag ang hari nagsiling kay Joab, Yari karon, ako naghimo sini nga butang: busa lakat ka, pabalika ang pamatan-on nga lalaki nga si Absalom.

22 Kag si Joab naghapa sa duta, kag nagyaub, kag nagpasalamat sa hari: kag si Joab nagsiling, Karon nga adlaw nakilala sang imo alagad nga ako nakapahamuut sa imo itololok, ginoo ko, O hari, kay ang hari naghimo sang pangabay sang iya alagad.

23 Gani si Joab nagtindug kag nagkadto sa Gesur, kag gindala si Absalom sa Jerusalem.

24 Kag ang hari nagsiling, Papauli-a sia sa iya kaugalingon nga balay, kag dili sia pagpatan-awa sang akon nawung. Gani si Absalom nagpauli sa iya kaugalingon nga balay, kag wala makakita sang nawung sang hari.

25 ś Apang sa bug-os nga Israel wala sing dalayawon pa subong kay Absalom tungud sang iya kaayoayo: kutub sa dapadapa sang iya tiil tubtub sa alimpudwan sang iya olo wala sing kasawayan sa iya.

26 Kag kon maggunting sia sang bohok sang iya olo, (kay ginaguntingan niya ini sa katapusan sang tagsa ka tuig: bangud nga mabug-at ang bohok sa iya, busa ginguntingan niya ini:) gintimbang niya ang bohok sang iya olo sa duha ka gatus ka siclo, sono sa itilimbang sang hari.

27 Kag natawo kay Absalom ang tatlo ka anak nga lalaki, kag isa ka anak nga babaye, nga ginhingalanan si Tamar: maayoayo sia sing dagway nga babaye.

28 ś Gani nagpuyo si Absalom sa bug-os nga duha ka tuig sa Jerusalem, kag wala sia makakita sang nawung sang hari.

29 Busa ginpatawag ni Absalom si Joab, nga ipadala sia sa hari; apang indi sia magkadto sa iya: kag sang nagpadala sia liwat sa ikaduha, indi sia magkadto.

30 Busa nagsiling sia sa iya mga alagad, Tan-awa, ang uma ni Joab malapit sa akon, kag sia may sebada didto; lakat kamo kag tutdi ini sing kalayo. Kag gintutdan sing kalayo sang mga alagad ni Absalom ang uma.

31 Niyan nagtindug si Joab, kag nagkadto kay Absalom sa iya balay, kag nagsiling sa iya, Ngaa bala nga gintutdan sing kalayo sang imo mga alagad ang akon uma?

32 Kag si Absalom nagsabat kay Joab, Yari karon, ginpakadtoan ko ikaw, nga nagasiling, Kari diri, agud nga mapakadto ko ikaw sa hari, sa pagsiling, Ngaa bala nga nagkari ako gikan sa Gesur? maayo pa sa akon nga didto gihapon: busa karon patan-awa ako sang nawung sang hari; kag kon may kasal-anan ako, patyon niya ako.

33 Gani si Joab nagkadto sa hari, kag nagsugid sa iya: kag sang ginpatawag niya si Absalom, nagkadto sia sa hari, kag naghapa sa atubang sang hari: kag ang hari naghaluk kay Absalom.

KAPITULO 15

KAG nahanabu sa tapus sini, nga si Absalom nag-aman sa iya sing mga kangga kag mga kabayo, kag kalim-an ka lalaki sa pagdalagan sa una niya.

2 Kag si Absalom nagbangon sing aga pa, kag nagtindug sa higad sang dalan sang gawang: kag kon ang bisan sin-ong tawo nga may kasaba nagapakadto sa pagpahukom sa hari, niyan ginpatawag sia ni Absalom, kag nagsiling, Taga-diin ka bala nga siudad? Kag nagsiling sia, Ang imo alagad isa sang mga tribo sang Israel.

3 Kag si Absalom nagsiling sa iya, Tan-awa, ang imo kasaba maayo kag matarung; apang wala sing tawo nga gintugyanan sang hari nga magpamati sa imo.

4 Labut pa si Absalom nagsiling, O kon ako kuntani ang ginhimo nga hukom sa duta, agud nga magkari sa akon ang tagsa ka tawo nga may kasaba ukon kasuayon, kag himoan ko sia sing katarungan!

5 Kag kon ang bisan sin-ong tawo magpalapit sa pagyaub sa iya, gin-untay niya ang iya kamut, kag ginkaptan sia, kag ginhalukan sia.

6 Kag sa sining bagay naghimo si Absalom sa bug-os nga Israel nga nagpakadto sa pagpahukom sa hari: gani si Absalom nagbihag sang mga tagiposoon sang mga tawo sang Israel.

7 ś Kag nahanabu sa tapus sang kap-atan ka tuig, nga si Absalom nagsiling sa hari, Ginaampo ko sa imo, tuguti ako sa pagkadto kag sa pagbayad sang akon saad, nga ginsaad ko sa GINOO, sa Hebron.

8 Kay ang imo alagad nagsaad sing isa ka saad sang nagpabilin ako sa Gesur sa Siria, nga nagasiling, Kon sa pagkamatuud ang GINOO magdala sa akon liwat sa Jerusalem, niyan alagdon ko ang GINOO.

9 Kag ang hari nagsiling sa iya, Lakat sa paghidait. Gani nagtindug sia, kag nagkadto sa Hebron.

10 ś Apang si Absalom nagpadala sing mga lampitaw sa tanan gid nga tribo sang Israel, nga nagasiling, Sa gilayon nga mabatian ninyo ang tonog sang budyong, niyan magsiling kamo, Si Absalom nagahari sa Hebron.

11 Kag upud kay Absalom naglakat pagowa sa Jerusalem ang duha ka gatus ka lalaki, nga ginpangtawag; kag naglakat sila sa ila kabunayag, kag wala sila sing nahibaloan nga bisan anong butang.

12 Kag si Absalom nagpatawag kay Ahitofel nga Gilonhon, ang manuglaygay ni David, gikan sa iya siudad nga Gilo, sang nagadolot sia sang mga halad. Kag ang pagpuhon mabakud; kay ang katawohan nagdugang sing dalayon upud kay Absalom.

13 ś Kag may nag-abut nga manugbalita kay David, nga nagasiling, Ang mga tagiposoon sang mga tawo sang Israel nagasonod kay Absalom.

14 Kag si David nagsiling sa tanan niyang alagad nga upud sa iya sa Jerusalem, Tindug kamo, kag malagyo kita; kay kon indi, indi kita makapalagyo kay Absalom: dalidali kamo sa pagtaliwan, basi kon malambut niya kita sing hinali, kag magpatupa sing malaut sa aton, kag maglaglag sang siudad sa sulab sang espada.

15 Kag ang mga alagad sang hari nagsiling sa hari, Yari karon, ang imo mga alagad handa sa paghimo sang bisan anong itangdo sang akon ginoong hari.

16 Kag ang hari naggowa, kag ang bug-os niyang panimalay sa olihi niya. Kag ginbilin sang hari ang napulo ka babaye, nga iya mga oloasawa, sa pagbantay sang balay.

17 Kag ang hari naggowa, kag ang tanan nga tawo sa olihi niya, kag nagdolog sila sa duug nga malayo.

18 Kag ang tanan niyang alagad nagligad sa iya luyo; kag ang tanan nga Keretnon, kag ang tanan nga Peletnon, kag ang tanan nga Githanon, anum ka gatus ka tawo nga naghalin sa Gat nga nagsonod sa iya, nag-una sa hari.

19 ś Niyan ang hari nagsiling kay Itai nga Githanon, Ngaa bala nga nagaupud ka man sa amon? balik ka sa imo duug, kag magpabilin upud sa hari: kay ikaw dumuloong, kag tinapok man gikan sa imo duug.

20 Sa bagay nga kahapon ka lamang mag-abut, pataklaron kag padolhogon ka bala nakon upud sa amon sining adlaw? sa ginatan-aw nga nagakadto ako kon diin ako sarang makakadto, balik ka, kag dalha pabalik ang imo mga utud: ang pagkalooy kag ang kamatooran manginkaupud nimo.

21 Kag si Itai nagsabat sa hari, kag nagsiling, Sa nagakabuhi ang GINOO, kag sa nagakabuhi ang akon ginoong hari, sa pagkamatuud sa bisan anong duug nga didto ang akon ginoong hari, bisan sa kamatayon ukon sa kabuhi, didto man ang imo alagad.

22 Kag si David nagsiling kay Itai, Lakat kag magtabok. Kag nagtabok si Itai nga Githanon, kag ang tanan niya nga tawo, kag ang tanan nga magamay nga upud sa iya.

23 Kag ang bug-os nga duta naghibi sa matonog nga tingug, kag nagtabok ang bug-os nga katawohan: ang hari man nagtabok sa sapa nga Kidron, kag ang bug-os nga katawohan nagtabok, nayon sa dalan sang kamingawan.

24 ś Kag yari karon si Sadoc man, kag ang tanan nga Levinhon upud sa iya, nga nagadala sang arka sang katipan sang Dios: kag ginpahamtang nila ang arka sang Dios; kag si Abiatar nagtaklad, tubtub nga ang bug-os nga katawohan nakatapus sa paggowa sa siudad.

25 Kag ang hari nagsiling kay Sadoc, Pas-ana pabalik ang arka sang Dios sa siudad: kon ako makakita sing kahamuut sa mga mata sang GINOO, sia magapabalik sa akon, kag magapakita sa akon sini, kag sang iya puluy-an:

26 Apang kon sia magsiling sing subong sini, Wala ako sing kahamuut sa imo; yari karon, yari ako, himoon niya sa akon ang maayo sa iya.

27 Nagsiling man ang hari kay Sadoc nga pari, Indi bala ikaw ang manugpanan-aw? balik ka sa siudad sa paghidait, kag ang inyo duha ka anak nga lalaki upud sa imo, ang imo anak nga si Ahimaaz, kag si Jonatan nga anak ni Abiatar.

28 Tan-awa, ako magahulat sa mga kapatagan sang kamingawan, tubtub nga may mag-abut nga polong gikan sa inyo sa pagpahibalo sa akon.

29 Gani ginyayongan ni Sadoc kag ni Abiatar ang arka sang Dios pabalik sa Jerusalem: kag nagpabilin sila didto.

30 ś Kag si David nagtaklad sa taklaran sang bukid nga Olivo, kag naghibi sang nagtaklad sia, kag ang iya olo natabonan, kag naglakat nga tiil lamang: kag ang bug-os nga katawohan nga yara upud sa iya nagtabon ang tagsa ka tawo sang iya olo, kag nagtaklad sila, nga nagahibi sang nagtaklad sila.

31 ś Kag nagsugid kay David ang isa, nga nagasiling, Si Ahitofel yara sa tunga sang mga manugpuhon upud kay Absalom. Kag si David nagsiling, O GINOO, ginaampo ko sa imo, liso-a sa kabuangon ang laygay ni Ahitofel.

32 ś Kag nahanabu, nga sang nakasap-ong si David sa putokputokan sang bukid, diin ginsimba niya ang Dios, yari karon, si Husai nga Arquinhon nagsamput sa pagsugata sa iya nga ang iya bayo nakusnit, kag dutaon ang iya olo:

33 Sa iya nagsiling si David, Kon maglakat ka upud sa akon, niyan manginlulan ka nakon:

34 Apang kon magbalik ka sa siudad, kag magsiling kay Absalom, Ako mangin-imo alagad, O hari; subong nga nangin-alagad ako anay sang imo amay, sa amo karon mangin-alagad mo ako: niyan madaug mo nga sa akon ang laygay ni Ahitofel.

35 Kag wala bala didto upud sa imo si Sadoc kag si Abiatar nga mga pari? gani ang bisan ano nga butang nga imo mabatian sa balay sang hari, isugid mo ini kay Sadoc kag kay Abiatar nga mga pari.

36 Yari karon, yadto sila didto upud sa ila ang ila duha ka anak nga lalaki, si Ahimaaz nga anak ni Sadoc, kag si Jonatan nga anak ni Abiatar; kag paagi sa ila ipadala ninyo sa akon ang tagsa ka butang nga inyo mabatian.

37 Gani si Husai nga abyan ni David nagpauli sa siudad, kag si Absalom nagkadto sa Jerusalem.

KAPITULO 16

KAG sang si David nakaligad sing diotay sa putokputokan sang bakolod, yari karon, si Siba nga alagad ni Mefiboset nagsugata sa iya, upud sang duha ka asno nga nasiyahan, kag sa ila may duha ka gatus ka bilog nga tinapay, kag isa ka gatus ka pinungpung nga pasas, kag isa ka gatus nga bunga sa tingadlaw, kag isa ka suludlan sang alak.

2 Kag ang hari nagsiling kay Siba, Ano bala ang buut mo isiling sini? Kag si Siba nagsiling, Ang mga asno salakyan sang panimalay sang hari; kag ang tinapay kag ang mga bunga sa tingadlaw kalan-on sang mga pamatan-on nga lalaki; kag ang alak, agud nga mainum sang mga napunaw sa kamingawan.

3 Kag ang hari nagsiling, Kag diin bala ang anak nga lalaki sang imo agalon? Kag si Siba nagsiling sa hari, Yari karon, nagapabilin sia sa Jerusalem: kay nagsiling sia, Karon nga adlaw igauli sa akon sang panimalay sang Israel ang ginharian sang akon amay.

4 Niyan ang hari nagsiling kay Siba, Yari karon, imo ang tanan nga naigo kay Mefiboset. Kag si Siba nagsiling, Ako sing mapainubuson nagapakilooy sa imo nga manginkalahamut-an ako sa imo itololok, ginoo ko, O hari.

5 ś Kag sang nag-abut si haring David sa Bahurim, yari karon, naggowa gikan didto ang isa ka tawo sang panimalay sang balay ni Saul, nga ginhingalanan Simei, ang anak nga lalaki ni Gera: naggowa sia, kag nagpakamalaut sia sing dalayon sa pag-abut niya.

6 Kag naghaboy sia sing mga bato kay David, kag sa tanan nga alagad ni haring David: kag ang tanan nga katawohan kag ang tanan nga gamhanan nga tawo yara sa iya too kag sa iya wala.

7 Kag amo ini ang ginsiling ni Simei sang nagpakamalaut sia, Kari, kari, ikaw nga lalaki nga dugoon, kag ikaw nga tawo ni Belial:

8 Ang GINOO nagpabalik sa imo sang tanan nga dugo sa balay ni Saul, nga sa tal-us niya naghari ka; kag ang GINOO nagtugyan sang ginharian sa kamut sang imo anak nga si Absalom: kag, yari karon, nadakup ka sa imo kaugalingon nga kalain, bangud nga tawo ka nga dugoon.

9 ś Niyan si Abisai nga anak nga lalaki ni Seruia nagsiling sa hari, Ngaa bala nga magpakamalaut ini nga patay nga ido sa akon ginoo nga hari? pakadto-a ako, ginaampo ko sa imo, kag punggolon ang iya olo.

10 Kag ang hari nagsiling, Ano bala ang labut ko sa inyo, kamo nga mga anak nga lalaki ni Seruia? gani magpakamalaut sia, bangud nga ang GINOO nagsiling sa iya, Pakamalauta si David. Sin-o bala niyan ang magasiling, Ngaa bala ginhimo mo ang subong?

11 Kag si David nagsiling kay Abisai, kag sa tanan niya nga alagad, Yari karon, ang akon anak, nga naggowa sa akon mga kasudlan, nagatinguha sang akon kabuhi: daw ano pa gid bala karon ang himoon sini nga Benjaminhon? pabayai sia, kag papakamalauta sia; kay ang GINOO nagsogo sa iya.

12 Ayhan ang GINOO magtamud sa akon kapipit-an, kag balusan ako sang GINOO sing maayo tungud sang iya pagpakamalaut sini nga adlaw.

13 Kag sang si David kag ang iya mga tawo naglakat sa dalanon, si Simei nag-ubay sa kilid sang bakolod sa atubang niya, kag sang naglakat nagpakamalaut, kag naghaboy sing mga bato sa iya, kag nagsabwag sing yab-ok.

14 Kag ang hari, kag ang bug-os nga katawohan nga upud niya, nag-abut nga lapyo, kag nagpaumpaw sila didto.

15 ś Kag si Absalom, kag ang bug-os nga katawohan nga mga lalaki sang Israel, nag-abut sa Jerusalem, kag upud sa iya si Ahitofel.

16 Kag nahanabu, sang si Husai nga Aquinhon, abyan ni David, nag-abut kay Absalom, nga nagsiling si Husai kay Absalom, Magluwas ang Dios sa hari, magluwas ang Dios sa hari.

17 Kag si Absalom nagsiling kay Husai, Kalolo mo bala ini sa imo abyan? ngaa bala nga wala ka mag-upud sa imo abyan?

18 Kag si Husai nagsiling kay Absalom, Indi; kondi ang ginpili sang GINOO, kag sini nga katawohan, kag sang tanan nga tawo sang Israel, mangin-iya ako, kag sa iya magapabilin ako.

19 Kag liwat, sin-o bala ang dapat ko nga alagdon? indi bala dapat ako mag-alagad sa atubang sang iya anak? subong nga nakaalagad ako sa atubang sang imo amay, manginsubong ako sa imo atubang.

20 ś Niyan si Absalom nagsiling kay Ahitofel, Ihatag ang inyo laygay kon ano ang aton himoon?

21 Kag si Ahitofel nagsiling kay Absalom, Hiusa ka sa mga oloasawa sang imo amay, nga ginbilin niya sa pagbantay sang balay; kag ang bug-os nga Israel makabati nga ginkangil-aran ka sang imo amay: niyan magabakud ang mga kamut sang tanan nga nagaupud sa imo.

22 Gani naghumlad sila sing layanglayang nga kay Absalom sa ibabaw sang atop sang balay; kag si Absalom naghiusa sa mga oloasawa sang iya amay sa itololok sang bug-os nga Israel.

23 Kag ang laygay ni Ahitofel, nga ginhatag niya sadto nga mga adlaw, subong nga nagapamangkot ang tawo sa oraculo sang Dios: amo ini ang tanan nga laygay ni Ahitofel kay David kag kay Absalom.

KAPITULO 17

LABUT PA si Ahitofel nagsiling kay Absalom, Tuguti ako nga magpili karon sing napulog duha ka libo ka tawo, kag magtindug ako kag maglagas kay David sini nga gab-i:

2 Kag malambut ko sia samtang sia lapyo kag maluya sing mga kamut, kag pahadlukon sia: kag ang bug-os nga katawohan nga nagaupud sa iya magapalagyo; kag patyon ko ang hari lamang:

3 Kag pabalikon ko ang bug-os nga katawohan sa imo: ang tawo nga imo ginapangita subong nga daw nagbalik sila tanan: gani ang bug-os nga katawohan magalinong.

4 Kag ang pinamolong nagpahamuut sing maayo kay Absalom, kag sa tanan nga tigulang sang Israel.

5 Niyan si Absalom nagsiling, Tawga man karon si Husai nga Arquinhon, kag mamati man kita sang iya ginasiling.

6 Kag sang pag-abut ni Husai kay Absalom, nagpamolong si Absalom sa iya, nga nagasiling, Si Ahitofel nagpamolong sono sini nga bagay: magahimo kita bala sono sa iya ginasiling? kon indi, pamolong ka.

7 Kag si Husai nagsiling kay Absalom, Ang laygay nga ginhatag ni Ahitofel indi maayo sa sining tion.

8 Kay, nagsiling si Husai, ikaw nakahibalo nga ang imo amay kag ang iya mga tawo, mga tawo nga gamhanan, kag naakig sila sa ila mga panghunahuna, subong sang oso nga ginkuhaan sang iya mga totoy sa latagon: kag ang imo amay lalaki sang pag-awayan, kag indi magpabilin upud sa katawohan.

9 Yari karon, sia nagapanago karon sa isa ka boho, ukon sa iban nga duug: kag mahanabu, kon ang iban sa ila mapukan sa kamunoan, nga ang bisan sin-o nga makabati sini magasiling, May pagpamatay sa mga tawo nga nagasonod kay Absalom.

10 Kag bisan sia nga maisug, nga ang iya tagiposoon subong sang tagiposoon sang leon, magakatunaw sing bug-os: kay ang bug-os nga Israel nakahibalo nga ang imo amay tawo nga gamhanan, kag ang mga nagaupud sa iya mga tawo nga isganan.

11 Busa nagalaygay ako nga ang bug-os nga Israel magtipon sa imo, kutub sa Dan tubtub sa Beer-seba, sa kadamuon subong sang balas nga yara sa baybayon sang dagat; kag nga ikaw imo sa kaugalingon magkadto sa inaway.

12 Gani magalambut kita sa iya sa duug diin sia masapwan, kag magatupa kita sa iya subong sang pagtolo sang ton-og sa duta: kag sa iya kag sa tanan nga tawo nga nagaupud sa iya walay mabilin bisan isa lamang.

13 Labut pa, kon magdangup sia sa isa ka siudad, niyan ang bug-os nga Israel magadala sing mga kalat sa sadto nga siudad, kag guyuron naton ini pakadto sa suba, tubtub nga wala sing makita didto bisan isa ka diotay nga bato.

14 Kag si Absalom kag ang tanan nga tawo sang Israel nagsiling, Ang laygay ni Husai nga Arquinhon maayo pa sa laygay ni Ahitofel. Kay ang GINOO nagtangdo sa paglutus sang maayo nga laygay ni Ahitofel, sa katuyoan nga ang GINOO makadala sing malaut kay Absalom.

15 ś Niyan si Husai nagsiling kay Sadoc kag kay Abiatar nga mga pari, Amo ini kag amo ini ang ginlaygay ni Ahitofel kay Absalom kag sa mga tigulang sang Israel; kag amo ini kag amo ini ang ginlaygay ko.

16 Busa karon magpadala sa madali, kag sugiri si David, nga nagasiling, Dili ka magpabilin sini nga gab-i sa mga kapatagan sang kamingawan, kondi magtabok ka gid nga mas-a; basi nga ang hari lamonon, kag ang bug-os nga katawohan nga nagaupud sa iya.

17 Karon si Jonatan kag si Ahimaaz nagpabilin sa En-rogel; kay indi sila dapat makita sa pagsulud sa siudad: kag ang isa ka dalaga nagkadto kag nagsugid sa ila; kag nagkadto sila kag nagsugid kay haring David.

18 Apang nakita sila sang isa ka bata nga lalaki, kag nagsugid kay Absalom: apang naglakat sila nga duha sing dali-dali, kag nag-abut sa balay sang isa ka tawo sa Bahurim, nga may bobon sa iya luwang; didto nagpanaug sila.

19 Kag ang babaye nagkuha kag naghumlad sing italabon sa ibabaw sang baba sang bobon, kag ginkay-agan sa ibabaw sang uyas nga ginaling; kag ang butang wala mahibaloi.

20 Kag sang nag-abut ang mga alagad ni Absalom sa babaye sa balay, nagsiling sila, Diin bala si Ahimaaz kag si Jonatan? Kag ang babaye nagsiling sa ila, Nakatabok na sila sa sapa sang tubig. Kag sang ginpangita nila kag wala sila makita, nagpauli sila sa Jerusalem.

21 Kag nahanabu, sang nakataliwan na sila, nga naggowa sila sa bobon, kag naglakat kag nagsugid kay haring David, kag nagsiling kay David, Tindug, kag magtabok sa tubig sing dalidali: kay amo ini ang ginlaygay ni Ahitofel batok sa inyo.

22 Niyan si David nagtindug, kag ang bug-os nga katawohan nga nagaupud sa iya, kag nagtabok sila sa Jordan: sang pagpamanagbanag wala sing bisan isa nga nakulang sa ila nga wala makatabok sa Jordan.

23 ś Kag sang nakita ni Ahitofel nga wala pagsonda ang iya laygay, nagsiya sia sang iya asno, kag nagtindug, kag nagpauli sa iya balay, sa iya siudad, kag ginpahamtang niya sing nagakaigo ang iya panimalay, kag nagbitay sang iya kaugalingon, kag napatay, kag ginlubung sa lulubngan sang iya amay.

24 Niyan si David nag-abut sa Mahanaim. Kag si Absalom nagtabok sa Jordan, sia kag ang tanan nga tawo sang Israel upud sa iya.

25 ś Kag si Absalom naghimo kay Amasa nga kapitan sang kasoldadosan sa tal-us ni Joab: ining si Amasa anak nga lalaki sang tawo, nga ginhingalanan Itra nga Israelnon, nga naghiusa kay Abigail nga babaye nga anak ni Nahas, babaye nga utud ni Seruia, iloy ni Joab.

26 Gani ang Israel kag si Absalom nagpahamtang sa duta sang Galaad.

27 ś Kag nahanabu, sang pag-abut ni David sa Mahanaim, nga si Sobi nga anak nga lalaki ni Nahas sang Raba gikan sa mga anak ni Amon, kag si Maquir nga anak nga lalaki ni Ameil sang Lo-debar, kag si Barsilai nga Galaadnon sang Rogelim,

28 Nagdala sing mga higdaan, kag mga batiya, kag mga suludlan nga daga, kag trigo, kag sebada, kag harina, kag uyas nga sinanlag, kag mga liso nga kulusiparon, kag mga lentejas, kag mga liso nga kulusiparon nga sinanlag,

29 Kag dugus, kag mantekilya, kag mga carnero, kag keso gikan sa kabakahan, nga kaonon ni David kag sang katawohan nga nag-upud sa iya: kay nagsiling sila, Ang katawohan nagutum, kag lapyo, kag nauhaw, sa kamingawan.

KAPITULO 18

KAG si David nag-isip sang katawohan nga nag-upud sa iya, kag nagbutang sing mga kapitan sang mga linibo kag mga kapitan sang mga ginatus labaw sa ila.

2 Kag ginpadala ni David ang ikatlong bahin sang katawohan sa idalum sang kamut ni Joab, kag ang isa ka ikatlo nga bahin sa idalum sang kamut ni Abisai nga anak nga lalaki ni Seruia, utud ni Joab, kag ang isa ka ikatlo nga bahin sa idalum sang kamut ni Itai nga Githanon. Kag ang hari nagsiling sa katawohan, Ako gid magagowa man upud sa inyo.

3 Apang ang katawohan nagsiling, Dili ka maggowa: kay kon kami malagyo, indi sila magkabalaka sa amon; kag kon ang katunga sa amon mapatay, indi sila magkabalaka sa amon: apang karon ikaw timbang sing napulo ka libo sa amon: busa karon maayo pa nga magbulig ka sa amon sa paggowa sa siudad.

4 Kag ang hari nagsiling sa ila, Himoon ko ang maayo gid sa inyo. Kag nagtindug ang hari sa luyo sang gawang, kag naggowa ang bug-os nga katawohan sa mga ginatus kag sa mga linibo.

5 Kag ang hari nagsogo kay Joab kag kay Abisai kag kay Itai, nga nagasiling, Dalhi ninyo sing kahumok tungud sa akon ang pamatan-on nga lalaki, nga si Absalom. Kag ang bug-os nga katawohan nakabati sang nagtugon ang hari sa tanan nga kapitan nahanungud kay Absalom.

6 ś Gani naggowa ang katawohan sa latagon batok sa Israel: kag ang inaway yara sa kagulangan sang Efraim;

7 Didto ang katawohan sang Israel ginlaglag sa atubang sang mga alagad ni David, kag may daku nga pagpamatay didto sang duha ka pulo ka libo ka tawo sadto nga adlaw.

8 Kay ang inaway didto naglapnag sa kadaygan sang bug-os nga duta: kag ang kagulangan naghalunhon sing madamu pa nga katawohan sang sa ginhalunhon sang espada.

9 ś Kag nasugata ni Absalom ang mga alagad ni David. Kag si Absalom nagsakay sa mula, kag ang mula nagsuhot sa idalum sang mga sanga nga daku sang isa ka daku nga terebinto, kag nakasangit ang iya olo sa terebinto, kag nagkabit sia sa tunga sang langit kag duta; kag ang mula nga iya ginasakyan nagpadayon.

10 Kag nakita ini sang isa ka tawo, kag nagsugid kay Joab, kag nagsiling, Yari karon, nakita ko si Absalom nga nagakabit sa terebinto.

11 Kag si Joab nagsiling sa tawo nga nagsugid sa iya, Kag, yari karon, nakita mo sia, kag ngaa bala nga wala mo sia pagpatya didto sa duta? kag nahatagan ko ikaw kuntani sing napulo ka siclo nga pilak, kag isa ka wagkus.

12 Kag ang tawo nagsiling kay Joab, Bisan magbaton ako sing isa ka libo ka siclo nga pilak sa akon kamut, apang indi ko gid pag-untayon ang akon kamut batok sa anak sang hari: kay sa aton palamatin-an nagtugon ang hari sa imo kag kay Abisai kag kay Itai, nga nagasiling, Mag-andam nga wala sing magtandug sa pamatan-on nga lalaki nga si Absalom.

13 Sa isa ka bagay, kon ako nagpatay sa iya, nakahimo ako kunta sang butang batok sa akon kaugalingon nga kabuhi: kay wala sing butang nga matago sa hari, kag ikaw gid kunta magamangin saksi batok sa akon.

14 Niyan si Joab nagsiling, Indi ako magpaawat sing subong sa imo. Kag nagdala sia sing tatlo ka baslay sa iya kamut, kag ginbuno ini sila sa tagiposoon ni Absalom, sang buhi pa sia sa tunga sang terebinto.

15 Kag si Absalom ginlibutan sang napulo ka pamatan-on nga lalaki nga nagdala sang hinganib ni Joab kag ginlabo sia, kag ginpatay sia.

16 Kag si Joab nagpatonog sang budyong, kag ang katawohan nagbalik gikan sa paglagas sang Israel: kay si Joab nagpugung sang katawohan.

17 Kag ginkuha nila si Absalom, kag ginholog sia sa daku nga boho sa kagulangan, kag gintampokan sa ibabaw niya sing daku gid nga tinumpok nga mga bato: kag ang bug-os nga Israel nagpalagyo ang tagsatagsa sa iya layanglayang.

18 ś Karon si Absalom sa iya pagkabuhi nagkuha kag nagpatindug nga sa iya sing haligi, nga yara sa nalupyakan sang hari: kay nagsiling sia, Ako wala sing anak nga lalaki nga magtipig sang handumanan sang akon ngalan: kag gintawag niya ang haligi sa iya kaugalingon nga ngalan: kag gintawag ini tubtub sini nga adlaw, ang duug ni Absalom.

19 ś Niyan si Ahimaaz nga anak nga lalaki ni Sadoc nagsiling, Tuguti ako karon nga magdalagan, kag magdala sing mga balita sa hari, kon paano sia gintimalus sang GINOO sa iya mga kaaway.

20 Kag si Joab nagsiling sa iya, Dili ka magdala sing mga balita sini nga adlaw, kondi magdala ka sing mga balita sa iban nga adlaw: apang sini nga adlaw dili ka magdala sing mga balita, bangud nga ang anak sang hari napatay.

21 Niyan si Joab nagsiling kay Cusi, Lakat, sugiri ang hari sang nakita mo. Kag si Cusi nagyaub kay Joab, kag nagdalagan.

22 Niyan si Ahimaaz nga anak nga lalaki ni Sadoc nagsiling liwat kay Joab, Bisan magkaano, ginaampo ko sa imo, padalagana man ako sa olihi ni Cusi. Kag si Joab nagsiling, Ngaa bala madalagan ka, anak ko, sa ginatan-aw nga wala ka sing mga balita nga naaman?

23 Bisan magkaano, nagsiling sia, padalagana ako. Kag sia nagsiling sa iya, Dalagan. Niyan nagdalagan si Ahimaaz sa dalanon sang kapatagan, kag nalumba-an si Cusi.

24 Kag si David naglingkod sa ulut sang duha ka gawang: kag ang manugbantay nagsaka sa atop sang gawang sa kuta, kag nagbayaw sang iya mga mata, kag naglantaw, kag nakita niya ang tawo nga nagadalagan nga isa lamang.

25 Kag ang manugbantay nagsinggit, kag nagsugid sa hari. Kag ang hari nagsiling, Kon isa lamang sia, may mga balita sa iya baba. Kag nagdasigdasig sia, kag nagpalapit.

26 Kag ang manugbantay nakakita sing isa pa ka tawo nga nagadalagan: kag ang manugbantay nagpanawag sa bantay sang gawang, kag nagsiling, Yari karon ang isa pa ka tawo nga nagadalagan nga isa lamang. Kag ang hari nagsiling, Sia man nagadala sing mga balita.

27 Kag ang manugbantay nagsiling, Banta ko ang pagdalagan sang nahauna kaangay sang pagdalagan ni Ahimaaz nga anak nga lalaki ni Sadoc. Kag nagsiling ang hari, Sia tawo nga maayo, kag nagaabut nga may maayo nga mga balita.

28 Kag si Ahimaaz nagtawag, kag nagsiling sa hari, Ang tanan maayo. Kag naghapa sia sa duta sa atubangan sang hari, kag nagsiling, Pakamaayohon ang GINOO nga imo Dios, nga nagtugyan sang mga tawo nga nagbayaw sang ila kamut batok sa akon ginoo nga hari.

29 Kag ang hari nagsiling, Maayo pa bala si Absalom nga pamatan-on nga lalaki? Kag si Ahimaaz nagsabat, Sang si Joab nagpadala sang alagad sang hari, kag ako nga imo alagad, nakita ko ang daku nga kinagubut, apang wala ako makahibalo kon ano yadto.

30 Kag ang hari nagsiling sa iya, Pahigad ka, kag tindug diri. Kag sia nagpahigad, kag nagpahimonong.

31 Kag, yari karon, si Cusi nag-abut; kag si Cusi nagsiling, Mga balita, ginoo ko nga hari: kay ang GINOO nagtimalus nga sa imo sini nga adlaw sa tanan nga nagtindug batok sa imo.

32 Kag ang hari nagsiling kay Cusi, Maayo pa bala si Absalom nga pamatan-on nga lalaki? Kag si Cusi nagsabat, Ang mga kaaway sang akon ginoo nga hari, kag ang tanan nga magtindug batok sa imo sa pagdaut sa imo, manginsubong sadto nga pamatan-on nga lalaki.

33 ś Kag ang hari natandug gid, kag nagsaka sa hulut sa ibabaw sang gawang, kag naghibi: kag sang naglakat sia, nagsiling sia sing subong, O anak ko nga Absalom, anak ko, anak ko nga Absalom! buut ko sa Dios kuntani nga ako napatay nga sa imo, O Absalom, anak ko, anak ko!

KAPITULO19

KAG ginsugid ini kay Joab, Yari karon, ang hari nagahibi kag nagalalaw tungud kay Absalom.

2 Kag sadto nga adlaw ang kadalag-an nabaylo sa paglalaw sa bug-os nga katawohan: kay nakabati ang katawohan nga ginsiling sadto nga adlaw nga ang hari nagakalisud tungud sa iya anak.

3 Kag ang katawohan nagsulud sing kawat sa siudad sa sadtong adlaw, subong sang pagpalagyo sing kawat sang katawohan nga nahuya kon nagapalagyo sila sa inaway.

4 Apang ang hari nagtabon sang iya nawung, kag ang hari nagsinggit sa matonog nga tingug, O anak ko nga Absalom, O Absalom, anak ko, anak ko!

5 Kag si Joab nagsulud sa balay sa hari, kag nagsiling, Sini nga adlaw ginpakahuy-an mo ang mga nawung sang tanan mo nga alagad, nga sa sini nga adlaw nagluwas sang imo kabuhi, kag sang mga kabuhi sang imo mga anak nga lalaki kag sang imo mga anak nga babaye, kag sang mga kabuhi sang imo mga asawa, kag sang mga kabuhi sang imo mga oloasawa;

6 Bangud nga nagahigugma ka sa imo mga kaaway, kag nagadumut sa imo mga abyan. Kay sini nga adlaw nagpahayag ka, nga wala ikaw nagasapak sang mga prinsipe ukon mga alagad: kay sini nga adlaw nahantup ko, nga kon si Absalom nabuhi, kag kami tanan napatay sini nga adlaw, niyan nagpahamuut ini kuntani sa imo sing maayo.

7 Busa karon tindug, gowa ka, kag magpamolong sing paglipay sa imo mga alagad: kay nagasumpa ako tungud sa GINOO, kon indi ka maggowa, wala sing isa nga mapabilin sa imo sini nga gab-i: kag ini manginlabi pa kalain sa imo sang sa bug-os nga malaut nga nahanabu sa imo kutub sang imo pagkapamatan-on tubtub karon.

8 Niyan nagtindug ang hari, kag naglingkod sa gawang. Kag nagsugid sila sa bug-os nga katawohan, nga nagasiling, Yari karon, ang hari nagalingkod sa gawang. Kag nag-abut ang bug-os nga katawohan sa atubang sang hari: kay ang Israel nagpalagyo ang tagsa ka tawo pakadto sa iya layanglayang.

9 ś Kag ang bug-os nga katawohan nagsinuay sa bug-os sang tanan nga tribo sang Israel, nga nagasiling, Ang hari nagluwas sa aton sa kamut sang aton mga kaaway, kag sia nagluwas sa aton sa kamut sang mga Filistinhon; kag karon nagpalagyo sia sa duta bangud kay Absalom.

10 Kag si Absalom, nga aton ginhaplas sa ibabaw naton, napatay sa inaway. Busa karon ngaa bala nga wala kamo magpamolong sing isa ka polong sa pagpabalik sang hari?

11 ś Kag si haring David nagpadala kay Sadoc kag kay Abiatar nga mga pari, nga nagasiling, Ipamolong sa mga tigulang sang Juda, nga nagasiling, Ngaa bala naolihi kamo sa pagpapauli sa hari sa iya balay? sa ginatan-aw nga ang hambal sang bug-os nga Israel nag-abut na sa hari, bisan sa balay niya?

12 Kamo akon mga utud, kamo akon mga tul-an kag akon unud: ngaa bala niyan nga naolihi kamo sa pagpabalik sang hari?

13 Kag isiling ninyo kay Amasa, Indi bala ikaw akon tul-an, kag akon unud? Amo ini ang himoon sang Dios sa akon, kag labi pa man, kon indi ka manginkapitan sang kasoldadosan sa atubang nakon sing dalayon sa tal-us ni Joab.

14 Kag nabuyok niya ang tagiposoon sang tanan nga tawo sang Juda, subong sang tagiposoon sang isa ka tawo; sa bagay nga nagpadala sila sining polong sa hari, Balik ka, kag ang tanan mo nga mga alagad.

15 Gani ang hari nagpauli, kag nag-abut sa Jordan. Kag ang Juda nag-abut sa Gilgal, sa pagsugata sang hari, sa pagpatabok sang hari sa Jordan.

16 ś Kag si Simei nga anak nga lalaki ni Gera, isa ka Benjaminhon, nga taga-Bahurim, nagdalidali kag nagdulhog upud sa mga tawo sang Juda sa pagsugata kay haring David.

17 Kag upud sa iya may isa ka libo ka tawo gikan sa Benjamin, kag si Siba nga alagad sang panimalay ni Saul, kag ang iya napulo kag lima ka anak nga lalaki kag ang iya duha ka pulo ka alagad upud sa iya; kag nagtabok sila sa Jordan sing una sa hari.

18 Kag may nagtabok nga banka nga talabokan sa pagpatabok sang panimalay sang hari, kag sa paghimo sang ginapakamaayo niya. Kag si Simei nga anak nga lalaki ni Gera naghapa sa atubang sang hari, sang sia nakatabok sa Jordan;

19 Kag nagsiling sa hari, Dili ang akon ginoo magpabangud sa akon sing kasal-anan, kag dili mo pagdumdumon inang ginhimo sing binalingag sang imo alagad sang adlaw nga ang akon ginoo nga hari naggowa sa Jerusalem, nga ang hari magsapak sini sa iya tagiposoon.

20 Kay ang imo alagad nagakilala nga nakasala ako: busa, yari karon, nagkari ako sini nga adlaw nga una sa bug-os nga panimalay ni Jose sa pagdulhog sa pagsugata sang akon ginoo nga hari.

21 Apang si Abisai nga anak nga lalaki ni Seruia nagsabat kag nagsiling, Indi bala pagpatyon tungud sini si Simei, bangud nga nagpakamalaut sia sang hinaplas sang GINOO?

22 Kag si David nagsiling, Ano bala ang labut ko sa inyo, kamo nga mga anak nga lalaki ni Seruia, nga manginkasumpung kamo nakon sini nga adlaw? may patyon bala nga tawo sini nga adlaw sa Israel? kay wala bala ako makahibalo nga sini nga adlaw hari ako sa Israel?

23 Busa nagsiling ang hari kay Simei, Indi ka mapatay. Kag ang hari nagsumpa sa iya.

24 ś Kag si Mefiboset nga anak nga lalaki ni Saul nagdulhog sa pagsugata sang hari, kag wala sia makatinlo sang iya mga tiil, ukon makabanhay sang iya bungut, ukon makabunak sang iya panapton, kutub sang adlaw nga nagtaliwan ang hari tubtub sang adlaw nga nagpauli sia sa paghidait.

25 Kag nahanabu, sang nag-abut sia sa Jerusalem sa pagsugata sang hari, nga ang hari nagsiling sa iya, Ngaa bala nga wala ka mag-upud sa akon, Mefiboset?

26 Kag sia nagsabat, Akon ginoo, O hari, ang akon alagad naglimbong sa akon: kay ang imo alagad nagsiling, Pagasiyahan ko ang asno, agud nga makasakay ako sa iya, kag magkadto sa hari; kay ang imo alagad piang.

27 Kag ginbutangbutangan niya ang imo alagad sa akon ginoo nga hari; apang ang akon ginoo nga hari kasubong sang anghel sang Dios: busa himoa ang maayo sa imo mga mata.

28 Kay ang bug-os nga panimalay sang akon amay patay lamang nga mga tawo sa atubang sang akon ginoo nga hari: wala sing sapayan ginbutang mo ang imo alagad sa tunga sang mga nagakaon sa imo kaugalingon nga latok. Busa ano pa bala ang kinamatarung nga magtuaw pa ako sa hari?

29 Kag ang hari nagsiling sa iya, Ngaa bala nga nagapamolong ka pa sang mga kahimtangan mo? Ako nakasiling, Ikaw kag si Siba magbahin sang duta.

30 Kag si Mefiboset nagsiling sa hari, Hoo, ipakuha sa iya ang tanan, sa bagay nga ang akon ginoo nga hari nag-abut sa paghidait sa iya kaugalingon nga balay.

31 ś Kag si Barsilai nga Galaadnon nagdulhog gikan sa Rogelim, kag nagtabok sa Jordan upud sa hari, sa pagdol-ong sa iya sa tabok sang Jordan.

32 Karon si Barsilai tama na katigulang nga tawo, kawaloan ka tuig: kag ginsakdag niya ang hari sang didto sia sa Mahanaim; kay sia tama gid kadaku nga tawo.

33 Kag ang hari nagsiling kay Barsilai, Kari ka upud sa akon, kag pakan-on ko ikaw upud sa akon sa Jerusalem.

34 Kag si Barsilai nagsiling sa hari, Ano kalawig pa bala ang ikabuhi ko, nga ako magtaklad upud sa hari sa Jerusalem?

35 Ako sini nga adlaw kawaloan ka tuig: kag makakilala pa ako bala sang maayo kag sang malain? makapanglalim pa bala ang imo alagad sang akon ginakaon ukon ginainum? makabati pa bala ako sang tingug sang nagaamba nga mga lalaki kag nagaamba nga mga babaye? ngaa bala niyan nga manginlulan pa ang imo alagad sa akon ginoo nga hari?

36 Ang imo alagad magatabok sa unhan sang Jordan upud sa hari: kag ngaa bala nga tumbasan ako sang hari sang subong nga balus?

37 Pabalika liwat ang imo alagad, nagaampo ako sa imo, agud nga mapatay ako sa akon kaugalingon nga siudad, kag ilubung sa luyo sang lulubngan sang akon amay kag sang akon iloy. Apang yari ang imo alagad nga si Kimham; pataboka sia upud sa akon ginoo nga hari; kag himoa sa iya ang maayo sa imo.

38 Kag ang hari nagsabat, Magatabok upud sa akon si Kimham, kag himoon ko sa iya ang maayo sa imo: kag ang bisan ano nga kinahanglanon mo sa akon, ina himoon ko sa imo.

39 Kag ang bug-os nga katawohan nagtabok sa Jordan. Kag sang nakatabok ang hari, naghaluk ang hari kay Barsilai, kag ginpakamaayo sia; kag sia nagpauli sa iya kaugalingon nga duug.

40 Niyan ang hari nagpadayon pa Gilgal, kag upud sa iya nagpadayon si Kimham: kag ang bug-os nga katawohan sang Juda nagpatabok sang hari, kag ang katunga man sang katawohan sang Israel.

41 ś Kag, yari karon, ang tanan nga lalaki sang Israel nagkadto sa hari, kag nagsiling sa hari, Ngaa bala nga ang amon mga kauturan nga mga lalaki sang Juda nagkawat sa imo, kag nagpatabok sa Jordan sang hari, kag sang iya panimalay, kag sang tanan nga tawo ni David upud sa iya?

42 Kag ang tanan nga lalaki sang Juda nagsabat sa mga lalaki sang Israel, Bangud nga ang hari amon himata nga malapit: ngaa bala niyan nga naakig kamo sini nga butang? nagkaon bala kami nga mas-a sa kahinguyangon sang hari? ukon ginhatagan bala niya kami sing bisan ano nga dolot?

43 Kag nagsabat ang mga lalaki sang Israel sa mga lalaki sang Juda, kag nagsiling, May napulo kami ka bahin sa hari, kag kami man may labi pa nga kinamatarung kay David sang sa inyo: ngaa bala niyan nga ginpasipalahan ninyo kami, nga ang amon laygay wala pagbatona sing una sa pagpapauli sang aton hari? Kag ang mga polong sang mga lalaki sang Juda matigdas pa sang sa mga polong sang mga lalaki sang Israel.

KAPITULO 20

KAG nahanabu nga yadto didto ang isa ka tawo ni Belial, nga ginhingalanan Seba, ang anak nga lalaki ni Bicri, nga Benjaminhon: kag nagpatonog sia sang budyong, kag nagsiling, Wala kita sing bahin kay David, kag wala kita panublion sa anak nga lalaki ni Jesse: ang tagsa ka lalaki sa iya mga layanglayang, O Israel.

2 Gani nagtaklad gikan sa pagsonod kay David ang tagsa ka lalaki sang Israel, kag nagsonod kay Seba nga anak nga lalaki ni Bicri: apang ang mga tawo sang Juda nagbuylog sa ila hari, kutub sa Jordan tubtub sa Jerusalem.

3 ś Kag nag-abut si David sa iya balay sa Jerusalem; kag ginkuha sang hari ang napulo niya ka oloasawa nga ginbilin niya sa pagbantay sang balay, kag ginpabantayan sila, kag ginsakdag sila, apang wala na maghiusa sa ila. Gani gintakpan sila tubtub sa adlaw sang ila kamatayon, nga nagakabuhi sa pagkabalo.

4 ś Niyan nagsiling ang hari kay Amasa, Itipon ako sing tingub sang mga tawo sang Juda sa sulud sang tatlo ka adlaw, kag magtambong ka diri.

5 Gani naglakat si Amasa sa pagpatipon sing tingub sang mga tawo sang Juda: apang nagdugay sia sing kapin sa tion nga ginpat-ud niya sa iya.

6 Kag si David nagsiling kay Abisai, Karon si Seba nga anak nga lalaki ni Bicri magahimo sa aton sing labi pa nga kalainan sang ginhimo ni Absalom: kuha ka sing mga alagad sang imo ginoo, kag lagsa sia, basi pa nga makaabut sia sa mga siudad nga napamakuran, kag makapalagyo gikan sa aton.

7 Kag may naggowa sa olihi niya nga mga tawo ni Joab, kag ang mga Keretnon, kag ang mga Peletnon, kag ang tanan nga gamhanan nga lalaki: kag naggowa sila sa Jerusalem, sa paglagas kay Seba nga anak nga lalaki ni Bicri.

8 Sang didto sila sa luyo sang daku nga bato nga yara sa Gabaon, si Amasa nag-una sa ila. Kag ang panapton ni Joab nga ginpanaput niya nasuklub sa iya, kag sa sini may wagkus nga may espada nga natagub nga natakud sa iya balikawang; kag sang paggowa niya naholog ini.

9 Kag si Joab nagsiling kay Amasa, Maayo ka bala, utud ko? Kag gindakup ni Joab si Amasa sa bungut sang iya kamut nga too sa paghaluk sa iya.

10 Apang si Amasa wala magsapak sang espada nga yara sa kamut ni Joab: gani ginlabo niya sia sini sa ikalima nga gusuk, kag ginpawagay ang iya mga kasudlan sa duta, kag wala na sia paglab-a liwat; kag napatay sia. Gani si Joab kag ang iya utud nga si Abisai naglagas kay Seba nga anak nga lalaki ni Bicri.

11 Kag ang isa sang mga kalalakihan ni Joab nagtindug sa luyo niya, kag nagsiling, Ang nakauyon kay Joab, kag ang nagadampig kay David, magsonod sia kay Joab.

12 Kag si Amasa nagtubog sa dugo niya sa tunga sang daku nga dalan. Kag sang nakita sang tawo nga ang tanan nga tawo nagdolog, ginguyud niya si Amasa pagowa sa daku nga dalan pakadto sa latagon, kag gintabunan sia sing panapton, sang nakita niya nga ang tagsatagsa nga naglabay sa luyo niya nagdolog.

13 Sang nakuha sia sa daku nga dalan, ang tanan nga tawo nagsonod kay Joab, sa paglagas kay Seba nga anak nga lalaki ni Bicri.

14 ś Kag ginlatas niya ang tanan nga tribo sang Israel tubtub sa Abel, kag sa Bet-maaca, kag ang tanan nga Berhanon: kag nagtipon sila sing tingub, kag nagsonod man sa iya.

15 Kag nag-abut sila kag ginlikupan sia sa Abel sang Bet-maaca, kag nagtalampok sila sing bungyud batok sa siudad, kag ini nagtindug sa kalog nga palalipdan: kag ang bug-os nga katawohan nga upud kay Joab nagbungkal sang kuta, sa pagpukan sini.

16 ś Niyan ang babaye nga maalamon nagsinggit gikan sa siudad, Pamati, pamati; isiling kay Joab, ginaampo ko sa inyo, Magpalapit ka diri, agud nga ako makapamolong sa imo.

17 Kag sang nagpalapit sia sa babaye, nagsiling ang babaye, Ikaw bala si Joab? Kag sia nagsabat, Amo ako. Niyan nagsiling sia sa iya, Pamatii ang mga polong sang imo alagad nga babaye. Kag sia nagsabat, Nagapamati ako.

18 Niyan nagpamolong sia, nga nagasiling, Naanad sila sa pagpamolong sa dumaan nga tion, nga nagasiling, Magapangayo gid sila sing laygay sa Abel: kag sa amo gintapus nila ang butang.

19 Ako isa sang mga makidaiton kag matutum sa Israel: ikaw nagahimulat sa paglaglag sing isa ka siudad kag isa ka iloy sa Israel: ngaa bala halunhonon mo ang panublion sang GINOO?

20 Kag si Joab nagsabat kag nagsiling, Malayo ini, malayo ini sa akon, nga ako maghalunhon ukon maglaglag.

21 Ang butang indi subong: kondi ang isa ka tawo gikan sa bukid nga Efraim, ginhingalanan Seba nga anak nga lalaki ni Bicri, nagbayaw sang iya kamut batok sa hari, batok kay David: itugyan lamang sia, kag magahalin ako sa siudad. Kag ang babaye nagsiling kay Joab, Yari karon, ang iya olo ihaboy sa imo kutub sa kuta.

22 Niyan ang babaye nagkadto sa bug-os nga katawohan sa iya kaalam. Kag ginpunggol nila ang olo ni Seba nga anak nga lalaki ni Bicri, kag ginhaboy ini kay Joab. Kag sia nagpatonog sang budyong, kag nagbalik sila gikan sa siudad, ang tagsa ka tawo pakadto sa iya layanglayang. Kag si Joab nagbalik sa hari sa Jerusalem.

23 ś Karon si Joab pangolo sa bug-os nga kasoldadosan sang Israel: kag si Benaya nga anak nga lalaki ni Jehoiada sa ibabaw sang mga Keretnon kag sa ibabaw sang mga Peletnon:

24 Kag si Adoram sa ibabaw sang buhis: kag si Josafat nga anak nga lalaki ni Ahilud amo ang manugsulat sang mga maragtas:

25 Kag si Seba amo ang escriba: kag si Sadoc kag si Abiatar amo ang mga pari:

26 Kag si Ira man nga Jairnon puno nga manugdumala ni David.

KAPITULO 21

NIYAN sa mga adlaw ni David may gutum nga tatlo ka tuig, sa tuigtuig; kag si David nagpamangkotanon sa GINOO. Kag ang GINOO nagsabat, Ini tungud kay Saul, kag tungud sa iya balay nga dugoon, bangud nga ginpatay niya ang mga Gabaonhon.

2 Kag ginpatawag sang hari ang mga Gabaonhon, kag nagsiling sa ila; (karon ang mga Gabaonhon indi sa kaanakan sang Israel, kondi gikan sa salin sang mga Amornon; kag ang kaanakan sang Israel nakasumpa sa ila: kag si Saul nagtinguha sa pagpatay sa ila sa iya kakugi tungud sa kaanakan sang Israel kag sang Juda.)

3 Busa nagsiling si David sa mga Gabaonhon, Ano bala ang himoon ko tungud sa inyo? kag sa ano nga magahimo ako sang katumbasan, agud nga mapakamaayo ninyo ang panublion sang GINOO?

4 Kag ang mga Gabaonhon nagsiling sa iya, Indi kami sang pilak ukon bulawan ni Saul, ukon sang iya balay; kag indi ka magpatay sang bisan sin-o nga tawo sa Israel tungud sa amon. Kag sia nagsiling, Kon ano ang inyo isiling, ina himoon ko tungud sa inyo.

5 Kag sila nagsabat sa hari, Ang tawo nga nagpapas sa amon, kag nagpadugi batok sa amon nga laglagon kami gikan sa pagpabilin sa bisan diin nga mga ginsakpan sang Israel,

6 Itugyan sa amon ang pito ka lalaki sang iya mga anak nga lalaki, kag bitayon namon sila nga sa GINOO sa Gabaa ni Saul, nga ginpili sang GINOO. Kag ang hari nagsiling, Ihatag ko sila.

7 Apang ginpaiway sang hari si Mefiboset, ang anak nga lalaki ni Jonatan nga anak nga lalaki ni Saul, bangud sang sumpa sang GINOO nga yara sa tunga nila, sa tunga ni David kag ni Jonatan nga anak nga lalaki ni Saul.

8 Apang nagkuha ang hari sang duha ka lalaki nga anak ni Rizpa nga babaye nga anak ni Aya, nga gin-anak niya kay Saul, si Armoni kag si Mefiboset; kag ang lima ka lalaki nga mga anak ni Micol nga babaye nga anak ni Saul, nga ginpadaku niya kay Adriel nga lalaki nga anak ni Barsilai nga Meholatnon:

9 Kag gintugyan niya sila sa mga kamut sang mga Gabaonhon, kag ginbitay sila nila sa bakolod sa atubang sang GINOO: kag napukan sila nga pito sing tingub, kag ginpatay sa mga adlaw sang ani, sa nahauna nga mga adlaw, sa pamuno sang ani sang sebada.

10 ś Kag si Rizpa nga anak nga babaye ni Aya nagkuha sing sako nga panapton, kag ginhumlad ini nga sa iya sa ibabaw sang dakung bato, kutub sa pamuno sang ani tubtub nga nag-ulan sa ibabaw nila sing tubig gikan sa langit, kag wala sia magtugut sa mga pispis sang langit nga maghapon sa ila sa adlaw, ukon sa mga sapat sang latagon sa kagab-ihon.

11 Kag ginsugid kay David ang ginhimo ni Rizpa nga anak nga babaye ni Aya, ang oloasawa ni Saul.

12 ś Kag si David nagkadto kag nagkuha sang mga tul-an ni Saul kag sang mga tul-an ni Jonatan nga iya anak gikan sa mga lalaki sang Jabes-galaad, nga nagkawat sa ila sa dalan sang Bet-san, diin ginbitay sila sang mga Filistinhon, sang ginpatay sang mga Filistinhon si Saul sa Gilboa:

13 Kag ginpadala niya gikan didto ang mga tul-an ni Saul kag ang mga tul-an ni Jonatan nga iya anak nga lalaki; kag gintipon nila ang mga tul-an sang mga ginbitay.

14 Kag ginlubung nila ang mga tul-an ni Saul kag ni Jonatan nga iya anak sa duta sang Benjamin sa Zela, sa lulubngan ni Cis nga iya amay: kag ginhimo nila ang tanan nga ginsogo sang hari. Kag sa tapus sina ang Dios napakilooyan tungud sa duta.

15 ś Labut pa ang mga Filistinhon nagpakig-away liwat batok sa Israel; kag si David nagdulhog, kag ang iya mga alagad upud sa iya, kag nagpakig-away batok sa mga Filistinhon: kag si David ginlapyo.

16 Kag si Isbi-benob, nga sa mga anak nga lalaki sang higante, nga ang bug-at sang iya bangkaw tatlo ka gatus ka siclo nga saway sa kabug-aton, nga sia nagtaklus sang bag-o nga espada, naghunahuna sa pagpatay kuntani kay David.

17 Apang si Abisai nga anak nga lalaki ni Seruia nagtabang sa iya, kag naglabo sang Filistinhon, kag nagpatay sa iya. Niyan ang mga tawo ni David nagsumpa sa iya, nga nagasiling, Indi ka na gid maggowa upud sa amon sa inaway, agud nga indi mo mapalong ang suga sang Israel.

18 Kag nahanabu sa tapus sini, nga may pagpakig-away liwat sa Gob batok sa mga Filistinhon: niyan si Sibecai nga Husatnon nagpatay kay Saf, nga sa mga anak nga lalaki sang higante.

19 Kag may pagpakig-away liwat batok sa mga Filistinhon sa Gob, diin si Elhanan nga lalaki nga anak ni Jaare-oregim, nga Bet-lehemnon, nagpatay sang utud nga lalaki ni Goliat nga Githanon, nga ang olongan sang iya bangkaw kaangay sang likisan sang manughabol.

20 Kag may isa pa ka inaway sa Gat, diin may isa ka lalaki nga mataas gid, nga may anum ka tudlo sa tagsa ka kamut, kag anum ka tudlo sa tagsa ka tiil, duha ka pulo kag apat sa kadamuon; kag sia man natawo sa higante.

21 Kag sang ginhangkat niya ang Israel, si Jonatan nga anak nga lalaki ni Simei, utud ni David, nagpatay sa iya.

22 Ini sila nga apat natawo sa higante sa Gat, kag napukan sila sa kamut ni David, kag sa kamut sang iya mga alagad.

KAPITULO 22

KAG si David nagpamolong sa GINOO sang mga polong sini nga ambahanon sang adlaw nga ang GINOO nagluwas sa iya gikan sa kamut sang tanan niya nga mga kaaway, kag gikan sa kamut ni Saul:

2 Kag nagsiling sia, Ang GINOO among akon dakung bato, kag akon kuta, kag akon mananabang;

3 Ang Dios sang akon dakung bato; sa iya magasalig ako: sia among akon taming, kag ang sungay sang akon kaluwasan, akon mataas nga torre, kag akon dalangpan, akon manluluwas; ikaw nagaluwas sa akon gikan sa kalugusan.

4 Magatawag ako sa GINOO, nga takus dayawon: sa amo pagaluwason ako sa akon mga kaaway.

5 Sang ginlibutan ako sang mga balud sang kamatayon, ang mga baha sang didiosnon nga mga tawo nagpahadluk sa akon;

6 Ang mga kasubu sang impierno naglikup sa akon; ang mga siod sang kamatayon nag-abut sa akon;

7 Sa akon kalisdanan nagtawag ako sa GINOO, kag nagtuaw sa akon Dios: kag sia nagpamati sang akon tingug gikan sa iya templo, kag ang akon pagtuaw naglambut sa iya mga idulungug.

8 Niyan ang duta nag-uyug kag nagkurug; ang mga sadsaran sang langit nagtay-og kag nag-uyug, bangud nga nagsingkal sia.

9 May nagtub-ok nga aso gikan sa mga boho sang iya ilong, kag ang kalayo gikan sa iya baba naglamon: ang mga uling naduktan sini.

10 Ginbawod niya ang mga langit man, kag nanaug; kag ang kadudulman yara sa idalum sang iya mga tiil.

11 Kag nagsakay sia sa querubin, kag naglupad: kag nakita sia sa ibabaw sang mga pakpak sang hangin.

12 Kag ginhimo niya ang kadudulman nga mga layanglayang sa palibut niya, madulum nga mga tubig, kag madamul nga mga gal-um sang kahawaan.

13 Sa kasilaw sa iya atubang nagdalabdab ang mga baga.

14 Nagdaguub ang GINOO gikan sa langit, kag ang labing Mataas nagmitlang sang iya tingug.

15 Kag nagpana sia sing mga baslay, kag ginpaaplaag sila; sing kilat, kag ginlaglag sila.

16 Kag nagpahayag ang mga iligan sang dagat, ang mga sadsaran sang kalibutan nabuksan, sa pagsabdong sang GINOO, sa pusnga sang ginhawa sang mga boho sang iya ilong.

17 Nagpadala sia gikan sa kahitaasan, gindakup niya ako; ginsagup niya ako gikan sa madamung mga tubig;

18 Ginluwas niya ako gikan sa akon makusug nga kaaway, kag gikan sa mga nagdumut sa akon: kay sila tama pa kakusug sa akon.

19 Ginlikupan nila ako sa adlaw sang akon kalalat-an: apang ang GINOO amo ang akon kapag-onan.

20 Gindala niya ako man sa malapad nga duug: ginluwas niya ako, bangud nga nahamut-an niya ako.

21 Ginbalusan ako sang GINOO sono sa akon pagkamatarung: sono sa katinlo sang akon mga kamut gintumbasan niya ako.

22 Kay ginbantayan ko ang mga dalanon sang GINOO, kag wala magbiya sing malauton sa akon Dios.

23 Kay ang tanan niyang pagsolondan yari sa akon atubang: kag sa iya mga palatukuran, wala ako nagbiya sa ila.

24 Ako man matarung sa atubangan niya, kag nagbantay ako sa akon, sa akon kasal-anan.

25 Busa gintumbasan ako sang GINOO sono sa akon pagkamatarung; sono sa akon katinlo sa iya itololok.

26 Sa maloloy-on magapahayag ka nga maloloy-on, kag sa tawong matarung magapahayag ka nga matarung.

27 Sa putli magapahayag ka nga putli; kag sa balingag magapahayag ka nga malas-ay.

28 Kag ang mga tawo nga napiotan luwason mo: apang ang imo mga mata yara sa mga matinaastaason, agud nga mapaubus mo sila.

29 Kay ikaw among akon suga, O GINOO: kag ang GINOO magapasanag sang akon kadudulman.

30 Kay paagi sa imo ginasalakay ko ang kabon: paagi sa akon Dios ginalumpat ko ang kuta.

31 Nahanungud sa Dios, ang iya dalanon himpit; ang polong sang GINOO natilawan: sia taming sa tanan nga nagasalig sa iya.

32 Kay si sin-o bala ang Dios, luwas sa GINOO? kag sin-o bala ang dakung bato, luwas sa aton Dios?

33 Ang Dios among akon kusug kag gahum: kag sia nagapahimpit sang akon dalanon.

34 Sia nagahimo sang akon mga tiil kaangay sang mga tiil sang mga usa nga babaye: kag nagapahamtang sa akon sa mataas nga mga duug.

35 Sia nagatudlo sang akon mga kamut sa pag-away; sa bagay nga ang pana nga asero ginbali sang akon mga butkon.

36 Ikaw naghatag man sa akon sang taming sang imo kaluwasan: kag ang imo pagkalolo nagpakadaku sa akon.

37 Ginpasangkad mo ang akon mga tikang sa idalum nakon; agud nga ang akon mga tiil wala makadanlug.

38 Ginlagas ko ang akon mga kaaway, kag ginlaglag sila; kag wala ako magbalik tubtub nga napapas ko sila.

39 Kag ginpapas ko sila, kag ginpilasan sila, agud nga indi sila makabangon: hoo, napukan sila sa idalum sang akon mga tiil.

40 Kay ginwagkusan mo ako sing kusug sa pag-away: ginpasakup mo sa akon ang mga nagsumpung sa akon.

41 Ikaw man naghatag sa akon sang mga liog sang akon mga kaaway, agud nga malaglag ko ang mga nagadumut sa akon.

42 Nagpanoloktolok sila, apang wala gid sing bisan sin-o nga magaluwas; bisan sa GINOO, apang wala sia magsabat sa ila.

43 Niyan ginbokbok ko sila subong sang yab-ok sang duta, ginlinas ko sila subong sang lunang sang dalan, kag ginsabwag sila.

44 Ikaw nagluwas man sa akon sa mga sumpunganay sang akon katawohan, ikaw nagbantay sa akon nga manginpangolo sang mga pagano: ang katawohan nga wala ko makilala magaalagad sa akon.

45 Ang mga dumuloong magapasakup sa akon: sa gilayon nga makabati sila sa akon, magatuman sila sa akon.

46 Ang mga dumuloong magakadula, kag magakahadluk sila sa gowa sang ila masiput nga mga duug.

47 Ang GINOO nagakabuhi; kag pagpakamaayohon ang akon dakung bato; kag pagpakataason ang Dios sang dakung bato sang akon kaluwasan.

48 Ang Dios amo ang nagapanimalus tungud sa akon, kag nagapasakup sang katawohan sa akon,

49 Kag nagakuha sa akon sa mga kaaway ko: ikaw man nagbayaw sa akon sa ibabaw sang mga nagsumpung sa akon: ginluwas mo ako sa tawong malugus.

50 Busa magapasalamat ako sa imo, O GINOO, sa tunga sang mga pagano, kag magaamba ako sing mga pagdayaw sa imo ngalan.

51 Sia ang torre sang kaluwasan tungud sa iya hari: kag nagapahayag sing kalooy sa iya hinaplas, kay David, kag sa iya kaliwat sa gihapon.

KAPITULO 23

KARON amo ini ang katapusan nga mga polong ni David. Si David nga anak nga lalaki ni Jesse nagsiling, kag ang lalaki nga ginbayaw sa kataasan, ang ginhaplas sang Dios ni Jacob, kag ang mayuyum nga manugsalmo sang Israel, nagsiling,

2 Ang Espiritu sang GINOO nagpamolong paagi sa akon, kag ang iya polong yari sa akon dila.

3 Ang Dios sang Israel nagsiling, ang Dakung Bato sang Israel nagpamolong sa akon, Sia nga nagagahum sang mga tawo dapat matarung, nga nagagahum sa kahadluk sa Dios.

4 Kag sia manginsubong sang kasanag sang kaagahon, kon magsubang ang adlaw, sa kaagahon nga wala sing mga gal-um; subong sang lum-ok nga hilamon nga nagatubo sa duta paagi sa masanag nga pagsilak sa tapus ang ulan.

5 Bisan pa ang akon balay indi subong sini sa atubangan sang Dios; walay sapayan sia naghimo upud sa akon sing katipan nga dayon, nga napahamtang sing nagakaigo sa tanan nga butang, kag malig-on: kay ini bug-os kong kaluwasan, kag bug-os kong handum, bisan indi niya pagpatuboon ini.

6 ś Apang ang mga anak nga lalaki ni Belial manginsubong sila tanan sa mga tunuk nga sinikway, bangud nga indi sila makuha sang mga kamut:

7 Kondi nga ang tawo nga nagatandug sa ila dapat sangkapan sing salsalon kag sang olongan sang bangkaw; kag sonogon sila sing bug-os sa kalayo sa amo nga duug.

8 ś Amo ini ang mga ngalan sang gamhanan nga mga tawo nga iya ni David: Ang Taquemonhon nga naglingkod sa lingkoran, sia puno sang mga kapitan; amo man si Adino nga Ezninhon: sia nagbayaw sang iya bangkaw batok sa walo ka gatus, nga ginpamatay niya sa isa ka tion.

9 Kag madason sa iya si Eleazar nga anak nga lalaki ni Dodo nga Ahohanon, nga isa sang tatlo ka gamhanan nga mga tawo upud kay David, sang paghangkat nila sa mga Filistinhon nga nagtilipon sing tingub didto sa inaway, kag ang mga tawo sang Israel nagtaliwan:

10 Sia nagtindug, kag ginpanglabo niya ang mga Filistinon tubtub nga kinapoy ang iya kamut, kag nagtapik sa espada ang iya kamut: kag ang GINOO naghikot sing dakung kadalag-an sadtong adlaw; kag nagbalik ang katawohan sa olihi niya lamang sa pagkuha sing inagaw.

11 Kag madason sa iya si Sama, lalaking anak ni Age nga Hararnon. Kag nagtilipon sing tingub ang mga Filistinhon sa isa ka kabon, diin may puna nga duta nga hil-ub sing mga lentejas: kag ang katawohan nagpalagyo gikan sa mga Filistinhon.

12 Apang sia nagtindug sa tunga sang puna, kag gin-apinan ini, kag ginpatay ang mga Filistinhon: kag ang GINOO naghikot sing dakung kadalag-an.

13 Kag ang tatlo sang katloan ka puno nga mga tawo nagdulhog, kag nagkadto kay David sang tig-alani sa lungib sang Adullam: kag ang kabon sang mga Filistinhon nagpahamtang sa nalupyakan sang Refaim.

14 Kag si David didto niyan sa pamakud, kag ang garison sang mga Filistinhon didto anay sa Bet-lehem.

15 Kag naghandum si David, kag nagsiling, O kabay nga ang isa maghatag sa pagpainum sa akon sing tubig gikan sa bobon sang Bet-lehem, nga yara sa luyo sang gawang!

16 Kag ang tatlo ka gamhanan nga mga lalaki nagbulwang sang kasoldadosan sang mga Filistinhon, kag nagsag-ub sing tubig sa bobon sang Bet-lehem, nga yara sa luyo sang gawang, kag nagkuha sini, kag nagdala sini kay David: apang indi sia buut mag-inum sini, kondi gin-ula ini sa GINOO.

17 Kag nagsiling sia, Malayo ini sa akon, O GINOO, nga ako maghimo sini: indi bala ini ang dugo sang mga lalaki nga naglakat nga nagpakatalagman sang ila mga kabuhi? busa indi sia buut mag-inum sini. Ini nga mga butang ginhimo sang tatlo ka gamhanan nga mga lalaki.

18 Kag si Abisai, ang utud ni Joab, ang anak nga lalaki ni Seruia, amo ang puno sang tatlo. Kag nagbayaw sia sang iya bangkaw batok sa tatlo ka gatus, kag ginpatay sila, kag may kabantugan sa tunga sang tatlo.

19 Indi bala sia ang labi gid kadungganon sa tatlo? busa sia nangin kapitan nila: walay sapayan wala sia makatupung sa tatlo nga nahauna.

20 Kag si Benaya nga anak nga lalaki ni Jehoiada, nga anak nga lalaki sang isganan nga lalaki sang Cabzeel, nga nakahimo sing madamu nga mga buhat, sia nagpatay sang duha ka lalaki nga daw leon sang Moab: sia nagdulhog man kag ginpatay ang isa ka leon sa tunga sang boho sa panag-on sang nieve:

21 Kag ginpatay niya ang isa ka Egiptohanon, lalaki nga may tindug: kag ang Egiptohanon may bangkaw sa iya kamut; apang nagdulhog sia sa iya nga may sungkud, kag gin-agaw sa kamut sang Egiptohanon ang bangkaw, kag ginpatay sia sang iya kaugalingon nga bangkaw.

22 Ini nga mga butang ginhimo ni Benaya nga anak nga lalaki ni Jehoiada, kag may kabantugan sa tunga sang tatlo ka gamhanan nga mga lalaki.

23 Sa katloan labi pa kadungganon sia, apang wala sia makatupung sa tatlo nga nahauna. Kag ginpadumala sia ni David sa iya bantay.

24 Si Asael nga utud ni Joab isa sang katloan; si Elhanan nga anak nga lalaki ni Dodo sang Bet-lehem,

25 Si Samma nga Harodnon, si Elica nga Harodnon,

26 Si Helez nga Paletnon, si Ira nga lalaking anak ni Iques nga Tekoanhon,

27 Si Abiezer nga Anatotnon, si Mebunai nga Husanhon,

28 Si Zalmon nga Ahohanon, si Maharai nga Netofanhon,

29 Si Heleb nga lalaking anak ni Baana, nga Netofanhon, si Itai nga lalaking anak ni Ribai sang Gabaa gikan sa mga anak ni Benjamin,

30 Si Benaya nga Piratnon, si Hidai nga gikan sa mga sapa sang Gaas,

31 Si Abi-albon nga Arbanhon, si Azmavet nga Barhumnon,

32 Si Eliaba nga Saalbonhon, gikan sa mga lalaking anak ni Jasen, si Jonatan,

33 Si Samma nga Hararnon, si Ahiam nga lalaking anak ni Sarar nga Hararnon,

34 Si Elifelet nga lalaking anak ni Ahasbai, ang lalaking anak sang Maacanhon, si Eliam nga lalaking anak ni Ahitofel nga Gilonhon,

35 Si Hezrai nga Carmelonhon, si Paarai nga Arbanhon,

36 Si Igal nga lalaking anak ni Natan sang Soba, si Bani nga Gadhanon,

37 Si Selec nga Amonhon, si Naharai nga Beerotnon, nga manugdala sing hinganib kay Joab nga lalaking anak ni Seruia,

38 Si Ira nga Itranhon, si Gareb nga Itranhon,

39 Si Urias nga Hithanon: tanan katloan kag pito.

KAPITULO 24

KAG liwat ang kaakig sang GINOO nagdabdab batok sa Israel, kag gintandug niya si David batok sa ila sa pagsiling, Lakat, isipa ang Israel kag Juda.

2 Kay nagsiling ang hari kay Joab nga kapitan sang kasoldadosan, nga nag-upud sa iya, Libuta karon ang tanan nga tribo sang Israel, kutub sa Dan tubtub sa Beer-seba, kag isipa ninyo ang katawohan, agud nga ako makahibalo sang kabilogan sang katawohan.

3 Kag si Joab nagsiling sa hari, Karon ang GINOO nga imo Dios magdugang sa imo katawohan, bisan daw ano kadamu sila, sing isa ka gatus ka pilo, kag kabay nga makita ini sang mga mata sang akon ginoo nga hari: apang ngaa bala nga ang akon ginoo nga hari nahamuut sini nga butang?

4 Apang ang polong sang hari naglandas batok kay Joab, kag batok sa mga kapitan sang kasoldadosan. Kag si Joab kag ang mga kapitan sang kasoldadosan naggowa gikan sa atubang sang hari, sa pag-isip sang katawohan sang Israel.

5 ś Kag nagtabok sila sang Jordan, kag nagpahamtang sa Aroer, sa too sang siudad nga yara sa tunga sang suba sang Gad, kag nayon sa Jazer:

6 Niyan nag-abut sila sa Galaad, kag sa duta sang Tatim-hodsi; kag nag-abut sila sa Dan-jaan, kag palibut pa Zidon,

7 Kag nag-abut sa pamakud sang Tiro, kag sa tanan nga siudad sang mga Hevhanon, kag sang mga Canaanhon: kag naggowa sila sa bagatnan sang Juda, pa Beer-seba.

8 Gani sang nalibut nila ang bug-os nga duta, nag-abut sila sa Jerusalem sa tapus sang siam ka bulan kag duha ka pulo ka adlaw.

9 Kag si Joab naghatag sang kabilogan sang kadamuon sang katawohan sa hari: kag sa Israel may walo ka gatus ka libo ka lalaki nga isganan nga naggabut sang espada; kag ang mga tawo sang Juda lima ka gatus ka libo ka lalaki.

10 ś Kag ginsuntok si David sang iya tagiposoon sang naisip na niya ang katawohan. Kag si David nagsiling sa GINOO, Ako nakasala sing daku sang nahimo ko: kag karon, nagapakilooy ako sa imo, O GINOO, kuhaa ang kasal-anan sang imo alagad; kay ako nakahimo sing binuang gid.

11 Kay sang nagbangon si David sang pagkaaga, nag-abut ang polong sang GINOO kay Gad nga manalagna, nga manugpanan-aw ni David, nga nagasiling,

12 Lakat kag isiling kay David, Amo ini ang ginasiling sang GINOO, Tatlo ka butang ang ginatanyag ko sa imo; magpili ka sing isa sa ila, nga akon himoon sa imo.

13 Gani nagkadto si Gad kay David, kag nagsugid sa iya, kag nagsiling sa iya, Magaabut bala sa imo ang pito ka tuig nga gutum sa imo sa imo duta? ukon magapalagyo ka sa atubang sang imo mga kaaway sing tatlo ka bulan, samtang sila nagalagas sa imo? ukon may tatlo bala ka adlaw nga pagpameste sa imo duta? karon binagbinagon mo, kag patugsilingan kon ano nga sabat ang ibalik ko sa nagpadala sa akon.

14 Kag si David nagsiling kay Gad, Yari ako sa daku nga ital-ital: itugut nga kami maholog karon sa kamut sang GINOO; kay ang iya mga kalooy dalagku: kag indi pag-itugut nga ako maholog sa kamut sang tawo.

15 ś Gani ang GINOO nagpadala sing pagpameste sa Israel kutub sa aga tubtub sa tion nga pinat-ud: kag may nagkalamatay sa katawohan kutub sa Dan tubtub sa Beer-seba nga kapitoan ka libo ka tawo.

16 Kag sang pag-untay sang anghel sang iya kamut sa ibabaw sang Jerusalem sa paglaglag sini, ang GINOO naghinulsul sang malaut, kag nagsiling sa anghel nga naglaglag sang katawohan, Tuman na: karon idolog ang imo kamut. Kag ang anghel sang GINOO yara sa luyo sang linasan ni Arauna nga Jebusnon.

17 Kag si David nagpamolong sa GINOO sang nakita niya ang anghel nga nagpamatay sang katawohan, kag nagsiling, Yari karon, ako nakasala, kag nakahimo sing malauton: apang ining mga carnero, ano bala ang nahimo nila? ginaampo ko sa imo, magmanginbatok sa akon ang imo kamut, kag batok sa balay sang akon amay.

18 ś Kag si Gad nag-abut kay David sadtong adlaw, kag nagsiling sa iya, Taklad ka, patindug sing halaran sa GINOO sa linasan ni Arauna nga Jebusnon.

19 Kag si David, sono sa ginsiling ni Gad, nagtaklad sono sang ginsogo sang GINOO.

20 Kag naglantaw si Arauna, kag nakita ang hari kag ang iya mga alagad nga nagapakari sa iya: kag naggowa si Arauna, kag nagyaub sia nga nagahapa sa duta sa atubang sang hari.

21 Kag si Arauna nagsiling, Ngaa bala nagkari ang akon ginoong hari sa iya alagad? Kag si David nagsiling, Sa pagbakal sa imo sing linasan, nga patindugan sing halaran sa GINOO, agud nga ang kamatay magtonong gikan sa katawohan.

22 Kag si Arauna nagsiling kay David, Magkuha kag magdolot ang akon ginoong hari sang maayo sa iya: yari karon, yari ang mga baka nga sa halad nga sinonog, kag ang mga gamit sa paglinas kag ang iban nga mga gamit sang mga baka nga sa gatong.

23 Ini tanan nga butang, ginhatag ni Arauna, subong nga hari, sa hari. Kag si Arauna nagsiling sa hari, Ang GINOO nga imo Dios magkahamuut sa imo.

24 Kag ang hari nagsiling kay Arauna, Indi; kondi sa pagkamatuud baklon ko ini sa imo sa bili: kag indi ako magdolot sing mga halad nga sinonog sa GINOO nga akon Dios sinang walay bili sa akon. Gani ginbakal ni David ang linasan kag ang mga baka sa kalim-an ka siklo nga pilak.

25 Kag nagpatindug didto si David sing halaran sa GINOO, kag nagdolot sing mga halad nga sinonog kag mga halad sa paghidait. Gani ang GINOO napakilooyan tungud sa duta, kag nagtonong ang kamatay gikan sa Israel.

AMAZING GRACE BIBLE INSTITUTE