ANG BALAAN NGA BIBLIA

ANG IKADUHANG SULAT NGA PANGKABUG-OSAN

NI PEDRO

KAPITULO 1

SI SIMON Pedro, isa ka alagad kag apostol ni Jesu-Cristo, sa mga nakaagum sing kaangay kahamili nga pagtoo upud sa amon paagi sa pagkamatarung sang Dios kag aton Manluluwas nga si Jesu-Cristo:

2 Ang bugay kag ang paghidait pagpaukaron sa inyo paagi sa pagkilala sa Dios, kag kay Jesus nga aton Ginoo,

3 Sono sa iya diosnon nga gahum naghatag sa aton sang tanan nga butang nga nahanungud sa kabuhi kag pagkadiosnon, paagi sa pagkilala sa iya nga nagtawag sa aton sa himaya kag birtud:

4 Nga paagi sini ginahatag niya sa aton ang tama kadaku kag hamili nga mga saad: agud nga paagi sini sa ila mangin-umalambit kamo sang kinaugali nga diosnon, nga nalikawan ninyo ang kaduluntan nga yara sa kalibutan paagi sa kailigbon.

5 Kag labut pa sini, sing may bug-os nga pagpaninguha, magdugang sa inyo pagtoo sang birtud; kag sa birtud ihibalo;

6 Kag sa ihibalo pagkamapinugungon; kag sa pagkamapinugungon pagpailub; kag sa pagpailub pagkadiosnon;

7 Kag sa pagkadiosnon paghiliutud nga kalolo; kag sa paghiliutud nga kalolo diosnon nga gugma.

8 Kay kon ining mga butang yara sa inyo, kag nagabugana, ginahimo nila nga indi kamo magmangin-walay pulus ukon dimabinungahon sa pagkilala sa aton Ginoong Jesu-Cristo.

9 Apang ang nakulangan sining mga butang bulag, kag indi makakita sang malayo, kag nalimot nga gintinloan sia gikan sa iya daan nga mga sala.

10 Busa hinonoo, mga kauturan, magmakugi kamo sa pagpalig-on sang pagkatinawag kag pagkapinili ninyo: kay kon maghimo kamo sining mga butang, indi gid kamo mapukan:

11 Kay sa amo ihatag sa inyo sing bugana ang pagsulud sa ginharian nga walay katapusan sang aton Ginoo kag Manluluwas nga si Jesu-Cristo.

12 Busa indi ako magpatumbaya sa pagpahanumdum sa inyo sa gihapon sining mga butang, bisan nahibaloan ninyo sila, kag napalig-onan kamo sa kamatooran nga karon.

13 Hoo, ginapakamatarung ko, tubtub nga yari ako sa sining tabernakulo, ang pagpukaw sa inyo paagi sa pagpahanumdum sa inyo;

14 Sa nahibaloan ko nga sa madali pagbayaan ko ining akon tabernakulo, sono sa ginpahayag sa akon sang aton Ginoong Jesu-Cristo.

15 Labut pa himulatan ko nga sa tapus ang akon pagkapatay sarang ninyo madumduman gihapon ining mga butang.

16 Kay wala kami magsonod sang mga sugilanon nga pinatopato sing malalangon, sang pagpakilala namon sa inyo sang gahum kag pag-abut sang aton Ginoong Jesu-Cristo, kondi mga saksi kami nga nakakita sang iya pagkahalangdon.

17 Kay sia nakabaton gikan sa Dios nga Amay sing dungug kag himaya, sang nag-abut sa iya ang amo nga tingug gikan sa halangdon nga himaya, Ini hinigugma ko nga Anak, nga sa iya nahamuut gid ako.

18 Kag ining tingug nga naggikan sa langit nabatian namon, sang kami upud sa iya sa bukid nga balaan.

19 May amon man kami nga labi pa kalig-on nga polong sang tagna; nga sa sini maayo sa inyo nga magtalupangud kamo, subong sang sa isa ka suga nga nagasiga sa duug nga madulum, tubtub sa pamanagbanag, kag ang adlawon nga bitoon magsubang sa inyo mga tagiposoon:

20 Nga mahibaloan ninyo anay ini, nga walay tagna sang kasulatan nga maggikan sa kaugalingon nga pagpatpat.

21 Kay ang tagna sa nagtaliwan nga dag-on wala nag-abut paagi sa kabubut-on sang tawo: kondi ang mga balaan nga tawo sang Dios naghambal sono sa pagpahulag sa ila sang Balaan nga Espiritu.

KAPITULO 2

APANG may dimatuud nga mga manalagna man nga naglutaw sa katawohan, subong nga sa inyo man magalutaw ang dimatuud nga mga manunudlo, nga sa tago magapasulud sing makatagudili nga mga herehia, nga nagapanghiwala bisan sang Ginoo nga nagbakal sa ila, kag magadala sa ila kaugalingon sing madagmit nga kalaglagan.

2 Kag madamu ang magasonod sa ila mga makahalalit nga mga paagi; nga bangud sa ila ang dalan sang kamatooran pagahambalon nga malaut.

3 Kag paagi sa pagkamahamkonon kaupud sa pinahitohito nga mga polong himoon kamo nila nga mga balaligya: nga ang paghukom sa ila karon kutub sa malawig na nga tion wala nagapalantang, kag ang ila katagudilian wala nagatolog.

4 Kay kon ang Dios wala magpaiway sang mga anghel nga nakasala, kondi gintagbung sila paidalum sa impierno, kag gintugyan sila sa mga kadena sang kadudulman, nga itigana sa paghukom;

5 Kag wala niya pagpaiwaya ang daan nga kalibutan, apang ginluwas si Noe nga ikawalo nga tawo, manugwali sang pagkamatarung, sang gin-anaw niya ang kalibutan sang mga didiosnon;

6 Kag sa pag-abo niya sang mga siudad sang Sodoma kag Gomorra gintagudilian niya sila sa kalaglagan, nga ginahimo sila nga huwaran sa mga buut magkabuhi sa tapus sina sing didiosnon;

7 Kag ginluwas ang matarung nga si Lot, nga nag-ugtas sang mahigko nga paggawi sang mga malauton:

8 (Kay yadtong tawo nga matarung nga nagapuyo sa tunga nila, sa pagtan-aw kag sa pagpamati, nagpaugtas sang iya matarung nga kalag adlawadlaw sa ila mga binuhatan nga malinapason;)

9 Ang Ginoo makahibalo kon paano magluwas sang mga diosnon sa mga pagsulay, kag magtigana sang mga dimatarung tubtub sa adlaw sang paghukom nga pagasilotan:

10 Apang labi na gid sila nga nagalakat sono sa unud sa kailigbon sang pagkadimatinlo, kag nagatamay sang pagbulut-an. Mga makahas sila, mainiyaiyahon, wala sila nahadluk sa paghambal sang malaut nahanungud sa mga halangdon.

11 Apang ang mga anghel, nga mga labi pa sa kagamhanan kag kusug, wala nagagamit sing mapasipalahon nga sulumbungon batok sa ila sa atubangan sang Ginoo.

12 Apang ini sila, subong sang natural nga mga sapat nga walay buut, ginhimo nga dakpon kag patyon, nagahambal sang malaut nahanungud sa mga butang nga wala nila mahangpan; kag mawala sila sing bug-os sa ila kaugalingon nga kaduluntan;

13 Kag magabaton sang balus sang pagkadimatarung, subong sa ila nga nagakabig nga kalipay ang pagpatuyang sa adlawon. Sila mga dagta kag mga kasawayan, nga nagapatuyang sa ila kaugalingon nga mga limbong samtang sila nagasinalosalo upud sa inyo;

14 Nga napun-an ang mga mata sang pagpanglahi, kag indi makauntat sa sala; nga nagadaya sang mga kalag nga mahuyang: may tagiposoon sila nga nahanas sa paghimo sang mga paghamkon; mga anak nga pinapakamalaut:

15 Nga nagbiya sang matarung nga dalan, kag nagtalang, nga nagsonod sang dalan ni Balaam, nga anak ni Bosor, nga naghigugma sang sohol sang pagkadimatarung;

16 Apang ginbadlong sia bangud sang iya sala: ang asno nga apa nga nagahambal sa tingug sang tawo nagpugung sang kabuangon sang manalagna.

17 Ini sila mga bobon nga walay tubig, mga gal-um nga ginapalid sang unus; sa ila natigana ang alupoop sang kadudulman sa walay katapusan.

18 Kay sa nagahambal sila sing dakung habok nga mga polong nga walay pulus, ginahaylo nila paagi sa mga kailigbon sang unud, paagi sa labi ka kaulag, yadtong mga nakapalagyo gid sa mga nagakabuhi sa sayup.

19 Samtang sila nagatug-an sa ila sing kahilwayan, sila ila mga alagad sang kaduluntan: kay ang tawo ulipon sang bisan sin-o nga nagadaug sa iya.

20 Kay kon sa tapus nga nakapalagyo sila sa mga kadagtaan sang kalibutan paagi sa pagkilala sa Ginoo kag Manluluwas nga si Jesu-Cristo, masaw-id sila liwat sa ila, kag madaug, ang naolihing kahimtangan nila labi pa kalain sang sa nahauna.

21 Kay maayo pa sa ila kuntani nga wala makahibalo sang dalan sang pagkamatarung, sang sa, sa tapus nga nakilala nila ini magtalikod sa balaan nga sogo nga gintugyan sa ila.

22 Apang nahanabu ini sa ila sono sa matuud nga hulubaton, Ang ido nagbalik sa iya kaugalingon nga suka; kag ang nayon nga napaligosan sa iya pagtubug sa lunang.

KAPITULO 3

INING ikaduhang sulat, mga hinigugma, akon karon ginasulat sa inyo; nga sa diin ginapukaw ko ang inyo putli nga mga hunahuna paagi sa pagpahanumdum:

2 Agud nga dumdumon ninyo ang mga polong nga ginhambal anay sang balaan nga mga manalagna, kag ang sogo namon nga mga apostol sang Ginoo kag Manluluwas:

3 Nga mahibaloan ninyo anay ini, nga sa katapusan nga mga adlaw may magaabut nga mga mayubiton, nga nagalakat sono sa ila kaugalingon nga mga kailigbon,

4 Kag nagasiling, Diin bala ang saad sang iya pag-abut? kay kutub sang pagtolog sang mga kaamayan, ang tanan nga mga butang nagapadayon subong nga amo sila kutub sa ginsuguran sang pagtuga.

5 Kay sa sini wala sila naghibalo sing hungud, nga paagi sa polong sang Dios ang mga langit kutub sa dumaan, kag ang duta nga nagatindug sa gowa sang tubig kag yara sa tubig:

6 Nga paagi sini ang kalibutan nga sadto anay, nga ginlapawan sang tubig, nawala:

7 Apang ang mga langit kag ang duta, nga amo karon, ginatipigan paagi sa amo man nga polong, ginatigana sa kalayo sa adlaw sang paghukom kag kalaglagan sang mga tawo nga didiosnon.

8 Apang, mga hinigugma, dili kamo magmangin walay nahibaloan nahanungud sining isa ka butang, nga ang isa ka adlaw sa Ginoo subong sang isa ka libo ka tuig, kag ang isa ka libo ka tuig subong sang isa ka adlaw.

9 Ang Ginoo indi mapabuyanbuyanon nahanungud sa iya saad, sono sa pagbanta sang iban nga mga tawo sang pagpabuyanbuyan; kondi mabinatason ayon sa aton, nga indi buut nga mawala ang bisan sin-o, kondi nga ang tanan makadangat sang paghinulsul.

10 Apang ang adlaw sang Ginoo magaabut subong sang makawat sa kagab-ihon; nga sa diin ang mga langit magataliwan sa dakung kagahud, kag ang mga elemento matunaw sa masingkal nga kainit, ang duta man kag ang mga binuhat nga yara sa sini pagasonogon.

11 Busa sanglit ini tanan nga butang pagatunawon, ano bala nga sari sang mga tawo dapat mangin-amo kamo sa tanan nga balaan nga pagginawi kag pagkadiosnon,

12 Nga nagahulat kag nagasalako sa pag-abut sang adlaw sang Dios, nga sa sini ang mga langit nga nagakalayo pagatunawon, kag ang mga elemento matunaw sa masingkal nga kainit?

13 Walay sapayan kita, sono sa iya saad, nagahulat sing bag-ong mga langit kag isa ka bag-ong duta, diin nagapuyo ang pagkamatarung.

14 Busa, mga hinigugma, sanglit nagahulat kamo sing among mga butang, magmakugihon kamo agud nga masapwan niya kamo sa paghidait, walay dagta, kag disalawayon.

15 Kag kabiga ninyo nga ang pagkamabinatason sang aton Ginoo kaluwasan; subong nga ang aton hinigugma nga utud nga si Pablo man nagsulat sa inyo sono sa kaalam nga ginhatag sa iya;

16 Subong man sa tanan niya nga mga sulat, nga sa ila nagahambal sia nahanungud sining mga butang; nga sa diin ang iban nga mga butang mabudlay nga hangpon, nga ginalubag sang mga dimaalam kag mga mahuyang, subong sang ginahimo man nila sa iban nga mga kasulatan, padulong sa ila kaugalingon nga kalaglagan.

17 Busa kamo, mga hinigugma, sanglit nga nakahibalo kamo nga daan sining mga butang, mag-andam kamo man, basi kon sa ginadala kamo sang sayup sang mga malauton, maholog kamo sa inyo kaugalingon nga pagkalig-on.

18 Apang magtubo kamo sa bugay, kag sa pagkilala sang aton Ginoo kag Manluluwas nga si Jesu-Cristo. Sa iya ang himaya karon kag sa walay katapusan. Amen.

AMAZING GRACE BIBLE INSTITUTE