ANG IKAP-AT NGA LIBRO SANG MGA HARI

KAPITULO 1

NIYAN nagribuk ang Moab batok sa Israel sa tapus nga si Acab napatay.

2 Kag si Ocozias naholog gikan sa balatibat sa iya hulut nga naibabaw nga didto sa Samaria, kag nagbalatian: kag nagpadala sia sing mga manugbalita, kag nagsiling sa ila, Lakat, pamangkot kay Baal-zebub, ang dios sang Ecron, kon bala magaayo pa ako sa sini nga balatian.

3 Apang ang anghel sang GINOO nagsiling kay Elias nga Tisbinhon, Tindug, taklad sa pagsugata sa mga manugbalita sang hari sang Samaria, kag isiling sa ila, Bangud bala ini nga wala sing Dios sa Israel, nga kamo nagakadto sa pagpamangkot kay Baal-zebub, ang dios sang Ecron?

4 Busa karon amo ini ang ginasiling sang GINOO, Indi ka magapanaug sinang higdaan nga ginsakaan mo, kondi nga mapatay sing totoo. Kag si Elias nagtaliwan.

5 ś Kag sang ang mga manugbalita nagbalik sa iya, nagsiling sia sa ila, Ngaa bala nga nagbalik na kamo?

6 Kag sila nagsiling sa iya, May nagsugata sa amon nga isa ka lalaki, kag nagsiling sa amon, Lakat, balik kamo sa hari nga nagpadala sa inyo, kag isiling sa iya, Amo ini ang ginasiling sang GINOO, Bangud bala ini nga wala sing Dios sa Israel, nga ikaw nagapadala sa pagpamangkot kay Baal-zebub, ang dios sang Ecron? busa indi ka magapanaug sinang higdaan nga ginsakaan mo, kondi mapatay sing totoo.

7 Kag sia nagsiling sa ila, Ano bala nga bagay sang lalaki sia nga nagtaklad sa pagsugata sa inyo, kag nagsugid sa inyo sini nga mga polong?

8 Kag nagsabat sila sa iya, Sia lalaking bulbulon, kag nagwagkus sa iya mga hawak sang isa ka wagkus nga panit. Kag sia nagsiling, Si Elias ini nga Tisbinhon.

9 Niyan ang hari nagpadala sa iya sing kapitan sang kalim-an upud sang iya mga kalim-an. Kag sia nagtukad sa iya: kag, yari karon, sia nagalingkod sa putokputokan sang bakolod. Kag sia nagpamolong sa iya, Ikaw nga tawo sang Dios, ang hari nagsiling, Dulhog ka.

10 Kag si Elias nagsabat kag nagsiling sa kapitan sang kalim-an, Kon ako tawo sang Dios, niyan magpanaug ang kalayo gikan sa langit, kag mag-upus sa imo kag sang imo kalim-an. Kag may nagpanaug nga kalayo gikan sa langit, kag nag-upus sa iya kag sang iya kalim-an.

11 Liwat nagpadala man sia sa iya sing isa pa ka kapitan sang kalim-an upud sang iya kalim-an. Kag sia nagsabat kag nagsiling sa iya, O tawo sang Dios, amo ini ang ginasiling sang hari, Dulhog ka sing madali.

12 Kag si Elias nagsabat kag nagsiling sa ila, Kon ako tawo sang Dios, magpanaug ang kalayo gikan sa langit, kag mag-upus sa imo kag sang imo kalim-an. Kag ang kalayo sang Dios nagpanaug gikan sa langit, kag nag-upus sa iya kag sang iya kalim-an.

13 ś Kag liwat nagpadala sia sang kapitan sang ikatlong kalim-an upud sang iya kalim-an. Kag ang ikatlo nga kapitan sang kalim-an nagtukad, kag nag-abut kag nagluhud sa atubangan ni Elias, kag nagpakilooy sa iya, kag nagsiling sa iya, O tawo sang Dios, ginaampo ko sa imo, magmanginbilidhon sa imo itololok ang akon kabuhi, kag ang kabuhi sini nga kalim-an nga mga alagad mo.

14 Yari karon, may nagpanaug nga kalayo gikan sa langit, kag nag-upus sang duha ka kapitan sang mga nahaunang kinalim-an upud sang ila kinalim-an: busa karon magmanginbilidhon ang akon kabuhi sa imo itololok.

15 Kag ang anghel sang GINOO nagsiling kay Elias, Dulhog ka upud sa iya: dili mahadluk sa iya. Kag nagtindug sia, kag nagdulhog upud sa iya pakadto sa hari.

16 Kag sia nagsiling sa iya, Amo ini ang ginasiling sang GINOO, Sa bagay nga nagpadala ka sing mga manugbalita sa pagpamangkot kay Baal-zebub, ang dios sang Ecron, bangud bala ini nga wala sing Dios sa Israel nga pamangkotan sang iya polong? busa indi ka magapanaug sinang higdaan nga ginsakaan mo, kondi mapatay sing totoo.

17 ś Gani napatay sia sono sa polong sang GINOO nga napamolong ni Elias. Kag naghari sa tal-us niya si Jehoram sa ikaduha nga tuig ni Jehoram nga anak nga lalaki ni Jehosafat, nga hari sang Juda; bangud nga wala sia sing anak nga lalaki.

18 Karon ang nabilin sang mga binuhatan ni Ocozias nga ginhimo niya, wala bala sila masulat sa libro sang mga maragtas sang mga hari sang Israel?

KAPITULO 2

KAG nahanabu, sang buut na bayawon sang GINOO si Elias pa langit paagi sa buhawi, nga si Elias naglakat upud kay Eliseo gikan sa Gilgal.

2 Kag si Elias nagsiling kay Eliseo, Pabilin ka diri, ginaampo ko sa imo; kay ginpadala ako sang GINOO tubtub sa Bet-el. Kag si Eliseo nagsiling sa iya, Sa nagakabuhi ang GINOO, kag sa nagakabuhi ang imo kalag, indi ako magbiya sa imo. Gani nagdulhog sila pa Bet-el.

3 Kag ang lalaki nga mga anak sang mga manalagna nga didto sa Bet-el nagsugata kay Eliseo, kag nagsiling sa iya, Nakahibalo ka bala nga kuhaon sang GINOO karon nga adlaw ang imo agalon gikan sa ibabaw sang imo olo? Kag nagsiling sia, Hoo, ako nakahibalo sini; hipus kamo.

4 Kag si Elias nagsiling sa iya, Eliseo, pabilin diri, ginaampo ko sa imo; kay ginpadala ako sang GINOO sa Jerico. Kag nagsiling sia, Sa nagakabuhi ang GINOO, kag sa nagakabuhi ang imo kalag, indi ako magbiya sa imo. Gani nag-abut sila sa Jerico.

5 Kag ang lalaki nga mga anak sang mga manalagna nga didto sa Jerico nagpalapit kay Eliseo, kag nagsiling sa iya, Nakahibalo ka bala nga kuhaon sang GINOO karon nga adlaw ang imo agalon gikan sa ibabaw sang imo olo? Kag sia nagsabat, Hoo, ako nakahibalo sini; hipus kamo.

6 Kag si Elias nagsiling sa iya, Pabilin diri, ginaampo ko sa imo; kay ginpadala ako sang GINOO sa Jordan. Kag nagsiling sia, Sa nagakabuhi ang GINOO, kag sa nagakabuhi ang imo kalag, indi ako magbiya sa imo. Kag nagpadayon sila nga duha.

7 Kag nagkadto ang kalim-an ka lalaki nga mga anak sang mga manalagna, kag nagtindug sa paglantaw sa malayo: kag sila nga duha nagatindug sa obay sang Jordan.

8 Kag ginkuha ni Elias ang iya kunup, kag ginpiod ini, kag ginbunal ang mga tubig, kag naghawa sila sa pihak kag pihak, sa bagay nga nagtabok sila nga duha sa mamala nga duta.

9 ś Kag nahanabu, sang nakatabok sila, nga si Elias nagsiling kay Eliseo, Pangayo ka sang himoon ko tungud sa imo, sa wala pa ako pagkuhaa sa imo. Kag si Eliseo nagsiling, Ginaampo ko sa imo, magmanginyari sa akon ang doble nga bahin sang imo espiritu.

10 Kag nagsiling sia, Nagpangayo ka sing butang nga mabudlay: walay sapayan, kon makita mo ako kon kuhaon ako sa imo, mangin-amo ini sa imo; apang kon indi, indi mangin-amo ini.

11 Kag nahanabu, sang naglakat pa sila kag naghambalanay, nga, yari karon, may nagpahayag nga isa ka kangga nga kalayo, kag mga kabayo nga kalayo, kag nagbulag sa ila nga duha; kag si Elias nagpaibabaw pa langit paagi sa buhawi.

12 ś Kag nakita ini ni Eliseo, kag nagsinggit sia, Amay ko, amay ko, ang kangga sang Israel, kag ang iya mga manugkabayo. Kag wala na nga mas-a makita niya sia: kag ginkaptan niya ang iya kaugalingon nga mga panapton, kag ginkusnit sila sa duha ka bahin.

13 Ginpulut man niya ang kunup ni Elias nga naholog gikan sa iya, kag nagbalik, kag nagtindug sa pangpang sang Jordan;

14 Kag ginkuha niya ang kunup ni Elias nga naholog gikan sa iya, kag ginbunal ang mga tubig, kag nagsiling, Diin bala ang GINOONG Dios ni Elias? kag sang nabunal man niya ang mga tubig, naghawa sila sa pihak kag pihak: kag nagtabok si Eliseo.

15 Kag sang ang mga anak nga lalaki sang mga manalagna nga naglantaw didto sa Jerico nakakita sa iya, nagsiling sila, Ang espiritu ni Elias nagapabilin kay Eliseo. Kag nag-abut sila sa pagsugata sa iya, kag nagyaub sila sa atubangan niya sa duta.

16 ś Kag nagsiling sila sa iya, Yari karon, may kalim-an ka lalaki nga mga makusug upud sang imo mga alagad; palakta sila, ginaampo namon sa imo, kag magpangita sang imo agalon: basi ayhan nga ginbayaw sia sang Espiritu sang GINOO, kag ginholog sia sa isa ka bukid, ukon sa isa ka nalupyakan. Kag nagsiling sia, Indi kamo magpadala.

17 Kag sang ginpilit nila sia tubtub nga nahuya sia, nagsiling sia, Ipadala. Busa ginpadala nila ang kalim-an ka tawo; kag ginpangita nila sing tatlo ka adlaw, apang wala sia makita.

18 Kag sang nagbalik sila sa iya, (kay sia nagpabilin sa Jerico,) nagsiling sia sa ila, Wala bala ako magsiling sa inyo, Indi kamo maglakat?

19 ś Kag ang mga lalaki sang siudad nagsiling kay Eliseo, Yari karon, ginaampo ko sa imo, ang kahimtangan sini nga siudad maayo, subong sa ginatan-aw sang akon ginoo: apang ang tubig malain, kag ang duta wala sing bunga.

20 Kag nagsiling sia, Dalhi ako sing tibud nga bag-o, kag sudli ini sing asin. Kag gindalhan nila sia sini.

21 Kag nagkadto sia sa tuburan sang mga tubig, kag ginsabwagan niya sa sulud sini sing asin, kag nagsiling, Amo ini ang ginasiling sang GINOO, Gin-ayo ko ini nga mga tubig; wala na sa iya sing kamatayon ukon pagkapulak.

22 Gani nag-ayo ang mga tubig tubtub sini nga adlaw, sono sa polong nga ginpamolong ni Eliseo.

23 ś Kag nagtaklad sia gikan didto pa Bet-el: kag sang nagataklad sia sa dalanon, may naggowa nga kabataan nga magagmay gikan sa siudad, kag nag-uligyat sa iya, kag nagsiling sa iya, Taklad, ikaw nga upaw; taklad, ikaw nga upaw.

24 Kag nagbalikid sia, kag nakita sila, kag ginpakamalaut sila sa ngalan sang GINOO. Kag may naggowa nga duha ka oso nga babaye gikan sa kakahoyan, kag ginkusnit ang kap-atan kag duha ka kabataan sa ila.

25 Kag kutub didto nagkadto sia sa bukid nga Carmelo, kag gikan didto nagbalik sia sa Samaria.

KAPITULO 3

KARON si Jehoram nga anak nga lalaki ni Acab nagsugud sa paghari sa ibabaw sang Israel sa Samaria sa tuig nga ikanapulog walo ni Jehosafat nga hari sang Juda, kag naghari sing napulog duha ka tuig.

2 Kag naghimo sia sing malaut sa itololok sang GINOO; apang indi subong sang iya amay, kag sang iya iloy: kay ginsikway niya ang imahen ni Baal nga nahimo sang iya amay.

3 Wala sing sapayan nagpabilin sia sa mga sala ni Jeroboam nga anak nga lalaki ni Nabat, diin ginpapakasala ang Israel; wala sia magbiya sa sini.

4 ś Kag si Mesa nga hari sang Moab tag-iya sang mga carnero, kag nagbayad sia sa hari sang Israel sang isa ka gatus ka libo ka cordero, kag sang isa ka gatus ka libo ka carnero nga lalaki, upud sang bulbul.

5 Apang nahanabu, sang patay na si Acab, nga ang hari sang Moab nagribuk batok sa hari sang Israel.

6 ś Kag si haring Jehoram naggowa gikan sa Samaria sa sadto nga tion, kag nag-isip sang bug-os nga Israel.

7 Kag nagkadto sia kag nagpadala kay Jehosafat nga hari sang Juda, nga nagasiling, Ang hari sang Moab nagribuk batok sa akon: magakadto ka bala upud sa akon sa pag-away batok sa Moab? Kag sia nagsiling, Magataklad ako: ako subong sa imo, ang akon katawohan subong sang imo katawohan, kag ang akon mga kabayo subong sang imo mga kabayo.

8 Kag nagsiling sia, Diin bala nga dalan magataklad kita? Kag nagsabat sia, Sa dalan sang kamingawan sang Edom.

9 Gani naglakat ang hari sang Israel, kag ang hari sang Juda, kag ang hari sang Edom: kag naglibut sila sing pito ka adlaw nga lalakton: kag wala sing tubig nga sa kasoldadosan, kag sa mga kahayupan nga nagsonod sa ila.

10 Kag ang hari sang Israel nagsiling, Ahay! nga gintawag sang GINOO ini nga tatlo ka hari sing tingub, sa pagtugyan sa ila sa kamut sang Moab!

11 Apang si Jehosafat nagsiling, Wala bala diri sang manalagna sang GINOO, agud nga makapamangkot kita sa GINOO paagi sa iya? Kag ang isa sang mga alagad sang hari sang Israel nagsabat kag nagsiling, Yari diri si Eliseo nga anak nga lalaki ni Safat, nga nagbobo sing tubig sa mga kamut ni Elias.

12 Kag si Jehosafat nagsiling, Ang polong sang GINOO yara sa iya. Gani nagdulhog sa iya ang hari sang Israel kag si Jehosafat kag ang hari sang Edom.

13 Kag si Eliseo nagsiling sa hari sang Israel, Ano bala ang akon labut sa imo? kadto ka sa mga manalagna sang imo amay, kag sa mga manalagna sang imo iloy. Kag ang hari sang Israel nagsiling sa iya, Indi: kay gintawag sang GINOO ini nga tatlo ka hari sing tingub, sa pagtugyan sa ila sa kamut sang Moab.

14 Kag si Eliseo nagsiling, Sa nagakabuhi ang GINOO sang mga kasoldadosan, nga sa iya atubangan nagatindug ako, sa pagkamatuud, kon wala ako nagahangad kay Jehosafat nga hari sang Juda, indi ako magtolok sa imo, ukon magpakigkita sa imo.

15 Apang karon, dalhi ninyo ako sing manuglanton. Kag nahanabu, sang nagkutingkuting ang manuglanton, nga ang kamut sang GINOO nag-abut sa iya.

16 Kag nagsiling sia, Amo ini ang ginasiling sang GINOO, Hil-uba ini nga nalupyakan sing mga kalog.

17 Kay amo ini ang ginasiling sang GINOO, Indi kamo makakita sing hangin, kag indi makakita kamo sing ulan; apang yadto nga nalupyakan mapuno sing tubig, agud nga makainum kamo, kamo, kag ang inyo kahayupan, kag ang inyo mga kasapatan.

18 Kag ini butang nga mahapus lamang sa itololok sang GINOO: itugyan man niya ang mga Moabnon sa inyo kamut.

19 Kag gubaton ninyo ang tagsa ka siudad nga napamakuran, kag ang tagsa ka siudad nga pinili, kag magapulud sang tagsa ka maayo nga kahoy, kag magatampok sang tanan nga tuburan sang tubig, kag magasamad sang tagsa ka maayo nga duta sing mga bato.

20 Kag nahanabu sa pagkaaga, sang gindolot ang halad nga kalan-on, nga, yari karon, may nag-abut nga tubig paagi sa dalan sa Edom, kag ang duta nakapanan sing tubig.

21 ś Kag sang nakabati ang tanan nga Moabnon nga ang mga hari nagtaklad sa pag-away batok sa ila, gintipon nila sing tingub ang tanan nga makasuklub sing hinganib, kag pa ibabaw, kag nagtindug sa dulunan.

22 Kag nagbangon sila sing aga pa, kag nagsubang ang adlaw sa ibabaw sang tubig, kag nakita sang mga Moabnon nga ang tubig sa pihak mapula subong sang dugo:

23 Kag nagsiling sila, Dugo ini: ang mga hari ginpatay sa pagkamatuud, kag nagpinilasay ang isa kag isa: busa karon, Moab, sa inagaw.

24 Kag sang nag-abut sila sa kampo sang Israel, nagtindug ang mga Israelnon kag gindamhagan ang mga Moabnon, sa bagay nga nagpalagyo sila sa atubangan nila: apang sila nagpadayon nga nagapamatay sang mga Moabnon, bisan sa sulud sang ila duta.

25 Kag ginlaglag nila ang mga siudad, kag ang tagsa ka tawo naghaboy sang iya bato sa tagsa ka maayo nga duta, kag ginhil-ob ini; kag gintampokan nila ang tanan nga tuburan sang tubig, kag ginpukan ang tanan nga maayo nga kahoy: lamang sa Kir-hareset ginbilin nila ang mga bato sini; wala sing sapayan ang mga manuglabyog naglikup sini, kag naglaglag sini.

26 ś Kag sang nakita sang hari sang Moab nga ang inaway matama sa iya, nagkuha sia upud sa iya sing pito ka gatus ka tawo nga naggabut sing mga espada, sa pagbulho pakadto sa hari sang Edom: apang indi sila makasarang.

27 Niyan ginkuha niya ang iya anak nga lalaki nga kamagulangan nga dapat kuntani maghari nga tal-us niya, kag ginhalad sia nga halad nga sinonog sa ibabaw sang kuta. Kag may daku nga kasingkal batok sa Israel: kag nagbiya sila sa iya, kag nagpauli sa ila kaugalingon nga duta.

KAPITULO 4

KARON may isa ka babaye sa mga asawa sang mga anak nga lalaki sang mga manalagna nga nagtuaw kay Eliseo, nga nagasiling, Ang imo alagad nga akon bana napatay; kag ikaw nakahibalo nga ang imo alagad nahadluk sa GINOO: kag nag-abut ang nautangan sa pagkuha sang akon duha ka anak nga lalaki nga uliponon niya.

2 Kag si Eliseo nagsiling sa iya, Ano bala ang himoon ko sa imo? sugiri ako, ano bala ang yara sa imo sa balay? Kag nagsiling sia, Ang imo alagad wala gid sing ano nga butang sa balay, luwas sang isa ka tibud nga lana.

3 Niyan nagsiling sia, Lakat, panghulam ka sa luwas sing mga suludlan sa tanan mo nga kaingud, mga suludlan nga wala sing sulud; indi ka manghulam sing pila lamang ka bilog.

4 Kag kon magsulud ka, takpan mo ang ganhaan sa imo kag sa imo mga anak nga lalaki, kag ihuwad sa sadto tanan nga suludlan, kag painon mo inang mapuno.

5 Gani nagtaliwan ang babaye gikan sa iya, kag gintakpan ang ganhaan sa iya kag sa iya mga anak nga lalaki, nga nagdala sa iya sang mga suludlan; kag ginhuwad niya.

6 Kag nahanabu, sang napuno na ang mga suludlan, nga nagsiling sia sa iya anak nga lalaki, Dalhi pa ako sing suludlan. Kag sia nagsiling sa iya, Wala na sing suludlan. Kag nagkunta ang lana.

7 Niyan nagkadto sia kag nagsugid sa tawo sang Dios. Kag nagsiling sia, Lakat, ibaligya ang lana, kag bayari ang imo utang, kag ikaw kag ang imo mga anak magpangabuhi sang mabilin.

8 ś Kag nahanabu sa isa ka adlaw, nga nag-agi si Eliseo pa Sunem, diin may dakung babaye; kag sia nagpilit sa iya nga magkaon. Kag sa masunsun nga naglabay sia didto, naghapit sia didto sa pagkaon sing tinapay.

9 Kag nagsiling sia sa iya bana, Yari karon, ginahantup ko nga ini balaan nga tawo sang Dios, nga nagalabay sa aton sing dalayon.

10 Maghimo kita sing diotay nga hulut, ginaampo ko sa imo, sa dingding; kag butangan naton sia didto sing higdaan, kag sing latok, kag sing lingkoran, kag sing kandilero: kag kon mag-abut sia sa aton, magadayon sia didto.

11 Kag nahanabu sa isa ka adlaw, nga nag-abut sia didto, kag sia nagdayon sa hulut, kag naghigda didto.

12 Kag nagsiling sia kay Giezi nga iya alagad, Tawga ini nga Sunemnon. Kag sang natawag niya sia, nagtindug sia sa atubangan niya.

13 Kag nagsiling sia kay Giezi, Isiling karon sa iya, Yari karon, ikaw nagmatinatapon sa amon sa sini tanan nga pagtatap; ano bala ang himoon tungud sa imo? buut ka bala nga ihinambit sa hari, ukon sa kapitan sang kasoldadosan? Kag nagsabat sia, Ako nagapuyo sa tunga sang akon kaugalingon nga katawohan.

14 Kag nagsiling sia, Ano bala niyan ang himoon tungud sa iya? Kag si Giezi nagsabat, Sa pagkamatuud wala sia sing anak, kag ang iya bana tigulang na.

15 Kag nagsiling sia, Tawga sia. Kag sang natawag niya sia, sia nagtindug sa ganhaan.

16 Kag nagsiling sia, Sa sini nga panag-on, sa pagsapul sang tion sang kabuhi, magahakus ka sing anak nga lalaki. Kag nagsiling sia, Indi, ginoo ko, ikaw nga tawo sang Dios, dili magbutig sa imo alagad.

17 Kag ang babaye nanamkon, kag nag-anak sing lalaki sa sadto nga panag-on sa pagsapul sang tion sang kabuhi, sono sa nasiling sa iya ni Eliseo.

18 ś Kag sang nagdaku ang bata, nahanabu sa isa ka adlaw, nga naggowa sia pakadto sa iya amay sa mga mangangani.

19 Kag nagsiling sia sa iya amay, Ang olo ko, ang olo ko. Kag nagsiling sia sa isa ka bata nga lalaki, Dalha sia sa iya iloy.

20 Kag sang nakuha niya sia, kag nadala sia sa iya iloy, naglingkod sia sa mga tuhud sang iya iloy tubtub sa odto, kag ugaling napatay.

21 Kag nagsaka sia, kag ginhamyang sia sa higdaan sang tawo sang Dios, kag gintakpan sa iya ang ganhaan, kag naggowa.

22 Kag gintawag niya ang iya bana, kag nagsiling, Ginaampo ko sa imo, padalhi ako sing isa sang mga pamatan-on nga lalaki, kag isa sang mga asno, agud nga magdalagan ako sa tawo sang Dios, kag magbalik.

23 Kag nagsiling sia, Ngaa bala magkadto ka sa iya karon nga adlaw? indi lati, ukon sabbath. Kag nagsiling sia, Magmanginmaayo ini.

24 Niyan ginpasiyahan niya ang asno, kag nagsiling sa iya alagad, Padalagana, kag magpadayon; indi pagpahinaya sa akon ang pagsakay luwas kon magsiling ako sa imo.

25 Gani nagkadto sia, kag nag-abut sa tawo sang Dios sa bukid nga Carmelo. Kag nahanabu, sang nakita sia sa malayo sang tawo sang Dios, nga sia nagsiling kay Giezi nga iya alagad, Yari karon, yadto yanang Sunemnon:

26 Dalagan ka karon, ginaampo ko sa imo, sa pagsugata sa iya, kag isiling sa iya, Maayo ka bala? maayo bala ang imo bana? maayo bala ang bata? Kag nagsabat sia, Maayo.

27 Kag sang nag-abut sia sa tawo sang Dios sa bakolod, nagkapyot sia sa iya mga tiil: apang nagpalapit si Giezi sa pagpapalayo sa iya. Kag ang tawo sang Dios nagsiling, Pabayai sia; kay ang iya kalag may kapaitan sa sulud niya: kag ang GINOO naglikum sini sa akon, kag wala magsugid sa akon.

28 Niyan nagsiling sia, Nagpangayo bala ako sing anak nga lalaki sa akon ginoo? wala bala ako magsiling, Dili ako paglimbongi?

29 Niyan nagsiling sia kay Giezi, Wagkusi ang imo mga hawak, kag dalha ang akon sungkud sa imo kamut, kag lakat ka: kon makasugata ka sing bisan sin-o nga tawo, dili sia pag-abiabiha; kag kon ang bisan sin-o mag-abiabi sa imo, dili ka magsabat sa iya: kag ibutang ang akon sungkud sa nawung sang bata.

30 Kag ang iloy sang bata nagsiling, Sa nagakabuhi ang GINOO, kag sa nagakabuhi ang imo kalag, indi ako magbiya sa imo. Kag nagtindug sia, kag nagsonod sa iya.

31 Kag si Giezi nag-una sa ila, kag nagbutang sang sungkud sa nawung sang bata; apang wala sing tingug, ukon idulungug. Busa nagbalik sia sa pagsugata kay Eliseo, kag nagsugid sa iya, Ang bata wala magmata.

32 Kag sang nagsulud si Eliseo sa balay, yari karon, ang bata patay, kag nahamyang sa iya higdaan.

33 Busa nagsulud sia, kag gintakup niya ang gawang sa ila nga duha, kag nagpangamuyo sa GINOO.

34 Kag nagsaka sia, kag naghapa sa bata, kag nagbutang sang iya baba sa baba niya, kag sang iya mga mata sa mga mata niya, kag sang iya mga kamut sa mga kamut niya: kag nag-untay sia sa ibabaw sang bata; kag nag-init ang unud sang bata.

35 Niyan naghalin sia, kag nagpakadto pakari sia sa balay; kag nagsaka, kag nag-untay sia sa ibabaw niya: kag ang bata nagpangatsi sing makapito, kag ang bata nagmuklat sang iya mga mata.

36 Kag gintawag niya si Giezi, kag nagsiling, Tawga ining Sunemnon. Gani gintawag niya sia. Kag sang nag-abut sia sa iya, nagsiling sia, Hakwata ang imo anak.

37 Niyan nagsulud sia, kag naghapa sa iya mga tiilan, kag nagyaub sa duta, kag ginkuha niya ang iya anak, kag naggowa.

38 ś Kag si Eliseo nag-abut liwat sa Gilgal: kag may tiggulutum sa duta; kag nagalingkod ang mga anak nga lalaki sang mga manalagna sa atubangan niya: kag nagsiling sia sa iya alagad, Itig-ang ang dakung kaldero, kag loto sing linaga sa mga anak sang mga manalagna.

39 Kag naggowa ang isa sa latagon sa pagpangutan, kag nakakita sing balagon nga talonon, kag nagkuha gikan sini sing mga talonon nga alupait nga isa niya ka bantal, kag nagbalik sia kag ginkidkid ini sa kaldero sang linaga: kay wala nila makilal-i ini sila.

40 Gani naghuwad sila nga kaonon sang mga tawo. Kag nahanabu, sang nagakaon sila sang linaga, nga nagsinggit sila, kag nagsiling, O ikaw nga tawo sang Dios, may kamatayon sa kaldero. Kag indi sila makakaon sini.

41 Apang sia nagsiling, Niyan dala sing harina. Kag ginsabwag niya ini sa kaldero; kag nagsiling sia, Maghuwad nga sa mga tawo, agud nga makakaon sila. Kag wala sing halit sa sulud sang kaldero.

42 ś Kag may nag-abut nga isa ka lalaki gikan sa Baal-salisa, kag gindalhan ang tawo sang Dios sing tinapay sang nahaunang mga bunga, duha ka pulo ka bilog nga sebada, kag sing mga pusu sang mais nga may panit. Kag sia nagsiling, Hatagi ang mga tawo, agud nga makakaon sila.

43 Kag ang iya alagad nagsiling, Ano, ibutang ko bala ini sa atubangan sang isa ka gatus ka lalaki? Sia liwat nagsiling, Hatagi ang mga tawo, agud nga makakaon sila: kay amo ini ang ginasiling sang GINOO, Magakaon sila, kag may mabilin sini.

44 Gani ginbutang niya ini sa atubangan nila, kag nagkaon sila, kag may nabilin sini, sono sa polong sang GINOO.

KAPITULO 5

KARON si Naaman, kapitan sang kasoldadosan sang hari sang Siria, isa ka daku nga lalaki sa atubangan sang iya agalon, kag dungganon, bangud nga paagi sa iya ang GINOO naghatag sing dakung pagdaug sa Siria: sia gamhanan man nga tawo nga isganan, apang sia aroon.

2 Kag ang mga Sirianhon naggowa sa mga kinabon, kag nakadala sing bihag gikan sa duta sang Israel nga isa ka diotay nga lin-ay; kag sia nag-alagad sa asawa ni Naaman.

3 Kag nagsiling sia sa iya agalon nga babaye, Buut ko sa Dios kuntani nga ang akon ginoo upud sa manalagna nga yara sa Samaria! kay ayohon niya sia sing iya aro.

4 Kag ang isa nagsulud, kag nagsugid sa iya ginoo, nga nagasiling, Amo ini kag amo ini ang ginsiling sang lin-ay nga gikan sa duta sang Israel.

5 Kag nagsiling ang hari sang Siria, Taliwan, lakat, kag ako magapadala sing sulat sa hari sang Israel. Kag nagtaliwan sia, kag nagdala sia sing napulo ka talanton nga pilak, kag anum ka libo ka bilog nga bulawan, kag napulo ka ilislan nga panapton.

6 Kag gindala niya ang sulat sa hari sang Israel, nga nagasiling, Karon kon mag-abut sa imo ining sulat, yari karon, napadala ko sa imo kaupud sini ang akon alagad nga si Naaman, agud nga ayohon mo sia sang iya aro.

7 Kag nahanabu, sang nabasa sang hari sang Israel ang sulat, nga ginkusnit niya ang iya mga panapton, kag nagsiling, Dios bala ako, sa pagpatay kag sa pagbuhi, nga ining tawo nagapadala sa akon sa pag-ayo sing isa ka tawo sang iya aro? busa talupangda, ginaampo ko sa imo, kag tan-awa kon paano nga nagapangita sia sing kaawayon batok sa akon.

8 ś Kag sang nabatian ni Eliseo nga tawo sang Dios nga ginkusnit sang hari sang Israel ang iya mga panapton, nagpadala sia sa hari, nga nagasiling, Ngaa bala nga ginkusnit mo ang imo mga panapton? pakari-a sia karon sa akon, kag mahibaloan niya nga may manalagna sa Israel.

9 Gani nag-abut si Naaman upud ang iya mga kabayo kag upud ang iya kangga, kag nagdolog sia sa ganhaan sang balay ni Eliseo.

10 Kag si Eliseo nagpadala sing manugbalita sa iya, nga nagasiling, Kadto kag magpanghugas sing makapito sa Jordan, kag ang imo unud mauli sa imo, kag manginmatinlo ka.

11 Apang si Naaman nagsingkal, kag naghalin, kag nagsiling, Yari karon, naghunahuna ako, Sia magagowa sa akon sa pagkamatuud, kag magatindug, kag magatawag sa ngalan sang GINOO nga iya Dios, kag magatapdas sang iya kamut sa ibabaw sang duug, kag ayohon ang aroon.

12 Indi bala ang Abana kag ang Farfar, mga suba sang Damasco, maayo pa sang tanan nga mga tubig sang Israel? indi bala ako makapanghugas sa ila, kag magmatinlo? Gani nagtalikod sia kag naglakat sa kaalipungut.

13 Kag ang iya mga alagad nagpalapit, kag nagpamolong sa iya, kag nagsiling, Amay ko, kon ang manalagna nagpangabay sa imo sa paghimo sing dakung butang, indi ka bala buut maghimo sini? daw ano pa niyan, sang nagasiling sia sa imo, Panghugas, kag magmatinlo?

14 Niyan naglusong sia, kag naglumoy sing makapito sa Jordan, sono sa pinamolong sang tawo sang Dios: kag ang iya unud nag-uli kaangay sa unud sang diotay nga bata, kag nagtinlo sia.

15 ś Kag nagbalik sia sa tawo sang Dios, sia kag ang bug-os niyang kaupdanan, kag nag-abut, kag nagtindug sa atubangan niya: kag sia nagsiling, Yari karon, ginakilala ko karon nga walay Dios sa bug-os nga duta, kondi sa Israel: gani karon, ginaampo ko sa imo, magbaton ka sing pagpakamaayo sa imo alagad.

16 Apang nagsiling sia, Sa nagakabuhi ang GINOO, nga sa atubangan niya nagatindug ako, indi ako magbaton sing bisan ano. Kag ginpilit niya sia sa pagbaton sini; apang nagdumili sia.

17 Kag si Naaman nagsiling, Niyan indi bala paghatagan ang imo alagad, ginaampo ko sa imo, sing duta nga malulan sang duha ka mula? kay kutub karon ang imo alagad indi na magdolot sing halad nga sinonog ukon halad sa iban nga mga dios, kondi sa GINOO.

18 Sa sining butang magpatawad ang GINOO sa imo alagad, kon ang akon agalon magsulud sa balay ni Rimon sa pagsimba didto, kag maghamboy sia sa akon kamut, kag ako magyaub sa balay ni Rimon: kon ako magyaub sa balay ni Rimon, magpatawad ang GINOO sang imo alagad sa sining butang.

19 Kag nagsiling sia sa iya, Lakat ka sa paghidait. Gani nagtaliwan sia gikan sa iya sa uluunhan.

20 ś Apang si Giezi, ang alagad ni Eliseo nga tawo sang Dios, nagsiling, Yari karon, ang akon agalon nagpasaylo sining Naaman nga Sirianhon, sa indi pagbaton sa iya kamut sinang gindala niya: apang, sa nagakabuhi ang GINOO, magalagas ako sa iya, kag magkuha sing bisan ano gikan sa iya.

21 Gani si Giezi nagsonod kay Naaman. Kag sang nakita sia ni Naaman nga nagadalagan sa olihi niya, nagpanaug sia sa kangga sa pagsugata sa iya, kag nagsiling, Maayo bala ang tanan?

22 Kag nagsiling sia, Maayo ang tanan. Ang akon agalon nagpadala sa akon, nga nagasiling, Yari karon, may nag-abut sa akon karon gid gikan sa bukid nga Efraim nga duha ka pamatan-on nga lalaki sa mga anak nga lalaki sang mga manalagna: hatagi sila, ginaampo ko sa imo, sing isa ka talanton nga pilak, kag duha ka ilislan nga panapton.

23 Kag si Naaman nagsiling, Magmahamuut ka, magkuha sing duha ka talanton. Kag ginpilit niya sia, kag ginputus ang duha ka talanton nga pilak sa duha ka puyo, pati sang duha ka ilislan nga panapton, kag ginpapas-an sila sa duha sang iya mga alagad; kag gindala nila sila sa una niya.

24 Kag sang nag-abut sia sa torre, ginkuha niya sila sa kamut nila, kag ginbutang sila sa balay: kag ginpalakat niya ang mga tawo, kag nagtaliwan sila.

25 Apang nagsulud sia, kag nagtindug sa atubangan sang iya agalon. Kag si Eliseo nagsiling sa iya, Diin ka bala maghalin, Giezi? Kag nagsiling sia, Ang imo alagad wala magkadto sa bisan diin.

26 Kag nagsiling sia sa iya, Wala bala mag-upud ang akon tagiposoon sa imo, sang nagbalik ang tawo gikan sa iya kangga sa pagsugata sa imo? Tion bala ini sa pagbaton sing kuarta, kag sa pagbaton sing mga panapton, kag mga katamnan sang olivo, kag mga ulubasan, kag mga carnero, kag mga baka, kag mga alagad nga lalaki, kag mga alagad nga babaye?

27 Busa ang aro ni Naaman magatapik sa imo, kag sa imo mga kaliwat sa gihapon. Kag sia naggowa gikan sa atubangan niya nga aroon, nga maputi subong sang nieve.

KAPITULO 6

KAG ang mga anak nga lalaki sang mga manalagna nagsiling kay Eliseo, Yari karon, ang duug nga ginapuy-an naton upud sa imo tama kakitid sa aton.

2 Magkadto kita, ginaampo namon sa imo, sa Jordan, kag magkuha didto ang tagsa ka tawo sing balayanon, kag maghimo kita didto sing duug nga mapuy-an naton. Kag nagsabat sia, Lakat kamo.

3 Kag ang isa nagsiling, Magcontento ka, ginaampo ko sa imo, kag mag-upud sa imo mga alagad. Kag sia nagsabat, Makadto ako.

4 Gani nag-upud sia sa ila. Kag sang nag-abut sila sa Jordan, nagpulud sila sing kahoy.

5 Apang sang nagapulud ang isa sing balayanon, ang olo sang wasay naholog sa tubig: kag nagsinggit sia, kag nagsiling, Ahay, agalon! kay hinulaman yadto.

6 Kag ang tawo sang Dios nagsiling, Diin bala maholog yadto? Kag sia nagtudlo sa iya sang duug. Kag nag-utud sia sing lipak, kag ginhaboy ini didto; kag naglutaw ang salsalon.

7 Busa nagsiling sia, Kab-uta ina sa imo. Kag gin-untay niya ang iya kamut, kag ginkuha ini.

8 ś Niyan nagpakig-away ang hari sang Siria batok sa Israel, kag nagpakigsapul sia sa iya mga alagad, nga nagasiling, Sa amo kag sa amo nga duug ipahamtang ko ang akon kampo.

9 Kag ang tawo sang Dios nagpadala sa hari sang Israel, nga nagasiling, Andam ka nga indi mag-agi sa among duug; kay ang mga Sirianhon nagadulhog didto.

10 Kag ang hari sang Israel nagpadala sa duug nga ginsugid sa iya sang tawo sang Dios kag ginpaandaman sia, kag naluwas niya ang iya kaugalingon didto, indi sa makaisa ukon makaduha.

11 Busa ang tagiposoon sang hari sang Siria naglibog sing tama nahanungud sining butang; kag nagtawag sia sang iya mga alagad, kag nagsiling sa ila, Indi bala kamo magpahayag sa akon kon sin-o sa aton ang nagaapin sa hari sang Israel?

12 Kag ang isa sang iya mga alagad nagsiling, Wala, ginoo ko, O hari: kondi si Eliseo, ang manalagna nga yara sa Israel, nagasugid sa hari sang Israel sang mga polong nga imo ginpamolong sa imo hulut nga hiligdaan.

13 ś Kag nagsiling sia, Lakat kag maglampitaw kon diin sia, agud nga makapadala ako kag ipakuha sia. Kag ginsugid ini sa iya, nga nagasiling, Yari karon, yara sia sa Dotan.

14 Gani nagpadala sia didto sing mga kabayo, kag mga kangga, kag dakung kasoldadosan: kag nag-abut sila sa kagab-ihon, kag ginlikupan ang siudad.

15 Kag sang nagbangon sing aga pa ang alagad sang tawo sang Dios, kag naggowa, yari karon, ang kasoldadosan nga may mga kabayo kag mga kangga naglikup sa siudad. Kag ang iya alagad nagsiling sa iya, Ahay, agalon ko! ano bala ang himoon ta?

16 Kag sia nagsabat, Dili ka magkahadluk: kay ang mga nagaupud sa aton madamu pa sa mga nagaupud sa ila.

17 Kag nagpangamuyo si Eliseo, kag nagsiling, GINOO, ginaampo ko sa imo, buksi ang iya mga mata, agud nga makakita sia. Kag ginbuksan sang GINOO ang mga mata sang pamatan-on nga lalaki; kag nakakita sia: kag, yari karon, ang bukid hil-ob sang mga kabayo kag sang mga kangga nga kalayo sa palibut ni Eliseo.

18 Kag sang nagdulhog sila sa iya, nagpangamuyo si Eliseo sa GINOO, kag nagsiling, Ginaampo ko sa imo, sakita ining katawohan sa pagkabulag. Kag ginsakit niya sila sa pagkabulag sono sa polong ni Eliseo.

19 ś Kag si Eliseo nagsiling sa ila, Indi amo ini ang dalan, kag indi ini ang siudad: sonod kamo sa akon, kag dalhon ko kamo sa tawo nga ginapangita ninyo. Apang gintuytuyan niya sila pa Samaria.

20 Kag nahanabu, sang nakasulud sila sa Samaria, nga si Eliseo nagsiling, GINOO, buksi ang mga mata sining mga tawo, agud nga makakita sila. Kag ginbuksan sang GINOO ang ila mga mata, kag nakakita sila; kag, yari karon, yara sila sa tunga sang Samaria.

21 Kag ang hari sang Israel nagsiling kay Eliseo, sang nakita niya sila, Amay ko, patyon ko bala sila? patyon ko bala sila?

22 Kag nagsabat sia, Dili mo sila pagpatyon: buut ka bala magpatay sang nabihag mo sa imo espada kag sa imo pana? butangi sa atubangan nila sing kalan-on kag tubig, agud nga makakaon kag makainum sila, kag makapauli sa ila agalon.

23 Kag gin-amanan niya sila sing dakung pagkaon: kag sang nakakaon kag nakainum sila, ginpapauli niya sila, kag sila nagkadto sa ila agalon. Gani ang mga kabon sang Siria wala na magkadto sa duta sang Israel.

24 ś Kag nahanabu sa tapus sini, nga si Ben-hadad nga hari sang Siria nagtipon sang bug-os niyang kasoldadosan, kag nagtaklad, kag nagkibon sang Samaria.

25 Kag may dakung tiggulutum sa Samaria: kag, yari karon, ginkibon nila ini, tubtub nga ang olo sang asno nabaligya sa kawaloan ka siclo nga pilak, kag ang ikap-at nga bahin sang isa ka kab nga iti sang pating sa lima ka siclo nga pilak.

26 Kag sang nagaligad ang hari sang Israel sa ibabaw sang kuta, may babaye nga nagsinggit sa iya, nga nagasiling, Tabang, ginoo ko, O hari.

27 Kag nagsiling sia, Kon indi ang GINOO magtabang sa imo, diin ko bala ikaw tabangan? gikan bala sa salog sang tambobo, ukon gikan sa linasan sang ubas?

28 Kag ang hari nagsiling sa iya, Ano bala ang nagasakit sa imo? Kag nagsabat sia, Ining babaye nagsiling sa akon, Ihatag ang imo anak nga lalaki, agud nga makaon naton sia karon nga adlaw, kag buwas kaonon naton ang akon anak nga lalaki.

29 Gani ginlaga namon ang akon anak nga lalaki, kag ginkaon sia: kag sa adlaw nga madason ako nagsiling sa iya, Ihatag ang imo anak nga lalaki, agud nga makaon naton sia: kag gintago niya ang iya anak nga lalaki.

30 ś Kag nahanabu, sang nabatian sang hari ang mga polong sang babaye, nga ginkusnit niya ang iya mga panapton; kag nagligad sia sa ibabaw sang kuta, kag ang katawohan nagtolok, kag, yari karon, sa sulud may panapton nga sako sia sa ibabaw sang iya unud.

31 Niyan nagsiling sia, Ang Dios maghimo sang subong sa akon, kag labi pa man, kon ang olo ni Eliseo nga anak nga lalaki ni Safat mabilin sa ibabaw niya sining adlaw.

32 Apang si Eliseo nagalingkod sa iya balay, kag ang mga tigulang nagalingkod upud sa iya; kag ang hari nagpadala sing isa ka tawo gikan sa atubangan niya: apang sa wala pa mag-abut ang manugbalita sa iya, nagsiling sia sa mga tigulang, Nakita bala ninyo kon paano nga ining lalaki nga anak sang manugpatay nagpadala sa pagkuha sang akon olo? tan-awa, kon mag-abut ang manugbalita, takpi ang ganhaan, kag punggi ninyo sia sa ganhaan: wala bala sa olihi niya ang lapaklapak sang mga tiil sang iya agalon?

33 Kag samtang nagahambal pa sia sa ila, yari karon, ang manugbalita nagdulhog sa iya: kag nagsiling sia, Yari karon, ining malaut nagagikan sa GINOO; ngaa bala maghulat pa ako sa GINOO?

KAPITULO 7

NIYAN si Eliseo nagsiling, Pamatii ninyo ang polong sang GINOO; Amo ini ang ginasiling sang GINOO, Buwas sa mga amo sining tion ang isa ka sukub sang mapino nga harina ibaligya sing isa ka siclo, kag ang duha ka sukub nga sebada sing isa ka siclo, sa gawang sang Samaria.

2 Niyan ang ginoo nga ginahamboyan sang hari sang iya kamut nagsabat sa tawo sang Dios, kag nagsiling, Yari karon, kon ang GINOO maghimo sing mga talamwaan sa langit, mahanabu bala ining butang? Kag nagsiling sia, Yari karon, makita mo ini sang imo mga mata, apang indi ka makakaon sini.

3 ś Kag may apat ka tawo nga aroon sa salamputan sang gawang: kag nagsilingay ang isa kag isa, Ngaa bala nagalingkod kita diri tubtub nga kita mapatay?

4 Kon magsiling kita, Masulud kita sa siudad, niyan ang tiggulutum yara sa siudad, kag mapatay kita didto: kag kon maglingkod pa kita diri, mapatay man kita. Busa karon kari, kag magdangup kita sa kasoldadosan sang mga Sirianhon: kon luwason kita nila nga buhi, mabuhi kita; kag kon patyon nila kita, mapatay lamang kita.

5 Kag nagtindug sila sa kasisidmon, sa pagkadto sa kampo sang mga Sirianhon: kag sang nag-abut sila sa nahigad gid nga bahin sang kampo sang Siria, yari karon, wala didto sing tawo.

6 Kay ginhimo sang GINOO nga ang kasoldadosan sang mga Sirianhon makabati sang dinagubdub sang mga kangga, kag sang kinagahud sang mga kabayo, bisan ang kinagahud sang daku nga kasoldadosan: kag nagsilingay ang isa kag isa, Yari karon, ang hari sang Israel naghinakay batok sa aton sang mga hari sang mga Hithanon, kag sang mga hari sang mga Egiptohanon, sa pagdamhag sa aton.

7 Busa nagtindug sila kag nagpalagyo sa kasisidmon, kag nagbiya sang ila mga layanglayang, kag sang ila mga kabayo, kag sang ila mga asno, bisan sang kampo subong nga amo sia, kag nagpalagyo tungud sa ila kabuhi.

8 Kag sang nagkadto ini nga mga aroon sa nahigad gid nga bahin sang kampo, nagsulud sila sa isa ka layanglayang, kag nagkaon kag nag-inum sila, kag nagdala gikan didto sing pilak, kag bulawan, kag panapton, kag naglakat kag gintago ini; kag nagbalik sila, kag nagsulud sila sa isa pa ka layanglayang, kag nagdala man gikan didto, kag naglakat kag gintago ini.

9 Niyan nagsilingay ang isa kag isa, Wala kita nagahimo sing maayo: ining adlaw adlaw sang maayo nga mga balita, kag nagahipus kita: kon maghulat kita tubtub sa pamanagbanag, lambuton kita sang kalainan: busa karon kari, agud nga maglakat kita kag magsugid sa panimalay sang hari.

10 Gani nag-abut sila kag nagpanawag sa bantay sang gawang sang siudad: kag nagsugid sila sa ila, nga nagasiling, Nagsulud kami sa kampo sang mga Sirianhon, kag, yari karon, wala sing tawo didto, bisan tingug sang tawo, kondi ang mga kabayo nga nagaid, kag ang mga asno nga nagaid, kag ang mga layanglayang subong nga amo sila.

11 Kag gintawag niya ang mga bantay sang gawang; kag ginsugid nila ini sa panimalay sang hari sa sulud.

12 ś Kag ang hari nagbangon sa kagab-ihon, kag nagsiling sa iya mga alagad, Ipakita ko karon sa inyo ang nahimo sa aton sang mga Sirianhon. Sila nakahibalo nga gutum kita; busa naghalin sila sa kampo sa pagpanago sa latagon, nga nagasiling, Kon maggowa sila sa siudad, dakpon naton sila nga buhi, kag magsulud sa siudad.

13 Kag ang isa sang iya mga alagad nagsabat kag nagsiling, Ipakuha sa iban, ginaampo ko sa imo, ang lima nga nabilin sang mga kabayo, nga nabilin sa siudad, (yari karon, sila subong sang bug-os nga kadam-an sang Israel nga nabilin sa sini: yari karon, siling ko, sila subong sang bug-os nga kadam-an sang Israel nga napapas:) kag ipadala naton sila kag patan-awon.

14 Busa nagkuha sila sing duha ka kabayo sang kangga; kag nagpadala ang hari sa olihi sang kasoldadosan sang mga Sirianhon, nga nagasiling, Lakat kamo kag tan-awa.

15 Kag ginsonod nila sila tubtub sa Jordan: kag, yari karon, ang bug-os nga dalan nahil-ob sang mga panapton kag mga suludlan, nga ginhaboy sang mga Sirianhon sa ila pagdalidali. Kag nagbalik ang mga manugbalita, kag nagsugid sa hari.

16 Kag ang katawohan naggowa, kag nag-ati sang layanglayang sang mga Sirianhon. Gani ang isa ka sukub sang harina nga mapino ginbaligya sa isa ka siclo, kag duha ka sukub nga sebada sa isa ka siclo, sono sa polong sang GINOO.

17 ś Kag gintulin sang hari ang gawang sa ginoo nga sa iya kamut nagahamboy sia: kag gintapak sia sang katawohan sa gawang, kag napatay sia, sono sa nasiling sang tawo sang Dios, nga nagpamolong sang nagdulhog ang hari sa iya.

18 Kag nahanabu subong sa napamolong sang tawo sang Dios sa hari, nga nagasiling, Duha ka sukub nga sebada sa isa ka siclo, kag isa ka sukub sang harina nga mapino sa isa ka siclo, buwas sa mga subong sini ang tion sa gawang sang Samaria:

19 Kag nagsabat yadto nga ginoo sa tawo sang Dios, kag nagsiling, Karon, yari karon, kon ang GINOO maghimo sing mga talamwaan sa langit, mahanabu bala ini nga butang? Kag sia nagsiling, Yari karon, makita mo ini sang imo mga mata, apang indi ka makakaon sini.

20 Kag amo ini gid ang nahanabu sa iya: kay ang katawohan nagtapak sa iya sa gawang, kag napatay sia.

KAPITULO 8

NIYAN si Eliseo nagpamolong sa babaye, nga ang iya anak nga lalaki ginbuhi niya, nga nagasiling, Tindug ka, kag lakat ka kag ang bug-os mo nga panimalay, kag magpanlugayaw sa bisan diin nga mapanlugayawan mo: kay ginpaabut sang GINOO ang tiggulutum; kag magaabut man ini sa duta sing pito ka tuig.

2 Kag ang babaye nagtindug, kag naghimo sono sa nasiling sang tawo sang Dios: kag naglakat sia pati sang iya panimalay, kag nagpanlugayaw sa duta sang mga Filistinhon sing pito ka tuig.

3 Kag nahanabu sa katapusan sang pito ka tuig, nga ang babaye nagbalik gikan sa duta sang mga Filistinhon: kag naggowa sia sa pagtuaw sa hari tungud sang iya balay kag sang iya duta.

4 Kag ang hari nagpakighambal kay Giezi nga alagad sang tawo sang Dios, nga nagasiling, Sugiri ako, ginaampo ko sa imo, sang tanan nga dalagku nga butang nga nahimo ni Eliseo.

5 Kag nahanabu, sang nagasugid sia sa hari kon paano nga ginbuhi niya ang patay nga lawas, nga, yari karon, ang babaye, nga ang iya anak nga lalaki ginbuhi niya, nagtuaw sa hari tungud sang iya balay kag sang iya duta. Kag si Giezi nagsiling, Akon ginoo, O hari, amo ini ang babaye, kag amo ini ang iya anak nga lalaki nga ginbuhi ni Eliseo.

6 Kag sang nagpamangkot ang hari sa babaye, sia nagsugid sa iya. Gani ang hari nagtangdo sa iya sang isa ka opisyal, nga nagasiling, Ipauli mo ang tanan nga iya, kag ang bug-os nga patubas sang latagon kutub sang adlaw nga nagbiya sia sang duta bisan tubtub karon.

7 ś Kag si Eliseo nagkadto sa Damasco; kag si Ben-hadad nga hari sang Siria nagmasakit; kag ginsugid ini sa iya, nga nagasiling, Ang tawo sang Dios nag-abut diri.

8 Kag ang hari nagsiling kay Hazael, Dala ka sa imo kamut sing regalo, kag maglakat, sugataa ang tawo sang Dios, kag pamangkot ka paagi sa iya sa GINOO, nga nagasiling, Magaayo bala ako sa sini nga balatian?

9 Gani si Hazael nagkadto sa pagsugata sa iya, kag nagdala sing regalo sa iya kamut, bisan sang tagsa ka maayo nga butang sang Damasco, nga malulan sa kap-atan ka camelyo, kag nag-abut sia kag nagtindug sa atubangan niya, kag nagsiling sia, Ang imo anak nga lalaki nga si Ben-hadad nga hari sang Siria nagpadala sa akon sa imo, nga nagasiling, Magaayo bala ako sa sini nga balatian?

10 Kag si Eliseo nagsiling sa iya, Lakat, isiling sa iya, Sa pagkamatuud magaayo ka: apang ang GINOO nagpahayag sa akon nga sia mapatay sing totoo.

11 Kag gintadlong niya ang iya nawung, tubtub nga nahuya sia: kag ang tawo sang Dios naghibi.

12 Kag nagsiling si Hazael, Ngaa bala nagahibi ang akon ginoo? Kag sia nagsabat, Bangud nga nahibaloan ko ang malaut nga himoon mo sa kaanakan sang Israel: ang ila mga pamakud tutdan mo sa kalayo, kag ang ila mga pamatan-on nga lalaki patyon mo sa espada, kag ipus-ang mo ang ila mga kabataan, kag gayhabon mo ang ila mga babaye nga nagabusung.

13 Kag si Hazael nagsiling, Apang ano bala, ido bala ang imo alagad, nga maghimo sia sini nga daku nga butang? Kag si Eliseo nagsabat, Ang GINOO nagpakita sa akon nga ikaw manginhari sa ibabaw sang Siria.

14 Gani nagtaliwan sia gikan kay Eliseo, kag nag-abut sa iya agalon; nga nagsiling sa iya, Ano bala ang ginsiling ni Eliseo sa imo? Kag sia nagsabat, Sia nagsugid sa akon nga magaayo ka sing totoo.

15 Kag nahanabu sa madason nga adlaw, nga nagkuha sia sing isa ka tabon nga madamul, kag gintusmog ini sa tubig, kag ginhumlad ini sa iya nawung, sa bagay nga napatay sia: kag si Hazael naghari nga tal-us niya.

16 ś Kag sa ikalima nga tuig ni Joram nga anak nga lalaki ni Acab, nga hari sang Israel, si Jehosafat nga niyan hari sang Juda, nagsugud sa paghari si Jehoram nga anak nga lalaki ni Jehosafat nga hari sang Juda.

17 Katloan kag duha ka tuig sia sang nagsugud sia sa paghari; kag naghari sia sing walo ka tuig sa Jerusalem.

18 Kag naglakat sia sa dalanon sang mga hari sang Israel, subong sang ginhimo sang panimalay ni Acab: kay ang anak nga babaye ni Acab nangin-asawa niya: kag ginhimo niya ang malaut sa itololok sang GINOO.

19 Apang ang GINOO indi buut maglaglag sang Juda bangud kay David nga iya alagad, subong sang ginsaad niya sa iya nga hatagan sia sing suga sa gihapon, kag ang iya mga anak.

20 ś Sa iya mga adlaw ang Edom nagribuk sa idalum sang kamut sang Juda, kag naghimo sila sing hari nila.

21 Gani si Joram nagliton sa Zair, kag ang tanan nga kangga upud sa iya: kag nagtindug sia sa kagab-ihon, kag ginlaglag ang mga Edomnon nga naglikup sa iya, kag ang mga kapitan sang mga kangga: kag ang katawohan nagpalagyo sa ila mga layanglayang.

22 Walay sapayan ang Edom nagribuk sa idalum sang kamut sang Juda tubtub sini nga adlaw. Niyan ang Libna nagribuk sa amo gid nga tion.

23 Kag ang nabilin nga mga binuhatan ni Joram, kag ang tanan nga ginhimo niya, wala bala sila masulat sa libro sang mga maragtas sang mga hari sang Juda?

24 Kag si Joram nagtolog upud sa iya mga kaamayan, kag ginlubung upud sa iya mga kaamayan sa siudad ni David: kag si Ocozias nga iya anak nga lalaki naghari sa tal-us niya.

25 ś Sa tuig nga ikanapulog duha ni Joram nga anak nga lalaki ni Acab, nga hari sang Israel, nagsugud sa paghari si Ocozias nga anak nga lalaki ni Jehoram, nga hari sang Juda.

26 Duha ka pulo kag duha ka tuig si Ocozias sang nagsugud sia sa paghari; kag naghari sia sing isa ka tuig sa Jerusalem. Kag ang ngalan sang iya iloy amo si Atalia, nga anak nga babaye ni Omri nga hari sang Israel.

27 Kag naglakat sia sa dalanon sang panimalay ni Acab, kag naghimo sang malaut sa itololok sang GINOO, subong sang ginhimo sang panimalay ni Acab: kay umagad sia sang panimalay ni Acab.

28 ś Kag nag-upud sia sa pag-awayan kay Joram nga anak nga lalaki ni Acab sa Ramot-galaad batok kay Hazael nga hari sang Siria; kag ginpilas sang mga Sirianhon si Joram.

29 Kag si haring Joram nagbalik sa Jezreel sa pagpaayo sang mga pilas nga ginhatag sa iya sang mga Sirianhon sa Rama, sang pagpakig-away niya kay Hazael nga hari sang Siria. Kag nagdulhog si Ocozias nga anak nga lalaki ni Jehoram nga hari sang Juda sa pagpakigkita kay Joram nga anak nga lalaki ni Acab sa Jezreel, bangud nga nagmasakit sia.

KAPITULO 9

KAG ang manalagna nga si Eliseo nagtawag sa isa sang mga lalaki nga anak sang mga manalagna, kag nagsiling sa iya, Wagkusi ang imo mga hawak, kag dalha ini nga suludlan sang lana sa imo kamut, kag magkadto sa Ramot-galaad:

2 Kag sa pag-abut mo didto, pangitaa didto si Jehu nga anak nga lalaki ni Jehosafat, nga anak nga lalaki ni Nimsi, kag magsulud, kag patinduga sia gikan sa tunga sang iya mga utud, kag dalha sia sa hulut nga nasulud;

3 Niyan dalha ang suludlan sang lana, kag ibobo ini sa iya olo, kag magsiling, Amo ini ang ginasiling sang GINOO, Nahaplas ko ikaw nga hari sa ibabaw sang Israel. Niyan buksi ang ganhaan kag magpalagyo, kag dili magpalantang.

4 ś Gani ang pamatan-on nga lalaki, bisan ang pamatan-on nga manalagna, nagkadto sa Ramot-galaad.

5 Kag sang pag-abut niya, yari karon, nagalingkod ang mga kapitan sang kasoldadosan; kag sia nagsiling, May inugpahimo ako sa imo, O kapitan. Kag si Jehu nagsiling, Sa kay sin-o bala sa amon nga tanan? Kag nagsiling sia, Sa imo, O kapitan.

6 Kag nagtindug sia, kag nagsulud sa balay; kag ginbobo niya ang lana sa iya olo, kag nagsiling sa iya, Amo ini ang ginasiling sang GINOONG Dios sang Israel, Nahaplas ko ikaw nga hari sa ibabaw sang katawohan sang GINOO, sa ibabaw sang Israel.

7 Kag laglagon mo ang panimalay ni Acab nga imo agalon, agud nga ako magtimalus sang dugo sang akon mga alagad nga mga manalagna, kag sang dugo sang tanan nga alagad sang GINOO, sa kamut ni Jezabel.

8 Kay ang bug-os nga panimalay ni Acab mawala: kag utdon ko gikan kay Acab ang nagaihi sa kuta, kag sia nga ginbokot kag nabilin sa Israel:

9 Kag himoon ko ang panimalay ni Acab kaangay sang panimalay ni Jeroboam nga anak nga lalaki ni Nabat, kag kaangay sang panimalay ni Baasa nga anak nga lalaki ni Ahias:

10 Kag si Jezabel kaonon sang mga ido sa bahin sang Jezreel, kag wala sing magalubung sa iya. Kag ginbuksan niya ang ganhaan, kag nagpalagyo.

11 ś Niyan naggowa si Jehu sa mga alagad sang iya ginoo: kag nagsiling sa iya ang isa, Maayo bala ang tanan? ngaa bala nagkari sa imo ining buang nga tawo? Kag nagsiling sia sa ila, Nakilala ninyo ang tawo, kag ang iya ginhambal.

12 Kag nagsiling sila, Dimatuud ini; sugiri na kami. Kag nagsiling sia, Amo ini kag amo ini ang ginpamolong niya sa akon, nga nagasiling, Amo ini ang ginasiling sang GINOO, Nahaplas ko ikaw nga hari sa ibabaw sang Israel.

13 Niyan nagdalidali sila, kag nagkuha ang tagsa ka tawo sang iya panapton, kag ginbutang nila ini sa idalum niya sa ibabaw sang hagdanan, kag nagpatonog sang budyong, nga nagasiling, Si Jehu hari.

14 Gani si Jehu nga anak nga lalaki ni Jehosafat, nga anak nga lalaki ni Nimsi, nagpuhon batok kay Joram. (Karon si Joram nagbantay sang Ramot-galaad, sia kag ang bug-os nga Israel, bangud kay Hazael nga hari sang Siria.

15 Apang si haring Joram nagbalik sa Jezreel sa pagpaayo sang mga pilas nga ginhatag sa iya sang mga Sirianhon, sang pagpakig-away niya kay Hazael nga hari sang Siria.) Kag si Jehu nagsiling, Kon amo ini ang inyo painoino, niyan wala sing bisan sin-o nga papalagyohon ukon pagowaon sa siudad sa paglakat sa pagsugid sini sa Jezreel.

16 Gani si Jehu nagsakay sa kangga, kag nagkadto sa Jezreel; kay si Joram nagahigda didto. Kag si Ocozias nga hari sang Juda nagdulhog sa pagtan-aw kay Joram.

17 Kag may manugbantay nga nagatindug sa torre sa Jezreel, kag nakita niya ang kabon ni Jehu sang nagpakari sia, kag nagsiling, Ako nakakita sing isa ka kabon. Kag si Joram nagsiling, Kuha ka sing isa ka manugkabayo, kag ipadala sa pagsugata sa ila, kag pasilingon sia, Paghidait bala?

18 Gani may nagkadto nga isa nga nagakabayo sa pagsugata sa iya, kag nagsiling, Amo ini ang ginasiling sang hari, Paghidait bala? Kag si Jehu nagsiling, Ano bala ang labut mo sa paghidait? liso ka paolihi nakon. Kag ang manugbantay nagsugid, nga nagasiling, Ang manugbalita nag-abut sa ila, apang wala sia magbalik.

19 Niyan nagpadala sia sing ikaduha nga nagakabayo, nga nag-abut sa ila, kag nagsiling, Amo ini ang ginasiling sang hari, Paghidait bala? Kag si Jehu nagsabat, Ano bala ang labut mo sa paghidait? liso ka paolihi nakon.

20 Kag ang manugbantay nagsugid, nga nagasiling, Sia nag-abut gid sa ila, kag wala magbalik: kag ang pagpadalagan kaangay sang pagpadalagan ni Jehu nga anak nga lalaki ni Nimsi; kay nagapadalagan sia nga may kasingkal.

21 Kag si Joram nagsiling, Magtakud. Kag gintakdan nila ang iya kangga. Kag si Joram nga hari sang Israel kag si Ocozias nga hari sang Juda naggowa, ang tagsa sa iya kangga, kag naggowa sila batok kay Jehu, kag nagsugata sa iya sa puna ni Nabot nga Jezreelnon.

22 Kag nahanabu, sang nakita ni Joram si Jehu, nga nagsiling sia, Paghidait bala, Jehu? Kag sia nagsabat, Ano bala nga paghidait, samtang may mga pagpamiga ni Jezabel nga imo iloy kag ang iya mga pagkababaylan tama kadamu?

23 Kag ginpaliso ni Joram ang iya mga kamut, kag nalagyo, kag nagsiling kay Ocozias, May budhi, O Ocozias.

24 Kag si Jehu nagbingat sang iya pana sa iya bug-os nga kusug, kag gin-igo si Jehoram sa ulut sang iya mga abaga, kag ang baslay naglapus sa iya tagiposoon, kag nag-uy-uy sia sa iya kangga.

25 Niyan nagsiling si Jehu kay Bidkar nga iya kapitan, Hakwata, kag ihaboy sia sa puna sang latagon ni Nabot nga Jezreelnon: kay dumduma kon paano nga, sang ako kag ikaw nagsakay sing tingub sa olihi ni Acab nga iya amay, ang GINOO nagbutang sining lulan sa iya;

26 Sa pagkamatuud nakita ko kahapon ang dugo ni Nabot, kag ang dugo sang iya mga anak nga lalaki, nagasiling ang GINOO; kag magabalus ako sa imo sa sini nga puna, nagasiling ang GINOO. Busa karon kuhaa kag ihaboy sia sa puna, sono sa polong sang GINOO.

27 ś Apang sang nakita ini ni Ocozias nga hari sang Juda, nagpalagyo sia sa dalan sang balay sa katamnan. Kag ginsonod sia ni Jehu, kag nagsiling, Pilasa man sia sa kangga. Kag amo ini ang ginhimo nila sa taklaran sang Gur, nga yara sa luyo sang Ibleam. Kag nagpalagyo sia sa Meguido, kag napatay didto.

28 Kag gindala sia sang iya mga alagad sa kangga pakadto sa Jerusalem, kag ginlubung sia sa iya lulubngan upud sang iya mga kaamayan sa siudad ni David.

29 Kag sa ikanapulog isa nga tuig ni Joram nga anak nga lalaki ni Acab, nagsugud sa paghari si Ocozias sa ibabaw sang Juda.

30 ś Kag sang nag-abut si Jehu sa Jezreel, nabatian ini ni Jezabel; kag ginduagan niya ang iya nawung, kag ginpunihan ang iya olo, kag naggawa sa bintana.

31 Kag sang nagsulud si Jehu sa gawang, si Jezabel nagsiling, May paghidait bala si Zimri, nga nagpatay sang iya agalon?

32 Kag nagtangla sia sang iya nawung nayon sa bintana, kag nagsiling, Sin-o bala ang dampig sa akon? sin-o? Kag may naggawa sa iya nga duha ukon tatlo ka eunuco.

33 Kag nagsiling sia, Iholog sia. Gani ginholog nila sia: kag ang iban sang iya dugo nag-asik sa dingding, kag sa mga kabayo: kag gintapak niya sia.

34 Kag sang nakasulud sia, nagkaon sia kag nag-inum, kag nagsiling, Lakat, atipana karon ninyo ining ginpakamalaut nga babaye, kag ilubung sia: kay anak nga babaye sia sang hari.

35 Kag nagkadto sila sa paglubung sa iya: apang wala na sila sing nakita sa iya kondi ang bagol, kag ang mga tiil, kag ang mga palad sang iya mga kamut.

36 Busa nagbalik sila, kag nagsugid sa iya. Kag nagsiling sia, Amo ini ang polong sang GINOO, nga ginpamolong niya paagi sa iya alagad nga si Elias nga Tisbinhon, nga nagasiling, Sa bahin sang Jezreel kaonon sang mga ido ang unud ni Jezabel:

37 Kag ang bangkay ni Jezabel manginsubong sang ipot sa kadaygan sang latagon sa bahin sang Jezreel; sa bagay nga indi sila magsiling, Ini amo si Jezabel.

KAPITULO 10

KAG si Acab may kapitoan ka anak nga lalaki sa Samaria. Kag si Jehu nagsulat sing mga sulat, kag ginpadala sa Samaria, sa mga pangolo sang Jezreel, bisan sa mga tigulang, kag sa mga nagbatiti sang mga anak ni Acab, nga nagasiling,

2 Karon sa pag-abut gid sining sulat sa inyo, sa ginatan-aw nga yara sa inyo ang mga anak nga lalaki sang inyo agalon, kag yara sa inyo may mga kangga kag mga kabayo, siudad nga may pamakud man, kag hinganib;

3 Pangitaa ninyo ang labi gid kaayo kag ang nagakaigo gid nga anak nga lalaki sang inyo agalon, kag ibutang sia sa trono sang iya amay, kag pakig-away kamo tungud sa panimalay sang inyo agalon.

4 Apang ginhadlukan sila sing lakas, kag nagsiling, Yari karon, ang duha ka hari wala makatindug sa atubangan niya: paano bala niyan ang pagtindug ta?

5 Kag ang nagdumala sang panimalay, kag ang nagdumala sang siudad, ang mga tigulang man, kag ang mga nagbatiti sang mga bata, nagpadala kay Jehu, nga nagasiling, Kami imo mga alagad, kag magahimo sang tanan nga isogo mo sa amon; indi kami maghimo sing bisan sin-o nga hari: himoa inang maayo sa imo mga mata.

6 Niyan nagsulat sia sa ila sa ikaduha, nga nagasiling, Kon kamo mga akon, kag kon magpamati kamo sa akon tingug, kuhaa ninyo ang mga olo sang mga tawo nga mga anak nga lalaki sang inyo agalon, kag kari kamo sa akon buwas sa sining tion sa Jezreel. Karon ang mga anak nga lalaki sang hari, nga kapitoan ka tawo, upud sa mga dakung tawo sang siudad, nga nagbatiti sa ila.

7 Kag nahanabu, sang pag-abut sang sulat sa ila, nga ginkuha nila ang mga anak nga lalaki sang hari, kag ginpatay ang kapitoan ka tawo, kag ginbutang ang ila mga olo sa mga alat, kag ginpadala sila sa iya sa Jezreel.

8 ś Kag may manugbalita nga nag-abut, kag nagsugid sa iya, nga nagasiling, Gindala nila ang mga olo sang mga anak nga lalaki sang hari. Kag sia nagsiling, Ibutang ninyo sila sa duha ka tumpok sa salamputan sang gawang tubtub sa aga.

9 Kag nahanabu sang pagkaaga, nga naggowa sia, kag nagtindug, kag nagsiling sa bug-os nga katawohan, Kamo mga matarung: yari karon, nagpuhon ako batok sa akon agalon, kag ginpatay sia: apang sin-o bala ang nagpatay sini tanan?

10 Kilalaha ninyo karon nga wala sing maholog sa duta sang polong sang GINOO, nga ginpamolong sang GINOO nahanungud sa panimalay ni Acab: kay nahimo sang GINOO inang ginpamolong niya paagi sa iya alagad nga si Elias.

11 Gani ginpatay ni Jehu ang tanan nga nabilin sang panimalay ni Acab sa Jezreel, kag ang tanan niyang dakung mga tawo, kag ang tanan niyang himata, kag ang iya mga pari, tubtub nga wala sia sing ginbilin sa iya.

12 ś Kag nagtindug sia kag nagtaliwan, kag nagkadto sa Samaria. Kag sang didto sia sa balay nga alalotan sa dalanon,

13 Nasugata ni Jehu ang mga utud ni Ocozias nga hari sang Juda, kag sia nagsiling, Sin-o bala kamo? Kag nagsabat sila, Mga utud kami ni Ocozias; kag nagdulhog kami sa pag-abiabi sa mga anak sang hari kag sa mga anak sang hara.

14 Kag nagsiling sia, Dakpa sila nga buhi. Kag gindakup nila sila nga buhi, kag ginpatay sila sa boho sang balay nga alalotan, ang kap-atan kag duha ka lalaki; kag wala sia sing ginbilin sa ila.

15 ś Kag sang nakataliwan sia didto, nasugata niya si Jehonadab nga anak nga lalaki ni Recab nga nagapakari sa pagsugata sa iya: kag gin-abiabi niya sia, kag nagsiling sa iya, Matadlong bala ang imo tagiposoon, subong nga ang akon tagiposoon ayon sa imo tagiposoon? Kag si Jehonadab nagsabat, Amo gid. Kon amo ini, idaho sa akon ang imo kamut. Kag gindaho niya sa iya ang iya kamut; kag ginpasaka niya sia upud sa iya sa kangga.

16 Kag nagsiling sia, Upud ka sa akon, kag tan-awa ang akon kakugi sa GINOO. Gani ginpasakay nila sia sa iya kangga.

17 Kag sang pag-abut niya sa Samaria, ginpatay niya ang tanan nga nabilin kay Acab sa Samaria, tubtub nga nalaglag niya sia sono sa pinamolong sang GINOO, nga ginpamolong niya kay Elias.

18 ś Kag gintipon sing tingub ni Jehu ang bug-os nga katawohan, kag nagsiling sa ila, Si Acab nag-alagad sing diotay kay Baal; apang si Jehu magaalagad sa iya sing daku.

19 Busa karon pakaria sa akon ang tanan nga manalagna ni Baal, ang tanan niyang alagad, kag ang tanan niyang pari; walay magkulang bisan isa: kay may isa ka daku ako nga halad kay Baal; ang bisan sin-o nga indi magtambong, indi sia mabuhi. Apang ginhimo ini ni Jehu nga may kalalang, sa katuyoan nga malaglag niya ang mga manugsimba kay Baal.

20 Kag si Jehu nagsiling, Bantala kamo sing isa ka pagtilipon nga solemne kay Baal. Kag ginbantala nila ini.

21 Kag si Jehu nagpadala sa bug-os nga Israel: kag nag-abut ang tanan nga manugsimba kay Baal, sa bagay nga walay nabilin nga tawo nga wala mag-abut. Kag nagsulud sila sa balay ni Baal; kag ang balay ni Baal napuno gikan sa isa ka ukbung tubtub sa isa.

22 Kag nagsiling sia sa manugtatap sang mga panapton, Pagowaa ang mga panapton nga sa tanan nga manugsimba kay Baal. Kag nagpagowa sia sa ila sing mga panapton.

23 Kag nagsulud si Jehu, kag si Jehonadab nga anak nga lalaki ni Recab, sa balay ni Baal, kag nagsiling sa mga manugsimba kay Baal, Usisaa, kag tan-awa nga wala diri upud sa inyo sang mga alagad sang GINOO, kondi ang mga manugsimba lamang kay Baal.

24 Kag sang nagsulud sila sa pagdolot sing mga halad kag mga halad nga sinonog, si Jehu nagtangdo sing kawaloan ka lalaki sa gowa, kag nagsiling, Kon ang bisan sin-o sang mga lalaki nga gindala ko sa inyo mga kamut magpalagyo, ang nagapapalagyo sa iya, ang iya kabuhi ibaylo tungud sa kabuhi niya.

25 Kag nahanabu, sa gilayon nga nakatapus sia sa pagdolot sang halad nga sinonog, nga si Jehu nagsiling sa mga bantay kag sa mga kapitan, Sulud kamo, kag patyon sila; walay bisan sin-o nga pagowaon. Kag ginpatay nila sila sa sulab sang espada; kag ang mga bantay kag ang mga kapitan nagpilak sa ila sa gowa, kag nagkadto sa siudad sang balay ni Baal.

26 Kag ginpagowa nila ang mga imahen sa balay ni Baal, kag ginsonog sila.

27 Kag ginwagwag nila ang imahen ni Baal, kag ginguba ang balay ni Baal, kag ginhimo ini nga palamus-onan nga balay tubtub sining adlaw.

28 Amo ini ang paglaglag ni Jehu kay Baal gikan sa Israel.

29 ś Apang gikan sa mga sala ni Jeroboam nga anak nga lalaki ni Nabat, nga nagpapakasala sang Israel, si Jehu wala magtaliwan sa ila, kon sayoron, ang mga tinday nga baka nga bulawan nga yadto sa Bet-el, kag ang yadto sa Dan.

30 Kag ang GINOO nagsiling kay Jehu, Bangud nga naghimo ka sing maayo sa paghikot sinang matarung sa akon mga mata, kag naghimo sa panimalay ni Acab sono sa tanan nga yari sa akon tagiposoon, ang imo mga anak sang ikap-at nga kaliwatan magalingkod sa trono sang Israel.

31 Apang si Jehu wala magsapak sa paglakat sa kasogoan sang GINOONG Dios sang Israel sa bug-os niyang tagiposoon: kay wala sia magtaliwan gikan sa mga sala ni Jeroboam, diin ginpapakasala ang Israel.

32 ś Sa sadtong mga adlaw ang GINOO nagsugud sa pag-utud sang Israel: kag si Hazael naglaglag sa ila sa tanan nga ginsakpan sang Israel;

33 Kutub sa Jordan pa sidlangan, ang bug-os nga duta sang Galaad, ang mga Gadhanon, kag ang mga Rubenhon, kag ang mga Manasinhon, kutub sa Aroer, nga sa ubay sang suba nga Arnon, nga amo, ang Galaad kag Basan.

34 Karon ang nabilin sang mga binuhatan ni Jehu, kag ang tanan nga ginhimo niya, kag ang bug-os niyang kagamhanan, wala bala sila masulat sa libro sang mga maragtas sang mga hari sang Israel?

35 Kag si Jehu nagtolog upud sa iya mga kaamayan, kag ginlubung nila sia sa Samaria. Kag naghari nga tal-us niya si Jehoacaz nga iya anak nga lalaki.

36 Kag ang tion nga naghari si Jehu sa ibabaw sang Israel sa Samaria duha ka pulo kag walo ka tuig.

KAPITULO 11

KAG sang nakita ni Atalia nga iloy ni Ocozias nga ang iya anak nga lalaki patay na, nagtindug sia kag ginlaglag ang bug-os nga kaliwat nga harianon.

2 Apang si Jehosaba, ang babaying anak ni haring Joram, ang babaye nga utud ni Ocozias, nagkuha kay Joas nga lalaking anak ni Ocozias, kag ginkawat sia gikan sa tunga sang mga anak nga lalaki sang hari nga ginpamatay; kag gintago nila sia, bisan sia kag ang iya sisiwa, gikan kay Atalia sa hulut nga higdaan, sa bagay nga wala sia mapatay.

3 Kag gintago sia upud sa iya sa balay sang GINOO sing anum ka tuig. Kag si Atalia naghari sa ibabaw sang duta.

4 ś Kag sa ikapitong tuig nagpadala si Jehoiada kag nagkuha sang mga pangolo sang mga ginatus, upud sang mga kapitan kag mga bantay, kag gindala sila sa iya sa balay sang GINOO, kag nagpakigkatipan sia sa ila, kag ginpasumpa sila sa balay sang GINOO, kag ginpakita sa ila ang lalaking anak sang hari.

5 Kag nagsogo sia sa ila, nga nagasiling, Ini amo ang butang nga inyo himoon; Ang ikatlong bahin sa inyo nga nagasulud sa sabbath mangin manugbantay sang balay sang hari;

6 Kag ang isa ka ikatlong bahin didto sila sa gawang nga Sur; kag ang isa ka ikatlong bahin sa gawang sa likod sang mga manugbantay: sa amo magbantay kamo sang balay, agud nga indi ini maguba.

7 Kag ang duha ka bahin sang tanan sa inyo nga nagagowa sa sabbath, sila ang magabantay sang balay sang GINOO sa palibut sang hari.

8 Kag libutan ninyo ang hari sing bug-os, nga ang tagsa ka tawo may iya nga mga hinganiban sa iya kamut: kag ang nagasulud sa mga kubay nga napaagisud, patyon sia: kag mag-upud kamo sa hari kon maggowa sia kag kon magsulud sia.

9 Kag ang mga kapitan sang ginatus naghimo sono sa tanan nga butang nga ginsogo ni Jehoiada nga pari: kag nagkuha sila ang tagsa ka tawo sang iya mga tawo nga magasulud sa sabbath, upud sa ila nga magagowa sa sabbath, kag nagkadto kay Jehoiada nga pari.

10 Kag ginhatag sang pari sa mga kapitan sang ginatus ang mga bangkaw kag ang mga taming nga iya anay ni haring David, nga didto sa templo sang GINOO.

11 Kag ang mga bantay nagtindug, ang tagsa ka tawo may iya nga mga hinganiban sa iya kamut, sa luyo sang hari palibut, kutub sa pamusud nga too sang templo tubtub sa pamusud nga wala sang templo, sa ubay sang halaran kag sang templo.

12 Kag gindala niya sa gowa ang anak nga lalaki sang hari, kag ginbutang sa iya ang purungpurung, kag ginhatag sa iya ang pagpamatuud; kag ginhimo nila sia nga hari, kag ginhaplas sia; kag nagpamalakpak sila, kag nagsiling, Magluwas ang Dios sa hari.

13 ś Kag sang nabatian ni Atalia ang ginahud sang mga bantay kag sang katawohan, nagkadto sia sa katawohan sa sulud sang templo sang GINOO.

14 Kag sang nagtolok sia, yari karon, ang hari nagatindug sa luyo sang haligi, sono sa kinabatasan, kag ang mga prinsipe kag ang mga manugbudyong sa luyo sang hari, kag ang bug-os nga katawohan sang duta nagkasadya, kag nagpatonog sing mga budyong: kag si Atalia nagkusnit sang iya mga panapton, kag nagsinggit, Budhi, Budhi.

15 Apang si Jehoiada nga pari nagsogo sa mga kapitan sang ginatus, nga mga opisyal sang kasoldadosan, kag nagsiling sa ila, Dalha ninyo sia sa gowa sang mga kubay: kag ang nagasonod sa iya patyon sa espada. Kay ang pari nagsiling, Dili sia pagpatyon sa balay sang GINOO.

16 Kag nagdakup sila sa iya; kag nag-agi sia sa dalan, sa diin nagasulud ang mga kabayo sa balay sang hari: kag ginpatay sia didto.

17 ś Kag si Jehoiada naghimo sing katipan sa tunga sang GINOO kag sang hari kag sang katawohan, nga manginkatawohan sila sang GINOO; sa tunga sang hari man kag sang katawohan.

18 Kag ang bug-os nga katawohan sang duta nagkadto sa balay ni Baal, kag ginguba nila ini; ginwagwag nila sing bug-os gid ang iya mga halaran kag ang iya mga imahen, kag ginpatay si Matan nga pari ni Baal sa atubangan sang mga halaran. Kag ang pari nagtangdo sing mga opisyal sa balay sang GINOO.

19 Kag ginkuha niya ang mga manugdumala sang ginatus, kag ang mga kapitan, kag ang mga bantay, kag ang bug-os nga katawohan sang duta; kag ginpadulhog nila ang hari gikan sa balay sang GINOO, kag nag-agi sa dalan sang gawang sang mga bantay pakadto sa balay sang hari. Kag naglingkod sia sa trono sang mga hari.

20 Kag ang bug-os nga katawohan sang duta nagkasadya, kag ang siudad naglinong: kag ginpatay nila si Atalia sa espada sa luyo sang balay sang hari.

21 Pito ka tuig si Jehoas sang nagsugud sia sa paghari.

KAPITULO 12

SA ikapitong tuig ni Jehu nagsugud sa paghari si Jehoas; kag naghari sia sing kap-atan ka tuig sa Jerusalem. Kag ang ngalan sang iya iloy si Sibia sang Beer-seba.

2 Kag si Jehoas naghimo sinang matarung sa itololok sang GINOO sa tanan niyang adlaw nga gintudloan sia ni Jehoiada nga pari.

3 Apang wala makuha ang mataas nga mga duug: ang katawohan naghalad kag nagsonog pa sing incienso sa mga duug nga mataas.

4 ś Kag si Jehoas nagsiling sa mga pari, Ang tanan nga kuarta sang mga butang nga gindedicar nga ginasulud sa balay sang GINOO, ang kuarta sang tagsatagsa nga may balayran, ang kuarta sang tagsa ka tawo nga ginpabili sa ila, kag ang tanan nga kuarta nga nagagikan sa tagiposoon sang bisan sin-ong tawo sa pagdala sa balay sang GINOO,

5 Batonon ini sang mga pari nga sa ila, ang tagsa ka tawo gikan sa iya kilala: kag kaayohon nila ang mga bulwang sang balay, bisan diin makita ang bulwang.

6 Apang sang tuig nga ikaduha ka pulo kag tatlo ni haring Jehoas wala mapakaayo sang mga pari ang mga bulwang sang balay.

7 Niyan gintawag ni haring Jehoas ang pari nga si Jehoiada, kag ang iban nga mga pari, kag nagsiling sa ila, Ngaa bala nga wala ninyo pagkaayoha ang mga bulwang sang balay? busa karon dili na kamo magbaton sing kuarta sa inyo mga kilala, kondi ihatag ninyo ini nga sa pagkaayo sang mga bulwang sang balay.

8 Kag ang mga pari nagsugut nga indi na sila magbaton sing kuarta gikan sa katawohan, ukon magpakaayo sang mga bulwang sang balay.

9 Apang si Jehoiada nga pari nagkuha sing kaban, kag nagboho sa takup sini, kag ginbutang ini sa luyo sang halaran, sa too nga kilid kon magsulud sa balay sang GINOO: kag ang mga pari nga nagbantay sa ganhaan nagbutang sa sini sang tanan nga kuarta nga ginsulud sa balay sang GINOO.

10 Kag sang nakita nila nga may madamu na nga kuarta sa kaban, nagtaklad ang escriba sang hari kag ang mataas nga pari, kag ginbutang nila sa mga puyo, kag gin-isip ang kuarta nga nakita sa balay sang GINOO.

11 Kag ang kuarta nga naisip ginhatag nila sa mga kamut sang naghimo sang buluhaton, nga gintulinan sang balay sang GINOO: kag ginbayad nila ini sa mga panday kag sa mga manugpatindug, nga naghimo sang balay sang GINOO,

12 Kag sa mga cantero, kag sa mga manugbasbas sing bato, kag sa pagbakal sing mga tablon kag sang bato nga binasbasan sa pagpakaayo sang mga bulwang sang balay sang GINOO, kag sa tanan nga hinguyangon sa pagkaayo sang balay.

13 Walay sapayan gikan sa kuarta nga ginsulud sa balay sang GINOO walay nahimo nga sa balay sang GINOO nga mga yahong nga pilak, mga inugpalong, mga batiya, mga budyong, bisan anong suludlan nga bulawan, ukon mga suludlan nga pilak:

14 Apang ginhatag nila yadto sa mga manugpangabudlay, kag sa sina ginkaayo nila ang balay sang GINOO.

15 Labut pa wala nila pagpangayoi sing isip ang mga tawo, nga sa ila kamut gintugyan nila ang kuarta sa paghatag sa mga manugpangabudlay: kay naghisayo sila sing matutum.

16 Ang kuarta tungud sa mga halad sa paglapas kag ang kuarta tungud sa mga halad nga sa sala wala madala sa balay sang GINOO: ini iya sang mga pari.

17 ś Niyan nagtaklad si Hazael nga hari sang Siria, kag nagpakig-away batok sa Gat, kag gin-agaw ini: kag si Hazael nagpahamtang sang iya nawung sa pagtaklad sa Jerusalem.

18 Kag ginkuha ni Jehoas nga hari sang Juda ang tanan nga mga butang nga balaan nga gindedicar ni Jehosafat, kag ni Jehoram, kag ni Ocozias, nga iya mga kaamayan, nga mga hari sang Juda, kag ang iya kaugalingon nga balaan nga mga butang, kag ang tanan nga bulawan nga nakita sa mga bahandi sang balay sang GINOO, kag sa balay sang hari, kag ginpadala ini kay Hazael nga hari sang Siria: kag naghalin sia sa Jerusalem.

19 ś Kag ang nabilin sang mga binuhatan ni Joas, kag ang tanan nga ginhimo niya, wala bala sila masulat sa libro sang mga maragtas sang mga hari sang Juda?

20 Kag ang iya mga alagad nagtindug, kag nagpuhon, kag nagpatay kay Joas sa balay sang Millo, sa dalanon nga nagapadulhog nayon sa Sila.

21 Kay si Josacar nga anak nga lalaki ni Simeat, kag si Jehosabad nga anak nga lalaki ni Somer, nga iya mga alagad, nag-igo sa iya, kag sia napatay; kag ginlubung nila sia upud sa iya mga kaamayan sa siudad ni David: kag naghari nga tal-us niya si Amasias nga iya anak nga lalaki.

KAPITULO 13

SA ikaduha ka pulo kag tatlo nga tuig ni Joas nga anak nga lalaki ni Ocozias, hari sang Juda, nagsugud sa paghari si Jehoacas nga anak nga lalaki ni Jehu sa ibabaw sang Israel sa Samaria, kag naghari sia sing napulog pito ka tuig.

2 Kag ginhimo niya inang malaut sa itololok sang GINOO, kag nagsonod sa mga sala ni Jeroboam nga anak nga lalaki ni Nabat, diin ginpapakasala ang Israel; wala sia magtaliwan gikan sa ila.

3 ś Kag ang kaakig sang GINOO nagsingkal batok sa Israel, kag gintugyan niya sila sa kamut ni Hazael nga hari sang Siria, kag sa kamut ni Ben-hadad nga anak nga lalaki ni Hazael, sa tanan nilang adlaw.

4 Kag si Jehoacas nagpakilooy sa GINOO, kag ang GINOO nagpamati sa iya: kay nakita niya ang pagpigus sang Israel, bangud nga ginpigus sila sang hari sang Siria.

5 (Kag ang GINOO naghatag sing manluluwas sa Israel, sa bagay nga naluwas sila sa idalum sang kamut sang mga Sirianhon: kag ang kaanakan sang Israel nagpuyo sa ila mga layanglayang, subong sang una nga tion.

6 Walay sapayan wala sila magtaliwan sa mga sala sang panimalay ni Jeroboam, nga nagpapakasala sang Israel, kondi naglakat sa ila: kag nagpabilin ang puong-puong sang kakahoyan man sa Samaria.)

7 Kag wala sia sing ginbilin nga mga tawo kay Jehoacas kondi kalim-an ka manugkabayo, kag napulo ka kangga, kag napulo ka libo ka hangaway nga nagalakat; kay ang hari sang Siria naglaglag sa ila, kag naghimo sa ila kaangay sang yab-ok paagi sa paglinas.

8 ś Karon ang nabilin sang mga binuhatan ni Jehoacas, kag ang tanan nga ginhimo niya, kag ang iya gahum, wala bala sila masulat sa libro sang mga maragtas sang mga hari sang Israel?

9 Kag si Jehoacas nagtolog upud sa iya mga kaamayan; kag ginlubung nila sia sa Samaria: kag naghari sa tal-us niya si Joas nga iya anak nga lalaki.

10 ś Sa ikakatloan kag pito nga tuig ni Joas nga hari sang Juda nagsugud si Jehoas nga anak nga lalaki ni Jehoacas sa paghari sa ibabaw sang Israel sa Samaria, kag naghari sing napulog anum ka tuig.

11 Kag ginhimo niya inang malaut sa itololok sang GINOO; wala sia magbiya sa tanan nga sala ni Jeroboam nga anak nga lalaki ni Nabat, nga nagpapakasala sang Israel: kondi naglakat sia sa ila.

12 Kag ang nabilin sang mga binuhatan ni Joas, kag ang tanan nga ginhimo niya, kag ang iya kagamhanan nga ginpakig-away niya batok kay Amasias nga hari sang Juda, wala bala sila masulat sa libro sang mga maragtas sang mga hari sang Israel?

13 Kag si Joas nagtolog upud sa iya mga kaamayan; kag naglingkod si Jeroboam sa iya trono: kag si Joas ginlubung sa Samaria upud sa mga hari sang Israel.

14 ś Karon si Eliseo nagmasakit sa iya balatian nga iya kinamatay. Kag nagdulhog sa iya si Joas nga hari sang Israel, kag naghibi sa ibabaw sang iya nawung, kag nagsiling, O amay ko, amay ko, ang kangga sang Israel, kag ang mga manugkabayo sini.

15 Kag nagsiling sa iya si Eliseo, Kuha ka sing pana kag mga baslay. Kag nagdala sia sa iya sing pana kag mga baslay.

16 Kag sia nagsiling sa hari sang Israel, Ibutang ang imo kamut sa pana. Kag ginbutang niya ang iya kamut sa sini: kag ginbutang ni Eliseo ang iya kamut sa ibabaw sang mga kamut sang hari.

17 Kag nagsiling sia, Buksi ang bintana nayon sa sidlangan. Kag ginbuksan niya ini. Niyan si Eliseo nagsiling, Pana ka. Kag nagpana sia. Kag nagsiling sia, Ang baslay sang kaluwasan sang GINOO, kag ang baslay sang kaluwasan sa Siria: kay daugon mo ang mga Sirianhon sa Afec, tubtub nga mapapas mo sila.

18 Kag nagsiling sia, Kuhaa ang mga baslay. Kag ginkuha niya sila. Kag nagsiling sia sa hari sang Israel, Lampusa ang duta. Kag ginlampus niya sing makatlo, kag nag-untat.

19 Kag ang tawo sang Dios nagsingkal sa iya, kag nagsiling, Dapat mo kuntani ginlampus sing makalima ukon makan-um; niyan madaug mo kuntani ang Siria tubtub nga mapapas mo ini: apang karon daugon mo sa makatlo lamang ang Siria.

20 ś Kag napatay si Eliseo, kag ginlubung sia nila. Kag ang mga kabon sang mga Moabnon naggubat sang duta sa pagsugud sang tuig.

21 Kag nahanabu, sang nagalubung sila sing tawo, nga, yari karon, nakakita sila sing kabon sang mga tawo; kag ginholog nila ang tawo sa lulubngan ni Eliseo: kag sang ginholog ang tawo, kag nakatandug sang mga tul-an ni Eliseo, nabuhi liwan sia, kag nagtindug sa iya mga tiil.

22 ś Apang si Hazael nga hari sang Siria nagpigus sang Israel sa bug-os nga mga adlaw ni Jehoacas.

23 Kag ang GINOO nagmaayohon sa ila, kag nalooy sa ila, kag nagtamud sa ila, bangud sang iya katipan kay Abraham, kay Isaac, kag kay Jacob, kag indi buut maglaglag sa ila, kag wala pa sia magsikway sa ila gikan sa atubangan niya.

24 Gani napatay si Hazael nga hari sang Siria; kag naghari nga tal-us niya si Ben-hadad nga iya anak nga lalaki.

25 Kag si Jehoas nga anak nga lalaki ni Jehoacas nagbawi gikan sa kamut ni Ben-hadad nga anak nga lalaki ni Hazael sang mga siudad, nga gin-agaw niya sa kamut ni Jehoacas nga iya amay tungud sa inaway. Makatlo sia gindaug ni Joas, kag nabawi ang mga siudad sang Israel.

KAPITULO 14

SA ikaduha nga tuig ni Joas nga anak nga lalaki ni Jehoacas nga hari sang Israel naghari si Amasias nga anak nga lalaki ni Joas, hari sang Juda.

2 Duha ka pulo kag lima ka tuig sia sang nagsugud sia sa paghari, kag naghari sia sing duha ka pulo kag siam ka tuig sa Jerusalem. Kag ang ngalan sang iya iloy si Jehoadan sang Jerusalem.

3 Kag ginhimo niya ang matarung sa itololok sang GINOO, apang indi kaangay kay David nga iya amay: naghimo sia sono sa tanan nga nahimo ni Joas nga iya amay.

4 Apang ang mataas nga mga duug wala makuha: ang katawohan naghalad kag nagsonog pa sing incienso sa mataas nga mga duug.

5 ś Kag nahanabu, sa gilayon nga napalig-on ang ginharian sa iya kamut, nga ginpatay niya ang iya mga alagad nga nagpatay sang hari nga iya amay.

6 Apang wala niya pagpatya ang mga anak sang mga manugpatay: sono sa sinang nasulat sa libro sang kasogoan ni Moises, nga ginsogo sang GINOO, nga nagasiling, Ang mga amay dili pagpatyon tungud sa kabataan, ukon ang kabataan patyon tungud sa mga amay; kondi ang tagsa ka tawo patyon tungud sa iya kaugalingon nga sala.

7 Ginpatay niya gikan sa Edom ang napulo ka libo sa nalupyakan sang asin, kag gin-agaw ang Sela sa inaway, kag ginhingalanan ini Jocteel tubtub sini nga adlaw.

8 ś Niyan si Amasias nagpadala sing mga manugbalita kay Jehoas, ang anak nga lalaki ni Jehoacas nga anak nga lalaki ni Jehu, hari sang Israel, nga nagasiling, Kari, magkitaay kita sa nawung.

9 Kag si Jehoas nga hari sang Israel nagpadala sing polong kay Amasias nga hari sang Juda, nga nagasiling, Ang sapinit nga yara sa Libano nagpadala sa cedro nga yara sa Libano, nga nagasiling, Ipaasawa ang imo anak nga babaye sa akon anak nga lalaki: kag may nag-agi nga sapat nga talonon nga yara sa Libano, kag gintapak ang sapinit.

10 Sa pagkamatuud gindaug mo ang Edom, kag ang imo tagiposoon nagpakataas sa imo: magkalipay ka sini, kag magpabilin sa imo puluy-an: kay ngaa bala naghilabut ka sa imo kahalitan, agud nga maholog ka, ikaw kag ang Juda upud sa imo?

11 Apang si Amasias indi buut magpamati. Gani nagtaklad si Jehoas nga hari sang Israel; kag sia kag si Amasias nga hari sang Juda nagkitaay sa nawung sa Bet-semes, nga naigo sa Juda.

12 Kag ang Juda natam-an sa atubangan sang Israel; kag nagpalagyo sila ang tagsa ka tawo sa iya mga layanglayang.

13 Kag si Jehoas nga hari sang Israel nagdakup sa Bet-semes kay Amasias nga hari sang Juda, ang anak nga lalaki ni Jehoas, nga anak nga lalaki ni Ocozias, kag nag-abut sa Jerusalem, kag ginwagwag ang kuta sang Jerusalem kutub sa gawang sang Efraim tubtub sa gawang sa pamusud, apat ka gatus ka maniko.

14 Kag ginkuha niya ang tanan nga bulawan kag pilak, kag ang tanan nga suludlan nga nakita sa balay sang GINOO, kag sa mga bahandi sang balay sang hari, kag sang mga tawo nga ginahawiran komo pasalig, kag nagbalik sa Samaria.

15 ś Karon ang nabilin sang mga binuhatan ni Jehoas nga ginhimo niya, kag ang iya kagamhanan, kag kon paano ang pagpakig-away niya kay Amasias nga hari sang Juda, wala bala sila masulat sa libro sang mga maragtas sang mga hari sang Israel?

16 Kag si Jehoas nagtolog upud sa iya mga kaamayan, kag ginlubung sa Samaria upud sa mga hari sang Israel; kag naghari nga tal-us niya si Jeroboam nga iya anak nga lalaki.

17 ś Kag si Amasias nga anak nga lalaki ni Joas, nga hari sang Juda, nagkabuhi sing napulo kag lima ka tuig sa tapus nga napatay si Jehoas nga anak nga lalaki ni Jehoacas, nga hari sang Israel.

18 Kag ang nabilin sang mga binuhatan ni Amasias, wala bala sila masulat sa libro sang mga maragtas sang mga hari sang Juda?

19 Karon nagpuhon sila batok sa iya sa Jerusalem: kag nagpalagyo sia sa Laquis; apang ginpaapasan nila sia sa Laquis, kag ginpatay sia didto.

20 Kag ginlulan nila sia sa mga kabayo: kag ginlubung sia sa Jerusalem upud sa iya mga kaamayan sa siudad ni David.

21 ś Kag ang bug-os nga katawohan sang Juda nagkuha kay Asarias, nga nagapanuigon sing napulo kag anum ka tuig, kag ginhimo sia nga hari sa tal-us ni Amasias nga iya amay.

22 Ginpatindug niya ang Elat, kag gin-uli ini sa Juda, sa tapus nga ang hari nagtolog upud sa iya mga kaamayan.

23 ś Sa ikanapulo kag lima nga tuig ni Amasias nga anak nga lalaki ni Joas nga hari sang Juda nagsugud sa paghari sa Samaria si Jeroboam nga anak nga lalaki ni Joas nga hari sang Israel, kag naghari sing kap-atan kag isa ka tuig.

24 Kag ginhimo niya inang malaut sa itololok sang GINOO: wala sia magbiya sa tanan nga sala ni Jeroboam nga anak nga lalaki ni Nabat, nga nagpapakasala sang Israel.

25 Gin-uli niya ang dulunan sang Israel kutub sa salamputan sang Hamat tubtub sa dagat sang kapatagan, sono sa polong sang GINOONG Dios sang Israel, nga ginpamolong niya paagi sa kamut sang iya alagad nga manalagna nga si Jonas, nga anak nga lalaki ni Amitai, nga taga-Gat-hefer.

26 Kay nakita sang GINOO ang kalisdanan sang Israel, nga tama kapait: kay wala sing bisan sin-o nga nabokot, ukon sing bisan sin-o nga nabilin, ukon sing bisan sin-o nga kabulig tungud sa Israel.

27 Kag ang GINOO wala magsiling nga panason niya ang ngalan sang Israel gikan sa idalum sang langit: kondi ginluwas niya sila paagi sa kamut ni Jeroboam nga anak nga lalaki ni Joas.

28 ś Karon ang nabilin sang mga binuhatan ni Jeroboam, kag ang tanan nga ginhimo niya, kag ang iya kagamhanan, kon paano ang pag-away niya, kag kon paano ang pagbawi niya tungud sa Israel sang Damasco kag sang Hamat, nga naigo anay sa Juda, wala bala sila masulat sa libro sang mga maragtas sang mga hari sang Israel?

29 Kag si Jeroboam nagtolog upud sa iya mga kaamayan, upud sa mga hari sang Israel; kag naghari nga tal-us niya si Zacarias nga iya anak nga lalaki.

KAPITULO 15

SA ikaduha ka pulo kag pito nga tuig ni Jeroboam nga hari sang Israel nagsugud sa paghari si Azarias nga anak nga lalaki ni Amasias nga hari sang Juda.

2 Napulo kag anum ka tuig sia sang nagsugud sia sa paghari, kag naghari sia sa Jerusalem sing kalim-an kag duha ka tuig. Kag ang ngalan sang iya iloy si Jecolia nga taga-Jerusalem.

3 Kag ginhimo niya inang matarung sa itololok sang GINOO, sono sa tanan nga nahimo ni Amasias nga iya amay;

4 Luwas nga wala makuha ang mataas nga mga duug: ang katawohan naghalad kag nagsonog pa sing mga incienso sa mataas nga mga duug.

5 ś Kag ginsakit sang GINOO ang hari, sa bagay nga nangin-aroon sia tubtub sa adlaw sang iya kamatayon, kag nagpuyo sia sa napain nga balay. Kag si Joatam nga anak nga lalaki sang hari naggahum sa panimalay, nga nagahukom sang katawohan sang duta.

6 Kag ang nabilin sang mga binuhatan ni Azarias, kag ang tanan nga ginhimo niya, wala bala sila masulat sa libro sang mga maragtas sang mga hari sang Juda?

7 Gani si Azarias nagtolog upud sang iya mga kaamayan; kag ginlubung nila sia upud sa iya mga kaamayan sa siudad ni David: kag si Joatam nga iya anak nga lalaki naghari nga tal-us niya.

8 ś Sa ikakatloan kag walo nga tuig ni Azarias nga hari sang Juda si Zacarias nga anak nga lalaki ni Jeroboam naghari sa ibabaw sang Israel sa Samaria sing anum ka bulan.

9 Kag ginhimo niya inang malaut sa itololok sang GINOO, subong sang nahimo sang iya mga kaamayan: wala sia magbiya sa mga sala ni Jeroboam nga anak nga lalaki ni Nabat, nga nagpapakasala sang Israel.

10 Kag si Sallum nga anak nga lalaki ni Jabes nagpuhon batok sa iya, kag ginpilas sia sa atubangan sang katawohan, kag ginpatay sia, kag naghari nga tal-us niya.

11 Kag ang nabilin sang mga binuhatan ni Zacarias, yari karon, nasulat sila sa libro sang mga maragtas sang mga hari sang Israel.

12 Amo ini ang polong sang GINOO nga ginpamolong niya kay Jehu, nga nagasiling, Ang imo mga anak nga lalaki tubtub sa ikap-at nga kaliwatan magalingkod sa trono sang Israel. Kag amo ini ang nahanabu.

13 ś Si Sallum nga anak nga lalaki ni Jabes nagsugud sa paghari sa ikakatloan kag siam nga tuig ni Uzias nga hari sang Juda; kag naghari sia sing isa ka bulan sa Samaria.

14 Kay si Menahen nga anak nga lalaki ni Gadi nagtaklad gikan sa Tirsa, kag nag-abut sa Samaria, kag ginpilas si Sallum nga anak nga lalaki ni Jabes sa Samaria, kag ginpatay sia, kag naghari nga tal-us niya.

15 Kag ang nabilin sang mga binuhatan ni Sallum, kag ang iya puhon nga ginpadugi niya, yari karon, nasulat sila sa libro sang mga maragtas sang mga hari sang Israel.

16 ś Niyan ginlaglag ni Menahen ang Tipsa, kag ang tanan nga yadto sa iya, kag ang iya mga ginsakpan kutub sa Tirza: bangud nga wala nila sia pagbuksi, busa ginlaglag niya ini; kag gingayhab niya ang tanan nga babaye nga nagabusung didto.

17 Sa ikakatloan kag siam nga tuig ni Azarias nga hari sang Juda nagsugud sa paghari sa Israel si Menahen nga anak nga lalaki ni Gadi, kag naghari sia sing napulo ka tuig sa Samaria.

18 Kag ginhimo niya inang malaut sa itololok sang GINOO: wala sia magbiya sa tanan niya nga adlaw sa mga sala ni Jeroboam nga anak nga lalaki ni Nabat, nga nagpapakasala sang Israel.

19 Kag nag-abut batok sa duta si Pul nga hari sang Asiria: kag naghatag si Menahen kay Pul sing isa ka libo ka talanton nga pilak, agud nga mag-upud sa iya ang iya kamut sa pagpalig-on sang ginharian sa iya kamut.

20 Kag ginpabuhis sing kuarta ni Menahen ang Israel, bisan ang tanan nga gamhanan nga tawo nga manggaranon, sa tagsa ka tawo kalim-an ka siclo nga pilak, nga ihatag sa hari sang Asiria. Gani ang hari sang Asiria nagpauli, kag wala magpabilin didto sa duta.

21 ś Kag ang nabilin sang mga binuhatan ni Menahen, kag ang tanan nga ginhimo niya, wala bala sila masulat sa libro sang mga maragtas sang mga hari sang Israel?

22 Kag si Menahen nagtolog upud sa iya mga kaamayan; kag naghari nga tal-us niya si Pecaya nga iya anak nga lalaki.

23 ś Sa ikakalim-an nga tuig ni Azarias nga hari sang Juda nagsugud sa paghari sa ibabaw sang Israel sa Samaria si Pecaya nga anak nga lalaki ni Menahen, kag naghari sing duha ka tuig.

24 Kag ginhimo niya inang malaut sa itololok sang GINOO: wala sia magbiya sa mga sala ni Jeroboam nga anak nga lalaki ni Nabat, nga nagpapakasala sang Israel.

25 Apang si Peca nga anak nga lalaki ni Remalias, isa ka kapitan niya, nagpuhon batok sa iya, kag gingubat sia sa Samaria, sa palacio sang balay sang hari, upud ni Argob kag ni Arye, kag upud sa iya ang kalim-an ka tawo sang mga Galaadnon: kag ginpatay niya sia, kag naghari nga tal-us niya.

26 Kag ang nabilin sang mga binuhatan ni Pecaya, kag ang tanan nga ginhimo niya, yari karon, nasulat sila sa libro sang mga maragtas sang mga hari sang Israel.

27 ś Sa ikakalim-an kag duha nga tuig ni Azarias nga hari sang Juda nagsugud sa paghari sa ibabaw sang Israel sa Samaria si Peca nga anak nga lalaki ni Remalias, kag naghari sing duha ka pulo ka tuig.

28 Kag ginhimo niya inang malaut sa itololok sang GINOO: wala sia magbiya sa mga sala ni Jeroboam nga anak nga lalaki ni Nabat, nga nagpapakasala sang Israel.

29 Sa mga adlaw ni Peca nga hari sang Israel nag-abut si Tiglat-peleser nga hari sang Asiria, kag gin-agaw ang Ijon, kag Abel-bet-maaca, kag Janoa, kag Cades, kag Hazor, kag Galaad, kag Galilea, ang bug-os nga duta sang Neftali, kag gindala niya sila nga bihag sa Asiria.

30 Kag si Oseas nga anak nga lalaki ni Ela nagpuhon batok kay Peca nga anak nga lalaki ni Remalias, kag nagpilas sa iya, kag nagpatay sa iya, kag naghari sia nga tal-us niya, sa ikaduha ka pulo nga tuig ni Joatam nga anak nga lalaki ni Uzias.

31 Kag ang nabilin sang mga binuhatan ni Peca, kag ang tanan nga ginhimo niya, yari karon, nasulat sila sa libro sang mga maragtas sang mga hari sang Israel.

32 ś Sa ikaduha nga tuig ni Peca nga anak nga lalaki ni Remalias, nga hari sang Israel, nagsugud sa paghari si Joatam nga anak nga lalaki ni Uzias, nga hari sang Juda.

33 Duha ka pulo kag lima ka tuig sia sang nagsugud sia sa paghari, kag naghari sia sing napulo kag anum ka tuig sa Jerusalem. Kag ang ngalan sang iya iloy si Jerusa, nga anak nga babaye ni Sadoc.

34 Kag naghimo sia sinang matarung sa itololok sang GINOO: naghimo sia sono sa tanan nga ginhimo sang iya amay nga si Uzias.

35 ś Wala sing sapayan ang mga mataas nga duug wala makuha: ang katawohan naghalad kag nagsonog pa sing incienso sa mataas nga mga duug. Nagpatindug sia sang naibabaw nga gawang sang balay sang GINOO.

36 ś Karon ang nabilin sang mga binuhatan ni Joatam, kag ang tanan nga ginhimo niya, wala bala sila masulat sa libro sang mga maragtas sang mga hari sang Juda?

37 Sa sadto nga mga adlaw nagsugud ang GINOO sa pagpadala batok sa Juda kay Resin nga hari sang Siria, kag kay Peca nga anak nga lalaki ni Remalias.

38 Kag si Joatam nagtolog upud sa iya mga kaamayan, kag ginlubung upud sa iya mga kaamayan sa siudad ni David nga iya amay: kag naghari nga tal-us niya si Acaz nga iya anak nga lalaki.

KAPITULO 16

SA ikanapulo kag pito nga tuig ni Peca nga anak nga lalaki ni Remalias, nagsugud sa paghari si Acaz nga anak nga lalaki ni Joatam nga hari sang Juda.

2 Nagsugud sa paghari si Acaz sang duha ka pulo ka tuig sia, kag naghari sia sing napulo kag anum ka tuig sa Jerusalem, kag wala sia maghimo sinang matarung sa itololok sang GINOO nga iya Dios, kaangay kay David nga iya amay.

3 Apang naglakat sia sa dalanon sang mga hari sang Israel, hoo, kag ginpaagi niya ang iya anak nga lalaki sa kalayo, sono sa mga kangil-aran sang mga pagano nga ginsobol sang GINOO gikan sa atubangan sang kaanakan sang Israel.

4 Kag sia naghalad kag nagsonog sing incienso sa mataas nga mga duug, kag sa ibabaw sang mga kabakoloran, kag sa idalum sang tagsa ka kahoy nga malagtum.

5 ś Niyan si Resin nga hari sang Siria kag si Peca nga anak nga lalaki ni Remalias nga hari sang Israel nagtaklad sa pagpakig-away sa Jerusalem: kag ginkibon nila si Acaz, apang indi makadaug sa iya.

6 Sa sadto nga tion si Resin nga hari sang Siria nagbawi sang Elat tungud sa Siria, kag ginsobol ang mga Judio gikan sa Elat: kag ang mga Sirianhon nag-abut sa Elat, kag nagpuyo didto tubtub sini nga adlaw.

7 Gani si Acaz nagpadala sing mga manugbalita kay Tiglat-peleser nga hari sang Asiria, nga nagasiling, Ako imo alagad kag imo anak nga lalaki: taklad ka, kag luwasa ako sa kamut sang hari sang Siria, kag sa kamut sang hari sang Israel, nga nagatilindug batok sa akon.

8 Kag si Acaz nagkuha sang pilak kag bulawan nga nakita sa balay sang GINOO, kag sa mga bahandi sang balay sang hari, kag nagpadala sini nga regalo sa hari sang Asiria.

9 Kag ang hari sang Asiria nagpamati sa iya: kay nagtaklad ang hari sang Asiria batok sa Damasco, kag gin-agaw ini, kag gindala nga bihag ang katawohan sini sa Kir, kag ginpatay si Resin.

10 ś Kag nagkadto si haring Acaz sa Damasco sa pagsugata kay Tiglat-peleser nga hari sang Asiria, kag nakita niya ang halaran nga yadto sa Damasco: kag ginpadala ni haring Acaz kay Urias nga pari ang dagway sang halaran, kag ang huwaran sini, sono sa tanan nga pagbuhat sini.

11 Kag si Urias nga pari nagpatindug sing halaran sono sa tanan nga ginpadala ni haring Acaz gikan sa Damasco: sa amo ginhimo ini ni Urias nga pari sa wala pa mag-abut si haring Acaz gikan sa Damasco.

12 Kag sang nag-abut ang hari gikan sa Damasco, nakita sang hari ang halaran: kag nagpalapit ang hari sa halaran, kag naghalad sa ibabaw sini.

13 Kag ginsonog niya ang iya halad nga sinonog kag ang iya halad nga kalan-on, kag gin-ula ang iya halad nga ilimnon, kag ginwisik ang dugo sang iya mga halad sa paghidait, sa ibabaw sang halaran.

14 Kag ang halaran nga saway nga yadto sa atubangan sang GINOO ginhalin man niya gikan sa atubangan sang balay, gikan sa ulut sang halaran kag sang balay sang GINOO, kag ginbutang ini sa kilid sang halaran nayon sa aminhan.

15 Kag si haring Acaz nagsogo kay Urias nga pari, nga nagasiling, Sa ibabaw sang daku nga halaran sonoga ang halad nga sinonog sang kaagahon, kag ang halad nga kalan-on sang kahaponon, kag ang halad nga sinonog sang hari, kag ang iya halad nga kalan-on, pati ang halad nga sinonog sang bug-os nga katawohan sang duta, kag ang ila halad nga kalan-on, kag ang ila mga halad nga ilimnon; kag iwisik sa ibabaw sini ang tanan nga dugo sang halad nga sinonog, kag ang tanan nga dugo sang halad: kag ang halaran nga saway mangin-akon pamangkotan.

16 Amo ini ang ginhimo ni Urias nga pari, sono sa tanan nga ginsogo sa iya ni haring Acaz.

17 ś Kag gingikas ni haring Acaz ang mga cuadro sang mga tulungtungan, kag ginkuha ang batiya sa ibabaw nila; kag ginpapanaug ang dagat gikan sa ibabaw sang mga baka nga saway sa idalum sini, kag ginbutang ini sa ibabaw sang salog nga nabatohan.

18 Kag ang natabunan nga duug nga sa sabbath nga ginhimo nila sa balay, kag ang salamputan sang hari pasulud, ginsaylo niya halin sa balay sang GINOO tungud sa hari sang Asiria.

19 ś Karon ang nabilin sang mga binuhatan ni Acaz nga ginhimo niya, wala bala sila masulat sa libro sang mga maragtas sang mga hari sang Juda?

20 Kag si Acaz nagtolog upud sa iya mga kaamayan, kag ginlubung upud sa iya mga kaamayan sa siudad ni David: kag naghari nga tal-us niya si Ezequias nga iya anak nga lalaki.

KAPITULO 17

SA ikanapulo kag duha nga tuig ni Acaz nga hari sang Juda nagsugud sa paghari si Oseas nga anak nga lalaki ni Ela sa Samaria sa ibabaw sang Israel sing siam ka tuig.

2 Kag ginhimo niya inang malaut sa itololok sang GINOO, apang indi subong sang mga hari sang Israel nga nahauna sa iya.

3 ś Batok sa iya nagtaklad si Salmanasar nga hari sang Asiria; kag si Oseas nangin-iya alagad, kag naghatag sa iya sing mga regalo.

4 Kag ang hari sang Asiria nakakita kay Oseas sing puhon: kay nagpadala sia sing mga manugbalita kay So, nga hari sang Egipto, kag wala magdala sing regalo sa hari sang Asiria, subong sang nahimo niya tuigtuig: busa gintakpan sia sang hari sang Asiria, kag gingapus sa bilanggoan.

5 ś Niyan ang hari sang Asiria nagtaklad sa bug-os nga duta, kag nagtaklad sa Samaria, kag ginkibon ini sing tatlo ka tuig.

6 ś Sa ikasiam nga tuig ni Oseas gin-agaw sang hari sang Asiria ang Samaria, kag gindala ang Israel sa Asiria, kag ginbutang sila sa Hala kag sa Habor sa luyo sang suba sang Gozan, kag sa mga siudad sang mga Mediahanon.

7 Kay nahanabu ini, nga nagpakasala ang kaanakan sang Israel batok sa GINOO nga ila Dios, nga nagpataklad sa ila gikan sa duta sang Egipto, gikan sa idalum sang kamut ni Faraon nga hari sang Egipto, kag nagkahadluk sa iban nga mga dios,

8 Kag naglakat sa mga palatukuran sang mga pagano, nga ginsobol sang GINOO gikan sa atubangan sang kaanakan sang Israel, kag sang mga hari sang Israel, nga ginhimo nila.

9 Kag ang kaanakan sang Israel naghimo sa tago sinang mga butang nga indi matarung batok sa GINOO nga ila Dios, kag nagpatindug sila nga sa ila sing mataas nga mga duug sa tanan nila nga mga siudad, gikan sa torre sang mga manugbantay tubtub sa siudad nga napamakuran.

10 Kag nagpatindug sila nga sa ila sing mga imahen kag mga puong-puong sang kakahoyan sa tagsa ka bakolod nga mataas, kag sa idalum sang tagsa ka kahoy nga malagtum:

11 Kag nagsonog sila didto sing mga incienso sa tanan nga mataas nga mga duug, subong sang mga pagano nga ginpaliton sang GINOO sa atubangan nila; kag naghimo sila sing malaut nga mga butang sa pagpaakig sang GINOO:

12 Kay nag-alagad sila sa mga diosdios, nga nahanungud sa ila ang GINOO nagsiling sa ila, Dili kamo maghimo sini nga butang.

13 Apang ang GINOO nagpamatuud batok sa Israel, kag batok sa Juda, paagi sa tanan nga manalagna, kag paagi sa tanan nga manugpanan-aw, nga nagasiling, Talikod kamo sa inyo mga malaut nga mga dalanon, kag bantayi ang akon mga sogo kag ang akon mga palatukuran, sono sa tanan nga kasogoan nga ginsogo ko sa inyo mga kaamayan, kag nga ginpadala ko sa inyo paagi sa akon mga alagad nga mga manalagna.

14 Wala sing sapayan indi sila buut magpamati, kondi nagpatig-a sang ila mga tingkoy, kaangay sang tingkoy sang ila mga kaamayan, nga wala magtoo sa GINOO nga ila Dios.

15 Kag ginsikway nila ang iya mga palatukuran, kag ang iya katipan nga ginhimo niya kaupud sa ila mga kaamayan, kag ang iya mga pagpamatuud nga ginpamatuud niya batok sa ila; kag nagsonod sila sa kadayawan, kag nanginhanginon, kag nagsonod sa mga pagano nga yadto sa palibut nila, nga nahanungud sa ila ang GINOO nagtugon sa ila nga indi sila maghimo kaangay nila.

16 Kag ginbayaan nila ang tanan nga sogo sang GINOO nga ila Dios, kag naghimo sila sing mga imahen nga tinunaw nga duha ka tinday nga baka, kag naghimo sing puong-puong sang kakahoyan, kag nagsimba sang bug-os nga panong sang langit, kag nag-alagad kay Baal.

17 Kag ginpaagi nila sa kalayo ang ila mga anak nga lalaki kag ang ila mga anak nga babaye, kag naggamit sing mga pagpamakut kag sing mga enkantohanon nga padihot, kag nagbaligya sang ila kaugalingon sa paghimo sang malaut sa itololok sang GINOO, sa pagpaakig sa iya.

18 Busa ang GINOO naakig sing tama gid sa Israel, kag ginkuha sila gikan sa iya itololok: wala sing bisan sin-o nga nabilin kondi ang tribo ni Juda lamang.

19 Ang Juda man wala magbantay sang mga sogo sang GINOO nga ila Dios, kondi naglakat sa mga palatukuran sang Israel nga ginhimo nila.

20 Kag ginsikway sang GINOO ang tanan nga kaliwat sang Israel, kag ginpapiotan sila, kag gintugyan sila sa kamut sang mga manug-agaw, tubtub nga nasobol niya sila gikan sa iya itololok.

21 Kay ginpaksi niya ang Israel gikan sa balay ni David; kag ginhimo nila nga hari si Jeroboam nga anak nga lalaki ni Nabat: kag gintabog ni Jeroboam ang Israel gikan sa pagsonod sa GINOO, kag ginpapakasala sila sing daku nga sala.

22 Kay ang kaanakan sang Israel naglakat sa tanan nga sala ni Jeroboam nga ginhimo niya; wala sila magbiya sa ila;

23 Tubtub nga ginkuha sang GINOO ang Israel gikan sa iya itololok, sono sa ginpamolong niya paagi sa tanan niyang mga alagad nga mga manalagna. Gani ang Israel ginpaliton gikan sa ila kaugalingon nga duta pa Asiria tubtub sining adlaw.

24 ś Kag ang hari sang Asiria nagdala sing mga tawo gikan sa Babilonia, kag gikan sa Cuta, kag gikan sa Ava, kag gikan sa Hamat, kag gikan sa Sefarvaim, kag ginbutang sila sa mga siudad sang Samaria sa tal-us sang kaanakan sang Israel: kag nagtag-iya sila sang Samaria, kag nagpuyo sa iya mga siudad.

25 Kag sa pagsugud sang ila pagpuyo didto, wala sila magkahadluk sa GINOO: busa nagpadala ang GINOO sa ila sing mga leon, nga nagpatay sang iban sa ila.

26 Gani nagpamolong sila sa hari sang Asiria, nga nagasiling, Ang mga pungsud nga imo ginpaliton, kag ginbutang sa mga siudad sang Samaria, wala makahibalo sang tulumanon sang Dios sang duta: busa nagpadala sia sing mga leon sa ila, kag, yari karon, ginpatay nila sila, bangud nga wala sila makahibalo sang tulumanon sang Dios sang duta.

27 Niyan ang hari sang Asiria nagsogo, nga nagasiling, Pakadtoa didto ang isa sang mga pari nga gindala ninyo gikan didto; kag palakta sila kag papuy-a didto, kag patudloa sia sa ila sang tulumanon sang Dios sang duta.

28 Niyan nag-abut ang isa sang mga pari nga pinaliton nila gikan sa Samaria kag nagpuyo sa Bet-el, kag nagtudlo sa ila kon paano sila magkahadluk sa GINOO.

29 Apang ang tagsa ka pungsud naghimo sang ila kaugalingon nga mga dios, kag ginbutang sila sa mga balay sang mataas nga mga duug nga ginhimo sang mga Samariahanon, ang tagsa ka pungsud sa ila mga siudad nga ginpuy-an nila.

30 Kag ang mga tawo sang Babilonia naghimo sang Succot-benot, kag ang mga tawo sang Cuta naghimo sang Nergal, kag ang mga tawo sang Hamat naghimo sang Asima,

31 Kag ang mga Avinhon naghimo sang Nibcaz kag sang Tartac, kag ang mga Sefarvaimnon nagsonog sa ila mga anak sa kalayo kay Adramilec kag kay Anamelec, ang mga dios sang Sefarvaim.

32 Gani nagkahadluk sila sa GINOO, kag naghimo sila nga sa ila sing mga pari sang mataas nga mga duug gikan sa labi gid kakubus sa ila, nga naghalad nga sa ila sa mga balay sang mataas nga mga duug.

33 Nagkahadluk sila sa GINOO, kag nag-alagad sang ila kaugalingon nga mga dios, sono sa kinabatasan sang mga pungsud nga ginpaliton nila gikan didto.

34 Tubtub sining adlaw nagahimo sila sono sa nahaunang kinabatasan: wala sila magkahadluk sa GINOO, ukon maghimo sila sono sa ila mga palatukuran, ukon sono sa ila mga pagsolondan, ukon sono sa kasogoan kag sogo nga ginsogo sang GINOO sa kaanakan ni Jacob, nga iya ginhingadlan Israel;

35 Nga sa ila ang GINOO naghimo sing katipan, kag nagtulin sa ila, nga nagasiling, Dili kamo mahadluk sa iban nga mga dios, ukon magyaub kamo sa atubangan nila, ukon mag-alagad sa ila, ukon maghalad sa ila:

36 Kondi sa GINOO, nga nagpagowa sa inyo gikan sa duta sang Egipto sa dakung gahum kag sa butkon nga inuntay, sia ang inyo kahadlukan, kag sa iya kamo magyaub, kag sa iya kamo maghalad.

37 Kag ang mga palatukuran, kag ang mga pagsolondan, kag ang kasogoan, kag ang sogo, nga sinulat niya tungud sa inyo, tumanon ninyo sa gihapon; kag dili kamo mahadluk sa iban nga mga dios.

38 Kag ang katipan nga ginhimo ko kaupud ninyo dili ninyo pagkalimtan; kag dili kamo mahadluk sa iban nga mga dios.

39 Apang magkahadluk kamo sa GINOO nga inyo Dios; kag sia magaluwas sa inyo sa kamut sang tanan ninyong kaaway.

40 Walay sapayan sila wala magpamati, kondi ginhimo nila ang sono sa ila nahaunang kinabatasan.

41 Gani ining mga pungsud nagkahadluk sa GINOO, kag nag-alagad sa ila mga imahen nga tinigban, bisan ang ila man mga anak, kag ang ila mga kaapohan: sono sa ginhimo sang ila mga kaamayan, nagahimo sila tubtub sining adlaw.

KAPITULO 18

KARON nahanabu sa ikatlong tuig ni Oseas nga anak nga lalaki ni Ela, nga hari sang Israel, nga nagsugud sa paghari si Ezequias nga anak nga lalaki ni Acaz, nga hari sang Juda.

2 Duha ka pulo kag lima ka tuig sia sang nagsugud sia sa paghari; kag naghari sia sing duha ka pulo kag siam ka tuig sa Jerusalem. Ang ngalan sang iya iloy si Abi nga anak nga babaye ni Zacarias.

3 Kag ginhimo niya inang matarung sa itololok sang GINOO, sono sa tanan nga nahimo ni David nga iya amay.

4 ś Ginkuha niya ang mataas nga mga duug, kag ginboong ang mga imahen, kag gin-utud ang mga puong-puong sang kakahoyan, kag gindugmok ang man-ug nga saway nga ginhimo ni Moises: kay tubtub sadtong mga adlaw nagsonog sa sini sing incienso ang kaanakan sang Israel: kag ini ginhingalanan niya nga Nehustan.

5 Sia nagsalig sa GINOONG Dios sang Israel; sa bagay nga sa olihi niya walay kaangay sa iya sa tunga sang tanan nga hari sang Juda, ukon sa mga nahauna sa iya.

6 Kay nagtapik sia sa GINOO, kag wala magbiya sa pagsonod sa iya, kondi ginbantayan ang mga sogo niya, nga ginsogo sang GINOO kay Moises.

7 Kag ang GINOO kaupud niya; kag bisan diin sia magkadto, nag-uswag sia: kag nagribuk sia batok sa hari sang Asiria, kag wala mag-alagad sa iya.

8 Ginlaglag niya ang mga Filistinhon tubtub sa Gasa, kag sa iya mga ginsakpan, kutub sa torre sang mga manugbantay tubtub sa siudad nga napamakuran.

9 ś Kag nahanabu sa ikap-at nga tuig ni haring Ezequias, nga amo ang ikapitong tuig ni Oseas nga anak nga lalaki ni Ela nga hari sang Israel, nga nagtaklad si Salmanasar nga hari sang Asiria batok sa Samaria, kag ginkibon ini.

10 Kag naagaw nila ini sa katapusan sang tatlo ka tuig: sa ikan-um nga tuig ni Ezequias, nga amo ang ikasiam nga tuig ni Oseas nga hari sang Israel, naagaw ang Samaria.

11 Kag ang hari sang Asiria nagtapok sang Israel pa Asiria, kag nagbutang sa ila sa Halah kag sa Habor sa luyo sang suba sang Gozan, kag sa mga siudad sang mga Mediahanon:

12 Bangud nga wala sila magtuman sang tingug sang GINOO nga ila Dios, kondi ginlapas ang iya katipan, kag ang tanan nga ginsogo ni Moises nga alagad sang GINOO, kag wala magpamati sini, ukon maghimo sini.

13 ś Karon sa ikanapulog apat nga tuig ni haring Ezequias nagtaklad si Senaquerib nga hari sang Asiria batok sa tanan nga mga siudad nga napamakuran sa Juda, kag gin-agaw sila.

14 Kag si Ezequias nga hari sang Juda nagpadala sa hari sang Asiria sa Laquis, nga nagasiling, Ako nakasala; halin sa akon: ang ginabutang mo sa akon batason ko. Kag ang hari sang Asiria nagkinahanglan kay Ezequias nga hari sang Juda sing tatlo ka gatus ka talanton nga pilak kag katloan ka talanton nga bulawan.

15 Kag ginhatag ni Ezequias sa iya ang tanan nga pilak nga nakita sa balay sang GINOO, kag sa mga bahandi sang balay sang hari.

16 Sa sadtong tion ginkakas ni Ezequias ang bulawan sa mga ganhaan sang templo sang GINOO, kag sa mga haligi nga gintaklapan ni Ezequias nga hari sang Juda, kag ginhatag ini sa hari sang Asiria.

17 ś Kag ang hari sang Asiria nagpadala kay Tartan kag kay Rabsaris kag kay Rab-saces gikan sa Laquis sa kay haring Ezequias, upud sang isa ka dakung kasoldadosan batok sa Jerusalem. Kag nagtaklad sila kag nag-abut sila sa Jerusalem. Kag sang nakataklad sila, nag-abut sila kag nagdolog sa luyo sang palatayonan sang punong nga naibabaw, nga yara sa luyo sang daku nga dalan sang latagon sang manugbunak sang tela.

18 Kag sang natawag nila ang hari, may naggowa sa ila nga si Eliaquim nga anak nga lalaki ni Helcias, nga tulugyanan sang panimalay, kag si Sebna nga escriba, kag si Joa nga anak nga lalaki ni Asaf, nga manugsulat sang mga maragtas.

19 Kag si Rab-saces nagsiling sa ila, Ipamolong ninyo karon kay Ezequias, Amo ini ang ginasiling sang dakung hari, ang hari sang Asiria, Ano bala nga kalig-onan ang imo ginasaligan?

20 Ikaw nagasiling, (apang walay pulus nga mga polong lamang sila,) May laygay kag kusug ako nga sa inaway. Karon sa kay sin-o ka bala nagasalig, nga nagabato ka sa akon?

21 Karon, yari karon, ikaw nagasalig sa sungkud sining tabon-ak nga basag, bisan sa Egipto, nga kon magpanukud sa sini ang isa ka tawo, magadulut ini sa iya kamut, kag magalapus sa sini: amo ini si Faraon nga hari sang Egipto sa tanan nga nagasalig sa iya.

22 Apang kon magsiling kamo sa akon, Kami nagasalig sa GINOO nga amon Dios: indi bala ini sia, nga ang iya mataas nga mga duug kag ang iya mga halaran ginkuha ni Ezequias, kag nagsiling sa Juda kag sa Jerusalem, Sa atubangan sining halaran magasimba kamo sa Jerusalem?

23 Busa karon, ginaampo ko sa imo, hatagi sing mga pasalig ang akon ginoo nga hari sang Asiria, kag ako magahatag sa imo sing duha ka libo nga kabayo, kon ikaw makasarang sa imo bahin sa pagbutang sing mga manugsakay sa ila.

24 Paano bala niyan ang pagpatalikud mo sang nawung sang isa ka kapitan sang labi ka kubus sang mga alagad sang akon agalon, kag nagasalig ka sa Egipto tungud sa mga kangga kag sa mga manugkabayo?

25 Nagataklad bala ako karon nga wala ginaupdi sang GINOO batok sining duug sa paglaglag sini? Ang GINOO nagsiling sa akon, Taklad ka batok sining duta, kag laglaga ini.

26 Niyan nagsiling si Eliaquim nga anak nga lalaki ni Helcias, kag si Sebna, kag si Joa, kay Rab-saces, Ginaampo ko sa imo, pamolong ka sa imo mga alagad sa hambal nga Sirianhon; kay kami nakahangup sini: kag dili ka magpamolong sa amon sa hambal nga Jinudio sa mga idulungug sang katawohan nga yara sa ibabaw sang kuta.

27 Apang si Rab-saces nagsiling sa ila, Ginpadala bala ako sang akon agalon sa imo agalon, kag sa imo, sa pagpamolong sining mga polong? wala bala niya ako pag-ipadala sa mga tawo nga nagalingkod sa kuta, agud nga magkaon sila sang ila kaugalingon nga ipot, kag mag-inum sang ila kaugalingon nga ihi upud sa inyo?

28 Niyan nagtindug si Rab-saces kag nagsinggit sa matonog nga tingug sa hambal nga Jinudio, kag nagpamolong, nga nagasiling, Pamati kamo sang polong sang dakung hari, ang hari sang Asiria:

29 Amo ini ang ginasiling sang hari, Dili kamo magpadaya kay Ezequias: kay indi sia makasarang sa pagluwas sa inyo gikan sa akon kamut:

30 Kag si Ezequias dili magpasalig sa inyo sa GINOO, nga nagasiling, Sa pagkamatuud luwason kita sang GINOO, kag ining siudad indi pag-itugyan sa kamut sang hari sang Asiria.

31 Dili kamo magpamati kay Ezequias: kay amo ini ang ginasiling sang hari sang Asiria, Magpakighisugut kamo sa akon paagi sa regalo, kag gowa kamo pakari sa akon, kag niyan ang tagsatagsa magkaon gikan sa iya ulubasan, kag ang tagsatagsa gikan sa iya kahoy nga higuera, kag ang tagsatagsa mag-inum sang mga tubig gikan sa iya tanki:

32 Tubtub nga ako mag-abut kag magdala sa inyo sa duta nga kaangay sang inyo kaugalingon nga duta, duta sang uyas kag alak, duta sang tinapay kag mga ulubasan, duta sang lana sang olivo kag dugus, agud nga magkabuhi kamo, kag indi mapatay: kag dili kamo magpamati kay Ezequias, kon sia magbuyok sa inyo, nga nagasiling, Ang GINOO magaluwas sa aton.

33 May bisan sin-o bala sang mga dios sang mga pungsud nga nakaluwas nga mas-a sang iya duta gikan sa kamut sang hari sang Asiria?

34 Diin na bala ang mga dios sang Hamat, kag sang Arpad? diin na bala ang mga dios sang Sefarvaim, Hena, kag Iva? naluwas bala nila ang Samaria sa akon kamut?

35 Sin-o bala sila sa tunga sang tanan nga dios sang mga duta, nga nagluwas sang ila duta gikan sa akon kamut, agud nga ang GINOO magluwas gikan sa akon kamut sang Jerusalem?

36 Apang ang katawohan naghipus, kag walay polong nga ginsabat sa iya: kay ang sogo sang hari nagsiling, Dili pagsabta sia.

37 Niyan si Eliaquim nga anak nga lalaki ni Helcias, nga tulugyanan sang panimalay, kag si Sebna nga escriba, kag si Joa nga anak nga lalaki ni Asaf, nga manugsulat sang mga maragtas, nag-abut kay Ezequias nga nakusnit ang ila mga panapton, kag nagsugid sa iya sang mga polong ni Rab-saces.

KAPITULO 19

KAG nahanabu, sang pagkabati sini ni haring Ezequias, nga ginkusnit niya ang iya mga panapton, kag nagpanabon sia sing panapton nga sako, kag nagsulud sa balay sang GINOO.

2 Kag ginpadala niya si Eliaquim, nga tulugyanan sang panimalay, kag si Sebna nga escriba, kag ang mga tigulang sang mga pari, nga nagpanabon sing panapton nga sako, kay Isaias nga manalagna nga anak nga lalaki ni Amoz.

3 Kag nagsiling sila sa iya, Amo ini ang ginasiling ni Ezequias, Ining adlaw adlaw sang kagamo, kag sang pagsabdong, kag sang pagpasipala: kay ang mga anak inugbun-ag na, kag wala sing kusug sa pagpatawo.

4 Ayhan ang GINOO nga imo Dios magapamati sang tanan nga polong ni Rab-saces, nga ginpadala sang hari sang Asiria nga iya agalon sa pagtampalas sang Dios nga buhi; kag magasabdong sang mga polong nga nabatian sang GINOO nga imo Dios: busa bayawa ang imo pangamuyo tungud sa salin nga nabilin.

5 Gani nag-abut ang mga alagad ni haring Ezequias kay Isaias.

6 ś Kag si Isaias nagsiling sa ila, Amo ini ang isiling ninyo sa inyo agalon, Amo ini ang ginasiling sang GINOO, Dili magkahadluk sa mga polong nga nabatian mo, nga ginpasipala sa akon sang mga alagad sang hari sang Asiria.

7 Yari karon, magapadala ako sa iya sang isa ka kalalat-an, kag magapamati sia sing sugidsugid, kag magabalik sia sa iya kaugalingon nga duta; kag ipapukan ko sia paagi sa espada sa iya kaugalingon nga duta.

8 ś Gani nagbalik si Rab-saces, kag nakita ang hari sang Asiria nga nagapakig-away batok sa Libna: kay sia nakabati nga nagtaliwan sia sa Laquis.

9 Kag sang nabatian niya ang ginasiling nahanungud kay Tirhaca nga hari sang Etiopia, Yari karon, nagagowa sia sa pagpakig-away sa imo: nagpadala sia liwat sing mga manugbalita kay Ezequias, nga nagasiling,

10 Amo ini ang ipamolong ninyo kay Ezequias nga hari sang Juda, nga nagasiling, Dili ka magpalimbong sa imo Dios nga ginasaligan mo, nga nagasiling, Ang Jerusalem indi pag-itugyan sa kamut sang hari sang Asiria.

11 Yari karon, ikaw nakabati sang ginhimo sang mga hari sang Asiria sa tanan nga duta, sa paglaglag sa ila sing bug-os: kag maluwas ka bala?

12 Naluwas bala sila sang mga dios sang mga pungsud nga ginlaglag sang akon mga kaamayan; subong sang Gozan, kag Haran, kag Rezef, kag sang kaanakan sang Eden nga didto sa Telassar?

13 Diin bala ang hari sang Hamat, kag ang hari sang Arpad, kag ang hari sang siudad sang Sefarvaim, sang Hena, kag sang Iva?

14 ś Kag ginbaton ni Ezequias ang sulat sa kamut sang mga manugbalita, kag ginbasa ini: kag si Ezequias nagsaka sa balay sang GINOO, kag ginhumlad ini sa atubangan sang GINOO.

15 Kag si Ezequias nagpangamuyo sa atubangan sang GINOO, kag nagsiling, O GINOONG Dios sang Israel, nga nagapuyo sa ulut sang mga querubin, ikaw amo ang Dios, ikaw gid lamang, sang tanan nga ginharian sang duta; ikaw ang naghimo sang langit kag sang duta.

16 GINOO, ilingig ang imo idulungug, kag magpamati: muklata, GINOO, ang imo mga mata, kag magtan-aw: kag magpamati sang mga polong ni Senaquerib, nga nagpadala sa iya sa pagtampalas sang Dios nga buhi.

17 Sa pagkamatuud, GINOO, ang mga hari sang Asiria naglaglag sang mga pungsud kag sang ila mga duta,

18 Kag nagdap-ung sang ila mga dios sa kalayo: kay indi sila mga dios, kondi buhat sang mga kamut sang mga tawo, kahoy kag bato: busa ginlaglag nila sila.

19 Gani karon, O GINOO nga amon Dios, ginapakilooy ko sa imo, luwasa kami sa iya kamut, agud nga ang tanan nga ginharian sang duta makakilala nga ikaw amo ang GINOONG Dios, ikaw gid lamang.

20 ś Niyan ginpadal-an ni Isaias nga anak nga lalaki ni Amoz si Ezequias, nga nagasiling, Amo ini ang ginasiling sang GINOONG Dios sang Israel, Ang gin-ampo mo sa akon batok kay Senaquerib nga hari sang Asiria ginpamatian ko.

21 Ini amo ang polong nga ginpamolong sang GINOO nahanungud sa iya; Ang ulay nga babaye nga anak sang Zion nagtamay sa imo, kag nagkadlaw sa pagyagota sa imo; ang babaye nga anak sang Jerusalem naglungolungo sang iya olo sa imo.

22 Sin-o bala ang gintampalas kag ginpasipalahan mo? kag batok kay sin-o bala ginbayaw mo ang imo tingug, kag ginbayawan mo sang imo mga mata sa hitaas? batok sa Balaan nga Isa sang Israel.

23 Paagi sa imo mga manugbalita gintampalas mo ang Ginoo, kag ikaw nagsiling, Upud sa kadam-an sang akon mga kangga nagataklad ako sa kataasan sang mga bukid, sa mga kilid sang Libano, kag pudlon ko ang mataas nga cedro nga mga kahoy sini, kag ang pili nga abeto nga mga kahoy sini: kag magasulud ako sa mga dalayonan sang iya mga dulunan, kag sa talon sang iya Carmel.

24 Ako nakakutkut kag nakainum sang mga tubig nga dumuloong, kag sa dapadapa sang akon mga tiil ginpamala ko ang tanan nga suba sang nakibon nga mga duug.

25 Wala ka bala makabati sing madugay na kon paano ang paghimo ko sini, kag sa mga tion nga dumaan nga ginhuman ko ini? karon napahanabu ko ina, nga mangin-imo ang paglaglag sang mga siudad nga napamakuran sa mga tinumpok sang kagulub-an.

26 Busa ang ila mga pumuluyo diotay sing gahum, nahanguyusan sila kag nagasalimuang; subong sila sang hilamon sang latagon, kag subong sang ulutanon nga malagtum, subong sang hilamon sa mga atop, kag subong sang uyas nga nakigas sa wala pa ini maggulang.

27 Apang nahibaloan ko ang imo puluy-an, kag ang imo paggowa, kag ang imo pagsulud, kag ang imo pagsingkal batok sa akon.

28 Bangud ang imo pagsingkal batok sa akon kag ang imo kagaruk nagalambut sa akon mga idulungug, busa ibutang ko ang akon kaw-it sa imo ilong, kag ang akon busal sa imo mga bibig, kag ibalik ko ikaw sa dalanon nga gin-agihan mo.

29 Kag ini mangin tanda sa imo, Magakaon kamo sa sining tuig sinang nagatubo nga mga butang sa iya kaugalingon, kag sa ikaduhang tuig sinang nagatubo sa amo; kag sa ikatlong tuig magsab-ug kamo, kag mag-ani, kag magtanum sing mga ulubasan, kag magkaon sang mga bunga nila.

30 Kag ang salin nga nakapalagyo sang panimalay ni Juda magapanggamut liwat paidalum, kag magapamunga paibabaw.

31 Kay gikan sa Jerusalem magagowa ang isa ka salin, kag gikan sa bukid nga Zion sila nga magapalagyo: ang kakugi sang GINOO sang mga kasoldadosan magahimo sini.

32 Busa amo ini ang ginasiling sang GINOO nahanungud sa hari sang Asiria, Indi sia magasulud sa sining siudad, ukon magapana sang baslay didto, ukon magakari nga may taming sa atubangan sini, ukon magatalampok sing bungyud batok sini.

33 Sa dalan nga gin-agihan niya, paagi sa amo magabalik sia, kag indi sia magasulud sa sining siudad, nagasiling ang GINOO.

34 Kay apinan ko ining siudad, sa pagluwas sini, tungud sa akon kaugalingon, kag tungud kay David nga akon alagad.

35 ś Kag nahanabu sa sinang gab-i, nga ang anghel sang GINOO naggowa, kag nagpamatay sa kampo sang mga Asiriahanon sing isa ka gatus kag kawaloan kag lima ka libo: kag sang pagbangon nila sing aga pa, yari karon, sila tanan mga patay nga lawas.

36 Gani si Senaquerib nga hari sang Asiria nagtaliwan, kag naglakat kag nagbalik, kag nagpuyo sa Ninive.

37 Kag nahanabu, sang nagasimba sia sa balay ni Nisroc nga iya dios, nga si Adramelec kag si Sarezer, nga iya mga anak nga lalaki, nagpatay sa iya sa espada: kag nagpalagyo sila pakadto sa duta sang Armenia. Kag naghari nga tal-us niya si Esarhadon nga iya anak nga lalaki.

KAPITULO 20

SA sadtong mga adlaw si Ezequias nagmasakit nga sa ikamatay. Kag si Isaias nga manalagna nga anak nga lalaki ni Amoz nag-abut sa iya, kag nagsiling sa iya, Amo ini ang ginasiling sang GINOO, Ipahamtang sing nagakaigo ang imo panimalay; kay mapatay ka, kag indi ka magkabuhi.

2 Niyan ginliso niya ang iya nawung sa dingding, kag nagpangamuyo sa GINOO, nga nagasiling,

3 Ginapakilooy ko sa imo, O GINOO, dumduma karon kon paano nga naglakat ako sa atubangan nimo sa kamatooran kag sa himpit nga tagiposoon, kag naghimo sinang maayo sa imo itololok. Kag si Ezequias naghibi sing tama.

4 Kag nahanabu, sa wala pa si Isaias makagowa sa natunga nga bahin sang luwang, nga nag-abut sa iya ang polong sang GINOO, nga nagasiling,

5 Balik ka, kag isiling kay Ezequias nga kapitan sang akon katawohan, Amo ini ang ginasiling sang GINOO, ang Dios ni David nga imo amay, Ginpamatian ko ang imo pangamuyo, nakita ko ang imo mga luha: yari karon, ayohon ko ikaw: sa ikatlo nga adlaw magataklad ka sa balay sang GINOO.

6 Kag dugangan ko ang imo mga adlaw sing napulo kag lima ka tuig; kag luwason ko ikaw kag ini nga siudad gikan sa kamut sang hari sang Asiria; kag apinan ko ini nga siudad tungud sa akon kaugalingon, kag tungud kay David nga akon alagad.

7 Kag si Isaias nagsiling, Kuha kamo sing isa ka pighol nga mga higos. Kag nagkuha sila kag naghampol sini sa hubag, kag nag-ayo sia.

8 ś Kag si Ezequias nagsiling kay Isaias, Ano bala ang tanda nga ayohon ako sang GINOO, kag nga magataklad ako sa balay sang GINOO sa ikatlo nga adlaw?

9 Kag si Isaias nagsiling, Ini mangin tanda sa imo gikan sa GINOO, nga himoon sang GINOO ang butang nga iya napamolong: magapadayon bala ang landong sing napulo ka alintaga, ukon magabalik sing napulo ka alintaga?

10 Kag si Ezequias nagsabat, Mahapus nga butang nga ang landong magpadayon sing napulo ka alintaga: indi, apang pabalika ang landong sing napulo ka alintaga.

11 Kag si Isaias nga manalagna nagtuaw sa GINOO: kag ginpabalik niya ang landong sing napulo ka alintaga, nga sa sini nagpaubus ini sa taknaan ni Acaz.

12 ś Sa sadto nga tion si Berodac-baladan nga anak nga lalaki ni Baladan, hari sang Babilonia, nagpadala sing mga sulat kag isa ka regalo kay Ezequias: kay nabatian niya nga si Ezequias nagmasakit.

13 Kag ginpamatian sila ni Ezequias, kag ginpakita sa ila ang bug-os nga balay sang ila bilidhon nga mga butang, ang pilak, kag ang bulawan, kag ang mga pahumut, kag ang ihalaplas nga bilidhon, kag ang bug-os nga balay sang iya hinganiban, kag ang tanan nga yara sa iya mga bahandi: wala gid sang bisan ano sa iya balay, ukon sa bug-os niya nga ginharian nga wala mapakita sa ila ni Ezequias.

14 ś Niyan ang manalagna nga si Isaias nag-abut kay haring Ezequias, kag nagsiling sa iya, Ano bala ang ginsiling sining mga lalaki? kag sa diin sila naggikan pakari sa imo? Kag si Ezequias nagsiling, Naghalin sila gikan sa malayo nga duta, bisan sa Babilonia.

15 Kag nagsiling sia, Ano bala ang nakita nila sa imo balay? Kag si Ezequias nagsabat, Nakita nila ang tanan nga butang nga yara sa akon balay: wala gid sing bisan ano sa akon mga bahandi nga wala ko mapakita sa ila.

16 Kag si Isaias nagsiling kay Ezequias, Pamatii ang polong sang GINOO.

17 Yari karon, magaabut ang mga adlaw, nga ang tanan nga yara sa imo balay, kag ang ginsuput sang imo kaamayan tubtub sini nga adlaw, dalhon sa Babilonia: wala gid sing mabilin, nagasiling ang GINOO.

18 Kag sa mga anak nimo nga lalaki nga magagikan sa imo, nga ipanganak mo, kuhaon nila; kag mangin-eunuco sila sa palacio sang hari sang Babilonia.

19 Niyan si Ezequias nagsiling kay Isaias, Maayo ang polong sang GINOO nga napamolong mo. Kag nagsiling sia, Indi bala ini maayo, kon ang paghidait kag ang kamatooran manginsa akon mga adlaw?

20 ś Kag ang nabilin sang mga binuhatan ni Ezequias, kag ang bug-os niya nga gahum, kag kon paano ang paghimo niya sang ponong, kag sang palatayonan, kag pagpadayon sing tubig sa siudad, wala bala sila masulat sa libro sang mga maragtas sang mga hari sang Juda?

21 Kag si Ezequias nagtolog upud sa iya mga kaamayan: kag naghari nga tal-us niya si Manases nga iya anak nga lalaki.

KAPITULO 21

SI MANASES napulo kag duha ka tuig sang nagsugud sia sa paghari, kag naghari sia sing kalim-an kag lima ka tuig sa Jerusalem. Kag ang ngalan sang iya iloy si Hefzi-ba.

2 Kag ginhimo niya inang malaut sa itololok sang GINOO, sono sa mga kangil-aran sang mga pagano nga ginsobol sang GINOO gikan sa atubangan sang kaanakan sang Israel.

3 Kay ginpatindug niya liwat ang mataas nga mga duug nga ginlaglag ni Ezequias nga iya amay; kag nagpatindug sia sing mga halaran kay Baal, kag naghimo sing puong-puong sang kakahoyan, subong sang ginhimo ni Acab nga hari sang Israel; kag nagsimba sang bug-os nga panong sang langit, kag nag-alagad sa ila.

4 Kag nagpatindug sia sing mga halaran sa balay sang GINOO, nga nahanungud sa iya nagsiling ang GINOO, Sa Jerusalem ibutang ko ang akon ngalan.

5 Kag nagpatindug sia sing mga halaran sa bug-os nga panong sang langit sa duha ka luwang sang balay sang GINOO.

6 Kag ginpaagi niya sa kalayo ang iya anak nga lalaki, kag nagbantay sang mga panag-on, kag naggamit sing mga enkantohanon nga padihot, kag naghisayo sa kinilala nga mga espiritu kag mga manugbabaylan: naghimo sia sing madamu gid nga malaut sa itololok sang GINOO, sa pagpaakig sa iya.

7 Kag ginpahamtang niya ang imahen nga tinigban sang puong-puong sang kakahoyan nga nahimo niya sa balay, nga nahanungud sini nagsiling ang GINOO kay David, kag kay Salomon nga iya anak nga lalaki, Sa sining balay, kag sa Jerusalem, nga ginpili ko gikan sa tanan nga tribo sang Israel ibutang ko ang akon ngalan sa gihapon:

8 Kag indi ko na pagpagowaon ang mga tiil sang Israel sa duta nga ginhatag ko sa ila mga kaamayan; kon lamang magbantay sila sa paghimo sono sa tanan nga ginsogo ko sa ila, kag sono sa bug-os nga kasogoan nga ginsogo sa ila sang akon alagad nga si Moises.

9 Apang wala sila magpamati: kag ginhaylo sila ni Manases sa paghimo sang malaut labi pa sa ginhimo sang mga pungsud nga ginlaglag sang GINOO sa atubangan sang kaanakan sang Israel.

10 ś Kag ang GINOO nagpamolong paagi sa iya mga alagad nga mga manalagna, nga nagasiling,

11 Bangud nga si Manases nga hari sang Juda naghimo sining mga kangil-aran, kag naghimo sang malaut labaw sa tanan nga ginhimo sang mga Amornon, nga una sa iya, kag ginpapakasala niya ang Juda man paagi sa iya mga diosdios:

12 Busa amo ini ang ginasiling sang GINOONG Dios sang Israel, Yari karon, nagadala ako sing subong nga kalaut sa Jerusalem kag sa Juda, nga ang bisan sin-o nga makabati sini, tinglan ang iya duha ka mga idulungug.

13 Kag untayon ko sa ibabaw sang Jerusalem ang latid sang Samaria, kag ang tonton sang balay ni Acab: kag pahiran ko ang Jerusalem subong sang tawo nga nagapahid sang pinggan, nga nagapahid sini, kag nagapakolob sini.

14 Kag isikway ko ang nabilin sang akon panublion, kag itugyan sila sa kamut sang ila mga kaaway; kag sila mangintulukbon kag mangin-alagawon sa tanan nila nga kaaway;

15 Bangud nga ginhimo nila inang malaut sa akon itololok, kag ginpaakig ako, kutub sa adlaw nga ang ila mga kaamayan naggowa gikan sa Egipto, tubtub sini nga adlaw.

16 Labut pa si Manases nagpaagay sing madamo gid nga dugo nga inocente, tubtub nga natugub niya ang Jerusalem kutub sa isa ka ukbung tubtub sa isa; luwas sa iya sala nga tungud sini ginpapakasala niya ang Juda sa paghimo sinang malaut sa itololok sang GINOO.

17 ś Karon ang nabilin sang mga binuhatan ni Manases, kag ang tanan nga ginhimo niya, kag ang iya sala nga ginpakasala niya, wala bala sila masulat sa libro sang mga maragtas sang mga hari sang Juda?

18 Kag si Manases nagtolog upud sa iya mga kaamayan, kag ginlubung sa katamnan sang iya kaugalingon nga balay, sa katamnan ni Uza: kag naghari nga tal-us niya si Amon nga iya anak nga lalaki.

19 ś Si Amon duha ka pulo kag duha ka tuig sang nagsugud sia sa paghari, kag naghari sia sa Jerusalem sing duha ka tuig. Kag ang ngalan sang iya iloy si Mesulemet nga anak ni Haruz sang Jotba.

20 Kag ginhimo niya inang malaut sa itololok sang GINOO, subung sang ginhimo ni Manases nga iya amay.

21 Kag naglakat sia sa bug-os nga dalanon nga ginlaktan sang iya amay, kag nag-alagad sa mga diosdios nga gin-alagad sang iya amay, kag ginsimba sila:

22 Kag ginbayaan niya ang GINOONG Dios sang iya mga kaamayan, kag wala maglakat sa dalanon sang GINOO.

23 ś Kag ang mga alagad ni Amon nagpuhon batok sa iya, kag ginpatay ang hari sa iya kaugalingon nga balay.

24 Kag ang katawohan sang duta nagpatay sang tanan nga nagpuhon batok kay haring Amon; kag ang katawohan sang duta naghimo nga hari kay Josias nga iya anak nga lalaki sa tal-us niya.

25 Karon ang nabilin sang mga binuhatan ni Amon nga ginhimo niya, wala bala sila masulat sa libro sang mga maragtas sang mga hari sang Juda?

26 Kag ginlubung sia sa iya lulubngan sa katamnan ni Uza: kag naghari sa tal-us niya si Josias nga iya anak nga lalaki.

KAPITULO 22

SI JOSIAS walo ka tuig sang nagsugud sia sa paghari, kag naghari sia sa Jerusalem sing katloan kag isa ka tuig. Kag ang ngalan sang iya iloy si Jedida, nga anak ni Adaya sang Boscat.

2 Kag ginhimo niya inang matarung sa itololok sang GINOO, kag naglakat sa bug-os nga dalanon ni David nga iya amay, kag wala maglipas sa too ukon sa wala.

3 ś Kag nahanabu sa ikanapulo kag walo nga tuig ni haring Josias, nga ginpadala sang hari si Safan nga escriba, ang anak nga lalaki ni Azalia, nga anak nga lalaki ni Mesullam, sa balay sang GINOO, nga nagasiling,

4 Taklad ka kay Helcias nga mataas nga pari, agud nga mabilog niya ang pilak nga ginsulud sa balay sang GINOO, nga gintipon sang mga manugbantay sang ganhaan gikan sa katawohan:

5 Kag itugyan nila ini sa kamut sang mga manugpangabudlay, nga nagadumala sa balay sang GINOO: kag ihatag nila ini sa mga manugpangabudlay nga didto sa balay sang GINOO, sa pagpakaayo sang mga lubot sang balay,

6 Sa mga panday, kag sa mga manugtukud, kag sa mga cantero, kag sa pagbakal sang tablon kag bato nga binasbasan sa pagpakaayo sang balay.

7 Apang wala sila ginpangayoan sing husay sang kuarta nga gintugyan sa ila kamut, kay sila nagagawi sing matutum.

8 ś Kag si Helcias nga mataas nga pari nagsiling kay Safan nga escriba, Nakita ko ang libro sang kasogoan sa balay sang GINOO. Kag ginhatag ni Helcias ang libro kay Safan, kag ginbasa niya ini.

9 Kag si Safan nga escriba nagkadto sa hari, kag nagsugid liwat sa hari, kag nagsiling, Gintipon sang imo mga alagad ang kuarta nga nakita sa balay, kag nagtugyan sini sa kamut sang mga manugpangabudlay, nga nagadumala sang balay sang GINOO.

10 Kag si Safan nga escriba nagpahayag sa hari, nga nagasiling, Si Helcias nga pari naghatag sa akon sing isa ka libro. Kag ginbasa ini ni Safan sa atubangan sang hari.

11 Kag nahanabu, sang nakabati ang hari sang mga polong sang libro sang kasogoan, nga ginkusnit niya ang iya mga panapton.

12 Kag ang hari nagsogo kay Helcias nga pari, kag kay Ahikam nga anak nga lalaki ni Safan, kag kay Acbor nga anak nga lalaki ni Mecaya, kag kay Safan nga escriba, kag kay Asaya nga alagad sang hari, nga nagasiling,

13 Lakat kamo, pamangkota ninyo ang GINOO tungud sa akon, kag tungud sa katawohan, kag tungud sa bug-os nga Juda, nahanungud sa mga polong sini nga libro nga nakita: kay daku ang kasingkal sang GINOO nga nagdabdab batok sa aton, bangud nga ang aton mga kaamayan wala magpamati sa mga polong sini nga libro, sa paghimo sono sa tanan nga nasulat nahanungud sa aton.

14 Gani si Helcias nga pari, kag si Ahicam, kag si Acbor, kag si Safan, kag si Asaya, nagkadto kay Hulda nga manalagna nga babaye, ang asawa ni Sallum nga anak nga lalaki ni Ticva, ang anak nga lalaki ni Carcas, manugbantay sang mga panapton; (karon nagpuyo si Hulda sa Jerusalem sa kolehio;) kag nagpakigsapul sila sa iya.

15 ś Kag nagsiling sia sa ila, Amo ini ang ginasiling sang GINOONG Dios sang Israel, Sugiri ninyo ang lalaki nga nagpadala sa inyo sa akon,

16 Amo ini ang ginasiling sang GINOO, Yari karon, magapadala ako sing malaut sa sini nga duug, kag sa iya pumuluyo, bisan sang tanan nga mga polong sang libro nga ginbasa sang hari sang Juda:

17 Bangud nga ginbayaan nila ako, kag nagsonog sing incienso sa iban nga mga dios, agud nga mapaakig ako nila sa bug-os nga binuhatan sang ila mga kamut; busa ang akon kasingkal magadabdab batok sini nga duug, kag indi ini mapalong.

18 Apang sa hari sang Juda, nga nagpadala sa inyo sa pagpamangkot sa GINOO, amo ini ang isiling ninyo sa iya, Amo ini ang ginasiling sang GINOONG Dios sang Israel, Nahanungud sa mga polong nga nabatian mo;

19 Bangud nga ang imo tagiposoon mahomok, kag nagpaubus ka sa atubangan sang GINOO, sang pagkabati mo sang ginpamolong ko batok sini nga duug, kag batok sa mga pumuluyo sini, nga sila manginmamingaw kag pagpakamalaut, kag nagkusnit ka sang imo mga panapton, kag naghibi sa akon atubangan; ako man nagpamati sa imo, nagasiling ang GINOO.

20 Busa, yari karon, isimpon ko ikaw sa imo mga kaamayan, kag isimpon ka sa paghidait sa imo lulubngan; kag indi makakita ang imo mga mata sang tanan nga malaut nga dalhon ko sa sini nga duug. Kag ginsugiran nila liwat ang hari.

KAPITULO 23

KAG ang hari nagpadala, kag gintipon nila sa iya ang tanan nga tigulang sang Juda kag sang Jerusalem.

2 Kag nagsaka ang hari sa balay sang GINOO, kag upud niya ang tanan nga tawo sang Juda kag ang tanan nga pumuluyo sang Jerusalem, kag ang mga pari, kag ang mga manalagna, kag ang bug-os nga katawohan, magamay kag dalagku: kag ginbasa niya sa ila mga idulungug ang tanan nga polong sang libro sang katipan nga nakita sa balay sang GINOO.

3 ś Kag nagtindug ang hari sa luyo sang haligi, kag nagpakigkatipan sa atubangan sang GINOO, sa pagsonod sa GINOO, kag sa pagbantay sang iya mga sogo kag sang iya mga pagpamatuud kag sang iya mga palatukuran sa bug-os nilang tagiposoon kag sa bug-os nilang kalag, sa pagtuman sang mga polong sini nga katipan nga nasulat sa sini nga libro. Kag ang bug-os nga katawohan nagpanangdo sa katipan.

4 Kag nagsogo ang hari kay Helcias nga mataas nga pari, kag sa mga pari nga sa ikaduha nga pasonod, kag sa mga manugbantay sang ganhaan, sa pagpagowa gikan sa templo sang GINOO sang tanan nga suludlan nga ginhimo tungud kay Baal, kag tungud sa puong-puong sang kakahoyan, kag tungud sa bug-os nga panong sang langit: kag ginsonog niya sila sa gowa sang Jerusalem sa mga latagon sang Kidron, kag gindala ang mga abo nila sa Bet-el.

5 Kag ginpahalin niya ang mga pari nga nagasimba sa mga diosdios, nga gintakdungan sang mga hari sang Juda sa pagsonog sing incienso sa mataas nga mga duug sa mga siudad sang Juda, kag sa mga duug palibut sa Jerusalem; sila man nga nagsonog sing incienso kay Baal, sa adlaw, kag sa bulan, kag sa mga planeta, kag sa bug-os nga panong sang langit.

6 Kag gindala niya ang puong-puong sang kakahoyan gikan sa balay sang GINOO, pagowa sa Jerusalem, sa sapa nga Kidron, kag ginsonog ini sa sapa nga Kidron, kag ginbukbuk ini, kag ginsabwag ang iya yab-ok sa ibabaw sang mga lulubngan sang kaanakan sang katawohan.

7 Kag ginguba niya ang mga balay sang mga sodomanhon, nga yara sa luyo sang balay sang GINOO, diin naghabol ang mga babaye sang mga kumbung nga sa puong-puong sang kakahoyan.

8 Kag ginpagowa niya ang tanan nga pari gikan sa mga siudad sang Juda, kag gindagtaan ang mataas nga mga duug diin ang mga pari nagsonog sing incienso, kutub sa Geba tubtub sa Beer-seba, kag ginguba niya ang mataas nga mga duug sang mga gawang nga yara sa salamputan sang gawang ni Josue nga gobernador sang siudad, nga yara sa wala sa gawang sang siudad.

9 Wala sing sapayan, ang mga pari sang mataas nga mga duug wala magtaklad sa halaran sang GINOO sa Jerusalem, kondi nagkaon sila sing mga tinapay nga wala sing tapay sa tunga sang ila mga utud.

10 Kag gindagtaan niya ang Tofet, nga yara sa nalupyakan sang mga anak ni Hinom, agud nga wala sing tawo nga magpaagi sang iya anak nga lalaki ukon sang iya anak nga babaye sa kalayo kay Moloc.

11 Kag ginkuha niya ang mga kabayo nga ginhalad sang mga hari sang Juda sa adlaw, sa salamputan sang balay sang GINOO, sa luyo sang hulut nga nasulud ni Natan-melec nga tulugyanan, nga yara sa mga palayas, kag ginsonog niya sa kalayo ang mga kangga sang adlaw.

12 Kag ang mga halaran nga yadto sa atop sang naibabaw nga hulut ni Acaz, nga nahimo sang mga hari sang Juda, kag ang mga halaran nga nahimo ni Manases sa duha ka luwang sang balay sang GINOO, ginlaglag sang hari, kag gindugmok sila gikan didto, kag ginsabwag ang yab-ok nila sa sapa nga Kidron.

13 Kag ang mataas nga mga duug nga yara sa atubangan sang Jerusalem, nga yara sa too sang bukid sang kalainan, nga ginpatindug ni Salomon nga hari sang Israel kay Astaret nga kangil-aran sang mga Sidonhon, kag kay Cemos nga kangil-aran sang mga Moabnon, kag kay Milcom nga kangil-aran sang mga anak ni Amon, gindagtaan sang hari.

14 Kag gindugmok niya ang mga imahen, kag ginpulud ang mga puong-puong sang kakahoyan, kag ginhil-ob ang mga duug nila sing mga tul-an sang mga tawo.

15 ś Labut pa ang halaran nga yadto sa Bet-el, kag ang mataas nga duug nga ginhimo ni Jeroboam nga anak nga lalaki ni Nabat, nga nagpapakasala sang Israel, yadto gid nga halaran kag ang mataas nga duug ginlumpag niya, kag ginsonog niya ang mataas nga duug, kag ginbukbuk ini, kag ginsonog ang puong-puong sang kakahoyan.

16 Kag sang nagliso si Josias, nakita niya ang mga lulubngan nga yadto didto sa bukid, kag nagpadala sia, kag ginpakuha ang mga tul-an gikan sa mga lulubngan, kag ginsonog sila sa ibabaw sang halaran, kag gindagtaan ini, sono sa polong sang GINOO nga ginbantala sang tawo sang Dios, nga nagbantala sini nga mga polong.

17 Niyan sia nagsiling, Ano bala ina nga monumento nga ginatan-aw ko? Kag ang mga tawo sang siudad nagsugid sa iya, Ini lulubngan sang tawo sang Dios, nga nag-abut gikan sa Juda, kag nagbantala sini nga mga butang nga nahimo mo batok sa halaran sang Bet-el.

18 Kag sia nagsiling, Pabayai sia; wala sing tawo nga maghulag sang iya mga tul-an. Gani ginpabay-an nila ang iya mga tul-an, upud sa mga tul-an sang manalagna nga nag-abut gikan sa Samaria.

19 Kag ang tanan nga balay man sang mataas nga mga duug nga yadto sa mga siudad sang Samaria, nga ginhimo sang mga hari sang Israel sa pagpaakig sa GINOO, ginkuha ni Josias, kag ginhimo sa ila ang sono sa tanan nga binuhatan nga nahimo niya sa Bet-el.

20 Kag ginpatay niya sa ibabaw sang mga halaran ang tanan nga pari sang mataas nga mga duug nga yadto didto, kag ginsonog sa ibabaw nila ang mga tul-an sang mga tawo, kag nagpauli sia sa Jerusalem.

21 ś Kag nagsogo ang hari sa bug-os nga katawohan, nga nagasiling, Hiwata ninyo ang pagligad sa GINOO nga inyo Dios, sono sa nasulat sa libro sining katipan.

22 Sa pagkamatuud wala gid sing nahiwat nga subong nga pagligad kutub sa mga adlaw sang mga hukom nga naghukom sa Israel, bisan sa tanan nga adlaw sang mga hari sang Israel, ukon sang mga hari sang Juda;

23 Kondi sa ikanapulo kag walo lamang nga tuig ni haring Josias, nga ang ini nga pagligad ginhiwat sa GINOO sa Jerusalem.

24 ś Labut pa ang mga nagahisayo sa kinilala nga mga espiritu, kag ang mga manugbabaylan, kag ang mga imahen, kag ang mga diosdios, kag ang tanan nga mga kalangil-aran nga nakita sa duta sang Juda kag sa Jerusalem, ginpahilayo ni Josias, agud nga matuman niya ang mga polong sang kasogoan nga nasulat sa libro nga nakita ni Helcias nga pari sa balay sang GINOO.

25 Kag sa nahauna niya wala sing hari nga kaangay niya, nga nagliso sa GINOO sa bug-os niya nga tagiposoon, kag sa bug-os niya nga kalag, kag sa bug-os niya nga kusug, sono sa bug-os nga kasogoan ni Moises; bisan sa olihi niya wala na sing nagtindug nga kaangay sa iya.

26 ś Wala sing sapayan ang GINOO wala magbiya gikan sa kaakig sang iya daku nga kasingkal, diin ang iya kaakig nagdabdab batok sa Juda, bangud sang tanan nga pag-akyat nga gin-akyat sa iya ni Manases.

27 Kag ang GINOO nagsiling, Pahalinon ko ang Juda man gikan sa akon itololok, subong nga ginpahalin ko ang Israel, kag sobolon ko ining siudad nga Jerusalem nga ginpili ko, kag ang balay nga nahanungud sa iya nagsiling ako, Ang akon ngalan mangindidto.

28 Karon ang nabilin sang mga binuhatan ni Josias, kag ang tanan nga ginhimo niya, wala bala sila masulat sa libro sang mga maragtas sang mga hari sang Juda?

29 ś Sa iya mga adlaw si Faraon-necao nga hari sang Egipto nagtaklad batok sa hari sang Asiria sa suba nga Eufrates: kag naggowa batok sa iya si haring Josias; kag ginpatay niya sia sa Meguido, sang nakit-an niya sia.

30 Kag ang iya mga alagad nagdala sa iya nga patay sa kangga gikan sa Meguido, kag gindala sia sa Jerusalem, kag ginlubung sia sa iya kaugalingon nga lulubngan. Kag ang katawohan sang duta nagkuha kay Jehoacaz nga anak nga lalaki ni Josias, kag ginhaplas sia, kag ginhimo sia nga hari nga tal-us sa iya amay.

31 ś Si Jehoacaz duha ka pulo kag tatlo ka tuig sang nagsugud sia sa paghari; kag naghari sia sing tatlo ka bulan sa Jerusalem. Kag ang ngalan sang iya iloy si Hamutal, nga anak nga babaye ni Jeremias sang Libna.

32 Kag ginhimo niya inang malaut sa itololok sang GINOO, sono sa tanan nga nahimo sang iya mga kaamayan.

33 Kag ginbilanggo sia ni Faraon-necao sa Ribla sa duta sang Hamat, agud nga indi sia maghari sa Jerusalem; kag ginpabuhis ang duta sing isa ka gatus ka talanton nga pilak, kag isa ka talanton nga bulawan.

34 Kag si Faraon-necao naghimo nga hari kay Eliaquim nga anak nga lalaki ni Josias nga tal-us ni Josias nga iya amay, kag ginbaylohan ang iya ngalan kay Jehoaquim, kag ginpahalin niya si Jehoacaz: kag nagkadto sia sa Egipto, kag napatay didto.

35 Kag si Jehoaquim naghatag kay Faraon sang pilak kag bulawan; apang ginpabuhis niya ang duta sa paghatag sang kuarta sono sa sogo ni Faraon: nagsukut sia sing pilak kag bulawan sa katawohan sang duta, sa tagsatagsa sono sa iya pagpabuhis, sa paghatag sini kay Faraon-necao.

36 ś Si Jehoaquim duha ka pulo kag lima ka tuig sang nagsugud sia sa paghari; kag naghari sia sing napulo kag isa ka tuig sa Jerusalem. Kag ang ngalan sang iya iloy si Zebida nga anak nga babaye ni Pedaya sang Ruma.

37 Kag ginhimo niya inang malaut sa itololok sang GINOO, sono sa tanan nga nahimo sang iya mga kaamayan.

KAPITULO 24

SA iya mga adlaw nagtaklad si Nabucodonosor nga hari sang Babilonia, kag si Jehoaquim nangin-alagad niya sing tatlo ka tuig: ugaling nagliso sia kag nagribuk batok sa iya.

2 Kag ang GINOO nagpadala batok sa iya sing mga kabon sang mga Caldeanhon, kag mga kabon sang mga Sirianhon, kag mga kabon sang mga Moabnon, kag mga kabon sang mga anak ni Amon, kag ginpadala sila batok sa Juda sa paglaglag sini, sono sa polong sang GINOO, nga ginpamolong niya paagi sa iya mga alagad nga mga manalagna.

3 Sa pagkamatuud sa sogo sang GINOO nag-abut ini sa Juda, sa pagkuha sa ila gikan sa iya itololok, tungud sa mga sala ni Manases, sono sa tanan nga ginhimo niya;

4 Kag subong man tungud sa dugo nga inocente nga ginpaagay niya: kay gintugub niya ang Jerusalem sing dugo nga inocente; nga ang GINOO indi buut magpatawad.

5 ś Karon ang nabilin sang mga binuhatan ni Jehoaquim, kag ang tanan nga ginhimo niya, wala bala sila masulat sa libro sang mga maragtas sang mga hari sang Juda?

6 Gani si Jehoaquim nagtolog upud sa iya mga kaamayan: kag naghari nga tal-us niya si Jehoaquin nga iya anak nga lalaki.

7 Kag ang hari sang Egipto wala na gid maggowa liwat sa iya duta: kay ang hari sang Babilonia nag-agaw sang tanan nga iya sang hari sang Egipto kutub sa suba sang Egipto tubtub sa suba nga Eufrates.

8 ś Si Jehoaquin napulo kag walo ka tuig sang nagsugud sia sa paghari, kag naghari sia sa Jerusalem sing tatlo ka bulan. Kag ang ngalan sang iya iloy si Nehusta, nga anak nga babaye ni Elnatan sang Jerusalem.

9 Kag ginhimo niya inang malaut sa itololok sang GINOO, sono sa tanan nga ginhimo sang iya amay.

10 ś Sa sadtong tion ang mga alagad ni Nabucodonosor nga hari sang Babilonia nagtaklad batok sa Jerusalem, kag ang siudad ginkibon.

11 Kag si Nabucodonosor nga hari sang Babilonia nag-abut batok sa siudad, kag ginkibon ini sang iya mga alagad.

12 Kag si Jehoaquin nga hari sang Juda naggowa pakadto sa hari sang Babilonia, sia, kag ang iya iloy, kag ang iya mga alagad, kag ang iya mga prinsipe, kag ang iya mga opisyal: kag gindakup sia sang hari sang Babilonia sa ikawalo nga tuig sang iya paghari.

13 Kag gindala niya gikan didto ang tanan nga mga bahandi sang balay sang GINOO, kag ang mga bahandi sang balay sang hari, kag gintipiktipik niya ang tanan nga suludlan nga bulawan, nga ginhimo ni Salomon nga hari sang Israel sa templo sang GINOO, sono sa napamolong sang GINOO.

14 Kag gindala niya ang bug-os nga Jerusalem, kag ang tanan nga prinsipe, kag ang tanan nga gamhanan nga mga tawo nga isganan, bisan napulo ka libo ka mga bihag, kag ang tanan nga panday kag mga manugsalsal sang salsalon: wala gid sing nabilin, luwas ang mga labi gid ka imol sang mga tawo sang duta.

15 Kag gindala niya si Jehoaquin sa Babilonia, kag ang iloy sang hari, kag ang mga asawa sang hari, kag ang iya mga opisyal, kag ang mga gamhanan sang duta, ini sila gindala niya sa kabihagan gikan sa Jerusalem pa Babilonia.

16 Kag ang tanan nga tawo nga gamhanan, nga pito ka libo, kag ang mga panday kag ang mga manugsalsal sang salsalon, nga isa ka libo, ang tanan makusug kag handa sa inaway, bisan sila gindala nga bihag sa Babilonia sang hari sang Babilonia.

17 ś Kag ang hari sang Babilonia naghimo kay Matanias, utud sang iya amay, nga hari nga tal-us niya, kag ginbaylohan ang iya ngalan sa kay Sedequias.

18 Si Sedequias duha ka pulo kag isa ka tuig sang nagsugud sia sa paghari, kag naghari sia sing napulog isa ka tuig sa Jerusalem. Kag ang ngalan sang iya iloy si Hamutal nga anak nga babaye ni Jeremias sang Libna.

19 Kag ginhimo niya inang malaut sa itololok sang GINOO, sono sa tanan nga nahimo ni Jehoaquim.

20 Kay paagi sa kaakig sang GINOO nahanabu ini sa Jerusalem kag sa Juda, tubtub nga ginsikway niya sila gikan sa iya atubangan, nga si Sedequias nagribuk batok sa hari sang Babilonia.

KAPITULO 25

KAG nahanabu sa ikasiam nga tuig sang iya paghari, sa bulan nga ikapulo, sa ikapulo nga adlaw sang bulan, nga si Nabucodonosor nga hari sang Babilonia nag-abut, sia, kag ang bug-os niyang kasoldadosan, batok sa Jerusalem, kag nagpahamtang batok sa iya; kag nagpatindug sila batok sa iya sing mga pamakud palibut.

2 Kag ang siudad nakibon tubtub sa ikanapulog isa nga tuig ni haring Sedequias.

3 Kag sa ikasiam nga adlaw sang ikap-at nga bulan ang tiggulutum naglandas sa siudad, kag wala na sing kalan-on nga sa katawohan sang duta.

4 ś Kag nabulwang ang siudad, kag nagpalagyo sa kagab-ihon ang tanan nga lalaki sang pag-awayan sa dalan sang gawang sa ulut sang duha ka kuta, nga yara sa luyo sang katamnan sang hari: (karon ang mga Caldeanhon batok sa siudad sa palibut:) kag ang hari naglakat sa dalan nayon sa kapatagan.

5 Kag ang kasoldadosan sang mga Caldeanhon naglagas sa hari, kag nalambut sia sa mga kapatagan sang Jerico: kag nag-alaplaag gikan sa iya ang bug-os niyang kasoldadosan.

6 Gani gindakup nila ang hari, kag ginpataklad sia pakadto sa hari sang Babilonia sa Ribla; kag ginhukman nila sia.

7 Kag ginpatay nila ang mga lalaking anak ni Sedequias sa atubangan sang iya mga mata, kag ginlukat ang mga mata ni Sedequias, kag gingapus sia sa mga grilyos nga saway, kag gindala sia sa Babilonia.

8 ś Kag sa ikalimang bulan, sa ikapitong adlaw sang bulan, nga amo ang ikanapulog siam nga tuig ni haring Nabucodonosor, hari sang Babilonia, nag-abut sa Jerusalem si Nabuzar-adan, nga kapitan sang mga bantay, nga alagad sang hari sang Babilonia:

9 Kag ginsonog niya ang balay sang GINOO, kag ang balay sang hari, kag ang tanan nga balay sang Jerusalem, kag ang balay sang tagsa ka dakung tawo ginsonog niya sa kalayo.

10 Kag ang bug-os nga kasoldadosan sang mga Caldeanhon, nga upud sa kapitan sang mga bantay, naglumpag sang mga kuta sang Jerusalem palibut.

11 Karon ang nabilin sang katawohan nga yadto sa siudad, kag ang mga manugpalagyo nga nagsaylo sa hari sang Babilonia, upud ang nabilin sang kadam-an, gindala nga bihag ni Nabuzar-adan nga kapitan sang mga bantay.

12 Apang ang kapitan sang mga bantay nagbilin sa mga imol sang duta nga mga mangin manugtatap sang ubas kag mga manugpanguma.

13 Kag ang mga haligi nga saway nga yadto sa balay sang GINOO, kag ang mga tulungtungan, kag ang dagat nga saway nga yadto sa balay sang GINOO, gindugmok sang mga Caldeanhon, kag gindala ang saway nila sa Babilonia.

14 Kag ginkuha nila ang mga kaldero, kag ang mga pala, kag ang mga inugpalong, kag ang mga kutsara, kag ang tanan nga suludlan nga saway nga sa ila nagpanghikot sila.

15 Kag ang mga balagahan, kag ang mga yahong, kag ina nga mga sa bulawan, sa bulawan, kag ina nga mga sa pilak, sa pilak, ginkuha sang kapitan sang mga bantay.

16 Ang duha ka haligi, ang isa ka dagat, kag ang mga tulungtungan nga ginhimo ni Salomon nga sa balay sang GINOO; ang saway sini tanan nga suludlan indi matimbang.

17 Ang kataason sang isa ka haligi napulog walo ka maniko, kag ang oloolo sa ibabaw sini saway: kag ang kataason sang oloolo tatlo ka maniko; kag ang pinuna, kag mga granada sa oloolo palibut, ang tanan saway: kag kaangay sini sa ila ang ikaduhang haligi, may pinuna.

18 ś Kag ginkuha sang kapitan sang mga bantay si Seraya nga puno nga pari, kag si Sofonias nga ikaduhang pari, kag ang tatlo ka bantay sang ganhaan:

19 Kag gikan sa siudad nagkuha sia sing isa ka opisyal nga ginpadumala sa mga lalaki sang pag-awayan, kag lima ka tawo sa ila nga nakakita sang nawung sang hari nga nakita sa siudad, kag sang esriba nga pangolo sang kasoldadosan, nga nagtipon sang katawohan sang duta, kag kan-uman ka tawo sang katawohan sang duta nga nakita sa siudad:

20 Kag si Nabuzar-adan nga kapitan sang mga bantay nagkuha sa ila, kag nagdala sa ila sa hari sang Babilonia sa Ribla:

21 Kag ang hari sang Babilonia nagpilas sa ila, kag nagpatay sa ila sa Ribla sa duta sang Hamat. Gani ang Juda gindala nga bihag gikan sa ila duta.

22 ś Kag sa mga tawo nga nabilin sa duta sang Juda, nga ginbilin ni Nabucodonosor nga hari sang Babilonia, ginpapangolo niya sa ila si Gedelias nga anak nga lalaki ni Ahicam, ang anak nga lalaki ni Safan.

23 Kag sang nakabati ang tanan nga kapitan sang mga kasoldadosan, sila kag ang ila mga tawo, nga ginhimo sang hari sang Babilonia nga gobernador si Gedelias, nagkadto sila kay Gedelias sa Mizpa, bisan si Ismael nga lalaking anak ni Netanias, kag si Johanan nga lalaking anak ni Carea, kag si Seraya nga lalaking anak ni Tanhumet nga Netofanhon, kag si Jazanias nga lalaking anak sang Maacatnon, sila kag ang ila mga tawo.

24 Kag si Gedelias nagsumpa sa ila, kag sa ila mga tawo, kag nagsiling sa ila, Dili kamo magkahadluk nga magmangin-alagad kamo sang mga Caldeanhon: puyo kamo sa duta, kag mag-alagad sa hari sang Babilonia; kag magmaayo sa inyo.

25 Apang nahanabu sa ikapitong bulan, nga nag-abut si Ismael nga anak nga lalaki ni Netanias, ang anak nga lalaki ni Elisama, sa kaliwat nga harianon, kag ang napulo ka lalaki upud sa iya, kag ginpilas si Gedelias, sa bagay nga napatay sia, kag ang mga Judio kag ang mga Caldeanhon nga nag-upud sa iya sa Mizpa.

26 Kag ang bug-os nga katawohan, magagmay kag dalagku, kag ang mga kapitan sang mga kasoldadosan nagtindug, kag nagkadto sa Egipto: kay nahadluk sila sa mga Caldeanhon.

27 ś Kag nahanabu sa ikakatloan kag pito nga tuig sang pagbihag kay Jehoaquin nga hari sang Juda, sa ikanapulog duha nga bulan, sa ikaduha ka pulo kag pito nga adlaw sang bulan, nga si Evil-merodac nga hari sang Babilonia, sa tuig nga nagsugud sia sa paghari, ginbayaw niya ang olo ni Jehoaquin nga hari sang Juda gikan sa bilanggoan;

28 Kag nagpamolong sia sing maayo sa iya, kag ginpahamtang ang iya trono sa ibabaw sang trono sang mga hari nga nag-upud sa iya sa Babilonia;

29 Kag gin-ilisan ang iya mga panapton sa bilanggoan: kag sia nagkaon sing tinapay sing dalayon sa atubangan niya sa tanan nga adlaw sang iya kabuhi.

30 Kag nahanungud sang iya inugkabuhi, may dalayon nga inugkabuhi nga ginhatag sa iya sang hari, sa adlawadlaw isa ka bahin, sa tanan nga adlaw sang iya kabuhi.

AMAZING GRACE BIBLE INSTITUTE