ANG IKADUHANG SULAT NIJUANANG tigulang, sa pinili nga ginang kag sa iya mga anak, nga ginahigugma ko sa kamatooran; kag indi ako lamang, kondi sila tanan man nga nakakilala sang kamatooran;2 Bangud sa kamatooran, nga nagapuyo sa aton, kag manginkaupud naton sa walay katapusan. 3 Ang bugay manginkaupud ninyo, ang kalooy, kag ang paghidait, gikan sa Dios nga Amay, kag kay Ginoong Jesu-Cristo, ang Anak sang Amay, sa kamatooran kag gugma. 4 Nagkalipay ako sing daku nga nasapwan ko ang imo mga anak nga nagalakat sa kamatooran, sono sa nabaton naton nga sogo gikan sa Amay. 5 Kag karon ginapakilooy ko sa imo, ginang, indi subong nga daw nagsulat ako sa imo sing isa ka bag-ong sogo, kondi inang aton nabaton kutub sa ginsuguran, nga maghigugmaanay kita ang isa kag isa. 6 Kag ini amo ang gugma, nga maglakat kita sono sa iya mga sogo. Ini amo ang sogo, Nga, subong sang nabatian ninyo kutub sa ginsuguran, dapat kamo maglakat sa sini. 7 Kay madamu nga mga madaya ang nagsulud sa kalibutan, nga wala nagatuad nga si Jesu-Cristo nag-abut sa unud. Ini sia isa ka madaya kag isa ka anticristo. 8 Andami ang inyo mga kaugalingon, nga indi naton madula inang mga butang nga aton ginpangabudlayan, kondi nga kita makabaton sing bug-os nga padya. 9 Ang bisan sin-o nga nagalapas, kag wala nagapabilin sa doktrina ni Cristo, wala sang Dios. Sia nga nagapabilin sa doktrina ni Cristo, sia may iya sang Amay kag sang Anak. 10 Kon may bisan sin-o nga mag-abut sa inyo, kag wala nagadala sining doktrina, dili pagbatona sia sa inyo balay, kag dili magsiling sa iya nga ang Dios magpakamaayo: 11 Kay sia nga nagasiling sa iya nga ang Dios magpakamaayo umalambit sang iya mga buhat nga malaut. 12 Bisan may madamu ako nga mga butang nga inugsulat sa inyo, indi ako buut magsulat sa papel kag tinta: kondi nagasalig ako sa pagkari sa inyo, kag pagpakighambal sa nawung kag nawung, agud nga ang aton kalipay mahimun-an. 13 Ang mga anak sang imo utud nga babaying pinili nagatamyaw sa imo. Amen. |