ANG BALAAN NGA BIBLIA

2 CORINTO

KAPITULO 1

SI PABLO, isa ka apostol ni Jesu-Cristo paagi sa kabubut-on sang Dios, kag si Timoteo nga aton utud, sa iglesia sang Dios nga yara sa Corinto, kaupud sang tanan nga santo nga yara sa bug-os nga Acaya:

2 Ang bugay sa inyo kag paghidait gikan sa Dios nga aton Amay, kag gikan kay Ginoong Jesu-Cristo.

3 Bulahan ang Dios, nga amo ang Amay sang aton Ginoong Jesu-Cristo, ang Amay sang mga kalooy, kag ang Dios sang tanan nga paglipay;

4 Nga nagalipay sa aton sa tanan naton nga kangitngitan, agud nga sarang naton malipay sila nga yara sa bisan anong kapipit-an, paagi sa paglipay nga ginlipay sang Dios sa aton.

5 Kay subong nga ang mga pag-antus ni Cristo nagabugana sa aton, amo man ang aton kalipay nagabugana man paagi kay Cristo.

6 Kag kon kami ginapapiotan, ina tungud sa inyo kalipay kag kaluwasan, nga nagahikot sa pagbatas sang amo man nga mga pag-antus nga amon man ginaantus: kag kon ginalipay kami, ina tungud sa inyo kalipay kag kaluwasan.

7 Kag malig-on ang amon nga paglaum sa inyo, sa nahibaloan nga, subong nga kamo mga umalambit sa mga pag-antus, subong man kamo sa kalipay.

8 Kay indi kami buut, mga kauturan, nga kamo dimakasayud nahanungud sa amon kapipit-an nga nag-abut sa amon sa Asia, nga ginpabug-atan kami sing lakas, labaw sa amon kusug, sa bagay nga wala na kami sing paglaum bisan sa pagkabuhi:

9 Apang sa amon kaugalingon kami nagbatiag sang pamatbat nga sa kamatayon, agud nga indi kami dapat magsalig sa amon kaugalingon, kondi sa Dios nga nagabanhaw sang mga patay:

10 Nga nagluwas sa amon sa tama ka daku nga kamatayon, kag nagaluwas: nga sa iya nagasalig kami nga sia magaluwas pa sa amon;

11 Kamo man nagabinuligay paagi sa pagpangamuyo tungud sa amon, agud nga bangud sang bugay nga ginhatag sa amon paagi sa madamu nga tawo ang mga pagpasalamat sarang mahatag sang madamu tungud sa amon.

12 Kay ang amon kalipay amo ini, ang pagpamatuud sang amon konsiensya, nga sa kabunayag kag diosnon nga pagkamatinutud-on, indi sa kaalam nga unudnon, kondi sa bugay sang Dios, nagagawi kami sa kalibutan, kag labi pa gid ayon sa inyo.

13 Kay wala kami nagasulat sing iban nga mga butang sa inyo, kondi ang ginabasa ninyo kag ginakilala; kag ginasaligan ko nga kilalahon ninyo tubtub sa katapusan;

14 Subong nga kamo man nagkilala sa amon sa bahin, nga kami amo ang inyo kalipay, subong nga kamo man amo ang amon sa adlaw sang Ginoong Jesus.

15 Kag sa sini nga pagsalig ginhagna ko ang pagkadto anay sa inyo, agud nga makabaton kamo sing ikaduha nga kaayohan;

16 Kag ang pag-agi sa inyo pa Macedonia, kag gikan sa Macedonia pabalik sa inyo, kag pagpatigayonon ninyo ako sa akon panlakatan pa Judea.

17 Busa sang paghagna ko sini, nagpakita bala ako sing pagkamabaylohon? ukon ang mga butang nga akon ginatuyo, ginatuyo ko bala sono sa unud, agud nga manginsa akon ang hoo, hoo, kag indi, indi?

18 Apang subong nga ang Dios matuud, ang amon polong sa inyo indi hoo kag indi.

19 Kay ang Anak sang Dios, nga si Jesu-Cristo, nga ginwali namon sa tunga ninyo, ni Silvano kag ni Timoteo kag nakon, indi hoo kag indi, apang sa iya amo ang hoo.

20 Kay ang tanan nga saad sang Dios sa iya hoo, kag sa iya Amen, sa himaya sang Dios paagi sa aton.

21 Karon sia nga nagapalig-on sa amon kaupud ninyo kay Cristo, kag naghaplas sa aton, amo ang Dios;

22 Nga nagselyo man sa aton, kag naghatag sang patinga sang Espiritu sa aton mga tagiposoon.

23 Labut pa ginatawag ko ang Dios nga saksi sa akon kalag, nga sa pagpalikaw sa inyo wala pa ako magkari sa Corinto.

24 Indi bangud nga kami may kagamhanan sa inyo pagtoo, kondi nga mga kabulig kami sang inyo kalipay: kay paagi sa pagtoo nagatindug kamo.

KAPITULO 2

APANG gintapat ko ini sa akon kaugalingon, nga indi ako magkari liwat sa inyo nga may kabug-atan.

2 Kay kon ginapasubu ko kamo, niyan sin-o bala ang nagalipay sa akon, kondi ang amo man nga ginpasubu ko?

3 Kag amo man ini ang ginsulat ko sa inyo, agud sa akon pag-abut, indi ako pagpasuboon nila nga amo kuntani ang maglipay sa akon; nga may pagsalig ako sa inyo tanan, nga ang akon kalipay amo ang kalipay ninyo tanan.

4 Kay sa madamu nga kapipit-an kag kasakitan sang tagiposoon nagsulat ako sa inyo nga may madamu nga luha; indi nga kamo pagpasuboon, kondi nga mahibaloan ninyo ang akon gugma nga bugana gid sa inyo.

5 Apang kon ang bisan sin-o nakapasubu, nakapasubu sia indi sa akon, kondi sa bahin: agud nga indi ako magtama ka bug-at sa inyo tanan.

6 Tuman na sa sinang tawo ining silot, nga ginhatag sang madamu.

7 Gani sa baylo dapat pagpatawaron ninyo sia, kag paglipayon sia, basi kon malumus sia sa iya lakas nga kasubu.

8 Busa ginapakilooy ko sa inyo nga lig-onon ninyo ang inyo gugma sa iya.

9 Kay sa sining katuyoan man nagsulat ako, agud nga mahibaloan ko ang kamatooran nahanungud sa inyo, kon matinumanon kamo sa tanan nga butang.

10 Sa iya nga nagapatawad kamo sing bisan ano nga butang, ako nagapatawad man: kay kon ako nagpatawad sing bisan ano nga butang, sa iya nga nagpatawad ako sini, tungud sa inyo nagpatawad ako sini sa bahin ni Cristo;

11 Agud nga indi si Satanas magbentaha sa aton: kay nahibaloan ta ang iya mga pahito.

12 Labut pa, sang pag-abut ko sa Troas sa pagwali sang ebanghelyo ni Cristo, kag ang isa ka ganhaan ginbuksan sa akon sang Ginoo,

13 Wala ako sing kapahuwayan sa akon espiritu, bangud nga wala ko makita si Tito nga akon utud: apang sa nagapaalam ako sa ila, naglakat ako gikan didto pa Macedonia.

14 Karon salamat sa Dios, nga gihapon nagapadaug sa aton kay Cristo, kag nagapahayag sang alisbong sang iya pagkilala paagi sa aton sa tagsa ka duug.

15 Kay kita sa Dios kaamyon ni Cristo, sa ila nga naluwas, kag sa ila nga nagakawala:

16 Sa isa kita ang alisbong sang kamatayon pa kamatayon; kag sa iban alisbong sang kabuhi pa kabuhi. Kag sin-o ang tuman bala tungud sining mga butang?

17 Kay indi kami subong sang madamu, nga nagadunut sang polong sang Dios: kondi nga subong nga maminatud-on, kondi nga subong nga iya sang Dios, sa itololok sang Dios nagahambal kami kay Cristo.

KAPITULO 3

NAGASUGUD bala kami liwat sa pagdayaw sang amon kaugalingon? ukon nagakinahanglan bala kami, subong sang iban, sing mga sulat sang pagdayaw ayon sa inyo, ukon sing mga sulat sang pagdayaw gikan sa inyo?

2 Kamo amo ang amon sulat nga nasulat sa amon mga tagiposoon, nga ginakilala kag ginabasa sang tanan nga tawo:

3 Bangud nga napahayag sing maathag nga kamo amo ang sulat ni Cristo nga gin-alagdan namon, nga nasulat indi sa tinta, kondi sa Espiritu sang buhi nga Dios; indi sa mga tapitapi nga bato, kondi sa mga tapitapi sang unud sang tagiposoon.

4 Kag ang amo nga pagsalig ginaangkon namon paagi kay Cristo ayon sa Dios:

5 Indi nga kami sangkol sa amon kaugalingon sa pag-isip sang bisan ano nga butang subong nga gikan sa amon gid; kondi ang amon pagkasangkol gikan sa Dios;

6 Nga sia man ang naghimo sa amon nga sangkol nga mga ministro sang bag-ong testamento; indi sang letra, kondi sang espiritu: kay ang letra nagapatay, apang ang espiritu nagahatag sing kabuhi.

7 Apang kon ang pagpanghikot sang kamatayon, nga nasulat kag natigib sa mga bato, sadto mahimayaon, sa bagay nga ang mga anak sang Israel indi makatolok sing dayon sa guya ni Moises tungud sang himaya sang iya nawung; nga ang amo nga himaya gintangdo nga mapanas:

8 Paano bala nga indi magmahimayaon pa ang pagpanghikot sang espiritu?

9 Kay kon ang pagpanghikot sang katagudilian mahimayaon, labi na gid ang pagpanghikot sang pagkamatarung nagalabaw sa himaya.

10 Kay bisan yadtong nanginmahimayaon wala sing himaya sa sining bagay, bangud sang himaya nga nagalabaw.

11 Kay kon inang nagtaliwan mahimayaon, labi na gid ka mahimayaon inang nagapabilin.

12 Niyan sanglit nga may amo kami nga paglaum, ginagamit namon ang daku nga kaathag sang paghambal:

13 Kag indi subong kay Moises, nga nagbutang sang isa ka tabon sa iya guya, agud nga ang mga anak sang Israel indi makakita sing dayon sang katapusan sinang napanas:

14 Apang ang ila mga panghunahuna ginbulag: kay tubtub karon nga adlaw nagapabilin ang amo man nga tabon nga wala makuha sa pagbasa sang daan nga testamento; nga ang amo nga tabon nakuha na kay Cristo.

15 Apang bisan tubtub karon nga adlaw, kon ginabasa si Moises, ang tabon yara sa ila tagiposoon.

16 Apang kon ini magliso sa Ginoo, makuha ang tabon.

17 Karon ang Ginoo amo inang Espiritu: kag kon diin ang Espiritu sang Ginoo, didto ang kahilwayan.

18 Apang kita nga tanan, sa nabuksan nga guya nagatolok sang himaya sang Ginoo, subong nga sa isa ka salaming, ginabalhin sa amo man nga dagway halin sa himaya pa himaya, paagi sa Espiritu sang Ginoo.

KAPITULO 4

BUSA sanglit may amon kami sining pag-alagdan, sono sa kalooy nga amon nabaton, wala kami nagapakaluya;

2 Kondi ginsikway ang tinago nga mga butang sang pagpangdaya, nga wala nagalakat sa kalag-it, kag wala nagagamit sang polong sang Dios sing malimbongon; kondi paagi sa pagpahayag sang kamatooran nagapakilala kami sang amon kaugalingon sa konsiensya sang tagsa ka tawo sa itololok sang Dios.

3 Apang kon ang amon ebanghelyo natago, natago ini sa ila nga nagakadula:

4 Nga sa ila ang dios sining kalibutan nagbulag sang mga panghunahuna sang mga wala nagatoo, agud nga ang kapawa sang mahimayaon nga ebanghelyo ni Cristo, nga amo ang dagway sang Dios, indi magsilak sa ila.

5 Kay wala namon ginawali ang amon kaugalingon, kondi si Cristo Jesus nga Ginoo; kag kami mga alagad ninyo tungud kay Jesus.

6 Kay ang Dios, nga nagsogo sa kapawa nga magsilak gikan sa kadudulman, nagsilak sa aton mga tagiposoon, sa paghatag sang kapawa sang pagkilala sang himaya sang Dios sa nawung ni Jesu-Cristo.

7 Apang may amon kami sining bahandi sa mga suludlan nga duta, agud nga ang pagkahalangdon sang gahum mangingikan sa Dios, kag indi gikan sa amon.

8 Ginatublag kami sa tagsa ka luyo, apang wala nagakalisud; ginapalibog kami, apang wala mawad-i sing paglaum;

9 Ginahingabut, apang wala mapatumbayai; ginpanglampus, apang wala malaglag;

10 Nga nagadala sa lawas sa gihapon sang kamatayon ni Ginoong Jesus, agud nga ang kabuhi man ni Jesus mapahayag sa amon lawas.

11 Kay kami nga nagakabuhi ginapanugyan gihapon sa kamatayon tungud kay Jesus, agud nga ang kabuhi man ni Jesus mapahayag sa amon nga unud nga mamalatyon.

12 Gani ang kamatayon nagahikot sa amon, apang ang kabuhi sa inyo.

13 Sanglit kami may amo man nga espiritu sang pagtoo, subong sa nasulat na, Nagtoo ako, kag gani nagpamolong ako; nagatoo man kami, kag gani nagapamolong;

14 Sa nahibaloan namon nga sia nga nagbanhaw kay Ginoong Jesus magabanhaw man sa amon paagi kay Jesus, kag ipaatubang kami kaupud ninyo.

15 Kay ang tanan nga butang tungud sa inyo, agud nga ang bugay nga bugana paagi sa pagpasalamat sang madamu magpabugana sa himaya sang Dios.

16 Bangud sina wala kami nagapakaluya; apang bisan ang amon tawo nga sa gowa nagakapatay, walay sapayan ang tawo nga sa sulud ginabag-o adlawadlaw.

17 Kay ang amon mamag-an nga kapipit-an, nga sa malip-ot lang nga tion, nagahikot nga sa amon sing labi pa gid kag walay katapusan nga kabug-aton sang himaya;

18 Sa wala kami nagatolok sa mga butang nga makita, kondi sa mga butang nga indi makita: kay ang mga butang nga makita mga umalagi; apang ang mga butang nga indi makita mga walay katapusan.

KAPITULO 5

KAY nahibaloan namon nga kon ang amon balay nga dutan-on sining tabernakulo matunaw, may amon kami nga isa ka tinukud gikan sa Dios, isa ka balay nga wala paghimoa sang mga kamut, nga walay katapusan sa mga langit.

2 Kay sa sini nagaugayong kami, nga nagahandum sing hanoot nga pagsukluban sang amon balay nga gikan sa langit:

3 Kon sa pagkamatuud nga nasukluban kami indi kami masapwan nga hublas.

4 Kay kami nga yari sa sining tabernakulo nagaugayong, nga nabug-atan: indi bangud nga buut kami mahublasan, kondi nga masukluban, agud nga ang mamalatyon malamon sang kabuhi.

5 Karon sia nga naghikot sa amon sa sini gid nga butang amo ang Dios, nga naghatag man sa amon sang patinga sang Espiritu.

6 Busa nagasalig gid kami gihapon, nga nakahibalo, nga samtang kami nagapuyo sa lawas, wala kami sa Ginoo:

7 (Kay nagalakat kami paagi sa pagtoo, indi sa panolok:)

8 Nagasalig gid kami, nagasiling ako, kag hinonoo buut kami mawala sa lawas, kag mag-upud sa Ginoo.

9 Busa kami nagapangabudlay, agud nga, bisan yara ukon wala, manginkalahamut-an kami sa iya.

10 Kay kinahanglan kita tanan ipahayag sa atubangan sang lingkoran nga hukmanan ni Cristo; agud nga ang tagsatagsa magbaton sing mga butang nga nahimo sa iya lawas, sono sinang iya nahimo, kon maayo ukon malain.

11 Busa sa nahibaloan namon ang kahadluk sa Ginoo, ginapatalupangud namon ang mga tawo; apang nahayag kami sa Dios; kag nagasalig man ako nga nahayag kami sa inyo mga konsiensya.

12 Kay wala namon ginadayaw ang amon kaugalingon liwat sa inyo, kondi nagahatag sa inyo sing kahigayonan sa paghimaya tungud sa amon, agud nga may isabat kamo sa ila nga nagahimaya sa gowa nga pagpakita, kag indi sa tagiposoon.

13 Kay kon kami wala sa amon kaugalingon, ina ayon sa Dios: kag kon mga but-anan kami, ina tungud sa inyo.

14 Kay ang gugma ni Cristo nagapilit sa amon; kay nagahukom kami sing subong sini, nga kon ang isa napatay tungud sa tanan, niyan ang tanan nagkalapatay:

15 Kag napatay sia tungud sa tanan, agud nga kutub karon sila nga nagakabuhi indi dapat magkabuhi nga sa ila kaugalingon, kondi nga sa iya nga napatay tungud sa ila, kag nabanhaw.

16 Busa kutub karon wala kami nagakilala sa tawo sono sa unud: hoo, bisan nakilala namon si Cristo sono sa unud, walay sapayan karon wala na kami nagakilala sa iya sing subong.

17 Busa kon ang bisan sin-o nga tawo yara kay Cristo, bag-o sia nga tinuga: ang daan nga mga butang nagtaliwan; yari karon, ang tanan nga butang nanginbag-o.

18 Kag ang tanan nga butang gikan sa Dios, nga nagpasag-uli sa aton sa iya kaugalingon paagi kay Jesu-Cristo, kag naghatag sa aton sang pag-alagdan sang pagpasag-uli;

19 Nga amo, nga ang Dios yara kay Cristo, nga nagapasag-uli sang kalibutan sa iya kaugalingon, nga wala nagaisip sa ila sang ila mga paglapas; kag nakatugyan sa aton sang polong sang pagpasag-uli.

20 Gani karon mga embajador kami tungud kay Cristo, subong nga ang Dios nagapakilooy sa inyo paagi sa amon: nagapakilooy kami sa inyo sa bahin ni Cristo, magpasag-uli kamo sa Dios.

21 Kay sia nga wala makakilala sing sala ginhimo niya nga nanginsala tungud sa aton; agud nga kita manginpagkamatarung sang Dios sa iya.

KAPITULO 6

NIYAN kami, subong nga mga manugpangabudlay kaupud niya, nagapakilooy sa inyo man nga dili ninyo pagbatonon ang bugay sang Dios sa walay pulus.

2 (Kay nagasiling sia, Ginpamatian ko ikaw sa tion nga nahamut-an, kag sa adlaw sang kaluwasan gintabangan ko ikaw: yari karon, karon gid amo ang tion nga nahamut-an; yari karon, karon gid amo ang adlaw sang kaluwasan.)

3 Nga wala kami nagahatag sing kasandaran sa bisan ano, agud nga ang pag-alagdan indi pagsawayon:

4 Apang sa tanan nga butang nagapakilala sang amon kaugalingon subong nga mga ministro sang Dios, sa dakung pagpailub, sa mga kapipit-an, sa mga kinahanglanon, sa mga kalisdanan,

5 Sa mga lapdus, sa mga pagbilanggo, sa mga kagubut, sa mga pagpangabudlay, sa mga pagpulaw, sa mga pagpuasa;

6 Paagi sa pagkaputli, paagi sa pagkilala, paagi sa pagbatas, paagi sa kalolo, paagi sa Balaan nga Espiritu, paagi sa gugma nga bunayag,

7 Paagi sa polong sang kamatooran, paagi sa gahum sang Dios, paagi sa hinganib sang pagkamatarung sa too kag sa wala,

8 Paagi sa kadungganan kag kahuluy-an, paagi sa malaut nga kabantugan kag maayo nga kabantugan: subong nga mga madaya, apang mga maminatud-on;

9 Subong nga wala makilal-i, apang mga kilala kaayo; subong nga nagakapatay, kag, yari karon, nagakabuhi kami; subong nga gindisiplina, kag wala ginapatay;

10 Subong nga masinulub-on, apang nagakalipay sa gihapon; subong nga imol, apang nagapamanggad sa madamu; subong nga walay bisan ano, apang nagaangkon sang tanan nga butang.

11 O kamo nga mga taga-Corinto, ang amon baba bukas sa inyo, ang amon tagiposoon ginpadaku.

12 Wala kamo ginapioti sa amon, kondi ginapiotan kamo sang inyo kaugalingon nga tagiposoon.

13 Karon sa pagbalus sa amo man, (nagapamolong ako subong nga sa akon mga anak,) magpadaku man kamo.

14 Dili kamo magpagota sing linibagon upud sa mga dimatinoohon: kay ano bala ang paghiliupud sang pagkamatarung sa pagkadimatarung? kag ano bala ang pagsugut sang kapawa sa kadudulman?

15 Kag ano bala ang pag-ugyon ni Cristo kay Belial? ukon ano bala ang kalabtanan sang nagatoo sa isa ka dimatinoohon?

16 Kag ano bala ang pagsinanto sang templo sang Dios sa mga diosdios? kay kamo amo ang templo sang Dios nga buhi; sono sa ginsiling sang Dios, Magapuyo ako sa ila, kag magalakat sa ila; kag ako mangin-ila Dios, kag sila mangin-akon katawohan.

17 Busa gowa kamo sa tunga nila, kag magpain kamo, nagasiling ang Ginoo, kag dili kamo magtandug sang dimatinlo nga butang; kag batonon ko kamo,

18 Kag mangin-isa ka Amay sa inyo, kag kamo mangin-akon mga anak nga lalaki kag mga anak nga babaye, nagasiling ang Ginoong Makaako.

KAPITULO 7

BUSA kay may aton kita sining mga saad, mga hinigugmang nalolotan, tinloan ta ang aton kaugalingon sa tanan nga kahigkoan sang unud kag espiritu, nga nagapahimpit sang pagkabalaan sa kahadluk sa Dios.

2 Batona ninyo kami; wala kami sing ginhimo nga sayup sa bisan sin-o nga tawo, wala kami sing nahalitan nga tawo, wala kami sing gindayaan nga tawo.

3 Ginasiling ko ini indi sa pagtagudili sa inyo: kay nasiling ko anay, nga yari kamo sa amon mga tagiposoon sa pagkamatay kag pagkabuhi upud sa inyo.

4 Daku ang akon kasidla sa paghambal sa inyo, daku ang paghimaya ko nahanungud sa inyo: puno ako sing paglipay, lakas ako ka malipayon sa bug-os namon nga kangitngitan.

5 Kay, sang pag-abut namon sa Macedonia, walay kapahuwayan ang amon unud, kondi ginpapiotan kami sa tagsa ka luyo; sa gowa mga pag-ilinaway, sa sulud mga kahadluk.

6 Apang ang Dios, nga nagalipay sang mga ginapabudlayan, naglipay sa amon sa pag-abut ni Tito;

7 Kag indi lamang sa iya pag-abut, kondi sa paglipay nga iya ginkalipay sa inyo, sang nagsugid sia sa amon sang inyo hanoot nga paghandum, sang inyo kasubu, sang inyo hanoot nga panghunahuna ayon sa akon; sa bagay nga nagkalipay ako sing labi pa.

8 Kay bisan ginpasubu ko kamo sa isa ka sulat, wala ako nagahinulsul, bisan naghinulsul ako: kay ginahantup ko nga ang amo man nga sulat nagpasubu sa inyo, bisan sa malip-ot nga tion lamang.

9 Karon nagakalipay ako, indi nga ginpasubu kamo, kondi nga ginpasubu kamo nga sa paghinulsul: kay ginpasubu kamo sa diosnon nga bagay, agud nga indi kamo makabaton sing bisan ano nga kadaut sa amon.

10 Kay ang diosnon nga kasubu nagahikot sing paghinulsul nga sa kaluwasan nga indi hilinulsulan: apang ang kasubu sang kalibutan nagahikot sing kamatayon.

11 Kay tan-awa ining amo gid nga butang, nga ginkasuboan ninyo sa diosnon nga bagay, kon daw ano nga kabalaka ang ginhikot sini sa inyo, hoo, daw ano ang pagtinlo sang inyo mga kaugalingon, hoo, daw anong kaakig, hoo, daw anong kahadluk, hoo, daw anong kainit nga paghandum, hoo, daw anong kakugi, hoo, daw anong pagtimalus! Sa tanan nga mga butang nagpamatuud kamo sang inyo mga kaugalingon nga matinlo sa sining butang.

12 Busa, bisan nagsulat ako sa inyo, akon ginhimo ini indi tungud sa kabangdanan sang naghimo sang sayup, ukon tungud sa kabangdanan sang nag-antus sang sayup, kondi agud nga ang amon pagkabalaka tungud sa inyo sa itololok sang Dios mapahayag sa inyo.

13 Busa nalipay kami sa inyo paglipay: hoo, kag nagkalipay kami sing labi pa gid bangud sa kalipay ni Tito, bangud nga ang iya espiritu ginpapahuway ninyo tanan.

14 Kay kon nagpabugal ako sing bisan ano sa iya nahanungud sa inyo, wala ako mahuy-i; apang subong nga nagpamolong kami sang tanan nga butang sa inyo sa kamatooran, amo man ang amon pagpabugal, nga ginhimo ko sa atubangan ni Tito, nasapwan nga isa ka kamatooran.

15 Kag ang iya tinagiposoon nga kahanoot bugana pa gid ayon sa inyo, sa nagadumdum sia sang pagkamatinumanon ninyo nga tanan, kon paano nga sa may kahadluk kag pagkurug ginbaton ninyo sia.

16 Busa nagakalipay ako nga may pagsalig ako sa inyo sa tanan nga butang.

KAPITULO 8

LABUT PA, mga kauturan, ginapahibalo namon sa inyo ang nahanungud sa bugay sang Dios nga nahatag sa mga iglesia sa Macedonia;

2 Nga sa isa ka dakung pagtilaw sa kapipit-an ang kabugana sang ila kalipay kag ila madalum nga kaimolon nagbugana nga sa kamanggaran sang ila kaalwan.

3 Kay buut sila sono sa ila ikasarang, nagasaksi ako, hoo, kag labaw pa sa ila ikasarang;

4 Nga nagapangabay sa amon nga may dakung pakilooy nga amon batonon ang dolot, kag batonon ang paghiliupud sa pag-alagad sa mga santo.

5 Kag ini ila ginhimo, indi subong sang amon ginlauman, kondi sa nahauna ginhatag nila ang ila mga kaugalingon sa Ginoo, kag sa amon paagi sa kabubut-on sang Dios.

6 Sa bagay nga ginlaygayan namon si Tito, nga subong nga nakapamuno na sia, subong man tapuson niya sa inyo ang amo man nga bugay.

7 Busa, subong nga nagabugana kamo sa tagsa ka butang, sa pagtoo, kag paghambal, kag sa ihibalo, kag sa bug-os nga paghimulat, kag sa inyo gugma sa amon, tatapa nga magbugana kamo sa sining bugay man.

8 Nagapamolong ako indi paagi sa sogo, kondi paagi sa kahigayonan sang pagkahanda sang iban, kag sa pagpamatuud sang kabunayag sang inyo gugma.

9 Kay nahibaloan ninyo ang bugay sang aton Ginoong Jesu-Cristo, nga, bisan manggaranon sia, walay sapayan nangin-imol sia tungud sa inyo, agud nga paagi sa iya pagkaimol mangin-manggaranon kamo.

10 Kag sa sini nagahatag ako sang akon panugyan: kay ini mapinuslanon sa inyo, nga nagpamuno sing una, indi lamang sa pagbuhat, kondi sa pagkahanda man sing may isa ka tuig nga nagligad.

11 Busa karon tumana ninyo ang paghimo sina; agud subong nga kamo may handa sa pagbuut, subong man sa pagtuman sono sa inyo ikasarang.

12 Kay kon sa nahauna may isa ka handa nga panghunahuna, ginakahamut-an ini sono sa yara sa tawo, kag indi sono sa wala sa iya.

13 Kay ginasiling ko ini indi agud nga ang iban nga mga tawo mahapusan, kag kamo mapiotan:

14 Kondi paagi sa isa ka pag-alangay, agud nga sa karon sa sining tion ang inyo kabugana mangin salili sa kinawad-on nila, agud nga ang ila kabugana man mangin salili sa inyo kinawad-on: agud nga may pag-alangay:

15 Subong sang nasulat na, Sia nga nagtipon sing madamu wala maglabi; kag sia nga nagtipon sing diotay wala makulangi.

16 Apang salamat sa Dios, nga nagbutang sa tagiposoon ni Tito sing amo man nga kahanoot nga pagkabalaka tungud sa inyo.

17 Kay matuud ginbaton niya ang paglaygay; apang sa labi pa kahanda, nag-abut sia sa inyo sa iya kaugalingon nga kabubut-on.

18 Kag ginpadala namon upud sa iya ang utud, nga ang pagdayaw sa iya yara sa ebanghelyo sa tanan nga mga iglesia;

19 Kag indi lamang amo ina, kondi sia man ginpili sang mga iglesia sa pagpanlakatan upud sa amon sa sining bugay, nga ginapanghikot namon sa himaya sang amo man nga Ginoo, kag sa pagpahayag sang inyo handa nga panghunahuna:

20 Nga malikawan namon, nga walay bisan sin-o nga tawo nga magbasol sa amon sa sining kabuganaan nga ginapanghikot namon:

21 Nga nagapatigayon sang mabunayag nga mga butang, indi lamang sa itololok sang Ginoo, kondi man sa itololok sang mga tawo.

22 Kag ginpadala namon upud sa ila ang amon utud, nga sa makadamu napamatud-an namon nga maukud sa madamu nga mga butang, apang karon labi pa gid kaukud, bangud sang dakung pagsalig ko sa inyo.

23 Kon ang bisan sin-o mag-usisa nahanungud kay Tito, kadampig ko sia kag masigkakabulig ayon sa inyo: kag kon may mag-usisa nahanungud sa amon mga kauturan, sila ang mga manugbalita sang mga iglesia, kag ang himaya ni Cristo.

24 Busa ipakita ninyo sa ila, kag sa atubangan sang mga iglesia, ang pamatuud sang inyo gugma, kag ang pagpabugal namon nahanungud sa inyo.

KAPITULO 9

KAY nahanungud sa pag-alagad sa mga santo, wala kinahanglan nga magsulat ako sa inyo:

2 Kay nakilala ko ang pagkahanda sang inyo panghunahuna, nga nahanungud sa inyo ginapabugal ko ini sa mga taga-Macedonia, nga ang Acaya nakahanda na sang tuig nga nagligad; kag ang inyo kakugi nakapukaw sang madamu gid.

3 Apang napadala ko ang mga kauturan, agud nga ang amon pagpabugal nahanungud sa inyo indi manginwalay pulus sa sining bagay; agud nga, subong sang ginsiling ko, mahanda kamo:

4 Basi kon mag-upud sila nga taga-Macedonia sa akon, kag masapwan kamo nga indi handa, kami (sa indi pagsiling nga kamo) mahuy-an sa sining amo man nga ginasaligan namon nga pagpabugal.

5 Busa ginhunahuna ko nga kinahanglan ang paglaygay sa mga kauturan, nga mag-una sila dira sa inyo, kag ihanda nga daan ang inyo amut, nga napahibalo na sa inyo anay, agud nga ang amo mahanda, subong nga butang sang pagkaalwan, kag indi subong sang pagkamahamkonon.

6 Apang nagasiling ako sini, Sia nga nagasab-ug sing halushalus magaani man sing halushalus; kag sia nga nagasab-ug sing bugana magaani man sing bugana.

7 Ang tagsa ka tawo sono sa ginatuyo niya sa iya tagiposoon, maghatag sia sing amo sina; indi sing may pagkumud, ukon sa pagpilit: kay ang Dios nagahigugma sa manughatag nga malipayon.

8 Kag ang Dios sarang sa pagpabugana sang tanan nga bugay sa inyo; agud nga kamo, sa gihapon may tuman sa tanan nga mga butang, magbugana sa tagsa ka maayo nga buhat:

9 (Subong sang nasulat na, Nakapanagtag sia; nakapanghatag sia sa mga imol: ang iya pagkamatarung nagapabilin sa gihapon.

10 Karon sia nga nagahatag sing binhi sa manugsab-ug nagahatag sing tinapay nga sa inyo pagkaon, kag nagapamuad sang inyo binhi nga nasab-ug, kag nagadugang sang mga bunga sang inyo pagkamatarung;)

11 Nga ginapamanggad sia sa tagsa ka butang sa bug-os nga pagkaalwan, nga nagahimo paagi sa amon sing pagpasalamat sa Dios.

12 Kay ang pagpanghikot sining pag-alagdan indi lamang nagapuno sang kakulangan sang mga santo, kondi bugana man paagi sa madamu nga pagpasalamat sa Dios;

13 Sanglit paagi sa pagtilaw sining pag-alagdan ginahimaya nila ang Dios tungud sang inyo pagpahayag nga pagpasakup sa ebanghelyo ni Cristo, kag sang inyo maalwan nga pagpanagtag sa ila, kag sa tanan nga tawo;

14 Kag paagi sa ila pagpangamuyo tungud sa inyo, nga nagahandum sa inyo bangud sang labaw gid nga bugay sang Dios sa inyo.

15 Salamat sa Dios tungud sang iya dimamitlang nga dolot.

KAPITULO 10

KARON ako, si Pablo, nagapakilooy sa inyo paagi sa pagkamapainubuson kag pagkalolo ni Cristo, ako nga sa atubangan ninyo kubus, apang sa wala ako maisug ako sa inyo:

2 Apang nagapakilooy ako sa inyo, nga kon nagaatubang ako indi ako magmaisug nga may pagsalig, nga ginahunahuna ko nga masidla batok sa iban, nga nagahunahuna sa amon subong nga daw nagalakat kami sono sa unud.

3 Kay bisan nagalakat kami sa unud, wala kami nagapakig-away sono sa unud:

4 (Kay ang mga hinganiban sang amon pagpakig-away indi unudnon, kondi gamhanan paagi sa Dios sa paglumpag sang mga pamakud;)

5 Nga nagaguba sang mga painoino, kag sang tagsa ka mataas nga butang nga nagapakalabaw sang iya kaugalingon batok sa pagkilala sang Dios, kag nagabihag sang tagsa ka hunahuna sa pagkamatinumanon kay Cristo;

6 Kag sa may pagkahanda sa pagpanimalus sang tanan nga pagkadimatinumanon, kon ang inyo pagkamatinumanon matuman.

7 Ginatolok ninyo bala ang mga butang sono sa nagowa nga dagway? Kon ang bisan sin-o nga tawo nagasalig sa iya kaugalingon nga sia iya ni Cristo, manghunahuna sia sa iya kaugalingon sini liwat, nga, subong nga sia iya ni Cristo, amo man kami iya ni Cristo.

8 Kay bisan magpabugal ako sing daw labi nahanungud sang amon pagbulut-an, nga ginhatag sang Ginoo sa amon sa pagpalig-on, kag indi nga sa inyo kalaglagan, indi ako dapat mahuy-an:

9 Agud nga indi ako nga daw nagapahog sa inyo paagi sa mga sulat.

10 Kay ang iya mga sulat, siling nila, mabug-at kag gamhanan; apang ang iya pagpangatubang sa lawas maluya, kag ang iya paghambal hilikayan.

11 Ang amo nga tawo manghunahuna sini, nga, subong nga mga amo kami sa polong paagi sa mga sulat sa wala kami nagaatubang, mga amo man kami sa buhat kon kami nagaatubang.

12 Kay wala kami nagapangahas sa pagpakig-isip sang amon kaugalingon, ukon sa pagpaangay sang amon kaugalingon upud sa iban nga nagapadayaw sang ila kaugalingon: apang sila nga nagatakus sang ila kaugalingon sing silahanon, kag nagapaangay sang ila kaugalingon sing silahanon, indi maalam.

13 Apang kami indi magpabugal nahanungud sa mga butang nga luwas sa amon talaksan, kondi sono sa takus sang talaksan nga ginpanagtag sang Dios sa amon, isa ka talaksan sa paglambut bisan sa inyo.

14 Kay wala kami nagapakalaba sang amon kaugalingon nga labaw sa amon talaksan, subong nga daw wala kami makalambut sa inyo: kay nakalambut kami tubtub man sa inyo sa pagwali sang ebanghelyo ni Cristo:

15 Nga wala kami nagapabugal sang mga butang nga luwas sa amon talaksan, nga amo, sa pinangabudlayan sang iban nga mga tawo; apang may paglaum kami, kon ang inyo pagtoo magtubo, nga kami padakuon paagi sa inyo sono sa amon pagdumalahan sing mabinuganaon,

16 Sa pagwali sang ebanghelyo sa mga ginsakpan sa unhan ninyo, kag indi sa pagpabugal sa sulud sang dulunan sang mga butang sang iban nga tawo nga nahanda na sa amon.

17 Apang sia nga nagahimaya, maghimaya sia sa Ginoo.

18 Kay indi yadtong nagapadayaw sang iya kaugalingon amo ang ginapakatakus, kondi yadtong ginadayaw sang Ginoo.

KAPITULO 11

KABAY sa Dios nga magbatas kamo sa akon sing diotay sa akon kabuangon: kag sa pagkamatuud batasa ninyo ako.

2 Kay nagakaimon ako sa inyo sa diosnon nga kaimon: kay ginkagon ko kamo sa isa ka bana, agud nga mapaatubang ko kamo subong nga isa ka putli nga ulay kay Cristo.

3 Apang nagakahadluk ako, basi sa ano man nga paagi, subong nga ang man-ug nagdaya kay Eva paagi sa iya pagkamalalang, amo man ang inyo mga panghunahuna patalangon gikan sa pagkabunayag nga yara kay Cristo.

4 Kay kon sia nga nagaabut nagawali sing iban nga Jesus, nga wala namon ginwali, ukon kon nagabaton kamo sing iban nga espiritu, nga wala ninyo nabaton, ukon iban nga ebanghelyo, nga wala ninyo nabaton, maayo ang pagbatas ninyo sa iya.

5 Kay ginaisip ko nga bisan sa ano nga butang indi ako kubus sa labing puno gid nga mga apostol.

6 Apang bisan bukalas ako sa hambal, apang indi sa ihibalo; apang kami napahayag sing bug-os sa tunga ninyo sa tanan nga butang.

7 Nakahimo bala ako sing sala sa pagpakubus ko sang akon kaugalingon agud nga mabayaw kamo, bangud nga ginwali ko sa inyo ang ebanghelyo sang Dios sa walay bayad?

8 Ginkawatan ko ang iban nga mga iglesia, sa pagbaton sing sohol sa ila, agud nga makaalagad ako sa inyo.

9 Kag sang yara ako kaupud ninyo, kag sa kakulangan, wala ako nangin lulan sa bisan kay sin-o: kay ang mga kauturan nga nag-abut gikan sa Macedonia naghimuno sang akon kakulangan: kag sa tanan nga butang gintipigan ko ang akon kaugalingon nga indi maglulan sa inyo, kag sa amo tipigan ko ang akon kaugalingon.

10 Subong nga ang kamatooran ni Cristo yari sa akon, walay tawo nga magatapna sa akon nahanungud sining pagpabugal sa mga ginsakpan sang Acaya.

11 Ngaa bala? bangud bala nga wala ako nagahigugma sa inyo? Ang Dios nakahibalo.

12 Apang ang ginahimo ko, ina himoon ko, agud nga mautud ko ang kahigayonan sa ila nga nagahandum sang kahigayonan; nga kon sa diin sila nagahimaya, masapwan nga subong sila sa amon.

13 Kay ini sila dimatuud nga mga apostol, madaya nga mga manugpangabudlay, nagabalhin sang ila mga kaugalingon sa pagkaapostol ni Cristo.

14 Kag indi katingalahan; kay bisan si Satanas nagabalhin sang iya kaugalingon sa isa ka anghel sang kapawa.

15 Busa indi daku nga butang kon ang iya mga ministro man nagabalhin subong nga mga ministro sang pagkamatarung; nga ang ila katapusan manginsono sa ila mga buhat.

16 Nagasiling liwat ako, Walay tawo nga maghunahuna nga ako isa ka buang; kon sa iban nga bagay, walay sapayan batona ninyo ako subong nga buang, agud nga makapabugal ako sing diotay sang akon kaugalingon.

17 Inang ginahambal ko, wala ko ginahambal sono sa Ginoo, kondi subong nga daw binuang, sa sining binugal nga pagsalig;

18 Sanglit nga madamu ang nagahimaya sono sa unud, magahimaya man ako.

19 Kay ginabatas ninyo sing malipayon ang mga buang, sanglit kamo inyo mga maalam.

20 Kay ginabatas ninyo, kon ang tawo nagadala sa inyo sa kahiolipnan, kon ang tawo nagalamon sa inyo, kon ang tawo nagakuha sang inyo, kon ang tawo nagapakataas sang iya kaugalingon, kon ang tawo nagatampa sa inyo sa guya.

21 Nagahambal ako nahanungud sa pasipala, subong nga daw nangin maluya kami. Walay sapayan kon sa diin ang bisan sin-o maisug, (nagahambal ako sing binuang,) ako man maisug.

22 Mga Hebreo bala sila? ako amo man. Mga Israelnon bala sila? ako amo man. Sila bala ang kaliwat ni Abraham? ako amo man.

23 Mga ministro bala sila ni Cristo? (Nagahambal ako subong nga isa ka buang) ako labi pa; sa mga pagpangabudlay labi pa kabugana, sa mga lapdus tama gid, sa mga bilanggoan labing masunsun, sa mga kamatayon masami.

24 Sa mga Judio makalima ako nakabaton sing kap-atan ka lapdus kulang isa.

25 Makatlo ako ginbunal sing mga bilogon, makaisa ginbato ako, makatlo ako nagbatas sa pagkawasdak sang sakayan, isa ka gab-i kag isa ka adlaw didto ako sa kadadalman;

26 Sa mga panlakatan masunsun, sa mga katalagman sa mga tubig, sa mga katalagman sa mga buyong, sa mga katalagman sa akon kaugalingon nga mga kasimanwa, sa mga katalagman sa mga pagano, sa mga katalagman sa siudad, sa mga katalagman sa kamingawan, sa mga katalagman sa dagat, sa mga katalagman sa tunga sang dimatuud nga mga kauturan;

27 Sa pagkalapyo kag kasakit, sa mga pagpulaw masunsun, sa kagutum kag kauhaw, sa mga pagpuasa masunsun, sa tugnaw kag kahubo.

28 Walay labut sinang mga butang nga sa gowa, inang nagaabut sa akon adlawadlaw, ang pagtatap sang tanan nga mga iglesia.

29 Sin-o bala ang maluya, kag ako indi maluya? sin-o bala ang ginpasandad, kag wala ako masonog?

30 Kon kinahanglan ako maghimaya, magahimaya ako sang mga butang nahanungud sa akon kaluyahon.

31 Ang Dios kag Amay sang aton Ginoong Jesu-Cristo, nga bulahan sa walay katapusan, nakahibalo nga wala ako nagabutig.

32 Sa Damasco ang gobernador nga sakup sang hari nga si Aretas nagbantay sang siudad sang mga taga-Damasco nga may isa ka garison, naghandum sa pagdakup sa akon:

33 Kag paagi sa isa ka bintana gintonton ako sa pader sa sulud sang isa ka alat, kag nakapalagyo sa iya mga kamut.

KAPITULO 12

INDI mapuslanon sa akon ang paghimaya nga walay pagduhaduha. Magaabut sa akon ang mga palanan-awon kag mga bugna sang Ginoo.

2 Nakakilala ako sang isa ka tawo kay Cristo sang kapin sa napulog apat na ka tuig ang nagligad, (kon sa lawas, indi ako makasugid; ukon sa gowa sang lawas, indi ako makasugid: ang Dios nakahibalo;) ini sia ginsabnit paibabaw pa ikatlo nga langit.

3 Kag nakilala ko ang among tawo, (kon sa lawas, ukon sa gowa sang lawas, indi ako makasugid: ang Dios nakahibalo;)

4 Nga sia ginsabnit paibabaw pa paraiso, kag nakabati sing mga polong nga dimamitlang, nga indi tugut sa isa ka tawo ang pagmitlang.

5 Nahanungud sa amo nga tawo magahimaya ako: apang nahanungud sa akon kaugalingon indi ako magahimaya, kondi sa akon mga kaluyahon.

6 Kay bisan buut ako nga maghimaya, indi ako mangin isa ka buang; kay magasiling ako sang kamatooran: apang karon ako nagapugung, basi kon ang bisan sin-o nga tawo mag-isip sa akon sing labaw sa ginatan-aw niya sa akon, ukon sa ginapamatian niya nahanungud sa akon.

7 Kag agud nga indi ako pagpakataason sing lakas paagi sa kabugana sang mga bugna, ginhatagan ako sing isa ka ungon sa unud, nga manugbalita ni Satanas sa pagsumbag sa akon, agud nga indi ako pagpakataason sing lakas.

8 Nahanungud sining butang ginpakilooy ko sing makatlo sa Ginoo, nga ini magbiya sa akon.

9 Kag nagsiling sia sa akon, Ang akon bugay tuman sa imo: kay ang akon kusug ginahimpit sa kaluyahon. Busa sa labing kalipay magahimaya pa ako sa akon mga kaluyahon, agud nga ang gahum ni Cristo magpabilin sa akon.

10 Busa nagakalipay ako sa mga kaluyahon, sa mga pasipala, sa mga kinahanglanon, sa mga paghingabut, sa mga kalisdanan tungud kay Cristo: kay kon maluya ako, niyan makusug ako.

11 Ako nangin isa ka buang sa paghimaya; ginpilit ninyo ako: kay dapat ako kuntani pagdayawon ninyo: kay bisan sa ano indi ako kubus sa labing puno gid nga mga apostol, bisan ako indi ano man.

12 Sa pagkamatuud ang mga tanda sang isa ka apostol ginpanghikot sa tunga ninyo sa bug-os nga pagpailub, sa mga tanda, kag mga katanhagaan, kag gamhanan nga mga buhat.

13 Kay sa ano bala nga bagay nga kubus kamo sa iban nga mga iglesia, luwas nga ako gid indi lulan sa inyo? patawara ako ninyo sining sayup.

14 Yari karon, ikatlo na nga tion nga handa ako sa pagkari sa inyo; kag indi ako manginlulan sa inyo: kay wala ko ginapangita ang inyo, kondi kamo: kay ang mga anak indi dapat magtipon tungud sa mga ginikanan, kondi ang mga ginikanan tungud sa mga anak.

15 Kag magakalipay gid ako sa paghinguyang kag nga paghinguyangon tungud sa inyo; bisan pa ginahigugma ko kamo sing labi, kubus ako nga ginahigugma.

16 Apang mag-amo, nga wala ako maglulan sa inyo: walay sapayan, maabtik ako, nadakpan ko kamo sa limbong.

17 Nakalakbang bala ako sa inyo paagi sa bisan kay sin-o sa ila nga napadala ko sa inyo?

18 Ginpangabay ko si Tito, kag ginpadala ko ang isa ka utud upud sa iya. Naglakbang bala si Tito sa inyo? wala bala kami maglakat sa amo man nga espiritu? wala bala kami maglakat sa amo man nga mga tikang?

19 Liwat, nagahunahuna bala kamo nga kami nagabalibad sang amon kaugalingon sa inyo? sa atubangan sang Dios nagapamolong kami kay Cristo: apang ginahimo namon ang tanan nga butang, mga hinigugmang nalolotan, sa pagpalig-on sa inyo.

20 Kay nahadluk ako, basi, kon sa pag-abut ko, indi ko kamo makit-an subong sang buut ko, kag makit-an ako ninyo nga subong sang indi buut ninyo: basi kon may mga pagbinais, mga kahisa, mga kasingkal, mga pagpinuyas, mga paglibak, mga pagkutso-kutso, mga paghabok, mga kagamo:

21 Kag basi, kon liwat sa pag-abut ko, paubuson ako sang akon Dios sa tunga ninyo, kag magkasubu ako tungud sa madamu nga nagpakasala na, kag wala maghinulsul sang kahigkoan kag pagpanghilawas kag kaulag nga ginhimo nila.

KAPITULO 13

IKATLO na ini nga tion nga nagakari ako sa inyo. Sa baba sang duha ukon tatlo ka mga saksi palig-onon ang tagsa ka polong.

2 Ginsugid ko sa inyo anay, kag ginasugid ko sa inyo karon, subong nga daw yara ako, sa ikaduha nga tion; kag karon nga wala ako ginasulat ko sa ila nga nakapakasala anay, kag sa iban nga tanan, nga, kon mag-abut ako liwat, indi ako magpasaylo:

3 Bangud nga nagapangita kamo sing isa ka pagpamatuud nga si Cristo nagahambal sa akon, nga indi maluya ayon sa inyo, kondi gamhanan sa inyo.

4 Kay bisan ginlansang sia sa krus sa kaluyahon, apang nagakabuhi sia paagi sa gahum sang Dios. Kay kami man maluya sa iya, apang magakabuhi kami kaupud niya paagi sa gahum sang Dios ayon sa inyo.

5 Usisaa ninyo ang inyo kaugalingon, kon yara kamo sa pagtoo; tilawi ninyo ang inyo kaugalingon. Wala bala ninyo mahibaloi sa inyo mga kaugalingon, kon paano nga yara sa inyo si Jesu-Cristo, luwas kon kamo mga lampingasan?

6 Apang nagasalig ako nga makahibalo kamo nga indi kami mga lampingasan.

7 Karon nagapangamuyo ako sa Dios nga indi kamo maghimo sing malaut; indi agud nga magpakita kami nga minamaayo, kondi nga kamo dapat maghimo sinang maayo, bisan kami mangindaw mga lampingasan.

8 Kay wala kami sing bisan ano nga mahimo batok sa kamatooran, kondi tungud sa kamatooran.

9 Kay nagakalipay kami, kon kami maluya, kag kamo mabaskug: kag ang amon man ginahandum, amo ang inyo pagkahimpit.

10 Busa nagasulat ako sining mga butang samtang wala dira ako, agud kon yara ako indi ako maggamit sing pagkatigdas, sono sa kagamhanan nga ginhatag sang Ginoo sa akon sa pagpalig-on, kag indi sa paglumpag.

11 Sa katapusan, mga kauturan, paalam. Magpakahimpit kamo, magkalipay, mag-isa sa hunahuna, magkabuhi sa paghidait; kag ang Dios sang gugma kag paghidait manginkaupud ninyo.

12 Tamyawa ang isa kag isa nga may balaan nga haluk.

13 Ang tanan nga santo nagaabiabi sa inyo.

14 Ang bugay ni Ginoong Jesu-Cristo, kag ang gugma sang Dios, kag ang pagpakighiambit sang Balaan nga Espiritu, manginkaupud ninyo tanan. Amen.

AMAZING GRACE BIBLE INSTITUTE