ANG BALAAN NGA BIBLIA

ANG IKADUHANG LIBRO SANG

MGA CRONICA

KAPITULO 1

KAG si Salomon nga anak nga lalaki ni David ginpalig-on sa iya ginharian, kag ang GINOO nga iya Dios nag-upud sa iya, kag nagpadaku sa iya sing lakas.

2 Niyan si Salomon nagpamolong sa bug-os nga Israel, sa mga kapitan sang mga linibo kag sang mga ginatus, kag sa mga hukom, kag sa tagsa ka gobernador sa bug-os nga Israel, ang mga puno sang mga kaamayan.

3 Gani si Salomon, kag ang bug-os nga katilingban upud sa iya, nagtaklad sa mataas nga duug nga yadto sa Gabaon; kay didto ang tabernakulo sang katilingban sang Dios, nga ginhimo sa kamingawan ni Moises nga alagad sang GINOO.

4 Apang ang arka sang Dios ginpataklad ni David gikan sa Kiryat-jearim sa duug nga gin-aman ni David tungud sini: kay nakapatindug sia sing layanglayang tungud sini sa Jerusalem.

5 Labut pa ang halaran nga saway, nga nahimo ni Bezalel nga lalaking anak ni Uri, lalaking anak ni Hur, ginbutang niya sa atubangan sang tabernakulo sang GINOO: kag si Salomon kag ang katilingban nagdangup sa sini.

6 Kag si Salomon nagsaka didto sa halaran nga saway sa atubangan sang GINOO, nga sa tabernakulo sang katilingban, kag nagdolot sing isa ka libo ka halad nga sinonog sa ibabaw sini.

7 ś Sa sadtong gab-i ang Dios nagpahayag kay Salomon, kag nagsiling sa iya, Pangayo ka kon ano ang ihatag ko sa imo.

8 Kag si Salomon nagsiling sa Dios, Nagpakita ka sing dakung kalooy sa kay David nga akon amay, kag naghimo sa akon nga maghari nga tal-us niya.

9 Karon, O GINOONG Dios, palig-ona ang imo saad kay David nga akon amay: kay ginhimo mo ako nga hari sa isa ka katawohan nga kaangay sa yab-ok sang duta sa kadamuon.

10 Hatagi ako karon sing kaalam kag ihibalo, agud nga makagowa ako kag makasulud sa atubangan sining katawohan: kay sin-o bala ang makahukom sining imo katawohan, nga tama kadaku?

11 Kag ang Dios nagsiling kay Salomon, Bangud yari ini sa imo tagiposoon, kag wala ka magpangayo sing kamanggaran, pagkabutang, ukon kadungganan, ukon sang kabuhi sang imo mga kaaway, kag wala man magpangayo sing malawig nga kabuhi; kondi nagpangayo sing kaalam kag ihibalo nga sa imo kaugalingon, agud nga ikaw makahukom sa akon katawohan, nga sa ibabaw nila ginhimo ko ikaw nga hari:

12 Ang kaalam kag ihibalo ginahatag sa imo; kag hatagan ko ikaw sing kamanggaran, kag pagkabutang, kag kadungganan, kasubong sang wala pa maagum sang mga hari nga una sa imo, kag walay na makaangay nga bisan sin-o sa olihi nimo.

13 ś Niyan si Salomon nagbalik gikan sa mataas nga duug nga didto sa Gabaon pakadto sa Jerusalem, gikan sa atubangan sang tabernakulo sang katilingban, kag naghari sia sa Israel.

14 Kag si Salomon nagtipon sang mga kangga kag mga manugkabayo: kag sia may isa ka libo kag apat ka gatus ka kangga, kag napulog duha ka libo ka manugkabayo, nga ginbutang niya sa mga siudad sang mga kangga, kag upud sa hari sa Jerusalem.

15 Kag ginpadamu sang hari ang pilak kag ang bulawan sa Jerusalem subong sang mga bato, kag ang mga kahoy nga cedro ginbilang niya nga daw mga kahoy nga sicomoro nga yara sa kapatagan, tungud sa kabugana.

16 Kag may mga kabayo si Salomon nga gindala gikan sa Egipto, kag lino nga bulunangon: ginbaton sang mga komersyante sang hari ang lino nga bulunangon sa bili.

17 Kag nagkuha sila, kag nagdala gikan sa Egipto sing isa ka kangga sa anum ka gatus ka siclo nga pilak, kag isa ka kabayo sa isa ka gatus kag kalim-an: kag sa amo gindala nila ang mga kabayo tungud sa tanan nga hari sang mga Hithanon, kag tungud sa mga hari sang Siria, paagi sa ila pagpangalima.

KAPITULO 2

KAG si Salomon nagtuyo sa pagpatindug sing balay nga sa ngalan sang GINOO, kag isa ka balay nga sa iya ginharian.

2 Kag si Salomon nag-isip sing kapitoan ka libo ka tawo sa pagdala sang mga lulan, kag kawaloan ka libo ka tawo nga mga manugpulud sa kabukiran, kag tatlo ka libo kag anum ka gatus nga magatatap sa ila.

3 ś Kag si Salomon nagpasogo kay Huram nga hari sang Tiro, nga nagasiling, Sono sa imo paghisayo sa kay David nga akon amay, kag nagpadala sa iya sing mga cedro sa pagpatindug sa iya sing balay nga puluy-an, sa amo maghisayo ka man sa akon.

4 Yari karon, buut na ako magpatindug sing balay nga sa ngalan sang GINOO nga akon Dios, sa pagdedicar sini sa iya, kag sa pagsonog sa atubangan niya sing maamyon nga incienso, kag nga sa dalayon nga tinapay nga pahayag, kag nga sa mga halad nga sinonog sa kaagahon kag sa kahaponon, sa mga sabbath, kag sa mga lati, kag sa solemne nga mga pandut sa GINOO nga amon Dios. Ini amo ang pagsolondan sa gihapon sa Israel.

5 Kag ang balay nga ginapatindug ko daku: kay daku ang amon Dios labaw sa tanan nga mga dios.

6 Apang sin-o bala ang makasarang sa pagpatindug sa iya sing balay, sa ginatan-aw nga ang langit kag ang langit sang mga langit indi makapahaigo sa iya? sin-o bala ako niyan, nga magpatindug ako sa iya sing balay, luwas lamang sa pagsonog sing incienso sa atubangan niya?

7 Busa karon padalhi ako sing isa ka tawo nga sampaton sa pagpangabudlay sa bulawan, kag sa pilak, kag sa saway, kag sa salsalon, kag sa purpura, kag sa carmesi, kag sa asul, kag nga makahibalo nga maggutib upud sa sampaton nga mga tawo nga yari sa akon sa Juda kag sa Jerusalem, nga gintigana ni David nga akon amay.

8 Padalhi man ako sing mga kahoy nga cedro, mga kahoy nga abeto, kag mga kahoy nga sandalo, gikan sa Libano: kay nahibaloan ko nga ang imo mga alagad makahibalo magpulud sing tablon sa Libano; kag, yari karon, ang akon mga alagad magaupud sa imo mga alagad,

9 Sa pag-aman sa akon sing tablon nga bugana: kay ang balay nga buut ko patindugon manginmakatilingala sa kadaku.

10 Kag, yari karon, magahatag ako sa imo mga alagad, nga mga manugpulud nga magapulud sing tablon, sing duha ka pulo ka libo ka sukub nga binayo nga trigo, kag duha ka pulo ka libo ka sukub nga sebada, kag duha ka pulo ka libo ka bat nga alak, kag duha ka pulo ka libo ka bat nga lana.

11 ś Niyan si Huram nga hari sang Tiro nagsabat sa sulat, nga ginpadala niya kay Salomon, Bangud nga ginhigugma sang GINOO ang iya katawohan, ginhimo ka niya nga hari sa ibabaw nila.

12 Si Huram nagsiling man, Pagpakamaayohon ang GINOONG Dios sang Israel, nga naghimo sang langit kag duta, nga naghatag kay David nga hari sing anak nga lalaki nga maalam, nahiyasan sang pagkamainandamon kag paghangup, nga magpatindug sing balay nga sa GINOO, kag sing balay nga sa iya ginharian.

13 Kag karon nagapadala ako sing tawong sampaton, nga nahiyasan sang paghangup, nga iya ni Huram nga amay ko,

14 Anak nga lalaki sia sang isa ka babaye nga gikan sa mga babaying mga anak ni Dan, kag ang iya amay tawo nga taga-Tiro, sia sampaton magpangabudlay sa bulawan, kag sa pilak, sa saway, sa salsalon, sa bato, kag sa tablon, sa purpura, sa asul, kag sa lino nga mapino, kag sa carmesi; sa paggutib man sa bisan anong bagay sang paggutib, kag pagpadugi sang bisan anong padugi nga ipahimo sa iya, upud sa imo mga tawong sampaton, kag upud sa mga tawong sampaton sang akon ginoo nga si David nga imo amay.

15 Busa karon ang trigo, kag ang sebada, ang lana, kag ang alak, nga ginpamolong sang akon ginoo, magpadala sia sa iya mga alagad:

16 Kag kami magapamulud sing kahoy sa Libano, sono sa kinahanglan mo: kag dalhon namon ini sa imo sa mga linantay paagi sa dagat tubtub sa Joppe; kag ikaw magdala sini pataklad sa Jerusalem.

17 ś Kag gin-isip ni Salomon ang tanan nga dumuloong nga yara sa duta sang Israel, sono sa isip nga ginhimo sa ila ni David nga iya amay; kag nasapwan sila nga isa ka gatus kag kalim-an kag tatlo ka libo kag anum ka gatus.

18 Kag ginbutang niya sa ila ang kapitoan ka libo nga manugdala sang mga lulan, kag kawaloan ka libo nga manugpulud sa kabukiran, kag tatlo ka libo kag anum ka gatus nga mga manugtatap sa pagpapangabudlay sang katawohan.

KAPITULO 3

NIYAN ginsugdan ni Salomon sa pagpatindug sang balay sang GINOO sa Jerusalem sa bukid nga Moria, diin nagpahayag ang GINOO kay David nga iya amay, sa duug nga gin-aman ni David sa linasan ni Ornan nga Jebusnon.

2 Kag nagsugud sia sa pagpatindug sa ikaduhang adlaw sa ikaduhang bulan, sa ikap-at nga tuig sang iya paghari.

3 ś Karon amo ini ang mga butang nga gintudlo kay Salomon nga sa pagpatindug sang balay sang Dios. Ang kalabaon sa mga maniko sono sa unang takus, kan-uman ka maniko, kag ang kasangkaron duha ka pulo ka maniko.

4 Kag ang portico nga yara sa atubangan sang balay, ang kalabaon sini sono sa kasangkaron sang balay, duha ka pulo ka maniko, kag ang kataason isa ka gatus kag duha ka pulo: kag gintaklapan niya ini sa sulud sang bulawan nga puro.

5 Kag ang kadak-an sang balay ginkisamihan niya sang kahoy nga abeto, nga gintaklapan niya sing ulay nga bulawan, kag nga sa ibabaw sini ginhimoan niya sing mga kahoy nga palma kag mga kadena.

6 Kag ginpunihan niya ang balay sing bilidhon nga mga bato nga sa katahuman: kag ang bulawan bulawan gikan sa Parvaim.

7 Gintaklapan man niya sing bulawan ang balay, ang mga balayan, ang mga haligi, kag ang mga dingding sini, kag ang mga ganhaan sini; kag naggutib sia sing mga querubin sa mga dingding.

8 Kag ginhimo niya ang balay nga labi gid ka balaan, ang iya kalabaon, sono sa kasangkaron sang balay, duha ka pulo ka maniko, kag ang iya kasangkaron duha ka pulo ka maniko: kag gintaklapan niya ini sing ulay nga bulawan sa kadamuon nga anum ka gatus ka talanton.

9 Kag ang timbang sang mga lansang kalim-an ka siclo nga bulawan. Kag gintaklapan niya sing bulawan ang mga hulut nga naibabaw.

10 Kag sa sulud sang balay nga labi gid ka balaan naghimo sia sing duha ka querubin nga inimahen, kag gintaklapan sila sang bulawan.

11 ś Kag ang mga pakpak sang mga querubin duha ka pulo ka maniko ang kalabaon: ang isa ka pakpak sang isa ka querubin lima ka maniko, nga nagalambut sa dingding sang balay: kag ang isa ka pakpak lima ka maniko man, nga nagalambut sa pakpak sang isa ka querubin.

12 Kag ang isa ka pakpak sang isa pa ka querubin lima ka maniko, nga nagalambut sa dingding sang balay: kag ang isa pa ka pakpak lima ka maniko man, nga nagaduut sa pakpak sang isa ka querubin.

13 Ang mga pakpak sining mga querubin nagahumlad sing duha ka pulo ka maniko: kag nagatindug sila sa ila mga tiil, kag ang ila mga nawung nayon sa sulud.

14 ś Kag naghimo sia sang kumbung nga asul, kag purpura, kag carmesi, kag lino nga mapino, kag ginpugtakan sa ibabaw sini sing mga querubin.

15 Sa atubangan sang balay naghimo man sia sing duha ka haligi nga katloan kag lima ka maniko ang kataason, kag ang oloolo nga yara sa ukbung sang tagsa sa ila lima ka maniko.

16 Kag naghimo sia sing mga kadena, subong sang yara sa oraculo, kag ginbutang sila sa mga ukbung sang mga haligi; kag naghimo sia sing isa ka gatus ka mga granada, kag ginbutang sila sa mga kadena.

17 Kag ginpatindug niya ang mga haligi sa atubangan sang templo, ang isa sa too, kag ang isa sa wala; ang sa too ginhingalanan niya Jaquin, kag inang sa wala ginhingalanan Boaz.

KAPITULO 4

LABUT PA naghimo sia sing halaran nga saway, duha ka pulo ka maniko ang kalabaon sini, kag duha ka pulo ka maniko ang kasangkaron sini, kag napulo ka maniko ang kataason sini.

2 ś Naghimo man sia sang isa ka dagat nga tinunaw nga napulo ka maniko sa bibig pa bibig, manipolon ini, kag lima ka maniko ang kataason sini; kag isa ka lubid nga katloan ka maniko makalikus sini.

3 Kag sa idalum sini may kaangay sang mga baka, nga naglibut sini: napulo sa isa ka maniko, nga nagalibut sang dagat. Ang mga baka duha ka kubay, nga unay sang pagtunaw sini sang sia gintunaw.

4 Natungtung ini sa napulog duha ka baka, nga ang tatlo nagatolok nayon sa aminhan, kag ang tatlo nagatolok nayon sa katundan, kag ang tatlo nagatolok nayon sa bagatnan, kag ang tatlo nagatolok nayon sa sidlangan: kag ang dagat natungtung sa ila, kag ang tanan nilang pangolihi nayon sa sulud.

5 Kag ang kadamul sini isa ka dapal, kag ang bibig sini kaangay sang paghimo sang bibig sang tagayan, nga may mga bulak nga mga lirio; kag ini makabaton kag masudlan sing tatlo ka libo ka bat.

6 ś Naghimo man sia sang napulo ka batiya, kag ginbutang ang lima sa too, kag ang lima sa wala, sa pagpanghugas sa ila: nahugasan nila sa ila ang mga butang nga gindolot nila nga sa halad nga sinonog; apang ang dagat iya sang mga pari panghinawan.

7 Kag naghimo sia sang napulo ka kandilero nga bulawan sono sa pagsolondan nahanungud sa ila, kag ginbutang niya sila sa sulud sang templo, lima sa too, kag lima sa wala.

8 Naghimo man sia sing napulo ka latok, kag ginbutang niya sila sa sulud sang templo, lima sa too nga kilid, kag lima sa wala. Kag naghimo sia sing isa ka gatus ka planggana nga bulawan.

9 ś Labut pa naghimo sia sing luwang sang mga pari, kag sang dakung luwang, kag mga ganhaan nga sa luwang, kag gintaklapan sing saway ang mga ganhaan nila.

10 Kag ginpahamtang niya ang dagat sa kilid nga too nayon sa sidlangan pa bagatnan.

11 Kag si Huram naghimo sang mga kolon, kag sang mga pala, kag sang mga planggana. Kag natapus ni Huram ang paghimo sang buluhaton nga ginhimo niya kay haring Salomon sa balay sang Dios;

12 Nga amo, ang duha ka haligi, kag ang mga manipolon, kag ang mga oloolo nga yara sa ukbung sang duha ka haligi, kag ang duha ka pinuna sa pagputus sang duha ka manipolon sang mga oloolo nga yara sa ukbung sang mga haligi;

13 Kag ang apat ka gatus ka granada nga sa duha ka pinuna; duha ka kubay nga granada sa tagsa ka pinuna, sa pagputus sang duha ka manipolon sang mga oloolo nga yara sa ukbung sang mga haligi.

14 Ginhimo man niya ang mga tulungtungan, kag ginhimo niya ang mga batiya sa ibabaw sang mga tulungtungan;

15 Ang isa ka dagat, kag ang napulog duha ka baka sa idalum sini.

16 Ang mga kolon man, kag ang mga pala, kag ang mga kaw-it sa unud, kag ang tanan nilang gamit, ginhimo ni Huram nga iya amay sila sa saway nga masiga tungud kay haring Salomon nga sa balay sang GINOO.

17 Ginhorma sila sang hari sa kapatagan sang Jordan, sa duta nga daga sa ulut sang Sucot kag Zeredata.

18 Sa amo ginhimo ni Salomon ang tanan sining suludlan sa dakung kabugana: kay wala masayri ang timbang sang saway.

19 ś Kag ginhimo ni Salomon ang tanan nga suludlan nga sa balay sang Dios, ang halaran nga bulawan man, kag ang mga latok nga sa ibabaw nila ginabutang ang tinapay nga pahayag;

20 Labut pa ang mga kandilero pati ang ila mga suga nga bulawan nga puro, agud nga pagpadabdabon sila sono sa pagsolondan sa atubangan sang oraculo;

21 Kag ang mga bulak, kag ang mga suga, kag ang mga kimpit, ginhimo niya sa bulawan, kag ina sa himpit nga buluwan;

22 Kag ang mga inugpalong, kag ang mga planggana, kag ang mga kutsara, kag ang mga incensario, sa bulawan nga puro: kag ang salamputan sang balay, ang nasulud nga mga ganhaan nga sa duug nga labi gid ka balaan, kag ang mga ganhaan sang balay sang templo, himo sa bulawan.

KAPITULO 5

SA AMO ang tanan nga buluhaton nga ginhimo ni Salomon tungud sa balay sang GINOO natapus: kag ginpasulud ni Salomon ang tanan nga butang nga gindedicar ni David nga iya amay; kag ang pilak, kag ang bulawan, kag ang tanan nga gamit, ginbutang niya sa mga bahandi sang balay sang Dios.

2 ś Niyan gintipon ni Salomon sa Jerusalem ang mga tigulang sang Israel, kag ang tanan nga pangolo sang mga tribo, ang mga pangolo sang mga kaamayan sang kaanakan sang Israel, sa pagpataklad sang arka sang katipan sang GINOO gikan sa siudad ni David, nga amo ang Zion.

3 Busa nagtipon sa hari ang tanan nga tawo sang Israel sa pandut nga sa bulan nga ikapito.

4 Kag ang tanan nga tigulang sang Israel nag-abut; kag ginyayongan sang mga Levinhon ang arka.

5 Kag ginpataklad nila ang arka, kag ang tabernakulo sang katilingban, kag ang tanan nga balaan nga mga suludlan nga didto sa tabernakulo, ini sila ginpataklad sang mga pari kag sang mga Levinhon.

6 Labut pa si haring Salomon, kag ang bug-os nga katilingban sang Israel nga nagtipon sa iya sa atubangan sang arka, naghalad sing mga carnero kag mga baka, nga indi maisip ukon matandaan tungud sa kadamuon.

7 Kag ginpasulud sang mga pari ang arka sang katipan sang GINOO sa iya duug, sa oraculo sang balay, sa duug nga labi gid kabalaan, sa idalum sang mga pakpak sang mga querubin:

8 Kay ang mga querubin naghumlad sang ila mga pakpak sa ibabaw sang duug sang arka, kag gintabonan sang mga querubin ang arka kag ang iya mga yayongan sa ibabaw.

9 Kag ginkuha nila ang mga yayongan sang arka, nga ang mga ukbung sang mga yayongan makita kutub sa arka sa atubangan sang oraculo; apang indi sila makita sa gowa. Kag didto ini tubtub sini nga adlaw.

10 Wala sing sulud ang arka luwas sang duha ka tapitapi nga ginsulud sa sini ni Moises sa Horeb, sang nagpakigkatipan ang GINOO sa mga kaanakan sang Israel, sang naggowa sila gikan sa Egipto.

11 ś Kag nahanabu, sang paggowa sang mga pari gikan sa balaan nga duug: (kay ang tanan nga pari nga yadto didto ginpakabalaan, kag wala magbantay sinang tion sang ila mga pag-inagisud:

12 Ang mga Levinhon man nga mga manug-amba, tanan sila nga kay Asaf, kay Heman, kay Jedutun, upud sa ila mga anak nga lalaki kag sa ila mga kauturan, nga napanaptan sa lino nga mapino, nga may mga apiping kag mga salterio kag mga arpa, nagtindug sa sidlangan nga ukbung sang halaran, kag upud sa ila ang isa ka gatus kag duha ka pulo ka pari nga nagapatonog sing mga budyong:)

13 Nahanabu ini, sang nag-isa ang mga manugbudyong kag ang mga manug-amba, sa paghatag sing isa ka tonog agud mabatian sila nga nagadayaw kag nagapasalamat sa GINOO; kag sang pagbayaw nila sang ila tingug upud sang mga budyong kag mga apiping kag mga tulunggon sa musika, kag nagdayaw sa GINOO, nga nagasiling, Kay maayo sia; kay ang iya kalooy nagapadayon sa gihapon: nga niyan ang balay napuno sang panganud, ang balay sang GINOO;

14 Sa bagay nga ang mga pari indi makasarang magtindug sa pag-alagad bangud sang panganud: kay ang himaya sang GINOO nagpuno sang balay sang Dios.

KAPITULO 6

NIYAN nagsiling si Salomon, Ang GINOO nagsiling nga sia magapuyo sa pitipit nga kadudulman.

2 Apang ako nagpatindug sa imo sing balay nga puluy-an, kag duug nga puluy-an mo sa gihapon.

3 Kag ang hari nagliso sang iya nawung, kag nagpakamaayo sang bug-os nga katilingban sang Israel: kag ang bug-os nga katilingban sang Israel nagtindug.

4 Kag sia nagsiling, Pakamaayohon ang GINOONG Dios sang Israel, nga sa iya mga kamut nagtuman sinang ginpamolong niya sa iya baba kay David nga akon amay, nga nagasiling,

5 Kutub sang adlaw nga ginpagowa ko ang akon katawohan gikan sa duta sang Egipto wala ako magpili sang siudad gikan sa tanan nga tribo sang Israel nga patindugan sang balay, agud nga mangindidto ang akon ngalan; kag wala ako magpili sing bisan sin-o nga lalaki nga manginpangolo sa ibabaw sang akon katawohan nga Israel:

6 Apang ginpili ko ang Jerusalem, agud nga mangindidto ang akon ngalan; kag ginpili si David nga maggahum sa akon katawohan nga Israel.

7 Karon yari ini sa tagiposoon ni David nga akon amay sa pagpatindug sing balay tungud sa ngalan sang GINOONG Dios sang Israel.

8 Apang ang GINOO nagsiling kay David nga akon amay, Tungud nga yara ini sa imo tagiposoon sa pagpatindug sing balay sa akon ngalan, naghimo ka sing maayo nga ini yara sa imo tagiposoon:

9 Walay sapayan dili ikaw magpatindug sang balay; kondi ang imo anak nga lalaki nga magagikan sa imo balikawang, sia magapatindug sang balay sa akon ngalan.

10 Busa gintuman sang GINOO ang iya polong nga ginpamolong niya: kay nagatindug ako nga tal-us ni David nga akon amay, kag ginpalingkod ako sa trono sang Israel, sono sa ginsaad sang GINOO, kag nagpatindug sang balay nga sa ngalan sang GINOONG Dios sang Israel.

11 Kag didto ginpahamtang ko ang arka, diin nasulud ang katipan sang GINOO, nga ginhimo niya upud sa kaanakan sang Israel.

12 ś Kag nagtindug sia sa atubangan sang halaran sang GINOO sa atubangan sang bug-os nga katilingban sang Israel, kag ginbayaw ang iya mga kamut:

13 Kay si Salomon naghimo sing plataforma nga saway, nga lima ka maniko kalaba, kag lima ka maniko kasangkad, kag tatlo ka maniko ang kataas, kag ginbutang ini sa tunga sang luwang: kag nagtindug sia sa ibabaw sini, kag nagluhud sa iya mga tuhud sa atubangan sang bug-os nga katilingban sang Israel, kag nagbayaw sang iya mga kamut nayon sa langit,

14 Kag nagsiling, O GINOONG Dios sang Israel, wala sing Dios kaangay sa imo sa langit, ukon sa duta; nga nagabantay sang katipan, kag nagapakita sang kalooy sa imo mga alagad, nga nagalakat sa atubangan mo sa bug-os nilang mga tagiposoon:

15 Ikaw nga naghuput upud sa imo alagad nga si David nga akon amay sinang imo ginsaad sa iya; kag nagpamolong ka sa imo baba, kag gintuman mo ini sang imo kamut, subong sang sa sini nga adlaw.

16 Busa karon, O GINOONG Dios sang Israel, hupti upud sa imo alagad nga si David nga akon amay inang ginsaad mo sa iya, nga nagasiling, Indi ka mawad-an sing lalaki sa akon itololok nga magalingkod sa trono sang Israel; lamang nga ang imo mga anak maghalong sa ila dalanon sa paglakat sa akon kasogoan, subong nga ikaw naglakat sa atubangan nakon.

17 Busa karon, O GINOONG Dios sang Israel, pamatud-i ang imo polong, nga ginpamolong mo sa imo alagad nga si David.

18 Apang matuud gid bala nga ang Dios magapuyo upud sa mga tawo sa duta? yari karon, ang langit kag ang langit sang mga langit indi makapahaigo sa imo; daw ano pa gid kakubus ini nga balay nga akon ginpatindug!

19 Busa tamda ang pangamuyo sang imo alagad, kag ang iya pag-ampo, O GINOO nga akon Dios, sa pagpamati sa pagtuaw kag sa pangamuyo nga ginapangamuyo sang imo alagad sa atubangan mo:

20 Nga ang imo mga mata mabuksan nayon sa sini nga balay sa adlaw kag gab-i, nayon sa duug nga imo ginsiling nga butangan mo sang imo ngalan didto; sa pagpamati sa pangamuyo nga ginapangamuyo sang imo alagad nayon sa sini nga duug.

21 Busa pamati ka sa mga pag-ampo sang imo alagad, kag sang imo katawohan nga Israel, nga himoon nila nayon sa sini nga duug: pamati ka kutub sa imo puluy-an, kutub sa langit; kag kon makabati ka, patawara.

22 ś Kon ang isa ka tawo makasala batok sa iya isigkatawo, kag piliton sia sing panumpa nga papanumpaon sia, kag ang sumpa mag-abut sa atubangan sang imo halaran sa sini nga balay;

23 Niyan pamati ka kutub sa langit, kag himoa, kag hukmi ang imo mga alagad, nga nagabalus sa malauton, sa pagpabalik sang iya pagginawi sa iya kaugalingon nga olo; kag nagapakamatarung sang matarung sa paghatag sa iya sono sang iya pagkamatarung.

24 ś Kag kon ang imo katawohan nga Israel dag-on sa atubangan sang kaaway, bangud nakasala sila batok sa imo; kag magbalik kag magtuad sang imo ngalan, kag magpangamuyo kag mag-ampo sa imo atubangan sa sini nga balay;

25 Niyan pamati ka kutub sa mga langit, kag patawara ang sala sang imo katawohan nga Israel, kag iuli sila sa duta nga ginhatag mo sa ila kag sa ila mga kaamayan.

26 ś Kon ang langit matakpan, kag wala sing ulan, bangud nga nakasala sila batok sa imo; apang kon magpangamuyo sila nayon sini nga duug, kag magtuad sang imo ngalan, kag magtalikod sa ila sala, kon sakiton mo sila;

27 Niyan pamati ka sa langit, kag patawara ang sala sang imo mga alagad, kag sang imo katawohan nga Israel, kon natudloan mo sila sang maayo nga dalan nga dapat nila laktan; kag padalhi sing ulan ang imo duta, nga nahatag mo nga panublion sa imo katawohan.

28 ś Kon sa duta may tiggulutum, kon may pagpameste, kon may panglaya, ukon agop-op, mga apan, ukon mga atatalo; kon kibonon sila sang ila mga kaaway sa mga siudad sang ila duta; bisan ano dira nga kasakitan ukon bisan ano nga balatian:

29 Niyan bisan ano nga pangamuyo ukon bisan ano nga pag-ampo nga himoon sang bisan sin-o nga tawo, ukon sang imo bug-os nga katawohan nga Israel, kon ang tagsatagsa makahibalo sang iya kaugalingon nga kasakitan kag sang iya kaugalingon nga kalisud, kag magabayaw sang iya mga kamut nayon sa sining balay:

30 Niyan pamati ka kutub sa langit nga imo puluy-an, kag patawara, kag ihatag sa tagsa ka tawo sono sa tanan niyang mga dalanon, nga nakilala nimo ang iya tagiposoon; (kay ikaw gid lamang ang nakakilala sang mga tagiposoon sang mga anak sang mga tawo:)

31 Agud nga magkahadluk sila sa imo, sa paglakat sa imo mga dalanon, tubtub nga nagakabuhi sila sa duta nga ginhatag mo sa amon mga kaamayan.

32 ś Labut pa nahanungud sa dumuloong, nga indi sa imo katawohan nga Israel, apang mag-abut sia gikan sa malayo nga duta tungud sang imo daku nga ngalan, kag sang imo gamhanan nga kamut, kag sang imo inuntay nga butkon; kon magkari sila kag magpangamuyo nayon sa sini nga balay;

33 Niyan pamati ka kutub sa mga langit, bisan kutub sa imo puluy-an, kag himoa sono sa tanan nga panawag sa imo sang dumuloong; agud nga ang tanan nga katawohan sang duta makakilala sang imo ngalan, kag magkahadluk sa imo, subong sang ginahimo sang imo katawohan nga Israel, kag agud nga makakilala sila nga ini nga balay nga napatindug ko ginatawag sa imo ngalan.

34 Kon ang imo katawohan maggowa sa inaway batok sa ila mga kaaway sa dalan nga ipadala mo sila, kag magpangamuyo sila sa imo nayon sini nga siudad nga napili mo, kag sa balay nga akon ginpatindug tungud sa imo ngalan;

35 Niyan pamati ka kutub sa mga langit sang ila pangamuyo kag sang ila pag-ampo, kag sakdaga ang ila kinamatarung.

36 Kon makasala sila batok sa imo, (kay wala sing tawo nga wala nagapakasala,) kag maakig ka sa ila, kag itugyan sila sa ila mga kaaway, kag bihagon nila sila pakadto sa duta nga malayo ukon malapit;

37 Apang kon makapanghunahuna sila sa ila kaugalingon sa duta diin gindala sila nga bihag, kag magliso liwat kag mag-ampo sa imo sa duta sang ila kabihagan, nga nagasiling, Nakasala kami, nakahimo kami sing sayup, kag naghisayo sing malaut;

38 Kon magbalik sila sa imo sa bug-os nila nga tagiposoon kag sa bug-os nila nga kalag sa duta sang ila kabihagan, diin gindala nila sila nga bihag, kag magpangamuyo nayon sa ila duta, nga imo ginhatag sa ila mga kaamayan, kag nayon sa siudad nga imo ginpili, kag nayon sa balay nga akon napatindug tungud sa imo ngalan:

39 Niyan pamati ka kutub sa mga langit, bisan kutub sa imo puluy-an, sang ila pangamuyo kag sang ila mga pag-ampo, kag sakdaga ang ila kinamatarung, kag patawara ang imo katawohan nga nakasala batok sa imo.

40 Karon, O Dios ko, ginapakilooy ko sa imo, magmuklat ang imo mga mata, kag ilingig ang imo mga idulungug sa pangamuyo nga ginahimo sa sining duug.

41 Busa karon tindug, O GINOONG Dios, pasulud sa imo palahuwayan, ikaw, kag ang arka sang imo kusug: pagpanaputan sing kaluwasan ang imo mga pari, O GINOONG Dios, kag magkasadya sa kaayohan ang imo mga santo.

42 O GINOONG Dios, dili pagpatalikda ang nawung sang imo hinaplas: dumduma ang mga kalooy kay David nga imo alagad.

KAPITULO 7

KARON sang nakatapus si Salomon sa pagpangamuyo, ang kalayo nagpanaug gikan sa langit, kag nag-upus sang halad nga sinonog kag sang mga halad; kag ang himaya sang GINOO nagpuno sang balay.

2 Kag ang mga pari indi makasulud sa balay sang GINOO, bangud nga ang himaya sang GINOO nagpuno sang balay sang GINOO.

3 Kag sang nakita sang tanan nga kaanakan sang Israel kon paano nagpanaug ang kalayo, kag ang himaya sang GINOO nga yara sa balay, nagyaub sila nga naghapa sa duta sa nabatohan, kag nagsimba, kag nagdayaw sa GINOO, nga nagasiling, Kay maayo sia; kay ang iya kalooy nagapadayon sa gihapon.

4 ś Niyan ang hari kag ang bug-os nga katawohan nagdolot sing mga halad sa atubangan sang GINOO.

5 Kag si haring Salomon nagdolot sing halad nga duha ka pulo kag duha ka libo ka baka, kag isa ka gatus kag duha ka pulo ka carnero: gani ang hari kag ang bug-os nga katawohan nagdedicar sang balay sang Dios.

6 Kag ang mga pari nagtindug sono sa ila mga palangakoan: ang mga Levinhon man nga may mga tulunggon sa musika nga sa GINOO, nga nahimo sang hari nga si David sa pagdayaw sa GINOO, kay ang iya kalooy nagapadayon sa gihapon, sang si David nagdayaw paagi sa ila pag-alagdan; kag ang mga pari nagpatonog sing mga budyong sa atubangan nila, kag ang bug-os nga Israel nagtindug.

7 Labut pa ginpakabalaan ni Salomon ang natunga sang luwang nga yara sa atubangan sang balay sang GINOO: kay didto nagdolot sia sang mga halad nga sinonog, kag sang sapay sang mga halad sa paghidait, bangud nga ang halaran nga saway nga nahimo ni Salomon indi makaigo sa pagbaton sang mga halad nga sinonog, kag sang halad nga kalan-on, kag sang sapay.

8 ś Labut pa si Salomon naghiwat sing pandut sa sadto nga tion sing pito ka adlaw, kag ang bug-os nga Israel upud sa iya, tama kadaku gid nga katilingban, kutub sa salamputan sang Hamut tubtub sa sapa sang Egipto.

9 Kag sa ikawalo nga adlaw naghiwat sila sing solemne nga pagtilipon: kay ginhiwat nila ang pagdedicar sang halaran sing pito ka adlaw, kag ang pandut sing pito ka adlaw.

10 Kag sa ikaduha ka pulo kag tatlo nga adlaw sang bulan nga ikapito ginpapauli niya ang katawohan sa ila mga layanglayang, nga masinadyahon kag malipayon sa tagiposoon tungud sang kaayo nga napakita sang GINOO kay David, kag kay Salomon, kag sa iya katawohan nga Israel.

11 Sa amo natapus ni Salomon ang balay sang GINOO, kag ang balay sang hari: kag ang tanan nga nag-abut sa tagiposoon ni Salomon nga himoon sa balay sang GINOO, kag sa iya kaugalingon nga balay, ginhimo niya sing mauswagon.

12 ś Kag ang GINOO nagpahayag kay Salomon sa kagab-ihon, kag nagsiling sa iya, Ginpamatian ko ang imo pangamuyo, kag ginpili nga sa akon ini nga duug nga balay sa halad.

13 Kon takpan ko ang langit sa bagay nga wala sing ulan, ukon kon sogoon ko ang mga apan sa paghalunhon sang duta, ukon kon magpadala ako sing pagpameste sa akon katawohan;

14 Kon ang akon katawohan, nga ginatawag sa akon ngalan, magpaubus sang ila kaugalingon, kag magpangamuyo, kag magpangita sang akon nawung, kag magtalikod gikan sa ila malaut nga mga dalanon; niyan magapamati ako kutub sa langit, kag magapatawad sang ila sala, kag magaayo sang ila duta.

15 Karon ang akon mga mata magamuklat, kag ang akon mga idulungug magalingig sa pangamuyo nga ginahimo sa sini nga duug.

16 Kay karon ginpili ko kag ginpakabalaan ini nga balay, agud nga ang akon ngalan mangindira sa gihapon: kag ang akon mga mata kag ang akon tagiposoon mangindira sing dalayon.

17 Kag nahanungud sa imo, kon maglakat ka sa atubangan ko, subong sang paglakat ni David nga imo amay, kag maghimo sono sa tanan nga ginsogo ko sa imo, kag magbantay sang akon mga palatukuran kag sang akon mga pagsolondan;

18 Niyan palig-onon ko ang trono sang imo ginharian, sono sang ginpakigkatipan ko kay David nga imo amay, nga nagasiling, Dili ka mawad-an sing lalaki nga manuggahum sa Israel.

19 Apang kon kamo magtalikod, kag magbiya sang akon mga palatukuran kag sang akon mga sogo, nga ginbutang ko sa atubangan ninyo, kag maglakat kag mag-alagad sa iban nga mga dios, kag magsimba sa ila;

20 Niyan gabuton ko sila sa mga gamut gikan sa akon duta nga nahatag ko sa ila; kag ini nga balay, nga ginpakabalaan ko tungud sa akon ngalan, sikwayon ko gikan sa itololok nakon, kag himoon ko ini nga hulubaton kag ululigyaton sa tanan nga mga pungsud.

21 Kag ini nga balay, nga mataas, mangin kahaorongan sa tagsatagsa nga magalabay sa sini; sa bagay nga magasiling sia, Ngaa bala nga ginhimo sang GINOO ang subong sa sini nga duta, kag sa sini nga balay?

22 Kag ini pagasabton, Bangud nga ginbayaan nila ang GINOONG Dios sang ila mga kaamayan, nga nagpagowa sa ila gikan sa duta sang Egipto, kag nagdangup sa iban nga mga dios, kag nagsimba sa ila, kag nag-alagad sa ila: busa gindala niya sa ila ini tanan nga malaut.

KAPITULO 8

KAG nahanabu sa katapusan sang duha ka pulo ka tuig, nga sa sulud nila si Salomon nagpatindug sang balay sang GINOO, kag sang iya kaugalingon nga balay,

2 Nga ang mga siudad nga gin-uli ni Huram kay Salomon, ginpatindug sila ni Salomon, kag ginpapuyo didto ang kaanakan sang Israel.

3 Kag si Salomon nagkadto sa Hamat-zoba, kag gindaug ini.

4 Kag ginpatindug niya ang Tadmor sa kamingawan, kag ang tanan nga mga siudad nga suluptan, nga ginpatindug niya sa Hamat.

5 Ginpatindug man niya ang Bet-horon nga naibabaw, kag ang Bet-horon nga naubus, mga siudad nga napamakuran, nga may mga kuta, mga gawang, kag mga pintal;

6 Kag ang Baalat, kag ang tanan nga mga siudad nga suluptan nga iya ni Salomon, kag ang tanan nga mga siudad nga sa mga kangga, kag ang mga siudad nga sa mga manugkabayo, kag ang tanan nga ginhandum ni Salomon sa pagpatindug sa Jerusalem, kag sa Libano, kag sa bug-os nga duta sang iya ginadumalahan.

7 ś Nahanungud sa tanan nga katawohan nga nabilin sang mga Hithanon, kag sang mga Amornon, kag sang mga Pereznon, kag sang mga Hevhanon, kag sang mga Jebusnon, nga indi gikan sa Israel,

8 Kondi gikan sa ila mga anak, nga nabilin sa duta sa olihi nila, nga wala pagpapasa sang kaanakan sang Israel, sa ila si Salomon nagpabayad sing buhis tubtub sining adlaw.

9 Apang gikan sa kaanakan sang Israel si Salomon wala maghimo sing mga alagad nga sa iya buluhaton; kondi sila mga lalaki sang pag-awayan, kag puno sang iya mga kapitan, kag mga kapitan sang iya mga kangga kag sang mga manugkabayo.

10 Kag ini sila amo ang puno sang mga opisyal ni haring Salomon, duha ka gatus kag kalim-an, nga naggahum sa katawohan.

11 ś Kag ginpataklad ni Salomon ang babaye nga anak ni Faraon gikan sa siudad ni David pakadto sa balay nga ginpatindug niya nga sa iya: kay nagsiling sia, Ang akon asawa indi magpuyo sa balay ni David nga hari sang Israel, bangud nga ang mga duug balaan sa diin nag-abut ang arka sang GINOO.

12 ś Niyan si Salomon nagdolot sing mga halad nga sinonog sa GINOO sa ibabaw sang halaran sang GINOO, nga napatindug niya sa atubangan sang portico,

13 Sono sa katungdanan nga kinahanglan sa tagsa ka adlaw, nga nagadolot sono sa sogo ni Moises, sa mga sabbath, kag sa mga lati, kag sa mga pandut nga solemne, nga makatlo sa isa ka tuig, sa pandut sang tinapay nga wala sing tapay, kag sa pandut sang mga sinemana, kag sa pandut sang mga tabernakulo.

14 ś Kag gintangdo niya, sono sa pagsolondan ni David nga iya amay, ang mga kinabon sang mga pari sa ila pag-alagdan, kag ang mga Levinhon sa ila mga palangakoan, sa pagdayaw kag sa pagpanghikot sa atubangan sang mga pari, sono sa katungdanan nga kinahanglan sa tagsa ka adlaw: ang mga manugbantay sang gawang man sono sa ila mga kinabon sa tagsa ka gawang: kay amo ini ang nasogo ni David nga tawo sang Dios.

15 Kag wala sila magbiya sa sogo sang hari sa mga pari kag sa mga Levinhon nahanungud sa bisan ano nga butang, ukon nahanungud sa mga bahandi.

16 Karon ang tanan nga buluhaton ni Salomon naaman sa adlaw sang pagpasad sang balay sang GINOO, kag tubtub nga natapus ini. Gani ang balay sang GINOO nahuman.

17 ś Niyan si Salomon nagkadto sa Ezion-geber, kag sa Elot, sa baybayon sa duta sang Edom.

18 Kag si Huram nagpadala sa iya paagi sa mga kamut sang iya mga alagad sing mga sakayan, kag sing mga alagad nga sampaton sa dagat; kag nagkadto sila upud sa mga alagad ni Salomon sa Ofir, kag nagkuha didto sing apat ka gatus kag kalim-an ka talanton nga bulawan, kag gindala sila kay haring Salomon.

KAPITULO 9

KAG sang nakabati ang hara sang Seba sang kabantugan ni Salomon, nag-abut sia sa pagtilaw kay Salomon sa mabudlay nga mga pamangkot sa Jerusalem, upud ang tama kadaku nga hubon, kag mga camelyo nga nagdala sing mga pahumut, kag bugana nga bulawan, kag mga bato nga bilidhon: kag sang nag-abut sia kay Salomon, ginpabutyag niya sa iya ang tanan nga yara sa iya tagiposoon.

2 Kag si Salomon nagsaysay sa iya sang tanan niya nga pamangkot: kag wala sing bisan ano nga natago kay Salomon nga wala niya masaysay sa iya.

3 Kag sang nakita sang hara sang Seba ang kaalam ni Salomon, kag ang balay nga iya napatindug,

4 Kag ang pagkaon sa iya latok, kag ang paglingkod sang iya mga alagad, kag ang pag-alagad sang iya mga ministro, kag ang ila panapton; ang iya mga manugtagay man, kag ang ila panapton; kag ang iya salakaan nga ginsakaan niya pakadto sa balay sang GINOO; wala na sing espiritu sa sulud niya.

5 Kag nagsiling sia sa hari, Matuud ang balita nga akon nabatian sa akon kaugalingon nga duta sang imo mga binuhatan, kag sang imo kaalam:

6 Apang ako wala magpati sang mga polong nila, tubtub nga nag-abut ako, kag ang akon mga mata nakakita sini: kag, yari karon, ang katunga sang pagkadaku sang imo kaalam wala masugid sa akon: kay nagalabaw ka sa kabantugan nga akon nabatian.

7 Malipayon ang imo mga tawo, kag malipayon ini nga imo mga alagad, nga yara sing dalayon sa imo atubangan, kag nagapamati sang imo kaalam.

8 Pakamaayohon ang GINOO nga imo Dios, nga nahamuut sa imo sa pagbutang sa imo sa iya trono nga hari nga sa GINOO nga imo Dios: bangud nga ang imo Dios naghigugma sang Israel, sa pagpalig-on sa ila sa gihapon, busa ginhimo ka niya nga hari sa ibabaw nila, sa paghukom kag sa paghimo sing katarungan.

9 Kag naghatag sia sa hari sing isa ka gatus kag duha ka pulo ka talanton nga bulawan, kag tama gid kabugana nga mga pahumut, kag mga bato nga bilidhon: wala na gid sing subong nga pahumut subong sang ginhatag sang hara sang Seba kay haring Salomon.

10 Kag ang mga alagad man ni Huram, kag ang mga alagad ni Salomon, nga nagdala sing bulawan gikan sa Ofir, nagdala sing mga kahoy nga sandalo kag mga bato nga bilidhon.

11 Kag sa mga kahoy nga sandalo naghimo ang hari sang mga terrasa nga sa balay sang GINOO, kag nga sa palacio sang hari, kag sang mga arpa kag mga salterio nga sa mga manug-amba: kag wala gid sing subong nga nakita sang una sa duta sang Juda.

12 Kag si haring Salomon naghatag sa hara sang Seba sang tanan nga iya naluyagan, ang bisan anong ginpangayo niya, luwas sinang gindala niya sa hari. Gani nagtaliwan sia, kag nagpauli sa iya kaugalingon nga duta, sia kag ang iya mga alagad.

13 ś Karon ang timbang sang bulawan nga nag-abut kay Salomon sa isa ka tuig anum ka gatus kag kan-uman kag anum ka talanton nga bulawan;

14 Luwas sinang gindala sang mga manugpatikang kag mga komersyante. Kag ang tanan nga hari sang Arabia kag ang mga gobernador sang duta nagdala sing bulawan kag pilak kay Salomon.

15 ś Kag si haring Salomon naghimo sing duha ka gatus ka kalasag nga bulawan nga pinapa: anum ka gatus ka siclo nga bulawan nga pinapa nagamit sa isa ka kalasag.

16 Kag naghimo sia sing tatlo ka gatus ka taming nga bulawan nga pinapa: tatlo ka gatus ka siclo nga bulawan nagamit sa isa ka taming. Kag ginbutang sila sang hari sa balay sang kagulangan sang Libano.

17 Labut pa ang hari naghimo man sing isa ka dakung trono nga tiposo, kag gintaklapan ini sing bulawan nga puro.

18 Kag may anum ka alintaga pakadto sa trono, nga may palatungan nga bulawan, nga natakud sa trono, kag mga halambuyan sa magtimbang nga kilid sang lingkoran, kag duha ka leon nga nagatindug sa luyo sang mga halambuyan:

19 Kag may napulog duha ka leon nga nagatindug didto, isa sa tagsa ka kilid sang anum ka alintaga. Walay kaangay sining nahimo sa bisan diin nga ginharian.

20 ś Kag ang tanan nga ilimnan ni haring Salomon bulawan, kag ang tanan nga suludlan sang balay sang kagulangan sang Libano puro nga bulawan: walay ano nga ginhimo sa pilak; sa mga adlaw ni Salomon wala ini pagpakamahala.

21 Kay ang mga sakayan sang hari nagkadto sa Tarsis upud sang mga alagad ni Huram: makaisa sa tagsa ka tatlo ka tuig nagaabut ang mga sakayan sang Tarsis nga nagadala sing bulawan, kag pilak, tiposo, kag mga amo, kag mga pabo real.

22 Kag si haring Salomon naglabaw sa tanan nga hari sang duta sa manggad kag sa kaalam.

23 ś Kag ang tanan nga hari sang duta naghimulat sa pagpakigkita kay Salomon, sa pagpamati sang iya kaalam, nga ginbutang sang Dios sa iya tagiposoon.

24 Kag ang tagsa ka tawo sa ila nagdala sang iya regalo, mga suludlan nga pilak, kag mga suludlan nga bulawan, kag panapton, hinganib, kag mga pahumut, mga kabayo, kag mga mula, sa amo kadamu tuigtuig.

25 ś Kag si Salomon may apat ka libo ka palasudlan nga sa mga kabayo kag mga kangga, kag napulog duha ka libo ka manugkabayo; nga ginbutang niya sa mga siudad nga sa mga kangga, kag upud sa hari sa Jerusalem.

26 ś Kag naghari sia sa tanan nga hari kutub sa suba tubtub sa duta sang mga Filistinhon, kag tubtub sa dulunan sang Egipto.

27 Kag sa Jerusalem ginbilang sang hari ang pilak nga daw mga bato, kag ginbilang niya ang mga kahoy nga cedro nga daw mga kahoy nga sicomoro nga yara sa naidalum nga mga kapatagan sa kabugana.

28 Kag nagdala sila sing mga kabayo kay Salomon gikan sa Egipto, kag gikan sa tanan nga duta.

29 ś Karon ang nabilin sang mga binuhatan ni Salomon, ang nahauna kag katapusan, wala bala sila nasulat sa libro ni Natan nga manalagna, kag sa tagna ni Ahias nga Silonhon, kag sa mga palanan-awon ni Iddo nga manugpanan-aw batok kay Jeroboam nga anak nga lalaki ni Nabat?

30 Kag si Salomon naghari sa Jerusalem sa bug-os nga Israel sing kap-atan ka tuig.

31 Kag si Salomon nagtolog upud sa iya mga kaamayan, kag ginlubung sia sa siudad ni David nga iya amay: kag naghari nga tal-us niya si Rehoboam nga iya anak nga lalaki.

KAPITULO 10

KAG si Rehoboam nagkadto sa Siquem: kay ang bug-os nga Israel nag-abut sa Siquem sa paghimo sa iya nga hari.

2 Kag nahanabu, sang pagkabati sini ni Jeroboam nga anak nga lalaki ni Nabat, sia didto pa sa Egipto, diin nagpalagyo sia gikan sa atubangan ni Salomon nga hari, nga si Jeroboam nagbalik gikan sa Egipto.

3 Kag nagpadala sila kag ginpatawag sia. Gani si Jeroboam kag ang bug-os nga Israel nag-abut kag nagpamolong kay Rehoboam, nga nagasiling,

4 Ang imo amay nagpabug-at sang amon gota: busa karon pamag-ana ang mapiot nga pag-alagdan sang imo amay, kag ang iya mabug-at nga gota nga ginbutang niya sa amon, kag magaalagad kami sa imo.

5 Kag nagsiling sia sa ila, Balik kamo sa akon sa tapus ang tatlo ka adlaw. Kag ang katawohan nagtaliwan.

6 ś Kag si haring Rehoboam nagpakigsapul sa tigulang nga mga lalaki nga nagtindug sa atubangan ni Salomon nga iya amay sang buhi pa sia, nga nagasiling, Ano bala ang ilaygay ninyo sa akon nga isabat sa sining katawohan?

7 Kag nagpamolong sila sa iya, nga nagasiling, Kon ikaw magmalolo sa sining katawohan, kag magpahamuut sa ila, kag magpamolong sing maayong mga polong sa ila, sila mangin-imo mga alagad sa gihapon.

8 Apang ginbayaan niya ang laygay nga ginhatag sa iya sang tigulang nga mga lalaki, kag nagpakigsapul sa pamatan-on nga mga lalaki nga nagtubo upud sa iya, nga nagtindug sa atubangan niya.

9 Kag nagsiling sia sa ila, Ano bala ang ilaygay ninyo nga isabat naton sa sining katawohan, nga nagpamolong sa akon, nga nagasiling, Pamag-ana ang gota nga ginbutang sang imo amay sa amon?

10 Kag ang pamatan-on nga mga lalaki nga nagtubo upud sa iya nagpamolong sa iya, nga nagasiling, Amo ini ang isabat mo sa katawohan nga nagpamolong sa imo, nga nagasiling, Ang imo amay nagpabug-at sang amon gota, apang ikaw magpamag-an sini sa amon; amo ini ang isiling mo sa ila, Ang akon kamalingking daku pa sa mga balikawang sang akon amay.

11 Kay sanglit nga ang akon amay naglulan sa inyo sing mabug-at nga gota, ako magadugang sa inyo gota: ang akon amay nagsilot sa inyo sa mga putik, apang ako magasilot sa inyo sa mga iwiiwi.

12 Gani sa ikatlong adlaw nag-abut si Jeroboam kag ang bug-os nga katawohan kay Rehoboam, sono sa ginsogo sang hari, nga nagasiling, Balik kamo sa akon sa ikatlong adlaw.

13 Kag ang hari nagsabat sing matigdas sa ila; kag si haring Rehoboam nagbiya sang laygay sang mga tigulang,

14 Kag nagsabat sa ila sono sa laygay sang pamatan-on nga mga lalaki, nga nagasiling, Ang akon amay nagpabug-at sang inyo gota, apang ako magadugang sa sini: ang akon amay nagsilot sa inyo sa mga putik, apang ako magasilot sa inyo sa mga iwiiwi.

15 Gani ang hari wala magpamati sa katawohan: kay nagikan ini sa Dios, agud nga matuman sang GINOO ang iya polong, nga ginpamolong niya paagi sa kamut ni Ahias nga Silonhon kay Jeroboam nga anak nga lalaki ni Nabat.

16 ś Kag sang nakita sang bug-os nga Israel nga ang hari wala magpamati sa ila, ang katawohan nagsabat sa hari, nga nagasiling, Ano bala ang bahin namon kay David? kag wala kami sing panublion sa anak nga lalaki ni Jesse: ang tagsa ka tawo magkadto sa inyo mga layanglayang, O Israel: kag karon, O David, tatapa ang imo kaugalingon nga balay. Gani ang bug-os nga Israel nagpauli sa ila mga layanglayang.

17 Apang sa kaanakan sang Israel nga nagpuyo sa mga siudad sang Juda, si Rehoboam naghari sa ila.

18 Niyan ginpadala ni haring Rehoboam si Adoram nga pangolo sang mga buhis; kag ginbato sia sang kaanakan sang Israel, nga napatay sia. Apang si haring Rehoboam nagdalidali sa pagsakay sa iya kangga, sa pagpalagyo pakadto sa Jerusalem.

19 Kag nagribuk ang Israel batok sa panimalay ni David tubtub sining adlaw.

KAPITULO 11

KAG sang nag-abut si Rehoboam sa Jerusalem, gintipon niya gikan sa panimalay sang Juda kag sa Benjamin ang isa ka gatus kag kawaloan ka libo ka lalaki nga pinili, nga mga hangaway, sa pagpakig-away batok sa Israel, agud nga magpabalik sia sang ginharian kay Rehoboam.

2 Apang ang polong sang GINOO nag-abut kay Semaya nga tawo sang Dios, nga nagasiling,

3 Ipamolong kay Rehoboam nga anak nga lalaki ni Salomon, hari sang Juda, kag sa bug-os nga Israel sa Juda kag sa Benjamin, nga nagasiling,

4 Amo ini ang ginasiling sang GINOO, Dili kamo magtaklad, ukon mag-away batok sa inyo mga kauturan: magpauli ang tagsa ka tawo sa iya balay: kay ining butang himo nakon. Kag nagtuman sila sa mga polong sang GINOO, kag nagbalik gikan sa pagkadto batok kay Rehoboam.

5 ś Kag nagpuyo si Rehoboam sa Jerusalem, kag nagpatindug sing mga siudad nga pamakud sa Juda.

6 Ginpatindug niya ang Bet-lehem, kag ang Etam, kag ang Tecoa,

7 Kag ang Bet-sur, kag ang Soco, kag ang Adullam,

8 Kag ang Gat, kag ang Maresa, kag ang Zif,

9 Kag ang Adoraim, kag ang Laquis, kag ang Azeca,

10 Kag ang Zora, kag ang Ayalon, kag ang Hebron, nga yara sa Juda kag sa Benjamin, mga siudad nga napamakuran.

11 Kag ginpamakuran niya ang mga kabakuran, kag nagbutang sa ila sing mga kapitan, kag sing sinuput nga kalan-on, kag sing lana kag alak.

12 Kag sa tagsa ka siudad nagbutang sia sing mga taming kag mga bangkaw, kag ginlig-on sila sing lakas, nga sa bahin niya ang Juda kag ang Benjamin.

13 ś Kag ang mga pari kag ang mga Levinhon nga didto sa bug-os nga Israel nagdangup sa iya gikan sa bug-os niyang mga ginsakpan.

14 Kay ginbayaan sang mga Levinhon ang ila mga palahalban kag ang ila ginapanag-iyahan, kag nagkadto sila sa Juda kag sa Jerusalem: kay ginpahalin sila ni Jeroboam kag sang iya mga lalaking anak sa pagpanghikot sang hilikuton nga pagkapari sa GINOO:

15 Kag nagtangdo sia iya sing mga pari nga sa mataas nga mga duug, kag sa mga yawa, kag sa mga tinday nga baka nga nahimo niya.

16 Kag sa olihi nila gikan sa tanan nga tribo sang Israel ang mga nagtuhoy sang ila mga tagiposoon sa pagpangita sa GINOONG Dios sang Israel nag-abut sa Jerusalem, sa paghalad sa GINOONG Dios sang ila mga kaamayan.

17 Gani ginpalig-on nila ang ginharian sang Juda, kag ginpabakud si Rehoboam nga anak nga lalaki ni Salomon sing tatlo ka tuig: kay naglakat sila sing tatlo ka tuig sa dalanon ni David kag ni Salomon.

18 ś Kag nagpangasawa si Rehoboam kay Mahalat nga babaying anak ni Jerimot nga lalaking anak ni David, kag kay Abihail nga babaying anak ni Eliab nga lalaking anak ni Jesse;

19 Nga nag-anak sa iya sing mga anak; kay Jeus, kag kay Semarias, kag kay Zaham.

20 Kag madason sa iya ginpangasawa niya si Maaca nga babaying anak ni Absalom; nga nag-anak sa iya kay Abias, kag kay Atai, kag kay Ziza, kag kay Selomit.

21 Kag ginhigugma ni Rehoboam si Maaca nga babaying anak ni Absalom labaw sa tanan niyang mga asawa kag mga oloasawa niya: (kay nangasawa sia sing napulog walo ka asawa, kag kan-uman ka mga oloasawa; kag nagpanganak sang duha ka pulo kag walo ka anak nga lalaki, kag kan-uman ka anak nga babaye.)

22 Kag gintangdo nga pangolo ni Rehoboam si Abias nga lalaking anak ni Maaca, nga mangin manugdumala sa iya mga utud: kay buut niya nga himoon sia nga hari.

23 Kag naggawi sia sing maalamon, kag ginlapta niya ang tanan niyang anak sa bug-os sang tanan nga duta sang Juda kag Benjamin, sa tagsa ka siudad nga napamakuran: kag ginhatagan niya sila sing mga kalan-on nga bugana. Kag naghandum sia sing madamu nga mga asawa.

KAPITULO 12

KAG nahanabu, sang napalig-on na ni Rehoboam ang ginharian, kag nagbakud sia, nga ginbayaan niya ang kasogoan sang GINOO, kag ang bug-os nga Israel upud sa iya.

2 Kag nahanabu, sa ikalimang tuig ni haring Rehoboam, nga si Sisac nga hari sang Egipto nagtaklad batok sa Jerusalem, bangud nga naglapas sila batok sa GINOO,

3 Nga may napulog duha ka gatus ka mga kangga, kag may kan-uman ka libo ka manugkabayo: kag indi maisip ang katawohan nga nag-abut upud sa iya gikan sa Egipto; ang mga Lubim, ang mga Suquim, kag ang mga Etiopiahanon.

4 Kag gin-agaw niya ang mga siudad nga napamakuran nga naigo sa Juda, kag nagkadto sa Jerusalem.

5 ś Niyan si Semaya nga manalagna nagkadto kay Rehoboam, kag sa mga prinsipe sang Juda, nga nagtipon sing tingub sa Jerusalem bangud kay Sisac, kag nagsiling sa ila, Amo ini ang ginasiling sang GINOO, Kamo nagbiya sa akon, kag busa ako man nagbiya sa inyo sa kamut ni Sisac.

6 Busa ang mga prinsipe sang Israel kag ang hari nagpaubus sang ila kaugalingon; kag nagsiling sila, Matarung ang GINOO.

7 Kag sang nakita sang GINOO nga nagpaubus sila sang ila kaugalingon, ang polong sang GINOO nag-abut kay Semaya, nga nagasiling, Nagpaubus sila sang ila kaugalingon; busa indi ko sila paglaglagon, kondi hatagan ko sila sing diotay nga kaluwasan; kag ang akon kasingkal indi pag-iula sa Jerusalem paagi sa kamut ni Sisac.

8 Walay sapayan sila mangin-iya mga alagad; agud nga makakilala sila sang akon pag-alagdan, kag sang pag-alagdan sang mga ginharian sang mga duta.

9 Gani si Sisac nga hari sang Egipto nagtaklad batok sa Jerusalem, kag nagkuha sang mga bahandi sang balay sang GINOO, kag sang mga bahandi sang balay sang hari; ginkuha niya ang tanan: ginkuha man niya ang mga taming nga bulawan nga ginhimo ni Salomon.

10 Sa tal-us nila si haring Rehoboam naghimo sing mga taming nga saway, kag gintugyan sila sa mga kamut sang mga pangolo sang mga manugbantay, nga nagbantay sang salamputan sang balay sang hari.

11 Kag kon magsulud ang hari sa balay sang GINOO, ang manugbantay nag-abut kag nagdala sa ila, kag gin-uli sila sa hulut sang manugbantay.

12 Kag sang nagpaubus sia, ang kasingkal sang GINOO nagpalayo sa iya, sa bagay nga wala niya sia paglaglaga sing bug-os: kag labut pa sa Juda nagnanginmaayo ang mga butang.

13 ś Gani si haring Rehoboam nagpangalig-on sang iya kaugalingon sa Jerusalem, kag naghari: kay si Rehoboam kap-atan kag isa ka tuig sang nagsugud sia sa paghari, kag naghari sia sing napulog pito ka tuig sa Jerusalem, ang siudad nga napili sang GINOO gikan sa tanan nga tribo sang Israel, sa pagbutang didto sang iya ngalan. Kag ang ngalan sang iya iloy si Naama nga Amonhon.

14 Kag ginhimo niya ang malaut, bangud nga wala sia magtuhoy sang iya tagiposoon sa pagpangita sa GINOO.

15 Karon ang mga binuhatan ni Rehoboam, ang nahauna kag ang katapusan, wala bala sila nasulat sa libro ni Semaya nga manalagna, kag ni Iddo nga manugpanan-aw sono sa lista sang mga kaliwatan? Kag may dalayon nga mga inaway sa tunga ni Rehoboam kag ni Jeroboam.

16 Kag si Rehoboam nagtolog upud sa iya mga kaamayan, kag ginlubung sa siudad ni David: kag naghari nga tal-us niya si Abias nga iya anak nga lalaki.

KAPITULO 13

KARON sa ikanapulog walo nga tuig ni haring Jeroboam nagsugud si Abias sa paghari sa Juda.

2 Naghari sia sing tatlo ka tuig sa Jerusalem. Ang ngalan man sang iya iloy amo si Micaya nga babaying anak ni Uriel sang Gabaa. Kag may inaway sa tunga ni Abias kag ni Jeroboam.

3 Kag si Abias nagpahamtang sing paagisud sa inaway nga may kasoldadosan nga mga lalaki sang pag-awayan nga isganan, nga apat ka gatus ka libo ka mga lalaki nga pinili: si Jeroboam man nagpahamtang sing paagisud sa inaway batok sa iya nga may walo ka gatus ka libo ka mga lalaki nga pinili, nga gamhanan nga mga lalaki nga isganan.

4 ś Kag si Abias nagtindug sa ibabaw sang bukid nga Zemaraim, nga yara sa bukid nga Efraim, kag nagsiling, Pamatii ninyo ako, ikaw nga Jeroboam, kag bug-os nga Israel;

5 Dili bala kamo dapat magkilala nga ang GINOONG Dios sang Israel naghatag sang ginharian sang Israel sing dayon kay David, sa iya gid kag sa iya mga anak nga lalaki paagi sa katipan sang asin?

6 Apang si Jeroboam nga anak nga lalaki ni Nabat, ang alagad ni Salomon nga anak nga lalaki ni David, nagtindug, kag nagribuk batok sa iya ginoo.

7 Kag nagdampig sa iya ang mga tawo nga walay pulus, mga anak ni Belial, kag nagpangalig-on batok kay Rehoboam nga anak nga lalaki ni Salomon, sang si Rehoboam bataon kag linghud pa sang tagiposoon, kag indi makasumpung sa ila.

8 Kag karon nagahunahuna kamo sa pagsumpung sa ginharian sang GINOO sa kamut sang mga anak nga lalaki ni David; kag kamo isa ka daku nga kadam-an, kag yara upud sa inyo ang bulawan nga mga tinday nga baka, nga ginhimo nga mga dios sa inyo ni Jeroboam.

9 Wala bala kamo nagsobol sang mga pari sang GINOO, ang mga anak nga lalaki ni Aaron, kag ang mga Levinhon, kag naghimo nga sa inyo sing mga pari subong sang pinamatasan sang mga pungsud sa iban nga mga duta? sa bagay nga ang bisan sin-o nga nagakari sa pagpasagrado sang iya kaugalingon nga may tinday nga baka nga lalaki kag pito ka carnero nga lalaki, ang amo makapari sa indi mga dios.

10 Apang nahanungud sa amon, ang GINOO amo ang amon Dios, kag wala kami magbiya sa iya; kag ang mga pari, nga nagaalagad sa GINOO, amo ang mga anak nga lalaki ni Aaron, kag ang mga Levinhon nagaalagad sa ila mga buluhaton:

11 Kag sila nagasonog sa GINOO sa tagsa ka kaagahon kag sa tagsa ka kahaponon sing mga halad nga sinonog kag maamyon nga incienso: ang tinapay nga pahayag man ginapahamtang nila sing nagakaigo sa putli nga latok; kag ang kandilero nga bulawan pati ang iya mga suga, sa pagpadabdab sa tagsa ka kahaponon: kay ginabantayan namon ang tinulin sang GINOO nga amon Dios; apang kamo nagbiya sa iya.

12 Kag, yari karon, ang Dios gid upud sa amon subong nga amon kapitan, kag ang iya mga pari nga may mga budyong nga nagatonog sa pagpatonog sing paandam batok sa inyo. O mga anak sang Israel, dili kamo mag-away batok sa GINOONG Dios sang inyo mga kaamayan; kay indi kamo mag-uswag.

13 ś Apang ginpaput-an sila ni Jeroboam sa likod nila: sa bagay nga yara sila sa atubangan sang Juda, kag ang puut yadto sa likod nila.

14 Kag sang nagbalikid ang Juda, yari karon, ang inaway yara sa atubangan kag sa likod: kag nagtuaw sila sa GINOO, kag ang mga pari nagpatonog sang mga budyong.

15 Niyan ang mga tawo sang Juda nagsinggit: kag sang pagsinggit sang mga tawo sang Juda, nahanabu, nga ang Dios nagsakit kay Jeroboam kag sang bug-os nga Israel sa atubangan ni Abias kag sang Juda.

16 Kag ang kaanakan sang Israel nagpalagyo gikan sa atubangan sang Juda: kag gintugyan sila sang Dios sa ila kamut.

17 Kag si Abias kag ang iya katawohan nagpatay sa ila sa daku nga kamatay: gani may napukan nga ginpamatay sa Israel nga lima ka gatus ka libo ka tawong pinili.

18 Sa amo ang kaanakan sang Israel nalutus sa sadtong tion, kag ang kaanakan sang Juda nagdaug, bangud nga nagsalig sila sa GINOONG Dios sang ila mga kaamayan.

19 Kag ginlagas ni Abias si Jeroboam, kag gin-agaw sa iya ang mga siudad, ang Bet-el pati ang iya mga banwa, kag ang Jesana pati ang iya mga banwa, kag ang Efrain pati ang iya mga banwa.

20 Wala na maumpawi sa kusug si Jeroboam sa mga adlaw ni Abias: kag ginsakit sia sang GINOO, kag napatay sia.

21 ś Apang si Abias naggamhanan, kag nagpangasawa sia sing napulog apat, kag nagpanganak sang duha ka pulo kag duha ka anak nga lalaki, kag napulo kag anum ka anak nga babaye.

22 Kag ang nabilin sang mga binuhatan ni Abias, kag ang iya mga dalanon, kag ang iya mga pinamolong, nasulat sa kasaysayan ni Iddo nga manalagna.

KAPITULO 14

GANI si Abias nagtolog upud sa iya mga kaamayan, kag ginlubung nila sia sa siudad ni David: kag naghari nga tal-us niya si Asa nga iya lalaking anak. Sa iya mga adlaw ang duta malinong sing napulo ka tuig.

2 Kag ginhimo ni Asa inang maayo kag matarung sa mga mata sang GINOO nga iya Dios:

3 Kay ginkuha niya ang mga halaran sang dumuloong nga mga dios, kag ang mataas nga mga duug, kag ginwagwag ang mga imahen, kag ginpulud ang mga puong-puong sang kakahoyan:

4 Kag ginsogo ang Juda sa pagpangita sa GINOONG Dios sang ila mga kaamayan, kag sa pagtuman sang kasogoan kag sang sogo.

5 Ginkuha man niya gikan sa tanan nga siudad sang Juda ang mataas nga mga duug kag ang mga imahen: kag ang ginharian malinong sa atubangan niya.

6 ś Kag nagpatindug sia sing mga siudad nga napamakuran sa Juda: kay ang duta may kapahuwayan, kag walay inaway sia sa sadtong mga tuig; bangud nga ginhatagan sia sang GINOO sing kapahuwayan.

7 Busa nagsiling sia sa Juda, Patindugon naton ining mga siudad, kag palibutan sila sing mga kuta, kag mga torre, mga gawang, kag mga pintal, samtang ang duta yara pa sa atubangan naton; bangud nga ginpangita naton ang GINOO nga aton Dios, ginpangita naton sia, kag sia naghatag sa aton sing pahuway sa palibut. Gani nagpatindug sila kag nag-uswag.

8 Kag si Asa may kasoldadosan nga mga lalaki, nga tatlo ka gatus ka libo gikan sa Juda, nga nagdala sing mga kalasag kag mga bangkaw; kag gikan sa Benjamin duha ka gatus kag kawaloan ka libo nga nagdala sing mga taming kag nagbingat sing mga pana: ini tanan gamhanan nga mga lalaki nga isganan.

9 ś Kag may naggowa batok sa ila nga si Zera nga Etiopiahanon nga may kasoldadosan nga isa ka libo ka libo, kag tatlo ka gatus ka kangga; kag nag-abut sia sa Maresa.

10 Niyan si Asa naggowa batok sa iya, kag nagpahamtang sila sing paagisud sa inaway sa nalupyakan sang Sefata sa Maresa.

11 Kag nagtuaw si Asa sa GINOO nga iya Dios, kag nagsiling, GINOO, wala sing ano man sa imo ang pagbulig, bisan sa madamu, ukon sa mga wala sing kusug: buligi kami, O GINOO nga Dios namon; kay sa imo nagasalig kami, kag sa imo ngalan nagakari kami batok sining kadam-an. O GINOO, ikaw ang amon Dios; dili pagpalandasa ang tawo batok sa imo.

12 Gani ginsakit sang GINOO ang mga Etiopiahanon sa atubangan ni Asa, kag sa atubangan sang Juda; kag nagpalagyo ang mga Etiopiahanon.

13 Kag si Asa kag ang katawohan nga upud sa iya naglagas sa ila tubtub sa Gerar: kag nalutus ang mga Etiopiahanon, sa bagay nga wala sila makautwas; kay nalaglag sila sa atubangan sang GINOO, kag sa atubangan sang iya kasoldadosan; kag nakakuha sila sing labi gid kadamu nga inagaw.

14 Kag gingubat nila ang tanan nga siudad sa palibut sang Gerar; kay ang kahadluk sa GINOO nag-abut sa ila: kag gin-ati nila ang tanan nga siudad; kay may madamu gid nga alatihon sa ila.

15 Gin-ati man nila ang mga layanglayang sang kahayupan, kag gindala nila ang bugana nga mga carnero kag mga camelyo, kag nagbalik sila sa Jerusalem.

KAPITULO 15

KAG nag-abut ang Espiritu sang Dios kay Azarias nga anak nga lalaki ni Oded:

2 Kag naggowa sia sa pagsugata kay Asa, kag nagsiling sa iya, Pamatii ninyo ako, Asa, kag bug-os nga Juda kag Benjamin; Ang GINOO nagaupud sa inyo, samtang kamo nagaupud sa iya; kag kon pangitaon ninyo sia, makita sia ninyo; apang kon bayaan ninyo sia, sia magabiya sa inyo.

3 Karon sa malawig nga panag-on ang Israel wala sang matuud nga Dios, kag wala sing pari nga manunudlo, kag wala sing kasogoan.

4 Apang sang yara sila sa ila kalisdanan nagbalik sila sa GINOONG Dios sang Israel, kag nagpangita sa iya, kag nakita nila sia.

5 Kag sa sadto nga mga tion wala sing paghidait sa naggowa, ukon sa nagsulud, kondi ang dalagku nga mga kagamo yara sa bug-os nga mga pumuluyo sang mga duta.

6 Kag ang pungsud ginlaglag sang pungsud, kag ang siudad sang siudad: kay ang Dios nagtublag sa ila sa tanan nga kapipit-an.

7 Busa magpakabakud kamo, kag dili magluya ang inyo mga kamut: kay ang inyo binuhatan balusan.

8 Kag sang nabatian ni Asa ining mga polong, kag ang tagna ni Oded nga manalagna, nagpakaisug sia, kag ginkuha niya ang makangilil-ad nga mga diosdios sa bug-os nga duta sang Juda kag sang Benjamin, kag gikan sa mga siudad nga iya kinuha sa bukid nga Efraim, kag ginkaayo niya ang halaran sang GINOO, nga yara sa atubangan sang portico sang GINOO.

9 Kag gintipon niya ang bug-os nga Juda kag Benjamin, kag ang mga dumuloong upud sa ila gikan sa Efraim kag sa Manases, kag gikan sa Simeon: kay madamu sila nga nagsaylo sa iya gikan sa Israel, sang nakita nila nga ang GINOO nga iya Dios yara upud sa iya.

10 Gani nagtipon sila sing tingub sa Jerusalem sa ikatlo nga bulan, sa tuig nga ikapulog lima sang paghari ni Asa.

11 Kag sa sadtong tion nagdolot sila sa GINOO, gikan sa inagaw nga nadala nila, sing pito ka gatus ka baka kag pito ka libo ka carnero.

12 Kag nagpakigkatipan sila sa pagpangita sa GINOONG Dios sang ila mga kaamayan sa bug-os nila nga tagiposoon kag sa bug-os nila nga kalag;

13 Nga ang bisan sin-o nga dili buut magpangita sa GINOONG Dios sang Israel, patyon, bisan dalagku ukon magamay, bisan lalaki ukon babaye.

14 Kag nagsumpa sila sa GINOO sa matonog nga tingug, kag may sininggit, kag may mga budyong, kag mga cornetin.

15 Kag ang bug-os nga Juda nagkasadya sa sumpa: kay sa bug-os nila nga tagiposoon nagsumpa sila, kag sa bug-os nila nga handum ginpangita nila sia; kag nakit-an sia nila: kag ginhatagan sila sang GINOO sing kapahuwayan sa palibut.

16 ś Kag nahanungud kay Maaca man, ang iloy ni Asa nga hari, ginkuha niya sia sa pagkahara, bangud nga naghimo sia sing isa ka diosdios sa puong-puong sang kakahoyan: kag ginpulud ni Asa ang iya diosdios, kag gintapaktapak ini, kag gintutdan ini sa sapa nga Kidron.

17 Apang ang mga duug nga mataas wala makuha sa Israel: wala sing sapayan ang tagiposoon ni Asa himpit sa tanan niya nga adlaw.

18 ś Kag ginsulud niya sa balay sang Dios ang mga butang nga gindedicar sang iya amay, kag nga ang iya gid gindedicar, pilak, kag bulawan, kag mga suludlan.

19 Kag wala na sing inaway tubtub sa ikakatloan kag lima nga tuig sang paghari ni Asa.

KAPITULO 16

SA ikakatloan kag anum nga tuig sang paghari ni Asa, si Baasa nga hari sang Israel nagtaklad batok sa Juda, kag nagpatindug sang Rama, sa katuyoan nga indi niya mapagowa ang bisan sin-o ukon mapasulud kay Asa nga hari sang Juda.

2 Niyan si Asa nagkuha sing pilak kag bulawan gikan sa mga bahandi sang balay sang GINOO kag sang balay sang hari, kag ginpadala sila kay Ben-hadad nga hari sang Siria, nga nagpuyo sa Damasco, nga nagasiling,

3 May katipan sa tunga nakon kag nimo, subong nga may yara sa tunga sang akon amay kag sang imo amay: yari karon, ako nagapadala sa imo sing pilak kag bulawan; lakat, bugtoa ang imo katipan kay Baasa nga hari sang Israel, agud nga magbiya sia sa akon.

4 Kag si Ben-hadad nagpamati kay haring Asa, kag ginpadala ang mga kapitan sang iya mga kasoldadosan batok sa mga siudad sang Israel; kag gingubat nila ang Ijon, kag ang Dan, kag ang Abel-maim, kag ang tanan nga siudad nga suluptan sang Neftali.

5 Kag nahanabu, sang pagkabati sini ni Baasa, nga nag-untat sia sa pagpatindug sang Rama, kag ginpadolog ang iya buluhaton.

6 Niyan gin-agaw ni haring Asa ang bug-os nga Juda; kag ginhakot nila ang mga bato sang Rama, kag ang iya mga tablon, nga ginpatindug ni Baasa; kag sa sini ginpatindug niya ang Geba kag Mizpa.

7 ś Kag sa sadto nga tion nag-abut si Hanani nga manugpanan-aw kay Asa nga hari sang Juda, kag nagsiling sa iya, Bangud nga nagsalig ka sa hari sang Siria, kag wala magsalig sa GINOO nga imo Dios, busa ang kasoldadosan sang hari sang Siria nagpalagyo gikan sa imo kamut.

8 Indi bala ang mga Etiopiahanon kag ang mga Lubim dakung kasoldadosan, nga may mga kangga kag mga manugkabayo nga lakas kadamu? apang, bangud nga nagsalig ka sa GINOO, sia nagtugyan sa ila sa imo kamut.

9 Kay ang mga mata sang GINOO nagapanoloktolok sa bug-os nga duta, sa pagpakita nga sia mabakud tungud sa ila nga may tagiposoon nga himpit ayon sa iya. Sa sini nakahimo ka sing binuang: busa kutub karon may mga inaway ka.

10 Niyan si Asa naakig sa manugpanan-aw, kag ginsulud sia sa balay nga bilanggoan; kay naalipungut sia sa iya bangud sining butang. Kag ginpigus ni Asa ang iban sang katawohan sa amo nga tion.

11 ś Kag, yari karon, ang mga binuhatan ni Asa, nahauna kag katapusan, yari karon, nasulat sila sa libro sang mga hari sang Juda kag Israel.

12 Kag sia Asa sa ikakatloan kag siam nga tuig sang iya paghari nagbalatian sa iya mga tiil, tubtub nga ang iya balatian matama sing lakas: apang sa iya balatian wala sia magdangup sa GINOO, kondi sa mga manugbolong.

13 ś Kag nagtolog si Asa upud sa iya mga kaamayan, kag napatay sa ikakap-atan kag isa nga tuig sang iya paghari.

14 Kag ginlubung nila sia sa iya kaugalingon nga mga lulubngan, nga ginpakutkut niya nga sa iya kaugalingon sa siudad ni David, kag ginpahamtang nila sia sa higdaan nga ginpuno sing mga pahumut nga maamyon kag sarisari nga mga bagay sang mga pahumut nga gin-aman sa kinaadman sang mga manugpahumut: kag naghimo sila tungud sa iya sing tama gid kadaku nga sonog.

KAPITULO 17

KAG si Jehosafat nga iya anak nga lalaki naghari nga tal-us niya, kag nagpangalig-on sia batok sa Israel.

2 Kag nagbutang sia sing mga kusug sa tanan nga siudad nga napamakuran sa Juda, kag nagbutang sing mga garison sa duta sang Juda, kag sa mga siudad sang Efraim, nga naagaw ni Asa nga iya amay.

3 Kag nag-upud ang GINOO kay Jehosafat, bangud nga naglakat sia sa nahauna nga mga dalanon sang iya amay nga si David, kag sia wala magdangup sa mga Baalim;

4 Kondi nagdangup sa GINOONG Dios sang iya amay, kag naglakat sa iya mga sogo, kag indi sono sa mga ginahimo sang Israel.

5 Busa ginpalig-on sang GINOO ang ginharian sa iya kamut; kag ang bug-os nga Juda nagdala kay Jehosafat sing mga regalo; kag may bugana sia nga manggad kag kadungganan.

6 Kag ginbayaw ang iya tagiposoon sa mga dalanon sang GINOO: labut pa ginkuha niya ang mataas nga mga duug kag ang mga puong-puong sang kakahoyan sa Juda.

7 ś Labut pa sa ikatlo nga tuig sang iya paghari ginpadalhan niya ang iya mga prinsipe, si Ben-hail, kag si Abdias, kag si Zacarias, kag si Natanael, kag si Micaya, nga magpanudlo sila sa mga siudad sang Juda.

8 Kag upud sa ila ginpadala niya ang mga Levinhon, nga si Semaias, kag si Netanias, kag si Zebadias, kag si Asael, kag si Semiramot, kag si Jehonatan, kag si Adonias, kag si Tobias, kag si Tob-adonias, nga mga Levinhon; kag upud sa ila, si Elisama kag si Jehoram, nga mga pari.

9 Kag nagpanudlo sila sa Juda, kag yara sa ila ang libro sang kasogoan sang GINOO, kag naglibut sila sa tanan gid nga siudad sang Juda, kag nagtudlo sa katawohan.

10 ś Kag ang kahadluk sa GINOO nag-abut sa tanan nga ginharian sang mga duta nga yara sa palibut sang Juda, sa bagay nga wala sila mag-away batok kay Jehosafat.

11 Labut pa ang iban sang mga Filistinhon nagdala sing mga regalo kay Jehosafat, kag pilak nga sa buhis; kag ang mga taga-Arabia nagdala sa iya sing mga panong, nga pito ka libo kag pito ka gatus ka mga carnero nga lalaki, kag pito ka libo kag pito ka gatus ka mga kanding nga lalaki.

12 ś Kag nagdaku sing lakas si Jehosafat; kag nagpatindug sia sa Juda sing mga castilyo, kag sang mga siudad nga suluptan.

13 Kag may madamu sia nga buluhaton sa mga siudad sang Juda: kag ang mga lalaki sang pag-awayan, nga gamhanan nga mga lalaki nga isganan, didto sa Jerusalem.

14 Kag ini amo ang mga pag-isip sa ila sono sa panimalay sang ila mga kaamayan: Gikan sa Juda, ang mga kapitan sang mga linibo; si Adna nga pangolo, kag upud sa iya ang tatlo ka gatus ka libo ka gamhanan nga mga lalaki nga isganan.

15 Kag madason sa iya si Jehohanan nga kapitan, kag upud sa iya ang duha ka gatus kag kawaloan ka libo.

16 Kag madason sa iya si Amasias nga lalaking anak ni Zicri, nga naghalad sing kinabubut-on sang iya kaugalingon sa GINOO; kag upud sa iya ang duha ka gatus ka libo ka gamhanan nga mga lalaki nga isganan.

17 Kag gikan sa Benjamin; si Eliada, gamhanan nga lalaki nga isganan, kag upud sa iya ang duha ka gatus ka libo nga mga lalaki nga nasangkapan sing pana kag taming.

18 Kag madason sa iya si Jehozabad, kag upud sa iya ang isa ka gatus kag kawaloan ka libo nga nahanda sa inaway.

19 Ini sila amo ang mga nag-alagad sa hari, luwas sang mga ginbutang sang hari sa mga siudad nga napamakuran sa bug-os gid nga Juda.

KAPITULO 18

KARON si Jehosafat may bugana nga manggad kag kadungganan, kag nakigtapik sia kay Acab.

2 Kag sa tapus sang pila ka tuig nagdulhog sia kay Acab sa Samaria. Kag si Acab nag-ihaw sing bugana nga mga carnero kag mga baka tungud sa iya, kag sa mga tawo nga upud sa iya, kag ginbuyuk sia sa pagtaklad upud sa iya pa Ramot-galaad.

3 Kag si Acab nga hari sang Israel nagsiling kay Jehosafat nga hari sang Juda, Magaupud ka bala sa akon pakadto sa Ramot-galaad? Kag sia nagsabat sa iya, Ako subong sa imo, kag ang akon katawohan subong sang imo katawohan; kag magaupud kami sa imo sa inaway.

4 ś Kag nagsiling si Jehosafat sa hari sang Israel, Magpamangkot ka, ginaampo ko sa imo, sa polong sang GINOO karon nga adlaw.

5 Busa gintipon sing tingub sang hari sang Israel ang mga manalagna, apat ka gatus ka lalaki, kag nagsiling sa ila, Magataklad bala kami sa pag-away sa Ramot-galaad, ukon magapaumud ako? Kag sila nagsiling, Taklad; kay ang Dios magatugyan sini sa kamut sang hari.

6 Apang si Jehosafat nagsiling, Wala bala diri sing iban pa nga manalagna sang GINOO, agud nga makapamangkot kita sa iya?

7 Kag ang hari sang Israel nagsiling kay Jehosafat, May isa pa ka lalaki, nga paagi sa iya makapamangkot kita sa GINOO: apang ako nagadumut sa iya; kay wala sia nga mas-a magtagna sa akon sing maayo, kondi malaut sa gihapon: amo ini si Micaya nga lalaking anak ni Imla. Kag si Jehosafat nagsiling, Indi magsiling ang hari sing subong.

8 Kag ang hari sang Israel nagtawag sing isa sang iya mga opisyal, kag nagsiling, Dalha sing madali si Micaya nga lalaking anak ni Imla.

9 Kag ang hari sang Israel kag si Jehosafat nga hari sang Juda naglingkod ang tagsa sa iya trono, nga nasukluban sang ila mga kunup, kag naglingkod sila sa nakawaan sa salamputan sang gawang sang Samaria; kag ang tanan nga manalagna nagtagna sa atubangan nila.

10 Kag si Sedequias nga lalaking anak ni Canaana naghimo nga sa iya sing mga sungay nga salsalon, kag nagsiling, Amo ini ang ginasiling sang GINOO, Sa sini idusdus mo ang Siria tubtub nga mapapas sila.

11 Kag ang tanan nga manalagna nagtagna sing amo, nga nagasiling, Taklad ka sa Ramot-galaad, kag mag-uswag: kay ang GINOO magatugyan sini sa kamut sang hari.

12 Kag ang manugbalita nga nagkadto sa pagtawag kay Micaya nagpamolong sa iya, nga nagasiling, Yari karon, ang mga polong sang mga manalagna nagapahayag sing maayo sa hari nga may paghilisugut; busa manginkaangay ang imo polong sa isa sa ila, ginaampo ko sa imo, kag magpamolong ka sing maayo.

13 Kag si Micaya nagsiling, Sa nagakabuhi ang GINOO, kon ano ang ginasiling sang akon Dios, ina ipamolong ko.

14 Kag sang nag-abut sia sa hari, ang hari nagsiling sa iya, Micaya, magakadto bala kami sa pag-away sa Ramot-galaad, ukon magapaumud ako? Kag sia nagsiling, Taklad kamo, kag mag-uswag, kag itugyan sila sa inyo kamut.

15 Kag ang hari nagsiling sa iya, Makapila pa bala pasumpaon ko ikaw nga indi ka magpamolong sa akon sing bisan ano kondi ang kamatooran sa ngalan sang GINOO?

16 Niyan sia nagsiling, Nakita ko ang bug-os nga Israel nga nag-aplaag sa kabukiran, subong sang mga carnero nga wala sing manugpahalab: kag ang GINOO nagsiling, Ini sila wala sing agalon; busa magpauli ang tagsa ka tawo sa iya balay sa paghidait.

17 Kag ang hari sang Israel nagsiling kay Jehosafat, Wala bala ako magsugid sa imo nga indi sia magtagna sa akon sing maayo, kondi malaut?

18 Liwat sia nagsiling, Busa pamatii ang polong sang GINOO; nakita ko ang GINOO nga nagalingkod sa iya trono, kag ang bug-os nga kasoldadosan sang langit nga nagatindug sa iya too kag sa iya wala.

19 Kag ang GINOO nagsiling, Sin-o bala ang magapahaylo kay Acab nga hari sang Israel, agud nga magtaklad sia kag mapukan sa Ramot-galaad? Kag ang isa nagsiling sa sini nga bagay, kag ang isa nagsiling sa sina nga bagay.

20 Niyan may naggowa nga isa ka espiritu, kag nag-atubang sa GINOO, kag nagsiling, Ako magapahaylo sa iya. Kag ang GINOO nagsiling sa iya, Sa ano bala?

21 Kag sia nagsiling, Ako magakadto, kag mangin-espiritu nga butigon sa baba sang tanan niya nga manalagna. Kag ang GINOO nagsiling, Ikaw magapahaylo sa iya, kag magalandas man: kadto ka, kag himoa ang subong.

22 Busa, yari karon, ang GINOO nagbutang sing isa ka espiritu nga butigon sa baba sining imo nga mga manalagna, kag ang GINOO nagpamolong sing malaut batok sa imo.

23 Niyan nagpalapit si Sedequias nga lalaking anak ni Canaana, kag gintampa si Micaya sa pisngi, kag nagsiling, Diin bala nag-agi gikan sa akon ang Espiritu sang GINOO sa pagpamolong sa imo?

24 Kag si Micaya nagsiling, Yari karon, makita mo sa sinang adlaw kon magasulud ka sa hulut nga nasulud sa pagpanago.

25 Niyan ang hari sang Israel nagsiling, Kuhaa ninyo si Micaya, kag dalha sia pabalik kay Amon nga gobernador sang siudad, kag kay Joas nga lalaking anak sang hari;

26 Kag isiling, Amo ini ang ginasiling sang hari, Isulud ini nga tawo sa bilanggoan, kag saguron sia sang tinapay sang kapipit-an kag sang tubig sang kapipit-an, tubtub nga ako magbalik sa paghidait.

27 Kag si Micaya nagsiling, Kon makapauli ka nga mas-a sa paghidait, niyan ang GINOO wala magpamolong paagi sa akon. Kag nagsiling sia, Pamati, tanan kamo nga katawohan.

28 Gani ang hari sang Israel kag si Jehosafat nga hari sang Juda nagtaklad pakadto sa Ramot-galaad.

29 Kag ang hari sang Israel nagsiling kay Jehosafat, Magasuklub ako sing panapton nga dipagpakilala, kag magkadto sa inaway; apang suklub ka sang imo mga kunup. Gani ang hari sang Israel nagsuklub sang panapton nga indi makilala; kag nagkadto sila sa inaway.

30 Karon ang hari sang Siria nagsogo sa mga kapitan sang mga kangga nga upud sa iya, nga nagasiling, Dili kamo mag-away bisan sa magamay ukon sa dalagku, luwas lamang sa hari sang Israel.

31 Kag nahanabu, sang nakita sang mga kapitan sang mga kangga si Jehosafat, nga nagsiling sila, Ini amo ang hari sang Israel. Busa ginlibutan nila sia sa pag-away batok sa iya: apang si Jehosafat nagtuaw, kag gintabangan sia sang GINOO; kag gintandug sila sang Dios sa pagtaliwan gikan sa iya.

32 Kay nahanabu, nga, sang nahantupan sang mga kapitan sang mga kangga nga indi ini ang hari sang Israel, nga nagbalik sila gikan sa paglagas sa iya.

33 Kag ang isa ka tawo nagpana sing palagpat, kag naigo ang hari sang Israel sa ulut sang mga tinaboan sang hinganib: busa nagsiling sia sa iya manugkangga, Palisoa ang imo kamut, agud nga pagowaon mo ako gikan sa kasoldadosan; kay napilasan ako.

34 Kag ang inaway nagsandukot sa sadto nga adlaw: wala sing sapayan ang hari sang Israel nagpanikasug sa pagtindug sa iya kangga batok sa mga Sirianhon tubtub sa kahaponon: kag sa paghinunud sang adlaw napatay sia.

KAPITULO 19

KAG si Jehosafat nga hari sang Juda nagpauli sa iya balay sa paghidait sa Jerusalem.

2 Kag si Jehu nga anak nga lalaki ni Hanani nga manugpanan-aw naggowa sa pagsugata sa iya, kag nagsiling kay haring Jehosafat, Buligan mo bala ang didiosnon, kag higugmaon ang mga nagadumut sa GINOO? busa ang kasingkal yara sa imo gikan sa atubangan sang GINOO.

3 Wala sing sapayan may maayo nga mga butang nga nakita sa imo, sa bagay nga ginkuha mo sa duta ang mga puong-puong sang kakahoyan, kag gintuhoy ang imo tagiposoon sa pagpangita sa Dios.

4 Kag si Jehosafat nagpuyo sa Jerusalem: kag naggowa sia liwat sa tunga sang katawohan kutub sa Beer-seba tubtub sa bukid nga Efraim, kag ginpabalik sila sa GINOONG Dios sang ila mga kaamayan.

5 ś Kag nagbutang sia sing mga hukom sa duta sa tanan gid nga siudad nga napamakuran sa Juda, siudad kag siudad,

6 Kag nagsiling sa mga hukom, Talupangda ang inyo ginahimo: kay wala kamo nagahukom tungud sa tawo, kondi tungud sa GINOO, nga nagaupud sa inyo sa paghukom.

7 Busa karon, manginsa inyo ang kahadluk sa GINOO; mag-andam kag maghimo sini: kay wala sing kalautan sa GINOO nga aton Dios, ukon pagpasulabi sang mga tawo, ukon pagbaton sang mga hamham.

8 ś Labut pa sa Jerusalem si Jehosafat nagbutang gikan sa mga Levinhon, kag sa mga pari, kag sa mga pangolo sang mga kaamayan sang Israel, sa paghukom nga sa GINOO, kag nga sa mga kasaba, sang nagbalik sila sa Jerusalem.

9 Kag gintulinan niya sila, nga nagasiling, Amo ini ang himoon ninyo sa kahadluk sa GINOO, sa katutum, kag may himpit nga tagiposoon.

10 Kag ang bisan ano man nga kasaba nga mag-abut sa inyo gikan sa inyo mga utud nga nagapuyo sa ila mga siudad, sa tunga sang dugo kag dugo, sa tunga sang kasogoan kag sogo, mga palatukuran kag mga pagsolondan, paandaman ninyo sila nga indi sila maglapas batok sa GINOO, kag sa amo ang kasingkal magaabut sa inyo, kag sa inyo mga utud: himoa ini, kag indi kamo magalapas.

11 Kag, yari karon, si Amarias nga puno nga pari nagagahum sa inyo sa tanan nga bagay sang GINOO; kag si Zebadias nga lalaking anak ni Ismael, ang manugdumala sang balay sang Juda, sa tanan nga bagay sang hari: ang mga Levinhon man mga opisyal sa atubangan ninyo. Magpanghikot nga may kaisug, kag ang GINOO magaupud sa mga maayo.

KAPITULO 20

NAHANABU sa tapus sini man, nga ang mga anak ni Moab, kag ang mga anak ni Amon, kag upud sa ila ang iban luwas sa mga Amonhon, nag-abut batok kay Jehosafat sa pag-away.

2 Niyan may nag-abut nga iban nga nagsugid kay Jehosafat, nga nagasiling, May nagapakari nga daku nga kadam-an batok sa imo gikan sa tabok sang dagat sa sining kilid sang Siria; kag, yari karon, yara sila sa Hazazon-tamar, nga amo ang En-gedi.

3 Kag si Jehosafat hinadlukan, kag nagtapat sang iya kaugalingon sa pagpangita sa GINOO, kag nagbantala sing puasa sa bug-os gid nga Juda.

4 Kag ang Juda nagtipon sing tingub sa ila kaugalingon, sa pagpatabang sa GINOO: gikan sa tanan gid nga siudad sang Juda nag-abut sila sa pagpangita sa GINOO.

5 ś Kag si Jehosafat nagtindug sa katilingban sang Juda kag sang Jerusalem, sa balay sang GINOO, sa atubangan sang luwang nga bag-o,

6 Kag nagsiling, O GINOONG Dios sang amon mga kaamayan, indi bala ikaw Dios sa langit? kag indi bala ikaw ang nagagahum sang tanan nga ginharian sang mga pagano? kag wala bala sa imo kamut ang gahum kag kusug, sa bagay nga walay sin-o nga sarang makasumpung sa imo?

7 Indi bala ikaw ang amon Dios, nga nagsobol sang mga pumuluyo sining duta gikan sa atubangan sang imo katawohan nga Israel, kag naghatag sini sing dayon sa kaliwat ni Abraham nga imo abyan?

8 Kag nagpuyo sila didto, kag nagpatindug sa imo didto sing santuario tungud sa imo ngalan, nga nagasiling,

9 Kon, kon ang malaut mag-abut sa amon, subong sang espada, paghukom, ukon pagpameste, ukon tiggulutum, magatindug kami sa atubangan sining balay, kag sa atubangan mo, (kay ang imo ngalan yari sa sining balay,) kag magatuaw sa imo sa amon kapipit-an, niyan ikaw magapamati kag magabulig.

10 Kag karon, yari karon, ang mga anak ni Amon kag ni Moab kag ang bukid nga Seir, nga wala mo gintugut nga gubaton sang Israel, sang naggowa sila gikan sa duta sang Egipto, kondi naglikaw sila sa ila, kag wala maglaglag sa ila;

11 Yari karon, masiling ako, daw ano nga pagbalus nila sa amon, sa pagkari sa pagsobol sa amon gikan sa imo ginapanag-iyahan, nga ginhatag mo sa amon nga panublion.

12 O Dios namon, indi mo bala paghukman sila? kay wala kami sing kusug batok sa sining daku nga kadam-an nga nagakari batok sa amon; kag indi kami makahibalo kon ano ang himoon: apang ang amon mga mata yara sa imo.

13 Kag ang bug-os nga Juda nagtindug sa atubangan sang GINOO, upud sang ila mga magamay, sang ila mga asawa, kag sang ila mga anak.

14 ś Niyan sa tunga sang katilingban nag-abut ang Espiritu sang GINOO kay Jahaziel nga lalaking anak ni Zacarias, lalaking anak ni Benaya, lalaking anak ni Jeiel, lalaking anak ni Matanias, isa ka Levinhon sang mga lalaking anak ni Asaf;

15 Kag nagsiling sia, Pamati kamo, bug-os nga Juda, kag kamo nga mga pumuluyo sang Jerusalem, kag ikaw haring Jehosafat, Amo ini ang ginasiling sang GINOO sa inyo, Dili kamo magkahadluk ukon magkahangawa bangud sining daku nga kadam-an; kay ang inaway indi inyo, kondi iya sang Dios.

16 Buwas dulhog kamo batok sa ila: yari karon, nagataklad sila paagi sa pil-as sang Ziz; kag makita ninyo sila sa ukbung sang sapa, sa atubang sang kamingawan sang Jeruel.

17 Dili kinahanglan nga kamo mag-away sa sining inaway: pahamtang kamo, pahimonong kamo, kag tan-awa ang kaluwasan sang GINOO upud sa inyo, O Juda kag Jerusalem: dili magkahadluk, ukon magkahangawa; buwas gowa kamo batok sa ila: kay ang GINOO magaupud sa inyo.

18 Kag si Jehosafat nagyaub nga ang iya nawung nayon sa duta: kag ang bug-os nga Juda kag ang mga pumuluyo sang Jerusalem naghapa sa atubangan sang GINOO, nga nagasimba sa GINOO.

19 Kag ang mga Levinhon, gikan sa kaanakan sang mga Coatnon, kag gikan sa kaanakan sang mga Corinhon, nagtindug sa pagdayaw sa GINOONG Dios sang Israel sa lakas katonog nga tingug.

20 ś Kag nagbangon sila sing aga pa, kag nagkadto sa kamingawan sang Tekoa: kag sang naglakat sila, si Jehosafat nagtindug kag nagsiling, Pamatii ako, O Juda, kag kamo nga mga pumuluyo sang Jerusalem; Magtoo kamo sa GINOO nga inyo Dios, sa amo magamalig-on kamo; toohi ang iya mga manalagna, sa amo magauswag kamo.

21 Kag sang nakapakigsapul sia sa katawohan, gintangdoan niya ang mga manug-amba sa GINOO, kag sa pagdalayaw sang kagayonan sang pagkabalaan, sa nagagowa sila sing una sa kasoldadosan, kag sa pagsiling, Dayawa ninyo ang GINOO; kay ang iya kalooy nagapadayon sa gihapon.

22 ś Kag sang nagsugud sila sa pag-amba kag pagdayaw, nagbutang ang GINOO sing mga puut batok sa mga anak ni Amon, ni Moab, kag sang bukid nga Seir, nga nagkari batok sa Juda; kag ginlaglag sila.

23 Kay ang mga anak ni Amon kag ni Moab nagtindug batok sa mga pumuluyo sang bukid nga Seir, sa pagpatay kag paglaglag sa ila sing bug-os: kag sang natapus nila ang mga pumuluyo sang Seir, ang tagsatagsa nagbuligay sa paglaglag sa isa kag isa.

24 Kag sang nag-abut ang Juda nayon sa torre nga balantayan sa kamingawan, naglantaw sila sa kadam-an, kag, yari karon, patay nga mga lawas sila nga napukan sa duta, kag wala gid sing nakapalagyo.

25 Kag sang nag-abut si Jehosafat kag ang iya katawohan sa pagkuha sang inagaw sa ila, nakita nila sa ila ang buganang manggad sa patay nga mga lawas, kag mga alahas nga bilidhon, nga ginpanghublas nila nga sa ila, kapin sa ila madala: kag tatlo ka adlaw ang pagkuha nila sang inagaw, nga tama kadamu.

26 ś Kag sa ikap-at nga adlaw nagtipon sila sa nalupyakan sang Beraca; kay didto ginpakamaayo nila ang GINOO: busa ginhingalanan yadtong duug, Ang nalupyakan sang Beraca, tubtub sining adlaw.

27 Niyan nagbalik sila, ang tagsa ka tawo sang Juda kag sang Jerusalem, kag si Jehosafat sa una nila, sa pagbalik sa Jerusalem nga may kalipay; kay ang GINOO nagpahalipay sa ila sa mga kaaway nila.

28 Kag nag-abut sila sa Jerusalem nga may mga salterio kag mga arpa kag mga budyong pakadto sa balay sang GINOO.

29 Kag ang kahadluk sa Dios yara sa tanan nga ginharian sinang mga pungsud, sang nabatian nila nga ang GINOO nag-away batok sa mga kaaway sang Israel.

30 Gani ang ginharian ni Jehosafat nagmalinong: kay ang iya Dios naghatag sa iya sing kapahuwayan sa palibut.

31 ś Kag si Jehosafat naghari sa ibabaw sang Juda: sia katloan kag lima ka tuig sang nagsugud sia sa paghari, kag naghari sia sing duha ka pulo kag lima ka tuig sa Jerusalem. Kag ang ngalan sang iya iloy si Azuba nga anak nga babaye ni Silhi.

32 Kag naglakat sia sa dalanon ni Asa nga iya amay, kag wala maglipas sa sini, nga nagahimo sinang matarung sa itololok sang GINOO.

33 Apang ang mataas nga mga duug wala makuha: kay ang katawohan wala pa magtuhoy sang ila mga tagiposoon sa Dios sang ila mga kaamayan.

34 Karon ang nabilin sang mga binuhatan ni Jehosafat, nahauna kag katapusan, yari karon, nasulat sila sa libro ni Jehu nga lalaking anak ni Hanani, nga ginsambit sa libro sang mga hari sang Israel.

35 ś Kag sa tapus sini si Jehosafat nga hari sang Juda nagbuylog kay Ocozias nga hari sang Israel, nga naghimo sing labi gid kalaut.

36 Kag nagkumbuya sia sa iya sa paghimo sing mga sakayan sa pagkadto sa Tarsis: kag ginhimo nila ang mga sakayan sa Ezion-geber.

37 Niyan si Eliezer nga lalaking anak ni Dodava sang Maresa nagtagna batok kay Jehosafat, nga nagasiling, Bangud nga nagkumbuya ka kay Ocozias, ginguba sang GINOO ang imo mga binuhatan. Kag ang mga sakayan naboong, sa bagay nga wala sila makakadto sa Tarsis.

KAPITULO 21

KARON si Jehosafat nagtolog upud sa iya mga kaamayan, kag ginlubung upud sa iya mga kaamayan sa siudad ni David. Kag naghari si Jehoram nga iya lalaking anak sa tal-us niya.

2 Kag may mga utud sia, ang mga lalaking anak ni Jehosafat, sila ni Azarias, kag Jeiel, kag Zacarias, kag Azarias, kag Micael, kag Sefatias: ini tanan mga lalaking anak ni Jehosafat nga hari sang Israel.

3 Kag ang ila amay naghatag sa ila sing dakung mga regalo nga pilak, kag bulawan, kag mga butang nga bilidhon, pati sang mga siudad nga napamakuran sa Juda: apang ang ginharian ginhatag niya kay Jehoram; bangud nga panganay sia.

4 Karon sang nabayaw si Jehoram sa ginharian sang iya amay, nagpangalig-on sia, kag ginpatay niya sa espada ang tanan niyang utud, kag pila man sang mga prinsipe sang Israel.

5 ś Si Jehoram katloan kag duha ka tuig sang nagsugud sia sa paghari, kag naghari sia sing walo ka tuig sa Jerusalem.

6 Kag naglakat sia sa dalanon sang mga hari sang Israel, subong sang ginhimo sang panimalay ni Acab: kay ginpangasawa niya ang babaying anak ni Acab: kag ginhimo niya inang malaut sa mga mata sang GINOO.

7 Apang ang GINOO indi buut maglaglag sang panimalay ni David, bangud sang katipan nga ginhimo niya upud kay David, kag subong sang ginsaad niya nga hatagan sing suga sia kag ang iya mga anak nga lalaki sa gihapon.

8 ś Sa iya mga adlaw nagribuk ang mga Edomnon sa idalum sang paggahum sang Juda, kag naghimo sing hari nga sa ila kaugalingon.

9 Niyan si Jehoram nagkadto upud sang iya mga prinsipe, kag ang tanan niya nga kangga upud sa iya: kag nagbangon sia sa kagab-ihon, kag ginsakit ang mga Edomnon nga nagkibon sa iya, kag ang mga kapitan sang mga kangga.

10 Gani ang mga Edomnon nagribuk sa idalum sang kamut sang Juda tubtub sining adlaw. Ang Libna nagribuk man sa among tion sa idalum sang iya kamut; bangud nga ginbayaan niya ang GINOONG Dios sang iya mga kaamayan.

11 Labut pa naghimo sia sing mataas nga mga duug sa mga bukid sang Juda, kag ginpapanghilawas niya ang mga pumuluyo sang Jerusalem, kag sa sini ginpilit niya ang Juda.

12 ś Kag may nag-abut sa iya nga sulat gikan kay Elias nga manalagna, nga nagasiling, Amo ini ang ginasiling sang GINOONG Dios ni David nga imo amay, Bangud nga wala ka maglakat sa mga dalanon ni Jehosafat nga imo amay, ukon sa mga dalanon ni Asa nga hari sang Juda,

13 Kondi naglakat sa dalanon sang mga hari sang Israel, kag ginpapanghilawas mo ang Juda kag ang mga pumuluyo sang Jerusalem, kaangay sang mga pagkamakihilawason sang panimalay ni Acab, kag ginpamatay mo man ang imo mga utud gikan sa panimalay sang imo amay, nga maayo pa sa imo:

14 Yari karon, samaron sang GINOO ang imo katawohan sa dakung kalalat-an, kag ang imo mga anak, kag ang imo mga asawa, kag ang bug-os mong pagkabutang:

15 Kag ikaw magaagum sing dakung balatian sa balatian sang imo mga kasudlan, tubtub nga maggowa ang imo mga kasudlan bangud sang balatian, sa inadlaw.

16 ś Labut pa gintublag sang GINOO batok kay Jehoram ang espiritu sang mga Filistinhon, kag sang mga Arabiahanon, nga nagaingud sa mga Etiopiahanon:

17 Kag nagtaklad sila batok sa Juda, kag naggubat sini, kag nagkuha sang tanan nga pagkabutang nga nakita sa balay sang hari, kag sang iya mga lalaking anak, kag sang iya mga asawa; sa bagay nga wala gid sing nabilin nga lalaking anak sa iya, luwas kay Jehoacaz, ang kamanghuran sang iya mga lalaking anak.

18 ś Kag sa tapus sini tanan ginpabalatian sia sang GINOO sa iya mga kasudlan sa balatian nga indi mabolong.

19 Kag nahanabu, sa pag-alagisud sang tion, sa tapus ang duha ka tuig, nga naggowa ang iya mga kasudlan bangud sang iya balatian: gani napatay sia sa malala nga mga balatian. Kag ang iya katawohan wala maghimo nga sa iya sing pagsonog kaangay sang pagsonog sa iya mga kaamayan.

20 Katloan kag duha ka tuig sia sang nagsugud sia sa paghari, kag naghari sia sa Jerusalem sing walo ka tuig, kag nagtaliwan sia nga wala paghanduma. Walay sapayan ginlubung nila sia sa siudad ni David, apang indi sa mga lulubngan sang mga hari.

KAPITULO 22

KAG ang mga pumuluyo sang Jerusalem naghimo nga hari nga tal-us niya kay Ocozias nga iya lalaking anak nga kamanghuran: kay ang kabon sang mga tawo nga nag-abut upud sang mga Arabiahanon sa kampo nagpatay sang tanan nga magulang. Gani naghari si Ocozias nga lalaking anak ni Jehoram nga hari sang Juda.

2 Kap-atan kag duha ka tuig si Ocozias sang nagsugud sia sa paghari, kag naghari sia sing isa ka tuig sa Jerusalem. Ang ngalan man sang iya iloy si Atalia, ang babaying anak ni Omri.

3 Sia naglakat man sa mga dalanon sang panimalay ni Acab: kay ang iya iloy manuglaygay niya sa paghimo sing kalautan.

4 Busa ginhimo niya ang malaut sa itololok sang GINOO subong sang panimalay ni Acab: kay sa tapus sang pagkamatay sang iya amay nangin-manuglaygay sila sa iya, nga sa iya kalaglagan.

5 ś Naglakat man sia sono sa laygay nila, kag nag-upud kay Jehoram nga lalaking anak ni Acab nga hari sang Israel sa pag-away batok kay Hazael nga hari sang Siria sa Ramot-galaad: kag ginpilas sang mga Sirianhon si Joram.

6 Kag nagpauli sia sa pagpabolong sa Jezreel bangud sang mga pilas nga nahatag sa iya sa Rama, sang nag-away sia batok kay Hazael nga hari sang Siria. Kag nagdulhog si Azarias nga lalaking anak ni Jehoram nga hari sang Juda sa pagduaw kay Jehoram nga lalaking anak ni Acab sa Jezreel, bangud nga nagmasakit sia.

7 Kag ang kalaglagan ni Ocozias gintangdo sang Dios paagi sa pagkadto niya kay Joram: kay sang nag-abut sia, naggowa sia upud kay Jehoram batok kay Jehu nga lalaking anak ni Nimsi, nga ginhaplas sang GINOO sa pag-utud sang panimalay ni Acab.

8 Kag nahanabu, nga, sang nagahimo sing paghukom si Jehu sa panimalay ni Acab, kag nasapwan niya ang mga prinsipe sang Juda, kag ang mga lalaking anak sang mga utud ni Ocozias, nga nag-alagad kay Ocozias, ginpatay niya sila.

9 Kag ginpangita niya si Ocozias: kag gindakup nila sia, (kay nagpanago sia sa Samaria,) kag gindala sia kay Jehu: kag sang ginpatay nila sia, ginlubung nila sia: Kay, nagsiling sila, sia anak nga lalaki ni Jehosafat, nga nagpangita sa GINOO sa bug-os niyang tagiposoon. Gani ang panimalay ni Ocozias wala sing gahum sa pagdumala sang ginharian.

10 ś Apang sang nakita ni Atalia nga iloy ni Ocozias nga ang iya anak nga lalaki patay na, nagtindug sia kag naglaglag sang bug-os nga kaliwat nga harianon sang panimalay sang Juda.

11 Apang si Jehosabet, ang babaying anak sang hari, nagkuha kay Joas nga lalaking anak ni Ocozias, kag ginkawat sia gikan sa tunga sang mga lalaking anak sang hari nga ginpamatay, kag ginbutang sia kag ang iya sisiwa sa hulut nga higdaan. Gani si Jehosabet, nga babaying anak ni haring Jehoram, asawa ni Jehoiada nga pari, (kay babaying utud sia ni Ocozias,) nagtago sa iya gikan kay Atalia, sa bagay nga wala niya mapatay sia.

12 Kag natago sia upud sa ila sa balay sang Dios sing anum ka tuig: kag si Atalia naghari sa duta.

KAPITULO 23

KAG sa ikapitong tuig nagpangalig-on sa iya kaugalingon si Jehoiada, kag nagpakigkatipan sia upud sa mga kapitan sang mga ginatus, kay Azarias nga lalaking anak ni Jeroham, kag kay Ismael nga lalaking anak ni Jeohanan, kag kay Azarias nga lalaking anak ni Obed, kag kay Maasias nga lalaking anak ni Adaya, kag kay Elisafat nga lalaking anak ni Zicri.

2 Kag ginlibut nila ang Juda, kag gintipon ang mga Levinhon gikan sa tanan nga siudad sang Juda, kag ang mga pangolo sang mga kaamayan sang Israel, kag nag-abut sila sa Jerusalem.

3 Kag ang bug-os nga katilingban nagpakigkatipan sa hari sa balay sang Dios. Kag sia nagsiling sa ila, Yari karon, magahari ang lalaking anak sang hari, subong sang napamolong sang GINOO nahanungud sang mga lalaking anak ni David.

4 Amo ini ang butang nga inyo himoon; Ang ikatlong bahin sa inyo nga nagasulud sa sabbath, gikan sa mga pari kag mga Levinhon, magabalantay sang mga gawang;

5 Kag ang ikatlong bahin manginsa balay sang hari; kag ang ikatlong bahin, sa gawang sang sadsaran: kag ang bug-os nga katawohan, sa mga luwang sang balay sang GINOO.

6 Apang walay bisan sin-o nga magsulud sa balay sang GINOO, luwas ang mga pari, kag ang mga nagaalagad gikan sa mga Levinhon; sila magasulud, kay balaan sila: apang ang bug-os nga katawohan magbantay sang tinulin sang GINOO.

7 Kag ang mga Levinhon magalibut sa hari sa tanan nga duug, nga ang tagsa ka tawo may iya nga mga hinganiban sa iya kamut; kag ang bisan sin-o nga iban nga magsulud sa balay, patyon sia: apang mag-upud kamo sa hari kon magsulud sia, kag kon maggowa sia.

8 Gani ang mga Levinhon kag ang bug-os nga Juda naghimo sono sa tanan nga mga butang nga ginsogo ni Jehoiada nga pari, kag ginkuha sang tagsa ka tawo ang iya mga tinawo, ang magasulud sa sabbath, upud sang magagowa sa sabbath: kay si Jehoiada nga pari wala magpapauli sang mga kinabon.

9 Labut pa gintugyan ni Jehoiada nga pari sa mga kapitan sang mga ginatus ang mga bangkaw, kag ang mga kalasag, kag ang mga taming, nga iya anay ni haring David, nga yadto sa balay sang Dios.

10 Kag ginpahamtang niya ang bug-os nga katawohan, nga ang tagsa ka tawo may iya hinganiban sa iya kamut, kutub sa kilid nga too sang templo tubtub sa kilid nga wala sang templo, sa ubay sang halaran kag sang templo, sa luyo sang hari palibut.

11 Niyan ginpagowa nila ang anak nga lalaki sang hari, kag ginbutang sa iya ang purungpurung, kag ginhatagan sia sing pagpamatuud, kag ginhimo sia nga hari. Kag ginhaplas sia ni Jehoiada kag sang iya mga anak nga lalaki, kag nagsiling sila, Magluwas ang Dios sa hari.

12 ś Karon sang nabatian ni Atalia ang ginahud sang katawohan nga nagadalagan kag nagadayaw sang hari, nagkadto sia sa katawohan sa balay sang GINOO:

13 Kag nagtolok sia, kag, yari karon, ang hari nagatindug sa luyo sang iya haligi sa salamputan, kag ang mga prinsipe kag ang mga budyong sa luyo sang hari: kag ang bug-os nga katawohan sang duta nagkasadya, kag nagpatonog sing mga budyong, kag ang mga manug-amba man naglanton sa mga tulunggon sa musica, kag inang mga natudloan nga mag-amba sing pagdayaw. Niyan ginkusnit ni Atalia ang iya mga panapton, kag nagsiling, Budhi, Budhi.

14 Niyan ginpagowa ni Jehoiada nga pari ang mga kapitan sang mga ginatus nga ginpadumala sa kasoldadosan, kag nagsiling sa ila, Dalha ninyo sia sa gowa sang mga kubay: kag ang bisan sin-o nga nagasonod sa iya, patyon sia sa espada. Kay ang pari nagsiling, Dili sia pagpatyon sa balay sang GINOO.

15 Gani gindakup nila sia; kag sang nagkadto sia sa salamputan sang gawang sang kabayo sa luyo sang balay sang hari, ginpatay nila sia didto.

16 ś Kag si Jehoiada naghimo sing katipan sa tunga niya, kag sang bug-os nga katawohan, kag sang hari, nga sila manginkatawohan sang GINOO.

17 Niyan ang bug-os nga katawohan nagsulud sa balay ni Baal, kag ginguba ini, kag ginwagwag nila ang iya mga halaran kag ang iya mga imahen, kag ginpatay sa atubangan sang mga halaran si Matan nga pari ni Baal.

18 Si Jehoiada nagtangdo man sang mga palangakoan sang balay sang GINOO sa kamut sang mga pari nga mga Levinhon, nga ginpanagtag ni David sa balay sang GINOO, sa pagdolot sang mga halad nga sinonog sa GINOO, sono sa nasulat sa kasogoan ni Moises, nga may kasadya kag may inamba, sono sa gintangdo ni David.

19 Kag sia nagpahamtang sang mga bantay sa mga gawang sang balay sang GINOO, agud nga indi magsulud ang bisan sin-o nga dimatinlo sa bisan anong bagay.

20 Kag ginkuha niya ang mga kapitan sang mga ginatus, kag ang mga dungganon, kag ang mga gobernador sang katawohan, kag ang bug-os nga katawohan sang duta, kag ginpapanaug ang hari gikan sa balay sang GINOO: kag sila nag-agi sa naibabaw nga gawang pakadto sa balay sang hari, kag ginpalingkod ang hari sa trono sang ginharian.

21 Kag ang bug-os nga katawohan sang duta nagkasadya: kag ang siudad naglinong, sa tapus nila mapatay sa espada si Atalia.

KAPITULO 24

SI JOAS pito ka tuig sang nagsugud sia sa paghari, kag naghari sia sing kap-atan ka tuig sa Jerusalem. Ang ngalan man sang iya iloy si Sibia sang Beer-seba.

2 Kag si Joas naghimo sinang matarung sa itololok sang GINOO sa bug-os nga mga adlaw ni Jehoiada nga pari.

3 Kag ginpaasaw-an sia ni Jehoiada sing duha ka asawa; kag nagpanganak sia sang mga anak nga lalaki kag mga anak nga babaye.

4 ś Kag nahanabu sa tapus sini, nga si Joas nagpainoino sa pagpakaayo sang balay sang GINOO.

5 Kag gintipon niya sing tingub ang mga pari kag ang mga Levinhon, kag nagsiling sa ila, Kadto kamo sa mga siudad sang Juda, kag tipon kamo sing kuarta gikan sa bug-os nga Israel sa pagkaayo sang balay sang inyo Dios sa tuigtuig, kag tatapa nga padalion ninyo ang butang. Apang ang mga Levinhon wala magpadali sini.

6 Kag ginpatawag sang hari si Jehoiada nga puno, kag ginsilingan sia, Ngaa bala nga wala mo pagkinahanglana sa mga Levinhon nga dalhon nila gikan sa Juda kag sa Jerusalem ang natipon, sono sa sogo ni Moises nga alagad sang GINOO, kag sang katilingban sang Israel, nga sa tabernakulo sang pagpamatuud?

7 Kay ang mga lalaking anak ni Atalia, yadtong malaut nga babaye, nagguba sang balay sang Dios; kag ang tanan man nga nadedicar nga mga butang sang balay sang GINOO ginhatag nila sa mga Baalim.

8 Kag sa sogo sang hari ginhimo nila ang kaban, kag ginpahamtang ini sa gowa sa gawang sang balay sang GINOO.

9 Kag ginpabantala nila sa Juda kag sa Jerusalem, sa pagdala sa GINOO sang natipon nga ginsukut sa Israel sa kamingawan ni Moises nga alagad sang Dios.

10 Kag ang tanan nga prinsipe kag ang bug-os nga katawohan nagkasadya, kag nagdala kag nagholog sa kaban, tubtub nga nakatapus sila.

11 Karon nahanabu, nga sa bisan anong tion gindala ang kaban sa talatapan sang hari paagi sa kamut sang mga Levinhon, kag kon makita nila nga may madamu nga kuarta, ang escriba sang hari kag ang opisyal sang mataas nga pari nag-abut kag naghuwad sang kaban, kag nagkuha sini, kag nag-uli sini sa iya duug. Amo ini ang ginhimo nila adlawadlaw, kag nagtipon sing bugana nga kuarta.

12 Kag ginhatag ini sang hari kag ni Jehoiada sa mga naghimo sang buluhaton sang pag-alagdan sang balay sang GINOO, kag nagsohol sila sing mga cantero kag mga panday sa pagkaayo sang balay sang GINOO, kag sa mga nagsalsal man sing salsalon kag saway sa pagkaayo sang balay sang GINOO.

13 Gani ang mga manugpangabudlay naghikot, kag ang hilikuton gintapus paagi sa ila, kag ginpahamtang nila ang balay sang Dios sa iya nagakaigo nga kahimtangan, kag ginpalig-on ini.

14 Kag sang nahuman nila ini, gindala nila ang nabilin sang kuarta sa hari kag kay Jehoiada, nga sa sini ginhimo ang mga suludlan nga sa balay sang GINOO, nga amo ang mga suludlan sa pag-alagad, kag sa pagdolot, kag mga kutsara, kag mga suludlan nga bulawan kag pilak. Kag nagdolot sila sing mga halad nga sinonog sing dalayon sa balay sang GINOO sa tanan nga adlaw ni Jehoiada.

15 ś Apang nagtigulang si Jehoiada, kag puno sing mga adlaw sang napatay sia; isa ka gatus kag katloan ka tuig sia sang napatay sia.

16 Kag ginlubung nila sia sa siudad ni David upud sa mga hari, bangud nga naghimo sia sing maayo sa Israel, ayon sa Dios, kag ayon sa iya balay.

17 Karon sa tapus sang pagkamatay ni Jehoiada nag-abut ang mga prinsipe sang Juda, kag nagyaub sa hari. Niyan ang hari nagpamati sa ila.

18 Kag ginbayaan nila ang balay sang GINOONG Dios sang ila mga kaamayan, kag nag-alagad sa mga puong-puong sang kakahoyan, kag sa mga diosdios: kag ang kasingkal nag-abut sa Juda kag sa Jerusalem tungud sini nga ila paglapas.

19 Walay sapayan nagpadala sia sing mga manalagna sa ila, sa pagpabalik sa ila sa GINOO; kag nagpamatuud sila batok sa ila: apang sila indi magpamati.

20 Kag ang Espiritu sang Dios nag-abut kay Zacarias nga lalaking anak ni Jehoiada nga pari, nga nagtindug labaw sa katawohan, kag nagsiling sa ila, Amo ini ang ginasiling sang Dios, Ngaa bala nga ginalalis ninyo ang mga sogo sang GINOO, sa bagay nga indi kamo makauswag? bangud nga ginbayaan ninyo ang GINOO, sia man nagbiya sa inyo.

21 Kag sila nagpuhon batok sa iya, kag ginbato sia sing mga bato sa sogo sang hari sa luwang sang balay sang GINOO.

22 Sa amo si Joas nga hari wala makadumdum sang kalolo nga ginhimo sa iya ni Jehoiada nga iya amay, kondi ginpatay ang iya anak nga lalaki. Kag sang tagumatayon sia, nagsiling sia, Magtan-aw sini ang GINOO, kag magtimalus.

23 ś Kag nahanabu sa katapusan sang tuig, nga nagtaklad batok sa iya ang kasoldadosan sang Siria: kag nag-abut sila sa Juda kag sa Jerusalem, kag ginlaglag ang tanan nga prinsipe sang katawohan gikan sa mga katawohan, kag ginpadala ang tanan nga inagaw sa ila sa hari sang Damasco.

24 Kay ang kasoldadosan sang mga Sirianhon nag-abut nga may diotay nga kabon sang mga tawo, kag ang GINOO nagtugyan sa ila kamut sang labi gid kadaku nga kasoldadosan, bangud nga ginbayaan nila ang GINOONG Dios sang ila mga kaamayan. Sa amo naghikot sila sing paghukom kay Joas.

25 Kag sang nakataliwan sila sa iya, (kay ginbilin nila sia nga ginasakitan sing tama,) nagpuhon batok sa iya ang iya kaugalingon nga mga alagad bangud sang dugo sang mga lalaking anak ni Jehoiada nga pari, kag ginpatay sia sa iya higdaan, kag napatay sia: kag ginlubung nila sia sa siudad ni David, apang wala nila pag-ilubung sia sa mga lulubngan sang mga hari.

26 Kag ini sila amo ang nagpuhon batok sa iya; si Zabad nga lalaking anak ni Simeat nga babaye nga Amonhon, kag si Jehozabad nga lalaking anak ni Simrit nga babaye nga Moabnon.

27 ś Karon nahanungud sa iya mga anak nga lalaki, kag sa kadaku sang mga lulan nga ginpahamtang sa iya, kag sa pagkaayo sang balay sang Dios, yari karon, nasulat sila sa kasaysayan sang libro sang mga hari. Kag naghari sa tal-us niya si Amasias nga iya anak nga lalaki.

KAPITULO 25

SI AMASIAS duha ka pulo kag lima ka tuig sang nagsugud sia sa paghari, kag naghari sia sing duha ka pulo kag siam ka tuig sa Jerusalem. Kag ang ngalan sang iya iloy si Jehoadan sang Jerusalem.

2 Kag ginhimo niya inang matarung sa itololok sang GINOO, apang indi sa himpit nga tagiposoon.

3 ś Karon nahanabu, sang naglig-on ang ginharian sa iya, nga ginpatay niya ang iya mga alagad nga nagpatay sa hari nga iya amay.

4 Apang wala niya pagpatya ang mga anak nila, kondi ginhimo ang sono sa nasulat sa kasogoan sa libro ni Moises, diin nagsogo ang GINOO, nga nagasiling, Ang mga amay indi mapatay tungud sa mga anak, kag ang mga anak indi mapatay tungud sa mga amay, apang ang tagsa ka tawo mapatay tungud sa iya kaugalingon nga sala.

5 ś Labut pa gintipon sing tingub ni Amasias ang Juda, kag ginhimo nga sa ila ang mga kapitan sang mga linibo, kag mga kapitan sang mga ginatus, sono sa mga panimalay sang ila mga kaamayan, sa bug-os gid nga Juda kag Benjamin: kag gin-isip niya sila kutub sa duha ka pulo ka tuig kag pa ibabaw, kag nakita sila nga tatlo ka gatus ka libo ka tawo nga pinili, nga sarang makakadto sa inaway, nga makakaput sing bangkaw kag taming.

6 Naghinakay man sia gikan sa Israel sing isa ka gatus ka libo ka gamhanan nga mga tawo nga isganan sa isa ka gatus ka talanton nga pilak.

7 Apang may tawo sang Dios nga nag-abut sa iya, nga nagasiling, O hari, dili pagpaupda sa imo ang kasoldadosan sang Israel; kay ang GINOO wala nagaupud sa Israel, buot silingon, sa tanan nga kaanakan sang Efraim.

8 Apang kon ikaw maglakat, himoa ini, magpakabakud ka sa inaway: ang Dios magapukan sa imo sa atubangan sang kaaway: kay ang Dios may gahum sa pagtabang, kag sa pagpukan.

9 Kag si Amasias nagsiling sa tawo sang Dios, Apang ano bala ang himoon naton tungud sang isa ka gatus ka talanton nga nahatag ko sa kasoldadosan sang Israel? Kag ang tawo sang Dios nagsabat, Ang GINOO makasarang maghatag sa imo sing labi pa sini.

10 Niyan ginpain ni Amasias sila, buot silingon, ang kasoldadosan nga nag-abut sa iya gikan sa Efraim, sa pagpapauli liwat: busa nagdabdab sing daku ang ila kaakig batok sa Juda, kag nagpauli sila sa masingkal nga kaakig.

11 ś Kag nagpakaisug si Amasias, kag ginpangolohan ang iya katawohan, kag nagkadto sa nalupyakan sang asin, kag ginpatay sa mga anak ni Seir ang napulo ka libo.

12 Kag ang iban nga napulo ka libo nga nabilin nga buhi gindala nga bihag sang kaanakan sang Juda, kag gindala sila sa putokputokan sang dakung bato, kag ginholog sila kutub sa putokputokan sang dakung bato, sa bagay nga tanan sila nagkalawas-ag.

13 ś Apang ang mga soldado sang kasoldadosan nga ginpapauli ni Amasias, agud nga indi sila mag-upud sa iya sa inaway, naggubat sang mga siudad sang Juda, kutub sa Samaria tubtub gid sa Bet-horon, kag ginpatay sa ila ang tatlo ka libo, kag nagkuha sing madamu nga inagaw.

14 ś Karon nahanabu, sa tapus nga nakaabut si Amasias gikan sa pagpamatay sang mga Edomnon, nga gindala niya ang mga dios sang mga anak ni Seir, kag ginpatindug sila nga mga dios niya, kag nagyaub sia sa atubangan nila, kag nagsonog sing incienso sa ila.

15 Busa nagdabdab ang kaakig sang GINOO batok kay Amasias, kag nagpadala sia sa iya sing manalagna, nga nagsiling sa iya, Ngaa bala nga nagdangup ka sa mga dios sang katawohan, nga wala makaluwas sang ila kaugalingon nga katawohan gikan sa imo kamut?

16 Kag nahanabu, samtang nagapakighambal sia sa iya, nga ang hari nagsiling sa iya, Ginhimo ka bala nga manuglaygay sang hari? paumud ka; ngaa bala nga patyon ka? Niyan nagpaumud ang manalagna, kag nagsiling, Nakahibalo ako nga ang Dios nagtapat sa paglaglag sa imo, bangud nga naghimo ka sini, kag wala magpamati sa akon laygay.

17 ś Niyan si Amasias nga hari sang Juda nagbaton sing laygay, kag nagpadala kay Joas, nga lalaking anak ni Jehoacaz, nga lalaking anak ni Jehu, hari sang Israel, nga nagasiling, Kari, magkitaay kita sa guya kag guya.

18 Kag si Joas nga hari sang Israel nagpadala kay Amasias nga hari sang Juda, nga nagasiling, Ang sapinit nga yara sa Libano nagpadala sa cedro nga yara sa Libano, nga nagasiling, Ipaasawa ang imo anak nga babaye sa akon anak nga lalaki: kag may nag-agi nga sapat nga talonon nga yara sa Libano, kag gintapak ang sapinit.

19 Ikaw nagasiling, Yari karon, gindaug mo ang mga Edomnon; kag ang imo tagiposoon nagabayaw sa imo sa pagpabugal: pabilin ka karon sa imo balay; ngaa bala nga maghilabut ka sa imo kasamaran, agud nga mapukan ka, ikaw, kag ang Juda upud sa imo?

20 Apang si Amasias indi magpamati; kay ini naggikan sa Dios, agud nga matugyan niya sila sa kamut sang ila mga kaaway, bangud nga nagdangup sila sa mga dios sang Edom.

21 Gani nagtaklad si Joas nga hari sang Israel; kag sila nagkilitaay sa nuwung kag nawung, sia kag si Amasias nga hari sang Juda, sa Bet-semes, nga iya sang Juda.

22 Kag ang Juda natam-an sa atubangan sang Israel, kag nagpalagyo sila ang tagsa ka tawo padulong sa iya layanglayang.

23 Kag si Joas nga hari sang Israel nagdakup sa Bet-semes kay Amasias nga hari sang Juda, ang anak nga lalaki ni Joas nga anak nga lalaki ni Jehoacaz, kag gindala sia sa Jerusalem, kag ginguba ang kuta sang Jerusalem kutub sa gawang sang Efraim tubtub sa gawang sang pamusud, apat ka gatus ka maniko.

24 Kag ginkuha niya ang tanan nga bulawan kag pilak, kag ang tanan nga suludlan nga nakita sa balay sang Dios nga yara kay Obed-edom, kag ang mga bahandi sa balay sang hari, kag ang mga tawo nga ginahawiran komo pasalig, kag nagbalik sa Samaria.

25 ś Kag si Amasias nga anak nga lalaki ni Joas nga hari sang Juda nagkabuhi sing napulo kag lima ka tuig sa tapus sang kamatayon ni Joas nga anak nga lalaki ni Jehoacaz, nga hari sang Israel.

26 Karon ang nabilin sang mga binuhatan ni Amasias, nahauna kag katapusan, yari karon, wala bala sila masulat sa libro sang mga hari sang Juda kag sang Israel?

27 ś Karon sa tapus sang tion nga si Amasias naglipas sa pagsonod sa GINOO nagpuhon sila batok sa iya sa Jerusalem; kag nagpalagyo sia padulong sa Laquis: apang ginpaapasan nila sia sa Laquis, kag ginpatay sia didto.

28 Kag ginlulan nila sia sa mga kabayo, kag ginlubung sia upud sa iya mga kaamayan sa siudad sang Juda.

KAPITULO 26

NIYAN ang bug-os nga katawohan sang Juda nagkuha kay Uzias, nga napulog anum ka tuig, kag ginhimo sia nga hari sa tal-us sang iya amay nga si Amasias.

2 Ginpatindug niya ang Elot, kag gin-uli ini sa Juda, sa tapus nga ang hari nagtolog upud sa iya mga kaamayan.

3 Si Uzias napulog anum ka tuig sang nagsugud sia sa paghari, kag naghari sia sing kalim-an kag duha ka tuig sa Jerusalem. Ang ngalan man sang iya iloy si Jecolia sang Jerusalem.

4 Kag ginhimo niya inang matarung sa itololok sang GINOO, sono sa tanan nga nahimo ni Amasias nga iya amay.

5 Kag nagpangita sia sa Dios sa mga adlaw ni Zacarias, nga may paghangup sa mga palanan-awon sang Dios: kag samtang nga ginpangita niya ang GINOO, ginpauswag sia sang Dios.

6 Kag naggowa sia kag nag-away batok sa mga Filistinhon, kag ginguba ang kuta sang Gat, kag ang kuta sang Jabne, kag ang kuta sang Asdod, kag nagpatindug sia sing mga siudad sa palibut sang Asdod, kag sa mga Filistinhon.

7 Kag gintabangan sia sang Dios batok sa mga Filistinhon, kag batok sa mga Arabiahanon nga nagpuyo sa Gur-baal, kag sa mga Meunimnon.

8 Kag naghatag ang mga Amonhon sing mga regalo kay Uzias: kag nabantugan ang iya ngalan tubtub sa salamputan sang Egipto; kay nagbakud sia sing lakas.

9 Labut pa nagpatindug si Uzias sing mga torre sa Jerusalem sa gawang sang pamusud, kag sa gawang sang nalupyakan, kag sa likoan sang kuta, kag ginpamakuran sila.

10 Nagpatindug sia man sing mga torre sa kamingawan, kag nagkutkut sing madamung bobon: kay may madamu sia nga kahayupan, sa manubo nga duta, kag sa mga kapatagan: mga mangunguma man, kag mga manugtatap sang ubas sa kabukiran, kag sa Carmel: kay maluyagon sia sang panguma.

11 Labut pa si Uzias may kasoldadosan sang mangangaway nga mga tawo, nga naggowa sa pag-away sa mga ginuban, sono sa kadamuon sang pag-isip sa ila nga ginhimo ni Jeiel nga escriba kag ni Maasias nga manugdumala, sa idalum sang kamut ni Hananias, isa sang mga kapitan sang hari.

12 Ang bug-os nga kadamuon sang mga pangolo sang mga kaamayan sang gamhanan nga mga lalaki nga isganan duha ka libo kag anum ka gatus.

13 Kag sa idalum sang kamut nila may kasoldadosan, nga tatlo ka gatus kag pito ka libo kag lima ka gatus, nga nagapakig-away nga may gamhanan nga kusug, sa pagtabang sa hari batok sa kaaway.

14 Kag naghanda si Uzias nga sa ila sa bug-os nga kasoldadosan sing mga taming, kag mga bangkaw, kag mga pandong, kag mga limbutong, kag mga pana, kag mga labyog nga inuglabyog sang mga bato.

15 Kag naghimo sia sa Jerusalem sing mga makina, nga ginpatok sang sampaton nga mga tawo, nga ipahamtang sa ibabaw sang mga torre kag sa ibabaw sang mga balwarte, nga ipana sing mga baslay kag dalagku nga mga bato. Kag ang iya ngalan naglapnag sa malayo; kay ginbuligan sia sing makatingala, tubtub nga nagbakud sia.

16 ś Apang sang nagbakud sia, nagmatinaastaason ang iya tagiposoon tubtub nga sa iya kalaglagan: kay naglapas sia sa GINOO nga iya Dios, kag nagsulud sia sa templo sang GINOO sa pagsonog sing incienso sa halaran sang incienso.

17 Kag ginsonod sia ni Asarias nga pari, kag upud sa iya ang kawaloan ka pari sang GINOO, nga mga tawo nga isganan:

18 Kag ginbatoan nila si Uzias nga hari, kag nagsiling sa iya, Indi naigo sa imo, Uzias, ang pagsonog sing incienso sa GINOO, kondi sa mga pari nga mga lalaking anak ni Aaron, nga ginpakasagrado sa pagsonog sing incienso: gowa ka sa santuario; kay nakalapas ka; kag ini indi manginsa imo kadungganan gikan sa GINOONG Dios.

19 Niyan nagsingkal si Uzias, kag may incensario sia sa iya kamut sa pagsonog sing incienso: kag sang nagsingkal sia sa mga pari, ang aro naglutaw sa iya agtang sa atubangan sang mga pari sa balay sang GINOO, sa luyo sang halaran sang incienso.

20 Kag gintolok sia ni Azarias nga puno nga pari, kag sang tanan nga pari, kag, yari karon, may aro sia sa iya agtang, kag gintulud nila sia pagowa gikan didto; hoo, sia gid nagdalidali man sa paggowa, bangud nga ginsakit sia sang GINOO.

21 Kag si Uzias nga hari aroon tubtub sa adlaw sang iya kamatayon, kag nagpuyo sa balay nga pinain, subong nga aroon; kay ginpabulag sia sa balay sang GINOO: kag si Joatam nga iya lalaking anak naggahum sa balay sang hari, nga nagahukom sa katawohan sang duta.

22 ś Karon ang nabilin sang mga binuhatan ni Uzias, nahauna kag katapusan, ginsulat ni Isaias nga manalagna nga lalaking anak ni Amoz.

23 Gani si Uzias nagtolog upud sa iya mga kaamayan, kag ginlubung nila sia upud sa iya mga kaamayan sa latagon nga lulubngan nga iya sang mga hari; kay nagsiling sila, Aroon sia: kag naghari sa tal-us niya si Joatam nga iya anak nga lalaki.

KAPITULO 27

SI JOATAM duha ka pulo kag lima ka tuig sang nagsugud sia sa paghari, kag naghari sia sing napulog anum ka tuig sa Jerusalem. Ang ngalan man sang iya iloy si Jerusa nga babaying anak ni Sadoc.

2 Kag naghimo sia sinang matarung sa itololok sang GINOO, sono sa tanan nga nahimo ni Uzias nga iya amay: apang wala sia magsulud sa templo sang GINOO. Kag ang katawohan naghimo pa sing kaduluntan.

3 Nagpatindug sia sang gawang nga naibabaw sang balay sang GINOO, kag sa kuta sang Ofel nagpatindug sia sing madamu.

4 Labut pa nagpatindug sia sing mga siudad sa kabukiran sang Juda, kag nagpatindug sia sing mga castilyo kag mga torre sa mga kagulangan.

5 ś Nagpakig-away man sia sa hari sang mga Amonhon, kag nagdaug sa ila. Kag naghatag sa iya ang mga anak ni Amon sa among tuig sing isa ka gatus ka talanton nga pilak, kag napulo ka libo ka sukub nga trigo, kag napulo ka libo ka sukub nga sebada. Subong sini kadamu ang ginbayad sa iya sang mga anak ni Amon, sa ikaduhang tuig, kag sa ikatlo.

6 Gani si Joatam nangingamhanan, bangud nga gin-aman niya ang iya mga dalanon sa atubangan sang GINOO nga iya Dios.

7 ś Karon ang nabilin sang mga binuhatan ni Joatam, kag ang tanan niyang pagpakig-away, kag ang iya mga dalanon, yari karon, nasulat sila sa libro sang mga hari sang Israel kag Juda.

8 Sia duha ka pulo kag lima ka tuig sang nagsugud sia sa paghari, kag naghari sia sing napulog anum ka tuig sa Jerusalem.

9 ś Kag si Joatam nagtolog upud sa iya mga kaamayan, kag ginlubung nila sia sa siudad ni David: kag si Acaz nga iya lalaking anak naghari sa tal-us niya.

KAPITULO 28

SI ACAZ duha ka pulo ka tuig sang nagsugud sia sa paghari, kag naghari sia sing napulog anum ka tuig sa Jerusalem: apang wala sia maghimo sinang matarung sa itololok sang GINOO, kaangay kay David nga iya amay:

2 Kay naglakat sia sa mga dalanon sang mga hari sang Israel, kag naghimo man sing mga imahen nga tinunaw sa mga Baalim.

3 Labut pa nagsonog sia sing incienso sa nalupyakan sang lalaking anak ni Hinom, kag nagsonog sang iya mga anak sa kalayo, sono sa mga kangil-aran sang mga pagano nga ginsobol sang GINOO gikan sa atubangan sang kaanakan sang Israel.

4 Naghalad man sia kag nagsonog sing incienso sa mataas nga mga duug, kag sa mga kabakoloran, kag sa idalum sang tagsa ka kahoy nga malagtum.

5 Busa gintugyan sia sang GINOO nga iya Dios sa kamut sang hari sang Siria; kag nagsakit sila sa iya, kag ginkuhaan sila sing daku nga kadam-an nga mga bihag, kag gindala sila sa Damasco. Kag sia gintugyan man sa kamut sang hari sang Israel, nga naglaglag sa iya sa dakung kamatay.

6 ś Kay si Peca nga lalaking anak ni Remalias nagpatay sa Juda sing isa ka gatus kag duha ka pulo ka libo sa isa ka adlaw, nga tanan sila tawo nga isganan; bangud nga ginbayaan nila ang GINOONG Dios sang ila mga kaamayan.

7 Kag si Zicri, isa ka gamhanan nga tawo sang Efraim, nagpatay kay Maasias nga lalaking anak sang hari, kag kay Azricam nga manugdumala sang balay, kag kay Elcana nga madason sa hari.

8 Kag gindala nga mga bihag sang kaanakan sang Israel gikan sa ila mga kauturan ang duha ka gatus ka libo, mga babaye, mga anak nga lalaki, kag mga anak nga babaye, kag nagdala man sing labi kadamu nga inagaw gikan sa ila, kag gindala ang inagaw sa Samaria.

9 Apang didto ang isa ka manalagna sang GINOO, nga ginahingalanan si Oded: kag naggowa sia sa pagsugata sang kasoldadosan nga nag-abut sa Samaria, kag nagsiling sa ila, Yari karon, bangud nga ang GINOONG Dios sang inyo mga kaamayan nagsingkal sa Juda, gintugyan niya sila sa inyo kamut, kag inyo ginpatay sila sa kaakig nga nagalambut sa langit.

10 Kag karon ginatuyo ninyo sa pagpasakup sa inyo ang mga kaanakan sang Juda kag sang Jerusalem subong nga mga lalaki nga ulipon kag mga babaye nga ulipon: apang wala bala sa inyo, bisan sa inyo gid, sing mga sala batok sa GINOO nga inyo Dios?

11 Busa karon pamatii ako, kag pabalika ang mga bihag, nga inyo ginbihag gikan sa inyo mga kauturan: kay ang masingkal nga kaakig sang GINOO yara sa inyo.

12 Niyan ang iban sang mga pangolo sang kaanakan sang Efraim, si Azarias nga lalaking anak ni Johanan, si Berequias nga lalaking anak ni Mesillemot, kag si Jehizkias nga lalaking anak ni Sallum, kag si Amasa nga lalaking anak ni Hadlai, nagtindug batok sa ila nga nag-abut gikan sa inaway,

13 Kag nagsiling sa ila, Dili ninyo pagdalhon diri ang mga bihag: kay sanglit nga naglapas na kita batok sa GINOO, nagatuyo kamo nga dugangan ang aton mga sala kag ang aton paglapas: kay daku ang aton paglapas, kag may masingkal nga kaakig batok sa Israel.

14 Gani ginbayaan sang lupit nga mga tawo ang mga bihag kag ang inagaw sa atubangan sang mga prinsipe kag sang bug-os nga katilingban.

15 Kag ang mga tawo nga nasambit sa ngalan nagtindug, kag nagkuha sang mga bihag, kag ginpasaputan ang tanan nga hubo sa ila sang inagaw, kag ginpasaputan nila sila, kag ginpasapatosan sila, kag ginpakaon kag ginpainum sila, kag ginhaplas sila, kag ang tanan nga maluya sa ila ginlulan sa mga asno, kag gindala sila sa Jerico, ang siudad sang mga kahoy nga palma, sa ila mga kauturan: niyan nagpauli sila sa Samaria.

16 ś Sa sadtong tion nagpadala si haring Acaz sa mga hari sang Asiria sa pagbulig sa iya.

17 Kay liwat ang mga Edomnon nag-abut kag naggubat sang Juda, kag nagpamihag.

18 Ang mga Filistinhon man naggubat sang mga siudad sang manubo nga duta, kag sang bagatnan sang Juda, kag nag-agaw sang Bet-semes, kag Ayalon, kag Gederot, kag Soco pati ang iya mga minoro, kag Timna pati ang iya mga minoro, Gimzo man pati ang iya mga minoro: kag nagpuyo sila didto.

19 Kay ginpapaubus sang GINOO ang Juda bangud kay Acaz nga hari sang Israel; kay ginpahubo niya ang Juda, kag naglalis sing tama batok sa GINOO.

20 Kag si Tilgat-pilneser nga hari sang Asiria nagkadto sa iya, kag nagpakalisud sa iya, apang wala magpabakud sa iya.

21 Kay si Acaz nagkuha sing bahin gikan sa balay sang GINOO, kag gikan sa balay sang hari, kag sang mga prinsipe, kag ginhatag ini sa hari sang Asiria: apang wala sia magbulig sa iya.

22 ś Kag sa tion sang iya kalisdanan naglapas sia sing labi pa batok sa GINOO: ini gid nga haring Acaz.

23 Kay naghalad sia sa mga dios sang Damasco, nga nagsamad sa iya: kag nagsiling sia, Bangud nga ang mga dios sang mga hari sang Siria nagbulig sa ila, busa magahalad ako sa ila, agud nga buligan nila ako. Apang sila kalaglagan niya, kag sang bug-os nga Israel.

24 Kag gintipon sing tingub ni Acaz ang mga suludlan sang balay sang Dios, kag ginpamihakpihak ang mga suludlan sang balay sang Dios, kag gintakpan ang mga ganhaan sang balay sang GINOO, kag naghimo sia nga sa iya sing mga halaran sa tagsa ka pamusud sang Jerusalem.

25 Kag sa tagsa ka siudad sang Juda naghimo sia sing mataas nga mga duug sa pagsonog sing incienso sa iban nga mga dios, kag nagpaakig sa GINOONG Dios sang iya mga kaamayan.

26 ś Karon ang nabilin sang iya mga binuhatan kag ang tanan niyang mga dalanon, nahauna kag katapusan, yari karon, nasulat sila sa libro sang mga hari sang Juda kag Israel.

27 Kag si Acaz nagtolog upud sa iya mga kaamayan, kag ginlubung nila sia sa siudad, sa Jerusalem: apang wala nila sia pagdalha sa mga lulubngan sang mga hari sang Israel: kag naghari nga tal-us niya si Ezequias nga iya lalaking anak.

KAPITULO 29

SI EZEQUIAS nagsugud sa paghari sang sia duha ka pulo kag lima ka tuig, kag naghari sia sing duha ka pulo kag siam ka tuig sa Jerusalem. Kag ang ngalan sang iya iloy si Abia, nga babaying anak ni Zacarias.

2 Kag ginhimo niya inang matarung sa itololok sang GINOO, sono sa tanan nga nahimo ni David nga iya amay.

3 ś Sa nahaunang tuig sang iya paghari, sa nahaunang bulan, ginbuksan niya ang mga ganhaan sang balay sang GINOO, kag ginkaayo sila.

4 Kag ginpasulud niya ang mga pari kag mga Levinhon, kag gintipon sila sing tingub sa dalan sa sidlangan,

5 Kag nagsiling sa ila, Pamati sa akon, kamo nga mga Levinhon, karon pakabalaana ang inyo kaugalingon, kag pakabalaana ang balay sang GINOONG Dios sang inyo mga kaamayan, kag ipagowa ninyo ang kahigkoan gikan sa balaan nga duug.

6 Kay ang aton mga kaamayan naglapas, kag naghimo sinang malaut sa mga mata sang GINOO nga aton Dios, kag nagbiya sila sa iya, kag nagtalingi sang ila mga nawung gikan sa puluy-an sang GINOO, kag nagtalikud sila.

7 Gintakpan man nila ang mga ganhaan sang portico, kag ginpalong ang mga suga, kag wala magsonog sing incienso ukon magdolot sing mga halad nga sinonog sa balaan nga duug sa Dios sang Israel.

8 Busa ang kasingkal sang GINOO yara sa Juda kag sa Jerusalem, kag gintugyan niya sila sa kagamo, sa kalatingalahan, kag sa ululigyaton, subong nga ginatan-aw ninyo sang inyo mga mata.

9 Kay, yari karon, ang aton mga kaamayan napukan paagi sa espada, kag ang aton mga lalaking anak kag ang aton mga babaying anak kag ang aton mga asawa yara sa kabihagan tungud sini.

10 Karon yari sa akon tagiposoon ang pagpakigkatipan sa GINOONG Dios sang Israel, agud nga ang iya masingkal nga kaakig magpalayo sa aton.

11 Mga lalaking anak ko, dili kamo karon magmapatumbayaon: kay ang GINOO nagpili sa inyo sa pagtindug sa atubangan niya, sa pag-alagad sa iya, kag nga mangin-alagad kamo niya, kag magsonog sing incienso.

12 ś Niyan ang mga Levinhon nagtindug, si Mahat nga lalaking anak ni Amasai, kag si Joel nga lalaking anak ni Azarias, gikan sa mga lalaking anak sang mga Coatnon: kag gikan sa mga lalaking anak ni Merari, si Cis nga lalaking anak ni Abdi, kag si Azarias nga lalaking anak ni Jehaleleel: kag gikan sa mga Gersonhon; si Joa nga lalaking anak ni Zima, kag si Eden nga lalaking anak ni Joa:

13 Kag gikan sa mga lalaking anak ni Elesafan; si Simri kag si Jeiel: kag gikan sa mga lalaking anak ni Asaf; si Zacarias, kag si Matanias:

14 Kag gikan sa mga lalaking anak ni Heman; si Jehiel, kag si Simei: kag gikan sa mga lalaking anak ni Jedutun; si Semaya, kag si Uziel.

15 Kag gintipon nila ang ila mga utud, kag nagpakabalaan sang ila kaugalingon, kag nag-abut, sono sa sogo sang hari, paagi sa mga polong sang GINOO, sa pagtinlo sang balay sang GINOO.

16 Kag ang mga pari nagsulud sa nasulud nga bahin sang balay sang GINOO, sa pagtinlo sini, kag nagpagowa pakadto sa luwang sang balay sang GINOO sang tanan nga kahigkoan nga nakita nila sa templo sang GINOO. Kag ginkuha ini sang mga Levinhon, sa pagdala sini sa gowa sa sapa nga Kidron.

17 Karon nagsugud sila sa pagpakabalaan sa nahaunang adlaw sang nahaunang bulan, kag sa ikawalong adlaw sang bulan nagkadto sila sa portico sang GINOO: gani ginpakabalaan nila ang balay sang GINOO sa walo ka adlaw; kag sila nakatapus sa ikanapulog anum nga adlaw sang nahaunang bulan.

18 Niyan nagsulud sila kay Ezequias nga hari, kag nagsiling, Natinloan na namon ang bug-os nga balay sang GINOO, kag ang halaran sang halad nga sinonog, pati ang tanan niyang suludlan, kag ang latok sang tinapay nga pahayag, pati ang tanan niyang suludlan.

19 Labut pa ang tanan nga suludlan, nga ginsikway ni haring Acaz sa iya paghari sang paglalis niya, gin-aman namon kag ginpakabalaan, kag, yari karon, yara sila sa atubangan sang halaran sang GINOO.

20 ś Niyan si Ezequias nga hari nagbangon sing aga pa, kag nagtipon sang mga manugdumala sang siudad, kag nagtaklad sa balay sang GINOO.

21 Kag nagdala sila sing pito ka tinday nga baka nga lalaki, kag pito ka carnero nga lalaki, kag pito ka cordero, kag pito ka kanding nga lalaki, nga sa halad tungud sa sala tungud sa ginharian, kag sa santuario, kag sa Juda. Kag ginsogo niya ang mga pari nga mga lalaking anak ni Aaron nga ihalad sila sa ibabaw sang halaran sang GINOO.

22 Gani gin-ihaw nila ang mga tinday nga baka nga lalaki, kag ang mga pari nagbaton sang dugo, kag ginwisik ini sa ibabaw sang halaran: subong man, sang gin-ihaw nila ang mga carnero nga lalaki, ginwisik nila ang dugo sa ibabaw sang halaran: gin-ihaw man nila ang mga cordero, kag ginwisik nila ang dugo sa ibabaw sang halaran.

23 Kag ang mga kanding nga lalaki nga sa halad tungud sa sala ginpapalapit nila sa atubangan sang hari kag sang katilingban; kag ginpandung nila ang ila mga kamut sa ila:

24 Kag gin-ihaw sila sang mga pari, kag ang ila dugo ginhimo nila nga pagpasag-uli sa ibabaw sang halaran, sa paghimo sing katumbasan tungud sa bug-os nga Israel: kay ang hari nagsogo nga ang halad nga sinonog kag ang halad tungud sa sala himoon tungud sa bug-os nga Israel.

25 Kag ginbutang niya ang mga Levinhon sa balay sang GINOO nga may mga apiping, may mga salterio, kag may mga arpa, sono sa sogo ni David, kag ni Gad nga manugpanan-aw sang hari, kag ni Natan nga manalagna: kay amo ini ang sogo gikan sa GINOO paagi sa iya mga manalagna.

26 Kag ang mga Levinhon nagtindug nga may mga tulunggon ni David, kag ang mga pari nga may mga budyong.

27 Kag si Ezequias nagsogo sa pagdolot sang halad nga sinonog sa ibabaw sang halaran. Kag sang nagsugud ang halad nga sinonog, ang ambahanon sa GINOO nagsugud man nga may mga budyong, kag may mga tulunggon nga gintangdo ni David nga hari sang Israel.

28 Kag ang bug-os nga katilingban nagsimba, kag ang mga manug-amba nag-amba, kag ang mga manugbudyong nagpatonog: kag tanan ini nagpadayon tubtub nga ang halad nga sinonog natapus.

29 Kag sang nakatapus sila sa paghalad, ang hari kag ang tanan nga nag-upud sa iya nagyaub sila, kag nagsimba.

30 Labut pa si Ezequias nga hari kag ang mga prinsipe nagsogo sang mga Levinhon sa pag-amba sing mga pagdayaw sa GINOO sa mga polong ni David, kag ni Asaf nga manugpanan-aw. Kag nag-amba sila sing mga pagdayaw nga may kalipay, kag nagduko sila sang ila mga olo, kag nagsimba.

31 Niyan si Ezequias nagsabat kag nagsiling, Karon ginpakasagrado na ninyo ang inyo kaugalingon sa GINOO, palapit kamo kag magdala sing mga halad kag mga halad sa pagpasalamat sa balay sang GINOO. Kag ang katilingban nagdala sa sulud sing mga halad kag mga halad sa pagpasalamat; kag ang kapid-an nga may bunayag nga tagiposoon sing mga halad nga sinonog.

32 Kag ang kadamuon sang mga halad nga sinonog, nga gindala sang katilingban kapitoan ka tinday nga baka nga lalaki, isa ka gatus ka carnero nga lalaki, kag duha ka gatus ka cordero: ini tanan sila tungud sa halad nga sinonog sa GINOO.

33 Kag ang mga butang nga ginpakasagrado anum ka gatus ka baka kag tatlo ka libo ka carnero.

34 Apang ang mga pari tama ka diotay, nga indi sila tuman sa pagpanit sang tanan nga halad nga sinonog: busa ang ila mga utud nga mga Levinhon nagbulig sa ila, tubtub nga natapus ang hilikuton, kag tubtub nga ang iban nga mga pari nakapakabalaan sang ila kaugalingon: kay ang mga Levinhon labi pa katarung sa tagiposoon sa pagpakabalaan sang ila kaugalingon sang sa mga pari.

35 Kag ang mga halad nga sinonog man bugana, pati ang sapay sang mga halad sa paghidait, kag ang mga halad nga ilimnon sa tagsa ka halad nga sinonog. Gani ang pag-alagdan sang balay sang GINOO napahamtang sing nagakaigo.

36 Kag si Ezequias nagkasadya, kag ang bug-os nga katawohan, nga naaman sang Dios ang katawohan: kay ang butang nahimo sa madali gid.

KAPITULO 30

KAG si Ezequias nagpadala sa bug-os nga Israel kag Juda, kag nagsulat man sing mga sulat sa Efraim kag sa Manases, nga magkari sila sa balay sang GINOO sa Jerusalem, sa paghiwat sang pagligad sa GINOONG Dios sang Israel.

2 Kay nakapakigsapul ang hari, kag ang iya mga prinsipe, kag ang bug-os nga katilingban sa Jerusalem, sa paghiwat sang pagligad sa ikaduha nga bulan.

3 Kay sa sadto nga tion indi sila makahiwat sini, bangud nga ang mga pari wala makapakabalaan sang ila kaugalingon sing bug-os, kag ang katawohan wala magtipon sing tingub sa Jerusalem.

4 Kag ang butang nagpahamuut sa hari kag sa bug-os nga katilingban.

5 Gani nagpatok sila sing mando nga magahimo sing pagbantala sa bug-os nga Israel, kutub gid sa Beer-seba tubtub sa Dan, nga magkari sila sa paghiwat sang pagligad sa GINOONG Dios sang Israel sa Jerusalem: kay sa malawig na nga tion wala sila makahiwat sini sa bagay nga sono sa nasulat.

6 Gani ang mga manugkoreo naglakat sa bug-os nga Israel kag Juda nga may mga sulat gikan sa hari kag sa iya mga prinsipe, kag sono sa sogo sang hari, nga nagasiling, Kamo nga kaanakan sang Israel, balik kamo sa GINOONG Dios ni Abraham, ni Isaac, kag ni Israel, kag sia magabalik sa nabilin sa inyo, nga nakapalagyo gikan sa kamut sang mga hari sang Asiria.

7 Kag dili kamo manginkaangay sa inyo mga kaamayan, kag kaangay sa inyo mga utud, nga naglapas batok sa GINOONG Dios sang ila mga kaamayan, sa bagay nga gintugyan niya sila sa kamingaw, subong sang ginatan-aw ninyo.

8 Karon dili kamo magtingkoyan, subong sang inyo mga kaamayan, kondi itugyan ang inyo kaugalingon sa GINOO, kag sulud kamo sa iya santuario, nga ginpakabalaan niya sa gihapon: kag alagda ang GINOO nga inyo Dios, agud nga ang kasingkal sang iya kaakig magpalayo sa inyo.

9 Kay kon magbalik kamo sa GINOO, ang inyo mga utud kag ang inyo mga anak makaagum sing kalooy sa atubangan sang mga nagdala sa ila nga bihag, agud nga magabalik sila sa sini nga duta: kay ang GINOO nga inyo Dios mahinoklogon kag maloloy-on, kag indi sia magtalingi gikan sa inyo sang iya nawung, kon magbalik kamo sa iya.

10 Gani ang mga manugkoreo nag-agi sa siudadsiudad sa duta sang Efraim kag Manases tubtub sa Zabulon: apang ginkadlawan nila sila, kag gin-uligyat sila.

11 Wala sing sapayan ang iban sa Aser kag sa Manases kag sa Zabulon nagpaubus sang ila kaugalingon, kag nagkadto sa Jerusalem.

12 Sa Juda man yara ang kamut sang Dios sa paghatag sa ila sing isa ka tagiposoon sa paghimo sang sogo sang hari kag sang mga prinsipe, paagi sa polong sang GINOO.

13 ś Kag nagtipon sa Jerusalem ang labi kadamu nga katawohan sa paghiwat sang pandut sang tinapay nga wala sing tapay sa bulan nga ikaduha, tama kadaku nga katilingban.

14 Kag nagtindug sila kag ginkuha ang mga halaran nga yara sa Jerusalem, kag ang tanan nga halaran sa mga incienso ginkuha nila, kag ginhaboy sila sa sapa nga Kidron.

15 Niyan gin-ihaw nila ang pagligad sa ikanapulo kag apat nga adlaw sang bulan nga ikaduha: kag ang mga pari kag ang mga Levinhon nahuya, kag nagpakabalaan sila sang ila kaugalingon, kag nagdala sing mga halad nga sinonog sa balay sang GINOO.

16 Kag nagtindug sila sa ila mga duug sono sa ila naigoan, sono sa kasogoan ni Moises nga tawo sang Dios: ang mga pari nagwisik sang dugo, nga ginbaton nila sa kamut sang mga Levinhon.

17 Kay may madamu sa katilingban nga wala napakabalaan: busa ang mga Levinhon nangin-tinulinan sa pag-ihaw sang mga pagligad tungud sa tagsatagsa nga indi matinlo, sa pagpakabalaan sa ila sa GINOO.

18 Kay ang kadam-an sang katawohan, ang madamu sa ila gikan sa Efraim, kag sa Manases, sa Isacar, kag sa Zabulon, wala makapaninlo sang ila kaugalingon, apang nagkaon sila sang pagligad tuhay sang sa nasulat. Apang si Ezequias nagpangamuyo tungud sa ila, nga nagasiling, Ang maayong GINOO magpatawad sang tagsatagsa

19 Nga nagatuhoy sang iya tagiposoon sa pagpangita sa Dios, ang GINOONG Dios sang iya mga kaamayan, bisan nga wala sia matinlo-i sono sa pagpaninlo sang santuario.

20 Kag ang GINOO nagpamati kay Ezequias, kag gin-ayo ang katawohan.

21 Kag ang kaanakan sang Israel nga nagtambong sa Jerusalem naghiwat sang pandut sang tinapay nga wala sing tapay sing pito ka adlaw sa daku nga kasadya: kag ang mga Levinhon kag ang mga pari nagdayaw sa GINOO adlawadlaw, nga nagaamba sa matonog nga mga tulunggon sa GINOO.

22 Kag si Ezequias nagpamolong sing paglipay sa tanan nga Levinhon nga nagpanudlo sang maayong ihibalo sang GINOO: kag nagkaon sila sa bug-os nga pandut sa pito ka adlaw, nga nagadolot sing mga halad sa paghidait, kag nagatuluad sa GINOONG Dios sang ila mga kaamayan.

23 Kag ang bug-os nga katilingban nagsinapul sa paghiwat sing pito pa ka adlaw: kag naghiwat sila sing pito pa ka adlaw nga may kasadya.

24 Kay si Ezequias nga hari sang Juda naghatag sa katilingban sing isa ka libo ka tinday nga baka nga lalaki kag pito ka libo ka carnero; kag naghatag ang mga prinsipe sa katilingban sing isa ka libo ka tinday nga baka nga lalaki kag napulo ka libo ka carnero: kag ang daku nga kadam-an sang mga pari nagpakabalaan sang ila kaugalingon.

25 Kag nagkalipay ang bug-os nga katilingban sang Juda, pati ang mga pari kag ang mga Levinhon, kag ang bug-os nga katilingban nga nag-abut gikan sa Israel, kag ang mga dumuloong nga nag-abut gikan sa duta sang Israel, kag nga nagpuyo sa Juda.

26 Gani may daku nga kasadya sa Jerusalem: kay kutub sa tion ni Salomon nga lalaking anak ni David nga hari sang Israel wala gid sing kaangay sini sa Jerusalem.

27 ś Niyan ang mga pari nga mga Levinhon nagtindug kag ginpakamaayo ang katawohan: kag ang tingug nila nabatian, kag ang ila pangamuyo naglambut sa iya balaan nga puluy-an, sa langit.

KAPITULO 31

KARON sang natapus ini tanan, ang bug-os nga Israel nga nagtambong naggowa pakadto sa mga siudad sang Juda, kag nagdugmok sang mga imahen, kag nagpulud sang mga puong-puong sang kakahoyan, kag naglumpag sang mataas nga mga duug kag sang mga halaran gikan sa bug-os nga Juda kag Benjamin, sa Efraim man kag sa Manases, tubtub nga nalaglag nila sila tanan. Niyan ang tanan nga kaanakan sang Israel nagpauli, ang tagsatagsa sa iya ginapanag-iyahan, sa ila kaugalingon nga mga siudad.

2 ś Kag gintangdo ni Ezequias ang mga kinabon sang mga pari kag sang mga Levinhon, sono sa ila mga kinabon, ang tagsa ka tawo sa iya pag-alagdan, tingub ang mga pari kag ang mga Levinhon nga sa mga halad nga sinonog kag nga sa mga halad sa paghidait, sa pag-alagad, kag sa pagpasalamat, kag sa pagdayaw sa mga gawang sang mga layanglayang sang GINOO.

3 Gintangdo man niya ang bahin sang hari gikan sa iya pagkabutang nga sa mga halad nga sinonog, buot silingon, nga sa kaagahon kag sa kahaponon nga mga halad nga sinonog, kag ang mga halad nga sinonog nga sa mga sabbath, kag sa mga lati, kag sa mga pandut nga pinat-ud, sono sa nasulat sa kasogoan sang GINOO.

4 Labut pa nagsogo sia sa katawohan nga nagpuyo sa Jerusalem sa paghatag sang bahin sang mga pari kag sang mga Levinhon, agud nga mapalig-on sila sa kasogoan sang GINOO.

5 ś Kag sang naglapnag ang sogo, ang kaanakan sang Israel nagdalala sing bugana sang nahauna nga mga bunga sang mais, sang alak, kag sang lana, kag sang dugus, kag sang tanan nga patubas sang uma; kag nagdala sila sing bugana sing ikapulo sang tanan nga butang.

6 Kag nahanungud sang kaanakan sang Israel kag sang Juda, nga nagpuyo sa mga siudad sang Juda, sila man nagdala sing ikapulo sang mga baka kag mga carnero, kag sang ikapulo sang mga balaan nga butang nga ginpakasagrado sa GINOO nga ila Dios, kag ginbutang sila sa mga tinumpok.

7 Sa ikatlo nga bulan nagsugud sila sa pagpasad sang sadsaran sang mga tinumpok, kag gintapus sila sang ikapito nga bulan.

8 Kag sang nag-abut kag nakita ni Ezequias kag sang mga prinsipe ang mga tinumpok, ginpakamaayo nila ang GINOO, kag ang iya katawohan nga Israel.

9 Niyan ginpamangkot ni Ezequias ang mga pari kag ang mga Levinhon nahanungud sang mga tinumpok.

10 Kag si Azarias nga puno nga pari gikan sa panimalay ni Sadoc nagsabat sa iya, kag nagsiling, Kutub sa pagsugud sang mga tawo sa pagdala sang mga halad sa balay sang GINOO, may tuman kami nga kalan-on, kag may nabilin nga madamu: kay ginpakamaayo sang GINOO ang iya katawohan; kag inang nabilin amo ini nga daku nga natipon.

11 ś Niyan si Ezequias nagsogo sa pag-aman sing mga hulut sa balay sang GINOO; kag gin-aman nila sila,

12 Kag ginsulud sing matutum ang mga halad kag ang mga ikapulo kag ang mga butang nga gindedicar: ang manugdumala sa ila sini amo si Conanias nga Levinhon, kag si Simei nga iya utud nga lalaki ang madason.

13 Kag si Jehiel, kag si Azazias, kag si Nahat, kag si Asael, kag si Jerimot, kag si Josabad, kag si Eliel, kag si Ismaquias, kag si Mahat, kag si Benaya, amo ang mga manugtatap sa idalum sang kamut ni Conanias kag ni Simei nga iya utud, sono sa sogo ni Ezequias nga hari, kag ni Azarias nga manugdumala sang balay sang Dios.

14 Kag si Core nga lalaking anak ni Imna nga Levinhon, ang manugbantay sang gawang nayon sa sidlangan, manugdumala sang mga halad nga kinabubut-on sa Dios, sa pagpanagtag sang mga halad nga sa GINOO, kag sang labi gid kabalaan nga mga butang.

15 Kag madason sa iya si Eden, kag si Minyamin, kag si Jesua, kag si Semaya, si Amarias, kag si Secanias, sa mga siudad sang mga pari, sa ila palangakoan nga salaligan, sa paghatag sa ila mga utud sono sa mga kinabon, subong sa dalagku amo man sa diotay:

16 Luwas sa lista sang ila kaliwatan nga mga lalaki, kutub sa tatlo ka tuig kag paibabaw, sa tagsatagsa nga nagasulud sa balay sang GINOO, sang iya adlawadlaw nga bahin tungud sa ila pag-alagdan sa ila mga palangakoan sono sa ila mga kinabon;

17 Sono sa lista sang kaliwatan sang mga pari sono sa panimalay sang ila kaamayan, kag sang mga Levinhon kutub sa duha ka pulo ka tuig kag paibabaw, sa ila mga palangakoan sono sa ila mga kinabon;

18 Kag sono sa lista sang kaliwatan sang tanan nila nga mga magamay, sang ila mga asawa, kag sang ila mga anak nga lalaki, kag sang ila mga anak nga babaye, sa bug-os nga katilingban: kay sa ila palangakoan nga salaligan nagpakabalaan sila sang ila kaugalingon sa pagkabalaan:

19 Sa mga lalaking anak ni Aaron man nga mga pari, nga yadto sa mga latagon sang mga halalban sang ila mga siudad, sa tagsa ka siudad, ang mga tawo nga nasambit sa ngalan, sa pagpanagtag sing mga bahin sa tanan nga lalaki sa mga pari, kag sa tanan nga gin-isip sono sa mga lista sang kaliwatan sa mga Levinhon.

20 ś Kag amo ini ang ginhimo ni Ezequias sa bug-os gid nga Juda, kag ginhimo niya inang maayo kag matarung kag matuud sa atubangan sang GINOO nga iya Dios.

21 Kag sa tagsa ka buluhaton nga ginsugdan niya sa pag-alagdan sa balay sang Dios, kag sa kasogoan, kag sa mga sogo, sa pagpangita sa iya Dios, ginhimo niya ini sa bug-os niya nga tagiposoon, kag nag-uswag.

KAPITULO 32

SA tapus sini nga mga butang, kag ang pagkatukud sini sa ila, nag-abut si Senaquerib nga hari sang Asiria, kag nagsulud sa Juda, kag nagpahamtang sang kampo batok sa napamakuran nga mga siudad, kag naghunahuna sa pag-agaw sa ila nga sa iya kaugalingon.

2 Kag sang nakita ni Ezequias nga nag-abut si Senaquerib, kag nga nagtuyo sia sa pagpakig-away batok sa Jerusalem,

3 Nagpakigsapul sia sa iya mga prinsipe kag sa iya gamhanan nga mga tawo sa pagtampok sang mga tubig sang mga tuburan nga yara sa gowa sang siudad: kag ginbuligan nila sia.

4 Gani may nagtipon sing tingub nga madamu nga mga tawo, nga nagtampok sang tanan nga tuburan, kag sang sapa nga nag-ilig paagi sa tunga sang duta, nga nagasiling, Ngaa bala nga mag-abut ang mga hari sang Asiria, kag makakita sing madamu nga tubig?

5 Sia nagpakaisug man, kag nagpatindug sang bug-os nga kuta nga naguba, kag ginpataas ini tubtub sa mga torre, kag ang iban nga kuta sa gowa, kag ginkaayo ang Milo sa siudad ni David, kag naghimo sia sing bugana nga mga baslay kag mga taming.

6 Kag nagbutang sia sing mga kapitan sang inaway sa katawohan, kag gintipon sila sing tingub sa iya sa dalan sang gawang sang siudad, kag nagpamolong sing paglipay sa ila, nga nagasiling,

7 Magpakabakud kamo kag magpakaisug, dili kamo magkahadluk ukon magkahangawa tungud sa hari sang Asiria, ukon sa bug-os nga kadam-an nga nagaupud sa iya: kay may labi pa kadaku nga nagaupud sa aton sang sa iya:

8 Upud sa iya amo ang butkon nga unud; apang upud sa aton amo ang GINOO nga aton Dios sa pagtabang sa aton, kag sa pag-away sang aton mga inaway. Kag ang katawohan nagsalig sang ila kaugalingon sa mga polong ni Ezequias nga hari sang Juda.

9 ś Sa tapus sini si Senaquerib nga hari sang Asiria nagpadala sang iya mga alagad sa Jerusalem, (apang sia iya nagkibon sang Laquis, kag ang bug-os niya nga kusug upud sa iya,) kay Ezequias nga hari sang Juda, kag sa bug-os nga Juda nga yara sa Jerusalem, nga nagasiling,

10 Amo ini ang ginasiling ni Senaquerib nga hari sang Asiria, Sa ano bala nagasalig kamo, nga nagapabilin kamo sa pagkibon sa Jerusalem?

11 Wala bala si Ezequias nagabuyok sa inyo, sa pagtugyan sa inyo nga mapatay sa tiggulutum kag sa kauhaw, nga nagasiling, Ang GINOO nga aton Dios magaluwas sa aton gikan sa kamut sang hari sang Asiria?

12 Wala bala ang amo nga Ezequias magkuha sang iya mataas nga mga duug kag sang iya mga halaran, kag magsogo sa Juda kag sa Jerusalem, nga nagasiling, Magasimba kamo sa atubangan sang isa ka halaran, kag sa ibabaw sini magasonog kamo sing incienso?

13 Wala bala kamo makahibalo sang ginhimo ko kag sang akon mga kaamayan sa tanan nga katawohan sang iban nga mga duta? ang mga dios sang mga pungsud sinang mga duta nakaluwas bala nga mas-a sang ila mga duta gikan sa akon kamut?

14 Sin-o bala dira sa tanan nga dios sadto nga mga pungsud nga ginlaglag sing bug-os sang akon mga kaamayan, nga makaluwas sang iya katawohan gikan sa akon kamut, nga ang inyo Dios makasarang magluwas sa inyo gikan sa akon kamut?

15 Busa karon dili kamo magpalimbong kay Ezequias, ukon magpabuyok sa inyo sa sini nga bagay, ukon magpati pa sa iya: kay wala sang dios sa bisan ano nga pungsud ukon ginharian nga nakasarang sa pagluwas sang iya katawohan gikan sa akon kamut, kag gikan sa kamut sang akon mga kaamayan: ano pa gid bala ang pagluwas sang inyo Dios sa inyo gikan sa akon kamut?

16 Kag ang iya mga alagad nagpamolong pa gid batok sa GINOONG Dios, kag batok sa iya alagad nga si Ezequias.

17 Nagsulat man sia sing mga sulat sa pagpasipala sa GINOONG Dios sang Israel, kag sa pagpamolong batok sa iya, nga nagasiling, Subong nga ang mga dios sang mga pungsud sang iban nga mga duta wala makaluwas sang ila katawohan gikan sa akon kamut, sa amo ang Dios ni Ezequias indi makaluwas sang iya katawohan gikan sa akon kamut.

18 Niyan nagsinggit sila sa matonog nga tingug sa Jinudio nga hambal sa katawohan sang Jerusalem nga yara sa kuta, sa pagpahog sa ila, kag sa pagpalisang sa ila; agud nga maagaw nila ang siudad.

19 Kag nagpamolong sila batok sa Dios sang Jerusalem, subong sang mga dios sang katawohan sang duta, nga binuhatan sang mga kamut sang mga tawo.

20 Kag sa sining kabangdanan si Ezequias nga hari, kag ang manalagna nga si Isaias nga lalaking anak ni Amoz, nagpangamuyo kag nagtuaw sa langit.

21 ś Kag ang GINOO nagpadala sang isa ka anghel, nga nagpapas sang tanan nga gamhanan nga tawo nga isganan, kag sang mga manugdumala kag mga kapitan sa kampo sang hari sang Asiria. Gani nagpauli sia nga may kahuya sa nawung sa iya kaugalingon nga duta. Kag sang nagsulud sia sa balay sang iya dios, sila nga naggowa sa iya kaugalingon nga kasudlan nagpatay sa iya didto sa espada.

22 Sa amo ginluwas sang GINOO si Ezequias kag ang mga pumuluyo sang Jerusalem gikan sa kamut ni Senaquerib nga hari sang Asiria, kag gikan sa kamut sang tanan nga iban, kag gintuytuyan sila sa tagsa ka luyo.

23 Kag madamu ang nagdala sing mga dolot sa GINOO sa Jerusalem, kag mga regalo kay Ezequias nga hari sang Juda: sa bagay nga nabayaw sia sa itololok sang tanan nga mga pungsud kutub sadto.

24 ś Sa sadtong mga adlaw si Ezequias nagmasakit nga sa ikamatay, kag nagpangamuyo sia sa GINOO: kag nagpamolong sia sa iya, kag naghatag sia sa iya sing tanda.

25 Apang si Ezequias wala magbalus sono sa kaayohan nga nahimo sa iya; kay ang iya tagiposoon nagmatinaastaason: busa may kasingkal batok sa iya, kag sa Juda kag sa Jerusalem.

26 Walay sapayan si Ezequias nagpaubus sang iya kaugalingon tungud sang bugal sang iya tagiposoon, sia kag ang mga pumuluyo sang Jerusalem, sa bagay nga wala mag-abut sa ila ang kasingkal sang GINOO sa mga adlaw ni Ezequias.

27 ś Kag si Ezequias may lakas gid kadamu nga mga manggad kag kadungganan: kag naghimo sia nga sa iya sing mga duug nga bahandian nga sa pilak, kag sa bulawan, kag sa bilidhon nga mga bato, kag sa mga pahumut, kag sa mga taming, kag sa tanan nga matahum nga mga alahas;

28 Mga bodega man nga sa patubas sang uyas, kag alak, kag lana; kag mga palasudlan tungud sa tanan nga bagay sang kahayupan, kag mga palasudlan tungud sa mga panong.

29 Labut pa nagbutang sia nga sa iya sing mga siudad, kag bugana nga mga pagpanag-iya sang mga panong kag kabakahan: kay ang Dios nakahatag sa iya sing madamu gid nga pagkabutang.

30 Ini man nga Ezequias nagtampok sang naibabaw nga ililigan sang Gihon, kag ginpailig ini sing tadlong paidalum sa katundan nga kilid sang siudad ni David. Kag si Ezequias nag-uswag sa tanan niyang binuhatan.

31 ś Apang sa hilikuton sang mga embajador sang mga prinsipe sang Babilonia, nga ginpadala sa iya nga sa pagpakigsayud sang katingalahan nga nahimo sa duta, ginpabayaan sia sang Dios, sa pagtilaw sa iya, agud nga mahibaloan niya ang tanan nga yara sa iya tagiposoon.

32 ś Karon ang nabilin nga mga binuhatan ni Ezequias, kag ang iya kaayo, yari karon, nasulat sila sa palanan-awon ni Isaias nga manalagna, nga lalaking anak ni Amoz, kag sa libro sang mga hari sang Juda kag sang Israel.

33 Kag si Ezequias nagtolog upud sa iya mga kaamayan, kag ginlubung nila sia sa labing maayo sa mga lulubngan sang mga lalaking anak ni David: kag nagpadungug sa iya ang bug-os nga Juda kag ang mga pumuluyo sang Jerusalem sa iya kamatayon. Kag naghari nga tal-us niya si Manases nga iya lalaking anak.

KAPITULO 33

SI MANASES napulog duha ka tuig sang nagsugud sia sa paghari, kag naghari sia sing kalim-an kag lima ka tuig sa Jerusalem:

2 Apang ginhimo niya inang malaut sa itololok sang GINOO, subong sa mga kangil-aran sang mga pagano nga ginsobol sang GINOO gikan sa atubangan sang kaanakan sang Israel.

3 ś Kay ginpatindug niya liwat ang mataas nga mga duug nga ginlumpag ni Ezequias nga iya amay, kag nagpatindug sing mga halaran sa mga Baalim, kag naghimo sing mga puong-puong sang kakahoyan, kag nagsimba sa bug-os nga panong sang langit, kag nag-alagad sa ila.

4 Nagpatindug man sia sing mga halaran sa balay sang GINOO, nga nahanungud sini ang GINOO nagsiling, Sa Jerusalem ang akon ngalan manginsa gihapon.

5 Kag nagpatindug sia sing mga halaran sa bug-os nga panong sang langit sa duha ka luwang sang balay sang GINOO.

6 Kag ang iya mga anak ginpaagi niya sa kalayo sa nalupyakan sang lalaking anak ni Hinom: labut pa sia nagbantay sang mga panag-on, kag naggamit sing mga enkantohanon nga padihot, kag naggamit sang pagbabaylan, kag naghisayo sa isa ka kinilala nga espiritu, kag sa mga manugbabaylan: naghimo sia sing madamu gid nga malaut sa itololok sang GINOO, sa pagpaakig sa iya.

7 Kag nagpahamtang sia sang imahen nga tinigban, ang diosdios nga nahimo niya, sa balay sang Dios, nga nahanungud sini nagsiling ang Dios kay David kag kay Salomon nga iya lalaking anak, Sa sining balay, kag sa Jerusalem, nga ginpili ko sa atubang sang tanan nga tribo sang Israel, ibutang ko ang akon ngalan sa gihapon:

8 Kag dili ko na paghalinon ang tiil sang Israel gikan sa duta nga gintangdo ko tungud sa inyo kaamayan; agud nga magbantay sila sa paghimo sang tanan nga ginsogo ko sa ila, sono sa bug-os nga kasogoan kag mga palatukuran kag mga pagsolondan nga nahatag paagi kay Moises.

9 Gani ginpatalang ni Manases ang Juda kag ang mga pumuluyo sang Jerusalem, kag ginpahimo sila sing malaut nga labi pa sang ginhimo sang mga pagano, nga ginlaglag sang GINOO sa atubangan sang kaanakan sang Israel.

10 Kag ang GINOO nagpamolong kay Manases, kag sa iya katawohan: apang wala sila magsapak.

11 ś Busa gindala sang GINOO sa ila ang mga kapitan sang kasoldadosan sang hari sang Asiria, nga nagdakup kay Manases sa mga tunuk, kag gingapus sia sa mga grilyos, kag gindala sia sa Babilonia.

12 Kag sang yara sia sa kapipit-an, nagpakilooy sia sa GINOO nga iya Dios, kag nagpaubus sang iya kaugalingon sing daku sa atubangan sang Dios sang iya mga kaamayan,

13 Kag nagpangamuyo sia sa iya: kag napakilooyan niya sia, kag ginpamatian ang iya pag-ampo, kag ginpabalik sia sa Jerusalem sa iya ginharian. Niyan si Manases nakakilala nga ang GINOO, sia Dios.

14 Karon sa tapus sini nagpatindug sia sing nagowa nga kuta sa siudad ni David, nayon sa kilid nga nakatundan sang Gihon, sa nalupyakan, tubtub sa salamputan sa gawang sang isda, kag ginlibutan niya sini ang Ofel, kag ginpataas niya ini sing tama gid, kag ginbutangan niya sing mga kapitan sang pag-awayan sa tanan nga napamakuran nga mga siudad sang Juda.

15 Kag ginkuha niya ang mga dios nga dumuloong, kag ang diosdios gikan sa balay sang GINOO, kag ang tanan nga halaran nga napatindug niya sa bukid sang balay sang GINOO, kag sa Jerusalem, kag ginpilak sila sa gowa sang siudad.

16 Kag ginkaayo niya ang halaran sang GINOO, kag naghalad sa sini sing mga halad sa paghidait kag sang mga halad sa pagpasalamat, kag nagsogo sang Juda sa pag-alagad sa GINOONG Dios sang Israel.

17 Walay sapayan ang katawohan naghalad pa sa mataas nga mga duug, apang sa GINOO lamang nga ila Dios.

18 ś Karon ang nabilin nga mga binuhatan ni Manases, kag ang iya pangamuyo sa iya Dios, kag ang mga polong sang mga manugpanan-aw nga nagpamolong sa iya sa ngalan sang GINOONG Dios sang Israel, yari karon, nasulat sila sa libro sang mga hari sang Israel.

19 Ang iya pangamuyo man, kag paano nga ang Dios nalooy sa iya, kag ang bug-os niyang sala, kag ang iya paglapas, kag ang mga duug nga diin nagpatindug sia sing mataas nga mga duug, kag nagpahamtang sang mga puong-puong sang kakahoyan kag sang mga imahen nga tinigban, sang wala pa sia magpaubus: yari karon, nasulat sila sa mga hambalanon sang mga manugpanan-aw.

20 ś Gani si Manases nagtolog upud sa iya mga kaamayan, kag ginlubung nila sia sa iya kaugalingon nga balay: kag naghari nga tal-us niya si Amon nga iya lalaking anak.

21 ś Si Amon duha ka pulo kag duha ka tuig sang nagsugud sia sa paghari, kag naghari sia sing duha ka tuig sa Jerusalem.

22 Apang naghimo sia sinang malaut sa itololok sang GINOO, subong sang ginhimo ni Manases nga iya amay: kay si Amon naghalad sa tanan nga imahen nga tinigban nga nahimo ni Manases nga iya amay, kag nag-alagad sa ila;

23 Kag wala sia magpaubus sang iya kaugalingon sa atubangan sang GINOO, subong kay Manases nga iya amay nga nagpaubus sang iya kaugalingon; kondi si Amon naglapas sing labi kag labi pa.

24 Kag ang iya mga alagad nagpuhon batok sa iya, kag nagpatay sa iya sa iya kaugalingon nga balay.

25 ś Apang ang katawohan sang duta nagpatay sang tanan nga nagpuhon batok kay haring Amon; kag ang katawohan sang duta naghimo nga hari nga tal-us niya kay Josias nga iya lalaking anak.

KAPITULO 34

SI JOSIAS walo ka tuig sang nagsugud sia sa paghari, kag naghari sia sing katloan kag isa ka tuig sa Jerusalem.

2 Kag naghimo sia sinang matarung sa itololok sang GINOO, kag naglakat sa mga dalanon ni David nga iya amay, kag wala maglipas sa too, ukon sa wala.

3 ś Kay sa ikawalo nga tuig sang iya paghari, sang bataon pa sia, nagsugud sia sa pagpangita sa Dios ni David nga iya amay: kag sa ikanapulo kag duha nga tuig nagsugud sia sa pagtinlo sang Juda kag sang Jerusalem sang mataas nga mga duug, kag sang mga puong-puong sang kakahoyan, kag sang mga imahen nga tinigban, kag sang mga imahen nga tinunaw.

4 Kag ginlumpag nila sa iya atubangan ang mga halaran sang mga Baalim; kag ginpulud niya ang mga imahen, nga yara sa hitaas sa ibabaw nila; kag ang mga puong-puong sang kakahoyan, kag ang mga imahen nga tinigban, kag ang mga imahen nga tinunaw, gindugmok niya, kag ginbukbuk sila, kag ginsabwag ini sa mga lulubngan sang mga naghalad sa ila.

5 Kag ginsonog niya ang mga tul-an sang mga pari sa ila mga halaran, kag gintinloan ang Juda kag ang Jerusalem.

6 Kag ginhimo niya ang subong sa mga siudad sang Manases, kag sang Efraim, kag sang Simeon, tubtub sa Neftali, sa ila mga sadol sa palibut.

7 Kag sang nalumpag niya ang mga halaran kag ang mga puong-puong sang kakahoyan, kag nabukbuk ang mga imahen nga tinigban, kag napulud ang tanan nga diosdios sa bug-os gid nga duta sang Israel, nagbalik sia sa Jerusalem.

8 ś Karon sa ikanapulo kag walo nga tuig sang iya paghari, sang natinloan niya ang duta, kag ang balay, ginpadala niya si Safan nga lalaking anak ni Azalias, kag si Maasias nga gobernador sang siudad, kag si Joa nga lalaking anak ni Joacas, nga manugsulat sang mga maragtas, sa pagkaayo sang balay sang GINOO nga iya Dios.

9 Kag sang nagkadto sila kay Helcias nga mataas nga pari, gintugyan nila ang kuarta nga ginsulud sa balay sang Dios, nga natipon sang mga Levinhon, ang mga manugbantay sang mga gawang, gikan sa kamut sang Manases kag sang Efraim, kag gikan sa tanan nga nabilin sang Israel, kag gikan sa bug-os nga Juda kag Benjamin; kag nagbalik sila sa Jerusalem.

10 Kag gintugyan nila ini sa kamut sang mga manugpangabudlay nga amo ang may pagtatap sang balay sang GINOO, kag ginhatag nila ini sa mga manugpangabudlay nga nagpanghikot sa balay sang GINOO, sa pagpahauli kag pagkaayo sang balay:

11 Sa mga panday kag sa mga manugpatindug ginhatag nila ini, sa pagbakal sing bato nga binasbasan, kag tablon nga mga inugsugpon, kag sa paghimo sang mga balayan nga sa mga balay nga ginlaglag sang mga hari sang Juda.

12 Kag ang mga tawo naghimo sang buluhaton sing matutum: kag ang mga manugtatap nila si Jahat kag si Obadias, nga mga Levinhon, gikan sa mga lalaking anak ni Merari; kag si Zacarias kag si Mesulam, gikan sa mga lalaking anak sang mga Coatnon, sa pagpadayon sini; kag ang iban sa mga Levinhon, ang tanan nga sampaton sa mga tulunggon sa musika.

13 Nagdumala man sila sa mga manugdala sang mga lulan, kag mga manugdumala sila sang tanan nga naghimo sang buluhaton sa tagsa ka bagay sang pag-alagdan: kag sa mga Levinhon may mga escriba, kag mga opisyal, kag mga manugbantay sang gawang.

14 ś Kag sang pagpagowa nila sang kuarta nga ginsulud sa balay sang GINOO, nakita ni Helcias nga pari ang libro sang kasogoan sang GINOO nga ginhatag paagi kay Moises.

15 Kag si Helcias nagsabat kag nagsiling kay Safan nga escriba, Nakita ko ang libro sang kasogoan sa balay sang GINOO. Kag gintugyan ni Helcias ang libro kay Safan.

16 Kag si Safan nagdala sang libro sa hari, kag nagpabalik sang polong sa hari, nga nagasiling, Ang tanan nga gintugyan sa imo mga alagad, ginahimo nila.

17 Kag gintipon nila ang kuarta nga nakita sa balay sang GINOO, kag gintugyan ini sa kamut sang mga manugtatap, kag sa kamut sang mga manugpangabudlay.

18 Niyan si Safan nga escriba nagsugid sa hari, nga nagasiling, Si Helcias nga pari naghatag sa akon sing libro. Kag si Safan nagbasa sini sa atubangan sang hari.

19 Kag nahanabu, sang nakabati ang hari sang mga polong sang kasogoan, nga ginkusnit niya ang iya mga panapton.

20 Kag ang hari nagsogo kay Helcias, kag kay Ahicam nga lalaking anak ni Safan, kag kay Abdon nga lalaking anak ni Mica, kag kay Safan nga escriba, kag kay Asaya nga alagad sang hari, nga nagasiling,

21 Kadto kamo, pakisayud kamo sa GINOO tungud sa akon, kag sa ila nga nabilin sa Israel kag sa Juda, nahanungud sa mga polong sang libro nga nakita: kay daku ang kasingkal sang GINOO nga gin-ula sa aton, bangud nga ang aton mga kaamayan wala magbantay sang polong sang GINOO, sa paghimo sono sa tanan nga nasulat sa sini nga libro.

22 Kag si Helcias, kag sila nga ginsogo sang hari, nagkadto kay Hulda nga manalagna nga babaye, ang asawa ni Salum nga lalaking anak ni Tikvat, ang lalaking anak ni Hasra, manugbantay sang mga panapton; (karon nagpuyo si Hulda sa Jerusalem sa kolehio:) kag nagpamolong sila sa iya sa sina nga bagay.

23 ś Kag nagsabat sia sa ila, Amo ini ang ginasiling sang GINOONG Dios sang Israel, Isugid ninyo sa lalaki nga nagpadala sa inyo sa akon,

24 Amo ini ang ginasiling sang GINOO, Yari karon, magadala ako sing malaut sa sining duug, kag sa mga pumuluyo niya, ang tanan nga pagpakamalaut nga nasulat sa libro nga ginbasa nila sa atubangan sang hari sang Juda:

25 Bangud nga ginbayaan nila ako, kag nagsonog sing incienso sa iban nga mga dios, agud nga mapaakig nila ako sa tanan nga binuhatan sang ila mga kamut; busa ang akon kasingkal paga-iula sa sini nga duug, kag indi mag-ugdaw.

26 Kag nahanungud sa hari sang Juda, nga nagpadala sa inyo sa pagpakisayud sa GINOO, amo ini ang isiling ninyo sa iya, Amo ini ang ginasiling sang GINOONG Dios sang Israel nahanungud sa mga polong nga nabatian mo;

27 Bangud nga ang imo tagiposoon mahomok, kag nagpaubus ka sang imo kaugalingon sa atubangan sang Dios, sang pagkabati mo sang iya mga polong batok sini nga duug, kag batok sa mga pumuluyo niya, kag nagpaubus sang imo kaugalingon sa atubangan nakon, kag nagkusnit sang imo mga panapton, kag naghibi sa akon atubangan; ako man nagpamati sa imo, nagasiling ang GINOO.

28 Yari karon, isimpon ko ikaw sa imo mga kaamayan, kag isimpon ka sa imo lulubngan sa paghidait, kag ang imo mga mata indi makakita sang tanan nga malaut nga dalhon ko sa sini nga duug, kag sa iya mga pumuluyo. Gani ginbalikan nila sing polong ang hari.

29 ś Niyan ang hari nagpadala kag nagtipon sing tingub sang tanan nga tigulang sang Juda kag Jerusalem.

30 Kag ang hari nagsaka sa balay sang GINOO, kag ang tanan nga tawo sang Juda, kag ang mga pumuluyo sang Jerusalem, kag ang mga pari, kag ang mga Levinhon, kag ang bug-os nga katawohan, dalagku kag magamay: kag ginbasa niya sa ila mga idulungug ang tanan nga polong sang libro sang katipan nga nakita sa balay sang GINOO.

31 Kag ang hari nagtindug sa iya duug, kag nagpakigkatipan sa atubangan sang GINOO, sa pagsonod sa GINOO, kag sa pagbantay sang iya mga sogo, kag sang iya mga pagpamatuud, kag sang iya mga palatukuran, sa bug-os niya nga tagiposoon, kag sa bug-os niya nga kalag, sa pagtuman sang mga polong sang katipan nga nasulat sa sini nga libro.

32 Kag ang tanan nga yadto sa Jerusalem kag sa Benjamin ginpatindug niya sa sini. Kag ang mga pumuluyo sang Jerusalem naghimo sono sa katipan sang Dios, ang Dios sang ila mga kaamayan.

33 Kag si Josias nagkuha sang tanan nga kangil-aran gikan sa tanan nga duta nga iya sang kaanakan sang Israel, kag ginpaalagad niya ang tanan nga yadto sa Israel, sa pag-alagad sa GINOO nga ila Dios. Kag sa tanan niya nga adlaw wala sila magbiya sa pagsonod sa GINOO, ang Dios sang ila mga kaamayan.

KAPITULO 35

LABUT PA si Josias naghiwat sing pagligad sa GINOO sa Jerusalem: kag gin-ihaw nila ang pagligad sa ikanapulo kag apat nga adlaw sang nahauna nga bulan.

2 Kag ginpahamtang niya ang mga pari sa ila mga palangakoan, kag ginpalig-on sila sa pag-alagdan sang balay sang GINOO,

3 Kag nagsiling sa mga Levinhon nga nagpanudlo sa bug-os nga Israel, nga mga balaan sa GINOO, Ibutang ninyo ang arka nga balaan sa balay nga ginpatindug ni Salomon nga lalaking anak ni David, nga hari sang Israel; indi ini manginlulan sa inyo mga abaga: karon alagda ang GINOO nga inyo Dios, kag ang iya katawohan nga Israel,

4 Kag pangaman kamo sono sa mga panimalay sang inyo mga kaamayan, sono sa inyo mga kinabon, sono sa sinulat ni David nga hari sang Israel, kag sono sa sinulat ni Salomon nga iya lalaking anak.

5 Kag tindug kamo sa balaan nga duug sono sa mga binahin sang mga panimalay sang mga kaamayan sang inyo mga utud, nga amo ang katawohan, kag sono sa binahin sang mga panimalay sang mga Levinhon.

6 Gani ihawon ang pagligad, kag pakabalaana ang inyo kaugalingon, kag iaman ang inyo mga utud, agud nga sila maghimo sono sa polong sang GINOO paagi sa kamut ni Moises.

7 Kag si Josias naghatag sa katawohan sing mga cordero kag mga tinday nga kanding gikan sa panong, sila tanan tungud sa mga halad sa pagligad, tungud sa tanan nga nagtambong, sa kadamuon nga katloan ka libo, kag tatlo ka libo ka tinday nga baka nga lalaki: ini sila gikan sa pagkabutang sang hari.

8 Kag ang iya mga prinsipe naghatag sing kinabubut-on sa katawohan, sa mga pari, kag sa mga Levinhon: si Helcias kag si Zacarias kag si Jehiel, ang mga manugdumala sang balay sang Dios, naghatag sa mga pari nga sa mga halad sa pagligad sing duha ka libo kag anum ka gatus nga tinday sang kahayupan, kag tatlo ka gatus ka baka.

9 Si Conanias man, kag si Semaya kag si Nataneel, nga iya mga utud, kag si Hasabias kag si Jeiel kag si Jozabad, ang mga puno sang mga Levinhon, naghatag sa mga Levinhon nga sa mga halad sa pagligad sing lima ka libo ka tinday sang kahayupan, kag lima ka gatus ka baka.

10 Gani ang pag-alagdan gin-aman, kag ang mga pari nagtindug sa ila duug, kag ang mga Levinhon sono sa ila mga kinabon sono sa sogo sang hari.

11 Kag gin-ihaw nila ang pagligad, kag ginwisik sang mga pari ang dugo gikan sa ila mga kamut, kag ginpanitan sila sang mga Levinhon.

12 Kag ginkuha nila ang mga halad nga sinonog, agud nga mahatag nila sila sono sa mga binahin sang mga panimalay sang katawohan, sa pagdolot sa GINOO, sono sa nasulat sa libro ni Moises. Kag amo ini ang ginhimo nila sa mga baka.

13 Kag gin-asal nila sa kalayo ang pagligad sono sa pagsolondan: apang ang iban nga balaan nga mga halad ginlaga nila sila sa mga kaldero, kag sa mga dalwasi, kag sa mga sartin, kag ginbahinbahin sila sing dalidali sa tanan nga katawohan.

14 Kag ugaling naghilimos sila nga sa ila kaugalingon, kag sa mga pari: bangud nga ang mga pari nga mga lalaking anak ni Aaron masaku tubtub sa gab-i sa pagdolot sang mga halad nga sinonog kag sang sapay; busa ang mga Levinhon naghilimos nga sa ila kaugalingon, kag sa mga pari nga mga lalaking anak ni Aaron.

15 Kag ang mga manug-amba, nga mga lalaking anak ni Asaf, yara sa ila duug, sono sa sogo ni David, kag ni Asaf, kag ni Heman, kag ni Jedutun nga manugpanan-aw sang hari; kag ang mga manugbantay nagbantay sa tagsa ka gawang; wala na sila kinahanglan magbiya sa ila pag-alagdan; kay ang ila mga utud nga mga Levinhon nag-aman tungud sa ila.

16 Gani ang bug-os nga pag-alagdan sang GINOO naaman sa amo nga adlaw, sa paghiwat sang pagligad kag sa pagdolot sang mga halad nga sinonog sa halaran sang GINOO, sono sa sogo ni haring Josias.

17 Kag ang kaanakan sang Israel nga nagtambong naghiwat sang pagligad sa sadto nga tion, kag sang pandut sang tinapay nga wala sing tapay sing pito ka adlaw.

18 Kag wala sing pagligad kaangay sadto nga nahiwat sa Israel kutub sang mga adlaw ni Samuel nga manalagna; kag wala sing bisan sin-o sang mga hari sang Israel nga naghiwat sing subong nga pagligad sang ginhiwat ni Josias, kag sang mga pari, kag sang mga Levinhon, kag sang bug-os nga Juda kag Israel nga nagtambong, kag sang mga pumuluyo sang Jerusalem.

19 Ini nga pagligad ginhiwat sa ikanapulo kag walo nga tuig sang paghari ni Josias.

20 ś Sa tapus sini tanan, sang nakaaman si Josias sang templo, si Necao nga hari sang Egipto nagtaklad sa pagpakig-away batok sa Carquemis sa ubay sang Eufrates: kag si Josias naggowa batok sa iya.

21 Apang nagpadala sia sing mga embajador sa iya, nga nagasiling, Ano bala ang akon labut sa imo, ikaw nga hari sang Juda? ako wala magkari batok sa imo sini nga adlaw, kondi batok sa panimalay nga may pagpakig-away ako: kay ang Dios nagsogo sa akon sa pagdalidali: paiway ka sa pagpahilabot sa Dios, nga yari upud sa akon, agud nga indi ka niya paglaglagon.

22 Wala sing sapayan si Josias indi magtalikud gikan sa iya, kondi wala magpakilala sang iya kaugalingon, agud nga makapakig-away sia sa iya, kag wala magpamati sang mga polong ni Necao gikan sa baba sang Dios, kag nagkadto sa pagpakig-away sa nalupyakan sang Meguido.

23 Kag ang mga manugpana nagpana kay haring Josias; kag nagsiling ang hari sa iya mga alagad, Ipahilayo ako; kay napilasan ako sing tama.

24 Gani ang iya mga alagad nagkuha sa iya sa sinang kangga, kag ginbutang sia sa ikaduha nga kangga nga may iya sia; kag gindala nila sia sa Jerusalem, kag napatay sia, kag ginlubung sa isa sang mga lulubngan sang iya mga kaamayan. Kag ang bug-os nga Juda kag Jerusalem naglalaw tungud kay Josias.

25 ś Kag si Jeremias nagpanalabiton tungud kay Josias: kag ang tanan nga manug-amba nga mga lalaki kag ang mga manug-amba nga mga babaye nagpamolong nahanungud kay Josias sa ila mga panalabiton tubtub sini nga adlaw, kag ginhimo ini sila nga pagsolondan sa Israel: kag, yari karon, nasulat sila sa mga panalabiton.

26 Karon ang nabilin sang mga binuhatan ni Josias, kag ang iya kaayo, sono sa sinang nasulat sa kasogoan sang GINOO,

27 Kag ang iya mga hinimoan, nahauna kag katapusan, yari karon, nasulat sila sa libro sang mga hari sang Israel kag Juda.

KAPITULO 36

NIYAN ang katawohan sang duta nagkuha kay Jehoacaz nga anak nga lalaki ni Josias, kag ginhimo sia nga hari nga tal-us sa iya amay sa Jerusalem.

2 Si Jehoacaz duha ka pulo kag tatlo ka tuig sang nagsugud sia sa paghari, kag naghari sia sing tatlo ka bulan sa Jerusalem.

3 Kag ginlutus sia gikan sa Jerusalem sang hari sang Egipto, kag ginsilotan niya ang duta sa pagbayad sang isa ka gatus ka talanton nga pilak kag isa ka talanton nga bulawan.

4 Kag ginhimo sang hari sang Egipto si Eliaquim nga iya utud nga hari sa Juda kag Jerusalem, kag gin-ilisan ang iya ngalan kay Jehoaquim. Kag si Jehoacaz nga iya utud ginkuha ni Necao, kag gindala sia sa Egipto.

5 ś Si Jehoaquim duha ka pulo kag lima ka tuig sang nagsugud sia sa paghari, kag naghari sia sing napulo kag isa ka tuig sa Jerusalem: kag naghimo sia sinang malaut sa itololok sang GINOO nga iya Dios.

6 Nagtaklad batok sa iya si Nabucodonosor nga hari sang Babilonia, kag gingapus sia sing mga grilyos, sa pagdala sa iya sa Babilonia.

7 Gindala man ni Nabucodonosor sa Babilonia ang mga suludlan sang balay sang GINOO, kag ginbutang sila sa iya templo sa Babilonia.

8 Karon ang nabilin sang mga binuhatan ni Jehoaquim, kag ang iya mga kangil-aran nga ginhimo niya, kag inang nakita sa iya, yari karon, nasulat sila sa libro sang mga hari sang Israel kag Juda: kag naghari sa tal-us niya si Jehoaquin nga iya anak nga lalaki.

9 ś Si Jehoaquin walo ka tuig sang nagsugud sia sa paghari, kag naghari sia sa Jerusalem sing tatlo ka bulan kag napulo ka adlaw: kag naghimo sia sinang malaut sa itololok sang GINOO.

10 Kag sa pagsapul sang tuig, ginpakadtoan ni haring Nabucodonosor, kag ginpadala sia sa Babilonia, pati ang mga suludlan nga matahum sang balay sang GINOO, kag si Sedequias nga iya utud ginhimo nga hari sa Juda kag Jerusalem.

11 ś Si Sedequias duha ka pulo kag isa ka tuig sang nagsugud sia sa paghari, kag naghari sia sa Jerusalem sing napulo kag isa ka tuig.

12 Kag naghimo sia sinang malaut sa itololok sang GINOO nga iya Dios, kag wala sia magpaubus sang iya kaugalingon sa atubangan ni Jeremias nga manalagna nga nagapamolong gikan sa baba sang GINOO.

13 Kag nagribuk man sia batok kay haring Nabucodonosor, nga nagpasumpa sa iya tungud sa Dios: apang nagpakatingkoyan sia, kag nagpatig-a sang iya tagiposoon batok sa pagbalik sa GINOONG Dios sang Israel.

14 ś Labut pa ang tanan nga puno sang mga pari, kag ang katawohan, naglapas sing labi gid sono sa tanan nga kangil-aran sang mga pagano; kag gindagtaan nila ang balay sang GINOO nga ginpakabalaan niya sa Jerusalem.

15 Kag ang GINOONG Dios sang ila mga kaamayan nagpadala sa ila paagi sa iya mga manugbalita, nga nagabangon sing temprano, kag nagapadala; bangud nga nalooy sia sa iya katawohan, kag sa iya puluy-an:

16 Apang gin-uligyat nila ang mga manugbalita sang Dios, kag gintamay ang iya mga polong, kag ginyubitan ang iya mga manalagna, tubtub nga nag-ibwal ang kasingkal sang GINOO batok sa iya katawohan, tubtub nga wala na sing tambal.

17 Busa ginpataklad niya ang hari sang mga Caldeanhon sa ila, nga nagpatay sa espada sang ila mga pamatan-on nga lalaki sa balay sang ila santuario, kag wala sia sing kalooy sa pamatan-on nga lalaki ukon dalaga, tigulang, ukon ang nagasikoktot sa katigulangon: sila tanan gintugyan niya sa iya kamut.

18 Kag ang tanan nga suludlan sang balay sang Dios, dalagku kag magamay, kag ang mga bahandi sang balay sang GINOO, kag ang mga bahandi sang hari, kag sang iya mga prinsipe; ini tanan gindala niya sa Babilonia.

19 Kag ginsonog nila ang balay sang Dios, kag ginguba ang kuta sang Jerusalem, kag ginsonog sa kalayo ang tanan nga palacio sini, kag ginlaglag ang tanan nga suludlan nga matahum sini.

20 Kag ang mga nakapalagyo gikan sa espada gindala niya sa Babilonia; diin nangin-alagad sila niya kag sang iya mga lalaking anak tubtub sa paghari sang ginharian sang Persia:

21 Sa pagtuman sang polong sang GINOO paagi sa baba ni Jeremias, tubtub nga ang duta nakaagum sang iya mga sabbath: kay samtang nagapabilin ini nga mamingaw nag-agum ini sang sabbath, sa pagtuman sing kapitoan ka tuig.

22 ś Karon sa nahauna nga tuig ni Ciro nga hari sang Persia, agud nga matuman ang polong sang GINOO nga ginpamolong paagi sa baba ni Jeremias, ginpukaw sang GINOO ang espiritu ni Ciro nga hari sang Persia, sa bagay nga nagpabantala sia sa bug-os niya nga ginharian, kag ginsulat man ini, nga nagasiling,

23 Amo ini ang ginasiling ni Ciro nga hari sang Persia, Ang tanan nga ginharian sang duta ginhatag sang GINOONG Dios sang langit sa akon; kag gintulinan niya ako sa pagpatindug sa iya sing balay sa Jerusalem, nga yara sa Juda. Sin-o bala ang yara sa tunga ninyo sa bug-os niya nga katawohan? Ang GINOO nga iya Dios magmanginkaupud niya, kag magtaklad sia.

AMAZING GRACE BIBLE INSTITUTE