ANG NAHAUNANG SULAT NI PABLO NGA APOSTOL SA MGATAGA-TESALONICAKAPITULO 1SI PABLO, kag si Silvano, kag si Timoteo, sa iglesia sang mga taga-Tesalonica nga yara sa Dios nga Amay kag sa Ginoong Jesu-Cristo: Ang bugay sa inyo, kag paghidait, gikan sa Dios nga aton Amay, kag kay Ginoong Jesu-Cristo.2 Nagapasalamat kami sa Dios sa gihapon tungud sa inyo tanan, nga nagasambit sa inyo sa amon mga pangamuyo; 3 Nga wala nagauntat sa pagdumdum sang inyo buhat sang pagtoo, kag pagpangabudlay sang paghigugma, kag pagpailub sang paglaum sa aton Ginoong Jesu-Cristo, sa itololok sang Dios kag sang aton Amay; 4 Sa nahibaloan, mga kauturan nga hinigugma, ang pagpili sa inyo sang Dios. 5 Kay ang amon ebanghelyo wala mag-abut sa inyo sa polong lamang, kondi man sa gahum, kag sa Balaan nga Espiritu, kag sa bug-os nga pagsalig; subong nga nahibaloan ninyo kon ano nga sari sang mga tawo kami sa inyo tunga tungud sa inyo. 6 Kag kamo nanginsomolonod sa amon, kag sa Ginoo, sa pagbaton ninyo sang polong sa dakung kapipit-an, nga may kalipay sa Balaan nga Espiritu: 7 Sa bagay nga nanginhuwaran kamo sa tanan nga nagatoo sa Macedonia kag sa Acaya. 8 Kag gikan sa inyo ang polong sang Ginoo nagguub indi lamang sa Macedonia kag Acaya, kondi man sa tagsa ka duug naglapnag ang inyo pagtoo ayon sa Dios; sa bagay nga wala na kami sing kinahanglan maghambal sing bisan ano nga butang. 9 Kay sila ila nagapahayag nahanungud sa amon kon ano ang amon pagsulud sa inyo, kag kon paano ang pagliso ninyo pa Dios gikan sa mga diosdios sa pag-alagad sa buhi kag matuud nga Dios; 10 Kag sa paghulat sa iya Anak gikan sa langit, nga iya ginbanhaw gikan sa mga patay, nga si Jesus, nga nagluwas sa aton sa kasingkal nga magaabut. KAPITULO 2KAY kamo inyo, mga kauturan, nakahibalo nga ang amon pagsulud sa inyo, wala magmangin walay pulus:2 Apang bisan sa tapus kami nakaantus sing una, kag ginpakahuy-an sa Filipos, subong nga nahibaloan ninyo, nagmasidla kami sa aton Dios sa paghambal sa inyo sang ebanghelyo sang Dios sa dakung pagpakigsumpung. 3 Kay ang amon paglaygay indi gikan sa limbong, ukon sa pagkadimatinlo, ukon sa daya: 4 Kondi subong nga gintugutan kami sang Dios nga pagsaligan sang ebanghelyo, sa amo nagapamolong kami; indi nga nagapahamuut sa mga tawo, kondi sa Dios, nga nagatilaw sang amon mga tagiposoon. 5 Kay wala gid kami naggamit sing mga polong nga madinayawdayawon, subong nga inyo nahibaloan, ukon sing isa ka pamalibad sang pagkahamkonon; saksi ang Dios: 6 Kag wala kami nagpangita sang himaya gikan sa mga tawo, bisan gikan sa inyo, ukon sa iban, bisan pa nga sarang kami makapabug-at sa inyo, subong nga mga apostol ni Cristo. 7 Apang nagmalolo kami sa tunga ninyo, subong sang yaya nga nagabatiti sang iya mga anak: 8 Gani, sanglit nga nagahandum sa inyo sing mahigugmaon, nahamuut kami sa pagpaambit sa inyo, indi lamang sang ebanghelyo sang Dios, kondi man sang amon kaugalingon nga mga kalag, bangud nga nanginmahal gid kamo sa amon. 9 Kay, mga kauturan, nakadumdum kamo sang amon pagpangabudlay kag kasakit: kay sa nagapangabudlay kami sa gab-i kag adlaw, bangud nga indi kami buut nga magpabug-at sa bisan sin-o sa inyo, nagwali kami sa inyo sang ebanghelyo sang Dios. 10 Kamo mga saksi, kag ang Dios man, kon daw ano kabalaan kag katarung kag kadisalawayon ang amon paggawi ayon sa inyo nga nagatoo: 11 Sanglit nahibaloan ninyo kon paano kami naglaygay kag naglipay kag nagtulin sa tagsatagsa sa inyo, subong sang ginahimo sang isa ka amay sa iya mga anak, 12 Nga kamo maglakat sing takus sa Dios, nga nagtawag sa inyo sa iya ginharian kag himaya. 13 Sa sining kabangdanan kami man nagapasalamat sa Dios sa walay langan, bangud, sang pagbaton ninyo sang polong sang Dios nga inyo nabatian sa amon, ginbaton ninyo ini indi subong sang polong sang mga tawo, kondi subong nga amo ini sa pagkamatuud, ang polong sang Dios, nga nagapanghikot sing mabinungahon man sa inyo nga nagatoo. 14 Kay kamo, mga kauturan, nanginsomolonod sang mga iglesia sang Dios nga yadto sa Judea nga yara kay Cristo Jesus: kay kamo man nag-antus sang amo nga mga butang sa inyo kaugalingon nga mga kasimanwa, subong nga sila nag-antus sa mga Judio: 15 Nga nagpatay kay Ginoong Jesus, kag sang ila kaugalingon nga mga manalagna, kag naghingabut sa amon; kag wala sila nagapahamuut sa Dios, kag nagasumpung sa tanan nga tawo: 16 Nga nagadumili sa amon sa pagpamolong sa mga Gentil agud nga maluwas sila, sa pagpuno sa gihapon sang ila mga sala: kay ang kasingkal nag-abut sa ila tubtub sa ukbung. 17 Apang kami, mga kauturan, nga nahamulag sa inyo sa halip-ot nga tion, sa pag-atubang, indi sa tagiposoon, nagpaninguha kami sing labi pa gid nga may daku nga handum sa pagtan-aw sang inyo nawung. 18 Bangud sini buut kami kuntani makadto sa inyo, ako, si Pablo, sa liwat kag liwat; apang si Satanas nagsablag sa amon. 19 Kay ano bala ang amon paglaum, ukon kasadya, ukon purungpurung sang kalipay? Indi bala kamo gid sa atubangan sang aton Ginoong Jesu-Cristo sa iya pag-abut? 20 Kay kamo amo ang amon himaya kag kalipay. KAPITULO 3BUSA sang indi na kami makabatas, ginpakamaayo namon nga bayaan kami sa Atenas;2 Kag ginpadala namon si Timoteo, nga amon utud, kag ministro sang Dios, kag amon masigkamanugpangabudlay sa ebanghelyo ni Cristo, sa pagpalig-on sa inyo, kag sa paglipay sa inyo nahanungud sa inyo pagtoo: 3 Agud nga walay tawo nga mati-ong sining mga kapipit-an: kay kamo gid nakasayud nga mga pinanangdoan kita sa sini. 4 Kay sa pagkamatuud, sang kaupud kami ninyo, nagsugid kami sa inyo nga daan nga magaantus kita sing kangitngitan; subong nga ini nahanabu, kag kamo nakahibalo. 5 Sa sining kabangdanan, sang indi na ako makabatas, nagpadala ako agud nga makahibalo ako sang inyo pagtoo, basi kon sa anong bagay ang manunulay nagsulay sa inyo, kag ang amon pagpangabudlay nanginwalay pulus. 6 Apang karon sang pag-abut ni Timoteo sa amon gikan sa inyo, kag nagdala sa amon sing mga maayong balita sang inyo pagtoo kag diosnon nga gugma, kag sa gihapon may maayo kamo nga pagpanumdum sa amon, nga ginahidlaw sing daku sa pagpakigkita sa amon, subong nga kami man sa pagpakigkita sa inyo: 7 Busa, mga kauturan, nalipay kami nahanungud sa inyo sa tanan namon nga kapipit-an kag kasisit-an bangud sang inyo pagtoo: 8 Kay karon nagakabuhi kami, kon magtindug kamo sing malig-on sa Ginoo. 9 Kay ano bala nga mga pagpasalamat ang mahatag namon sa Dios liwat tungud sa inyo, bangud sang bug-os nga kalipay nga amon ginakalipay tungud sa inyo sa atubangan sang aton Dios; 10 Nga nagapangamuyo sing lakas gid sa gab-i kag adlaw nga makakita kami sa inyo nawung, kag mahimpit namon ang kakulangan sa inyo pagtoo? 11 Karon ang Dios gid kag aton Amay, kag ang aton Ginoong Jesu-Cristo, magtuytuy sang amon dalanon sa inyo. 12 Kag ang Ginoo magdugang kag magpabugana sa inyo sa gugma ang isa ayon sa isa, kag ayon sa tanan nga tawo, subong nga kami man ayon sa inyo: 13 Sa katuyoan nga mapalig-on niya ang inyo mga tagiposoon nga disalawayon sa pagkabalaan sa atubangan sang Dios, nga aton Amay, sa pag-abut sang aton Ginoong Jesu-Cristo kaupud sang tanan niya nga santo. KAPITULO 4NIYAN labut pa, mga kauturan, nagapakilooy kag nagalaygay kami sa inyo paagi kay Ginoong Jesus, nga subong sang naton-an ninyo sa amon kon paano nga dapat kamo maglakat kag magpahamuut sa Dios, sa amo magbugana kamo sing labi kag labi pa.2 Kay nahibaloan ninyo kon anong mga sogo ang amon ginhatag sa inyo paagi kay Ginoong Jesus. 3 Kay ini amo ang kabubut-on sang Dios, ang inyo pagkabalaan, nga maglikaw kamo sa pagpanghilawas: 4 Nga ang tagsatagsa sa inyo dapat makahibalo kon paano maghuput sang iya suludlan sa pagkabalaan kag kadungganan; 5 Indi sa kailigbon sang kaulag, subong nga mga Gentil nga wala makakilala sa Dios: 6 Nga walay tawo nga maglakbang kag maglimbong sa iya utud sa bisan ano nga butang: kay ang Ginoo amo ang manugtimalus sang tanan nga tagsubong sina, subong nga amon man ginpaandaman kamo nga daan kag ginpamatud-an. 7 Kay ang Dios wala magtawag sa aton nga sa pagkadimatinlo, kondi sa pagkabalaan. 8 Busa ang nagatamay, wala nagatamay sang tawo, kondi sang Dios, nga naghatag man sa aton sang iya balaan nga Espiritu. 9 Apang nahanungud sa gugma sa paghiliutud wala kamo sing kinahanglan nga ako magsulat sa inyo: kay kamo gid natudloan sang Dios nga maghigugmaanay ang isa kag isa. 10 Kag matuud gid ginahimo ninyo ini sa tanan nga kauturan nga yara sa bug-os nga Macedonia: apang nagalaygay kami sa inyo, mga kauturan, nga magbugana kamo sing labi kag labi pa; 11 Kag nga magtoon kamo sa pagpakalinong, kag sa paghimo sang inyo kaugalingon nga buluhaton, kag sa pagpangabudlay sa inyo kaugalingon nga mga kamut, subong nga gintugyanan kamo namon; 12 Agud nga maglakat kamo sing bunayag ayon sa mga sa gowa, kag agud nga indi kamo pagkulangan sang bisan ano. 13 Apang indi ako buut, mga kauturan, nga indi ninyo mahibaloan ang nahanungud sa ila nga mga nagakatolog, agud nga indi kamo magkasubu, subong sang iban nga walay paglaum. 14 Kay kon nagatoo kita nga si Jesus napatay kag nabanhaw, subong man sila nga nagakatolog kay Jesus pagadalhon sang Dios kaupud niya. 15 Kay ini ginasiling namon sa inyo paagi sa polong sang Ginoo, nga kita nga mga buhi kag nabilin tubtub sa pag-abut sang Ginoo indi mag-una sa ila nga mga nagakatolog. 16 Kay ang Ginoo gid magakunsad gikan sa langit nga may isa ka pagsinggit, sa tingug sang puno nga anghel, kag sa budyong sang Dios: kag ang mga napatay kay Cristo mabanhaw sing una: 17 Niyan kita nga mga buhi kag nabilin sabniton sing tingub upud sa ila paibabaw sa mga panganud, sa pagsugata sa Ginoo sa kahanginan: kag sa sini manginkaupud kita sing dalayon sa Ginoo. 18 Busa maglinipayay kamo ang isa kag isa sa sining mga polong. KAPITULO 5APANG nahanungud sa mga tion kag mga panag-on, mga kauturan, wala kamo sing kinahanglan nga sulatan ko kamo.2 Kay kamo gid nakahibalo sing sibo nga ang adlaw sang Ginoo magaabut subong sang isa ka makawat sa kagab-ihon. 3 Kay kon magsiling sila, Paghidait kag kalig-on; niyan ang hinali nga kalaglagan magaabut sa ila, subong nga ang kasakit sa pag-anak nagaabut sa babaye nga nagadala; kag indi sila makapalagyo. 4 Apang kamo, mga kauturan, wala sa kadudulman, nga pagkibuton kamo sinang adlaw subong sang isa ka makawat. 5 Kamo tanan mga anak sang kapawa, kag mga anak sang kaadlawon: indi kita iya sang kagab-ihon, ukon sang kadudulman. 6 Busa dili kita magtolog, subong sang iban; kondi magpulaw kita kag magbut-anan. 7 Kay ang mga nagakatolog nagatolog sa kagab-ihon; kag ang mga nagakahobog nagakahobog sa kagab-ihon. 8 Apang kita, nga iya sang kaadlawon, magbut-anan, nga ginasul-ub ang taming sa dughan sang pagtoo kag paghigugma; kag nga sa pandong, ang paglaum sang kaluwasan. 9 Kay wala kita pagtangdo-i sang Dios nga sa kasingkal, kondi sa pag-agum sang kaluwasan paagi sa aton Ginoong Jesu-Cristo, 10 Nga napatay tungud sa aton, agud nga, bisan kita nagamata ukon nagakatolog, magkabuhi kita kaupud niya. 11 Busa maglinipayay kamo tanan, kag maglinig-onay kamo ang isa kag isa, subong sang ginahimo ninyo man. 12 Kag ginapakilooy namon sa inyo, mga kauturan, nga magpangilala kamo sa ila nga nagapangabudlay sa tunga ninyo, kag nagatatap sa inyo sa Ginoo, kag nagalaygay sa inyo; 13 Kag pakamahala sila sing daku gid sa gugma bangud sang ila buhat. Kag magpakighidaitay kamo. 14 Karon nagalaygay kami sa inyo, mga kauturan, paandami sila nga mga malalison, palipayon ang mga mahuyang sing hunahuna, sakdagon ang mga maluya, magmapinailubon kamo ayon sa tanan nga tawo. 15 Andami nga wala sing magbalus sing malaut sa malaut sa bisan sin-o nga tawo; apang magtinguha sa gihapon sa paghimo sinang maayo, sa isa kag isa, kag sa tanan nga tawo. 16 Magkalipay sa gihapon. 17 Magpangamuyo sa walay langan. 18 Magpasalamat sa tagsa ka butang: kay ini amo ang kabubut-on sang Dios sa kay Cristo Jesus ayon sa inyo. 19 Dili pagpalongon ang Espiritu. 20 Dili pagtamayon ang mga pagpanagna. 21 Pagpamatud-an ninyo ang tanan nga mga butang; hupti sing malig-on inang maayo. 22 Maglikaw sa tagsa ka dagway sang kalautan. 23 Kag ang matuud nga Dios sang paghidait magpabalaan sa inyo sing bug-os; kag nagapangamuyo ako sa Dios nga pagtipigan ang inyo bug-os nga espiritu kag kalag kag lawas nga disalawayon tubtub sa pag-abut sang aton Ginoong Jesu-Cristo. 24 Matututm sia nga nagtawag sa inyo, nga magahimo man sini. 25 Mga kauturan, magpangamuyo kamo tungud sa amon. 26 Tamyawa ninyo ang tanan nga kauturan nga may balaan nga haluk. 27 Ginatulin ko sa inyo paagi sa Ginoo nga ining sulat basahon sa tanan nga balaan nga kauturan. 28 Ang bugay sang aton Ginoong Jesu-Cristo manginkaupud ninyo. Amen. ¶ Ang nahaunang sulat sa mga taga-Tesalonica ginsulat gikan sa Atenas. |