ANG NAHAUNANG SULAT NGA PANGKABUG-OSAN NIJUANKAPITULO 1INANG kutub sa ginsuguran, nga amon nabatian, nga amon nakita sang amon mga mata, nga amon natan-aw, kag nakaptan sang amon mga kamut, nahanungud sang Polong sang kabuhi;2 (Kay ang kabuhi ginpahayag, kag nakita namon ini, kag ginasaksihan, kag ginapakita sa inyo inang kabuhi nga walay katapusan, nga upud sa Amay, kag ginpahayag sa amon;) 3 Inang amon nakita kag nabatian ginasugid namon sa inyo, agud nga kamo man may paghiliupud upud sa amon: kag sa pagkamatuud ang aton paghiliupud upud sa Amay, kag upud sa iya Anak nga si Jesu-Cristo. 4 Kag ining mga butang ginasulat namon sa inyo, agud nga ang inyo kalipay mapuno. 5 Ini niyan amo ang mensahi nga nabatian namon sa iya, kag ginasugid sa inyo, nga ang Dios kapawa, kag sa iya wala gid sing kadudulman. 6 Kon magsiling kita nga may paghiliupud kita upud sa iya, kag nagalakat sa kadudulman, nagabutig kita, kag wala nagahimo sang kamatooran: 7 Apang kon nagalakat kita sa kapawa, subong nga sia yara sa kapawa, may paghiliupud kita sa isa kag isa, kag ang dugo ni Jesu-Cristo nga iya Anak nagatinlo sa aton sa tanan nga sala. 8 Kon magsiling kita nga wala kita sing sala, ginadayaan ta ang aton kaugalingon, kag ang kamatooran wala sa aton. 9 Kon ituad ta ang aton mga sala, matutum kag matarung sia sa pagpatawad sa aton sang aton mga sala, kag sa pagtinlo sa aton sa tanan nga pagkadimatarung. 10 Kon magsiling kita nga wala kita makasala, ginahimo ta sia nga butigon, kag ang iya polong wala sa aton. KAPITULO 2MAGAGMAY kong mga anak, nagasulat ako sa inyo sining mga butang, agud nga indi kamo magpakasala. Kag kon ang bisan sin-o nga tawo makasala, may mananabang kita sa Amay, si Jesu-Cristo nga matarung:2 Kag sia amo ang katumbasan tungud sang aton mga sala: kag indi lamang tungud sang aton, kondi man tungud sang mga sala sang bug-os nga kalibutan. 3 Kag sa sini nahibaloan ta nga nakakilala kita sa iya, kon ginahuptan ta ang iya mga sogo. 4 Sia nga nagasiling, Ako nakakilala sa iya, kag wala nagahuput sang iya mga sogo, butigon sia, kag ang kamatooran wala sa iya. 5 Apang ang bisan sin-o nga nagahuput sang iya polong, sa pagkamatuud ang gugma sang Dios nahimpit sa iya: sa sini nahibaloan ta nga yara kita sa iya. 6 Sia nga nagasiling nga nagapabilin sia sa iya dapat man maglakat, subong sang paglakat niya. 7 Mga kauturan, wala ako nagasulat sa inyo sing bag-ong sogo, kondi isa ka daan nga sogo nga nabaton ninyo kutub sa ginsuguran. Ang daan nga sogo amo ang polong nga inyo nabatian kutub sa ginsuguran. 8 Liwat, isa ka bag-ong sogo akon ginasulat sa inyo, nga ang among butang matuud sa iya kag sa inyo: bangud ang kadudulman nagtaliwan na, kag ang matuud nga kapawa karon nagasilak. 9 Sia nga nagasiling nga yara sia sa kapawa, kag nagadumut sang iya utud, yara sa kadudulman pa tubtub karon. 10 Sia nga nagahigugma sang iya utud nagapabilin sa kapawa, kag walay kahigayonan sang kasandad sa iya. 11 Apang sia nga nagadumut sang iya utud yara sa kadudulman, kag nagalakat sa kadudulman, kag wala makahibalo kon diin sia nagapakadto, bangud inang kadudulman nagabulag sang iya mga mata. 12 Nagasulat ako sa inyo, magagmay nga mga anak, bangud ang inyo mga sala napatawad sa inyo tungud sa iya ngalan. 13 Nagasulat ako sa inyo, mga amay, bangud nakakilala kamo sa iya nga kutub sa ginsuguran. Nagasulat ako sa inyo, mga pamatan-on nga lalaki, bangud nadaug ninyo ang malaut nga isa. Nagasulat ako sa inyo, magagmay nga mga anak, bangud nakilala ninyo ang Amay. 14 Nagsulat ako sa inyo, mga amay, bangud nakakilala kamo sa iya nga kutub sa ginsuguran. Nagsulat ako sa inyo, mga pamatan-on nga lalaki, bangud mabakud kamo, kag ang polong sang Dios nagapabilin sa inyo, kag nadaug ninyo ang malaut nga isa. 15 Dili ninyo paghigugmaon ang kalibutan, ukon ang mga butang nga yara sa kalibutan. Kon ang bisan sin-o nga tawo nagahigugma sang kalibutan, ang gugma sang Amay wala sa iya. 16 Kay ang tanan nga yara sa kalibutan, ang kailigbon sang unud, kag ang kailigbon sang mga mata, kag ang bugal sang kabuhi, indi iya sang Amay, kondi iya sang kalibutan. 17 Kag ang kalibutan nagataliwan, kag ang kailigbon sini: apang sia nga nagahimo sang kabubut-on sang Dios nagapadayon sa walay katapusan. 18 Magagmay nga mga anak, amo ining katapusan nga tion: kag sa nabatian ninyo nga magaabut ang anticristo, bisan sa karon may madamu nga mga anticristo; paagi sini nakahibalo kita nga amo ining katapusan nga tion. 19 Naghalin sila sa aton, apang indi sila tagaaton; kay kon sila tagaaton, sa wala pangduhaduha nagpadayon kuntani sila kaupud naton: apang naghalin sila, agud nga mapahayag sila nga sila tanan indi tagaaton. 20 Apang kamo may haplas gikan sa Balaan nga Isa, kag kamo nakahibalo sang tanan nga mga butang. 21 Nagsulat ako sa inyo, indi bangud wala ninyo mahibaloi ang kamatooran, kondi bangud nahibaloan ninyo ini, kag nga walay butig nga iya sang kamatooran. 22 Sin-o bala ang butigon kondi sia nga nagapanghiwala nga si Jesus amo ang Cristo? Sia anticristo, nga nagapanghiwala sang Amay kag sang Anak. 23 Ang bisan sin-o nga nagapanghiwala sang Anak, ang amo man wala sang Amay: apang] sia nga nagatuad sang Anak may iya sang Amay man. 24 Busa padayona sa inyo inang nabatian ninyo kutub sa ginsuguran. Kon inang nabatian ninyo kutub sa ginsuguran magpabilin sa inyo, kamo man magapabilin sa Anak, kag sa Amay. 25 Kag amo ini ang saad nga ginsaad niya sa aton, ang kabuhi nga walay katapusan. 26 Ining mga butang nasulat ko sa inyo nahanungud sa mga nagapatalang sa inyo. 27 Apang ang haplas nga nabaton ninyo sa iya nagapabilin sa inyo, kag wala kamo kinahanglan nga may bisan sin-o nga tawo nga magtudlo sa inyo: apang subong nga ang amo man nga haplas nagatudlo sa inyo nahanungud sa tanan nga mga butang, kag ini kamatooran, kag indi butig, kag sono sa gintudlo sini sa inyo, magapabilin kamo sa iya. 28 Kag karon, magagmay nga mga anak, magpabilin kamo sa iya; agud nga, kon magpahayag sia, may pagsalig kita, kag indi mahuya sa iya atubangan sa pag-abut niya. 29 Kon nahibaloan ninyo nga sia matarung, nakahibalo kamo nga ang tagsatagsa nga nagahimo sing pagkamatarung natawo sa iya. KAPITULO 3TAN-AWA ninyo, kon daw ano nga gugma ang ginhatag sang Amay sa aton, nga pagtawgon kita nga mga anak nga lalaki sang Dios: gani ang kalibutan wala makakilala sa aton, bangud wala ini makakilala sa iya.2 Mga hinigugma, karon mga anak nga lalaki kita sang Dios, kag wala pa mapahayag kon mangin-ano kita: apang aton nahibaloan, nga kon magpahayag sia, manginkaangay kita niya; kay makita naton sia subong nga amo sia. 3 Kag ang tagsa ka tawo nga may iya sining paglaum sa iya nagapaputli sang iya kaugalingon, subong nga sia putli. 4 Ang bisan sin-o nga nagapakasala nagalapas man sang kasogoan: kay ang sala amo ang paglapas sa kasogoan. 5 Kag nahibaloan ninyo nga sia ginpahayag sa pagkuha sang aton mga sala; kag sa iya walay sala. 6 Ang bisan sin-o nga nagapabilin sa iya wala nagapakasala: ang bisan sin-o nga nagapakasala wala makakita sa iya, ukon nakakilala sa iya. 7 Mga magagmay nga anak, indi kamo magpadaya sa bisan kay sin-o: sia nga nagahimo sing pagkamatarung matarung, subong nga sia matarung. 8 Sia nga nagapakasala iya sang yawa; kay ang yawa nagapakasala kutub sa ginsuguran. Sa sining katuyoan ginpahayag ang Anak sang Dios, agud nga malaglag niya ang mga binuhatan sang yawa. 9 Ang bisan sin-ong natawo sa Dios wala nagapakasala; kay ang iya binhi nagapabilin sa iya: kag indi sia makasala, bangud natawo sia sa Dios. 10 Sa sini ginapahayag ang mga anak sang Dios, kag ang mga anak sang yawa: ang bisan sin-o nga wala nagahimo sing pagkamatarung indi iya sang Dios, amo man ang wala nagahigugma sang iya utud. 11 Kay amo ini ang mensahi nga nabatian ninyo kutub sa ginsuguran, nga dapat maghigugmaanay kita ang isa kag isa. 12 Indi kaangay kay Cain, nga gikan sinang malaut nga isa, kag nagpatay sang iya utud. Kag ngaa bala nga ginpatay niya sia? Bangud nga ang iya kaugalingon nga mga binuhatan malaut, kag ang iya sang iya utud matarung. 13 Indi kamo matingala, mga kauturan ko, kon ang kalibutan nagadumut sa inyo. 14 Nakahibalo kita nga nagliton kita gikan sa kamatayon pa kabuhi, bangud ginahigugma ta ang mga kauturan. Sia nga wala nagahigugma sang iya utud nagapabilin sa kamatayon. 15 Ang bisan sin-o nga nagadumut sang iya utud manugpatay: kag nakahibalo kamo nga walay manugpatay nga may kabuhi nga walay katapusan nga nagapabilin sa iya. 16 Sa sini nahantup naton ang gugma sang Dios, bangud ginhatag niya ang iya kabuhi tungud sa aton: kag dapat naton ihatag ang aton mga kabuhi tungud sa mga kauturan. 17 Apang ang bisan sin-o nga may pangabuhian sining kalibutan, kag nagatan-aw sa iya utud nga yara sa kakulangan, kag nagapugung sang iya igbalatyag nga pagkaawa sa iya, paano bala ang pagpuyo sang gugma sang Dios sa iya? 18 Magagmay kong mga anak, dili kita maghigugma sa polong, ukon sa dila; kondi sa buhat kag sa kamatooran. 19 Kag sa sini nahibaloan naton nga kita iya sang kamatooran, kag mapalig-on ang aton mga tagiposoon sa atubangan niya. 20 Kay kon ang aton tagiposoon nagatagudili sa aton, ang Dios daku pa sa aton tagiposoon, kag nakahibalo sang tanan nga mga butang. 21 Mga hinigugma, kon ang aton tagiposoon wala nagatagudili sa aton, niyan may pagsalig kita ayon sa Dios. 22 Kag ang bisan ano nga aton ginapangayo, mabaton ta sa iya, bangud ginahuptan ta ang iya mga sogo, kag nagahimo sinang mga butang nga kalahamut-an sa iya itololok. 23 Kag ini amo ang iya sogo, Nga magtoo kita sa ngalan sang iya Anak nga si Jesu-Cristo, kag maghigugmaanay ang isa kag isa, sono sa ginsogo niya sa aton. 24 Kag sia nga nagahuput sang iya mga sogo nagapuyo sa iya, kag sia sa iya. Kag sa sini nahibaloan ta nga nagapabilin sia sa aton, paagi sa Espiritu nga ginhatag niya sa aton. KAPITULO 4MGA HINIGUGMA, dili ninyo pagtoohan ang tagsa ka espiritu, kondi tilawi ang mga espiritu kon sila iya sang Dios: bangud madamu ang dimatuud nga mga manalagna nga naglapnag sa kalibutan.2 Sa sini mahibaloan ninyo ang Espiritu sang Dios: Ang tagsa ka espiritu nga nagatuad nga si Jesu-Cristo nakaabut sa unud iya sang Dios: 3 Kag ang tagsa ka espiritu nga wala nagatuad nga si Jesu-Cristo nakaabut sa unud indi iya sang Dios: kag ini amo inang espiritu sang anticristo, nga inyo nabatian nga magaabut; kag bisan karon yari na ini sa kalibutan. 4 Mga magagmay nga anak, iya kamo sang Dios, kag nadaug ninyo sila: bangud sia nga yara sa inyo daku pa sa iya nga yara sa kalibutan. 5 Sila iya sang kalibutan: busa nagahambal sila sang iya sang kalibutan, kag ang kalibutan nagapamati sa ila. 6 Kita iya sang Dios: sia nga nakakilala sa Dios nagapamati sa aton; sia nga indi iya sang Dios wala nagapamati sa aton. Sa sini nahibaloan ta ang espiritu sang kamatooran, kag ang espiritu sang kasaypanan. 7 Mga hinigugma, maghigugmaanay kita ang isa kag isa: kay ang gugma gikan sa Dios; kag ang tagsatagsa nga nagahigugma natawo sa Dios, kag nakakilala sa Dios. 8 Sia nga wala nagahigugma wala makakilala sa Dios; kay ang Dios gugma. 9 Sa sini ginpahayag sa aton ang gugma sang Dios, bangud nga ginpadala sang Dios sa kalibutan ang iya bugtong nga ginpanganak nga Anak, agud nga magkabuhi kita paagi sa iya. 10 Sa sini amo ang gugma, indi nga ginhigugma naton ang Dios, kondi nga ginhigugma niya kita, kag ginpadala ang iya Anak nga mangin katumbasan tungud sa aton mga sala. 11 Mga hinigugma, kon ang Dios naghigugma gid sa aton, kita man dapat maghigugmaanay ang isa kag isa. 12 Wala sang tawo nga nakakita sa Dios sa bisan ano nga tion. Kon maghigugmaanay kita ang isa kag isa, ang Dios nagapuyo sa aton, kag ang iya gugma ginahimpit sa aton. 13 Sa sini nakahibalo kita nga kita nagapuyo sa iya, kag sia sa aton, bangud ginhatagan niya kita sang iya Espiritu. 14 Kag nakita namon kag ginasaksihan nga ang Amay nagpadala sang Anak nga mangin Manluluwas sang kalibutan. 15 Ang bisan sin-o nga magtuad nga si Jesus amo ang Anak sang Dios, ang Dios nagapuyo sa iya, kag sia sa Dios. 16 Kag nahibaloan ta kag natoohan ang gugma nga may iya ang Dios ayon sa aton. Ang Dios gugma; kag sia nga nagapuyo sa gugma nagapuyo sa Dios, kag ang Dios sa iya. 17 Sa sini ginhimpit ang aton gugma, agud nga may pagsalig kita sa adlaw sang paghukom: bangud subong nga amo sia, amo man kita sa sining kalibutan. 18 Sa gugma walay kahadluk; kondi ang himpit nga gugma nagasobol sang kahadluk: bangud ang kahadluk may kasakit. Sia nga nagakahadluk wala mahimpit sa gugma. 19 Nagahigugma kita sa iya, bangud sia naghigugma sa aton sing una. 20 Kon ang isa ka tawo nagasiling, Ako nagahigugma sa Dios, kag nagadumut sang iya utud, butigon sia: kay sia nga wala nagahigugma sang iya utud nga iya makita, paano bala nga sarang sia makahigugma sa Dios nga wala niya makit-i? 21 Kag ining sogo aton nabaton sa iya, Nga sia nga nagahigugma sa Dios maghigugma sang iya utud man. KAPITULO 5ANG bisan sin-o nga nagatoo nga si Jesus amo ang Cristo natawo sa Dios: kag ang tagsatagsa nga nagahigugma sa iya nga nagpanganak nagahigugma man sa iya nga ginpanganak niya.2 Sa sini aton nahibaloan nga nagahigugma kita sa mga anak sang Dios, kon nagahigugma kita sa Dios, kag nagahuput sang iya mga sogo. 3 Kay ini amo ang gugma sang Dios, nga huptan naton ang iya mga sogo: kag ang iya mga sogo indi mabug-at. 4 Kay ang bisan ano nga natawo sa Dios nagadaug sang kalibutan: kag ini amo ang pagdaug nga nagadaug sang kalibutan, ang aton pagtoo. 5 Sin-o bala ang nagadaug sang kalibutan, kondi ang nagatoo nga si Jesus amo ang Anak sang Dios? 6 Ini sia amo ang nagkari paagi sa tubig kag dugo, si Jesu-Cristo; indi paagi sa tubig lamang, kondi paagi sa tubig kag dugo. Kag ang Espiritu amo ang nagasaksi, bangud ang Espiritu kamatooran. 7 Kay may tatlo nga nagasaksi sa langit, ang Amay, ang Polong, kag ang Balaan nga Espiritu: kag ining tatlo isa. 8 Kag may tatlo nga nagasaksi sa duta, ang Espiritu, kag ang tubig, kag ang dugo: kag ining tatlo nagahilisugut sa isa. 9 Kon ginabaton ta ang panaksi sang mga tawo, ang panaksi sang Dios daku pa: kay ini amo ang panaksi sang Dios nga ginsaksi niya nahanungud sa iya Anak. 10 Sia nga nagatoo sa Anak sang Dios may panaksi sa iya kaugalingon: sia nga wala nagatoo sa Dios nagahimo sa iya nga butigon; bangud wala sia nagatoo sa panaksi nga ginhatag sang Dios nahanungud sa iya Anak. 11 Kag ini amo ang panaksi, nga ang Dios naghatag sa aton sing kabuhi nga walay katapusan, kag ining kabuhi yara sa iya Anak. 12 Sia nga yara sa iya ang Anak may kabuhi; kag sia nga wala sa iya ang Anak sang Dios wala sang kabuhi. 13 Ining mga butang nasulat ko sa inyo nga nagatoo sa ngalan sang Anak sang Dios; agud nga mahibaloan ninyo nga kamo may kabuhi nga walay katapusan, kag agud nga magtoo kamo sa ngalan sang Anak sang Dios. 14 Kag ini amo ang pagsalig nga may aton kita sa iya, nga, kon magpangayo kita sing bisan anong butang sono sa iya kabubut-on, nagapamati sia sa aton: 15 Kag kon nahibaloan ta nga nagapamati sia sa aton, ang bisan ano nga aton ginapangayo, nahibaloan ta nga nabaton naton ang mga pangabay nga aton ginpangayo sa iya. 16 Kon ang bisan sin-o nga tawo makakita sa iya utud nga nagapakasala sing sala nga indi sa kamatayon, magapangayo sia, kag sia magahatag sa iya sing kabuhi tungud sa mga nagapakasala nga indi sa kamatayon. May sala nga sa kamatayon: wala ako nagasiling nga sia magpangamuyo tungud sini. 17 Ang tanan nga pagkadimatarung sala: kag may sala nga indi sa kamatayon. 18 Nakahibalo kita nga ang bisan sin-o nga natawo sa Dios wala nagapakasala; kondi sia nga ginpanganak sang Dios nagaandam sang iya kaugalingon, kag inang malaut nga isa wala nagatandug sa iya. 19 Kag nakahibalo kita nga kita iya sang Dios, kag ang bug-os nga kalibutan nahamtang sa kalautan. 20 Kag nakahibalo kita nga nagkari ang Anak sang Dios, kag naghatag sa aton sing paghangup, nga makilala naton sia nga matuud, kag yara kita sa iya nga matuud, sa iya Anak nga si Jesu-Cristo. Ini amo ang matuud nga Dios, kag ang kabuhi nga walay katapusan. 21 Mga magagmay nga anak, maglikaw kamo sa mga diosdios. Amen. |