Philippians

Fî-li̍p-pí 1

1 Kî-tuk Yâ-sû ke phu̍k-ngìn Pó-lò lâu Thì-mô-thai siá sin-é pûn he̍t chhai Fî-li̍p-pí ke Song-ti ke chṳ́-mìn, chhiu-he su̍k Kî-tuk Yâ-sû ke chung sṳn-thù, pin ke-têu kam-tuk lâu chṳp-sṳ. 2 Ngien ngài-têu ke Â-pâ Song-ti lâu Chú Yâ-sû Kî-tuk su ên-tién, phìn-ôn pûn ngì-têu! 3 Tak-pái sióng-tó ngì-têu, ngài chhiu kám-chhia ngài ke Song-ti, 4 tak-pái vi ngì thai-kâ khì-tó, ngài chhiu mân-sîm fôn-hí; 5 yîn-vi tui thèu-yit-ngit to liá-ha, ngì-têu yit-chhṳ̍t chhai chhòn fuk-yîm ke kûng-chok-song pông-chhu ngài. 6 Ngài chhṳ̂m-sin, chhai ngì-têu chûng-kiên sṳ́ liá án chiâng ke kûng-chok khôi-sṳ́ ke Song-ti, yit-thin voi sṳ́ liá-ke kûng-chok ki-siu̍k hâ-hi, chhṳ̍t-to Kî-tuk Yâ-sû chai-lòi ke-ngit tet-tó vàn-sṳ̀n. 7 Ngì-têu thai-kâ sòng-sòng chhai ngài ke sîm-kôn tî-poi! Ngài sióng-ngiam ngì-têu he tông-yèn ke sṳ; yîn-vi, mò-lun he liá-ha ngài chhai kâm-ngiu̍k tú, ya-he thèu-pái ngài chhṳ-chhṳ yù-yù vi fuk-yîm phien-fu lâu cho-chṳn ke-sṳ̀, ngì-têu lûng-chúng yû-fun chhai Song-ti só su pûn ngài ke ên-tién. 8 Song-ti cho-tet vi ngài cho-chṳn: Chhiong Kî-tuk Yâ-sû thung-siak ngì-têu, ngài chhṳ̂m-chhṳ̂m sióng-ngiam ngì-têu thai-kâ ke sîm-chhìn ya he khiung-yong! 9 Ngài só khì-tó ke chhiu-he ngì-têu ke oi-sîm voi yit-chhṳ̍t thùng chṳ̂n ke chṳ-sṳt lâu phan-ton ke nèn-li̍t khiung-ha chóng-chin, 10 pûn ngì-têu yû fap-thu sién-tó ke chui-hó ke. Án-ngiòng, ngì-têu voi cho sùn-kiet mò hó hiàm ke ngìn, chhṳ̍t-to Kî-tuk chai-lòi ke-ngit. 11 Ngì-têu ke sên-fa̍t voi chhûng-mân thûng-ko Yâ-sû Kî-tuk chang khó-nèn kiet ke yìn-ngi ke kó-chṳ́, lòi yùng-kông chan-mî Song-ti. 12 Hiûng-thi chí-moi â, ngài oi ngì-têu tî, ngài só tù-tó ke sṳ fán-chón chhiuk-sṳ̀n fuk-yîm ke khok-chán. 13 Kiet-kó, vòng-kiûng kín-ví-chhui chhiòn-thí, lâu chhai liá-vi só-yû khì-thâ ke ngìn, lûng-chúng tî ngài he yîn-vi Kî-tuk ke yèn-ku chhô-kâm ke. 14 Ngài chhô-kâm, sa pûn thai-phu-fun ke hiûng-thi chí-moi tui Chú kien-kâ yû sin-sîm, ye̍t-fat yúng-kám chhòn-yòng Song-ti ke chṳ̂n-tho, chhiòn mò kiâng má-ke. 15 Tông-yèn, yû-têu ngìn chhòn-yòng Kî-tuk he chhut-yì chhit-tu lâu hau-teu ke sîm-lî, chúng-he ya yû-têu he sṳ̀n-sîm sṳ̀n-yi ke. 16 Liá-têu yîn-vi oi-sîm chhòn fuk-yîm ke ngìn lûng-chúng tî, Song-ti kâu-pûn ngài ke sṳ́-min chhiu-he vi fuk-yîm phien-fu. 17 Khì-thâ ke ngìn chhòn Kî-tuk, thung-kî mò sùn-chṳn, he chhut-yì yâ-sîm; kì-têu sióng-oi chhai ngài chhô-kâm ke sṳ̀ chen-kâ ngài ke thung-khú. 18 Chúng-he, liá yû má-ke koân-he nè? Mò-lun kì-têu ke thung-kî chho̍k ya-he m̀-chho̍k, Kî-tuk hàn-he pûn-ngìn chhòn khôi-lòi. Yîn-vi án-ngiòng, ngài chhiu chhin fôn-hí. Ngài hàn oi ki-siu̍k fôn-hí; 19 yîn-vi ngài tî, thûng-ko ngì-têu ke khì-tó lâu Yâ-sû Kî-tuk ke Lìn ke pông-chhu, ngài yit-thin voi tet-tó sṳt-fong. 20 Ngài pet-chhiet hot-mu lâu phan-mong ke chhiu-he: Ngài m̀-voi khûi-fu ngài ke chit-ngim, fán-chón sṳ̀-sṳ̀ khiet-khiet, thi̍t-phe̍t he liá-ha, voi yû la-ngiak ke yúng-hi, mò-lun sâng-sí, yung ngài kûi-ke ngìn lòi yùng-kông Kî-tuk. 21 Yîn-vi tui ngài lòi kóng, ngài sâng he vi-tó Kî-tuk, sí chhiu yû thai fuk-hi! 22 Chúng-he, na-he ngài sâng-hâ-hi nèn kâ cho têu yû li-yit ke kûng-chok, ngài chhiu m̀-tî oi ngióng-pân kiet-thin. 23 Ngài chhai lióng-nàn ke chûng-kiên: Ngài chhin oi lì-khôi liá sṳ-kiên, hi thùng Kî-tuk khiung-ha, liá he chui-hó ke sṳ; 24 chúng-he vi-tó ngì-têu, ngài sâng-hâ-hi kha yeu-kín. 25 Liá he ngài chhṳ̂m-sin ke, só-yî ngài tî ngài voi sâng-hâ-hi. Ngài oi thùng ngì-têu thai-kâ khiung-ha, pông-chhu ngì-têu chhai sin-ngióng-song yu chóng-chin yu khoai-lo̍k, 26 án-ngiòng, ngài thùng ngì-têu chai kien-mien ke sṳ̀, ngì-têu chhai Kî-tuk Yâ-sû tî-poi ke fôn-hí chhiu voi ye̍t-fat chen-kâ. 27 Chui chhung-yeu ke, ngì-têu ke sên-fa̍t oi ha̍p Kî-tuk ke fuk-yîm só yêu-khiù ke. Án-ngiòng, mò-lun ngài he chhîn-sṳ̂n hi khon ngì-têu, ya-he tui phe̍t-ngìn thâng-kóng ngì-têu ke chhìn-hìn, ngài voi tî ngì-têu yû khiung-thùng ke muk-phêu, khî-to chhai-chhai, thùng-sîm hia̍p-li̍t vi fuk-yîm ke sin-ngióng lòi tá-piang. 28 Fàm-sṳ tû m̀-sṳ́ kiâng thi̍t-ngìn ke khiúng-hak; oi yúng-kám, yung án-ngiòng lòi tui kì-têu chṳn-mìn, kì-têu yit-thin voi me̍t-mòng, ngì-têu yit-thin voi tet-kiu, yîn-vi liá he Song-ti só kiet-chhài ke. 29 Ngì-têu yí-kîn tet-tó thi̍t-phe̍t ke ên-tién lòi sṳ-fung Kî-tuk, m̀ tân-chhiang oi sin kì, ya oi vi kì su-khú. 30 Liá-ha, ngì-têu cho-tet thùng ngài khiung-ha chok-chan; liá chan-chên ngì-têu sṳt khon ngài tá-ko, ya thâng-kóng ngài hàn chhai liá-vi ki-siu̍k chok-chan.

Fî-li̍p-pí 2

1 Só-yî, ki-yèn ngì-têu chhai Kî-tuk tî-poi ke sâng-miang sṳ́ ngì-têu kha kiên-khiòng, kì ke thung-siak kú-li ngì-têu, ngì-têu lâu Sṳn-Lìn yû kâu-thûng, ngì-têu ya yû chhṳ̀-pî lâu lìn-mén ke sîm, 2 ngì-têu chhiu oi yû khiung-thùng ke sîm-chṳ, khiung-yong ke oi-sîm, siông-thùng ke chhìn-kám, lâu yit-chṳ ke sióng-fap, hó pûn ngài chhûng-mân fôn-hí. 3 M̀-hó chhṳ-sṳ̂ chhṳ-li ya-he chhṳ-kô chhṳ-thai, fán-chón oi pí-chhṳ́ khiâm-pî, khon phe̍t-ngìn pí chhṳ-kâ kha kô-mìn. 4 M̀-hó tân-chhiang ku chhṳ-kâ, ya oi koân-sîm phe̍t-ngìn ke sṳ. 5 Ngì-têu oi yung Kî-tuk Yâ-sû ke sîm cho ho̍k-si̍p ke mù-fam: 6 Kì pún-lòi chhiu yû Song-ti ke pún-chṳt, chúng-he m̀-sṳt lam-yung kì thùng Song-ti khiung-yong ke thi̍t-khièn. 7 Tiên-to, kì chhṳ-ngien piong-thet yit-chhiet, chhí nù-phu̍k ke pún-chṳt. Kì sàng-cho ngìn, yung ngìn ke hìn-thí chhut-hien. 8 Kì chhṳ-kâ kâm-ngien pî-mì, sun-fu̍k to sí, yu sí chhai sṳ̍p-sṳ-ka-táng. 9 Só-yî, Song-ti sṳ́ kì kô-sṳ̂n to chṳ-kô, su-pûn kì ke chhêu-ko van-miàng ke miàng; 10 sṳ́ thiên-táng, thi-song lâu thi-tái-hâ ke chung-sên, yit thâng-tó Yâ-sû ke miàng, chhiòn-phu chhiu khúi lo̍k-hi, 11 chung khiéu ko-pha̍k kóng: "Yâ-sû Kî-tuk he Chú!" kûi yùng-kông pûn Â-pâ Song-ti. 12 Só-yî, chhîn-oi ke phèn-yû, ngài thùng ngì-têu khiung-ha ke sṳ̀, ngì-têu sòng-sòng thâng-chhiùng ngài; liá-ha ngài mò chhai ngì-têu ke-vi, ngì-têu hàn-kha oi thâng ngài ke fa. Ngì-têu oi kiâng-kiâng lu̍k-lu̍k, yit-chhṳ̍t tá-piang lòi vàn-sṳ̀n ngì-têu chhṳ-kâ ke tet-kiu; 13 yîn-vi he Song-ti sòng-sòng chhai ngì-têu sîm-kôn-tú yun-hàng, sṳ́ ngì-têu yu kâm-ngien yu nèn sṳ̍t-hàng Kì mî-san ke chṳ́-yi. 14 Ngì-têu mò-lun cho má-ke, m̀-hó mài-yen ya-he chên-lun, 15 hó pûn ngì-têu sàng-cho sùn-kiet sṳ̀n-sṳ̍t ke ngìn, chhai liá fú-phai, chhui-ok ke sṳ-thoi chûng, cho Song-ti mò khiet-tiám ke chṳ́-ńg. Ngì-têu oi chhai sṳ-kiên-ngìn tông-chûng fat-kông, chhiong sên-é cheu-kông thiên-táng, 16 chiông sâng-miang ke tho chhòn-pûn kì-têu. Ngì-têu na-he án-ngiòng cho, chhai Kî-tuk chai-lòi ke-ngit, ngài chhiu yû hó khoâ-khiéu lé, yîn-vi liá voi chṳn-mìn ngài mò chéu ngong-lu, mò cho ngong-se. 17 Khó-nèn ngài oi yung chhṳ-kâ ke hiet cho chi-chiú, lòi lìm chhai ngì-têu yung sin-sîm hien-pûn Song-ti ke chi-vu̍t-táng. Na-he án-ngiòng, ngài ya chhin fôn-hí, thùng-sṳ̀, ngài oi thùng ngì-têu thai-kâ fûn-hióng ngài ke fôn-hí. 18 Khiung-yong, ngì-têu ya oi fôn-fôn hí-hí, pûn ngài ya fûn-hióng ngì-têu ke fôn-hí. 19 Ngài kho Chú Yâ-sû, hî-mong mò kí-kiú heu, ngài cho-tet phai Thì-mô-thai hi ngì-têu ke-vi, chiông ngì-têu ke sêu-sit tai-chón-lòi pûn ngài, pûn ngài tet-tó ôn-ví. 20 Kì he vì-yit lâu ngài thùng-sîm, yu chṳn-kîn koân-sîm ngì-têu ke ngìn. 21 Phe̍t-ngìn lûng-chúng vi chhṳ-kâ ke sṳ tá-son, mò koân-sîm Yâ-sû Kî-tuk ke sṳ-chhìn. 22 Chúng-he ngì-têu chhîn-chhú tî Thì-mô-thai ke cho-ngìn: Kì thùng ngài chhiu-chhiong lai-é lâu â-pâ, vi-tó fuk-yîm, khiung-ha sîn-khú kûng-chok. 23 Tén ngài yit tî chhṳ-kâ ke kiet-khiu̍k voi ngióng-pân ke sṳ̀, ngài hî-mong phai-hi khon ngì-têu ke chhiu-he kì. 24 Ngài kho Chú chhṳ-sin chhai tón sṳ̀-kiên-nui ya voi chhîn-sṳ̂n hi khon ngì-têu. 25 Ngài sióng, ngài yin-kôi sung ngài-têu ke hiûng-thi Yî-pâ-fut-thì chón ngì-têu ke-vi hi. Ngì-têu sién-phai kì lòi thùng ngài then-sú, khiung-ha kûng-chok, khiung-ha chok-chan. 26 Kì tông sióng-ngiam ngì-têu thai-kâ; sîm-kôn ya chhin m̀-ko-yi, yîn-vi tî ngì-têu thâng-tó kì pot-phiang lé. 27 Kì yû-yáng sṳt pot-phiang, hiám-hiám sí-thet. Chúng-he Song-ti lìn-mén kì, m̀ tân-chhiang lìn-mén kì, ya he lìn-mén ngài, pûn ngài m̀-sṳ́ tù-tó kien-tô ke yù-sông. 28 Só-yî, ngài hàn-kha sióng-oi kón-kín sung kì chón-hi, pûn ngì-têu fôn-fôn hí-hí thùng kì chhi-si̍p; án-ngiòng, ngài ke yù-sông ya voi kám-séu. 29 Ngì-têu oi chhai Chú ke tî-poi fôn-fôn hí-hí chiap-thai kì. Ngì-têu oi chûn-chhung chhiong kì án-ngiòng ke ngìn; 30 yîn-vi kì vi-tó Kî-tuk ke kûng-chok mo sâng-miang ke ngùi-hiám, hiám-hiám sí-thet, vi-tó oi pú-chiuk ngì-têu mò fap-thu fu̍k-sṳ ngài ke só-chhai.

Fî-li̍p-pí 3

1 Hiûng-thi chí-moi â, chúng-kóng: Ngì-têu oi yîn-vi thùng Chú kiet-lièn lòi fôn-hí! Ngài chiông liá-têu fa chai siá pûn ngì-têu, tui ngài he mò mà-fàn, tui ngì-têu ya he thó-tong. 2 Ngì-têu oi thì-fòng ke-têu chok-ok ke ngìn, ke-têu fù-khiùn kiéu-tóng, chhiu-he ke-têu kiên-chhṳ̀ oi kot chhṳ-kâ sṳ̂n-thí ke ngìn. 3 Khì-sṳ̍t, chiap-su chṳ̂n kot-lî ke, m̀-he kì-têu, he ngài-têu; yîn-vi ngài-têu he thûng-ko Song-ti ke Lìn lòi kin-pai, só khoâ-khiéu ke he Kî-tuk Yâ-sû, m̀-he yí-kho ngoi-péu ke lî-ngì. 4 Khì-sṳ̍t, ngài ya cho-tet kho ngoi-péu ke lî-ngì. Na-he yû-ngìn láu-tó kì cho-tet kho ngoi-péu ke lî-ngì, ngài hàn-kha cho-tet án-ngiòng cho. 5 Ngài chhut-se thi-pat-ngit chhiu su kot-lî. Ngài sên-lòi chhiu he Yî-set-lie̍t-ngìn, su̍k Phien-ngâ-mén kî-chhu̍k, he hiet-thúng sùn-chṳn ke Hî-pak-lòi-ngìn. Tui chûn-sú Yù-thai-kau kau-kûi liá-tiám lòi kóng, ngài he su̍k Fap-li-soi-phai; 6 tui ngie̍t-sîm lòi kóng, ngài sṳt pet-hoi kau-fi; tui chûn-sú fap-li̍t chhiu son he ngi lòi kóng, ngài mò má-ke hó pûn-ngìn chit-phi ke. 7 Chúng-he, thèu-pái ngài ngin-vì yû li-yit ke yit-chhiet, liá-ha vi-tó Kî-tuk ke yèn-ku, ngài chhiòn-phu khon-cho he sún-hoi. 8 M̀ tân-chhiang án-ngiòng, ngài kien chiông van-sṳ lûng-chúng khon-cho sún-hoi, yîn-vi ngài khon ngin-sṳt ngài ke Chú Kî-tuk Yâ-sû cho chui pó-kui ke. Só-yî, ngài chiông yit-chhiet chún-cho lá-sap fit-thet, vi-tó oi tet-tó Kî-tuk, 9 vàn-chhiòn thùng kì kiet-lièn. Ngài só-yû ke m̀-he chhṳ-kâ tui sú fap-li̍t lòi tet-tó ke ngi, he thûng-ko sin Kî-tuk só liâng-su ke ngi; liá-ke ngi he phìn sin-sîm tui Song-ti lòi liâng-su ke. 10 Ngài yit-chhiet só phan-mong ke chhiu-he ngin-sṳt Kî-tuk, thí-ngiam kì fu̍k-fa̍t ke nèn-li̍t, fûn-tâm kì ke khú-nan, háu-fap kì ke sí, 11 hî-mong tui án-ngiòng ngài chhṳ-kâ ya voi tui sí fu̍k-fa̍t. 12 Liá m̀-he kóng ngài yí-kîn sṳ̀n-kûng, ya-he yí-kîn vàn-chhiòn lé. Ngài ki-siu̍k kín chéu, oi tet-tó ke chióng-sóng; khì-sṳ̍t, vi-tó oi pûn ngài tha̍t-sṳ̀n liá-ke muk-phêu, Kî-tuk Yâ-sû yí-kîn siên sṳ́ ngài kûi-su̍k kì. 13 Hiûng-thi chí-moi â, ngài m̀-kám kóng ngài yí-kîn tet-tó ke chióng-sóng; ngài chṳ́-yû chôn-sîm yit-khien sṳ: Chhiu-he m̀ ki-tet heu-poi, chhiòn-li̍t chûi-khiù thèu-chhièn ke sṳ. 14 Ngài hiong muk-phêu chhṳ̍t-chhṳ̍t kín chéu, vi-tó oi tet-tó chióng-sóng; liá chióng-sóng chhiu-he su̍k-thiên ke sîn sâng-miang, he Song-ti thûng-ko Kî-tuk Yâ-sû fû-seu ngài hi liâng-su ke. 15 Só-yî, ngài-têu chûng-kiên só-yû lìn-sin sṳ̀n-su̍k ke ngìn, chhiòn-phu oi yû liá-chúng ke sîm-chṳ; na-he ngì-têu yû phe̍t-yong ke khon-fap, Song-ti ya voi chhîn-chhîn chhú-chhú chṳ́-sṳ ngì-têu. 16 Mò-lun ngióng-pân, ngài-têu oi cheu ngài-têu yit-tán só chûn-sú ke kûi-kí hiong-chhièn hàng. 17 Hiûng-thi chí-moi â, ngì-têu oi ki-siu̍k háu-fap ngài. Ngài-têu yí-kîn vi ngì-têu cho póng-yong; ngì-têu oi ngin-chṳ̂n ho̍k ke-têu háu-fap ngài-têu ke ngìn. 18 Ngài yí-kîn khien ngì-têu hó-tô pái, liá-ha ngài liù muk-chṳp chai yit-pái khien-va ngì-têu: Yû-têu ngìn ke hàng-vì sṳ́ kì-têu sàng-cho Kî-tuk sṳ̍p-sṳ-ka ke sù-thi̍t. 19 Kì-têu ke kiet-khiu̍k he me̍t-mòng, yîn-vi kì-têu ke sṳ̀n chhiu-he chhṳ-kâ ke tú-sṳ́. Kì-têu nâ chhṳ-kâ kien-seu ke sṳ lòi khoâ-khiéu, só sióng ke mò yit-hong m̀-he sṳ-kiên ke sṳ. 20 Chúng-he, ngài-têu he thiên-táng ke kûng-mìn; ngài-têu yit-sîm tén-heu ngài-têu ke Kiu-chú, chhiu-he Chú Yâ-sû Kî-tuk tui thiên-táng kong-lìm. 21 Kì oi yung sṳ́ van-yû kûi-fu̍k kì ke nèn-li̍t, lòi kói-pien ngài-têu ngiôn-ngio̍k voi sí ke sṳ̂n-thí, pûn ngài-têu thùng kì khiung-yong, yû yùng-kông ke sṳ̂n-thí.

Fî-li̍p-pí 4

1 Ngài só chhîn-oi, só sióng-ngiam ke hiûng-thi chí-moi â, ngì-têu he ngài ke fôn-hí, he ngài ke miên-liù! Ngài só-siak ke â, ngì-têu oi kho Chú khî-vún. 2 Yû-â-thia̍p lâu Sùn-tû-kî â, ngài khién-khiù ngì-têu oi thùng-sîm, chhiu-chhiong sin Chú ke chí-moi. 3 Ngài chûng-sṳ̍t ke thùng-phân â, ngài ya khiù ngì pông-chhu kì lióng-sà; yîn-vi kì-têu chhai fuk-yîm ke kûng-chok-song thùng ngài, Kiet-li-miên, lâu khì-thâ ke thùng-kûng sṳt khiung-ha lò-khú; liá-têu ngìn ke miàng chhiòn-phu yí-kîn ki chhai Song-ti ke sâng-miang-chhak. 4 Ngì-têu oi yîn-vi thùng Chú kiet-lièn lòi sòng-sòng fôn-hí. Ngài chai kóng, ngì-têu oi fôn-hí! 5 Tui só-yû ke ngìn, ngì-têu lûng-chúng oi hién-chhut khiâm-pî. Chú oi lòi lé. 6 Yin-tông chhiòn mò koa-li; fàm-sṳ oi khì-tó, chiông ngì-têu só sî-yeu ke lâu Song-ti kóng, yung kám-chhia ke sîm lòi khì-khiù. 7 Song-ti só su, ke chhêu-ko ngìn só sióng-siong ke phìn-ôn, voi thûng-ko Kî-tuk Yâ-sû pó-sú ngì-têu ke sîm-fài yi-ngiam. 8 Hiûng-thi chí-moi â, chúng-kóng, ngì-têu oi sṳ̀-sòng liù-yi ke-têu hó tet-hen lâu khâm-tet chhṳ̂n-chan ke sṳ. Yit-chhiet chṳ̂n-sṳ̍t, kô-kui, kûng-chṳn, sùn-kiet, tet-ngìn-siak lâu kông-yùng ke sṳ, ngì-têu chhiòn-phu oi khon-chhûng. 9 Ngì-têu tui ngài só ho̍k-si̍p, só liâng-su, ya-he só thâng-tó, só khon-tó ke ngièn-hàng kí-chṳ́, lûng-chúng oi sṳ̍t-hàng chhut-lòi. Su phìn-ôn ke Song-ti chhiu voi lâu ngì-têu thùng-chhai. 10 Ngài chhai Chú ke sâng-miang tî-poi khi̍t fôn-hí! Yîn-vi ko án-kiú yî-heu, liá-ha ngì-têu yu kiûng-kip ngài. Khì-sṳ̍t, ngì-têu yit-chhṳ̍t koân-sîm ngài, chúng-he mò kî-fi hó péu-sṳ thin-thin. 11 Ngài án-ngiòng kóng, m̀-he yîn-vi ngài khiet-séu má-ke; ngài yí-kîn ho̍k-voi mân-chiuk hien-khóng. 12 Ngài tî ngióng-pân ko khiùng-khú ke ngit-è, ya tî ngióng-pân ko fu-chiuk ke sên-fa̍t. Ngài yí-kîn tet-tó pi-kiet, sùi-sṳ̀ sùi-thi, he páu he kî, fûng-fu khiet-fa̍t, ngài lûng-chúng chhin chhṳ-chhai. 13 Ngài kho ke su-pûn ngài nèn-li̍t ke, fàm-sṳ tû nèn cho. 14 Chúng-he, ngài chhai khun-nàn chûng, ngì-têu lòi pông-chhu ngài, sṳ̍t-chhai he hó sṳ. 15 Ngì-têu Fî-li̍p-pí-ngìn tî, chhai ngài chhòn fuk-yîm ke chhû-khì, chhiu-he ngài lì-khôi Mâ-khì-tun ke sṳ̀-chiet, chhai sû-chṳ̂ ke sṳ-song, chhù-liáu ngì-têu yî-ngoi, pin mò phe̍t ke kau-fi lâu ngài fûn-tâm. 16 Lièn chhai Thiap-sat-lò-nì-kâ ke sṳ̀, ngì-têu yit-chai phai-ngìn lòi kiûng-kip ngài ke sî-yeu. 17 Ngài pin mò thâm ngì-têu ke lî-vu̍t; ngài só hî-mong ke chhiu-he ngì-têu chhon kâ têu-é, hó ki chhai ngì-têu ke chong-hong. 18 Liá chhiu-he ngì-têu sung pûn ngài yit-chhiet lî-vu̍t ke sû-kí; ngì-têu só sung ke chhêu-ko ngài só sî-yeu ke. Ngài yí-kîn chhûng-chiuk, yîn-vi ngài tui Yî-pâ-fut-thì chiap-su ngì-têu só sung ke lî-vu̍t. Kì-têu chhiong chhin hó phi ke hiông-mi, he Song-ti só chiap-na̍p, só fôn-hí ke chi-vu̍t. 19 Ngài ke Song-ti voi cheu Kì chhai Kî-tuk Yâ-sû tî-poi ví-thai ke fûng-sṳn, chiông ngì-têu só sî-yeu ke yit-chhiet su-pûn ngì-têu. 20 Ngien yùng-yeu kûi-pûn ngài-têu ke Â-pâ Song-ti, sṳ-sṳ vù-khiùng! Â-mén. 21 Chhiáng thoi ngài tui kok-vi su̍k Kî-tuk Yâ-sû ke sṳn-thù chhiáng-ôn. Thùng ngài khiung-ha ke chung hiûng-thi chí-moi ya tui ngì-têu chhiáng-ôn. 22 Só-yû ke sṳn-thù, thi̍t-phe̍t he fòng-kiûng-tú ke-têu ngìn, chhiòn-phu tui ngì-têu chhiáng-ôn. 23 Ngien Chú Yâ-sû Kî-tuk ke ên-tién sòng chhai ngì-têu sîm-nui!

AMAZING GRACE BIBLE INSTITUTE