1 Peter

1 Pí-tet

1 Ngài he Pí-tet, Yâ-sû Kî-tuk ke sṳ́-thù. Ngài siá sin-é pûn Song-ti ke sién-mìn, chhiu-he ke-têu fûn-san chhai Pún-tû, Kâ-lâ-thai, Kâ-pha-tô-kâ, Â-se-â, Pí-thûi-nì kok thi-fông phit-nan ke ngìn. 2 Ngì-têu su kién-sién he cheu Â-pâ Song-ti só yi-thin ke chṳ́-yi, thûng-ko Sṳn-Lìn sàng-cho sṳn-kiet, lòi sun-fu̍k Yâ-sû Kî-tuk, pûn kì ke hiet kiet-chhiang. Ngien Song-ti fûng-fûng fu-fu su ên-tién, phìn-ôn pûn ngì-têu! 3 Siung-chan kûi-pûn ngài-têu Chú Yâ-sû Kî-tuk ke Â-pâ Song-ti! Cheu Kì ke thai chhṳ̀-pî, thûng-ko Yâ-sû Kî-tuk tui sí fu̍k-fa̍t, Kì chiông sîn ke sâng-miang su-pûn ngài-têu, pûn ngài-têu yû sâng ke phan-mong, 4 lòi sṳ̀n-su Song-ti vi Kì ke chṳ́-mìn só pó-liù ke fûng-fu ke fuk-fun. Kì vi ngì-têu pó-liù chhai thiên-táng ke fuk-fun he m̀-voi phai-fai, m̀-voi tá lá-sap, ya m̀-voi sêu-sṳt. 5 Liá-ke fuk-fun oi su-pûn ngì liá-têu yîn-vi sin Song-ti mùng Kì thai-nèn pó-sú ke ngìn, pûn ngì-têu sṳ̀n-su ke yí-kîn chún-phi-hó, chhai li̍t-sṳ́ ke kiet-mî oi sṳ̍t-hien ke chṳ́n-kiu. 6 Só-yî, ngì-têu oi thai fôn-hí, sûi-yèn yîn-vi chúng-chúng ke sṳ-lien, ngì-têu liá-ha khó-nèn chhiam-sṳ̀ voi yû yù-sèu. 7 Liá he oi chṳn-mìn ngì-têu khok-sṳ̍t yû kiên-thin ke sin-sîm. Voi sêu-me̍t ke kîm-é, hàn yung fó lòi lien; ngì-têu ke sin-sîm pí kîm-é ko kha kui-chhung, tông-yèn hàn-kha oi su kháu-ngiam lòi kiên-thin, pûn ngì-têu chhai Yâ-sû Kî-tuk hién-hien ke-ngit tet-tó chhṳ̂n-chan, kông-yùng, lâu chûn-kui. 8 Ngì-têu sûi-yèn mò kien-ko kì, chúng-he kin-oi kì; sûi-yèn liá-ha khon kì m̀-tó, hàn-he sin-kho kì. Só-yî, ngì-têu chhiu yû mò fap-thu péu-tha̍t ke-chúng mân-yû yùng-kông ke fôn-hí, 9 yîn-vi ngì-têu liá-ha liâng-su sin-sîm ke háu-kó, chhiu-he ngì-têu lìn-fùn ke tet-kiu. 10 Lun-tó liá chṳ́n-kiu, chung siên-tî chó chhiu siòng-se chhà-kháu ngiên-kiu ko lé, kì-têu sṳt yi-ngièn Song-ti só-oi su pûn ngì-têu ke ên-tién. 11 Kì-têu chhà-kháu, oi tî Kî-tuk ke Lìn chhai kì-têu tî-poi só chṳ́-sṳ ke, chhiu-he "Kî-tuk thin-chho̍k oi su-khú, heu-lòi yit-thin voi tet-tó yùng-kông" liá-ke yi-ngièn, voi chhai má-ke sṳ̀-chiet, nai-chúng chhìn-hìn chṳ̂-ha lòi sṳ̍t-hien. 12 Song-ti khí-sṳ chung siên-tî, pûn kì-têu tî, kì-têu ke kûng-chok pin m̀-he vi chhṳ-kâ, he vi ngì-têu. Kì-têu só-kóng ke liá-têu sṳ, liá-ha yí-kîn thûng-ko fuk-yîm ke sṳ́-chá, yí-kho tui thiên-táng lòi ke Sṳn-Lìn, chhòn-pûn ngì-têu lé; liá-têu sṳ, lièn thiên-sṳ́ me chhin sióng-oi chhà-khon! 13 Só-yî, ngì-têu ke sîm oi chún-phi hó-se; oi kín-siáng, chôn-sîm phan-mong Yâ-sû Kî-tuk hién-hien ke-sṳ̀ só-oi su-pûn ngì-têu ke ên-tién. 14 Oi cho thâng-chhiùng Song-ti ke chṳ́-ńg, m̀-hó pûn sṳ̂-yu̍k hot-chṳ, chhiong ngì-têu thèu-pái ngong-tong mò chṳ-sṳt ke sṳ̀-chiet án-ngiòng. 15 Fû-seu ngì-têu ke Song-ti he sṳn-kiet ke; ngì-têu ya thin-chho̍k oi chhai yit-chhiet só cho ke sṳ-song sṳn-kiet; 16 yîn-vi Sṳn-kîn kóng: "Ngì-têu oi sṳn-kiet, yîn-vi Ngài he sṳn-kiet ke." 17 Ngì-têu khì-tó ke sṳ̀, ham ke cheu ngìn ke hàng-vì, yung khiung-yong ke phêu-chún lòi sṳ́m-phan ngìn ke Song-ti cho Â-pâ; án-ngiòng, ngì-têu chhai sṳ-kiên cho lî-hak ke ngit-è chhiu yin-kôi oi kin-vi Kì. 18 Yîn-vi ngì-têu tî, ngì-têu tui chú-siên só-chhòn ke, voi phai-fai ke sâng-miang-chûng tet-tó sṳt-fong, só fu-song ke thoi-ka he má-ke. Pin m̀-he chhiong kîm-ngiùn liá-têu voi phai-fai ke tûng-sî, 19 he Kî-tuk pó-kui ke hiet; Kì he chhiong hien-chi só yung, mò khiet-tiám mò lá-sap ke kâu-yòng yit-yong. 20 Chhai sṳ-kie chhóng-chho yî-chhièn, Song-ti yí-kîn siên kién-sién Kî-tuk, oi kì chhai liá li̍t-sṳ́ ke ma̍t-khì vi ngì-têu lòi hién-hien. 21 Thûng-ko kì, ngì-têu siông-sin ke sṳ́ kì tui sí fu̍k-fa̍t, yu su kì yùng-yeu ke Song-ti; yîn-vi án-ngiòng, ngì-têu ke sin-sîm lâu phan-mong he tang-kîn chhai Song-ti ke tî-poi. 22 Liá-ha, yîn-vi thâng-chhiùng chṳ̂n-lî, ngì-têu yí-kîn sṳ́ chhṳ-kâ sàng-cho kiet-chhiang ke ngìn, yu chṳ̂n-sṳ̍t oi hiûng-thi chí-moi, chhiu yin-tông tui sîm-tái pí-chhṳ́ ngie̍t-sṳ̀n siông-siak. 23 Yîn-vi ngì-têu tet-tó chhùng-sên, m̀-he tui ke voi phai-fai ke chúng-chṳ́ sâng chhut-lòi ke, he tui ke m̀-voi phai-fai ke chúng-chṳ́, chhiu-he Song-ti yû sâng-miang, chhòng-chhùn ke tho-lî lòi ke. 24 Chhiong Sṳn-kîn só kóng: Tak-ke ngìn lûng-chúng chhiong yâ-chhó khiung-yong, kì-têu ke yùng-fà chhiòn-phu chhiong yâ-fâ; chhó voi khû-châu, fâ voi chhia-thet, 25 chúng-he Chú ke tho yún-yén chhòng-chhùn! Liá tho chhiu-he ke chhòn-pûn ngì-têu ke fuk-yîm.

1 Pí-tet 2

1 Só-yî, ngì-têu oi chhù-thet yit-chhiet ke sià-ok, kúi-cha, ká-mo vì-san, chhit-tu, lâu yit-chhiet fí-pong ngìn ke fa; 2 oi chhiong chang chhut-se ke ô-nga-é, hot-mu sùn-chhiang ke lìn-nen, pûn ngì-têu thûng-ko kì lòi chóng-thai chṳ-to tet-kiu. 3 Chhiong Sṳn-kîn só kóng: "Ngì-têu yí-kîn sòng-ko Chú chhṳ̀-oi ke chṳ̂-mi." 4 Oi chhîn-khiun Chú, kì he sâng ke sa̍k-thèu; sûi-yèn kì pûn-ngìn khî-chhie̍t, chúng-he Song-ti kién-sién kì, khon kì cho pó-pi ke. 5 Ngì-têu ya oi chhiong sâng ke sa̍k-thèu, su kien-chho sàng-cho su̍k-lìn ke sṳn-thien, chhai ke-vi cho sṳn-kiet ke chi-sṳ̂, thûng-ko Yâ-sû Kî-tuk lòi hien Song-ti só fôn-hí su̍k-lìn ke chi-vu̍t. 6 Yîn-vi Sṳn-kîn kóng: Ngài tho̍k yit-te kui-chhung ke sa̍k-thèu, lòi cho Siak-ôn fòng-kok ke sa̍k-thèu; sin-kho kì ke, chhie̍t-tui m̀-voi sṳt-mong. 7 Tui ngì-têu sin ke ngìn lòi kóng, liá sa̍k-thèu he fî-sòng pó-kui ke; chúng-he, tui ke-têu m̀ sin ke ngìn: Nài-súi sṳ̂-fu só fit-thet ke liá-te sa̍k-thèu, yí-kîn sàng-cho thi-kî chûng chui chhung-yeu ke! 8 Sṳn-kîn nang-ngoi yu kóng: Liá-te sa̍k-thèu voi pan ngìn ke kiok, he voi sṳ́-ngìn tiet-tó ke thai sa̍k-thèu! Kì-têu pan-tó lé, yîn-vi kì-têu m̀ sin chṳ̂n-tho; liá ya he Song-ti ke chṳ́-yi. 9 Chúng-he, ngì-têu he su kién-sién ke yit-chhu̍k, he Vòng ke chi-sṳ̂, sṳn-kiet ke koet, Song-ti ke chṳ́-mìn. Song-ti fû-seu ngì-têu lì-khôi vû-am, chin-ngi̍p Kì khì-meu ke kông-mìn, lòi siên-yòng Kì o-meu ke chok-vì. 10 Ngì-têu yî-chhièn m̀-he Song-ti ke chṳ́-mìn, chúng-he liá-ha he Kì ke chṳ́-mìn; yî-chhièn mò tet-tó Song-ti ke lìn-mén, liá-ha yí-kîn tet-tó Kì ke lìn-mén. 11 Chhîn-oi ke phèn-yû â, ngì-têu chhai sṳ-kiên he lî-hak, he phit-nan ke ngìn! Ngài khien ngì-têu, m̀-hó fong-chiúng ngiuk-thí ke chhìn-yu̍k; chhìn-yu̍k chhiùng-lòi chhiu-he kûng-kit lìn-fùn ke. 12 Chhai Ngoi-pâng-ngìn tông-chûng, ngì-têu yin-tông yû tôn-chang ke phín-hen, pûn ke-têu kóng ngì-têu fái-fa, chit-phi ngì-têu cho fái-sṳ ke ngìn, yîn-vi khon-tó ngì-têu ke hó hàng-vì, chhai Chú chai-lòi ke-ngit, voi kûi yùng-kông pûn Song-ti. 13 Vi-tó Chú ke yèn-ku, ngì-têu oi sun-chhiùng sṳ-kiên só-yû ke chóng-khièn-chá, chhiu-he chhai-song ke kiûn-vòng, 14 pin kì só phai-lòi chit-fa̍t chok-ok, chióng-li hàng-san ke kôn-chóng. 15 Yîn-vi Song-ti ke chṳ́-yi he oi ngì-têu yung hó hàng-vì lòi set-sí ke-pân fù-thù-ngìn vù-tî ke choi. 16 Ngì-têu oi cho chhṳ-yù-ngìn! Chúng-he m̀-hó yung chhṳ-yù cho sià-ok ke chia-khiéu; tiên-to, ngì-têu oi cho Song-ti ke nù-phu̍k. 17 Ngì-têu oi chûn-chhung mî-yit-ke ngìn; siak sin Chú ke hiûng-thi chí-moi; kin-vi Song-ti; chûn-chhung kiûn-vòng. 18 Cho nù-phu̍k ke, ngì-têu oi sun-chhiùng chú-ngìn, ya oi tui kì-têu péu-hien sṳ̍p-fûn ke kiûng-kin; m̀ tân-chhiang tui hó-sîm vûn-yù ke chú-ngìn oi án-ngiòng, tui chhû-phau ke chú-ngìn ya oi án-ngiòng. 19 Na-he ngì-têu khon liá he Song-ti ke chṳ́-yi, kâm-ngien ngiûn-su m̀ yin-kôi sṳ̍t ke khú, Song-ti yit-thin voi su-fuk pûn ngì-têu. 20 Na-he ngì-têu yîn-vi fam-chhui lòi ngiûn-su chit-tá, yû má-ke kông-yùng nè? Vì-yû yîn-vi hàng-san lòi ngiûn-su khú-nan ke ngìn chang voi tet-tó Song-ti ke su-fuk. 21 Song-ti fû-seu ngì-têu ke muk-tit chhiu-he chhai liá-vi; yîn-vi Kî-tuk vi ngì-têu su-khú, liù-hâ póng-yong pûn ngì-têu, oi pûn ngì-têu thèn kì ke kiok-phu hàng. 22 Kì mò fam-ko chhui; mò ngìn thâng-ko kì kóng fâ-liâu. 23 Kì pûn-ngìn yu̍k-ma mò en-choi, pûn-ngìn ngio̍k-thai ya mò kóng khiúng-hak ke fa, chṳ́-yû ngióng-mong ke cheu kûng-ngi sṳ́m-phan ngìn ke Chú. 24 Kî-tuk chhai sṳ̍p-sṳ-ka-táng chhîn-sṳ̂n tâm-tông ngài-têu ke chhui, pûn ngài-têu ki-yèn chhai chhui-ok-song sí, chhiu vi-tó kûng-ngi lòi sâng. Yîn-vi kì só-su ke piên-sông, ngì-têu chhiu tet-tó yî-chhṳ. 25 Yî-chhièn ngì-têu chhiong mì-lu ke yòng, chúng-he liá-ha yí-kîn fì-thèu, thèn-tén ngì-têu lìn-fùn ke mu̍k-chá lâu kam-fu-ngìn lé.

1 Pí-tet 3

1 Khiung-yong, cho pû-ngiòng ke, ngì-têu ya yin-kôi sun-chhiùng chhṳ-kâ ke ló-kûng, pûn mò sin-chhiùng chṳ̂n-tho ke ló-kûng yîn-vi ngì-têu ke hó phín-hen lòi su kám-fa. Ngì-têu ke fa m̀-sṳ́ kóng án-tô, 2 yîn-vi kì-têu voi khon-tó ngì-têu sùn-kiet lâu tôn-chông ke phín-hen. 3 Ngì-têu m̀-hó kóng-kiu ngoi-chhai ke tá-pan, chhiong oi ngióng-pân piên thèu-nà-mô, tai kîm-lien, chok chiâng sâm tén. 4 Yin-tông yû nui-chhai ke chiâng, yung m̀-voi thui-set ke vûn-yù lâu tiâm-chhin lòi tá-pan; cheu Song-ti khon, liá he chui yû ka-chhṳ̍t ke. 5 Yîn-vi, thèu-pái ke-têu sṳn-kiet ke fu-ńg, kì-têu ngióng-mong Song-ti, lûng-chúng yung sun-chhiùng ló-kûng lòi tá-pan chhṳ-kâ. 6 Sâ-lâ chhiu-he án-ngiòng; kì sun-chhiùng Â-pak-lâ-hón, chhṳ̂n kì cho "Thèu-kâ". Ngì-têu na hàng-san, mò kiâng tûng kiâng sî, chhiu-he Sâ-lâ ke moi-é lé. 7 Khiung-yong, cho ló-kûng ke, ngì-têu thùng pû-ngiòng khiung-ha sên-fa̍t, oi thí-thiap kì-têu he kha ngiôn-ngio̍k ke thùng-phân. Oi chûn-chhung kì-têu, yîn-vi kì-têu he thùng ngì-têu khiung-ha sṳ̀n-chiap Song-ti só su ke sîn sâng-miang. Án-ngiòng, ngì-têu ke khì-tó chhiu m̀-voi su chú-ngoi. 8 Chúng-kóng, ngì-têu thai-kâ oi yû khiung-yong ke sîm-chṳ lâu sîm-chhìn, chhiong hiûng-thi chí-moi án-ngiòng siông-siak, yung chhṳ̀-oi lâu khiâm-pî fu-siông khoán-thai. 9 M̀-hó yung fái po fái, yung yu̍k-ma vàn yu̍k-ma; tiên-to, oi chuk-fuk, yîn-vi Song-ti fû-seu ngì-têu ke muk-tit he oi pûn ngì-têu sṳ̀n-su chuk-fuk. 10 Chhiong Sṳn-kîn só kóng: Má-ngìn sióng-oi hióng-su ngìn-sên, hî-mong ko ôn-lo̍k ke ngit-è, sa̍t-mà chhiu m̀-hó kóng fái-fa, choi-sùn ya m̀-hó kóng fâ-liâu. 11 Oi hi-chhie̍t sià-ok, chhin-li̍t hàng-san; oi chûi-khiù fò-phìn, sat-mâng hi hàng. 12 Yîn-vi Chú khon-ku ngi-ngìn, liù-sîm thâng kì-têu ke khì-tó; chúng-he ke-têu chok-ok ke ngìn, Chú chhiu tui kì-têu pien-mien. 13 Ngì-têu na-he ngie̍t-sîm hàng-san, má-ngìn voi hoi ngì-têu nè? 14 Ngì-têu chhiu-he vi ngi su-khú, ya he chhin yû fuk-hi â! M̀-sṳ́ kiâng ngìn ke vî-hia̍p, ya m̀-sṳ́ yù-sèu. 15 Ngì-têu ke sîm oi kin-vi Kî-tuk, chûn kì cho Chú. Oi sòng-sòng chún-phi hó-se, lòi fì-tap phe̍t-ngìn ke mun-thì, chhiu-he koân-he ngì-têu sîm-chûng ke phan-mong; 16 chúng-he oi yung vûn-yù lâu kiún-sṳ́m ke thai-thu lòi fì-tap. Oi yû chhîn-pha̍k ke liòng-sîm; án-ngiòng, chhai ngì-têu su vú-yu̍k ke sṳ̀-chiet, ke-têu fí-pong ngì-têu ke ngìn, voi yîn-vi ngì-têu cho Kî-tuk-thù só péu-hien ke hó hàng-vì, chhṳ-kâ kám-kok kien-seu. 17 Song-ti ke yi-sṳ, na-he oi ngì-têu yîn-vi hàng-san lòi su-khú, kha-yàng yîn-vi chok-ok lòi su-khú. 18 Yîn-vi Kî-tuk sṳt vi chhui lòi sí, yit-pái chhiu vàn-sṳ̀n, he ngi ke thoi put-ngi ke, oi tai ngì-têu to Song-ti ke mien-chhièn hi. Kì ke ngiuk-thí pûn-ngìn chhú sí-hìn, chúng-he kì ke lìn hàn-he sâng-sâng. 19 Kì thûng-ko liá-ke lìn sṳt hi tui kâm-ngiu̍k tú ke-têu lìn chhòn-tho. 20 Ke-têu lìn he ngang-kiáng ke lìn, chhiu-he chhai Nò-â chho thai-sòn ke sṳ̀, Song-ti ngiûn-nai tén-thai ke lìn. Tông-sṳ̀, ngi̍p thai-sòn thûng-ko súi tet-tó chṳ́n-kiu ke ngìn m̀ tô, chṳ́-yû pat-sà. 21 Liá-ke súi só yi-péu ke sé-lî, liá-ha yí-kîn kiu-tó ngì-têu. Sé-lî m̀-he sé-chhiang ngì-têu sṳ̂n-thí ke lá-sap, he péu-sṳ ngì-têu yung chhiang-li ke liòng-sîm tui Song-ti hí-ngien; liá sé-lî thûng-ko Yâ-sû Kî-tuk ke fu̍k-fa̍t chṳ́n-kiu ngì-têu. 22 Yâ-sû Kî-tuk yí-kîn sông thiên-táng hi, liá-ha chhô chhai Song-ti ke yu-phién; só-yû ke thiên-sṳ́ pin thiên-kie ke chóng-khièn-chá lâu thúng-chhṳ-chá lûng-chúng fu̍k-chhiùng kì.

1 Pí-tet 4

1 Kî-tuk ki-yèn chhai ngiuk-thí su-khú, ngì-têu chhiu yin-kôi yung liá-chúng ke sîm-chṳ chông-phi chhṳ-kâ, yîn-vi chhai ngiuk-thí-song su-ko khú ke ngìn, kì thùng chhui-ok ke koân-he yí-kîn chhiet-thôn; 2 chhiùng-kîm yî-heu, ngì-têu chhai sṳ-kiên ke ngit-è oi sun-chhiùng Song-ti ke chṳ́-yi, m̀-hó chai pûn ngìn ke yu̍k-mong hot-chṳ. 3 Vông-sṳ̀ ngì-têu long-fi kông-yîm, hàng mò sin ke ngìn fôn-hí cho ke kok-chúng sṳ, chhiong yìm-lon, sṳ̂-yu̍k, hau-chiú, yen-lo̍k, chiú-chui, lâu Song-ti fap-li̍t só kim-chṳ́ ke pai ngiéu-siong. 4 Liá-ha ngì-têu mò chai lâu kì-têu khiung-yong ko ke-chúng fong-thong, mò chiet-chṳ ke sên-fa̍t, kì-têu kám-kok chhin khì-koai, chhiu vú-yu̍k ngì-têu. 5 Chúng-he, kì-têu yit-thin oi tui ke sṳ́m-phan sâng-ngìn lâu sí-ngìn ke Song-ti kâu-chong. 6 Chhiu-he yîn-vi án-ngiòng, fuk-yîm ya sṳt chhòn pûn sí-ngìn, pûn kì-têu sûi-yèn ngiuk-thí thùng khì-thâ ke ngìn khiung-yong su sṳ́m-phan, chúng-he lìn-fùn yû-hó chhiong Song-ti án-ngiòng sâng-tén. 7 Van-sṳ ke kiet-khiu̍k khiûn lé. Ngì-têu oi kiún-sṳ́m chiet-chṳ, kín-siáng khì-tó. 8 Chui chhung-yeu ke he oi pí-chhṳ́ ngie̍t-sṳ̀n siông-siak, yîn-vi oi-siak chang nèn châ-koi tô-tô ke chhui. 9 Thai-kâ oi pí-chhṳ́ chiap-thai, m̀-hó mài-yen. 10 Ki-yèn tak-sà he Song-ti kok-yong ên-su ke hó kón-kâ, chhiu oi cheu só liâng-su ke chúng-chúng ên-su, pí-chhṳ́ fu̍k-vu. 11 Kóng-tho ke, oi cheu Song-ti ke fa lòi kóng; fu̍k-vu ke, oi yung Song-ti só su ke li̍t-liong lòi fu̍k-vu, pûn van-hong sṳ lûng-chúng thûng-ko Yâ-sû Kî-tuk kûi yùng-kông pûn Song-ti. Ngien yùng-kông lâu khièn-nèn chhiòn-phu kûi-pûn Kì, chhṳ̍t-to yún-yún yén-yén! Â-mén. 12 Chhîn-oi ke phèn-yû â, ngì-têu tù-tó chhiong fó án-ngiòng ke kháu-ngiam, m̀-sṳ́ khì-koai, chhiong-he tù-tó má-ke hî-khì ke sṳ. 13 Tiên-to, ngì-têu yin-kôi chiông fûn-tâm Kî-tuk ke khú-nan khon-cho khoai-lo̍k ke sṳ, hó pûn ngì-têu chhai kì ke yùng-kông hién-hien ke sṳ̀ lòi fôn-hí khoai-lo̍k. 14 Ngì-têu na yîn-vi thèn Kî-tuk su vú-yu̍k, chhiu yû fuk-hi lé! Liá péu-sṳ yùng-kông ke Sṳn-Lìn, chhiu-he Song-ti ke Lìn, chhai ngì-têu ke sṳ̂n-song. 15 Chúng-he, ngì-têu tông-chûng na yû-ngìn su-khú, m̀-hó he yîn-vi hiûng-sat, cho chhe̍t, fam hìn-sṳ on-khien, ya-he hau chhap hàn-sṳ. 16 Su-khú na-he yîn-vi cho Kî-tuk-thù, m̀-hó khon-cho kien-seu, fán-chón oi yîn-vi yû liá-ke miàng-chhṳ̂n lòi yùng-kông Song-ti. 17 Sṳ́m-phan ke sṳ̀-chiet to lé, Song-ti kâ-nui ke chṳ́-ńg oi siên su sṳ́m-phan. Ki-yèn sṳ́m-phan oi tui ngài-têu khôi-sṳ́, án-ngiòng, m̀ sin-chhiùng Song-ti fuk-yîm ke ngìn kiet-khiu̍k voi ngióng-pân nè? 18 Chhiong Sṳn-kîn só kóng: Lièn ngi-ngìn tet-kiu ya án mò kién-tân, m̀ kin-khièn ke chhui-ngìn voi ngióng-pân nè? 19 Só-yî, ke-têu yîn-vi Song-ti ke chṳ́-yi su-khú ke ngìn, oi yit-sîm hàng-san, chiông chhṳ-kâ kâu-thok ke sin-sṳ̍t ke Chhóng-chho Chú.

1 Pí-tet 5

1 Ngài liá cho chóng-ló, cho Kî-tuk su-khú ke kien-chṳn-ngìn, yû-fun chiông-lòi só oi hién-hien ke yùng-kông, liá-ha khien ngì-têu chûng-kiên khiung-ha cho chóng-ló ke. 2 Ngì-têu oi mu̍k-yông Song-ti thok-fu ngì-têu ke yòng-khiùn, lo̍k-yi cheu Song-ti ke chṳ́-yi cheu-ku kì-têu, m̀-he chhut-yì miên-kióng; m̀-he yîn-vi thâm-chhòi, he chhut-yì kâm-sîm lòi sṳ-fung. 3 M̀-hó hot-chṳ só thok-fu ngì-têu ke yòng-khiùn, fán-chón oi cho kì-têu ke póng-yong. 4 Án-ngiòng, thai mu̍k-chá chhut-hien ke sṳ̀-chiet, ngì-têu chhiu voi liâng-su ke yún-yén m̀-voi sṳt-hi yùng-kông ke miên-liù. 5 Khiung-yong, ngì-têu heu-sâng ke ngìn yin-kôi sun-chhiùng chóng-pi. Thai-kâ oi yung khiâm-pî cho vì-sṳ̂n-khiùn kiê-tén lòi fu-siông fu̍k-sṳ; yîn-vi Sṳn-kîn kóng: Song-ti chú-tóng kiêu-ngau ke ngìn, su ên-tién pûn khiâm-pî ke ngìn. 6 Só-yî, ngì-têu oi khiâm-pî, hòng-fu̍k chhai Song-ti thai-nèn ke sú-hâ, án-ngiòng, Kì voi chhai sṳt-tông ke sṳ̀-kî kô-sṳ̂n ngì-têu. 7 Oi chiông yit-chhiet ke koa-li kâu-pûn Kì, yîn-vi Kì koân-sîm ngì-têu. 8 Oi chiet-chṳ kín-siáng! Ngì-têu ke tui-thi̍t --- Mô-kúi chhiong ho-ho-kún ke sṳ̂-é án-ngiòng hàng-lòi hàng-hi, chhìm kì thûn-tet-lo̍k-hi ke ngìn. 9 Ngì-têu oi sin-sîm kiên-thin lòi tí-khong kì, yîn-vi tî, ngì-têu chhai chhiòn sṳ-kie ke chung hiûng-thi chí-moi ya kîn-li̍t khiung-yong ke khú-nan. 10 Chúng-he, chhai ngì-têu chhiam-sṳ̀ su-khú yî-heu, ke su yit-chhiet ên-tién ke Song-ti, chhiu-he fû-seu ngì-têu thûng-ko thùng Kî-tuk Yâ-sû kiet-lièn lòi fûn-hióng Kì yún-yén ke yùng-kông ke Song-ti, thin-chho̍k voi chhîn-chhṳ sṳ̀n-chhiòn ngì-têu, kiên-thin ngì-têu, su li̍t-liong lâu kiên-ku ke thi-kî pûn ngì-têu. 11 Ngien khièn-nèn kûi-pûn Kì, chhṳ̍t-to yún-yún yén-yén! Â-mén. 12 Chhai chûng-sîm ke hiûng-thi Sî-lâ ke pông-chhu chṳ̂-ha, ngài siá liá-fûng tón-tón ke sin-é pûn ngì-têu, lòi khien-miên ngì-têu, tui ngì-têu cho kien-chṳn: Liá he Song-ti chṳ̂n-sṳ̍t ke ên-tién; ngì-têu oi chhai liá-ke ên-tién táng-kô khî-vún. 13 Thùng ngì-têu khiung-ha tet-tó kién-sién ke Pâ-pí-lùn kau-fi tui ngì-têu chhiáng-ôn; ngâ lai-é Mâ-khó ya tui ngì-têu chhiáng-ôn. 14 Ngì-têu oi yung oi-sîm lòi pí-chhṳ́ chîm-choi chhiáng-ôn. Ngien ngì-têu só-yû su̍k Kî-tuk ke ngìn lûng-chúng tet-tó phìn-ôn!

AMAZING GRACE BIBLE INSTITUTE