Titus

1 Mi Pol, mi man blong wok blong God, mo mi aposol blong Jisas Kraes. Hem i jusumaot mi, mo i sanem mi blong givhan long ol man we God i jusumaot olgeta finis se bambae oli bilif long hem, blong oli save ol trutok ya we i stamba blong Kristin laef blong yumi. 2 Hem i sanem mi blong mi givhan long olgeta, blong oli putum tingting blong olgeta i stap long laef ya we i no save finis. Bifo olgeta, taem we wol ya i no stap yet, God ya we i no save giaman, hem i promes finis blong givim laef ya long olgeta, 3 nao long stret taem blong hem, hem i soemaot laef ya long tok blong hem. Hem i Sevia blong yumi, mo hem i putum tok ya long han blong mi, i talem strong long mi, se mi mi mas talemaot long ol man. 4 Taetas. Mi mi raetem tok ya i kam long yu, we yu yu olsem stret pikinini blong mi, long fasin ya blong bilif we yumitufala i joen long hem. Prea blong mi, we God, Papa blong yumi, wetem Jisas Kraes, Sevia blong yumi, tufala bambae i stap givhan long yu long gladhat blong tufala, tufala i putum pis i stap wetem yu. 5 Taem mi mi aot long ples ya Krit, mi livim yu yu stap blong mekem ol wok ya we i stap yet. Mo mi talem long yu, se yu mas putumap ol elda blong jos long evri ples, stret long fasin ya we mi tijim yu finis long hem. 6 Man we i elda i mas man we laef blong hem i stret gud, i no gat rabis poen long hem. Hem i mas gat wan woman blong hem nomo, mo ol pikinini blong hem oli mas bilif long God. I nogud ol pikinini ya, oli stap mekem stronghed, no oli stap mekem nogud, nao ol man oli stap tokbaot olgeta from. 7 Man we i bisop, hem i gat nem blong God i stap long hem, nao laef blong hem i mas stret gud, we i no gat rabis poen long hem. Hem i mas man we tingting blong hem i no go antap tumas, mo we i no save kros kwik. Man blong drong, mo man blong faet, mo man blong winim mane long evri rod, hem i no save tekem wok ya. 8 Man we i tekem wok ya, hem i mas man we i stap tekem strenja i kam long haos blong hem. Hem i mas man we i laekem ol gudfala fasin, mo i mas waes. Hem i mas stret man, we i tabu, i man blong God, mo i mas man we i save blokem ol samting we hem nomo i wantem. 9 Mo hem i mas holemstrong tok ya we yumi save putum tingting blong yumi i stap long hem, mo we yumi stap tijim ol man long hem. Nao bambae hem i save tijim ol man long ol stret tok, mo bambae i save soemaot we ol man we oli stap tok nogud long tok ya oli rong. 10 I gat plante man we oli girap agens long trutok mo oli stap giaman long ol man long ol krangke toktok blong olgeta. Mo long olgeta ya i gat ol man we fastaem oli laen blong Isrel. 11 Yu mas blokem ol toktok ya blong ol man olsem, from we long sam famle, tok olsem i spolem olgeta man finis. Ol man ya oli stap tijim ol man long ol tok we i no stret, be oli stap mekem olsem blong winim mane nomo. Fasin ya i blong sem nomo. 12 Wan man Krit bifo we i wan profet blong olgeta, hem i talem se, “Ol man Krit oli man blong giaman oltaem, oli olsem anamol we oli nogud olgeta, mo oli man blong les we oli wantem stap kakae oltaem nomo.” 13 Be tok blong profet ya i tru nomo. Nao from samting ya, yu mas tok strong long olgeta, blong mekem fasin blong bilif blong olgeta i kam strong moa. 14 Yu mas blokem olgeta blong bambae oli no moa holem ol giaman storian ya blong ol laen blong Isrel bifo, mo blong oli no moa folem ol toktok blong ol man ya we oli gowe long trutok finis. 15 Man we tingting blong hem i klin gud, laef blong hem i klin olgeta. Be man we tingting blong hem i no klin, mo we hem i no bilif, hem i no gat wan samting nating i klin gud long laef blong hem. Rabis fasin i spolem tingting blong hem finis, nao hem i no moa save haremsave se hem i mekem samting we i no stret. 16 Ol man ya oli stap talem se oli save God, be ol fasin we oli stap mekem, i soemaot we tok ya blong olgeta i no tru. Ol man ya oli rabis, fasin blong olgeta i krangke nomo. Olgeta oli no save mekem wan gudfala samting nating.

Titus 2

1 Taetas. Yu yu mas tijim ol man long ol tok we i folem ol tijing we i stret gud. 2 Yu mas tijim ol olfala, se oli no mas dring tumas. Fasin blong olgeta i mas stret, mo oli mas strong blong oli save blokem ol samting we olgeta nomo oli wantem. Bilif blong olgeta i mas stret gud, mo oli mas lavem ol man, mo oli mas man blong holem wok gogo kasem en blong hem. 3 Mo long sem fasin, yu mas tijim ol olfala woman tu blong oli mas mekem ol fasin we i stret, we i fasin blong ol woman we oli tabu, oli blong God. Bambae oli no mas tok nogud long nem blong narafala man, mo oli no mas woman blong drong. Oli mas soemaot ol stret fasin, 4 blong bambae oli save tijim ol yangfala woman long stret rod blong lavem ol man blong olgeta wetem ol pikinini blong olgeta. 5 Oli mas tijim ol yangfala woman ya blong oli kwaet woman, we laef blong olgeta i klin gud. Oli mas tijim olgeta long fasin blong lukaot gud long haos blong olgeta, mo blong ona long ol man blong olgeta. Nao bambae i no gat man i save tok nogud long tok blong God. 6 Long sem fasin, yu mas talem strong long ol yang man tu blong oli save blokem ol samting we olgeta nomo oli wantem. 7 Long olgeta samting we yu yu mekem, be yu mas soemaot long fes blong olgeta, fasin blong yu blong mekem gudfala wok. Taem yu stap tij, yu mas tru oltaem, mo tok blong yu i mas hevi. 8 Mo yu mas yusum ol stret tok nomo, we ol man oli no save tok nogud long hem, nao bambae yu save mekem ol enemi blong yu oli sem, from we oli no save faenem rabis poen long yu. 9 Yu mas tijim ol slef blong oli obei long ol masta blong olgeta, mo blong oli mekem ol masta blong olgeta oli harem gud long evri samting. Bambae oli no tokbak long olgeta, 10 mo oli no stil long olgeta. Oli mas soemaot oltaem we oli stap mekem i stret, mo we ol masta blong olgeta oli save trastem olgeta. Long fasin ya, long olgeta samting we oli mekem, bambae oli stap leftemap tok blong God ya we i sevem yumi, long fes blong ol man. 11 God i soemaot finis fasin blong hem blong givhan long ol man long gladhat blong hem. Fasin ya blong God i openem rod, blong hem i sevem olgeta man. 12 Naoia yumi stap wet blong luk bigfala Dei ya we tingting blong yumi i stap long hem, we Jisas Kraes ya we i Hae God mo i Sevia blong yumi, hem bambae i kamtru bakegen long bigfala paoa blong hem. Mo naoia we yumi stap wet, gladhat ya blong God i stap soemaot long yumi we naoia nomo yumi mas livim olgeta fasin we oli no stret long fes blong hem. Yumi no mas wantem tumas ol samting blong wol ya, mo yumi mas blokem ol samting we yumi nomo i wantem. Naoia yumi mas mekem ol fasin we i stret, we God i stap harem gud long hem. 14 Jisas Kraes, hem i givim laef blong hem blong sevem yumi. Hem i tekemaot yumi long ol fasin blong yumi we i no stret, i mekem yumi fri. Mo hem i mekem yumi evriwan i kam wan famle, we laef blong yumi i klin, yumi man blong hem nomo, mo yumi strong blong mekem ol gudfala samting. 15 Yu mas talem ol tok ya long ol man blong yu, mo yu mas yusum paoa we yu gat from hae nem blong yu, blong leftemap tingting blong olgeta, mo blong tok long olgeta, blong blokem ol fasin nogud blong olgeta. Bambae yu no letem olgeta oli stap lukluk nogud long yu.

Titus 3

1 Yu mas talemgud long ol man blong yu blong oli ona long ol haeman mo gavman blong olgeta. Oli mas obei long olgeta, mo oli mas rere oltaem blong mekem ol gudfala wok. 2 Bambae oli no mas tok nogud long nem blong narafala man, mo oli no man blong rao. Oli mas man we oli save fren gud long ol man, mo oltaem oli mas mekem i gud long ol man. 3 Oli mas mekem olsem, from we bifo, yumi tu yumi stap mekem krangke fasin. Yumi no save obei, mo yumi lusum stret rod olgeta. Bifo, yumi stap mekem ol samting we yumi nomo i wantem, mo we yumi stap harem gud long hem. Long taem ya, yumi fas long ol fasin ya olsem we yumi kalabus nomo, we yumi no save kam fri bakegen. Mo oltaem yumi stap jalus, mo yumi stap kros longtaem, we ol narafala man oli no laekem yumi, oli agens long yumi, mo yumi tu yumi no laekem olgeta, yumi agens long olgeta. 4 Be God ya we i Sevia blong yumi, hem i sevem yumi long taem ya we hem i soemaot ol fasin blong hem, we i lavem tumas ol man, mo we hem i stap mekem i gud long olgeta. Be hem i no mekem olsem from we yumi stap folem ol gudfala fasin, nogat. Hem i sevem yumi from we hem i gat sore long yumi. Hem i wasem yumi long wota, i mekem we yumi bon bakegen long Tabu Spirit we i givim niufala laef long yumi. 6 God i givim Tabu Spirit i kam bigwan long yumi, mo Jisas Kraes, Sevia blong yumi, hem i wok blong God blong sanem Spirit ya i kamtru long yumi. 7 God i sevem yumi, blong bambae yumi save kam stret man long fes blong hem from we Kraes i givhan long yumi long gladhat blong hem, nao bambae yumi save kasem laef ya we i no save finis, we yumi putum tingting blong yumi i stap finis long hem. 8 Tok ya i wan trutok ya. Mi mi wantem we bambae yu tokbaotgud ol samting ya long ol man, blong bambae olgeta we oli bilif long God oli save mekem tingting blong olgeta i strong blong mekem ol gudfala wok. Ol wok olsem oli gud, mo oli save givhan long olgeta man. 9 Be yu no mas go joen long ol krangke rao blong ol tija ya, mo long fasin ya we oli stap makem ol laen blong papa blong olgeta, gogo kasem bifo olgeta. Mo bambae yu no go joen long ol rao mo ol faet we oli stap mekem from mining blong Loa blong Moses. Ol fasin ya oli nogud nating, oli no save givhan long ol man. 10 Sipos i gat man we i stap mekem ol man oli seraot from toktok olsem, yu mas toktok gud long hem blong wonem hem, be tu taem i naf. Biaen yu no go joen long hem bakegen, 11 from we yu save, ol man olsem, tingting blong olgeta i kam nogud finis. Mo ol samting nogud we oli stap mekem, i soemaot i klia we oli rong olgeta. 12 Taem mi sanem wan long tufala ya, Atemas no Tikikas i kam luk yu, bambae yu mas traehad blong kam luk mi long Nikopolis, from we mi tingbaot finis, se bambae long koltaem, mi save go stap long ples ya. 13 Mo yu mas traehad blong givhan long Apolos, mo long Sinas we i loea, blong faenem rod blong tufala. Mo yu mas lukaot gud long tufala, blong bambae tufala i no sot long sam samting. 14 Olgeta man blong yumi oli mas lan blong yusum taem blong olgeta long ol gudfala wok, blong oli save givhan long ol man we oli sot long sam samting. I nogud oli stap nating nomo, we oli no wok. 15 Olgeta man we oli stap wetem mi oli talem halo long yu. Plis, long bihaf blong mifala, yu go talem halo long ol fren blong mifala we oli bilif long Jisas. Prea blong mi, we God bambae i stap givhan long yufala evriwan long gladhat blong hem.