Jude

1 Mi Jud, mi man blong wok blong Jisas Kraes, mo mi brata blong Jemes. Mi mi talem halo long yufala we God i singaot yufala. Yufala i savegud we God Papa blong yumi i lavem yufala, mo we Jisas Kraes i stap lukaot gud long yufala. 2 Prea blong mi, we oltaem God bambae i gat sore long yufala, mo bambae i putum pis i stap wetem yufala, mo bambae i lavem yufala, mo we oltaem bambae fasin ya blong hem i kam bigwan moa long laef blong yufala. 3 Ol fren. Fastaem mi wantem tumas blong raetem leta ya i kam long yufala blong tokbaot rod we God i stap yusum blong sevem yumi. Be naoia mi harem we mi mas raetem tok ya i kam long yufala, blong leftemap tingting blong yufala, se yufala i mas faet strong blong holem trutok ya we yumi bilif long hem finis. Hemia trutok ya we God i givim wan taem nomo long ol man blong hem we i no moa save givim bakegen. 4 Mi mi harem olsem from we sam man we oli agensem God, oli kam joen long grup blong yufala, we yufala i no luk. Olgeta oli tekem tok ya we i talem se, “Long gladhat blong God, hem i sevem yumi,” oli tanem i kam wan eskius blong olgeta blong mekem ol rabis fasin blong olgeta. Mo oli stap talem se oli no wantem Jisas Kraes, be hem nomo i Hae God blong yumi, mo i Masta blong yumi. Olgeta ya, Baebol i talemaot panis blong olgeta bifo finis we bambae oli kasem. 5 Tok ya, yufala i lanem evriwan finis, be mi wantem talemgud long yufala bakegen. Bifo, taem Hae God i sevem ol laen blong Isrel, hem i tekemaot olgeta long Ijip, be biaen hem i kilim olgeta ya we oli no bilif long hem oli ded. 6 Mo yufala i mas tingbaot ol enjel ya we oli no glad blong holem hae nem we God i givim long olgeta, nao oli livim prapa ples blong olgeta, oli gowe long hem. God i fasem olgeta long jen we i no save brok samtaem, mo i lokem olgeta long ples blong tudak. Nao oli stap wet long bigfala Dei ya we God bambae i jajem olgeta long hem. 7 Mo yufala i mas tingbaot ol man blong tufala taon ya Sodom mo Gomora, mo blong ol taon raonabaot long tufala. Olgeta oli go krangke olsem ol enjel ya, nao oli mekem i nogud wetem woman, mo oli mekem i krangke wetem olgeta nomo. Nao God i panisim olgeta long faea we i no save ded samtaem, blong wonem ol man blong oli no mekem ol fasin ya. 8 Mo long sem fasin, ol man ya we oli stap agens long God naoia, oli stap luk ol rabis vison, nao oli gohed blong mekem ol fasin nogud long bodi blong olgeta. Oli stap lukluk nogud long God se hem i no gat raet long olgeta, mo oli stap tok nogud long ol enjel blong heven. 9 Be Mikael, jif blong ol enjel, hem i no mekem olsem. Taem hem i stap rao wetem Setan from bodi blong Moses, se hu long tufala bambae i tekem, be hem i no save leftemap hem blong i sakem toktok we i nogud long Setan. Hem i talem nomo se, “Hae God bambae i jajem yu se yu mas ded.” 10 Be ol man ya, sipos oli no save mining blong wan samting, bambae oli mas tok nogud long samting ya. Long fasin blong olgeta, oli olsem anamol we i no gat tingting, we i stap mekem ol samting we hem i harem nomo blong i mekem. Be fasin ya blong olgeta i stap spolem olgeta nomo. 11 !Sore tumas long ol tija ya! Oli folem rod blong man ya Ken bifo. Mo from we oli wantem mane tumas, oli foldaon long sem mastik we Profet Balam bifo i mekem. Olgeta nomo oli stap spolem olgeta from we oli girap oli agens long God, olsem we Kora i mekem bifo. 12 Taem yufala i stap mekem ol gudfala lafet ya blong yufala blong soemaot we yufala i stap lavlavem yufala, olgeta ya oli olsem wan rif afsaed we sip i save fas long hem, nao i brok. Bambae oli spolem ol lafet ya blong yufala from we oli stap kakae, oli stap dring we oli no gat sem, oli stap tingbaot olgeta nomo. Oli olsem klaod we win i karem i kam, be i no gat ren. Oli olsem wan tri we nating we long stret taem blong hem blong karem frut be hem i no gat frut blong hem nating, mo ol man oli pulumaot, nao i ded olgeta. 13 Taem bigfala solwota i brok, hem i stap waet olbaot, mo long sem fasin, ol man nogud ya, oltaem ol fasin blong sem i stap kamaot long laef blong olgeta. Oli olsem ol sta we oli foldaon, we God i makemaot ples blong olgeta finis long ples we i tudak we i tudak. 14 Inok ya bifo, we i namba seven long laen blong Adam, hem i talemaot tok we i stret long olgeta. Hem i talem se, “Yufala i luk. Bambae Hae God i kam wetem plante taosen tabu enjel blong hem. 15 Bambae hem i jajem olgeta man, nao bambae hem i givim panis long ol man we oli no obei long hem from ol samting nogud we oli mekem, mo from ol tok nogud we oli sakem long fes blong hem.” 16 Ol man ya, oltaem oli stap mekem trabol mo oli stap toktok nogud. Oli stap folem ol rabis tingting blong olgeta, mo oli stap tok flas tumas, mo oli stap switim ol narafala man blong mekem ol man ya oli folem tingting blong olgeta. 17 Ol fren. Oltaem yufala i mas tingbaot tok we ol aposol blong Jisas Kraes, Masta blong yumi oli givim long yufala bifo, blong soemaot wanem bambae i save kamtru. 18 Oli talem long yufala finis se, “Klosap long taem ya we bambae wol ya i finis, bambae i gat ol man we oli save laf long yufala. Olgeta ya bambae oli folem ol fasin we olgeta nomo oli wantem, we bambae oli no obei long God nating.” 19 Ol man olsem oli save mekem yufala i seraot, from we oli folem tingting blong olgeta, oli no folem Tabu Spirit. 20 Ol fren. Yufala i mas wok strong blong mekem bilif blong yufala i kam strong moa. Bilif ya i kamaot long God mo i klin gud. Mo oltaem yufala i mas prea long paoa blong Tabu Spirit. 21 Yufala i mas stap long laef ya we oltaem yufala i save se God i stap lavem yufala, mo oltaem yufala i mas luk long Jisas Kraes, Masta blong yumi, blong hem bambae i gat sore long yufala, i givim laef long yufala we i no save finis. 22 I gat sam man we bilif blong olgeta i no strong, oli gat tu tingting, mo yufala i mas sore long olgeta. 23 Mo i gat sam narafala man we klosap oli lus, we yufala i mas sevem olgeta, olsem we yufala i pulumaot olgeta long faea. Mo i gat sam narafala man tu we yufala i mas sore long olgeta, be yufala i mas fraet long olgeta tu. Nating we klos blong olgeta nomo, be yufala i mas fraet long hem, yufala i no mas tajem, from we ol rabis fasin blong olgeta i mekem klos blong olgeta tu i doti. 24 I gat wan God nomo we i save holem yufala, blong yufala i no foldaon. Hem nomo i save tekem yufala i kam stanap long fes blong hem long heven, we i no gat wan samting i rong long laef blong yufala, mo we yufala i glad tumas. 25 God ya, hem nomo i God, mo hem i Sevia blong yumi. Mo yumi joen long Jisas Kraes, Masta blong yumi, blong leftemap hae nem blong hem, mo blong talemaot we hem i King, we i hae moa long olgeta king, mo hem i gat olgeta paoa, i stat bifo olgeta, i kam kasem naoia, gogo i no save finis. Amen.