2 Peter

1 Mi Saemon Pita, mi man blong wok blong Jisas Kraes, mo mi aposol blong hem. Mi talem halo long yufala we yumi gat sem fasin blong bilif ya we i gud tumas. Bilif ya i kamtru long yufala from ol stret fasin ya blong Jisas Kraes, we hem i God mo i Sevia blong yumi. 2 Prea blong mi we oltaem God bambae i stap givhan moa long yufala long gladhat blong hem, mo i stap putum pis i kam moa long yufala, from we yufala i save hem, mo yufala i save Jisas, Masta blong yumi. 3 Long paoa blong God, hem i givim olgeta samting long yumi we yumi mas gat blong mekem ol fasin we hem i wantem. Ol samting ya i kamtru long yumi from we yumi save hem, mo hem nao i singaot yumi blong yumi gat hae nem mo stret laef olsem we hem i gat. 4 Long fasin ya, God i givim ol nambawan presen long yumi we oli gud tumas, olsem we hem i promes blong givim. Nao taem yufala i kasem ol presen ya, yufala i gat rod blong ronwe long fasin blong wol, we i stap spolem ol man we oli wantem tumas ol samting ya, nao yufala i save kam joen long laef blong God. 5 Nao from samting ya, yufala i mas traehad blong mekem fasin blong yufala i kam gud moa. Yufala i gat fasin blong bilif finis, ale yufala i mas soemaot bilif ya long ol fasin we i stret. Mo taem yufala i stap mekem ol fasin we i stret, ale yufala i mas soemaot we yufala i gat save. 6 Mo taem yufala i kasem save ya finis, ale yufala i mas soemaot we yufala i save blokem ol samting we yufala nomo i wantem. Mo taem yufala i save mekem olsem, ale yufala i mas soemaot we yufala i gat paoa blong holem wok longtaem. Mo taem yufala i gat paoa blong holem wok longtaem, ale yufala i mas soemaot samting ya long fasin ya we yufala i stap mekem ol samting we God i wantem. 7 Mo taem yufala i stap mekem ol samting we God i wantem, ale yufala i mas soemaot we yufala i lavem ol brata blong yufala. Mo taem yufala i stap lavem ol brata blong yufala, ale yufala i mas soemaot we yufala i lavem olgeta man. 8 I stret blong yufala i kasem ol fasin ya, mo sipos yufala i gohed blong holemstrong olgeta long laef blong yufala, bambae yufala i no save stap nating nomo. Bambae yufala i save savegud Jisas Kraes, Masta blong yumi, nao bambae laef blong yufala i save karem frut. 9 Be man we i no gat ol fasin ya long laef blong hem, i olsem we ae blong hem i nogud, hem i no save lukluk i go longwe. Hem i fogetem we ol sin we hem i mekem fastaem, God i wasemaot olgeta finis. 10 Ol brata mo sista. God i jusumaot yufala, mo i singaot yufala blong yufala i man blong hem. Mo from ol samting ya, yufala i mas traehad moa blong soemaot samting ya oltaem long laef blong yufala. Sipos yufala i mekem olsem, bambae yufala i no save foldaon samtaem. 11 Nao long fasin ya, bambae God i givim raet long yufala blong yufala i go insaed long niufala wol ya we bambae i no save lus samtaem, we Jisas Kraes, Masta mo Sevia blong yumi, hem i king long hem. 12 Nating we yufala i save finis ol samting ya, mo yufala i stap stanap strong long ol trutok we yufala i kasem finis, be oltaem mi mi mas talemaotgud ol trutok ya bakegen long yufala. 13 Mi mi savegud se bambae i no longtaem, mi mi aot long bodi blong mi, stret olsem we Jisas Kraes, Masta blong yumi i talemaot i klia long mi bifo. Nao from samting ya, taem mi stap yet long bodi ya, i stret nomo blong mi talemaot ol tok ya oltaem, blong wekemap yufala. 15 Mo mi mas traehad blong givhan long yufala, blong bambae taem mi mi aot long wol ya, be oltaem yufala i save tingbaot ol trutok ya bakegen. 16 Taem mifala i talemaot long yufala, se Jisas Kraes Masta blong yumi i gat paoa, mo bambae hem i kambak bakegen, be mifala i no kasem ol samting ya long ol storian olbaot, nogat. Mifala tri, we long ae blong mitrifala, mifala i luk laet ya we i saenaot long Kraes, we i saen we i saen. 17 Taem God Papa blong yumi i leftemap nem blong hem, nao i mekem laet ya i saenaot long hem, mitrifala i stap. Nao mitrifala i harem tok i kamaot long bigfala laet blong heven, i talem se, “Hemia Pikinini blong mi ya, we mi lavem hem. Mi mi glad tumas long hem.” 18 Taem mitrifala i stap wetem hem long bigfala hil ya we i tabu, mitrifala i harem tok ya we i aot long heven i kam. 19 Ol samting ya oli mekem mifala i save moa we tok blong ol profet i tru. I gud yufala i lesin gud long hem from we tok blong ol profet i olsem wan laet we i stap saen long ples we i tudak. Laet ya bambae i stap saen, gogo i brok delaet, nao bigfala Dei ya i kamtru, mo laet blong moningsta i kasem tingting blong yufala. 20 Be wan bigfala samting we yufala i mas tingbaot i olsem. Wok blong talemaot mining blong tok blong ol profet we i stap long Baebol, hem i no wan wok we man i save mekem, hem wan, 21 from we i no gat tok blong profet we i kamaot long tingting blong man nomo. Taem tok blong profet i kamaot, ol profet oli talem, be Tabu Spirit i stap givim tok long olgeta, nao oli talemaot tok we i kamaot long God.

2 Peter 2

1 Bifo, i gat ol profet we tijing blong olgeta i no stret, oli kamtru long ol man, mo long sem fasin, bambae i gat ol tija oli kamtru long yufala we tijing blong olgeta i no stret. Bambae oli tekem ol giaman toktok i kam insaed, we i save spolem bilif blong yufala. Bambae oli tanem baksaed long Masta ya blong olgeta we i pemaot olgeta i mekem olgeta oli fri. Be kwiktaem nomo, bambae olgeta nomo oli spolem olgeta bakegen, 2 mo plante man tu bambae oli folem fasin blong olgeta ya we i nogud we i nogud. Mo from fasin ya blong olgeta, bambae plante man oli tok nogud long Rod blong Trutok. 3 Mo from we oli hanggri tumas blong kasem mane, bambae oli winim plante mane long ol giaman toktok blong olgeta. Be God bambae i jajem olgeta, mo hem i stap rere long olgeta longtaem finis. Hem bambae i spolem olgeta, mo hem i no save slip, i stap wet long olgeta. 4 Yufala i save. Taem ol enjel ya bifo oli mekem sin, God i no letem olgeta oli go fri nomo. Hem i sakem olgeta oli go long hel. Long ples ya, hem i fasem olgeta long jen, nao oli stap long tudak, oli stap wet long Dei ya we hem bambae i jajem olgeta. 5 Mo God i no letem ol man ya bifo long taem blong Noa oli go fri. Hem i sevem Noa we i wan prija we i stap talemaot stret fasin, wetem seven narafala man tu, be i letem wota i kam bigwan, i draonem ol narafala man ya we oli no obei long hem. 6 God i jajem tufala taon ya Sodom mo Gomora, nao i bonem tufala long faea, tufala i kam olsem asis nomo. Hem i mekem olsem, blong soemaot fasin we hem i save mekem long ol man we oli kam biaen, we oli no obei long hem. 7 Be hem i sevem Lot. Man ya, fasin blong hem i stret, mo hem i stap harem nogud tumas from ol fasin nogud we ol rabis man long ples ya oli stap mekem. 8 Hem i stap long medel blong olgeta, mo oltaem hem i stap luk rabis fasin blong olgeta, mo i stap harem rabis tok blong olgeta, mo evri dei nomo, hem i stap harem nogud tumas from. 9 Ol samting ya i soemaot we Hae God i save sevem ol man we oli bilif long hem, i save tekemaot olgeta long ol samting we i stap traem olgeta. Be ol man we oli no stret, hem i save holem olgeta oli stap long kalabus, gogo bambae bigfala Dei ya blong jajem man i kamtru. 10 Mo olgeta we oli no save mestem blong go long kalabus, hemia olgeta ya we oli stap mekem ol rabis fasin we olgeta nomo oli wantem, wetem olgeta ya we oli stap lukluk God olsem rabis nomo. Ol tija ya oli stronghed, mo oli wantem folem tingting blong olgeta nomo. Oli no save ona long ol enjel long heven, oli stap tok nogud nomo long olgeta. 11 Be ol narafala enjel we oli hae moa, mo oli gat paoa moa long ol tija ya, oli no save ripotem olgeta, mo oli no save tok nogud long olgeta long fes blong Hae God. 12 Ol tija ya oli olsem anamol stret. Anamol i no gat tingting blong hem, i stap mekem ol samting we i harem nomo blong mekem, mo i stap nomo blong narafala anamol i kam kasem hem, i kilim hem. Ol tija ya i olsem. Oli stap tok nogud long ol samting we oli no savegud olgeta. Nao bambae oli save lus olsem ol anamol nomo. 13 Pei blong olgeta from we oli mekem ol narafala man oli harem nogud long bodi blong olgeta, bambae olgeta tu oli harem nogud long bodi blong olgeta. Olgeta ya oli glad nomo blong mekem ol rabis lafet blong olgeta long delaet. Olgeta oli stap mekem sem long nem blong yufala, oli stap spolem yufala. Oli save kam sidaon blong kakae wetem yufala, be long semtaem nomo, oli stap giaman long yufala, oli stap mekem nogud. 14 Oltaem olgeta oli wantem wan samting nomo, oli wantem stilim woman. Oli stap hanggri blong mekem sin olwe nomo. Oli stap pulum ol man we oli no strong oli go krangke. Oli lanem finis fasin blong wantem tumas ol samting blong narafala man. Olgeta ya, tok blong God i stap long olgeta finis, se bambae oli mas lus. 15 Oli lego stret rod nao oli go krangke, oli folem fasin blong Profet Balam ya bifo, pikinini blong Beo. Hem i wantem mane tumas. Hem i ting se bambae i kasem mane from rabis fasin blong hem. 16 Be God i tok long hem from rabis fasin ya blong hem, i yusum wan dongki we i tok olsem man blong blokem krangke fasin we profet ya i stap mekem. 17 Ol tija ya oli olsem springwota we i drae finis, oli olsem ol klaod we bigfala win i blu, i tekemaot olgeta. God i mekemrere wan ples blong olgeta finis we i tudak we i tudak. 18 Oli stap mekem ol flas tok we i krangke nomo, blong leftemap ol rabis tingting ya we man i wantem ol samting blong bodi blong hem nomo. Oli stap mekem fasin ya blong pulum ol man we oli jes kamaot long hiten, blong oli go krangke bakegen. 19 Ol tija ya oli stap promes long ol man ya, se bambae oli fri, be olgeta ya oli no fri nating, oli olsem slef nomo blong ol fasin ya we i stap spolem olgeta. Olgeta oli no fri, from we taem wan fasin i winim man, we man i no save blokem, man ya i olsem slef blong fasin ya nao. 20 Taem man i save Jisas Kraes, Masta mo Sevia blong yumi, hem i save aot long ol fasin blong wol, we oli mekem hem i doti. Be sipos biaen, hem i gobak bakegen, i paspas long ol fasin ya, nao oli kam bos blong hem bakegen, bambae trabol blong man ya i nogud moa, i winim trabol we hem i gat fastaem, taem hem i no save Jisas yet. 21 Sipos man olsem i no save rod blong stret fasin samtaem, hemia i nogud. Be sipos man olsem i save rod ya, be biaen i tanemraon, i gobak, i livim tabu tok we God i givim long hem, hemia i nogud moa. 22 Fasin blong man olsem i soemaot we tu olfala tok ya i tru we wan i talem se, “Dog i save gobak blong kakae traot blong hem bakegen,” mo narawan i talem se, “Taem pig i swim gud finis, be biaen, bambae hem i save go slip bakegen long sofmad.”

2 Peter 3

1 Ol fren. Hemia seken leta blong mi we mi raetem i kam long yufala. Mo long tufala leta ya, mi stap tok blong wekemap yufala, blong mekem tingting blong yufala i stret. 2 Mi wantem yufala i tingbaot bakegen, ol tok we ol tabu profet oli talem bifo, mo tok blong Masta mo Sevia blong yumi, we mifala ol aposol, mifala i bin talemaot long yufala. 3 I gat wan samting we yufala i mas save. Long taem blong Lasdei, bambae sam man oli save kamtru, we fasin blong olgeta blong wantem ol samting nogud, hem i bos blong olgeta. Olgeta ya bambae oli laf long yufala, 4 oli talem se, “?Olsem wanem nao? ?Hem i promes finis blong kam, be hem i stap wea? Ol olfala blong yumi oli lus evriwan finis, be i no gat wan samting i jenis. I stat bifo olgeta, taem we God i mekem wol ya fastaem, i kam kasem tede, evri samting oli stap sem mak nomo.” 5 Olgeta oli stap tok olsem be oli no wantem tingbaot we bifo longtaem, God i tok, nao skae mo graon tufala i kamaot. Hem i mekem graon ya i kamaot long medel blong ol wota, mo hem i yusum wota ya blong wokem olgeta ples long wol. 6 Mo long sem fasin, hem i yusum wota bakegen blong spolem, long taem ya we hem i spolem wol ya we i stap bifo, long wota ya we i ron bigwan. 7 Be skae mo graon we i stap naoia, tok blong God i blokem tufala, tufala i stap wet blong bambae faea i kasem tufala. Tok ya bambae i stap holem tufala, gogo i kasem bigfala Dei ya we God bambae i jajem ol man we oli no obei long hem, nao bambae oli lus. 8 Ol fren. I gat wan poen we yufala i mas tingbaot. Long fes blong Masta blong yumi, wan dei, mo wan taosen yia, be tufala i sem mak nomo, tufala i no naranarafala. 9 Sam man oli ting se Masta blong yumi i stap tektaem tumas, i no mekem promes blong hem i kamtru kwik, be i no olsem. Hem i stap mekem tingting blong hem i longfala blong wet long yufala, from we hem i no wantem se bambae wan man i lus. Hem i wantem blong olgeta man bambae oli tanem tingting blong olgeta from ol sin blong olgeta. 10 Be Dei blong Masta blong yumi bambae i kam olsem we man blong stil i kam, we i kam long taem we man i no save. Mo long Dei ya, bambae i gat bigfala noes, nao skae bambae i lus. Bigfala faea we i hot we i hot bambae i bonem ol sta gogo oli ronaot, mo wol tu, wetem evri samting blong hem bambae i lus. 11 Nao from we olgeta samting ya bambae oli lus olsem, yufala i mas luklukgud long laef blong yufala. Taem yufala i stap wet long Dei ya blong God blong i kamtru, yufala i mas tabu, yufala i man blong God, mo yufala i mas mekem ol fasin we hem i wantem. Mo yufala i mas gohed blong wok blong mekem Dei ya i kamtru kwik. Long Dei ya, bambae faea i kakae skae we i finisim olgeta, mo ol sta bambae oli ronaot long faea ya we i hot we i hot. 13 Be God i promes finis blong putum niufala skae mo niufala wol, we stret fasin nomo bambae i stap long hem. Mo yumi stap wet long ol samting ya blong oli kamtru. 14 Ol fren. From ol samting ya, taem yufala i stap wet long Dei ya, yufala i mas traehad blong mekem we long fes blong God, laef blong yufala i klin gud, mo we i no gat wan samting i rong long laef blong yufala. Nao long fasin ya, yufala i gat pis wetem God. 15 Masta blong yumi i gat longfala tingting blong wet long yufala. Mo yufala i mas luk fasin ya blong hem olsem janis blong yufala blong God i sevem yufala, nao yufala i no kasem panis. Gudfala brata ya blong yumi Pol, hem i raetem leta i kam long yufala long waes we God i givim long hem, mo i talemaot sem rod nomo long yufala. 16 Oltaem long ol leta blong hem, hem i stap tokbaot ol samting ya. Long ol leta blong hem, sam tok blong hem i strong blong save. Mo sam man we oli no gat hed, we tingting blong olgeta i no stret, oli tanem mining blong ol tok ya i kam narafala, olsem we oli stap mekem long ol narafala tok we i stap long Baebol. Long fasin ya olgeta oli stap spolem olgeta, mo bambae oli lus. 17 Ol fren. Yufala i kasem finis ol tok blong wekemap yufala, taem trabol ya i no kamtru yet. From samting ya, yufala i mas lukaot gud. Sipos no, ol man ya we oli no holem stret fasin, bambae oli pulum yufala long ol krangke tok blong olgeta, nao bambae yufala i aot long sef ples ya we yufala i stap long hem, yufala i foldaon. 18 Be oltaem yufala i mas kam strong moa long Kristin laef blong yufala, we Jisas Kraes, we i Masta mo Sevia blong yumi, i stap givhan moa long yufala long gladhat blong hem, mo we yufala i save hem moa. Yumi mas leftemap nem blong hem i stap go antap oltaem, i stat naoia, gogo i no save finis. Amen.