Titus

1 Surat uli tiang, Paulus, parekan Ida Sang Hyang Widi Wasa muah utusan Ida Hyang Yesus Kristus. Tiang suba kaselik muah kutus buat magehang kapracayan kaula seselikan Ida Sang Hyang Widi Wasa muah buat nuntun kaulan Idane, apanga sayan teleb baana ngresepang kasujatian ane kuruk baan agaman iragane, 2 ane kadasarin baan pangajap-ajap buat ngulati idup ane langgeng. Ida Sang Hyang Widi Wasa, ane tusing pesan taen linyok, Ida suba nyanjiang idup ane langgeng ento teken iraga uli duk tan ana paran-paran. 3 Didina ane suba pastiang Ida, Ida Sang Hyang Widi Wasa suba nyinahang unduke ento sajeroning Orti Rahayun Idane, ane pisarayang Ida teken tiang muah ane ortaang tiang manut pituduh Ida Sang Hyang Widi Wasa, Juru Rahayun iragane. 4 Surate ene katiba teken Titus, pianak tiange ane sujati sajeroning kapracayan iragane teken Ida Sang Kristus. Dumadak Ida Sang Hyang Widi Wasa, Sang Aji muah Ida Sang Kristus Yesus, Juru Rahayun iragane maicayang sih pasueca muah sutrepti rahayu teken cening. 5 Tiang ngutang cening di Pulo Kreta, apanga cening nabdabang paundukan-paundukan ane perlu kadabdab muah buat milih saha ngadegang panglingsir-panglingsir pasamuane di asing-asing kota. Ingetangja pitutur-pitutur tiange ene; 6 anake ane dadi panglingsir ento patut tan paceda; ia patut ngelah kurenan tuah aukud dogen muah pianak-pianakne patut pracaya teken Ida Sang Kristus, buina ia tusing taen nekaang paplungguhan malarapan solah pianakne ane tuara nganutin pidabdab muah tuara ngidepang munyi. 7 Sawireh ia kapisarain pakaryan Ida Sang Hyang Widi Wasa, panglingsir pasamuane ento patut tan paceda. Ia tusing dadi ngagu wiadin brangsongan wiadin demen mapunyah-punyahan, gemes wiadin loba angkara. 8 Ia patut demen nampi dunungan, demen teken paundukan-paundukan ane melah, nyidayang ngeret budi, polos, sadu muah bisa ngabetang dewek. 9 Ia patut kukuh ngagem sabda ane patut kagugu muah ane adung teken paurukan ento, apanga ia nyidayang mituturin anak lenan baan paurukan ane sujati, buina ia nyidayang nyinahang kapelihan anake ane nungkasin ia. 10 Sawireh liu ada anak ane tungkas muah anak ane nguluk-uluk anak lenan baan raos ane puyung, minakadinne pesan di pantaran anak Yahudine ane suba pracaya teken Ida Sang Kristus. 11 Anake ane buka keto patut kabungkem apanga ia siep, sawireh ia nguugang pakurenan anak baan paurukan ane tuara patut, buat munduhang pipis aji cara ane ngranayang kimud. 12 Salah tunggal uli pantaran nabinnyane, anak uedan pulo Kreta, suba ngorahang buka kene: "Wong Kretane ento mula setata demen mobab, buron ane loba angkara, jadma ane mayus, budag ngamah." 13 Unduk ane orahanga ento mula saja beneh buka keto. Ento krananne, sangetang pesan nglemekin anake ento makejang, apanga ia nguleng pracaya teken Ida Sang Kristus, 14 buina apanga ia suud ngrunguang satuan anak Yahudine muah pituduh-pituduh manusane, ane kawitne uli manusa, ane suba nulak kasujatiane ento. 15 Buat anake ane suci, saluiring paundukan dadi suci, nanging pabuat anake cemer muah ane tuara pracaya teken Ida Sang Kristus, tusing ada paundukan ane suci, sawireh budi muah angennyane pada cemer. 16 Ia pada ngaku nawang Widi, nanging parisolahnyane moyanin Widi. Ia pada setata geting muah piwal teken pituduh, tuara mampuh ngae ane melah.

Titus 2

1 Nanging cening patut ngurukang paurukan-paurukan ane melah. 2 Pituturinja anake muani ane tua-tua, apanga ia tusing mapunyah-punyahan, nanging apanga pada enteg ngaba keneh muah ngeret budi, pada pageh sajeroning kapracayan, kapitresnan muah sabar. 3 Keto masih tuturinja eluh-eluhe ane tua-tua. Apanga ia masolah satinut teken solah eluh-eluhe ane sadu. Apanga tusing demen ngae pisuna muah katagihan nginum anggur. Ia patut ngurukang paundukan-paundukan ane melah, 4 buat ngajahin eluh-eluhe ane cerikan nresnain kurenan muah pianak-pianaknyane, 5 ngeret budi muah tan paceda, jemet nabdabang pumahannyane, satinut teken kurenane, apanga sabdan Ida Sang Hyang Widi Wasa tusing kanti cacada baan anake. 6 Aketo masih pituturinja paratrunane apanga ia pada ngeret budi. 7 Cening niri patut dadi tetuladan sajeroning laksanan ceninge di saluiring paundukan. Buina cening patut tansah jujur muah teleb sajeroning paurukan ceninge. 8 Gunayangja raos ane beneh, apanga tusing kanti sida baana melihang baan anake, buina apanga musuh-musuh ceninge pada marasa kimud, sawireh tusing sida baana nyelekang iraga. 9 Anak ane dadi panjak patut ia satinut teken pamekelnyane, tur tansah ngae kaliangan keneh pamekelne. Ia patut tusing bani tulak teken munyin pamekelne, 10 wiadin mamaling pagelahan pamekelne. Tungkalikane ia patut tansah muktiang awakne maperah melah tur satia tuu, apanga uli laksanannyane ento, anake makejang pada pracaya teken sabdan Ida Sang Hyang Widi Wasa, Juru Rahayun iragane. 11 Sawireh Ida Sang Hyang Widi Wasa suba nyinahang sih pasuecan Idane buat ngrahayuang manusane makejang. 12 Sih pasuecan Idane ento mituduhang iraga, apanga iraga ngutang idup ane tan pawidi muah saluiring indriane ane sekala, buina apanga iraga ngeret budi, jujur muah astiti bakti teken Ida Sang Hyang Widi Wasa di gumine ene, 13 sajeroning iraga ngati-ati dina ane kamertanin baan Ida Sang Hyang Widi Wasa, Juru Rahayun iragane. Didinane ento kaluihan Ida Sang Hyang Widi Wasa ane luih muah Ida Sang Kristus Yesus lakar kasinahang. 14 Ida suba maicayang ragan Idane teken iraga, buat ngluputang iraga uli saluiring kacorahan muah nadiang iraga kaulan Idane ane suci, ane dadi druen Idane ngraga, buina ane demen ngae paundukan-paundukan ane melah. 15 Urukangja paundukan-paundukane ene, tur anggonja wewenang ceninge buat mituturin muah nglemekin anake ane nyak madingehang tutur ceninge, apanga eda cening kanti temberanga.

Titus 3

1 Patingetja warga pasamuan ceninge, apanga ia pada ngasorang deweknyane teken parapamrentah muah parapanguasane, buina apanga ia pada satinut muah sadia nglaksanayang gegaen ane melah. 2 Pituturinja ia, apanga ia tusing misunayang anak lenan, nanging apanga ia pada sapsap muah setata ajer tur masolah andap asor marep teken anake makejang. 3 Sawireh ane malu iraga mamuduh, tusing ngidepang munyi muah murang laku. Iraga demen ngulurin indria muah kawiryan. Iraga mabikas corah muah setata iri, buina saling gedegin. 4 Nanging dikalane sih pasueca muah welas asih Ida Sang Hyang Widi Wasa, Juru Rahayun iragane kasinahang, 5 Ida ngrahayuang iraga. Tusingja malarapan pakardin iragane ane melah, nanging tuah uli krana sih kapiolasan Idane. Ida suba ngrahayuang iraga malarapan lelukatan, tur sangkaning ento Roh Idane maicayang idup ane anyar teken iraga. 6 Malantaran Ida Hyang Yesus Kristus, Juru Rahayun iragane, Ida Sang Hyang Widi Wasa maicayang Roh Idane teken iraga kanti maliah-liah, 7 apanga masrana sih pasuecan Idane, iraga sida kadameang pamantuka teken Ida Sang Hyang Widi Wasa muah sida molih idup ane langgeng, ane ajap-ajap iraga. 8 Raos tiange ene sujati pesan. Pangaptin tiange, apanga cening nyekenang paundukan-paundukane ene, apanga anake ane pracaya teken Ida Sang Hyang Widi Wasa ngusahayang deweknyane buat ngae melah. Ene paundukan ane melah tur maguna pabuat anake muani-muani. 9 Nanging kelidinja pasogsag ane tan papuara, babad palelintihan ane dawa-dawa, paiegan muah pagerengan unduk Pidabdab Torate. Ento makejang tan mapikenoh buina tan papuara. 10 Anake ane ngae sogsag di pantaran ceninge glemekinja kanti ping pindo, suud keto sepekangja ia. 11 Cening suba nawang, mungguing anake ane buka keto ento anak dursila tur dosan-dosannyane muktiang kadursilannyane. 12 Yen tiang ngutus Artemas wiadin Tikikus nekain cening, usahayangja dewek ceninge buat nekain tiang ka kota Nikopolis, sawireh tiang suba makeneh lakar nongos ditu dimasan dingine. 13 Saratangja nulungin Senas, ane dadi pangacara muah Apolos, apang ia ajaka dadua nyidayang majalan luas, tur tureksainja apanga ia tusing kanti kuangan bekel. 14 Urukangja warga pasamuane setata mapagae melah, buat nyukupang pangupajiwannyane; apanga idupnyane mapikenoh. 15 Sakancan anake ane sig tiange nekedang pangayu bagia teken cening. Tekedangja pangayu bagian tiange teken timpal iragane sajeroning kapracayan teken Ida Sang Kristus. Sih pasuecan Ida Sang Hyang Widi Wasa ngraksa cening ajak makejang.