James

Yakobus

1 Pangayu bagia saking tiang Yakobus, parekan Ida Sang Hyang Widi Wasa miwah Ida Hyang Yesus Kristus, buat kaulan Ida Sang Hyang Widi Wasa sane pada sumebar ring sakuub jagate. 2 Parasemeton, yening semeton katempuh antuk gegodan mawarni-warni, semeton patut marasa aget. 3 Santukan parasemeton sami sampun pada uning, yening kapracayan semetone mrasidayang ngarepin gegodan-gegodane punika, pamuputipun semeton pacang molih kapagehan. 4 Pracayaja mungguing kapagehan semetone punika jaga nuntun semeton ring salampah lakun semetone, saha semeton tan pacang labuh, mangdane semeton prasida sampurna tur jangkep, samaliha tan kakirangan punapa-punapi. 5 Nanging yening wenten ring pantaran parasemeton sane kirang wicaksana, mangda ipun ngastawa ring Ida Sang Hyang Widi Wasa sane pacang ngicen ipun kawicaksanan; santukan Ida Sang Hyang Widi Wasa kalintang dana tur tan madue pamrih ring jadmane makasami. 6 Nanging yen semeton ngastawa, mangda semeton sawiakti pracaya, tur tan pisan-pisan dados bingbang ring kayun. Santukan anake sane bingbang, tan bina sakadi ombak segarane, sane kampehang antuk angine mrika-mriki. 7 Jadmane kadi asapunika sampunang ipun mitaenang pinunasipune pacang kadagingin antuk Ida Sang Panembahan. 8 Santukan anake sane mapi-mapi, tan pacang marasa tentrem ring uripnyane. 9 Buat parasemeton sane tiwas ipun patut suka bungah yening Ida Sang Hyang Widi Wasa ningtingang ipun. 10 Asapunika taler buat semeton-semeton sane sugih, ipun patut suka bungah yening Ida Sang Hyang Widi Wasa ngasorang ipun. Santukan anake sugih punika pacang ical sakadi bungan padange. 11 Rikala sang surya sampun endag panesnyane ngranayang padange layu, bungannyane aas tur kaasriannyane kasirnayang. Kadi asapunika waluyane kawentenan anake sugih. Ipun pacang kasirnayang sajeroning ipun repot ngetangang kasugihanipune. 12 Bagia pisan anake sane pageh satia tuu sajeroning gegodan. Santukan yening ipun mrasidayang nglintangin gegodane punika, ipun jaga molih upah, inggih punika urip sane sampun kajanjiang antuk Ida Sang Hyang Widi Wasa buat sawatek anake sane astiti bakti ring Ida. 13 Yen wenten anak sane katempuh gegodan sane kadi asapunika, sampunang ipun mabaos: "Gegodane puniki saking Ida Sang Hyang Widi Wasa rauhnya." Santukan Ida tan pisan prasida kagoda antuk dursila, tur Ida tan pisan-pisan mintonin isapasira jua. 14 Nanging jadmane punika keni gegodan, yening ipun kapaid tur keni kajeet antuk indrianipune sane corah. 15 Raris indrianipune sane corah punika mobot tur ngembasang dosa, samaliha idosa punika, yen sampun tutug wulananipune raris ngembasang pati. 16 Parasemeton, sampunangja semeton keni kauluk-uluk! 17 Saluiring paicane sane becik miwah wara nugrahane sane sampurna, punika rauhnya saking suarga tumurun saking Ida Sang Hyang Widi Wasa sane ngardi galang suargane. Ida ngraga tan obah-obah; tur lawat peteng taler tan wenten ring anggan Idane. 18 Malantaran pakarsan Idane ngraga Ida ngadakang iraga antuk sabda jati, mangdane iraga puniki molih genah sane pamucuk ring pantaran saluiring sane kakardi antuk Ida. 19 Parasemeton sane tresnain tiang, elingang pisan atur tiange puniki: Semeton suang-suang mangda gelis mirengang, nanging mangda tan gegison mabaos tur sampunang gelis duka. 20 Santukan pedihe punika tan pacang muponin pakarsan Ida Sang Hyang Widi Wasa sane patut. 21 Duaning punika bebasangja ragan semetone saking kabiasaan sane cemer miwah sakatahing parisolahe sane dursila. Sumungkemja ring Ida Sang Hyang Widi Wasa, tur tampija sabda sane sampun celekang Ida ring telenging pakayunan parasemetone, inggih punika sabda sane kuasa ngrahayuang semeton. 22 Sampunangja semeton mamelog, malantaran wantah mirengang sabdan Idane. Nanging laksanayangja sabdane punika. 23 Sapasiraja miragiang sabdane punika, nanging ipun nenten nglaksanayang sabdane punika, ipun tan bina sakadi anak sane masuluh ring mekane tur manggihin lawatipune niri. 24 Ipun mrasidayang uning ring rupannyane, nanging wau ipun makaon, ipun lali ring rupannyane niri. 25 Nanging sapasiraja sane yakti nlektekang pidabdabe sane sampurna, inggih punika pidabdab sane ngawinang jadmane merdeka, tur ipun pageh puguh nyungkemin, samaliha boyaja wantah miragi tur raris lali, nanging puguh taler nglakonin, anake punika kamertanin antuk Ida Sang Hyang Widi Wasa sajeroning laksananipune. 26 Yening wenten anak sane mitaenang dewek sampun ngamargiang agama, nanging ipun tan majangka-jangka sajeroning mabaos, ipun ngapus awakipune niri tur nirguna agamanipune. 27 Pangubakti sane patut miwah sujati ring ayun Ida Sang Hyang Widi Wasa, Ajin iragane, inggih punika: nelokin anak ubuh miwah parabebalu sane kaliput antuk kakewehan. Ping kalih nyaga dewek mangda sampunang kantos karusak antuk jagate puniki.

Yakobus 2

1 Parasemeton, sakadi anak sane sampun pracaya ring Ida Sang Hyang Widi Wasa, Panembahan iragane Sane Maha Luur, sampunangja mapilih kasih marep ring anake sinamian rikalaning semeton ngayahin anak. 2 Rikalaning kawentenang kumpulan pangubakti, menawi wenten anak sugih rauh ngangge pangangge sarwa mule, minakadinne: maali-ali mas miwah wenten taler anak tiwas rauh, sane mapangangge dekil. 3 Yening rikala punika semeton bangetan ngajiang anake sane mapangangge sarwa becik iwau, tur mabaos ring ipun sapuniki: "Rarisang semeton malinggih ring ajeng," nanging arepa ring anake sane tiwas punika semeton mabaos: "Semeton becikan ngadeg irika," wiadin: "Rarisang malinggih iriki ring samping batis tiange!", 4 kenginan malantaran punika semeton sampun iwang, santukan semeton mapilih kasih ring pantaran semetone miwah semeton sampun ngamargiang tetepasan antuk manah dursila. 5 Parasemeton sane tresnain tiang, sane mangkin indayang pirengang! Ida Sang Hyang Widi Wasa sampun milih anak sane tiwas ring jagate iriki mangdane dados sugih sajeroning kapracayan tur dados kaulan Ida Sang Hyang Widi Wasa ring jagate sane anyar sane sampun janjiang Ida buat anake sane bakti ring Ida. 6 Nanging semeton nganistayang anake sane tiwas. Sapasirake sane makta semeton ka pangadilan tur nyangsarain semeton? Boyake anake sane sugih? 7 Ipun sane nganistayang parabe sane luih, sane sampun kapaicayang ring semeton. 8 Nanging yening semeton pageh mamargi manut pituduh Pamrentahan Ida Sang Hyang Widi Wasa, sane munggah ring Cakepan Sucine, inggih punika: "Tresna asihja teken sesama buka nresnain deweke padidi," semeton sampun malaksana sane patut. 9 Nanging yening semeton mapilih kasih, semeton sampun ngardi dosa. Tur pituduhe iwau nyisipang semeton, mungguing semeton sampun tungkas ring pituduh. 10 Sapasiraja tungkas ring Pidabdab Torate, yadiastu wantah asiki, ipun iwang, tur tungkas ring pituduhe makasami. 11 Santukan Ida sane masabda: "Edaja mamitra," Ida taler sane masabda: "Edaja ngamatiang." Dadosipun, yadian semeton tan nglakonin mamitra, nanging mamati-mati, semeton sampun tungkas ring pituduhe punika. 12 Duaning punika becikan parasemeton sajeroning mabaos miwah matingkah solah, mangda sakadi anak sane jaga katepasin antuk pituduh sane jaga mebasang punika. 13 Santukan Ida Sang Hyang Widi Wasa tan pacang nyinahang sih pasueca rikala Ida nepasin jadmane sane tan maderbe sih kapiolasan; nanging sih kapiolasane punika ngaonang tetepasane punika. 14 Parasemeton yening wenten anak sane maosang padewekanipune madue kapracayan, nanging laksananipune tan manut ring kapracayan punika, napike pikenohipune? Punapike mrasidayang kapracayannyane punika ngrahayuang ipun? 15 Yening wenten semeton lanang wiadin istri sane tan madue pangangge wiadin tan madue dedaaran sane patut daar ipun nyabran rahina, 16 raris saking pantaran semetone wenten sane mabaos: "Rahayuangja mamargi parasemeton, saputin ragane mangda anget, tur majenganja mangda wareg!" nanging parasemeton tan pisan ngwehin ipun punapa-punapi sane patut buat sikiannyane, napike pikenohipun baos semetone iwau? 17 Kadi asapunika taler ngeniang indik kapracayan punika. Kapracayane yen tan kadulurin antuk laksana, sujatinipun kapracayan punika sampun padem. 18 Menawita wenten anak mabaos: "Wenten anak sane madue kapracayan, wenten anak sane madue laksana," tiang jagi nyaurin ipun: "Indayang edengang ring tiang, tur tiang pacang ngedengang ring ragane kapracayan tiange antuk laksanan tiange." Sapunapi antuk anake jaga madue kapracayan, yening ipun tan kadulurin antuk laksana. 19 Ragane pada pracaya mungguing Ida Sang Hyang Widi Wasa punika tunggal. Patut! Nanging setan-setane taler pada pracaya, tur ipun sami pada jejeh ngetor. 20 Ih manusa punggung, sapunapi mangkin, kayunke semeton mariangken, mungguing kapracayan sane tan kadulurin antuk laksana punika sujatinne puyung? 21 Boyake Dane Abraham, leluur iragane, kadameang pamantuka ring Ida Sang Hyang Widi Wasa majalaran laksanan danene, rikala dane ngaturang Ishak, okan danene ring genah aturane? 22 Irika semeton nyingak, mungguing kapracayan miwah laksana punika saling tulung. Tur antuk laksanane punika kapracayane punika dados sampurna. 23 Duaning punika prasida tegep sabda sane sampun kakecap ring Cakepan Sucine sane kadi asapuniki: "Irika Dane Abraham raris pracaya ring Ida Sang Hyang Widi Wasa, tur malantaran kapracayan danene, Ida Sang Hyang Widi Wasa ledang nampi dane." Duaning punika Dane Abraham kawastanin sawitran Ida Sang Hyang Widi Wasa. 24 Sane mangkin sampun pada sinah, mungguing manusane punika kadameang pamantuka ring Ida Sang Hyang Widi Wasa majalaran saking laksanannyane, boyaja wantah antuk kapracayannyane kewanten. 25 Rahab, sundele punika, taler kadi asapunika. Ipun taler kadameang pamantuka ring Ida Sang Hyang Widi Wasa majalaran laksananipune, rikala ipun ngengkebang utusan bangsa Yahudine ring umahnyane, tur nulungin utusane punika mangda prasida luput, nuut margine sane lianan. 26 Santukan pateh sakadi sikiane puniki, yening tan madaging roh, ipun padem, kadi asapunika taler kapracayan punika yening tan kadulurin antuk laksana taler padem.

Yakobus 3

1 Parasemeton, saking pantaran parasemeton sampunang akeh sane mamanah dados guru; santukan iraga sampun sami pada uning, mungguing guru punika pacang katepasin antuk tetepasan sane abotan ring anake sane lianan. 2 Santukan iraga sareng sami puniki sering ngardi iwang. Sapasira sane tan iwang sajeroning bebaosan, ipun sampun kawastanin sampurna, tur ipun mrasidayang ngereh sikianipune. 3 Bungut kudane kapasangin padangal, mangda ipun nyak tinut ring iraga, tur iraga mrasidayang mrentah ipun manut ring saparimanah iragane. 4 Maliha indayangja cingakin kapale punika! Yadian kapale punika kalintang ageng, tur kampehang angin sane baret, nanging ipun prasida kareh antuk kemudi sane alit pisan manut saparimanah ijuru mudi. 5 Kadi asapunika taler lidahe punika, yadiastu lidahe punika kalintang alit nanging mrasidayang nyumbungang paindikan-paindikan sane ageng-ageng. Indayang mangkin malih pakayunin genine punika. Yadian ipun katon kalintang alit, nanging ipun mrasidayang muunang alase sane jimbar. 6 Lidahe punika tan bina sakadi geni, ipun satmaka sakadi jagat sane bek madaging kiwangan. Ipun nglikub sikian iragane, tur nglikub sikian iragane antuk kacorahan. Ipun ngeseng sakuub urip iragane antuk geni, sane rauhipun saking nraka. 7 Sawatek sato alase, sarwa paksi miwah sato sane ngrayang miwah satone ring segarane sami prasida kaebohang antuk imanusa, 8 nanging durung naenin wenten jadma sane nyidayang ngebohang layahnyane. Lidahe punika sujatinne kalintang galak tur tan sida kaprentah. Ipun bek madaging wisia sane ngamademang. 9 Iraga ngluihang Ida Sang Aji, Panembahan iragane antuk lidah, nanging antuk lidahe punika taler iraga nemah sane kakardi manut gambar Ida Sang Hyang Widi Wasa. 10 Saking cangkeme sane asiki punika wetu temah miwah puji suksma. Paindikan-paindikan sane sakadi asapunika ring pantaran parasemeton tan pisan-pisan patut. 11 Punapike wenten klebutan toya sane asiki pacang ngwetuang toya sane manis miwah toya sane pait? 12 Parasemeton, punapi wenten punyan aa mabuah saitun, wiadin punyan anggur ngamedalang woh aa? Kadi asapunika taler klebutan toyane sane pakeh, tanja ngamedalang toya nyem. 13 Punapi wenten ring pantaran semetone sane wicaksana miwah midep? Ipun patut muktiang indike punika antuk laksananipune sane becik, malantaran solahnyane sane kasinahang antuk alap asor miwah kawicaksanan. 14 Yening semeton madue pakayunan iri ati, tur wantah ngulahang sikian kewanten, sampunangja semeton nyumbungang raga, tur sampunang mogbog arepa ring kasujatian! 15 Kawicaksanan sane kadi asapunika boyaja kawicaksanan sane saking suarga, nanging saking jagate puniki, medal saking angkaran manusane, inggih punika saking setan. 16 Santukan ring dijaja wenten iri ati miwah indik ngulahang dewek kewanten, irika jaga wenten ieg miwah sakancaning kadursilan. 17 Nanging yening kawicaksanan sane saking luur, punika kapingarep pisan nirmala, salanturipun seneng ngardi dame, ajer, ngidep munyi, bek madaging sih kapiolasan miwah matingkah solah sane becik, tan maroang-roangan, tur tan mapi-mapi. 18 Paindikan-paindikan sane becik dados pikolih saking tetanduran sane kasambeh antuk anake sane ngardi tentrem raharja sajeroning sutrepti rahayu.

Yakobus 4

1 Napike sane ngranayang sogsag lan paiegan ring pantaran parasemetone? Boyake wetu saking indria sane saling tembung sajeroning angen parasemetone? 2 Semeton ngedotang satunggiling barang nanging tan prasida polih. Raris semeton sregep jaga ngamatiang anak. Semeton banget pisan edot ring satunggiling barang, nanging taler nenten prasida keniang semeton barang sane buatang semeton punika, raris semeton ngawitin saling tembungin raos, tur maiegan. Semeton tan mapikolih punapa-punapi, santukan semeton tan mapinunas ring Ida Sang Hyang Widi Wasa. 3 Menawita semeton taler mapinunas, nanging semeton taler tan molih, santukan dasar pepineh semetone mapinunas tan becik. Sawetning sane tunas semeton punika pacang telasang semeton buat ngulurin indrian semetone. 4 Ih jero, anak sane tan satia! Punapike parasemeton durung uning, mungguing makakasihan ring jagate puniki mapiteges mameseh ring Ida Sang Hyang Widi Wasa? Duaning punika sapasiraja mamanah masawitra ring jagate puniki, ipun nadosang deweknyane meseh Ida Sang Hyang Widi Wasa. 5 Sampunang pitaenanga tan paguna kecap Cakepan Sucine sane kadi asapuniki: "Roh sane kagenahang sajeroning padewekan iragane, antuk Ida Sang Hyang Widi Wasa, kabekin antuk kameledan sane banget pisan." 6 Nanging sih pasueca sane sampun kapaicayang antuk Ida Sang Hyang Widi Wasa, langkung agengan ring punika. Sakadi kakecap Cakepan Sucine sapuniki: "Ida Sang Hyang Widi Wasa nglawan anake sane mrekak, nanging mapaica sih pasueca ring anake sane andap asor." 7 Duaning punika suksrahja ring Ida Sang Hyang Widi Wasa, tur lawanja Ratun Setane, ipun pacang malaib jerih! 8 Tangkilinja Ida Sang Hyang Widi Wasa, tur Ida pacang rauh nganampekin parasemeton. Bresihinja tangane, ih anak sane madosa! Tur eningangja kayune ih anak sane mapi-mapi! 9 Pada duhkitaja masesambatan; salinin gargitan semetone antuk tangis, tur suka bungahe antuk kaduhkitan. 10 Sorangja ragan semetone ring ayun Ida Sang Panembahan, Ida pacang nintingang parasemeton. 11 Parasemeton, sampunang semeton seneng pada saling cacad! Sapasira seneng nyacad timpal wiadin nepasin anak sane tiosan, ipun nganistayang Pidabdab Torat tur ipun nepasin Pidabdab Torate punika. Yening semeton nepasin Pidabdab Torate punika, semeton sampun tan satinut malih ring Pidabdab Torate punika, nanging semeton sampun dados hakimipun. 12 Wantah Ida Sang Hyang Widi Wasa kewanten sane mapaica pituduh lan kuasa nepasin manusane, Ida ngraga mrasidayang ngrahayuang miwah nyirnayang. Sapasirake pitaenang semeton ragan semetone, kantos semeton mamanah nepasin sesaman semetone? 13 Sane mangkin pirengangja tiang, ih parasemeton sane mabaos: "Didinane ene wiadin mani tiang lakar luas ka kota anu, ditu tiang bakal nongos nyang atiban tur madagang apang liu maan bati." 14 Nanging sujatinne semeton tan pisan uning ring paindikan rahinane benjang. Napi piteges urip semetone puniki? Urip semetone punika tan bina sakadi andus sane kanten wantah ajebos raris ical. 15 Sapatutipun semeton patut mabaos sapuniki: "Yening Ida Sang Panembahan ngarsayang, tiang jaga urip tur makarya sapuniki wiadin sapunika." 16 Nanging sane mangkin semeton sampun nyumbungang raga antuk kamrekakan semetone. Masesumbung kadi asapunika sujatinne iwang. 17 Yening anake sane uning ring paindikan sane becik sane patut kardi ipun, nanging ipun tan nyak nglaksanayang punika, ipun keni pasisip dosa.

Yakobus 5

1 Dadosipun sane mangkin ih jero sane sugih-sugih, pirengangja atur tiange. Pada nangisja tur pada masesambatanja marep ring sangsarane sane pacang nibenin semeton. 2 Kasugihan semetone sampun berek tur panganggen semetone sampun telas amah ngetnget. 3 Mas miwah perak semetone sampun pada amah barak, tur baraknyane pacang dados saksi marep ring semeton, tur ipun pacang neda ragan semetone sakadi api. Semeton sampun munduhang kasugihan ring masa-masa sane pacang puput puniki. 4 Semeton sampun tan naur upah anake sane makarya ring pategalan semetone. Pirengangja sesambatanipune. Sesambatan anake sane munduhang upon-upon semetone sampun kapireng antuk Ida Sang Hyang Widi Wasa, Ida Sang Panembahan Sane Maha Kuasa. 5 Semeton sampun tansah masuka-sukan antuk kasugihan semetone ring jagate iriki, tur semeton sampun ngulurin kayun sakadi ring rahina panampahane. 6 Semeton sampun nyisipang muah ngamademang anak tan padosa tur ipun tan nglawan semeton. 7 Punika awinanipun parasemeton, pada sabarja kantos panemayan rauh Ida Sang Panembahan. Cingakinja, kadi asapunapi sabar parapetanine rikala ipun nyantosang pamupun pategalanipune sane becik. Ipun sabar nyantosang masan endang miwah masan sabeh. 8 Semeton taler patut sabar tur kukuhangja pangajap-ajap semetone, santukan masan rauh Ida Sang Panembahan sampun nampek. 9 Parasemeton, sampunangja semeton pada saling iwangang, mangda Ida Sang Hyang Widi Wasa tan pacang nyisipang semeton. Sang Hakim sujatinipun sampun ngadeg ring arepan korine. 10 Parasemeton, elingangja paranabine sane sampun ngandika sajeroning parab Ida Sang Panembahan. Tuladja dane sajeroning kasabaran danene nandang sangsara. 11 Tiang ngwastanin dane punika, yuakti bagia. Semeton sami sampun pada mireng indik kapagehan Dane Ayub tur parasemeton taler sami pada uning ring indik sane sampun kacawisang buat dane antuk Ida Sang Panembahan ring wekasannyane. Santukan Ida Sang Panembahan asih darma, bek antuk sih pasuecan. 12 Nanging sane pinih buat parasemeton, yen semeton majanji, sampunangja masumpah masrana suarga wiadin masrana gumi wiadin sane sios-siosan. Yening yakti, baosang yakti, yening nenten, baosangja nenten, mangda sampunang ragane keni tetepasan Ida Sang Hyang Widi Wasa. 13 Yening wenten ring pantaran semetone, sane nandang kewuh becikan ipun ngastawa! Yening wenten sane masuka rena becikan ipun makidung muji. 14 Yening wenten ring pantaran parasemetone sane sungkan, gelisang aturin parapanglingsir pasamuane rauh, mangda dane ngastawayang sang sungkan, kadulurin antuk kolesin antuk minyak masrana nyambat parab Ida Sang Panembahan. 15 Pangastawa sane kadulurin antuk kapracayan sane sujati pacang nyegerang sang sungkan, tur Ida Sang Panembahan pacang ngwaliang ipun sakadi jati mula; tur yening ipun ngardi dosa, dosanipun taler jagi kampurayang. 16 Duaning punika, patut pisan semeton pada saling angkenin dosan semetone suang-suang, tur pada saling astawayang, mangdane semeton pada kasegerang. Santukan pangastawan anake patut, ageng pisan kuasannyane. 17 Dane Elia punika anak sane pateh sakadi iraga. Dane sampun ngastawa saking nekeng ati, mapinunas mangda sampunang wenten sabeh, raris tigang taun nem sasih suenipun tan wenten sabeh ring jagate. 18 Tumuli dane ngastawa malih, raris tedun sabeh tur tanahe numbuhang palawija. 19 Parasemeton, yening wenten semeton sane lempas saking kapatutan, raris wenten semeton sane ngwaliang ipun ka pamarginipune sane patut, 20 elingangja, mungguing sapasiraja sane mrasidayang ngwaliang anake sane sampun madosa, saking pamargin ipune sane iwang, semeton iwau ngrahayuang jiwan anake madosa punika saking patine, tur dosanipune sane akeh pacang kampurayang.